੯. ਗੋਲਿਯਾਨਿਸੁਤ੍ਤਵਣ੍ਣਨਾ

੧੭੩. ਏਵਂ ਮੇ ਸੁਤਨ੍ਤਿ ਗੋਲਿਯਾਨਿਸੁਤ੍ਤਂ. ਤਤ੍ਥ ਪਦਸਮਾਚਾਰੋਤਿ ਦੁਬ੍ਬਲਸਮਾਚਾਰੋ ਓਲ਼ਾਰਿਕਾਚਾਰੋ, ਪਚ੍ਚਯੇਸੁ ਸਾਪੇਕ੍ਖੋ ਮਹਾਰਕ੍ਖਿਤਤ੍ਥੇਰੋ ਵਿਯ. ਤਂ ਕਿਰ ਉਪਟ੍ਠਾਕਕੁਲੇ ਨਿਸਿਨ੍ਨਂ ਉਪਟ੍ਠਾਕੋ ਆਹ ‘‘ਅਸੁਕਤ੍ਥੇਰਸ੍ਸ ਮੇ, ਭਨ੍ਤੇ, ਚੀਵਰਂ ਦਿਨ੍ਨ’’ਨ੍ਤਿ. ਸਾਧੁ ਤੇ ਕਤਂ ਤਂਯੇਵ ਤਕ੍ਕੇਤ੍ਵਾ ਵਿਹਰਨ੍ਤਸ੍ਸ ਚੀਵਰਂ ਦੇਨ੍ਤੇਨਾਤਿ. ਤੁਮ੍ਹਾਕਮ੍ਪਿ, ਭਨ੍ਤੇ, ਦਸ੍ਸਾਮੀਤਿ. ਸਾਧੁ ਕਰਿਸ੍ਸਸਿ ਤਂਯੇਵ ਤਕ੍ਕੇਨ੍ਤਸ੍ਸਾਤਿ ਆਹ. ਅਯਮ੍ਪਿ ਏਵਰੂਪੋ ਓਲ਼ਾਰਿਕਾਚਾਰੋ ਅਹੋਸਿ. ਸਪ੍ਪਤਿਸ੍ਸੇਨਾਤਿ ਸਜੇਟ੍ਠਕੇਨ, ਨ ਅਤ੍ਤਾਨਂ ਜੇਟ੍ਠਕਂ ਕਤ੍ਵਾ ਵਿਹਰਿਤਬ੍ਬਂ. ਸੇਰਿਵਿਹਾਰੇਨਾਤਿ ਸਚ੍ਛਨ੍ਦਵਿਹਾਰੇਨ ਨਿਰਙ੍ਕੁਸਵਿਹਾਰੇਨ.

ਨਾਨੂਪਖਜ੍ਜਾਤਿ ਨ ਅਨੁਪਖਜ੍ਜ ਨ ਅਨੁਪਵਿਸਿਤ੍ਵਾ. ਤਤ੍ਥ ਯੋ ਦ੍ਵੀਸੁ ਮਹਾਥੇਰੇਸੁ ਉਭਤੋ ਨਿਸਿਨ੍ਨੇਸੁ ਤੇ ਅਨਾਪੁਚ੍ਛਿਤ੍ਵਾਵ ਚੀਵਰੇਨ ਵਾ ਜਾਣੁਨਾ ਵਾ ਘਟ੍ਟੇਨ੍ਤੋ ਨਿਸੀਦਤਿ, ਅਯਂ ਅਨੁਪਖਜ੍ਜ ਨਿਸੀਦਤਿ ਨਾਮ. ਏਵਂ ਅਕਤ੍ਵਾ ਪਨ ਅਤ੍ਤਨੋ ਪਤ੍ਤਆਸਨਸਨ੍ਤਿਕੇ ਠਤ੍ਵਾ ਨਿਸੀਦਾਵੁਸੋਤਿ ਵੁਤ੍ਤੇ ਨਿਸੀਦਿਤਬ੍ਬਂ. ਸਚੇ ਨ ਵਦਨ੍ਤਿ, ਨਿਸੀਦਾਮਿ, ਭਨ੍ਤੇਤਿ ਆਪੁਚ੍ਛਿਤ੍ਵਾ ਨਿਸੀਦਿਤਬ੍ਬਂ ਆਪੁਚ੍ਛਿਤਕਾਲਤੋ ਪਟ੍ਠਾਯ ਨਿਸੀਦਾਤਿ ਵੁਤ੍ਤੇਪਿ ਅਵੁਤ੍ਤੇਪਿ ਨਿਸੀਦਿਤੁਂ ਵਟ੍ਟਤਿਯੇਵ. ਨ ਪਟਿਬਾਹਿਸ੍ਸਾਮੀਤਿ ਏਤ੍ਥ ਯੋ ਅਤ੍ਤਨੋ ਪਤ੍ਤਾਸਨਂ ਅਤਿਕ੍ਕਮਿਤ੍ਵਾ ਨਵਕਾਨਂ ਪਾਪੁਣਨਟ੍ਠਾਨੇ ਨਿਸੀਦਤਿ, ਅਯਂ ਨਵੇ ਭਿਕ੍ਖੂ ਆਸਨੇਨ ਪਟਿਬਾਹਤਿ ਨਾਮ. ਤਸ੍ਮਿਞ੍ਹਿ ਤਥਾ ਨਿਸਿਨ੍ਨੇ ਨਵਾ ਭਿਕ੍ਖੂ ‘‘ਅਮ੍ਹਾਕਂ ਨਿਸੀਦਿਤੁਂ ਨ ਦੇਤੀ’’ਤਿ ਉਜ੍ਝਾਯਨ੍ਤਾ ਤਿਟ੍ਠਨ੍ਤਿ ਵਾ ਆਸਨਂ ਵਾ ਪਰਿਯੇਸਨ੍ਤਾ ਆਹਿਣ੍ਡਨ੍ਤਿ. ਤਸ੍ਮਾ ਅਤ੍ਤਨੋ ਪਤ੍ਤਾਸਨੇਯੇਵ ਨਿਸੀਦਿਤਬ੍ਬਂ. ਏਵਂ ਨ ਪਟਿਬਾਹਤਿ ਨਾਮ.

ਆਭਿਸਮਾਚਾਰਿਕਮ੍ਪਿ ਧਮ੍ਮਨ੍ਤਿ ਅਭਿਸਮਾਚਾਰਿਕਂ ਵਤ੍ਤਪਟਿਪਤ੍ਤਿਮਤ੍ਤਮ੍ਪਿ. ਨਾਤਿਕਾਲੇਨਾਤਿ ਨ ਅਤਿਪਾਤੋ ਪਵਿਸਿਤਬ੍ਬਂ, ਨ ਅਤਿਦਿਵਾ ਪਟਿਕ੍ਕਮਿਤਬ੍ਬਂ, ਭਿਕ੍ਖੁਸਙ੍ਘੇਨ ਸਦ੍ਧਿਂਯੇਵ ਪਵਿਸਿਤਬ੍ਬਞ੍ਚ ਨਿਕ੍ਖਮਿਤਬ੍ਬਞ੍ਚ. ਅਤਿਪਾਤੋ ਪਵਿਸਿਤ੍ਵਾ ਅਤਿਦਿਵਾ ਨਿਕ੍ਖਮਨ੍ਤਸ੍ਸ ਹਿ ਚੇਤਿਯਙ੍ਗਣਬੋਧਿਯਙ੍ਗਣਵਤ੍ਤਾਦੀਨਿ ਪਰਿਹਾਯਨ੍ਤਿ. ਕਾਲਸ੍ਸੇਵ ਮੁਖਂ ਧੋਵਿਤ੍ਵਾ ਮਕ੍ਕਟਕਸੁਤ੍ਤਾਨਿ ਛਿਨ੍ਦਨ੍ਤੇਨ ਉਸ੍ਸਾਵਬਿਨ੍ਦੂ ਨਿਪਾਤੇਨ੍ਤੇਨ ਗਾਮਂ ਪਵਿਸਿਤ੍ਵਾ ਯਾਗੁਂ ਪਰਿਯੇਸਿਤ੍ਵਾ ਯਾਵ ਭਿਕ੍ਖਾਕਾਲਾ ਅਨ੍ਤੋਗਾਮੇਯੇਵ ਨਾਨਪ੍ਪਕਾਰਂ ਤਿਰਚ੍ਛਾਨਕਥਂ ਕਥੇਨ੍ਤੇਨ ਨਿਸੀਦਿਤ੍ਵਾ ਭਤ੍ਤਕਿਚ੍ਚਂ ਕਤ੍ਵਾ ਦਿਵਾ ਨਿਕ੍ਖਮ੍ਮ ਭਿਕ੍ਖੂਨਂ ਪਾਦਧੋਵਨਵੇਲਾਯ ਵਿਹਾਰਂ ਪਚ੍ਚਾਗਨ੍ਤਬ੍ਬਂ ਹੋਤਿ. ਨ ਪੁਰੇਭਤ੍ਤਂ ਪਚ੍ਛਾਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਿਤਬ੍ਬਨ੍ਤਿ ‘‘ਯੋ ਪਨ ਭਿਕ੍ਖੁ ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯ, ਅਞ੍ਞਤ੍ਰ ਸਮਯਾ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੨੯੯) ਇਮਂ ਸਿਕ੍ਖਾਪਦਂ ਰਕ੍ਖਨ੍ਤੇਨ ਤਸ੍ਸ ਵਿਭਙ੍ਗੇ ਵੁਤ੍ਤਂ ਪੁਰੇਭਤ੍ਤਞ੍ਚ ਪਚ੍ਛਾਭਤ੍ਤਞ੍ਚ ਚਾਰਿਤ੍ਤਂ ਨ ਆਪਜ੍ਜਿਤਬ੍ਬਂ. ਉਦ੍ਧਤੋ ਹੋਤਿ ਚਪਲੋਤਿ ਉਦ੍ਧਚ੍ਚਪਕਤਿਕੋ ਚੇਵ ਹੋਤਿ ਚੀਵਰਮਣ੍ਡਨ-ਪਤ੍ਤਮਣ੍ਡਨ-ਸੇਨਾਸਨਮਣ੍ਡਨਾ ਇਮਸ੍ਸ ਵਾ ਪੂਤਿਕਾਯਸ੍ਸ ਕੇਲਾਯਨਾ ਮਣ੍ਡਨਾਤਿ ਏਵਂ ਵੁਤ੍ਤੇਨ ਚ ਤਰੁਣਦਾਰਕਾਵਚਾਪਲ੍ਯੇਨ ਸਮਨ੍ਨਾਗਤੋ.

ਪਞ੍ਞਵਤਾ ਭਵਿਤਬ੍ਬਨ੍ਤਿ ਚੀਵਰਕਮ੍ਮਾਦੀਸੁ ਇਤਿਕਤ੍ਤਬ੍ਬੇਸੁ ਉਪਾਯਪਞ੍ਞਾਯ ਸਮਨ੍ਨਾਗਤੇਨ ਭਵਿਤਬ੍ਬਂ. ਅਭਿਧਮ੍ਮੇ ਅਭਿਵਿਨਯੇਤਿ ਅਭਿਧਮ੍ਮਪਿਟਕੇ ਚੇਵ ਵਿਨਯਪਿਟਕੇ ਚ ਪਾਲ਼ਿਵਸੇਨ ਚੇਵ ਅਟ੍ਠਕਥਾਵਸੇਨ ਚ ਯੋਗੋ ਕਰਣੀਯੋ. ਸਬ੍ਬਨ੍ਤਿਮੇਨ ਹਿ ਪਰਿਚ੍ਛੇਦੇਨ ਅਭਿਧਮ੍ਮੇ ਦੁਕਤਿਕਮਾਤਿਕਾਹਿ ਸਦ੍ਧਿਂ ਧਮ੍ਮਹਦਯਵਿਭਙ੍ਗਂ ਵਿਨਾ ਨ ਵਟ੍ਟਤਿ. ਵਿਨਯੇ ਪਨ ਕਮ੍ਮਾਕਮ੍ਮਵਿਨਿਚ੍ਛਯੇਨ ਸਦ੍ਧਿਂ ਸੁਵਿਨਿਚ੍ਛਿਤਾਨਿ ਦ੍ਵੇ ਪਾਤਿਮੋਕ੍ਖਾਨਿ ਵਿਨਾ ਨ ਵਟ੍ਟਤਿ.

