੩. ਉਦਪਾਨਵਗ੍ਗੋ

[੨੭੧] ੧. ਉਦਪਾਨਦੂਸਕਜਾਤਕਵਣ੍ਣਨਾ

ਆਰਞ੍ਞਿਕਸ੍ਸ ਇਸਿਨੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਉਦਪਾਨਦੂਸਕਸਿਙ੍ਗਾਲਂ ਆਰਬ੍ਭ ਕਥੇਸਿ. ਏਕੋ ਕਿਰ ਸਿਙ੍ਗਾਲੋ ਭਿਕ੍ਖੁਸਙ੍ਘਸ੍ਸ ਪਾਨੀਯਉਦਪਾਨਂ ਉਚ੍ਚਾਰਪਸ੍ਸਾਵਕਰਣੇਨ ਦੂਸੇਤ੍ਵਾ ਪਕ੍ਕਾਮਿ. ਅਥ ਨਂ ਏਕਦਿਵਸਂ ਉਦਪਾਨਸਮੀਪਂ ਆਗਤਂ ਸਾਮਣੇਰਾ ਲੇਡ੍ਡੂਹਿ ਪਹਰਿਤ੍ਵਾ ਕਿਲਮੇਸੁਂ, ਸੋ ਤਤੋ ਪਟ੍ਠਾਯ ਤਂ ਠਾਨਂ ਪੁਨ ਨਿਵਤ੍ਤਿਤ੍ਵਾਪਿ ਨ ਓਲੋਕੇਸਿ. ਭਿਕ੍ਖੂ ਤਂ ਪਵਤ੍ਤਿਂ ਞਤ੍ਵਾ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਆਵੁਸੋ, ਉਦਪਾਨਦੂਸਕਸਿਙ੍ਗਾਲੋ ਕਿਰ ਸਾਮਣੇਰੇਹਿ ਕਿਲਮਿਤਕਾਲਤੋ ਪਟ੍ਠਾਯ ਪੁਨ ਨਿਵਤ੍ਤਿਤ੍ਵਾਪਿ ਨ ਓਲੋਕੇਸੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਸ ਸਿਙ੍ਗਾਲੋ ਉਦਪਾਨਦੂਸਕੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਇਦਮੇਵ ਇਸਿਪਤਨਂ ਅਯਮੇਵ ਉਦਪਾਨੋ ਅਹੋਸਿ. ਤਦਾ ਬੋਧਿਸਤ੍ਤੋ ਬਾਰਾਣਸਿਯਂ ਕੁਲਘਰੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਇਸਿਗਣਪਰਿਵੁਤੋ ਇਸਿਪਤਨੇ ਵਾਸਂ ਕਪ੍ਪੇਸਿ. ਤਦਾ ਏਕੋ ਸਿਙ੍ਗਾਲੋ ਇਦਮੇਵ ਉਦਪਾਨਂ ਦੂਸੇਤ੍ਵਾ ਪਕ੍ਕਮਤਿ. ਅਥ ਨਂ ਏਕਦਿਵਸਂ ਤਾਪਸਾ ਪਰਿਵਾਰੇਤ੍ਵਾ ਠਿਤਾ ਏਕੇਨੁਪਾਯੇਨ ਗਹੇਤ੍ਵਾ ਬੋਧਿਸਤ੍ਤਸ੍ਸ ਸਨ੍ਤਿਕਂ ਆਨਯਿਂਸੁ. ਬੋਧਿਸਤ੍ਤੋ ਸਿਙ੍ਗਾਲੇਨ ਸਦ੍ਧਿਂ ਸਲ੍ਲਪਨ੍ਤੋ ਪਠਮਂ ਗਾਥਮਾਹ –

੬੧. ‘‘ਆਰਞ੍ਞਿਕਸ੍ਸ ਇਸਿਨੋ, ਚਿਰਰਤ੍ਤਤਪਸ੍ਸਿਨੋ;

ਕਿਚ੍ਛਾਕਤਂ ਉਦਪਾਨਂ, ਕਥਂ ਸਮ੍ਮ ਅਵਾਹਯੀ’’ਤਿ.

ਤਸ੍ਸਤ੍ਥੋ – ਅਰਞ੍ਞੇ ਵਸਨਤਾਯ ਆਰਞ੍ਞਿਕਸ੍ਸ, ਏਸਿਤਗੁਣਤ੍ਤਾ ਇਸਿਨੋ, ਚਿਰਰਤ੍ਤਂ ਤਪਂ ਨਿਸ੍ਸਾਯ ਵੁਤ੍ਥਤ੍ਤਾ ਚਿਰਰਤ੍ਤਤਪਸ੍ਸਿਨੋ ਕਿਚ੍ਛਾਕਤਂ ਕਿਚ੍ਛੇਨ ਦੁਕ੍ਖੇਨ ਨਿਪ੍ਫਾਦਿਤਂ ਉਦਪਾਨਂ ਕਥਂ ਕਿਮਤ੍ਥਾਯ ਸਮ੍ਮ ਸਿਙ੍ਗਾਲ, ਤ੍ਵਂ ਅਵਾਹਯਿ ਮੁਤ੍ਤਕਰੀਸੇਨ ਅਜ੍ਝੋਤ੍ਥਰਿ ਦੂਸੇਸਿ, ਤਂ ਵਾ ਮੁਤ੍ਤਕਰੀਸਂ ਏਤ੍ਥ ਅਵਾਹਯਿ ਪਾਤੇਸੀਤਿ.

ਤਂ ਸੁਤ੍ਵਾ ਸਿਙ੍ਗਾਲੋ ਦੁਤਿਯਂ ਗਾਥਮਾਹ –

੬੨. ‘‘ਏਸ ਧਮ੍ਮੋ ਸਿਙ੍ਗਾਲਾਨਂ, ਯਂ ਪਿਤ੍ਵਾ ਓਹਦਾਮਸੇ;

ਪਿਤੁਪਿਤਾਮਹਂ ਧਮ੍ਮੋ, ਨ ਤਂ ਉਜ੍ਝਾਤੁਮਰਹਸੀ’’ਤਿ.

ਤਤ੍ਥ ਏਸ ਧਮ੍ਮੋਤਿ ਏਸ ਸਭਾਵੋ. ਯਂ ਪਿਤ੍ਵਾ ਓਹਦਾਮਸੇਤਿ, ਸਮ੍ਮ, ਯਂ ਮਯਂ ਯਤ੍ਥ ਪਾਨੀਯਂ ਪਿਵਾਮ, ਤਮੇਵ ਊਹਦਾਮਪਿ ਓਮੁਤ੍ਤੇਮਪਿ, ਏਸ ਅਮ੍ਹਾਕਂ ਸਿਙ੍ਗਾਲਾਨਂ ਧਮ੍ਮੋਤਿ ਦਸ੍ਸੇਤਿ. ਪਿਤੁਪਿਤਾਮਹਨ੍ਤਿ ਪਿਤੂਨਞ੍ਚ ਪਿਤਾਮਹਾਨਞ੍ਚ ਨੋ ਏਸ ਧਮ੍ਮੋ. ਨ ਤਂ ਉਜ੍ਝਾਤੁਮਰਹਸੀਤਿ ਤਂ ਅਮ੍ਹਾਕਂ ਪਵੇਣਿਆਗਤਂ ਧਮ੍ਮਂ ਸਭਾਵਂ ਤ੍ਵਂ ਉਜ੍ਝਾਤੁਂ ਨ ਅਰਹਸਿ, ਨ ਯੁਤ੍ਤਂ ਤੇ ਏਤ੍ਥ ਕੁਜ੍ਝਿਤੁਨ੍ਤਿ.

ਅਥਸ੍ਸ ਬੋਧਿਸਤ੍ਤੋ ਤਤਿਯਂ ਗਾਥਮਾਹ –

੬੩. ‘‘ਯੇਸਂ ਵੋ ਏਦਿਸੋ ਧਮ੍ਮੋ, ਅਧਮ੍ਮੋ ਪਨ ਕੀਦਿਸੋ;

ਮਾ ਵੋ ਧਮ੍ਮਂ ਅਧਮ੍ਮਂ ਵਾ, ਅਦ੍ਦਸਾਮ ਕੁਦਾਚਨ’’ਨ੍ਤਿ.

ਤਤ੍ਥ ਮਾ ਵੋਤਿ ਤੁਮ੍ਹਾਕਂ ਧਮ੍ਮਂ ਵਾ ਅਧਮ੍ਮਂ ਵਾ ਨ ਮਯਂ ਕਦਾਚਿ ਅਦ੍ਦਸਾਮਾਤਿ.

ਏਵਂ ਬੋਧਿਸਤ੍ਤੋ ਤਸ੍ਸ ਓਵਾਦਂ ਦਤ੍ਵਾ ‘‘ਮਾ ਪੁਨ ਆਗਚ੍ਛਾ’’ਤਿ ਆਹ. ਸੋ ਤਤੋ ਪਟ੍ਠਾਯ ਪੁਨ ਨਿਵਤ੍ਤਿਤ੍ਵਾਪਿ ਨ ਓਲੋਕੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਉਦਪਾਨਦੂਸਕੋ ਅਯਮੇਵ ਸਿਙ੍ਗਾਲੋ ਅਹੋਸਿ, ਗਣਸਤ੍ਥਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਉਦਪਾਨਦੂਸਕਜਾਤਕਵਣ੍ਣਨਾ ਪਠਮਾ.

[੨੭੨] ੨. ਬ੍ਯਗ੍ਘਜਾਤਕਵਣ੍ਣਨਾ

ਯੇਨ ਮਿਤ੍ਤੇਨ ਸਂਸਗ੍ਗਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਕਾਲਿਕਂ ਆਰਬ੍ਭ ਕਥੇਸਿ. ਕੋਕਾਲਿਕਵਤ੍ਥੁ ਤੇਰਸਕਨਿਪਾਤੇ ਤਕ੍ਕਾਰਿਯਜਾਤਕੇ (ਜਾ. ੧.੧੩.੧੦੪ ਆਦਯੋ) ਆਵਿਭਵਿਸ੍ਸਤਿ. ਕੋਕਾਲਿਕੋ ਪਨ ‘‘ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਗਹੇਤ੍ਵਾ ਆਗਮਿਸ੍ਸਾਮੀ’’ਤਿ ਕੋਕਾਲਿਕਰਟ੍ਠਤੋ ਜੇਤਵਨਂ ਆਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਥੇਰੇ ਉਪਸਙ੍ਕਮਿਤ੍ਵਾ ‘‘ਆਵੁਸੋ, ਕੋਕਾਲਿਕਰਟ੍ਠਵਾਸਿਨੋ ਮਨੁਸ੍ਸਾ ਤੁਮ੍ਹੇ ਪਕ੍ਕੋਸਨ੍ਤਿ, ਏਥ ਗਚ੍ਛਾਮਾ’’ਤਿ ਆਹ. ‘‘ਗਚ੍ਛ ਤ੍ਵਂ, ਆਵੁਸੋ, ਨ ਮਯਂ ਆਗਚ੍ਛਾਮਾ’’ਤਿ. ਸੋ ਥੇਰੇਹਿ ਪਟਿਕ੍ਖਿਤ੍ਤੋ ਸਯਮੇਵ ਅਗਮਾਸਿ. ਅਥ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਆਵੁਸੋ, ਕੋਕਾਲਿਕੋ ਸਾਰਿਪੁਤ੍ਤਮੋਗ੍ਗਲ੍ਲਾਨੇਹਿ ਸਹਾਪਿ ਵਿਨਾਪਿ ਵਤ੍ਤਿਤੁਂ ਨ ਸਕ੍ਕੋਤਿ, ਸਂਯੋਗਮ੍ਪਿ ਨ ਸਹਤਿ, ਵਿਯੋਗਮ੍ਪਿ ਨ ਸਹਤੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਕੋਕਾਲਿਕੋ ਸਾਰਿਪੁਤ੍ਤਮੋਗ੍ਗਲ੍ਲਾਨੇਹਿ ਨੇਵ ਸਹ, ਨ ਵਿਨਾ ਵਤ੍ਤਿਤੁਂ ਸਕ੍ਕੋਤੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਞ੍ਞਤਰਸ੍ਮਿਂ ਅਰਞ੍ਞਾਯਤਨੇ ਰੁਕ੍ਖਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਵਿਮਾਨਤੋ ਅਵਿਦੂਰੇ ਅਞ੍ਞਤਰਸ੍ਮਿਂ ਵਨਪ੍ਪਤਿਜੇਟ੍ਠਕੇ ਅਞ੍ਞਾ ਰੁਕ੍ਖਦੇਵਤਾ ਵਸਤਿ. ਤਸ੍ਮਿਂ ਵਨਸਣ੍ਡੇ ਸੀਹੋ ਚ ਬ੍ਯਗ੍ਘੋ ਚ ਵਸਨ੍ਤਿ. ਤੇਸਂ ਭਯੇਨ ਕੋਚਿ ਤਤ੍ਥ ਨ ਖੇਤ੍ਤਂ ਕਰੋਤਿ, ਨ ਰੁਕ੍ਖਂ ਛਿਨ੍ਦਤਿ, ਨਿਵਤ੍ਤਿਤ੍ਵਾ ਓਲੋਕੇਤੁਂ ਸਮਤ੍ਥੋ ਨਾਮ ਨਤ੍ਥਿ. ਤੇ ਪਨ ਸੀਹਬ੍ਯਗ੍ਘਾ ਨਾਨਪ੍ਪਕਾਰੇ ਮਿਗੇ ਵਧਿਤ੍ਵਾ ਖਾਦਨ੍ਤਿ, ਖਾਦਿਤਾਵਸੇਸਂ ਤਤ੍ਥੇਵ ਪਹਾਯ ਗਚ੍ਛਨ੍ਤਿ. ਤੇਨ ਸੋ ਵਨਸਣ੍ਡੋ ਅਸੁਚਿਕੁਣਪਗਨ੍ਧੋ ਹੋਤਿ. ਅਥ ਇਤਰਾ ਰੁਕ੍ਖਦੇਵਤਾ ਅਨ੍ਧਬਾਲਾ ਕਾਰਣਾਕਾਰਣਂ ਅਜਾਨਮਾਨਾ ਏਕਦਿਵਸਂ ਬੋਧਿਸਤ੍ਤਂ ਆਹ – ‘‘ਸਮ੍ਮ, ਏਤੇ ਨੋ ਸੀਹਬ੍ਯਗ੍ਘੇ ਨਿਸ੍ਸਾਯ ਵਨਸਣ੍ਡੋ ਅਸੁਚਿਕੁਣਪਗਨ੍ਧੋ ਜਾਤੋ, ਅਹਂ ਏਤੇ ਪਲਾਪੇਮੀ’’ਤਿ. ਬੋਧਿਸਤ੍ਤੋ ‘‘ਸਮ੍ਮ, ਇਮੇ ਦ੍ਵੇ ਨਿਸ੍ਸਾਯ ਅਮ੍ਹਾਕਂ ਵਿਮਾਨਾਨਿ ਰਕ੍ਖਿਯਨ੍ਤਿ, ਏਤੇਸੁ ਪਲਾਯਨ੍ਤੇਸੁ ਵਿਮਾਨਾਨਿ ਨੋ ਵਿਨਸ੍ਸਿਸ੍ਸਨ੍ਤਿ, ਸੀਹਬ੍ਯਗ੍ਘਾਨਂ ਪਦਂ ਅਪਸ੍ਸਨ੍ਤਾ ਮਨੁਸ੍ਸਾ ਸਬ੍ਬਂ ਵਨਂ ਛਿਨ੍ਦਿਤ੍ਵਾ ਏਕਙ੍ਗਣਂ ਕਤ੍ਵਾ ਖੇਤ੍ਤਾਨਿ ਕਰਿਸ੍ਸਨ੍ਤਿ, ਮਾ ਤੇ ਏਵਂ ਰੁਚ੍ਚੀ’’ਤਿ ਵਤ੍ਵਾ ਪੁਰਿਮਾ ਦ੍ਵੇ ਗਾਥਾ ਅਵੋਚ –

੬੪. ‘‘ਯੇਨ ਮਿਤ੍ਤੇਨ ਸਂਸਗ੍ਗਾ, ਯੋਗਕ੍ਖੇਮੋ ਵਿਹਿਯ੍ਯਤਿ;

ਪੁਬ੍ਬੇਵਜ੍ਝਾਭਵਂ ਤਸ੍ਸ, ਰਕ੍ਖੇ ਅਕ੍ਖੀਵ ਪਣ੍ਡਿਤੋ.

੬੫. ‘‘ਯੇਨ ਮਿਤ੍ਤੇਨ ਸਂਸਗ੍ਗਾ, ਯੋਗਕ੍ਖੇਮੋ ਪਵਡ੍ਢਤਿ;

ਕਰੇਯ੍ਯਤ੍ਤਸਮਂ ਵੁਤ੍ਤਿਂ, ਸਬ੍ਬਕਿਚ੍ਚੇਸੁ ਪਣ੍ਡਿਤੋ’’ਤਿ.

ਤਤ੍ਥ ਯੇਨ ਮਿਤ੍ਤੇਨ ਸਂਸਗ੍ਗਾਤਿ ਯੇਨ ਪਾਪਮਿਤ੍ਤੇਨ ਸਦ੍ਧਿਂ ਸਂਸਗ੍ਗਹੇਤੁ ਸਂਸਗ੍ਗਕਾਰਣਾ, ਯੇਨ ਸਦ੍ਧਿਂ ਦਸ੍ਸਨਸਂਸਗ੍ਗੋ ਸਵਨਸਂਸਗ੍ਗੋ ਕਾਯਸਂਸਗ੍ਗੋ ਸਮੁਲ੍ਲਪਨਸਂਸਗ੍ਗੋ ਪਰਿਭੋਗਸਂਸਗ੍ਗੋਤਿ ਇਮਸ੍ਸ ਪਞ੍ਚਵਿਧਸ੍ਸ ਸਂਸਗ੍ਗਸ੍ਸ ਕਤਤ੍ਤਾਤਿ ਅਤ੍ਥੋ. ਯੋਗਕ੍ਖੇਮੋਤਿ ਕਾਯਚਿਤ੍ਤਸੁਖਂ. ਤਞ੍ਹਿ ਦੁਕ੍ਖਯੋਗਤੋ ਖੇਮਤ੍ਤਾ ਇਧ ਯੋਗਕ੍ਖੇਮੋਤਿ ਅਧਿਪ੍ਪੇਤਂ. ਵਿਹਿਯ੍ਯਤੀਤਿ ਪਰਿਹਾਯਤਿ. ਪੁਬ੍ਬੇਵਜ੍ਝਾਭਵਂ ਤਸ੍ਸ, ਰਕ੍ਖੇ ਅਕ੍ਖੀਵ ਪਣ੍ਡਿਤੋਤਿ ਤਸ੍ਸ ਪਾਪਮਿਤ੍ਤਸ੍ਸ ਅਜ੍ਝਾਭਵਂ ਤੇਨ ਅਭਿਭਵਿਤਬ੍ਬਂ ਅਤ੍ਤਨੋ ਲਾਭਯਸਜੀਵਿਤਂ, ਯਥਾ ਨਂ ਸੋ ਨ ਅਜ੍ਝਾਭਵਤਿ, ਤਥਾ ਪਠਮਤਰਮੇਵ ਅਤ੍ਤਨੋ ਅਕ੍ਖੀ ਵਿਯ ਪਣ੍ਡਿਤੋ ਪੁਰਿਸੋ ਰਕ੍ਖੇਯ੍ਯ.

ਦੁਤਿਯਗਾਥਾਯ ਯੇਨਾਤਿ ਯੇਨ ਕਲ੍ਯਾਣਮਿਤ੍ਤੇਨ ਸਹ ਸਂਸਗ੍ਗਕਾਰਣਾ. ਯੋਗਕ੍ਖੇਮੋ ਪਵਡ੍ਢਤੀਤਿ ਕਾਯਚਿਤ੍ਤਸੁਖਂ ਵਡ੍ਢਤਿ. ਕਰੇਯ੍ਯਤ੍ਤਸਮਂ ਵੁਤ੍ਤਿਨ੍ਤਿ ਤਸ੍ਸ ਕਲ੍ਯਾਣਮਿਤ੍ਤਸ੍ਸ ਸਬ੍ਬਕਿਚ੍ਚੇਸੁ ਪਣ੍ਡਿਤੋ ਪੁਰਿਸੋ ਯਥਾ ਅਤ੍ਤਨੋ ਜੀਵਿਤਵੁਤ੍ਤਿਞ੍ਚ ਉਪਭੋਗਪਰਿਭੋਗਵੁਤ੍ਤਿਞ੍ਚ ਕਰੋਤਿ, ਏਵਮੇਤਂ ਸਬ੍ਬਂ ਕਰੇਯ੍ਯ, ਅਧਿਕਮ੍ਪਿ ਕਰੇਯ੍ਯ, ਹੀਨਂ ਪਨ ਨ ਕਰੇਯ੍ਯਾਤਿ.

ਏਵਂ ਬੋਧਿਸਤ੍ਤੇਨ ਕਾਰਣੇ ਕਥਿਤੇਪਿ ਸਾ ਬਾਲਦੇਵਤਾ ਅਨੁਪਧਾਰੇਤ੍ਵਾ ਏਕਦਿਵਸਂ ਭੇਰਵਰੂਪਾਰਮ੍ਮਣਂ ਦਸ੍ਸੇਤ੍ਵਾ ਤੇ ਸੀਹਬ੍ਯਗ੍ਘੇ ਪਲਾਪੇਸਿ. ਮਨੁਸ੍ਸਾ ਤੇਸਂ ਪਦਵਲਞ੍ਜਂ ਅਦਿਸ੍ਵਾ ‘‘ਸੀਹਬ੍ਯਗ੍ਘਾ ਅਞ੍ਞਂ ਵਨਸਣ੍ਡਂ ਗਤਾ’’ਤਿ ਞਤ੍ਵਾ ਵਨਸਣ੍ਡਸ੍ਸ ਏਕਪਸ੍ਸਂ ਛਿਨ੍ਦਿਂਸੁ. ਦੇਵਤਾ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ‘‘ਅਹਂ, ਸਮ੍ਮ, ਤਵ ਵਚਨਂ ਅਕਤ੍ਵਾ ਤੇ ਪਲਾਪੇਸਿਂ, ਇਦਾਨਿ ਤੇਸਂ ਗਤਭਾਵਂ ਞਤ੍ਵਾ ਮਨੁਸ੍ਸਾ ਵਨਸਣ੍ਡਂ ਛਿਨ੍ਦਨ੍ਤਿ, ਕਿਂ ਨੁ ਖੋ ਕਾਤਬ੍ਬ’’ਨ੍ਤਿ ਵਤ੍ਵਾ ‘‘ਇਦਾਨਿ ਤੇ ਅਸੁਕਵਨਸਣ੍ਡੇ ਨਾਮ ਵਸਨ੍ਤਿ, ਗਨ੍ਤ੍ਵਾ ਤੇ ਆਨੇਹੀ’’ਤਿ ਵੁਤ੍ਤਾ ਤਤ੍ਥ ਗਨ੍ਤ੍ਵਾ ਤੇਸਂ ਪੁਰਤੋ ਠਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਤਤਿਯਂ ਗਾਥਮਾਹ –

੬੬. ‘‘ਏਥ ਬ੍ਯਗ੍ਘਾ ਨਿਵਤ੍ਤਵ੍ਹੋ, ਪਚ੍ਚੁਪੇਥ ਮਹਾਵਨਂ;

ਮਾ ਵਨਂ ਛਿਨ੍ਦਿ ਨਿਬ੍ਯਗ੍ਘਂ, ਬ੍ਯਗ੍ਘਾ ਮਾਹੇਸੁ ਨਿਬ੍ਬਨਾ’’ਤਿ.

