੯. ਅਪਾਯਿਮ੍ਹਵਗ੍ਗੋ

[੮੧] ੧. ਸੁਰਾਪਾਨਜਾਤਕਵਣ੍ਣਨਾ

ਅਪਾਯਿਮ੍ਹ ਅਨਚ੍ਚਿਮ੍ਹਾਤਿ ਇਦਂ ਸਤ੍ਥਾ ਕੋਸਮ੍ਬਿਂ ਉਪਨਿਸ੍ਸਾਯ ਘੋਸਿਤਾਰਾਮੇ ਵਿਹਰਨ੍ਤੋ ਸਾਗਤਤ੍ਥੇਰਂ ਆਰਬ੍ਭ ਕਥੇਸਿ. ਭਗਵਤਿ ਹਿ ਸਾਵਤ੍ਥਿਯਂ ਵਸ੍ਸਂ ਵਸਿਤ੍ਵਾ ਚਾਰਿਕਾਗਮਨੇਨ ਭਦ੍ਦਵਤਿਕਂ ਨਾਮ ਨਿਗਮਂ ਸਮ੍ਪਤ੍ਤੇ ਗੋਪਾਲਕਾ ਪਸੁਪਾਲਕਾ ਕਸ੍ਸਕਾ ਪਥਾਵਿਨੋ ਚ ਸਤ੍ਥਾਰਂ ਦਿਸ੍ਵਾ ਵਨ੍ਦਿਤ੍ਵਾ ‘‘ਮਾ, ਭਨ੍ਤੇ, ਭਗਵਾ ਅਮ੍ਬਤਿਤ੍ਥਂ ਅਗਮਾਸਿ, ਅਮ੍ਬਤਿਤ੍ਥੇ ਜਟਿਲਸ੍ਸ ਅਸ੍ਸਮੇ ਅਮ੍ਬਤਿਤ੍ਥਕੋ ਨਾਮ ਨਾਗੋ ਆਸੀਵਿਸੋ ਘੋਰਵਿਸੋ, ਸੋ ਭਗਵਨ੍ਤਂ ਵਿਹੇਠੇਯ੍ਯਾ’’ਤਿ ਵਾਰਯਿਂਸੁ. ਭਗਵਾਪਿ ਤੇਸਂ ਕਥਂ ਅਸੁਣਨ੍ਤੋ ਵਿਯ ਤੇਸੁ ਯਾਵਤਤਿਯਂ ਵਾਰਯਮਾਨੇਸੁਪਿ ਅਗਮਾਸਿਯੇਵ.

ਤਤ੍ਰ ਸੁਦਂ ਭਗਵਾ ਭਦ੍ਦਵਤਿਕਾਯ ਅਵਿਦੂਰੇ ਅਞ੍ਞਤਰਸ੍ਮਿਂ ਵਨਸਣ੍ਡੇ ਵਿਹਰਤਿ. ਤੇਨ ਖੋ ਪਨ ਸਮਯੇਨ ਬੁਦ੍ਧੂਪਟ੍ਠਾਕੋ ਸਾਗਤੋ ਨਾਮ ਥੇਰੋ ਪੋਥੁਜ੍ਜਨਿਕਾਯ ਇਦ੍ਧਿਯਾ ਸਮਨ੍ਨਾਗਤੋ ਤਂ ਅਸ੍ਸਮਂ ਉਪਸਙ੍ਕਮਿਤ੍ਵਾ ਤਸ੍ਸ ਨਾਗਰਾਜਸ੍ਸ ਵਸਨਟ੍ਠਾਨੇ ਤਿਣਸਨ੍ਥਾਰਕਂ ਪਞ੍ਞਾਪੇਤ੍ਵਾ ਪਲ੍ਲਙ੍ਕੇਨ ਨਿਸੀਦਿ. ਨਾਗੋ ਮਕ੍ਖਂ ਅਸਹਮਾਨੋ ਧੂਮਾਯਿ, ਥੇਰੋਪਿ ਧੂਮਾਯਿ. ਨਾਗੋ ਪਜ੍ਜਲਿ, ਥੇਰੋਪਿ ਪਜ੍ਜਲਿ. ਨਾਗਸ੍ਸ ਤੇਜੋ ਥੇਰਂ ਨ ਬਾਧਤਿ, ਥੇਰਸ੍ਸ ਤੇਜੋ ਨਾਗਂ ਬਾਧਤਿ. ਏਵਂ ਸੋ ਖਣੇਨ ਤਂ ਨਾਗਰਾਜਾਨਂ ਦਮੇਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਪੇਤ੍ਵਾ ਸਤ੍ਥੁ ਸਨ੍ਤਿਕਂ ਅਗਮਾਸਿ.

ਸਤ੍ਥਾ ਭਦ੍ਦਵਤਿਕਾਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਕੋਸਮ੍ਬਿਂ ਅਗਮਾਸਿ. ਸਾਗਤਤ੍ਥੇਰੇਨ ਨਾਗਸ੍ਸ ਦਮਿਤਭਾਵੋ ਸਕਲਜਨਪਦਂ ਪਤ੍ਥਰਿ. ਕੋਸਮ੍ਬਿਨਗਰਵਾਸਿਨੋ ਸਤ੍ਥੁ ਪਚ੍ਚੁਗ੍ਗਮਨਂ ਕਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਸਾਗਤਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤਾ ਏਵਮਾਹਂਸੁ ‘‘ਭਨ੍ਤੇ, ਯਂ ਤੁਮ੍ਹਾਕਂ ਦੁਲ੍ਲਭਂ, ਤਂ ਵਦੇਯ੍ਯਾਥ, ਤਦੇਵ ਮਯਂ ਪਟਿਯਾਦੇਸ੍ਸਾਮਾ’’ਤਿ. ਥੇਰੋ ਤੁਣ੍ਹੀ ਅਹੋਸਿ. ਛਬ੍ਬਗ੍ਗਿਯਾ ਪਨਾਹਂਸੁ ‘‘ਆਵੁਸੋ, ਪਬ੍ਬਜਿਤਾਨਂ ਨਾਮ ਕਾਪੋਤਿਕਾ ਸੁਰਾ ਦੁਲ੍ਲਭਾ ਚੇਵ ਮਨਾਪਾ ਚ. ਸਚੇ ਤੁਮ੍ਹੇ ਥੇਰਸ੍ਸ ਪਸਨ੍ਨਾ, ਕਾਪੋਤਿਕਂ ਸੁਰਂ ਪਟਿਯਾਦੇਥਾ’’ਤਿ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਸਤ੍ਥਾਰਂ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਨਗਰਂ ਪਵਿਸਿਤ੍ਵਾ ਅਤ੍ਤਨੋ ਅਤ੍ਤਨੋ ਗੇਹੇ ‘‘ਥੇਰਸ੍ਸ ਦਸ੍ਸਾਮਾ’’ਤਿ ਕਾਪੋਤਿਕਂ ਸੁਰਂ ਪਸਨ੍ਨਂ ਪਟਿਯਾਦੇਤ੍ਵਾ ਥੇਰਂ ਨਿਮਨ੍ਤੇਤ੍ਵਾ ਘਰੇ ਘਰੇ ਪਸਨ੍ਨਂ ਸੁਰਂ ਅਦਂਸੁ. ਥੇਰੋ ਪਿਵਿਤ੍ਵਾ ਸੁਰਾਮਦਮਤ੍ਤੋ ਨਗਰਤੋ ਨਿਕ੍ਖਮਨ੍ਤੋ ਦ੍ਵਾਰਨ੍ਤਰੇ ਪਤਿਤ੍ਵਾ ਵਿਲਪਮਾਨੋ ਨਿਪਜ੍ਜਿ.

ਸਤ੍ਥਾ ਕਤਭਤ੍ਤਕਿਚ੍ਚੋ ਨਗਰਾ ਨਿਕ੍ਖਮਨ੍ਤੋ ਥੇਰਂ ਤੇਨਾਕਾਰੇਨ ਨਿਪਨ੍ਨਂ ਦਿਸ੍ਵਾ ‘‘ਗਣ੍ਹਥ, ਭਿਕ੍ਖਵੇ, ਸਾਗਤ’’ਨ੍ਤਿ ਗਾਹਾਪੇਤ੍ਵਾ ਆਰਾਮਂ ਅਗਮਾਸਿ. ਭਿਕ੍ਖੂ ਥੇਰਸ੍ਸ ਸੀਸਂ ਤਥਾਗਤਸ੍ਸ ਪਾਦਮੂਲੇ ਕਤ੍ਵਾ ਤਂ ਨਿਪਜ੍ਜਾਪੇਸੁਂ, ਸੋ ਪਰਿਵਤ੍ਤਿਤ੍ਵਾ ਪਾਦੇ ਤਥਾਗਤਾਭਿਮੁਖੇ ਕਤ੍ਵਾ ਨਿਪਜ੍ਜਿ. ਸਤ੍ਥਾ ਭਿਕ੍ਖੂ ਪਟਿਪੁਚ੍ਛਿ ‘‘ਕਿਂ ਨੁ ਖੋ, ਭਿਕ੍ਖਵੇ, ਯਂ ਪੁਬ੍ਬੇ ਸਾਗਤਸ੍ਸ ਮਯਿ ਗਾਰਵਂ, ਤਂ ਇਦਾਨਿ ਅਤ੍ਥੀ’’ਤਿ? ‘‘ਨਤ੍ਥਿ, ਭਨ੍ਤੇ’’ਤਿ. ‘‘ਭਿਕ੍ਖਵੇ, ਅਮ੍ਬਤਿਤ੍ਥਕਂ ਨਾਗਰਾਜਾਨਂ ਕੋ ਦਮੇਸੀ’’ਤਿ. ‘‘ਸਾਗਤੋ, ਭਨ੍ਤੇ’’ਤਿ. ‘‘ਕਿਂ ਪਨੇਤਰਹਿ, ਭਿਕ੍ਖਵੇ, ਸਾਗਤੋ ਉਦਕਦੇਡ੍ਡੂਭਕਮ੍ਪਿ ਦਮੇਤੁਂ ਸਕ੍ਕੁਣੇਯ੍ਯਾ’’ਤਿ. ‘‘ਨੋ ਹੇਤਂ, ਭਨ੍ਤੇ’’. ‘‘ਅਪਿ ਨੁ ਖੋ, ਭਿਕ੍ਖਵੇ, ਏਵਰੂਪਂ ਪਾਤੁਂ ਯੁਤ੍ਤਂ, ਯਂ ਪਿਵਿਤ੍ਵਾ ਏਵਂਵਿਸਞ੍ਞੀ ਹੋਤੀ’’ਤਿ. ‘‘ਅਯੁਤ੍ਤਂ, ਭਨ੍ਤੇ’’ਤਿ. ਅਥ ਖੋ ਭਗਵਾ ਥੇਰਂ ਗਰਹਿਤ੍ਵਾ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਸੁਰਾਮੇਰਯਪਾਨੇ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੩੨੭) ਸਿਕ੍ਖਾਪਦਂ ਪਞ੍ਞਾਪੇਤ੍ਵਾ ਉਟ੍ਠਾਯਾਸਨਾ ਗਨ੍ਧਕੁਟਿਂ ਪਾਵਿਸਿ.

ਧਮ੍ਮਸਭਾਯਂ ਸਨ੍ਨਿਪਤਿਤਾ ਭਿਕ੍ਖੂ ਸੁਰਾਪਾਨਸ੍ਸ ਅਵਣ੍ਣਂ ਕਥਯਿਂਸੁ ‘‘ਯਾਵ ਮਹਾਦੋਸਞ੍ਚੇਤਂ, ਆਵੁਸੋ, ਸੁਰਾਪਾਨਂ ਨਾਮ, ਤਾਵ ਪਞ੍ਞਾਸਮ੍ਪਨ੍ਨਂ ਨਾਮ ਇਦ੍ਧਿਮਨ੍ਤਂ ਸਾਗਤਂ ਯਥਾ ਸਤ੍ਥੁ ਗੁਣਮਤ੍ਤਮ੍ਪਿ ਨ ਜਾਨਾਤਿ, ਤਥਾ ਅਕਾਸੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ ਸੁਰਂ ਪਿਵਿਤ੍ਵਾ ਪਬ੍ਬਜਿਤਾ ਵਿਸਞ੍ਞਿਨੋ ਹੋਨ੍ਤਿ, ਪੁਬ੍ਬੇਪਿ ਅਹੇਸੁਂਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਸਿਰਟ੍ਠੇ ਉਦਿਚ੍ਚਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਉਪ੍ਪਾਦੇਤ੍ਵਾ ਝਾਨਕੀਲ਼ਂ ਕੀਲ਼ਨ੍ਤੋ ਹਿਮਵਨ੍ਤਪ੍ਪਦੇਸੇ ਵਸਤਿ ਪਞ੍ਚਹਿ ਅਨ੍ਤੇਵਾਸਿਕਸਤੇਹਿ ਪਰਿਵੁਤੋ. ਅਥ ਨਂ ਵਸ੍ਸਾਨਸਮਯੇ ਸਮ੍ਪਤ੍ਤੇ ਅਨ੍ਤੇਵਾਸਿਕਾ ਆਹਂਸੁ ‘‘ਆਚਰਿਯ, ਮਨੁਸ੍ਸਪਥਂ ਗਨ੍ਤ੍ਵਾ ਲੋਣਮ੍ਬਿਲਂ ਸੇਵਿਤ੍ਵਾ ਆਗਚ੍ਛਾਮਾ’’ਤਿ. ‘‘ਆਵੁਸੋ, ਅਹਂ ਇਧੇਵ ਵਸਿਸ੍ਸਾਮਿ, ਤੁਮ੍ਹੇ ਪਨ ਗਨ੍ਤ੍ਵਾ ਸਰੀਰਂ ਸਨ੍ਤਪ੍ਪੇਤ੍ਵਾ ਵਸ੍ਸਂ ਵੀਤਿਨਾਮੇਤ੍ਵਾ ਆਗਚ੍ਛਥਾ’’ਤਿ. ਤੇ ‘‘ਸਾਧੂ’’ਤਿ ਆਚਰਿਯਂ ਵਨ੍ਦਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਰਾਜੁਯ੍ਯਾਨੇ ਵਸਿਤ੍ਵਾ ਪੁਨਦਿਵਸੇ ਬਹਿਦ੍ਵਾਰਗਾਮੇਯੇਵ ਭਿਕ੍ਖਾਯ ਚਰਿਤ੍ਵਾ ਸੁਹਿਤਾ ਹੁਤ੍ਵਾ ਪੁਨਦਿਵਸੇ ਨਗਰਂ ਪਵਿਸਿਂਸੁ. ਮਨੁਸ੍ਸਾ ਸਮ੍ਪਿਯਾਯਮਾਨਾ ਭਿਕ੍ਖਂ ਅਦਂਸੁ. ਕਤਿਪਾਹਚ੍ਚਯੇਨ ਚ ਰਞ੍ਞੋਪਿ ਆਰੋਚੇਸੁਂ ‘‘ਦੇਵ, ਹਿਮਵਨ੍ਤਤੋ ਪਞ੍ਚਸਤਾ ਇਸਯੋ ਆਗਨ੍ਤ੍ਵਾ ਉਯ੍ਯਾਨੇ ਵਸਨ੍ਤਿ ਘੋਰਤਪਾ ਪਰਮਧਿਤਿਨ੍ਦ੍ਰਿਯਾ ਸੀਲਵਨ੍ਤੋ’’ਤਿ. ਰਾਜਾ ਤੇਸਂ ਗੁਣੇ ਸੁਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਵਨ੍ਦਿਤ੍ਵਾ ਕਤਪਟਿਸਨ੍ਥਾਰੋ ਵਸ੍ਸਾਨਂ ਚਤੁਮਾਸਂ ਤਤ੍ਥੇਵ ਵਸਨਤ੍ਥਾਯ ਪਟਿਞ੍ਞਂ ਗਹੇਤ੍ਵਾ ਨਿਮਨ੍ਤੇਸਿ, ਤੇ ਤਤੋ ਪਟ੍ਠਾਯ ਰਾਜਗੇਹੇਯੇਵ ਭੁਞ੍ਜਿਤ੍ਵਾ ਉਯ੍ਯਾਨੇ ਵਸਨ੍ਤਿ.

