੧੦. ਸਾਰਿਪੁਤ੍ਤਉਪਸਮਸੁਤ੍ਤਵਣ੍ਣਨਾ

੪੦. ਦਸਮੇ ਅਤ੍ਤਨੋ ਉਪਸਮਨ੍ਤਿ ਸਾਵਕਪਾਰਮੀਮਤ੍ਥਕਪ੍ਪਤ੍ਤਿਯਾ ਹੇਤੁਭੂਤਂ ਅਗ੍ਗਮਗ੍ਗੇਨ ਅਤ੍ਤਨੋ ਅਨਵਸੇਸਕਿਲੇਸਵੂਪਸਮਂ.

ਆਯਸ੍ਮਾ ਹਿ ਸਾਰਿਪੁਤ੍ਤੋ ਅਨੁਪਸਨ੍ਤਕਿਲੇਸਾਨਂ ਸਤ੍ਤਾਨਂ ਰਾਗਾਦਿਕਿਲੇਸਜਨਿਤਸਨ੍ਤਾਪਦਰਥਪਰਿਲ਼ਾਹਦੁਕ੍ਖਞ੍ਚੇਵ ਕਿਲੇਸਾਭਿਸਙ੍ਖਾਰਨਿਮਿਤ੍ਤਂ ਜਾਤਿਜਰਾਬ੍ਯਾਧਿਮਰਣਸੋਕਪਰਿਦੇਵਾਦਿਦੁਕ੍ਖਞ੍ਚ ਪਚ੍ਚਕ੍ਖਤੋ ਦਿਸ੍ਵਾ ਅਤੀਤਾਨਾਗਤੇਪਿ ਨੇਸਂ ਵਟ੍ਟਮੂਲਕਦੁਕ੍ਖਂ ਪਰਿਤੁਲੇਤ੍ਵਾ ਕਰੁਣਾਯਮਾਨੋ ਅਤ੍ਤਨਾਪਿ ਪੁਥੁਜ੍ਜਨਕਾਲੇ ਅਨੁਭੂਤਂ ਕਿਲੇਸਨਿਮਿਤ੍ਤਂ ਵਾ ਅਨਪ੍ਪਕਂ ਦੁਕ੍ਖਂ ਅਨੁਸ੍ਸਰਿਤ੍ਵਾ ‘‘ਈਦਿਸਸ੍ਸ ਨਾਮ ਮਹਾਦੁਕ੍ਖਸ੍ਸ ਹੇਤੁਭੂਤਾ ਕਿਲੇਸਾ ਇਦਾਨਿ ਮੇ ਸੁਪ੍ਪਹੀਨਾ’’ਤਿ ਅਤ੍ਤਨੋ ਕਿਲੇਸਵੂਪਸਮਂ ਅਭਿਣ੍ਹਂ ਪਚ੍ਚਵੇਕ੍ਖਤਿ. ਪਚ੍ਚਵੇਕ੍ਖਨ੍ਤੋ ਚ ‘‘ਇਮੇ ਏਤ੍ਤਕਾ ਕਿਲੇਸਾ ਸੋਤਾਪਤ੍ਤਿਮਗ੍ਗੇਨ ਉਪਸਮਿਤਾ, ਏਤ੍ਤਕਾ ਸਕਦਾਗਾਮਿਮਗ੍ਗੇਨ, ਏਤ੍ਤਕਾ ਅਨਾਗਾਮਿਮਗ੍ਗੇਨ, ਏਤ੍ਤਕਾ ਅਰਹਤ੍ਤਮਗ੍ਗੇਨ ਉਪਸਮਿਤਾ’’ਤਿ ਤਂਤਂਮਗ੍ਗਞਾਣੇਹਿ ਓਧਿਸੋ ਕਿਲੇਸਾਨਂ ਉਪਸਮਿਤਭਾਵਂ ਪਚ੍ਚਵੇਕ੍ਖਤਿ, ਤੇਨ ਵੁਤ੍ਤਂ – ‘‘ਅਤ੍ਤਨੋ ਉਪਸਮਂ ਪਚ੍ਚਵੇਕ੍ਖਮਾਨੋ’’ਤਿ.

