੯. ਉਪਸੇਨਸੁਤ੍ਤਵਣ੍ਣਨਾ

੩੯. ਨਵਮੇ ਉਪਸੇਨਸ੍ਸਾਤਿ ਏਤ੍ਥ ਉਪਸੇਨੋਤਿ ਤਸ੍ਸ ਥੇਰਸ੍ਸ ਨਾਮਂ, ਵਙ੍ਗਨ੍ਤਬ੍ਰਾਹ੍ਮਣਸ੍ਸ ਪਨ ਪੁਤ੍ਤਤ੍ਤਾ ‘‘ਵਙ੍ਗਨ੍ਤਪੁਤ੍ਤੋ’’ਤਿ ਚ ਨਂ ਵੋਹਰਨ੍ਤਿ.

ਅਯਞ੍ਹਿ ਥੇਰੋ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਕਨਿਟ੍ਠਭਾਤਾ, ਸਾਸਨੇ ਪਬ੍ਬਜਿਤ੍ਵਾ ਅਪਞ੍ਞਤ੍ਤੇ ਸਿਕ੍ਖਾਪਦੇ ਉਪਸਮ੍ਪਦਾਯ ਦ੍ਵਿਵਸ੍ਸੋ ਉਪਜ੍ਝਾਯੋ ਹੁਤ੍ਵਾ ਏਕਂ ਭਿਕ੍ਖੁਂ ਉਪਸਮ੍ਪਾਦੇਤ੍ਵਾ ਤੇਨ ਸਦ੍ਧਿਂ ਭਗਵਤੋ ਉਪਟ੍ਠਾਨਂ ਗਤੋ, ਤਸ੍ਸ ਭਿਕ੍ਖੁਨੋ ਭਗਵਤਾ ਤਸ੍ਸ ਸਦ੍ਧਿਵਿਹਾਰਿਕਭਾਵਂ ਪੁਚ੍ਛਿਤ੍ਵਾ ਖਨ੍ਧਕੇ ਆਗਤਨਯੇਨ ‘‘ਅਤਿਲਹੁਂ ਖੋ ਤ੍ਵਂ, ਮੋਘਪੁਰਿਸ, ਆਵਤ੍ਤੋ ਬਾਹੁਲ੍ਲਾਯ, ਯਦਿਦਂ ਗਣਬਨ੍ਧਿਯ’’ਨ੍ਤਿ (ਮਹਾਵ. ੭੫) ਵਿਗਰਹਿਤੋ ਪਤੋਦਾਭਿਤੁਨ੍ਨੋ ਵਿਯ ਆਜਾਨੀਯੋ ਸਂਵਿਗ੍ਗਮਾਨਸੋ ‘‘ਯਦਿਪਾਹਂ ਇਦਾਨਿ ਪਰਿਸਂ ਨਿਸ੍ਸਾਯ ਭਗਵਤਾ ਵਿਗਰਹਿਤੋ, ਪਰਿਸਂਯੇਵ ਪਨ ਨਿਸ੍ਸਾਯ ਪਾਸਂਸਿਯੋ ਭਵੇਯ੍ਯ’’ਨ੍ਤਿ ਉਸ੍ਸਾਹਜਾਤੋ ਸਬ੍ਬੇ ਧੁਤਧਮ੍ਮੇ ਸਮਾਦਾਯ ਵਤ੍ਤਮਾਨੋ ਵਿਪਸ੍ਸਨਂ ਆਰਭਿਤ੍ਵਾ ਨ ਚਿਰਸ੍ਸੇਵ ਛਲ਼ਭਿਞ੍ਞੋ ਪਟਿਸਮ੍ਭਿਦਾਪ੍ਪਤ੍ਤੋ ਮਹਾਖੀਣਾਸਵੋ ਹੁਤ੍ਵਾ ਅਤ੍ਤਨੋ ਨਿਸ੍ਸਿਤਕੇ ਧੁਤਙ੍ਗਧਰੇ ਏਵ ਕਤ੍ਵਾ ਤੇਹਿ ਸਦ੍ਧਿਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਸਨ੍ਥਤਸਿਕ੍ਖਾਪਦੇ (ਪਾਰਾ. ੫੬੫ ਆਦਯੋ) ਆਗਤਨਯੇਨ ‘‘ਪਾਸਾਦਿਕਾ ਖੋ ਤ੍ਯਾਯਂ, ਉਪਸੇਨ, ਪਰਿਸਾ’’ਤਿ ਪਰਿਸਵਸੇਨ ਭਗਵਤੋ ਸਨ੍ਤਿਕਾ ਲਦ੍ਧਪਸਂਸੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਸਮਨ੍ਤਪਾਸਾਦਿਕਾਨਂ ਯਦਿਦਂ ਉਪਸੇਨੋ ਵਙ੍ਗਨ੍ਤਪੁਤ੍ਤੋ’’ਤਿ (ਅ. ਨਿ. ੧.੨੧੩) ਏਤਦਗ੍ਗੇ ਠਪਿਤੋ ਅਸੀਤਿਯਾ ਮਹਾਸਾਵਕੇਸੁ ਅਬ੍ਭਨ੍ਤਰੋ.

