੮. ਸਲ੍ਲੇਖਸੁਤ੍ਤਵਣ੍ਣਨਾ

੮੧. ਏਵਂ ਮੇ ਸੁਤਨ੍ਤਿ ਸਲ੍ਲੇਖਸੁਤ੍ਤਂ. ਤਤ੍ਥ ਮਹਾਚੁਨ੍ਦੋਤਿ ਤਸ੍ਸ ਥੇਰਸ੍ਸ ਨਾਮਂ. ਸਾਯਨ੍ਹਸਮਯਨ੍ਤਿ ਸਾਯਨ੍ਹਕਾਲੇ. ਪਟਿਸਲ੍ਲਾਨਾ ਵੁਟ੍ਠਿਤੋਤਿ ਏਤ੍ਥ ਪਟਿਸਲ੍ਲਾਨਨ੍ਤਿ ਤੇਹਿ ਤੇਹਿ ਸਤ੍ਤਸਙ੍ਖਾਰੇਹਿ ਪਟਿਨਿਵਤ੍ਤਿਤ੍ਵਾ ਸਲ੍ਲਾਨਂ ਨਿਲੀਯਨਂ, ਏਕੀਭਾਵੋ ਪਵਿਵੇਕੋਤਿ ਵੁਤ੍ਤਂ ਹੋਤਿ. ਯੋ ਤਤੋ ਵੁਟ੍ਠਿਤੋ, ਸੋ ਪਟਿਸਲ੍ਲਾਨਾ ਵੁਟ੍ਠਿਤੋ ਨਾਮ ਹੋਤਿ. ਅਯਂ ਪਨ ਯਸ੍ਮਾ ਪਟਿਸਲ੍ਲਾਨਾਨਂ ਉਤ੍ਤਮਤੋ ਫਲਸਮਾਪਤ੍ਤਿਤੋ ਵੁਟ੍ਠਾਸਿ, ਤਸ੍ਮਾ ‘‘ਪਟਿਸਲ੍ਲਾਨਾ ਵੁਟ੍ਠਿਤੋ’’ਤਿ ਵੁਤ੍ਤੋ. ਭਗਵਨ੍ਤਂ ਅਭਿਵਾਦੇਤ੍ਵਾਤਿ ਸਮਦਸਨਖੁਜ੍ਜਲਵਿਭੂਸਿਤੇਨ ਸਿਰਸਾ ਭਗਵਨ੍ਤਂ ਸਕ੍ਕਚ੍ਚਂ ਵਨ੍ਦਿਤ੍ਵਾ, ਅਭਿਵਾਦਾਪੇਤ੍ਵਾ ਵਾ ‘‘ਸੁਖੀ ਭਵ, ਚੁਨ੍ਦਾ’’ਤਿ ਏਵਂ ਵਚੀਭੇਦਂ ਕਾਰਾਪੇਤ੍ਵਾ, ਭਗਵਾ ਪਨ ਕਿਰ ਵਨ੍ਦਿਤੋ ਸਮਾਨੋ ਸੁਵਣ੍ਣਦੁਨ੍ਦੁਭਿਸਦਿਸਂ ਗੀਵਂ ਪਗ੍ਗਯ੍ਹ ਕਣ੍ਣਸੁਖਂ ਪੇਮਨਿਯਂ ਅਮਤਾਭਿਸੇਕਸਦਿਸਂ ਬ੍ਰਹ੍ਮਘੋਸਂ ਨਿਚ੍ਛਾਰੇਨ੍ਤੋ ‘‘ਸੁਖੀ ਹੋਹੀ’’ਤਿ ਤਸ੍ਸ ਤਸ੍ਸ ਨਾਮਂ ਗਹੇਤ੍ਵਾ ਵਦਤਿ, ਏਤਂ ਆਚਿਣ੍ਣਂ ਤਥਾਗਤਾਨਂ. ਤਤ੍ਰਿਦਂ ਸਾਧਕਸੁਤ੍ਤਂ, ‘‘ਸਕ੍ਕੋ, ਭਨ੍ਤੇ, ਦੇਵਾਨਮਿਨ੍ਦੋ ਸਾਮਚ੍ਚੋ ਸਪਰਿਜਨੋ ਭਗਵਤੋ ਪਾਦੇ ਸਿਰਸਾ ਵਨ੍ਦਤੀਤਿ, ਸੁਖੀ ਹੋਤੁ ਪਞ੍ਚਸਿਖ ਸਕ੍ਕੋ ਦੇਵਾਨਮਿਨ੍ਦੋ ਸਾਮਚ੍ਚੋ ਸਪਰਿਜਨੋ, ਸੁਖਕਾਮਾ ਹਿ ਦੇਵਾ ਮਨੁਸ੍ਸਾ ਅਸੁਰਾ ਨਾਗਾ ਗਨ੍ਧਬ੍ਬਾ, ਯੇ ਚਞ੍ਞੇ ਸਨ੍ਤਿ ਪੁਥੁਕਾਯਾ’’ਤਿ. ਏਵਞ੍ਚ ਪਨ ਤਥਾਗਤਾ ਏਵਰੂਪੇ ਮਹੇਸਕ੍ਖੇ ਯਕ੍ਖੇ ਅਭਿਵਦਨ੍ਤੀਤਿ.

ਯਾ ਇਮਾਤਿ ਇਦਾਨਿ ਵਤ੍ਤਬ੍ਬਾਭਿਮੁਖਂ ਕਰੋਨ੍ਤੋ ਵਿਯ ਆਹ. ਅਨੇਕਵਿਹਿਤਾਤਿ ਨਾਨਪ੍ਪਕਾਰਾ. ਦਿਟ੍ਠਿਯੋਤਿ ਮਿਚ੍ਛਾਦਿਟ੍ਠਿਯੋ. ਲੋਕੇ ਉਪ੍ਪਜ੍ਜਨ੍ਤੀਤਿ ਸਤ੍ਤੇਸੁ ਪਾਤੁਭਵਨ੍ਤਿ. ਅਤ੍ਤਵਾਦਪ੍ਪਟਿਸਂਯੁਤ੍ਤਾਤਿ ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿਆਦਿਨਯਪ੍ਪਵਤ੍ਤੇਨ ਅਤ੍ਤਵਾਦੇਨ ਪਟਿਸਂਯੁਤ੍ਤਾ, ਤਾ ਵੀਸਤਿ ਭਵਨ੍ਤਿ. ਲੋਕਵਾਦਪ੍ਪਟਿਸਂਯੁਤ੍ਤਾਤਿ ‘‘ਸਸ੍ਸਤੋ ਅਤ੍ਤਾ ਚ ਲੋਕੋ ਚਾ’’ਤਿਆਦਿਨਯਪ੍ਪਵਤ੍ਤੇਨ ਲੋਕਵਾਦੇਨ ਪਟਿਸਂਯੁਤ੍ਤਾ, ਤਾ ਅਟ੍ਠ ਹੋਨ੍ਤਿ ਸਸ੍ਸਤੋ, ਅਸਸ੍ਸਤੋ, ਸਸ੍ਸਤੋ ਚ ਅਸਸ੍ਸਤੋ ਚ, ਨੇਵ ਸਸ੍ਸਤੋ ਨਾਸਸ੍ਸਤੋ, ਅਨ੍ਤਵਾ, ਅਨਨ੍ਤਵਾ, ਅਨ੍ਤਵਾ ਚ ਅਨਨ੍ਤਵਾ ਚ, ਨੇਵਨ੍ਤਵਾ ਨਾਨਨ੍ਤਵਾ ਅਤ੍ਤਾ ਚ ਲੋਕੋ ਚਾਤਿ ਏਵਂ ਪਵਤ੍ਤਤ੍ਤਾ.

ਆਦਿਮੇਵਾਤਿਆਦੀਸੁ ਅਯਮਤ੍ਥੋ ਕਿਂ ਨੁ ਖੋ ਭਨ੍ਤੇ ਆਦਿਮੇਵ ਮਨਸਿਕਰੋਨ੍ਤਸ੍ਸ ਅਪ੍ਪਤ੍ਵਾਪਿ ਸੋਤਾਪਤ੍ਤਿਮਗ੍ਗਂ ਵਿਪਸ੍ਸਨਾਮਿਸ੍ਸਕਪਠਮਮਨਸਿਕਾਰਮੇਵ ਮਨਸਿਕਰੋਨ੍ਤਸ੍ਸ ਭਿਕ੍ਖੁਨੋ ਏਵਮੇਤਾਸਂ ਏਤ੍ਤਕੇਨੇਵ ਉਪਾਯੇਨ ਏਤਾਸਂ ਦਿਟ੍ਠੀਨਂ ਪਹਾਨਞ੍ਚ ਪਟਿਨਿਸ੍ਸਗ੍ਗੋ ਚ ਹੋਤੀਤਿ. ਇਦਞ੍ਚ ਥੇਰੋ ਅਤ੍ਤਨਾ ਅਨਧਿਮਾਨਿਕੋਪਿ ਸਮਾਨੋ ਅਧਿਮਾਨਿਕਾਨਂ ਅਧਿਮਾਨਪ੍ਪਹਾਨਤ੍ਥਂ ਅਧਿਮਾਨਿਕੋ ਵਿਯ ਹੁਤ੍ਵਾ ਪੁਚ੍ਛਤੀਤਿ ਵੇਦਿਤਬ੍ਬੋ. ਅਪਰੇ ਪਨਾਹੁ ‘‘ਥੇਰਸ੍ਸ ਅਨ੍ਤੇਵਾਸਿਕਾ ਆਦਿਮਨਸਿਕਾਰੇਨੇਵ ਦਿਟ੍ਠੀਨਂ ਸਮੁਚ੍ਛੇਦਪ੍ਪਹਾਨਂ ਹੋਤੀਤਿ ਏਵਂਸਞ੍ਞਿਨੋਪਿ, ਸਮਾਪਤ੍ਤਿਵਿਹਾਰਾ ਸਲ੍ਲੇਖਵਿਹਾਰਾਤਿ ਏਵਂਸਞ੍ਞਿਨੋਪਿ ਅਤ੍ਥਿ. ਸੋ ਤੇਸਂ ਅਤ੍ਥਾਯ ਭਗਵਨ੍ਤਂ ਪੁਚ੍ਛਤੀ’’ਤਿ.

੮੨. ਅਥਸ੍ਸ ਭਗਵਾ ਤਾਸਂ ਦਿਟ੍ਠੀਨਂ ਪਹਾਨੂਪਾਯਂ ਦਸ੍ਸੇਨ੍ਤੋ ਯਾ ਇਮਾਤਿਆਦਿਮਾਹ. ਤਤ੍ਥ ਯਤ੍ਥ ਚੇਤਾ ਦਿਟ੍ਠਿਯੋ ਉਪ੍ਪਜ੍ਜਨ੍ਤੀਤਿਆਦਿ ਪਞ੍ਚਕ੍ਖਨ੍ਧੇ ਸਨ੍ਧਾਯ ਵੁਤ੍ਤਂ. ਏਤੇਸੁ ਹਿ ਏਤਾ ਦਿਟ੍ਠਿਯੋ ਉਪ੍ਪਜ੍ਜਨ੍ਤਿ. ਯਥਾਹ ‘‘ਰੂਪੇ ਖੋ, ਭਿਕ੍ਖਵੇ, ਸਤਿ ਰੂਪਂ ਅਭਿਨਿਵਿਸ੍ਸ ਏਵਂ ਦਿਟ੍ਠਿ ਉਪ੍ਪਜ੍ਜਤਿ, ਸੋ ਅਤ੍ਤਾ ਸੋ ਲੋਕੋ ਸੋ ਪੇਚ੍ਚ ਭਵਿਸ੍ਸਾਮਿ ਨਿਚ੍ਚੋ ਧੁਵੋ ਸਸ੍ਸਤੋ ਅਵਿਪਰਿਣਾਮਧਮ੍ਮੋ’’ਤਿ (ਸਂ. ਨਿ. ੩.੧੫੨) ਵਿਤ੍ਥਾਰੋ. ਆਰਮ੍ਮਣਵਸੇਨ ਪਨ ਏਕਵਚਨਂ ਕਤ੍ਵਾ ਯਤ੍ਥ ਚਾਤਿ ਆਹ, ਯਸ੍ਮਿਂ ਆਰਮ੍ਮਣੇ ਉਪ੍ਪਜ੍ਜਨ੍ਤੀਤਿ ਵੁਤ੍ਤਂ ਹੋਤਿ. ਏਤ੍ਥ ਚ ਉਪ੍ਪਜ੍ਜਨ੍ਤਿ ਅਨੁਸੇਨ੍ਤਿ ਸਮੁਦਾਚਰਨ੍ਤੀਤਿ ਇਮੇਸਂ ਏਵਂ ਨਾਨਾਕਰਣਂ ਵੇਦਿਤਬ੍ਬਂ. ਜਾਤਿਵਸੇਨ ਹਿ ਅਜਾਤਾ ਜਾਯਮਾਨਾ ਉਪ੍ਪਜ੍ਜਨ੍ਤੀਤਿ ਵੁਚ੍ਚਨ੍ਤਿ. ਪੁਨਪ੍ਪੁਨਂ ਆਸੇਵਿਤਾ ਥਾਮਗਤਾ ਅਪ੍ਪਟਿਵਿਨੀਤਾ ਅਨੁਸੇਨ੍ਤੀਤਿ. ਕਾਯਵਚੀਦ੍ਵਾਰਂ ਸਮ੍ਪਤ੍ਤਾ ਸਮੁਦਾਚਰਨ੍ਤੀਤਿ, ਇਦਮੇਤੇਸਂ ਨਾਨਾਕਰਣਂ. ਤਂ ਨੇਤਂ ਮਮਾਤਿਆਦੀਸੁ ਤਂ ਪਞ੍ਚਕ੍ਖਨ੍ਧਪ੍ਪਭੇਦਂ ਆਰਮ੍ਮਣਮੇਤਂ ਮਯ੍ਹਂ ਨ ਹੋਤਿ, ਅਹਮ੍ਪਿ ਏਸੋ ਨ ਅਸ੍ਮਿ, ਏਸੋ ਮੇ ਅਤ੍ਤਾਪਿ ਨ ਹੋਤੀਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਪਸ੍ਸਤੋਤਿ ਏਵਂ ਤਾਵ ਪਦਤ੍ਥੋ ਵੇਦਿਤਬ੍ਬੋ.

