੧੯. ਪਞ੍ਞਾਸਨਿਪਾਤੋ

੧. ਤਾਲਪੁਟਤ੍ਥੇਰਗਾਥਾਵਣ੍ਣਨਾ

ਪਞ੍ਞਾਸਨਿਪਾਤੇ ਕਦਾ ਨੁਹਨ੍ਤਿਆਦਿਕਾ ਆਯਸ੍ਮਤੋ ਤਾਲਪੁਟਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਅਞ੍ਞਤਰਸ੍ਮਿਂ ਨਟਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਕੁਲਾਨੁਰੂਪੇਸੁ ਨਚ੍ਚਟ੍ਠਾਨੇਸੁ ਨਿਪ੍ਫਤ੍ਤਿਂ ਗਨ੍ਤ੍ਵਾ ਸਕਲਜਮ੍ਬੁਦੀਪੇ ਪਾਕਟੋ ਨਟਗਾਮਣਿ ਅਹੋਸਿ. ਸੋ ਪਞ੍ਚਸਤਮਾਤੁਗਾਮਪਰਿਵਾਰੋ ਮਹਤਾ ਨਟਵਿਭਵੇਨ ਗਾਮਨਿਗਮਰਾਜਧਾਨੀਸੁ ਸਮਜ੍ਜਂ ਦਸ੍ਸੇਤ੍ਵਾ, ਮਹਨ੍ਤਂ ਪੂਜਾਸਕ੍ਕਾਰਂ ਲਭਿਤ੍ਵਾ, ਵਿਚਰਨ੍ਤੋ ਰਾਜਗਹਂ ਆਗਨ੍ਤ੍ਵਾ, ਨਗਰਵਾਸੀਨਂ ਸਮਜ੍ਜਂ ਦਸ੍ਸੇਤ੍ਵਾ, ਲਦ੍ਧਸਮ੍ਮਾਨਸਕ੍ਕਾਰੋ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ, ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਭਗਵਨ੍ਤਂ ਏਤਦਵੋਚ – ‘‘ਸੁਤਮੇਤਂ, ਭਨ੍ਤੇ, ਪੁਬ੍ਬਕਾਨਂ ਆਚਰਿਯਪਾਚਰਿਯਾਨਂ ਨਟਾਨਂ ਭਾਸਮਾਨਾਨਂ ‘ਯੋ ਸੋ ਨਟੋ ਰਙ੍ਗਮਜ੍ਝੇ ਸਮਜ੍ਜਮਜ੍ਝੇ ਸਚ੍ਚਾਲਿਕੇਨ ਜਨਂ ਹਾਸੇਤਿ ਰਮੇਤਿ, ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਪਹਾਸਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਤੀ’ਤਿ, ਇਧ ਭਗਵਾ ਕਿਮਾਹਾ’’ਤਿ. ਅਥ ਨਂ ਭਗਵਾ ਤਿਕ੍ਖਤ੍ਤੁਂ ਪਟਿਕ੍ਖਿਪਿ ‘‘ਮਾ ਮਂ ਏਤਂ ਪੁਚ੍ਛੀ’’ਤਿ. ਚਤੁਤ੍ਥਵਾਰਂ ਪੁਟ੍ਠੋ ਆਹ – ‘‘ਗਾਮਣਿ, ਇਮੇ ਸਤ੍ਤਾ ਪਕਤਿਯਾਪਿ ਰਾਗਬਨ੍ਧਨਬਦ੍ਧਾ ਦੋਸਬਨ੍ਧਨਬਦ੍ਧਾ ਮੋਹਬਨ੍ਧਨਬਦ੍ਧਾ ਤੇਸਂ ਭਿਯ੍ਯੋਪਿ ਰਜਨੀਯੇ ਦੋਸਨੀਯੇ ਮੋਹਨੀਯੇ ਧਮ੍ਮੇ ਉਪਸਂਹਰਨ੍ਤੋ ਪਮਾਦੇਤ੍ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਨਿਰਯੇ ਉਪਪਜ੍ਜਤਿ. ਸਚੇ ਪਨਸ੍ਸ ਏਵਂਦਿਟ੍ਠਿ ਹੋਤਿ ‘ਯੋ ਸੋ ਨਟੋ ਰਙ੍ਗਮਜ੍ਝੇ ਸਮਜ੍ਜਮਜ੍ਝੇ ਸਚ੍ਚਾਲਿਕੇਨ ਜਨਂ ਹਾਸੇਤਿ ਰਮੇਤਿ, ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਪਹਾਸਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਤੀ’’’ਤਿ ਸਾਸ੍ਸ ਹੋਤਿ ਮਿਚ੍ਛਾਦਿਟ੍ਠਿ. ਮਿਚ੍ਛਾਦਿਟ੍ਠਿਸ੍ਸ ਚ ਦ੍ਵਿਨ੍ਨਂ ਗਤੀਨਂ ਅਞ੍ਞਤਰਾ ਗਤਿ ਇਚ੍ਛਿਤਬ੍ਬਾ, ਨਿਰਯਸ੍ਸ ਵਾ ਤਿਰਚ੍ਛਾਨਯੋਨਿਯਾ ਵਾਤਿ. ਤਂ ਸੁਤ੍ਵਾ ਤਾਲਪੁਟੋ ਗਾਮਣਿ ਪਰੋਦਿ. ਨਨੁ ਗਾਮਣਿ ਪਗੇਵ ਮਯਾ ਪਟਿਕ੍ਖਿਤ੍ਤੋ ‘‘ਮਾ ਮਂ ਏਤਂ ਪੁਚ੍ਛੀ’’ਤਿ (ਸਂ. ਨਿ. ੪.੩੫੪)? ‘‘ਨਾਹਂ, ਭਨ੍ਤੇ, ਏਤਂ ਰੋਦਾਮਿ, ਯਂ ਮਂ ਭਗਵਾ ਨਟਾਨਂ ਅਭਿਸਮ੍ਪਰਾਯਂ ਏਵਮਾਹਾ’’ਤਿ. ਅਪਿ ਚਾਹਂ, ਭਨ੍ਤੇ, ਪੁਬ੍ਬਕੇਹਿ ਆਚਰਿਯਪਾਚਰਿਯੇਹਿ ਨਟੇਹਿ ਵਞ੍ਚਿਤੋ ‘‘ਨਟੋ ਮਹਾਜਨਸ੍ਸ ਨਟਸਮਜ੍ਜਂ ਦਸ੍ਸੇਤ੍ਵਾ ਸੁਗਤਿਂ ਉਪਪਜ੍ਜਤੀ’’ਤਿ. ਸੋ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਨ੍ਨੋ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ, ਅਧਿਗਤਾਰਹਤ੍ਤੋ ਪਨ ਅਰਹਤ੍ਤਪ੍ਪਤ੍ਤਿਤੋ ਪੁਬ੍ਬੇ ਯੇਨਾਕਾਰੇਨ ਅਤ੍ਤਨੋ ਚਿਤ੍ਤਂ ਨਿਗ੍ਗਣ੍ਹਨਵਸੇਨ ਯੋਨਿਸੋਮਨਸਿਕਾਰੋ ਉਦਪਾਦਿ, ਤਂ ਅਨੇਕਧਾ ਵਿਭਜਿਤ੍ਵਾ ਦਸ੍ਸੇਤੁਂ –

੧੦੯੪. ‘‘ਕਦਾ ਨੁਹਂ ਪਬ੍ਬਤਕਨ੍ਦਰਾਸੁ, ਏਕਾਕਿਯੋ ਅਦ੍ਦੁਤਿਯੋ ਵਿਹਸ੍ਸਂ;

ਅਨਿਚ੍ਚਤੋ ਸਬ੍ਬਭਵਂ ਵਿਪਸ੍ਸਂ, ਤਂ ਮੇ ਇਦਂ ਤਂ ਨੁ ਕਦਾ ਭਵਿਸ੍ਸਤਿ.

੧੦੯੫. ‘‘ਕਦਾ ਨੁਹਂ ਭਿਨ੍ਨਪਟਨ੍ਧਰੋ ਮੁਨਿ, ਕਾਸਾਵਵਤ੍ਥੋ ਅਮਮੋ ਨਿਰਾਸੋ;

ਰਾਗਞ੍ਚ ਦੋਸਞ੍ਚ ਤਥੇਵ ਮੋਹਂ, ਹਨ੍ਤ੍ਵਾ ਸੁਖੀ ਪਵਨਗਤੋ ਵਿਹਸ੍ਸਂ.

੧੦੯੬. ‘‘ਕਦਾ ਅਨਿਚ੍ਚਂ ਵਧਰੋਗਨੀਲ਼ਂ, ਕਾਯਂ ਇਮਂ ਮਚ੍ਚੁਜਰਾਯੁਪਦ੍ਦੁਤਂ;

ਵਿਪਸ੍ਸਮਾਨੋ ਵੀਤਭਯੋ ਵਿਹਸ੍ਸਂ, ਏਕੋ ਵਨੇ ਤਂ ਨੁ ਕਦਾ ਭਵਿਸ੍ਸਤਿ.

੧੦੯੭. ‘‘ਕਦਾ ਨੁਹਂ ਭਯਜਨਨਿਂ ਦੁਖਾਵਹਂ, ਤਣ੍ਹਾਲਤਂ ਬਹੁਵਿਧਾਨੁਵਤ੍ਤਨਿਂ;

ਪਞ੍ਞਾਮਯਂ ਤਿਖਿਣਮਸਿਂ ਗਹੇਤ੍ਵਾ, ਛੇਤ੍ਵਾ ਵਸੇ ਤਮ੍ਪਿ ਕਦਾ ਭਵਿਸ੍ਸਤਿ.

੧੦੯੮. ‘‘ਕਦਾ ਨੁ ਪਞ੍ਞਾਮਯਮੁਗ੍ਗਤੇਜਂ, ਸਤ੍ਥਂ ਇਸੀਨਂ ਸਹਸਾਦਿਯਿਤ੍ਵਾ;

ਮਾਰਂ ਸਸੇਨਂ ਸਹਸਾ ਭਞ੍ਜਿਸ੍ਸਂ, ਸੀਹਾਸਨੇ ਤਂ ਨੁ ਕਦਾ ਭਵਿਸ੍ਸਤਿ.

੧੦੯੯. ‘‘ਕਦਾ ਨੁਹਂ ਸਬ੍ਭਿ ਸਮਾਗਮੇਸੁ, ਦਿਟ੍ਠੋ ਭਵੇ ਧਮ੍ਮਗਰੂਹਿ ਤਾਦਿਭਿ;

ਯਾਥਾਵਦਸ੍ਸੀਹਿ ਜਿਤਿਨ੍ਦ੍ਰਿਯੇਹਿ, ਪਧਾਨਿਯੋ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੦. ‘‘ਕਦਾ ਨੁ ਮਂ ਤਨ੍ਦਿ ਖੁਦਾ ਪਿਪਾਸਾ, ਵਾਤਾਤਪਾ ਕੀਟਸਰੀਸਪਾ ਵਾ;

ਨ ਬਾਧਯਿਸ੍ਸਨ੍ਤਿ ਨ ਤਂ ਗਿਰਿਬ੍ਬਜੇ, ਅਤ੍ਥਤ੍ਥਿਯਂ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੧. ‘‘ਕਦਾ ਨੁ ਖੋ ਯਂ ਵਿਦਿਤਂ ਮਹੇਸਿਨਾ, ਚਤ੍ਤਾਰਿ ਸਚ੍ਚਾਨਿ ਸੁਦੁਦ੍ਦਸਾਨਿ;

ਸਮਾਹਿਤਤ੍ਤੋ ਸਤਿਮਾ ਅਗਚ੍ਛਂ, ਪਞ੍ਞਾਯ ਤਂ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੨. ‘‘ਕਦਾ ਨੁ ਰੂਪੇ ਅਮਿਤੇ ਚ ਸਦ੍ਦੇ, ਗਨ੍ਧੇ ਰਸੇ ਫੁਸਿਤਬ੍ਬੇ ਚ ਧਮ੍ਮੇ;

ਆਦਿਤ੍ਤਤੋਹਂ ਸਮਥੇਹਿ ਯੁਤ੍ਤੋ, ਪਞ੍ਞਾਯ ਦਚ੍ਛਂ ਤਦਿਦਂ ਕਦਾ ਮੇ.

