੧੦. ਲਿਤ੍ਤਵਗ੍ਗੋ

[੯੧] ੧. ਲਿਤ੍ਤਜਾਤਕਵਣ੍ਣਨਾ

ਲਿਤ੍ਤਂ ਪਰਮੇਨ ਤੇਜਸਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਪਚ੍ਚਵੇਕ੍ਖਿਤਪਰਿਭੋਗਂ ਆਰਬ੍ਭ ਕਥੇਸਿ. ਤਸ੍ਮਿਂ ਕਿਰ ਕਾਲੇ ਭਿਕ੍ਖੂ ਚੀਵਰਾਦੀਨਿ ਲਭਿਤ੍ਵਾ ਯੇਭੁਯ੍ਯੇਨ ਅਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਨ੍ਤਿ. ਤੇ ਚਤ੍ਤਾਰੋ ਪਚ੍ਚਯੇ ਅਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਮਾਨਾ ਯੇਭੁਯ੍ਯੇਨ ਨਿਰਯਤਿਰਚ੍ਛਾਨਯੋਨਿਤੋ ਨ ਮੁਚ੍ਚਨ੍ਤਿ. ਸਤ੍ਥਾ ਤਂ ਕਾਰਣਂ ਞਤ੍ਵਾ ਭਿਕ੍ਖੂਨਂ ਅਨੇਕਪਰਿਯਾਯੇਨ ਧਮ੍ਮਿਂ ਕਥਂ ਕਥੇਤ੍ਵਾ ਅਪਚ੍ਚਵੇਕ੍ਖਿਤਪਰਿਭੋਗੇ ਆਦੀਨਵਂ ਦਸ੍ਸੇਤ੍ਵਾ ‘‘ਭਿਕ੍ਖਵੇ, ਭਿਕ੍ਖੁਨਾ ਨਾਮ ਚਤ੍ਤਾਰੋ ਪਚ੍ਚਯੇ ਲਭਿਤ੍ਵਾ ਅਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤਿ, ਤਸ੍ਮਾ ਇਤੋ ਪਟ੍ਠਾਯ ਚਤ੍ਤਾਰੋ ਪਚ੍ਚਯੇ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜੇਯ੍ਯਾਥਾ’’ਤਿ ਪਚ੍ਚਵੇਕ੍ਖਨਵਿਧਿਂ ਦਸ੍ਸੇਨ੍ਤੋ ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਟਿਸਙ੍ਖਾ ਯੋਨਿਸੋ ਚੀਵਰਂ ਪਟਿਸੇਵਤਿ ਸੀਤਸ੍ਸ ਪਟਿਘਾਤਾਯਾ’’ਤਿਆਦਿਨਾ (ਮ. ਨਿ. ੧.੨੩; ਅ. ਨਿ. ੬.੫੮) ਨਯੇਨ ਤਨ੍ਤਿਂ ਠਪੇਤ੍ਵਾ ‘‘ਭਿਕ੍ਖਵੇ, ਚਤ੍ਤਾਰੋ ਪਚ੍ਚਯੇ ਏਵਂ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ, ਅਪਚ੍ਚਵੇਕ੍ਖਿਤ੍ਵਾ ਪਰਿਭੋਗੋ ਨਾਮ ਹਲਾਹਲਵਿਸਪਰਿਭੋਗਸਦਿਸੋ. ਪੋਰਾਣਕਾ ਹਿ ਅਪਚ੍ਚਵੇਕ੍ਖਿਤ੍ਵਾ ਦੋਸਂ ਅਜਾਨਿਤ੍ਵਾ ਵਿਸਂ ਪਰਿਭੁਞ੍ਜਿਤ੍ਵਾ ਵਿਪਾਕਨ੍ਤੇ ਮਹਾਦੁਕ੍ਖਂ ਅਨੁਭਵਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਞ੍ਞਤਰਸ੍ਮਿਂ ਮਹਾਭੋਗਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਅਕ੍ਖਧੁਤ੍ਤੋ ਅਹੋਸਿ. ਅਥਾਪਰੋ ਕੂਟਕ੍ਖਧੁਤ੍ਤੋ ਬੋਧਿਸਤ੍ਤੇਨ ਸਦ੍ਧਿਂ ਕੀਲ਼ਨ੍ਤੋ ਅਤ੍ਤਨੋ ਜਯੇ ਵਤ੍ਤਮਾਨੇ ਕੇਲ਼ਿਮਣ੍ਡਲਂ ਨ ਭਿਨ੍ਦਤਿ, ਪਰਾਜਯਕਾਲੇ ਪਨ ਅਕ੍ਖਂ ਮੁਖੇ ਪਕ੍ਖਿਪਿਤ੍ਵਾ ‘‘ਅਕ੍ਖੋ ਨਟ੍ਠੋ’’ਤਿ ਕੇਲ਼ਿਮਣ੍ਡਲਂ ਭਿਨ੍ਦਿਤ੍ਵਾ ਪਕ੍ਕਮਤਿ. ਬੋਧਿਸਤ੍ਤੋ ਤਸ੍ਸ ਤਂ ਕਾਰਣਂ ਞਤ੍ਵਾ ‘‘ਹੋਤੁ, ਜਾਨਿਸ੍ਸਾਮੇਤ੍ਥ ਪਤਿਰੂਪਕਾਰਣ’’ਨ੍ਤਿ ਅਕ੍ਖੇ ਆਦਾਯ ਅਤ੍ਤਨੋ ਘਰੇ ਹਲਾਹਲਵਿਸੇਨ ਰਞ੍ਜਿਤ੍ਵਾ ਪੁਨਪ੍ਪੁਨਂ ਸੁਕ੍ਖਾਪੇਤ੍ਵਾ ਤੇ ਆਦਾਯ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਏਹਿ, ਸਮ੍ਮ, ਅਕ੍ਖੇਹਿ ਕੀਲ਼ਾਮਾ’’ਤਿ ਆਹ. ਸੋ ‘‘ਸਾਧੁ, ਸਮ੍ਮਾ’’ਤਿ ਕੇਲ਼ਿਮਣ੍ਡਲਂ ਸਜ੍ਜੇਤ੍ਵਾ ਤੇਨ ਸਦ੍ਧਿਂ ਕੀਲ਼ਨ੍ਤੋ ਅਤ੍ਤਨੋ ਪਰਾਜਯਕਾਲੇ ਏਕਂ ਅਕ੍ਖਂ ਮੁਖੇ ਪਕ੍ਖਿਪਿ. ਅਥ ਨਂ ਬੋਧਿਸਤ੍ਤੋ ਤਥਾ ਕਰੋਨ੍ਤਂ ਦਿਸ੍ਵਾ ‘‘ਗਿਲਾਹਿ ਤਾਵ, ਪਚ੍ਛਾ ਇਦਂ ਨਾਮੇਤਨ੍ਤਿ ਜਾਨਿਸ੍ਸਸੀ’’ਤਿ ਚੋਦੇਤੁਂ ਇਮਂ ਗਾਥਮਾਹ –

੯੧. ‘‘ਲਿਤ੍ਤਂ ਪਰਮੇਨ ਤੇਜਸਾ, ਗਿਲਮਕ੍ਖਂ ਪੁਰਿਸੋ ਨ ਬੁਜ੍ਝਤਿ;

ਗਿਲ ਰੇ ਗਿਲ ਪਾਪਧੁਤ੍ਤਕ, ਪਚ੍ਛਾ ਤੇ ਕਟੁਕਂ ਭਵਿਸ੍ਸਤੀ’’ਤਿ.

ਤਤ੍ਥ ਲਿਤ੍ਤਨ੍ਤਿ ਮਕ੍ਖਿਤਂ ਰਞ੍ਜਿਤਂ. ਪਰਮੇਨ ਤੇਜਸਾਤਿ ਉਤ੍ਤਮਤੇਜਸਮ੍ਪਨ੍ਨੇਨ ਹਲਾਹਲਵਿਸੇਨ. ਗਿਲਨ੍ਤਿ ਗਿਲਨ੍ਤੋ. ਅਕ੍ਖਨ੍ਤਿ ਗੁਲ਼ਕਂ. ਨ ਬੁਜ੍ਝਤੀਤਿ ‘‘ਅਯਂ ਮੇ ਗਿਲਤੋ ਇਦਂ ਨਾਮ ਕਰਿਸ੍ਸਤੀ’’ਤਿ ਨ ਜਾਨਾਤਿ. ਗਿਲ ਰੇਤਿ ਗਿਲਾਹਿ ਅਰੇ. ਗਿਲਾਤਿ ਪੁਨਪਿ ਚੋਦੇਨ੍ਤੋ ਵਦਤਿ. ਪਚ੍ਛਾ ਤੇ ਕਟੁਕਂ ਭਵਿਸ੍ਸਤੀਤਿ ਇਮਸ੍ਮਿਂ ਤੇ ਅਕ੍ਖੇ ਗਿਲਿਤੇ ਪਚ੍ਛਾ ਏਤਂ ਵਿਸਂ ਤਿਖਿਣਂ ਭਵਿਸ੍ਸਤੀਤਿ ਅਤ੍ਥੋ.

ਸੋ ਬੋਧਿਸਤ੍ਤਸ੍ਸ ਕਥੇਨ੍ਤਸ੍ਸੇਵ ਵਿਸਵੇਗੇਨ ਮੁਚ੍ਛਿਤੋ ਅਕ੍ਖੀਨਿ ਪਰਿਵਤ੍ਤੇਤ੍ਵਾ ਖਨ੍ਧਂ ਨਾਮੇਤ੍ਵਾ ਪਤਿ. ਬੋਧਿਸਤ੍ਤੋ ‘‘ਇਦਾਨਿਸ੍ਸ ਜੀਵਿਤਦਾਨਂ ਦਾਤੁਂ ਵਟ੍ਟਤੀ’’ਤਿ ਓਸਧਪਰਿਭਾਵਿਤਂ ਵਮਨਯੋਗਂ ਦਤ੍ਵਾ ਵਮੇਤ੍ਵਾ ਸਪ੍ਪਿਫਾਣਿਤਮਧੁਸਕ੍ਕਰਾਦਯੋ ਖਾਦਾਪੇਤ੍ਵਾ ਅਰੋਗਂ ਕਤ੍ਵਾ ‘‘ਪੁਨ ਏਵਰੂਪਂ ਮਾ ਅਕਾਸੀ’’ਤਿ ਓਵਦਿਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਭਿਕ੍ਖਵੇ, ਅਪਚ੍ਚਵੇਕ੍ਖਿਤਪਰਿਭੋਗੋ ਨਾਮ ਅਪਚ੍ਚਵੇਕ੍ਖਿਤ੍ਵਾ ਕਤਵਿਸਪਰਿਭੋਗਸਦਿਸੋ ਹੋਤੀ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪਣ੍ਡਿਤਧੁਤ੍ਤੋ ਅਹਮੇਵ ਅਹੋਸਿਂ, ਕੂਟਧੁਤ੍ਤੋ ਪਨੇਤ੍ਥ ਨ ਕਥੀਯਤਿ, ਯਥਾ ਚ ਏਤ੍ਥ, ਏਵਂ ਸਬ੍ਬਤ੍ਥ. ਯੋ ਪਨ ਇਮਸ੍ਮਿਂ ਕਾਲੇ ਨ ਪਞ੍ਞਾਯਤਿ, ਸੋ ਨ ਕਥੀਯਤੇਵਾ’’ਤਿ.

ਲਿਤ੍ਤਜਾਤਕਵਣ੍ਣਨਾ ਪਠਮਾ.

[੯੨] ੨. ਮਹਾਸਾਰਜਾਤਕਵਣ੍ਣਨਾ

ਉਕ੍ਕਟ੍ਠੇ ਸੂਰਮਿਚ੍ਛਨ੍ਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਆਯਸ੍ਮਨ੍ਤਂ ਆਨਨ੍ਦਤ੍ਥੇਰਂ ਆਰਬ੍ਭ ਕਥੇਸਿ. ਏਕਸ੍ਮਿਞ੍ਹਿ ਸਮਯੇ ਕੋਸਲਰਞ੍ਞੋ ਇਤ੍ਥਿਯੋ ਚਿਨ੍ਤਯਿਂਸੁ ‘‘ਬੁਦ੍ਧੁਪ੍ਪਾਦੋ ਨਾਮ ਦੁਲ੍ਲਭੋ, ਤਥਾ ਮਨੁਸ੍ਸਪਟਿਲਾਭੋ, ਪਰਿਪੁਣ੍ਣਾਯਤਨਤਾ ਚ. ਮਯਞ੍ਚ ਇਮਂ ਦੁਲ੍ਲਭਂ ਖਣਸਮਵਾਯਂ ਲਭਿਤ੍ਵਾਪਿ ਅਤ੍ਤਨੋ ਰੁਚਿਯਾ ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਵਾ ਸੋਤੁਂ ਬੁਦ੍ਧਪੂਜਂ ਵਾ ਕਾਤੁਂ ਦਾਨਂ ਵਾ ਦਾਤੁਂ ਨ ਲਭਾਮ, ਮਞ੍ਜੂਸਾਯ ਪਕ੍ਖਿਤ੍ਤਾ ਵਿਯ ਵਸਾਮ, ਰਞ੍ਞੋ ਕਥੇਤ੍ਵਾ ਅਮ੍ਹਾਕਂ ਧਮ੍ਮਂ ਦੇਸੇਤੁਂ ਅਨੁਚ੍ਛਵਿਕਂ ਏਕਂ ਭਿਕ੍ਖੁਂ ਪਕ੍ਕੋਸਾਪੇਤ੍ਵਾ ਤਸ੍ਸ ਸਨ੍ਤਿਕੇ ਧਮ੍ਮਂ ਸੋਸ੍ਸਾਮ, ਤਤੋ ਯਂ ਸਕ੍ਖਿਸ੍ਸਾਮ, ਤਂ ਉਗ੍ਗਣ੍ਹਿਸ੍ਸਾਮ, ਦਾਨਾਦੀਨਿ ਚ ਪੁਞ੍ਞਾਨਿ ਕਰਿਸ੍ਸਾਮ. ਏਵਂ ਨੋ ਅਯਂ ਖਣਪਟਿਲਾਭੋ ਸਫਲੋ ਭਵਿਸ੍ਸਤੀ’’ਤਿ. ਤਾ ਸਬ੍ਬਾਪਿ ਰਾਜਾਨਂ ਉਪਸਙ੍ਕਮਿਤ੍ਵਾ ਅਤ੍ਤਨਾ ਚਿਨ੍ਤਿਤਕਾਰਣਂ ਕਥਯਿਂਸੁ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ.

ਅਥੇਕਦਿਵਸਂ ਰਾਜਾ ਉਯ੍ਯਾਨਕੀਲ਼ਂ ਕੀਲ਼ਿਤੁਕਾਮੋ ਉਯ੍ਯਾਨਪਾਲਂ ਪਕ੍ਕੋਸਾਪੇਤ੍ਵਾ ‘‘ਉਯ੍ਯਾਨਂ ਸੋਧੇਹੀ’’ਤਿ ਆਹ. ਉਯ੍ਯਾਨਪਾਲੋ ਉਯ੍ਯਾਨਂ ਸੋਧੇਨ੍ਤੋ ਸਤ੍ਥਾਰਂ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨਂ ਦਿਸ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ‘‘ਸੁਦ੍ਧਂ, ਦੇਵ, ਉਯ੍ਯਾਨਂ, ਅਪਿਚੇਤ੍ਥ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਭਗਵਾ ਨਿਸਿਨ੍ਨੋ’’ਤਿ ਆਹ. ਰਾਜਾ ‘‘ਸਾਧੁ, ਸਮ੍ਮ, ਸਤ੍ਥੁ ਸਨ੍ਤਿਕੇ ਧਮ੍ਮਮ੍ਪਿ ਸੋਸ੍ਸਾਮਾ’’ਤਿ ਅਲਙ੍ਕਤਰਥਂ ਅਭਿਰੁਹਿਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕਂ ਅਗਮਾਸਿ.

ਤਸ੍ਮਿਞ੍ਚ ਸਮਯੇ ਛਤ੍ਤਪਾਣਿ ਨਾਮੇਕੋ ਅਨਾਗਾਮੀ ਉਪਾਸਕੋ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਮਾਨੋ ਨਿਸਿਨ੍ਨੋ ਹੋਤਿ. ਰਾਜਾ ਤਂ ਦਿਸ੍ਵਾ ਆਸਙ੍ਕਮਾਨੋ ਮੁਹੁਤ੍ਤਂ ਠਤ੍ਵਾ ਪੁਨ ‘‘ਸਚਾਯਂ ਪਾਪਕੋ ਭਵੇਯ੍ਯ, ਨ ਸਤ੍ਥੁ ਸਨ੍ਤਿਕੇ ਨਿਸੀਦਿਤ੍ਵਾ ਧਮ੍ਮਂ ਸੁਣੇਯ੍ਯ, ਅਪਾਪਕੇਨ ਇਮਿਨਾ ਭਵਿਤਬ੍ਬ’’ਨ੍ਤਿ ਚਿਨ੍ਤੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਉਪਾਸਕੋ ਬੁਦ੍ਧਗਾਰਵੇਨ ਰਞ੍ਞੋ ਪਚ੍ਚੁਟ੍ਠਾਨਂ ਵਾ ਵਨ੍ਦਨਂ ਵਾ ਨ ਅਕਾਸਿ, ਤੇਨਸ੍ਸ ਰਾਜਾ ਅਨਤ੍ਤਮਨੋ ਅਹੋਸਿ. ਸਤ੍ਥਾ ਤਸ੍ਸ ਅਨਤ੍ਤਮਨਭਾਵਂ ਞਤ੍ਵਾ ਉਪਾਸਕਸ੍ਸ ਗੁਣਂ ਕਥੇਸਿ ‘‘ਅਯਂ, ਮਹਾਰਾਜ, ਉਪਾਸਕੋ ਬਹੁਸ੍ਸੁਤੋ ਆਗਤਾਗਮੋ ਕਾਮੇਸੁ ਵੀਤਰਾਗੋ’’ਤਿ ਰਾਜਾ ‘‘ਨ ਇਮਿਨਾ ਓਰਕੇਨ ਭਵਿਤਬ੍ਬਂ, ਯਸ੍ਸ ਸਤ੍ਥਾ ਗੁਣਂ ਵਣ੍ਣੇਤੀ’’ਤਿ ਚਿਨ੍ਤੇਤ੍ਵਾ ‘‘ਉਪਾਸਕ, ਵਦੇਯ੍ਯਾਸਿ ਯੇਨ ਤੇ ਅਤ੍ਥੋ’’ਤਿ ਆਹ. ਉਪਾਸਕੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਰਾਜਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਤ੍ਥਾਰਂ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

ਸੋ ਏਕਦਿਵਸਂ ਉਪਰਿਪਾਸਾਦੇ ਮਹਾਵਾਤਪਾਨਂ ਵਿਵਰਿਤ੍ਵਾ ਠਿਤੋ ਤਂ ਉਪਾਸਕਂ ਭੁਤ੍ਤਪਾਤਰਾਸਂ ਛਤ੍ਤਮਾਦਾਯ ਜੇਤਵਨਂ ਗਚ੍ਛਨ੍ਤਂ ਦਿਸ੍ਵਾ ਪਕ੍ਕੋਸਾਪੇਤ੍ਵਾ ਏਵਮਾਹ ‘‘ਤ੍ਵਂ ਕਿਰ, ਉਪਾਸਕ, ਬਹੁਸ੍ਸੁਤੋ, ਅਮ੍ਹਾਕਞ੍ਚ ਇਤ੍ਥਿਯੋ ਧਮ੍ਮਂ ਸੋਤੁਕਾਮਾ ਚੇਵ ਉਗ੍ਗਹੇਤੁਕਾਮਾ ਚ, ਸਾਧੁ ਵਤਸ੍ਸ ਸਚੇ ਤਾਸਂ ਧਮ੍ਮਂ ਵਾਚੇਯ੍ਯਾਸੀ’’ਤਿ. ‘‘ਦੇਵ, ਗਿਹੀਨਂ ਨਾਮ ਰਾਜਨ੍ਤੇਪੁਰੇ ਧਮ੍ਮਂ ਦੇਸੇਤੁਂ ਵਾ ਵਾਚੇਤੁਂ ਵਾ ਨਪ੍ਪਤਿਰੂਪਂ, ਅਯ੍ਯਾਨਂ ਏਵ ਪਤਿਰੂਪ’’ਨ੍ਤਿ. ਰਾਜਾ ‘‘ਸਚ੍ਚਂ ਏਸ ਵਦਤੀ’’ਤਿ ਉਯ੍ਯੋਜੇਤ੍ਵਾ ਇਤ੍ਥਿਯੋ ਪਕ੍ਕੋਸਾਪੇਤ੍ਵਾ ‘‘ਭਦ੍ਦੇ, ਅਹਂ ਤੁਮ੍ਹਾਕਂ ਧਮ੍ਮਦੇਸਨਤ੍ਥਾਯ ਚ ਧਮ੍ਮਵਾਚਨਤ੍ਥਾਯ ਚ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਏਕਂ ਭਿਕ੍ਖੁਂ ਯਾਚਾਮਿ, ਅਸੀਤਿਯਾ ਮਹਾਸਾਵਕੇਸੁ ਕਤਰਂ ਯਾਚਾਮੀ’’ਤਿ ਆਹ. ਤਾ ਸਬ੍ਬਾਪਿ ਮਨ੍ਤੇਤ੍ਵਾ ਧਮ੍ਮਭਣ੍ਡਾਗਾਰਿਕਂ ਆਨਨ੍ਦਤ੍ਥੇਰਮੇਵ ਆਰੋਚੇਸੁਂ. ਰਾਜਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਏਵਮਾਹ ‘‘ਭਨ੍ਤੇ, ਅਮ੍ਹਾਕਂ ਗੇਹੇ ਇਤ੍ਥਿਯੋ ਆਨਨ੍ਦਤ੍ਥੇਰਸ੍ਸ ਸਨ੍ਤਿਕੇ ਧਮ੍ਮਂ ਸੋਤੁਞ੍ਚ ਉਗ੍ਗਣ੍ਹਿਤੁਞ੍ਚ ਇਚ੍ਛਨ੍ਤਿ, ਸਾਧੁ ਵਤ ਸਚੇ ਥੇਰੋ ਅਮ੍ਹਾਕਂ ਗੇਹੇ ਧਮ੍ਮਂ ਦੇਸੇਯ੍ਯ ਚੇਵ ਵਾਚੇਯ੍ਯ ਚਾ’’ਤਿ. ਸਤ੍ਥਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਥੇਰਂ ਆਣਾਪੇਸਿ. ਤਤੋ ਪਟ੍ਠਾਯ ਰਞ੍ਞੋ ਇਤ੍ਥਿਯੋ ਥੇਰਸ੍ਸ ਸਨ੍ਤਿਕੇ ਧਮ੍ਮਂ ਸੁਣਨ੍ਤਿ ਚੇਵ ਉਗ੍ਗਣ੍ਹਨ੍ਤਿ ਚ.

