੨. ਸੇਲਸੁਤ੍ਤਵਣ੍ਣਨਾ

੩੯੬. ਏਵਂ ਮੇ ਸੁਤਨ੍ਤਿ ਸੇਲਸੁਤ੍ਤਂ. ਤਤ੍ਥ ਅਙ੍ਗੁਤ੍ਤਰਾਪੇਸੂਤਿਆਦਿ ਪੋਤਲਿਯਸੁਤ੍ਤੇ ਵਿਤ੍ਥਾਰਿਤਮੇਵ. ਅਡ੍ਢਤੇਲ਼ਸੇਹੀਤਿ ਅਡ੍ਢੇਨ ਤੇਲ਼ਸੇਹਿ, ਦ੍ਵਾਦਸਹਿ ਸਤੇਹਿ ਪਞ੍ਞਾਸਾਯ ਚ ਭਿਕ੍ਖੂਹਿ ਸਦ੍ਧਿਨ੍ਤਿ ਵੁਤ੍ਤਂ ਹੋਤਿ. ਤੇ ਪਨ ਸਾਵਕਸਨ੍ਨਿਪਾਤੇ ਸਨ੍ਨਿਪਤਿਤਾ ਭਿਕ੍ਖੂਯੇਵ ਸਬ੍ਬੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤਾ ਖੀਣਾਸਵਾ. ਕੇਣਿਯੋਤਿ ਤਸ੍ਸ ਨਾਮਂ, ਜਟਿਲੋਤਿ ਤਾਪਸੋ. ਸੋ ਕਿਰ ਬ੍ਰਾਹ੍ਮਣਮਹਾਸਾਲੋ, ਧਨਰਕ੍ਖਣਤ੍ਥਾਯ ਪਨ ਤਾਪਸਪਬ੍ਬਜ੍ਜਂ ਸਮਾਦਾਯ ਰਞ੍ਞੋ ਪਣ੍ਣਾਕਾਰਂ ਦਤ੍ਵਾ ਭੂਮਿਭਾਗਂ ਗਹੇਤ੍ਵਾ ਤਤ੍ਥ ਅਸ੍ਸਮਂ ਕਾਰੇਤ੍ਵਾ ਵਸਤਿ ਪਞ੍ਚਹਿ ਸਕਟਸਤੇਹਿ ਵਣਿਜ੍ਜਂ ਪਯੋਜੇਤ੍ਵਾ ਕੁਲਸਹਸ੍ਸਸ੍ਸ ਨਿਸ੍ਸਯੋ ਹੁਤ੍ਵਾ, ਅਸ੍ਸਮੇਪਿ ਚਸ੍ਸ ਏਕੋ ਤਾਲਰੁਕ੍ਖੋ ਦਿਵਸੇ ਦਿਵਸੇ ਏਕਂ ਸੋਵਣ੍ਣਮਯਂ ਤਾਲਫਲਂ ਮੁਞ੍ਚਤੀਤਿ ਵਦਨ੍ਤਿ. ਸੋ ਦਿਵਾ ਕਾਸਾਯਾਨਿ ਧਾਰੇਤਿ, ਜਟਾ ਚ ਬਨ੍ਧਤਿ, ਰਤ੍ਤਿਂ ਕਾਮਸਮ੍ਪਤ੍ਤਿਂ ਅਨੁਭਵਤਿ. ਧਮ੍ਮਿਯਾ ਕਥਾਯਾਤਿ ਪਾਨਕਾਨਿਸਂਸਪਟਿਸਂਯੁਤ੍ਤਾਯ ਧਮ੍ਮਿਯਾ ਕਥਾਯ. ਅਯਞ੍ਹਿ ਕੇਣਿਯੋ ਤੁਚ੍ਛਹਤ੍ਥੋ ਭਗਵਤੋ ਦਸ੍ਸਨਾਯ ਗਨ੍ਤੁਂ ਲਜ੍ਜਾਯਮਾਨੋ – ‘‘ਵਿਕਾਲਭੋਜਨਾ ਵਿਰਤਾਨਮ੍ਪਿ ਪਾਨਕਂ ਕਪ੍ਪਤੀ’’ਤਿ ਚਿਨ੍ਤੇਤ੍ਵਾ ਸੁਸਙ੍ਖਤਬਦਰਪਾਨਂ ਪਞ੍ਚਹਿ ਕਾਜਸਤੇਹਿ ਗਾਹਾਪੇਤ੍ਵਾ ਅਗਮਾਸਿ. ਏਵਂ ਗਤਭਾਵੋ ਚਸ੍ਸ – ‘‘ਅਥ ਖੋ ਕੇਣਿਯਸ੍ਸ ਜਟਿਲਸ੍ਸ ਏਤਦਹੋਸਿ ਕਿਂ ਨੁ ਖੋ ਅਹਂ ਸਮਣਸ੍ਸ ਗੋਤਮਸ੍ਸ ਹਰਾਪੇਯ੍ਯ’’ਨ੍ਤਿ ਭੇਸਜ੍ਜਕ੍ਖਨ੍ਧਕੇ (ਮਹਾਵ. ੩੦੦) ਪਾਲ਼ਿਆਰੁਲ਼੍ਹੋਯੇਵ.

