੮. ਸਙ੍ਗਾਮਜਿਸੁਤ੍ਤਵਣ੍ਣਨਾ

੮. ਅਟ੍ਠਮੇ ਸਙ੍ਗਾਮਜੀਤਿ ਏਵਂਨਾਮੋ. ਅਯਞ੍ਹਿ ਆਯਸ੍ਮਾ ਸਾਵਤ੍ਥਿਯਂ ਅਞ੍ਞਤਰਸ੍ਸ ਮਹਾਵਿਭਵਸ੍ਸ ਸੇਟ੍ਠਿਨੋ ਪੁਤ੍ਤੋ, ਵਯਪ੍ਪਤ੍ਤਕਾਲੇ ਮਾਤਾਪਿਤੂਹਿ ਪਤਿਰੂਪੇਨ ਦਾਰੇਨ ਨਿਯੋਜੇਤ੍ਵਾ ਸਾਪਤੇਯ੍ਯਂ ਨਿਯ੍ਯਾਤੇਤ੍ਵਾ ਘਰਬਨ੍ਧਨੇਨ ਬਦ੍ਧੋ ਹੋਤਿ. ਸੋ ਏਕਦਿਵਸਂ ਸਾਵਤ੍ਥਿਵਾਸਿਨੋ ਉਪਾਸਕੇ ਪੁਬ੍ਬਣ੍ਹਸਮਯਂ ਦਾਨਂ ਦਤ੍ਵਾ ਸੀਲਂ ਸਮਾਦਿਯਿਤ੍ਵਾ ਸਾਯਨ੍ਹਸਮਯੇ ਸੁਦ੍ਧਵਤ੍ਥੇ ਸੁਦ੍ਧੁਤ੍ਤਰਾਸਙ੍ਗੇ ਗਨ੍ਧਮਾਲਾਦਿਹਤ੍ਥੇ ਧਮ੍ਮਸ੍ਸਵਨਤ੍ਥਂ ਜੇਤਵਨਾਭਿਮੁਖੇ ਗਚ੍ਛਨ੍ਤੇ ਦਿਸ੍ਵਾ ‘‘ਕਤ੍ਥ ਤੁਮ੍ਹੇ ਗਚ੍ਛਥਾ’’ਤਿ ਪੁਚ੍ਛਿਤ੍ਵਾ ‘‘ਧਮ੍ਮਸ੍ਸਵਨਤ੍ਥਂ ਜੇਤਵਨੇ ਸਤ੍ਥੁ ਸਨ੍ਤਿਕ’’ਨ੍ਤਿ ਵੁਤ੍ਤੇ ‘‘ਤੇਨ ਹਿ ਅਹਮ੍ਪਿ ਗਮਿਸ੍ਸਾਮੀ’’ਤਿ ਤੇਹਿ ਸਦ੍ਧਿਂ ਜੇਤਵਨਂ ਅਗਮਾਸਿ. ਤੇਨ ਚ ਸਮਯੇਨ ਭਗਵਾ ਕਞ੍ਚਨਗੁਹਾਯਂ ਸੀਹਨਾਦਂ ਨਦਨ੍ਤੋ ਕੇਸਰਸੀਹੋ ਵਿਯ ਸਦ੍ਧਮ੍ਮਮਣ੍ਡਪੇ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸੀਦਿਤ੍ਵਾ ਚਤੁਪਰਿਸਮਜ੍ਝੇ ਧਮ੍ਮਂ ਦੇਸੇਤਿ.

