੮. ਮਹਾਹਤ੍ਥਿਪਦੋਪਮਸੁਤ੍ਤਵਣ੍ਣਨਾ

੩੦੦. ਏਵਂ ਮੇ ਸੁਤਨ੍ਤਿ ਮਹਾਹਤ੍ਥਿਪਦੋਪਮਸੁਤ੍ਤਂ. ਤਤ੍ਥ ਜਙ੍ਗਲਾਨਨ੍ਤਿ ਪਥਵੀਤਲਚਾਰੀਨਂ. ਪਾਣਾਨਨ੍ਤਿ ਸਪਾਦਕਪਾਣਾਨਂ. ਪਦਜਾਤਾਨੀਤਿ ਪਦਾਨਿ. ਸਮੋਧਾਨਂ ਗਚ੍ਛਨ੍ਤੀਤਿ ਓਧਾਨਂ ਪਕ੍ਖੇਪਂ ਗਚ੍ਛਨ੍ਤਿ. ਅਗ੍ਗਮਕ੍ਖਾਯਤੀਤਿ ਸੇਟ੍ਠਂ ਅਕ੍ਖਾਯਤਿ. ਯਦਿਦਂ ਮਹਨ੍ਤਤ੍ਤੇਨਾਤਿ ਮਹਨ੍ਤਭਾਵੇਨ ਅਗ੍ਗਂ ਅਕ੍ਖਾਯਤਿ, ਨ ਗੁਣਵਸੇਨਾਤਿ ਅਤ੍ਥੋ. ਯੇ ਕੇਚਿ ਕੁਸਲਾ ਧਮ੍ਮਾਤਿ ਯੇ ਕੇਚਿ ਲੋਕਿਯਾ ਵਾ ਲੋਕੁਤ੍ਤਰਾ ਵਾ ਕੁਸਲਾ ਧਮ੍ਮਾ. ਸਙ੍ਗਹਂ ਗਚ੍ਛਨ੍ਤੀਤਿ ਏਤ੍ਥ ਚਤੁਬ੍ਬਿਧੋ ਸਙ੍ਗਹੋ – ਸਜਾਤਿਸਙ੍ਗਹੋ, ਸਞ੍ਜਾਤਿਸਙ੍ਗਹੋ, ਕਿਰਿਯਸਙ੍ਗਹੋ, ਗਣਨਸਙ੍ਗਹੋਤਿ. ਤਤ੍ਥ ‘‘ਸਬ੍ਬੇ ਖਤ੍ਤਿਯਾ ਆਗਚ੍ਛਨ੍ਤੁ ਸਬ੍ਬੇ ਬ੍ਰਾਹ੍ਮਣਾ’’ਤਿ ਏਵਂ ਸਮਾਨਜਾਤਿਵਸੇਨ ਸਙ੍ਗਹੋ ਸਜਾਤਿਸਙ੍ਗਹੋ ਨਾਮ. ‘‘ਸਬ੍ਬੇ ਕੋਸਲਕਾ ਸਬ੍ਬੇ ਮਾਗਧਕਾ’’ਤਿ ਏਵਂ ਸਞ੍ਜਾਤਿਦੇਸਵਸੇਨ ਸਙ੍ਗਹੋ ਸਞ੍ਜਾਤਿਸਙ੍ਗਹੋ ਨਾਮ. ‘‘ਸਬ੍ਬੇ ਰਥਿਕਾ ਸਬ੍ਬੇ ਧਨੁਗ੍ਗਹਾ’’ਤਿ ਏਵਂ ਕਿਰਿਯਵਸੇਨ ਸਙ੍ਗਹੋ ਕਿਰਿਯਸਙ੍ਗਹੋ ਨਾਮ. ‘‘ਚਕ੍ਖਾਯਤਨਂ ਕਤਮਕ੍ਖਨ੍ਧਗਣਨਂ ਗਚ੍ਛਤੀਤਿ? ਚਕ੍ਖਾਯਤਨਂ ਰੂਪਕ੍ਖਨ੍ਧਗਣਨਂ ਗਚ੍ਛਤਿ. ਹਞ੍ਚਿ ਚਕ੍ਖਾਯਤਨਂ ਰੂਪਕ੍ਖਨ੍ਧਗਣਨਂ ਗਚ੍ਛਤਿ, ਤੇਨ ਵਤ ਰੇ ਵਤ੍ਤਬ੍ਬੇ ਚਕ੍ਖਾਯਤਨਂ ਰੂਪਕ੍ਖਨ੍ਧੇਨ ਸਙ੍ਗਹਿਤ’’ਨ੍ਤਿ (ਕਥਾ. ੪੭੧), ਅਯਂ ਗਣਨਸਙ੍ਗਹੋ ਨਾਮ. ਇਮਸ੍ਮਿਮ੍ਪਿ ਠਾਨੇ ਅਯਮੇਵ ਅਧਿਪ੍ਪੇਤੋ.

ਨਨੁ ਚ ‘‘ਚਤੁਨ੍ਨਂ ਅਰਿਯਸਚ੍ਚਾਨਂ ਕਤਿ ਕੁਸਲਾ ਕਤਿ ਅਕੁਸਲਾ ਕਤਿ ਅਬ੍ਯਾਕਤਾਤਿ ਪਞ੍ਹਸ੍ਸ ਵਿਸ੍ਸਜ੍ਜਨੇ ਸਮੁਦਯਸਚ੍ਚਂ ਅਕੁਸਲਂ, ਮਗ੍ਗਸਚ੍ਚਂ ਕੁਸਲਂ, ਨਿਰੋਧਸਚ੍ਚਂ ਅਬ੍ਯਾਕਤਂ, ਦੁਕ੍ਖਸਚ੍ਚਂ ਸਿਯਾ ਕੁਸਲਂ, ਸਿਯਾ ਅਕੁਸਲਂ, ਸਿਯਾ ਅਬ੍ਯਾਕਤ’’ਨ੍ਤਿ (ਵਿਭ. ੨੧੬-੨੧੭) ਆਗਤਤ੍ਤਾ ਚਤੁਭੂਮਕਮ੍ਪਿ ਕੁਸਲਂ ਦਿਯਡ੍ਢਮੇਵ ਸਚ੍ਚਂ ਭਜਤਿ. ਅਥ ਕਸ੍ਮਾ ਮਹਾਥੇਰੋ ਚਤੂਸੁ ਅਰਿਯਸਚ੍ਚੇਸੁ ਗਣਨਂ ਗਚ੍ਛਤੀਤਿ ਆਹਾਤਿ? ਸਚ੍ਚਾਨਂ ਅਨ੍ਤੋਗਧਤ੍ਤਾ. ਯਥਾ ਹਿ ‘‘ਸਾਧਿਕਮਿਦਂ, ਭਿਕ੍ਖਵੇ, ਦਿਯਡ੍ਢਸਿਕ੍ਖਾਪਦਸਤਂ ਅਨ੍ਵਦ੍ਧਮਾਸਂ ਉਦ੍ਦੇਸਂ ਆਗਚ੍ਛਤਿ, ਯਤ੍ਥ ਅਤ੍ਤਕਾਮਾ ਕੁਲਪੁਤ੍ਤਾ ਸਿਕ੍ਖਨ੍ਤਿ. ਤਿਸ੍ਸੋ ਇਮਾ, ਭਿਕ੍ਖਵੇ, ਸਿਕ੍ਖਾ ਅਧਿਸੀਲਸਿਕ੍ਖਾ ਅਧਿਚਿਤ੍ਤਸਿਕ੍ਖਾ ਅਧਿਪਞ੍ਞਾਸਿਕ੍ਖਾ’’ਤਿ (ਅ. ਨਿ. ੩.੮੮) ਏਤ੍ਥ ਸਾਧਿਕਮਿਦਂ ਦਿਯਡ੍ਢਸਿਕ੍ਖਾਪਦਸਤਂ ਏਕਾ ਅਧਿਸੀਲਸਿਕ੍ਖਾਵ ਹੋਤਿ, ਤਂ ਸਿਕ੍ਖਨ੍ਤੋਪਿ ਤਿਸ੍ਸੋ ਸਿਕ੍ਖਾ ਸਿਕ੍ਖਤੀਤਿ ਦਸ੍ਸਿਤੋ, ਸਿਕ੍ਖਾਨਂ ਅਨ੍ਤੋਗਧਤ੍ਤਾ. ਯਥਾ ਚ ਏਕਸ੍ਸ ਹਤ੍ਥਿਪਦਸ੍ਸ ਚਤੂਸੁ ਕੋਟ੍ਠਾਸੇਸੁ ਏਕਸ੍ਮਿਂ ਕੋਟ੍ਠਾਸੇ ਓਤਿਣ੍ਣਾਨਿਪਿ ਦ੍ਵੀਸੁ ਤੀਸੁ ਚਤੂਸੁ ਕੋਟ੍ਠਾਸੇਸੁ ਓਤਿਣ੍ਣਾਨਿਪਿ ਸਿਙ੍ਗਾਲਸਸਮਿਗਾਦੀਨਂ ਪਾਦਾਨਿ ਹਤ੍ਥਿਪਦੇ ਸਮੋਧਾਨਂ ਗਤਾਨੇਵ ਹੋਨ੍ਤਿ. ਹਤ੍ਥਿਪਦਤੋ ਅਮੁਚ੍ਚਿਤ੍ਵਾ ਤਸ੍ਸੇਵ ਅਨ੍ਤੋਗਧਤ੍ਤਾ. ਏਵਮੇਵ ਏਕਸ੍ਮਿਮ੍ਪਿ ਦ੍ਵੀਸੁਪਿ ਤੀਸੁਪਿ ਚਤੂਸੁਪਿ ਸਚ੍ਚੇਸੁ ਗਣਨਂ ਗਤਾ ਧਮ੍ਮਾ ਚਤੂਸੁ ਸਚ੍ਚੇਸੁ ਗਣਨਂ ਗਤਾਵ ਹੋਨ੍ਤਿ; ਸਚ੍ਚਾਨਂ ਅਨ੍ਤੋਗਧਤ੍ਤਾਤਿ ਦਿਯਡ੍ਢਸਚ੍ਚਗਣਨਂ ਗਤੇਪਿ ਕੁਸਲਧਮ੍ਮੇ ‘‘ਸਬ੍ਬੇ ਤੇ ਚਤੂਸੁ ਅਰਿਯਸਚ੍ਚੇਸੁ ਸਙ੍ਗਹਂ ਗਚ੍ਛਨ੍ਤੀ’’ਤਿ ਆਹ. ‘‘ਦੁਕ੍ਖੇ ਅਰਿਯਸਚ੍ਚੇ’’ਤਿਆਦੀਸੁ ਉਦ੍ਦੇਸਪਦੇਸੁ ਚੇਵ ਜਾਤਿਪਿ ਦੁਕ੍ਖਾਤਿਆਦੀਸੁ ਨਿਦ੍ਦੇਸਪਦੇਸੁ ਚ ਯਂ ਵਤ੍ਤਬ੍ਬਂ, ਤਂ ਵਿਸੁਦ੍ਧਿਮਗ੍ਗੇ ਵੁਤ੍ਤਮੇਵ. ਕੇਵਲਂ ਪਨੇਤ੍ਥ ਦੇਸਨਾਨੁਕ੍ਕਮੋਵ ਵੇਦਿਤਬ੍ਬੋ.