ਯਸ੍ਮਾ ਪਨ ਏਤ੍ਥ ਏਤਂ ਮਮਾਤਿ ਤਣ੍ਹਾਗਾਹੋ, ਤਞ੍ਚ ਗਣ੍ਹਨ੍ਤੋ ਅਟ੍ਠਸਤਤਣ੍ਹਾਵਿਚਰਿਤਪ੍ਪਭੇਦਂ ਤਣ੍ਹਾਪਪਞ੍ਚਂ ਗਣ੍ਹਾਤਿ. ਏਸੋਹਮਸ੍ਮੀਤਿ ਮਾਨਗਾਹੋ, ਤਞ੍ਚ ਗਣ੍ਹਨ੍ਤੋ ਨਵਪ੍ਪਭੇਦਂ ਮਾਨਪਪਞ੍ਚਂ ਗਣ੍ਹਾਤਿ. ਏਸੋ ਮੇ ਅਤ੍ਤਾਤਿ ਦਿਟ੍ਠਿਗਾਹੋ, ਤਞ੍ਚ ਗਣ੍ਹਨ੍ਤੋ ਦ੍ਵਾਸਟ੍ਠਿਦਿਟ੍ਠਿਗਤਪ੍ਪਭੇਦਂ ਦਿਟ੍ਠਿਪਪਞ੍ਚਂ ਗਣ੍ਹਾਤਿ. ਤਸ੍ਮਾ ਨੇਤਂ ਮਮਾਤਿ ਵਦਨ੍ਤੋ ਭਗਵਾ ਯਥਾਵੁਤ੍ਤਪ੍ਪਭੇਦਂ ਤਣ੍ਹਾਪਪਞ੍ਚਂ ਪਟਿਕ੍ਖਿਪਤਿ. ਨੇਸੋਹਮਸ੍ਮੀਤਿ ਮਾਨਪਪਞ੍ਚਂ. ਨ ਮੇਸੋ ਅਤ੍ਤਾਤਿ ਦਿਟ੍ਠਿਪਪਞ੍ਚਂ. ਦਿਟ੍ਠੇਕਟ੍ਠਾਯੇਵ ਚੇਤ੍ਥ ਤਣ੍ਹਾਮਾਨਾ ਵੇਦਿਤਬ੍ਬਾ. ਏਵਮੇਤਨ੍ਤਿ ਏਵਂ ‘‘ਨੇਤਂ ਮਮਾ’’ਤਿਆਦਿਨਾ ਆਕਾਰੇਨ ਏਤਂ ਖਨ੍ਧਪਞ੍ਚਕਂ. ਯਥਾਭੂਤਨ੍ਤਿ ਯਥਾ ਸਭਾਵਂ, ਯਥਾ ਅਤ੍ਥੀਤਿ ਵੁਤ੍ਤਂ ਹੋਤਿ. ਖਨ੍ਧਪਞ੍ਚਕਞ੍ਹਿ ਏਤੇਨੇਵ ਆਕਾਰੇਨ ਅਤ੍ਥਿ. ਮਮਨ੍ਤਿਆਦਿਨਾ ਪਨ ਗਯ੍ਹਮਾਨਮ੍ਪਿ ਤੇਨਾਕਾਰੇਨ ਨੇਵਤ੍ਥੀਤਿ ਅਧਿਪ੍ਪਾਯੋ. ਸਮ੍ਮਪ੍ਪਞ੍ਞਾਯ ਪਸ੍ਸਤੋਤਿ ਸੋਤਾਪਤ੍ਤਿਮਗ੍ਗਪਞ੍ਞਾਪਰਿਯੋਸਾਨਾਯ ਵਿਪਸ੍ਸਨਾਪਞ੍ਞਾਯ ਸੁਟ੍ਠੁ ਪਸ੍ਸਨ੍ਤਸ੍ਸ. ਏਵਮੇਤਾਸਨ੍ਤਿ ਏਤੇਨ ਉਪਾਯੇਨ ਏਤਾਸਂ. ਪਹਾਨਂ ਪਟਿਨਿਸ੍ਸਗ੍ਗੋਤਿ ਉਭਯਮ੍ਪੇਤਂ ਸਮੁਚ੍ਛੇਦਪ੍ਪਹਾਨਸ੍ਸੇਵਾਧਿਵਚਨਂ.

ਏਵਂ ਭਗਵਾ ਆਦਿਮਨਸਿਕਾਰੇਨੇਵ ਦਿਟ੍ਠੀਨਂ ਪਹਾਨਂ ਹੋਤਿ ਨੁ ਖੋ ਨੋਤਿ ਆਯਸ੍ਮਤਾ ਮਹਾਚੁਨ੍ਦੇਨ ਅਧਿਮਾਨਿਕਾਨਂ ਵਸੇਨ ਪਞ੍ਹਂ ਪੁਟ੍ਠੋ ਸੋਤਾਪਤ੍ਤਿਮਗ੍ਗੇਨ ਦਿਟ੍ਠਿਪ੍ਪਹਾਨਂ ਦਸ੍ਸੇਤ੍ਵਾ ਇਦਾਨਿ ਸਯਮੇਵ ਅਧਿਮਾਨਿਕਾਨਂ ਝਾਨਂ ਵਿਭਜਨ੍ਤੋ ਠਾਨਂ ਖੋ ਪਨੇਤਨ੍ਤਿਆਦਿਮਾਹ. ਤਤ੍ਥ ਅਧਿਮਾਨਿਕਾ ਨਾਮ ਯੇਸਂ ਅਪ੍ਪਤ੍ਤੇ ਪਤ੍ਤਸਞ੍ਞਾਯ ਅਧਿਮਾਨੋ ਉਪ੍ਪਜ੍ਜਤਿ, ਸ੍ਵਾਯਂ ਉਪ੍ਪਜ੍ਜਮਾਨੋ ਨੇਵ ਲੋਕਵਟ੍ਟਾਨੁਸਾਰੀਨਂ ਬਾਲਪੁਥੁਜ੍ਜਨਾਨਂ ਉਪ੍ਪਜ੍ਜਤਿ, ਨ ਅਰਿਯਸਾਵਕਾਨਂ. ਨ ਹਿ ਸੋਤਾਪਨ੍ਨਸ੍ਸ ‘‘ਸਕਦਾਗਾਮੀ ਅਹ’’ਨ੍ਤਿ ਅਧਿਮਾਨੋ ਉਪ੍ਪਜ੍ਜਤਿ, ਨ ਸਕਦਾਗਾਮਿਸ੍ਸ ‘‘ਅਨਾਗਾਮੀ ਅਹ’’ਨ੍ਤਿ, ਨ ਅਨਾਗਾਮਿਨੋ ‘‘ਅਰਹਾ ਅਹ’’ਨ੍ਤਿ, ਕਾਰਕਸ੍ਸੇਵ ਪਨ ਸਮਥਵਸੇਨ ਵਾ ਵਿਪਸ੍ਸਨਾਵਸੇਨ ਵਾ ਵਿਕ੍ਖਮ੍ਭਿਤਕਿਲੇਸਸ੍ਸ ਨਿਚ੍ਚਂ ਯੁਤ੍ਤਪਯੁਤ੍ਤਸ੍ਸ ਆਰਦ੍ਧਵਿਪਸ੍ਸਕਸ੍ਸ ਉਪ੍ਪਜ੍ਜਤਿ. ਤਸ੍ਸ ਹਿ ਸਮਥਵਿਕ੍ਖਮ੍ਭਿਤਾਨਂ ਵਾ ਵਿਪਸ੍ਸਨਾਵਿਕ੍ਖਮ੍ਭਿਤਾਨਂ ਵਾ ਕਿਲੇਸਾਨਂ ਸਮੁਦਾਚਾਰਂ ਅਪਸ੍ਸਤੋ ‘‘ਸੋਤਾਪਨ੍ਨੋ ਅਹਨ੍ਤਿ ਵਾ, ਸਕਦਾਗਾਮੀ, ਅਨਾਗਾਮੀ, ਅਰਹਾ ਅਹ’’ਨ੍ਤਿ ਵਾ ਅਧਿਮਾਨੋ ਉਪ੍ਪਜ੍ਜਤਿ, ਤਲਙ੍ਗਰਤਿਸ੍ਸਪਬ੍ਬਤਵਾਸਿਧਮ੍ਮਦਿਨ੍ਨਤ੍ਥੇਰੇਨ ਓਵਾਦਿਯਮਾਨਤ੍ਥੇਰਾਨਂ ਵਿਯ.

ਥੇਰਸ੍ਸ ਕਿਰ ਅਚਿਰੂਪਸਮ੍ਪਨ੍ਨਸ੍ਸੇਵ ਓਵਾਦੇ ਠਤ੍ਵਾ ਬਹੂ ਭਿਕ੍ਖੂ ਵਿਸੇਸਂ ਅਧਿਗਚ੍ਛਿਂਸੁ. ਤਂ ਪਵਤ੍ਤਿਂ ਸੁਤ੍ਵਾ ਤਿਸ੍ਸਮਹਾਵਿਹਾਰਵਾਸੀ ਭਿਕ੍ਖੁਸਙ੍ਘੋ ‘‘ਨ ਅਟ੍ਠਾਨਨਿਯੋਜਕੋ ਥੇਰੋਤਿ ਥੇਰਂ ਆਨੇਥਾ’’ਤਿ ਸਮ੍ਬਹੁਲੇ ਭਿਕ੍ਖੂ ਪਾਹੇਸਿ. ਤੇ ਗਨ੍ਤ੍ਵਾ, ‘‘ਆਵੁਸੋ, ਧਮ੍ਮਦਿਨ੍ਨ ਭਿਕ੍ਖੁਸਙ੍ਘੋ ਤਂ ਪਕ੍ਕੋਸਾਪੇਤੀ’’ਤਿ ਆਹਂਸੁ. ਸੋ ਆਹ ‘‘ਕਿਂ ਪਨ ਤੁਮ੍ਹੇ, ਭਨ੍ਤੇ, ਅਤ੍ਤਾਨਂ ਗਵੇਸਥ ਪਰ’’ਨ੍ਤਿ? ਅਤ੍ਤਾਨਂ ਸਪ੍ਪੁਰਿਸਾਤਿ, ਸੋ ਤੇਸਂ ਕਮ੍ਮਟ੍ਠਾਨਮਦਾਸਿ, ਸਬ੍ਬੇਵ ਅਰਹਤ੍ਤਂ ਪਾਪੁਣਿਂਸੁ. ਭਿਕ੍ਖੁਸਙ੍ਘੋ ਪੁਨ ਅਞ੍ਞੇ ਭਿਕ੍ਖੂ ਪਾਹੇਸਿ, ਏਵਂ ਯਾਵਤਤਿਯਂ ਪਹਿਤਾ ਸਬ੍ਬੇਪਿ ਤਤ੍ਥੇਵ ਅਰਹਤ੍ਤਂ ਪਤ੍ਵਾ ਵਿਹਰਿਂਸੁ.

ਤਤੋ ਸਙ੍ਘੋ ਗਤਗਤਾ ਨਾਗਚ੍ਛਨ੍ਤੀਤਿ ਅਞ੍ਞਤਰਂ ਵੁਡ੍ਢਪਬ੍ਬਜਿਤਂ ਪਾਹੇਸਿ. ਸੋ ਗਨ੍ਤ੍ਵਾ ਚ, ‘‘ਭਨ੍ਤੇ, ਧਮ੍ਮਦਿਨ੍ਨ ਤਿਕ੍ਖਤ੍ਤੁਂ ਤਿਸ੍ਸਮਹਾਵਿਹਾਰਵਾਸੀ ਭਿਕ੍ਖੁਸਙ੍ਘੋ ਤੁਯ੍ਹਂ ਸਨ੍ਤਿਕੇ ਪੇਸੇਸਿ, ਤ੍ਵਂ ਨਾਮ ਸਙ੍ਘਸ੍ਸ ਆਣਂ ਗਰੁਂ ਨ ਕਰੋਸਿ, ਨਾਗਚ੍ਛਸੀ’’ਤਿ ਆਹ. ਥੇਰੋ ਕਿਮੇਤਨ੍ਤਿ ਪਣ੍ਣਸਾਲਂ ਅਪ੍ਪਵਿਸਿਤ੍ਵਾਵ ਪਤ੍ਤਚੀਵਰਂ ਗਾਹਾਪੇਤ੍ਵਾ ਤਾਵਦੇਵ ਨਿਕ੍ਖਮਿ, ਸੋ ਅਨ੍ਤਰਾਮਗ੍ਗੇ ਹਙ੍ਕਨਵਿਹਾਰਂ ਪਾਵਿਸਿ. ਤਤ੍ਥ ਚੇਕੋ ਮਹਾਥੇਰੋ ਸਟ੍ਠਿਵਸ੍ਸਾਤੀਤੋ ਅਧਿਮਾਨੇਨ ਅਰਹਤ੍ਤਂ ਪਟਿਜਾਨਾਤਿ. ਥੇਰੋ ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਅਧਿਗਮਂ ਪੁਚ੍ਛਿ. ਥੇਰੋ ਆਹ ‘‘ਆਮ ਧਮ੍ਮਦਿਨ੍ਨ, ਯਂ ਪਬ੍ਬਜਿਤੇਨ ਕਾਤਬ੍ਬਂ, ਚਿਰਕਤਂ ਤਂ ਮਯਾ, ਅਤੀਤਸਟ੍ਠਿਵਸ੍ਸੋਮ੍ਹਿ ਏਤਰਹੀ’’ਤਿ. ਕਿਂ, ਭਨ੍ਤੇ, ਇਦ੍ਧਿਮ੍ਪਿ ਵਲ਼ਞ੍ਜੇਥਾਤਿ. ਆਮ ਧਮ੍ਮਦਿਨ੍ਨਾਤਿ. ਸਾਧੁ ਵਤ, ਭਨ੍ਤੇ, ਹਤ੍ਥਿਂ ਤੁਮ੍ਹਾਕਂ ਪਟਿਮੁਖਂ ਆਗਚ੍ਛਨ੍ਤਂ ਮਾਪੇਥਾਤਿ. ਸਾਧਾਵੁਸੋਤਿ ਥੇਰੋ ਸਬ੍ਬਸੇਤਂ ਸਤ੍ਤਪ੍ਪਤਿਟ੍ਠਂ ਤਿਧਾਪਭਿਨ੍ਨਂ ਨਙ੍ਗੁਟ੍ਠਂ ਬੀਜਯਮਾਨਂ ਸੋਣ੍ਡਂ ਮੁਖੇ ਪਕ੍ਖਿਪਿਤ੍ਵਾ ਦ੍ਵੀਹਿ ਦਨ੍ਤੇਹਿ ਵਿਜ੍ਝਿਤੁਕਾਮਂ ਵਿਯ ਪਟਿਮੁਖਂ ਆਗਚ੍ਛਨ੍ਤਂ ਮਹਾਹਤ੍ਥਿਂ ਮਾਪੇਸਿ. ਸੋ ਤਂ ਅਤ੍ਤਨਾਯੇਵ ਮਾਪਿਤਂ ਹਤ੍ਥਿਂ ਦਿਸ੍ਵਾ ਭੀਤੋ ਪਲਾਯਿਤੁਂ ਆਰਭਿ. ਤਦਾਵ ਅਤ੍ਤਾਨਂ ‘‘ਨਾਹਂ ਅਰਹਾ’’ਤਿ ਞਤ੍ਵਾ ਧਮ੍ਮਦਿਨ੍ਨਸ੍ਸ ਪਾਦਮੂਲੇ ਉਕ੍ਕੁਟਿਕਂ ਨਿਸੀਦਿਤ੍ਵਾ ‘‘ਪਤਿਟ੍ਠਾ ਮੇ ਹੋਹਿ, ਆਵੁਸੋ’’ਤਿ ਆਹ. ਧਮ੍ਮਦਿਨ੍ਨੋ ‘‘ਮਾ, ਭਨ੍ਤੇ, ਸੋਚਿ, ਮਾ ਅਨਤ੍ਤਮਨੋ ਅਹੋਸਿ, ਕਾਰਕਾਨਂਯੇਵ ਅਧਿਮਾਨੋ ਉਪ੍ਪਜ੍ਜਤੀ’’ਤਿ ਥੇਰਂ ਸਮਸ੍ਸਾਸੇਤ੍ਵਾ ਕਮ੍ਮਟ੍ਠਾਨਮਦਾਸਿ. ਥੇਰੋ ਤਸ੍ਸੋਵਾਦੇ ਠਤ੍ਵਾ ਅਰਹਤ੍ਤਂ ਪਾਪੁਣਿ.

