੭. ਵਤ੍ਥਸੁਤ੍ਤਵਣ੍ਣਨਾ
੭੦. ਏਵਂ ਮੇ ਸੁਤਨ੍ਤਿ ਵਤ੍ਥਸੁਤ੍ਤਂ. ਤਤ੍ਥ ਸੇਯ੍ਯਥਾਪਿ, ਭਿਕ੍ਖਵੇ, ਵਤ੍ਥਨ੍ਤਿ ਉਪਮਾਵਚਨਮੇਵੇਤਂ. ਉਪਮਂ ਕਰੋਨ੍ਤੋ ਚ ਭਗਵਾ ਕਤ੍ਥਚਿ ਪਠਮਂਯੇਵ ਉਪਮਂ ਦਸ੍ਸੇਤ੍ਵਾ ਪਚ੍ਛਾ ਅਤ੍ਥਂ ਦਸ੍ਸੇਤਿ, ਕਤ੍ਥਚਿ ਪਠਮਮਤ੍ਥਂ ਦਸ੍ਸੇਤ੍ਵਾ ਪਚ੍ਛਾ ਉਪਮਂ, ਕਤ੍ਥਚਿ ਉਪਮਾਯ ਅਤ੍ਥਂ ਪਰਿਵਾਰੇਤ੍ਵਾ ਦਸ੍ਸੇਤਿ, ਕਤ੍ਥਚਿ ਅਤ੍ਥੇਨ ਉਪਮਂ.
ਤਥਾ ਹੇਸ – ‘‘ਸੇਯ੍ਯਥਾਪਿਸ੍ਸੁ, ਭਿਕ੍ਖਵੇ, ਦ੍ਵੇ ਅਗਾਰਾ ਸਦ੍ਵਾਰਾ, ਤਤ੍ਥ ਚਕ੍ਖੁਮਾ ਪੁਰਿਸੋ ਮਜ੍ਝੇ ਠਿਤੋ ਪਸ੍ਸੇਯ੍ਯਾ’’ਤਿ (ਮ. ਨਿ. ੩.੨੬੧) ਸਕਲਮ੍ਪਿ ਦੇਵਦੂਤਸੁਤ੍ਤਂ ਉਪਮਂ ਪਠਮਂ ਦਸ੍ਸੇਤ੍ਵਾ ਪਚ੍ਛਾ ਅਤ੍ਥਂ ਦਸ੍ਸੇਨ੍ਤੋ ਆਹ. ‘‘ਤਿਰੋਕੁਟ੍ਟਂ ਤਿਰੋਪਾਕਾਰਂ ਤਿਰੋਪਬ੍ਬਤਂ ਅਸਜ੍ਜਮਾਨੋ ਗਚ੍ਛਤਿ, ਸੇਯ੍ਯਥਾਪਿ ਆਕਾਸੇ’’ਤਿਆਦਿਨਾ (ਦੀ. ਨਿ. ੧.੨੩੮; ਪਟਿ. ਮ. ੧.੧੦੨) ਪਨ ਨਯੇਨ ਸਕਲਮ੍ਪਿ ਇਦ੍ਧਿਵਿਧਮਤ੍ਥਂ ਪਠਮਂ ਦਸ੍ਸੇਤ੍ਵਾ ਪਚ੍ਛਾ ਉਪਮਂ ਦਸ੍ਸੇਨ੍ਤੋ ਆਹ. ‘‘ਸੇਯ੍ਯਥਾਪਿ ਬ੍ਰਾਹ੍ਮਣਪੁਰਿਸੋ ਸਾਰਤ੍ਥਿਕੋ ਸਾਰਗਵੇਸੀ’’ਤਿਆਦਿਨਾਵ (ਮ. ਨਿ. ੧.੩੧੮) ਨਯੇਨ ਸਕਲਮ੍ਪਿ ਚੂਲ਼ਸਾਰੋਪਮਸੁਤ੍ਤਂ ਉਪਮਾਯ ਅਤ੍ਥਂ ਪਰਿਵਾਰੇਤ੍ਵਾ ਦਸ੍ਸੇਨ੍ਤੋ ਆਹ. ‘‘ਇਧ ਪਨ, ਭਿਕ੍ਖਵੇ, ਏਕਚ੍ਚੇ ਕੁਲਪੁਤ੍ਤਾ ਧਮ੍ਮਂ ਪਰਿਯਾਪੁਣਨ੍ਤਿ ਸੁਤ੍ਤਂ…ਪੇ… ਸੇਯ੍ਯਥਾਪਿ, ਭਿਕ੍ਖਵੇ, ਪੁਰਿਸੋ ਅਲਗਦ੍ਦਤ੍ਥਿਕੋ’’ਤਿਆਦਿਨਾ (ਮ. ਨਿ. ੧.੨੩੮) ਨਯੇਨ ਸਕਲਮ੍ਪਿ ਅਲਗਦ੍ਦਸੁਤ੍ਤਂ ਮਹਾਸਾਰੋਪਮਸੁਤ੍ਤਨ੍ਤਿ ਏਵਮਾਦੀਨਿ ਸੁਤ੍ਤਾਨਿ ਅਤ੍ਥੇਨ ਉਪਮਂ ਪਰਿਵਾਰੇਤ੍ਵਾ ਦਸ੍ਸੇਨ੍ਤੋ ਆਹ.
ਸ੍ਵਾਯਂ ਇਧ ਪਠਮਂ ਉਪਮਂ ਦਸ੍ਸੇਤ੍ਵਾ ਪਚ੍ਛਾ ਅਤ੍ਥਂ ਦਸ੍ਸੇਤਿ. ਕਸ੍ਮਾ ਪਨੇਵਂ ਭਗਵਾ ਦਸ੍ਸੇਤੀਤਿ? ਪੁਗ੍ਗਲਜ੍ਝਾਸਯੇਨ ਵਾ ਦੇਸਨਾਵਿਲਾਸੇਨ ਵਾ. ਯੇ ਹਿ ਪੁਗ੍ਗਲਾ ਪਠਮਂ ਉਪਮਂ ਦਸ੍ਸੇਤ੍ਵਾ ਵੁਚ੍ਚਮਾਨਮਤ੍ਥਂ ਸੁਖੇਨ ਪਟਿਵਿਜ੍ਝਨ੍ਤਿ, ਤੇਸਂ ਪਠਮਂ ਉਪਮਂ ਦਸ੍ਸੇਤਿ. ਏਸ ਨਯੋ ਸਬ੍ਬਤ੍ਥ. ਯਸ੍ਸਾ ਚ ਧਮ੍ਮਧਾਤੁਯਾ ਸੁਪ੍ਪਟਿਵਿਦ੍ਧਤ੍ਤਾ ਦੇਸਨਾਵਿਲਾਸਂ ਪਤ੍ਤੋ ਹੋਤਿ, ਤਸ੍ਸਾ ਸੁਪ੍ਪਟਿਵਿਦ੍ਧਾ. ਤਸ੍ਮਾ ਏਸ ਦੇਸਨਾਵਿਲਾਸਮ੍ਪਤ੍ਤੋ ਧਮ੍ਮਿਸ੍ਸਰੋ ਧਮ੍ਮਰਾਜਾ, ਸੋ ਯਥਾ ਯਥਾ ਇਚ੍ਛਤਿ, ਤਥਾ ਤਥਾ ਧਮ੍ਮਂ ਦੇਸੇਤੀਤਿ ਏਵਂ ਇਮਿਨਾ ਪੁਗ੍ਗਲਜ੍ਝਾਸਯੇਨ ਵਾ ਦੇਸਨਾਵਿਲਾਸੇਨ ਵਾ ਏਵਂ ਦਸ੍ਸੇਤੀਤਿ ਵੇਦਿਤਬ੍ਬੋ.
ਤਤ੍ਥ ਵਤ੍ਥਨ੍ਤਿ ਪਕਤਿਪਰਿਸੁਦ੍ਧਂ ਵਤ੍ਥਂ. ਸਂਕਿਲਿਟ੍ਠਂ ਮਲਗ੍ਗਹਿਤਨ੍ਤਿ ਆਗਨ੍ਤੁਕੇਨ ਪਂਸੁਰਜਾਦਿਨਾ ਸਂਕਿਲੇਸੇਨ ਸਂਕਿਲਿਟ੍ਠਂ, ਸੇਦਜਲ੍ਲਿਕਾਦਿਨਾ ਮਲੇਨ ਗਹਿਤਤ੍ਤਾ ਮਲਗ੍ਗਹਿਤਂ. ਰਙ੍ਗਜਾਤੇਤਿ ਏਤ੍ਥ ਰਙ੍ਗਮੇਵ ਰਙ੍ਗਜਾਤਂ. ਉਪਸਂਹਰੇਯ੍ਯਾਤਿ ਉਪਨਾਮੇਯ੍ਯ. ਯਦਿ ਨੀਲਕਾਯਾਤਿ ਨੀਲਕਾਯ ਵਾ, ਨੀਲਕਤ੍ਥਾਯ ਵਾਤਿ ਵੁਤ੍ਤਂ ਹੋਤਿ. ਏਵਂ ਸਬ੍ਬਤ੍ਥ. ਰਜਕੋ ਹਿ ਨੀਲਕਤ੍ਥਾਯ ਉਪਸਂਹਰਨ੍ਤੋ ਕਂਸਨੀਲਪਲਾਸਨੀਲਾਦਿਕੇ ਨੀਲਰਙ੍ਗੇ ਉਪਸਂਹਰਤਿ. ਪੀਤਕਤ੍ਥਾਯ ਉਪਸਂਹਰਨ੍ਤੋ ਕਣਿਕਾਰਪੁਪ੍ਫਸਦਿਸੇ ਪੀਤਕਰਙ੍ਗੇ. ਲੋਹਿਤਕਤ੍ਥਾਯ ਉਪਸਂਹਰਨ੍ਤੋ ਬਨ੍ਧੁਜੀਵਕਪੁਪ੍ਫਸਦਿਸੇ ਲੋਹਿਤਕਰਙ੍ਗੇ. ਮਞ੍ਜਿਟ੍ਠਕਤ੍ਥਾਯ ਉਪਸਂਹਰਨ੍ਤੋ ਕਣਵੀਰਪੁਪ੍ਫਸਦਿਸੇ ਮਨ੍ਦਰਤ੍ਤਰਙ੍ਗੇ. ਤੇਨ ਵੁਤ੍ਤਂ ‘‘ਯਦਿ ਨੀਲਕਾਯ…ਪੇ… ਯਦਿ ਮਞ੍ਜਿਟ੍ਠਕਾਯਾ’’ਤਿ.
ਦੁਰਤ੍ਤਵਣ੍ਣਮੇਵਸ੍ਸਾਤਿ ਦੁਟ੍ਠੁ ਰਞ੍ਜਿਤਵਣ੍ਣਮੇਵ ਅਸ੍ਸ. ਅਪਰਿਸੁਦ੍ਧਵਣ੍ਣਮੇਵਸ੍ਸਾਤਿ ਨੀਲਵਣ੍ਣੋਪਿਸ੍ਸ ਪਰਿਸੁਦ੍ਧੋ ਨ ਭਵੇਯ੍ਯ, ਸੇਸਵਣ੍ਣੋਪਿ. ਤਾਦਿਸਞ੍ਹਿ ਵਤ੍ਥਂ ਨੀਲਕੁਮ੍ਭਿਯਾ ਪਕ੍ਖਿਤ੍ਤਮ੍ਪਿ ਸੁਨੀਲਂ ਨ ਹੋਤਿ, ਸੇਸਕੁਮ੍ਭੀਸੁ ਪਕ੍ਖਿਤ੍ਤਮ੍ਪਿ ਪੀਤਕਾਦਿਵਣ੍ਣਂ ਨ ਹੋਤਿ, ਮਿਲਾਤਨੀਲ ਕੁਰਣ੍ਡ-ਕਣਿਕਾਰ-ਬਨ੍ਧੁਜੀਵਕ-ਕਣਵੀਰਪੁਪ੍ਫਵਣ੍ਣਮੇਵ ਹੋਤਿ. ਤਂ ਕਿਸ੍ਸ ਹੇਤੂਤਿ ਤਂ ਵਤ੍ਥਂ ਕਿਸ੍ਸ ਹੇਤੁ ਕਿਂ ਕਾਰਣਾ ਈਦਿਸਂ ਹੋਤਿ, ਤਸ੍ਮਿਂ ਵਾ ਵਤ੍ਥੇ ਰਙ੍ਗਜਾਤਂ ਕਿਸ੍ਸ ਹੇਤੁ ਈਦਿਸਂ ਦੁਰਤ੍ਤਵਣ੍ਣਂ ਅਪਰਿਸੁਦ੍ਧਵਣ੍ਣਂ ਹੋਤੀਤਿ? ਯਸ੍ਮਾ ਪਨਸ੍ਸ ਵਤ੍ਥਸ੍ਸ ਸਂਕਿਲਿਟ੍ਠਭਾਵੋਯੇਵੇਤ੍ਥ ਕਾਰਣਂ, ਨ ਅਞ੍ਞਂ ਕਿਞ੍ਚਿ, ਤਸ੍ਮਾ ‘‘ਅਪਰਿਸੁਦ੍ਧਤ੍ਤਾ, ਭਿਕ੍ਖਵੇ, ਵਤ੍ਥਸ੍ਸਾ’’ਤਿ ਆਹ.
ਏਵਮੇਵ ਖੋਤਿ ਉਪਮਾਸਮ੍ਪਟਿਪਾਦਨਂ. ਚਿਤ੍ਤੇ ਸਂਕਿਲਿਟ੍ਠੇਤਿ ਚਿਤ੍ਤਮ੍ਹਿ ਸਂਕਿਲਿਟ੍ਠਮ੍ਹਿ. ਕਸ੍ਮਾ ਪਨ ਭਗਵਾ ਸਂਕਿਲਿਟ੍ਠਵਤ੍ਥੇਨ ਓਪਮ੍ਮਂ ਅਕਾਸੀਤਿ ਚੇ, ਵਾਯਾਮਮਹਪ੍ਫਲਦਸ੍ਸਨਤ੍ਥਂ. ਯਥਾ ਹਿ ਆਗਨ੍ਤੁਕੇਹਿ ਮਲੇਹਿ ਸਂਕਿਲਿਟ੍ਠਂ ਵਤ੍ਥਂ ਪਕਤਿਯਾ ਪਣ੍ਡਰਤ੍ਤਾ ਪੁਨ ਧੋਵੀਯਮਾਨਂ ਪਣ੍ਡਰਂ ਹੋਤਿ, ਨ ਤਤ੍ਥ ਜਾਤਿਕਾਲ਼ਕੇ ਵਿਯ ਏਲ਼ਕਲੋਮੇ ਵਾਯਾਮੋ ਨਿਪ੍ਫਲੋ ਹੋਤਿ, ਏਵਂ ਚਿਤ੍ਤਮ੍ਪਿ ਆਗਨ੍ਤੁਕੇਹਿ ਕਿਲੇਸੇਹਿ ਸਂਕਿਲਿਟ੍ਠਂ. ਪਕਤਿਯਾ ਪਨ ਤਂ ਸਕਲੇਪਿ ਪਟਿਸਨ੍ਧਿਭਵਙ੍ਗਵਾਰੇ ਪਣ੍ਡਰਮੇਵ. ਯਥਾਹ – ‘‘ਪਭਸ੍ਸਰਮਿਦਂ, ਭਿਕ੍ਖਵੇ, ਚਿਤ੍ਤਂ, ਤਞ੍ਚ ਖੋ ਆਗਨ੍ਤੁਕੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠ’’ਨ੍ਤਿ (ਅ. ਨਿ. ੧.੫੧). ਤਂ ਵਿਸੋਧੀਯਮਾਨਂ ਸਕ੍ਕਾ ਪਭਸ੍ਸਰਤਰਂ ਕਾਤੁਂ, ਨ ਤਤ੍ਥ ਵਾਯਾਮੋ ਨਿਪ੍ਫਲੋਤਿ ਏਵਂ ਵਾਯਾਮਮਹਪ੍ਫਲਦਸ੍ਸਨਤ੍ਥਂ ਸਂਕਿਲਿਟ੍ਠਵਤ੍ਥੇਨ ਓਪਮ੍ਮਂ ਅਕਾਸੀਤਿ ਵੇਦਿਤਬ੍ਬੋ.
