੬. ਲਟੁਕਿਕੋਪਮਸੁਤ੍ਤਵਣ੍ਣਨਾ

੧੪੮. ਏਵਂ ਮੇ ਸੁਤਨ੍ਤਿ ਲਟੁਕਿਕੋਪਮਸੁਤ੍ਤਂ. ਤਤ੍ਥ ਯੇਨ ਸੋ ਵਨਸਣ੍ਡੋਤਿ ਅਯਮ੍ਪਿ ਮਹਾਉਦਾਯਿਤ੍ਥੇਰੋ ਭਗਵਤਾ ਸਦ੍ਧਿਂਯੇਵ ਪਿਣ੍ਡਾਯ ਪਵਿਸਿਤ੍ਵਾ ਸਦ੍ਧਿਂ ਪਟਿਕ੍ਕਮਿ. ਤਸ੍ਮਾ ਯੇਨ ਸੋ ਭਗਵਤਾ ਉਪਸਙ੍ਕਮਨ੍ਤੋ ਵਨਸਣ੍ਡੋ ਤੇਨੁਪਸਙ੍ਕਮੀਤਿ ਵੇਦਿਤਬ੍ਬੋ. ਅਪਹਤ੍ਤਾਤਿ ਅਪਹਾਰਕੋ. ਉਪਹਤ੍ਤਾਤਿ ਉਪਹਾਰਕੋ. ਪਟਿਸਲ੍ਲਾਨਾ ਵੁਟ੍ਠਿਤੋਤਿ ਫਲਸਮਾਪਤ੍ਤਿਤੋ ਵੁਟ੍ਠਿਤੋ.

੧੪੯. ਯਂ ਭਗਵਾਤਿ ਯਸ੍ਮਿਂ ਸਮਯੇ ਭਗਵਾ. ਇਙ੍ਘਾਤਿ ਆਣਤ੍ਤਿਯਂ ਨਿਪਾਤੋ. ਅਞ੍ਞਥਤ੍ਤਨ੍ਤਿ ਚਿਤ੍ਤਸ੍ਸ ਅਞ੍ਞਥਤ੍ਤਂ. ਤਞ੍ਚ ਖੋ ਨ ਭਗਵਨ੍ਤਂ ਪਟਿਚ੍ਚ, ਏਵਰੂਪਂ ਪਨ ਪਣੀਤਭੋਜਨਂ ਅਲਭਨ੍ਤਾ ਕਥਂ ਯਾਪੇਸ੍ਸਾਮਾਤਿ ਏਵਂ ਪਣੀਤਭੋਜਨਂ ਪਟਿਚ੍ਚ ਅਹੋਸੀਤਿ ਵੇਦਿਤਬ੍ਬਂ. ਭੂਤਪੁਬ੍ਬਨ੍ਤਿ ਇਮਿਨਾ ਰਤ੍ਤਿਭੋਜਨਸ੍ਸ ਪਣੀਤਭਾਵਂ ਦਸ੍ਸੇਤਿ. ਸੂਪੇਯ੍ਯਨ੍ਤਿ ਸੂਪੇਨ ਉਪਨੇਤਬ੍ਬਂ ਮਚ੍ਛਮਂਸਕਲ਼ੀਰਾਦਿ. ਸਮਗ੍ਗਾ ਭੁਞ੍ਜਿਸ੍ਸਾਮਾਤਿ ਏਕਤੋ ਭੁਞ੍ਜਿਸ੍ਸਾਮ. ਸਙ੍ਖਤਿਯੋਤਿ ਅਭਿਸਙ੍ਖਾਰਿਕਖਾਦਨੀਯਾਨਿ. ਸਬ੍ਬਾ ਤਾ ਰਤ੍ਤਿਨ੍ਤਿ ਸਬ੍ਬਾ ਤਾ ਸਙ੍ਖਤਿਯੋ ਰਤ੍ਤਿਂਯੇਵ ਹੋਨ੍ਤਿ, ਦਿਵਾ ਪਨ ਅਪ੍ਪਾ ਪਰਿਤ੍ਤਾ ਥੋਕਿਕਾ ਹੋਨ੍ਤੀਤਿ. ਮਨੁਸ੍ਸਾ ਹਿ ਦਿਵਾ ਯਾਗੁਕਞ੍ਜਿਯਾਦੀਹਿ ਯਾਪੇਤ੍ਵਾਪਿ ਰਤ੍ਤਿਂ ਯਥਾਸਤ੍ਤਿ ਯਥਾਪਣੀਤਮੇਵ ਭੁਞ੍ਜਨ੍ਤਿ.

