੧੫. ਅਤ੍ਤਦਣ੍ਡਸੁਤ੍ਤਵਣ੍ਣਨਾ

੯੪੨. ਅਤ੍ਤਦਣ੍ਡਾ ਭਯਂ ਜਾਤਨ੍ਤਿ ਅਤ੍ਤਦਣ੍ਡਸੁਤ੍ਤਂ. ਕਾ ਉਪ੍ਪਤ੍ਤਿ? ਯੋ ਸੋ ਸਮ੍ਮਾਪਰਿਬ੍ਬਾਜਨੀਯਸੁਤ੍ਤਸ੍ਸ ਉਪ੍ਪਤ੍ਤਿਯਂ ਵੁਚ੍ਚਮਾਨਾਯ ਸਾਕਿਯਕੋਲਿਯਾਨਂ ਉਦਕਂ ਪਟਿਚ੍ਚ ਕਲਹੋ ਵਣ੍ਣਿਤੋ, ਤਂ ਞਤ੍ਵਾ ਭਗਵਾ ‘‘ਞਾਤਕਾ ਕਲਹਂ ਕਰੋਨ੍ਤਿ, ਹਨ੍ਦ ਨੇ ਵਾਰੇਸ੍ਸਾਮੀ’’ਤਿ ਦ੍ਵਿਨ੍ਨਂ ਸੇਨਾਨਂ ਮਜ੍ਝੇ ਠਤ੍ਵਾ ਇਮਂ ਸੁਤ੍ਤਮਭਾਸਿ.

ਤਤ੍ਥ ਪਠਮਗਾਥਾਯਤ੍ਥੋ – ਯਂ ਲੋਕਸ੍ਸ ਦਿਟ੍ਠਧਮ੍ਮਿਕਂ ਵਾ ਸਮ੍ਪਰਾਯਿਕਂ ਵਾ ਭਯਂ ਜਾਤਂ, ਤਂ ਸਬ੍ਬਂ ਅਤ੍ਤਦਣ੍ਡਾ ਭਯਂ ਜਾਤਂ ਅਤ੍ਤਨੋ ਦੁਚ੍ਚਰਿਤਕਾਰਣਾ ਜਾਤਂ, ਏਵਂ ਸਨ੍ਤੇਪਿ ਜਨਂ ਪਸ੍ਸਥ ਮੇਧਗਂ, ਇਮਂ ਸਾਕਿਯਾਦਿਜਨਂ ਪਸ੍ਸਥ ਅਞ੍ਞਮਞ੍ਞਂ ਮੇਧਗਂ ਹਿਂਸਕਂ ਬਾਧਕਨ੍ਤਿ. ਏਵਂ ਤਂ ਪਟਿਵਿਰੁਦ੍ਧਂ ਵਿਪ੍ਪਟਿਪਨ੍ਨਂ ਜਨਂ ਪਰਿਭਾਸਿਤ੍ਵਾ ਅਤ੍ਤਨੋ ਸਮ੍ਮਾਪਟਿਪਤ੍ਤਿਦਸ੍ਸਨੇਨ ਤਸ੍ਸ ਸਂਵੇਗਂ ਜਨੇਤੁਂ ਆਹ ‘‘ਸਂਵੇਗਂ ਕਿਤ੍ਤਯਿਸ੍ਸਾਮਿ, ਯਥਾ ਸਂਵਿਜਿਤਂ ਮਯਾ’’ਤਿ, ਪੁਬ੍ਬੇ ਬੋਧਿਸਤ੍ਤੇਨੇਵ ਸਤਾਤਿ ਅਧਿਪ੍ਪਾਯੋ.

੯੪੩. ਇਦਾਨਿ ਯਥਾਨੇਨ ਸਂਵਿਜਿਤਂ, ਤਂ ਪਕਾਰਂ ਦਸ੍ਸੇਨ੍ਤੋ ‘‘ਫਨ੍ਦਮਾਨ’’ਨ੍ਤਿਆਦਿਮਾਹ. ਤਤ੍ਥ ਫਨ੍ਦਮਾਨਨ੍ਤਿ ਤਣ੍ਹਾਦੀਹਿ ਕਮ੍ਪਮਾਨਂ. ਅਪ੍ਪੋਦਕੇਤਿ ਅਪ੍ਪਉਦਕੇ. ਅਞ੍ਞਮਞ੍ਞੇਹਿ ਬ੍ਯਾਰੁਦ੍ਧੇ ਦਿਸ੍ਵਾਤਿ ਨਾਨਾਸਤ੍ਤੇ ਚ ਅਞ੍ਞਮਞ੍ਞੇਹਿ ਸਦ੍ਧਿਂ ਵਿਰੁਦ੍ਧੇ ਦਿਸ੍ਵਾ. ਮਂ ਭਯਮਾਵਿਸੀਤਿ ਮਂ ਭਯਂ ਪਵਿਟ੍ਠਂ.

੯੪੪. ਸਮਨ੍ਤਮਸਾਰੋ ਲੋਕੋਤਿ ਨਿਰਯਂ ਆਦਿਂ ਕਤ੍ਵਾ ਸਮਨ੍ਤਤੋ ਲੋਕੋ ਅਸਾਰੋ ਨਿਚ੍ਚਸਾਰਾਦਿਰਹਿਤੋ. ਦਿਸਾ ਸਬ੍ਬਾ ਸਮੇਰਿਤਾਤਿ ਸਬ੍ਬਾ ਦਿਸਾ ਅਨਿਚ੍ਚਤਾਯ ਕਮ੍ਪਿਤਾ. ਇਚ੍ਛਂ ਭਵਨਮਤ੍ਤਨੋਤਿ ਅਤ੍ਤਨੋ ਤਾਣਂ ਇਚ੍ਛਨ੍ਤੋ. ਨਾਦ੍ਦਸਾਸਿਂ ਅਨੋਸਿਤਨ੍ਤਿ ਕਿਞ੍ਚਿ ਠਾਨਂ ਜਰਾਦੀਹਿ ਅਨਜ੍ਝਾਵੁਤ੍ਥਂ ਨਾਦ੍ਦਕ੍ਖਿਂ.

੯੪੫. ਓਸਾਨੇਤ੍ਵੇਵ ਬ੍ਯਾਰੁਦ੍ਧੇ, ਦਿਸ੍ਵਾ ਮੇ ਅਰਤੀ ਅਹੂਤਿ ਯੋਬ੍ਬਞ੍ਞਾਦੀਨਂ ਓਸਾਨੇ ਏਵ ਅਨ੍ਤਗਮਕੇ ਏਵ ਵਿਨਾਸਕੇ ਏਵ ਜਰਾਦੀਹਿ ਬ੍ਯਾਰੁਦ੍ਧੇ ਆਹਤਚਿਤ੍ਤੇ ਸਤ੍ਤੇ ਦਿਸ੍ਵਾ ਅਰਤਿ ਮੇ ਅਹੋਸਿ. ਅਥੇਤ੍ਥ ਸਲ੍ਲਨ੍ਤਿ ਅਥ ਏਤੇਸੁ ਸਤ੍ਤੇਸੁ ਰਾਗਾਦਿਸਲ੍ਲਂ. ਹਦਯਨਿਸ੍ਸਿਤਨ੍ਤਿ ਚਿਤ੍ਤਨਿਸ੍ਸਿਤਂ.

੯੪੬. ‘‘ਕਥਂਆਨੁਭਾਵਂ ਸਲ੍ਲ’’ਨ੍ਤਿ ਚੇ – ਯੇਨ ਸਲ੍ਲੇਨ ਓਤਿਣ੍ਣੋਤਿ ਗਾਥਾ. ਤਤ੍ਥ ਦਿਸਾ ਸਬ੍ਬਾ ਵਿਧਾਵਤੀਤਿ ਸਬ੍ਬਾ ਦੁਚ੍ਚਰਿਤਦਿਸਾਪਿ ਪੁਰਤ੍ਥਿਮਾਦਿਦਿਸਾਵਿਦਿਸਾਪਿ ਧਾਵਤਿ. ਤਮੇਵ ਸਲ੍ਲਮਬ੍ਬੁਯ੍ਹ, ਨ ਧਾਵਤਿ ਨ ਸੀਦਤੀਤਿ ਤਮੇਵ ਸਲ੍ਲਂ ਉਦ੍ਧਰਿਤ੍ਵਾ ਤਾ ਚ ਦਿਸਾ ਨ ਧਾਵਤਿ, ਚਤੁਰੋਘੇ ਚ ਨ ਸੀਦਤੀਤਿ.

