੮. ਅਟ੍ਠਕਨਿਪਾਤੋ

੧. ਸੀਸੂਪਚਾਲਾਥੇਰੀਗਾਥਾਵਣ੍ਣਨਾ

ਅਟ੍ਠਕਨਿਪਾਤੇ ਭਿਕ੍ਖੁਨੀ ਸੀਲਸਮ੍ਪਨ੍ਨਾਤਿਆਦਿਕਾ ਸੀਸੂਪਚਾਲਾਯ ਥੇਰਿਯਾ ਗਾਥਾ. ਇਮਿਸ੍ਸਾਪਿ ਵਤ੍ਥੁ ਚਾਲਾਯ ਥੇਰਿਯਾ ਵਤ੍ਥੁਮ੍ਹਿ ਵੁਤ੍ਤਨਯਮੇਵ. ਅਯਮ੍ਪਿ ਹਿ ਆਯਸ੍ਮਤੋ ਧਮ੍ਮਸੇਨਾਪਤਿਸ੍ਸ ਪਬ੍ਬਜਿਤਭਾਵਂ ਸੁਤ੍ਵਾ ਸਯਮ੍ਪਿ ਉਸ੍ਸਾਹਜਾਤਾ ਪਬ੍ਬਜਿਤ੍ਵਾ ਕਤਪੁਬ੍ਬਕਿਚ੍ਚਾ ਵਿਪਸ੍ਸਨਂ ਪਟ੍ਠਪੇਤ੍ਵਾ, ਘਟੇਨ੍ਤੀ ਵਾਯਮਨ੍ਤੀ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਅਰਹਤ੍ਤਂ ਪਤ੍ਵਾ ਫਲਸਮਾਪਤ੍ਤਿਸੁਖੇਨ ਵਿਹਰਨ੍ਤੀ ਏਕਦਿਵਸਂ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਕਤਕਿਚ੍ਚਾਤਿ ਸੋਮਨਸ੍ਸਜਾਤਾ ਉਦਾਨਵਸੇਨ –

੧੯੬. ‘‘ਭਿਕ੍ਖੁਨੀ ਸੀਲਸਮ੍ਪਨ੍ਨਾ, ਇਨ੍ਦ੍ਰਿਯੇਸੁ ਸੁਸਂਵੁਤਾ;

ਅਧਿਗਚ੍ਛੇ ਪਦਂ ਸਨ੍ਤਂ, ਅਸੇਚਨਕਮੋਜਵ’’ਨ੍ਤਿ. – ਗਾਥਮਾਹ;

ਤਤ੍ਥ ਸੀਲਸਮ੍ਪਨ੍ਨਾਤਿ ਪਰਿਸੁਦ੍ਧੇਨ ਭਿਕ੍ਖੁਨਿਸੀਲੇਨ ਸਮਨ੍ਨਾਗਤਾ ਪਰਿਪੁਣ੍ਣਾ. ਇਨ੍ਦ੍ਰਿਯੇਸੁ ਸੁਸਂਵੁਤਾਤਿ ਮਨਚ੍ਛਟ੍ਠੇਸੁ ਇਨ੍ਦ੍ਰਿਯੇਸੁ ਸੁਟ੍ਠੁ ਸਂਵੁਤਾ, ਰੂਪਾਦਿਆਰਮ੍ਮਣੇ ਇਟ੍ਠੇ ਰਾਗਂ, ਅਨਿਟ੍ਠੇ ਦੋਸਂ, ਅਸਮਪੇਕ੍ਖਨੇ ਮੋਹਞ੍ਚ ਪਹਾਯ ਸੁਟ੍ਠੁ ਪਿਹਿਤਿਨ੍ਦ੍ਰਿਯਾ. ਅਸੇਚਨਕਮੋਜਵਨ੍ਤਿ ਕੇਨਚਿ ਅਨਾਸਿਤ੍ਤਕਂ ਓਜਵਨ੍ਤਂ ਸਭਾਵਮਧੁਰਂ ਸਬ੍ਬਸ੍ਸਾਪਿ ਕਿਲੇਸਰੋਗਸ੍ਸ ਵੂਪਸਮਨੋਸਧਭੂਤਂ ਅਰਿਯਮਗ੍ਗਂ, ਨਿਬ੍ਬਾਨਮੇਵ ਵਾ. ਅਰਿਯਮਗ੍ਗਮ੍ਪਿ ਹਿ ਨਿਬ੍ਬਾਨਤ੍ਥਿਕੇਹਿ ਪਟਿਪਜ੍ਜਿਤਬ੍ਬਤੋ ਕਿਲੇਸਪਰਿਲ਼ਾਹਾਭਾਵਤੋ ਚ ਪਦਂ ਸਨ੍ਤਨ੍ਤਿ ਵਤ੍ਤੁਂ ਵਟ੍ਟਤਿ.

੧੯੭. ‘‘ਤਾਵਤਿਂਸਾ ਚ ਯਾਮਾ ਚ, ਤੁਸਿਤਾ ਚਾਪਿ ਦੇਵਤਾ;

ਨਿਮ੍ਮਾਨਰਤਿਨੋ ਦੇਵਾ, ਯੇ ਦੇਵਾ ਵਸਵਤ੍ਤਿਨੋ;

ਤਤ੍ਥ ਚਿਤ੍ਤਂ ਪਣੀਧੇਹਿ, ਯਤ੍ਥ ਤੇ ਵੁਸਿਤਂ ਪੁਰੇ’’ਤਿ. –

ਅਯਂ ਗਾਥਾ ਕਾਮਸਗ੍ਗੇਸੁ ਨਿਕਨ੍ਤਿਂ ਉਪ੍ਪਾਦੇਹੀਤਿ ਤਤ੍ਥ ਉਯ੍ਯੋਜਨਵਸੇਨ ਥੇਰਿਂ ਸਮਾਪਤ੍ਤਿਯਾ ਚਾਵੇਤੁਕਾਮੇਨ ਮਾਰੇਨ ਵੁਤ੍ਤਾ.

ਤਤ੍ਥ ਸਹਪੁਞ੍ਞਕਾਰਿਨੋ ਤੇਤ੍ਤਿਂਸ ਜਨਾ ਯਤ੍ਥ ਉਪਪਨ੍ਨਾ, ਤਂ ਠਾਨਂ ਤਾਵਤਿਂਸਨ੍ਤਿ. ਤਤ੍ਥ ਨਿਬ੍ਬਤ੍ਤਾ ਸਬ੍ਬੇਪਿ ਦੇਵਪੁਤ੍ਤਾ ਤਾਵਤਿਂਸਾ. ਕੇਚਿ ਪਨ ‘‘ਤਾਵਤਿਂਸਾਤਿ ਤੇਸਂ ਦੇਵਾਨਂ ਨਾਮਮੇਵਾ’’ਤਿ ਵਦਨ੍ਤਿ. ਦ੍ਵੀਹਿ ਦੇਵਲੋਕੇਹਿ ਵਿਸਿਟ੍ਠਂ ਦਿਬ੍ਬਂ ਸੁਖਂ ਯਾਤਾ ਉਪਯਾਤਾ ਸਮ੍ਪਨ੍ਨਾਤਿ ਯਾਮਾ. ਦਿਬ੍ਬਾਯ ਸਮ੍ਪਤ੍ਤਿਯਾ ਤੁਟ੍ਠਾ ਪਹਟ੍ਠਾਤਿ ਤੁਸਿਤਾ. ਪਕਤਿਪਟਿਯਤ੍ਤਾਰਮ੍ਮਣਤੋ ਅਤਿਰੇਕੇਨ ਰਮਿਤੁਕਾਮਤਾਕਾਲੇ ਯਥਾਰੁਚਿਤੇ ਭੋਗੇ ਨਿਮ੍ਮਿਨਿਤ੍ਵਾ ਰਮਨ੍ਤੀਤਿ ਨਿਮ੍ਮਾਨਰਤਿਨੋ. ਚਿਤ੍ਤਰੁਚਿਂ ਞਤ੍ਵਾ ਪਰੇਹਿ ਨਿਮ੍ਮਿਤੇਸੁ ਭੋਗੇਸੁ ਵਸਂ ਵਤ੍ਤੇਨ੍ਤੀਤਿ ਵਸਵਤ੍ਤਿਨੋ. ਤਤ੍ਥ ਚਿਤ੍ਤਂ ਪਣੀਧੇਹੀਤਿ ਤਸ੍ਮਿਂ ਤਾਵਤਿਂਸਾਦਿਕੇ ਦੇਵਨਿਕਾਯੇ ਤਵ ਚਿਤ੍ਤਂ ਠਪੇਹਿ, ਉਪਪਜ੍ਜਨਾਯ ਨਿਕਨ੍ਤਿਂ ਕਰੋਹਿ. ਚਾਤੁਮਹਾਰਾਜਿਕਾਨਂ ਭੋਗਾ ਇਤਰੇਹਿ ਨਿਹੀਨਾਤਿ ਅਧਿਪ੍ਪਾਯੇਨ ਤਾਵਤਿਂਸਾਦਯੋਵ ਵੁਤ੍ਤਾ. ਯਤ੍ਥ ਤੇ ਵੁਸਿਤਂ ਪੁਰੇਤਿ ਯੇਸੁ ਦੇਵਨਿਕਾਯੇਸੁ ਤਯਾ ਪੁਬ੍ਬੇ ਵੁਤ੍ਥਂ. ਅਯਂ ਕਿਰ ਪੁਬ੍ਬੇ ਦੇਵੇਸੁ ਉਪ੍ਪਜ੍ਜਨ੍ਤੀ, ਤਾਵਤਿਂਸਤੋ ਪਟ੍ਠਾਯ ਪਞ੍ਚਕਾਮਸਗ੍ਗੇ ਸੋਧੇਤ੍ਵਾ ਪੁਨ ਹੇਟ੍ਠਤੋ ਓਤਰਨ੍ਤੀ, ਤੁਸਿਤੇਸੁ ਠਤ੍ਵਾ ਤਤੋ ਚਵਿਤ੍ਵਾ ਇਦਾਨਿ ਮਨੁਸ੍ਸੇਸੁ ਨਿਬ੍ਬਤ੍ਤਾ.

ਤਂ ਸੁਤ੍ਵਾ ਥੇਰੀ – ‘‘ਤਿਟ੍ਠਤੁ, ਮਾਰ, ਤਯਾ ਵੁਤ੍ਤਕਾਮਲੋਕੋ. ਅਞ੍ਞੋਪਿ ਸਬ੍ਬੋ ਲੋਕੋ ਰਾਗਗ੍ਗਿਆਦੀਹਿ ਆਦਿਤ੍ਤੋ ਸਮ੍ਪਜ੍ਜਲਿਤੋ. ਨ ਤਤ੍ਥ ਵਿਞ੍ਞੂਨਂ ਚਿਤ੍ਤਂ ਰਮਤੀ’’ਤਿ ਕਾਮਤੋ ਚ ਲੋਕਤੋ ਚ ਅਤ੍ਤਨੋ ਵਿਨਿਵਤ੍ਤਿਤਮਾਨਸਤਂ ਦਸ੍ਸੇਤ੍ਵਾ ਮਾਰਂ ਤਜ੍ਜੇਨ੍ਤੀ –

੧੯੮. ਯਾਮਾ ਚ‘‘ਤਾਵਤਿਂਸਾ ਚ ਯਾਮਾ ਚ, ਤੁਸਿਤਾ ਚਾਪਿ ਦੇਵਤਾ;

ਨਿਮ੍ਮਾਨਰਤਿਨੋ ਦੇਵਾ, ਯੇ ਦੇਵਾ ਵਸਵਤ੍ਤਿਨੋ.

੧੯੯. ‘‘ਕਾਲਂ ਕਾਲਂ ਭਵਾ ਭਵਂ, ਸਕ੍ਕਾਯਸ੍ਮਿਂ ਪੁਰਕ੍ਖਤਾ;

ਅਵੀਤਿਵਤ੍ਤਾ ਸਕ੍ਕਾਯਂ, ਜਾਤਿਮਰਣਸਾਰਿਨੋ.

੨੦੦. ‘‘ਸਬ੍ਬੋ ਆਦੀਪਿਤੋ ਲੋਕੋ, ਸਬ੍ਬੋ ਲੋਕੋ ਪਦੀਪਿਤੋ;

ਸਬ੍ਬੋ ਪਜ੍ਜਲਿਤੋ ਲੋਕੋ, ਸਬ੍ਬੋ ਲੋਕੋ ਪਕਮ੍ਪਿਤੋ.

੨੦੧. ‘‘ਅਕਮ੍ਪਿਯਂ ਅਤੁਲਿਯਂ, ਅਪੁਥੁਜ੍ਜਨਸੇਵਿਤਂ;

ਬੁਦ੍ਧੋ ਧਮ੍ਮਮਦੇਸੇਸਿ, ਤਤ੍ਥ ਮੇ ਨਿਰਤੋ ਮਨੋ.

੨੦੨. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਵਿਹਰਿਂ ਸਾਸਨੇ ਰਤਾ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੨੦੩. ‘‘ਸਬ੍ਬਤ੍ਥ ਵਿਹਤਾ ਨਨ੍ਦੀ, ਤਮੋਕ੍ਖਨ੍ਧੋ ਪਦਾਲਿਤੋ;

ਏਵਂ ਜਾਨਾਹਿ ਪਾਪਿਮ, ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਕਾਲਂ ਕਾਲਨ੍ਤਿ ਤਂ ਤਂ ਕਾਲਂ. ਭਵਾ ਭਵਨ੍ਤਿ ਭਵਤੋ ਭਵਂ. ਸਕ੍ਕਾਯਸ੍ਮਿਨ੍ਤਿ ਖਨ੍ਧਪਞ੍ਚਕੇ. ਪੁਰਕ੍ਖਤਾਤਿ ਪੁਰਕ੍ਖਾਰਕਾਰਿਨੋ. ਇਦਂ ਵੁਤ੍ਤਂ ਹੋਤਿ – ਮਾਰ, ਤਯਾ ਵੁਤ੍ਤਾ ਤਾਵਤਿਂਸਾਦਯੋ ਦੇਵਾ ਭਵਤੋ ਭਵਂ ਉਪਗਚ੍ਛਨ੍ਤਾ ਅਨਿਚ੍ਚਤਾਦਿਅਨੇਕਾਦੀਨਵਾਕੁਲੇ ਸਕ੍ਕਾਯੇ ਪਤਿਟ੍ਠਿਤਾ, ਤਸ੍ਮਾ ਤਸ੍ਮਿਂ ਭਵੇ ਉਪ੍ਪਤ੍ਤਿਕਾਲੇ, ਵੇਮਜ੍ਝਕਾਲੇ, ਪਰਿਯੋਸਾਨਕਾਲੇਤਿ ਤਸ੍ਮਿਂ ਤਸ੍ਮਿਂ ਕਾਲੇ ਸਕ੍ਕਾਯਮੇਵ ਪੁਰਕ੍ਖਤ੍ਵਾ ਠਿਤਾ. ਤਤੋ ਏਵ ਅਵੀਤਿਵਤ੍ਤਾ ਸਕ੍ਕਾਯਂ ਨਿਸ੍ਸਰਣਾਭਿਮੁਖਾ ਅਹੁਤ੍ਵਾ ਸਕ੍ਕਾਯਤੀਰਮੇਵ ਅਨੁਪਰਿਧਾਵਨ੍ਤਾ ਜਾਤਿਮਰਣਸਾਰਿਨੋ ਰਾਗਾਦੀਹਿ ਅਨੁਗਤਤ੍ਤਾ ਪੁਨਪ੍ਪੁਨਂ ਜਾਤਿਮਰਣਮੇਵ ਅਨੁਸ੍ਸਰਨ੍ਤਿ, ਤਤੋ ਨ ਵਿਮੁਚ੍ਚਨ੍ਤੀਤਿ.

