੬. ਮਹਾਕਸ੍ਸਪਸੁਤ੍ਤਵਣ੍ਣਨਾ

੬. ਛਟ੍ਠੇ ਰਾਜਗਹੇਤਿ ਏਵਂਨਾਮਕੇ ਨਗਰੇ. ਤਞ੍ਹਿ ਮਹਾਮਨ੍ਧਾਤੁਮਹਾਗੋਵਿਨ੍ਦਾਦੀਹਿ ਪਰਿਗ੍ਗਹਿਤਤ੍ਤਾ ‘‘ਰਾਜਗਹ’’ਨ੍ਤਿ ਵੁਚ੍ਚਤਿ. ‘‘ਦੁਰਭਿਭਵਨੀਯਤ੍ਤਾ ਪਟਿਰਾਜੂਨਂ ਗਹਭੂਤਨ੍ਤਿ ਰਾਜਗਹ’’ਨ੍ਤਿਆਦਿਨਾ ਅਞ੍ਞੇਨੇਤ੍ਥ ਪਕਾਰੇਨ ਵਣ੍ਣਯਨ੍ਤਿ. ਕਿਨ੍ਤੇਹਿ? ਨਾਮਮੇਤਂ ਤਸ੍ਸ ਨਗਰਸ੍ਸ. ਤਂ ਪਨੇਤਂ ਬੁਦ੍ਧਕਾਲੇ ਚਕ੍ਕਵਤ੍ਤਿਕਾਲੇ ਚ ਨਗਰਂ ਹੋਤਿ, ਸੇਸਕਾਲੇ ਸੁਞ੍ਞਂ ਯਕ੍ਖਪਰਿਗ੍ਗਹਿਤਂ ਤੇਸਂ ਵਸਨਟ੍ਠਾਨਂ ਹੁਤ੍ਵਾ ਤਿਟ੍ਠਤਿ. ਵੇਲ਼ੁਵਨੇ ਕਲਨ੍ਦਕਨਿਵਾਪੇਤਿ ਵੇਲ਼ੁਵਨਨ੍ਤਿ ਤਸ੍ਸ ਵਿਹਾਰਸ੍ਸ ਨਾਮਂ. ਤਂ ਕਿਰ ਅਟ੍ਠਾਰਸਹਤ੍ਥੁਬ੍ਬੇਧੇਨ ਪਾਕਾਰੇਨ ਪਰਿਕ੍ਖਿਤ੍ਤਂ ਬੁਦ੍ਧਸ੍ਸ ਭਗਵਤੋ ਵਸਨਾਨੁਚ੍ਛਵਿਕਾਯ ਮਹਤਿਯਾ ਗਨ੍ਧਕੁਟਿਯਾ ਅਞ੍ਞੇਹਿ ਚ ਪਾਸਾਦਕੁਟਿਲੇਣਮਣ੍ਡਪਚਙ੍ਕਮਦ੍ਵਾਰਕੋਟ੍ਠਕਾਦੀਹਿ ਪਟਿਮਣ੍ਡਿਤਂ ਬਹਿ ਵੇਲ਼ੂਹਿ ਪਰਿਕ੍ਖਿਤ੍ਤਂ ਅਹੋਸਿ ਨੀਲੋਭਾਸਂ ਮਨੋਰਮਂ, ਤੇਨ ‘‘ਵੇਲ਼ੁਵਨ’’ਨ੍ਤਿ ਵੁਚ੍ਚਤਿ. ਕਲਨ੍ਦਕਾਨਞ੍ਚੇਤ੍ਥ ਨਿਵਾਪਂ ਅਦਂਸੁ, ਤਸ੍ਮਾ ‘‘ਕਲਨ੍ਦਕਨਿਵਾਪੋ’’ਤਿ ਵੁਚ੍ਚਤਿ. ਪੁਬ੍ਬੇ ਕਿਰ ਅਞ੍ਞਤਰੋ ਰਾਜਾ ਤਂ ਉਯ੍ਯਾਨਂ ਕੀਲ਼ਨਤ੍ਥਂ ਪਵਿਟ੍ਠੋ ਸੁਰਾਮਦਮਤ੍ਤੋ ਦਿਵਾਸੇਯ੍ਯਂ ਉਪਗਤੋ ਸੁਪਿ, ਪਰਿਜਨੋਪਿਸ੍ਸ ‘‘ਸੁਤ੍ਤੋ ਰਾਜਾ’’ਤਿ ਪੁਪ੍ਫਫਲਾਦੀਹਿ ਪਲੋਭਿਯਮਾਨੋ ਇਤੋ ਚਿਤੋ ਚ ਪਕ੍ਕਾਮਿ. ਅਥ ਸੁਰਾਗਨ੍ਧੇਨ ਅਞ੍ਞਤਰਸ੍ਮਾ ਰੁਕ੍ਖਸੁਸਿਰਾ ਕਣ੍ਹਸਪ੍ਪੋ ਨਿਕ੍ਖਮਿਤ੍ਵਾ ਰਞ੍ਞੋ ਅਭਿਮੁਖੋ ਆਗਚ੍ਛਤਿ. ਤਂ ਦਿਸ੍ਵਾ ਰੁਕ੍ਖਦੇਵਤਾ ‘‘ਰਞ੍ਞੋ ਜੀਵਿਤਂ ਦਸ੍ਸਾਮੀ’’ਤਿ ਕਲਨ੍ਦਕਵੇਸੇਨ ਗਨ੍ਤ੍ਵਾ ਕਣ੍ਣਮੂਲੇ ਸਦ੍ਦਮਕਾਸਿ. ਰਾਜਾ ਪਟਿਬੁਜ੍ਝਿ, ਕਣ੍ਹਸਪ੍ਪੋ ਨਿਵਤ੍ਤੋ. ਸੋ ਤਂ ਦਿਸ੍ਵਾ ‘‘ਇਮਾਯ ਕਾਲ਼ਕਾਯ ਮਮ ਜੀਵਿਤਂ ਦਿਨ੍ਨ’’ਨ੍ਤਿ ਕਾਲ਼ਕਾਨਂ ਨਿਵਾਪਂ ਤਤ੍ਥ ਪਟ੍ਠਪੇਸਿ, ਅਭਯਘੋਸਞ੍ਚ ਘੋਸਾਪੇਸਿ. ਤਸ੍ਮਾ ਤਤੋ ਪਟ੍ਠਾਯ ਤਂ ‘‘ਕਲਨ੍ਦਕਨਿਵਾਪ’’ਨ੍ਤਿ ਸਙ੍ਖਂ ਗਤਂ. ਕਲਨ੍ਦਕਾਤਿ ਹਿ ਕਾਲ਼ਕਾਨਂ ਨਾਮਂ, ਤਸ੍ਮਿਂ ਵੇਲ਼ੁਵਨੇ ਕਲਨ੍ਦਕਨਿਵਾਪੇ.