੧੧੦੩. ‘‘ਕਦਾ ਨੁਹਂ ਦੁਬ੍ਬਚਨੇਨ ਵੁਤ੍ਤੋ, ਤਤੋ ਨਿਮਿਤ੍ਤਂ ਵਿਮਨੋ ਨ ਹੇਸ੍ਸਂ;

ਅਥੋ ਪਸਤ੍ਥੋਪਿ ਤਤੋ ਨਿਮਿਤ੍ਤਂ, ਤੁਟ੍ਠੋ ਨ ਹੇਸ੍ਸਂ ਤਦਿਦਂ ਕਦਾ ਮੇ.

੧੧੦੪. ‘‘ਕਦਾ ਨੁ ਕਟ੍ਠੇ ਚ ਤਿਣੇ ਲਤਾ ਚ, ਖਨ੍ਧੇ ਇਮੇਹਂ ਅਮਿਤੇ ਚ ਧਮ੍ਮੇ;

ਅਜ੍ਝਤ੍ਤਿਕਾਨੇਵ ਚ ਬਾਹਿਰਾਨਿ ਚ, ਸਮਂ ਤੁਲੇਯ੍ਯਂ ਤਦਿਦਂ ਕਦਾ ਮੇ.

੧੧੦੫. ‘‘ਕਦਾ ਨੁ ਮਂ ਪਾਵੁਸਕਾਲਮੇਘੋ, ਨਵੇਨ ਤੋਯੇਨ ਸਚੀਵਰਂ ਵਨੇ;

ਇਸਿਪ੍ਪਯਾਤਮ੍ਹਿ ਪਥੇ ਵਜਨ੍ਤਂ, ਓਵਸ੍ਸਤੇ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੬. ‘‘ਕਦਾ ਮਯੂਰਸ੍ਸ ਸਿਖਣ੍ਡਿਨੋ ਵਨੇ, ਦਿਜਸ੍ਸ ਸੁਤ੍ਵਾ ਗਿਰਿਗਬ੍ਭਰੇ ਰੁਤਂ;

ਪਚ੍ਚੁਟ੍ਠਹਿਤ੍ਵਾ ਅਮਤਸ੍ਸ ਪਤ੍ਤਿਯਾ, ਸਂਚਿਨ੍ਤਯੇ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੭. ‘‘ਕਦਾ ਨੁ ਗਙ੍ਗਂ ਯਮੁਨਂ ਸਰਸ੍ਸਤਿਂ, ਪਾਤਾਲਖਿਤ੍ਤਂ ਵਲ਼ਵਾਮੁਖਞ੍ਚ;

ਅਸਜ੍ਜਮਾਨੋ ਪਤਰੇਯ੍ਯਮਿਦ੍ਧਿਯਾ, ਵਿਭਿਂਸਨਂ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੮. ‘‘ਕਦਾ ਨੁ ਨਾਗੋਵ ਅਸਙ੍ਗਚਾਰੀ, ਪਦਾਲਯੇ ਕਾਮਗੁਣੇਸੁ ਛਨ੍ਦਂ;

ਨਿਬ੍ਬਜ੍ਜਯਂ ਸਬ੍ਬਸੁਭਂ ਨਿਮਿਤ੍ਤਂ, ਝਾਨੇ ਯੁਤੋ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੯. ‘‘ਕਦਾ ਇਣਟ੍ਟੋਵ ਦਲਿਦ੍ਦਕੋ ਨਿਧਿਂ, ਆਰਾਧਯਿਤ੍ਵਾ ਧਨਿਕੇਹਿ ਪੀਲ਼ਿਤੋ;

ਤੁਟ੍ਠੋ ਭਵਿਸ੍ਸਂ ਅਧਿਗਮ੍ਮ ਸਾਸਨਂ, ਮਹੇਸਿਨੋ ਤਂ ਨੁ ਕਦਾ ਭਵਿਸ੍ਸਤਿ.

੧੧੧੦. ‘‘ਬਹੂਨਿ ਵਸ੍ਸਾਨਿ ਤਯਾਮ੍ਹਿ ਯਾਚਿਤੋ, ਅਗਾਰਵਾਸੇਨ ਅਲਂ ਨੁ ਤੇ ਇਦਂ;

ਤਂ ਦਾਨਿ ਮਂ ਪਬ੍ਬਜਿਤਂ ਸਮਾਨਂ, ਕਿਂਕਾਰਣਾ ਚਿਤ੍ਤ ਤੁਵਂ ਨ ਯੁਞ੍ਜਸਿ.

੧੧੧੧. ‘‘ਨਨੁ ਅਹਂ ਚਿਤ੍ਤ ਤਯਾਮ੍ਹਿ ਯਾਚਿਤੋ, ਗਿਰਿਬ੍ਬਜੇ ਚਿਤ੍ਰਛਦਾ ਵਿਹਙ੍ਗਮਾ;

ਮਹਿਨ੍ਦਘੋਸਤ੍ਥਨਿਤਾਭਿਗਜ੍ਜਿਨੋ, ਤੇ ਤਂ ਰਮੇਸ੍ਸਨ੍ਤਿ ਵਨਮ੍ਹਿ ਝਾਯਿਨਂ.

੧੧੧੨. ‘‘ਕੁਲਮ੍ਹਿ ਮਿਤ੍ਤੇ ਚ ਪਿਯੇ ਚ ਞਾਤਕੇ, ਖਿਡ੍ਡਾਰਤਿਂ ਕਾਮਗੁਣਞ੍ਚ ਲੋਕੇ;

ਸਬ੍ਬਂ ਪਹਾਯ ਇਮਮਜ੍ਝੁਪਾਗਤੋ, ਅਥੋਪਿ ਤ੍ਵਂ ਚਿਤ੍ਤ ਨ ਮਯ੍ਹ ਤੁਸ੍ਸਸਿ.

੧੧੧੩. ‘‘ਮਮੇਵ ਏਤਂ ਨ ਹਿ ਤ੍ਵਂ ਪਰੇਸਂ, ਸਨ੍ਨਾਹਕਾਲੇ ਪਰਿਦੇਵਿਤੇਨ ਕਿਂ;

ਸਬ੍ਬਂ ਇਦਂ ਚਲਮਿਤਿ ਪੇਕ੍ਖਮਾਨੋ, ਅਭਿਨਿਕ੍ਖਮਿਂ ਅਮਤਪਦਂ ਜਿਗੀਸਂ.

੧੧੧੪. ‘‘ਸੁਯੁਤ੍ਤਵਾਦੀ ਦ੍ਵਿਪਦਾਨਮੁਤ੍ਤਮੋ, ਮਹਾਭਿਸਕ੍ਕੋ ਨਰਦਮ੍ਮਸਾਰਥਿ;

ਚਿਤ੍ਤਂ ਚਲਂ ਮਕ੍ਕਟਸਨ੍ਨਿਭਂ ਇਤਿ, ਅਵੀਤਰਾਗੇਨ ਸੁਦੁਨ੍ਨਿਵਾਰਯਂ.

੧੧੧੫. ‘‘ਕਾਮਾ ਹਿ ਚਿਤ੍ਰਾ ਮਧੁਰਾ ਮਨੋਰਮਾ, ਅਵਿਦ੍ਦਸੂ ਯਤ੍ਥ ਸਿਤਾ ਪੁਥੁਜ੍ਜਨਾ;

ਤੇ ਦੁਕ੍ਖਮਿਚ੍ਛਨ੍ਤਿ ਪੁਨਬ੍ਭਵੇਸਿਨੋ, ਚਿਤ੍ਤੇਨ ਨੀਤਾ ਨਿਰਯੇ ਨਿਰਾਕਤਾ.

੧੧੧੬. ‘‘ਮਯੂਰਕੋਞ੍ਚਾਭਿਰੁਤਮ੍ਹਿ ਕਾਨਨੇ, ਦੀਪੀਹਿ ਬ੍ਯਗ੍ਘੇਹਿ ਪੁਰਕ੍ਖਤੋ ਵਸਂ;

ਕਾਯੇ ਅਪੇਕ੍ਖਂ ਜਹ ਮਾ ਵਿਰਾਧਯ, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੧੭. ‘‘ਭਾਵੇਹਿ ਝਾਨਾਨਿ ਚ ਇਨ੍ਦ੍ਰਿਯਾਨਿ ਚ, ਬਲਾਨਿ ਬੋਜ੍ਝਙ੍ਗਸਮਾਧਿਭਾਵਨਾ;

ਤਿਸ੍ਸੋ ਚ ਵਿਜ੍ਜਾ ਫੁਸ ਬੁਦ੍ਧਸਾਸਨੇ, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੧੮. ‘‘ਭਾਵੇਹਿ ਮਗ੍ਗਂ ਅਮਤਸ੍ਸ ਪਤ੍ਤਿਯਾ, ਨਿਯ੍ਯਾਨਿਕਂ ਸਬ੍ਬਦੁਖਕ੍ਖਯੋਗਧਂ;

ਅਟ੍ਠਙ੍ਗਿਕਂ ਸਬ੍ਬਕਿਲੇਸਸੋਧਨਂ, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੧੯. ‘‘ਦੁਕ੍ਖਨ੍ਤਿ ਖਨ੍ਧੇ ਪਟਿਪਸ੍ਸ ਯੋਨਿਸੋ, ਯਤੋ ਚ ਦੁਕ੍ਖਂ ਸਮੁਦੇਤਿ ਤਂ ਜਹ;

ਇਧੇਵ ਦੁਕ੍ਖਸ੍ਸ ਕਰੋਹਿ ਅਨ੍ਤਂ, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੨੦. ‘‘ਅਨਿਚ੍ਚਂ ਦੁਕ੍ਖਨ੍ਤਿ ਵਿਪਸ੍ਸ ਯੋਨਿਸੋ, ਸੁਞ੍ਞਂ ਅਨਤ੍ਤਾਤਿ ਅਘਂ ਵਧਨ੍ਤਿ ਚ;

ਮਨੋਵਿਚਾਰੇ ਉਪਰੁਨ੍ਧ ਚੇਤਸੋ, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੨੧. ‘‘ਮੁਣ੍ਡੋ ਵਿਰੂਪੋ ਅਭਿਸਾਪਮਾਗਤੋ, ਕਪਾਲਹਤ੍ਥੋਵ ਕੁਲੇਸੁ ਭਿਕ੍ਖਸੁ;

ਯੁਞ੍ਜਸ੍ਸੁ ਸਤ੍ਥੁਵਚਨੇ ਮਹੇਸਿਨੋ, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੨੨. ‘‘ਸੁਸਂਵੁਤਤ੍ਤੋ ਵਿਸਿਖਨ੍ਤਰੇ ਚਰਂ, ਕੁਲੇਸੁ ਕਾਮੇਸੁ ਅਸਙ੍ਗਮਾਨਸੋ;

ਚਨ੍ਦੋ ਯਥਾ ਦੋਸਿਨਪੁਣ੍ਣਮਾਸਿਯਾ, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੨੩. ‘‘ਆਰਞ੍ਞਿਕੋ ਹੋਹਿ ਚ ਪਿਣ੍ਡਪਾਤਿਕੋ, ਸੋਸਾਨਿਕੋ ਹੋਹਿ ਚ ਪਂਸੁਕੂਲਿਕੋ;

ਨੇਸਜ੍ਜਿਕੋ ਹੋਹਿ ਸਦਾ ਧੁਤੇ ਰਤੋ, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੨੪. ‘‘ਰੋਪੇਤ੍ਵ ਰੁਕ੍ਖਾਨਿ ਯਥਾ ਫਲੇਸੀ, ਮੂਲੇ ਤਰੁਂ ਛੇਤ੍ਤੁ ਤਮੇਵ ਇਚ੍ਛਸਿ;

ਤਥੂਪਮਂ ਚਿਤ੍ਤਮਿਦਂ ਕਰੋਸਿ, ਯਂ ਮਂ ਅਨਿਚ੍ਚਮ੍ਹਿ ਚਲੇ ਨਿਯੁਞ੍ਜਸਿ.

੧੧੨੫. ‘‘ਅਰੂਪ ਦੂਰਙ੍ਗਮ ਏਕਚਾਰਿ, ਨ ਤੇ ਕਰਿਸ੍ਸਂ ਵਚਨਂ ਇਦਾਨਿਹਂ;

ਦੁਕ੍ਖਾ ਹਿ ਕਾਮਾ ਕਟੁਕਾ ਮਹਬ੍ਭਯਾ, ਨਿਬ੍ਬਾਨਮੇਵਾਭਿਮਨੋ ਚਰਿਸ੍ਸਂ.