ਸੋ ਏਕਦਿਵਸਂ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਅਨ੍ਤੇਵਾਸਿਕੇਸੁ ਅਤ੍ਤਨੋ ਅਤ੍ਤਨੋ ਦਿਵਾਟ੍ਠਾਨਂ ਗਤੇਸੁ ਉਦਕਕੁਮ੍ਭਤੋ ਉਦਕਂ ਗਹੇਤ੍ਵਾ ਪਾਦੇ ਪਕ੍ਖਾਲੇਤ੍ਵਾ ਗਤ੍ਤਾਨਿ ਸੀਤਿਂ ਕਤ੍ਵਾ ਚਮ੍ਮਕ੍ਖਣ੍ਡਂ ਅਤ੍ਥਰਿਤ੍ਵਾ ਦਿਵਾਟ੍ਠਾਨੇ ਦਿਵਾਵਿਹਾਰਂ ਨਿਸਿਨ੍ਨੋ ਅਤ੍ਤਨੋ ਗੁਣੇ ਆਵਜ੍ਜੇਸਿ. ਤਸ੍ਸ ਤੇ ਅਨੇਕਸਤਾ ਅਨੇਕਸਹਸ੍ਸਾ ਪੋਙ੍ਖਾਨੁਪੋਙ੍ਖਂ ਉਪਟ੍ਠਹਿਂਸੁ. ਸੋ ‘‘ਮਯ੍ਹਂ ਤਾਵ ਸਾਵਕਸ੍ਸ ਸਤੋ ਇਮੇ ਏਵਰੂਪਾ ਗੁਣਾ, ਕੀਦਿਸਾ ਨੁ ਖੋ ਮਯ੍ਹਂ ਸਤ੍ਥੁ ਗੁਣਾ’’ਤਿ ਭਗਵਤੋ ਗੁਣਾਭਿਮੁਖਂ ਮਨਸਿਕਾਰਂ ਪੇਸੇਸਿ. ਤੇ ਤਸ੍ਸ ਞਾਣਬਲਾਨੁਰੂਪਂ ਅਨੇਕਕੋਟਿਸਹਸ੍ਸਾ ਉਪਟ੍ਠਹਿਂਸੁ. ਸੋ ‘‘ਏਵਂਸੀਲੋ ਮੇ ਸਤ੍ਥਾ ਏਵਂਧਮ੍ਮੋ ਏਵਂਪਞ੍ਞੋ ਏਵਂਵਿਮੁਤ੍ਤੀ’’ਤਿਆਦਿਨਾ ਚ ‘‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿਆਦਿਨਾ ਚ ਆਵਿਭਾਵਾਨੁਰੂਪਂ ਸਤ੍ਥੁ ਗੁਣੇ ਅਨੁਸ੍ਸਰਿਤ੍ਵਾ, ਤਤੋ ‘‘ਸ੍ਵਾਕ੍ਖਾਤੋ’’ਤਿਆਦਿਨਾ ਧਮ੍ਮਸ੍ਸ, ‘‘ਸੁਪ੍ਪਟਿਪਨ੍ਨੋ’’ਤਿਆਦਿਨਾ ਅਰਿਯਸਙ੍ਘਸ੍ਸ ਚ ਗੁਣੇ ਅਨੁਸ੍ਸਰਿ. ਏਵਂ ਮਹਾਥੇਰੋ ਅਨੇਕਾਕਾਰਵੋਕਾਰਂ ਰਤਨਤ੍ਤਯਗੁਣੇਸੁ ਆਵਿਭੂਤੇਸੁ ਅਤ੍ਤਮਨੋ ਪਮੁਦਿਤੋ ਉਲ਼ਾਰਪੀਤਿਸੋਮਨਸ੍ਸਂ ਪਟਿਸਂਵੇਦੇਨ੍ਤੋ ਨਿਸੀਦਿ. ਤਮਤ੍ਥਂ ਦਸ੍ਸੇਤੁਂ ‘‘ਆਯਸ੍ਮਤੋ ਉਪਸੇਨਸ੍ਸ ਵਙ੍ਗਨ੍ਤਪੁਤ੍ਤਸ੍ਸ ਰਹੋਗਤਸ੍ਸਾ’’ਤਿਆਦਿ ਵੁਤ੍ਤਂ.

