੯. ਜਟਿਲਸੁਤ੍ਤਵਣ੍ਣਨਾ

੯. ਨਵਮੇ ਗਯਾਯਨ੍ਤਿ ਏਤ੍ਥ ਗਯਾਤਿ ਗਾਮੋਪਿ ਤਿਤ੍ਥਮ੍ਪਿ ਵੁਚ੍ਚਤਿ. ਗਯਾਗਾਮਸ੍ਸ ਹਿ ਅਵਿਦੂਰੇ ਵਿਹਰਨ੍ਤੋ ਭਗਵਾ ‘‘ਗਯਾਯਂ ਵਿਹਰਤੀ’’ਤਿ ਵੁਚ੍ਚਤਿ, ਤਥਾ ਗਯਾਤਿਤ੍ਥਸ੍ਸ. ਗਯਾਤਿਤ੍ਥਨ੍ਤਿ ਹਿ ਗਯਾਗਾਮਸ੍ਸ ਅਵਿਦੂਰੇ ਏਕਾ ਪੋਕ੍ਖਰਣੀ ਅਤ੍ਥਿ ਨਦੀਪਿ, ਤਦੁਭਯਂ ‘‘ਪਾਪਪਵਾਹਨਤਿਤ੍ਥ’’ਨ੍ਤਿ ਲੋਕਿਯਮਹਾਜਨੋ ਸਮੁਦਾਚਰਤਿ. ਗਯਾਸੀਸੇਤਿ ਗਜਸੀਸਸਦਿਸਸਿਖਰੋ ਤਤ੍ਥ ਏਕੋ ਪਬ੍ਬਤੋ ਗਯਾਸੀਸਨਾਮਕੋ, ਯਤ੍ਥ ਹਤ੍ਥਿਕੁਮ੍ਭਸਦਿਸੋ ਪਿਟ੍ਠਿਪਾਸਾਣੋ ਭਿਕ੍ਖੁਸਹਸ੍ਸਸ੍ਸ ਓਕਾਸੋ ਪਹੋਤਿ, ਤਤ੍ਰ ਭਗਵਾ ਵਿਹਰਤਿ. ਤੇਨ ਵੁਤ੍ਤਂ – ‘‘ਗਯਾਯਂ ਵਿਹਰਤਿ ਗਯਾਸੀਸੇ’’ਤਿ.

ਜਟਿਲਾਤਿ ਤਾਪਸਾ. ਤੇ ਹਿ ਜਟਾਧਾਰਿਤਾਯ ਇਧ ‘‘ਜਟਿਲਾ’’ਤਿ ਵੁਤ੍ਤਾ. ਅਨ੍ਤਰਟ੍ਠਕੇ ਹਿਮਪਾਤਸਮਯੇਤਿ ਹੇਮਨ੍ਤਸ੍ਸ ਉਤੁਨੋ ਅਬ੍ਭਨ੍ਤਰਭੂਤੇ ਮਾਘਮਾਸਸ੍ਸ ਅਵਸਾਨੇ ਚਤ੍ਤਾਰੋ ਫਗ੍ਗੁਣਮਾਸਸ੍ਸ ਆਦਿਮ੍ਹਿ ਚਤ੍ਤਾਰੋਤਿ ਅਟ੍ਠਦਿਵਸਪਰਿਮਾਣੇ ਹਿਮਸ੍ਸ ਪਤਨਕਾਲੇ. ਗਯਾਯਂ ਉਮ੍ਮੁਜ੍ਜਨ੍ਤੀਤਿ ਕੇਚਿ ਤਸ੍ਮਿਂ ਤਿਤ੍ਥਸਮ੍ਮਤੇ ਉਦਕੇ ਪਠਮਂ ਨਿਮੁਗ੍ਗਸਕਲਸਰੀਰਾ ਤਤੋ ਉਮ੍ਮੁਜ੍ਜਨ੍ਤਿ ਵੁਟ੍ਠਹਨ੍ਤਿ ਉਪ੍ਪਿਲਵਨ੍ਤਿ. ਨਿਮੁਜ੍ਜਨ੍ਤੀਤਿ ਸਸੀਸਂ ਉਦਕੇ ਓਸੀਦਨ੍ਤਿ. ਉਮ੍ਮੁਜ੍ਜਨਿਮੁਜ੍ਜਮ੍ਪਿ ਕਰੋਨ੍ਤੀਤਿ ਪੁਨਪ੍ਪੁਨਂ ਉਮ੍ਮੁਜ੍ਜਨਨਿਮੁਜ੍ਜਨਾਨਿਪਿ ਕਰੋਨ੍ਤਿ.