ਅਥੇਕਦਿਵਸਂ ਨਗਰੇ ਸੁਰਾਨਕ੍ਖਤ੍ਤਂ ਨਾਮ ਅਹੋਸਿ. ਰਾਜਾ ‘‘ਪਬ੍ਬਜਿਤਾਨਂ ਸੁਰਾ ਦੁਲ੍ਲਭਾ’’ਤਿ ਬਹੁਂ ਉਤ੍ਤਮਸੁਰਂ ਦਾਪੇਸਿ. ਤਾਪਸਾ ਸੁਰਂ ਪਿਵਿਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਸੁਰਾਮਦਮਤ੍ਤਾ ਹੁਤ੍ਵਾ ਏਕਚ੍ਚੇ ਉਟ੍ਠਾਯ ਨਚ੍ਚਿਂਸੁ, ਏਕਚ੍ਚੇ ਗਾਯਿਂਸੁ, ਨਚ੍ਚਿਤ੍ਵਾ ਗਾਯਿਤ੍ਵਾ ਖਾਰਿਕਾਦੀਨਿ ਅਵਤ੍ਥਰਿਤ੍ਵਾ ਨਿਦ੍ਦਾਯਿਤ੍ਵਾ ਸੁਰਾਮਦੇ ਛਿਨ੍ਨੇ ਪਬੁਜ੍ਝਿਤ੍ਵਾ ਤਂ ਅਤ੍ਤਨੋ ਵਿਪ੍ਪਕਾਰਂ ਦਿਸ੍ਵਾ ‘‘ਨ ਅਮ੍ਹੇਹਿ ਪਬ੍ਬਜਿਤਸਾਰੁਪ੍ਪਂ ਕਤ’’ਨ੍ਤਿ ਰੋਦਿਤ੍ਵਾ ਪਰਿਦੇਵਿਤ੍ਵਾ ‘‘ਮਯਂ ਆਚਰਿਯੇਨ ਵਿਨਾਭੂਤਤ੍ਤਾ ਏਵਰੂਪਂ ਪਾਪਕਮ੍ਮਂ ਕਰਿਮ੍ਹਾ’’ਤਿ ਤਙ੍ਖਣਞ੍ਞੇਵ ਉਯ੍ਯਾਨਂ ਪਹਾਯ ਹਿਮਵਨ੍ਤਂ ਗਨ੍ਤ੍ਵਾ ਪਟਿਸਾਮਿਤਪਰਿਕ੍ਖਾਰਾ ਆਚਰਿਯਂ ਵਨ੍ਦਿਤ੍ਵਾ ਨਿਸੀਦਿਤ੍ਵਾ ‘‘ਕਿਂ ਨੁ ਖੋ, ਤਾਤਾ, ਮਨੁਸ੍ਸਪਥੇ ਭਿਕ੍ਖਾਯ ਅਕਿਲਮਮਾਨਾ ਸੁਖਂ ਵਸਿਤ੍ਥ, ਸਮਗ੍ਗਵਾਸਞ੍ਚ ਪਨ ਵਸਿਤ੍ਥਾ’’ਤਿ ਪੁਚ੍ਛਿਤਾ ‘‘ਆਚਰਿਯ, ਸੁਖਂ ਵਸਿਮ੍ਹ, ਅਪਿਚ ਖੋ ਪਨ ਮਯਂ ਅਪਾਤਬ੍ਬਯੁਤ੍ਤਕਂ ਪਿਵਿਤ੍ਵਾ ਵਿਸਞ੍ਞੀਭੂਤਾ ਸਤਿਂ ਪਚ੍ਚੁਪਟ੍ਠਾਪੇਤੁਂ ਅਸਕ੍ਕੋਨ੍ਤਾ ਨਚ੍ਚਿਮ੍ਹ ਚੇਵ ਗਾਯਿਮ੍ਹ ਚਾ’’ਤਿ ਏਤਮਤ੍ਥਂ ਆਰੋਚੇਨ੍ਤਾ ਇਮਂ ਗਾਥਂ ਸਮੁਟ੍ਠਾਪੇਤ੍ਵਾ ਆਹਂਸੁ –

੮੧. ‘‘ਅਪਾਯਿਮ੍ਹ ਅਨਚ੍ਚਿਮ੍ਹ, ਅਗਾਯਿਮ੍ਹ ਰੁਦਿਮ੍ਹ ਚ;

ਵਿਸਞ੍ਞੀਕਰਣਿਂ ਪਿਤ੍ਵਾ, ਦਿਟ੍ਠਾ ਨਾਹੁਮ੍ਹ ਵਾਨਰਾ’’ਤਿ.

ਤਤ੍ਥ ਅਪਾਯਿਮ੍ਹਾਤਿ ਸੁਰਂ ਪਿਵਿਮ੍ਹ. ਅਨਚ੍ਚਿਮ੍ਹਾਤਿ ਤਂ ਪਿਵਿਤ੍ਵਾ ਹਤ੍ਥਪਾਦੇ ਲਾਲ਼ੇਨ੍ਤਾ ਨਚ੍ਚਿਮ੍ਹ. ਅਗਾਯਿਮ੍ਹਾਤਿ ਮੁਖਂ ਵਿਵਰਿਤ੍ਵਾ ਆਯਤਕੇਨ ਸਰੇਨ ਗਾਯਿਮ੍ਹ. ਰੁਦਿਮ੍ਹ ਚਾਤਿ ਪੁਨ ਵਿਪ੍ਪਟਿਸਾਰਿਨੋ ‘‘ਏਵਰੂਪਂ ਨਾਮ ਅਮ੍ਹੇਹਿ ਕਤ’’ਨ੍ਤਿ ਰੋਦਿਮ੍ਹ ਚ. ਵਿਸਞ੍ਞੀਕਰਣਿਂ ਪਿਤ੍ਵਾ, ਦਿਟ੍ਠਾ ਨਾਹੁਮ੍ਹ ਵਾਨਰਾਤਿ ਏਵਰੂਪਂ ਸਞ੍ਞਾਵਿਨਾਸਨਤੋ ਵਿਸਞ੍ਞੀਕਰਣਿਂ ਸੁਰਂ ਪਿਵਿਤ੍ਵਾ ‘‘ਏਤਦੇਵ ਸਾਧੁ, ਯਂ ਵਾਨਰਾ ਨਾਹੁਮ੍ਹਾ’’ਤਿ. ਏਵਂ ਤੇ ਅਤ੍ਤਨੋ ਅਗੁਣਂ ਕਥੇਸੁਂ.

ਬੋਧਿਸਤ੍ਤੋ ‘‘ਗਰੁਸਂਵਾਸਰਹਿਤਾਨਂ ਨਾਮ ਏਵਰੂਪਂ ਹੋਤਿਯੇਵਾ’’ਤਿ ਤੇ ਤਾਪਸੇ ਗਰਹਿਤ੍ਵਾ ‘‘ਪੁਨ ਏਵਰੂਪਂ ਮਾਕਰਿਤ੍ਥਾ’’ਤਿ ਤੇਸਂ ਓਵਾਦਂ ਦਤ੍ਵਾ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ. ਇਤੋ ਪਟ੍ਠਾਯ ਹਿ ‘‘ਅਨੁਸਨ੍ਧਿਂ ਘਟੇਤ੍ਵਾ’’ਤਿ ਇਦਮ੍ਪਿ ਨ ਵਕ੍ਖਾਮ. ਤਦਾ ਇਸਿਗਣੋ ਬੁਦ੍ਧਪਰਿਸਾ ਅਹੋਸਿ, ਗਣਸਤ੍ਥਾ ਪਨ ਅਹਮੇਵ ਅਹੋਸਿਨ੍ਤਿ.

ਸੁਰਾਪਾਨਜਾਤਕਵਣ੍ਣਨਾ ਪਠਮਾ.

[੮੨] ੨. ਮਿਤ੍ਤਵਿਨ੍ਦਕਜਾਤਕਵਣ੍ਣਨਾ

ਅਤਿਕ੍ਕਮ੍ਮ ਰਮਣਕਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਦੁਬ੍ਬਚਭਿਕ੍ਖੁਂ ਆਰਬ੍ਭ ਕਥੇਸਿ. ਇਮਸ੍ਸ ਪਨ ਜਾਤਕਸ੍ਸ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲਿਕਂ ਵਤ੍ਥੁ, ਤਂ ਦਸਕਨਿਪਾਤੇ ਮਹਾਮਿਤ੍ਤਵਿਨ੍ਦਕਜਾਤਕੇ (ਜਾ. ੧.੧.੮੨; ੧.੫.੧੦੦ ਆਦਯੋ) ਆਵਿ ਭਵਿਸ੍ਸਤਿ. ਤਦਾ ਪਨ ਬੋਧਿਸਤ੍ਤੋ ਇਮਂ ਗਾਥਮਾਹ –

੮੨. ‘‘ਅਤਿਕ੍ਕਮ੍ਮ ਰਮਣਕਂ, ਸਦਾਮਤ੍ਤਞ੍ਚ ਦੂਭਕਂ;

ਸ੍ਵਾਸਿ ਪਾਸਾਣਮਾਸੀਨੋ, ਯਸ੍ਮਾ ਜੀਵਂ ਨ ਮੋਕ੍ਖਸੀ’’ਤਿ.

ਤਤ੍ਥ ਰਮਣਕਨ੍ਤਿ ਤਸ੍ਮਿਂ ਕਾਲੇ ਫਲਿਕਸ੍ਸ ਨਾਮਂ, ਫਲਿਕਪਾਸਾਦਞ੍ਚ ਅਤਿਕ੍ਕਨ੍ਤੋਸੀਤਿ ਦੀਪੇਤਿ. ਸਦਾਮਤ੍ਤਞ੍ਚਾਤਿ ਰਜਤਸ੍ਸ ਨਾਮਂ, ਰਜਤਪਾਸਾਦਞ੍ਚ ਅਤਿਕ੍ਕਨ੍ਤੋਸੀਤਿ ਦੀਪੇਤਿ. ਦੂਭਕਨ੍ਤਿ ਮਣਿਨੋ ਨਾਮਂ, ਮਣਿਪਾਸਾਦਞ੍ਚ ਅਤਿਕ੍ਕਨ੍ਤੋਸੀਤਿ ਦੀਪੇਤਿ. ਸ੍ਵਾਸੀਤਿ ਸੋ ਅਸਿ ਤ੍ਵਂ. ਪਾਸਾਣਮਾਸੀਨੋਤਿ ਖੁਰਚਕ੍ਕਂ ਨਾਮ ਪਾਸਾਣਮਯਂ ਵਾ ਹੋਤਿ ਰਜਤਮਯਂ ਵਾ ਮਣਿਮਯਂ ਵਾ, ਤਂ ਪਨ ਪਾਸਾਣਮਯਮੇਵ. ਸੋ ਚ ਤੇਨ ਆਸੀਨੋ ਅਤਿਨਿਵਿਟ੍ਠੋ ਅਜ੍ਝੋਤ੍ਥਟੋ. ਤਸ੍ਮਾ ਪਾਸਾਣੇਨ ਆਸੀਨਤ੍ਤਾ ‘‘ਪਾਸਾਣਾਸੀਨੋ’’ਤਿ ਵਤ੍ਤਬ੍ਬੇ ਬ੍ਯਞ੍ਜਨਸਨ੍ਧਿਵਸੇਨ ਮਕਾਰਂ ਆਦਾਯ ‘‘ਪਾਸਾਣਮਾਸੀਨੋ’’ਤਿ ਵੁਤ੍ਤਂ. ਪਾਸਾਣਂ ਵਾ ਆਸੀਨੋ, ਤਂ ਖੁਰਚਕ੍ਕਂ ਆਸਜ੍ਜ ਪਾਪੁਣਿਤ੍ਵਾ ਠਿਤੋਤਿ ਅਤ੍ਥੋ. ਯਸ੍ਮਾ ਜੀਵਂ ਨ ਮੋਕ੍ਖਸੀਤਿ ਯਸ੍ਮਾ ਖੁਰਚਕ੍ਕਾ ਯਾਵ ਤੇ ਪਾਪਂ ਨ ਖੀਯਤਿ, ਤਾਵ ਜੀਵਨ੍ਤੋਯੇਵ ਨ ਮੁਚ੍ਚਿਸ੍ਸਸਿ, ਤਂ ਆਸੀਨੋਸੀਤਿ.

ਇਮਂ ਗਾਥਂ ਵਤ੍ਵਾ ਬੋਧਿਸਤ੍ਤੋ ਅਤ੍ਤਨੋ ਵਸਨਟ੍ਠਾਨਂਯੇਵ ਗਤੋ. ਮਿਤ੍ਤਵਿਨ੍ਦਕੋਪਿ ਖੁਰਚਕ੍ਕਂ ਉਕ੍ਖਿਪਿਤ੍ਵਾ ਮਹਾਦੁਕ੍ਖਂ ਅਨੁਭਵਮਾਨੋ ਪਾਪਕਮ੍ਮੇ ਪਰਿਕ੍ਖੀਣੇ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਿਤ੍ਤਵਿਨ੍ਦਕੋ ਦੁਬ੍ਬਚਭਿਕ੍ਖੁ ਅਹੋਸਿ, ਦੇਵਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਿਤ੍ਤਵਿਨ੍ਦਕਜਾਤਕਵਣ੍ਣਨਾ ਦੁਤਿਯਾ.

[੮੩] ੩. ਕਾਲ਼ਕਣ੍ਣਿਜਾਤਕਵਣ੍ਣਨਾ

ਮਿਤ੍ਤੋ ਹਵੇ ਸਤ੍ਤਪਦੇਨ ਹੋਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਅਨਾਥਪਿਣ੍ਡਿਕਸ੍ਸ ਮਿਤ੍ਤਂ ਆਰਬ੍ਭ ਕਥੇਸਿ. ਸੋ ਕਿਰ ਅਨਾਥਪਿਣ੍ਡਿਕੇਨ ਸਦ੍ਧਿਂ ਸਹਪਂਸੁਕੀਲ਼ਿਕੋ ਏਕਾਚਰਿਯਸ੍ਸੇਵ ਸਨ੍ਤਿਕੇ ਉਗ੍ਗਹਿਤਸਿਪ੍ਪੋ ਨਾਮੇਨ ਕਾਲ਼ਕਣ੍ਣੀ ਨਾਮ. ਸੋ ਗਚ੍ਛਨ੍ਤੇ ਕਾਲੇ ਦੁਗ੍ਗਤੋ ਹੁਤ੍ਵਾ ਜੀਵਿਤੁਂ ਅਸਕ੍ਕੋਨ੍ਤੋ ਸੇਟ੍ਠਿਸ੍ਸ ਸਨ੍ਤਿਕਂ ਅਗਮਾਸਿ. ਸੋ ਤਂ ਸਮਸ੍ਸਾਸੇਤ੍ਵਾ ਪਰਿਬ੍ਬਯਂ ਦਤ੍ਵਾ ਅਤ੍ਤਨੋ ਕੁਟੁਮ੍ਬਂ ਪਟਿਚ੍ਛਾਪੇਸਿ. ਸੋ ਸੇਟ੍ਠਿਨੋ ਉਪਕਾਰਕੋ ਹੁਤ੍ਵਾ ਸਬ੍ਬਕਿਚ੍ਚਾਨਿ ਕਰੋਤਿ. ਤਂ ਸੇਟ੍ਠਿਸ੍ਸ ਸਨ੍ਤਿਕਂ ਆਗਤਕਾਲੇ ‘‘ਤਿਟ੍ਠ, ਕਾਲ਼ਕਣ੍ਣਿ, ਨਿਸੀਦ, ਕਾਲ਼ਕਣ੍ਣਿ, ਭੁਞ੍ਜ ਕਾਲ਼ਕਣ੍ਣੀ’’ਤਿ ਵਦਨ੍ਤਿ. ਅਥੇਕਦਿਵਸਂ ਸੇਟ੍ਠਿਨੋ ਮਿਤ੍ਤਾਮਚ੍ਚਾ ਸੇਟ੍ਠਿਂ ਉਪਸਙ੍ਕਮਿਤ੍ਵਾ ਏਵਮਾਹਂਸੁ ‘‘ਮਹਾਸੇਟ੍ਠਿ, ਮਾ ਏਤਂ ਤਵ ਸਨ੍ਤਿਕੇ ਕਰਿ, ‘ਤਿਟ੍ਠ, ਕਾਲ਼ਕਣ੍ਣਿ, ਨਿਸੀਦ ਕਾਲ਼ਕਣ੍ਣਿ, ਭੁਞ੍ਜ ਕਾਲ਼ਕਣ੍ਣੀ’ਤਿ ਹਿ ਇਮਿਨਾ ਸਦ੍ਦੇਨ ਯਕ੍ਖੋਪਿ ਪਲਾਯੇਯ੍ਯ, ਨ ਚੇਸ ਤਯਾ ਸਮਾਨੋ, ਦੁਗ੍ਗਤੋ ਦੁਰੂਪੇਤੋ, ਕਿਂ ਤੇ ਇਮਿਨਾ’’ਤਿ. ਅਨਾਥਪਿਣ੍ਡਿਕੋ ‘‘ਨਾਮਂ ਨਾਮ ਵੋਹਾਰਮਤ੍ਤਂ, ਨ ਤਂ ਪਣ੍ਡਿਤਾ ਪਮਾਣਂ ਕਰੋਨ੍ਤਿ, ਸੁਤਮਙ੍ਗਲਿਕੇਨ ਨਾਮ ਭਵਿਤੁਂ ਨ ਵਟ੍ਟਤਿ, ਨ ਸਕ੍ਕਾ ਮਯਾ ਨਾਮਮਤ੍ਤਂ ਨਿਸ੍ਸਾਯ ਸਹਪਂਸੁਕੀਲ਼ਿਕਂ ਸਹਾਯਂ ਪਰਿਚ੍ਚਜਿਤੁ’’ਨ੍ਤਿ ਤੇਸਂ ਵਚਨਂ ਅਨਾਦਾਯ ਏਕਦਿਵਸਂ ਅਤ੍ਤਨੋ ਭੋਗਗਾਮਂ ਗਚ੍ਛਨ੍ਤੋ ਤਂ ਗੇਹਰਕ੍ਖਕਂ ਕਤ੍ਵਾ ਅਗਮਾਸਿ.

ਚੋਰਾ ‘‘ਸੇਟ੍ਠਿ ਕਿਰ ਭੋਗਗਾਮਂ ਗਤੋ, ਗੇਹਮਸ੍ਸ ਵਿਲੁਮ੍ਪਿਸ੍ਸਾਮਾ’’ਤਿ ਨਾਨਾਵੁਧਹਤ੍ਥਾ ਰਤ੍ਤਿਭਾਗੇ ਆਗਨ੍ਤ੍ਵਾ ਗੇਹਂ ਪਰਿਵਾਰੇਸੁਂ. ਇਤਰੋਪਿ ਚੋਰਾਨਞ੍ਞੇਵ ਆਗਮਨਂ ਆਸਙ੍ਕਮਾਨੋ ਅਨਿਦ੍ਦਾਯਨ੍ਤੋਵ ਨਿਸੀਦਿ. ਸੋ ਚੋਰਾਨਂ ਆਗਤਭਾਵਂ ਞਤ੍ਵਾ ਮਨੁਸ੍ਸੇ ਪਬੋਧੇਤੁਂ ‘‘ਤ੍ਵਂ ਸਙ੍ਖਂ ਧਮ, ਤ੍ਵਂ ਮੁਦਿਙ੍ਗਂ ਵਾਦੇਹੀ’’ਤਿ ਮਹਾਸਮਜ੍ਜਂ ਕਰੋਨ੍ਤੋ ਵਿਯ ਸਕਲਨਿਵੇਸਨਂ ਏਕਸਦ੍ਦਂ ਕਾਰੇਸਿ. ਚੋਰਾ ‘‘ਸੁਞ੍ਞਂ ਗੇਹਨ੍ਤਿ ਦੁਸ੍ਸੁਤਂ ਅਮ੍ਹੇਹਿ, ਅਤ੍ਥੇਵ ਇਧ ਮਹਾਸੇਟ੍ਠੀ’’ਤਿ ਪਾਸਾਣਮੁਗ੍ਗਰਾਦੀਨਿ ਤਤ੍ਥੇਵ ਛਡ੍ਡੇਤ੍ਵਾ ਪਲਾਯਿਂਸੁ.

