੪. ਯਕ੍ਖਪਹਾਰਸੁਤ੍ਤਵਣ੍ਣਨਾ

੩੪. ਚਤੁਤ੍ਥੇ ਕਪੋਤਕਨ੍ਦਰਾਯਨ੍ਤਿ ਏਵਂਨਾਮਕੇ ਵਿਹਾਰੇ. ਤਸ੍ਮਿਂ ਕਿਰ ਪਬ੍ਬਤਕਨ੍ਦਰੇ ਪੁਬ੍ਬੇ ਬਹੂ ਕਪੋਤਾ ਵਸਿਂਸੁ, ਤੇਨ ਸਾ ਪਬ੍ਬਤਕਨ੍ਦਰਾ ‘‘ਕਪੋਤਕਨ੍ਦਰਾ’’ਤਿ ਵੁਚ੍ਚਤਿ. ਅਪਰਭਾਗੇ ਤਤ੍ਥ ਕਤਵਿਹਾਰੋਪਿ ‘‘ਕਪੋਤਕਨ੍ਦਰਾ’’ਤ੍ਵੇਵ ਪਞ੍ਞਾਯਿਤ੍ਥ. ਤੇਨ ਵੁਤ੍ਤਂ – ‘‘ਕਪੋਤਕਨ੍ਦਰਾਯਨ੍ਤਿ ਏਵਂਨਾਮਕੇ ਵਿਹਾਰੇ’’ਤਿ. ਜੁਣ੍ਹਾਯ ਰਤ੍ਤਿਯਾਤਿ ਸੁਕ੍ਕਪਕ੍ਖਰਤ੍ਤਿਯਂ. ਨਵੋਰੋਪਿਤੇਹਿ ਕੇਸੇਹੀਤਿ ਅਚਿਰਓਹਾਰਿਤੇਹਿ ਕੇਸੇਹਿ, ਇਤ੍ਥਮ੍ਭੂਤਲਕ੍ਖਣੇ ਚੇਤਂ ਕਰਣਵਚਨਂ. ਅਬ੍ਭੋਕਾਸੇਤਿ ਯਤ੍ਥ ਉਪਰਿਚ੍ਛਦਨਂ ਪਰਿਕ੍ਖੇਪੋ ਵਾ ਨਤ੍ਥਿ, ਤਾਦਿਸੇ ਆਕਾਸਙ੍ਗਣੇ.

ਤਤ੍ਥ ਆਯਸ੍ਮਾ ਸਾਰਿਪੁਤ੍ਤੋ ਸੁਵਣ੍ਣਵਣ੍ਣੋ, ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਨੀਲੁਪ੍ਪਲਵਣ੍ਣੋ. ਉਭੋਪਿ ਪਨ ਤੇ ਮਹਾਥੇਰਾ ਉਦਿਚ੍ਚਬ੍ਰਾਹ੍ਮਣਜਚ੍ਚਾ ਕਪ੍ਪਾਨਂ ਸਤਸਹਸ੍ਸਾਧਿਕਂ ਏਕਂ ਅਸਙ੍ਖ੍ਯੇਯ੍ਯਂ ਅਭਿਨੀਹਾਰਸਮ੍ਪਨ੍ਨਾ ਛਲ਼ਭਿਞ੍ਞਾਪਟਿਸਮ੍ਭਿਦਾਪ੍ਪਤ੍ਤਾ ਮਹਾਖੀਣਾਸਵਾ ਸਮਾਪਤ੍ਤਿਲਾਭਿਨੋ ਸਤ੍ਤਸਟ੍ਠਿਯਾ ਸਾਵਕਪਾਰਮਿਞਾਣਾਨਂ ਮਤ੍ਥਕਪ੍ਪਤ੍ਤਾ ਏਤਂ ਕਪੋਤਕਨ੍ਦਰਵਿਹਾਰਂ ਉਪਸੋਭਯਨ੍ਤਾ ਏਕਂ ਕਨਕਗੁਹਂ ਪਵਿਟ੍ਠਾ ਦ੍ਵੇ ਸੀਹਾ ਵਿਯ, ਏਕਂ ਵਿਜਮ੍ਭਨਭੂਮਿਂ ਓਤਿਣ੍ਣਾ ਦ੍ਵੇ ਬ੍ਯਗ੍ਘਾ ਵਿਯ, ਏਕਂ ਸੁਪੁਪ੍ਫਿਤਸਾਲਵਨਂ ਪਵਿਟ੍ਠਾ ਦ੍ਵੇ ਛਦ੍ਦਨ੍ਤਨਾਗਰਾਜਾਨੋ ਵਿਯ, ਏਕਂ ਸਿਮ੍ਬਲਿਵਨਂ ਪਵਿਟ੍ਠਾ ਦ੍ਵੇ ਸੁਪਣ੍ਣਰਾਜਾਨੋ ਵਿਯ, ਏਕਂ ਨਰਵਾਹਨਯਾਨਂ ਅਭਿਰੁਲ਼੍ਹਾ ਦ੍ਵੇ ਵੇਸ੍ਸਵਣਾ ਵਿਯ, ਏਕਂ ਪਣ੍ਡੁਕਮ੍ਬਲਸਿਲਾਸਨਂ ਅਭਿਨਿਸਿਨ੍ਨਾ ਦ੍ਵੇ ਸਕ੍ਕਾ ਵਿਯ, ਏਕਵਿਮਾਨਬ੍ਭਨ੍ਤਰਗਤਾ ਦ੍ਵੇ ਮਹਾਬ੍ਰਹ੍ਮਾਨੋ ਵਿਯ, ਏਕਸ੍ਮਿਂ ਗਗਨਟ੍ਠਾਨੇ ਠਿਤਾਨਿ ਦ੍ਵੇ ਚਨ੍ਦਮਣ੍ਡਲਾਨਿ ਵਿਯ, ਦ੍ਵੇ ਸੂਰਿਯਮਣ੍ਡਲਾਨਿ ਵਿਯ ਚ ਵਿਰੋਚਿਂਸੁ. ਤੇਸੁ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤੁਣ੍ਹੀ ਨਿਸੀਦਿ, ਆਯਸ੍ਮਾ ਪਨ ਸਾਰਿਪੁਤ੍ਤੋ ਸਮਾਪਜ੍ਜਿ. ਤੇਨ ਵੁਤ੍ਤਂ – ‘‘ਅਞ੍ਞਤਰਂ ਸਮਾਧਿਂ ਸਮਾਪਜ੍ਜਿਤ੍ਵਾ’’ਤਿ.

ਤਤ੍ਥ ਅਞ੍ਞਤਰਂ ਸਮਾਧਿਨ੍ਤਿ ਉਪੇਕ੍ਖਾਬ੍ਰਹ੍ਮਵਿਹਾਰਸਮਾਪਤ੍ਤਿਂ. ਕੇਚਿ ‘‘ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ’’ਨ੍ਤਿ ਵਦਨ੍ਤਿ, ਅਪਰੇ ਪਨਾਹੁ ‘‘ਆਰੁਪ੍ਪਪਾਦਕਂ ਫਲਸਮਾਪਤ੍ਤਿ’’ਨ੍ਤਿ. ਇਮਾ ਏਵ ਹਿ ਤਿਸ੍ਸੋ ਕਾਯਰਕ੍ਖਣਸਮਤ੍ਥਾ ਸਮਾਪਤ੍ਤਿਯੋ. ਤਤ੍ਥ ਨਿਰੋਧਸਮਾਪਤ੍ਤਿਯਾ ਸਮਾਧਿਪਰਿਯਾਯਸਮ੍ਭਵੋ ਹੇਟ੍ਠਾ ਵੁਤ੍ਤੋਵ, ਪਚ੍ਛਿਮਂਯੇਵ ਪਨ ਆਚਰਿਯਾ ਵਣ੍ਣੇਨ੍ਤਿ. ਉਤ੍ਤਰਾਯ ਦਿਸਾਯ ਦਕ੍ਖਿਣਂ ਦਿਸਂ ਗਚ੍ਛਨ੍ਤੀਤਿ ਉਤ੍ਤਰਾਯ ਦਿਸਾਯ ਯਕ੍ਖਸਮਾਗਮਂ ਗਨ੍ਤ੍ਵਾ ਅਤ੍ਤਨੋ ਭਵਨਂ ਗਨ੍ਤੁਂ ਦਕ੍ਖਿਣਂ ਦਿਸਂ ਗਚ੍ਛਨ੍ਤਿ. ਪਟਿਭਾਤਿ ਮਨ੍ਤਿ ਉਪਟ੍ਠਾਤਿ ਮਮ. ਮਨ੍ਤਿ ਹਿ ਪਟਿਸਦ੍ਦਯੋਗੇਨ ਸਾਮਿਅਤ੍ਥੇ ਉਪਯੋਗਵਚਨਂ, ਇਮਸ੍ਸ ਸੀਸੇ ਪਹਾਰਂ ਦਾਤੁਂ ਚਿਤ੍ਤਂ ਮੇ ਉਪ੍ਪਜ੍ਜਤੀਤਿ ਅਤ੍ਥੋ. ਸੋ ਕਿਰ ਪੁਰਿਮਜਾਤਿਯਂ ਥੇਰੇ ਬਦ੍ਧਾਘਾਤੋ, ਤੇਨਸ੍ਸ ਥੇਰਂ ਦਿਸ੍ਵਾ ਪਦੁਟ੍ਠਚਿਤ੍ਤਸ੍ਸ ਏਵਂ ਅਹੋਸਿ. ਇਤਰੋ ਪਨ ਸਪ੍ਪਞ੍ਞਜਾਤਿਕੋ, ਤਸ੍ਮਾ ਤਂ ਪਟਿਸੇਧੇਨ੍ਤੋ ‘‘ਅਲਂ ਸਮ੍ਮਾ’’ਤਿਆਦਿਮਾਹ. ਤਤ੍ਥ ਮਾ ਆਸਾਦੇਸੀਤਿ ਮਾ ਘਟ੍ਟੇਸਿ, ਮਾ ਪਹਾਰਂ ਦੇਹੀਤਿ ਵੁਤ੍ਤਂ ਹੋਤਿ. ਉਲ਼ਾਰੋਤਿ ਉਲ਼ਾਰੇਹਿ ਉਤ੍ਤਮੇਹਿ ਸੀਲਾਦਿਗੁਣੇਹਿ ਸਮਨ੍ਨਾਗਤੋ.

ਅਨਾਦਿਯਿਤ੍ਵਾਤਿ ਆਦਰਂ ਅਕਤ੍ਵਾ, ਤਸ੍ਸ ਵਚਨਂ ਅਗ੍ਗਹੇਤ੍ਵਾ. ਯਸ੍ਮਾ ਪਨ ਤਸ੍ਸ ਵਚਨਂ ਅਗ੍ਗਣ੍ਹਨ੍ਤੋ ਤਂ ਅਨਾਦਿਯਨ੍ਤੋ ਨਾਮ ਹੋਤਿ, ਤਸ੍ਮਾ ਵੁਤ੍ਤਂ – ‘‘ਤਂ ਯਕ੍ਖਂ ਅਨਾਦਿਯਿਤ੍ਵਾ’’ਤਿ. ਸੀਸੇ ਪਹਾਰਂ ਅਦਾਸੀਤਿ ਸਬ੍ਬਥਾਮੇਨ ਉਸ੍ਸਾਹਂ ਜਨੇਤ੍ਵਾ ਆਕਾਸੇ ਠਿਤੋਵ ਸੀਸੇ ਖਟਕਂ ਅਦਾਸਿ, ਮੁਦ੍ਧਨਿ ਮੁਟ੍ਠਿਘਾਤਂ ਅਕਾਸੀਤਿ ਅਤ੍ਥੋ. ਤਾਵ ਮਹਾਤਿ ਥਾਮਮਹਤ੍ਤੇਨ ਤਤ੍ਤਕਂ ਮਹਨ੍ਤੋ ਪਹਾਰੋ ਅਹੋਸਿ. ਤੇਨ ਪਹਾਰੇਨਾਤਿ ਤੇਨ ਪਹਾਰੇਨ ਕਰਣਭੂਤੇਨ. ਸਤ੍ਤਰਤਨਨ੍ਤਿ ਪਮਾਣਮਜ੍ਝਿਮਸ੍ਸ ਪੁਰਿਸਸ੍ਸ ਰਤਨੇਨ ਸਤ੍ਤਰਤਨਂ. ਨਾਗਨ੍ਤਿ ਹਤ੍ਥਿਨਾਗਂ. ਓਸਾਦੇਯ੍ਯਾਤਿ ਪਥਵਿਯਂ ਓਸੀਦਾਪੇਯ੍ਯ ਨਿਮੁਜ੍ਜਾਪੇਯ੍ਯ. ‘‘ਓਸਾਰੇਯ੍ਯਾ’’ਤਿਪਿ ਪਾਠੋ, ਚੁਣ੍ਣਵਿਚੁਣ੍ਣਂ ਕਰੇਯ੍ਯਾਤਿ ਅਤ੍ਥੋ. ਅਡ੍ਢਟ੍ਠਮਰਤਨਨ੍ਤਿ ਅਡ੍ਢੇਨ ਅਟ੍ਠਨ੍ਨਂ ਪੂਰਣਾਨਿ ਅਡ੍ਢਟ੍ਠਮਾਨਿ, ਅਡ੍ਢਟ੍ਠਮਾਨਿ ਰਤਨਾਨਿ ਪਮਾਣਂ ਏਤਸ੍ਸਾਤਿ ਅਡ੍ਢਟ੍ਠਮਰਤਨੋ, ਤਂ ਅਡ੍ਢਟ੍ਠਮਰਤਨਂ. ਮਹਨ੍ਤਂ ਪਬ੍ਬਤਕੂਟਨ੍ਤਿ ਕੇਲਾਸਕੂਟਪ੍ਪਮਾਣਂ ਵਿਪੁਲਂ ਗਿਰਿਕੂਟਂ. ਪਦਾਲੇਯ੍ਯਾਤਿ ਸਕਲਿਕਾਕਾਰੇਨ ਭਿਨ੍ਦੇਯ੍ਯ. ਅਪਿ ਓਸਾਦੇਯ੍ਯ, ਅਪਿ ਪਦਾਲੇਯ੍ਯਾਤਿ ਸਮ੍ਬਨ੍ਧੋ.

ਤਾਵਦੇਵ ਚਸ੍ਸ ਸਰੀਰੇ ਮਹਾਪਰਿਲ਼ਾਹੋ ਉਪ੍ਪਜ੍ਜਿ, ਸੋ ਵੇਦਨਾਤੁਰੋ ਆਕਾਸੇ ਠਾਤੁਂ ਅਸਕ੍ਕੋਨ੍ਤੋ ਭੂਮਿਯਂ ਪਤਿ, ਤਙ੍ਖਣਞ੍ਞੇਵ ਅਟ੍ਠਸਟ੍ਠਿਸਹਸ੍ਸਾਧਿਕਯੋਜਨਸਤਸਹਸ੍ਸੁਬ੍ਬੇਧਂ ਸਿਨੇਰੁਮ੍ਪਿ ਪਬ੍ਬਤਰਾਜਾਨਂ ਸਨ੍ਧਾਰੇਨ੍ਤੀ ਚਤੁਨਹੁਤਾਧਿਕਦ੍ਵਿਯੋਜਨਸਤਸਹਸ੍ਸਬਹਲਾ ਮਹਾਪਥਵੀ ਤਂ ਪਾਪਸਤ੍ਤਂ ਧਾਰੇਤੁਂ ਅਸਕ੍ਕੋਨ੍ਤੀ ਵਿਯ ਵਿਵਰਮਦਾਸਿ. ਅਵੀਚਿਤੋ ਜਾਲਾ ਉਟ੍ਠਹਿਤ੍ਵਾ ਕਨ੍ਦਨ੍ਤਂਯੇਵ ਤਂ ਗਣ੍ਹਿਂਸੁ, ਸੋ ਕਨ੍ਦਨ੍ਤੋ ਵਿਪ੍ਪਲਪਨ੍ਤੋ ਪਤਿ. ਤੇਨ ਵੁਤ੍ਤਂ – ‘‘ਅਥ ਚ ਪਨ ਸੋ ਯਕ੍ਖੋ ‘ਡਯ੍ਹਾਮਿ ਡਯ੍ਹਾਮੀ’ਤਿ ਵਤ੍ਵਾ ਤਤ੍ਥੇਵ ਮਹਾਨਿਰਯਂ ਅਪਤਾਸੀਤਿ. ਤਤ੍ਥ ਅਪਤਾਸੀਤਿ ਅਪਤਿ.