ਪੁਨ ਭੂਤਪੁਬ੍ਬਨ੍ਤਿ ਇਮਿਨਾ ਰਤ੍ਤਿ ਵਿਕਾਲਭੋਜਨੇ ਆਦੀਨਵਂ ਦਸ੍ਸੇਤਿ. ਤਤ੍ਥ ਅਨ੍ਧਕਾਰਤਿਮਿਸਾਯਨ੍ਤਿ ਬਹਲਨ੍ਧਕਾਰੇ. ਮਾਣਵੇਹੀਤਿ ਚੋਰੇਹਿ. ਕਤਕਮ੍ਮੇਹੀਤਿ ਕਤਚੋਰਕਮ੍ਮੇਹਿ. ਚੋਰਾ ਕਿਰ ਕਤਕਮ੍ਮਾ ਯਂ ਨੇਸਂ ਦੇਵਤਂ ਆਯਾਚਿਤ੍ਵਾ ਕਮ੍ਮਂ ਨਿਪ੍ਫਨ੍ਨਂ, ਤਸ੍ਸ ਉਪਹਾਰਤ੍ਥਾਯ ਮਨੁਸ੍ਸੇ ਮਾਰੇਤ੍ਵਾ ਗਲਲੋਹਿਤਾਦੀਨਿ ਗਣ੍ਹਨ੍ਤਿ. ਤੇ ਅਞ੍ਞੇਸੁ ਮਨੁਸ੍ਸੇਸੁ ਮਾਰਿਯਮਾਨੇਸੁ ਕੋਲਾਹਲਾ ਉਪ੍ਪਜ੍ਜਿਸ੍ਸਨ੍ਤਿ, ਪਬ੍ਬਜਿਤਂ ਪਰਿਯੇਸਨ੍ਤੋ ਨਾਮ ਨਤ੍ਥੀਤਿ ਮਞ੍ਞਮਾਨਾ ਭਿਕ੍ਖੂ ਗਹੇਤ੍ਵਾ ਮਾਰੇਨ੍ਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਅਕਤਕਮ੍ਮੇਹੀਤਿ ਅਟਵਿਤੋ ਗਾਮਂ ਆਗਮਨਕਾਲੇ ਕਮ੍ਮਨਿਪ੍ਫਨ੍ਨਤ੍ਥਂ ਪੁਰੇਤਰਂ ਬਲਿਕਮ੍ਮਂ ਕਾਤੁਕਾਮੇਹਿ. ਅਸਦ੍ਧਮ੍ਮੇਨ ਨਿਮਨ੍ਤੇਤੀਤਿ ‘‘ਏਹਿ ਭਿਕ੍ਖੁ ਅਜ੍ਜੇਕਰਤ੍ਤਿਂ ਇਧੇਵ ਭੁਞ੍ਜਿਤ੍ਵਾ ਇਧ ਵਸਿਤ੍ਵਾ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਸ੍ਵੇ ਗਮਿਸ੍ਸਸੀ’’ਤਿ ਮੇਥੁਨਧਮ੍ਮੇਨ ਨਿਮਨ੍ਤੇਤਿ.

ਪੁਨ ਭੂਤਪੁਬ੍ਬਨ੍ਤਿ ਇਮਿਨਾ ਅਤ੍ਤਨਾ ਦਿਟ੍ਠਕਾਰਣਂ ਕਥੇਤਿ. ਵਿਜ੍ਜਨ੍ਤਰਿਕਾਯਾਤਿ ਵਿਜ੍ਜੁਵਿਜ੍ਜੋਤਨਕ੍ਖਣੇ. ਵਿਸ੍ਸਰਮਕਾਸੀਤਿ ਮਹਾਸਦ੍ਦਮਕਾਸਿ. ਅਭੁਮ੍ਮੇਤਿ ਭੂ’ਤਿ ਵਡ੍ਢਿ, ਅਭੂ’ਤਿ ਅਵਡ੍ਢਿ, ਵਿਨਾਸੋ ਮਯ੍ਹਨ੍ਤਿ ਅਤ੍ਥੋ. ਪਿਸਾਚੋ ਵਤ ਮਨ੍ਤਿ ਪਿਸਾਚੋ ਮਂ ਖਾਦਿਤੁਂ ਆਗਤੋ ਵਤ. ਆਤੁਮਾਰੀ ਮਾਤੁਮਾਰੀਤਿ ਏਤ੍ਥ ਆਤੂਤਿ ਪਿਤਾ, ਮਾਤੂਤਿ ਮਾਤਾ. ਇਦਂ ਵੁਤ੍ਤਂ ਹੋਤਿ – ਯਸ੍ਸ ਪਿਤਾ ਵਾ ਮਾਤਾ ਵਾ ਅਤ੍ਥਿ, ਤਂ ਮਾਤਾਪਿਤਰੋ ਅਮ੍ਹਾਕਂ ਪੁਤ੍ਤਕੋਤਿ ਯਥਾ ਤਥਾ ਵਾ ਉਪ੍ਪਾਦੇਤ੍ਵਾ ਯਂਕਿਞ੍ਚਿ ਖਾਦਨੀਯਭੋਜਨੀਯਂ ਦਤ੍ਵਾ ਏਕਸ੍ਮਿਂ ਠਾਨੇ ਸਯਾਪੇਨ੍ਤਿ. ਸੋ ਏਵਂ ਰਤ੍ਤਿਂ ਪਿਣ੍ਡਾਯ ਨ ਚਰਤਿ. ਤੁਯ੍ਹਂ ਪਨ ਮਾਤਾਪਿਤਰੋ ਮਤਾ ਮਞ੍ਞੇ, ਤੇਨ ਏਵਂ ਚਰਸੀਤਿ.

