੬. ਪਿਣ੍ਡੋਲਸੁਤ੍ਤਵਣ੍ਣਨਾ

੩੬. ਛਟ੍ਠੇ ਪਿਣ੍ਡੋਲਭਾਰਦ੍ਵਾਜੋਤਿ ਪਿਣ੍ਡਂ ਉਲਮਾਨੋ ਪਰਿਯੇਸਮਾਨੋ ਪਬ੍ਬਜਿਤੋਤਿ ਪਿਣ੍ਡੋਲੋ. ਸੋ ਕਿਰ ਪਰਿਜਿਣ੍ਣਭੋਗੋ ਬ੍ਰਾਹ੍ਮਣੋ ਹੁਤ੍ਵਾ ਮਹਨ੍ਤਂ ਭਿਕ੍ਖੁਸਙ੍ਘਸ੍ਸ ਲਾਭਸਕ੍ਕਾਰਂ ਦਿਸ੍ਵਾ ਪਿਣ੍ਡਤ੍ਥਾਯ ਨਿਕ੍ਖਮਿਤ੍ਵਾ ਪਬ੍ਬਜਿਤੋ. ਸੋ ਮਹਨ੍ਤਂ ਕਪਲ੍ਲਂ ‘‘ਪਤ੍ਤ’’ਨ੍ਤਿ ਗਹੇਤ੍ਵਾ ਚਰਤਿ, ਕਪਲ੍ਲਪੂਰਂ ਯਾਗੁਂ ਪਿਵਤਿ, ਭਤ੍ਤਂ ਭੁਞ੍ਜਤਿ, ਪੂਵਖਜ੍ਜਕਞ੍ਚ ਖਾਦਤਿ. ਅਥਸ੍ਸ ਮਹਗ੍ਘਸਭਾਵਂ ਸਤ੍ਥੁ ਆਰੋਚੇਸੁਂ. ਸਤ੍ਥਾ ਤਸ੍ਸ ਪਤ੍ਤਤ੍ਥਵਿਕਂ ਨਾਨੁਜਾਨਿ, ਹੇਟ੍ਠਾਮਞ੍ਚੇ ਪਤ੍ਤਂ ਨਿਕ੍ਕੁਜ੍ਜਿਤ੍ਵਾ ਠਪੇਤਿ, ਸੋ ਠਪੇਨ੍ਤੋਪਿ ਘਂਸੇਨ੍ਤੋਵ ਪਣਾਮੇਤ੍ਵਾ ਠਪੇਤਿ, ਗਣ੍ਹਨ੍ਤੋਪਿ ਘਂਸੇਨ੍ਤੋਵ ਆਕਡ੍ਢਿਤ੍ਵਾ ਗਣ੍ਹਾਤਿ. ਤਂ ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਘਂਸਨੇਨ ਪਰਿਕ੍ਖੀਣਂ, ਨਾਲ਼ਿਕੋਦਨਮਤ੍ਤਸ੍ਸੇਵ ਗਣ੍ਹਨਕਂ ਜਾਤਂ. ਤਤੋ ਸਤ੍ਥੁ ਆਰੋਚੇਸੁਂ, ਅਥਸ੍ਸ ਸਤ੍ਥਾ ਪਤ੍ਤਤ੍ਥਵਿਕਂ ਅਨੁਜਾਨਿ. ਥੇਰੋ ਅਪਰੇਨ ਸਮਯੇਨ ਇਨ੍ਦ੍ਰਿਯਭਾਵਨਂ ਭਾਵੇਨ੍ਤੋ ਅਗ੍ਗਫਲੇ ਅਰਹਤ੍ਤੇ ਪਤਿਟ੍ਠਾਸਿ. ਇਤਿ ਸੋ ਪੁਬ੍ਬੇ ਸਵਿਸੇਸਂ ਪਿਣ੍ਡਤ੍ਥਾਯ ਉਲਤੀਤਿ ਪਿਣ੍ਡੋਲੋ, ਗੋਤ੍ਤੇਨ ਪਨ ਭਾਰਦ੍ਵਾਜੋਤਿ ਉਭਯਂ ਏਕਤੋ ਕਤ੍ਵਾ ‘‘ਪਿਣ੍ਡੋਲਭਾਰਦ੍ਵਾਜੋ’’ਤਿ ਵੁਚ੍ਚਤਿ.