੧੧੨੬. ‘‘ਨਾਹਂ ਅਲਕ੍ਖ੍ਯਾ ਅਹਿਰਿਕ੍ਕਤਾਯ ਵਾ,

ਨ ਚਿਤ੍ਤਹੇਤੂ ਨ ਚ ਦੂਰਕਨ੍ਤਨਾ;

ਆਜੀਵਹੇਤੂ ਚ ਅਹਂ ਨ ਨਿਕ੍ਖਮਿਂ,

ਕਤੋ ਚ ਤੇ ਚਿਤ੍ਤ ਪਟਿਸ੍ਸਵੋ ਮਯਾ.

੧੧੨੭. ‘‘ਅਪ੍ਪਿਚ੍ਛਤਾ ਸਪ੍ਪੁਰਿਸੇਹਿ ਵਣ੍ਣਿਤਾ, ਮਕ੍ਖਪ੍ਪਹਾਨਂ ਵੂਪਸਮੋ ਦੁਖਸ੍ਸ;

ਇਤਿਸ੍ਸੁ ਮਂ ਚਿਤ੍ਤ ਤਦਾ ਨਿਯੁਞ੍ਜਸਿ, ਇਦਾਨਿ ਤ੍ਵਂ ਗਚ੍ਛਸਿ ਪੁਬ੍ਬਚਿਣ੍ਣਂ.

੧੧੨੮. ‘‘ਤਣ੍ਹਾ ਅਵਿਜ੍ਜਾ ਚ ਪਿਯਾਪਿਯਞ੍ਚ, ਸੁਭਾਨਿ ਰੂਪਾਨਿ ਸੁਖਾ ਚ ਵੇਦਨਾ;

ਮਨਾਪਿਯਾ ਕਾਮਗੁਣਾ ਚ ਵਨ੍ਤਾ, ਵਨ੍ਤੇ ਅਹਂ ਆਵਮਿਤੁਂ ਨ ਉਸ੍ਸਹੇ.

੧੧੨੯. ‘‘ਸਬ੍ਬਤ੍ਥ ਤੇ ਚਿਤ੍ਤ ਵਚੋ ਕਤਂ ਮਯਾ, ਬਹੂਸੁ ਜਾਤੀਸੁ ਨਮੇਸਿ ਕੋਪਿਤੋ;

ਅਜ੍ਝਤ੍ਤਸਮ੍ਭਵੋ ਕਤਞ੍ਞੁਤਾਯ ਤੇ, ਦੁਕ੍ਖੇ ਚਿਰਂ ਸਂਸਰਿਤਂ ਤਯਾ ਕਤੇ.

੧੧੩੦. ‘‘ਤ੍ਵਞ੍ਞੇਵ ਨੋ ਚਿਤ੍ਤ ਕਰੋਸਿ ਬ੍ਰਾਹ੍ਮਣੋ, ਤ੍ਵਂ ਖਤ੍ਤਿਯੋ ਰਾਜਦਸੀ ਕਰੋਸਿ;

ਵੇਸ੍ਸਾ ਚ ਸੁਦ੍ਦਾ ਚ ਭਵਾਮ ਏਕਦਾ, ਦੇਵਤ੍ਤਨਂ ਵਾਪਿ ਤਵੇਵ ਵਾਹਸਾ.

੧੧੩੧. ‘‘ਤਵੇਵ ਹੇਤੂ ਅਸੁਰਾ ਭਵਾਮਸੇ, ਤ੍ਵਂਮੂਲਕਂ ਨੇਰਯਿਕਾ ਭਵਾਮਸੇ;

ਅਥੋ ਤਿਰਚ੍ਛਾਨਗਤਾਪਿ ਏਕਦਾ, ਪੇਤਤ੍ਤਨਂ ਵਾਪਿ ਤਵੇਵ ਵਾਹਸਾ.

੧੧੩੨. ‘‘ਨਨੁ ਦੁਬ੍ਭਿਸ੍ਸਸਿ ਮਂ ਪੁਨਪ੍ਪੁਨਂ, ਮੁਹੁਂ ਮੁਹੁਂ ਚਾਰਣਿਕਂਵ ਦਸ੍ਸਯਂ;

ਉਮ੍ਮਤ੍ਤਕੇਨੇਵ ਮਯਾ ਪਲੋਭਸਿ, ਕਿਞ੍ਚਾਪਿ ਤੇ ਚਿਤ੍ਤ ਵਿਰਾਧਿਤਂ ਮਯਾ.

੧੧੩੩. ‘‘ਇਦਂ ਪੁਰੇ ਚਿਤ੍ਤਮਚਾਰਿ ਚਾਰਿਕਂ, ਯੇਨਿਚ੍ਛਕਂ ਯਤ੍ਥਕਾਮਂ ਯਥਾਸੁਖਂ;

ਤਦਜ੍ਜਹਂ ਨਿਗ੍ਗਹੇਸ੍ਸਾਮਿ ਯੋਨਿਸੋ, ਹਤ੍ਥਿਪ੍ਪਭਿਨ੍ਨਂ ਵਿਯ ਅਙ੍ਗੁਸਗ੍ਗਹੋ.

੧੧੩੪. ‘‘ਸਤ੍ਥਾ ਚ ਮੇ ਲੋਕਮਿਮਂ ਅਧਿਟ੍ਠਹਿ, ਅਨਿਚ੍ਚਤੋ ਅਦ੍ਧੁਵਤੋ ਅਸਾਰਤੋ;

ਪਕ੍ਖਨ੍ਦ ਮਂ ਚਿਤ੍ਤ ਜਿਨਸ੍ਸ ਸਾਸਨੇ, ਤਾਰੇਹਿ ਓਘਾ ਮਹਤਾ ਸੁਦੁਤ੍ਤਰਾ.

੧੧੩੫. ‘‘ਨ ਤੇ ਇਦਂ ਚਿਤ੍ਤ ਯਥਾ ਪੁਰਾਣਕਂ, ਨਾਹਂ ਅਲਂ ਤੁਯ੍ਹ ਵਸੇ ਨਿਵਤ੍ਤਿਤੁਂ;

ਮਹੇਸਿਨੋ ਪਬ੍ਬਜਿਤੋਮ੍ਹਿ ਸਾਸਨੇ, ਨ ਮਾਦਿਸਾ ਹੋਨ੍ਤਿ ਵਿਨਾਸਧਾਰਿਨੋ.

੧੧੩੬. ‘‘ਨਗਾ ਸਮੁਦ੍ਦਾ ਸਰਿਤਾ ਵਸੁਨ੍ਧਰਾ, ਦਿਸਾ ਚਤਸ੍ਸੋ ਵਿਦਿਸਾ ਅਧੋ ਦਿਵਾ;

ਸਬ੍ਬੇ ਅਨਿਚ੍ਚਾ ਤਿਭਵਾ ਉਪਦ੍ਦੁਤਾ, ਕੁਹਿਂ ਗਤੋ ਚਿਤ੍ਤ ਸੁਖਂ ਰਮਿਸ੍ਸਸਿ.

੧੧੩੭. ‘‘ਧਿਤਿਪ੍ਪਰਂ ਕਿਂ ਮਮ ਚਿਤ੍ਤ ਕਾਹਿਸਿ, ਨ ਤੇ ਅਲਂ ਚਿਤ੍ਤ ਵਸਾਨੁਵਤ੍ਤਕੋ;

ਨ ਜਾਤੁ ਭਸ੍ਤਂ ਉਭਤੋਮੁਖਂ ਛੁਪੇ, ਧਿਰਤ੍ਥੁ ਪੂਰਂ ਨਵਸੋਤਸਨ੍ਦਨਿਂ.

੧੧੩੮. ‘‘ਵਰਾਹਏਣੇਯ੍ਯਵਿਗਾਲ਼੍ਹਸੇਵਿਤੇ, ਪਬ੍ਭਾਰਕੁਟ੍ਟੇ ਪਕਤੇਵ ਸੁਨ੍ਦਰੇ;

ਨਵਮ੍ਬੁਨਾ ਪਾਵੁਸਸਿਤ੍ਤਕਾਨਨੇ, ਤਹਿਂ ਗੁਹਾਗੇਹਗਤੋ ਰਮਿਸ੍ਸਸਿ.

੧੧੩੯. ‘‘ਸੁਨੀਲਗੀਵਾ ਸੁਸਿਖਾ ਸੁਪੇਖੁਨਾ, ਸੁਚਿਤ੍ਤਪਤ੍ਤਚ੍ਛਦਨਾ ਵਿਹਙ੍ਗਮਾ;

ਸੁਮਞ੍ਜੁਘੋਸਤ੍ਥਨਿਤਾਭਿਗਜ੍ਜਿਨੋ, ਤੇ ਤਂ ਰਮੇਸ੍ਸਨ੍ਤਿ ਵਨਮ੍ਹਿ ਝਾਯਿਨਂ.

੧੧੪੦. ‘‘ਵੁਟ੍ਠਮ੍ਹਿ ਦੇਵੇ ਚਤੁਰਙ੍ਗੁਲੇ ਤਿਣੇ, ਸਂਪੁਪ੍ਫਿਤੇ ਮੇਘਨਿਭਮ੍ਹਿ ਕਾਨਨੇ;

ਨਗਨ੍ਤਰੇ ਵਿਟਪਿਸਮੋ ਸਯਿਸ੍ਸਂ, ਤਂ ਮੇ ਮੁਦੂ ਹੇਹਿਤਿ ਤੂਲਸਨ੍ਨਿਭਂ.

੧੧੪੧. ‘‘ਤਥਾ ਤੁ ਕਸ੍ਸਾਮਿ ਯਥਾਪਿ ਇਸ੍ਸਰੋ, ਯਂ ਲਬ੍ਭਤਿ ਤੇਨਪਿ ਹੋਤੁ ਮੇ ਅਲਂ;

ਨ ਤਾਹਂ ਕਸ੍ਸਾਮਿ ਯਥਾ ਅਤਨ੍ਦਿਤੋ, ਬਿਲ਼ਾਰਭਸ੍ਤਂਵ ਯਥਾ ਸੁਮਦ੍ਦਿਤਂ.

੧੧੪੨. ‘‘ਤਥਾ ਤੁ ਕਸ੍ਸਾਮਿ ਯਥਾਪਿ ਇਸ੍ਸਰੋ, ਯਂ ਲਬ੍ਭਤਿ ਤੇਨਪਿ ਹੋਤੁ ਮੇ ਅਲਂ;

ਵਿਰਿਯੇਨ ਤਂ ਮਯ੍ਹ ਵਸਾਨਯਿਸ੍ਸਂ, ਗਜਂਵ ਮਤ੍ਤਂ ਕੁਸਲਙ੍ਕੁਸਗ੍ਗਹੋ.

੧੧੪੩. ‘‘ਤਯਾ ਸੁਦਨ੍ਤੇਨ ਅਵਟ੍ਠਿਤੇਨ ਹਿ, ਹਯੇਨ ਯੋਗ੍ਗਾਚਰਿਯੋਵ ਉਜ੍ਜੁਨਾ;

ਪਹੋਮਿ ਮਗ੍ਗਂ ਪਟਿਪਜ੍ਜਿਤੁਂ ਸਿਵਂ, ਚਿਤ੍ਤਾਨੁਰਕ੍ਖੀਹਿ ਸਦਾ ਨਿਸੇਵਿਤਂ.

੧੧੪੪. ‘‘ਆਰਮ੍ਮਣੇ ਤਂ ਬਲਸਾ ਨਿਬਨ੍ਧਿਸਂ, ਨਾਗਂਵ ਥਮ੍ਭਮ੍ਹਿ ਦਲ਼੍ਹਾਯ ਰਜ੍ਜੁਯਾ;

ਤਂ ਮੇ ਸੁਗੁਤ੍ਤਂ ਸਤਿਯਾ ਸੁਭਾਵਿਤਂ, ਅਨਿਸ੍ਸਿਤਂ ਸਬ੍ਬਭਵੇਸੁ ਹੇਹਿਸਿ.

੧੧੪੫. ‘‘ਪਞ੍ਞਾਯ ਛੇਤ੍ਵਾ ਵਿਪਥਾਨੁਸਾਰਿਨਂ, ਯੋਗੇਨ ਨਿਗ੍ਗਯ੍ਹ ਪਥੇ ਨਿਵੇਸਿਯ;

ਦਿਸ੍ਵਾ ਸਮੁਦਯਂ ਵਿਭਵਞ੍ਚ ਸਮ੍ਭਵਂ, ਦਾਯਾਦਕੋ ਹੇਹਿਸਿ ਅਗ੍ਗਵਾਦਿਨੋ.