ਦੁਗ੍ਗਤਿ ਪਾਟਿਕਙ੍ਖਾਤਿ ਈਦਿਸੇ ਚਿਤ੍ਤੇ ਦੁਗ੍ਗਤਿ ਪਾਟਿਕਙ੍ਖਿਤਬ੍ਬਾ, ਦੁਗ੍ਗਤਿਂ ਏਵ ਏਸ ਪਾਪੁਣਿਸ੍ਸਤਿ, ਨਾਞ੍ਞਨ੍ਤਿ ਏਵਂ ਦੁਗ੍ਗਤਿ ਇਚ੍ਛਿਤਬ੍ਬਾ, ਅਵਸ੍ਸਂ ਭਾਵੀਤਿ ਵੁਤ੍ਤਂ ਹੋਤਿ. ਸਾ ਚਾਯਂ ਦੁਗ੍ਗਤਿ ਨਾਮ ਪਟਿਪਤ੍ਤਿਦੁਗ੍ਗਤਿ, ਗਤਿਦੁਗ੍ਗਤੀਤਿ ਦੁਵਿਧਾ ਹੋਤਿ. ਪਟਿਪਤ੍ਤਿਦੁਗ੍ਗਤਿਪਿ ਅਗਾਰਿਯਪਟਿਪਤ੍ਤਿਦੁਗ੍ਗਤਿ, ਅਨਗਾਰਿਯਪਟਿਪਤ੍ਤਿਦੁਗ੍ਗਤੀਤਿ ਦੁਵਿਧਾ ਹੋਤਿ.
ਅਗਾਰਿਯੋ ਹਿ ਸਂਕਿਲਿਟ੍ਠਚਿਤ੍ਤੋ ਪਾਣਮ੍ਪਿ ਹਨਤਿ, ਅਦਿਨ੍ਨਮ੍ਪਿ ਆਦਿਯਤਿ, ਸਕਲੇਪਿ ਦਸ ਅਕੁਸਲਕਮ੍ਮਪਥੇ ਪੂਰੇਤਿ, ਅਯਮਸ੍ਸ ਅਗਾਰਿਯਪਟਿਪਤ੍ਤਿਦੁਗ੍ਗਤਿ. ਸੋ ਤਤ੍ਥ ਠਿਤੋ ਕਾਯਸ੍ਸ ਭੇਦਾ ਨਿਰਯਮ੍ਪਿ ਗਚ੍ਛਤਿ, ਤਿਰਚ੍ਛਾਨਯੋਨਿਮ੍ਪਿ, ਪੇਤ੍ਤਿਵਿਸਯਮ੍ਪਿ ਗਚ੍ਛਤਿ, ਅਯਮਸ੍ਸ ਗਤਿਦੁਗ੍ਗਤਿ.
ਅਨਗਾਰਿਯੋਪਿ ਇਮਸ੍ਮਿਂ ਸਾਸਨੇ ਪਬ੍ਬਜਿਤੋ ਸਂਕਿਲਿਟ੍ਠਚਿਤ੍ਤੋ ਦੂਤੇਯ੍ਯਪਹਿਣਗਮਨਂ ਗਚ੍ਛਤਿ, ਵੇਜ੍ਜਕਮ੍ਮਂ ਕਰੋਤਿ, ਸਙ੍ਘਭੇਦਾਯ ਚੇਤਿਯਭੇਦਾਯ ਪਰਕ੍ਕਮਤਿ, ਵੇਲ਼ੁਦਾਨਾਦੀਹਿ ਜੀਵਿਕਂ ਕਪ੍ਪੇਤਿ, ਸਕਲਮ੍ਪਿ ਅਨਾਚਾਰਂ ਅਗੋਚਰਞ੍ਚ ਪਰਿਪੂਰੇਤਿ, ਅਯਮਸ੍ਸ ਅਨਗਾਰਿਯਪਟਿਪਤ੍ਤਿਦੁਗ੍ਗਤਿ.ਸੋ ਤਤ੍ਥ ਠਿਤੋ ਕਾਯਸ੍ਸ ਭੇਦਾ ਨਿਰਯਮ੍ਪਿ ਗਚ੍ਛਤਿ, ਤਿਰਚ੍ਛਾਨਯੋਨਿਮ੍ਪਿ, ਪੇਤ੍ਤਿਵਿਸਯਮ੍ਪਿ ਗਚ੍ਛਤਿ ਸਮਣਯਕ੍ਖੋ ਨਾਮ ਹੋਤਿ ਸਮਣਪੇਤੋ, ਆਦਿਤ੍ਤੇਹਿ ਸਙ੍ਘਾਟਿਆਦੀਹਿ ਸਮ੍ਪਜ੍ਜਲਿਤਕਾਯੋ ਅਟ੍ਟਸ੍ਸਰਂ ਕਰੋਨ੍ਤੋ ਵਿਚਰਤਿ, ਅਯਮਸ੍ਸ ਗਤਿਦੁਗ੍ਗਤਿ.
ਸੇਯ੍ਯਥਾਪੀਤਿ ਸੁਕ੍ਕਪਕ੍ਖਂ ਦਸ੍ਸੇਤੁਮਾਰਦ੍ਧੋ, ਤਸ੍ਸਤ੍ਥੋ ਕਣ੍ਹਪਕ੍ਖੇ ਵੁਤ੍ਤਪਚ੍ਚਨੀਕੇਨੇਵ ਵੇਦਿਤਬ੍ਬੋ. ਏਤ੍ਥਾਪਿ ਚ ਸੁਗਤਿ ਨਾਮ ਪਟਿਪਤ੍ਤਿਸੁਗਤਿ ਗਤਿਸੁਗਤੀਤਿ ਦੁਵਿਧਾ ਹੋਤਿ. ਪਟਿਪਤ੍ਤਿਸੁਗਤਿਪਿ ਅਗਾਰਿਯਪਟਿਪਤ੍ਤਿਸੁਗਤਿ ਅਨਗਾਰਿਯਪਟਿਪਤ੍ਤਿਸੁਗਤੀਤਿ ਦੁਵਿਧਾ ਹੋਤਿ. ਅਗਾਰਿਯੋ ਹਿ ਪਰਿਸੁਦ੍ਧਚਿਤ੍ਤੋ ਪਾਣਾਤਿਪਾਤਾਪਿ ਵਿਰਮਤਿ, ਅਦਿਨ੍ਨਾਦਾਨਾਪਿ, ਸਕਲੇਪਿ ਦਸ ਕੁਸਲਕਮ੍ਮਪਥੇ ਪਰਿਪੂਰੇਤਿ, ਅਯਮਸ੍ਸ ਅਗਾਰਿਯਪਟਿਪਤ੍ਤਿਸੁਗਤਿ. ਸੋ ਤਤ੍ਥ ਠਿਤੋ ਕਾਯਸ੍ਸ ਭੇਦਾ ਮਨੁਸ੍ਸਮਹਨ੍ਤਤਮ੍ਪਿ ਦੇਵਮਹਨ੍ਤਤਮ੍ਪਿ ਉਪਪਜ੍ਜਤਿ, ਅਯਮਸ੍ਸ ਗਤਿਸੁਗਤਿ.
ਅਨਗਾਰਿਯੋਪਿ ਇਮਸ੍ਮਿਂ ਸਾਸਨੇ ਪਬ੍ਬਜਿਤ੍ਵਾ ਪਰਿਸੁਦ੍ਧਚਿਤ੍ਤੋ ਚਤੁਪਾਰਿਸੁਦ੍ਧਿਸੀਲਂ ਸੋਧੇਤਿ, ਤੇਰਸ ਧੁਤਙ੍ਗਾਨਿ ਸਮਾਦਿਯਤਿ, ਅਟ੍ਠਤਿਂਸਾਰਮ੍ਮਣੇਸੁ ਅਤ੍ਤਨੋ ਅਨੁਕੂਲਕਮ੍ਮਟ੍ਠਾਨਂ ਗਹੇਤ੍ਵਾ ਪਨ੍ਤਸੇਨਾਸਨੇ ਪਟਿਸੇਵਮਾਨੋ ਕਸਿਣਪਰਿਕਮ੍ਮਂ ਕਤ੍ਵਾ ਝਾਨਸਮਾਪਤ੍ਤਿਯੋ ਨਿਬ੍ਬਤ੍ਤੇਤਿ, ਸੋਤਾਪਤ੍ਤਿਮਗ੍ਗਂ ਭਾਵੇਤਿ…ਪੇ… ਅਨਾਗਾਮਿਮਗ੍ਗਂ ਭਾਵੇਤਿ, ਅਯਮਸ੍ਸ ਅਨਗਾਰਿਯਪਟਿਪਤ੍ਤਿਸੁਗਤਿ. ਸੋ ਤਤ੍ਥ ਠਿਤੋ ਕਾਯਸ੍ਸ ਭੇਦਾ ਮਨੁਸ੍ਸਲੋਕੇ ਵਾ ਤੀਸੁ ਮਹਾਕੁਲੇਸੁ, ਛਸੁ ਵਾ ਕਾਮਾਵਚਰਦੇਵੇਸੁ, ਦਸਸੁ ਵਾ ਬ੍ਰਹ੍ਮਭਵਨੇਸੁ, ਪਞ੍ਚਸੁ ਵਾ ਸੁਦ੍ਧਾਵਾਸੇਸੁ, ਚਤੂਸੁ ਵਾ ਆਰੁਪ੍ਪੇਸੁ ਉਪਪਜ੍ਜਤਿ, ਅਯਮਸ੍ਸ ਗਤਿਸੁਗਤੀਤਿ.
੭੧. ਏਵਂ ਸਂਕਿਲਿਟ੍ਠੇ ਚਿਤ੍ਤੇ ਦੁਗ੍ਗਤਿ ਪਾਟਿਕਙ੍ਖਾ, ਅਸਂਕਿਲਿਟ੍ਠੇ ਚ ਸੁਗਤੀਤਿ ਵਤ੍ਵਾ ਇਦਾਨਿ ਯੇਹਿ ਉਪਕ੍ਕਿਲੇਸੇਹਿ ਚਿਤ੍ਤਂ ਸਂਕਿਲਿਟ੍ਠਂ ਹੋਤਿ, ਤੇ ਦਸ੍ਸੇਨ੍ਤੋ ਕਤਮੇ ਚ, ਭਿਕ੍ਖਵੇ, ਚਿਤ੍ਤਸ੍ਸ ਉਪਕ੍ਕਿਲੇਸਾ? ਅਭਿਜ੍ਝਾ ਵਿਸਮਲੋਭੋਤਿਆਦਿਮਾਹ.
ਤਤ੍ਥ ਸਕਭਣ੍ਡੇ ਛਨ੍ਦਰਾਗੋ ਅਭਿਜ੍ਝਾ, ਪਰਭਣ੍ਡੇ ਵਿਸਮਲੋਭੋ. ਅਥ ਵਾ ਸਕਭਣ੍ਡੇ ਵਾ ਪਰਭਣ੍ਡੇ ਵਾ ਹੋਤੁ, ਯੁਤ੍ਤਪਤ੍ਤਟ੍ਠਾਨੇ ਛਨ੍ਦਰਾਗੋ ਅਭਿਜ੍ਝਾ, ਅਯੁਤ੍ਤਾਪਤ੍ਤਟ੍ਠਾਨੇ ਵਿਸਮਲੋਭੋ. ਥੇਰੋ ਪਨਾਹ ‘‘ਕਿਸ੍ਸ ਵਿਨਿਬ੍ਭੋਗਂ ਕਰੋਥ, ਯੁਤ੍ਤੇ ਵਾ ਅਯੁਤ੍ਤੇ ਵਾ ਹੋਤੁ, ‘ਰਾਗੋ ਵਿਸਮਂ ਦੋਸੋ ਵਿਸਮਂ ਮੋਹੋ ਵਿਸਮ’ਨ੍ਤਿ (ਵਿਭ. ੯੨੪) ਵਚਨਤੋ ਨ ਕੋਚਿ ਲੋਭੋ ਅਵਿਸਮੋ ਨਾਮ, ਤਸ੍ਮਾ ਲੋਭੋਯੇਵ ਅਭਿਜ੍ਝਾਯਨਟ੍ਠੇਨ ਅਭਿਜ੍ਝਾ, ਵਿਸਮਟ੍ਠੇਨ ਵਿਸਮਂ, ਏਕਤ੍ਥਮੇਤਂ ਬ੍ਯਞ੍ਜਨਮੇਵ ਨਾਨ’’ਨ੍ਤਿ. ਸੋ ਪਨੇਸ ਅਭਿਜ੍ਝਾਵਿਸਮਲੋਭੋ ਉਪ੍ਪਜ੍ਜਿਤ੍ਵਾ ਚਿਤ੍ਤਂ ਦੂਸੇਤਿ, ਓਭਾਸਿਤੁਂ ਨ ਦੇਤਿ. ਤਸ੍ਮਾ ‘‘ਚਿਤ੍ਤਸ੍ਸ ਉਪਕ੍ਕਿਲੇਸੋ’’ਤਿ ਵੁਚ੍ਚਤਿ.
ਯਥਾ ਚੇਸ, ਏਵਂ ਨਵਵਿਧਆਘਾਤਵਤ੍ਥੁਸਮ੍ਭਵੋ ਬ੍ਯਾਪਾਦੋ. ਦਸਵਿਧਆਘਾਤਵਤ੍ਥੁਸਮ੍ਭਵੋ ਕੋਧੋ. ਪੁਨਪ੍ਪੁਨਂ ਚਿਤ੍ਤਪਰਿਯੋਨਨ੍ਧਨੋ ਉਪਨਾਹੋ. ਅਗਾਰਿਯਸ੍ਸ ਵਾ ਅਨਗਾਰਿਯਸ੍ਸ ਵਾ ਸੁਕਤਕਰਣਵਿਨਾਸਨੋ ਮਕ੍ਖੋ. ਅਗਾਰਿਯੋਪਿ ਹਿ ਕੇਨਚਿ ਅਨੁਕਮ੍ਪਕੇਨ ਦਲਿਦ੍ਦੋ ਸਮਾਨੋ ਉਚ੍ਚੇ ਠਾਨੇ ਠਪਿਤੋ, ਅਪਰੇਨ ਸਮਯੇਨ ‘‘ਕਿਂ ਤਯਾ ਮਯ੍ਹਂ ਕਤ’’ਨ੍ਤਿ ਤਸ੍ਸ ਸੁਕਤਕਰਣਂ ਵਿਨਾਸੇਤਿ. ਅਨਗਾਰਿਯੋਪਿ ਸਾਮਣੇਰਕਾਲਤੋ ਪਭੁਤਿ ਆਚਰਿਯੇਨ ਵਾ ਉਪਜ੍ਝਾਯੇਨ ਵਾ ਚਤੂਹਿ ਪਚ੍ਚਯੇਹਿ ਉਦ੍ਦੇਸਪਰਿਪੁਚ੍ਛਾਹਿ ਚ ਅਨੁਗ੍ਗਹੇਤ੍ਵਾ ਧਮ੍ਮਕਥਾਨਯਪਕਰਣਕੋਸਲ੍ਲਾਦੀਨਿ ਸਿਕ੍ਖਾਪਿਤੋ, ਅਪਰੇਨ ਸਮਯੇਨ ਰਾਜਰਾਜਮਹਾਮਤ੍ਤਾਦੀਹਿ ਸਕ੍ਕਤੋ ਗਰੁਕਤੋ ਆਚਰਿਯੁਪਜ੍ਝਾਯੇਸੁ ਅਚਿਤ੍ਤੀਕਤੋ ਚਰਮਾਨੋ ‘‘ਅਯਂ ਅਮ੍ਹੇਹਿ ਦਹਰਕਾਲੇ ਏਵਂ ਅਨੁਗ੍ਗਹਿਤੋ ਸਂਵਡ੍ਢਿਤੋ ਚ, ਅਥ ਪਨਿਦਾਨਿ ਨਿਸ੍ਸਿਨੇਹੋ ਜਾਤੋ’’ਤਿ ਵੁਚ੍ਚਮਾਨੋ ‘‘ਕਿਂ ਮਯ੍ਹਂ ਤੁਮ੍ਹੇਹਿ ਕਤ’’ਨ੍ਤਿ ਤੇਸਂ ਸੁਕਤਕਰਣਂ ਵਿਨਾਸੇਤਿ, ਤਸ੍ਸ ਸੋ ਸੁਕਤਕਰਣਵਿਨਾਸਨੋ ਮਕ੍ਖੋ ਉਪ੍ਪਜ੍ਜਿਤ੍ਵਾ ਚਿਤ੍ਤਂ ਦੂਸੇਤਿ, ਓਭਾਸਿਤੁਂ ਨ ਦੇਤਿ. ਤਸ੍ਮਾ ‘‘ਚਿਤ੍ਤਸ੍ਸ ਉਪਕ੍ਕਿਲੇਸੋ’’ਤਿ ਵੁਚ੍ਚਤਿ.
ਯਥਾ ਚਾਯਂ, ਏਵਂ ਬਹੁਸ੍ਸੁਤੇਪਿ ਪੁਗ੍ਗਲੇ ਅਜ੍ਝੋਤ੍ਥਰਿਤ੍ਵਾ ‘‘ਈਦਿਸਸ੍ਸ ਚੇਵ ਬਹੁਸ੍ਸੁਤਸ੍ਸ ਅਨਿਯਤਾ ਗਤਿ, ਤਵ ਵਾ ਮਮ ਵਾ ਕੋ ਵਿਸੇਸੋ’’ਤਿਆਦਿਨਾ ਨਯੇਨ ਉਪ੍ਪਜ੍ਜਮਾਨੋ ਯੁਗਗ੍ਗਾਹਗਾਹੀ ਪਲ਼ਾਸੋ. ਪਰੇਸਂ ਸਕ੍ਕਾਰਾਦੀਨਿ ਖੀਯਨਾ ਇਸ੍ਸਾ. ਅਤ੍ਤਨੋ ਸਮ੍ਪਤ੍ਤਿਯਾ ਪਰੇਹਿ ਸਾਧਾਰਣਭਾਵਂ ਅਸਹਮਾਨਂ ਮਚ੍ਛਰਿਯਂ. ਵਞ੍ਚਨਿਕਚਰਿਯਭੂਤਾ ਮਾਯਾ. ਕੇਰਾਟਿਕਭਾਵੇਨ ਉਪ੍ਪਜ੍ਜਮਾਨਂ ਸਾਠੇਯ੍ਯਂ. ਕੇਰਾਟਿਕੋ ਹਿ ਆਯਤਨਮਚ੍ਛੋ ਵਿਯ ਹੋਤਿ. ਆਯਤਨਮਚ੍ਛੋ ਨਾਮ ਕਿਰ ਮਚ੍ਛਾਨਂ ਨਙ੍ਗੁਟ੍ਠਂ ਦਸ੍ਸੇਤਿ ਸਪ੍ਪਾਨਂ ਸੀਸਂ, ‘‘ਤੁਮ੍ਹੇਹਿ ਸਦਿਸੋ ਅਹ’’ਨ੍ਤਿ ਜਾਨਾਪੇਤੁਂ. ਏਵਮੇਵ ਕੇਰਾਟਿਕੋ ਪੁਗ੍ਗਲੋ ਯਂ ਯਂ ਸੁਤ੍ਤਨ੍ਤਿਕਂ ਵਾ ਆਭਿਧਮ੍ਮਿਕਂ ਵਾ ਉਪਸਙ੍ਕਮਤਿ, ਤਂ ਤਂ ਏਵਂ ਵਦਤਿ ‘‘ਅਹਂ ਤੁਮ੍ਹਾਕਂ ਬਦ੍ਧਚਰੋ, ਤੁਮ੍ਹੇ ਮਯ੍ਹਂ ਅਨੁਕਮ੍ਪਕਾ, ਨਾਹਂ ਤੁਮ੍ਹੇ ਮੁਞ੍ਚਾਮੀ’’ਤਿ ‘‘ਏਵਮੇਤੇ ‘ਸਗਾਰਵੋ ਅਯਂ ਅਮ੍ਹੇਸੁ ਸਪ੍ਪਤਿਸ੍ਸੋ’ਤਿ ਮਞ੍ਞਿਸ੍ਸਨ੍ਤੀ’’ਤਿ. ਤਸ੍ਸੇਤਂ ਕੇਰਾਟਿਕਭਾਵੇਨ ਉਪ੍ਪਜ੍ਜਮਾਨਂ ਸਾਠੇਯ੍ਯਂ ਉਪ੍ਪਜ੍ਜਿਤ੍ਵਾ ਚਿਤ੍ਤਂ ਦੂਸੇਤਿ, ਓਭਾਸਿਤੁਂ ਨ ਦੇਤਿ. ਤਸ੍ਮਾ ‘‘ਚਿਤ੍ਤਸ੍ਸ ਉਪਕ੍ਕਿਲੇਸੋ’’ਤਿ ਵੁਚ੍ਚਤਿ.
ਯਥਾ ਚੇਤਂ, ਏਵਂ ਵਾਤਭਰਿਤਭਸ੍ਤਸਦਿਸਥਦ੍ਧਭਾਵਪਗ੍ਗਹਿਤਸਿਰਅਨਿਵਾਤਵੁਤ੍ਤਿਕਾਰਕਰਣੋ ਥਮ੍ਭੋ. ਤਦੁਤ੍ਤਰਿਕਰਣੋ ਸਾਰਮ੍ਭੋ. ਸੋ ਦੁਵਿਧੇਨ ਲਬ੍ਭਤਿ ਅਕੁਸਲਵਸੇਨ ਚੇਵ ਕੁਸਲਵਸੇਨ ਚ. ਤਤ੍ਥ ਅਗਾਰਿਯਸ੍ਸ ਪਰੇਨ ਕਤਂ ਅਲਙ੍ਕਾਰਾਦਿਂ ਦਿਸ੍ਵਾ ਤਦ੍ਦਿਗੁਣਕਰਣੇਨ ਉਪ੍ਪਜ੍ਜਮਾਨੋ, ਅਨਗਾਰਿਯਸ੍ਸ ਚ ਯਤ੍ਤਕਂ ਯਤ੍ਤਕਂ ਪਰੋ ਪਰਿਯਾਪੁਣਾਤਿ ਵਾ ਕਥੇਤਿ ਵਾ, ਮਾਨਵਸੇਨ ਤਦ੍ਦਿਗੁਣਤਦ੍ਦਿਗੁਣਕਰਣੇਨ ਉਪ੍ਪਜ੍ਜਮਾਨੋ ਅਕੁਸਲੋ. ਅਗਾਰਿਯਸ੍ਸ ਪਨ ਪਰਂ ਏਕਂ ਸਲਾਕਭਤ੍ਤਂ ਦੇਨ੍ਤਂ ਦਿਸ੍ਵਾ ਅਤ੍ਤਨਾ ਦ੍ਵੇ ਵਾ ਤੀਣਿ ਵਾ ਦਾਤੁਕਾਮਤਾਯ ਉਪ੍ਪਜ੍ਜਮਾਨੋ, ਅਨਗਾਰਿਯਸ੍ਸ ਚ ਪਰੇਨ ਏਕਨਿਕਾਯੇ ਗਹਿਤੇ ਮਾਨਂ ਅਨਿਸ੍ਸਾਯ ਕੇਵਲਂ ਤਂ ਦਿਸ੍ਵਾ ਅਤ੍ਤਨਾ ਆਲਸਿਯਂ ਅਭਿਭੁਯ੍ਯ ਦ੍ਵੇ ਨਿਕਾਯੇ ਗਹੇਤੁਕਾਮਤਾਯ ਉਪ੍ਪਜ੍ਜਮਾਨੋ ਕੁਸਲੋ. ਇਧ ਪਨ ਅਕੁਸਲੋ ਅਧਿਪ੍ਪੇਤੋ. ਅਯਞ੍ਹਿ ਉਪ੍ਪਜ੍ਜਿਤ੍ਵਾ ਚਿਤ੍ਤਂ ਦੂਸੇਤਿ, ਓਭਾਸਿਤੁਂ ਨ ਦੇਤਿ. ਤਸ੍ਮਾ ‘‘ਚਿਤ੍ਤਸ੍ਸ ਉਪਕ੍ਕਿਲੇਸੋ’’ਤਿ ਵੁਚ੍ਚਤਿ.
ਯਥਾ ਚਾਯਂ, ਏਵਂ ਜਾਤਿਆਦੀਨਿ ਨਿਸ੍ਸਾਯ ਚਿਤ੍ਤਸ੍ਸ ਉਣ੍ਣਤਿਵਸੇਨ ਪਵਤ੍ਤਮਾਨੋ ਮਾਨੋ, ਅਚ੍ਚੁਣ੍ਣਤਿਵਸੇਨ ਅਤਿਮਾਨੋ, ਮਦਗ੍ਗਹਣਾਕਾਰੋ ਮਦੋ, ਕਾਮਗੁਣੇਸੁ ਚਿਤ੍ਤਵੋਸ੍ਸਗ੍ਗਵਸੇਨ ਉਪ੍ਪਜ੍ਜਮਾਨੋ ਪਮਾਦੋ ਉਪ੍ਪਜ੍ਜਿਤ੍ਵਾ ਚਿਤ੍ਤਂ ਦੂਸੇਤਿ, ਓਭਾਸਿਤੁਂ ਨ ਦੇਤਿ. ਤਸ੍ਮਾ ‘‘ਚਿਤ੍ਤਸ੍ਸ ਉਪਕ੍ਕਿਲੇਸੋ’’ਤਿ ਵੁਚ੍ਚਤਿ.
ਕਸ੍ਮਾ ਪਨ ਭਗਵਾ ਉਪਕ੍ਕਿਲੇਸਂ ਦਸ੍ਸੇਨ੍ਤੋ ਲੋਭਮਾਦਿਂ ਕਤ੍ਵਾ ਦਸ੍ਸੇਤੀਤਿ? ਤਸ੍ਸ ਪਠਮੁਪ੍ਪਤ੍ਤਿਤੋ. ਸਬ੍ਬਸਤ੍ਤਾਨਞ੍ਹਿ ਯਤ੍ਥ ਕਤ੍ਥਚਿ ਉਪਪਨ੍ਨਾਨਂ ਅਨ੍ਤਮਸੋ ਸੁਦ੍ਧਾਵਾਸਭੂਮਿਯਮ੍ਪਿ ਸਬ੍ਬਪਠਮਂ ਭਵਨਿਕਨ੍ਤਿਵਸੇਨ ਲੋਭੋ ਉਪ੍ਪਜ੍ਜਤਿ, ਤਤੋ ਅਤ੍ਤਨੋ ਅਤ੍ਤਨੋ ਅਨੁਰੂਪਪਚ੍ਚਯਂ ਪਟਿਚ੍ਚ ਯਥਾਸਮ੍ਭਵਂ ਇਤਰੇ, ਨ ਚ ਏਤੇ ਸੋਲ਼ਸੇਵ ਚਿਤ੍ਤਸ੍ਸ ਉਪਕ੍ਕਿਲੇਸਾ, ਏਤੇਨ ਪਨ ਨਯੇਨ ਸਬ੍ਬੇਪਿ ਕਿਲੇਸਾ ਗਹਿਤਾਯੇਵ ਹੋਨ੍ਤੀਤਿ ਵੇਦਿਤਬ੍ਬਾ.
੭੨. ਏਤ੍ਤਾਵਤਾ ਸਂਕਿਲੇਸਂ ਦਸ੍ਸੇਤ੍ਵਾ ਇਦਾਨਿ ਵੋਦਾਨਂ ਦਸ੍ਸੇਨ੍ਤੋ ਸ ਖੋ ਸੋ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਇਤਿ ਵਿਦਿਤ੍ਵਾਤਿ ਏਵਂ ਜਾਨਿਤ੍ਵਾ. ਪਜਹਤੀਤਿ ਸਮੁਚ੍ਛੇਦਪ੍ਪਹਾਨਵਸੇਨ ਅਰਿਯਮਗ੍ਗੇਨ ਪਜਹਤਿ. ਤਤ੍ਥ ਕਿਲੇਸਪਟਿਪਾਟਿਯਾ ਮਗ੍ਗਪਟਿਪਾਟਿਯਾਤਿ ਦ੍ਵਿਧਾ ਪਹਾਨਂ ਵੇਦਿਤਬ੍ਬਂ. ਕਿਲੇਸਪਟਿਪਾਟਿਯਾ ਤਾਵ ਅਭਿਜ੍ਝਾਵਿਸਮਲੋਭੋ ਥਮ੍ਭੋ ਸਾਰਮ੍ਭੋ ਮਾਨੋ ਅਤਿਮਾਨੋ ਮਦੋਤਿ ਇਮੇ ਛ ਕਿਲੇਸਾ ਅਰਹਤ੍ਤਮਗ੍ਗੇਨ ਪਹੀਯਨ੍ਤਿ. ਬ੍ਯਾਪਾਦੋ ਕੋਧੋ ਉਪਨਾਹੋ ਪਮਾਦੋਤਿ ਇਮੇ ਚਤ੍ਤਾਰੋ ਕਿਲੇਸਾ ਅਨਾਗਾਮਿਮਗ੍ਗੇਨ ਪਹੀਯਨ੍ਤਿ. ਮਕ੍ਖੋ ਪਲ਼ਾਸੋ ਇਸ੍ਸਾ ਮਚ੍ਛਰਿਯਂ ਮਾਯਾ ਸਾਠੇਯ੍ਯਨ੍ਤਿ ਇਮੇ ਛ ਸੋਤਾਪਤ੍ਤਿਮਗ੍ਗੇਨ ਪਹੀਯਨ੍ਤੀਤਿ. ਮਗ੍ਗਪਟਿਪਾਟਿਯਾ ਪਨ, ਸੋਤਾਪਤ੍ਤਿਮਗ੍ਗੇਨ ਮਕ੍ਖੋ ਪਲ਼ਾਸੋ ਇਸ੍ਸਾ ਮਚ੍ਛਰਿਯਂ ਮਾਯਾ ਸਾਠੇਯ੍ਯਨ੍ਤਿ ਇਮੇ ਛ ਪਹੀਯਨ੍ਤਿ. ਅਨਾਗਾਮਿਮਗ੍ਗੇਨ ਬ੍ਯਾਪਾਦੋ ਕੋਧੋ ਉਪਨਾਹੋ ਪਮਾਦੋਤਿ ਇਮੇ ਚਤ੍ਤਾਰੋ. ਅਰਹਤ੍ਤਮਗ੍ਗੇਨ ਅਭਿਜ੍ਝਾਵਿਸਮਲੋਭੋ ਥਮ੍ਭੋ ਸਾਰਮ੍ਭੋ ਮਾਨੋ ਅਤਿਮਾਨੋ ਮਦੋਤਿ ਇਮੇ ਛ ਪਹੀਯਨ੍ਤੀਤਿ.
