੩. ਨਨ੍ਦਕਪੇਤਵਤ੍ਥੁਵਣ੍ਣਨਾ

ਰਾਜਾ ਪਿਙ੍ਗਲਕੋ ਨਾਮਾਤਿ ਇਦਂ ਨਨ੍ਦਕਪੇਤਵਤ੍ਥੁ. ਤਸ੍ਸ ਕਾ ਉਪ੍ਪਤ੍ਤਿ? ਸਤ੍ਥੁ ਪਰਿਨਿਬ੍ਬਾਨਤੋ ਵਸ੍ਸਸਤਦ੍ਵਯਸ੍ਸ ਅਚ੍ਚਯੇਨ ਸੁਰਟ੍ਠਵਿਸਯੇ ਪਿਙ੍ਗਲੋ ਨਾਮ ਰਾਜਾ ਅਹੋਸਿ. ਤਸ੍ਸ ਸੇਨਾਪਤਿ ਨਨ੍ਦਕੋ ਨਾਮ ਮਿਚ੍ਛਾਦਿਟ੍ਠੀ ਵਿਪਰੀਤਦਸ੍ਸਨੋ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਾ ਮਿਚ੍ਛਾਗਾਹਂ ਪਗ੍ਗਯ੍ਹ ਵਿਚਰਿ. ਤਸ੍ਸ ਧੀਤਾ ਉਤ੍ਤਰਾ ਨਾਮ ਉਪਾਸਿਕਾ ਪਤਿਰੂਪੇ ਕੁਲੇ ਦਿਨ੍ਨਾ ਅਹੋਸਿ. ਨਨ੍ਦਕੋ ਪਨ ਕਾਲਂ ਕਤ੍ਵਾ ਵਿਞ੍ਝਾਟਵਿਯਂ ਮਹਤਿ ਨਿਗ੍ਰੋਧਰੁਕ੍ਖੇ ਵੇਮਾਨਿਕਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਮਿਂ ਕਾਲਕਤੇ ਉਤ੍ਤਰਾ ਸੁਚਿਸੀਤਲਗਨ੍ਧੋਦਕਪੂਰਿਤਂ ਪਾਨੀਯਘਟਂ ਕੁਮ੍ਮਾਸਾਭਿਸਙ੍ਖਤੇਹਿ ਵਣ੍ਣਗਨ੍ਧਰਸਸਮ੍ਪਨ੍ਨੇਹਿ ਪੂਵੇਹਿ ਪਰਿਪੁਣ੍ਣਸਰਾਵਕਞ੍ਚ ਅਞ੍ਞਤਰਸ੍ਸ ਖੀਣਾਸਵਤ੍ਥੇਰਸ੍ਸ ਦਤ੍ਵਾ ‘‘ਅਯਂ ਦਕ੍ਖਿਣਾ ਮਯ੍ਹਂ ਪਿਤੁ ਉਪਕਪ੍ਪਤੂ’’ਤਿ ਉਦ੍ਦਿਸਿ, ਤਸ੍ਸ ਤੇਨ ਦਾਨੇਨ ਦਿਬ੍ਬਪਾਨੀਯਂ ਅਪਰਿਮਿਤਾ ਚ ਪੂਵਾ ਪਾਤੁਭਵਿਂਸੁ. ਤਂ ਦਿਸ੍ਵਾ ਸੋ ਏਵਂ ਚਿਨ੍ਤੇਸਿ – ‘‘ਪਾਪਕਂ ਵਤ ਮਯਾ ਕਤਂ, ਯਂ ਮਹਾਜਨੋ ‘ਨਤ੍ਥਿ ਦਿਨ੍ਨ’ਨ੍ਤਿਆਦਿਨਾ ਮਿਚ੍ਛਾਗਾਹਂ ਗਾਹਿਤੋ. ਇਦਾਨਿ ਪਨ ਪਿਙ੍ਗਲੋ ਰਾਜਾ ਧਮ੍ਮਾਸੋਕਸ੍ਸ ਰਞ੍ਞੋ ਓਵਾਦਂ ਦਾਤੁਂ ਗਤੋ, ਸੋ ਤਂ ਤਸ੍ਸ ਦਤ੍ਵਾ ਆਗਮਿਸ੍ਸਤਿ, ਹਨ੍ਦਾਹਂ ਨਤ੍ਥਿਕਦਿਟ੍ਠਿਂ ਵਿਨੋਦੇਸ੍ਸਾਮੀ’’ਤਿ. ਨ ਚਿਰੇਨੇਵ ਚ ਪਿਙ੍ਗਲੋ ਰਾਜਾ ਧਮ੍ਮਾਸੋਕਸ੍ਸ ਰਞ੍ਞੋ ਓਵਾਦਂ ਦਤ੍ਵਾ ਪਟਿਨਿਵਤ੍ਤਨ੍ਤੋ ਮਗ੍ਗਂ ਪਟਿਪਜ੍ਜਿ.

ਅਥ ਸੋ ਪੇਤੋ ਅਤ੍ਤਨੋ ਵਸਨਟ੍ਠਾਨਾਭਿਮੁਖਂ ਤਂ ਮਗ੍ਗਂ ਨਿਮ੍ਮਿਨਿ. ਰਾਜਾ ਠਿਤਮਜ੍ਝਨ੍ਹਿਕੇ ਸਮਯੇ ਤੇਨ ਮਗ੍ਗੇਨ ਗਚ੍ਛਤਿ. ਤਸ੍ਸ ਗਛਨ੍ਤਸ੍ਸ ਪੁਰਤੋ ਮਗ੍ਗੋ ਦਿਸ੍ਸਤਿ, ਪਿਟ੍ਠਿਤੋ ਪਨਸ੍ਸ ਅਨ੍ਤਰਧਾਯਤਿ. ਸਬ੍ਬਪਚ੍ਛਤੋ ਗਚ੍ਛਨ੍ਤੋ ਪੁਰਿਸੋ ਮਗ੍ਗਂ ਅਨ੍ਤਰਹਿਤਂ ਦਿਸ੍ਵਾ ਭੀਤੋ ਵਿਸ੍ਸਰਂ ਵਿਰਵਨ੍ਤੋ ਧਾਵਿਤ੍ਵਾ ਰਞ੍ਞੋ ਆਰੋਚੇਸਿ, ਤਂ ਸੁਤ੍ਵਾ ਰਾਜਾ ਭੀਤੋ ਸਂਵਿਗ੍ਗਮਾਨਸੋ ਹਤ੍ਥਿਕ੍ਖਨ੍ਧੇ ਠਤ੍ਵਾ ਚਤਸ੍ਸੋ ਦਿਸਾ ਓਲੋਕੇਨ੍ਤੋ ਪੇਤਸ੍ਸ ਵਸਨਨਿਗ੍ਰੋਧਰੁਕ੍ਖਂ ਦਿਸ੍ਵਾ ਤਦਭਿਮੁਖੋ ਅਗਮਾਸਿ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯ. ਅਥਾਨੁਕ੍ਕਮੇਨ ਰਞ੍ਞੇ ਤਂ ਠਾਨਂ ਪਤ੍ਤੇ ਪੇਤੋ ਸਬ੍ਬਾਭਰਣਵਿਭੂਸਿਤੋ ਰਾਜਾਨਂ ਉਪਸਙ੍ਕਮਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਪੂਵੇ ਚ ਪਾਨੀਯਞ੍ਚ ਦਾਪੇਸਿ. ਰਾਜਾ ਸਪਰਿਜਨੋ ਨ੍ਹਤ੍ਵਾ ਪੂਵੇ ਖਾਦਿਤ੍ਵਾ ਪਾਨੀਯਂ ਪਿਵਿਤ੍ਵਾ ਪਟਿਪ੍ਪਸ੍ਸਦ੍ਧਮਗ੍ਗਕਿਲਮਥੋ ‘‘ਦੇਵਤਾ ਨੁਸਿ ਗਨ੍ਧਬ੍ਬੋ’’ਤਿਆਦਿਨਾ ਪੇਤਂ ਪੁਚ੍ਛਿ. ਪੇਤੋ ਆਦਿਤੋ ਪਟ੍ਠਾਯ ਅਤ੍ਤਨੋ ਪਵਤ੍ਤਿਂ ਆਚਿਕ੍ਖਿਤ੍ਵਾ ਰਾਜਾਨਂ ਮਿਚ੍ਛਾਦਸ੍ਸਨਤੋ ਵਿਮੋਚੇਤ੍ਵਾ ਸਰਣੇਸੁ ਸੀਲੇਸੁ ਚ ਪਤਿਟ੍ਠਾਪੇਸਿ. ਤਮਤ੍ਥਂ ਦਸ੍ਸੇਤੁਂ ਸਙ੍ਗੀਤਿਕਾਰਾ –

੬੫੮. ‘‘ਰਾਜਾ ਪਿਙ੍ਗਲਕੋ ਨਾਮ, ਸੁਰਟ੍ਠਾਨਂ ਅਧਿਪਤਿ ਅਹੁ;

ਮੋਰਿਯਾਨਂ ਉਪਟ੍ਠਾਨਂ ਗਨ੍ਤ੍ਵਾ, ਸੁਰਟ੍ਠਂ ਪੁਨਰਾਗਮਾ.

੬੫੯. ‘‘ਉਣ੍ਹੇ ਮਜ੍ਝਨ੍ਹਿਕੇ ਕਾਲੇ, ਰਾਜਾ ਪਙ੍ਕਂ ਉਪਾਗਮਿ;

ਅਦ੍ਦਸ ਮਗ੍ਗਂ ਰਮਣੀਯਂ, ਪੇਤਾਨਂ ਤਂ ਵਣ੍ਣੁਪਥਂ.