ਦੁਤਿਯਮ੍ਪਿ ਖੋ ਭਗਵਾਤਿ ਕਸ੍ਮਾ ਪੁਨਪ੍ਪੁਨਂ ਪਟਿਕ੍ਖਿਪਿ? ਤਿਤ੍ਥਿਯਾਨਂ ਪਟਿਕ੍ਖੇਪਪਸਨ੍ਨਤਾਯ, ਅਕਾਰਣਮੇਤਂ, ਨਤ੍ਥਿ ਬੁਦ੍ਧਾਨਂ ਪਚ੍ਚਯਹੇਤੁ ਏਵਰੂਪਂ ਕੋਹਞ੍ਞਂ. ਅਯਂ ਪਨ ਅਡ੍ਢਤੇਲ਼ਸਾਨਿ ਭਿਕ੍ਖੁਸਤਾਨਿ ਦਿਸ੍ਵਾ ਏਤ੍ਤਕਾਨਂਯੇਵ ਭਿਕ੍ਖਂ ਪਟਿਯਾਦੇਸ੍ਸਤਿ, ਸ੍ਵੇਵ ਸੇਲੋ ਤੀਹਿ ਪੁਰਿਸਸਤੇਹਿ ਸਦ੍ਧਿਂ ਪਬ੍ਬਜਿਸ੍ਸਤਿ. ਅਯੁਤ੍ਤਂ ਖੋ ਪਨ ਨਵਕੇ ਅਞ੍ਞਤੋ ਪੇਸੇਤ੍ਵਾ ਇਮੇਹੇਵ ਸਦ੍ਧਿਂ ਗਨ੍ਤੁਂ, ਇਮੇ ਵਾ ਅਞ੍ਞਤੋ ਪੇਸੇਤ੍ਵਾ ਨਵਕੇਹਿ ਸਦ੍ਧਿਂ ਗਨ੍ਤੁਂ. ਅਥਾਪਿ ਸਬ੍ਬੇ ਗਹੇਤ੍ਵਾ ਗਮਿਸ੍ਸਾਮਿ, ਭਿਕ੍ਖਾਹਾਰੋ ਨਪ੍ਪਹੋਸ੍ਸਤਿ. ਤਤੋ ਭਿਕ੍ਖੂਸੁ ਪਿਣ੍ਡਾਯ ਚਰਨ੍ਤੇਸੁ ਮਨੁਸ੍ਸਾ ਉਜ੍ਝਾਯਿਸ੍ਸਨ੍ਤਿ – ‘‘ਚਿਰਸ੍ਸਾਪਿ ਕੇਣਿਯੋ ਸਮਣਂ ਗੋਤਮਂ ਨਿਮਨ੍ਤੇਤ੍ਵਾ ਯਾਪਨਮਤ੍ਤਂ ਦਾਤੁਂ ਨਾਸਕ੍ਖੀ’’ਤਿ, ਸਯਮ੍ਪਿ ਵਿਪ੍ਪਟਿਸਾਰੀ ਭਵਿਸ੍ਸਤਿ. ਪਟਿਕ੍ਖੇਪੇ ਪਨ ਕਤੇ ‘‘ਸਮਣੋ ਗੋਤਮੋ ਪੁਨਪ੍ਪੁਨਂ ‘ਤ੍ਵਞ੍ਚ ਬ੍ਰਾਹ੍ਮਣੇਸੁ ਅਭਿਪ੍ਪਸਨ੍ਨੋ’ਤਿ ਬ੍ਰਾਹ੍ਮਣਾਨਂ ਨਾਮਂ ਗਣ੍ਹਾਤੀ’’ਤਿ ਚਿਨ੍ਤੇਤ੍ਵਾ ਬ੍ਰਾਹ੍ਮਣੇਪਿ ਨਿਮਨ੍ਤੇਤੁਕਾਮੋ ਭਵਿਸ੍ਸਤਿ, ਤਤੋ ਬ੍ਰਾਹ੍ਮਣੇ ਪਾਟਿਯੇਕ੍ਕਂ ਨਿਮਨ੍ਤੇਸ੍ਸਤਿ, ਤੇ ਤੇਨ ਨਿਮਨ੍ਤਿਤਾ ਭਿਕ੍ਖੂ ਹੁਤ੍ਵਾ ਭੁਞ੍ਜਿਸ੍ਸਨ੍ਤਿ. ਏਵਮਸ੍ਸ ਸਦ੍ਧਾ ਅਨੁਰਕ੍ਖਿਤਾ ਭਵਿਸ੍ਸਤੀਤਿ ਪੁਨਪ੍ਪੁਨਂ ਪਟਿਕ੍ਖਿਪਿ. ਕਿਞ੍ਚਾਪਿ ਖੋ, ਭੋਤਿ ਇਮਿਨਾ ਇਦਂ ਦੀਪੇਤਿ, – ‘‘ਭੋ ਗੋਤਮ, ਕਿਂ ਜਾਤਂ ਯਦਿ ਅਹਂ ਬ੍ਰਾਹ੍ਮਣੇਸੁ ਅਭਿਪ੍ਪਸਨ੍ਨੋ, ਅਧਿਵਾਸੇਤੁ ਭਵਂ ਗੋਤਮੋ, ਅਹਂ ਬ੍ਰਾਹ੍ਮਣਾਨਮ੍ਪਿ ਦਾਤੁਂ ਸਕ੍ਕੋਮਿ ਤੁਮ੍ਹਾਕਮ੍ਪੀ’’ਤਿ.

ਕਾਯਵੇਯ੍ਯਾਵਟਿਕਨ੍ਤਿ ਕਾਯਵੇਯ੍ਯਾਵਚ੍ਚਂ. ਮਣ੍ਡਲਮਾਲ਼ਨ੍ਤਿ ਦੁਸ੍ਸਮਣ੍ਡਪਂ.