੧੫੦. ਏਵਮੇਵਾਤਿ ਏਵਮੇਵ ਕਿਞ੍ਚਿ ਆਨਿਸਂਸਂ ਅਪਸ੍ਸਨ੍ਤਾ ਨਿਕ੍ਕਾਰਣੇਨੇਵ. ਏਵਮਾਹਂਸੂਤਿ ਗਰਹਨ੍ਤੋ ਆਹ. ਤਤ੍ਥ ਆਹਂਸੂਤਿ ਵਦਨ੍ਤਿ. ਕਿਂ ਪਨਿਮਸ੍ਸਾਤਿ ਇਮਸ੍ਸ ਅਪ੍ਪਮਤ੍ਤਕਸ੍ਸ ਹੇਤੁ ਕਿਂ ਵਤ੍ਤਬ੍ਬਂ ਨਾਮ, ਨਨੁ ਅਪਸ੍ਸਨ੍ਤੇਨ ਵਿਯ ਅਸੁਣਨ੍ਤੇਨ ਵਿਯ ਭਵਿਤਬ੍ਬਨ੍ਤਿ. ਓਰਮਤ੍ਤਕਸ੍ਸਾਤਿ ਪਰਿਤ੍ਤਮਤ੍ਤਕਸ੍ਸ. ਅਧਿਸਲ੍ਲਿਖਤੇਵਾਯਨ੍ਤਿ ਅਯਂ ਸਮਣੋ ਨਵਨੀਤਂ ਪਿਸਨ੍ਤੋ ਵਿਯ ਪਦੁਮਨਾਲ਼ਸੁਤ੍ਤਂ ਕਕਚੇਨ ਓਕ੍ਕਨ੍ਤਨ੍ਤੋ ਵਿਯ ਅਤਿਸਲ੍ਲੇਖਤਿ, ਅਤਿਵਾਯਾਮਂ ਕਰੋਤਿ. ਸਿਕ੍ਖਾਕਾਮਾਤਿ ਸਾਰਿਪੁਤ੍ਤਮੋਗ੍ਗਲ੍ਲਾਨਾਦਯੋ ਵਿਯ ਸਿਕ੍ਖਾਕਾਮਾ, ਤੇਸੁ ਚ ਅਪ੍ਪਚ੍ਚਯਂ ਉਪਟ੍ਠਪੇਨ੍ਤਿ. ਤੇਸਞ੍ਹਿ ਏਵਂ ਹੋਤਿ ‘‘ਸਚੇ ਏਤੇ ‘ਅਪ੍ਪਮਤ੍ਤਕਮੇਤਂ, ਹਰਥ ਭਗਵਾ’ਤਿ ਵਦੇਯ੍ਯੁਂ, ਕਿਂ ਸਤ੍ਥਾ ਨ ਹਰੇਯ੍ਯ. ਏਵਂ ਪਨ ਅਵਤ੍ਵਾ ਭਗਵਨ੍ਤਂ ਪਰਿਵਾਰੇਤ੍ਵਾ ਨਿਸਿਨ੍ਨਾ ‘ਏਵਂ ਭਗਵਾ, ਸਾਧੁ ਭਗਵਾ, ਪਞ੍ਞਪੇਥ ਭਗਵਾ’ਤਿ ਅਤਿਰੇਕਤਰਂ ਉਸ੍ਸਾਹਂ ਪਟਿਲਭਨ੍ਤੀ’’ਤਿ. ਤਸ੍ਮਾ ਤੇਸੁ ਅਪ੍ਪਚ੍ਚਯਂ ਉਪਟ੍ਠਪੇਨ੍ਤਿ.

ਤੇਸਨ੍ਤਿ ਤੇਸਂ ਏਕਚ੍ਚਾਨਂ ਮੋਘਪੁਰਿਸਾਨਂ. ਤਨ੍ਤਿ ਤਂ ਅਪ੍ਪਮਤ੍ਤਕਂ ਪਹਾਤਬ੍ਬਂ. ਥੂਲੋ ਕਲਿਙ੍ਗਰੋਤਿ ਗਲੇ ਬਦ੍ਧਂ ਮਹਾਕਟ੍ਠਂ ਵਿਯ ਹੋਤਿ. ਲਟੁਕਿਕਾ ਸਕੁਣਿਕਾਤਿ ਚਾਤਕਸਕੁਣਿਕਾ. ਸਾ ਕਿਰ ਰਵਸਤਂ ਰਵਿਤ੍ਵਾ ਨਚ੍ਚਸਤਂ ਨਚ੍ਚਿਤ੍ਵਾ ਸਕਿਂ ਗੋਚਰਂ ਗਣ੍ਹਾਤਿ. ਆਕਾਸਤੋ ਭੂਮਿਯਂ ਪਤਿਟ੍ਠਿਤਂ ਪਨ ਨਂ ਦਿਸ੍ਵਾ ਵਚ੍ਛਪਾਲਕਾਦਯੋ ਕੀਲ਼ਨਤ੍ਥਂ ਪੂਤਿਲਤਾਯ ਬਨ੍ਧਨ੍ਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਆਗਮੇਤੀਤਿ ਉਪੇਤਿ. ਤਞ੍ਹਿ ਤਸ੍ਸਾਤਿ ਤਂ ਪੂਤਿਲਤਾਬਨ੍ਧਨਂ ਤਸ੍ਸਾ ਅਪ੍ਪਸਰੀਰਤਾਯ ਚੇਵ ਅਪ੍ਪਥਾਮਤਾਯ ਚ ਬਲਵਬਨ੍ਧਨਂ ਨਾਮ, ਮਹਨ੍ਤਂ ਨਾਲ਼ਿਕੇਰਰਜ੍ਜੁ ਵਿਯ ਦੁਚ੍ਛਿਜ੍ਜਂ ਹੋਤਿ. ਤੇਸਨ੍ਤਿ ਤੇਸਂ ਮੋਘਪੁਰਿਸਾਨਂ ਸਦ੍ਧਾਮਨ੍ਦਤਾਯ ਚ ਪਞ੍ਞਾਮਨ੍ਦਤਾਯ ਚ ਬਲਵਂ ਬਨ੍ਧਨਂ ਨਾਮ, ਦੁਕ੍ਕਟਵਤ੍ਥੁਮਤ੍ਤਕਮ੍ਪਿ ਮਹਨ੍ਤਂ ਪਾਰਾਜਿਕਵਤ੍ਥੁ ਵਿਯ ਦੁਪ੍ਪਜਹਂ ਹੋਤਿ.