ਕਿਂ ਪਨ ਸੋ ਯਕ੍ਖਤ੍ਤਭਾਵੇਨੇਵ ਨਿਰਯਂ ਉਪਗਚ੍ਛੀਤਿ? ਨ ਉਪਗਚ੍ਛਿ, ਯਞ੍ਹੇਤ੍ਥ ਦਿਟ੍ਠਧਮ੍ਮਵੇਦਨੀਯਂ ਪਾਪਕਮ੍ਮਂ ਅਹੋਸਿ, ਤਸ੍ਸ ਬਲੇਨ ਯਕ੍ਖਤ੍ਤਭਾਵੇ ਮਹਨ੍ਤਂ ਦੁਕ੍ਖਂ ਅਨੁਭਵਿ. ਯਂ ਪਨ ਉਪਪਜ੍ਜਵੇਦਨੀਯਂ ਆਨਨ੍ਤਰਿਯਕਮ੍ਮਂ, ਤੇਨ ਚੁਤਿਅਨਨ੍ਤਰਂ ਨਿਰਯੇ ਉਪ੍ਪਜ੍ਜੀਤਿ. ਥੇਰਸ੍ਸ ਪਨ ਸਮਾਪਤ੍ਤਿਬਲੇਨ ਉਪਤ੍ਥਮ੍ਭਿਤਸਰੀਰਸ੍ਸ ਨ ਕੋਚਿ ਵਿਕਾਰੋ ਅਹੋਸਿ. ਸਮਾਪਤ੍ਤਿਤੋ ਅਵੁਟ੍ਠਿਤਕਾਲੇ ਹਿ ਤਂ ਯਕ੍ਖੋ ਪਹਰਿ, ਤਥਾ ਪਹਰਨ੍ਤਂ ਦਿਬ੍ਬਚਕ੍ਖੁਨਾ ਦਿਸ੍ਵਾ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਧਮ੍ਮਸੇਨਾਪਤਿਂ ਉਪਸਙ੍ਕਮਿ, ਉਪਸਙ੍ਕਮਨਸਮਕਾਲਮੇਵ ਚ ਧਮ੍ਮਸੇਨਾਪਤਿ ਸਮਾਪਤ੍ਤਿਤੋ ਉਟ੍ਠਾਸਿ. ਅਥ ਨਂ ਮਹਾਮੋਗ੍ਗਲ੍ਲਾਨੋ ਸਰੀਰਵੁਤ੍ਤਿਂ ਪੁਚ੍ਛਿ, ਸੋਪਿਸ੍ਸ ਬ੍ਯਾਕਾਸਿ, ਤੇਨ ਵੁਤ੍ਤਂ – ‘‘ਅਦ੍ਦਸਾ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ…ਪੇ… ਅਪਿ ਚ ਮੇ ਸੀਸਂ ਥੋਕਂ ਦੁਕ੍ਖ’’ਨ੍ਤਿ.

ਤਤ੍ਥ ਥੋਕਂ ਦੁਕ੍ਖਨ੍ਤਿ ਥੋਕਂ ਅਪ੍ਪਮਤ੍ਤਕਂ ਮਧੁਰਕਜਾਤਂ ਵਿਯ ਮੇ ਸੀਸਂ ਦੁਕ੍ਖਿਤਂ, ਦੁਕ੍ਖਪ੍ਪਤ੍ਤਨ੍ਤਿ ਅਤ੍ਥੋ. ਦੁਕ੍ਖਾਧਿਟ੍ਠਾਨਞ੍ਹਿ ਸੀਸਂ ਦੁਕ੍ਖਨ੍ਤਿ ਵੁਤ੍ਤਂ. ‘‘ਸੀਸੇ ਥੋਕਂ ਦੁਕ੍ਖ’’ਨ੍ਤਿਪਿ ਪਾਠੋ. ਕਥਂ ਪਨ ਸਮਾਪਤ੍ਤਿਬਲੇਨ ਸਰੀਰੇ ਉਪਤ੍ਥਮ੍ਭਿਤੇ ਥੇਰਸ੍ਸ ਸੀਸੇ ਥੋਕਮ੍ਪਿ ਦੁਕ੍ਖਂ ਅਹੋਸੀਤਿ? ਅਚਿਰੇਨੇਵ ਵੁਟ੍ਠਿਤਤ੍ਤਾ. ਅਨ੍ਤੋਸਮਾਪਤ੍ਤਿਯਂ ਅਪਞ੍ਞਾਯਮਾਨਦੁਕ੍ਖਞ੍ਹਿ ਕਾਯਨਿਸ੍ਸਿਤਤ੍ਤਾ ਨਿਦ੍ਦਂ ਉਪਗਤਸ੍ਸ ਮਕਸਾਦਿਜਨਿਤਂ ਵਿਯ ਪਟਿਬੁਦ੍ਧਸ੍ਸ ਥੋਕਂ ਪਞ੍ਞਾਯਿਤ੍ਥ.