ਆਰਞ੍ਞਕੋਤਿ ਗਾਮਨ੍ਤਸੇਨਾਸਨਪਟਿਕ੍ਖਿਪਨੇਨ ਅਰਞ੍ਞੇ ਨਿਵਾਸੋ ਅਸ੍ਸਾਤਿ ਆਰਞ੍ਞਕੋ, ਆਰਞ੍ਞਕਧੁਤਙ੍ਗਂ ਸਮਾਦਾਯ ਵਤ੍ਤਨ੍ਤਸ੍ਸੇਤਂ ਨਾਮਂ. ਤਥਾ ਭਿਕ੍ਖਾਸਙ੍ਖਾਤਾਨਂ ਆਮਿਸਪਿਣ੍ਡਾਨਂ ਪਾਤੋ ਪਿਣ੍ਡਪਾਤੋ, ਪਰੇਹਿ ਦਿਨ੍ਨਾਨਂ ਪਿਣ੍ਡਾਨਂ ਪਤ੍ਤੇ ਨਿਪਤਨਨ੍ਤਿ ਅਤ੍ਥੋ. ਪਿਣ੍ਡਪਾਤਂ ਉਞ੍ਛਤਿ ਤਂ ਤਂ ਕੁਲਂ ਉਪਸਙ੍ਕਮਨ੍ਤੋ ਗਵੇਸਤੀਤਿ ਪਿਣ੍ਡਪਾਤਿਕੋ, ਪਿਣ੍ਡਾਯ ਵਾ ਪਤਿਤੁਂ ਚਰਿਤੁਂ ਵਤਮੇਤਸ੍ਸਾਤਿ ਪਿਣ੍ਡਪਾਤੀ, ਪਿਣ੍ਡਪਾਤੀਯੇਵ ਪਿਣ੍ਡਪਾਤਿਕੋ. ਸਙ੍ਕਾਰਕੂਟਾਦੀਸੁ ਪਂਸੂਨਂ ਉਪਰਿ ਠਿਤਤ੍ਤਾ ਅਬ੍ਭੁਗ੍ਗਤਟ੍ਠੇਨ ਪਂਸੁਕੂਲਂ ਵਿਯਾਤਿ ਪਂਸੁਕੂਲਂ, ਪਂਸੁ ਵਿਯ ਵਾ ਕੁਚ੍ਛਿਤਭਾਵਂ ਉਲਤਿ ਗਚ੍ਛਤੀਤਿ ਪਂਸੁਕੂਲਂ, ਪਂਸੁਕੂਲਸ੍ਸ ਧਾਰਣਂ ਪਂਸੁਕੂਲਂ, ਤਂ ਸੀਲਂ ਏਤਸ੍ਸਾਤਿ ਪਂਸੁਕੂਲਿਕੋ. ਸਙ੍ਘਾਟਿਉਤ੍ਤਰਾਸਙ੍ਗਅਨ੍ਤਰਵਾਸਕਸਙ੍ਖਾਤਾਨਿ ਤੀਣਿ ਚੀਵਰਾਨਿ ਤਿਚੀਵਰਂ, ਤਿਚੀਵਰਸ੍ਸ ਧਾਰਣਂ ਤਿਚੀਵਰਂ, ਤਂ ਸੀਲਂ ਏਤਸ੍ਸਾਤਿ ਤੇਚੀਵਰਿਕੋ. ਅਪ੍ਪਿਚ੍ਛੋਤਿਆਦੀਨਂ ਪਦਾਨਂ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ.

ਧੁਤਵਾਦੋਤਿ ਧੁਤੋ ਵੁਚ੍ਚਤਿ ਧੁਤਕਿਲੇਸੋ ਪੁਗ੍ਗਲੋ, ਕਿਲੇਸਧੁਨਨਕਧਮ੍ਮੋ ਵਾ. ਤਤ੍ਥ ਅਤ੍ਥਿ ਧੁਤੋ, ਨ ਧੁਤਵਾਦੋ, ਅਤ੍ਥਿ ਨ ਧੁਤੋ, ਧੁਤਵਾਦੋ, ਅਤ੍ਥਿ ਨੇਵ ਧੁਤੋ, ਨ ਧੁਤਵਾਦੋ, ਅਤ੍ਥਿ ਧੁਤੋ ਚੇਵ, ਧੁਤਵਾਦੋ ਚਾਤਿ ਇਦਂ ਚਤੁਕ੍ਕਂ ਵੇਦਿਤਬ੍ਬਂ. ਤੇਸੁ ਯੋ ਸਯਂ ਧੁਤਧਮ੍ਮੇ ਸਮਾਦਾਯ ਵਤ੍ਤਤਿ, ਨ ਪਰਂ ਤਦਤ੍ਥਾਯ ਸਮਾਦਪੇਤਿ, ਅਯਂ ਪਠਮੋ. ਯੋ ਪਨ ਸਯਂ ਨ ਧੁਤਧਮ੍ਮੇ ਸਮਾਦਾਯ ਵਤ੍ਤਤਿ, ਪਰਂ ਸਮਾਦਪੇਤਿ, ਅਯਂ ਦੁਤਿਯੋ. ਯੋ ਉਭਯਰਹਿਤੋ, ਅਯਂ ਤਤਿਯੋ. ਯੋ ਪਨ ਉਭਯਸਮ੍ਪਨ੍ਨੋ, ਅਯਂ ਚਤੁਤ੍ਥੋ. ਏਵਰੂਪੋ ਚ ਆਯਸ੍ਮਾ ਪਿਣ੍ਡੋਲਭਾਰਦ੍ਵਾਜੋਤਿ. ਤੇਨ ਵੁਤ੍ਤਂ ‘‘ਧੁਤਵਾਦੋ’’ਤਿ. ਏਕਦੇਸਸਰੂਪੇਕਸੇਸਵਸੇਨ ਹਿ ਅਯਂ ਨਿਦ੍ਦੇਸੋ ਯਥਾ ਤਂ ‘‘ਨਾਮਰੂਪ’’ਨ੍ਤਿ.

