੫. ਚਙ੍ਕੀਸੁਤ੍ਤਵਣ੍ਣਨਾ
੪੨੨. ਏਵਂ ਮੇ ਸੁਤਨ੍ਤਿ ਚਙ੍ਕੀਸੁਤ੍ਤਂ. ਤਤ੍ਥ ਦੇਵਵਨੇ ਸਾਲਵਨੇਤਿ ਤਸ੍ਮਿਂ ਕਿਰ ਦੇਵਤਾਨਂ ਬਲਿਕਮ੍ਮਂ ਕਰੀਯਤਿ, ਤੇਨ ਤਂ ਦੇਵਵਨਨ੍ਤਿਪਿ ਸਾਲਵਨਨ੍ਤਿਪਿ ਵੁਚ੍ਚਤਿ. ਓਪਾਸਾਦਂ ਅਜ੍ਝਾਵਸਤੀਤਿ ਓਪਾਸਾਦਨਾਮਕੇ ਬ੍ਰਾਹ੍ਮਣਗਾਮੇ ਵਸਤਿ, ਅਭਿਭਵਿਤ੍ਵਾ ਵਾ ਆਵਸਤਿ, ਤਸ੍ਸ ਸਾਮੀ ਹੁਤ੍ਵਾ ਯਾਯ ਮਰਿਯਾਦਾਯ ਤਤ੍ਥ ਵਸਿਤਬ੍ਬਂ, ਤਾਯ ਮਰਿਯਾਦਾਯ ਵਸਤਿ. ਉਪਸਗ੍ਗਵਸੇਨ ਪਨੇਤ੍ਥ ਭੁਮ੍ਮਤ੍ਥੇ ਉਪਯੋਗਵਚਨਂ ਵੇਦਿਤਬ੍ਬਂ, ਤਥਸ੍ਸ ਅਨੁਪ੍ਪਯੋਗਤ੍ਤਾਵ ਸੇਸਪਦੇਸੁ. ਤਤ੍ਥ ਲਕ੍ਖਣਂ ਸਦ੍ਦਸਤ੍ਥਤੋ ਪਰਿਯੇਸਿਤਬ੍ਬਂ. ਸਤ੍ਤੁਸ੍ਸਦਨ੍ਤਿ ਸਤ੍ਤੇਹਿ ਉਸ੍ਸਦਂ ਉਸ੍ਸਨ੍ਨਂ, ਬਹੁਜਨਂ ਆਕਿਣ੍ਣਮਨੁਸ੍ਸਂ ਪੋਸਾਵਨਿਯਹਤ੍ਥਿਅਸ੍ਸਮੋਰਮਿਗਾਦਿਅਨੇਕਸਤ੍ਤਸਮਾਕਿਣ੍ਣਞ੍ਚਾਤਿ ਅਤ੍ਥੋ. ਯਸ੍ਮਾ ਪਨ ਸੋ ਗਾਮੋ ਬਹਿ ਆਵਿਜ੍ਝਿਤ੍ਵਾ ਜਾਤੇਨ ਹਤ੍ਥਿਅਸ੍ਸਾਦੀਨਂ ਘਾਸਤਿਣੇਨ ਚੇਵ ਗੇਹਚ੍ਛਦਨਤਿਣੇਨ ਚ ਸਮ੍ਪਨ੍ਨੋ, ਤਥਾ ਦਾਰੁਕਟ੍ਠੇਹਿ ਚੇਵ ਗੇਹਸਮ੍ਭਾਰਕਟ੍ਠੇਹਿ ਚ, ਯਸ੍ਮਾ ਚਸ੍ਸ ਅਬ੍ਭਨ੍ਤਰੇ ਵਟ੍ਟਚਤੁਰਸ੍ਸਾਦਿਸਣ੍ਠਾਨਾ ਬਹੂ ਪੋਕ੍ਖਰਣਿਯੋ, ਜਲਜਕੁਸੁਮਵਿਚਿਤ੍ਤਾਨਿ ਚ ਬਹਿ ਅਨੇਕਾਨਿ ਤਲ਼ਾਕਾਨਿ ਵਾ ਉਦਕਸ੍ਸ ਨਿਚ੍ਚਭਰਿਤਾਨੇਵ ਹੋਨ੍ਤਿ, ਤਸ੍ਮਾ ਸਤਿਣਕਟ੍ਠੋਦਕਨ੍ਤਿ ਵੁਤ੍ਤਂ.
ਸਹ ਧਞ੍ਞੇਨ ਸਧਞ੍ਞਂ, ਪੁਬ੍ਬਣ੍ਣਾਪਰਣ੍ਣਾਦਿਭੇਦਂ ਬਹੁਧਞ੍ਞਸਨ੍ਨਿਚਯਨ੍ਤਿ ਅਤ੍ਥੋ. ਏਤ੍ਤਾਵਤਾ ਯਸ੍ਮਿਂ ਗਾਮੇ ਬ੍ਰਾਹ੍ਮਣੋ ਸੇਤਚ੍ਛਤ੍ਤਂ ਉਸ੍ਸਾਪੇਤ੍ਵਾ ਰਾਜਲੀਲਾਯ ਵਸਤਿ. ਤਸ੍ਸ ਸਮਿਦ੍ਧਿਸਮ੍ਪਤ੍ਤਿ ਦੀਪਿਤਾ ਹੋਤਿ. ਰਾਜਤੋ ਲਦ੍ਧਂ ਭੋਗ੍ਗਂ ਰਾਜਭੋਗ੍ਗਂ. ਕੇਨ ਦਿਨ੍ਨਨ੍ਤਿ ਚੇ, ਰਞ੍ਞਾ ਪਸੇਨਦਿਨਾ ਕੋਸਲੇਨ ਦਿਨ੍ਨਂ. ਰਾਜਦਾਯਨ੍ਤਿ ਰਞ੍ਞੋ ਦਾਯਭੂਤਂ, ਦਾਯਜ੍ਜਨ੍ਤਿ ਅਤ੍ਥੋ. ਬ੍ਰਹ੍ਮਦੇਯ੍ਯਨ੍ਤਿ ਸੇਟ੍ਠਦੇਯ੍ਯਂ, ਛਤ੍ਤਂ ਉਸ੍ਸਾਪੇਤ੍ਵਾ ਰਾਜਸਙ੍ਖੇਪੇਨ ਭੁਞ੍ਜਿਤਬ੍ਬਨ੍ਤਿ ਅਤ੍ਥੋ. ਅਥ ਵਾ ਰਾਜਭੋਗ੍ਗਨ੍ਤਿ ਸਬ੍ਬਂ ਛੇਜ੍ਜਭੇਜ੍ਜਂ ਅਨੁਸਾਸਨ੍ਤੇਨ ਤਿਤ੍ਥਪਬ੍ਬਤਾਦੀਸੁ ਸੁਙ੍ਕਂ ਗਣ੍ਹਨ੍ਤੇਨ ਸੇਤਚ੍ਛਤ੍ਤਂ ਉਸ੍ਸਾਪੇਤ੍ਵਾ ਰਞ੍ਞਾ ਹੁਤ੍ਵਾ ਭੁਞ੍ਜਿਤਬ੍ਬਂ. ਤਤ੍ਥ ਰਞ੍ਞਾ ਪਸੇਨਦਿਨਾ ਕੋਸਲੇਨ ਦਿਨ੍ਨਂ ਰਾਜਦਾਯਨ੍ਤਿ. ਏਤ੍ਥ ਰਞ੍ਞਾ ਦਿਨ੍ਨਤ੍ਤਾ ਰਾਜਦਾਯਂ, ਦਾਯਕਰਾਜਦੀਪਨਤ੍ਥਂ ਪਨਸ੍ਸ ‘‘ਰਞ੍ਞਾ ਪਸੇਨਦਿਨਾ ਕੋਸਲੇਨ ਦਿਨ੍ਨ’’ਨ੍ਤਿ ਇਦਂ ਵੁਤ੍ਤਂ. ਬ੍ਰਹ੍ਮਦੇਯ੍ਯਨ੍ਤਿ ਸੇਟ੍ਠਦੇਯ੍ਯਂ, ਯਥਾ ਦਿਨ੍ਨਂ ਨ ਪੁਨ ਗਹੇਤਬ੍ਬਂ ਹੋਤਿ ਨਿਸ੍ਸਟ੍ਠਪਰਿਚ੍ਚਤ੍ਤਂ, ਏਵਂ ਦਿਨ੍ਨਨ੍ਤਿ ਅਤ੍ਥੋ.