ਅਥ ਖੋ ਤੇ ਉਪਾਸਕਾ ਭਗਵਨ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ, ਸਙ੍ਗਾਮਜਿਪਿ ਕੁਲਪੁਤ੍ਤੋ ਤਸ੍ਸਾ ਪਰਿਸਾਯ ਪਰਿਯਨ੍ਤੇ ਧਮ੍ਮਂ ਸੁਣਨ੍ਤੋ ਨਿਸੀਦਿ. ਭਗਵਾ ਅਨੁਪੁਬ੍ਬਿਕਥਂ ਕਥੇਤ੍ਵਾ ਚਤ੍ਤਾਰਿ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਅਨੇਕੇਸਂ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਸਙ੍ਗਾਮਜਿਪਿ ਕੁਲਪੁਤ੍ਤੋ ਸੋਤਾਪਤ੍ਤਿਫਲਂ ਪਤ੍ਵਾ ਪਰਿਸਾਯ ਵੁਟ੍ਠਿਤਾਯ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਪਬ੍ਬਜ੍ਜਂ ਯਾਚਿ ‘‘ਪਬ੍ਬਾਜੇਥ ਮਂ ਭਗਵਾ’’ਤਿ. ‘‘ਅਨੁਞ੍ਞਾਤੋਸਿ ਪਨ ਤ੍ਵਂ ਮਾਤਾਪਿਤੂਹਿ ਪਬ੍ਬਜ੍ਜਾਯਾ’’ਤਿ? ‘‘ਨਾਹਂ, ਭਨ੍ਤੇ, ਅਨੁਞ੍ਞਾਤੋ’’ਤਿ. ‘‘ਨ ਖੋ, ਸਙ੍ਗਾਮਜਿ, ਤਥਾਗਤਾ ਮਾਤਾਪਿਤੂਹਿ ਅਨਨੁਞ੍ਞਾਤਂ ਪੁਤ੍ਤਂ ਪਬ੍ਬਾਜੇਨ੍ਤੀ’’ਤਿ. ‘‘ਸੋਹਂ, ਭਨ੍ਤੇ, ਤਥਾ ਕਰਿਸ੍ਸਾਮਿ, ਯਥਾ ਮਂ ਮਾਤਾਪਿਤਰੋ ਪਬ੍ਬਜਿਤੁਂ ਅਨੁਜਾਨਨ੍ਤੀ’’ਤਿ. ਸੋ ਭਗਵਨ੍ਤਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਮਾਤਾਪਿਤਰੋ ਉਪਸਙ੍ਕਮਿਤ੍ਵਾ, ‘‘ਅਮ੍ਮਤਾਤਾ, ਅਨੁਜਾਨਾਥ ਮਂ ਪਬ੍ਬਜਿਤੁ’’ਨ੍ਤਿ ਆਹ. ਤਤੋ ਪਰਂ ਰਟ੍ਠਪਾਲਸੁਤ੍ਤੇ (ਮ. ਨਿ. ੨.੨੯੩ ਆਦਯੋ) ਆਗਤਨਯੇਨ ਵੇਦਿਤਬ੍ਬਂ.

ਅਥ ਸੋ ‘‘ਪਬ੍ਬਜਿਤ੍ਵਾ ਅਤ੍ਤਾਨਂ ਦਸ੍ਸੇਸ੍ਸਾਮੀ’’ਤਿ ਪਟਿਞ੍ਞਂ ਦਤ੍ਵਾ ਅਨੁਞ੍ਞਾਤੋ ਮਾਤਾਪਿਤੂਹਿ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਅਲਤ੍ਥ ਖੋ ਚ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ ਉਪਸਮ੍ਪਦਞ੍ਚ, ਅਚਿਰੂਪਸਮ੍ਪਨ੍ਨੋ ਚ ਪਨ ਸੋ ਉਪਰਿਮਗ੍ਗਤ੍ਥਾਯ ਘਟੇਨ੍ਤੋ ਵਾਯਮਨ੍ਤੋ ਅਞ੍ਞਤਰਸ੍ਮਿਂ ਅਰਞ੍ਞਾਵਾਸੇ ਵਸ੍ਸਂ ਵਸਿਤ੍ਵਾ ਛਲ਼ਭਿਞ੍ਞੋ ਹੁਤ੍ਵਾ ਵੁਤ੍ਥਵਸ੍ਸੋ ਭਗਵਨ੍ਤਂ ਦਸ੍ਸਨਾਯ ਮਾਤਾਪਿਤੂਨਞ੍ਚ ਪਟਿਸ੍ਸਵਮੋਚਨਤ੍ਥਂ ਸਾਵਤ੍ਥਿਂ ਅਗਮਾਸਿ. ਤੇਨ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਸਙ੍ਗਾਮਜਿ ਸਾਵਤ੍ਥਿਂ ਅਨੁਪ੍ਪਤ੍ਤੋ ਹੋਤੀ’’ਤਿ.

