੫. ਨਾਗਸੁਤ੍ਤਵਣ੍ਣਨਾ

੩੫. ਪਞ੍ਚਮੇ ਕੋਸਮ੍ਬਿਯਨ੍ਤਿ ਕੁਸੁਮ੍ਬੇਨ ਨਾਮ ਇਸਿਨਾ ਵਸਿਤਟ੍ਠਾਨੇ ਮਾਪਿਤਤ੍ਤਾ ‘‘ਕੋਸਮ੍ਬੀ’’ਤਿ ਏਵਂਲਦ੍ਧਨਾਮਕੇ ਨਗਰੇ. ਘੋਸਿਤਾਰਾਮੇਤਿ ਘੋਸਿਤਸੇਟ੍ਠਿਨਾ ਕਾਰਿਤੇ ਆਰਾਮੇ. ਭਗਵਾ ਆਕਿਣ੍ਣੋ ਵਿਹਰਤੀਤਿ ਭਗਵਾ ਸਮ੍ਬਾਧਪ੍ਪਤ੍ਤੋ ਵਿਹਰਤਿ. ਕਿਂ ਪਨ ਭਗਵਤੋ ਸਮ੍ਬਾਧੋ ਅਤ੍ਥਿ, ਸਂਸਗ੍ਗੋ ਵਾਤਿ? ਨਤ੍ਥਿ. ਨ ਹਿ ਕੋਚਿ ਭਗਵਨ੍ਤਂ ਅਨਿਚ੍ਛਾਯ ਉਪਸਙ੍ਕਮਿਤੁਂ ਸਕ੍ਕੋਤਿ. ਦੁਰਾਸਦਾ ਹਿ ਬੁਦ੍ਧਾ ਭਗਵਨ੍ਤੋ ਸਬ੍ਬਤ੍ਥ ਚ ਅਨੁਪਲਿਤ੍ਤਤ੍ਤਾ. ਹਿਤੇਸਿਤਾਯ ਪਨ ਸਤ੍ਤੇਸੁ ਅਨੁਕਮ੍ਪਂ ਉਪਾਦਾਯ ‘‘ਮੁਤ੍ਤੋ ਮੋਚੇਸ੍ਸਾਮੀ’’ਤਿ ਪਟਿਞ੍ਞਾਨੁਰੂਪਂ ਚਤੁਰੋਘਨਿਤ੍ਥਰਣਤ੍ਥਂ ਅਟ੍ਠਨ੍ਨਂ ਪਰਿਸਾਨਂ ਅਤ੍ਤਨੋ ਸਨ੍ਤਿਕਂ ਕਾਲੇਨ ਕਾਲਂ ਉਪਸਙ੍ਕਮਨਂ ਅਧਿਵਾਸੇਤਿ, ਸਯਞ੍ਚ ਮਹਾਕਰੁਣਾਸਮੁਸ੍ਸਾਹਿਤੋ ਕਾਲਞ੍ਞੂ ਹੁਤ੍ਵਾ ਤਤ੍ਥ ਉਪਸਙ੍ਕਮਤਿ, ਇਦਂ ਸਬ੍ਬਬੁਦ੍ਧਾਨਂ ਆਚਿਣ੍ਣਂ, ਅਯਮਿਧ ਆਕਿਣ੍ਣਵਿਹਾਰੋਤਿ ਅਧਿਪ੍ਪੇਤੋ.

ਇਧ ਪਨ ਕੋਸਮ੍ਬਿਕਾਨਂ ਭਿਕ੍ਖੂਨਂ ਕਲਹਜਾਤਾਨਂ ਸਤ੍ਥਾ ਦੀਘੀਤਿਸ੍ਸ ਕੋਸਲਰਞ੍ਞੋ ਵਤ੍ਥੁਂ ਆਹਰਿਤ੍ਵਾ, ‘‘ਨ ਹਿ ਵੇਰੇਨ ਵੇਰਾਨਿ, ਸਮ੍ਮਨ੍ਤੀਧ ਕੁਦਾਚਨ’’ਨ੍ਤਿਆਦਿਨਾ (ਧ. ਪ. ੫; ਮ. ਨਿ. ੩.੨੩੭; ਮਹਾਵ. ੪੬੪) ਓਵਾਦਂ ਅਦਾਸਿ, ਤਂ ਦਿਵਸਂ ਤੇਸਂ ਕਲਹਂ ਕਰੋਨ੍ਤਾਨਂਯੇਵ ਰਤ੍ਤਿ ਵਿਭਾਤਾ. ਦੁਤਿਯਦਿਵਸੇਪਿ ਭਗਵਾ ਤਮੇਵ ਵਤ੍ਥੁਂ ਕਥੇਸਿ, ਤਂ ਦਿਵਸਮ੍ਪਿ ਤੇਸਂ ਕਲਹਂ ਕਰੋਨ੍ਤਾਨਂਯੇਵ ਰਤ੍ਤਿ ਵਿਭਾਤਾ. ਤਤਿਯਦਿਵਸੇਪਿ ਭਗਵਾ ਤਮੇਵ ਵਤ੍ਥੁਂ ਕਥੇਸਿ, ਅਥਞ੍ਞਤਰੋ ਭਿਕ੍ਖੁ ਭਗਵਨ੍ਤਂ ਏਵਮਾਹ – ‘‘ਅਪ੍ਪੋਸ੍ਸੁਕ੍ਕੋ, ਭਨ੍ਤੇ ਭਗਵਾ, ਦਿਟ੍ਠਧਮ੍ਮਸੁਖਵਿਹਾਰਮਨੁਯੁਤ੍ਤੋ ਵਿਹਰਤੁ, ਮਯਮੇਤੇਨ ਭਣ੍ਡਨੇਨ ਕਲਹੇਨ ਵਿਗ੍ਗਹੇਨ ਵਿਵਾਦੇਨ ਪਞ੍ਞਾਯਿਸ੍ਸਾਮਾ’’ਤਿ. ਸਤ੍ਥਾ ‘‘ਪਰਿਯਾਦਿਨ੍ਨਚਿਤ੍ਤਾ ਖੋ ਇਮੇ ਮੋਘਪੁਰਿਸਾ ਨ ਦਾਨਿਮੇ ਸਕ੍ਕਾ ਸਞ੍ਞਾਪੇਤੁਂ, ਨਤ੍ਥਿ ਚੇਤ੍ਥ ਸਞ੍ਞਾਪੇਤਬ੍ਬਾ, ਯਂਨੂਨਾਹਂ ਏਕਚਾਰਿਕਵਾਸਂ ਵਸੇਯ੍ਯਂ, ਏਵਂ ਇਮੇ ਭਿਕ੍ਖੂ ਕਲਹਤੋ ਓਰਮਿਸ੍ਸਨ੍ਤੀ’’ਤਿ ਚਿਨ੍ਤੇਸਿ. ਏਵਂ ਤੇਹਿ ਕਲਹਕਾਰਕੇਹਿ ਭਿਕ੍ਖੂਹਿ ਸਦ੍ਧਿਂ ਏਕਵਿਹਾਰੇ ਵਾਸਂ ਵਿਨੇਤਬ੍ਬਾਭਾਵਤੋ ਉਪਾਸਕਾਦੀਹਿ ਉਪਸਙ੍ਕਮਨਞ੍ਚ ਆਕਿਣ੍ਣਵਿਹਾਰਂ ਕਤ੍ਵਾ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਭਗਵਾ ਆਕਿਣ੍ਣੋ ਵਿਹਰਤੀ’’ਤਿਆਦਿ.