ਅਪਰੇ ‘‘ਥੇਰੋ ਅਰਹਤ੍ਤਫਲਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਂ ਪਚ੍ਚਵੇਕ੍ਖਿਤ੍ਵਾ ‘ਇਮਸ੍ਸ ਵਤਾਯਂ ਸਨ੍ਤਪਣੀਤਭਾਵੋ ਅਚ੍ਚਨ੍ਤਸਨ੍ਤਾਯ ਅਸਙ੍ਖਤਾਯ ਧਾਤੁਯਾ ਆਰਮ੍ਮਣਤੋ, ਸਯਞ੍ਚ ਸਮ੍ਮਦੇਵ ਕਿਲੇਸਵੂਪਸਮਤੋ’ਤਿ ਏਵਂ ਅਭਿਣ੍ਹਂ ਉਪਸਮਂ ਪਚ੍ਚਵੇਕ੍ਖਤੀ’’ਤਿ ਵਦਨ੍ਤਿ. ਅਞ੍ਞੇ ਪਨ ‘‘ਅਨਵਸੇਸਕਿਲੇਸਾਨਂ ਉਪਸਮਪਰਿਯੋਸਾਨੇ ਜਾਤਂ ਅਗ੍ਗਫਲਮੇਵੇਤ੍ਥ ਉਪਸਮੋ ਨਾਮ, ਤਂ ਪਚ੍ਚਵੇਕ੍ਖਮਾਨੋ ਨਿਸਿਨ੍ਨੋ’’ਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਯਦਿਦਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਮਹਾਪਞ੍ਞਤਾਦਿਹੇਤੁਭੂਤਂ ਸਾਵਕੇਸੁ ਅਨਞ੍ਞਸਾਧਾਰਣਂ ਕਿਲੇਸਪ੍ਪਹਾਨਂ ਅਗ੍ਗਫਲਂ ਵਾ ਉਪਸਮਪਰਿਯਾਯੇਨ ਵੁਤ੍ਤਂ, ਤਸ੍ਸ ਪਚ੍ਚਵੇਕ੍ਖਣਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ ਤਦਨੁਭਾਵਦੀਪਕਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਉਪਸਨ੍ਤਸਨ੍ਤਚਿਤ੍ਤਸ੍ਸਾਤਿ ਉਪਸਨ੍ਤਮੇਵ ਹੁਤ੍ਵਾ ਸਨ੍ਤਂ ਚਿਤ੍ਤਂ ਏਤਸ੍ਸਾਤਿ ਉਪਸਨ੍ਤਸਨ੍ਤਚਿਤ੍ਤੋ. ਸਮਾਪਤ੍ਤਿਯਾ ਵਿਕ੍ਖਮ੍ਭਨੇਨ ਹਿ ਉਪਸਨ੍ਤਕਿਲੇਸਤ੍ਤਾ ਉਪਸਨ੍ਤਚਿਤ੍ਤਂ ਨ ਸਬ੍ਬਥਾ ‘‘ਉਪਸਨ੍ਤਸਨ੍ਤ’’ਨ੍ਤਿ ਵੁਚ੍ਚਤਿ ਤਸ੍ਸ ਉਪਸਮਸ੍ਸ ਅਨਚ੍ਚਨ੍ਤਿਕਭਾਵਤੋ, ਨ ਤਥਾ ਅਗ੍ਗਮਗ੍ਗੇਨ. ਤੇਨ ਪਨ ਅਚ੍ਚਨ੍ਤਮੇਵ ਕਿਲੇਸਾਨਂ ਸਮੁਚ੍ਛਿਨ੍ਨਤ੍ਤਾ ਅਰਹਤੋ ਚਿਤ੍ਤਂ ਪੁਨ ਕਿਲੇਸਾਨਂ ਅਨੁਪਸਮੇਤਬ੍ਬਤਾਯ ਸਮਥਵਿਪਸ੍ਸਨਾਹੇਟ੍ਠਿਮਮਗ੍ਗੇਹਿ ਉਪਸਨ੍ਤਕਿਲੇਸਂ ਹੁਤ੍ਵਾ ਅਚ੍ਚਨ੍ਤਸਨ੍ਤਭਾਵਤੋਵ ‘‘ਉਪਸਨ੍ਤਸਨ੍ਤ’’ਨ੍ਤਿ ਵੁਚ੍ਚਤਿ. ਤੇਨ ਵੁਤ੍ਤਂ – ‘‘ਉਪਸਨ੍ਤਮੇਵ ਹੁਤ੍ਵਾ ਸਨ੍ਤਂ ਚਿਤ੍ਤਂ ਏਤਸ੍ਸਾਤਿ ਉਪਸਨ੍ਤਸਨ੍ਤਚਿਤ੍ਤੋ’’ਤਿ. ਉਪਸਨ੍ਤਨ੍ਤਿ ਵਾ ਉਪਸਮੋ ਵੁਚ੍ਚਤਿ, ਤਸ੍ਮਾ ‘‘ਉਪਸਨ੍ਤਸਨ੍ਤਚਿਤ੍ਤਸ੍ਸਾ’’ਤਿ ਅਚ੍ਚਨ੍ਤੂਪਸਮੇਨ ਸਨ੍ਤਚਿਤ੍ਤਸ੍ਸਾਤਿ ਅਤ੍ਥੋ.

