੧. ਬ੍ਰਹ੍ਮਾਯੁਸੁਤ੍ਤਵਣ੍ਣਨਾ

੩੮੩. ਏਵਂ ਮੇ ਸੁਤਨ੍ਤਿ ਬ੍ਰਹ੍ਮਾਯੁਸੁਤ੍ਤਂ. ਤਤ੍ਥ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਨ੍ਤਿ ਮਹਤਾਤਿ ਗੁਣਮਹਤ੍ਤੇਨਪਿ ਮਹਤਾ, ਸਙ੍ਖ੍ਯਾਮਹਤ੍ਤੇਨਪਿ. ਸੋ ਹਿ ਭਿਕ੍ਖੁਸਙ੍ਘੇ ਗੁਣੇਹਿਪਿ ਮਹਾ ਅਹੋਸਿ ਅਪ੍ਪਿਚ੍ਛਤਾਦਿਗੁਣਸਮਨ੍ਨਾਗਤਤ੍ਤਾ, ਸਙ੍ਖ੍ਯਾਯਪਿ ਮਹਾ ਪਞ੍ਚਸਤਸਙ੍ਖ੍ਯਤ੍ਤਾ. ਭਿਕ੍ਖੂਨਂ ਸਙ੍ਘੇਨ ਭਿਕ੍ਖੁਸਙ੍ਘੇਨ, ਦਿਟ੍ਠਿਸੀਲਸਾਮਞ੍ਞਸਙ੍ਘਾਤਸਙ੍ਖਾਤੇਨ ਸਮਣਗਣੇਨਾਤਿ ਅਤ੍ਥੋ. ਸਦ੍ਧਿਨ੍ਤਿ ਏਕਤੋ. ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹੀਤਿ ਪਞ੍ਚ ਮਤ੍ਤਾ ਏਤੇਸਨ੍ਤਿ ਪਞ੍ਚਮਤ੍ਤਾਨਿ. ਮਤ੍ਤਾਤਿ ਪਮਾਣਂ ਵੁਚ੍ਚਤਿ, ਤਸ੍ਮਾ ਯਥਾ ਭੋਜਨੇ ਮਤ੍ਤਞ੍ਞੂਤਿ ਵੁਤ੍ਤੇ ਭੋਜਨੇ ਮਤ੍ਤਂ ਜਾਨਾਤਿ ਪਮਾਣਂ ਜਾਨਾਤੀਤਿ ਅਤ੍ਥੋ ਹੋਤਿ, ਏਵਮਿਧਾਪਿ ਤੇਸਂ ਭਿਕ੍ਖੁਸਤਾਨਂ ਪਞ੍ਚਮਤ੍ਤਾ ਪਞ੍ਚਪਮਾਣਨ੍ਤਿ ਏਵਮਤ੍ਥੋ ਦਟ੍ਠਬ੍ਬੋ. ਭਿਕ੍ਖੂਨਂ ਸਤਾਨਿ ਭਿਕ੍ਖੁਸਤਾਨਿ. ਤੇਹਿ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ.

ਵੀਸਵਸ੍ਸਸਤਿਕੋਤਿ ਵੀਸਾਧਿਕਵਸ੍ਸਸਤਿਕੋ. ਤਿਣ੍ਣਂ ਵੇਦਾਨਨ੍ਤਿ ਇਰੁਵੇਦਯਜੁਵੇਦਸਾਮਵੇਦਾਨਂ. ਓਟ੍ਠਪਹਤਕਰਣਵਸੇਨ ਪਾਰਂ ਗਤੋਤਿ ਪਾਰਗੂ. ਸਹ ਨਿਘਣ੍ਡੁਨਾ ਚ ਕੇਟੁਭੇਨ ਚ ਸਨਿਘਣ੍ਡੁਕੇਟੁਭਾਨਂ, ਨਿਘਣ੍ਡੂਤਿ ਨਾਮਨਿਘਣ੍ਟੁਰੁਕ੍ਖਾਦੀਨਂ ਵੇਵਚਨਪ੍ਪਕਾਸਕਂ ਸਤ੍ਥਂ. ਕੇਟੁਭਨ੍ਤਿ ਕਿਰਿਯਾਕਪ੍ਪਵਿਕਪ੍ਪੋ ਕਵੀਨਂ ਉਪਕਾਰਾਯ ਸਤ੍ਥਂ. ਸਹ ਅਕ੍ਖਰਪ੍ਪਭੇਦੇਨ ਸਕ੍ਖਰਪ੍ਪਭੇਦਾਨਂ. ਅਕ੍ਖਰਪ੍ਪਭੇਦੋਤਿ ਸਿਕ੍ਖਾ ਚ ਨਿਰੁਤ੍ਤਿ ਚ. ਇਤਿਹਾਸਪਞ੍ਚਮਾਨਨ੍ਤਿ ਆਥਬ੍ਬਣਵੇਦਂ ਚਤੁਤ੍ਥਂ ਕਤ੍ਵਾ ‘‘ਇਤਿਹ ਆਸ ਇਤਿਹ ਆਸਾ’’ਤਿ ਈਦਿਸਵਚਨਪ੍ਪਟਿਸਂਯੁਤ੍ਤੋ ਪੁਰਾਣਕਥਾਸਙ੍ਖਾਤੋ ਇਤਿਹਾਸੋ ਪਞ੍ਚਮੋ ਏਤੇਸਨ੍ਤਿ ਇਤਿਹਾਸਪਞ੍ਚਮਾ, ਤੇਸਂ ਇਤਿਹਾਸਪਞ੍ਚਮਾਨਂ. ਪਦਞ੍ਚ ਤਦਵਸੇਸਞ੍ਚ ਬ੍ਯਾਕਰਣਂ ਅਧੀਯਤਿ ਪਵੇਦੇਤਿ ਚਾਤਿ ਪਦਕੋ ਵੇਯ੍ਯਾਕਰਣੋ. ਲੋਕਾਯਤਂ ਵੁਚ੍ਚਤਿ ਵਿਤਣ੍ਡਵਾਦਸਤ੍ਥਂ. ਮਹਾਪੁਰਿਸਲਕ੍ਖਣਨ੍ਤਿ ਮਹਾਪੁਰਿਸਾਨਂ ਬੁਦ੍ਧਾਦੀਨਂ ਲਕ੍ਖਣਦੀਪਕਂ ਦ੍ਵਾਦਸਸਹਸ੍ਸਗਨ੍ਥਪ੍ਪਮਾਣਂ ਸਤ੍ਥਂ, ਯਤ੍ਥ ਸੋਲ਼ਸਸਹਸ੍ਸਗਾਥਾਪਰਿਮਾਣਾਯ ਬੁਦ੍ਧਮਨ੍ਤਾ ਨਾਮ ਅਹੇਸੁਂ, ਯੇਸਂ ਵਸੇਨ ‘‘ਇਮਿਨਾ ਲਕ੍ਖਣੇਨ ਸਮਨ੍ਨਾਗਤਾ ਬੁਦ੍ਧਾ ਨਾਮ ਹੋਨ੍ਤਿ, ਇਮਿਨਾ ਪਚ੍ਚੇਕਬੁਦ੍ਧਾ ਨਾਮ ਹੋਨ੍ਤਿ, ਇਮਿਨਾ ਦ੍ਵੇ ਅਗ੍ਗਸਾਵਕਾ, ਅਸੀਤਿਮਹਾਸਾਵਕਾ, ਬੁਦ੍ਧਮਾਤਾ, ਬੁਦ੍ਧਪਿਤਾ, ਅਗ੍ਗੁਪਟ੍ਠਾਕੋ, ਅਗ੍ਗੁਪਟ੍ਠਾਯਿਕਾ, ਰਾਜਾ ਚਕ੍ਕਵਤ੍ਤੀ’’ਤਿ ਅਯਂ ਵਿਸੇਸੋ ਞਾਯਤਿ. ਅਨਵਯੋਤਿ ਇਮੇਸੁ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨੂਨੋ ਪਰਿਪੂਰਕਾਰੀ, ਅਵਯੋ ਨ ਹੋਤੀਤਿ ਵੁਤ੍ਤਂ ਹੋਤਿ. ਅਵਯੋ ਨਾਮ ਯੋ ਤਾਨਿ ਅਤ੍ਥਤੋ ਚ ਗਨ੍ਥਤੋ ਚ ਸਨ੍ਧਾਰੇਤੁਂ ਨ ਸਕ੍ਕੋਤਿ. ਅਸ੍ਸੋਸਿ ਖੋਤਿਆਦੀਸੁ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਾਲੇਯ੍ਯਕਸੁਤ੍ਤੇ (ਮ. ਨਿ. ੧.੪੩੯ ਆਦਯੋ) ਵੁਤ੍ਤਮੇਵ.

੩੮੪. ਅਯਂ ਤਾਤਾਤਿ ਅਯਂ ਮਹਲ੍ਲਕਤਾਯ ਗਨ੍ਤੁਂ ਅਸਕ੍ਕੋਨ੍ਤੋ ਮਾਣਵਂ ਆਮਨ੍ਤੇਤ੍ਵਾ ਏਵਮਾਹ. ਅਪਿਚ ਏਸ ਬ੍ਰਾਹ੍ਮਣੋ ਚਿਨ੍ਤੇਸਿ ‘‘ਇਮਸ੍ਮਿਂ ਲੋਕੇ ‘ਅਹਂ ਬੁਦ੍ਧੋ ਅਹਂ ਬੁਦ੍ਧੋ’ਤਿ ਉਗ੍ਗਤਸ੍ਸ ਨਾਮਂ ਗਹੇਤ੍ਵਾ ਬਹੂ ਜਨਾ ਵਿਚਰਨ੍ਤਿ, ਤਸ੍ਮਾ ਨ ਮੇ ਅਨੁਸ੍ਸਵਮਤ੍ਤੇਨੇਵ ਉਪਸਙ੍ਕਮਿਤੁਂ ਯੁਤ੍ਤਂ. ਏਕਚ੍ਚਞ੍ਹਿ ਉਪਸਙ੍ਕਮਨ੍ਤਸ੍ਸ ਅਪਕ੍ਕਮਨਮ੍ਪਿ ਗਰੁ ਹੋਤਿ, ਅਨਤ੍ਥੋਪਿ ਉਪ੍ਪਜ੍ਜਤਿ. ਯਂਨੂਨਾਹਂ ਮਮ ਅਨ੍ਤੇਵਾਸਿਕਂ ਪੇਸੇਤ੍ਵਾ ‘ਬੁਦ੍ਧੋ ਵਾ ਨੋ ਵਾ’ਤਿ ਜਾਨਿਤ੍ਵਾ ਉਪਸਙ੍ਕਮੇਯ੍ਯ’’ਨ੍ਤਿ ਤਸ੍ਮਾ ਮਾਣਵਂ ਆਮਨ੍ਤੇਤ੍ਵਾ ‘‘ਅਯਂ ਤਾਤਾ’’ਤਿਆਦਿਮਾਹ. ਤਂ ਭਵਨ੍ਤਨ੍ਤਿ ਤਸ੍ਸ ਭਵਤੋ. ਤਥਾ ਸਨ੍ਤਂਯੇਵਾਤਿ ਤਥਾ ਸਤੋਯੇਵ. ਇਦਞ੍ਹਿ ਇਤ੍ਥਮ੍ਭੂਤਾਖ੍ਯਾਨਤ੍ਥੇ ਉਪਯੋਗਵਚਨਂ. ਯਥਾ ਕਥਂ ਪਨਾਹਂ, ਭੋਤਿ ਏਤ੍ਥ ਕਥਂ ਪਨਾਹਂ, ਭੋ, ਤਂ ਭਵਨ੍ਤਂ ਗੋਤਮਂ ਜਾਨਿਸ੍ਸਾਮਿ, ਯਥਾ ਸਕ੍ਕਾ ਸੋ ਞਾਤੁਂ, ਤਥਾ ਮੇ ਆਚਿਕ੍ਖਾਤਿ ਅਤ੍ਥੋ. ਯਥਾਤਿ ਵਾ ਨਿਪਾਤਮਤ੍ਤਮੇਵੇਤਂ. ਕਥਨ੍ਤਿ ਅਯਂ ਆਕਾਰਪੁਚ੍ਛਾ, ਕੇਨਾਕਾਰੇਨਾਹਂ ਭਵਨ੍ਤਂ ਗੋਤਮਂ ਜਾਨਿਸ੍ਸਾਮੀਤਿ ਅਤ੍ਥੋ.

ਏਵਂ ਵੁਤ੍ਤੇ ਕਿਰ ਨਂ ਉਪਜ੍ਝਾਯੋ – ‘‘ਕਿਂ ਤ੍ਵਂ, ਤਾਤ, ਪਥਵਿਯਂ ਠਿਤੋ ਪਥਵਿਂ ਨ ਪਸ੍ਸਾਮੀਤਿ ਵਿਯ ਚਨ੍ਦਿਮਸੂਰਿਯਾਨਂ ਓਭਾਸੇ ਠਿਤੋ ਚਨ੍ਦਿਮਸੂਰਿਯੇ ਨ ਪਸ੍ਸਾਮੀਤਿ ਵਿਯ ਵਦਸੀ’’ਤਿਆਦੀਨਿ ਵਤ੍ਵਾ ਜਾਨਨਾਕਾਰਂ ਦਸ੍ਸੇਨ੍ਤੋ ਆਗਤਾਨਿ ਖੋ ਤਾਤਾਤਿਆਦਿਮਾਹ. ਤਤ੍ਥ ਮਨ੍ਤੇਸੂਤਿ ਵੇਦੇਸੁ. ਤਥਾਗਤੋ ਕਿਰ ਉਪ੍ਪਜ੍ਜਿਸ੍ਸਤੀਤਿ ਪਟਿਕਚ੍ਚੇਵ ਸੁਦ੍ਧਾਵਾਸਾ ਦੇਵਾ ਵੇਦੇਸੁ ਲਕ੍ਖਣਾਨਿ ਪਕ੍ਖਿਪਿਤ੍ਵਾ ‘‘ਬੁਦ੍ਧਮਨ੍ਤਾ ਨਾਮ ਏਤੇ’’ਤਿ ਬ੍ਰਾਹ੍ਮਣਵੇਸੇਨ ਵੇਦੇ ਵਾਚੇਨ੍ਤਿ ‘‘ਤਦਨੁਸਾਰੇਨ ਮਹੇਸਕ੍ਖਾ ਸਤ੍ਤਾ ਤਥਾਗਤਂ ਜਾਨਿਸ੍ਸਨ੍ਤੀ’’ਤਿ. ਤੇਨ ਪੁਬ੍ਬੇ ਵੇਦੇਸੁ ਮਹਾਪੁਰਿਸਲਕ੍ਖਣਾਨਿ ਆਗਚ੍ਛਨ੍ਤਿ. ਪਰਿਨਿਬ੍ਬੁਤੇ ਪਨ ਤਥਾਗਤੇ ਅਨੁਕ੍ਕਮੇਨ ਅਨ੍ਤਰਧਾਯਨ੍ਤਿ, ਤੇਨ ਏਤਰਹਿ ਨਤ੍ਥਿ. ਮਹਾਪੁਰਿਸਸ੍ਸਾਤਿ ਪਣਿਧਿਸਮਾਦਾਨਞਾਣਕਰੁਣਾਦਿਗੁਣਮਹਤੋ ਪੁਰਿਸਸ੍ਸ. ਦ੍ਵੇਯੇਵ ਗਤਿਯੋਤਿ ਦ੍ਵੇ ਏਵ ਨਿਟ੍ਠਾ. ਕਾਮਞ੍ਚਾਯਂ ਗਤਿਸਦ੍ਦੋ – ‘‘ਪਞ੍ਚ ਖੋ ਇਮਾ, ਸਾਰਿਪੁਤ੍ਤ, ਗਤਿਯੋ’’ਤਿਆਦੀਸੁ (ਮ. ਨਿ. ੧.੧੫੩) ਭਵਭੇਦੇ ਵਤ੍ਤਤਿ, ‘‘ਗਤਿ ਮਿਗਾਨਂ ਪਵਨ’’ਨ੍ਤਿਆਦੀਸੁ (ਪਰਿ. ੩੩੯) ਨਿਵਾਸਟ੍ਠਾਨੇ, ‘‘ਏਵਂ ਅਧਿਮਤ੍ਤਗਤਿਮਨ੍ਤੋ’’ਤਿਆਦੀਸੁ (ਮ. ਨਿ. ੧.੧੬੧) ਪਞ੍ਞਾਯ, ‘‘ਗਤਿਗਤ’’ਨ੍ਤਿਆਦੀਸੁ ਵਿਸਟਭਾਵੇ, ਇਧ ਪਨ ਨਿਟ੍ਠਾਯਂ ਵਤ੍ਤਤੀਤਿ ਵੇਦਿਤਬ੍ਬੋ. ਤਤ੍ਥ ਕਿਞ੍ਚਾਪਿ ਯੇਹਿ ਸਮਨ੍ਨਾਗਤੋ ਰਾਜਾ ਹੋਤਿ, ਨ ਤੇਹੇਵ ਬੁਦ੍ਧੋ ਹੋਤਿ, ਜਾਤਿਸਾਮਞ੍ਞਤੋ ਪਨ ਤਾਨਿਯੇਵ ਤਾਨੀਤਿ ਵੁਚ੍ਚਨ੍ਤਿ. ਤੇਨ ਵੁਤ੍ਤਂ – ‘‘ਯੇਹਿ ਸਮਨ੍ਨਾਗਤਸ੍ਸਾ’’ਤਿ. ਸਚੇ ਅਗਾਰਂ ਅਜ੍ਝਾਵਸਤੀਤਿ ਯਦਿ ਅਗਾਰੇ ਵਸਤਿ, ਰਾਜਾ ਹੋਤਿ ਚਕ੍ਕਵਤ੍ਤੀ. ਚਤੂਹਿ ਅਚ੍ਛਰਿਯਧਮ੍ਮੇਹਿ ਸਙ੍ਗਹਵਤ੍ਥੂਹਿ ਚ ਲੋਕਂ ਰਞ੍ਜਨਤੋ ਰਾਜਾ. ਚਕ੍ਕਰਤਨਂ ਵਤ੍ਤੇਤਿ, ਚਤੂਹਿ ਸਮ੍ਪਤ੍ਤਿਚਕ੍ਕੇਹਿ ਵਤ੍ਤੇਤਿ, ਤੇਹਿ ਚ ਪਰਂ ਵਤ੍ਤੇਤਿ, ਪਰਹਿਤਾਯ ਚ ਇਰਿਯਾਪਥਚਕ੍ਕਾਨਂ ਵਤ੍ਤੋ ਏਤਸ੍ਮਿਂ ਅਤ੍ਥੀਤਿ ਚਕ੍ਕਵਤ੍ਤੀ. ਏਤ੍ਥ ਚ ਰਾਜਾਤਿ ਸਾਮਞ੍ਞਂ, ਚਕ੍ਕਵਤ੍ਤੀਤਿ ਵਿਸੇਸਨਂ. ਧਮ੍ਮੇਨ ਚਰਤੀਤਿ ਧਮ੍ਮਿਕੋ, ਞਾਯੇਨ ਸਮੇਨ ਵਤ੍ਤਤੀਤਿ ਅਤ੍ਥੋ. ਧਮ੍ਮੇਨ ਰਜ੍ਜਂ ਲਭਿਤ੍ਵਾ ਰਾਜਾ ਜਾਤੋਤਿ ਧਮ੍ਮਰਾਜਾ. ਪਰਹਿਤਧਮ੍ਮਕਰਣੇਨ ਵਾ ਧਮ੍ਮਿਕੋ, ਅਤ੍ਤਹਿਤਧਮ੍ਮਕਰਣੇਨ ਧਮ੍ਮਰਾਜਾ. ਚਤੁਰਨ੍ਤਾਯ ਇਸ੍ਸਰੋਤਿ ਚਾਤੁਰਨ੍ਤੋ, ਚਤੁਸਮੁਦ੍ਦਨ੍ਤਾਯ ਚਤੁਬ੍ਬਿਧਦੀਪਭੂਸਿਤਾਯ ਚ ਪਥਵਿਯਾ ਇਸ੍ਸਰੋਤਿ ਅਤ੍ਥੋ. ਅਜ੍ਝਤ੍ਤਂ ਕੋਪਾਦਿਪਚ੍ਚਤ੍ਥਿਕੇ ਬਹਿਦ੍ਧਾ ਚ ਸਬ੍ਬਰਾਜਾਨੋ ਵਿਜੇਸੀਤਿ ਵਿਜਿਤਾਵੀ. ਜਨਪਦਤ੍ਥਾਵਰਿਯਪ੍ਪਤ੍ਤੋਤਿ ਜਨਪਦੇ ਥਾਵਰਭਾਵਂ ਧੁਵਭਾਵਂ ਪਤ੍ਤੋ, ਨ ਸਕ੍ਕਾ ਕੇਨਚਿ ਚਾਲੇਤੁਂ, ਜਨਪਦੋ ਵਾ ਤਮ੍ਹਿ ਥਾਵਰਿਯਪ੍ਪਤ੍ਤੋ ਅਨੁਸ੍ਸੁਕ੍ਕੋ ਸਕਮ੍ਮਨਿਰਤੋ ਅਚਲੋ ਅਸਮ੍ਪਵੇਧੀਤਿ ਜਨਪਦਤ੍ਥਾਵਰਿਯਪ੍ਪਤ੍ਤੋ. ਸੇਯ੍ਯਥਿਦਨ੍ਤਿ ਨਿਪਾਤੋ, ਤਸ੍ਸ ਤਾਨਿ ਕਤਮਾਨੀਤਿ ਅਤ੍ਥੋ. ਚਕ੍ਕਰਤਨਨ੍ਤਿਆਦੀਸੁ ਚਕ੍ਕਞ੍ਚ ਤਂ ਰਤਿਜਨਨਤ੍ਥੇਨ ਰਤਨਞ੍ਚਾਤਿ ਚਕ੍ਕਰਤਨਂ. ਏਸੇਵ ਨਯੋ ਸਬ੍ਬਤ੍ਥ.

ਇਮੇਸੁ ਪਨ ਰਤਨੇਸੁ ਅਯਂ ਚਕ੍ਕਵਤ੍ਤਿਰਾਜਾ ਚਕ੍ਕਰਤਨੇਨ ਅਜਿਤਂ ਜਿਨਾਤਿ, ਹਤ੍ਥਿਅਸ੍ਸਰਤਨੇਹਿ ਵਿਜਿਤੇ ਯਥਾਸੁਖਂ ਅਨੁਵਿਚਰਤਿ, ਪਰਿਣਾਯਕਰਤਨੇਨ ਵਿਜਿਤਮਨੁਰਕ੍ਖਤਿ, ਸੇਸੇਹਿ ਉਪਭੋਗਸੁਖਮਨੁਭਵਤਿ. ਪਠਮੇਨ ਚਸ੍ਸ ਉਸ੍ਸਾਹਸਤ੍ਤਿਯੋਗੋ, ਹਤ੍ਥਿਅਸ੍ਸਗਹਪਤਿਰਤਨੇਹਿ ਪਭੁਸਤ੍ਤਿਯੋਗੋ, ਪਚ੍ਛਿਮੇਨ ਮਨ੍ਤਸਤ੍ਤਿਯੋਗੋ ਸੁਪਰਿਪੁਣ੍ਣੋ ਹੋਤਿ, ਇਤ੍ਥਿਮਣਿਰਤਨੇਹਿ ਤਿਵਿਧਸਤ੍ਤਿਯੋਗਫਲਂ. ਸੋ ਇਤ੍ਥਿਮਣਿਰਤਨੇਹਿ ਭੋਗਸੁਖਮਨੁਭਵਤਿ, ਸੇਸੇਹਿ ਇਸ੍ਸਰਿਯਸੁਖਂ. ਵਿਸੇਸਤੋ ਚਸ੍ਸ ਪੁਰਿਮਾਨਿ ਤੀਣਿ ਅਦੋਸਕੁਸਲਮੂਲਜਨਿਤਕਮ੍ਮਾਨੁਭਾਵੇਨ ਸਮ੍ਪਜ੍ਜਨ੍ਤਿ, ਮਜ੍ਝਿਮਾਨਿ ਅਲੋਭਕੁਸਲਮੂਲਜਨਿਤਕਮ੍ਮਾਨੁਭਾਵੇਨ, ਪਚ੍ਛਿਮਮੇਕਂ ਅਮੋਹਕੁਸਲਮੂਲਜਨਿਤਕਮ੍ਮਾਨੁਭਾਵੇਨਾਤਿ ਵੇਦਿਤਬ੍ਬਂ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਬੋਜ੍ਝਙ੍ਗਸਂਯੁਤ੍ਤੇ ਰਤਨਸੁਤ੍ਤਸ੍ਸ (ਸਂ. ਨਿ. ੫.੨੨੨-੨੨੩) ਉਪਦੇਸਤੋ ਗਹੇਤਬ੍ਬੋ. ਅਪਿਚ ਬਾਲਪਣ੍ਡਿਤਸੁਤ੍ਤੇਪਿ (ਮ. ਨਿ. ੩.੨੫੫) ਇਮੇਸਂ ਰਤਨਾਨਂ ਉਪ੍ਪਤ੍ਤਿਕ੍ਕਮੇਨ ਸਦ੍ਧਿਂ ਵਣ੍ਣਨਾ ਆਗਮਿਸ੍ਸਤਿ.

ਪਰੋਸਹਸ੍ਸਨ੍ਤਿ ਅਤਿਰੇਕਸਹਸ੍ਸਂ. ਸੂਰਾਤਿ ਅਭੀਰੁਕਜਾਤਿਕਾ. ਵੀਰਙ੍ਗਰੂਪਾਤਿ ਦੇਵਪੁਤ੍ਤਸਦਿਸਕਾਯਾ, ਏਵਂ ਤਾਵ ਏਕੇ ਵਣ੍ਣਯਨ੍ਤਿ, ਅਯਂ ਪਨੇਤ੍ਥ ਸਭਾਵੋ – ਵੀਰਾਤਿ ਉਤ੍ਤਮਸੂਰਾ ਵੁਚ੍ਚਨ੍ਤਿ. ਵੀਰਾਨਂ ਅਙ੍ਗਂ ਵੀਰਙ੍ਗਂ, ਵੀਰਕਾਰਣਂ ਵੀਰਿਯਨ੍ਤਿ ਵੁਤ੍ਤਂ ਹੋਤਿ. ਵੀਰਙ੍ਗਂ ਰੂਪਂ ਏਤੇਸਨ੍ਤਿ ਵੀਰਙ੍ਗਰੂਪਾ, ਵੀਰਿਯਮਯਸਰੀਰਾ ਵਿਯਾਤਿ ਵੁਤ੍ਤਂ ਹੋਤਿ. ਪਰਸੇਨਪ੍ਪਮਦ੍ਦਨਾਤਿ ਸਚੇ ਪਟਿਮੁਖਂ ਤਿਟ੍ਠੇਯ੍ਯ ਪਰਸੇਨਾ, ਤਂ ਮਦ੍ਦਿਤੁਂ ਸਮਤ੍ਥਾਤਿ ਅਧਿਪ੍ਪਾਯੋ. ਧਮ੍ਮੇਨਾਤਿ ‘‘ਪਾਣੋ ਨ ਹਨ੍ਤਬ੍ਬੋ’’ਤਿਆਦਿਨਾ ਪਞ੍ਚਸੀਲਧਮ੍ਮੇਨ.

ਅਰਹਂ ਹੋਤਿ ਸਮ੍ਮਾਸਮ੍ਬੁਦ੍ਧੋ ਲੋਕੇ ਵਿਵਟ੍ਟਚ੍ਛਦੋਤਿ ਏਤ੍ਥ ਰਾਗਦੋਸਮੋਹਮਾਨਦਿਟ੍ਠਿਅਵਿਜ੍ਜਾਦੁਚ੍ਚਰਿਤਛਦਨੇਹਿ ਸਤ੍ਤਹਿ ਪਟਿਚ੍ਛਨ੍ਨੇ ਕਿਲੇਸਨ੍ਧਕਾਰਲੋਕੇ ਤਂ ਛਦਨਂ ਵਿਵਟ੍ਟੇਤ੍ਵਾ ਸਮਨ੍ਤਤੋ ਸਞ੍ਜਾਤਾਲੋਕੋ ਹੁਤ੍ਵਾ ਠਿਤੋਤਿ ਵਿਵਟ੍ਟਚ੍ਛਦੋ. ਤਤ੍ਥ ਪਠਮੇਨ ਪਦੇਨ ਪੂਜਾਰਹਤਾ, ਦੁਤਿਯੇਨ ਤਸ੍ਸਾ ਹੇਤੁ ਯਸ੍ਮਾ ਸਮ੍ਮਾਸਮ੍ਬੁਦ੍ਧੋਤਿ, ਤਤਿਯੇਨ ਬੁਦ੍ਧਤ੍ਤਹੇਤੁਭੂਤਾ ਵਿਵਟ੍ਟਚ੍ਛਦਤਾ ਵੁਤ੍ਤਾਤਿ ਵੇਦਿਤਬ੍ਬਾ. ਅਥ ਵਾ ਵਿਵਟ੍ਟੋ ਚ ਵਿਚ੍ਛਦੋ ਚਾਤਿ ਵਿਵਟ੍ਟਚ੍ਛਦੋ, ਵਟ੍ਟਰਹਿਤੋ ਛਦਨਰਹਿਤੋ ਚਾਤਿ ਵੁਤ੍ਤਂ ਹੋਤਿ. ਤੇਨ ਅਰਹਂ ਵਟ੍ਟਾਭਾਵੇਨ, ਸਮ੍ਮਾਸਮ੍ਬੁਦ੍ਧੋ ਛਦਨਾਭਾਵੇਨਾਤਿ ਏਵਂ ਪੁਰਿਮਪਦਦ੍ਵਯਸ੍ਸੇਵ ਹੇਤੁਦ੍ਵਯਂ ਵੁਤ੍ਤਂ ਹੋਤਿ. ਦੁਤਿਯਵੇਸਾਰਜ੍ਜੇਨ ਚੇਤ੍ਥ ਪੁਰਿਮਸਿਦ੍ਧਿ, ਪਠਮੇਨ ਦੁਤਿਯਸਿਦ੍ਧਿ, ਤਤਿਯਚਤੁਤ੍ਥੇਹਿ ਤਤਿਯਸਿਦ੍ਧਿ ਹੋਤਿ. ਪੁਰਿਮਞ੍ਚ ਧਮ੍ਮਚਕ੍ਖੁਂ, ਦੁਤਿਯਂ ਬੁਦ੍ਧਚਕ੍ਖੁਂ, ਤਤਿਯਂ ਸਮਨ੍ਤਚਕ੍ਖੁਂ ਸਾਧੇਤੀਤਿਪਿ ਵੇਦਿਤਬ੍ਬਂ. ਤ੍ਵਂ ਮਨ੍ਤਾਨਂ ਪਟਿਗ੍ਗਹੇਤਾਤਿ ਇਮਿਨਾਸ੍ਸ ਸੂਰਭਾਵਂ ਜਨੇਤਿ.

੩੮੫. ਸੋਪਿ ਤਾਯ ਆਚਰਿਯਕਥਾਯ ਲਕ੍ਖਣੇਸੁ ਵਿਗਤਸਮ੍ਮੋਹੋ ਏਕੋਭਾਸਜਾਤੋ ਵਿਯ ਬੁਦ੍ਧਮਨ੍ਤੇ ਸਮ੍ਪਸ੍ਸਮਾਨੋ ਏਵਂ, ਭੋਤਿ ਆਹ. ਤਸ੍ਸਤ੍ਥੋ – ਯਥਾ, ਭੋ, ਮਂ ਤ੍ਵਂ ਵਦਸਿ, ਏਵਂ ਕਰਿਸ੍ਸਾਮੀਤਿ. ਸਮਨ੍ਨੇਸੀਤਿ ਗਵੇਸਿ, ਏਕਂ ਦ੍ਵੇਤਿ ਵਾ ਗਣਯਨ੍ਤੋ ਸਮਾਨਯਿ. ਅਦ੍ਦਸਾ ਖੋਤਿ ਕਥਂ ਅਦ੍ਦਸ? ਬੁਦ੍ਧਾਨਞ੍ਹਿ ਨਿਸਿਨ੍ਨਾਨਂ ਵਾ ਨਿਪਨ੍ਨਾਨਂ ਵਾ ਕੋਚਿ ਲਕ੍ਖਣਂ ਪਰਿਯੇਸਿਤੁਂ ਨ ਸਕ੍ਕੋਤਿ, ਠਿਤਾਨਂ ਪਨ ਚਙ੍ਕਮਨ੍ਤਾਨਂ ਵਾ ਸਕ੍ਕੋਤਿ. ਤਸ੍ਮਾ ਲਕ੍ਖਣਪਰਿਯੇਸਨਤ੍ਥਂ ਆਗਤਂ ਦਿਸ੍ਵਾ ਬੁਦ੍ਧਾ ਉਟ੍ਠਾਯਾਸਨਾ ਤਿਟ੍ਠਨ੍ਤਿ ਵਾ ਚਙ੍ਕਮਂ ਵਾ ਅਧਿਟ੍ਠਹਨ੍ਤਿ. ਇਤਿ ਲਕ੍ਖਣਦਸ੍ਸਨਾਨੁਰੂਪੇ ਇਰਿਯਾਪਥੇ ਵਤ੍ਤਮਾਨਸ੍ਸ ਅਦ੍ਦਸ. ਯੇਭੁਯ੍ਯੇਨਾਤਿ ਪਾਯੇਨ, ਬਹੁਕਾਨਿ ਅਦ੍ਦਸ, ਅਪ੍ਪਾਨਿ ਨ ਅਦ੍ਦਸਾਤਿ ਅਤ੍ਥੋ. ਤਤੋ ਯਾਨਿ ਨ ਅਦ੍ਦਸ, ਤੇਸਂ ਦੀਪਨਤ੍ਥਂ ਵੁਤ੍ਤਂ ਠਪੇਤ੍ਵਾ ਦ੍ਵੇਤਿ. ਕਙ੍ਖਤੀਤਿ ‘‘ਅਹੋ ਵਤ ਪਸ੍ਸੇਯ੍ਯ’’ਨ੍ਤਿ ਪਤ੍ਥਨਂ ਉਪ੍ਪਾਦੇਤਿ. ਵਿਚਿਕਿਚ੍ਛਤੀਤਿ ਤਤੋ ਤਤੋ ਤਾਨਿ ਵਿਚਿਨਨ੍ਤੋ ਕਿਚ੍ਛਤਿ ਨ ਸਕ੍ਕੋਤਿ ਦਟ੍ਠੁਂ. ਨਾਧਿਮੁਚ੍ਚਤੀਤਿ ਤਾਯ ਵਿਚਿਕਿਚ੍ਛਾਯ ਸਨ੍ਨਿਟ੍ਠਾਨਂ ਨ ਗਚ੍ਛਤਿ. ਨ ਸਮ੍ਪਸੀਦਤੀਤਿ ਤਤੋ ‘‘ਪਰਿਪੁਣ੍ਣਲਕ੍ਖਣੋ ਅਯ’’ਨ੍ਤਿ ਭਗਵਤਿ ਪਸਾਦਂ ਨਾਪਜ੍ਜਤਿ. ਕਙ੍ਖਾਯ ਵਾ ਦੁਬ੍ਬਲਾ ਵਿਮਤਿ ਵੁਤ੍ਤਾ, ਵਿਚਿਕਿਚ੍ਛਾਯ ਮਜ੍ਝਿਮਾ, ਅਨਧਿਮੁਚ੍ਚਨਤਾਯ ਬਲਵਤੀ, ਅਸਮ੍ਪਸਾਦੇਨ ਤੇਹਿ ਤੀਹਿ ਧਮ੍ਮੇਹਿ ਚਿਤ੍ਤਸ੍ਸ ਕਾਲੁਸ੍ਸਿਯਭਾਵੋ. ਕੋਸੋਹਿਤੇਤਿ ਵਤ੍ਥਿਕੋਸੇਨ ਪਟਿਚ੍ਛਨ੍ਨੇ. ਵਤ੍ਥਗੁਯ੍ਹੇਤਿ ਅਙ੍ਗਜਾਤੇ. ਭਗਵਤੋ ਹਿ ਵਾਰਣਸ੍ਸੇਵ ਕੋਸੋਹਿਤਵਤ੍ਥਗੁਯ੍ਹਂ ਸੁਵਣ੍ਣਵਣ੍ਣਂ ਪਦੁਮਗਬ੍ਭਸਮਾਨਂ, ਤਂ ਸੋ ਵਤ੍ਥਪਟਿਚ੍ਛਨ੍ਨਤ੍ਤਾ, ਅਨ੍ਤੋਮੁਖਗਤਾਯ ਚ ਜਿਵ੍ਹਾਯ ਪਹੂਤਭਾਵਂ ਅਸਲ੍ਲਕ੍ਖੇਨ੍ਤੋ ਤੇਸੁ ਦ੍ਵੀਸੁ ਲਕ੍ਖਣੇਸੁ ਕਙ੍ਖੀ ਅਹੋਸਿ ਵਿਚਿਕਿਚ੍ਛੀ.

ਅਥ ਖੋ ਭਗਵਾਤਿ ਅਥ ਭਗਵਾ ਚਿਨ੍ਤੇਸਿ – ‘‘ਸਚਾਹਂ ਇਮਸ੍ਸ ਏਤਾਨਿ ਦ੍ਵੇ ਲਕ੍ਖਣਾਨਿ ਨ ਦਸ੍ਸੇਸ੍ਸਾਮਿ, ਨਿਕ੍ਕਙ੍ਖੋ ਨ ਭਵਿਸ੍ਸਤਿ. ਏਤਸ੍ਸ ਕਙ੍ਖਾਯ ਸਤਿ ਆਚਰਿਯੋਪਿਸ੍ਸ ਨਿਕ੍ਕਙ੍ਖੋ ਨ ਭਵਿਸ੍ਸਤਿ, ਅਥ ਮਂ ਦਸ੍ਸਨਾਯ ਨ ਆਗਮਿਸ੍ਸਤਿ, ਅਨਾਗਤੋ ਧਮ੍ਮਂ ਨ ਸੋਸ੍ਸਤਿ, ਧਮ੍ਮਂ ਅਸੁਣਨ੍ਤੋ ਤੀਣਿ ਸਾਮਞ੍ਞਫਲਾਨਿ ਨ ਸਚ੍ਛਿਕਰਿਸ੍ਸਤਿ. ਏਤਸ੍ਮਿਂ ਪਨ ਨਿਕ੍ਕਙ੍ਖੇ ਆਚਰਿਯੋਪਿਸ੍ਸ ਨਿਕ੍ਕਙ੍ਖੋ ਮਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਤੀਣਿ ਸਾਮਞ੍ਞਫਲਾਨਿ ਸਚ੍ਛਿਕਰਿਸ੍ਸਤਿ. ਏਤਦਤ੍ਥਂਯੇਵ ਚ ਮਯਾ ਪਾਰਮਿਯੋ ਪੂਰਿਤਾ. ਦਸ੍ਸੇਸ੍ਸਾਮਿਸ੍ਸ ਤਾਨਿ ਲਕ੍ਖਣਾਨੀ’’ਤਿ.

ਤਥਾਰੂਪਂ ਇਦ੍ਧਾਭਿਸਙ੍ਖਾਰਮਕਾਸਿ. ਕਥਂਰੂਪਂ? ਕਿਮੇਤ੍ਥ ਅਞ੍ਞੇਨ ਵਤ੍ਤਬ੍ਬਂ? ਵੁਤ੍ਤਮੇਤਂ ਨਾਗਸੇਨਤ੍ਥੇਰੇਨੇਵ ਮਿਲਿਨ੍ਦਰਞ੍ਞਾ ਪੁਟ੍ਠੇਨ –

ਆਹ ਚ ਦੁਕ੍ਕਰਂ, ਭਨ੍ਤੇ ਨਾਗਸੇਨ, ਭਗਵਤਾ ਕਤਨ੍ਤਿ. ਕਿਂ ਮਹਾਰਾਜਾਤਿ? ਮਹਾਜਨੇਨ ਹਿਰਿਕਰਣੋਕਾਸਂ ਬ੍ਰਹ੍ਮਾਯੁਬ੍ਰਾਹ੍ਮਣਸ੍ਸ ਚ ਅਨ੍ਤੇਵਾਸਿਉਤ੍ਤਰਸ੍ਸ ਚ ਬਾਵਰਿਯਸ੍ਸ ਅਨ੍ਤੇਵਾਸੀਨਂ ਸੋਲ਼ਸਬ੍ਰਾਹ੍ਮਣਾਨਞ੍ਚ ਸੇਲਸ੍ਸ ਚ ਬ੍ਰਾਹ੍ਮਣਸ੍ਸ ਅਨ੍ਤੇਵਾਸੀਨਂ ਤਿਸਤਮਾਣਵਾਨਞ੍ਚ ਦਸ੍ਸੇਸਿ, ਭਨ੍ਤੇਤਿ. ਨ, ਮਹਾਰਾਜ, ਭਗਵਾ ਗੁਯ੍ਹਂ ਦਸ੍ਸੇਤਿ, ਛਾਯਂ ਭਗਵਾ ਦਸ੍ਸੇਤਿ, ਇਦ੍ਧਿਯਾ ਅਭਿਸਙ੍ਖਰਿਤ੍ਵਾ ਨਿਵਾਸਨਨਿਵਤ੍ਥਂ ਕਾਯਬਨ੍ਧਨਬਦ੍ਧਂ ਚੀਵਰਪਾਰੁਤਂ ਛਾਯਾਰੂਪਕਮਤ੍ਤਂ ਦਸ੍ਸੇਸਿ ਮਹਾਰਾਜਾਤਿ. ਛਾਯਂ ਦਿਟ੍ਠੇ ਸਤਿ ਦਿਟ੍ਠੋਯੇਵ. ਨਨੁ, ਭਨ੍ਤੇਤਿ? ਤਿਟ੍ਠਤੇਤਂ, ਮਹਾਰਾਜ, ਹਦਯਰੂਪਂ ਦਿਸ੍ਵਾ ਬੁਜ੍ਝਨਕਸਤ੍ਤੋ ਭਵੇਯ੍ਯ, ਹਦਯਮਂਸਂ ਨੀਹਰਿਤ੍ਵਾ ਦਸ੍ਸੇਯ੍ਯ ਸਮ੍ਮਾਸਮ੍ਬੁਦ੍ਧੋਤਿ. ਕਲ੍ਲੋਸਿ, ਭਨ੍ਤੇ ਨਾਗਸੇਨਾਤਿ.

ਨਿਨ੍ਨਾਮੇਤ੍ਵਾਤਿ ਨੀਹਰਿਤ੍ਵਾ. ਅਨੁਮਸੀਤਿ ਕਥਿਨਸੂਚਿਂ ਵਿਯ ਕਤ੍ਵਾ ਅਨੁਮਜ੍ਜਿ. ਤਥਾ ਕਰਣੇਨ ਚੇਤ੍ਥ ਮੁਦੁਭਾਵੋ, ਕਣ੍ਣਸੋਤਾਨੁਮਸਨੇਨ ਦੀਘਭਾਵੋ, ਨਾਸਿਕਸੋਤਾਨੁਮਸਨੇਨ ਤਨੁਭਾਵੋ, ਨਲਾਟਚ੍ਛਾਦਨੇਨ ਪੁਥੁਲਭਾਵੋ ਪਕਾਸਿਤੋਤਿ ਵੇਦਿਤਬ੍ਬੋ. ਉਭੋਪਿ ਕਣ੍ਣਸੋਤਾਨੀਤਿਆਦੀਸੁ ਚੇਤ੍ਥ ਬੁਦ੍ਧਾਨਂ ਕਣ੍ਣਸੋਤੇਸੁ ਮਲਂ ਵਾ ਜਲ੍ਲਿਕਾ ਵਾ ਨਤ੍ਥਿ, ਧੋਵਿਤ੍ਵਾ ਠਪਿਤਰਜਤਪਨਾਲ਼ਿਕਾ ਵਿਯ ਹੋਨ੍ਤਿ, ਤਥਾ ਨਾਸਿਕਸੋਤੇਸੁ, ਤਾਨਿਪਿ ਹਿ ਸੁਪਰਿਕਮ੍ਮਕਤਕਞ੍ਚਨਪਨਾਲ਼ਿਕਾ ਵਿਯ ਚ ਮਣਿਪਨਾਲ਼ਿਕਾ ਵਿਯ ਚ ਹੋਨ੍ਤਿ. ਤਸ੍ਮਾ ਜਿਵ੍ਹਂ ਨੀਹਰਿਤ੍ਵਾ ਕਥਿਨਸੂਚਿਂ ਵਿਯ ਕਤ੍ਵਾ ਮੁਖਪਰਿਯਨ੍ਤੇ ਉਪਸਂਹਰਨ੍ਤੋ ਦਕ੍ਖਿਣਕਣ੍ਣਸੋਤਂ ਪਵੇਸੇਤ੍ਵਾ ਤਤੋ ਨੀਹਰਿਤ੍ਵਾ ਵਾਮਕਣ੍ਣਸੋਤਂ ਪਵੇਸੇਸਿ, ਤਤੋ ਨੀਹਰਿਤ੍ਵਾ ਦਕ੍ਖਿਣਨਾਸਿਕਸੋਤਂ ਪਵੇਸੇਤ੍ਵਾ ਤਤੋ ਨੀਹਰਿਤ੍ਵਾ ਵਾਮਨਾਸਿਕਸੋਤਂ ਪਵੇਸੇਸਿ, ਤਤੋ ਨੀਹਰਿਤ੍ਵਾ ਪੁਥੁਲਭਾਵਂ ਦਸ੍ਸੇਨ੍ਤੋ ਰਤ੍ਤਵਲਾਹਕੇਨ ਅਡ੍ਢਚਨ੍ਦਂ ਵਿਯ ਚ ਸੁਵਣ੍ਣਪਤ੍ਤਂ ਵਿਯ ਚ ਰਤ੍ਤਕਮ੍ਬਲਪਟਲੇਨ ਵਿਜ੍ਜੁਜੋਤਸਦਿਸਾਯ ਜਿਵ੍ਹਾਯ ਕੇਵਲਕਪ੍ਪਂ ਨਲਾਟਮਣ੍ਡਲਂ ਪਟਿਚ੍ਛਾਦੇਸਿ.

ਯਂਨੂਨਾਹਨ੍ਤਿ ਕਸ੍ਮਾ ਚਿਨ੍ਤੇਸਿ? ਅਹਞ੍ਹਿ ਮਹਾਪੁਰਿਸਲਕ੍ਖਣਾਨਿ ਸਮਨ੍ਨੇਸਿਤ੍ਵਾ ਗਤੋ ‘‘ਦਿਟ੍ਠਾਨਿ ਤੇ, ਤਾਤ, ਮਹਾਪੁਰਿਸਲਕ੍ਖਣਾਨੀ’’ਤਿ ਆਚਰਿਯੇਨ ਪੁਚ੍ਛਿਤੋ ‘‘ਆਮ, ਆਚਰਿਯਾ’’ਤਿ ਵਤ੍ਤੁਂ ਸਕ੍ਖਿਸ੍ਸਾਮਿ. ਸਚੇ ਪਨ ਮਂ ‘‘ਕਿਰਿਯਾਕਰਣਮਸ੍ਸ ਕੀਦਿਸ’’ਨ੍ਤਿ ਪੁਚ੍ਛਿਸ੍ਸਤਿ, ਤਂ ਵਤ੍ਤੁਂ ਨ ਸਕ੍ਖਿਸ੍ਸਾਮਿ, ਨ ਜਾਨਾਮੀਤਿ ਵੁਤ੍ਤੇ ਪਨ ਆਚਰਿਯੋ ਕੁਜ੍ਝਿਸ੍ਸਤਿ ‘‘ਨਨੁ ਤ੍ਵਂ ਮਯਾ ਸਬ੍ਬਮ੍ਪੇਤਂ ਜਾਨਨਤ੍ਥਾਯ ਪੇਸਿਤੋ, ਕਸ੍ਮਾ ਅਜਾਨਿਤ੍ਵਾ ਆਗਤੋਸੀ’’ਤਿ, ਤਸ੍ਮਾ ਯਨ੍ਨੂਨਾਹਨ੍ਤਿ ਚਿਨ੍ਤੇਤ੍ਵਾ ਅਨੁਬਨ੍ਧਿ. ਭਗਵਾ ਨ੍ਹਾਨਟ੍ਠਾਨਂ ਮੁਖਧੋਵਨਟ੍ਠਾਨਂ ਸਰੀਰਪਟਿਜਗ੍ਗਨਟ੍ਠਾਨਂ ਰਾਜਰਾਜਮਹਾਮਤ੍ਤਾਦੀਨਂ ਓਰੋਧੇਹਿ ਸਦ੍ਧਿਂ ਪਰਿਵਾਰੇਤ੍ਵਾ ਨਿਸਿਨ੍ਨਟ੍ਠਾਨਨ੍ਤਿ ਇਮਾਨਿ ਚਤ੍ਤਾਰਿ ਠਾਨਾਨਿ ਠਪੇਤ੍ਵਾ ਸੇਸਟ੍ਠਾਨੇਸੁ ਅਨ੍ਤਮਸੋ ਏਕਗਨ੍ਧਕੁਟਿਯਮ੍ਪਿ ਓਕਾਸਮਕਾਸਿ.

ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ – ‘‘ਅਯਂ ਕਿਰ ਬ੍ਰਹ੍ਮਾਯੁਬ੍ਰਾਹ੍ਮਣਸ੍ਸ ਮਾਣਵੋ ਉਤ੍ਤਰੋ ਨਾਮ ‘ਬੁਦ੍ਧੋ ਵਾ ਨੋ ਵਾ’ਤਿ ਤਥਾਗਤਸ੍ਸ ਬੁਦ੍ਧਭਾਵਂ ਵੀਮਂਸਨ੍ਤੋ ਚਰਤਿ, ਬੁਦ੍ਧਵੀਮਂਸਕੋ ਨਾਮਾਯ’’ਨ੍ਤਿ ਪਾਕਟੋ ਜਾਤੋ. ਯਮ੍ਹਿ ਯਮ੍ਹਿ ਠਾਨੇ ਬੁਦ੍ਧਾ ਵਸਨ੍ਤਿ, ਪਞ੍ਚ ਕਿਚ੍ਚਾਨਿ ਕਤਾਨੇਵ ਹੋਨ੍ਤਿ, ਤਾਨਿ ਹੇਟ੍ਠਾ ਦਸ੍ਸਿਤਾਨੇਵ. ਤਤ੍ਥ ਪਚ੍ਛਾਭਤ੍ਤਂ ਅਲਙ੍ਕਤਧਮ੍ਮਾਸਨੇ ਨਿਸੀਦਿਤ੍ਵਾ ਦਨ੍ਤਖਚਿਤਂ ਚਿਤ੍ਤਬੀਜਨਿਂ ਗਹੇਤ੍ਵਾ ਮਹਾਜਨਸ੍ਸ ਧਮ੍ਮਂ ਦੇਸੇਨ੍ਤੇ ਭਗਵਤਿ ਉਤ੍ਤਰੋਪਿ ਅਵਿਦੂਰੇ ਨਿਸੀਦਤਿ. ਧਮ੍ਮਸ੍ਸਵਨਪਰਿਯੋਸਾਨੇ ਸਦ੍ਧਾ ਮਨੁਸ੍ਸਾ ਸ੍ਵਾਤਨਾਯ ਭਗਵਨ੍ਤਂ ਨਿਮਨ੍ਤੇਤ੍ਵਾ ਮਾਣਵਮ੍ਪਿ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘‘ਤਾਤ, ਅਮ੍ਹੇਹਿ ਭਗਵਾ ਨਿਮਨ੍ਤਿਤੋ, ਤ੍ਵਮ੍ਪਿ ਭਗਵਤਾ ਸਦ੍ਧਿਂ ਆਗਨ੍ਤ੍ਵਾ ਅਮ੍ਹਾਕਂ ਗੇਹੇ ਭਤ੍ਤਂ ਗਣ੍ਹੇਯ੍ਯਾਸੀ’’ਤਿ. ਪੁਨਦਿਵਸੇ ਤਥਾਗਤੋ ਭਿਕ੍ਖੁਸਙ੍ਘਪਰਿਵੁਤੋ ਗਾਮਂ ਪਵਿਸਤਿ, ਉਤ੍ਤਰੋਪਿ ਪਦਵਾਰੇ ਪਦਵਾਰੇ ਪਰਿਗ੍ਗਣ੍ਹਨ੍ਤੋ ਪਦਾਨੁਪਦਿਕੋ ਅਨੁਬਨ੍ਧਤਿ. ਕੁਲਗੇਹਂ ਪਵਿਟ੍ਠਕਾਲੇ ਦਕ੍ਖਿਣੋਦਕਗ੍ਗਹਣਂ ਆਦਿਂ ਕਤ੍ਵਾ ਸਬ੍ਬਂ ਓਲੋਕੇਨ੍ਤੋ ਨਿਸੀਦਤਿ. ਭਤ੍ਤਕਿਚ੍ਚਾਵਸਾਨੇ ਤਥਾਗਤਸ੍ਸ ਪਤ੍ਤਂ ਭੂਮਿਯਂ ਠਪੇਤ੍ਵਾ ਨਿਸਿਨ੍ਨਕਾਲੇ ਮਾਣਵਕਸ੍ਸ ਪਾਤਰਾਸਭਤ੍ਤਂ ਸਜ੍ਜੇਨ੍ਤਿ. ਸੋ ਏਕਮਨ੍ਤੇ ਨਿਸਿਨ੍ਨੋ ਭੁਞ੍ਜਿਤ੍ਵਾ ਪੁਨ ਆਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਠਤ੍ਵਾ ਭਤ੍ਤਾਨੁਮੋਦਨਂ ਸੁਤ੍ਵਾ ਭਗਵਤਾ ਸਦ੍ਧਿਂਯੇਵ ਵਿਹਾਰਂ ਗਚ੍ਛਤਿ.

ਤਤ੍ਥ ਭਗਵਾ ਭਿਕ੍ਖੂਨਂ ਭਤ੍ਤਕਿਚ੍ਚਪਰਿਯੋਸਾਨਂ ਆਗਮੇਨ੍ਤੋ ਗਨ੍ਧਮਣ੍ਡਲਮਾਲ਼ੇ ਨਿਸੀਦਤਿ. ਭਿਕ੍ਖੂਹਿ ਭਤ੍ਤਕਿਚ੍ਚਂ ਕਤ੍ਵਾ ਪਤ੍ਤਚੀਵਰਂ ਪਟਿਸਾਮੇਤ੍ਵਾ ਆਗਮ੍ਮ ਵਨ੍ਦਿਤ੍ਵਾ ਕਾਲੇ ਆਰੋਚਿਤੇ ਭਗਵਾ ਗਨ੍ਧਕੁਟਿਂ ਪਵਿਸਤਿ, ਮਾਣਵੋਪਿ ਭਗਵਤਾ ਸਦ੍ਧਿਂਯੇਵ ਗਚ੍ਛਤਿ. ਭਗਵਾ ਪਰਿਵਾਰੇਤ੍ਵਾ ਆਗਤਂ ਭਿਕ੍ਖੁਸਙ੍ਘਂ ਗਨ੍ਧਕੁਟਿਪ੍ਪਮੁਖੇ ਠਿਤੋ ਓਵਦਿਤ੍ਵਾ ਉਯ੍ਯੋਜੇਤ੍ਵਾ ਗਨ੍ਧਕੁਟਿਂ ਪਵਿਸਤਿ, ਮਾਣਵੋਪਿ ਪਵਿਸਤਿ. ਭਗਵਾ ਖੁਦ੍ਦਕਮਞ੍ਚੇ ਅਪ੍ਪਮਤ੍ਤਕਂ ਕਾਲਂ ਨਿਸੀਦਤਿ, ਮਾਣਵੋਪਿ ਅਵਿਦੂਰੇ ਓਲੋਕੇਨ੍ਤੋ ਨਿਸੀਦਤਿ. ਭਗਵਾ ਮੁਹੁਤ੍ਤਂ ਨਿਸੀਦਿਤ੍ਵਾ ਸੀਸੋਕ੍ਕਮਨਂ ਦਸ੍ਸੇਤਿ, – ‘‘ਭੋਤੋ ਗੋਤਮਸ੍ਸ ਵਿਹਾਰਵੇਲਾ ਭਵਿਸ੍ਸਤੀ’’ਤਿ ਮਾਣਵੋ ਗਨ੍ਧਕੁਟਿਦ੍ਵਾਰਂ ਪਿਦਹਨ੍ਤੋ ਨਿਕ੍ਖਮਿਤ੍ਵਾ ਏਕਮਨ੍ਤਂ ਨਿਸੀਦਤਿ. ਮਨੁਸ੍ਸਾ ਪੁਰੇਭਤ੍ਤਂ ਦਾਨਂ ਦਤ੍ਵਾ ਭੁਤ੍ਤਪਾਤਰਾਸਾ ਸਮਾਦਿਨ੍ਨਉਪੋਸਥਙ੍ਗਾ ਸੁਦ੍ਧੁਤ੍ਤਰਾਸਙ੍ਗਾ ਮਾਲਾਗਨ੍ਧਾਦਿਹਤ੍ਥਾ ਧਮ੍ਮਂ ਸੁਣਿਸ੍ਸਾਮਾਤਿ ਵਿਹਾਰਂ ਆਗਚ੍ਛਨ੍ਤਿ, ਚਕ੍ਕਵਤ੍ਤਿਨੋ ਖਨ੍ਧਾਵਾਰਟ੍ਠਾਨਂ ਵਿਯ ਹੋਤਿ.

ਭਗਵਾ ਮੁਹੁਤ੍ਤਂ ਸੀਹਸੇਯ੍ਯਂ ਕਪ੍ਪੇਤ੍ਵਾ ਵੁਟ੍ਠਾਯ ਪੁਬ੍ਬਭਾਗੇਨ ਪਰਿਚ੍ਛਿਨ੍ਦਿਤ੍ਵਾ ਸਮਾਪਤ੍ਤਿਂ ਸਮਾਪਜ੍ਜਤਿ. ਸਮਾਪਤ੍ਤਿਤੋ ਵੁਟ੍ਠਾਯ ਮਹਾਜਨਸ੍ਸ ਆਗਤਭਾਵਂ ਞਤ੍ਵਾ ਗਨ੍ਧਕੁਟਿਤੋ ਨਿਕ੍ਖਮ੍ਮ ਮਹਾਜਨਪਰਿਵੁਤੋ ਗਨ੍ਧਮਣ੍ਡਲਮਾਲ਼ਂ ਗਨ੍ਤ੍ਵਾ ਪਞ੍ਞਤ੍ਤਵਰਬੁਦ੍ਧਾਸਨਗਤੋ ਪਰਿਸਾਯ ਧਮ੍ਮਂ ਦੇਸੇਤਿ. ਮਾਣਵੋਪਿ ਅਵਿਦੂਰੇ ਨਿਸੀਦਿਤ੍ਵਾ – ‘‘ਕਿਂ ਨੁ ਖੋ ਸਮਣੋ ਗੋਤਮੋ ਗੇਹਸ੍ਸਿਤਵਸੇਨ ਪਰਿਸਂ ਉਸ੍ਸਾਦੇਨ੍ਤੋ ਵਾ ਅਪਸਾਦੇਨ੍ਤੋ ਵਾ ਧਮ੍ਮਂ ਦੇਸੇਤਿ, ਉਦਾਹੁ ਨੋ’’ਤਿ ਅਕ੍ਖਰਕ੍ਖਰਂ ਪਦਂ ਪਦਂ ਪਰਿਗ੍ਗਣ੍ਹਾਤਿ. ਭਗਵਾ ਤਥਾਵਿਧਂ ਕਥਂ ਅਕਥੇਤ੍ਵਾਵ ਕਾਲਂ ਞਤ੍ਵਾ ਦੇਸਨਂ ਨਿਟ੍ਠਾਪੇਸਿ. ਮਾਣਵੋ ਇਮਿਨਾ ਨਿਯਾਮੇਨ ਪਰਿਗ੍ਗਣ੍ਹਨ੍ਤੋ ਸਤ੍ਤ ਮਾਸੇ ਏਕਤੋ ਵਿਚਰਿਤ੍ਵਾ ਭਗਵਤੋ ਕਾਯਦ੍ਵਾਰਾਦੀਸੁ ਅਣੁਮਤ੍ਤਮ੍ਪਿ ਅਵਕ੍ਖਲਿਤਂ ਨ ਅਦ੍ਦਸ. ਅਨਚ੍ਛਰਿਯਞ੍ਚੇਤਂ, ਯਂ ਬੁਦ੍ਧਭੂਤਸ੍ਸ ਮਨੁਸ੍ਸਭੂਤੋ ਮਾਣਵੋ ਨ ਪਸ੍ਸੇਯ੍ਯ, ਯਸ੍ਸ ਬੋਧਿਸਤ੍ਤਭੂਤਸ੍ਸ ਛਬ੍ਬਸ੍ਸਾਨਿ ਪਧਾਨਭੂਮਿਯਂ ਅਮਨੁਸ੍ਸਭੂਤੋ ਮਾਰੋ ਦੇਵਪੁਤ੍ਤੋ ਗੇਹਸ੍ਸਿਤਵਿਤਕ੍ਕਮਤ੍ਤਮ੍ਪਿ ਅਦਿਸ੍ਵਾ ਬੁਦ੍ਧਭੂਤਂ ਏਕਸਂਵਚ੍ਛਰਂ ਅਨੁਬਨ੍ਧਿਤ੍ਵਾ ਕਿਞ੍ਚਿ ਅਪਸ੍ਸਨ੍ਤੋ –

‘‘ਸਤ੍ਤ ਵਸ੍ਸਾਨਿ ਭਗਵਨ੍ਤਂ, ਅਨੁਬਨ੍ਧਿਂ ਪਦਾਪਦਂ;

ਓਤਾਰਂ ਨਾਧਿਗਚ੍ਛਿਸ੍ਸਂ, ਸਮ੍ਬੁਦ੍ਧਸ੍ਸ ਸਤੀਮਤੋ’’ਤਿ. (ਸੁ. ਨਿ. ੪੪੮) –

ਆਦਿਗਾਥਾਯੋ ਵਤ੍ਵਾ ਪਕ੍ਕਾਮਿ. ਤਤੋ ਮਾਣਵੋ ਚਿਨ੍ਤੇਸਿ – ‘‘ਅਹਂ ਭਵਨ੍ਤਂ ਗੋਤਮਂ ਸਤ੍ਤ ਮਾਸੇ ਅਨੁਬਨ੍ਧਮਾਨੋ ਕਿਞ੍ਚਿ ਵਜ੍ਜਂ ਨ ਪਸ੍ਸਾਮਿ. ਸਚੇ ਪਨਾਹਂ ਅਞ੍ਞੇਪਿ ਸਤ੍ਤ ਮਾਸੇ ਸਤ੍ਤ ਵਾ ਵਸ੍ਸਾਨਿ ਵਸ੍ਸਸਤਂ ਵਾ ਵਸ੍ਸਸਹਸ੍ਸਂ ਵਾ ਅਨੁਬਨ੍ਧੇਯ੍ਯਂ, ਨੇਵਸ੍ਸ ਵਜ੍ਜਂ ਪਸ੍ਸੇਯ੍ਯਂ. ਆਚਰਿਯੋ ਖੋ ਪਨਸ੍ਸ ਮੇ ਮਹਲ੍ਲਕੋ, ਯੋਗਕ੍ਖੇਮਂ ਨਾਮ ਨ ਸਕ੍ਕਾ ਜਾਨਿਤੁਂ. ਸਮਣਸ੍ਸ ਗੋਤਮਸ੍ਸ ਸਭਾਵਗੁਣੇਨੇਵ ਬੁਦ੍ਧਭਾਵਂ ਵਤ੍ਵਾ ਮਯ੍ਹਂ ਆਚਰਿਯਸ੍ਸ ਆਰੋਚੇਸ੍ਸਾਮੀ’’ਤਿ ਭਗਵਨ੍ਤਂ ਆਪੁਚ੍ਛਿਤ੍ਵਾ ਭਿਕ੍ਖੁਸਙ੍ਘਂ ਵਨ੍ਦਿਤ੍ਵਾ ਨਿਕ੍ਖਮਿ.

ਆਚਰਿਯਸ੍ਸ ਸਨ੍ਤਿਕਞ੍ਚ ਪਨ ਗਨ੍ਤ੍ਵਾ – ‘‘ਕਚ੍ਚਿ, ਤਾਤ ਉਤ੍ਤਰ, ਤਂ ਭਵਨ੍ਤਂ ਗੋਤਮਂ ਤਥਾਸਨ੍ਤਂਯੇਵ ਸਦ੍ਦੋ ਅਬ੍ਭੁਗ੍ਗਤੋ’’ਤਿ ਪੁਚ੍ਛਿਤੋ, ‘‘ਆਚਰਿਯ, ਕਿਂ ਵਦੇਸਿ? ਚਕ੍ਕਵਾਲ਼ਂ ਅਤਿਸਮ੍ਬਾਧਂ, ਭਵਗ੍ਗਂ ਅਤਿਨੀਚਂ, ਤਸ੍ਸ ਹਿ, ਭੋਤੋ ਗੋਤਮਸ੍ਸ ਆਕਾਸਂ ਵਿਯ ਅਪਰਿਯਨ੍ਤੋ ਗੁਣਗਣੋ. ਤਥਾਸਨ੍ਤਂਯੇਵ, ਭੋ, ਤਂ ਭਵਨ੍ਤਂ ਗੋਤਮ’’ਨ੍ਤਿਆਦੀਨਿ ਵਤ੍ਵਾ ਯਥਾਦਿਟ੍ਠਾਨਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ ਪਟਿਪਾਟਿਯਾ ਆਚਿਕ੍ਖਿਤ੍ਵਾ ਕਿਰਿਯਸਮਾਚਾਰਂ ਆਚਿਕ੍ਖਿ. ਤੇਨ ਵੁਤ੍ਤਂ – ‘‘ਅਥ ਖੋ ਉਤ੍ਤਰੋ ਮਾਣਵੋ…ਪੇ… ਏਦਿਸੋ ਚ ਏਦਿਸੋ ਚ ਭਵਂ ਗੋਤਮੋ ਤਤੋ ਚ ਭਿਯ੍ਯੋ’’ਤਿ.

੩੮੬. ਤਤ੍ਥ ਸੁਪ੍ਪਤਿਟ੍ਠਿਤਪਾਦੋਤਿ ਯਥਾ ਹਿ ਅਞ੍ਞੇਸਂ ਭੂਮਿਯਂ ਪਾਦਂ ਠਪੇਨ੍ਤਾਨਂ ਅਗ੍ਗਤਲਂ ਵਾ ਪਣ੍ਹਿ ਵਾ ਪਸ੍ਸਂ ਵਾ ਪਠਮਂ ਫੁਸਤਿ, ਵੇਮਜ੍ਝਂ ਵਾ ਪਨ ਛਿਦ੍ਦਂ ਹੋਤਿ, ਉਕ੍ਖਿਪਨ੍ਤਾਨਮ੍ਪਿ ਅਗ੍ਗਤਲਾਦੀਸੁ ਏਕਕੋਟ੍ਠਾਸੋਵ ਪਠਮਂ ਉਟ੍ਠਹਤਿ, ਨ ਏਵਂ ਤਸ੍ਸ. ਤਸ੍ਸ ਪਨ ਸੁਵਣ੍ਣਪਾਦੁਕਤਲਂ ਵਿਯ ਏਕਪ੍ਪਹਾਰੇਨੇਵ ਸਕਲਂ ਪਾਦਤਲਂ ਭੂਮਿਂ ਫੁਸਤਿ, ਭੂਮਿਤੋ ਉਟ੍ਠਹਤਿ. ਤਸ੍ਮਾ ‘‘ਸੁਪ੍ਪਤਿਟ੍ਠਿਤਪਾਦੋ ਖੋ ਪਨ ਸੋ ਭਵਂ ਗੋਤਮੋ’’ਤਿ ਵਦਤਿ.

ਤਤ੍ਰਿਦਂ ਭਗਵਤੋ ਸੁਪ੍ਪਤਿਟ੍ਠਿਤਪਾਦਤਾਯ – ਸਚੇਪਿ ਹਿ ਭਗਵਾ ਅਨੇਕਸਤਪੋਰਿਸਂ ਨਰਕਂ ਅਕ੍ਕਮਿਸ੍ਸਾਮੀਤਿ ਪਾਦਂ ਨੀਹਰਤਿ, ਤਾਵਦੇਵ ਨਿਨ੍ਨਟ੍ਠਾਨਂ ਵਾਤਪੂਰਿਤਂ ਵਿਯ ਕਮ੍ਮਾਰਭਸ੍ਤਂ ਉਨ੍ਨਮਿਤ੍ਵਾ ਪਥਵੀਸਮਂ ਹੋਤਿ, ਉਨ੍ਨਤਟ੍ਠਾਨਮ੍ਪਿ ਅਨ੍ਤੋ ਪਵਿਸਤਿ. ਦੂਰੇ ਅਕ੍ਕਮਿਸ੍ਸਾਮੀਤਿ ਅਭਿਨੀਹਰਨ੍ਤਸ੍ਸ ਸਿਨੇਰੁਪ੍ਪਮਾਣੋਪਿ ਪਬ੍ਬਤੋ ਸੇਦਿਤਵੇਤ੍ਤਙ੍ਕੁਰੋ ਵਿਯ ਨਮਿਤ੍ਵਾ ਪਾਦਸਮੀਪਂ ਆਗਚ੍ਛਤਿ. ਤਥਾ ਹਿਸ੍ਸ ਯਮਕਪਾਟਿਹਾਰਿਯਂ ਕਤ੍ਵਾ ਯੁਗਨ੍ਧਰਪਬ੍ਬਤਂ ਅਕ੍ਕਮਿਸ੍ਸਾਮੀਤਿ ਪਾਦੇ ਅਭਿਨੀਹਰਤੋ ਪਬ੍ਬਤੋ ਨਮਿਤ੍ਵਾ ਪਾਦਸਮੀਪਂ ਆਗਤੋ, ਸੋ ਤਂ ਅਕ੍ਕਮਿਤ੍ਵਾ ਦੁਤਿਯਪਾਦੇਨ ਤਾਵਤਿਂਸਭਵਨਂ ਅਕ੍ਕਮਿ. ਨ ਹਿ ਚਕ੍ਕਲਕ੍ਖਣੇਨ ਪਤਿਟ੍ਠਾਤਬ੍ਬਟ੍ਠਾਨਂ ਵਿਸਮਂ ਭਵਿਤੁਂ ਸਕ੍ਕੋਤਿ. ਖਾਣੁ ਵਾ ਕਣ੍ਡਕੋ ਵਾ ਸਕ੍ਖਰਕਥਲਾ ਵਾ ਉਚ੍ਚਾਰਪਸ੍ਸਾਵੋ ਵਾ ਖੇਲ਼ਸਿਙ੍ਘਾਣਿਕਾਦੀਨਿ ਵਾ ਪੁਰਿਮਤਰਾਵ ਅਪਗਚ੍ਛਨ੍ਤਿ, ਤਤ੍ਥ ਤਤ੍ਥੇਵ ਚ ਪਥਵਿਂ ਪਵਿਸਨ੍ਤਿ. ਤਥਾਗਤਸ੍ਸ ਹਿ ਸੀਲਤੇਜੇਨ ਪਞ੍ਞਾਤੇਜੇਨ ਧਮ੍ਮਤੇਜੇਨ ਦਸਨ੍ਨਂ ਪਾਰਮੀਨਂ ਆਨੁਭਾਵੇਨ ਅਯਂ ਮਹਾਪਥਵੀ ਸਮਾ ਮੁਦੁ ਪੁਪ੍ਫਾਭਿਕਿਣ੍ਣਾ ਹੋਤਿ. ਤਤ੍ਰ ਤਥਾਗਤੋ ਸਮਂ ਪਾਦਂ ਨਿਕ੍ਖਿਪਤਿ, ਸਮਂ ਉਦ੍ਧਰਤਿ, ਸਬ੍ਬਾਵਨ੍ਤੇਹਿ ਪਾਦਤਲੇਹਿ ਭੂਮਿਂ ਫੁਸਤਿ.