ਪੁਨਦਿਵਸੇ ਮਨੁਸ੍ਸਾ ਤਤ੍ਥ ਤਤ੍ਥ ਛਡ੍ਡਿਤੇ ਪਾਸਾਣਮੁਗ੍ਗਰਾਦਯੋ ਦਿਸ੍ਵਾ ਸਂਵੇਗਪ੍ਪਤ੍ਤਾ ਹੁਤ੍ਵਾ ‘‘ਸਚੇ ਅਜ੍ਜ ਏਵਰੂਪੋ ਬੁਦ੍ਧਿਸਮ੍ਪਨ੍ਨੋ ਘਰਵਿਚਾਰਕੋ ਨਾਭਵਿਸ੍ਸ, ਚੋਰੇਹਿ ਯਥਾਰੁਚਿਯਾ ਪਵਿਸਿਤ੍ਵਾ ਸਬ੍ਬਂ ਗੇਹਂ ਵਿਲੁਤ੍ਤਂ ਅਸ੍ਸ, ਇਮਂ ਦਲ਼੍ਹਮਿਤ੍ਤਂ ਨਿਸ੍ਸਾਯ ਸੇਟ੍ਠਿਨੋ ਵੁਡ੍ਢਿ ਜਾਤਾ’’ਤਿ ਤਂ ਪਸਂਸਿਤ੍ਵਾ ਸੇਟ੍ਠਿਸ੍ਸ ਭੋਗਗਾਮਤੋ ਆਗਤਕਾਲੇ ਸਬ੍ਬਂ ਤਂ ਪਵਤ੍ਤਿਂ ਆਰੋਚਯਿਂਸੁ. ਅਥ ਨੇ ਸੇਟ੍ਠਿ ਅਵੋਚ ‘‘ਤੁਮ੍ਹੇ ਏਵਰੂਪਂ ਮਮ ਗੇਹਰਕ੍ਖਕਂ ਮਿਤ੍ਤਂ ਨਿਕ੍ਕਡ੍ਢਾਪੇਥ, ਸਚਾਯਂ ਤੁਮ੍ਹਾਕਂ ਵਚਨੇਨ ਮਯਾ ਨਿਕ੍ਕਡ੍ਢਿਤੋ ਅਸ੍ਸ, ਅਜ੍ਜ ਮੇ ਕੁਟੁਮ੍ਬਂ ਕਿਞ੍ਚਿ ਨਾਭਵਿਸ੍ਸ, ਨਾਮਂ ਨਾਮ ਅਪ੍ਪਮਾਣਂ, ਹਿਤਚਿਤ੍ਤਮੇਵ ਪਮਾਣ’’ਨ੍ਤਿ ਤਸ੍ਸ ਉਤ੍ਤਰਿਤਰਂ ਪਰਿਬ੍ਬਯਂ ਦਤ੍ਵਾ ‘‘ਅਤ੍ਥਿ ਦਾਨਿ ਮੇ ਇਦਂ ਕਥਾਪਾਭਤ’’ਨ੍ਤਿ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਆਦਿਤੋ ਪਟ੍ਠਾਯ ਸਬ੍ਬਂ ਤਂ ਪਵਤ੍ਤਿਂ ਆਰੋਚੇਸਿ. ਸਤ੍ਥਾ ‘‘ਨ ਖੋ, ਗਹਪਤਿ, ਇਦਾਨੇਵ ਕਾਲ਼ਕਣ੍ਣਿਮਿਤ੍ਤੋ ਅਤ੍ਤਨੋ ਮਿਤ੍ਤਸ੍ਸ ਘਰੇ ਕੁਟੁਮ੍ਬਂ ਰਕ੍ਖਤਿ, ਪੁਬ੍ਬੇਪਿ ਰਕ੍ਖਿਯੇਵਾ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਮਹਾਯਸੋ ਸੇਟ੍ਠਿ ਅਹੋਸਿ. ਤਸ੍ਸ ਕਾਲ਼ਕਣ੍ਣੀ ਨਾਮ ਮਿਤ੍ਤੋਤਿ ਸਬ੍ਬਂ ਪਚ੍ਚੁਪ੍ਪਨ੍ਨਵਤ੍ਥੁਸਦਿਸਮੇਵ. ਬੋਧਿਸਤ੍ਤੋ ਭੋਗਗਾਮਤੋ ਆਗਤੋ ਤਂ ਪਵਤ੍ਤਿਂ ਸੁਤ੍ਵਾ ‘‘ਸਚੇ ਮਯਾ ਤੁਮ੍ਹਾਕਂ ਵਚਨੇਨ ਏਵਰੂਪੋ ਮਿਤ੍ਤੋ ਨਿਕ੍ਕਡ੍ਢਿਤੋ ਅਸ੍ਸ, ਅਜ੍ਜ ਮੇ ਕੁਟੁਮ੍ਬਂ ਕਿਞ੍ਚਿ ਨਾਭਵਿਸ੍ਸਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੮੩. ‘‘ਮਿਤ੍ਤੋ ਹਵੇ ਸਤ੍ਤਪਦੇਨ ਹੋਤਿ, ਸਹਾਯੋ ਪਨ ਦ੍ਵਾਦਸਕੇਨ ਹੋਤਿ;

ਮਾਸਡ੍ਢਮਾਸੇਨ ਚ ਞਾਤਿ ਹੋਤਿ, ਤਤੁਤ੍ਤਰਿਂ ਅਤ੍ਤਸਮੋਪਿ ਹੋਤਿ;

ਸੋਹਂ ਕਥਂ ਅਤ੍ਤਸੁਖਸ੍ਸ ਹੇਤੁ, ਚਿਰਸਨ੍ਥੁਤਂ ਕਾਲ਼ਕਣ੍ਣਿਂ ਜਹੇਯ੍ਯ’’ਨ੍ਤਿ.

ਤਤ੍ਥ ਹਵੇਤਿ ਨਿਪਾਤਮਤ੍ਤਂ. ਮੇਤ੍ਤਾਯਤੀਤਿ ਮਿਤ੍ਤੋ, ਮੇਤ੍ਤਂ ਪਚ੍ਚੁਪਟ੍ਠਾਪੇਤਿ, ਸਿਨੇਹਂ ਕਰੋਤੀਤਿ ਅਤ੍ਥੋ. ਸੋ ਪਨੇਸ ਸਤ੍ਤਪਦੇਨ ਹੋਤਿ, ਏਕਤੋ ਸਤ੍ਤਪਦਵੀਤਿਹਾਰਗਮਨਮਤ੍ਤੇਨ ਹੋਤੀਤਿ ਅਤ੍ਥੋ. ਸਹਾਯੋ ਪਨ ਦ੍ਵਾਦਸਕੇਨ ਹੋਤੀਤਿ ਸਬ੍ਬਕਿਚ੍ਚਾਨਿ ਏਕਤੋ ਕਰਣਵਸੇਨ ਸਬ੍ਬਿਰਿਯਾਪਥੇਸੁ ਸਹ ਗਚ੍ਛਤੀਤਿ ਸਹਾਯੋ. ਸੋ ਪਨੇਸ ਦ੍ਵਾਦਸਕੇਨ ਹੋਤਿ, ਦ੍ਵਾਦਸਾਹਂ ਏਕਤੋ ਨਿਵਾਸੇਨ ਹੋਤੀਤਿ ਅਤ੍ਥੋ. ਮਾਸਡ੍ਢਮਾਸੇਨ ਚਾਤਿ ਮਾਸੇਨ ਵਾ ਅਡ੍ਢਮਾਸੇਨ ਵਾ. ਞਾਤਿ ਹੋਤੀਤਿ ਞਾਤਿਸਮੋ ਹੋਤਿ. ਤਤੁਤ੍ਤਰਿਨ੍ਤਿ ਤਤੋ ਉਤ੍ਤਰਿਂ ਏਕਤੋ ਵਾਸੇਨ ਅਤ੍ਤਸਮੋਪਿ ਹੋਤਿਯੇਵ. ਜਹੇਯ੍ਯਨ੍ਤਿ ‘‘ਏਵਰੂਪਂ ਸਹਾਯਂ ਕਥਂ ਜਹੇਯ੍ਯ’’ਨ੍ਤਿ ਮਿਤ੍ਤਸ੍ਸ ਗੁਣਂ ਕਥੇਸਿ. ਤਤੋ ਪਟ੍ਠਾਯ ਪੁਨ ਕੋਚਿ ਤਸ੍ਸ ਅਨ੍ਤਰੇ ਵਤ੍ਤਾ ਨਾਮ ਨਾਹੋਸੀਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕਾਲ਼ਕਣ੍ਣੀ ਆਨਨ੍ਦੋ ਅਹੋਸਿ, ਬਾਰਾਣਸਿਸੇਟ੍ਠਿ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕਾਲ਼ਕਣ੍ਣਿਜਾਤਕਵਣ੍ਣਨਾ ਤਤਿਯਾ.

[੮੪] ੪. ਅਤ੍ਥਸ੍ਸਦ੍ਵਾਰਜਾਤਕਵਣ੍ਣਨਾ

ਆਰੋਗ੍ਯਮਿਚ੍ਛੇ ਪਰਮਞ੍ਚ ਲਾਭਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਅਤ੍ਥਕੁਸਲਂ ਕੁਲਪੁਤ੍ਤਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਞ੍ਹਿ ਏਕਸ੍ਸ ਮਹਾਵਿਭਵਸ੍ਸ ਸੇਟ੍ਠਿਨੋ ਪੁਤ੍ਤੋ ਜਾਤਿਯਾ ਸਤ੍ਤਵਸ੍ਸੋ ਪਞ੍ਞਵਾ ਅਤ੍ਥਕੁਸਲੋ. ਸੋ ਏਕਦਿਵਸਂ ਪਿਤਰਂ ਉਪਸਙ੍ਕਮਿਤ੍ਵਾ ਅਤ੍ਥਸ੍ਸ ਦ੍ਵਾਰਪਞ੍ਹਂ ਨਾਮ ਪੁਚ੍ਛਿ, ਸੋ ਤਂ ਨ ਜਾਨਾਤਿ. ਅਥਸ੍ਸ ਏਤਦਹੋਸਿ ‘‘ਅਯਂ ਪਞ੍ਹੋ ਅਤਿਸੁਖੁਮੋ, ਠਪੇਤ੍ਵਾ ਸਬ੍ਬਞ੍ਞੁਬੁਦ੍ਧਂ ਅਞ੍ਞੋ ਉਪਰਿ ਭਵਗ੍ਗੇਨ, ਹੇਟ੍ਠਾ ਚ ਅਵੀਚਿਨਾ ਪਰਿਚ੍ਛਿਨ੍ਨੇ ਲੋਕਸਨ੍ਨਿਵਾਸੇ ਏਤਂ ਪਞ੍ਹਂ ਕਥੇਤੁਂ ਸਮਤ੍ਥੋ ਨਾਮ ਨਤ੍ਥੀ’’ਤਿ. ਸੋ ਪੁਤ੍ਤਮਾਦਾਯ ਬਹੁਂ ਮਾਲਾਗਨ੍ਧਵਿਲੇਪਨਂ ਗਾਹਾਪੇਤ੍ਵਾ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਪੂਜੇਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਭਗਵਨ੍ਤਂ ਏਤਦਵੋਚ ‘‘ਅਯਂ, ਭਨ੍ਤੇ, ਦਾਰਕੋ ਪਞ੍ਞਵਾ ਅਤ੍ਥਕੁਸਲੋ ਮਂ ਅਤ੍ਥਸ੍ਸ ਦ੍ਵਾਰਪਞ੍ਹਂ ਨਾਮ ਪੁਚ੍ਛਿ, ਅਹਂ ਤਂ ਪਞ੍ਹਂ ਅਜਾਨਨ੍ਤੋ ਤੁਮ੍ਹਾਕਂ ਸਨ੍ਤਿਕਂ ਆਗਤੋ, ਸਾਧੁ ਮੇ, ਭਨ੍ਤੇ, ਭਗਵਾ ਤਂ ਪਞ੍ਹਂ ਕਥੇਤੂ’’ਤਿ. ਸਤ੍ਥਾ ‘‘ਪੁਬ੍ਬੇਪਾਹਂ, ਉਪਾਸਕ, ਇਮਿਨਾ ਕੁਮਾਰਕੇਨੇਤਂ ਪਞ੍ਹਂ ਪੁਟ੍ਠੋ, ਮਯਾ ਚਸ੍ਸ ਕਥਿਤੋ, ਤਦਾ ਨਂ ਏਸ ਜਾਨਾਤਿ, ਇਦਾਨਿ ਪਨ ਭਵਸਙ੍ਖੇਪਗਤਤ੍ਤਾ ਨ ਸਲ੍ਲਕ੍ਖੇਤੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਮਹਾਵਿਭਵੋ ਸੇਟ੍ਠਿ ਅਹੋਸਿ. ਅਥਸ੍ਸ ਪੁਤ੍ਤੋ ਸਤ੍ਤਵਸ੍ਸਿਕੋ ਜਾਤਿਯਾ ਪਞ੍ਞਵਾ ਅਤ੍ਥਕੁਸਲੋ. ਸੋ ਏਕਦਿਵਸਂ ਪਿਤਰਂ ਉਪਸਙ੍ਕਮਿਤ੍ਵਾ ‘‘ਤਾਤ, ਅਤ੍ਥਸ੍ਸ ਦ੍ਵਾਰਂ ਨਾਮ ਕਿ’’ਨ੍ਤਿ ਅਤ੍ਥਸ੍ਸ ਦ੍ਵਾਰਪਞ੍ਹਂ ਪੁਚ੍ਛਿ. ਅਥਸ੍ਸ ਪਿਤਾ ਤਂ ਪਞ੍ਹਂ ਕਥੇਨ੍ਤੋ ਇਮਂ ਗਾਥਮਾਹ –

੮੪. ‘‘ਆਰੋਗ੍ਯਮਿਚ੍ਛੇ ਪਰਮਞ੍ਚ ਲਾਭਂ, ਸੀਲਞ੍ਚ ਵੁਦ੍ਧਾਨੁਮਤਂ ਸੁਤਞ੍ਚ;

ਧਮ੍ਮਾਨੁਵਤ੍ਤੀ ਚ ਅਲੀਨਤਾ ਚ, ਅਤ੍ਥਸ੍ਸ ਦ੍ਵਾਰਾ ਪਮੁਖਾ ਛਲ਼ੇਤੇ’’ਤਿ.

ਤਤ੍ਥ ਆਰੋਗ੍ਯਮਿਚ੍ਛੇ ਪਰਮਞ੍ਚ ਲਾਭਨ੍ਤਿ ਚ-ਕਾਰੋ ਨਿਪਾਤਮਤ੍ਤਂ. ਤਾਤ, ਪਠਮਮੇਵ ਆਰੋਗ੍ਯਸਙ੍ਖਾਤਂ ਪਰਮਂ ਲਾਭਂ ਇਚ੍ਛੇਯ੍ਯਾਤਿ ਇਮਮਤ੍ਥਂ ਦੀਪੇਨ੍ਤੋ ਏਵਮਾਹ. ਤਤ੍ਥ ਆਰੋਗ੍ਯਂ ਨਾਮ ਸਰੀਰਸ੍ਸ ਚੇਵ ਚਿਤ੍ਤਸ੍ਸ ਚ ਅਰੋਗਭਾਵੋ ਅਨਾਤੁਰਤਾ. ਸਰੀਰੇ ਹਿ ਰੋਗਾਤੁਰੇ ਨੇਵ ਅਲਦ੍ਧਂ ਭੋਗਲਾਭਂ ਉਪ੍ਪਾਦੇਤੁਂ ਸਕ੍ਕੋਤਿ, ਨ ਲਦ੍ਧਂ ਪਰਿਭੁਞ੍ਜਿਤੁਂ, ਅਨਾਤੁਰੇ ਪਨ ਉਭਯਮ੍ਪੇਤਂ ਸਕ੍ਕੋਤਿ. ਚਿਤ੍ਤੇ ਚ ਕਿਲੇਸਾਤੁਰੇ ਨੇਵ ਅਲਦ੍ਧਂ ਝਾਨਾਦਿਭੇਦਂ ਲਾਭਂ ਉਪ੍ਪਾਦੇਤੁਂ ਸਕ੍ਕੋਤਿ, ਨ ਲਦ੍ਧਂ ਪੁਨ ਸਮਾਪਤ੍ਤਿਵਸੇਨ ਪਰਿਭੁਞ੍ਜਿਤੁਂ. ਏਤਸ੍ਮਿਂ ਅਨਾਰੋਗ੍ਯੇ ਸਤਿ ਅਲਦ੍ਧੋਪਿ ਲਾਭੋ ਨ ਲਬ੍ਭਤਿ, ਲਦ੍ਧੋਪਿ ਨਿਰਤ੍ਥਕੋ ਹੋਤਿ, ਅਸਤਿ ਪਨੇਤਸ੍ਮਿਂ ਅਲਦ੍ਧੋਪਿ ਲਾਭੋ ਲਬ੍ਭਤਿ, ਲਦ੍ਧੋਪਿ ਸਾਤ੍ਥਕੋ ਹੋਤੀਤਿ ਆਰੋਗ੍ਯਂ ਪਰਮੋ ਲਾਭੋ ਨਾਮ. ਤਂ ਸਬ੍ਬਪਠਮਂ ਇਚ੍ਛਿਤਬ੍ਬਂ. ਇਦਮੇਕਂ ਅਤ੍ਥਸ੍ਸ ਦ੍ਵਾਰਨ੍ਤਿ ਅਯਮੇਤ੍ਥ ਅਤ੍ਥੋ. ਸੀਲਞ੍ਚਾਤਿ ਆਚਾਰਸੀਲਂ. ਇਮਿਨਾ ਲੋਕਚਾਰਿਤ੍ਤਂ ਦਸ੍ਸੇਤਿ. ਵੁਦ੍ਧਾਨੁਮਤਨ੍ਤਿ ਗੁਣਵੁਦ੍ਧਾਨਂ ਪਣ੍ਡਿਤਾਨਂ ਅਨੁਮਤਂ. ਇਮਿਨਾ ਞਾਣਸਮ੍ਪਨ੍ਨਾਨਂ ਗਰੂਨਂ ਓਵਾਦਂ ਦਸ੍ਸੇਤਿ. ਸੁਤਞ੍ਚਾਤਿ ਕਾਰਣਨਿਸ੍ਸਿਤਂ ਸੁਤਂ. ਇਮਿਨਾ ਇਮਸ੍ਮਿਂ ਲੋਕੇ ਅਤ੍ਥਨਿਸ੍ਸਿਤਂ ਬਾਹੁਸਚ੍ਚਂ ਦਸ੍ਸੇਤਿ. ਧਮ੍ਮਾਨੁਵਤ੍ਤੀ ਚਾਤਿ ਤਿਵਿਧਸ੍ਸ ਸੁਚਰਿਤਧਮ੍ਮਸ੍ਸ ਅਨੁਵਤ੍ਤਨਂ. ਇਮਿਨਾ ਦੁਚ੍ਚਰਿਤਧਮ੍ਮਂ ਵਜ੍ਜੇਤ੍ਵਾ ਸੁਚਰਿਤਧਮ੍ਮਸ੍ਸ ਅਨੁਵਤ੍ਤਨਭਾਵਂ ਦਸ੍ਸੇਤਿ. ਅਲੀਨਤਾ ਚਾਤਿ ਚਿਤ੍ਤਸ੍ਸ ਅਲੀਨਤਾ ਅਨੀਚਤਾ. ਇਮਿਨਾ ਚਿਤ੍ਤਸ੍ਸ ਅਸਙ੍ਕੋਚਤਂ ਪਣੀਤਭਾਵਂ ਉਤ੍ਤਮਭਾਵਂ ਦਸ੍ਸੇਤਿ. ਅਤ੍ਥਸ੍ਸ ਦ੍ਵਾਰਾ ਪਮੁਖਾ ਛਲ਼ੇਤੇਤਿ ਅਤ੍ਥੋ ਨਾਮ ਵੁਡ੍ਢਿ, ਤਸ੍ਸ ਵੁਡ੍ਢਿਸਙ੍ਖਾਤਸ੍ਸ ਲੋਕਿਯਲੋਕੁਤ੍ਤਰਸ੍ਸ ਅਤ੍ਥਸ੍ਸ ਏਤੇ ਪਮੁਖਾ ਉਤ੍ਤਮਾ ਛ ਦ੍ਵਾਰਾ ਉਪਾਯਾ ਅਧਿਗਮਮੁਖਾਨੀਤਿ.

