੮. ਨਲ਼ਕਪਾਨਸੁਤ੍ਤਵਣ੍ਣਨਾ

੧੬੬. ਏਵਂ ਮੇ ਸੁਤਨ੍ਤਿ ਨਲ਼ਕਪਾਨਸੁਤ੍ਤਂ. ਤਤ੍ਥ ਨਲ਼ਕਪਾਨੇਤਿ ਏਵਂਨਾਮਕੇ ਗਾਮੇ. ਪੁਬ੍ਬੇ ਕਿਰ ਅਮ੍ਹਾਕਂ ਬੋਧਿਸਤ੍ਤੋ ਵਾਨਰਯੋਨਿਯਂ ਨਿਬ੍ਬਤ੍ਤੋ, ਮਹਾਕਾਯੋ ਕਪਿਰਾਜਾ ਅਨੇਕਵਾਨਰਸਹਸ੍ਸਪਰਿਵੁਤੋ ਪਬ੍ਬਤਪਾਦੇ ਵਿਚਰਤਿ. ਪਞ੍ਞਵਾ ਖੋ ਪਨ ਹੋਤਿ ਮਹਾਪੁਞ੍ਞੋ. ਸੋ ਪਰਿਸਂ ਏਵਂ ਓਵਦਤਿ – ‘‘ਇਮਸ੍ਮਿਂ ਪਬ੍ਬਤਪਾਦੇ ਤਾਤਾ, ਵਿਸਫਲਾਨਿ ਨਾਮ ਹੋਨ੍ਤਿ, ਅਮਨੁਸ੍ਸਪਰਿਗ੍ਗਹਿਤਾ ਪੋਕ੍ਖਰਣਿਯੋ ਨਾਮ ਹੋਨ੍ਤਿ, ਤੁਮ੍ਹੇ ਪੁਬ੍ਬੇ ਖਾਦਿਤਪੁਬ੍ਬਾਨੇਵ ਫਲਾਨਿ ਖਾਦਥ, ਪੀਤਪੁਬ੍ਬਾਨੇਵ ਪਾਨੀਯਾਨਿ ਚ ਪਿਵਥ, ਏਤ੍ਥ ਵੋ ਮਂ ਪਟਿਪੁਚ੍ਛਿਤਬ੍ਬਕਿਚ੍ਚਂ ਨਤ੍ਥਿ, ਅਖਾਦਿਤਪੁਬ੍ਬਾਨਿ ਪਨ ਫਲਾਨਿ ਅਪੀਤਪੁਬ੍ਬਾਨਿ ਚ ਪਾਨੀਯਾਨਿ ਮਂ ਅਪੁਚ੍ਛਿਤ੍ਵਾ ਮਾ ਖਾਦਿਤ੍ਥ ਮਾ ਪਿਵਿਤ੍ਥਾ’’ਤਿ.