ਚਕ੍ਕਾਨੀਤਿ ਦ੍ਵੀਸੁ ਪਾਦੇਸੁ ਦ੍ਵੇ ਚਕ੍ਕਾਨਿ. ਤੇਸਂ ਅਰਾ ਚ ਨੇਮਿ ਚ ਨਾਭਿ ਚ ਪਾਲ਼ਿਯਂ ਵੁਤ੍ਤਾਵ. ਸਬ੍ਬਾਕਾਰਪਰਿਪੂਰਾਨੀਤਿ ਇਮਿਨਾ ਪਨ ਅਯਂ ਵਿਸੇਸੋ ਵੇਦਿਤਬ੍ਬੋ – ਤੇਸਂ ਕਿਰ ਚਕ੍ਕਾਨਂ ਪਾਦਤਲਸ੍ਸ ਮਜ੍ਝੇ ਨਾਭਿ ਦਿਸ੍ਸਤਿ, ਨਾਭਿਪਰਿਚ੍ਛਿਨ੍ਨਾ ਵਟ੍ਟਲੇਖਾ ਦਿਸ੍ਸਤਿ, ਨਾਭਿਮੁਖਪਰਿਕ੍ਖੇਪਪਟ੍ਟੋ ਦਿਸ੍ਸਤਿ, ਪਨਾਲ਼ਿਮੁਖਂ ਦਿਸ੍ਸਤਿ, ਅਰਾ ਦਿਸ੍ਸਨ੍ਤਿ, ਅਰੇਸੁ ਵਟ੍ਟਲੇਖਾ ਦਿਸ੍ਸਨ੍ਤਿ, ਨੇਮੀ ਦਿਸ੍ਸਨ੍ਤਿ, ਨੇਮਿਮਣਿਕਾ ਦਿਸ੍ਸਨ੍ਤਿ. ਇਦਂ ਤਾਵ ਪਾਲ਼ਿਆਗਤਮੇਵ.

ਸਮ੍ਬਹੁਲਵਾਰੋ ਪਨ ਅਨਾਗਤੋ, ਸੋ ਏਵਂ ਦਟ੍ਠਬ੍ਬੋ – ਸਤ੍ਤਿ ਸਿਰਿ ਵਚ੍ਛੋ ਨਨ੍ਦਿ ਸੋਵਤ੍ਤਿਕੋ ਵਟਂਸਕੋ ਵਡ੍ਢਮਾਨਕਂ ਮਚ੍ਛਯੁਗਲਂ ਭਦ੍ਦਪੀਠਂ ਅਙ੍ਕੁਸਂ ਤੋਮਰੋ ਪਾਸਾਦੋ ਤੋਰਣਂ ਸੇਤਚ੍ਛਤ੍ਤਂ ਖਗ੍ਗੋ ਤਾਲਵਣ੍ਟਂ ਮੋਰਹਤ੍ਥਕੋ ਵਾਲ਼ਬੀਜਨੀ ਉਣ੍ਹੀਸਂ ਪਤ੍ਤੋ ਮਣਿ ਕੁਸੁਮਦਾਮਂ ਨੀਲੁਪ੍ਪਲਂ ਰਤ੍ਤੁਪ੍ਪਲਂ ਸੇਤੁਪ੍ਪਲਂ ਪਦੁਮਂ ਪੁਣ੍ਡਰੀਕਂ ਪੁਣ੍ਣਘਟੋ ਪੁਣ੍ਣਪਾਤਿ ਸਮੁਦ੍ਦੋ ਚਕ੍ਕਵਾਲ਼ੋ ਹਿਮਵਾ ਸਿਨੇਰੁ ਚਨ੍ਦਿਮਸੂਰਿਯਾ ਨਕ੍ਖਤ੍ਤਾਨਿ ਚਤ੍ਤਾਰੋ ਮਹਾਦੀਪਾ ਦ੍ਵੇਪਰਿਤ੍ਤਦੀਪਸਹਸ੍ਸਾਨਿ, ਅਨ੍ਤਮਸੋ ਚਕ੍ਕਵਤ੍ਤਿਰਞ੍ਞੋ ਪਰਿਸਂ ਉਪਾਦਾਯ ਸਬ੍ਬੋ ਚਕ੍ਕਲਕ੍ਖਣਸ੍ਸੇਵ ਪਰਿਵਾਰੋ.

ਆਯਤਪਣ੍ਹੀਤਿ ਦੀਘਪਣ੍ਹਿ, ਪਰਿਪੁਣ੍ਣਪਣ੍ਹੀਤਿ ਅਤ੍ਥੋ. ਯਥਾ ਹਿ ਅਞ੍ਞੇਸਂ ਅਗ੍ਗਪਾਦੋ ਦੀਘੋ ਹੋਤਿ, ਪਣ੍ਹਿਮਤ੍ਥਕੇ ਜਙ੍ਘਾ ਪਤਿਟ੍ਠਾਤਿ, ਪਣ੍ਹਿ ਤਚ੍ਛੇਤ੍ਵਾ ਠਪਿਤਾ ਵਿਯ ਹੋਤਿ, ਨ ਏਵਂ ਤਥਾਗਤਸ੍ਸ. ਤਥਾਗਤਸ੍ਸ ਪਨ ਚਤੂਸੁ ਕੋਟ੍ਠਾਸੇਸੁ ਦ੍ਵੇ ਕੋਟ੍ਠਾਸਾ ਅਗ੍ਗਪਾਦੋ ਹੋਤਿ, ਤਤਿਯੇ ਕੋਟ੍ਠਾਸੇ ਜਙ੍ਘਾ ਪਤਿਟ੍ਠਾਤਿ, ਚਤੁਤ੍ਥੇ ਕੋਟ੍ਠਾਸੇ ਆਰਗ੍ਗੇਨ ਵਟ੍ਟੇਤ੍ਵਾ ਠਪਿਤਾ ਵਿਯ ਰਤ੍ਤਕਮ੍ਬਲੇ ਗੇਣ੍ਡੁਕਸਦਿਸਾ ਪਣ੍ਹਿ ਹੋਤਿ.

ਦੀਘਙ੍ਗੁਲੀਤਿ ਯਥਾ ਅਞ੍ਞੇਸਂ ਕਾਚਿ ਅਙ੍ਗੁਲਿ ਦੀਘਾ ਹੋਤਿ, ਕਾਚਿ ਰਸ੍ਸਾ, ਨ ਏਵਂ ਤਥਾਗਤਸ੍ਸ. ਤਥਾਗਤਸ੍ਸ ਪਨ ਮਕ੍ਕਟਸ੍ਸੇਵ ਦੀਘਹਤ੍ਥਪਾਦਙ੍ਗੁਲਿਯੋ ਮੂਲੇ ਥੂਲਾ ਅਨੁਪੁਬ੍ਬੇਨ ਗਨ੍ਤ੍ਵਾ ਅਗ੍ਗੇ ਤਨੁਕਾ ਨਿਯ੍ਯਾਸਤੇਲੇਨ ਮਦ੍ਦਿਤ੍ਵਾ ਵਟ੍ਟਿਤਹਰਿਤਾਲਵਟ੍ਟਿਸਦਿਸਾ ਹੋਨ੍ਤਿ. ਤੇਨ ਵੁਤ੍ਤਂ ‘‘ਦੀਘਙ੍ਗੁਲੀ’’ਤਿ.

ਮੁਦੁਤਲੁਨਹਤ੍ਥਪਾਦੋਤਿ ਸਪ੍ਪਿਮਣ੍ਡੇ ਓਸਾਦੇਤ੍ਵਾ ਠਪਿਤਂ ਸਤਵਾਰਵਿਹਤਕਪ੍ਪਾਸਪਟਲਂ ਵਿਯ ਮੁਦੂ, ਜਾਤਮਤ੍ਤਕੁਮਾਰਸ੍ਸ ਵਿਯ ਚ ਨਿਚ੍ਚਕਾਲਂ ਤਲੁਨਾ ਚ ਹਤ੍ਥਪਾਦਾ ਅਸ੍ਸਾਤਿ ਮੁਦੁਤਲੁਨਹਤ੍ਥਪਾਦੋ.

ਜਾਲਹਤ੍ਥਪਾਦੋਤਿ ਨ ਚਮ੍ਮੇਨ ਪਟਿਬਦ੍ਧਅਙ੍ਗੁਲਨ੍ਤਰੋ. ਏਦਿਸੋ ਹਿ ਫਣਹਤ੍ਥਕੋ ਪੁਰਿਸਦੋਸੇਨ ਉਪਹਤੋ ਪਬ੍ਬਜ੍ਜਮ੍ਪਿ ਨ ਲਭਤਿ. ਤਥਾਗਤਸ੍ਸ ਪਨ ਚਤਸ੍ਸੋ ਹਤ੍ਥਙ੍ਗੁਲਿਯੋ ਪਞ੍ਚਪਿ ਪਾਦਙ੍ਗੁਲਿਯੋ ਏਕਪ੍ਪਮਾਣਾ ਹੋਨ੍ਤਿ, ਤਾਸਂ ਏਕਪ੍ਪਮਾਣਤ੍ਤਾਯ ਯਵਲਕ੍ਖਣਂ ਅਞ੍ਞਮਞ੍ਞਂ ਪਟਿਵਿਜ੍ਝਿਤ੍ਵਾ ਤਿਟ੍ਠਤਿ. ਅਥਸ੍ਸ ਹਤ੍ਥਪਾਦਾ ਕੁਸਲੇਨ ਵਡ੍ਢਕਿਨਾ ਯੋਜਿਤਜਾਲਵਾਤਪਾਨਸਦਿਸਾ ਹੋਨ੍ਤਿ. ਤੇਨ ਵੁਤ੍ਤਂ ‘‘ਜਾਲਹਤ੍ਥਪਾਦੋ’’ਤਿ.

ਉਦ੍ਧਂ ਪਤਿਟ੍ਠਿਤਗੋਪ੍ਫਕਤ੍ਤਾ ਉਸ੍ਸਙ੍ਖਾ ਪਾਦਾ ਅਸ੍ਸਾਤਿ ਉਸ੍ਸਙ੍ਖਪਾਦੋ. ਅਞ੍ਞੇਸਞ੍ਹਿ ਪਿਟ੍ਠਿਪਾਦੇ ਗੋਪ੍ਫਕਾ ਹੋਨ੍ਤਿ. ਤੇਨ ਤੇਸਂ ਪਾਦਾ ਆਣਿਬਦ੍ਧਾ ਵਿਯ ਥਦ੍ਧਾ ਹੋਨ੍ਤਿ, ਨ ਯਥਾਸੁਖਂ ਪਰਿਵਤ੍ਤਨ੍ਤਿ, ਗਚ੍ਛਨ੍ਤਾਨਂ ਪਾਦਤਲਾਨਿ ਨ ਦਿਸ੍ਸਨ੍ਤਿ. ਤਥਾਗਤਸ੍ਸ ਪਨ ਅਭਿਰੁਹਿਤ੍ਵਾ ਉਪਰਿ ਗੋਪ੍ਫਕਾ ਪਤਿਟ੍ਠਹਨ੍ਤਿ. ਤੇਨਸ੍ਸ ਨਾਭਿਤੋ ਪਟ੍ਠਾਯ ਉਪਰਿਮਕਾਯੋ ਨਾਵਾਯ ਠਪਿਤਸੁਵਣ੍ਣਪਟਿਮਾ ਵਿਯ ਨਿਚ੍ਚਲੋ ਹੋਤਿ, ਅਧੋਕਾਯੋਵ ਇਞ੍ਜਤਿ. ਸੁਖੇਨ ਪਾਦਾ ਪਰਿਵਤ੍ਤਨ੍ਤਿ. ਪੁਰਤੋਪਿ ਪਚ੍ਛਤੋਪਿ ਉਭਯਪਸ੍ਸੇਸੁਪਿ ਠਤ੍ਵਾ ਪਸ੍ਸਨ੍ਤਾਨਂ ਪਾਦਤਲਾਨਿ ਪਞ੍ਞਾਯਨ੍ਤਿ, ਨ ਹਤ੍ਥੀਨਂ ਵਿਯ ਪਚ੍ਛਤੋਯੇਵ.

ਏਣਿਜਙ੍ਘੋਤਿ ਏਣਿਮਿਗਸਦਿਸਜਙ੍ਘੋ ਮਂਸੁਸ੍ਸਦੇਨ ਪਰਿਪੁਣ੍ਣਜਙ੍ਘੋ, ਨ ਏਕਤੋ ਬਦ੍ਧਪਿਣ੍ਡਿਕਮਂਸੋ, ਸਮਨ੍ਤਤੋ ਸਮਸਣ੍ਠਿਤੇਨ ਮਂਸੇਨ ਪਰਿਕ੍ਖਿਤ੍ਤਾਹਿ ਸੁਵਟ੍ਟਿਤਾਹਿ ਸਾਲਿਗਬ੍ਭਸਦਿਸਾਹਿ ਜਙ੍ਘਾਹਿ ਸਮਨ੍ਨਾਗਤੋਤਿ ਅਤ੍ਥੋ.

ਅਨੋਨਮਨ੍ਤੋਤਿ ਅਨਮਨ੍ਤੋ. ਏਤੇਨਸ੍ਸ ਅਖੁਜ੍ਜਅਵਾਮਨਭਾਵੋ ਦੀਪਿਤੋ. ਅਵਸੇਸਜਨਾ ਹਿ ਖੁਜ੍ਜਾ ਵਾ ਹੋਨ੍ਤਿ ਵਾਮਨਾ ਵਾ, ਖੁਜ੍ਜਾਨਂ ਉਪਰਿਮਕਾਯੋ ਅਪਰਿਪੁਣ੍ਣੋ ਹੋਤਿ, ਵਾਮਨਾਨਂ ਹੇਟ੍ਠਿਮਕਾਯੋ. ਤੇ ਅਪਰਿਪੁਣ੍ਣਕਾਯਤ੍ਤਾ ਨ ਸਕ੍ਕੋਨ੍ਤਿ ਅਨੋਨਮਨ੍ਤਾ ਜਣ੍ਣੁਕਾਨਿ ਪਰਿਮਜ੍ਜਿਤੁਂ. ਤਥਾਗਤੋ ਪਨ ਪਰਿਪੁਣ੍ਣਉਭਯਕਾਯਤ੍ਤਾ ਸਕ੍ਕੋਤਿ.

ਉਸਭਵਾਰਣਾਦੀਨਂ ਵਿਯ ਸੁਵਣ੍ਣਪਦੁਮਕਣ੍ਣਿਕਸਦਿਸੇ ਕੋਸੇ ਓਹਿਤਂ ਪਟਿਚ੍ਛਨ੍ਨਂ ਵਤ੍ਥਗੁਯ੍ਹਂ ਅਸ੍ਸਾਤਿ ਕੋਸੋਹਿਤਵਤ੍ਥਗੁਯ੍ਹੋ. ਵਤ੍ਥਗੁਯ੍ਹਨ੍ਤਿ ਵਤ੍ਥੇਨ ਗੂਹਿਤਬ੍ਬਂ ਅਙ੍ਗਜਾਤਂ ਵੁਚ੍ਚਤਿ.

ਸੁਵਣ੍ਣਵਣ੍ਣੋਤਿ ਜਾਤਿਹਿਙ੍ਗੁਲਕੇਨ ਮਜ੍ਜਿਤ੍ਵਾ ਦੀਪਿਦਾਠਾਯ ਘਂਸਿਤ੍ਵਾ ਗੇਰੁਕਪਰਿਕਮ੍ਮਂ ਕਤ੍ਵਾ ਠਪਿਤਘਨਸੁਵਣ੍ਣਰੂਪਕਸਦਿਸੋਤਿ ਅਤ੍ਥੋ. ਏਤੇਨਸ੍ਸ ਘਨਸਿਨਿਦ੍ਧਸਣ੍ਹਸਰੀਰਤਂ ਦਸ੍ਸੇਤ੍ਵਾ ਛਵਿਵਣ੍ਣਦਸ੍ਸਨਤ੍ਥਂ ਕਞ੍ਚਨਸਨ੍ਨਿਭਤ੍ਤਚੋਤਿ ਵੁਤ੍ਤਂ, ਪੁਰਿਮਸ੍ਸ ਵਾ ਵੇਵਚਨਮੇਵ ਏਤਂ.

ਰਜੋਜਲ੍ਲਨ੍ਤਿ ਰਜੋ ਵਾ ਮਲਂ ਵਾ. ਨ ਉਪਲਿਮ੍ਪਤੀਤਿ ਨ ਲਗ੍ਗਤਿ, ਪਦੁਮਪਲਾਸਤੋ ਉਦਕਬਿਨ੍ਦੁ ਵਿਯ ਵਿਵਟ੍ਟਤਿ. ਹਤ੍ਥਧੋਵਨਪਾਦਧੋਵਨਾਦੀਨਿ ਪਨ ਉਤੁਗ੍ਗਹਣਤ੍ਥਾਯ ਚੇਵ ਦਾਯਕਾਨਂ ਪੁਞ੍ਞਫਲਤ੍ਥਾਯ ਚ ਬੁਦ੍ਧਾ ਕਰੋਨ੍ਤਿ, ਵਤ੍ਤਸੀਸੇਨਾਪਿ ਚ ਕਰੋਨ੍ਤਿਯੇਵ. ਸੇਨਾਸਨਂ ਪਵਿਸਨ੍ਤੇਨ ਹਿ ਭਿਕ੍ਖੁਨਾ ਪਾਦੇ ਧੋਵਿਤ੍ਵਾ ਪਵਿਸਿਤਬ੍ਬਨ੍ਤਿ ਵੁਤ੍ਤਮੇਤਂ.

ਉਦ੍ਧਗ੍ਗਲੋਮੋਤਿ ਆਵਟ੍ਟਪਰਿਯੋਸਾਨੇ ਉਦ੍ਧਗ੍ਗਾਨਿ ਹੁਤ੍ਵਾ ਮੁਖਸੋਭਂ ਉਲ੍ਲੋਕਯਮਾਨਾਨਿ ਵਿਯ ਠਿਤਾਨਿ ਲੋਮਾਨਿ ਅਸ੍ਸਾਤਿ ਉਦ੍ਧਗ੍ਗਲੋਮੋ.

ਬ੍ਰਹ੍ਮੁਜੁਗਤ੍ਤੋਤਿ ਬ੍ਰਹ੍ਮਾ ਵਿਯ ਉਜੁਗਤ੍ਤੋ, ਉਜੁਮੇਵ ਉਗ੍ਗਤਦੀਘਸਰੀਰੋ. ਯੇਭੁਯ੍ਯੇਨ ਹਿ ਸਤ੍ਤਾ ਖਨ੍ਧੇ ਕਟਿਯਂ ਜਾਣੂਸੂਤਿ ਤੀਸੁ ਠਾਨੇਸੁ ਨਮਨ੍ਤਿ. ਤੇ ਕਟਿਯਂ ਨਮਨ੍ਤਾ ਪਚ੍ਛਤੋ ਨਮਨ੍ਤਿ, ਇਤਰੇਸੁ ਦ੍ਵੀਸੁ ਠਾਨੇਸੁ ਪੁਰਤੋ. ਦੀਘਸਰੀਰਾ ਪਨੇਕੇ ਪਸ੍ਸਵਙ੍ਕਾ ਹੋਨ੍ਤਿ, ਏਕੇ ਮੁਖਂ ਉਨ੍ਨਾਮੇਤ੍ਵਾ ਨਕ੍ਖਤ੍ਤਾਨਿ ਗਣਯਨ੍ਤਾ ਵਿਯ ਚਰਨ੍ਤਿ, ਏਕੇ ਅਪ੍ਪਮਂਸਲੋਹਿਤਾ ਸੂਲਸਦਿਸਾ ਹੋਨ੍ਤਿ, ਪਵੇਧਮਾਨਾ ਗਚ੍ਛਨ੍ਤਿ. ਤਥਾਗਤੋ ਪਨ ਉਜੁਮੇਵ ਉਗ੍ਗਨ੍ਤ੍ਵਾ ਦੀਘਪ੍ਪਮਾਣੋ ਦੇਵਨਗਰੇ ਉਸ੍ਸਿਤਸੁਵਣ੍ਣਤੋਰਣਂ ਵਿਯ ਹੋਤਿ.

ਸਤ੍ਤੁਸ੍ਸਦੋਤਿ ਦ੍ਵੇ ਹਤ੍ਥਪਿਟ੍ਠਿਯੋ ਦ੍ਵੇ ਪਾਦਪਿਟ੍ਠਿਯੋ ਦ੍ਵੇ ਅਂਸਕੂਟਾਨਿ ਖਨ੍ਧੋਤਿ ਇਮੇਸੁ ਸਤ੍ਤਸੁ ਠਾਨੇਸੁ ਪਰਿਪੁਣ੍ਣਮਂਸੁਸ੍ਸਦੋ ਅਸ੍ਸਾਤਿ ਸਤ੍ਤੁਸ੍ਸਦੋ. ਅਞ੍ਞੇਸਂ ਪਨ ਹਤ੍ਥਪਾਦਪਿਟ੍ਠੀਸੁ ਨ੍ਹਾਰੁਜਾਲਾ ਪਞ੍ਞਾਯਨ੍ਤਿ, ਅਂਸਕੂਟਖਨ੍ਧੇਸੁ ਅਟ੍ਠਿਕੋਟਿਯੋ, ਤੇ ਮਨੁਸ੍ਸਪੇਤਾ ਵਿਯ ਖਾਯਨ੍ਤਿ, ਨ ਤਥਾਗਤੋ. ਤਥਾਗਤੋ ਪਨ ਸਤ੍ਤਸੁ ਠਾਨੇਸੁ ਪਰਿਪੁਣ੍ਣਮਂਸੁਸ੍ਸਦਤ੍ਤਾ ਨਿਗੂਲ਼੍ਹਨ੍ਹਾਰੁਜਾਲੇਹਿ ਹਤ੍ਥਪਿਟ੍ਠਾਦੀਹਿ ਵਟ੍ਟੇਤ੍ਵਾ ਠਪਿਤਸੁਵਣ੍ਣਵਣ੍ਣਾਲਿਙ੍ਗਸਦਿਸੇਨ ਖਨ੍ਧੇਨ ਸਿਲਾਰੂਪਕਂ ਵਿਯ ਚਿਤ੍ਤਕਮ੍ਮਰੂਪਕਂ ਵਿਯ ਚ ਖਾਯਤਿ.

ਸੀਹਸ੍ਸ ਪੁਬ੍ਬਦ੍ਧਂ ਵਿਯ ਕਾਯੋ ਅਸ੍ਸਾਤਿ ਸੀਹਪੁਬ੍ਬਦ੍ਧਕਾਯੋ. ਸੀਹਸ੍ਸ ਹਿ ਪੁਰਤ੍ਥਿਮਕਾਯੋਵ ਪਰਿਪੁਣ੍ਣੋ ਹੋਤਿ, ਪਚ੍ਛਿਮਕਾਯੋ ਅਪਰਿਪੁਣ੍ਣੋ. ਤਥਾਗਤਸ੍ਸ ਪਨ ਸੀਹਸ੍ਸ ਪੁਬ੍ਬਦ੍ਧਕਾਯੋਵ ਸਬ੍ਬੋ ਕਾਯੋ ਪਰਿਪੁਣ੍ਣੋ. ਸੋਪਿ ਸੀਹਸ੍ਸੇਵ ਨ ਤਤ੍ਥ ਤਤ੍ਥ ਵਿਨਤੁਨ੍ਨਤਾਦਿਵਸੇਨ ਦੁਸ੍ਸਣ੍ਠਿਤਵਿਸਣ੍ਠਿਤੋ, ਦੀਘਯੁਤ੍ਤਠਾਨੇ ਪਨ ਦੀਘੋ, ਰਸ੍ਸਕਿਸਥੂਲਅਨੁਵਟ੍ਟਿਤਯੁਤ੍ਤਟ੍ਠਾਨੇਸੁ ਤਥਾਵਿਧੋਵ ਹੋਤਿ. ਵੁਤ੍ਤਞ੍ਹੇਤਂ –

‘‘ਮਨਾਪਿਯੇ ਚ ਖੋ, ਭਿਕ੍ਖਵੇ, ਕਮ੍ਮਵਿਪਾਕੇ ਪਚ੍ਚੁਪਟ੍ਠਿਤੇ ਯੇਹਿ ਅਙ੍ਗੇਹਿ ਦੀਘੇਹਿ ਸੋਭਤਿ, ਤਾਨਿ ਅਙ੍ਗਾਨਿ ਦੀਘਾਨਿ ਸਣ੍ਠਹਨ੍ਤਿ. ਯੇਹਿ ਅਙ੍ਗੇਹਿ ਰਸ੍ਸੇਹਿ ਸੋਭਤਿ, ਤਾਨਿ ਅਙ੍ਗਾਨਿ ਰਸ੍ਸਾਨਿ ਸਣ੍ਠਹਨ੍ਤਿ. ਯੇਹਿ ਅਙ੍ਗੇਹਿ ਥੂਲੇਹਿ ਸੋਭਤਿ, ਤਾਨਿ ਅਙ੍ਗਾਨਿ ਥੂਲਾਨਿ ਸਣ੍ਠਹਨ੍ਤਿ. ਯੇਹਿ ਅਙ੍ਗੇਹਿ ਕਿਸੇਹਿ ਸੋਭਤਿ, ਤਾਨਿ ਅਙ੍ਗਾਨਿ ਕਿਸਾਨਿ ਸਣ੍ਠਹਨ੍ਤਿ. ਯੇਹਿ ਅਙ੍ਗੇਹਿ ਵਟ੍ਟੇਹਿ ਸੋਭਤਿ, ਤਾਨਿ ਅਙ੍ਗਾਨਿ ਵਟ੍ਟਾਨਿ ਸਣ੍ਠਹਨ੍ਤੀ’’ਤਿ.