ਅਧਿਚਿਤ੍ਤਮਨੁਯੁਤ੍ਤੋਤਿ ਏਤ੍ਥ ਅਟ੍ਠਸਮਾਪਤ੍ਤਿਸਮ੍ਪਯੋਗਤੋ ਅਰਹਤ੍ਤਫਲਸਮਾਪਤ੍ਤਿਸਮ੍ਪਯੋਗਤੋ ਵਾ ਚਿਤ੍ਤਸ੍ਸ ਅਧਿਚਿਤ੍ਤਭਾਵੋ ਵੇਦਿਤਬ੍ਬੋ, ਇਧ ਪਨ ‘‘ਅਰਹਤ੍ਤਫਲਚਿਤ੍ਤ’’ਨ੍ਤਿ ਵਦਨ੍ਤਿ. ਤਂਤਂਸਮਾਪਤ੍ਤੀਸੁ ਸਮਾਧਿ ਏਵ ਅਧਿਚਿਤ੍ਤਂ, ਇਧ ਪਨ ਅਰਹਤ੍ਤਫਲਸਮਾਧਿ ਵੇਦਿਤਬ੍ਬੋ. ਕੇਚਿ ਪਨ ‘‘ਅਧਿਚਿਤ੍ਤਮਨੁਯੁਤ੍ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਕਾਲੇਨ ਕਾਲਂ ਤੀਣਿ ਨਿਮਿਤ੍ਤਾਨਿ ਮਨਸਿ ਕਾਤਬ੍ਬਾਨੀਤਿ ਏਤਸ੍ਮਿਂ ਅਧਿਚਿਤ੍ਤਸੁਤ੍ਤੇ (ਅ. ਨਿ. ੩.੧੦੩) ਵਿਯ ਸਮਥਵਿਪਸ੍ਸਨਾਚਿਤ੍ਤਂ ਅਧਿਚਿਤ੍ਤਨ੍ਤਿ ਇਧਾਧਿਪ੍ਪੇਤ’’ਨ੍ਤਿ ਵਦਨ੍ਤਿ, ਤਂ ਨ ਸੁਨ੍ਦਰਂ. ਪੁਰਿਮੋਯੇਵਤ੍ਥੋ ਗਹੇਤਬ੍ਬੋ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਆਯਸ੍ਮਤੋ ਪਿਣ੍ਡੋਲਭਾਰਦ੍ਵਾਜਸ੍ਸ ਅਧਿਟ੍ਠਾਨਪਰਿਕ੍ਖਾਰਸਮ੍ਪਦਾਸਮ੍ਪਨ੍ਨਂ ਅਧਿਚਿਤ੍ਤਾਨੁਯੋਗਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਏਵਂ ‘‘ਅਧਿਚਿਤ੍ਤਾਨੁਯੋਗੋ ਮਮ ਸਾਸਨਾਨੁਟ੍ਠਾਨ’’ਨ੍ਤਿ ਦੀਪੇਨ੍ਤੋ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਅਨੂਪਵਾਦੋਤਿ ਵਾਚਾਯ ਕਸ੍ਸਚਿਪਿ ਅਨੁਪਵਦਨਂ. ਅਨੂਪਘਾਤੋਤਿ ਕਾਯੇਨ ਕਸ੍ਸਚਿ ਉਪਘਾਤਾਕਰਣਂ. ਪਾਤਿਮੋਕ੍ਖੇਤਿ ਏਤ੍ਥ ਪਾਤਿਮੋਕ੍ਖਪਦਸ੍ਸ ਅਤ੍ਥੋ ਹੇਟ੍ਠਾ ਨਾਨਪ੍ਪਕਾਰੇਹਿ ਵੁਤ੍ਤੋ, ਤਸ੍ਮਿਂ ਪਾਤਿਮੋਕ੍ਖੇ. ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਅਵੀਤਿਕ੍ਕਮਲਕ੍ਖਣੋ ਸਂਵਰੋ. ਮਤ੍ਤਞ੍ਞੁਤਾਤਿ ਪਟਿਗ੍ਗਹਣਪਰਿਭੋਗਵਸੇਨ ਪਮਾਣਞ੍ਞੁਤਾ. ਪਨ੍ਤਞ੍ਚ ਸਯਨਾਸਨਨ੍ਤਿ ਵਿਵਿਤ੍ਤਂ ਸਙ੍ਘਟ੍ਟਨਵਿਰਹਿਤਂ ਸੇਨਾਸਨਂ. ਅਧਿਚਿਤ੍ਤੇ ਚ ਆਯੋਗੋਤਿ ਅਟ੍ਠਨ੍ਨਂ ਸਮਾਪਤ੍ਤੀਨਂ ਅਧਿਗਮਾਯ ਭਾਵਨਾਨੁਯੋਗੋ.