ਤਤ੍ਥ ਬ੍ਯਗ੍ਘਾਤਿ ਉਭੋਪਿ ਤੇ ਬ੍ਯਗ੍ਘਨਾਮੇਨੇਵਾਲਪਨ੍ਤੀ ਆਹ. ਨਿਵਤ੍ਤਵ੍ਹੋਤਿ ਨਿਵਤ੍ਤਥ. ਪਚ੍ਚੁਪੇਥ ਮਹਾਵਨਨ੍ਤਿ ਤਂ ਮਹਾਵਨਂ ਪਚ੍ਚੁਪੇਥ ਪੁਨ ਉਪਗਚ੍ਛਥ, ਅਯਮੇਵ ਵਾ ਪਾਠੋ. ਮਾ ਵਨਂ ਛਿਨ੍ਦਿ ਨਿਬ੍ਯਗ੍ਘਨ੍ਤਿ ਅਮ੍ਹਾਕਂ ਵਸਨਕਵਨਸਣ੍ਡਂ ਇਦਾਨਿ ਤੁਮ੍ਹਾਕਂ ਅਭਾਵੇਨ ਨਿਬ੍ਯਗ੍ਘਂ ਮਨੁਸ੍ਸਾ ਮਾ ਛਿਨ੍ਦਿਂਸੁ. ਬ੍ਯਗ੍ਘਾ ਮਾਹੇਸੁ ਨਿਬ੍ਬਨਾਤਿ ਤੁਮ੍ਹਾਦਿਸਾ ਚ ਬ੍ਯਗ੍ਘਰਾਜਾਨੋ ਅਤ੍ਤਨੋ ਵਸਨਟ੍ਠਾਨਾ ਪਲਾਯਿਤਤ੍ਤਾ ਨਿਬ੍ਬਨਾ ਵਸਨਟ੍ਠਾਨਭੂਤੇਨ ਵਨੇਨ ਵਿਰਹਿਤਾ ਮਾ ਅਹੇਸੁਂ. ਤੇ ਏਵਂ ਤਾਯ ਦੇਵਤਾਯ ਯਾਚਿਯਮਾਨਾਪਿ ‘‘ਗਚ੍ਛ ਤ੍ਵਂ, ਨ ਮਯਂ ਆਗਮਿਸ੍ਸਾਮਾ’’ਤਿ ਪਟਿਕ੍ਖਿਪਿਂਸੁਯੇਵ. ਦੇਵਤਾ ਏਕਿਕਾਵ ਵਨਸਣ੍ਡਂ ਪਚ੍ਚਾਗਞ੍ਛਿ. ਮਨੁਸ੍ਸਾਪਿ ਕਤਿਪਾਹੇਨੇਵ ਸਬ੍ਬਂ ਵਨਂ ਛਿਨ੍ਦਿਤ੍ਵਾ ਖੇਤ੍ਤਾਨਿ ਕਰਿਤ੍ਵਾ ਕਸਿਕਮ੍ਮਂ ਕਰਿਂਸੁ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਅਪਣ੍ਡਿਤਾ ਦੇਵਤਾ ਕੋਕਾਲਿਕੋ ਅਹੋਸਿ, ਸੀਹੋ ਸਾਰਿਪੁਤ੍ਤੋ, ਬ੍ਯਗ੍ਘੋ ਮੋਗ੍ਗਲ੍ਲਾਨੋ, ਪਣ੍ਡਿਤਦੇਵਤਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਬ੍ਯਗ੍ਘਜਾਤਕਵਣ੍ਣਨਾ ਦੁਤਿਯਾ.

[੨੭੩] ੩. ਕਚ੍ਛਪਜਾਤਕਵਣ੍ਣਨਾ

ਕੋ ਨੁ ਉਦ੍ਧਿਤਭਤ੍ਤੋਵਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਸਲਰਾਜਸ੍ਸ ਦ੍ਵਿਨ੍ਨਂ ਮਹਾਮਤ੍ਤਾਨਂ ਕਲਹਵੂਪਸਮਨਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਦੁਕਨਿਪਾਤੇ ਕਥਿਤਮੇਵ.

ਅਤੀਤੇ ਪਨ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਸਿਰਟ੍ਠੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਕਾਮੇ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਪਦੇਸੇ ਗਙ੍ਗਾਤੀਰੇ ਅਸ੍ਸਮਪਦਂ ਮਾਪੇਤ੍ਵਾ ਤਤ੍ਥ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਝਾਨਕੀਲ਼ਂ ਕੀਲ਼ਨ੍ਤੋ ਵਾਸਂ ਕਪ੍ਪੇਸਿ. ਇਮਸ੍ਮਿਂ ਕਿਰ ਜਾਤਕੇ ਬੋਧਿਸਤ੍ਤੋ ਪਰਮਮਜ੍ਝਤ੍ਤੋ ਅਹੋਸਿ, ਉਪੇਕ੍ਖਾਪਾਰਮਿਂ ਪੂਰੇਸਿ. ਤਸ੍ਸ ਪਣ੍ਣਸਾਲਦ੍ਵਾਰੇ ਨਿਸਿਨ੍ਨਸ੍ਸ ਏਕੋ ਪਗਬ੍ਭੋ ਦੁਸ੍ਸੀਲੋ ਮਕ੍ਕਟੋ ਆਗਨ੍ਤ੍ਵਾ ਕਣ੍ਣਸੋਤੇਸੁ ਅਙ੍ਗਜਾਤੇਨ ਸਲਾਕਪਵੇਸਨਕਮ੍ਮਂ ਕਰੋਤਿ, ਬੋਧਿਸਤ੍ਤੋ ਅਵਾਰੇਤ੍ਵਾ ਮਜ੍ਝਤ੍ਤੋ ਹੁਤ੍ਵਾ ਨਿਸੀਦਤਿਯੇਵ. ਅਥੇਕਦਿਵਸਂ ਏਕੋ ਕਚ੍ਛਪੋ ਉਦਕਾ ਉਤ੍ਤਰਿਤ੍ਵਾ ਗਙ੍ਗਾਤੀਰੇ ਮੁਖਂ ਵਿਵਰਿਤ੍ਵਾ ਆਤਪਂ ਤਪ੍ਪਨ੍ਤੋ ਨਿਦ੍ਦਾਯਤਿ. ਤਂ ਦਿਸ੍ਵਾ ਸੋ ਲੋਲਵਾਨਰੋ ਤਸ੍ਸ ਮੁਖੇ ਸਲਾਕਪਵੇਸਨਕਮ੍ਮਂ ਅਕਾਸਿ. ਅਥਸ੍ਸ ਕਚ੍ਛਪੋ ਪਬੁਜ੍ਝਿਤ੍ਵਾ ਅਙ੍ਗਜਾਤਂ ਸਮੁਗ੍ਗੇ ਪਕ੍ਖਿਪਨ੍ਤੋ ਵਿਯ ਡਂਸਿ, ਬਲਵਵੇਦਨਾ ਉਪ੍ਪਜ੍ਜਿ. ਵੇਦਨਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ‘‘ਕੋ ਨੁ ਖੋ ਮਂ ਇਮਮ੍ਹਾ ਦੁਕ੍ਖਾ ਮੋਚੇਯ੍ਯ, ਕਸ੍ਸ ਸਨ੍ਤਿਕਂ ਗਚ੍ਛਾਮੀ’’ਤਿ ਚਿਨ੍ਤੇਤ੍ਵਾ ‘‘ਅਞ੍ਞੋ ਮਂ ਇਮਮ੍ਹਾ ਦੁਕ੍ਖਾ ਮੋਚੇਤੁਂ ਸਮਤ੍ਥੋ ਨਤ੍ਥਿ ਅਞ੍ਞਤ੍ਰ ਤਾਪਸੇਨ, ਤਸ੍ਸੇਵ ਸਨ੍ਤਿਕਂ ਮਯਾ ਗਨ੍ਤੁਂ ਵਟ੍ਟਤੀ’’ਤਿ ਕਚ੍ਛਪਂ ਦ੍ਵੀਹਿ ਹਤ੍ਥੇਹਿ ਉਕ੍ਖਿਪਿਤ੍ਵਾ ਬੋਧਿਸਤ੍ਤਸ੍ਸ ਸਨ੍ਤਿਕਂ ਅਗਮਾਸਿ. ਬੋਧਿਸਤ੍ਤੋ ਤੇਨ ਦੁਸ੍ਸੀਲਮਕ੍ਕਟੇਨ ਸਦ੍ਧਿਂ ਦਵਂ ਕਰੋਨ੍ਤੋ ਪਠਮਂ ਗਾਥਮਾਹ –

੬੭. ‘‘ਕੋ ਨੁ ਉਦ੍ਧਿਤਭਤ੍ਤੋਵ, ਪੂਰਹਤ੍ਥੋਵ ਬ੍ਰਾਹ੍ਮਣੋ;

ਕਹਂ ਨੁ ਭਿਕ੍ਖਂ ਅਚਰਿ, ਕਂ ਸਦ੍ਧਂ ਉਪਸਙ੍ਕਮੀ’’ਤਿ.

ਤਤ੍ਥ ਕੋ ਨੁ ਉਦ੍ਧਿਤਭਤ੍ਤੋਵਾਤਿ ਕੋ ਨੁ ਏਸ ਵਡ੍ਢਿਤਭਤ੍ਤੋ ਵਿਯ, ਏਕਂ ਵਡ੍ਢਿਤਭਤ੍ਤਂ ਭਤ੍ਤਪੂਰਪਾਤਿਂ ਹਤ੍ਥੇਹਿ ਗਹੇਤ੍ਵਾ ਵਿਯ ਕੋ ਨੁ ਏਸੋ ਆਗਚ੍ਛਤੀਤਿ ਅਤ੍ਥੋ. ਪੂਰਹਤ੍ਥੋਵ ਬ੍ਰਾਹ੍ਮਣੋਤਿ ਕਤ੍ਤਿਕਮਾਸੇ ਵਾਚਨਕਂ ਲਭਿਤ੍ਵਾ ਪੂਰਹਤ੍ਥੋ ਬ੍ਰਾਹ੍ਮਣੋ ਵਿਯ ਚ ਕੋ ਨੁ ਖੋ ਏਸੋਤਿ ਵਾਨਰਂ ਸਨ੍ਧਾਯ ਵਦਤਿ. ਕਹਂ ਨੁ ਭਿਕ੍ਖਂ ਅਚਰੀਤਿ, ਭੋ ਵਾਨਰ, ਕਸ੍ਮਿਂ ਪਦੇਸੇ ਅਜ੍ਜ ਤ੍ਵਂ ਭਿਕ੍ਖਂ ਅਚਰਿ. ਕਂ ਸਦ੍ਧਂ ਉਪਸਙ੍ਕਮੀਤਿ ਕਤਰਂ ਨਾਮ ਪੁਬ੍ਬਪੇਤੇ ਉਦ੍ਦਿਸ੍ਸ ਕਤਂ ਸਦ੍ਧਭਤ੍ਤਂ, ਕਤਰਂ ਵਾ ਸਦ੍ਧਂ ਪੁਗ੍ਗਲਂ ਤ੍ਵਂ ਉਪਸਙ੍ਕਮਿ, ਕੁਤੋ ਤੇ ਅਯਂ ਦੇਯ੍ਯਧਮ੍ਮੋ ਲਦ੍ਧੋਤਿ ਦੀਪੇਤਿ.

ਤਂ ਸੁਤ੍ਵਾ ਦੁਸ੍ਸੀਲਵਾਨਰੋ ਦੁਤਿਯਂ ਗਾਥਮਾਹ –

੬੮. ‘‘ਅਹਂ ਕਪਿਸ੍ਮਿ ਦੁਮ੍ਮੇਧੋ, ਅਨਾਮਾਸਾਨਿ ਆਮਸਿਂ;

ਤ੍ਵਂ ਮਂ ਮੋਚਯ ਭਦ੍ਦਂ ਤੇ, ਮੁਤ੍ਤੋ ਗਚ੍ਛੇਯ੍ਯ ਪਬ੍ਬਤ’’ਨ੍ਤਿ.

ਤਤ੍ਥ ਅਹਂ ਕਪਿਸ੍ਮਿ ਦੁਮ੍ਮੇਧੋਤਿ ਭਦ੍ਦਂ ਤੇ ਅਹਂ ਅਸ੍ਮਿ ਦੁਮ੍ਮੇਧੋ ਚਪਲਚਿਤ੍ਤੋ ਮਕ੍ਕਟੋ. ਅਨਾਮਾਸਾਨਿ ਆਮਸਿਨ੍ਤਿ ਅਨਾਮਸਿਤਬ੍ਬਟ੍ਠਾਨਾਨਿ ਆਮਸਿਂ. ਤ੍ਵਂ ਮਂ ਮੋਚਯ ਭਦ੍ਦਂ ਤੇਤਿ ਤ੍ਵਂ ਦਯਾਲੁ ਅਨੁਕਮ੍ਪਕੋ ਮਂ ਇਮਮ੍ਹਾ ਦੁਕ੍ਖਾ ਮੋਚੇਹਿ, ਭਦ੍ਦਂ ਤੇ ਹੋਤੁ. ਮੁਤ੍ਤੋ ਗਚ੍ਛੇਯ੍ਯ ਪਬ੍ਬਤਨ੍ਤਿ ਸੋਹਂ ਤਵਾਨੁਭਾਵੇਨ ਇਮਮ੍ਹਾ ਬ੍ਯਸਨਾ ਮੁਤ੍ਤੋ ਪਬ੍ਬਤਮੇਵ ਗਚ੍ਛੇਯ੍ਯਂ, ਨ ਤੇ ਪੁਨ ਚਕ੍ਖੁਪਥੇ ਅਤ੍ਤਾਨਂ ਦਸ੍ਸੇਯ੍ਯਨ੍ਤਿ.

ਬੋਧਿਸਤ੍ਤੋ ਤਸ੍ਮਿਂ ਕਾਰੁਞ੍ਞੇਨ ਕਚ੍ਛਪੇਨ ਸਦ੍ਧਿਂ ਸਲ੍ਲਪਨ੍ਤੋ ਤਤਿਯਂ ਗਾਥਮਾਹ –

੬੯. ‘‘ਕਚ੍ਛਪਾ ਕਸ੍ਸਪਾ ਹੋਨ੍ਤਿ, ਕੋਣ੍ਡਞ੍ਞਾ ਹੋਨ੍ਤਿ ਮਕ੍ਕਟਾ;

ਮੁਞ੍ਚ ਕਸ੍ਸਪ ਕੋਣ੍ਡਞ੍ਞਂ, ਕਤਂ ਮੇਥੁਨਕਂ ਤਯਾ’’ਤਿ.

ਤਸ੍ਸਤ੍ਥੋ – ਕਚ੍ਛਪਾ ਨਾਮ ਕਸ੍ਸਪਗੋਤ੍ਤਾ ਹੋਨ੍ਤਿ, ਮਕ੍ਕਟਾ ਕੋਣ੍ਡਞ੍ਞਗੋਤ੍ਤਾ, ਕਸ੍ਸਪਕੋਣ੍ਡਞ੍ਞਾਨਞ੍ਚ ਅਞ੍ਞਮਞ੍ਞਂ ਆਵਾਹਵਿਵਾਹਸਮ੍ਬਨ੍ਧੋ ਅਤ੍ਥਿ. ਅਦ੍ਧਾ ਤਯਿਦਂ ਲੋਲੇਨ ਦੁਸ੍ਸੀਲਮਕ੍ਕਟੇਨ ਤਯਾ ਸਦ੍ਧਿਂ, ਤਯਾ ਚ ਦੁਸ੍ਸੀਲੇਨ ਇਮਿਨਾ ਮਕ੍ਕਟੇਨ ਸਦ੍ਧਿਂ ਗੋਤ੍ਤਸਦਿਸਤਾਸਙ੍ਖਾਤਸ੍ਸ ਮੇਥੁਨਧਮ੍ਮਸ੍ਸ ਅਨੁਚ੍ਛਵਿਕਂ ਦੁਸ੍ਸੀਲ੍ਯਕਮ੍ਮਸਙ੍ਖਾਤਮ੍ਪਿ ਮੇਥੁਨਕਂ ਕਤਂ, ਤਸ੍ਮਾ ਮੁਞ੍ਚ, ਕਸ੍ਸਪ, ਕੋਣ੍ਡਞ੍ਞਨ੍ਤਿ.

ਕਚ੍ਛਪੋ ਬੋਧਿਸਤ੍ਤਸ੍ਸ ਵਚਨਂ ਸੁਤ੍ਵਾ ਕਾਰਣੇਨ ਪਸਨ੍ਨੋ ਵਾਨਰਸ੍ਸ ਅਙ੍ਗਜਾਤਂ ਮੁਞ੍ਚਿ. ਮਕ੍ਕਟੋ ਮੁਤ੍ਤਮਤ੍ਤੋਵ ਬੋਧਿਸਤ੍ਤਂ ਵਨ੍ਦਿਤ੍ਵਾ ਪਲਾਤੋ, ਪੁਨ ਤਂ ਠਾਨਂ ਨਿਵਤ੍ਤਿਤ੍ਵਾਪਿ ਨ ਓਲੋਕੇਸਿ. ਕਚ੍ਛਪੋਪਿ ਬੋਧਿਸਤ੍ਤਂ ਵਨ੍ਦਿਤ੍ਵਾ ਸਕਟ੍ਠਾਨਮੇਵ ਗਤੋ. ਬੋਧਿਸਤ੍ਤੋਪਿ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕਚ੍ਛਪਵਾਨਰਾ ਦ੍ਵੇ ਮਹਾਮਤ੍ਤਾ ਅਹੇਸੁਂ, ਤਾਪਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕਚ੍ਛਪਜਾਤਕਵਣ੍ਣਨਾ ਤਤਿਯਾ.

[੨੭੪] ੪. ਲੋਲਜਾਤਕਵਣ੍ਣਨਾ

ਕਾਯਂ ਬਲਾਕਾ ਸਿਖਿਨੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਲੋਲਭਿਕ੍ਖੁਂ ਆਰਬ੍ਭ ਕਥੇਸਿ. ਤਞ੍ਹਿ ਧਮ੍ਮਸਭਂ ਆਨੀਤਂ ਸਤ੍ਥਾ ‘‘ਨ ਤ੍ਵਂ ਭਿਕ੍ਖੁ ਇਦਾਨੇਵ ਲੋਲੋ, ਪੁਬ੍ਬੇਪਿ ਲੋਲੋਯੇਵ, ਲੋਲਤਾਯੇਵ ਚ ਜੀਵਿਤਕ੍ਖਯਂ ਪਤ੍ਤੋ, ਤਂ ਨਿਸ੍ਸਾਯ ਪੋਰਾਣਕਪਣ੍ਡਿਤਾਪਿ ਅਤ੍ਤਨੋ ਵਸਨਟ੍ਠਾਨਾ ਪਰਿਬਾਹਿਰਾ ਅਹੇਸੁ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਾਰਾਣਸਿਸੇਟ੍ਠਿਨੋ ਮਹਾਨਸੇ ਭਤ੍ਤਕਾਰਕੋ ਪੁਞ੍ਞਤ੍ਥਾਯ ਨੀਲ਼ਪਚ੍ਛਿਂ ਠਪੇਸਿ. ਤਦਾ ਬੋਧਿਸਤ੍ਤੋ ਪਾਰਾਵਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਤਤ੍ਥ ਵਾਸਂ ਕਪ੍ਪੇਸਿ. ਅਥੇਕੋ ਲੋਲਕਾਕੋ ਮਹਾਨਸਮਤ੍ਥਕੇਨ ਗਚ੍ਛਨ੍ਤੋ ਨਾਨਪ੍ਪਕਾਰਂ ਮਚ੍ਛਮਂਸਵਿਕਤਿਂ ਦਿਸ੍ਵਾ ਪਿਪਾਸਾਭਿਭੂਤੋ ‘‘ਕਂ ਨੁ ਖੋ ਨਿਸ੍ਸਾਯ ਸਕ੍ਕਾ ਭਵੇਯ੍ਯਂ ਓਕਾਸਂ ਲਦ੍ਧੁ’’ਨ੍ਤਿ ਚਿਨ੍ਤੇਤ੍ਵਾ ਬੋਧਿਸਤ੍ਤਂ ਦਿਸ੍ਵਾ ‘‘ਇਮਂ ਨਿਸ੍ਸਾਯ ਸਕ੍ਕਾ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਤਸ੍ਸ ਗੋਚਰਾਯ ਅਰਞ੍ਞਗਮਨਕਾਲੇ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿ. ਅਥ ਨਂ ਬੋਧਿਸਤ੍ਤੋ ‘‘ਮਯਂ ਖੋ, ਕਾਕ, ਅਞ੍ਞਗੋਚਰਾ, ਤ੍ਵਮ੍ਪਿ ਅਞ੍ਞਗੋਚਰੋ, ਕਿਂ ਨੁ ਖੋ ਮਂ ਅਨੁਬਨ੍ਧਸੀ’’ਤਿ ਆਹ. ‘‘ਤੁਮ੍ਹਾਕਂ, ਸਾਮਿ, ਕਿਰਿਯਾ ਮਯ੍ਹਂ ਰੁਚ੍ਚਤਿ, ਅਹਮ੍ਪਿ ਤੁਮ੍ਹੇਹਿ ਸਮਾਨਗੋਚਰੋ ਹੁਤ੍ਵਾ ਤੁਮ੍ਹੇ ਉਪਟ੍ਠਾਤੁਂ ਇਚ੍ਛਾਮੀ’’ਤਿ. ਬੋਧਿਸਤ੍ਤੋ ਸਮ੍ਪਟਿਚ੍ਛਿ. ਸੋ ਤੇਨ ਸਦ੍ਧਿਂ ਗੋਚਰਭੂਮਿਯਂ ਏਕਗੋਚਰਂ ਚਰਨ੍ਤੋ ਵਿਯ ਓਸਕ੍ਕਿਤ੍ਵਾ ਗੋਮਯਰਾਸਿਂ ਵਿਦ੍ਧਂਸੇਤ੍ਵਾ ਪਾਣਕੇ ਖਾਦਿਤ੍ਵਾ ਕੁਚ੍ਛਿਪੂਰਂ ਕਤ੍ਵਾ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ‘‘ਤੁਮ੍ਹੇ ਏਤ੍ਤਕਂ ਕਾਲਂ ਚਰਥੇਵ, ਨਨੁ ਭੋਜਨੇ ਨਾਮ ਪਮਾਣਂ ਞਾਤੁਂ ਵਟ੍ਟਤਿ, ਏਥ ਨਾਤਿਸਾਯਮੇਵ ਗਚ੍ਛਾਮਾ’’ਤਿ ਆਹ. ਬੋਧਿਸਤ੍ਤੋ ਤਂ ਆਦਾਯ ਵਸਨਟ੍ਠਾਨਂ ਅਗਮਾਸਿ. ਭਤ੍ਤਕਾਰਕੋ ‘‘ਅਮ੍ਹਾਕਂ ਪਾਰਾਵਤੋ ਸਹਾਯਂ ਗਹੇਤ੍ਵਾ ਆਗਤੋ’’ਤਿ ਕਾਕਸ੍ਸਾਪਿ ਏਕਂ ਥੁਸਪਚ੍ਛਿਂ ਠਪੇਸਿ. ਕਾਕੋਪਿ ਚਤੂਹਪਞ੍ਚਾਹਂ ਤੇਨੇਵ ਨੀਹਾਰੇਨ ਵਸਿ.

ਅਥੇਕਦਿਵਸਂ ਸੇਟ੍ਠਿਨੋ ਬਹੁਮਚ੍ਛਮਂਸਂ ਆਹਰਿਯਿਤ੍ਥ, ਕਾਕੋ ਤਂ ਦਿਸ੍ਵਾ ਲੋਭਾਭਿਭੂਤੋ ਪਚ੍ਚੂਸਕਾਲਤੋ ਪਟ੍ਠਾਯ ਨਿਤ੍ਥੁਨਨ੍ਤੋ ਨਿਪਜ੍ਜਿ. ਅਥ ਨਂ ਪੁਨਦਿਵਸੇ ਬੋਧਿਸਤ੍ਤੋ ‘‘ਏਹਿ, ਸਮ੍ਮ, ਗੋਚਰਾਯ ਪਕ੍ਕਮਿਸ੍ਸਾਮਾ’’ਤਿ ਆਹ. ‘‘ਤੁਮ੍ਹੇ ਗਚ੍ਛਥ, ਮਯ੍ਹਂ ਅਜਿਣ੍ਣਾਸਙ੍ਕਾ ਅਤ੍ਥੀ’’ਤਿ. ‘‘ਸਮ੍ਮ, ਕਾਕਾਨਂ ਅਜੀਰਕੋ ਨਾਮ ਨਤ੍ਥਿ, ਦੀਪਵਟ੍ਟਿਮਤ੍ਤਮੇਵ ਹਿ ਤੁਮ੍ਹਾਕਂ ਕੁਚ੍ਛਿਯਂ ਥੋਕਂ ਤਿਟ੍ਠਤਿ, ਸੇਸਂ ਅਜ੍ਝੋਹਟਮਤ੍ਤਮੇਵ ਜੀਰਤਿ, ਮਮ ਵਚਨਂ ਕਰੋਹਿ, ਮਾ ਏਤਂ ਮਚ੍ਛਮਂਸਂ ਦਿਸ੍ਵਾ ਏਵਮਕਾਸੀ’’ਤਿ. ‘‘ਸਾਮਿ, ਕਿਂ ਨਾਮੇਤਂ ਕਥੇਥ, ਅਜਿਣ੍ਣਾਸਙ੍ਕਾਵ ਮਯ੍ਹ’’ਨ੍ਤਿ. ‘‘ਤੇਨ ਹਿ ਅਪ੍ਪਮਤ੍ਤੋ ਹੋਹੀ’’ਤਿ ਤਂ ਓਵਦਿਤ੍ਵਾ ਬੋਧਿਸਤ੍ਤੋ ਪਕ੍ਕਾਮਿ.

