੮. ਸੁਨ੍ਦਰੀਸੁਤ੍ਤਵਣ੍ਣਨਾ

੩੮. ਅਟ੍ਠਮੇ ਸਕ੍ਕਤੋਤਿਆਦੀਨਂ ਪਦਾਨਂ ਅਤ੍ਥੋ ਹੇਟ੍ਠਾ ਵਣ੍ਣਿਤੋਯੇਵ. ਅਸਹਮਾਨਾਤਿ ਨ ਸਹਮਾਨਾ, ਉਸੂਯਨ੍ਤਾਤਿ ਅਤ੍ਥੋ. ਭਿਕ੍ਖੁਸਙ੍ਘਸ੍ਸ ਚ ਸਕ੍ਕਾਰਂ ਅਸਹਮਾਨਾਤਿ ਸਮ੍ਬਨ੍ਧੋ.

ਸੁਨ੍ਦਰੀਤਿ ਤਸ੍ਸਾ ਨਾਮਂ. ਸਾ ਕਿਰ ਤਸ੍ਮਿਂ ਕਾਲੇ ਸਬ੍ਬਪਰਿਬ੍ਬਾਜਿਕਾਸੁ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ, ਤੇਨੇਵ ਸਾ ‘‘ਸੁਨ੍ਦਰੀ’’ਤਿ ਪਞ੍ਞਾਯਿਤ੍ਥ. ਸਾ ਚ ਅਨਤੀਤਯੋਬ੍ਬਨਾ ਅਸਂਯਤਸਮਾਚਾਰਾਵ ਹੋਤਿ, ਤਸ੍ਮਾ ਤੇ ਸੁਨ੍ਦਰਿਂ ਪਰਿਬ੍ਬਾਜਿਕਂ ਪਾਪਕਮ੍ਮੇ ਉਯ੍ਯੋਜੇਸੁਂ. ਤੇ ਹਿ ਅਞ੍ਞਤਿਤ੍ਥਿਯਾ ਬੁਦ੍ਧੁਪ੍ਪਾਦਤੋ ਪਟ੍ਠਾਯ ਸਯਂ ਹਤਲਾਭਸਕ੍ਕਾਰਾ ਹੇਟ੍ਠਾ ਅਕ੍ਕੋਸਸੁਤ੍ਤਵਣ੍ਣਨਾਯਂ ਆਗਤਨਯੇਨ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਉਲ਼ਾਰਂ ਅਪਰਿਮਿਤਂ ਲਾਭਸਕ੍ਕਾਰਂ ਪਵਤ੍ਤਮਾਨਂ ਦਿਸ੍ਵਾ ਇਸ੍ਸਾਪਕਤਾ ਏਕਤੋ ਹੁਤ੍ਵਾ ਸਮ੍ਮਨ੍ਤਯਿਂਸੁ – ਮਯਂ ਸਮਣਸ੍ਸ ਗੋਤਮਸ੍ਸ ਉਪ੍ਪਨ੍ਨਕਾਲਤੋ ਪਟ੍ਠਾਯ ਨਟ੍ਠਾ ਹਤਲਾਭਸਕ੍ਕਾਰਾ, ਨ ਨੋ ਕੋਚਿ ਅਤ੍ਥਿਭਾਵਮ੍ਪਿ ਜਾਨਾਤਿ, ਕਿਂ ਨਿਸ੍ਸਾਯ ਨੁ ਖੋ ਲੋਕੋ ਸਮਣੇ ਗੋਤਮੇ ਅਭਿਪ੍ਪਸਨ੍ਨੋ ਉਲ਼ਾਰਂ ਸਕ੍ਕਾਰਸਮ੍ਮਾਨਂ ਉਪਨੇਤੀਤਿ? ਤਤ੍ਥੇਕੋ ਆਹ – ‘‘ਉਚ੍ਚਾਕੁਲਪ੍ਪਸੁਤੋ ਅਸਮ੍ਭਿਨ੍ਨਾਯ ਮਹਾਸਮ੍ਮਤਪ੍ਪਵੇਣਿਯਾ ਜਾਤੋ’’ਤਿ, ਅਪਰੋ ‘‘ਅਭਿਜਾਤਿਯਂ ਤਸ੍ਸ ਅਨੇਕਾਨਿ ਅਚ੍ਛਰਿਯਾਨਿ ਪਾਤੁਭੂਤਾਨੀ’’ਤਿ, ਅਞ੍ਞੋ ‘‘ਕਾਲਦੇਵਿਲਂ ਵਨ੍ਦਾਪੇਤੁਂ ਉਪਨੀਤਸ੍ਸ ਪਾਦਾ ਪਰਿਵਤ੍ਤਿਤ੍ਵਾ ਤਸ੍ਸ ਜਟਾਸੁ ਪਤਿਟ੍ਠਿਤਾ’’ਤਿ, ਅਪਰੋ ‘‘ਵਪ੍ਪਮਙ੍ਗਲਕਾਲੇ ਜਮ੍ਬੁਚ੍ਛਾਯਾਯ ਸਯਾਪਿਤਸ੍ਸ ਵੀਤਿਕ੍ਕਨ੍ਤੇਪਿ ਮਜ੍ਝਨ੍ਹਿਕੇ ਜਮ੍ਬੁਚ੍ਛਾਯਾ ਅਪਰਿਵਤ੍ਤਿਤ੍ਵਾ ਠਿਤਾ’’ਤਿ, ਅਞ੍ਞੋ ‘‘ਅਭਿਰੂਪੋ ਦਸ੍ਸਨੀਯੋ ਪਾਸਾਦਿਕੋ ਰੂਪਸਮ੍ਪਤ੍ਤਿਯਾ’’ਤਿ, ਅਪਰੋ ‘‘ਜਿਣ੍ਣਾਤੁਰਮਤਪਬ੍ਬਜਿਤਸਙ੍ਖਾਤਨਿਮਿਤ੍ਤੇ ਦਿਸ੍ਵਾ ਸਂਵੇਗਜਾਤੋ ਆਗਾਮਿਨਂ ਚਕ੍ਕਵਤ੍ਤਿਰਜ੍ਜਂ ਪਹਾਯ ਪਬ੍ਬਜਿਤੋ’’ਤਿ. ਏਵਂ ਅਪਰਿਮਾਣਕਾਲੇ ਸਮ੍ਭਤਂ ਅਨਞ੍ਞਸਾਧਾਰਣਂ ਭਗਵਤੋ ਪੁਞ੍ਞਞਾਣਸਮ੍ਭਾਰਂ ਉਕ੍ਕਂਸਪਾਰਮਿਪ੍ਪਤ੍ਤਂ ਨਿਰੁਪਮਂ ਸਲ੍ਲੇਖਪ੍ਪਟਿਪਦਂ ਅਨੁਤ੍ਤਰਞ੍ਚ ਞਾਣਪਹਾਨਸਮ੍ਪਦਾਦਿਬੁਦ੍ਧਾਨੁਭਾਵਂ ਅਜਾਨਨ੍ਤਾ ਅਤ੍ਤਨਾ ਯਥਾਦਿਟ੍ਠਂ ਯਥਾਸੁਤਂ ਧਰਮਾਨਂ ਤਂ ਤਂ ਭਗਵਤੋ ਬਹੁਮਾਨਕਾਰਣਂ ਕਿਤ੍ਤੇਤ੍ਵਾ ਅਬਹੁਮਾਨਕਾਰਣਂ ਪਰਿਯੇਸਿਤ੍ਵਾ ਅਪਸ੍ਸਨ੍ਤਾ ‘‘ਕੇਨ ਨੁ ਖੋ ਕਾਰਣੇਨ ਮਯਂ ਸਮਣਸ੍ਸ ਗੋਤਮਸ੍ਸ ਅਯਸਂ ਉਪ੍ਪਾਦੇਤ੍ਵਾ ਲਾਭਸਕ੍ਕਾਰਂ ਨਾਸੇਯ੍ਯਾਮਾ’’ਤਿ. ਤੇਸੁ ਏਕੋ ਤਿਖਿਣਮਨ੍ਤੀ ਏਵਮਾਹ – ‘‘ਅਮ੍ਭੋ ਇਮਸ੍ਮਿਂ ਸਤ੍ਤਲੋਕੇ ਮਾਤੁਗਾਮਸੁਖੇ ਅਸਤ੍ਤਸਤ੍ਤਾ ਨਾਮ ਨਤ੍ਥਿ, ਅਯਞ੍ਚ ਸਮਣੋ ਗੋਤਮੋ ਅਭਿਰੂਪੋ ਦੇਵਸਮੋ ਤਰੁਣੋ, ਅਤ੍ਤਨੋ ਸਮਰੂਪਂ ਮਾਤੁਗਾਮਂ ਲਭਿਤ੍ਵਾ ਸਜ੍ਜੇਯ੍ਯ. ਅਥਾਪਿ ਨ ਸਜ੍ਜੇਯ੍ਯ, ਜਨਸ੍ਸ ਪਨ ਸਙ੍ਕਿਯੋ ਭਵੇਯ੍ਯ, ਹਨ੍ਦ ਮਯਂ ਸੁਨ੍ਦਰਿਂ ਪਰਿਬ੍ਬਾਜਿਕਂ ਤਥਾ ਉਯ੍ਯੋਜੇਮ, ਯਥਾ ਸਮਣਸ੍ਸ ਗੋਤਮਸ੍ਸ ਅਯਸੋ ਪਥਵਿਯਂ ਪਤ੍ਥਰੇਯ੍ਯਾ’’ਤਿ.