੬੬੦. ਸਾਰਥਿਂ ਆਮਨ੍ਤਯੀ ਰਾਜਾ –

‘‘‘ਅਯਂ ਮਗ੍ਗੋ ਰਮਣੀਯੋ, ਖੇਮੋ ਸੋਵਤ੍ਥਿਕੋ ਸਿਵੋ;

ਇਮਿਨਾ ਸਾਰਥਿ ਯਾਮ, ਸੁਰਟ੍ਠਾਨਂ ਸਨ੍ਤਿਕੇ ਇਤੋ’.

੬੬੧. ‘‘ਤੇਨ ਪਾਯਾਸਿ ਸੋਰਟ੍ਠੋ, ਸੇਨਾਯ ਚਤੁਰਙ੍ਗਿਨਿਯਾ;

ਉਬ੍ਬਿਗ੍ਗਰੂਪੋ ਪੁਰਿਸੋ, ਸੋਰਟ੍ਠਂ ਏਤਦਬ੍ਰਵਿ.

੬੬੨. ‘‘‘ਕੁਮ੍ਮਗ੍ਗਂ ਪਟਿਪਨ੍ਨਮ੍ਹਾ, ਭਿਂਸਨਂ ਲੋਮਹਂਸਨਂ;

ਪੁਰਤੋ ਦਿਸ੍ਸਤਿ ਮਗ੍ਗੋ, ਪਚ੍ਛਤੋ ਚ ਨ ਦਿਸ੍ਸਤਿ.

੬੬੩. ‘‘‘ਕੁਮ੍ਮਗ੍ਗਂ ਪਟਿਪਨ੍ਨਮ੍ਹਾ, ਯਮਪੁਰਿਸਾਨ ਸਨ੍ਤਿਕੇ;

ਅਮਾਨੁਸੋ ਵਾਯਤਿ ਗਨ੍ਧੋ, ਘੋਸੋ ਸੁਯ੍ਯਤਿ ਦਾਰੁਣੋ’.

੬੬੪. ‘‘ਸਂਵਿਗ੍ਗੋ ਰਾਜਾ ਸੋਰਟ੍ਠੋ, ਸਾਰਥਿਂ ਏਤਦਬ੍ਰਵਿ;

‘ਕੁਮ੍ਮਗ੍ਗਂ ਪਟਿਪਨ੍ਨਮ੍ਹਾ, ਭਿਂਸਨਂ ਲੋਮਹਂਸਨਂ;

ਪੁਰਤੋ ਦਿਸ੍ਸਤਿ ਮਗ੍ਗੋ, ਪਚ੍ਛਤੋ ਚ ਨ ਦਿਸ੍ਸਤਿ.

੬੬੫. ‘‘‘ਕੁਮ੍ਮਗ੍ਗਂ ਪਟਿਪਨ੍ਨਮ੍ਹਾ, ਯਮਪੁਰਿਸਾਨ ਸਨ੍ਤਿਕੇ;

ਅਮਾਨੁਸੋ ਵਾਯਤਿ ਗਨ੍ਧੋ, ਘੋਸੋ ਸੁਯ੍ਯਤਿ ਦਾਰੁਣੋ’.

੬੬੬. ‘‘ਹਤ੍ਥਿਕ੍ਖਨ੍ਧਂ ਸਮਾਰੁਯ੍ਹ, ਓਲੋਕੇਨ੍ਤੋ ਚਤੁਦ੍ਦਿਸਾ;

ਅਦ੍ਦਸ ਨਿਗ੍ਰੋਧਂ ਰਮਣੀਯਂ, ਪਾਦਪਂ ਛਾਯਾਸਮ੍ਪਨ੍ਨਂ;

ਨੀਲਬ੍ਭਵਣ੍ਣਸਦਿਸਂ, ਮੇਘਵਣ੍ਣਸਿਰੀਨਿਭਂ.

੬੬੭. ‘‘ਸਾਰਥਿਂ ਆਮਨ੍ਤਯੀ ਰਾਜਾ, ‘ਕਿਂ ਏਸੋ ਦਿਸ੍ਸਤਿ ਬ੍ਰਹਾ;

ਨੀਲਬ੍ਭਵਣ੍ਣਸਦਿਸੋ, ਮੇਘਵਣ੍ਣਸਿਰੀਨਿਭੋ’.

੬੬੮. ‘‘ਨਿਗ੍ਰੋਧੋ ਸੋ ਮਹਾਰਾਜ, ਪਾਦਪੋ ਛਾਯਾਸਮ੍ਪਨ੍ਨੋ;

ਨੀਲਬ੍ਭਵਣ੍ਣਸਦਿਸੋ, ਮੇਘਵਣ੍ਣਸਿਰੀਨਿਭੋ.

੬੬੯. ‘‘ਤੇਨ ਪਾਯਾਸਿ ਸੋਰਟ੍ਠੋ, ਯੇਨ ਸੋ ਦਿਸ੍ਸਤੇ ਬ੍ਰਹਾ;

ਨੀਲਬ੍ਭਵਣ੍ਣਸਦਿਸੋ, ਮੇਘਵਣ੍ਣਸਿਰੀਨਿਭੋ.

੬੭੦. ‘‘ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ, ਰਾਜਾ ਰੁਕ੍ਖਂ ਉਪਾਗਮਿ;

ਨਿਸੀਦਿ ਰੁਕ੍ਖਮੂਲਸ੍ਮਿਂ, ਸਾਮਚ੍ਚੋ ਸਪਰਿਜ੍ਜਨੋ;

ਪੂਰਂ ਪਾਨੀਯਸਰਕਂ, ਪੂਵੇ ਵਿਤ੍ਤੇ ਚ ਅਦ੍ਦਸ.

੬੭੧. ‘‘ਪੁਰਿਸੋ ਚ ਦੇਵਵਣ੍ਣੀ, ਸਬ੍ਬਾਭਰਣਭੂਸਿਤੋ;

ਉਪਸਙ੍ਕਮਿਤ੍ਵਾ ਰਾਜਾਨਂ, ਸੋਰਟ੍ਠਂ ਏਤਦਬ੍ਰਵਿ.

੬੭੨. ‘‘‘ਸ੍ਵਾਗਤਂ ਤੇ ਮਹਾਰਾਜ, ਅਥੋ ਤੇ ਅਦੁਰਾਗਤਂ;

ਪਿਵਤੁ ਦੇਵੋ ਪਾਨੀਯਂ, ਪੂਵੇ ਖਾਦ ਅਰਿਨ੍ਦਮ’.

੬੭੩. ‘‘ਪਿਵਿਤ੍ਵਾ ਰਾਜਾ ਪਾਨੀਯਂ, ਸਾਮਚ੍ਚੋ ਸਪਰਿਜ੍ਜਨੋ;

ਪੂਵੇ ਖਾਦਿਤ੍ਵਾ ਪਿਤ੍ਵਾ ਚ, ਸੋਰਟ੍ਠੋ ਏਤਦਬ੍ਰਵਿ.

੬੭੪. ‘‘ਦੇਵਤਾ ਨੁਸਿ ਗਨ੍ਧਬ੍ਬੋ, ਅਦੁ ਸਕ੍ਕੋ ਪੁਰਿਨ੍ਦਦੋ;

ਅਜਾਨਨ੍ਤਾ ਤਂ ਪੁਚ੍ਛਾਮ, ਕਥਂ ਜਾਨੇਮੁ ਤਂ ਮਯਨ੍ਤਿ.

੬੭੫. ‘‘ਨਾਮ੍ਹਿ ਦੇਵੋ ਨ ਗਨ੍ਧਬ੍ਬੋ, ਨਾਪਿ ਸਕ੍ਕੋ ਪੁਰਿਨ੍ਦਦੋ;

ਪੇਤੋ ਅਹਂ ਮਹਾਰਾਜ, ਸੁਰਟ੍ਠਾ ਇਧ ਮਾਗਤੋਤਿ.

੬੭੬. ‘‘ਕਿਂਸੀਲੋ ਕਿਂਸਮਾਚਾਰੋ, ਸੁਰਟ੍ਠਸ੍ਮਿਂ ਪੁਰੇ ਤੁਵਂ;

ਕੇਨ ਤੇ ਬ੍ਰਹ੍ਮਚਰਿਯੇਨ, ਆਨੁਭਾਵੋ ਅਯਂ ਤਵਾਤਿ.

੬੭੭. ‘‘ਤਂ ਸੁਣੋਹਿ ਮਹਾਰਾਜ, ਅਰਿਨ੍ਦਮ ਰਟ੍ਠਵਡ੍ਢਨ;

ਅਮਚ੍ਚਾ ਪਾਰਿਸਜ੍ਜਾ ਚ, ਬ੍ਰਾਹ੍ਮਣੋ ਚ ਪੁਰੋਹਿਤੋ.

੬੭੮. ‘‘ਸੁਰਟ੍ਠਸ੍ਮਿਂ ਅਹਂ ਦੇਵ, ਪੁਰਿਸੋ ਪਾਪਚੇਤਸੋ;

ਮਿਚ੍ਛਾਦਿਟ੍ਠਿ ਚ ਦੁਸ੍ਸੀਲੋ, ਕਦਰਿਯੋ ਪਰਿਭਾਸਕੋ.

੬੭੯. ‘‘ਦਦਨ੍ਤਾਨਂ ਕਰੋਨ੍ਤਾਨਂ, ਵਾਰਯਿਸ੍ਸਂ ਬਹੁਜ੍ਜਨਂ;

ਅਞ੍ਞੇਸਂ ਦਦਮਾਨਾਨਂ, ਅਨ੍ਤਰਾਯਕਰੋ ਅਹਂ.