ਆਰੁਪ੍ਪਾਤਿ ਏਤ੍ਤਾਵਤਾ ਅਟ੍ਠਪਿ ਸਮਾਪਤ੍ਤਿਯੋ ਵੁਤ੍ਤਾ ਹੋਨ੍ਤਿ. ਤਾ ਪਨ ਸਬ੍ਬੇਨ ਸਬ੍ਬਂ ਅਸਕ੍ਕੋਨ੍ਤੇਨ ਸਤ੍ਤਸੁਪਿ ਯੋਗੋ ਕਰਣੀਯੋ, ਛਸੁਪਿ…ਪੇ… ਪਞ੍ਚਸੁਪਿ. ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਏਕਂ ਕਸਿਣੇ ਪਰਿਕਮ੍ਮਕਮ੍ਮਟ੍ਠਾਨਂ ਪਗੁਣਂ ਕਤ੍ਵਾ ਆਦਾਯ ਵਿਚਰਿਤਬ੍ਬਂ, ਏਤ੍ਤਕਂ ਵਿਨਾ ਨ ਵਟ੍ਟਤਿ. ਉਤ੍ਤਰਿਮਨੁਸ੍ਸਧਮ੍ਮੇਤਿ ਇਮਿਨਾ ਸਬ੍ਬੇਪਿ ਲੋਕੁਤ੍ਤਰਧਮ੍ਮੇ ਦਸ੍ਸੇਤਿ. ਤਸ੍ਮਾ ਅਰਹਨ੍ਤੇਨ ਹੁਤ੍ਵਾ ਵਿਹਾਤਬ੍ਬਂ, ਅਰਹਤ੍ਤਂ ਅਨਭਿਸਮ੍ਭੁਣਨ੍ਤੇਨ ਅਨਾਗਾਮਿਫਲੇ ਸਕਦਾਗਾਮਿਫਲੇ ਸੋਤਾਪਤ੍ਤਿਫਲੇ ਵਾ ਪਤਿਟ੍ਠਾਤਬ੍ਬਂ. ਸਬ੍ਬਨ੍ਤਿਮੇਨ ਪਰਿਯਾਯੇਨ ਏਕਂ ਵਿਪਸ੍ਸਨਾਮੁਖਂ ਯਾਵ ਅਰਹਤ੍ਤਾ ਪਗੁਣਂ ਕਤ੍ਵਾ ਆਦਾਯ ਵਿਚਰਿਤਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਇਮਂ ਪਨ ਦੇਸਨਂ ਆਯਸ੍ਮਾ ਸਾਰਿਪੁਤ੍ਤੋ ਨੇਯ੍ਯਪੁਗ੍ਗਲਸ੍ਸ ਵਸੇਨ ਆਭਿਸਮਾਚਾਰਿਕਵਤ੍ਤਤੋ ਪਟ੍ਠਾਯ ਅਨੁਪੁਬ੍ਬੇਨ ਅਰਹਤ੍ਤਂ ਪਾਪੇਤ੍ਵਾ ਨਿਟ੍ਠਾਪੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਗੋਲਿਯਾਨਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.