ਤਂ ਸੁਤ੍ਵਾ ਇਤਰੇ ‘‘ਇਦਂ ਸੁਟ੍ਠੁ ਤਯਾ ਚਿਨ੍ਤਿਤਂ, ਏਵਞ੍ਹਿ ਕਤੇ ਸਮਣੋ ਗੋਤਮੋ ਅਯਸਕੇਨ ਉਪਦ੍ਦੁਤੋ ਸੀਸਂ ਉਕ੍ਖਿਪਿਤੁਂ ਅਸਕ੍ਕੋਨ੍ਤੋ ਯੇਨ ਵਾ ਤੇਨ ਵਾ ਪਲਾਯਿਸ੍ਸਤੀ’’ਤਿ ਸਬ੍ਬੇਵ ਏਕਜ੍ਝਾਸਯਾ ਹੁਤ੍ਵਾ ਤਥਾ ਉਯ੍ਯੋਜੇਤੁਂ ਸੁਨ੍ਦਰਿਯਾ ਸਨ੍ਤਿਕਂ ਅਗਮਂਸੁ. ਸਾ ਤੇ ਦਿਸ੍ਵਾ ‘‘ਕਿਂ ਤੁਮ੍ਹੇ ਏਕਤੋ ਆਗਤਤ੍ਥਾ’’ਤਿ ਆਹ. ਤਿਤ੍ਥਿਯਾ ਅਨਾਲਪਨ੍ਤਾ ਆਰਾਮਪਰਿਯਨ੍ਤੇ ਪਟਿਚ੍ਛਨ੍ਨੇ ਠਾਨੇ ਨਿਸੀਦਿਂਸੁ. ਸਾ ਤਤ੍ਥ ਗਨ੍ਤ੍ਵਾ ਪੁਨਪ੍ਪੁਨਂ ਆਲਪਨ੍ਤੀ ਪਟਿਵਚਨਂ ਅਲਭਿਤ੍ਵਾ ਕਿਂ ਤੁਮ੍ਹਾਕਂ ਅਪਰਜ੍ਝਂ? ਕਸ੍ਮਾ ਮੇ ਪਟਿਵਚਨਂ ਨ ਦੇਥਾਤਿ? ਤਥਾ ਹਿ ਪਨ ਤ੍ਵਂ ਅਮ੍ਹੇ ਵਿਹੇਠਿਯਮਾਨੇ ਅਜ੍ਝੁਪੇਕ੍ਖਸੀਤਿ. ਕੋ ਤੁਮ੍ਹੇ ਵਿਹੇਠੇਤੀਤਿ? ‘‘ਕਿਂ ਪਨ ਤ੍ਵਂ ਨ ਪਸ੍ਸਸਿ, ਸਮਣਂ ਗੋਤਮਂ ਅਮ੍ਹੇ ਵਿਹੇਠੇਤ੍ਵਾ ਹਤਲਾਭਸਕ੍ਕਾਰੇ ਕਤ੍ਵਾ ਵਿਚਰਨ੍ਤ’’ਨ੍ਤਿ ਵਤ੍ਵਾ ‘‘ਤਤ੍ਥ ਮਯਾ ਕਿਂ ਕਾਤਬ੍ਬ’’ਨ੍ਤਿ ਵੁਤ੍ਤੇ ‘‘ਤੇਨ ਹਿ ਤ੍ਵਂ ਅਭਿਕ੍ਖਣਂ ਜੇਤਵਨਸਮੀਪਂ ਗਨ੍ਤ੍ਵਾ ਮਹਾਜਨਸ੍ਸ ਏਵਞ੍ਚੇਵਞ੍ਚ ਵਦੇਯ੍ਯਾਸੀ’’ਤਿ ਆਹਂਸੁ. ਸਾਪਿ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਤੇਨ ਵੁਤ੍ਤਂ – ‘‘ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਭਗਵਤੋਸਕ੍ਕਾਰਂ ਅਸਹਮਾਨਾ’’ਤਿਆਦਿ.

ਤਤ੍ਥ ਉਸ੍ਸਹਸੀਤਿ ਸਕ੍ਕੋਸਿ. ਅਤ੍ਥਨ੍ਤਿ ਹਿਤਂ ਕਿਚ੍ਚਂ ਵਾ. ਕ੍ਯਾਹਨ੍ਤਿ ਕਿਂ ਅਹਂ. ਯਸ੍ਮਾ ਤੇ ਤਿਤ੍ਥਿਯਾ ਤਸ੍ਸਾ ਅਞ੍ਞਾਤਕਾਪਿ ਸਮਾਨਾ ਪਬ੍ਬਜ੍ਜਸਮ੍ਬਨ੍ਧਮਤ੍ਤੇਨ ਸਙ੍ਗਣ੍ਹਿਤੁਂ ਞਾਤਕਾ ਵਿਯ ਹੁਤ੍ਵਾ ‘‘ਉਸ੍ਸਹਸਿ ਤ੍ਵਂ ਭਗਿਨਿ ਞਾਤੀਨਂ ਅਤ੍ਥਂ ਕਾਤੁ’’ਨ੍ਤਿ ਆਹਂਸੁ. ਤਸ੍ਮਾ ਸਾਪਿ ਮਿਗਂ ਵਲ੍ਲਿ ਵਿਯ ਪਾਦੇ ਲਗ੍ਗਾ ਜੀਵਿਤਮ੍ਪਿ ਮੇ ਪਰਿਚ੍ਚਤ੍ਤਂ ਞਾਤੀਨਂ ਅਤ੍ਥਾਯਾਤਿ ਆਹ.