੩੦੧. ਯਥਾ ਹਿ ਛੇਕੋ ਵਿਲੀਵਕਾਰੋ ਸੁਜਾਤਂ ਵੇਲ਼ੁਂ ਲਭਿਤ੍ਵਾ ਚਤੁਧਾ ਛੇਤ੍ਵਾ ਤਤੋ ਤਯੋ ਕੋਟ੍ਠਾਸੇ ਠਪੇਤ੍ਵਾ ਏਕਂ ਗਣ੍ਹਿਤ੍ਵਾ ਪਞ੍ਚਧਾ ਭਿਨ੍ਦੇਯ੍ਯ, ਤਤੋਪਿ ਚਤ੍ਤਾਰੋ ਠਪੇਤ੍ਵਾ ਏਕਂ ਗਣ੍ਹਿਤ੍ਵਾ ਫਾਲੇਨ੍ਤੋ ਪਞ੍ਚ ਪੇਸਿਯੋ ਕਰੇਯ੍ਯ, ਤਤੋ ਚਤਸ੍ਸੋ ਠਪੇਤ੍ਵਾ ਏਕਂ ਗਣ੍ਹਿਤ੍ਵਾ ਕੁਚ੍ਛਿਭਾਗਂ ਪਿਟ੍ਠਿਭਾਗਨ੍ਤਿ ਦ੍ਵਿਧਾ ਫਾਲੇਤ੍ਵਾ ਪਿਟ੍ਠਿਭਾਗਂ ਠਪੇਤ੍ਵਾ ਕੁਚ੍ਛਿਭਾਗਂ ਆਦਾਯ ਤਤੋ ਸਮੁਗ੍ਗਬੀਜਨਿਤਾਲਵਣ੍ਟਾਦਿਨਾਨਪ੍ਪਕਾਰਂ ਵੇਲ਼ੁਵਿਕਤਿਂ ਕਰੇਯ੍ਯ, ਸੋ ਪਿਟ੍ਠਿਭਾਗਞ੍ਚ ਇਤਰਾ ਚ ਚਤਸ੍ਸੋ ਪੇਸਿਯੋ ਇਤਰੇ ਚ ਚਤ੍ਤਾਰੋ ਕੋਟ੍ਠਾਸੇ ਇਤਰੇ ਚ ਤਯੋ ਕੋਟ੍ਠਾਸੇ ਕਮ੍ਮਾਯ ਨ ਉਪਨੇਸ੍ਸਤੀਤਿ ਨ ਵਤ੍ਤਬ੍ਬੋ. ਏਕਪ੍ਪਹਾਰੇਨ ਪਨ ਉਪਨੇਤੁਂ ਨ ਸਕ੍ਕਾ, ਅਨੁਪੁਬ੍ਬੇਨ ਉਪਨੇਸ੍ਸਤਿ. ਏਵਮੇਵ ਅਯਂ ਮਹਾਥੇਰੋਪਿ ਵਿਲੀਵਕਾਰੋ ਸੁਜਾਤਂ ਵੇਲ਼ੁਂ ਲਭਿਤ੍ਵਾ ਚਤ੍ਤਾਰੋ ਕੋਟ੍ਠਾਸੇ ਵਿਯ, ਇਮਂ ਮਹਨ੍ਤਂ ਸੁਤ੍ਤਨ੍ਤਂ ਆਰਭਿਤ੍ਵਾ ਚਤੁਅਰਿਯਸਚ੍ਚਵਸੇਨ ਮਾਤਿਕਂ ਠਪੇਸਿ. ਵਿਲੀਵਕਾਰਸ੍ਸ ਤਯੋ ਕੋਟ੍ਠਾਸੇ ਠਪੇਤ੍ਵਾ ਏਕਂ ਗਹੇਤ੍ਵਾ ਤਸ੍ਸ ਪਞ੍ਚਧਾ ਕਰਣਂ ਵਿਯ ਥੇਰਸ੍ਸ ਤੀਣਿ ਅਰਿਯਸਚ੍ਚਾਨਿ ਠਪੇਤ੍ਵਾ ਏਕਂ ਦੁਕ੍ਖਸਚ੍ਚਂ ਗਹੇਤ੍ਵਾ ਭਾਜੇਨ੍ਤਸ੍ਸ ਖਨ੍ਧਵਸੇਨ ਪਞ੍ਚਧਾ ਕਰਣਂ. ਤਤੋ ਯਥਾ ਸੋ ਵਿਲੀਵਕਾਰੋ ਚਤ੍ਤਾਰੋ ਕੋਟ੍ਠਾਸੇ ਠਪੇਤ੍ਵਾ ਏਕਂ ਭਾਗਂ ਗਹੇਤ੍ਵਾ ਪਞ੍ਚਧਾ ਫਾਲੇਸਿ, ਏਵਂ ਥੇਰੋ ਚਤ੍ਤਾਰੋ ਅਰੂਪਕ੍ਖਨ੍ਧੇ ਠਪੇਤ੍ਵਾ ਰੂਪਕ੍ਖਨ੍ਧਂ ਵਿਭਜਨ੍ਤੋ ਚਤ੍ਤਾਰਿ ਚ ਮਹਾਭੂਤਾਨਿ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯ ਰੂਪਨ੍ਤਿ ਪਞ੍ਚਧਾ ਅਕਾਸਿ. ਤਤੋ ਯਥਾ ਸੋ ਵਿਲੀਵਕਾਰੋ ਚਤਸ੍ਸੋ ਪੇਸਿਯੋ ਠਪੇਤ੍ਵਾ ਏਕਂ ਗਹੇਤ੍ਵਾ ਕੁਚ੍ਛਿਭਾਗਂ ਪਿਟ੍ਠਿਭਾਗਨ੍ਤਿ ਦ੍ਵਿਧਾ ਫਾਲੇਸਿ, ਏਵਂ ਥੇਰੋ ਉਪਾਦਾਯ ਰੂਪਞ੍ਚ ਤਿਸ੍ਸੋ ਚ ਧਾਤੁਯੋ ਠਪੇਤ੍ਵਾ ਏਕਂ ਪਥਵੀਧਾਤੁਂ ਵਿਭਜਨ੍ਤੋ ਅਜ੍ਝਤ੍ਤਿਕਬਾਹਿਰਵਸੇਨ ਦ੍ਵਿਧਾ ਦਸ੍ਸੇਸਿ. ਯਥਾ ਸੋ ਵਿਲੀਵਕਾਰੋ ਪਿਟ੍ਠਿਭਾਗਂ ਠਪੇਤ੍ਵਾ ਕੁਚ੍ਛਿਭਾਗਂ ਆਦਾਯ ਨਾਨਪ੍ਪਕਾਰਂ ਵਿਲੀਵਵਿਕਤਿਂ ਅਕਾਸਿ, ਏਵਂ ਥੇਰੋ ਬਾਹਿਰਂ ਪਥਵੀਧਾਤੁਂ ਠਪੇਤ੍ਵਾ ਅਜ੍ਝਤ੍ਤਿਕਂ ਪਥਵੀਧਾਤੁਂ ਵੀਸਤਿਯਾ ਆਕਾਰੇਹਿ ਵਿਭਜਿਤ੍ਵਾ ਦਸ੍ਸੇਤੁਂ ਕਤਮਾ ਚਾਵੁਸੋ, ਅਜ੍ਝਤ੍ਤਿਕਾ ਪਥਵੀਧਾਤੂਤਿਆਦਿਮਾਹ.

ਯਥਾ ਪਨ ਵਿਲੀਵਕਾਰੋ ਪਿਟ੍ਠਿਭਾਗਞ੍ਚ ਇਤਰਾ ਚ ਚਤ੍ਤਸ੍ਸੋ ਪੇਸਿਯੋ ਇਤਰੇ ਚ ਚਤ੍ਤਾਰੋ ਕੋਟ੍ਠਾਸੇ ਇਤਰੇ ਚ ਤਯੋ ਕੋਟ੍ਠਾਸੇ ਅਨੁਪੁਬ੍ਬੇਨ ਕਮ੍ਮਾਯ ਉਪਨੇਸ੍ਸਤਿ, ਨ ਹਿ ਸਕ੍ਕਾ ਏਕਪ੍ਪਹਾਰੇਨ ਉਪਨੇਤੁਂ, ਏਵਂ ਥੇਰੋਪਿ ਬਾਹਿਰਞ੍ਚ ਪਥਵੀਧਾਤੁਂ ਇਤਰਾ ਚ ਤਿਸ੍ਸੋ ਧਾਤੁਯੋ ਉਪਾਦਾਰੂਪਞ੍ਚ ਇਤਰੇ ਚ ਚਤ੍ਤਾਰੋ ਅਰੂਪਿਨੋ ਖਨ੍ਧੇ ਇਤਰਾਨਿ ਚ ਤੀਣਿ ਅਰਿਯਸਚ੍ਚਾਨਿ ਅਨੁਪੁਬ੍ਬੇਨ ਵਿਭਜਿਤ੍ਵਾ ਦਸ੍ਸੇਸ੍ਸਤਿ, ਨ ਹਿ ਸਕ੍ਕਾ ਏਕਪ੍ਪਹਾਰੇਨ ਦਸ੍ਸੇਤੁਂ. ਅਪਿਚ ਰਾਜਪੁਤ੍ਤੂਪਮਾਯਪਿ ਅਯਂ ਕਮੋ ਵਿਭਾਵੇਤਬ੍ਬੋ –

ਏਕੋ ਕਿਰ ਮਹਾਰਾਜਾ, ਤਸ੍ਸ ਪਰੋਸਹਸ੍ਸਂ ਪੁਤ੍ਤਾ. ਸੋ ਤੇਸਂ ਪਿਲ਼ਨ੍ਧਨਪਰਿਕ੍ਖਾਰਂ ਚਤੂਸੁ ਪੇਲ਼ਾਸੁ ਠਪੇਤ੍ਵਾ ਜੇਟ੍ਠਪੁਤ੍ਤਸ੍ਸ ਅਪ੍ਪੇਸਿ – ‘‘ਇਦਂ ਤੇ, ਤਾਤ, ਭਾਤਿਕਾਨਂ ਪਿਲ਼ਨ੍ਧਨਭਣ੍ਡਂ ਤਥਾਰੂਪੇ ਛਣੇ ਸਮ੍ਪਤ੍ਤੇ ਪਿਲ਼ਨ੍ਧਨਂ ਨੋ ਦੇਹੀਤਿ ਯਾਚਨ੍ਤਾਨਂ ਦਦੇਯ੍ਯਾਸੀ’’ਤਿ. ਸੋ ‘‘ਸਾਧੁ ਦੇਵਾ’’ਤਿ ਸਾਰਗਬ੍ਭੇ ਪਟਿਸਾਮੇਸਿ, ਤਥਾਰੂਪੇ ਛਣਦਿਵਸੇ ਰਾਜਪੁਤ੍ਤਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ‘‘ਪਿਲ਼ਨ੍ਧਨਂ ਨੋ, ਤਾਤ, ਦੇਥ, ਨਕ੍ਖਤ੍ਤਂ ਕੀਲ਼ਿਸ੍ਸਾਮਾ’’ਤਿ ਆਹਂਸੁ. ਤਾਤਾ, ਜੇਟ੍ਠਭਾਤਿਕਸ੍ਸ ਵੋ ਹਤ੍ਥੇ ਮਯਾ ਪਿਲ਼ਨ੍ਧਨਂ ਠਪਿਤਂ, ਤਂ ਆਹਰਾਪੇਤ੍ਵਾ ਪਿਲ਼ਨ੍ਧਥਾਤਿ. ਤੇ ਸਾਧੂਤਿ ਪਟਿਸ੍ਸੁਣਿਤ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ, ‘‘ਤੁਮ੍ਹਾਕਂ ਕਿਰ ਨੋ ਹਤ੍ਥੇ ਪਿਲ਼ਨ੍ਧਨਭਣ੍ਡਂ, ਤਂ ਦੇਥਾ’’ਤਿ ਆਹਂਸੁ. ਸੋ ਏਵਂ ਕਰਿਸ੍ਸਾਮੀਤਿ ਗਬ੍ਭਂ ਵਿਵਰਿਤ੍ਵਾ, ਚਤਸ੍ਸੋ ਪੇਲ਼ਾਯੋ ਨੀਹਰਿਤ੍ਵਾ ਤਿਸ੍ਸੋ ਠਪੇਤ੍ਵਾ ਏਕਂ ਵਿਵਰਿਤ੍ਵਾ, ਤਤੋ ਪਞ੍ਚ ਸਮੁਗ੍ਗੇ ਨੀਹਰਿਤ੍ਵਾ ਚਤ੍ਤਾਰੋ ਠਪੇਤ੍ਵਾ ਏਕਂ ਵਿਵਰਿਤ੍ਵਾ, ਤਤੋ ਪਞ੍ਚਸੁ ਕਰਣ੍ਡੇਸੁ ਨੀਹਰਿਤੇਸੁ ਚਤ੍ਤਾਰੋ ਠਪੇਤ੍ਵਾ ਏਕਂ ਵਿਵਰਿਤ੍ਵਾ ਪਿਧਾਨਂ ਪਸ੍ਸੇ ਠਪੇਤ੍ਵਾ ਤਤੋ ਹਤ੍ਥੂਪਗਪਾਦੂਪਗਾਦੀਨਿ ਨਾਨਪ੍ਪਕਾਰਾਨਿ ਪਿਲ਼ਨ੍ਧਨਾਨਿ ਨੀਹਰਿਤ੍ਵਾ ਅਦਾਸਿ. ਸੋ ਕਿਞ੍ਚਾਪਿ ਇਤਰੇਹਿ ਚਤੂਹਿ ਕਰਣ੍ਡੇਹਿ ਇਤਰੇਹਿ ਚਤੂਹਿ ਸਮੁਗ੍ਗੇਹਿ ਇਤਰਾਹਿ ਤੀਹਿ ਪੇਲ਼ਾਹਿ ਨ ਤਾਵ ਭਾਜੇਤ੍ਵਾ ਦੇਤਿ, ਅਨੁਪੁਬ੍ਬੇਨ ਪਨ ਦਸ੍ਸਤਿ, ਨ ਹਿ ਸਕ੍ਕਾ ਏਕਪ੍ਪਹਾਰੇਨ ਦਾਤੁਂ.