੧੧੪੬. ‘‘ਚਤੁਬ੍ਬਿਪਲ੍ਲਾਸਵਸਂ ਅਧਿਟ੍ਠਿਤਂ, ਗਾਮਣ੍ਡਲਂਵ ਪਰਿਨੇਸਿ ਚਿਤ੍ਤ ਮਂ;

ਨਨੁ ਸਂਯੋਜਨਬਨ੍ਧਨਚ੍ਛਿਦਂ, ਸਂਸੇਵਸੇ ਕਾਰੁਣਿਕਂ ਮਹਾਮੁਨਿਂ.

੧੧੪੭. ‘‘ਮਿਗੋ ਯਥਾ ਸੇਰਿ ਸੁਚਿਤ੍ਤਕਾਨਨੇ, ਰਮ੍ਮਂ ਗਿਰਿਂ ਪਾਵੁਸਅਬ੍ਭਮਾਲਿਨਿਂ;

ਅਨਾਕੁਲੇ ਤਤ੍ਥ ਨਗੇ ਰਮਿਸ੍ਸਂ, ਅਸਂਸਯਂ ਚਿਤ੍ਤ ਪਰਾ ਭਵਿਸ੍ਸਸਿ.

੧੧੪੮. ‘‘ਯੇ ਤੁਯ੍ਹ ਛਨ੍ਦੇਨ ਵਸੇਨ ਵਤ੍ਤਿਨੋ,

ਨਰਾ ਚ ਨਾਰੀ ਚ ਅਨੁਭੋਨ੍ਤਿ ਯਂ ਸੁਖਂ;

ਅਵਿਦ੍ਦਸੂ ਮਾਰਵਸਾਨੁਵਤ੍ਤਿਨੋ,

ਭਵਾਭਿਨਨ੍ਦੀ ਤਵ ਚਿਤ੍ਤ ਸਾਵਕਾ’’ਤਿ.

ਤਤ੍ਥ ਕਦਾ ਨੁਹਨ੍ਤਿ ਕਦਾ ਨੁ ਅਹਂ. ਪਬ੍ਬਤਕਨ੍ਦਰਾਸੂਤਿ ਪਬ੍ਬਤੇਸੁ ਚ ਕਨ੍ਦਰੇਸੁ ਚ, ਪਬ੍ਬਤਸ੍ਸ ਵਾ ਕਨ੍ਦਰਾਸੁ. ਏਕਾਕਿਯੋਤਿ ਏਕਕੋ. ਅਦ੍ਦੁਤਿਯੋਤਿ ਨਿਤ੍ਤਣ੍ਹੋ. ਤਣ੍ਹਾ ਹਿ ਪੁਰਿਸਸ੍ਸ ਦੁਤਿਯਾ ਨਾਮ. ਵਿਹਸ੍ਸਨ੍ਤਿ ਵਿਹਰਿਸ੍ਸਾਮਿ. ਅਨਿਚ੍ਚਤੋ ਸਬ੍ਬਭਵਂ ਵਿਪਸ੍ਸਨ੍ਤਿ ਕਾਮਭਵਾਦਿਭੇਦਂ ਸਬ੍ਬਮ੍ਪਿ ਭਵਂ ‘‘ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚ’’ਨ੍ਤਿ ਵਿਪਸ੍ਸਨ੍ਤੋ ਕਦਾ ਨੁ ਵਿਹਰਿਸ੍ਸਨ੍ਤਿ ਯੋਜਨਾ. ਨਿਦਸ੍ਸਨਮਤ੍ਤਞ੍ਚੇਤਂ, ‘‘ਯਦਨਿਚ੍ਚਂ ਤਂ ਦੁਕ੍ਖਂ, ਯਂ ਦੁਕ੍ਖਂ ਤਦਨਤ੍ਤਾ’’ਤਿ ਵਚਨਤੋ (ਸਂ. ਨਿ. ੩.੧੫) ਇਤਰਮ੍ਪਿ ਲਕ੍ਖਣਦ੍ਵਯਂ ਵੁਤ੍ਤਮੇਵਾਤਿ ਦਟ੍ਠਬ੍ਬਂ. ਤਂ ਮੇ ਇਦਂ ਤਂ ਨੁ ਕਦਾ ਭਵਿਸ੍ਸਤੀਤਿ ਤਂ ਇਦਂ ਮੇ ਪਰਿਵਿਤਕ੍ਕਿਤਂ ਕਦਾ ਨੁ ਭਵਿਸ੍ਸਤਿ, ਕਦਾ ਨੁ ਖੋ ਮਤ੍ਥਕਂ ਪਾਪੁਣਿਸ੍ਸਤੀਤਿ ਅਤ੍ਥੋ. ਤਂ ਨੂਤਿ ਚੇਤ੍ਥ ਤਨ੍ਤਿ ਨਿਪਾਤਮਤ੍ਤਂ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਕਦਾ ਨੁ ਖੋ ਅਹਂ ਮਹਾਗਜੋ ਵਿਯ ਸਙ੍ਖਲਿਕਬਨ੍ਧਨਂ, ਗਿਹਿਬਨ੍ਧਨਂ ਛਿਨ੍ਦਿਤ੍ਵਾ ਪਬ੍ਬਜਿਤ੍ਵਾ ਕਾਯਵਿਵੇਕਂ ਪਰਿਬ੍ਰੂਹਯਨ੍ਤੋ ਏਕਾਕੀ ਪਬ੍ਬਤਕਨ੍ਦਰਾਸੁ ਅਦੁਤਿਯੋ ਸਬ੍ਬਤ੍ਥ ਨਿਰਪੇਕ੍ਖੋ ਸਬ੍ਬਸਙ੍ਖਾਰਗਤਂ ਅਨਿਚ੍ਚਾਦਿਤੋ ਵਿਪਸ੍ਸਨ੍ਤੋ ਵਿਹਰਿਸ੍ਸਾਮੀਤਿ.

ਭਿਨ੍ਨਪਟਨ੍ਧਰੋਤਿ ਭਿਨ੍ਨਵਤ੍ਥਧਰੋ, ਗਾਥਾਸੁਖਤ੍ਥਂ ਨਕਾਰਾਗਮਂ ਕਤ੍ਵਾ ਵੁਤ੍ਤਂ. ਸਤ੍ਥਕਚ੍ਛਿਨ੍ਨਅਗ੍ਘਫਸ੍ਸਵਣ੍ਣਭਿਨ੍ਨਂ ਪਟਚੀਵਰਂ ਧਾਰੇਨ੍ਤੋਤਿ ਅਤ੍ਥੋ. ਮੁਨੀਤਿ ਪਬ੍ਬਜਿਤੋ. ਅਮਮੋਤਿ ਕੁਲੇ ਵਾ ਗਣੇ ਵਾ ਮਮਤ੍ਤਾਭਾਵੇਨ ਅਮਮੋ. ਕਤ੍ਥਚਿਪਿ ਆਰਮ੍ਮਣੇ ਆਸੀਸਨਾਯ ਅਭਾਵੇਨ ਨਿਰਾਸੋ. ਹਨ੍ਤ੍ਵਾ ਸੁਖੀ ਪਵਨਗਤੋ ਵਿਹਸ੍ਸਨ੍ਤਿ ਰਾਗਾਦਿਕੇ ਕਿਲੇਸੇ ਅਰਿਯਮਗ੍ਗੇਨ ਸਮੁਚ੍ਛਿਨ੍ਦਿਤ੍ਵਾ ਮਗ੍ਗਸੁਖੇਨ ਫਲਸੁਖੇਨ ਸੁਖੀ ਮਹਾਵਨਗਤੋ ਕਦਾ ਨੁ ਖੋ ਅਹਂ ਵਿਹਰਿਸ੍ਸਾਮਿ.

ਵਧਰੋਗਨੀਲ਼ਨ੍ਤਿ ਮਰਣਸ੍ਸ ਚ ਰੋਗਸ੍ਸ ਚ ਕੁਲਾਵਕਭੂਤਂ. ਕਾਯਂ ਇਮਨ੍ਤਿ ਇਮਂ ਖਨ੍ਧਪਞ੍ਚਕਸਙ੍ਖਾਤਂ ਕਾਯਂ. ਖਨ੍ਧਪਞ੍ਚਕੋਪਿ ਹਿ ‘‘ਅਵਿਜ੍ਜਾਗਤਸ੍ਸ, ਭਿਕ੍ਖਵੇ, ਪੁਰਿਸਪੁਗ੍ਗਲਸ੍ਸ ਤਣ੍ਹਾਨੁਗਤਸ੍ਸ ਅਯਮੇਵ ਕਾਯੋ ਬਹਿਦ੍ਧਾ ਨਾਮਰੂਪ’’ਨ੍ਤਿਆਦੀਸੁ ਕਾਯੋ ਵੁਚ੍ਚਤਿ. ਮਚ੍ਚੁਜਰਾਯੁਪਦ੍ਦੁਤਨ੍ਤਿ ਮਰਣੇਨ ਚੇਵ ਜਰਾਯ ਚ ਪੀਲ਼ਿਤਂ, ਵਿਪਸ੍ਸਮਾਨੋ ਅਹਂ ਭਯਹੇਤੁਪਹਾਨੇਨ ਵੀਤਭਯੋ, ਤਂ ਨੁ ਕਦਾ ਭਵਿਸ੍ਸਤੀਤਿ ਅਤ੍ਥੋ.

ਭਯਜਨਨਿਨ੍ਤਿ ਪਞ੍ਚਵੀਸਤਿਯਾ ਮਹਾਭਯਾਨਂ ਉਪ੍ਪਾਦਕਾਰਣਭੂਤਂ ਕਾਯਿਕਸ੍ਸ ਚ ਚੇਤਸਿਕਸ੍ਸ ਚ ਸਕਲਸ੍ਸਪਿ ਵਟ੍ਟਦੁਕ੍ਖਸ੍ਸ ਆਵਹਨਤੋ ਦੁਖਾਵਹਂ. ਤਣ੍ਹਾਲਤਂ ਬਹੁਵਿਧਾਨੁਵਤ੍ਤਨਿਨ੍ਤਿ ਬਹੁਵਿਧਞ੍ਚ ਆਰਮ੍ਮਣਂ ਭਵਮੇਵ ਵਾ ਅਨੁਵਤ੍ਤਤਿ ਸਨ੍ਤਨੋਤੀਤਿ ਬਹੁਵਿਧਾਨੁਵਤ੍ਤਨਿਂ, ਤਣ੍ਹਾਸਙ੍ਖਾਤਲਤਂ. ਪਞ੍ਞਾਮਯਨ੍ਤਿ ਮਗ੍ਗਪਞ੍ਞਾਮਯਂ ਸੁਨਿਸਿਤਂ ਅਸਿਖਗ੍ਗਂ ਵੀਰਿਯਪਗ੍ਗਹਿਤੇਨ ਸਦ੍ਧਾਹਤ੍ਥੇਨ ਗਹੇਤ੍ਵਾ ਸਮੁਚ੍ਛਿਨ੍ਦਿਤ੍ਵਾ ‘‘ਕਦਾ ਨੁਹਂ ਵਸੇ’’ਤਿ ਯਂ ਪਰਿਵਿਤਕ੍ਕਿਤਂ, ਤਮ੍ਪਿ ਕਦਾ ਭਵਿਸ੍ਸਤੀਤਿ ਯੋਜਨਾ.

ਉਗ੍ਗਤੇਜਨ੍ਤਿ ਸਮਥਵਿਪਸ੍ਸਨਾਵਸੇਨ ਨਿਸਿਤਤਾਯ ਤਿਕ੍ਖਤੇਜਂ. ਸਤ੍ਥਂ ਇਸੀਨਨ੍ਤਿ ਬੁਦ੍ਧਪਚ੍ਚੇਕਬੁਦ੍ਧਅਰਿਯਸਾਵਕਇਸੀਨਂ ਸਤ੍ਥਭੂਤਂ. ਮਾਰਂ ਸਸੇਨਂ ਸਹਸਾ ਭਞ੍ਜਿਸ੍ਸਨ੍ਤਿ ਕਿਲੇਸਸੇਨਾਯ ਸਸੇਨਂ ਅਭਿਸਙ੍ਖਾਰਾਦਿਮਾਰਂ ਸਹਸਾ ਸੀਘਮੇਵ ਭਞ੍ਜਿਸ੍ਸਾਮਿ. ਸੀਹਾਸਨੇਤਿ ਥਿਰਾਸਨੇ, ਅਪਰਾਜਿਤਪਲ੍ਲਙ੍ਕੇਤਿ ਅਤ੍ਥੋ.