ਸੋ ਹਾਯਸ੍ਮਾ ਧੁਰਗਾਮੇ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਜੇਤਵਨਂ ਪਵਿਸਿਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਕਤਪਟਿਸਨ੍ਥਾਰੋ ਅਞ੍ਞਂ ਬ੍ਯਾਕਰਿਤ੍ਵਾ ਪੁਨ ਭਗਵਨ੍ਤਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਨਿਕ੍ਖਮਿਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਦਿਵਾਵਿਹਾਰਂ ਨਿਸੀਦਿ. ਅਥਸ੍ਸ ਮਾਤਾਪਿਤਰੋ ਞਾਤਿਮਿਤ੍ਤਾ ਚਸ੍ਸ ਆਗਮਨਂ ਸੁਤ੍ਵਾ, ‘‘ਸਙ੍ਗਾਮਜਿ, ਕਿਰ ਇਧਾਗਤੋ’’ਤਿ ਹਟ੍ਠਤੁਟ੍ਠਾ ਤੁਰਿਤਤੁਰਿਤਾ ਵਿਹਾਰਂ ਗਨ੍ਤ੍ਵਾ ਪਰਿਯੇਸਨ੍ਤਾ ਨਂ ਤਤ੍ਥ ਨਿਸਿਨ੍ਨਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ‘‘ਮਾ ਅਪੁਤ੍ਤਕਂ ਸਾਪਤੇਯ੍ਯਂ ਰਾਜਾਨੋ ਹਰੇਯ੍ਯੁਂ, ਅਪ੍ਪਿਯਾ ਦਾਯਾਦਾ ਵਾ ਗਣ੍ਹੇਯ੍ਯੁਂ, ਨਾਲਂ ਪਬ੍ਬਜ੍ਜਾਯ, ਏਹਿ, ਤਾਤ, ਵਿਬ੍ਭਮਾ’’ਤਿ ਯਾਚਿਂਸੁ. ਤਂ ਸੁਤ੍ਵਾ ਥੇਰੋ ‘‘ਇਮੇ ਮਯ੍ਹਂ ਕਾਮੇਹਿ ਅਨਤ੍ਥਿਕਭਾਵਂ ਨ ਜਾਨਨ੍ਤਿ, ਗੂਥਧਾਰੀ ਵਿਯ ਗੂਥਪਿਣ੍ਡੇ ਕਾਮੇਸੁਯੇਵ ਅਲ੍ਲੀਯਨਂ ਇਚ੍ਛਨ੍ਤਿ, ਨਯਿਮੇ ਸਕ੍ਕਾ ਧਮ੍ਮਕਥਾਯ ਸਞ੍ਞਾਪੇਤੁ’’ਨ੍ਤਿ ਅਸ੍ਸੁਣਨ੍ਤੋ ਵਿਯ ਨਿਸੀਦਿ. ਤੇ ਨਾਨਪ੍ਪਕਾਰਂ ਯਾਚਿਤ੍ਵਾ ਅਤ੍ਤਨੋ ਵਚਨਂ ਅਗ੍ਗਣ੍ਹਨ੍ਤਂ ਦਿਸ੍ਵਾ ਘਰਂ ਪਵਿਸਿਤ੍ਵਾ ਪੁਤ੍ਤੇਨ ਸਦ੍ਧਿਂ ਤਸ੍ਸ ਭਰਿਯਂ ਸਪਰਿਵਾਰਂ ਉਯ੍ਯੋਜੇਸੁਂ ‘‘ਮਯਂ ਨਾਨਪ੍ਪਕਾਰਂ ਤਂ ਯਾਚਨ੍ਤਾਪਿ ਤਸ੍ਸ ਮਨਂ ਅਲਭਿਤ੍ਵਾ ਆਗਤਾ, ਗਚ੍ਛ ਤ੍ਵਂ, ਭਦ੍ਦੇ, ਤਵ ਭਤ੍ਤਾਰਂ ਪੁਤ੍ਤਸਨ੍ਦਸ੍ਸਨੇਨ ਯਾਚਿਤ੍ਵਾ ਸਞ੍ਞਾਪੇਹੀ’’ਤਿ. ਤਾਯ ਕਿਰ ਆਪਨ੍ਨਸਤ੍ਤਾਯ ਅਯਮਾਯਸ੍ਮਾ ਪਬ੍ਬਜਿਤੋ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਦਾਰਕਮਾਦਾਯ ਮਹਤਾ ਪਰਿਵਾਰੇਨ ਜੇਤਵਨਂ ਅਗਮਾਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਅਸ੍ਸੋਸਿ ਖੋ ਆਯਸ੍ਮਤੋ ਸਙ੍ਗਾਮਜਿਸ੍ਸਾ’’ਤਿਆਦਿ.

