੯. ਸੁਭਸੁਤ੍ਤਵਣ੍ਣਨਾ

੪੬੨. ਏਵਂ ਮੇ ਸੁਤਨ੍ਤਿ ਸੁਭਸੁਤ੍ਤਂ. ਤਤ੍ਥ ਤੋਦੇਯ੍ਯਪੁਤ੍ਤੋਤਿ ਤੁਦਿਗਾਮਵਾਸਿਨੋ ਤੋਦੇਯ੍ਯਬ੍ਰਾਹ੍ਮਣਸ੍ਸ ਪੁਤ੍ਤੋ. ਆਰਾਧਕੋ ਹੋਤੀਤਿ ਸਮ੍ਪਾਦਕੋ ਹੋਤਿ ਪਰਿਪੂਰਕੋ. ਞਾਯਂ ਧਮ੍ਮਨ੍ਤਿ ਕਾਰਣਧਮ੍ਮਂ. ਕੁਸਲਨ੍ਤਿ ਅਨਵਜ੍ਜਂ.

੪੬੩. ਮਿਚ੍ਛਾਪਟਿਪਤ੍ਤਿਨ੍ਤਿ ਅਨਿਯ੍ਯਾਨਿਕਂ ਅਕੁਸਲਪਟਿਪਦਂ. ਸਮ੍ਮਾਪਟਿਪਤ੍ਤਿਨ੍ਤਿ ਨਿਯ੍ਯਾਨਿਕਂ ਕੁਸਲਪਟਿਪਦਂ.

ਮਹਟ੍ਠਨ੍ਤਿਆਦੀਸੁ ਮਹਨ੍ਤੇਹਿ ਵੇਯ੍ਯਾਵਚ੍ਚਕਰੇਹਿ ਵਾ ਉਪਕਰਣੇਹਿ ਵਾ ਬਹੂਹਿ ਅਤ੍ਥੋ ਏਤ੍ਥਾਤਿ ਮਹਟ੍ਠਂ. ਮਹਨ੍ਤਾਨਿ ਨਾਮਗ੍ਗਹਣਮਙ੍ਗਲਾਦੀਨਿ ਕਿਚ੍ਚਾਨਿ ਏਤ੍ਥਾਤਿ ਮਹਾਕਿਚ੍ਚਂ. ਇਦਂ ਅਜ੍ਜ ਕਤ੍ਤਬ੍ਬਂ, ਇਦਂ ਸ੍ਵੇਤਿ ਏਵਂ ਮਹਨ੍ਤਾਨਿ ਅਧਿਕਾਰਸਙ੍ਖਾਤਾਨਿ ਅਧਿਕਰਣਾਨਿ ਏਤ੍ਥਾਤਿ ਮਹਾਧਿਕਰਣਂ. ਬਹੂਨਂ ਕਮ੍ਮੇ ਯੁਤ੍ਤਪ੍ਪਯੁਤ੍ਤਤਾਵਸੇਨ ਪੀਲ਼ਾਸਙ੍ਖਾਤੋ ਮਹਾਸਮਾਰਮ੍ਭੋ ਏਤ੍ਥਾਤਿ ਮਹਾਸਮਾਰਮ੍ਭਂ. ਘਰਾਵਾਸਕਮ੍ਮਟ੍ਠਾਨਨ੍ਤਿ ਘਰਾਵਾਸਕਮ੍ਮਂ. ਏਵਂ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਕਸਿਕਮ੍ਮੇ ਚੇਤ੍ਥ ਨਙ੍ਗਲਕੋਟਿਂ ਆਦਿਂ ਕਤ੍ਵਾ ਉਪਕਰਣਾਨਂ ਪਰਿਯੇਸਨਵਸੇਨ ਮਹਟ੍ਠਤਾ, ਵਣਿਜ੍ਜਾਯ ਯਥਾਠਿਤਂਯੇਵ ਭਣ੍ਡਂ ਗਹੇਤ੍ਵਾ ਪਰਿਵਤ੍ਤਨਵਸੇਨ ਅਪ੍ਪਟ੍ਠਤਾ ਵੇਦਿਤਬ੍ਬਾ. ਵਿਪਜ੍ਜਮਾਨਨ੍ਤਿ ਅਵੁਟ੍ਠਿਅਤਿਵੁਟ੍ਠਿਆਦੀਹਿ ਕਸਿਕਮ੍ਮਂ, ਮਣਿਸੁਵਣ੍ਣਾਦੀਸੁ ਅਚ੍ਛੇਕਤਾਦੀਹਿ ਚ ਵਣਿਜ੍ਜਕਮ੍ਮਂ ਅਪ੍ਪਫਲਂ ਹੋਤਿ, ਮੂਲਚ੍ਛੇਦਮ੍ਪਿ ਪਾਪੁਣਾਤਿ. ਵਿਪਰਿਯਾਯੇਨ ਸਮ੍ਪਜ੍ਜਮਾਨਂ ਮਹਪ੍ਫਲਂ ਚੂਲ਼ਨ੍ਤੇਵਾਸਿਕਸ੍ਸ ਵਿਯ.