ਤਤ੍ਥ ਹਿ ਕੇਚਿ ‘‘ਏਕੁਮ੍ਮੁਜ੍ਜਨੇਨੇਵ ਪਾਪਸੁਦ੍ਧਿ ਹੋਤੀ’’ਤਿ ਏਵਂਦਿਟ੍ਠਿਕਾ, ਤੇ ਉਮ੍ਮੁਜ੍ਜਨਮੇਵ ਕਤ੍ਵਾ ਗਚ੍ਛਨ੍ਤਿ. ਉਮ੍ਮੁਜ੍ਜਨਂ ਪਨ ਨਿਮੁਜ੍ਜਨਮਨ੍ਤਰੇਨ ਨਤ੍ਥੀਤਿ ਅਵਿਨਾਭਾਵਤੋ ਨਿਮੁਜ੍ਜਨਮ੍ਪਿ ਤੇ ਕਰੋਨ੍ਤਿਯੇਵ. ਯੇਪਿ ‘‘ਏਕਨਿਮੁਜ੍ਜਨੇਨੇਵ ਪਾਪਸੁਦ੍ਧਿ ਹੋਤੀ’’ਤਿ ਏਵਂਦਿਟ੍ਠਿਕਾ, ਤੇਪਿ ਏਕਵਾਰਮੇਵ ਨਿਮੁਜ੍ਜਿਤ੍ਵਾ ਵੁਤ੍ਤਨਯੇਨ ਅਵਿਨਾਭਾਵਤੋ ਉਮ੍ਮੁਜ੍ਜਨਮ੍ਪਿ ਕਤ੍ਵਾ ਪਕ੍ਕਮਨ੍ਤਿ. ਯੇ ਪਨ ‘‘ਤਸ੍ਮਿਂ ਤਿਤ੍ਥੇ ਨਿਮੁਜ੍ਜਨੇਨੇਵ ਪਾਪਸੁਦ੍ਧਿ ਹੋਤੀ’’ਤਿ ਏਵਂਦਿਟ੍ਠਿਕਾ, ਤੇ ਤਤ੍ਥ ਨਿਮੁਜ੍ਜਿਤ੍ਵਾ ਅਸ੍ਸਾਸੇ ਸਨ੍ਨਿਰੁਮ੍ਭਿਤ੍ਵਾ ਮਰੁਪ੍ਪਪਾਤਪਤਿਤਾ ਵਿਯ ਤਤ੍ਥੇਵ ਜੀਵਿਤਕ੍ਖਯਂ ਪਾਪੁਣਨ੍ਤਿ. ਅਪਰੇ ‘‘ਪੁਨਪ੍ਪੁਨਂ ਉਮ੍ਮੁਜ੍ਜਨਨਿਮੁਜ੍ਜਨਾਨਿ ਕਤ੍ਵਾ ਨ੍ਹਾਤੇ ਪਾਪਸੁਦ੍ਧਿ ਹੋਤੀ’’ਤਿ ਏਵਂਦਿਟ੍ਠਿਕਾ, ਤੇ ਕਾਲੇਨ ਕਾਲਂ ਉਮ੍ਮੁਜ੍ਜਨਨਿਮੁਜ੍ਜਨਾਨਿ ਕਰੋਨ੍ਤਿ. ਤੇ ਸਬ੍ਬੇਪਿ ਸਨ੍ਧਾਯ ਵੁਤ੍ਤਂ – ‘‘ਉਮ੍ਮੁਜ੍ਜਨ੍ਤਿਪਿ ਨਿਮੁਜ੍ਜਨ੍ਤਿਪਿ ਉਮ੍ਮੁਜ੍ਜਨਿਮੁਜ੍ਜਮ੍ਪਿ ਕਰੋਨ੍ਤੀ’’ਤਿ. ਏਤ੍ਥ ਚ ਕਿਞ੍ਚਾਪਿ ਨਿਮੁਜ੍ਜਨਪੁਬ੍ਬਕਂ ਉਮ੍ਮੁਜ੍ਜਨਂ, ਨਿਮੁਜ੍ਜਨਮੇਵ ਪਨ ਕਰੋਨ੍ਤਾ ਕਤਿਪਯਾ, ਉਮ੍ਮੁਜ੍ਜਨਂ ਤਦੁਭਯਞ੍ਚ ਕਰੋਨ੍ਤਾ ਬਹੂਤਿ ਤੇਸਂ ਯੇਭੁਯ੍ਯਭਾਵਦਸ੍ਸਨਤ੍ਥਂ ਉਮ੍ਮੁਜ੍ਜਨਂ ਪਠਮਂ ਵੁਤ੍ਤਂ. ਤਥਾ ਸਮ੍ਬਹੁਲਾ ਜਟਿਲਾਤਿ ਜਟਿਲਾਨਂ ਯੇਭੁਯ੍ਯਤਾਯ ਵੁਤ੍ਤਂ, ਮੁਣ੍ਡਸਿਖਣ੍ਡਿਨੋਪਿ ਚ ਬ੍ਰਾਹ੍ਮਣਾ ਉਦਕਸੁਦ੍ਧਿਕਾ ਤਸ੍ਮਿਂ ਕਾਲੇ ਤਤ੍ਥ ਤਥਾ ਕਰੋਨ੍ਤਿ.

ਓਸਿਞ੍ਚਨ੍ਤੀਤਿ ਕੇਚਿ ਗਯਾਯ ਉਦਕਂ ਹਤ੍ਥੇਨ ਗਹੇਤ੍ਵਾ ਅਤ੍ਤਨੋ ਸੀਸੇ ਚ ਸਰੀਰੇ ਚ ਓਸਿਞ੍ਚਨ੍ਤਿ, ਅਪਰੇ ਘਟੇਹਿ ਉਦਕਂ ਗਹੇਤ੍ਵਾ ਤੀਰੇ ਠਤ੍ਵਾ ਤਥਾ ਕਰੋਨ੍ਤਿ. ਅਗ੍ਗਿਂ ਜੁਹਨ੍ਤੀਤਿ ਕੇਚਿ ਗਯਾਤੀਰੇ ਵੇਦਿਂ ਸਜ੍ਜੇਤ੍ਵਾ ਧੂਮਦਬ੍ਭਿਪੂਜਾਦਿਕੇ ਉਪਕਰਣੇ ਉਪਨੇਤ੍ਵਾ ਅਗ੍ਗਿਹੁਤਂ ਜੁਹਨ੍ਤਿ ਅਗ੍ਗਿਹੁਤਂ ਪਰਿਚਰਨ੍ਤਿ. ਇਮਿਨਾ ਸੁਦ੍ਧੀਤਿ ਇਮਿਨਾ ਗਯਾਯਂ ਉਮ੍ਮੁਜ੍ਜਨਾਦਿਨਾ ਅਗ੍ਗਿਪਰਿਚਰਣੇਨ ਚ ਪਾਪਮਲਤੋ ਸੁਦ੍ਧਿ ਪਾਪਪਵਾਹਨਾ ਸਂਸਾਰਸੁਦ੍ਧਿ ਏਵ ਵਾ ਹੋਤੀਤਿ ਏਵਂਦਿਟ੍ਠਿਕਾ ਹੁਤ੍ਵਾਤਿ ਅਤ੍ਥੋ.