ਤਤ੍ਥ ਪੁਰਾਣਦੁਤਿਯਿਕਾਤਿ ਪੁਬ੍ਬੇ ਗਿਹਿਕਾਲੇ ਪਾਦਪਰਿਚਰਣਵਸੇਨ ਦੁਤਿਯਿਕਾ, ਭਰਿਯਾਤਿ ਅਤ੍ਥੋ. ਅਯ੍ਯੋਤਿ ‘‘ਅਯ੍ਯਪੁਤ੍ਤੋ’’ਤਿ ਵਤ੍ਤਬ੍ਬੇ ਪਬ੍ਬਜਿਤਾਨਂ ਅਨੁਚ੍ਛਵਿਕਵੋਹਾਰੇਨ ਵਦਤਿ. ਕਿਰਾਤਿ ਅਨੁਸ੍ਸਵਨਤ੍ਥੇ ਨਿਪਾਤੋ, ਤਸ੍ਸ ਅਨੁਪ੍ਪਤ੍ਤੋ ਕਿਰਾਤਿ ਸਮ੍ਬਨ੍ਧੋ ਵੇਦਿਤਬ੍ਬੋ. ਖੁਦ੍ਦਪੁਤ੍ਤਞ੍ਹਿ ਸਮਣ, ਪੋਸ ਮਨ੍ਤਿ ਆਪਨ੍ਨਸਤ੍ਤਮੇਵ ਮਂ ਛਡ੍ਡੇਤ੍ਵਾ ਪਬ੍ਬਜਿਤੋ, ਸਾਹਂ ਏਤਰਹਿ ਖੁਦ੍ਦਪੁਤ੍ਤਾ, ਤਾਦਿਸਂ ਮਂ ਛਡ੍ਡੇਤ੍ਵਾਵ ਤਵ ਸਮਣਧਮ੍ਮਕਰਣਂ ਅਯੁਤ੍ਤਂ, ਤਸ੍ਮਾ, ਸਮਣ, ਪੁਤ੍ਤਦੁਤਿਯਂ ਮਂ ਘਾਸਚ੍ਛਾਦਨਾਦੀਹਿ ਭਰਸ੍ਸੂਤਿ. ਆਯਸ੍ਮਾ ਪਨ, ਸਙ੍ਗਾਮਜਿ, ਇਨ੍ਦ੍ਰਿਯਾਨਿ ਉਕ੍ਖਿਪਿਤ੍ਵਾ ਤਂ ਨੇਵ ਓਲੋਕੇਤਿ, ਨਾਪਿ ਆਲਪਤਿ. ਤੇਨ ਵੁਤ੍ਤਂ – ‘‘ਏਵਂ ਵੁਤ੍ਤੇ ਆਯਸ੍ਮਾ ਸਙ੍ਗਾਮਜਿ ਤੁਣ੍ਹੀ ਅਹੋਸੀ’’ਤਿ.