੪੬੪. ਏਵਮੇਵ ਖੋਤਿ ਯਥਾ ਕਸਿਕਮ੍ਮਟ੍ਠਾਨਂ ਵਿਪਜ੍ਜਮਾਨਂ ਅਪ੍ਪਫਲਂ ਹੋਤਿ, ਏਵਂ ਘਰਾਵਾਸਕਮ੍ਮਟ੍ਠਾਨਮ੍ਪਿ. ਅਕਤਕਲ੍ਯਾਣੋ ਹਿ ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤਤਿ. ਮਹਾਦਤ੍ਤਸੇਨਾਪਤਿ ਨਾਮ ਕਿਰੇਕੋ ਬ੍ਰਾਹ੍ਮਣਭਤ੍ਤੋ ਅਹੋਸਿ, ਤਸ੍ਸ ਮਰਣਸਮਯੇ ਨਿਰਯੋ ਉਪਟ੍ਠਾਸਿ. ਸੋ ਬ੍ਰਾਹ੍ਮਣੇਹਿ ‘‘ਕਿਂ ਪਸ੍ਸਸੀ’’ਤਿ ਵੁਤ੍ਤੋ? ਲੋਹਿਤਘਰਨ੍ਤਿ ਆਹ. ਬ੍ਰਹ੍ਮਲੋਕੋ ਭੋ ਏਸੋਤਿ. ਬ੍ਰਹ੍ਮਲੋਕੋ ਨਾਮ ਭੋ ਕਹਨ੍ਤਿ? ਉਪਰੀਤਿ. ਮਯ੍ਹਂ ਹੇਟ੍ਠਾ ਉਪਟ੍ਠਾਤੀਤਿ. ਕਿਞ੍ਚਾਪਿ ਹੇਟ੍ਠਾ ਉਪਟ੍ਠਾਤਿ, ਤਥਾਪਿ ਉਪਰੀਤਿ ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤੋ. ‘‘ਇਮਿਨਾ ਅਮ੍ਹਾਕਂ ਯਞ੍ਞੇ ਦੋਸੋ ਦਿਨ੍ਨੋ’’ਤਿ ਸਹਸ੍ਸਂ ਗਹੇਤ੍ਵਾ ਨੀਹਰਿਤੁਂ ਅਦਂਸੁ. ਸਮ੍ਪਜ੍ਜਮਾਨਂ ਪਨ ਮਹਪ੍ਫਲਂ ਹੋਤਿ. ਕਤਕਲ੍ਯਾਣੋ ਹਿ ਕਾਲਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤਤਿ. ਸਕਲਾਯ ਗੁਤ੍ਤਿਲਵਿਮਾਨਕਥਾਯ ਦੀਪੇਤਬ੍ਬਂ. ਯਥਾ ਪਨ ਤਂ ਵਣਿਜ੍ਜਕਮ੍ਮਟ੍ਠਾਨਂ ਵਿਪਜ੍ਜਮਾਨਂ ਅਪ੍ਪਫਲਂ ਹੋਤਿ, ਏਵਂ ਸੀਲੇਸੁ ਅਪਰਿਪੂਰਕਾਰਿਨੋ ਅਨੇਸਨਾਯ ਯੁਤ੍ਤਸ੍ਸ ਪਬ੍ਬਜ੍ਜਾਕਮ੍ਮਟ੍ਠਾਨਮ੍ਪਿ. ਏਵਰੂਪਾ ਹਿ ਨੇਵ ਝਾਨਾਦਿਸੁਖਂ ਨ ਸਗ੍ਗਮੋਕ੍ਖਂ ਲਭਤਿ. ਸਮ੍ਪਜ੍ਜਮਾਨਂ ਪਨ ਮਹਪ੍ਫਲਂ ਹੋਤਿ. ਸੀਲਾਨਿ ਹਿ ਪੂਰੇਤ੍ਵਾ ਵਿਪਸ੍ਸਨਂ ਵਡ੍ਢੇਨ੍ਤੋ ਅਰਹਤ੍ਤਮ੍ਪਿ ਪਾਪੁਣਾਤਿ.