ਅਥੇਕਦਿਵਸਂ ਰਞ੍ਞੋ ਚੂਲ਼ਾਮਣਿ ਨਟ੍ਠੋ. ਰਾਜਾ ਤਸ੍ਸ ਨਟ੍ਠਭਾਵਂ ਸੁਤ੍ਵਾ ਅਮਚ੍ਚੇ ਆਣਾਪੇਸਿ ‘‘ਸਬ੍ਬੇ ਅਨ੍ਤੋਵਲ਼ਞ੍ਜਨਕੇ ਮਨੁਸ੍ਸੇ ਗਹੇਤ੍ਵਾ ਚੂਲ਼ਾਮਣਿਂ ਆਹਰਾਪੇਥਾ’’ਤਿ. ਅਮਚ੍ਚਾ ਮਾਤੁਗਾਮੇ ਆਦਿਂ ਕਤ੍ਵਾ ਚੂਲ਼ਾਮਣਿਂ ਪਰਿਪੁਚ੍ਛਨ੍ਤਾ ਅਦਿਸ੍ਵਾ ਮਹਾਜਨਂ ਕਿਲਮੇਨ੍ਤਿ. ਤਂ ਦਿਵਸਂ ਆਨਨ੍ਦਤ੍ਥੇਰੋ ਰਾਜਨਿਵੇਸਨਂ ਪਵਿਟ੍ਠੋ. ਯਥਾ ਤਾ ਇਤ੍ਥਿਯੋ ਪੁਬ੍ਬੇ ਥੇਰਂ ਦਿਸ੍ਵਾਵ ਹਟ੍ਠਤੁਟ੍ਠਾ ਧਮ੍ਮਂ ਸੁਣਨ੍ਤਿ ਚੇਵ ਉਗ੍ਗਣ੍ਹਨ੍ਤਿ ਚ, ਤਥਾ ਅਕਤ੍ਵਾ ਸਬ੍ਬਾ ਦੋਮਨਸ੍ਸਪ੍ਪਤ੍ਤਾਵ ਅਹੇਸੁਂ. ਤਤੋ ਥੇਰੇਨ ‘‘ਕਸ੍ਮਾ ਤੁਮ੍ਹੇ ਅਜ੍ਜ ਏਵਰੂਪਾ ਜਾਤਾ’’ਤਿ ਪੁਚ੍ਛਿਤਾ ਏਵਮਾਹਂਸੁ ‘‘ਭਨ੍ਤੇ, ਰਞ੍ਞੋ ਚੂਲ਼ਾਮਣਿਂ ਪਰਿਯੇਸਾਮਾਤਿ ਅਮਚ੍ਚਾ ਮਾਤੁਗਾਮੇ ਉਪਾਦਾਯ ਅਨ੍ਤੋਵਲ਼ਞ੍ਜਨਕੇ ਕਿਲਮੇਨ੍ਤਿ, ਨ ਜਾਨਾਮ ਕਸ੍ਸ ‘ਕਿਂ ਭਵਿਸ੍ਸਤੀ’ਤਿ, ਤੇਨਮ੍ਹ ਦੋਮਨਸ੍ਸਪ੍ਪਤ੍ਤਾ’’ਤਿ. ਥੇਰੋ ‘‘ਮਾ ਚਿਨ੍ਤਯਿਤ੍ਥਾ’’ਤਿ ਤਾ ਸਮਸ੍ਸਾਸੇਤ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ‘‘ਮਣਿ ਕਿਰ ਤੇ, ਮਹਾਰਾਜ, ਨਟ੍ਠੋ’’ਤਿ ਪੁਚ੍ਛਿ. ‘‘ਆਮ, ਭਨ੍ਤੇ’’ਤਿ. ‘‘ਅਸਕ੍ਖਿ ਪਨ ਤਂ ਆਹਰਾਪੇਤੁ’’ਨ੍ਤਿ. ‘‘ਭਨ੍ਤੇ, ਸਬ੍ਬਂ ਅਨ੍ਤੋਜਨਂ ਗਹੇਤ੍ਵਾ ਕਿਲਮੇਨ੍ਤੋਪਿ ਨ ਸਕ੍ਕੋਮਿ ਆਹਰਾਪੇਤੁ’’ਨ੍ਤਿ. ‘‘ਮਹਾਰਾਜ, ਮਹਾਜਨਂ ਅਕਿਲਮੇਤ੍ਵਾਵ ਆਹਰਣੂਪਾਯੋ ਅਤ੍ਥੀ’’ਤਿ. ‘‘ਕਤਰੋ, ਭਨ੍ਤੇ’’ਤਿ? ‘‘ਪਿਣ੍ਡਦਾਨਂ, ਮਹਾਰਾਜਾ’’ਤਿ. ‘‘ਕਤਰਂ ਪਿਣ੍ਡਦਾਨਂ, ਭਨ੍ਤੇ’’ਤਿ? ‘‘ਮਹਾਰਾਜ, ਯਤ੍ਤਕੇਸੁ ਆਸਙ੍ਕਾ ਅਤ੍ਥਿ, ਤੇ ਗਹੇਤ੍ਵਾ ਏਕੇਕਸ੍ਸ ਏਕੇਕਂ ਪਲਾਲਪਿਣ੍ਡਂ ਵਾ ਮਤ੍ਤਿਕਾਪਿਣ੍ਡਂ ਵਾ ਦਤ੍ਵਾ ‘ਇਮਂ ਪਚ੍ਚੂਸਕਾਲੇ ਆਹਰਿਤ੍ਵਾ ਅਸੁਕਟ੍ਠਾਨੇ ਨਾਮ ਪਾਤੇਥਾ’ਤਿ ਵਤ੍ਤਬ੍ਬਂ. ਯੇਨ ਗਹਿਤੋ ਭਵਿਸ੍ਸਤਿ, ਸੋ ਤਸ੍ਮਿਂ ਪਕ੍ਖਿਪਿਤ੍ਵਾ ਆਹਰਿਸ੍ਸਤਿ. ਸਚੇ ਪਠਮਦਿਵਸੇਯੇਵ ਪਾਤੇਨ੍ਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਪਾਤੇਨ੍ਤਿ, ਦੁਤਿਯਦਿਵਸੇਪਿ ਤਤਿਯਦਿਵਸੇਪਿ ਤਥੇਵ ਕਾਤਬ੍ਬਂ. ਏਵਂ ਮਹਾਜਨੋ ਚ ਨ ਕਿਲਮਿਸ੍ਸਤਿ, ਮਣਿਞ੍ਚ ਲਭਿਸ੍ਸਸੀ’’ਤਿ ਏਵਂ ਵਤ੍ਵਾ ਥੇਰੋ ਅਗਮਾਸਿ.

ਰਾਜਾ ਵੁਤ੍ਤਨਯੇਨੇਵ ਤਯੋ ਦਿਵਸੇ ਦਾਪੇਸਿ, ਨੇਵ ਮਣਿਂ ਆਹਰਿਂਸੁ. ਥੇਰੋ ਤਤਿਯਦਿਵਸੇ ਆਗਨ੍ਤ੍ਵਾ ‘‘ਕਿਂ, ਮਹਾਰਾਜ, ਪਾਤਿਤੋ ਮਣੀ’’ਤਿ ਪੁਚ੍ਛਿ. ‘‘ਨ ਪਾਤੇਨ੍ਤਿ, ਭਨ੍ਤੇ’’ਤਿ. ‘‘ਤੇਨ ਹਿ, ਮਹਾਰਾਜ, ਮਹਾਤਲਸ੍ਮਿਂਯੇਵ ਪਟਿਚ੍ਛਨ੍ਨਟ੍ਠਾਨੇ ਮਹਾਚਾਟਿਂ ਠਪਾਪੇਤ੍ਵਾ ਉਦਕਸ੍ਸ ਪੂਰਾਪੇਤ੍ਵਾ ਸਾਣਿਂ ਪਰਿਕ੍ਖਿਪਾਪੇਤ੍ਵਾ ‘ਸਬ੍ਬੇ ਅਨ੍ਤੋਵਲ਼ਞ੍ਜਨਕਮਨੁਸ੍ਸਾ ਚ ਇਤ੍ਥਿਯੋ ਚ ਉਤ੍ਤਰਾਸਙ੍ਗਂ ਕਤ੍ਵਾ ਏਕੇਕੋਵ ਅਨ੍ਤੋਸਾਣਿਂ ਪਵਿਸਿਤ੍ਵਾ ਹਤ੍ਥਂ ਧੋਵਿਤ੍ਵਾ ਆਗਚ੍ਛਨ੍ਤੂ’ਤਿ ਵਦੇਹੀ’’ਤਿ ਥੇਰੋ ਇਮਂ ਉਪਾਯਂ ਆਚਿਕ੍ਖਿਤ੍ਵਾ ਪਕ੍ਕਾਮਿ. ਰਾਜਾ ਤਥਾ ਕਾਰੇਸਿ. ਮਣਿਚੋਰੋ ਚਿਨ੍ਤੇਸਿ ‘‘ਧਮ੍ਮਭਣ੍ਡਾਗਾਰਿਕੋ ਇਮਂ ਅਧਿਕਰਣਂ ਆਦਾਯ ਮਣਿਂ ਅਦਸ੍ਸੇਤ੍ਵਾ ਓਸਕ੍ਕਿਸ੍ਸਤੀਤਿ ਅਟ੍ਠਾਨਮੇਤਂ, ਪਾਤੇਤੁਂ ਦਾਨਿ ਵਟ੍ਟਤੀ’’ਤਿ ਮਣਿਂ ਪਟਿਚ੍ਛਨ੍ਨਂ ਕਤ੍ਵਾ ਆਦਾਯ ਅਨ੍ਤੋਸਾਣਿਂ ਪਵਿਸਿਤ੍ਵਾ ਚਾਟਿਯਂ ਪਾਤੇਤ੍ਵਾ ਨਿਕ੍ਖਮਿ. ਸਬ੍ਬੇਸਂ ਨਿਕ੍ਖਨ੍ਤਕਾਲੇ ਉਦਕਂ ਛਡ੍ਡੇਤ੍ਵਾ ਮਣਿਂ ਅਦ੍ਦਸਂਸੁ. ਰਾਜਾ ‘‘ਥੇਰਂ ਨਿਸ੍ਸਾਯ ਮਹਾਜਨਂ ਅਕਿਲਮੇਤ੍ਵਾਵ ਮੇ ਮਣਿ ਲਦ੍ਧੋ’’ਤਿ ਤੁਸ੍ਸਿ, ਅਨ੍ਤੋਵਲ਼ਞ੍ਜਨਕਮਨੁਸ੍ਸਾਪਿ ‘‘ਥੇਰਂ ਨਿਸ੍ਸਾਯ ਮਹਾਦੁਕ੍ਖਤੋ ਮੁਤ੍ਤਮ੍ਹਾ’’ਤਿ ਤੁਸ੍ਸਿਂਸੁ. ‘‘ਥੇਰਸ੍ਸਾਨੁਭਾਵੇਨ ਰਞ੍ਞੋ ਚੂਲ਼ਾਮਣਿ ਲਦ੍ਧੋ’’ਤਿ ਥੇਰਸ੍ਸਾਨੁਭਾਵੋ ਸਕਲਨਗਰੇ ਚੇਵ ਭਿਕ੍ਖੁਸਙ੍ਘੇ ਚ ਪਾਕਟੋ ਜਾਤੋ.

ਧਮ੍ਮਸਭਾਯਂ ਸਨ੍ਨਿਸਿਨ੍ਨਾ ਭਿਕ੍ਖੂ ਥੇਰਸ੍ਸ ਗੁਣਂ ਵਣ੍ਣਯਿਂਸੁ ‘‘ਆਵੁਸੋ, ਆਨਨ੍ਦਤ੍ਥੇਰੋ ਅਤ੍ਤਨੋ ਬਹੁਸ੍ਸੁਤਤਾਯ ਪਣ੍ਡਿਚ੍ਚੇਨ ਉਪਾਯਕੁਸਲਤਾਯ ਮਹਾਜਨਂ ਅਕਿਲਮੇਤ੍ਵਾ ਉਪਾਯੇਨੇਵ ਰਞ੍ਞੋ ਮਣਿਂ ਦਸ੍ਸੇਸੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨਿ ਆਨਨ੍ਦੇਨੇਵ ਪਰਹਤ੍ਥਗਤਂ ਭਣ੍ਡਂ ਦਸ੍ਸਿਤਂ, ਪੁਬ੍ਬੇਪਿ ਪਣ੍ਡਿਤਾ ਮਹਾਜਨਂ ਅਕਿਲਮੇਤ੍ਵਾ ਉਪਾਯੇਨੇਵ ਤਿਰਚ੍ਛਾਨਹਤ੍ਥਗਤਂ ਭਣ੍ਡਂ ਦਸ੍ਸਯਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਤੋ ਤਸ੍ਸੇਵ ਅਮਚ੍ਚੋ ਅਹੋਸਿ. ਅਥੇਕਦਿਵਸਂ ਰਾਜਾ ਮਹਨ੍ਤੇਨ ਪਰਿਵਾਰੇਨ ਉਯ੍ਯਾਨਂ ਗਨ੍ਤ੍ਵਾ ਵਨਨ੍ਤਰਾਨਿ ਵਿਚਰਿਤ੍ਵਾ ਉਦਕਕੀਲ਼ਂ ਕੀਲ਼ਿਤੁਕਾਮੋ ਮਙ੍ਗਲਪੋਕ੍ਖਰਣਿਂ ਓਤਰਿਤ੍ਵਾ ਇਤ੍ਥਾਗਾਰਮ੍ਪਿ ਪਕ੍ਕੋਸਿ. ਇਤ੍ਥਿਯੋ ਅਤ੍ਤਨੋ ਅਤ੍ਤਨੋ ਸੀਸੂਪਗਗੀਵੂਪਗਾਦੀਨਿ ਆਭਰਣਾਨਿ ਓਮੁਞ੍ਚਿਤ੍ਵਾ ਉਤ੍ਤਰਾਸਙ੍ਗੇਸੁ ਪਕ੍ਖਿਪਿਤ੍ਵਾ ਸਮੁਗ੍ਗਪਿਟ੍ਠੇਸੁ ਠਪੇਤ੍ਵਾ ਦਾਸਿਯੋ ਪਟਿਚ੍ਛਾਪੇਤ੍ਵਾ ਪੋਕ੍ਖਰਣਿਂ ਓਤਰਿਂਸੁ. ਅਥੇਕਾ ਉਯ੍ਯਾਨਮਕ੍ਕਟੀ ਸਾਖਨ੍ਤਰੇ ਨਿਸਿਨ੍ਨਾ ਦੇਵਿਂ ਪਿਲ਼ਨ੍ਧਨਾਨਿ ਓਮੁਞ੍ਚਿਤ੍ਵਾ ਉਤ੍ਤਰਾਸਙ੍ਗੇ ਪਕ੍ਖਿਪਿਤ੍ਵਾ ਸਮੁਗ੍ਗਪਿਟ੍ਠੇ ਠਪਯਮਾਨਂ ਦਿਸ੍ਵਾ ਤਸ੍ਸਾ ਮੁਤ੍ਤਾਹਾਰਂ ਪਿਲ਼ਨ੍ਧਿਤੁਕਾਮਾ ਹੁਤ੍ਵਾ ਦਾਸਿਯਾ ਪਮਾਦਂ ਓਲੋਕਯਮਾਨਾ ਨਿਸੀਦਿ, ਦਾਸੀਪਿ ਤਂ ਰਕ੍ਖਮਾਨਾ ਤਹਂ ਤਹਂ ਓਲੋਕੇਤ੍ਵਾ ਨਿਸਿਨ੍ਨਾਯੇਵ ਨਿਦ੍ਦਾਯਿਤੁਂ ਆਰਭਿ. ਮਕ੍ਕਟੀ ਤਸ੍ਸਾ ਪਮਾਦਭਾਵਂ ਞਤ੍ਵਾ ਵਾਤਵੇਗੇਨ ਓਤਰਿਤ੍ਵਾ ਮਹਾਮੁਤ੍ਤਾਹਾਰਂ ਗੀਵਾਯ ਪਟਿਮੁਞ੍ਚਿਤ੍ਵਾ ਵਾਤਵੇਗੇਨ ਉਪ੍ਪਤਿਤ੍ਵਾ ਸਾਖਨ੍ਤਰੇ ਨਿਸੀਦਿਤ੍ਵਾ ਅਞ੍ਞਾਸਂ ਮਕ੍ਕਟੀਨਂ ਦਸ੍ਸਨਭਯੇਨ ਏਕਸ੍ਮਿਂ ਰੁਕ੍ਖਸੁਸਿਰਟ੍ਠਾਨੇ ਠਪੇਤ੍ਵਾ ਉਪਸਨ੍ਤੂਪਸਨ੍ਤਾ ਵਿਯ ਤਂ ਰਕ੍ਖਮਾਨਾ ਨਿਸੀਦਿ.