ਤਤ੍ਥ ਰਹੋਗਤਸ੍ਸਾਤਿ ਰਹਸਿ ਗਤਸ੍ਸ. ਪਟਿਸਲ੍ਲੀਨਸ੍ਸਾਤਿ ਏਕੀਭੂਤਸ੍ਸ. ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦੀਤਿ ਏਵਂ ਇਦਾਨਿ ਵੁਚ੍ਚਮਾਨਾਕਾਰੋ ਚਿਤ੍ਤਸ੍ਸ ਵਿਤਕ੍ਕੋ ਉਪ੍ਪਜ੍ਜਿ. ਲਾਭਾ ਵਤ ਮੇਤਿ ਯੇ ਇਮੇ ਮਨੁਸ੍ਸਤ੍ਤਬੁਦ੍ਧੁਪ੍ਪਾਦਸਦ੍ਧਾਸਮਧਿਗਮਾਦਯੋ, ਅਹੋ ਵਤ ਮੇ ਏਤੇ ਲਾਭਾ. ਸੁਲਦ੍ਧਂ ਵਤ ਮੇਤਿ ਯਞ੍ਚਿਦਂ ਮਯਾ ਭਗਵਤੋ ਸਾਸਨੇ ਪਬ੍ਬਜ੍ਜੂਪਸਮ੍ਪਦਾਰਤਨਤ੍ਤਯਪਯਿਰੁਪਾਸਨਾਦਿ ਪਟਿਲਦ੍ਧਂ, ਤਂ ਮੇ ਅਹੋ ਵਤ ਸੁਟ੍ਠੁ ਲਦ੍ਧਂ. ਤਤ੍ਥ ਕਾਰਣਮਾਹ ‘‘ਸਤ੍ਥਾ ਚ ਮੇ’’ਤਿਆਦਿਨਾ.

ਤਤ੍ਥ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਯਥਾਰਹਂ ਸਤ੍ਤੇ ਅਨੁਸਾਸਤੀਤਿ ਸਤ੍ਥਾ. ਭਾਗ੍ਯਵਨ੍ਤਤਾਦੀਹਿ ਕਾਰਣੇਹਿ ਭਗਵਾ. ਆਰਕਤ੍ਤਾ ਕਿਲੇਸੇਹਿ, ਕਿਲੇਸਾਰੀਨਂ ਹਤਤ੍ਤਾ, ਸਂਸਾਰਚਕ੍ਕਸ੍ਸ ਵਾ ਅਰਾਨਂ ਹਤਤ੍ਤਾ, ਪਚ੍ਚਯਾਦੀਨਂ ਅਰਹਤ੍ਤਾ, ਪਾਪਕਰਣੇ ਰਹਾਭਾਵਾ ਅਰਹਂ. ਸਮ੍ਮਾ ਸਾਮਞ੍ਚ ਸਬ੍ਬਧਮ੍ਮਾਨਂ ਬੁਦ੍ਧਤ੍ਤਾ ਸਮ੍ਮਾਸਮ੍ਬੁਦ੍ਧੋਤਿ ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੨੩ ਆਦਯੋ) ਬੁਦ੍ਧਾਨੁਸ੍ਸਤਿਨਿਦ੍ਦੇਸਤੋ ਗਹੇਤਬ੍ਬੋ.