੧੫੧. ਸੁਕ੍ਕਪਕ੍ਖੇ ਪਹਾਤਬ੍ਬਸ੍ਸਾਤਿ ਕਿਂ ਇਮਸ੍ਸ ਅਪ੍ਪਮਤ੍ਤਕਸ੍ਸ ਪਹਾਤਬ੍ਬਸ੍ਸ ਹੇਤੁ ਭਗਵਤਾ ਵਤ੍ਤਬ੍ਬਂ ਅਤ੍ਥਿ, ਯਸ੍ਸ ਨੋ ਭਗਵਾ ਪਹਾਨਮਾਹ. ਨਨੁ ਏਵਂ ਭਗਵਤੋ ਅਧਿਪ੍ਪਾਯਂ ਞਤ੍ਵਾਪਿ ਪਹਾਤਬ੍ਬਮੇਵਾਤਿ ਅਤ੍ਥੋ. ਅਪ੍ਪੋਸ੍ਸੁਕ੍ਕਾਤਿ ਅਨੁਸ੍ਸੁਕ੍ਕਾ. ਪਨ੍ਨਲੋਮਾਤਿ ਪਤਿਤਲੋਮਾ, ਨ ਤਸ੍ਸ ਪਹਾਤਬ੍ਬਭਯੇਨ ਉਦ੍ਧਗ੍ਗਲੋਮਾ. ਪਰਦਤ੍ਤਵੁਤ੍ਤਾਤਿ ਪਰੇਹਿ ਦਿਨ੍ਨਵੁਤ੍ਤਿਨੋ, ਪਰਤੋ ਲਦ੍ਧੇਨ ਯਾਪੇਨ੍ਤਾਤਿ ਅਤ੍ਥੋ. ਮਿਗਭੂਤੇਨ ਚੇਤਸਾ ਵਿਹਰਨ੍ਤੀਤਿ ਅਪਚ੍ਚਾਸੀਸਨਪਕ੍ਖੇ ਠਿਤਾ ਹੁਤ੍ਵਾ ਵਿਹਰਨ੍ਤਿ. ਮਿਗੋ ਹਿ ਪਹਾਰਂ ਲਭਿਤ੍ਵਾ ਮਨੁਸ੍ਸਾਵਾਸਂ ਗਨ੍ਤ੍ਵਾ ਭੇਸਜ੍ਜਂ ਵਾ ਵਣਤੇਲਂ ਵਾ ਲਭਿਸ੍ਸਾਮੀਤਿ ਅਜ੍ਝਾਸਯਂ ਅਕਤ੍ਵਾ ਪਹਾਰਂ ਲਭਿਤ੍ਵਾਵ ਅਗਾਮਕਂ ਅਰਞ੍ਞਂ ਪਵਿਸਿਤ੍ਵਾ ਪਹਟਟ੍ਠਾਨਂ ਹੇਟ੍ਠਾ ਕਤ੍ਵਾ ਨਿਪਤਿਤ੍ਵਾ ਫਾਸੁਭੂਤਕਾਲੇ ਉਟ੍ਠਾਯ ਗਚ੍ਛਤਿ. ਏਵਂ ਮਿਗਾ ਅਪਚ੍ਚਾਸੀਸਨਪਕ੍ਖੇ ਠਿਤਾ. ਇਦਂ ਸਨ੍ਧਾਯ ਵੁਤ੍ਤਂ ‘‘ਮਿਗਭੂਤੇਨ ਚੇਤਸਾ ਵਿਹਰਨ੍ਤੀ’’ਤਿ. ਤਞ੍ਹਿ ਤਸ੍ਸਾਤਿ ਤਂ ਵਰਤ੍ਤਬਨ੍ਧਨਂ ਤਸ੍ਸ ਹਤ੍ਥਿਨਾਗਸ੍ਸ ਮਹਾਸਰੀਰਤਾਯ ਚੇਵ ਮਹਾਥਾਮਤਾਯ ਚ ਦੁਬ੍ਬਲਬਨ੍ਧਨਂ ਨਾਮ. ਪੂਤਿਲਤਾ ਵਿਯ ਸੁਛਿਜ੍ਜਂ ਹੋਤਿ. ਤੇਸਂ ਤਨ੍ਤਿ ਤੇਸਂ ਤਂ ਕੁਲਪੁਤ੍ਤਾਨਂ ਸਦ੍ਧਾਮਹਨ੍ਤਤਾਯ ਚ ਪਞ੍ਞਾਮਹਨ੍ਤਤਾਯ ਚ ਮਹਨ੍ਤਂ ਪਾਰਾਜਿਕਵਤ੍ਥੁਪਿ ਦੁਕ੍ਕਟਵਤ੍ਥੁਮਤ੍ਤਕਂ ਵਿਯ ਸੁਪ੍ਪਜਹਂ ਹੋਤਿ.

੧੫੨. ਦਲਿਦ੍ਦੋਤਿ ਦਾਲਿਦ੍ਦਿਯੇਨ ਸਮਨ੍ਨਾਗਤੋ. ਅਸ੍ਸਕੋਤਿ ਨਿਸ੍ਸਕੋ. ਅਨਾਲ਼੍ਹਿਯੋਤਿ ਅਨਡ੍ਢੋ. ਅਗਾਰਕਨ੍ਤਿ ਖੁਦ੍ਦਕਗੇਹਂ. ਓਲੁਗ੍ਗਵਿਲੁਗ੍ਗਨ੍ਤਿ ਯਸ੍ਸ ਗੇਹਯਟ੍ਠਿਯੋ ਪਿਟ੍ਠਿਵਂਸਤੋ ਮੁਚ੍ਚਿਤ੍ਵਾ ਮਣ੍ਡਲੇ ਲਗ੍ਗਾ, ਮਣ੍ਡਲਤੋ ਮੁਚ੍ਚਿਤ੍ਵਾ ਭੂਮਿਯਂ ਲਗ੍ਗਾ. ਕਾਕਾਤਿਦਾਯਿਨ੍ਤਿ ਯਤ੍ਥ ਕਿਞ੍ਚਿਦੇਵ ਭੁਞ੍ਜਿਸ੍ਸਾਮਾਤਿ ਅਨ੍ਤੋ ਨਿਸਿਨ੍ਨਕਾਲੇ ਵਿਸੁਂ ਦ੍ਵਾਰਕਿਚ੍ਚਂ ਨਾਮ ਨਤ੍ਥਿ, ਤਤੋ ਤਤੋ ਕਾਕਾ ਪਵਿਸਿਤ੍ਵਾ ਪਰਿਵਾਰੇਨ੍ਤਿ. ਸੂਰਕਾਕਾ ਹਿ ਪਲਾਯਨਕਾਲੇ ਚ ਯਥਾਸਮ੍ਮੁਖਟ੍ਠਾਨੇਨੇਵ ਨਿਕ੍ਖਮਿਤ੍ਵਾ ਪਲਾਯਨ੍ਤਿ. ਨਪਰਮਰੂਪਨ੍ਤਿ ਨ ਪੁਞ੍ਞਵਨ੍ਤਾਨਂ ਗੇਹਂ ਵਿਯ ਉਤ੍ਤਮਰੂਪਂ. ਖਟੋਪਿਕਾਤਿ ਵਿਲੀਵਮਞ੍ਚਕੋ. ਓਲੁਗ੍ਗਵਿਲੁਗ੍ਗਾਤਿ ਓਣਤੁਣ੍ਣਤਾ. ਧਞ੍ਞਸਮਵਾਪਕਨ੍ਤਿ ਧਞ੍ਞਞ੍ਚ ਸਮਵਾਪਕਞ੍ਚ. ਤਤ੍ਥ ਧਞ੍ਞਂ ਨਾਮ ਕੁਦ੍ਰੂਸਕੋ. ਸਮਵਾਪਕਨ੍ਤਿ ਲਾਬੁਬੀਜਕੁਮ੍ਭਣ੍ਡਬੀਜਕਾਦਿ ਬੀਜਜਾਤਂ. ਨਪਰਮਰੂਪਨ੍ਤਿ ਯਥਾ ਪੁਞ੍ਞਵਨ੍ਤਾਨਂ ਗਨ੍ਧਸਾਲਿਬੀਜਾਦਿ ਪਰਿਸੁਦ੍ਧਂ ਬੀਜਂ, ਨ ਏਵਰੂਪਂ. ਜਾਯਿਕਾਤਿ ਕਪਣਜਾਯਾ. ਨਪਰਮਰੂਪਾਤਿ ਪਚ੍ਛਿਸੀਸਾ ਲਮ੍ਬਤ੍ਥਨੀ ਮਹੋਦਰਾ ਪਿਸਾਚਾ ਵਿਯ ਬੀਭਚ੍ਛਾ. ਸਾਮਞ੍ਞਨ੍ਤਿ ਸਮਣਭਾਵੋ. ਸੋ ਵਤਸ੍ਸਂ, ਯੋਹਨ੍ਤਿ ਸੋ ਵਤਾਹਂ ਪੁਰਿਸੋ ਨਾਮ ਅਸ੍ਸਂ, ਯੋ ਕੇਸਮਸ੍ਸੁਂ ਓਹਾਰੇਤ੍ਵਾ ਪਬ੍ਬਜੇਯ੍ਯਨ੍ਤਿ.

