੧. ਅਮ੍ਬਲਟ੍ਠਿਕਰਾਹੁਲੋਵਾਦਸੁਤ੍ਤਵਣ੍ਣਨਾ

੧੦੭. ਏਵਂ ਮੇ ਸੁਤਨ੍ਤਿ ਅਮ੍ਬਲਟ੍ਠਿਕਰਾਹੁਲੋਵਾਦਸੁਤ੍ਤਂ. ਤਤ੍ਥ ਅਮ੍ਬਲਟ੍ਠਿਕਾਯਂ ਵਿਹਰਤੀਤਿ ਵੇਲ਼ੁਵਨਵਿਹਾਰਸ੍ਸ ਪਚ੍ਚਨ੍ਤੇ ਪਧਾਨਘਰਸਙ੍ਖੇਪੇ ਵਿਵੇਕਕਾਮਾਨਂ ਵਸਨਤ੍ਥਾਯ ਕਤੇ ਅਮ੍ਬਲਟ੍ਠਿਕਾਤਿ ਏਵਂਨਾਮਕੇ ਪਾਸਾਦੇ ਪਵਿਵੇਕਂ ਬ੍ਰੂਹਯਨ੍ਤੋ ਵਿਹਰਤਿ. ਕਣ੍ਟਕੋ ਨਾਮ ਜਾਤਕਾਲਤੋ ਪਟ੍ਠਾਯ ਤਿਖਿਣੋਵ ਹੋਤਿ, ਏਵਮੇਵਂ ਅਯਮ੍ਪਿ ਆਯਸ੍ਮਾ ਸਤ੍ਤਵਸ੍ਸਿਕਸਾਮਣੇਰਕਾਲੇਯੇਵ ਪਵਿਵੇਕਂ ਬ੍ਰੂਹਯਮਾਨੋ ਤਤ੍ਥ ਵਿਹਾਸਿ. ਪਟਿਸਲ੍ਲਾਨਾ ਵੁਟ੍ਠਿਤੋਤਿ ਫਲਸਮਾਪਤ੍ਤਿਤੋ ਵੁਟ੍ਠਾਯ. ਆਸਨਨ੍ਤਿ ਪਕਤਿਪਞ੍ਞਤ੍ਤਮੇਵੇਤ੍ਥ ਆਸਨਂ ਅਤ੍ਥਿ, ਤਂ ਪਪ੍ਫੋਟੇਤ੍ਵਾ ਠਪੇਸਿ. ਉਦਕਾਧਾਨੇਤਿ ਉਦਕਭਾਜਨੇ. ‘‘ਉਦਕਟ੍ਠਾਨੇ’’ਤਿਪਿ ਪਾਠੋ.

ਆਯਸ੍ਮਨ੍ਤਂ ਰਾਹੁਲਂ ਆਮਨ੍ਤੇਸੀਤਿ ਓਵਾਦਦਾਨਤ੍ਥਂ ਆਮਨ੍ਤੇਸਿ. ਭਗਵਤਾ ਹਿ ਰਾਹੁਲਤ੍ਥੇਰਸ੍ਸ ਸਮ੍ਬਹੁਲਾ ਧਮ੍ਮਦੇਸਨਾ ਕਤਾ. ਸਾਮਣੇਰਪਞ੍ਹਂ ਥੇਰਸ੍ਸੇਵ ਵੁਤ੍ਤਂ. ਤਥਾ ਰਾਹੁਲਸਂਯੁਤ੍ਤਂ ਮਹਾਰਾਹੁਲੋਵਾਦਸੁਤ੍ਤਂ ਚੂਲ਼ਰਾਹੁਲੋਵਾਦਸੁਤ੍ਤਮਿਦਂ ਅਮ੍ਬਲਟ੍ਠਿਕਰਾਹੁਲੋਵਾਦਸੁਤ੍ਤਨ੍ਤਿ.

ਅਯਞ੍ਹਿ ਆਯਸ੍ਮਾ ਸਤ੍ਤਵਸ੍ਸਿਕਕਾਲੇ ਭਗਵਨ੍ਤਂ ਚੀਵਰਕਣ੍ਣੇ ਗਹੇਤ੍ਵਾ ‘‘ਦਾਯਜ੍ਜਂ ਮੇ ਸਮਣ ਦੇਹੀ’’ਤਿ ਦਾਯਜ੍ਜਂ ਯਾਚਮਾਨੋ ਭਗਵਤਾ ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰਸ੍ਸ ਨਿਯ੍ਯਾਦੇਤ੍ਵਾ ਪਬ੍ਬਾਜਿਤੋ. ਅਥ ਭਗਵਾ ਦਹਰਕੁਮਾਰਾ ਨਾਮ ਯੁਤ੍ਤਾਯੁਤ੍ਤਂ ਕਥਂ ਕਥੇਨ੍ਤਿ, ਓਵਾਦਮਸ੍ਸ ਦੇਮੀਤਿ ਰਾਹੁਲਕੁਮਾਰਂ ਆਮਨ੍ਤੇਤ੍ਵਾ ‘‘ਸਾਮਣੇਰੇਨ ਨਾਮ, ਰਾਹੁਲ, ਤਿਰਚ੍ਛਾਨਕਥਂ ਕਥੇਤੁਂ ਨ ਵਟ੍ਟਤਿ, ਤ੍ਵਂ ਕਥਯਮਾਨੋ ਏਵਰੂਪਂ ਕਥਂ ਕਥੇਯ੍ਯਾਸੀ’’ਤਿ ਸਬ੍ਬਬੁਦ੍ਧੇਹਿ ਅਵਿਜਹਿਤਂ ਦਸਪੁਚ੍ਛਂ ਪਞ੍ਚਪਣ੍ਣਾਸਵਿਸ੍ਸਜ੍ਜਨਂ – ‘‘ਏਕੋ ਪਞ੍ਹੋ ਏਕੋ ਉਦ੍ਦੇਸੋ ਏਕਂ ਵੇਯ੍ਯਾਕਰਣਂ ਦ੍ਵੇ ਪਞ੍ਹਾ…ਪੇ… ਦਸ ਪਞ੍ਹਾ ਦਸ ਉਦ੍ਦੇਸਾ ਦਸ ਵੇਯ੍ਯਾਕਰਣਾਤਿ. ਏਕਂ ਨਾਮ ਕਿਂ? ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾ…ਪੇ… ਦਸ ਨਾਮ ਕਿਂ? ਦਸਹਙ੍ਗੇਹਿ ਸਮਨ੍ਨਾਗਤੋ ਅਰਹਾਤਿ ਵੁਚ੍ਚਤੀ’’ਤਿ (ਖੁ. ਪਾ. ੪.੧੦) ਇਮਂ ਸਾਮਣੇਰਪਞ੍ਹਂ ਕਥੇਸਿ. ਪੁਨ ਚਿਨ੍ਤੇਸਿ ‘‘ਦਹਰਕੁਮਾਰਾ ਨਾਮ ਪਿਯਮੁਸਾਵਾਦਾ ਹੋਨ੍ਤਿ, ਅਦਿਟ੍ਠਮੇਵ ਦਿਟ੍ਠਂ ਅਮ੍ਹੇਹਿ, ਦਿਟ੍ਠਮੇਵ ਨ ਦਿਟ੍ਠਂ ਅਮ੍ਹੇਹੀਤਿ ਵਦਨ੍ਤਿ ਓਵਾਦਮਸ੍ਸ ਦੇਮੀ’’ਤਿ ਅਕ੍ਖੀਹਿ ਓਲੋਕੇਤ੍ਵਾਪਿ ਸੁਖਸਞ੍ਜਾਨਨਤ੍ਥਂ ਪਠਮਮੇਵ ਚਤਸ੍ਸੋ ਉਦਕਾਧਾਨੂਪਮਾਯੋ, ਤਤੋ ਦ੍ਵੇ ਹਤ੍ਥਿਉਪਮਾਯੋ ਏਕਂ ਆਦਾਸੂਪਮਞ੍ਚ ਦਸ੍ਸੇਤ੍ਵਾ ਇਮਂ ਸੁਤ੍ਤਂ ਕਥੇਸਿ. ਚਤੂਸੁ ਪਨ ਪਚ੍ਚਯੇਸੁ ਤਣ੍ਹਾਵਿਵਟ੍ਟਨਂ ਪਞ੍ਚਸੁ ਕਾਮਗੁਣੇਸੁ ਛਨ੍ਦਰਾਗਪ੍ਪਹਾਨਂ ਕਲ੍ਯਾਣਮਿਤ੍ਤੁਪਨਿਸ੍ਸਯਸ੍ਸ ਮਹਨ੍ਤਭਾਵਞ੍ਚ ਦਸ੍ਸੇਤ੍ਵਾ ਰਾਹੁਲਸੁਤ੍ਤਂ (ਸੁ. ਨਿ. ਰਾਹੁਲਸੁਤ੍ਤ) ਕਥੇਸਿ. ਆਗਤਾਗਤਟ੍ਠਾਨੇ ਭਵੇਸੁ ਛਨ੍ਦਰਾਗੋ ਨ ਕਤ੍ਤਬ੍ਬੋਤਿ ਦਸ੍ਸੇਤੁਂ ਰਾਹੁਲਸਂਯੁਤ੍ਤਂ (ਸਂ. ਨਿ. ੨.੧੮੮ ਆਦਯੋ) ਕਥੇਸਿ. ‘‘ਅਹਂ ਸੋਭਾਮਿ, ਮਮ ਵਣ੍ਣਾਯਤਨਂ ਪਸਨ੍ਨ’’ਨ੍ਤਿ ਅਤ੍ਤਭਾਵਂ ਨਿਸ੍ਸਾਯ ਗੇਹਸ੍ਸਿਤਛਨ੍ਦਰਾਗੋ ਨ ਕਤ੍ਤਬ੍ਬੋਤਿ ਮਹਾਰਾਹੁਲੋਵਾਦਸੁਤ੍ਤਂ ਕਥੇਸਿ.