ਸ੍ਵਾਕ੍ਖਾਤੇਤਿ ਸੁਟ੍ਠੁ ਅਕ੍ਖਾਤੇ, ਏਕਨ੍ਤਨਿਯ੍ਯਾਨਿਕਂ ਕਤ੍ਵਾ ਭਾਸਿਤੇ. ਧਮ੍ਮਵਿਨਯੇਤਿ ਪਾਵਚਨੇ. ਤਞ੍ਹਿ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨਾਨਂ ਸਂਸਾਰਦੁਕ੍ਖਪਾਤਤੋ ਧਾਰਣੇਨ, ਰਾਗਾਦਿਕਿਲੇਸੇ ਵਿਨਯਨੇਨ ਚ ਧਮ੍ਮਵਿਨਯੋਤਿ ਵੁਚ੍ਚਤਿ. ਸਬ੍ਰਹ੍ਮਚਾਰਿਨੋਤਿ ਸੇਟ੍ਠਟ੍ਠੇਨ ਬ੍ਰਹ੍ਮਸਙ੍ਖਾਤਂ ਭਗਵਤੋ ਸਾਸਨਂ ਅਰਿਯਮਗ੍ਗਂ ਸਹ ਚਰਨ੍ਤਿ ਪਟਿਪਜ੍ਜਨ੍ਤੀਤਿ ਸਬ੍ਰਹ੍ਮਚਾਰਿਨੋ. ਸੀਲਵਨ੍ਤੋਤਿ ਮਗ੍ਗਫਲਸੀਲਵਸੇਨ ਸੀਲਵਨ੍ਤੋ. ਕਲ੍ਯਾਣਧਮ੍ਮਾਤਿ ਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਾਦਯੋ ਕਲ੍ਯਾਣਾ ਸੁਨ੍ਦਰਾ ਧਮ੍ਮਾ ਏਤੇਸਂ ਅਤ੍ਥੀਤਿ ਕਲ੍ਯਾਣਧਮ੍ਮਾ. ਏਤੇਨ ਸਙ੍ਘਸ੍ਸ ਸੁਪ੍ਪਟਿਪਤ੍ਤਿਂ ਦਸ੍ਸੇਤਿ. ਸੀਲੇਸੁ ਚਮ੍ਹਿ ਪਰਿਪੂਰਕਾਰੀਤਿ ‘‘ਅਹਮ੍ਪਿ ਪਬ੍ਬਜਿਤ੍ਵਾ ਨ ਤਿਰਚ੍ਛਾਨਕਥਾਕਥਿਕੋ ਕਾਯਦਲ਼੍ਹਿਬਹੁਲੋ ਹੁਤ੍ਵਾ ਵਿਹਾਸਿਂ, ਅਥ ਖੋ ਪਾਤਿਮੋਕ੍ਖਸਂਵਰਾਦਿਂ ਚਤੁਬ੍ਬਿਧਮ੍ਪਿ ਸੀਲਂ ਅਖਣ੍ਡਂ ਅਛਿਦ੍ਦਂ ਅਸਬਲਂ ਅਕਮ੍ਮਾਸਂ ਭੁਜਿਸ੍ਸਂ ਵਿਞ੍ਞੁਪ੍ਪਸਤ੍ਥਂ ਅਪਰਾਮਟ੍ਠਂ ਕਤ੍ਵਾ ਪਰਿਪੂਰੇਨ੍ਤੋ ਅਰਿਯਮਗ੍ਗਂਯੇਵ ਪਾਪੇਸਿ’’ਨ੍ਤਿ ਵਦਤਿ. ਏਤੇਨ ਹੇਟ੍ਠਿਮਫਲਦ੍ਵਯਸਮ੍ਪਤ੍ਤਿਮਤ੍ਤਨੋ ਦੀਪੇਤਿ. ਸੋਤਾਪਨ੍ਨਸਕਦਾਗਾਮਿਨੋ ਹਿ ਸੀਲੇਸੁ ਪਰਿਪੂਰਕਾਰਿਨੋ. ਸੁਸਮਾਹਿਤੋ ਚਮ੍ਹਿ ਏਕਗ੍ਗਚਿਤ੍ਤੋਤਿ ਉਪਚਾਰਪ੍ਪਨਾਭੇਦੇਨ ਸਮਾਧਿਨਾ ਸਬ੍ਬਥਾਪਿ ਸਮਾਹਿਤੋ ਚ ਅਮ੍ਹਿ ਅਵਿਕ੍ਖਿਤ੍ਤਚਿਤ੍ਤੋ. ਇਮਿਨਾ ਸਮਾਧਿਸ੍ਮਿਂ ਪਰਿਪੂਰਕਾਰਿਤਾਵਚਨੇਨ ਤਤਿਯਫਲਸਮ੍ਪਤ੍ਤਿਮਤ੍ਤਨੋ ਦੀਪੇਤਿ. ਅਨਾਗਾਮਿਨੋ ਹਿ ਸਮਾਧਿਸ੍ਮਿਂ ਪਰਿਪੂਰਕਾਰਿਨੋ. ਅਰਹਾ ਚਮ੍ਹਿ ਖੀਣਾਸਵੋਤਿ ਕਾਮਾਸਵਾਦੀਨਂ ਸਬ੍ਬਸੋ ਖੀਣਤ੍ਤਾ ਖੀਣਾਸਵੋ, ਤਤੋ ਏਵ ਪਰਿਕ੍ਖੀਣਭਵਸਂਯੋਜਨੋ ਸਦੇਵਕੇ ਲੋਕੇ ਅਗ੍ਗਦਕ੍ਖਿਣੇਯ੍ਯਤਾਯ ਅਰਹਾ ਚਮ੍ਹਿ. ਏਤੇਨ ਅਤ੍ਤਨੋ ਕਤਕਰਣੀਯਤਂ ਦਸ੍ਸੇਤਿ. ਮਹਿਦ੍ਧਿਕੋ ਚਮ੍ਹਿ ਮਹਾਨੁਭਾਵੋਤਿ ਅਧਿਟ੍ਠਾਨਵਿਕੁਬ੍ਬਨਾਦਿਇਦ੍ਧੀਸੁ ਮਹਤਾ ਵਸੀਭਾਵੇਨ ਸਮਨ੍ਨਾਗਤਤ੍ਤਾ ਮਹਿਦ੍ਧਿਕੋ ਉਲ਼ਾਰਸ੍ਸ ਪੁਞ੍ਞਾਨੁਭਾਵਸ੍ਸ ਗੁਣਾਨੁਭਾਵਸ੍ਸ ਚ ਸਮ੍ਪਤ੍ਤਿਯਾ ਮਹਾਨੁਭਾਵੋ ਚ ਅਸ੍ਮਿ. ਏਤੇਨ ਲੋਕਿਯਾਭਿਞ੍ਞਾਨਵਾਨੁਪੁਬ੍ਬਵਿਹਾਰਸਮਾਪਤ੍ਤਿਯੋਗਮਤ੍ਤਨੋ ਦੀਪੇਤਿ. ਅਭਿਞ੍ਞਾਸੁ ਵਸੀਭਾਵੇਨ ਹਿ ਅਰਿਯਾ ਯਥਿਚ੍ਛਿਤਨਿਪ੍ਫਾਦਨੇਨ ਮਹਿਦ੍ਧਿਕਾ, ਪੁਬ੍ਬੂਪਨਿਸ੍ਸਯਸਮ੍ਪਤ੍ਤਿਯਾ ਨਾਨਾਵਿਹਾਰਸਮਾਪਤ੍ਤੀਹਿ ਚ ਵਿਸੋਧਿਤਸਨ੍ਤਾਨਤ੍ਤਾ ਮਹਾਨੁਭਾਵਾ ਚ ਹੋਨ੍ਤੀਤਿ.

