੩. ਚੂਲ਼ਮਾਲੁਕ੍ਯਸੁਤ੍ਤਵਣ੍ਣਨਾ

੧੨੨. ਏਵਂ ਮੇ ਸੁਤਨ੍ਤਿ ਮਾਲੁਕ੍ਯਸੁਤ੍ਤਂ. ਤਤ੍ਥ ਮਾਲੁਕ੍ਯਪੁਤ੍ਤਸ੍ਸਾਤਿ ਏਵਂਨਾਮਕਸ੍ਸ ਥੇਰਸ੍ਸ. ਠਪਿਤਾਨਿ ਪਟਿਕ੍ਖਿਤ੍ਤਾਨੀਤਿ ਦਿਟ੍ਠਿਗਤਾਨਿ ਨਾਮ ਨ ਬ੍ਯਾਕਾਤਬ੍ਬਾਨੀਤਿ ਏਵਂ ਠਪਿਤਾਨਿ ਚੇਵ ਪਟਿਕ੍ਖਿਤ੍ਤਾਨਿ ਚ. ਤਥਾਗਤੋਤਿ ਸਤ੍ਤੋ. ਤਂ ਮੇ ਨ ਰੁਚ੍ਚਤੀਤਿ ਤਂ ਅਬ੍ਯਾਕਰਣਂ ਮਯ੍ਹਂ ਨ ਰੁਚ੍ਚਤਿ. ਸਿਕ੍ਖਂ ਪਚ੍ਚਕ੍ਖਾਯਾਤਿ ਸਿਕ੍ਖਂ ਪਟਿਕ੍ਖਿਪਿਤ੍ਵਾ.

੧੨੫. ਕੋ ਸਨ੍ਤੋ ਕਂ ਪਚ੍ਚਾਚਿਕ੍ਖਸੀਤਿ ਯਾਚਕੋ ਵਾ ਹਿ ਯਾਚਿਤਕਂ ਪਚ੍ਚਾਚਿਕ੍ਖੇਯ੍ਯ, ਯਾਚਿਤਕੋ ਵਾ ਯਾਚਕਂ. ਤ੍ਵਂ ਨੇਵ ਯਾਚਕੋ ਨ ਯਾਚਿਤਕੋ, ਸੋ ਦਾਨਿ ਤ੍ਵਂ ਕੋ ਸਨ੍ਤੋ ਕਂ ਪਚ੍ਚਾਚਿਕ੍ਖਸੀਤਿ ਅਤ੍ਥੋ.

੧੨੬. ਵਿਦ੍ਧੋ ਅਸ੍ਸਾਤਿ ਪਰਸੇਨਾਯ ਠਿਤੇਨ ਵਿਦ੍ਧੋ ਭਵੇਯ੍ਯ. ਗਾਲ਼੍ਹਪਲੇਪਨੇਨਾਤਿ ਬਹਲਲੇਪਨੇਨ. ਭਿਸਕ੍ਕਨ੍ਤਿ ਵੇਜ੍ਜਂ. ਸਲ੍ਲਕਤ੍ਤਨ੍ਤਿ ਸਲ੍ਲਕਨ੍ਤਨਂ ਸਲ੍ਲਕਨ੍ਤਿਯਸੁਤ੍ਤਵਾਚਕਂ. ਅਕ੍ਕਸ੍ਸਾਤਿ ਅਕ੍ਕਵਾਕੇ ਗਹੇਤ੍ਵਾ ਜਿਯਂ ਕਰੋਨ੍ਤਿ. ਤੇਨ ਵੁਤ੍ਤਂ ‘‘ਅਕ੍ਕਸ੍ਸਾ’’ਤਿ. ਸਣ੍ਹਸ੍ਸਾਤਿ ਵੇਣੁਵਿਲੀਵਸ੍ਸ. ਮਰੁਵਾਖੀਰਪਣ੍ਣੀਨਮ੍ਪਿ ਵਾਕੇਹਿਯੇਵ ਕਰੋਨ੍ਤਿ. ਤੇਨ ਵੁਤ੍ਤਂ ਯਦਿ ਵਾ ਮਰੁਵਾਯ ਯਦਿ ਵਾ ਖੀਰਪਣ੍ਣਿਨੋਤਿ. ਗਚ੍ਛਨ੍ਤਿ ਪਬ੍ਬਤਗਚ੍ਛਨਦੀਗਚ੍ਛਾਦੀਸੁ ਜਾਤਂ. ਰੋਪਿਮਨ੍ਤਿ ਰੋਪੇਤ੍ਵਾ ਵਡ੍ਢਿਤਂ ਸਰਵਨਤੋ ਸਰਂ ਗਹੇਤ੍ਵਾ ਕਤਂ. ਸਿਥਿਲਹਨੁਨੋਤਿ ਏਵਂਨਾਮਕਸ੍ਸ ਪਕ੍ਖਿਨੋ. ਭੇਰਵਸ੍ਸਾਤਿ ਕਾਲ਼ਸੀਹਸ੍ਸ. ਸੇਮ੍ਹਾਰਸ੍ਸਾਤਿ ਮਕ੍ਕਟਸ੍ਸ. ਏਵਂ ਨੋਤਿ ਏਤਾਯ ਦਿਟ੍ਠਿਯਾ ਸਤਿ ਨ ਹੋਤੀਤਿ ਅਤ੍ਥੋ.