ਅਥ ਵਾ ਸਤਿਪਿ ਸਬ੍ਬੇਸਂ ਖੀਣਾਸਵਾਨਂ ਅਨਵਸੇਸਕਿਲੇਸਵੂਪਸਮੇ ਸਾਵਕਪਾਰਮੀਞਾਣਸ੍ਸ ਪਨ ਮਤ੍ਥਕਪ੍ਪਤ੍ਤਿਹੇਤੁਭੂਤੋ ਸਾਵਕੇਸੁ ਅਨਞ੍ਞਸਾਧਾਰਣੋ ਸਵਿਸੇਸੋ ਧਮ੍ਮਸੇਨਾਪਤਿਨੋ ਕਿਲੇਸਵੂਪਸਮੋਤਿ ਦਸ੍ਸੇਤੁਂ ਸਤ੍ਥਾ ਉਪਸਨ੍ਤਸਦ੍ਦੇਨ ਵਿਸੇਸੇਤ੍ਵਾ ਆਹ ‘‘ਉਪਸਨ੍ਤਸਨ੍ਤਚਿਤ੍ਤਸ੍ਸਾ’’ਤਿ.

ਤਤ੍ਰਾਯਮਤ੍ਥੋ – ਭੁਸਂ ਦਲ਼੍ਹਂ ਵਾ ਸਨ੍ਤਂ ਉਪਸਨ੍ਤਂ, ਤੇਨ ਉਪਸਨ੍ਤੇਨ ਉਪਸਨ੍ਤਮੇਵ ਹੁਤ੍ਵਾ ਸਨ੍ਤਂ ਉਪਸਨ੍ਤਸਨ੍ਤਂ, ਤਾਦਿਸਂ ਚਿਤ੍ਤਂ ਏਤਸ੍ਸਾਤਿ ਸਬ੍ਬਂ ਪੁਰਿਮਸਦਿਸਮੇਵ. ਤਥਾ ਹੇਸ ਭਗਵਤਾ – ‘‘ਸਾਰਿਪੁਤ੍ਤੋ, ਭਿਕ੍ਖਵੇ, ਮਹਾਪਞ੍ਞੋ ਪੁਥੁਪਞ੍ਞੋ ਹਾਸਪਞ੍ਞੋ ਜਵਨਪਞ੍ਞੋ ਤਿਕ੍ਖਪਞ੍ਞੋ ਨਿਬ੍ਬੇਧਿਕਪਞ੍ਞੋ’’ਤਿਆਦਿਨਾ (ਮ. ਨਿ. ੩.੯੩) ਅਨੇਕਪਰਿਯਾਯੇਨ ਵਣ੍ਣਿਤੋ ਥੋਮਿਤੋ. ਨੇਤ੍ਤਿਚ੍ਛਿਨ੍ਨਸ੍ਸਾਤਿ ਨੇਤ੍ਤਿ ਵੁਚ੍ਚਤਿ ਭਵਤਣ੍ਹਾ ਸਂਸਾਰਸ੍ਸ ਨਯਨਤੋ, ਸਾ ਨੇਤ੍ਤਿ ਛਿਨ੍ਨਾ ਏਤਸ੍ਸਾਤਿ ਨੇਤ੍ਤਿਚ੍ਛਿਨ੍ਨੋ. ਤਸ੍ਸ ਨੇਤ੍ਤਿਚ੍ਛਿਨ੍ਨਸ੍ਸ, ਪਹੀਨਤਣ੍ਹਸ੍ਸਾਤਿ ਅਤ੍ਥੋ. ਮੁਤ੍ਤੋ ਸੋ ਮਾਰਬਨ੍ਧਨਾਤਿ ਸੋ ਏਵਂਵਿਧੋ ਪਰਿਕ੍ਖੀਣਭਵਸਂਯੋਜਨੋ ਸਬ੍ਬਸ੍ਮਾ ਮਾਰਬਨ੍ਧਨਤੋ ਮੁਤ੍ਤੋ, ਨ ਤਸ੍ਸ ਮਾਰਬਨ੍ਧਨਮੋਚਨਾਯ ਕਰਣੀਯਂ ਅਤ੍ਥਿ, ਤਸ੍ਮਾ ਧਮ੍ਮਸੇਨਾਪਤਿ ਅਤ੍ਤਨੋ ਉਪਸਮਂ ਪਚ੍ਚਵੇਕ੍ਖਤੀਤਿ. ਸੇਸਂ ਵੁਤ੍ਤਨਯਮੇਵ.

ਦਸਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਮੇਘਿਯਵਗ੍ਗਵਣ੍ਣਨਾ.