ਭਤ੍ਤਕਾਰਕੋਪਿ ਨਾਨਾਮਚ੍ਛਮਂਸਵਿਕਤਿਯੋ ਸਮ੍ਪਾਦੇਤ੍ਵਾ ਸਰੀਰਤੋ ਸੇਦਂ ਅਪਨੇਨ੍ਤੋ ਮਹਾਨਸਦ੍ਵਾਰੇ ਅਟ੍ਠਾਸਿ. ਕਾਕੋ ‘‘ਅਯਂ ਇਦਾਨਿ ਕਾਲੋ ਮਂਸਂ ਖਾਦਿਤੁ’’ਨ੍ਤਿ ਗਨ੍ਤ੍ਵਾ ਰਸਕਰੋਟਿਮਤ੍ਥਕੇ ਨਿਸੀਦਿ. ਭਤ੍ਤਕਾਰਕੋ ‘‘ਕਿਰੀ’’ਤਿ ਸਦ੍ਦਂ ਸੁਤ੍ਵਾ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ਕਾਕਂ ਦਿਸ੍ਵਾ ਪਵਿਸਿਤ੍ਵਾ ਤਂ ਗਹੇਤ੍ਵਾ ਸਕਲਸਰੀਰਲੋਮਂ ਲੁਞ੍ਚਿਤ੍ਵਾ ਮਤ੍ਥਕੇ ਚੂਲ਼ਂ ਠਪੇਤ੍ਵਾ ਸਿਙ੍ਗੀਵੇਰਮਰਿਚਾਦੀਨਿ ਪਿਸਿਤ੍ਵਾ ਤਕ੍ਕੇਨ ਆਲੋਲ਼ੇਤ੍ਵਾ ‘‘ਤ੍ਵਂ ਅਮ੍ਹਾਕਂ ਸੇਟ੍ਠਿਨੋ ਮਚ੍ਛਮਂਸਂ ਉਚ੍ਛਿਟ੍ਠਕਂ ਕਰੋਸੀ’’ਤਿ ਸਕਲਸਰੀਰਮਸ੍ਸ ਮਕ੍ਖੇਤ੍ਵਾ ਖਿਪਿਤ੍ਵਾ ਨੀਲ਼ਪਚ੍ਛਿਯਂ ਪਾਤੇਸਿ, ਬਲਵਵੇਦਨਾ ਉਪ੍ਪਜ੍ਜਿ. ਬੋਧਿਸਤ੍ਤੋ ਗੋਚਰਭੂਮਿਤੋ ਆਗਨ੍ਤ੍ਵਾ ਤਂ ਨਿਤ੍ਥੁਨਨ੍ਤਂ ਦਿਸ੍ਵਾ ਦਵਂ ਕਰੋਨ੍ਤੋ ਪਠਮਂ ਗਾਥਮਾਹ –

੭੦. ‘‘ਕਾਯਂ ਬਲਾਕਾ ਸਿਖਿਨੀ, ਚੋਰੀ ਲਙ੍ਘਿਪਿਤਾਮਹਾ;

ਓਰਂ ਬਲਾਕੇ ਆਗਚ੍ਛ, ਚਣ੍ਡੋ ਮੇ ਵਾਯਸੋ ਸਖਾ’’ਤਿ.

ਤਤ੍ਥ ਕਾਯਂ ਬਲਾਕਾ ਸਿਖਿਨੀਤਿ ਤਂ ਕਾਕਂ ਤਸ੍ਸ ਬਹਲਤਕ੍ਕੇਨ ਮਕ੍ਖਿਤਸਰੀਰਸੇਤਵਣ੍ਣਤ੍ਤਾ ਮਤ੍ਥਕੇ ਚ ਸਿਖਾਯ ਠਪਿਤਤ੍ਤਾ ‘‘ਕਾ ਏਸਾ ਬਲਾਕਾ ਸਿਖਿਨੀ’’ਤਿ ਪੁਚ੍ਛਨ੍ਤੋ ਆਲਪਤਿ. ਚੋਰੀਤਿ ਕੁਲਸ੍ਸ ਅਨਨੁਞ੍ਞਾਯ ਕੁਲਘਰਂ, ਕਾਕਸ੍ਸ ਵਾ ਅਰੁਚਿਯਾ ਪਚ੍ਛਿਂ ਪਵਿਟ੍ਠਤ੍ਤਾ ‘‘ਚੋਰੀ’’ਤਿ ਵਦਤਿ. ਲਙ੍ਘਿਪਿਤਾਮਹਾਤਿ ਲਙ੍ਘੀ ਵੁਚ੍ਚਤਿ ਆਕਾਸੇ ਲਙ੍ਘਨਤੋ ਮੇਘੋ, ਬਲਾਕਾ ਚ ਨਾਮ ਮੇਘਸਦ੍ਦੇਨ ਗਬ੍ਭਂ ਗਣ੍ਹਨ੍ਤੀਤਿ ਮੇਘਸਦ੍ਦੋ ਬਲਾਕਾਨਂ ਪਿਤਾ, ਮੇਘੋ ਪਿਤਾਮਹੋ ਹੋਤਿ. ਤੇਨਾਹ ‘‘ਲਙ੍ਘਿਪਿਤਾਮਹਾ’’ਤਿ. ਓਰਂ ਬਲਾਕੇ ਆਗਚ੍ਛਾਤਿ, ਅਮ੍ਭੋ ਬਲਾਕੇ, ਇਤੋ ਏਹਿ. ਚਣ੍ਡੋ ਮੇ ਵਾ ਯਸੋ ਸਖਾਤਿ ਮਯ੍ਹਂ ਸਖਾ ਪਚ੍ਛਿਸਾਮਿਕੋ ਵਾਯਸੋ ਚਣ੍ਡੋ ਫਰੁਸੋ, ਸੋ ਆਗਤੋ ਤਂ ਦਿਸ੍ਵਾ ਕਣਯਸਦਿਸੇਨ ਤੁਣ੍ਡੇਨ ਕੋਟ੍ਟੇਤ੍ਵਾ ਜੀਵਿਤਕ੍ਖਯਂ ਪਾਪੇਯ੍ਯ, ਤਸ੍ਮਾ ਯਾਵ ਵਾਯਸੋ ਨਾਗਚ੍ਛਤਿ, ਤਾਵ ਪਚ੍ਛਿਤੋ ਓਤਰਿਤ੍ਵਾ ਇਤੋ ਏਹਿ, ਸੀਘਂ ਪਲਾਯਸ੍ਸੂਤਿ ਵਦਤਿ.

ਤਂ ਸੁਤ੍ਵਾ ਕਾਕੋ ਦੁਤਿਯਂ ਗਾਥਮਾਹ –

੭੧. ‘‘ਨਾਹਂ ਬਲਾਕਾ ਸਿਖਿਨੀ, ਅਹਂ ਲੋਲੋਸ੍ਮਿ ਵਾਯਸੋ;

ਅਕਤ੍ਵਾ ਵਚਨਂ ਤੁਯ੍ਹਂ, ਪਸ੍ਸ ਲੂਨੋਸ੍ਮਿ ਆਗਤੋ’’ਤਿ.

ਤਤ੍ਥ ਆਗਤੋਤਿ ਤ੍ਵਂ ਇਦਾਨਿ ਗੋਚਰਭੂਮਿਤੋ ਆਗਤੋ, ਮਂ ਲੂਨਂ ਪਸ੍ਸਾਤਿ ਅਤ੍ਥੋ.

ਤਂ ਸੁਤ੍ਵਾ ਬੋਧਿਸਤ੍ਤੋ ਤਤਿਯਂ ਗਾਥਮਾਹ –

੭੨. ‘‘ਪੁਨਪਾਪਜ੍ਜਸੀ ਸਮ੍ਮ, ਸੀਲਞ੍ਹਿ ਤਵ ਤਾਦਿਸਂ;

ਨ ਹਿ ਮਾਨੁਸਕਾ ਭੋਗਾ, ਸੁਭੁਞ੍ਜਾ ਹੋਨ੍ਤਿ ਪਕ੍ਖਿਨਾ’’ਤਿ.

ਤਤ੍ਥ ਪੁਨਪਾਪਜ੍ਜਸੀ ਸਮ੍ਮਾਤਿ ਸਮ੍ਮ ਵਾਯਸ, ਪੁਨਪਿ ਤ੍ਵਂ ਏਵਰੂਪਂ ਦੁਕ੍ਖਂ ਪਟਿਲਭਿਸ੍ਸਸੇਵ, ਨਤ੍ਥਿ ਤੇ ਏਤ੍ਤਕੇਨ ਮੋਕ੍ਖੋ. ਕਿਂਕਾਰਣਾ? ਸੀਲਞ੍ਹਿ ਤਵ ਤਾਦਿਸਂ ਪਾਪਕਂ, ਯਸ੍ਮਾ ਤਵ ਆਚਾਰਸੀਲਂ ਤਾਦਿਸਂ ਦੁਕ੍ਖਾਧਿਗਮਸ੍ਸੇਵ ਅਨੁਰੂਪਂ. ਨ ਹਿ ਮਾਨੁਸਕਾਤਿ ਮਨੁਸ੍ਸਾ ਨਾਮ ਮਹਾਪੁਞ੍ਞਾ, ਤਿਰਚ੍ਛਾਨਗਤਾਨਂ ਤਥਾਰੂਪਂ ਪੁਞ੍ਞਂ ਨਤ੍ਥਿ, ਤਸ੍ਮਾ ਮਾਨੁਸਕਾ ਭੋਗਾ ਤਿਰਚ੍ਛਾਨਗਤੇਨ ਪਕ੍ਖਿਨਾ ਨ ਭੁਞ੍ਜੀਯਨ੍ਤੀਤਿ.

ਏਵਞ੍ਚ ਪਨ ਵਤ੍ਵਾ ਬੋਧਿਸਤ੍ਤੋ ‘‘ਇਤੋ ਦਾਨਿ ਪਟ੍ਠਾਯ ਮਯਾ ਏਤ੍ਥ ਵਸਿਤੁਂ ਨ ਸਕ੍ਕਾ’’ਤਿ ਉਪ੍ਪਤਿਤ੍ਵਾ ਅਞ੍ਞਤ੍ਥ ਅਗਮਾਸਿ. ਕਾਕੋਪਿ ਨਿਤ੍ਥੁਨਨ੍ਤੋ ਤਤ੍ਥੇਵ ਕਾਲਮਕਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਲੋਲਭਿਕ੍ਖੁ ਅਨਾਗਾਮਿਫਲੇ ਪਤਿਟ੍ਠਹਿ. ‘‘ਤਦਾ ਲੋਲਕਾਕੋ ਲੋਲਭਿਕ੍ਖੁ ਅਹੋਸਿ, ਪਾਰਾਵਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਲੋਲਜਾਤਕਵਣ੍ਣਨਾ ਚਤੁਤ੍ਥਾ.

[੨੭੫] ੫. ਰੁਚਿਰਜਾਤਕਵਣ੍ਣਨਾ

ਕਾਯਂ ਬਲਾਕਾ ਰੁਚਿਰਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਲੋਲਭਿਕ੍ਖੁਂ ਆਰਬ੍ਭ ਕਥੇਸਿ. ਦ੍ਵੇਪਿ ਵਤ੍ਥੂਨਿ ਪੁਰਿਮਸਦਿਸਾਨੇਵ ਗਾਥਾਪਿ.

੭੩. ‘‘ਕਾਯਂ ਬਲਾਕਾ ਰੁਚਿਰਾ, ਕਾਕਨੀਲ਼ਸ੍ਮਿਮਚ੍ਛਤਿ;

ਚਣ੍ਡੋ ਕਾਕੋ ਸਖਾ ਮਯ੍ਹਂ, ਯਸ੍ਸ ਚੇਤਂ ਕੁਲਾਵਕਂ.

੭੪. ‘‘ਨਨੁ ਮਂ ਸਮ੍ਮ ਜਾਨਾਸਿ, ਦਿਜ ਸਾਮਾਕਭੋਜਨ;

ਅਕਤ੍ਵਾ ਵਚਨਂ ਤੁਯ੍ਹਂ, ਪਸ੍ਸ ਲੂਨੋਸ੍ਮਿ ਆਗਤੋ.

੭੫. ‘‘ਪੁਨਪਾਪਜ੍ਜਸੀ ਸਮ੍ਮ, ਸੀਲਞ੍ਹਿ ਤਵ ਤਾਦਿਸਂ;

ਨ ਹਿ ਮਾਨੁਸਕਾ ਭੋਗਾ, ਸੁਭੁਞ੍ਜਾ ਹੋਨ੍ਤਿ ਪਕ੍ਖਿਨਾ’’ਤਿ. –

ਗਾਥਾ ਹਿ ਏਕਨ੍ਤਰਿਕਾਯੇਵ.

ਤਤ੍ਥ ‘‘ਰੁਚਿਰਾ’’ਤਿ ਤਕ੍ਕਮਕ੍ਖਿਤਸਰੀਰਤਾਯ ਸੇਤਵਣ੍ਣਤਂ ਸਨ੍ਧਾਯ ਵਦਤਿ. ਰੁਚਿਰਾ ਪਿਯਦਸ੍ਸਨਾ, ਪਣ੍ਡਰਾਤਿ ਅਤ੍ਥੋ. ਕਾਕਨੀਲ਼ਸ੍ਮਿਨ੍ਤਿ ਕਾਕਕੁਲਾਵਕੇ. ‘‘ਕਾਕਨਿਡ੍ਢਸ੍ਮਿ’’ਨ੍ਤਿਪਿ ਪਾਠੋ. ਦਿਜਾਤਿ ਕਾਕੋ ਪਾਰੇਵਤਂ ਆਲਪਤਿ. ਸਾਮਾਕਭੋਜਨਾਤਿ ਤਿਣਬੀਜਭੋਜਨ. ਸਾਮਾਕਗ੍ਗਹਣੇਨ ਹੇਤ੍ਥ ਸਬ੍ਬਮ੍ਪਿ ਤਿਣਬੀਜਂ ਗਹਿਤਂ. ਇਧਾਪਿ ਬੋਧਿਸਤ੍ਤੋ ‘‘ਨ ਇਦਾਨਿ ਸਕ੍ਕਾ ਇਤੋ ਪਟ੍ਠਾਯ ਮਯਾ ਏਤ੍ਥ ਵਸਿਤੁ’’ਨ੍ਤਿ ਉਪ੍ਪਤਿਤ੍ਵਾ ਅਞ੍ਞਤ੍ਥ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਲੋਲਭਿਕ੍ਖੁ ਅਨਾਗਾਮਿਫਲੇ ਪਤਿਟ੍ਠਹਿ. ‘‘ਤਦਾ ਲੋਲਕਾਕੋ ਲੋਲਭਿਕ੍ਖੁ ਅਹੋਸਿ, ਪਾਰਾਵਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਰੁਚਿਰਜਾਤਕਵਣ੍ਣਨਾ ਪਞ੍ਚਮਾ.

[੨੭੬] ੬. ਕੁਰੁਧਮ੍ਮਜਾਤਕਵਣ੍ਣਨਾ

ਤਵ ਸਦ੍ਧਞ੍ਚ ਸੀਲਞ੍ਚਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਹਂਸਘਾਤਕਭਿਕ੍ਖੁਂ ਆਰਬ੍ਭ ਕਥੇਸਿ. ਸਾਵਤ੍ਥਿਵਾਸਿਨੋ ਦ੍ਵੇ ਸਹਾਯਕਾ ਭਿਕ੍ਖੂ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦਾ ਯੇਭੁਯ੍ਯੇਨ ਏਕਤੋ ਵਿਚਰਨ੍ਤਿ. ਤੇ ਏਕਦਿਵਸਂ ਅਚਿਰਵਤਿਂ ਗਨ੍ਤ੍ਵਾ ਨ੍ਹਤ੍ਵਾ ਵਾਲੁਕਪੁਲਿਨੇ ਆਤਪਂ ਤਪ੍ਪਮਾਨਾ ਸਾਰਣੀਯਕਥਂ ਕਥੇਨ੍ਤਾ ਅਟ੍ਠਂਸੁ, ਤਸ੍ਮਿਂ ਖਣੇ ਦ੍ਵੇ ਹਂਸਾ ਆਕਾਸੇਨ ਗਚ੍ਛਨ੍ਤਿ. ਅਥੇਕੋ ਦਹਰਭਿਕ੍ਖੁ ਸਕ੍ਖਰਂ ਗਹੇਤ੍ਵਾ ‘‘ਏਕਸ੍ਸ ਹਂਸਪੋਤਕਸ੍ਸ ਅਕ੍ਖਿਂ ਪਹਰਿਸ੍ਸਾਮੀ’’ਤਿ ਆਹ, ਇਤਰੋ ‘‘ਨ ਸਕ੍ਖਿਸ੍ਸਸੀ’’ਤਿ ਆਹ. ‘‘ਤਿਟ੍ਠਤੁ ਇਮਸ੍ਮਿਂ ਪਸ੍ਸੇ ਅਕ੍ਖਿ, ਪਰਪਸ੍ਸੇ ਅਕ੍ਖਿਂ ਪਹਰਿਸ੍ਸਾਮੀ’’ਤਿ. ‘‘ਇਦਮ੍ਪਿ ਨ ਸਕ੍ਖਿਸ੍ਸਸਿਯੇਵਾ’’ਤਿ. ‘‘ਤੇਨ ਹਿ ਉਪਧਾਰੇਹੀ’’ਤਿ ਤਿਯਂਸਂ ਸਕ੍ਖਰਂ ਗਹੇਤ੍ਵਾ ਹਂਸਸ੍ਸ ਪਚ੍ਛਾਭਾਗੇ ਖਿਪਿ. ਹਂਸੋ ਸਕ੍ਖਰਸਦ੍ਦਂ ਸੁਤ੍ਵਾ ਨਿਵਤ੍ਤਿਤ੍ਵਾ ਓਲੋਕੇਸਿ, ਅਥ ਨਂ ਇਤਰੋ ਵਟ੍ਟਸਕ੍ਖਰਂ ਗਹੇਤ੍ਵਾ ਪਰਪਸ੍ਸੇ ਅਕ੍ਖਿਮ੍ਹਿ ਪਹਰਿਤ੍ਵਾ ਓਰਿਮਕ੍ਖਿਨਾ ਨਿਕ੍ਖਮਾਪੇਸਿ. ਹਂਸੋ ਵਿਰਵਨ੍ਤੋ ਪਰਿਵਤ੍ਤਿਤ੍ਵਾ ਤੇਸਂ ਪਾਦਮੂਲੇਯੇਵ ਪਤਿ. ਤਤ੍ਥ ਤਤ੍ਥ ਠਿਤਾ ਭਿਕ੍ਖੂ ਦਿਸ੍ਵਾ ਆਗਨ੍ਤ੍ਵਾ ‘‘ਆਵੁਸੋ, ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਅਨਨੁਚ੍ਛਵਿਕਂ ਵੋ ਕਤਂ ਪਾਣਾਤਿਪਾਤਂ ਕਰੋਨ੍ਤੇਹੀ’’ਤਿ ਵਤ੍ਵਾ ਤੇ ਆਦਾਯ ਤਥਾਗਤਸ੍ਸ ਦਸ੍ਸੇਸੁਂ. ਸਤ੍ਥਾ ‘‘ਸਚ੍ਚਂ, ਕਿਰ ਤਯਾ ਭਿਕ੍ਖੁ ਪਾਣਾਤਿਪਾਤੋ ਕਤੋ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ, ਕਸ੍ਮਾ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਏਵਮਕਾਸਿ, ਪੋਰਾਣਕਪਣ੍ਡਿਤਾ ਅਨੁਪ੍ਪਨ੍ਨੇ ਬੁਦ੍ਧੇ ਅਗਾਰਮਜ੍ਝੇ ਸਂਕਿਲਿਟ੍ਠਵਾਸਂ ਵਸਮਾਨਾ ਅਪ੍ਪਮਤ੍ਤਕੇਸੁਪਿ ਠਾਨੇਸੁ ਕੁਕ੍ਕੁਚ੍ਚਂ ਕਰਿਂਸੁ, ਤ੍ਵਂ ਪਨ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਕੁਕ੍ਕੁਚ੍ਚਮਤ੍ਤਮ੍ਪਿ ਨ ਅਕਾਸਿ, ਨਨੁ ਨਾਮ ਭਿਕ੍ਖੁਨਾ ਕਾਯਵਾਚਾਚਿਤ੍ਤੇਹਿ ਸਞ੍ਞਤੇਨ ਭਵਿਤਬ੍ਬ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕੁਰੁਰਟ੍ਠੇ ਇਨ੍ਦਪਤ੍ਥਨਗਰੇ ਧਨਞ੍ਚਯੇ ਕੋਰਬ੍ਯੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਹੇਤ੍ਵਾ ਅਨੁਪੁਬ੍ਬੇਨ ਵਿਞ੍ਞੁਤਂ ਪਤ੍ਤੋ ਤਕ੍ਕਸਿਲਾਯਂ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਪਿਤਰਾ ਓਪਰਜ੍ਜੇ ਪਤਿਟ੍ਠਾਪਿਤੋ ਅਪਰਭਾਗੇ ਪਿਤੁ ਅਚ੍ਚਯੇਨ ਰਜ੍ਜਂ ਪਤ੍ਵਾ ਦਸ ਰਾਜਧਮ੍ਮੇ ਅਕੋਪੇਨ੍ਤੋ ਕੁਰੁਧਮ੍ਮੇ ਵਤ੍ਤਿਤ੍ਥ. ਕੁਰੁਧਮ੍ਮੋ ਨਾਮ ਪਞ੍ਚ ਸੀਲਾਨਿ, ਤਾਨਿ ਬੋਧਿਸਤ੍ਤੋ ਪਰਿਸੁਦ੍ਧਾਨਿ ਕਤ੍ਵਾ ਰਕ੍ਖਿ. ਯਥਾ ਚ ਬੋਧਿਸਤ੍ਤੋ, ਏਵਮਸ੍ਸ ਮਾਤਾ ਅਗ੍ਗਮਹੇਸੀ ਕਨਿਟ੍ਠਭਾਤਾ ਉਪਰਾਜਾ ਪੁਰੋਹਿਤੋ ਬ੍ਰਾਹ੍ਮਣੋ ਰਜ੍ਜੁਗਾਹਕੋ ਅਮਚ੍ਚੋ ਸਾਰਥਿ ਸੇਟ੍ਠਿ ਦੋਣਮਾਪਕੋ ਮਹਾਮਤ੍ਤੋ ਦੋਵਾਰਿਕੋ ਨਗਰਸੋਭਿਨੀ ਵਣ੍ਣਦਾਸੀਤਿ ਏਵਮੇਤੇ.

‘‘ਰਾਜਾ ਮਾਤਾ ਮਹੇਸੀ ਚ, ਉਪਰਾਜਾ ਪੁਰੋਹਿਤੋ;

ਰਜ੍ਜੁਕੋ ਸਾਰਥਿ ਸੇਟ੍ਠਿ, ਦੋਣੋ ਦੋਵਾਰਿਕੋ ਤਥਾ;

ਗਣਿਕੇਕਾਦਸ ਜਨਾ, ਕੁਰੁਧਮ੍ਮੇ ਪਤਿਟ੍ਠਿਤਾ’’ਤਿ.

ਇਤਿ ਇਮੇ ਸਬ੍ਬੇਪਿ ਪਰਿਸੁਦ੍ਧਾਨਿ ਕਤ੍ਵਾ ਪਞ੍ਚ ਸੀਲਾਨਿ ਰਕ੍ਖਿਂਸੁ. ਰਾਜਾ ਚਤੂਸੁ ਨਗਰਦ੍ਵਾਰੇਸੁ ਚ ਨਗਰਮਜ੍ਝੇ ਚ ਨਿਵੇਸਨਦ੍ਵਾਰੇ ਚਾਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛਸਤਸਹਸ੍ਸਂ ਧਨਂ ਵਿਸ੍ਸਜ੍ਜੇਨ੍ਤੋ ਸਕਲਜਮ੍ਬੁਦੀਪਂ ਉਨ੍ਨਙ੍ਗਲਂ ਕਤ੍ਵਾ ਦਾਨਂ ਅਦਾਸਿ, ਤਸ੍ਸ ਪਨ ਦਾਨਜ੍ਝਾਸਯਤਾ ਦਾਨਾਭਿਰਤਤਾ ਸਕਲਜਮ੍ਬੁਦੀਪਂ ਅਜ੍ਝੋਤ੍ਥਰਿ. ਤਸ੍ਮਿਂ ਕਾਲੇ ਕਾਲਿਙ੍ਗਰਟ੍ਠੇ ਦਨ੍ਤਪੁਰਨਗਰੇ ਕਾਲਿਙ੍ਗਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਰਟ੍ਠੇ ਦੇਵੋ ਨ ਵਸ੍ਸਿ, ਤਸ੍ਮਿਂ ਅਵਸ੍ਸਨ੍ਤੇ ਸਕਲਰਟ੍ਠੇ ਛਾਤਕਂ ਜਾਤਂ, ਆਹਾਰਵਿਪਤ੍ਤਿਯਾ ਚ ਮਨੁਸ੍ਸਾਨਂ ਰੋਗੋ ਉਦਪਾਦਿ, ਦੁਬ੍ਬੁਟ੍ਠਿਭਯਂ ਛਾਤਕਭਯਂ ਰੋਗਭਯਨ੍ਤਿ ਤੀਣਿ ਭਯਾਨਿ ਉਪ੍ਪਜ੍ਜਿਂਸੁ. ਮਨੁਸ੍ਸਾ ਨਿਗ੍ਗਹਣਾ ਦਾਰਕੇ ਹਤ੍ਥੇਸੁ ਗਹੇਤ੍ਵਾ ਤਤ੍ਥ ਤਤ੍ਥ ਵਿਚਰਨ੍ਤਿ.