ਬ੍ਰਾਹ੍ਮਣਾ, ਭੋ ਗੋਤਮੋਤਿ ਇਧ ਕਿਂ ਪੁਚ੍ਛਾਮੀਤਿ ਪੁਚ੍ਛਤਿ? ਬ੍ਰਾਹ੍ਮਣਾ ਵਦਨ੍ਤਿ – ‘‘ਪਬ੍ਬਜਿਤੋ ਇਮੇ ਪਞ੍ਚ ਧਮ੍ਮੇ ਪੂਰੇਤੁਂ ਸਮਤ੍ਥੋ ਨਾਮ ਨਤ੍ਥਿ, ਗਹਟ੍ਠੋਵ ਪੂਰੇਤੀ’’ਤਿ. ਸਮਣੋ ਪਨ ਗੋਤਮੋ – ‘‘ਗਿਹਿਸ੍ਸ ਵਾ ਅਹਂ ਮਾਣਵ ਪਬ੍ਬਜਿਤਸ੍ਸ ਵਾ’’ਤਿ ਪੁਨਪ੍ਪੁਨਂ ਵਦਤਿ, ਨੇਵ ਪਬ੍ਬਜਿਤਂ ਮੁਞ੍ਚਤਿ, ਮਯ੍ਹਮੇਵ ਪੁਚ੍ਛਂ ਮਞ੍ਞੇ ਨ ਸਲ੍ਲਕ੍ਖੇਤੀਤਿ ਚਾਗਸੀਸੇਨ ਪਞ੍ਚ ਧਮ੍ਮੇ ਪੁਚ੍ਛਾਮੀਤਿ ਪੁਚ੍ਛਤਿ. ਸਚੇ ਤੇ ਅਗਰੂਤਿ ਸਚੇ ਤੁਯ੍ਹਂ ਯਥਾ ਬ੍ਰਾਹ੍ਮਣਾ ਪਞ੍ਞਪੇਨ੍ਤਿ, ਤਥਾ ਇਧ ਭਾਸਿਤੁਂ ਭਾਰਿਯਂ ਨ ਹੋਤਿ, ਯਦਿ ਨ ਕੋਚਿ ਅਫਾਸੁਕਭਾਵੋ ਹੋਤਿ, ਭਾਸਸ੍ਸੂਤਿ ਅਤ੍ਥੋ. ਨ ਖੋ ਮੇ, ਭੋਤਿ ਕਿਂ ਸਨ੍ਧਾਯਾਹ? ਪਣ੍ਡਿਤਪਟਿਰੂਪਕਾਨਞ੍ਹਿ ਸਨ੍ਤਿਕੇ ਕਥੇਤੁਂ ਦੁਕ੍ਖਂ ਹੋਤਿ, ਤੇ ਪਦੇ ਪਦੇ ਅਕ੍ਖਰੇ ਅਕ੍ਖਰੇ ਦੋਸਮੇਵ ਵਦਨ੍ਤਿ. ਏਕਨ੍ਤਪਣ੍ਡਿਤਾ ਪਨ ਕਥਂ ਸੁਤ੍ਵਾ ਸੁਕਥਿਤਂ ਪਸਂਸਨ੍ਤਿ, ਦੁਕ੍ਕਥਿਤੇ ਪਾਲ਼ਿਪਦਅਤ੍ਥਬ੍ਯਞ੍ਜਨੇਸੁ ਯਂ ਯਂ ਵਿਰੁਜ੍ਝਤਿ, ਤਂ ਤਂ ਉਜੁਂ ਕਤ੍ਵਾ ਦੇਨ੍ਤਿ. ਭਗਵਤਾ ਚ ਸਦਿਸੋ ਏਕਨ੍ਤਪਣ੍ਡਿਤੋ ਨਾਮ ਨਤ੍ਥਿ, ਤੇਨਾਹ ‘‘ਨ ਖੋ ਮੇ, ਭੋ ਗੋਤਮ, ਗਰੁ, ਯਤ੍ਥਸ੍ਸੁ ਭਵਨ੍ਤੋ ਵਾ ਨਿਸਿਨ੍ਨੋ ਭਵਨ੍ਤਰੂਪੋ ਵਾ’’ਤਿ. ਸਚ੍ਚਨ੍ਤਿ ਵਚੀਸਚ੍ਚਂ. ਤਪਨ੍ਤਿ ਤਪਚਰਿਯਂ. ਬ੍ਰਹ੍ਮਚਰਿਯਨ੍ਤਿ ਮੇਥੁਨਵਿਰਤਿਂ. ਅਜ੍ਝੇਨਨ੍ਤਿ ਮਨ੍ਤਗਹਣਂ. ਚਾਗਨ੍ਤਿ ਆਮਿਸਪਰਿਚ੍ਚਾਗਂ.

