੭. ਧਨਞ੍ਜਾਨਿਸੁਤ੍ਤਵਣ੍ਣਨਾ

੪੪੫. ਏਵਂ ਮੇ ਸੁਤਨ੍ਤਿ ਧਨਞ੍ਜਾਨਿਸੁਤ੍ਤਂ. ਤਤ੍ਥ ਦਕ੍ਖਿਣਾਗਿਰਿਸ੍ਮਿਨ੍ਤਿ ਗਿਰੀਤਿ ਪਬ੍ਬਤੋ, ਰਾਜਗਹਂ ਪਰਿਕ੍ਖਿਪਿਤ੍ਵਾ ਠਿਤਪਬ੍ਬਤਸ੍ਸ ਦਕ੍ਖਿਣਦਿਸਾਭਾਗੇ ਜਨਪਦਸ੍ਸੇਤਂ ਨਾਮਂ. ਤਣ੍ਡੁਲਪਾਲਿਦ੍ਵਾਰਾਯਾਤਿ ਰਾਜਗਹਸ੍ਸ ਕਿਰ ਦ੍ਵਤ੍ਤਿਂਸਮਹਾਦ੍ਵਾਰਾਨਿ ਚਤੁਸਟ੍ਠਿਖੁਦ੍ਦਕਦ੍ਵਾਰਾਨਿ, ਤੇਸੁ ਏਕਂ ਤਣ੍ਡੁਲਪਾਲਿਦ੍ਵਾਰਂ ਨਾਮ, ਤਂ ਸਨ੍ਧਾਯੇਵਮਾਹ. ਰਾਜਾਨਂ ਨਿਸ੍ਸਾਯਾਤਿ ‘‘ਗਚ੍ਛ ਮਨੁਸ੍ਸੇ ਅਪੀਲ਼ੇਤ੍ਵਾ ਸਸ੍ਸਭਾਗਂ ਗਣ੍ਹਾਹੀ’’ਤਿ ਰਞ੍ਞਾ ਪੇਸਿਤੋ ਗਨ੍ਤ੍ਵਾ ਸਬ੍ਬਮੇਵ ਸਸ੍ਸਂ ਗਣ੍ਹਾਤਿ, ‘‘ਮਾ ਨੋ, ਭਨ੍ਤੇ, ਨਾਸੇਹੀ’’ਤਿ ਚ ਵੁਤ੍ਤੇ – ‘‘ਰਾਜਕੁਲੇ ਵੁਤ੍ਤਂ ਮਨ੍ਦਂ, ਅਹਂ ਰਞ੍ਞਾ ਆਗਮਨਕਾਲੇਯੇਵ ਏਵਂ ਆਣਤ੍ਤੋ, ਮਾ ਕਨ੍ਦਿਤ੍ਥਾ’’ਤਿ ਏਵਂ ਰਾਜਾਨਂ ਨਿਸ੍ਸਾਯ ਬ੍ਰਾਹ੍ਮਣਗਹਪਤਿਕੇ ਵਿਲੁਮ੍ਪਤਿ. ਧਞ੍ਞਂ ਯੇਭੁਯ੍ਯੇਨ ਅਤ੍ਤਨੋ ਘਰਂ ਪਵੇਸੇਤ੍ਵਾ ਅਪ੍ਪਕਂ ਰਾਜਕੁਲੇ ਪਵੇਸੇਤਿ. ਕਿਂ ਬ੍ਰਾਹ੍ਮਣਗਹਪਤਿਕਾਨਂ ਨ ਪੀਲ਼ਂ ਅਕਾਸੀਤਿ ਚ ਵੁਤ੍ਤੋ – ‘‘ਆਮ, ਮਹਾਰਾਜ, ਇਮਸ੍ਮਿਂ ਵਾਰੇ ਖੇਤ੍ਤਾਨਿ ਮਨ੍ਦਸਸ੍ਸਾਨਿ ਅਹੇਸੁਂ, ਤਸ੍ਮਾ ਅਪੀਲ਼ੇਨ੍ਤਸ੍ਸ ਮੇ ਗਣ੍ਹਤੋ ਨ ਬਹੁਂ ਜਾਤ’’ਨ੍ਤਿ ਏਵਂ ਬ੍ਰਾਹ੍ਮਣਗਹਪਤਿਕੇ ਨਿਸ੍ਸਾਯ ਰਾਜਾਨਂ ਵਿਲੁਮ੍ਪਤਿ.

੪੪੬. ਪਯੋ ਪੀਯਤਨ੍ਤਿ ਤਰੁਣਖੀਰਂ ਪਿਵਤੁ. ਤਾਵ ਭਤ੍ਤਸ੍ਸਾਤਿ ਯਾਵ ਖੀਰਂ ਪਿਵਿਤ੍ਵਾ ਨਿਸੀਦਿਸ੍ਸਥ, ਤਾਵਦੇਵ ਭਤ੍ਤਸ੍ਸ ਕਾਲੋ ਭਵਿਸ੍ਸਤਿ. ਇਧੇਵ ਹਿ ਨੋ ਪਾਤਰਾਸਭਤ੍ਤਂ ਆਹਰਿਸ੍ਸਨ੍ਤੀਤਿ ਦਸ੍ਸੇਤਿ. ਮਾਤਾਪਿਤਰੋਤਿਆਦੀਸੁ ਮਹਲ੍ਲਕਾ ਮਾਤਾਪਿਤਰੋ ਮੁਦੁਕਾਨਿ ਅਤ੍ਥਰਣਪਾਵੁਰਣਾਨਿ ਸੁਖੁਮਾਨਿ ਵਤ੍ਥਾਨਿ ਮਧੁਰਭੋਜਨਂ ਸੁਗਨ੍ਧਗਨ੍ਧਮਾਲਾਦੀਨਿ ਚ ਪਰਿਯੇਸਿਤ੍ਵਾ ਪੋਸੇਤਬ੍ਬਾ. ਪੁਤ੍ਤਧੀਤਾਨਂ ਨਾਮਕਰਣਮਙ੍ਗਲਾਦੀਨਿ ਸਬ੍ਬਕਿਚ੍ਚਾਨਿ ਕਰੋਨ੍ਤੇਨ ਪੁਤ੍ਤਦਾਰੋ ਪੋਸੇਤਬ੍ਬੋ. ਏਵਞ੍ਹਿ ਅਕਰਿਯਮਾਨੇ ਗਰਹਾ ਉਪ੍ਪਜ੍ਜਤੀਤਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ.

੪੪੭. ਅਧਮ੍ਮਚਾਰੀਤਿ ਪਞ੍ਚ ਦੁਸ੍ਸੀਲ੍ਯਕਮ੍ਮਾਨਿ ਵਾ ਦਸ ਦੁਸ੍ਸੀਲ੍ਯਕਮ੍ਮਾਨਿ ਵਾ ਇਧ ਅਧਮ੍ਮੋ ਨਾਮ. ਉਪਕਡ੍ਢੇਯ੍ਯੁਨ੍ਤਿ ਪਞ੍ਚਵਿਧਬਨ੍ਧਨਾਦਿਕਮ੍ਮਕਰਣਤ੍ਥਂ ਤਂ ਤਂ ਨਿਰਯਂ ਕਡ੍ਢੇਯ੍ਯੁਂ.

੪੪੮. ਧਮ੍ਮਚਾਰੀਤਿ ਧਮ੍ਮਿਕਸਿਵਵਿਜ੍ਜਾਦਿਕਮ੍ਮਕਾਰੀ. ਪਟਿਕ੍ਕਮਨ੍ਤੀਤਿ ਓਸਰਨ੍ਤਿ ਪਰਿਹਾਯਨ੍ਤਿ. ਅਭਿਕ੍ਕਮਨ੍ਤੀਤਿ ਅਭਿਸਰਨ੍ਤਿ ਵਡ੍ਢਨ੍ਤਿ. ਸੇਯ੍ਯੋਤਿ ਵਰਤਰਂ. ਹੀਨੇਤਿ ਨਿਹੀਨੇ ਲਾਮਕੇ. ਕਾਲਙ੍ਕਤੋ ਚ ਸਾਰਿਪੁਤ੍ਤਾਤਿ ਇਦਂ ਭਗਵਾ ‘‘ਤਤ੍ਰਸ੍ਸ ਗਨ੍ਤ੍ਵਾ ਦੇਸੇਹੀ’’ਤਿ ਅਧਿਪ੍ਪਾਯੇਨ ਥੇਰਮਾਹ. ਥੇਰੋਪਿ ਤਂਖਣਂਯੇਵ ਗਨ੍ਤ੍ਵਾ ਮਹਾਬ੍ਰਹ੍ਮੁਨੋ ਧਮ੍ਮਂ ਦੇਸੇਸਿ, ਤਤੋ ਪਟ੍ਠਾਯ ਚਾਤੁਪ੍ਪਦਿਕਂ ਗਾਥਂ ਕਥੇਨ੍ਤੋਪਿ ਚਤੁਸਚ੍ਚਵਿਮੁਤ੍ਤਂ ਨਾਮ ਨ ਕਥੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਧਨਞ੍ਜਾਨਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.