੧. ਕਾਮਸੁਤ੍ਤਵਣ੍ਣਨਾ

੭੭੩. ਕਾਮਂ ਕਾਮਯਮਾਨਸ੍ਸਾਤਿ ਕਾਮਸੁਤ੍ਤਂ. ਕਾ ਉਪ੍ਪਤ੍ਤਿ? ਭਗਵਤਿ ਕਿਰ ਸਾਵਤ੍ਥਿਯਂ ਵਿਹਰਨ੍ਤੇ ਅਞ੍ਞਤਰੋ ਬ੍ਰਾਹ੍ਮਣੋ ਸਾਵਤ੍ਥਿਯਾ ਜੇਤਵਨਸ੍ਸ ਚ ਅਨ੍ਤਰੇ ਅਚਿਰਵਤੀਨਦੀਤੀਰੇ ‘‘ਯਵਂ ਵਪਿਸ੍ਸਾਮੀ’’ਤਿ ਖੇਤ੍ਤਂ ਕਸਤਿ. ਭਗਵਾ ਭਿਕ੍ਖੁਸਙ੍ਘਪਰਿਵੁਤੋ ਪਿਣ੍ਡਾਯ ਪਵਿਸਨ੍ਤੋ ਤਂ ਦਿਸ੍ਵਾ ਆਵਜ੍ਜੇਨ੍ਤੋ ਅਦ੍ਦਸ – ‘‘ਅਸ੍ਸ ਬ੍ਰਾਹ੍ਮਣਸ੍ਸ ਯਵਾ ਵਿਨਸ੍ਸਿਸ੍ਸਨ੍ਤੀ’’ਤਿ, ਪੁਨ ਉਪਨਿਸ੍ਸਯਸਮ੍ਪਤ੍ਤਿਂ ਆਵਜ੍ਜੇਨ੍ਤੋ ਚਸ੍ਸ ਸੋਤਾਪਤ੍ਤਿਫਲਸ੍ਸ ਉਪਨਿਸ੍ਸਯਂ ਅਦ੍ਦਸ. ‘‘ਕਦਾ ਪਾਪੁਣੇਯ੍ਯਾ’’ਤਿ ਆਵਜ੍ਜੇਨ੍ਤੋ ‘‘ਸਸ੍ਸੇ ਵਿਨਟ੍ਠੇ ਸੋਕਾਭਿਭੂਤੋ ਧਮ੍ਮਦੇਸਨਂ ਸੁਤ੍ਵਾ’’ਤਿ ਅਦ੍ਦਸ. ਤਤੋ ਚਿਨ੍ਤੇਸਿ – ‘‘ਸਚਾਹਂ ਤਦਾ ਏਵ ਬ੍ਰਾਹ੍ਮਣਂ ਉਪਸਙ੍ਕਮਿਸ੍ਸਾਮਿ, ਨ ਮੇ ਓਵਾਦਂ ਸੋਤਬ੍ਬਂ ਮਞ੍ਞਿਸ੍ਸਤਿ. ਨਾਨਾਰੁਚਿਕਾ ਹਿ ਬ੍ਰਾਹ੍ਮਣਾ, ਹਨ੍ਦ, ਨਂ ਇਤੋ ਪਭੁਤਿਯੇਵ ਸਙ੍ਗਣ੍ਹਾਮਿ, ਏਵਂ ਮਯਿ ਮੁਦੁਚਿਤ੍ਤੋ ਹੁਤ੍ਵਾ ਤਦਾ ਓਵਾਦਂ ਸੋਸ੍ਸਤੀ’’ਤਿ ਬ੍ਰਾਹ੍ਮਣਂ ਉਪਸਙ੍ਕਮਿਤ੍ਵਾ ਆਹ – ‘‘ਕਿਂ, ਬ੍ਰਾਹ੍ਮਣ, ਕਰੋਸੀ’’ਤਿ. ਬ੍ਰਾਹ੍ਮਣੋ ‘‘ਏਵਂ ਉਚ੍ਚਾਕੁਲੀਨੋ ਸਮਣੋ ਗੋਤਮੋ ਮਯਾ ਸਦ੍ਧਿਂ ਪਟਿਸਨ੍ਥਾਰਂ ਕਰੋਤੀ’’ਤਿ ਤਾਵਤਕੇਨੇਵ ਭਗਵਤਿ ਪਸਨ੍ਨਚਿਤ੍ਤੋ ਹੁਤ੍ਵਾ ‘‘ਖੇਤ੍ਤਂ, ਭੋ ਗੋਤਮ, ਕਸਾਮਿ ਯਵਂ ਵਪਿਸ੍ਸਾਮੀ’’ਤਿ ਆਹ. ਅਥ ਸਾਰਿਪੁਤ੍ਤਤ੍ਥੇਰੋ ਚਿਨ੍ਤੇਸਿ – ‘‘ਭਗਵਾ ਬ੍ਰਾਹ੍ਮਣੇਨ ਸਦ੍ਧਿਂ ਪਟਿਸਨ੍ਥਾਰਂ ਅਕਾਸਿ, ਨ ਚ ਅਹੇਤੁ ਅਪ੍ਪਚ੍ਚਯਾ ਤਥਾਗਤਾ ਏਵਂ ਕਰੋਨ੍ਤਿ, ਹਨ੍ਦਾਹਮ੍ਪਿ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਰੋਮੀ’’ਤਿ ਬ੍ਰਾਹ੍ਮਣਂ ਉਪਸਙ੍ਕਮਿਤ੍ਵਾ ਤਥੇਵ ਪਟਿਸਨ੍ਥਾਰਮਕਾਸਿ. ਏਵਂ ਮਹਾਮੋਗ੍ਗਲ੍ਲਾਨਤ੍ਥੇਰੋ ਸੇਸਾ ਚ ਅਸੀਤਿ ਮਹਾਸਾਵਕਾ. ਬ੍ਰਾਹ੍ਮਣੋ ਅਤੀਵ ਅਤ੍ਤਮਨੋ ਅਹੋਸਿ.

ਅਥ ਭਗਵਾ ਸਮ੍ਪਜ੍ਜਮਾਨੇਪਿ ਸਸ੍ਸੇ ਏਕਦਿਵਸਂ ਕਤਭਤ੍ਤਕਿਚ੍ਚੋ ਸਾਵਤ੍ਥਿਤੋ ਜੇਤਵਨਂ ਗਚ੍ਛਨ੍ਤੋ ਮਗ੍ਗਾ ਓਕ੍ਕਮ੍ਮ ਬ੍ਰਾਹ੍ਮਣਸ੍ਸ ਸਨ੍ਤਿਕਂ ਗਨ੍ਤ੍ਵਾ ਆਹ – ‘‘ਸੁਨ੍ਦਰਂ ਤੇ, ਬ੍ਰਾਹ੍ਮਣ, ਯਵਕ੍ਖੇਤ੍ਤ’’ਨ੍ਤਿ. ‘‘ਏਵਂ, ਭੋ ਗੋਤਮ, ਸੁਨ੍ਦਰਂ, ਸਚੇ ਸਮ੍ਪਜ੍ਜਿਸ੍ਸਤਿ, ਤੁਮ੍ਹਾਕਮ੍ਪਿ ਸਂਵਿਭਾਗਂ ਕਰਿਸ੍ਸਾਮੀ’’ਤਿ. ਅਥਸ੍ਸ ਚਤੁਮਾਸਚ੍ਚਯੇਨ ਯਵਾ ਨਿਪ੍ਫਜ੍ਜਿਂਸੁ. ਤਸ੍ਸ ‘‘ਅਜ੍ਜ ਵਾ ਸ੍ਵੇ ਵਾ ਲਾਯਿਸ੍ਸਾਮੀ’’ਤਿ ਉਸ੍ਸੁਕ੍ਕਂ ਕੁਰੁਮਾਨਸ੍ਸੇਵ ਮਹਾਮੇਘੋ ਉਟ੍ਠਹਿਤ੍ਵਾ ਸਬ੍ਬਰਤ੍ਤਿਂ ਵਸ੍ਸਿ. ਅਚਿਰਵਤੀ ਨਦੀ ਪੂਰਾ ਆਗਨ੍ਤ੍ਵਾ ਸਬ੍ਬਂ ਯਵਂ ਵਹਿ. ਬ੍ਰਾਹ੍ਮਣੋ ਸਬ੍ਬਰਤ੍ਤਿਂ ਅਨਤ੍ਤਮਨੋ ਹੁਤ੍ਵਾ ਪਭਾਤੇ ਨਦੀਤੀਰਂ ਗਤੋ ਸਬ੍ਬਂ ਸਸ੍ਸਵਿਪਤ੍ਤਿਂ ਦਿਸ੍ਵਾ ‘‘ਵਿਨਟ੍ਠੋਮ੍ਹਿ, ਕਥਂ ਦਾਨਿ ਜੀਵਿਸ੍ਸਾਮੀ’’ਤਿ ਬਲਵਸੋਕਂ ਉਪ੍ਪਾਦੇਸਿ. ਭਗਵਾਪਿ ਤਮੇਵ ਰਤ੍ਤਿਂ ਪਚ੍ਚੂਸਸਮਯੇ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ‘‘ਅਜ੍ਜ ਬ੍ਰਾਹ੍ਮਣਸ੍ਸ ਧਮ੍ਮਦੇਸਨਾਕਾਲੋ’’ਤਿ ਞਤ੍ਵਾ ਭਿਕ੍ਖਾਚਾਰਵਤ੍ਤੇਨ ਸਾਵਤ੍ਥਿਂ ਪਵਿਸਿਤ੍ਵਾ ਬ੍ਰਾਹ੍ਮਣਸ੍ਸ ਘਰਦ੍ਵਾਰੇ ਅਟ੍ਠਾਸਿ. ਬ੍ਰਾਹ੍ਮਣੋ ਭਗਵਨ੍ਤਂ ਦਿਸ੍ਵਾ ‘‘ਸੋਕਾਭਿਭੂਤਂ ਮਂ ਅਸ੍ਸਾਸੇਤੁਕਾਮੋ ਸਮਣੋ ਗੋਤਮੋ ਆਗਤੋ’’ਤਿ ਚਿਨ੍ਤੇਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਪਤ੍ਤਂ ਗਹੇਤ੍ਵਾ ਭਗਵਨ੍ਤਂ ਨਿਸੀਦਾਪੇਸਿ. ਭਗਵਾ ਜਾਨਨ੍ਤੋਵ ਬ੍ਰਾਹ੍ਮਣਂ ਪੁਚ੍ਛਿ – ‘‘ਕਿਂ ਬ੍ਰਾਹ੍ਮਣ ਪਦੁਟ੍ਠਚਿਤ੍ਤੋ ਵਿਹਾਸੀ’’ਤਿ? ਆਮ, ਭੋ ਗੋਤਮ, ਸਬ੍ਬਂ ਮੇ ਯਵਕ੍ਖੇਤ੍ਤਂ ਉਦਕੇਨ ਵੂਲ਼੍ਹਨ੍ਤਿ. ਅਥ ਭਗਵਾ ‘‘ਨ, ਬ੍ਰਾਹ੍ਮਣ, ਵਿਪਨ੍ਨੇ ਦੋਮਨਸ੍ਸਂ, ਸਮ੍ਪਨ੍ਨੇ ਚ ਸੋਮਨਸ੍ਸਂ ਕਾਤਬ੍ਬਂ. ਕਾਮਾ ਹਿ ਨਾਮ ਸਮ੍ਪਜ੍ਜਨ੍ਤਿਪਿ ਵਿਪਜ੍ਜਨ੍ਤਿਪੀ’’ਤਿ ਵਤ੍ਵਾ ਤਸ੍ਸ ਬ੍ਰਾਹ੍ਮਣਸ੍ਸ ਸਪ੍ਪਾਯਂ ਞਤ੍ਵਾ ਧਮ੍ਮਦੇਸਨਾਵਸੇਨ ਇਮਂ ਸੁਤ੍ਤਮਭਾਸਿ. ਤਤ੍ਥ ਸਙ੍ਖੇਪਤੋ ਪਦਤ੍ਥਸਮ੍ਬਨ੍ਧਮਤ੍ਤਮੇਵ ਵਣ੍ਣਯਿਸ੍ਸਾਮ, ਵਿਤ੍ਥਾਰੋ ਪਨ ਨਿਦ੍ਦੇਸੇ (ਮਹਾਨਿ. ੧) ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਯਥਾ ਚ ਇਮਸ੍ਮਿਂ ਸੁਤ੍ਤੇ, ਏਵਂ ਇਤੋ ਪਰਂ ਸਬ੍ਬਸੁਤ੍ਤੇਸੁ.