ਸਾ ਤਿਕ੍ਖਤ੍ਤੁਂ ਤਥੇਵ ਵਤ੍ਵਾ ਤੁਣ੍ਹੀਭੂਤਮੇਵ ਤਂ ਦਿਸ੍ਵਾ ‘‘ਪੁਰਿਸਾ ਨਾਮ ਭਰਿਯਾਸੁ ਨਿਰਪੇਕ੍ਖਾਪਿ ਪੁਤ੍ਤੇਸੁ ਸਾਪੇਕ੍ਖਾ ਹੋਨ੍ਤਿ, ਪੁਤ੍ਤਸਿਨੇਹੋ ਪਿਤੁ ਅਟ੍ਠਿਮਿਞ੍ਜਂ ਆਹਚ੍ਚ ਤਿਟ੍ਠਤਿ, ਤਸ੍ਮਾ ਪੁਤ੍ਤਪੇਮੇਨਾਪਿ ਮਯ੍ਹਂ ਵਸੇ ਵਤ੍ਤੇਯ੍ਯਾ’’ਤਿ ਮਞ੍ਞਮਾਨਾ ਪੁਤ੍ਤਂ ਥੇਰਸ੍ਸ ਅਙ੍ਕੇ ਨਿਕ੍ਖਿਪਿਤ੍ਵਾ ਏਕਮਨ੍ਤਂ ਅਪਕ੍ਕਮ੍ਮ ‘‘ਏਸੋ ਤੇ, ਸਮਣ, ਪੁਤ੍ਤੋ, ਪੋਸ ਨ’’ਨ੍ਤਿ ਵਤ੍ਵਾ ਥੋਕਂ ਅਗਮਾਸਿ. ਸਾ ਕਿਰ ਸਮਣਤੇਜੇਨਸ੍ਸ ਸਮ੍ਮੁਖੇ ਠਾਤੁਂ ਨਾਸਕ੍ਖਿ. ਥੇਰੋ ਦਾਰਕਮ੍ਪਿ ਨੇਵ ਓਲੋਕੇਤਿ ਨਾਪਿ ਆਲਪਤਿ. ਅਥ ਸਾ ਇਤ੍ਥੀ ਅਵਿਦੂਰੇ ਠਤ੍ਵਾ ਮੁਖਂ ਪਰਿਵਤ੍ਤੇਤ੍ਵਾ ਓਲੋਕੇਨ੍ਤੀ ਥੇਰਸ੍ਸ ਆਕਾਰਂ ਞਤ੍ਵਾ ਪਟਿਨਿਵਤ੍ਤਿਤ੍ਵਾ ‘‘ਪੁਤ੍ਤੇਨਪਿ ਅਯਂ ਸਮਣੋ ਅਨਤ੍ਥਿਕੋ’’ਤਿ ਦਾਰਕਂ ਗਹੇਤ੍ਵਾ ਪਕ੍ਕਾਮਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਤੋ ਸਙ੍ਗਾਮਜਿਸ੍ਸ ਪੁਰਾਣਦੁਤਿਯਿਕਾ’’ਤਿਆਦਿ.

ਤਤ੍ਥ ਪੁਤ੍ਤੇਨਪੀਤਿ ਅਯਂ ਸਮਣੋ ਅਤ੍ਤਨੋ ਓਰਸਪੁਤ੍ਤੇਨਪਿ ਅਨਤ੍ਥਿਕੋ, ਪਗੇਵ ਅਞ੍ਞੇਹੀਤਿ ਅਧਿਪ੍ਪਾਯੋ. ਦਿਬ੍ਬੇਨਾਤਿ ਏਤ੍ਥ ਦਿਬ੍ਬਸਦਿਸਤ੍ਤਾ ਦਿਬ੍ਬਂ. ਦੇਵਤਾਨਞ੍ਹਿ ਸੁਚਰਿਤਕਮ੍ਮਨਿਬ੍ਬਤ੍ਤਂ ਪਿਤ੍ਤਸੇਮ੍ਹਰੁਹਿਰਾਦੀਹਿ ਅਪਲਿਬੁਦ੍ਧਂ ਦੂਰੇਪਿ ਆਰਮ੍ਮਣਸਮ੍ਪਟਿਚ੍ਛਨਸਮਤ੍ਥਂ ਦਿਬ੍ਬਂ ਪਸਾਦਚਕ੍ਖੁ ਹੋਤਿ. ਇਦਮ੍ਪਿ ਚਤੁਤ੍ਥਜ੍ਝਾਨਸਮਾਧਿਨਿਬ੍ਬਤ੍ਤਂ ਅਭਿਞ੍ਞਾਚਕ੍ਖੁਂ ਤਾਦਿਸਨ੍ਤਿ ਦਿਬ੍ਬਂ ਵਿਯਾਤਿ ਦਿਬ੍ਬਂ, ਦਿਬ੍ਬਵਿਹਾਰਸਨ੍ਨਿਸ੍ਸਯੇਨ ਲਦ੍ਧਤ੍ਤਾ ਵਾ ਦਿਬ੍ਬਂ, ਮਹਾਜੁਤਿਕਤ੍ਤਾ ਮਹਾਗਤਿਕਤ੍ਤਾ ਵਾ ਦਿਬ੍ਬਂ, ਤੇਨ ਦਿਬ੍ਬੇਨ. ਵਿਸੁਦ੍ਧੇਨਾਤਿ ਨੀਵਰਣਾਦਿਸਂਕਿਲੇਸਵਿਗਮੇਨ ਸੁਪਰਿਸੁਦ੍ਧੇਨ. ਅਤਿਕ੍ਕਨ੍ਤਮਾਨੁਸਕੇਨਾਤਿ ਮਨੁਸ੍ਸਾਨਂ ਵਿਸਯਾਤੀਤੇਨ. ਇਮਂ ਏਵਰੂਪਂ ਵਿਪ੍ਪਕਾਰਨ੍ਤਿ ਇਮਂ ਏਵਂ ਵਿਪ੍ਪਕਾਰਂ ਯਥਾਵੁਤ੍ਤਂ ਪਬ੍ਬਜਿਤੇਸੁ ਅਸਾਰੁਪ੍ਪਂ ਅਙ੍ਕੇ ਪੁਤ੍ਤਟ੍ਠਪਨਸਙ੍ਖਾਤਂ ਵਿਰੂਪਕਿਰਿਯਂ.