ਸਾਪਿ ਖੋ ਦਾਸੀ ਪਟਿਬੁਜ੍ਝਿਤ੍ਵਾ ਮੁਤ੍ਤਾਹਾਰਂ ਅਪਸ੍ਸਨ੍ਤੀ ਕਮ੍ਪਮਾਨਾ ਅਞ੍ਞਂ ਉਪਾਯਂ ਅਦਿਸ੍ਵਾ ‘‘ਪੁਰਿਸੋ ਦੇਵਿਯਾ ਮੁਤ੍ਤਾਹਾਰਂ ਗਹੇਤ੍ਵਾ ਪਲਾਤੋ’’ਤਿ ਮਹਾਵਿਰਵਂ ਵਿਰਵਿ. ਆਰਕ੍ਖਮਨੁਸ੍ਸਾ ਤਤੋ ਤਤੋ ਸਨ੍ਨਿਪਤਿਤ੍ਵਾ ਤਸ੍ਸਾ ਵਚਨਂ ਸੁਤ੍ਵਾ ਰਞ੍ਞੋ ਆਰੋਚਯਿਂਸੁ. ਰਾਜਾ ‘‘ਚੋਰਂ ਗਣ੍ਹਥਾ’’ਤਿ ਆਹ. ਪੁਰਿਸਾ ਉਯ੍ਯਾਨਾ ਨਿਕ੍ਖਮਿਤ੍ਵਾ ‘‘ਚੋਰਂ ਗਣ੍ਹਥ, ਚੋਰਂ ਗਣ੍ਹਥਾ’’ਤਿ ਇਤੋ ਚਿਤੋ ਚ ਓਲੋਕੇਨ੍ਤਿ. ਅਥੇਕੋ ਜਾਨਪਦੋ ਬਲਿਕਾਰਕਪੁਰਿਸੋ ਤਂ ਸਦ੍ਦਂ ਸੁਤ੍ਵਾ ਕਮ੍ਪਮਾਨੋ ਪਲਾਯਿ. ਤਂ ਦਿਸ੍ਵਾ ਰਾਜਪੁਰਿਸਾ ‘‘ਅਯਂ ਚੋਰੋ ਭਵਿਸ੍ਸਤੀ’’ਤਿ ਅਨੁਬਨ੍ਧਿਤ੍ਵਾ ਤਂ ਗਹੇਤ੍ਵਾ ਪੋਥੇਤ੍ਵਾ ‘‘ਅਰੇ, ਦੁਟ੍ਠਚੋਰ, ਏਵਂ ਮਹਾਸਾਰਂ ਨਾਮ ਪਿਲ਼ਨ੍ਧਨਂ ਅਵਹਰਿਸ੍ਸਸੀ’’ਤਿ ਪਰਿਭਾਸਿਂਸੁ. ਸੋ ਚਿਨ੍ਤੇਸਿ ‘‘ਸਚਾਹਂ ‘ਨ ਗਣ੍ਹਾਮੀ’ਤਿ ਵਕ੍ਖਾਮਿ, ਅਜ੍ਜ ਮੇ ਜੀਵਿਤਂ ਨਤ੍ਥਿ, ਪੋਥੇਨ੍ਤਾਯੇਵ ਮਂ ਮਾਰੇਸ੍ਸਨ੍ਤਿ, ਸਮ੍ਪਟਿਚ੍ਛਾਮਿ ਨ’’ਨ੍ਤਿ. ਸੋ ‘‘ਆਮ, ਸਾਮਿ, ਗਹਿਤਂ ਮੇ’’ਤਿ ਆਹ. ਅਥ ਨਂ ਬਨ੍ਧਿਤ੍ਵਾ ਰਞ੍ਞੋ ਸਨ੍ਤਿਕਂ ਆਨਯਿਂਸੁ. ਰਾਜਾਪਿ ਨਂ ਪੁਚ੍ਛਿ ‘‘ਗਹਿਤਂ ਤੇ ਮਹਾਸਾਰਪਿਲ਼ਨ੍ਧਨ’’ਨ੍ਤਿ? ‘‘ਆਮ, ਦੇਵਾ’’ਤਿ. ‘‘ਇਦਾਨਿ ਤਂ ਕਹ’’ਨ੍ਤਿ. ‘‘ਦੇਵ, ਮਯਾ ਮਹਾਸਾਰਂ ਨਾਮ ਮਞ੍ਚਪੀਠਮ੍ਪਿ ਨ ਦਿਟ੍ਠਪੁਬ੍ਬਂ, ਸੇਟ੍ਠਿ ਪਨ ਮਂ ਮਹਾਸਾਰਪਿਲ਼ਨ੍ਧਨਂ ਗਣ੍ਹਾਪੇਸਿ, ਸੋਹਂ ਤਂ ਗਹੇਤ੍ਵਾਵ ਤਸ੍ਸ ਅਦਾਸਿਂ, ਸੋ ਨਂ ਜਾਨਾਤੀ’’ਤਿ.

ਰਾਜਾ ਸੇਟ੍ਠਿਂ ਪਕ੍ਕੋਸਾਪੇਤ੍ਵਾ ‘‘ਗਹਿਤਂ ਤੇ ਇਮਸ੍ਸ ਹਤ੍ਥਤੋ ਮਹਾਸਾਰਪਿਲ਼ਨ੍ਧਨ’’ਨ੍ਤਿ ਪੁਚ੍ਛਿ. ‘‘ਆਮ, ਦੇਵਾ’’ਤਿ. ‘‘ਕਹਂ ਤ’’ਨ੍ਤਿ. ‘‘ਪੁਰੋਹਿਤਸ੍ਸ ਮੇ ਦਿਨ੍ਨ’’ਨ੍ਤਿ. ਪੁਰੋਹਿਤਮ੍ਪਿ ਪਕ੍ਕੋਸਾਪੇਤ੍ਵਾ ਤਥੇਵ ਪੁਚ੍ਛਿ, ਸੋਪਿ ਸਮ੍ਪਟਿਚ੍ਛਿਤ੍ਵਾ ‘‘ਗਨ੍ਧਬ੍ਬਸ੍ਸ ਮੇ ਦਿਨ੍ਨ’’ਨ੍ਤਿ ਆਹ. ਤਮ੍ਪਿ ਪਕ੍ਕੋਸਾਪੇਤ੍ਵਾ ‘‘ਪੁਰੋਹਿਤਸ੍ਸ ਹਤ੍ਥਤੋ ਤੇ ਮਹਾਸਾਰਪਿਲ਼ਨ੍ਧਨਂ ਗਹਿਤ’’ਨ੍ਤਿ ਪੁਚ੍ਛਿ. ‘‘ਆਮ, ਦੇਵਾ’’ਤਿ. ‘‘ਕਹਂ ਤ’’ਨ੍ਤਿ. ‘‘ਕਿਲੇਸਵਸੇਨ ਮੇ ਵਣ੍ਣਦਾਸਿਯਾ ਦਿਨ੍ਨ’’ਨ੍ਤਿ. ਤਮ੍ਪਿ ਪਕ੍ਕੋਸਾਪੇਤ੍ਵਾ ਪੁਚ੍ਛਿ, ਸਾ ‘‘ਨ ਗਣ੍ਹਾਮੀ’’ਤਿ ਆਹ. ਤੇ ਪਞ੍ਚ ਜਨੇ ਪੁਚ੍ਛਨ੍ਤਾਨਞ੍ਞੇਵ ਸੂਰਿਯੋ ਅਤ੍ਥਂ ਗਤੋ. ਰਾਜਾ ‘‘ਇਦਾਨਿ ਵਿਕਾਲੋ ਜਾਤੋ, ਸ੍ਵੇ ਜਾਨਿਸ੍ਸਾਮਾ’’ਤਿ ਤੇ ਪਞ੍ਚ ਜਨੇ ਅਮਚ੍ਚਾਨਂ ਦਤ੍ਵਾ ਨਗਰਂ ਪਾਵਿਸਿ.

ਬੋਧਿਸਤ੍ਤੋ ਚਿਨ੍ਤੇਸਿ – ‘‘ਇਦਂ ਪਿਲ਼ਨ੍ਧਨਂ ਅਨ੍ਤੋਵਲ਼ਞ੍ਜੇ ਨਟ੍ਠਂ, ਅਯਞ੍ਚ ਗਹਪਤਿਕੋ ਬਹਿਵਲ਼ਞ੍ਜੋ, ਦ੍ਵਾਰੇਪਿ ਬਲਵਾਰਕ੍ਖੋ, ਤਸ੍ਮਾ ਅਨ੍ਤੋਵਲ਼ਞ੍ਜਨਕਾਨਮ੍ਪਿ ਤਂ ਗਹੇਤ੍ਵਾ ਪਲਾਯਿਤੁਂ ਨ ਸਕ੍ਕਾ. ਏਵਂ ਨੇਵ ਬਹਿਵਲ਼ਞ੍ਜਨਕਾਨਂ, ਨ ਅਨ੍ਤੋ, ਉਯ੍ਯਾਨੇ ਵਲ਼ਞ੍ਜਨਕਾਨਂ ਗਹਣੂਪਾਯੋ ਦਿਸ੍ਸਤਿ. ਇਮਿਨਾ ਦੁਗ੍ਗਤਮਨੁਸ੍ਸੇਨ ‘ਸੇਟ੍ਠਿਸ੍ਸ ਮੇ ਦਿਨ੍ਨ’ਨ੍ਤਿ ਕਥੇਨ੍ਤੇਨ ਅਤ੍ਤਨੋ ਮੋਕ੍ਖਤ੍ਥਾਯ ਕਥਿਤਂ ਭਵਿਸ੍ਸਤਿ, ਸੇਟ੍ਠਿਨਾਪਿ ‘ਪੁਰੋਹਿਤਸ੍ਸ ਮੇ ਦਿਨ੍ਨ’ਨ੍ਤਿ ਕਥੇਨ੍ਤੇਨ ‘ਏਕਤੋ ਹੁਤ੍ਵਾ ਨਿਤ੍ਥਰਿਸ੍ਸਾਮੀ’ਤਿ ਚਿਨ੍ਤੇਤ੍ਵਾ ਕਥਿਤਂ ਭਵਿਸ੍ਸਤਿ, ਪੁਰੋਹਿਤੇਨਾਪਿ ‘ਗਨ੍ਧਬ੍ਬਸ੍ਸ ਮੇ ਦਿਨ੍ਨ’ਨ੍ਤਿ ਕਥੇਨ੍ਤੇਨ ‘ਬਨ੍ਧਨਾਗਾਰੇ ਗਨ੍ਧਬ੍ਬਂ ਨਿਸ੍ਸਾਯ ਸੁਖੇਨ ਵਸਿਸ੍ਸਾਮਾ’ਤਿ ਚਿਨ੍ਤੇਤ੍ਵਾ ਕਥਿਤਂ ਭਵਿਸ੍ਸਤਿ, ਗਨ੍ਧਬ੍ਬੇਨਾਪਿ ‘ਵਣ੍ਣਦਾਸਿਯਾ ਮੇ ਦਿਨ੍ਨ’ਨ੍ਤਿ ਕਥੇਨ੍ਤੇਨ ‘ਏਕਨ੍ਤੇਨ ਅਨੁਕ੍ਕਣ੍ਠਿਤਾ ਭਵਿਸ੍ਸਾਮਾ’ਤਿ ਚਿਨ੍ਤੇਤ੍ਵਾ ਕਥਿਤਂ ਭਵਿਸ੍ਸਤਿ, ਇਮੇਹਿ ਪਞ੍ਚਹਿਪਿ ਚੋਰੇਹਿ ਨ ਭਵਿਤਬ੍ਬਂ, ਉਯ੍ਯਾਨੇ ਮਕ੍ਕਟਾ ਬਹੂ, ਪਿਲ਼ਨ੍ਧਨੇਨ ਏਕਿਸ੍ਸਾ ਮਕ੍ਕਟਿਯਾ ਹਤ੍ਥੇ ਆਰੁਲ਼੍ਹੇਨ ਭਵਿਤਬ੍ਬ’’ਨ੍ਤਿ. ਸੋ ਰਾਜਾਨਂ ਉਪਸਙ੍ਕਮਿਤ੍ਵਾ ‘‘ਮਹਾਰਾਜ, ਚੋਰੇ ਅਮ੍ਹਾਕਂ ਨਿਯ੍ਯਾਦੇਥ, ਮਯਂ ਤਂ ਕਿਚ੍ਚਂ ਸੋਧੇਸ੍ਸਾਮਾ’’ਤਿ ਆਹ. ਰਾਜਾ ‘‘ਸਾਧੁ, ਪਣ੍ਡਿਤ, ਸੋਧੇਹੀ’’ਤਿ ਤਸ੍ਸ ਨਿਯ੍ਯਾਦੇਸਿ.

ਬੋਧਿਸਤ੍ਤੋ ਅਤ੍ਤਨੋ ਦਾਸਪੁਰਿਸੇ ਪਕ੍ਕੋਸਾਪੇਤ੍ਵਾ ਤੇ ਪਞ੍ਚ ਜਨੇ ਏਕਸ੍ਮਿਂਯੇਵ ਠਾਨੇ ਵਸਾਪੇਤ੍ਵਾ ਸਮਨ੍ਤਾ ਆਰਕ੍ਖਂ ਕਤ੍ਵਾ ਕਣ੍ਣਂ ਦਤ੍ਵਾ ‘‘ਯਂ ਤੇ ਅਞ੍ਞਮਞ੍ਞਂ ਕਥੇਨ੍ਤਿ, ਤਂ ਮਯ੍ਹਂ ਆਰੋਚੇਥਾ’’ਤਿ ਵਤ੍ਵਾ ਪਕ੍ਕਾਮਿ. ਤੇ ਤਥਾ ਅਕਂਸੁ. ਤਤੋ ਮਨੁਸ੍ਸਾਨਂ ਸਨ੍ਨਿਸਿਨ੍ਨਵੇਲਾਯ ਸੇਟ੍ਠਿ ਤਂ ਗਹਪਤਿਕਂ ਆਹ – ‘‘ਅਰੇ, ਦੁਟ੍ਠਗਹਪਤਿ, ਤਯਾ ਅਹਂ, ਮਯਾ ਵਾ ਤ੍ਵਂ ਕਹਂ ਦਿਟ੍ਠਪੁਬ੍ਬੋ, ਕਦਾ ਤੇ ਮਯ੍ਹਂ ਪਿਲ਼ਨ੍ਧਨਂ ਦਿਨ੍ਨ’’ਨ੍ਤਿ ਆਹ. ਸੋ ‘‘ਸਾਮਿ ਮਹਾਸੇਟ੍ਠਿ, ਅਹਂ ਮਹਾਸਾਰਂ ਨਾਮ ਰੁਕ੍ਖਸਾਰਪਾਦਕਂ ਮਞ੍ਚਪੀਠਮ੍ਪਿ ਨ ਜਾਨਾਮਿ, ‘ਤਂ ਨਿਸ੍ਸਾਯ ਪਨ ਮੋਕ੍ਖਂ ਲਭਿਸ੍ਸਾਮੀ’ਤਿ ਏਵਂ ਅਵਚਂ, ਮਾ ਮੇ ਕੁਜ੍ਝ, ਸਾਮੀ’’ਤਿ ਆਹ. ਪੁਰੋਹਿਤੋਪਿ ਸੇਟ੍ਠਿਂ ਆਹ ‘‘ਮਹਾਸੇਟ੍ਠਿ, ਤ੍ਵਂ ਇਮਿਨਾ ਅਤ੍ਤਨੋ ਅਦਿਨ੍ਨਕਮੇਵ ਮਯ੍ਹਂ ਕਥਂ ਅਦਾਸੀ’’ਤਿ? ‘‘ਮਯਮ੍ਪਿ ਦ੍ਵੇ ਇਸ੍ਸਰਾ, ਅਮ੍ਹਾਕਂ ਏਕਤੋ ਹੁਤ੍ਵਾ ਠਿਤਕਾਲੇ ਕਮ੍ਮਂ ਖਿਪ੍ਪਂ ਨਿਪ੍ਫਜ੍ਜਿਸ੍ਸਤੀ’’ਤਿ ਕਥੇਸਿਨ੍ਤਿ. ਗਨ੍ਧਬ੍ਬੋਪਿ ਪੁਰੋਹਿਤਂ ਆਹ ‘‘ਬ੍ਰਾਹ੍ਮਣ, ਕਦਾ ਤਯਾ ਮਯ੍ਹਂ ਪਿਲ਼ਨ੍ਧਨਂ ਦਿਨ੍ਨ’’ਨ੍ਤਿ? ‘‘ਅਹਂ ਤਂ ਨਿਸ੍ਸਾਯ ਵਸਨਟ੍ਠਾਨੇ ਸੁਖਂ ਵਸਿਸ੍ਸਾਮੀ’’ਤਿ ਕਥੇਸਿਨ੍ਤਿ. ਵਣ੍ਣਦਾਸੀਪਿ ਗਨ੍ਧਬ੍ਬਂ ਆਹ ‘‘ਅਰੇ ਦੁਟ੍ਠਗਨ੍ਧਬ੍ਬ, ਅਹਂ ਕਦਾ ਤਵ ਸਨ੍ਤਿਕਂ ਗਤਪੁਬ੍ਬਾ, ਤ੍ਵਂ ਵਾ ਮਮ ਸਨ੍ਤਿਕਂ ਆਗਤਪੁਬ੍ਬੋ, ਕਦਾ ਤੇ ਮਯ੍ਹਂ ਪਿਲ਼ਨ੍ਧਨਂ ਦਿਨ੍ਨ’’ਨ੍ਤਿ? ਭਗਿਨਿ ਕਿਂਕਾਰਣਾ ਕੁਜ੍ਝਸਿ, ‘‘ਅਮ੍ਹੇਸੁ ਪਞ੍ਚਸੁ ਏਕਤੋ ਵਸਨ੍ਤੇਸੁ ਘਰਾਵਾਸੋ ਭਵਿਸ੍ਸਤਿ, ਅਨੁਕ੍ਕਣ੍ਠਮਾਨਾ ਸੁਖਂ ਵਸਿਸ੍ਸਾਮਾ’’ਤਿ ਕਥੇਸਿਨ੍ਤਿ. ਬੋਧਿਸਤ੍ਤੋ ਪਯੋਜਿਤਮਨੁਸ੍ਸਾਨਂ ਸਨ੍ਤਿਕਾ ਤਂ ਕਥਂ ਸੁਤ੍ਵਾ ਤੇਸਂ ਤਥਤੋ ਅਚੋਰਭਾਵਂ ਞਤ੍ਵਾ ‘‘ਮਕ੍ਕਟਿਯਾ ਗਹਿਤਪਿਲ਼ਨ੍ਧਨਂ ਉਪਾਯੇਨੇਵ ਪਾਤੇਸ੍ਸਾਮੀ’’ਤਿ ਗੇਣ੍ਡੁਮਯਾਨਿ ਬਹੂਨਿ ਪਿਲ਼ਨ੍ਧਨਾਨਿ ਕਾਰੇਤ੍ਵਾ ਉਯ੍ਯਾਨੇ ਮਕ੍ਕਟਿਯੋ ਗਾਹਾਪੇਤ੍ਵਾ ਹਤ੍ਥਪਾਦਗੀਵਾਸੁ ਗੇਣ੍ਡੁਪਿਲ਼ਨ੍ਧਨਾਨਿ ਪਿਲ਼ਨ੍ਧਾਪੇਤ੍ਵਾ ਵਿਸ੍ਸਜ੍ਜੇਸਿ. ਇਤਰਾ ਮਕ੍ਕਟੀ ਪਿਲ਼ਨ੍ਧਨਂ ਰਕ੍ਖਮਾਨਾ ਉਯ੍ਯਾਨੇ ਏਵ ਨਿਸੀਦਿ.

ਬੋਧਿਸਤ੍ਤੋ ਮਨੁਸ੍ਸੇ ਆਣਾਪੇਸਿ ‘‘ਗਚ੍ਛਥ ਤੁਮ੍ਹੇ, ਉਯ੍ਯਾਨੇ ਸਬ੍ਬਾ ਮਕ੍ਕਟਿਯੋ ਉਪਧਾਰੇਥ, ਯਸ੍ਸਾ ਤਂ ਪਿਲ਼ਨ੍ਧਨਂ ਪਸ੍ਸਥ, ਤਂ ਉਤ੍ਤਾਸੇਤ੍ਵਾ ਪਿਲ਼ਨ੍ਧਨਂ ਗਣ੍ਹਥਾ’’ਤਿ. ਤਾਪਿ ਖੋ ਮਕ੍ਕਟਿਯੋ ‘‘ਪਿਲ਼ਨ੍ਧਨਂ ਨੋ ਲਦ੍ਧ’’ਨ੍ਤਿ ਤੁਟ੍ਠਪਹਟ੍ਠਾ ਉਯ੍ਯਾਨੇ ਵਿਚਰਨ੍ਤਿਯੋ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ‘‘ਪਸ੍ਸ ਅਮ੍ਹਾਕਂ ਪਿਲ਼ਨ੍ਧਨ’’ਨ੍ਤਿ ਆਹਂਸੁ. ਸਾ ਮਕ੍ਕਟੀ ਅਸਹਮਾਨਾ ‘‘ਕਿਂ ਇਮਿਨਾ ਗੇਣ੍ਡੁਪਿਲ਼ਨ੍ਧਨੇਨਾ’’ਤਿ ਮੁਤ੍ਤਾਹਾਰਂ ਪਿਲ਼ਨ੍ਧਿਤ੍ਵਾ ਨਿਕ੍ਖਮਿ. ਅਥ ਨਂ ਤੇ ਪੁਰਿਸਾ ਦਿਸ੍ਵਾ ਪਿਲ਼ਨ੍ਧਨਂ ਛਡ੍ਡਾਪੇਤ੍ਵਾ ਆਹਰਿਤ੍ਵਾ ਬੋਧਿਸਤ੍ਤਸ੍ਸ ਅਦਂਸੁ. ਸੋ ਤਂ ਆਦਾਯ ਰਞ੍ਞੋ ਦਸ੍ਸੇਤ੍ਵਾ ‘‘ਇਦਂ ਤੇ ਦੇਵ ਪਿਲ਼ਨ੍ਧਨਂ, ਤੇ ਪਞ੍ਚਪਿ ਅਚੋਰਾ, ਇਦਂ ਪਨ ਉਯ੍ਯਾਨੇ ਮਕ੍ਕਟਿਯਾ ਆਭਤ’’ਨ੍ਤਿ ਆਹ. ‘‘ਕਥਂ ਪਨ ਤੇ, ਪਣ੍ਡਿਤ, ਮਕ੍ਕਟਿਯਾ ਹਤ੍ਥਂ ਆਰੁਲ਼੍ਹਭਾਵੋ ਞਾਤੋ, ਕਥਂ ਤੇ ਗਹਿਤ’’ਨ੍ਤਿ? ਸੋ ਸਬ੍ਬਂ ਆਚਿਕ੍ਖਿ. ਰਾਜਾ ਤੁਟ੍ਠਮਾਨਸੋ ‘‘ਸਙ੍ਗਾਮਸੀਸਾਦੀਸੁ ਨਾਮ ਸੂਰਾਦਯੋ ਇਚ੍ਛਿਤਬ੍ਬਾ ਹੋਨ੍ਤੀ’’ਤਿ ਬੋਧਿਸਤ੍ਤਸ੍ਸ ਥੁਤਿਂ ਕਰੋਨ੍ਤੋ ਇਮਂ ਗਾਥਮਾਹ –

੯੨. ‘‘ਉਕ੍ਕਟ੍ਠੇ ਸੂਰਮਿਚ੍ਛਨ੍ਤਿ, ਮਨ੍ਤੀਸੁ ਅਕੁਤੂਹਲਂ;

ਪਿਯਞ੍ਚ ਅਨ੍ਨਪਾਨਮ੍ਹਿ, ਅਤ੍ਥੇ ਜਾਤੇ ਚ ਪਣ੍ਡਿਤ’’ਨ੍ਤਿ.