ਇਤਿ ਨਾਨਾਚਿਤ੍ਤੇਨ ਪੁਞ੍ਞਚਿਤ੍ਤੇਨ ਚਿਤ੍ਤਿਤੋ ਦਸਹਿ ਪਾਰਮੀਹਿ ਸਜ੍ਜਿਤੋ ਤਥਾਗਤਸ੍ਸ ਅਤ੍ਤਭਾਵੋ, ਤਸ੍ਸ ਲੋਕੇ ਸਬ੍ਬਸਿਪ੍ਪਿਨੋ ਵਾ ਇਦ੍ਧਿਮਨ੍ਤੋ ਵਾ ਪਟਿਰੂਪਕਮ੍ਪਿ ਕਾਤੁਂ ਨ ਸਕ੍ਕੋਨ੍ਤਿ.

ਚਿਤਨ੍ਤਰਂਸੋਤਿ ਅਨ੍ਤਰਂਸਂ ਵੁਚ੍ਚਤਿ ਦ੍ਵਿਨ੍ਨਂ ਕੋਟ੍ਟਾਨਮਨ੍ਤਰਂ, ਤਂ ਚਿਤਂ ਪਰਿਪੁਣ੍ਣਮਸ੍ਸਾਤਿ ਚਿਤਨ੍ਤਰਂਸੋ. ਅਞ੍ਞੇਸਞ੍ਹਿ ਤਂ ਠਾਨਂ ਨਿਨ੍ਨਂ ਹੋਤਿ, ਦ੍ਵੇ ਪਿਟ੍ਠਿਕੋਟ੍ਟਾ ਪਾਟਿਯੇਕ੍ਕਂ ਪਞ੍ਞਾਯਨ੍ਤਿ. ਤਥਾਗਤਸ੍ਸ ਪਨ ਕਟਿਤੋ ਪਟ੍ਠਾਯ ਮਂਸਪਟਲਂ ਯਾਵ ਖਨ੍ਧਾ ਉਗ੍ਗਮ੍ਮ ਸਮੁਸ੍ਸਿਤਸੁਵਣ੍ਣਫਲਕਂ ਵਿਯ ਪਿਟ੍ਠਿਂ ਛਾਦੇਤ੍ਵਾ ਪਤਿਟ੍ਠਿਤਂ.

ਨਿਗ੍ਰੋਧਪਰਿਮਣ੍ਡਲੋਤਿ ਨਿਗ੍ਰੋਧੋ ਵਿਯ ਪਰਿਮਣ੍ਡਲੋ. ਯਥਾ ਪਣ੍ਣਾਸਹਤ੍ਥਤਾਯ ਵਾ ਸਤਹਤ੍ਥਤਾਯ ਵਾ ਸਮਕ੍ਖਨ੍ਧਸਾਖੋ ਨਿਗ੍ਰੋਧੋ ਦੀਘਤੋਪਿ ਵਿਤ੍ਥਾਰਤੋਪਿ ਏਕਪ੍ਪਮਾਣੋਵ ਹੋਤਿ, ਏਵਂ ਕਾਯਤੋਪਿ ਬ੍ਯਾਮਤੋਪਿ ਏਕਪ੍ਪਮਾਣੋ. ਯਥਾ ਅਞ੍ਞੇਸਂ ਕਾਯੋ ਵਾ ਦੀਘੋ ਹੋਤਿ ਬ੍ਯਾਮੋ ਵਾ, ਨ ਏਵਂ ਵਿਸਮਪ੍ਪਮਾਣੋਤਿ ਅਤ੍ਥੋ. ਤੇਨੇਵ ‘‘ਯਾਵਤਕ੍ਵਸ੍ਸ ਕਾਯੋ’’ਤਿਆਦਿ ਵੁਤ੍ਤਂ. ਤਤ੍ਥ ਯਾਵਤਕੋ ਅਸ੍ਸਾਤਿ ਯਾਵਤਕ੍ਵਸ੍ਸ.

ਸਮਵਟ੍ਟਕ੍ਖਨ੍ਧੋਤਿ ਸਮਵਟ੍ਟਿਤਕ੍ਖਨ੍ਧੋ. ਯਥਾ ਏਕੇ ਕੋਞ੍ਚਾ ਵਿਯ ਬਕਾ ਵਿਯ ਵਰਾਹਾ ਵਿਯ ਚ ਦੀਘਗਲਾ ਵਙ੍ਕਗਲਾ ਪੁਥੁਲਗਲਾ ਚ ਹੋਨ੍ਤਿ, ਕਥਨਕਾਲੇ ਸਿਰਾਜਾਲਂ ਪਞ੍ਞਾਯਤਿ, ਮਨ੍ਦੋ ਸਰੋ ਨਿਕ੍ਖਮਤਿ, ਨ ਏਵਂ ਤਸ੍ਸ. ਤਥਾਗਤਸ੍ਸ ਪਨ ਸੁਵਟ੍ਟਿਤਸੁਵਣ੍ਣਾਲਿਙ੍ਗਸਦਿਸੋ ਖਨ੍ਧੋ ਹੋਤਿ, ਕਥਨਕਾਲੇ ਸਿਰਾਜਾਲਂ ਨ ਪਞ੍ਞਾਯਤਿ, ਮੇਘਸ੍ਸ ਵਿਯ ਗਜ੍ਜਤੋ ਸਰੋ ਮਹਾ ਹੋਤਿ.

ਰਸਗ੍ਗਸਗ੍ਗੀਤਿ ਏਤ੍ਥ ਰਸਂ ਗਸਨ੍ਤੀਤਿ ਰਸਗ੍ਗਸਾ, ਰਸਹਰਣੀਨਮੇਤਂ ਅਧਿਵਚਨਂ, ਤਾ ਅਗ੍ਗਾ ਅਸ੍ਸਾਤਿ ਰਸਗ੍ਗਸਗ੍ਗੀ. ਤਥਾਗਤਸ੍ਸ ਹਿ ਸਤ੍ਤ ਰਸਹਰਣਿਸਹਸ੍ਸਾਨਿ ਉਦ੍ਧਗ੍ਗਾਨਿ ਹੁਤ੍ਵਾ ਗੀਵਾਯਮੇਵ ਪਟਿਮੁਕ੍ਕਾਨਿ. ਤਿਲਫਲਮਤ੍ਤੋਪਿ ਆਹਾਰੋ ਜਿਵ੍ਹਗ੍ਗੇ ਠਪਿਤੋ ਸਬ੍ਬਂ ਕਾਯਂ ਅਨੁਫਰਤਿ, ਤੇਨੇਵ ਮਹਾਪਧਾਨਂ ਪਦਹਨ੍ਤਸ੍ਸ ਏਕਤਣ੍ਡੁਲਾਦੀਹਿਪਿ ਕਾਲ਼ਾਯਯੂਸਪਸਤੇਨਾਪਿ ਕਾਯਸ੍ਸ ਯਾਪਨਂ ਅਹੋਸਿ. ਅਞ੍ਞੇਸਂ ਪਨ ਤਥਾ ਅਭਾਵਾ ਨ ਸਕਲਕਾਯਂ ਓਜਾ ਫਰਤਿ, ਤੇਨ ਤੇ ਬਹ੍ਵਾਬਾਧਾ ਹੋਨ੍ਤਿ. ਇਦਂ ਲਕ੍ਖਣਂ ਅਪ੍ਪਾਬਾਧਤਾਸਙ੍ਖਾਤਸ੍ਸ ਨਿਸ੍ਸਨ੍ਦਫਲਸ੍ਸ ਵਸੇਨ ਪਾਕਟਂ ਹੋਤਿ.

ਸੀਹਸ੍ਸੇਵ ਹਨੁ ਅਸ੍ਸਾਤਿ ਸੀਹਹਨੁ. ਤਤ੍ਥ ਸੀਹਸ੍ਸ ਹੇਟ੍ਠਿਮਹਨੁਮੇਵ ਪਰਿਪੁਣ੍ਣਂ ਹੋਤਿ, ਨ ਉਪਰਿਮਂ. ਤਥਾਗਤਸ੍ਸ ਪਨ ਸੀਹਸ੍ਸ ਹੇਟ੍ਠਿਮਂ ਵਿਯ ਦ੍ਵੇਪਿ ਪਰਿਪੁਣ੍ਣਾਨਿ ਦ੍ਵਾਦਸਿਯਂ ਪਕ੍ਖਸ੍ਸ ਚਨ੍ਦਸਦਿਸਾਨਿ ਹੋਨ੍ਤਿ.

ਚਤ੍ਤਾਲੀਸਦਨ੍ਤੋਤਿਆਦੀਸੁ ਉਪਰਿਮਹਨੁਕੇ ਪਤਿਟ੍ਠਿਤਾ ਵੀਸਤਿ, ਹੇਟ੍ਠਿਮੇ ਵੀਸਤੀਤਿ ਚਤ੍ਤਾਲੀਸ ਦਨ੍ਤਾ ਅਸ੍ਸਾਤਿ ਚਤ੍ਤਾਲੀਸਦਨ੍ਤੋ. ਅਞ੍ਞੇਸਞ੍ਹਿ ਪਰਿਪੁਣ੍ਣਦਨ੍ਤਾਨਮ੍ਪਿ ਦ੍ਵਤ੍ਤਿਂਸ ਦਨ੍ਤਾ ਹੋਨ੍ਤਿ, ਤਥਾਗਤਸ੍ਸ ਚਤ੍ਤਾਲੀਸਂ.

ਅਞ੍ਞੇਸਞ੍ਚ ਕੇਚਿ ਦਨ੍ਤਾ ਉਚ੍ਚਾ ਕੇਚਿ ਨੀਚਾਤਿ ਵਿਸਮਾ ਹੋਨ੍ਤਿ, ਤਥਾਗਤਸ੍ਸ ਪਨ ਅਯਪਟ੍ਟਛਿਨ੍ਨਸਙ੍ਖਪਟਲਂ ਵਿਯ ਸਮਾ.

ਅਞ੍ਞੇਸਂ ਕੁਮ੍ਭੀਲਾਨਂ ਵਿਯ ਦਨ੍ਤਾ ਵਿਰਲ਼ਾ ਹੋਨ੍ਤਿ, ਮਚ੍ਛਮਂਸਾਦੀਨਿ ਖਾਦਨ੍ਤਾਨਂ ਦਨ੍ਤਨ੍ਤਰਂ ਪੂਰਤਿ. ਤਥਾਗਤਸ੍ਸ ਪਨ ਕਨਕਲਤਾਯ ਸਮੁਸ੍ਸਾਪਿਤਵਜਿਰਪਨ੍ਤਿ ਵਿਯ ਅਵਿਰਲ਼ਾ ਤੁਲਿਕਾਯ ਦਸ੍ਸਿਤਪਰਿਚ੍ਛੇਦਾ ਵਿਯ ਦਨ੍ਤਾ ਹੋਨ੍ਤਿ.

ਸੁਸੁਕ੍ਕਦਾਠੋਤਿ ਅਞ੍ਞੇਸਞ੍ਚ ਪੂਤਿਦਨ੍ਤਾ ਉਟ੍ਠਹਨ੍ਤਿ, ਤੇਨ ਕਾਚਿ ਦਾਠਾ ਕਾਲ਼ਾਪਿ ਵਿਵਣ੍ਣਾਪਿ ਹੋਨ੍ਤਿ. ਤਥਾਗਤੋ ਸੁਸੁਕ੍ਕਦਾਠੋ ਓਸਧਿਤਾਰਕਮ੍ਪਿ ਅਤਿਕ੍ਕਮ੍ਮ ਵਿਰੋਚਮਾਨਾਯ ਪਭਾਯ ਸਮਨ੍ਨਾਗਤਦਾਠੋ, ਤੇਨ ਵੁਤ੍ਤਂ ‘‘ਸੁਸੁਕ੍ਕਦਾਠੋ’’ਤਿ.

ਪਹੂਤਜਿਵ੍ਹੋਤਿ ਅਞ੍ਞੇਸਂ ਜਿਵ੍ਹਾ ਥੂਲਾਪਿ ਹੋਤਿ ਕਿਸਾਪਿ ਰਸ੍ਸਾਪਿ ਥਦ੍ਧਾਪਿ ਵਿਸਮਾਪਿ, ਤਥਾਗਤਸ੍ਸ ਪਨ ਮੁਦੁ ਦੀਘਾ ਪੁਥੁਲਾ ਵਣ੍ਣਸਮ੍ਪਨ੍ਨਾ ਹੋਤਿ. ਸੋ ਤਂ ਲਕ੍ਖਣਂ ਪਰਿਯੇਸਿਤੁਂ ਆਗਤਾਨਂ ਕਙ੍ਖਾਵਿਨੋਦਨਤ੍ਥਂ ਮੁਦੁਕਤ੍ਤਾ ਤਂ ਜਿਵ੍ਹਂ ਕਥਿਨਸੂਚਿਂ ਵਿਯ ਵਟ੍ਟੇਤ੍ਵਾ ਉਭੋ ਨਾਸਿਕਸੋਤਾਨਿ ਪਰਾਮਸਤਿ, ਦੀਘਤ੍ਤਾ ਉਭੋ ਕਣ੍ਣਸੋਤਾਨਿ ਪਰਾਮਸਤਿ, ਪੁਥੁਲਤ੍ਤਾ ਕੇਸਨ੍ਤਪਰਿਯੋਸਾਨਂ ਕੇਵਲਮ੍ਪਿ ਨਲਾਟਂ ਪਟਿਚ੍ਛਾਦੇਤਿ. ਏਵਂ ਤਸ੍ਸਾ ਮੁਦੁਦੀਘਪੁਥੁਲਭਾਵਂ ਪਕਾਸੇਨ੍ਤੋ ਕਙ੍ਖਂ ਵਿਨੋਦੇਤਿ. ਏਵਂ ਤਿਲਕ੍ਖਣਸਮ੍ਪਨ੍ਨਂ ਜਿਵ੍ਹਂ ਸਨ੍ਧਾਯ ‘‘ਪਹੂਤਜਿਵ੍ਹੋ’’ਤਿ ਵੁਤ੍ਤਂ.

ਬ੍ਰਹ੍ਮਸ੍ਸਰੋਤਿ ਅਞ੍ਞੇ ਛਿਨ੍ਨਸ੍ਸਰਾਪਿ ਭਿਨ੍ਨਸ੍ਸਰਾਪਿ ਕਾਕਸ੍ਸਰਾਪਿ ਹੋਨ੍ਤਿ, ਤਥਾਗਤੋ ਪਨ ਮਹਾਬ੍ਰਹ੍ਮੁਨੋ ਸਰਸਦਿਸੇਨ ਸਰੇਨ ਸਮਨ੍ਨਾਗਤੋ. ਮਹਾਬ੍ਰਹ੍ਮੁਨੋ ਹਿ ਪਿਤ੍ਤਸੇਮ੍ਹੇਹਿ ਅਪਲਿਬੁਦ੍ਧਤ੍ਤਾ ਸਰੋ ਵਿਸੁਦ੍ਧੋ ਹੋਤਿ. ਤਥਾਗਤੇਨਾਪਿ ਕਤਕਮ੍ਮਂ ਵਤ੍ਥੁਂ ਸੋਧੇਤਿ, ਵਤ੍ਥੁਸ੍ਸ ਸੁਦ੍ਧਤ੍ਤਾ ਨਾਭਿਤੋ ਪਟ੍ਠਾਯ ਸਮੁਟ੍ਠਹਨ੍ਤੋ ਸਰੋ ਵਿਸੁਦ੍ਧੋ ਅਟ੍ਠਙ੍ਗਸਮਨ੍ਨਾਗਤੋਵ ਸਮੁਟ੍ਠਾਤਿ. ਕਰਵਿਕੋ ਵਿਯ ਭਣਤੀਤਿ ਕਰਵਿਕਭਾਣੀ, ਮਤ੍ਤਕਰਵਿਕਰੁਤਮਞ੍ਜੁਘੋਸੋਤਿ ਅਤ੍ਥੋ.

ਤਤ੍ਰਿਦਂ ਕਰਵਿਕਰੁਤਸ੍ਸ ਮਞ੍ਜੁਤਾਯ – ਕਰਵਿਕਸਕੁਣੇ ਕਿਰ ਮਧੁਰਰਸਂ ਅਮ੍ਬਪਕ੍ਕਂ ਮੁਖਤੁਣ੍ਡਕੇਨ ਪਹਰਿਤ੍ਵਾ ਪਗ੍ਘਰਿਤਂ ਰਸਂ ਸਾਯਿਤ੍ਵਾ ਪਕ੍ਖੇਨ ਤਾਲਂ ਦਤ੍ਵਾ ਵਿਕੂਜਮਾਨੇ ਚਤੁਪ੍ਪਦਾਦੀਨਿ ਮਤ੍ਤਾਨਿ ਵਿਯ ਲਲ਼ਿਤੁਂ ਆਰਭਨ੍ਤਿ. ਗੋਚਰਪ੍ਪਸੁਤਾਪਿ ਚਤੁਪ੍ਪਦਾ ਮੁਖਗਤਾਨਿਪਿ ਤਿਣਾਨਿ ਛਡ੍ਡੇਤ੍ਵਾ ਤਂ ਸਦ੍ਦਂ ਸੁਣਨ੍ਤਿ, ਵਾਲ਼ਮਿਗਾ ਖੁਦ੍ਦਕਮਿਗੇ ਅਨੁਬਨ੍ਧਮਾਨਾ ਉਕ੍ਖਿਤ੍ਤਪਾਦਂ ਅਨੁਕ੍ਖਿਪਿਤ੍ਵਾਵ ਤਿਟ੍ਠਨ੍ਤਿ, ਅਨੁਬਦ੍ਧਮਿਗਾਪਿ ਮਰਣਭਯਂ ਹਿਤ੍ਵਾਪਿ ਤਿਟ੍ਠਨ੍ਤਿ, ਆਕਾਸੇ ਪਕ੍ਖਨ੍ਦਪਕ੍ਖਿਨੋਪਿ ਪਕ੍ਖੇ ਪਸਾਰੇਤ੍ਵਾ ਤਿਟ੍ਠਨ੍ਤਿ, ਉਦਕੇ ਮਚ੍ਛਾਪਿ ਕਣ੍ਣਪਟਲਂ ਅਪ੍ਫੋਟੇਨ੍ਤਾ ਤਂ ਸਦ੍ਦਂ ਸੁਣਮਾਨਾਵ ਤਿਟ੍ਠਨ੍ਤਿ. ਏਵਂ ਮਞ੍ਜੁਰੁਤਾ ਕਰਵਿਕਾ.

ਅਸਨ੍ਧਿਮਿਤ੍ਤਾਪਿ ਧਮ੍ਮਾਸੋਕਸ੍ਸ ਦੇਵੀ – ‘‘ਅਤ੍ਥਿ ਨੁ ਖੋ, ਭਨ੍ਤੇ, ਬੁਦ੍ਧਸਦ੍ਦੇਨ ਸਦਿਸੋ ਕਸ੍ਸਚਿ ਸਦ੍ਦੋ’’ਤਿ ਸਙ੍ਘਂ ਪੁਚ੍ਛਿ. ਅਤ੍ਥਿ ਕਰਵਿਕਸਕੁਣਸ੍ਸਾਤਿ. ਕੁਹਿਂ, ਭਨ੍ਤੇ, ਸਕੁਣਾਤਿ? ਹਿਮਵਨ੍ਤੇਤਿ. ਸਾ ਰਾਜਾਨਂ ਆਹ, – ‘‘ਦੇਵ, ਕਰਵਿਕਸਕੁਣਂ ਦਟ੍ਠੁਕਾਮਾ’’ਤਿ. ਰਾਜਾ ‘‘ਇਮਸ੍ਮਿਂ ਪਞ੍ਜਰੇ ਨਿਸੀਦਿਤ੍ਵਾ ਕਰਵਿਕੋ ਆਗਚ੍ਛਤੂ’’ਤਿ ਸੁਵਣ੍ਣਪਞ੍ਜਰਂ ਵਿਸ੍ਸਜ੍ਜੇਸਿ. ਪਞ੍ਜਰੋ ਗਨ੍ਤ੍ਵਾ ਏਕਸ੍ਸ ਕਰਵਿਕਸ੍ਸ ਪੁਰਤੋ ਅਟ੍ਠਾਸਿ. ਸੋ ‘‘ਰਾਜਾਣਾਯ ਆਗਤੋ ਪਞ੍ਜਰੋ, ਨ ਸਕ੍ਕਾ ਅਗਨ੍ਤੁ’’ਨ੍ਤਿ ਤਤ੍ਥ ਨਿਸੀਦਿ. ਪਞ੍ਜਰੋ ਆਗਨ੍ਤ੍ਵਾ ਰਞ੍ਞੋ ਪੁਰਤੋਵ ਅਟ੍ਠਾਸਿ. ਕਰਵਿਕਂ ਸਦ੍ਦਂ ਕਾਰਾਪੇਤੁਂ ਨ ਸਕ੍ਕੋਨ੍ਤਿ. ਅਥ ਰਾਜਾ ‘‘ਕਥਂ ਭਣੇ ਇਮੇ ਸਦ੍ਦਂ ਕਰੋਨ੍ਤੀ’’ਤਿ ਆਹ? ਞਾਤਕੇ ਦਿਸ੍ਵਾ ਦੇਵਾਤਿ. ਅਥ ਨਂ ਰਾਜਾ ਆਦਾਸੇਹਿ ਪਰਿਕ੍ਖਿਪਾਪੇਸਿ. ਸੋ ਅਤ੍ਤਨੋਵ ਛਾਯਂ ਦਿਸ੍ਵਾ ‘‘ਞਾਤਕਾ ਮੇ ਆਗਤਾ’’ਤਿ ਮਞ੍ਞਮਾਨੋ ਪਕ੍ਖੇਨ ਤਾਲ਼ਂ ਦਤ੍ਵਾ ਮਞ੍ਜੁਸ੍ਸਰੇਨ ਮਣਿਵਂਸਂ ਧਮਮਾਨੋ ਵਿਯ ਵਿਰਵਿ. ਸਕਲਨਗਰੇ ਮਨੁਸ੍ਸਾ ਮਤ੍ਤਾ ਵਿਯ ਲਲ਼ਿਂਸੁ. ਅਸਨ੍ਧਿਮਿਤ੍ਤਾ ਚਿਨ੍ਤੇਸਿ – ‘‘ਇਮਸ੍ਸ ਤਾਵ ਤਿਰਚ੍ਛਾਨਸ੍ਸ ਏਵਂ ਮਧੁਰੋ ਸਦ੍ਦੋ, ਕੀਦਿਸੋ ਨੁ ਖੋ ਸਬ੍ਬਞ੍ਞੁਤਞ੍ਞਾਣਸਿਰਿਪ੍ਪਤ੍ਤਸ੍ਸ ਭਗਵਤੋ ਅਹੋਸੀ’’ਤਿ ਪੀਤਿਂ ਉਪ੍ਪਾਦੇਤ੍ਵਾ ਤਂ ਪੀਤਿਂ ਅਵਿਜਹਿਤ੍ਵਾ ਸਤ੍ਤਹਿ ਜਙ੍ਘਸਤੇਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਏਵਂ ਮਧੁਰੋ ਕਰਵਿਕਸਦ੍ਦੋ. ਤਤੋ ਸਤਭਾਗੇਨ ਸਹਸ੍ਸਭਾਗੇਨ ਚ ਮਧੁਰਤਰੋ ਤਥਾਗਤਸ੍ਸ ਸਦ੍ਦੋ, ਲੋਕੇ ਪਨ ਕਰਵਿਕਤੋ ਅਞ੍ਞਸ੍ਸ ਮਧੁਰਰਸ੍ਸ ਅਭਾਵਤੋ ‘‘ਕਰਵਿਕਭਾਣੀ’’ਤਿ ਵੁਤ੍ਤਂ.

