੬. ਏਸੁਕਾਰੀਸੁਤ੍ਤਵਣ੍ਣਨਾ

੪੩੭. ਏਵਂ ਮੇ ਸੁਤਨ੍ਤਿ ਏਸੁਕਾਰੀਸੁਤ੍ਤਂ. ਤਤ੍ਥ ਬਿਲਂ ਓਲਗ੍ਗੇਯ੍ਯੁਨ੍ਤਿ ਕੋਟ੍ਠਾਸਂ ਲਗ੍ਗਾਪੇਯ੍ਯੁਂ, ਇਮਿਨਾ ਸਤ੍ਥਧਮ੍ਮਂ ਨਾਮ ਦਸ੍ਸੇਤਿ. ਸਤ੍ਥਵਾਹੋ ਕਿਰ ਮਹਾਕਨ੍ਤਾਰਪਟਿਪਨ੍ਨੋ ਅਨ੍ਤਰਾਮਗ੍ਗੇ ਗੋਣੇ ਮਤੇ ਮਂਸਂ ਗਹੇਤ੍ਵਾ ਸਬ੍ਬੇਸਂ ਸਤ੍ਥਿਕਾਨਂ ‘‘ਇਦਂ ਖਾਦਿਤ੍ਵਾ ਏਤ੍ਤਕਂ ਮੂਲਂ ਦਾਤਬ੍ਬ’’ਨ੍ਤਿ ਕੋਟ੍ਠਾਸਂ ਓਲਗ੍ਗੇਤਿ, ਗੋਣਮਂਸਂ ਨਾਮ ਖਾਦਨ੍ਤਾਪਿ ਅਤ੍ਥਿ ਅਖਾਦਨ੍ਤਾਪਿ, ਮੂਲਂ ਦਾਤੁਂ ਸਕ੍ਕੋਨ੍ਤਾਪਿ ਅਸਕ੍ਕੋਨ੍ਤਾਪਿ. ਸਤ੍ਥਵਾਹੋ ਯੇਨ ਮੂਲੇਨ ਗੋਣੋ ਗਹਿਤੋ, ਤਸ੍ਸ ਨਿਕ੍ਖਮਨਤ੍ਥਂ ਸਬ੍ਬੇਸਂ ਬਲਕ੍ਕਾਰੇਨ ਕੋਟ੍ਠਾਸਂ ਦਤ੍ਵਾ ਮੂਲਂ ਗਣ੍ਹਾਤਿ, ਅਯਂ ਸਤ੍ਥਧਮ੍ਮੋ. ਏਵਮੇਵਂ ਬ੍ਰਾਹ੍ਮਣਾਪਿ ਲੋਕਸ੍ਸ ਪਟਿਞ੍ਞਂ ਅਗ੍ਗਹੇਤ੍ਵਾ ਅਤ੍ਤਨੋਵ ਧਮ੍ਮਤਾਯ ਚਤਸ੍ਸੋ ਪਾਰਿਚਰਿਯਾ ਪਞ੍ਞਪੇਨ੍ਤੀਤਿ ਦਸ੍ਸੇਤੁਂ ਏਵਮੇਵ ਖੋਤਿਆਦਿਮਾਹ. ਪਾਪਿਯੋ ਅਸ੍ਸਾਤਿ ਪਾਪਂ ਅਸ੍ਸ. ਸੇਯ੍ਯੋ ਅਸ੍ਸਾਤਿ ਹਿਤਂ ਅਸ੍ਸ. ਅਥ ਵਾ ਪਾਪਿਯੋਤਿ ਪਾਪਕੋ ਲਾਮਕੋ ਅਤ੍ਤਭਾਵੋ ਅਸ੍ਸ. ਸੇਯ੍ਯੋਤਿ ਸੇਟ੍ਠੋ ਉਤ੍ਤਮੋ. ਸੇਯ੍ਯਂਸੋਤਿ ਸੇਯ੍ਯੋ. ਉਚ੍ਚਾਕੁਲੀਨਤਾਤਿ ਉਚ੍ਚਾਕੁਲੀਨਤ੍ਤੇਨ ਸੇਯ੍ਯੋ. ਪਾਪਿਯਂਸੋਤਿ ਪਾਪਿਯੋ. ਉਚ੍ਚਾਕੁਲੀਨਤਾ ਚ ਦ੍ਵੀਸੁ ਕੁਲੇਸੁ ਵਡ੍ਢੇਤਿ ਖਤ੍ਤਿਯਕੁਲੇ ਬ੍ਰਾਹ੍ਮਣਕੁਲੇ ਚ, ਉਲ਼ਾਰਵਣ੍ਣਤਾ ਤੀਸੁ. ਵੇਸ੍ਸੋਪਿ ਹਿ ਉਲ਼ਾਰਵਣ੍ਣੋ ਹੋਤਿ. ਉਲ਼ਾਰਭੋਗਤਾ ਚਤੂਸੁਪਿ. ਸੁਦ੍ਦੋਪਿ ਹਿ ਅਨ੍ਤਮਸੋ ਚਣ੍ਡਾਲੋਪਿ ਉਲ਼ਾਰਭੋਗੋ ਹੋਤਿਯੇਵ.

੪੪੦. ਭਿਕ੍ਖਾਚਰਿਯਨ੍ਤਿ ਕੋਟਿਧਨੇਨਪਿ ਹਿ ਬ੍ਰਾਹ੍ਮਣੇਨ ਭਿਕ੍ਖਾ ਚਰਿਤਬ੍ਬਾਵ, ਪੋਰਾਣਕਬ੍ਰਾਹ੍ਮਣਾ ਅਸੀਤਿਕੋਟਿਧਨਾਪਿ ਏਕਵੇਲਂ ਭਿਕ੍ਖਂ ਚਰਨ੍ਤਿ. ਕਸ੍ਮਾ? ਦੁਗ੍ਗਤਕਾਲੇ ਚਰਨ੍ਤਾਨਂ ਇਦਾਨਿ ਭਿਕ੍ਖਂ ਚਰਿਤੁਂ ਆਰਦ੍ਧਾਤਿ ਗਰਹਾ ਨ ਭਵਿਸ੍ਸਤੀਤਿ. ਅਤਿਮਞ੍ਞਮਾਨੋਤਿ ਯੋ ਭਿਕ੍ਖਾਚਰਿਯਵਂਸਂ ਹਰਿਤ੍ਵਾ ਸਤ੍ਤਜੀਵਕਸਿਕਮ੍ਮਵਣਿਜ੍ਜਾਦੀਹਿ ਜੀਵਿਕਂ ਕਪ੍ਪੇਤਿ, ਅਯਂ ਅਤਿਮਞ੍ਞਤਿ ਨਾਮ. ਗੋਪੋ ਵਾਤਿ ਯਥਾ ਗੋਪਕੋ ਅਤ੍ਤਨਾ ਰਕ੍ਖਿਤਬ੍ਬਂ ਭਣ੍ਡਂ ਥੇਨੇਨ੍ਤੋ ਅਕਿਚ੍ਚਕਾਰੀ ਹੋਤਿ, ਏਵਨ੍ਤਿ ਅਤ੍ਥੋ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਅਸਿਤਬ੍ਯਾਭਙ੍ਗਿਨ੍ਤਿ ਤਿਣਲਾਯਨਅਸਿਤਞ੍ਚੇਵ ਕਾਜਞ੍ਚ. ਅਨੁਸ੍ਸਰਤੋਤਿ ਯਤ੍ਥ ਜਾਤੋ, ਤਸ੍ਮਿਂ ਪੋਰਾਣੇ ਮਾਤਾਪੇਤ੍ਤਿਕੇ ਕੁਲਵਂਸੇ ਅਨੁਸ੍ਸਰਿਯਮਾਨੇਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਏਸੁਕਾਰੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.