ਏਵਂ ਬੋਧਿਸਤ੍ਤੋ ਪੁਤ੍ਤਸ੍ਸ ਅਤ੍ਥਸ੍ਸ ਦ੍ਵਾਰਪਞ੍ਹਂ ਕਥੇਸਿ. ਸੋ ਤਤੋ ਪਟ੍ਠਾਯ ਤੇਸੁ ਛਸੁ ਧਮ੍ਮੇਸੁ ਵਤ੍ਤਿ. ਬੋਧਿਸਤ੍ਤੋਪਿ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪੁਤ੍ਤੋਵ ਪਚ੍ਚੁਪ੍ਪਨ੍ਨਪੁਤ੍ਤੋ, ਮਹਾਸੇਟ੍ਠਿ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਤ੍ਥਸ੍ਸਦ੍ਵਾਰਜਾਤਕਵਣ੍ਣਨਾ ਚਤੁਤ੍ਥਾ.

[੮੫] ੫. ਕਿਂਪਕ੍ਕਜਾਤਕਵਣ੍ਣਨਾ

ਆਯਤਿਂ ਦੋਸਂ ਨਾਞ੍ਞਾਯਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਅਞ੍ਞਤਰੋ ਕਿਰ ਕੁਲਪੁਤ੍ਤੋ ਬੁਦ੍ਧਸਾਸਨੇ ਉਰਂ ਦਤ੍ਵਾ ਪਬ੍ਬਜਿਤੋ ਏਕਦਿਵਸਂ ਸਾਵਤ੍ਥਿਯਂ ਪਿਣ੍ਡਾਯ ਚਰਨ੍ਤੋ ਏਕਂ ਅਲਙ੍ਕਤਇਤ੍ਥਿਂ ਦਿਸ੍ਵਾ ਉਕ੍ਕਣ੍ਠਿ. ਅਥ ਨਂ ਆਚਰਿਯੁਪਜ੍ਝਾਯਾ ਸਤ੍ਥੁ ਸਨ੍ਤਿਕਂ ਆਨਯਿਂਸੁ. ਸਤ੍ਥਾ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚ’’ਨ੍ਤਿ ਵੁਤ੍ਤੇ ‘‘ਪਞ੍ਚ ਕਾਮਗੁਣਾ ਨਾਮੇਤੇ ਭਿਕ੍ਖੁ ਪਰਿਭੋਗਕਾਲੇ ਰਮਣੀਯਾ. ਸੋ ਪਨ ਤੇਸਂ ਪਰਿਭੋਗੋ ਨਿਰਯਾਦੀਸੁ ਪਟਿਸਨ੍ਧਿਦਾਯਕਤ੍ਤਾ ਕਿਂਪਕ੍ਕਫਲਪਰਿਭੋਗਸਦਿਸੋ ਹੋਤਿ. ਕਿਂਪਕ੍ਕਫਲਂ ਨਾਮ ਵਣ੍ਣਗਨ੍ਧਰਸਸਮ੍ਪਨ੍ਨਂ, ਖਾਦਿਤਂ ਪਨ ਅਨ੍ਤਾਨਿ ਖਣ੍ਡਿਤ੍ਵਾ ਜੀਵਿਤਕ੍ਖਯਂ ਪਾਪੇਤਿ. ਪੁਬ੍ਬੇ ਬਹੂ ਬਾਲਜਨਾ ਤਸ੍ਸ ਦੋਸਂ ਅਦਿਸ੍ਵਾ ਵਣ੍ਣਗਨ੍ਧਰਸੇਸੁ ਬਜ੍ਝਿਤ੍ਵਾ ਤਂ ਫਲਂ ਪਰਿਭੁਞ੍ਜਿਤ੍ਵਾ ਜੀਵਿਤਕ੍ਖਯਂ ਪਾਪੁਣਿਂਸੂ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸਤ੍ਥਵਾਹੋ ਹੁਤ੍ਵਾ ਪਞ੍ਚਹਿ ਸਕਟਸਤੇਹਿ ਪੁਬ੍ਬਨ੍ਤਾਪਰਨ੍ਤਂ ਗਚ੍ਛਨ੍ਤੋ ਅਟਵਿਮੁਖਂ ਪਤ੍ਵਾ ਮਨੁਸ੍ਸੇ ਸਨ੍ਨਿਪਾਤੇਤ੍ਵਾ ‘‘ਇਮਿਸ੍ਸਾ ਅਟਵਿਯਾ ਵਿਸਰੁਕ੍ਖਾ ਨਾਮ ਅਤ੍ਥਿ, ਮਾ ਖੋ ਮਂ ਅਨਾਪੁਚ੍ਛਾ ਪੁਬ੍ਬੇ ਅਖਾਦਿਤਪੁਬ੍ਬਾਨਿ ਫਲਾਫਲਾਨਿ ਖਾਦਿਤ੍ਥਾ’’ਤਿ ਓਵਦਿ. ਮਨੁਸ੍ਸਾ ਅਟਵਿਂ ਅਤਿਕ੍ਕਮਿਤ੍ਵਾ ਅਟਵਿਮੁਖੇ ਏਕਂ ਕਿਂਪਕ੍ਕਰੁਕ੍ਖਂ ਫਲਭਾਰਓਣਮਿਤਸਾਖਂ ਅਦ੍ਦਸਂਸੁ. ਤਸ੍ਸ ਖਨ੍ਧਸਾਖਾਪਤ੍ਤਫਲਾਨਿ ਸਣ੍ਠਾਨਵਣ੍ਣਰਸਗਨ੍ਧੇਹਿ ਅਮ੍ਬਸਦਿਸਾਨੇਵ. ਤੇਸੁ ਏਕਚ੍ਚੇ ਵਣ੍ਣਗਨ੍ਧਰਸੇਸੁ ਬਜ੍ਝਿਤ੍ਵਾ ਅਮ੍ਬਫਲਸਞ੍ਞਾਯ ਫਲਾਨਿ ਖਾਦਿਂਸੁ, ਏਕਚ੍ਚੇ ‘‘ਸਤ੍ਥਵਾਹਂ ਪੁਚ੍ਛਿਤ੍ਵਾ ਖਾਦਿਸ੍ਸਾਮਾ’’ਤਿ ਗਹੇਤ੍ਵਾ ਅਟ੍ਠਂਸੁ. ਬੋਧਿਸਤ੍ਤੋ ਤਂ ਠਾਨਂ ਪਤ੍ਵਾ ਯੇ ਗਹੇਤ੍ਵਾ ਠਿਤਾ, ਤੇ ਫਲਾਨਿ ਛਡ੍ਡਾਪੇਤ੍ਵਾ, ਯੇ ਖਾਦਮਾਨਾ ਅਟ੍ਠਂਸੁ, ਤੇ ਵਮਨਂ ਕਾਰੇਤ੍ਵਾ ਤੇਸਂ ਭੇਸਜ੍ਜਂ ਅਦਾਸਿ. ਤੇਸੁ ਏਕਚ੍ਚੇ ਅਰੋਗਾ ਜਾਤਾ, ਪਠਮਮੇਵ ਖਾਦਿਤ੍ਵਾ ਠਿਤਾ ਪਨ ਜੀਵਿਤਕ੍ਖਯਂ ਪਤ੍ਤਾ. ਬੋਧਿਸਤ੍ਤੋਪਿ ਇਚ੍ਛਿਤਟ੍ਠਾਨਂ ਸੋਤ੍ਥਿਨਾ ਗਨ੍ਤ੍ਵਾ ਲਾਭਂ ਲਭਿਤ੍ਵਾ ਪੁਨ ਸਕਟ੍ਠਾਨਮੇਵ ਆਗਨ੍ਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਤਂ ਵਤ੍ਥੁਂ ਕਥੇਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਂ ਗਾਥਮਾਹ –

੮੫. ‘‘ਆਯਤਿਂ ਦੋਸਂ ਨਾਞ੍ਞਾਯ, ਯੋ ਕਾਮੇ ਪਟਿਸੇਵਤਿ;

ਵਿਪਾਕਨ੍ਤੇ ਹਨਨ੍ਤਿ ਨਂ, ਕਿਂਪਕ੍ਕਮਿਵ ਭਕ੍ਖਿਤ’’ਨ੍ਤਿ.

ਤਤ੍ਥ ਆਯਤਿਂ ਦੋਸਂ ਨਾਞ੍ਞਾਯਾਤਿ ਅਨਾਗਤੇ ਦੋਸਂ ਨ ਅਞ੍ਞਾਯ, ਅਜਾਨਿਤ੍ਵਾਤਿ ਅਤ੍ਥੋ. ਯੋ ਕਾਮੇ ਪਟਿਸੇਵਤੀਤਿ ਯੋ ਵਤ੍ਥੁਕਾਮੇ ਚ ਕਿਲੇਸਕਾਮੇ ਚ ਪਟਿਸੇਵਤਿ. ਵਿਪਾਕਨ੍ਤੇ ਹਨਨ੍ਤਿ ਨਨ੍ਤਿ ਤੇ ਕਾਮਾ ਤਂ ਪੁਰਿਸਂ ਅਤ੍ਤਨੋ ਵਿਪਾਕਸਙ੍ਖਾਤੇ ਅਨ੍ਤੇ ਨਿਰਯਾਦੀਸੁ ਉਪ੍ਪਨ੍ਨਂ ਨਾਨਪ੍ਪਕਾਰੇਨ ਦੁਕ੍ਖੇਨ ਸਂਯੋਜਯਮਾਨਾ ਹਨਨ੍ਤਿ. ਕਥਂ? ਕਿਂਪਕ੍ਕਮਿਵ ਭਕ੍ਖਿਤਨ੍ਤਿ, ਯਥਾ ਪਰਿਭੋਗਕਾਲੇ ਵਣ੍ਣਗਨ੍ਧਰਸਸਮ੍ਪਤ੍ਤਿਯਾ ਮਨਾਪਂ ਕਿਂਪਕ੍ਕਫਲਂ ਅਨਾਗਤਦੋਸਂ ਅਦਿਸ੍ਵਾ ਭਕ੍ਖਿਤਂ ਅਨ੍ਤੇ ਹਨਤਿ, ਜੀਵਿਤਕ੍ਖਯਂ ਪਾਪੇਤਿ, ਏਵਂ ਪਰਿਭੋਗਕਾਲੇ ਮਨਾਪਾਪਿ ਕਾਮਾ ਵਿਪਾਕਕਾਲੇ ਹਨਨ੍ਤੀਤਿ ਦੇਸਨਂ ਯਥਾਨੁਸਨ੍ਧਿਂ ਪਾਪੇਤ੍ਵਾ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲਂ ਪਾਪੁਣਿ. ਸੇਸਪਰਿਸਾਯਪਿ ਕੇਚਿ ਸੋਤਾਪਨ੍ਨਾ, ਕੇਚਿ ਸਕਦਾਗਾਮਿਨੋ, ਕੇਚਿ ਅਨਾਗਾਮਿਨੋ, ਕੇਚਿ ਅਰਹਨ੍ਤੋ ਅਹੇਸੁਂ.

ਸਤ੍ਥਾਪਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪਰਿਸਾ ਬੁਦ੍ਧਪਰਿਸਾ ਅਹੋਸਿ, ਸਤ੍ਥਵਾਹੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕਿਂਪਕ੍ਕਜਾਤਕਵਣ੍ਣਨਾ ਪਞ੍ਚਮਾ.

[੮੬] ੬. ਸੀਲਵੀਮਂਸਕਜਾਤਕਵਣ੍ਣਨਾ

ਸੀਲਂ ਕਿਰੇਵ ਕਲ੍ਯਾਣਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਸੀਲਵੀਮਂਸਕਂ ਬ੍ਰਾਹ੍ਮਣਂ ਆਰਬ੍ਭ ਕਥੇਸਿ. ਸੋ ਕਿਰ ਕੋਸਲਰਾਜਾਨਂ ਨਿਸ੍ਸਾਯ ਜੀਵਤਿ ਤਿਸਰਣਂ ਗਤੋ ਅਖਣ੍ਡਪਞ੍ਚਸੀਲੋ ਤਿਣ੍ਣਂ ਵੇਦਾਨਂ ਪਾਰਗੂ. ਰਾਜਾ ‘‘ਅਯਂ ਸੀਲਵਾ’’ਤਿ ਤਸ੍ਸ ਅਤਿਰੇਕਸਮ੍ਮਾਨਂ ਕਰੋਤਿ. ਸੋ ਚਿਨ੍ਤੇਸਿ ‘‘ਅਯਂ ਰਾਜਾ ਮਯ੍ਹਂ ਅਞ੍ਞੇਹਿ ਬ੍ਰਾਹ੍ਮਣੇਹਿ ਅਤਿਰੇਕਸਮ੍ਮਾਨਂ ਕਰੋਤਿ, ਅਤਿਵਿਯ ਮਂ ਗਰੁਂ ਕਤ੍ਵਾ ਪਸ੍ਸਤਿ, ਕਿਂ ਨੁ ਖੋ ਏਸ ਮਮ ਜਾਤਿਗੋਤ੍ਤਕੁਲਪ੍ਪਦੇਸਸਿਪ੍ਪਸਮ੍ਪਤ੍ਤਿਂ ਨਿਸ੍ਸਾਯ ਇਮਂ ਸਮ੍ਮਾਨਂ ਕਰੋਤਿ, ਉਦਾਹੁ ਸੀਲਸਮ੍ਪਤ੍ਤਿਂ, ਵੀਮਂਸਿਸ੍ਸਾਮਿ ਤਾਵਾ’’ਤਿ. ਸੋ ਏਕਦਿਵਸਂ ਰਾਜੂਪਟ੍ਠਾਨਂ ਗਨ੍ਤ੍ਵਾ ਘਰਂ ਆਗਚ੍ਛਨ੍ਤੋ ਏਕਸ੍ਸ ਹੇਰਞ੍ਞਿਕਸ੍ਸ ਫਲਕਤੋ ਅਨਾਪੁਚ੍ਛਿਤ੍ਵਾ ਏਕਂ ਕਹਾਪਣਂ ਗਹੇਤ੍ਵਾ ਅਗਮਾਸਿ, ਹੇਰਞ੍ਞਿਕੋ ਬ੍ਰਾਹ੍ਮਣੇ ਗਰੁਭਾਵੇਨ ਕਿਞ੍ਚਿ ਅਵਤ੍ਵਾ ਨਿਸੀਦਿ. ਪੁਨਦਿਵਸੇ ਦ੍ਵੇ ਕਹਾਪਣੇ ਗਣ੍ਹਿ, ਹੇਰਞ੍ਞਿਕੋ ਤਥੇਵ ਅਧਿਵਾਸੇਸਿ. ਤਤਿਯਦਿਵਸੇ ਕਹਾਪਣਮੁਟ੍ਠਿਂ ਅਗ੍ਗਹੇਸਿ, ਅਥ ਨਂ ਹੇਰਞ੍ਞਿਕੋ ‘‘ਅਜ੍ਜ ਤੇ ਤਤਿਯੋ ਦਿਵਸੋ ਰਾਜਕੁਟੁਮ੍ਬਂ ਵਿਲੁਮ੍ਪਨ੍ਤਸ੍ਸਾ’’ਤਿ ‘‘ਰਾਜਕੁਟੁਮ੍ਬਵਿਲੁਮ੍ਪਕਚੋਰੋ ਮੇ ਗਹਿਤੋ’’ਤਿ ਤਿਕ੍ਖਤ੍ਤੁਂ ਵਿਰਵਿ. ਅਥ ਨਂ ਮਨੁਸ੍ਸਾ ਇਤੋ ਚਿਤੋ ਚ ਆਗਨ੍ਤ੍ਵਾ ‘‘ਚਿਰਂਦਾਨਿ ਤ੍ਵਂ ਸੀਲਵਾ ਵਿਯ ਵਿਚਰੀ’’ਤਿ ਦ੍ਵੇ ਤਯੋ ਪਹਾਰੇ ਦਤ੍ਵਾ ਬਨ੍ਧਿਤ੍ਵਾ ਰਞ੍ਞੋ ਦਸ੍ਸੇਸੁਂ.