ਚਿਤ੍ਤਲਪਬ੍ਬਤੇਪਿ ਤਾਦਿਸੋਵ ਥੇਰੋ ਵਸਤਿ. ਧਮ੍ਮਦਿਨ੍ਨੋ ਤਮ੍ਪਿ ਉਪਸਙ੍ਕਮਿਤ੍ਵਾ ਤਥੇਵ ਪੁਚ੍ਛਿ. ਸੋਪਿ ਤਥੇਵ ਬ੍ਯਾਕਾਸਿ. ਤਤੋ ਨਂ ਧਮ੍ਮਦਿਨ੍ਨੋ ਕਿਂ, ਭਨ੍ਤੇ, ਇਦ੍ਧਿਮ੍ਪਿ ਵਲ਼ਞ੍ਜੇਥਾਤਿ ਆਹ. ਆਮਾਵੁਸੋਤਿ. ਸਾਧੁ ਵਤ, ਭਨ੍ਤੇ, ਏਕਂ ਪੋਕ੍ਖਰਣਿਂ ਮਾਪੇਥਾਤਿ. ਥੇਰੋ ਮਾਪੇਸਿ. ਏਤ੍ਥ, ਭਨ੍ਤੇ, ਪਦੁਮਗੁਮ੍ਬਂ ਮਾਪੇਥਾਤਿ. ਤਮ੍ਪਿ ਮਾਪੇਸਿ. ਪਦੁਮਗੁਮ੍ਬੇ ਮਹਾਪਦੁਮਂ ਮਾਪੇਥਾਤਿ. ਤਮ੍ਪਿ ਮਾਪੇਸਿ. ਏਤਸ੍ਮਿਂ ਪਦੁਮਗੁਮ੍ਬੇ ਠਤ੍ਵਾ ਮਧੁਰਸ੍ਸਰੇਨ ਗਾਯਨ੍ਤਂ ਨਚ੍ਚਨ੍ਤਞ੍ਚ ਏਕਂ ਇਤ੍ਥਿਵਿਗ੍ਗਹਂ ਮਾਪੇਥਾਤਿ. ਤਮ੍ਪਿ ਮਾਪੇਸਿ. ਸੋ ਏਤਂ, ਭਨ੍ਤੇ, ਪੁਨਪ੍ਪੁਨਂ ਉਪਨਿਜ੍ਝਾਯਥਾਤਿ ਵਤ੍ਵਾ ਸਯਂ ਪਾਸਾਦਂ ਪਾਵਿਸਿ. ਥੇਰਸ੍ਸ ਤਂ ਉਪਨਿਜ੍ਝਾਯਤੋ ਸਟ੍ਠਿਵਸ੍ਸਾਨਿ ਵਿਕ੍ਖਮ੍ਭਿਤਕਿਲੇਸਾ ਚਲਿਂਸੁ, ਸੋ ਤਦਾ ਅਤ੍ਤਾਨਂ ਞਤ੍ਵਾ ਪੁਰਿਮਤ੍ਥੇਰੋ ਵਿਯ ਧਮ੍ਮਦਿਨ੍ਨਤ੍ਥੇਰਸ੍ਸ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਅਰਹਤ੍ਤਂ ਪਾਪੁਣਿ.

ਧਮ੍ਮਦਿਨ੍ਨੋਪਿ ਅਨੁਪੁਬ੍ਬੇਨ ਤਿਸ੍ਸਮਹਾਵਿਹਾਰਂ ਅਗਮਾਸਿ. ਤਸ੍ਮਿਞ੍ਚ ਸਮਯੇ ਥੇਰਾ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਬੁਦ੍ਧਾਰਮ੍ਮਣਂ ਪੀਤਿਂ ਉਪ੍ਪਾਦੇਤ੍ਵਾ ਨਿਸਿਨ੍ਨਾ ਹੋਨ੍ਤਿ, ਏਤਂ ਕਿਰ ਤੇਸਂ ਵਤ੍ਤਂ. ਤੇਨ ਨੇਸਂ ਏਕੋਪਿ ‘‘ਇਧ ਪਤ੍ਤਚੀਵਰਂ ਠਪੇਹੀ’’ਤਿ ਧਮ੍ਮਦਿਨ੍ਨਂ ਵਤ੍ਤਾ ਪੁਚ੍ਛਿਤਾਪਿ ਨਾਹੋਸਿ. ਧਮ੍ਮਦਿਨ੍ਨੋ ਏਸੋ ਭਵੇਯ੍ਯਾਤਿ ਞਤ੍ਵਾ ਪਨ ਪਞ੍ਹਂ ਪੁਚ੍ਛਿਂਸੁ. ਸੋ ਪੁਚ੍ਛਿਤਪਞ੍ਹੇ ਤਿਣ੍ਹੇਨ ਅਸਿਨਾ ਕੁਮੁਦਨਾਲ਼ਕਲਾਪਂ ਵਿਯ ਛਿਨ੍ਦਿਤ੍ਵਾ ਪਾਦਙ੍ਗੁਲਿਯਾ ਮਹਾਪਥਵਿਂ ਪਹਰਿ. ਭਨ੍ਤੇ ਅਯਂ ਅਚੇਤਨਾ ਮਹਾਪਥਵੀਪਿ ਧਮ੍ਮਦਿਨ੍ਨਸ੍ਸ ਗੁਣਂ ਜਾਨਾਤਿ. ਤੁਮ੍ਹੇ ਪਨ ਨ ਜਾਨਿਤ੍ਥਾਤਿ ਚ ਵਤ੍ਵਾ ਇਮਂ ਗਾਥਮਾਹ –

‘‘ਅਚੇਤਨਾਯਂ ਪਥਵੀ, ਵਿਜਾਨਾਤਿ ਗੁਣਾਗੁਣਂ;

ਸਚੇਤਨਾਥ ਖੋ ਭਨ੍ਤੇ, ਨ ਜਾਨਾਥ ਗੁਣਾਗੁਣ’’ਨ੍ਤਿ.

ਤਾਵਦੇਵ ਚ ਆਕਾਸੇ ਅਬ੍ਭੁਗ੍ਗਨ੍ਤ੍ਵਾ ਤਲਙ੍ਗਰਤਿਸ੍ਸਪਬ੍ਬਤਮੇਵ ਅਗਮਾਸਿ. ਏਵਂ ਕਾਰਕਸ੍ਸੇਵ ਅਧਿਮਾਨੋ ਉਪ੍ਪਜ੍ਜਤਿ. ਤਸ੍ਮਾ ਭਗਵਾ ਤਾਦਿਸਾਨਂ ਭਿਕ੍ਖੂਨਂ ਵਸੇਨ ਝਾਨਂ ਵਿਭਜਨ੍ਤੋ ਠਾਨਂ ਖੋ ਪਨੇਤਨ੍ਤਿਆਦਿਮਾਹ.

ਤਸ੍ਸਤ੍ਥੋ, ਅਤ੍ਥੇਤਂ ਕਾਰਣਂ, ਨੋ ਨਤ੍ਥਿ. ਯੇਨ ਇਧੇਕਚ੍ਚੋ ਭਿਕ੍ਖੁ ਬਾਹਿਰਪਰਿਬ੍ਬਾਜਕੇਹਿ ਸਾਧਾਰਣਂ ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰੇਯ੍ਯ, ਯਂ ਪਨ ਤਸ੍ਸ ਏਵਮਸ੍ਸ ਸਲ੍ਲੇਖੇਨ ਵਿਹਰਾਮੀਤਿ, ਯਂ ਪਟਿਪਤ੍ਤਿਵਿਧਾਨਂ ਕਿਲੇਸੇ ਸਂਲਿਖਤਿ, ਤੇਨਾਹਂ ਵਿਹਰਾਮੀਤਿ, ਤਂ ਨ ਯੁਜ੍ਜਤਿ, ਨ ਹਿ ਅਧਿਮਾਨਿਕਸ੍ਸ ਭਿਕ੍ਖੁਨੋ ਝਾਨਂ ਸਲ੍ਲੇਖੋ ਵਾ ਸਲ੍ਲੇਖਪਟਿਪਦਾ ਵਾ ਹੋਤਿ. ਕਸ੍ਮਾ? ਅਵਿਪਸ੍ਸਨਾਪਾਦਕਤ੍ਤਾ. ਨ ਹਿ ਸੋ ਝਾਨਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਤਿ, ਝਾਨਂ ਪਨਸ੍ਸ ਚਿਤ੍ਤੇਕਗ੍ਗਮਤ੍ਤਂ ਕਰੋਤਿ, ਦਿਟ੍ਠਧਮ੍ਮਸੁਖਵਿਹਾਰੋ ਹੋਤਿ. ਤਸ੍ਮਾ ਤਮਤ੍ਥਂ ਦਸ੍ਸੇਨ੍ਤੋ ਭਗਵਾ ‘‘ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ ਵਿਨਯੇ ਸਲ੍ਲੇਖਾ ਵੁਚ੍ਚਨ੍ਤਿ, ਦਿਟ੍ਠਧਮ੍ਮਸੁਖਵਿਹਾਰਾ ਏਤੇ ਅਰਿਯਸ੍ਸ ਵਿਨਯੇ ਵੁਚ੍ਚਨ੍ਤੀ’’ਤਿ ਆਹ.

ਤਤ੍ਥ ਏਤੇਤਿ ਝਾਨਧਮ੍ਮਵਸੇਨ ਬਹੁਵਚਨਂ ਵੇਦਿਤਬ੍ਬਂ, ਏਤੇ ਪਠਮਜ੍ਝਾਨਧਮ੍ਮਾਤਿ ਵੁਤ੍ਤਂ ਹੋਤਿ. ਸਮਾਪਤ੍ਤਿਵਸੇਨ ਵਾ, ਏਕਮ੍ਪਿ ਹਿ ਪਠਮਜ੍ਝਾਨਂ ਪੁਨਪ੍ਪੁਨਂ ਸਮਾਪਤ੍ਤਿਵਸੇਨ ਪਵਤ੍ਤਤ੍ਤਾ ਬਹੁਤ੍ਤਂ ਗਚ੍ਛਤਿ. ਆਰਮ੍ਮਣਵਸੇਨ ਵਾ, ਏਕਮ੍ਪਿ ਹਿ ਪਠਮਜ੍ਝਾਨਂ ਪਥਵੀਕਸਿਣਾਦੀਸੁ ਪਵਤ੍ਤਿਵਸੇਨ ਬਹੁਤ੍ਤਂ ਗਚ੍ਛਤੀਤਿ. ਏਸ ਨਯੋ ਦੁਤਿਯਤਤਿਯਚਤੁਤ੍ਥਜ੍ਝਾਨੇਸੁ. ਆਰੁਪ੍ਪਝਾਨੇਸੁ ਪਨ ਆਰਮ੍ਮਣਭੇਦਾਭਾਵਤੋ ਪੁਰਿਮਕਾਰਣਦ੍ਵਯਵਸੇਨੇਵ ਬਹੁਵਚਨਂ ਵੇਦਿਤਬ੍ਬਂ.

ਯਸ੍ਮਾ ਚੇਤੇਸਂ ਅਙ੍ਗਾਨਿਪਿ ਸਨ੍ਤਾਨਿ ਆਰਮ੍ਮਣਾਨਿਪਿ, ਨਿਬ੍ਬੁਤਾਨਿ ਚੇਵ ਸੁਖੁਮਾਨਿ ਚਾਤਿ ਵੁਤ੍ਤਂ ਹੋਤਿ, ਤਸ੍ਮਾ ਤਾਨਿ ਸਨ੍ਤਾ ਏਤੇ ਵਿਹਾਰਾਤਿ ਏਵਂ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ. ਅਯਂ ਤਾਵ ਤੇਸਂ ਚਤੁਨ੍ਨਮ੍ਪਿ ਸਾਧਾਰਣਾ ਵਣ੍ਣਨਾ. ਵਿਸੇਸਵਣ੍ਣਨਾ ਪਨ ‘‘ਸਬ੍ਬਸੋ ਰੂਪਸਞ੍ਞਾਨ’’ਨ੍ਤਿਆਦਿਪਦਾਨੁਸਾਰਤੋ ਵਤ੍ਤਬ੍ਬਾ ਸਿਯਾ. ਸਾ ਵਿਸੁਦ੍ਧਿਮਗ੍ਗੇ ਸਬ੍ਬਾਕਾਰੇਨ ਵੁਤ੍ਤਾਯੇਵ.

੮੩. ਏਵਂ ਯਸ੍ਮਾ ਅਧਿਮਾਨਿਕਸ੍ਸ ਭਿਕ੍ਖੁਨੋ ਝਾਨਵਿਹਾਰੋ ਅਵਿਪਸ੍ਸਨਾਪਾਦਕਤ੍ਤਾ ਸਲ੍ਲੇਖਵਿਹਾਰੋ ਨ ਹੋਤਿ, ਨ ਹਿ ਸੋ ਝਾਨਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਤਿ, ਚਿਤ੍ਤੇਕਗ੍ਗਕਰੋ ਦਿਟ੍ਠਧਮ੍ਮੇ ਸੁਖਵਿਹਾਰੋ ਪਨਸ੍ਸ ਹੋਤਿ, ਤਸ੍ਮਾ ਤਮਤ੍ਥਂ ਦਸ੍ਸੇਨ੍ਤੋ ਰੂਪਜ੍ਝਾਨਾਨਿ ਚ ਅਰੂਪਜ੍ਝਾਨਾਨਿ ਚ ਵਿਭਜਿਤ੍ਵਾ ਇਦਾਨਿ ਚ ਯਤ੍ਥ ਸਲ੍ਲੇਖੋ ਕਾਤਬ੍ਬੋ ਚਤੁਚਤ੍ਤਾਲੀਸਾਯ ਆਕਾਰੇਹਿ, ਤਞ੍ਚ ਵਤ੍ਥੁਂ ਤਞ੍ਚ ਸਲ੍ਲੇਖਂ ਦਸ੍ਸੇਨ੍ਤੋ ਇਧ ਖੋ ਪਨ ਵੋਤਿਆਦਿਮਾਹ.

ਕਸ੍ਮਾ ਪਨ ‘‘ਅਟ੍ਠਹਿ ਸਮਾਪਤ੍ਤੀਹਿ ਅਵਿਹਿਂਸਾਦਯੋ ਸਲ੍ਲੇਖਾ’’ਤਿ ਵੁਤ੍ਤਾ? ਲੋਕੁਤ੍ਤਰਪਾਦਕਤ੍ਤਾ. ਬਾਹਿਰਕਾਨਞ੍ਹਿ ਅਟ੍ਠ ਸਮਾਪਤ੍ਤਿਯੋ ਵਟ੍ਟਪਾਦਕਾਯੇਵ. ਸਾਸਨੇ ਸਰਣਗਮਨਮ੍ਪਿ ਲੋਕੁਤ੍ਤਰਪਾਦਕਂ, ਪਗੇਵ ਅਵਿਹਿਂਸਾਦਯੋ. ਇਮਿਨਾਯੇਵ ਚ ਸੁਤ੍ਤੇਨ ਵੇਦਿਤਬ੍ਬਂ ‘‘ਯਥਾ ਬਾਹਿਰਕਸ੍ਸ ਅਟ੍ਠਸਮਾਪਤ੍ਤਿਲਾਭਿਨੋ ਪਞ੍ਚਾਭਿਞ੍ਞਸ੍ਸਾਪਿ ਦਿਨ੍ਨਦਾਨਤੋ ਸਾਸਨੇ ਤਿਸਰਣਗਤਸ੍ਸ ਦਿਨ੍ਨਦਾਨਂ ਮਹਪ੍ਫਲਤਰਂ ਹੋਤੀ’’ਤਿ. ਇਦਞ੍ਹਿ ਸਨ੍ਧਾਯ ਦਕ੍ਖਿਣਾਵਿਸੁਦ੍ਧਿਸੁਤ੍ਤੇ ‘‘ਬਾਹਿਰਕੇ ਕਾਮੇਸੁ ਵੀਤਰਾਗੇ ਦਾਨਂ ਦਤ੍ਵਾ ਕੋਟਿਸਤਸਹਸ੍ਸਗੁਣਾ ਪਾਟਿਕਙ੍ਖਿਤਬ੍ਬਾ. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ ਦਾਨਂ ਦਤ੍ਵਾ ਅਸਙ੍ਖੇਯ੍ਯਾ ਅਪ੍ਪਮੇਯ੍ਯਾ ਦਕ੍ਖਿਣਾ ਪਾਟਿਕਙ੍ਖਿਤਬ੍ਬਾ, ਕੋ ਪਨ ਵਾਦੋ ਸੋਤਾਪਨ੍ਨੇ’’ਤਿ ਵੁਤ੍ਤਂ (ਮ. ਨਿ. ੩.੩੭੯). ਸਰਣਗਮਨਤੋ ਪਟ੍ਠਾਯ ਹਿ ਤਤ੍ਥ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਅਧਿਪ੍ਪੇਤੋਤਿ, ਅਯਂ ਤਾਵੇਤ੍ਥ ਪਾਲ਼ਿਯੋਜਨਾ.

ਅਨੁਪਦਵਣ੍ਣਨਾਯਂ ਪਨ ਇਧਾਤਿ ਵਿਹਿਂਸਾਦਿਵਤ੍ਥੁਦੀਪਨਮੇਤਂ. ਖੋ ਪਨਾਤਿ ਨਿਪਾਤਮਤ੍ਤਂ. ਵੋਤਿ ਕਰਣਤ੍ਥੇ ਸਾਮਿਵਚਨਂ, ਅਯਂ ਪਨ ਸਙ੍ਖੇਪਤ੍ਥੋ, ਯਦੇਤਂ ‘‘ਪਰੇ ਵਿਹਿਂਸਕਾ ਭਵਿਸ੍ਸਨ੍ਤੀ’’ਤਿਆਦਿਨਾ ਨਯੇਨ ਵਿਹਿਂਸਾਦਿਵਤ੍ਥੁਂ ਵਦਾਮ. ਇਧ, ਚੁਨ੍ਦ, ਤੁਮ੍ਹੇਹਿ ਸਲ੍ਲੇਖੋ ਕਾਤਬ੍ਬੋਤਿ.

ਏਵਂ ਸਙ੍ਖੇਪਤੋ ਵਤ੍ਵਾ ਇਦਾਨਿ ਵਿਤ੍ਥਾਰੇਨ੍ਤੋ ‘‘ਪਰੇ ਵਿਹਿਂਸਕਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਵਿਹਿਂਸਕਾ ਭਵਿਸ੍ਸਾਮਾਤਿ ਸਲ੍ਲੇਖੋ ਕਰਣੀਯੋ’’ਤਿਆਦਿਮਾਹ.

ਤਤ੍ਥ ਪਰੇਤਿ ਯੇ ਕੇਚਿ ਇਮਂ ਸਲ੍ਲੇਖਮਨਨੁਯੁਤ੍ਤਾ. ਵਿਹਿਂਸਕਾ ਭਵਿਸ੍ਸਨ੍ਤੀਤਿ ਪਾਣਿਨਾ ਵਾ ਲੇਡ੍ਡੁਨਾ ਵਾਤਿਆਦੀਹਿ ਸਤ੍ਤਾਨਂ ਵਿਹੇਸਕਾ ਭਵਿਸ੍ਸਨ੍ਤਿ. ਮਯਮੇਤ੍ਥ ਅਵਿਹਿਂਸਕਾ ਭਵਿਸ੍ਸਾਮਾਤਿ ਮਯਂ ਪਨ ਯਤ੍ਥੇਵ ਵਤ੍ਥੁਸ੍ਮਿਂ ਪਰੇ ਏਵਂ ਵਿਹਿਂਸਕਾ ਭਵਿਸ੍ਸਨ੍ਤਿ, ਏਤ੍ਥੇਵ ਅਵਿਹਿਂਸਕਾ ਭਵਿਸ੍ਸਾਮ, ਅਵਿਹਿਂਸਂ ਉਪ੍ਪਾਦੇਤ੍ਵਾ ਵਿਹਰਿਸ੍ਸਾਮ. ਇਤਿ ਸਲ੍ਲੇਖੋ ਕਰਣੀਯੋਤਿ ਏਵਂ ਤੁਮ੍ਹੇਹਿ ਸਲ੍ਲੇਖੋ ਕਾਤਬ੍ਬੋ. ਸਲ੍ਲੇਖੋਤਿ ਚ ਇਧ ਅਵਿਹਿਂਸਾਵ ਵੇਦਿਤਬ੍ਬਾ. ਅਵਿਹਿਂਸਾ ਹਿ ਵਿਹਿਂਸਂ ਸਲ੍ਲੇਖਤਿ, ਤਂ ਛਿਨ੍ਦਤਿ, ਤਸ੍ਮਾ ਸਲ੍ਲੇਖੋਤਿ ਵੁਚ੍ਚਤਿ. ਏਸ ਨਯੋ ਸਬ੍ਬਤ੍ਥ. ਅਯਂ ਪਨ ਵਿਸੇਸੋ. ਪਰੇ ਮਿਚ੍ਛਾਦਿਟ੍ਠੀਤਿ ਏਤ੍ਥ ਕਮ੍ਮਪਥਾਨਂ ਅਨ੍ਤਮਿਚ੍ਛਾਦਿਟ੍ਠਿਞ੍ਚ ਮਿਚ੍ਛਤ੍ਤਾਨਂ ਆਦਿਮਿਚ੍ਛਾਦਿਟ੍ਠਿਞ੍ਚ ਮਿਸ੍ਸੇਤ੍ਵਾ ਦਿਟ੍ਠਿ ਵੁਤ੍ਤਾਤਿ ਵੇਦਿਤਬ੍ਬਾ. ਤਥਾ ਮਯਮੇਤ੍ਥ ਸਮ੍ਮਾਦਿਟ੍ਠੀਤਿ ਵੁਤ੍ਤਟ੍ਠਾਨੇ ਸਮ੍ਮਾਦਿਟ੍ਠਿ. ਏਤ੍ਥ ਚ ਕਮ੍ਮਪਥਕਥਾ ਵਿਤ੍ਥਾਰਤੋ ਸਮ੍ਮਾਦਿਟ੍ਠਿਸੁਤ੍ਤੇ ਆਵਿ ਭਵਿਸ੍ਸਤਿ. ਮਿਚ੍ਛਤ੍ਤੇਸੁ ਮਿਚ੍ਛਾਦਿਟ੍ਠਿਆਦਯੋ ਦ੍ਵੇਧਾਵਿਤਕ੍ਕੇ.

ਅਯਂ ਪਨੇਤ੍ਥ ਸਙ੍ਖੇਪੋ, ਪਾਣਂ ਅਤਿਪਾਤੇਨ੍ਤੀਤਿ ਪਾਣਾਤਿਪਾਤੀ ਪਾਣਘਾਤਕਾਤਿ ਅਤ੍ਥੋ. ਅਦਿਨ੍ਨਂ ਆਦਿਯਨ੍ਤੀਤਿ ਅਦਿਨ੍ਨਾਦਾਯੀ, ਪਰਸ੍ਸ ਹਾਰਿਨੋਤਿ ਅਤ੍ਥੋ. ਅਬ੍ਰਹ੍ਮਂ ਹੀਨਂ ਲਾਮਕਧਮ੍ਮਂ ਚਰਨ੍ਤੀਤਿ ਅਬ੍ਰਹ੍ਮਚਾਰੀ, ਮੇਥੁਨਧਮ੍ਮਪ੍ਪਟਿਸੇਵਕਾਤਿ ਅਤ੍ਥੋ. ਬ੍ਰਹ੍ਮਂ ਸੇਟ੍ਠਂ ਪਟਿਪਦਂ ਚਰਨ੍ਤੀਤਿ ਬ੍ਰਹ੍ਮਚਾਰੀ, ਮੇਥੁਨਾ ਪਟਿਵਿਰਤਾਤਿ ਅਤ੍ਥੋ. ਏਤ੍ਥ ਚ ਬ੍ਰਹ੍ਮਚਰਿਯਂ ਸਲ੍ਲੇਖੋਤਿ ਵੇਦਿਤਬ੍ਬਂ. ਬ੍ਰਹ੍ਮਚਰਿਯਞ੍ਹਿ ਅਬ੍ਰਹ੍ਮਚਰਿਯਂ ਸਲ੍ਲੇਖਤਿ. ਮੁਸਾ ਵਦਨ੍ਤੀਤਿ ਮੁਸਾਵਾਦੀ, ਪਰੇਸਂ ਅਤ੍ਥਭਞ੍ਜਨਕਂ ਤੁਚ੍ਛਂ ਅਲਿਕਂ ਵਾਚਂ ਭਾਸਿਤਾਰੋਤਿ ਅਤ੍ਥੋ. ਪਿਸੁਣਾ ਵਾਚਾ ਏਤੇਸਨ੍ਤਿ ਪਿਸੁਣਵਾਚਾ. ਪਰੇਸਂ ਮਮ੍ਮਚ੍ਛੇਦਿਕਾ ਫਰੁਸਾ ਵਾਚਾ ਏਤੇਸਨ੍ਤਿ ਫਰੁਸਵਾਚਾ. ਸਮ੍ਫਂ ਨਿਰਤ੍ਥਕਵਚਨਂ ਪਲਪਨ੍ਤੀਤਿ ਸਮ੍ਫਪ੍ਪਲਾਪੀ. ਅਭਿਜ੍ਝਾਯਨ੍ਤੀਤਿ ਅਭਿਜ੍ਝਾਲੂ, ਪਰਭਣ੍ਡਲੁਬ੍ਭਨਸੀਲਾਤਿ ਅਤ੍ਥੋ. ਬ੍ਯਾਪਨ੍ਨਂ ਪੂਤਿਭੂਤਂ ਚਿਤ੍ਤਮੇਤੇਸਨ੍ਤਿ ਬ੍ਯਾਪਨ੍ਨਚਿਤ੍ਤਾ. ਮਿਚ੍ਛਾ ਪਾਪਿਕਾ ਵਿਞ੍ਞੁਗਰਹਿਤਾ ਏਤੇਸਂ ਦਿਟ੍ਠੀਤਿ ਮਿਚ੍ਛਾਦਿਟ੍ਠੀ, ਕਮ੍ਮਪਥਪਰਿਯਾਪਨ੍ਨਾਯ ਨਤ੍ਥਿ ਦਿਨ੍ਨਨ੍ਤਿਆਦਿਵਤ੍ਥੁਕਾਯ, ਮਿਚ੍ਛਤ੍ਤਪਰਿਯਾਪਨ੍ਨਾਯ ਅਨਿਯ੍ਯਾਨਿਕਦਿਟ੍ਠਿਯਾ ਚ ਸਮਨ੍ਨਾਗਤਾਤਿ ਅਤ੍ਥੋ. ਸਮ੍ਮਾ ਸੋਭਨਾ ਵਿਞ੍ਞੁਪ੍ਪਸਤ੍ਥਾ ਏਤੇਸਂ ਦਿਟ੍ਠੀਤਿ ਸਮ੍ਮਾਦਿਟ੍ਠੀ, ਕਮ੍ਮਪਥਪਰਿਯਾਪਨ੍ਨਾਯ ਅਤ੍ਥਿ ਦਿਨ੍ਨਨ੍ਤਿਆਦਿਕਾਯ ਕਮ੍ਮਸ੍ਸਕਤਾਦਿਟ੍ਠਿਯਾ, ਸਮ੍ਮਤ੍ਤਪਰਿਯਾਪਨ੍ਨਾਯ ਮਗ੍ਗਦਿਟ੍ਠਿਯਾ ਚ ਸਮਨ੍ਨਾਗਤਾਤਿ ਅਤ੍ਥੋ.