ਤਤ੍ਥ ਦੁਕ੍ਖਨ੍ਤਿ ਨ ਸੁਖਂ, ਅਨਾਰਾਧਿਤਚਿਤ੍ਤਤਾਯ ਨ ਇਟ੍ਠਨ੍ਤਿ ਅਤ੍ਥੋ. ਤੇਨੇਵਾਹ ‘‘ਨ ਫਾਸੁ ਵਿਹਰਾਮੀ’’ਤਿ. ਵੂਪਕਟ੍ਠੋਤਿ ਪਵਿਵੇਕਟ੍ਠੋ ਦੂਰੀਭੂਤੋ. ਤਥਾ ਚਿਨ੍ਤੇਤ੍ਵਾਵ ਭਗਵਾ ਪਾਤੋਵ ਸਰੀਰਪ੍ਪਟਿਜਗ੍ਗਨਂ ਕਤ੍ਵਾ ਕੋਸਮ੍ਬਿਯਂ ਪਿਣ੍ਡਾਯ ਚਰਿਤ੍ਵਾ ਕਞ੍ਚਿ ਅਨਾਮਨ੍ਤੇਤ੍ਵਾ ਏਕੋ ਅਦੁਤਿਯੋ ਗਨ੍ਤ੍ਵਾ ਕੋਸਲਰਟ੍ਠੇ ਪਾਲਿਲੇਯ੍ਯਕੇ ਵਨਸਣ੍ਡੇ ਭਦ੍ਦਸਾਲਮੂਲੇ ਵਿਹਾਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ…ਪੇ… ਭਦ੍ਦਸਾਲਮੂਲੇ’’ਤਿ. ਤਤ੍ਥ ਸਾਮਨ੍ਤਿ ਸਯਂ. ਸਂਸਾਮੇਤ੍ਵਾਤਿ ਪਟਿਸਾਮੇਤ੍ਵਾ. ਪਤ੍ਤਚੀਵਰਮਾਦਾਯਾਤਿ ਏਤ੍ਥਾਪਿ ਸਾਮਨ੍ਤਿ ਪਦਂ ਆਨੇਤ੍ਵਾ ਯੋਜੇਤਬ੍ਬਂ. ਉਪਟ੍ਠਾਕੇਤਿ ਕੋਸਮ੍ਬਿਨਗਰਵਾਸਿਨੋ ਘੋਸਿਤਸੇਟ੍ਠਿਆਦਿਕੇ ਉਪਟ੍ਠਾਕੇ, ਵਿਹਾਰੇ ਚ ਅਗ੍ਗੁਪਟ੍ਠਾਕਂ ਆਯਸ੍ਮਨ੍ਤਂ ਆਨਨ੍ਦਂ ਅਨਾਮਨ੍ਤੇਤ੍ਵਾ.

ਏਵਂ ਗਤੇ ਸਤ੍ਥਰਿ ਪਞ੍ਚਸਤਾ ਭਿਕ੍ਖੂ ਆਯਸ੍ਮਨ੍ਤਂ ਆਨਨ੍ਦਂ ਆਹਂਸੁ – ‘‘ਆਵੁਸੋ ਆਨਨ੍ਦ, ਸਤ੍ਥਾ ਏਕਕੋਵ ਗਤੋ, ਮਯਂ ਅਨੁਬਨ੍ਧਿਸ੍ਸਾਮਾ’’ਤਿ. ‘‘ਆਵੁਸੋ, ਯਦਾ ਭਗਵਾ ਸਾਮਂ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਅਨਾਮਨ੍ਤੇਤ੍ਵਾ ਉਪਟ੍ਠਾਕੇ ਚ ਅਨਪਲੋਕੇਤ੍ਵਾ ਭਿਕ੍ਖੁਸਙ੍ਘਂ ਅਦੁਤਿਯੋ ਗਚ੍ਛਤਿ, ਤਦਾ ਏਕਚਾਰਂ ਚਰਿਤੁਂ ਭਗਵਤੋ ਅਜ੍ਝਾਸਯੋ, ਸਾਵਕੇਨ ਨਾਮ ਸਤ੍ਥੁ ਅਜ੍ਝਾਸਯਾਨੁਰੂਪਂ ਪਟਿਪਜ੍ਜਿਤਬ੍ਬਂ, ਤਸ੍ਮਾ ਨ ਇਮੇਸੁ ਦਿਵਸੇਸੁ ਭਗਵਾ ਅਨੁਗਨ੍ਤਬ੍ਬੋ’’ਤਿ ਨਿਵਾਰੇਸਿ, ਸਯਮ੍ਪਿ ਨਾਨੁਗਚ੍ਛਿ.