ਤਤ੍ਥ ਰਾਹੁਲਸੁਤ੍ਤਂ ਇਮਸ੍ਮਿਂ ਨਾਮ ਕਾਲੇ ਵੁਤ੍ਤਨ੍ਤਿ ਨ ਵਤ੍ਤਬ੍ਬਂ. ਤਞ੍ਹਿ ਅਭਿਣ੍ਹੋਵਾਦਵਸੇਨ ਵੁਤ੍ਤਂ. ਰਾਹੁਲਸਂਯੁਤ੍ਤਂ ਸਤ੍ਤਵਸ੍ਸਿਕਕਾਲਤੋ ਪਟ੍ਠਾਯ ਯਾਵ ਅਵਸ੍ਸਿਕਭਿਕ੍ਖੁਕਾਲਾ ਵੁਤ੍ਤਂ. ਮਹਾਰਾਹੁਲੋਵਾਦਸੁਤ੍ਤਂ ਅਟ੍ਠਾਰਸ ਵਸ੍ਸਸਾਮਣੇਰਕਾਲੇ ਵੁਤ੍ਤਂ. ਚੂਲ਼ਰਾਹੁਲੋਵਾਦਸੁਤ੍ਤਂ ਅਵਸ੍ਸਿਕਭਿਕ੍ਖੁਕਾਲੇ ਵੁਤ੍ਤਂ. ਕੁਮਾਰਕਪਞ੍ਹਞ੍ਚ ਇਦਞ੍ਚ ਅਮ੍ਬਲਟ੍ਠਿਕਰਾਹੁਲੋਵਾਦਸੁਤ੍ਤਂ ਸਤ੍ਤਵਸ੍ਸਿਕਸਾਮਣੇਰਕਾਲੇ ਵੁਤ੍ਤਂ. ਤੇਸੁ ਰਾਹੁਲਸੁਤ੍ਤਂ ਅਭਿਣ੍ਹੋਵਾਦਤ੍ਥਂ, ਰਾਹੁਲਸਂਯੁਤ੍ਤਂ, ਥੇਰਸ੍ਸ ਵਿਪਸ੍ਸਨਾਗਬ੍ਭਗਹਣਤ੍ਥਂ, ਮਹਾਰਾਹੁਲੋਵਾਦਂ ਗੇਹਸ੍ਸਿਤਛਨ੍ਦਰਾਗਵਿਨੋਦਨਤ੍ਥਂ, ਚੂਲ਼ਰਾਹੁਲੋਵਾਦਂ ਥੇਰਸ੍ਸ ਪਞ੍ਚਦਸ-ਵਿਮੁਤ੍ਤਿਪਰਿਪਾਚਨੀਯ-ਧਮ੍ਮਪਰਿਪਾਕਕਾਲੇ ਅਰਹਤ੍ਤਗਾਹਾਪਨਤ੍ਥਂ ਵੁਤ੍ਤਂ. ਇਦਞ੍ਚ ਪਨ ਸਨ੍ਧਾਯ ਰਾਹੁਲਤ੍ਥੇਰੋ ਭਿਕ੍ਖੁਸਙ੍ਘਮਜ੍ਝੇ ਤਥਾਗਤਸ੍ਸ ਗੁਣਂ ਕਥੇਨ੍ਤੋ ਇਦਮਾਹ –