ਤਤ੍ਥ ਉਕ੍ਕਟ੍ਠੇਤਿ ਉਪਕਟ੍ਠੇ, ਉਭਤੋਬ੍ਯੂਲ਼੍ਹੇ ਸਙ੍ਗਾਮੇ ਸਮ੍ਪਹਾਰੇ ਵਤ੍ਤਮਾਨੇਤਿ ਅਤ੍ਥੋ. ਸੂਰਮਿਚ੍ਛਨ੍ਤੀਤਿ ਅਸਨਿਯਾਪਿ ਮਤ੍ਥਕੇ ਪਤਮਾਨਾਯ ਅਪਲਾਯਿਨਂ ਸੂਰਂ ਇਚ੍ਛਨ੍ਤਿ, ਤਸ੍ਮਿਂ ਖਣੇ ਏਵਰੂਪੋ ਸਙ੍ਗਾਮਯੋਧੋ ਪਤ੍ਥੇਤਬ੍ਬੋ ਹੋਤਿ. ਮਨ੍ਤੀਸੁ ਅਕੁਤੂਹਲਨ੍ਤਿ ਕਤ੍ਤਬ੍ਬਾਕਤ੍ਤਬ੍ਬਕਿਚ੍ਚਂ ਸਮ੍ਮਨ੍ਤਨਕਾਲੇ ਉਪ੍ਪਨ੍ਨੇ ਮਨ੍ਤੀਸੁ ਯੋ ਅਕੁਤੂਹਲੋ ਅਵਿਕਿਣ੍ਣਵਾਚੋ ਮਨ੍ਤਂ ਨ ਭਿਨ੍ਦਤਿ, ਤਂ ਇਚ੍ਛਨ੍ਤਿ, ਤਾਦਿਸੋ ਤੇਸੁ ਠਾਨੇਸੁ ਪਤ੍ਥੇਤਬ੍ਬੋ ਹੋਤਿ. ਪਿਯਞ੍ਚ ਅਨ੍ਨਪਾਨਮ੍ਹੀਤਿ ਮਧੁਰੇ ਅਨ੍ਨਪਾਨੇ ਪਚ੍ਚੁਪਟ੍ਠਿਤੇ ਸਹਪਰਿਭੁਞ੍ਜਨਤ੍ਥਾਯ ਪਿਯਪੁਗ੍ਗਲਂ ਪਤ੍ਥੇਨ੍ਤਿ, ਤਾਦਿਸੋ ਤਸ੍ਮਿਂ ਕਾਲੇ ਪਤ੍ਥੇਤਬ੍ਬੋ ਹੋਤਿ. ਅਤ੍ਥੇ ਜਾਤੇ ਚ ਪਣ੍ਡਿਤਨ੍ਤਿ ਅਤ੍ਥਗਮ੍ਭੀਰੇ ਧਮ੍ਮਗਮ੍ਭੀਰੇ ਕਿਸ੍ਮਿਞ੍ਚਿਦੇਵ ਕਾਰਣੇ ਵਾ ਪਞ੍ਹੇ ਵਾ ਉਪ੍ਪਨ੍ਨੇ ਪਣ੍ਡਿਤਂ ਵਿਚਕ੍ਖਣਂ ਇਚ੍ਛਨ੍ਤਿ. ਤਥਾਰੂਪੋ ਹਿ ਤਸ੍ਮਿਂ ਸਮਯੇ ਪਤ੍ਥੇਤਬ੍ਬੋ ਹੋਤੀਤਿ.

ਏਵਂ ਰਾਜਾ ਬੋਧਿਸਤ੍ਤਂ ਵਣ੍ਣੇਤ੍ਵਾ ਥੋਮੇਤ੍ਵਾ ਘਨਵਸ੍ਸਂ ਵਸ੍ਸੇਨ੍ਤੋ ਮਹਾਮੇਘੋ ਵਿਯ ਸਤ੍ਤਾਹਿ ਰਤਨੇਹਿ ਪੂਜੇਤ੍ਵਾ ਤਸ੍ਸੋਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ, ਬੋਧਿਸਤ੍ਤੋਪਿ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਥੇਰਸ੍ਸ ਗੁਣਂ ਕਥੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਪਣ੍ਡਿਤਾਮਚ੍ਚੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਹਾਸਾਰਜਾਤਕਵਣ੍ਣਨਾ ਦੁਤਿਯਾ.

[੯੩] ੩. ਵਿਸ੍ਸਾਸਭੋਜਨਜਾਤਕਵਣ੍ਣਨਾ

ਨ ਵਿਸ੍ਸਸੇ ਅਵਿਸ੍ਸਤ੍ਥੇਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਵਿਸ੍ਸਾਸਭੋਜਨਂ ਆਰਬ੍ਭ ਕਥੇਸਿ. ਤਸ੍ਮਿਂ ਕਿਰ ਸਮਯੇ ਯੇਭੁਯ੍ਯੇਨ ਭਿਕ੍ਖੂ ‘‘ਮਾਤਰਾ ਨੋ ਦਿਨ੍ਨਂ, ਪਿਤਰਾ ਨੋ ਦਿਨ੍ਨਂ, ਭਾਤਰਾ, ਭਗਿਨਿਯਾ, ਚੂਲ਼ਮਾਤਰਾ, ਚੂਲ਼ਪਿਤਰਾ, ਮਾਤੁਲੇਨ, ਮਾਤੁਲਾਨਿਯਾ ਦਿਨ੍ਨਂ. ਅਮ੍ਹਾਕਂ ਗਿਹਿਕਾਲੇਪਿ ਭਿਕ੍ਖੁਕਾਲੇਪਿ ਏਤੇ ਦਾਤੁਂ ਯੁਤ੍ਤਰੂਪਾਵਾ’’ਤਿ ਞਾਤੀਹਿ ਦਿਨ੍ਨੇ ਚਤ੍ਤਾਰੋ ਪਚ੍ਚਯੇ ਵਿਸ੍ਸਤ੍ਥਾ ਹੁਤ੍ਵਾ ਅਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਨ੍ਤਿ. ਸਤ੍ਥਾ ਤਂ ਕਾਰਣਂ ਞਤ੍ਵਾ ‘‘ਭਿਕ੍ਖੂਨਂ ਮਯਾ ਧਮ੍ਮਦੇਸਨਂ ਕਾਤੁਂ ਵਟ੍ਟਤੀ’’ਤਿ ਭਿਕ੍ਖੂ ਸਨ੍ਨਿਪਾਤਾਪੇਤ੍ਵਾ ‘‘ਭਿਕ੍ਖਵੇ, ਭਿਕ੍ਖੁਨਾ ਨਾਮ ਞਾਤੀਹਿਪਿ ਅਞ੍ਞਾਤੀਹਿਪਿ ਦਿਨ੍ਨਕੇ ਚਤ੍ਤਾਰੋ ਪਚ੍ਚਯੇ ਪਚ੍ਚਵੇਕ੍ਖਿਤ੍ਵਾਵ ਪਰਿਭੋਗੋ ਕਾਤਬ੍ਬੋ. ਅਪਚ੍ਚਵੇਕ੍ਖਿਤ੍ਵਾ ਪਰਿਭੋਗਂ ਕਤ੍ਵਾ ਹਿ ਕਾਲਂ ਕੁਰੁਮਾਨੋ ਭਿਕ੍ਖੁ ਯਕ੍ਖਪੇਤਅਤ੍ਤਭਾਵਤੋ ਨ ਮੁਚ੍ਚਤਿ, ਅਪਚ੍ਚਵੇਕ੍ਖਿਤਪਰਿਭੋਗੋ ਨਾਮੇਸ ਵਿਸਪਰਿਭੋਗਸਦਿਸੋ. ਵਿਸਞ੍ਹਿ ਵਿਸ੍ਸਾਸਿਕੇਨ ਦਿਨ੍ਨਕਮ੍ਪਿ ਅਵਿਸ੍ਸਾਸਿਕੇਨ ਦਿਨ੍ਨਕਮ੍ਪਿ ਮਾਰੇਤਿਯੇਵ. ਪੁਬ੍ਬੇਪਿ ਵਿਸ੍ਸਾਸੇਨ ਦਿਨ੍ਨਂ ਵਿਸਂ ਪਰਿਭੁਞ੍ਜਿਤ੍ਵਾ ਜੀਵਿਤਕ੍ਖਯਂ ਪਤ੍ਤਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਮਹਾਵਿਭਵੋ ਸੇਟ੍ਠਿ ਅਹੋਸਿ. ਤਸ੍ਸੇਕੋ ਗੋਪਾਲਕੋ ਕਿਟ੍ਠਸਮ੍ਬਾਧਸਮਯੇ ਗਾਵੋ ਗਹੇਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਤਤ੍ਥ ਗੋਸਾਲਂ ਕਤ੍ਵਾ ਰਕ੍ਖਨ੍ਤੋ ਵਸਤਿ. ਸੇਟ੍ਠਿਨੋ ਚ ਕਾਲੇਨ ਕਾਲਂ ਗੋਰਸਂ ਆਹਰਤਿ. ਅਥਸ੍ਸ ਗੋਸਾਲਾਯ ਅਵਿਦੂਰੇ ਸੀਹੋ ਨਿਵਾਸਂ ਗਣ੍ਹਿ. ਗਾਵੀਨਂ ਸੀਹਸਨ੍ਤਾਸੇਨ ਮਿਲਾਤਾਨਂ ਖੀਰਂ ਮਨ੍ਦਂ ਅਹੋਸਿ. ਅਥ ਨਂ ਏਕਦਿਵਸਂ ਸਪ੍ਪਿਂ ਆਦਾਯ ਆਗਤਂ ਸੇਟ੍ਠਿ ਪੁਚ੍ਛਿ ‘‘ਕਿਂ ਨੁ ਖੋ, ਸਮ੍ਮ ਗੋਪਾਲਕ, ਮਨ੍ਦਂ ਸਪ੍ਪੀ’’ਤਿ? ਸੋ ਤਂ ਕਾਰਣਂ ਆਚਿਕ੍ਖਿ. ‘‘ਅਤ੍ਥਿ ਪਨ, ਸਮ੍ਮ, ਤਸ੍ਸ ਸੀਹਸ੍ਸ ਕਤ੍ਥਚਿ ਪਟਿਬਨ੍ਧੋ’’ਤਿ? ‘‘ਅਤ੍ਥਿਸ੍ਸ ਸਾਮਿ, ਏਕਾਯ ਮਿਗਮਾਤੁਕਾਯ ਸਦ੍ਧਿਂ ਸਂਸਗ੍ਗੋ’’ਤਿ. ‘‘ਸਕ੍ਕਾ ਪਨ ਤਂ ਗਾਹਾਪੇਤੁ’’ਨ੍ਤਿ? ‘‘ਸਕ੍ਕਾ, ਸਾਮੀ’’ਤਿ. ‘‘ਤੇਨ ਹਿ ਤਂ ਗਹੇਤ੍ਵਾ ਤਸ੍ਸਾ ਨਲਾਟਤੋ ਪਟ੍ਠਾਯ ਸਰੀਰੇ ਲੋਮਾਨਿ ਵਿਸੇਨ ਪੁਨਪ੍ਪੁਨਂ ਰਜਿਤ੍ਵਾ ਸੁਕ੍ਖਾਪੇਤ੍ਵਾ ਦ੍ਵੇ ਤਯੋ ਦਿਵਸੇ ਅਤਿਕ੍ਕਾਮੇਤ੍ਵਾ ਤਂ ਮਿਗਮਾਤੁਕਂ ਵਿਸ੍ਸਜ੍ਜੇਹਿ, ਸੋ ਤਸ੍ਸਾ ਸਿਨੇਹੇਨ ਸਰੀਰਂ ਲੇਹਿਤ੍ਵਾ ਜੀਵਿਤਕ੍ਖਯਂ ਪਾਪੁਣਿਸ੍ਸਤਿ. ਅਥਸ੍ਸ ਚਮ੍ਮਨਖਦਾਠਾ ਚੇਵ ਵਸਞ੍ਚ ਮਂਸਞ੍ਚ ਗਹੇਤ੍ਵਾ ਆਗਚ੍ਛੇਯ੍ਯਾਸੀ’’ਤਿ ਹਲਾਹਲਵਿਸਂ ਦਤ੍ਵਾ ਉਯ੍ਯੋਜੇਸਿ.

ਸੋ ਗੋਪਾਲਕੋ ਜਾਲਂ ਖਿਪਿਤ੍ਵਾ ਉਪਾਯੇਨ ਤਂ ਮਿਗਮਾਤੁਕਂ ਗਣ੍ਹਿਤ੍ਵਾ ਤਥਾ ਅਕਾਸਿ. ਸੀਹੋ ਤਂ ਦਿਸ੍ਵਾਵ ਬਲਵਸਿਨੇਹੇਨ ਤਸ੍ਸਾ ਸਰੀਰਂ ਲੇਹਿਤ੍ਵਾ ਜੀਵਿਤਕ੍ਖਯਂ ਪਾਪੁਣਿ. ਗੋਪਾਲਕੋਪਿ ਚਮ੍ਮਾਦੀਨਿ ਗਹੇਤ੍ਵਾ ਬੋਧਿਸਤ੍ਤਸ੍ਸ ਸਨ੍ਤਿਕਂ ਅਗਮਾਸਿ. ਬੋਧਿਸਤ੍ਤੋ ਤਂ ਕਾਰਣਂ ਞਤ੍ਵਾ ‘‘ਪਰੇਸੁ ਸਿਨੇਹੋ ਨਾਮ ਨ ਕਾਤਬ੍ਬੋ, ਏਵਂ ਬਲਸਮ੍ਪਨ੍ਨੋਪਿ ਸੀਹੋ ਮਿਗਰਾਜਾ ਕਿਲੇਸਵਸੇਨ ਸਂਸਗ੍ਗਂ ਨਿਸ੍ਸਾਯ ਮਿਗਮਾਤੁਕਾਯ ਸਰੀਰਂ ਲੇਹਨ੍ਤੋ ਵਿਸਪਰਿਭੋਗਂ ਕਤ੍ਵਾ ਜੀਵਿਤਕ੍ਖਯਂ ਪਤ੍ਤੋ’’ਤਿ ਵਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੯੩. ‘‘ਨ ਵਿਸ੍ਸਸੇ ਅਵਿਸ੍ਸਤ੍ਥੇ, ਵਿਸ੍ਸਤ੍ਥੇਪਿ ਨ ਵਿਸ੍ਸਸੇ;

ਵਿਸ੍ਸਾਸਾ ਭਯਮਨ੍ਵੇਤਿ, ਸੀਹਂਵ ਮਿਗਮਾਤੁਕਾ’’ਤਿ.

ਤਤ੍ਰਾਯਂ ਸਙ੍ਖੇਪਤ੍ਥੋ – ਯੋ ਪੁਬ੍ਬੇ ਸਭਯੋ ਅਤ੍ਤਨਿ ਅਵਿਸ੍ਸਤ੍ਥੋ ਅਹੋਸਿ, ਤਸ੍ਮਿਂ ਅਵਿਸ੍ਸਤ੍ਥੇ, ਯੋ ਪੁਬ੍ਬੇਪਿ ਨਿਬ੍ਭਯੋ ਅਤ੍ਤਨਿ ਵਿਸ੍ਸਾਸਿਕੋਯੇਵ, ਤਸ੍ਮਿਂ ਵਿਸ੍ਸਤ੍ਥੇਪਿ ਨ ਵਿਸ੍ਸਸੇ, ਨੇਵ ਵਿਸ੍ਸਾਸਂ ਕਰੇਯ੍ਯ. ਕਿਂਕਾਰਣਾ? ਵਿਸ੍ਸਾਸਾ ਭਯਮਨ੍ਵੇਤਿ, ਯੋ ਹਿ ਮਿਤ੍ਤੇਪਿ ਅਮਿਤ੍ਤੇਪਿ ਵਿਸ੍ਸਾਸੋ, ਤਤੋ ਭਯਮੇਵ ਆਗਚ੍ਛਤਿ. ਕਥਂ? ਸੀਹਂਵ ਮਿਗਮਾਤੁਕਾ, ਯਥਾ ਮਿਤ੍ਤਸਨ੍ਥਵਵਸੇਨ ਕਤਵਿਸ੍ਸਾਸਾਯ ਮਿਗਮਾਤੁਕਾਯ ਸਨ੍ਤਿਕਾ ਸੀਹਸ੍ਸ ਭਯਂ ਅਨ੍ਵੇਤਿ, ਉਪਗਤਂ ਸਮ੍ਪਤ੍ਤਨ੍ਤਿ ਅਤ੍ਥੋ. ਯਥਾ ਵਾ ਵਿਸ੍ਸਾਸਵਸੇਨ ਸੀਹਂ ਮਿਗਮਾਤੁਕਾ ਅਨ੍ਵੇਤਾ ਉਪਗਤਾਤਿਪਿ ਅਤ੍ਥੋ.

ਏਵਂ ਬੋਧਿਸਤ੍ਤੋ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਹਾਸੇਟ੍ਠਿ ਅਹਮੇਵ ਅਹੋਸਿ’’ਨ੍ਤਿ.

ਵਿਸ੍ਸਾਸਭੋਜਨਜਾਤਕਵਣ੍ਣਨਾ ਤਤਿਯਾ.