ਰਾਜਾ ਵਿਪ੍ਪਟਿਸਾਰੀ ਹੁਤ੍ਵਾ ‘‘ਕਸ੍ਮਾ, ਬ੍ਰਾਹ੍ਮਣ, ਏਵਰੂਪਂ ਦੁਸ੍ਸੀਲਕਮ੍ਮਂ ਕਰੋਸੀ’’ਤਿ ਵਤ੍ਵਾ ‘‘ਗਚ੍ਛਥ, ਤਸ੍ਸ ਰਾਜਾਣਂ ਕਰੋਥਾ’’ਤਿ ਆਹ. ਬ੍ਰਾਹ੍ਮਣੋ ‘‘ਨਾਹਂ, ਮਹਾਰਾਜ, ਚੋਰੋ’’ਤਿ ਆਹ. ਅਥ ‘‘ਕਸ੍ਮਾ ਰਾਜਕੁਟੁਮ੍ਬਿਕਸ੍ਸ ਫਲਕਤੋ ਕਹਾਪਣੇ ਗਣ੍ਹੀ’’ਤਿ? ‘‘ਏਤਂ ਮਯਾ ਤਯਿ ਮਮ ਅਤਿਸਮ੍ਮਾਨਂ ਕਰੋਨ੍ਤੇ ‘ਕਿਂ ਨੁ ਖੋ ਰਾਜਾ ਮਮ ਜਾਤਿਆਦੀਨਿ ਨਿਸ੍ਸਾਯ ਅਤਿਸਮ੍ਮਾਨਂ ਕਰੋਤਿ, ਉਦਾਹੁ ਸੀਲਂ ਨਿਸ੍ਸਾਯਾ’ਤਿ ਵੀਮਂਸਨਤ੍ਥਾਯ ਕਤਂ, ਇਦਾਨਿ ਪਨ ਮਯਾ ਏਕਂਸੇਨ ਞਾਤਂ. ਯਥਾ ਸੀਲਮੇਵ ਨਿਸ੍ਸਾਯ ਤਯਾ ਮਮ ਸਮ੍ਮਾਨੋ ਕਤੋ, ਨ ਜਾਤਿਆਦੀਨਿ. ਤਥਾ ਹਿ ਮੇ ਇਦਾਨਿ ਰਾਜਾਣਂ ਕਾਰੇਸਿ, ਸ੍ਵਾਹਂ ਇਮਿਨਾ ਕਾਰਣੇਨ ‘ਇਮਸ੍ਮਿਂ ਲੋਕੇ ਸੀਲਮੇਵ ਉਤ੍ਤਮਂ ਸੀਲਂ ਪਮੁਖ’ਨ੍ਤਿ ਸਨ੍ਨਿਟ੍ਠਾਨਂ ਗਤੋ. ਇਮਸ੍ਸ ਪਨਾਹਂ ਸੀਲਸ੍ਸ ਅਨੁਚ੍ਛਵਿਕਂ ਕਰੋਨ੍ਤੋ ਗੇਹੇ ਠਿਤੋ ਕਿਲੇਸੇ ਪਰਿਭੁਞ੍ਜਨ੍ਤੋ ਨ ਸਕ੍ਖਿਸ੍ਸਾਮਿ ਕਾਤੁਂ, ਅਜ੍ਜੇਵ ਜੇਤਵਨਂ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਸ੍ਸਾਮਿ, ਪਬ੍ਬਜ੍ਜਂ ਮੇ ਦੇਥ, ਦੇਵਾ’’ਤਿ ਵਤ੍ਵਾ ਰਾਜਾਨਂ ਅਨੁਜਾਨਾਪੇਤ੍ਵਾ ਜੇਤਵਨਾਭਿਮੁਖੋ ਪਾਯਾਸਿ.

ਅਥ ਨਂ ਞਾਤਿਸੁਹਜ੍ਜਬਨ੍ਧਵਾ ਸਨ੍ਨਿਪਤਿਤ੍ਵਾ ਨਿਵਾਰੇਤੁਂ ਅਸਕ੍ਕੋਨ੍ਤਾ ਨਿਵਤ੍ਤਿਂਸੁ. ਸੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਬ੍ਬਜ੍ਜਂ ਯਾਚਿਤ੍ਵਾ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਲਭਿਤ੍ਵਾ ਅਵਿਸ੍ਸਟ੍ਠਕਮ੍ਮਟ੍ਠਾਨੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਮਯ੍ਹਂ ਪਬ੍ਬਜ੍ਜਾ ਮਤ੍ਥਕਂ ਪਤ੍ਤਾ’’ਤਿ ਅਞ੍ਞਂ ਬ੍ਯਾਕਾਸਿ. ਤਸ੍ਸ ਤਂ ਅਞ੍ਞਬ੍ਯਾਕਰਣਂ ਭਿਕ੍ਖੁਸਙ੍ਘੇ ਪਾਕਟਂ ਜਾਤਂ. ਅਥੇਕਦਿਵਸਂ ਧਮ੍ਮਸਭਾਯਂ ਸਨ੍ਨਿਪਤਿਤਾ ਭਿਕ੍ਖੂ ‘‘ਆਵੁਸੋ, ਅਸੁਕੋ ਨਾਮ ਰਞ੍ਞੋ ਉਪਟ੍ਠਾਕਬ੍ਰਾਹ੍ਮਣੋ ਅਤ੍ਤਨੋ ਸੀਲਂ ਵੀਮਂਸਿਤ੍ਵਾ ਰਾਜਾਨਂ ਆਪੁਚ੍ਛਿਤ੍ਵਾ ਪਬ੍ਬਜਿਤ੍ਵਾ ਅਰਹਤ੍ਤੇ ਪਤਿਟ੍ਠਿਤੋ’’ਤਿ ਤਸ੍ਸ ਗੁਣਂ ਕਥਯਮਾਨਾ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨਿ ਅਯਮੇਵ ਬ੍ਰਾਹ੍ਮਣੋ ਅਤ੍ਤਨੋ ਸੀਲਂ ਵੀਮਂਸਿਤ੍ਵਾ ਪਬ੍ਬਜਿਤ੍ਵਾ ਅਤ੍ਤਨੋ ਪਤਿਟ੍ਠਂ ਅਕਾਸਿ, ਪੁਬ੍ਬੇਪਿ ਪਣ੍ਡਿਤਾ ਅਤ੍ਤਨੋ ਸੀਲਂ ਵੀਮਂਸਿਤ੍ਵਾ ਪਬ੍ਬਜਿਤ੍ਵਾ ਅਤ੍ਤਨੋ ਪਤਿਟ੍ਠਂ ਕਰਿਂਸੂ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਪੁਰੋਹਿਤੋ ਅਹੋਸਿ ਦਾਨਾਧਿਮੁਤ੍ਤੋ ਸੀਲਜ੍ਝਾਸਯੋ ਅਖਣ੍ਡਪਞ੍ਚਸੀਲੋ. ਰਾਜਾ ਸੇਸਬ੍ਰਾਹ੍ਮਣੇਹਿ ਅਤਿਰੇਕਂ ਤਸ੍ਸ ਸਮ੍ਮਾਨਂ ਕਰੋਤੀਤਿ ਸਬ੍ਬਂ ਪੁਰਿਮਸਦਿਸਮੇਵ. ਬੋਧਿਸਤ੍ਤੇ ਪਨ ਬਨ੍ਧਿਤ੍ਵਾ ਰਞ੍ਞੋ ਸਨ੍ਤਿਕਂ ਨੀਯਮਾਨੇ ਅਹਿਤੁਣ੍ਡਿਕਾ ਅਨ੍ਤਰਵੀਥਿਯਂ ਸਪ੍ਪਂ ਕੀਲ਼ਾਪੇਨ੍ਤਾ ਨਙ੍ਗੁਟ੍ਠੇ ਗਣ੍ਹਨ੍ਤਿ, ਗੀਵਾਯ ਗਣ੍ਹਨ੍ਤਿ, ਗਲੇ ਵੇਠੇਨ੍ਤਿ. ਬੋਧਿਸਤ੍ਤੋ ਤੇ ਦਿਸ੍ਵਾ ‘‘ਮਾ, ਤਾਤਾ, ਏਵਂ ਸਪ੍ਪਂ ਨਙ੍ਗੁਟ੍ਠੇ ਗਣ੍ਹਥ, ਮਾ ਗੀਵਾਯ ਗਣ੍ਹਥ, ਮਾ ਗਲੇ ਵੇਠੇਥ. ਅਯਞ੍ਹਿ ਵੋ ਡਂਸਿਤ੍ਵਾ ਜੀਵਿਤਕ੍ਖਯਂ ਪਾਪੇਯ੍ਯਾ’’ਤਿ ਆਹ. ਅਹਿਤੁਣ੍ਡਿਕਾ ‘‘ਅਯਂ, ਬ੍ਰਾਹ੍ਮਣ, ਸਪ੍ਪੋ ਸੀਲਵਾ ਆਚਾਰਸਮ੍ਪਨ੍ਨੋ ਤਾਦਿਸੋ ਦੁਸ੍ਸੀਲੋ ਨ ਹੋਤਿ, ਤ੍ਵਂ ਪਨ ਅਤ੍ਤਨੋ ਦੁਸ੍ਸੀਲਤਾਯ ਅਨਾਚਾਰੇਨ ਰਾਜਕੁਟੁਮ੍ਬਵਿਲੁਮ੍ਪਕਚੋਰੋਤਿ ਬਨ੍ਧਿਤ੍ਵਾ ਨੀਯਸੀ’’ਤਿ ਆਹਂਸੁ.

ਸੋ ਚਿਨ੍ਤੇਸਿ ‘‘ਸਪ੍ਪਾਪਿ ਤਾਵ ਅਡਂਸਨ੍ਤਾ ਅਵਿਹੇਠੇਨ੍ਤਾ ‘ਸੀਲਵਨ੍ਤੋ’ਤਿ ਨਾਮਂ ਲਭਨ੍ਤਿ, ਕਿਮਙ੍ਗਂ ਪਨ ਮਨੁਸ੍ਸਭੂਤਾ. ਸੀਲਮੇਵ ਇਮਸ੍ਮਿਂ ਲੋਕੇ ਉਤ੍ਤਮਂ, ਨਤ੍ਥਿ ਤਤੋ ਉਤ੍ਤਰਿਤਰ’’ਨ੍ਤਿ. ਅਥ ਨਂ ਨੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ‘‘ਕਿਂ ਇਦਂ, ਤਾਤਾ’’ਤਿ ਪੁਚ੍ਛਿ. ‘‘ਰਾਜਕੁਟੁਮ੍ਬਵਿਲੁਮ੍ਪਕੋ ਚੋਰੋ, ਦੇਵਾ’’ਤਿ. ‘‘ਤੇਨ ਹਿਸ੍ਸ ਰਾਜਾਣਂ ਕਰੋਥਾ’’ਤਿ. ਬ੍ਰਾਹ੍ਮਣੋ ‘‘ਨਾਹਂ, ਮਹਾਰਾਜ, ਚੋਰੋ’’ਤਿ ਆਹ. ‘‘ਅਥ ਕਸ੍ਮਾ ਕਹਾਪਣੇ ਅਗ੍ਗਹੇਸੀ’’ਤਿ ਚ ਵੁਤ੍ਤੇ ਪੁਰਿਮਨਯੇਨੇਵ ਸਬ੍ਬਂ ਆਰੋਚੇਨ੍ਤੋ ‘‘ਸ੍ਵਾਹਂ ਇਮਿਨਾ ਕਾਰਣੇਨ ‘ਇਮਸ੍ਮਿਂ ਲੋਕੇ ਸੀਲਮੇਵ ਉਤ੍ਤਮਂ, ਸੀਲਂ ਪਾਮੋਕ੍ਖ’ਨ੍ਤਿ ਸਨ੍ਨਿਟ੍ਠਾਨਂ ਗਤੋ’’ਤਿ ਵਤ੍ਵਾ ‘‘ਤਿਟ੍ਠਤੁ ਤਾਵ ਇਦਂ, ਆਸੀਵਿਸੋਪਿ ਤਾਵ ਅਡਂਸਨ੍ਤੋ ਅਵਿਹੇਠੇਨ੍ਤੋ ‘ਸੀਲਵਾ’ਤਿ ਵਤ੍ਤਬ੍ਬਤਂ ਲਭਤਿ. ਇਮਿਨਾਪਿ ਕਾਰਣੇਨ ਸੀਲਮੇਵ ਉਤ੍ਤਮਂ, ਸੀਲਂ ਪਵਰ’’ਨ੍ਤਿ ਸੀਲਂ ਵਣ੍ਣੇਨ੍ਤੋ ਇਮਂ ਗਾਥਮਾਹ –

੮੬. ‘‘ਸੀਲਂ ਕਿਰੇਵ ਕਲ੍ਯਾਣਂ, ਸੀਲਂ ਲੋਕੇ ਅਨੁਤ੍ਤਰਂ;

ਪਸ੍ਸ ਘੋਰਵਿਸੋ ਨਾਗੋ, ਸੀਲਵਾਤਿ ਨ ਹਞ੍ਞਤੀ’’ਤਿ.

ਤਤ੍ਥ ਸੀਲਂ ਕਿਰੇਵਾਤਿ ਕਾਯਵਾਚਾਚਿਤ੍ਤੇਹਿ ਅਵੀਤਿਕ੍ਕਮਸਙ੍ਖਾਤਂ ਆਚਾਰਸੀਲਮੇਵ. ਕਿਰਾਤਿ ਅਨੁਸ੍ਸਵਵਸੇਨ ਵਦਤਿ. ਕਲ੍ਯਾਣਨ੍ਤਿ ਸੁਨ੍ਦਰਤਰਂ. ਅਨੁਤ੍ਤਰਨ੍ਤਿ ਜੇਟ੍ਠਕਂ ਸਬ੍ਬਗੁਣਦਾਯਕਂ. ਪਸ੍ਸਾਤਿ ਅਤ੍ਤਨਾ ਦਿਟ੍ਠਕਾਰਣਂ ਅਭਿਮੁਖਂ ਕਰੋਨ੍ਤੋ ਕਥੇਤਿ. ਸੀਲਵਾਤਿ ਨ ਹਞ੍ਞਤੀਤਿ ਘੋਰਵਿਸੋਪਿ ਸਮਾਨੋ ਅਡਂਸਨਅਵਿਹੇਠਨਮਤ੍ਤਕੇਨ ਸੀਲਵਾਤਿ ਪਸਂਸਂ ਲਭਤਿ, ਨ ਹਞ੍ਞਤਿ ਨ ਵਿਹਞ੍ਞਤੀਤਿ. ਇਮਿਨਾਪਿ ਕਾਰਣੇਨ ਸੀਲਮੇਵ ਉਤ੍ਤਮਨ੍ਤਿ.

ਏਵਂ ਬੋਧਿਸਤ੍ਤੋ ਇਮਾਯ ਗਾਥਾਯ ਰਞ੍ਞੋ ਧਮ੍ਮਂ ਦੇਸੇਤ੍ਵਾ ਕਾਮੇ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਪਞ੍ਚਾਭਿਞ੍ਞਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਰਾਜਪਰਿਸਾ ਬੁਦ੍ਧਪਰਿਸਾ, ਪੁਰੋਹਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੀਲਵੀਮਂਸਕਜਾਤਕਵਣ੍ਣਨਾ ਛਟ੍ਠਾ.

[੮੭] ੭. ਮਙ੍ਗਲਜਾਤਕਵਣ੍ਣਨਾ

ਯਸ੍ਸ ਮਙ੍ਗਲਾ ਸਮੂਹਤਾਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਏਕਂ ਸਾਟਕਲਕ੍ਖਣਬ੍ਰਾਹ੍ਮਣਂ ਆਰਬ੍ਭ ਕਥੇਸਿ. ਰਾਜਗਹਵਾਸਿਕੋ ਕਿਰੇਕੋ ਬ੍ਰਾਹ੍ਮਣੋ ਕੋਤੁਹਲਮਙ੍ਗਲਿਕੋ ਤੀਸੁ ਰਤਨੇਸੁ ਅਪ੍ਪਸਨ੍ਨੋ ਮਿਚ੍ਛਾਦਿਟ੍ਠਿਕੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ, ਤਸ੍ਸ ਸਮੁਗ੍ਗੇ ਠਪਿਤਂ ਸਾਟਕਯੁਗਂ ਮੂਸਿਕਾ ਖਾਦਿਂਸੁ. ਅਥਸ੍ਸ ਸੀਸਂ ਨ੍ਹਾਯਿਤ੍ਵਾ ‘‘ਸਾਟਕੇ ਆਹਰਥਾ’’ਤਿ ਵੁਤ੍ਤਕਾਲੇ ਮੂਸਿਕਾਯ ਖਾਦਿਤਭਾਵਂ ਆਰੋਚਯਿਂਸੁ. ਸੋ ਚਿਨ੍ਤੇਸਿ ‘‘ਸਚੇ ਇਦਂ ਮੂਸਿਕਾਦਟ੍ਠਂ ਸਾਟਕਯੁਗਂ ਇਮਸ੍ਮਿਂ ਗੇਹੇ ਭਵਿਸ੍ਸਤਿ, ਮਹਾਵਿਨਾਸੋ ਭਵਿਸ੍ਸਤਿ. ਇਦਞ੍ਹਿ ਅਵਮਙ੍ਗਲਂ ਕਾਲ਼ਕਣ੍ਣਿਸਦਿਸਂ ਪੁਤ੍ਤਧੀਤਾਦੀਨਂ ਵਾ ਦਾਸਕਮ੍ਮਕਰਾਦੀਨਂ ਵਾ ਨ ਸਕ੍ਕਾ ਦਾਤੁਂ. ਯੋ ਹਿ ਇਦਂ ਗਣ੍ਹਿਸ੍ਸਤਿ, ਸਬ੍ਬਸ੍ਸ ਮਹਾਵਿਨਾਸੋ ਭਵਿਸ੍ਸਤਿ, ਆਮਕਸੁਸਾਨੇ ਤਂ ਛਡ੍ਡਾਪੇਸ੍ਸਾਮਿ, ਨ ਖੋ ਪਨ ਸਕ੍ਕਾ ਦਾਸਕਮ੍ਮਕਰਾਦੀਨਂ ਹਤ੍ਥੇ ਦਾਤੁਂ. ਤੇ ਹਿ ਏਤ੍ਥ ਲੋਭਂ ਉਪ੍ਪਾਦੇਤ੍ਵਾ ਇਮਂ ਗਹੇਤ੍ਵਾ ਵਿਨਾਸਂ ਪਾਪੁਣੇਯ੍ਯੁਂ, ਪੁਤ੍ਤਸ੍ਸ ਤਂ ਹਤ੍ਥੇ ਦਸ੍ਸਾਮੀ’’ਤਿ. ਸੋ ਪੁਤ੍ਤਂ ਪਕ੍ਕੋਸਾਪੇਤ੍ਵਾ ਤਮਤ੍ਥਂ ਆਰੋਚੇਤ੍ਵਾ ‘‘ਤ੍ਵਮ੍ਪਿ ਨਂ, ਤਾਤ, ਹਤ੍ਥੇਨ ਅਫੁਸਿਤ੍ਵਾ ਦਣ੍ਡਕੇਨ ਗਹੇਤ੍ਵਾ ਆਮਕਸੁਸਾਨੇ ਛਡ੍ਡੇਤ੍ਵਾ ਸੀਸਂ ਨ੍ਹਾਯਿਤ੍ਵਾ ਏਹੀ’’ਤਿ ਪੇਸੇਸਿ.