ਮਹਾਕਸ੍ਸਪੋਤਿ ਮਹਨ੍ਤੇਹਿ ਸੀਲਕ੍ਖਨ੍ਧਾਦੀਹਿ ਸਮਨ੍ਨਾਗਤਤ੍ਤਾ ਮਹਨ੍ਤੋ ਕਸ੍ਸਪੋਤਿ ਮਹਾਕਸ੍ਸਪੋ, ਅਪਿਚ ਕੁਮਾਰਕਸ੍ਸਪਤ੍ਥੇਰਂ ਉਪਾਦਾਯ ਅਯਂ ਮਹਾਥੇਰੋ ‘‘ਮਹਾਕਸ੍ਸਪੋ’’ਤਿ ਵੁਚ੍ਚਤਿ. ਪਿਪ੍ਪਲਿਗੁਹਾਯਨ੍ਤਿ ਤਸ੍ਸਾ ਕਿਰ ਗੁਹਾਯ ਦ੍ਵਾਰਸਮੀਪੇ ਏਕੋ ਪਿਪ੍ਪਲਿਰੁਕ੍ਖੋ ਅਹੋਸਿ, ਤੇਨ ਸਾ ‘‘ਪਿਪ੍ਪਲਿਗੁਹਾ’’ਤਿ ਪਞ੍ਞਾਯਿਤ੍ਥ. ਤਸ੍ਸਂ ਪਿਪ੍ਪਲਿਗੁਹਾਯਂ. ਆਬਾਧਿਕੋਤਿ ਆਬਾਧੋ ਅਸ੍ਸ ਅਤ੍ਥੀਤਿ ਆਬਾਧਿਕੋ, ਬ੍ਯਾਧਿਕੋਤਿ ਅਤ੍ਥੋ. ਦੁਕ੍ਖਿਤੋਤਿ ਕਾਯਸਨ੍ਨਿਸ੍ਸਿਤਂ ਦੁਕ੍ਖਂ ਸਞ੍ਜਾਤਂ ਅਸ੍ਸਾਤਿ ਦੁਕ੍ਖਿਤੋ, ਦੁਕ੍ਖਪ੍ਪਤ੍ਤੋਤਿ ਅਤ੍ਥੋ. ਬਾਲ਼੍ਹਗਿਲਾਨੋਤਿ ਅਧਿਮਤ੍ਤਗੇਲਞ੍ਞੋ, ਤਂ ਪਨ ਗੇਲਞ੍ਞਂ ਸਤੋ ਸਮ੍ਪਜਾਨੋ ਹੁਤ੍ਵਾ ਅਧਿਵਾਸੇਸਿ. ਅਥਸ੍ਸ ਭਗਵਾ ਤਂ ਪਵਤ੍ਤਿਂ ਞਤ੍ਵਾ ਤਤ੍ਥ ਗਨ੍ਤ੍ਵਾ ਬੋਜ੍ਝਙ੍ਗਪਰਿਤ੍ਤਂ ਅਭਾਸਿ, ਤੇਨੇਵ ਥੇਰਸ੍ਸ ਸੋ ਆਬਾਧੋ ਵੂਪਸਮਿ. ਵੁਤ੍ਤਞ੍ਹੇਤਂ ਬੋਜ੍ਝਙ੍ਗਸਂਯੁਤ੍ਤੇ –

‘‘ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਮਹਾਕਸ੍ਸਪੋ ਪਿਪ੍ਪਲਿਗੁਹਾਯਂ ਵਿਹਰਤਿ ਆਬਾਧਿਕੋ ਦੁਕ੍ਖਿਤੋ ਬਾਲ਼੍ਹਗਿਲਾਨੋ. ਅਥ ਖੋ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨਾਯਸ੍ਮਾ ਮਹਾਕਸ੍ਸਪੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਨਿਸਜ੍ਜ ਖੋ ਭਗਵਾ…ਪੇ… ਏਤਦਵੋਚ – ‘ਕਚ੍ਚਿ ਤੇ, ਕਸ੍ਸਪ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਦੁਕ੍ਖਾ ਵੇਦਨਾ ਪਟਿਕ੍ਕਮਨ੍ਤਿ, ਨੋ ਅਭਿਕ੍ਕਮਨ੍ਤਿ, ਪਟਿਕ੍ਕਮੋਸਾਨਂ ਪਞ੍ਞਾਯਤਿ ਨੋ ਅਭਿਕ੍ਕਮੋ’ਤਿ? ‘ਨ ਮੇ, ਭਨ੍ਤੇ, ਖਮਨੀਯਂ, ਨ ਯਾਪਨੀਯਂ, ਬਾਲ਼੍ਹਾ ਮੇ ਭਨ੍ਤੇ, ਦੁਕ੍ਖਾ ਵੇਦਨਾ ਅਭਿਕ੍ਕਮਨ੍ਤਿ ਨੋ ਪਟਿਕ੍ਕਮਨ੍ਤਿ, ਅਭਿਕ੍ਕਮੋਸਾਨਂ ਪਞ੍ਞਾਯਤਿ ਨੋ ਪਟਿਕ੍ਕਮੋ’ਤਿ.