ਅਭਿਨੀਲਨੇਤ੍ਤੋਤਿ ਨ ਸਕਲਨੀਲਨੇਤ੍ਤੋਵ, ਨੀਲਯੁਤ੍ਤਟ੍ਠਾਨੇ ਪਨਸ੍ਸ ਉਮਾਪੁਪ੍ਫਸਦਿਸੇਨ ਅਤਿਵਿਸੁਦ੍ਧੇਨ ਨੀਲਵਣ੍ਣੇਨ ਸਮਨ੍ਨਾਗਤਾਨਿ ਅਕ੍ਖੀਨਿ ਹੋਨ੍ਤਿ. ਪੀਤਯੁਤ੍ਤਟ੍ਠਾਨੇ ਕਣਿਕਾਰਪੁਪ੍ਫਸਦਿਸੇਨ ਪੀਤਵਣ੍ਣੇਨ, ਲੋਹਿਤਯੁਤ੍ਤਟ੍ਠਾਨੇ ਬਨ੍ਧੁਜੀਵਕਪੁਪ੍ਫਸਦਿਸੇਨ ਲੋਹਿਤਵਣ੍ਣੇਨ, ਸੇਤਯੁਤ੍ਤਟ੍ਠਾਨੇ ਓਸਧਿਤਾਰਕਸਦਿਸੇਨ ਸੇਤਵਣ੍ਣੇਨ, ਕਾਲ਼ਯੁਤ੍ਤਟ੍ਠਾਨੇ ਅਦ੍ਦਾਰਿਟ੍ਠਕਸਦਿਸੇਨ ਕਾਲ਼ਵਣ੍ਣੇਨ ਸਮਨ੍ਨਾਗਤਾਨਿ ਸੁਵਣ੍ਣਵਿਮਾਨੇ ਉਗ੍ਘਾਟਿਤਮਣਿਸੀਹਪਞ੍ਜਰਸਦਿਸਾਨਿ ਖਾਯਨ੍ਤਿ.

ਗੋਪਖੁਮੋਤਿ ਏਤ੍ਥ ਪਖੁਮਨ੍ਤਿ ਸਕਲਂ ਚਕ੍ਖੁਭਣ੍ਡਂ ਅਧਿਪ੍ਪੇਤਂ. ਤਂ ਕਾਲ਼ਵਚ੍ਛਕਸ੍ਸ ਬਹਲਧਾਤੁਕਂ ਹੋਤਿ, ਰਤ੍ਤਵਚ੍ਛਕਸ੍ਸ ਵਿਪ੍ਪਸਨ੍ਨਂ, ਤਂਮੁਹੁਤ੍ਤਜਾਤਰਤ੍ਤਵਚ੍ਛਸਦਿਸਚਕ੍ਖੁਭਣ੍ਡੋਤਿ ਅਤ੍ਥੋ. ਅਞ੍ਞੇਸਞ੍ਹਿ ਅਕ੍ਖਿਭਣ੍ਡਾ ਅਪਰਿਪੁਣ੍ਣਾ ਹੋਨ੍ਤਿ, ਹਤ੍ਥਿਮੂਸਿਕਕਾਕਾਦੀਨਂ ਅਕ੍ਖਿਸਦਿਸੇਹਿ ਵਿਨਿਗ੍ਗਤੇਹਿ ਗਮ੍ਭੀਰੇਹਿਪਿ ਅਕ੍ਖੀਹਿ ਸਮਨ੍ਨਾਗਤਾ ਹੋਨ੍ਤਿ. ਤਥਾਗਤਸ੍ਸ ਪਨ ਧੋਵਿਤ੍ਵਾ ਮਜ੍ਜਿਤ੍ਵਾ ਠਪਿਤਮਣਿਗੁਲ਼ਿਕਾ ਵਿਯ ਮੁਦੁਸਿਨਿਦ੍ਧਨੀਲਸੁਖੁਮਪਖੁਮਾਚਿਤਾਨਿ ਅਕ੍ਖੀਨਿ.

ਉਣ੍ਣਾਤਿ ਉਣ੍ਣਲੋਮਂ. ਭਮੁਕਨ੍ਤਰੇਤਿ ਦ੍ਵਿਨ੍ਨਂ ਭਮੁਕਾਨਂ ਵੇਮਜ੍ਝੇ ਨਾਸਿਕਮਤ੍ਥਕੇਯੇਵ ਜਾਤਾ. ਉਗ੍ਗਨ੍ਤ੍ਵਾ ਪਨ ਨਲਾਟਮਜ੍ਝਜਾਤਾ. ਓਦਾਤਾਤਿ ਪਰਿਸੁਦ੍ਧਾ ਓਸਧਿਤਾਰਕਵਣ੍ਣਾ. ਮੁਦੂਤਿ ਸਪ੍ਪਿਮਣ੍ਡੇ ਓਸਾਦੇਤ੍ਵਾ ਠਪਿਤਸਤਵਾਰਵਿਹਤਕਪ੍ਪਾਸਪਟਲਸਦਿਸਾ. ਤੂਲਸਨ੍ਨਿਭਾਤਿ ਸਿਮ੍ਬਲਿਤੂਲਲਤਾਤੂਲਸਮਾਨਾ, ਅਯਮਸ੍ਸਾ ਓਦਾਤਤਾਯ ਉਪਮਾ. ਸਾ ਪਨੇਸਾ ਕੋਟਿਯਂ ਗਹੇਤ੍ਵਾ ਆਕਡ੍ਢਿਯਮਾਨਾ ਉਪਡ੍ਢਬਾਹੁਪ੍ਪਮਾਣਾ ਹੋਤਿ, ਵਿਸ੍ਸਟ੍ਠਾ ਦਕ੍ਖਿਣਾਵਟ੍ਟਵਸੇਨ ਆਵਟ੍ਟਿਤ੍ਵਾ ਉਦ੍ਧਗ੍ਗਾ ਹੁਤ੍ਵਾ ਸਨ੍ਤਿਟ੍ਠਤਿ, ਸੁਵਣ੍ਣਫਲਕਮਜ੍ਝੇ ਠਪਿਤਰਜਤਪੁਪ੍ਫੁਲ਼ਕਾ ਵਿਯ ਸੁਵਣ੍ਣਘਟਤੋ ਨਿਕ੍ਖਮਮਾਨਾ ਖੀਰਧਾਰਾ ਵਿਯ ਅਰੁਣਪ੍ਪਭਾਰਞ੍ਜਿਤੇ ਗਮਨਤਲੇ ਓਸਧਿਤਾਰਕਾ ਵਿਯ ਚ ਅਤਿਮਨੋਹਰਾਯ ਸਿਰਿਯਾ ਵਿਰੋਚਤਿ.

ਉਣ੍ਹੀਸਸੀਸੋਤਿ ਇਦਂ ਪਰਿਪੁਣ੍ਣਨਲਾਟਤਞ੍ਚੇਵ ਪਰਿਪੁਣ੍ਣਸੀਸਤਞ੍ਚਾਤਿ ਦ੍ਵੇ ਅਤ੍ਥਵਸੇ ਪਟਿਚ੍ਚ ਵੁਤ੍ਤਂ. ਤਥਾਗਤਸ੍ਸ ਹਿ ਦਕ੍ਖਿਣਕਣ੍ਣਚੂਲ਼ਿਕਤੋ ਪਟ੍ਠਾਯ ਮਂਸਪਟਲਂ ਉਟ੍ਠਹਿਤ੍ਵਾ ਸਕਲਂ ਨਲਾਟਂ ਛਾਦਯਮਾਨਂ ਪੂਰਯਮਾਨਂ ਗਨ੍ਤ੍ਵਾ ਵਾਮਕਣ੍ਣਚੂਲ਼ਿਕਾਯ ਪਤਿਟ੍ਠਿਤਂ, ਰਞ੍ਞੋ ਬਦ੍ਧਉਣ੍ਹੀਸਪਟ੍ਟੋ ਵਿਯ ਵਿਰੋਚਤਿ. ਪਚ੍ਛਿਮਭਵਿਕਬੋਧਿਸਤ੍ਤਾਨਂ ਕਿਰ ਇਮਂ ਲਕ੍ਖਣਂ ਵਿਦਿਤ੍ਵਾ ਰਾਜੂਨਂ ਉਣ੍ਹੀਸਪਟ੍ਟਂ ਅਕਂਸੁ, ਅਯਂ ਤਾਵ ਏਕੋ ਅਤ੍ਥੋ. ਅਞ੍ਞੇ ਪਨ ਜਨਾ ਅਪਰਿਪੁਣ੍ਣਸੀਸਾ ਹੋਨ੍ਤਿ, ਕੇਚਿ ਕਪ੍ਪਸੀਸਾ, ਕੇਚਿ ਫਲਸੀਸਾ, ਕੇਚਿ ਅਟ੍ਠਿਸੀਸਾ, ਕੇਚਿ ਤੁਮ੍ਬਸੀਸਾ, ਕੇਚਿ ਪਬ੍ਭਾਰਸੀਸਾ. ਤਥਾਗਤਸ੍ਸ ਪਨ ਆਰਗ੍ਗੇਨ ਵਟ੍ਟੇਤ੍ਵਾ ਠਪਿਤਂ ਵਿਯ ਸੁਪਰਿਪੁਣ੍ਣਂ ਉਦਕਪੁਪ੍ਫੁਲ਼ਸਦਿਸਂ ਸੀਸਂ ਹੋਤਿ. ਤਤ੍ਥ ਪੁਰਿਮਨਯੇਨ ਉਣ੍ਹੀਸਵੇਠਿਤਸੀਸੋ ਵਿਯਾਤਿ ਉਣ੍ਹੀਸਸੀਸੋ. ਦੁਤਿਯਨਯੇਨ ਉਣ੍ਹੀਸਂ ਵਿਯ ਸਬ੍ਬਤ੍ਥ ਪਰਿਮਣ੍ਡਲਸੀਸੋਤਿ ਉਣ੍ਹੀਸਸੀਸੋ.

ਇਮਾਨਿ ਪਨ ਮਹਾਪੁਰਿਸਲਕ੍ਖਣਾਨਿ ਕਮ੍ਮਂ ਕਮ੍ਮਸਰਿਕ੍ਖਕਂ ਲਕ੍ਖਣਂ ਲਕ੍ਖਣਾਨਿਸਂਸਨ੍ਤਿ ਇਮੇ ਚਤ੍ਤਾਰੋ ਕੋਟ੍ਠਾਸੇ ਏਕੇਕਸ੍ਮਿਂ ਲਕ੍ਖਣੇ ਦਸ੍ਸੇਤ੍ਵਾ ਕਥਿਤਾਨਿ ਸੁਕਥਿਤਾਨਿ ਹੋਨ੍ਤਿ. ਤਸ੍ਮਾ ਭਗਵਤਾ ਲਕ੍ਖਣਸੁਤ੍ਤੇ (ਦੀ. ਨਿ. ੩.੨੦੦-੨੦੨) ਵੁਤ੍ਤਾਨਿ ਇਮਾਨਿ ਕਮ੍ਮਾਦੀਨਿ ਦਸ੍ਸੇਤ੍ਵਾ ਕਥੇਤਬ੍ਬਾਨਿ. ਸੁਤ੍ਤਵਸੇਨ ਵਿਨਿਚ੍ਛਿਤੁਂ ਅਸਕ੍ਕੋਨ੍ਤੇਨ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ ਤਸ੍ਸੇਵ ਸੁਤ੍ਤਸ੍ਸ ਵਣ੍ਣਨਾਯ ਵੁਤ੍ਤਨਯੇਨ ਗਹੇਤਬ੍ਬਾਨਿ.

ਇਮੇਹਿ ਖੋ, ਭੋ, ਸੋ ਭਵਂ ਗੋਤਮੋਤਿ, ਭੋ ਆਚਰਿਯ, ਇਮੇਹਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸੋ ਭਵਂ ਗੋਤਮੋ ਸਮਨ੍ਨਾਗਤੋ ਦੇਵਨਗਰੇ ਸਮੁਸ੍ਸਿਤਰਤਨਵਿਚਿਤ੍ਤਂ ਸੁਵਣ੍ਣਤੋਰਣਂ ਵਿਯ ਯੋਜਨਸਤੁਬ੍ਬੇਧੋ ਸਬ੍ਬਪਾਲਿਫੁਲ੍ਲੋ ਪਾਰਿਚ੍ਛਤ੍ਤਕੋ ਵਿਯ ਸੇਲਨ੍ਤਰਮ੍ਹਿ ਸੁਪੁਪ੍ਫਿਤਸਾਲਰੁਕ੍ਖੋ ਵਿਯ ਤਾਰਾਗਣਪਟਿਮਣ੍ਡਿਤਗਗਨਤਲਮਿਵ ਚ ਅਤ੍ਤਨੋ ਸਿਰਿਵਿਭਵੇਨ ਲੋਕਂ ਆਲੋਕਂ ਕੁਰੁਮਾਨੋ ਵਿਯ ਚਰਤੀਤਿ ਇਮਤ੍ਥਮ੍ਪਿ ਦੀਪੇਤ੍ਵਾ ਕਿਰਿਯਾਚਾਰਂ ਆਚਿਕ੍ਖਿਤੁਂ ਗਚ੍ਛਨ੍ਤੋ ਖੋ ਪਨਾਤਿਆਦਿਮਾਹ.

੩੮੭. ਦਕ੍ਖਿਣੇਨਾਤਿ ਬੁਦ੍ਧਾਨਞ੍ਹਿ ਠਤ੍ਵਾ ਵਾ ਨਿਸੀਦਿਤ੍ਵਾ ਵਾ ਨਿਪਜ੍ਜਿਤ੍ਵਾ ਵਾ ਗਮਨਂ ਅਭਿਨੀਹਰਨ੍ਤਾਨਂ ਦਕ੍ਖਿਣਪਾਦੋਵ ਪੁਰਤੋ ਹੋਤਿ. ਸਤਤਪਾਟਿਹਾਰਿਯਂ ਕਿਰੇਤਂ. ਨਾਤਿਦੂਰੇ ਪਾਦਂ ਉਦ੍ਧਰਤੀਤਿ ਤਂ ਦਕ੍ਖਿਣਪਾਦਂ ਨ ਅਤਿਦੂਰੇ ਠਪੇਸ੍ਸਾਮੀਤਿ ਉਦ੍ਧਰਤਿ. ਅਤਿਦੂਰਞ੍ਹਿ ਅਭਿਹਰਿਯਮਾਨੇ ਦਕ੍ਖਿਣਪਾਦੇਨ ਵਾਮਪਾਦੋ ਆਕਡ੍ਢਿਯਮਾਨੋ ਗਚ੍ਛੇਯ੍ਯ, ਦਕ੍ਖਿਣਪਾਦੋਪਿ ਦੂਰਂ ਗਨ੍ਤੁਂ ਨ ਸਕ੍ਕੁਣੇਯ੍ਯ, ਆਸਨ੍ਨੇਯੇਵ ਪਤਿਟ੍ਠਹੇਯ੍ਯ, ਏਵਂ ਸਤਿ ਪਦਵਿਚ੍ਛੇਦੋ ਨਾਮ ਹੋਤਿ. ਦਕ੍ਖਿਣਪਾਦੇ ਪਨ ਪਮਾਣੇਨੇਵ ਉਦ੍ਧਤੇ ਵਾਮਪਾਦੋਪਿ ਪਮਾਣੇਨੇਵ ਉਦ੍ਧਰਿਯਤਿ, ਪਮਾਣੇਨ ਉਦ੍ਧਤੋ ਪਤਿਟ੍ਠਹਨ੍ਤੋਪਿ ਪਮਾਣੇਯੇਵ ਪਤਿਟ੍ਠਾਤਿ. ਏਵਮਨੇਨ ਤਥਾਗਤਸ੍ਸ ਦਕ੍ਖਿਣਪਾਦਕਿਚ੍ਚਂ ਵਾਮਪਾਦੇਨ ਨਿਯਮਿਤਂ, ਵਾਮਪਾਦਕਿਚ੍ਚਂ ਦਕ੍ਖਿਣਪਾਦੇਨ ਨਿਯਮਿਤਨ੍ਤਿ ਵੇਦਿਤਬ੍ਬਂ.

ਨਾਤਿਸੀਘਨ੍ਤਿ ਦਿਵਾ ਵਿਹਾਰਭਤ੍ਤਤ੍ਥਾਯ ਗਚ੍ਛਨ੍ਤੋ ਭਿਕ੍ਖੁ ਵਿਯ ਨ ਅਤਿਸੀਘਂ ਗਚ੍ਛਤਿ. ਨਾਤਿਸਣਿਕਨ੍ਤਿ ਯਥਾ ਪਚ੍ਛਤੋ ਆਗਚ੍ਛਨ੍ਤੋ ਓਕਾਸਂ ਨ ਲਭਤਿ, ਏਵਂ ਨ ਅਤਿਸਣਿਕਂ ਗਚ੍ਛਤਿ. ਅਦ੍ਦੁਵੇਨ ਅਦ੍ਦੁਵਨ੍ਤਿ ਜਣ੍ਣੁਕੇਨ ਜਣ੍ਣੁਕਂ, ਨ ਸਤ੍ਥਿਂ ਉਨ੍ਨਾਮੇਤੀਤਿ ਗਮ੍ਭੀਰੇ ਉਦਕੇ ਗਚ੍ਛਨ੍ਤੋ ਵਿਯ ਨ ਊਰੁਂ ਉਨ੍ਨਾਮੇਤਿ. ਨ ਓਨਾਮੇਤੀਤਿ ਰੁਕ੍ਖਸਾਖਾਛੇਦਨਦਣ੍ਡਙ੍ਕੁਸਪਾਦੋ ਵਿਯ ਨ ਪਚ੍ਛਤੋ ਓਸਕ੍ਕਾਪੇਤਿ. ਨ ਸਨ੍ਨਾਮੇਤੀਤਿ ਓਬਦ੍ਧਾਨਾਬਦ੍ਧਟ੍ਠਾਨੇਹਿ ਪਾਦਂ ਕੋਟ੍ਟੇਨ੍ਤੋ ਵਿਯ ਨ ਥਦ੍ਧਂ ਕਰੋਤਿ. ਨ ਵਿਨਾਮੇਤੀਤਿ ਯਨ੍ਤਰੂਪਕਂ ਕੀਲ਼ਾਪੇਨ੍ਤੋ ਵਿਯ ਨ ਇਤੋ ਚਿਤੋ ਚ ਚਾਲੇਤਿ. ਅਧਰਕਾਯੋਵਾਤਿ ਹੇਟ੍ਠਿਮਕਾਯੋਵ ਇਞ੍ਜਤਿ, ਉਪਰਿਮਕਾਯੋ ਨਾਵਾਯ ਠਪਿਤਸੁਵਣ੍ਣਪਟਿਮਾ ਵਿਯ ਨਿਚ੍ਚਲੋ ਹੋਤਿ. ਦੂਰੇ ਠਤ੍ਵਾ ਓਲੋਕੇਨ੍ਤੋ ਹਿ ਬੁਦ੍ਧਾਨਂ ਠਿਤਭਾਵਂ ਵਾ ਗਮਨਭਾਵਂ ਵਾ ਨ ਜਾਨਾਤਿ. ਕਾਯਬਲੇਨਾਤਿ ਬਾਹਾ ਖਿਪਨ੍ਤੋ ਸਰੀਰਤੋ ਸੇਦੇਹਿ ਮੁਚ੍ਚਨ੍ਤੇਹਿ ਨ ਕਾਯਬਲੇਨ ਗਚ੍ਛਤਿ. ਸਬ੍ਬਕਾਯੇਨੇਵਾਤਿ ਗੀਵਂ ਅਪਰਿਵਤ੍ਤੇਤ੍ਵਾ ਰਾਹੁਲੋਵਾਦੇ ਵੁਤ੍ਤਨਾਗਾਪਲੋਕਿਤਵਸੇਨੇਵ ਅਪਲੋਕੇਤਿ.

ਨ ਉਦ੍ਧਨ੍ਤਿਆਦੀਸੁ ਨਕ੍ਖਤ੍ਤਾਨਿ ਗਣੇਨ੍ਤੋ ਵਿਯ ਨ ਉਦ੍ਧਂ ਉਲ੍ਲੋਕੇਤਿ, ਨਟ੍ਠਂ ਕਾਕਣਿਕਂ ਵਾ ਮਾਸਕਂ ਵਾ ਪਰਿਯੇਸਨ੍ਤੋ ਵਿਯ ਨ ਅਧੋ ਓਲੋਕੇਤਿ, ਨ ਹਤ੍ਥਿਅਸ੍ਸਾਦਯੋ ਪਸ੍ਸਨ੍ਤੋ ਵਿਯ ਇਤੋ ਚਿਤੋ ਚ ਵਿਪੇਕ੍ਖਮਾਨੋ ਗਚ੍ਛਤਿ. ਯੁਗਮਤ੍ਤਨ੍ਤਿ ਨਵਵਿਦਤ੍ਥਿਮਤ੍ਤੇ ਚਕ੍ਖੂਨਿ ਠਪੇਤ੍ਵਾ ਗਚ੍ਛਨ੍ਤੋ ਯੁਗਮਤ੍ਤਂ ਪੇਕ੍ਖਤਿ ਨਾਮ, ਭਗਵਾਪਿ ਯੁਗੇ ਯੁਤ੍ਤੋ ਸੁਦਨ੍ਤਆਜਾਨੀਯੋ ਵਿਯ ਏਤ੍ਤਕਂ ਪਸ੍ਸਨ੍ਤੋ ਗਚ੍ਛਤਿ. ਤਤੋ ਚਸ੍ਸ ਉਤ੍ਤਰੀਤਿ ਯੁਗਮਤ੍ਤਤੋ ਪਰਂ ਨ ਪਸ੍ਸਤੀਤਿ ਨ ਵਤ੍ਤਬ੍ਬੋ. ਨ ਹਿ ਕੁਟ੍ਟਂ ਵਾ ਕਵਾਟਂ ਵਾ ਗਚ੍ਛੋ ਵਾ ਲਤਾ ਵਾ ਆਵਰਿਤੁਂ ਸਕ੍ਕੋਤਿ, ਅਥ ਖ੍ਵਸ੍ਸ ਅਨਾਵਰਣਞਾਣਸ੍ਸ ਅਨੇਕਾਨਿ ਚਕ੍ਕਵਾਲ਼ਸਹਸ੍ਸਾਨਿ ਏਕਙ੍ਗਣਾਨੇਵ ਹੋਨ੍ਤਿ. ਅਨ੍ਤਰਘਰਨ੍ਤਿ ਹੇਟ੍ਠਾ ਮਹਾਸਕੁਲੁਦਾਯਿਸੁਤ੍ਤੇ ਇਨ੍ਦਖੀਲਤੋ ਪਟ੍ਠਾਯ ਅਨ੍ਤਰਘਰਂ, ਇਧ ਘਰਉਮ੍ਮਾਰਤੋ ਪਟ੍ਠਾਯ ਵੇਦਿਤਬ੍ਬਂ. ਨ ਕਾਯਨ੍ਤਿਆਦਿ ਪਕਤਿਇਰਿਯਪਥੇਨੇਵ ਪਵਿਸਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਦਲਿਦ੍ਦਮਨੁਸ੍ਸਾਨਂ ਨੀਚਘਰਕਂ ਪਵਿਸਨ੍ਤੇਪਿ ਹਿ ਤਥਾਗਤੇ ਛਦਨਂ ਵਾ ਉਗ੍ਗਚ੍ਛਤਿ, ਪਥਵੀ ਵਾ ਓਗਚ੍ਛਤਿ, ਭਗਵਾ ਪਨ ਪਕਤਿਗਮਨੇਨੇਵ ਗਚ੍ਛਤਿ. ਨਾਤਿਦੂਰੇਤਿ ਅਤਿਦੂਰੇ ਪਰਿਵਤ੍ਤਨ੍ਤੇਨ ਹਿ ਏਕਂ ਦ੍ਵੇ ਪਦਵਾਰੇ ਪਿਟ੍ਠਿਭਾਗੇਨ ਗਨ੍ਤ੍ਵਾ ਨਿਸੀਦਿਤਬ੍ਬਂ ਹੋਤਿ. ਨਾਚ੍ਚਾਸਨ੍ਨੇਤਿ ਅਚ੍ਚਾਸਨ੍ਨੇ ਪਰਿਵਤ੍ਤਨ੍ਤੇਨ ਏਕਂ ਦ੍ਵੇ ਪਦਵਾਰੇ ਪੁਰਤੋ ਗਨ੍ਤ੍ਵਾ ਨਿਸੀਦਿਤਬ੍ਬਂ ਹੋਤਿ. ਤਸ੍ਮਾ ਯਸ੍ਮਿਂ ਪਦਵਾਰੇ ਠਿਤੇਨ ਪੁਰਤੋ ਵਾ ਪਚ੍ਛਤੋ ਵਾ ਅਗਨ੍ਤ੍ਵਾ ਨਿਸੀਦਿਤਬ੍ਬਂ ਹੋਤਿ, ਤਤ੍ਥ ਪਰਿਵਤ੍ਤਤਿ.