ਮਿਚ੍ਛਾਸਙ੍ਕਪ੍ਪਾਤਿ ਅਯਾਥਾਵਅਨਿਯ੍ਯਾਨਿਕਅਕੁਸਲਸਙ੍ਕਪ੍ਪਾ. ਏਸ ਨਯੋ ਮਿਚ੍ਛਾਵਾਚਾਤਿਆਦੀਸੁ. ਅਯਂ ਪਨ ਵਿਸੇਸੋ, ਮਿਚ੍ਛਾਸਙ੍ਕਪ੍ਪਾਦਯੋ ਵਿਯ ਹਿ ਮਿਚ੍ਛਾਸਤਿ ਨਾਮ ਪਾਟਿਏਕ੍ਕੋ ਕੋਚਿ ਧਮ੍ਮੋ ਨਤ੍ਥਿ, ਅਤੀਤਂ ਪਨ ਚਿਨ੍ਤਯਤੋ ਪਵਤ੍ਤਾਨਂ ਚਤੁਨ੍ਨਮ੍ਪਿ ਅਕੁਸਲਕ੍ਖਨ੍ਧਾਨਮੇਤਂ ਅਧਿਵਚਨਂ. ਯਮ੍ਪਿ ਵੁਤ੍ਤਂ ਭਗਵਤਾ – ‘‘ਅਤ੍ਥੇਸਾ, ਭਿਕ੍ਖਵੇ, ਅਨੁਸ੍ਸਤਿ, ਨੇਸਾ ਨਤ੍ਥੀਤਿ ਵਦਾਮਿ, ਪੁਤ੍ਤਲਾਭਂ ਵਾ, ਭਿਕ੍ਖਵੇ, ਅਨੁਸ੍ਸਰਤੋ, ਧਨਲਾਭਂ ਵਾ, ਭਿਕ੍ਖਵੇ, ਅਨੁਸ੍ਸਰਤੋ, ਯਸਲਾਭਂ ਵਾ, ਭਿਕ੍ਖਵੇ, ਅਨੁਸ੍ਸਰਤੋ’’ਤਿ, ਤਮ੍ਪਿ ਤਂ ਤਂ ਚਿਨ੍ਤੇਨ੍ਤਸ੍ਸ ਸਤਿਪਤਿਰੂਪਕੇਨ ਉਪ੍ਪਤ੍ਤਿਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਮਿਚ੍ਛਾਞਾਣੀਤਿ ਏਤ੍ਥ ਚ ਮਿਚ੍ਛਾਞਾਣਨ੍ਤਿ ਪਾਪਕਿਰਿਯਾਸੁ ਉਪਾਯਚਿਨ੍ਤਾਵਸੇਨ ਪਾਪਂ ਕਤ੍ਵਾ ‘‘ਸੁਕਤਂ ਮਯਾ’’ਤਿ ਪਚ੍ਚਵੇਕ੍ਖਣਾਕਾਰੇਨ ਚ ਉਪ੍ਪਨ੍ਨੋ ਮੋਹੋ ਵੇਦਿਤਬ੍ਬੋ, ਤੇਨ ਸਮਨ੍ਨਾਗਤਾ ਪੁਗ੍ਗਲਾ ਮਿਚ੍ਛਾਞਾਣੀ. ਸਮ੍ਮਾਞਾਣੀਤਿ ਏਤ੍ਥ ਪਨ ਏਕੂਨਵੀਸਤਿਭੇਦਂ ਪਚ੍ਚਵੇਕ੍ਖਣਾਞਾਣਂ ‘‘ਸਮ੍ਮਾਞਾਣ’’ਨ੍ਤਿ ਵੁਚ੍ਚਤਿ, ਤੇਨ ਸਮਨ੍ਨਾਗਤਾ ਪੁਗ੍ਗਲਾ ਸਮ੍ਮਾਞਾਣੀ. ਮਿਚ੍ਛਾਵਿਮੁਤ੍ਤੀਤਿ ਅਵਿਮੁਤ੍ਤਾਯੇਵ ਸਮਾਨਾ ‘‘ਵਿਮੁਤ੍ਤਾ ਮਯ’’ਨ੍ਤਿ ਏਵਂਸਞ੍ਞਿਨੋ, ਅਵਿਮੁਤ੍ਤਿਯਂ ਵਾ ਵਿਮੁਤ੍ਤਿਸਞ੍ਞਿਨੋ. ਤਤ੍ਰਾਯਂ ਵਚਨਤ੍ਥੋ, ਮਿਚ੍ਛਾ ਪਾਪਿਕਾ ਵਿਪਰੀਤਾ ਵਿਮੁਤ੍ਤਿ ਏਤੇਸਂ ਅਤ੍ਥੀਤਿ ਮਿਚ੍ਛਾਵਿਮੁਤ੍ਤੀ. ਮਿਚ੍ਛਾਵਿਮੁਤ੍ਤੀਤਿ ਚ ਯਥਾਵੁਤ੍ਤੇਨਾਕਾਰੇਨ ਪਵਤ੍ਤਾਨਂ ਅਕੁਸਲਕ੍ਖਨ੍ਧਾਨਮੇਤਂ ਅਧਿਵਚਨਂ. ਫਲਸਮ੍ਪਯੁਤ੍ਤਾਨਿ ਪਨ ਸਮ੍ਮਾਦਿਟ੍ਠਿਆਦੀਨਿ ਅਟ੍ਠਙ੍ਗਾਨਿ ਠਪੇਤ੍ਵਾ ਸੇਸਧਮ੍ਮਾ ਸਮ੍ਮਾਵਿਮੁਤ੍ਤੀਤਿ ਵੇਦਿਤਬ੍ਬਾ. ਸਾ ਚ ਮਿਚ੍ਛਾਵਿਮੁਤ੍ਤਿਂ ਸਲ੍ਲਿਖਿਤ੍ਵਾ ਠਿਤਤ੍ਤਾ ਸਲ੍ਲੇਖੋਤਿ ਵੇਦਿਤਬ੍ਬਾ. ਤਤ੍ਥ ਨਿਯੋਜੇਨ੍ਤੋ ਆਹ ‘‘ਮਯਮੇਤ੍ਥ ਸਮ੍ਮਾਵਿਮੁਤ੍ਤੀ ਭਵਿਸ੍ਸਾਮਾਤਿ ਸਲ੍ਲੇਖੋ ਕਰਣੀਯੋ’’ਤਿ.

ਇਤੋ ਪਰਾਨਿ ਤੀਣਿ ਨੀਵਰਣਵਸੇਨ ਵੁਤ੍ਤਾਨਿ. ਅਭਿਜ੍ਝਾਲੂ ਬ੍ਯਾਪਨ੍ਨਚਿਤ੍ਤਾਤਿ ਏਵਂ ਕਮ੍ਮਪਥੇਸੁ ਵੁਤ੍ਤਤ੍ਤਾ ਪਨੇਤ੍ਥ ਪਠਮਾਨਿ ਦ੍ਵੇ ਨੀਵਰਣਾਨਿ ਨ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ. ਤਤ੍ਥ ਥਿਨਮਿਦ੍ਧੇਨ ਪਰਿਯੁਟ੍ਠਿਤਾ ਅਭਿਭੂਤਾਤਿ ਥਿਨਮਿਦ੍ਧਪਰਿਯੁਟ੍ਠਿਤਾ. ਉਦ੍ਧਚ੍ਚੇਨ ਸਮਨ੍ਨਾਗਤਾਤਿ ਉਦ੍ਧਤਾ. ਵਿਚਿਨਨ੍ਤਾ ਕਿਚ੍ਛਨ੍ਤਿ ਨ ਸਕ੍ਕੋਨ੍ਤਿ ਸਨ੍ਨਿਟ੍ਠਾਨਂ ਕਾਤੁਨ੍ਤਿ ਵਿਚਿਕਿਚ੍ਛੀ. ਕੋਧਨਾਤਿਆਦੀਨਿ ਦਸ ਚਿਤ੍ਤਸ੍ਸ ਉਪਕ੍ਕਿਲੇਸਵਸੇਨ ਵੁਤ੍ਤਾਨਿ. ਤਤ੍ਥ ਕੋਧਾਦੀਸੁ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਧਮ੍ਮਦਾਯਾਦਵਤ੍ਥਸੁਤ੍ਤੇਸੁ ਵੁਤ੍ਤਂ. ਅਯਂ ਪਨੇਤ੍ਥ ਵਚਨਤ੍ਥੋ – ਕੋਧਨਾਤਿ ਕੁਜ੍ਝਨਸੀਲਾ. ਉਪਨਾਹੀਤਿ ਉਪਨਾਹਨਸੀਲਾ, ਉਪਨਾਹੋ ਵਾ ਏਤੇਸਂ ਅਤ੍ਥੀਤਿ ਉਪਨਾਹੀ. ਤਥਾ ਮਕ੍ਖੀ ਪਲਾਸੀ ਚ. ਇਸ੍ਸਨ੍ਤੀਤਿ ਇਸ੍ਸੁਕੀ. ਮਚ੍ਛਰਾਯਨ੍ਤੀਤਿ ਮਚ੍ਛਰੀ, ਮਚ੍ਛੇਰਂ ਵਾ ਏਤੇਸਂ ਅਤ੍ਥੀਤਿ ਮਚ੍ਛਰੀ. ਸਠਯਨ੍ਤੀਤਿ ਸਠਾ, ਨ ਸਮ੍ਮਾ ਭਾਸਨ੍ਤੀਤਿ ਵੁਤ੍ਤਂ ਹੋਤਿ, ਕੇਰਾਟਿਕਯੁਤ੍ਤਾਨਮੇਤਂ ਅਧਿਵਚਨਂ. ਮਾਯਾ ਏਤੇਸਂ ਅਤ੍ਥੀਤਿ ਮਾਯਾਵੀ. ਥਮ੍ਭਸਮਙ੍ਗਿਤਾਯ ਥਦ੍ਧਾ. ਅਤਿਮਾਨਯੋਗੇਨ ਅਤਿਮਾਨੀ. ਵੁਤ੍ਤਪਚ੍ਚਨੀਕਨਯੇਨ ਸੁਕ੍ਕਪਕ੍ਖੋ ਵੇਦਿਤਬ੍ਬੋ.

ਦੁਬ੍ਬਚਾਤਿ ਵਤ੍ਤੁਂ ਦੁਕ੍ਖਾ ਕਿਞ੍ਚਿ ਵੁਚ੍ਚਮਾਨਾ ਨ ਸਹਨ੍ਤਿ. ਤਬ੍ਬਿਪਰੀਤਾ ਸੁਵਚਾ. ਦੇਵਦਤ੍ਤਾਦਿਸਦਿਸਾ ਪਾਪਕਾ ਮਿਤ੍ਤਾ ਏਤੇਸਨ੍ਤਿ ਪਾਪਮਿਤ੍ਤਾ. ਬੁਦ੍ਧਾ ਵਾ ਸਾਰਿਪੁਤ੍ਤਾਦਿਸਦਿਸਾ ਵਾ ਕਲ੍ਯਾਣਾ ਮਿਤ੍ਤਾ ਏਤੇਸਨ੍ਤਿ ਕਲ੍ਯਾਣਮਿਤ੍ਤਾ. ਕਾਯਦੁਚ੍ਚਰਿਤਾਦੀਸੁ ਚਿਤ੍ਤਵੋਸ੍ਸਗ੍ਗਵਸੇਨ ਪਮਤ੍ਤਾ. ਵਿਪਰੀਤਾ ਅਪ੍ਪਮਤ੍ਤਾਤਿ ਵੇਦਿਤਬ੍ਬਾ. ਇਮਾਨਿ ਤੀਣਿ ਪਕਿਣ੍ਣਕਵਸੇਨ ਵੁਤ੍ਤਾਨਿ. ਅਸ੍ਸਦ੍ਧਾਤਿਆਦੀਨਿ ਸਤ੍ਤ ਅਸਦ੍ਧਮ੍ਮਵਸੇਨ. ਤਤ੍ਥ ਤੀਸੁ ਵਤ੍ਥੂਸੁ ਸਦ੍ਧਾ ਏਤੇਸਂ ਨਤ੍ਥੀਤਿ ਅਸ੍ਸਦ੍ਧਾ. ਸੁਕ੍ਕਪਕ੍ਖੇ ਸਦ੍ਦਹਨ੍ਤੀਤਿ ਸਦ੍ਧਾ, ਸਦ੍ਧਾ ਵਾ ਏਤੇਸਂ ਅਤ੍ਥੀਤਿਪਿ ਸਦ੍ਧਾ. ਨਤ੍ਥਿ ਏਤੇਸਂ ਹਿਰੀਤਿ ਅਹਿਰਿਕਾ, ਅਕੁਸਲਸਮਾਪਤ੍ਤਿਯਾ ਅਜਿਗੁਚ੍ਛਮਾਨਾਨਮੇਤਂ ਅਧਿਵਚਨਂ. ਹਿਰੀ ਏਤੇਸਂ ਮਨੇ, ਹਿਰਿਯਾ ਵਾ ਯੁਤ੍ਤਮਨਾਤਿ ਹਿਰਿਮਨਾ. ਨ ਓਤ੍ਤਪ੍ਪਨ੍ਤੀਤਿ ਅਨੋਤ੍ਤਪ੍ਪੀ, ਅਕੁਸਲਸਮਾਪਤ੍ਤਿਯਾ ਨ ਭਾਯਨ੍ਤੀਤਿ ਵੁਤ੍ਤਂ ਹੋਤਿ. ਤਬ੍ਬਿਪਰੀਤਾ ਓਤ੍ਤਪ੍ਪੀ. ਅਪ੍ਪਂ ਸੁਤਮੇਤੇਸਨ੍ਤਿ ਅਪ੍ਪਸ੍ਸੁਤਾ, ਅਪ੍ਪਨ੍ਤਿ ਚ ਥੋਕਨ੍ਤਿ ਨ ਗਹੇਤਬ੍ਬਂ, ਨਤ੍ਥੀਤਿ ਗਹੇਤਬ੍ਬਂ. ‘‘ਅਪ੍ਪਸ੍ਸੁਤਾ’’ਤਿ ਹਿ ਨਿਸ੍ਸੁਤਾ ਸੁਤਵਿਰਹਿਤਾ ਵੁਚ੍ਚਨ੍ਤਿ. ਬਹੁ ਸੁਤਮੇਤੇਸਨ੍ਤਿ ਬਹੁਸ੍ਸੁਤਾ, ਤਥਾਗਤਭਾਸਿਤਂ ਏਕਮ੍ਪਿ ਗਾਥਂ ਯਾਥਾਵਤੋ ਞਤ੍ਵਾ ਅਨੁਰੂਪਪਟਿਪਨ੍ਨਾਨਮੇਤਂ ਅਧਿਵਚਨਂ. ਕੁਚ੍ਛਿਤਾ ਸੀਦਨ੍ਤੀਤਿ ਕੁਸੀਤਾ, ਹੀਨਵੀਰਿਯਾਨਮੇਤਂ ਅਧਿਵਚਨਂ. ਆਰਦ੍ਧਂ ਵੀਰਿਯਮੇਤੇਸਨ੍ਤਿ ਆਰਦ੍ਧਵੀਰਿਯਾ, ਸਮ੍ਮਪ੍ਪਧਾਨਯੁਤ੍ਤਾਨਮੇਤਂ ਅਧਿਵਚਨਂ, ਮੁਟ੍ਠਾ ਸਤਿ ਏਤੇਸਨ੍ਤਿ ਮੁਟ੍ਠਸ੍ਸਤੀ, ਨਟ੍ਠਸ੍ਸਤੀਤਿ ਵੁਤ੍ਤਂ ਹੋਤਿ. ਉਪਟ੍ਠਿਤਾ ਸਤਿ ਏਤੇਸਨ੍ਤਿ ਉਪਟ੍ਠਿਤਸ੍ਸਤੀ, ਨਿਚ੍ਚਂ ਆਰਮ੍ਮਣਾਭਿਮੁਖਪ੍ਪਵਤ੍ਤਸਤੀਨਮੇਤਂ ਅਧਿਵਚਨਂ. ਦੁਟ੍ਠਾ ਪਞ੍ਞਾ ਏਤੇਸਨ੍ਤਿ ਦੁਪ੍ਪਞ੍ਞਾ, ਨਟ੍ਠਪਞ੍ਞਾਤਿ ਵੁਤ੍ਤਂ ਹੋਤਿ. ਪਞ੍ਞਾਯ ਸਮ੍ਪਨ੍ਨਾਤਿ ਪਞ੍ਞਾਸਮ੍ਪਨ੍ਨਾ, ਪਞ੍ਞਾਤਿ ਚ ਇਧ ਵਿਪਸ੍ਸਨਾਪਞ੍ਞਾ ਵੇਦਿਤਬ੍ਬਾ. ਵਿਪਸ੍ਸਨਾਸਮ੍ਭਾਰੋ ਹਿ ਪਰਿਪੂਰੋ ਇਮਸ੍ਮਿਂ ਠਾਨੇ ਆਗਤੋ, ਤਸ੍ਮਾ ਵਿਪਸ੍ਸਨਾਪਞ੍ਞਾਵ ਅਯਨ੍ਤਿ ਪੋਰਾਣਾਨਂ ਆਣਾ.