‘‘‘ਸਤ੍ਤਿਮੇ, ਕਸ੍ਸਪ, ਬੋਜ੍ਝਙ੍ਗਾ ਮਯਾ ਸਮ੍ਮਦਕ੍ਖਾਤਾ ਭਾਵਿਤਾ ਬਹੁਲੀਕਤਾ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਨ੍ਤਿ. ਕਤਮੇ ਸਤ੍ਤ? ਸਤਿਸਮ੍ਬੋਜ੍ਝਙ੍ਗੋ ਖੋ, ਕਸ੍ਸਪ, ਮਯਾ ਸਮ੍ਮਦਕ੍ਖਾਤੋ ਭਾਵਿਤੋ ਬਹੁਲੀਕਤੋ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ…ਪੇ… ਉਪੇਕ੍ਖਾਸਮ੍ਬੋਜ੍ਝਙ੍ਗੋ ਖੋ, ਕਸ੍ਸਪ, ਮਯਾ ਸਮ੍ਮਦਕ੍ਖਾਤੋ ਭਾਵਿਤੋ ਬਹੁਲੀਕਤੋ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ. ਇਮੇ ਖੋ, ਕਸ੍ਸਪ, ਸਤ੍ਤ ਬੋਜ੍ਝਙ੍ਗਾ ਮਯਾ ਸਮ੍ਮਦਕ੍ਖਾਤਾ ਭਾਵਿਤਾ ਬਹੂਲੀਕਤਾ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਨ੍ਤੀ’ਤਿ. ‘ਤਗ੍ਘ ਭਗਵਾ ਬੋਜ੍ਝਙ੍ਗਾ, ਤਗ੍ਘ, ਸੁਗਤ, ਬੋਜ੍ਝਙ੍ਗਾ’’’ਤਿ.

‘‘ਇਦਮਵੋਚ ਭਗਵਾ. ਅਤ੍ਤਮਨੋ ਆਯਸ੍ਮਾ ਮਹਾਕਸ੍ਸਪੋ ਭਗਵਤੋ ਭਾਸਿਤਂ ਅਭਿਨਨ੍ਦਿ. ਵੁਟ੍ਠਹਿ ਚਾਯਸ੍ਮਾ ਮਹਾਕਸ੍ਸਪੋ ਤਮ੍ਹਾ ਆਬਾਧਾ, ਤਥਾ ਪਹੀਨੋ ਚਾਯਸ੍ਮਤੋ ਮਹਾਕਸ੍ਸਪਸ੍ਸ ਸੋ ਆਬਾਧੋ ਅਹੋਸੀ’’ਤਿ.

ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਮਹਾਕਸ੍ਸਪੋ ਅਪਰੇਨ ਸਮਯੇਨ ਤਮ੍ਹਾ ਆਬਾਧਾ ਵੁਟ੍ਠਾਸੀ’’ਤਿ.