ਸਕਲਰਟ੍ਠਵਾਸਿਨੋ ਏਕਤੋ ਹੁਤ੍ਵਾ ਦਨ੍ਤਪੁਰਂ ਗਨ੍ਤ੍ਵਾ ਰਾਜਦ੍ਵਾਰੇ ਉਕ੍ਕੁਟ੍ਠਿਮਕਂਸੁ. ਰਾਜਾ ਵਾਤਪਾਨਂ ਨਿਸ੍ਸਾਯ ਠਿਤੋ ਤਂ ਸਦ੍ਦਂ ਸੁਤ੍ਵਾ ‘‘ਕਿਂ ਕਾਰਣਾ ਏਤੇ ਵਿਰਵਨ੍ਤੀ’’ਤਿ ਪੁਚ੍ਛਿ. ‘‘ਮਹਾਰਾਜ, ਸਕਲਰਟ੍ਠੇ ਤੀਣਿ ਭਯਾਨਿ ਉਪ੍ਪਨ੍ਨਾਨਿ, ਦੇਵੋ ਨ ਵਸ੍ਸਤਿ, ਸਸ੍ਸਾਨਿ ਨ ਵਿਪਨ੍ਨਾਨਿ, ਛਾਤਕਂ ਜਾਤਂ. ਮਨੁਸ੍ਸਾ ਦੁਬ੍ਭੋਜਨਾ ਰੋਗਾਭਿਭੂਤਾ ਨਿਗ੍ਗਹਣਾ ਪੁਤ੍ਤੇ ਹਤ੍ਥੇਸੁ ਗਹੇਤ੍ਵਾ ਵਿਚਰਨ੍ਤਿ, ਦੇਵਂ ਵਸ੍ਸਾਪੇਹਿ ਮਹਾਰਾਜਾ’’ਤਿ. ‘‘ਪੋਰਾਣਕਰਾਜਾਨੋ ਦੇਵੇ ਅਵਸ੍ਸਨ੍ਤੇ ਕਿਂ ਕਰੋਨ੍ਤੀ’’ਤਿ? ‘‘ਪੋਰਾਣਕਰਾਜਾਨੋ, ਮਹਾਰਾਜ, ਦੇਵੇ ਅਵਸ੍ਸਨ੍ਤੇ ਦਾਨਂ ਦਤ੍ਵਾ ਉਪੋਸਥਂ ਅਧਿਟ੍ਠਾਯ ਸਮਾਦਿਨ੍ਨਸੀਲਾ ਸਿਰਿਗਬ੍ਭਂ ਪਵਿਸਿਤ੍ਵਾ ਦਬ੍ਬਸਨ੍ਥਰੇ ਸਤ੍ਤਾਹਂ ਨਿਪਜ੍ਜਨ੍ਤਿ, ਤਦਾ ਦੇਵੋ ਵਸ੍ਸਤੀ’’ਤਿ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਥਾ ਅਕਾਸਿ. ਏਵਂ ਸਨ੍ਤੇਪਿ ਦੇਵੋ ਨ ਵਸ੍ਸਿ.

ਰਾਜਾ ਅਮਚ੍ਚੇ ਪੁਚ੍ਛਿ – ‘‘ਅਹਂ ਕਤ੍ਤਬ੍ਬਕਿਚ੍ਚਂ ਅਕਾਸਿਂ, ਦੇਵੋ ਨ ਵਸ੍ਸਤਿ, ਕਿਨ੍ਤਿ ਕਰੋਮਾ’’ਤਿ? ‘‘ਮਹਾਰਾਜ, ਇਨ੍ਦਪਤ੍ਥਨਗਰੇ ਧਨਞ੍ਚਯਸ੍ਸ ਕੋਰਬ੍ਯਰਞ੍ਞੋ ਅਞ੍ਜਨਵਣ੍ਣੋ ਨਾਮ ਮਙ੍ਗਲਹਤ੍ਥੀ ਅਤ੍ਥਿ, ਤਂ ਆਨੇਸ੍ਸਾਮ, ਏਵਂ ਸਨ੍ਤੇ ਦੇਵੋ ਵਸ੍ਸਤੀ’’ਤਿ. ‘‘ਸੋ ਰਾਜਾ ਬਲਵਾਹਨਸਮ੍ਪਨ੍ਨੋ ਦੁਪ੍ਪਸਹੋ, ਕਥਮਸ੍ਸ ਹਤ੍ਥਿਂ ਆਨੇਸ੍ਸਾਮਾ’’ਤਿ? ‘‘ਮਹਾਰਾਜ, ਤੇਨ ਸਦ੍ਧਿਂ ਯੁਦ੍ਧਕਿਚ੍ਚਂ ਨਤ੍ਥਿ, ਦਾਨਜ੍ਝਾਸਯੋ ਰਾਜਾ ਦਾਨਾਭਿਰਤੋ ਯਾਚਿਤੋ ਸਮਾਨੋ ਅਲਙ੍ਕਤਸੀਸਮ੍ਪਿ ਛਿਨ੍ਦਿਤ੍ਵਾ ਪਸਾਦਸਮ੍ਪਨ੍ਨਾਨਿ ਅਕ੍ਖੀਨਿਪਿ ਉਪ੍ਪਾਟੇਤ੍ਵਾ ਸਕਲਰਜ੍ਜਮ੍ਪਿ ਨਿਯ੍ਯਾਦੇਤ੍ਵਾ ਦਦੇਯ੍ਯ, ਹਤ੍ਥਿਮ੍ਹਿ ਵਤ੍ਤਬ੍ਬਮੇਵ ਨਤ੍ਥਿ, ਅਵਸ੍ਸਂ ਯਾਚਿਤੋ ਦਸ੍ਸਤੀ’’ਤਿ. ‘‘ਕੇ ਪਨ ਤਂ ਯਾਚਿਤੁਂ ਸਮਤ੍ਥਾ’’ਤਿ? ‘‘ਬ੍ਰਾਹ੍ਮਣਾ, ਮਹਾਰਾਜਾ’’ਤਿ. ਰਾਜਾ ਬ੍ਰਾਹ੍ਮਣਗਾਮਤੋ ਅਟ੍ਠ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ਸਕ੍ਕਾਰਸਮ੍ਮਾਨਂ ਕਤ੍ਵਾ ਹਤ੍ਥਿਂ ਯਾਚਨਤ੍ਥਾਯ ਪੇਸੇਸਿ. ਤੇ ਪਰਿਬ੍ਬਯਂ ਆਦਾਯ ਅਦ੍ਧਿਕਵੇਸਂ ਗਹੇਤ੍ਵਾ ਸਬ੍ਬਤ੍ਥ ਏਕਰਤ੍ਤਿਵਾਸੇਨ ਤੁਰਿਤਗਮਨਂ ਗਨ੍ਤ੍ਵਾ ਕਤਿਪਾਹਂ ਨਗਰਦ੍ਵਾਰੇ ਦਾਨਸਾਲਾਸੁ ਭੁਞ੍ਜਿਤ੍ਵਾ ਸਰੀਰਂ ਸਨ੍ਤਪ੍ਪੇਤ੍ਵਾ ‘‘ਕਦਾ ਰਾਜਾ ਦਾਨਗ੍ਗਂ ਆਗਚ੍ਛਿਸ੍ਸਤੀ’’ਤਿ ਪੁਚ੍ਛਿਂਸੁ. ਮਨੁਸ੍ਸਾ ‘‘ਪਕ੍ਖਸ੍ਸ ਤਯੋ ਦਿਵਸੇ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਞ੍ਚ ਆਗਚ੍ਛਤਿ, ਸ੍ਵੇ ਪਨ ਪੁਣ੍ਣਮੀ, ਤਸ੍ਮਾ ਸ੍ਵੇ ਆਗਚ੍ਛਿਸ੍ਸਤੀ’’ਤਿ ਵਦਿਂਸੁ.

ਬ੍ਰਾਹ੍ਮਣਾ ਪੁਨਦਿਵਸੇ ਪਾਤੋਵ ਗਨ੍ਤ੍ਵਾ ਪਾਚੀਨਦ੍ਵਾਰੇ ਅਟ੍ਠਂਸੁ. ਬੋਧਿਸਤ੍ਤੋ ਪਾਤੋਵ ਨ੍ਹਤ੍ਵਾ ਗਤ੍ਤਾਨੁਲਿਤ੍ਤੋ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਅਲਙ੍ਕਤਹਤ੍ਥਿਕ੍ਖਨ੍ਧਵਰਗਤੋ ਮਹਨ੍ਤੇਨ ਪਰਿਵਾਰੇਨ ਪਾਚੀਨਦ੍ਵਾਰੇਨ ਦਾਨਸਾਲਂ ਗਨ੍ਤ੍ਵਾ ਓਤਰਿਤ੍ਵਾ ਸਤ੍ਤਟ੍ਠਜਨਾਨਂ ਸਹਤ੍ਥਾ ਭਤ੍ਤਂ ਦਤ੍ਵਾ ‘‘ਇਮਿਨਾਵ ਨੀਹਾਰੇਨ ਦੇਥਾ’’ਤਿ ਵਤ੍ਵਾ ਹਤ੍ਥਿਂ ਅਭਿਰੁਹਿਤ੍ਵਾ ਦਕ੍ਖਿਣਦ੍ਵਾਰਂ ਅਗਮਾਸਿ. ਬ੍ਰਾਹ੍ਮਣਾ ਪਾਚੀਨਦ੍ਵਾਰੇ ਆਰਕ੍ਖਸ੍ਸ ਬਲਵਤਾਯ ਓਕਾਸਂ ਅਲਭਿਤ੍ਵਾ ਦਕ੍ਖਿਣਦ੍ਵਾਰਮੇਵ ਗਨ੍ਤ੍ਵਾ ਰਾਜਾਨਂ ਆਗਚ੍ਛਨ੍ਤਂ ਓਲੋਕਯਮਾਨਾ ਦ੍ਵਾਰਤੋ ਨਾਤਿਦੂਰੇ ਉਨ੍ਨਤਟ੍ਠਾਨੇ ਠਿਤਾ ਸਮ੍ਪਤ੍ਤਂ ਰਾਜਾਨਂ ਹਤ੍ਥੇ ਉਕ੍ਖਿਪਿਤ੍ਵਾ ‘‘ਜਯਤੁ ਭਵਂ, ਮਹਾਰਾਜਾ’’ਤਿ ਜਯਾਪੇਸੁਂ. ਰਾਜਾ ਵਜਿਰਙ੍ਕੁਸੇਨ ਵਾਰਣਂ ਨਿਵਤ੍ਤੇਤ੍ਵਾ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ‘‘ਭੋ ਬ੍ਰਾਹ੍ਮਣਾ, ਕਿਂ ਇਚ੍ਛਥਾ’’ਤਿ ਪੁਚ੍ਛਿ. ਬ੍ਰਾਹ੍ਮਣਾ ਬੋਧਿਸਤ੍ਤਸ੍ਸ ਗੁਣਂ ਵਣ੍ਣੇਨ੍ਤਾ ਪਠਮਂ ਗਾਥਮਾਹਂਸੁ –

੭੬. ‘‘ਤਵ ਸਦ੍ਧਞ੍ਚ ਸੀਲਞ੍ਚ, ਵਿਦਿਤ੍ਵਾਨ ਜਨਾਧਿਪ;

ਵਣ੍ਣਂ ਅਞ੍ਜਨਵਣ੍ਣੇਨ, ਕਾਲਿਙ੍ਗਸ੍ਮਿਂ ਨਿਮਿਮ੍ਹਸੇ’’ਤਿ.

ਤਤ੍ਥ ਸਦ੍ਧਨ੍ਤਿ ਕਮ੍ਮਫਲਾਨਂ ਸਦ੍ਦਹਨਵਸੇਨ ਓਕਪ੍ਪਨਿਯਸਦ੍ਧਂ. ਸੀਲਨ੍ਤਿ ਸਂਵਰਸੀਲਂ ਅਵੀਤਿਕ੍ਕਮਸੀਲਂ. ਵਣ੍ਣਨ੍ਤਿ ਤਦਾ ਤਸ੍ਮਿਂ ਦੇਸੇ ਸੁਵਣ੍ਣਂ ਵੁਚ੍ਚਤਿ, ਦੇਸਨਾਸੀਸਮੇਵ ਚੇਤਂ. ਇਮਿਨਾ ਪਨ ਪਦੇਨ ਸਬ੍ਬਮ੍ਪਿ ਹਿਰਞ੍ਞਸੁਵਣ੍ਣਾਦਿਧਨਧਞ੍ਞਂ ਸਙ੍ਗਹਿਤਂ. ਅਞ੍ਜਨਵਣ੍ਣੇਨਾਤਿ ਅਞ੍ਜਨਪੁਞ੍ਜਸਮਾਨਵਣ੍ਣੇਨ ਇਮਿਨਾ ਤਵ ਨਾਗੇਨ, ਕਾਲਿਙ੍ਗਸ੍ਮਿਨ੍ਤਿ ਕਾਲਿਙ੍ਗਰਞ੍ਞੋ ਸਨ੍ਤਿਕੇ. ਨਿਮਿਮ੍ਹਸੇਤਿ ਵਿਨਿਮਯਵਸੇਨ ਗਣ੍ਹਿਮ੍ਹ, ਪਰਿਭੋਗਵਸੇਨ ਵਾ ਉਦਰੇ ਪਕ੍ਖਿਪਿਮ੍ਹਾਤਿ ਅਤ੍ਥੋ. ਸੇਤਿ ਨਿਪਾਤਮਤ੍ਤਂ. ਇਦਂ ਵੁਤ੍ਤਂ ਹੋਤਿ – ਮਯਞ੍ਹਿ, ਜਨਾਧਿਪ, ਤਵ ਸਦ੍ਧਞ੍ਚ ਸੀਲਞ੍ਚ ਵਿਦਿਤ੍ਵਾਨ ‘‘ਅਦ੍ਧਾ ਨੋ ਏਵਂ ਸਦ੍ਧਾਸੀਲਸਮ੍ਪਨ੍ਨੋ ਰਾਜਾ ਯਾਚਿਤੋ ਅਞ੍ਜਨਵਣ੍ਣਂ ਨਾਗਂ ਦਸ੍ਸਤੀ’’ਤਿ ਇਮਿਨਾ ਅਤ੍ਤਨੋ ਸਨ੍ਤਕੇਨ ਵਿਯ ਅਞ੍ਜਨਵਣ੍ਣੇਨ ਕਾਲਿਙ੍ਗਰਞ੍ਞੋ ਸਨ੍ਤਿਕੇ ਨਾਗਂ ਵੋ ਆਹਰਿਸ੍ਸਾਮਾਤਿ ਵਤ੍ਵਾ ਬਹੁਧਨਧਞ੍ਞਂ ਨਿਮਿਮ੍ਹਸੇ ਪਰਿਵਤ੍ਤਯਿਮ੍ਹ ਚੇਵ ਉਦਰੇ ਚ ਪਕ੍ਖਿਪਿਮ੍ਹ. ਏਵਂ ਤਂ ਮਯਂ ਧਾਰਯਮਾਨਾ ਇਧਾਗਤਾ. ਤਤ੍ਥ ਕਤ੍ਤਬ੍ਬਂ ਦੇਵੋ ਜਾਨਾਤੂਤਿ.

ਅਪਰੋ ਨਯੋ – ਤਵ ਸਦ੍ਧਞ੍ਚ ਸੀਲਗੁਣਸਙ੍ਖਾਤਂ ਵਣ੍ਣਞ੍ਚ ਸੁਤ੍ਵਾ ‘‘ਉਲ਼ਾਰਗੁਣੋ ਰਾਜਾ ਜੀਵਿਤਮ੍ਪਿ ਯਾਚਿਤੋ ਦਦੇਯ੍ਯ, ਪਗੇਵ ਤਿਰਚ੍ਛਾਨਗਤਂ ਨਾਗ’’ਨ੍ਤਿ ਏਵਂ ਕਾਲਿਙ੍ਗਸ੍ਸ ਸਨ੍ਤਿਕੇ ਇਮਿਨਾ ਅਞ੍ਜਨਵਣ੍ਣੇਨ ਤਵ ਵਣ੍ਣਂ ਨਿਮਿਮ੍ਹਸੇ ਨਿਮਿਮ੍ਹ ਤੁਲਯਿਮ੍ਹ, ਤੇਨਮ੍ਹਾ ਇਧਾਗਤਾਤਿ.

ਤਂ ਸੁਤ੍ਵਾ ਬੋਧਿਸਤ੍ਤੋ ‘‘ਸਚੇ, ਵੋ ਬ੍ਰਾਹ੍ਮਣਾ, ਇਮਂ ਨਾਗਂ ਪਰਿਵਤ੍ਤੇਤ੍ਵਾ ਧਨਂ ਖਾਦਿਤਂ ਸੁਖਾਦਿਤਂ ਮਾ ਚਿਨ੍ਤਯਿਤ੍ਥ, ਯਥਾਲਙ੍ਕਤਮੇਵ ਵੋ ਨਾਗਂ ਦਸ੍ਸਾਮੀ’’ਤਿ ਸਮਸ੍ਸਾਸੇਤ੍ਵਾ ਇਤਰਾ ਦ੍ਵੇ ਗਾਥਾ ਅਵੋਚ –

੭੭. ‘‘ਅਨ੍ਨਭਚ੍ਚਾ ਚਭਚ੍ਚਾ ਚ, ਯੋਧ ਉਦ੍ਦਿਸ੍ਸ ਗਚ੍ਛਤਿ;

ਸਬ੍ਬੇ ਤੇ ਅਪ੍ਪਟਿਕ੍ਖਿਪ੍ਪਾ, ਪੁਬ੍ਬਾਚਰਿਯਵਚੋ ਇਦਂ.

੭੮. ‘‘ਦਦਾਮਿ ਵੋ ਬ੍ਰਾਹ੍ਮਣਾ ਨਾਗਮੇਤਂ, ਰਾਜਾਰਹਂ ਰਾਜਭੋਗ੍ਗਂ ਯਸਸ੍ਸਿਨਂ;

ਅਲਙ੍ਕਤਂ ਹੇਮਜਾਲਾਭਿਛਨ੍ਨਂ, ਸਸਾਰਥਿਂ ਗਚ੍ਛਥ ਯੇਨਕਾਮ’’ਨ੍ਤਿ.

ਤਤ੍ਥ ਅਨ੍ਨਭਚ੍ਚਾ ਚਭਚ੍ਚਾ ਚਾਤਿ ਪੁਰਿਸਂ ਉਪਨਿਸ੍ਸਾਯ ਜੀਵਮਾਨਾ ਯਾਗੁਭਤ੍ਤਾਦਿਨਾ ਅਨ੍ਨੇਨ ਭਰਿਤਬ੍ਬਾਤਿ ਅਨ੍ਨਭਚ੍ਚਾ, ਇਤਰੇ ਤਥਾ ਅਭਰਿਤਬ੍ਬਤ੍ਤਾ ਅਭਚ੍ਚਾ. ਸਨ੍ਧਿਵਸੇਨ ਪਨੇਤ੍ਥ ਅਕਾਰਲੋਪੋ ਵੇਦਿਤਬ੍ਬੋ. ਏਤ੍ਤਾਵਤਾ ਅਤ੍ਤਾਨਂ ਉਪਨਿਸ੍ਸਾਯ ਚ ਅਨੁਪਨਿਸ੍ਸਾਯ ਚ ਜੀਵਮਾਨਵਸੇਨ ਸਬ੍ਬੇਪਿ ਸਤ੍ਤਾ ਦ੍ਵੇ ਕੋਟ੍ਠਾਸੇ ਕਤ੍ਵਾ ਦਸ੍ਸਿਤਾ ਹੋਨ੍ਤਿ. ਯੋਧ ਉਦ੍ਦਿਸ੍ਸ ਗਚ੍ਛਤੀਤਿ ਤੇਸੁ ਸਤ੍ਤੇਸੁ ਇਧ ਜੀਵਲੋਕੇ ਯੋ ਸਤ੍ਤੋ ਯਂ ਪੁਰਿਸਂ ਕਾਯਚਿਦੇਵ ਪਚ੍ਚਾਸੀਸਨਾਯ ਉਦ੍ਦਿਸ੍ਸ ਗਚ੍ਛਤਿ. ਸਬ੍ਬੇ ਤੇ ਅਪ੍ਪਟਿਕ੍ਖਿਪ੍ਪਾਤਿ ਤਥਾ ਉਦ੍ਦਿਸ੍ਸ ਗਚ੍ਛਨ੍ਤਾ ਸਚੇਪਿ ਬਹੂ ਹੋਨ੍ਤਿ, ਤਥਾਪਿ ਤੇਨ ਪੁਰਿਸੇਨ ਸਬ੍ਬੇ ਤੇ ਅਪ੍ਪਟਿਕ੍ਖਿਪ੍ਪਾ, ‘‘ਅਪੇਥ, ਨ ਵੋ ਦਸ੍ਸਾਮੀ’’ਤਿ ਏਵਂ ਨ ਪਟਿਕ੍ਖਿਪਿਤਬ੍ਬਾਤਿ ਅਤ੍ਥੋ. ਪੁਬ੍ਬਾਚਰਿਯਵਚੋ ਇਦਨ੍ਤਿ ਪੁਬ੍ਬਾਚਰਿਯਾ ਵੁਚ੍ਚਨ੍ਤਿ ਮਾਤਾਪਿਤਰੋ, ਇਦਂ ਤੇਸਂ ਵਚਨਂ. ਏਵਮਹਂ ਮਾਤਾਪਿਤੂਹਿ ਸਿਕ੍ਖਾਪਿਤੋਤਿ ਦੀਪੇਤਿ.

ਦਦਾਮਿ ਵੋ ਬ੍ਰਾਹ੍ਮਣਾ ਨਾਗਮੇਤਨ੍ਤਿ ਯਸ੍ਮਾ ਇਦਂ ਅਮ੍ਹਾਕਂ ਪੁਬ੍ਬਾਚਰਿਯਵਚੋ, ਤਸ੍ਮਾਹਂ ਬ੍ਰਾਹ੍ਮਣਾ ਤੁਮ੍ਹਾਕਂ ਇਮਂ ਨਾਗਂ ਦਦਾਮਿ. ਰਾਜਾਰਹਨ੍ਤਿ ਰਞ੍ਞੋ ਅਨੁਚ੍ਛਵਿਕਂ. ਰਾਜਭੋਗ੍ਗਨ੍ਤਿ ਰਾਜਪਰਿਭੋਗਂ. ਯਸਸ੍ਸਿਨਨ੍ਤਿ ਪਰਿਵਾਰਸਮ੍ਪਨ੍ਨਂ, ਤਂ ਕਿਰ ਹਤ੍ਥਿਂ ਨਿਸ੍ਸਾਯ ਹਤ੍ਥਿਗੋਪਕਹਤ੍ਥਿਵੇਜ੍ਜਾਦੀਨਿ ਪਞ੍ਚ ਕੁਲਸਤਾਨਿ ਜੀਵਨ੍ਤਿ, ਤੇਹਿ ਸਦ੍ਧਿਞ੍ਞੇਵ ਵੋ ਦਦਾਮੀਤਿ ਅਤ੍ਥੋ. ਅਲਙ੍ਕਤਨ੍ਤਿ ਨਾਨਾਵਿਧੇਹਿ ਹਤ੍ਥਿਅਲਙ੍ਕਾਰੇਹਿ ਅਲਙ੍ਕਤਂ. ਹੇਮਜਾਲਾਭਿਛਨ੍ਨਨ੍ਤਿ ਸੁਵਣ੍ਣਜਾਲੇਨ ਅਭਿਚ੍ਛਨ੍ਨਂ. ਸਸਾਰਥਿਨ੍ਤਿ ਯੋ ਪਨਸ੍ਸ ਸਾਰਥਿ ਹਤ੍ਥਿਗੋਪਕੋ ਆਚਰਿਯੋ, ਤੇਨ ਸਦ੍ਧਿਂਯੇਵ ਦਦਾਮਿ, ਤਸ੍ਮਾ ਸਸਾਰਥਿ ਹੁਤ੍ਵਾ ਤੁਮ੍ਹੇ ਸਪਰਿਵਾਰਂ ਇਮਂ ਨਾਗਂ ਗਹੇਤ੍ਵਾ ਯੇਨਕਾਮਂ ਗਚ੍ਛਥਾਤਿ.