ਅਨੁਪੁਬ੍ਬੇਨਾਤਿ ਅਨੁਕ੍ਕਮੇਨ, ਗਾਮਨਿਗਮਪਟਿਪਾਟਿਯਾ ਚਾਰਿਕਂ ਚਰਮਾਨੋ ‘‘ਏਕਚਾਰਵਾਸਂ ਤਾਵ ਵਸਮਾਨਂ ਭਿਕ੍ਖੁਂ ਪਸ੍ਸਿਸ੍ਸਾਮੀ’’ਤਿ ਬਾਲਕਲੋਣਕਾਰਗਾਮਂ ਗਨ੍ਤ੍ਵਾ ਤਤ੍ਥ ਭਗੁਤ੍ਥੇਰਸ੍ਸ ਸਕਲਂ ਪਚ੍ਛਾਭਤ੍ਤਞ੍ਚੇਵ ਤਿਯਾਮਞ੍ਚ ਰਤ੍ਤਿਂ ਏਕਚਾਰਵਾਸੇ ਆਨਿਸਂਸਂ ਕਥੇਤ੍ਵਾ ਪੁਨਦਿਵਸੇ ਤੇਨ ਪਚ੍ਛਾਸਮਣੇਨ ਪਿਣ੍ਡਾਯ ਚਰਿਤ੍ਵਾ ਤਂ ਤਤ੍ਥੇਵ ਨਿਵਤ੍ਤੇਤ੍ਵਾ ‘‘ਸਮਗ੍ਗਵਾਸਂ ਵਸਮਾਨੇ ਤਯੋ ਕੁਲਪੁਤ੍ਤੇ ਪਸ੍ਸਿਸ੍ਸਾਮੀ’’ਤਿ ਪਾਚੀਨਵਂਸਮਿਗਦਾਯਂ ਗਨ੍ਤ੍ਵਾ ਤੇਸਮ੍ਪਿ ਸਕਲਰਤ੍ਤਿਂ ਸਮਗ੍ਗਵਾਸੇ ਆਨਿਸਂਸਂ ਕਥੇਤ੍ਵਾ ਤੇਪਿ ਤਤ੍ਥੇਵ ਨਿਵਤ੍ਤੇਤ੍ਵਾ ਏਕਕੋਵ ਪਾਲਿਲੇਯ੍ਯਗਾਮਂ ਸਮ੍ਪਤ੍ਤੋ. ਪਾਲਿਲੇਯ੍ਯਗਾਮਵਾਸਿਨੋ ਪਚ੍ਚੁਗ੍ਗਨ੍ਤ੍ਵਾ ਭਗਵਤੋ ਦਾਨਂ ਦਤ੍ਵਾ ਪਾਲਿਲੇਯ੍ਯਗਾਮਸ੍ਸ ਅਵਿਦੂਰੇ ਰਕ੍ਖਿਤਵਨਸਣ੍ਡੋ ਨਾਮ ਅਤ੍ਥਿ, ਤਤ੍ਥ ਭਗਵਤੋ ਪਣ੍ਣਸਾਲਂ ਕਤ੍ਵਾ ‘‘ਏਤ੍ਥ ਭਗਵਾ ਵਸਤੂ’’ਤਿ ਯਾਚਿਤ੍ਵਾ ਵਾਸਯਿਂਸੁ. ਭਦ੍ਦਸਾਲੋਤਿ ਪਨ ਤਤ੍ਥੇਕੋ ਮਨਾਪੋ ਭਦ੍ਦਕੋ ਸਾਲਰੁਕ੍ਖੋ, ਭਗਵਾ ਤਂ ਗਾਮਂ ਉਪਨਿਸ੍ਸਾਯ ਵਨਸਣ੍ਡੇ ਪਣ੍ਣਸਾਲਸਮੀਪੇ ਤਸ੍ਮਿਂ ਰੁਕ੍ਖਮੂਲੇ ਵਿਹਾਸਿ. ਤੇਨ ਵੁਤ੍ਤਂ – ‘‘ਪਾਲਿਲੇਯ੍ਯਕੇ ਵਿਹਰਤਿ ਰਕ੍ਖਿਤਵਨਸਣ੍ਡੇ ਭਦ੍ਦਸਾਲਮੂਲੇ’’ਤਿ.