੩੯੭. ਆਵਾਹੋਤਿ ਕਞ੍ਞਾਗਹਣਂ. ਵਿਵਾਹੋਤਿ ਕਞ੍ਞਾਦਾਨਂ. ਸੋ ਮੇ ਨਿਮਨ੍ਤਿਤੋਤਿ ਸੋ ਮਯਾ ਨਿਮਨ੍ਤਿਤੋ. ਅਥ ਬ੍ਰਾਹ੍ਮਣੋ ਪਰਿਪਕ੍ਕੋਪਨਿਸ੍ਸਯਤ੍ਤਾ ਬੁਦ੍ਧਸਦ੍ਦਂ ਸੁਤ੍ਵਾਵ ਅਮਤੇਨੇਵਾਭਿਸਿਤ੍ਤੋ ਪਸਾਦਂ ਆਵਿਕਰੋਨ੍ਤੋ ਬੁਦ੍ਧੋਤਿ, ਭੋ ਕੇਣਿਯ, ਵਦੇਸੀਤਿ ਆਹ. ਕੇਣਿਯੋ ਯਥਾਭੂਤਂ ਆਚਿਕ੍ਖਨ੍ਤੋ ਬੁਦ੍ਧੋਤਿ, ਭੋ ਸੇਲ, ਵਦਾਮੀਤਿ ਆਹ. ਤਤੋ ਨਂ ਪੁਨਪਿ ਦਲ਼੍ਹੀਕਰਣਤ੍ਥਂ ਪੁਚ੍ਛਿ, ਇਤਰੋਪਿ ਤਥੇਵ ਆਰੋਚੇਸਿ.

੩੯੮. ਅਥਸ੍ਸ ਕਪ੍ਪਸਤਸਹਸ੍ਸੇਹਿਪਿ ਬੁਦ੍ਧਸਦ੍ਦਸ੍ਸੇਵ ਦੁਲ੍ਲਭਭਾਵਂ ਸਮ੍ਪਸ੍ਸਤੋ. ਏਤਦਹੋਸੀਤਿ. ਏਤਂ ‘‘ਘੋਸੋਪਿ ਖੋ’’ਤਿਆਦਿ ਅਹੋਸਿ. ਨੀਲਵਨਰਾਜੀਤਿ ਨੀਲਵਣ੍ਣਰੁਕ੍ਖਪਨ੍ਤਿ. ਪਦੇ ਪਦਨ੍ਤਿ ਪਦਪ੍ਪਮਾਣੇ ਪਦਂ. ਅਚ੍ਚਾਸਨ੍ਨੇ ਹਿ ਅਤਿਦੂਰੇ ਵਾ ਪਾਦੇ ਨਿਕ੍ਖਿਪਮਾਨੇ ਸਦ੍ਦੋ ਉਟ੍ਠਾਤਿ, ਤਂ ਪਟਿਸੇਧੇਨ੍ਤੋ ਏਵਮਾਹ. ਸੀਹਾਵ ਏਕਚਰਾਤਿ ਗਣਵਾਸੀ ਸੀਹੋ ਸੀਹਪੋਤਕਾਦੀਹਿ ਸਦ੍ਧਿਂ ਪਮਾਦਂ ਆਪਜ੍ਜਤਿ, ਏਕਚਰੋ ਅਪ੍ਪਮਤ੍ਤੋ ਹੋਤਿ. ਇਤਿ ਅਪ੍ਪਮਾਦਵਿਹਾਰਂ ਦਸ੍ਸੇਨ੍ਤੋ ਏਕਚਰਸੀਹੇਨ ਓਪਮ੍ਮਂ ਕਰੋਤਿ. ਮਾ ਮੇ ਭੋਨ੍ਤੋਤਿ ਆਚਾਰਂ ਸਿਕ੍ਖਾਪੇਨ੍ਤੋ ਆਹ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਸਚੇ ਤੁਮ੍ਹੇ ਕਥਾਵਾਰਂ ਅਲਭਿਤ੍ਵਾ ਮਮ ਕਥਾਯ ਅਨ੍ਤਰੇ ਕਥਂ ਪਵੇਸੇਸ੍ਸਥ, ‘‘ਅਨ੍ਤੇਵਾਸਿਕੇ ਸਿਕ੍ਖਾਪੇਤੁਂ ਨਾਸਕ੍ਖੀ’’ਤਿ ਮਯ੍ਹਂ ਗਰਹਾ ਉਪ੍ਪਜ੍ਜਿਸ੍ਸਤਿ, ਤਸ੍ਮਾ ਓਕਾਸਂ ਪਸ੍ਸਿਤ੍ਵਾ ਮਨ੍ਤੇਯ੍ਯਾਥਾਤਿ. ਨੋ ਚ ਖੋ ਨਂ ਜਾਨਾਮੀਤਿ ਵਿਪਸ੍ਸੀਪਿ ਬੋਧਿਸਤ੍ਤੋ ਚਤੁਰਾਸੀਤਿਸਹਸ੍ਸਤ੍ਥੇਰਪਬ੍ਬਜਿਤਪਰਿਵਾਰੋ ਸਤ੍ਤ ਮਾਸਾਨਿ ਬੋਧਿਸਤ੍ਤਚਾਰਿਕਂ ਚਰਿ, ਬੁਦ੍ਧੁਪ੍ਪਾਦਕਾਲੋ ਵਿਯ ਅਹੋਸਿ. ਅਮ੍ਹਾਕਮ੍ਪਿ ਬੋਧਿਸਤ੍ਤੋ ਛਬ੍ਬਸ੍ਸਾਨਿ ਬੋਧਿਸਤ੍ਤਚਾਰਿਕਂ ਚਰਿ. ਏਵਂ ਪਰਿਪੁਣ੍ਣਸਰੀਰਲਕ੍ਖਣੇਹਿ ਸਮਨ੍ਨਾਗਤਾਪਿ ਬੁਦ੍ਧਾ ਨ ਹੋਨ੍ਤਿ. ਤਸ੍ਮਾ ਬ੍ਰਾਹ੍ਮਣੋ ‘‘ਨੋ ਚ ਖੋ ਨਂ ਜਾਨਾਮੀ’’ਤਿ ਆਹ.