ਏਵਂ ਹਤ੍ਥਿਕ੍ਖਨ੍ਧਵਰਗਤੋਵ ਮਹਾਸਤ੍ਤੋ ਵਾਚਾਯ ਦਤ੍ਵਾ ਪੁਨ ਹਤ੍ਥਿਕ੍ਖਨ੍ਧਾ ਓਰੁਯ੍ਹ ‘‘ਸਚੇ ਅਨਲਙ੍ਕਤਟ੍ਠਾਨਂ ਅਤ੍ਥਿ, ਅਲਙ੍ਕਰਿਤ੍ਵਾ ਦਸ੍ਸਾਮੀ’’ਤਿ ਵਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਰੋਨ੍ਤੋ ਉਪਧਾਰੇਤ੍ਵਾ ਅਨਲਙ੍ਕਤਟ੍ਠਾਨਂ ਅਦਿਸ੍ਵਾ ਤਸ੍ਸ ਸੋਣ੍ਡਂ ਬ੍ਰਾਹ੍ਮਣਾਨਂ ਹਤ੍ਥੇਸੁ ਠਪੇਤ੍ਵਾ ਸੁਵਣ੍ਣਭਿਙ੍ਕਾਰੇਨ ਪੁਪ੍ਫਗਨ੍ਧਵਾਸਿਤਂ ਉਦਕਂ ਪਾਤੇਤ੍ਵਾ ਅਦਾਸਿ. ਬ੍ਰਾਹ੍ਮਣਾ ਸਪਰਿਵਾਰਂ ਨਾਗਂ ਸਮ੍ਪਟਿਚ੍ਛਿਤ੍ਵਾ ਹਤ੍ਥਿਪਿਟ੍ਠੇ ਨਿਸਿਨ੍ਨਾ ਦਨ੍ਤਪੁਰਂ ਗਨ੍ਤ੍ਵਾ ਹਤ੍ਥਿਂ ਰਞ੍ਞੋ ਅਦਂਸੁ, ਹਤ੍ਥਿਮ੍ਹਿ ਆਗਤੇਪਿ ਦੇਵੋ ਨ ਵਸ੍ਸਤੇਵ. ਰਾਜਾ ‘‘ਕਿਂ ਨੁ ਖੋ ਕਾਰਣ’’ਨ੍ਤਿ ਉਤ੍ਤਰਿਂ ਪੁਚ੍ਛਨ੍ਤੋ ‘‘ਧਨਞ੍ਚਯਕੋਰਬ੍ਯਰਾਜਾ ਕੁਰੁਧਮ੍ਮਂ ਰਕ੍ਖਤਿ, ਤੇਨਸ੍ਸ ਰਟ੍ਠੇ ਅਨ੍ਵਡ੍ਢਮਾਸਂ ਅਨੁਦਸਾਹਂ ਦੇਵੋ ਵਸ੍ਸਤਿ, ਰਞ੍ਞੋ ਗੁਣਾਨੁਭਾਵੋ ਚੇਸ, ਇਮਸ੍ਸ ਪਨ ਤਿਰਚ੍ਛਾਨਗਤਸ੍ਸ ਗੁਣਾ ਹੋਨ੍ਤਾਪਿ ਕਿਤ੍ਤਕਾ ਭਵੇਯ੍ਯੁ’’ਨ੍ਤਿ ਸੁਤ੍ਵਾ ‘‘ਤੇਨ ਹਿ ਯਥਾਲਙ੍ਕਤਮੇਵ ਸਪਰਿਵਾਰਂ ਹਤ੍ਥਿਂ ਪਤਿਨੇਤ੍ਵਾ ਰਞ੍ਞੋ ਦਤ੍ਵਾ ਯਂ ਸੋ ਕੁਰੁਧਮ੍ਮਂ ਰਕ੍ਖਤਿ, ਤਂ ਸੁਵਣ੍ਣਪਟ੍ਟੇ ਲਿਖਿਤ੍ਵਾ ਆਨੇਥਾ’’ਤਿ ਬ੍ਰਾਹ੍ਮਣੇ ਚ ਅਮਚ੍ਚੇ ਚ ਪੇਸੇਸਿ. ਤੇ ਗਨ੍ਤ੍ਵਾ ਰਞ੍ਞੋ ਹਤ੍ਥਿਂ ਨਿਯ੍ਯਾਦੇਤ੍ਵਾ ‘‘ਦੇਵ, ਇਮਸ੍ਮਿਂ ਹਤ੍ਥਿਮ੍ਹਿ ਗਤੇਪਿ ਅਮ੍ਹਾਕਂ ਰਟ੍ਠੇ ਦੇਵੋ ਨ ਵਸ੍ਸਤਿ, ਤੁਮ੍ਹੇ ਕਿਰ ਕੁਰੁਧਮ੍ਮਂ ਨਾਮ ਰਕ੍ਖਥ, ਅਮ੍ਹਾਕਮ੍ਪਿ ਰਾਜਾ ਤਂ ਰਕ੍ਖਿਤੁਕਾਮੋ ਇਮਸ੍ਮਿਂ ਸੁਵਣ੍ਣਪਟ੍ਟੇ ਲਿਖਿਤ੍ਵਾ ਆਨੇਥਾ’’ਤਿ ਪੇਸੇਸਿ. ‘‘ਦੇਥ ਨੋ ਕੁਰੁਧਮ੍ਮ’’ਨ੍ਤਿ. ‘‘ਤਾਤਾ, ਸਚ੍ਚਾਹਂ ਏਤਂ ਕੁਰੁਧਮ੍ਮਂ ਰਕ੍ਖਾਮਿ, ਇਦਾਨਿ ਪਨ ਮੇ ਤਤ੍ਥ ਕੁਕ੍ਕੁਚ੍ਚਂ ਅਤ੍ਥਿ, ਨ ਮੇ ਸੋ ਕੁਰੁਧਮ੍ਮੋ ਚਿਤ੍ਤਂ ਆਰਾਧੇਤਿ, ਤਸ੍ਮਾ ਤੁਮ੍ਹਾਕਂ ਦਾਤੁਂ ਨ ਸਕ੍ਕਾ’’ਤਿ.

ਕਸ੍ਮਾ ਪਨ ਤਂ ਸੀਲਂ ਰਾਜਾਨਂ ਨ ਆਰਾਧੇਤੀਤਿ? ਤਦਾ ਕਿਰ ਰਾਜੂਨਂ ਤਤਿਯੇ ਤਤਿਯੇ ਸਂਵਚ੍ਛਰੇ ਕਤ੍ਤਿਕਮਾਸੇ ਪਵਤ੍ਤੋ ਛਣੋ ਨਾਮ ਹੋਤਿ, ਤਂ ਛਣਂ ਕੀਲ਼ਨ੍ਤਾ ਰਾਜਾਨੋ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਦੇਵਵੇਸਂ ਗਹੇਤ੍ਵਾ ਚਿਤ੍ਤਰਾਜਸ੍ਸ ਨਾਮ ਯਕ੍ਖਸ੍ਸ ਸਨ੍ਤਿਕੇ ਠਤ੍ਵਾ ਚਤੁਦ੍ਦਿਸਾ ਪੁਪ੍ਫਪਟਿਮਣ੍ਡਿਤੇ ਚਿਤ੍ਤਸਰੇ ਖਿਪਨ੍ਤਿ. ਅਯਮ੍ਪਿ ਰਾਜਾ ਤਂ ਖਣਂ ਕੀਲ਼ਨ੍ਤੋ ਏਕਿਸ੍ਸਾ ਤਲ਼ਾਕਪਾਲ਼ਿਯਾ ਚਿਤ੍ਤਰਾਜਸ੍ਸ ਯਕ੍ਖਸ੍ਸ ਸਨ੍ਤਿਕੇ ਠਤ੍ਵਾ ਚਤੁਦ੍ਦਿਸਾ ਚਿਤ੍ਤਸਰੇ ਖਿਪਿਤ੍ਵਾ ਤੇਸੁ ਸੇਸਦਿਸਾਗਤੇ ਤਯੋ ਸਰੇ ਦਿਸ੍ਵਾ ਉਦਕਪਿਟ੍ਠੇ ਖਿਤ੍ਤਸਰਂ ਨ ਅਦ੍ਦਸ. ਰਞ੍ਞੋ ‘‘ਕਚ੍ਚਿ ਨੁ ਖੋ ਮਯਾ ਖਿਤ੍ਤੋ ਸਰੋ ਮਚ੍ਛਸਰੀਰੇ ਪਤਿਤੋ’’ਤਿ ਕੁਕ੍ਕੁਚ੍ਚਂ ਅਹੋਸਿ ਪਾਣਾਤਿਪਾਤਕਮ੍ਮੇਨ ਸੀਲਭੇਦਂ ਆਰਬ੍ਭ, ਤਸ੍ਮਾ ਸੀਲਂ ਨ ਆਰਾਧੇਤਿ. ਸੋ ਏਵਮਾਹ – ‘‘ਤਾਤਾ, ਮਯ੍ਹਂ ਕੁਰੁਧਮ੍ਮੇ ਕੁਕ੍ਕੁਚ੍ਚਂ ਅਤ੍ਥਿ, ਮਾਤਾ ਪਨ ਮੇ ਸੁਰਕ੍ਖਿਤਂ ਰਕ੍ਖਤਿ, ਤਸ੍ਸਾ ਸਨ੍ਤਿਕੇ ਗਣ੍ਹਥਾ’’ਤਿ. ‘‘ਮਹਾਰਾਜ, ਤੁਮ੍ਹਾਕਂ ‘ਪਾਣਂ ਵਧਿਸ੍ਸਾਮੀ’ਤਿ ਚੇਤਨਾ ਨਤ੍ਥਿ, ਤਂ ਵਿਨਾ ਪਾਣਾਤਿਪਾਤੋ ਨਾਮ ਨ ਹੋਤਿ, ਦੇਥ ਨੋ ਅਤ੍ਤਨਾ ਰਕ੍ਖਿਤਂ ਕੁਰੁਧਮ੍ਮ’’ਨ੍ਤਿ. ‘‘ਤੇਨ ਹਿ ਲਿਖਥਾ’’ਤਿ ਸੁਵਣ੍ਣਪਟ੍ਟੇ ਲਿਖਾਪੇਸਿ – ‘‘ਪਾਣੋ ਨ ਹਨ੍ਤਬ੍ਬੋ, ਅਦਿਨ੍ਨਂ ਨਾਦਾਤਬ੍ਬਂ, ਕਾਮੇਸੁ ਮਿਚ੍ਛਾ ਨ ਚਰਿਤਬ੍ਬਂ, ਮੁਸਾ ਨ ਭਣਿਤਬ੍ਬਂ, ਮਜ੍ਜਂ ਨ ਪਾਤਬ੍ਬ’’ਨ੍ਤਿ ਲਿਖਾਪੇਤ੍ਵਾ ਚ ਪਨ ‘‘ਏਵਂ ਸਨ੍ਤੇਪਿ ਨੇਵ ਮਂ ਆਰਾਧੇਤਿ, ਮਾਤੁ ਮੇ ਸਨ੍ਤਿਕੇ ਗਣ੍ਹਥਾ’’ਤਿ ਆਹ.

ਦੂਤਾ ਰਾਜਾਨਂ ਵਨ੍ਦਿਤ੍ਵਾ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ‘‘ਦੇਵਿ, ਤੁਮ੍ਹੇ ਕਿਰ ਕੁਰੁਧਮ੍ਮਂ ਰਕ੍ਖਥ, ਤਂ ਨੋ ਦੇਥਾ’’ਤਿ ਵਦਿਂਸੁ. ‘‘ਤਾਤਾ, ਸਚ੍ਚਾਹਂ ਕੁਰੁਧਮ੍ਮਂ ਰਕ੍ਖਾਮਿ, ਇਦਾਨਿ ਪਨ ਮੇ ਤਤ੍ਥ ਕੁਕ੍ਕੁਚ੍ਚਂ ਉਪ੍ਪਨ੍ਨਂ, ਨ ਮੇ ਸੋ ਕੁਰੁਧਮ੍ਮੋ ਆਰਾਧੇਤਿ ਤੇਨ ਵੋ ਦਾਤੁਂ ਨ ਸਕ੍ਕਾ’’ਤਿ. ਤਸ੍ਸਾ ਕਿਰ ਦ੍ਵੇ ਪੁਤ੍ਤਾ ਜੇਟ੍ਠੋ ਰਾਜਾ, ਕਨਿਟ੍ਠੋ ਉਪਰਾਜਾ. ਅਥੇਕੋ ਰਾਜਾ ਬੋਧਿਸਤ੍ਤਸ੍ਸ ਸਤਸਹਸ੍ਸਗ੍ਘਨਕਂ ਚਨ੍ਦਨਸਾਰਂ ਸਹਸ੍ਸਗ੍ਘਨਕਂ ਕਞ੍ਚਨਮਾਲਂ ਪੇਸੇਸਿ. ਸੋ ‘‘ਮਾਤਰਂ ਪੂਜੇਸ੍ਸਾਮੀ’’ਤਿ ਤਂ ਸਬ੍ਬਂ ਮਾਤੁ ਪੇਸੇਸਿ. ਸਾ ਚਿਨ੍ਤੇਸਿ – ‘‘ਅਹਂ ਨੇਵ ਚਨ੍ਦਨਂ ਵਿਲਿਮ੍ਪਾਮਿ, ਨ ਮਾਲਂ ਧਾਰੇਮਿ, ਸੁਣਿਸਾਨਂ ਦਸ੍ਸਾਮੀ’’ਤਿ. ਅਥਸ੍ਸਾ ਏਤਦਹੋਸਿ – ‘‘ਜੇਟ੍ਠਸੁਣਿਸਾ ਮੇ ਇਸ੍ਸਰਾ, ਅਗ੍ਗਮਹੇਸਿਟ੍ਠਾਨੇ ਠਿਤਾ, ਤਸ੍ਸਾ ਸੁਵਣ੍ਣਮਾਲਂ ਦਸ੍ਸਾਮਿ. ਕਨਿਟ੍ਠਸੁਣਿਸਾ ਪਨ ਦੁਗ੍ਗਤਾ, ਤਸ੍ਸਾ ਚਨ੍ਦਨਸਾਰਂ ਦਸ੍ਸਾਮੀ’’ਤਿ. ਸਾ ਰਞ੍ਞੋ ਦੇਵਿਯਾ ਸੁਵਣ੍ਣਮਾਲਂ ਦਤ੍ਵਾ ਉਪਰਾਜਭਰਿਯਾਯ ਚਨ੍ਦਨਸਾਰਂ ਅਦਾਸਿ, ਦਤ੍ਵਾ ਚ ਪਨਸ੍ਸਾ ‘‘ਅਹਂ ਕੁਰੁਧਮ੍ਮਂ ਰਕ੍ਖਾਮਿ, ਏਤਾਸਂ ਦੁਗ੍ਗਤਾਦੁਗ੍ਗਤਭਾਵੋ ਮਯ੍ਹਂ ਅਪ੍ਪਮਾਣਂ, ਜੇਟ੍ਠਾਪਚਾਯਿਕਕਮ੍ਮਮੇਵ ਪਨ ਕਾਤੁਂ ਮਯ੍ਹਂ ਅਨੁਰੂਪਂ, ਕਚ੍ਚਿ ਨੁ ਖੋ ਮੇ ਤਸ੍ਸ ਅਕਤਤ੍ਤਾ ਸੀਲਂ ਭਿਨ੍ਨ’’ਨ੍ਤਿ ਕੁਕ੍ਕੁਚ੍ਚਂ ਅਹੋਸਿ, ਤਸ੍ਮਾ ਏਵਮਾਹ. ਅਥ ਨਂ ਦੂਤਾ ‘‘ਅਤ੍ਤਨੋ ਸਨ੍ਤਕਂ ਨਾਮ ਯਥਾਰੁਚਿਯਾ ਦੀਯਤਿ, ਤੁਮ੍ਹੇ ਏਤ੍ਤਕੇਨਪਿ ਕੁਕ੍ਕੁਚ੍ਚਂ ਕੁਰੁਮਾਨਾ ਕਿਂ ਅਞ੍ਞਂ ਪਾਪਂ ਕਰਿਸ੍ਸਥ, ਸੀਲਂ ਨਾਮ ਏਵਰੂਪੇਨ ਨ ਭਿਜ੍ਜਤਿ, ਦੇਥ ਨੋ ਕੁਰੁਧਮ੍ਮ’’ਨ੍ਤਿ ਵਤ੍ਵਾ ਤਸ੍ਸਾਪਿ ਸਨ੍ਤਿਕੇ ਗਹੇਤ੍ਵਾ ਸੁਵਣ੍ਣਪਟ੍ਟੇ ਲਿਖਿਂਸੁ.

‘‘ਤਾਤਾ, ਏਵਂ ਸਨ੍ਤੇਪਿ ਨੇਵ ਮਂ ਆਰਾਧੇਤਿ, ਸੁਣਿਸਾ ਪਨ ਮੇ ਸੁਟ੍ਠੁ ਰਕ੍ਖਤਿ, ਤਸ੍ਸਾ ਸਨ੍ਤਿਕੇ ਗਣ੍ਹਥਾ’’ਤਿ ਵੁਤ੍ਤਾ ਚ ਪਨ ਅਗ੍ਗਮਹੇਸਿਂ ਉਪਸਙ੍ਕਮਿਤ੍ਵਾ ਪੁਰਿਮਨਯੇਨੇਵ ਕੁਰੁਧਮ੍ਮਂ ਯਾਚਿਂਸੁ. ਸਾਪਿ ਪੁਰਿਮਨਯੇਨੇਵ ਵਤ੍ਵਾ ‘‘ਇਦਾਨਿ ਮਂ ਸੀਲਂ ਨਾਰਾਧੇਤਿ, ਤੇਨ ਵੋ ਦਾਤੁਂ ਨ ਸਕ੍ਕਾ’’ਤਿ ਆਹ. ਸਾ ਕਿਰ ਏਕਦਿਵਸਂ ਸੀਹਪਞ੍ਜਰੇ ਠਿਤਾ ਰਞ੍ਞੋ ਨਗਰਂ ਪਦਕ੍ਖਿਣਂ ਕਰੋਨ੍ਤਸ੍ਸ ਪਚ੍ਛਤੋ ਹਤ੍ਥਿਪਿਟ੍ਠੇ ਨਿਸਿਨ੍ਨਂ ਉਪਰਾਜਂ ਦਿਸ੍ਵਾ ਲੋਭਂ ਉਪ੍ਪਾਦੇਤ੍ਵਾ ‘‘ਸਚਾਹਂ ਇਮਿਨਾ ਸਦ੍ਧਿਂ ਸਨ੍ਥਵਂ ਕਰੇਯ੍ਯਂ, ਭਾਤੁ ਅਚ੍ਚਯੇਨ ਰਜ੍ਜੇ ਪਤਿਟ੍ਠਿਤੋ ਮਂ ਏਸ ਸਙ੍ਗਣ੍ਹੇਯ੍ਯਾ’’ਤਿ ਚਿਨ੍ਤੇਸਿ. ਅਥਸ੍ਸਾ ‘‘ਅਹਂ ਕੁਰੁਧਮ੍ਮਂ ਰਕ੍ਖਮਾਨਾ ਸਸਾਮਿਕਾ ਹੁਤ੍ਵਾ ਕਿਲੇਸਵਸੇਨ ਅਞ੍ਞਂ ਪੁਰਿਸਂ ਓਲੋਕੇਸਿਂ, ਸੀਲੇਨ ਮੇ ਭਿਨ੍ਨੇਨ ਭਵਿਤਬ੍ਬ’’ਨ੍ਤਿ ਕੁਕ੍ਕੁਚ੍ਚਂ ਅਹੋਸਿ, ਤਸ੍ਮਾ ਏਵਮਾਹ. ਅਥ ਨਂ ਦੂਤਾ ‘‘ਅਤਿਚਾਰੋ ਨਾਮ ਅਯ੍ਯੇ ਚਿਤ੍ਤੁਪ੍ਪਾਦਮਤ੍ਤੇਨ ਨ ਹੋਤਿ, ਤੁਮ੍ਹੇ ਏਤ੍ਤਕੇਨਪਿ ਕੁਕ੍ਕੁਚ੍ਚਂ ਕੁਰੁਮਾਨਾ ਵੀਤਿਕ੍ਕਮਂ ਕਿਂਕਰਿਸ੍ਸਥ, ਨ ਏਤ੍ਤਕੇਨ ਸੀਲਂ ਭਿਜ੍ਜਤਿ, ਦੇਥ ਨੋ ਕੁਰੁਧਮ੍ਮ’’ਨ੍ਤਿ ਵਤ੍ਵਾ ਤਸ੍ਸਾਪਿ ਸਨ੍ਤਿਕੇ ਗਹੇਤ੍ਵਾ ਸੁਵਣ੍ਣਪਟ੍ਟੇ ਲਿਖਿਂਸੁ.