੬੮੦. ‘‘ਵਿਪਾਕੋ ਨਤ੍ਥਿ ਦਾਨਸ੍ਸ, ਸਂਯਮਸ੍ਸ ਕੁਤੋ ਫਲਂ;

ਨਤ੍ਥਿ ਆਚਰਿਯੋ ਨਾਮ, ਅਦਨ੍ਤਂ ਕੋ ਦਮੇਸ੍ਸਤਿ.

੬੮੧. ‘‘ਸਮਤੁਲ੍ਯਾਨਿ ਭੂਤਾਨਿ, ਕੁਤੋ ਜੇਟ੍ਠਾਪਚਾਯਿਕੋ;

ਨਤ੍ਥਿ ਬਲਂ ਵੀਰਿਯਂ ਵਾ, ਕੁਤੋ ਉਟ੍ਠਾਨਪੋਰਿਸਂ.

੬੮੨. ‘‘ਨਤ੍ਥਿ ਦਾਨਫਲਂ ਨਾਮ, ਨ ਵਿਸੋਧੇਤਿ ਵੇਰਿਨਂ;

ਲਦ੍ਧੇਯ੍ਯਂ ਲਭਤੇ ਮਚ੍ਚੋ, ਨਿਯਤਿਪਰਿਣਾਮਜਂ.

੬੮੩. ‘‘ਨਤ੍ਥਿ ਮਾਤਾ ਪਿਤਾ ਭਾਤਾ, ਲੋਕੋ ਨਤ੍ਥਿ ਇਤੋ ਪਰਂ;

ਨਤ੍ਥਿ ਦਿਨ੍ਨਂ ਨਤ੍ਥਿ ਹੁਤਂ, ਸੁਨਿਹਿਤਂ ਨ ਵਿਜ੍ਜਤਿ.

੬੮੪. ‘‘ਯੋਪਿ ਹਨੇਯ੍ਯ ਪੁਰਿਸਂ, ਪਰਸ੍ਸ ਛਿਨ੍ਦਤੇ ਸਿਰਂ;

ਨ ਕੋਚਿ ਕਞ੍ਚਿ ਹਨਤਿ, ਸਤ੍ਤਨ੍ਨਂ ਵਿਵਰਮਨ੍ਤਰੇ.

੬੮੫. ‘‘ਅਚ੍ਛੇਜ੍ਜਾਭੇਜ੍ਜੋ ਹਿ ਜੀਵੋ, ਅਟ੍ਠਂਸੋ ਗੁਲ਼ਪਰਿਮਣ੍ਡਲੋ;

ਯੋਜਨਾਨਂ ਸਤਂ ਪਞ੍ਚ, ਕੋ ਜੀਵਂ ਛੇਤ੍ਤੁਮਰਹਤਿ.

੬੮੬. ‘‘ਯਥਾ ਸੁਤ੍ਤਗੁਲ਼ੇ ਖਿਤ੍ਤੇ, ਨਿਬ੍ਬੇਠੇਨ੍ਤਂ ਪਲਾਯਤਿ;

ਏਵਮੇਵ ਚ ਸੋ ਜੀਵੋ, ਨਿਬ੍ਬੇਠੇਨ੍ਤੋ ਪਲਾਯਤਿ.

੬੮੭. ‘‘ਯਥਾ ਗਾਮਤੋ ਨਿਕ੍ਖਮ੍ਮ, ਅਞ੍ਞਂ ਗਾਮਂ ਪਵਿਸਤਿ;

ਏਵਮੇਵ ਚ ਸੋ ਜੀਵੋ, ਅਞ੍ਞਂ ਬੋਨ੍ਦਿਂ ਪਵਿਸਤਿ.

੬੮੮. ‘‘ਯਥਾ ਗੇਹਤੋ ਨਿਕ੍ਖਮ੍ਮ, ਅਞ੍ਞਂ ਗੇਹਂ ਪਵਿਸਤਿ;

ਏਵਮੇਵ ਚ ਸੋ ਜੀਵੋ, ਅਞ੍ਞਂ ਬੋਨ੍ਦਿਂ ਪਵਿਸਤਿ.

੬੮੯. ‘‘ਚੁਲ੍ਲਾਸੀਤਿ ਮਹਾਕਪ੍ਪਿਨੋ, ਸਤਸਹਸ੍ਸਾਨਿ ਹਿ;

ਯੇ ਬਾਲਾ ਯੇ ਚ ਪਣ੍ਡਿਤਾ, ਸਂਸਾਰਂ ਖੇਪਯਿਤ੍ਵਾਨ;

ਦੁਕ੍ਖਸ੍ਸਨ੍ਤਂ ਕਰਿਸ੍ਸਰੇ.

੬੯੦. ‘‘ਮਿਤਾਨਿ ਸੁਖਦੁਕ੍ਖਾਨਿ, ਦੋਣੇਹਿ ਪਿਟਕੇਹਿ ਚ;

ਜਿਨੋ ਸਬ੍ਬਂ ਪਜਾਨਾਤਿ, ਸਮ੍ਮੂਲ਼੍ਹਾ ਇਤਰਾ ਪਜਾ.

੬੯੧. ‘‘ਏਵਂਦਿਟ੍ਠਿ ਪੁਰੇ ਆਸਿਂ, ਸਮ੍ਮੂਲ਼੍ਹੋ ਮੋਹਪਾਰੁਤੋ;

ਮਿਚ੍ਛਾਦਿਟ੍ਠਿ ਚ ਦੁਸ੍ਸੀਲੋ, ਕਦਰਿਯੋ ਪਰਿਭਾਸਕੋ.

੬੯੨. ‘‘ਓਰਂ ਮੇ ਛਹਿ ਮਾਸੇਹਿ, ਕਾਲਕਿਰਿਯਾ ਭਵਿਸ੍ਸਤਿ;

ਏਕਨ੍ਤਕਟੁਕਂ ਘੋਰਂ, ਨਿਰਯਂ ਪਪਤਿਸ੍ਸਹਂ.

੬੯੩. ‘‘ਚਤੁਕ੍ਕਣ੍ਣਂ ਚਤੁਦ੍ਵਾਰਂ, ਵਿਭਤ੍ਤਂ ਭਾਗਸੋ ਮਿਤਂ;

ਅਯੋਪਾਕਾਰਪਰਿਯਨ੍ਤਂ, ਅਯਸਾ ਪਟਿਕੁਜ੍ਜਿਤਂ.

੬੯੪. ‘‘ਤਸ੍ਸ ਅਯੋਮਯਾ ਭੂਮਿ, ਜਲਿਤਾ ਤੇਜਸਾ ਯੁਤਾ;

ਸਮਨ੍ਤਾ ਯੋਜਨਸਤਂ, ਫਰਿਤ੍ਵਾ ਤਿਟ੍ਠਤਿ ਸਬ੍ਬਦਾ.

੬੯੫. ‘‘ਵਸ੍ਸਾਨਿ ਸਤਸਹਸ੍ਸਾਨਿ, ਘੋਸੋ ਸੁਯ੍ਯਤਿ ਤਾਵਦੇ;

ਲਕ੍ਖੋ ਏਸੋ ਮਹਾਰਾਜ, ਸਤਭਾਗਵਸ੍ਸਕੋਟਿਯੋ.

੬੯੬. ‘‘ਕੋਟਿਸਤਸਹਸ੍ਸਾਨਿ, ਨਿਰਯੇ ਪਚ੍ਚਰੇ ਜਨਾ;

ਮਿਚ੍ਛਾਦਿਟ੍ਠੀ ਚ ਦੁਸ੍ਸੀਲਾ, ਯੇ ਚ ਅਰਿਯੂਪਵਾਦਿਨੋ.

੬੯੭. ‘‘ਤਤ੍ਥਾਹਂ ਦੀਘਮਦ੍ਧਾਨਂ, ਦੁਕ੍ਖਂ ਵੇਦਿਸ੍ਸ ਵੇਦਨਂ;

ਫਲਂ ਪਾਪਸ੍ਸ ਕਮ੍ਮਸ੍ਸ, ਤਸ੍ਮਾ ਸੋਚਾਮਹਂ ਭੁਸਂ.

੬੯੮. ‘‘ਤਂ ਸੁਣੋਹਿ ਮਹਾਰਾਜ, ਅਰਿਨ੍ਦਮ ਰਟ੍ਠਵਡ੍ਢਨ;

ਧੀਤਾ ਮਯ੍ਹਂ ਮਹਾਰਾਜ, ਉਤ੍ਤਰਾ ਭਦ੍ਦਮਤ੍ਥੁ ਤੇ.

੬੯੯. ‘‘ਕਰੋਤਿ ਭਦ੍ਦਕਂ ਕਮ੍ਮਂ, ਸੀਲੇਸੁਪੋਸਥੇ ਰਤਾ;

ਸਞ੍ਞਤਾ ਸਂਵਿਭਾਗੀ ਚ, ਵਦਞ੍ਞੂ ਵੀਤਮਚ੍ਛਰਾ.

੭੦੦. ‘‘ਅਖਣ੍ਡਕਾਰੀ ਸਿਕ੍ਖਾਯ, ਸੁਣ੍ਹਾ ਪਰਕੁਲੇਸੁ ਚ;

ਉਪਾਸਿਕਾ ਸਕ੍ਯਮੁਨਿਨੋ, ਸਮ੍ਬੁਦ੍ਧਸ੍ਸ ਸਿਰੀਮਤੋ.

੭੦੧. ‘‘ਭਿਕ੍ਖੁ ਚ ਸੀਲਸਮ੍ਪਨ੍ਨੋ, ਗਾਮਂ ਪਿਣ੍ਡਾਯ ਪਾਵਿਸਿ;

ਓਕ੍ਖਿਤ੍ਤਚਕ੍ਖੁ ਸਤਿਮਾ, ਗੁਤ੍ਤਦ੍ਵਾਰੋ ਸੁਸਂਵੁਤੋ.