ਸਤ੍ਥਾਪਿ ਖੋ ਤਂ ਦਿਵਸਂ ਪਚ੍ਚੂਸਸਮਯੇ ਬੋਧਨੇਯ੍ਯਬਨ੍ਧਵੇ ਓਲੋਕੇਨ੍ਤੋ ਇਮੇਸਂ ਪਿਤਾਪੁਤ੍ਤਾਨਂ ਸੋਤਾਪਤ੍ਤਿਫਲਸ੍ਸ ਉਪਨਿਸ੍ਸਯਂ ਦਿਸ੍ਵਾ ਮਿਗਵੀਥਿਂ ਗਹੇਤ੍ਵਾ ਮਿਗਲੁਦ੍ਦਕੋ ਵਿਯ ਗਨ੍ਤ੍ਵਾ ਆਮਕਸੁਸਾਨਦ੍ਵਾਰੇ ਨਿਸੀਦਿ ਛਬ੍ਬਣ੍ਣਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਨ੍ਤੋ. ਮਾਣਵੋਪਿ ਪਿਤੁ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਜਗਰਸਪ੍ਪਂ ਵਿਯ ਤਂ ਯੁਗਸਾਟਕਂ ਯਟ੍ਠਿਕੋਟਿਯਾ ਗਹੇਤ੍ਵਾ ਆਮਕਸੁਸਾਨਦ੍ਵਾਰਂ ਪਾਪੁਣਿ. ਅਥ ਨਂ ਸਤ੍ਥਾ ‘‘ਕਿਂ ਕਰੋਸਿ ਮਾਣਵਾ’’ਤਿ ਆਹ. ‘‘ਭੋ ਗੋਤਮ, ਇਦਂ ਸਾਟਕਯੁਗਂ ਮੂਸਿਕਾਦਟ੍ਠਂ ਕਾਲ਼ਕਣ੍ਣਿਸਦਿਸਂ ਹਲਾਹਲਵਿਸੂਪਮਂ, ਮਮ ਪਿਤਾ ‘ਅਞ੍ਞੋ ਏਤਂ ਛਡ੍ਡੇਨ੍ਤੋ ਲੋਭਂ ਉਪ੍ਪਾਦੇਤ੍ਵਾ ਗਣ੍ਹੇਯ੍ਯਾ’ਤਿ ਭਯੇਨ ਮਂ ਪਹਿਣਿ, ਅਹਮੇਤਂ ਛਡ੍ਡੇਤ੍ਵਾ ਸੀਸਂ ਨ੍ਹਾਯਿਸ੍ਸਾਮੀਤਿ ਆਗਤੋਮ੍ਹਿ, ਭੋ ਗੋਤਮਾ’’ਤਿ. ‘‘ਤੇਨ ਹਿ ਛਡ੍ਡੇਹੀ’’ਤਿ. ਮਾਣਵੋ ਛਡ੍ਡੇਸਿ, ਸਤ੍ਥਾ ‘‘ਅਮ੍ਹਾਕਂ ਦਾਨਿ ਵਟ੍ਟਤੀ’’ਤਿ ਤਸ੍ਸ ਸਮ੍ਮੁਖਾਵ ਗਣ੍ਹਿ. ‘‘ਅਵਮਙ੍ਗਲਂ, ਭੋ ਗੋਤਮ, ਏਤਂ ਕਾਲ਼ਕਣ੍ਣਿਸਦਿਸਂ, ਮਾ ਗਣ੍ਹਿ ਮਾ ਗਣ੍ਹੀ’’ਤਿ ਤਸ੍ਮਿਂ ਵਾਰਯਮਾਨੇਯੇਵ ਤਂ ਗਹੇਤ੍ਵਾ ਵੇਲ਼ੁਵਨਾਭਿਮੁਖੋ ਪਾਯਾਸਿ.

ਮਾਣਵੋ ਵੇਗੇਨ ਗਨ੍ਤ੍ਵਾ ਪਿਤੁ ਆਰੋਚੇਸਿ ‘‘ਤਾਤ, ਮਯਾ ਆਮਕਸੁਸਾਨੇ ਛਡ੍ਡਿਤਂ ਸਾਟਕਯੁਗਂ ਸਮਣੋ ਗੋਤਮੋ ‘ਅਮ੍ਹਾਕਂ ਵਟ੍ਟਤੀ’ਤਿ ਮਯਾ ਵਾਰਿਯਮਾਨੋਪਿ ਗਹੇਤ੍ਵਾ ਵੇਲ਼ੁਵਨਂ ਗਤੋ’’ਤਿ. ਬ੍ਰਾਹ੍ਮਣੋ ਚਿਨ੍ਤੇਸਿ ‘‘ਤਂ ਸਾਟਕਯੁਗਂ ਅਵਮਙ੍ਗਲਂ ਕਾਲ਼ਕਣ੍ਣਿਸਦਿਸਂ, ਤਂ ਵਲ਼ਞ੍ਜੇਨ੍ਤੋ ਸਮਣੋਪਿ ਗੋਤਮੋ ਨਸ੍ਸਿਸ੍ਸਤਿ, ਵਿਹਾਰੋਪਿ ਨਸ੍ਸਿਸ੍ਸਤਿ, ਤਤੋ ਅਮ੍ਹਾਕਂ ਗਰਹਾ ਭਵਿਸ੍ਸਤਿ, ਸਮਣਸ੍ਸ ਗੋਤਮਸ੍ਸ ਅਞ੍ਞੇ ਬਹੂ ਸਾਟਕੇ ਦਤ੍ਵਾ ਤਂ ਛਡ੍ਡਾਪੇਸ੍ਸਾਮੀ’’ਤਿ. ਸੋ ਬਹੂ ਸਾਟਕੇ ਗਾਹਾਪੇਤ੍ਵਾ ਪੁਤ੍ਤੇਨ ਸਦ੍ਧਿਂ ਵੇਲ਼ੁਵਨਂ ਗਨ੍ਤ੍ਵਾ ਸਤ੍ਥਾਰਂ ਦਿਸ੍ਵਾ ਏਕਮਨ੍ਤਂ ਠਿਤੋ ਏਵਮਾਹ ‘‘ਸਚ੍ਚਂ ਕਿਰ ਵੋ, ਭੋ ਗੋਤਮ, ਆਮਕਸੁਸਾਨੇ ਸਾਟਕਯੁਗਂ ਗਹਿਤ’’ਨ੍ਤਿ? ‘‘ਸਚ੍ਚਂ, ਬ੍ਰਾਹ੍ਮਣਾ’’ਤਿ. ‘‘ਭੋ ਗੋਤਮ, ਤਂ ਸਾਟਕਯੁਗਂ ਅਵਮਙ੍ਗਲਂ, ਤੁਮ੍ਹੇ ਤਂ ਪਰਿਭੁਞ੍ਜਮਾਨਾ ਨਸ੍ਸਿਸ੍ਸਥ, ਸਕਲਵਿਹਾਰੋਪਿ ਨਸ੍ਸਿਸ੍ਸਤਿ. ਸਚੇ ਵੋ ਨਿਵਾਸਨਂ ਵਾ ਪਾਰੁਪਨਂ ਵਾ ਨਪ੍ਪਹੋਤਿ, ਇਮੇ ਸਾਟਕੇ ਗਹੇਤ੍ਵਾ ਤਂ ਛਡ੍ਡਾਪੇਥਾ’’ਤਿ. ਅਥ ਨਂ ਸਤ੍ਥਾ ‘‘ਮਯਂ ਬ੍ਰਾਹ੍ਮਣ ਪਬ੍ਬਜਿਤਾ ਨਾਮ, ਅਮ੍ਹਾਕਂ ਆਮਕਸੁਸਾਨੇ ਅਨ੍ਤਰਵੀਥਿਯਂ ਸਙ੍ਕਾਰਟ੍ਠਾਨੇ ਨ੍ਹਾਨਤਿਤ੍ਥੇ ਮਹਾਮਗ੍ਗੇਤਿ ਏਵਰੂਪੇਸੁ ਠਾਨੇਸੁ ਛਡ੍ਡਿਤਾ ਵਾ ਪਤਿਤਾ ਵਾ ਪਿਲੋਤਿਕਾ ਵਟ੍ਟਤਿ, ਤ੍ਵਂ ਪਨ ਨ ਇਦਾਨੇਵ ਏਵਂਲਦ੍ਧਿਕੋ, ਪੁਬ੍ਬੇਪਿ ਏਵਂਲਦ੍ਧਿਕੋਯੇਵਾ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਮਗਧਰਟ੍ਠੇ ਰਾਜਗਹਨਗਰੇ ਧਮ੍ਮਿਕੋ ਮਗਧਰਾਜਾ ਰਜ੍ਜਂ ਕਾਰੇਸਿ. ਤਦਾ ਬੋਧਿਸਤ੍ਤੋ ਏਕਸ੍ਮਿਂ ਉਦਿਚ੍ਚਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਹਿਮਵਨ੍ਤੇ ਵਸਮਾਨੋ ਏਕਸ੍ਮਿਂ ਕਾਲੇ ਹਿਮਵਨ੍ਤਤੋ ਨਿਕ੍ਖਮਿਤ੍ਵਾ ਰਾਜਗਹਨਗਰੇ ਰਾਜੁਯ੍ਯਾਨਂ ਪਤ੍ਵਾ ਤਤ੍ਥ ਵਸਿਤ੍ਵਾ ਦੁਤਿਯਦਿਵਸੇ ਭਿਕ੍ਖਾਚਾਰਤ੍ਥਾਯ ਨਗਰਂ ਪਾਵਿਸਿ. ਰਾਜਾ ਤਂ ਦਿਸ੍ਵਾ ਪਕ੍ਕੋਸਾਪੇਤ੍ਵਾ ਪਾਸਾਦੇ ਨਿਸੀਦਾਪੇਤ੍ਵਾ ਭੋਜੇਤ੍ਵਾ ਉਯ੍ਯਾਨੇਯੇਵ ਵਸਨਤ੍ਥਾਯ ਪਟਿਞ੍ਞਂ ਗਣ੍ਹਿ. ਬੋਧਿਸਤ੍ਤੋ ਰਞ੍ਞੋ ਨਿਵੇਸਨੇ ਭੁਞ੍ਜਿਤ੍ਵਾ ਉਯ੍ਯਾਨੇ ਵਸਤਿ. ਤਸ੍ਮਿਂ ਕਾਲੇ ਰਾਜਗਹਨਗਰੇ ਦੁਸ੍ਸਲਕ੍ਖਣਬ੍ਰਾਹ੍ਮਣੋ ਨਾਮ ਅਹੋਸਿ. ਤਸ੍ਸ ਸਮੁਗ੍ਗੇ ਠਪਿਤਂ ਸਾਟਕਯੁਗਨ੍ਤਿ ਸਬ੍ਬਂ ਪੁਰਿਮਸਦਿਸਮੇਵ.

ਮਾਣਵੇ ਪਨ ਸੁਸਾਨਂ ਗਚ੍ਛਨ੍ਤੇ ਬੋਧਿਸਤ੍ਤੋ ਪਠਮਤਰਂ ਗਨ੍ਤ੍ਵਾ ਸੁਸਾਨਦ੍ਵਾਰੇ ਨਿਸੀਦਿਤ੍ਵਾ ਤੇਨ ਛਡ੍ਡਿਤਂ ਸਾਟਕਯੁਗਂ ਗਹੇਤ੍ਵਾ ਉਯ੍ਯਾਨਂ ਅਗਮਾਸਿ. ਮਾਣਵੋ ਗਨ੍ਤ੍ਵਾ ਪਿਤੁ ਆਰੋਚੇਸਿ. ਪਿਤਾ ‘‘ਰਾਜਕੁਲੂਪਕੋ ਤਾਪਸੋ ਨਸ੍ਸੇਯ੍ਯਾ’’ਤਿ ਬੋਧਿਸਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਤਾਪਸ, ਤਯਾ ਗਹਿਤਸਾਟਕੇ ਛਡ੍ਡੇਹਿ, ਮਾ ਨਸ੍ਸੀ’’ਤਿ ਆਹ. ਤਾਪਸੋ ‘‘ਅਮ੍ਹਾਕਂ ਸੁਸਾਨੇ ਛਡ੍ਡਿਤਪਿਲੋਤਿਕਾ ਵਟ੍ਟਤਿ, ਨ ਮਯਂ ਕੋਤੁਹਲਮਙ੍ਗਲਿਕਾ, ਕੋਤੁਹਲਮਙ੍ਗਲਂ ਨਾਮੇਤਂ ਨ ਬੁਦ੍ਧਪਚ੍ਚੇਕਬੁਦ੍ਧਬੋਧਿਸਤ੍ਤੇਹਿ ਵਣ੍ਣਿਤਂ, ਤਸ੍ਮਾ ਪਣ੍ਡਿਤੇਨ ਨਾਮ ਕੋਤੁਹਲਮਙ੍ਗਲਿਕੇਨ ਨ ਭਵਿਤਬ੍ਬ’’ਨ੍ਤਿ ਬ੍ਰਾਹ੍ਮਣਸ੍ਸ ਧਮ੍ਮਂ ਦੇਸੇਸਿ. ਬ੍ਰਾਹ੍ਮਣੋ ਧਮ੍ਮਂ ਸੁਤ੍ਵਾ ਦਿਟ੍ਠਿਂ ਭਿਨ੍ਦਿਤ੍ਵਾ ਬੋਧਿਸਤ੍ਤਂ ਸਰਣਂ ਗਤੋ. ਬੋਧਿਸਤ੍ਤੋਪਿ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਸਤ੍ਥਾਪਿ ਇਮਂ ਅਤੀਤਂ ਆਹਰਿਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਬ੍ਰਾਹ੍ਮਣਸ੍ਸ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੮੭. ‘‘ਯਸ੍ਸ ਮਙ੍ਗਲਾ ਸਮੂਹਤਾ, ਉਪ੍ਪਾਤਾ ਸੁਪਿਨਾ ਚ ਲਕ੍ਖਣਾ ਚ;

ਸੋ ਮਙ੍ਗਲਦੋਸਵੀਤਿਵਤ੍ਤੋ, ਯੁਗਯੋਗਾਧਿਗਤੋ ਨ ਜਾਤੁਮੇਤੀ’’ਤਿ.

