੨. ਉਦ੍ਧਤਸੁਤ੍ਤਵਣ੍ਣਨਾ
੩੨. ਦੁਤਿਯੇ ਕੁਸਿਨਾਰਾਯਨ੍ਤਿ ਕੁਸਿਨਾਰਾਯਂ ਨਾਮ ਮਲ੍ਲਰਾਜੂਨਂ ਨਗਰੇ. ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇਤਿ ਯਥਾ ਹਿ ਅਨੁਰਾਧਪੁਰਸ੍ਸ ਥੂਪਾਰਾਮੋ, ਏਵਂ ਕੁਸਿਨਾਰਾਯ ਉਯ੍ਯਾਨਂ ਦਕ੍ਖਿਣਪਚ੍ਛਿਮਦਿਸਾਯ ਹੋਤਿ. ਯਥਾ ਥੂਪਾਰਾਮਤੋ ਦਕ੍ਖਿਣਦ੍ਵਾਰੇਨ ਨਗਰਪਵਿਸਨਮਗ੍ਗੋ ਪਾਚੀਨਮੁਖੋ ਗਨ੍ਤ੍ਵਾ ਉਤ੍ਤਰੇਨ ਨਿਵਤ੍ਤਤਿ, ਏਵਂ ਉਯ੍ਯਾਨਤੋ ਸਾਲਪਨ੍ਤਿ ਪਾਚੀਨਮੁਖਾ ਗਨ੍ਤ੍ਵਾ ਉਤ੍ਤਰੇਨ ਨਿਵਤ੍ਤਾ, ਤਸ੍ਮਾ ‘‘ਉਪਵਤ੍ਤਨ’’ਨ੍ਤਿ ਵੁਚ੍ਚਤਿ. ਤਸ੍ਮਿਂ ਉਪਵਤ੍ਤਨੇ ਮਲ੍ਲਰਾਜੂਨਂ ਸਾਲਵਨੇ. ਅਰਞ੍ਞਕੁਟਿਕਾਯਨ੍ਤਿ ਸਾਲਪਨ੍ਤਿਯਾ ਅਵਿਦੂਰੇ ਰੁਕ੍ਖਗਚ੍ਛਸਞ੍ਛਨ੍ਨਟ੍ਠਾਨੇ ਕਤਾ ਕੁਟਿਕਾ, ਤਂ ਸਨ੍ਧਾਯ ਵੁਤ੍ਤਂ ‘‘ਅਰਞ੍ਞਕੁਟਿਕਾਯਂ ਵਿਹਰਤੀ’’ਤਿ. ਤੇ ਪਨ ਭਿਕ੍ਖੂ ਪਟਿਸਙ੍ਖਾਨਵਿਰਹਿਤਾ ਓਸ੍ਸਟ੍ਠਵੀਰਿਯਾ ਪਮਤ੍ਤਵਿਹਾਰਿਨੋ, ਤੇਨ ਵੁਤ੍ਤਂ ‘‘ਉਦ੍ਧਤਾ’’ਤਿਆਦਿ.