ਤੇਨ ਹੀਤਿ ‘‘ਯਸ੍ਮਾ ਤ੍ਵਂ ‘ਜੀਵਿਤਮ੍ਪਿ ਮੇ ਤੁਮ੍ਹਾਕਂ ਅਤ੍ਥਾਯ ਪਰਿਚ੍ਚਤ੍ਤ’ਨ੍ਤਿ ਵਦਸਿ, ਤ੍ਵਞ੍ਚ ਪਠਮਵਯੇ ਠਿਤਾ ਅਭਿਰੂਪਾ ਸੋਭਗ੍ਗਪ੍ਪਤ੍ਤਾ ਚ, ਤਸ੍ਮਾ ਯਥਾ ਤਂ ਨਿਸ੍ਸਾਯ ਸਮਣਸ੍ਸ ਗੋਤਮਸ੍ਸ ਅਯਸੋ ਉਪ੍ਪਜ੍ਜਿਸ੍ਸਤਿ, ਤਥਾ ਕਰੇਯ੍ਯਾਸੀ’’ਤਿ ਵਤ੍ਵਾ ‘‘ਅਭਿਕ੍ਖਣਂ ਜੇਤਵਨਂ ਗਚ੍ਛਾਹੀ’’ਤਿ ਉਯ੍ਯੋਜੇਸੁਂ. ਸਾਪਿ ਖੋ ਬਾਲਾ ਕਕਚਦਨ੍ਤਪਨ੍ਤਿਯਾ ਪੁਪ੍ਫਾਵਲਿਕੀਲ਼ਂ ਕੀਲ਼ਿਤੁਕਾਮਾ ਵਿਯ, ਪਭਿਨ੍ਨਮਦਂ ਚਣ੍ਡਹਤ੍ਥਿਂ ਸੋਣ੍ਡਾਯ ਪਰਾਮਸਨ੍ਤੀ ਵਿਯ, ਨਲਾਟੇਨ ਮਚ੍ਚੁਂ ਗਣ੍ਹਨ੍ਤੀ ਵਿਯ ਤਿਤ੍ਥਿਯਾਨਂ ਵਚਨਂ ਸਮ੍ਪਟਿਚ੍ਛਿਤ੍ਵਾ ਮਾਲਾਗਨ੍ਧਵਿਲੇਪਨਤਮ੍ਬੂਲਮੁਖਵਾਸਾਦੀਨਿ ਗਹੇਤ੍ਵਾ ਮਹਾਜਨਸ੍ਸ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਨਗਰਂ ਪਵਿਸਨਕਾਲੇ ਜੇਤਵਨਾਭਿਮੁਖੀ ਗਚ੍ਛਨ੍ਤੀ ‘‘ਕਹਂ ਗਚ੍ਛਸੀ’’ਤਿ ਚ ਪੁਟ੍ਠਾ ‘‘ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ, ਅਹਞ੍ਹਿ ਤੇਨ ਸਦ੍ਧਿਂ ਏਕਗਨ੍ਧਕੁਟਿਯਂ ਵਸਾਮੀ’’ਤਿ ਵਤ੍ਵਾ ਅਞ੍ਞਤਰਸ੍ਮਿਂ ਤਿਤ੍ਥਿਯਾਰਾਮੇ ਵਸਿਤ੍ਵਾ ਪਾਤੋਵ ਜੇਤਵਨਮਗ੍ਗਂ ਓਤਰਿਤ੍ਵਾ ਨਗਰਾਭਿਮੁਖੀ ਆਗਚ੍ਛਨ੍ਤੀ ‘‘ਕਿਂ ਸੁਨ੍ਦਰਿ ਕਹਂ ਗਤਾਸੀ’’ਤਿ ਚ ਪੁਟ੍ਠਾ ‘‘ਸਮਣੇਨ ਗੋਤਮੇਨ ਸਦ੍ਧਿਂ ਏਕਗਨ੍ਧਕੁਟਿਯਂ ਵਸਿਤ੍ਵਾ ਤਂ ਕਿਲੇਸਰਤਿਯਾ ਰਮਾਪੇਤ੍ਵਾ ਆਗਤਾਮ੍ਹੀ’’ਤਿ ਵਦਤਿ. ਤੇਨ ਵੁਤ੍ਤਂ – ‘‘ਏਵਂ ਅਯ੍ਯਾਤਿ ਖੋ ਸੁਨ੍ਦਰੀ ਪਰਿਬ੍ਬਾਜਿਕਾ ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਪਟਿਸ੍ਸੁਤ੍ਵਾ ਅਭਿਕ੍ਖਣਂ ਜੇਤਵਨਂ ਅਗਮਾਸੀ’’ਤਿ.

ਤਿਤ੍ਥਿਯਾ ਕਤਿਪਾਹਸ੍ਸ ਅਚ੍ਚਯੇਨ ਧੁਤ੍ਤਾਨਂ ਕਹਾਪਣੇ ਦਤ੍ਵਾ ‘‘ਗਚ੍ਛਥ, ਸੁਨ੍ਦਰਿਂ ਮਾਰੇਤ੍ਵਾ ਸਮਣਸ੍ਸ ਗੋਤਮਸ੍ਸ ਗਨ੍ਧਕੁਟਿਯਾ ਅਵਿਦੂਰੇ ਮਾਲਾਕਚਵਰਨ੍ਤਰੇ ਨਿਕ੍ਖਿਪਿਤ੍ਵਾ ਏਥਾ’’ਤਿ ਵਦਿਂਸੁ. ਤੇ ਤਥਾ ਅਕਂਸੁ. ਤਤੋ ਤਿਤ੍ਥਿਯਾ ‘‘ਸੁਨ੍ਦਰਿਂ ਨ ਪਸ੍ਸਾਮਾ’’ਤਿ ਕੋਲਾਹਲਂ ਕਤ੍ਵਾ ਰਞ੍ਞੋ ਆਰੋਚੇਤ੍ਵਾ ‘‘ਕਤ੍ਥ ਪਨ ਤੁਮ੍ਹੇ ਪਰਿਸਙ੍ਕਥਾ’’ਤਿ ਰਞ੍ਞਾ ਵੁਤ੍ਤਾ ਇਮੇਸੁ ਦਿਵਸੇਸੁ ਜੇਤਵਨੇ ਵਸਤਿ, ਤਤ੍ਥਸ੍ਸਾ ਪਵਤ੍ਤਿਂ ਨ ਜਾਨਾਮਾਤਿ. ‘‘ਤੇਨ ਹਿ ਗਚ੍ਛਥ, ਨਂ ਤਤ੍ਥ ਵਿਚਿਨਥਾ’’ਤਿ ਰਞ੍ਞਾ ਅਨੁਞ੍ਞਾਤਾ ਅਤ੍ਤਨੋ ਉਪਟ੍ਠਾਕੇ ਗਹੇਤ੍ਵਾ ਜੇਤਵਨਂ ਗਨ੍ਤ੍ਵਾ ਵਿਚਿਨਨ੍ਤਾ ਵਿਯ ਹੁਤ੍ਵਾ ਮਾਲਾਕਚਵਰਂ ਬ੍ਯੂਹਿਤ੍ਵਾ ਤਸ੍ਸਾ ਸਰੀਰਂ ਮਞ੍ਚਕਂ ਆਰੋਪੇਤ੍ਵਾ ਨਗਰਂ ਪਵੇਸੇਤ੍ਵਾ ‘‘ਸਮਣਸ੍ਸ ਗੋਤਮਸ੍ਸ ਸਾਵਕਾ ‘ਸਤ੍ਥੁਨਾ ਕਤਂ ਪਾਪਕਮ੍ਮਂ ਪਟਿਚ੍ਛਾਦੇਸ੍ਸਾਮਾ’ਤਿ ਸੁਨ੍ਦਰਿਂ ਮਾਰੇਤ੍ਵਾ ਮਾਲਾਕਚਵਰਨ੍ਤਰੇ ਨਿਕ੍ਖਿਪਿਂਸੂ’’ਤਿ ਰਞ੍ਞੋ ਆਰੋਚੇਸੁਂ. ਰਾਜਾਪਿ ਅਨੁਪਪਰਿਕ੍ਖਿਤ੍ਵਾ ‘‘ਤੇਨ ਹਿ ਗਚ੍ਛਥ, ਨਗਰਂ ਆਹਿਣ੍ਡਥਾ’’ਤਿ ਆਹ. ਤੇ ਨਗਰਵੀਥੀਸੁ ‘‘ਪਸ੍ਸਥ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਕਮ੍ਮ’’ਨ੍ਤਿਆਦੀਨਿ ਵਦਨ੍ਤਾ ਵਿਚਰਿਤ੍ਵਾ ਪੁਨ ਰਞ੍ਞੋ ਨਿਵੇਸਨਦ੍ਵਾਰਂ ਅਗਮਂਸੁ. ਰਾਜਾ ਸੁਨ੍ਦਰਿਯਾ ਸਰੀਰਂ ਆਮਕਸੁਸਾਨੇ ਅਟ੍ਟਕਂ ਆਰੋਪੇਤ੍ਵਾ ਰਕ੍ਖਾਪੇਸਿ. ਸਾਵਤ੍ਥਿਵਾਸਿਨੋ ਠਪੇਤ੍ਵਾ ਅਰਿਯਸਾਵਕੇ ਯੇਭੁਯ੍ਯੇਨ ‘‘ਪਸ੍ਸਥ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਕਮ੍ਮ’’ਨ੍ਤਿਆਦੀਨਿ ਵਤ੍ਵਾ ਅਨ੍ਤੋਨਗਰੇ ਬਹਿਨਗਰੇ ਚ ਭਿਕ੍ਖੂ ਅਕ੍ਕੋਸਨ੍ਤਾ ਵਿਚਰਿਂਸੁ. ਤੇਨ ਵੁਤ੍ਤਂ – ‘‘ਯਦਾ ਤੇ ਅਞ੍ਞਿਂਸੁ ਤਿਤ੍ਥਿਯਾ ਪਰਿਬ੍ਬਾਜਕਾ ‘ਵੋਦਿਟ੍ਠਾ ਖੋ ਸੁਨ੍ਦਰੀ’’’ਤਿਆਦਿ.

