੧੨. ਧਮ੍ਮਦਿਨ੍ਨਾਥੇਰੀਗਾਥਾਵਣ੍ਣਨਾ

ਛਨ੍ਦਜਾਤਾ ਅਵਸਾਯੀਤਿ ਧਮ੍ਮਦਿਨ੍ਨਾਥੇਰਿਯਾ ਗਾਥਾ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਪਰਾਧੀਨਵੁਤ੍ਤਿਕਾ ਹੁਤ੍ਵਾ ਜੀਵਨ੍ਤੀ ਨਿਰੋਧਤੋ ਵੁਟ੍ਠਿਤਸ੍ਸ ਅਗ੍ਗਸਾਵਕਸ੍ਸ ਪੂਜਾਸਕ੍ਕਾਰਪੁਬ੍ਬਕਂ ਦਾਨਂ ਦਤ੍ਵਾ ਦੇਵਲੋਕੇ ਨਿਬ੍ਬਤ੍ਤਾ. ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਫੁਸ੍ਸਸ੍ਸ ਭਗਵਤੋ ਕਾਲੇ ਸਤ੍ਥੁ ਵੇਮਾਤਿਕਭਾਤਿਕਾਨਂ ਕਮ੍ਮਿਕਸ੍ਸ ਗੇਹੇ ਵਸਮਾਨਾ ਦਾਨਂ ਪਟਿਚ੍ਚ ‘‘ਏਕਂ ਦੇਹੀ’’ਤਿ ਸਾਮਿਕੇਨ ਵੁਤ੍ਤੇ ਦ੍ਵੇ ਦੇਨ੍ਤੀ, ਬਹੁਂ ਪੁਞ੍ਞਂ ਕਤ੍ਵਾ ਕਸ੍ਸਪਬੁਦ੍ਧਕਾਲੇ ਕਿਕਿਸ੍ਸ ਕਾਸਿਕਰਞ੍ਞੋ ਗੇਹੇ ਪਟਿਸਨ੍ਧਿਂ ਗਹੇਤ੍ਵਾ ਸਤ੍ਤਨ੍ਨਂ ਭਗਿਨੀਨਂ ਅਬ੍ਭਨ੍ਤਰਾ ਹੁਤ੍ਵਾ ਵੀਸਤਿਵਸ੍ਸਸਹਸ੍ਸਾਨਿ ਬ੍ਰਹ੍ਮਚਰਿਯਂ ਚਰਿਤ੍ਵਾ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤਾ ਵਿਸਾਖਸ੍ਸ ਸੇਟ੍ਠਿਨੋ ਗੇਹਂ ਗਤਾ.