ਤੇ ਏਕਦਿਵਸਂ ਚਰਮਾਨਾ ਅਞ੍ਞਂ ਪਬ੍ਬਤਪਾਦਂ ਗਨ੍ਤ੍ਵਾ ਗੋਚਰਂ ਗਹੇਤ੍ਵਾ ਪਾਨੀਯਂ ਓਲੋਕੇਨ੍ਤਾ ਏਕਂ ਅਮਨੁਸ੍ਸਪਰਿਗ੍ਗਹਿਤਂ ਪੋਕ੍ਖਰਣਿਂ ਦਿਸ੍ਵਾ ਸਹਸਾ ਅਪਿਵਿਤ੍ਵਾ ਸਮਨ੍ਤਾ ਪਰਿਵਾਰੇਤ੍ਵਾ ਮਹਾਸਤ੍ਤਸ੍ਸ ਆਗਮਨਂ ਓਲੋਕਯਮਾਨਾ ਨਿਸੀਦਿਂਸੁ. ਮਹਾਸਤ੍ਤੋ ਆਗਨ੍ਤ੍ਵਾ ‘‘ਕਿਂ ਤਾਤਾ ਪਾਨੀਯਂ ਨ ਪਿਵਥਾ’’ਤਿ ਆਹ. ਤੁਮ੍ਹਾਕਂ ਆਗਮਨਂ ਓਲੋਕੇਮਾਤਿ. ਸਾਧੁ ਤਾਤਾਤਿ ਸਮਨ੍ਤਾ ਪਦਂ ਪਰਿਯੇਸਮਾਨੋ ਓਤਿਣ੍ਣਪਦਂਯੇਵ ਅਦ੍ਦਸ, ਨ ਉਤ੍ਤਿਣ੍ਣਪਦਂ, ਦਿਸ੍ਵਾ ਸਪਰਿਸ੍ਸਯਾਤਿ ਅਞ੍ਞਾਸਿ. ਤਾਵਦੇਵ ਚ ਤਤ੍ਥ ਅਭਿਨਿਬ੍ਬਤ੍ਤਅਮਨੁਸ੍ਸੋ ਉਦਕਂ ਦ੍ਵੇਧਾ ਕਤ੍ਵਾ ਉਟ੍ਠਾਸਿ ਸੇਤਮੁਖੋ ਨੀਲਕੁਚ੍ਛਿ ਰਤ੍ਤਹਤ੍ਥਪਾਦੋ ਮਹਾਦਾਠਿਕੋ ਵਙ੍ਕਦਾਠੋ ਵਿਰੂਪੋ ਬੀਭਚ੍ਛੋ ਉਦਕਰਕ੍ਖਸੋ. ਸੋ ਏਵਮਾਹ – ‘‘ਕਸ੍ਮਾ ਪਾਨੀਯਂ ਨ ਪਿਵਥ, ਮਧੁਰਂ ਉਦਕਂ ਪਿਵਥ, ਕਿਂ ਤੁਮ੍ਹੇ ਏਤਸ੍ਸ ਵਚਨਂ ਸੁਣਾਥਾ’’ਤਿ? ਮਹਾਸਤ੍ਤੋ ਆਹ – ‘‘ਤ੍ਵਂ ਇਧ ਅਧਿਵਤ੍ਥੋ ਅਮਨੁਸ੍ਸੋ’’ਤਿ? ਆਮਾਹਨ੍ਤਿ. ਤ੍ਵਂ ਇਧ ਓਤਿਣ੍ਣੇ ਲਭਸੀਤਿ? ਆਮ ਲਭਾਮਿ, ਤੁਮ੍ਹੇ ਪਨ ਸਬ੍ਬੇ ਖਾਦਿਸ੍ਸਾਮੀਤਿ. ਨ ਸਕ੍ਖਿਸ੍ਸਸਿ, ਯਕ੍ਖਾਤਿ. ਪਾਨੀਯਂ ਪਨ ਪਿਵਿਸ੍ਸਥਾਤਿ? ਆਮ ਪਿਵਿਸ੍ਸਾਮਾਤਿ. ਏਵਂ ਸਨ੍ਤੇ ਏਕੋਪਿ ਵੋ ਨ ਮੁਚ੍ਚਿਸ੍ਸਤੀਤਿ. ਪਾਨੀਯਞ੍ਚ ਪਿਵਿਸ੍ਸਾਮ, ਨ ਚ ਤੇ ਵਸਂ ਗਮਿਸ੍ਸਾਮਾਤਿ ਏਕਨਲ਼ਂ ਆਹਰਾਪੇਤ੍ਵਾ ਕੋਟਿਯਂ ਗਹੇਤ੍ਵਾ ਧਮਿ, ਸਬ੍ਬੋ ਏਕਚ੍ਛਿਦ੍ਦੋ ਅਹੋਸਿ, ਤੀਰੇ ਨਿਸੀਦਿਤ੍ਵਾਵ ਪਾਨੀਯਂ ਪਿਵਿ, ਸੇਸਵਾਨਰਾਨਂ ਪਾਟਿਯੇਕ੍ਕੇ ਨਲ਼ੇ ਆਹਰਾਪੇਤ੍ਵਾ ਧਮਿਤ੍ਵਾ ਅਦਾਸਿ. ਸਬ੍ਬੇ ਯਕ੍ਖਸ੍ਸ ਪਸ੍ਸਨ੍ਤਸ੍ਸੇਵ ਪਾਨੀਯਂ ਪਿਵਿਂਸੁ. ਵੁਤ੍ਤਮ੍ਪਿ ਚੇਤਂ –

‘‘ਦਿਸ੍ਵਾ ਪਦਮਨੁਤ੍ਤਿਣ੍ਣਂ, ਦਿਸ੍ਵਾਨੋ’ ਤਰਿਤਂ ਪਦਂ;

