੩. ਗੋਪਾਲਕਸੁਤ੍ਤਵਣ੍ਣਨਾ

੩੩. ਤਤਿਯੇ ਕੋਸਲੇਸੂਤਿ ਕੋਸਲਾ ਨਾਮ ਜਾਨਪਦਿਨੋ ਰਾਜਕੁਮਾਰਾ, ਤੇਸਂ ਨਿਵਾਸੋ ਏਕੋਪਿ ਜਨਪਦੋ ‘‘ਕੋਸਲਾ’’ਤ੍ਵੇਵ ਵੁਚ੍ਚਤਿ, ਤੇਸੁ ਕੋਸਲੇਸੁ ਜਨਪਦੇ. ਚਾਰਿਕਂ ਚਰਤੀਤਿ ਅਤੁਰਿਤਚਾਰਿਕਾਵਸੇਨ ਜਨਪਦਚਾਰਿਕਂ ਚਰਤਿ. ਮਹਤਾਤਿ ਗੁਣਮਹਤ੍ਤੇਨਪਿ ਮਹਤਾ, ਅਪਰਿਚ੍ਛਿਨ੍ਨਸਙ੍ਖ੍ਯਤ੍ਤਾ ਸਙ੍ਖ੍ਯਾਮਹਤ੍ਤੇਨਪਿ ਮਹਤਾ. ਭਿਕ੍ਖੁਸਙ੍ਘੇਨਾਤਿ ਦਿਟ੍ਠਿਸੀਲਸਾਮਞ੍ਞਸਂਹਤੇਨ ਸਮਣਗਣੇਨ. ਸਦ੍ਧਿਨ੍ਤਿ ਏਕਤੋ. ਮਗ੍ਗਾ ਓਕ੍ਕਮ੍ਮਾਤਿ ਮਗ੍ਗਤੋ ਅਪਕ੍ਕਮਿਤ੍ਵਾ. ਅਞ੍ਞਤਰਂ ਰੁਕ੍ਖਮੂਲਨ੍ਤਿ ਘਨਪਤ੍ਤਸਾਖਾਵਿਟਪਸਮ੍ਪਨ੍ਨਸ੍ਸ ਸਨ੍ਦਚ੍ਛਾਯਸ੍ਸ ਮਹਤੋ ਰੁਕ੍ਖਸ੍ਸ ਸਮੀਪਸਙ੍ਖਾਤਂ ਮੂਲਂ.

ਅਞ੍ਞਤਰੋ ਗੋਪਾਲਕੋਤਿ ਏਕੋ ਗੋਗਣਰਕ੍ਖਕੋ, ਨਾਮੇਨ ਪਨ ਨਨ੍ਦੋ ਨਾਮ. ਸੋ ਕਿਰ ਅਡ੍ਢੋ ਮਹਦ੍ਧਨੋ ਮਹਾਭੋਗੋ, ਯਥਾ ਕੇਣਿਯੋ ਜਟਿਲੋ ਪਬ੍ਬਜ੍ਜਾਵਸੇਨ, ਏਵਂ ਅਨਾਥਪਿਣ੍ਡਿਕਸ੍ਸ ਗੋਯੂਥਂ ਰਕ੍ਖਨ੍ਤੋ ਗੋਪਾਲਕਤ੍ਤੇਨ ਰਾਜਪੀਲ਼ਂ ਅਪਹਰਨ੍ਤੋ ਅਤ੍ਤਨੋ ਕੁਟੁਮ੍ਬਂ ਰਕ੍ਖਤਿ. ਸੋ ਕਾਲੇਨ ਕਾਲਂ ਪਞ੍ਚ ਗੋਰਸੇ ਗਹੇਤ੍ਵਾ, ਮਹਾਸੇਟ੍ਠਿਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਨਿਯ੍ਯਾਤੇਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ, ਸਤ੍ਥਾਰਂ ਪਸ੍ਸਤਿ, ਧਮ੍ਮਂ ਸੁਣਾਤਿ, ਅਤ੍ਤਨੋ ਵਸਨਟ੍ਠਾਨਂ ਆਗਮਨਤ੍ਥਾਯ ਸਤ੍ਥਾਰਂ ਯਾਚਤਿ. ਸਤ੍ਥਾ ਤਸ੍ਸੇਵ ਞਾਣਪਰਿਪਾਕਂ ਆਗਮਯਮਾਨੋ ਅਗਨ੍ਤ੍ਵਾ, ਅਪਰਭਾਗੇ ਮਹਤਾ ਭਿਕ੍ਖੁਸਙ੍ਘੇਨ ਪਰਿਵੁਤੋ ਜਨਪਦਚਾਰਿਕਂ ਚਰਨ੍ਤੋ, ‘‘ਇਦਾਨਿਸ੍ਸ ਞਾਣਂ ਪਰਿਪਕ੍ਕ’’ਨ੍ਤਿ ਞਤ੍ਵਾ ਤਸ੍ਸ ਵਸਨਟ੍ਠਾਨਸ੍ਸ ਅਵਿਦੂਰੇ ਮਗ੍ਗਾ ਓਕ੍ਕਮ੍ਮ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ ਤਸ੍ਸ ਆਗਮਨਂ ਆਗਮਯਮਾਨੋ. ਨਨ੍ਦੋਪਿ ਖੋ ‘‘ਸਤ੍ਥਾ ਕਿਰ ਜਨਪਦਚਾਰਿਕਂ ਚਰਨ੍ਤੋ ਇਤੋ ਆਗਚ੍ਛਤੀ’’ਤਿ ਸੁਤ੍ਵਾ, ਹਟ੍ਠਤੁਟ੍ਠੋ ਵੇਗੇਨ ਗਨ੍ਤ੍ਵਾ, ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਕਤਪਟਿਸਨ੍ਥਾਰੋ ਏਕਮਨ੍ਤਂ ਨਿਸੀਦਿ, ਅਥਸ੍ਸ ਭਗਵਾ ਧਮ੍ਮਂ ਦੇਸੇਸਿ. ਸੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿਤ੍ਵਾ ਭਗਵਨ੍ਤਂ ਨਿਮਨ੍ਤੇਤ੍ਵਾ ਸਤ੍ਤਾਹਂ ਪਾਯਾਸਦਾਨਮਦਾਸਿ, ਸਤ੍ਤਮੇ ਦਿਵਸੇ ਭਗਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਤੇਨ ਵੁਤ੍ਤਂ – ‘‘ਏਕਮਨ੍ਤਂ ਨਿਸਿਨ੍ਨਂ ਖੋ ਤਂ ਗੋਪਾਲਕਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ…ਪੇ… ਉਟ੍ਠਾਯਾਸਨਾ ਪਕ੍ਕਾਮੀ’’ਤਿ.