‘‘ਕਿਕੀਵ ਬੀਜਂ ਰਕ੍ਖੇਯ੍ਯ, ਚਾਮਰੀ ਵਾਲਮੁਤ੍ਤਮਂ;

ਨਿਪਕੋ ਸੀਲਸਮ੍ਪਨ੍ਨੋ, ਮਮਂ ਰਕ੍ਖਿ ਤਥਾਗਤੋ’’ਤਿ. (ਅਪ. ੧.੨.੮੩);

ਸਾਮਣੇਰਪਞ੍ਹਂ ਅਯੁਤ੍ਤਵਚਨਪਹਾਨਤ੍ਥਂ, ਇਦਂ ਅਮ੍ਬਲਟ੍ਠਿਕਰਾਹੁਲੋਵਾਦਸੁਤ੍ਤਂ ਸਮ੍ਪਜਾਨਮੁਸਾਵਾਦਸ੍ਸ ਅਕਰਣਤ੍ਥਂ ਵੁਤ੍ਤਂ.

ਤਤ੍ਥ ਪਸ੍ਸਸਿ ਨੋਤਿ ਪਸ੍ਸਸਿ ਨੁ. ਪਰਿਤ੍ਤਨ੍ਤਿ ਥੋਕਂ. ਸਾਮਞ੍ਞਨ੍ਤਿ ਸਮਣਧਮ੍ਮੋ. ਨਿਕ੍ਕੁਜ੍ਜਿਤ੍ਵਾਤਿ ਅਧੋਮੁਖਂ ਕਤ੍ਵਾ. ਉਕ੍ਕੁਜ੍ਜਿਤ੍ਵਾਤਿ ਉਤ੍ਤਾਨਂ ਕਤ੍ਵਾ.

੧੦੮. ਸੇਯ੍ਯਥਾਪਿ, ਰਾਹੁਲ, ਰਞ੍ਞੋ ਨਾਗੋਤਿ ਅਯਂ ਉਪਮਾ ਸਮ੍ਪਜਾਨਮੁਸਾਵਾਦੇ ਸਂਵਰਰਹਿਤਸ੍ਸ ਓਪਮ੍ਮਦਸ੍ਸਨਤ੍ਥਂ ਵੁਤ੍ਤਾ. ਤਤ੍ਥ ਈਸਾਦਨ੍ਤੋਤਿ ਰਥੀਸਾਸਦਿਸਦਨ੍ਤੋ. ਉਰੁਲ਼੍ਹਵਾਤਿ ਅਭਿਵਡ੍ਢਿਤੋ ਆਰੋਹਸਮ੍ਪਨ੍ਨੋ. ਅਭਿਜਾਤੋਤਿ ਸੁਜਾਤੋ ਜਾਤਿਸਮ੍ਪਨ੍ਨੋ. ਸਙ੍ਗਾਮਾਵਚਰੋਤਿ ਸਙ੍ਗਾਮਂ ਓਤਿਣ੍ਣਪੁਬ੍ਬੋ. ਕਮ੍ਮਂ ਕਰੋਤੀਤਿ ਆਗਤਾਗਤੇ ਪਵਟ੍ਟੇਨ੍ਤੋ ਘਾਤੇਤਿ. ਪੁਰਤ੍ਥਿਮਕਾਯਾਦੀਸੁ ਪਨ ਪੁਰਤ੍ਥਿਮਕਾਯੇਨ ਤਾਵ ਪਟਿਸੇਨਾਯ ਫਲਕਕੋਟ੍ਠਕਮੁਣ੍ਡਪਾਕਾਰਾਦਯੋ ਪਾਤੇਤਿ, ਤਥਾ ਪਚ੍ਛਿਮਕਾਯੇਨ. ਸੀਸੇਨ ਕਮ੍ਮਂ ਨਾਮ ਨਿਯਮੇਤ੍ਵਾ ਏਤਂ ਪਦੇਸਂ ਮਦ੍ਦਿਸ੍ਸਾਮੀਤਿ ਨਿਵਤ੍ਤਿਤ੍ਵਾ ਓਲੋਕੇਤਿ, ਏਤ੍ਤਕੇਨ ਸਤਮ੍ਪਿ ਸਹਸ੍ਸਮ੍ਪਿ ਦ੍ਵੇਧਾ ਭਿਜ੍ਜਤਿ. ਕਣ੍ਣੇਹਿ ਕਮ੍ਮਂ ਨਾਮ ਆਗਤਾਗਤੇ ਸਰੇ ਕਣ੍ਣੇਹਿ ਪਹਰਿਤ੍ਵਾ ਪਾਤਨਂ. ਦਨ੍ਤੇਹਿ ਕਮ੍ਮਂ ਨਾਮ ਪਟਿਹਤ੍ਥਿਅਸ੍ਸਹਤ੍ਥਾਰੋਹਅਸ੍ਸਾਰੋਹਪਦਾਦੀਨਂ ਵਿਜ੍ਝਨਂ. ਨਙ੍ਗੁਟ੍ਠੇਨ ਕਮ੍ਮਂ ਨਾਮ ਨਙ੍ਗੁਟ੍ਠੇ ਬਨ੍ਧਾਯ ਦੀਘਾਸਿਲਟ੍ਠਿਯਾ ਵਾ ਅਯਮੁਸਲੇਨ ਵਾ ਛੇਦਨਭੇਦਨਂ. ਰਕ੍ਖਤੇਵ ਸੋਣ੍ਡਨ੍ਤਿ ਸੋਣ੍ਡਂ ਪਨ ਮੁਖੇ ਪਕ੍ਖਿਪਿਤ੍ਵਾ ਰਕ੍ਖਤਿ.