ਸੋ ਨ ਸਕ੍ਕੁਣੇਯ੍ਯਾਤਿ ਸੋ ਏਵਂ ਚਿਨ੍ਤੇਤ੍ਵਾਪਿ ਗੇਹਂ ਗਨ੍ਤ੍ਵਾ – ‘‘ਪਬ੍ਬਜ੍ਜਾ ਨਾਮ ਲਾਭਗਰੁਕਾ ਦੁਕ੍ਕਰਾ ਦੁਰਾਸਦਾ, ਸਤ੍ਤਪਿ ਅਟ੍ਠਪਿ ਗਾਮੇ ਪਿਣ੍ਡਾਯ ਚਰਿਤ੍ਵਾ ਯਥਾਧੋਤੇਨੇਵ ਪਤ੍ਤੇਨ ਆਗਨ੍ਤਬ੍ਬਮ੍ਪਿ ਹੋਤਿ, ਏਵਂ ਯਾਪੇਤੁਂ ਅਸਕ੍ਕੋਨ੍ਤਸ੍ਸ ਮੇ ਪੁਨ ਆਗਤਸ੍ਸ ਵਸਨਟ੍ਠਾਨਂ ਇਚ੍ਛਿਤਬ੍ਬਂ, ਤਿਣਵਲ੍ਲਿਦਬ੍ਬਸਮ੍ਭਾਰਾ ਨਾਮ ਦੁਸ੍ਸਮੋਧਾਨਿਯਾ, ਕਿਨ੍ਤਿ ਕਰੋਮੀ’’ਤਿ ਵੀਮਂਸਤਿ. ਅਥਸ੍ਸ ਤਂ ਅਗਾਰਕਂ ਵੇਜਯਨ੍ਤਪਾਸਾਦੋ ਵਿਯ ਉਪਟ੍ਠਾਤਿ. ਅਥਸ੍ਸ ਖਟੋਪਿਕਂ ਓਲੋਕੇਤ੍ਵਾ – ‘‘ਮਯਿ ਗਤੇ ਇਮਂ ਵਿਸਙ੍ਖਰਿਤ੍ਵਾ ਉਦ੍ਧਨਾਲਾਤਂ ਕਰਿਸ੍ਸਨ੍ਤਿ, ਪੁਨ ਅਟ੍ਟਨਿਪਾਦਵਿਲੀਵਾਦੀਨਿ ਲਦ੍ਧਬ੍ਬਾਨਿ ਹੋਨ੍ਤਿ, ਕਿਨ੍ਤਿ ਕਰਿਸ੍ਸਾਮੀ’’ਤਿ ਚਿਨ੍ਤੇਤਿ. ਅਥਸ੍ਸ ਸਾ ਸਿਰਿਸਯਨਂ ਵਿਯ ਉਪਟ੍ਠਾਤਿ. ਤਤੋ ਧਞ੍ਞਕੁਮ੍ਭਿਂ ਓਲੋਕੇਤ੍ਵਾ – ‘‘ਮਯਿ ਗਤੇ ਅਯਂ ਘਰਣੀ ਇਮਂ ਧਞ੍ਞਂ ਤੇਨ ਤੇਨ ਸਦ੍ਧਿਂ ਭੁਞ੍ਜਿਸ੍ਸਤਿ. ਪੁਨ ਆਗਤੇਨ ਜੀਵਿਤਵੁਤ੍ਤਿ ਨਾਮ ਲਦ੍ਧਬ੍ਬਾ ਹੋਤਿ, ਕਿਨ੍ਤਿ ਕਰਿਸ੍ਸਾਮੀ’’ਤਿ ਚਿਨ੍ਤੇਤਿ. ਅਥਸ੍ਸ ਸਾ ਅਡ੍ਢਤੇਲ਼ਸਾਨਿ ਕੋਟ੍ਠਾਗਾਰਸਤਾਨਿ ਵਿਯ ਉਪਟ੍ਠਾਤਿ. ਤਤੋ ਮਾਤੁਗਾਮਂ ਓਲੋਕੇਤ੍ਵਾ – ‘‘ਮਯਿ ਗਤੇ ਇਮਂ ਹਤ੍ਥਿਗੋਪਕੋ ਵਾ ਅਸ੍ਸਗੋਪਕੋ ਵਾ ਯੋ ਕੋਚਿ ਪਲੋਭੇਸ੍ਸਤਿ, ਪੁਨ ਆਗਤੇਨ ਭਤ੍ਤਪਾਚਿਕਾ ਨਾਮ ਲਦ੍ਧਬ੍ਬਾ ਹੋਤਿ, ਕਿਨ੍ਤਿ ਕਰਿਸ੍ਸਾਮੀ’’ਤਿ ਚਿਨ੍ਤੇਤਿ. ਅਥਸ੍ਸ ਸਾ ਰੂਪਿਨੀ ਦੇਵੀ ਵਿਯ ਉਪਟ੍ਠਾਤਿ. ਇਦਂ ਸਨ੍ਧਾਯ ‘‘ਸੋ ਨ ਸਕ੍ਕੁਣੇਯ੍ਯਾ’’ਤਿਆਦਿ ਵੁਤ੍ਤਂ.