੧੨੭. ਅਤ੍ਥੇਵ ਜਾਤੀਤਿ ਏਤਾਯ ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋਵ ਨਤ੍ਥਿ, ਜਾਤਿ ਪਨ ਅਤ੍ਥਿਯੇਵ. ਤਥਾ ਜਰਾਮਰਣਾਦੀਨੀਤਿ ਦਸ੍ਸੇਤਿ. ਯੇਸਾਹਨ੍ਤਿ ਯੇਸਂ ਅਹਂ. ਨਿਘਾਤਨ੍ਤਿ ਉਪਘਾਤਂ ਵਿਨਾਸਂ. ਮਮ ਸਾਵਕਾ ਹਿ ਏਤੇਸੁ ਨਿਬ੍ਬਿਨ੍ਨਾ ਇਧੇਵ ਨਿਬ੍ਬਾਨਂ ਪਾਪੁਣਨ੍ਤੀਤਿ ਅਧਿਪ੍ਪਾਯੋ.

੧੨੮. ਤਸ੍ਮਾਤਿਹਾਤਿ ਯਸ੍ਮਾ ਅਬ੍ਯਾਕਤਮੇਤਂ, ਚਤੁਸਚ੍ਚਮੇਵ ਮਯਾ ਬ੍ਯਾਕਤਂ, ਤਸ੍ਮਾਤਿ ਅਤ੍ਥੋ. ਨ ਹੇਤਂ ਮਾਲੁਕ੍ਯਪੁਤ੍ਤ ਅਤ੍ਥਸਂਹਿਤਨ੍ਤਿ ਏਤਂ ਦਿਟ੍ਠਿਗਤਂ ਵਾ ਏਤਂ ਬ੍ਯਾਕਰਣਂ ਵਾ ਕਾਰਣਨਿਸ੍ਸਿਤਂ ਨ ਹੋਤਿ. ਨ ਆਦਿਬ੍ਰਹ੍ਮਚਰਿਯਕਨ੍ਤਿ ਬ੍ਰਹ੍ਮਚਰਿਯਸ੍ਸ ਆਦਿਮਤ੍ਤਮ੍ਪਿ ਪੁਬ੍ਬਭਾਗਸੀਲਮਤ੍ਤਮ੍ਪਿ ਨ ਹੋਤਿ. ਨ ਨਿਬ੍ਬਿਦਾਯਾਤਿਆਦੀਸੁ ਵਟ੍ਟੇ ਨਿਬ੍ਬਿਨ੍ਦਨਤ੍ਥਾਯ ਵਾ ਵਿਰਜ੍ਝਨਤ੍ਥਾਯ ਵਾ ਵਟ੍ਟਨਿਰੋਧਾਯ ਵਾ ਰਾਗਾਦਿਵੂਪਸਮਨਤ੍ਥਾਯ ਵਾ ਅਭਿਞ੍ਞੇਯ੍ਯੇ ਧਮ੍ਮੇ ਅਭਿਜਾਨਨਤ੍ਥਾਯ ਵਾ ਚਤੁਮਗ੍ਗਸਙ੍ਖਾਤਸਮ੍ਬੋਧਤ੍ਥਾਯ ਵਾ ਅਸਙ੍ਖਤਨਿਬ੍ਬਾਨਸਚ੍ਛਿਕਿਰਿਯਤ੍ਥਾਯ ਵਾ ਨ ਹੋਤਿ. ਏਤਂ ਹੀਤਿ ਏਤਂ ਚਤੁਸਚ੍ਚਬ੍ਯਾਕਰਣਂ. ਆਦਿਬ੍ਰਹ੍ਮਚਰਿਯਕਨ੍ਤਿ ਬ੍ਰਹ੍ਮਚਰਿਯਸ੍ਸ ਆਦਿਭੂਤਂ ਪੁਬ੍ਬਪਦਟ੍ਠਾਨਂ. ਸੇਸਂ ਵੁਤ੍ਤਪਟਿਵਿਪਕ੍ਖਨਯੇਨ ਵੇਦਿਤਬ੍ਬਂ. ਇਮਮ੍ਪਿ ਦੇਸਨਂ ਭਗਵਾ ਨੇਯ੍ਯਪੁਗ੍ਗਲਵਸੇਨ ਨਿਟ੍ਠਾਪੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਚੂਲ਼ਮਾਲੁਕ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.