ਤਤ੍ਥ ਅਞ੍ਞਿਂਸੂਤਿ ਜਾਨਿਂਸੁ. ਵੋਦਿਟ੍ਠਾਤਿ ਬ੍ਯਪਦਿਟ੍ਠਾ, ਜੇਤਵਨਂ ਆਗਚ੍ਛਨ੍ਤੀ ਚ ਗਚ੍ਛਨ੍ਤੀ ਚ ਵਿਸੇਸਤੋ ਦਿਟ੍ਠਾ, ਬਹੁਲਂ ਦਿਟ੍ਠਾਤਿ ਅਤ੍ਥੋ. ਪਰਿਖਾਕੂਪੇਤਿ ਦੀਘਿਕਾਵਾਟੇ. ਯਾ ਸਾ, ਮਹਾਰਾਜ, ਸੁਨ੍ਦਰੀਤਿ, ਮਹਾਰਾਜ, ਯਾ ਸਾ ਇਮਸ੍ਮਿਂ ਨਗਰੇ ਰੂਪਸੁਨ੍ਦਰਤਾਯ ‘‘ਸੁਨ੍ਦਰੀ’’ਤਿ ਪਾਕਟਾ ਅਭਿਞ੍ਞਾਤਾ ਪਰਿਬ੍ਬਾਜਿਕਾ. ਸਾ ਨੋ ਨ ਦਿਸ੍ਸਤੀਤਿ ਸਾ ਅਮ੍ਹਾਕਂ ਚਕ੍ਖੁ ਵਿਯ ਜੀਵਿਤਂ ਵਿਯ ਚ ਪਿਯਾਯਿਤਬ੍ਬਾ, ਇਦਾਨਿ ਨ ਦਿਸ੍ਸਤਿ. ਯਥਾਨਿਕ੍ਖਿਤ੍ਤਨ੍ਤਿ ਪੁਰਿਸੇ ਆਣਾਪੇਤ੍ਵਾ ਮਾਲਾਕਚਵਰਨ੍ਤਰੇ ਅਤ੍ਤਨਾ ਯਥਾਠਪਿਤਂ. ‘‘ਯਥਾਨਿਖਾਤ’’ਨ੍ਤਿਪਿ ਪਾਠੋ, ਪਥਵਿਯਂ ਨਿਖਾਤਪ੍ਪਕਾਰਨ੍ਤਿ ਅਤ੍ਥੋ.

ਰਥਿਯਾਯ ਰਥਿਯਨ੍ਤਿ ਵੀਥਿਤੋ ਵੀਥਿਂ. ਵੀਥੀਤਿ ਹਿ ਵਿਨਿਵਿਜ੍ਝਨਕਰਚ੍ਛਾ. ਸਿਙ੍ਘਾਟਕਨ੍ਤਿ ਤਿਕੋਣਰਚ੍ਛਾ. ਅਲਜ੍ਜਿਨੋਤਿ ਨ ਲਜ੍ਜਿਨੋ, ਪਾਪਜਿਗੁਚ੍ਛਾਵਿਰਹਿਤਾਤਿ ਅਤ੍ਥੋ. ਦੁਸ੍ਸੀਲਾਤਿ ਨਿਸ੍ਸੀਲਾ. ਪਾਪਧਮ੍ਮਾਤਿ ਲਾਮਕਸਭਾਵਾ ਨਿਹੀਨਾਚਾਰਾ. ਮੁਸਾਵਾਦਿਨੋਤਿ ਦੁਸ੍ਸੀਲਾ ਸਮਾਨਾ ‘‘ਸੀਲਵਨ੍ਤੋ ਮਯ’’ਨ੍ਤਿ ਅਲਿਕਵਾਦਿਤਾਯ ਮੁਸਾਵਾਦਿਨੋ. ਅਬ੍ਰਹ੍ਮਚਾਰਿਨੋਤਿ ‘‘ਮੇਥੁਨਪ੍ਪਟਿਸੇਵਿਤਾਯ ਅਸੇਟ੍ਠਚਾਰਿਨੋ ਇਮੇ ਹਿ ਨਾਮਾ’’ਤਿ ਹੀਲ਼ੇਨ੍ਤਾ ਵਦਨ੍ਤਿ. ਧਮ੍ਮਚਾਰਿਨੋਤਿ ਕੁਸਲਧਮ੍ਮਚਾਰਿਨੋ. ਸਮਚਾਰਿਨੋਤਿ ਕਾਯਕਮ੍ਮਾਦਿਸਮਚਾਰਿਨੋ. ਕਲ੍ਯਾਣਧਮ੍ਮਾਤਿ ਸੁਨ੍ਦਰਸਭਾਵਾ, ਪਟਿਜਾਨਿਸ੍ਸਨ੍ਤਿ ਨਾਮਾਤਿ ਸਮ੍ਬਨ੍ਧੋ. ਨਾਮਸਦ੍ਦਯੋਗੇਨ ਹਿ ਏਤ੍ਥ ਪਟਿਜਾਨਿਸ੍ਸਨ੍ਤੀਤਿ ਅਨਾਗਤਕਾਲਵਚਨਂ. ਸਾਮਞ੍ਞਨ੍ਤਿ ਸਮਣਭਾਵੋ ਸਮਿਤਪਾਪਤਾ. ਬ੍ਰਹ੍ਮਞ੍ਞਨ੍ਤਿ ਸੇਟ੍ਠਭਾਵੋ ਬਾਹਿਤਪਾਪਤਾ. ਕੁਤੋਤਿ ਕੇਨ ਕਾਰਣੇਨ. ਅਪਗਤਾਤਿ ਅਪੇਤਾ ਪਰਿਭਟ੍ਠਾ. ਪੁਰਿਸਕਿਚ੍ਚਨ੍ਤਿ ਮੇਥੁਨਪ੍ਪਟਿਸੇਵਨਂ ਸਨ੍ਧਾਯ ਵਦਨ੍ਤਿ.

ਅਥ ਭਿਕ੍ਖੂ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸੁਂ. ਸਤ੍ਥਾ ‘‘ਤੇਨ ਹਿ, ਭਿਕ੍ਖਵੇ, ਤੁਮ੍ਹੇਪਿ ਤੇ ਮਨੁਸ੍ਸੇ ਇਮਾਯ ਗਾਥਾਯ ਪਟਿਚੋਦੇਥਾ’’ਤਿ ਵਤ੍ਵਾ ‘‘ਅਭੂਤਵਾਦੀ’’ਤਿ ਗਾਥਮਾਹ. ਤਂ ਸਨ੍ਧਾਯ ਵੁਤ੍ਤਂ – ‘‘ਅਥ ਖੋ ਸਮ੍ਬਹੁਲਾ…ਪੇ… ਨਿਹੀਨਕਮ੍ਮਾ ਮਨੁਜਾ ਪਰਤ੍ਥਾ’’ਤਿ. ਤਤ੍ਥ ਨੇਸੋ, ਭਿਕ੍ਖਵੇ, ਸਦ੍ਦੋ ਚਿਰਂ ਭਵਿਸ੍ਸਤੀਤਿ ਇਦਂ ਸਤ੍ਥਾ ਤਸ੍ਸ ਅਯਸਸ੍ਸ ਨਿਪ੍ਫਤ੍ਤਿਂ ਸਬ੍ਬਞ੍ਞੁਤਞ੍ਞਾਣੇਨ ਜਾਨਿਤ੍ਵਾ ਭਿਕ੍ਖੂ ਸਮਸ੍ਸਾਸੇਨ੍ਤੋ ਆਹ.

ਗਾਥਾਯਂ ਅਭੂਤਵਾਦੀਤਿ ਪਰਸ੍ਸ ਦੋਸਂ ਅਦਿਸ੍ਵਾਵ ਮੁਸਾਵਾਦਂ ਕਤ੍ਵਾ ਅਭੂਤੇਨ ਅਤਚ੍ਛੇਨ ਪਰਂ ਅਬ੍ਭਾਚਿਕ੍ਖਨ੍ਤੋ. ਯੋ ਵਾਪਿ ਕਤ੍ਵਾਤਿ ਯੋ ਵਾ ਪਨ ਪਾਪਕਮ੍ਮਂ ਕਤ੍ਵਾ ‘‘ਨਾਹਂ ਏਤਂ ਕਰੋਮੀ’’ਤਿ ਆਹ. ਪੇਚ੍ਚ ਸਮਾ ਭਵਨ੍ਤੀਤਿ ਤੇ ਉਭੋਪਿ ਜਨਾ ਇਤੋ ਪਰਲੋਕਂ ਗਨ੍ਤ੍ਵਾ ਨਿਰਯੂਪਗਮਨੇਨ ਗਤਿਯਾ ਸਮਾ ਭਵਨ੍ਤਿ. ਗਤਿਯੇਵ ਹਿ ਨੇਸਂ ਪਰਿਚ੍ਛਿਨ੍ਨਾ, ਆਯੂ ਪਨ ਅਪਰਿਚ੍ਛਿਨ੍ਨਾ. ਬਹੁਕਞ੍ਹਿ ਪਾਪਂ ਕਤ੍ਵਾ ਚਿਰਂ ਨਿਰਯੇ ਪਚ੍ਚਤਿ, ਪਰਿਤ੍ਤਕਂ ਕਤ੍ਵਾ ਅਪ੍ਪਮਤ੍ਤਕਮੇਵ ਕਾਲਂ ਪਚ੍ਚਤਿ. ਯਸ੍ਮਾ ਪਨ ਨੇਸਂ ਉਭਿਨ੍ਨਮ੍ਪਿ ਲਾਮਕਮੇਵ ਕਮ੍ਮਂ, ਤੇਨ ਵੁਤ੍ਤਂ – ਨਿਹੀਨਕਮ੍ਮਾ ਮਨੁਜਾ ਪਰਤ੍ਥਾਤਿ. ‘‘ਪਰਤ੍ਥਾ’’ਤਿ ਇਮਸ੍ਸ ਪਨ ਪਦਸ੍ਸ ਪੁਰਤੋ ‘‘ਪੇਚ੍ਚਾ’’ਤਿਪਦੇਨ ਸਮ੍ਬਨ੍ਧੋ, ਪੇਚ੍ਚ ਪਰਤ੍ਥ ਇਤੋ ਗਨ੍ਤ੍ਵਾ ਤੇ ਨਿਹੀਨਕਮ੍ਮਾ ਪਰਲੋਕੇ ਸਮਾ ਭਵਨ੍ਤੀਤਿ ਅਤ੍ਥੋ.

