੪. ਤਿਸ੍ਸਾਥੇਰੀਗਾਥਾਵਣ੍ਣਨਾ

ਤਿਸ੍ਸੇ ਸਿਕ੍ਖਸ੍ਸੁ ਸਿਕ੍ਖਾਯਾਤਿ ਤਿਸ੍ਸਾਯ ਸਿਕ੍ਖਮਾਨਾਯ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਸਮ੍ਭਤਕੁਸਲਪਚ੍ਚਯਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਸ੍ਮਿਂ ਸਕ੍ਯਰਾਜਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤਾ ਬੋਧਿਸਤ੍ਤਸ੍ਸ ਓਰੋਧਭੂਤਾ ਪਚ੍ਛਾ ਮਹਾਪਜਾਪਤਿਗੋਤਮਿਯਾ ਸਦ੍ਧਿਂ ਨਿਕ੍ਖਮਿਤ੍ਵਾ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਤਿ. ਤਸ੍ਸਾ ਸਤ੍ਥਾ ਹੇਟ੍ਠਾ ਵੁਤ੍ਤਨਯੇਨੇਵ ਓਭਾਸਂ ਵਿਸ੍ਸਜ੍ਜੇਤ੍ਵਾ –

੪. ‘‘ਤਿਸ੍ਸੇ ਸਿਕ੍ਖਸ੍ਸੁ ਸਿਕ੍ਖਾਯ, ਮਾ ਤਂ ਯੋਗਾ ਉਪਚ੍ਚਗੁਂ;

ਸਬ੍ਬਯੋਗਵਿਸਂਯੁਤ੍ਤਾ, ਚਰ ਲੋਕੇ ਅਨਾਸਵਾ’’ਤਿ. – ਗਾਥਂ ਅਭਾਸਿ;

ਤਤ੍ਥ ਤਿਸ੍ਸੇਤਿ ਤਸ੍ਸਾ ਆਲਪਨਂ. ਸਿਕ੍ਖਸ੍ਸੁ ਸਿਕ੍ਖਾਯਾਤਿ ਅਧਿਸੀਲਸਿਕ੍ਖਾਦਿਕਾਯ ਤਿਵਿਧਾਯ ਸਿਕ੍ਖਾਯ ਸਿਕ੍ਖ, ਮਗ੍ਗਸਮ੍ਪਯੁਤ੍ਤਾ ਤਿਸ੍ਸੋ ਸਿਕ੍ਖਾਯੋ ਸਮ੍ਪਾਦੇਹੀਤਿ ਅਤ੍ਥੋ. ਇਦਾਨਿ ਤਾਸਂ ਸਮ੍ਪਾਦਨੇ ਕਾਰਣਮਾਹ ‘‘ਮਾ ਤਂ ਯੋਗਾ ਉਪਚ੍ਚਗੁ’’ਨ੍ਤਿ ਮਨੁਸ੍ਸਤ੍ਤਂ, ਇਨ੍ਦ੍ਰਿਯਾਵੇਕਲ੍ਲਂ, ਬੁਦ੍ਧੁਪ੍ਪਾਦੋ, ਸਦ੍ਧਾਪਟਿਲਾਭੋਤਿ ਇਮੇ ਯੋਗਾ ਸਮਯਾ ਦੁਲ੍ਲਭਕ੍ਖਣਾ ਤਂ ਮਾ ਅਤਿਕ੍ਕਮੁਂ. ਕਾਮਯੋਗਾਦਯੋ ਏਵ ਵਾ ਚਤ੍ਤਾਰੋ ਯੋਗਾ ਤਂ ਮਾ ਉਪਚ੍ਚਗੁਂ ਮਾ ਅਭਿਭਵੇਯ੍ਯੁਂ. ਸਬ੍ਬਯੋਗਵਿਸਂਯੁਤ੍ਤਾਤਿ ਸਬ੍ਬੇਹਿ ਕਾਮਯੋਗਾਦੀਹਿ ਯੋਗੇਹਿ ਵਿਮੁਤ੍ਤਾ ਤਤੋ ਏਵ ਅਨਾਸਵਾ ਹੁਤ੍ਵਾ ਲੋਕੇ ਚਰ, ਦਿਟ੍ਠਸੁਖਵਿਹਾਰੇਨ ਵਿਹਰਾਹੀਤਿ ਅਤ੍ਥੋ.

ਸਾ ਤਂ ਗਾਥਂ ਸੁਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣੀਤਿ ਆਦਿਨਯੋ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਤਿਸ੍ਸਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.