ਉਮ੍ਮੁਜ੍ਜਨਾਦਿ ਚੇਤ੍ਥ ਨਿਦਸ੍ਸਨਮਤ੍ਤਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤੇਸੁ ਹਿ ਕੇਚਿ ਉਦਕਵਾਸਂ ਵਸਨ੍ਤਿ, ਕੇਚਿ ਉਦਕਸ੍ਸਞ੍ਜਲਿਂ ਦੇਨ੍ਤਿ, ਕੇਚਿ ਤਸ੍ਮਿਂ ਉਦਕੇ ਠਤ੍ਵਾ ਚਨ੍ਦਿਮਸੂਰਿਯੇ ਅਨੁਪਰਿਵਤ੍ਤਨ੍ਤਿ, ਕੇਚਿ ਅਨੇਕਸਹਸ੍ਸਵਾਰਂ ਸਾਵਿਤ੍ਤਿਆਦਿਕੇ ਜਪਨ੍ਤਿ, ਕੇਚਿ ‘‘ਇਨ੍ਦ ਆਗਚ੍ਛਾ’’ਤਿਆਦਿਨਾ ਵਿਜ੍ਜਾਜਪਂ ਅਵ੍ਹਾਯਨ੍ਤਿ, ਕੇਚਿ ਮਹਤੁਪਟ੍ਠਾਨਂ ਕਰੋਨ੍ਤਿ, ਏਵਞ੍ਚ ਕਰੋਨ੍ਤਾ ਕੇਚਿ ਓਤਰਨ੍ਤਿ, ਕੇਚਿ ਉਤ੍ਤਰਨ੍ਤਿ ਕੇਚਿ ਉਤ੍ਤਰਿਤ੍ਵਾ ਸੁਦ੍ਧਿਕਆਚਮਨਂ ਕਰੋਨ੍ਤਿ, ਕੇਚਿ ਅਨ੍ਤੋਉਦਕੇ ਠਿਤਾ ਤਨ੍ਤੀ ਵਾਦੇਨ੍ਤਿ, ਵੀਣਂ ਵਾਦੇਨ੍ਤੀਤਿ ਏਵਮਾਦਿਕਾ ਨਾਨਪ੍ਪਕਾਰਕਿਰਿਯਾ ਦਸ੍ਸੇਨ੍ਤਿ. ਯਸ੍ਮਾ ਵਾ ਤੇ ਏਵਰੂਪਾ ਵਿਕਾਰਕਿਰਿਯਾ ਕਰੋਨ੍ਤਾਪਿ ਤਸ੍ਮਿਂ ਉਦਕੇ ਨਿਮੁਜ੍ਜਨਉਮ੍ਮੁਜ੍ਜਨਪੁਬ੍ਬਕਮੇਵ ਕਰੋਨ੍ਤਿ, ਤਸ੍ਮਾ ਤਂ ਸਬ੍ਬਂ ਨਿਮੁਜ੍ਜਨੁਮ੍ਮੁਜ੍ਜਨਨ੍ਤੋਗਧਮੇਵ ਕਤ੍ਵਾ ‘‘ਉਮ੍ਮੁਜ੍ਜਨ੍ਤੀ’’ਤਿਪਿਆਦਿ ਵੁਤ੍ਤਂ. ਏਵਂ ਤਤ੍ਥ ਆਕੁਲਬ੍ਯਾਕੁਲੇ ਵਤ੍ਤਮਾਨੇ ਉਪਰਿਪਬ੍ਬਤੇ ਠਿਤੋ ਭਗਵਾ ਤੇਸਂ ਤਂ ਕੋਲਾਹਲਂ ਸੁਤ੍ਵਾ ‘‘ਕਿਨ੍ਨੁ ਖੋ ਏਤ’’ਨ੍ਤਿ ਓਲੋਕੇਨ੍ਤੋ ਤਂ ਕਿਰਿਯਵਿਕਾਰਂ ਅਦ੍ਦਸ, ਤਂ ਸਨ੍ਧਾਯ ਵੁਤ੍ਤਂ – ‘‘ਅਦ੍ਦਸਾ ਖੋ ਭਗਵਾ…ਪੇ… ਇਮਿਨਾ ਸੁਦ੍ਧੀ’’ਤਿ, ਤਂ ਵੁਤ੍ਤਤ੍ਥਮੇਵ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਅਤ੍ਥਂ ਉਦਕੋਰੋਹਨਾਦਿਅਸੁਦ੍ਧਿਮਗ੍ਗੇ ਤੇਸਂ ਸੁਦ੍ਧਿਮਗ੍ਗਪਰਾਮਸਨਂ ਸਚ੍ਚਾਦਿਕੇ ਚ ਸੁਦ੍ਧਿਮਗ੍ਗੇ ਅਤ੍ਤਨੋ ਅਵਿਪਰੀਤਾਵਬੋਧਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਉਦਕਸੁਦ੍ਧਿਯਾ ਅਸੁਦ੍ਧਿਮਗ੍ਗਭਾਵਦੀਪਕਂ ਸਚ੍ਚਾਦਿਧਮ੍ਮਾਨਞ੍ਚ ਯਾਥਾਵਤੋ ਸੁਦ੍ਧਿਮਗ੍ਗਭਾਵਦੀਪਕਂ ਉਦਾਨਂ ਉਦਾਨੇਸਿ.