ਸਬ੍ਭਿ ਸਮਾਗਮੇਸੁ ਦਿਟ੍ਠੋ ਭਵੇਤਿ ਧਮ੍ਮਗਾਰਵਯੁਤ੍ਤਤਾਯ ਧਮ੍ਮਗਰੂਹਿ ਤਾਦਿਲਕ੍ਖਣਪ੍ਪਤ੍ਤਿਯਾ ਤਾਦੀਹਿ ਅਵਿਪਰੀਤਦਸ੍ਸਿਤਾਯ ਯਾਥਾਵਦਸ੍ਸੀਹਿ ਅਰਿਯਮਗ੍ਗੇਨੇਵ ਪਾਪਜਿਤਿਨ੍ਦ੍ਰਿਯਤਾਯ ਜਿਤਿਨ੍ਦ੍ਰਿਯੇਹਿ ਬੁਦ੍ਧਾਦੀਹਿ ਸਾਧੂਹਿ ਸਮਾਗਮੇਸੁ ‘‘ਕਦਾ ਨੁ ਅਹਂ ਪਧਾਨਿਯੋਤਿ ਦਿਟ੍ਠੋ ਭਵੇਯ੍ਯ’’ਨ੍ਤਿ ਯਂ ਮੇ ਪਰਿਵਿਤਕ੍ਕਿਤਂ, ਤਂ ਨੁ ਕਦਾ ਭਵਿਸ੍ਸਤੀਤਿ ਯੋਜਨਾ. ਇਮਿਨਾ ਨਯੇਨ ਸਬ੍ਬਤ੍ਥ ਪਦਯੋਜਨਾ ਵੇਦਿਤਬ੍ਬਾ, ਪਦਤ੍ਥਮਤ੍ਤਮੇਵ ਵਣ੍ਣਯਿਸ੍ਸਾਮ.

ਤਨ੍ਦੀਤਿ ਆਲਸਿਯਂ. ਖੁਦਾਤਿ ਜਿਘਚ੍ਛਾ. ਕੀਟਸਰੀਸਪਾਤਿ ਕੀਟਞ੍ਚੇਵ ਸਰੀਸਪਾ ਚ. ਨ ਬਾਧਯਿਸ੍ਸਨ੍ਤੀਤਿ ਮਂ ਨ ਬ੍ਯਾਧਯਿਸ੍ਸਨ੍ਤਿ ਸੁਖਦੁਕ੍ਖਸੋਮਨਸ੍ਸਦੋਮਨਸ੍ਸਾਨਂ ਝਾਨੇਹਿ ਪਟਿਬਾਹਿਤਤ੍ਤਾਤਿ ਅਧਿਪ੍ਪਾਯੋ. ਗਿਰਿਬ੍ਬਜੇਤਿ ਪਬ੍ਬਤਕਨ੍ਦਰਾਯ. ਅਤ੍ਥਤ੍ਥਿਯਨ੍ਤਿ ਸਦਤ੍ਥਸਙ੍ਖਾਤੇਨ ਅਤ੍ਥੇਨ ਅਤ੍ਥਿਕਂ.

ਯਂ ਵਿਦਿਤਂ ਮਹੇਸਿਨਾਤਿ ਯਂ ਚਤੁਸਚ੍ਚਂ ਮਹੇਸਿਨਾ ਸਮ੍ਮਾਸਮ੍ਬੁਦ੍ਧੇਨ ਸਯਮ੍ਭੂਞਾਣੇਨ ਞਾਤਂ ਪਟਿਵਿਦ੍ਧਂ, ਤਾਨਿ ਚਤ੍ਤਾਰਿ ਸਚ੍ਚਾਨਿ ਅਨੁਪਚਿਤਕੁਸਲਸਮ੍ਭਾਰੇਹਿ ਸੁਟ੍ਠੁ ਦੁਦ੍ਦਸਾਨਿ ਮਗ੍ਗਸਮਾਧਿਨਾ ਸਮਾਹਿਤਤ੍ਤੋ, ਸਮ੍ਮਾਸਤਿਯਾ ਸਤਿਮਾ, ਅਰਿਯਮਗ੍ਗਪਞ੍ਞਾਯ ਅਹਂ ਅਗਚ੍ਛਂ ਪਟਿਵਿਜ੍ਝਿਸ੍ਸਂ ਅਧਿਗਮਿਸ੍ਸਨ੍ਤਿ ਅਤ੍ਥੋ.

ਰੂਪੇਤਿ ਚਕ੍ਖੁਵਿਞ੍ਞੇਯ੍ਯਰੂਪੇ. ਅਮਿਤੇਤਿ ਞਾਣੇਨ ਅਮਿਤੇ, ਅਪਰਿਚ੍ਛਿਨ੍ਨੇ ਅਪਰਿਞ੍ਞਾਤੇਤਿ ਅਤ੍ਥੋ. ਫੁਸਿਤਬ੍ਬੇਤਿ, ਫੋਟ੍ਠਬ੍ਬੇ. ਧਮ੍ਮੇਤਿ ਮਨੋਵਿਞ੍ਞੇਯ੍ਯਧਮ੍ਮੇ. ਅਮਿਤੇਤਿ ਵਾ ਅਪਰਿਮਾਣੇ ਨੀਲਾਦਿਵਸੇਨ ਅਨੇਕਭੇਦਭਿਨ੍ਨੇ ਰੂਪੇ ਭੇਰਿਸਦ੍ਦਾਦਿਵਸੇਨ, ਮੂਲਰਸਾਦਿਵਸੇਨ, ਕਕ੍ਖਲ਼ਮੁਦੁਤਾਦਿਵਸੇਨ, ਸੁਖਦੁਕ੍ਖਾਦਿਵਸੇਨ ਚ, ਅਨੇਕਭੇਦਸਦ੍ਦਾਦਿਕੇ ਚਾਤਿ ਅਤ੍ਥੋ. ਆਦਿਤ੍ਤਤੋਤਿ ਏਕਾਦਸਹਿ ਅਗ੍ਗੀਹਿ ਆਦਿਤ੍ਤਭਾਵਤੋ. ਸਮਥੇਹਿ ਯੁਤ੍ਤੋਤਿ ਝਾਨਵਿਪਸ੍ਸਨਾਮਗ੍ਗਸਮਾਧੀਹਿ ਸਮਨ੍ਨਾਗਤੋ. ਪਞ੍ਞਾਯ ਦਚ੍ਛਨ੍ਤਿ ਵਿਪਸ੍ਸਨਾਪਞ੍ਞਾਸਹਿਤਾਯ ਮਗ੍ਗਪਞ੍ਞਾਯ ਦਕ੍ਖਿਸ੍ਸਂ.

ਦੁਬ੍ਬਚਨੇਨ ਵੁਤ੍ਤੋਤਿ ਦੁਰੁਤ੍ਤਵਚਨੇਨ ਘਟ੍ਟਿਤੋ. ਤਤੋ ਨਿਮਿਤ੍ਤਨ੍ਤਿ ਫਰੁਸਵਾਚਾਹੇਤੁ. ਵਿਮਨੋ ਨ ਹੇਸ੍ਸਨ੍ਤਿ ਦੋਮਨਸ੍ਸਿਤੋ ਨ ਭਵੇਯ੍ਯਂ. ਅਥੋਤਿ ਅਥ. ਪਸਤ੍ਥੋਤਿ ਕੇਨਚਿ ਪਸਂਸਿਤੋ.

ਕਟ੍ਠੇਤਿ ਦਾਰੁਕ੍ਖਨ੍ਧੇ. ਤਿਣੇਤਿ ਤਿਣਾਨਂ ਖਨ੍ਧੇ. ਇਮੇਤਿ ਇਮੇ ਮਮ ਸਨ੍ਤਤਿਪਰਿਯਾਪਨ੍ਨੇ ਪਞ੍ਚ ਖਨ੍ਧੇ. ਅਮਿਤੇ ਚ ਧਮ੍ਮੇਤਿ ਤਤੋ ਅਞ੍ਞੇਨ ਇਨ੍ਦ੍ਰਿਯਕ੍ਖਨ੍ਧੇਨ ਅਮਿਤੇ ਰੂਪਧਮ੍ਮੇ. ਤੇਨਾਹ – ‘‘ਅਜ੍ਝਤ੍ਤਿਕਾਨੇਵ ਚ ਬਾਹਿਰਾਨਿ ਚਾ’’ਤਿ. ਸਮਂ ਤੁਲੇਯ੍ਯਨ੍ਤਿ ਅਨਿਚ੍ਚਾਦਿਵਸੇਨ ਚੇਵ ਅਸਾਰਾਦਿਉਪਮਾਵਸੇਨ ਚ ਸਬ੍ਬਂ ਸਮਮੇਵ ਕਤ੍ਵਾ ਤੀਰੇਯ੍ਯਂ.

ਇਸਿਪ੍ਪਯਾਤਮ੍ਹਿ ਪਥੇ ਵਜਨ੍ਤਨ੍ਤਿ ਬੁਦ੍ਧਾਦੀਹਿ ਮਹੇਸੀਹਿ ਸਮ੍ਮਦੇਵ ਪਯਾਤੇ ਸਮਥਵਿਪਸ੍ਸਨਾਮਗ੍ਗੇ ਵਜਨ੍ਤਂ ਪਟਿਪਜ੍ਜਨ੍ਤਂ. ਪਾਵੁਸਸਮਯੇ ਕਾਲਮੇਘੋ ਨਵੇਨ ਤੋਯੇਨ ਵਸ੍ਸੋਦਕੇਨ ਸਚੀਵਰਂ ਪਵਨੇ ਕਦਾ ਨੁ ਓਵਸ੍ਸਤਿ, ਤੇਮੇਤੀਤਿ ਅਤ੍ਤਨੋ ਅਬ੍ਭੋਕਾਸਿਕਭਾਵਪਰਿਵਿਤਕ੍ਕਿਤਂ ਦਸ੍ਸੇਤਿ.

ਮਯੂਰਸ੍ਸ ਸਿਖਣ੍ਡਿਨੋ ਵਨੇ ਦਿਜਸ੍ਸਾਤਿ ਮਾਤੁਕੁਚ੍ਛਿਤੋ ਅਣ੍ਡਕੋਸਤੋ ਚਾਤਿ ਦ੍ਵਿਕ੍ਖਤ੍ਤੁਂ ਜਾਯਨਵਸੇਨ ਦਿਜਸ੍ਸ, ਸਿਖਾਸਮ੍ਭਵੇਨ ਸਿਖਣ੍ਡਿਨੋ ਚ ਮਯੂਰਸ੍ਸ ਵਨੇ ਕਦਾ ਪਨ ਗਿਰਿਗਬ੍ਭਰੇ ਰੁਤਂ ਕੇਕਾਰਵਂ ਸੁਤ੍ਵਾ ਵੇਲਂ ਸਲ੍ਲਕ੍ਖਿਤ੍ਵਾ ਸਯਨਤੋ ਵੁਟ੍ਠਹਿਤ੍ਵਾ ਅਮਤਸ੍ਸ ਪਤ੍ਤਿਯਾ ਨਿਬ੍ਬਾਨਾਧਿਗਮਾਯ. ਸਂਚਿਨ੍ਤਯੇਤਿ ਵੁਚ੍ਚਮਾਨੇ ਭਵੇ ਅਨਿਚ੍ਚਾਦਿਤੋ ਮਨਸਿ ਕਰੇਯ੍ਯਂ ਵਿਪਸ੍ਸੇਯ੍ਯਨ੍ਤਿ ਅਤ੍ਥੋ.