‘‘ਮਹਾਬਲੇਨ ਯਕ੍ਖੇਨ ਤਥਾ ਸਬ੍ਬੁਸ੍ਸਾਹੇਨ ਪਹਟੇ ਸਰੀਰੇਪਿ ਵਿਕਾਰੋ ਨਾਮ ਨਤ੍ਥੀ’’ਤਿ ਅਚ੍ਛਰਿਯਬ੍ਭੁਤਚਿਤ੍ਤਜਾਤੇਨ ਆਯਸ੍ਮਤਾ ਮਹਾਮੋਗ੍ਗਲ੍ਲਾਨੇਨ ‘‘ਅਚ੍ਛਰਿਯਂ, ਆਵੁਸੋ ਸਾਰਿਪੁਤ੍ਤਾ’’ਤਿਆਦਿਨਾ ਧਮ੍ਮਸੇਨਾਪਤਿਨੋ ਮਹਾਨੁਭਾਵਤਾਯ ਵਿਭਾਵਿਤਾਯ ਸੋਪਿਸ੍ਸ ‘ਅਚ੍ਛਰਿਯਂ, ਆਵੁਸੋ ਮੋਗ੍ਗਲ੍ਲਾਨਾ’’ਤਿਆਦਿਨਾ ਇਦ੍ਧਾਨੁਭਾਵਮਹਨ੍ਤਤਾਪਕਾਸਨਾਪਦੇਸੇਨ ਅਤ੍ਤਨੋ ਇਸ੍ਸਾਮਚ੍ਛਰਿਯਾਹਙ੍ਕਾਰਾਦਿਮਲਾਨਂ ਸੁਪ੍ਪਹੀਨਤਂ ਦੀਪੇਤਿ. ਪਂਸੁਪਿਸਾਚਕਮ੍ਪਿ ਨ ਪਸ੍ਸਾਮਾਤਿ ਸਙ੍ਕਾਰਕੂਟਾਦੀਸੁ ਵਿਚਰਣਕਖੁਦ੍ਦਕਪੇਤਮ੍ਪਿ ਨ ਪਸ੍ਸਾਮ. ਇਤਿ ਅਧਿਗਮਪ੍ਪਿਚ੍ਛਾਨਂ ਅਗ੍ਗਭੂਤੋ ਮਹਾਥੇਰੋ ਤਸ੍ਮਿਂ ਕਾਲੇ ਅਨਾਵਜ੍ਜਨੇਨ ਤੇਸਂ ਅਦਸ੍ਸਨਂ ਸਨ੍ਧਾਯ ਵਦਤਿ. ਤੇਨੇਵਾਹ ‘‘ਏਤਰਹੀ’’ਤਿ.