੪੬੬. ਪਾਪਿਤੋ ਭਵਿਸ੍ਸਤੀਤਿ. ਅਜਾਨਨਭਾਵਂ ਪਾਪਿਤੋ ਭਵਿਸ੍ਸਤਿ. ਏਤਦਵੋਚਾਤਿ ਭਗਵਤਾ ਅਨ੍ਧਵੇਣੂਪਮਾਯ ਨਿਗ੍ਗਹਿਤੋ ਤਂ ਪਚ੍ਚਾਹਰਿਤੁਂ ਅਸਕ੍ਕੋਨ੍ਤੋ ਯਥਾ ਨਾਮ ਦੁਬ੍ਬਲਸੁਨਖੋ ਮਿਗਂ ਉਟ੍ਠਪੇਤ੍ਵਾ ਸਾਮਿਕਸ੍ਸ ਅਭਿਮੁਖਂ ਕਤ੍ਵਾ ਸਯਂ ਅਪਸਕ੍ਕਤਿ, ਏਵਮੇਵਂ ਆਚਰਿਯਂ ਅਪਦਿਸਨ੍ਤੋ ਏਵਂ ‘‘ਬ੍ਰਾਹ੍ਮਣੋ’’ਤਿਆਦਿਵਚਨਂ ਅਵੋਚ. ਤਤ੍ਥ ਪੋਕ੍ਖਰਸਾਤੀਤਿ ਇਦਂ ਤਸ੍ਸ ਨਾਮਂ, ‘‘ਪੋਕ੍ਖਰਸਾਯੀ’’ਤਿਪਿ ਵੁਚ੍ਚਤਿ. ਤਸ੍ਸ ਕਿਰ ਕਾਯੋ ਸੇਤਪੋਕ੍ਖਰਸਦਿਸੋ ਦੇਵਨਗਰੇ ਉਸ੍ਸਾਪਿਤਰਜਤਤੋਰਣਂ ਵਿਯ ਸੋਭਤਿ, ਸੀਸਂ ਪਨਸ੍ਸ ਕਾਲ਼ਵਣ੍ਣਇਨ੍ਦਨੀਲਮਯਂ ਵਿਯ, ਮਸ੍ਸੁਪਿ ਚਨ੍ਦਮਣ੍ਡਲੇ ਕਾਲ਼ਮੇਘਰਾਜਿ ਵਿਯ ਖਾਯਤਿ, ਅਕ੍ਖੀਨਿ ਨੀਲੁਪ੍ਪਲਸਦਿਸਾਨਿ, ਨਾਸਾ ਰਜਤਪਨਾਲ਼ਿਕਾ ਵਿਯ ਸੁਵਟ੍ਟਿਤਾ ਸੁਪਰਿਸੁਦ੍ਧਾ, ਹਤ੍ਥਪਾਦਤਲਾਨਿ ਚੇਵ ਮੁਖਞ੍ਚ ਕਤਲਾਖਾਰਸਪਰਿਕਮ੍ਮਂ ਵਿਯ ਸੋਭਤਿ. ਅਤਿਵਿਯ ਸੋਭਗ੍ਗਪ੍ਪਤ੍ਤੋ ਬ੍ਰਾਹ੍ਮਣਸ੍ਸ ਅਤ੍ਤਭਾਵੋ. ਅਰਾਜਕੇ ਠਾਨੇ ਰਾਜਾਨਂ ਕਾਤੁਂ ਯੁਤ੍ਤਮਿਮਂ ਬ੍ਰਾਹ੍ਮਣਂ, ਏਵਮੇਸ ਸਸ੍ਸਿਰਿਕੋ, ਇਤਿ ਨਂ ਪੋਕ੍ਖਰਸਦਿਸਤ੍ਤਾ ‘‘ਪੋਕ੍ਖਰਸਾਤੀ’’ਤਿ ਸਞ੍ਜਾਨਨ੍ਤਿ, ਪੋਕ੍ਖਰੇ ਪਨ ਸੋ ਨਿਬ੍ਬਤ੍ਤੋ, ਨ ਮਾਤੁਕੁਚ੍ਛਿਯਨ੍ਤਿ ਇਤਿ ਨਂ ਪੋਕ੍ਖਰੇ ਸਯਿਤਤ੍ਤਾ ‘‘ਪੋਕ੍ਖਰਸਾਯੀ’’ਤਿਪਿ ਸਞ੍ਜਾਨਨ੍ਤਿ. ਓਪਮਞ੍ਞੋਤਿ ਉਪਮਞ੍ਞਗੋਤ੍ਤੋ. ਸੁਭਗਵਨਿਕੋਤਿ ਉਕ੍ਕਟ੍ਠਾਯ ਸੁਭਗਵਨਸ੍ਸ ਇਸ੍ਸਰੋ. ਹਸ੍ਸਕਂਯੇਵਾਤਿ ਹਸਿਤਬ੍ਬਕਞ੍ਞੇਵ. ਨਾਮਕਂਯੇਵਾਤਿ ਲਾਮਕਂਯੇਵ. ਤਦੇਵ ਤਂ ਅਤ੍ਥਾਭਾਵੇਨ ਰਿਤ੍ਤਕਂ. ਰਿਤ੍ਤਕਤ੍ਤਾ ਚ ਤੁਚ੍ਛਕਂ. ਇਦਾਨਿ ਨਂ ਭਗਵਾ ਸਾਚਰਿਯਕਂ ਨਿਗ੍ਗਣ੍ਹਿਤੁਂ ਕਿਂ ਪਨ ਮਾਣਵਾਤਿਆਦਿਮਾਹ.