ਅਪਰੋ ਨਯੋ – ਅਨੂਪਵਾਦੋਤਿ ਕਸ੍ਸਚਿਪਿ ਉਪਰੁਜ੍ਝਨਵਚਨਸ੍ਸ ਅਵਦਨਂ. ਤੇਨ ਸਬ੍ਬਮ੍ਪਿ ਵਾਚਸਿਕਂ ਸੀਲਂ ਸਙ੍ਗਣ੍ਹਾਤਿ. ਅਨੂਪਘਾਤੋਤਿ ਕਾਯੇਨ ਕਸ੍ਸਚਿ ਉਪਘਾਤਸ੍ਸ ਪਰਵਿਹੇਠਨਸ੍ਸ ਅਕਰਣਂ. ਤੇਨ ਸਬ੍ਬਮ੍ਪਿ ਕਾਯਿਕਂ ਸੀਲਂ ਸਙ੍ਗਣ੍ਹਾਤਿ. ਯਾਦਿਸਂ ਪਨਿਦਂ ਉਭਯਂ ਬੁਦ੍ਧਾਨਂ ਸਾਸਨਨ੍ਤੋਗਧਂ ਹੋਤਿ, ਤਂ ਦਸ੍ਸੇਤੁਂ – ‘‘ਪਾਤਿਮੋਕ੍ਖੇ ਚ ਸਂਵਰੋ’’ਤਿ ਵੁਤ੍ਤਂ. ਚਸਦ੍ਦੋ ਨਿਪਾਤਮਤ੍ਤਂ. ਪਾਤਿਮੋਕ੍ਖੇ ਚ ਸਂਵਰੋਤਿ ਪਾਤਿਮੋਕ੍ਖਸਂਵਰਭੂਤੋ ਅਨੂਪਵਾਦੋ ਅਨੂਪਘਾਤੋ ਚਾਤਿ ਅਤ੍ਥੋ.

ਅਥ ਵਾ ਪਾਤਿਮੋਕ੍ਖੇਤਿ ਅਧਿਕਰਣੇ ਭੁਮ੍ਮਂ. ਪਾਤਿਮੋਕ੍ਖੇ ਨਿਸ੍ਸਯਭੂਤੇ ਸਂਵਰੋ. ਕੋ ਪਨ ਸੋਤਿ? ਅਨੂਪਵਾਦੋ ਅਨੂਪਘਾਤੋ. ਉਪਸਮ੍ਪਦਵੇਲਾਯਞ੍ਹਿ ਅਵਿਸੇਸੇਨ ਪਾਤਿਮੋਕ੍ਖਸੀਲਂ ਸਮਾਦਿਨ੍ਨਂ ਨਾਮ ਹੋਤਿ, ਤਸ੍ਮਿਂ ਪਾਤਿਮੋਕ੍ਖੇ ਠਿਤਸ੍ਸ ਤਤੋ ਪਰਂ ਉਪਵਾਦੂਪਘਾਤਾਨਂ ਅਕਰਣਵਸੇਨ ਸਂਵਰੋ, ਸੋ ਅਨੂਪਵਾਦੋ ਅਨੂਪਘਾਤੋ ਚਾਤਿ ਵੁਤ੍ਤੋ.

