੭. ਚਾਤੁਮਸੁਤ੍ਤਵਣ੍ਣਨਾ

੧੫੭. ਏਵਂ ਮੇ ਸੁਤਨ੍ਤਿ ਚਾਤੁਮਸੁਤ੍ਤਂ. ਤਤ੍ਥ ਚਾਤੁਮਾਯਨ੍ਤਿ ਏਵਂਨਾਮਕੇ ਗਾਮੇ. ਪਞ੍ਚਮਤ੍ਤਾਨਿ ਭਿਕ੍ਖੁਸਤਾਨੀਤਿ ਅਧੁਨਾ ਪਬ੍ਬਜਿਤਾਨਂ ਭਿਕ੍ਖੂਨਂ ਪਞ੍ਚ ਸਤਾਨਿ. ਥੇਰਾ ਕਿਰ ਚਿਨ੍ਤੇਸੁਂ – ‘‘ਇਮੇ ਕੁਲਪੁਤ੍ਤਾ ਦਸਬਲਂ ਅਦਿਸ੍ਵਾਵ ਪਬ੍ਬਜਿਤਾ, ਏਤੇਸਂ ਭਗਵਨ੍ਤਂ ਦਸ੍ਸੇਸ੍ਸਾਮ, ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਅਤ੍ਤਨੋ ਅਤ੍ਤਨੋ ਯਥਾਉਪਨਿਸ੍ਸਯੇਨ ਪਤਿਟ੍ਠਹਿਸ੍ਸਨ੍ਤੀ’’ਤਿ. ਤਸ੍ਮਾ ਤੇ ਭਿਕ੍ਖੂ ਗਹੇਤ੍ਵਾ ਆਗਤਾ. ਪਟਿਸਮ੍ਮੋਦਮਾਨਾਤਿ ‘‘ਕਚ੍ਚਾਵੁਸੋ, ਖਮਨੀਯ’’ਨ੍ਤਿਆਦਿਂ ਪਟਿਸਨ੍ਥਾਰਕਥਂ ਕੁਰੁਮਾਨਾ. ਸੇਨਾਸਨਾਨਿ ਪਞ੍ਞਾਪਯਮਾਨਾਤਿ ਅਤ੍ਤਨੋ ਅਤ੍ਤਨੋ ਆਚਰਿਯੁਪਜ੍ਝਾਯਾਨਂ ਵਸਨਟ੍ਠਾਨਾਨਿ ਪੁਚ੍ਛਿਤ੍ਵਾ ਦ੍ਵਾਰਵਾਤਪਾਨਾਨਿ ਵਿਵਰਿਤ੍ਵਾ ਮਞ੍ਚਪੀਠਕਟਸਾਰਕਾਦੀਨਿ ਨੀਹਰਿਤ੍ਵਾ ਪਪ੍ਫੋਟੇਤ੍ਵਾ ਯਥਾਟ੍ਠਾਨੇ ਸਣ੍ਠਾਪਯਮਾਨਾ. ਪਤ੍ਤਚੀਵਰਾਨਿ ਪਟਿਸਾਮਯਮਾਨਾਤਿ, ਭਨ੍ਤੇ, ਇਦਂ ਮੇ ਪਤ੍ਤਂ ਠਪੇਥ, ਇਦਂ ਚੀਵਰਂ, ਇਦਂ ਥਾਲਕਂ, ਇਦਂ ਉਦਕਤੁਮ੍ਬਂ, ਇਮਂ ਕਤ੍ਤਰਯਟ੍ਠਿਨ੍ਤਿ ਏਵਂ ਸਮਣਪਰਿਕ੍ਖਾਰੇ ਸਙ੍ਗੋਪਯਮਾਨਾ.