੪੬੭. ਤਤ੍ਥ ਕਤਮਾ ਨੇਸਂ ਸੇਯ੍ਯੋਤਿ ਕਤਮਾ ਵਾਚਾ ਤੇਸਂ ਸੇਯ੍ਯੋ, ਪਾਸਂਸਤਰੋਤਿ ਅਤ੍ਥੋ. ਸਮ੍ਮੁਚ੍ਚਾਤਿ ਸਮ੍ਮੁਤਿਯਾ ਲੋਕਵੋਹਾਰੇਨ. ਮਨ੍ਤਾਤਿ ਤੁਲਯਿਤ੍ਵਾ ਪਰਿਗ੍ਗਣ੍ਹਿਤ੍ਵਾ. ਪਟਿਸਙ੍ਖਾਯਾਤਿ ਜਾਨਿਤ੍ਵਾ. ਅਤ੍ਥਸਂਹਿਤਨ੍ਤਿ ਕਾਰਣਨਿਸ੍ਸਿਤਂ. ਏਵਂ ਸਨ੍ਤੇਤਿ ਲੋਕਵੋਹਾਰਂ ਅਮੁਞ੍ਚਿਤ੍ਵਾ ਤੁਲਯਿਤ੍ਵਾ ਜਾਨਿਤ੍ਵਾ ਕਾਰਣਨਿਸ੍ਸਿਤਂ ਕਤ੍ਵਾ ਕਥਿਤਾਯ ਸੇਯ੍ਯਭਾਵੇ ਸਤਿ. ਆਵੁਤੋਤਿ ਆਵਰਿਤੋ. ਨਿਵੁਤੋਤਿ ਨਿਵਾਰਿਤੋ. ਓਫੁਟੋਤਿ ਓਨਦ੍ਧੋ. ਪਰਿਯੋਨਦ੍ਧੋਤਿ ਪਲਿਵੇਠਿਤੋ.

੪੬੮. ਗਧਿਤੋਤਿਆਦੀਨਿ ਵੁਤ੍ਤਤ੍ਥਾਨੇਵ. ਸਚੇ ਤਂ, ਭੋ ਗੋਤਮ, ਠਾਨਨ੍ਤਿ ਸਚੇ ਏਤਂ ਕਾਰਣਮਤ੍ਥਿ. ਸ੍ਵਾਸ੍ਸਾਤਿ ਧੂਮਛਾਰਿਕਾਦੀਨਂ ਅਭਾਵੇਨ ਸੋ ਅਸ੍ਸ ਅਗ੍ਗਿ ਅਚ੍ਚਿਮਾ ਚ ਵਣ੍ਣਿਮਾ ਚ ਪਭਸ੍ਸਰੋ ਚਾਤਿ. ਤਥੂਪਮਾਹਂ ਮਾਣਵਾਤਿ ਤਪ੍ਪਟਿਭਾਗਂ ਅਹਂ. ਇਦਂ ਵੁਤ੍ਤਂ ਹੋਤਿ – ਯਥੇਵ ਹਿ ਤਿਣਕਟ੍ਠੁਪਾਦਾਨਂ ਪਟਿਚ੍ਚ ਜਲਮਾਨੋ ਅਗ੍ਗਿ ਧੂਮਛਾਰਿਕਙ੍ਗਾਰਾਨਂ ਅਤ੍ਥਿਤਾਯ ਸਦੋਸੋ ਹੋਤਿ, ਏਵਮੇਵਂ ਪਞ੍ਚ ਕਾਮਗੁਣੇ ਪਟਿਚ੍ਚ ਉਪ੍ਪਨ੍ਨਾ ਪੀਤਿ ਜਾਤਿਜਰਾਬ੍ਯਾਧਿਮਰਣਸੋਕਾਦੀਨਂ ਅਤ੍ਥਿਤਾਯ ਸਦੋਸਾ. ਯਥਾ ਪਨ ਪਰਿਚ੍ਚਤ੍ਤਤਿਣਕਟ੍ਠੁਪਾਦਾਨੋ ਧੂਮਾਦੀਨਂ ਅਭਾਵੇਨ ਪਰਿਸੁਦ੍ਧੋ, ਏਵਮੇਵਂ ਲੋਕੁਤ੍ਤਰਜ੍ਝਾਨਦ੍ਵਯਸਮ੍ਪਯੁਤ੍ਤਾ ਪੀਤਿ ਜਾਤਿਆਦੀਨਂ ਅਭਾਵੇਨ ਪਰਿਸੁਦ੍ਧਾਤਿ ਅਤ੍ਥੋ.