੭੦੨. ‘‘ਸਪਦਾਨਂ ਚਰਮਾਨੋ, ਅਗਮਾ ਤਂ ਨਿਵੇਸਨਂ;

ਤਮਦ੍ਦਸ ਮਹਾਰਾਜ, ਉਤ੍ਤਰਾ ਭਦ੍ਦਮਤ੍ਥੁ ਤੇ.

੭੦੩. ‘‘ਪੂਰਂ ਪਾਨੀਯਸਰਕਂ, ਪੂਵੇ ਵਿਤ੍ਤੇ ਚ ਸਾ ਅਦਾ;

ਪਿਤਾ ਮੇ ਕਾਲਕਤੋ ਭਨ੍ਤੇ, ਤਸ੍ਸੇਤਂ ਉਪਕਪ੍ਪਤੁ.

੭੦੪. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੁਞ੍ਜਾਮਿ ਕਾਮਕਾਮੀਹਂ, ਰਾਜਾ ਵੇਸ੍ਸਵਣੋ ਯਥਾ.

੭੦੫. ‘‘ਤਂ ਸੁਣੋਹਿ ਮਹਾਰਾਜ, ਅਰਿਨ੍ਦਮ ਰਟ੍ਠਵਡ੍ਢਨ;

ਸਦੇਵਕਸ੍ਸ ਲੋਕਸ੍ਸ, ਬੁਦ੍ਧੋ ਅਗ੍ਗੋ ਪਵੁਚ੍ਚਤਿ;

ਤਂ ਬੁਦ੍ਧਂ ਸਰਣਂ ਗਚ੍ਛ, ਸਪੁਤ੍ਤਦਾਰੋ ਅਰਿਨ੍ਦਮ.

੭੦੬. ‘‘ਅਟ੍ਠਙ੍ਗਿਕੇਨ ਮਗ੍ਗੇਨ, ਫੁਸਨ੍ਤਿ ਅਮਤਂ ਪਦਂ;

ਤਂ ਧਮ੍ਮਂ ਸਰਣਂ ਗਚ੍ਛ, ਸਪੁਤ੍ਤਦਾਰੋ ਅਰਿਨ੍ਦਮ.

੭੦੭. ‘‘ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ;

ਤਂ ਸਙ੍ਘਂ ਸਰਣਂ ਗਚ੍ਛ, ਸਪੁਤ੍ਤਦਾਰੋ ਅਰਿਨ੍ਦਮ.

੭੦੮. ‘‘ਪਾਣਾਤਿਪਾਤਾ ਵਿਰਮਸ੍ਸੁ ਖਿਪ੍ਪਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਸ੍ਸੁ;

ਅਮਜ੍ਜਪੋ ਮਾ ਚ ਮੁਸਾ ਅਭਾਣਿ, ਸਕੇਨ ਦਾਰੇਨ ਚ ਹੋਹਿ ਤੁਟ੍ਠੋਤਿ.

੭੦੯. ‘‘ਅਤ੍ਥਕਾਮੋਸਿ ਮੇ ਯਕ੍ਖ, ਹਿਤਕਾਮੋਸਿ ਦੇਵਤੇ;

ਕਰੋਮਿ ਤੁਯ੍ਹਂ ਵਚਨਂ, ਤ੍ਵਂਸਿ ਆਚਰਿਯੋ ਮਮ.

੭੧੦. ‘‘ਉਪੇਮਿ ਸਰਣਂ ਬੁਦ੍ਧਂ, ਧਮ੍ਮਞ੍ਚਾਪਿ ਅਨੁਤ੍ਤਰਂ;

ਸਙ੍ਘਞ੍ਚ ਨਰਦੇਵਸ੍ਸ, ਗਚ੍ਛਾਮਿ ਸਰਣਂ ਅਹਂ.

੭੧੧. ‘‘ਪਾਣਾਤਿਪਾਤਾ ਵਿਰਮਾਮਿ ਖਿਪ੍ਪਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਾਮਿ;

ਅਮਜ੍ਜਪੋ ਨੋ ਚ ਮੁਸਾ ਭਣਾਮਿ, ਸਕੇਨ ਦਾਰੇਨ ਚ ਹੋਮਿ ਤੁਟ੍ਠੋ.

੭੧੨. ‘‘ਓਫੁਣਾਮਿ ਮਹਾਵਾਤੇ, ਨਦਿਯਾ ਸੀਘਗਾਮਿਯਾ;

ਵਮਾਮਿ ਪਾਪਿਕਂ ਦਿਟ੍ਠਿਂ, ਬੁਦ੍ਧਾਨਂ ਸਾਸਨੇ ਰਤੋ.

੭੧੩. ‘‘ਇਦਂ ਵਤ੍ਵਾਨ ਸੋਰਟ੍ਠੋ, ਵਿਰਮਿਤ੍ਵਾ ਪਾਪਦਸ੍ਸਨਾ;

ਨਮੋ ਭਗਵਤੋ ਕਤ੍ਵਾ, ਪਾਮੋਕ੍ਖੋ ਰਥਮਾਰੁਹੀ’’ਤਿ. – ਗਾਥਾਯੋ ਅਵੋਚੁਂ;

੬੫੮-੯. ਤਤ੍ਥ ਰਾਜਾ ਪਿਙ੍ਗਲਕੋ ਨਾਮ, ਸੁਰਟ੍ਠਾਨਂ ਅਧਿਪਤਿ ਅਹੂਤਿ ਪਿਙ੍ਗਲਚਕ੍ਖੁਤਾਯ ‘‘ਪਿਙ੍ਗਲੋ’’ਤਿ ਪਾਕਟਨਾਮੋ ਸੁਰਟ੍ਠਦੇਸਸ੍ਸ ਇਸ੍ਸਰੋ ਰਾਜਾ ਅਹੋਸਿ. ਮੋਰਿਯਾਨਨ੍ਤਿ ਮੋਰਿਯਰਾਜੂਨਂ, ਧਮ੍ਮਾਸੋਕਂ ਸਨ੍ਧਾਯ ਵਦਤਿ. ਸੁਰਟ੍ਠਂ ਪੁਨਰਾਗਮਾਤਿ ਸੁਰਟ੍ਠਸ੍ਸ ਵਿਸਯਂ ਉਦ੍ਦਿਸ੍ਸ ਸੁਰਟ੍ਠਗਾਮਿਮਗ੍ਗਂ ਪਚ੍ਚਾਗਞ੍ਛਿ. ਪਙ੍ਕਨ੍ਤਿ ਮੁਦੁਭੂਮਿਂ. ਵਣ੍ਣੁਪਥਨ੍ਤਿ ਪੇਤੇਨ ਨਿਮ੍ਮਿਤਂ ਮਰੂਭੂਮਿਮਗ੍ਗਂ.

੬੬੦. ਖੇਮੋਤਿ ਨਿਬ੍ਭਯੋ. ਸੋਵਤ੍ਥਿਕੋਤਿ ਸੋਤ੍ਥਿਭਾਵਾਵਹੋ. ਸਿਵੋਤਿ ਅਨੁਪਦ੍ਦਵੋ. ਸੁਰਟ੍ਠਾਨਂ ਸਨ੍ਤਿਕੇ ਇਤੋਤਿ ਇਮਿਨਾ ਮਗ੍ਗੇਨ ਗਚ੍ਛਨ੍ਤਾ ਮਯਂ ਸੁਰਟ੍ਠਵਿਸਯਸ੍ਸ ਸਮੀਪੇਯੇਵ.

੬੬੧-੨. ਸੋਰਟ੍ਠੋਤਿ ਸੁਰਟ੍ਠਾਧਿਪਤਿ. ਉਬ੍ਬਿਗ੍ਗਰੂਪੋਤਿ ਉਤ੍ਰਸ੍ਤਸਭਾਵੋ. ਭਿਂਸਨਨ੍ਤਿ ਭਯਜਨਨਂ. ਲੋਮਹਂਸਨਨ੍ਤਿ ਭਿਂਸਨਕਭਾਵੇਨ ਲੋਮਾਨਂ ਹਂਸਾਪਨਂ.

੬੬੩. ਯਮਪੁਰਿਸਾਨ ਸਨ੍ਤਿਕੇਤਿ ਪੇਤਾਨਂ ਸਮੀਪੇ ਵਤ੍ਤਾਮ. ਅਮਾਨੁਸੋ ਵਾਯਤਿ ਗਨ੍ਧੋਤਿ ਪੇਤਾਨਂ ਸਰੀਰਗਨ੍ਧੋ ਵਾਯਤਿ. ਘੋਸੋ ਸੁਯ੍ਯਤਿ ਦਾਰੁਣੋਤਿ ਪਚ੍ਚੇਕਨਿਰਯੇਸੁ ਕਾਰਣਂ ਕਾਰਿਯਮਾਨਾਨਂ ਸਤ੍ਤਾਨਂ ਘੋਰਤਰੋ ਸਦ੍ਦੋ ਸੁਯ੍ਯਤਿ.

੬੬੬. ਪਾਦਪਨ੍ਤਿ ਪਾਦਸਦਿਸੇਹਿ ਮੂਲਾਵਯਵੇਹਿ ਉਦਕਸ੍ਸ ਪਿਵਨਤੋ ‘‘ਪਾਦਪੋ’’ਤਿ ਲਦ੍ਧਨਾਮਂ ਤਰੁਂ. ਛਾਯਾਸਮ੍ਪਨ੍ਨਨ੍ਤਿ ਸਮ੍ਪਨ੍ਨਚ੍ਛਾਯਂ. ਨੀਲਬ੍ਭਵਣ੍ਣਸਦਿਸਨ੍ਤਿ ਵਣ੍ਣੇਨ ਨੀਲਮੇਘਸਦਿਸਂ. ਮੇਘਵਣ੍ਣਸਿਰੀਨਿਭਨ੍ਤਿ ਮੇਘਵਣ੍ਣਸਣ੍ਠਾਨਂ ਹੁਤ੍ਵਾ ਖਾਯਮਾਨਂ.