ਇਮਸ੍ਮਿਂ ਪਨ ਠਾਨੇ ਇਮੇ ਕਿਲੇਸਾ ਸੋਤਾਪਤ੍ਤਿਮਗ੍ਗਵਜ੍ਝਾ ਵਾ ਹੋਨ੍ਤੁ, ਸੇਸਮਗ੍ਗਵਜ੍ਝਾ ਵਾ, ਅਥ ਖੋ ਅਨਾਗਾਮਿਮਗ੍ਗੇਨੇਵ ਪਹਾਨਂ ਸਨ੍ਧਾਯ ‘‘ਅਭਿਜ੍ਝਾਵਿਸਮਲੋਭਂ ਚਿਤ੍ਤਸ੍ਸ ਉਪਕ੍ਕਿਲੇਸਂ ਪਜਹਤੀ’’ਤਿਆਦਿਮਾਹਾਤਿ ਵੇਦਿਤਬ੍ਬਾ. ਅਯਮੇਤ੍ਥ ਪਵੇਣਿਮਗ੍ਗਾਗਤੋ ਸਮ੍ਭਵੋ, ਸੋ ਚ ਉਪਰਿ ਚਤੁਤ੍ਥਮਗ੍ਗਸ੍ਸੇਵ ਨਿਦ੍ਦਿਟ੍ਠਤ੍ਤਾ ਯੁਜ੍ਜਤਿ, ਤਤਿਯਮਗ੍ਗੇਨ ਪਹੀਨਾਵਸੇਸਾਨਞ੍ਹਿ ਵਿਸਮਲੋਭਾਦੀਨਂ ਤੇਨ ਪਹਾਨਂ ਹੋਤਿ, ਸੇਸਾਨਂ ਇਮਿਨਾਵ. ਯੇਪਿ ਹਿ ਸੋਤਾਪਤ੍ਤਿਮਗ੍ਗੇਨ ਪਹੀਯਨ੍ਤਿ, ਤੇਪਿ ਤਂਸਮੁਟ੍ਠਾਪਕਚਿਤ੍ਤਾਨਂ ਅਪ੍ਪਹੀਨਤ੍ਤਾ ਅਨਾਗਾਮਿਮਗ੍ਗੇਨੇਵ ਸੁਪ੍ਪਹੀਨਾ ਹੋਨ੍ਤੀਤਿ. ਕੇਚਿ ਪਨ ਪਠਮਮਗ੍ਗੇਨ ਚੇਤ੍ਥ ਪਹਾਨਂ ਵਣ੍ਣਯਨ੍ਤਿ, ਤਂ ਪੁਬ੍ਬਾਪਰੇਨ ਨ ਸਨ੍ਧਿਯਤਿ. ਕੇਚਿ ਵਿਕ੍ਖਮ੍ਭਨਪ੍ਪਹਾਨਮ੍ਪਿ, ਤਂ ਤੇਸਂ ਇਚ੍ਛਾਮਤ੍ਤਮੇਵ.
੭੩. ਯਤੋ ਖੋ, ਭਿਕ੍ਖਵੇਤਿ ਏਤ੍ਥ ਯਤੋਤਿ ਯਮ੍ਹਿ ਕਾਲੇ. ਪਹੀਨੋ ਹੋਤੀਤਿ ਅਨਾਗਾਮਿਮਗ੍ਗਕ੍ਖਣੇ ਪਹਾਨਂ ਸਨ੍ਧਾਯੇਵਾਹ.
੭੪. ਸੋ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨਾਤਿ ਏਤਂ ‘‘ਯਤੋ ਖੋ, ਭਿਕ੍ਖਵੇ, ਅਭਿਜ੍ਝਾਵਿਸਮਲੋਭੋ ਪਹੀਨੋ ਹੋਤਿ, ਸੋ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਹੋਤੀ’’ਤਿ ਏਵਂ ਏਕਮੇਕੇਨ ਪਦੇਨ ਯੋਜੇਤਬ੍ਬਂ. ਇਮਸ੍ਸ ਹਿ ਭਿਕ੍ਖੁਨੋ ਅਨਾਗਾਮਿਮਗ੍ਗੇਨ ਲੋਕੁਤ੍ਤਰਪ੍ਪਸਾਦੋ ਆਗਤੋ, ਅਥਸ੍ਸ ਅਪਰੇਨ ਸਮਯੇਨ ਬੁਦ੍ਧਗੁਣੇ ਧਮ੍ਮਗੁਣੇ ਸਙ੍ਘਗੁਣੇ ਚ ਅਨੁਸ੍ਸਰਤੋ ਲੋਕਿਯੋ ਉਪ੍ਪਜ੍ਜਤਿ, ਤਮਸ੍ਸ ਸਬ੍ਬਮ੍ਪਿ ਲੋਕਿਯਲੋਕੁਤ੍ਤਰਮਿਸ੍ਸਕਂ ਪਸਾਦਂ ਦਸ੍ਸੇਨ੍ਤੋ ਭਗਵਾ ‘‘ਬੁਦ੍ਧੇ ਅਵੇਚ੍ਚਪ੍ਪਸਾਦੇਨਾ’’ਤਿਆਦਿਮਾਹ.
ਤਤ੍ਥ ਅਵੇਚ੍ਚਪ੍ਪਸਾਦੇਨਾਤਿ ਬੁਦ੍ਧਧਮ੍ਮਸਙ੍ਘਗੁਣਾਨਂ ਯਾਥਾਵਤੋ ਞਾਤਤ੍ਤਾ ਅਚਲੇਨ ਅਚ੍ਚੁਤੇਨ ਪਸਾਦੇਨ. ਇਦਾਨਿ ਯਥਾ ਤਸ੍ਸ ਭਿਕ੍ਖੁਨੋ ਅਨੁਸ੍ਸਰਤੋ ਸੋ ਅਵੇਚ੍ਚਪ੍ਪਸਾਦੋ ਉਪ੍ਪਨ੍ਨੋ, ਤਂ ਵਿਧਿਂ ਦਸ੍ਸੇਨ੍ਤੋ ‘‘ਇਤਿਪਿ ਸੋ ਭਗਵਾ’’ਤਿਆਦਿਨਾ ਨਯੇਨ ਤੀਣਿ ਅਨੁਸ੍ਸਤਿਟ੍ਠਾਨਾਨਿ ਵਿਤ੍ਥਾਰੇਸਿ. ਤੇਸਂ ਅਤ੍ਥਵਣ੍ਣਨਾ ਸਬ੍ਬਾਕਾਰੇਨ ਵਿਸੁਦ੍ਧਿਮਗ੍ਗੇ ਅਨੁਸ੍ਸਤਿਕਥਾਯਂ ਵੁਤ੍ਤਾ.
੭੫. ਏਵਮਸ੍ਸ ਲੋਕਿਯਲੋਕੁਤ੍ਤਰਮਿਸ੍ਸਕਂ ਪਸਾਦਂ ਦਸ੍ਸੇਤ੍ਵਾ ਇਦਾਨਿ ਕਿਲੇਸਪ੍ਪਹਾਨਂ ਅਵੇਚ੍ਚਪ੍ਪਸਾਦਸਮਨ੍ਨਾਗਤਞ੍ਚ ਪਚ੍ਚਵੇਕ੍ਖਤੋ ਉਪ੍ਪਜ੍ਜਮਾਨਂ ਸੋਮਨਸ੍ਸਾਦਿਆਨਿਸਂਸਂ ਦਸ੍ਸੇਨ੍ਤੋ ਯਥੋਧਿ ਖੋ ਪਨਸ੍ਸਾਤਿਆਦਿਮਾਹ. ਅਨਾਗਾਮਿਸ੍ਸ ਹਿ ਪਚ੍ਚਨ੍ਤੇ ਵੁਟ੍ਠਿਤਂ ਚੋਰੁਪਦ੍ਦਵਂ ਵੂਪਸਮੇਤ੍ਵਾ ਤਂ ਪਚ੍ਚਵੇਕ੍ਖਤੋ ਮਹਾਨਗਰੇ ਵਸਨ੍ਤਸ੍ਸ ਰਞ੍ਞੋ ਵਿਯ ਇਮੇ ਚਿਮੇ ਚ ਮਮ ਕਿਲੇਸਾ ਪਹੀਨਾਤਿ ਅਤ੍ਤਨੋ ਕਿਲੇਸਪ੍ਪਹਾਨਂ ਪਚ੍ਚਵੇਕ੍ਖਤੋ ਬਲਵਸੋਮਨਸ੍ਸਂ ਉਪ੍ਪਜ੍ਜਤਿ. ਤਂ ਦਸ੍ਸੇਨ੍ਤੋ ਭਗਵਾ ‘‘ਯਥੋਧਿ ਖੋ ਪਨਸ੍ਸਾ’’ਤਿਆਦਿਮਾਹ.
ਤਸ੍ਸਤ੍ਥੋ – ਯ੍ਵਾਯਂ ਅਨਾਗਾਮੀ ਭਿਕ੍ਖੁ ਏਵਂ ‘‘ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਹੋਤਿ…ਪੇ… ਧਮ੍ਮੇ…ਪੇ… ਸਙ੍ਘੇ…ਪੇ… ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾ’’ਤਿ, ਤਸ੍ਸ ਯਥੋਧਿ ਖੋ ਚਤ੍ਤਂ ਹੋਤਿ ਪਟਿਨਿਸ੍ਸਟ੍ਠਂ, ਸਕਸਕਓਧਿਵਸੇਨ ਚਤ੍ਤਮੇਵ ਹੋਤਿ, ਤਂ ਤਂ ਕਿਲੇਸਜਾਤਂ ਵਨ੍ਤਂ ਮੁਤ੍ਤਂ ਪਹੀਨਂ ਪਟਿਨਿਸ੍ਸਟ੍ਠਂ. ਸਕਸਕਓਧਿਵਸੇਨਾਤਿ ਦ੍ਵੇ ਓਧੀ ਕਿਲੇਸੋਧਿ ਚ ਮਗ੍ਗੋਧਿ ਚ. ਤਤ੍ਥ ਕਿਲੇਸੋਧਿਵਸੇਨਾਪਿ ਯੇ ਕਿਲੇਸਾ ਯਂ ਮਗ੍ਗਵਜ੍ਝਾ, ਤੇ ਅਞ੍ਞਮਗ੍ਗਵਜ੍ਝੇਹਿ ਅਮਿਸ੍ਸਾ ਹੁਤ੍ਵਾ ਸਕੇਨੇਵ ਓਧਿਨਾ ਪਹੀਨਾ. ਮਗ੍ਗੋਧਿਵਸੇਨਾਪਿ ਯੇ ਕਿਲੇਸਾ ਯੇਨ ਮਗ੍ਗੇਨ ਪਹਾਤਬ੍ਬਾ, ਤੇਨ ਤੇਯੇਵ ਪਹੀਨਾ ਹੋਨ੍ਤਿ. ਏਵਂ ਸਕਸਕਓਧਿਵਸੇਨ ਤਂ ਤਂ ਕਿਲੇਸਜਾਤਂ ਚਤ੍ਤਮੇਵ ਹੋਤਿ ਪਟਿਨਿਸ੍ਸਟ੍ਠਂ, ਤਂ ਪਚ੍ਚਵੇਕ੍ਖਿਤ੍ਵਾ ਚ ਲਦ੍ਧਸੋਮਨਸ੍ਸੋ ਤਤੁਤ੍ਤਰਿਪਿ ਸੋ ‘‘ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋਮ੍ਹੀ’’ਤਿ ਲਭਤਿ ਅਤ੍ਥਵੇਦਨ੍ਤਿ ਸਮ੍ਬਨ੍ਧੋ.
ਯਤੋਧਿ ਖੋਤਿਪਿ ਪਾਠੋ. ਤਸ੍ਸ ਵਸੇਨ ਅਯਮਤ੍ਥੋ, ਅਸ੍ਸ ਭਿਕ੍ਖੁਨੋ ਯਤੋਧਿ ਖੋ ਪਨ ਚਤ੍ਤਂ ਹੋਤਿ ਪਟਿਨਿਸ੍ਸਟ੍ਠਂ. ਤਤ੍ਥ ਯਤੋਤਿ ਕਾਰਣਵਚਨਂ, ਯਸ੍ਮਾਤਿ ਵੁਤ੍ਤਂ ਹੋਤਿ. ਓਧੀਤਿ ਹੇਟ੍ਠਾ ਤਯੋ ਮਗ੍ਗਾ ਵੁਚ੍ਚਨ੍ਤਿ. ਕਸ੍ਮਾ? ਤੇ ਹਿ ਓਧਿਂ ਕਤ੍ਵਾ ਕੋਟ੍ਠਾਸਂ ਕਤ੍ਵਾ ਉਪਰਿਮਗ੍ਗੇਨ ਪਹਾਤਬ੍ਬਕਿਲੇਸੇ ਠਪੇਤ੍ਵਾ ਪਜਹਨ੍ਤਿ, ਤਸ੍ਮਾ ਓਧੀਤਿ ਵੁਚ੍ਚਨ੍ਤਿ. ਅਰਹਤ੍ਤਮਗ੍ਗੋ ਪਨ ਕਿਞ੍ਚਿ ਕਿਲੇਸਂ ਅਨਵਸੇਸੇਤ੍ਵਾ ਪਜਹਤਿ, ਤਸ੍ਮਾ ਅਨੋਧੀਤਿ ਵੁਚ੍ਚਤਿ. ਇਮਸ੍ਸ ਚ ਭਿਕ੍ਖੁਨੋ ਹੇਟ੍ਠਾਮਗ੍ਗਤ੍ਤਯੇਨ ਚਤ੍ਤਂ. ਤੇਨ ਵੁਤ੍ਤਂ ‘‘ਯਤੋਧਿ ਖੋ ਪਨਸ੍ਸ ਚਤ੍ਤਂ ਹੋਤੀ’’ਤਿ. ਤਤ੍ਥ ਖੋ ਪਨਾਤਿ ਨਿਪਾਤਮਤ੍ਤਂ. ਅਯਂ ਪਨ ਪਿਣ੍ਡਤ੍ਥੋ. ਯਸ੍ਮਾ ਅਸ੍ਸ ਓਧਿ ਚਤ੍ਤਂ ਹੋਤਿ ਪਟਿਨਿਸ੍ਸਟ੍ਠਂ, ਤਸ੍ਮਾ ਤਂ ਪਚ੍ਚਵੇਕ੍ਖਿਤ੍ਵਾ ਚ ਲਦ੍ਧਸੋਮਨਸ੍ਸੋ ਤਤੁਤ੍ਤਰਿਪਿ ਸੋ ‘‘ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋਮ੍ਹੀ’’ਤਿ ਲਭਤਿ ਅਤ੍ਥਵੇਦਨ੍ਤਿ ਯਥਾਪਾਲ਼ਿ ਨੇਤਬ੍ਬਂ.
