੭. ਕਙ੍ਖਾਰੇਵਤਸੁਤ੍ਤਵਣ੍ਣਨਾ

੪੭. ਸਤ੍ਤਮੇ ਕਙ੍ਖਾਰੇਵਤੋਤਿ ਤਸ੍ਸ ਥੇਰਸ੍ਸ ਨਾਮਂ. ਸੋ ਹਿ ਸਾਸਨੇ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਸੀਲਵਾ ਕਲ੍ਯਾਣਧਮ੍ਮੋ ਵਿਹਰਤਿ, ‘‘ਅਕਪ੍ਪਿਯਾ ਮੁਗ੍ਗਾ, ਨ ਕਪ੍ਪਨ੍ਤਿ ਮੁਗ੍ਗਾ ਪਰਿਭੁਞ੍ਜਿਤੁਂ, ਅਕਪ੍ਪਿਯੋ ਗੁਲ਼ੋ’’ਤਿ (ਮਹਾਵ. ੨੭੨) ਚ ਆਦਿਨਾ ਵਿਨਯਕੁਕ੍ਕੁਚ੍ਚਸਙ੍ਖਾਤਕਙ੍ਖਾਬਹੁਲੋ ਪਨ ਹੋਤਿ. ਤੇਨ ਕਙ੍ਖਾਰੇਵਤੋਤਿ ਪਞ੍ਞਾਯਿਤ੍ਥ. ਸੋ ਅਪਰਭਾਗੇ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਘਟੇਨ੍ਤੋ ਵਾਯਮਨ੍ਤੋ ਛਲ਼ਭਿਞ੍ਞਾ ਸਚ੍ਛਿਕਤ੍ਵਾ ਝਾਨਸੁਖੇਨ ਫਲਸੁਖੇਨ ਵੀਤਿਨਾਮੇਤਿ, ਯੇਭੁਯ੍ਯੇਨ ਪਨ ਅਤ੍ਤਨਾ ਅਧਿਗਤਂ ਅਰਿਯਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ. ਤੇਨ ਵੁਤ੍ਤਂ – ‘‘ਅਤ੍ਤਨੋ ਕਙ੍ਖਾਵਿਤਰਣਵਿਸੁਦ੍ਧਿਂ ਪਚ੍ਚਵੇਕ੍ਖਮਾਨੋ’’ਤਿ. ਮਗ੍ਗਪਞ੍ਞਾ ਹਿ ‘‘ਅਹੋਸਿਂ ਨੁ ਖੋ ਅਹਂ ਅਤੀਤਮਦ੍ਧਾਨ’’ਨ੍ਤਿਆਦਿਨਯਪਵਤ੍ਤਾਯ (ਮ. ਨਿ. ੧.੧੮; ਸਂ. ਨਿ. ੨.੨੦) ਸੋਲ਼ਸਵਤ੍ਥੁਕਾਯ, ‘‘ਬੁਦ੍ਧੇ ਕਙ੍ਖਤਿ…ਪੇ… ਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਕਙ੍ਖਤੀ’’ਤਿ (ਧ. ਸ. ੧੦੦੮) ਏਵਂ ਵੁਤ੍ਤਾਯ ਅਟ੍ਠਵਤ੍ਥੁਕਾਯ, ਪਗੇਵ ਇਤਰਾਸਨ੍ਤਿ ਅਨਵਸੇਸਤੋ ਸਬ੍ਬਕਙ੍ਖਾਨਂ ਵਿਤਰਣਤੋ ਸਮਤਿਕ੍ਕਮਨਤੋ, ਅਞ੍ਞੇਹਿ ਚ ਅਤ੍ਤਨਾ ਪਹਾਤਬ੍ਬਕਿਲੇਸੇਹਿ ਅਚ੍ਚਨ੍ਤਵਿਸੁਜ੍ਝਨਤੋ ‘‘ਕਙ੍ਖਾਵਿਤਰਣਵਿਸੁਦ੍ਧੀ’’ਤਿ ਇਧਾਧਿਪ੍ਪੇਤਾ. ਤਞ੍ਹਿ ਅਯਮਾਯਸ੍ਮਾ ਦੀਘਰਤ੍ਤਂ ਕਙ੍ਖਾਪਕਤਤ੍ਤਾ ‘‘ਇਮਂ ਮਗ੍ਗਧਮ੍ਮਂ ਅਧਿਗਮ੍ਮ ਇਮਾ ਮੇ ਕਙ੍ਖਾ ਅਨਵਸੇਸਾ ਪਹੀਨਾ’’ਤਿ ਗਰੁਂ ਕਤ੍ਵਾ ਪਚ੍ਚਵੇਕ੍ਖਮਾਨੋ ਨਿਸੀਦਿ, ਨ ਸਪ੍ਪਚ੍ਚਯਨਾਮਰੂਪਦਸ੍ਸਨਂ ਅਨਿਚ੍ਚਨ੍ਤਿਕਤ੍ਤਾ ਤਸ੍ਸ ਕਙ੍ਖਾਵਿਤਰਣਸ੍ਸ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਅਰਿਯਮਗ੍ਗਸ੍ਸ ਅਨਵਸੇਸਕਙ੍ਖਾਵਿਤਰਣਸਙ੍ਖਾਤਂ ਅਤ੍ਥਂ ਵਿਦਿਤ੍ਵਾ ਤਦਤ੍ਥਦੀਪਕਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਯਾ ਕਾਚਿ ਕਙ੍ਖਾ ਇਧ ਵਾ ਹੁਰਂ ਵਾਤਿ ਇਧ ਇਮਸ੍ਮਿਂ ਪਚ੍ਚੁਪ੍ਪਨ੍ਨੇ ਅਤ੍ਤਭਾਵੇ ‘‘ਅਹਂ ਨੁ ਖੋਸ੍ਮਿ ਨੋ ਨੁ ਖੋਸ੍ਮੀ’’ਤਿਆਦਿਨਾ ਹੁਰਂ ਵਾ, ਅਤੀਤਾਨਾਗਤੇਸੁ ਅਤ੍ਤਭਾਵੇਸੁ ‘‘ਅਹੋਸਿਂ ਨੁ ਖੋ ਅਹਂ ਅਤੀਤਮਦ੍ਧਾਨ’’ਨ੍ਤਿਆਦਿਨਾ ਉਪ੍ਪਜ੍ਜਨਕਾ ਕਙ੍ਖਾ. ਸਕਵੇਦਿਯਾ ਵਾ ਪਰਵੇਦਿਯਾ ਵਾਤਿ ਤਾ ਏਵਂ ਵੁਤ੍ਤਨਯੇਨੇਵ ਸਕਅਤ੍ਤਭਾਵੇ ਆਰਮ੍ਮਣਵਸੇਨ ਪਟਿਲਭਿਤਬ੍ਬਾਯ ਪਵਤ੍ਤਿਯਾ ਸਕਵੇਦਿਯਾ ਵਾ ਪਰਸ੍ਸ ਅਤ੍ਤਭਾਵੇ ਪਟਿਲਭਿਤਬ੍ਬਾਯ ‘‘ਬੁਦ੍ਧੋ ਨੁ ਖੋ, ਨੋ ਨੁ ਖੋ’’ਤਿਆਦਿਨਾ ਵਾ ਪਰਸ੍ਮਿਂ ਪਧਾਨੇ ਉਤ੍ਤਮੇ ਪਟਿਲਭਿਤਬ੍ਬਾਯ ਪਵਤ੍ਤਿਯਾ ਪਰਵੇਦਿਯਾ ਵਾ ਯਾ ਕਾਚਿ ਕਙ੍ਖਾ ਵਿਚਿਕਿਚ੍ਛਾ. ਯੇ ਝਾਯਿਨੋ ਤਾ ਪਜਹਨ੍ਤਿ ਸਬ੍ਬਾ, ਆਤਾਪਿਨੋ ਬ੍ਰਹ੍ਮਚਰਿਯਂ ਚਰਨ੍ਤਾਤਿ ਯੇ ਆਰਮ੍ਮਣੂਪਨਿਜ੍ਝਾਨੇਨ ਲਕ੍ਖਣੂਪਨਿਜ੍ਝਾਨੇਨ ਝਾਯਿਨੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਚਤੁਬ੍ਬਿਧਸਮ੍ਮਪ੍ਪਧਾਨਪਾਰਿਪੂਰਿਯਾ ਆਤਾਪਿਨੋ ਮਗ੍ਗਬ੍ਰਹ੍ਮਚਰਿਯਂ ਚਰਨ੍ਤਾ ਅਧਿਗਚ੍ਛਨ੍ਤਾ ਸਦ੍ਧਾਨੁਸਾਰੀਆਦਿਪ੍ਪਭੇਦਾ ਪਠਮਮਗ੍ਗਟ੍ਠਾ ਪੁਗ੍ਗਲਾ, ਤਾ ਸਬ੍ਬਾ ਕਙ੍ਖਾ ਪਜਹਨ੍ਤਿ ਸਮੁਚ੍ਛਿਨ੍ਦਨ੍ਤਿ ਮਗ੍ਗਕ੍ਖਣੇ. ਤਤੋ ਪਰਂ ਪਨ ਤਾ ਪਹੀਨਾ ਨਾਮ ਹੋਨ੍ਤਿ, ਤਸ੍ਮਾ ਇਤੋ ਅਞ੍ਞਂ ਤਾਸਂ ਅਚ੍ਚਨ੍ਤਪ੍ਪਹਾਨਂ ਨਾਮ ਨਤ੍ਥੀਤਿ ਅਧਿਪ੍ਪਾਯੋ.

ਇਤਿ ਭਗਵਾ ਝਾਨਮੁਖੇਨ ਆਯਸ੍ਮਤੋ ਕਙ੍ਖਾਰੇਵਤਸ੍ਸ ਝਾਨਸੀਸੇਨ ਅਰਿਯਮਗ੍ਗਾਧਿਗਮਂ ਥੋਮੇਨ੍ਤੋ ਥੋਮਨਾਵਸੇਨ ਉਦਾਨਂ ਉਦਾਨੇਸਿ. ਤੇਨੇਵ ਚ ਨਂ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਝਾਯੀਨਂ ਯਦਿਦਂ ਕਙ੍ਖਾਰੇਵਤੋ’’ਤਿ (ਅ. ਨਿ. ੧.੨੦੪) ਝਾਯੀਭਾਵੇਨ ਏਤਦਗ੍ਗੇ ਠਪੇਸੀਤਿ.

ਸਤ੍ਤਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.