੬੭੦. ਪੂਰਂ ਪਾਨੀਯਸਰਕਨ੍ਤਿ ਪਾਨੀਯੇਨ ਪੁਣ੍ਣਂ ਪਾਨੀਯਭਾਜਨਂ. ਪੂਵੇਤਿ ਖਜ੍ਜਕੇ. ਵਿਤ੍ਤੇਤਿ ਵਿਤ੍ਤਿਜਨਨੇ ਮਧੁਰੇ ਮਨੁਞ੍ਞੇ ਤਹਿਂ ਤਹਿਂ ਸਰਾਵੇ ਪੂਰੇਤ੍ਵਾ ਠਪਿਤਪੂਵੇ ਅਦ੍ਦਸ.

੬੭੨. ਅਥੋ ਤੇ ਅਦੁਰਾਗਤਨ੍ਤਿ ਏਤ੍ਥ ਅਥੋਤਿ ਨਿਪਾਤਮਤ੍ਤਂ, ਅਵਧਾਰਣਤ੍ਥੇ ਵਾ, ਮਹਾਰਾਜ, ਤੇ ਆਗਤਂ ਦੁਰਾਗਤਂ ਨ ਹੋਤਿ, ਅਥ ਖੋ ਸ੍ਵਾਗਤਮੇਵਾਤਿ ਮਯਂ ਸਮ੍ਪਟਿਚ੍ਛਾਮਾਤਿ ਅਤ੍ਥੋ. ਅਰਿਨ੍ਦਮਾਤਿ ਅਰੀਨਂ ਦਮਨਸੀਲ.

੬੭੭. ਅਮਚ੍ਚਾ ਪਾਰਿਸਜ੍ਜਾਤਿ ਅਮਚ੍ਚਾ ਪਾਰਿਸਜ੍ਜਾ ਚ ਵਚਨਂ ਸੁਣਨ੍ਤੁ, ਬ੍ਰਾਹ੍ਮਣੋ ਚ ਤੁਯ੍ਹਂ ਪੁਰੋਹਿਤੋ ਤਂ ਸੁਣਾਤੂਤਿ ਯੋਜਨਾ.

੬੭੮. ਸੁਰਟ੍ਠਸ੍ਮਿਂ ਅਹਨ੍ਤਿ ਸੁਰਟ੍ਠਦੇਸੇ ਅਹਂ. ਦੇਵਾਤਿ ਰਾਜਾਨਂ ਆਲਪਤਿ. ਮਿਚ੍ਛਾਦਿਟ੍ਠੀਤਿ ਨਤ੍ਥਿਕਦਿਟ੍ਠਿਯਾ ਵਿਪਰੀਤਦਸ੍ਸਨੋ. ਦੁਸ੍ਸੀਲੋਤਿ ਨਿਸ੍ਸੀਲੋ. ਕਦਰਿਯੋਤਿ ਥਦ੍ਧਮਚ੍ਛਰੀ. ਪਰਿਭਾਸਕੋਤਿ ਸਮਣਬ੍ਰਾਹ੍ਮਣਾਨਂ ਅਕ੍ਕੋਸਕੋ.

੬੭੯. ਵਾਰਯਿਸ੍ਸਨ੍ਤਿ ਵਾਰੇਸਿਂ. ਅਨ੍ਤਰਾਯਕਰੋ ਅਹਨ੍ਤਿ ਦਾਨਂ ਦਦਨ੍ਤਾਨਂ ਉਪਕਾਰਂ ਕਰੋਨ੍ਤਾਨਂ ਅਨ੍ਤਰਾਯਕਰੋ ਹੁਤ੍ਵਾ ਅਞ੍ਞੇਸਞ੍ਚ ਪਰੇਸਂ ਦਾਨਂ ਦਦਮਾਨਾਨਂ ਦਾਨਮਯਪੁਞ੍ਞਤੋ ਅਹਂ ਬਹੁਜਨਂ ਵਾਰਯਿਸ੍ਸਂ ਵਾਰੇਸਿਨ੍ਤਿ ਯੋਜਨਾ.

੬੮੦. ਵਿਪਾਕੋ ਨਤ੍ਥਿ ਦਾਨਸ੍ਸਾਤਿਆਦਿ ਵਾਰਿਤਾਕਾਰਦਸ੍ਸਨਂ. ਤਤ੍ਥ ਵਿਪਾਕੋ ਨਤ੍ਥਿ ਦਾਨਸ੍ਸਾਤਿ ਦਾਨਂ ਦਦਤੋ ਤਸ੍ਸ ਵਿਪਾਕੋ ਆਯਤਿਂ ਪਤ੍ਤਬ੍ਬਫਲਂ ਨਤ੍ਥੀਤਿ ਵਿਪਾਕਂ ਪਟਿਬਾਹਤਿ. ਸਂਯਮਸ੍ਸ ਕੁਤੋ ਫਲਨ੍ਤਿ ਸੀਲਸ੍ਸ ਪਨ ਕੁਤੋ ਨਾਮ ਫਲਂ, ਸਬ੍ਬੇਨ ਸਬ੍ਬਂ ਤਂ ਨਤ੍ਥੀਤਿ ਅਧਿਪ੍ਪਾਯੋ. ਨਤ੍ਥਿ ਆਚਰਿਯੋ ਨਾਮਾਤਿ ਆਚਾਰਸਮਾਚਾਰਸਿਕ੍ਖਾਪਕੋ ਆਚਰਿਯੋ ਨਾਮ ਕੋਚਿ ਨਤ੍ਥਿ. ਸਭਾਵਤੋ ਏਵ ਹਿ ਸਤ੍ਤਾ ਦਨ੍ਤਾ ਵਾ ਅਦਨ੍ਤਾ ਵਾ ਹੋਨ੍ਤੀਤਿ ਅਧਿਪ੍ਪਾਯੋ. ਤੇਨਾਹ ‘‘ਅਦਨ੍ਤਂ ਕੋ ਦਮੇਸ੍ਸਤੀ’’ਤਿ.

੬੮੧. ਸਮਤੁਲ੍ਯਾਨਿ ਭੂਤਾਨੀਤਿ ਇਮੇ ਸਤ੍ਤਾ ਸਬ੍ਬੇਪਿ ਅਞ੍ਞਮਞ੍ਞਂ ਸਮਸਮਾ, ਤਸ੍ਮਾ ਜੇਟ੍ਠੋ ਏਵ ਨਤ੍ਥਿ, ਕੁਤੋ ਜੇਟ੍ਠਾਪਚਾਯਿਕੋ, ਜੇਟ੍ਠਾਪਚਾਯਨਪੁਞ੍ਞਂ ਨਾਮ ਨਤ੍ਥੀਤਿ ਅਤ੍ਥੋ. ਨਤ੍ਥਿ ਬਲਨ੍ਤਿ ਯਮ੍ਹਿ ਅਤ੍ਤਨੋ ਬਲੇ ਪਤਿਟ੍ਠਿਤਾ ਸਤ੍ਤਾ ਵੀਰਿਯਂ ਕਤ੍ਵਾ ਮਨੁਸ੍ਸਸੋਭਗ੍ਯਤਂ ਆਦਿਂ ਕਤ੍ਵਾ ਯਾਵਅਰਹਤ੍ਤਂ ਸਮ੍ਪਤ੍ਤਿਯੋ ਪਾਪੁਣਨ੍ਤਿ, ਤਂ ਵੀਰਿਯਬਲਂ ਪਟਿਕ੍ਖਿਪਤਿ. ਵੀਰਿਯਂ ਵਾ ਨਤ੍ਥਿ ਕੁਤੋ ਉਟ੍ਠਾਨਪੋਰਿਸਨ੍ਤਿ ਇਦਂ ਨੋ ਪੁਰਿਸਵੀਰਿਯੇਨ ਪੁਰਿਸਕਾਰੇਨ ਪਵਤ੍ਤਨ੍ਤਿ ਏਵਂ ਪਵਤ੍ਤਵਾਦਪਟਿਕ੍ਖੇਪਵਸੇਨ ਵੁਤ੍ਤਂ.