ਅਥੇਕਦਿਵਸਂ ਵਿਸਾਖੋ ਸੇਟ੍ਠਿ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਅਨਾਗਾਮੀ ਹੁਤ੍ਵਾ ਘਰਂ ਗਨ੍ਤ੍ਵਾ ਪਾਸਾਦਂ ਅਭਿਰੁਹਨ੍ਤੋ ਸੋਪਾਨਮਤ੍ਥਕੇ ਠਿਤਾਯ ਧਮ੍ਮਦਿਨ੍ਨਾਯ ਪਸਾਰਿਤਹਤ੍ਥਂ ਅਨਾਲਮ੍ਬਿਤ੍ਵਾਵ ਪਾਸਾਦਂ ਅਭਿਰੁਹਿਤ੍ਵਾ ਭੁਞ੍ਜਮਾਨੋਪਿ ਤੁਣ੍ਹੀਭੂਤੋਵ ਭੁਞ੍ਜਿ. ਧਮ੍ਮਦਿਨ੍ਨਾ ਤਂ ਉਪਧਾਰੇਤ੍ਵਾ, ‘‘ਅਯ੍ਯਪੁਤ੍ਤ, ਕਸ੍ਮਾ ਤ੍ਵਂ ਅਜ੍ਜ ਮਮ ਹਤ੍ਥਂ ਨਾਲਮ੍ਬਿ, ਭੁਞ੍ਜਮਾਨੋਪਿ ਨ ਕਿਞ੍ਚਿ ਕਥੇਸਿ, ਅਤ੍ਥਿ ਨੁ ਖੋ ਕੋਚਿ ਮਯ੍ਹਂ ਦੋਸੋ’’ਤਿ ਆਹ. ਵਿਸਾਖੋ ‘‘ਧਮ੍ਮਦਿਨ੍ਨੇ, ਨ ਤੇ ਦੋਸੋ ਅਤ੍ਥਿ, ਅਹਂ ਪਨ ਅਜ੍ਜ ਪਟ੍ਠਾਯ ਇਤ੍ਥਿਸਰੀਰਂ ਫੁਸਿਤੁਂ ਆਹਾਰੇ ਚ ਲੋਲਭਾਵਂ ਕਾਤੁਂ ਅਨਰਹੋ, ਤਾਦਿਸੋ ਮਯਾ ਧਮ੍ਮੋ ਪਟਿਵਿਦ੍ਧੋ. ਤ੍ਵਂ ਪਨ ਸਚੇ ਇਚ੍ਛਸਿ, ਇਮਸ੍ਮਿਂਯੇਵ ਗੇਹੇ ਵਸ. ਨੋ ਚੇ ਇਚ੍ਛਸਿ, ਯਤ੍ਤਕੇਨ ਧਨੇਨ ਤੇ ਅਤ੍ਥੋ, ਤਤ੍ਤਕਂ ਗਹੇਤ੍ਵਾ ਕੁਲਘਰਂ ਗਚ੍ਛਾਹੀ’’ਤਿ ਆਹ. ‘‘ਨਾਹਂ, ਅਯ੍ਯਪੁਤ੍ਤ, ਤਯਾ ਵਨ੍ਤਵਮਨਂ ਆਚਮਿਸ੍ਸਾਮਿ, ਪਬ੍ਬਜ੍ਜਂ ਮੇ ਅਨੁਜਾਨਾਹੀ’’ਤਿ. ਵਿਸਾਖੋ ‘‘ਸਾਧੁ, ਧਮ੍ਮਦਿਨ੍ਨੇ’’ਤਿ ਤਂ ਸੁਵਣ੍ਣਸਿਵਿਕਾਯ ਭਿਕ੍ਖੁਨਿਉਪਸ੍ਸਯਂ ਪੇਸੇਸਿ. ਸਾ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਗਹੇਤ੍ਵਾ ਕਤਿਪਾਹਂ ਤਤ੍ਥ ਵਸਿਤ੍ਵਾ ਵਿਵੇਕਵਾਸਂ ਵਸਿਤੁਕਾਮਾ ਆਚਰਿਯੁਪਜ੍ਝਾਯਾਨਂ ਸਨ੍ਤਿਕਂ ਗਨ੍ਤ੍ਵਾ, ‘‘ਅਯ੍ਯਾ, ਆਕਿਣ੍ਣਟ੍ਠਾਨੇ ਮਯ੍ਹਂ ਚਿਤ੍ਤਂ ਨ ਰਮਤਿ, ਗਾਮਕਾਵਾਸਂ ਗਚ੍ਛਾਮੀ’’ਤਿ ਆਹ. ਭਿਕ੍ਖੁਨਿਯੋ ਤਂ ਗਾਮਕਾਵਾਸਂ ਨਯਿਂਸੁ. ਸਾ ਤਤ੍ਥ ਵਸਨ੍ਤੀ ਅਤੀਤੇ ਮਦ੍ਦਿਤਸਙ੍ਖਾਰਤਾਯ ਨ ਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੩.੯੫-੧੩੦) –

‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

‘‘ਤਦਾਹਂ ਹਂਸਵਤਿਯਂ, ਕੁਲੇ ਅਞ੍ਞਤਰੇ ਅਹੁਂ;

ਪਰਕਮ੍ਮਕਾਰੀ ਆਸਿਂ, ਨਿਪਕਾ ਸੀਲਸਂਵੁਤਾ.

‘‘ਪਦੁਮੁਤ੍ਤਰਬੁਦ੍ਧਸ੍ਸ, ਸੁਜਾਤੋ ਅਗ੍ਗਸਾਵਕੋ;

ਵਿਹਾਰਾ ਅਭਿਨਿਕ੍ਖਮ੍ਮ, ਪਿਣ੍ਡਪਾਤਾਯ ਗਚ੍ਛਤਿ.