ਭਗਵਾ ਪਨ ਵੇਲ਼ੁਵਨੇ ਠਿਤੋ ਉਭਿਨ੍ਨਂ ਅਗ੍ਗਸਾਵਕਾਨਂ ਇਮਂ ਕਥਾਸਲ੍ਲਾਪਂ ਦਿਬ੍ਬਸੋਤੇਨ ਅਸ੍ਸੋਸਿ. ਤੇਨ ਵੁਤ੍ਤਂ – ‘‘ਅਸ੍ਸੋਸਿ ਖੋ ਭਗਵਾ’’ਤਿਆਦਿ, ਤਂ ਵੁਤ੍ਤਤ੍ਥਮੇਵ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਸਮਾਪਤ੍ਤਿਬਲੂਪਗਤਂ ਇਦ੍ਧਾਨੁਭਾਵਮਹਨ੍ਤਤਂ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਤਸ੍ਸੇਵ ਤਾਦਿਭਾਵਪ੍ਪਤ੍ਤਿਦੀਪਕਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਯਸ੍ਸ ਸੇਲੂਪਮਂ ਚਿਤ੍ਤਂ, ਠਿਤਂ ਨਾਨੁਪਕਮ੍ਪਤੀਤਿ ਯਸ੍ਸ ਖੀਣਾਸਵਸ੍ਸ ਚਿਤ੍ਤਂ ਏਕਗ੍ਘਨਸਿਲਾਮਯਪਬ੍ਬਤੂਪਮਂ ਸਬ੍ਬੇਸਂ ਇਞ੍ਜਨਾਨਂ ਅਭਾਵਤੋ ਵਸੀਭਾਵਪ੍ਪਤ੍ਤਿਯਾਵ ਠਿਤਂ ਸਬ੍ਬੇਹਿਪਿ ਲੋਕਧਮ੍ਮੇਹਿ ਨਾਨੁਪਕਮ੍ਪਤਿ ਨ ਪਵੇਧਤਿ. ਇਦਾਨਿਸ੍ਸ ਅਕਮ੍ਪਨਾਕਾਰਂ ਸਦ੍ਧਿਂ ਕਾਰਣੇਨ ਦਸ੍ਸੇਤੁਂ ‘‘ਵਿਰਤ੍ਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਵਿਰਤ੍ਤਂ ਰਜਨੀਯੇਸੂਤਿ ਵਿਰਾਗਸਙ੍ਖਾਤੇਨ ਅਰਿਯਮਗ੍ਗੇਨ ਰਜਨੀਯੇਸੁ ਰਾਗੁਪ੍ਪਤ੍ਤਿਹੇਤੁਭੂਤੇਸੁ ਸਬ੍ਬੇਸੁ ਤੇਭੂਮਕਧਮ੍ਮੇਸੁ ਵਿਰਤ੍ਤਂ, ਤਤ੍ਥ ਸਬ੍ਬਸੋ ਸਮੁਚ੍ਛਿਨ੍ਨਰਾਗਨ੍ਤਿ ਅਤ੍ਥੋ. ਕੋਪਨੇਯ੍ਯੇਤਿ ਪਟਿਘਟ੍ਠਾਨੀਯੇ ਸਬ੍ਬਸ੍ਮਿਮ੍ਪਿ ਆਘਾਤਵਤ੍ਥੁਸ੍ਮਿਂ ਨ ਕੁਪ੍ਪਤਿ ਨ ਦੁਸ੍ਸਤਿ ਨ ਵਿਕਾਰਂ ਆਪਜ੍ਜਤਿ. ਯਸ੍ਸੇਵਂ ਭਾਵਿਤਂ ਚਿਤ੍ਤਨ੍ਤਿ ਯਸ੍ਸ ਯਥਾਵੁਤ੍ਤਸ੍ਸ ਅਰਿਯਪੁਗ੍ਗਲਸ੍ਸ ਚਿਤ੍ਤਂ ਏਵਂ ਵੁਤ੍ਤਨਯੇਨ ਤਾਦਿਭਾਵਾਵਹਨਭਾਵੇਨ ਭਾਵਿਤਂ. ਕੁਤੋ ਤਂ ਦੁਕ੍ਖਮੇਸ੍ਸਤੀਤਿ ਤਂ ਉਤ੍ਤਮਪੁਗ੍ਗਲਂ ਕੁਤੋ ਸਤ੍ਤਤੋ ਸਙ੍ਖਾਰਤੋ ਵਾ ਦੁਕ੍ਖਂ ਉਪਗਮਿਸ੍ਸਤਿ, ਨ ਤਾਦਿਸਸ੍ਸ ਦੁਕ੍ਖਂ ਅਤ੍ਥੀਤਿ ਅਤ੍ਥੋ.

ਚਤੁਤ੍ਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.