ਤਤ੍ਥ ਚਤ੍ਤਨ੍ਤਿ ਇਦਂ ਸਕਭਾਵਪਰਿਚ੍ਚਜਨਵਸੇਨ ਵੁਤ੍ਤਂ. ਵਨ੍ਤਨ੍ਤਿ ਇਦਂ ਪਨ ਅਨਾਦਿਯਨਭਾਵਦਸ੍ਸਨਵਸੇਨ. ਮੁਤ੍ਤਨ੍ਤਿ ਇਦਂ ਸਨ੍ਤਤਿਤੋ ਵਿਨਿਮੋਚਨਵਸੇਨ. ਪਹੀਨਨ੍ਤਿ ਇਦਂ ਮੁਤ੍ਤਸ੍ਸਪਿ ਕ੍ਵਚਿ ਅਨਵਟ੍ਠਾਨਦਸ੍ਸਨਵਸੇਨ. ਪਟਿਨਿਸ੍ਸਟ੍ਠਨ੍ਤਿ ਇਦਂ ਪੁਬ੍ਬੇ ਆਦਿਨ੍ਨਪੁਬ੍ਬਸ੍ਸ ਪਟਿਨਿਸ੍ਸਗ੍ਗਦਸ੍ਸਨਵਸੇਨ ਪਟਿਮੁਖਂ ਵਾ ਨਿਸ੍ਸਟ੍ਠਭਾਵਦਸ੍ਸਨਵਸੇਨ ਭਾਵਨਾਬਲੇਨ ਅਭਿਭੁਯ੍ਯ ਨਿਸ੍ਸਟ੍ਠਭਾਵਦਸ੍ਸਨਵਸੇਨਾਤਿ ਵੁਤ੍ਤਂ ਹੋਤਿ. ਲਭਤਿ ਅਤ੍ਥਵੇਦਂ ਲਭਤਿ ਧਮ੍ਮਵੇਦਨ੍ਤਿ ਏਤ੍ਥ ਬੁਦ੍ਧਾਦੀਸੁ ਅਵੇਚ੍ਚਪ੍ਪਸਾਦੋਯੇਵ ਅਰਣੀਯਤੋ ਅਤ੍ਥੋ, ਉਪਗਨ੍ਤਬ੍ਬਤੋਤਿ ਵੁਤ੍ਤਂ ਹੋਤਿ. ਧਾਰਣਤੋ ਧਮ੍ਮੋ, ਵਿਨਿਪਤਿਤੁਂ ਅਪ੍ਪਦਾਨਤੋਤਿ ਵੁਤ੍ਤਂ ਹੋਤਿ. ਵੇਦੋਤਿ ਗਨ੍ਥੋਪਿ ਞਾਣਮ੍ਪਿ ਸੋਮਨਸ੍ਸਮ੍ਪਿ. ‘‘ਤਿਣ੍ਣਂ ਵੇਦਾਨਂ ਪਾਰਗੂ’’ਤਿਆਦੀਸੁ (ਦੀ. ਨਿ. ੧.੨੫੬) ਹਿ ਗਨ੍ਥੋ ‘‘ਵੇਦੋ’’ਤਿ ਵੁਚ੍ਚਤਿ. ‘‘ਯਂ ਬ੍ਰਾਹ੍ਮਣਂ ਵੇਦਗੁਮਾਭਿਜਞ੍ਞਾ, ਅਕਿਞ੍ਚਨਂ ਕਾਮਭਾਵੇ ਅਸਤ੍ਤ’’ਨ੍ਤਿਆਦੀਸੁ (ਸੁ. ਨਿ. ੧੦੬੫) ਞਾਣਂ. ‘‘ਯੇ ਵੇਦਜਾਤਾ ਵਿਚਰਨ੍ਤਿ ਲੋਕੇ’’ਤਿਆਦੀਸੁ ਸੋਮਨਸ੍ਸਂ. ਇਧ ਪਨ ਸੋਮਨਸ੍ਸਞ੍ਚ ਸੋਮਨਸ੍ਸਸਮ੍ਪਯੁਤ੍ਤਞਾਣਞ੍ਚ ਅਧਿਪ੍ਪੇਤਂ, ਤਸ੍ਮਾ ‘‘ਲਭਤਿ ਅਤ੍ਥਵੇਦਂ ਲਭਤਿ ਧਮ੍ਮਵੇਦਨ੍ਤਿ ਅਵੇਚ੍ਚਪ੍ਪਸਾਦਾਰਮ੍ਮਣਸੋਮਨਸ੍ਸਞ੍ਚ ਸੋਮਨਸ੍ਸਮਯਞਾਣਞ੍ਚ ਲਭਤੀ’’ਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.
ਅਥ ਵਾ ਅਤ੍ਥਵੇਦਨ੍ਤਿ ਅਵੇਚ੍ਚਪ੍ਪਸਾਦਂ ਪਚ੍ਚਵੇਕ੍ਖਤੋ ਉਪ੍ਪਨ੍ਨਂ ਵੁਤ੍ਤਪ੍ਪਕਾਰਮੇਵ ਵੇਦਂ. ਧਮ੍ਮਵੇਦਨ੍ਤਿ ਅਵੇਚ੍ਚਪ੍ਪਸਾਦਸ੍ਸ ਹੇਤੁਂ ਓਧਿਸੋ ਕਿਲੇਸਪ੍ਪਹਾਨਂ ਪਚ੍ਚਵੇਕ੍ਖਤੋ ਉਪ੍ਪਨ੍ਨਂ ਵੁਤ੍ਤਪ੍ਪਕਾਰਮੇਵ ਵੇਦਨ੍ਤਿ ਏਵਮ੍ਪਿ ਏਤ੍ਥ ਅਤ੍ਥੋ ਵੇਦਿਤਬ੍ਬੋ. ਵੁਤ੍ਤਞ੍ਹੇਤਂ ‘‘ਹੇਤੁਮ੍ਹਿ ਞਾਣਂ ਧਮ੍ਮਪਟਿਸਮ੍ਭਿਦਾ, ਹੇਤੁਫਲੇ ਞਾਣਂ ਅਤ੍ਥਪਟਿਸਮ੍ਭਿਦਾ’’ਤਿ (ਵਿਭ. ੭੧੮-੭੧੯). ਧਮ੍ਮੂਪਸਂਹਿਤਂ ਪਾਮੋਜ੍ਜਨ੍ਤਿ ਤਮੇਵ ਅਤ੍ਥਞ੍ਚ ਧਮ੍ਮਞ੍ਚ ਅਤ੍ਥਧਮ੍ਮਾਨਿਸਂਸਭੂਤਂ ਵੇਦਞ੍ਚ ਪਚ੍ਚਵੇਕ੍ਖਤੋ ਉਪ੍ਪਨ੍ਨਂ ਪਾਮੋਜ੍ਜਂ. ਤਞ੍ਹਿ ਅਨਵਜ੍ਜਲਕ੍ਖਣੇਨ ਪਚ੍ਚਵੇਕ੍ਖਣਾਕਾਰਪ੍ਪਵਤ੍ਤੇਨ ਧਮ੍ਮੇਨ ਉਪਸਞ੍ਹਿਤਨ੍ਤਿ ਵੁਚ੍ਚਤਿ. ਪਮੁਦਿਤਸ੍ਸ ਪੀਤਿ ਜਾਯਤੀਤਿ ਇਮਿਨਾ ਪਾਮੋਜ੍ਜੇਨ ਪਮੁਦਿਤਸ੍ਸ ਨਿਰਾਮਿਸਾ ਪੀਤਿ ਜਾਯਤਿ. ਪੀਤਿਮਨਸ੍ਸਾਤਿ ਤਾਯ ਪੀਤਿਯਾ ਪੀਣਿਤਮਨਸ੍ਸ. ਕਾਯੋ ਪਸ੍ਸਮ੍ਭਤੀਤਿ ਕਾਯੋਪਿ ਪਸ੍ਸਦ੍ਧੋ ਹੋਤਿ ਵੂਪਸਨ੍ਤਦਰਥੋ. ਪਸ੍ਸਦ੍ਧਕਾਯੋ ਸੁਖਨ੍ਤਿ ਏਵਂ ਵੂਪਸਨ੍ਤਕਾਯਦਰਥੋ ਚੇਤਸਿਕਂ ਸੁਖਂ ਪਟਿਸਂਵੇਦੇਤਿ. ਚਿਤ੍ਤਂ ਸਮਾਧਿਯਤੀਤਿ ਚਿਤ੍ਤਂ ਸਮ੍ਮਾ ਆਧਿਯਤਿ ਅਪ੍ਪਿਤਂ ਵਿਯ ਅਚਲਂ ਤਿਟ੍ਠਤਿ.
੭੬. ਏਵਮਸ੍ਸ ਕਿਲੇਸਪ੍ਪਹਾਨਂ ਅਵੇਚ੍ਚਪ੍ਪਸਾਦਸਮਨ੍ਨਾਗਤਂ ਪਚ੍ਚਵੇਕ੍ਖਤੋ ਉਪ੍ਪਜ੍ਜਮਾਨਂ ਸੋਮਨਸ੍ਸਾਦਿਆਨਿਸਂਸਂ ਦਸ੍ਸੇਤ੍ਵਾ ਇਦਾਨਿ ‘‘ਯਥੋਧਿ ਖੋ ਪਨ ਮੇ’’ਤਿ ਵਾਰੇਨ ਤਸ੍ਸ ਪਚ੍ਚਵੇਕ੍ਖਣਾਯ ਪਵਤ੍ਤਾਕਾਰਂ ਪਕਾਸੇਤ੍ਵਾ ਤਸ੍ਸੇਵ ਅਨਾਗਾਮਿਮਗ੍ਗਾਨੁਭਾਵਸੂਚਕਂ ਫਲਂ ਦਸ੍ਸੇਨ੍ਤੋ ਸ ਖੋ ਸੋ, ਭਿਕ੍ਖਵੇਤਿਆਦਿਮਾਹ.
ਤਤ੍ਥ ਏਵਂਸੀਲੋਤਿ ਤਸ੍ਸ ਅਨਾਗਾਮਿਮਗ੍ਗਸਮ੍ਪਯੁਤ੍ਤਂ ਸੀਲਕ੍ਖਨ੍ਧਂ ਦਸ੍ਸੇਤਿ. ਏਵਂਧਮ੍ਮੋ ਏਵਂਪਞ੍ਞੋਤਿ ਤਂਸਮ੍ਪਯੁਤ੍ਤਮੇਵ ਸਮਾਧਿਕ੍ਖਨ੍ਧਂ ਪਞ੍ਞਾਕ੍ਖਨ੍ਧਞ੍ਚ ਦਸ੍ਸੇਤਿ. ਸਾਲੀਨਨ੍ਤਿ ਲੋਹਿਤਸਾਲਿਗਨ੍ਧਸਾਲਿਆਦੀਨਂ ਅਨੇਕਰੂਪਾਨਂ. ਪਿਣ੍ਡਪਾਤਨ੍ਤਿ ਓਦਨਂ. ਵਿਚਿਤਕਾਲ਼ਕਨ੍ਤਿ ਅਪਨੀਤਕਾਲ਼ਕਂ. ਨੇਵਸ੍ਸ ਤਂ ਹੋਤਿ ਅਨ੍ਤਰਾਯਾਯਾਤਿ ਤਸ੍ਸ ਏਵਂਵਿਧਸ੍ਸ ਭਿਕ੍ਖੁਨੋ ਤਂ ਵੁਤ੍ਤਪ੍ਪਕਾਰਪਿਣ੍ਡਪਾਤਭੋਜਨਂ ਮਗ੍ਗਸ੍ਸ ਵਾ ਫਲਸ੍ਸ ਵਾ ਨੇਵ ਅਨ੍ਤਰਾਯਾਯ ਹੋਤਿ, ਪਟਿਲਦ੍ਧਗੁਣਸ੍ਸ ਹਿ ਤਂ ਕਿਮਨ੍ਤਰਾਯਂ ਕਰਿਸ੍ਸਤਿ? ਯੋਪਿਸ੍ਸ ਅਪ੍ਪਟਿਲਦ੍ਧੋ ਚਤੁਤ੍ਥਮਗ੍ਗੋ ਚ ਫਲਂ ਚ ਤਪ੍ਪਟਿਲਾਭਾਯ ਵਿਪਸ੍ਸਨਂ ਆਰਭਤੋਪਿ ਨੇਵਸ੍ਸ ਤਂ ਹੋਤਿ ਅਨ੍ਤਰਾਯਾਯ, ਅਨ੍ਤਰਾਯਂ ਕਾਤੁਂ ਅਸਮਤ੍ਥਮੇਵ ਹੋਤਿ. ਕਸ੍ਮਾ? ਵੁਤ੍ਤਪ੍ਪਕਾਰਸੀਲਧਮ੍ਮਪਞ੍ਞਾਸਙ੍ਗਹੇਨ ਮਗ੍ਗੇਨ ਵਿਸੁਦ੍ਧਚਿਤ੍ਤਤ੍ਤਾ.
ਯਸ੍ਮਾ ਚੇਤ੍ਥ ਏਤਦੇਵ ਕਾਰਣਂ, ਤਸ੍ਮਾ ਤਦਨੁਰੂਪਂ ਉਪਮਂ ਦਸ੍ਸੇਨ੍ਤੋ ਸੇਯ੍ਯਥਾਪੀਤਿਆਦਿਮਾਹ.
ਤਤ੍ਥ ਅਚ੍ਛਨ੍ਤਿ ਵਿਪ੍ਪਸਨ੍ਨਂ. ਪਰਿਸੁਦ੍ਧਂ ਮਲਵਿਗਮੇਨ. ਪਰਿਯੋਦਾਤਂ ਪਭਸ੍ਸਰਤਾਯ. ਉਕ੍ਕਾਮੁਖਨ੍ਤਿ ਸੁਵਣ੍ਣਕਾਰਾਨਂ ਮੂਸਾਮੁਖਂ. ਸੁਵਣ੍ਣਕਾਰਾਨਂ ਮੂਸਾ ਹਿ ਇਧ ਉਕ੍ਕਾ, ਅਞ੍ਞਤ੍ਥ ਪਨ ਦੀਪਿਕਾਦਯੋਪਿ ਵੁਚ੍ਚਨ੍ਤਿ. ‘‘ਉਕ੍ਕਾਸੁ ਧਾਰੀਯਮਾਨਾਸੂ’’ਤਿ (ਦੀ. ਨਿ. ੧.੧੫੯) ਹਿ ਆਗਤਟ੍ਠਾਨੇ ਦੀਪਿਕਾ ‘‘ਉਕ੍ਕਾ’’ਤਿ ਵੁਚ੍ਚਤਿ. ‘‘ਉਕ੍ਕਂ ਬਨ੍ਧੇਯ੍ਯ, ਉਕ੍ਕਂ ਬਨ੍ਧਿਤ੍ਵਾ ਉਕ੍ਕਾਮੁਖਂ ਆਲਿਮ੍ਪੇਯ੍ਯਾ’’ਤਿ (ਮ. ਨਿ. ੩.੩੬੦) ਆਗਤਟ੍ਠਾਨੇ ਅਙ੍ਗਾਰਕਪਲ੍ਲਂ. ‘‘ਕਮ੍ਮਾਰਾਨਂ ਯਥਾ ਉਕ੍ਕਾ, ਅਨ੍ਤੋ ਝਾਯਤਿ ਨੋ ਬਹੀ’’ਤਿ (ਜਾ. ੨.੨੨.੬੪੯) ਆਗਤਟ੍ਠਾਨੇ ਕਮ੍ਮਾਰੁਦ੍ਧਨਂ. ‘‘ਏਵਂਵਿਪਾਕੋ ਉਕ੍ਕਾਪਾਤੋ ਭਵਿਸ੍ਸਤੀ’’ਤਿ (ਦੀ. ਨਿ. ੧.੨੪) ਆਗਤਟ੍ਠਾਨੇ ਵਾਤਵੇਗੋ ‘‘ਉਕ੍ਕਾ’’ਤਿ ਵੁਚ੍ਚਤਿ. ਇਮਸ੍ਮਿਂ ਪਨ ਠਾਨੇ ਅਞ੍ਞੇਸੁ ਚ ਏਵਰੂਪੇਸੁ ‘‘ਸਣ੍ਡਾਸੇਨ ਜਾਤਰੂਪਂ ਗਹੇਤ੍ਵਾ ਉਕ੍ਕਾਮੁਖੇ ਪਕ੍ਖਿਪਤੀ’’ਤਿ ਆਗਤਟ੍ਠਾਨੇਸੁ ਸੁਵਣ੍ਣਕਾਰਾਨਂ ਮੂਸਾ ‘‘ਉਕ੍ਕਾ’’ਤਿ ਵੇਦਿਤਬ੍ਬਾ.