ਤਤ੍ਥ ਮਹਾਰਾਜਾ ਵਿਯ ਭਗਵਾ ਦਟ੍ਠਬ੍ਬੋ. ਵੁਤ੍ਤਮ੍ਪਿ ਚੇਤਂ – ‘‘ਰਾਜਾਹਮਸ੍ਮਿ ਸੇਲਾਤਿ ਭਗਵਾ, ਧਮ੍ਮਰਾਜਾ ਅਨੁਤ੍ਤਰੋ’’ਤਿ (ਸੁ. ਨਿ. ੫੫੯). ਜੇਟ੍ਠਪੁਤ੍ਤੋ ਵਿਯ ਸਾਰਿਪੁਤ੍ਤਤ੍ਥੇਰੋ, ਵੁਤ੍ਤਮ੍ਪਿ ਚੇਤਂ – ‘‘ਯਂ ਖੋ ਤਂ, ਭਿਕ੍ਖਵੇ, ਸਮ੍ਮਾ ਵਦਮਾਨੋ ਵਦੇਯ੍ਯ, ‘ਭਗਵਤੋ ਪੁਤ੍ਤੋ ਓਰਸੋ ਮੁਖਤੋ ਜਾਤੋ ਧਮ੍ਮਜੋ ਧਮ੍ਮਨਿਮ੍ਮਿਤੋ ਧਮ੍ਮਦਾਯਾਦੋ, ਨੋ ਆਮਿਸਦਾਯਾਦੋ’ਤਿ ਸਾਰਿਪੁਤ੍ਤਮੇਵ ਤਂ ਸਮ੍ਮਾ ਵਦਮਾਨੋ ਵਦੇਯ੍ਯ, ਭਗਵਤੋ ਪੁਤ੍ਤੋ…ਪੇ… ਨੋ ਆਮਿਸਦਾਯਾਦੋ’’ਤਿ (ਮ. ਨਿ. ੩.੯੭). ਪਰੋਸਹਸ੍ਸਰਾਜਪੁਤ੍ਤਾ ਵਿਯ ਭਿਕ੍ਖੁਸਙ੍ਘੋ ਦਟ੍ਠਬ੍ਬੋ. ਵੁਤ੍ਤਮ੍ਪਿ ਚੇਤਂ –

‘‘ਪਰੋਸਹਸ੍ਸਂ ਭਿਕ੍ਖੂਨਂ, ਸੁਗਤਂ ਪਯਿਰੁਪਾਸਤਿ;

ਦੇਸੇਨ੍ਤਂ ਵਿਰਜਂ ਧਮ੍ਮਂ, ਨਿਬ੍ਬਾਨਂ ਅਕੁਤੋਭਯ’’ਨ੍ਤਿ. (ਸਂ. ਨਿ. ੧.੨੧੬);

ਰਞ੍ਞੋ ਤੇਸਂ ਪੁਤ੍ਤਾਨਂ ਪਿਲ਼ਨ੍ਧਨਂ ਚਤੂਸੁ ਪੇਲ਼ਾਸੁ ਪਕ੍ਖਿਪਿਤ੍ਵਾ ਜੇਟ੍ਠਪੁਤ੍ਤਸ੍ਸ ਹਤ੍ਥੇ ਠਪਿਤਕਾਲੋ ਵਿਯ ਭਗਵਤੋ ਧਮ੍ਮਸੇਨਾਪਤਿਸ੍ਸ ਹਤ੍ਥੇ ਚਤੁਸਚ੍ਚਪ੍ਪਕਾਸਨਾਯ ਠਪਿਤਕਾਲੋ, ਤੇਨੇਵਾਹ – ‘‘ਸਾਰਿਪੁਤ੍ਤੋ, ਭਿਕ੍ਖਵੇ, ਪਹੋਤਿ ਚਤ੍ਤਾਰਿ ਅਰਿਯਸਚ੍ਚਾਨਿ ਵਿਤ੍ਥਾਰੇਨ ਆਚਿਕ੍ਖਿਤੁਂ ਦੇਸੇਤੁਂ ਪਞ੍ਞਾਪੇਤੁਂ ਪਟ੍ਠਪੇਤੁਂ ਵਿਵਰਿਤੁਂ ਵਿਭਜਿਤੁਂ ਉਤ੍ਤਾਨੀਕਾਤੁ’’ਨ੍ਤਿ (ਮ. ਨਿ. ੩.੩੭੧). ਤਥਾਰੂਪੇ ਖਣੇ ਤੇਸਂ ਰਾਜਪੁਤ੍ਤਾਨਂ ਤਂ ਰਾਜਾਨਂ ਉਪਸਙ੍ਕਮਿਤ੍ਵਾ ਪਿਲ਼ਨ੍ਧਨਂ ਯਾਚਨਕਾਲੋ ਵਿਯ ਭਿਕ੍ਖੁਸਙ੍ਘਸ੍ਸ ਵਸ੍ਸੂਪਨਾਯਿਕਸਮਯੇ ਆਗਨ੍ਤ੍ਵਾ ਧਮ੍ਮਦੇਸਨਾਯ ਯਾਚਿਤਕਾਲੋ. ਉਪਕਟ੍ਠਾਯ ਕਿਰ ਵਸ੍ਸੂਪਨਾਯਿਕਾਯ ਇਦਂ ਸੁਤ੍ਤਂ ਦੇਸਿਤਂ. ਰਞ੍ਞੋ, ‘‘ਤਾਤਾ, ਜੇਟ੍ਠਭਾਤਿਕਸ੍ਸ ਵੋ ਹਤ੍ਥੇ ਮਯਾ ਪਿਲ਼ਨ੍ਧਨਂ ਠਪਿਤਂ ਤਂ ਆਹਰਾਪੇਤ੍ਵਾ ਪਿਲ਼ਨ੍ਧਥਾ’’ਤਿ ਵੁਤ੍ਤਕਾਲੋ ਵਿਯ ਸਮ੍ਬੁਦ੍ਧੇਨਾਪਿ, ‘‘ਸੇਵੇਥ, ਭਿਕ੍ਖਵੇ, ਸਾਰਿਪੁਤ੍ਤਮੋਗ੍ਗਲ੍ਲਾਨੇ, ਭਜਥ, ਭਿਕ੍ਖਵੇ, ਸਾਰਿਪੁਤ੍ਤਮੋਗ੍ਗਲ੍ਲਾਨੇ. ਪਣ੍ਡਿਤਾ ਭਿਕ੍ਖੂ ਅਨੁਗ੍ਗਾਹਕਾ ਸਬ੍ਰਹ੍ਮਚਾਰੀਨ’’ਨ੍ਤਿ ਏਵਂ ਧਮ੍ਮਸੇਨਾਪਤਿਨੋ ਸਨ੍ਤਿਕੇ ਭਿਕ੍ਖੂਨਂ ਪੇਸਿਤਕਾਲੋ.

ਰਾਜਪੁਤ੍ਤੇਹਿ ਰਞ੍ਞੋ ਕਥਂ ਸੁਤ੍ਵਾ ਜੇਟ੍ਠਭਾਤਿਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਿਲ਼ਨ੍ਧਨਂ ਯਾਚਿਤਕਾਲੋ ਵਿਯ ਭਿਕ੍ਖੂਹਿ ਸਤ੍ਥੁਕਥਂ ਸੁਤ੍ਵਾ ਧਮ੍ਮਸੇਨਾਪਤਿਂ ਉਪਸਙ੍ਕਮ੍ਮ ਧਮ੍ਮਦੇਸਨਂ ਆਯਾਚਿਤਕਾਲੋ. ਜੇਟ੍ਠਭਾਤਿਕਸ੍ਸ ਗਬ੍ਭਂ ਵਿਵਰਿਤ੍ਵਾ ਚਤਸ੍ਸੋ ਪੇਲ਼ਾਯੋ ਨੀਹਰਿਤ੍ਵਾ ਠਪਨਂ ਵਿਯ ਧਮ੍ਮਸੇਨਾਪਤਿਸ੍ਸ ਇਮਂ ਸੁਤ੍ਤਨ੍ਤਂ ਆਰਭਿਤ੍ਵਾ ਚਤੁਨ੍ਨਂ ਅਰਿਯਸਚ੍ਚਾਨਂ ਵਸੇਨ ਮਾਤਿਕਾਯ ਠਪਨਂ. ਤਿਸ੍ਸੋ ਪੇਲ਼ਾਯੋ ਠਪੇਤ੍ਵਾ ਏਕਂ ਵਿਵਰਿਤ੍ਵਾ ਤਤੋ ਪਞ੍ਚਸਮੁਗ੍ਗਨੀਹਰਣਂ ਵਿਯ ਤੀਣਿ ਅਰਿਯਸਚ੍ਚਾਨਿ ਠਪੇਤ੍ਵਾ ਦੁਕ੍ਖਂ ਅਰਿਯਸਚ੍ਚਂ ਵਿਭਜਨ੍ਤਸ੍ਸ ਪਞ੍ਚਕ੍ਖਨ੍ਧਦਸ੍ਸਨਂ. ਚਤ੍ਤਾਰੋ ਸਮੁਗ੍ਗੇ ਠਪੇਤ੍ਵਾ ਏਕਂ ਵਿਵਰਿਤ੍ਵਾ ਤਤੋ ਪਞ੍ਚਕਰਣ੍ਡਨੀਹਰਣਂ ਵਿਯ ਚਤ੍ਤਾਰੋ ਅਰੂਪਕ੍ਖਨ੍ਧੇ ਠਪੇਤ੍ਵਾ ਏਕਂ ਰੂਪਕ੍ਖਨ੍ਧਂ ਵਿਭਜਨ੍ਤਸ੍ਸ ਚਤੁਮਹਾਭੂਤਉਪਾਦਾਰੂਪਵਸੇਨ ਪਞ੍ਚਕੋਟ੍ਠਾਸਦਸ੍ਸਨਂ.

੩੦੨. ਚਤ੍ਤਾਰੋ ਕਰਣ੍ਡੇ ਠਪੇਤ੍ਵਾ ਏਕਂ ਵਿਵਰਿਤ੍ਵਾ ਪਿਧਾਨਂ ਪਸ੍ਸੇ ਠਪੇਤ੍ਵਾ ਹਤ੍ਥੂਪਗਪਾਦੂਪਗਾਦਿਪਿਲ਼ਨ੍ਧਨਦਾਨਂ ਵਿਯ ਤੀਣਿ ਮਹਾਭੂਤਾਨਿ ਉਪਾਦਾਰੂਪਞ੍ਚ ਠਪੇਤ੍ਵਾ ਏਕਂ ਪਥਵੀਧਾਤੁਂ ਵਿਭਜਨ੍ਤਸ੍ਸ ਬਾਹਿਰਂ ਤਾਵ ਪਿਧਾਨਂ ਵਿਯ ਠਪੇਤ੍ਵਾ ਅਜ੍ਝਤ੍ਤਿਕਾਯ ਪਥਵੀਧਾਤੁਯਾ ਨਾਨਾਸਭਾਵਤੋ ਵੀਸਤਿਯਾ ਆਕਾਰੇਹਿ ਦਸ੍ਸਨਤ੍ਥਂ ‘‘ਕਤਮਾ ਚਾਵੁਸੋ ਅਜ੍ਝਤ੍ਤਿਕਾ ਪਥਵੀਧਾਤੂ’’ਤਿਆਦਿਵਚਨਂ.