ਤਤ੍ਥਾਤਿ ਤਸ੍ਮਿਂ ਤਸ੍ਸ ਹਤ੍ਥਿਨੋ ਕਰਣੇ. ਅਪਰਿਚ੍ਚਤ੍ਤਨ੍ਤਿ ਅਨਿਸ੍ਸਟ੍ਠਂ, ਪਰੇਸਂ ਜਯਂ ਅਮ੍ਹਾਕਞ੍ਚ ਪਰਾਜਯਂ ਪਸ੍ਸੀਤਿ ਮਞ੍ਞਤਿ. ਸੋਣ੍ਡਾਯਪਿ ਕਮ੍ਮਂ ਕਰੋਤੀਤਿ ਅਯਮੁਗ੍ਗਰਂ ਵਾ ਖਦਿਰਮੁਸਲਂ ਵਾ ਗਹੇਤ੍ਵਾ ਸਮਨ੍ਤਾ ਅਟ੍ਠਾਰਸਹਤ੍ਥਟ੍ਠਾਨਂ ਮਦ੍ਦਤਿ. ਪਰਿਚ੍ਚਤ੍ਤਨ੍ਤਿ ਵਿਸ੍ਸਟ੍ਠਂ, ਇਦਾਨਿ ਹਤ੍ਥਿਯੋਧਾਦੀਸੁ ਨ ਕੁਤੋਚਿ ਭਾਯਤਿ, ਅਮ੍ਹਾਕਂ ਜਯਂ ਪਰੇਸਞ੍ਚ ਪਰਾਜਯਂ ਪਸ੍ਸੀਤਿ ਮਞ੍ਞਤਿ. ਨਾਹਂ ਤਸ੍ਸ ਕਿਞ੍ਚਿ ਪਾਪਨ੍ਤਿ ਤਸ੍ਸ ਦੁਕ੍ਕਟਾਦਿਆਪਤ੍ਤਿਵੀਤਿਕ੍ਕਮੇ ਵਾ ਮਾਤੁਘਾਤਕਾਦਿਕਮ੍ਮੇਸੁ ਵਾ ਕਿਞ੍ਚਿ ਪਾਪਂ ਅਕਤ੍ਤਬ੍ਬਂ ਨਾਮ ਨਤ੍ਥਿ. ਤਸ੍ਮਾ ਤਿਹ ਤੇਤਿ ਯਸ੍ਮਾ ਸਮ੍ਪਜਾਨਮੁਸਾਵਾਦਿਨੋ ਅਕਤ੍ਤਬ੍ਬਂ ਪਾਪਂ ਨਾਮ ਨਤ੍ਥਿ, ਤਸ੍ਮਾ ਤਯਾ ਹਸਾਯਪਿ ਦਵਕਮ੍ਯਤਾਯਪਿ ਮੁਸਾ ਨ ਭਣਿਸ੍ਸਾਮੀਤਿ ਸਿਕ੍ਖਿਤਬ੍ਬਂ. ਪਚ੍ਚਵੇਕ੍ਖਣਤ੍ਥੋਤਿ ਓਲੋਕਨਤ੍ਥੋ, ਯਂ ਮੁਖੇ ਵਜ੍ਜਂ ਹੋਤਿ, ਤਸ੍ਸ ਦਸ੍ਸਨਤ੍ਥੋਤਿ ਵੁਤ੍ਤਂ ਹੋਤਿ. ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾਤਿ ਓਲੋਕੇਤ੍ਵਾ ਓਲੋਕੇਤ੍ਵਾ.