ਤਤ੍ਥ ਸਨ੍ਦਸ੍ਸੇਸੀਤਿ ‘‘ਇਮੇ ਧਮ੍ਮਾ ਕੁਸਲਾ, ਇਮੇ ਧਮ੍ਮਾ ਅਕੁਸਲਾ’’ਤਿਆਦਿਨਾ ਕੁਸਲਾਦਿਧਮ੍ਮੇ ਕਮ੍ਮਵਿਪਾਕੇ ਇਧਲੋਕਪਰਲੋਕੇ ਪਚ੍ਚਕ੍ਖਤੋ ਦਸ੍ਸੇਨ੍ਤੋ ਅਨੁਪੁਬ੍ਬਿਕਥਾਵਸਾਨੇ ਚਤ੍ਤਾਰਿ ਅਰਿਯਸਚ੍ਚਾਨਿ ਸਮ੍ਮਾ ਦਸ੍ਸੇਸਿ. ਸਮਾਦਪੇਸੀਤਿ ‘‘ਸਚ੍ਚਾਧਿਗਮਾਯ ਇਮੇ ਨਾਮ ਧਮ੍ਮਾ ਅਤ੍ਤਨਿ ਉਪ੍ਪਾਦੇਤਬ੍ਬਾ’’ਤਿ ਸੀਲਾਦਿਧਮ੍ਮੇ ਸਮ੍ਮਾ ਗਣ੍ਹਾਪੇਤ੍ਵਾ ਤੇਸੁ ਤਂ ਪਤਿਟ੍ਠਪੇਸਿ. ਸਮੁਤ੍ਤੇਜੇਸੀਤਿ ਤੇ ਧਮ੍ਮਾ ਸਮਾਦਿਨ੍ਨਾ ਅਨੁਕ੍ਕਮੇਨ ਭਾਵਿਯਮਾਨਾ ਨਿਬ੍ਬੇਧਭਾਗਿਯਾ ਹੁਤ੍ਵਾ ਤਿਕ੍ਖਵਿਸਦਾ ਯਥਾ ਖਿਪ੍ਪਂ ਅਰਿਯਮਗ੍ਗਂ ਆਵਹਨ੍ਤਿ, ਤਥਾ ਸਮ੍ਮਾ ਉਤ੍ਤੇਜੇਸਿ ਸਮ੍ਮਦੇਵ ਤੇਜੇਸਿ. ਸਮ੍ਪਹਂਸੇਸੀਤਿ ਭਾਵਨਾਯ ਪੁਬ੍ਬੇਨਾਪਰਂ ਵਿਸੇਸਭਾਵਦਸ੍ਸਨੇਨ ਚਿਤ੍ਤਸ੍ਸ ਪਮੋਦਾਪਨਵਸੇਨ ਸੁਟ੍ਠੁ ਪਹਂਸੇਸਿ. ਅਪਿਚੇਤ੍ਥ ਸਾਵਜ੍ਜਾਨਵਜ੍ਜਧਮ੍ਮੇਸੁ ਦੁਕ੍ਖਾਦੀਸੁ ਚ ਸਮ੍ਮੋਹਵਿਨੋਦਨੇਨ ਸਨ੍ਦਸ੍ਸਨਂ, ਸਮ੍ਮਾਪਟਿਪਤ੍ਤਿਯਂ ਪਮਾਦਾਪਨੋਦਨੇਨ ਸਮਾਦਪਨਂ, ਚਿਤ੍ਤਸ੍ਸਾਲਸਿਯਾਪਤ੍ਤਿਵਿਨੋਦਨੇਨ ਸਮੁਤ੍ਤੇਜਨਂ, ਸਮ੍ਮਾਪਟਿਪਤ੍ਤਿਸਿਦ੍ਧਿਯਾ ਸਮ੍ਪਹਂਸਨਂ ਵੇਦਿਤਬ੍ਬਂ. ਏਵਂ ਸੋ ਭਗਵਤੋ ਸਾਮੁਕ੍ਕਂਸਿਕਾਯ ਧਮ੍ਮਦੇਸਨਾਯ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਅਧਿਵਾਸੇਸੀਤਿ ਤੇਨ ਦਿਟ੍ਠਸਚ੍ਚੇਨ ‘‘ਅਧਿਵਾਸੇਤੁ ਮੇ, ਭਨ੍ਤੇ ਭਗਵਾ’’ਤਿਆਦਿਨਾ ਨਿਮਨ੍ਤਿਤੋ ਕਾਯਙ੍ਗਵਾਚਙ੍ਗਂ ਅਚੋਪੇਨ੍ਤੋ ਚਿਤ੍ਤੇਨੇਵ ਅਧਿਵਾਸੇਸਿ ਸਾਦਿਯਿ. ਤੇਨੇਵਾਹ ‘‘ਤੁਣ੍ਹੀਭਾਵੇਨਾ’’ਤਿ.