ਤਤ੍ਥ ਨ ਉਦਕੇਨ ਸੁਚੀ ਹੋਤੀਤਿ ਏਤ੍ਥ ਉਦਕੇਨਾਤਿ ਉਦਕੁਮ੍ਮੁਜ੍ਜਨਾਦਿਨਾ. ਉਦਕੁਮ੍ਮੁਜ੍ਜਨਾਦਿ ਹਿ ਇਧ ਉਤ੍ਤਰਪਦਲੋਪੇਨ ‘‘ਉਦਕ’’ਨ੍ਤਿ ਵੁਤ੍ਤਂ ਯਥਾ ਰੂਪਭਵੋ ਰੂਪਨ੍ਤਿ. ਅਥ ਵਾ ਉਦਕੇਨਾਤਿ ਉਮ੍ਮੁਜ੍ਜਨਾਦਿਕਿਰਿਯਾਯ ਸਾਧਨਭੂਤੇਨ ਉਦਕੇਨ ਸੁਚਿ ਸਤ੍ਤਸ੍ਸ ਸੁਦ੍ਧਿ ਨਾਮ ਨ ਹੋਤਿ, ਨਤ੍ਥੀਤਿ ਅਤ੍ਥੋ. ਅਥ ਵਾ ਸੁਚੀਤਿ ਤੇਨ ਯਥਾਵੁਤ੍ਤੇਨ ਉਦਕੇਨ ਸੁਚਿ ਪਾਪਮਲਤੋ ਸੁਦ੍ਧੋ ਨਾਮ ਸਤ੍ਤੋ ਨ ਹੋਤਿ. ਕਸ੍ਮਾ? ਬਹ੍ਵੇਤ੍ਥ ਨ੍ਹਾਯਤੀ ਜਨੋ. ਯਦਿ ਹਿ ਉਦਕੋਰੋਹਨਾਦਿਨਾ ਯਥਾਵੁਤ੍ਤੇਨ ਪਾਪਸੁਦ੍ਧਿ ਨਾਮ ਸਿਯਾ, ਬਹੁ ਏਤ੍ਥ ਉਦਕੇ ਜਨੋ ਨ੍ਹਾਯਤਿ, ਮਾਤੁਘਾਤਾਦਿਪਾਪਕਮ੍ਮਕਾਰੀ ਅਞ੍ਞੋ ਚ ਗੋਮਹਿਂਸਾਦਿਕੋ ਅਨ੍ਤਮਸੋ ਮਚ੍ਛਕਚ੍ਛਪੇ ਉਪਾਦਾਯ, ਤਸ੍ਸ ਸਬ੍ਬਸ੍ਸਾਪਿ ਪਾਪਸੁਦ੍ਧਿ ਸਿਯਾ, ਨ ਪਨੇਵਂ ਹੋਤਿ. ਕਸ੍ਮਾ? ਨ੍ਹਾਨਸ੍ਸ ਪਾਪਹੇਤੂਨਂ ਅਪ੍ਪਟਿਪਕ੍ਖਭਾਵਤੋ. ਯਞ੍ਹਿ ਯਂ ਵਿਨਾਸੇਤਿ, ਸੋ ਤਸ੍ਸ ਪਟਿਪਕ੍ਖੋ ਯਥਾ ਆਲੋਕੋ ਅਨ੍ਧਕਾਰਸ੍ਸ, ਵਿਜ੍ਜਾ ਚ ਅਵਿਜ੍ਜਾਯ, ਨ ਏਵਂ ਨ੍ਹਾਨਂ ਪਾਪਸ੍ਸ. ਤਸ੍ਮਾ ਨਿਟ੍ਠਮੇਤ੍ਥ ਗਨ੍ਤਬ੍ਬਂ ‘‘ਨ ਉਦਕੇਨ ਸੁਚਿ ਹੋਤੀ’’ਤਿ.