ਗਙ੍ਗਂ ਯਮੁਨਂ ਸਰਸ੍ਸਤਿਨ੍ਤਿ ਏਤਾ ਮਹਾਨਦਿਯੋ ਅਸਜ੍ਜਮਾਨੋ ਭਾਵਨਾਮਯਾਯ ਇਦ੍ਧਿਯਾ ਕਦਾ ਨੁ ਪਤਰੇਯ੍ਯਨ੍ਤਿ ਯੋਜਨਾ. ਪਾਤਾਲਖਿਤ੍ਤਂ ਬਲ਼ਵਾਮੁਖਞ੍ਚਾਤਿ ਪਾਤਾਯ ਅਲਂ ਪਰਿਯਤ੍ਤਨ੍ਤਿ ਪਾਤਾਲਂ, ਤਦੇਵ ਖਿਤ੍ਤਂ, ਪਥਵਿਯਾ ਸਣ੍ਠਹਨਕਾਲੇ ਤਥਾ ਠਿਤਨ੍ਤਿ ਪਾਤਾਲਖਿਤ੍ਤਂ. ਯੋਜਨਸਤਿਕਾਦਿਭੇਦਾਨਿ ਸਮੁਦ੍ਦਸ੍ਸ ਅਨ੍ਤੋਪਥਵਿਯਾ ਤੀਰਟ੍ਠਾਨਾਨਿ, ਯੇਸੁ ਕਾਨਿਚਿ ਨਾਗਾਦੀਨਂ ਵਸਨਟ੍ਠਾਨਾਨਿ ਹੋਨ੍ਤਿ, ਕਾਨਿਚਿ ਸੁਞ੍ਞਾਨਿਯੇਵ ਹੁਤ੍ਵਾ ਤਿਟ੍ਠਨ੍ਤਿ. ਬਲ਼ਵਾਮੁਖਨ੍ਤਿ ਮਹਾਸਮੁਦ੍ਦੇ ਮਹਨ੍ਤਂ ਆਵਟ੍ਟਮੁਖਂ. ਮਹਾਨਿਰਯਦ੍ਵਾਰਸ੍ਸ ਹਿ ਵਿਵਟਕਾਲੇ ਮਹਾਅਗ੍ਗਿਕ੍ਖਨ੍ਧੋ ਤਤੋ ਨਿਕ੍ਖਨ੍ਤੋ ਤਦਭਿਮੁਖਂ ਅਨੇਕਯੋਜਨਸਤਾਯਾਮਵਿਤ੍ਥਾਰਂ ਹੇਟ੍ਠਾ ਸਮੁਦ੍ਦਪਦੇਸਂ ਡਹਤਿ, ਤਸ੍ਮਿਂ ਦਡ੍ਢੇ ਉਪਰਿ ਉਦਕਂ ਆਵਟ੍ਟਾਕਾਰੇਨ ਪਰਿਬ੍ਭਮਨ੍ਤਂ ਮਹਤਾ ਸਦ੍ਦੇਨ ਹੇਟ੍ਠਾ ਨਿਪਤਤਿ. ਤਤ੍ਥ ਬਲ਼ਵਾਮੁਖਸਮਞ੍ਞਾ, ਇਤਿ ਤਞ੍ਚ ਪਾਤਾਲਖਿਤ੍ਤਂ ਬਲ਼ਵਾਮੁਖਞ੍ਚ ਵਿਭਿਂਸਨਂ ਭਯਾਨਕਂ ਅਸਜ੍ਜਮਾਨੋ ਇਦ੍ਧਿਯਾ ਕਦਾ ਨੁ ਪਤਰੇਯ੍ਯਨ੍ਤਿ ਯਂ ਪਰਿਵਿਤਕ੍ਕਿਤਂ, ਤਂ ਕਦਾ ਨੁ ਭਵਿਸ੍ਸਤਿ, ਭਾਵਨਾਮਯਂ ਇਦ੍ਧਿਂ ਨਿਬ੍ਬਤ੍ਤੇਤ੍ਵਾ ਕਦਾ ਨੁ ਏਵਂ ਇਦ੍ਧਿਂ ਵਲ਼ਞ੍ਜਿਸ੍ਸਾਮੀਤਿ ਅਤ੍ਥੋ.

ਨਾਗੋਵ ਅਸਙ੍ਗਚਾਰੀ ਪਦਾਲਯੇਤਿ ਯਥਾ ਮਤ੍ਤਵਾਰਣੋ ਦਲ਼੍ਹਥਮ੍ਭਂ ਭਿਨ੍ਦਿਤ੍ਵਾ ਅਯਸਙ੍ਖਲਿਕਂ ਵਿਦ੍ਧਂਸੇਤ੍ਵਾ ਅਸਙ੍ਗਚਾਰੀ ਵਨਂ ਪਵਿਸਿਤ੍ਵਾ ਏਕੋ ਅਦੁਤਿਯੋ ਹੁਤ੍ਵਾ ਅਤ੍ਤਨੋ ਰੁਚਿਵਸੇਨ ਚਰਤਿ, ਏਵਮਹਂ ਕਦਾ ਨੁ ਸਬ੍ਬਸੁਭਂ ਨਿਮਿਤ੍ਤਂ ਨਿਬ੍ਬਜ੍ਜਯਂ ਨਿਰਵਸੇਸਤੋ ਵਜ੍ਜਯਨ੍ਤੋ ਕਾਮਚ੍ਛਨ੍ਦਵਸੋ ਅਹੁਤ੍ਵਾ ਝਾਨੇ ਯੁਤੋ ਪਯੁਤ੍ਤੋ ਕਾਮਗੁਣੇਸੁ ਛਨ੍ਦਂ ਸਮ੍ਮਦੇਵ ਪਦਾਲੇਯ੍ਯਂ ਛਿਨ੍ਦੇਯ੍ਯਂ ਪਜਹੇਯ੍ਯਨ੍ਤਿ ਯਂ ਪਰਿਵਿਤਕ੍ਕਿਤਂ, ਤਂ ਨੁ ਕਦਾ ਭਵਿਸ੍ਸਤਿ.

ਇਣਟ੍ਟੋਵ ਦਲਿਦ੍ਦਕੋ ਨਿਧਿਂ ਆਰਾਧਯਿਤ੍ਵਾਤਿ ਯਥਾ ਕੋਚਿ ਦਲਿਦ੍ਦੋ ਜੀਵਿਕਪਕਤੋ ਇਣਂ ਗਹੇਤ੍ਵਾ ਤਂ ਸੋਧੇਤੁਂ ਅਸਕ੍ਕੋਨ੍ਤੋ ਇਣਟ੍ਟੋ ਇਣੇਨ ਅਟ੍ਟਿਤੋ ਧਨਿਕੇਹਿ ਪੀਲ਼ਿਤੋ ਨਿਧਿਂ ਆਰਾਧਯਿਤ੍ਵਾ ਅਧਿਗਨ੍ਤ੍ਵਾ ਇਣਞ੍ਚ ਸੋਧੇਤ੍ਵਾ ਸੁਖੇਨ ਚ ਜੀਵਨ੍ਤੋ ਤੁਟ੍ਠੋ ਭਵੇਯ੍ਯ, ਏਵਂ ਅਹਮ੍ਪਿ ਕਦਾ ਨੁ ਇਣਸਦਿਸਂ ਕਾਮਚ੍ਛਨ੍ਦਂ ਪਹਾਯ ਮਹੇਸਿਨੋ ਅਰਿਯਧਨਸਮ੍ਪੁਣ੍ਣਤਾਯ ਮਣਿਕਨਕਾਦਿਰਤਨਸਮ੍ਪੁਣ੍ਣਨਿਧਿਸਦਿਸਂ ਬੁਦ੍ਧਸ੍ਸ ਸਾਸਨਂ ਅਧਿਗਨ੍ਤ੍ਵਾ ਤੁਟ੍ਠੋ ਭਵੇਯ੍ਯਨ੍ਤਿ ਯਂ ਪਰਿਵਿਤਕ੍ਕਿਤਂ, ਤਂ ਕਦਾ ਨੁ ਭਵਿਸ੍ਸਤੀਤਿ.

ਏਵਂ ਪਬ੍ਬਜ੍ਜਤੋ ਪੁਬ੍ਬੇ ਨੇਕ੍ਖਮ੍ਮਵਿਤਕ੍ਕਵਸੇਨ ਪਵਤ੍ਤਂ ਅਤ੍ਤਨੋ ਵਿਤਕ੍ਕਪਵਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਪਬ੍ਬਜਿਤ੍ਵਾ ਯੇਹਾਕਾਰੇਹਿ ਅਤ੍ਤਾਨਂ ਓਵਦਿਤ੍ਵਾ ਅਧਿਗਚ੍ਛਿ, ਤੇ ਦਸ੍ਸੇਨ੍ਤੋ ‘‘ਬਹੂਨਿ ਵਸ੍ਸਾਨੀ’’ਤਿਆਦਿਕਾ ਗਾਥਾ ਅਭਾਸਿ. ਤਤ੍ਥ ਬਹੂਨਿ ਵਸ੍ਸਾਨਿ ਤਯਾਮ੍ਹਿ ਯਾਚਿਤੋ, ਅਗਾਰਵਾਸੇਨ ਅਲਂ ਨੁ ਤੇ ਇਦਨ੍ਤਿ ਅਨੇਕਸਂਵਚ੍ਛਰਾਨਿ ਵਿਵਿਧਦੁਕ੍ਖਾਨੁਬਨ੍ਧੇਨ ਅਗਾਰਮਜ੍ਝੇ ਵਾਸੇਨ ਅਲਂ ਪਰਿਯਤ੍ਤਮੇਵ ਤੇਤਿ, ਅਮ੍ਭੋ ਚਿਤ੍ਤ, ਇਦਂ ਤਯਾ ਅਨੇਕਾਨਿ ਸਂਵਚ੍ਛਰਾਨਿ ਅਹਂ ਅਮ੍ਹਿ ਨਨੁ ਯਾਚਿਤੋ. ਤਂ ਦਾਨਿ ਮਂ ਪਬ੍ਬਜਿਤਂ ਸਮਾਨਨ੍ਤਿ ਤਂ ਮਂ ਤਯਾ ਤਥਾ ਉਸ੍ਸਾਹਨੇਨ ਪਬ੍ਬਜਿਤਂ ਸਮਾਨਂ ਕੇਨ ਕਾਰਣੇਨ ਚਿਤ੍ਤ ਤੁਵਂ ਨ ਯੁਞ੍ਜਸਿ, ਸਮਥਵਿਪਸ੍ਸਨਂ ਛਡ੍ਡੇਤ੍ਵਾ ਨਿਹੀਨੇ ਆਲਸਿਯੇ ਨਿਯੋਜੇਸੀਤਿ ਅਤ੍ਥੋ.

ਨਨੁ ਅਹਂ, ਚਿਤ੍ਤ, ਤਯਾਮ੍ਹਿ ਯਾਚਿਤੋਤਿ, ਅਮ੍ਭੋ ਚਿਤ੍ਤ, ਅਹਂ ਤਯਾ ਨਨੁ ਯਾਚਿਤੋ ਅਮ੍ਹਿ ਆਯਾਚਿਤੋ ਮਞ੍ਞੇ. ਯਦਿ ਯਾਚਿਤੋ, ਕਸ੍ਮਾ ਇਦਾਨਿ ਤਦਨੁਰੂਪਂ ਨ ਪਟਿਪਜ੍ਜਸੀਤਿ ਅਧਿਪ੍ਪਾਯੋ. ‘‘ਗਿਰਿਬ੍ਬਜੇ’’ਤਿਆਦਿਨਾ ਯਾਚਿਤਾਕਾਰਂ ਦਸ੍ਸੇਤਿ. ਚਿਤ੍ਰਛਦਾ ਵਿਹਙ੍ਗਮਾ ਵਿਚਿਤ੍ਰਪੇਖੁਣਪਕ੍ਖਿਨੋ, ਮਯੂਰਾਤਿ ਅਤ੍ਥੋ. ਮਹਿਨ੍ਦਘੋਸਤ੍ਥਨਿਤਾਭਿਗਜ੍ਜਿਨੋਤਿ ਜਲਘੋਸਤ੍ਥਨਿਤੇਨ ਹੇਤੁਨਾ ਸੁਟ੍ਠੁ ਗਜ੍ਜਨਸੀਲਾ. ਤੇ ਤਂ ਰਮੇਸ੍ਸਨ੍ਤਿ ਵਨਮ੍ਹਿ ਝਾਯਿਨਨ੍ਤਿ ਤੇ ਮਯੂਰਾ ਤਂ ਵਨੇ ਝਾਨਪਸੁਤਂ ਰਮੇਸ੍ਸਨ੍ਤੀਤਿ ਨਨੁ ਤਯਾ ਯਾਚਿਤੋਤਿ ਦਸ੍ਸੇਤਿ.

ਕੁਲਮ੍ਹੀਤਿ ਕੁਲਪਰਿਵਟ੍ਟੇ. ਇਮਮਜ੍ਝੁਪਾਗਤੋਤਿ ਇਮਂ ਅਰਞ੍ਞਟ੍ਠਾਨਂ ਪਬ੍ਬਜ੍ਜਂ ਵਾ ਅਜ੍ਝੁਪਾਗਤੋ. ਅਥੋਪਿ ਤ੍ਵਂ, ਚਿਤ੍ਤ, ਨ ਮਯ੍ਹ ਤੁਸ੍ਸਸੀਤਿ ਤ੍ਵਂ ਅਨੁਵਤ੍ਤਿਤ੍ਵਾ ਠਿਤਮ੍ਪਿ ਮਂ ਨਾਰਾਧੇਸ੍ਸਸੀਤਿ ਅਤ੍ਥੋ.