ਅਪ੍ਪੋਦਕਪਾਯਾਸਨ੍ਤਿ ਨਿਰੁਦਕਪਾਯਾਸਂ. ਪਟਿਯਾਦਾਪੇਤ੍ਵਾਤਿ ਸਮ੍ਪਾਦੇਤ੍ਵਾ ਸਜ੍ਜੇਤ੍ਵਾ. ਨਵਞ੍ਚ ਸਪ੍ਪਿਨ੍ਤਿ ਨਵਨੀਤਂ ਗਹੇਤ੍ਵਾ ਤਾਵਦੇਵ ਵਿਲੀਨਂ ਮਣ੍ਡਸਪ੍ਪਿਞ੍ਚ ਪਟਿਯਾਦਾਪੇਤ੍ਵਾ. ਸਹਤ੍ਥਾਤਿ ਆਦਰਜਾਤੋ ਸਹਤ੍ਥੇਨੇਵ ਪਰਿਵਿਸਨ੍ਤੋ. ਸਨ੍ਤਪ੍ਪੇਸੀਤਿ ਪਟਿਯਤ੍ਤਂ ਭੋਜਨਂ ਭੋਜੇਸਿ. ਸਮ੍ਪਵਾਰੇਸੀਤਿ ‘‘ਅਲਂ ਅਲ’’ਨ੍ਤਿ ਵਾਚਾਯ ਪਟਿਕ੍ਖਿਪਾਪੇਸਿ. ਭੁਤ੍ਤਾਵਿਨ੍ਤਿ ਕਤਭਤ੍ਤਕਿਚ੍ਚਂ. ਓਨੀਤਪਤ੍ਤਪਾਣਿਨ੍ਤਿ ਪਤ੍ਤਤੋ ਅਪਨੀਤਪਾਣਿਂ, ‘‘ਧੋਤਪਤ੍ਤਪਾਣਿ’’ਨ੍ਤਿਪਿ ਪਾਠੋ, ਧੋਤਪਤ੍ਤਹਤ੍ਥਨ੍ਤਿ ਅਤ੍ਥੋ. ਨੀਚਨ੍ਤਿ ਅਨੁਚ੍ਚਂ ਆਸਨਂ ਗਹੇਤ੍ਵਾ ਆਸਨੇਯੇਵ ਨਿਸੀਦਨਂ ਅਰਿਯਦੇਸਵਾਸੀਨਂ ਚਾਰਿਤ੍ਤਂ, ਸੋ ਪਨ ਸਤ੍ਥੁ ਸਨ੍ਤਿਕੇ ਉਪਚਾਰਵਸੇਨ ਪਞ੍ਞਤ੍ਤਸ੍ਸ ਦਾਰੁਫਲਕਾਸਨਸ੍ਸ ਸਮੀਪੇ ਨਿਸੀਦਿ. ਧਮ੍ਮਿਯਾ ਕਥਾਯਾਤਿਆਦਿ ਸਤ੍ਤਮੇ ਦਿਵਸੇ ਕਤਂ ਅਨੁਮੋਦਨਂ ਸਨ੍ਧਾਯ ਵੁਤ੍ਤਂ. ਸੋ ਕਿਰ ਸਤ੍ਤਾਹਂ ਭਗਵਨ੍ਤਂ ਭਿਕ੍ਖੁਸਙ੍ਘਞ੍ਚ ਤਤ੍ਥ ਵਸਾਪੇਤ੍ਵਾ ਮਹਾਦਾਨਂ ਪਵਤ੍ਤੇਸਿ. ਸਤ੍ਤਮੇ ਪਨ ਦਿਵਸੇ ਅਪ੍ਪੋਦਕਪਾਯਾਸਦਾਨਂ ਅਦਾਸਿ. ਸਤ੍ਥਾ ਤਸ੍ਸ ਤਸ੍ਮਿਂ ਅਤ੍ਤਭਾਵੇ ਉਪਰਿਮਗ੍ਗਤ੍ਥਾਯ ਞਾਣਪਰਿਪਾਕਾਭਾਵਤੋ ਅਨੁਮੋਦਨਮੇਵ ਕਤ੍ਵਾ ਪਕ੍ਕਾਮਿ.