ਏਤਦਹੋਸੀਤਿ ਪੁਬ੍ਬੇ ਗੇਲਞ੍ਞਦਿਵਸੇਸੁ ਸਦ੍ਧਿਵਿਹਾਰਿਕੇਹਿ ਉਪਨੀਤਂ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਵਿਹਾਰੇ ਏਵ ਅਹੋਸਿ. ਅਥਸ੍ਸ ਤਮ੍ਹਾ ਆਬਾਧਾ ਵੁਟ੍ਠਿਤਸ੍ਸ ਏਤਂ ‘‘ਯਂਨੂਨਾਹਂ ਰਾਜਗਹਂ ਪਿਣ੍ਡਾਯ ਪਵਿਸੇਯ੍ਯ’’ਨ੍ਤਿ ਪਰਿਵਿਤਕ੍ਕੋ ਅਹੋਸਿ. ਪਞ੍ਚਮਤ੍ਤਾਨਿ ਦੇਵਤਾਸਤਾਨੀਤਿ ਸਕ੍ਕਸ੍ਸ ਦੇਵਰਞ੍ਞੋ ਪਰਿਚਾਰਿਕਾ ਪਞ੍ਚਸਤਾ ਕਕੁਟਪਾਦਿਨਿਯੋ ਅਚ੍ਛਰਾਯੋ. ਉਸ੍ਸੁਕ੍ਕਂ ਆਪਨ੍ਨਾਨਿ ਹੋਨ੍ਤੀਤਿ ਥੇਰਸ੍ਸ ਪਿਣ੍ਡਪਾਤਂ ਦਸ੍ਸਾਮਾਤਿ ਪਞ੍ਚਪਿਣ੍ਡਪਾਤਸਤਾਨਿ ਸਜ੍ਜੇਤ੍ਵਾ ਸੁਵਣ੍ਣਭਾਜਨੇਹਿ ਆਦਾਯ ਅਨ੍ਤਰਾਮਗ੍ਗੇ ਠਤ੍ਵਾ, ‘‘ਭਨ੍ਤੇ, ਇਮਂ ਪਿਣ੍ਡਪਾਤਂ ਗਣ੍ਹਥ, ਸਙ੍ਗਹਂ ਨੋ ਕਰੋਥਾ’’ਤਿ ਵਦਮਾਨਾ ਪਿਣ੍ਡਪਾਤਦਾਨੇ ਯੁਤ੍ਤਪ੍ਪਯੁਤ੍ਤਾਨਿ ਹੋਨ੍ਤਿ. ਤੇਨ ਵੁਤ੍ਤਂ ‘‘ਆਯਸ੍ਮਤੋ ਮਹਾਕਸ੍ਸਪਸ੍ਸ ਪਿਣ੍ਡਪਾਤਪ੍ਪਟਿਲਾਭਾਯਾ’’ਤਿ.

ਸਕ੍ਕੋ ਕਿਰ ਦੇਵਰਾਜਾ ਥੇਰਸ੍ਸ ਚਿਤ੍ਤਪ੍ਪਵਤ੍ਤਿਂ ਞਤ੍ਵਾ ਤਾ ਅਚ੍ਛਰਾਯੋ ਉਯ੍ਯੋਜੇਸਿ ‘‘ਗਚ੍ਛਥ ਤੁਮ੍ਹੇ ਅਯ੍ਯਸ੍ਸ ਮਹਾਕਸ੍ਸਪਤ੍ਥੇਰਸ੍ਸ ਪਿਣ੍ਡਪਾਤਂ ਦਤ੍ਵਾ ਅਤ੍ਤਨੋ ਪਤਿਟ੍ਠਂ ਕਰੋਥਾ’’ਤਿ. ਏਵਂ ਹਿਸ੍ਸ ਅਹੋਸਿ ‘‘ਇਮਾਸੁ ਸਬ੍ਬਾਸੁ ਗਤਾਸੁ ਕਦਾਚਿ ਏਕਿਸ੍ਸਾਪਿ ਹਤ੍ਥਤੋ ਪਿਣ੍ਡਪਾਤਂ ਥੇਰੋ ਪਟਿਗ੍ਗਣ੍ਹੇਯ੍ਯ, ਤਂ ਤਸ੍ਸਾ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਪਟਿਕ੍ਖਿਪਿ ਥੇਰੋ, ‘‘ਭਨ੍ਤੇ, ਮਯ੍ਹਂ ਪਿਣ੍ਡਪਾਤਂ ਗਣ੍ਹਥ, ਮਯ੍ਹਂ ਪਿਣ੍ਡਪਾਤਂ ਗਣ੍ਹਥਾ’’ਤਿ ਵਦਨ੍ਤਿਯੋ ‘‘ਗਚ੍ਛਥ ਤੁਮ੍ਹੇ ਕਤਪੁਞ੍ਞਾ ਮਹਾਭੋਗਾ, ਅਹਂ ਦੁਗ੍ਗਤਾਨਂ ਸਙ੍ਗਹਂ ਕਰਿਸ੍ਸਾਮੀ’’ਤਿ ਵਤ੍ਵਾ, ‘‘ਭਨ੍ਤੇ, ਮਾ ਨੋ ਨਾਸੇਥ, ਸਙ੍ਗਹਂ ਨੋ ਕਰੋਥਾ’’ਤਿ ਵਦਨ੍ਤਿਯੋ ਪੁਨਪਿ ਪਟਿਕ੍ਖਿਪਿਤ੍ਵਾ ਪੁਨਪਿ ਅਪਗਨ੍ਤੁਂ ਅਨਿਚ੍ਛਮਾਨਾ ਯਾਚਨ੍ਤਿਯੋ ‘‘ਨ ਅਤ੍ਤਨੋ ਪਮਾਣਂ ਜਾਨਾਥ, ਅਪਗਚ੍ਛਥਾ’’ਤਿ ਵਤ੍ਵਾ ਅਚ੍ਛਰਂ ਪਹਰਿ. ਤਾ ਥੇਰਸ੍ਸ ਅਚ੍ਛਰਾਸਦ੍ਦਂ ਸੁਤ੍ਵਾ ਸਨ੍ਤਜ੍ਜਿਤਾ ਠਾਤੁਂ ਅਸਕ੍ਕੋਨ੍ਤਿਯੋ ਪਲਾਯਿਤ੍ਵਾ ਦੇਵਲੋਕਮੇਵ ਗਤਾ. ਤੇਨ ਵੁਤ੍ਤਂ – ‘‘ਪਞ੍ਚਮਤ੍ਤਾਨਿ ਦੇਵਤਾਸਤਾਨਿ ਪਟਿਕ੍ਖਿਪਿਤ੍ਵਾ’’ਤਿ.

ਪੁਬ੍ਬਣ੍ਹਸਮਯਨ੍ਤਿ ਪੁਬ੍ਬਣ੍ਹੇ ਏਕਂ ਸਮਯਂ, ਏਕਸ੍ਮਿਂ ਕਾਲੇ. ਨਿਵਾਸੇਤ੍ਵਾਤਿ ਵਿਹਾਰਨਿਵਾਸਨਪਰਿਵਤ੍ਤਨਵਸੇਨ ਨਿਵਾਸਨਂ ਦਲ਼੍ਹਂ ਨਿਵਾਸੇਤ੍ਵਾ. ਪਤ੍ਤਚੀਵਰਮਾਦਾਯਾਤਿ ਚੀਵਰਂ ਪਾਰੁਪਿਤ੍ਵਾ ਪਤ੍ਤਂ ਹਤ੍ਥੇਨ ਗਹੇਤ੍ਵਾ. ਪਿਣ੍ਡਾਯ ਪਾਵਿਸੀਤਿ ਪਿਣ੍ਡਪਾਤਤ੍ਥਾਯ ਪਾਵਿਸਿ. ਦਲਿਦ੍ਦਵਿਸਿਖਾਤਿ ਦੁਗ੍ਗਤਮਨੁਸ੍ਸਾਨਂ ਵਸਨੋਕਾਸੋ. ਕਪਣਵਿਸਿਖਾਤਿ ਭੋਗਪਾਰਿਜੁਞ੍ਞਪ੍ਪਤ੍ਤਿਯਾ ਦੀਨਮਨੁਸ੍ਸਾਨਂ ਵਾਸੋ. ਪੇਸਕਾਰਵਿਸਿਖਾਤਿ ਤਨ੍ਤਵਾਯਵਾਸੋ. ਅਦ੍ਦਸਾ ਖੋ ਭਗਵਾਤਿ ਕਥਂ ਅਦ੍ਦਸ? ‘‘ਆਬਾਧਾ ਵੁਟ੍ਠਿਤੋ ਮਮ ਪੁਤ੍ਤੋ ਕਸ੍ਸਪੋ ਕਿਨ੍ਨੁ ਖੋ ਕਰੋਤੀ’’ਤਿ ਆਵਜ੍ਜੇਨ੍ਤੋ ਵੇਲ਼ੁਵਨੇ ਨਿਸਿਨ੍ਨੋ ਏਵ ਭਗਵਾ ਦਿਬ੍ਬਚਕ੍ਖੁਨਾ ਅਦ੍ਦਸ.