੩੯੯. ਪਰਿਪੁਣ੍ਣਕਾਯੋਤਿ ਲਕ੍ਖਣੇਹਿ ਪਰਿਪੁਣ੍ਣਤਾਯ ਅਹੀਨਙ੍ਗਤਾਯ ਚ ਪਰਿਪੁਣ੍ਣਸਰੀਰੋ. ਸੁਰੁਚੀਤਿ ਸੁਨ੍ਦਰਸਰੀਰਪ੍ਪਭੋ. ਸੁਜਾਤੋਤਿ ਆਰੋਹਪਰਿਣਾਹਸਮ੍ਪਤ੍ਤਿਯਾ ਸਣ੍ਠਾਨਸਮ੍ਪਤ੍ਤਿਯਾ ਚ ਸੁਨਿਬ੍ਬਤ੍ਤੋ. ਚਾਰੁਦਸ੍ਸਨੋਤਿ ਸੁਚਿਰਮ੍ਪਿ ਪਸ੍ਸਨ੍ਤਾਨਂ ਅਤਿਤ੍ਤਿਜਨਕੋ ਮਨੋਹਰਦਸ੍ਸਨੋ. ਸੁਵਣ੍ਣਵਣ੍ਣੋਤਿ ਸੁਵਣ੍ਣਸਦਿਸਵਣ੍ਣੋ. ਸੁਸੁਕ੍ਕਦਾਠੋਤਿ ਸੁਟ੍ਠੁ ਸੁਕ੍ਕਦਾਠੋ. ਮਹਾਪੁਰਿਸਲਕ੍ਖਣਾਤਿ ਪਠਮਂ ਵੁਤ੍ਤਬ੍ਯਞ੍ਜਨਾਨੇਵ ਵਚਨਨ੍ਤਰੇਨ ਨਿਗਮੇਨ੍ਤੋ ਆਹ.

ਇਦਾਨਿ ਤੇਸੁ ਲਕ੍ਖਣੇਸੁ ਅਤ੍ਤਨੋ ਚਿਤ੍ਤਰੁਚਿਤਾਨਿ ਗਹੇਤ੍ਵਾ ਥੋਮੇਨ੍ਤੋ ਪਸਨ੍ਨਨੇਤ੍ਤੋਤਿਆਦਿਮਾਹ. ਭਗਵਾ ਹਿ ਪਞ੍ਚਵਣ੍ਣਪਸਾਦਸਮ੍ਪਤ੍ਤਿਯਾ ਪਸਨ੍ਨਨੇਤ੍ਤੋ, ਪੁਣ੍ਣਚਨ੍ਦਸਦਿਸਮੁਖਤਾਯ ਸੁਮੁਖੋ, ਆਰੋਹਪਰਿਣਾਹਸਮ੍ਪਤ੍ਤਿਯਾ ਬ੍ਰਹਾ, ਬ੍ਰਹ੍ਮੁਜੁਗਤ੍ਤਤਾਯ ਉਜੁ, ਜੁਤਿਮਨ੍ਤਤਾਯ ਪਤਾਪਵਾ. ਯਮ੍ਪਿ ਚੇਤ੍ਥ ਪੁਬ੍ਬੇ ਵੁਤ੍ਤਂ, ਤਂ ‘‘ਮਜ੍ਝੇ ਸਮਣਸਙ੍ਘਸ੍ਸਾ’’ਤਿ ਇਮਿਨਾ ਪਰਿਯਾਯੇਨ ਥੋਮਯਤਾ ਪੁਨ ਵੁਤ੍ਤਂ. ਏਦਿਸੋ ਹਿ ਏਵਂ ਵਿਰੋਚਤਿ. ਉਤ੍ਤਰਗਾਥਾਯਪਿ ਏਸੇਵ ਨਯੋ. ਉਤ੍ਤਮਵਣ੍ਣੀਨੋਤਿ ਉਤ੍ਤਮਵਣ੍ਣਸਮ੍ਪਨ੍ਨਸ੍ਸ. ਰਥੇਸਭੋਤਿ ਉਤ੍ਤਮਸਾਰਥਿ. ਜਮ੍ਬੁਸਣ੍ਡਸ੍ਸਾਤਿ ਜਮ੍ਬੁਦੀਪਸ੍ਸ. ਪਾਕਟੇਨ ਇਸ੍ਸਰਿਯਂ ਇਸ੍ਸਰੋ ਹੋਤਿ.

ਖਤ੍ਤਿਯਾਤਿ ਜਾਤਿਖਤ੍ਤਿਯਾ. ਭੋਗੀਤਿ ਭੋਗਿਯਾ. ਰਾਜਾਨੋਤਿ ਯੇ ਕੇਚਿ ਰਜ੍ਜਂ ਕਾਰੇਨ੍ਤਾ. ਰਾਜਾਭਿਰਾਜਾਤਿ ਰਾਜੂਨਂ ਪੂਜਨੀਯੋ, ਅਧਿਰਾਜਾ ਹੁਤ੍ਵਾ, ਚਕ੍ਕਵਤ੍ਤੀਤਿ ਅਧਿਪ੍ਪਾਯੋ. ਮਨੁਜਿਨ੍ਦੋਤਿ ਮਨੁਸ੍ਸਾਧਿਪਤਿ ਪਰਮਿਸ੍ਸਰੋ ਹੁਤ੍ਵਾ.