੯੪੭. ਏਵਂਮਹਾਨੁਭਾਵੇਨ ਸਲ੍ਲੇਨ ਓਤਿਣ੍ਣੇਸ੍ਵਪਿ ਚ ਸਤ੍ਤੇਸੁ – ਤਤ੍ਥ ਸਿਕ੍ਖਾਨੁਗੀਯਨ੍ਤਿ, ਯਾਨਿ ਲੋਕੇ ਗਧਿਤਾਨੀਤਿ ਗਾਥਾ. ਤਸ੍ਸਤ੍ਥੋ – ਯੇ ਲੋਕੇ ਪਞ੍ਚ ਕਾਮਗੁਣਾ ਪਟਿਲਾਭਾਯ ਗਿਜ੍ਝਨ੍ਤੀਤਿ ਕਤ੍ਵਾ ‘‘ਗਧਿਤਾਨੀ’’ਤਿ ਵੁਚ੍ਚਨ੍ਤਿ, ਚਿਰਕਾਲਾਸੇਵਿਤਤ੍ਤਾ ਵਾ ‘‘ਗਧਿਤਾਨੀ’’ਤਿ ਵੁਚ੍ਚਨ੍ਤਿ, ਤਤ੍ਥ ਤਂ ਨਿਮਿਤ੍ਤਂ ਹਤ੍ਥਿਸਿਕ੍ਖਾਦਿਕਾ ਅਨੇਕਾ ਸਿਕ੍ਖਾ ਕਥੀਯਨ੍ਤਿ ਉਗ੍ਗਯ੍ਹਨ੍ਤਿ ਵਾ. ਪਸ੍ਸਥ ਯਾਵ ਪਮਤ੍ਤੋ ਵਾਯਂ ਲੋਕੋ, ਯਤੋ ਪਣ੍ਡਿਤੋ ਕੁਲਪੁਤ੍ਤੋ ਤੇਸੁ ਵਾ ਗਧਿਤੇਸੁ ਤਾਸੁ ਵਾ ਸਿਕ੍ਖਾਸੁ ਅਧਿਮੁਤ੍ਤੋ ਨ ਸਿਯਾ, ਅਞ੍ਞਦਤ੍ਥੁ ਅਨਿਚ੍ਚਾਦਿਦਸ੍ਸਨੇਨ ਨਿਬ੍ਬਿਜ੍ਝ ਸਬ੍ਬਸੋ ਕਾਮੇ ਅਤ੍ਤਨੋ ਨਿਬ੍ਬਾਨਮੇਵ ਸਿਕ੍ਖੇਤਿ.

੯੪੮. ਇਦਾਨਿ ਯਥਾ ਨਿਬ੍ਬਾਨਾਯ ਸਿਕ੍ਖਿਤਬ੍ਬਂ, ਤਂ ਦਸ੍ਸੇਨ੍ਤੋ ‘‘ਸਚ੍ਚੋ ਸਿਯਾ’’ਤਿਆਦਿਮਾਹ. ਤਤ੍ਥ ਸਚ੍ਚੋਤਿ ਵਾਚਾਸਚ੍ਚੇਨ ਞਾਣਸਚ੍ਚੇਨ ਮਗ੍ਗਸਚ੍ਚੇਨ ਚ ਸਮਨ੍ਨਾਗਤੋ. ਰਿਤ੍ਤਪੇਸੁਣੋਤਿ ਪਹੀਨਪੇਸੁਣੋ. ਵੇਵਿਚ੍ਛਨ੍ਤਿ ਮਚ੍ਛਰਿਯਂ.