ਪਰਿਯਾਪੁਣਿਤ੍ਵਾਤਿ ਉਗ੍ਗਹੇਤ੍ਵਾ. ਅਕਾਰਕਾਤਿ ਅਪਰਾਧਸ੍ਸ ਨ ਕਾਰਕਾ. ਨਯਿਮੇਹਿ ਕਤਨ੍ਤਿ ਏਵਂ ਕਿਰ ਨੇਸਮਹੋਸਿ – ਇਮੇਹਿ ਸਮਣੇਹਿ ਸਕ੍ਯਪੁਤ੍ਤਿਯੇਹਿ ਅਦ੍ਧਾ ਤਂ ਪਾਪਕਮ੍ਮਂ ਨ ਕਤਂ, ਯਂ ਅਞ੍ਞਤਿਤ੍ਥਿਯਾ ਉਗ੍ਘੋਸਿਤ੍ਵਾ ਸਕਲਨਗਰਂ ਆਹਿਣ੍ਡਿਂਸੁ, ਯਸ੍ਮਾ ਇਮੇ ਅਮ੍ਹੇਸੁ ਏਵਂ ਅਸਬ੍ਭਾਹਿ ਫਰੁਸਾਹਿ ਵਾਚਾਹਿ ਅਬ੍ਭਾਚਿਕ੍ਖਨ੍ਤੇਸੁਪਿ ਨ ਕਿਞ੍ਚਿ ਵਿਕਾਰਂ ਦਸ੍ਸੇਨ੍ਤਿ, ਖਨ੍ਤਿਸੋਰਚ੍ਚਞ੍ਚ ਨ ਵਿਜਹਨ੍ਤਿ, ਕੇਵਲਂ ਪਨ ‘‘ਅਭੂਤਵਾਦੀ ਨਿਰਯਂ ਉਪੇਤੀ’’ਤਿ ਧਮ੍ਮਂਯੇਵ ਵਦਨ੍ਤਾ ਸਪਨ੍ਤਿਯੇਵ, ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਅਮ੍ਹੇ ਅਨੁਪਧਾਰੇਤ੍ਵਾ ਅਬ੍ਭਾਚਿਕ੍ਖਨ੍ਤੇ ਸਪਨ੍ਤਿ, ਸਪਥਂ ਕਰੋਨ੍ਤਾ ਵਿਯ ਵਦਨ੍ਤਿ. ਅਥ ਵਾ ‘‘ਯੋ ਵਾਪਿ ਕਤ੍ਵਾ ‘ਨ ਕਰੋਮਿ’ ਚਾਹਾ’’ਤਿ ਵਦਨ੍ਤਾ ਸਪਨ੍ਤਿ, ਅਤ੍ਤਨੋ ਅਕਾਰਕਭਾਵਂ ਬੋਧੇਤੁਂ ਅਮ੍ਹਾਕਂ ਸਪਥਂ ਕਰੋਨ੍ਤਿ ਇਮੇਤਿ ਅਤ੍ਥੋ.

ਤੇਸਞ੍ਹਿ ਮਨੁਸ੍ਸਾਨਂ ਭਗਵਤਾ ਭਾਸਿਤਗਾਥਾਯ ਸਵਨਸਮਨਨ੍ਤਰਮੇਵ ਬੁਦ੍ਧਾਨੁਭਾਵੇਨ ਸਾਰਜ੍ਜਂ ਓਕ੍ਕਮਿ, ਸਂਵੇਗੋ ਉਪ੍ਪਜ੍ਜਿ ‘‘ਨਯਿਦਂ ਅਮ੍ਹੇਹਿ ਪਚ੍ਚਕ੍ਖਤੋ ਦਿਟ੍ਠਂ, ਸੁਤਂ ਨਾਮ ਤਥਾਪਿ ਹੋਤਿ, ਅਞ੍ਞਥਾਪਿ ਹੋਤਿ, ਏਤੇ ਚ ਅਞ੍ਞਤਿਤ੍ਥਿਯਾ ਇਮੇਸਂ ਅਨਤ੍ਥਕਾਮਾ ਅਹਿਤਕਾਮਾ, ਤਸ੍ਮਾ ਤੇ ਸਦ੍ਧਾਯ ਨਯਿਦਂ ਅਮ੍ਹੇਹਿ ਵਤ੍ਤਬ੍ਬਂ, ਦੁਜ੍ਜਾਨਾ ਹਿ ਸਮਣਾ’’ਤਿ. ਤੇ ਤਤੋ ਪਟ੍ਠਾਯ ਤਤੋ ਓਰਮਿਂਸੁ.

ਰਾਜਾਪਿ ਯੇਹਿ ਸੁਨ੍ਦਰੀ ਮਾਰਿਤਾ, ਤੇਸਂ ਜਾਨਨਤ੍ਥਂ ਪੁਰਿਸੇ ਆਣਾਪੇਸਿ. ਅਥ ਤੇ ਧੁਤ੍ਤਾ ਤੇਹਿ ਕਹਾਪਣੇਹਿ ਸੁਰਂ ਪਿਵਨ੍ਤਾ ਅਞ੍ਞਮਞ੍ਞਂ ਕਲਹਂ ਕਰਿਂਸੁ. ਤੇਸੁ ਹਿ ਏਕੋ ਏਕਂ ਆਹ – ‘‘ਤ੍ਵਂ ਸੁਨ੍ਦਰਿਂ ਏਕਪ੍ਪਹਾਰੇਨ ਮਾਰੇਤ੍ਵਾ ਮਾਲਾਕਚਵਰਨ੍ਤਰੇ ਖਿਪਿਤ੍ਵਾ ਤਤੋ ਲਦ੍ਧਕਹਾਪਣੇਹਿ ਸੁਰਂ ਪਿਵਸਿ, ਹੋਤੁ ਹੋਤੂ’’ਤਿ. ਰਾਜਪੁਰਿਸਾ ਤਂ ਸੁਤ੍ਵਾ ਤੇ ਧੁਤ੍ਤੇ ਗਹੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ‘‘ਤੁਮ੍ਹੇਹਿ ਸਾ ਮਾਰਿਤਾ’’ਤਿ ਤੇ ਧੁਤ੍ਤੇ ਪੁਚ੍ਛਿ. ‘‘ਆਮ, ਦੇਵਾ’’ਤਿ. ‘‘ਕੇਹਿ ਮਾਰਾਪਿਤਾ’’ਤਿ? ‘‘ਅਞ੍ਞਤਿਤ੍ਥਿਯੇਹਿ, ਦੇਵਾ’’ਤਿ. ਰਾਜਾ ਤਿਤ੍ਥਿਯੇ ਪਕ੍ਕੋਸਾਪੇਤ੍ਵਾ ਤਮਤ੍ਥਂ ਪਟਿਜਾਨਾਪੇਤ੍ਵਾ, ‘‘ਅਯਂ ਸੁਨ੍ਦਰੀ ਤਸ੍ਸ ਸਮਣਸ੍ਸ ਗੋਤਮਸ੍ਸ ਅਵਣ੍ਣਂ ਆਰੋਪੇਤੁਕਾਮੇਹਿ ਅਮ੍ਹੇਹਿ ਮਾਰਾਪਿਤਾ, ਨੇਵ ਗੋਤਮਸ੍ਸ, ਨ ਗੋਤਮਸਾਵਕਾਨਂ ਦੋਸੋ ਅਤ੍ਥਿ, ਅਮ੍ਹਾਕਮੇਵ ਦੋਸੋਤਿ ਏਵਂ ਵਦਨ੍ਤਾ ਨਗਰਂ ਆਹਿਣ੍ਡਥਾ’’ਤਿ ਆਣਾਪੇਸਿ. ਤੇ ਤਥਾ ਅਕਂਸੁ. ਮਹਾਜਨੋ ਸਮ੍ਮਦੇਵ ਸਦ੍ਦਹਿ. ਤਿਤ੍ਥਿਯਾਨਂ ਧਿਕ੍ਕਾਰਂ ਅਕਾਸਿ, ਤਿਤ੍ਥਿਯਾ ਮਨੁਸ੍ਸਵਧਦਣ੍ਡਂ ਪਾਪੁਣਿਂਸੁ. ਤਤੋ ਪਟ੍ਠਾਯ ਬੁਦ੍ਧਸ੍ਸ ਭਿਕ੍ਖੁਸਙ੍ਘਸ੍ਸ ਚ ਭਿਯ੍ਯੋਸੋਮਤ੍ਤਾਯ ਸਕ੍ਕਾਰਸਮ੍ਮਾਨੋ ਮਹਾ ਅਹੋਸਿ. ਭਿਕ੍ਖੂ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਭਗਵਨ੍ਤਂ ਅਭਿਵਾਦੇਤ੍ਵਾ ਅਤ੍ਤਮਨਾ ਪਟਿਵੇਦੇਸੁਂ. ਤੇਨ ਵੁਤ੍ਤਂ – ‘‘ਅਥ ਖੋ ਸਮ੍ਬਹੁਲਾ ਭਿਕ੍ਖੂ…ਪੇ… ਅਨ੍ਤਰਹਿਤੋ ਸੋ, ਭਨ੍ਤੇ, ਸਦ੍ਦੋ’’ਤਿ.

