੧੨. ਸੋਲ਼ਸਨਿਪਾਤੋ

੧. ਪੁਣ੍ਣਾਥੇਰੀਗਾਥਾਵਣ੍ਣਨਾ

ਸੋਲ਼ਸਨਿਪਾਤੇ ਉਦਹਾਰੀ ਅਹਂ ਸੀਤੇਤਿਆਦਿਕਾ ਪੁਣ੍ਣਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਹੇਤੁਸਮ੍ਪਨ੍ਨਤਾਯ ਸਞ੍ਜਾਤਸਂਵੇਗਾ ਭਿਕ੍ਖੁਨੀਨਂ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਲਦ੍ਧਪ੍ਪਸਾਦਾ ਪਬ੍ਬਜਿਤ੍ਵਾ ਪਰਿਸੁਦ੍ਧਸੀਲਾ ਤੀਣਿ ਪਿਟਕਾਨਿ ਉਗ੍ਗਹੇਤ੍ਵਾ ਬਹੁਸ੍ਸੁਤਾ ਧਮ੍ਮਧਰਾ ਧਮ੍ਮਕਥਿਕਾ ਚ ਅਹੋਸਿ. ਯਥਾ ਚ ਵਿਪਸ੍ਸਿਸ੍ਸ ਭਗਵਤੋ ਸਾਸਨੇ, ਏਵਂ ਸਿਖਿਸ੍ਸ ਵੇਸ੍ਸਭੁਸ੍ਸ ਕਕੁਸਨ੍ਧਸ੍ਸ ਕੋਣਾਗਮਨਸ੍ਸ ਕਸ੍ਸਪਸ੍ਸ ਚ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਸੀਲਸਮ੍ਪਨ੍ਨਾ ਬਹੁਸ੍ਸੁਤਾ ਧਮ੍ਮਧਰਾ ਧਮ੍ਮਕਥਿਕਾ ਚ ਅਹੋਸਿ. ਮਾਨਧਾਤੁਕਤ੍ਤਾ ਪਨ ਕਿਲੇਸੇ ਸਮੁਚ੍ਛਿਨ੍ਦਿਤੁਂ ਨਾਸਕ੍ਖਿ. ਮਾਨੋਪਨਿਸ੍ਸਯਵਸੇਨ ਕਮ੍ਮਸ੍ਸ ਕਤਤ੍ਤਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਅਨਾਥਪਿਣ੍ਡਿਕਸ੍ਸ ਸੇਟ੍ਠਿਨੋ ਘਰਦਾਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ਪੁਣ੍ਣਾਤਿਸ੍ਸਾ ਨਾਮਂ ਅਹੋਸਿ. ਸਾ ਸੀਹਨਾਦਸੁਤ੍ਤਨ੍ਤਦੇਸਨਾਯ (ਮ. ਨਿ. ੧.੧੪੬ ਆਦਯੋ) ਸੋਤਾਪਨ੍ਨਾ ਹੁਤ੍ਵਾ ਪਚ੍ਛਾ ਉਦਕਸੁਦ੍ਧਿਕਂ ਬ੍ਰਾਹ੍ਮਣਂ ਦਮੇਤ੍ਵਾ ਸੇਟ੍ਠਿਨਾ ਸਮ੍ਭਾਵਿਤਾ ਹੁਤ੍ਵਾ ਤੇਨ ਭੁਜਿਸ੍ਸਭਾਵਂ ਪਾਪਿਤਾ ਤਂ ਪਬ੍ਬਜ੍ਜਂ ਅਨੁਜਾਨਾਪੇਤ੍ਵਾ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੀ ਨ ਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੪.੧੮੪-੨੦੩) –

‘‘ਵਿਪਸ੍ਸਿਨੋ ਭਗਵਤੋ, ਸਿਖਿਨੋ ਵੇਸ੍ਸਭੁਸ੍ਸ ਚ;

ਕਕੁਸਨ੍ਧਸ੍ਸ ਮੁਨਿਨੋ, ਕੋਣਾਗਮਨਤਾਦਿਨੋ.

‘‘ਕਸ੍ਸਪਸ੍ਸ ਚ ਬੁਦ੍ਧਸ੍ਸ, ਪਬ੍ਬਜਿਤ੍ਵਾਨ ਸਾਸਨੇ;

ਭਿਕ੍ਖੁਨੀ ਸੀਲਸਮ੍ਪਨ੍ਨਾ, ਨਿਪਕਾ ਸਂਵੁਤਿਨ੍ਦ੍ਰਿਯਾ.

‘‘ਬਹੁਸ੍ਸੁਤਾ ਧਮ੍ਮਧਰਾ, ਧਮ੍ਮਤ੍ਥਪਟਿਪੁਚ੍ਛਿਕਾ;

ਉਗ੍ਗਹੇਤਾ ਚ ਧਮ੍ਮਾਨਂ, ਸੋਤਾ ਪਯਿਰੁਪਾਸਿਤਾ.

‘‘ਦੇਸੇਨ੍ਤੀ ਜਨਮਜ੍ਝੇਹਂ, ਅਹੋਸਿਂ ਜਿਨਸਾਸਨੇ;

ਬਾਹੁਸਚ੍ਚੇਨ ਤੇਨਾਹਂ, ਪੇਸਲਾ ਅਭਿਮਞ੍ਞਿਸਂ.