ਤਤ੍ਰਾਯਂ ਉਪਮਾਸਂਸਨ੍ਦਨਾ – ਸਂਕਿਲਿਟ੍ਠਵਤ੍ਥਂ ਵਿਯ ਹਿ ਸਂਕਿਲਿਟ੍ਠਜਾਤਰੂਪਂ ਵਿਯ ਚ ਇਮਸ੍ਸ ਭਿਕ੍ਖੁਨੋ ਪੁਥੁਜ੍ਜਨਕਾਲੇ ਕਾਮਰਾਗਾਦਿਮਲਾਨੁਗਤਂ ਚਿਤ੍ਤਂ ਦਟ੍ਠਬ੍ਬਂ. ਅਚ੍ਛੋਦਕਂ ਵਿਯ ਉਕ੍ਕਾਮੁਖਂ ਵਿਯ ਚ ਅਨਾਗਾਮਿਮਗ੍ਗੋ. ਤਂ ਉਦਕਂ ਉਕ੍ਕਾਮੁਖਞ੍ਚ ਆਗਮ੍ਮ ਵਤ੍ਥਸੁਵਣ੍ਣਾਨਂ ਪਰਿਸੁਦ੍ਧਤਾ ਵਿਯ ਤਸ੍ਸ ਭਿਕ੍ਖੁਨੋ ਵੁਤ੍ਤਪ੍ਪਕਾਰਸੀਲਧਮ੍ਮਪਞ੍ਞਾਸਙ੍ਗਹਂ ਅਨਾਗਾਮਿਮਗ੍ਗਂ ਆਗਮ੍ਮ ਵਿਸੁਦ੍ਧਚਿਤ੍ਤਤਾਤਿ.
੭੭. ਸੋ ਮੇਤ੍ਤਾਸਹਗਤੇਨ ਚੇਤਸਾਤਿ ਯਥਾਨੁਸਨ੍ਧਿਵਸੇਨ ਦੇਸਨਾ ਆਗਤਾ. ਤਯੋ ਹਿ ਅਨੁਸਨ੍ਧੀ ਪੁਚ੍ਛਾਨੁਸਨ੍ਧਿ ਅਜ੍ਝਾਸਯਾਨੁਸਨ੍ਧਿ ਯਥਾਨੁਸਨ੍ਧੀਤਿ. ਤਤ੍ਥ ‘‘ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ ‘ਸਿਯਾ ਨੁ ਖੋ, ਭਨ੍ਤੇ, ਬਹਿਦ੍ਧਾ ਅਸਤਿ ਪਰਿਤਸ੍ਸਨਾ’ਤਿ? ‘ਸਿਯਾ ਭਿਕ੍ਖੂ’ਤਿ ਭਗਵਾ ਅਵੋਚਾ’’ਤਿ (ਮ. ਨਿ. ੧.੨੪੨). ਏਵਂ ਪੁਚ੍ਛਨ੍ਤਾਨਂ ਵਿਸ੍ਸਜ੍ਜਿਤਸੁਤ੍ਤਵਸੇਨ ਪੁਚ੍ਛਾਨੁਸਨ੍ਧਿ ਵੇਦਿਤਬ੍ਬੋ. ‘‘ਸਿਯਾ ਖੋ ਪਨ ਤੇ ਬ੍ਰਾਹ੍ਮਣ ਏਵਮਸ੍ਸ, ਅਜ੍ਜਾਪਿ ਨੂਨ ਸਮਣੋ ਗੋਤਮੋ ਅਵੀਤਰਾਗੋ’’ਤਿ (ਮ. ਨਿ. ੧.੫੫) ਏਵਂ ਪਰੇਸਂ ਅਜ੍ਝਾਸਯਂ ਵਿਦਿਤ੍ਵਾ ਵੁਤ੍ਤਸ੍ਸ ਸੁਤ੍ਤਸ੍ਸ ਵਸੇਨ ਅਜ੍ਝਾਸਯਾਨੁਸਨ੍ਧਿ ਵੇਦਿਤਬ੍ਬੋ. ਯੇਨ ਪਨ ਧਮ੍ਮੇਨ ਆਦਿਮ੍ਹਿ ਦੇਸਨਾ ਉਟ੍ਠਿਤਾ, ਤਸ੍ਸ ਧਮ੍ਮਸ੍ਸ ਅਨੁਰੂਪਧਮ੍ਮਵਸੇਨ ਵਾ ਪਟਿਪਕ੍ਖਵਸੇਨ ਵਾ ਯੇਸੁ ਸੁਤ੍ਤੇਸੁ ਉਪਰਿ ਦੇਸਨਾ ਆਗਚ੍ਛਤਿ, ਤੇਸਂ ਵਸੇਨ ਯਥਾਨੁਸਨ੍ਧਿ ਵੇਦਿਤਬ੍ਬੋ. ਸੇਯ੍ਯਥਿਦਂ, ਆਕਙ੍ਖੇਯ੍ਯਸੁਤ੍ਤੇ ਹੇਟ੍ਠਾ ਸੀਲੇਨ ਦੇਸਨਾ ਉਟ੍ਠਿਤਾ, ਉਪਰਿ ਛ ਅਭਿਞ੍ਞਾ ਆਗਤਾ. ਕਕਚੂਪਮੇ ਹੇਟ੍ਠਾ ਅਕ੍ਖਨ੍ਤਿਯਾ ਉਟ੍ਠਿਤਾ, ਉਪਰਿ ਕਕਚੂਪਮੋਵਾਦੋ ਆਗਤੋ. ਅਲਗਦ੍ਦੇ ਹੇਟ੍ਠਾ ਦਿਟ੍ਠਿਪਰਿਦੀਪਨੇਨ ਉਟ੍ਠਿਤਾ, ਉਪਰਿ ਤਿਪਰਿਵਟ੍ਟਸੁਞ੍ਞਤਾਪਕਾਸਨਾ ਆਗਤਾ, ਚੂਲ਼ਅਸ੍ਸਪੁਰੇ ਹੇਟ੍ਠਾ ਕਿਲੇਸਪਰਿਦੀਪਨੇਨ ਉਟ੍ਠਿਤਾ, ਉਪਰਿ ਬ੍ਰਹ੍ਮਵਿਹਾਰਾ ਆਗਤਾ. ਕੋਸਮ੍ਬਿਯਸੁਤ੍ਤੇ ਹੇਟ੍ਠਾ ਭਣ੍ਡਨੇਨ ਉਟ੍ਠਿਤਾ, ਉਪਰਿ ਸਾਰਣੀਯਧਮ੍ਮਾ ਆਗਤਾ. ਇਮਸ੍ਮਿਮ੍ਪਿ ਵਤ੍ਥਸੁਤ੍ਤੇ ਹੇਟ੍ਠਾ ਕਿਲੇਸਪਰਿਦੀਪਨੇਨ ਉਟ੍ਠਿਤਾ, ਉਪਰਿ ਬ੍ਰਹ੍ਮਵਿਹਾਰਾ ਆਗਤਾ. ਤੇਨ ਵੁਤ੍ਤਂ ‘‘ਯਥਾਨੁਸਨ੍ਧਿਵਸੇਨ ਦੇਸਨਾ ਆਗਤਾ’’ਤਿ. ਬ੍ਰਹ੍ਮਵਿਹਾਰੇਸੁ ਪਨ ਅਨੁਪਦਵਣ੍ਣਨਾ ਚ ਭਾਵਨਾਨਯੋ ਚ ਸਬ੍ਬੋ ਸਬ੍ਬਾਕਾਰੇਨ ਵਿਸੁਦ੍ਧਿਮਗ੍ਗੇ ਵੁਤ੍ਤੋ.
੭੮. ਏਵਂ ਭਗਵਾ ਅਭਿਜ੍ਝਾਦੀਨਂ ਉਪਕ੍ਕਿਲੇਸਾਨਂ ਪਟਿਪਕ੍ਖਭੂਤਂ ਸਬ੍ਬਸੋ ਚ ਕਾਮਰਾਗਬ੍ਯਾਪਾਦਪ੍ਪਹਾਨੇਨ ਵਿਹਤਪਚ੍ਚਤ੍ਥਿਕਤ੍ਤਾ ਲਦ੍ਧਪਦਟ੍ਠਾਨਂ ਤਸ੍ਸ ਅਨਾਗਾਮਿਨੋ ਬ੍ਰਹ੍ਮਵਿਹਾਰਭਾਵਨਂ ਦਸ੍ਸੇਤ੍ਵਾ ਇਦਾਨਿਸ੍ਸ ਅਰਹਤ੍ਤਾਯ ਵਿਪਸ੍ਸਨਂ ਦਸ੍ਸੇਤ੍ਵਾ ਅਰਹਤ੍ਤਪ੍ਪਤ੍ਤਿਂ ਦਸ੍ਸੇਤੁਂ ਸੋ ਅਤ੍ਥਿ ਇਦਨ੍ਤਿਆਦਿਮਾਹ.
ਤਸ੍ਸਤ੍ਥੋ – ਸੋ ਅਨਾਗਾਮੀ ਏਵਂ ਭਾਵਿਤਬ੍ਰਹ੍ਮਵਿਹਾਰੋ ਏਤੇਸਂ ਬ੍ਰਹ੍ਮਵਿਹਾਰਾਨਂ ਯਤੋ ਕੁਤੋਚਿ ਵੁਟ੍ਠਾਯ ਤੇ ਏਵ ਬ੍ਰਹ੍ਮਵਿਹਾਰਧਮ੍ਮੇ ਨਾਮਵਸੇਨ ਤੇਸਂ ਨਿਸ੍ਸਯਂ ਹਦਯਵਤ੍ਥੁਂ ਵਤ੍ਥੁਨਿਸ੍ਸਯਾਨਿ ਭੂਤਾਨੀਤਿ ਇਮਿਨਾ ਨਯੇਨ ਭੂਤੁਪਾਦਾਯਧਮ੍ਮੇ ਰੂਪਵਸੇਨ ਚ ਵਵਤ੍ਥਪੇਤ੍ਵਾ ਅਤ੍ਥਿ ਇਦਨ੍ਤਿ ਪਜਾਨਾਤਿ, ਏਤ੍ਤਾਵਤਾਨੇਨ ਦੁਕ੍ਖਸਚ੍ਚਵਵਤ੍ਥਾਨਂ ਕਤਂ ਹੋਤਿ. ਤਤੋ ਤਸ੍ਸ ਦੁਕ੍ਖਸ੍ਸ ਸਮੁਦਯਂ ਪਟਿਵਿਜ੍ਝਨ੍ਤੋ ਅਤ੍ਥਿ ਹੀਨਨ੍ਤਿ ਪਜਾਨਾਤਿ, ਏਤ੍ਤਾਵਤਾਨੇਨ ਸਮੁਦਯਸਚ੍ਚਵਵਤ੍ਥਾਨਂ ਕਤਂ ਹੋਤਿ. ਤਤੋ ਤਸ੍ਸ ਪਹਾਨੁਪਾਯਂ ਵਿਚਿਨਨ੍ਤੋ ਅਤ੍ਥਿ ਪਣੀਤਨ੍ਤਿ ਪਜਾਨਾਤਿ, ਏਤ੍ਤਾਵਤਾਨੇਨ ਮਗ੍ਗਸਚ੍ਚਵਵਤ੍ਥਾਨਂ ਕਤਂ ਹੋਤਿ. ਤਤੋ ਤੇਨ ਮਗ੍ਗੇਨ ਅਧਿਗਨ੍ਤਬ੍ਬਟ੍ਠਾਨਂ ਵਿਚਿਨਨ੍ਤੋ ਅਤ੍ਥਿ ਉਤ੍ਤਰਿ ਇਮਸ੍ਸ ਸਞ੍ਞਾਗਤਸ੍ਸ ਨਿਸ੍ਸਰਣਨ੍ਤਿ ਪਜਾਨਾਤਿ, ਇਮਸ੍ਸ ਮਯਾ ਅਧਿਗਤਸ੍ਸ ਬ੍ਰਹ੍ਮਵਿਹਾਰਸਞ੍ਞਾਗਤਸ੍ਸ ਉਤ੍ਤਰਿ ਨਿਸ੍ਸਰਣਂ ਨਿਬ੍ਬਾਨਂ ਅਤ੍ਥੀਤਿ ਏਵਂ ਪਜਾਨਾਤੀਤਿ ਅਧਿਪ੍ਪਾਯੋ, ਏਤ੍ਤਾਵਤਾਨੇਨ ਨਿਰੋਧਸਚ੍ਚਵਵਤ੍ਥਾਨਂ ਕਤਂ ਹੋਤਿ. ਤਸ੍ਸ ਏਵਂ ਜਾਨਤੋ ਏਵਂ ਪਸ੍ਸਤੋਤਿ ਤਸ੍ਸ ਵਿਪਸ੍ਸਨਾਪਞ੍ਞਾਯ ਏਵਂ ਚਤੂਹਿ ਆਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਜਾਨਤੋ, ਮਗ੍ਗਪਞ੍ਞਾਯ ਏਵਂ ਪਸ੍ਸਤੋ, ਭਯਭੇਰਵੇ ਵੁਤ੍ਤਨਯੇਨੇਵ ਕਾਮਾਸਵਾਪਿ ਚਿਤ੍ਤਂ ਵਿਮੁਚ੍ਚਤਿ…ਪੇ… ਇਤ੍ਥਤ੍ਤਾਯਾਤਿ ਪਜਾਨਾਤੀਤਿ.
ਏਵਂ ਯਾਵ ਅਰਹਤ੍ਤਾ ਦੇਸਨਂ ਪਾਪੇਤ੍ਵਾ ਇਦਾਨਿ ਯਸ੍ਮਾ ਤਸ੍ਸਂ ਪਰਿਸਤਿ ਨ੍ਹਾਨਸੁਦ੍ਧਿਕੋ ਬ੍ਰਾਹ੍ਮਣੋ ਨਿਸਿਨ੍ਨੋ, ਸੋ ਏਵਂ ਨ੍ਹਾਨਸੁਦ੍ਧਿਯਾ ਵਣ੍ਣਂ ਵੁਚ੍ਚਮਾਨਂ ਸੁਤ੍ਵਾ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਸ੍ਸਤੀਤਿ ਭਗਵਤਾ ਵਿਦਿਤੋ, ਤਸ੍ਮਾ ਤਸ੍ਸ ਚੋਦਨਤ੍ਥਾਯ ‘‘ਅਯਂ ਵੁਚ੍ਚਤਿ, ਭਿਕ੍ਖਵੇ, ਭਿਕ੍ਖੁ ਸਿਨਾਤੋ ਅਨ੍ਤਰੇਨ ਸਿਨਾਨੇਨਾ’’ਤਿ ਇਮਂ ਪਾਟਿਯੇਕ੍ਕਂ ਅਨੁਸਨ੍ਧਿਮਾਹ. ਤਤ੍ਥ ਅਨ੍ਤਰੇਨ ਸਿਨਾਨੇਨਾਤਿ ਅਬ੍ਭਨ੍ਤਰੇਨ ਕਿਲੇਸਵੁਟ੍ਠਾਨਸਿਨਾਨੇਨ.
੭੯. ਸੁਨ੍ਦਰਿਕਭਾਰਦ੍ਵਾਜੋਤਿ ਭਾਰਦ੍ਵਾਜੋ ਨਾਮ ਸੋ ਬ੍ਰਾਹ੍ਮਣੋ ਅਤ੍ਤਨੋ ਗੋਤ੍ਤਵਸੇਨ, ਸੁਨ੍ਦਰਿਕਾਯ ਪਨ ਨਦਿਯਾ ਸਿਨਾਤਸ੍ਸ ਪਾਪਪ੍ਪਹਾਨਂ ਹੋਤੀਤਿ ਅਯਮਸ੍ਸ ਦਿਟ੍ਠਿ, ਤਸ੍ਮਾ ‘‘ਸੁਨ੍ਦਰਿਕਭਾਰਦ੍ਵਾਜੋ’’ਤਿ ਵੁਚ੍ਚਤਿ. ਸੋ ਤਂ ਭਗਵਤੋ ਵਚਨਂ ਸੁਤ੍ਵਾ ਚਿਨ੍ਤੇਸਿ ‘‘ਮਯਂ ਸਿਨਾਨਸੁਦ੍ਧਿਂ ਵਣ੍ਣੇਮ, ਸਮਣੋਪਿ ਗੋਤਮੋ ਤਥੇਵ ਵਣ੍ਣੇਤਿ, ਸਮਾਨਚ੍ਛਨ੍ਦੋ ਦਾਨਿ ਏਸ ਅਮ੍ਹੇਹੀ’’ਤਿ. ਅਥ ਭਗਵਨ੍ਤਂ ਬਾਹੁਕਂ ਨਦਿਂ ਗਨ੍ਤ੍ਵਾ ਤਂ ਤਤ੍ਥ ਪਾਪਂ ਪਵਾਹੇਤ੍ਵਾ ਆਗਤਂ ਵਿਯ ਮਞ੍ਞਮਾਨੋ ਆਹ ‘‘ਗਚ੍ਛਤਿ ਪਨ ਭਵਂ ਗੋਤਮੋ ਬਾਹੁਕਂ ਨਦਿਂ ਸਿਨਾਯਿਤੁ’’ਨ੍ਤਿ? ਭਗਵਾ ਤਸ੍ਸ ਗਚ੍ਛਾਮੀਤਿ ਵਾ ਨ ਗਚ੍ਛਾਮੀਤਿ ਵਾ ਅਵਤ੍ਵਾਯੇਵ ਬ੍ਰਾਹ੍ਮਣਸ੍ਸ ਦਿਟ੍ਠਿਸਮੁਗ੍ਘਾਤਂ ਕਤ੍ਤੁਕਾਮੋ ‘‘ਕਿਂ ਬ੍ਰਾਹ੍ਮਣ ਬਾਹੁਕਾਯ ਨਦਿਯਾ, ਕਿਂ ਬਾਹੁਕਾ ਨਦੀ ਕਰਿਸ੍ਸਤੀ’’ਤਿ ਆਹ. ਤਸ੍ਸਤ੍ਥੋ ਕਿਂ ਪਯੋਜਨਂ ਬਾਹੁਕਾਯ, ਕਿਂ ਸਾ ਕਰਿਸ੍ਸਤਿ? ਅਸਮਤ੍ਥਾ ਸਾ ਕਸ੍ਸਚਿ ਅਤ੍ਥਾਯ, ਕਿਂ ਤਤ੍ਥ ਗਮਿਸ੍ਸਾਮੀਤਿ?
ਅਥ ਬ੍ਰਾਹ੍ਮਣੋ ਤਂ ਪਸਂਸਨ੍ਤੋ ਲੋਕ੍ਖਸਮ੍ਮਤਾਤਿਆਦਿਮਾਹ. ਤਤ੍ਥ ਲੋਕ੍ਖਸਮ੍ਮਤਾਤਿ ਲੂਖਭਾਵਸਮ੍ਮਤਾ, ਲੂਖਭਾਵਨ੍ਤਿ ਚੋਕ੍ਖਭਾਵਂ, ਵਿਸੁਦ੍ਧਿਭਾਵਂ ਦੇਤੀਤਿ ਏਵਂ ਸਮ੍ਮਤਾਤਿ ਵੁਤ੍ਤਂ ਹੋਤਿ. ਲੋਕ੍ਯਸਮ੍ਮਤਾਤਿਪਿ ਪਾਠੋ. ਤਸ੍ਸਤ੍ਥੋ, ਸੇਟ੍ਠਂ ਲੋਕਂ ਗਮਯਤੀਤਿ ਏਵਂ ਸਮ੍ਮਤਾਤਿ. ਪੁਞ੍ਞਸਮ੍ਮਤਾਤਿ ਪੁਞ੍ਞਨ੍ਤਿ ਸਮ੍ਮਤਾ. ਪਵਾਹੇਤੀਤਿ ਗਮਯਤਿ ਵਿਸੋਧੇਤਿ. ਗਾਥਾਹਿ ਅਜ੍ਝਭਾਸੀਤਿ ਗਾਥਾਹਿ ਅਭਾਸਿ. ਗਾਥਾ ਚ ਵੁਚ੍ਚਮਾਨਾ ਤਦਤ੍ਥਦੀਪਨਤ੍ਥਮੇਵ ਵਾ ਗਾਥਾਰੁਚਿਕਾਨਂ ਵੁਚ੍ਚਤਿ, ਵਿਸੇਸਤ੍ਥਦੀਪਨਤ੍ਥਂ ਵਾ. ਇਧ ਪਨੇਤਾ ਉਭਯਤ੍ਥਦੀਪਨਤ੍ਥਂ ਵੁਤ੍ਤਾਤਿ ਵੇਦਿਤਬ੍ਬਾ.
ਬਾਹੁਕਨ੍ਤਿ ਇਦਮੇਵ ਹਿ ਏਤ੍ਥ ਵਚਨਂ ਤਦਤ੍ਥਦੀਪਕਂ, ਸੇਸਾਨਿ ਵਿਸੇਸਤ੍ਥਦੀਪਕਾਨਿ. ਯਥੇਵ ਹਿ ਬਾਹੁਕਂ, ਏਵਂ ਅਧਿਕਕ੍ਕਾਦੀਨਿਪਿ ਲੋਕੋ ਗਚ੍ਛਤਿ ਨ੍ਹਾਨੇਨ ਪਾਪਂ ਪਵਾਹੇਤੁਂ. ਤਤ੍ਥ ਯੇ ਤੇਸਂ ਠਾਨਾਨਂ ਆਸਨ੍ਨਾ ਹੋਨ੍ਤਿ, ਤੇ ਦਿਵਸਸ੍ਸ ਤਿਕ੍ਖਤ੍ਤੁਂ ਨ੍ਹਾਯਨ੍ਤਿ. ਯੇ ਦੂਰਾ, ਤੇ ਯਥਾਕ੍ਕਮਂ ਦ੍ਵਿਕ੍ਖਤ੍ਤੁਂ ਸਕਿਂ ਏਕਦਿਵਸਨ੍ਤਰਂ, ਏਵਂ ਯਾਵ ਸਂਵਚ੍ਛਰਨ੍ਤਰਂ ਨ੍ਹਾਯਨ੍ਤਿ. ਯੇ ਪਨ ਸਬ੍ਬਥਾਪਿ ਗਨ੍ਤੁਂ ਨ ਸਕ੍ਕੋਨ੍ਤਿ, ਤੇ ਘਟੇਹਿਪਿ ਤਤੋ ਉਦਕਂ ਆਹਰਾਪੇਤ੍ਵਾ ਨ੍ਹਾਯਨ੍ਤਿ. ਸਬ੍ਬਞ੍ਚੇਤਂ ਨਿਰਤ੍ਥਕਂ, ਤਸ੍ਮਾ ਇਮਂ ਵਿਸੇਸਤ੍ਥਂ ਦੀਪੇਤੁਂ ਅਧਿਕਕ੍ਕਾਦੀਨਿਪੀਤਿ ਆਹ.
ਤਤ੍ਥ ਅਧਿਕਕ੍ਕਨ੍ਤਿ ਨ੍ਹਾਨਸਮ੍ਭਾਰਵਸੇਨ ਲਦ੍ਧਵੋਹਾਰਂ ਏਕਂ ਤਿਤ੍ਥਂ ਵੁਚ੍ਚਤਿ. ਗਯਾਤਿਪਿ ਮਣ੍ਡਲਵਾਪਿਸਣ੍ਠਾਨਂ ਤਿਤ੍ਥਮੇਵ ਵੁਚ੍ਚਤਿ. ਪਯਾਗਾਤਿ ਏਤਮ੍ਪਿ ਗਙ੍ਗਾਯ ਏਕਂ ਤਿਤ੍ਥਮੇਵ ਮਹਾਪਨਾਦਸ੍ਸ ਰਞ੍ਞੋ ਗਙ੍ਗਾਯਂ ਨਿਮੁਗ੍ਗਪਾਸਾਦਸ੍ਸ ਸੋਪਾਨਸਮ੍ਮੁਖਟ੍ਠਾਨਂ, ਬਾਹੁਕਾ ਸੁਨ੍ਦਰਿਕਾ ਸਰਸ੍ਸਤੀ ਬਾਹੁਮਤੀਤਿ ਇਮਾ ਪਨ ਚਤਸ੍ਸੋ ਨਦਿਯੋ. ਬਾਲੋਤਿ ਦੁਪ੍ਪਞ੍ਞੋ. ਪਕ੍ਖਨ੍ਦੋਤਿ ਪਵਿਸਨ੍ਤੋ. ਨ ਸੁਜ੍ਝਤੀਤਿ ਕਿਲੇਸਸੁਦ੍ਧਿਂ ਨ ਪਾਪੁਣਾਤਿ, ਕੇਵਲਂ ਰਜੋਜਲ੍ਲਮੇਵ ਪਵਾਹੇਤਿ.
ਕਿਂ ਸੁਨ੍ਦਰਿਕਾ ਕਰਿਸ੍ਸਤੀਤਿ ਸੁਨ੍ਦਰਿਕਾ ਕਿਲੇਸਵਿਸੋਧਨੇ ਕਿਂ ਕਰਿਸ੍ਸਤਿ? ਨ ਕਿਞ੍ਚਿ ਕਾਤੁਂ ਸਮਤ੍ਥਾਤਿ ਅਧਿਪ੍ਪਾਯੋ. ਏਸ ਨਯੋ ਪਯਾਗਬਾਹੁਕਾਸੁ. ਇਮੇਹਿ ਚ ਤੀਹਿ ਪਦੇਹਿ ਵੁਤ੍ਤੇਹਿ ਇਤਰਾਨਿਪਿ ਚਤ੍ਤਾਰਿ ਲਕ੍ਖਣਾਹਾਰਨਯੇਨ ਵੁਤ੍ਤਾਨੇਵ ਹੋਨ੍ਤਿ, ਤਸ੍ਮਾ ਯਥੇਵ ਸੁਨ੍ਦਰਿਕਾ ਪਯਾਗਾ ਬਾਹੁਕਾ ਨ ਕਿਞ੍ਚਿ ਕਰੋਨ੍ਤਿ, ਤਥਾ ਅਧਿਕਕ੍ਕਾਦਯੋਪੀਤਿ ਵੇਦਿਤਬ੍ਬਾ.
ਵੇਰਿਨ੍ਤਿ ਪਾਣਾਤਿਪਾਤਾਦਿਪਞ੍ਚਵੇਰਸਮਨ੍ਨਾਗਤਂ. ਕਤਕਿਬ੍ਬਿਸਨ੍ਤਿ ਕਤਲੁਦ੍ਦਕਮ੍ਮਂ. ਨ ਹਿ ਨਂ ਸੋਧਯੇਤਿ ਸੁਨ੍ਦਰਿਕਾ ਵਾ ਪਯਾਗਾ ਵਾ ਬਾਹੁਕਾ ਵਾ ਨ ਸੋਧਯੇ, ਨ ਸੋਧੇਤੀਤਿ ਵੁਤ੍ਤਂ ਹੋਤਿ. ਪਾਪਕਮ੍ਮਿਨਨ੍ਤਿ ਪਾਪਕੇਹਿ ਵੇਰਕਿਬ੍ਬਿਸਕਮ੍ਮੇਹਿ ਯੁਤ੍ਤਂ, ਲਾਮਕਕਮ੍ਮੇ ਯੁਤ੍ਤਂ ਵਾ ਵੇਰਕਿਬ੍ਬਿਸਭਾਵਂ ਅਪ੍ਪਤ੍ਤੇਹਿ ਖੁਦ੍ਦਕੇਹਿਪਿ ਪਾਪੇਹਿ ਯੁਤ੍ਤਨ੍ਤਿ ਵੁਤ੍ਤਂ ਹੋਤਿ.
ਸੁਦ੍ਧਸ੍ਸਾਤਿ ਨਿਕ੍ਕਿਲੇਸਸ੍ਸ. ਸਦਾ ਫਗ੍ਗੂਤਿ ਨਿਚ੍ਚਮ੍ਪਿ ਫਗ੍ਗੁਨੀਨਕ੍ਖਤ੍ਤਮੇਵ. ਫਗ੍ਗੁਨਮਾਸੇ ਕਿਰ ‘‘ਉਤ੍ਤਰਫਗ੍ਗੁਨਦਿਵਸੇ ਯੋ ਨ੍ਹਾਯਤਿ, ਸੋ ਸਂਵਚ੍ਛਰਂ ਕਤਪਾਪਂ ਸੋਧੇਤੀ’’ਤਿ ਏਵਂ ਦਿਟ੍ਠਿਕੋ ਸੋ ਬ੍ਰਾਹ੍ਮਣੋ, ਤੇਨਸ੍ਸ ਭਗਵਾ ਤਂ ਦਿਟ੍ਠਿਂ ਪਟਿਹਨਨ੍ਤੋ ਆਹ ‘‘ਸੁਦ੍ਧਸ੍ਸ ਵੇ ਸਦਾ ਫਗ੍ਗੂ’’ਤਿ. ਨਿਕ੍ਕਿਲੇਸਸ੍ਸ ਨਿਚ੍ਚਂ ਫਗ੍ਗੁਨੀਨਕ੍ਖਤ੍ਤਂ, ਇਤਰੋ ਕਿਂ ਸੁਜ੍ਝਤੀਤਿ? ਉਪੋਸਥੋ ਸਦਾਤਿ ਸੁਦ੍ਧਸ੍ਸ ਚ ਚਾਤੁਦ੍ਦਸਪਨ੍ਨਰਸਾਦੀਸੁ ਉਪੋਸਥਙ੍ਗਾਨਿ ਅਸਮਾਦਿਯਤੋਪਿ ਨਿਚ੍ਚਮੇਵ ਉਪੋਸਥੋ. ਸੁਦ੍ਧਸ੍ਸ ਸੁਚਿਕਮ੍ਮਸ੍ਸਾਤਿ ਨਿਕ੍ਕਿਲੇਸਤਾਯ ਸੁਦ੍ਧਸ੍ਸ ਸੁਚੀਹਿ ਚ ਕਾਯਕਮ੍ਮਾਦੀਹਿ ਸਮਨ੍ਨਾਗਤਸ੍ਸ. ਸਦਾ ਸਮ੍ਪਜ੍ਜਤੇ ਵਤਨ੍ਤਿ ਈਦਿਸਸ੍ਸ ਚ ਕੁਸਲੂਪਸਞ੍ਹਿਤਂ ਵਤਸਮਾਦਾਨਮ੍ਪਿ ਨਿਚ੍ਚਂ ਸਮ੍ਪਨ੍ਨਮੇਵ ਹੋਤੀਤਿ. ਇਧੇਵ ਸਿਨਾਹੀਤਿ ਇਮਸ੍ਮਿਂਯੇਵ ਮਮ ਸਾਸਨੇ ਸਿਨਾਹਿ. ਕਿਂ ਵੁਤ੍ਤਂ ਹੋਤਿ? ‘‘ਸਚੇ ਅਜ੍ਝਤ੍ਤਿਕਕਿਲੇਸਮਲਪ੍ਪਵਾਹਨਂ ਇਚ੍ਛਸਿ, ਇਧੇਵ ਮਮ ਸਾਸਨੇ ਅਟ੍ਠਙ੍ਗਿਕਮਗ੍ਗਸਲਿਲੇਨ ਸਿਨਾਹਿ, ਅਞ੍ਞਤ੍ਰ ਹਿ ਇਦਂ ਨਤ੍ਥੀ’’ਤਿ.