੯੪੯. ਨਿਦ੍ਦਂ ਤਨ੍ਦਿਂ ਸਹੇ ਥੀਨਨ੍ਤਿ ਪਚਲਾਯਿਕਞ੍ਚ ਕਾਯਾਲਸਿਯਞ੍ਚ ਚਿਤ੍ਤਾਲਸਿਯਞ੍ਚਾਤਿ ਇਮੇ ਤਯੋ ਧਮ੍ਮੇ ਅਭਿਭਵੇਯ੍ਯ. ਨਿਬ੍ਬਾਨਮਨਸੋਤਿ ਨਿਬ੍ਬਾਨਨਿਨ੍ਨਚਿਤ੍ਤੋ.

੯੫੦-੫੧. ਸਾਹਸਾਤਿ ਰਤ੍ਤਸ੍ਸ ਰਾਗਚਰਿਯਾਦਿਭੇਦਾ ਸਾਹਸਕਰਣਾ. ਪੁਰਾਣਂ ਨਾਭਿਨਨ੍ਦੇਯ੍ਯਾਤਿ ਅਤੀਤਰੂਪਾਦਿਂ ਨਾਭਿਨਨ੍ਦੇਯ੍ਯ. ਨਵੇਤਿ ਪਚ੍ਚੁਪ੍ਪਨ੍ਨੇ. ਹਿਯ੍ਯਮਾਨੇਤਿ ਵਿਨਸ੍ਸਮਾਨੇ. ਆਕਾਸਂ ਨ ਸਿਤੋ ਸਿਯਾਤਿ ਤਣ੍ਹਾਨਿਸ੍ਸਿਤੋ ਨ ਭਵੇਯ੍ਯ. ਤਣ੍ਹਾ ਹਿ ਰੂਪਾਦੀਨਂ ਆਕਾਸਨਤੋ ‘‘ਆਕਾਸੋ’’ਤਿ ਵੁਚ੍ਚਤਿ.

੯੫੨. ‘‘ਕਿਂਕਾਰਣਾ ਆਕਾਸਂ ਨ ਸਿਤੋ ਸਿਯਾ’’ਤਿ ਚੇ – ‘‘ਗੇਧਂ ਬ੍ਰੂਮੀ’’ਤਿ ਗਾਥਾ. ਤਸ੍ਸਤ੍ਥੋ – ਅਹਞ੍ਹਿ ਇਮਂ ਆਕਾਸਸਙ੍ਖਾਤਂ ਤਣ੍ਹਂ ਰੂਪਾਦੀਸੁ ਗਿਜ੍ਝਨਤੋ ਗੇਧਂ ਬ੍ਰੂਮਿ ‘‘ਗੇਧੋ’’ਤਿ ਵਦਾਮਿ. ਕਿਞ੍ਚ ਭਿਯ੍ਯੋ – ਅਵਹਨਨਟ੍ਠੇਨ ‘‘ਓਘੋ’’ਤਿ ਚ ਆਜਵਨਟ੍ਠੇਨ ‘‘ਆਜਵ’’ਨ੍ਤਿ ਚ ‘‘ਇਦਂ ਮਯ੍ਹਂ, ਇਦਂ ਮਯ੍ਹ’’ਨ੍ਤਿ ਜਪ੍ਪਕਾਰਣਤੋ ‘‘ਜਪ੍ਪਨ’’ਨ੍ਤਿ ਚ ਦੁਮ੍ਮੁਞ੍ਚਨਟ੍ਠੇਨ ‘‘ਆਰਮ੍ਮਣ’’ਨ੍ਤਿ ਚ ਕਮ੍ਪਕਰਣੇਨ ‘‘ਪਕਮ੍ਪਨ’’ਨ੍ਤਿ ਚ ਬ੍ਰੂਮਿ, ਏਸਾ ਚ ਲੋਕਸ੍ਸ ਪਲਿਬੋਧਟ੍ਠੇਨ ਦੁਰਤਿਕ੍ਕਮਨੀਯਟ੍ਠੇਨ ਚ ਕਾਮਪਙ੍ਕੋ ਦੁਰਚ੍ਚਯੋਤਿ. ‘‘ਆਕਾਸਂ ਨ ਸਿਤੋ ਸਿਯਾ’’ਤਿ ਏਵਂ ਵੁਤ੍ਤੇ ਵਾ ‘‘ਕਿਮੇਤਂ ਆਕਾਸ’’ਨ੍ਤਿ ਚੇ? ਗੇਧਂ ਬ੍ਰੂਮੀਤਿ. ਏਵਮ੍ਪਿ ਤਸ੍ਸਾ ਗਾਥਾਯ ਸਮ੍ਬਨ੍ਧੋ ਵੇਦਿਤਬ੍ਬੋ. ਤਤ੍ਥ ਪਦਯੋਜਨਾ – ਆਕਾਸਨ੍ਤਿ ਗੇਧਂ ਬ੍ਰੂਮੀਤਿ. ਤਥਾ ਯ੍ਵਾਯਂ ਮਹੋਘੋਤਿ ਵੁਚ੍ਚਤਿ. ਤਂ ਬ੍ਰੂਮਿ, ਆਜਵਂ ਬ੍ਰੂਮਿ, ਜਪ੍ਪਨਂ ਬ੍ਰੂਮਿ, ਪਕਮ੍ਪਨਂ ਬ੍ਰੂਮਿ, ਯ੍ਵਾਯਂ ਸਦੇਵਕੇ ਲੋਕੇ ਕਾਮਪਙ੍ਕੋ ਦੁਰਚ੍ਚਯੋ, ਤਂ ਬ੍ਰੂਮੀਤਿ.