੪੨੩. ਬਹੂ ਬਹੂ ਹੁਤ੍ਵਾ ਸਂਹਤਾਤਿ ਸਙ੍ਘਾ. ਏਕੇਕਿਸ੍ਸਾ ਦਿਸਾਯ ਸਙ੍ਘੋ ਤੇਸਂ ਅਤ੍ਥੀਤਿ ਸਙ੍ਘੀ. ਪੁਬ੍ਬੇ ਗਾਮਸ੍ਸ ਅਨ੍ਤੋ ਅਗਣਾ ਬਹਿ ਨਿਕ੍ਖਮਿਤ੍ਵਾ ਗਣਾ ਸਮ੍ਪਨ੍ਨਾਤਿ ਗਣੀਭੂਤਾ. ਉਤ੍ਤਰੇਨਮੁਖਾਤਿ ਉਤ੍ਤਰਦਿਸਾਭਿਮੁਖਾ. ਖਤ੍ਤਂ ਆਮਨ੍ਤੇਸੀਤਿ ਖਤ੍ਤਾ ਵੁਚ੍ਚਤਿ ਪੁਚ੍ਛਿਤਪਞ੍ਹਬ੍ਯਾਕਰਣਸਮਤ੍ਥੋ ਮਹਾਮਤ੍ਤੋ, ਤਂ ਆਮਨ੍ਤੇਸਿ. ਆਗਮੇਨ੍ਤੂਤਿ ਮੁਹੁਤ੍ਤਂ ਪਟਿਮਾਨੇਨ੍ਤੁ, ਅਚ੍ਛਨ੍ਤੂਤਿ ਵੁਤ੍ਤਂ ਹੋਤਿ.
੪੨੪. ਨਾਨਾਵੇਰਜ੍ਜਕਾਨਨ੍ਤਿ ਨਾਨਾਵਿਧੇਸੁ ਰਜ੍ਜੇਸੁ ਅਞ੍ਞੇਸੁ ਕਾਸਿਕੋਸਲਾਦੀਸੁ ਜਾਤਾ ਵਾ ਨਿਵਸਨ੍ਤਿ ਵਾ, ਤਤੋ ਵਾ ਆਗਤਾਤਿ ਨਾਨਾਵੇਰਜ੍ਜਕਾ, ਤੇਸਂ ਨਾਨਾਵੇਰਜ੍ਜਕਾਨਂ. ਕੇਨਚਿਦੇਵਾਤਿ ਅਨਿਯਮਿਤੇਨ ਯਞ੍ਞੁਪਾਸਨਾਦਿਨਾ ਕੇਨਚਿ ਕਿਚ੍ਚੇਨ. ਤੇ ਤਸ੍ਸ ਗਮਨਂ ਸੁਤ੍ਵਾ ਚਿਨ੍ਤੇਸੁਂ – ‘‘ਅਯਂ, ਚਙ੍ਕੀ, ਉਗ੍ਗਤਬ੍ਰਾਹ੍ਮਣੋ, ਯੇਭੁਯ੍ਯੇਨ ਚ ਅਞ੍ਞੇ ਬ੍ਰਾਹ੍ਮਣਾ ਸਮਣਂ ਗੋਤਮਂ ਸਰਣਂ ਗਤਾ, ਅਯਮੇਵ ਨ ਗਤੋ. ਸ੍ਵਾਯਂ ਸਚੇ ਤਤ੍ਥ ਗਮਿਸ੍ਸਤਿ, ਅਦ੍ਧਾ ਸਮਣਸ੍ਸ ਗੋਤਮਸ੍ਸ ਆਵਟ੍ਟਨਿਯਾ ਮਾਯਾਯ ਆਵਟ੍ਟਿਤੋ ਸਰਣਂ ਗਮਿਸ੍ਸਤਿ. ਤਤੋ ਏਤਸ੍ਸਾਪਿ ਗੇਹਦ੍ਵਾਰੇ ਬ੍ਰਾਹ੍ਮਣਾਨਂ ਅਸਨ੍ਨਿਪਾਤੋ ਭਵਿਸ੍ਸਤਿ. ਹਨ੍ਦਸ੍ਸ ਗਮਨਨ੍ਤਰਾਯਂ ਕਰੋਮਾ’’ਤਿ ਸਮ੍ਮਨ੍ਤਯਿਤ੍ਵਾ ਤਤ੍ਥ ਅਗਮਂਸੁ. ਤਂ ਸਨ੍ਧਾਯ ‘‘ਅਥ ਖੋ ਤੇ ਬ੍ਰਾਹ੍ਮਣਾ’’ਤਿਆਦਿ ਵੁਤ੍ਤਂ.
ਤਤ੍ਥ ਉਭਤੋਤਿ ਦ੍ਵੀਹਿ ਪਕ੍ਖੇਹਿ. ਮਾਤਿਤੋ ਚ ਪਿਤਿਤੋ ਚਾਤਿ, ਭੋਤੋ ਮਾਤਾ ਬ੍ਰਾਹ੍ਮਣੀ, ਮਾਤੁਮਾਤਾ ਬ੍ਰਾਹ੍ਮਣੀ, ਤਸ੍ਸਾਪਿ ਮਾਤਾ ਬ੍ਰਾਹ੍ਮਣੀ. ਪਿਤਾ ਬ੍ਰਾਹ੍ਮਣੋ, ਪਿਤੁਪਿਤਾ ਬ੍ਰਾਹ੍ਮਣੋ, ਤਸ੍ਸਪਿ ਪਿਤਾ ਬ੍ਰਾਹ੍ਮਣੋਤਿ. ਏਵਂ ਭਵਂ ਉਭਤੋ ਸੁਜਾਤੋ, ਮਾਤਿਤੋ ਚ ਪਿਤਿਤੋ ਚ. ਸਂਸੁਦ੍ਧਗਹਣਿਕੋਤਿ ਸਂਸੁਦ੍ਧਾ ਤੇ ਮਾਤੁ ਗਹਣੀ, ਸਂਸੁਦ੍ਧਾ ਤੇ ਮਾਤੁ ਕੁਚ੍ਛੀਤਿ ਅਤ੍ਥੋ. ਯਾਵ ਸਤ੍ਤਮਾ ਪਿਤਾਮਹਯੁਗਾਤਿ ਏਤ੍ਥ ਪਿਤੁ ਪਿਤਾ ਪਿਤਾਮਹੋ, ਪਿਤਾਮਹਸ੍ਸ ਯੁਗਂ ਪਿਤਾਮਹਯੁਗਂ. ਯੁਗਨ੍ਤਿ ਆਯੁਪ੍ਪਮਾਣਂ ਵੁਚ੍ਚਤਿ. ਅਭਿਲਾਪਮਤ੍ਤਮੇਵ ਚੇਤਂ, ਅਤ੍ਥਤੋ ਪਨ ਪਿਤਾਮਹੋਵ ਪਿਤਾਮਹਯੁਗਂ. ਤਤੋ ਉਦ੍ਧਂ ਸਬ੍ਬੇਪਿ ਪੁਬ੍ਬਪੁਰਿਸਾ ਪਿਤਾਮਹਗ੍ਗਹਣੇਨੇਵ ਗਹਿਤਾ. ਏਵਂ ਯਾਵ ਸਤ੍ਤਮੋ ਪੁਰਿਸੋ, ਤਾਵ ਸਂਸੁਦ੍ਧਗਹਣਿਕੋ. ਅਥ ਵਾ ਅਕ੍ਖਿਤ੍ਤੋ ਅਨੁਪਕੁਟ੍ਠੋ ਜਾਤਿਵਾਦੇਨਾਤਿ ਦਸ੍ਸੇਤਿ. ਅਕ੍ਖਿਤ੍ਤੋਤਿ ਅਪਨੇਥ ਏਤਂ, ਕਿਂ ਇਮਿਨਾਤਿ ਏਵਂ ਅਕ੍ਖਿਤ੍ਤੋ ਅਨਵਕ੍ਖਿਤ੍ਤੋ. ਅਨੁਪਕ੍ਕੁਟ੍ਠੋਤਿ ਨ ਉਪਕੁਟ੍ਠੋ, ਨ ਅਕ੍ਕੋਸਂ ਵਾ ਨਿਨ੍ਦਂ ਵਾ ਪਤ੍ਤਪੁਬ੍ਬੋ. ਕੇਨ ਕਾਰਣੇਨਾਤਿ. ਜਾਤਿਵਾਦੇਨ, ਇਤਿਪਿ ਹੀਨਜਾਤਿਕੋ ਏਸੋਤਿ ਏਵਰੂਪੇਨ ਵਚਨੇਨਾਤਿ ਅਤ੍ਥੋ. ਇਮਿਨਾਪਙ੍ਗੇਨਾਤਿ ਇਮਿਨਾਪਿ ਕਾਰਣੇਨ.