ਤਤ੍ਥ ਉਦ੍ਧਚ੍ਚਬਹੁਲਤ੍ਤਾ ਅਵੂਪਸਨ੍ਤਚਿਤ੍ਤਤਾਯ ਉਦ੍ਧਤਾ. ਤੁਚ੍ਛਭਾਵੇਨ ਮਾਨੋ ਨਲ਼ੋ ਵਿਯਾਤਿ ਨਲ਼ੋ, ਮਾਨਸਙ੍ਖਾਤੋ ਉਗ੍ਗਤੋ ਨਲ਼ੋ ਏਤੇਸਨ੍ਤਿ ਉਨ੍ਨਲ਼ਾ, ਉਗ੍ਗਤਤੁਚ੍ਛਮਾਨਾਤਿ ਅਤ੍ਥੋ. ਪਤ੍ਤਚੀਵਰਮਣ੍ਡਨਾਦਿਚਾਪਲ੍ਲੇਨ ਸਮਨ੍ਨਾਗਤਤ੍ਤਾ ਬਹੁਕਤਾਯ ਵਾ ਚਪਲਾ. ਫਰੁਸਵਾਚਤਾਯ ਮੁਖੇਨ ਖਰਾਤਿ ਮੁਖਰਾ. ਤਿਰਚ੍ਛਾਨਕਥਾਬਹੁਲਤਾਯ ਵਿਕਿਣ੍ਣਾ ਬ੍ਯਾਕੁਲਾ ਵਾਚਾ ਏਤੇਸਨ੍ਤਿ ਵਿਕਿਣ੍ਣਵਾਚਾ. ਮੁਟ੍ਠਾ ਨਟ੍ਠਾ ਸਤਿ ਏਤੇਸਨ੍ਤਿ ਮੁਟ੍ਠਸ੍ਸਤਿਨੋ, ਸਤਿਵਿਰਹਿਤਾ ਪਮਾਦਵਿਹਾਰਿਨੋਤਿ ਅਤ੍ਥੋ. ਸਬ੍ਬੇਨ ਸਬ੍ਬਂ ਸਮ੍ਪਜਞ੍ਞਾਭਾਵਤੋ ਅਸਮ੍ਪਜਾਨਾ. ਗਦ੍ਦੂਹਨਮਤ੍ਤਮ੍ਪਿ ਕਾਲਂ ਚਿਤ੍ਤਸਮਾਧਾਨਸ੍ਸ ਅਭਾਵਤੋ ਨ ਸਮਾਹਿਤਾਤਿ ਅਸਮਾਹਿਤਾ. ਲੋਲਸਭਾਵਤ੍ਤਾ ਭਨ੍ਤਮਿਗਸਪ੍ਪਟਿਭਾਗਤਾਯ ਵਿਬ੍ਭਨ੍ਤਚਿਤ੍ਤਾ. ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਅਸਂਵਰਣਤੋ ਅਸਞ੍ਞਤਿਨ੍ਦ੍ਰਿਯਤਾਯ ਪਾਕਤਿਨ੍ਦ੍ਰਿਯਾ.
ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਤੇਸਂ ਭਿਕ੍ਖੂਨਂ ਉਦ੍ਧਚ੍ਚਾਦਿਵਸੇਨ ਪਮਾਦਵਿਹਾਰਂ ਜਾਨਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਪਮਾਦਵਿਹਾਰੇ ਅਪ੍ਪਮਾਦਵਿਹਾਰੇ ਚ ਯਥਾਕ੍ਕਮਂ ਆਦੀਨਵਾਨਿਸਂਸਵਿਭਾਵਨਂ ਉਦਾਨਂ ਉਦਾਨੇਸਿ.