‘‘ਤਾਤਾ, ਏਵਂ ਸਨ੍ਤੇਪਿ ਨੇਵ ਮਂ ਆਰਾਧੇਤਿ, ਉਪਰਾਜਾ ਪਨ ਸੁਟ੍ਠੁ ਰਕ੍ਖਤਿ, ਤਸ੍ਸ ਸਨ੍ਤਿਕੇ ਗਣ੍ਹਥਾ’’ਤਿ ਵੁਤ੍ਤਾ ਚ ਪਨ ਉਪਰਾਜਾਨਂ ਉਪਸਙ੍ਕਮਿਤ੍ਵਾ ਪੁਰਿਮਨਯੇਨੇਵ ਕੁਰੁਧਮ੍ਮਂ ਯਾਚਿਂਸੁ. ਸੋ ਪਨ ਸਾਯਂ ਰਾਜੁਪਟ੍ਠਾਨਂ ਗਚ੍ਛਨ੍ਤੋ ਰਥੇਨੇਵ ਰਾਜਙ੍ਗਣਂ ਪਤ੍ਵਾ ਸਚੇ ਰਞ੍ਞੋ ਸਨ੍ਤਿਕੇ ਭੁਞ੍ਜਿਤ੍ਵਾ ਤਤ੍ਥੇਵ ਸਯਿਤੁਕਾਮੋ ਹੋਤਿ, ਰਸ੍ਮਿਯੋ ਚ ਪਤੋਦਞ੍ਚ ਅਨ੍ਤੋਧੁਰੇ ਛਡ੍ਡੇਤਿ. ਤਾਯ ਸਞ੍ਞਾਯ ਜਨੋ ਪਕ੍ਕਮਿਤ੍ਵਾ ਪੁਨਦਿਵਸੇ ਪਾਤੋਵ ਗਨ੍ਤ੍ਵਾ ਤਸ੍ਸ ਨਿਕ੍ਖਮਨਂ ਓਲੋਕੇਨ੍ਤੋਵ ਤਿਟ੍ਠਤਿ. ਸਾਰਥਿਪਿ ਰਥਂ ਗੋਪਯਿਤ੍ਵਾ ਪੁਨਦਿਵਸੇ ਪਾਤੋਵ ਤਂ ਆਦਾਯ ਰਾਜਦ੍ਵਾਰੇ ਤਿਟ੍ਠਤਿ. ਸਚੇ ਤਙ੍ਖਣਞ੍ਞੇਵ ਨਿਕ੍ਖਨ੍ਤੁਕਾਮੋ ਹੋਤਿ, ਰਸ੍ਮਿਯੋ ਚ ਪਤੋਦਞ੍ਚ ਅਨ੍ਤੋਰਥੇਯੇਵ ਠਪੇਤ੍ਵਾ ਰਾਜੁਪਟ੍ਠਾਨਂ ਗਚ੍ਛਤਿ. ਮਹਾਜਨੋ ਤਾਯ ਸਞ੍ਞਾਯ ‘‘ਇਦਾਨੇਵ ਨਿਕ੍ਖਮਿਸ੍ਸਤੀ’’ਤਿ ਰਾਜਦ੍ਵਾਰੇਯੇਵ ਤਿਟ੍ਠਤਿ. ਸੋ ਏਕਦਿਵਸਂ ਏਵਂ ਕਤ੍ਵਾ ਰਾਜਨਿਵੇਸਨਂ ਪਾਵਿਸਿ, ਪਵਿਟ੍ਠਮਤ੍ਤਸ੍ਸਯੇਵਸ੍ਸ ਦੇਵੋ ਪਾਵਸ੍ਸਿ. ਰਾਜਾ ‘‘ਦੇਵੋ ਵਸ੍ਸਤੀ’’ਤਿ ਤਸ੍ਸ ਨਿਕ੍ਖਨ੍ਤੁਂ ਨਾਦਾਸਿ, ਸੋ ਤਤ੍ਥੇਵ ਭੁਞ੍ਜਿਤ੍ਵਾ ਸਯਿ. ਮਹਾਜਨੋ ‘‘ਇਦਾਨਿ ਨਿਕ੍ਖਮਿਸ੍ਸਤੀ’’ਤਿ ਸਬ੍ਬਰਤ੍ਤਿਂ ਤੇਮੇਨ੍ਤੋ ਅਟ੍ਠਾਸਿ. ਉਪਰਾਜਾ ਦੁਤਿਯਦਿਵਸੇ ਨਿਕ੍ਖਮਿਤ੍ਵਾ ਤੇਮੇਤ੍ਵਾ ਠਿਤਂ ਮਹਾਜਨਂ ਦਿਸ੍ਵਾ ‘‘ਅਹਂ ਕੁਰੁਧਮ੍ਮਂ ਰਕ੍ਖਨ੍ਤੋ ਏਤ੍ਤਕਂ ਜਨਂ ਕਿਲਮੇਸਿਂ, ਸੀਲੇਨ ਮੇ ਭਿਨ੍ਨੇਨ ਭਵਿਤਬ੍ਬ’’ਨ੍ਤਿ ਕੁਕ੍ਕੁਚ੍ਚਂ ਅਹੋਸਿ, ਤੇਨ ਤੇਸਂ ਦੂਤਾਨਂ ‘‘ਸਚ੍ਚਾਹਂ ਕੁਰੁਧਮ੍ਮਂ ਰਕ੍ਖਾਮਿ, ਇਦਾਨਿ ਪਨ ਮੇ ਕੁਕ੍ਕੁਚ੍ਚਂ ਅਤ੍ਥਿ, ਤੇਨ ਵੋ ਨ ਸਕ੍ਕਾ ਦਾਤੁ’’ਨ੍ਤਿ ਵਤ੍ਵਾ ਤਮਤ੍ਥਂ ਆਰੋਚੇਸਿ. ਅਥ ਨਂ ਦੂਤਾ ‘‘ਤੁਮ੍ਹਾਕਂ, ਦੇਵ, ‘ਏਤੇ ਕਿਲਮਨ੍ਤੂ’ਤਿ ਚਿਤ੍ਤਂ ਨਤ੍ਥਿ, ਅਚੇਤਨਕਂ ਕਮ੍ਮਂ ਨ ਹੋਤਿ, ਏਤ੍ਤਕੇਨਪਿ ਕੁਕ੍ਕੁਚ੍ਚਂ ਕਰੋਨ੍ਤਾਨਂ ਕਥਂ ਤੁਮ੍ਹਾਕਂ ਵੀਤਿਕ੍ਕਮੋ ਭਵਿਸ੍ਸਤੀ’’ਤਿ ਵਤ੍ਵਾ ਤਸ੍ਸਪਿ ਸਨ੍ਤਿਕੇ ਸੀਲਂ ਗਹੇਤ੍ਵਾ ਸੁਵਣ੍ਣਪਟ੍ਟੇ ਲਿਖਿਂਸੁ.

‘‘ਏਵਂ ਸਨ੍ਤੇਪਿ ਨੇਵ ਮਂ ਆਰਾਧੇਤਿ, ਪੁਰੋਹਿਤੋ ਪਨ ਸੁਟ੍ਠੁ ਰਕ੍ਖਤਿ, ਤਸ੍ਸ ਸਨ੍ਤਿਕੇ ਗਣ੍ਹਥਾ’’ਤਿ ਵੁਤ੍ਤਾ ਚ ਪਨ ਪੁਰੋਹਿਤਂ ਉਪਸਙ੍ਕਮਿਤ੍ਵਾ ਯਾਚਿਂਸੁ. ਸੋਪਿ ਏਕਦਿਵਸਂ ਰਾਜੁਪਟ੍ਠਾਨਂ ਗਚ੍ਛਨ੍ਤੋ ਏਕੇਨ ਰਞ੍ਞਾ ਤਸ੍ਸ ਰਞ੍ਞੋ ਪੇਸਿਤਂ ਤਰੁਣਰਵਿਵਣ੍ਣਂ ਰਥਂ ਅਨ੍ਤਰਾਮਗ੍ਗੇ ਦਿਸ੍ਵਾ ‘‘ਕਸ੍ਸਾਯਂ ਰਥੋ’’ਤਿ ਪੁਚ੍ਛਿਤ੍ਵਾ ‘‘ਰਞ੍ਞੋ ਆਭਤੋ’’ਤਿ ਸੁਤ੍ਵਾ ‘‘ਅਹਂ ਮਹਲ੍ਲਕੋ, ਸਚੇ ਮੇ ਰਾਜਾ ਇਮਂ ਰਥਂ ਦਦੇਯ੍ਯ, ਸੁਖਂ ਇਮਂ ਆਰੁਯ੍ਹ ਵਿਚਰੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਰਾਜੁਪਟ੍ਠਾਨਂ ਗਤੋ. ਤਸ੍ਸ ਜਯਾਪੇਤ੍ਵਾ ਠਿਤਕਾਲੇ ਰਞ੍ਞੋ ਰਥਂ ਦਸ੍ਸੇਸੁਂ. ਰਾਜਾ ਦਿਸ੍ਵਾ ‘‘ਅਤਿ ਵਿਯ ਸੁਨ੍ਦਰੋ ਅਯਂ ਰਥੋ, ਆਚਰਿਯਸ੍ਸ ਨਂ ਦੇਥਾ’’ਤਿ ਆਹ. ਪੁਰੋਹਿਤੋ ਨ ਇਚ੍ਛਿ, ਪੁਨਪ੍ਪੁਨਂ ਵੁਚ੍ਚਮਾਨੋਪਿ ਨ ਇਚ੍ਛਿਯੇਵ. ਕਿਂਕਾਰਣਾ? ਏਵਂ ਕਿਰਸ੍ਸ ਅਹੋਸਿ – ‘‘ਅਹਂ ਕੁਰੁਧਮ੍ਮਂ ਰਕ੍ਖਨ੍ਤੋਵ ਪਰਸਨ੍ਤਕੇ ਲੋਭਂ ਅਕਾਸਿਂ, ਭਿਨ੍ਨੇਨ ਮੇ ਸੀਲੇਨ ਭਵਿਤਬ੍ਬ’’ਨ੍ਤਿ. ਸੋ ਏਤਮਤ੍ਥਂ ਆਚਿਕ੍ਖਿਤ੍ਵਾ ‘‘ਤਾਤਾ, ਕੁਰੁਧਮ੍ਮੇ ਮੇ ਕੁਕ੍ਕੁਚ੍ਚਂ ਅਤ੍ਥਿ, ਨ ਮਂ ਸੋ ਧਮ੍ਮੋ ਆਰਾਧੇਤਿ, ਤਸ੍ਮਾ ਨ ਸਕ੍ਕਾ ਦਾਤੁ’’ਨ੍ਤਿ ਆਹ. ਅਥ ਨਂ ਦੂਤਾ ‘‘ਅਯ੍ਯ, ਲੋਭੁਪ੍ਪਾਦਮਤ੍ਤੇਨ ਨ ਸੀਲਂ ਭਿਜ੍ਜਤਿ, ਤੁਮ੍ਹੇ ਏਤ੍ਤਕੇਨਪਿ ਕੁਕ੍ਕੁਚ੍ਚਂ ਕਰੋਨ੍ਤਾ ਕਿਂ ਵੀਤਿਕ੍ਕਮਂ ਕਰਿਸ੍ਸਥਾ’’ਤਿ ਵਤ੍ਵਾ ਤਸ੍ਸਪਿ ਸਨ੍ਤਿਕੇ ਸੀਲਂ ਗਹੇਤ੍ਵਾ ਸੁਵਣ੍ਣਪਟ੍ਟੇ ਲਿਖਿਂਸੁ.

‘‘ਏਵਂ ਸਨ੍ਤੇਪਿ ਨੇਵ ਮਂ ਆਰਾਧੇਤਿ, ਰਜ੍ਜੁਗਾਹਕੋ ਅਮਚ੍ਚੋ ਪਨ ਸੁਟ੍ਠੁ ਰਕ੍ਖਤਿ, ਤਸ੍ਸ ਸਨ੍ਤਿਕੇ ਗਣ੍ਹਥਾ’’ਤਿ ਵੁਤ੍ਤਾ ਚ ਪਨ ਤਮ੍ਪਿ ਉਪਸਙ੍ਕਮਿਤ੍ਵਾ ਯਾਚਿਂਸੁ. ਸੋਪਿ ਏਕਦਿਵਸਂ ਜਨਪਦੇ ਖੇਤ੍ਤਂ ਮਿਨਨ੍ਤੋ ਰਜ੍ਜੁਂ ਦਣ੍ਡਕੇ ਬਨ੍ਧਿਤ੍ਵਾ ਏਕਂ ਕੋਟਿਂ ਖੇਤ੍ਤਸਾਮਿਕੇਨ ਗਣ੍ਹਾਪੇਤ੍ਵਾ ਏਕਂ ਅਤ੍ਤਨਾ ਅਗ੍ਗਹੇਸਿ, ਤੇਨ ਗਹਿਤਰਜ੍ਜੁਕੋਟਿਯਾ ਬਦ੍ਧਦਣ੍ਡਕੋ ਏਕਸ੍ਸ ਕਕ੍ਕਟਕਸ੍ਸ ਬਿਲਮਜ੍ਝਂ ਪਾਪੁਣਿ. ਸੋ ਚਿਨ੍ਤੇਸਿ – ‘‘ਸਚੇ ਦਣ੍ਡਕਂ ਬਿਲੇ ਓਤਾਰੇਸ੍ਸਾਮਿ, ਅਨ੍ਤੋਬਿਲੇ ਕਕ੍ਕਟਕੋ ਨਸ੍ਸਿਸ੍ਸਤਿ. ਸਚੇ ਪਨ ਪਰਤੋ ਕਰਿਸ੍ਸਾਮਿ, ਰਞ੍ਞੋ ਸਨ੍ਤਕਂ ਨਸ੍ਸਿਸ੍ਸਤਿ. ਸਚੇ ਓਰਤੋ ਕਰਿਸ੍ਸਾਮਿ, ਕੁਟੁਮ੍ਬਿਕਸ੍ਸ ਸਨ੍ਤਕਂ ਨਸ੍ਸਿਸ੍ਸਤਿ, ਕਿਂ ਨੁ ਖੋ ਕਾਤਬ੍ਬ’’ਨ੍ਤਿ? ਅਥਸ੍ਸ ਏਤਦਹੋਸਿ – ‘‘ਬਿਲੇ ਕਕ੍ਕਟਕੇਨ ਭਵਿਤਬ੍ਬਂ, ਸਚੇ ਭਵੇਯ੍ਯ, ਪਞ੍ਞਾਯੇਯ੍ਯ, ਏਤ੍ਥੇਵ ਨਂ ਓਤਾਰੇਸ੍ਸਾਮੀ’’ਤਿ ਬਿਲੇ ਦਣ੍ਡਕਂ ਓਤਾਰੇਸਿ, ਕਕ੍ਕਟਕੋ ‘‘ਕਿਰੀ’’ਤਿ ਸਦ੍ਦਮਕਾਸਿ. ਅਥਸ੍ਸ ਏਤਦਹੋਸਿ – ‘‘ਦਣ੍ਡਕੋ ਕਕ੍ਕਟਕਪਿਟ੍ਠੇ ਓਤਿਣ੍ਣੋ ਭਵਿਸ੍ਸਤਿ, ਕਕ੍ਕਟਕੋ ਮਤੋ ਭਵਿਸ੍ਸਤਿ, ਅਹਞ੍ਚ ਕੁਰੁਧਮ੍ਮਂ ਰਕ੍ਖਾਮਿ, ਤੇਨ ਮੇ ਸੀਲੇਨ ਭਿਨ੍ਨੇਨ ਭਵਿਤਬ੍ਬ’’ਨ੍ਤਿ. ਸੋ ਏਤਮਤ੍ਥਂ ਆਚਿਕ੍ਖਿਤ੍ਵਾ ‘‘ਇਮਿਨਾ ਮੇ ਕਾਰਣੇਨ ਕੁਰੁਧਮ੍ਮੇ ਕੁਕ੍ਕੁਚ੍ਚਂ ਅਤ੍ਥਿ, ਤੇਨ ਵੋ ਨ ਸਕ੍ਕਾ ਦਾਤੁ’’ਨ੍ਤਿ ਆਹ. ਅਥ ਨਂ ਦੂਤਾ ‘‘ਤੁਮ੍ਹਾਕਂ ‘ਕਕ੍ਕਟਕੋ ਮਰਤੂ’ਤਿ ਚਿਤ੍ਤਂ ਨਤ੍ਥਿ, ਅਚੇਤਨਕਂ ਕਮ੍ਮਂ ਨਾਮ ਨ ਹੋਤਿ. ਤੁਮ੍ਹੇ ਏਤ੍ਤਕੇਨਪਿ ਕੁਕ੍ਕੁਚ੍ਚਂ ਕਰੋਨ੍ਤਾ ਕਿਂ ਵੀਤਿਕ੍ਕਮਂ ਕਰਿਸ੍ਸਥਾ’’ਤਿ ਵਤ੍ਵਾ ਤਸ੍ਸਪਿ ਸਨ੍ਤਿਕੇ ਸੀਲਂ ਗਹੇਤ੍ਵਾ ਸੁਵਣ੍ਣਪਟ੍ਟੇ ਲਿਖਿਂਸੁ.

‘‘ਏਵਂ ਸਨ੍ਤੇਪਿ ਨੇਵ ਮਂ ਆਰਾਧੇਤਿ, ਸਾਰਥਿ ਪਨ ਸੁਟ੍ਠੁ ਰਕ੍ਖਤਿ, ਤਸ੍ਸ ਸਨ੍ਤਿਕੇ ਗਣ੍ਹਥਾ’’ਤਿ ਵੁਤ੍ਤਾ ਚ ਪਨ ਤਮ੍ਪਿ ਉਪਸਙ੍ਕਮਿਤ੍ਵਾ ਯਾਚਿਂਸੁ. ਸੋ ਏਕਦਿਵਸਂ ਰਾਜਾਨਂ ਰਥੇਨ ਉਯ੍ਯਾਨਂ ਨੇਸਿ. ਰਾਜਾ ਤਤ੍ਥ ਦਿਵਾ ਕੀਲ਼ਿਤ੍ਵਾ ਸਾਯਂ ਨਿਕ੍ਖਮਿਤ੍ਵਾ ਰਥਂ ਅਭਿਰੁਹਿ, ਤਸ੍ਸ ਨਗਰਂ ਅਸਮ੍ਪਤ੍ਤਸ੍ਸੇਵ ਸੂਰਿਯਤ੍ਥਙ੍ਗਮਨਵੇਲਾਯ ਮੇਘੋ ਉਟ੍ਠਹਿ. ਸਾਰਥਿ ਰਞ੍ਞੋ ਤੇਮਨਭਯੇਨ ਸਿਨ੍ਧਵਾਨਂ ਪਤੋਦਸਞ੍ਞਮਦਾਸਿ. ਸਿਨ੍ਧਵਾ ਜਵੇਨ ਪਕ੍ਖਨ੍ਦਿਂਸੁ. ਤਤੋ ਪਟ੍ਠਾਯ ਚ ਪਨ ਤੇ ਉਯ੍ਯਾਨਂ ਗਚ੍ਛਨ੍ਤਾਪਿ ਤਤੋ ਆਗਚ੍ਛਨ੍ਤਾਪਿ ਤਂ ਠਾਨਂ ਪਤ੍ਵਾ ਜਵੇਨ ਗਚ੍ਛਨ੍ਤਿ ਆਗਚ੍ਛਨ੍ਤਿ. ਕਿਂ ਕਾਰਣਾ? ਤੇਸਂ ਕਿਰ ਏਤਦਹੋਸਿ – ‘‘ਇਮਸ੍ਮਿਂ ਠਾਨੇ ਪਰਿਸ੍ਸਯੇਨ ਭਵਿਤਬ੍ਬਂ, ਤੇਨ ਨੋ ਸਾਰਥਿ ਤਦਾ ਪਤੋਦਸਞ੍ਞਂ ਅਦਾਸੀ’’ਤਿ. ਸਾਰਥਿਸ੍ਸਪਿ ਏਤਦਹੋਸਿ – ‘‘ਰਞ੍ਞੋ ਤੇਮਨੇ ਵਾ ਅਤੇਮਨੇ ਵਾ ਮਯ੍ਹਂ ਦੋਸੋ ਨਤ੍ਥਿ, ਅਹਂ ਪਨ ਅਟ੍ਠਾਨੇ ਸੁਸਿਕ੍ਖਿਤਸਿਨ੍ਧਵਾਨਂ ਪਤੋਦਸਞ੍ਞਂ ਅਦਾਸਿਂ, ਤੇਨ ਇਮੇ ਇਦਾਨਿ ਅਪਰਾਪਰਂ ਜਵਨ੍ਤਾ ਕਿਲਮਨ੍ਤਿ, ਅਹਞ੍ਚ ਕੁਰੁਧਮ੍ਮਂ ਰਕ੍ਖਾਮਿ, ਤੇਨ ਮੇ ਭਿਨ੍ਨੇਨ ਸੀਲੇਨ ਭਵਿਤਬ੍ਬ’’ਨ੍ਤਿ. ਸੋ ਏਤਮਤ੍ਥਂ ਆਚਿਕ੍ਖਿਤ੍ਵਾ ‘‘ਇਮਿਨਾ ਕਾਰਣੇਨ ਕੁਰੁਧਮ੍ਮੇ ਕੁਕ੍ਕੁਚ੍ਚਂ ਅਤ੍ਥਿ, ਤੇਨ ਵੋ ਨ ਸਕ੍ਕਾ ਦਾਤੁ’’ਨ੍ਤਿ ਆਹ. ਅਥ ਨਂ ਦੂਤਾ ‘‘ਤੁਮ੍ਹਾਕਂ ‘ਸਿਨ੍ਧਵਾ ਕਿਲਮਨ੍ਤੂ’ਤਿ ਚਿਤ੍ਤਂ ਨਤ੍ਥਿ, ਅਚੇਤਨਕਂ ਕਮ੍ਮਂ ਨਾਮ ਨ ਹੋਤਿ, ਏਤ੍ਤਕੇਨਪਿ ਚ ਤੁਮ੍ਹੇ ਕੁਕ੍ਕੁਚ੍ਚਂ ਕਰੋਨ੍ਤਾ ਕਿਂ ਵੀਤਿਕ੍ਕਮਂ ਕਰਿਸ੍ਸਥਾ’’ਤਿ ਵਤ੍ਵਾ ਤਸ੍ਸ ਸਨ੍ਤਿਕੇ ਸੀਲਂ ਗਹੇਤ੍ਵਾ ਸੁਵਣ੍ਣਪਟ੍ਟੇ ਲਿਖਿਂਸੁ.

‘‘ਏਵਂ ਸਨ੍ਤੇਪਿ ਨੇਵ ਮਂ ਆਰਾਧੇਤਿ, ਸੇਟ੍ਠਿ ਪਨ ਸੁਟ੍ਠੁ ਰਕ੍ਖਤਿ, ਤਸ੍ਸ ਸਨ੍ਤਿਕੇ ਗਣ੍ਹਥਾ’’ਤਿ ਵੁਤ੍ਤਾ ਚ ਪਨ ਤਮ੍ਪਿ ਉਪਸਙ੍ਕਮਿਤ੍ਵਾ ਯਾਚਿਂਸੁ. ਸੋਪਿ ਏਕਦਿਵਸਂ ਗਬ੍ਭਤੋ ਨਿਕ੍ਖਨ੍ਤਸਾਲਿਸੀਸਂ ਅਤ੍ਤਨੋ ਸਾਲਿਖੇਤ੍ਤਂ ਗਨ੍ਤ੍ਵਾ ਪਚ੍ਚਵੇਕ੍ਖਿਤ੍ਵਾ ਨਿਵਤ੍ਤਮਾਨੋ ‘‘ਵੀਹਿਮਾਲਂ ਬਨ੍ਧਾਪੇਸ੍ਸਾਮੀ’’ਤਿ ਏਕਂ ਸਾਲਿਸੀਸਮੁਟ੍ਠਿਂ ਗਾਹਾਪੇਤ੍ਵਾ ਥੂਣਾਯ ਬਨ੍ਧਾਪੇਸਿ. ਅਥਸ੍ਸ ਏਤਦਹੋਸਿ – ‘‘ਇਮਮ੍ਹਾ ਕੇਦਾਰਾ ਮਯਾ ਰਞ੍ਞੋ ਭਾਗੋ ਦਾਤਬ੍ਬੋ, ਅਦਿਨ੍ਨਭਾਗਤੋਯੇਵ ਮੇ ਕੇਦਾਰਤੋ ਸਾਲਿਸੀਸਮੁਟ੍ਠਿ ਗਾਹਾਪਿਤੋ, ਅਹਞ੍ਚ ਕੁਰੁਧਮ੍ਮਂ ਰਕ੍ਖਾਮਿ, ਤੇਨ ਮੇ ਭਿਨ੍ਨੇਨ ਸੀਲੇਨ ਭਵਿਤਬ੍ਬ’’ਨ੍ਤਿ. ਸੋ ਏਤਮਤ੍ਥਂ ਆਚਿਕ੍ਖਿਤ੍ਵਾ ‘‘ਇਮਿਨਾ ਮੇ ਕਾਰਣੇਨ ਕੁਰੁਧਮ੍ਮੇ ਕੁਕ੍ਕੁਚ੍ਚਂ ਅਤ੍ਥਿ, ਤੇਨ ਵੋ ਨ ਸਕ੍ਕਾ ਦਾਤੁ’’ਨ੍ਤਿ ਆਹ. ਅਥ ਨਂ ਦੂਤਾ ‘‘ਤੁਮ੍ਹਾਕਂ ਥੇਯ੍ਯਚਿਤ੍ਤਂ ਨਤ੍ਥਿ, ਤੇਨ ਵਿਨਾ ਅਦਿਨ੍ਨਾਦਾਨਂ ਨਾਮ ਪਞ੍ਞਾਪੇਤੁਂ ਨ ਸਕ੍ਕਾ, ਏਤ੍ਤਕੇਨਪਿ ਕੁਕ੍ਕੁਚ੍ਚਂ ਕਰੋਨ੍ਤਾ ਤੁਮ੍ਹੇ ਪਰਸਨ੍ਤਕਂ ਨਾਮ ਕਿਂ ਗਣ੍ਹਿਸ੍ਸਥਾ’’ਤਿ ਵਤ੍ਵਾ ਤਸ੍ਸਪਿ ਸਨ੍ਤਿਕੇ ਸੀਲਂ ਗਹੇਤ੍ਵਾ ਸੁਵਣ੍ਣਪਟ੍ਟੇ ਲਿਖਿਂਸੁ.