੬੮੨. ਨਤ੍ਥਿ ਦਾਨਫਲਂ ਨਾਮਾਤਿ ਦਾਨਸ੍ਸ ਫਲਂ ਨਾਮ ਕਿਞ੍ਚਿ ਨਤ੍ਥਿ, ਦੇਯ੍ਯਧਮ੍ਮਪਰਿਚ੍ਚਾਗੋ ਭਸ੍ਮਨਿਹਿਤਂ ਵਿਯ ਨਿਪ੍ਫਲੋ ਏਵਾਤਿ ਅਤ੍ਥੋ. ਨ ਵਿਸੋਧੇਤਿ ਵੇਰਿਨਨ੍ਤਿ ਏਤ੍ਥ ਵੇਰਿਨਨ੍ਤਿ ਵੇਰਵਨ੍ਤਂ ਵੇਰਾਨਂ ਵਸੇਨ ਪਾਣਾਤਿਪਾਤਾਦੀਨਂ ਵਸੇਨ ਚ ਕਤਪਾਪਂ ਪੁਗ੍ਗਲਂ ਦਾਨਸੀਲਾਦਿਵਤਤੋ ਨ ਵਿਸੋਧੇਤਿ, ਕਦਾਚਿਪਿ ਸੁਦ੍ਧਂ ਨ ਕਰੋਤਿ. ਪੁਬ੍ਬੇ ‘‘ਵਿਪਾਕੋ ਨਤ੍ਥਿ ਦਾਨਸ੍ਸਾ’’ਤਿਆਦਿ ਦਾਨਾਦਿਤੋ ਅਤ੍ਤਨੋ ਪਰੇਸਂ ਨਿਵਾਰਿਤਾਕਾਰਦਸ੍ਸਨਂ, ‘‘ਨਤ੍ਥਿ ਦਾਨਫਲਂ ਨਾਮਾ’’ਤਿਆਦਿ ਪਨ ਅਤ੍ਥਨੋ ਮਿਚ੍ਛਾਭਿਨਿਵੇਸਦਸ੍ਸਨਨ੍ਤਿ ਦਟ੍ਠਬ੍ਬਂ. ਲਦ੍ਧੇਯ੍ਯਨ੍ਤਿ ਲਦ੍ਧਬ੍ਬਂ. ਕਥਂ ਪਨ ਲਦ੍ਧਬ੍ਬਨ੍ਤਿ ਆਹ ‘‘ਨਿਯਤਿਪਰਿਣਾਮਜ’’ਨ੍ਤਿ. ਅਯਂ ਸਤ੍ਤੋ ਸੁਖਂ ਵਾ ਦੁਕ੍ਖਂ ਵਾ ਲਭਨ੍ਤੋ ਨਿਯਤਿਵਿਪਰਿਣਾਮਵਸੇਨੇਵ ਲਭਤਿ, ਨ ਕਮ੍ਮਸ੍ਸ ਕਤਤ੍ਤਾ, ਨ ਇਸ੍ਸਰਾਦਿਨਾ ਚਾਤਿ ਅਧਿਪ੍ਪਾਯੋ.

੬੮੩. ਨਤ੍ਥਿ ਮਾਤਾ ਪਿਤਾ ਭਾਤਾਤਿ ਮਾਤਾਦੀਸੁ ਸਮ੍ਮਾਪਟਿਪਤ੍ਤਿਮਿਚ੍ਛਾਪਟਿਪਤ੍ਤੀਨਂ ਫਲਾਭਾਵਂ ਸਨ੍ਧਾਯ ਵਦਤਿ. ਲੋਕੋ ਨਤ੍ਥਿ ਇਤੋ ਪਰਨ੍ਤਿ ਇਤੋ ਇਧਲੋਕਤੋ ਪਰਲੋਕੋ ਨਾਮ ਕੋਚਿ ਨਤ੍ਥਿ, ਤਤ੍ਥ ਤਤ੍ਥੇਵ ਸਤ੍ਤਾ ਉਚ੍ਛਿਜ੍ਜਨ੍ਤੀਤਿ ਅਧਿਪ੍ਪਾਯੋ. ਦਿਨ੍ਨਨ੍ਤਿ ਮਹਾਦਾਨਂ. ਹੁਤਨ੍ਤਿ ਪਹੇਨਕਸਕ੍ਕਾਰੋ, ਤਦੁਭਯਮ੍ਪਿ ਫਲਾਭਾਵਂ ਸਨ੍ਧਾਯ ‘‘ਨਤ੍ਥੀ’’ਤਿ ਪਟਿਕ੍ਖਿਪਤਿ. ਸੁਨਿਹਿਤਨ੍ਤਿ ਸੁਟ੍ਠੁ ਨਿਹਿਤਂ. ਨ ਵਿਜ੍ਜਤੀਤਿ ਯਂ ਸਮਣਬ੍ਰਾਹ੍ਮਣਾਨਂ ਦਾਨਂ ਨਾਮ ‘‘ਅਨੁਗਾਮਿਕਨਿਧੀ’’ਤਿ ਵਦਨ੍ਤਿ, ਤਂ ਨ ਵਿਜ੍ਜਤਿ. ਤੇਸਂ ਤਂ ਵਾਚਾਵਤ੍ਥੁਮਤ੍ਤਮੇਵਾਤਿ ਅਧਿਪ੍ਪਾਯੋ.

੬੮੪. ਨ ਕੋਚਿ ਕਞ੍ਚਿ ਹਨਤੀਤਿ ਯੋ ਪੁਰਿਸੋ ਪਰਂ ਪੁਰਿਸਂ ਹਨੇਯ੍ਯ, ਪਰਸ੍ਸ ਪੁਰਿਸਸ੍ਸ ਸੀਸਂ ਛਿਨ੍ਦੇਯ੍ਯ, ਤਤ੍ਥ ਪਰਮਤ੍ਥਤੋ ਨ ਕੋਚਿ ਕਞ੍ਚਿ ਹਨਤਿ, ਸਤ੍ਤਨ੍ਨਂ ਕਾਯਾਨਂ ਛਿਦ੍ਦਭਾਵਤੋ ਹਨਨ੍ਤੋ ਵਿਯ ਹੋਤਿ. ਕਥਂ ਸਤ੍ਥਪਹਾਰੋਤਿ ਆਹ ‘‘ਸਤ੍ਤਨ੍ਨਂ ਵਿਵਰਮਨ੍ਤਰੇ’’ਤਿ. ਪਥਵੀਆਦੀਨਂ ਸਤ੍ਤਨ੍ਨਂ ਕਾਯਾਨਂ ਵਿਵਰਭੂਤੇ ਅਨ੍ਤਰੇ ਛਿਦ੍ਦੇ ਸਤ੍ਥਂ ਪਵਿਸਤਿ, ਤੇਨ ਸਤ੍ਤਾ ਅਸਿਆਦੀਹਿ ਪਹਤਾ ਵਿਯ ਹੋਨ੍ਤਿ, ਜੀਵੋ ਵਿਯ ਪਨ ਸੇਸਕਾਯਾਪਿ ਨਿਚ੍ਚਸਭਾਵਤ੍ਤਾ ਨ ਛਿਜ੍ਜਨ੍ਤੀਤਿ ਅਧਿਪ੍ਪਾਯੋ.

੬੮੫. ਅਚ੍ਛੇਜ੍ਜਾਭੇਜ੍ਜੋ ਹਿ ਜੀਵੋਤਿ ਅਯਂ ਸਤ੍ਤਾਨਂ ਜੀਵੋ ਸਤ੍ਥਾਦੀਹਿ ਨ ਛਿਨ੍ਦਿਤਬ੍ਬੋ ਨ ਭਿਨ੍ਦਿਤਬ੍ਬੋ ਨਿਚ੍ਚਸਭਾਵਤ੍ਤਾ. ਅਟ੍ਠਂਸੋ ਗੁਲ਼ਪਰਿਮਣ੍ਡਲੋਤਿ ਸੋ ਪਨ ਜੀਵੋ ਕਦਾਚਿ ਅਟ੍ਠਂਸੋ ਹੋਤਿ ਕਦਾਚਿ ਗੁਲ਼ਪਰਿਮਣ੍ਡਲੋ. ਯੋਜਨਾਨਂ ਸਤਂ ਪਞ੍ਚਾਤਿ ਕੇਵਲੀਭਾਵਂ ਪਤ੍ਤੋ ਪਞ੍ਚਯੋਜਨਸਤੁਬ੍ਬੇਧੋ ਹੋਤਿ. ਕੋ ਜੀਵਂ ਛੇਤ੍ਤੁਮਰਹਤੀਤਿ ਨਿਚ੍ਚਂ ਨਿਬ੍ਬਿਕਾਰਂ ਜੀਵਂ ਕੋ ਨਾਮ ਸਤ੍ਥਾਦੀਹਿ ਛਿਨ੍ਦਿਤੁਂ ਅਰਹਤਿ, ਨ ਸੋ ਕੇਨਚਿ ਵਿਕੋਪਨੇਯ੍ਯੋਤਿ ਵਦਤਿ.

੬੮੬. ਸੁਤ੍ਤਗੁਲ਼ੇਤਿ ਵੇਠੇਤ੍ਵਾ ਕਤਸੁਤ੍ਤਗੁਲ਼ੇ. ਖਿਤ੍ਤੇਤਿ ਨਿਬ੍ਬੇਠਨਵਸੇਨ ਖਿਤ੍ਤੇ. ਨਿਬ੍ਬੇਠੇਨ੍ਤਂ ਪਲਾਯਤੀਤਿ ਪਬ੍ਬਤੇ ਵਾ ਰੁਕ੍ਖਗ੍ਗੇ ਵਾ ਠਤ੍ਵਾ ਨਿਬ੍ਬੇਠਿਯਮਾਨਂ ਖਿਤ੍ਤਂ ਸੁਤ੍ਤਗੁਲ਼ਂ ਨਿਬ੍ਬੇਠੇਨ੍ਤਮੇਵ ਗਚ੍ਛਤਿ, ਸੁਤ੍ਤੇ ਖੀਣੇ ਨ ਗਚ੍ਛਤਿ. ਏਵਮੇਵਨ੍ਤਿ ਯਥਾ ਤਂ ਸੁਤ੍ਤਗੁਲ਼ਂ ਨਿਬ੍ਬੇਠਿਯਮਾਨਂ ਗਚ੍ਛਤਿ, ਸੁਤ੍ਤੇ ਖੀਣੇ ਨ ਗਚ੍ਛਤਿ, ਏਵਮੇਵ ਸੋ ਜੀਵੋ ‘‘ਚੁਲ੍ਲਾਸੀਤਿ ਮਹਾਕਪ੍ਪਿਨੋ ਸਤਸਹਸ੍ਸਾਨੀ’’ਤਿ ਵੁਤ੍ਤਕਾਲਮੇਵ ਅਤ੍ਤਭਾਵਗੁਲ਼ਂ ਨਿਬ੍ਬੇਠੇਨ੍ਤੋ ਪਲਾਯਤਿ ਪਵਤ੍ਤਤਿ, ਤਤੋ ਉਦ੍ਧਂ ਨ ਪਵਤ੍ਤਤਿ.