ਕਸ੍ਮਾ ਪਨ ਭਗਵਾ ‘‘ਤਿਤ੍ਥਿਯਾਨਂ ਇਦਂ ਕਮ੍ਮ’’ਨ੍ਤਿ ਭਿਕ੍ਖੂਨਂ ਨਾਰੋਚੇਸਿ? ਅਰਿਯਾਨਂ ਤਾਵ ਆਰੋਚਨੇਨ ਪਯੋਜਨਂ ਨਤ੍ਥਿ, ਪੁਥੁਜ੍ਜਨੇਸੁ ਪਨ ‘‘ਯੇ ਨ ਸਦ੍ਦਹੇਯ੍ਯੁਂ, ਤੇਸਂ ਤਂ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ ਸਂਵਤ੍ਤੇਯ੍ਯਾ’’ਤਿ ਨਾਰੋਚੇਸਿ. ਅਪਿਚੇਤਂ ਬੁਦ੍ਧਾਨਂ ਅਨਾਚਿਣ੍ਣਂ, ਯਂ ਅਨਾਗਤਸ੍ਸ ਈਦਿਸਸ੍ਸ ਵਤ੍ਥੁਸ੍ਸ ਆਚਿਕ੍ਖਨਂ. ਪਰਾਨੁਦ੍ਦੇਸਿਕਮੇਵ ਹਿ ਭਗਵਾ ਸਂਕਿਲੇਸਪਕ੍ਖਂ ਵਿਭਾਵੇਤਿ, ਕਮ੍ਮਞ੍ਚ ਕਤੋਕਾਸਂ ਨ ਸਕ੍ਕਾ ਨਿਵਤ੍ਤੇਤੁਨ੍ਤਿ ਅਬ੍ਭਕ੍ਖਾਨਂ ਤਨ੍ਨਿਮਿਤ੍ਤਞ੍ਚ ਭਗਵਾ ਅਜ੍ਝੁਪੇਕ੍ਖਨ੍ਤੋ ਨਿਸੀਦਿ. ਵੁਤ੍ਤਞ੍ਹੇਤਂ –

‘‘ਨ ਅਨ੍ਤਲਿਕ੍ਖੇ ਨ ਸਮੁਦ੍ਦਮਜ੍ਝੇ,

ਨ ਪਬ੍ਬਤਾਨਂ ਵਿਵਰਂ ਪਵਿਸ੍ਸ;

ਨ ਵਿਜ੍ਜਤੀ ਸੋ ਜਗਤਿਪ੍ਪਦੇਸੋ,

ਯਤ੍ਥਟ੍ਠਿਤੋ ਮੁਚ੍ਚੇਯ੍ਯ ਪਾਪਕਮ੍ਮਾ’’ਤਿ. (ਧ. ਪ. ੧੨੭; ਮਿ. ਪ. ੪.੨.੪);

ਏਤਮਤ੍ਥਂ ਵਿਦਿਤ੍ਵਾਤਿ ਮਮ੍ਮਚ੍ਛੇਦਨਵਸੇਨਾਪਿ ਬਾਲਜਨੇਹਿ ਪਵਤ੍ਤਿਤਂ ਦੁਰੁਤ੍ਤਵਚਨਂ ਖਨ੍ਤਿਬਲਸਮਨ੍ਨਾਗਤਸ੍ਸ ਧੀਰਸ੍ਸ ਦੁਤ੍ਤਿਤਿਕ੍ਖਾ ਨਾਮ ਨਤ੍ਥੀਤਿ ਇਮਮਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਅਧਿਵਾਸਨਖਨ੍ਤਿਬਲਵਿਭਾਵਨਂ ਉਦਾਨਂ ਉਦਾਨੇਸਿ.

ਤਤ੍ਥ ਤੁਦਨ੍ਤਿ ਵਾਚਾਯ ਜਨਾ ਅਸਞ੍ਞਤਾ, ਸਰੇਹਿ ਸਙ੍ਗਾਮਗਤਂਵ ਕੁਞ੍ਜਰਨ੍ਤਿ ਕਾਯਿਕਸਂਵਰਾਦੀਸੁ ਕਸ੍ਸਚਿਪਿ ਸਂਵਰਸ੍ਸ ਅਭਾਵੇਨ ਅਸਂਯਤਾ ਅਵਿਨੀਤਾ ਬਾਲਜਨਾ ਸਰੇਹਿ ਸਾਯਕੇਹਿ ਸਙ੍ਗਾਮਗਤਂ ਯੁਦ੍ਧਗਤਂ ਕੁਞ੍ਜਰਂਵ ਹਤ੍ਥਿਨਾਗਂ ਪਟਿਯੋਧਾ ਵਿਯ ਵਾਚਾਸਤ੍ਤੀਹਿ ਤੁਦਨ੍ਤਿ ਵਿਜ੍ਝਨ੍ਤਿ, ਅਯਂ ਤੇਸਂ ਸਭਾਵੋ. ਸੁਤ੍ਵਾਨ ਵਾਕ੍ਯਂ ਫਰੁਸਂ ਉਦੀਰਿਤਂ, ਅਧਿਵਾਸਯੇ ਭਿਕ੍ਖੁ ਅਦੁਟ੍ਠਚਿਤ੍ਤੋਤਿ ਤਂ ਪਨ ਤੇਹਿ ਬਾਲਜਨੇਹਿ ਉਦੀਰਿਤਂ ਭਾਸਿਤਂ ਮਮ੍ਮਘਟ੍ਟਨਵਸੇਨ ਪਵਤ੍ਤਿਤਂ ਫਰੁਸਂ ਵਾਕ੍ਯਂ ਵਚਨਂ ਅਭੂਤਂ ਭੂਤਤੋ ਨਿਬ੍ਬੇਠੇਨ੍ਤੋ ਮਮ ਕਕਚੂਪਮਓਵਾਦਂ (ਮ. ਨਿ. ੧.੨੨੨ ਆਦਯੋ) ਅਨੁਸ੍ਸਰਨ੍ਤੋ ਈਸਕਮ੍ਪਿ ਅਦੁਟ੍ਠਚਿਤ੍ਤੋ ਹੁਤ੍ਵਾ ‘‘ਸਂਸਾਰਸਭਾਵੋ ਏਸੋ’’ਤਿ ਸਂਸਾਰੇ ਭਯਂ ਇਕ੍ਖਣਸੀਲੋ ਭਿਕ੍ਖੁ ਅਧਿਵਾਸਯੇ, ਅਧਿਵਾਸਨਖਨ੍ਤਿਯਂ ਠਤ੍ਵਾ ਖਮੇਯ੍ਯਾਤਿ ਅਤ੍ਥੋ.