‘‘ਪਚ੍ਛਿਮੇ ਚ ਭਵੇ ਦਾਨਿ, ਸਾਵਤ੍ਥਿਯਂ ਪੁਰੁਤ੍ਤਮੇ;

ਅਨਾਥਪਿਣ੍ਡਿਨੋ ਗੇਹੇ, ਜਾਤਾਹਂ ਕੁਮ੍ਭਦਾਸਿਯਾ.

‘‘ਗਤਾ ਉਦਕਹਾਰਿਯਂ, ਸੋਤ੍ਥਿਯਂ ਦਿਜਮਦ੍ਦਸਂ;

ਸੀਤਟ੍ਟਂ ਤੋਯਮਜ੍ਝਮ੍ਹਿ, ਤਂ ਦਿਸ੍ਵਾ ਇਦਮਬ੍ਰਵਿਂ.

‘‘ਉਦਹਾਰੀ ਅਹਂ ਸੀਤੇ, ਸਦਾ ਉਦਕਮੋਤਰਿਂ;

ਅਯ੍ਯਾਨਂ ਦਣ੍ਡਭਯਭੀਤਾ, ਵਾਚਾਦੋਸਭਯਟ੍ਟਿਤਾ.

‘‘ਕਸ੍ਸ ਬ੍ਰਾਹ੍ਮਣ ਤ੍ਵਂ ਭੀਤੋ, ਸਦਾ ਉਦਕਮੋਤਰਿ;

ਵੇਧਮਾਨੇਹਿ ਗਤ੍ਤੇਹਿ, ਸੀਤਂ ਵੇਦਯਸੇ ਭੁਸਂ.

‘‘ਜਾਨਨ੍ਤੀ ਵਤ ਮਂ ਭੋਤਿ, ਪੁਣ੍ਣਿਕੇ ਪਰਿਪੁਚ੍ਛਸਿ;

ਕਰੋਨ੍ਤਂ ਕੁਸਲਂ ਕਮ੍ਮਂ, ਰੁਨ੍ਧਨ੍ਤਂ ਕਤਪਾਪਕਂ.

‘‘ਯੋ ਚ ਵੁਡ੍ਢੋ ਦਹਰੋ ਵਾ, ਪਾਪਕਮ੍ਮਂ ਪਕੁਬ੍ਬਤਿ;

ਦਕਾਭਿਸੇਚਨਾ ਸੋਪਿ, ਪਾਪਕਮ੍ਮਾ ਪਮੁਚ੍ਚਤਿ.

‘‘ਉਤ੍ਤਰਨ੍ਤਸ੍ਸ ਅਕ੍ਖਾਸਿਂ, ਧਮ੍ਮਤ੍ਥਸਂਹਿਤਂ ਪਦਂ;

ਤਞ੍ਚ ਸੁਤ੍ਵਾ ਸ ਸਂਵਿਗ੍ਗੋ, ਪਬ੍ਬਜਿਤ੍ਵਾਰਹਾ ਅਹੁ.

‘‘ਪੂਰੇਨ੍ਤੀ ਊਨਕਸਤਂ, ਜਾਤਾ ਦਾਸਿਕੁਲੇ ਯਤੋ;

ਤਤੋ ਪੁਣ੍ਣਾਤਿ ਨਾਮਂ ਮੇ, ਭੁਜਿਸ੍ਸਂ ਮਂ ਅਕਂਸੁ ਤੇ.

‘‘ਸੇਟ੍ਠਿਂ ਤਤੋਨੁਜਾਨੇਤ੍ਵਾ, ਪਬ੍ਬਜਿਂ ਅਨਗਾਰਿਯਂ;

ਨ ਚਿਰੇਨੇਵ ਕਾਲੇਨ, ਅਰਹਤ੍ਤਮਪਾਪੁਣਿਂ.

‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨੇ.

‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮੇ ਵਿਮਲਂ ਸੁਦ੍ਧਂ, ਬੁਦ੍ਧਸੇਟ੍ਠਸ੍ਸ ਵਾਹਸਾ.

‘‘ਭਾਵਨਾਯ ਮਹਾਪਞ੍ਞਾ, ਸੁਤੇਨੇਵ ਸੁਤਾਵਿਨੀ;

ਮਾਨੇਨ ਨੀਚਕੁਲਜਾ, ਨ ਹਿ ਕਮ੍ਮਂ ਵਿਨਸ੍ਸਤਿ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ –

੨੩੬. ‘‘ਉਦਹਾਰੀ ਅਹਂ ਸੀਤੇ, ਸਦਾ ਉਦਕਮੋਤਰਿਂ;

ਅਯ੍ਯਾਨਂ ਦਣ੍ਡਭਯਭੀਤਾ, ਵਾਚਾਦੋਸਭਯਟ੍ਟਿਤਾ.

੨੩੭. ‘‘ਕਸ੍ਸ ਬ੍ਰਾਹ੍ਮਣ ਤ੍ਵਂ ਭੀਤੋ, ਸਦਾ ਉਦਕਮੋਤਰਿ;

ਵੇਧਮਾਨੇਹਿ ਗਤ੍ਤੇਹਿ, ਸੀਤਂ ਵੇਦਯਸੇ ਭੁਸਂ.

੨੩੮. ‘‘ਜਾਨਨ੍ਤੀ ਵਤ ਮਂ ਭੋਤਿ, ਪੁਣ੍ਣਿਕੇ ਪਰਿਪੁਚ੍ਛਸਿ;

ਕਰੋਨ੍ਤਂ ਕੁਸਲਂ ਕਮ੍ਮਂ, ਰੁਨ੍ਧਨ੍ਤਂ ਕਤਪਾਪਕਂ.