ਏਤਮਤ੍ਥਂ ਵਿਦਿਤ੍ਵਾਤਿ ਯਾਯਂ ਆਯਸ੍ਮਤੋ ਮਹਾਕਸ੍ਸਪਸ੍ਸ ਪਞ੍ਚਹਿ ਅਚ੍ਛਰਾਸਤੇਹਿ ਉਪਨੀਤਂ ਅਨੇਕਸੂਪਂ ਅਨੇਕਬ੍ਯਞ੍ਜਨਂ ਦਿਬ੍ਬਪਿਣ੍ਡਪਾਤਂ ਪਟਿਕ੍ਖਿਪਿਤ੍ਵਾ ਕਪਣਜਨਾਨੁਗ੍ਗਹਪ੍ਪਟਿਪਤ੍ਤਿ ਵੁਤ੍ਤਾ, ਏਤਮਤ੍ਥਂ ਜਾਨਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਪਰਮਪ੍ਪਿਚ੍ਛਤਾਦਸ੍ਸਨਮੁਖੇਨ ਖੀਣਾਸਵਸ੍ਸ ਤਾਦੀਭਾਵਾਨੁਭਾਵਦੀਪਕਂ ਉਦਾਨਂ ਉਦਾਨੇਸਿ.

ਤਤ੍ਥ ਅਨਞ੍ਞਪੋਸਿਨ੍ਤਿ ਅਞ੍ਞਂ ਪੋਸੇਤੀਤਿ ਅਞ੍ਞਪੋਸੀ, ਨ ਅਞ੍ਞਪੋਸੀ ਅਨਞ੍ਞਪੋਸੀ, ਅਤ੍ਤਨਾ ਪੋਸੇਤਬ੍ਬਸ੍ਸ ਅਞ੍ਞਸ੍ਸ ਅਭਾਵੇਨ ਅਦੁਤਿਯੋ, ਏਕਕੋਤਿ ਅਤ੍ਥੋ. ਤੇਨ ਥੇਰਸ੍ਸ ਸੁਭਰਤਂ ਦਸ੍ਸੇਤਿ. ਥੇਰੋ ਹਿ ਕਾਯਪਰਿਹਾਰਿਕੇਨ ਚੀਵਰੇਨ ਕੁਚ੍ਛਿਪਰਿਹਾਰਿਕੇਨ ਚ ਪਿਣ੍ਡਪਾਤੇਨ ਅਤ੍ਤਾਨਮੇਵ ਪੋਸੇਨ੍ਤੋ ਪਰਮਪ੍ਪਿਚ੍ਛੋ ਹੁਤ੍ਵਾ ਵਿਹਰਤਿ, ਅਞ੍ਞਂ ਞਾਤਿਮਿਤ੍ਤਾਦੀਸੁ ਕਞ੍ਚਿ ਨ ਪੋਸੇਤਿ ਕਤ੍ਥਚਿ ਅਲਗ੍ਗਭਾਵਤੋ. ਅਥ ਵਾ ਅਞ੍ਞੇਨ ਅਞ੍ਞਤਰੇਨ ਪੋਸੇਤਬ੍ਬਤਾਯ ਅਭਾਵਤੋ ਅਨਞ੍ਞਪੋਸੀ. ਯੋ ਹਿ ਏਕਸ੍ਮਿਂਯੇਵ ਪਚ੍ਚਯਦਾਯਕੇ ਪਟਿਬਦ੍ਧਚਤੁਪਚ੍ਚਯੋ ਸੋ ਅਨਞ੍ਞਪੋਸੀ ਨਾਮ ਨ ਹੋਤਿ ਏਕਾਯਤ੍ਤਵੁਤ੍ਤਿਤੋ. ਥੇਰੋ ਪਨ ‘‘ਯਥਾਪਿ ਭਮਰੋ ਪੁਪ੍ਫ’’ਨ੍ਤਿ (ਧ. ਪ. ੪੯) ਗਾਥਾਯ ਵੁਤ੍ਤਨਯੇਨ ਜਙ੍ਘਾਬਲਂ ਨਿਸ੍ਸਾਯ ਪਿਣ੍ਡਾਯ ਚਰਨ੍ਤੋ ਕੁਲੇਸੁ ਨਿਚ੍ਚਨਵੋ ਹੁਤ੍ਵਾ ਮਿਸ੍ਸਕਭਤ੍ਤੇਨ ਯਾਪੇਤਿ. ਤਥਾ ਹਿ ਨਂ ਭਗਵਾ ਚਨ੍ਦੂਪਮਪ੍ਪਟਿਪਦਾਯ ਥੋਮੇਸਿ. ਅਞ੍ਞਾਤਨ੍ਤਿ ਅਭਿਞ੍ਞਾਤਂ, ਯਥਾਭੁਚ੍ਚਗੁਣੇਹਿ ਪਤ੍ਥਟਯਸਂ, ਤੇਨੇਵ ਵਾ ਅਨਞ੍ਞਪੋਸਿਭਾਵੇਨ ਅਪ੍ਪਿਚ੍ਛਤਾਸਨ੍ਤੁਟ੍ਠਿਤਾਹਿ ਞਾਤਂ. ਅਥ ਵਾ ਅਞ੍ਞਾਤਨ੍ਤਿ ਸਬ੍ਬਸੋ ਪਹੀਨਤਣ੍ਹਤਾਯ ਲਾਭਸਕ੍ਕਾਰਸਿਲੋਕਨਿਕਾਮਨਹੇਤੁ ਅਤ੍ਤਾਨਂ ਜਾਨਾਪਨਵਸੇਨ ਨ ਞਾਤਂ. ਅਵੀਤਤਣ੍ਹੋ ਹਿ ਪਾਪਿਚ੍ਛੋ ਕੁਹਕਤਾਯ ਸਮ੍ਭਾਵਨਾਧਿਪ੍ਪਾਯੇਨ ਅਤ੍ਤਾਨਂ ਜਾਨਾਪੇਤਿ. ਦਨ੍ਤਨ੍ਤਿ ਛਲ਼ਙ੍ਗੁਪੇਕ੍ਖਾਵਸੇਨ ਇਨ੍ਦ੍ਰਿਯੇਸੁ ਉਤ੍ਤਮਦਮਨੇਨ ਦਨ੍ਤਂ. ਸਾਰੇ ਪਤਿਟ੍ਠਿਤਨ੍ਤਿ ਵਿਮੁਤ੍ਤਿਸਾਰੇ ਅਵਟ੍ਠਿਤਂ, ਅਸੇਕ੍ਖਸੀਲਕ੍ਖਨ੍ਧਾਦਿਕੇ ਵਾ ਸੀਲਾਦਿਸਾਰੇ ਪਤਿਟ੍ਠਿਤਂ. ਖੀਣਾਸਵਂ ਵਨ੍ਤਦੋਸਨ੍ਤਿ ਕਾਮਾਸਵਾਦੀਨਂ ਚਤੁਨ੍ਨਂ ਆਸਵਾਨਂ ਅਨਵਸੇਸਂ ਪਹੀਨਤ੍ਤਾ ਖੀਣਾਸਵਂ. ਤਤੋ ਏਵ ਰਾਗਾਦਿਦੋਸਾਨਂ ਸਬ੍ਬਸੋ ਵਨ੍ਤਤ੍ਤਾ ਵਨ੍ਤਦੋਸਂ. ਤਮਹਂ ਬ੍ਰੂਮਿ ਬ੍ਰਾਹ੍ਮਣਨ੍ਤਿ ਤਂ ਯਥਾਵੁਤ੍ਤਗੁਣਂ ਪਰਮਤ੍ਥਬ੍ਰਾਹ੍ਮਣਂ ਅਹਂ ਬ੍ਰਾਹ੍ਮਣਨ੍ਤਿ ਵਦਾਮੀਤਿ. ਇਧਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਦੇਸਨਾਨਾਨਤ੍ਤਂ ਵੇਦਿਤਬ੍ਬਂ.

ਛਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.