‘‘ਘਟਂ ਗਹੇਤ੍ਵਾ ਗਚ੍ਛਨ੍ਤੀ, ਤਦਾ ਉਦਕਹਾਰਿਕਾ;

ਤਂ ਦਿਸ੍ਵਾ ਅਦਦਂ ਪੂਪਂ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਪਟਿਗ੍ਗਹੇਤ੍ਵਾ ਤਤ੍ਥੇਵ, ਨਿਸਿਨ੍ਨੋ ਪਰਿਭੁਞ੍ਜਿ ਸੋ;

ਤਤੋ ਨੇਤ੍ਵਾਨ ਤਂ ਗੇਹਂ, ਅਦਾਸਿਂ ਤਸ੍ਸ ਭੋਜਨਂ.

‘‘ਤਤੋ ਮੇ ਅਯ੍ਯਕੋ ਤੁਟ੍ਠੋ, ਅਕਰੀ ਸੁਣਿਸਂ ਸਕਂ;

ਸਸ੍ਸੁਯਾ ਸਹ ਗਨ੍ਤ੍ਵਾਨ, ਸਮ੍ਬੁਦ੍ਧਂ ਅਭਿਵਾਦਯਿਂ.

‘‘ਤਦਾ ਸੋ ਧਮ੍ਮਕਥਿਕਂ, ਭਿਕ੍ਖੁਨਿਂ ਪਰਿਕਿਤ੍ਤਯਂ;

ਠਪੇਸਿ ਏਤਦਗ੍ਗਮ੍ਹਿ, ਤਂ ਸੁਤ੍ਵਾ ਮੁਦਿਤਾ ਅਹਂ.

‘‘ਨਿਮਨ੍ਤਯਿਤ੍ਵਾ ਸੁਗਤਂ, ਸਸਙ੍ਘਂ ਲੋਕਨਾਯਕਂ;

ਮਹਾਦਾਨਂ ਦਦਿਤ੍ਵਾਨ, ਤਂ ਠਾਨਮਭਿਪਤ੍ਥਯਿਂ.

‘‘ਤਤੋ ਮਂ ਸੁਗਤੋ ਆਹ, ਘਨਨਿਨ੍ਨਾਦਸੁਸ੍ਸਰੋ;

ਮਮੁਪਟ੍ਠਾਨਨਿਰਤੇ, ਸਸਙ੍ਘਪਰਿਵੇਸਿਕੇ.

‘‘ਸਦ੍ਧਮ੍ਮਸ੍ਸਵਨੇ ਯੁਤ੍ਤੇ, ਗੁਣਵਦ੍ਧਿਤਮਾਨਸੇ;

ਭਦ੍ਦੇ ਭਵਸ੍ਸੁ ਮੁਦਿਤਾ, ਲਚ੍ਛਸੇ ਪਣਿਧੀਫਲਂ.

‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

‘‘ਤਸ੍ਸ ਧਮ੍ਮੇਸੁ ਦਾਯਾਦਾ, ਓਰਸਾ ਧਮ੍ਮਨਿਮ੍ਮਿਤਾ;

ਧਮ੍ਮਦਿਨ੍ਨਾਤਿ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਿਕਾ.

‘‘ਤਂ ਸੁਤ੍ਵਾ ਮੁਦਿਤਾ ਹੁਤ੍ਵਾ, ਯਾਵਜੀਵਂ ਮਹਾਮੁਨਿਂ;

ਮੇਤ੍ਤਚਿਤ੍ਤਾ ਪਰਿਚਰਿਂ, ਪਚ੍ਚਯੇਹਿ ਵਿਨਾਯਕਂ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

‘‘ਉਪਟ੍ਠਾਕੋ ਮਹੇਸਿਸ੍ਸ, ਤਦਾ ਆਸਿ ਨਰਿਸ੍ਸਰੋ;

ਕਾਸਿਰਾਜਾ ਕਿਕੀ ਨਾਮ, ਬਾਰਾਣਸਿਪੁਰੁਤ੍ਤਮੇ.

‘‘ਛਟ੍ਠਾ ਤਸ੍ਸਾਸਹਂ ਧੀਤਾ, ਸੁਧਮ੍ਮਾ ਇਤਿ ਵਿਸ੍ਸੁਤਾ;

ਧਮ੍ਮਂ ਸੁਤ੍ਵਾ ਜਿਨਗ੍ਗਸ੍ਸ, ਪਬ੍ਬਜ੍ਜਂ ਸਮਰੋਚਯਿਂ.