ਏਤ੍ਥਾਹ – ਕਿਂ ਪਨ ਤਂ ਕਮ੍ਮਂ, ਯਂ ਅਪਰਿਮਾਣਕਾਲਂ ਸਕ੍ਕਚ੍ਚਂ ਉਪਚਿਤਵਿਪੁਲਪੁਞ੍ਞਸਮ੍ਭਾਰੋ ਸਤ੍ਥਾ ਏਵਂ ਦਾਰੁਣਂ ਅਭੂਤਬ੍ਭਕ੍ਖਾਨਂ ਪਾਪੁਣੀਤਿ? ਵੁਚ੍ਚਤੇ – ਅਯਂ ਸੋ ਭਗਵਾ ਬੋਧਿਸਤ੍ਤਭੂਤੋ ਅਤੀਤਜਾਤਿਯਂ ਮੁਨਾਲ਼ਿ ਨਾਮ ਧੁਤ੍ਤੋ ਹੁਤ੍ਵਾ ਪਾਪਜਨਸੇਵੀ ਅਯੋਨਿਸੋਮਨਸਿਕਾਰਬਹੁਲੋ ਵਿਚਰਤਿ. ਸੋ ਏਕਦਿਵਸਂ ਸੁਰਭਿਂ ਨਾਮ ਪਚ੍ਚੇਕਸਮ੍ਬੁਦ੍ਧਂ ਨਗਰਂ ਪਿਣ੍ਡਾਯ ਪਵਿਸਿਤੁਂ ਚੀਵਰਂ ਪਾਰੁਪਨ੍ਤਂ ਪਸ੍ਸਿ. ਤਸ੍ਮਿਞ੍ਚ ਸਮਯੇ ਅਞ੍ਞਤਰਾ ਇਤ੍ਥੀ ਤਸ੍ਸ ਅਵਿਦੂਰੇਨ ਗਚ੍ਛਤਿ. ਧੁਤ੍ਤੋ ‘‘ਅਬ੍ਰਹ੍ਮਚਾਰੀ ਅਯਂ ਸਮਣੋ’’ਤਿ ਅਬ੍ਭਾਚਿਕ੍ਖਿ. ਸੋ ਤੇਨ ਕਮ੍ਮੇਨ ਬਹੂਨਿ ਵਸ੍ਸਸਤਸਹਸ੍ਸਾਨਿ ਨਿਰਯੇ ਪਚ੍ਚਿਤ੍ਵਾ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਇਦਾਨਿ ਬੁਦ੍ਧੋ ਹੁਤ੍ਵਾਪਿ ਸੁਨ੍ਦਰਿਯਾ ਕਾਰਣਾ ਅਭੂਤਬ੍ਭਕ੍ਖਾਨਂ ਪਾਪੁਣਿ. ਯਥਾ ਚੇਤਂ, ਏਵਂ ਚਿਞ੍ਚਮਾਣਵਿਕਾਦੀਨਂ ਵਿਕਾਰਕਿਤ੍ਥੀਨਂ ਭਗਵਤੋ ਅਬ੍ਭਕ੍ਖਾਨਾਦੀਨਿ ਦੁਕ੍ਖਾਨਿ ਪਤ੍ਤਾਨਿ, ਸਬ੍ਬਾਨਿ ਪੁਬ੍ਬੇ ਕਤਸ੍ਸ ਕਮ੍ਮਸ੍ਸ ਵਿਪਾਕਾਵਸੇਸਾਨਿ, ਯਾਨਿ ‘‘ਕਮ੍ਮਪਿਲੋਤਿਕਾਨੀ’’ਤਿ ਵੁਚ੍ਚਨ੍ਤਿ. ਵੁਤ੍ਤਞ੍ਹੇਤਂ ਅਪਦਾਨੇ (ਅਪ. ਥੇਰ ੧.੩੯.੬੪-੯੬) –

‘‘ਅਨੋਤਤ੍ਤਸਰਾਸਨ੍ਨੇ, ਰਮਣੀਯੇ ਸਿਲਾਤਲੇ;

ਨਾਨਾਰਤਨਪਜ੍ਜੋਤੇ, ਨਾਨਾਗਨ੍ਧਵਨਨ੍ਤਰੇ.

‘‘ਮਹਤਾ ਭਿਕ੍ਖੁਸਙ੍ਘੇਨ, ਪਰੇਤੋ ਲੋਕਨਾਯਕੋ;

ਆਸੀਨੋ ਬ੍ਯਾਕਰੀ ਤਤ੍ਥ, ਪੁਬ੍ਬਕਮ੍ਮਾਨਿ ਅਤ੍ਤਨੋ.

‘‘ਸੁਣਾਥ ਭਿਕ੍ਖਵੋ ਮਯ੍ਹਂ, ਯਂ ਕਮ੍ਮਂ ਪਕਤਂ ਮਯਾ;

ਪਿਲੋਤਿਕਸ੍ਸ ਕਮ੍ਮਸ੍ਸ, ਬੁਦ੍ਧਤ੍ਤੇਪਿ ਵਿਪਚ੍ਚਤਿ.

੧. ‘‘ਮੁਨਾਲ਼ਿ ਨਾਮਹਂ ਧੁਤ੍ਤੋ, ਪੁਬ੍ਬੇ ਅਞ੍ਞਾਸੁ ਜਾਤਿਸੁ;

ਪਚ੍ਚੇਕਬੁਦ੍ਧਂ ਸੁਰਭਿਂ, ਅਬ੍ਭਾਚਿਕ੍ਖਿਂ ਅਦੂਸਕਂ.

‘‘ਤੇਨ ਕਮ੍ਮਵਿਪਾਕੇਨ, ਨਿਰਯੇ ਸਂਸਰਿਂ ਚਿਰਂ;

ਬਹੂ ਵਸ੍ਸਸਹਸ੍ਸਾਨਿ, ਦੁਕ੍ਖਂ ਵੇਦੇਮਿ ਵੇਦਨਂ.

‘‘ਤੇਨ ਕਮ੍ਮਾਵਸੇਸੇਨ, ਇਧ ਪਚ੍ਛਿਮਕੇ ਭਵੇ;

ਅਬ੍ਭਕ੍ਖਾਨਂ ਮਯਾ ਲਦ੍ਧਂ, ਸੁਨ੍ਦਰਿਕਾਯ ਕਾਰਣਾ.

੨. ‘‘ਸਬ੍ਬਾਭਿਭੁਸ੍ਸ ਬੁਦ੍ਧਸ੍ਸ, ਨਨ੍ਦੋ ਨਾਮਾਸਿ ਸਾਵਕੋ;

ਤਂ ਅਬ੍ਭਕ੍ਖਾਯ ਨਿਰਯੇ, ਚਿਰਂ ਸਂਸਰਿਤਂ ਮਯਾ.

‘‘ਦਸ ਵਸ੍ਸਸਹਸ੍ਸਾਨਿ, ਨਿਰਯੇ ਸਂਸਰਿਂ ਚਿਰਂ;

ਮਨੁਸ੍ਸਭਾਵਂ ਲਦ੍ਧਾਹਂ, ਅਬ੍ਭਕ੍ਖਾਨਂ ਬਹੁਂ ਲਭਿਂ.

‘‘ਤੇਨ ਕਮ੍ਮਾਵਸੇਸੇਨ, ਚਿਞ੍ਚਮਾਣਵਿਕਾ ਮਮਂ;

ਅਬ੍ਭਾਚਿਕ੍ਖਿ ਅਭੂਤੇਨ, ਜਨਕਾਯਸ੍ਸ ਅਗ੍ਗਤੋ.

੩. ‘‘ਬ੍ਰਾਹ੍ਮਣੋ ਸੁਤਵਾ ਆਸਿਂ, ਅਹਂ ਸਕ੍ਕਤਪੂਜਿਤੋ;

ਮਹਾਵਨੇ ਪਞ੍ਚਸਤੇ, ਮਨ੍ਤੇ ਵਾਚੇਮਿ ਮਾਣਵੇ.

‘‘ਤਤ੍ਥਾਗਤੋ ਇਸੀ ਭੀਮੋ, ਪਞ੍ਚਾਭਿਞ੍ਞੋ ਮਹਿਦ੍ਧਿਕੋ;

ਤਞ੍ਚਾਹਂ ਆਗਤਂ ਦਿਸ੍ਵਾ, ਅਬ੍ਭਾਚਿਕ੍ਖਿਂ ਅਦੂਸਕਂ.

‘‘ਤਤੋਹਂ ਅਵਚਂ ਸਿਸ੍ਸੇ, ਕਾਮਭੋਗੀ ਅਯਂ ਇਸਿ;

ਮਯ੍ਹਮ੍ਪਿ ਭਾਸਮਾਨਸ੍ਸ, ਅਨੁਮੋਦਿਂਸੁ ਮਾਣਵਾ.

‘‘ਤਤੋ ਮਾਣਵਕਾ ਸਬ੍ਬੇ, ਭਿਕ੍ਖਮਾਨਂ ਕੁਲੇ ਕੁਲੇ;

ਮਹਾਜਨਸ੍ਸ ਆਹਂਸੁ, ਕਾਮਭੋਗੀ ਅਯਂ ਇਸਿ.