ਤਸ੍ਸ ਪਨ ਰਾਜਪੁਤ੍ਤਸ੍ਸ ਤੇਹਿ ਚਤੂਹਿ ਕਰਣ੍ਡੇਹਿ ਚਤੂਹਿ ਸਮੁਗ੍ਗੇਹਿ ਤੀਹਿ ਚ ਪੇਲ਼ਾਹਿ ਪਚ੍ਛਾ ਅਨੁਪੁਬ੍ਬੇਨ ਨੀਹਰਿਤ੍ਵਾ ਪਿਲ਼ਨ੍ਧਨਦਾਨਂ ਵਿਯ ਥੇਰਸ੍ਸਾਪਿ ਇਤਰੇਸਞ੍ਚ ਤਿਣ੍ਣਂ ਮਹਾਭੂਤਾਨਂ ਉਪਾਦਾਰੂਪਾਨਞ੍ਚ ਚਤੁਨ੍ਨਂ ਅਰੂਪਕ੍ਖਨ੍ਧਾਨਞ੍ਚ ਤਿਣ੍ਣਂ ਅਰਿਯਸਚ੍ਚਾਨਞ੍ਚ ਪਚ੍ਛਾ ਅਨੁਪੁਬ੍ਬੇਨ ਭਾਜੇਤ੍ਵਾ ਦਸ੍ਸਨਂ ਵੇਦਿਤਬ੍ਬਂ. ਯਂ ਪਨੇਤਂ ‘‘ਕਤਮਾ ਚਾਵੁਸੋ, ਅਜ੍ਝਤ੍ਤਿਕਾ ਪਥਵੀਧਾਤੂ’’ਤਿਆਦਿ ਵੁਤ੍ਤਂ. ਤਤ੍ਥ ਅਜ੍ਝਤ੍ਤਂ ਪਚ੍ਚਤ੍ਤਨ੍ਤਿ ਉਭਯਮ੍ਪੇਤਂ ਨਿਯਕਾਧਿਵਚਨਮੇਵ. ਕਕ੍ਖਲ਼ਨ੍ਤਿ ਥਦ੍ਧਂ. ਖਰਿਗਤਨ੍ਤਿ ਫਰੁਸਂ. ਉਪਾਦਿਨ੍ਨਨ੍ਤਿ ਨ ਕਮ੍ਮਸਮੁਟ੍ਠਾਨਮੇਵ, ਅਵਿਸੇਸੇਨ ਪਨ ਸਰੀਰਟ੍ਠਕਸ੍ਸੇਤਂ ਗਹਣਂ. ਸਰੀਰਟ੍ਠਕਞ੍ਹਿ ਉਪਾਦਿਨ੍ਨਂ ਵਾ ਹੋਤੁ, ਅਨੁਪਾਦਿਨ੍ਨਂ ਵਾ, ਆਦਿਨ੍ਨਗਹਿਤਪਰਾਮਟ੍ਠਵਸੇਨ ਸਬ੍ਬਂ ਉਪਾਦਿਨ੍ਨਮੇਵ ਨਾਮ. ਸੇਯ੍ਯਥਿਦਂ – ਕੇਸਾ ਲੋਮਾ…ਪੇ… ਉਦਰਿਯਂ ਕਰੀਸਨ੍ਤਿ ਇਦਂ ਧਾਤੁਕਮ੍ਮਟ੍ਠਾਨਿਕਸ੍ਸ ਕੁਲਪੁਤ੍ਤਸ੍ਸ ਅਜ੍ਝਤ੍ਤਿਕਪਥਵੀਧਾਤੁਵਸੇਨ ਤਾਵ ਕਮ੍ਮਟ੍ਠਾਨਂ ਵਿਭਤ੍ਤਂ. ਏਤ੍ਥ ਪਨ ਮਨਸਿਕਾਰਂ ਆਰਭਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਗਹੇਤੁਕਾਮੇਨ ਯਂ ਕਾਤਬ੍ਬਂ, ਤਂ ਸਬ੍ਬਂ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਮੇਵ. ਮਤ੍ਥਲੁਙ੍ਗਂ ਪਨ ਨ ਇਧ ਪਾਲ਼ਿਆਰੁਲ਼੍ਹਂ. ਤਮ੍ਪਿ ਆਹਰਿਤ੍ਵਾ, ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨੇਵ ਵਣ੍ਣਸਣ੍ਠਾਨਾਦਿਵਸੇਨ ਵਵਤ੍ਥਪੇਤ੍ਵਾ, ‘‘ਅਯਮ੍ਪਿ ਅਚੇਤਨਾ ਅਬ੍ਯਾਕਤਾ ਸੁਞ੍ਞਾ ਥਦ੍ਧਾ ਪਥਵੀਧਾਤੁ ਏਵਾ’’ਤਿ ਮਨਸਿ ਕਾਤਬ੍ਬਂ. ਯਂ ਵਾ ਪਨਞ੍ਞਮ੍ਪੀਤਿ ਇਦਂ ਇਤਰੇਸੁ ਤੀਸੁ ਕੋਟ੍ਠਾਸੇਸੁ ਅਨੁਗਤਾਯ ਪਥਵੀਧਾਤੁਯਾ ਗਹਣਤ੍ਥਂ ਵੁਤ੍ਤਂ. ਯਾ ਚੇਵ ਖੋ ਪਨ ਅਜ੍ਝਤ੍ਤਿਕਾ ਪਥਵੀਧਾਤੂਤਿ ਯਾ ਚ ਅਯਂ ਵੁਤ੍ਤਪ੍ਪਕਾਰਾ ਅਜ੍ਝਤ੍ਤਿਕਾ ਪਥਵੀਧਾਤੁ. ਯਾ ਚ ਬਾਹਿਰਾਤਿ ਯਾ ਚ ਵਿਭਙ੍ਗੇ, ‘‘ਅਯੋ ਲੋਹਂ ਤਿਪੁ ਸੀਸ’’ਨ੍ਤਿਆਦਿਨਾ (ਵਿਭ. ੧੭੩) ਨਯੇਨ ਆਗਤਾ ਬਾਹਿਰਾ ਪਥਵੀਧਾਤੁ.

ਏਤ੍ਤਾਵਤਾ ਥੇਰੇਨ ਅਜ੍ਝਤ੍ਤਿਕਾ ਪਥਵੀਧਾਤੁ ਨਾਨਾਸਭਾਵਤੋ ਵੀਸਤਿਯਾ ਆਕਾਰੇਹਿ ਵਿਤ੍ਥਾਰੇਨ ਦਸ੍ਸਿਤਾ, ਬਾਹਿਰਾ ਸਙ੍ਖੇਪੇਨ. ਕਸ੍ਮਾ? ਯਸ੍ਮਿਞ੍ਹਿ ਠਾਨੇ ਸਤ੍ਤਾਨਂ ਆਲਯੋ ਨਿਕਨ੍ਤਿ ਪਤ੍ਥਨਾ ਪਰਿਯੁਟ੍ਠਾਨਂ ਗਹਣਂ ਪਰਾਮਾਸੋ ਬਲਵਾ ਹੋਤਿ, ਤਤ੍ਥ ਤੇਸਂ ਆਲਯਾਦੀਨਂ ਉਦ੍ਧਰਣਤ੍ਥਂ ਬੁਦ੍ਧਾ ਵਾ ਬੁਦ੍ਧਸਾਵਕਾ ਵਾ ਵਿਤ੍ਥਾਰਕਥਂ ਕਥੇਨ੍ਤਿ. ਯਤ੍ਥ ਪਨ ਨ ਬਲਵਾ, ਤਤ੍ਥ ਕਤ੍ਤਬ੍ਬਕਿਚ੍ਚਾਭਾਵਤੋ ਸਙ੍ਖੇਪੇਨ ਕਥੇਨ੍ਤਿ. ਯਥਾ ਹਿ ਕਸ੍ਸਕੋ ਖੇਤ੍ਤਂ ਕਸਮਾਨੋ ਯਤ੍ਥ ਮੂਲਸਨ੍ਤਾਨਕਾਨਂ ਬਲਵਤਾਯ ਨਙ੍ਗਲਂ ਲਗ੍ਗਤਿ, ਤਤ੍ਥ ਗੋਣੇ ਠਪੇਤ੍ਵਾ ਪਂਸੁਂ ਵਿਯੂਹਿਤ੍ਵਾ ਮੂਲਸਨ੍ਤਾਨਕਾਨਿ ਛੇਤ੍ਵਾ ਛੇਤ੍ਵਾ ਉਦ੍ਧਰਨ੍ਤੋ ਬਹੁਂ ਵਾਯਾਮਂ ਕਰੋਤਿ. ਯਤ੍ਥ ਤਾਨਿ ਨਤ੍ਥਿ, ਤਤ੍ਥ ਬਲਵਂ ਪਯੋਗਂ ਕਤ੍ਵਾ ਗੋਣੇ ਪਿਟ੍ਠਿਯਂ ਪਹਰਮਾਨੋ ਕਸਤਿਯੇਵ, ਏਵਂਸਮ੍ਪਦਮਿਦਂ ਵੇਦਿਤਬ੍ਬਂ.

ਪਥਵੀਧਾਤੁਰੇਵੇਸਾਤਿ ਦੁਵਿਧਾਪੇਸਾ ਥਦ੍ਧਟ੍ਠੇਨ ਕਕ੍ਖਲ਼ਟ੍ਠੇਨ ਫਰੁਸਟ੍ਠੇਨ ਏਕਲਕ੍ਖਣਾ ਪਥਵੀਧਾਤੁਯੇਵ, ਆਵੁਸੋਤਿ ਅਜ੍ਝਤ੍ਤਿਕਂ ਬਾਹਿਰਾਯ ਸਦ੍ਧਿਂ ਯੋਜੇਤ੍ਵਾ ਦਸ੍ਸੇਤਿ. ਯਸ੍ਮਾ ਬਾਹਿਰਾਯ ਪਥਵੀਧਾਤੁਯਾ ਅਚੇਤਨਾਭਾਵੋ ਪਾਕਟੋ, ਨ ਅਜ੍ਝਤ੍ਤਿਕਾਯ, ਤਸ੍ਮਾ ਸਾ ਬਾਹਿਰਾਯ ਸਦ੍ਧਿਂ ਏਕਸਦਿਸਾ ਅਚੇਤਨਾਯੇਵਾਤਿ ਗਣ੍ਹਨ੍ਤਸ੍ਸ ਸੁਖਪਰਿਗ੍ਗਹੋ ਹੋਤਿ. ਯਥਾ ਕਿਂ? ਯਥਾ ਦਨ੍ਤੇਨ ਗੋਣੇਨ ਸਦ੍ਧਿਂ ਯੋਜਿਤੋ ਅਦਨ੍ਤੋ ਕਤਿਪਾਹਮੇਵ ਵਿਸੂਕਾਯਤਿ ਵਿਪ੍ਫਨ੍ਦਤਿ, ਅਥ ਨ ਚਿਰਸ੍ਸੇਵ ਦਮਥਂ ਉਪੇਤਿ. ਏਵਂ ਅਜ੍ਝਤ੍ਤਿਕਾਪਿ ਬਾਹਿਰਾਯ ਸਦ੍ਧਿਂ ਏਕਸਦਿਸਾਤਿ ਗਣ੍ਹਨ੍ਤਸ੍ਸ ਕਤਿਪਾਹਮੇਵ ਅਚੇਤਨਾਭਾਵੋ ਨ ਉਪਟ੍ਠਾਤਿ, ਅਥ ਨ ਚਿਰੇਨੇਵਸ੍ਸਾ ਅਚੇਤਨਾਭਾਵੋ ਪਾਕਟੋ ਹੋਤਿ. ਤਂ ਨੇਤਂ ਮਮਾਤਿ ਤਂ ਉਭਯਮ੍ਪਿ ਨ ਏਤਂ ਮਮ, ਨ ਏਸੋਹਮਸ੍ਮਿ, ਨ ਏਸੋ ਮੇ ਅਤ੍ਤਾਤਿ ਏਵਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਯਥਾਭੂਤਨ੍ਤਿ ਯਥਾਸਭਾਵਂ, ਤਞ੍ਹਿ ਅਨਿਚ੍ਚਾਦਿਸਭਾਵਂ, ਤਸ੍ਮਾ ਅਨਿਚ੍ਚਂ ਦੁਕ੍ਖਮਨਤ੍ਤਾਤਿ ਏਵਂ ਦਟ੍ਠਬ੍ਬਨ੍ਤਿ ਅਤ੍ਥੋ.

ਹੋਤਿ ਖੋ ਸੋ, ਆਵੁਸੋਤਿ ਕਸ੍ਮਾ ਆਰਭਿ? ਬਾਹਿਰਆਪੋਧਾਤੁਵਸੇਨ ਬਾਹਿਰਾਯ ਪਥਵੀਧਾਤੁਯਾ ਵਿਨਾਸਂ ਦਸ੍ਸੇਤ੍ਵਾ ਤਤੋ ਵਿਸੇਸਤਰੇਨ ਉਪਾਦਿਨ੍ਨਾਯ ਸਰੀਰਟ੍ਠਕਪਥਵੀਧਾਤੁਯਾ ਵਿਨਾਸਦਸ੍ਸਨਤ੍ਥਂ. ਪਕੁਪ੍ਪਤੀਤਿ ਆਪੋਸਂਵਟ੍ਟਵਸੇਨ ਵਡ੍ਢਮਾਨਾ ਕੁਪ੍ਪਤਿ. ਅਨ੍ਤਰਹਿਤਾ ਤਸ੍ਮਿਂ ਸਮਯੇ ਬਾਹਿਰਾ ਪਥਵੀਧਾਤੁ ਹੋਤੀਤਿ ਤਸ੍ਮਿਂ ਸਮਯੇ ਕੋਟਿਸਤਸਹਸ੍ਸਚਕ੍ਕਵਾਲ਼ੇ ਖਾਰੋਦਕੇਨ ਵਿਲੀਯਮਾਨਾ ਉਦਕਾਨੁਗਤਾ ਹੁਤ੍ਵਾ ਸਬ੍ਬਾ ਪਬ੍ਬਤਾਦਿਵਸੇਨ ਸਣ੍ਠਿਤਾ ਪਥਵੀਧਾਤੁ ਅਨ੍ਤਰਹਿਤਾ ਹੋਤਿ. ਵਿਲੀਯਿਤ੍ਵਾ ਉਦਕਮੇਵ ਹੋਤਿ. ਤਾਵ ਮਹਲ੍ਲਿਕਾਯਾਤਿ ਤਾਵ ਮਹਨ੍ਤਾਯ.