ਭਦ੍ਦਕਂ ਮੇ ਜੀਵਿਤਨ੍ਤਿ ਏਵਂਵਿਧਸੀਲਾਦਿਗੁਣਸਮਨ੍ਨਾਗਤਸ੍ਸ ਮੇ ਯਾਵਾਯਂ ਕਾਯੋ ਧਰਤਿ, ਤਾਵ ਸਤ੍ਤਾਨਂ ਹਿਤਸੁਖਮੇਵ ਵਡ੍ਢਤਿ, ਪੁਞ੍ਞਕ੍ਖੇਤ੍ਤਭਾਵਤੋ ਜੀਵਿਤਮ੍ਪਿ ਮੇ ਭਦ੍ਦਕਂ ਸੁਨ੍ਦਰਂ. ਭਦ੍ਦਕਂ ਮਰਣਨ੍ਤਿ ਸਚੇ ਪਨਿਦਂ ਖਨ੍ਧਪਞ੍ਚਕਂ ਅਜ੍ਜ ਵਾ ਇਮਸ੍ਮਿਂਯੇਵ ਵਾ ਖਣੇ ਅਨੁਪਾਦਾਨੋ ਵਿਯ ਜਾਤਵੇਦੋ ਨਿਬ੍ਬਾਯਤਿ, ਤਂ ਅਪ੍ਪਟਿਸਨ੍ਧਿਕਂ ਪਰਿਨਿਬ੍ਬਾਨਸਙ੍ਖਾਤਂ ਮਰਣਮ੍ਪਿ ਮੇ ਭਦ੍ਦਕਨ੍ਤਿ ਉਭਯਤ੍ਥ ਤਾਦਿਭਾਵਂ ਦੀਪੇਤਿ. ਏਵਂ ਮਹਾਥੇਰੋ ਅਪ੍ਪਹੀਨਸੋਮਨਸ੍ਸੁਪ੍ਪਿਲਾਵਿਤਵਾਸਨੁਸ੍ਸਨ੍ਨਤ੍ਤਾ ਉਲ਼ਾਰਸੋਮਨਸ੍ਸਿਤੋ ਧਮ੍ਮਬਹੁਮਾਨੇਨ ਧਮ੍ਮਪੀਤਿਪਟਿਸਂਵੇਦਨੇਨ ਪਰਿਵਿਤਕ੍ਕੇਸਿ.