ਮਮੇਵ ਏਤਂ ਨ ਹਿ ਤ੍ਵਂ ਪਰੇਸਨ੍ਤਿ ਏਤਂ, ਚਿਤ੍ਤ, ਮਮੇਵ ਤਸ੍ਮਾ ਤ੍ਵਂ ਪਰੇਸਂ ਨ ਹੋਸਿ. ਤ੍ਵਂ ਪਨ ਅਞ੍ਞੇਸਂ ਵਿਯ ਕਤ੍ਵਾ ਸਨ੍ਨਾਹਕਾਲੇ ਕਿਲੇਸਮਾਰੇ ਯੁਜ੍ਝਿਤੁਂ ਭਾਵਨਾਸਨ੍ਨਾਹਕਾਲੇ ਨਤਿ ਵਤ੍ਵਾ ਪਰਿਦੇਵਿਤੇਨ ਕਿਂ ਪਯੋਜਨਂ, ਇਦਾਨਿ ਤਂ ਅਞ੍ਞਥਾ ਵਤ੍ਤਿਤੁਂ ਨ ਦਸ੍ਸਾਮੀਤਿ ਅਧਿਪ੍ਪਾਯੋ. ਸਬ੍ਬਂ ਇਦਂ ਚਲਮਿਤਿ ਪੇਕ੍ਖਮਾਨੋਤਿ ਯਸ੍ਮਾ ‘‘ਇਦਂ ਚਿਤ੍ਤਂ ਅਞ੍ਞਞ੍ਚ ਸਬ੍ਬਂ ਤੇਭੂਮਕਸਙ੍ਖਾਰਂ ਚਲਂ ਅਨਵਟ੍ਠਿਤ’’ਨ੍ਤਿ ਪਞ੍ਞਾਚਕ੍ਖੁਨਾ ਓਲੋਕੇਨ੍ਤੋ ਗੇਹਤੋ ਕਾਮੇਹਿ ਚ ਅਭਿਨਿਕ੍ਖਮਿਂ ਅਮਤਪਦਂ ਨਿਬ੍ਬਾਨਂ ਜਿਗੀਸਂ ਪਰਿਯੇਸਨ੍ਤੋ, ਤਸ੍ਮਾ, ਚਿਤ੍ਤ, ਅਨਨੁਵਤ੍ਤਨ੍ਤੋ ਨਿਬ੍ਬਾਨਂ ਪਰਿਯੇਸਨਮੇਵ ਕਰੋਮੀਤਿ ਅਧਿਪ੍ਪਾਯੋ.

ਅਵੀਤਰਾਗੇਨ ਸੁਦੁਨ੍ਨਿਵਾਰਯਂ ਚਿਤ੍ਤਂ ਚਲਂ ਮਕ੍ਕਟਸਨ੍ਨਿਭਂ ਵਨਮਕ੍ਕਟਸਦਿਸਂ ਇਤਿ ਸੁਯੁਤ੍ਤਵਾਦੀ ਸੁਭਾਸਿਤਵਾਦੀ ਦ੍ਵਿਪਦਾਨਮੁਤ੍ਤਮੋ ਮਹਾਭਿਸਕ੍ਕੋ ਨਰਦਮ੍ਮਸਾਰਥੀਤਿ ਯੋਜਨਾ.

ਅਵਿਦ੍ਦਸੂ ਯਤ੍ਥ ਸਿਤਾ ਪੁਥੁਜ੍ਜਨਾਤਿ ਯਤ੍ਥ ਯੇਸੁ ਵਤ੍ਥੁਕਾਮੇਸੁ ਕਿਲੇਸਕਾਮੇਸੁ ਚ ਸਿਤਾ ਪਟਿਬਦ੍ਧਾ ਤੇ ਅਨ੍ਧਪੁਥੁਜ੍ਜਨਾ ਤੇਨ ਕਾਮਰਾਗੇਨ ਪੁਨਬ੍ਭਵੇਸਿਨੋ ਏਕਨ੍ਤੇਨੇਵ ਦੁਕ੍ਖਮਿਚ੍ਛਨ੍ਤਿ. ਇਚ੍ਛਨ੍ਤਾ ਚ ਚਿਤ੍ਤੇਨ ਨੀਤਾ ਨਿਰਯੇ ਨਿਰਾਕਤਾਤਿ ਚਿਤ੍ਤਵਸਿਕਾ ਨਿਰਯਸਂਵਤ੍ਤਨਿਕਂ ਕਮ੍ਮਂ ਕਰੋਨ੍ਤਾ ਹਿਤਸੁਖਤੋ ਨਿਰਾਕਤਾ ਹੁਤ੍ਵਾ ਅਤ੍ਤਨੋ ਚਿਤ੍ਤੇਨੇਵ ਨਿਰਯੇ ਨੀਤਾ ਨ ਅਞ੍ਞਥਾਤਿ ਚਿਤ੍ਤਸ੍ਸੇਵ ਨਿਗ੍ਗਹੇਤਬ੍ਬਤਂ ਦਸ੍ਸੇਤਿ.

ਪੁਨਪਿ ਚਿਤ੍ਤਂਯੇਵ ਨਿਗ੍ਗਹੇਤੁਂ ਮਨ੍ਤੇਨ੍ਤੋ ‘‘ਮਯੂਰਕੋਞ੍ਚਾਭਿਰੁਤਮ੍ਹੀ’’ਤਿਆਦਿਮਾਹ. ਤਤ੍ਥ ਮਯੂਰਕੋਞ੍ਚਾਭਿਰੁਤਮ੍ਹੀਤਿ ਸਿਖੀਹਿ ਸਾਰਸੇਹਿ ਚ ਅਭਿਕੂਜਿਤੇ. ਦੀਪੀਹਿ ਬ੍ਯਗ੍ਘੇਹਿ ਪੁਰਕ੍ਖਤੋ ਵਸਨ੍ਤਿ ਮੇਤ੍ਤਾਵਿਹਾਰਿਤਾਯ ਏਵਰੂਪੇਹਿ ਤਿਰਚ੍ਛਾਨਗਤੇਹਿ ਪੁਰਕ੍ਖਤੋ ਪਰਿਵਾਰਿਤੋ ਹੁਤ੍ਵਾ ਵਨੇ ਵਸਨ੍ਤੋ, ਏਤੇਨ ਸੁਞ੍ਞਭਾਵਪਰਿਬ੍ਰੂਹਨਮਾਹ. ਕਾਯੇ ਅਪੇਕ੍ਖਂ ਜਹਾਤਿ ਸਬ੍ਬਸੋ ਕਾਯੇ ਨਿਰਪੇਕ੍ਖੋ ਜਹ, ਏਤੇਨ ਪਹਿਤਤ੍ਤਤਂ ਵਦਤਿ. ਮਾ ਵਿਰਾਧਯਾਤਿ ਇਮਂ ਸੁਦੁਲ੍ਲਭਂ ਨਵਮਂ ਖਣਂ ਮਾ ਵਿਰਾਧੇਹਿ. ਇਤਿਸ੍ਸੁ ਮਂ, ਚਿਤ੍ਤ, ਪੁਰੇ ਨਿਯੁਞ੍ਜਸੀਤਿ ਏਵਞ੍ਹਿ ਤ੍ਵਂ, ਚਿਤ੍ਤ, ਮਂ ਪਬ੍ਬਜ੍ਜਤੋ ਪੁਬ੍ਬੇ ਸਮ੍ਮਾਪਟਿਪਤ੍ਤਿਯਂ ਉਯ੍ਯੋਜੇਸੀਤਿ ਅਤ੍ਥੋ.

ਭਾਵੇਹੀਤਿ ਉਪ੍ਪਾਦੇਹਿ ਵਡ੍ਢੇਹਿ ਚ. ਝਾਨਾਨੀਤਿ ਪਠਮਾਦੀਨਿ ਚਤ੍ਤਾਰਿ ਝਾਨਾਨਿ. ਇਨ੍ਦ੍ਰਿਯਾਨੀਤਿ ਸਦ੍ਧਾਦੀਨਿ ਪਞ੍ਚਿਨ੍ਦ੍ਰਿਯਾਨਿ. ਬਲਾਨੀਤਿ ਤਾਨਿਯੇਵ ਪਞ੍ਚ ਬਲਾਨਿ. ਬੋਜ੍ਝਙ੍ਗਸਮਾਧਿਭਾਵਨਾਤਿ ਸਤ੍ਤ ਬੋਜ੍ਝਙ੍ਗੇ ਚਤਸ੍ਸੋ ਸਮਾਧਿਭਾਵਨਾ ਚ. ਤਿਸ੍ਸੋ ਚ ਵਿਜ੍ਜਾਤਿ ਪੁਬ੍ਬੇਨਿਵਾਸਞਾਣਾਦਿਕਾ ਤਿਸ੍ਸੋ ਵਿਜ੍ਜਾ ਚ. ਫੁਸ ਪਾਪੁਣਾਹਿ ਬੁਦ੍ਧਸਾਸਨੇ ਸਮ੍ਮਾਸਮ੍ਬੁਦ੍ਧਓਵਾਦੇ ਠਿਤੋ.

ਨਿਯ੍ਯਾਨਿਕਨ੍ਤਿ ਵਟ੍ਟਦੁਕ੍ਖਤੋ ਨਿਯ੍ਹਾਨਵਹਂ. ਸਬ੍ਬਦੁਕ੍ਖਕ੍ਖਯੋਗਧਨ੍ਤਿ ਅਮਤੋਗਧਂ ਨਿਬ੍ਬਾਨਪਤਿਟ੍ਠਂ ਨਿਬ੍ਬਾਨਾਰਮ੍ਮਣਂ. ਸਬ੍ਬਕਿਲੇਸਸੋਧਨਨ੍ਤਿ ਅਨਵਸੇਸਕਿਲੇਸਮਲਵਿਸੋਧਨਂ.

ਖਨ੍ਧੇਤਿ ਉਪਾਦਾਨਕ੍ਖਨ੍ਧੇ. ਪਟਿਪਸ੍ਸ ਯੋਨਿਸੋਤਿ ਰੋਗਤੋ ਗਣ੍ਡਤੋ ਸਲ੍ਲਤੋ ਅਘਤੋ ਆਬਾਧਤੋਤਿ ਏਵਮਾਦੀਹਿ ਵਿਵਿਧੇਹਿ ਪਕਾਰੇਹਿ ਵਿਪਸ੍ਸਨਾਞਾਣੇਨ ਸਮ੍ਮਾ ਉਪਾਯੇਨ ਨਯੇਨ ਪਸ੍ਸ. ਤਂ ਜਹਾਤਿ ਤਂ ਦੁਕ੍ਖਸ੍ਸ ਸਮੁਦਯਂ ਤਣ੍ਹਂ ਪਜਹ, ਸਮੁਚ੍ਛਿਨ੍ਦ. ਇਧੇਵਾਤਿ ਇਮਸ੍ਮਿਂਯੇਵ ਅਤ੍ਤਭਾਵੇ.

ਅਨਿਚ੍ਚਨ੍ਤਿਆਦਿ ਅਨ੍ਤਵਨ੍ਤਤੋ ਅਨਿਚ੍ਚਨ੍ਤਿਕਤੋ ਤਾਵਕਾਲਿਕਤੋ ਨਿਚ੍ਚਪਟਿਕ੍ਖੇਪਤੋ ਚ ਅਨਿਚ੍ਚਨ੍ਤਿ ਵਾ ਪਸ੍ਸ. ਦੁਕ੍ਖਨ੍ਤਿ ਤੇ ਉਦਯਬ੍ਬਯਪਟਿਪੀਲ਼ਨਤੋ ਸਪ੍ਪਟਿਭਯਤੋ ਦੁਕ੍ਖਮਤੋ ਸੁਖਪਟਿਕ੍ਖੇਪਤੋ ਦੁਕ੍ਖਨ੍ਤਿ ਵਾ ਪਸ੍ਸ. ਸੁਞ੍ਞਨ੍ਤਿ ਅਵਸਵਤ੍ਤਨਤੋ ਅਸਾਮਿਕਤੋ ਅਸਾਰਤੋ ਅਤ੍ਤਪਟਿਕ੍ਖੇਪਤੋ ਚ ਸੁਞ੍ਞਂ, ਤਤੋ ਏਵ ਅਨਤ੍ਤਾਤਿ. ਵਿਗਰਹਿਤਬ੍ਬਤੋ ਅਵਡ੍ਢਿਆਬਾਧਨਤੋ ਚ ਅਘਨ੍ਤਿ ਚ ਵਧਨ੍ਤਿ ਚ ਵਿਪਸ੍ਸ ਯੋਨਿਸੋਤਿ ਯੋਜਨਾ. ਮਨੋਵਿਚਾਰੇ ਉਪਰੁਨ੍ਧ ਚੇਤਸੋਤਿ ਮਨੋਵਿਚਾਰਸਞ੍ਞਿਨੋ ਗੇਹਸਿਤਸੋਮਨਸ੍ਸੁਪਵਿਚਾਰਾਦਿਕੇ ਅਟ੍ਠਾਰਸ ਚੇਤਸੋ ਉਪਰੁਨ੍ਧ ਵਾਰੇਹਿ ਨਿਰੋਧੇਹਿ.