‘‘ਤੇਨ ਕਮ੍ਮਵਿਪਾਕੇਨ, ਪਞ੍ਚ ਭਿਕ੍ਖੁਸਤਾ ਇਮੇ;

ਅਬ੍ਭਕ੍ਖਾਨਂ ਲਭੁਂ ਸਬ੍ਬੇ, ਸੁਨ੍ਦਰਿਕਾਯ ਕਾਰਣਾ.

੪. ‘‘ਵੇਮਾਤੁਭਾਤਿਕਂ ਪੁਬ੍ਬੇ, ਧਨਹੇਤੁ ਹਨਿਂ ਅਹਂ;

ਪਕ੍ਖਿਪਿਂਗਿਰਿਦੁਗ੍ਗਸ੍ਮਿਂ, ਸਿਲਾਯ ਚ ਅਪਿਂਸਯਿਂ.

‘‘ਤੇਨ ਕਮ੍ਮਵਿਪਾਕੇਨ, ਦੇਵਦਤ੍ਤੋ ਸਿਲਂ ਖਿਪਿ;

ਅਙ੍ਗੁਟ੍ਠਂ ਪਿਂਸਯੀ ਪਾਦੇ, ਮਮ ਪਾਸਾਣਸਕ੍ਖਰਾ.

੫. ‘‘ਪੁਰੇਹਂ ਦਾਰਕੋ ਹੁਤ੍ਵਾ, ਕੀਲ਼ਮਾਨੋ ਮਹਾਪਥੇ;

ਪਚ੍ਚੇਕਬੁਦ੍ਧਂ ਦਿਸ੍ਵਾਨ, ਮਗ੍ਗੇ ਸਕਲਿਕਂ ਖਿਪਿਂ.

‘‘ਤੇਨ ਕਮ੍ਮਵਿਪਾਕੇਨ, ਇਧ ਪਚ੍ਛਿਮਕੇ ਭਵੇ;

ਵਧਤ੍ਥਂ ਮਂ ਦੇਵਦਤ੍ਤੋ, ਅਭਿਮਾਰੇ ਪਯੋਜਯਿ.

੬. ‘‘ਹਤ੍ਥਾਰੋਹੋ ਪੁਰੇ ਆਸਿਂ, ਪਚ੍ਚੇਕਮੁਨਿਮੁਤ੍ਤਮਂ;

ਪਿਣ੍ਡਾਯ ਵਿਚਰਨ੍ਤਂ ਤਂ, ਆਸਾਦੇਸਿਂ ਗਜੇਨਹਂ.

‘‘ਤੇਨ ਕਮ੍ਮਵਿਪਾਕੇਨ, ਭਨ੍ਤੋ ਨਾਲ਼ਾਗਿਰੀ ਗਜੋ;

ਗਿਰਿਬ੍ਬਜੇ ਪੁਰਵਰੇ, ਦਾਰੁਣੋ ਸਮੁਪਾਗਮਿ.

੭. ‘‘ਰਾਜਾਹਂ ਪਤ੍ਥਿਵੋ ਆਸਿਂ, ਸਤ੍ਤਿਯਾ ਪੁਰਿਸੇ ਹਨਿਂ;

ਤੇਨ ਕਮ੍ਮਵਿਪਾਕੇਨ, ਨਿਰਯੇ ਪਚ੍ਚਿਸਂ ਭੁਸਂ.

‘‘ਕਮ੍ਮੁਨੋ ਤਸ੍ਸ ਸੇਸੇਨ, ਸੋਦਾਨਿ ਸਕਲਂ ਮਮ;

ਪਾਦੇ ਛਵਿਂ ਪਕਪ੍ਪੇਸਿ, ਨ ਹਿ ਕਮ੍ਮਂ ਵਿਨਸ੍ਸਤਿ.

੮. ‘‘ਅਹਂ ਕੇਵਟ੍ਟਗਾਮਸ੍ਮਿਂ, ਅਹੁਂ ਕੇਵਟ੍ਟਦਾਰਕੋ;

ਮਚ੍ਛਕੇ ਘਾਤਿਤੇ ਦਿਸ੍ਵਾ, ਜਨਯਿਂ ਸੋਮਨਸ੍ਸਕਂ.

‘‘ਤੇਨ ਕਮ੍ਮਵਿਪਾਕੇਨ, ਸੀਸਦੁਕ੍ਖਂ ਅਹੂ ਮਮ;

ਸਕ੍ਕਾ ਚ ਸਬ੍ਬੇ ਹਞ੍ਞਿਂਸੁ, ਯਦਾ ਹਨਿ ਵਿਟਟੂਭੋ.

੯. ‘‘ਫੁਸ੍ਸਸ੍ਸਾਹਂ ਪਾਵਚਨੇ, ਸਾਵਕੇ ਪਰਿਭਾਸਯਿਂ;

ਯਵਂ ਖਾਦਥ ਭੁਞ੍ਜਥ, ਮਾ ਚ ਭੁਞ੍ਜਥ ਸਾਲਯੋ.

‘‘ਤੇਨ ਕਮ੍ਮਵਿਪਾਕੇਨ, ਤੇਮਾਸਂ ਖਾਦਿਤਂ ਯਵਂ;

ਨਿਮਨ੍ਤਿਤੋ ਬ੍ਰਾਹ੍ਮਣੇਨ, ਵੇਰਞ੍ਜਾਯਂ ਵਸਿਂ ਤਦਾ.

੧੦. ‘‘ਨਿਬ੍ਬੁਦ੍ਧੇ ਵਤ੍ਤਮਾਨਮ੍ਹਿ, ਮਲ੍ਲਪੁਤ੍ਤਂ ਨਿਹੇਠਯਿਂ;

ਤੇਨ ਕਮ੍ਮਵਿਪਾਕੇਨ, ਪਿਟ੍ਠਿਦੁਕ੍ਖਂ ਅਹੂ ਮਮ.

੧੧. ‘‘ਤਿਕਿਚ੍ਛਕੋ ਅਹਂ ਆਸਿਂ, ਸੇਟ੍ਠਿਪੁਤ੍ਤਂ ਵਿਰੇਚਯਿਂ;

ਤੇਨ ਕਮ੍ਮਵਿਪਾਕੇਨ, ਹੋਤਿ ਪਕ੍ਖਨ੍ਦਿਕਾ ਮਮ.

੧੨. ‘‘ਅਵਚਾਹਂ ਜੋਤਿਪਾਲੋ, ਕਸ੍ਸਪਂ ਸੁਗਤਂ ਤਦਾ;

ਕੁਤੋ ਨੁ ਬੋਧਿ ਮੁਣ੍ਡਸ੍ਸ, ਬੋਧਿ ਪਰਮਦੁਲ੍ਲਭਾ.

‘‘ਤੇਨ ਕਮ੍ਮਵਿਪਾਕੇਨ, ਅਚਰਿਂ ਦੁਕ੍ਕਰਂ ਬਹੁਂ;

ਛਬ੍ਬਸ੍ਸਾਨੁਰੁਵੇਲਾਯਂ, ਤਤੋ ਬੋਧਿਂ ਅਪਾਪੁਣਿਂ.

‘‘ਨਾਹਂ ਏਤੇਨ ਮਗ੍ਗੇਨ, ਪਾਪੁਣਿਂ ਬੋਧਿਮੁਤ੍ਤਮਂ;

ਕੁਮ੍ਮਗ੍ਗੇਨ ਗਵੇਸਿਸ੍ਸਂ, ਪੁਬ੍ਬਕਮ੍ਮੇਨ ਵਾਰਿਤੋ.

‘‘ਪੁਞ੍ਞਪਾਪਪਰਿਕ੍ਖੀਣੋ, ਸਬ੍ਬਸਨ੍ਤਾਪਵਜ੍ਜਿਤੋ;

ਅਸੋਕੋ ਅਨੁਪਾਯਾਸੋ, ਨਿਬ੍ਬਾਯਿਸ੍ਸਮਨਾਸਵੋ.

‘‘ਏਵਂ ਜਿਨੋ ਵਿਯਾਕਾਸਿ, ਭਿਕ੍ਖੁਸਙ੍ਘਸ੍ਸ ਅਗ੍ਗਤੋ;

ਸਬ੍ਬਾਭਿਞ੍ਞਾਬਲਪ੍ਪਤ੍ਤੋ, ਅਨੋਤਤ੍ਤਮਹਾਸਰੇ’’ਤਿ. (ਅਪ. ਥੇਰ ੧.੩੯.੬੪-੯੬);

ਅਟ੍ਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.