ਤਤ੍ਥ ਕਾਮਨ੍ਤਿ ਮਨਾਪਿਯਰੂਪਾਦਿਤੇਭੂਮਕਧਮ੍ਮਸਙ੍ਖਾਤਂ ਵਤ੍ਥੁਕਾਮਂ, ਕਾਮਯਮਾਨਸ੍ਸਾਤਿ ਇਚ੍ਛਮਾਨਸ੍ਸ. ਤਸ੍ਸ ਚੇ ਤਂ ਸਮਿਜ੍ਝਤੀਤਿ ਤਸ੍ਸ ਕਾਮਯਮਾਨਸ੍ਸ ਸਤ੍ਤਸ੍ਸ ਤਂ ਕਾਮਸਙ੍ਖਾਤਂ ਵਤ੍ਥੁ ਸਮਿਜ੍ਝਤਿ ਚੇ, ਸਚੇ ਸੋ ਤਂ ਲਭਤੀਤਿ ਵੁਤ੍ਤਂ ਹੋਤਿ. ਅਦ੍ਧਾ ਪੀਤਿਮਨੋ ਹੋਤੀਤਿ ਏਕਂਸਂ ਤੁਟ੍ਠਚਿਤ੍ਤੋ ਹੋਤਿ. ਲਦ੍ਧਾਤਿ ਲਭਿਤ੍ਵਾ. ਮਚ੍ਚੋਤਿ ਸਤ੍ਤੋ. ਯਦਿਚ੍ਛਤੀਤਿ ਯਂ ਇਚ੍ਛਤਿ.

੭੭੪. ਤਸ੍ਸ ਚੇ ਕਾਮਯਾਨਸ੍ਸਾਤਿ ਤਸ੍ਸ ਪੁਗ੍ਗਲਸ੍ਸ ਕਾਮੇ ਇਚ੍ਛਮਾਨਸ੍ਸ, ਕਾਮੇਨ ਵਾ ਯਾਯਮਾਨਸ੍ਸ. ਛਨ੍ਦਜਾਤਸ੍ਸਾਤਿ ਜਾਤਤਣ੍ਹਸ੍ਸ. ਜਨ੍ਤੁਨੋਤਿ ਸਤ੍ਤਸ੍ਸ. ਤੇ ਕਾਮਾ ਪਰਿਹਾਯਨ੍ਤੀਤਿ ਤੇ ਕਾਮਾ ਪਰਿਹਾਯਨ੍ਤਿ ਚੇ. ਸਲ੍ਲਵਿਦ੍ਧੋਵ ਰੁਪ੍ਪਤੀਤਿ ਅਥ ਅਯੋਮਯਾਦਿਨਾ ਸਲ੍ਲੇਨ ਵਿਦ੍ਧੋ ਵਿਯ ਪੀਲ਼ੀਯਤਿ.

੭੭੫. ਤਤਿਯਗਾਥਾਯ ਸਙ੍ਖੇਪਤ੍ਥੋ – ਯੋ ਪਨ ਇਮੇ ਕਾਮੇ ਤਤ੍ਥ ਛਨ੍ਦਰਾਗਵਿਕ੍ਖਮ੍ਭਨੇਨ ਵਾ ਸਮੁਚ੍ਛੇਦੇਨ ਵਾ ਅਤ੍ਤਨੋ ਪਾਦੇਨ ਸਪ੍ਪਸ੍ਸ ਸਿਰਂ ਇਵ ਪਰਿਵਜ੍ਜੇਤਿ. ਸੋ ਭਿਕ੍ਖੁ ਸਬ੍ਬਂ ਲੋਕਂ ਵਿਸਰਿਤ੍ਵਾ ਠਿਤਤ੍ਤਾ ਲੋਕੇ ਵਿਸਤ੍ਤਿਕਾਸਙ੍ਖਾਤਂ ਤਣ੍ਹਂ ਸਤੋ ਹੁਤ੍ਵਾ ਸਮਤਿਵਤ੍ਤਤੀਤਿ.