ਅਡ੍ਢੋਤਿ ਇਸ੍ਸਰੋ. ਮਹਦ੍ਧਨੋਤਿ ਮਹਤਾ ਧਨੇਨ ਸਮਨ੍ਨਾਗਤੋ. ਭੋਤੋ ਹਿ ਗੇਹੇ ਪਥਵਿਯਂ ਪਂਸੁਵਾਲਿਕਾ ਵਿਯ ਬਹੁ ਧਨਂ, ਸਮਣੋ ਪਨ ਗੋਤਮੋ ਅਧਨੋ ਭਿਕ੍ਖਾਯ ਉਦਰਂ ਪੂਰੇਤ੍ਵਾ ਯਾਪੇਤੀਤਿ ਦਸ੍ਸੇਨ੍ਤਿ. ਮਹਾਭੋਗੋਤਿ ਪਞ੍ਚਕਾਮਗੁਣਵਸੇਨ ਮਹਾਉਪਭੋਗੋ. ਏਵਂ ਯਂ ਯਂ ਗੁਣਂ ਵਦਨ੍ਤਿ, ਤਸ੍ਸ ਤਸ੍ਸ ਪਟਿਪਕ੍ਖਵਸੇਨ ਭਗਵਤੋ ਅਗੁਣਂਯੇਵ ਦਸ੍ਸੇਮਾਤਿ ਮਞ੍ਞਮਾਨਾ ਵਦਨ੍ਤਿ.
ਅਭਿਰੂਪੋਤਿ ਅਞ੍ਞੇਹਿ ਮਨੁਸ੍ਸੇਹਿ ਅਧਿਕਰੂਪੋ. ਦਸ੍ਸਨੀਯੋਤਿ ਦਿਵਸਮ੍ਪਿ ਪਸ੍ਸਨ੍ਤਾਨਂ ਅਤਿਤ੍ਤਿਕਰਣਤੋ ਦਸ੍ਸਨਯੋਗ੍ਗੋ, ਦਸ੍ਸਨੇਨੇਵ ਚਿਤ੍ਤਪਸਾਦਜਨਨਤੋ ਪਾਸਾਦਿਕੋ. ਪੋਕ੍ਖਰਤਾ ਵੁਚ੍ਚਤਿ ਸੁਨ੍ਦਰਭਾਵੋ, ਵਣ੍ਣਸ੍ਸ ਪੋਕ੍ਖਰਤਾ ਵਣ੍ਣਪੋਕ੍ਖਰਤਾ, ਤਾਯ ਵਣ੍ਣਪੋਕ੍ਖਰਤਾਯ, ਵਣ੍ਣਸਮ੍ਪਤ੍ਤਿਯਾਤਿ ਅਤ੍ਥੋ. ਪੋਰਾਣਾ ਪਨ ਪੋਕ੍ਖਰਨ੍ਤਿ ਸਰੀਰਂ ਵਦਨ੍ਤਿ, ਵਣ੍ਣਂ ਵਣ੍ਣਮੇਵ. ਤੇਸਂ ਮਤੇਨ ਵਣ੍ਣੋ ਚ ਪੋਕ੍ਖਰਞ੍ਚ ਵਣ੍ਣਪੋਕ੍ਖਰਾਨਿ, ਤੇਸਂ ਭਾਵੋ ਵਣ੍ਣਪੋਕ੍ਖਰਤਾ. ਇਤਿ ਪਰਮਾਯ ਵਣ੍ਣਪੋਕ੍ਖਰਤਾਯਾਤਿ ਉਤ੍ਤਮਪਰਿਸੁਦ੍ਧੇਨ ਵਣ੍ਣੇਨ ਚੇਵ ਸਰੀਰਸਣ੍ਠਾਨਸਮ੍ਪਤ੍ਤਿਯਾ ਚਾਤਿ ਅਤ੍ਥੋ. ਬ੍ਰਹ੍ਮਵਣ੍ਣੀਤਿ ਸੇਟ੍ਠਵਣ੍ਣੀ, ਪਰਿਸੁਦ੍ਧਵਣ੍ਣੇਸੁਪਿ ਸੇਟ੍ਠੇਨ ਸੁਵਣ੍ਣਵਣ੍ਣੇਨੇਵ ਸਮਨ੍ਨਾਗਤੋਤਿ ਅਤ੍ਥੋ. ਬ੍ਰਹ੍ਮਵਚ੍ਛਸੀਤਿ ਮਹਾਬ੍ਰਹ੍ਮੁਨੋ ਸਰੀਰਸਦਿਸੇਨ ਸਰੀਰੇਨ ਸਮਨ੍ਨਾਗਤੋ. ਅਖੁਦ੍ਦਾਵਕਾਸੋ ਦਸ੍ਸਨਾਯਾਤਿ ਭੋਤੋ ਸਰੀਰੇ ਦਸ੍ਸਨਸ੍ਸ ਓਕਾਸੋ ਨ ਖੁਦ੍ਦਕੋ ਮਹਾ. ਸਬ੍ਬਾਨੇਵ ਤੇ ਅਙ੍ਗਪਚ੍ਚਙ੍ਗਾਨਿ ਦਸ੍ਸਨੀਯਾਨੇਵ, ਤਾਨਿ ਚਾਪਿ ਮਹਨ੍ਤਾਨੇਵਾਤਿ ਦੀਪੇਤਿ.
ਸੀਲਮਸ੍ਸ ਅਤ੍ਥੀਤਿ ਸੀਲਵਾ. ਵੁਦ੍ਧਂ ਵਡ੍ਢਿਤਂ ਸੀਲਮਸ੍ਸਾਤਿ ਵੁਦ੍ਧਸੀਲੀ. ਵੁਦ੍ਧਸੀਲੇਨਾਤਿ ਵੁਦ੍ਧੇਨ ਵਡ੍ਢਿਤੇਨ ਸੀਲੇਨ. ਸਮਨ੍ਨਾਗਤੋਤਿ ਯੁਤ੍ਤੋ, ਇਦਂ ਵੁਦ੍ਧਸੀਲੀਪਦਸ੍ਸੇਵ ਵੇਵਚਨਂ. ਸਬ੍ਬਮੇਤਂ ਪਞ੍ਚਸੀਲਮਤ੍ਤਮੇਵ ਸਨ੍ਧਾਯ ਵਦਨ੍ਤਿ.
ਕਾਲ੍ਯਾਣਵਾਚੋਤਿਆਦੀਸੁ ਕਲ੍ਯਾਣਾ ਸੁਨ੍ਦਰਾ ਪਰਿਮਣ੍ਡਲਪਦਬ੍ਯਞ੍ਜਨਾ ਵਾਚਾ ਅਸ੍ਸਾਤਿ ਕਲ੍ਯਾਣਵਾਚੋ. ਕਲ੍ਯਾਣਂ ਮਧੁਰਂ ਵਾਕ੍ਕਰਣਂ ਅਸ੍ਸਾਤਿ ਕਲ੍ਯਾਣਵਾਕ੍ਕਰਣੋ. ਵਾਕ੍ਕਰਣਨ੍ਤਿ ਉਦਾਹਰਣਘੋਸੋ. ਗੁਣਪਰਿਪੁਣ੍ਣਭਾਵੇਨ ਪੁਰੇ ਭਵਾਤਿ ਪੋਰੀ. ਪੁਰੇ ਵਾ ਭਵਤ੍ਤਾ ਪੋਰੀ. ਨਾਗਰਿਕਿਤ੍ਥਿਯਾ ਸੁਖੁਮਾਲਤ੍ਤਨੇਨ ਸਦਿਸਾਤਿਪਿ ਪੋਰੀ. ਤਾਯ ਪੋਰਿਯਾ. ਵਿਸ੍ਸਟ੍ਠਾਯਾਤਿ ਅਪਲਿਬੁਦ੍ਧਾਯ, ਸਨ੍ਦਿਟ੍ਠਵਿਲਮ੍ਬਿਤਾਦਿਦੋਸਰਹਿਤਾਯ. ਅਨੇਲਗਲਾਯਾਤਿ ਏਲਗਲੇਨ ਵਿਰਹਿਤਾਯ. ਏਕਚ੍ਚਸ੍ਸ ਹਿ ਕਥੇਨ੍ਤਸ੍ਸ ਏਲਂ ਗਲਤਿ, ਲਾਲਾ ਵਾ ਪਗ੍ਘਰਤਿ, ਖੇਲ਼ਫੁਸਿਤਾਨਿ ਵਾ ਨਿਕ੍ਖਮਨ੍ਤਿ, ਤਸ੍ਸ ਵਾਚਾ ਏਲਗਲਾ ਨਾਮ ਹੋਤਿ. ਤਬ੍ਬਿਪਰਿਤਾਯਾਤਿ ਅਤ੍ਥੋ. ਅਤ੍ਥਸ੍ਸ ਵਿਞ੍ਞਾਪਨਿਯਾਤਿਆਦਿਮਜ੍ਝਪਰਿਯੋਸਾਨਂ ਪਾਕਟਂ ਕਤ੍ਵਾ ਭਾਸਿਤਤ੍ਥਸ੍ਸ ਵਿਞ੍ਞਾਪਨਸਮਤ੍ਥਾਯ. ਸੇਸਮੇਤ੍ਥ ਬ੍ਰਾਹ੍ਮਣਵਣ੍ਣੇ ਉਤ੍ਤਾਨਮੇਵ.