ਤਤ੍ਥ ਯਸ੍ਸ ਮਙ੍ਗਲਾ ਸਮੂਹਤਾਤਿ ਯਸ੍ਸ ਅਰਹਤੋ ਖੀਣਾਸਵਸ੍ਸ ਦਿਟ੍ਠਮਙ੍ਗਲਂ, ਸੁਤਮਙ੍ਗਲਂ, ਮੁਤਮਙ੍ਗਲਨ੍ਤਿ ਏਤੇ ਮਙ੍ਗਲਾ ਸਮੁਚ੍ਛਿਨ੍ਨਾ. ਉਪ੍ਪਾਤਾ ਸੁਪਿਨਾ ਚ ਲਕ੍ਖਣਾ ਚਾਤਿ ‘‘ਏਵਰੂਪੋ ਚਨ੍ਦਗ੍ਗਾਹੋ ਭਵਿਸ੍ਸਤਿ, ਏਵਰੂਪੋ ਸੂਰਿਯਗ੍ਗਾਹੋ ਭਵਿਸ੍ਸਤਿ, ਏਵਰੂਪੋ ਨਕ੍ਖਤ੍ਤਗ੍ਗਾਹੋ ਭਵਿਸ੍ਸਤਿ, ਏਵਰੂਪੋ ਉਕ੍ਕਾਪਾਤੋ ਭਵਿਸ੍ਸਤਿ, ਏਵਰੂਪੋ ਦਿਸਾਡਾਹੋ ਭਵਿਸ੍ਸਤੀ’’ਤਿ ਇਮੇ ਪਞ੍ਚ ਮਹਾਉਪ੍ਪਾਤਾ, ਨਾਨਪ੍ਪਕਾਰਾ ਸੁਪਿਨਾ, ਸੁਭਗਲਕ੍ਖਣਂ, ਦੁਬ੍ਭਗਲਕ੍ਖਣਂ, ਇਤ੍ਥਿਲਕ੍ਖਣਂ, ਪੁਰਿਸਲਕ੍ਖਣਂ, ਦਾਸਿਲਕ੍ਖਣਂ, ਦਾਸਲਕ੍ਖਣਂ, ਅਸਿਲਕ੍ਖਣਂ, ਹਤ੍ਥਿਲਕ੍ਖਣਂ, ਅਸ੍ਸਲਕ੍ਖਣਂ, ਉਸਭਲਕ੍ਖਣਂ, ਆਵੁਧਲਕ੍ਖਣਂ, ਵਤ੍ਥਲਕ੍ਖਣਨ੍ਤਿ ਏਵਮਾਦਿਕਾਨਿ ਲਕ੍ਖਣਾਨਿ ਇਮੇ ਚ ਦਿਟ੍ਠਿਟ੍ਠਾਨਾ ਯਸ੍ਸ ਸਮੂਹਤਾ, ਨ ਏਤੇਹਿ ਉਪ੍ਪਾਤਾਦੀਹਿ ਅਤ੍ਤਨੋ ਮਙ੍ਗਲਂ ਵਾ ਅਵਮਙ੍ਗਲਂ ਵਾ ਪਚ੍ਚੇਤਿ. ਸੋ ਮਙ੍ਗਲਦੋਸਵੀਤਿਵਤ੍ਤੋਤਿ ਸੋ ਖੀਣਾਸਵੋ ਸਬ੍ਬਮਙ੍ਗਲਦੋਸੇ ਵੀਤਿਵਤ੍ਤੋ ਅਤਿਕ੍ਕਨ੍ਤੋ ਪਜਹਿਤ੍ਵਾ ਠਿਤੋ. ਯੁਗਯੋਗਾਧਿਗਤੋਤਿ ‘‘ਕੋਧੋ ਚ ਉਪਨਾਹੋ ਚ, ਮਕ੍ਖੋ ਚ ਪਲ਼ਾਸੋ ਚਾ’’ਤਿਆਦਿਨਾ (ਵਿਭ. ੮੩੩) ਨਯੇਨ ਦ੍ਵੇ ਦ੍ਵੇ ਏਕਤੋ ਆਗਤਕਿਲੇਸਾ ਯੁਗਾ ਨਾਮ. ਕਾਮਯੋਗੋ, ਭਵਯੋਗੋ, ਦਿਟ੍ਠਿਯੋਗੋ, ਅਵਿਜ੍ਜਾਯੋਗੋਤਿ ਇਮੇ ਸਂਸਾਰੇ ਯੋਜਨਭਾਵਤੋ ਚਤ੍ਤਾਰੋ ਯੋਗਾ ਨਾਮ. ਤੇ ਯੁਗੇ ਚ ਯੋਗੇ ਚਾਤਿ ਯੁਗਯੋਗੇ ਅਧਿਗਤੋ ਅਭਿਭਵਿਤ੍ਵਾ ਗਤੋ ਵੀਤਿਵਤ੍ਤੋ ਸਮਤਿਕ੍ਕਨ੍ਤੋ ਖੀਣਾਸਵੋ ਭਿਕ੍ਖੁ. ਨ ਜਾਤੁਮੇਤੀਤਿ ਪੁਨ ਪਟਿਸਨ੍ਧਿਵਸੇਨ ਏਕਂਸੇਨੇਵ ਇਮਂ ਲੋਕਂ ਨ ਏਤਿ ਨਾਗਚ੍ਛਤੀਤਿ.

ਏਵਂ ਸਤ੍ਥਾ ਇਮਾਯ ਗਾਥਾਯ ਬ੍ਰਾਹ੍ਮਣਸ੍ਸ ਧਮ੍ਮਂ ਦੇਸੇਤ੍ਵਾ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਬ੍ਰਾਹ੍ਮਣੋ ਸਦ੍ਧਿਂ ਪੁਤ੍ਤੇਨ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਤ੍ਥਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਏਤੇਵ ਪਿਤਾਪੁਤ੍ਤਾ ਇਦਾਨਿ ਪਿਤਾਪੁਤ੍ਤਾ ਅਹੇਸੁਂ, ਤਾਪਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਙ੍ਗਲਜਾਤਕਵਣ੍ਣਨਾ ਸਤ੍ਤਮਾ.

[੮੮] ੮. ਸਾਰਮ੍ਭਜਾਤਕਵਣ੍ਣਨਾ

ਕਲ੍ਯਾਣਿਮੇਵ ਮੁਞ੍ਚੇਯ੍ਯਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਓਮਸਵਾਦਸਿਕ੍ਖਾਪਦਂ (ਪਾਚਿ. ੧੫) ਆਰਬ੍ਭ ਕਥੇਸਿ. ਦ੍ਵੇਪਿ ਵਤ੍ਥੂਨਿ ਹੇਟ੍ਠਾ ਨਨ੍ਦਿਵਿਸਾਲਜਾਤਕੇ ਵੁਤ੍ਤਸਦਿਸਾਨੇਵ. ਇਮਸ੍ਮਿਂ ਪਨ ਜਾਤਕੇ ਬੋਧਿਸਤ੍ਤੋ ਗਨ੍ਧਾਰਰਟ੍ਠੇ ਤਕ੍ਕਸਿਲਾਯਂ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਸਾਰਮ੍ਭੋ ਨਾਮ ਬਲਿਬਦ੍ਦੋ ਅਹੋਸਿ. ਸਤ੍ਥਾ ਇਦਂ ਅਤੀਤਵਤ੍ਥੁਂ ਕਥੇਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਂ ਗਾਥਮਾਹ –

੮੮. ‘‘ਕਲ੍ਯਾਣਿਮੇਵ ਮੁਞ੍ਚੇਯ੍ਯ, ਨ ਹਿ ਮੁਞ੍ਚੇਯ੍ਯ ਪਾਪਿਕਂ;

ਮੋਕ੍ਖੋ ਕਲ੍ਯਾਣਿਯਾ ਸਾਧੁ, ਮੁਤ੍ਵਾ ਤਪ੍ਪਤਿ ਪਾਪਿਕ’’ਨ੍ਤਿ.

ਤਤ੍ਥ ਕਲ੍ਯਾਣਿਮੇਵ ਮੁਞ੍ਚੇਯ੍ਯਾਤਿ ਚਤੁਦੋਸਵਿਨਿਮੁਤ੍ਤਂ ਕਲ੍ਯਾਣਿਂ ਸੁਨ੍ਦਰਂ ਅਨਵਜ੍ਜਂ ਵਾਚਮੇਵ ਮੁਞ੍ਚੇਯ੍ਯ ਵਿਸ੍ਸਜ੍ਜੇਯ੍ਯ ਕਥੇਯ੍ਯ. ਨ ਹਿ ਮੁਞ੍ਚੇਯ੍ਯ ਪਾਪਿਕਨ੍ਤਿ ਪਾਪਿਕਂ ਲਾਮਿਕਂ ਪਰੇਸਂ ਅਪ੍ਪਿਯਂ ਅਮਨਾਪਂ ਨ ਮੁਞ੍ਚੇਯ੍ਯ ਨ ਕਥੇਯ੍ਯ. ਮੋਕ੍ਖੋ ਕਲ੍ਯਾਣਿਯਾ ਸਾਧੂਤਿ ਕਲ੍ਯਾਣਵਾਚਾਯ ਵਿਸ੍ਸਜ੍ਜਨਮੇਵ ਇਮਸ੍ਮਿਂ ਲੋਕੇ ਸਾਧੁ ਸੁਨ੍ਦਰਂ ਭਦ੍ਦਕਂ. ਮੁਤ੍ਵਾ ਤਪ੍ਪਤਿ ਪਾਪਿਕਨ੍ਤਿ ਪਾਪਿਕਂ ਫਰੁਸਵਾਚਂ ਮੁਞ੍ਚਿਤ੍ਵਾ ਵਿਸ੍ਸਜ੍ਜੇਤ੍ਵਾ ਕਥੇਤ੍ਵਾ ਸੋ ਪੁਗ੍ਗਲੋ ਤਪ੍ਪਤਿ ਸੋਚਤਿ ਕਿਲਮਤੀਤਿ.

ਏਵਂ ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਬ੍ਰਾਹ੍ਮਣੋ ਆਨਨ੍ਦੋ ਅਹੋਸਿ, ਬ੍ਰਾਹ੍ਮਣੀ ਉਪ੍ਪਲਵਣ੍ਣਾ, ਸਾਰਮ੍ਭੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਾਰਮ੍ਭਜਾਤਕਵਣ੍ਣਨਾ ਅਟ੍ਠਮਾ.

[੮੯] ੯. ਕੁਹਕਜਾਤਕਵਣ੍ਣਨਾ

ਵਾਚਾਵ ਕਿਰ ਤੇ ਆਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਕੁਹਕਭਿਕ੍ਖੁਂ ਆਰਬ੍ਭ ਕਥੇਸਿ. ਕੁਹਕਵਤ੍ਥੁ ਉਦ੍ਦਾਲਕਜਾਤਕੇ ਆਵਿ ਭਵਿਸ੍ਸਤਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਏਕਂ ਗਾਮਕਂ ਉਪਨਿਸ੍ਸਾਯ ਏਕੋ ਕੂਟਜਟਿਲੋ ਕੁਹਕਤਾਪਸੋ ਵਸਤਿ. ਏਕੋ ਕੁਟੁਮ੍ਬਿਕੋ ਤਸ੍ਸ ਅਰਞ੍ਞੇ ਪਣ੍ਣਸਾਲਂ ਕਾਰੇਤ੍ਵਾ ਤਤ੍ਥ ਨਂ ਵਾਸੇਨ੍ਤੋ ਅਤ੍ਤਨੋ ਗੇਹੇ ਪਣੀਤਾਹਾਰੇਨ ਪਟਿਜਗ੍ਗਤਿ. ਸੋ ਤਂ ਕੂਟਜਟਿਲਂ ‘‘ਸੀਲਵਾ ਏਸੋ’’ਤਿ ਸਦ੍ਦਹਿਤ੍ਵਾ ਚੋਰਭਯੇਨ ਸੁਵਣ੍ਣਨਿਕ੍ਖਸਤਂ ਤਸ੍ਸ ਪਣ੍ਣਸਾਲਂ ਨੇਤ੍ਵਾ ਭੂਮਿਗਤਂ ਕਤ੍ਵਾ ‘‘ਇਦਂ ਓਲੋਕੇਯ੍ਯਾਸਿ, ਭਨ੍ਤੇ’’ਤਿ ਆਹ. ਅਥ ਨਂ ਤਾਪਸੋ ‘‘ਪਬ੍ਬਜਿਤਾਨਂ ਨਾਮ, ਆਵੁਸੋ, ਏਵਰੂਪਂ ਕਥੇਤੁਂ, ਨ ਵਟ੍ਟਤਿ, ਅਮ੍ਹਾਕਂ ਪਨ ਪਰਸਨ੍ਤਕੇ ਲੋਭੋ ਨਾਮ ਨਤ੍ਥੀ’’ਤਿ ਆਹ. ਸੋ ‘‘ਸਾਧੁ, ਭਨ੍ਤੇ’’ਤਿ ਤਸ੍ਸ ਵਚਨਂ ਸਦ੍ਦਹਿਤ੍ਵਾ ਪਕ੍ਕਾਮਿ. ਦੁਟ੍ਠਤਾਪਸੋ ‘‘ਸਕ੍ਕਾ ਏਤ੍ਤਕੇਨ ਜੀਵਿਤੁ’’ਨ੍ਤਿ ਕਤਿਪਾਹਂ ਅਤਿਕ੍ਕਮਿਤ੍ਵਾ ਤਂ ਸੁਵਣ੍ਣਂ ਗਹੇਤ੍ਵਾ ਅਨ੍ਤਰਾਮਗ੍ਗੇ ਏਕਸ੍ਮਿਂ ਠਾਨੇ ਠਪੇਤ੍ਵਾ ਆਗਨ੍ਤ੍ਵਾ ਪਣ੍ਣਸਾਲਾਯਮੇਵ ਵਸਿਤ੍ਵਾ ਪੁਨਦਿਵਸੇ ਤਸ੍ਸ ਗੇਹੇ ਭਤ੍ਤਕਿਚ੍ਚਂ ਕਤ੍ਵਾ ਏਵਮਾਹ ‘‘ਆਵੁਸੋ, ਮਯਂ ਤੁਮ੍ਹੇ ਨਿਸ੍ਸਾਯ ਚਿਰਂ ਵਸਿਮ੍ਹ, ਅਤਿਚਿਰਂ ਏਕਸ੍ਮਿਂ ਠਾਨੇ ਵਸਨ੍ਤਾਨਂ ਮਨੁਸ੍ਸੇਹਿ ਸਦ੍ਧਿਂ ਸਂਸਗ੍ਗੋ ਹੋਤਿ, ਸਂਸਗ੍ਗੋ ਚ ਨਾਮ ਪਬ੍ਬਜਿਤਾਨਂ ਮਲਂ, ਤਸ੍ਮਾ ਗਚ੍ਛਾਮਹ’’ਨ੍ਤਿ ਵਤ੍ਵਾ ਤੇਨ ਪੁਨਪ੍ਪੁਨਂ ਯਾਚਿਯਮਾਨੋਪਿ ਨਿਵਤ੍ਤਿਤੁਂ ਨ ਇਚ੍ਛਿ. ਅਥ ਨਂ ਸੋ ‘‘ਏਵਂ ਸਨ੍ਤੇ ਗਚ੍ਛਥ, ਭਨ੍ਤੇ’’ਤਿ ਯਾਵ ਗਾਮਦ੍ਵਾਰਂ ਅਨੁਗਨ੍ਤ੍ਵਾ ਨਿਵਤ੍ਤਿ. ਤਾਪਸੋਪਿ ਥੋਕਂ ਗਨ੍ਤ੍ਵਾਵ ‘‘ਇਮਂ ਕੁਟੁਮ੍ਬਿਕਂ ਮਯਾ ਵਞ੍ਚੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਜਟਾਨਂ ਅਨ੍ਤਰੇ ਤਿਣਂ ਠਪੇਤ੍ਵਾ ਪਟਿਨਿਵਤ੍ਤਿ. ਕੁਟੁਮ੍ਬਿਕੋ ‘‘ਕਿਂ, ਭਨ੍ਤੇ, ਨਿਵਤ੍ਤਿਤ੍ਥਾ’’ਤਿ ਪੁਚ੍ਛਿ. ਆਵੁਸੋ ਤੁਮ੍ਹਾਕਂ ਗੇਹਚ੍ਛਦਨਤੋ ਮੇ ਜਟਾਸੁ ਏਕਤਿਣਂ ਲਗ੍ਗਂ, ਅਦਿਨ੍ਨਾਦਾਨਞ੍ਚ ਨਾਮ ਪਬ੍ਬਜਿਤਾਨਂ ਨ ਵਟ੍ਟਤਿ, ਤਂ ਆਦਾਯ ਆਗਤੋਮ੍ਹੀਤਿ. ਕੁਟੁਮ੍ਬਿਕੋ ‘‘ਛਡ੍ਡੇਤ੍ਵਾ ਗਚ੍ਛਥ, ਭਨ੍ਤੇ’’ਤਿ ਵਤ੍ਵਾ ‘‘ਤਿਣਸਲਾਕਮ੍ਪਿ ਨਾਮ ਪਰਸਨ੍ਤਕਂ ਨ ਗਣ੍ਹਾਤਿ, ਅਹੋ ਕੁਕ੍ਕੁਚ੍ਚਕੋ ਮੇ ਅਯ੍ਯੋ’’ਤਿ ਪਸੀਦਿਤ੍ਵਾ ਵਨ੍ਦਿਤ੍ਵਾ ਉਯ੍ਯੋਜੇਸਿ.

ਤਦਾ ਪਨ ਬੋਧਿਸਤ੍ਤੇਨ ਭਣ੍ਡਤ੍ਥਾਯ ਪਚ੍ਚਨ੍ਤਂ ਗਚ੍ਛਨ੍ਤੇਨ ਤਸ੍ਮਿਂ ਨਿਵੇਸਨੇ ਨਿਵਾਸੋ ਗਹਿਤੋ ਹੋਤਿ. ਸੋ ਤਾਪਸਸ੍ਸ ਵਚਨਂ ਸੁਤ੍ਵਾਵ ‘‘ਅਦ੍ਧਾ ਇਮਿਨਾ ਦੁਟ੍ਠਤਾਪਸੇਨ ਇਮਸ੍ਸ ਕਿਞ੍ਚਿ ਗਹਿਤਂ ਭਵਿਸ੍ਸਤੀ’’ਤਿ ਕੁਟੁਮ੍ਬਿਕਂ ਪੁਚ੍ਛਿ ‘‘ਅਤ੍ਥਿ ਪਨ ਤੇ, ਸਮ੍ਮ, ਕਿਞ੍ਚਿ ਏਤਸ੍ਸ ਤਾਪਸਸ੍ਸ ਸਨ੍ਤਿਕੇ ਨਿਕ੍ਖਿਤ੍ਤ’’ਨ੍ਤਿ? ‘‘ਅਤ੍ਥਿ, ਸਮ੍ਮ, ਸੁਵਣ੍ਣਨਿਕ੍ਖਸਤ’’ਨ੍ਤਿ. ‘‘ਤੇਨ ਹਿ ਗਚ੍ਛ, ਤਂ ਉਪਧਾਰੇਹੀ’’ਤਿ. ਸੋ ਪਣ੍ਣਸਾਲਂ ਗਨ੍ਤ੍ਵਾ ਤਂ ਅਦਿਸ੍ਵਾ ਵੇਗੇਨਾਗਨ੍ਤ੍ਵਾ ‘‘ਨਤ੍ਥਿ, ਸਮ੍ਮਾ’’ਤਿ ਆਹ. ‘‘ਨ ਤੇ ਸੁਵਣ੍ਣਂ ਅਞ੍ਞੇਨ ਗਹਿਤਂ, ਤੇਨੇਵ ਕੁਹਕਤਾਪਸੇਨ ਗਹਿਤਂ, ਏਹਿ, ਤਂ ਅਨੁਬਨ੍ਧਿਤ੍ਵਾ ਗਣ੍ਹਾਮਾ’’ਤਿ ਵੇਗੇਨ ਗਨ੍ਤ੍ਵਾ ਕੂਟਤਾਪਸਂ ਗਣ੍ਹਿਤ੍ਵਾ ਹਤ੍ਥੇਹਿ ਚ ਪਾਦੇਹਿ ਚ ਪੋਥੇਤ੍ਵਾ ਸੁਵਣ੍ਣਂ ਆਹਰਾਪੇਤ੍ਵਾ ਗਣ੍ਹਿਂਸੁ. ਬੋਧਿਸਤ੍ਤੋ ਸੁਵਣ੍ਣਂ ਦਿਸ੍ਵਾ ‘‘ਨਿਕ੍ਖਸਤਂ ਹਰਮਾਨੋ ਅਸਜ੍ਜਿਤ੍ਵਾ ਤਿਣਮਤ੍ਤੇ ਸਤ੍ਤੋਸੀ’’ਤਿ ਵਤ੍ਵਾ ਤਂ ਗਰਹਨ੍ਤੋ ਇਮਂ ਗਾਥਮਾਹ –

੮੯. ‘‘ਵਾਚਾਵ ਕਿਰ ਤੇ ਆਸਿ, ਸਣ੍ਹਾ ਸਖਿਲਭਾਣਿਨੋ;

ਤਿਣਮਤ੍ਤੇ ਅਸਜ੍ਜਿਤ੍ਥੋ, ਨੋ ਚ ਨਿਕ੍ਖਸਤਂ ਹਰ’’ਨ੍ਤਿ.