੭੭੬-੮. ਤਤੋ ਪਰਾਸਂ ਤਿਸ੍ਸਨ੍ਨਂ ਗਾਥਾਨਂ ਅਯਂ ਸਙ੍ਖੇਪਤ੍ਥੋ – ਯੋ ਏਤਂ ਸਾਲਿਕ੍ਖੇਤ੍ਤਾਦਿਂ ਖੇਤ੍ਤਂ ਵਾ ਘਰਵਤ੍ਥਾਦਿਂ ਵਤ੍ਥੁਂ ਵਾ ਕਹਾਪਣਸਙ੍ਖਾਤਂ ਹਿਰਞ੍ਞਂ ਵਾ ਗੋਅਸ੍ਸਭੇਦਂ ਗਵਾਸ੍ਸਂ ਵਾ ਇਤ੍ਥਿਸਞ੍ਞਿਕਾ ਥਿਯੋ ਵਾ ਞਾਤਿਬਨ੍ਧਵਾਦੀ ਬਨ੍ਧੂ ਵਾ ਅਞ੍ਞੇ ਵਾ ਮਨਾਪਿਯਰੂਪਾਦੀ ਪੁਥੁ ਕਾਮੇ ਅਨੁਗਿਜ੍ਝਤਿ, ਤਂ ਪੁਗ੍ਗਲਂ ਅਬਲਸਙ੍ਖਾਤਾ ਕਿਲੇਸਾ ਬਲੀਯਨ੍ਤਿ ਸਹਨ੍ਤਿ ਮਦ੍ਦਨ੍ਤਿ, ਸਦ੍ਧਾਬਲਾਦਿਵਿਰਹੇਨ ਵਾ ਅਬਲਂ ਤਂ ਪੁਗ੍ਗਲਂ ਅਬਲਾ ਕਿਲੇਸਾ ਬਲੀਯਨ੍ਤਿ, ਅਬਲਤ੍ਤਾ ਬਲੀਯਨ੍ਤੀਤਿ ਅਤ੍ਥੋ. ਅਥ ਤਂ ਕਾਮਗਿਦ੍ਧਂ ਕਾਮੇ ਰਕ੍ਖਨ੍ਤਂ ਪਰਿਯੇਸਨ੍ਤਞ੍ਚ ਸੀਹਾਦਯੋ ਚ ਪਾਕਟਪਰਿਸ੍ਸਯਾ ਕਾਯਦੁਚ੍ਚਰਿਤਾਦਯੋ ਚ ਅਪਾਕਟਪਰਿਸ੍ਸਯਾ ਮਦ੍ਦਨ੍ਤਿ, ਤਤੋ ਅਪਾਕਟਪਰਿਸ੍ਸਯੇਹਿ ਅਭਿਭੂਤਂ ਤਂ ਪੁਗ੍ਗਲਂ ਜਾਤਿਆਦਿਦੁਕ੍ਖਂ ਭਿਨ੍ਨਂ ਨਾਵਂ ਉਦਕਂ ਵਿਯ ਅਨ੍ਵੇਤਿ. ਤਸ੍ਮਾ ਕਾਯਗਤਾਸਤਿਆਦਿਭਾਵਨਾਯ ਜਨ੍ਤੁ ਸਦਾ ਸਤੋ ਹੁਤ੍ਵਾ ਵਿਕ੍ਖਮ੍ਭਨਸਮੁਚ੍ਛੇਦਵਸੇਨ ਰੂਪਾਦੀਸੁ ਵਤ੍ਥੁਕਾਮੇਸੁ ਸਬ੍ਬਪ੍ਪਕਾਰਮ੍ਪਿ ਕਿਲੇਸਕਾਮਂ ਪਰਿਵਜ੍ਜੇਨ੍ਤੋ ਕਾਮਾਨਿ ਪਰਿਵਜ੍ਜਯੇ. ਏਵਂ ਤੇ ਕਾਮੇ ਪਹਾਯ ਤਪ੍ਪਹਾਨਕਰਮਗ੍ਗੇਨੇਵ ਚਤੁਬ੍ਬਿਧਮ੍ਪਿ ਤਰੇ ਓਘਂ ਤਰੇਯ੍ਯ ਤਰਿਤੁਂ ਸਕ੍ਕੁਣੇਯ੍ਯ. ਤਤੋ ਯਥਾ ਪੁਰਿਸੋ ਉਦਕਗਰੁਕਂ ਨਾਵਂ ਸਿਞ੍ਚਿਤ੍ਵਾ ਲਹੁਕਾਯ ਨਾਵਾਯ ਅਪ੍ਪਕਸਿਰੇਨੇਵ ਪਾਰਗੂ ਭਵੇਯ੍ਯ, ਪਾਰਂ ਗਚ੍ਛੇਯ੍ਯ, ਏਵਮੇਵ ਅਤ੍ਤਭਾਵਨਾਵਂ ਕਿਲੇਸੂਦਕਗਰੁਕਂ ਸਿਞ੍ਚਿਤ੍ਵਾ ਲਹੁਕੇਨ ਅਤ੍ਤਭਾਵੇਨ ਪਾਰਗੂ ਭਵੇਯ੍ਯ, ਸਬ੍ਬਧਮ੍ਮਪਾਰਂ ਨਿਬ੍ਬਾਨਂ ਗਤੋ ਭਵੇਯ੍ਯ, ਅਰਹਤ੍ਤਪ੍ਪਤ੍ਤਿਯਾ ਗਚ੍ਛੇਯ੍ਯ ਚ, ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਤੀਤਿ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ. ਦੇਸਨਾਪਰਿਯੋਸਾਨੇ ਬ੍ਰਾਹ੍ਮਣੋ ਚ ਬ੍ਰਾਹ੍ਮਣੀ ਚ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੂਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਕਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.