[੯੪] ੪. ਲੋਮਹਂਸਜਾਤਕਵਣ੍ਣਨਾ

ਸੋਤਤ੍ਤੋ ਸੋਸਿਨ੍ਨੋ ਚੇਵਾਤਿ ਇਦਂ ਸਤ੍ਥਾ ਵੇਸਾਲਿਂ ਉਪਨਿਸ੍ਸਾਯ ਪਾਟਿਕਾਰਾਮੇ ਵਿਹਰਨ੍ਤੋ ਸੁਨਕ੍ਖਤ੍ਤਂ ਆਰਬ੍ਭ ਕਥੇਸਿ. ਏਕਸ੍ਮਿਞ੍ਹਿ ਸਮਯੇ ਸੁਨਕ੍ਖਤ੍ਤੋ ਸਤ੍ਥੁ ਉਪਟ੍ਠਾਕੋ ਹੁਤ੍ਵਾ ਪਤ੍ਤਚੀਵਰਮਾਦਾਯ ਵਿਚਰਮਾਨੋ ਕੋਰਕ੍ਖਤ੍ਤਿਯਸ੍ਸ ਧਮ੍ਮਂ ਰੋਚੇਨ੍ਤੋ ਦਸਬਲਸ੍ਸ ਪਤ੍ਤਚੀਵਰਂ ਨਿਯ੍ਯਾਦੇਤ੍ਵਾ ਕੋਰਕ੍ਖਤ੍ਤਿਯਂ ਨਿਸ੍ਸਾਯ ਵਸਤਿ. ਤਸ੍ਸ ਕਾਲਕਞ੍ਜਿਕਅਸੁਰਯੋਨਿਯਂ ਨਿਬ੍ਬਤ੍ਤਕਾਲੇ ਗਿਹਿ ਹੁਤ੍ਵਾ ‘‘ਨਤ੍ਥਿ ਸਮਣਸ੍ਸ ਗੋਤਮਸ੍ਸ ਉਤ੍ਤਰਿ ਮਨੁਸ੍ਸਧਮ੍ਮਾ ਅਲਮਰਿਯਞਾਣਦਸ੍ਸਨਵਿਸੇਸੋ, ਤਕ੍ਕਪਰਿਯਾਹਤਂ ਸਮਣੋ ਗੋਤਮੋ ਧਮ੍ਮਂ ਦੇਸੇਤਿ ਵੀਮਂਸਾਨੁਚਰਿਤਂ ਸਯਂਪਟਿਭਾਨਂ. ਯਸ੍ਸ ਚ ਖ੍ਵਾਸ੍ਸ ਅਤ੍ਥਾਯ ਧਮ੍ਮੋ ਦੇਸਿਤੋ, ਨ ਸੋ ਨਿਯ੍ਯਾਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯਾ’’ਤਿ (ਮ. ਨਿ. ੧.੧੪੬) ਵੇਸਾਲਿਯਂ ਤਿਣ੍ਣਂ ਪਾਕਾਰਾਨਂ ਅਨ੍ਤਰੇ ਵਿਚਰਨ੍ਤੋ ਸਤ੍ਥੁ ਅਵਣ੍ਣਂ ਭਾਸਤਿ.

ਅਥਾਯਸ੍ਮਾ ਸਾਰਿਪੁਤ੍ਤੋ ਪਿਣ੍ਡਾਯ ਚਰਨ੍ਤੋ ਤਸ੍ਸੇਵਂ ਅਵਣ੍ਣਂ ਭਾਸਨ੍ਤਸ੍ਸ ਸੁਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਤਮਤ੍ਥਂ ਭਗਵਤੋ ਆਰੋਚੇਸਿ. ਭਗਵਾ ‘‘ਕੋਧਨੋ, ਸਾਰਿਪੁਤ੍ਤ, ਸੁਨਕ੍ਖਤ੍ਤੋ ਮੋਘਪੁਰਿਸੋ, ਕੋਧਵਸੇਨੇਵਮਾਹ, ਕੋਧਵਸੇਨਾਪਿ ਪਨ ‘ਨ ਸੋ ਨਿਯ੍ਯਾਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯਾ’ਤਿ ਵਦਨ੍ਤੋ ਅਜਾਨਿਤ੍ਵਾਪਿ ਮਯ੍ਹਂ ਗੁਣਮੇਵ ਭਾਸਤਿ. ਨ ਖੋ ਪਨ ਸੋ ਮੋਘਪੁਰਿਸੋ ਮਯ੍ਹਂ ਗੁਣਂ ਜਾਨਾਤਿ. ਮਯ੍ਹਞ੍ਹਿ, ਸਾਰਿਪੁਤ੍ਤ, ਛ ਅਭਿਞ੍ਞਾ ਨਾਮ ਅਤ੍ਥਿ, ਅਯਮ੍ਪਿ ਮੇ ਉਤ੍ਤਰਿਮਨੁਸ੍ਸਧਮ੍ਮੋਵ. ਦਸਬਲਞਾਣਾਨਿ ਅਤ੍ਥਿ, ਚਤੁਵੇਸਾਰਜ੍ਜਞਾਣਂ ਅਤ੍ਥਿ, ਚਤੁਯੋਨਿਪਰਿਚ੍ਛੇਦਕਞਾਣਂ ਅਤ੍ਥਿ, ਪਞ੍ਚਗਤਿਪਰਿਚ੍ਛੇਦਕਞਾਣਂ ਅਤ੍ਥਿ, ਅਯਮ੍ਪਿ ਮੇ ਉਤ੍ਤਰਿਮਨੁਸ੍ਸਧਮ੍ਮੋਵ. ਏਵਂ ਉਤ੍ਤਰਿਮਨੁਸ੍ਸਧਮ੍ਮਸਮਨ੍ਨਾਗਤਂ ਪਨ ਮਂ ਯੋ ਏਵਂ ਵਦੇਯ੍ਯ ‘ਨਤ੍ਥਿ ਸਮਣਸ੍ਸ ਗੋਤਮਸ੍ਸ ਉਤ੍ਤਰਿਮਨੁਸ੍ਸਧਮ੍ਮੋ’ਤਿ, ਸੋ ਤਂ ਵਾਚਂ ਅਪ੍ਪਹਾਯ ਤਂ ਚਿਤ੍ਤਂ ਅਪ੍ਪਹਾਯ ਤਂ ਦਿਟ੍ਠਿਂ ਅਪ੍ਪਟਿਨਿਸ੍ਸਜ੍ਜਿਤ੍ਵਾ ਯਥਾਭਤਂ ਨਿਕ੍ਖਿਤ੍ਤੋ ਏਵਂ ਨਿਰਯੇ’’ਤਿ ਏਵਂ ਅਤ੍ਤਨੋ ਵਿਜ੍ਜਮਾਨਂ ਉਤ੍ਤਰਿਮਨੁਸ੍ਸਧਮ੍ਮਸ੍ਸ ਗੁਣਂ ਕਥੇਤ੍ਵਾ ‘‘ਸੁਨਕ੍ਖਤ੍ਤੋ ਕਿਰ, ਸਾਰਿਪੁਤ੍ਤ, ਕੋਰਕ੍ਖਤ੍ਤਿਯਸ੍ਸ ਦੁਕ੍ਕਰਕਾਰਿਕਾਯ ਮਿਚ੍ਛਾਤਪੇ ਪਸਨ੍ਨੋ, ਮਿਚ੍ਛਾਤਪੇ ਪਸੀਦਨ੍ਤੇਨ ਪਨ ਮਯਿ ਏਵ ਪਸੀਦਿਤੁਂ ਵਟ੍ਟਤਿ. ਅਹਞ੍ਹਿ ਇਤੋ ਏਕਨਵੁਤਿਕਪ੍ਪਮਤ੍ਥਕੇ ‘ਅਤ੍ਥਿ ਨੁ ਖੋ ਏਤ੍ਥ ਸਾਰੋ’ਤਿ ਬਾਹਿਰਕਂ ਮਿਚ੍ਛਾਤਪਂ ਵੀਮਂਸਨ੍ਤੋ ਚਤੁਰਙ੍ਗਸਮਨ੍ਨਾਗਤਂ ਬ੍ਰਹ੍ਮਚਰਿਯਵਾਸਂ ਵਸਿਂ, ਤਪਸ੍ਸੀ ਸੁਦਂ ਹੋਮਿ ਪਰਮਤਪਸ੍ਸੀ, ਲੂਖੋ ਸੁਦਂ ਹੋਮਿ ਪਰਮਲੂਖੋ, ਜੇਗੁਚ੍ਛੀ ਸੁਦਂ ਹੋਮਿ ਪਰਮਜੇਗੁਚ੍ਛੀ, ਪਵਿਵਿਤ੍ਤੋ ਸੁਦਂ ਹੋਮਿ ਪਰਮਪਵਿਵਿਤ੍ਤੋ’’ਤਿ ਵਤ੍ਵਾ ਥੇਰੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਏਕਨਵੁਤਿਕਪ੍ਪਮਤ੍ਥਕੇ ਬੋਧਿਸਤ੍ਤੋ ‘‘ਬਾਹਿਰਕਤਪਂ ਵੀਮਂਸਿਸ੍ਸਾਮੀ’’ਤਿ ਆਜੀਵਕਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਚੇਲਕੋ ਅਹੋਸਿ ਰਜੋਜਲ੍ਲਿਕੋ, ਪਵਿਵਿਤ੍ਤੋ ਅਹੋਸਿ ਏਕਵਿਹਾਰੀ. ਮਨੁਸ੍ਸੇ ਦਿਸ੍ਵਾ ਮਿਗੋ ਵਿਯ ਪਲਾਯਿ, ਮਹਾਵਿਕਤਿਭੋਜਨੋ ਅਹੋਸਿ, ਵਚ੍ਛਕਗੋਮਯਾਦੀਨਿ ਪਰਿਭੁਞ੍ਜਿ, ਅਪ੍ਪਮਾਦਵਿਹਾਰਤ੍ਥਾਯ ਅਰਞ੍ਞੇ ਏਕਸ੍ਮਿਂ ਭਿਂਸਨਕੇ ਵਨਸਣ੍ਡੇ ਵਿਹਾਸਿ. ਤਸ੍ਮਿਮ੍ਪਿ ਵਿਹਰਨ੍ਤੋ ਹਿਮਪਾਤਸਮਯੇ ਅਨ੍ਤਰਟ੍ਠਕੇ ਰਤ੍ਤਿਂ ਵਨਸਣ੍ਡਾ ਨਿਕ੍ਖਮਿਤ੍ਵਾ ਅਬ੍ਭੋਕਾਸੇ ਵਿਹਰਿਤ੍ਵਾ ਸੂਰਿਯੇ ਉਗ੍ਗਤੇ ਵਨਸਣ੍ਡਂ ਪਵਿਸਤਿ. ਸੋ ਯਥਾ ਰਤ੍ਤਿਂ ਅਬ੍ਭੋਕਾਸੇ ਹਿਮੋਦਕੇਨ ਤਿਨ੍ਤੋ, ਤਥੇਵ ਦਿਵਾ ਵਨਸਣ੍ਡਤੋ ਪਗ੍ਘਰਨ੍ਤੇਹਿ ਉਦਕਬਿਨ੍ਦੂਹਿ ਤੇਮਯਿ. ਏਵਂ ਅਹੋਰਤ੍ਤਂ ਸੀਤਦੁਕ੍ਖਂ ਅਨੁਭੋਤਿ. ਗਿਮ੍ਹਾਨਂ ਪਨ ਪਚ੍ਛਿਮੇ ਮਾਸੇ ਦਿਵਾ ਅਬ੍ਭੋਕਾਸੇ ਵਿਹਰਿਤ੍ਵਾ ਰਤ੍ਤਿਂ ਵਨਸਣ੍ਡਂ ਪਵਿਸਤਿ. ਸੋ ਯਥਾ ਦਿਵਾ ਅਬ੍ਭੋਕਾਸੇ ਆਤਪੇਨ ਪਰਿਲ਼ਾਹਪ੍ਪਤ੍ਤੋ, ਤਥੇਵ ਰਤ੍ਤਿਂ ਨਿਵਾਤੇ ਵਨਸਣ੍ਡੇ ਪਰਿਲ਼ਾਹਂ ਪਾਪੁਣਾਤਿ, ਸਰੀਰਾ ਸੇਦਧਾਰਾ ਮੁਚ੍ਚਨ੍ਤਿ. ਅਥਸ੍ਸ ਪੁਬ੍ਬੇ ਅਸ੍ਸੁਤਪੁਬ੍ਬਾ ਅਯਂ ਗਾਥਾ ਪਟਿਭਾਸਿ –

੯੪. ‘‘ਸੋਤਤ੍ਤੋ ਸੋਸਿਨ੍ਨੋ ਚੇਵ, ਏਕੋ ਭਿਂਸਨਕੇ ਵਨੇ;

ਨਗ੍ਗੋ ਨ ਚਗ੍ਗਿਮਾਸੀਨੋ, ਏਸਨਾਪਸੁਤੋ ਮੁਨੀ’’ਤਿ.

ਤਤ੍ਥ ਸੋਤਤ੍ਤੋਤਿ ਸੂਰਿਯਸਨ੍ਤਾਪੇਨ ਸੁਟ੍ਠੁ ਤਤ੍ਤੋ. ਸੋਸਿਨ੍ਨੋਤਿ ਹਿਮੋਦਕੇਨ ਸੁਸਿਨ੍ਨੋ ਸੁਟ੍ਠੁ ਤਿਨ੍ਤੋ. ਏਕੋ ਭਿਂਸਨਕੇ ਵਨੇਤਿ ਯਤ੍ਥ ਪਵਿਟ੍ਠਾਨਂ ਯੇਭੁਯ੍ਯੇਨ ਲੋਮਾਨਿ ਹਂਸਨ੍ਤਿ, ਤਥਾਰੂਪੇ ਭਿਂਸਨਕੇਵਨਸਣ੍ਡੇ ਏਕੋ ਅਦੁਤਿਯੋਵ ਅਹੋਸਿਨ੍ਤਿ ਦੀਪੇਤਿ. ਨਗ੍ਗੋ ਨ ਚਗ੍ਗਿਮਾਸੀਨੋਤਿ ਨਗ੍ਗੋ ਚ ਨ ਚ ਅਗ੍ਗਿਮਾਸੀਨੋ. ਤਥਾ ਸੀਤੇਨ ਪੀਲ਼ਿਯਮਾਨੋਪਿ ਨੇਵ ਨਿਵਾਸਨਪਾਰੁਪਨਂ ਵਾ ਆਦਿਯਿਂ, ਨ ਚ ਅਗ੍ਗਿਂ ਆਗਮ੍ਮ ਨਿਸੀਦਿਨ੍ਤਿ ਦੀਪੇਤਿ. ਏਸਨਾਪਸੁਤੋਤਿ ਅਬ੍ਰਹ੍ਮਚਰਿਯੇਪਿ ਤਸ੍ਮਿਂ ਬ੍ਰਹ੍ਮਚਰਿਯਸਞ੍ਞੀ ਹੁਤ੍ਵਾ ‘‘ਬ੍ਰਹ੍ਮਚਰਿਯਮੇਵੇਤਂ ਏਸਨਾ ਗਵੇਸਨਾ ਉਪਾਯੋ ਬ੍ਰਹ੍ਮਲੋਕਸ੍ਸਾ’’ਤਿ ਏਵਂ ਤਾਯ ਬ੍ਰਹ੍ਮਚਰਿਯੇਸਨਾਯ ਪਸੁਤੋ ਅਨੁਯੁਤ੍ਤੋ ਉਸ੍ਸੁਕ੍ਕਂ ਆਪਨ੍ਨੋ ਅਹੋਸਿਨ੍ਤਿ ਦਸ੍ਸੇਤਿ. ਮੁਨੀਤਿ ‘‘ਮੁਨਿ ਖੋ ਏਸ ਮੋਨਤ੍ਥਾਯ ਪਟਿਪਨ੍ਨੋ’’ਤਿ ਏਵਂ ਲੋਕੇਨ ਸਮ੍ਭਾਵਿਤੋ ਅਹੋਸਿਨ੍ਤਿ ਦੀਪੇਤਿ.

ਏਵਂ ਚਤੁਰਙ੍ਗਸਮਨ੍ਨਾਗਤਂ ਬ੍ਰਹ੍ਮਚਰਿਯਂ ਚਰਿਤ੍ਵਾ ਬੋਧਿਸਤ੍ਤੋ ਮਰਣਕਾਲੇ ਉਪਟ੍ਠਿਤਂ ਨਿਰਯਨਿਮਿਤ੍ਤਂ ਦਿਸ੍ਵਾ ‘‘ਇਦਂ ਵਤਸਮਾਦਾਨਂ ਨਿਰਤ੍ਥਕ’’ਨ੍ਤਿ ਞਤ੍ਵਾ ਤਙ੍ਖਣਞ੍ਞੇਵ ਤਂ ਲਦ੍ਧਿਂ ਭਿਨ੍ਦਿਤ੍ਵਾ ਸਮ੍ਮਾਦਿਟ੍ਠਿਂ ਗਹੇਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਅਹਂ ਤੇਨ ਸਮਯੇਨ ਸੋ ਆਜੀਵਕੋ ਅਹੋਸਿ’’ਨ੍ਤਿ.

ਲੋਮਹਂਸਜਾਤਕਵਣ੍ਣਨਾ ਚਤੁਤ੍ਥਾ.

[੯੫] ੫. ਮਹਾਸੁਦਸ੍ਸਨਜਾਤਕਵਣ੍ਣਨਾ

ਅਨਿਚ੍ਚਾ ਵਤ ਸਙ੍ਖਾਰਾਤਿ ਇਦਂ ਸਤ੍ਥਾ ਪਰਿਨਿਬ੍ਬਾਨਮਞ੍ਚੇ ਨਿਪਨ੍ਨੋ ਆਨਨ੍ਦਤ੍ਥੇਰਸ੍ਸ ‘‘ਮਾ, ਭਨ੍ਤੇ, ਭਗਵਾ ਇਮਸ੍ਮਿਂ ਖੁਦ੍ਦਕਨਗਰਕੇ’’ਤ੍ਯਾਦਿਵਚਨਂ (ਦੀ. ਨਿ. ੨.੨੧੦) ਆਰਬ੍ਭ ਕਥੇਸਿ. ਤਥਾਗਤੇ ਹਿ ਜੇਤਵਨੇ ਵਿਹਰਨ੍ਤੇ ਸਾਰਿਪੁਤ੍ਤਤ੍ਥੇਰੋ ਕਤ੍ਤਿਕਪੁਣ੍ਣਮਾਯਂ ਨਾਲ਼ਕਗਾਮਕੇ ਜਾਤੋਵਰਕੇ ਪਰਿਨਿਬ੍ਬਾਯਿ, ਮਹਾਮੋਗ੍ਗਲ੍ਲਾਨੋ ਕਤ੍ਤਿਕਮਾਸਸ੍ਸੇਵ ਕਾਲ਼ਪਕ੍ਖਅਮਾਵਸਿਯਂ. ਏਵਂ ਪਰਿਨਿਬ੍ਬੁਤੇ ਅਗ੍ਗਸਾਵਕਯੁਗੇ ‘‘ਅਹਮ੍ਪਿ ਕੁਸਿਨਾਰਾਯਂ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਤਤ੍ਥ ਗਨ੍ਤ੍ਵਾ ਯਮਕਸਾਲਾਨਮਨ੍ਤਰੇ ਉਤ੍ਤਰਸੀਸਕੇ ਮਞ੍ਚਕੇ ਅਨੁਟ੍ਠਾਨਸੇਯ੍ਯਾਯ ਨਿਪਜ੍ਜਿ. ਅਥ ਨਂ ਆਯਸ੍ਮਾ ਆਨਨ੍ਦਤ੍ਥੇਰੋ ‘‘ਮਾ, ਭਨ੍ਤੇ, ਭਗਵਾ ਇਮਸ੍ਮਿਂ ਖੁਦ੍ਦਕਨਗਰਕੇ ਵਿਸਮੇ ਉਜ੍ਜਙ੍ਗਲਨਗਰਕੇ, ਸਾਖਾਨਗਰਕੇ ਪਰਿਨਿਬ੍ਬਾਯਿ, ਅਞ੍ਞੇਸਂ ਚਮ੍ਪਾਰਾਜਗਹਾਦੀਨਂ ਮਹਾਨਗਰਾਨਂ ਅਞ੍ਞਤਰਸ੍ਮਿਂ ਭਗਵਾ ਪਰਿਨਿਬ੍ਬਾਯਤੂ’’ਤਿ ਯਾਚਿ. ਸਤ੍ਥਾ ‘‘ਮਾ, ਆਨਨ੍ਦ, ਇਮਂ ‘ਖੁਦ੍ਦਕਨਗਰਕਂ, ਉਜ੍ਜਙ੍ਗਲਨਗਰਕਂ ਸਾਖਾਨਗਰਕ’ਨ੍ਤਿ ਵਦੇਹਿ, ਅਹਞ੍ਹਿ ਪੁਬ੍ਬੇ ਸੁਦਸ੍ਸਨਚਕ੍ਕਵਤ੍ਤਿਰਾਜਕਾਲੇ ਇਮਸ੍ਮਿਂ ਨਗਰੇ ਵਸਿਂ, ਤਦਾ ਇਦਂ ਦ੍ਵਾਦਸਯੋਜਨਿਕੇਨ ਰਤਨਪਾਕਾਰੇਨ ਪਰਿਕ੍ਖਿਤ੍ਤਂ ਮਹਾਨਗਰਂ ਅਹੋਸੀ’’ਤਿ ਵਤ੍ਵਾ ਥੇਰੇਨ ਯਾਚਿਤੋ ਅਤੀਤਂ ਆਹਰਨ੍ਤੋ ਮਹਾਸੁਦਸ੍ਸਨਸੁਤ੍ਤਂ (ਦੀ. ਨਿ. ੨.੨੪੧ ਆਦਯੋ) ਕਥੇਸਿ.