੪੬੯. ਇਦਾਨਿ ਯੇ ਤੇ ਬ੍ਰਾਹ੍ਮਣੇਹਿ ਚਾਗਸੀਸੇਨ ਪਞ੍ਚ ਧਮ੍ਮਾ ਪਞ੍ਞਤ੍ਤਾ, ਤੇਪਿ ਯਸ੍ਮਾ ਪਞ੍ਚੇਵ ਹੁਤ੍ਵਾ ਨ ਨਿਚ੍ਚਲਾ ਤਿਟ੍ਠਨ੍ਤਿ, ਅਨੁਕਮ੍ਪਾਜਾਤਿਕੇਨ ਸਦ੍ਧਿਂ ਛ ਆਪਜ੍ਜਨ੍ਤਿ. ਤਸ੍ਮਾ ਤਂ ਦੋਸਂ ਦਸ੍ਸੇਤੁਂ ਯੇ ਤੇ ਮਾਣਵਾਤਿਆਦਿਮਾਹ. ਤਤ੍ਥ ਅਨੁਕਮ੍ਪਾਜਾਤਿਕਨ੍ਤਿ ਅਨੁਕਮ੍ਪਾਸਭਾਵਂ.

ਕਤ੍ਥ ਬਹੁਲਂ ਸਮਨੁਪਸ੍ਸਸੀਤਿ ਇਦਂ ਭਗਵਾ ਯਸ੍ਮਾ – ‘‘ਏਸ ਇਮੇ ਪਞ੍ਚ ਧਮ੍ਮੇ ਪਬ੍ਬਜਿਤੋ ਪਰਿਪੂਰੇਤੁਂ ਸਮਤ੍ਥੋ ਨਾਮ ਨਤ੍ਥਿ, ਗਹਟ੍ਠੋ ਪਰਿਪੂਰੇਤੀ’’ਤਿ ਆਹ, ਤਸ੍ਮਾ – ‘‘ਪਬ੍ਬਜਿਤੋਵ ਇਮੇ ਪੂਰੇਤਿ, ਗਹਟ੍ਠੋ ਪੂਰੇਤੁਂ ਸਮਤ੍ਥੋ ਨਾਮ ਨਤ੍ਥੀ’’ਤਿ ਤੇਨੇਵ ਮੁਖੇਨ ਭਣਾਪੇਤੁਂ ਪੁਚ੍ਛਤਿ.

ਨ ਸਤਤਂ ਸਮਿਤਂ ਸਚ੍ਚਵਾਦੀਤਿਆਦੀਸੁ ਗਹਟ੍ਠੋ ਅਞ੍ਞਸ੍ਮਿਂ ਅਸਤਿ ਵਲ਼ਞ੍ਜਨਕਮੁਸਾਵਾਦਮ੍ਪਿ ਕਰੋਤਿਯੇਵ, ਪਬ੍ਬਜਿਤਾ ਅਸਿਨਾ ਸੀਸੇ ਛਿਜ੍ਜਨ੍ਤੇਪਿ ਦ੍ਵੇ ਕਥਾ ਨ ਕਥੇਨ੍ਤਿ. ਗਹਟ੍ਠੋ ਚ ਅਨ੍ਤੋਤੇਮਾਸਮਤ੍ਤਮ੍ਪਿ ਸਿਕ੍ਖਾਪਦਂ ਰਕ੍ਖਿਤੁਂ ਨ ਸਕ੍ਕੋਤਿ, ਪਬ੍ਬਜਿਤੋ ਨਿਚ੍ਚਮੇਵ ਤਪਸ੍ਸੀ ਸੀਲਵਾ ਤਪਨਿਸ੍ਸਿਤਕੋ ਹੋਤਿ. ਗਹਟ੍ਠੋ ਮਾਸਸ੍ਸ ਅਟ੍ਠਦਿਵਸਮਤ੍ਤਮ੍ਪਿ ਉਪੋਸਥਕਮ੍ਮਂ ਕਾਤੁਂ ਨ ਸਕ੍ਕੋਤਿ, ਪਬ੍ਬਜਿਤਾ ਯਾਵਜੀਵਂ ਬ੍ਰਹ੍ਮਚਾਰਿਨੋ ਹੋਨ੍ਤਿ. ਗਹਟ੍ਠੋ ਰਤਨਸੁਤ੍ਤਮਙ੍ਗਲਸੁਤ੍ਤਮਤ੍ਤਮ੍ਪਿ ਪੋਤ੍ਥਕੇ ਲਿਖਿਤ੍ਵਾ ਠਪੇਤਿ, ਪਬ੍ਬਜਿਤਾ ਨਿਚ੍ਚਂ ਸਜ੍ਝਾਯਨ੍ਤਿ. ਗਹਟ੍ਠੋ ਸਲਾਕਭਤ੍ਤਮ੍ਪਿ ਅਖਣ੍ਡਂ ਕਤ੍ਵਾ ਦਾਤੁਂ ਨ ਸਕ੍ਕੋਤਿ, ਪਬ੍ਬਜਿਤਾ ਅਞ੍ਞਸ੍ਮਿਂ ਅਸਤਿ ਕਾਕਸੁਨਖਾਦੀਨਮ੍ਪਿ ਪਿਣ੍ਡਂ ਦੇਨ੍ਤਿ, ਭਣ੍ਡਗ੍ਗਾਹਕਦਹਰਸ੍ਸਪਿ ਪਤ੍ਤੇ ਪਕ੍ਖਿਪਨ੍ਤੇਵਾਤਿ ਏਵਮਤ੍ਥੋ ਦਟ੍ਠਬ੍ਬੋ. ਚਿਤ੍ਤਸ੍ਸਾਹਮੇਤੇਨ੍ਤਿ ਅਹਂ ਏਤੇ ਪਞ੍ਚ ਧਮ੍ਮੇ ਮੇਤ੍ਤਚਿਤ੍ਤਸ੍ਸ ਪਰਿਵਾਰੇ ਵਦਾਮੀਤਿ ਅਤ੍ਥੋ.