੨੩੯. ‘‘ਯੋ ਚ ਵੁਡ੍ਢੋ ਦਹਰੋ ਵਾ, ਪਾਪਕਮ੍ਮਂ ਪਕੁਬ੍ਬਤਿ;

ਦਕਾਭਿਸੇਚਨਾ ਸੋਪਿ, ਪਾਪਕਮ੍ਮਾ ਪਮੁਚ੍ਚਤਿ.

੨੪੦. ‘‘ਕੋ ਨੁ ਤੇ ਇਦਮਕ੍ਖਾਸਿ, ਅਜਾਨਨ੍ਤਸ੍ਸ ਅਜਾਨਕੋ;

‘ਦਕਾਭਿਸੇਚਨਾ ਨਾਮ, ਪਾਪਕਮ੍ਮਾ ਪਮੁਚ੍ਚਤਿ’.

੨੪੧. ‘‘ਸਗ੍ਗਂ ਨੂਨ ਗਮਿਸ੍ਸਨ੍ਤਿ, ਸਬ੍ਬੇ ਮਣ੍ਡੂਕਕਚ੍ਛਪਾ;

ਨਾਗਾ ਚ ਸੁਸੁਮਾਰਾ ਚ, ਯੇ ਚਞ੍ਞੇ ਉਦਕੇ ਚਰਾ.

੨੪੨. ‘‘ਓਰਬ੍ਭਿਕਾ ਸੂਕਰਿਕਾ, ਮਚ੍ਛਿਕਾ ਮਿਗਬਨ੍ਧਕਾ;

ਚੋਰਾ ਚ ਵਜ੍ਝਘਾਤਾ ਚ, ਯੇ ਚਞ੍ਞੇ ਪਾਪਕਮ੍ਮਿਨੋ;

ਦਕਾਭਿਸੇਚਨਾ ਤੇਪਿ, ਪਾਪਕਮ੍ਮਾ ਪਮੁਚ੍ਚਰੇ.

੨੪੩. ‘‘ਸਚੇ ਇਮਾ ਨਦਿਯੋ ਤੇ, ਪਾਪਂ ਪੁਬ੍ਬੇ ਕਤਂ ਵਹੁਂ;

ਪੁਞ੍ਞਮ੍ਪਿ ਮਾ ਵਹੇਯ੍ਯੁਂ ਤੇ, ਤੇਨ ਤ੍ਵਂ ਪਰਿਬਾਹਿਰੋ.

੨੪੪. ‘‘ਯਸ੍ਸ ਬ੍ਰਾਹ੍ਮਣ ਤ੍ਵਂ ਭੀਤੋ, ਸਦਾ ਉਦਕਮੋਤਰਿ;

ਤਮੇਵ ਬ੍ਰਹ੍ਮੇ ਮਾਕਾਸਿ, ਮਾ ਤੇ ਸੀਤਂ ਛਵਿਂ ਹਨੇ.

੨੪੫. ‘‘ਕੁਮ੍ਮਗ੍ਗਪਟਿਪਨ੍ਨਂ ਮਂ, ਅਰਿਯਮਗ੍ਗਂ ਸਮਾਨਯਿ;

ਦਕਾਭਿਸੇਚਨਾ ਭੋਤਿ, ਇਮਂ ਸਾਟਂ ਦਦਾਮਿ ਤੇ.

੨੪੬. ‘‘ਤੁਯ੍ਹੇਵ ਸਾਟਕੋ ਹੋਤੁ, ਨਾਹਮਿਚ੍ਛਾਮਿ ਸਾਟਕਂ;

ਸਚੇ ਭਾਯਸਿ ਦੁਕ੍ਖਸ੍ਸ, ਸਚੇ ਤੇ ਦੁਕ੍ਖਮਪ੍ਪਿਯਂ.

੨੪੭. ‘‘ਮਾਕਾਸਿ ਪਾਪਕਂ ਕਮ੍ਮਂ, ਆਵਿ ਵਾ ਯਦਿ ਵਾ ਰਹੋ;

ਸਚੇ ਚ ਪਾਪਕਂ ਕਮ੍ਮਂ, ਕਰਿਸ੍ਸਸਿ ਕਰੋਸਿ ਵਾ.

੨੪੮. ‘‘ਨ ਤੇ ਦੁਕ੍ਖਾ ਪਮੁਤ੍ਯਤ੍ਥਿ, ਉਪੇਚ੍ਚਾਪਿ ਪਲਾਯਤੋ;

ਸਚੇ ਭਾਯਸਿ ਦੁਕ੍ਖਸ੍ਸ, ਸਚੇ ਤੇ ਦੁਕ੍ਖਮਪ੍ਪਿਯਂ.

੨੪੯. ‘‘ਉਪੇਹਿ ਸਰਣਂ ਬੁਦ੍ਧਂ, ਧਮ੍ਮਂ ਸਙ੍ਘਞ੍ਚ ਤਾਦਿਨਂ;

ਸਮਾਦਿਯਾਹਿ ਸੀਲਾਨਿ, ਤਂ ਤੇ ਅਤ੍ਥਾਯ ਹੇਹਿਤਿ.

੨੫੦. ‘‘ਉਪੇਮਿ ਸਰਣਂ ਬੁਦ੍ਧਂ, ਧਮ੍ਮਂ ਸਙ੍ਘਞ੍ਚ ਤਾਦਿਨਂ;

ਸਮਾਦਿਯਾਮਿ ਸੀਲਾਨਿ, ਤਂ ਮੇ ਅਤ੍ਥਾਯ ਹੇਹਿਤਿ.

੨੫੧. ‘‘ਬ੍ਰਹ੍ਮਬਨ੍ਧੁ ਪੁਰੇ ਆਸਿਂ, ਅਜ੍ਜਮ੍ਹਿ ਸਚ੍ਚਬ੍ਰਾਹ੍ਮਣੋ;

ਤੇਵਿਜ੍ਜੋ ਵੇਦਸਮ੍ਪਨ੍ਨੋ, ਸੋਤ੍ਤਿਯੋ ਚਮ੍ਹਿ ਨ੍ਹਾਤਕੋ’’ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਉਦਹਾਰੀਤਿ ਘਟੇਨ ਉਦਕਂ ਵਾਹਿਕਾ. ਸੀਤੇ ਤਦਾ ਉਦਕਮੋਤਰਿਨ੍ਤਿ ਸੀਤਕਾਲੇਪਿ ਸਬ੍ਬਦਾ ਰਤ੍ਤਿਨ੍ਦਿਵਂ ਉਦਕਂ ਓਤਰਿਂ. ਯਦਾ ਯਦਾ ਅਯ੍ਯਕਾਨਂ ਉਦਕੇਨ ਅਤ੍ਥੋ, ਤਦਾ ਤਦਾ ਉਦਕਂ ਪਾਵਿਸਿਂ, ਉਦਕਮੋਤਰਿਤ੍ਵਾ ਉਦਕਂ ਉਪਨੇਸਿਨ੍ਤਿ ਅਧਿਪ੍ਪਾਯੋ. ਅਯ੍ਯਾਨਂ ਦਣ੍ਡਭਯਭੀਤਾਤਿ ਅਯ੍ਯਕਾਨਂ ਦਣ੍ਡਭਯੇਨ ਭੀਤਾ. ਵਾਚਾਦੋਸਭਯਟ੍ਟਿਤਾਤਿ ਵਚੀਦਣ੍ਡਭਯੇਨ ਚੇਵ ਦੋਸਭਯੇਨ ਚ ਅਟ੍ਟਿਤਾ ਪੀਲ਼ਿਤਾ, ਸੀਤੇਪਿ ਉਦਕਮੋਤਰਿਨ੍ਤਿ ਯੋਜਨਾ.

ਅਥੇਕਦਿਵਸਂ ਪੁਣ੍ਣਾ ਦਾਸੀ ਘਟੇਨ ਉਦਕਂ ਆਨੇਤੁਂ ਉਦਕਤਿਤ੍ਥਂ ਗਤਾ. ਤਤ੍ਥ ਅਦ੍ਦਸ ਅਞ੍ਞਤਰਂ ਬ੍ਰਾਹ੍ਮਣਂ ਉਦਕਸੁਦ੍ਧਿਕਂ ਹਿਮਪਾਤਸਮਯੇ ਮਹਤਿ ਸੀਤੇ ਵਤ੍ਤਮਾਨੇ ਪਾਤੋਵ ਉਦਕਂ ਓਤਰਿਤ੍ਵਾ ਸਸੀਸਂ ਨਿਮੁਜ੍ਜਿਤ੍ਵਾ ਮਨ੍ਤੇ ਜਪ੍ਪਿਤ੍ਵਾ ਉਦਕਤੋ ਉਟ੍ਠਹਿਤ੍ਵਾ ਅਲ੍ਲਵਤ੍ਥਂ ਅਲ੍ਲਕੇਸਂ ਪਵੇਧਨ੍ਤਂ ਦਨ੍ਤਵੀਣਂ ਵਾਦਯਮਾਨਂ. ਤਂ ਦਿਸ੍ਵਾ ਕਰੁਣਾਯ ਸਞ੍ਚੋਦਿਤਮਾਨਸਾ ਤਤੋ ਨਂ ਦਿਟ੍ਠਿਗਤਾ ਵਿਵੇਚੇਤੁਕਾਮਾ ‘‘ਕਸ੍ਸ, ਬ੍ਰਾਹ੍ਮਣ, ਤ੍ਵਂ ਭੀਤੋ’’ਤਿ ਗਾਥਮਾਹ. ਤਤ੍ਥ ਕਸ੍ਸ, ਬ੍ਰਾਹ੍ਮਣ, ਤ੍ਵਂ ਕੁਤੋ ਚ ਨਾਮ ਭਯਹੇਤੁਤੋ ਭੀਤੋ ਹੁਤ੍ਵਾ ਸਦਾ ਉਦਕਮੋਤਰਿ ਸਬ੍ਬਕਾਲਂ ਸਾਯਂ ਪਾਤਂ ਉਦਕਂ ਓਤਰਿ. ਓਤਰਿਤ੍ਵਾ ਚ ਵੇਧਮਾਨੇਹਿ ਕਮ੍ਪਮਾਨੇਹਿ ਗਤ੍ਤੇਹਿ ਸਰੀਰਾਵਯਵੇਹਿ ਸੀਤਂ ਵੇਦਯਸੇ ਭੁਸਂ ਸੀਤਦੁਕ੍ਖਂ ਅਤਿਵਿਯ ਦੁਸ੍ਸਹਂ ਪਟਿਸਂਵੇਦਯਸਿ ਪਚ੍ਚਨੁਭਵਸਿ.