ਦੁਵੇ ਸਤਸਹਸ੍ਸਾਨਿ, ਚਤ੍ਤਾਰਿ ਨਹੁਤਾਨਿ ਚ;

ਏਤ੍ਤਕਂ ਬਹਲਤ੍ਤੇਨ, ਸਙ੍ਖਾਤਾਯਂ ਵਸੁਨ੍ਧਰਾਤਿ. –

ਏਵਂ ਬਹਲਤ੍ਤੇਨੇਵ ਮਹਨ੍ਤਾਯ, ਵਿਤ੍ਥਾਰਤੋ ਪਨ ਕੋਟਿਸਤਸਹਸ੍ਸਚਕ੍ਕਵਾਲ਼ਪ੍ਪਮਾਣਾਯ. ਅਨਿਚ੍ਚਤਾਤਿ ਹੁਤ੍ਵਾ ਅਭਾਵਤਾ. ਖਯਧਮ੍ਮਤਾਤਿ ਖਯਂ ਗਮਨਸਭਾਵਤਾ. ਵਯਧਮ੍ਮਤਾਤਿ ਵਯਂ ਗਮਨਸਭਾਵਤਾ. ਵਿਪਰਿਣਾਮਧਮ੍ਮਤਾਤਿ ਪਕਤਿਵਿਜਹਨਸਭਾਵਤਾ, ਇਤਿ ਸਬ੍ਬੇਹਿਪਿ ਇਮੇਹਿ ਪਦੇਹਿ ਅਨਿਚ੍ਚਲਕ੍ਖਣਮੇਵ ਵੁਤ੍ਤਂ. ਯਂ ਪਨ ਅਨਿਚ੍ਚਂ, ਤਂ ਦੁਕ੍ਖਂ. ਯਂ ਦੁਕ੍ਖਂ, ਤਂ ਅਨਤ੍ਤਾਤਿ ਤੀਣਿਪਿ ਲਕ੍ਖਣਾਨਿ ਆਗਤਾਨੇਵ ਹੋਨ੍ਤਿ. ਮਤ੍ਤਟ੍ਠਕਸ੍ਸਾਤਿ ਪਰਿਤ੍ਤਟ੍ਠਿਤਿਕਸ੍ਸ, ਤਤ੍ਥ ਦ੍ਵੀਹਾਕਾਰੇਹਿ ਇਮਸ੍ਸ ਕਾਯਸ੍ਸ ਪਰਿਤ੍ਤਟ੍ਠਿਤਿਤਾ ਵੇਦਿਤਬ੍ਬਾ ਠਿਤਿਪਰਿਤ੍ਤਤਾਯ ਚ ਸਰਸਪਰਿਤ੍ਤਤਾਯ ਚ. ਅਯਞ੍ਹਿ ਅਤੀਤੇ ਚਿਤ੍ਤਕ੍ਖਣੇ ਜੀਵਿਤ੍ਥ, ਨ ਜੀਵਤਿ, ਨ ਜੀਵਿਸ੍ਸਤਿ. ਅਨਾਗਤੇ ਚਿਤ੍ਤਕ੍ਖਣੇ ਜੀਵਿਸ੍ਸਤਿ, ਨ ਜੀਵਤਿ, ਨ ਜੀਵਿਤ੍ਥ. ਪਚ੍ਚੁਪ੍ਪਨ੍ਨੇ ਚਿਤ੍ਤਕ੍ਖਣੇ ਜੀਵਤਿ, ਨ ਜੀਵਿਤ੍ਥ, ਨ ਜੀਵਿਸ੍ਸਤੀਤਿ ਵੁਚ੍ਚਤਿ.

‘‘ਜੀਵਿਤਂ ਅਤ੍ਤਭਾਵੋ ਚ, ਸੁਖਦੁਕ੍ਖਾ ਚ ਕੇਵਲਾ;

ਏਕਚਿਤ੍ਤਸਮਾਯੁਤ੍ਤਾ, ਲਹੁ ਸੋ ਵਤ੍ਤਤੇ ਖਣੋ’’ਤਿ. –

ਇਦਂ ਏਤਸ੍ਸੇਵ ਪਰਿਤ੍ਤਟ੍ਠਿਤਿਦਸ੍ਸਨਤ੍ਥਂ ਵੁਤ੍ਤਂ. ਏਵਂ ਠਿਤਿਪਰਿਤ੍ਤਤਾਯ ਪਰਿਤ੍ਤਟ੍ਠਿਤਿਤਾ ਵੇਦਿਤਬ੍ਬਾ.

ਅਸ੍ਸਾਸਪਸ੍ਸਾਸੂਪਨਿਬਦ੍ਧਾਦਿਭਾਵੇਨ ਪਨਸ੍ਸ ਸਰਸਪਰਿਤ੍ਤਤਾ ਵੇਦਿਤਬ੍ਬਾ. ਸਤ੍ਤਾਨਞ੍ਹਿ ਅਸ੍ਸਾਸੂਪਨਿਬਦ੍ਧਂ ਜੀਵਿਤਂ, ਪਸ੍ਸਾਸੂਪਨਿਬਦ੍ਧਂ ਜੀਵਿਤਂ, ਅਸ੍ਸਾਸਪਸ੍ਸਾਸੂਪਨਿਬਦ੍ਧਂ ਜੀਵਿਤਂ, ਮਹਾਭੂਤੂਪਨਿਬਦ੍ਧਂ ਜੀਵਿਤਂ, ਕਬਲ਼ੀਕਾਰਾਹਾਰੂਪਨਿਬਦ੍ਧਂ ਜੀਵਿਤਂ, ਵਿਞ੍ਞਾਣੂਪਨਿਬਦ੍ਧਂ ਜੀਵਿਤਨ੍ਤਿ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਂ.

ਤਣ੍ਹੁਪਾਦਿਨ੍ਨਸ੍ਸਾਤਿ ਤਣ੍ਹਾਯ ਆਦਿਨ੍ਨਗਹਿਤਪਰਾਮਟ੍ਠਸ੍ਸ ਅਹਨ੍ਤਿ ਵਾ ਮਮਨ੍ਤਿ ਵਾ ਅਸ੍ਮੀਤਿ ਵਾ. ਅਥ ਖ੍ਵਾਸ੍ਸ ਨੋਤੇਵੇਤ੍ਥ ਹੋਤੀਤਿ ਅਥ ਖੋ ਅਸ੍ਸ ਭਿਕ੍ਖੁਨੋ ਏਵਂ ਤੀਣਿ ਲਕ੍ਖਣਾਨਿ ਆਰੋਪੇਤ੍ਵਾ ਪਸ੍ਸਨ੍ਤਸ੍ਸ ਏਤ੍ਥ ਅਜ੍ਝਤ੍ਤਿਕਾਯ ਪਥਵੀਧਾਤੁਯਾ ਅਹਨ੍ਤਿ ਵਾਤਿਆਦਿ ਤਿਵਿਧੋ ਤਣ੍ਹਾਮਾਨਦਿਟ੍ਠਿਗ੍ਗਾਹੋ ਨੋਤੇਵ ਹੋਤਿ, ਨ ਹੋਤਿਯੇਵਾਤਿ ਅਤ੍ਥੋ. ਯਥਾ ਚ ਆਪੋਧਾਤੁਵਸੇਨ, ਏਵਂ ਤੇਜੋਧਾਤੁਵਾਯੋਧਾਤੁਵਸੇਨਪਿ ਬਾਹਿਰਾਯ ਪਥਵੀਧਾਤੁਯਾ ਅਨ੍ਤਰਧਾਨਂ ਹੋਤਿ. ਇਧ ਪਨ ਏਕਂਯੇਵ ਆਗਤਂ. ਇਤਰਾਨਿਪਿ ਅਤ੍ਥਤੋ ਵੇਦਿਤਬ੍ਬਾਨਿ.

ਤਞ੍ਚੇ, ਆਵੁਸੋਤਿ ਇਧ ਤਸ੍ਸ ਧਾਤੁਕਮ੍ਮਟ੍ਠਾਨਿਕਸ੍ਸ ਭਿਕ੍ਖੁਨੋ ਸੋਤਦ੍ਵਾਰੇ ਪਰਿਗ੍ਗਹਂ ਪਟ੍ਠਪੇਨ੍ਤੋ ਬਲਂ ਦਸ੍ਸੇਤਿ. ਅਕ੍ਕੋਸਨ੍ਤੀਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਨ੍ਤਿ. ਪਰਿਭਾਸਨ੍ਤੀਤਿ ਤਯਾ ਇਦਞ੍ਚਿਦਞ੍ਚ ਕਤਂ, ਏਵਞ੍ਚ ਏਵਞ੍ਚ ਤਂ ਕਰਿਸ੍ਸਾਮਾਤਿ ਵਾਚਾਯ ਪਰਿਭਾਸਨ੍ਤਿ. ਰੋਸੇਨ੍ਤੀਤਿ ਘਟ੍ਟੇਨ੍ਤਿ. ਵਿਹੇਸੇਨ੍ਤੀਤਿ ਦੁਕ੍ਖਾਪੇਨ੍ਤਿ, ਸਬ੍ਬਂ ਵਾਚਾਯ ਘਟ੍ਟਨਮੇਵ ਵੁਤ੍ਤਂ. ਸੋ ਏਵਨ੍ਤਿ ਸੋ ਧਾਤੁਕਮ੍ਮਟ੍ਠਾਨਿਕੋ ਏਵਂ ਸਮ੍ਪਜਾਨਾਤਿ. ਉਪ੍ਪਨ੍ਨਾ ਖੋ ਮੇ ਅਯਨ੍ਤਿ ਸਮ੍ਪਤਿਵਤ੍ਤਮਾਨੁਪ੍ਪਨ੍ਨਭਾਵੇਨ ਚ ਸਮੁਦਾਚਾਰੁਪ੍ਪਨ੍ਨਭਾਵੇਨ ਚ ਉਪ੍ਪਨ੍ਨਾ. ਸੋਤਸਮ੍ਫਸ੍ਸਜਾਤਿ ਉਪਨਿਸ੍ਸਯਵਸੇਨ ਸੋਤਸਮ੍ਫਸ੍ਸਤੋ ਜਾਤਾ ਸੋਤਦ੍ਵਾਰਜਵਨਵੇਦਨਾ, ਫਸ੍ਸੋ ਅਨਿਚ੍ਚੋਤਿ ਸੋਤਸਮ੍ਫਸ੍ਸੋ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚੋਤਿ ਪਸ੍ਸਤਿ. ਵੇਦਨਾਦਯੋਪਿ ਸੋਤਸਮ੍ਫਸ੍ਸਸਮ੍ਪਯੁਤ੍ਤਾਵ ਵੇਦਿਤਬ੍ਬਾ. ਧਾਤਾਰਮ੍ਮਣਮੇਵਾਤਿ ਧਾਤੁਸਙ੍ਖਾਤਮੇਵ ਆਰਮ੍ਮਣਂ. ਪਕ੍ਖਨ੍ਦਤੀਤਿ ਓਤਰਤਿ. ਪਸੀਦਤੀਤਿ ਤਸ੍ਮਿਂ ਆਰਮ੍ਮਣੇ ਪਸੀਦਤਿ, ਭੁਮ੍ਮਵਚਨਮੇਵ ਵਾ ਏਤਂ. ਬ੍ਯਞ੍ਜਨਸਨ੍ਧਿਵਸੇਨ ‘‘ਧਾਤਾਰਮ੍ਮਣਮੇਵਾ’’ਤਿ ਵੁਤ੍ਤਂ, ਧਾਤਾਰਮ੍ਮਣੇਯੇਵਾਤਿ ਅਯਮੇਤ੍ਥ ਅਤ੍ਥੋ. ਅਧਿਮੁਚ੍ਚਤੀਤਿ ਧਾਤੁਵਸੇਨ ਏਵਨ੍ਤਿ ਅਧਿਮੋਕ੍ਖਂ ਲਭਤਿ, ਨ ਰਜ੍ਜਤਿ, ਨ ਦੁਸ੍ਸਤਿ. ਅਯਞ੍ਹਿ ਸੋਤਦ੍ਵਾਰਮ੍ਹਿ ਆਰਮ੍ਮਣੇ ਆਪਾਥਗਤੇ ਮੂਲਪਰਿਞ੍ਞਾਆਗਨ੍ਤੁਕਤਾਵਕਾਲਿਕਵਸੇਨ ਪਰਿਗ੍ਗਹਂ ਕਰੋਤਿ, ਤਸ੍ਸ ਵਿਤ੍ਥਾਰਕਥਾ ਸਤਿਪਟ੍ਠਾਨੇ ਸਤਿਸਮ੍ਪਜਞ੍ਞਪਬ੍ਬੇ ਵੁਤ੍ਤਾ. ਸਾ ਪਨ ਤਤ੍ਥ ਚਕ੍ਖੁਦ੍ਵਾਰਵਸੇਨ ਵੁਤ੍ਤਾ, ਇਧ ਸੋਤਦ੍ਵਾਰਵਸੇਨ ਵੇਦਿਤਬ੍ਬਾ.