ਇਦਾਨਿ ਏਕਮੇਵ ਲੋਕੁਤ੍ਤਰਗੁਣਾਨਂ ਅਨ੍ਤਰਾਯਕਰਂ ਅਨਿਯ੍ਯਾਨਿਕਦਿਟ੍ਠਿਂ ਤੀਹਾਕਾਰੇਹਿ ਦਸ੍ਸੇਨ੍ਤੋ ਸਨ੍ਦਿਟ੍ਠਿਪਰਾਮਾਸੀਤਿਆਦਿਮਾਹ. ਤਤ੍ਥ ਸਨ੍ਦਿਟ੍ਠਿਂ ਪਰਾਮਸਨ੍ਤੀਤਿ ਸਨ੍ਦਿਟ੍ਠਿਪਰਾਮਾਸੀ. ਆਧਾਨਂ ਗਣ੍ਹਨ੍ਤੀਤਿ ਆਧਾਨਗ੍ਗਾਹੀ, ਆਧਾਨਨ੍ਤਿ ਦਲ਼੍ਹਂ ਵੁਚ੍ਚਤਿ, ਦਲ਼੍ਹਗ੍ਗਾਹੀਤਿ ਅਤ੍ਥੋ. ਯੁਤ੍ਤਕਾਰਣਂ ਦਿਸ੍ਵਾਵ ਲਦ੍ਧਿਂ ਪਟਿਨਿਸ੍ਸਜ੍ਜਨ੍ਤੀਤਿ ਪਟਿਨਿਸ੍ਸਗ੍ਗੀ, ਦੁਕ੍ਖੇਨ ਕਿਚ੍ਛੇਨ ਕਸਿਰੇਨ ਬਹੁਮ੍ਪਿ ਕਾਰਣਂ ਦਸ੍ਸੇਤ੍ਵਾ ਨ ਸਕ੍ਕਾ ਪਟਿਨਿਸ੍ਸਗ੍ਗਂ ਕਾਤੁਨ੍ਤਿ ਦੁਪ੍ਪਟਿਨਿਸ੍ਸਗ੍ਗੀ, ਯੇ ਅਤ੍ਤਨੋ ਉਪ੍ਪਨ੍ਨਂ ਦਿਟ੍ਠਿਂ ਇਦਮੇਵ ਸਚ੍ਚਨ੍ਤਿ ਦਲ਼੍ਹਂ ਗਣ੍ਹਿਤ੍ਵਾ ਅਪਿ ਬੁਦ੍ਧਾਦੀਹਿ ਕਾਰਣਂ ਦਸ੍ਸੇਤ੍ਵਾ ਵੁਚ੍ਚਮਾਨਾ ਨ ਪਟਿਨਿਸ੍ਸਜ੍ਜਨ੍ਤਿ, ਤੇਸਮੇਤਂ ਅਧਿਵਚਨਂ. ਤਾਦਿਸਾ ਹਿ ਪੁਗ੍ਗਲਾ ਯਂ ਯਦੇਵ ਧਮ੍ਮਂ ਵਾ ਅਧਮ੍ਮਂ ਵਾ ਗਣ੍ਹਨ੍ਤਿ, ਤਂ ਸਬ੍ਬਂ ‘‘ਏਵਂ ਅਮ੍ਹਾਕਂ ਆਚਰਿਯੇਹਿ ਕਥਿਤਂ, ਏਵਂ ਅਮ੍ਹੇਹਿ ਸੁਤ’’ਨ੍ਤਿ ਕੁਮ੍ਮੋਵ ਅਙ੍ਗਾਨਿ ਸਕੇ ਕਪਾਲੇ ਅਨ੍ਤੋਯੇਵ ਸਮੋਦਹਨ੍ਤਿ, ਕੁਮ੍ਭੀਲਗ੍ਗਾਹਂ ਗਣ੍ਹਨ੍ਤਿ ਨ ਵਿਸ੍ਸਜ੍ਜਨ੍ਤਿ. ਵੁਤ੍ਤਵਿਪਰਿਯਾਯੇਨ ਸੁਕ੍ਕਪਕ੍ਖੋ ਵੇਦਿਤਬ੍ਬੋ.

੮੪. ਏਵਂ ਚਤੁਚਤ੍ਤਾਲੀਸਾਯ ਆਕਾਰੇਹਿ ਸਲ੍ਲੇਖਂ ਦਸ੍ਸੇਤ੍ਵਾ ਇਦਾਨਿ ਤਸ੍ਮਿਂ ਸਲ੍ਲੇਖੇ ਚਿਤ੍ਤੁਪ੍ਪਾਦਸ੍ਸਾਪਿ ਬਹੂਪਕਾਰਤਂ ਦਸ੍ਸੇਤੁਂ ਚਿਤ੍ਤੁਪ੍ਪਾਦਮ੍ਪਿ ਖੋ ਅਹਨ੍ਤਿਆਦਿਮਾਹ.

ਤਸ੍ਸਤ੍ਥੋ, ਅਹਂ, ਚੁਨ੍ਦ, ਕੁਸਲੇਸੁ ਧਮ੍ਮੇਸੁ ਚਿਤ੍ਤੁਪ੍ਪਾਦਮ੍ਪਿ ਬਹੂਪਕਾਰਂ ਵਦਾਮਿ, ਯਾ ਪਨੇਤਾ ਕਾਯੇਨ ਚ ਵਾਚਾਯ ਚ ਅਨੁਵਿਧਿਯਨਾ, ਯਥਾ ਪਠਮਂ ਚਿਤ੍ਤਂ ਉਪ੍ਪਨ੍ਨਂ, ਤਥੇਵ ਤੇਸਂ ਧਮ੍ਮਾਨਂ ਕਾਯੇਨ ਕਰਣਂ, ਵਾਚਾਯ ਚ ‘‘ਕਰੋਥਾ’’ਤਿ ਆਣਾਪਨਂ ਵਾ, ਉਗ੍ਗਹਪਰਿਪੁਚ੍ਛਾਦੀਨਿ ਵਾ, ਤਤ੍ਥ ਵਾਦੋਯੇਵ ਕੋ, ਏਕਨ੍ਤਬਹੂਪਕਾਰਾਯੇਵ ਹਿ ਤਾ ਅਨੁਵਿਧਿਯਨਾਤਿ ਦਸ੍ਸੇਤਿ. ਕਸ੍ਮਾ ਪਨੇਤ੍ਥ ਚਿਤ੍ਤੁਪ੍ਪਾਦੋਪਿ ਬਹੂਪਕਾਰੋਤਿ? ਏਕਨ੍ਤਹਿਤਸੁਖਾਵਹਤ੍ਤਾ ਅਨੁਵਿਧਿਯਨਾਨਂ ਹੇਤੁਤ੍ਤਾ ਚ.

‘‘ਦਾਨਂ ਦਸ੍ਸਾਮੀ’’ਤਿ ਹਿ ਚਿਤ੍ਤੁਪ੍ਪਾਦੋ ਸਯਮ੍ਪਿ ਏਕਨ੍ਤਹਿਤਸੁਖਾਵਹੋ ਅਨੁਵਿਧਿਯਨਾਨਮ੍ਪਿ ਹੇਤੁ, ਏਵਞ੍ਹਿ ਉਪ੍ਪਨ੍ਨਚਿਤ੍ਤਤ੍ਤਾਯੇਵ ਦੁਤਿਯਦਿਵਸੇ ਮਹਾਵੀਥਿਂ ਪਿਦਹਿਤ੍ਵਾ ਮਹਾਮਣ੍ਡਪਂ ਕਤ੍ਵਾ ਭਿਕ੍ਖੁਸਤਸ੍ਸ ਵਾ ਭਿਕ੍ਖੁਸਹਸ੍ਸਸ੍ਸ ਵਾ ਦਾਨਂ ਦੇਤਿ, ‘‘ਭਿਕ੍ਖੁਸਙ੍ਘਂ ਨਿਮਨ੍ਤੇਥ ਪੂਜੇਥ ਪਰਿਵਿਸਥਾ’’ਤਿ ਪਰਿਜਨੇ ਆਣਾਪੇਤਿ. ਏਵਂ ‘‘ਸਙ੍ਘਸ੍ਸ ਚੀਵਰਂ ਸੇਨਾਸਨਂ ਭੇਸਜ੍ਜਂ ਦਸ੍ਸਾਮੀ’’ਤਿ ਚਿਤ੍ਤੁਪ੍ਪਾਦੋ ਸਯਮ੍ਪਿ ਏਕਨ੍ਤਹਿਤਸੁਖਾਵਹੋ ਅਨੁਵਿਧਿਯਨਾਨਮ੍ਪਿ ਹੇਤੁ, ਏਵਂ ਉਪ੍ਪਨ੍ਨਚਿਤ੍ਤਤ੍ਤਾਯੇਵ ਹਿ ਚੀਵਰਾਦੀਨਿ ਅਭਿਸਙ੍ਖਰੋਤਿ ਦੇਤਿ ਦਾਪੇਤਿ ਚ. ਏਸ ਨਯੋ ਸਰਣਗਮਨਾਦੀਸੁ.

‘‘ਸਰਣਂ ਗਚ੍ਛਾਮੀ’’ਤਿ ਹਿ ਚਿਤ੍ਤਂ ਉਪ੍ਪਾਦੇਤ੍ਵਾਵ ਪਚ੍ਛਾ ਕਾਯੇਨ ਵਾ ਵਾਚਾਯ ਵਾ ਸਰਣਂ ਗਣ੍ਹਾਤਿ. ਤਥਾ ‘‘ਪਞ੍ਚਙ੍ਗਂ ਅਟ੍ਠਙ੍ਗਂ ਦਸਙ੍ਗਂ ਵਾ ਸੀਲਂ ਸਮਾਦਿਯਿਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ਕਾਯੇਨ ਵਾ ਵਾਚਾਯ ਵਾ ਸਮਾਦਿਯਤਿ, ‘‘ਪਬ੍ਬਜਿਤ੍ਵਾ ਚਤੂਸੁ ਸੀਲੇਸੁ ਪਤਿਟ੍ਠਹਿਸ੍ਸਾਮੀ’’ਤਿ ਚ ਚਿਤ੍ਤਂ ਉਪ੍ਪਾਦੇਤ੍ਵਾ ਕਾਯੇਨ ਵਾਚਾਯ ਚ ਪੂਰੇਤਬ੍ਬਂ ਸੀਲਂ ਪੂਰੇਤਿ. ‘‘ਬੁਦ੍ਧਵਚਨਂ ਉਗ੍ਗਹੇਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਾਦੇਤ੍ਵਾਵ ਏਕਂ ਵਾ ਨਿਕਾਯਂ ਦ੍ਵੇ ਵਾ ਤਯੋ ਵਾ ਚਤ੍ਤਾਰੋ ਵਾ ਪਞ੍ਚ ਵਾ ਨਿਕਾਯੇ ਵਾਚਾਯ ਉਗ੍ਗਣ੍ਹਾਤਿ. ਏਵਂ ਧੁਤਙ੍ਗਸਮਾਦਾਨ-ਕਮ੍ਮਟ੍ਠਾਨੁਗ੍ਗਹ-ਕਸਿਣਪਰਿਕਮ੍ਮ-ਝਾਨਸਮਾਪਤ੍ਤਿਵਿਪਸ੍ਸਨਾਮਗ੍ਗਫਲ- ਪਚ੍ਚੇਕਬੋਧਿ-ਸਮ੍ਮਾਸਮ੍ਬੋਧਿਵਸੇਨ ਨੇਤਬ੍ਬਂ.

‘‘ਬੁਦ੍ਧੋ ਭਵਿਸ੍ਸਾਮੀ’’ਤਿ ਹਿ ਚਿਤ੍ਤੁਪ੍ਪਾਦੋ ਸਯਮ੍ਪਿ ਏਕਨ੍ਤਹਿਤਸੁਖਾਵਹੋ ਅਨੁਵਿਧਿਯਨਾਨਮ੍ਪਿ ਹੇਤੁ, ਏਵਞ੍ਹਿ ਉਪ੍ਪਨ੍ਨਚਿਤ੍ਤਤ੍ਤਾਯੇਵ ਅਪਰੇਨ ਸਮਯੇਨ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖੇਯ੍ਯਾਨਿ ਕਾਯੇਨ ਵਾਚਾਯ ਚ ਪਾਰਮਿਯੋ ਪੂਰੇਤ੍ਵਾ ਸਦੇਵਕਂ ਲੋਕਂ ਤਾਰੇਨ੍ਤੋ ਵਿਚਰਤਿ. ਏਵਂ ਸਬ੍ਬਤ੍ਥ ਚਿਤ੍ਤੁਪ੍ਪਾਦੋਪਿ ਬਹੂਪਕਾਰੋ. ਕਾਯਵਾਚਾਹਿ ਪਨ ਅਨੁਵਿਧਿਯਨਾ ਅਤਿਬਹੂਪਕਾਰਾਯੇਵਾਤਿ ਵੇਦਿਤਬ੍ਬਾ.

ਏਵਂ ਕੁਸਲੇਸੁ ਧਮ੍ਮੇਸੁ ਚਿਤ੍ਤੁਪ੍ਪਾਦਸ੍ਸਾਪਿ ਬਹੂਪਕਾਰਤਂ ਦਸ੍ਸੇਤ੍ਵਾ ਇਦਾਨਿ ਤਤ੍ਥ ਨਿਯੋਜੇਨ੍ਤੋ ‘‘ਤਸ੍ਮਾ ਤਿਹ ਚੁਨ੍ਦਾ’’ਤਿਆਦਿਮਾਹ. ਤਂ ਅਤ੍ਥਤੋ ਪਾਕਟਮੇਵ.

੮੫. ਏਵਂ ਚਤੁਚਤ੍ਤਾਲੀਸਾਯ ਆਕਾਰੇਹਿ ਦਸ੍ਸਿਤੇ ਸਲ੍ਲੇਖੇ ਚਿਤ੍ਤੁਪ੍ਪਾਦਸ੍ਸਾਪਿ ਬਹੂਪਕਾਰਤਂ ਦਸ੍ਸੇਤ੍ਵਾ ਇਦਾਨਿ ਤਸ੍ਸੇਵ ਸਲ੍ਲੇਖਸ੍ਸ ਹਿਤਾਧਿਗਮਾਯ ਮਗ੍ਗਭਾਵਂ ਦਸ੍ਸੇਨ੍ਤੋ ਸੇਯ੍ਯਥਾਪੀਤਿਆਦਿਮਾਹ.