੪੨੫. ਏਵਂ ਵੁਤ੍ਤੇਤਿ ਏਵਂ ਤੇਹਿ ਬ੍ਰਾਹ੍ਮਣੇਹਿ ਵੁਤ੍ਤੇ, ਚਙ੍ਕੀ, ‘‘ਇਮੇ ਬ੍ਰਾਹ੍ਮਣਾ ਅਤ੍ਤਨੋ ਵਣ੍ਣੇ ਵੁਚ੍ਚਮਾਨੇ ਅਤੁਸ੍ਸਨਕਸਤ੍ਤੋ ਨਾਮ ਨਤ੍ਥਿ, ਵਣ੍ਣਮਸ੍ਸ ਭਣਿਤ੍ਵਾ ਨਿਵਾਰੇਸ੍ਸਾਮਾਤਿ ਜਾਤਿਆਦੀਹਿ ਮਮ ਵਣ੍ਣਂ ਵਦਨ੍ਤਿ, ਨ ਖੋ ਪਨ ਮੇ ਯੁਤ੍ਤਂ ਅਤ੍ਤਨੋ ਵਣ੍ਣੇ ਰਜ੍ਜਿਤੁਂ. ਹਨ੍ਦਾਹਂ ਏਤੇਸਂ ਵਾਦਂ ਭਿਨ੍ਦਿਤ੍ਵਾ ਸਮਣਸ੍ਸ ਗੋਤਮਸ੍ਸ ਮਹਨ੍ਤਭਾਵਂ ਞਾਪੇਤ੍ਵਾ ਏਤੇਸਂ ਤਤ੍ਥ ਗਮਨਂ ਕਰੋਮੀ’’ਤਿ ਚਿਨ੍ਤੇਤ੍ਵਾ ਤੇਨ ਹਿ, ਭੋ, ਮਮਾਪਿ ਸੁਣਾਥਾਤਿਆਦਿਮਾਹ. ਤਤ੍ਥ ਯੇਪਿ ‘‘ਉਭਤੋ ਸੁਜਾਤੋ’’ਤਿਆਦਯੋ ਅਤ੍ਤਨੋ ਗੁਣੇਹਿ ਸਦਿਸਾ ਗੁਣਾ, ਤੇਪਿ ‘‘ਕੋ ਚਾਹਂ, ਕੇ ਚ ਸਮਣਸ੍ਸ ਗੋਤਮਸ੍ਸ ਜਾਤਿਸਮ੍ਪਤ੍ਤਿਆਦਯੋ ਗੁਣਾ’’ਤਿ ਅਤ੍ਤਨੋ ਗੁਣੇਹਿ ਉਤ੍ਤਰਿਤਰੇਯੇਵ ਮਞ੍ਞਮਾਨੋ, ਇਤਰੇ ਪਨ ਏਕਨ੍ਤੇਨੇਵ ਭਗਵਤੋ ਮਹਨ੍ਤਭਾਵਦੀਪਨਤ੍ਥਂ ਪਕਾਸੇਤਿ. ਮਯਮੇਵ ਅਰਹਾਮਾਤਿ ਏਵਂ ਨਿਯਮੇਨ੍ਤੋ ਚੇਤ੍ਥ ਇਦਂ ਦੀਪੇਤਿ – ਯਦਿ ਗੁਣਮਹਨ੍ਤਤਾਯ ਉਪਸਙ੍ਕਮਿਤਬ੍ਬੋ ਨਾਮ ਹੋਤਿ, ਯਥਾ ਸਿਨੇਰੁਂ ਉਪਨਿਧਾਯ ਸਾਸਪੋ, ਮਹਾਸਮੁਦ੍ਦਂ ਉਪਨਿਧਾਯ ਗੋਪਦਕਂ, ਸਤ੍ਤਸੁ ਮਹਾਸਰੇਸੁ ਉਦਕਂ ਉਪਨਿਧਾਯ ਉਸ੍ਸਾਵਬਿਨ੍ਦੁ ਪਰਿਤ੍ਤੋ ਲਾਮਕੋ, ਏਵਮੇਵਂ ਸਮਣਸ੍ਸ ਗੋਤਮਸ੍ਸ ਜਾਤਿਸਮ੍ਪਤ੍ਤਿਆਦਯੋ ਗੁਣੇ ਉਪਨਿਧਾਯ ਅਮ੍ਹਾਕਂ ਗੁਣਾ ਪਰਿਤ੍ਤਾ ਲਾਮਕਾ, ਤਸ੍ਮਾ ਮਯਮੇਵ ਅਰਹਾਮ ਤਂ ਭਵਨ੍ਤਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁਨ੍ਤਿ.
ਭੂਮਿਗਤਞ੍ਚ ਵੇਹਾਸਟ੍ਠਞ੍ਚਾਤਿ ਏਤ੍ਥ ਰਾਜਙ੍ਗਣੇ ਚੇਵ ਉਯ੍ਯਾਨੇ ਚ ਸੁਧਾਮਟ੍ਠਾ ਪੋਕ੍ਖਰਣਿਯੋ ਸਤ੍ਤਰਤਨਪੂਰਿਂ ਕਤ੍ਵਾ ਭੂਮਿਯਂ ਠਪਿਤਂ ਧਨਂ ਭੂਮਿਗਤਂ ਨਾਮ, ਪਾਸਾਦਨਿਯੂਹਾਦਯੋ ਪਨ ਪੂਰੇਤ੍ਵਾ ਠਪਿਤਂ ਵੇਹਾਸਟ੍ਠਂ ਨਾਮ. ਏਵਂ ਤਾਵ ਕੁਲਪਰਿਯਾਯੇਨ ਆਗਤਂ. ਤਥਾਗਤਸ੍ਸ ਪਨ ਜਾਤਦਿਵਸੇਯੇਵ ਸਙ੍ਖੋ ਏਲੋ ਉਪ੍ਪਲੋ ਪੁਣ੍ਡਰੀਕੋਤਿ ਚਤ੍ਤਾਰੋ ਨਿਧਯੋ ਉਪਗਤਾ. ਤੇਸੁ ਸਙ੍ਖੋ ਗਾਵੁਤਿਕੋ, ਏਲੋ ਅਡ੍ਢਯੋਜਨਿਕੋ, ਉਪ੍ਪਲੋ ਤਿਗਾਵੁਤਿਕੋ ਪੁਣ੍ਡਰੀਕੋ ਯੋਜਨਿਕੋਤਿ. ਤੇਸੁਪਿ ਗਹਿਤਗਹਿਤਟ੍ਠਾਨਂ ਪੂਰਤਿਯੇਵ. ਇਤਿ ਭਗਵਾ ਪਹੂਤਂ ਹਿਰਞ੍ਞਸੁਵਣ੍ਣਂ ਓਹਾਯ ਪਬ੍ਬਜਿਤੋਤਿ ਵੇਦਿਤਬ੍ਬੋ. ਦਹਰੋ ਵਾਤਿਆਦੀਨਿ ਹੇਟ੍ਠਾ ਵਿਤ੍ਥਾਰਿਤਾਨੇਵ.
ਅਖੁਦ੍ਦਾਵਕਾਸੋਤਿ ਏਤ੍ਥ ਭਗਵਤਿ ਅਪਰਿਮਾਣੋਯੇਵ ਦਸ੍ਸਨਾਵਕਾਸੋਤਿ ਵੇਦਿਤਬ੍ਬੋ. ਤਤ੍ਰਿਦਂ ਵਤ੍ਥੁਂ – ਰਾਜਗਹੇ ਕਿਰ ਅਞ੍ਞਤਰੋ ਬ੍ਰਾਹ੍ਮਣੋ ‘‘ਸਮਣਸ੍ਸ ਕਿਰ ਗੋਤਮਸ੍ਸ ਪਮਾਣਂ ਗਹੇਤੁਂ ਨ ਸਕ੍ਕਾ’’ਤਿ ਸੁਤ੍ਵਾ ਭਗਵਤੋ ਪਿਣ੍ਡਾਯ ਪਵਿਸਨਕਾਲੇ ਸਟ੍ਠਿਹਤ੍ਥਂ ਵੇਲ਼ੁਂ ਗਹੇਤ੍ਵਾ ਨਗਰਦ੍ਵਾਰਸ੍ਸ ਬਹਿ ਠਤ੍ਵਾ ਸਮ੍ਪਤ੍ਤੇ ਭਗਵਤਿ ਵੇਲ਼ੁਂ ਗਹੇਤ੍ਵਾ ਸਮੀਪੇ ਅਟ੍ਠਾਸਿ, ਵੇਲ਼ੁ ਭਗਵਤੋ ਜਾਣੁਮਤ੍ਤਂ ਪਾਪੁਣਿ. ਪੁਨਦਿਵਸੇ ਦ੍ਵੇ ਵੇਲ਼ੂ ਘਟੇਤ੍ਵਾ ਸਮੀਪੇ ਅਟ੍ਠਾਸਿ, ਭਗਵਾ ਦ੍ਵਿਨ੍ਨਂ ਵੇਲ਼ੂਨਂ ਉਪਰਿ ਦ੍ਵਿਵੇਣੁਮਤ੍ਤਮੇਵ ਪਞ੍ਞਾਯਮਾਨੋ, ‘‘ਬ੍ਰਾਹ੍ਮਣ, ਕਿਂ ਕਰੋਸੀ’’ਤਿ ਆਹ? ਤੁਮ੍ਹਾਕਂ ਪਮਾਣਂ ਗਣ੍ਹਾਮੀਤਿ. ‘‘ਬ੍ਰਾਹ੍ਮਣ, ਸਚੇਪਿ ਤ੍ਵਂ ਸਕਲਚਕ੍ਕਵਾਲ਼ਗਬ੍ਭਂ ਪੂਰੇਤ੍ਵਾ ਠਿਤਵੇਲ਼ੁਂ ਘਟੇਤ੍ਵਾ ਆਗਮਿਸ੍ਸਸਿ, ਨੇਵ ਮੇ ਪਮਾਣਂ ਗਹੇਤੁਂ ਸਕ੍ਖਿਸ੍ਸਸਿ. ਨ ਹਿ ਮਯਾ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਕਪ੍ਪਸਤਸਹਸ੍ਸਞ੍ਚ ਤਥਾ ਪਾਰਮਿਯੋ ਪੂਰਿਤਾ, ਯਥਾ ਮੇ ਪਰੋ ਪਮਾਣਂ ਗਣ੍ਹੇਯ੍ਯ, ਅਤੁਲੋ ਬ੍ਰਾਹ੍ਮਣ, ਤਥਾਗਤੋ ਅਪ੍ਪਮੇਯ੍ਯੋ’’ਤਿ ਵਤ੍ਵਾ ਧਮ੍ਮਪਦੇ ਗਾਥਮਾਹ. ਗਾਥਾਪਰਿਯੋਸਾਨੇ ਚਤੁਰਾਸੀਤਿਪਾਣਸਹਸ੍ਸਾਨਿ ਅਮਤਂ ਪਿਵਿਂਸੁ.
ਅਪਰਮ੍ਪਿ ਵਤ੍ਥੁ – ਰਾਹੁ ਕਿਰ ਅਸੁਰਿਨ੍ਦੋ ਚਤ੍ਤਾਰਿ ਯੋਜਨਸਹਸ੍ਸਾਨਿ ਅਟ੍ਠ ਚ ਯੋਜਨਸਤਾਨਿ ਉਚ੍ਚੋ, ਬਾਹਨ੍ਤਰਮਸ੍ਸ ਦ੍ਵਾਦਸਯੋਜਨਸਤਾਨਿ, ਹਤ੍ਥਤਲਪਾਦਤਲਾਨਂ ਪੁਥੁਲਤਾ ਤੀਣਿ ਯੋਜਨਸਤਾਨਿ, ਅਙ੍ਗੁਲਿਪਬ੍ਬਾਨਿ ਪਣ੍ਣਾਸਯੋਜਨਾਨਿ, ਭਮੁਕਨ੍ਤਰਂ ਪਣ੍ਣਾਸਯੋਜਨਂ, ਨਲਾਟਂ ਤਿਯੋਜਨਸਤਂ, ਸੀਸਂ ਨਵਯੋਜਨਸਤਂ. ਸੋ – ‘‘ਅਹਂ ਉਚ੍ਚੋਸ੍ਮਿ, ਸਤ੍ਥਾਰਂ ਓਨਮਿਤ੍ਵਾ ਓਲੋਕੇਤੁਂ ਨ ਸਕ੍ਖਿਸ੍ਸਾਮੀ’’ਤਿ ਨ ਗਚ੍ਛਤਿ. ਸੋ ਏਕਦਿਵਸਂ ਭਗਵਤੋ ਵਣ੍ਣਂ ਸੁਤ੍ਵਾ ‘‘ਯਥਾ ਕਥਞ੍ਚ ਓਲੋਕੇਸ੍ਸਾਮੀ’’ਤਿ ਆਗਤੋ. ਭਗਵਾ ਤਸ੍ਸ ਅਜ੍ਝਾਸਯਂ ਵਿਦਿਤ੍ਵਾ ‘‘ਚਤੂਸੁ ਇਰਿਯਾਪਥੇਸੁ ਕਤਰੇਨ ਦਸ੍ਸੇਮੀ’’ਤਿ ਚਿਨ੍ਤੇਤ੍ਵਾ ‘‘ਠਿਤਕੋ ਨਾਮ ਨੀਚੋਪਿ ਉਚ੍ਚੋ ਵਿਯ ਪਞ੍ਞਾਯਤਿ, ਨਿਪਨ੍ਨੋਵਸ੍ਸ ਅਤ੍ਤਾਨਂ ਦਸ੍ਸੇਸ੍ਸਾਮੀ’’ਤਿ, ‘‘ਆਨਨ੍ਦ, ਗਨ੍ਧਕੁਟਿਪਰਿਵੇਣੇ ਮਞ੍ਚਕਂ ਪਞ੍ਞਾਪੇਹੀ’’ਤਿ ਵਤ੍ਵਾ ਤਤ੍ਥ ਸੀਹਸੇਯ੍ਯਂ ਕਪ੍ਪੇਸਿ. ਰਾਹੁ ਆਗਨ੍ਤ੍ਵਾ ਨਿਪਨ੍ਨਂ ਭਗਵਨ੍ਤਂ ਗੀਵਂ ਉਨ੍ਨਾਮੇਤ੍ਵਾ ਨਭਮਜ੍ਝੇ ਪੁਣ੍ਣਚਨ੍ਦਂ ਵਿਯ ਉਲ੍ਲੋਕੇਤਿ. ਕਿਮਿਦਂ ਅਸੁਰਿਨ੍ਦਾਤਿ ਚ ਵੁਤ੍ਤੇ, ਭਗਵਾ ਓਨਮਿਤ੍ਵਾ ਓਲੋਕੇਤੁਂ ਨ ਸਕ੍ਖਿਸ੍ਸਾਮੀਤਿ ਨ ਗਚ੍ਛਿਨ੍ਤਿ. ਨ ਮਯਾ ਅਸੁਰਿਨ੍ਦ ਅਧੋਮੁਖੇਨ ਪਾਰਮਿਯੋ ਪੂਰਿਤਾ, ਉਦ੍ਧਗ੍ਗਂ ਮੇ ਕਤ੍ਵਾ ਦਾਨਂ ਦਿਨ੍ਨਨ੍ਤਿ. ਤਂਦਿਵਸਂ ਰਾਹੁ ਸਰਣਂ ਅਗਮਾਸਿ. ਏਵਂ ਭਗਵਾ ਅਖੁਦ੍ਦਾਵਕਾਸੋ ਦਸ੍ਸਨਾਯ.
ਚਤੁਪਾਰਿਸੁਦ੍ਧਿਸੀਲੇਨ ਸੀਲਵਾ. ਤਂ ਪਨ ਸੀਲਂ ਅਰਿਯਂ ਉਤ੍ਤਮਂ ਪਰਿਸੁਦ੍ਧਂ, ਤੇਨਾਹ ਅਰਿਯਸੀਲੀਤਿ. ਤਦੇਵ ਅਨਵਜ੍ਜਟ੍ਠੇਨ ਕੁਸਲਂ, ਤੇਨਾਹ ਕੁਸਲਸੀਲੀਤਿ. ਕੁਸਲੇਨ ਸੀਲੇਨਾਤਿ ਇਦਮਸ੍ਸ ਵੇਵਚਨਂ. ਬਹੂਨਂ ਆਚਰਿਯਪਾਚਰਿਯੋਤਿ ਭਗਵਤੋ ਏਕੇਕਾਯ ਧਮ੍ਮਦੇਸਨਾਯ ਚਤੁਰਾਸੀਤਿਪਾਣਸਹਸ੍ਸਾਨਿ ਅਪਰਿਮਾਣਾਪਿ ਦੇਵਮਨੁਸ੍ਸਾ ਮਗ੍ਗਫਲਾਮਤਂ ਪਿਵਨ੍ਤਿ. ਤਸ੍ਮਾ ਬਹੂਨਂ ਆਚਰਿਯੋ, ਸਾਵਕਵਿਨੇਯ੍ਯਾਨਂ ਪਾਚਰਿਯੋਤਿ.