‘‘ਏਵਂ ਸਨ੍ਤੇਪਿ ਨੇਵ ਮਂ ਆਰਾਧੇਤਿ, ਦੋਣਮਾਪਕੋ ਪਨ ਮਹਾਮਤ੍ਤੋ ਸੁਟ੍ਠੁ ਰਕ੍ਖਤਿ, ਤਸ੍ਸ ਸਨ੍ਤਿਕੇ ਗਣ੍ਹਥਾ’’ਤਿ ਵੁਤ੍ਤਾ ਚ ਪਨ ਤਮ੍ਪਿ ਉਪਸਙ੍ਕਮਿਤ੍ਵਾ ਯਾਚਿਂਸੁ. ਸੋ ਕਿਰ ਏਕਦਿਵਸਂ ਕੋਟ੍ਠਾਗਾਰਦ੍ਵਾਰੇ ਨਿਸੀਦਿਤ੍ਵਾ ਰਾਜਭਾਗੇ ਵੀਹਿਂ ਮਿਨਾਪੇਨ੍ਤੋ ਅਮਿਤਵੀਹਿਰਾਸਿਤੋ ਵੀਹਿਂ ਗਹੇਤ੍ਵਾ ਲਕ੍ਖਂ ਠਪੇਸਿ, ਤਸ੍ਮਿਂ ਖਣੇ ਦੇਵੋ ਪਾਵਸ੍ਸਿ. ਮਹਾਮਤ੍ਤੋ ਲਕ੍ਖਾਨਿ ਗਣੇਤ੍ਵਾ ‘‘ਮਿਤਵੀਹੀ ਏਤ੍ਤਕਾ ਨਾਮ ਹੋਨ੍ਤੀ’’ਤਿ ਵਤ੍ਵਾ ਲਕ੍ਖਵੀਹਿਂ ਸਂਕਡ੍ਢਿਤ੍ਵਾ ਮਿਤਰਾਸਿਮ੍ਹਿ ਪਕ੍ਖਿਪਿਤ੍ਵਾ ਵੇਗੇਨ ਗਨ੍ਤ੍ਵਾ ਦ੍ਵਾਰਕੋਟ੍ਠਕੇ ਠਤ੍ਵਾ ਚਿਨ੍ਤੇਸਿ – ‘‘ਕਿਂ ਨੁ ਖੋ ਮਯਾ ਲਕ੍ਖਵੀਹੀ ਮਿਤਵੀਹਿਰਾਸਿਮ੍ਹਿ ਪਕ੍ਖਿਤ੍ਤਾ, ਉਦਾਹੁ ਅਮਿਤਰਾਸਿਮ੍ਹੀ’’ਤਿ. ਅਥਸ੍ਸ ਏਤਦਹੋਸਿ – ‘‘ਸਚੇ ਮੇ ਮਿਤਵੀਹਿਰਾਸਿਮ੍ਹਿ ਪਕ੍ਖਿਤ੍ਤਾ ਅਕਾਰਣੇਨੇਵ ਰਞ੍ਞੋ ਸਨ੍ਤਕਂ ਵਡ੍ਢਿਤਂ, ਗਹਪਤਿਕਾਨਂ ਸਨ੍ਤਕਂ ਨਾਸਿਤਂ, ਅਹਞ੍ਚ ਕੁਰੁਧਮ੍ਮਂ ਰਕ੍ਖਾਮਿ, ਤੇਨ ਮੇ ਭਿਨ੍ਨੇਨ ਸੀਲੇਨ ਭਵਿਤਬ੍ਬ’’ਨ੍ਤਿ. ਸੋ ਏਤਮਤ੍ਥਂ ਆਚਿਕ੍ਖਿਤ੍ਵਾ ‘‘ਇਮਿਨਾ ਮੇ ਕਾਰਣੇਨ ਕੁਰੁਧਮ੍ਮੇ ਕੁਕ੍ਕੁਚ੍ਚਂ ਅਤ੍ਥਿ, ਤੇਨ ਵੋ ਨ ਸਕ੍ਕਾ ਦਾਤੁ’’ਨ੍ਤਿ ਆਹ. ਅਥ ਨਂ ਦੂਤਾ ‘‘ਤੁਮ੍ਹਾਕਂ ਥੇਯ੍ਯਚਿਤ੍ਤਂ ਨਤ੍ਥਿ, ਤੇਨ ਵਿਨਾ ਅਦਿਨ੍ਨਾਦਾਨਂ ਨਾਮ ਪਞ੍ਞਾਪੇਤੁਂ ਨ ਸਕ੍ਕਾ, ਏਤ੍ਤਕੇਨਪਿ ਕੁਕ੍ਕੁਚ੍ਚਂ ਕਰੋਨ੍ਤਾ ਕਿਂ ਤੁਮ੍ਹੇ ਪਰਸ੍ਸ ਸਨ੍ਤਕਂ ਗਣ੍ਹਿਸ੍ਸਥਾ’’ਤਿ ਵਤ੍ਵਾ ਤਸ੍ਸਪਿ ਸਨ੍ਤਿਕੇ ਸੀਲਂ ਗਹੇਤ੍ਵਾ ਸੁਵਣ੍ਣਪਟ੍ਟੇ ਲਿਖਿਂਸੁ.

‘‘ਏਵਂ ਸਨ੍ਤੇਪਿ ਨੇਵ ਮਂ ਆਰਾਧੇਤਿ, ਦੋਵਾਰਿਕੋ ਪਨ ਸੁਟ੍ਠੁ ਰਕ੍ਖਤਿ, ਤਸ੍ਸ ਸਨ੍ਤਿਕੇ ਗਣ੍ਹਥਾ’’ਤਿ ਵੁਤ੍ਤਾ ਚ ਪਨ ਤਮ੍ਪਿ ਉਪਸਙ੍ਕਮਿਤ੍ਵਾ ਯਾਚਿਂਸੁ. ਸੋਪਿ ਏਕਦਿਵਸਂ ਨਗਰਦ੍ਵਾਰਂ ਪਿਧਾਨਵੇਲਾਯ ਤਿਕ੍ਖਤ੍ਤੁਂ ਸਦ੍ਦਮਨੁਸ੍ਸਾਵੇਸਿ. ਅਥੇਕੋ ਦਲਿਦ੍ਦਮਨੁਸ੍ਸੋ ਅਤ੍ਤਨੋ ਕਨਿਟ੍ਠਭਗਿਨਿਯਾ ਸਦ੍ਧਿਂ ਦਾਰੁਪਣ੍ਣਤ੍ਥਾਯ ਅਰਞ੍ਞਂ ਗਨ੍ਤ੍ਵਾ ਨਿਵਤ੍ਤਨ੍ਤੋ ਤਸ੍ਸ ਸਦ੍ਦਂ ਸੁਤ੍ਵਾ ਭਗਿਨਿਂ ਆਦਾਯ ਵੇਗੇਨ ਦ੍ਵਾਰਂ ਸਮ੍ਪਾਪੁਣਿ. ਅਥ ਨਂ ਦੋਵਾਰਿਕੋ ‘‘ਤ੍ਵਂ ਨਗਰੇ ਰਞ੍ਞੋ ਅਤ੍ਥਿਭਾਵਂ ਕਿਂ ਨ ਜਾਨਾਸਿ, ‘ਸਕਲਸ੍ਸੇਵ ਇਮਸ੍ਸ ਨਗਰਸ੍ਸ ਦ੍ਵਾਰਂ ਪਿਧੀਯਤੀ’ਤਿ ਨ ਜਾਨਾਸਿ, ਅਤ੍ਤਨੋ ਮਾਤੁਗਾਮਂ ਗਹੇਤ੍ਵਾ ਅਰਞ੍ਞੇ ਕਾਮਰਤਿਕੀਲ਼ਂ ਕੀਲ਼ਨ੍ਤੋ ਦਿਵਸਂ ਵਿਚਰਸੀ’’ਤਿ ਆਹ. ਅਥਸ੍ਸ ਇਤਰੇਨ ‘‘ਨ ਮੇ, ਸਾਮਿ, ਭਰਿਯਾ, ਭਗਿਨੀ ਮੇ ਏਸਾ’’ਤਿ ਵੁਤ੍ਤੇ ਏਤਦਹੋਸਿ – ‘‘ਅਕਾਰਣਂ ਵਤ ਮੇ ਕਤਂ ਭਗਿਨਿਂ ਭਰਿਯਾਤਿ ਕਥੇਨ੍ਤੇਨ, ਅਹਞ੍ਚ ਕੁਰੁਧਮ੍ਮਂ ਰਕ੍ਖਾਮਿ, ਤੇਨ ਮੇ ਭਿਨ੍ਨੇਨ ਸੀਲੇਨ ਭਵਿਤਬ੍ਬ’’ਨ੍ਤਿ. ਸੋ ਏਤਮਤ੍ਥਂ ਆਚਿਕ੍ਖਿਤ੍ਵਾ ‘‘ਇਮਿਨਾ ਮੇ ਕਾਰਣੇਨ ਕੁਰੁਧਮ੍ਮੇ ਕੁਕ੍ਕੁਚ੍ਚਂ ਅਤ੍ਥਿ, ਤੇਨ ਵੋ ਨ ਸਕ੍ਕਾ ਦਾਤੁ’’ਨ੍ਤਿ ਆਹ. ਅਥ ਨਂ ਦੂਤਾ ‘‘ਏਤਂ ਤੁਮ੍ਹੇਹਿ ਤਥਾਸਞ੍ਞਾਯ ਕਥਿਤਂ, ਏਤ੍ਥ ਵੋ ਸੀਲਭੇਦੋ ਨਤ੍ਥਿ, ਏਤ੍ਤਕੇਨਪਿ ਚ ਤੁਮ੍ਹੇ ਕੁਕ੍ਕੁਚ੍ਚਾਯਨ੍ਤਾ ਕੁਰੁਧਮ੍ਮੇ ਸਮ੍ਪਜਾਨਮੁਸਾਵਾਦਂ ਨਾਮ ਕਿਂ ਕਰਿਸ੍ਸਥਾ’’ਤਿ ਵਤ੍ਵਾ ਤਸ੍ਸਪਿ ਸਨ੍ਤਿਕੇ ਸੀਲਂ ਗਹੇਤ੍ਵਾ ਸੁਵਣ੍ਣਪਟ੍ਟੇ ਲਿਖਿਂਸੁ.

‘‘ਏਵਂ ਸਨ੍ਤੇਪਿ ਨੇਵ ਮਂ ਆਰਾਧੇਤਿ, ਵਣ੍ਣਦਾਸੀ ਪਨ ਸੁਟ੍ਠੁ ਰਕ੍ਖਤਿ, ਤਸ੍ਸ ਸਨ੍ਤਿਕੇ ਗਣ੍ਹਥਾ’’ਤਿ ਵੁਤ੍ਤਾ ਚ ਪਨ ਤਮ੍ਪਿ ਉਪਸਙ੍ਕਮਿਤ੍ਵਾ ਯਾਚਿਂਸੁ. ਸਾ ਪੁਰਿਮਨਯੇਨੇਵ ਪਟਿਕ੍ਖਿਪਿ. ਕਿਂਕਾਰਣਾ? ਸਕ੍ਕੋ ਕਿਰ ਦੇਵਾਨਮਿਨ੍ਦੋ ‘‘ਤਸ੍ਸਾ ਸੀਲਂ ਵੀਮਂਸਿਸ੍ਸਾਮੀ’’ਤਿ ਮਾਣਵਕਵਣ੍ਣੇਨ ਆਗਨ੍ਤ੍ਵਾ ‘‘ਅਹਂ ਆਗਮਿਸ੍ਸਾਮੀ’’ਤਿ ਵਤ੍ਵਾ ਸਹਸ੍ਸਂ ਦਤ੍ਵਾ ਦੇਵਲੋਕਮੇਵ ਗਨ੍ਤ੍ਵਾ ਤੀਣਿ ਸਂਵਚ੍ਛਰਾਨਿ ਨਾਗਚ੍ਛਿ. ਸਾ ਅਤ੍ਤਨੋ ਸੀਲਭੇਦਭਯੇਨ ਤੀਣਿ ਸਂਵਚ੍ਛਰਾਨਿ ਅਞ੍ਞਸ੍ਸ ਪੁਰਿਸਸ੍ਸ ਹਤ੍ਥਤੋ ਤਮ੍ਬੂਲਮਤ੍ਤਮ੍ਪਿ ਨ ਗਣ੍ਹਿ, ਸਾ ਅਨੁਕ੍ਕਮੇਨ ਦੁਗ੍ਗਤਾ ਹੁਤ੍ਵਾ ਚਿਨ੍ਤੇਸਿ – ‘‘ਮਯ੍ਹਂ ਸਹਸ੍ਸਂ ਦਤ੍ਵਾ ਗਤਪੁਰਿਸਸ੍ਸ ਤੀਣਿ ਸਂਵਚ੍ਛਰਾਨਿ ਅਨਾਗਚ੍ਛਨ੍ਤਸ੍ਸ ਦੁਗ੍ਗਤਾ ਜਾਤਾ, ਜੀਵਿਤਵੁਤ੍ਤਿਂ ਘਟੇਤੁਂ ਨ ਸਕ੍ਕੋਮਿ, ਇਤੋ ਦਾਨਿ ਪਟ੍ਠਾਯ ਮਯਾ ਵਿਨਿਚ੍ਛਯਮਹਾਮਤ੍ਤਾਨਂ ਆਰੋਚੇਤ੍ਵਾ ਪਰਿਬ੍ਬਯਂ ਗਹੇਤੁਂ ਵਟ੍ਟਤੀ’’ਤਿ. ਸਾ ਵਿਨਿਚ੍ਛਯਂ ਗਨ੍ਤ੍ਵਾ ‘‘ਸਾਮਿ, ਪਰਿਬ੍ਬਯਂ ਦਤ੍ਵਾ ਗਤਪੁਰਿਸਸ੍ਸ ਮੇ ਤੀਣਿ ਸਂਵਚ੍ਛਰਾਨਿ, ਮਤਭਾਵਮ੍ਪਿਸ੍ਸ ਨ ਜਾਨਾਮਿ, ਜੀਵਿਤਂ ਘਟੇਤੁਂ ਨ ਸਕ੍ਕੋਮਿ, ਕਿਂ ਕਰੋਮਿ, ਸਾਮੀ’’ਤਿ ਆਹ. ਤੀਣਿ ਸਂਵਚ੍ਛਰਾਨਿ ਅਨਾਗਚ੍ਛਨ੍ਤੇ ਕਿਂ ਕਰਿਸ੍ਸਸਿ, ਇਤੋ ਪਟ੍ਠਾਯ ਪਰਿਬ੍ਬਯਂ ਗਣ੍ਹਾਤਿ. ਤਸ੍ਸਾ ਲਦ੍ਧਵਿਨਿਚ੍ਛਯਾਯ ਵਿਨਿਚ੍ਛਯਤੋ ਨਿਕ੍ਖਮਮਾਨਾਯ ਏਵ ਏਕੋ ਪੁਰਿਸੋ ਸਹਸ੍ਸਭਣ੍ਡਿਕਂ ਉਪਨਾਮੇਸਿ.

ਤਸ੍ਸ ਗਹਣਤ੍ਥਾਯ ਹਤ੍ਥਂ ਪਸਾਰਣਕਾਲੇ ਸਕ੍ਕੋ ਅਤ੍ਤਾਨਂ ਦਸ੍ਸੇਸਿ. ਸਾ ਦਿਸ੍ਵਾਵ ‘‘ਮਯ੍ਹਂ ਸਂਵਚ੍ਛਰਤ੍ਤਯਮਤ੍ਥਕੇ ਸਹਸ੍ਸਦਾਯਕੋ ਪੁਰਿਸੋ ਆਗਤੋ, ਤਾਤ, ਨਤ੍ਥਿ ਮੇ ਤਵ ਕਹਾਪਣੇਹਿ ਅਤ੍ਥੋ’’ਤਿ ਹਤ੍ਥਂ ਸਮਿਞ੍ਜੇਸਿ. ਸਕ੍ਕੋ ਅਤ੍ਤਨੋ ਸਰੀਰਞ੍ਞੇਵ ਅਭਿਨਿਮ੍ਮਿਨਿਤ੍ਵਾ ਤਰੁਣਸੂਰਿਯੋ ਵਿਯ ਜਲਨ੍ਤੋ ਆਕਾਸੇ ਅਟ੍ਠਾਸਿ, ਸਕਲਨਗਰਂ ਸਨ੍ਨਿਪਤਿ. ਸਕ੍ਕੋ ਮਹਾਜਨਮਜ੍ਝੇ ‘‘ਅਹਂ ਏਤਿਸ੍ਸਾ ਵੀਮਂਸਨਵਸੇਨ ਸਂਵਚ੍ਛਰਤ੍ਤਯਮਤ੍ਥਕੇ ਸਹਸ੍ਸਂ ਅਦਾਸਿਂ, ਸੀਲਂ ਰਕ੍ਖਨ੍ਤਾ ਨਾਮ ਏਵਰੂਪਾ ਹੁਤ੍ਵਾ ਰਕ੍ਖਥਾ’’ਤਿ ਓਵਾਦਂ ਦਤ੍ਵਾ ਤਸ੍ਸਾ ਨਿਵੇਸਨਂ ਸਤ੍ਤਰਤਨੇਹਿ ਪੂਰੇਤ੍ਵਾ ‘‘ਇਤੋ ਪਟ੍ਠਾਯ ਅਪ੍ਪਮਤ੍ਤਾ ਹੋਹੀ’’ਤਿ ਤਂ ਅਨੁਸਾਸਿਤ੍ਵਾ ਦੇਵਲੋਕਮੇਵ ਅਗਮਾਸਿ. ਇਮਿਨਾ ਕਾਰਣੇਨ ਸਾ ‘‘ਅਹਂ ਗਹਿਤਭਤਿਂ ਅਜੀਰਾਪੇਤ੍ਵਾਵ ਅਞ੍ਞੇਨ ਦੀਯਮਾਨਾਯ ਭਤਿਯਾ ਹਤ੍ਥਂ ਪਸਾਰੇਸਿਂ, ਇਮਿਨਾ ਕਾਰਣੇਨ ਮਂ ਸੀਲਂ ਨਾਰਾਧੇਤਿ, ਤੇਨ ਵੋ ਦਾਤੁਂ ਨ ਸਕ੍ਕਾ’’ਤਿ ਪਟਿਕ੍ਖਿਪਿ. ਅਥ ਨਂ ਦੂਤਾ ‘‘ਹਤ੍ਥਪ੍ਪਸਾਰਣਮਤ੍ਤੇਨ ਸੀਲਭੇਦੋ ਨਤ੍ਥਿ, ਸੀਲਂ ਨਾਮ ਏਤਂ ਪਰਮਵਿਸੁਦ੍ਧਿ ਹੋਤੀ’’ਤਿ ਵਤ੍ਵਾ ਤਸ੍ਸਾਪਿ ਸਨ੍ਤਿਕੇ ਸੀਲਂ ਗਹੇਤ੍ਵਾ ਸੁਵਣ੍ਣਪਟ੍ਟੇ ਲਿਖਿਂਸੁ.

ਇਤਿ ਇਮੇਸਂ ਏਕਾਦਸਨ੍ਨਂ ਜਨਾਨਂ ਰਕ੍ਖਣਸੀਲਂ ਸੁਵਣ੍ਣਪਟ੍ਟੇ ਲਿਖਿਤ੍ਵਾ ਦਨ੍ਤਪੁਰਂ ਗਨ੍ਤ੍ਵਾ ਕਾਲਿਙ੍ਗਰਞ੍ਞੋ ਸੁਵਣ੍ਣਪਟ੍ਟਂ ਦਤ੍ਵਾ ਤਂ ਪਵਤ੍ਤਿਂ ਆਰੋਚੇਸੁਂ. ਰਾਜਾ ਤਸ੍ਮਿਂ ਕੁਰੁਧਮ੍ਮੇ ਵਤ੍ਤਮਾਨੋ ਪਞ੍ਚ ਸੀਲਾਨਿ ਪੂਰੇਸਿ. ਤਸ੍ਮਿਂ ਖਣੇ ਸਕਲਕਾਲਿਙ੍ਗਰਟ੍ਠੇ ਦੇਵੋ ਵਸ੍ਸਿ, ਤੀਣਿ ਭਯਾਨਿ ਵੂਪਸਨ੍ਤਾਨਿ, ਰਟ੍ਠਂ ਖੇਮਂ ਸੁਭਿਕ੍ਖਂ ਅਹੋਸਿ. ਬੋਧਿਸਤ੍ਤੋ ਯਾਵਜੀਵਂ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਪਰਿਵਾਰੋ ਸਗ੍ਗਪੁਰਂ ਪੂਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ. ‘‘ਸਚ੍ਚਪਰਿਯੋਸਾਨੇ ਕੇਚਿ ਸੋਤਾਪਨ੍ਨਾ ਅਹੇਸੁਂ, ਕੇਚਿ ਸਕਦਾਗਾਮਿਨੋ, ਕੇਚਿ ਅਨਾਗਾਮਿਨੋ, ਕੇਚਿ ਅਰਹਨ੍ਤੋ’’ਤਿ. ਜਾਤਕਸਮੋਧਾਨੇ ਪਨ –

‘‘ਗਣਿਕਾ ਉਪ੍ਪਲਵਣ੍ਣਾ, ਪੁਣ੍ਣੋ ਦੋਵਾਰਿਕੋ ਤਦਾ;

ਰਜ੍ਜੁਗਾਹੋ ਕਚ੍ਚਾਯਨੋ, ਮੋਗ੍ਗਲ੍ਲਾਨੋ ਦੋਣਮਾਪਕੋ.

‘‘ਸਾਰਿਪੁਤ੍ਤੋ ਤਦਾ ਸੇਟ੍ਠਿ, ਅਨੁਰੁਦ੍ਧੋ ਚ ਸਾਰਥਿ;

ਬ੍ਰਾਹ੍ਮਣੋ ਕਸ੍ਸਪੋ ਥੇਰੋ, ਉਪਰਾਜਾ ਨਨ੍ਦਪਣ੍ਡਿਤੋ.

‘‘ਮਹੇਸੀ ਰਾਹੁਲਮਾਤਾ, ਮਾਯਾਦੇਵੀ ਜਨੇਤ੍ਤਿਯਾ;

ਕੁਰੁਰਾਜਾ ਬੋਧਿਸਤ੍ਤੋ, ਏਵਂ ਧਾਰੇਥ ਜਾਤਕ’’ਨ੍ਤਿ.

ਕੁਰੁਧਮ੍ਮਜਾਤਕਵਣ੍ਣਨਾ ਛਟ੍ਠਾ.

[੨੭੭] ੭. ਰੋਮਕਜਾਤਕਵਣ੍ਣਨਾ

ਵਸ੍ਸਾਨਿ ਪਞ੍ਞਾਸ ਸਮਾਧਿਕਾਨੀਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਭਗਵਤੋ ਵਧਾਯ ਪਰਿਸਕ੍ਕਨਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਉਤ੍ਤਾਨਮੇਵ.

ਅਤੀਤੇ ਪਨ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਪਾਰਾਵਤੋ ਹੁਤ੍ਵਾ ਬਹੁਪਾਰਾਵਤਪਰਿਵੁਤੋ ਅਰਞ੍ਞੇ ਪਬ੍ਬਤਗੁਹਾਯਂ ਵਾਸਂ ਕਪ੍ਪੇਸਿ. ਅਞ੍ਞਤਰੋਪਿ ਖੋ ਤਾਪਸੋ ਸੀਲਸਮ੍ਪਨ੍ਨੋ ਤੇਸਂ ਪਾਰਾਵਤਾਨਂ ਵਸਨਟ੍ਠਾਨਤੋ ਅਵਿਦੂਰੇ ਏਕਂ ਪਚ੍ਚਨ੍ਤਗਾਮਂ ਉਪਨਿਸ੍ਸਾਯ ਅਸ੍ਸਮਪਦਂ ਮਾਪੇਤ੍ਵਾ ਪਬ੍ਬਤਗੁਹਾਯਂ ਵਾਸਂ ਕਪ੍ਪੇਸਿ. ਬੋਧਿਸਤ੍ਤੋ ਅਨ੍ਤਰਨ੍ਤਰਾ ਤਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਸੋਤਬ੍ਬਯੁਤ੍ਤਕਂ ਸੁਣਾਤਿ. ਤਾਪਸੋ ਤਤ੍ਥ ਚਿਰਂ ਵਸਿਤ੍ਵਾ ਪਕ੍ਕਾਮਿ, ਅਥਞ੍ਞੋ ਕੂਟਜਟਿਲੋ ਆਗਨ੍ਤ੍ਵਾ ਤਤ੍ਥ ਵਾਸਂ ਕਪ੍ਪੇਸਿ. ਬੋਧਿਸਤ੍ਤੋ ਪਾਰਾਵਤਪਰਿਵੁਤੋ ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਅਸ੍ਸਮਪਦੇ ਵਿਚਰਿਤ੍ਵਾ ਗਿਰਿਕਨ੍ਦਰਸਮੀਪੇ ਗੋਚਰਂ ਗਹੇਤ੍ਵਾ ਸਾਯਂ ਅਤ੍ਤਨੋ ਵਸਨਟ੍ਠਾਨਂ ਗਚ੍ਛਤਿ. ਕੂਟਤਾਪਸੋ ਤਤ੍ਥ ਅਤਿਰੇਕਪਣ੍ਣਾਸਵਸ੍ਸਾਨਿ ਵਸਿ.