ਤਤ੍ਥ ਅਰਕ੍ਖਿਤੇਨਾਤਿ ਸਤਿਆਰਕ੍ਖਾਭਾਵੇਨ ਅਗੁਤ੍ਤੇਨ. ਕਾਯੇਨਾਤਿ ਛਵਿਞ੍ਞਾਣਕਾਯੇਨ ਚਕ੍ਖੁਵਿਞ੍ਞਾਣੇਨ ਹਿ ਰੂਪਂ ਦਿਸ੍ਵਾ ਤਤ੍ਥ ਨਿਮਿਤ੍ਤਾਨੁਬ੍ਯਞ੍ਜਨਗ੍ਗਹਣਵਸੇਨ ਅਭਿਜ੍ਝਾਦਿਪਵਤ੍ਤਿਤੋ ਵਿਞ੍ਞਾਣਦ੍ਵਾਰਸ੍ਸ ਸਤਿਯਾ ਅਰਕ੍ਖਿਤਭਾਵਤੋ. ਸੋਤਵਿਞ੍ਞਾਣਾਦੀਸੁਪਿ ਏਸੇਵ ਨਯੋ. ਏਵਂ ਛਵਿਞ੍ਞਾਣਕਾਯਸ੍ਸ ਅਰਕ੍ਖਿਤਭਾਵਂ ਸਨ੍ਧਾਯਾਹ ‘‘ਅਰਕ੍ਖਿਤੇਨ ਕਾਯੇਨਾ’’ਤਿ. ਕੇਚਿ ਪਨ ‘‘ਕਾਯੇਨਾ’’ਤਿ ਅਤ੍ਥਂ ਵਦਨ੍ਤਿ, ਤੇਸਮ੍ਪਿ ਵੁਤ੍ਤਨਯੇਨੇਵ ਅਤ੍ਥਯੋਜਨਾਯ ਸਤਿ ਯੁਜ੍ਜੇਯ੍ਯ. ਅਪਰੇ ਪਨ ‘‘ਅਰਕ੍ਖਿਤੇਨ ਚਿਤ੍ਤੇਨਾ’’ਤਿ ਪਠਨ੍ਤਿ, ਤੇਸਮ੍ਪਿ ਵੁਤ੍ਤਨਯੋ ਏਵ ਅਤ੍ਥੋ. ਮਿਚ੍ਛਾਦਿਟ੍ਠਿਹਤੇਨਾਤਿ ਸਸ੍ਸਤਾਦਿਮਿਚ੍ਛਾਭਿਨਿਵੇਸਦੂਸਿਤੇਨ. ਥਿਨਮਿਦ੍ਧਾਭਿਭੂਤੇਨਾਤਿ ਚਿਤ੍ਤਸ੍ਸ ਅਕਲ੍ਯਤਾਲਕ੍ਖਣੇਨ ਥਿਨੇਨ ਕਾਯਸ੍ਸ ਅਕਲ੍ਯਤਾਲਕ੍ਖਣੇਨ ਮਿਦ੍ਧੇਨ ਚ ਅਜ੍ਝੋਤ੍ਥਟੇਨ, ਤੇਨ ਕਾਯੇਨ ਚਿਤ੍ਤੇਨਾਤਿ ਵਾ ਸਮ੍ਬਨ੍ਧੋ. ਵਸਂ ਮਾਰਸ੍ਸ ਗਚ੍ਛਤੀਤਿ ਕਿਲੇਸਮਾਰਾਦਿਕਸ੍ਸ ਸਬ੍ਬਸ੍ਸਪਿ ਮਾਰਸ੍ਸ ਵਸਂ ਯਥਾਕਾਮਕਰਣੀਯਤਂ ਉਪਗਚ੍ਛਤਿ, ਤੇਸਂ ਵਿਸਯਂ ਨਾਤਿਕ੍ਕਮਤੀਤਿ ਅਤ੍ਥੋ.
ਇਮਾਯ ਹਿ ਗਾਥਾਯ ਭਗਵਾ ਯੇ ਸਤਿਆਰਕ੍ਖਾਭਾਵੇਨ ਸਬ੍ਬਸੋ ਅਰਕ੍ਖਿਤਚਿਤ੍ਤਾ, ਯੋਨਿਸੋਮਨਸਿਕਾਰਸ੍ਸ ਹੇਤੁਭੂਤਾਯ ਪਞ੍ਞਾਯ ਅਭਾਵਤੋ ਅਯੋਨਿਸੋ ਉਮ੍ਮੁਜ੍ਜਨੇਨ ਨਿਚ੍ਚਨ੍ਤਿਆਦਿਨਾ ਵਿਪਰਿਯੇਸਗਾਹਿਨੋ, ਤਤੋ ਏਵ ਕੁਸਲਕਿਰਿਯਾਯ ਵੀਰਿਯਾਰਮ੍ਭਾਭਾਵਤੋ ਕੋਸਜ੍ਜਾਭਿਭੂਤਾ ਸਂਸਾਰਵਟ੍ਟਤੋ ਸੀਸਂ ਨ ਉਕ੍ਖਿਪਿਸ੍ਸਨ੍ਤੀਤਿ ਤੇਸਂ ਭਿਕ੍ਖੂਨਂ ਪਮਾਦਵਿਹਾਰਗਰਹਾਮੁਖੇਨ ਵਟ੍ਟਂ ਦਸ੍ਸੇਤ੍ਵਾ ਇਦਾਨਿ ਵਿਵਟ੍ਟਂ ਦਸ੍ਸੇਤੁਂ, ‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸਾ’’ਤਿ ਦੁਤਿਯਗਾਥਮਾਹ.