ਖੀਣਕਾਮਰਾਗੋਤਿ ਏਤ੍ਥ ਕਾਮਂ ਭਗਵਤੋ ਸਬ੍ਬੇਪਿ ਕਿਲੇਸਾ ਖੀਣਾ, ਬ੍ਰਾਹ੍ਮਣੋ ਪਨ ਤੇ ਨ ਜਾਨਾਤਿ, ਅਤ੍ਤਨੋ ਜਾਨਨਟ੍ਠਾਨੇਯੇਵ ਗੁਣਂ ਕਥੇਤਿ. ਵਿਗਤਚਾਪਲ੍ਲੋਤਿ ‘‘ਪਤ੍ਤਮਣ੍ਡਨਾ ਚੀਵਰਮਣ੍ਡਨਾ ਸੇਨਾਸਨਮਣ੍ਡਨਾ ਇਮਸ੍ਸ ਵਾ ਪੂਤਿਕਾਯਸ੍ਸ…ਪੇ… ਕੇਲਨਾ ਪਟਿਕੇਲਨਾ’’ਤਿ ਏਵਂ ਵੁਤ੍ਤਚਾਪਲ੍ਯਵਿਰਹਿਤੋ.
ਅਪਾਪਪੁਰੇਕ੍ਖਾਰੋਤਿ ਅਪਾਪੇ ਨਵਲੋਕੁਤ੍ਤਰਧਮ੍ਮੇ ਪੁਰਤੋ ਕਤ੍ਵਾ ਵਿਚਰਤਿ. ਬ੍ਰਹ੍ਮਞ੍ਞਾਯ ਪਜਾਯਾਤਿ ਸਾਰਿਪੁਤ੍ਤਮੋਗ੍ਗਲ੍ਲਾਨਮਹਾਕਸ੍ਸਪਾਦਿਭੇਦਾਯ ਬ੍ਰਾਹ੍ਮਣਪਜਾਯ. (ਅਵਿਰੁਦ੍ਧੋ ਹਿ ਸੋ) ਏਤਿਸ੍ਸਾਯ ਪਜਾਯ ਪੁਰੇਕ੍ਖਾਰੋ. ਅਯਞ੍ਹਿ ਪਜਾ ਸਮਣਂ ਗੋਤਮਂ ਪੁਰਤੋ ਕਤ੍ਵਾ ਚਰਤੀਤਿ ਅਤ੍ਥੋ. ਅਪਿਚ ਅਪਾਪਪੁਰੇਕ੍ਖਾਰੋਤਿ ਨ ਪਾਪੁਪੁਰੇਕ੍ਖਾਰੋ, ਨ ਪਾਪਂ ਪੁਰਤੋ ਕਤ੍ਵਾ ਚਰਤਿ, ਪਾਪਂ ਨ ਇਚ੍ਛਤੀਤਿ ਅਤ੍ਥੋ. ਕਸ੍ਸ? ਬ੍ਰਹ੍ਮਞ੍ਞਾਯ ਪਜਾਯ ਅਤ੍ਤਨਾ ਸਦ੍ਧਿਂ ਪਟਿਵਿਰੁਦ੍ਧਾਯਪਿ ਬ੍ਰਾਹ੍ਮਣਪਜਾਯ ਅਵਿਰੁਦ੍ਧੋ ਹਿਤਸੁਖਤ੍ਥਿਕੋਯੇਵਾਤਿ ਵੁਤ੍ਤਂ ਹੋਤਿ.
ਤਿਰੋਰਟ੍ਠਾਤਿ ਪਰਰਟ੍ਠਤੋ. ਤਿਰੋਜਨਪਦਾਤਿ ਪਰਜਨਪਦਤੋ. ਸਂਪੁਚ੍ਛਿਤੁਂ ਆਗਚ੍ਛਨ੍ਤੀਤਿ ਖਤ੍ਤਿਯਪਣ੍ਡਿਤਾਦਯੋ ਚੇਵ ਬ੍ਰਾਹ੍ਮਣਗਨ੍ਧਬ੍ਬਾਦਯੋ ਚ ਪਞ੍ਹੇ ਅਭਿਸਙ੍ਖਰਿਤ੍ਵਾ ਪੁਚ੍ਛਿਸ੍ਸਾਮਾਤਿ ਆਗਚ੍ਛਨ੍ਤਿ. ਤਤ੍ਥ ਕੇਚਿ ਪੁਚ੍ਛਾਯ ਵਾ ਦੋਸਂ ਵਿਸ੍ਸਜ੍ਜਨਸਮ੍ਪਟਿਚ੍ਛਨੇ ਵਾ ਅਸਮਤ੍ਥਤਂ ਸਲ੍ਲਕ੍ਖੇਤ੍ਵਾ ਅਪੁਚ੍ਛਿਤ੍ਵਾਵ ਤੁਣ੍ਹੀ ਨਿਸੀਦਨ੍ਤਿ, ਕੇਚਿ ਪੁਚ੍ਛਨ੍ਤਿ, ਕੇਸਞ੍ਚਿ ਭਗਵਾ ਪੁਚ੍ਛਾਯ ਉਸ੍ਸਾਹਂ ਜਨੇਤ੍ਵਾ ਵਿਸ੍ਸਜ੍ਜੇਤਿ. ਏਵਂ ਸਬ੍ਬੇਸਮ੍ਪਿ ਤੇਸਂ ਵਿਮਤਿਯੋ ਤੀਰਂ ਪਤ੍ਵਾ ਮਹਾਸਮੁਦ੍ਦਸ੍ਸ ਊਮਿਯੋ ਵਿਯ ਭਗਵਨ੍ਤਂ ਪਤ੍ਵਾਵ ਭਿਜ੍ਜਨ੍ਤਿ. ਸੇਸਮੇਤ੍ਥ ਤਥਾਗਤਸ੍ਸ ਵਣ੍ਣੇ ਉਤ੍ਤਾਨਮੇਵ.
ਅਤਿਥੀ ਨੋ ਤੇ ਹੋਨ੍ਤੀਤਿ ਤੇ ਅਮ੍ਹਾਕਂ ਆਗਨ੍ਤੁਕਾ ਨਵਕਾ ਪਾਹੁਨਕਾ ਹੋਨ੍ਤੀਤਿ ਅਤ੍ਥੋ. ਪਰਿਯਾਪੁਣਾਮੀਤਿ ਜਾਨਾਮਿ. ਅਪਰਿਮਾਣਵਣ੍ਣੋਤਿ ਤਥਾਰੂਪੇਨੇਵ ਸਬ੍ਬਞ੍ਞੁਨਾਪਿ ਅਪ੍ਪਮੇਯ੍ਯਵਣ੍ਣੋ, ਪਗੇਵ ਮਾਦਿਸੇਨਾਤਿ ਦਸ੍ਸੇਤਿ. ਵੁਤ੍ਤਮ੍ਪਿ ਚੇਤਂ –
‘‘ਬੁਦ੍ਧੋਪਿ ਬੁਦ੍ਧਸ੍ਸ ਭਣੇਯ੍ਯ ਵਣ੍ਣਂ,
ਕਪ੍ਪਮ੍ਪਿ ਚੇ ਅਞ੍ਞਮਭਾਸਮਾਨੋ;
ਖੀਯੇਥ ਕਪ੍ਪੋ ਚਿਰਦੀਘਮਨ੍ਤਰੇ,
ਵਣ੍ਣੋ ਨ ਖੀਯੇਥ ਤਥਾਗਤਸ੍ਸਾ’’ਤਿ.
ਇਮਂ ਪਨ ਗੁਣਕਥਂ ਸੁਤ੍ਵਾ ਤੇ ਬ੍ਰਾਹ੍ਮਣਾ ਚਿਨ੍ਤਯਿਂਸੁ ‘‘ਯਥਾ, ਚਙ੍ਕੀ, ਸਮਣਸ੍ਸ ਗੋਤਮਸ੍ਸ ਵਣ੍ਣਂ ਭਾਸਤਿ, ਅਨੋਮਗੁਣੋ ਸੋ ਭਵਂ ਗੋਤਮੋ, ਏਵਂ ਤਸ੍ਸ ਗੁਣੇ ਜਾਨਮਾਨੇਨ ਖੋ ਪਨ ਇਮਿਨਾ ਅਤਿਚਿਰਂ ਅਧਿਵਾਸਿਤਂ, ਹਨ੍ਦ ਨਂ ਅਨੁਵਤ੍ਤਾਮਾ’’ਤਿ ਅਨੁਵਤ੍ਤਮਾਨਾ ‘‘ਤੇਨ ਹਿ, ਭੋ’’ਤਿਆਦਿਮਾਹਂਸੁ.