੬੮੭. ਏਵਮੇਵ ਚ ਸੋ ਜੀਵੋਤਿ ਯਥਾ ਕੋਚਿ ਪੁਰਿਸੋ ਅਤ੍ਤਨੋ ਨਿਵਾਸਗਾਮਤੋ ਨਿਕ੍ਖਮਿਤ੍ਵਾ ਤਤੋ ਅਞ੍ਞਂ ਗਾਮਂ ਪਵਿਸਤਿ ਕੇਨਚਿਦੇਵ ਕਰਣੀਯੇਨ, ਏਵਮੇਵ ਸੋ ਜੀਵੋ ਇਤੋ ਸਰੀਰਤੋ ਨਿਕ੍ਖਮਿਤ੍ਵਾ ਅਞ੍ਞਂ ਅਪਰਂ ਸਰੀਰਂ ਨਿਯਤਵਸੇਨ ਪਵਿਸਤੀਤਿ ਅਧਿਪ੍ਪਾਯੋ. ਬੋਨ੍ਦਿਨ੍ਤਿ ਕਾਯਂ.

੬੮੯. ਚੁਲ੍ਲਾਸੀਤੀਤਿ ਚਤੁਰਾਸੀਤਿ. ਮਹਾਕਪ੍ਪਿਨੋਤਿ ਮਹਾਕਪ੍ਪਾਨਂ. ਤਤ੍ਥ ‘‘ਏਕਮ੍ਹਾ ਮਹਾਸਰਾ ਅਨੋਤਤ੍ਤਾਦਿਤੋ ਵਸ੍ਸਸਤੇ ਵਸ੍ਸਸਤੇ ਕੁਸਗ੍ਗੇਨ ਏਕੇਕਂ ਉਦਕਬਿਨ੍ਦੁਂ ਨੀਹਰਨ੍ਤੇ ਇਮਿਨਾ ਉਪਕ੍ਕਮੇਨ ਸਤ੍ਤਕ੍ਖਤ੍ਤੁਂ ਤਮ੍ਹਿ ਸਰੇ ਨਿਰੁਦਕੇ ਜਾਤੇ ਏਕੋ ਮਹਾਕਪ੍ਪੋ ਨਾਮ ਹੋਤੀ’’ਤਿ ਵਤ੍ਵਾ ‘‘ਏਵਰੂਪਾਨਂ ਮਹਾਕਪ੍ਪਾਨਂ ਚਤੁਰਾਸੀਤਿਸਤਸਹਸ੍ਸਾਨਿ ਸਂਸਾਰਸ੍ਸ ਪਰਿਮਾਣ’’ਨ੍ਤਿ ਵਦਨ੍ਤਿ. ਯੇ ਬਾਲਾ ਯੇ ਚ ਪਣ੍ਡਿਤਾਤਿ ਯੇ ਅਨ੍ਧਬਾਲਾ, ਯੇ ਚ ਸਪ੍ਪਞ੍ਞਾ, ਸਬ੍ਬੇਪਿ ਤੇ. ਸਂਸਾਰਂ ਖੇਪਯਿਤ੍ਵਾਨਾਤਿ ਯਥਾਵੁਤ੍ਤਕਾਲਪਰਿਚ੍ਛੇਦਂ ਸਂਸਾਰਂ ਅਪਰਾਪਰੁਪ੍ਪਤ੍ਤਿਵਸੇਨ ਖੇਪੇਤ੍ਵਾ. ਦੁਕ੍ਖਸ੍ਸਨ੍ਤਂ ਕਰਿਸ੍ਸਰੇਤਿ ਵਟ੍ਟਦੁਕ੍ਖਸ੍ਸ ਪਰਿਯਨ੍ਤਂ ਪਰਿਯੋਸਾਨਂ ਕਰਿਸ੍ਸਨ੍ਤਿ. ਪਣ੍ਡਿਤਾਪਿ ਅਨ੍ਤਰਾ ਸੁਜ੍ਝਿਤੁਂ ਨ ਸਕ੍ਕੋਨ੍ਤਿ, ਬਾਲਾਪਿ ਤਤੋ ਉਦ੍ਧਂ ਨਪ੍ਪਵਤ੍ਤਨ੍ਤੀਤਿ ਤਸ੍ਸ ਲਦ੍ਧਿ.

੬੯੦. ਮਿਤਾਨਿ ਸੁਖਦੁਕ੍ਖਾਨਿ, ਦੋਣੇਹਿ ਪਿਟਕੇਹਿ ਚਾਤਿ ਸਤ੍ਤਾਨਂ ਸੁਖਦੁਕ੍ਖਾਨਿ ਨਾਮ ਦੋਣੇਹਿ ਪਿਟਕੇਹਿ ਮਾਨਭਾਜਨੇਹਿ ਮਿਤਾਨਿ ਵਿਯ ਯਥਾਵੁਤ੍ਤਕਾਲਪਰਿਚ੍ਛੇਦੇਨੇਵ ਪਰਿਮਿਤਤ੍ਤਾ ਪਚ੍ਚੇਕਞ੍ਚ ਤੇਸਂ ਤੇਸਂ ਸਤ੍ਤਾਨਂ ਤਾਨਿ ਨਿਯਤਿਪਰਿਣਾਮਜਾਨਿ ਪਰਿਮਿਤਾਨਿ. ਤਯਿਦਂ ਜਿਨੋ ਸਬ੍ਬਂ ਪਜਾਨਾਤਿ ਜਿਨਭੂਮਿਯਂ ਠਿਤੋ ਕੇਵਲਂ ਪਜਾਨਾਤਿ ਸਂਸਾਰਸ੍ਸ ਸਮਤਿਕ੍ਕਨ੍ਤਤ੍ਤਾ. ਸਂਸਾਰੇ ਪਨ ਪਰਿਬ੍ਭਮਤਿ ਸਮ੍ਮੂਲ਼੍ਹਾਯਂ ਇਤਰਾ ਪਜਾ.

੬੯੧. ਏਵਂਦਿਟ੍ਠਿ ਪੁਰੇ ਆਸਿਨ੍ਤਿ ਯਥਾਵੁਤ੍ਤਨਤ੍ਥਿਕਦਿਟ੍ਠਿਕੋ ਪੁਬ੍ਬੇਵ ਅਹਂ ਅਹੋਸਿਂ. ਸਮ੍ਮੂਲ਼੍ਹੋ ਮੋਹਪਾਰੁਤੋਤਿ ਯਥਾਵੁਤ੍ਤਾਯ ਦਿਟ੍ਠਿਯਾ ਹੇਤੁਭੂਤੇਨ ਸਮ੍ਮੋਹੇਨ ਸਮ੍ਮੂਲ਼੍ਹੋ, ਤਂਸਹਜਾਤੇਨ ਪਨ ਮੋਹੇਨ ਪਾਰੁਤੋ, ਪਟਿਚ੍ਛਾਦਿਤਕੁਸਲਬੀਜੋਤਿ ਅਧਿਪ੍ਪਾਯੋ.

੬੯੨. ਏਵਂ ਪੁਬ੍ਬੇ ਯਾ ਅਤ੍ਤਨੋ ਉਪ੍ਪਨ੍ਨਾ ਪਾਪਦਿਟ੍ਠਿ, ਤਸ੍ਸਾ ਵਸੇਨ ਕਤਂ ਪਾਪਕਮ੍ਮਂ ਦਸ੍ਸੇਤ੍ਵਾ ਇਦਾਨਿ ਅਤ੍ਤਨਾ ਆਯਤਿਂ ਅਨੁਭਵਿਤਬ੍ਬਂ ਤਸ੍ਸ ਫਲਂ ਦਸ੍ਸੇਨ੍ਤੋ ‘‘ਓਰਂ ਮੇ ਛਹਿ ਮਾਸੇਹੀ’’ਤਿਆਦਿਮਾਹ.