੯੫੩. ਏਵਮੇਤਂ ਗੇਧਾਦਿਪਰਿਯਾਯਂ ਆਕਾਸਂ ਅਨਿਸ੍ਸਿਤੋ – ਸਚ੍ਚਾ ਅਵੋਕ੍ਕਮ੍ਮਾਤਿ ਗਾਥਾ. ਤਸ੍ਸਤ੍ਥੋ – ਪੁਬ੍ਬੇ ਵੁਤ੍ਤਾ ਤਿਵਿਧਾਪਿ ਸਚ੍ਚਾ ਅਵੋਕ੍ਕਮ੍ਮ ਮੋਨੇਯ੍ਯਪ੍ਪਤ੍ਤਿਯਾ ਮੁਨੀਤਿ ਸਙ੍ਖ੍ਯਂ ਗਤੋ ਨਿਬ੍ਬਾਨਤ੍ਥਲੇ ਤਿਟ੍ਠਤਿ ਬ੍ਰਾਹ੍ਮਣੋ, ਸ ਵੇ ਏਵਰੂਪੋ ਸਬ੍ਬਾਨਿ ਆਯਤਨਾਨਿ ਨਿਸ੍ਸਜ੍ਜਿਤ੍ਵਾ ‘‘ਸਨ੍ਤੋ’’ਤਿ ਵੁਚ੍ਚਤੀਤਿ.

੯੫੪. ਕਿਞ੍ਚ ਭਿਯ੍ਯੋ – ਸ ਵੇ ਵਿਦ੍ਵਾਤਿ ਗਾਥਾ. ਤਤ੍ਥ ਞਤ੍ਵਾ ਧਮ੍ਮਨ੍ਤਿ ਅਨਿਚ੍ਚਾਦਿਨਯੇਨ ਸਙ੍ਖਤਧਮ੍ਮਂ ਞਤ੍ਵਾ. ਸਮ੍ਮਾ ਸੋ ਲੋਕੇ ਇਰਿਯਾਨੋਤਿ ਅਸਮ੍ਮਾਇਰਿਯਨਕਰਾਨਂ ਕਿਲੇਸਾਨਂ ਪਹਾਨਾ ਸਮ੍ਮਾ ਸੋ ਲੋਕੇ ਇਰਿਯਮਾਨੋ.

੯੫੫. ਏਵਂ ਅਪਿਹੇਨ੍ਤੋ ਚ – ਯੋਧ ਕਾਮੇਤਿ ਗਾਥਾ. ਤਤ੍ਥ ਸਙ੍ਗਨ੍ਤਿ ਸਤ੍ਤਵਿਧਂ ਸਙ੍ਗਞ੍ਚ ਯੋ ਅਚ੍ਚਤਰਿ ਨਾਜ੍ਝੇਤੀਤਿ ਨਾਭਿਜ੍ਝਾਯਤਿ.