ਤਦਾ ਪਨ ਮਹਾਸੁਦਸ੍ਸਨਂ ਸੁਧਮ੍ਮਪਾਸਾਦਾ ਓਤਰਿਤ੍ਵਾ ਅਵਿਦੂਰੇ ਸਤ੍ਤਰਤਨਮਯੇ ਤਾਲਵਨੇ ਪਞ੍ਞਤ੍ਤਸ੍ਮਿਂ ਕਪ੍ਪਿਯਮਞ੍ਚਕੇ ਦਕ੍ਖਿਣੇਨ ਪਸ੍ਸੇਨ ਅਨੁਟ੍ਠਾਨਸੇਯ੍ਯਾਯ ਨਿਪਨ੍ਨਂ ਦਿਸ੍ਵਾ ‘‘ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਨਗਰਸਹਸ੍ਸਾਨਿ ਕੁਸਾਵਤਿਰਾਜਧਾਨਿਪ੍ਪਮੁਖਾਨਿ, ਏਤ੍ਥ ਛਨ੍ਦਂ ਕਰੋਹੀ’’ਤਿ ਸੁਭਦ੍ਦਾਯ ਦੇਵਿਯਾ ਵੁਤ੍ਤੇ ਮਹਾਸੁਦਸ੍ਸਨੋ ‘‘ਮਾ ਦੇਵਿ ਏਵਂ ਅਵਚ, ਅਥ ਖੋ ‘ਏਤ੍ਥ ਛਨ੍ਦਂ ਵਿਨੇਹਿ, ਮਾ ਅਪੇਕ੍ਖਂ ਅਕਾਸੀ’ਤਿ ਏਵਂ ਮਂ ਓਵਦਾ’’ਤਿ ਵਤ੍ਵਾ ‘‘ਕਿਂਕਾਰਣਾ, ਦੇਵਾ’’ਤਿ ਪੁਚ੍ਛਿਤੋ ‘‘ਅਜ੍ਜਾਹਂ ਕਾਲਕਿਰਿਯਂ ਕਰਿਸ੍ਸਾਮੀ’’ਤਿ. ਅਥ ਨਂ ਦੇਵੀ ਰੋਦਮਾਨਾ ਅਕ੍ਖੀਨਿ ਪੁਞ੍ਛਿਤ੍ਵਾ ਕਿਚ੍ਛੇਨ ਕਸਿਰੇਨ ਤਥਾ ਵਤ੍ਵਾ ਰੋਦਿ ਪਰਿਦੇਵਿ. ਸੇਸਾਪਿ ਚਤੁਰਾਸੀਤਿਸਹਸ੍ਸਇਤ੍ਥਿਯੋ ਰੋਦਿਂਸੁ ਪਰਿਦੇਵਿਂਸੁ. ਅਮਚ੍ਚਾਦੀਸੁਪਿ ਏਕੋਪਿ ਅਧਿਵਾਸੇਤੁਂ ਨਾਸਕ੍ਖਿ, ਸਬ੍ਬੇਪਿ ਰੋਦਿਂਸੁ. ਬੋਧਿਸਤ੍ਤੋ ‘‘ਅਲਂ, ਭਣੇ, ਮਾ ਸਦ੍ਦਮਕਤ੍ਥਾ’’ਤਿ ਸਬ੍ਬੇ ਨਿਵਾਰੇਤ੍ਵਾ ਦੇਵਿਂ ਆਮਨ੍ਤੇਤ੍ਵਾ ‘‘ਮਾ ਤ੍ਵਂ ਦੇਵਿ ਰੋਦਿ, ਮਾ ਪਰਿਦੇਵਿ. ਤਿਲਫਲਮਤ੍ਤੋਪਿ ਹਿ ਸਙ੍ਖਾਰੋ ਨਿਚ੍ਚੋ ਨਾਮ ਨਤ੍ਥਿ, ਸਬ੍ਬੇਪਿ ਅਨਿਚ੍ਚਾ ਭੇਦਨਧਮ੍ਮਾ ਏਵਾ’’ਤਿ ਵਤ੍ਵਾ ਦੇਵਿਂ ਓਵਦਨ੍ਤੋ ਇਮਂ ਗਾਥਮਾਹ –

੯੫. ‘‘ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ’’ਤਿ.

ਤਤ੍ਥ ਅਨਿਚ੍ਚਾ ਵਤ ਸਙ੍ਖਾਰਾਤਿ ਭਦ੍ਦੇ ਸੁਭਦ੍ਦਾਦੇਵਿ, ਯਤ੍ਤਕਾ ਕੇਹਿਚਿ ਪਚ੍ਚਯੇਹਿ ਸਮਾਗਨ੍ਤ੍ਵਾ ਕਤਾ ਖਨ੍ਧਾਯਤਨਾਦਯੋ ਸਙ੍ਖਾਰਾ, ਸਬ੍ਬੇ ਤੇ ਅਨਿਚ੍ਚਾਯੇਵ ਨਾਮ. ਏਤੇਸੁ ਹਿ ਰੂਪਂ ਅਨਿਚ੍ਚਂ…ਪੇ… ਵਿਞ੍ਞਾਣਂ ਅਨਿਚ੍ਚਂ. ਚਕ੍ਖੁ ਅਨਿਚ੍ਚਂ…ਪੇ… ਧਮ੍ਮਾ ਅਨਿਚ੍ਚਾ. ਯਂਕਿਞ੍ਚਿ ਸਵਿਞ੍ਞਾਣਕਂ ਅਵਿਞ੍ਞਾਣਕਂ ਰਤਨਂ, ਸਬ੍ਬਂ ਤਂ ਅਨਿਚ੍ਚਮੇਵ. ਇਤਿ ‘‘ਅਨਿਚ੍ਚਾ ਵਤ ਸਙ੍ਖਾਰਾ’’ਤਿ ਗਣ੍ਹ. ਕਸ੍ਮਾ? ਉਪ੍ਪਾਦਵਯਧਮ੍ਮਿਨੋਤਿ, ਸਬ੍ਬੇ ਹੇਤੇ ਉਪ੍ਪਾਦਧਮ੍ਮਿਨੋ ਚੇਵ ਵਯਧਮ੍ਮਿਨੋ ਚ ਉਪ੍ਪਜ੍ਜਨਭਿਜ੍ਜਨਸਭਾਵਾਯੇਵ, ਤਸ੍ਮਾ ‘‘ਅਨਿਚ੍ਚਾ’’ਤਿ ਵੇਦਿਤਬ੍ਬਾ. ਯਸ੍ਮਾ ਚ ਅਨਿਚ੍ਚਾ, ਤਸ੍ਮਾ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਉਪ੍ਪਜ੍ਜਿਤ੍ਵਾ ਠਿਤਿਂ ਪਤ੍ਵਾਪਿ ਨਿਰੁਜ੍ਝਨ੍ਤਿਯੇਵ. ਸਬ੍ਬੇਵ ਹੇਤੇ ਨਿਬ੍ਬਤ੍ਤਮਾਨਾ ਉਪ੍ਪਜ੍ਜਨ੍ਤਿ ਨਾਮ, ਭਿਜ੍ਜਮਾਨਾ ਨਿਰੁਜ੍ਝਨ੍ਤਿ ਨਾਮ. ਤੇਸਂ ਉਪ੍ਪਾਦੇ ਸਤਿਯੇਵ ਚ ਠਿਤਿ ਨਾਮ ਹੋਤਿ, ਠਿਤਿਯਾ ਸਤਿਯੇਵ ਭਙ੍ਗੋ ਨਾਮ ਹੋਤਿ, ਨ ਹਿ ਅਨੁਪ੍ਪਨ੍ਨਸ੍ਸ ਠਿਤਿ ਨਾਮ, ਨਾਪਿ ਠਿਤਂ ਅਭਿਜ੍ਜਨਕਂ ਨਾਮ ਅਤ੍ਥਿ. ਇਤਿ ਸਬ੍ਬੇਪਿ ਸਙ੍ਖਾਰਾ ਤੀਣਿ ਲਕ੍ਖਣਾਨਿ ਪਤ੍ਵਾ ਤਤ੍ਥ ਤਤ੍ਥੇਵ ਨਿਰੁਜ੍ਝਨ੍ਤਿ, ਤਸ੍ਮਾ ਸਬ੍ਬੇਪਿਮੇ ਅਨਿਚ੍ਚਾ ਖਣਿਕਾ ਇਤ੍ਤਰਾ ਅਧੁਵਾ ਪਭਙ੍ਗੁਨੋ ਚਲਿਤਾ ਸਮੀਰਿਤਾ ਅਨਦ੍ਧਨਿਯਾ ਪਯਾਤਾ ਤਾਵਕਾਲਿਕਾ ਨਿਸ੍ਸਾਰਾ, ਤਾਵਕਾਲਿਕਟ੍ਠੇਨ ਮਾਯਾਮਰੀਚਿਫੇਣਸਦਿਸਾ. ਤੇਸੁ ਭਦ੍ਦੇ ਸੁਭਦ੍ਦਾਦੇਵਿ, ਕਸ੍ਮਾ ਸੁਖਸਞ੍ਞਂ ਉਪ੍ਪਾਦੇਸਿ, ਏਵਂ ਪਨ ਗਣ੍ਹ ਤੇਸਂ ਵੂਪਸਮੋ ਸੁਖੋਤਿ, ਸਬ੍ਬਵਟ੍ਟਵੂਪਸਮਨਤੋ ਤੇਸਂ ਵੂਪਸਮੋ ਨਾਮ ਨਿਬ੍ਬਾਨਂ, ਤਦੇਵੇਕਂ ਏਕਨ੍ਤਤੋ ਸੁਖਂ, ਤਤੋ ਅਞ੍ਞਂ ਸੁਖਂ ਨਾਮ ਨਤ੍ਥੀਤਿ.

ਏਵਂ ਮਹਾਸੁਦਸ੍ਸਨੋ ਅਮਤਮਹਾਨਿਬ੍ਬਾਨੇਨ ਦੇਸਨਾਯ ਕੂਟਂ ਗਹੇਤ੍ਵਾ ਅਵਸੇਸਸ੍ਸਪਿ ਮਹਾਜਨਸ੍ਸ ‘‘ਦਾਨਂ ਦੇਥ, ਸੀਲਂ ਰਕ੍ਖਥ, ਉਪੋਸਥਕਮ੍ਮਂ ਕਰੋਥਾ’’ਤਿ ਓਵਾਦਂ ਦਤ੍ਵਾ ਦੇਵਲੋਕਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸੁਭਦ੍ਦਾ ਦੇਵੀ ਰਾਹੁਲਮਾਤਾ ਅਹੋਸਿ, ਪਰਿਣਾਯਕਰਤਨਂ ਰਾਹੁਲੋ, ਸੇਸਪਰਿਸਾ ਬੁਦ੍ਧਪਰਿਸਾ, ਮਹਾਸੁਦਸ੍ਸਨੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਹਾਸੁਦਸ੍ਸਨਜਾਤਕਵਣ੍ਣਨਾ ਪਞ੍ਚਮਾ.

[੯੬] ੬. ਤੇਲਪਤ੍ਤਜਾਤਕਵਣ੍ਣਨਾ

ਸਮਤਿਤ੍ਤਿਕਂ ਅਨਵਸੇਸਕਨ੍ਤਿ ਇਦਂ ਸਤ੍ਥਾ ਸੁਮ੍ਭਰਟ੍ਠੇ ਸੇਦਕਂ ਨਾਮ ਨਿਗਮਂ ਉਪਨਿਸ੍ਸਾਯ ਅਞ੍ਞਤਰਸ੍ਮਿਂ ਵਨਸਣ੍ਡੇ ਵਿਹਰਨ੍ਤੋ ਜਨਪਦਕਲ੍ਯਾਣਿਸੁਤ੍ਤਂ ਆਰਬ੍ਭ ਕਥੇਸਿ. ਤਤ੍ਰ ਹਿ ਭਗਵਾ –

‘‘ਸੇਯ੍ਯਥਾਪਿ, ਭਿਕ੍ਖਵੇ, ‘ਜਨਪਦਕਲ੍ਯਾਣੀ ਜਨਪਦਕਲ੍ਯਾਣੀ’ਤਿ ਖੋ, ਭਿਕ੍ਖਵੇ, ਮਹਾਜਨਕਾਯੋ ਸਨ੍ਨਿਪਤੇਯ੍ਯ, ਸਾ ਖੋ ਪਨਸ੍ਸ ਜਨਪਦਕਲ੍ਯਾਣੀ ਪਰਮਪਾਸਾਵਿਨੀ ਨਚ੍ਚੇ, ਪਰਮਪਾਸਾਵਿਨੀ ਗੀਤੇ. ‘ਜਨਪਦਕਲ੍ਯਾਣੀ ਨਚ੍ਚਤਿ ਗਾਯਤੀ’ਤਿ ਖੋ, ਭਿਕ੍ਖਵੇ, ਭਿਯ੍ਯੋਸੋਮਤ੍ਤਾਯ ਮਹਾਜਨਕਾਯੋ ਸਨ੍ਨਿਪਤੇਯ੍ਯ. ਅਥ ਪੁਰਿਸੋ ਆਗਚ੍ਛੇਯ੍ਯ ਜੀਵਿਤੁਕਾਮੋ ਅਮਰਿਤੁਕਾਮੋ ਸੁਖਕਾਮੋ ਦੁਕ੍ਖਪਟਿਕੂਲੋ. ਤਮੇਨਂ ਏਵਂ ਵਦੇਯ੍ਯ ‘‘ਅਯਂ ਤੇ, ਅਮ੍ਭੋ ਪੁਰਿਸ, ਸਮਤਿਤ੍ਤਿਕੋ ਤੇਲਪਤ੍ਤੋ ਅਨ੍ਤਰੇਨ ਚ ਮਹਾਜਨਕਾਯਸ੍ਸ ਅਨ੍ਤਰੇਨ ਚ ਜਨਪਦਕਲ੍ਯਾਣਿਯਾ ਪਰਿਹਰਿਤਬ੍ਬੋ, ਪੁਰਿਸੋ ਚ ਤਂ ਉਕ੍ਖਿਤ੍ਤਾਸਿਕੋ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿਸ੍ਸਤਿ ‘ਯਤ੍ਥੇਵ ਨਂ ਥੋਕਮ੍ਪਿ ਛਡ੍ਡੇਸ੍ਸਸਿ, ਤਤ੍ਥੇਵ ਤੇ ਸੀਸਂ ਪਾਤੇਸ੍ਸਾਮੀ’’’ਤਿ. ‘‘ਤਂ ਕਿਂ ਮਞ੍ਞਥ, ਭਿਕ੍ਖਵੇ, ਅਪਿ ਨੁ ਸੋ ਪੁਰਿਸੋ ਅਮੁਂ ਤੇਲਪਤ੍ਤਂ ਅਮਨਸਿਕਰਿਤ੍ਵਾ ਬਹਿਦ੍ਧਾ ਪਮਾਦਂ ਆਹਰੇਯ੍ਯਾ’’ਤਿ? ‘‘ਨੋ ਹੇਤਂ, ਭਨ੍ਤੇ’’. ਉਪਮਾ ਖੋ ਮ੍ਯਾਯਂ, ਭਿਕ੍ਖਵੇ, ਕਤਾ ਅਤ੍ਥਸ੍ਸ ਵਿਞ੍ਞਾਪਨਾਯ. ਅਯਮੇਵੇਤ੍ਥ ਅਤ੍ਥੋ – ‘ਸਮਤਿਤ੍ਤਿਕੋ ਤੇਲਪਤ੍ਤੋ’ਤਿ ਖੋ, ਭਿਕ੍ਖਵੇ, ਕਾਯਗਤਾਯੇਤਂ ਸਤਿਯਾ ਅਧਿਵਚਨਂ. ਤਸ੍ਮਾਤਿਹ, ਭਿਕ੍ਖਵੇ, ਏਵਂ ਸਿਕ੍ਖਿਤਬ੍ਬਂ ‘ਕਾਯਗਤਾ ਨੋ ਸਤਿ ਭਾਵਿਤਾ ਭਵਿਸ੍ਸਤਿ ਸੁਸਮਾਰਦ੍ਧਾ’ਤਿ ਏਵਞ੍ਹਿ ਵੋ, ਭਿਕ੍ਖਵੇ, ਸਿਕ੍ਖਿਤਬ੍ਬ’’ਨ੍ਤਿ (ਸਂ. ਨਿ. ੫.੩੮੬) –

ਇਦਂ ਜਨਪਦਕਲ੍ਯਾਣਿਸੁਤ੍ਤਂ ਸਾਤ੍ਥਂ ਸਬ੍ਯਞ੍ਜਨਂ ਕਥੇਸਿ.

ਤਤ੍ਰਾਯਂ ਸਙ੍ਖੇਪਤ੍ਥੋ – ਜਨਪਦਕਲ੍ਯਾਣੀਤਿ ਜਨਪਦਮ੍ਹਿ ਕਲ੍ਯਾਣੀ ਉਤ੍ਤਮਾ ਛਸਰੀਰਦੋਸਰਹਿਤਾ ਪਞ੍ਚਕਲ੍ਯਾਣਸਮਨ੍ਨਾਗਤਾ. ਸਾ ਹਿ ਯਸ੍ਮਾ ਨਾਤਿਦੀਘਾ, ਨਾਤਿਰਸ੍ਸਾ, ਨਾਤਿਕਿਸਾ, ਨਾਤਿਥੂਲਾ, ਨਾਤਿਕਾਲ਼ਾ, ਨਾਚ੍ਚੋਦਾਤਾ, ਅਤਿਕ੍ਕਨ੍ਤਾ ਮਾਨੁਸਕਵਣ੍ਣਂ, ਅਪਤ੍ਤਾ ਦਿਬ੍ਬਵਣ੍ਣਂ, ਤਸ੍ਮਾ ਛਸਰੀਰਦੋਸਰਹਿਤਾ. ਛਵਿਕਲ੍ਯਾਣਂ, ਮਂਸਕਲ੍ਯਾਣਂ, ਨ੍ਹਾਰੁਕਲ੍ਯਾਣਂ, ਅਟ੍ਠਿਕਲ੍ਯਾਣਂ, ਵਯੋਕਲ੍ਯਾਣਨ੍ਤਿ ਇਮੇਹਿ ਪਨ ਪਞ੍ਚਹਿ ਕਲ੍ਯਾਣੇਹਿ ਸਮਨ੍ਨਾਗਤਤ੍ਤਾ ਪਞ੍ਚਕਲ੍ਯਾਣਸਮਨ੍ਨਾਗਤਾ ਨਾਮ. ਤਸ੍ਸਾ ਹਿ ਆਗਨ੍ਤੁਕੋਭਾਸਕਿਚ੍ਚਂ ਨਾਮ ਨਤ੍ਥਿ, ਅਤ੍ਤਨੋ ਸਰੀਰੋਭਾਸੇਨੇਵ ਦ੍ਵਾਦਸਹਤ੍ਥੇ ਠਾਨੇ ਆਲੋਕਂ ਕਰੋਤਿ, ਪਿਯਙ੍ਗੁਸਾਮਾ ਵਾ ਹੋਤਿ ਸੁਵਣ੍ਣਸਾਮਾ ਵਾ. ਅਯਮਸ੍ਸਾ ਛਵਿਕਲ੍ਯਾਣਤਾ. ਚਤ੍ਤਾਰੋ ਪਨਸ੍ਸਾ ਹਤ੍ਥਪਾਦਾ ਮੁਖਪਰਿਯੋਸਾਨਞ੍ਚ ਲਾਖਾਰਸਪਰਿਕਮ੍ਮਕਤਂ ਵਿਯ ਰਤ੍ਤਪਵਾਲ਼ਰਤ੍ਤਕਮ੍ਬਲਸਦਿਸਂ ਹੋਤਿ. ਅਯਮਸ੍ਸਾ ਮਂਸਕਲ੍ਯਾਣਤਾ. ਵੀਸਤਿ ਨਖਪਤ੍ਤਾਨਿ ਮਂਸਤੋ ਅਮੁਤ੍ਤਟ੍ਠਾਨੇ ਲਾਖਾਰਸਪੂਰਿਤਾਨਿ ਵਿਯ, ਮੁਤ੍ਤਟ੍ਠਾਨੇ ਖੀਰਧਾਰਾਸਦਿਸਾਨਿ. ਅਯਮਸ੍ਸਾ ਨ੍ਹਾਰੁਕਲ੍ਯਾਣਤਾ. ਦ੍ਵਤ੍ਤਿਂਸ ਦਨ੍ਤਾ ਸੁਫੁਸਿਤਾ ਸੁਧੋਤਵਜਿਰਪਨ੍ਤਿ ਵਿਯ ਖਾਯਨ੍ਤਿ. ਅਯਮਸ੍ਸਾ ਅਟ੍ਠਿਕਲ੍ਯਾਣਤਾ. ਵੀਸਤਿਵਸ੍ਸਸਤਿਕਾਪਿ ਪਨ ਸਮਾਨਾ ਸੋਲ਼ਸਵਸ੍ਸੁਦ੍ਦੇਸਿਕਾ ਵਿਯ ਹੋਤਿ ਨਿਬ੍ਬਲਿਪਲਿਤਾ. ਅਯਮਸ੍ਸਾ ਵਯੋਕਲ੍ਯਾਣਤਾ.

ਪਰਮਪਾਸਾਵਿਨੀਤਿ ਏਤ੍ਥ ਪਨ ਪਸਵਨਂ ਪਸਵੋ, ਪਵਤ੍ਤੀਤਿ ਅਤ੍ਥੋ. ਪਸਵੋ ਏਵ ਪਾਸਾਵੋ, ਪਰਮੋ ਪਾਸਾਵੋ ਪਰਮਪਾਸਾਵੋ, ਸੋ ਅਸ੍ਸਾ ਅਤ੍ਥੀਤਿ ਪਰਮਪਾਸਾਵਿਨੀ. ਨਚ੍ਚੇ ਚ ਗੀਤੇ ਚ ਉਤ੍ਤਮਪ੍ਪਵਤ੍ਤਿ ਸੇਟ੍ਠਕਿਰਿਯਾ. ਉਤ੍ਤਮਮੇਵ ਨਚ੍ਚਂ ਨਚ੍ਚਤਿ, ਗੀਤਞ੍ਚ ਗਾਯਤੀਤਿ ਵੁਤ੍ਤਂ ਹੋਤਿ.

ਅਥ ਪੁਰਿਸੋ ਆਗਚ੍ਛੇਯ੍ਯਾਤਿ ਨ ਅਤ੍ਤਨੋ ਰੁਚਿਯਾ ਆਗਚ੍ਛੇਯ੍ਯ, ਅਯਂ ਪਨੇਤ੍ਥ ਅਧਿਪ੍ਪਾਯੋ – ਅਥੇਵਂ ਮਹਾਜਨਮਜ੍ਝੇ ਜਨਪਦਕਲ੍ਯਾਣਿਯਾ ਨਚ੍ਚਮਾਨਾਯ ‘‘ਸਾਧੁ ਸਾਧੂ’’ਤਿ ਸਾਧੁਕਾਰੇਸੁ ਅਙ੍ਗੁਲਿਫੋਟਨੇਸੁ ਚੇਲੁਕ੍ਖੇਪੇਸੁ ਚ ਪਵਤ੍ਤਮਾਨੇਸੁ ਤਂ ਪਵਤ੍ਤਿਂ ਸੁਤ੍ਵਾ ਰਾਜਾ ਬਨ੍ਧਨਾਗਾਰਤੋ ਏਕਂ ਚੋਰਪੁਰਿਸਂ ਪਕ੍ਕੋਸਾਪੇਤ੍ਵਾ ਨਿਗਲ਼ਾਨਿ ਛਿਨ੍ਦਿਤ੍ਵਾ ਸਮਤਿਤ੍ਤਿਕਂ ਸੁਪਰਿਪੁਣ੍ਣਂ ਤੇਲਪਤ੍ਤਂ ਤਸ੍ਸ ਹਤ੍ਥੇ ਦਤ੍ਵਾ ਉਭੋਹਿ ਹਤ੍ਥੇਹਿ ਦਲ਼੍ਹਂ ਗਾਹਾਪੇਤ੍ਵਾ ਏਕਂ ਅਸਿਹਤ੍ਥਂ ਪੁਰਿਸਂ ਆਣਾਪੇਸਿ ‘‘ਏਤਂ ਗਹੇਤ੍ਵਾ ਜਨਪਦਕਲ੍ਯਾਣਿਯਾ ਸਮਜ੍ਜਟ੍ਠਾਨਂ ਗਚ੍ਛ. ਯਤ੍ਥੇਵ ਚੇਸ ਪਮਾਦਂ ਆਗਮ੍ਮ ਏਕਮ੍ਪਿ ਤੇਲਬਿਨ੍ਦੁਂ ਛਡ੍ਡੇਤਿ, ਤਤ੍ਥੇਵਸ੍ਸ ਸੀਸਂ ਛਿਨ੍ਦਾ’’ਤਿ. ਸੋ ਪੁਰਿਸੋ ਅਸਿਂ ਉਕ੍ਖਿਪਿਤ੍ਵਾ ਤਂ ਤਜ੍ਜੇਨ੍ਤੋ ਤਤ੍ਥ ਨੇਸਿ. ਸੋ ਮਰਣਭਯਤਜ੍ਜਿਤੋ ਜੀਵਿਤੁਕਾਮਤਾਯ ਪਮਾਦਵਸੇਨ ਤਂ ਅਮਨਸਿਕਰਿਤ੍ਵਾ ਸਕਿਮ੍ਪਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਤਂ ਜਨਪਦਕਲ੍ਯਾਣਿਂ ਨ ਓਲੋਕੇਸਿ. ਏਵਂ ਭੂਤਪੁਬ੍ਬਮੇਵੇਤਂ ਵਤ੍ਥੁ, ਸੁਤ੍ਤੇ ਪਨ ਪਰਿਕਪ੍ਪਵਸੇਨੇਤਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਉਪਮਾ ਖੋ ਮ੍ਯਾਯਨ੍ਤਿ ਏਤ੍ਥ ਪਨ ਤੇਲਪਤ੍ਤਸ੍ਸ ਤਾਵ ਕਾਯਗਤਾਸਤਿਯਾ ਓਪਮ੍ਮਸਂਸਨ੍ਦਨਂ ਕਤਮੇਵ. ਏਤ੍ਥ ਪਨ ਰਾਜਾ ਵਿਯ ਕਮ੍ਮਂ ਦਟ੍ਠਬ੍ਬਂ, ਅਸਿ ਵਿਯ ਕਿਲੇਸਾ, ਉਕ੍ਖਿਤ੍ਤਾਸਿਕਪੁਰਿਸੋ ਵਿਯ ਮਾਰੋ, ਤੇਲਪਤ੍ਤਹਤ੍ਥੋ ਪੁਰਿਸੋ ਵਿਯ ਕਾਯਗਤਾਸਤਿਭਾਵਕੋ ਵਿਪਸ੍ਸਕਯੋਗਾਵਚਰੋ. ਇਤਿ ਭਗਵਾ ‘‘ਕਾਯਗਤਾਸਤਿਂ ਭਾਵੇਤੁਕਾਮੇਨ ਭਿਕ੍ਖੁਨਾ ਤੇਲਪਤ੍ਤਹਤ੍ਥੇਨ ਤੇਨ ਪੁਰਿਸੇਨ ਵਿਯ ਸਤਿਂ ਅਵਿਸ੍ਸਜ੍ਜੇਤ੍ਵਾ ਅਪ੍ਪਮਤ੍ਤੇਨ ਕਾਯਗਤਾਸਤਿ ਭਾਵੇਤਬ੍ਬਾ’’ਤਿ ਇਮਂ ਸੁਤ੍ਤਂ ਆਹਰਿਤ੍ਵਾ ਦਸ੍ਸੇਸਿ.

ਭਿਕ੍ਖੂ ਇਮਂ ਸੁਤ੍ਤਞ੍ਚ ਅਤ੍ਥਞ੍ਚ ਸੁਤ੍ਵਾ ਏਵਮਾਹਂਸੁ – ‘‘ਦੁਕ੍ਕਰਂ, ਭਨ੍ਤੇ, ਤੇਨ ਪੁਰਿਸੇਨ ਕਤਂ ਤਥਾਰੂਪਿਂ ਜਨਪਦਕਲ੍ਯਾਣਿਂ ਅਨੋਲੋਕੇਤ੍ਵਾ ਤੇਲਪਤ੍ਤਂ ਆਦਾਯ ਗਚ੍ਛਨ੍ਤੇਨਾ’’ਤਿ. ਸਤ੍ਥਾ ‘‘ਨ, ਭਿਕ੍ਖਵੇ, ਤੇਨ ਦੁਕ੍ਕਰਂ ਕਤਂ, ਸੁਕਰਮੇਵੇਤਂ. ਕਸ੍ਮਾ? ਉਕ੍ਖਿਤ੍ਤਾਸਿਕੇਨ ਪੁਰਿਸੇਨ ਸਨ੍ਤਜ੍ਜੇਤ੍ਵਾ ਨੀਯਮਾਨਤਾਯ. ਯਂ ਪਨ ਪੁਬ੍ਬੇ ਪਣ੍ਡਿਤਾ ਅਪ੍ਪਮਾਦੇਨ ਸਤਿਂ ਅਵਿਸ੍ਸਜ੍ਜੇਤ੍ਵਾ ਅਭਿਸਙ੍ਖਤਂ ਦਿਬ੍ਬਰੂਪਮ੍ਪਿ ਇਨ੍ਦ੍ਰਿਯਾਨਿ ਭਿਨ੍ਦਿਤ੍ਵਾ ਅਨੋਲੋਕੇਤ੍ਵਾਵ ਗਨ੍ਤ੍ਵਾ ਰਜ੍ਜਂ ਪਾਪੁਣਿਂਸੁ, ਏਤਂ ਦੁਕ੍ਕਰ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਰਞ੍ਞੋ ਪੁਤ੍ਤਸਤਸ੍ਸ ਸਬ੍ਬਕਨਿਟ੍ਠੋ ਹੁਤ੍ਵਾ ਨਿਬ੍ਬਤ੍ਤਿ, ਸੋ ਅਨੁਪੁਬ੍ਬੇਨ ਵਿਞ੍ਞੁਤਂ ਪਾਪੁਣਿ. ਤਦਾ ਚ ਰਞ੍ਞੋ ਗੇਹੇ ਪਚ੍ਚੇਕਬੁਦ੍ਧਾ ਭੁਞ੍ਜਨ੍ਤਿ, ਬੋਧਿਸਤ੍ਤੋ ਤੇਸਂ ਵੇਯ੍ਯਾਵਚ੍ਚਂ ਕਰੋਤਿ. ਸੋ ਏਕਦਿਵਸਂ ਚਿਨ੍ਤੇਸਿ ‘‘ਮਮ ਬਹੂ ਭਾਤਰੋ, ਲਚ੍ਛਾਮਿ ਨੁ ਖੋ ਅਹਂ ਇਮਸ੍ਮਿਂ ਨਗਰੇ ਕੁਲਸਨ੍ਤਕਂ ਰਜ੍ਜਂ, ਉਦਾਹੁ ਨੋ’’ਤਿ? ਅਥਸ੍ਸ ਏਤਦਹੋਸਿ ‘‘ਪਚ੍ਚੇਕਬੁਦ੍ਧੇ ਪੁਚ੍ਛਿਤ੍ਵਾ ਜਾਨਿਸ੍ਸਾਮੀ’’ਤਿ. ਸੋ ਦੁਤਿਯਦਿਵਸੇ ਪਚ੍ਚੇਕਬੁਦ੍ਧੇਸੁ ਆਗਤੇਸੁ ਧਮਕਰਣਂ ਆਦਾਯ ਪਾਨੀਯਂ ਪਰਿਸ੍ਸਾਵੇਤ੍ਵਾ ਪਾਦੇ ਧੋਵਿਤ੍ਵਾ ਤੇਲੇਨ ਮਕ੍ਖੇਤ੍ਵਾ ਤੇਸਂ ਅਨ੍ਤਰਖਜ੍ਜਕਂ ਖਾਦਿਤ੍ਵਾ ਨਿਸਿਨ੍ਨਕਾਲੇ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਤਮਤ੍ਥਂ ਪੁਚ੍ਛਿ. ਅਥ ਨਂ ਤੇ ਅਵੋਚੁਂ – ਕੁਮਾਰ, ਨ ਤ੍ਵਂ ਇਮਸ੍ਮਿਂ ਨਗਰੇ ਰਜ੍ਜਂ ਲਭਿਸ੍ਸਸਿ, ਇਤੋ ਪਨ ਵੀਸਯੋਜਨਸਤਮਤ੍ਥਕੇ ਗਨ੍ਧਾਰਰਟ੍ਠੇ ਤਕ੍ਕਸਿਲਾਨਗਰਂ ਨਾਮ ਅਤ੍ਥਿ, ਤਤ੍ਥ ਗਨ੍ਤੁਂ ਸਕ੍ਕੋਨ੍ਤੋ ਇਤੋ ਸਤ੍ਤਮੇ ਦਿਵਸੇ ਰਜ੍ਜਂ ਲਚ੍ਛਸਿ. ਅਨ੍ਤਰਾਮਗ੍ਗੇ ਪਨ ਮਹਾਵਤ੍ਤਨਿਅਟਵਿਯਂ ਪਰਿਪਨ੍ਥੋ ਅਤ੍ਥਿ, ਤਂ ਅਟਵਿਂ ਪਰਿਹਰਿਤ੍ਵਾ ਗਚ੍ਛਨ੍ਤਸ੍ਸ ਯੋਜਨਸਤਿਕੋ ਮਗ੍ਗੋ ਹੋਤਿ, ਉਜੁਕਂ ਗਚ੍ਛਨ੍ਤਸ੍ਸ ਪਞ੍ਞਾਸ ਯੋਜਨਾਨਿ ਹੋਨ੍ਤਿ. ਸੋ ਹਿ ਅਮਨੁਸ੍ਸਕਨ੍ਤਾਰੋ ਨਾਮ. ਤਤ੍ਥ ਯਕ੍ਖਿਨਿਯੋ ਅਨ੍ਤਰਾਮਗ੍ਗੇ ਗਾਮੇ ਚ ਸਾਲਾਯੋ ਚ ਮਾਪੇਤ੍ਵਾ ਉਪਰਿ ਸੁਵਣ੍ਣਤਾਰਕਵਿਚਿਤ੍ਤਵਿਤਾਨਂ ਮਹਾਰਹਸੇਯ੍ਯਂ ਪਞ੍ਞਾਪੇਤ੍ਵਾ ਨਾਨਾਵਿਰਾਗਪਟਸਾਣਿਯੋ ਪਰਿਕ੍ਖਿਪਿਤ੍ਵਾ ਦਿਬ੍ਬਾਲਙ੍ਕਾਰੇਹਿ ਅਤ੍ਤਭਾਵਂ ਮਣ੍ਡੇਤ੍ਵਾ ਸਾਲਾਸੁ ਨਿਸੀਦਿਤ੍ਵਾ ਆਗਚ੍ਛਨ੍ਤੇ ਪੁਰਿਸੇ ਮਧੁਰਾਹਿ ਵਾਚਾਹਿ ਸਙ੍ਗਣ੍ਹਿਤ੍ਵਾ ‘‘ਕਿਲਨ੍ਤਰੂਪਾ ਵਿਯ ਪਞ੍ਞਾਯਥ, ਇਧਾਗਨ੍ਤ੍ਵਾ ਨਿਸੀਦਿਤ੍ਵਾ ਪਾਨੀਯਂ ਪਿਵਿਤ੍ਵਾ ਗਚ੍ਛਥਾ’’ਤਿ ਪਕ੍ਕੋਸਿਤ੍ਵਾ ਆਗਤਾਗਤਾਨਂ ਆਸਨਾਨਿ ਦਤ੍ਵਾ ਅਤ੍ਤਨੋ ਰੂਪਲੀਲਾਵਿਲਾਸੇਹਿ ਪਲੋਭੇਤ੍ਵਾ ਕਿਲੇਸਵਸਿਕੇ ਕਤ੍ਵਾ ਅਤ੍ਤਨਾ ਸਦ੍ਧਿਂ ਅਜ੍ਝਾਚਾਰੇ ਕਤੇ ਤਤ੍ਥੇਵ ਨੇ ਲੋਹਿਤੇਨ ਪਗ੍ਘਰਨ੍ਤੇਨ ਖਾਦਿਤ੍ਵਾ ਜੀਵਿਤਕ੍ਖਯਂ ਪਾਪੇਨ੍ਤਿ. ਰੂਪਗੋਚਰਂ ਸਤ੍ਤਂ ਰੂਪੇਨੇਵ ਗਣ੍ਹਨ੍ਤਿ, ਸਦ੍ਦਗੋਚਰਂ ਮਧੁਰੇਨ ਗੀਤਵਾਦਿਤਸਦ੍ਦੇਨ, ਗਨ੍ਧਗੋਚਰਂ ਦਿਬ੍ਬਗਨ੍ਧੇਹਿ, ਰਸਗੋਚਰਂ ਦਿਬ੍ਬੇਨ ਨਾਨਗ੍ਗਰਸਭੋਜਨੇਨ, ਫੋਟ੍ਠਬ੍ਬਗੋਚਰਂ ਉਭਤੋਲੋਹਿਤਕੂਪਧਾਨੇਹਿ ਦਿਬ੍ਬਸਯਨੇਹਿ ਗਣ੍ਹਨ੍ਤਿ. ਸਚੇ ਇਨ੍ਦ੍ਰਿਯਾਨਿ ਭਿਨ੍ਦਿਤ੍ਵਾ ਤਾ ਅਨੋਲੋਕੇਤ੍ਵਾ ਸਤਿਂ ਪਚ੍ਚੁਪਟ੍ਠਾਪੇਤ੍ਵਾ ਗਮਿਸ੍ਸਸਿ, ਸਤ੍ਤਮੇ ਦਿਵਸੇ ਤਤ੍ਥ ਰਜ੍ਜਂ ਲਚ੍ਛਸੀਤਿ.

ਬੋਧਿਸਤ੍ਤੋ ‘‘ਹੋਤੁ, ਭਨ੍ਤੇ, ਤੁਮ੍ਹਾਕਂ ਓਵਾਦਂ ਗਹੇਤ੍ਵਾ ਕਿਂ ਤਾ ਓਲੋਕੇਸ੍ਸਾਮੀ’’ਤਿ ਪਚ੍ਚੇਕਬੁਦ੍ਧੇਹਿ ਪਰਿਤ੍ਤਂ ਕਾਰਾਪੇਤ੍ਵਾ ਪਰਿਤ੍ਤਵਾਲੁਕਞ੍ਚੇਵ ਪਰਿਤ੍ਤਸੁਤ੍ਤਞ੍ਚ ਆਦਾਯ ਪਚ੍ਚੇਕਬੁਦ੍ਧੇ ਚ ਮਾਤਾਪਿਤਰੋ ਚ ਵਨ੍ਦਿਤ੍ਵਾ ਨਿਵੇਸਨਂ ਗਨ੍ਤ੍ਵਾ ਅਤ੍ਤਨੋ ਪੁਰਿਸੇ ਆਹ – ‘‘ਅਹਂ ਤਕ੍ਕਸਿਲਾਯਂ ਰਜ੍ਜਂ ਗਹੇਤੁਂ ਗਚ੍ਛਾਮਿ, ਤੁਮ੍ਹੇ ਇਧੇਵ ਤਿਟ੍ਠਥਾ’’ਤਿ. ਅਥ ਨਂ ਪਞ੍ਚ ਜਨਾ ਆਹਂਸੁ ‘‘ਮਯਮ੍ਪਿ ਅਨੁਗਚ੍ਛਾਮਾ’’ਤਿ. ‘‘ਨ ਸਕ੍ਕਾ ਤੁਮ੍ਹੇਹਿ ਅਨੁਗਨ੍ਤੁਂ, ਅਨ੍ਤਰਾਮਗ੍ਗੇ ਕਿਰ ਯਕ੍ਖਿਨਿਯੋ ਰੂਪਾਦਿਗੋਚਰੇ ਮਨੁਸ੍ਸੇ ਏਵਞ੍ਚੇਵਞ੍ਚ ਰੂਪਾਦੀਹਿ ਪਲੋਭੇਤ੍ਵਾ ਗਣ੍ਹਨ੍ਤਿ, ਮਹਾ ਪਰਿਪਨ੍ਥੋ, ਅਹਂ ਪਨ ਅਤ੍ਤਾਨਂ ਤਕ੍ਕੇਤ੍ਵਾ ਗਚ੍ਛਾਮੀ’’ਤਿ. ‘‘ਕਿਂ ਪਨ, ਦੇਵ, ਮਯਂ ਤੁਮ੍ਹੇਹਿ ਸਦ੍ਧਿਂ ਗਚ੍ਛਨ੍ਤਾ ਅਤ੍ਤਨੋ ਪਿਯਾਨਿ ਰੂਪਾਦੀਨਿ ਓਲੋਕੇਸ੍ਸਾਮ, ਮਯਮ੍ਪਿ ਤਥੇਵ ਗਮਿਸ੍ਸਾਮਾ’’ਤਿ. ਬੋਧਿਸਤ੍ਤੋ ‘‘ਤੇਨ ਹਿ ਅਪ੍ਪਮਤ੍ਤਾ ਹੋਥਾ’’ਤਿ ਤੇ ਪਞ੍ਚ ਜਨੇ ਆਦਾਯ ਮਗ੍ਗਂ ਪਟਿਪਜ੍ਜਿ.