ਯੇਨ ਪਨ ਸੁਚਿ ਹੋਤਿ, ਤਂ ਦਸ੍ਸੇਤੁਂ ‘‘ਯਮ੍ਹਿ ਸਚ੍ਚਞ੍ਚਾ’’ਤਿਆਦਿਮਾਹ. ਤਤ੍ਥ ਯਮ੍ਹੀਤਿ ਯਸ੍ਮਿਂ ਪੁਗ੍ਗਲੇ. ਸਚ੍ਚਨ੍ਤਿ ਵਚੀਸਚ੍ਚਞ੍ਚੇਵ ਵਿਰਤਿਸਚ੍ਚਞ੍ਚ. ਅਥ ਵਾ ਸਚ੍ਚਨ੍ਤਿ ਞਾਣਸਚ੍ਚਞ੍ਚੇਵ ਪਰਮਤ੍ਥਸਚ੍ਚਞ੍ਚ. ਧਮ੍ਮੋਤਿ ਅਰਿਯਮਗ੍ਗਧਮ੍ਮੋ, ਫਲਧਮ੍ਮੋ ਚ, ਸੋ ਸਬ੍ਬੋਪਿ ਯਸ੍ਮਿਂ ਪੁਗ੍ਗਲੇ ਉਪਲਬ੍ਭਤਿ, ਸੋ ਸੁਚੀ ਸੋ ਚ ਬ੍ਰਾਹ੍ਮਣੋਤਿ ਸੋ ਅਰਿਯਪੁਗ੍ਗਲੋ ਵਿਸੇਸਤੋ ਖੀਣਾਸਵੋ ਅਚ੍ਚਨ੍ਤਸੁਦ੍ਧਿਯਾ ਸੁਚਿ ਚ ਬ੍ਰਾਹ੍ਮਣੋ ਚਾਤਿ. ਕਸ੍ਮਾ ਪਨੇਤ੍ਥ ਸਚ੍ਚਂ ਧਮ੍ਮਤੋ ਵਿਸੁਂ ਕਤ੍ਵਾ ਗਹਿਤਂ? ਸਚ੍ਚਸ੍ਸ ਬਹੂਪਕਾਰਤ੍ਤਾ. ਤਥਾ ਹਿ ‘‘ਸਚ੍ਚਂ ਵੇ ਅਮਤਾ ਵਾਚਾ (ਸੁ. ਨਿ. ੪੫੫), ਸਚ੍ਚਂ ਹਵੇ ਸਾਦੁਤਰਂ ਰਸਾਨਂ (ਸਂ. ਨਿ. ੧.੨੪੬; ਸੁ. ਨਿ. ੧੮੪), ਸਚ੍ਚੇ ਅਤ੍ਥੇ ਚ ਧਮ੍ਮੇ ਚ, ਆਹੁ ਸਨ੍ਤੋ ਪਤਿਟ੍ਠਿਤਾ (ਸੁ. ਨਿ. ੪੫੫), ਸਚ੍ਚੇ ਠਿਤਾ ਸਮਣਬ੍ਰਾਹ੍ਮਣਾ ਚਾ’’ਤਿਆਦਿਨਾ (ਜਾ. ੨.੨੧.੪੩੩) ਅਨੇਕੇਸੁ ਸੁਤ੍ਤਪਦੇਸੁ ਸਚ੍ਚਗੁਣਾ ਪਕਾਸਿਤਾ. ਸਚ੍ਚਵਿਪਰਿਯਸ੍ਸ ਚ ‘‘ਏਕਂ ਧਮ੍ਮਂ ਅਤੀਤਸ੍ਸ, ਮੁਸਾਵਾਦਿਸ੍ਸ ਜਨ੍ਤੁਨੋ (ਧ. ਪ. ੧੭੬), ਅਭੂਤਵਾਦੀ ਨਿਰਯਂ ਉਪੇਤੀ’’ਤਿ (ਧ. ਪ. ੩੦੬) ਚ ਆਦਿਨਾ ਪਕਾਸਿਤਾਤਿ.

ਨਵਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.