ਜਾਨਨ੍ਤੀ ਵਤ ਮਂ ਭੋਤੀਤਿ, ਭੋਤਿ ਪੁਣ੍ਣਿਕੇ, ਤ੍ਵਂ ਤਂ ਉਪਚਿਤਂ ਪਾਪਕਮ੍ਮਂ ਰੁਨ੍ਧਨ੍ਤਂ ਨਿਵਾਰਣਸਮਤ੍ਥਂ ਕੁਸਲਂ ਕਮ੍ਮਂ ਇਮਿਨਾ ਉਦਕੋਰੋਹਨੇਨ ਕਰੋਨ੍ਤਂ ਮਂ ਜਾਨਨ੍ਤੀ ਵਤ ਪਰਿਪੁਚ੍ਛਸਿ.

ਨਨੁ ਅਯਮਤ੍ਥੋ ਲੋਕੇ ਪਾਕਟੋ ਏਵ. ਕਥਾਪਿ ਮਯਂ ਤੁਯ੍ਹਂ ਵਦਾਮਾਤਿ ਦਸ੍ਸੇਨ੍ਤੋ ‘‘ਯੋ ਚ ਵੁਡ੍ਢੋ’’ਤਿ ਗਾਥਮਾਹ. ਤਸ੍ਸਤ੍ਥੋ – ਵੁਡ੍ਢੋ ਵਾ ਦਹਰੋ ਵਾ ਮਜ੍ਝਿਮੋ ਵਾ ਯੋ ਕੋਚਿ ਹਿਂਸਾਦਿਭੇਦਂ ਪਾਪਕਮ੍ਮਂ ਪਕੁਬ੍ਬਤਿ ਅਤਿਵਿਯ ਕਰੋਤਿ, ਸੋਪਿ ਭੁਸਂ ਪਾਪਕਮ੍ਮਨਿਰਤੋ ਦਕਾਭਿਸੇਚਨਾ ਸਿਨਾਨੇਨ ਤਤੋ ਪਾਪਕਮ੍ਮਾ ਪਮੁਚ੍ਚਤਿ ਅਚ੍ਚਨ੍ਤਮੇਵ ਵਿਮੁਚ੍ਚਤੀਤਿ.

ਤਂ ਸੁਤ੍ਵਾ ਪੁਣ੍ਣਿਕਾ ਤਸ੍ਸ ਪਟਿਵਚਨਂ ਦੇਨ੍ਤੀ ‘‘ਕੋ ਨੁ ਤੇ’’ਤਿਆਦਿਮਾਹ. ਤਤ੍ਥ ਕੋ ਨੁ ਤੇ ਇਦਮਕ੍ਖਾਸਿ, ਅਜਾਨਨ੍ਤਸ੍ਸ ਅਜਾਨਕੋਤਿ ਕਮ੍ਮਵਿਪਾਕਂ ਅਜਾਨਨ੍ਤਸ੍ਸ ਤੇ ਸਬ੍ਬੇਨ ਸਬ੍ਬਂ ਕਮ੍ਮਵਿਪਾਕਂ ਅਜਾਨਤੋ ਅਜਾਨਕੋ ਅਵਿਦ੍ਦਸੁ ਬਾਲੋ ਉਦਕਾਭਿਸੇਚਨਹੇਤੁ ਪਾਪਕਮ੍ਮਤੋ ਪਮੁਚ੍ਚਤੀਤਿ, ਇਦਂ ਅਤ੍ਥਜਾਤਂ ਕੋ ਨੁ ਨਾਮ ਅਕ੍ਖਾਸਿ, ਨ ਸੋ ਸਦ੍ਧੇਯ੍ਯਵਚਨੋ, ਨਾਪਿ ਚੇਤਂ ਯੁਤ੍ਤਨ੍ਤਿ ਅਧਿਪ੍ਪਾਯੋ.

ਇਦਾਨਿਸ੍ਸ ਤਮੇਵ ਯੁਤ੍ਤਿਅਭਾਵਂ ਵਿਭਾਵੇਨ੍ਤੀ ‘‘ਸਗ੍ਗਂ ਨੂਨ ਗਮਿਸ੍ਸਨ੍ਤੀ’’ਤਿਆਦਿਮਾਹ. ਤਤ੍ਥ ਨਾਗਾਤਿ ਵਿਜ੍ਝਸਾ. ਸੁਸੁਮਾਰਾਤਿ ਕੁਮ੍ਭੀਲਾ. ਯੇ ਚਞ੍ਞੇ ਉਦਕੇ ਚਰਾਤਿ ਯੇ ਚਞ੍ਞੇਪਿ ਵਾਰਿਗੋਚਰਾ ਮਚ੍ਛਮਕਰਨਨ੍ਦਿਯਾਵਤ੍ਤਾਦਯੋ ਚ, ਤੇਪਿ ਸਗ੍ਗਂ ਨੂਨ ਗਮਿਸ੍ਸਨ੍ਤਿ ਦੇਵਲੋਕਂ ਉਪਪਜ੍ਜਿਸ੍ਸਨ੍ਤਿ ਮਞ੍ਞੇ, ਉਦਕਾਭਿਸੇਚਨਾ ਪਾਪਕਮ੍ਮਤੋ ਮੁਤ੍ਤਿ ਹੋਤਿ ਚੇਤਿ ਅਤ੍ਥੋ.

ਓਰਬ੍ਭਿਕਾਤਿ ਉਰਬ੍ਭਘਾਤਕਾ. ਸੂਕਰਿਕਾਤਿ ਸੂਕਰਘਾਤਕਾ. ਮਚ੍ਛਿਕਾਤਿ ਕੇਵਟ੍ਟਾ. ਮਿਗਬਨ੍ਧਕਾਤਿ ਮਾਗਵਿਕਾ. ਵਜ੍ਝਘਾਤਾਤਿ ਵਜ੍ਝਘਾਤਕਮ੍ਮੇ ਨਿਯੁਤ੍ਤਾ.

ਪੁਞ੍ਞਮ੍ਪਿ ਮਾ ਵਹੇਯ੍ਯੁਨ੍ਤਿ ਇਮਾ ਅਚਿਰਵਤਿਆਦਯੋ ਨਦਿਯੋ ਯਥਾ ਤਯਾ ਪੁਬ੍ਬੇ ਕਤਂ ਪਾਪਂ ਤਤ੍ਥ ਉਦਕਾਭਿਸੇਚਨੇਨ ਸਚੇ ਵਹੁਂ ਨੀਹਰੇਯ੍ਯੁਂ, ਤਥਾ ਤਯਾ ਕਤਂ ਪੁਞ੍ਞਮ੍ਪਿ ਇਮਾ ਨਦਿਯੋ ਵਹੇਯ੍ਯੁਂ ਪਵਾਹੇਯ੍ਯੁਂ. ਤੇਨ ਤ੍ਵਂਪਰਿਬਾਹਿਰੋ ਅਸ੍ਸ ਤਥਾ ਸਤਿ ਤੇਨ ਪੁਞ੍ਞਕਮ੍ਮੇਨ ਤ੍ਵਂ ਪਰਿਬਾਹਿਰੋ ਵਿਰਹਿਤੋਵ ਭਵੇਯ੍ਯਾਤਿ ਨ ਚੇਤਂ ਯੁਤ੍ਤਨ੍ਤਿ ਅਧਿਪ੍ਪਾਯੋ. ਯਥਾ ਵਾ ਉਦਕੇਨ ਉਦਕੋਰੋਹਕਸ੍ਸ ਪੁਞ੍ਞਪਵਾਹਨਂ ਨ ਹੋਤਿ, ਏਵਂ ਪਾਪਪਵਾਹਨਮ੍ਪਿ ਨ ਹੋਤਿ ਏਵ. ਕਸ੍ਮਾ? ਨ੍ਹਾਨਸ੍ਸ ਪਾਪਹੇਤੂਨਂ ਅਪ੍ਪਟਿਪਕ੍ਖਭਾਵਤੋ. ਯੋ ਯਂ ਵਿਨਾਸੇਤਿ, ਸੋ ਤਸ੍ਸ ਪਟਿਪਕ੍ਖੋ. ਯਥਾ ਆਲੋਕੋ ਅਨ੍ਧਕਾਰਸ੍ਸ, ਵਿਜ੍ਜਾ ਚ ਅਵਿਜ੍ਜਾਯ, ਨ ਏਵਂ ਨ੍ਹਾਨਂ ਪਾਪਸ੍ਸ. ਤਸ੍ਮਾ ਨਿਟ੍ਠਮੇਤ੍ਥ ਗਨ੍ਤਬ੍ਬਂ ‘‘ਨ ਉਦਕਾਭਿਸੇਚਨਾ ਪਾਪਤੋ ਪਰਿਮੁਤ੍ਤੀ’’ਤਿ. ਤੇਨਾਹ ਭਗਵਾ –

‘‘ਨ ਉਦਕੇਨ ਸੁਚੀ ਹੋਤਿ, ਬਹ੍ਵੇਤ੍ਥ ਨ੍ਹਾਯਤੀ ਜਨੋ;

ਯਮ੍ਹਿ ਸਚ੍ਚਞ੍ਚ ਧਮ੍ਮੋ ਚ, ਸੋ ਸੁਚੀ ਸੋ ਚ ਬ੍ਰਾਹ੍ਮਣੋ’’ਤਿ. (ਉਦਾ. ੯; ਨੇਤ੍ਤਿ. ੧੦੪);

ਇਦਾਨਿ ਯਦਿ ਪਾਪਂ ਪਵਾਹੇਤੁਕਾਮੋਸਿ, ਸਬ੍ਬੇਨ ਸਬ੍ਬਂ ਪਾਪਂ ਮਾ ਕਰੋਹੀਤਿ ਦਸ੍ਸੇਤੁਂ ‘‘ਯਸ੍ਸ, ਬ੍ਰਾਹ੍ਮਣਾ’’ਤਿ ਗਾਥਮਾਹ. ਤਤ੍ਥ ਤਮੇਵ ਬ੍ਰਹ੍ਮੇ ਮਾਕਾਸੀਤਿ ਯਤੋ ਪਾਪਤੋ ਤ੍ਵਂ ਭੀਤੋ, ਤਮੇਵ ਪਾਪਂ ਬ੍ਰਹ੍ਮੇ, ਬ੍ਰਾਹ੍ਮਣ, ਤ੍ਵਂ ਮਾ ਅਕਾਸਿ. ਉਦਕੋਰੋਹਨਂ ਪਨ ਈਦਿਸੇ ਸੀਤਕਾਲੇ ਕੇਵਲਂ ਸਰੀਰਮੇਵ ਬਾਧਤਿ. ਤੇਨਾਹ – ‘‘ਮਾ ਤੇ ਸੀਤਂ ਛਵਿਂ ਹਨੇ’’ਤਿ, ਈਦਿਸੇ ਸੀਤਕਾਲੇ ਉਦਕਾਭਿਸੇਚਨੇਨ ਜਾਤਸੀਤਂ ਤਵ ਸਰੀਰਚ੍ਛਵਿਂ ਮਾ ਹਨੇਯ੍ਯ ਮਾ ਬਾਧੇਸੀਤਿ ਅਤ੍ਥੋ.

