੪. ਘੋਟਮੁਖਸੁਤ੍ਤਵਣ੍ਣਨਾ

੪੧੨. ਏਵਂ ਮੇ ਸੁਤਨ੍ਤਿ ਘੋਟਮੁਖਸੁਤ੍ਤਂ. ਤਤ੍ਥ ਖੇਮਿਯਮ੍ਬਵਨੇਤਿ ਏਵਂਨਾਮਕੇ ਅਮ੍ਬਵਨੇ. ਧਮ੍ਮਿਕੋ ਪਰਿਬ੍ਬਜੋਤਿ ਧਮ੍ਮਿਕਾ ਪਬ੍ਬਜ੍ਜਾ. ਅਦਸ੍ਸਨਾਤਿ ਤੁਮ੍ਹਾਦਿਸਾਨਂ ਵਾ ਪਣ੍ਡਿਤਾਨਂ ਅਦਸ੍ਸਨੇਨ. ਯੋ ਵਾ ਪਨੇਤ੍ਥ ਧਮ੍ਮੋਤਿ ਯੋ ਵਾ ਪਨ ਏਤ੍ਥ ਧਮ੍ਮੋ ਸਭਾਵੋ, ਤਸ੍ਸੇਵ ਵਾ ਅਦਸ੍ਸਨੇਨ. ਇਮਿਨਾ ‘‘ਅਮ੍ਹਾਕਂ ਕਥਾ ਅਪ੍ਪਮਾਣਂ, ਧਮ੍ਮੋਵ ਪਮਾਣ’’ਨ੍ਤਿ ਦਸ੍ਸੇਤਿ. ਤਤੋ ਥੇਰੋ ‘‘ਨਵਉਪੋਸਥਾਗਾਰੇ ਵਿਯ ਬਹੁਨਾ ਕਮ੍ਮੇਨ ਇਧ ਭਵਿਤਬ੍ਬ’’ਨ੍ਤਿ ਚਿਨ੍ਤੇਤ੍ਵਾ ਚਙ੍ਕਮਾ ਓਰੁਯ੍ਹ ਪਣ੍ਣਸਾਲਂ ਪਵਿਸਿਤ੍ਵਾ ਨਿਸੀਦਿ. ਤਂ ਦਸ੍ਸੇਤੁਂ ਏਵਂ ਵੁਤ੍ਤੇਤਿਆਦਿ ਵੁਤ੍ਤਂ.

੪੧੩. ਚਤ੍ਤਾਰੋਮੇ ਬ੍ਰਾਹ੍ਮਣਾਤਿ ਥੇਰਸ੍ਸ ਕਿਰ ਏਤਦਹੋਸਿ – ‘‘ਅਯਂ ਬ੍ਰਾਹ੍ਮਣੋ ‘ਧਮ੍ਮਿਕਂ ਪਬ੍ਬਜ੍ਜਂ ਉਪਗਤੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਨਤ੍ਥੀ’ਤਿ ਵਦਤਿ. ਇਮਸ੍ਸ ਚਤ੍ਤਾਰੋ ਪੁਗ੍ਗਲੇ ਦ੍ਵੇ ਚ ਪਰਿਸਾ ਦਸ੍ਸੇਤ੍ਵਾ ‘ਚਤੁਤ੍ਥਂ ਪੁਗ੍ਗਲਂ ਕਤਰਾਯ ਪਰਿਸਾਯ ਬਹੁਲਂ ਪਸ੍ਸਸੀ’ਤਿ ਪੁਚ੍ਛਿਸ੍ਸਾਮਿ, ਜਾਨਮਾਨੋ ‘ਅਨਾਗਾਰਿਯਪਰਿਸਾਯ’ਨ੍ਤਿ ਵਕ੍ਖਤਿ. ਏਵਮੇਤਂ ਸਕਮੁਖੇਨੇਵ ‘ਧਮ੍ਮਿਕੋ ਪਰਿਬ੍ਬਜੋ ਅਤ੍ਥੀ’ਤਿ ਵਦਾਪੇਸ੍ਸਾਮੀ’’ਤਿ ਇਮਂ ਦੇਸਨਂ ਆਰਭਿ.

੪੧੪. ਤਤ੍ਥ ਸਾਰਤ੍ਤਰਤ੍ਤਾਤਿ ਸੁਟ੍ਠੁ ਰਤ੍ਤਰਤ੍ਤਾ. ਸਾਨੁਗ੍ਗਹਾ ਵਾਚਾ ਭਾਸਿਤਾ ਸਕਾਰਣਾ ਵਾਚਾ ਭਾਸਿਤਾ. ਵੁਤ੍ਤਞ੍ਹੇਤਂ ਮਯਾ ‘‘ਅਮ੍ਹਾਕਂ ਕਥਾ ਅਪ੍ਪਮਾਣਂ, ਧਮ੍ਮੋਵ ਪਮਾਣ’’ਨ੍ਤਿ.