੧੫੩. ਨਿਕ੍ਖਗਣਾਨਨ੍ਤਿ ਸੁਵਣ੍ਣਨਿਕ੍ਖਸਤਾਨਂ. ਚਯੋਤਿ ਸਨ੍ਤਾਨਤੋ ਕਤਸਨ੍ਨਿਚਯੋ. ਧਞ੍ਞਗਣਾਨਨ੍ਤਿ ਧਞ੍ਞਸਕਟਸਤਾਨਂ.

੧੫੪. ਚਤ੍ਤਾਰੋਮੇ, ਉਦਾਯਿ, ਪੁਗ੍ਗਲਾਤਿ ਇਧ ਕਿਂ ਦਸ੍ਸੇਤਿ? ਹੇਟ੍ਠਾ ‘‘ਤੇ ਤਞ੍ਚੇਵ ਪਜਹਨ੍ਤਿ, ਤੇ ਤਞ੍ਚੇਵ ਨਪ੍ਪਜਹਨ੍ਤੀ’’ਤਿ ਪਜਹਨਕਾ ਚ ਅਪ੍ਪਜਹਨਕਾ ਚ ਰਾਸਿਵਸੇਨ ਦਸ੍ਸਿਤਾ, ਨ ਪਾਟਿਯੇਕ੍ਕਂ ਵਿਭਤ੍ਤਾ. ਇਦਾਨਿ ਯਥਾ ਨਾਮ ਦਬ੍ਬਸਮ੍ਭਾਰਤ੍ਥਂ ਗਤੋ ਪੁਰਿਸੋ ਪਟਿਪਾਟਿਯਾ ਰੁਕ੍ਖੇ ਛਿਨ੍ਦਿਤ੍ਵਾ ਪੁਨ ਨਿਵਤ੍ਤਿਤ੍ਵਾ ਵਙ੍ਕਞ੍ਚ ਪਹਾਯ ਕਮ੍ਮੇ ਉਪਨੇਤਬ੍ਬਯੁਤ੍ਤਕਮੇਵ ਗਣ੍ਹਾਤਿ, ਏਵਮੇਵ ਅਪ੍ਪਜਹਨਕੇ ਛਡ੍ਡੇਤ੍ਵਾ ਅਬ੍ਬੋਹਾਰਿਕੇ ਕਤ੍ਵਾ ਪਜਹਨਕਪੁਗ੍ਗਲਾ ਚਤ੍ਤਾਰੋ ਹੋਨ੍ਤੀਤਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ.

ਉਪਧਿਪਹਾਨਾਯਾਤਿ ਖਨ੍ਧੁਪਧਿਕਿਲੇਸੁਪਧਿਅਭਿਸਙ੍ਖਾਰੁਪਧਿਕਾਮਗੁਣੂਪਧੀਤਿ ਇਮੇਸਂ ਉਪਧੀਨਂ ਪਹਾਨਾਯ. ਉਪਧਿਪਟਿਸਂਯੁਤ੍ਤਾਤਿ ਉਪਧਿਅਨੁਧਾਵਨਕਾ. ਸਰਸਙ੍ਕਪ੍ਪਾਤਿ ਏਤ੍ਥ ਸਰਨ੍ਤਿ ਧਾਵਨ੍ਤੀਤਿ ਸਰਾ. ਸਙ੍ਕਪ੍ਪੇਨ੍ਤੀਤਿ ਸਙ੍ਕਪ੍ਪਾ. ਪਦਦ੍ਵਯੇਨਪਿ ਵਿਤਕ੍ਕਾਯੇਵ ਵੁਤ੍ਤਾ. ਸਮੁਦਾਚਰਨ੍ਤੀਤਿ ਅਭਿਭਵਨ੍ਤਿ ਅਜ੍ਝੋਤ੍ਥਰਿਤ੍ਵਾ ਵਤ੍ਤਨ੍ਤਿ. ਸਂਯੁਤ੍ਤੋਤਿ ਕਿਲੇਸੇਹਿ ਸਂਯੁਤ੍ਤੋ. ਇਨ੍ਦ੍ਰਿਯਵੇਮਤ੍ਤਤਾਤਿ ਇਨ੍ਦ੍ਰਿਯਨਾਨਤ੍ਤਤਾ. ਕਦਾਚਿ ਕਰਹਚੀਤਿ ਬਹੁਕਾਲਂ ਵੀਤਿਵਤ੍ਤੇਤ੍ਵਾ. ਸਤਿਸਮ੍ਮੋਸਾਤਿ ਸਤਿਸਮ੍ਮੋਸੇਨ. ਨਿਪਾਤੋਤਿ ਅਯੋਕਟਾਹਮ੍ਹਿ ਪਤਨਂ. ਏਤ੍ਤਾਵਤਾ ‘‘ਨਪ੍ਪਜਹਤਿ, ਪਜਹਤਿ, ਖਿਪ੍ਪਂ ਪਜਹਤੀ’’ਤਿ ਤਯੋ ਰਾਸਯੋ ਦਸ੍ਸਿਤਾ. ਤੇਸੁ ਚਤ੍ਤਾਰੋ ਜਨਾ ਨਪ੍ਪਜਹਨ੍ਤਿ ਨਾਮ, ਚਤ੍ਤਾਰੋ ਪਜਹਨ੍ਤਿ ਨਾਮ, ਚਤ੍ਤਾਰੋ ਖਿਪ੍ਪਂ ਪਜਹਨ੍ਤਿ ਨਾਮ.