੪੨੬. ਓਪਾਤੇਤੀਤਿ ਪਵੇਸੇਤਿ. ਸਂਪੁਰੇਕ੍ਖਰੋਨ੍ਤੀਤਿ ਪੁਤ੍ਤਮਤ੍ਤਨਤ੍ਤਮਤ੍ਤਮ੍ਪਿ ਸਮਾਨਂ ਪੁਰਤੋ ਕਤ੍ਵਾ ਵਿਚਰਨ੍ਤਿ.
੪੨੭. ਮਨ੍ਤਪਦਨ੍ਤਿ ਮਨ੍ਤਾਯੇਵ ਮਨ੍ਤਪਦਂ, ਵੇਦੋਤਿ ਅਤ੍ਥੋ. ਇਤਿਹਿਤਿਹ ਪਰਮ੍ਪਰਾਯਾਤਿ ਏਵਂ ਕਿਰ ਏਵਂ ਕਿਰਾਤਿ ਪਰਮ੍ਪਰਭਾਵੇਨ ਆਗਤਨ੍ਤਿ ਦੀਪੇਤਿ. ਪਿਟਕਸਮ੍ਪਦਾਯਾਤਿ ਪਾਵਚਨਸਙ੍ਖਾਤਸਮ੍ਪਤ੍ਤਿਯਾ. ਸਾਵਿਤ੍ਤਿਆਦੀਹਿ ਛਨ੍ਦਬਨ੍ਧੇਹਿ ਚ ਵਗ੍ਗਬਨ੍ਧੇਹਿ ਚ ਸਮ੍ਪਾਦੇਤ੍ਵਾ ਆਗਤਨ੍ਤਿ ਦਸ੍ਸੇਤਿ. ਤਤ੍ਥ ਚਾਤਿ ਤਸ੍ਮਿਂ ਮਨ੍ਤਪਦੇ. ਪਵਤ੍ਤਾਰੋਤਿ ਪਵਤ੍ਤਯਿਤਾਰੋ. ਯੇਸਨ੍ਤਿ ਯੇਸਂ ਸਨ੍ਤਕਂ. ਮਨ੍ਤਪਦਨ੍ਤਿ ਵੇਦਸਙ੍ਖਾਤਂ ਮਨ੍ਤਮੇਵ. ਗੀਤਨ੍ਤਿ ਅਟ੍ਠਕਾਦੀਹਿ ਦਸਹਿ ਪੋਰਾਣਕਬ੍ਰਾਹ੍ਮਣੇਹਿ ਪਦਸਮ੍ਪਤ੍ਤਿਵਸੇਨ ਸਜ੍ਝਾਯਿਤਂ. ਪਵੁਤ੍ਤਨ੍ਤਿ ਅਞ੍ਞੇਸਂ ਵੁਤ੍ਤਂ, ਵਾਚਿਤਨ੍ਤਿ ਅਤ੍ਥੋ. ਸਮਿਹਿਤਨ੍ਤਿ ਸਮੁਪਬ੍ਯੂਲ਼੍ਹਂ ਰਾਸਿਕਤਂ, ਪਿਣ੍ਡਂ ਕਤ੍ਵਾ ਠਪਿਤਨ੍ਤਿ ਅਤ੍ਥੋ. ਤਦਨੁਗਾਯਨ੍ਤੀਤਿ ਏਤਰਹਿ ਬ੍ਰਾਹ੍ਮਣਾ ਤਂ ਤੇਹਿ ਪੁਬ੍ਬੇ ਗੀਤਂ ਅਨੁਗਾਯਨ੍ਤਿ ਅਨੁਸਜ੍ਝਾਯਨ੍ਤਿ ਵਾਦੇਨ੍ਤਿ. ਤਦਨੁਭਾਸਨ੍ਤੀਤਿ ਤਂ ਅਨੁਭਾਸਨ੍ਤਿ, ਇਦਂ ਪੁਰਿਮਸ੍ਸੇਵ ਵੇਵਚਨਂ. ਭਾਸਿਤਮਨੁਭਾਸਨ੍ਤੀਤਿ ਤੇਹਿ ਭਾਸਿਤਂ ਸਜ੍ਝਾਯਿਤਂ ਅਨੁਸਜ੍ਝਾਯਨ੍ਤਿ. ਵਾਚਿਤਮਨੁਵਾਚੇਨ੍ਤੀਤਿ ਤੇਹਿ ਅਞ੍ਞੇਸਂ ਵਾਚਿਤਂ ਅਨੁਵਾਚੇਨ੍ਤਿ. ਸੇਯ੍ਯਥਿਦਨ੍ਤਿ ਤੇ ਕਤਮੇਤਿ ਅਤ੍ਥੋ. ਅਟ੍ਠਕੋਤਿਆਦੀਨਿ ਤੇਸਂ ਨਾਮਾਨਿ, ਤੇ ਕਿਰ ਦਿਬ੍ਬੇਨ ਚਕ੍ਖੁਨਾ ਓਲੋਕੇਤ੍ਵਾ ਪਰੂਪਘਾਤਂ ਅਕਤ੍ਵਾ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਭਗਵਤੋ ਪਾਵਚਨੇਨ ਸਹ ਸਂਸਨ੍ਦੇਤ੍ਵਾ ਮਨ੍ਤੇ ਗਨ੍ਥੇਸੁਂ, ਅਪਰਾਪਰੇ ਪਨ ਬ੍ਰਾਹ੍ਮਣਾ ਪਾਣਾਤਿਪਾਤਾਦੀਨਿ ਪਕ੍ਖਿਪਿਤ੍ਵਾ ਤਯੋ ਵੇਦੇ ਭਿਨ੍ਦਿਤ੍ਵਾ ਬੁਦ੍ਧਵਚਨੇਨ ਸਦ੍ਧਿਂ ਵਿਰੁਦ੍ਧੇ ਅਕਂਸੁ.
੪੨੮. ਅਨ੍ਧਵੇਣੀਤਿ ਅਨ੍ਧਪਵੇਣੀ. ਏਕੇਨ ਹਿ ਚਕ੍ਖੁਮਤਾ ਗਹਿਤਯਟ੍ਠਿਯਾ ਕੋਟਿਂ ਏਕੋ ਅਨ੍ਧੋ ਗਣ੍ਹਾਤਿ, ਤਂ ਅਨ੍ਧਂ ਅਞ੍ਞੋ, ਤਂ ਅਞ੍ਞੋਤਿ ਏਵਂ ਪਣ੍ਣਾਸ ਸਟ੍ਠਿ ਅਨ੍ਧਾ ਪਟਿਪਾਟਿਯਾ ਘਟਿਤਾ ਅਨ੍ਧਵੇਣੀਤਿ ਵੁਚ੍ਚਤਿ. ਪਰਮ੍ਪਰਾਸਂਸਤ੍ਤਾਤਿ ਅਞ੍ਞਮਞ੍ਞਂ ਲਗ੍ਗਾ, ਯਟ੍ਠਿਗ੍ਗਾਹਕੇਨਪਿ ਚਕ੍ਖੁਮਤਾ ਵਿਰਹਿਤਾਤਿ ਅਤ੍ਥੋ. ਏਕੋ ਕਿਰ ਧੁਤ੍ਤੋ ਅਨ੍ਧਗਣਂ ਦਿਸ੍ਵਾ ‘‘ਅਸੁਕਸ੍ਮਿਂ ਨਾਮ ਗਾਮੇ ਖਜ੍ਜਭੋਜ੍ਜਂ ਸੁਲਭ’’ਨ੍ਤਿ ਉਸ੍ਸਾਹੇਤ੍ਵਾ ਤੇਹਿ ‘‘ਤਤ੍ਥ ਨੋ ਸਾਮਿ ਨੇਹਿ, ਇਦਂ ਨਾਮ ਤੇ ਦੇਮਾ’’ਤਿ ਵੁਤ੍ਤੇ ਲਞ੍ਜਂ ਗਹੇਤ੍ਵਾ ਅਨ੍ਤਰਾਮਗ੍ਗੇ ਮਗ੍ਗਾ ਓਕ੍ਕਮ੍ਮ ਮਹਨ੍ਤਂ ਗਚ੍ਛਂ ਅਨੁਪਰਿਗਨ੍ਤ੍ਵਾ ਪੁਰਿਮਸ੍ਸ ਹਤ੍ਥੇਨ ਪਚ੍ਛਿਮਸ੍ਸ ਕਚ੍ਛਂ ਗਣ੍ਹਾਪੇਤ੍ਵਾ ‘‘ਕਿਞ੍ਚਿ ਕਮ੍ਮਂ ਅਤ੍ਥਿ, ਗਚ੍ਛਥ ਤਾਵ ਤੁਮ੍ਹੇ’’ਤਿ ਵਤ੍ਵਾ ਪਲਾਯਿ. ਤੇ ਦਿਵਸਮ੍ਪਿ ਗਨ੍ਤ੍ਵਾ ਮਗ੍ਗਂ ਅਵਿਨ੍ਦਮਾਨਾ ‘‘ਕਹਂ, ਭੋ, ਚਕ੍ਖੁਮਾ ਕਹਂ ਮਗ੍ਗੋ’’ਤਿ ਪਰਿਦੇਵਿਤ੍ਵਾ ਮਗ੍ਗਂ ਅਵਿਨ੍ਦਮਾਨਾ ਤਤ੍ਥੇਵ ਮਰਿਂਸੁ. ਤੇ ਸਨ੍ਧਾਯ ਵੁਤ੍ਤਂ ‘‘ਪਰਮ੍ਪਰਾਸਂਸਤ੍ਤਾ’’ਤਿ. ਪੁਰਿਮੋਪੀਤਿ ਪੁਰਿਮੇਸੁ ਦਸਸੁ ਬ੍ਰਾਹ੍ਮਣੇਸੁ ਏਕੋਪਿ. ਮਜ੍ਝਿਮੋਪੀਤਿ ਮਜ੍ਝੇ ਆਚਰਿਯਪਾਚਰਿਯੇਸੁ ਏਕੋਪਿ. ਪਚ੍ਛਿਮੋਪੀਤਿ ਇਦਾਨਿ ਬ੍ਰਾਹ੍ਮਣੇਸੁ ਏਕੋਪਿ.