ਤਸ੍ਸਤ੍ਥੋ, ਯਥਾ ਨਾਮ, ਚੁਨ੍ਦ, ਖਾਣੁਕਣ੍ਟਕਪਾਸਾਣਾਦੀਹਿ ਵਿਸਮੋ ਮਗ੍ਗੋ ਭਵੇਯ੍ਯ, ਤਸ੍ਸ ਪਰਿਕ੍ਕਮਨਾਯ ਪਰਿਵਜ੍ਜਨਤ੍ਥਾਯ ਅਞ੍ਞੋ ਸੁਪਰਿਕਮ੍ਮਕਤੋ ਵਿਯ ਭੂਮਿਭਾਗੋ ਸਮੋ ਮਗ੍ਗੋ ਭਵੇਯ੍ਯ, ਯਥਾ ਚ ਰੁਕ੍ਖਮੂਲਪਾਸਾਣਪਪਾਤਕੁਮ੍ਭੀਲਮਕਰਾਦਿ ਪਰਿਬ੍ਯਾਕੁਲਂ ਵਿਸਮਂ ਤਿਤ੍ਥਮਸ੍ਸ, ਤਸ੍ਸ ਪਰਿਕ੍ਕਮਨਾਯ ਪਰਿਵਜ੍ਜਨਤ੍ਥਾਯ ਅਞ੍ਞਂ ਅਵਿਸਮਂ ਅਨੁਪੁਬ੍ਬਗਮ੍ਭੀਰਂ ਸੋਪਾਨਫਲਕਸਦਿਸਂ ਤਿਤ੍ਥਂ ਭਵੇਯ੍ਯ, ਯਂ ਪਟਿਪਨ੍ਨੋ ਸੁਖੇਨੇਵ ਤਂ ਨਦਿਂ ਵਾ ਤਲ਼ਾਕਂ ਵਾ ਅਜ੍ਝੋਗਾਹੇਤ੍ਵਾ ਨ੍ਹਾਯੇਯ੍ਯ ਵਾ ਉਤ੍ਤਰੇਯ੍ਯ ਵਾ, ਏਵਮੇਵ ਖੋ, ਚੁਨ੍ਦ, ਵਿਸਮਮਗ੍ਗਵਿਸਮਤਿਤ੍ਥਸਦਿਸਾਯ ਵਿਹਿਂਸਾਯ ਸਮਨ੍ਨਾਗਤਸ੍ਸ ਵਿਹਿਂਸਕਪੁਗ੍ਗਲਸ੍ਸ ਸਮਮਗ੍ਗਸਮਤਿਤ੍ਥਸਦਿਸਾ ਅਵਿਹਿਂਸਾ ਹੋਤਿ ਪਰਿਕ੍ਕਮਨਾਯ. ਯਥੇਵ ਹਿ ਵਿਸਮਮਗ੍ਗਤਿਤ੍ਥਪਰਿਵਜ੍ਜਨਤ੍ਥਾਯ ਸਮੋ ਮਗ੍ਗੋ ਚ ਤਿਤ੍ਥਞ੍ਚ ਪਟਿਯਤ੍ਤਂ, ਏਵਂ ਵਿਹਿਂਸਾਪਰਿਵਜ੍ਜਨਤ੍ਥਾਯ ਅਵਿਹਿਂਸਾ ਪਟਿਯਤ੍ਤਾ, ਯਂ ਪਟਿਪਨ੍ਨੋ ਸੁਖੇਨੇਵ ਮਨੁਸ੍ਸਗਤਿਂ ਵਾ ਦੇਵਗਤਿਂ ਵਾ ਅਜ੍ਝੋਗਾਹੇਤ੍ਵਾ ਸਮ੍ਪਤ੍ਤਿਂ ਵਾ ਅਨੁਭਵੇਯ੍ਯ ਉਤ੍ਤਰੇਯ੍ਯ ਵਾ ਲੋਕਾ. ਏਤੇਨੇਵ ਉਪਾਯੇਨ ਸਬ੍ਬਪਦਾਨਿ ਯੋਜੇਤਬ੍ਬਾਨਿ.

੮੬. ਏਵਂ ਤਸ੍ਸੇਵ ਹਿਤਾਧਿਗਮਾਯ ਮਗ੍ਗਭਾਵਂ ਦਸ੍ਸੇਤ੍ਵਾ ਇਦਾਨਿ ਉਪਰਿਭਾਗਙ੍ਗਮਨੀਯਤਂ ਦਸ੍ਸੇਨ੍ਤੋ, ਸੇਯ੍ਯਥਾਪੀਤਿਆਦਿਮਾਹ.

ਤਸ੍ਸਤ੍ਥੋ, ਯਥਾ ਨਾਮ, ਚੁਨ੍ਦ, ਯੇ ਕੇਚਿ ਅਕੁਸਲਾ ਧਮ੍ਮਾ ਪਟਿਸਨ੍ਧਿਯਾ ਜਨਕਾ ਵਾ ਅਜਨਕਾ ਵਾ, ਦਿਨ੍ਨਾਯਪਿ ਪਟਿਸਨ੍ਧਿਯਾ ਵਿਪਾਕਜਨਕਾ ਵਾ ਅਜਨਕਾ ਵਾ, ਸਬ੍ਬੇ ਤੇ ਜਾਤਿਵਸੇਨ ਅਧੋਭਾਗਙ੍ਗਮਨੀਯਾਤਿ ਏਵਂਨਾਮਾਵ ਹੋਨ੍ਤਿ, ਵਿਪਾਕਕਾਲੇ ਅਨਿਟ੍ਠਾਕਨ੍ਤਵਿਪਾਕਤ੍ਤਾ. ਯਥਾ ਚ ਯੇ ਕੇਚਿ ਕੁਸਲਾ ਧਮ੍ਮਾ ਪਟਿਸਨ੍ਧਿਯਾ ਜਨਕਾ ਵਾ ਅਜਨਕਾ ਵਾ ਦਿਨ੍ਨਾਯਪਿ ਪਟਿਸਨ੍ਧਿਯਾ ਵਿਪਾਕਜਨਕਾ ਵਾ ਅਜਨਕਾ ਵਾ, ਸਬ੍ਬੇ ਤੇ ਜਾਤਿਵਸੇਨ ਉਪਰਿਭਾਗਙ੍ਗਮਨੀਯਾਤਿ ਏਵਂਨਾਮਾਵ ਹੋਨ੍ਤਿ, ਵਿਪਾਕਕਾਲੇ ਇਟ੍ਠਕਨ੍ਤਵਿਪਾਕਤ੍ਤਾ, ਏਵਮੇਵ ਖੋ, ਚੁਨ੍ਦ, ਵਿਹਿਂਸਕਸ੍ਸ…ਪੇ… ਉਪਰਿਭਾਗਾਯਾਤਿ. ਤਤ੍ਰਾਯਂ ਓਪਮ੍ਮਸਂਸਨ੍ਦਨਾ – ਯਥਾ ਸਬ੍ਬੇ ਅਕੁਸਲਾ ਅਧੋਭਾਗਙ੍ਗਮਨੀਯਾ, ਏਵਂ ਵਿਹਿਂਸਕਸ੍ਸ ਏਕਾ ਵਿਹਿਂਸਾਪਿ. ਯਥਾ ਚ ਸਬ੍ਬੇ ਕੁਸਲਾ ਉਪਰਿਭਾਗਙ੍ਗਮਨੀਯਾ, ਏਵਂ ਅਵਿਹਿਂਸਕਸ੍ਸ ਏਕਾ ਅਵਿਹਿਂਸਾਪਿ. ਏਤੇਨੇਵ ਉਪਾਯੇਨ ਅਕੁਸਲਂ ਅਕੁਸਲੇਨ ਕੁਸਲਞ੍ਚ ਕੁਸਲੇਨ ਉਪਮੇਤਬ੍ਬਂ, ਅਯਂ ਕਿਰੇਤ੍ਥ ਅਧਿਪ੍ਪਾਯੋਤਿ.

੮੭. ਏਵਂ ਤਸ੍ਸੇਵ ਸਲ੍ਲੇਖਸ੍ਸ ਉਪਰਿਭਾਗਙ੍ਗਮਨੀਯਤਂ ਦਸ੍ਸੇਤ੍ਵਾ ਇਦਾਨਿ ਪਰਿਨਿਬ੍ਬਾਪਨੇ ਸਮਤ੍ਥਭਾਵਂ ਦਸ੍ਸੇਤੁਂ ਸੋ ਵਤ ਚੁਨ੍ਦਾਤਿਆਦਿਮਾਹ. ਤਤ੍ਥ ਸੋਤਿ ਵੁਤ੍ਤਪ੍ਪਕਾਰਪੁਗ੍ਗਲਨਿਦ੍ਦੇਸੋ. ਤਸ੍ਸ ਯੋਤਿ ਇਮਂ ਉਦ੍ਦੇਸਵਚਨਂ ਆਹਰਿਤ੍ਵਾ ਯੋ ਅਤ੍ਤਨਾ ਪਲਿਪਪਲਿਪਨ੍ਨੋ, ਸੋ ਵਤ, ਚੁਨ੍ਦ, ਪਰਂ ਪਲਿਪਪਲਿਪਨ੍ਨਂ ਉਦ੍ਧਰਿਸ੍ਸਤੀਤਿ ਏਵਂ ਸਬ੍ਬਪਦੇਸੁ ਸਮ੍ਬਨ੍ਧੋ ਵੇਦਿਤਬ੍ਬੋ. ਪਲਿਪਪਲਿਪਨ੍ਨੋਤਿ ਗਮ੍ਭੀਰਕਦ੍ਦਮੇ ਨਿਮੁਗ੍ਗੋ ਵੁਚ੍ਚਤਿ, ਨੋ ਚ ਖੋ ਅਰਿਯਸ੍ਸ ਵਿਨਯੇ. ਅਰਿਯਸ੍ਸ ਪਨ ਵਿਨਯੇ ਪਲਿਪਨ੍ਤਿ ਪਞ੍ਚ ਕਾਮਗੁਣਾ ਵੁਚ੍ਚਨ੍ਤਿ. ਪਲਿਪਨ੍ਨੋਤਿ ਤਤ੍ਥ ਨਿਮੁਗ੍ਗੋ ਬਾਲਪੁਥੁਜ੍ਜਨੋ, ਤਸ੍ਮਾ ਏਵਮੇਤ੍ਥ ਅਤ੍ਥਯੋਜਨਾ ਵੇਦਿਤਬ੍ਬਾ. ਯਥਾ, ਚੁਨ੍ਦ, ਕੋਚਿ ਪੁਰਿਸੋ ਯਾਵ ਨਾਸਿਕਗ੍ਗਾ ਗਮ੍ਭੀਰੇ ਕਦ੍ਦਮੇ ਨਿਮੁਗ੍ਗੋ ਅਪਰਂ ਤਤ੍ਥੇਵ ਨਿਮੁਗ੍ਗਂ ਹਤ੍ਥੇ ਵਾ ਸੀਸੇ ਵਾ ਗਹੇਤ੍ਵਾ ਉਦ੍ਧਰਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ, ਨ ਹਿ ਤਂ ਕਾਰਣਮਤ੍ਥਿ, ਯੇਨ ਸੋ ਤਂ ਉਦ੍ਧਰਿਤ੍ਵਾ ਥਲੇ ਪਤਿਟ੍ਠਪੇਯ੍ਯ, ਏਵਮੇਵ ਯੋ ਅਤ੍ਤਨਾ ਪਞ੍ਚਕਾਮਗੁਣਪਲਿਪੇ ਪਲਿਪਨ੍ਨੋ, ਸੋ ਵਤ ਪਰਂ ਤਥੇਵ ਪਲਿਪਪਲਿਪਨ੍ਨਂ ਉਦ੍ਧਰਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ.

ਤਤ੍ਥ ਸਿਯਾ ਅਯੁਤ੍ਤਮੇਤਂ, ਪੁਥੁਜ੍ਜਨਾਨਮ੍ਪਿ ਭਿਕ੍ਖੁਭਿਕ੍ਖੁਨੀਉਪਾਸਕਉਪਾਸਿਕਾਨਂ ਧਮ੍ਮਦੇਸਨਂ ਸੁਤ੍ਵਾ ਹੋਨ੍ਤਿਯੇਵ ਧਮ੍ਮਂ ਅਭਿਸਮੇਤਾਰੋ, ਤਸ੍ਮਾ ਪਲਿਪਪਲਿਪਨ੍ਨੋ ਉਦ੍ਧਰਤੀਤਿ, ਤਂ ਨ ਤਥਾ ਦਟ੍ਠਬ੍ਬਂ. ਭਗਵਾਯੇਵ ਹਿ ਤਤ੍ਥ ਉਦ੍ਧਰਤਿ, ਪਸਂਸਾਮਤ੍ਤਮੇਵ ਪਨ ਧਮ੍ਮਕਥਿਕਾ ਲਭਨ੍ਤਿ ਰਞ੍ਞਾ ਪਹਿਤਲੇਖਵਾਚਕੋ ਵਿਯ. ਯਥਾ ਹਿ ਰਞ੍ਞੋ ਪਚ੍ਚਨ੍ਤਜਨਪਦੇ ਪਹਿਤਂ ਲੇਖਂ ਤਤ੍ਥ ਮਨੁਸ੍ਸਾ ਲੇਖਂ ਵਾਚੇਤੁਂ ਅਜਾਨਨ੍ਤਾ ਯੋ ਵਾਚੇਤੁਂ ਜਾਨਾਤਿ, ਤੇਨ ਵਾਚਾਪੇਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਰਞ੍ਞੋ ਆਣਾ’’ਤਿ ਆਦਰੇਨ ਸਮ੍ਪਾਦੇਨ੍ਤਿ, ਨ ਚ ਨੇਸਂ ਹੋਤਿ ‘‘ਲੇਖਵਾਚਕਸ੍ਸ ਅਯਂ ਆਣਾ’’ਤਿ. ਲੇਖਵਾਚਕੋ ਪਨ ‘‘ਵਿਸ੍ਸਟ੍ਠਾਯ ਵਾਚਾਯ ਵਾਚੇਸਿ ਅਨੇਲਗਲ਼ਾਯਾ’’ਤਿ ਪਸਂਸਾਮਤ੍ਤਮੇਵ ਲਭਤਿ, ਏਵਮੇਵ ਕਿਞ੍ਚਾਪਿ ਸਾਰਿਪੁਤ੍ਤਪਭੁਤਯੋ ਧਮ੍ਮਕਥਿਕਾ ਧਮ੍ਮਂ ਦੇਸੇਨ੍ਤਿ, ਅਥ ਖੋ ਲਿਖਿਤਪਣ੍ਣਵਾਚਕੋ ਵਿਯ ਤੇ ਹੋਨ੍ਤਿ. ਭਗਵਤੋਯੇਵ ਪਨ ਸਾ ਧਮ੍ਮਦੇਸਨਾ ਰਞ੍ਞੋ ਆਣਾ ਵਿਯ. ਯੇ ਚ ਤਂ ਸੁਤ੍ਵਾ ਧਮ੍ਮਂ ਅਭਿਸਮੇਨ੍ਤਿ, ਤੇ ਭਗਵਾਯੇਵ ਉਦ੍ਧਰਤੀਤਿ ਵੇਦਿਤਬ੍ਬਾ. ਧਮ੍ਮਕਥਿਕਾ ਪਨ ‘‘ਵਿਸ੍ਸਟ੍ਠਾਯ ਵਾਚਾਯ ਧਮ੍ਮਂ ਦੇਸੇਨ੍ਤਿ ਅਨੇਲਗਲ਼ਾਯਾ’’ਤਿ ਪਸਂਸਾਮਤ੍ਤਮੇਵ ਲਭਨ੍ਤੀਤਿ. ਤਸ੍ਮਾ ਯੁਤ੍ਤਮੇਵੇਤਨ੍ਤਿ. ਵੁਤ੍ਤਵਿਪਰਿਯਾਯੇਨ ਸੁਕ੍ਕਪਕ੍ਖੋ ਵੇਦਿਤਬ੍ਬੋ.