ਤਤ੍ਥ ਵਾਚਾਵ ਕਿਰ ਤੇ ਆਸਿ, ਸਣ੍ਹਾ ਸਖਿਲਭਾਣਿਨੋਤਿ ‘‘ਪਬ੍ਬਜਿਤਾਨਂ ਤਿਣਮਤ੍ਤਮ੍ਪਿ ਅਦਿਨ੍ਨਂ ਆਦਾਤੁਂ ਨ ਵਟ੍ਟਤੀ’’ਤਿ ਏਵਂ ਸਖਿਲਂ ਮੁਦੁਵਚਨਂ ਵਦਨ੍ਤਸ੍ਸ ਵਾਚਾ ਏਵ ਕਿਰ ਤੇ ਸਣ੍ਹਾ ਆਸਿ, ਵਚਨਮਤ੍ਤਮੇਵ ਮਟ੍ਠਂ ਅਹੋਸੀਤਿ ਅਤ੍ਥੋ. ਤਿਣਮਤ੍ਤੇ ਅਸਜ੍ਜਿਤ੍ਥੋਤਿ ਕੂਟਜਟਿਲ ਏਕਿਸ੍ਸਾ ਤਿਣਸਲਾਕਾਯ ਕੁਕ੍ਕੁਚ੍ਚਂ ਕੁਰੁਮਾਨੋ ਤ੍ਵਂ ਸਤ੍ਤੋ ਆਸਤ੍ਤੋ ਲਗ੍ਗੋ ਅਹੋਸਿ. ਨੋ ਚ ਨਿਕ੍ਖਸਤਂ ਹਰਨ੍ਤਿ ਇਮਂ ਪਨ ਨਿਕ੍ਖਸਤਂ ਹਰਨ੍ਤੋ ਅਸਤ੍ਤੋ ਨਿਲ੍ਲਗ੍ਗੋਵ ਜਾਤੋਸੀਤਿ.

ਏਵਂ ਬੋਧਿਸਤ੍ਤੋ ਤਂ ਗਰਹਿਤ੍ਵਾ ‘‘ਮਾ ਪੁਨ, ਕੂਟਜਟਿਲ, ਏਵਰੂਪਮਕਾਸੀ’’ਤਿ ਓਵਾਦਂ ਦਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵੇਸ ਭਿਕ੍ਖੁ ਕੁਹਕੋ, ਪੁਬ੍ਬੇਪਿ ਕੁਹਕੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕੂਟਤਾਪਸੋ ਕੁਹਕਭਿਕ੍ਖੁ ਅਹੋਸਿ, ਪਣ੍ਡਿਤਪੁਰਿਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕੁਹਕਜਾਤਕਵਣ੍ਣਨਾ ਨਵਮਾ.

[੯੦] ੧੦. ਅਕਤਞ੍ਞੁਜਾਤਕਵਣ੍ਣਨਾ

ਯੋ ਪੁਬ੍ਬੇ ਕਤਕਲ੍ਯਾਣੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਨਾਥਪਿਣ੍ਡਿਕਂ ਆਰਬ੍ਭ ਕਥੇਸਿ. ਤਸ੍ਸ ਕਿਰੇਕੋ ਪਚ੍ਚਨ੍ਤਵਾਸਿਕੋ ਸੇਟ੍ਠਿ ਅਦਿਟ੍ਠਸਹਾਯੋ ਅਹੋਸਿ. ਸੋ ਏਕਦਾ ਪਚ੍ਚਨ੍ਤੇ ਉਟ੍ਠਾਨਕਭਣ੍ਡਸ੍ਸ ਪਞ੍ਚ ਸਕਟਸਤਾਨਿ ਪੂਰੇਤ੍ਵਾ ਕਮ੍ਮਨ੍ਤਿਕਮਨੁਸ੍ਸੇ ਆਹ – ‘‘ਗਚ੍ਛਥ, ਭੋ, ਇਮਂ ਭਣ੍ਡਂ ਸਾਵਤ੍ਥਿਂ ਨੇਤ੍ਵਾ ਅਮ੍ਹਾਕਂ ਸਹਾਯਕਸ੍ਸ ਅਨਾਥਪਿਣ੍ਡਿਕਮਹਾਸੇਟ੍ਠਿਸ੍ਸ ਪਚ੍ਚਗ੍ਘੇਨ ਵਿਕ੍ਕਿਣਿਤ੍ਵਾ ਪਟਿਭਣ੍ਡਂ ਆਹਰਥਾ’’ਤਿ. ਤੇ ‘‘ਸਾਧੂ’’ਤਿ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਸਾਵਤ੍ਥਿਂ ਗਨ੍ਤ੍ਵਾ ਮਹਾਸੇਟ੍ਠਿਂ ਦਿਸ੍ਵਾ ਪਣ੍ਣਾਕਾਰਂ ਦਤ੍ਵਾ ਤਂ ਪਵਤ੍ਤਿਂ ਆਰੋਚੇਸੁਂ. ਮਹਾਸੇਟ੍ਠਿ ‘‘ਸ੍ਵਾਗਤਂ ਵੋ’’ਤਿ ਤੇਸਂ ਆਵਾਸਞ੍ਚ ਪਰਿਬ੍ਬਯਞ੍ਚ ਦਾਪੇਤ੍ਵਾ ਸਹਾਯਕਸ੍ਸ ਸੁਖਂ ਪੁਚ੍ਛਿਤ੍ਵਾ ਭਣ੍ਡਂ ਵਿਕ੍ਕਿਣਿਤ੍ਵਾ ਪਟਿਭਣ੍ਡਂ ਦਾਪੇਸਿ. ਤੇ ਪਚ੍ਚਨ੍ਤਂ ਗਨ੍ਤ੍ਵਾ ਤਮਤ੍ਥਂ ਅਤ੍ਤਨੋ ਸੇਟ੍ਠਿਸ੍ਸ ਆਰੋਚੇਸੁਂ.

ਅਪਰਭਾਗੇ ਅਨਾਥਪਿਣ੍ਡਿਕੋਪਿ ਤਥੇਵ ਪਞ੍ਚ ਸਕਟਸਤਾਨਿ ਤਤ੍ਥ ਪੇਸੇਸਿ. ਮਨੁਸ੍ਸਾ ਤਤ੍ਥ ਗਨ੍ਤ੍ਵਾ ਪਣ੍ਣਾਕਾਰਂ ਆਦਾਯ ਪਚ੍ਚਨ੍ਤਵਾਸਿਕਸੇਟ੍ਠਿਂ ਪਸ੍ਸਿਂਸੁ. ਸੋ ‘‘ਕੁਤੋ ਆਗਚ੍ਛਥਾ’’ਤਿ ਪੁਚ੍ਛਿਤ੍ਵਾ ‘‘ਸਾਵਤ੍ਥਿਤੋ ਤੁਮ੍ਹਾਕਂ ਸਹਾਯਕਸ੍ਸ ਅਨਾਥਪਿਣ੍ਡਿਕਸ੍ਸ ਸਨ੍ਤਿਕਾ’’ਤਿ ਵੁਤ੍ਤੇ ‘‘ਅਨਾਥਪਿਣ੍ਡਿਕੋਤਿ ਕਸ੍ਸਚਿ ਪੁਰਿਸਸ੍ਸ ਨਾਮਂ ਭਵਿਸ੍ਸਤੀ’’ਤਿ ਪਰਿਹਾਸਂ ਕਤ੍ਵਾ ਪਣ੍ਣਾਕਾਰਂ ਗਹੇਤ੍ਵਾ ‘‘ਗਚ੍ਛਥ ਤੁਮ੍ਹੇ’’ਤਿ ਉਯ੍ਯੋਜੇਸਿ, ਨੇਵ ਨਿਵਾਸਂ, ਨ ਪਰਿਬ੍ਬਯਂ ਦਾਪੇਸਿ. ਤੇ ਸਯਮੇਵ ਭਣ੍ਡਂ ਵਿਕ੍ਕਿਣਿਤ੍ਵਾ ਪਟਿਭਣ੍ਡਂ ਆਦਾਯ ਸਾਵਤ੍ਥਿਂ ਆਗਨ੍ਤ੍ਵਾ ਸੇਟ੍ਠਿਸ੍ਸ ਤਂ ਪਵਤ੍ਤਿਂ ਆਰੋਚੇਸੁਂ.

ਅਥ ਸੋ ਪਚ੍ਚਨ੍ਤਵਾਸੀ ਪੁਨਪਿ ਏਕਵਾਰਂ ਤਥੇਵ ਪਞ੍ਚ ਸਕਟਸਤਾਨਿ ਸਾਵਤ੍ਥਿਂ ਪੇਸੇਸਿ, ਮਨੁਸ੍ਸਾ ਪਣ੍ਣਾਕਾਰਂ ਆਦਾਯ ਮਹਾਸੇਟ੍ਠਿਂ ਪਸ੍ਸਿਂਸੁ. ਤੇ ਪਨ ਦਿਸ੍ਵਾ ਅਨਾਥਪਿਣ੍ਡਿਕਸ੍ਸ ਮਨੁਸ੍ਸਾ ‘‘ਮਯਂ, ਸਾਮਿ, ਏਤੇਸਂ ਨਿਵਾਸਞ੍ਚ ਭਤ੍ਤਞ੍ਚ ਪਰਿਬ੍ਬਯਞ੍ਚ ਜਾਨਿਸ੍ਸਾਮਾ’’ਤਿ ਵਤ੍ਵਾ ਤੇਸਂ ਸਕਟਾਨਿ ਬਹਿਨਗਰੇ ਤਥਾਰੂਪੇ ਠਾਨੇ ਮੋਚਾਪੇਤ੍ਵਾ ‘‘ਤੁਮ੍ਹੇ ਇਧੇਵ ਵਸਥ, ਅਮ੍ਹਾਕਂ ਵੋ ਘਰੇ ਯਾਗੁਭਤ੍ਤਞ੍ਚ ਪਰਿਬ੍ਬਯੋ ਚ ਭਵਿਸ੍ਸਤੀ’’ਤਿ ਗਨ੍ਤ੍ਵਾ ਦਾਸਕਮ੍ਮਕਰੇ ਸਨ੍ਨਿਪਾਤੇਤ੍ਵਾ ਮਜ੍ਝਿਮਯਾਮਸਮਨਨ੍ਤਰੇ ਪਞ੍ਚ ਸਕਟਸਤਾਨਿ ਵਿਲੁਮ੍ਪਿਤ੍ਵਾ ਨਿਵਾਸਨਪਾਰੁਪਨਾਨਿਪਿ ਨੇਸਂ ਅਚ੍ਛਿਨ੍ਦਿਤ੍ਵਾ ਗੋਣੇ ਪਲਾਪੇਤ੍ਵਾ ਸਕਟਾਨਿ ਵਿਚਕ੍ਕਾਨਿ ਕਤ੍ਵਾ ਭੂਮਿਯਂ ਠਪੇਤ੍ਵਾ ਚਕ੍ਕਾਨਿਪਿ ਗਣ੍ਹਿਤ੍ਵਾਵ ਅਗਮਂਸੁ. ਪਚ੍ਚਨ੍ਤਵਾਸਿਨੋ ਨਿਵਾਸਨਮਤ੍ਤਸ੍ਸਪਿ ਸਾਮਿਕਾ ਅਹੁਤ੍ਵਾ ਭੀਤਾ ਵੇਗੇਨ ਪਲਾਯਿਤ੍ਵਾ ਪਚ੍ਚਨ੍ਤਮੇਵ ਗਤਾ. ਸੇਟ੍ਠਿਮਨੁਸ੍ਸਾਪਿ ਤਮਤ੍ਥਂ ਮਹਾਸੇਟ੍ਠਿਨੋ ਆਰੋਚੇਸੁਂ. ਸੋ ‘‘ਅਤ੍ਥਿ ਦਾਨਿਦਂ ਕਥਾਪਾਭਤ’’ਨ੍ਤਿ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਆਦਿਤੋ ਪਟ੍ਠਾਯ ਸਬ੍ਬਂ ਤਂ ਪਵਤ੍ਤਿਂ ਆਰੋਚੇਸਿ. ਸਤ੍ਥਾ ‘‘ਨ ਖੋ, ਗਹਪਤਿ, ਸੋ ਪਚ੍ਚਨ੍ਤਵਾਸੀ ਇਦਾਨੇਵ ਏਵਂਸੀਲੋ, ਪੁਬ੍ਬੇਪਿ ਏਵਂਸੀਲੋਯੇਵ ਅਹੋਸੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਬਾਰਾਣਸਿਯਂ ਮਹਾਵਿਭਵੋ ਸੇਟ੍ਠਿ ਅਹੋਸਿ. ਤਸ੍ਸੇਕੋ ਪਚ੍ਚਨ੍ਤਵਾਸਿਕੋ ਸੇਟ੍ਠਿ ਅਦਿਟ੍ਠਸਹਾਯੋ ਅਹੋਸਿ. ਸਬ੍ਬਂ ਅਤੀਤਵਤ੍ਥੁ ਪਚ੍ਚੁਪ੍ਪਨ੍ਨਵਤ੍ਥੁਸਦਿਸਮੇਵ ਬੋਧਿਸਤ੍ਤੋ ਪਨ ਅਤ੍ਤਨੋ ਮਨੁਸ੍ਸੇਹਿ ‘‘ਅਜ੍ਜ ਅਮ੍ਹੇਹਿ ਇਦਂ ਨਾਮ ਕਤ’’ਨ੍ਤਿ ਆਰੋਚਿਤੇ ‘‘ਪਠਮਂ ਅਤ੍ਤਨੋ ਕਤਂ ਉਪਕਾਰਂ ਅਜਾਨਨ੍ਤਾ ਪਚ੍ਛਾ ਏਵਰੂਪਂ ਲਭਨ੍ਤਿਯੇਵਾ’’ਤਿ ਵਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੯੦. ‘‘ਯੋ ਪੁਬ੍ਬੇ ਕਤਕਲ੍ਯਾਣੋ, ਕਤਤ੍ਥੋ ਨਾਵਬੁਜ੍ਝਤਿ;

ਪਚ੍ਛਾ ਕਿਚ੍ਚੇ ਸਮੁਪ੍ਪਨ੍ਨੇ, ਕਤ੍ਤਾਰਂ ਨਾਧਿਗਚ੍ਛਤੀ’’ਤਿ.

ਤਤ੍ਰਾਯਂ ਪਿਣ੍ਡਤ੍ਥੋ – ਖਤ੍ਤਿਯਾਦੀਸੁ ਯੋ ਕੋਚਿ ਪੁਰਿਸੋ ਪੁਬ੍ਬੇ ਪਠਮਤਰਂ ਅਞ੍ਞੇਨ ਕਤਕਲ੍ਯਾਣੋ ਕਤੂਪਕਾਰੋ ਕਤਤ੍ਥੋ ਨਿਪ੍ਫਾਦਿਤਕਿਚ੍ਚੋ ਹੁਤ੍ਵਾ ਤਂ ਪਰੇਨ ਅਤ੍ਤਨਿ ਕਤਂ ਕਲ੍ਯਾਣਞ੍ਚੇਵ ਅਤ੍ਥਞ੍ਚ ਨ ਜਾਨਾਤਿ, ਸੋ ਪਚ੍ਛਾ ਅਤ੍ਤਨੋ ਕਿਚ੍ਚੇ ਸਮੁਪ੍ਪਨ੍ਨੇ ਤਸ੍ਸ ਕਿਚ੍ਚਸ੍ਸ ਕਤ੍ਤਾਰਂ ਨਾਧਿਗਚ੍ਛਤਿ ਨ ਲਭਤੀਤਿ.

ਏਵਂ ਬੋਧਿਸਤ੍ਤੋ ਇਮਾਯ ਗਾਥਾਯ ਧਮ੍ਮਂ ਦੇਸੇਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪਚ੍ਚਨ੍ਤਵਾਸੀ ਇਦਾਨੀਪਿ ਪਚ੍ਚਨ੍ਤਵਾਸੀਯੇਵ, ਬਾਰਾਣਸਿਸੇਟ੍ਠਿ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਕਤਞ੍ਞੁਜਾਤਕਵਣ੍ਣਨਾ ਦਸਮਾ.

ਅਪਾਯਿਮ੍ਹਵਗ੍ਗੋ ਨਵਮੋ.

ਤਸ੍ਸੁਦ੍ਦਾਨਂ –

ਸੁਰਾਪਾਨਂ ਮਿਤ੍ਤਵਿਨ੍ਦਂ, ਕਾਲ਼ਕਣ੍ਣੀ ਅਤ੍ਥਦ੍ਵਾਰਂ;

ਕਿਂਪਕ੍ਕਸੀਲਵੀਮਂਸਂ, ਮਙ੍ਗਲਞ੍ਚਾਪਿ ਸਾਰਮ੍ਭਂ;

ਕੁਹਕਂ ਅਕਤਞ੍ਞੂ ਚਾਤਿ.