ਤਂ ਸਤ੍ਥਾ ਗਨ੍ਧਕੁਟਿਯਂ ਨਿਸਿਨ੍ਨੋਵ ਸਬ੍ਬਞ੍ਞੁਤਞ੍ਞਾਣੇਨ ਜਾਨਿਤ੍ਵਾ ਜੀਵਿਤੇ ਮਰਣੇ ਚ ਤਸ੍ਸ ਤਾਦਿਭਾਵਵਿਭਾਵਨਂ ਇਮਂ ਉਦਾਨਂ ਉਦਾਨੇਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਭਗਵਾ…ਪੇ… ਉਦਾਨੇਸੀ’’ਤਿ.

ਤਤ੍ਥ ਯਂ ਜੀਵਿਤਂ ਨ ਤਪਤੀਤਿ ਯਂ ਖੀਣਾਸਵਪੁਗ੍ਗਲਂ ਜੀਵਿਤਂ ਆਯਤਿਂ ਖਨ੍ਧਪ੍ਪਵਤ੍ਤਿਯਾ ਸਬ੍ਬੇਨ ਸਬ੍ਬਂ ਅਭਾਵਤੋ ਨ ਤਪਤਿ ਨ ਬਾਧਤਿ, ਵਤ੍ਤਮਾਨਮੇਵ ਵਾ ਜੀਵਿਤਂ ਸਬ੍ਬਸੋ ਸਙ੍ਖਤਧਮ੍ਮਤ੍ਤਾ ਸਤਿਪਞ੍ਞਾਵੇਪੁਲ੍ਲਪ੍ਪਤ੍ਤਿਯਾ ਸਬ੍ਬਤ੍ਥ ਸਤਿਸਮ੍ਪਜਞ੍ਞਸਮਾਯੋਗਤੋ ਨ ਬਾਧਤਿ. ਯੋ ਹਿ ਅਨ੍ਧਪੁਥੁਜ੍ਜਨੋ ਪਾਪਜਨਸੇਵੀ ਅਯੋਨਿਸੋਮਨਸਿਕਾਰਬਹੁਲੋ ਅਕਤਕੁਸਲੋ ਅਕਤਪੁਞ੍ਞੋ, ਸੋ ‘‘ਅਕਤਂ ਵਤ ਮੇ ਕਲ੍ਯਾਣ’’ਨ੍ਤਿਆਦਿਨਾ ਵਿਪ੍ਪਟਿਸਾਰੇਨ ਤਪਤੀਤਿ ਤਸ੍ਸ ਜੀਵਿਤਂ ਤਂ ਤਪਤਿ ਨਾਮ. ਇਤਰੇ ਪਨ ਅਕਤਪਾਪਾ ਕਤਪੁਞ੍ਞਾ ਕਲ੍ਯਾਣਪੁਥੁਜ੍ਜਨੇਨ ਸਦ੍ਧਿਂ ਸਤ੍ਤ ਸੇਖਾ ਤਪਨੀਯਧਮ੍ਮਪਰਿਵਜ੍ਜਨੇਨ ਅਤਪਨੀਯਧਮ੍ਮਸਮਨ੍ਨਾਗਮੇਨ ਚ ਪਚ੍ਛਾਨੁਤਾਪੇਨ ਨ ਤਪਨ੍ਤੀਤਿ ਨ ਤੇਸਂ ਜੀਵਿਤਂ ਤਪਤਿ. ਖੀਣਾਸਵੇ ਪਨ ਵਤ੍ਤਬ੍ਬਮੇਵ ਨਤ੍ਥੀਤਿ ਪਵਤ੍ਤਿਦੁਕ੍ਖਵਸੇਨ ਅਤ੍ਥਵਣ੍ਣਨਾ ਕਤਾ.

ਮਰਣਨ੍ਤੇ ਨ ਸੋਚਤੀਤਿ ਮਰਣਸਙ੍ਖਾਤੇ ਅਨ੍ਤੇ ਪਰਿਯੋਸਾਨੇ, ਮਰਣਸਮੀਪੇ ਵਾ ਨ ਸੋਚਤਿ ਅਨਾਗਾਮਿਮਗ੍ਗੇਨੇਵ ਸੋਕਸ੍ਸ ਸਮੁਗ੍ਘਾਤਿਤਤ੍ਤਾ. ਸ ਵੇ ਦਿਟ੍ਠਪਦੋ ਧੀਰੋ, ਸੋਕਮਜ੍ਝੇ ਨ ਸੋਚਤੀਤਿ ਸੋ ਅਨਭਿਜ੍ਝਾਦੀਨਂ ਚਤੁਨ੍ਨਂ ਧਮ੍ਮਪਦਾਨਂ ਨਿਬ੍ਬਾਨਸ੍ਸੇਵ ਵਾ ਦਿਟ੍ਠਤ੍ਤਾ ਦਿਟ੍ਠਪਦੋ, ਧਿਤਿਸਮ੍ਪਨ੍ਨਤ੍ਤਾ ਧੀਰੋ ਖੀਣਾਸਵੋ ਸੋਚਨਧਮ੍ਮਤ੍ਤਾ ‘‘ਸੋਕਾ’’ਤਿ ਲਦ੍ਧਨਾਮਾਨਂ ਅਵੀਤਰਾਗਾਨਂ ਸਤ੍ਤਾਨਂ, ਸੋਕਹੇਤੂਨਂ ਵਾ ਲੋਕਧਮ੍ਮਾਨਂ ਮਜ੍ਝੇ ਠਤ੍ਵਾਪਿ ਨ ਸੋਚਤਿ.