ਮੁਣ੍ਡੋਤਿ ਮੁਣ੍ਡਭਾਵਂ ਉਪਗਤੋ, ਓਹਾਰਿਤਕੇਸਮਸ੍ਸੁਕੋ. ਵਿਰੂਪੋਤਿ ਤੇਨ ਮੁਣ੍ਡਭਾਵੇਨ ਪਰੂਲ਼੍ਹਲੋਮਤਾਯ ਛਿਨ੍ਨਭਿਨ੍ਨਕਾਸਾਯ ਵਤ੍ਥਤਾਯ ਵਿਰੂਪੋ ਵੇਵਣ੍ਣਿਯਂ ਉਪਗਤੋ. ਅਭਿਸਾਪਮਾਗਤੋਤਿ ‘‘ਪਿਣ੍ਡੋਲੋ ਵਿਚਰਤਿ ਪਤ੍ਤਪਾਣੀ’’ਤਿ ਅਰਿਯੇਹਿ ਕਾਤਬ੍ਬਂ ਅਭਿਸਾਪਂ ਉਪਗਤੋ. ਵੁਤ੍ਤਞ੍ਹੇਤਂ – ‘‘ਅਭਿਸਾਪੋਯਂ, ਭਿਕ੍ਖਵੇ, ਲੋਕਸ੍ਮਿਂ ਪਿਣ੍ਡੋਲੋ ਵਿਚਰਸਿ ਪਤ੍ਤਪਾਣੀ’’ਤਿ (ਸਂ. ਨਿ. ੩.੮੦). ਤੇਨਾਹ ‘‘ਕਪਾਲਹਤ੍ਥੋਵ ਕੁਲੇਸੁ ਭਿਕ੍ਖਸੂ’’ਤਿ. ਯੁਞ੍ਜਸ੍ਸੁ ਸਤ੍ਥੁਵਚਨੇਤਿ ਸਮ੍ਮਾਸਮ੍ਬੁਦ੍ਧਸ੍ਸ ਓਵਾਦੇ ਯੋਗਂ ਕਰੋਹਿ ਅਨੁਯੁਞ੍ਜਸ੍ਸੁ.

ਸੁਸਂਵੁਤਤ੍ਤੋਤਿ ਸੁਟ੍ਠੁ ਕਾਯਵਾਚਾਚਿਤ੍ਤੇਹਿ ਸਮ੍ਮਦੇਵ ਸਂਵੁਤੋ. ਵਿਸਿਖਨ੍ਤਰੇ ਚਰਨ੍ਤਿ ਭਿਕ੍ਖਾਚਰਿਯਾਯ ਇਚ੍ਛਾਵਿਸੇਸੇਸੁ ਚਰਨ੍ਤੋ. ਚਨ੍ਦੋ ਯਥਾ ਦੋਸਿਨਪੁਣ੍ਣਮਾਸਿਯਾਤਿ ਵਿਗਤਦੋਸਾਯ ਪੁਣ੍ਣਮਾਯ ਕੁਲੇਸੁ ਨਿਚ੍ਚਨਵਸਾਯ ਪਾਸਾਦਿਕਤਾਯ ਚਨ੍ਦਿਮਾ ਵਿਯ ਚਰਾਤਿ ਯੋਜਨਾ.

ਸਦਾ ਧੁਤੇ ਰਤੋਤਿ ਸਬ੍ਬਕਾਲਞ੍ਚ ਧੁਤਗੁਣੇ ਅਭਿਰਤੋ. ਤਥੂਪਮਂ ਚਿਤ੍ਤਮਿਦਂ ਕਰੋਸੀਤਿ ਯਥਾ ਕੋਚਿ ਪੁਰਿਸੋ ਫਲਾਨਿ ਇਚ੍ਛਨ੍ਤੋ ਫਲਰੁਕ੍ਖੇ ਰੋਪੇਤ੍ਵਾ ਤਤੋ ਅਲਦ੍ਧਫਲੋਵ ਤੇ ਮੂਲਤੋ ਛਿਨ੍ਦਿਤੁਂ ਇਚ੍ਛਤਿ, ਚਿਤ੍ਤ, ਤ੍ਵਂ ਤਥੂਪਮਂ ਤਪ੍ਪਟਿਭਾਗਂ ਇਦਂ ਕਰੋਸਿ. ਯਂ ਮਂ ਅਨਿਚ੍ਚਮ੍ਹਿ ਚਲੇ ਨਿਯੁਞ੍ਜਸੀਤਿ ਯਂ ਮਂ ਪਬ੍ਬਜ੍ਜਾਯ ਨਿਯੋਜੇਤ੍ਵਾ ਪਬ੍ਬਜਿਤ੍ਵਾ ਅਦ੍ਧਾਗਤਂ ਪਬ੍ਬਜ੍ਜਾਫਲਂ ਅਨਿਚ੍ਚਮ੍ਹਿ ਚਲੇ ਸਂਸਾਰਮੁਖੇ ਨਿਯੁਞ੍ਜਸਿ ਨਿਯੋਜਨਵਸੇਨ ਪਵਤ੍ਤੇਸਿ.

ਰੂਪਾਭਾਵਤੋ ਅਰੂਪਾ. ਚਿਤ੍ਤਸ੍ਸ ਹਿ ਤਾਦਿਸਂ ਸਣ੍ਠਾਨਂ ਨੀਲਾਦਿਵਣ੍ਣਭੇਦੋ ਵਾ ਨਤ੍ਥਿ, ਤਸ੍ਮਾ ਵੁਤ੍ਤਂ ਅਰੂਪਾਤਿ. ਦੂਰਟ੍ਠਾਨਪ੍ਪਵਤ੍ਤਿਯਾ ਦੂਰਙ੍ਗਮ. ਯਦਿਪਿ ਚਿਤ੍ਤਸ੍ਸ ਮਕ੍ਕਟਸੁਤ੍ਤਮਤ੍ਤਮ੍ਪਿ ਪੁਰਤ੍ਥਿਮਾਦਿਦਿਸਾਭਾਗੇਨ ਗਮਨਂ ਨਾਮ ਨਤ੍ਥਿ, ਦੂਰੇ ਸਨ੍ਤਂ ਪਨ ਆਰਮ੍ਮਣਂ ਸਮ੍ਪਟਿਚ੍ਛਤੀਤਿ ਦੂਰਙ੍ਗਮ. ਏਕੋਯੇਵ ਹੁਤ੍ਵਾ ਚਰਣਵਸੇਨ ਪਵਤ੍ਤਨਤੋ ਏਕਚਾਰਿ, ਅਨ੍ਤਮਸੋ ਦ੍ਵੇ ਤੀਣਿਪਿ ਚਿਤ੍ਤਾਨਿ ਏਕਤੋ ਉਪ੍ਪਜ੍ਜਿਤੁਂ ਸਮਤ੍ਥਾਨਿ ਨਾਮ ਨਤ੍ਥਿ, ਏਕਮੇਵ ਪਨ ਚਿਤ੍ਤਂ ਏਕਸ੍ਮਿਂ ਸਨ੍ਤਾਨੇ ਉਪ੍ਪਜ੍ਜਤਿ. ਤਸ੍ਮਿਂ ਨਿਰੁਦ੍ਧੇ ਅਪਰਮ੍ਪਿ ਏਕਮੇਵ ਉਪ੍ਪਜ੍ਜਤਿ, ਤਸ੍ਮਾ ਏਕਚਾਰਿ. ਨ ਤੇ ਕਰਿਸ੍ਸਂ ਵਚਨਂ ਇਦਾਨਿਹਨ੍ਤਿ ਯਦਿਪਿ ਪੁਬ੍ਬੇ ਤਵ ਵਸੇ ਅਨੁਵਤ੍ਤਿਂ, ਇਦਾਨਿ ਪਨ ਸਤ੍ਥੁ ਓਵਾਦਂ ਲਦ੍ਧਕਾਲਤੋ ਪਟ੍ਠਾਯ ਚਿਤ੍ਤਵਸਿਕੋ ਨ ਭਵਿਸ੍ਸਾਮਿ. ਕਸ੍ਮਾਤਿ ਚੇ? ਦੁਕ੍ਖਾ ਹਿ ਕਾਮਾ ਕਟੁਕਾ ਮਹਬ੍ਭਯਾ ਕਾਮਾ ਨਾਮੇਤੇ ਅਤੀਤੇਪਿ ਦੁਕ੍ਖਾ, ਆਯਤਿਮ੍ਪਿ ਕਟੁਕਫਲਾ, ਅਤ੍ਤਾਨੁਵਾਦਾਦਿਭੇਦੇਨ ਮਹਤਾ ਭਯੇਨ ਅਨੁਬਨ੍ਧਨ੍ਤਾ ਮਹਬ੍ਭਯਾ. ਨਿਬ੍ਬਾਨਮੇਵਾਭਿਮਨੋ ਚਰਿਸ੍ਸਂ ਤਸ੍ਮਾ ਨਿਬ੍ਬਾਨਮੇਵ ਉਦ੍ਦਿਸ੍ਸ ਅਭਿਮੁਖਚਿਤ੍ਤੋ ਵਿਹਰਿਸ੍ਸਂ.

ਤਮੇਵ ਨਿਬ੍ਬਾਨਾਭਿਮੁਖਭਾਵਂ ਦਸ੍ਸੇਨ੍ਤੋ ‘‘ਨਾਹਂ ਅਲਕ੍ਖ੍ਯਾ’’ਤਿਆਦਿਮਾਹ. ਤਤ੍ਥ ਨਾਹਂ ਅਲਕ੍ਖ੍ਯਾਤਿ ਅਲਕ੍ਖਿਕਤਾਯ ਨਿਸ੍ਸਿਰੀਕਤਾਯ ਨਾਹਂ ਗੇਹਤੋ ਨਿਕ੍ਖਮਿਨ੍ਤਿ ਯੋਜਨਾ.

ਅਹਿਰਿਕ੍ਕਤਾਯਾਤਿ ਯਥਾਵਜ੍ਜਂ ਕੇਲ਼ਿਂ ਕਰੋਨ੍ਤੋ ਵਿਯ ਨਿਲ੍ਲਜ੍ਜਤਾਯ. ਚਿਤ੍ਤਹੇਤੂਤਿ ਏਕਦਾ ਨਿਗਣ੍ਠੋ, ਏਕਦਾ ਪਰਿਬ੍ਬਾਜਕਾਦਿਕੋ ਹੋਨ੍ਤੋ ਅਨਵਟ੍ਠਿਤਚਿਤ੍ਤੋ ਪੁਰਿਸੋ ਵਿਯ ਚਿਤ੍ਤਵਸਿਕੋ ਹੁਤ੍ਵਾ. ਦੂਰਕਨ੍ਤਨਾਤਿ ਰਾਜਾਦੀਹਿ ਮੇਤ੍ਤਂ ਕਤ੍ਵਾ ਤੇਸੁ ਦੁਬ੍ਭਿਤ੍ਵਾ ਦੁਬ੍ਭਿਭਾਵੇਨ. ਆਜੀਵਹੇਤੂਤਿ ਆਜੀਵਕਾਰਣਾ ਜੀਵਿਕਾਪਕਤੋ ਹੁਤ੍ਵਾ ਆਜੀਵਿਕਾਭਯੇਨ ਅਹਂ ਨ ਨਿਕ੍ਖਮਿਂ ਨ ਪਬ੍ਬਜਿਂ. ਕਤੋ ਚ ਤੇ, ਚਿਤ੍ਤ, ਪਟਿਸ੍ਸਵੋ ਮਯਾਤਿ, ‘‘ਪਬ੍ਬਜਿਤਕਾਲਤੋ ਪਟ੍ਠਾਯ ਨ ਤਵ ਵਸੇ ਵਤ੍ਤਾਮਿ, ਮਮੇਵ ਪਨ ਵਸੇ ਵਤ੍ਤਾਮੀ’’ਤਿ, ਚਿਤ੍ਤ, ਮਯਾ ਨਨੁ ਪਟਿਞ੍ਞਾ ਕਤਾਤਿ ਦਸ੍ਸੇਤਿ.