ਨਲ਼ੇਨ ਵਾਰਿਂ ਪਿਸ੍ਸਾਮ, ਨੇਵ ਮਂ ਤ੍ਵਂ ਵਧਿਸ੍ਸਸੀ’’ਤਿ. (ਜਾ. ੧.੧.੨੦);

ਤਤੋ ਪਟ੍ਠਾਯ ਯਾਵ ਅਜ੍ਜਦਿਵਸਾ ਤਸ੍ਮਿਂ ਠਾਨੇ ਨਲ਼ਾ ਏਕਚ੍ਛਿਦ੍ਦਾਵ ਹੋਨ੍ਤਿ. ਇਮਿਨਾ ਹਿ ਸਦ੍ਧਿਂ ਇਮਸ੍ਮਿਂ ਕਪ੍ਪੇ ਚਤ੍ਤਾਰਿ ਕਪ੍ਪਟ੍ਠਿਯਪਾਟਿਹਾਰਿਯਾਨਿ ਨਾਮ – ਚਨ੍ਦੇ ਸਸਬਿਮ੍ਬਂ, ਵਟ੍ਟਕਜਾਤਕਮ੍ਹਿ ਸਚ੍ਚਕਿਰਿਯਟ੍ਠਾਨੇ ਅਗ੍ਗਿਸ੍ਸ ਗਮਨੁਪਚ੍ਛੇਦੋ, ਘਟਿਕਾਰਕੁਮ੍ਭਕਾਰਸ੍ਸ ਮਾਤਾਪਿਤੂਨਂ ਵਸਨਟ੍ਠਾਨੇ ਦੇਵਸ੍ਸ ਅਵਸ੍ਸਨਂ, ਤਸ੍ਸਾ ਪੋਕ੍ਖਰਣਿਯਾ ਤੀਰੇ ਨਲ਼ਾਨਂ ਏਕਚ੍ਛਿਦ੍ਦਭਾਵੋਤਿ. ਇਤਿ ਸਾ ਪੋਕ੍ਖਰਣੀ ਨਲ਼ੇਨ ਪਾਨੀਯਸ੍ਸ ਪੀਤਤ੍ਤਾ ਨਲ਼ਕਪਾਨਾਤਿ ਨਾਮਂ ਲਭਿ. ਅਪਰਭਾਗੇ ਤਂ ਪੋਕ੍ਖਰਣਿਂ ਨਿਸ੍ਸਾਯ ਗਾਮੋ ਪਤਿਟ੍ਠਾਸਿ, ਤਸ੍ਸਾਪਿ ਨਲ਼ਕਪਾਨਨ੍ਤੇਵ ਨਾਮਂ ਜਾਤਂ. ਤਂ ਸਨ੍ਧਾਯ ਵੁਤ੍ਤਂ ‘‘ਨਲ਼ਕਪਾਨੇ’’ਤਿ. ਪਲਾਸਵਨੇਤਿ ਕਿਂਸੁਕਵਨੇ.

੧੬੭. ਤਗ੍ਘ ਮਯਂ, ਭਨ੍ਤੇਤਿ ਏਕਂਸੇਨੇਵ ਮਯਂ, ਭਨ੍ਤੇ, ਅਭਿਰਤਾ. ਅਞ੍ਞੇਪਿ ਯੇ ਤੁਮ੍ਹਾਕਂ ਸਾਸਨੇ ਅਭਿਰਮਨ੍ਤਿ, ਤੇ ਅਮ੍ਹੇਹਿ ਸਦਿਸਾਵ ਹੁਤ੍ਵਾ ਅਭਿਰਮਨ੍ਤੀਤਿ ਦੀਪੇਨ੍ਤਿ.