ਇਦਾਨਿਸ੍ਸ ਸਬ੍ਬਸੋ ਸੋਕਹੇਤੂਨਂ ਅਭਾਵਂ ਦੀਪੇਤੁਂ ‘‘ਉਚ੍ਛਿਨ੍ਨਭਵਤਣ੍ਹਸ੍ਸਾ’’ਤਿਆਦਿਮਾਹ. ਤਤ੍ਥ ਯਸ੍ਸ ਅਗ੍ਗਮਗ੍ਗੇਨ ਸਬ੍ਬਸੋ ਉਚ੍ਛਿਨ੍ਨਾ ਭਵਤਣ੍ਹਾ, ਸੋ ਉਚ੍ਛਿਨ੍ਨਭਵਤਣ੍ਹੋ. ਤਸ੍ਸ ਅਵਸੇਸਕਿਲੇਸਾਨਂ ਅਨਵਸੇਸਵੂਪਸਮੇਨ ਸਨ੍ਤਚਿਤ੍ਤਸ੍ਸ ਖੀਣਾਸਵਭਿਕ੍ਖੁਨੋ. ਵਿਕ੍ਖੀਣੋ ਜਾਤਿਸਂਸਾਰੋਤਿ ਜਾਤਿਆਦਿਕੋ –

‘‘ਖਨ੍ਧਾਨਞ੍ਚ ਪਟਿਪਾਟਿ, ਧਾਤੁਆਯਤਨਾਨ ਚ;

ਅਬ੍ਬੋਚ੍ਛਿਨ੍ਨਂ ਵਤ੍ਤਮਾਨਾ, ‘ਸਂਸਾਰੋ’ਤਿ ਪਵੁਚ੍ਚਤੀ’’ਤਿ. –

ਵੁਤ੍ਤਲਕ੍ਖਣੋ ਸਂਸਾਰੋ ਵਿਸੇਸਤੋ ਖੀਣੋ. ਤਸ੍ਮਾ ਨਤ੍ਥਿ ਤਸ੍ਸ ਪੁਨਬ੍ਭਵੋਤਿ ਯਸ੍ਮਾ ਤਸ੍ਸ ਏਵਰੂਪਸ੍ਸ ਅਰਿਯਪੁਗ੍ਗਲਸ੍ਸ ਆਯਤਿਂ ਪੁਨਬ੍ਭਵੋ ਨਤ੍ਥਿ, ਤਸ੍ਮਾ ਤਸ੍ਸ ਜਾਤਿਸਂਸਾਰੋ ਖੀਣੋ. ਕਸ੍ਮਾ ਪਨਸ੍ਸ ਪੁਨਬ੍ਭਵੋ ਨਤ੍ਥਿ? ਯਸ੍ਮਾ ਉਚ੍ਛਿਨ੍ਨਭਵਤਣ੍ਹੋ ਸਨ੍ਤਚਿਤ੍ਤੋ ਚ ਹੋਤਿ, ਤਸ੍ਮਾਤਿ ਆਵਤ੍ਤੇਤ੍ਵਾ ਵਤ੍ਤਬ੍ਬਂ. ਅਥ ਵਾ ਵਿਕ੍ਖੀਣੋ ਜਾਤਿਸਂਸਾਰੋ, ਤਤੋ ਏਵ ਨਤ੍ਥਿ ਤਸ੍ਸ ਪੁਨਬ੍ਭਵੋਤਿ ਅਤ੍ਥੋ ਯੋਜੇਤਬ੍ਬੋ.

ਨਵਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.