੧੦੯. ਸਸਕ੍ਕਂ ਨ ਕਰਣੀਯਨ੍ਤਿ ਏਕਂਸੇਨੇਵ ਨ ਕਾਤਬ੍ਬਂ. ਪਟਿਸਂਹਰੇਯ੍ਯਾਸੀਤਿ ਨਿਵਤ੍ਤੇਯ੍ਯਾਸਿ ਮਾ ਕਰੇਯ੍ਯਾਸਿ. ਅਨੁਪਦਜ੍ਜੇਯ੍ਯਾਸੀਤਿ ਅਨੁਪਦੇਯ੍ਯਾਸਿ ਉਪਤ੍ਥਮ੍ਭੇਯ੍ਯਾਸਿ ਪੁਨਪ੍ਪੁਨਂ ਕਰੇਯ੍ਯਾਸਿ. ਅਹੋਰਤ੍ਤਾਨੁਸਿਕ੍ਖੀਤਿ ਰਤ੍ਤਿਞ੍ਚ ਦਿਵਞ੍ਚ ਸਿਕ੍ਖਮਾਨੋ.

੧੧੧. ਅਟ੍ਟੀਯਿਤਬ੍ਬਨ੍ਤਿ ਅਟ੍ਟੇਨ ਪੀਲ਼ਿਤੇਨ ਭਵਿਤਬ੍ਬਂ. ਹਰਾਯਿਤਬ੍ਬਨ੍ਤਿ ਲਜ੍ਜਿਤਬ੍ਬਂ. ਜਿਗੁਚ੍ਛਿਤਬ੍ਬਨ੍ਤਿ ਗੂਥਂ ਦਿਸ੍ਵਾ ਵਿਯ ਜਿਗੁਚ੍ਛਾ ਉਪ੍ਪਾਦੇਤਬ੍ਬਾ. ਮਨੋਕਮ੍ਮਸ੍ਸ ਪਨ ਅਦੇਸਨਾਵਤ੍ਥੁਕਤ੍ਤਾ ਇਧ ਦੇਸੇਤਬ੍ਬਨ੍ਤਿ ਨ ਵੁਤ੍ਤਂ. ਕਿਤ੍ਤਕੇ ਪਨ ਠਾਨੇ ਕਾਯਕਮ੍ਮਵਚੀਕਮ੍ਮਾਨਿ ਸੋਧੇਤਬ੍ਬਾਨਿ, ਕਿਤ੍ਤਕੇ ਮਨੋਕਮ੍ਮਨ੍ਤਿ. ਕਾਯਕਮ੍ਮਵਚੀਕਮ੍ਮਾਨਿ ਤਾਵ ਏਕਸ੍ਮਿਂ ਪੁਰੇਭਤ੍ਤੇਯੇਵ ਸੋਧੇਤਬ੍ਬਾਨਿ. ਭਤ੍ਤਕਿਚ੍ਚਂ ਕਤ੍ਵਾ ਦਿਵਾਟ੍ਠਾਨੇ ਨਿਸਿਨ੍ਨੇਨ ਹਿ ਪਚ੍ਚਵੇਕ੍ਖਿਤਬ੍ਬਂ ‘‘ਅਰੁਣੁਗ੍ਗਮਨਤੋ ਪਟ੍ਠਾਯ ਯਾਵ ਇਮਸ੍ਮਿਂ ਠਾਨੇ ਨਿਸਜ੍ਜਾ ਅਤ੍ਥਿ ਨੁ ਖੋ ਮੇ ਇਮਸ੍ਮਿਂ ਅਨ੍ਤਰੇ ਪਰੇਸਂ ਅਪ੍ਪਿਯਂ ਕਾਯਕਮ੍ਮਂ ਵਾ ਵਚੀਕਮ੍ਮਂ ਵਾ’’ਤਿ. ਸਚੇ ਅਤ੍ਥੀਤਿ ਜਾਨਾਤਿ, ਦੇਸਨਾਯੁਤ੍ਤਂ ਦੇਸੇਤਬ੍ਬਂ, ਆਵਿਕਰਣਯੁਤ੍ਤਂ ਆਵਿਕਾਤਬ੍ਬਂ. ਸਚੇ ਨਤ੍ਥਿ, ਤੇਨੇਵ ਪੀਤਿਪਾਮੋਜ੍ਜੇਨ ਵਿਹਾਤਬ੍ਬਂ. ਮਨੋਕਮ੍ਮਂ ਪਨ ਏਤਸ੍ਮਿਂ ਪਿਣ੍ਡਪਾਤਪਰਿਯੇਸਨਟ੍ਠਾਨੇ ਸੋਧੇਤਬ੍ਬਂ. ਕਥਂ? ‘‘ਅਤ੍ਥਿ ਨੁ ਖੋ ਮੇ ਅਜ੍ਜ ਪਿਣ੍ਡਪਾਤਪਰਿਯੇਸਨਟ੍ਠਾਨੇ ਰੂਪਾਦੀਸੁ ਛਨ੍ਦੋ ਵਾ ਰਾਗੋ ਵਾ ਪਟਿਘਂ ਵਾ’’ਤਿ? ਸਚੇ ਅਤ੍ਥਿ, ‘‘ਪੁਨ ਨ ਏਵਂ ਕਰਿਸ੍ਸਾਮੀ’’ਤਿ ਚਿਤ੍ਤੇਨੇਵ ਅਧਿਟ੍ਠਾਤਬ੍ਬਂ. ਸਚੇ ਨਤ੍ਥਿ, ਤੇਨੇਵ ਪੀਤਿਪਾਮੋਜ੍ਜੇਨ ਵਿਹਾਤਬ੍ਬਂ.

੧੧੨. ਸਮਣਾ ਵਾ ਬ੍ਰਾਹ੍ਮਣਾ ਵਾਤਿ ਬੁਦ੍ਧਾ ਵਾ ਪਚ੍ਚੇਕਬੁਦ੍ਧਾ ਵਾ ਤਥਾਗਤਸਾਵਕਾ ਵਾ. ਤਸ੍ਮਾਤਿਹਾਤਿ ਯਸ੍ਮਾ ਅਤੀਤੇਪਿ ਏਵਂ ਪਰਿਸੋਧੇਸੁਂ, ਅਨਾਗਤੇਪਿ ਪਰਿਸੋਧੇਸ੍ਸਨ੍ਤਿ, ਏਤਰਹਿਪਿ ਪਰਿਸੋਧੇਨ੍ਤਿ, ਤਸ੍ਮਾ ਤੁਮ੍ਹੇਹਿਪਿ ਤੇਸਂ ਅਨੁਸਿਕ੍ਖਨ੍ਤੇਹਿ ਏਵਂ ਸਿਕ੍ਖਿਤਬ੍ਬਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਇਮਂ ਪਨ ਦੇਸਨਂ ਭਗਵਾ ਯਾਵ ਭਵਗ੍ਗਾ ਉਸ੍ਸਿਤਸ੍ਸ ਰਤਨਰਾਸਿਨੋ ਯੋਜਨਿਯਮਣਿਕ੍ਖਨ੍ਧੇਨ ਕੂਟਂ ਗਣ੍ਹਨ੍ਤੋ ਵਿਯ ਨੇਯ੍ਯਪੁਗ੍ਗਲਵਸੇਨ ਪਰਿਨਿਟ੍ਠਾਪੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਮ੍ਬਲਟ੍ਠਿਕਰਾਹੁਲੋਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.