ਹਤ੍ਥਿਨਾਗੋਤਿ ਮਹਾਹਤ੍ਥੀ ਯੂਥਪਤਿ. ਹਤ੍ਥਿਕਲਭੇਹੀਤਿ ਹਤ੍ਥਿਪੋਤਕੇਹਿ. ਹਤ੍ਥਿਚ੍ਛਾਪੇਹੀਤਿ ਖੀਰੂਪਗੇਹਿ ਦਹਰਹਤ੍ਥਿਪੋਤਕੇਹਿ, ਯੇ ‘‘ਭਿਙ੍ਕਾ’’ਤਿਪਿ ਵੁਚ੍ਚਨ੍ਤਿ. ਛਿਨ੍ਨਗ੍ਗਾਨੀਤਿ ਪੁਰਤੋ ਪੁਰਤੋ ਗਚ੍ਛਨ੍ਤੇਹਿ ਤੇਹਿ ਹਤ੍ਥਿਆਦੀਹਿ ਛਿਨ੍ਨਗ੍ਗਾਨਿ ਖਾਦਿਤਾਵਸੇਸਾਨਿ ਖਾਣੁਸਦਿਸਾਨਿ ਖਾਦਤਿ. ਓਭਗ੍ਗੋਭਗ੍ਗਨ੍ਤਿ ਤੇਨ ਹਤ੍ਥਿਨਾਗੇਨ ਉਚ੍ਚਟ੍ਠਾਨਤੋ ਭਞ੍ਜਿਤ੍ਵਾ ਭਞ੍ਜਿਤ੍ਵਾ ਪਾਤਿਤਂ. ਅਸ੍ਸ ਸਾਖਾਭਙ੍ਗਨ੍ਤਿ ਏਤਸ੍ਸ ਸਨ੍ਤਕਂ ਸਾਖਾਭਙ੍ਗਂ ਤੇ ਖਾਦਨ੍ਤਿ. ਆਵਿਲਾਨੀਤਿ ਤੇਹਿ ਪਠਮਤਰਂ ਓਤਰਿਤ੍ਵਾ ਪਿਵਨ੍ਤੇਹਿ ਆਲੁਲ਼ਿਤਤ੍ਤਾ ਆਵਿਲਾਨਿ ਕਦ੍ਦਮਮਿਸ੍ਸਾਨਿ ਪਾਨੀਯਾਨਿ ਪਿਵਤਿ. ਓਗਾਹਾਤਿ ਤਿਤ੍ਥਤੋ. ‘‘ਓਗਾਹ’’ਨ੍ਤਿਪਿ ਪਾਲ਼ਿ. ਅਸ੍ਸਾਤਿ ਹਤ੍ਥਿਨਾਗਸ੍ਸ. ਉਪਨਿਘਂਸਨ੍ਤਿਯੋਤਿ ਘਟ੍ਟੇਨ੍ਤਿਯੋ, ਉਪਨਿਘਂਸਿਯਮਾਨੋਪਿ ਅਤ੍ਤਨੋ ਉਲ਼ਾਰਭਾਵੇਨ ਨ ਕੁਜ੍ਝਤਿ, ਤੇਨ ਤਾ ਤਂ ਘਂਸਨ੍ਤਿਯੇਵ. ਯੂਥਾਤਿ ਹਤ੍ਥਿਘਟਾ.

ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਸੋ ਕਿਰ ਹਤ੍ਥਿਨਾਗੋ ਯੂਥਵਾਸੇ ਉਕ੍ਕਣ੍ਠਿਤੋ ਤਂ ਵਨਸਣ੍ਡਂ ਪਵਿਟ੍ਠੋ ਤਤ੍ਥ ਭਗਵਨ੍ਤਂ ਦਿਸ੍ਵਾ ਘਟਸਹਸ੍ਸੇਨ ਨਿਬ੍ਬਾਪਿਤਸਨ੍ਤਾਪੋ ਵਿਯ ਨਿਬ੍ਬੁਤੋ ਹੁਤ੍ਵਾ ਪਸਨ੍ਨਚਿਤ੍ਤੋ ਭਗਵਤੋ ਸਨ੍ਤਿਕੇ ਅਟ੍ਠਾਸਿ, ਤਤੋ ਪਟ੍ਠਾਯ ਵਤ੍ਤਸੀਸੇ ਠਤ੍ਵਾ ਭਦ੍ਦਸਾਲਸ੍ਸ ਪਣ੍ਣਸਾਲਾਯ ਚ ਸਮਨ੍ਤਤੋ ਅਪ੍ਪਹਰਿਤਕਂ ਕਤ੍ਵਾ ਸਾਖਾਭਙ੍ਗੇਹਿ ਸਮ੍ਮਜ੍ਜਤਿ, ਭਗਵਤੋ ਮੁਖਧੋਵਨਂ ਦੇਤਿ, ਨ੍ਹਾਨੋਦਕਂ ਆਹਰਤਿ, ਦਨ੍ਤਕਟ੍ਠਂ ਦੇਤਿ, ਅਰਞ੍ਞਤੋ ਮਧੁਰਾਨਿ ਫਲਾਨਿ ਆਹਰਿਤ੍ਵਾ ਸਤ੍ਥੁ ਉਪਨੇਤਿ, ਸਤ੍ਥਾ ਤਾਨਿ ਪਰਿਭੁਞ੍ਜਤਿ. ਤੇਨ ਵੁਤ੍ਤਂ – ‘‘ਤਤ੍ਰ ਸੁਦਂ ਸੋ ਹਤ੍ਥਿਨਾਗੋ ਯਸ੍ਮਿਂ ਪਦੇਸੇ ਭਗਵਾ ਵਿਹਰਤਿ, ਤਂ ਪਦੇਸਂ ਅਪ੍ਪਹਰਿਤਞ੍ਚ ਕਰੋਤਿ, ਸੋਣ੍ਡਾਯ ਭਗਵਤੋ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤੀ’’ਤਿ. ਸੋਣ੍ਡਾਯ ਦਾਰੂਨਿ ਆਹਰਿਤ੍ਵਾ ਅਞ੍ਞਮਞ੍ਞਂ ਘਂਸਿਤ੍ਵਾ ਅਗ੍ਗਿਂ ਉਟ੍ਠਾਪੇਤ੍ਵਾ ਦਾਰੂਨਿ ਜਾਲਾਪੇਤ੍ਵਾ ਤਤ੍ਥ ਪਾਸਾਣਖਣ੍ਡਾਨਿ ਤਾਪੇਤ੍ਵਾ ਤਾਨਿ ਦਣ੍ਡਕੇਹਿ ਪਵਟ੍ਟੇਤ੍ਵਾ ਸੋਣ੍ਡਿਯਂ ਖਿਪਿਤ੍ਵਾ ਉਦਕਸ੍ਸ ਤਤ੍ਤਭਾਵਂ ਞਤ੍ਵਾ ਭਗਵਤੋ ਸਨ੍ਤਿਕਂ ਉਪਗਨ੍ਤ੍ਵਾ ਤਿਟ੍ਠਤਿ, ਭਗਵਾ ‘‘ਹਤ੍ਥਿਨਾਗੋ ਮਮ ਨ੍ਹਾਨਂ ਇਚ੍ਛਤੀ’’ਤਿ ਤਤ੍ਥ ਗਨ੍ਤ੍ਵਾ ਨ੍ਹਾਨਕਿਚ੍ਚਂ ਕਰੋਤਿ, ਪਾਨੀਯੇਪਿ ਏਸੇਵ ਨਯੋ. ਤਸ੍ਮਿਂ ਪਨ ਸੀਤਲੇ ਸਞ੍ਜਾਤੇ ਉਪਸਙ੍ਕਮਤਿ, ਤਂ ਸਨ੍ਧਾਯ ਵੁਤ੍ਤਂ – ‘‘ਸੋਣ੍ਡਾਯ ਭਗਵਤੋ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤੀ’’ਤਿ.