ਨੇਵ ਰਾਜਾਭਿਨੀਤਾਤਿਆਦੀਸੁ ਏਕੋ ਰਞ੍ਞੋ ਅਪਰਾਧਂ ਕਤ੍ਵਾ ਪਲਾਯਤਿ. ਰਾਜਾ ਕੁਹਿਂ, ਭੋ, ਅਸੁਕੋਤਿ? ਪਲਾਤੋ ਦੇਵਾਤਿ. ਪਲਾਤਟ੍ਠਾਨੇਪਿ ਮੇ ਨ ਮੁਚ੍ਚਿਸ੍ਸਤਿ, ਸਚੇ ਪਨ ਪਬ੍ਬਜੇਯ੍ਯ, ਮੁਚ੍ਚੇਯ੍ਯਾਤਿ ਵਦਤਿ. ਤਸ੍ਸ ਕੋਚਿਦੇਵ ਸੁਹਦੋ ਗਨ੍ਤ੍ਵਾ ਤਂ ਪਵਤ੍ਤਿਂ ਆਰੋਚੇਤ੍ਵਾ ਤ੍ਵਂ ਸਚੇ ਜੀਵਿਤੁਮਿਚ੍ਛਸਿ, ਪਬ੍ਬਜਾਹੀਤਿ. ਸੋ ਪਬ੍ਬਜਿਤ੍ਵਾ ਜੀਵਿਤਂ ਰਕ੍ਖਮਾਨੋ ਚਰਤਿ. ਅਯਂ ਰਾਜਾਭਿਨੀਤੋ ਨਾਮ.

ਏਕੋ ਪਨ ਚੋਰਾਨਂ ਮੂਲਂ ਛਿਨ੍ਦਨ੍ਤੋ ਚਰਤਿ. ਚੋਰਾ ਸੁਤ੍ਵਾ ‘‘ਪੁਰਿਸਾਨਂ ਅਤ੍ਥਿਕਭਾਵਂ ਨ ਜਾਨਾਤਿ, ਜਾਨਾਪੇਸ੍ਸਾਮ ਨ’’ਨ੍ਤਿ ਵਦਨ੍ਤਿ. ਸੋ ਤਂ ਪਵਤ੍ਤਿਂ ਸੁਤ੍ਵਾ ਪਲਾਯਤਿ. ਚੋਰਾ ਪਲਾਤੋਤਿ ਸੁਤ੍ਵਾ ‘‘ਪਲਾਤਟ੍ਠਾਨੇਪਿ ਨੋ ਨ ਮੁਚ੍ਚਿਸ੍ਸਤਿ, ਸਚੇ ਪਨ ਪਬ੍ਬਜੇਯ੍ਯ, ਮੁਚ੍ਚੇਯ੍ਯਾ’’ਤਿ ਵਦਨ੍ਤਿ. ਸੋ ਤਂ ਪਵਤ੍ਤਿਂ ਸੁਤ੍ਵਾ ਪਬ੍ਬਜਤਿ. ਅਯਂ ਚੋਰਾਭਿਨੀਤੋ ਨਾਮ.

ਏਕੋ ਪਨ ਬਹੁਂ ਇਣਂ ਖਾਦਿਤ੍ਵਾ ਤੇਨ ਇਣੇਨ ਅਟ੍ਟੋ ਪੀਲ਼ਿਤੋ ਤਮ੍ਹਾ ਗਾਮਾ ਪਲਾਯਤਿ. ਇਣਸਾਮਿਕਾ ਸੁਤ੍ਵਾ ‘‘ਪਲਾਤਟ੍ਠਾਨੇਪਿ ਨੋ ਨ ਮੁਚ੍ਚਿਸ੍ਸਤਿ, ਸਚੇ ਪਨ ਪਬ੍ਬਜੇਯ੍ਯ, ਮੁਚ੍ਚੇਯ੍ਯਾ’’ਤਿ ਵਦਨ੍ਤਿ. ਸੋ ਤਂ ਪਵਤ੍ਤਿਂ ਸੁਤ੍ਵਾ ਪਬ੍ਬਜਤਿ. ਅਯਂ ਇਣਟ੍ਟੋ ਨਾਮ.

ਰਾਜਭਯਾਦੀਨਂ ਪਨ ਅਞ੍ਞਤਰੇਨ ਭਯੇਨ ਭੀਤੋ ਅਟ੍ਟੋ ਆਤੁਰੋ ਹੁਤ੍ਵਾ ਨਿਕ੍ਖਮ੍ਮ ਪਬ੍ਬਜਿਤੋ ਭਯਟ੍ਟੋ ਨਾਮ. ਦੁਬ੍ਭਿਕ੍ਖਾਦੀਸੁ ਜੀਵਿਤੁਂ ਅਸਕ੍ਕੋਨ੍ਤੋ ਪਬ੍ਬਜਿਤੋ ਆਜੀਵਿਕਾਪਕਤੋ ਨਾਮ, ਆਜੀਵਿਕਾਯ ਪਕਤੋ ਅਭਿਭੂਤੋਤਿ ਅਤ੍ਥੋ. ਇਮੇਸੁ ਪਨ ਏਕੋਪਿ ਇਮੇਹਿ ਕਾਰਣੇਹਿ ਪਬ੍ਬਜਿਤੋ ਨਾਮ ਨਤ੍ਥਿ, ਤਸ੍ਮਾ ‘‘ਨੇਵ ਰਾਜਾਭਿਨੀਤੋ’’ਤਿਆਦਿਮਾਹ.