ਯਕ੍ਖਿਨਿਯੋ ਗਾਮਾਦੀਨਿ ਮਾਪੇਤ੍ਵਾ ਨਿਸੀਦਿਂਸੁ. ਤੇਸੁ ਰੂਪਗੋਚਰੋ ਪੁਰਿਸੋ ਤਾ ਯਕ੍ਖਿਨਿਯੋ ਓਲੋਕੇਤ੍ਵਾ ਰੂਪਾਰਮ੍ਮਣੇ ਪਟਿਬਦ੍ਧਚਿਤ੍ਤੋ ਥੋਕਂ ਓਹੀਯਿ. ਬੋਧਿਸਤ੍ਤੋ ‘‘ਕਿਂ ਭੋ, ਥੋਕਂ ਓਹੀਯਸੀ’’ਤਿ ਆਹ. ‘‘ਦੇਵ, ਪਾਦਾ ਮੇ ਰੁਜ੍ਜਨ੍ਤਿ, ਥੋਕਂ ਸਾਲਾਯਂ ਨਿਸੀਦਿਤ੍ਵਾ ਆਗਚ੍ਛਾਮੀ’’ਤਿ. ‘‘ਅਮ੍ਭੋ, ਏਤਾ ਯਕ੍ਖਿਨਿਯੋ, ਮਾ ਖੋ ਪਤ੍ਥੇਸੀ’’ਤਿ. ‘‘ਯਂ ਹੋਤਿ, ਤਂ ਹੋਤੁ, ਨ ਸਕ੍ਕੋਮਿ, ਦੇਵਾ’’ਤਿ. ‘‘ਤੇਨ ਹਿ ਪਞ੍ਞਾਯਿਸ੍ਸਸੀ’’ਤਿ ਇਤਰੇ ਚਤ੍ਤਾਰੋ ਆਦਾਯ ਅਗਮਾਸਿ. ਸੋਪਿ ਰੂਪਗੋਚਰਕੋ ਤਾਸਂ ਸਨ੍ਤਿਕਂ ਅਗਮਾਸਿ. ਤਾ ਅਤ੍ਤਨਾ ਸਦ੍ਧਿਂ ਅਜ੍ਝਾਚਾਰੇ ਕਤੇ ਤਂ ਤਤ੍ਥੇਵ ਜੀਵਿਤਕ੍ਖਯਂ ਪਾਪੇਤ੍ਵਾ ਪੁਰਤੋ ਗਨ੍ਤ੍ਵਾ ਅਞ੍ਞਂ ਸਾਲਂ ਮਾਪੇਤ੍ਵਾ ਨਾਨਾਤੂਰਿਯਾਨਿ ਗਹੇਤ੍ਵਾ ਗਾਯਮਾਨਾ ਨਿਸੀਦਿਂਸੁ, ਤਤ੍ਥ ਸਦ੍ਦਗੋਚਰਕੋ ਓਹੀਯਿ. ਪੁਰਿਮਨਯੇਨੇਵ ਤਮ੍ਪਿ ਖਾਦਿਤ੍ਵਾ ਪੁਰਤੋ ਗਨ੍ਤ੍ਵਾ ਨਾਨਪ੍ਪਕਾਰੇ ਗਨ੍ਧਕਰਣ੍ਡਕੇ ਪੂਰੇਤ੍ਵਾ ਆਪਣਂ ਪਸਾਰੇਤ੍ਵਾ ਨਿਸੀਦਿਂਸੁ, ਤਤ੍ਥ ਗਨ੍ਧਗੋਚਰਕੋ ਓਹੀਯਿ. ਤਮ੍ਪਿ ਖਾਦਿਤ੍ਵਾ ਪੁਰਤੋ ਗਨ੍ਤ੍ਵਾ ਨਾਨਗ੍ਗਰਸਾਨਂ ਦਿਬ੍ਬਭੋਜਨਾਨਂ ਭਾਜਨਾਨਿ ਪੂਰੇਤ੍ਵਾ ਓਦਨਿਕਾਪਣਂ ਪਸਾਰੇਤ੍ਵਾ ਨਿਸੀਦਿਂਸੁ, ਤਤ੍ਥ ਰਸਗੋਚਰਕੋ ਓਹੀਯਿ. ਤਮ੍ਪਿ ਖਾਦਿਤ੍ਵਾ ਪੁਰਤੋ ਗਨ੍ਤ੍ਵਾ ਦਿਬ੍ਬਸਯਨਾਨਿ ਪਞ੍ਞਾਪੇਤ੍ਵਾ ਨਿਸੀਦਿਂਸੁ, ਤਤ੍ਥ ਫੋਟ੍ਠਬ੍ਬਗੋਚਰਕੋ ਓਹੀਯਿ. ਤਮ੍ਪਿ ਖਾਦਿਂਸੁ, ਬੋਧਿਸਤ੍ਤੋ ਏਕਕੋਵ ਅਹੋਸਿ.

ਅਥੇਕਾ ਯਕ੍ਖਿਨੀ ‘‘ਅਤਿਖਰਮਨ੍ਤੋ ਵਤਾਯਂ, ਅਹਂ ਤਂ ਖਾਦਿਤ੍ਵਾਵ ਨਿਵਤ੍ਤਿਸ੍ਸਾਮੀ’’ਤਿ ਬੋਧਿਸਤ੍ਤਸ੍ਸ ਪਚ੍ਛਤੋ ਪਚ੍ਛਤੋ ਅਗਮਾਸਿ. ਅਟਵਿਯਾ ਪਰਭਾਗੇ ਵਨਕਮ੍ਮਿਕਾਦਯੋ ਯਕ੍ਖਿਨਿਂ ਦਿਸ੍ਵਾ ‘‘ਅਯਂ ਤੇ ਪੁਰਤੋ ਗਚ੍ਛਨ੍ਤੋ ਪੁਰਿਸੋ ਕਿਂ ਹੋਤੀ’’ਤਿ ਪੁਚ੍ਛਿਂਸੁ. ‘‘ਕੋਮਾਰਸਾਮਿਕੋ ਮੇ, ਅਯ੍ਯਾ’’ਤਿ. ‘‘ਅਮ੍ਭੋ, ਅਯਂ ਏਵਂ ਸੁਕੁਮਾਲਾ ਪੁਪ੍ਫਦਾਮਸਦਿਸਾ ਸੁਵਣ੍ਣਵਣ੍ਣਾ ਕੁਮਾਰਿਕਾ ਅਤ੍ਤਨੋ ਕੁਲਂ ਛਡ੍ਡੇਤ੍ਵਾ ਭਵਨ੍ਤਂ ਤਕ੍ਕੇਤ੍ਵਾ ਨਿਕ੍ਖਨ੍ਤਾ, ਕਸ੍ਮਾ ਏਤਂ ਅਕਿਲਮੇਤ੍ਵਾ ਆਦਾਯ ਨ ਗਚ੍ਛਸੀ’’ਤਿ? ‘‘ਨੇਸਾ, ਅਯ੍ਯਾ, ਮਯ੍ਹਂ ਪਜਾਪਤਿ, ਯਕ੍ਖਿਨੀ ਏਸਾ, ਏਤਾਯ ਮੇ ਪਞ੍ਚ ਮਨੁਸ੍ਸਾ ਖਾਦਿਤਾ’’ਤਿ. ‘‘ਅਯ੍ਯਾ, ਪੁਰਿਸਾ ਨਾਮ ਕੁਦ੍ਧਕਾਲੇ ਅਤ੍ਤਨੋ ਪਜਾਪਤਿਯੋ ਯਕ੍ਖਿਨਿਯੋਪਿ ਕਰੋਨ੍ਤਿ ਪੇਤਿਨਿਯੋਪੀ’’ਤਿ. ਸਾ ਗਚ੍ਛਮਾਨਾ ਗਬ੍ਭਿਨਿਵਣ੍ਣਂ ਦਸ੍ਸੇਤ੍ਵਾ ਪੁਨ ਸਕਿਂ ਵਿਜਾਤਵਣ੍ਣਂ ਕਤ੍ਵਾ ਪੁਤ੍ਤਂ ਅਙ੍ਕੇਨ ਆਦਾਯ ਬੋਧਿਸਤ੍ਤਂ ਅਨੁਬਨ੍ਧਿ, ਦਿਟ੍ਠਦਿਟ੍ਠਾ ਪੁਰਿਮਨਯੇਨੇਵ ਪੁਚ੍ਛਨ੍ਤਿ. ਬੋਧਿਸਤ੍ਤੋਪਿ ਤਥੇਵ ਵਤ੍ਵਾ ਗਚ੍ਛਨ੍ਤੋ ਤਕ੍ਕਸਿਲਂ ਪਾਪੁਣਿ. ਸਾ ਪੁਤ੍ਤਂ ਅਨ੍ਤਰਧਾਪੇਤ੍ਵਾ ਏਕਿਕਾਵ ਅਨੁਬਨ੍ਧਿ. ਬੋਧਿਸਤ੍ਤੋ ਨਗਰਦ੍ਵਾਰਂ ਗਨ੍ਤ੍ਵਾ ਏਕਿਸ੍ਸਾ ਸਾਲਾਯ ਨਿਸੀਦਿ. ਸਾ ਬੋਧਿਸਤ੍ਤਸ੍ਸ ਤੇਜੇਨ ਪਵਿਸਿਤੁਂ ਅਸਕ੍ਕੋਨ੍ਤੀ ਦਿਬ੍ਬਰੂਪਂ ਮਾਪੇਤ੍ਵਾ ਸਾਲਾਦ੍ਵਾਰੇ ਅਟ੍ਠਾਸਿ.

ਤਸ੍ਮਿਂ ਸਮਯੇ ਤਕ੍ਕਸਿਲਰਾਜਾ ਉਯ੍ਯਾਨਂ ਗਚ੍ਛਨ੍ਤੋ ਤਂ ਦਿਸ੍ਵਾ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ‘‘ਗਚ੍ਛ, ਇਮਿਸ੍ਸਾ ਸਸ੍ਸਾਮਿਕਅਸ੍ਸਾਮਿਕਭਾਵਂ ਜਾਨਾਹੀ’’ਤਿ ਮਨੁਸ੍ਸਂ ਪੇਸੇਸਿ. ਸੋ ਤਂ ਉਪਸਙ੍ਕਮਿਤ੍ਵਾ ‘‘ਸਸ੍ਸਾਮਿਕਾਸੀ’’ਤਿ ਪੁਚ੍ਛਿ. ‘‘ਆਮ, ਅਯ੍ਯ, ਅਯਂ ਮੇ ਸਾਲਾਯ ਨਿਸਿਨ੍ਨੋ ਸਾਮਿਕੋ’’ਤਿ. ਬੋਧਿਸਤ੍ਤੋ ‘‘ਨੇਸਾ ਮਯ੍ਹਂ ਪਜਾਪਤਿ, ਯਕ੍ਖਿਨੀ ਏਸਾ, ਏਤਾਯ ਮੇ ਪਞ੍ਚ ਮਨੁਸ੍ਸਾ ਖਾਦਿਤਾ’’ਤਿ ਆਹ. ਸਾਪਿ ‘‘ਪੁਰਿਸਾ ਨਾਮ ਅਯ੍ਯਾ ਕੁਦ੍ਧਕਾਲੇ ਯਂ ਇਚ੍ਛਨ੍ਤਿ, ਤਂ ਵਦਨ੍ਤੀ’’ਤਿ ਆਹ. ਸੋ ਉਭਿਨ੍ਨਮ੍ਪਿ ਵਚਨਂ ਰਞ੍ਞੋ ਆਰੋਚੇਸਿ. ਰਾਜਾ ‘‘ਅਸ੍ਸਾਮਿਕਭਣ੍ਡਂ ਨਾਮ ਰਾਜਸਨ੍ਤਕਂ ਹੋਤੀ’’ਤਿ ਯਕ੍ਖਿਨਿਂ ਪਕ੍ਕੋਸਾਪੇਤ੍ਵਾ ਏਕਹਤ੍ਥਿਪਿਟ੍ਠੇ ਨਿਸੀਦਾਪੇਤ੍ਵਾ ਨਗਰਂ ਪਦਕ੍ਖਿਣਂ ਕਤ੍ਵਾ ਪਾਸਾਦਂ ਅਭਿਰੁਯ੍ਹ ਤਂ ਅਗ੍ਗਮਹੇਸਿਟ੍ਠਾਨੇ ਠਪੇਸਿ.

ਸੋ ਨ੍ਹਾਤਵਿਲਿਤ੍ਤੋ ਸਾਯਮਾਸਂ ਭੁਞ੍ਜਿਤ੍ਵਾ ਸਿਰੀਸਯਨਂ ਅਭਿਰੁਹਿ. ਸਾਪਿ ਯਕ੍ਖਿਨੀ ਅਤ੍ਤਨੋ ਉਪਕਪ੍ਪਨਕਂ ਆਹਾਰਂ ਆਹਰਿਤ੍ਵਾ ਅਲਙ੍ਕਤਪਟਿਯਤ੍ਤਾ ਸਿਰਿਸਯਨੇ ਰਞ੍ਞਾ ਸਦ੍ਧਿਂ ਨਿਪਜ੍ਜਿਤ੍ਵਾ ਰਞ੍ਞੋ ਰਤਿਵਸੇਨ ਸੁਖਂ ਸਮਪ੍ਪਿਤਸ੍ਸ ਨਿਪਨ੍ਨਕਾਲੇ ਏਕੇਨ ਪਸ੍ਸੇਨ ਪਰਿਵਤ੍ਤਿਤ੍ਵਾ ਪਰੋਦਿ. ਅਥ ਨਂ ਰਾਜਾ ‘‘ਕਿਂ, ਭਦ੍ਦੇ, ਰੋਦਸੀ’’ਤਿ ਪੁਚ੍ਛਿ. ‘‘ਦੇਵ, ਅਹਂ ਤੁਮ੍ਹੇਹਿ ਮਗ੍ਗੇ ਦਿਸ੍ਵਾ ਆਨੀਤਾ, ਤੁਮ੍ਹਾਕਞ੍ਚ ਗੇਹੇ ਬਹੂ ਇਤ੍ਥਿਯੋ, ਅਹਂ ਸਪਤ੍ਤੀਨਂ ਅਨ੍ਤਰੇ ਵਸਮਾਨਾ ਕਥਾਯ ਉਪ੍ਪਨ੍ਨਾਯ ‘ਕੋ ਤੁਯ੍ਹਂ ਮਾਤਰਂ ਵਾ ਪਿਤਰਂ ਵਾ ਗੋਤ੍ਤਂ ਵਾ ਜਾਤਿਂ ਵਾ ਜਾਨਾਤਿ, ਤ੍ਵਂ ਅਨ੍ਤਰਾਮਗ੍ਗੇ ਦਿਸ੍ਵਾ ਆਨੀਤਾ ਨਾਮਾ’ਤਿ ਸੀਸੇ ਗਹੇਤ੍ਵਾ ਨਿਪ੍ਪੀਲ਼ਿਯਮਾਨਾ ਵਿਯ ਮਙ੍ਕੁ ਭਵਿਸ੍ਸਾਮਿ. ਸਚੇ ਤੁਮ੍ਹੇ ਸਕਲਰਜ੍ਜੇ ਇਸ੍ਸਰਿਯਞ੍ਚ ਆਣਞ੍ਚ ਮਯ੍ਹਂ ਦਦੇਯ੍ਯਾਥ, ਕੋਚਿ ਮਯ੍ਹਂ ਚਿਤ੍ਤਂ ਕੋਪੇਤ੍ਵਾ ਕਥੇਤੁਂ ਨ ਸਕ੍ਖਿਸ੍ਸਤੀ’’ਤਿ. ‘‘ਭਦ੍ਦੇ, ਮਯ੍ਹਂ ਸਕਲਰਟ੍ਠਵਾਸਿਨੋ ਨ ਕਿਞ੍ਚਿ ਹੋਨ੍ਤਿ, ਨਾਹਂ ਏਤੇਸਂ ਸਾਮਿਕੋ. ਯੇ ਪਨ ਰਾਜਾਣਂ ਕੋਪੇਤ੍ਵਾ ਅਕਤ੍ਤਬ੍ਬਂ ਕਰੋਨ੍ਤਿ, ਤੇਸਞ੍ਞੇਵਾਹਂ ਸਾਮਿਕੋ. ਇਮਿਨਾ ਕਾਰਣੇਨ ਨ ਸਕ੍ਕਾ ਤੁਯ੍ਹਂ ਸਕਲਰਟ੍ਠੇ ਵਾ ਨਗਰੇ ਵਾ ਇਸ੍ਸਰਿਯਞ੍ਚ ਆਣਞ੍ਚ ਦਾਤੁ’’ਨ੍ਤਿ. ‘‘ਤੇਨ ਹਿ, ਦੇਵ, ਸਚੇ ਰਟ੍ਠੇ ਵਾ ਨਗਰੇ ਵਾ ਆਣਂ ਦਾਤੁਂ ਨ ਸਕ੍ਕੋਥ, ਅਨ੍ਤੋਨਿਵੇਸਨੇ ਅਨ੍ਤੋਵਲ਼ਞ੍ਜਨਕਾਨਂ ਉਪਰਿ ਮਮ ਵਸਂ ਵਤ੍ਤਨਤ੍ਥਾਯ ਆਣਂ ਦੇਥਾ’’ਤਿ. ਰਾਜਾ ਦਿਬ੍ਬਫੋਟ੍ਠਬ੍ਬੇਨ ਬਦ੍ਧੋ ਤਸ੍ਸਾ ਵਚਨਂ ਅਤਿਕ੍ਕਮਿਤੁਂ ਅਸਕ੍ਕੋਨ੍ਤੋ ‘‘ਸਾਧੁ, ਭਦ੍ਦੇ, ਅਨ੍ਤੋਵਲ਼ਞ੍ਜਨਕੇਸੁ ਤੁਯ੍ਹਂ ਆਣਂ ਦਮ੍ਮਿ, ਤ੍ਵਂ ਏਤੇ ਅਤ੍ਤਨੋ ਵਸੇ ਵਤ੍ਤਾਪੇਹੀ’’ਤਿ ਆਹ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਰਞ੍ਞੋ ਨਿਦ੍ਦਂ ਓਕ੍ਕਨ੍ਤਕਾਲੇ ਯਕ੍ਖਨਗਰਂ ਗਨ੍ਤ੍ਵਾ ਯਕ੍ਖੇ ਪਕ੍ਕੋਸਿਤ੍ਵਾ ਅਤ੍ਤਨਾ ਰਾਜਾਨਂ ਜੀਵਿਤਕ੍ਖਯਂ ਪਾਪੇਤ੍ਵਾ ਅਟ੍ਠਿਮਤ੍ਤਂ ਸੇਸੇਤ੍ਵਾ ਸਬ੍ਬਂ ਨ੍ਹਾਰੁਚਮ੍ਮਮਂਸਲੋਹਿਤਂ ਖਾਦਿ, ਅਵਸੇਸਾ ਯਕ੍ਖਾ ਮਹਾਦ੍ਵਾਰਤੋ ਪਟ੍ਠਾਯ ਅਨ੍ਤੋਨਿਵੇਸਨੇ ਕੁਕ੍ਕੁਟਕੁਕ੍ਕੁਰੇ ਆਦਿਂ ਕਤ੍ਵਾ ਸਬ੍ਬੇ ਖਾਦਿਤ੍ਵਾ ਅਟ੍ਠਿਮਤ੍ਤਸੇਸੇ ਅਕਂਸੁ.

ਪੁਨਦਿਵਸੇ ਦ੍ਵਾਰਂ ਯਥਾਪਿਹਿਤਮੇਵ ਦਿਸ੍ਵਾ ਮਨੁਸ੍ਸਾ ਫਰਸੂਹਿ ਕਵਾਟਾਨਿ ਕੋਟ੍ਟੇਤ੍ਵਾ ਅਨ੍ਤੋ ਪਵਿਸਿਤ੍ਵਾ ਸਬ੍ਬਂ ਨਿਵੇਸਨਂ ਅਟ੍ਠਿਕਪਰਿਕਿਣ੍ਣਂ ਦਿਸ੍ਵਾ ‘‘ਸਚ੍ਚਂ ਵਤ ਸੋ ਪੁਰਿਸੋ ਆਹ ‘ਨਾਯਂ ਮਯ੍ਹਂ ਪਜਾਪਤਿ, ਯਕ੍ਖਿਨੀ ਏਸਾ’ਤਿ. ਰਾਜਾ ਪਨ ਕਿਞ੍ਚਿ ