੫. ਭਦ੍ਦਾਲਿਸੁਤ੍ਤਵਣ੍ਣਨਾ

੧੩੪. ਏਵਂ ਮੇ ਸੁਤਨ੍ਤਿ ਭਦ੍ਦਾਲਿਸੁਤ੍ਤਂ. ਤਤ੍ਥ ਏਕਾਸਨਭੋਜਨਨ੍ਤਿ ਏਕਸ੍ਮਿਂ ਪੁਰੇਭਤ੍ਤੇ ਅਸਨਭੋਜਨਂ, ਭੁਞ੍ਜਿਤਬ੍ਬਭਤ੍ਤਨ੍ਤਿ ਅਤ੍ਥੋ. ਅਪ੍ਪਾਬਾਧਤਨ੍ਤਿਆਦੀਨਿ ਕਕਚੋਪਮੇ ਵਿਤ੍ਥਾਰਿਤਾਨਿ. ਨ ਉਸ੍ਸਹਾਮੀਤਿ ਨ ਸਕ੍ਕੋਮਿ. ਸਿਯਾ ਕੁਕ੍ਕੁਚ੍ਚਂ ਸਿਯਾ ਵਿਪ੍ਪਟਿਸਾਰੋਤਿ ਏਵਂ ਭੁਞ੍ਜਨ੍ਤੋ ਯਾਵਜੀਵਂ ਬ੍ਰਹ੍ਮਚਰਿਯਂ ਚਰਿਤੁਂ ਸਕ੍ਖਿਸ੍ਸਾਮਿ ਨੁ ਖੋ, ਨ ਨੁ ਖੋਤਿ ਇਤਿ ਮੇ ਵਿਪ੍ਪਟਿਸਾਰਕੁਕ੍ਕੁਚ੍ਚਂ ਭਵੇਯ੍ਯਾਤਿ ਅਤ੍ਥੋ. ਏਕਦੇਸਂ ਭੁਞ੍ਜਿਤ੍ਵਾਤਿ ਪੋਰਾਣਕਤ੍ਥੇਰਾ ਕਿਰ ਪਤ੍ਤੇ ਭਤ੍ਤਂ ਪਕ੍ਖਿਪਿਤ੍ਵਾ ਸਪ੍ਪਿਮ੍ਹਿ ਦਿਨ੍ਨੇ ਸਪ੍ਪਿਨਾ ਉਣ੍ਹਮੇਵ ਥੋਕਂ ਭੁਞ੍ਜਿਤ੍ਵਾ ਹਤ੍ਥੇ ਧੋਵਿਤ੍ਵਾ ਅਵਸੇਸਂ ਬਹਿ ਨੀਹਰਿਤ੍ਵਾ ਛਾਯੂਦਕਫਾਸੁਕੇ ਠਾਨੇ ਨਿਸੀਦਿਤ੍ਵਾ ਭੁਞ੍ਜਨ੍ਤਿ. ਏਤਂ ਸਨ੍ਧਾਯ ਸਤ੍ਥਾ ਆਹ. ਭਦ੍ਦਾਲਿ, ਪਨ ਚਿਨ੍ਤੇਸਿ – ‘‘ਸਚੇ ਸਕਿਂ ਪਤ੍ਤਂ ਪੂਰੇਤ੍ਵਾ ਦਿਨ੍ਨਂ ਭਤ੍ਤਂ ਭੁਞ੍ਜਿਤ੍ਵਾ ਪੁਨ ਪਤ੍ਤਂ ਧੋਵਿਤ੍ਵਾ ਓਦਨਸ੍ਸ ਪੂਰੇਤ੍ਵਾ ਲਦ੍ਧਂ ਬਹਿ ਨੀਹਰਿਤ੍ਵਾ ਛਾਯੂਦਕਫਾਸੁਕੇ ਠਾਨੇ ਭੁਞ੍ਜੇਯ੍ਯ, ਇਤਿ ਏਵਂ ਵਟ੍ਟੇਯ੍ਯ, ਇਤਰਥਾ ਕੋ ਸਕ੍ਕੋਤੀ’’ਤਿ. ਤਸ੍ਮਾ ਏਵਮ੍ਪਿ ਖੋ ਅਹਂ, ਭਨ੍ਤੇ, ਨ ਉਸ੍ਸਹਾਮੀਤਿ ਆਹ. ਅਯਂ ਕਿਰ ਅਤੀਤੇ ਅਨਨ੍ਤਰਾਯ ਜਾਤਿਯਾ ਕਾਕਯੋਨਿਯਂ ਨਿਬ੍ਬਤ੍ਤਿ. ਕਾਕਾ ਚ ਨਾਮ ਮਹਾਛਾਤਕਾ ਹੋਨ੍ਤਿ. ਤਸ੍ਮਾ ਛਾਤਕਤ੍ਥੇਰੋ ਨਾਮ ਅਹੋਸਿ. ਤਸ੍ਸ ਪਨ ਵਿਰਵਨ੍ਤਸ੍ਸੇਵ ਭਗਵਾ ਤਂ ਮਦ੍ਦਿਤ੍ਵਾ ਅਜ੍ਝੋਤ੍ਥਰਿਤ੍ਵਾ – ‘‘ਯੋ ਪਨ ਭਿਕ੍ਖੁ ਵਿਕਾਲੇ ਖਾਦਨੀਯਂ ਵਾ ਭੋਜਨੀਯਂ ਵਾ ਖਾਦੇਯ੍ਯ ਵਾ ਭੁਞ੍ਜੇਯ੍ਯ ਵਾ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੨੪੮) ਸਿਕ੍ਖਾਪਦਂ ਪਞ੍ਞਪੇਸਿ. ਤੇਨ ਵੁਤ੍ਤਂ ਅਥ ਖੋ ਆਯਸ੍ਮਾ, ਭਦ੍ਦਾਲਿ,…ਪੇ… ਅਨੁਸ੍ਸਾਹਂ ਪਵੇਦੇਸੀਤਿ.

ਯਥਾ ਤਨ੍ਤਿ ਯਥਾ ਅਞ੍ਞੋਪਿ ਸਿਕ੍ਖਾਯ ਨ ਪਰਿਪੂਰਕਾਰੀ ਏਕਵਿਹਾਰੇਪਿ ਵਸਨ੍ਤੋ ਸਤ੍ਥੁ ਸਮ੍ਮੁਖੀਭਾਵਂ ਨ ਦਦੇਯ੍ਯ, ਤਥੇਵ ਨ ਅਦਾਸੀਤਿ ਅਤ੍ਥੋ. ਨੇਵ ਭਗਵਤੋ ਉਪਟ੍ਠਾਨਂ ਅਗਮਾਸਿ, ਨ ਧਮ੍ਮਦੇਸਨਟ੍ਠਾਨਂ ਨ ਵਿਤਕ੍ਕਮਾਲ਼ਕਂ, ਨ ਏਕਂ ਭਿਕ੍ਖਾਚਾਰਮਗ੍ਗਂ ਪਟਿਪਜ੍ਜਿ. ਯਸ੍ਮਿਂ ਕੁਲੇ ਭਗਵਾ ਨਿਸੀਦਤਿ, ਤਸ੍ਸ ਦ੍ਵਾਰੇਪਿ ਨ ਅਟ੍ਠਾਸਿ. ਸਚਸ੍ਸ ਵਸਨਟ੍ਠਾਨਂ ਭਗਵਾ ਗਚ੍ਛਤਿ, ਸੋ ਪੁਰੇਤਰਮੇਵ ਞਤ੍ਵਾ ਅਞ੍ਞਤ੍ਥ ਗਚ੍ਛਤਿ. ਸਦ੍ਧਾਪਬ੍ਬਜਿਤੋ ਕਿਰੇਸ ਕੁਲਪੁਤ੍ਤੋ ਪਰਿਸੁਦ੍ਧਸੀਲੋ. ਤੇਨਸ੍ਸ ਨ ਅਞ੍ਞੋ ਵਿਤਕ੍ਕੋ ਅਹੋਸਿ, – ‘‘ਮਯਾ ਨਾਮ ਉਦਰਕਾਰਣਾ ਭਗਵਤੋ ਸਿਕ੍ਖਾਪਦਪਞ੍ਞਾਪਨਂ ਪਟਿਬਾਹਿਤਂ, ਅਨਨੁਚ੍ਛਵਿਕਂ ਮੇ ਕਤ’’ਨ੍ਤਿ ਅਯਮੇਵ ਵਿਤਕ੍ਕੋ ਅਹੋਸਿ. ਤਸ੍ਮਾ ਏਕਵਿਹਾਰੇ ਵਸਨ੍ਤੋਪਿ ਲਜ੍ਜਾਯ ਸਤ੍ਥੁ ਸਮ੍ਮੁਖੀਭਾਵਂ ਨਾਦਾਸਿ.

੧੩੫. ਚੀਵਰਕਮ੍ਮਂ ਕਰੋਨ੍ਤੀਤਿ ਮਨੁਸ੍ਸਾ ਭਗਵਤੋ ਚੀਵਰਸਾਟਕਂ ਅਦਂਸੁ, ਤਂ ਗਹੇਤ੍ਵਾ ਚੀਵਰਂ ਕਰੋਨ੍ਤਿ. ਏਤਂ ਦੋਸਕਨ੍ਤਿ ਏਤਂ ਓਕਾਸਮੇਤਂ ਅਪਰਾਧਂ, ਸਤ੍ਥੁ ਸਿਕ੍ਖਾਪਦਂ ਪਞ੍ਞਪੇਨ੍ਤਸ੍ਸ ਪਟਿਬਾਹਿਤਕਾਰਣਂ ਸਾਧੁਕਂ ਮਨਸਿ ਕਰੋਹੀਤਿ ਅਤ੍ਥੋ. ਦੁਕ੍ਕਰਤਰਨ੍ਤਿ ਵਸ੍ਸਞ੍ਹਿ ਵਸਿਤ੍ਵਾ ਦਿਸਾਪਕ੍ਕਨ੍ਤੇ ਭਿਕ੍ਖੂ ਕੁਹਿਂ ਵਸਿਤ੍ਥਾਤਿ ਪੁਚ੍ਛਨ੍ਤਿ, ਤੇਹਿ ਜੇਤਵਨੇ ਵਸਿਮ੍ਹਾਤਿ ਵੁਤ੍ਤੇ, ‘‘ਆਵੁਸੋ, ਭਗਵਾ ਇਮਸ੍ਮਿਂ ਅਨ੍ਤੋਵਸ੍ਸੇ ਕਤਰਂ ਜਾਤਕਂ ਕਥੇਸਿ, ਕਤਰਂ ਸੁਤ੍ਤਨ੍ਤਂ, ਕਤਰਂ ਸਿਕ੍ਖਾਪਦਂ ਪਞ੍ਞਪੇਸੀ’’ਤਿ ਪੁਚ੍ਛਿਤਾਰੋ ਹੋਨ੍ਤਿ. ਤਤੋ ‘‘ਵਿਕਾਲਭੋਜਨਸਿਕ੍ਖਾਪਦਂ ਪਞ੍ਞਪੇਸਿ, ਭਦ੍ਦਾਲਿ, ਨਾਮ ਨਂ ਏਕੋ ਥੇਰੋ ਪਟਿਬਾਹੀ’’ਤਿ ਵਕ੍ਖਨ੍ਤਿ. ਤਂ ਸੁਤ੍ਵਾ ਭਿਕ੍ਖੂ – ‘‘ਭਗਵਤੋਪਿ ਨਾਮ ਸਿਕ੍ਖਾਪਦਂ ਪਞ੍ਞਪੇਨ੍ਤਸ੍ਸ ਪਟਿਬਾਹਿਤਂ ਅਯੁਤ੍ਤਂ ਅਕਾਰਣ’’ਨ੍ਤਿ ਵਦਨ੍ਤਿ. ਏਵਂ ਤੇ ਅਯਂ ਦੋਸੋ ਮਹਾਜਨਨ੍ਤਰੇ ਪਾਕਟੋ ਹੁਤ੍ਵਾ ਦੁਪ੍ਪਟਿਕਾਰਤਂ ਆਪਜ੍ਜਿਸ੍ਸਤੀਤਿ ਮਞ੍ਞਮਾਨਾ ਏਵਮਾਹਂਸੁ. ਅਪਿਚ ਅਞ੍ਞੇਪਿ ਭਿਕ੍ਖੂ ਪਵਾਰੇਤ੍ਵਾ ਸਤ੍ਥੁ ਸਨ੍ਤਿਕਂ ਆਗਮਿਸ੍ਸਨ੍ਤਿ. ਅਥ ਤ੍ਵਂ ‘‘ਏਥਾਵੁਸੋ, ਮਮ ਸਤ੍ਥਾਰਂ ਖਮਾਪੇਨ੍ਤਸ੍ਸ ਸਹਾਯਾ ਹੋਥਾ’’ਤਿ ਸਙ੍ਘਂ ਸਨ੍ਨਿਪਾਤੇਸ੍ਸਸਿ. ਤਤ੍ਥ ਆਗਨ੍ਤੁਕਾ ਪੁਚ੍ਛਿਸ੍ਸਨ੍ਤਿ, ‘‘ਆਵੁਸੋ, ਕਿਂ ਇਮਿਨਾਪਿ ਭਿਕ੍ਖੁਨਾ ਕਤ’’ਨ੍ਤਿ. ਤਤੋ ਏਤਮਤ੍ਥਂ ਸੁਤ੍ਵਾ ‘‘ਭਾਰਿਯਂ ਕਤਂ ਭਿਕ੍ਖੁਨਾ, ਦਸਬਲਂ ਨਾਮ ਪਟਿਬਾਹਿਸ੍ਸਤੀਤਿ ਅਯੁਤ੍ਤਮੇਤ’’ਨ੍ਤਿ ਵਕ੍ਖਨ੍ਤਿ. ਏਵਮ੍ਪਿ ਤੇ ਅਯਂ ਅਪਰਾਧੋ ਮਹਾਜਨਨ੍ਤਰੇ ਪਾਕਟੋ ਹੁਤ੍ਵਾ ਦੁਪ੍ਪਟਿਕਾਰਤਂ ਆਪਜ੍ਜਿਸ੍ਸਤੀਤਿ ਮਞ੍ਞਮਾਨਾਪਿ ਏਵਮਾਹਂਸੁ. ਅਥ ਵਾ ਭਗਵਾ ਪਵਾਰੇਤ੍ਵਾ ਚਾਰਿਕਂ ਪਕ੍ਕਮਿਸ੍ਸਤਿ, ਅਥ ਤ੍ਵਂ ਗਤਗਤਟ੍ਠਾਨੇ ਭਗਵਤੋ ਖਮਾਪਨਤ੍ਥਾਯ ਸਙ੍ਘਂ ਸਨ੍ਨਿਪਾਤੇਸ੍ਸਸਿ. ਤਤ੍ਰ ਦਿਸਾਵਾਸਿਨੋ ਭਿਕ੍ਖੂ ਪੁਚ੍ਛਿਸ੍ਸਨ੍ਤਿ, ‘‘ਆਵੁਸੋ, ਕਿਂ ਇਮਿਨਾ ਭਿਕ੍ਖੁਨਾ ਕਤ’’ਨ੍ਤਿ…ਪੇ… ਦੁਪ੍ਪਟਿਕਾਰਤਂ ਆਪਜ੍ਜਿਸ੍ਸਤੀਤਿ ਮਞ੍ਞਮਾਨਾਪਿ ਏਵਮਾਹਂਸੁ.

ਏਤਦਵੋਚਾਤਿ ਅਪ੍ਪਤਿਰੂਪਂ ਮਯਾ ਕਤਂ, ਭਗਵਾ ਪਨ ਮਹਨ੍ਤੇਪਿ ਅਗੁਣੇ ਅਲਗ੍ਗਿਤ੍ਵਾ ਮਯ੍ਹਂ ਅਚ੍ਚਯਂ ਪਟਿਗ੍ਗਣ੍ਹਿਸ੍ਸਤੀਤਿ ਮਞ੍ਞਮਾਨੋ ਏਤਂ ‘‘ਅਚ੍ਚਯੋ ਮਂ, ਭਨ੍ਤੇ,’’ਤਿਆਦਿਵਚਨਂ ਅਵੋਚ. ਤਤ੍ਥ ਅਚ੍ਚਯੋਤਿ ਅਪਰਾਧੋ. ਮਂ ਅਚ੍ਚਗਮਾਤਿ ਮਂ ਅਤਿਕ੍ਕਮ੍ਮ ਅਭਿਭਵਿਤ੍ਵਾ ਪਵਤ੍ਤੋ. ਪਟਿਗ੍ਗਣ੍ਹਾਤੂਤਿ ਖਮਤੁ. ਆਯਤਿਂ ਸਂਵਰਾਯਾਤਿ ਅਨਾਗਤੇ ਸਂਵਰਣਤ੍ਥਾਯ, ਪੁਨ ਏਵਰੂਪਸ੍ਸ ਅਪਰਾਧਸ੍ਸ ਦੋਸਸ੍ਸ ਖਲਿਤਸ੍ਸ ਅਕਰਣਤ੍ਥਾਯ. ਤਗ੍ਘਾਤਿ ਏਕਂਸੇਨ. ਸਮਯੋਪਿ ਖੋ ਤੇ, ਭਦ੍ਦਾਲੀਤਿ, ਭਦ੍ਦਾਲਿ, ਤਯਾ ਪਟਿਵਿਜ੍ਝਿਤਬ੍ਬਯੁਤ੍ਤਕਂ ਏਕਂ ਕਾਰਣਂ ਅਤ੍ਥਿ, ਤਮ੍ਪਿ ਤੇ ਨ ਪਟਿਵਿਦ੍ਧਂ ਨ ਸਲ੍ਲਕ੍ਖਿਤਨ੍ਤਿ ਦਸ੍ਸੇਤਿ.

੧੩੬. ਉਭਤੋਭਾਗਵਿਮੁਤ੍ਤੋਤਿਆਦੀਸੁ ਧਮ੍ਮਾਨੁਸਾਰੀ, ਸਦ੍ਧਾਨੁਸਾਰੀਤਿ ਦ੍ਵੇ ਏਕਚਿਤ੍ਤਕ੍ਖਣਿਕਾ ਮਗ੍ਗਸਮਙ੍ਗਿਪੁਗ੍ਗਲਾ. ਏਤੇ ਪਨ ਸਤ੍ਤਪਿ ਅਰਿਯਪੁਗ੍ਗਲੇ ਭਗਵਤਾਪਿ ਏਵਂ ਆਣਾਪੇਤੁਂ ਨ ਯੁਤ੍ਤਂ, ਭਗਵਤਾ ਆਣਤ੍ਤੇ ਤੇਸਮ੍ਪਿ ਏਵਂ ਕਾਤੁਂ ਨ ਯੁਤ੍ਤਂ. ਅਟ੍ਠਾਨਪਰਿਕਪ੍ਪਵਸੇਨ ਪਨ ਅਰਿਯਪੁਗ੍ਗਲਾਨਂ ਸੁਵਚਭਾਵਦਸ੍ਸਨਤ੍ਥਂ ਭਦ੍ਦਾਲਿਤ੍ਥੇਰਸ੍ਸ ਚ ਦੁਬ੍ਬਚਭਾਵਦਸ੍ਸਨਤ੍ਥਮੇਤਂ ਵੁਤ੍ਤਂ.

ਅਪਿ ਨੁ ਤ੍ਵਂ ਤਸ੍ਮਿਂ ਸਮਯੇ ਉਭਤੋਭਾਗਵਿਮੁਤ੍ਤੋਤਿ ਦੇਸਨਂ ਕਸ੍ਮਾ ਆਰਭਿ? ਭਦ੍ਦਾਲਿਸ੍ਸ ਨਿਗ੍ਗਹਣਤ੍ਥਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਭਦ੍ਦਾਲਿ, ਇਮੇ ਸਤ੍ਤ ਅਰਿਯਪੁਗ੍ਗਲਾ ਲੋਕੇ ਦਕ੍ਖਿਣੇਯ੍ਯਾ ਮਮ ਸਾਸਨੇ ਸਾਮਿਨੋ, ਮਯਿ ਸਿਕ੍ਖਾਪਦਂ ਪਞ੍ਞਪੇਨ੍ਤੇ ਪਟਿਬਾਹਿਤਬ੍ਬਯੁਤ੍ਤੇ ਕਾਰਣੇ ਸਤਿ ਏਤੇਸਂ ਪਟਿਬਾਹਿਤੁਂ ਯੁਤ੍ਤਂ. ਤ੍ਵਂ ਪਨ ਮਮ ਸਾਸਨਤੋ ਬਾਹਿਰਕੋ, ਮਯਿ ਸਿਕ੍ਖਾਪਦਂ ਪਞ੍ਞਪੇਨ੍ਤੇ ਤੁਯ੍ਹਂ ਪਟਿਬਾਹਿਤੁਂ ਨ ਯੁਤ੍ਤਨ੍ਤਿ.

ਰਿਤ੍ਤੋ ਤੁਚ੍ਛੋਤਿ ਅਨ੍ਤੋ ਅਰਿਯਗੁਣਾਨਂ ਅਭਾਵੇਨ ਰਿਤ੍ਤਕੋ ਤੁਚ੍ਛਕੋ, ਇਸ੍ਸਰਵਚਨੇ ਕਿਞ੍ਚਿ ਨ ਹੋਤਿ. ਯਥਾਧਮ੍ਮਂ ਪਟਿਕਰੋਸੀਤਿ ਯਥਾ ਧਮ੍ਮੋ ਠਿਤੋ, ਤਥੇਵ ਕਰੋਸਿ, ਖਮਾਪੇਸੀਤਿ ਵੁਤ੍ਤਂ ਹੋਤਿ. ਤਂ ਤੇ ਮਯਂ ਪਟਿਗ੍ਗਣ੍ਹਾਮਾਤਿ ਤਂ ਤਵ ਅਪਰਾਧਂ ਮਯਂ ਖਮਾਮ. ਵੁਡ੍ਢਿ ਹੇਸਾ, ਭਦ੍ਦਾਲਿ, ਅਰਿਯਸ੍ਸ ਵਿਨਯੇਤਿ ਏਸਾ, ਭਦ੍ਦਾਲਿ, ਅਰਿਯਸ੍ਸ ਵਿਨਯੇ ਬੁਦ੍ਧਸ੍ਸ ਭਗਵਤੋ ਸਾਸਨੇ ਵੁਡ੍ਢਿ ਨਾਮ. ਕਤਮਾ? ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰਿਤ੍ਵਾ ਆਯਤਿਂ ਸਂਵਰਾਪਜ੍ਜਨਾ. ਦੇਸਨਂ ਪਨ ਪੁਗ੍ਗਲਾਧਿਟ੍ਠਾਨਂ ਕਰੋਨ੍ਤੋ ‘‘ਯੋ ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਤਿ, ਆਯਤਿਂ ਸਂਵਰਂ ਆਪਜ੍ਜਤੀ’’ਤਿ ਆਹ.

੧੩੭. ਸਤ੍ਥਾਪਿ ਉਪਵਦਤੀਤਿ ‘‘ਅਸੁਕਵਿਹਾਰਵਾਸੀ ਅਸੁਕਸ੍ਸ ਥੇਰਸ੍ਸ ਸਦ੍ਧਿਵਿਹਾਰਿਕੋ ਅਸੁਕਸ੍ਸ ਅਨ੍ਤੇਵਾਸਿਕੋ ਇਤ੍ਥਨ੍ਨਾਮੋ ਨਾਮ ਭਿਕ੍ਖੁ ਲੋਕੁਤ੍ਤਰਧਮ੍ਮਂ ਨਿਬ੍ਬਤ੍ਤੇਤੁਂ ਅਰਞ੍ਞਂ ਪਵਿਟ੍ਠੋ’’ਤਿ ਸੁਤ੍ਵਾ – ‘‘ਕਿਂ ਤਸ੍ਸ ਅਰਞ੍ਞਵਾਸੇਨ, ਯੋ ਮਯ੍ਹਂ ਪਨ ਸਾਸਨੇ ਸਿਕ੍ਖਾਯ ਅਪਰਿਪੂਰਕਾਰੀ’’ਤਿ ਏਵਂ ਉਪਵਦਤਿ, ਸੇਸਪਦੇਸੁਪਿ ਏਸੇਵ ਨਯੋ, ਅਪਿਚੇਤ੍ਥ ਦੇਵਤਾ ਨ ਕੇਵਲਂ ਉਪਵਦਨ੍ਤਿ, ਭੇਰਵਾਰਮ੍ਮਣਂ ਦਸ੍ਸੇਤ੍ਵਾ ਪਲਾਯਨਾਕਾਰਮ੍ਪਿ ਕਰੋਨ੍ਤਿ. ਅਤ੍ਤਨਾਪਿ ਅਤ੍ਤਾਨਨ੍ਤਿ ਸੀਲਂ ਆਵਜ੍ਜਨ੍ਤਸ੍ਸ ਸਂਕਿਲਿਟ੍ਠਟ੍ਠਾਨਂ ਪਾਕਟਂ ਹੋਤਿ, ਚਿਤ੍ਤਂ ਵਿਧਾਵਤਿ, ਨ ਕਮ੍ਮਟ੍ਠਾਨਂ ਅਲ੍ਲੀਯਤਿ. ਸੋ ‘‘ਕਿਂ ਮਾਦਿਸਸ੍ਸ ਅਰਞ੍ਞਵਾਸੇਨਾ’’ਤਿ ਵਿਪ੍ਪਟਿਸਾਰੀ ਉਟ੍ਠਾਯ ਪਕ੍ਕਮਤਿ. ਅਤ੍ਤਾਪਿ ਅਤ੍ਤਾਨਂ ਉਪਵਦਿਤੋਤਿ ਅਤ੍ਤਨਾਪਿ ਅਤ੍ਤਾ ਉਪਵਦਿਤੋ, ਅਯਮੇਵ ਵਾ ਪਾਠੋ. ਸੁਕ੍ਕਪਕ੍ਖੋ ਵੁਤ੍ਤਪਚ੍ਚਨੀਕਨਯੇਨ ਵੇਦਿਤਬ੍ਬੋ. ਸੋ ਵਿਵਿਚ੍ਚੇਵ ਕਾਮੇਹੀਤਿਆਦਿ ਏਵਂ ਸਚ੍ਛਿਕਰੋਤੀਤਿ ਦਸ੍ਸਨਤ੍ਥਂ ਵੁਤ੍ਤਂ.

੧੪੦. ਪਸਯ੍ਹ ਪਸਯ੍ਹ ਕਾਰਣਂ ਕਰੋਨ੍ਤੀਤਿ ਅਪ੍ਪਮਤ੍ਤਕੇਪਿ ਦੋਸੇ ਨਿਗ੍ਗਹੇਤ੍ਵਾ ਪੁਨਪ੍ਪੁਨਂ ਕਾਰੇਨ੍ਤਿ. ਨੋ ਤਥਾਤਿ ਮਹਨ੍ਤੇਪਿ ਅਪਰਾਧੇ ਯਥਾ ਇਤਰਂ, ਏਵਂ ਪਸਯ੍ਹ ਨ ਕਾਰੇਨ੍ਤਿ. ਸੋ ਕਿਰ, ‘‘ਆਵੁਸੋ, ਭਦ੍ਦਾਲਿ, ਮਾ ਚਿਨ੍ਤਯਿਤ੍ਥ, ਏਵਰੂਪਂ ਨਾਮ ਹੋਤਿ, ਏਹਿ ਸਤ੍ਥਾਰਂ ਖਮਾਪੇਹੀ’’ਤਿ ਭਿਕ੍ਖੁਸਙ੍ਘਤੋਪਿ, ਕਞ੍ਚਿ ਭਿਕ੍ਖੁਂ ਪੇਸੇਤ੍ਵਾ ਅਤ੍ਤਨੋ ਸਨ੍ਤਿਕਂ ਪਕ੍ਕੋਸਾਪੇਤ੍ਵਾ, ‘‘ਭਦ੍ਦਾਲਿ, ਮਾ ਚਿਨ੍ਤਯਿਤ੍ਥ, ਏਵਰੂਪਂ ਨਾਮ ਹੋਤੀ’’ਤਿ ਏਵਂ ਸਤ੍ਥੁਸਨ੍ਤਿਕਾਪਿ ਅਨੁਗ੍ਗਹਂ ਪਚ੍ਚਾਸੀਸਤਿ. ਤਤੋ ‘‘ਭਿਕ੍ਖੁਸਙ੍ਘੇਨਾਪਿ ਨ ਸਮਸ੍ਸਾਸਿਤੋ, ਸਤ੍ਥਾਰਾਪੀ’’ਤਿ ਚਿਨ੍ਤੇਤ੍ਵਾ ਏਵਮਾਹ.

ਅਥ ਭਗਵਾ ਭਿਕ੍ਖੁਸਙ੍ਘੋਪਿ ਸਤ੍ਥਾਪਿ ਓਵਦਿਤਬ੍ਬਯੁਤ੍ਤਮੇਵ ਓਵਦਤਿ, ਨ ਇਤਰਨ੍ਤਿ ਦਸ੍ਸੇਤੁਂ ਇਧ, ਭਦ੍ਦਾਲਿ, ਏਕਚ੍ਚੋਤਿਆਦਿਮਾਹ. ਤਤ੍ਥ ਅਞ੍ਞੇਨਾਞ੍ਞਨ੍ਤਿਆਦੀਨਿ ਅਨੁਮਾਨਸੁਤ੍ਤੇ ਵਿਤ੍ਥਾਰਿਤਾਨਿ. ਨ ਸਮ੍ਮਾ ਵਤ੍ਤਤੀਤਿ ਸਮ੍ਮਾ ਵਤ੍ਤਮ੍ਪਿ ਨ ਵਤ੍ਤਤਿ. ਨ ਲੋਮਂ ਪਾਤੇਤੀਤਿ ਅਨੁਲੋਮਵਤ੍ਤੇ ਨ ਵਤ੍ਤਤਿ, ਵਿਲੋਮਮੇਵ ਗਣ੍ਹਾਤਿ. ਨ ਨਿਤ੍ਥਾਰਂ ਵਤ੍ਤਤੀਤਿ ਨਿਤ੍ਥਾਰਣਕਵਤ੍ਤਮ੍ਹਿ ਨ ਵਤ੍ਤਤਿ, ਆਪਤ੍ਤਿਵੁਟ੍ਠਾਨਤ੍ਥਂ ਤੁਰਿਤਤੁਰਿਤੋ ਛਨ੍ਦਜਾਤੋ ਨ ਹੋਤਿ. ਤਤ੍ਰਾਤਿ ਤਸ੍ਮਿਂ ਤਸ੍ਸ ਦੁਬ੍ਬਚਕਰਣੇ. ਅਭਿਣ੍ਹਾਪਤ੍ਤਿਕੋਤਿ ਨਿਰਨ੍ਤਰਾਪਤ੍ਤਿਕੋ. ਆਪਤ੍ਤਿਬਹੁਲੋਤਿ ਸਾਪਤ੍ਤਿਕਕਾਲੋਵਸ੍ਸ ਬਹੁ, ਸੁਦ੍ਧੋ ਨਿਰਾਪਤ੍ਤਿਕਕਾਲੋ ਅਪ੍ਪੋਤਿ ਅਤ੍ਥੋ. ਨ ਖਿਪ੍ਪਮੇਵ ਵੂਪਸਮ੍ਮਤੀਤਿ ਖਿਪ੍ਪਂ ਨ ਵੂਪਸਮ੍ਮਤਿ, ਦੀਘਸੁਤ੍ਤਂ ਹੋਤਿ. ਵਿਨਯਧਰਾ ਪਾਦਧੋਵਨਕਾਲੇ ਆਗਤਂ ‘‘ਗਚ੍ਛਾਵੁਸੋ, ਵਤ੍ਤਵੇਲਾ’’ਤਿ ਵਦਨ੍ਤਿ. ਪੁਨ ਕਾਲਂ ਮਞ੍ਞਿਤ੍ਵਾ ਆਗਤਂ ‘‘ਗਚ੍ਛਾਵੁਸੋ, ਤੁਯ੍ਹਂ ਵਿਹਾਰਵੇਲਾ, ਗਚ੍ਛਾਵੁਸੋ, ਸਾਮਣੇਰਾਦੀਨਂ ਉਦ੍ਦੇਸਦਾਨਵੇਲਾ, ਅਮ੍ਹਾਕਂ ਨ੍ਹਾਨਵੇਲਾ, ਥੇਰੂਪਟ੍ਠਾਨਵੇਲਾ, ਮੁਖਧੋਵਨਵੇਲਾ’’ਤਿਆਦੀਨਿ ਵਤ੍ਵਾ ਦਿਵਸਭਾਗੇਪਿ ਰਤ੍ਤਿਭਾਗੇਪਿ ਆਗਤਂ ਉਯ੍ਯੋਜੇਨ੍ਤਿਯੇਵ. ‘‘ਕਾਯ ਵੇਲਾਯ, ਭਨ੍ਤੇ, ਓਕਾਸੋ ਭਵਿਸ੍ਸਤੀ’’ਤਿ ਵੁਤ੍ਤੇਪਿ ‘‘ਗਚ੍ਛਾਵੁਸੋ, ਤ੍ਵਂ ਇਮਮੇਵ ਠਾਨਂ ਜਾਨਾਸਿ, ਅਸੁਕੋ ਨਾਮ ਵਿਨਯਧਰਤ੍ਥੇਰੋ ਸਿਨੇਹਪਾਨਂ ਪਿਵਤਿ, ਅਸੁਕੋ ਵਿਰੇਚਨਂ ਕਾਰੇਤਿ, ਕਸ੍ਮਾ ਤੁਰਿਤੋਸੀ’’ਤਿਆਦੀਨਿ ਵਤ੍ਵਾ ਦੀਘਸੁਤ੍ਤਮੇਵ ਕਰੋਨ੍ਤਿ.

੧੪੧. ਖਿਪ੍ਪਮੇਵ ਵੂਪਸਮ੍ਮਤੀਤਿ ਲਹੁਂ ਵੂਪਸਮ੍ਮਤਿ, ਨ ਦੀਘਸੁਤ੍ਤਂ ਹੋਤਿ. ਉਸ੍ਸੁਕ੍ਕਾਪਨ੍ਨਾ ਭਿਕ੍ਖੂ – ‘‘ਆਵੁਸੋ, ਅਯਂ ਸੁਬ੍ਬਚੋ ਭਿਕ੍ਖੁ, ਜਨਪਦਵਾਸਿਨੋ ਨਾਮ ਗਾਮਨ੍ਤਸੇਨਾਸਨੇ ਵਸਨਟ੍ਠਾਨਨਿਸਜ੍ਜਨਾਦੀਨਿ ਨ ਫਾਸੁਕਾਨਿ ਹੋਨ੍ਤਿ, ਭਿਕ੍ਖਾਚਾਰੋਪਿ ਦੁਕ੍ਖੋ ਹੋਤਿ, ਸੀਘਮਸ੍ਸ ਅਧਿਕਰਣਂ ਵੂਪਸਮੇਮਾ’’ਤਿ ਸਨ੍ਨਿਪਤਿਤ੍ਵਾ ਆਪਤ੍ਤਿਤੋ ਵੁਟ੍ਠਾਪੇਤ੍ਵਾ ਸੁਦ੍ਧਨ੍ਤੇ ਪਤਿਟ੍ਠਾਪੇਨ੍ਤਿ.

੧੪੨. ਅਧਿਚ੍ਚਾਪਤ੍ਤਿਕੋਤਿ ਕਦਾਚਿ ਕਦਾਚਿ ਆਪਤ੍ਤਿਂ ਆਪਜ੍ਜਤਿ. ਸੋ ਕਿਞ੍ਚਾਪਿ ਲਜ੍ਜੀ ਹੋਤਿ ਪਕਤਤ੍ਤੋ, ਦੁਬ੍ਬਚਤ੍ਤਾ ਪਨਸ੍ਸ ਭਿਕ੍ਖੂ ਤਥੇਵ ਪਟਿਪਜ੍ਜਨ੍ਤਿ.

੧੪੪. ਸਦ੍ਧਾਮਤ੍ਤਕੇਨ ਵਹਤਿ ਪੇਮਮਤ੍ਤਕੇਨਾਤਿ ਆਚਰਿਯੁਪਜ੍ਝਾਯੇਸੁ ਅਪ੍ਪਮਤ੍ਤਿਕਾਯ ਗੇਹਸ੍ਸਿਤਸਦ੍ਧਾਯ ਅਪ੍ਪਮਤ੍ਤਕੇਨ ਗੇਹਸ੍ਸਿਤਪੇਮੇਨ ਯਾਪੇਤਿ. ਪਟਿਸਨ੍ਧਿਗ੍ਗਹਣਸਦਿਸਾ ਹਿ ਅਯਂ ਪਬ੍ਬਜ੍ਜਾ ਨਾਮ, ਨਵਪਬ੍ਬਜਿਤੋ ਪਬ੍ਬਜ੍ਜਾਯ ਗੁਣਂ ਅਜਾਨਨ੍ਤੋ ਆਚਰਿਯੁਪਜ੍ਝਾਯੇਸੁ ਪੇਮਮਤ੍ਤੇਨ ਯਾਪੇਤਿ, ਤਸ੍ਮਾ ਏਵਰੂਪਾ ਸਙ੍ਗਣ੍ਹਿਤਬ੍ਬਾ. ਅਪ੍ਪਮਤ੍ਤਕਮ੍ਪਿ ਹਿ ਸਙ੍ਗਹਂ ਲਭਿਤ੍ਵਾ ਪਬ੍ਬਜ੍ਜਾਯ ਠਿਤਾ ਅਭਿਞ੍ਞਾਪਤ੍ਤਾ ਮਹਾਸਮਣਾ ਭਵਿਸ੍ਸਨ੍ਤਿ. ਏਤ੍ਤਕੇਨ ਕਥਾਮਗ੍ਗੇਨ ‘‘ਓਵਦਿਤਬ੍ਬਯੁਤ੍ਤਕਂ ਓਵਦਨ੍ਤਿ, ਨ ਇਤਰ’’ਨ੍ਤਿ ਇਮਮੇਵ ਭਗਵਤਾ ਦਸ੍ਸਿਤਂ.

੧੪੫. ਅਞ੍ਞਾਯ ਸਣ੍ਠਹਿਂਸੂਤਿ ਅਰਹਤ੍ਤੇ ਪਤਿਟ੍ਠਹਿਂਸੁ. ਸਤ੍ਤੇਸੁ ਹਾਯਮਾਨੇਸੂਤਿ ਪਟਿਪਤ੍ਤਿਯਾ ਹਾਯਮਾਨਾਯ ਸਤ੍ਤਾ ਹਾਯਨ੍ਤਿ ਨਾਮ. ਸਦ੍ਧਮ੍ਮੇ ਅਨ੍ਤਰਧਾਯਮਾਨੇਤਿ ਪਟਿਪਤ੍ਤਿਸਦ੍ਧਮ੍ਮੇ ਅਨ੍ਤਰਧਾਯਮਾਨੇ. ਪਟਿਪਤ੍ਤਿਸਦ੍ਧਮ੍ਮੋਪਿ ਹਿ ਪਟਿਪਤ੍ਤਿਪੂਰਕੇਸੁ ਸਤ੍ਤੇਸੁ ਅਸਤਿ ਅਨ੍ਤਰਧਾਯਤਿ ਨਾਮ. ਆਸਵਟ੍ਠਾਨੀਯਾਤਿ ਆਸਵਾ ਤਿਟ੍ਠਨ੍ਤਿ ਏਤੇਸੂਤਿ ਆਸਵਟ੍ਠਾਨੀਯਾ. ਯੇਸੁ ਦਿਟ੍ਠਧਮ੍ਮਿਕਸਮ੍ਪਰਾਯਿਕਾ ਪਰੂਪਵਾਦਵਿਪ੍ਪਟਿਸਾਰਵਧਬਨ੍ਧਨਾਦਯੋ ਚੇਵ ਅਪਾਯਦੁਕ੍ਖਵਿਸੇਸਭੂਤਾ ਚ ਆਸਵਾ ਤਿਟ੍ਠਨ੍ਤਿਯੇਵ. ਯਸ੍ਮਾ ਨੇਸਂ ਤੇ ਕਾਰਣਂ ਹੋਨ੍ਤੀਤਿ ਅਤ੍ਥੋ. ਤੇ ਆਸਵਟ੍ਠਾਨੀਯਾ ਵੀਤਿਕ੍ਕਮਧਮ੍ਮਾ ਯਾਵ ਨ ਸਙ੍ਘੇ ਪਾਤੁਭਵਨ੍ਤਿ, ਨ ਤਾਵ ਸਤ੍ਥਾ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਪੇਤੀਤਿ ਅਯਮੇਤ੍ਥ ਯੋਜਨਾ.

ਏਵਂ ਅਕਾਲਂ ਦਸ੍ਸੇਤ੍ਵਾ ਪੁਨ ਕਾਲਂ ਦਸ੍ਸੇਤੁਂ ਯਤੋ ਚ ਖੋ, ਭਦ੍ਦਾਲੀਤਿਆਦਿਮਾਹ. ਤਤ੍ਥ ਯਤੋਤਿ ਯਦਾ, ਯਸ੍ਮਿਂ ਕਾਲੇਤਿ ਵੁਤ੍ਤਂ ਹੋਤਿ. ਸੇਸਂ ਵੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬਂ. ਅਯਂ ਵਾ ਏਤ੍ਥ ਸਙ੍ਖੇਪਤ੍ਥੋ – ਯਸ੍ਮਿਂ ਕਾਲੇ ਆਸਵਟ੍ਠਾਨੀਯਾ ਧਮ੍ਮਾਤਿ ਸਙ੍ਖਂ ਗਤਾ ਵੀਤਿਕ੍ਕਮਦੋਸਾ ਸਙ੍ਘੇ ਪਾਤੁਭਵਨ੍ਤਿ, ਤਦਾ ਸਤ੍ਥਾ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਪੇਤਿ. ਕਸ੍ਮਾ? ਤੇਸਂਯੇਵ ਆਸਵਟ੍ਠਾਨੀਯਧਮ੍ਮਸਙ੍ਖਾਤਾਨਂ ਵੀਤਿਕ੍ਕਮਦੋਸਾਨਂ ਪਟਿਘਾਤਾਯ.

ਏਵਂ ਆਸਵਟ੍ਠਾਨੀਯਾਨਂ ਧਮ੍ਮਾਨਂ ਅਨੁਪ੍ਪਤ੍ਤਿਂ ਸਿਕ੍ਖਾਪਦਪਞ੍ਞਤ੍ਤਿਯਾ ਅਕਾਲਂ, ਉਪ੍ਪਤ੍ਤਿਞ੍ਚ ਕਾਲਨ੍ਤਿ ਵਤ੍ਵਾ ਇਦਾਨਿ ਤੇਸਂ ਧਮ੍ਮਾਨਂ ਅਨੁਪ੍ਪਤ੍ਤਿਕਾਲਞ੍ਚ ਉਪ੍ਪਤ੍ਤਿਕਾਲਞ੍ਚ ਦਸ੍ਸੇਤੁਂ ‘‘ਨ ਤਾਵ, ਭਦ੍ਦਾਲਿ, ਇਧੇਕਚ੍ਚੇ’’ਤਿਆਦਿਮਾਹ. ਤਤ੍ਥ ਮਹਤ੍ਤਨ੍ਤਿ ਮਹਨ੍ਤਭਾਵਂ. ਸਙ੍ਘੋ ਹਿ ਯਾਵ ਨ ਥੇਰਨਵਮਜ੍ਝਿਮਾਨਂ ਵਸੇਨ ਮਹਤ੍ਤਂ ਪਤ੍ਤੋ ਹੋਤਿ, ਤਾਵ ਸੇਨਾਸਨਾਨਿ ਪਹੋਨ੍ਤਿ, ਸਾਸਨੇ ਏਕਚ੍ਚੇ ਆਸਵਟ੍ਠਾਨੀਯਾ ਧਮ੍ਮਾ ਨ ਉਪ੍ਪਜ੍ਜਨ੍ਤਿ. ਮਹਤ੍ਤਂ ਪਤ੍ਤੇ ਪਨ ਤੇ ਉਪ੍ਪਜ੍ਜਨ੍ਤਿ, ਅਥ ਸਤ੍ਥਾ ਸਿਕ੍ਖਾਪਦਂ ਪਞ੍ਞਪੇਤਿ. ਤਤ੍ਥ ਮਹਤ੍ਤਂ ਪਤ੍ਤੇ ਸਙ੍ਘੇ ਪਞ੍ਞਤ੍ਤਸਿਕ੍ਖਾਪਦਾਨਿ –

‘‘ਯੋ ਪਨ ਭਿਕ੍ਖੁ ਅਨੁਪਸਮ੍ਪਨ੍ਨੇਨ ਉਤ੍ਤਰਿਦ੍ਵਿਰਤ੍ਤਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਯ੍ਯ ਪਾਚਿਤ੍ਤਿਯਂ (ਪਾਚਿ. ੫੧). ਯਾ ਪਨ ਭਿਕ੍ਖੁਨੀ ਅਨੁਵਸ੍ਸਂ ਵੁਟ੍ਠਾਪੇਯ੍ਯ ਪਾਚਿਤ੍ਤਿਯਂ (ਪਾਚਿ. ੧੧੭੧). ਯਾ ਪਨ ਭਿਕ੍ਖੁਨੀ ਏਕਵਸ੍ਸਂ ਦ੍ਵੇ ਵੁਟ੍ਠਾਪੇਯ੍ਯ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੧੭੫).

ਇਮਿਨਾ ਨਯੇਨ ਵੇਦਿਤਬ੍ਬਾਨਿ.

ਲਾਭਗ੍ਗਨ੍ਤਿ ਲਾਭਸ੍ਸ ਅਗ੍ਗਂ. ਸਙ੍ਘੋ ਹਿ ਯਾਵ ਨ ਲਾਭਗ੍ਗਪਤ੍ਤੋ ਹੋਤਿ, ਨ ਤਾਵ ਲਾਭਂ ਪਟਿਚ੍ਚ ਆਸਵਟ੍ਠਾਨੀਯਾ ਧਮ੍ਮਾ ਉਪ੍ਪਜ੍ਜਨ੍ਤਿ. ਪਤ੍ਤੇ ਪਨ ਉਪ੍ਪਜ੍ਜਨ੍ਤਿ, ਅਥ ਸਤ੍ਥਾ ਸਿਕ੍ਖਾਪਦਂ ਪਞ੍ਞਪੇਤਿ –

‘‘ਯੋ ਪਨ ਭਿਕ੍ਖੁ ਅਚੇਲਕਸ੍ਸ ਵਾ ਪਰਿਬ੍ਬਾਜਕਸ੍ਸ ਵਾ ਪਰਿਬ੍ਬਾਜਿਕਾਯ ਵਾ ਸਹਤ੍ਥਾ ਖਾਦਨੀਯਂ ਵਾ ਭੋਜਨੀਯਂ ਵਾ ਦਦੇਯ੍ਯ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੨੭੦).

ਇਦਞ੍ਹਿ ਲਾਭਗ੍ਗਪਤ੍ਤੇ ਸਙ੍ਘੇ ਸਿਕ੍ਖਾਪਦਂ ਪਞ੍ਞਤ੍ਤਂ.

ਯਸਗ੍ਗਨ੍ਤਿ ਯਸਸ੍ਸ ਅਗ੍ਗਂ. ਸਙ੍ਘੋ ਹਿ ਯਾਵ ਨ ਯਸਗ੍ਗਪਤ੍ਤੋ ਹੋਤਿ, ਨ ਤਾਵ ਯਸਂ ਪਟਿਚ੍ਚ ਆਸਵਟ੍ਠਾਨੀਯਾ ਧਮ੍ਮਾ ਉਪ੍ਪਜ੍ਜਨ੍ਤਿ. ਪਤ੍ਤੇ ਪਨ ਉਪ੍ਪਜ੍ਜਨ੍ਤਿ, ਅਥ ਸਤ੍ਥਾ ਸਿਕ੍ਖਾਪਦਂ ਪਞ੍ਞਪੇਤਿ ‘‘ਸੁਰਾਮੇਰਯਪਾਨੇ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੩੨੭). ਇਦਞ੍ਹਿ ਯਸਗ੍ਗਪਤ੍ਤੇ ਸਙ੍ਘੇ ਸਿਕ੍ਖਾਪਦਂ ਪਞ੍ਞਤ੍ਤਂ.

ਬਾਹੁਸਚ੍ਚਨ੍ਤਿ ਬਹੁਸ੍ਸੁਤਭਾਵਂ. ਸਙ੍ਘੋ ਹਿ ਯਾਵ ਨ ਬਾਹੁਸਚ੍ਚਪਤ੍ਤੋ ਹੋਤਿ, ਨ ਤਾਵ ਆਸਵਟ੍ਠਾਨੀਯਾ ਧਮ੍ਮਾ ਉਪ੍ਪਜ੍ਜਨ੍ਤਿ. ਬਾਹੁਸਚ੍ਚਪਤ੍ਤੇ ਪਨ ਯਸ੍ਮਾ ਏਕਂ ਨਿਕਾਯਂ ਦ੍ਵੇ ਨਿਕਾਯੇ ਪਞ੍ਚਪਿ ਨਿਕਾਯੇ ਉਗ੍ਗਹੇਤ੍ਵਾ ਅਯੋਨਿਸੋ ਉਮ੍ਮੁਜ੍ਜਮਾਨਾ ਪੁਗ੍ਗਲਾ ਰਸੇਨ ਰਸਂ ਸਂਸਨ੍ਦੇਤ੍ਵਾ ਉਦ੍ਧਮ੍ਮਂ ਉਬ੍ਬਿਨਯਂ ਸਤ੍ਥੁ ਸਾਸਨਂ ਦੀਪੇਨ੍ਤਿ, ਅਥ ਸਤ੍ਥਾ – ‘‘ਯੋ ਪਨ ਭਿਕ੍ਖੁ ਏਵਂ ਵਦੇਯ੍ਯ ਤਥਾਹਂ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮਿ (ਪਾਚਿ. ੪੧੮)…ਪੇ… ਸਮਣੁਦ੍ਦੇਸੋਪਿ ਚੇ ਏਵਂ ਵਦੇਯ੍ਯਾ’’ਤਿਆਦਿਨਾ (ਪਾਚਿ. ੪੨੯) ਨਯੇਨ ਸਿਕ੍ਖਾਪਦਂ ਪਞ੍ਞਪੇਤਿ.

ਰਤ੍ਤਞ੍ਞੁਤਂ ਪਤ੍ਤੋਤਿ ਏਤ੍ਥ ਰਤ੍ਤਿਯੋ ਜਾਨਨ੍ਤੀਤਿ ਰਤ੍ਤਞ੍ਞੂ. ਅਤ੍ਤਨੋ ਪਬ੍ਬਜਿਤਦਿਵਸਤੋ ਪਟ੍ਠਾਯ ਬਹੂ ਰਤ੍ਤਿਯੋ ਜਾਨਨ੍ਤਿ, ਚਿਰਪਬ੍ਬਜਿਤਾਤਿ ਵੁਤ੍ਤਂ ਹੋਤਿ. ਰਤ੍ਤਞ੍ਞੂਨਂ ਭਾਵਂ ਰਤ੍ਤਞ੍ਞੁਤਂ. ਤਤ੍ਰ ਰਤ੍ਤਞ੍ਞੁਤਂ ਪਤ੍ਤੇ ਸਙ੍ਘੇ ਉਪਸੇਨਂ ਵਙ੍ਗਨ੍ਤਪੁਤ੍ਤਂ ਆਰਬ੍ਭ ਸਿਕ੍ਖਾਪਦਂ ਪਞ੍ਞਤ੍ਤਨ੍ਤਿ ਵੇਦਿਤਬ੍ਬਂ. ਸੋ ਹਾਯਸ੍ਮਾ ਊਨਦਸਵਸ੍ਸੇ ਭਿਕ੍ਖੂ ਉਪਸਮ੍ਪਾਦੇਨ੍ਤੇ ਦਿਸ੍ਵਾ ਏਕਵਸ੍ਸੋ ਸਦ੍ਧਿਵਿਹਾਰਿਕਂ ਉਪਸਮ੍ਪਾਦੇਸਿ. ਅਥ ਭਗਵਾ ਸਿਕ੍ਖਾਪਦਂ ਪਞ੍ਞਪੇਸਿ – ‘‘ਨ, ਭਿਕ੍ਖਵੇ, ਊਨਦਸਵਸ੍ਸੇਨ ਉਪਸਮ੍ਪਾਦੇਤਬ੍ਬੋ, ਯੋ ਉਪਸਮ੍ਪਾਦੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੭੫). ਏਵਂ ਪਞ੍ਞਤ੍ਤੇ ਸਿਕ੍ਖਾਪਦੇ ਪੁਨ ਭਿਕ੍ਖੂ ‘‘ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾ’’ਤਿ ਬਾਲਾ ਅਬ੍ਯਤ੍ਤਾ ਉਪਸਮ੍ਪਾਦੇਨ੍ਤਿ. ਅਥ ਭਗਵਾ ਅਪਰਮ੍ਪਿ ਸਿਕ੍ਖਾਪਦਂ ਪਞ੍ਞਪੇਸਿ – ‘‘ਨ, ਭਿਕ੍ਖਵੇ, ਬਾਲੇਨ ਅਬ੍ਯਤ੍ਤੇਨ ਉਪਸਮ੍ਪਾਦੇਤਬ੍ਬੋ, ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਦਸਵਸ੍ਸੇਨ ਵਾ ਅਤਿਰੇਕਦਸਵਸ੍ਸੇਨ ਵਾ ਉਪਸਮ੍ਪਾਦੇਤੁ’’ਨ੍ਤਿ. ਇਤਿ ਰਤ੍ਤਞ੍ਞੁਤਂ ਪਤ੍ਤਕਾਲੇ ਦ੍ਵੇ ਸਿਕ੍ਖਾਪਦਾਨਿ ਪਞ੍ਞਤ੍ਤਾਨਿ.

੧੪੬. ਆਜਾਨੀਯਸੁਸੂਪਮਂ ਧਮ੍ਮਪਰਿਯਾਯਂ ਦੇਸੇਸਿਨ੍ਤਿ ਤਰੁਣਾਜਾਨੀਯਉਪਮਂ ਕਤ੍ਵਾ ਧਮ੍ਮਂ ਦੇਸਯਿਂ. ਤਤ੍ਰਾਤਿ ਤਸ੍ਮਿਂ ਅਸਰਣੇ. ਨ ਖੋ, ਭਦ੍ਦਾਲਿ, ਏਸੇਵ ਹੇਤੂਤਿ ਨ ਏਸ ਸਿਕ੍ਖਾਯ ਅਪਰਿਪੂਰਕਾਰੀਭਾਵੋਯੇਵ ਏਕੋ ਹੇਤੁ.

੧੪੭. ਮੁਖਾਧਾਨੇ ਕਾਰਣਂ ਕਾਰੇਤੀਤਿ ਖਲੀਨਬਨ੍ਧਾਦੀਹਿ ਮੁਖਟ੍ਠਪਨੇ ਸਾਧੁਕਂ ਗੀਵਂ ਪਗ੍ਗਣ੍ਹਾਪੇਤੁਂ ਕਾਰਣਂ ਕਾਰੇਤਿ. ਵਿਸੂਕਾਯਿਤਾਨੀਤਿਆਦੀਹਿ ਵਿਸੇਵਨਾਚਾਰਂ ਕਥੇਸਿ. ਸਬ੍ਬਾਨੇਵ ਹੇਤਾਨਿ ਅਞ੍ਞਮਞ੍ਞਵੇਵਚਨਾਨਿ. ਤਸ੍ਮਿਂ ਠਾਨੇਤਿ ਤਸ੍ਮਿਂ ਵਿਸੇਵਨਾਚਾਰੇ. ਪਰਿਨਿਬ੍ਬਾਯਤੀਤਿ ਨਿਬ੍ਬਿਸੇਵਨੋ ਹੋਤਿ, ਤਂ ਵਿਸੇਵਨਂ ਜਹਤੀਤਿ ਅਤ੍ਥੋ. ਯੁਗਾਧਾਨੇਤਿ ਯੁਗਟ੍ਠਪਨੇ ਯੁਗਸ੍ਸ ਸਾਧੁਕਂ ਗਹਣਤ੍ਥਂ.

ਅਨੁਕ੍ਕਮੇਤਿ ਚਤ੍ਤਾਰੋਪਿ ਪਾਦੇ ਏਕਪ੍ਪਹਾਰੇਨੇਵ ਉਕ੍ਖਿਪਨੇ ਚ ਨਿਕ੍ਖਿਪਨੇ ਚ. ਪਰਸੇਨਾਯ ਹਿ ਆਵਾਟੇ ਠਤ੍ਵਾ ਅਸਿਂ ਗਹੇਤ੍ਵਾ ਆਗਚ੍ਛਨ੍ਤਸ੍ਸ ਅਸ੍ਸਸ੍ਸ ਪਾਦੇ ਛਿਨ੍ਦਨ੍ਤਿ. ਤਸ੍ਮਿਂ ਸਮਯੇ ਏਸ ਏਕਪ੍ਪਹਾਰੇਨੇਵ ਚਤ੍ਤਾਰੋਪਿ ਪਾਦੇ ਉਕ੍ਖਿਪਿਸ੍ਸਤੀਤਿ ਰਜ੍ਜੁਬਨ੍ਧਨਵਿਧਾਨੇਨ ਏਤਂ ਕਾਰਣਂ ਕਰੋਨ੍ਤਿ. ਮਣ੍ਡਲੇਤਿ ਯਥਾ ਅਸ੍ਸੇ ਨਿਸਿਨ੍ਨੋਯੇਵ ਭੂਮਿਯਂ ਪਤਿਤਂ ਆਵੁਧਂ ਗਹੇਤੁਂ ਸਕ੍ਕੋਤਿ, ਏਵਂ ਕਰਣਤ੍ਥਂ ਮਣ੍ਡਲੇ ਕਾਰਣਂ ਕਾਰੇਤਿ. ਖੁਰਕਾਸੇਤਿ ਅਗ੍ਗਗ੍ਗਖੁਰੇਹਿ ਪਥਵੀਕਮਨੇ. ਰਤ੍ਤਿਂ ਓਕ੍ਕਨ੍ਤਕਰਣਸ੍ਮਿਞ੍ਹਿ ਯਥਾ ਪਦਸਦ੍ਦੋ ਨ ਸੁਯ੍ਯਤਿ, ਤਦਤ੍ਥਂ ਏਕਸ੍ਮਿਂ ਠਾਨੇ ਸਞ੍ਞਂ ਦਤ੍ਵਾ ਅਗ੍ਗਗ੍ਗਖੁਰੇਹਿਯੇਵ ਗਮਨਂ ਸਿਕ੍ਖਾਪੇਨ੍ਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਜਵੇਤਿ ਸੀਘਵਾਹਨੇ. ‘‘ਧਾਵੇ’’ਤਿਪਿ ਪਾਠੋ. ਅਤ੍ਤਨੋ ਪਰਾਜਯੇ ਸਤਿ ਪਲਾਯਨਤ੍ਥਂ, ਪਰਂ ਪਲਾਯਨ੍ਤਂ ਅਨੁਬਨ੍ਧਿਤ੍ਵਾ ਗਹਣਤ੍ਥਞ੍ਚ ਏਤਂ ਕਾਰਣਂ ਕਾਰੇਤਿ. ਦਵਤ੍ਤੇਤਿ ਦਵਤ੍ਤਾਯ, ਯੁਦ੍ਧਕਾਲਸ੍ਮਿਞ੍ਹਿ ਹਤ੍ਥੀਸੁ ਵਾ ਕੋਞ੍ਚਨਾਦਂ ਕਰੋਨ੍ਤੇਸੁ ਅਸ੍ਸੇਸੁ ਵਾ ਹਸਨ੍ਤੇਸੁ ਰਥੇਸੁ ਵਾ ਨਿਘੋਸਨ੍ਤੇਸੁ ਯੋਧੇਸੁ ਵਾ ਉਕ੍ਕੁਟ੍ਠਿਂ ਕਰੋਨ੍ਤੇਸੁ ਤਸ੍ਸ ਰਵਸ੍ਸ ਅਭਾਯਿਤ੍ਵਾ ਪਰਸੇਨਪਵੇਸਨਤ੍ਥਂ ਅਯਂ ਕਾਰਣਾ ਕਰੀਯਤਿ.

ਰਾਜਗੁਣੇਤਿ ਰਞ੍ਞਾ ਜਾਨਿਤਬ੍ਬਗੁਣੇ. ਕੂਟਕਣ੍ਣਰਞ੍ਞੋ ਕਿਰ ਗੁਲ਼ਵਣ੍ਣੋ ਨਾਮ ਅਸ੍ਸੋ ਅਹੋਸਿ. ਰਾਜਾ ਪਾਚੀਨਦ੍ਵਾਰੇਨ ਨਿਕ੍ਖਮਿਤ੍ਵਾ ਚੇਤਿਯਪਬ੍ਬਤਂ ਗਮਿਸ੍ਸਾਮੀਤਿ ਕਲਮ੍ਬਨਦੀਤੀਰਂ ਸਮ੍ਪਤ੍ਤੋ. ਅਸ੍ਸੋ ਤੀਰੇ ਠਤ੍ਵਾ ਉਦਕਂ ਓਤਰਿਤੁਂ ਨ ਇਚ੍ਛਤਿ, ਰਾਜਾ ਅਸ੍ਸਾਚਰਿਯਂ ਆਮਨ੍ਤੇਤ੍ਵਾ – ‘‘ਅਹੋ ਤਯਾ ਅਸ੍ਸੋ ਸਿਕ੍ਖਾਪਿਤੋ ਉਦਕਂ ਓਤਰਿਤੁਂ ਨ ਇਚ੍ਛਤੀ’’ਤਿ ਆਹ. ਆਚਰਿਯੋ – ‘‘ਸੁਸਿਕ੍ਖਾਪਿਤੋ ਦੇਵ ਅਸ੍ਸੋ, ਏਵਮਸ੍ਸ ਹਿ ਚਿਤ੍ਤਂ ‘ਸਚਾਹਂ ਉਦਕਂ ਓਤਰਿਸ੍ਸਾਮਿ, ਵਾਲਂ ਤੇਮਿਸ੍ਸਤਿ, ਵਾਲੇ ਤਿਨ੍ਤੇ ਰਞ੍ਞੋ ਅਙ੍ਗੇ ਉਦਕਂ ਪਾਤੇਯ੍ਯਾ’ਤਿ ਏਵਂ ਤੁਮ੍ਹਾਕਂ ਸਰੀਰੇ ਉਦਕਪਾਤਨਭਯੇਨ ਨ ਓਤਰਤਿ, ਵਾਲਂ ਗਣ੍ਹਾਪੇਥਾ’’ਤਿ ਆਹ. ਰਾਜਾ ਤਥਾ ਕਾਰੇਸਿ. ਅਸ੍ਸੋ ਵੇਗੇਨ ਓਤਰਿਤ੍ਵਾ ਪਾਰਂ ਗਤੋ. ਏਤਦਤ੍ਥਂ ਅਯਂ ਕਾਰਣਾ ਕਰੀਯਤਿ. ਰਾਜਵਂਸੇਤਿ ਅਸ੍ਸਰਾਜਵਂਸੇ. ਵਂਸੋ ਚੇਸੋ ਅਸ੍ਸਰਾਜਾਨਂ, ਤਥਾਰੂਪੇਨ ਪਹਾਰੇਨ ਛਿਨ੍ਨਭਿਨ੍ਨਸਰੀਰਾਪਿ ਅਸ੍ਸਾਰੋਹਂ ਪਰਸੇਨਾਯ ਅਪਾਤੇਤ੍ਵਾ ਬਹਿ ਨੀਹਰਨ੍ਤਿਯੇਵ. ਏਤਦਤ੍ਥਂ ਕਾਰਣਂ ਕਾਰੇਤੀਤਿ ਅਤ੍ਥੋ.

ਉਤ੍ਤਮੇ ਜਵੇਤਿ ਜਵਸਮ੍ਪਤ੍ਤਿਯਂ, ਯਥਾ ਉਤ੍ਤਮਜਵੋ ਹੋਤਿ, ਏਵਂ ਕਾਰਣਂ ਕਾਰੇਤੀਤਿ ਅਤ੍ਥੋ. ਉਤ੍ਤਮੇ ਹਯੇਤਿ ਉਤ੍ਤਮਹਯਭਾਵੇ, ਯਥਾ ਉਤ੍ਤਮਹਯੋ ਹੋਤਿ, ਏਵਂ ਕਾਰਣਂ ਕਾਰੇਤੀਤਿ ਅਤ੍ਥੋ. ਤਤ੍ਥ ਪਕਤਿਯਾ ਉਤ੍ਤਮਹਯੋਵ ਉਤ੍ਤਮਹਯਕਾਰਣਂ ਅਰਹਤਿ, ਨ ਅਞ੍ਞੋ. ਉਤ੍ਤਮਹਯਕਾਰਣਾਯ ਏਵ ਚ ਹਯੋ ਉਤ੍ਤਮਜਵਂ ਪਟਿਪਜ੍ਜਤਿ, ਨ ਅਞ੍ਞੋਤਿ.

ਤਤ੍ਰਿਦਂ ਵਤ੍ਥੁ – ਏਕੋ ਕਿਰ ਰਾਜਾ ਏਕਂ ਸਿਨ੍ਧਵਪੋਤਕਂ ਲਭਿਤ੍ਵਾ ਸਿਨ੍ਧਵਭਾਵਂ ਅਜਾਨਿਤ੍ਵਾਵ ਇਮਂ ਸਿਕ੍ਖਾਪੇਹੀਤਿ ਆਚਰਿਯਸ੍ਸ ਅਦਾਸਿ. ਆਚਰਿਯੋਪਿ ਤਸ੍ਸ ਸਿਨ੍ਧਵਭਾਵਂ ਅਜਾਨਨ੍ਤੋ ਤਂ ਮਾਸਖਾਦਕਘੋਟਕਾਨਂ ਕਾਰਣਾਸੁ ਉਪਨੇਤਿ. ਸੋ ਅਤ੍ਤਨੋ ਅਨਨੁਚ੍ਛਵਿਕਤ੍ਤਾ ਕਾਰਣਂ ਨ ਪਟਿਪਜ੍ਜਤਿ. ਸੋ ਤਂ ਦਮੇਤੁਂ ਅਸਕ੍ਕੋਨ੍ਤੋ ‘‘ਕੂਟਸ੍ਸੋ ਅਯਂ ਮਹਾਰਾਜਾ’’ਤਿ ਵਿਸ੍ਸਜ੍ਜਾਪੇਸਿ.

ਅਥੇਕਦਿਵਸਂ ਏਕੋ ਅਸ੍ਸਾਚਰਿਯਪੁਬ੍ਬਕੋ ਦਹਰੋ ਉਪਜ੍ਝਾਯਸ੍ਸ ਭਣ੍ਡਕਂ ਗਹੇਤ੍ਵਾ ਗਚ੍ਛਨ੍ਤੋ ਤਂ ਪਰਿਖਾਪਿਟ੍ਠੇ ਚਰਨ੍ਤਂ ਦਿਸ੍ਵਾ – ‘‘ਅਨਗ੍ਘੋ, ਭਨ੍ਤੇ, ਸਿਨ੍ਧਵਪੋਤਕੋ’’ਤਿ ਉਪਜ੍ਝਾਯਸ੍ਸ ਕਥੇਸਿ. ਸਚੇ ਰਾਜਾ ਜਾਨੇਯ੍ਯ, ਮਙ੍ਗਲਸ੍ਸਂ ਨਂ ਕਰੇਯ੍ਯਾਤਿ. ਥੇਰੋ ਆਹ – ‘‘ਮਿਚ੍ਛਾਦਿਟ੍ਠਿਕੋ, ਤਾਤ, ਰਾਜਾ ਅਪ੍ਪੇਵ ਨਾਮ ਬੁਦ੍ਧਸਾਸਨੇ ਪਸੀਦੇਯ੍ਯ ਰਞ੍ਞੋ ਕਥੇਹੀ’’ਤਿ. ਸੋ ਗਨ੍ਤ੍ਵਾ, – ‘‘ਮਹਾਰਾਜ, ਅਨਗ੍ਘੋ ਸਿਨ੍ਧਵਪੋਤਕੋ ਅਤ੍ਥੀ’’ਤਿ ਕਥੇਸਿ. ਤਯਾ ਦਿਟ੍ਠੋ, ਤਾਤਾਤਿ? ਆਮ, ਮਹਾਰਾਜਾਤਿ. ਕਿਂ ਲਦ੍ਧੁਂ ਵਟ੍ਟਤੀਤਿ? ਤੁਮ੍ਹਾਕਂ ਭੁਞ੍ਜਨਕਸੁਵਣ੍ਣਥਾਲੇ ਤੁਮ੍ਹਾਕਂ ਭੁਞ੍ਜਨਕਭਤ੍ਤਂ ਤੁਮ੍ਹਾਕਂ ਪਿਵਨਕਰਸੋ ਤੁਮ੍ਹਾਕਂ ਗਨ੍ਧਾ ਤੁਮ੍ਹਾਕਂ ਮਾਲਾਤਿ. ਰਾਜਾ ਸਬ੍ਬਂ ਦਾਪੇਸਿ. ਦਹਰੋ ਗਾਹਾਪੇਤ੍ਵਾ ਅਗਮਾਸਿ.

ਅਸ੍ਸੋ ਗਨ੍ਧਂ ਘਾਯਿਤ੍ਵਾਵ ‘‘ਮਯ੍ਹਂ ਗੁਣਜਾਨਨਕਆਚਰਿਯੋ ਅਤ੍ਥਿ ਮਞ੍ਞੇ’’ਤਿ ਸੀਸਂ ਉਕ੍ਖਿਪਿਤ੍ਵਾ ਓਲੋਕੇਨ੍ਤੋ ਅਟ੍ਠਾਸਿ. ਦਹਰੋ ਗਨ੍ਤ੍ਵਾ ‘‘ਭਤ੍ਤਂ ਭੁਞ੍ਜਾ’’ਤਿ ਅਚ੍ਛਰਂ ਪਹਰਿ. ਅਸ੍ਸੋ ਆਗਨ੍ਤ੍ਵਾ ਸੁਵਣ੍ਣਥਾਲੇ ਭਤ੍ਤਂ ਭੁਞ੍ਜਿ, ਰਸਂ ਪਿਵਿ. ਅਥ ਨਂ ਗਨ੍ਧੇਹਿ ਵਿਲਿਮ੍ਪਿਤ੍ਵਾ ਰਾਜਪਿਲ਼ਨ੍ਧਨਂ ਪਿਲ਼ਨ੍ਧਿਤ੍ਵਾ ‘‘ਪੁਰਤੋ ਪੁਰਤੋ ਗਚ੍ਛਾ’’ਤਿ ਅਚ੍ਛਰਂ ਪਹਰਿ. ਸੋ ਦਹਰਸ੍ਸ ਪੁਰਤੋ ਪੁਰਤੋ ਗਨ੍ਤ੍ਵਾ ਮਙ੍ਗਲਸ੍ਸਟ੍ਠਾਨੇ ਅਟ੍ਠਾਸਿ. ਦਹਰੋ – ‘‘ਅਯਂ ਤੇ, ਮਹਾਰਾਜ, ਅਨਗ੍ਘੋ ਸਿਨ੍ਧਵਪੋਤਕੋ, ਇਮਿਨਾਵ ਨਂ ਨਿਯਾਮੇਨ ਕਤਿਪਾਹਂ ਪਟਿਜਗ੍ਗਾਪੇਹੀ’’ਤਿ ਵਤ੍ਵਾ ਨਿਕ੍ਖਮਿ.

ਅਥ ਕਤਿਪਾਹਸ੍ਸ ਅਚ੍ਚਯੇਨ ਆਗਨ੍ਤ੍ਵਾ ਅਸ੍ਸਸ੍ਸ ਆਨੁਭਾਵਂ ਪਸ੍ਸਿਸ੍ਸਸਿ, ਮਹਾਰਾਜਾਤਿ. ਸਾਧੁ ਆਚਰਿਯ ਕੁਹਿਂ ਠਤ੍ਵਾ ਪਸ੍ਸਾਮਾਤਿ? ਉਯ੍ਯਾਨਂ ਗਚ੍ਛ, ਮਹਾਰਾਜਾਤਿ. ਰਾਜਾ ਅਸ੍ਸਂ ਗਾਹਾਪੇਤ੍ਵਾ ਅਗਮਾਸਿ. ਦਹਰੋ ਅਚ੍ਛਰਂ ਪਹਰਿਤ੍ਵਾ ‘‘ਏਤਂ ਰੁਕ੍ਖਂ ਅਨੁਪਰਿਯਾਹੀ’’ਤਿ ਅਸ੍ਸਸ੍ਸ ਸਞ੍ਞਂ ਅਦਾਸਿ. ਅਸ੍ਸੋ ਪਕ੍ਖਨ੍ਦਿਤ੍ਵਾ ਰੁਕ੍ਖਂ ਅਨੁਪਰਿਗਨ੍ਤ੍ਵਾ ਆਗਤੋ. ਰਾਜਾ ਨੇਵ ਗਚ੍ਛਨ੍ਤਂ ਨ ਆਗਚ੍ਛਨ੍ਤਂ ਅਦ੍ਦਸ. ਦਿਟ੍ਠੋ ਤੇ, ਮਹਾਰਾਜਾਤਿ? ਨ ਦਿਟ੍ਠੋ, ਤਾਤਾਤਿ. ਵਲਞ੍ਜਕਦਣ੍ਡਂ ਏਤਂ ਰੁਕ੍ਖਂ ਨਿਸ੍ਸਾਯ ਠਪੇਥਾਤਿ ਵਤ੍ਵਾ ਅਚ੍ਛਰਂ ਪਹਰਿ ‘‘ਵਲਞ੍ਜਕਦਣ੍ਡਂ ਗਹੇਤ੍ਵਾ ਏਹੀ’’ਤਿ. ਅਸ੍ਸੋ ਪਕ੍ਖਨ੍ਦਿਤ੍ਵਾ ਮੁਖੇਨ ਗਹੇਤ੍ਵਾ ਆਗਤੋ. ਦਿਟ੍ਠਂ, ਮਹਾਰਾਜਾਤਿ. ਦਿਟ੍ਠਂ, ਤਾਤਾਤਿ.

ਪੁਨ ਅਚ੍ਛਰਂ ਪਹਰਿ ‘‘ਉਯ੍ਯਾਨਸ੍ਸ ਪਾਕਾਰਮਤ੍ਥਕੇਨ ਚਰਿਤ੍ਵਾ ਏਹੀ’’ਤਿ. ਅਸ੍ਸੋ ਤਥਾ ਅਕਾਸਿ. ਦਿਟ੍ਠੋ, ਮਹਾਰਾਜਾਤਿ. ਨ ਦਿਟ੍ਠੋ, ਤਾਤਾਤਿ. ਰਤ੍ਤਕਮ੍ਬਲਂ ਆਹਰਾਪੇਤ੍ਵਾ ਅਸ੍ਸਸ੍ਸ ਪਾਦੇ ਬਨ੍ਧਾਪੇਤ੍ਵਾ ਤਥੇਵ ਸਞ੍ਞਂ ਅਦਾਸਿ. ਅਸ੍ਸੋ ਉਲ੍ਲਙ੍ਘਿਤ੍ਵਾ ਪਾਕਾਰਮਤ੍ਥਕੇਨ ਅਨੁਪਰਿਯਾਯਿ. ਬਲਵਤਾ ਪੁਰਿਸੇਨ ਆਵਿਞ੍ਛਨਅਲਾਤਗ੍ਗਿਸਿਖਾ ਵਿਯ ਉਯ੍ਯਾਨਪਾਕਾਰਮਤ੍ਥਕੇ ਪਞ੍ਞਾਯਿਤ੍ਥ. ਅਸ੍ਸੋ ਗਨ੍ਤ੍ਵਾ ਸਮੀਪੇ ਠਿਤੋ. ਦਿਟ੍ਠਂ, ਮਹਾਰਾਜਾਤਿ. ਦਿਟ੍ਠਂ, ਤਾਤਾਤਿ. ਮਙ੍ਗਲਪੋਕ੍ਖਰਣਿਪਾਕਾਰਮਤ੍ਥਕੇ ਅਨੁਪਰਿਯਾਹੀਤਿ ਸਞ੍ਞਂ ਅਦਾਸਿ.

ਪੁਨ ‘‘ਪੋਕ੍ਖਰਣਿਂ ਓਤਰਿਤ੍ਵਾ ਪਦੁਮਪਤ੍ਤੇਸੁ ਚਾਰਿਕਂ ਚਰਾਹੀ’’ਤਿ ਸਞ੍ਞਂ ਅਦਾਸਿ. ਪੋਕ੍ਖਰਣਿਂ ਓਤਰਿਤ੍ਵਾ ਸਬ੍ਬਪਦੁਮਪਤ੍ਤੇ ਚਰਿਤ੍ਵਾ ਅਗਮਾਸਿ, ਏਕਂ ਪਤ੍ਤਮ੍ਪਿ ਅਨਕ੍ਕਨ੍ਤਂ ਵਾ ਫਾਲਿਤਂ ਵਾ ਛਿਨ੍ਦਿਤਂ ਵਾ ਖਣ੍ਡਿਤਂ ਵਾ ਨਾਹੋਸਿ. ਦਿਟ੍ਠਂ, ਮਹਾਰਾਜਾਤਿ. ਦਿਟ੍ਠਂ, ਤਾਤਾਤਿ. ਅਚ੍ਛਰਂ ਪਹਰਿਤ੍ਵਾ ਤਂ ਹਤ੍ਥਤਲਂ ਉਪਨਾਮੇਸਿ. ਧਾਤੂਪਤ੍ਥਦ੍ਧੋ ਲਙ੍ਘਿਤ੍ਵਾ ਹਤ੍ਥਤਲੇ ਅਟ੍ਠਾਸਿ. ਦਿਟ੍ਠਂ, ਮਹਾਰਾਜਾਤਿ? ਦਿਟ੍ਠਂ, ਤਾਤਾਤਿ. ਏਵਂ ਉਤ੍ਤਮਹਯੋ ਏਵ ਉਤ੍ਤਮਕਾਰਣਾਯ ਉਤ੍ਤਮਜਵਂ ਪਟਿਪਜ੍ਜਤਿ.

ਉਤ੍ਤਮੇ ਸਾਖਲ੍ਯੇਤਿ ਮੁਦੁਵਾਚਾਯ. ਮੁਦੁਵਾਚਾਯ ਹਿ, ‘‘ਤਾਤ, ਤ੍ਵਂ ਮਾ ਚਿਨ੍ਤਯਿ, ਰਞ੍ਞੋ ਮਙ੍ਗਲਸ੍ਸੋ ਭਵਿਸ੍ਸਸਿ, ਰਾਜਭੋਜਨਾਦੀਨਿ ਲਭਿਸ੍ਸਸੀ’’ਤਿ ਉਤ੍ਤਮਹਯਕਾਰਣਂ ਕਾਰੇਤਬ੍ਬੋ. ਤੇਨ ਵੁਤ੍ਤਂ ‘‘ਉਤ੍ਤਮੇ ਸਾਖਲ੍ਯੇ’’ਤਿ. ਰਾਜਭੋਗ੍ਗੋਤਿ ਰਞ੍ਞੋ ਉਪਭੋਗੋ. ਰਞ੍ਞੋ ਅਙ੍ਗਨ੍ਤੇਵ ਸਙ੍ਖਂ ਗਚ੍ਛਤੀਤਿ ਯਤ੍ਥ ਕਤ੍ਥਚਿ ਗਚ੍ਛਨ੍ਤੇਨ ਹਤ੍ਥਂ ਵਿਯ ਪਾਦਂ ਵਿਯ ਅਨੋਹਾਯੇਵ ਗਨ੍ਤਬ੍ਬਂ ਹੋਤਿ. ਤਸ੍ਮਾ ਅਙ੍ਗਨ੍ਤਿ ਸਙ੍ਖਂ ਗਚ੍ਛਤਿ, ਚਤੂਸੁ ਵਾ ਸੇਨਙ੍ਗੇਸੁ ਏਕਂ ਅਙ੍ਗਂ ਹੋਤਿ.

ਅਸੇਖਾਯ ਸਮ੍ਮਾਦਿਟ੍ਠਿਯਾਤਿ ਅਰਹਤ੍ਤਫਲਸਮ੍ਮਾਦਿਟ੍ਠਿਯਾ. ਸਮ੍ਮਾਸਙ੍ਕਪ੍ਪਾਦਯੋਪਿ ਤਂਸਮ੍ਪਯੁਤ੍ਤਾਵ. ਸਮ੍ਮਾਞਾਣਂ ਪੁਬ੍ਬੇ ਵੁਤ੍ਤਸਮ੍ਮਾਦਿਟ੍ਠਿਯੇਵ. ਠਪੇਤ੍ਵਾ ਪਨ ਅਟ੍ਠ ਫਲਙ੍ਗਾਨਿ ਸੇਸਾ ਧਮ੍ਮਾ ਵਿਮੁਤ੍ਤੀਤਿ ਵੇਦਿਤਬ੍ਬਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਅਯਂ ਪਨ ਦੇਸਨਾ ਉਗ੍ਘਟਿਤਞ੍ਞੂਪੁਗ੍ਗਲਸ੍ਸ ਵਸੇਨ ਅਰਹਤ੍ਤਨਿਕੂਟਂ ਗਹੇਤ੍ਵਾ ਨਿਟ੍ਠਾਪਿਤਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਭਦ੍ਦਾਲਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.