ਤਤ੍ਥ ਪੁਥੁਜ੍ਜਨੋ ਸੋਤਾਪਨ੍ਨੋ ਸਕਦਾਗਾਮੀ ਅਨਾਗਾਮੀਤਿ ਇਮੇ ਚਤ੍ਤਾਰੋ ਜਨਾ ਨਪ੍ਪਜਹਨ੍ਤਿ ਨਾਮ. ਪੁਥੁਜ੍ਜਨਾਦਯੋ ਤਾਵ ਮਾ ਪਜਹਨ੍ਤੁ, ਅਨਾਗਾਮੀ ਕਥਂ ਨ ਪਜਹਤੀਤਿ? ਸੋਪਿ ਹਿ ਯਾਵਦੇਵਸ੍ਸ ਭਵਲੋਭੋ ਅਤ੍ਥਿ, ਤਾਵ ਅਹੋਸੁਖਂ ਅਹੋਸੁਖਨ੍ਤਿ ਅਭਿਨਨ੍ਦਤਿ. ਤਸ੍ਮਾ ਨਪ੍ਪਜਹਤਿ ਨਾਮ. ਏਤੇਯੇਵ ਪਨ ਚਤ੍ਤਾਰੋ ਜਨਾ ਪਜਹਨ੍ਤਿ ਨਾਮ. ਸੋਤਾਪਨ੍ਨਾਦਯੋ ਤਾਵ ਪਜਹਨ੍ਤੁ, ਪੁਥੁਜ੍ਜਨੋ ਕਥਂ ਪਜਹਤੀਤਿ? ਆਰਦ੍ਧਵਿਪਸ੍ਸਕੋ ਹਿ ਸਤਿਸਮ੍ਮੋਸੇਨ ਸਹਸਾ ਕਿਲੇਸੇ ਉਪ੍ਪਨ੍ਨੇ ‘‘ਮਾਦਿਸਸ੍ਸ ਨਾਮ ਭਿਕ੍ਖੁਨੋ ਕਿਲੇਸੋ ਉਪ੍ਪਨ੍ਨੋ’’ਤਿ ਸਂਵੇਗਂ ਕਤ੍ਵਾ ਵੀਰਿਯਂ ਪਗ੍ਗਯ੍ਹ ਵਿਪਸ੍ਸਨਂ ਵਡ੍ਢੇਤ੍ਵਾ ਮਗ੍ਗੇਨ ਕਿਲੇਸੇ ਸਮੁਗ੍ਘਾਤੇਤਿ. ਇਤਿ ਸੋ ਪਜਹਤਿ ਨਾਮ. ਤੇਯੇਵ ਚਤ੍ਤਾਰੋ ਖਿਪ੍ਪਂ ਪਜਹਨ੍ਤਿ ਨਾਮ. ਤਤ੍ਥ ਇਮਸ੍ਮਿਂ ਸੁਤ੍ਤੇ, ਮਹਾਹਤ੍ਥਿਪਦੋਪਮੇ (ਮ. ਨਿ. ੧.੨੮੮ ਆਦਯੋ), ਇਨ੍ਦ੍ਰਿਯਭਾਵਨੇਤਿ (ਮ. ਨਿ. ੩.੪੫੩ ਆਦਯੋ) ਇਮੇਸੁ ਸੁਤ੍ਤੇਸੁ ਕਿਞ੍ਚਾਪਿ ਤਤਿਯਵਾਰੋ ਗਹਿਤੋ, ਪਞ੍ਹੋ ਪਨ ਦੁਤਿਯਵਾਰੇਨੇਵ ਕਥਿਤੋਤਿ ਵੇਦਿਤਬ੍ਬੋ.

ਉਪਧਿ ਦੁਕ੍ਖਸ੍ਸ ਮੂਲਨ੍ਤਿ ਏਤ੍ਥ ਪਞ੍ਚ ਖਨ੍ਧਾ ਉਪਧਿ ਨਾਮ. ਤਂ ਦੁਕ੍ਖਸ੍ਸ ਮੂਲਨ੍ਤਿ ਇਤਿ ਵਿਦਿਤ੍ਵਾ ਕਿਲੇਸੁਪਧਿਨਾ ਨਿਰੁਪਧਿ ਹੋਤਿ, ਨਿਗ੍ਗਹਣੋ ਨਿਤਣ੍ਹੋਤਿ ਅਤ੍ਥੋ. ਉਪਧਿਸਙ੍ਖਯੇ ਵਿਮੁਤ੍ਤੋਤਿ ਤਣ੍ਹਕ੍ਖਯੇ ਨਿਬ੍ਬਾਨੇ ਆਰਮ੍ਮਣਤੋ ਵਿਮੁਤ੍ਤੋ.