ਏਤਮਤ੍ਥਨ੍ਤਿ ਏਤਂ ਆਯਸ੍ਮਤੋ ਸਙ੍ਗਾਮਜਿਸ੍ਸ ਪੁਤ੍ਤਦਾਰਾਦੀਸੁ ਸਬ੍ਬਤ੍ਥ ਨਿਰਪੇਕ੍ਖਭਾਵਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਤਸ੍ਸ ਇਟ੍ਠਾਨਿਟ੍ਠਾਦੀਸੁ ਤਾਦਿਭਾਵਦੀਪਕਂ ਉਦਾਨਂ ਉਦਾਨੇਸਿ.

ਤਤ੍ਥ ਆਯਨ੍ਤਿਨ੍ਤਿ ਆਗਚ੍ਛਨ੍ਤਿਂ, ਪੁਰਾਣਦੁਤਿਯਿਕਨ੍ਤਿ ਅਧਿਪ੍ਪਾਯੋ. ਨਾਭਿਨਨ੍ਦਤੀਤਿ ਦਟ੍ਠੁਂ ਮਂ ਆਗਤਾਤਿ ਨ ਨਨ੍ਦਤਿ ਨ ਤੁਸ੍ਸਤਿ. ਪਕ੍ਕਮਨ੍ਤਿਨ੍ਤਿ ਸਾ ਅਯਂ ਮਯਾ ਅਸਮ੍ਮੋਦਿਤਾਵ ਗਚ੍ਛਤੀਤਿ ਗਚ੍ਛਨ੍ਤਿਂ. ਨ ਸੋਚਤੀਤਿ ਨ ਚਿਤ੍ਤਸਨ੍ਤਾਪਮਾਪਜ੍ਜਤਿ. ਯੇਨ ਪਨ ਕਾਰਣੇਨ ਥੇਰੋ ਏਵਂ ਨਾਭਿਨਨ੍ਦਤਿ ਨ ਸੋਚਤਿ, ਤਂ ਦਸ੍ਸੇਤੁਂ ‘‘ਸਙ੍ਗਾ ਸਙ੍ਗਾਮਜਿਂ ਮੁਤ੍ਤ’’ਨ੍ਤਿ ਵੁਤ੍ਤਂ. ਤਤ੍ਥ ਸਙ੍ਗਾਤਿ ਰਾਗਸਙ੍ਗੋ ਦੋਸਮੋਹਮਾਨਦਿਟ੍ਠਿਸਙ੍ਗੋਤਿ ਪਞ੍ਚਵਿਧਾਪਿ ਸਙ੍ਗਾ ਸਮੁਚ੍ਛੇਦਪ੍ਪਟਿਪਸ੍ਸਦ੍ਧਿਵਿਮੁਤ੍ਤੀਹਿ ਵਿਮੁਤ੍ਤਂ ਸਙ੍ਗਾਮਜਿਂ ਭਿਕ੍ਖੁਂ. ਤਮਹਂ ਬ੍ਰੂਮਿ ਬ੍ਰਾਹ੍ਮਣਨ੍ਤਿ ਤਂ ਤਾਦਿਭਾਵਪ੍ਪਤ੍ਤਂ ਖੀਣਾਸਵਂ ਅਹਂ ਸਬ੍ਬਸੋ ਬਾਹਿਤਪਾਪਤ੍ਤਾ ਬ੍ਰਾਹ੍ਮਣਨ੍ਤਿ ਵਦਾਮੀਤਿ.

ਅਟ੍ਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.