ਉਚ੍ਚਾਸਦ੍ਦਾ ਮਹਾਸਦ੍ਦਾਤਿ ਉਦ੍ਧਂ ਉਗ੍ਗਤਤ੍ਤਾ ਉਚ੍ਚਂ, ਪਤ੍ਥਟਤ੍ਤਾ ਮਹਨ੍ਤਂ ਅਵਿਨਿਬ੍ਭੋਗਸਦ੍ਦਂ ਕਰੋਨ੍ਤਾ. ਕੇਵਟ੍ਟਾ ਮਞ੍ਞੇ ਮਚ੍ਛਵਿਲੋਪੇਤਿ ਕੇਵਟ੍ਟਾਨਂ ਮਚ੍ਛਪਚ੍ਛਿਠਪਿਤਟ੍ਠਾਨੇ ਮਹਾਜਨੋ ਸਨ੍ਨਿਪਤਿਤ੍ਵਾ – ‘‘ਇਧ ਅਞ੍ਞਂ ਏਕਂ ਮਚ੍ਛਂ ਦੇਹਿ, ਏਕਂ ਮਚ੍ਛਫਾਲਂ ਦੇਹਿ, ਏਤਸ੍ਸ ਤੇ ਮਹਾ ਦਿਨ੍ਨੋ, ਮਯ੍ਹਂ ਖੁਦ੍ਦਕੋ’’ਤਿ ਏਵਂ ਉਚ੍ਚਾਸਦ੍ਦਂ ਮਹਾਸਦ੍ਦਂ ਕਰੋਨ੍ਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਮਚ੍ਛਗਹਣਤ੍ਥਂ ਜਾਲੇ ਪਕ੍ਖਿਤ੍ਤੇਪਿ ਤਸ੍ਮਿਂ ਠਾਨੇ ਕੇਵਟ੍ਟਾ ਚੇਵ ਅਞ੍ਞੇ ਚ ‘‘ਪਵਿਟ੍ਠੋ ਨ ਪਵਿਟ੍ਠੋ, ਗਹਿਤੋ ਨ ਗਹਿਤੋ’’ਤਿ ਮਹਾਸਦ੍ਦਂ ਕਰੋਨ੍ਤਿ. ਤਮ੍ਪਿ ਸਨ੍ਧਾਯੇਤਂ ਵੁਤ੍ਤਂ. ਪਣਾਮੇਮੀਤਿ ਨੀਹਰਾਮਿ. ਨ ਵੋ ਮਮ ਸਨ੍ਤਿਕੇ ਵਤ੍ਥਬ੍ਬਨ੍ਤਿ ਤੁਮ੍ਹੇ ਮਾਦਿਸਸ੍ਸ ਬੁਦ੍ਧਸ੍ਸ ਵਸਨਟ੍ਠਾਨਂ ਆਗਨ੍ਤ੍ਵਾ ਏਵਂ ਮਹਾਸਦ੍ਦਂ ਕਰੋਥ, ਅਤ੍ਤਨੋ ਧਮ੍ਮਤਾਯ ਵਸਨ੍ਤਾ ਕਿਂ ਨਾਮ ਸਾਰੁਪ੍ਪਂ ਕਰਿਸ੍ਸਥ, ਤੁਮ੍ਹਾਦਿਸਾਨਂ ਮਮ ਸਨ੍ਤਿਕੇ ਵਸਨਕਿਚ੍ਚਂ ਨਤ੍ਥੀਤਿ ਦੀਪੇਤਿ. ਤੇਸੁ ਏਕਭਿਕ੍ਖੁਪਿ ‘‘ਭਗਵਾ ਤੁਮ੍ਹੇ ਮਹਾਸਦ੍ਦਮਤ੍ਤਕੇਨ ਅਮ੍ਹੇ ਪਣਾਮੇਥਾ’’ਤਿ ਵਾ ਅਞ੍ਞਂ ਵਾ ਕਿਞ੍ਚਿ ਵਤ੍ਤੁਂ ਨਾਸਕ੍ਖਿ, ਸਬ੍ਬੇ ਭਗਵਤੋ ਵਚਨਂ ਸਮ੍ਪਟਿਚ੍ਛਨ੍ਤਾ ‘‘ਏਵਂ, ਭਨ੍ਤੇ,’’ਤਿ ਵਤ੍ਵਾ ਨਿਕ੍ਖਮਿਂਸੁ. ਏਵਂ ਪਨ ਤੇਸਂ ਅਹੋਸਿ ‘‘ਮਯਂ ਸਤ੍ਥਾਰਂ ਪਸ੍ਸਿਸ੍ਸਾਮ, ਧਮ੍ਮਕਥਂ ਸੋਸ੍ਸਾਮ, ਸਤ੍ਥੁ ਸਨ੍ਤਿਕੇ ਵਸਿਸ੍ਸਾਮਾਤਿ ਆਗਤਾ. ਏਵਰੂਪਸ੍ਸ ਪਨ ਗਰੁਨੋ ਸਤ੍ਥੁ ਸਨ੍ਤਿਕਂ ਆਗਨ੍ਤ੍ਵਾ ਮਹਾਸਦ੍ਦਂ ਕਰਿਮ੍ਹਾ, ਅਮ੍ਹਾਕਮੇਵ ਦੋਸੋਯਂ, ਪਣਾਮਿਤਮ੍ਹਾ, ਨ ਨੋ ਲਦ੍ਧਂ ਭਗਵਤੋ ਸਨ੍ਤਿਕੇ ਵਤ੍ਥੁਂ, ਨ ਸੁਵਣ੍ਣਵਣ੍ਣਸਰੀਰਂ ਓਲੋਕੇਤੁਂ, ਨ ਮਧੁਰਸ੍ਸਰੇਨ ਧਮ੍ਮਂ ਸੋਤੁ’’ਨ੍ਤਿ. ਤੇ ਬਲਵਦੋਮਨਸ੍ਸਜਾਤਾ ਹੁਤ੍ਵਾ ਪਕ੍ਕਮਿਂਸੁ.

੧੫੮. ਤੇਨੁਪਸਙ੍ਕਮਿਂਸੂਤਿ ਤੇ ਕਿਰ ਸਕ੍ਯਾ ਆਗਮਨਸਮਯੇਪਿ ਤੇ ਭਿਕ੍ਖੂ ਤਤ੍ਥੇਵ ਨਿਸਿਨ੍ਨਾ ਪਸ੍ਸਿਂਸੁ. ਅਥ ਨੇਸਂ ਏਤਦਹੋਸਿ – ‘‘ਕਿਂ ਨੁ ਖੋ ਏਤੇ ਭਿਕ੍ਖੂ ਪਵਿਸਿਤ੍ਵਾਵ ਪਟਿਨਿਵਤ੍ਤਾ, ਜਾਨਿਸ੍ਸਾਮ ਤਂ ਕਾਰਣ’’ਨ੍ਤਿ ਚਿਨ੍ਤੇਤ੍ਵਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿਂਸੁ. ਹਨ੍ਦਾਤਿ ਵਵਸ੍ਸਗ੍ਗਤ੍ਥੇ ਨਿਪਾਤੋ. ਕਹਂ ਪਨ ਤੁਮ੍ਹੇਤਿ ਤੁਮ੍ਹੇ ਇਦਾਨੇਵ ਆਗਨ੍ਤ੍ਵਾ ਕਹਂ ਗਚ੍ਛਥ, ਕਿਂ ਤੁਮ੍ਹਾਕਂ ਕੋਚਿ ਉਪਦ੍ਦਵੋ, ਉਦਾਹੁ ਦਸਬਲਸ੍ਸਾਤਿ? ਤੇਸਂ ਪਨ ਭਿਕ੍ਖੂਨਂ, – ‘‘ਆਵੁਸੋ, ਮਯਂ ਭਗਵਨ੍ਤਂ ਦਸ੍ਸਨਾਯ ਆਗਤਾ, ਦਿਟ੍ਠੋ ਨੋ ਭਗਵਾ, ਇਦਾਨਿ ਅਤ੍ਤਨੋ ਵਸਨਟ੍ਠਾਨਂ ਗਚ੍ਛਾਮਾ’’ਤਿ ਕਿਞ੍ਚਾਪਿ ਏਵਂ ਵਚਨਪਰਿਹਾਰੋ ਅਤ੍ਥਿ, ਏਵਰੂਪਂ ਪਨ ਲੇਸਕਪ੍ਪਂ ਅਕਤ੍ਵਾ ਯਥਾਭੂਤਮੇਵ ਆਰੋਚੇਤ੍ਵਾ ਭਗਵਤਾ ਖੋ, ਆਵੁਸੋ, ਭਿਕ੍ਖੁਸਙ੍ਘੋ ਪਣਾਮਿਤੋਤਿ ਆਹਂਸੁ. ਤੇ ਪਨ ਰਾਜਾਨੋ ਸਾਸਨੇ ਧੁਰਵਹਾ, ਤਸ੍ਮਾ ਚਿਨ੍ਤੇਸੁਂ – ‘‘ਦ੍ਵੀਹਿ ਅਗ੍ਗਸਾਵਕੇਹਿ ਸਦ੍ਧਿਂ ਪਞ੍ਚਸੁ ਭਿਕ੍ਖੁਸਤੇਸੁ ਗਚ੍ਛਨ੍ਤੇਸੁ ਭਗਵਤੋ ਪਾਦਮੂਲਂ ਵਿਗਚ੍ਛਿਸ੍ਸਤਿ, ਇਮੇਸਂ ਨਿਵਤ੍ਤਨਾਕਾਰਂ ਕਰਿਸ੍ਸਾਮਾ’’ਤਿ. ਏਵਂ ਚਿਨ੍ਤੇਤ੍ਵਾ ਤੇਨ ਹਾਯਸ੍ਮਨ੍ਤੋਤਿਆਦਿਮਾਹਂਸੁ. ਤੇਸੁਪਿ ਭਿਕ੍ਖੂਸੁ ‘‘ਮਯਂ ਮਹਾਸਦ੍ਦਮਤ੍ਤਕੇਨ ਪਣਾਮਿਤਾ, ਨ ਮਯਂ ਜੀਵਿਤੁਂ ਅਸਕ੍ਕੋਨ੍ਤਾ ਪਬ੍ਬਜਿਤਾ’’ਤਿ ਏਕਭਿਕ੍ਖੁਪਿ ਪਟਿਪ੍ਫਰਿਤੋ ਨਾਮ ਨਾਹੋਸਿ, ਸਬ੍ਬੇ ਪਨ ਸਮਕਂਯੇਵ, ‘‘ਏਵਮਾਵੁਸੋ,’’ਤਿ ਸਮ੍ਪਟਿਚ੍ਛਿਂਸੁ.

੧੫੯. ਅਭਿਨਨ੍ਦਤੂਤਿ ਭਿਕ੍ਖੁਸਙ੍ਘਸ੍ਸ ਆਗਮਨਂ ਇਚ੍ਛਨ੍ਤੋ ਅਭਿਨਨ੍ਦਤੁ. ਅਭਿਵਦਤੂਤਿ ਏਤੁ ਭਿਕ੍ਖੁਸਙ੍ਘੋਤਿ ਏਵਂ ਚਿਤ੍ਤਂ ਉਪ੍ਪਾਦੇਨ੍ਤੋ ਅਭਿਵਦਤੁ. ਅਨੁਗ੍ਗਹਿਤੋਤਿ ਆਮਿਸਾਨੁਗ੍ਗਹੇਨ ਚ ਧਮ੍ਮਾਨੁਗ੍ਗਹੇਨ ਚ ਅਨੁਗ੍ਗਹਿਤੋ. ਅਞ੍ਞਥਤ੍ਤਨ੍ਤਿ ਦਸਬਲਸ੍ਸ ਦਸ੍ਸਨਂ ਨ ਲਭਾਮਾਤਿ ਪਸਾਦਞ੍ਞਥਤ੍ਤਂ ਭਵੇਯ੍ਯ. ਵਿਪਰਿਣਾਮੋਤਿ ਪਸਾਦਞ੍ਞਥਤ੍ਤੇਨ ਵਿਬ੍ਭਮਨ੍ਤਾਨਂ ਵਿਪਰਿਣਾਮਞ੍ਞਥਤ੍ਤਂ ਭਵੇਯ੍ਯ. ਬੀਜਾਨਂ ਤਰੁਣਾਨਨ੍ਤਿ ਤਰੁਣਸਸ੍ਸਾਨਂ. ਸਿਯਾ ਅਞ੍ਞਥਤ੍ਤਨ੍ਤਿ ਉਦਕਵਾਰਕਾਲੇ ਉਦਕਂ ਅਲਭਨ੍ਤਾਨਂ ਮਿਲਾਤਭਾਵੇਨ ਅਞ੍ਞਥਤ੍ਤਂ ਭਵੇਯ੍ਯ, ਸੁਸ੍ਸਿਤ੍ਵਾ ਮਿਲਾਤਭਾਵਂ ਆਪਜ੍ਜਨੇਨ ਵਿਪਰਿਣਾਮੋ ਭਵੇਯ੍ਯ. ਵਚ੍ਛਕਸ੍ਸ ਪਨ ਖੀਰਪਿਪਾਸਾਯ ਸੁਸ੍ਸਨਂ ਅਞ੍ਞਥਤ੍ਤਂ ਨਾਮ, ਸੁਸ੍ਸਿਤ੍ਵਾ ਕਾਲਕਿਰਿਯਾ ਵਿਪਰਿਣਾਮੋ ਨਾਮ.

੧੬੦. ਪਸਾਦਿਤੋ ਭਗਵਾਤਿ ਥੇਰੋ ਕਿਰ ਤਤ੍ਥ ਨਿਸਿਨ੍ਨੋਵ ਦਿਬ੍ਬਚਕ੍ਖੁਨਾ ਬ੍ਰਹ੍ਮਾਨਂ ਆਗਤਂ ਅਦ੍ਦਸ, ਦਿਬ੍ਬਾਯ ਸੋਤਧਾਤੁਯਾ ਚ ਆਯਾਚਨਸਦ੍ਦਂ ਸੁਣਿ, ਚੇਤੋਪਰਿਯਞਾਣੇਨ ਭਗਵਤੋ ਪਸਨ੍ਨਭਾਵਂ ਅਞ੍ਞਾਸਿ. ਤਸ੍ਮਾ – ‘‘ਕਞ੍ਚਿ ਭਿਕ੍ਖੁਂ ਪੇਸੇਤ੍ਵਾ ਪਕ੍ਕੋਸਿਯਮਾਨਾਨਂ ਗਮਨਂ ਨਾਮ ਨ ਫਾਸੁਕਂ, ਯਾਵ ਸਤ੍ਥਾ ਨ ਪੇਸੇਤਿ, ਤਾਵਦੇਵ ਗਮਿਸ੍ਸਾਮਾ’’ਤਿ ਮਞ੍ਞਮਾਨੋ ਏਵਮਾਹ. ਅਪ੍ਪੋਸ੍ਸੁਕ੍ਕੋਤਿ ਅਞ੍ਞੇਸੁ ਕਿਚ੍ਚੇਸੁ ਅਨੁਸ੍ਸੁਕ੍ਕੋ ਹੁਤ੍ਵਾ. ਦਿਟ੍ਠਧਮ੍ਮਸੁਖਵਿਹਾਰਨ੍ਤਿ ਫਲਸਮਾਪਤ੍ਤਿਵਿਹਾਰਂ ਅਨੁਯੁਤ੍ਤੋ ਮਞ੍ਞੇ ਭਗਵਾ ਵਿਹਰਿਤੁਕਾਮੋ, ਸੋ ਇਦਾਨਿ ਯਥਾਰੁਚਿਯਾ ਵਿਹਰਿਸ੍ਸਤੀਤਿ ਏਵਂ ਮੇ ਅਹੋਸੀਤਿ ਵਦਤਿ. ਮਯਮ੍ਪਿ ਦਾਨੀਤਿ ਮਯਂ ਪਰਂ ਓਵਦਮਾਨਾ ਵਿਹਾਰਤੋ ਨਿਕ੍ਕਡ੍ਢਿਤਾ, ਕਿਂ ਅਮ੍ਹਾਕਂ ਪਰੋਵਾਦੇਨ. ਇਦਾਨਿ ਮਯਮ੍ਪਿ ਦਿਟ੍ਠਧਮ੍ਮਸੁਖਵਿਹਾਰੇਨੇਵ ਵਿਹਰਿਸ੍ਸਾਮਾਤਿ ਦੀਪੇਤਿ. ਥੇਰੋ ਇਮਸ੍ਮਿਂ ਠਾਨੇ ਵਿਰਦ੍ਧੋ ਅਤ੍ਤਨੋ ਭਾਰਭਾਵਂ ਨ ਅਞ੍ਞਾਸਿ. ਅਯਞ੍ਹਿ ਭਿਕ੍ਖੁਸਙ੍ਘੋ ਦ੍ਵਿਨ੍ਨਮ੍ਪਿ ਮਹਾਥੇਰਾਨਂ ਭਾਰੋ, ਤੇਨ ਨਂ ਪਟਿਸੇਧੇਨ੍ਤੋ ਭਗਵਾ ਆਗਮੇਹੀਤਿਆਦਿਮਾਹ. ਮਹਾਮੋਗ੍ਗਲ੍ਲਾਨਤ੍ਥੇਰੋ ਪਨ ਅਤ੍ਤਨੋ ਭਾਰਭਾਵਂ ਅਞ੍ਞਾਸਿ. ਤੇਨਸ੍ਸ ਭਗਵਾ ਸਾਧੁਕਾਰਂ ਅਦਾਸਿ.

੧੬੧. ਚਤ੍ਤਾਰਿਮਾਨਿ, ਭਿਕ੍ਖਵੇਤਿ ਕਸ੍ਮਾ ਆਰਭਿ? ਇਮਸ੍ਮਿਂ ਸਾਸਨੇ ਚਤ੍ਤਾਰਿ ਭਯਾਨਿ. ਯੋ ਤਾਨਿ ਅਭੀਤੋ ਹੋਤਿ, ਸੋ ਇਮਸ੍ਮਿਂ ਸਾਸਨੇ ਪਤਿਟ੍ਠਾਤੁਂ ਸਕ੍ਕੋਤਿ. ਇਤਰੋ ਪਨ ਨ ਸਕ੍ਕੋਤੀਤਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ. ਤਤ੍ਥ ਉਦਕੋਰੋਹਨ੍ਤੇਤਿ ਉਦਕਂ ਓਰੋਹਨ੍ਤੇ ਪੁਗ੍ਗਲੇ. ਕੁਮ੍ਭੀਲਭਯਨ੍ਤਿ ਸੁਂਸੁਮਾਰਭਯਂ. ਸੁਸੁਕਾਭਯਨ੍ਤਿ ਚਣ੍ਡਮਚ੍ਛਭਯਂ.

੧੬੨. ਕੋਧੁਪਾਯਾਸਸ੍ਸੇਤਂ ਅਧਿਵਚਨਨ੍ਤਿ ਯਥਾ ਹਿ ਬਾਹਿਰਂ ਉਦਕਂ ਓਤਿਣ੍ਣੋ ਊਮੀਸੁ ਓਸੀਦਿਤ੍ਵਾ ਮਰਤਿ, ਏਵਂ ਇਮਸ੍ਮਿਂ ਸਾਸਨੇ ਕੋਧੁਪਾਯਾਸੇ ਓਸੀਦਿਤ੍ਵਾ ਵਿਬ੍ਭਮਤਿ. ਤਸ੍ਮਾ ਕੋਧੁਪਾਯਾਸੋ ‘‘ਊਮਿਭਯ’’ਨ੍ਤਿ ਵੁਤ੍ਤੋ.