ਅਥ ਵਾ ਪਾਤਿਮੋਕ੍ਖੇਤਿ ਨਿਪ੍ਫਾਦੇਤਬ੍ਬੇ ਭੁਮ੍ਮਂ ਯਥਾ ‘‘ਚੇਤਸੋ ਅਵੂਪਸਮੋ ਅਯੋਨਿਸੋਮਨਸਿਕਾਰਪਦਟ੍ਠਾਨ’’ਨ੍ਤਿ (ਸਂ. ਨਿ. ੫.੨੩੨). ਤੇਨ ਪਾਤਿਮੋਕ੍ਖੇਨ ਸਾਧੇਤਬ੍ਬੋ ਅਨੂਪਵਾਦੋ ਅਨੂਪਘਾਤੋ, ਪਾਤਿਮੋਕ੍ਖਸਂਵਰਸਙ੍ਗਹਿਤੋ ਅਨੂਪਵਾਦੋ ਅਨੂਪਘਾਤੋਇਚ੍ਚੇਵ ਅਤ੍ਥੋ. ਸਂਵਰੋਤਿ ਇਮਿਨਾ ਪਨ ਸਤਿਸਂਵਰੋ, ਞਾਣਸਂਵਰੋ, ਖਨ੍ਤਿਸਂਵਰੋ, ਵੀਰਿਯਸਂਵਰੋਤਿ ਇਮੇਸਂ ਚਤੁਨ੍ਨਂ ਸਂਵਰਾਨਂ ਗਹਣਂ, ਪਾਤਿਮੋਕ੍ਖਸਾਧਨਂ ਇਦਂ ਸਂਵਰਚਤੁਕ੍ਕਂ.

ਮਤ੍ਤਞ੍ਞੁਤਾ ਚ ਭਤ੍ਤਸ੍ਮਿਨ੍ਤਿ ਪਰਿਯੇਸਨਪਟਿਗ੍ਗਹਣਪਰਿਭੋਗਵਿਸ੍ਸਜ੍ਜਨਾਨਂ ਵਸੇਨ ਭੋਜਨੇ ਪਮਾਣਞ੍ਞੁਤਾ. ਪਨ੍ਤਞ੍ਚ ਸਯਨਾਸਨਨ੍ਤਿ ਭਾਵਨਾਨੁਕੂਲਂ ਅਰਞ੍ਞਰੁਕ੍ਖਮੂਲਾਦਿਵਿਵਿਤ੍ਤਸੇਨਾਸਨਂ. ਅਧਿਚਿਤ੍ਤੇ ਚ ਆਯੋਗੋਤਿ ਸਬ੍ਬਚਿਤ੍ਤਾਨਂ ਅਧਿਕਤ੍ਤਾ ਉਤ੍ਤਮਤ੍ਤਾ ਅਧਿਚਿਤ੍ਤਸਙ੍ਖਾਤੇ ਅਰਹਤ੍ਤਫਲਚਿਤ੍ਤੇ ਸਾਧੇਤਬ੍ਬੇ ਤਸ੍ਸ ਨਿਪ੍ਫਾਦਨਤ੍ਥਂ ਸਮਥਵਿਪਸ੍ਸਨਾਭਾਵਨਾਵਸੇਨ ਆਯੋਗੋ. ਏਤਂ ਬੁਦ੍ਧਾਨ ਸਾਸਨਨ੍ਤਿ ਏਤਂ ਪਰਸ੍ਸ ਅਨੂਪਵਦਨਂ, ਅਨੂਪਘਾਤਨਂ, ਪਾਤਿਮੋਕ੍ਖਸਂਵਰੋ, ਪਰਿਯੇਸਨਪਟਿਗ੍ਗਹਣਾਦੀਸੁ ਮਤ੍ਤਞ੍ਞੁਤਾ, ਵਿਵਿਤ੍ਤਵਾਸੋ, ਯਥਾਵੁਤ੍ਤਅਧਿਚਿਤ੍ਤਾਨੁਯੋਗੋ ਚ ਬੁਦ੍ਧਾਨਂ ਸਾਸਨਂ ਓਵਾਦੋ ਅਨੁਸਿਟ੍ਠੀਤਿ ਅਤ੍ਥੋ. ਏਵਂ ਇਮਾਯ ਗਾਥਾਯ ਤਿਸ੍ਸੋ ਸਿਕ੍ਖਾ ਕਥਿਤਾਤਿ ਵੇਦਿਤਬ੍ਬਾ.

ਛਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.