ਸਬ੍ਬੋ ਆਦੀਪਿਤੋ ਲੋਕੋਤਿ, ਮਾਰ, ਨ ਕੇਵਲਂ ਤਯਾ ਵੁਤ੍ਤਕਾਮਲੋਕੋਯੇਵ ਧਾਤੁਤ੍ਤਯਸਞ੍ਞਿਤੋ, ਸਬ੍ਬੋਪਿ ਲੋਕੋ ਰਾਗਗ੍ਗਿਆਦੀਹਿ ਏਕਾਦਸਹਿ ਆਦਿਤ੍ਤੋ. ਤੇਹਿਯੇਵ ਪੁਨਪ੍ਪੁਨਂ ਆਦੀਪਿਤਤਾਯ ਪਦੀਪਿਤੋ. ਨਿਰਨ੍ਤਰਂ ਏਕਜਾਲੀਭੂਤਤਾਯ ਪਜ੍ਜਲਿਤੋ. ਤਣ੍ਹਾਯ ਸਬ੍ਬਕਿਲੇਸੇਹਿ ਚ ਇਤੋ ਚਿਤੋ ਚ ਕਮ੍ਪਿਤਤਾਯ ਚਲਿਤਤਾਯ ਪਕਮ੍ਪਿਤੋ.

ਏਵਂ ਆਦਿਤ੍ਤੇ ਪਜ੍ਜਲਿਤੇ ਪਕਮ੍ਪਿਤੇ ਚ ਲੋਕੇ ਕੇਨਚਿਪਿ ਕਮ੍ਪੇਤੁਂ ਚਾਲੇਤੁਂ ਅਸਕ੍ਕੁਣੇਯ੍ਯਤਾਯ ਅਕਮ੍ਪਿਯਂ, ਗੁਣਤੋ ‘‘ਏਤ੍ਤਕੋ’’ਤਿ ਤੁਲੇਤੁਂ ਅਸਕ੍ਕੁਣੇਯ੍ਯਤਾਯ ਅਤ੍ਤਨਾ ਸਦਿਸਸ੍ਸ ਅਭਾਵਤੋ ਚ ਅਤੁਲਿਯਂ. ਬੁਦ੍ਧਾਦੀਹਿ ਅਰਿਯੇਹਿ ਏਵ ਗੋਚਰਭਾਵਨਾਭਿਗਮਤੋ ਸੇਵਿਤਤ੍ਤਾ ਅਪੁਥੁਜ੍ਜਨਸੇਵਿਤਂ. ਬੁਦ੍ਧੋ ਭਗਵਾ ਮਗ੍ਗਫਲਨਿਬ੍ਬਾਨਪ੍ਪਭੇਦਂ ਨਵਵਿਧਂ ਲੋਕੁਤ੍ਤਰਧਮ੍ਮਂ ਮਹਾਕਰੁਣਾਯ ਸਞ੍ਚੋਦਿਤਮਾਨਸੋ ਅਦੇਸੇਸਿ ਸਦੇਵਕਸ੍ਸ ਲੋਕਸ੍ਸ ਕਥੇਸਿ ਪਵੇਦੇਸਿ. ਤਤ੍ਥ ਤਸ੍ਮਿਂ ਅਰਿਯਧਮ੍ਮੇ ਮਯ੍ਹਂ ਮਨੋ ਨਿਰਤੋ ਅਭਿਰਤੋ, ਨ ਤਤੋ ਵਿਨਿਵਤ੍ਤਤੀਤਿ ਅਤ੍ਥੋ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਸੀਸੂਪਚਾਲਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.

ਅਟ੍ਠਕਨਿਪਾਤਵਣ੍ਣਨਾ ਨਿਟ੍ਠਿਤਾ.