ਕੁਮ੍ਮਗ੍ਗਪਟਿਪਨ੍ਨਂ ਮਨ੍ਤਿ ‘‘ਉਦਕਾਭਿਸੇਚਨੇਨ ਸੁਦ੍ਧਿ ਹੋਤੀ’’ਤਿ ਇਮਂ ਕੁਮ੍ਮਗ੍ਗਂ ਮਿਚ੍ਛਾਗਾਹਂ ਪਟਿਪਨ੍ਨਂ ਪਗ੍ਗਯ੍ਹ ਠਿਤਂ ਮਂ. ਅਰਿਯਮਗ੍ਗਂ ਸਮਾਨਯੀਤਿ ‘‘ਸਬ੍ਬਪਾਪਸ੍ਸ ਅਕਰਣਂ, ਕੁਸਲਸ੍ਸ ਉਪਸਮ੍ਪਦਾ’’ਤਿ (ਦੀ. ਨਿ. ੨.੯੦; ਧ. ਪ. ੧੮੩; ਨੇਤ੍ਤਿ. ੩੦, ੧੧੬, ੧੨੪; ਪੇਟਕੋ. ੨੯) ਇਮਂ ਬੁਦ੍ਧਾਦੀਹਿ ਅਰਿਯੇਹਿ ਗਤਮਗ੍ਗਂ ਸਮਾਨਯਿ, ਸਮ੍ਮਦੇਵ ਉਪਨੇਸਿ, ਤਸ੍ਮਾ ਭੋਤਿ ਇਮਂ ਸਾਟਕਂ ਤੁਟ੍ਠਿਦਾਨਂ ਆਚਰਿਯਭਾਗਂ ਤੁਯ੍ਹਂ ਦਦਾਮਿ, ਤਂ ਪਟਿਗ੍ਗਣ੍ਹਾਤਿ ਅਤ੍ਥੋ.

ਸਾ ਤਂ ਪਟਿਕ੍ਖਿਪਿਤ੍ਵਾ ਧਮ੍ਮਂ ਕਥੇਤ੍ਵਾ ਸਰਣੇਸੁ ਸੀਲੇਸੁ ਚ ਪਤਿਟ੍ਠਾਪੇਤੁਂ ‘‘ਤੁਯ੍ਹੇਵ ਸਾਟਕੋ ਹੋਤੁ, ਨਾਹਮਿਚ੍ਛਾਮਿ ਸਾਟਕ’’ਨ੍ਤਿ ਵਤ੍ਵਾ ‘‘ਸਚੇ ਭਾਯਸਿ ਦੁਕ੍ਖਸ੍ਸਾ’’ਤਿਆਦਿਮਾਹ. ਤਸ੍ਸਤ੍ਥੋ – ਯਦਿ ਤੁਵਂ ਸਕਲਾਪਾਯਿਕੇ ਸੁਗਤਿਯਞ੍ਚ ਅਫਾਸੁਕਤਾਦੋਭਗ੍ਗਤਾਦਿਭੇਦਾ ਦੁਕ੍ਖਾ ਭਾਯਸਿ. ਯਦਿ ਤੇ ਤਂ ਅਪ੍ਪਿਯਂ ਨ ਇਟ੍ਠਂ. ਆਵਿ ਵਾ ਪਰੇਸਂ ਪਾਕਟਭਾਵੇਨ ਅਪ੍ਪਟਿਚ੍ਛਨ੍ਨਂ ਕਤ੍ਵਾ ਕਾਯੇਨ ਵਾਚਾਯ ਪਾਣਾਤਿਪਾਤਾਦਿਵਸੇਨ ਵਾ ਯਦਿ ਵਾ ਰਹੋ ਅਪਾਕਟਭਾਵੇਨ ਪਟਿਚ੍ਛਨ੍ਨਂ ਕਤ੍ਵਾ ਮਨੋਦ੍ਵਾਰੇਯੇਵ ਅਭਿਜ੍ਝਾਦਿਵਸੇਨ ਵਾ ਅਣੁਮਤ੍ਤਮ੍ਪਿ ਪਾਪਕਂ ਲਾਮਕਂ ਕਮ੍ਮਂ ਮਾਕਾਸਿ ਮਾ ਕਰਿ. ਅਥ ਪਨ ਤਂ ਪਾਪਕਮ੍ਮਂ ਆਯਤਿਂ ਕਰਿਸ੍ਸਸਿ, ਏਤਰਹਿ ਕਰੋਸਿ ਵਾ, ‘‘ਨਿਰਯਾਦੀਸੁ ਚਤੂਸੁ ਅਪਾਯੇਸੁ ਮਨੁਸ੍ਸੇਸੁ ਚ ਤਸ੍ਸ ਫਲਭੂਤਂ ਦੁਕ੍ਖਂ ਇਤੋ ਏਤ੍ਤੋ ਵਾ ਪਲਾਯਨ੍ਤੇ ਮਯਿ ਨਾਨੁਬਨ੍ਧਿਸ੍ਸਤੀ’’ਤਿ ਅਧਿਪ੍ਪਾਯੇਨ ਉਪੇਚ੍ਚ ਸਞ੍ਚਿਚ੍ਚ ਪਲਾਯਤੋਪਿ ਤੇ ਤਤੋ ਪਾਪਤੋ ਮੁਤ੍ਤਿ ਮੋਕ੍ਖਾ ਨਤ੍ਥਿ, ਗਤਿਕਾਲਾਦਿਪਚ੍ਚਯਨ੍ਤਰਸਮਵਾਯੇ ਸਤਿ ਵਿਪਚ੍ਚਤੇ ਏਵਾਤਿ ਅਤ੍ਥੋ. ‘‘ਉਪ੍ਪਚ੍ਚਾ’’ਤਿ ਵਾ ਪਾਠੋ, ਉਪ੍ਪਤਿਤ੍ਵਾਤਿ ਅਤ੍ਥੋ. ਏਵਂ ਪਾਪਸ੍ਸ ਅਕਰਣੇਨ ਦੁਕ੍ਖਾਭਾਵਂ ਦਸ੍ਸੇਤ੍ਵਾ ਇਦਾਨਿ ਪੁਞ੍ਞਸ੍ਸ ਕਰਣੇਨਪਿ ਤਂ ਦਸ੍ਸੇਤੁਂ ‘‘ਸਚੇ ਭਾਯਸੀ’’ਤਿਆਦਿ ਵੁਤ੍ਤਂ. ਤਤ੍ਥ ਤਾਦਿਨਨ੍ਤਿ ਦਿਟ੍ਠਾਦੀਸੁ ਤਾਦਿਭਾਵਪ੍ਪਤ੍ਤਂ. ਯਥਾ ਵਾ ਪੁਰਿਮਕਾ ਸਮ੍ਮਾਸਮ੍ਬੁਦ੍ਧਾ ਪਸ੍ਸਿਤਬ੍ਬਾ, ਤਥਾ ਪਸ੍ਸਿਤਬ੍ਬਤੋ ਤਾਦਿ, ਤਂ ਬੁਦ੍ਧਂ ਸਰਣਂ ਉਪੇਹੀਤਿ ਯੋਜਨਾ. ਧਮ੍ਮਸਙ੍ਘੇਸੁਪਿ ਏਸੇਵ ਨਯੋ. ਤਾਦੀਨਂ ਵਰਬੁਦ੍ਧਾਨਂ ਧਮ੍ਮਂ, ਅਟ੍ਠਨ੍ਨਂ ਅਰਿਯਪੁਗ੍ਗਲਾਨਂ ਸਙ੍ਘਂ ਸਮੂਹਨ੍ਤਿ ਯੋਜਨਾ. ਤਨ੍ਤਿ ਸਰਣਗਮਨਂ ਸੀਲਾਨਂ ਸਮਾਦਾਨਞ੍ਚ. ਹੇਹਿਤੀਤਿ ਭਵਿਸ੍ਸਤਿ.