ਏਵਂ ਕਤਪਰਿਗ੍ਗਹਸ੍ਸ ਹਿ ਧਾਤੁਕਮ੍ਮਟ੍ਠਾਨਿਕਸ੍ਸ ਬਲਵਵਿਪਸ੍ਸਕਸ੍ਸ ਸਚੇਪਿ ਚਕ੍ਖੁਦ੍ਵਾਰਾਦੀਸੁ ਆਰਮ੍ਮਣੇ ਆਪਾਥਗਤੇ ਅਯੋਨਿਸੋ ਆਵਜ੍ਜਨਂ ਉਪ੍ਪਜ੍ਜਤਿ, ਵੋਟ੍ਠਬ੍ਬਨਂ ਪਤ੍ਵਾ ਏਕਂ ਦ੍ਵੇ ਵਾਰੇ ਆਸੇਵਨਂ ਲਭਿਤ੍ਵਾ ਚਿਤ੍ਤਂ ਭਵਙ੍ਗਮੇਵ ਓਤਰਤਿ, ਨ ਰਾਗਾਦਿਵਸੇਨ ਉਪ੍ਪਜ੍ਜਤਿ, ਅਯਂ ਕੋਟਿਪ੍ਪਤ੍ਤੋ ਤਿਕ੍ਖਵਿਪਸ੍ਸਕੋ. ਅਪਰਸ੍ਸ ਰਾਗਾਦਿਵਸੇਨ ਏਕਂ ਵਾਰਂ ਜਵਨਂ ਜਵਤਿ, ਜਵਨਪਰਿਯੋਸਾਨੇ ਪਨ ਰਾਗਾਦਿਵਸੇਨ ਏਵਂ ਮੇ ਜਵਨਂ ਜਵਿਤਨ੍ਤਿ ਆਵਜ੍ਜਤੋ ਆਰਮ੍ਮਣਂ ਪਰਿਗ੍ਗਹਿਤਮੇਵ ਹੋਤਿ, ਪੁਨ ਵਾਰਂ ਤਥਾ ਨ ਜਵਤਿ. ਅਪਰਸ੍ਸ ਏਕਵਾਰਂ ਏਵਂ ਆਵਜ੍ਜਤੋ ਪੁਨ ਦੁਤਿਯਵਾਰਂ ਰਾਗਾਦਿਵਸੇਨ ਜਵਨਂ ਜਵਤਿਯੇਵ, ਦੁਤਿਯਵਾਰਾਵਸਾਨੇ ਪਨ ਏਵਂ ਮੇ ਜਵਨਂ ਜਵਿਤਨ੍ਤਿ ਆਵਜ੍ਜਤੋ ਆਰਮ੍ਮਣਂ ਪਰਿਗ੍ਗਹਿਤਮੇਵ ਹੋਤਿ, ਤਤਿਯਵਾਰੇ ਤਥਾ ਨ ਉਪ੍ਪਜ੍ਜਤਿ. ਏਤ੍ਥ ਪਨ ਪਠਮੋ ਅਤਿਤਿਕ੍ਖੋ, ਤਤਿਯੋ ਅਤਿਮਨ੍ਦੋ, ਦੁਤਿਯਸ੍ਸ ਪਨ ਵਸੇਨ ਇਮਸ੍ਮਿਂ ਸੁਤ੍ਤੇ, ਲਟੁਕਿਕੋਪਮੇ, ਇਨ੍ਦ੍ਰਿਯਭਾਵਨੇ ਚ ਅਯਮਤ੍ਥੋ ਵੇਦਿਤਬ੍ਬੋ.

ਏਵਂ ਸੋਤਦ੍ਵਾਰੇ ਪਰਿਗ੍ਗਹਿਤਵਸੇਨ ਧਾਤੁਕਮ੍ਮਟ੍ਠਾਨਿਕਸ੍ਸ ਬਲਂ ਦਸ੍ਸੇਤ੍ਵਾ ਇਦਾਨਿ ਕਾਯਦ੍ਵਾਰੇ ਦੀਪੇਨ੍ਤੋ ਤਞ੍ਚੇ, ਆਵੁਸੋਤਿਆਦਿਮਾਹ. ਅਨਿਟ੍ਠਾਰਮ੍ਮਣਞ੍ਹਿ ਪਤ੍ਵਾ ਦ੍ਵੀਸੁ ਵਾਰੇਸੁ ਕਿਲਮਤਿ ਸੋਤਦ੍ਵਾਰੇ ਚ ਕਾਯਦ੍ਵਾਰੇ ਚ. ਤਸ੍ਮਾ ਯਥਾ ਨਾਮ ਖੇਤ੍ਤਸ੍ਸਾਮੀ ਪੁਰਿਸੋ ਕੁਦਾਲਂ ਗਹੇਤ੍ਵਾ ਖੇਤ੍ਤਂ ਅਨੁਸਞ੍ਚਰਨ੍ਤੋ ਯਤ੍ਥ ਵਾ ਤਤ੍ਥ ਵਾ ਮਤ੍ਤਿਕਪਿਣ੍ਡਂ ਅਦਤ੍ਵਾ ਦੁਬ੍ਬਲਟ੍ਠਾਨੇਸੁਯੇਵ ਕੁਦਾਲੇਨ ਭੂਮਿਂ ਭਿਨ੍ਦਿਤ੍ਵਾ ਸਤਿਣਮਤ੍ਤਿਕਪਿਣ੍ਡਂ ਦੇਤਿ. ਏਵਮੇਵ ਮਹਾਥੇਰੋ ਅਨਾਗਤੇ ਸਿਕ੍ਖਾਕਾਮਾ ਪਧਾਨਕਮ੍ਮਿਕਾ ਕੁਲਪੁਤ੍ਤਾ ਇਮੇਸੁ ਦ੍ਵਾਰੇਸੁ ਸਂਵਰਂ ਪਟ੍ਠਪੇਤ੍ਵਾ ਖਿਪ੍ਪਮੇਵ ਜਾਤਿਜਰਾਮਰਣਸ੍ਸ ਅਨ੍ਤਂ ਕਰਿਸ੍ਸਨ੍ਤੀਤਿ ਇਮੇਸੁਯੇਵ ਦ੍ਵੀਸੁ ਦ੍ਵਾਰੇਸੁ ਗਾਲ਼੍ਹਂ ਕਤ੍ਵਾ ਸਂਵਰਂ ਦੇਸੇਨ੍ਤੋ ਇਮਂ ਦੇਸਨਂ ਆਰਭਿ.

ਤਤ੍ਥ ਸਮੁਦਾਚਰਨ੍ਤੀਤਿ ਉਪਕ੍ਕਮਨ੍ਤਿ. ਪਾਣਿਸਮ੍ਫਸ੍ਸੇਨਾਤਿ ਪਾਣਿਪ੍ਪਹਾਰੇਨ, ਇਤਰੇਸੁਪਿ ਏਸੇਵ ਨਯੋ. ਤਥਾਭੂਤੋਤਿ ਤਥਾਸਭਾਵੋ. ਯਥਾਭੂਤਸ੍ਮਿਨ੍ਤਿ ਯਥਾਸਭਾਵੇ. ਕਮਨ੍ਤੀਤਿ ਪਵਤ੍ਤਨ੍ਤਿ. ਏਵਂ ਬੁਦ੍ਧਂ ਅਨੁਸ੍ਸਰਤੋਤਿਆਦੀਸੁ ਇਤਿਪਿ ਸੋ ਭਗਵਾਤਿਆਦਿਨਾ ਨਯੇਨ ਅਨੁਸ੍ਸਰਨ੍ਤੋਪਿ ਬੁਦ੍ਧਂ ਅਨੁਸ੍ਸਰਤਿ, ਵੁਤ੍ਤਂ ਖੋ ਪਨੇਤਂ ਭਗਵਤਾਤਿ ਅਨੁਸ੍ਸਰਨ੍ਤੋਪਿ ਅਨੁਸ੍ਸਰਤਿਯੇਵ. ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋਤਿਆਦਿਨਾ ਨਯੇਨ ਅਨੁਸ੍ਸਰਨ੍ਤੋਪਿ ਧਮ੍ਮਂ ਅਨੁਸ੍ਸਰਤਿ, ਕਕਚੂਪਮੋਵਾਦਂ ਅਨੁਸ੍ਸਰਨ੍ਤੋਪਿ ਅਨੁਸ੍ਸਰਤਿਯੇਵ. ਸੁਪ੍ਪਟਿਪਨ੍ਨੋਤਿਆਦਿਨਾ ਨਯੇਨ ਅਨੁਸ੍ਸਰਨ੍ਤੋਪਿ ਸਙ੍ਘਂ ਅਨੁਸ੍ਸਰਤਿ, ਕਕਚੋਕਨ੍ਤਨਂ ਅਧਿਵਾਸਯਮਾਨਸ੍ਸ ਭਿਕ੍ਖੁਨੋ ਗੁਣਂ ਅਨੁਸ੍ਸਰਮਾਨੋਪਿ ਅਨੁਸ੍ਸਰਤਿਯੇਵ.

ਉਪੇਕ੍ਖਾ ਕੁਸਲਨਿਸ੍ਸਿਤਾ ਨ ਸਣ੍ਠਾਤੀਤਿ ਇਧ ਵਿਪਸ੍ਸਨੁਪੇਕ੍ਖਾ ਅਧਿਪ੍ਪੇਤਾ. ਉਪੇਕ੍ਖਾ ਕੁਸਲਨਿਸ੍ਸਿਤਾ ਸਣ੍ਠਾਤੀਤਿ ਇਧ ਛਲ਼ਙ੍ਗੁਪੇਕ੍ਖਾ, ਸਾ ਪਨੇਸਾ ਕਿਞ੍ਚਾਪਿ ਖੀਣਾਸਵਸ੍ਸ ਇਟ੍ਠਾਨਿਟ੍ਠੇਸੁ ਆਰਮ੍ਮਣੇਸੁ ਅਰਜ੍ਜਨਾਦਿਵਸੇਨ ਪਵਤ੍ਤਤਿ, ਅਯਂ ਪਨ ਭਿਕ੍ਖੁ ਵੀਰਿਯਬਲੇਨ ਭਾਵਨਾਸਿਦ੍ਧਿਯਾ ਅਤ੍ਤਨੋ ਵਿਪਸ੍ਸਨਂ ਖੀਣਾਸਵਸ੍ਸ ਛਲ਼ਙ੍ਗੁਪੇਕ੍ਖਾਠਾਨੇ ਠਪੇਤੀਤਿ ਵਿਪਸ੍ਸਨਾਵ ਛਲ਼ਙ੍ਗੁਪੇਕ੍ਖਾ ਨਾਮ ਜਾਤਾ.

੩੦੩. ਆਪੋਧਾਤੁਨਿਦ੍ਦੇਸੇ ਆਪੋਗਤਨ੍ਤਿ ਸਬ੍ਬਆਪੇਸੁ ਗਤਂ ਅਲ੍ਲਯੂਸਭਾਵਲਕ੍ਖਣਂ. ਪਿਤ੍ਤਂ ਸੇਮ੍ਹਨ੍ਤਿਆਦੀਸੁ ਪਨ ਯਂ ਵਤ੍ਤਬ੍ਬਂ, ਤਂ ਸਬ੍ਬਂ ਸਦ੍ਧਿਂ ਭਾਵਨਾਨਯੇਨ ਵਿਸੁਦ੍ਧਿਮਗ੍ਗੇ ਵੁਤ੍ਤਂ. ਪਕੁਪ੍ਪਤੀਤਿ ਓਘਵਸੇਨ ਵਡ੍ਢਤਿ, ਸਮੁਦ੍ਦਤੋ ਵਾ ਉਦਕਂ ਉਤ੍ਤਰਤਿ, ਅਯਮਸ੍ਸ ਪਾਕਤਿਕੋ ਪਕੋਪੋ, ਆਪੋਸਂਵਟ੍ਟਕਾਲੇ ਪਨ ਕੋਟਿਸਤਸਹਸ੍ਸਚਕ੍ਕਵਾਲ਼ਂ ਉਦਕਪੂਰਮੇਵ ਹੋਤਿ. ਓਗਚ੍ਛਨ੍ਤੀਤਿ ਹੇਟ੍ਠਾ ਗਚ੍ਛਨ੍ਤਿ, ਉਦ੍ਧਨੇ ਆਰੋਪਿਤਉਦਕਂ ਵਿਯ ਖਯਂ ਵਿਨਾਸਂ ਪਾਪੁਣਨ੍ਤਿ. ਸੇਸਂ ਪੁਰਿਮਨਯੇਨੇਵ ਵੇਦਿਤਬ੍ਬਂ.