ਪਞ੍ਚ ਖੋਤਿ ਪਾਲ਼ਿਆਗਤੇਸੁ ਦ੍ਵੀਸੁ ਅਞ੍ਞੇਪਿ ਏਵਰੂਪੇ ਤਯੋ ਪਕ੍ਖਿਪਿਤ੍ਵਾ ਵਦਤਿ. ਦ੍ਵੇਧਾਵਿਪਾਕਾਤਿ ਭੂਤਵਿਪਾਕਾ ਵਾ ਅਭੂਤਵਿਪਾਕਾ ਵਾ. ਨਾਲਮੇਤ੍ਥਾਤਿ, ਭਾਰਦ੍ਵਾਜ, ਸਚ੍ਚਂ ਅਨੁਰਕ੍ਖਿਸ੍ਸਾਮੀਤਿ ਪਟਿਪਨ੍ਨੇਨ ਵਿਞ੍ਞੁਨਾ ‘‘ਯਂ ਮਯਾ ਗਹਿਤਂ, ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਏਤ੍ਥ ਏਕਂਸੇਨੇਵ ਨਿਟ੍ਠਂ ਗਨ੍ਤੁਂ ਨਾਲਂ ਨ ਯੁਤ੍ਤਨ੍ਤਿ ਉਪਰਿ ਪੁਚ੍ਛਾਯ ਮਗ੍ਗਂ ਵਿਵਰਿਤ੍ਵਾ ਠਪੇਸਿ.
੪੩੦. ਇਧ, ਭਾਰਦ੍ਵਾਜ, ਭਿਕ੍ਖੂਤਿ ਜੀਵਕਸੁਤ੍ਤੇ (ਮ. ਨਿ. ੨.੫੧ ਆਦਯੋ) ਵਿਯ ਮਹਾਵਚ੍ਛਸੁਤ੍ਤੇ (ਮ. ਨਿ. ੨.੧੯੩ ਆਦਯੋ) ਵਿਯ ਚ ਅਤ੍ਤਾਨਞ੍ਞੇਵ ਸਨ੍ਧਾਯ ਵਦਤਿ. ਲੋਭਨੀਯੇਸੁ ਧਮ੍ਮੇਸੂਤਿ ਲੋਭਧਮ੍ਮੇਸੁ. ਸੇਸਪਦਦ੍ਵਯੇਪਿ ਏਸੇਵ ਨਯੋ.
੪੩੨. ਸਦ੍ਧਂ ਨਿਵੇਸੇਤੀਤਿ ਓਕਪ੍ਪਨਿਯਸਦ੍ਧਂ ਨਿਵੇਸੇਤਿ. ਉਪਸਙ੍ਕਮਤੀਤਿ ਉਪਗਚ੍ਛਤਿ. ਪਯਿਰੁਪਾਸਤੀਤਿ ਸਨ੍ਤਿਕੇ ਨਿਸੀਦਤਿ. ਸੋਤਨ੍ਤਿ ਪਸਾਦਸੋਤਂ ਓਦਹਤਿ. ਧਮ੍ਮਨ੍ਤਿ ਦੇਸਨਾਧਮ੍ਮਂ ਸੁਣਾਤਿ. ਧਾਰੇਤੀਤਿ ਪਗੁਣਂ ਕਤ੍ਵਾ ਧਾਰੇਤਿ. ਉਪਪਰਿਕ੍ਖਤੀਤਿ ਅਤ੍ਥਤੋ ਚ ਕਾਰਣਤੋ ਚ ਵੀਮਂਸਤਿ. ਨਿਜ੍ਝਾਨਂ ਖਮਨ੍ਤੀਤਿ ਓਲੋਕਨਂ ਖਮਨ੍ਤਿ, ਇਧ ਸੀਲਂ ਕਥਿਤਂ, ਇਧ ਸਮਾਧੀਤਿ ਏਵਂ ਉਪਟ੍ਠਹਨ੍ਤੀਤਿ ਅਤ੍ਥੋ. ਛਨ੍ਦੋਤਿ ਕਤ੍ਤੁਕਮ੍ਯਤਾ ਛਨ੍ਦੋ. ਉਸ੍ਸਹਤੀਤਿ ਵਾਯਮਤਿ. ਤੁਲੇਤੀਤਿ ਅਨਿਚ੍ਚਾਦਿਵਸੇਨ ਤੀਰੇਤਿ. ਪਦਹਤੀਤਿ ਮਗ੍ਗਪਧਾਨਂ ਪਦਹਤਿ. ਕਾਯੇਨ ਚੇਵ ਪਰਮਸਚ੍ਚਨ੍ਤਿ ਸਹਜਾਤਨਾਮਕਾਯੇਨ ਚ ਨਿਬ੍ਬਾਨਂ ਸਚ੍ਛਿਕਰੋਤਿ, ਪਞ੍ਞਾਯ ਚ ਕਿਲੇਸੇ ਨਿਬ੍ਬਿਜ੍ਝਿਤ੍ਵਾ ਤਦੇਵ ਵਿਭੂਤਂ ਪਾਕਟਂ ਕਰੋਨ੍ਤੋ ਪਸ੍ਸਤਿ.
੪੩੩. ਸਚ੍ਚਾਨੁਬੋਧੋਤਿ ਮਗ੍ਗਾਨੁਬੋਧੋ. ਸਚ੍ਚਾਨੁਪ੍ਪਤ੍ਤੀਤਿ ਫਲਸਚ੍ਛਿਕਿਰਿਯਾ. ਤੇਸਂਯੇਵਾਤਿ ਹੇਟ੍ਠਾ ਵੁਤ੍ਤਾਨਂ ਦ੍ਵਾਦਸਨ੍ਨਂ, ਏਵਂ ਦੀਘਂ ਮਗ੍ਗਵਾਦਂ ਅਨੁਲੋਮੇਤਿ, ਤਸ੍ਮਾ ਨਾਯਮਤ੍ਥੋ. ਅਯਂ ਪਨੇਤ੍ਥ ਅਤ੍ਥੋ – ਤੇਸਂਯੇਵਾਤਿ ਤੇਸਂ ਮਗ੍ਗਸਮ੍ਪਯੁਤ੍ਤਧਮ੍ਮਾਨਂ. ਪਧਾਨਨ੍ਤਿ ਮਗ੍ਗਪਧਾਨਂ. ਤਞ੍ਹਿ ਫਲਸਚ੍ਛਿਕਿਰਿਯਸਙ੍ਖਾਤਾਯ ਸਚ੍ਚਾਨੁਪ੍ਪਤ੍ਤਿਯਾ ਬਹੁਕਾਰਂ, ਮਗ੍ਗੇ ਅਸਤਿ ਫਲਾਭਾਵਤੋਤਿ. ਇਮਿਨਾ ਨਯੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਚਙ੍ਕੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.