੧੬੩. ਓਦਰਿਕਤ੍ਤਸ੍ਸੇਤਂ ਅਧਿਵਚਨਨ੍ਤਿ ਯਥਾ ਹਿ ਬਾਹਿਰਂ ਉਦਕਂ ਓਤਿਣ੍ਣੋ ਕੁਮ੍ਭੀਲੇਨ ਖਾਦਿਤੋ ਮਰਤਿ, ਏਵਂ ਇਮਸ੍ਮਿਂ ਸਾਸਨੇ ਓਦਰਿਕਤ੍ਤੇਨ ਖਾਦਿਤੋ ਵਿਬ੍ਭਮਤਿ. ਤਸ੍ਮਾ ਓਦਰਿਕਤ੍ਤਂ ‘‘ਕੁਮ੍ਭੀਲਭਯ’’ਨ੍ਤਿ ਵੁਤ੍ਤਂ.

੧੬੪. ਅਰਕ੍ਖਿਤੇਨੇਵ ਕਾਯੇਨਾਤਿ ਸੀਸਪ੍ਪਚਾਲਕਾਦਿਕਰਣੇਨ ਅਰਕ੍ਖਿਤਕਾਯੋ ਹੁਤ੍ਵਾ. ਅਰਕ੍ਖਿਤਾਯ ਵਾਚਾਯਾਤਿ ਦੁਟ੍ਠੁਲ੍ਲਭਾਸਨਾਦਿਵਸੇਨ ਅਰਕ੍ਖਿਤਵਾਚੋ ਹੁਤ੍ਵਾ. ਅਨੁਪਟ੍ਠਿਤਾਯ ਸਤਿਯਾਤਿ ਕਾਯਗਤਾਸਤਿਂ ਅਨੁਪਟ੍ਠਾਪੇਤ੍ਵਾ. ਅਸਂਵੁਤੇਹੀਤਿ ਅਪਿਹਿਤੇਹਿ. ਪਞ੍ਚਨ੍ਨੇਤਂਕਾਮਗੁਣਾਨਂ ਅਧਿਵਚਨਨ੍ਤਿ ਯਥਾ ਹਿ ਬਾਹਿਰਂ ਉਦਕਂ ਓਤਿਣ੍ਣੋ ਆਵਟ੍ਟੇ ਨਿਮੁਜ੍ਜਿਤ੍ਵਾ ਮਰਤਿ, ਏਵਂ ਇਮਸ੍ਮਿਂ ਸਾਸਨੇ ਪਬ੍ਬਜਿਤੋ ਪਞ੍ਚਕਾਮਗੁਣਾਵਟ੍ਟੇ ਨਿਮੁਜ੍ਜਿਤ੍ਵਾ ਵਿਬ੍ਭਮਤਿ. ਤਸ੍ਮਾ ਪਞ੍ਚ ਕਾਮਗੁਣਾ ‘‘ਆਵਟ੍ਟਭਯ’’ਨ੍ਤਿ ਵੁਤ੍ਤਾ.

੧੬੫. ਅਨੁਦ੍ਧਂਸੇਤੀਤਿ ਕਿਲਮੇਤਿ ਮਿਲਾਪੇਤਿ. ਰਾਗਾਨੁਦ੍ਧਂਸੇਨਾਤਿ ਰਾਗਾਨੁਦ੍ਧਂਸਿਤੇਨ. ਮਾਤੁਗਾਮਸ੍ਸੇਤਂ ਅਧਿਵਚਨਨ੍ਤਿ ਯਥਾ ਹਿ ਬਾਹਿਰਂ ਉਦਕਂ ਓਤਿਣ੍ਣੋ ਚਣ੍ਡਮਚ੍ਛਂ ਆਗਮ੍ਮ ਲਦ੍ਧਪ੍ਪਹਾਰੋ ਮਰਤਿ, ਏਵਂ ਇਮਸ੍ਮਿਂ ਸਾਸਨੇ ਮਾਤੁਗਾਮਂ ਆਗਮ੍ਮ ਉਪ੍ਪਨ੍ਨਕਾਮਰਾਗੋ ਵਿਬ੍ਭਮਤਿ. ਤਸ੍ਮਾ ਮਾਤੁਗਾਮੋ ‘‘ਸੁਸੁਕਾਭਯ’’ਨ੍ਤਿ ਵੁਤ੍ਤੋ.