੩੦੪. ਤੇਜੋਧਾਤੁਨਿਦ੍ਦੇਸੇ ਤੇਜੋਗਤਨ੍ਤਿ ਸਬ੍ਬਤੇਜੇਸੁ ਗਤਂ ਉਣ੍ਹਤ੍ਤਲਕ੍ਖਣਂ. ਤੇਜੋ ਏਵ ਵਾ ਤੇਜੋਭਾਵਂ ਗਤਨ੍ਤਿ ਤੇਜੋਗਤਂ. ਪੁਰਿਮੇ ਆਪੋਗਤੇਪਿ ਪਚ੍ਛਿਮੇ ਵਾਯੋਗਤੇਪਿ ਏਸੇਵ ਨਯੋ. ਯੇਨ ਚਾਤਿ ਯੇਨ ਤੇਜੋਗਤੇਨ. ਤਸ੍ਮਿਂ ਕੁਪ੍ਪਿਤੇ ਅਯਂ ਕਾਯੋ ਸਨ੍ਤਪ੍ਪਤਿ, ਏਕਾਹਿਕਜਰਾਦਿਭਾਵੇਨ ਉਸੁਮਜਾਤੋ ਹੋਤਿ. ਯੇਨ ਚ ਜੀਰੀਯਤੀਤਿ ਯੇਨ ਅਯਂ ਕਾਯੋ ਜੀਰਤਿ, ਇਨ੍ਦ੍ਰਿਯਵੇਕਲ੍ਲਤ੍ਤਂ ਬਲਪਰਿਕ੍ਖਯਂ ਵਲਿਪਲਿਤਾਦਿਭਾਵਞ੍ਚ ਪਾਪੁਣਾਤਿ. ਯੇਨ ਚ ਪਰਿਡਯ੍ਹਤੀਤਿ ਯੇਨ ਕੁਪ੍ਪਿਤੇਨ ਅਯਂ ਕਾਯੋ ਦਯ੍ਹਤਿ, ਸੋ ਚ ਪੁਗ੍ਗਲੋ ਦਯ੍ਹਾਮਿ ਦਯ੍ਹਾਮੀਤਿ ਕਨ੍ਦਨ੍ਤੋ ਸਤਧੋਤਸਪ੍ਪਿਗੋਸੀਤਚਨ੍ਦਨਾਦਿਲੇਪਞ੍ਚ ਤਾਲਵਣ੍ਟਵਾਤਞ੍ਚ ਪਚ੍ਚਾਸੀਸਤਿ. ਯੇਨ ਚ ਅਸਿਤਪੀਤਖਾਯਿਤਸਾਯਿਤਂ ਸਮ੍ਮਾ ਪਰਿਣਾਮਂ ਗਚ੍ਛਤੀਤਿ ਯੇਨ ਤਂ ਅਸਿਤਂ ਵਾ ਓਦਨਾਦਿ, ਪੀਤਂ ਵਾ ਪਾਨਕਾਦਿ, ਖਾਯਿਤਂ ਵਾ ਪਿਟ੍ਠਖਜ੍ਜਕਾਦਿ, ਸਾਯਿਤਂ ਵਾ ਅਮ੍ਬਪਕ੍ਕਮਧੁਫਾਣਿਤਾਦਿ ਸਮ੍ਮਾ ਪਰਿਪਾਕਂ ਗਚ੍ਛਤਿ, ਰਸਾਦਿਭਾਵੇਨ ਵਿਵੇਕਂ ਗਚ੍ਛਤੀਤਿ ਅਤ੍ਥੋ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰਤੋ ਪਨ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਸਦ੍ਧਿਂ ਭਾਵਨਾਨਯੇਨ ਵਿਸੁਦ੍ਧਿਮਗ੍ਗੇ ਵੁਤ੍ਤਂ.

ਹਰਿਤਨ੍ਤਨ੍ਤਿ ਹਰਿਤਮੇਵ. ਅਲ੍ਲਤਿਣਾਦਿਂ ਆਗਮ੍ਮ ਨਿਬ੍ਬਾਯਤੀਤਿ ਅਤ੍ਥੋ. ਪਨ੍ਥਨ੍ਤਨ੍ਤਿ ਮਹਾਮਗ੍ਗਮੇਵ. ਸੇਲਨ੍ਤਨ੍ਤਿ ਪਬ੍ਬਤਂ. ਉਦਕਨ੍ਤਨ੍ਤਿ ਉਦਕਂ. ਰਮਣੀਯਂ ਵਾ ਭੂਮਿਭਾਗਨ੍ਤਿ ਤਿਣਗੁਮ੍ਬਾਦਿਰਹਿਤਂ, ਵਿਵਿਤ੍ਤਂ ਅਬ੍ਭੋਕਾਸਂ ਭੂਮਿਭਾਗਂ. ਅਨਾਹਾਰਾਤਿ ਨਿਰਾਹਾਰਾ ਨਿਰੁਪਾਦਾਨਾ, ਅਯਮ੍ਪਿ ਪਕਤਿਯਾਵ ਤੇਜੋਵਿਕਾਰੋ ਵੁਤ੍ਤੋ, ਤੇਜੋਸਂਵਟ੍ਟਕਾਲੇ ਪਨ ਕੋਟਿਸਤਸਹਸ੍ਸਚਕ੍ਕਵਾਲ਼ਂ ਝਾਪੇਤ੍ਵਾ ਛਾਰਿਕਾਮਤ੍ਤਮ੍ਪਿ ਨ ਤਿਟ੍ਠਤਿ. ਨ੍ਹਾਰੁਦਦ੍ਦੁਲੇਨਾਤਿ ਚਮ੍ਮਨਿਲ੍ਲੇਖਨੇਨ. ਅਗ੍ਗਿਂ ਗਵੇਸਨ੍ਤੀਤਿ ਏਵਰੂਪਂ ਸੁਖੁਮਂ ਉਪਾਦਾਨਂ ਗਹੇਤ੍ਵਾ ਅਗ੍ਗਿਂ ਪਰਿਯੇਸਨ੍ਤਿ, ਯਂ ਅਪ੍ਪਮਤ੍ਤਕਮ੍ਪਿ ਉਸੁਮਂ ਲਭਿਤ੍ਵਾ ਪਜ੍ਜਲਤਿ, ਸੇਸਮਿਧਾਪਿ ਪੁਰਿਮਨਯੇਨੇਵ ਵੇਦਿਤਬ੍ਬਂ.

੩੦੫. ਵਾਯੋਧਾਤੁਨਿਦ੍ਦੇਸੇ ਉਦ੍ਧਙ੍ਗਮਾ ਵਾਤਾਤਿ ਉਗ੍ਗਾਰਹਿਕ੍ਕਾਰਾਦਿਪਵਤ੍ਤਕਾ ਉਦ੍ਧਂ ਆਰੋਹਨਵਾਤਾ. ਅਧੋਗਮਾ ਵਾਤਾਤਿ ਉਚ੍ਚਾਰਪਸ੍ਸਾਵਾਦਿਨੀਹਰਣਕਾ ਅਧੋ ਓਰੋਹਨਵਾਤਾ. ਕੁਚ੍ਛਿਸਯਾ ਵਾਤਾਤਿ ਅਨ੍ਤਾਨਂ ਬਹਿਵਾਤਾ. ਕੋਟ੍ਠਾਸਯਾ ਵਾਤਾਤਿ ਅਨ੍ਤਾਨਂ ਅਨ੍ਤੋਵਾਤਾ. ਅਙ੍ਗਮਙ੍ਗਾਨੁਸਾਰਿਨੋਤਿ ਧਮਨੀਜਾਲਾਨੁਸਾਰੇਨ ਸਕਲਸਰੀਰੇ ਅਙ੍ਗਮਙ੍ਗਾਨਿ ਅਨੁਸਟਾ ਸਮਿਞ੍ਜਨਪਸਾਰਣਾਦਿਨਿਬ੍ਬਤ੍ਤਕਵਾਤਾ. ਅਸ੍ਸਾਸੋਤਿ ਅਨ੍ਤੋਪਵਿਸਨਨਾਸਿਕਵਾਤੋ. ਪਸ੍ਸਾਸੋਤਿ ਬਹਿਨਿਕ੍ਖਮਨਨਾਸਿਕਵਾਤੋ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰਤੋ ਪਨ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਸਦ੍ਧਿਂ ਭਾਵਨਾਨਯੇਨ ਵਿਸੁਦ੍ਧਿਮਗ੍ਗੇ ਵੁਤ੍ਤਂ.

ਗਾਮਮ੍ਪਿ ਵਹਤੀਤਿ ਸਕਲਗਾਮਮ੍ਪਿ ਚੁਣ੍ਣਵਿਚੁਣ੍ਣਂ ਕੁਰੁਮਾਨਾ ਆਦਾਯ ਗਚ੍ਛਤਿ, ਨਿਗਮਾਦੀਸੁਪਿ ਏਸੇਵ ਨਯੋ. ਇਧ ਵਾਯੋਸਂਵਟ੍ਟਕਾਲੇ ਕੋਟਿਸਤਸਹਸ੍ਸਚਕ੍ਕਵਾਲ਼ਵਿਦ੍ਧਂਸਨਵਸੇਨ ਵਾਯੋਧਾਤੁਵਿਕਾਰੋ ਦਸ੍ਸਿਤੋ. ਵਿਧੂਪਨੇਨਾਤਿ ਅਗ੍ਗਿਬੀਜਨਕੇਨ. ਓਸ੍ਸਵਨੇਤਿ ਛਦਨਗ੍ਗੇ, ਤੇਨ ਹਿ ਉਦਕਂ ਸਵਤਿ, ਤਸ੍ਮਾ ਤਂ ‘‘ਓਸ੍ਸਵਨ’’ਨ੍ਤਿ ਵੁਚ੍ਚਤਿ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੩੦੬. ਸੇਯ੍ਯਥਾਪਿ, ਆਵੁਸੋਤਿ ਇਧ ਕਿਂ ਦਸ੍ਸੇਤਿ? ਹੇਟ੍ਠਾ ਕਥਿਤਾਨਂ ਮਹਾਭੂਤਾਨਂ ਨਿਸ੍ਸਤ੍ਤਭਾਵਂ. ਕਟ੍ਠਨ੍ਤਿ ਦਬ੍ਬਸਮ੍ਭਾਰਂ. ਵਲ੍ਲਿਨ੍ਤਿ ਆਬਨ੍ਧਨਵਲ੍ਲਿਂ. ਤਿਣਨ੍ਤਿ ਛਦਨਤਿਣਂ. ਮਤ੍ਤਿਕਨ੍ਤਿ ਅਨੁਲੇਪਮਤ੍ਤਿਕਂ. ਆਕਾਸੋ ਪਰਿਵਾਰਿਤੋਤਿ ਏਤਾਨਿ ਕਟ੍ਠਾਦੀਨਿ ਅਨ੍ਤੋ ਚ ਬਹਿ ਚ ਪਰਿਵਾਰੇਤ੍ਵਾ ਆਕਾਸੋ ਠਿਤੋਤਿ ਅਤ੍ਥੋ. ਅਗਾਰਂਤ੍ਵੇਵ ਸਙ੍ਖਂ ਗਚ੍ਛਤੀਤਿ ਅਗਾਰਨ੍ਤਿ ਪਣ੍ਣਤ੍ਤਿਮਤ੍ਤਂ ਹੋਤਿ. ਕਟ੍ਠਾਦੀਸੁ ਪਨ ਵਿਸੁਂ ਵਿਸੁਂ ਰਾਸਿਕਤੇਸੁ ਕਟ੍ਠਰਾਸਿਵਲ੍ਲਿਰਾਸੀਤ੍ਵੇਵ ਵੁਚ੍ਚਤਿ. ਏਵਮੇਵ ਖੋਤਿ ਏਵਮੇਵ ਅਟ੍ਠਿਆਦੀਨਿ ਅਨ੍ਤੋ ਚ ਬਹਿ ਚ ਪਰਿਵਾਰੇਤ੍ਵਾ ਠਿਤੋ ਆਕਾਸੋ, ਤਾਨੇਵ ਅਟ੍ਠਿਆਦੀਨਿ ਪਟਿਚ੍ਚ ਰੂਪਂਤ੍ਵੇਵ ਸਙ੍ਖਂ ਗਚ੍ਛਤਿ, ਸਰੀਰਨ੍ਤਿ ਵੋਹਾਰਂ ਗਚ੍ਛਤਿ. ਯਥਾ ਕਟ੍ਠਾਦੀਨਿ ਪਟਿਚ੍ਚ ਗੇਹਨ੍ਤਿ ਸਙ੍ਖਂ ਗਤਂ ਅਗਾਰਂ ਖਤ੍ਤਿਯਗੇਹਂ ਬ੍ਰਾਹ੍ਮਣਗੇਹਨ੍ਤਿ ਵੁਚ੍ਚਤਿ, ਏਵਮਿਦਮ੍ਪਿ ਖਤ੍ਤਿਯਸਰੀਰਂ ਬ੍ਰਾਹ੍ਮਣਸਰੀਰਨ੍ਤਿ ਵੁਚ੍ਚਤਿ, ਨ ਹੇਤ੍ਥ ਕੋਚਿ ਸਤ੍ਤੋ ਵਾ ਜੀਵੋ ਵਾ ਵਿਜ੍ਜਤਿ.

ਅਜ੍ਝਤ੍ਤਿਕਞ੍ਚੇਵ, ਆਵੁਸੋ, ਚਕ੍ਖੂਤਿ ਇਦਂ ਕਸ੍ਮਾ ਆਰਦ੍ਧਂ? ਹੇਟ੍ਠਾ ਉਪਾਦਾਰੂਪਂ ਚਤ੍ਤਾਰੋ ਚ ਅਰੂਪਿਨੋ ਖਨ੍ਧਾ ਤੀਣਿ ਚ ਅਰਿਯਸਚ੍ਚਾਨਿ ਨ ਕਥਿਤਾਨਿ, ਇਦਾਨਿ ਤਾਨਿ ਕਥੇਤੁਂ ਅਯਂ ਦੇਸਨਾ ਆਰਦ੍ਧਾਤਿ. ਤਤ੍ਥ ਚਕ੍ਖੁਂ ਅਪਰਿਭਿਨ੍ਨਨ੍ਤਿ ਚਕ੍ਖੁਪਸਾਦੇ ਨਿਰੁਦ੍ਧੇਪਿ ਉਪਹਤੇਪਿ ਪਿਤ੍ਤਸੇਮ੍ਹਲੋਹਿਤੇਹਿ ਪਲਿਬੁਦ੍ਧੇਪਿ ਚਕ੍ਖੁ ਚਕ੍ਖੁਵਿਞ੍ਞਾਣਸ੍ਸ ਪਚ੍ਚਯੋ ਭਵਿਤੁਂ ਨ ਸਕ੍ਕੋਤਿ, ਪਰਿਭਿਨ੍ਨਮੇਵ ਹੋਤਿ, ਚਕ੍ਖੁਵਿਞ੍ਞਾਣਸ੍ਸ ਪਨ ਪਚ੍ਚਯੋ ਭਵਿਤੁਂ ਸਮਤ੍ਥਂ ਅਪਰਿਭਿਨ੍ਨਂ ਨਾਮ. ਬਾਹਿਰਾ ਚ ਰੂਪਾਤਿ ਬਾਹਿਰਾ ਚਤੁਸਮੁਟ੍ਠਾਨਿਕਰੂਪਾ. ਤਜ੍ਜੋ ਸਮਨ੍ਨਾਹਾਰੋਤਿ ਤਂ ਚਕ੍ਖੁਞ੍ਚ ਰੂਪੇ ਚ ਪਟਿਚ੍ਚ ਭਵਙ੍ਗਂ ਆਵਟ੍ਟੇਤ੍ਵਾ ਉਪ੍ਪਜ੍ਜਨਮਨਸਿਕਾਰੋ, ਭਵਙ੍ਗਾਵਟ੍ਟਨਸਮਤ੍ਥਂ ਚਕ੍ਖੁਦ੍ਵਾਰੇ ਕਿਰਿਯਮਨੋਧਾਤੁਚਿਤ੍ਤਨ੍ਤਿ ਅਤ੍ਥੋ. ਤਂ ਰੂਪਾਨਂ ਅਨਾਪਾਥਗਤਤ੍ਤਾਪਿ ਅਞ੍ਞਾਵਿਹਿਤਸ੍ਸਪਿ ਨ ਹੋਤਿ, ਤਜ੍ਜਸ੍ਸਾਤਿ ਤਦਨੁਰੂਪਸ੍ਸ. ਵਿਞ੍ਞਾਣਭਾਗਸ੍ਸਾਤਿ ਵਿਞ੍ਞਾਣਕੋਟ੍ਠਾਸਸ੍ਸ.

ਯਂ ਤਥਾਭੂਤਸ੍ਸਾਤਿਆਦੀਸੁ ਦ੍ਵਾਰਵਸੇਨ ਚਤ੍ਤਾਰਿ ਸਚ੍ਚਾਨਿ ਦਸ੍ਸੇਤਿ. ਤਤ੍ਥ ਤਥਾਭੂਤਸ੍ਸਾਤਿ ਚਕ੍ਖੁਵਿਞ੍ਞਾਣੇਨ ਸਹਭੂਤਸ੍ਸ, ਚਕ੍ਖੁਵਿਞ੍ਞਾਣਸਮਙ੍ਗਿਨੋਤਿ ਅਤ੍ਥੋ. ਰੂਪਨ੍ਤਿ ਚਕ੍ਖੁਵਿਞ੍ਞਾਣਸ੍ਸ ਨ ਰੂਪਜਨਕਤ੍ਤਾ ਚਕ੍ਖੁਵਿਞ੍ਞਾਣਕ੍ਖਣੇ ਤਿਸਮੁਟ੍ਠਾਨਰੂਪਂ, ਤਦਨਨ੍ਤਰਚਿਤ੍ਤਕ੍ਖਣੇ ਚਤੁਸਮੁਟ੍ਠਾਨਮ੍ਪਿ ਲਬ੍ਭਤਿ. ਸਙ੍ਗਹਂ ਗਚ੍ਛਤੀਤਿ ਗਣਨਂ ਗਚ੍ਛਤਿ. ਵੇਦਨਾਦਯੋ ਚਕ੍ਖੁਵਿਞ੍ਞਾਣਸਮ੍ਪਯੁਤ੍ਤਾਵ. ਵਿਞ੍ਞਾਣਮ੍ਪਿ ਚਕ੍ਖੁਵਿਞ੍ਞਾਣਮੇਵ. ਏਤ੍ਥ ਚ ਸਙ੍ਖਾਰਾਤਿ ਚੇਤਨਾਵ ਵੁਤ੍ਤਾ. ਸਙ੍ਗਹੋਤਿ ਏਕਤੋ ਸਙ੍ਗਹੋ. ਸਨ੍ਨਿਪਾਤੋਤਿ ਸਮਾਗਮੋ. ਸਮਵਾਯੋਤਿ ਰਾਸਿ. ਯੋ ਪਟਿਚ੍ਚਸਮੁਪ੍ਪਾਦਂ ਪਸ੍ਸਤੀਤਿ ਯੋ ਪਚ੍ਚਯੇ ਪਸ੍ਸਤਿ. ਸੋ ਧਮ੍ਮਂ ਪਸ੍ਸਤੀਤਿ ਸੋ ਪਟਿਚ੍ਚਸਮੁਪ੍ਪਨ੍ਨਧਮ੍ਮੇ ਪਸ੍ਸਤਿ, ਛਨ੍ਦੋਤਿਆਦਿ ਸਬ੍ਬਂ ਤਣ੍ਹਾਵੇਵਚਨਮੇਵ, ਤਣ੍ਹਾ ਹਿ ਛਨ੍ਦਕਰਣਵਸੇਨ ਛਨ੍ਦੋ. ਆਲਯਕਰਣਵਸੇਨ ਆਲਯੋ. ਅਨੁਨਯਕਰਣਵਸੇਨ ਅਨੁਨਯੋ. ਅਜ੍ਝੋਗਾਹਿਤ੍ਵਾ ਗਿਲਿਤ੍ਵਾ ਗਹਨਵਸੇਨ ਅਜ੍ਝੋਸਾਨਨ੍ਤਿ ਵੁਚ੍ਚਤਿ. ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨਨ੍ਤਿ ਨਿਬ੍ਬਾਨਸ੍ਸੇਵ ਵੇਵਚਨਂ, ਇਤਿ ਤੀਣਿ ਸਚ੍ਚਾਨਿ ਪਾਲ਼ਿਯਂ ਆਗਤਾਨੇਵ ਮਗ੍ਗਸਚ੍ਚਂ ਆਹਰਿਤ੍ਵਾ ਗਹੇਤਬ੍ਬਂ, ਯਾ ਇਮੇਸੁ ਤੀਸੁ ਠਾਨੇਸੁ ਦਿਟ੍ਠਿ ਸਙ੍ਕਪ੍ਪੋ ਵਾਚਾ ਕਮ੍ਮਨ੍ਤੋ ਆਜੀਵੋ ਵਾਯਾਮੋ ਸਤਿ ਸਮਾਧਿ ਭਾਵਨਾਪਟਿਵੇਧੋ, ਅਯਂ ਮਗ੍ਗੋਤਿ. ਬਹੁਕਤਂ ਹੋਤੀਤਿ ਏਤ੍ਤਾਵਤਾਪਿ ਬਹੁਂ ਭਗਵਤੋ ਸਾਸਨਂ ਕਤਂ ਹੋਤਿ, ਅਜ੍ਝਤ੍ਤਿਕਞ੍ਚੇਵ, ਆਵੁਸੋ, ਸੋਤਨ੍ਤਿਆਦਿਵਾਰੇਸੁਪਿ ਏਸੇਵ ਨਯੋ.

ਮਨੋਦ੍ਵਾਰੇ ਪਨ ਅਜ੍ਝਤ੍ਤਿਕੋ ਮਨੋ ਨਾਮ ਭਵਙ੍ਗਚਿਤ੍ਤਂ. ਤਂ ਨਿਰੁਦ੍ਧਮ੍ਪਿ ਆਵਜ੍ਜਨਚਿਤ੍ਤਸ੍ਸ ਪਚ੍ਚਯੋ ਭਵਿਤੁਂ ਅਸਮਤ੍ਥਂ ਮਨ੍ਦਥਾਮਗਤਮੇਵ ਪਵਤ੍ਤਮਾਨਮ੍ਪਿ ਪਰਿਭਿਨ੍ਨਂ ਨਾਮ ਹੋਤਿ. ਆਵਜ੍ਜਨਸ੍ਸ ਪਨ ਪਚ੍ਚਯੋ ਭਵਿਤੁਂ ਸਮਤ੍ਥਂ ਅਪਰਿਭਿਨ੍ਨਂ ਨਾਮ. ਬਾਹਿਰਾ ਚ ਧਮ੍ਮਾਤਿ ਧਮ੍ਮਾਰਮ੍ਮਣਂ. ਨੇਵ ਤਾਵ ਤਜ੍ਜਸ੍ਸਾਤਿ ਇਦਂ ਭਵਙ੍ਗਸਮਯੇਨੇਵ ਕਥਿਤਂ. ਦੁਤਿਯਵਾਰੋ ਪਗੁਣਜ੍ਝਾਨਪਚ੍ਚਵੇਕ੍ਖਣੇਨ ਵਾ, ਪਗੁਣਕਮ੍ਮਟ੍ਠਾਨਮਨਸਿਕਾਰੇਨ ਵਾ, ਪਗੁਣਬੁਦ੍ਧਵਚਨਸਜ੍ਝਾਯਕਰਣਾਦਿਨਾ ਵਾ, ਅਞ੍ਞਵਿਹਿਤਕਂ ਸਨ੍ਧਾਯ ਵੁਤ੍ਤੋ. ਇਮਸ੍ਮਿਂ ਵਾਰੇ ਰੂਪਨ੍ਤਿ ਚਤੁਸਮੁਟ੍ਠਾਨਮ੍ਪਿ ਲਬ੍ਭਤਿ. ਮਨੋਵਿਞ੍ਞਾਣਞ੍ਹਿ ਰੂਪਂ ਸਮੁਟ੍ਠਾਪੇਤਿ, ਵੇਦਨਾਦਯੋ ਮਨੋਵਿਞ੍ਞਾਣਸਮ੍ਪਯੁਤ੍ਤਾ, ਵਿਞ੍ਞਾਣਂ ਮਨੋਵਿਞ੍ਞਾਣਮੇਵ. ਸਙ੍ਖਾਰਾ ਪਨੇਤ੍ਥ ਫਸ੍ਸਚੇਤਨਾਵਸੇਨੇਵ ਗਹਿਤਾ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਤਿ ਮਹਾਥੇਰੋ ਹੇਟ੍ਠਾ ਏਕਦੇਸਮੇਵ ਸਮ੍ਮਸਨ੍ਤੋ ਆਗਨ੍ਤ੍ਵਾ ਇਮਸ੍ਮਿਂ ਠਾਨੇ ਠਤ੍ਵਾ ਹੇਟ੍ਠਾ ਪਰਿਹੀਨਦੇਸਨਂ ਸਬ੍ਬਂ ਤਂਤਂਦ੍ਵਾਰਵਸੇਨ ਭਾਜੇਤ੍ਵਾ ਦਸ੍ਸੇਨ੍ਤੋ ਯਥਾਨੁਸਨ੍ਧਿਨਾਵ ਸੁਤ੍ਤਨ੍ਤਂ ਨਿਟ੍ਠਪੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਹਾਹਤ੍ਥਿਪਦੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.