੯੫੬. ਤਸ੍ਮਾ ਤੁਮ੍ਹੇਸੁਪਿ ਯੋ ਏਵਰੂਪੋ ਹੋਤੁਮਿਚ੍ਛਤਿ, ਤਂ ਵਦਾਮਿ – ਯਂ ਪੁਬ੍ਬੇਤਿ ਗਾਥਾ. ਤਤ੍ਥ ਯਂ ਪੁਬ੍ਬੇਤਿ ਅਤੀਤੇ ਸਙ੍ਖਾਰੇ ਆਰਬ੍ਭ ਉਪ੍ਪਜ੍ਜਨਧਮ੍ਮਂ ਕਿਲੇਸਜਾਤਂ ਅਤੀਤਕਮ੍ਮਞ੍ਚ. ਪਚ੍ਛਾ ਤੇ ਮਾਹੁ ਕਿਞ੍ਚਨਨ੍ਤਿ ਅਨਾਗਤੇਪਿ ਸਙ੍ਖਾਰੇ ਆਰਬ੍ਭ ਉਪ੍ਪਜ੍ਜਨਧਮ੍ਮਂ ਰਾਗਾਦਿਕਿਞ੍ਚਨਂ ਮਾਹੁ. ਮਜ੍ਝੇ ਚੇ ਨੋ ਗਹੇਸ੍ਸਸੀਤਿ ਪਚ੍ਚੁਪ੍ਪਨ੍ਨੇ ਰੂਪਾਦਿਧਮ੍ਮੇਪਿ ਨ ਗਹੇਸ੍ਸਸਿ ਚੇ.

੯੫੭. ਏਵਂ ‘‘ਉਪਸਨ੍ਤੋ ਚਰਿਸ੍ਸਸੀ’’ਤਿ ਅਰਹਤ੍ਤਪ੍ਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਅਰਹਤੋ ਥੁਤਿਵਸੇਨ ਇਤੋ ਪਰਾ ਗਾਥਾਯੋ ਅਭਾਸਿ. ਤਤ੍ਥ ਸਬ੍ਬਸੋਤਿ ਗਾਥਾਯ ਮਮਾਯਿਤਨ੍ਤਿ ਮਮਤ੍ਤਕਰਣਂ, ‘‘ਮਮ ਇਦ’’ਨ੍ਤਿ ਗਹਿਤਂ ਵਾ ਵਤ੍ਥੁ. ਅਸਤਾ ਚ ਨ ਸੋਚਤੀਤਿ ਅਵਿਜ੍ਜਮਾਨਕਾਰਣਾ ਅਸਨ੍ਤਕਾਰਣਾ ਨ ਸੋਚਤਿ. ਨ ਜੀਯਤੀਤਿ ਜਾਨਿਮ੍ਪਿ ਨ ਗਚ੍ਛਤਿ.

੯੫੮-੯. ਕਿਞ੍ਚ ਭਿਯ੍ਯੋ – ਯਸ੍ਸ ਨਤ੍ਥੀਤਿ ਗਾਥਾ. ਤਤ੍ਥ ਕਿਞ੍ਚਨਨ੍ਤਿ ਕਿਞ੍ਚਿ ਰੂਪਾਦਿਧਮ੍ਮਜਾਤਂ. ਕਿਞ੍ਚ ਭਿਯ੍ਯੋ – ਅਨਿਟ੍ਠੁਰੀਤਿ ਗਾਥਾ. ਤਤ੍ਥ ਅਨਿਟ੍ਠੁਰੀਤਿ ਅਨਿਸ੍ਸੁਕੀ. ‘‘ਅਨਿਦ੍ਧੁਰੀ’’ਤਿਪਿ ਕੇਚਿ ਪਠਨ੍ਤਿ. ਸਬ੍ਬਧੀ ਸਮੋਤਿ ਸਬ੍ਬਤ੍ਥ ਸਮੋ, ਉਪੇਕ੍ਖਕੋਤਿ ਅਧਿਪ੍ਪਾਯੋ. ਕਿਂ ਵੁਤ੍ਤਂ ਹੋਤਿ? ਯੋ ਸੋ ‘‘ਨਤ੍ਥਿ ਮੇ’’ਤਿ ਨ ਸੋਚਤਿ, ਤਮਹਂ ਅਵਿਕਮ੍ਪਿਨਂ ਪੁਗ੍ਗਲਂ ਪੁਟ੍ਠੋ ਸਮਾਨੋ ਅਨਿਟ੍ਠੁਰੀ ਅਨਨੁਗਿਦ੍ਧੋ ਅਨੇਜੋ ਸਬ੍ਬਧਿ ਸਮੋਤਿ ਇਮਂ ਤਸ੍ਮਿਂ ਪੁਗ੍ਗਲੇ ਚਤੁਬ੍ਬਿਧਮਾਨਿਸਂਸਂ ਬ੍ਰੂਮੀਤਿ.