ਏਵਂ ਵੁਤ੍ਤੇ ਭਗਵਾ – ‘‘ਯੇ ਤੇ ਭਵਨ੍ਤਿ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ, ਤੇ ਸਕਵਣ੍ਣੇ ਭਞ੍ਞਮਾਨੇ ਅਤ੍ਤਾਨਂ ਪਾਤੁਕਰੋਨ੍ਤੀ’’ਤਿ ਇਮਂ ਸੇਲਸ੍ਸ ਮਨੋਰਥਂ ਪੂਰੇਨ੍ਤੋ ਰਾਜਾਹਮਸ੍ਮੀਤਿਆਦਿਮਾਹ. ਤਤ੍ਰਾਯਮਧਿਪ੍ਪਾਯੋ – ਯਂ ਮਂ ਤ੍ਵਂ ਸੇਲ ‘‘ਰਾਜਾ ਅਰਹਸਿ ਭਵਿਤੁ’’ਨ੍ਤਿ ਯਾਚਸਿ, ਏਤ੍ਥ ਅਪ੍ਪੋਸ੍ਸੁਕ੍ਕੋ ਹੋਤਿ ਰਾਜਾਹਮਸ੍ਮਿ. ਸਤਿ ਚ ਰਾਜਤ੍ਤੇ ਯਥਾ ਅਞ੍ਞੋ ਰਾਜਾ ਯੋਜਨਸਤਂ ਵਾ ਅਨੁਸਾਸਤਿ ਯੋਜਨਸਹਸ੍ਸਂ ਵਾ, ਚਕ੍ਕਵਤ੍ਤੀ ਹੁਤ੍ਵਾਪਿ ਚਤੁਦੀਪਪਰਿਯਨ੍ਤਮਤ੍ਤਂ ਵਾ, ਨਾਹਮੇਵਂ ਪਰਿਚ੍ਛਿਨ੍ਨਵਿਸਯੋ, ਅਹਞ੍ਹਿ ਧਮ੍ਮਰਾਜਾ ਅਨੁਤ੍ਤਰੋ ਭਵਗ੍ਗਤੋ ਅਵੀਚਿਪਰਿਯਨ੍ਤਂ ਕਤ੍ਵਾ ਤਿਰਿਯਂ ਅਪ੍ਪਮਾਣਲੋਕਧਾਤੁਯੋ ਅਨੁਸਾਸਾਮਿ. ਯਾਵਤਾ ਹਿ ਅਪਦਦ੍ਵਿਪਦਾਦਿਭੇਦਾ ਸਤ੍ਤਾ, ਅਹਂ ਤੇਸਂ ਅਗ੍ਗੋ. ਨ ਹਿ ਮੇ ਕੋਚਿ ਸੀਲੇਨ ਵਾ…ਪੇ… ਵਿਮੁਤ੍ਤਿਞਾਣਦਸ੍ਸਨੇਨ ਵਾ ਪਟਿਭਾਗੋ ਅਤ੍ਥਿ, ਸ੍ਵਾਹਂ ਏਵਂ ਧਮ੍ਮਰਾਜਾ ਅਨੁਤ੍ਤਰੋ ਅਨੁਤ੍ਤਰੇਨੇਵ ਚਤੁਸਤਿਪਟ੍ਠਾਨਾਦਿਭੇਦੇਨ ਧਮ੍ਮੇਨ ਚਕ੍ਕਂ ਵਤ੍ਤੇਮਿ. ਇਦਂ ਪਜਹਥ, ਇਦਂ ਉਪਸਮ੍ਪਜ੍ਜ ਵਿਹਰਥਾਤਿ ਆਣਾਚਕ੍ਕਂ, ਇਦਂ ਖੋ ਪਨ, ਭਿਕ੍ਖਵੇ, ਦੁਕ੍ਖਂ ਅਰਿਯਸਚ੍ਚਨ੍ਤਿਆਦਿਨਾ ਪਰਿਯਤ੍ਤਿਧਮ੍ਮੇਨ ਧਮ੍ਮਚਕ੍ਕਮੇਵ ਵਾ. ਚਕ੍ਕਂ ਅਪ੍ਪਟਿਵਤ੍ਤਿਯਨ੍ਤਿ ਯਂ ਚਕ੍ਕਂ ਅਪ੍ਪਟਿਵਤ੍ਤਿਯਂ ਹੋਤਿ ਸਮਣੇਨ ਵਾ…ਪੇ… ਕੇਨਚਿ ਵਾ ਲੋਕਸ੍ਮਿਨ੍ਤਿ.

ਏਵਂ ਅਤ੍ਤਾਨਂ ਆਵਿਕਰੋਨ੍ਤਂ ਭਗਵਨ੍ਤਂ ਦਿਸ੍ਵਾ ਪੀਤਿਸੋਮਨਸ੍ਸਜਾਤੋ ਸੇਲੋ ਪੁਨ ਦਲ਼੍ਹੀਕਰਣਤ੍ਥਂ ਸਮ੍ਬੁਦ੍ਧੋ ਪਟਿਜਾਨਾਸੀਤਿ ਗਾਥਾਦ੍ਵਯਮਾਹ. ਤਤ੍ਥ ਕੋ ਨੁ ਸੇਨਾਪਤੀਤਿ ਰਞ੍ਞੋ ਭੋਤੋ ਧਮ੍ਮੇਨ ਪਵਤ੍ਤਿਤਸ੍ਸ ਚਕ੍ਕਸ੍ਸ ਅਨੁਪਵਤ੍ਤਕੋ ਸੇਨਾਪਤਿ ਕੋ ਨੂਤਿ ਪੁਚ੍ਛਿ.

ਤੇਨ ਚ ਸਮਯੇਨ ਭਗਵਤੋ ਦਕ੍ਖਿਣਪਸ੍ਸੇ ਆਯਸ੍ਮਾ ਸਾਰਿਪੁਤ੍ਤੋ ਨਿਸਿਨ੍ਨੋ ਹੋਤਿ ਸੁਵਣ੍ਣਪੁਞ੍ਜੋ ਵਿਯ ਸਿਰਿਯਾ ਸੋਭਮਾਨੋ, ਤਂ ਦਸ੍ਸੇਨ੍ਤੋ ਭਗਵਾ ਮਯਾ ਪਵਤ੍ਤਿਤਨ੍ਤਿ ਗਾਥਮਾਹ. ਤਤ੍ਥ ਅਨੁਜਾਤੋ ਤਥਾਗਤਨ੍ਤਿ ਤਥਾਗਤਂ ਹੇਤੁਂ ਅਨੁਜਾਤੋ, ਤਥਾਗਤੇਨ ਹੇਤੁਨਾ ਜਾਤੋਤਿ ਅਤ੍ਥੋ. ਅਪਿਚ ਅਵਜਾਤੋ ਅਨੁਜਾਤੋ ਅਤਿਜਾਤੋਤਿ ਤਯੋ ਵੁਤ੍ਤਾ. ਤੇਸੁ ਅਵਜਾਤੋ ਦੁਸ੍ਸੀਲੋ, ਸੋ ਤਥਾਗਤਸ੍ਸ ਪੁਤ੍ਤੋ ਨਾਮ ਨ ਹੋਤਿ. ਅਤਿਜਾਤੋ ਨਾਮ ਪਿਤਰਾ ਉਤ੍ਤਰਿਤਰੋ, ਤਾਦਿਸੋਪਿ ਤਥਾਗਤਸ੍ਸ ਪੁਤ੍ਤੋ ਨਤ੍ਥਿ. ਤਥਾਗਤਸ੍ਸ ਪਨ ਏਕੋ ਅਨੁਜਾਤੋਵ ਪੁਤ੍ਤੋ ਹੋਤਿ, ਤਂ ਦਸ੍ਸੇਨ੍ਤੋ ਏਵਮਾਹ.