ਅਦਨ੍ਤੋ ਅਵਿਨੀਤੋ ਅਪਰਿਨਿਬ੍ਬੁਤੋਤਿ ਏਤ੍ਥ ਪਨ ਅਨਿਬ੍ਬਿਸਤਾਯ ਅਦਨ੍ਤੋ. ਅਸਿਕ੍ਖਿਤਵਿਨਯਤਾਯ ਅਵਿਨੀਤੋ. ਅਨਿਬ੍ਬੁਤਕਿਲੇਸਤਾਯ ਅਪਰਿਨਿਬ੍ਬੁਤੋਤਿ ਵੇਦਿਤਬ੍ਬੋ. ਸੋ ਤਾਦਿਸੋ ਪਰਂ ਦਮੇਸ੍ਸਤਿ, ਨਿਬ੍ਬਿਸਂ ਕਰਿਸ੍ਸਤਿ, ਵਿਨੇਸ੍ਸਤਿ ਵਾ ਤਿਸ੍ਸੋ ਸਿਕ੍ਖਾ ਸਿਕ੍ਖਾਪੇਸ੍ਸਤਿ, ਪਰਿਨਿਬ੍ਬਾਪੇਸ੍ਸਤਿ ਵਾ ਤਸ੍ਸ ਕਿਲੇਸੇ ਨਿਬ੍ਬਾਪੇਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ. ਵੁਤ੍ਤਵਿਪਰਿਯਾਯੇਨ ਸੁਕ੍ਕਪਕ੍ਖੋ ਵੇਦਿਤਬ੍ਬੋ.

ਏਵਮੇਵ ਖੋ, ਚੁਨ੍ਦ, ਵਿਹਿਂਸਕਸ੍ਸ…ਪੇ… ਪਰਿਨਿਬ੍ਬਾਨਾਯਾਤਿ ਏਤ੍ਥ ਪਨ ਏਵਮਤ੍ਥੋ ਵੇਦਿਤਬ੍ਬੋ – ਯਥਾ ਹਿ ਅਤ੍ਤਨਾ ਅਪਲਿਪਪਲਿਪਨ੍ਨੋ ਪਰਂ ਪਲਿਪਪਲਿਪਨ੍ਨਂ ਉਦ੍ਧਰਿਸ੍ਸਤਿ, ਦਨ੍ਤੋ ਦਮੇਸ੍ਸਤਿ, ਵਿਨੀਤੋ ਵਿਨੇਸ੍ਸਤਿ, ਪਰਿਨਿਬ੍ਬੁਤੋ ਪਰਿਨਿਬ੍ਬਾਪੇਸ੍ਸਤੀਤਿ ਠਾਨਮੇਤਂ ਵਿਜ੍ਜਤੀਤਿ. ਕਿਂ ਪਨ ਤਨ੍ਤਿ? ਅਪਲਿਪਪਲਿਪਨ੍ਨਤ੍ਤਂ, ਦਨ੍ਤਤ੍ਤਂ ਵਿਨੀਤਤ੍ਤਂ ਪਰਿਨਿਬ੍ਬੁਤਤ੍ਤਞ੍ਚ, ਏਵਮੇਵ ਖੋ, ਚੁਨ੍ਦ, ਵਿਹਿਂਸਕਸ੍ਸ ਪੁਰਿਸਪੁਗ੍ਗਲਸ੍ਸ ਅਵਿਹਿਂਸਾ ਹੋਤਿ ਪਰਿਨਿਬ੍ਬਾਨਾਯ. ਕਿਂ ਵੁਤ੍ਤਂ ਹੋਤਿ? ਯੋ ਅਤ੍ਤਨਾ ਅਵਿਹਿਂਸਕੋ, ਤਸ੍ਸ ਯਾ ਅਵਿਹਿਂਸਾ, ਅਯਂ ਯਾ ਏਸਾ ਵਿਹਿਂਸਕਸ੍ਸ ਪਰਸ੍ਸ ਵਿਹਿਂਸਾ, ਤਸ੍ਸਾ ਪਰਿਨਿਬ੍ਬਾਨਾਯ ਹੋਤਿ, ਅਤ੍ਤਨਾ ਹਿ ਅਵਿਹਿਂਸਕੋ ਪਰਸ੍ਸ ਵਿਹਿਂਸਾਚੇਤਨਂ ਨਿਬ੍ਬਾਪੇਸ੍ਸਤੀਤਿ ਠਾਨਮੇਤਂ ਵਿਜ੍ਜਤਿ. ਕਿਂ ਪਨ ਤਨ੍ਤਿ? ਅਵਿਹਿਂਸਕਤ੍ਤਮੇਵ. ਯਞ੍ਹਿ ਯੇਨ ਅਤ੍ਤਨਾ ਅਧਿਗਤਂ ਹੋਤਿ, ਸੋ ਪਰਂ ਤਦਤ੍ਥਾਯ ਸਮਾਦਪੇਤੁਂ ਸਕ੍ਕੋਤੀਤਿ.

ਅਥ ਵਾ ਯਥਾ ਅਤ੍ਤਨਾ ਅਪਲਿਪਨ੍ਨੋ ਦਨ੍ਤੋ ਵਿਨੀਤੋ ਪਰਿਨਿਬ੍ਬੁਤੋ ਪਰਂ ਪਲਿਪਪਲਿਪਨ੍ਨਂ ਅਦਨ੍ਤਂ ਅਵਿਨੀਤਂ ਅਪਰਿਨਿਬ੍ਬੁਤਞ੍ਚ ਉਦ੍ਧਰਿਸ੍ਸਤਿ ਦਮੇਸ੍ਸਤਿ ਵਿਨੇਸ੍ਸਤਿ ਪਰਿਨਿਬ੍ਬਾਪੇਸ੍ਸਤੀਤਿ ਠਾਨਮੇਤਂ ਵਿਜ੍ਜਤਿ, ਏਵਮੇਵ ਵਿਹਿਂਸਕਸ੍ਸ ਪੁਰਿਸਪੁਗ੍ਗਲਸ੍ਸ ਵਿਹਿਂਸਾਪਹਾਨਾਯ ਮਗ੍ਗਂ ਭਾਵਯਤੋ ਉਪ੍ਪਨ੍ਨਾ ਅਵਿਹਿਂਸਾ ਹੋਤਿ ਪਰਿਨਿਬ੍ਬਾਨਾਯ. ਪਰਿਨਿਬ੍ਬੁਤੋ ਵਿਯ ਹਿ ਅਪਰਿਨਿਬ੍ਬੁਤਂ ਅਵਿਹਿਂਸਾਚੇਤਨਾਵ ਵਿਹਿਂਸਾਚੇਤਨਂ ਪਰਿਨਿਬ੍ਬਾਪੇਤੁਂ ਸਮਤ੍ਥਾ. ਏਤਮਤ੍ਥਂ ਦਸ੍ਸੇਨ੍ਤੋ ‘‘ਏਵਮੇਵ ਖੋ, ਚੁਨ੍ਦਾ’’ਤਿਆਦਿਮਾਹਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਯਥਾ ਚੇਤ੍ਥ, ਏਵਂ ਸਬ੍ਬਪਦੇਸੁ. ਅਤਿਵਿਤ੍ਥਾਰਭਯੇਨ ਪਨ ਅਨੁਪਦਯੋਜਨਾ ਨ ਕਤਾਤਿ.

੮੮. ਏਵਂ ਤਸ੍ਸ ਪਰਿਨਿਬ੍ਬਾਪਨੇ ਸਮਤ੍ਥਭਾਵਂ ਦਸ੍ਸੇਤ੍ਵਾ ਇਦਾਨਿ ਤਂ ਦੇਸਨਂ ਨਿਗਮੇਤ੍ਵਾ ਧਮ੍ਮਪਟਿਪਤ੍ਤਿਯਂ ਨਿਯੋਜੇਤੁਂ ਇਤਿ ਖੋ, ਚੁਨ੍ਦਾਤਿਆਦਿਮਾਹ. ਤਤ੍ਥ ਸਲ੍ਲੇਖਪਰਿਯਾਯੋਤਿ ਸਲ੍ਲੇਖਕਾਰਣਂ. ਏਸ ਨਯੋ ਸਬ੍ਬਤ੍ਥ ਏਤ੍ਥ ਅਵਿਹਿਂਸਾਦਯੋ ਏਵ ਵਿਹਿਂਸਾਦੀਨਂ ਸਲ੍ਲੇਖਨਤੋ ਸਲ੍ਲੇਖਕਾਰਣਂ. ਤੇਸਂ ਵਸੇਨ ਚਿਤ੍ਤਸ੍ਸ ਉਪ੍ਪਾਦੇਤਬ੍ਬਤੋ ਚਿਤ੍ਤੁਪਾਦਕਾਰਣਂ, ਵਿਹਿਂਸਾਦਿ, ਪਰਿਕ੍ਕਮਨਸ੍ਸ ਹੇਤੁਤੋ ਪਰਿਕ੍ਕਮਨਕਾਰਣਂ, ਉਪਰਿਭਾਗਨਿਪ੍ਫਾਦਨਤੋ ਉਪਰਿਭਾਗਕਾਰਣਂ, ਵਿਹਿਂਸਾਦੀਨਂ ਪਰਿਨਿਬ੍ਬਾਪਨਤੋ ਪਰਿਨਿਬ੍ਬਾਨਕਾਰਣਨ੍ਤਿ ਵੇਦਿਤਬ੍ਬਾ. ਹਿਤੇਸਿਨਾਤਿ ਹਿਤਂ ਏਸਨ੍ਤੇਨ. ਅਨੁਕਮ੍ਪਕੇਨਾਤਿ ਅਨੁਕਮ੍ਪਮਾਨੇਨ. ਅਨੁਕਮ੍ਪਂ ਉਪਾਦਾਯਾਤਿ ਅਨੁਕਮ੍ਪਂ ਚਿਤ੍ਤੇਨ ਪਰਿਗ੍ਗਹੇਤ੍ਵਾ, ਪਰਿਚ੍ਚਾਤਿਪਿ ਵੁਤ੍ਤਂ ਹੋਤਿ. ਕਤਂ ਵੋ ਤਂ ਮਯਾਤਿ ਤਂ ਮਯਾ ਇਮੇ ਪਞ੍ਚ ਪਰਿਯਾਯੇ ਦਸ੍ਸੇਨ੍ਤੇਨ ਤੁਮ੍ਹਾਕਂ ਕਤਂ. ਏਤ੍ਤਕਮੇਵ ਹਿ ਅਨੁਕਮ੍ਪਕਸ੍ਸ ਸਤ੍ਥੁ ਕਿਚ੍ਚਂ, ਯਦਿਦਂ ਅਵਿਪਰੀਤਧਮ੍ਮਦੇਸਨਾ. ਇਤੋ ਪਰਂ ਪਨ ਪਟਿਪਤ੍ਤਿ ਨਾਮ ਸਾਵਕਾਨਂ ਕਿਚ੍ਚਂ. ਤੇਨਾਹ ਏਤਾਨਿ, ਚੁਨ੍ਦ, ਰੁਕ੍ਖਮੂਲਾਨਿ…ਪੇ… ਅਮ੍ਹਾਕਂ ਅਨੁਸਾਸਨੀਤਿ.

ਤਤ੍ਥ ਚ ਰੁਕ੍ਖਮੂਲਾਨੀਤਿ ਇਮਿਨਾ ਰੁਕ੍ਖਮੂਲਸੇਨਾਸਨਂ ਦਸ੍ਸੇਤਿ. ਸੁਞ੍ਞਾਗਾਰਾਨੀਤਿ ਇਮਿਨਾ ਜਨਵਿਵਿਤ੍ਤਟ੍ਠਾਨਂ. ਉਭਯੇਨਾਪਿ ਚ ਯੋਗਾਨੁਰੂਪਸੇਨਾਸਨਮਾਚਿਕ੍ਖਤਿ, ਦਾਯਜ੍ਜਂ ਨਿਯ੍ਯਾਤੇਤਿ. ਝਾਯਥਾਤਿ ਆਰਮ੍ਮਣੂਪਨਿਜ੍ਝਾਨੇਨ ਅਟ੍ਠਤਿਂਸਾਰਮ੍ਮਣਾਨਿ, ਲਕ੍ਖਣੂਪਨਿਜ੍ਝਾਨੇਨ ਚ ਅਨਿਚ੍ਚਾਦਿਤੋ ਖਨ੍ਧਾਯਤਨਾਦੀਨਿ ਉਪਨਿਜ੍ਝਾਯਥ, ਸਮਥਞ੍ਚ ਵਿਪਸ੍ਸਨਞ੍ਚ ਵਡ੍ਢੇਥਾਤਿ ਵੁਤ੍ਤਂ ਹੋਤਿ. ਮਾ ਪਮਾਦਤ੍ਥਾਤਿ ਮਾ ਪਮਜ੍ਜਿਤ੍ਥ. ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥਾਤਿ ਯੇ ਹਿ ਪੁਬ੍ਬੇ ਦਹਰਕਾਲੇ, ਆਰੋਗ੍ਯਕਾਲੇ, ਸਤ੍ਤਸਪ੍ਪਾਯਾਦਿਸਮ੍ਪਤ੍ਤਿਕਾਲੇ, ਸਤ੍ਥੁ ਸਮ੍ਮੁਖੀਭਾਵਕਾਲੇ ਚ ਯੋਨਿਸੋਮਨਸਿਕਾਰਵਿਰਹਿਤਾ ਰਤ੍ਤਿਨ੍ਦਿਵਂ ਮਙ੍ਗੁਲਭਤ੍ਤਾ ਹੁਤ੍ਵਾ ਸੇਯ੍ਯਸੁਖਂ ਮਿਦ੍ਧਸੁਖਮਨੁਭੋਨ੍ਤਾ ਪਮਜ੍ਜਨ੍ਤਿ, ਤੇ ਪਚ੍ਛਾ ਜਰਾਕਾਲੇ, ਰੋਗਕਾਲੇ, ਮਰਣਕਾਲੇ, ਵਿਪਤ੍ਤਿਕਾਲੇ, ਸਤ੍ਥੁ ਪਰਿਨਿਬ੍ਬੁਤਕਾਲੇ ਚ ਤਂ ਪੁਬ੍ਬੇ ਪਮਾਦਵਿਹਾਰਂ ਅਨੁਸ੍ਸਰਨ੍ਤਾ, ਸਪ੍ਪਟਿਸਨ੍ਧਿਕਾਲਕਿਰਿਯਞ੍ਚ ਭਾਰਿਯਂ ਸਮ੍ਪਸ੍ਸਮਾਨਾ ਵਿਪ੍ਪਟਿਸਾਰਿਨੋ ਹੋਨ੍ਤਿ, ਤੁਮ੍ਹੇ ਪਨ ਤਾਦਿਸਾ ਮਾ ਅਹੁਵਤ੍ਥਾਤਿ ਏਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥਾ’’ਤਿ. ਅਯਂ ਵੋ ਅਮ੍ਹਾਕਂ ਅਨੁਸਾਸਨੀਤਿ ਅਯਂ ਅਮ੍ਹਾਕਂ ਸਨ੍ਤਿਕਾ ‘‘ਝਾਯਥ ਮਾ ਪਮਾਦਤ੍ਥਾ’’ਤਿ ਤੁਮ੍ਹਾਕਂ ਅਨੁਸਾਸਨੀ, ਓਵਾਦੋਤਿ ਵੁਤ੍ਤਂ ਹੋਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਸਲ੍ਲੇਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.