ਇਮਾਨਿ ਪਨ ਚਤ੍ਤਾਰਿ ਭਯਾਨਿ ਭਾਯਿਤ੍ਵਾ ਯਥਾ ਉਦਕਂ ਅਨੋਰੋਹਨ੍ਤਸ੍ਸ ਉਦਕਂ ਨਿਸ੍ਸਾਯ ਆਨਿਸਂਸੋ ਨਤ੍ਥਿ, ਉਦਕਪਿਪਾਸਾਯ ਪਿਪਾਸਿਤੋ ਚ ਹੋਤਿ ਰਜੋਜਲ੍ਲੇਨ ਕਿਲਿਟ੍ਠਸਰੀਰੋ ਚ, ਏਵਮੇਵਂ ਇਮਾਨਿ ਚਤ੍ਤਾਰਿ ਭਯਾਨਿ ਭਾਯਿਤ੍ਵਾ ਸਾਸਨੇ ਅਪਬ੍ਬਜਨ੍ਤਸ੍ਸਾਪਿ ਇਮਂ ਸਾਸਨਂ ਨਿਸ੍ਸਾਯ ਆਨਿਸਂਸੋ ਨਤ੍ਥਿ, ਤਣ੍ਹਾਪਿਪਾਸਾਯ ਪਿਪਾਸਿਤੋ ਚ ਹੋਤਿ ਕਿਲੇਸਰਜੇਨ ਸਂਕਿਲਿਟ੍ਠਚਿਤ੍ਤੋ ਚ. ਯਥਾ ਪਨ ਇਮਾਨਿ ਚਤ੍ਤਾਰਿ ਭਯਾਨਿ ਅਭਾਯਿਤ੍ਵਾ ਉਦਕਂ ਓਰੋਹਨ੍ਤਸ੍ਸ ਵੁਤ੍ਤਪ੍ਪਕਾਰੋ ਆਨਿਸਂਸੋ ਹੋਤਿ, ਏਵਂ ਇਮਾਨਿ ਅਭਾਯਿਤ੍ਵਾ ਸਾਸਨੇ ਪਬ੍ਬਜਿਤਸ੍ਸਾਪਿ ਵੁਤ੍ਤਪ੍ਪਕਾਰੋ ਆਨਿਸਂਸੋ ਹੋਤਿ. ਥੇਰੋ ਪਨਾਹ – ‘‘ਚਤ੍ਤਾਰਿ ਭਯਾਨਿ ਭਾਯਿਤ੍ਵਾ ਉਦਕਂ ਅਨੋਤਰਨ੍ਤੋ ਸੋਤਂ ਛਿਨ੍ਦਿਤ੍ਵਾ ਪਰਤੀਰਂ ਪਾਪੁਣਿਤੁਂ ਨ ਸਕ੍ਕੋਤਿ, ਅਭਾਯਿਤ੍ਵਾ ਓਤਰਨ੍ਤੋ ਸਕ੍ਕੋਤਿ, ਏਵਮੇਵਂ ਭਾਯਿਤ੍ਵਾ ਸਾਸਨੇ ਅਪਬ੍ਬਜਨ੍ਤੋਪਿ ਤਣ੍ਹਾਸੋਤਂ ਛਿਨ੍ਦਿਤ੍ਵਾ ਨਿਬ੍ਬਾਨਪਾਰਂ ਦਟ੍ਠੁਂ ਨ ਸਕ੍ਕੋਤਿ, ਅਭਾਯਿਤ੍ਵਾ ਪਬ੍ਬਜਨ੍ਤੋ ਪਨ ਸਕ੍ਕੋਤੀ’’ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਅਯਂ ਪਨ ਦੇਸਨਾ ਨੇਯ੍ਯਪੁਗ੍ਗਲਸ੍ਸ ਵਸੇਨ ਨਿਟ੍ਠਾਪਿਤਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਚਾਤੁਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.