ਪਾਣਿਨਾਤਿ ਕਟਿਵਾਤਾਬਾਧਿਕੋ ਵਿਯ ਨ ਆਸਨਂ ਹਤ੍ਥੇਹਿ ਗਹੇਤ੍ਵਾ ਨਿਸੀਦਤਿ. ਪਕ੍ਖਿਪਤੀਤਿ ਯੋ ਕਿਞ੍ਚਿ ਕਮ੍ਮਂ ਕਤ੍ਵਾ ਕੀਲ਼ਨ੍ਤੋ ਠਿਤਕੋਵ ਪਤਤਿ, ਯੋਪਿ ਓਰਿਮਂ ਅਙ੍ਗਂ ਨਿਸ੍ਸਾਯ ਨਿਸਿਨ੍ਨੋ ਘਂਸਨ੍ਤੋ ਯਾਵ ਪਾਰਿਮਙ੍ਗਾ ਗਚ੍ਛਤਿ, ਪਾਰਿਮਙ੍ਗਂ ਵਾ ਨਿਸ੍ਸਾਯ ਨਿਸਿਨ੍ਨੋ ਤਥੇਵ ਯਾਵ ਓਰਿਮਙ੍ਗਾ ਆਗਚ੍ਛਤਿ, ਸਬ੍ਬੋ ਸੋ ਆਸਨੇ ਕਾਯਂ ਪਕ੍ਖਿਪਤਿ ਨਾਮ. ਭਗਵਾ ਪਨ ਏਵਂ ਅਕਤ੍ਵਾ ਆਸਨਸ੍ਸ ਮਜ੍ਝੇ ਓਲਮ੍ਬਕਂ ਧਾਰੇਨ੍ਤੋ ਵਿਯ ਤੂਲਪਿਚੁਂ ਠਪੇਨ੍ਤੋ ਵਿਯ ਸਣਿਕਂ ਨਿਸੀਦਤਿ. ਹਤ੍ਥਕੁਕ੍ਕੁਚ੍ਚਨ੍ਤਿ ਪਤ੍ਤਮੁਖਵਟ੍ਟਿਯਂ ਉਦਕਬਿਨ੍ਦੁਠਪਨਂ ਮਕ੍ਖਿਕਬੀਜਨਿਯਾ ਪਣ੍ਣਚ੍ਛੇਦਨਫਾਲਨਾਦਿ ਹਤ੍ਥੇਨ ਅਸਂਯਤਕਰਣਂ. ਪਾਦਕੁਕ੍ਕੁਚ੍ਚਨ੍ਤਿ ਪਾਦੇਨ ਭੂਮਿਘਂਸਨਾਦਿ ਅਸਂਯਤਕਰਣਂ.

ਨ ਛਮ੍ਭਤੀਤਿ ਨ ਭਾਯਤਿ. ਨ ਕਮ੍ਪਤੀਤਿ ਨ ਓਸੀਦਤਿ. ਨ ਵੇਧਤੀਤਿ ਨ ਚਲਤਿ. ਨ ਪਰਿਤਸ੍ਸਤੀਤਿ ਭਯਪਰਿਤਸ੍ਸਨਾਯਪਿ ਤਣ੍ਹਾਪਰਿਤਸ੍ਸਨਾਯਪਿ ਨ ਪਰਿਤਸ੍ਸਤਿ. ਏਕਚ੍ਚੋ ਹਿ ਧਮ੍ਮਕਥਾਦੀਨਂ ਅਤ੍ਥਾਯ ਆਗਨ੍ਤ੍ਵਾ ਮਨੁਸ੍ਸੇਸੁ ਵਨ੍ਦਿਤ੍ਵਾ ਠਿਤੇਸੁ ‘‘ਸਕ੍ਖਿਸ੍ਸਾਮਿ ਨੁ ਖੋ ਤੇਸਂ ਚਿਤ੍ਤਂ ਗਣ੍ਹਨ੍ਤੋ ਧਮ੍ਮਂ ਵਾ ਕਥੇਤੁਂ, ਪਞ੍ਹਂ ਵਾ ਪੁਚ੍ਛਿਤੋ ਵਿਸ੍ਸਜ੍ਜੇਤੁਂ, ਭਤ੍ਤਾਨੁਮੋਦਨਂ ਵਾ ਕਾਤੁ’’ਨ੍ਤਿ ਭਯਪਰਿਤਸ੍ਸਨਾਯ ਪਰਿਤਸ੍ਸਤਿ. ਏਕਚ੍ਚੋ ‘‘ਮਨਾਪਾ ਨੁ ਖੋ ਮੇ ਯਾਗੁ ਆਗਚ੍ਛਿਸ੍ਸਤਿ, ਮਨਾਪਂ ਅਨ੍ਤਰਖਜ੍ਜਕ’’ਨ੍ਤਿ ਵਾ ਤਣ੍ਹਾਪਰਿਤਸ੍ਸਨਾਯ ਪਰਿਤਸ੍ਸਤਿ. ਤਦੁਭਯਮ੍ਪਿ ਤਸ੍ਸ ਨਤ੍ਥੀਤਿ ਨ ਪਰਿਤਸ੍ਸਤਿ. ਵਿਵੇਕਾਵਟ੍ਟੋਤਿ ਵਿਵੇਕੇ ਨਿਬ੍ਬਾਨੇ ਆਵਟ੍ਟਮਾਨਸੋ ਹੁਤ੍ਵਾ. ਵਿਵੇਕਵਤ੍ਤੋਤਿਪਿ ਪਾਠੋ, ਵਿਵੇਕਵਤ੍ਤਯੁਤ੍ਤੋ ਹੁਤ੍ਵਾਤਿ ਅਤ੍ਥੋ. ਵਿਵੇਕਵਤ੍ਤਂ ਨਾਮ ਕਤਭਤ੍ਤਕਿਚ੍ਚਸ੍ਸ ਭਿਕ੍ਖੁਨੋ ਦਿਵਾਵਿਹਾਰੇ ਸਮਥਵਿਪਸ੍ਸਨਾਵਸੇਨ ਮੂਲਕਮ੍ਮਟ੍ਠਾਨਂ ਗਹੇਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਨਂ. ਏਵਂ ਨਿਸਿਨ੍ਨਸ੍ਸ ਹਿ ਇਰਿਯਾਪਥੋ ਉਪਸਨ੍ਤੋ ਹੋਤਿ.

ਨ ਪਤ੍ਤਂ ਉਨ੍ਨਾਮੇਤੀਤਿਆਦੀਸੁ ਏਕਚ੍ਚੋ ਪਤ੍ਤਮੁਖਵਟ੍ਟਿਯਾ ਉਦਕਦਾਨਂ ਆਹਰਨ੍ਤੋ ਵਿਯ ਪਤ੍ਤਂ ਉਨ੍ਨਾਮੇਤਿ, ਏਕੋ ਪਾਦਪਿਟ੍ਠਿਯਂ ਠਪੇਨ੍ਤੋ ਵਿਯ ਓਨਾਮੇਤਿ, ਏਕੋ ਬਦ੍ਧਂ ਕਤ੍ਵਾ ਗਣ੍ਹਾਤਿ, ਏਕੋ ਇਤੋ ਚਿਤੋ ਚ ਫਨ੍ਦਾਪੇਤਿ, ਏਵਂ ਅਕਤ੍ਵਾ ਉਭੋਹਿ ਹਤ੍ਥੇਹਿ ਗਹੇਤ੍ਵਾ ਈਸਕਂ ਨਾਮੇਤ੍ਵਾ ਉਦਕਂ ਪਟਿਗ੍ਗਣ੍ਹਾਤੀਤਿ ਅਤ੍ਥੋ. ਨ ਸਮ੍ਪਰਿਵਤ੍ਤਕਨ੍ਤਿ ਪਰਿਵਤ੍ਤੇਤ੍ਵਾ ਪਠਮਮੇਵ ਪਤ੍ਤਪਿਟ੍ਠਿਂ ਨ ਧੋਵਤਿ. ਨਾਤਿਦੂਰੇਤਿ ਯਥਾ ਨਿਸਿਨ੍ਨਾਸਨਤੋ ਦੂਰੇ ਪਤਤਿ, ਨ ਏਵਂ ਛਡ੍ਡੇਤਿ. ਨਾਚ੍ਚਾਸਨ੍ਨੇਤਿ ਪਾਦਮੂਲੇਯੇਵ ਨ ਛਡ੍ਡੇਤਿ. ਵਿਚ੍ਛਡ੍ਡਯਮਾਨੋਤਿ ਵਿਕਿਰਨ੍ਤੋ, ਯਥਾ ਪਟਿਗ੍ਗਾਹਕੋ ਤੇਮਤਿ, ਨ ਏਵਂ ਛਡ੍ਡੇਤਿ.

ਨਾਤਿਥੋਕਨ੍ਤਿ ਯਥਾ ਏਕਚ੍ਚੋ ਪਾਪਿਚ੍ਛੋ ਅਪ੍ਪਿਚ੍ਛਤਂ ਦਸ੍ਸੇਨ੍ਤੋ ਮੁਟ੍ਠਿਮਤ੍ਤਮੇਵ ਗਣ੍ਹਾਤਿ, ਨ ਏਵਂ. ਅਤਿਬਹੁਨ੍ਤਿ ਯਾਪਨਮਤ੍ਤਤੋ ਅਤਿਰੇਕਂ. ਬ੍ਯਞ੍ਜਨਮਤ੍ਤਾਯਾਤਿ ਬ੍ਯਞ੍ਜਨਸ੍ਸ ਮਤ੍ਤਾ ਨਾਮ ਓਦਨਤੋ ਚਤੁਤ੍ਥੋ ਭਾਗੋ. ਏਕਚ੍ਚੋ ਹਿ ਭਤ੍ਤੇ ਮਨਾਪੇ ਭਤ੍ਤਂ ਬਹੁਂ ਗਣ੍ਹਾਤਿ, ਬ੍ਯਞ੍ਜਨੇ ਮਨਾਪੇ ਬ੍ਯਞ੍ਜਨਂ ਬਹੁਂ. ਸਤ੍ਥਾ ਪਨ ਤਥਾ ਨ ਗਣ੍ਹਾਤਿ. ਨ ਚ ਬ੍ਯਞ੍ਜਨੇਨਾਤਿ ਅਮਨਾਪਞ੍ਹਿ ਬ੍ਯਞ੍ਜਨਂ ਠਪੇਤ੍ਵਾ ਭਤ੍ਤਮੇਵ ਭੁਞ੍ਜਨ੍ਤੋ, ਭਤ੍ਤਂ ਵਾ ਠਪੇਤ੍ਵਾ ਬ੍ਯਞ੍ਜਨਮੇਵ ਖਾਦਨ੍ਤੋ ਬ੍ਯਞ੍ਜਨੇਨ ਆਲੋਪਂ ਅਤਿਨਾਮੇਤਿ ਨਾਮ. ਸਤ੍ਥਾ ਏਕਨ੍ਤਰਿਕਂ ਬ੍ਯਞ੍ਜਨਂ ਗਣ੍ਹਾਤਿ, ਭਤ੍ਤਮ੍ਪਿ ਬ੍ਯਞ੍ਜਨਮ੍ਪਿ ਏਕਤੋਵ ਨਿਟ੍ਠਨ੍ਤਿ. ਦ੍ਵਤ੍ਤਿਕ੍ਖਤ੍ਤੁਨ੍ਤਿ ਤਥਾਗਤਸ੍ਸ ਹਿ ਪੁਥੁਜਿਵ੍ਹਾਯ ਦਨ੍ਤਾਨਂ ਉਪਨੀਤਭੋਜਨਂ ਦ੍ਵਤ੍ਤਿਕ੍ਖਤ੍ਤੁਂ ਦਨ੍ਤੇਹਿ ਫੁਟ੍ਠਮਤ੍ਤਮੇਵ ਸਣ੍ਹਕਰਣੀਯਪਿਟ੍ਠਵਿਲੇਪਨਂ ਵਿਯ ਹੋਤਿ, ਤਸ੍ਮਾ ਏਵਮਾਹ. ਨ ਮੁਖੇ ਅਵਸਿਟ੍ਠਾਤਿ ਪੋਕ੍ਖਰਪਤ੍ਤੇ ਪਤਿਤਉਦਕਬਿਨ੍ਦੁ ਵਿਯ ਵਿਨਿਵਤ੍ਤਿਤ੍ਵਾ ਪਰਗਲਮੇਵ ਯਾਤਿ, ਤਸ੍ਮਾ ਅਵਸਿਟ੍ਠਾ ਨ ਹੋਤਿ. ਰਸਪਟਿਸਂਵੇਦੀਤਿ ਮਧੁਰਤਿਤ੍ਤਕਦੁਕਾਦਿਰਸਂ ਜਾਨਾਤਿ. ਬੁਦ੍ਧਾਨਞ੍ਹਿ ਅਨ੍ਤਮਸੋ ਪਾਨੀਯੇਪਿ ਦਿਬ੍ਬੋਜਾ ਪਕ੍ਖਿਤ੍ਤਾਵ ਹੋਤਿ, ਤੇਨ ਨੇਸਂ ਸਬ੍ਬਤ੍ਥੇਵ ਰਸੋ ਪਾਕਟੋ ਹੋਤਿ, ਰਸਗੇਧੋ ਪਨ ਨਤ੍ਥਿ.

ਅਟ੍ਠਙ੍ਗਸਮਨ੍ਨਾਗਤਨ੍ਤਿ ‘‘ਨੇਵ ਦਵਾਯਾ’’ਤਿ ਵੁਤ੍ਤੇਹਿ ਅਟ੍ਠਹਿ ਅਙ੍ਗੇਹਿ ਸਮਨ੍ਨਾਗਤਂ. ਵਿਸੁਦ੍ਧਿਮਗ੍ਗੇ ਪਨਸ੍ਸ ਵਿਨਿਚ੍ਛਯੋ ਆਗਤੋਤਿ ਸਬ੍ਬਾਸਵਸੁਤ੍ਤੇ ਵੁਤ੍ਤਮੇਤਂ. ਹਤ੍ਥੇਸੁ ਧੋਤੇਸੂਤਿ ਸਤ੍ਥਾ ਕਿਂ ਕਰੋਤਿ? ਪਠਮਂ ਪਤ੍ਤਸ੍ਸ ਗਹਣਟ੍ਠਾਨਂ ਧੋਵਤਿ. ਤਤ੍ਥ ਪਤ੍ਤਂ ਗਹੇਤ੍ਵਾ ਸੁਖੁਮਜਾਲਹਤ੍ਥਂ ਪੇਸੇਤ੍ਵਾ ਦ੍ਵੇ ਵਾਰੇ ਸਞ੍ਚਾਰੇਤਿ. ਏਤ੍ਤਾਵਤਾ ਪੋਕ੍ਖਰਪਤ੍ਤੇ ਪਤਿਤਉਦਕਂ ਵਿਯ ਵਿਨਿਵਤ੍ਤਿਤ੍ਵਾ ਗਚ੍ਛਤਿ. ਨ ਚ ਅਨਤ੍ਥਿਕੋਤਿ ਯਥਾ ਏਕਚ੍ਚੋ ਪਤ੍ਤਂ ਆਧਾਰਕੇ ਠਪੇਤ੍ਵਾ ਪਤ੍ਤੇ ਉਦਕਂ ਨ ਪੁਞ੍ਛਤਿ, ਰਜੇ ਪਤਨ੍ਤੇ ਅਜ੍ਝੁਪੇਕ੍ਖਤਿ, ਨ ਏਵਂ ਕਰੋਤਿ. ਨ ਚ ਅਤਿਵੇਲਾਨੁਰਕ੍ਖੀਤਿ ਯਥਾ ਏਕਚ੍ਚੋ ਪਮਾਣਾਤਿਕ੍ਕਨ੍ਤਂ ਆਰਕ੍ਖਂ ਠਪੇਤਿ, ਭੁਞ੍ਜਿਤ੍ਵਾ ਵਾ ਪਤ੍ਤੇ ਉਦਕਂ ਪੁਞ੍ਛਿਤ੍ਵਾ ਚੀਵਰਭੋਗਨ੍ਤਰਂ ਪਵੇਸੇਤ੍ਵਾ ਪਤ੍ਤਂ ਉਦਰੇਨ ਅਕ੍ਕਮਿਤ੍ਵਾ ਗਣ੍ਹਾਤਿ, ਨ ਏਵਂ ਕਰੋਤਿ.

ਨ ਚ ਅਨੁਮੋਦਨਸ੍ਸਾਤਿ ਯੋ ਹਿ ਭੁਤ੍ਤਮਤ੍ਤੋਵ ਦਾਰਕੇਸੁ ਭਤ੍ਤਤ੍ਥਾਯ ਰੋਦਨ੍ਤੇਸੁ ਛਾਤਜ੍ਝਤ੍ਤੇਸੁ ਮਨੁਸ੍ਸੇਸੁ ਭੁਞ੍ਜਿਤ੍ਵਾ ਅਨਾਗਤੇਸ੍ਵੇਵ ਅਨੁਮੋਦਨਂ ਆਰਭਤਿ, ਤਤੋ ਸਬ੍ਬਕਮ੍ਮਾਨਿ ਛਡ੍ਡੇਤ੍ਵਾ ਏਕਚ੍ਚੇ ਆਗਚ੍ਛਨ੍ਤਿ, ਏਕਚ੍ਚੇ ਅਨਾਗਤਾਵ ਹੋਨ੍ਤਿ, ਅਯਂ ਕਾਲਂ ਅਤਿਨਾਮੇਤਿ. ਯੋਪਿ ਮਨੁਸ੍ਸੇਸੁ ਆਗਨ੍ਤ੍ਵਾ ਅਨੁਮੋਦਨਤ੍ਥਾਯ ਵਨ੍ਦਿਤ੍ਵਾ ਨਿਸਿਨ੍ਨੇਸੁ ਅਨੁਮੋਦਨਂ ਅਕਤ੍ਵਾਵ ‘‘ਕਥਂ ਤਿਸ੍ਸ, ਕਥਂ ਫੁਸ੍ਸ, ਕਥਂ ਸੁਮਨ, ਕਥਂ ਤਿਸ੍ਸੇ, ਕਥਂ ਫੁਸ੍ਸੇ, ਕਥਂ ਸੁਮਨੇ, ਕਚ੍ਚਿਤ੍ਥ ਅਰੋਗਾ, ਸਸ੍ਸਂ ਸਮ੍ਪਨ੍ਨ’’ਨ੍ਤਿਆਦਿਂ ਪਾਟਿਯੇਕ੍ਕਂ ਕਥਂ ਸਮੁਟ੍ਠਾਪੇਤਿ, ਅਯਂ ਅਨੁਮੋਦਨਸ੍ਸ ਕਾਲਂ ਅਤਿਨਾਮੇਤਿ, ਮਨੁਸ੍ਸਾਨਂ ਪਨ ਓਕਾਸਂ ਞਤ੍ਵਾ ਆਯਾਚਿਤਕਾਲੇ ਕਰੋਨ੍ਤੋ ਨਾਤਿਨਾਮੇਤਿ ਨਾਮ, ਸਤ੍ਥਾ ਤਥਾ ਕਰੋਤਿ.

ਨ ਤਂ ਭਤ੍ਤਨ੍ਤਿ ਕਿਂ ਭਤ੍ਤਂ ਨਾਮੇਤਂ ਉਤ੍ਤਣ੍ਡੁਲਂ ਅਤਿਕਿਲਿਨ੍ਨਨ੍ਤਿਆਦੀਨਿ ਵਤ੍ਵਾ ਨ ਗਰਹਤਿ. ਨ ਅਞ੍ਞਂ ਭਤ੍ਤਨ੍ਤਿ ਸ੍ਵਾਤਨਾਯ ਵਾ ਪੁਨਦਿਵਸਾਯ ਵਾ ਭਤ੍ਤਂ ਉਪ੍ਪਾਦੇਸ੍ਸਾਮੀਤਿ ਹਿ ਅਨੁਮੋਦਨਂ ਕਰੋਨ੍ਤੋ ਅਞ੍ਞਂ ਭਤ੍ਤਂ ਪਟਿਕਙ੍ਖਤਿ. ਯੋ ਵਾ – ‘‘ਯਾਵ ਮਾਤੁਗਾਮਾਨਂ ਭਤ੍ਤਂ ਪਚ੍ਚਤਿ, ਤਾਵ ਅਨੁਮੋਦਨਂ ਕਰਿਸ੍ਸਾਮਿ, ਅਥ ਮੇ ਅਨੁਮੋਦਨਾਵਸਾਨੇ ਅਤ੍ਤਨੋ ਪਕ੍ਕਭਤ੍ਤਤੋਪਿ ਥੋਕਂ ਦਸ੍ਸਨ੍ਤੀ’’ਤਿ ਅਨੁਮੋਦਨਂ ਵਡ੍ਢੇਤਿ, ਅਯਮ੍ਪਿ ਪਟਿਕਙ੍ਖਤਿ ਨਾਮ. ਸਤ੍ਥਾ ਨ ਏਵਂ ਕਰੋਤਿ. ਨ ਚ ਮੁਚ੍ਚਿਤੁਕਾਮੋਤਿ ਏਕਚ੍ਚੋ ਹਿ ਪਟਿਸਂਮੁਞ੍ਚਿਤ੍ਵਾ ਗਚ੍ਛਤਿ, ਵੇਗੇਨ ਅਨੁਬਨ੍ਧਿਤਬ੍ਬੋ ਹੋਤਿ. ਸਤ੍ਥਾ ਪਨ ਨ ਏਵਂ ਗਚ੍ਛਤਿ, ਪਰਿਸਾਯ ਮਜ੍ਝੇ ਠਿਤੋਵ ਗਚ੍ਛਤਿ. ਅਚ੍ਚੁਕ੍ਕਟ੍ਠਨ੍ਤਿ ਯੋ ਹਿ ਯਾਵ ਹਨੁਕਟ੍ਠਿਤੋ ਉਕ੍ਖਿਪਿਤ੍ਵਾ ਪਾਰੁਪਤਿ, ਤਸ੍ਸ ਅਚ੍ਚੁਕ੍ਕਟ੍ਠਂ ਨਾਮ ਹੋਤਿ. ਯੋ ਯਾਵ ਗੋਪ੍ਫਕਾ ਓਤਾਰੇਤ੍ਵਾਵ ਪਾਰੁਪਤਿ, ਤਸ੍ਸ ਅਚ੍ਚੁਕ੍ਕਟ੍ਠਂ ਹੋਤਿ. ਯੋਪਿ ਉਭਤੋ ਉਕ੍ਖਿਪਿਤ੍ਵਾ ਉਦਰਂ ਵਿਵਰਿਤ੍ਵਾ ਯਾਤਿ, ਤਸ੍ਸਪਿ ਅਚ੍ਚੁਕ੍ਕਟ੍ਠਂ ਹੋਤਿ. ਯੋ ਏਕਂਸਂ ਕਤ੍ਵਾ ਥਨਂ ਵਿਵਰਿਤ੍ਵਾ ਯਾਤਿ, ਤਸ੍ਸਪਿ ਅਚ੍ਚੁਕ੍ਕਟ੍ਠਂ. ਸਤ੍ਥਾ ਤਂ ਸਬ੍ਬਂ ਨ ਕਰੋਤਿ.