ਏਵਂ ‘‘ਕੋ ਨੁ ਸੇਨਾਪਤੀ’’ਤਿ ਪਞ੍ਹਂ ਬ੍ਯਾਕਰਿਤ੍ਵਾ ਯਂ ਸੇਲੋ ਆਹ ‘‘ਸਮ੍ਬੁਦ੍ਧੋ ਪਟਿਜਾਨਾਸੀ’’ਤਿ, ਤਤ੍ਰ ਨਂ ਨਿਕ੍ਕਙ੍ਖਂ ਕਾਤੁਕਾਮੋ ‘‘ਨਾਹਂ ਪਟਿਞ੍ਞਾਮਤ੍ਤੇਨੇਵ ਪਟਿਜਾਨਾਮਿ, ਅਪਿਚਾਹਂ ਇਮਿਨਾ ਕਾਰਣੇਨ ਬੁਦ੍ਧੋ’’ਤਿ ਞਾਪੇਤੁਂ ਅਭਿਞ੍ਞੇਯ੍ਯਨ੍ਤਿ ਗਾਥਮਾਹ. ਤਤ੍ਰ ਅਭਿਞ੍ਞੇਯ੍ਯਨ੍ਤਿ ਵਿਜ੍ਜਾ ਚ ਵਿਮੁਤ੍ਤਿ ਚ. ਭਾਵੇਤਬ੍ਬਂ ਮਗ੍ਗਸਚ੍ਚਂ. ਪਹਾਤਬ੍ਬਂ ਸਮੁਦਯਸਚ੍ਚਂ. ਹੇਤੁਵਚਨੇਨ ਪਨ ਫਲਸਿਦ੍ਧਿਤੋ ਤੇਸਂ ਫਲਾਨਿ ਨਿਰੋਧਸਚ੍ਚਦੁਕ੍ਖਸਚ੍ਚਾਨਿਪਿ ਵੁਤ੍ਤਾਨੇਵ ਹੋਨ੍ਤਿ. ਏਵਂ ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ ਪਰਿਞ੍ਞਾਤਬ੍ਬਂ ਪਰਿਞ੍ਞਾਤਨ੍ਤਿ ਇਦਮ੍ਪੇਤ੍ਥ ਸਙ੍ਗਹਿਤਨ੍ਤਿ ਚਤੁਸਚ੍ਚਭਾਵਨਾਫਲਞ੍ਚ ਵਿਮੁਤ੍ਤਿਞ੍ਚ ਦਸ੍ਸੇਨ੍ਤੋ ‘‘ਬੁਜ੍ਝਿਤਬ੍ਬਂ ਬੁਜ੍ਝਿਤ੍ਵਾ ਬੁਦ੍ਧੋ ਜਾਤੋਸ੍ਮੀ’’ਤਿ ਯੁਤ੍ਤਹੇਤੁਨਾ ਬੁਦ੍ਧਭਾਵਂ ਸਾਧੇਤਿ.

ਏਵਂ ਨਿਪ੍ਪਰਿਯਾਯੇਨ ਅਤ੍ਤਾਨਂ ਆਵਿਕਤ੍ਵਾ ਅਤ੍ਤਨਿ ਕਙ੍ਖਾਵਿਤਰਣਤ੍ਥਂ ਬ੍ਰਾਹ੍ਮਣਂ ਅਤਿਚਾਰਿਯਮਾਨੋ ਵਿਨਯਸ੍ਸੂਤਿ ਗਾਥਤ੍ਤਯਮਾਹ. ਤਤ੍ਥ ਸਲ੍ਲਕਤ੍ਤੋਤਿ ਰਾਗਾਦਿਸਲ੍ਲਕਨ੍ਤਨੋ. ਅਨੁਤ੍ਤਰੋਤਿ ਯਥਾ ਬਾਹਿਰਵੇਜ੍ਜੇਨ ਵੂਪਸਮਿਤਰੋਗੋ ਇਮਸ੍ਮਿਞ੍ਞੇਵਤ੍ਤਭਾਵੇ ਕੁਪ੍ਪਤਿ, ਨ ਏਵਂ. ਮਯਾ ਵੂਪਸਮਿਤਸ੍ਸ ਪਨ ਰੋਗਸ੍ਸ ਭਵਨ੍ਤਰੇਪਿ ਉਪ੍ਪਤ੍ਤਿ ਨਤ੍ਥਿ, ਤਸ੍ਮਾ ਅਹਂ ਅਨੁਤ੍ਤਰੋਤਿ ਅਤ੍ਥੋ. ਬ੍ਰਹ੍ਮਭੂਤੋਤਿ ਸੇਟ੍ਠਭੂਤੋ. ਅਤਿਤੁਲੋਤਿ ਤੁਲਂ ਅਤੀਤੋ, ਨਿਰੁਪਮੋਤਿ ਅਤ੍ਥੋ. ਮਾਰਸੇਨਪ੍ਪਮਦ੍ਦਨੋਤਿ ਕਾਮਾ ਤੇ ਪਠਮਾ ਸੇਨਾਤਿ ਏਵਂ ਆਗਤਾਯ ਮਾਰਸੇਨਾਯ ਪਮਦ੍ਦਨੋ. ਸਬ੍ਬਾਮਿਤ੍ਤੇਤਿ ਖਨ੍ਧਕਿਲੇਸਾਭਿਸਙ੍ਖਾਰਮਚ੍ਚੁਦੇਵਪੁਤ੍ਤਮਾਰਸਙ੍ਖਾਤੇ ਸਬ੍ਬਪਚ੍ਚਤ੍ਥਿਕੇ. ਵਸੀਕਤ੍ਵਾਤਿ ਅਤ੍ਤਨੋ ਵਸੇ ਵਤ੍ਤੇਤ੍ਵਾ. ਅਕੁਤੋਭਯੋਤਿ ਕੁਤੋਚਿ ਅਭਯੋ.