੪੭੦. ਜਾਤਵਦ੍ਧੋਤਿ ਜਾਤੋ ਚ ਵਡ੍ਢਿਤੋ ਚ. ਯੋ ਹਿ ਕੇਵਲਂ ਤਤ੍ਥ ਜਾਤੋਵ ਹੋਤਿ, ਅਞ੍ਞਤ੍ਥ ਵਡ੍ਢਿਤੋ, ਤਸ੍ਸ ਸਮਨ੍ਤਾ ਗਾਮਮਗ੍ਗਾ ਨ ਸਬ੍ਬਸੋ ਪਚ੍ਚਕ੍ਖਾ ਹੋਨ੍ਤਿ, ਤਸ੍ਮਾ ਜਾਤਵਦ੍ਧੋਤਿ ਆਹ. ਜਾਤਵਦ੍ਧੋਪਿ ਹਿ ਯੋ ਚਿਰਂ ਨਿਕ੍ਖਨ੍ਤੋ, ਤਸ੍ਸ ਨ ਸਬ੍ਬਸੋ ਪਚ੍ਚਕ੍ਖਾ ਹੋਨ੍ਤਿ, ਤਸ੍ਮਾ ਤਾਵਦੇਵ ਅਵਸਟਨ੍ਤਿ ਆਹ, ਤਂਖਣਮੇਵ ਨਿਕ੍ਖਨ੍ਤਨ੍ਤਿ ਅਤ੍ਥੋ. ਦਨ੍ਧਾਯਿਤਤ੍ਤਨ੍ਤਿ ‘‘ਅਯਂ ਨੁ ਖੋ ਮਗ੍ਗੋ ਅਯਂ ਨ ਨੁ ਖੋ’’ਤਿ ਕਙ੍ਖਾਵਸੇਨ ਚਿਰਾਯਿਤਤ੍ਤਂ. ਵਿਤ੍ਥਾਯਿਤਤ੍ਤਨ੍ਤਿ ਯਥਾ ਸੁਖੁਮਂ ਅਤ੍ਥਜਾਤਂ ਸਹਸਾ ਪੁਚ੍ਛਿਤਸ੍ਸ ਕਸ੍ਸਚਿ ਸਰੀਰਂ ਥਦ੍ਧਭਾਵਂ ਗਣ੍ਹਾਤਿ, ਏਵਂ ਥਦ੍ਧਭਾਵਗਹਣਂ. ਨਤ੍ਵੇਵਾਤਿ ਇਮਿਨਾ ਸਬ੍ਬਞ੍ਞੁਤਞ੍ਞਾਣਸ੍ਸ ਅਪ੍ਪਟਿਹਤਭਾਵਂ ਦਸ੍ਸੇਤਿ. ਤਸ੍ਸ ਹਿ ਪੁਰਿਸਸ੍ਸ ਮਾਰਾਵਟ੍ਟਨਾਦੀਨਂ ਵਸੇਨ ਸਿਯਾ ਞਾਣਸ੍ਸ ਪਟਿਘਾਤੋ, ਤੇਨ ਸੋ ਦਨ੍ਧਾਯੇਯ੍ਯ ਵਾ ਵਿਤ੍ਥਾਯੇਯ੍ਯ ਵਾ, ਸਬ੍ਬਞ੍ਞੁਤਞ੍ਞਾਣਂ ਪਨ ਅਪ੍ਪਟਿਹਤਂ, ਨ ਸਕ੍ਕਾ ਤਸ੍ਸ ਕੇਨਚਿ ਅਨ੍ਤਰਾਯੋ ਕਾਤੁਨ੍ਤਿ ਦੀਪੇਤਿ.