੧੫੫. ਏਵਂ ਚਤ੍ਤਾਰੋ ਪੁਗ੍ਗਲੇ ਵਿਤ੍ਥਾਰੇਤ੍ਵਾ ਇਦਾਨਿ ਯੇ ਪਜਹਨ੍ਤਿ, ਤੇ ‘‘ਇਮੇ ਨਾਮ ਏਤ੍ਤਕੇ ਕਿਲੇਸੇ ਪਜਹਨ੍ਤਿ’’. ਯੇ ਨਪ੍ਪਜਹਨ੍ਤਿ, ਤੇਪਿ ‘‘ਇਮੇ ਨਾਮ ਏਤ੍ਤਕੇ ਕਿਲੇਸੇ ਨਪ੍ਪਜਹਨ੍ਤੀ’’ਤਿ ਦਸ੍ਸੇਤੁਂ ਪਞ੍ਚ ਖੋ ਇਮੇ ਉਦਾਯਿ ਕਾਮਗੁਣਾਤਿਆਦਿਮਾਹ. ਤਤ੍ਥ ਮਿਲ਼੍ਹਸੁਖਨ੍ਤਿ ਅਸੁਚਿਸੁਖਂ. ਅਨਰਿਯਸੁਖਨ੍ਤਿ ਅਨਰਿਯੇਹਿ ਸੇਵਿਤਸੁਖਂ. ਭਾਯਿਤਬ੍ਬਨ੍ਤਿ ਏਤਸ੍ਸ ਸੁਖਸ੍ਸ ਪਟਿਲਾਭਤੋਪਿ ਵਿਪਾਕਤੋਪਿ ਭਾਯਿਤਬ੍ਬਂ. ਨੇਕ੍ਖਮ੍ਮਸੁਖਨ੍ਤਿ ਕਾਮਤੋ ਨਿਕ੍ਖਨ੍ਤਸੁਖਂ. ਪਵਿਵੇਕਸੁਖਨ੍ਤਿ ਗਣਤੋਪਿ ਕਿਲੇਸਤੋਪਿ ਪਵਿਵਿਤ੍ਤਸੁਖਂ. ਉਪਸਮਸੁਖਨ੍ਤਿ ਰਾਗਾਦਿਵੂਪਸਮਤ੍ਥਾਯ ਸੁਖਂ. ਸਮ੍ਬੋਧਸੁਖਨ੍ਤਿ ਮਗ੍ਗਸਙ੍ਖਾਤਸ੍ਸ ਸਮ੍ਬੋਧਸ੍ਸ ਨਿਬ੍ਬਤ੍ਤਨਤ੍ਥਾਯ ਸੁਖਂ. ਨ ਭਾਯਿਤਬ੍ਬਨ੍ਤਿ ਏਤਸ੍ਸ ਸੁਖਸ੍ਸ ਪਟਿਲਾਭਤੋਪਿ ਵਿਪਾਕਤੋਪਿ ਨ ਭਾਯਿਤਬ੍ਬਂ, ਭਾਵੇਤਬ੍ਬਮੇਵੇਤਂ.

੧੫੬. ਇਞ੍ਜਿਤਸ੍ਮਿਂ ਵਦਾਮੀਤਿ ਇਞ੍ਜਨਂ ਚਲਨਂ ਫਨ੍ਦਨਨ੍ਤਿ ਵਦਾਮਿ. ਕਿਞ੍ਚ ਤਤ੍ਥ ਇਞ੍ਜਿਤਸ੍ਮਿਨ੍ਤਿ ਕਿਞ੍ਚ ਤਤ੍ਥ ਇਞ੍ਜਿਤਂ. ਇਦਂ ਤਤ੍ਥ ਇਞ੍ਜਿਤਸ੍ਮਿਨ੍ਤਿ ਯੇ ਏਤੇ ਅਨਿਰੁਦ੍ਧਾ ਵਿਤਕ੍ਕਵਿਚਾਰਾ, ਇਦਂ ਤਤ੍ਥ ਇਞ੍ਜਿਤਂ. ਦੁਤਿਯਤਤਿਯਜ੍ਝਾਨੇਸੁਪਿ ਏਸੇਵ ਨਯੋ. ਅਨਿਞ੍ਜਿਤਸ੍ਮਿਂ ਵਦਾਮੀਤਿ ਇਦਂ ਚਤੁਤ੍ਥਜ੍ਝਾਨਂ ਅਨਿਞ੍ਜਨਂ ਅਚਲਨਂ ਨਿਪ੍ਫਨ੍ਦਨਨ੍ਤਿ ਵਦਾਮਿ.

ਅਨਲਨ੍ਤਿ ਵਦਾਮੀਤਿ ਅਕਤ੍ਤਬ੍ਬਆਲਯਨ੍ਤਿ ਵਦਾਮਿ, ਤਣ੍ਹਾਲਯੋ ਏਤ੍ਥ ਨ ਉਪ੍ਪਾਦੇਤਬ੍ਬੋਤਿ ਦਸ੍ਸੇਤਿ. ਅਥ ਵਾ ਅਨਲਂ ਅਪਰਿਯਤ੍ਤਂ, ਨ ਏਤ੍ਤਾਵਤਾ ਅਲਮੇਤਨ੍ਤਿ ਸਨ੍ਨਿਟ੍ਠਾਨਂ ਕਾਤਬ੍ਬਨ੍ਤਿ ਵਦਾਮਿ. ਨੇਵਸਞ੍ਞਾਨਾਸਞ੍ਞਾਯਤਨਸ੍ਸਾਪੀਤਿ ਏਵਰੂਪਾਯਪਿ ਸਨ੍ਤਾਯ ਸਮਾਪਤ੍ਤਿਯਾ ਪਹਾਨਮੇਵ ਵਦਾਮਿ. ਅਣੁਂ ਵਾ ਥੂਲਂ ਵਾਤਿ ਖੁਦ੍ਦਕਂ ਵਾ ਮਹਨ੍ਤਂ ਵਾ ਅਪ੍ਪਸਾਵਜ੍ਜਂ ਵਾ ਮਹਾਸਾਵਜ੍ਜਂ ਵਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਦੇਸਨਾ ਪਨ ਨੇਯ੍ਯਪੁਗ੍ਗਲਸ੍ਸ ਵਸੇਨ ਅਰਹਤ੍ਤਨਿਕੂਟੇਨੇਵ ਨਿਟ੍ਠਾਪਿਤਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਲਟੁਕਿਕੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.