ਇਦਾਨਿਸ੍ਸ ਸਪ੍ਪਾਯਦੇਸਨਾਵਸੇਨ ਤੀਸੁਪਿ ਦ੍ਵਾਰੇਸੁ ਸੁਦ੍ਧਿਂ ਦਸ੍ਸੇਨ੍ਤੋ ਸਬ੍ਬਭੂਤੇਸੁ ਕਰੋਹਿ ਖੇਮਤਨ੍ਤਿਆਦਿਮਾਹ. ਤਤ੍ਥ ਖੇਮਤਨ੍ਤਿ ਅਭਯਂ ਹਿਤਭਾਵਂ, ਮੇਤ੍ਤਨ੍ਤਿ ਵੁਤ੍ਤਂ ਹੋਤਿ. ਏਤੇਨਸ੍ਸ ਮਨੋਦ੍ਵਾਰਸੁਦ੍ਧਿ ਦਸ੍ਸਿਤਾ ਹੋਤਿ.
ਸਚੇ ਮੁਸਾ ਨ ਭਣਸੀਤਿ ਏਤੇਨਸ੍ਸ ਵਚੀਦ੍ਵਾਰਸੁਦ੍ਧਿ. ਸਚੇ ਪਾਣਂ ਨ ਹਿਂਸਸਿ ਸਚੇ ਅਦਿਨ੍ਨਂ ਨਾਦਿਯਸੀਤਿ ਏਤੇਹਿ ਕਾਯਦ੍ਵਾਰਸੁਦ੍ਧਿ. ਸਦ੍ਦਹਾਨੋ ਅਮਚ੍ਛਰੀਤਿ ਏਤੇਹਿ ਪਨ ਨਂ ਏਵਂ ਪਰਿਸੁਦ੍ਧਦ੍ਵਾਰਂ ਸਦ੍ਧਾਸਮ੍ਪਦਾਯ ਚਾਗਸਮ੍ਪਦਾਯ ਚ ਨਿਯੋਜੇਸਿ. ਕਿਂ ਕਾਹਸਿ ਗਯਂ ਗਨ੍ਤ੍ਵਾ, ਉਦਪਾਨੋਪਿ ਤੇ ਗਯਾਤਿ ਅਯਂ ਪਨ ਉਪਡ੍ਢਗਾਥਾ, ਸਚੇ ਸਬ੍ਬਭੂਤੇਸੁ ਖੇਮਤਂ ਕਰਿਸ੍ਸਸਿ, ਮੁਸਾ ਨ ਭਣਿਸ੍ਸਸਿ, ਪਾਣਂ ਨ ਹਨਿਸ੍ਸਸਿ, ਅਦਿਨ੍ਨਂ ਨਾਦਿਯਿਸ੍ਸਸਿ, ਸਦ੍ਧਹਾਨੋ ਅਮਚ੍ਛਰੀ ਭਵਿਸ੍ਸਸਿ, ਕਿਂ ਕਾਹਸਿ ਗਯਂ ਗਨ੍ਤ੍ਵਾ ਉਦਪਾਨੋਪਿ ਤੇ ਗਯਾ, ਗਯਾਯਪਿ ਹਿ ਤੇ ਨ੍ਹਾਯਨ੍ਤਸ੍ਸ ਉਦਪਾਨੇਪਿ ਇਮਾਯ ਏਵ ਪਟਿਪਤ੍ਤਿਯਾ ਕਿਲੇਸਸੁਦ੍ਧਿ, ਸਰੀਰਮਲਸੁਦ੍ਧਿ ਪਨ ਉਭਯਤ੍ਥ ਸਮਾਤਿ ਏਵਂ ਯੋਜੇਤਬ੍ਬਂ. ਯਸ੍ਮਾ ਚ ਲੋਕੇ ਗਯਾ ਸਮ੍ਮਤਤਰਾ, ਤਸ੍ਮਾ ਤਸ੍ਸ ਭਗਵਾ ‘‘ਗਚ੍ਛਤਿ ਪਨ ਭਵਂ ਗੋਤਮੋ ਬਾਹੁਕ’’ਨ੍ਤਿ ਪੁਟ੍ਠੋਪਿ ‘‘ਕਿਂ ਕਾਹਸਿ ਬਾਹੁਕਂ ਗਨ੍ਤ੍ਵਾ’’ਤਿ ਅਵਤ੍ਵਾ ‘‘ਕਿਂ ਕਾਹਸਿ ਗਯਂ ਗਨ੍ਤ੍ਵਾ’’ਤਿ ਆਹਾਤਿ ਵੇਦਿਤਬ੍ਬੋ.
੮੦. ਏਵਂ ਵੁਤ੍ਤੇਤਿ ਏਵਮਾਦਿ ਭਯਭੇਰਵੇ ਵੁਤ੍ਤਤ੍ਤਾ ਪਾਕਟਮੇਵ. ਏਕੋ ਵੂਪਕਟ੍ਠੋਤਿਆਦੀਸੁ ਪਨ ਏਕੋ ਕਾਯਵਿਵੇਕੇਨ. ਵੂਪਕਟ੍ਠੋ ਚਿਤ੍ਤਵਿਵੇਕੇਨ. ਅਪ੍ਪਮਤ੍ਤੋ ਕਮ੍ਮਟ੍ਠਾਨੇ ਸਤਿ ਅਵਿਜਹਨੇਨ. ਆਤਾਪੀ ਕਾਯਿਕਚੇਤਸਿਕਵੀਰਿਯਸਙ੍ਖਾਤੇਨ ਆਤਾਪੇਨ. ਪਹਿਤਤ੍ਤੋ ਕਾਯੇ ਚ ਜੀਵਿਤੇ ਚ ਅਨਪੇਕ੍ਖਤਾਯ. ਵਿਹਰਨ੍ਤੋ ਅਞ੍ਞਤਰਇਰਿਯਾਪਥਵਿਹਾਰੇਨ. ਨਚਿਰਸ੍ਸੇਵਾਤਿ ਪਬ੍ਬਜ੍ਜਂ ਉਪਾਦਾਯ ਵੁਚ੍ਚਤਿ. ਕੁਲਪੁਤ੍ਤਾਤਿ ਦੁਵਿਧਾ ਕੁਲਪੁਤ੍ਤਾ ਜਾਤਿਕੁਲਪੁਤ੍ਤਾ ਚ ਆਚਾਰਕੁਲਪੁਤ੍ਤਾ ਚ, ਅਯਂ ਪਨ ਉਭਯਥਾਪਿ ਕੁਲਪੁਤ੍ਤੋ. ਅਗਾਰਸ੍ਮਾਤਿ ਘਰਾ. ਅਗਾਰਸ੍ਸ ਹਿਤਂ ਅਗਾਰਿਯਂ, ਕਸਿਗੋਰਕ੍ਖਾਦਿਕੁਟੁਮ੍ਬਪੋਸਨਕਮ੍ਮਂ ਵੁਚ੍ਚਤਿ, ਨਤ੍ਥਿ ਏਤ੍ਥ ਅਗਾਰਿਯਨ੍ਤਿ ਅਨਗਾਰਿਯਂ, ਪਬ੍ਬਜ੍ਜਾਯੇਤਂ ਅਧਿਵਚਨਂ. ਪਬ੍ਬਜਨ੍ਤੀਤਿ ਉਪਗਚ੍ਛਨ੍ਤਿ ਉਪਸਙ੍ਕਮਨ੍ਤਿ. ਤਦਨੁਤ੍ਤਰਨ੍ਤਿ ਤਂ ਅਨੁਤ੍ਤਰਂ. ਬ੍ਰਹ੍ਮਚਰਿਯਪਰਿਯੋਸਾਨਨ੍ਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਪਰਿਯੋਸਾਨਂ, ਅਰਹਤ੍ਤਫਲਨ੍ਤਿ ਵੁਤ੍ਤਂ ਹੋਤਿ. ਤਸ੍ਸ ਹਿ ਅਤ੍ਥਾਯ ਕੁਲਪੁਤ੍ਤਾ ਪਬ੍ਬਜਨ੍ਤਿ. ਦਿਟ੍ਠੇਵ ਧਮ੍ਮੇਤਿ ਤਸ੍ਮਿਂਯੇਵ ਅਤ੍ਤਭਾਵੇ. ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਅਤ੍ਤਨਾਯੇਵ ਪਞ੍ਞਾਯ ਪਚ੍ਚਕ੍ਖਂ ਕਤ੍ਵਾ, ਅਪਰਪ੍ਪਚ੍ਚਯਂ ਕਤ੍ਵਾਤਿ ਅਤ੍ਥੋ. ਉਪਸਮ੍ਪਜ੍ਜ ਵਿਹਾਸੀਤਿ ਪਾਪੁਣਿਤ੍ਵਾ ਸਮ੍ਪਾਦੇਤ੍ਵਾ ਵਿਹਾਸੀਤਿ, ਏਵਂ ਵਿਹਰਨ੍ਤੋ ਚ ਖੀਣਾ ਜਾਤਿ…ਪੇ… ਅਬ੍ਭਞ੍ਞਾਸਿ. ਏਤੇਨਸ੍ਸ ਪਚ੍ਚਵੇਕ੍ਖਣਭੂਮਿਂ ਦਸ੍ਸੇਤਿ.
ਕਤਮਾ ਪਨਸ੍ਸ ਜਾਤਿ ਖੀਣਾ? ਕਥਞ੍ਚ ਨਂ ਅਬ੍ਭਞ੍ਞਾਸੀਤਿ? ਵੁਚ੍ਚਤੇ, ਕਾਮਞ੍ਚੇਤਂ ਭਯਭੇਰਵੇਪਿ ਵੁਤ੍ਤਂ, ਤਥਾਪਿ ਨਂ ਇਧ ਪਠਮਪੁਰਿਸਵਸੇਨ ਯੋਜਨਾਨਯਸ੍ਸ ਦਸ੍ਸਨਤ੍ਥਂ ਪੁਨ ਸਙ੍ਖੇਪਤੋ ਭਣਾਮ. ਨ ਤਾਵਸ੍ਸ ਅਤੀਤਾ ਜਾਤਿ ਖੀਣਾ, ਪੁਬ੍ਬੇਵ ਖੀਣਤ੍ਤਾ. ਨ ਅਨਾਗਤਾ, ਤਤ੍ਥ ਵਾਯਾਮਾਭਾਵਤੋ. ਨ ਪਚ੍ਚੁਪ੍ਪਨ੍ਨਾ, ਵਿਜ੍ਜਮਾਨਤ੍ਤਾ. ਮਗ੍ਗਸ੍ਸ ਪਨ ਅਭਾਵਿਤਤ੍ਤਾ ਯਾ ਉਪ੍ਪਜ੍ਜੇਯ੍ਯ ਏਕਚਤੁਪਞ੍ਚਵੋਕਾਰਭਵੇਸੁ ਏਕਚਤੁਪਞ੍ਚਕ੍ਖਨ੍ਧਪ੍ਪਭੇਦਾ ਜਾਤਿ, ਸਾ ਮਗ੍ਗਸ੍ਸ ਭਾਵਿਤਤ੍ਤਾ ਅਨੁਪ੍ਪਾਦਧਮ੍ਮਤਂ ਆਪਜ੍ਜਨੇਨ ਖੀਣਾ, ਤਂ ਸੋ ਮਗ੍ਗਭਾਵਨਾਯ ਪਹੀਨਕਿਲੇਸੇ ਪਚ੍ਚਵੇਕ੍ਖਿਤ੍ਵਾ ਕਿਲੇਸਾਭਾਵੇ ਵਿਜ੍ਜਮਾਨਮ੍ਪਿ ਕਮ੍ਮਂ ਆਯਤਿਂ ਅਪ੍ਪਟਿਸਨ੍ਧਿਕਂ ਹੋਤੀਤਿ ਜਾਨਨ੍ਤੋ ਜਾਨਾਤਿ.
ਵੁਸਿਤਨ੍ਤਿ ਵੁਤ੍ਥਂ ਪਰਿਵੁਤ੍ਥਂ, ਕਤਂ ਚਰਿਤਂ ਨਿਟ੍ਠਾਪਿਤਨ੍ਤਿ ਅਤ੍ਥੋ. ਬ੍ਰਹ੍ਮਚਰਿਯਨ੍ਤਿ ਮਗ੍ਗਬ੍ਰਹ੍ਮਚਰਿਯਂ. ਕਤਂ ਕਰਣੀਯਨ੍ਤਿ ਚਤੂਸੁ ਸਚ੍ਚੇਸੁ ਚਤੂਹਿ ਮਗ੍ਗੇਹਿ ਪਰਿਞ੍ਞਾਪਹਾਨਸਚ੍ਛਿਕਿਰਿਯਭਾਵਨਾਵਸੇਨ ਸੋਲ਼ਸਵਿਧਮ੍ਪਿ ਕਿਚ੍ਚਂ ਨਿਟ੍ਠਾਪਿਤਨ੍ਤਿ ਅਤ੍ਥੋ. ਨਾਪਰਂ ਇਤ੍ਥਤ੍ਤਾਯਾਤਿ ਇਦਾਨਿ ਪੁਨਇਤ੍ਥਭਾਵਾਯ ਏਵਂਸੋਲ਼ਸਕਿਚ੍ਚਭਾਵਾਯ, ਕਿਲੇਸਕ੍ਖਯਾਯ ਵਾ ਮਗ੍ਗਭਾਵਨਾ ਨਤ੍ਥੀਤਿ. ਅਥ ਵਾ, ਇਤ੍ਥਤ੍ਤਾਯਾਤਿ ਇਤ੍ਥਭਾਵਤੋ ਇਮਸ੍ਮਾ ਏਵਂਪਕਾਰਾ ਇਦਾਨਿ ਵਤ੍ਤਮਾਨਕ੍ਖਨ੍ਧਸਨ੍ਤਾਨਾ ਅਪਰਂ ਖਨ੍ਧਸਨ੍ਤਾਨਂ ਨਤ੍ਥਿ. ਇਮੇ ਪਨ ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ ਤਿਟ੍ਠਨ੍ਤਿ, ਛਿਨ੍ਨਮੂਲਕੋ ਰੁਕ੍ਖੋ ਵਿਯਾਤਿ ਅਬ੍ਭਞ੍ਞਾਸਿ. ਅਞ੍ਞਤਰੋਤਿ ਏਕੋ. ਅਰਹਤਨ੍ਤਿ ਅਰਹਨ੍ਤਾਨਂ, ਭਗਵਤੋ ਸਾਵਕਾਨਂ ਅਰਹਤਂ ਅਬ੍ਭਨ੍ਤਰੋ ਅਹੋਸੀਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਵਤ੍ਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.