ਸੋ ਬ੍ਰਾਹ੍ਮਣੋ ਸਰਣੇਸੁ ਸੀਲੇਸੁ ਚ ਪਤਿਟ੍ਠਾਯ ਅਪਰਭਾਗੇ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਘਟੇਨ੍ਤੋ ਵਾਯਮਨ੍ਤੋ ਨ ਚਿਰਸ੍ਸੇਵ ਤੇਵਿਜ੍ਜੋ ਹੁਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨੇਨ੍ਤੋ ‘‘ਬ੍ਰਹ੍ਮਬਨ੍ਧੂ’’ਤਿ ਗਾਥਮਾਹ.

ਤਸ੍ਸਤ੍ਥੋ – ਅਹਂ ਪੁਬ੍ਬੇ ਬ੍ਰਾਹ੍ਮਣਕੁਲੇ ਉਪ੍ਪਤ੍ਤਿਮਤ੍ਤੇਨ ਬ੍ਰਹ੍ਮਬਨ੍ਧੁ ਨਾਮਾਸਿਂ. ਤਥਾ ਇਰੁਬ੍ਬੇਦਾਦੀਨਂ ਅਜ੍ਝੇਨਾਦਿਮਤ੍ਤੇਨ ਤੇਵਿਜ੍ਜੋ ਵੇਦਸਮ੍ਪਨ੍ਨੋ ਸੋਤ੍ਤਿਯੋ ਨ੍ਹਾਤਕੋ ਚ ਨਾਮਾਸਿਂ. ਇਦਾਨਿ ਸਬ੍ਬਸੋ ਬਾਹਿਤਪਾਪਤਾਯ ਸਚ੍ਚਬ੍ਰਾਹ੍ਮਣੋ ਪਰਮਤ੍ਥਬ੍ਰਾਹ੍ਮਣੋ, ਵਿਜ੍ਜਤ੍ਤਯਾਧਿਗਮੇਨ ਤੇਵਿਜ੍ਜੋ, ਮਗ੍ਗਞਾਣਸਙ੍ਖਾਤੇਨ ਵੇਦੇਨ ਸਮਨ੍ਨਾਗਤਤ੍ਤਾ ਵੇਦਸਮ੍ਪਨ੍ਨੋ, ਨਿਤ੍ਥਰਸਬ੍ਬਪਾਪਤਾਯ ਨ੍ਹਾਤਕੋ ਚ ਅਮ੍ਹੀਤਿ. ਏਤ੍ਥ ਚ ਬ੍ਰਾਹ੍ਮਣੇਨ ਵੁਤ੍ਤਗਾਥਾਪਿ ਅਤ੍ਤਨਾ ਵੁਤ੍ਤਗਾਥਾਪਿ ਪਚ੍ਛਾ ਥੇਰਿਯਾ ਪਚ੍ਚੇਕਂ ਭਾਸਿਤਾਤਿ ਸਬ੍ਬਾ ਥੇਰਿਯਾ ਗਾਥਾ ਏਵ ਜਾਤਾਤਿ.

ਪੁਣ੍ਣਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.

ਸੋਲ਼ਸਨਿਪਾਤਵਣ੍ਣਨਾ ਨਿਟ੍ਠਿਤਾ.