‘‘ਅਨੁਜਾਨਿ ਨ ਨੋ ਤਾਤੋ, ਅਗਾਰੇਵ ਤਦਾ ਮਯਂ;

ਵੀਸਵਸ੍ਸਸਹਸ੍ਸਾਨਿ, ਵਿਚਰਿਮ੍ਹ ਅਤਨ੍ਦਿਤਾ.

‘‘ਕੋਮਾਰਿਬ੍ਰਹ੍ਮਚਰਿਯਂ, ਰਾਜਕਞ੍ਞਾ ਸੁਖੇਧਿਤਾ;

ਬੁਦ੍ਧੋਪਟ੍ਠਾਨਨਿਰਤਾ, ਮੁਦਿਤਾ ਸਤ੍ਤ ਧੀਤਰੋ.

‘‘ਸਮਣੀ ਸਮਣਗੁਤ੍ਤਾ ਚ, ਭਿਕ੍ਖੁਨੀ ਭਿਕ੍ਖੁਦਾਯਿਕਾ;

ਧਮ੍ਮਾ ਚੇਵ ਸੁਧਮ੍ਮਾ ਚ, ਸਤ੍ਤਮੀ ਸਙ੍ਘਦਾਯਿਕਾ.

‘‘ਖੇਮਾ ਉਪ੍ਪਲਵਣ੍ਣਾ ਚ, ਪਟਾਚਾਰਾ ਚ ਕੁਣ੍ਡਲਾ;

ਗੋਤਮੀ ਚ ਅਹਞ੍ਚੇਵ, ਵਿਸਾਖਾ ਹੋਤਿ ਸਤ੍ਤਮੀ.

‘‘ਤੇਹਿ ਕਮ੍ਮੇਹਿ ਸੁਕਤੇਹਿ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਪਚ੍ਛਿਮੇ ਚ ਭਵੇ ਦਾਨਿ, ਗਿਰਿਬ੍ਬਜਪੁਰੁਤ੍ਤਮੇ;

ਜਾਤਾ ਸੇਟ੍ਠਿਕੁਲੇ ਫੀਤੇ, ਸਬ੍ਬਕਾਮਸਮਿਦ੍ਧਿਨੇ.

‘‘ਯਦਾ ਰੂਪਗੁਣੂਪੇਤਾ, ਪਠਮੇ ਯੋਬ੍ਬਨੇ ਠਿਤਾ;

ਤਦਾ ਪਰਕੁਲਂ ਗਨ੍ਤ੍ਵਾ, ਵਸਿਂ ਸੁਖਸਮਪ੍ਪਿਤਾ.

‘‘ਉਪੇਤ੍ਵਾ ਲੋਕਸਰਣਂ, ਸੁਣਿਤ੍ਵਾ ਧਮ੍ਮਦੇਸਨਂ;

ਅਨਾਗਾਮਿਫਲਂ ਪਤ੍ਤੋ, ਸਾਮਿਕੋ ਮੇ ਸੁਬੁਦ੍ਧਿਮਾ.

‘‘ਤਦਾਹਂ ਅਨੁਜਾਨੇਤ੍ਵਾ, ਪਬ੍ਬਜਿਂ ਅਨਗਾਰਿਯਂ;

ਨਚਿਰੇਨੇਵ ਕਾਲੇਨ, ਅਰਹਤ੍ਤਮਪਾਪੁਣਿਂ.

‘‘ਤਦਾ ਉਪਾਸਕੋ ਸੋ ਮਂ, ਉਪਗਨ੍ਤ੍ਵਾ ਅਪੁਚ੍ਛਥ;

ਗਮ੍ਭੀਰੇ ਨਿਪੁਣੇ ਪਞ੍ਹੇ, ਤੇ ਸਬ੍ਬੇ ਬ੍ਯਾਕਰਿਂ ਅਹਂ.

‘‘ਜਿਨੋ ਤਸ੍ਮਿਂ ਗੁਣੇ ਤੁਟ੍ਠੋ, ਏਤਦਗ੍ਗੇ ਠਪੇਸਿ ਮਂ;

ਭਿਕ੍ਖੁਨਿਂ ਧਮ੍ਮਕਥਿਕਂ, ਨਾਞ੍ਞਂ ਪਸ੍ਸਾਮਿ ਏਦਿਸਿਂ.

‘‘ਧਮ੍ਮਦਿਨ੍ਨਾ ਯਥਾ ਧੀਰਾ, ਏਵਂ ਧਾਰੇਥ ਭਿਕ੍ਖਵੋ;

ਏਵਾਹਂ ਪਣ੍ਡਿਤਾ ਹੋਮਿ, ਨਾਯਕੇਨਾਨੁਕਮ੍ਪਿਤਾ.

‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿ ਸਮੂਹਤਾ.

‘‘ਯਸ੍ਸਤ੍ਥਾਯ ਪਬ੍ਬਜਿਤਾ, ਅਗਾਰਸ੍ਮਾਨਗਾਰਿਯਂ;

ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ.

‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਪਰਚਿਤ੍ਤਾਨਿ ਜਾਨਾਮਿ, ਸਤ੍ਥੁਸਾਸਨਕਾਰਿਕਾ.

‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਖੇਪੇਤ੍ਵਾ ਆਸਵੇ ਸਬ੍ਬੇ, ਵਿਸੁਦ੍ਧਾਸਿਂ ਸੁਨਿਮ੍ਮਲਾ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ. (ਅਪ. ਥੇਰੀ ੨.੩.੯੫-੧੩੦);

ਅਰਹਤ੍ਤਂ ਪਨ ਪਤ੍ਵਾ ‘‘ਮਯ੍ਹਂ ਮਨਂ ਮਤ੍ਥਕਂ ਪਤ੍ਤਂ, ਇਦਾਨਿ ਇਧ ਵਸਿਤ੍ਵਾ ਕਿਂ ਕਰਿਸ੍ਸਾਮਿ, ਰਾਜਗਹਮੇਵ ਗਨ੍ਤ੍ਵਾ ਸਤ੍ਥਾਰਞ੍ਚ ਵਨ੍ਦਿਸ੍ਸਾਮਿ, ਬਹੂ ਚ ਮੇ ਞਾਤਕਾ ਪੁਞ੍ਞਾਨਿ ਕਰਿਸ੍ਸਨ੍ਤੀ’’ਤਿ ਭਿਕ੍ਖੁਨੀਹਿ ਸਦ੍ਧਿਂ ਰਾਜਗਹਮੇਵ ਪਚ੍ਚਾਗਤਾ. ਵਿਸਾਖੋ ਤਸ੍ਸਾ ਆਗਤਭਾਵਂ ਸੁਤ੍ਵਾ ਤਸ੍ਸਾ ਅਧਿਗਮਂ ਵੀਮਂਸਨ੍ਤੋ ਪਞ੍ਚਕ੍ਖਨ੍ਧਾਦਿਵਸੇਨ ਪਞ੍ਹਂ ਪੁਚ੍ਛਿ. ਧਮ੍ਮਦਿਨ੍ਨਾ ਸੁਨਿਸਿਤੇਨ ਸਤ੍ਥੇਨ ਕੁਮੁਦਨਾਲ਼ੇ ਛਿਨ੍ਦਨ੍ਤੀ ਵਿਯ ਪੁਚ੍ਛਿਤਂ ਪੁਚ੍ਛਿਤਂ ਪਞ੍ਹਂ ਵਿਸ੍ਸਜ੍ਜੇਸਿ. ਵਿਸਾਖੋ ਸਬ੍ਬਂ ਪੁਚ੍ਛਾਵਿਸ੍ਸਜ੍ਜਨਨਯਂ ਸਤ੍ਥੁ ਆਰੋਚੇਸਿ. ਸਤ੍ਥਾ ‘‘ਪਣ੍ਡਿਤਾ, ਵਿਸਾਖ, ਧਮ੍ਮਦਿਨ੍ਨਾ ਭਿਕ੍ਖੁਨੀ’’ਤਿਆਦਿਨਾ ਤਂ ਪਸਂਸਨ੍ਤੋ ਸਬ੍ਬਞ੍ਞੁਤਞ੍ਞਾਣੇਨ ਸਦ੍ਧਿਂ ਸਂਸਨ੍ਦੇਤ੍ਵਾ ਬ੍ਯਾਕਤਭਾਵਂ ਪਵੇਦੇਤ੍ਵਾ ਤਮੇਵ ਚੂਲ਼ਵੇਦਲ੍ਲਸੁਤ੍ਤਂ (ਮ. ਨਿ. ੧.੪੬੦) ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਤਂ ਧਮ੍ਮਕਥਿਕਾਨਂ ਭਿਕ੍ਖੁਨੀਨਂ ਅਗ੍ਗਟ੍ਠਾਨੇ ਠਪੇਸਿ. ਯਦਾ ਪਨ ਸਾ ਤਸ੍ਮਿਂ ਗਾਮਕਾਵਾਸੇ ਵਸਨ੍ਤੀ ਹੇਟ੍ਠਿਮਮਗ੍ਗੇ ਅਧਿਗਨ੍ਤ੍ਵਾ ਅਗ੍ਗਮਗ੍ਗਤ੍ਥਾਯ ਵਿਪਸ੍ਸਨਂ ਪਟ੍ਠਪੇਸਿ, ਤਦਾ –