ਵਿਵੇਕਨ੍ਤਿ ਵਿਵਿਚ੍ਚ ਵਿਵਿਤ੍ਤੋ ਹੁਤ੍ਵਾ. ਇਦਂ ਵੁਤ੍ਤਂ ਹੋਤਿ – ਯਂ ਕਾਮੇਹਿ ਚ ਅਕੁਸਲਧਮ੍ਮੇਹਿ ਚ ਵਿਵਿਤ੍ਤੇਨ ਪਠਮਦੁਤਿਯਜ੍ਝਾਨਸਙ੍ਖਾਤਂ ਪੀਤਿਸੁਖਂ ਅਧਿਗਨ੍ਤਬ੍ਬਂ, ਸਚੇ ਤਂ ਵਿਵਿਚ੍ਚ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਪੀਤਿਸੁਖਂ ਨਾਧਿਗਚ੍ਛਤਿ, ਅਞ੍ਞਂ ਵਾ ਉਪਰਿ ਦ੍ਵਿਨ੍ਨਂ ਝਾਨਾਨਂ ਚਤੁਨ੍ਨਞ੍ਚ ਮਗ੍ਗਾਨਂ ਵਸੇਨ ਸਨ੍ਤਤਰਂ ਸੁਖਂ ਨਾਧਿਗਚ੍ਛਤਿ, ਤਸ੍ਸ ਇਮੇ ਅਭਿਜ੍ਝਾਦਯੋ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤੀਤਿ. ਤਤ੍ਥ ਅਰਤੀਤਿ ਅਧਿਕੁਸਲੇਸੁ ਧਮ੍ਮੇਸੁ ਉਕ੍ਕਣ੍ਠਿਤਤਾ. ਤਨ੍ਦੀਤਿ ਆਲਸਿਯਭਾਵੋ. ਏਵਂ ਯੋ ਪਬ੍ਬਜਿਤ੍ਵਾ ਪਬ੍ਬਜਿਤਕਿਚ੍ਚਂ ਕਾਤੁਂ ਨ ਸਕ੍ਕੋਤਿ, ਤਸ੍ਸ ਇਮੇ ਸਤ੍ਤ ਪਾਪਧਮ੍ਮਾ ਉਪ੍ਪਜ੍ਜਿਤ੍ਵਾ ਚਿਤ੍ਤਂ ਪਰਿਯਾਦਿਯਨ੍ਤੀਤਿ ਦਸ੍ਸੇਤ੍ਵਾ ਇਦਾਨਿ ਯਸ੍ਸ ਤੇ ਧਮ੍ਮਾ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤਿ, ਸੋਯੇਵ ਸਮਣਕਿਚ੍ਚਮ੍ਪਿ ਕਾਤੁਂ ਨ ਸਕ੍ਕੋਤੀਤਿ ਪੁਨ ਵਿਵੇਕਂ ਅਨੁਰੁਦ੍ਧਾ…ਪੇ… ਅਞ੍ਞਂ ਵਾ ਤਤੋ ਸਨ੍ਤਤਰਨ੍ਤਿ ਆਹ.