੯੬੦. ਕਿਞ੍ਚ ਭਿਯ੍ਯੋ – ਅਨੇਜਸ੍ਸਾਤਿ ਗਾਥਾ. ਤਤ੍ਥ ਨਿਸਙ੍ਖਤੀਤਿ ਪੁਞ੍ਞਾਭਿਸਙ੍ਖਾਰਾਦੀਸੁ ਯੋ ਕੋਚਿ ਸਙ੍ਖਾਰੋ. ਸੋ ਹਿ ਯਸ੍ਮਾ ਨਿਸਙ੍ਖਰਿਯਤਿ ਨਿਸਙ੍ਖਰੋਤਿ ਵਾ, ਤਸ੍ਮਾ ‘‘ਨਿਸਙ੍ਖਤੀ’’ਤਿ ਵੁਚ੍ਚਤਿ. ਵਿਯਾਰਮ੍ਭਾਤਿ ਵਿਵਿਧਾ ਪੁਞ੍ਞਾਭਿਸਙ੍ਖਾਰਾਦਿਕਾ ਆਰਮ੍ਭਾ. ਖੇਮਂ ਪਸ੍ਸਤਿ ਸਬ੍ਬਧੀਤਿ ਸਬ੍ਬਤ੍ਥ ਅਭਯਮੇਵ ਪਸ੍ਸਤਿ.

੯੬੧. ਏਵਂ ਪਸ੍ਸਨ੍ਤੋ ਨ ਸਮੇਸੂਤਿ ਗਾਥਾ. ਤਤ੍ਥ ਨ ਵਦਤੇਤਿ ‘‘ਸਦਿਸੋਹਮਸ੍ਮੀ’’ਤਿਆਦਿਨਾ ਮਾਨਵਸੇਨ ਸਮੇਸੁਪਿ ਅਤ੍ਤਾਨਂ ਨ ਵਦਤਿ ਓਮੇਸੁਪਿ ਉਸ੍ਸੇਸੁਪਿ. ਨਾਦੇਤਿ ਨ ਨਿਰਸ੍ਸਤੀਤਿ ਰੂਪਾਦੀਸੁ ਕਞ੍ਚਿ ਧਮ੍ਮਂ ਨ ਗਣ੍ਹਾਤਿ; ਨ ਨਿਸ੍ਸਜ੍ਜਤਿ. ਸੇਸਂ ਸਬ੍ਬਤ੍ਥ ਪਾਕਟਮੇਵ. ਏਵਂ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ, ਦੇਸਨਾਪਰਿਯੋਸਾਨੇ ਪਞ੍ਚਸਤਾ ਸਾਕਿਯਕੁਮਾਰਾ ਚ ਕੋਲਿਯਕੁਮਾਰਾ ਚ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤਾ, ਤੇ ਗਹੇਤ੍ਵਾ ਭਗਵਾ ਮਹਾਵਨਂ ਪਾਵਿਸੀਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਅਤ੍ਤਦਣ੍ਡਸੁਤ੍ਤਵਣ੍ਣਨਾ ਨਿਟ੍ਠਿਤਾ.