ਸੇਯ੍ਯਥਾਪਿ ਮਾਣਵ ਬਲਵਾ ਸਙ੍ਖਧਮੋਤਿ ਏਤ੍ਥ ਬਲਵਾਤਿ ਬਲਸਮ੍ਪਨ੍ਨੋ. ਸਙ੍ਖਧਮੋਤਿ ਸਙ੍ਖਧਮਕੋ. ਅਪ੍ਪਕਸਿਰੇਨਾਤਿ ਅਕਿਚ੍ਛੇਨ ਅਦੁਕ੍ਖੇਨ. ਦੁਬ੍ਬਲੋ ਹਿ ਸਙ੍ਖਧਮਕੋ ਸਙ੍ਖਂ ਧਮਨ੍ਤੋਪਿ ਨ ਸਕ੍ਕੋਤਿ ਚਤਸ੍ਸੋ ਦਿਸਾ ਸਰੇਨ ਵਿਞ੍ਞਾਪੇਤੁਂ, ਨਾਸ੍ਸ ਸਙ੍ਖਸਦ੍ਦੋ ਸਬ੍ਬਸੋ ਫਰਿ. ਬਲਵਤੋ ਪਨ ਵਿਪ੍ਫਾਰਿਕੋ ਹੋਤਿ, ਤਸ੍ਮਾ ਬਲਵਾਤਿ ਆਹ. ਮੇਤ੍ਤਾਯ ਚੇਤੋਵਿਮੁਤ੍ਤਿਯਾਤਿ ਏਤ੍ਥ ਮੇਤ੍ਤਾਯਾਤਿ ਵੁਤ੍ਤੇ ਉਪਚਾਰੋਪਿ ਅਪ੍ਪਨਾਪਿ ਵਟ੍ਟਤਿ, ਚੇਤੋਵਿਮੁਤ੍ਤਿਯਾਤਿ ਵੁਤ੍ਤੇ ਪਨ ਅਪ੍ਪਨਾਵ ਵਟ੍ਟਤਿ. ਯਂ ਪਮਾਣਕਤਂ ਕਮ੍ਮਨ੍ਤਿ ਪਮਾਣਕਤਂ ਕਮ੍ਮਂ ਨਾਮ ਕਾਮਾਵਚਰਂ ਵੁਚ੍ਚਤਿ, ਅਪ੍ਪਮਾਣਕਤਂ ਕਮ੍ਮਂ ਨਾਮ ਰੂਪਾਰੂਪਾਵਚਰਂ. ਤੇਸੁਪਿ ਇਧ ਬ੍ਰਹ੍ਮਵਿਹਾਰਕਮ੍ਮਞ੍ਞੇਵ ਅਧਿਪ੍ਪੇਤਂ. ਤਞ੍ਹਿ ਪਮਾਣਂ ਅਤਿਕ੍ਕਮਿਤ੍ਵਾ ਓਧਿਸਕਅਨੋਧਿਸਕ ਦਿਸਾਫਰਣਵਸੇਨ ਵਡ੍ਢੇਤ੍ਵਾ ਕਤਤ੍ਤਾ ਅਪ੍ਪਮਾਣਕਤਨ੍ਤਿ ਵੁਚ੍ਚਤਿ. ਨ ਤਂ ਤਤ੍ਰਾਵਸਿਸ੍ਸਤਿ, ਨ ਤਂ ਤਤ੍ਰਾਵਤਿਟ੍ਠਤੀਤਿ ਤਂ ਕਾਮਾਵਚਰਕਮ੍ਮਂ ਤਸ੍ਮਿਂ ਰੂਪਾਰੂਪਾਵਚਰਕਮ੍ਮੇ ਨ ਓਹੀਯਤਿ ਨ ਤਿਟ੍ਠਤਿ. ਕਿਂ ਵੁਤ੍ਤਂ ਹੋਤਿ? ਕਾਮਾਵਚਰਕਮ੍ਮਂ ਤਸ੍ਸ ਰੂਪਾਰੂਪਾਵਚਰਕਮ੍ਮਸ੍ਸ ਅਨ੍ਤਰਾ ਲਗ੍ਗਿਤੁਂ ਵਾ ਠਾਤੁਂ ਵਾ ਰੂਪਾਰੂਪਾਵਚਰਕਮ੍ਮਂ ਫਰਿਤ੍ਵਾ ਪਰਿਯਾਦਿਯਿਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਪਤਿਟ੍ਠਾਤੁਂ ਵਾ ਨ ਸਕ੍ਕੋਤਿ, ਅਥ ਖੋ ਰੂਪਾਰੂਪਾਵਚਰਕਮ੍ਮਮੇਵ ਕਾਮਾਵਚਰਂ ਮਹੋਘੋ ਵਿਯ ਪਰਿਤ੍ਤਉਦਕਂ ਫਰਿਤ੍ਵਾ ਪਰਿਯਾਦਿਯਿਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਤਿਟ੍ਠਤਿ, ਤਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਸਯਮੇਵ ਬ੍ਰਹ੍ਮਸਹਬ੍ਯਤਂ ਉਪਨੇਤੀਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਸੁਭਸੁਤ੍ਤਵਣ੍ਣਨਾ ਨਿਟ੍ਠਿਤਾ.