੧੨. ‘‘ਛਨ੍ਦਜਾਤਾ ਅਵਸਾਯੀ, ਮਨਸਾ ਚ ਫੁਟਾ ਸਿਯਾ;

ਕਾਮੇਸੁ ਅਪ੍ਪਟਿਬਦ੍ਧਚਿਤ੍ਤਾ, ਉਦ੍ਧਂਸੋਤਾਤਿ ਵੁਚ੍ਚਤੀ’’ਤਿ. –

ਇਮਂ ਗਾਥਂ ਅਭਾਸਿ.

ਤਤ੍ਥ ਛਨ੍ਦਜਾਤਾਤਿ ਅਗ੍ਗਫਲਤ੍ਥਂ ਜਾਤਚ੍ਛਨ੍ਦਾ. ਅਵਸਾਯੀਤਿ ਅਵਸਾਯੋ ਵੁਚ੍ਚਤਿ ਅਵਸਾਨਂ ਨਿਟ੍ਠਾਨਂ, ਤਮ੍ਪਿ ਕਾਮੇਸੁ ਅਪ੍ਪਟਿਬਦ੍ਧਚਿਤ੍ਤਤਾਯ ‘‘ਉਦ੍ਧਂਸੋਤਾ’’ਤਿ ਵਕ੍ਖਮਾਨਤ੍ਤਾ ਸਮਣਕਿਚ੍ਚਸ੍ਸ ਨਿਟ੍ਠਾਨਂ ਵੇਦਿਤਬ੍ਬਂ, ਨ ਯਸ੍ਸ ਕਸ੍ਸਚਿ, ਤਸ੍ਮਾ ਪਦਦ੍ਵਯੇਨਾਪਿ ਅਪ੍ਪਤ੍ਤਮਾਨਸਾ ਅਨੁਤ੍ਤਰਂ ਯੋਗਕ੍ਖੇਮਂ ਪਤ੍ਥਯਮਾਨਾਤਿ ਅਯਮਤ੍ਥੋ ਵੁਤ੍ਤੋ ਹੋਤਿ. ਮਨਸਾ ਚ ਫੁਟਾ ਸਿਯਾਤਿ ਹੇਟ੍ਠਿਮੇਹਿ ਤੀਹਿ ਮਗ੍ਗਚਿਤ੍ਤੇਹਿ ਨਿਬ੍ਬਾਨਂ ਫੁਟਾ ਫੁਸਿਤਾ ਭਵੇਯ੍ਯ. ਕਾਮੇਸੁ ਅਪ੍ਪਟਿਬਦ੍ਧਚਿਤ੍ਤਾਤਿ ਅਨਾਗਾਮਿਮਗ੍ਗਵਸੇਨ ਕਾਮੇਸੁ ਨ ਪਟਿਬਦ੍ਧਚਿਤ੍ਤਾ. ਉਦ੍ਧਂਸੋਤਾਤਿ ਉਦ੍ਧਮੇਵ ਮਗ੍ਗਸੋਤੋ ਸਂਸਾਰਸੋਤੋ ਚ ਏਤਿਸ੍ਸਾਤਿ ਉਦ੍ਧਂਸੋਤਾ. ਅਨਾਗਾਮਿਨੋ ਹਿ ਯਥਾ ਅਗ੍ਗਮਗ੍ਗੋ ਉਪ੍ਪਜ੍ਜਤਿ, ਨ ਅਞ੍ਞੋ, ਏਵਂ ਅਵਿਹਾਦੀਸੁ ਉਪ੍ਪਨ੍ਨਸ੍ਸ ਯਾਵ ਅਕਨਿਟ੍ਠਾ ਉਦ੍ਧਮੇਵ ਉਪ੍ਪਤ੍ਤਿ ਹੋਤੀਤਿ.

ਧਮ੍ਮਦਿਨ੍ਨਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.