ਅਥ ਖੋ ਭਗਵਤੋ ਰਹੋਗਤਸ੍ਸਾਤਿਆਦਿ ਉਭਿਨ੍ਨਂ ਮਹਾਨਾਗਾਨਂ ਵਿਵੇਕਸੁਖਪਚ੍ਚਵੇਕ੍ਖਣਦਸ੍ਸਨਂ, ਤਂ ਵੁਤ੍ਤਤ੍ਥਮੇਵ. ਅਤ੍ਤਨੋ ਚ ਪਵਿਵੇਕਂ ਵਿਦਿਤ੍ਵਾਤਿ ਕੇਹਿਚਿ ਅਨਾਕਿਣ੍ਣਭਾਵਲਦ੍ਧਂ ਕਾਯਵਿਵੇਕਂ ਜਾਨਿਤ੍ਵਾ, ਇਤਰੇ ਪਨ ਵਿਵੇਕਾ ਭਗਵਤੋ ਸਬ੍ਬਕਾਲਂ ਵਿਜ੍ਜਨ੍ਤਿਯੇਵ.

ਇਮਂ ਉਦਾਨਨ੍ਤਿ ਇਮਂ ਅਤ੍ਤਨੋ ਹਤ੍ਥਿਨਾਗਸ੍ਸ ਚ ਪਵਿਵੇਕਾਭਿਰਤਿਯਾ ਸਮਾਨਜ੍ਝਾਸਯਭਾਵਦੀਪਨਂ ਉਦਾਨਂ ਉਦਾਨੇਸਿ.

ਤਤ੍ਥਾਯਂ ਸਙ੍ਖੇਪਤ੍ਥੋ – ਏਤਂ ਈਸਾਦਨ੍ਤਸ੍ਸ ਰਥਈਸਾਸਦਿਸਦਨ੍ਤਸ੍ਸ ਹਤ੍ਥਿਨਾਗਸ੍ਸ ਚਿਤ੍ਤਂ ਨਾਗੇਨ ਬੁਦ੍ਧਨਾਗਸ੍ਸ ਚਿਤ੍ਤੇਨ ਸਮੇਤਿ ਸਂਸਨ੍ਦਤਿ. ਕਥਂ ਸਮੇਤਿ ਚੇ? ਯਦੇਕੋ ਰਮਤੀ ਵਨੇ ਯਸ੍ਮਾ ਬੁਦ੍ਧਨਾਗੋ ‘‘ਅਹਂ ਖੋ ਪੁਬ੍ਬੇ ਆਕਿਣ੍ਣੋ ਵਿਹਾਸਿ’’ਨ੍ਤਿ ਪੁਰਿਮਂ ਆਕਿਣ੍ਣਵਿਹਾਰਂ ਜਿਗੁਚ੍ਛਿਤ੍ਵਾ ਵਿਵੇਕਂ ਉਪਬ੍ਰੂਹਯਮਾਨੋ ਇਦਾਨਿ ਯਥਾ ਏਕੋ ਅਦੁਤਿਯੋ ਵਨੇ ਅਰਞ੍ਞੇ ਰਮਤਿ ਅਭਿਰਮਤਿ, ਏਵਂ ਅਯਮ੍ਪਿ ਹਤ੍ਥਿਨਾਗੋ ਪੁਬ੍ਬੇ ਅਤ੍ਤਨੋ ਹਤ੍ਥਿਆਦੀਹਿ ਆਕਿਣ੍ਣਵਿਹਾਰਂ ਜਿਗੁਚ੍ਛਿਤ੍ਵਾ ਵਿਵੇਕਂ ਉਪਬ੍ਰੂਹਯਮਾਨੋ ਇਦਾਨਿ ਏਕੋ ਅਸਹਾਯੋ ਵਨੇ ਅਰਞ੍ਞੇ ਰਮਤਿ ਅਭਿਰਮਤਿ. ਤਸ੍ਮਾਸ੍ਸ ਚਿਤ੍ਤਂ ਨਾਗੇਨ ਸਮੇਤਿ ਤਸ੍ਸ ਚਿਤ੍ਤੇਨ ਸਮੇਤੀਤਿ ਕਤ੍ਵਾ ਏਕੀਭਾਵਰਤਿਯਾ ਏਕਸਦਿਸਂ ਹੋਤੀਤਿ ਅਤ੍ਥੋ.

ਪਞ੍ਚਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.