ਸੀਮਨ੍ਤਰਿਕਾਯਾਤਿ ਸੀਮਨ੍ਤਰੇ, ਤਸ੍ਸ ਗਾਮਸ੍ਸ ਅਨ੍ਤਰਂ. ਗਾਮਵਾਸਿਨੋ ਕਿਰ ਏਕਂ ਤਲ਼ਾਕਂ ਨਿਸ੍ਸਾਯ ਤੇਨ ਸਦ੍ਧਿਂ ਕਲਹਂ ਅਕਂਸੁ. ਸੋ ਤੇ ਅਭਿਭਵਿਤ੍ਵਾ ਤਂ ਤਲ਼ਾਕਂ ਗਣ੍ਹਿ. ਤੇਨ ਬਦ੍ਧਾਘਾਤੋ ਏਕੋ ਪੁਰਿਸੋ ਤਂ ਸਤ੍ਥੁ ਪਤ੍ਤਂ ਗਹੇਤ੍ਵਾ ਦੂਰਂ ਅਨੁਗਨ੍ਤ੍ਵਾ ‘‘ਨਿਵਤ੍ਤਾਹਿ ਉਪਾਸਕਾ’’ਤਿ ਵੁਤ੍ਤੇ ਭਗਵਨ੍ਤਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਭਿਕ੍ਖੁਸਙ੍ਘਸ੍ਸ ਚ ਅਞ੍ਜਲਿਂ ਕਤ੍ਵਾ ਯਾਵ ਦਸ੍ਸਨੂਪਚਾਰਸਮਤਿਕ੍ਕਮਾ ਦਸਨਖਸਮੋਧਾਨਸਮੁਜ੍ਜਲਂ ਅਞ੍ਜਲਿਂ ਸਿਰਸਿ ਪਗ੍ਗਯ੍ਹ ਪਟਿਨਿਵਤ੍ਤਿਤ੍ਵਾ ਦ੍ਵਿਨ੍ਨਂ ਗਾਮਾਨਂ ਅਨ੍ਤਰੇ ਅਰਞ੍ਞਪ੍ਪਦੇਸੇ ਏਕਕਂ ਗਚ੍ਛਨ੍ਤਂ ਸਰੇਨ ਵਿਜ੍ਝਿਤ੍ਵਾ ਮਾਰੇਸਿ. ਤੇਨ ਵੁਤ੍ਤਂ ਅਚਿਰਪਕ੍ਕਨ੍ਤਸ੍ਸ…ਪੇ… ਵੋਰੋਪੇਸੀ’’ਤਿ. ਕੇਨਚਿਦੇਵ ਕਰਣੀਯੇਨ ਓਹੀਯਿਤ੍ਵਾ ਪਚ੍ਛਾ ਗਚ੍ਛਨ੍ਤਾ ਭਿਕ੍ਖੂ ਤਂ ਤਥਾ ਮਤਂ ਦਿਸ੍ਵਾ ਭਗਵਤੋ ਤਮਤ੍ਥਂ ਆਰੋਚੇਸੁਂ, ਤਂ ਸਨ੍ਧਾਯ ਵੁਤ੍ਤਂ ‘‘ਅਥ ਖੋ ਸਮ੍ਬਹੁਲਾ ਭਿਕ੍ਖੂ’’ਤਿਆਦਿ.

ਏਤਮਤ੍ਥਂ ਵਿਦਿਤ੍ਵਾਤਿ ਯਸ੍ਮਾ ਦਿਟ੍ਠਿਸਮ੍ਪਨ੍ਨਂ ਅਰਿਯਸਾਵਕਂ ਨਨ੍ਦਂ ਮਾਰੇਨ੍ਤੇਨ ਪੁਰਿਸੇਨ ਆਨਨ੍ਤਰਿਯਕਮ੍ਮਂ ਬਹੁਲਂ ਅਪੁਞ੍ਞਂ ਪਸੁਤਂ, ਤਸ੍ਮਾ ਯਂ ਚੋਰੇਹਿ ਚ ਵੇਰੀਹਿ ਚ ਕਤ੍ਤਬ੍ਬਂ, ਤਤੋਪਿ ਘੋਰਤਰਂ ਇਮੇਸਂ ਸਤ੍ਤਾਨਂ ਮਿਚ੍ਛਾਪਣਿਹਿਤਂ ਚਿਤ੍ਤਂ ਕਰੋਤੀਤਿ ਇਮਮਤ੍ਥਂ ਜਾਨਿਤ੍ਵਾ ਤਦਤ੍ਥਦੀਪਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਦਿਸੋ ਦਿਸਨ੍ਤਿ ਦੂਸਕੋ ਦੂਸਨੀਯਂ ਚੋਰੋ ਚੋਰਂ, ਦਿਸ੍ਵਾਤਿ ਵਚਨਸੇਸੋ. ਯਂ ਤਂ ਕਯਿਰਾਤਿ ਯਂ ਤਸ੍ਸ ਅਨਯਬ੍ਯਸਨਂ ਕਰੇਯ੍ਯ, ਦੁਤਿਯਪਦੇਪਿ ਏਸੇਵ ਨਯੋ. ਇਦਂ ਵੁਤ੍ਤਂ ਹੋਤਿ – ਏਕੋ ਏਕਸ੍ਸ ਮਿਤ੍ਤਦੁਬ੍ਭੀ ਚੋਰੋ ਪੁਤ੍ਤਦਾਰਖੇਤ੍ਤਵਤ੍ਥੁਗੋਮਹਿਂਸਾਦੀਸੁ ਅਪਰਜ੍ਝਨ੍ਤੋ ਯਸ੍ਸ ਅਪਰਜ੍ਝਤਿ, ਤਮ੍ਪਿ ਤਥੇਵ ਅਤ੍ਤਨਿ ਅਪਰਜ੍ਝਨ੍ਤਂ ਚੋਰਂ ਦਿਸ੍ਵਾ, ਵੇਰੀ ਵਾ ਪਨ ਕੇਨਚਿਦੇਵ ਕਾਰਣੇਨ ਬਦ੍ਧਵੇਰਂ ਵੇਰਿਂ ਦਿਸ੍ਵਾ ਅਤ੍ਤਨੋ ਕਕ੍ਖਲ਼ਤਾਯ ਦਾਰੁਣਤਾਯ ਯਂ ਤਸ੍ਸ ਅਨਯਬ੍ਯਸਨਂ ਕਰੇਯ੍ਯ, ਪੁਤ੍ਤਦਾਰਂ ਵਾ ਪੀਲ਼ੇਯ੍ਯ, ਖੇਤ੍ਤਾਦੀਨਿ ਵਾ ਨਾਸੇਯ੍ਯ, ਜੀਵਿਤਾ ਵਾ ਵੋਰੋਪੇਯ੍ਯ, ਦਸਸੁ ਅਕੁਸਲਕਮ੍ਮਪਥੇਸੁ ਮਿਚ੍ਛਾਠਪਿਤਤ੍ਤਾ ਮਿਚ੍ਛਾਪਣਿਹਿਤਂ ਚਿਤ੍ਤਂ ਪਾਪਿਯੋ ਨਂ ਤਤੋ ਕਰੇ, ਨਂ ਪੁਰਿਸਂ ਪਾਪਤਰਂ ਤਤੋ ਕਰੇਯ੍ਯ. ਵੁਤ੍ਤਪ੍ਪਕਾਰੋ ਹਿ ਦਿਸੋ ਵਾ ਵੇਰੀ ਵਾ ਦਿਸਸ੍ਸ ਵਾ ਵੇਰਿਨੋ ਵਾ ਇਮਸ੍ਮਿਂਯੇਵ ਅਤ੍ਤਭਾਵੇ ਦੁਕ੍ਖਂ ਵਾ ਉਪ੍ਪਾਦੇਯ੍ਯ, ਜੀਵਿਤਕ੍ਖਯਂ ਵਾ ਕਰੇਯ੍ਯ. ਇਦਂ ਪਨ ਅਕੁਸਲਕਮ੍ਮਪਥੇਸੁ ਮਿਚ੍ਛਾਠਪਿਤਂ ਚਿਤ੍ਤਂ ਦਿਟ੍ਠੇਵ ਧਮ੍ਮੇ ਅਨਯਬ੍ਯਸਨਂ ਪਾਪੇਤਿ, ਅਤ੍ਤਭਾਵਸਤਸਹਸ੍ਸੇਸੁਪਿ ਚਤੂਸੁ ਅਪਾਯੇਸੁ ਖਿਪਿਤ੍ਵਾ ਸੀਸਮਸ੍ਸ ਉਕ੍ਖਿਪਿਤੁਂ ਨ ਦੇਤੀਤਿ.

ਤਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.