ਤਤ੍ਥ ਤਸ੍ਮਾ ਰਕ੍ਖਿਤਚਿਤ੍ਤਸ੍ਸਾਤਿ ਯਸ੍ਮਾ ਅਰਕ੍ਖਿਤਚਿਤ੍ਤੋ ਮਾਰਸ੍ਸ ਯਥਾਕਾਮਕਰਣੀਯੋ ਹੁਤ੍ਵਾ ਸਂਸਾਰੇਯੇਵ ਹੋਤਿ, ਤਸ੍ਮਾ ਸਤਿਸਂਵਰੇਨ ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਰਕ੍ਖਣੇਨ ਪਿਦਹਨੇਨ ਰਕ੍ਖਿਤਚਿਤ੍ਤੋ ਅਸ੍ਸ. ਚਿਤ੍ਤੇ ਹਿ ਰਕ੍ਖਿਤੇ ਚਕ੍ਖਾਦਿਇਨ੍ਦ੍ਰਿਯਾਨਿ ਰਕ੍ਖਿਤਾਨੇਵ ਹੋਨ੍ਤੀਤਿ. ਸਮ੍ਮਾਸਙ੍ਕਪ੍ਪਗੋਚਰੋਤਿ ਯਸ੍ਮਾ ਮਿਚ੍ਛਾਸਙ੍ਕਪ੍ਪਗੋਚਰੋ ਤਥਾ ਤਥਾ ਅਯੋਨਿਸੋ ਵਿਤਕ੍ਕੇਤ੍ਵਾ ਨਾਨਾਵਿਧਾਨਿ ਮਿਚ੍ਛਾਦਸ੍ਸਨਾਨਿ ਗਣ੍ਹਨ੍ਤੋ ਮਿਚ੍ਛਾਦਿਟ੍ਠਿਹਤੇਨ ਚਿਤ੍ਤੇਨ ਮਾਰਸ੍ਸ ਯਥਾਕਾਮਕਰਣੀਯੋ ਹੋਤਿ, ਤਸ੍ਮਾ ਯੋਨਿਸੋਮਨਸਿਕਾਰੇਨ ਕਮ੍ਮਂ ਕਰੋਨ੍ਤੋ ਨੇਕ੍ਖਮ੍ਮਸਙ੍ਕਪ੍ਪਾਦਿਸਮ੍ਮਾਸਙ੍ਕਪ੍ਪਗੋਚਰੋ ਅਸ੍ਸ, ਝਾਨਾਦਿਸਮ੍ਪਯੁਤ੍ਤਂ ਸਮ੍ਮਾਸਙ੍ਕਪ੍ਪਮੇਵ ਅਤ੍ਤਨੋ ਚਿਤ੍ਤਸ੍ਸ ਪਵਤ੍ਤਿਟ੍ਠਾਨਂ ਕਰੇਯ੍ਯ. ਸਮ੍ਮਾਦਿਟ੍ਠਿਪੁਰੇਕ੍ਖਾਰੋਤਿ ਸਮ੍ਮਾਸਙ੍ਕਪ੍ਪਗੋਚਰਤਾਯ ਵਿਧੂਤਮਿਚ੍ਛਾਦਸ੍ਸਨੋ ਪੁਰੇਤਰਂਯੇਵ ਕਮ੍ਮਸ੍ਸਕਤਾਲਕ੍ਖਣਂ, ਤਤੋ ਯਥਾਭੂਤਞਾਣਲਕ੍ਖਣਞ੍ਚ ਸਮ੍ਮਾਦਿਟ੍ਠਿਂ ਪੁਰਤੋ ਕਤ੍ਵਾ ਪੁਬ੍ਬੇ ਵੁਤ੍ਤਨਯੇਨੇਵ ਸੀਲਸਮਾਧੀਸੁ ਯੁਤ੍ਤੋ ਪਯੁਤ੍ਤੋ ਵਿਪਸ੍ਸਨਂ ਆਰਭਿਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੋ ਞਤ੍ਵਾਨ ਉਦਯਬ੍ਬਯਂ ਪਞ੍ਚਸੁ ਉਪਾਦਾਨਕ੍ਖਨ੍ਧੇਸੁ ਸਮਪਞ੍ਞਾਸਾਯ ਆਕਾਰੇਹਿ ਉਪ੍ਪਾਦਨਿਰੋਧਂ ਵਵਤ੍ਥਪੇਤ੍ਵਾ ਉਦਯਬ੍ਬਯਞਾਣਮਧਿਗਨ੍ਤ੍ਵਾ ਤਤੋ ਪਰਂ ਭਙ੍ਗਾਨੁਪਸ੍ਸਨਾਦਿਵਸੇਨ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਨੁਕ੍ਕਮੇਨ ਅਰਿਯਮਗ੍ਗਂ ਗਣ੍ਹਨ੍ਤੋ ਅਗ੍ਗਮਗ੍ਗੇਨ, ਥਿਨਮਿਦ੍ਧਾਭਿਭੂ ਭਿਕ੍ਖੁ ਸਬ੍ਬਾ ਦੁਗ੍ਗਤਿਯੋ ਜਹੇਤਿ, ਏਵਂ ਸੋ ਹੇਟ੍ਠਿਮਮਗ੍ਗਵਜ੍ਝਾਨਂ ਕਿਲੇਸਾਨਂ ਪਠਮਮੇਵ ਪਹੀਨਤ੍ਤਾ ਦਿਟ੍ਠਿਵਿਪ੍ਪਯੁਤ੍ਤਲੋਭਸਹਗਤਚਿਤ੍ਤੁਪ੍ਪਾਦੇਸੁ ਉਪ੍ਪਜ੍ਜਨਕਥਿਨਮਿਦ੍ਧਾਨਂ ਅਧਿਗਤੇਨ ਅਰਹਤ੍ਤਮਗ੍ਗੇਨ ਸਮੁਚ੍ਛਿਨ੍ਦਨਤੋ ਤਦੇਕਟ੍ਠਾਨਂ ਮਾਨਾਦੀਨਮ੍ਪਿ ਪਹੀਨਤ੍ਤਾ ਸਬ੍ਬਸੋ ਭਿਨ੍ਨਕਿਲੇਸੋ ਖੀਣਾਸਵੋ ਭਿਕ੍ਖੁ ਤਿਵਿਧਦੁਕ੍ਖਤਾਯੋਗੇਨ ਦੁਗ੍ਗਤਿਸਙ੍ਖਾਤਾ ਸਬ੍ਬਾਪਿ ਗਤਿਯੋ ਉਚ੍ਛਿਨ੍ਨਭਵਮੂਲਤ੍ਤਾ ਜਹੇ, ਪਜਹੇਯ੍ਯ. ਤਾਸਂ ਪਰਭਾਗੇ ਨਿਬ੍ਬਾਨੇ ਪਤਿਟ੍ਠੇਯ੍ਯਾਤਿ ਅਤ੍ਥੋ.
ਦੁਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.