ਏਵਂ ਵੁਤ੍ਤੇ ਸੇਲੋ ਬ੍ਰਾਹ੍ਮਣੋ ਤਾਵਦੇਵ ਭਗਵਤਿ ਸਞ੍ਜਾਤਪਸਾਦੋ ਪਬ੍ਬਜ੍ਜਾਪੇਕ੍ਖੋ ਹੁਤ੍ਵਾ ਇਮਂ ਭੋਨ੍ਤੋਤਿ ਗਾਥਤ੍ਤਯਮਾਹ. ਤਤ੍ਥ ਕਣ੍ਹਾਭਿਜਾਤਿਕੋਤਿ ਚਣ੍ਡਾਲਾਦਿਨੀਚਕੁਲੇ ਜਾਤੋ. ਤਤੋ ਤੇਪਿ ਮਾਣਵਕਾ ਪਬ੍ਬਜ੍ਜਾਪੇਕ੍ਖਾ ਹੁਤ੍ਵਾ ਏਵਞ੍ਚੇ ਰੁਚ੍ਚਤਿ, ਭੋਤੋਤਿ ਗਾਥਮਾਹਂਸੁ. ਅਥ ਸੇਲੋ ਤੇਸੁ ਮਾਣਵਕੇਸੁ ਤੁਟ੍ਠਚਿਤ੍ਤੋ ਤੇ ਚ ਦਸ੍ਸੇਨ੍ਤੋ ਪਬ੍ਬਜ੍ਜਂ ਯਾਚਨ੍ਤੋ ‘‘ਬ੍ਰਾਹ੍ਮਣਾ’’ਤਿ ਗਾਥਮਾਹ.

ਤਤੋ ਭਗਵਾ ਯਸ੍ਮਾ ਸੇਲੋ ਅਤੀਤੇ ਪਦੁਮੁਤ੍ਤਰਸ੍ਸ ਭਗਵਤੋ ਸਾਸਨੇ ਤੇਸਂਯੇਵ ਤਿਣ੍ਣਂ ਪੁਰਿਸਸਤਾਨਂ ਗਣਸੇਟ੍ਠੋ ਹੁਤ੍ਵਾ ਤੇਹਿ ਸਦ੍ਧਿਂ ਪਰਿਵੇਣਂ ਕਾਰੇਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਤੇਨ ਕਮ੍ਮੇਨ ਦੇਵਮਨੁਸ੍ਸਸਮ੍ਪਤ੍ਤਿਂ ਅਨੁਭਵਮਾਨੋ ਪਚ੍ਛਿਮੇ ਭਵੇ ਤੇਸਂਯੇਵ ਆਚਰਿਯੋ ਹੁਤ੍ਵਾ ਨਿਬ੍ਬਤ੍ਤੋ, ਤਞ੍ਚ ਤੇਸਂ ਕਮ੍ਮਂ ਵਿਮੁਤ੍ਤਿਪਰਿਪਾਕਾਯ ਪਰਿਪਕ੍ਕਂ ਏਹਿਭਿਕ੍ਖੁਭਾਵਸ੍ਸ ਚ ਉਪਨਿਸ੍ਸਯਭੂਤਂ, ਤਸ੍ਮਾ ਤੇ ਸਬ੍ਬੇਵ ਏਹਿਭਿਕ੍ਖੁਪਬ੍ਬਜ੍ਜਂ ਪਬ੍ਬਾਜੇਨ੍ਤੋ ਸ੍ਵਾਕ੍ਖਾਤਨ੍ਤਿ ਗਾਥਮਾਹ. ਤਤ੍ਥ ਸਨ੍ਦਿਟ੍ਠਿਕਨ੍ਤਿ ਸਯਮੇਵ ਦਟ੍ਠਬ੍ਬਂ ਪਚ੍ਚਕ੍ਖਂ. ਅਕਾਲਿਕਨ੍ਤਿ ਮਗ੍ਗਾਨਨ੍ਤਰਫਲੁਪ੍ਪਤ੍ਤਿਯਾ ਨ ਕਾਲਨ੍ਤਰਂ ਪਤ੍ਤਬ੍ਬਫਲਂ. ਯਤ੍ਥ ਅਮੋਘਾਤਿ ਯਸ੍ਮਿਂ ਮਗ੍ਗਬ੍ਰਹ੍ਮਚਰਿਯੇ ਅਪ੍ਪਮਤ੍ਤਸ੍ਸ ਸਿਕ੍ਖਤ੍ਤਯਪੂਰਣੇਨ ਸਿਕ੍ਖਤੋ ਪਬ੍ਬਜ੍ਜਾ ਅਮੋਘਾ ਹੋਤਿ, ਸਫਲਾਤਿ ਅਤ੍ਥੋ. ਏਵਞ੍ਚ ਵਤ੍ਵਾ ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ. ਤੇ ਸਬ੍ਬੇ ਪਤ੍ਤਚੀਵਰਧਰਾ ਹੁਤ੍ਵਾ ਆਕਾਸੇਨਾਗਨ੍ਤ੍ਵਾ ਵਸ੍ਸਸਤਿਕਤ੍ਥੇਰਾ ਵਿਯ ਸੁਵਿਨੀਤਾ ਭਗਵਨ੍ਤਂ ਅਭਿਵਾਦਯਿਂਸੁ. ਏਵਮਿਮਂ ਤੇਸਂ ਏਹਿਭਿਕ੍ਖੁਭਾਵਂ ਸਨ੍ਧਾਯ ‘‘ਅਲਤ੍ਥ ਖੋ ਸੇਲੋ’’ਤਿਆਦਿ ਵੁਤ੍ਤਂ.