ਅਲ੍ਲੀਨਨ੍ਤਿ ਯਥਾ ਅਞ੍ਞੇਸਂ ਸੇਦੇਨ ਤਿਨ੍ਤਂ ਅਲ੍ਲੀਯਤਿ, ਨ ਏਵਂ ਸਤ੍ਥੁ. ਅਪਕਟ੍ਠਨ੍ਤਿ ਖਲਿਸਾਟਕੋ ਵਿਯ ਕਾਯਤੋ ਮੁਚ੍ਚਿਤ੍ਵਾਪਿ ਨ ਤਿਟ੍ਠਤਿ. ਵਾਤੋਤਿ ਵੇਰਮ੍ਭਵਾਤੋਪਿ ਉਟ੍ਠਹਿਤ੍ਵਾ ਚਾਲੇਤੁਂ ਨ ਸਕ੍ਕੋਤਿ. ਪਾਦਮਣ੍ਡਨਾਨੁਯੋਗਨ੍ਤਿ ਇਟ੍ਠਕਾਯ ਘਂਸਨਾਦੀਹਿ ਪਾਦਸੋਭਾਨੁਯੋਗਂ. ਪਕ੍ਖਾਲੇਤ੍ਵਾਤਿ ਪਾਦੇਨੇਵ ਪਾਦਂ ਧੋਵਿਤ੍ਵਾ. ਸੋ ਨੇਵ ਅਤ੍ਤਬ੍ਯਾਬਾਧਾਯਾਤਿਆਦੀਨਿ ਨ ਪੁਬ੍ਬੇਨਿਵਾਸਚੇਤੋਪਰਿਯਞਾਣਾਨਂ ਅਤ੍ਥਿਤਾਯ ਵਦਤਿ, ਇਰਿਯਾਪਥਸਨ੍ਤਤਂ ਪਨ ਦਿਸ੍ਵਾ ਅਨੁਮਾਨੇਨ ਵਦਤਿ. ਧਮ੍ਮਨ੍ਤਿ ਪਰਿਯਤ੍ਤਿਧਮ੍ਮਂ. ਨ ਉਸ੍ਸਾਦੇਤੀਤਿ ਕਿਂ ਮਹਾਰਟ੍ਠਿਕ, ਕਿਂ ਮਹਾਕੁਟੁਮ੍ਬਿਕਾਤਿਆਦੀਨਿ ਵਤ੍ਵਾ ਗੇਹਸ੍ਸਿਤਵਸੇਨ ਨ ਉਸ੍ਸਾਦੇਤਿ. ਨ ਅਪਸਾਦੇਤੀਤਿ ‘‘ਕਿਂ, ਉਪਾਸਕ, ਕਥਂ ਤੇ ਵਿਹਾਰਮਗ੍ਗੋ ਞਾਤੋ? ਕਿਂ ਭਯੇਨ ਨਾਗਚ੍ਛਸਿ? ਨ ਹਿ ਭਿਕ੍ਖੂ ਕਿਞ੍ਚਿ ਅਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤਿ, ਮਾ ਭਾਯੀ’’ਤਿ ਵਾ ‘‘ਕਿਂ ਤੁਯ੍ਹਂ ਏਵਂ ਮਚ੍ਛਰਿਯਜੀਵਿਤਂ ਨਾਮਾ’’ਤਿ ਵਾ ਆਦੀਨਿ ਵਤ੍ਵਾ ਗੇਹਸ੍ਸਿਤਪੇਮੇਨ ਨ ਅਪਸਾਦੇਤਿ.

ਵਿਸ੍ਸਟ੍ਠੋਤਿ ਸਿਨਿਦ੍ਧੋ ਅਪਲਿਬੁਦ੍ਧੋ. ਵਿਞ੍ਞੇਯ੍ਯੋਤਿ ਵਿਞ੍ਞਾਪਨੀਯੋ ਪਾਕਟੋ, ਵਿਸ੍ਸਟ੍ਠਤ੍ਤਾਯੇਵ ਚੇਸ ਵਿਞ੍ਞੇਯ੍ਯੋ ਹੋਤਿ. ਮਞ੍ਜੂਤਿ ਮਧੁਰੋ. ਸਵਨੀਯੋਤਿ ਸੋਤਸੁਖੋ, ਮਧੁਰਤ੍ਤਾਯੇਵ ਚੇਸ ਸਵਨੀਯੋ ਹੋਤਿ. ਬਿਨ੍ਦੂਤਿ ਸਮ੍ਪਿਣ੍ਡਿਤੋ. ਅਵਿਸਾਰੀਤਿ ਅਵਿਸਟੋ, ਬਿਨ੍ਦੁਤ੍ਤਾਯੇਵ ਚੇਸ ਅਵਿਸਾਰੀ ਹੋਤਿ. ਗਮ੍ਭੀਰੋਤਿ ਗਮ੍ਭੀਰਸਮੁਟ੍ਠਿਤੋ. ਨਿਨ੍ਨਾਦੀਤਿ ਨਿਨ੍ਨਾਦਵਾ, ਗਮ੍ਭੀਰਤ੍ਤਾਯੇਵ ਚੇਸ ਨਿਨ੍ਨਾਦੀ ਹੋਤਿ. ਯਥਾਪਰਿਸਨ੍ਤਿ ਚਕ੍ਕਵਾਲ਼ਪਰਿਯਨ੍ਤਮ੍ਪਿ ਏਕਾਬਦ੍ਧਪਰਿਸਂ ਵਿਞ੍ਞਾਪੇਤਿ. ਬਹਿਦ੍ਧਾਤਿ ਅਙ੍ਗੁਲਿਮਤ੍ਤਮ੍ਪਿ ਪਰਿਸਤੋ ਬਹਿਦ੍ਧਾ ਨ ਗਚ੍ਛਤਿ. ਤਸ੍ਮਾ? ਸੋ ਏਵਰੂਪੋ ਮਧੁਰਸ੍ਸਰੋ ਅਕਾਰਣਾ ਮਾ ਨਸ੍ਸੀਤਿ. ਇਤਿ ਭਗਵਤੋ ਘੋਸੋ ਪਰਿਸਾਯ ਮਤ੍ਥਕੇਨੇਵ ਚਰਤਿ.

ਅਵਲੋਕਯਮਾਨਾਤਿ ਸਿਰਸ੍ਮਿਂ ਅਞ੍ਜਲਿਂ ਠਪੇਤ੍ਵਾ ਭਗਵਨ੍ਤਂ ਓਲੋਕੇਨ੍ਤਾਵ ਪਚ੍ਚੋਸਕ੍ਕਿਤ੍ਵਾ ਦਸ੍ਸਨਵਿਜਹਨਟ੍ਠਾਨੇ ਵਨ੍ਦਿਤ੍ਵਾ ਗਚ੍ਛਨ੍ਤਿ. ਅਵਿਜਹਿਤਤ੍ਤਾਤਿ ਯੋ ਹਿ ਕਥਂ ਸੁਤ੍ਵਾ ਵੁਟ੍ਠਿਤੋ ਅਞ੍ਞਂ ਦਿਟ੍ਠਸੁਤਾਦਿਕਂ ਕਥਂ ਕਥੇਨ੍ਤੋ ਗਚ੍ਛਤਿ, ਏਸ ਸਭਾਵੇਨ ਵਿਜਹਤਿ ਨਾਮ. ਯੋ ਪਨ ਸੁਤਧਮ੍ਮਕਥਾਯ ਵਣ੍ਣਂ ਕਥੇਨ੍ਤੋਵ ਗਚ੍ਛਤਿ, ਅਯਂ ਨ ਵਿਜਹਤਿ ਨਾਮ, ਏਵਂ ਅਵਿਜਹਨ੍ਤਭਾਵੇਨ ਪਕ੍ਕਮਨ੍ਤਿ. ਗਚ੍ਛਨ੍ਤਨ੍ਤਿ ਰਜ੍ਜੁਯਨ੍ਤਵਸੇਨ ਰਤਨਸਤ੍ਤੁਬ੍ਬੇਧਂ ਸੁਵਣ੍ਣਗ੍ਘਿਕਂ ਵਿਯ ਗਚ੍ਛਨ੍ਤਂ. ਅਦ੍ਦਸਾਮ ਠਿਤਨ੍ਤਿ ਸਮੁਸ੍ਸਿਤਕਞ੍ਚਨਪਬ੍ਬਤਂ ਵਿਯ ਠਿਤਂ ਅਦ੍ਦਸਾਮ. ਤਤੋ ਚ ਭਿਯ੍ਯੋਤਿ ਵਿਤ੍ਥਾਰੇਤ੍ਵਾ ਗੁਣੇ ਕਥੇਤੁਂ ਅਸਕ੍ਕੋਨ੍ਤੋ ਅਵਸੇਸੇ ਗੁਣੇ ਸਂਖਿਪਿਤ੍ਵਾ ਕਲਾਪਂ ਵਿਯ ਸੁਤ੍ਤਕਬਦ੍ਧਂ ਵਿਯ ਚ ਕਤ੍ਵਾ ਵਿਸ੍ਸਜ੍ਜੇਨ੍ਤੋ ਏਵਮਾਹ. ਅਯਮੇਤ੍ਥ ਅਧਿਪ੍ਪਾਯੋ – ਮਯਾ ਕਥਿਤਗੁਣੇਹਿ ਅਕਥਿਤਾਵ ਬਹੁਤਰਾ. ਮਹਾਪਥਵਿਮਹਾਸਮੁਦ੍ਦਾਦਯੋ ਵਿਯ ਹਿ ਤਸ੍ਸ ਭੋਤੋ ਅਨਨ੍ਤਾ ਅਪ੍ਪਮੇਯ੍ਯਾ ਗੁਣਾ ਆਕਾਸਮਿਵ ਵਿਤ੍ਥਾਰਿਤਾਤਿ.

੩੯੦. ਅਪ੍ਪਟਿਸਂਵਿਦਿਤੋਤਿ ਅਵਿਞ੍ਞਾਤਆਗਮਨੋ. ਪਬ੍ਬਜਿਤੇ ਉਪਸਙ੍ਕਮਨ੍ਤੇਨ ਹਿ ਚੀਵਰਪਰਿਕਮ੍ਮਾਦਿਸਮਯੇ ਵਾ ਏਕਂ ਨਿਵਾਸੇਤ੍ਵਾ ਸਰੀਰਭਞ੍ਜਨਸਮਯੇ ਵਾ ਉਪਸਙ੍ਕਮਿਤ੍ਵਾ ਤਤੋਵ ਪਟਿਨਿਵਤ੍ਤਿਤਬ੍ਬਂ ਹੋਤਿ, ਪਟਿਸਨ੍ਥਾਰਮਤ੍ਤਮ੍ਪਿ ਨ ਜਾਯਤਿ. ਪੁਰੇਤਰਂ ਪਨ ਓਕਾਸੇ ਕਾਰਿਤੇ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਚੀਵਰਂ ਪਾਰੁਪਿਤ੍ਵਾ ਭਿਕ੍ਖੁ ਵਿਵਿਤ੍ਤੇ ਠਾਨੇ ਨਿਸੀਦਤਿ, ਤਂ ਆਗਨ੍ਤ੍ਵਾ ਪਸ੍ਸਨ੍ਤਾ ਦਸ੍ਸਨੇਨਪਿ ਪਸੀਦਨ੍ਤਿ, ਪਟਿਸਨ੍ਥਾਰੋ ਜਾਯਤਿ, ਪਞ੍ਹਬ੍ਯਾਕਰਣਂ ਵਾ ਧਮ੍ਮਕਥਾ ਵਾ ਲਬ੍ਭਤਿ. ਤਸ੍ਮਾ ਪਣ੍ਡਿਤਾ ਓਕਾਸਂ ਕਾਰੇਨ੍ਤਿ. ਸੋ ਚ ਨੇਸਂ ਅਞ੍ਞਤਰੋ, ਤੇਨਸ੍ਸ ਏਤਦਹੋਸਿ. ਜਿਣ੍ਣੋ ਵੁਡ੍ਢੋਤਿ ਅਤ੍ਤਨੋ ਉਗ੍ਗਤਭਾਵਂ ਅਕਥੇਤ੍ਵਾ ਕਸ੍ਮਾ ਏਵਮਾਹ? ਬੁਦ੍ਧਾ ਨਾਮ ਅਨੁਦ੍ਦਯਸਮ੍ਪਨ੍ਨਾ ਹੋਨ੍ਤਿ, ਮਹਲ੍ਲਕਭਾਵਂ ਞਤ੍ਵਾ ਸੀਘਂ ਓਕਾਸਂ ਕਰਿਸ੍ਸਤੀਤਿ ਏਵਮਾਹ.

੩੯੧. ਓਰਮਿਯ ਓਕਾਸਮਕਾਸੀਤਿ ਵੇਗੇਨ ਉਟ੍ਠਾਯ ਦ੍ਵਿਧਾ ਭਿਜ੍ਜਿਤ੍ਵਾ ਓਕਾਸਮਕਾਸਿ.

ਯੇ ਮੇਤਿ ਯੇ ਮਯਾ. ਨਾਰੀਸਮਾਨਸਵ੍ਹਯਾਤਿ ਨਾਰੀਸਮਾਨਨਾਮਂ ਇਤ੍ਥਿਲਿਙ੍ਗਂ, ਤੇਨ ਅਵ੍ਹਾਤਬ੍ਬਾਤਿ ਨਾਰੀਸਮਾਨਸਵ੍ਹਯਾ, ਇਤ੍ਥਿਲਿਙ੍ਗੇਨ ਵਤ੍ਤਬ੍ਬਾਤਿ ਵੋਹਾਰਕੁਸਲਤਾਯ ਏਵਂ ਵਦਤਿ. ਪਹੂਤਜਿਵ੍ਹੋਤਿ ਪੁਥੁਲਜਿਵ੍ਹੋ. ਨਿਨ੍ਨਾਮਯੇਤਨ੍ਤਿ ਨੀਹਰ ਏਤਂ.

੩੯੩. ਕੇਵਲੀਤਿ ਸਕਲਗੁਣਸਮ੍ਪਨ੍ਨੋ.

੩੯੪. ਪਚ੍ਚਭਾਸੀਤਿ ਏਕਪ੍ਪਹਾਰੇਨ ਪੁਚ੍ਛਿਤੇ ਅਟ੍ਠ ਪਞ੍ਹੇ ਬ੍ਯਾਕਰੋਨ੍ਤੋ ਪਤਿਅਭਾਸਿ. ਯੋ ਵੇਦੀਤਿ ਯੋ ਵਿਦਤਿ ਜਾਨਾਤਿ, ਯਸ੍ਸ ਪੁਬ੍ਬੇਨਿਵਾਸੋ ਪਾਕਟੋ. ਸਗ੍ਗਾਪਾਯਞ੍ਚ ਪਸ੍ਸਤੀਤਿ ਦਿਬ੍ਬਚਕ੍ਖੁਞਾਣਂ ਕਥਿਤਂ. ਜਾਤਿਕ੍ਖਯਂ ਪਤ੍ਤੋਤਿ ਅਰਹਤ੍ਤਂ ਪਤ੍ਤੋ. ਅਭਿਞ੍ਞਾ ਵੋਸਿਤੋਤਿ ਤਂ ਅਰਹਤ੍ਤਂ ਅਭਿਜਾਨਿਤ੍ਵਾ ਵੋਸਿਤੋ ਵੋਸਾਨਪ੍ਪਤ੍ਤੋ. ਮੁਨੀਤਿ ਅਰਹਤ੍ਤਞਾਣਮੋਨੇਯ੍ਯੇਨ ਸਮਨ੍ਨਾਗਤੋ.

ਵਿਸੁਦ੍ਧਨ੍ਤਿ ਪਣ੍ਡਰਂ. ਮੁਤ੍ਤਂ ਰਾਗੇਹੀਤਿ ਕਿਲੇਸਰਾਗੇਹਿ ਮੁਤ੍ਤਂ. ਪਹੀਨਜਾਤਿਮਰਣੋਤਿ ਜਾਤਿਕ੍ਖਯਪ੍ਪਤ੍ਤਤ੍ਤਾ ਪਹੀਨਜਾਤਿਕੋ, ਜਾਤਿਪਹਾਨੇਨੇਵ ਪਹੀਨਮਰਣੋ. ਬ੍ਰਹ੍ਮਚਰਿਯਸ੍ਸ ਕੇਵਲੀਤਿ ਯਂ ਬ੍ਰਹ੍ਮਚਰਿਯਸ੍ਸ ਕੇਵਲੀ ਸਕਲਭਾਵੋ, ਤੇਨ ਸਮਨ੍ਨਾਗਤੋ, ਸਕਲਚਤੁਮਗ੍ਗਬ੍ਰਹ੍ਮਚਰਿਯਵਾਸੋਤਿ ਅਤ੍ਥੋ. ਪਾਰਗੂ ਸਬ੍ਬਧਮ੍ਮਾਨਨ੍ਤਿ ਸਬ੍ਬੇਸਂ ਲੋਕਿਯਲੋਕੁਤ੍ਤਰਧਮ੍ਮਾਨਂ ਅਭਿਞ੍ਞਾਯ ਪਾਰਂ ਗਤੋ, ਸਬ੍ਬਧਮ੍ਮੇ ਅਭਿਜਾਨਿਤ੍ਵਾ ਠਿਤੋਤਿ ਅਤ੍ਥੋ. ਪਾਰਗੂਤਿ ਵਾ ਏਤ੍ਤਾਵਤਾ ਪਰਿਞ੍ਞਾਪਾਰਗੂ ਪਞ੍ਚਨ੍ਨਂ ਖਨ੍ਧਾਨਂ, ਪਹਾਨਪਾਰਗੂ ਸਬ੍ਬਕਿਲੇਸਾਨਂ, ਭਾਵਨਾਪਾਰਗੂ ਚਤੁਨ੍ਨਂ ਮਗ੍ਗਾਨਂ, ਸਚ੍ਛਿਕਿਰਿਯਾਪਾਰਗੂ ਨਿਰੋਧਸ੍ਸ, ਸਮਾਪਤ੍ਤਿਪਾਰਗੂ ਸਬ੍ਬਸਮਾਪਤ੍ਤੀਨਨ੍ਤਿ ਅਯਮਤ੍ਥੋ ਵੁਤ੍ਤੋ. ਪੁਨ ਸਬ੍ਬਧਮ੍ਮਾਨਨ੍ਤਿ ਇਮਿਨਾ ਅਭਿਞ੍ਞਾਪਾਰਗੂ ਵੁਤ੍ਤੋਤਿ. ਬੁਦ੍ਧੋ ਤਾਦੀ ਪਵੁਚ੍ਚਤੀਤਿ ਤਾਦਿਸੋ ਛਹਿ ਆਕਾਰੇਹਿ ਪਾਰਂ ਗਤੋ ਸਬ੍ਬਾਕਾਰੇਨ ਚਤੁਨ੍ਨਂ ਸਚ੍ਚਾਨਂ ਬੁਦ੍ਧਤ੍ਤਾ ਬੁਦ੍ਧੋਤਿ ਪਵੁਚ੍ਚਤੀਤਿ.

ਕਿਂ ਪਨ ਏਤ੍ਤਾਵਤਾ ਸਬ੍ਬੇ ਪਞ੍ਹਾ ਵਿਸ੍ਸਜ੍ਜਿਤਾ ਹੋਨ੍ਤੀਤਿ? ਆਮ ਵਿਸ੍ਸਜ੍ਜਿਤਾ, ਚਿਤ੍ਤਂ ਵਿਸੁਦ੍ਧਂ ਜਾਨਾਤਿ, ਮੁਤ੍ਤਂ ਰਾਗੇਹੀਤਿ ਇਮਿਨਾ ਤਾਵ ਬਾਹਿਤਪਾਪਤ੍ਤਾ ਬ੍ਰਾਹ੍ਮਣੋਤਿ ਪਠਮਪਞ੍ਹੋ ਵਿਸ੍ਸਜ੍ਜਿਤੋ ਹੋਤਿ. ਪਾਰਗੂਤਿ ਇਮਿਨਾ ਵੇਦੇਹਿ ਗਤਤ੍ਤਾ ਵੇਦਗੂਤਿ ਦੁਤਿਯਪਞ੍ਹੋ ਵਿਸ੍ਸਜ੍ਜਿਤੋ ਹੋਤਿ. ਪੁਬ੍ਬੇਨਿਵਾਸਨ੍ਤਿਆਦੀਹਿ ਇਮਾਸਂ ਤਿਸ੍ਸਨ੍ਨਂ ਵਿਜ੍ਜਾਨਂ ਅਤ੍ਥਿਤਾਯ ਤੇਵਿਜ੍ਜੋਤਿ ਤਤਿਯਪਞ੍ਹੋ ਵਿਸ੍ਸਜ੍ਜਿਤੋ ਹੋਤਿ. ਮੁਤ੍ਤਂ ਰਾਗੇਹਿ ਸਬ੍ਬਸੋਤਿ ਇਮਿਨਾਵ ਨਿਸ੍ਸਟਤ੍ਤਾ ਪਾਪਧਮ੍ਮਾਨਂ ਸੋਤ੍ਤਿਯੋਤਿ ਚਤੁਤ੍ਥਪਞ੍ਹੋ ਵਿਸ੍ਸਜ੍ਜਿਤੋ ਹੋਤਿ. ਜਾਤਿਕ੍ਖਯਂ ਪਤ੍ਤੋਤਿ ਇਮਿਨਾ ਪਨ ਅਰਹਤ੍ਤਸ੍ਸੇਵ ਵੁਤ੍ਤਤ੍ਤਾ ਪਞ੍ਚਮਪਞ੍ਹੋ ਵਿਸ੍ਸਜ੍ਜਿਤੋ ਹੋਤਿ. ਵੋਸਿਤੋਤਿ ਚ ਬ੍ਰਹ੍ਮਚਰਿਯਸ੍ਸ ਕੇਵਲੀਤਿ ਚ ਇਮੇਹਿ ਛਟ੍ਠਪਞ੍ਹੋ ਵਿਸ੍ਸਜ੍ਜਿਤੋ ਹੋਤਿ. ਅਭਿਞ੍ਞਾ ਵੋਸਿਤੋ ਮੁਨੀਤਿ ਇਮਿਨਾ ਸਤ੍ਤਮਪਞ੍ਹੋ ਵਿਸ੍ਸਜ੍ਜਿਤੋ ਹੋਤਿ. ਪਾਰਗੂ ਸਬ੍ਬਧਮ੍ਮਾਨਂ, ਬੁਦ੍ਧੋ ਤਾਦੀ ਪਵੁਚ੍ਚਤੀਤਿ ਇਮਿਨਾ ਅਟ੍ਠਮਪਞ੍ਹੋ ਵਿਸ੍ਸਜ੍ਜਿਤੋ ਹੋਤਿ.

੩੯੫. ਦਾਨਕਥਨ੍ਤਿਆਦੀਨਿ ਹੇਟ੍ਠਾ ਸੁਤ੍ਤੇ ਵਿਤ੍ਥਾਰਿਤਾਨੇਵ. ਪਚ੍ਚਪਾਦੀਤਿ ਪਟਿਪਜ੍ਜਿ. ਧਮ੍ਮਸ੍ਸਾਨੁਧਮ੍ਮਨ੍ਤਿ ਇਮਸ੍ਮਿਂ ਸੁਤ੍ਤੇ ਧਮ੍ਮੋ ਨਾਮ ਅਰਹਤ੍ਤਮਗ੍ਗੋ, ਅਨੁਧਮ੍ਮੋ ਨਾਮ ਹੇਟ੍ਠਿਮਾ ਤਯੋ ਮਗ੍ਗਾ ਤੀਣਿ ਚ ਸਾਮਞ੍ਞਫਲਾਨਿ, ਤਾਨਿ ਪਟਿਪਾਟਿਯਾ ਪਟਿਲਭੀਤਿ ਅਤ੍ਥੋ. ਨ ਚ ਮਂ ਧਮ੍ਮਾਧਿਕਰਣਂ ਵਿਹੇਸੇਸੀਤਿ ਮਞ੍ਚ ਧਮ੍ਮਕਾਰਣਾ ਨ ਕਿਲਮੇਸਿ, ਨ ਪੁਨਪ੍ਪੁਨਂ ਕਥਾਪੇਸੀਤਿ ਵੁਤ੍ਤਂ ਹੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਤਤ੍ਥ ਪਰਿਨਿਬ੍ਬਾਯੀਤਿ ਪਨ ਪਦੇਨ ਦੇਸਨਾਯ ਅਰਹਤ੍ਤੇਨੇਵ ਕੂਟਂ ਗਹਿਤਨ੍ਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਬ੍ਰਹ੍ਮਾਯੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.