੬੯੫-੭. ਤਤ੍ਥ ਵਸ੍ਸਾਨਿ ਸਤਸਹਸ੍ਸਾਨੀਤਿ ਵਸ੍ਸਾਨਂ ਸਤਸਹਸ੍ਸਾਨਿ, ਅਤਿਕ੍ਕਮਿਤ੍ਵਾਤਿ ਵਚਨਸੇਸੋ. ਭੁਮ੍ਮਤ੍ਥੇ ਵਾ ਏਤਂ ਪਚ੍ਚਤ੍ਤਵਚਨਂ, ਵਸ੍ਸੇਸੁ ਸਤਸਹਸ੍ਸੇਸੁ ਵੀਤਿਵਤ੍ਤੇਸੂਤਿ ਅਤ੍ਥੋ. ਘੋਸੋ ਸੁਯ੍ਯਤਿ ਤਾਵਦੇਤਿ ਯਦਾ ਏਤ੍ਤਕੋ ਕਾਲੋ ਅਤਿਕ੍ਕਨ੍ਤੋ ਹੋਤਿ, ਤਾਵਦੇਵ ਤਸ੍ਮਿਂ ਕਾਲੇ ‘‘ਇਧ ਪਚ੍ਚਨ੍ਤਾਨਂ ਵੋ ਮਾਰਿਸਾ ਵਸ੍ਸਸਤਸਹਸ੍ਸਪਰਿਮਾਣੋ ਕਾਲੋ ਅਤੀਤੋ’’ਤਿ ਏਵਂ ਤਸ੍ਮਿਂ ਨਿਰਯੇ ਸਦ੍ਦੋ ਸੁਯ੍ਯਤਿ. ਲਕ੍ਖੋ ਏਸੋ, ਮਹਾਰਾਜ, ਸਤਭਾਗਵਸ੍ਸਕੋਟਿਯੋਤਿ ਸਤਭਾਗਾ ਸਤਕੋਟ੍ਠਾਸਾ ਵਸ੍ਸਕੋਟਿਯੋ, ਮਹਾਰਾਜ, ਨਿਰਯੇ ਪਚ੍ਚਨ੍ਤਾਨਂ ਸਤ੍ਤਾਨਂ ਆਯੁਨੋ ਏਸੋ ਲਕ੍ਖੋ ਏਸੋ ਪਰਿਚ੍ਛੇਦੋਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਦਸਦਸਕਂ ਸਤਂ ਨਾਮ, ਦਸ ਸਤਾਨਿ ਸਹਸ੍ਸਂ ਨਾਮ, ਦਸਦਸਸਹਸ੍ਸਾਨਿ ਸਤਸਹਸ੍ਸਂ ਨਾਮ, ਸਤਸਤਸਹਸ੍ਸਾਨਿ ਕੋਟਿ ਨਾਮ, ਤਾਸਂ ਕੋਟੀਨਂ ਵਸੇਨ ਸਤਸਹਸ੍ਸਵਸ੍ਸਕੋਟਿਯੋ ਸਤਭਾਗਾ ਵਸ੍ਸਕੋਟਿਯੋ. ਸਾ ਚ ਖੋ ਨੇਰਯਿਕਾਨਂਯੇਵ ਵਸ੍ਸਗਣਨਾਵਸੇਨ ਵੇਦਿਤਬ੍ਬਾ, ਨ ਮਨੁਸ੍ਸਾਨਂ, ਦੇਵਾਨਂ ਵਾ. ਈਦਿਸਾਨਿ ਅਨੇਕਾਨਿ ਵਸ੍ਸਕੋਟਿਸਤਸਹਸ੍ਸਾਨਿ ਨੇਰਯਿਕਾਨਂ ਆਯੁ. ਤੇਨਾਹ ‘‘ਕੋਟਿਸਤਸਹਸ੍ਸਾਨਿ, ਨਿਰਯੇ ਪਚ੍ਚਰੇ ਜਨਾ’’ਤਿ. ਯਾਦਿਸੇਨ ਪਨ ਪਾਪੇਨ ਸਤ੍ਤਾ ਏਵਂ ਨਿਰਯੇਸੁ ਪਚ੍ਚਨ੍ਤਿ, ਤਂ ਨਿਗਮਨਵਸੇਨ ਦਸ੍ਸੇਤੁਂ ‘‘ਮਿਚ੍ਛਾਦਿਟ੍ਠੀ ਚ ਦੁਸ੍ਸੀਲਾ, ਯੇ ਚ ਅਰਿਯੂਪਵਾਦਿਨੋ’’ਤਿ ਵੁਤ੍ਤਂ. ਵੇਦਿਸ੍ਸਨ੍ਤਿ ਅਨੁਭਵਿਸ੍ਸਂ.

੬੯੮-੭੦੬. ਏਵਂ ਆਯਤਿਂ ਅਤ੍ਤਨਾ ਅਨੁਭਵਿਤਬ੍ਬਂ ਪਾਪਫਲਂ ਦਸ੍ਸੇਤ੍ਵਾ ਇਦਾਨਿ ‘‘ਕੇਨ ਤੇ ਬ੍ਰਹ੍ਮਚਰਿਯੇਨ, ਆਨੁਭਾਵੋ ਅਯਂ ਤਵਾ’’ਤਿ ਰਞ੍ਞਾ ਪੁਚ੍ਛਿਤਮਤ੍ਥਂ ਆਚਿਕ੍ਖਿਤ੍ਵਾ ਤਂ ਸਰਣੇਸੁ ਚੇਵ ਸੀਲੇਸੁ ਚ ਪਤਿਟ੍ਠਾਪੇਤੁਕਾਮੋ ‘‘ਤਂ ਸੁਣੋਹਿ ਮਹਾਰਾਜਾ’’ਤਿਆਦਿਮਾਹ. ਤਤ੍ਥ ਸੀਲੇਸੁਪੋਸਥੇ ਰਤਾਤਿ ਨਿਚ੍ਚਸੀਲੇਸੁ ਚ ਉਪੋਸਥਸੀਲੇਸੁ ਚ ਅਭਿਰਤਾ. ਅਦਾਤਿ ਅਦਾਸਿ. ਤਂ ਧਮ੍ਮਨ੍ਤਿ ਤਂ ਅਟ੍ਠਙ੍ਗਿਕਂ ਮਗ੍ਗਂ ਅਮਤਪਦਞ੍ਚ.

੭੦੯-੧੨. ਏਵਂ ਪੇਤੇਨ ਸਰਣੇਸੁ ਸੀਲੇਸੁ ਚ ਸਮਾਦਪਿਤੋ ਰਾਜਾ ਪਸਨ੍ਨਮਾਨਸੋ ਤੇਨ ਅਤ੍ਤਨੋ ਕਤਂ ਉਪਕਾਰਂ ਤਾਵ ਕਿਤ੍ਤੇਤ੍ਵਾ ਸਰਣਾਦੀਸੁ ਪਤਿਟ੍ਠਹਨ੍ਤੋ ‘‘ਅਤ੍ਥਕਾਮੋ’’ਤਿਆਦਿਕਾ ਤਿਸ੍ਸੋ ਗਾਥਾ ਵਤ੍ਵਾ ਪੁਬ੍ਬੇ ਅਤ੍ਤਨਾ ਗਹਿਤਾਯ ਪਾਪਿਕਾਯ ਦਿਟ੍ਠਿਯਾ ਪਟਿਨਿਸ੍ਸਟ੍ਠਭਾਵਂ ਪਕਾਸੇਨ੍ਤੋ ‘‘ਓਫੁਣਾਮੀ’’ਤਿ ਗਾਥਮਾਹ.

ਤਤ੍ਥ ਓਫੁਣਾਮਿ ਮਹਾਵਾਤੇਤਿ ਮਹਨ੍ਤੇ ਵਾਤੇ ਵਾਯਨ੍ਤੇ ਭੁਸਂ ਵਿਯ ਤਂ ਪਾਪਕਂ ਦਿਟ੍ਠਿਂ, ਯਕ੍ਖ, ਤਵ ਧਮ੍ਮਦੇਸਨਾਵਾਤੇ ਓਫੁਣਾਮਿ ਨਿਦ੍ਧੁਨਾਮਿ. ਨਦਿਯਾ ਵਾ ਸੀਘਗਾਮਿਯਾਤਿ ਸੀਘਸੋਤਾਯ ਮਹਾਨਦਿਯਾ ਵਾ ਤਿਣਕਟ੍ਠਪਣ੍ਣਕਸਟਂ ਵਿਯ ਪਾਪਿਕਂ ਦਿਟ੍ਠਿਂ ਪਵਾਹੇਮੀਤਿ ਅਧਿਪ੍ਪਾਯੋ. ਵਮਾਮਿ ਪਾਪਿਕਂ ਦਿਟ੍ਠਿਨ੍ਤਿ ਮਮ ਮਨੋਮੁਖਗਤਂ ਪਾਪਿਕਂ ਦਿਟ੍ਠਿਂ ਉਚ੍ਛਡ੍ਡਯਾਮਿ. ਤਤ੍ਥ ਕਾਰਣਮਾਹ ‘‘ਬੁਦ੍ਧਾਨਂ ਸਾਸਨੇ ਰਤੋ’’ਤਿ. ਯਸ੍ਮਾ ਏਕਂਸੇਨ ਅਮਤਾਵਹੇ ਬੁਦ੍ਧਾਨਂ ਭਗਵਨ੍ਤਾਨਂ ਸਾਸਨੇ ਰਤੋ ਅਭਿਰਤੋ, ਤਸ੍ਮਾ ਤਂ ਦਿਟ੍ਠਿਸਙ੍ਖਾਤਂ ਵਿਸਂ ਵਮਾਮੀਤਿ ਯੋਜਨਾ.

੭੧੩. ਤਿ ਓਸਾਨਗਾਥਾ ਸਙ੍ਗੀਤਿਕਾਰੇਹਿ ਠਪਿਤਾ. ਤਤ੍ਥ ਪਾਮੋਕ੍ਖੋਤਿਪਾਚੀਨਦਿਸਾਭਿਮੁਖੋ ਹੁਤ੍ਵਾ. ਰਥਮਾਰੁਹੀਤਿ ਰਾਜਾ ਗਮਨਸਜ੍ਜਂ ਅਤ੍ਤਨੋ ਰਾਜਰਥਂ ਅਭਿਰੁਹਿ, ਆਰੁਯ੍ਹ ਯਕ੍ਖਾਨੁਭਾਵੇਨ ਤਂ ਦਿਵਸਮੇਵ ਅਤ੍ਤਨੋ ਨਗਰਂ ਪਤ੍ਵਾ ਰਾਜਭਵਨਂ ਪਾਵਿਸਿ. ਸੋ ਅਪਰੇਨ ਸਮਯੇਨ ਇਮਂ ਪਵਤ੍ਤਿਂ ਭਿਕ੍ਖੂਨਂ ਆਰੋਚੇਸਿ, ਭਿਕ੍ਖੂ ਤਂ ਥੇਰਾਨਂ ਆਰੋਚੇਸੁਂ, ਥੇਰਾ ਤਤਿਯਸਙ੍ਗੀਤਿਯਂ ਸਙ੍ਗਹਂ ਆਰੋਪੇਸੁਂ.

ਨਨ੍ਦਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.