੪੨੧. ਕਿਂ ਪਨ ਤੇਤਿ ਗਿਹਿ ਨਾਮ ਕਪ੍ਪਿਯਮ੍ਪਿ ਅਕਪ੍ਪਿਯਮ੍ਪਿ ਵਦੇਯ੍ਯਾਤਿ ਵਿਵੇਚਨਤ੍ਥਂ ਪੁਚ੍ਛਿ. ਕਾਰਾਪੇਸੀਤਿ ਮਾਪੇਸਿ. ਕਾਰਾਪੇਤ੍ਵਾ ਚ ਪਨ ਕਾਲਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤੋ. ਏਤਸ੍ਸ ਕਿਰ ਜਾਨਨਸਿਪ੍ਪੇ ਮਾਤਰਮ੍ਪਿ ਪਿਤਰਮ੍ਪਿ ਘਾਤੇਤ੍ਵਾ ਅਤ੍ਤਾਵ ਘਾਤੇਤਬ੍ਬੋਤਿ ਆਗਚ੍ਛਤਿ. ਏਤਂ ਸਿਪ੍ਪਂ ਜਾਨਨ੍ਤੋ ਠਪੇਤ੍ਵਾ ਏਤਂ ਅਞ੍ਞੋ ਸਗ੍ਗੇ ਨਿਬ੍ਬਤ੍ਤੋ ਨਾਮ ਨਤ੍ਥਿ, ਏਸ ਪਨ ਥੇਰਂ ਉਪਨਿਸ੍ਸਾਯ ਪੁਞ੍ਞਂ ਕਤ੍ਵਾ ਤਤ੍ਥ ਨਿਬ੍ਬਤ੍ਤਿਤ੍ਵਾ ਚ ਪਨ ‘‘ਕੇਨਾਹਂ ਕਮ੍ਮੇਨ ਇਧ ਨਿਬ੍ਬਤ੍ਤੋ’’ਤਿ ਆਵਜ੍ਜੇਤ੍ਵਾ ਯਥਾਭੂਤਂ ਞਤ੍ਵਾ ਏਕਦਿਵਸਂ ਜਿਣ੍ਣਾਯ ਭੋਜਨਸਾਲਾਯ ਪਟਿਸਙ੍ਖਰਣਤ੍ਥਂ ਸਙ੍ਘੇ ਸਨ੍ਨਿਪਤਿਤੇ ਮਨੁਸ੍ਸਵੇਸੇਨ ਆਗਨ੍ਤ੍ਵਾ ਪੁਚ੍ਛਿ – ‘‘ਕਿਮਤ੍ਥਂ, ਭਨ੍ਤੇ, ਸਙ੍ਘੋ ਸਨ੍ਨਿਪਤਿਤੋ’’ਤਿ? ਭੋਜਨਸਾਲਾਯ ਪਟਿਸਙ੍ਖਰਣਤ੍ਥਨ੍ਤਿ. ਕੇਨੇਸਾ ਕਾਰਿਤਾਤਿ? ਘੋਟਮੁਖੇਨਾਤਿ. ਇਦਾਨਿ ਸੋ ਕੁਹਿਨ੍ਤਿ? ਕਾਲਙ੍ਕਤੋਤਿ. ਅਤ੍ਥਿ ਪਨਸ੍ਸ ਕੋਚਿ ਞਾਤਕੋਤਿ? ਅਤ੍ਥਿ ਏਕਾ ਭਗਿਨੀਤਿ. ਪਕ੍ਕੋਸਾਪੇਥ ਨਨ੍ਤਿ. ਭਿਕ੍ਖੂ ਪਕ੍ਕੋਸਾਪੇਸੁਂ. ਸੋ ਤਂ ਉਪਸਙ੍ਕਮਿਤ੍ਵਾ – ‘‘ਅਹਂ, ਤਵ ਭਾਤਾ, ਘੋਟਮੁਖੋ ਨਾਮ ਇਮਂ ਸਾਲਂ ਕਾਰੇਤ੍ਵਾ ਸਗ੍ਗੇ ਨਿਬ੍ਬਤ੍ਤੋ, ਅਸੁਕੇ ਚ ਅਸੁਕੇ ਚ ਠਾਨੇ ਮਯਾ ਠਪਿਤਂ ਧਨਂ ਅਤ੍ਥਿ, ਤਂ ਗਹੇਤ੍ਵਾ ਇਮਞ੍ਚ ਭੋਜਨਸਾਲਂ ਕਾਰੇਹਿ, ਦਾਰਕੇ ਚ ਪੋਸੇਹੀ’’ਤਿ ਵਤ੍ਵਾ ਭਿਕ੍ਖੁਸਙ੍ਘਂ ਵਨ੍ਦਿਤ੍ਵਾ ਵੇਹਾਸਂ ਉਪ੍ਪਤਿਤ੍ਵਾ ਦੇਵਲੋਕਮੇਵ ਅਗਮਾਸਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਘੋਟਮੁਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.