੪੦੦. ਇਮਾਹੀਤਿ ਇਮਾਹਿ ਕੇਣਿਯਸ੍ਸ ਚਿਤ੍ਤਾਨੁਕੂਲਾਹਿ ਗਾਥਾਹਿ. ਤਤ੍ਥ ਅਗ੍ਗਿਪਰਿਚਰਿਯਂ ਵਿਨਾ ਬ੍ਰਾਹ੍ਮਣਾਨਂ ਯਞ੍ਞਾਭਾਵਤੋ ‘‘ਅਗ੍ਗਿਹੁਤ੍ਤਮੁਖਾ ਯਞ੍ਞਾ’’ਤਿ ਵੁਤ੍ਤਂ. ਅਗ੍ਗਿਹੁਤ੍ਤਸੇਟ੍ਠਾ ਅਗ੍ਗਿਜੁਹਨਪ੍ਪਧਾਨਾਤਿ ਅਤ੍ਥੋ. ਵੇਦੇ ਸਜ੍ਝਾਯਨ੍ਤੇਹਿ ਪਠਮਂ ਸਜ੍ਝਾਯਿਤਬ੍ਬਤੋ, ਸਾਵਿਤ੍ਤੀ, ‘‘ਛਨ੍ਦਸੋ ਮੁਖ’’ਨ੍ਤਿ ਵੁਤ੍ਤੋ. ਮਨੁਸ੍ਸਾਨਂ ਸੇਟ੍ਠਤੋ ਰਾਜਾ ‘‘ਮੁਖ’’ਨ੍ਤਿ ਵੁਤ੍ਤੋ. ਨਦੀਨਂ ਆਧਾਰਤੋ ਪਟਿਸਰਣਤੋ ਚ ਸਾਗਰੋ ‘‘ਮੁਖ’’ਨ੍ਤਿ ਵੁਤ੍ਤੋ. ਚਨ੍ਦਯੋਗਵਸੇਨ ‘‘ਅਜ੍ਜ ਕਤ੍ਤਿਕਾ ਅਜ੍ਜ ਰੋਹਿਣੀ’’ਤਿ ਸਞ੍ਞਾਣਤੋ ਆਲੋਕਕਰਣਤੋ ਸੋਮ੍ਮਭਾਵਤੋ ਚ ‘‘ਨਕ੍ਖਤ੍ਤਾਨਂ ਮੁਖਂ ਚਨ੍ਦੋ’’ਤਿ ਵੁਤ੍ਤਂ. ਤਪਨ੍ਤਾਨਂ ਅਗ੍ਗਤ੍ਤਾ ਆਦਿਚ੍ਚੋ ‘‘ਤਪਤਂ ਮੁਖ’’ਨ੍ਤਿ ਵੁਤ੍ਤੋ. ਦਕ੍ਖਿਣੇਯ੍ਯਾਨਂ ਪਨ ਅਗ੍ਗਤ੍ਤਾ ਵਿਸੇਸੇਨ ਤਸ੍ਮਿਂ ਸਮਯੇ ਬੁਦ੍ਧਪ੍ਪਮੁਖਂ ਸਙ੍ਘਂ ਸਨ੍ਧਾਯ ‘‘ਪੁਞ੍ਞਂ ਆਕਙ੍ਖਮਾਨਾਨਂ, ਸਙ੍ਘੋ ਏਵ ਯਜਤਂ ਮੁਖ’’ਨ੍ਤਿ ਵੁਤ੍ਤਂ. ਤੇਨ ਸਙ੍ਘੋ ਪੁਞ੍ਞਸ੍ਸ ਆਯਮੁਖਨ੍ਤਿ ਦਸ੍ਸੇਤਿ.

ਯਂ ਤਂ ਸਰਣਨ੍ਤਿ ਅਞ੍ਞਂ ਬ੍ਯਾਕਰਣਗਾਥਮਾਹ. ਤਸ੍ਸਤ੍ਥੋ – ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਾ ਭਗਵਾ ਯਸ੍ਮਾ ਮਯਂ ਇਤੋ ਅਟ੍ਠਮੇ ਦਿਵਸੇ ਤਂ ਸਰਣਂ ਆਗਤਮ੍ਹਾ, ਤਸ੍ਮਾ ਅਤ੍ਤਨਾ ਤਵ ਸਾਸਨੇ ਅਨੁਤ੍ਤਰੇਨ ਦਮਥੇਨ ਦਨ੍ਤਾਮ੍ਹਾ, ਅਹੋ ਤੇ ਸਰਣਸ੍ਸ ਆਨੁਭਾਵੋਤਿ.

ਤਤੋ ਪਰਂ ਭਗਵਨ੍ਤਂ ਦ੍ਵੀਹਿ ਗਾਥਾਹਿ ਥੋਮੇਤ੍ਵਾ ਤਤਿਯਾਯ ਵਨ੍ਦਨਂ ਯਾਚਨ੍ਤੋ ਭਿਕ੍ਖਵੋ ਤਿਸਤਾ ਇਮੇਤਿਆਦਿਮਾਹਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਸੇਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.