ਅਥਸ੍ਸ ਏਕਦਿਵਸਂ ਪਚ੍ਚਨ੍ਤਗਾਮਵਾਸਿਨੋ ਮਨੁਸ੍ਸਾ ਪਾਰਾਵਤਮਂਸਂ ਅਭਿਸਙ੍ਖਰਿਤ੍ਵਾ ਅਦਂਸੁ. ਸੋ ਤਤ੍ਥ ਰਸਤਣ੍ਹਾਯ ਬਜ੍ਝਿਤ੍ਵਾ ‘‘ਕਿਂ ਮਂਸਂ ਨਾਮੇਤ’’ਨ੍ਤਿ ਪੁਚ੍ਛਿਤ੍ਵਾ ‘‘ਪਾਰਾਵਤਮਂਸ’’ਨ੍ਤਿ ਸੁਤ੍ਵਾ ਚਿਨ੍ਤੇਸਿ – ‘‘ਮਯ੍ਹਂ ਅਸ੍ਸਮਪਦਂ ਬਹੂ ਪਾਰਾਵਤਾ ਆਗਚ੍ਛਨ੍ਤਿ, ਤੇ ਮਾਰੇਤ੍ਵਾ ਮਂਸਂ ਖਾਦਿਤੁਂ ਵਟ੍ਟਤੀ’’ਤਿ. ਸੋ ਤਣ੍ਡੁਲਸਪ੍ਪਿਦਧਿਖੀਰਮਰਿਚਾਦੀਨਿ ਆਹਰਿਤ੍ਵਾ ਏਕਮਨ੍ਤੇ ਠਪੇਤ੍ਵਾ ਮੁਗ੍ਗਰਂ ਚੀਵਰਕਣ੍ਣੇਨ ਪਟਿਚ੍ਛਾਦੇਤ੍ਵਾ ਪਾਰਾਵਤਾਨਂ ਆਗਮਨਂ ਓਲੋਕੇਨ੍ਤੋ ਪਣ੍ਣਸਾਲਦ੍ਵਾਰੇ ਨਿਸੀਦਿ. ਬੋਧਿਸਤ੍ਤੋ ਪਾਰਾਵਤਪਰਿਵੁਤੋ ਆਗਨ੍ਤ੍ਵਾ ਤਸ੍ਸ ਕੂਟਜਟਿਲਸ੍ਸ ਦੁਟ੍ਠਕਿਰਿਯਂ ਓਲੋਕੇਤ੍ਵਾ ‘‘ਅਯਂ ਦੁਟ੍ਠਤਾਪਸੋ ਅਞ੍ਞੇਨਾਕਾਰੇਨ ਨਿਸਿਨ੍ਨੋ, ਕਚ੍ਚਿ ਨੁ ਖੋ ਅਮ੍ਹਾਕਂ ਸਮਾਨਜਾਤੀਨਂ ਮਂਸਂ ਖਾਦਿ, ਪਰਿਗਣ੍ਹਿਸ੍ਸਾਮਿ ਨ’’ਨ੍ਤਿ ਅਨੁਵਾਤੇ ਠਤ੍ਵਾ ਤਸ੍ਸ ਸਰੀਰਗਨ੍ਧਂ ਘਾਯਿਤ੍ਵਾ ‘‘ਅਯਂ ਅਮ੍ਹੇ ਮਾਰੇਤ੍ਵਾ ਮਂਸਂ ਖਾਦਿਤੁਕਾਮੋ, ਨ ਤਸ੍ਸ ਸਨ੍ਤਿਕਂ ਗਨ੍ਤੁਂ ਵਟ੍ਟਤੀ’’ਤਿ ਪਾਰਾਵਤੇ ਆਦਾਯ ਪਟਿਕ੍ਕਮਿਤ੍ਵਾ ਚਰਿ. ਤਾਪਸੋ ਤਂ ਅਨਾਗਚ੍ਛਨ੍ਤਂ ਦਿਸ੍ਵਾ ‘‘ਮਧੁਰਕਥਂ ਤੇਹਿ ਸਦ੍ਧਿਂ ਕਥੇਤ੍ਵਾ ਵਿਸ੍ਸਾਸੇਨ ਉਪਗਤੇ ਮਾਰੇਤ੍ਵਾ ਮਂਸਂ ਖਾਦਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਰਿਮਾ ਦ੍ਵੇ ਗਾਥਾ ਅਵੋਚ –

੭੯. ‘‘ਵਸ੍ਸਾਨਿ ਪਞ੍ਞਾਸ ਸਮਾਧਿਕਾਨਿ, ਵਸਿਮ੍ਹ ਸੇਲਸ੍ਸ ਗੁਹਾਯ ਰੋਮਕ;

ਅਸਙ੍ਕਮਾਨਾ ਅਭਿਨਿਬ੍ਬੁਤਤ੍ਤਾ, ਹਤ੍ਥਤ੍ਤਮਾਯਨ੍ਤਿ ਮਮਣ੍ਡਜਾ ਪੁਰੇ.

੮੦. ‘‘ਤੇਦਾਨਿ ਵਕ੍ਕਙ੍ਗ ਕਿਮਤ੍ਥਮੁਸ੍ਸੁਕਾ, ਭਜਨ੍ਤਿ ਅਞ੍ਞਂ ਗਿਰਿਕਨ੍ਦਰਂ ਦਿਜਾ;

ਨ ਨੂਨ ਮਞ੍ਞਨ੍ਤਿ ਮਮਂ ਯਥਾ ਪੁਰੇ, ਚਿਰਪ੍ਪਵੁਤ੍ਥਾ ਅਥ ਵਾ ਨ ਤੇ ਇਮੇ’’ਤਿ.

ਤਤ੍ਥ ਸਮਾਧਿਕਾਨੀਤਿ ਸਮਅਧਿਕਾਨਿ. ਰੋਮਕਾਤਿ ਰੁਮਾਯ ਉਪ੍ਪਨ੍ਨ, ਸੁਧੋਤਪਵਾਲ਼ੇਨ ਸਮਾਨਵਣ੍ਣਨੇਤ੍ਤਪਾਦਤਾਯ ਬੋਧਿਸਤ੍ਤਂ ਪਾਰਾਵਤਂ ਆਲਪਤਿ. ਅਸਙ੍ਕਮਾਨਾਤਿ ਏਵਂ ਅਤਿਰੇਕਪਞ੍ਞਾਸਵਸ੍ਸਾਨਿ ਇਮਿਸ੍ਸਾ ਪਬ੍ਬਤਗੁਹਾਯ ਵਸਨ੍ਤੇਸੁ ਅਮ੍ਹੇਸੁ ਏਤੇ ਅਣ੍ਡਜਾ ਏਕਦਿਵਸਮ੍ਪਿ ਮਯਿ ਆਸਙ੍ਕਂ ਅਕਤ੍ਵਾ ਅਭਿਨਿਬ੍ਬੁਤਚਿਤ੍ਤਾਵ ਹੁਤ੍ਵਾ ਪੁਬ੍ਬੇ ਮਮ ਹਤ੍ਥਤ੍ਤਂ ਹਤ੍ਥਪ੍ਪਸਾਰਣੋਕਾਸਂ ਆਗਚ੍ਛਨ੍ਤੀਤਿ ਅਤ੍ਥੋ.

ਤੇਦਾਨੀਤਿ ਤੇ ਇਦਾਨਿ. ਵਕ੍ਕਙ੍ਗਾਤਿ ਬੋਧਿਸਤ੍ਤਂ ਆਲਪਤਿ, ਸਬ੍ਬੇਪਿ ਪਨ ਪਕ੍ਖਿਨੋ ਉਪ੍ਪਤਨਕਾਲੇ ਗੀਵਂ ਵਕ੍ਕਂ ਕਤ੍ਵਾ ਉਪ੍ਪਤਨਤੋ ‘‘ਵਕ੍ਕਙ੍ਗਾ’’ਤਿ ਵੁਚ੍ਚਨ੍ਤਿ. ਕਿਮਤ੍ਥਨ੍ਤਿ ਕਿਂਕਾਰਣਂ ਸਮ੍ਪਸ੍ਸਮਾਨਾ? ਉਸ੍ਸੁਕਾਤਿ ਉਕ੍ਕਣ੍ਠਿਤਰੂਪਾ ਹੁਤ੍ਵਾ. ਗਿਰਿਕਨ੍ਦਰਨ੍ਤਿ ਗਿਰਿਤੋ ਅਞ੍ਞਂ ਪਬ੍ਬਤਕਨ੍ਦਰਂ. ਯਥਾ ਪੁਰੇਤਿ ਯਥਾ ਪੁਬ੍ਬੇ ਏਤੇ ਪਕ੍ਖਿਨੋ ਮਂ ਗਰੁਂ ਕਤ੍ਵਾ ਪਿਯਂ ਕਤ੍ਵਾ ਮਞ੍ਞਨ੍ਤਿ, ਤਥਾ ਇਦਾਨਿ ਨ ਨੂਨ ਮਞ੍ਞਨ੍ਤਿ, ਪੁਬ੍ਬੇ ਇਧ ਨਿਵੁਤ੍ਥਤਾਪਸੋ ਅਞ੍ਞੋ, ਅਯਂ ਅਞ੍ਞੋ, ਏਵਂ ਮਞ੍ਞੇ ਏਤੇ ਮਂ ਮਞ੍ਞਨ੍ਤੀਤਿ ਦੀਪੇਤਿ. ਚਿਰਪ੍ਪਵੁਤ੍ਥਾ ਅਥ ਵਾ ਨ ਤੇ ਇਮੇਤਿ ਕਿਂ ਨੁ ਖੋ ਇਮੇ ਚਿਰਂ ਵਿਪ੍ਪਵਸਿਤ੍ਵਾ ਦੀਘਸ੍ਸ ਅਦ੍ਧੁਨੋ ਅਚ੍ਚਯੇਨ ਆਗਤਤ੍ਤਾ ਮਂ ‘‘ਸੋਯੇਵ ਅਯ’’ਨ੍ਤਿ ਨ ਸਞ੍ਜਾਨਨ੍ਤਿ, ਉਦਾਹੁ ਯੇ ਅਮ੍ਹੇਸੁ ਅਭਿਨਿਬ੍ਬੁਤਚਿਤ੍ਤਾ, ਨ ਤੇ ਇਮੇ, ਅਞ੍ਞੇਵ ਆਗਨ੍ਤੁਕਪਕ੍ਖਿਨੋ, ਇਮੇ ਕੇਨ ਮਂ ਨ ਉਪਸਙ੍ਕਮਨ੍ਤੀਤਿ ਪੁਚ੍ਛਤਿ.

ਤਂ ਸੁਤ੍ਵਾ ਬੋਧਿਸਤ੍ਤੋ ਪਕ੍ਕਮਿਤ੍ਵਾ ਠਿਤੋਵ ਤਤਿਯਂ ਗਾਥਮਾਹ –

੮੧. ‘‘ਜਾਨਾਮ ਤਂ ਨ ਮਯਂ ਸਮ੍ਪਮੂਲ਼੍ਹਾ, ਸੋਯੇਵ ਤ੍ਵਂ ਤੇ ਮਯਮਸ੍ਮ ਨਾਞ੍ਞੇ;

ਚਿਤ੍ਤਞ੍ਚ ਤੇ ਅਸ੍ਮਿਂ ਜਨੇ ਪਦੁਟ੍ਠਂ, ਆਜੀਵਿਕਾ ਤੇਨ ਤਮੁਤ੍ਤਸਾਮਾ’’ਤਿ.

ਤਤ੍ਥ ਨ ਮਯਂ ਸਮ੍ਪਮੂਲ਼੍ਹਾਤਿ ਮਯਂ ਮੂਲ਼੍ਹਾ ਪਮਤ੍ਤਾ ਨ ਹੋਮ. ਚਿਤ੍ਤਞ੍ਚ ਤੇ ਅਸ੍ਮਿਂ ਜਨੇ ਪਦੁਟ੍ਠਨ੍ਤਿ ਤ੍ਵਂ, ਸੋਯੇਵ ਮਯਮ੍ਪਿ ਤੇਯੇਵ, ਨ ਤਂ ਸਞ੍ਜਾਨਾਮ, ਅਪਿਚ ਖੋ ਪਨ ਤਵ ਚਿਤ੍ਤਂ ਅਸ੍ਮਿਂ ਜਨੇ ਪਦੁਟ੍ਠਂ ਅਮ੍ਹੇ ਮਾਰੇਤੁਂ ਉਪ੍ਪਨ੍ਨਂ. ਆਜੀਵਿਕਾਤਿ ਆਜੀਵਹੇਤੁ ਪਬ੍ਬਜਿਤ ਪਦੁਟ੍ਠਤਾਪਸ. ਤੇਨ ਤਮੁਤ੍ਤਸਾਮਾਤਿ ਤੇਨ ਕਾਰਣੇਨ ਤਂ ਉਤ੍ਤਸਾਮ ਭਾਯਾਮ ਨ ਉਪਸਙ੍ਕਮਾਮ.

ਕੂਟਤਾਪਸੋ ‘‘ਞਾਤੋ ਅਹਂ ਇਮੇਹੀ’’ਤਿ ਮੁਗ੍ਗਰਂ ਖਿਪਿਤ੍ਵਾ ਵਿਰਜ੍ਝਿਤ੍ਵਾ ‘‘ਗਚ੍ਛ ਤਾਵ ਤ੍ਵਂ ਵਿਰਦ੍ਧੋਮ੍ਹੀ’’ਤਿ ਆਹ. ਅਥ ਨਂ ਬੋਧਿਸਤ੍ਤੋ ‘‘ਮਂ ਤਾਵ ਵਿਰਦ੍ਧੋਸਿ, ਚਤ੍ਤਾਰੋ ਪਨ ਅਪਾਯੇ ਨ ਵਿਰਜ੍ਝਸਿ. ਸਚੇ ਇਧ ਵਸਿਸ੍ਸਸਿ, ਗਾਮਵਾਸੀਨਂ ‘ਚੋਰੋ ਅਯ’ਨ੍ਤਿ ਆਚਿਕ੍ਖਿਤ੍ਵਾ ਤਂ ਗਾਹਾਪੇਸ੍ਸਾਮਿ ਸੀਘਂ ਪਲਾਯਸ੍ਸੂ’’ਤਿ ਤਂ ਤਜ੍ਜੇਤ੍ਵਾ ਪਕ੍ਕਾਮਿ. ਕੂਟਜਟਿਲੋ ਤਤ੍ਥ ਵਸਿਤੁਂ ਨਾਸਕ੍ਖਿ, ਅਞ੍ਞਤ੍ਥ ਅਗਮਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕੂਟਤਾਪਸੋ ਦੇਵਦਤ੍ਤੋ ਅਹੋਸਿ, ਪੁਰਿਮੋ ਸੀਲਵਨ੍ਤਤਾਪਸੋ ਸਾਰਿਪੁਤ੍ਤੋ, ਪਾਰਾਵਤਜੇਟ੍ਠਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਰੋਮਕਜਾਤਕਵਣ੍ਣਨਾ ਸਤ੍ਤਮਾ.

[੨੭੮] ੮. ਮਹਿਂਸਰਾਜਜਾਤਕਵਣ੍ਣਨਾ

ਕਿਮਤ੍ਥਮਭਿਸਨ੍ਧਾਯਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਲੋਲਮਕ੍ਕਟਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਏਕਸ੍ਮਿਂ ਕੁਲੇ ਏਕੋ ਪੋਸਾਵਨਿਯਲੋਲਮਕ੍ਕਟੋ ਹਤ੍ਥਿਸਾਲਂ ਗਨ੍ਤ੍ਵਾ ਏਕਸ੍ਸ ਸੀਲਵਨ੍ਤਸ੍ਸ ਹਤ੍ਥਿਸ੍ਸ ਪਿਟ੍ਠਿਯਂ ਨਿਸੀਦਿਤ੍ਵਾ ਉਚ੍ਚਾਰਪਸ੍ਸਾਵਂ ਕਰੋਤਿ, ਪਿਟ੍ਠਿਯਂ ਚਙ੍ਕਮਤਿ. ਹਤ੍ਥੀ ਅਤ੍ਤਨੋ ਸੀਲਵਨ੍ਤਤਾਯ ਖਨ੍ਤਿਸਮ੍ਪਦਾਯ ਨ ਕਿਞ੍ਚਿ ਕਰੋਤਿ. ਅਥੇਕਦਿਵਸਂ ਤਸ੍ਸ ਹਤ੍ਥਿਸ੍ਸ ਠਾਨੇ ਅਞ੍ਞੋ ਦੁਟ੍ਠਹਤ੍ਥਿਪੋਤੋ ਅਟ੍ਠਾਸਿ. ਮਕ੍ਕਟੋ ‘‘ਸੋਯੇਵ ਅਯ’’ਨ੍ਤਿ ਸਞ੍ਞਾਯ ਦੁਟ੍ਠਹਤ੍ਥਿਸ੍ਸ ਪਿਟ੍ਠਿਂ ਅਭਿਰੁਹਿ. ਅਥ ਨਂ ਸੋ ਸੋਣ੍ਡਾਯ ਗਹੇਤ੍ਵਾ ਭੂਮਿਯਂ ਠਪੇਤ੍ਵਾ ਪਾਦੇਨ ਅਕ੍ਕਮਿਤ੍ਵਾ ਸਞ੍ਚੁਣ੍ਣੇਸਿ. ਸਾ ਪਵਤ੍ਤਿ ਭਿਕ੍ਖੁਸਙ੍ਘੇ ਪਾਕਟਾ ਜਾਤਾ. ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਆਵੁਸੋ, ਲੋਲਮਕ੍ਕਟੋ ਕਿਰ ਸੀਲਵਨ੍ਤਹਤ੍ਥਿਸਞ੍ਞਾਯ ਦੁਟ੍ਠਹਤ੍ਥਿਪਿਟ੍ਠਿਂ ਅਭਿਰੁਹਿ, ਅਥ ਨਂ ਸੋ ਜੀਵਿਤਕ੍ਖਯਂ ਪਾਪੇਸੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵੇਸ, ਲੋਲਮਕ੍ਕਟੋ ਏਵਂਸੀਲੋ, ਪੋਰਾਣਤੋ ਪਟ੍ਠਾਯ ਏਵਂਸੀਲੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਹਿਮਵਨ੍ਤਪਦੇਸੇ ਮਹਿਂਸਯੋਨਿਯਂ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਥਾਮਸਮ੍ਪਨ੍ਨੋ ਮਹਾਸਰੀਰੋ ਪਬ੍ਬਤਪਾਦਪਬ੍ਭਾਰਗਿਰਿਦੁਗ੍ਗਵਨਘਟੇਸੁ ਵਿਚਰਨ੍ਤੋ ਏਕਂ ਫਾਸੁਕਂ ਰੁਕ੍ਖਮੂਲਂ ਦਿਸ੍ਵਾ ਗੋਚਰਂ ਗਹੇਤ੍ਵਾ ਦਿਵਾ ਤਸ੍ਮਿਂ ਰੁਕ੍ਖਮੂਲੇ ਅਟ੍ਠਾਸਿ. ਅਥੇਕੋ ਲੋਲਮਕ੍ਕਟੋ ਰੁਕ੍ਖਾ ਓਤਰਿਤ੍ਵਾ ਤਸ੍ਸ ਪਿਟ੍ਠਿਂ ਅਭਿਰੁਹਿਤ੍ਵਾ ਉਚ੍ਚਾਰਪਸ੍ਸਾਵਂ ਕਤ੍ਵਾ ਸਿਙ੍ਗੇ ਗਣ੍ਹਿਤ੍ਵਾ ਓਲਮ੍ਬਨ੍ਤੋ ਨਙ੍ਗੁਟ੍ਠੇ ਗਹੇਤ੍ਵਾ ਦੋਲਾਯਨ੍ਤੋਵ ਕੀਲ਼ਿ. ਬੋਧਿਸਤ੍ਤੋ ਖਨ੍ਤਿਮੇਤ੍ਤਾਨੁਦ੍ਦਯਸਮ੍ਪਦਾਯ ਤਂ ਤਸ੍ਸ ਅਨਾਚਾਰਂ ਨ ਮਨਸਾਕਾਸਿ, ਮਕ੍ਕਟੋ ਪੁਨਪ੍ਪੁਨਂ ਤਥੇਵ ਕਰਿ. ਅਥੇਕਦਿਵਸਂ ਤਸ੍ਮਿਂ ਰੁਕ੍ਖੇ ਅਧਿਵਤ੍ਥਾ ਦੇਵਤਾ ਰੁਕ੍ਖਕ੍ਖਨ੍ਧੇ ਠਤ੍ਵਾ ਨਂ ‘‘ਮਹਿਂਸਰਾਜ ਕਸ੍ਮਾ ਇਮਸ੍ਸ ਦੁਟ੍ਠਮਕ੍ਕਟਸ੍ਸ ਅਵਮਾਨਂ ਸਹਸਿ, ਨਿਸੇਧੇਹਿ ਨ’’ਨ੍ਤਿ ਵਤ੍ਵਾ ਏਤਮਤ੍ਥਂ ਪਕਾਸੇਨ੍ਤੀ ਪੁਰਿਮਾ ਦ੍ਵੇ ਗਾਥਾ ਅਵੋਚ –

੮੨. ‘‘ਕਿਮਤ੍ਥਮਭਿਸਨ੍ਧਾਯ, ਲਹੁਚਿਤ੍ਤਸ੍ਸ ਦੁਬ੍ਭਿਨੋ;

ਸਬ੍ਬਕਾਮਦਦਸ੍ਸੇਵ, ਇਮਂ ਦੁਕ੍ਖਂ ਤਿਤਿਕ੍ਖਸਿ.

੮੩. ‘‘ਸਿਙ੍ਗੇਨ ਨਿਹਨਾਹੇਤਂ, ਪਦਸਾ ਚ ਅਧਿਟ੍ਠਹ;

ਭਿਯ੍ਯੋ ਬਾਲਾ ਪਕੁਜ੍ਝੇਯ੍ਯੁਂ, ਨੋ ਚਸ੍ਸ ਪਟਿਸੇਧਕੋ’’ਤਿ.

ਤਤ੍ਥ ਕਿਮਤ੍ਥਮਭਿਸਨ੍ਧਾਯਾਤਿ ਕਿਂ ਨੁ ਖੋ ਕਾਰਣਂ ਪਟਿਚ੍ਚ ਕਿਂ ਸਮ੍ਪਸ੍ਸਮਾਨੋ. ਦੁਬ੍ਭਿਨੋਤਿ ਮਿਤ੍ਤਦੁਬ੍ਭਿਸ੍ਸ. ਸਬ੍ਬਕਾਮਦਦਸ੍ਸੇਵਾਤਿ ਸਬ੍ਬਕਾਮਦਦਸ੍ਸ ਸਾਮਿਕਸ੍ਸ ਇਵ. ਤਿਤਿਕ੍ਖਸੀਤਿ ਅਧਿਵਾਸੇਸਿ. ਪਦਸਾ ਚ ਅਧਿਟ੍ਠਹਾਤਿ ਪਾਦੇਨ ਚ ਨਂ ਤਿਣ੍ਹਖੁਰਗ੍ਗੇਨ ਯਥਾ ਏਤ੍ਥੇਵ ਮਰਤਿ, ਏਵਂ ਅਕ੍ਕਮ. ਭਿਯ੍ਯੋ ਬਾਲਾਤਿ ਸਚੇ ਹਿ ਪਟਿਸੇਧਕੋ ਨ ਭਵੇਯ੍ਯ, ਬਾਲਾ ਅਞ੍ਞਾਣਸਤ੍ਤਾ ਪੁਨਪ੍ਪੁਨਂ ਕੁਜ੍ਝੇਯ੍ਯੁਂ ਘਟ੍ਟੇਯ੍ਯੁਂ ਵਿਹੇਠੇਯ੍ਯੁਂ ਏਵਾਤਿ ਦੀਪੇਤਿ.

ਤਂ ਸੁਤ੍ਵਾ ਬੋਧਿਸਤ੍ਤੋ ‘‘ਰੁਕ੍ਖਦੇਵਤੇ, ਸਚਾਹਂ ਇਮਿਨਾ ਜਾਤਿਗੋਤ੍ਤਬਲਾਦੀਹਿ ਅਧਿਕੋ ਸਮਾਨੋ ਇਮਸ੍ਸ ਦੋਸਂ ਨ ਸਹਿਸ੍ਸਾਮਿ, ਕਥਂ ਮੇ ਮਨੋਰਥੋ ਨਿਪ੍ਫਤ੍ਤਿਂ ਗਮਿਸ੍ਸਤਿ. ਅਯਂ ਪਨ ਮਂ ਵਿਯ ਅਞ੍ਞਮ੍ਪਿ ਮਞ੍ਞਮਾਨੋ ਏਵਂ ਅਨਾਚਾਰਂ ਕਰਿਸ੍ਸਤਿ, ਤਤੋ ਯੇਸਂ ਚਣ੍ਡਮਹਿਂਸਾਨਂ ਏਸ ਏਵਂ ਕਰਿਸ੍ਸਤਿ, ਏਤੇਯੇਵ ਏਤਂ ਵਧਿਸ੍ਸਨ੍ਤਿ. ਸਾ ਤਸ੍ਸ ਅਞ੍ਞੇਹਿ ਮਾਰਣਾ ਮਯ੍ਹਂ ਦੁਕ੍ਖਤੋ ਚ ਪਾਣਾਤਿਪਾਤਤੋ ਚ ਵਿਮੁਤ੍ਤਿ ਭਵਿਸ੍ਸਤੀ’’ਤਿ ਵਤ੍ਵਾ ਤਤਿਯਂ ਗਾਥਮਾਹ –