ਏਵਂ ਕਣ੍ਹਪਕ੍ਖਂ ਦਸ੍ਸੇਤ੍ਵਾ ਇਦਾਨਿ ਤੇਨੇਵ ਨਯੇਨ ਸੁਕ੍ਕਪਕ੍ਖਂ ਦਸ੍ਸੇਤੁਂ ਪੁਨ ਵਿਵੇਕਨ੍ਤਿਆਦਿਮਾਹ. ਤਸ੍ਸਤ੍ਥੋ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੧੬੮. ਸਙ੍ਖਾਯਾਤਿ ਜਾਨਿਤ੍ਵਾ. ਏਕਨ੍ਤਿ ਏਕਚ੍ਚਂ. ਪਟਿਸੇਵਤੀਤਿ ਸੇਵਿਤਬ੍ਬਯੁਤ੍ਤਕਂ ਸੇਵਤਿ. ਸੇਸਪਦੇਸੁਪਿ ਏਸੇਵ ਨਯੋ. ਉਪਪਤ੍ਤੀਸੁ ਬ੍ਯਾਕਰੋਤੀਤਿ ਸਪ੍ਪਟਿਸਨ੍ਧਿਕੇ ਤਾਵ ਬ੍ਯਾਕਰੋਤੁ, ਅਪ੍ਪਟਿਸਨ੍ਧਿਕੇ ਕਥਂ ਬ੍ਯਾਕਰੋਤੀਤਿ. ਅਪ੍ਪਟਿਸਨ੍ਧਿਕਸ੍ਸ ਪੁਨ ਭਵੇ ਪਟਿਸਨ੍ਧਿ ਨਤ੍ਥੀਤਿ ਵਦਨ੍ਤੋ ਉਪਪਤ੍ਤੀਸੁ ਬ੍ਯਾਕਰੋਤਿ ਨਾਮ.

ਜਨਕੁਹਨਤ੍ਥਨ੍ਤਿ ਜਨਵਿਮ੍ਹਾਪਨਤ੍ਥਂ. ਜਨਲਪਨਤ੍ਥਨ੍ਤਿ ਮਹਾਜਨਸ੍ਸ ਉਪਲਾਪਨਤ੍ਥਂ. ਨ ਇਤਿ ਮਂ ਜਨੋ ਜਾਨਾਤੂਤਿ ਏਵਂ ਮਂ ਮਹਾਜਨੋ ਜਾਨਿਸ੍ਸਤਿ, ਏਵਂ ਮੇ ਮਹਾਜਨਸ੍ਸ ਅਨ੍ਤਰੇ ਕਿਤ੍ਤਿਸਦ੍ਦੋ ਉਗ੍ਗਚ੍ਛਿਸ੍ਸਤੀਤਿ ਇਮਿਨਾਪਿ ਕਾਰਣੇਨ ਨ ਬ੍ਯਾਕਰੋਤੀਤਿ ਅਤ੍ਥੋ. ਉਲ਼ਾਰਵੇਦਾਤਿ ਮਹਨ੍ਤਤੁਟ੍ਠਿਨੋ.

੧੬੯. ਸੋ ਖੋ ਪਨਸ੍ਸ ਆਯਸ੍ਮਾਤਿ ਸੋ ਪਰਿਨਿਬ੍ਬੁਤੋ ਆਯਸ੍ਮਾ ਇਮਸ੍ਸ ਠਿਤਸ੍ਸ ਆਯਸ੍ਮਤੋ. ਏਵਂਸੀਲੋਤਿਆਦੀਸੁ ਲੋਕਿਯਲੋਕੁਤ੍ਤਰਮਿਸ੍ਸਕਾਵ ਸੀਲਾਦਯੋ ਵੇਦਿਤਬ੍ਬੋ. ਏਵਂਧਮ੍ਮੋਤਿ ਏਤ੍ਥ ਪਨ ਸਮਾਧਿਪਕ੍ਖਿਕਾ ਧਮ੍ਮਾ ਧਮ੍ਮਾਤਿ ਅਧਿਪ੍ਪੇਤਾ. ਫਾਸੁਵਿਹਾਰੋ ਹੋਤੀਤਿ ਤੇਨ ਭਿਕ੍ਖੁਨਾ ਪੂਰਿਤਪਟਿਪਤ੍ਤਿਂ ਪੂਰੇਨ੍ਤਸ੍ਸ ਅਰਹਤ੍ਤਫਲਂ ਸਚ੍ਛਿਕਤ੍ਵਾ ਫਲਸਮਾਪਤ੍ਤਿਵਿਹਾਰੇਨ ਫਾਸੁਵਿਹਾਰੋ ਹੋਤਿ, ਅਰਹਤ੍ਤਂ ਪਤ੍ਤੁਮਸਕ੍ਕੋਨ੍ਤਸ੍ਸ ਪਟਿਪਤ੍ਤਿਂ ਪੂਰਯਮਾਨਸ੍ਸ ਚਰਤੋਪਿ ਫਾਸੁਵਿਹਾਰੋਯੇਵ ਨਾਮ ਹੋਤਿ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਨਲ਼ਕਪਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.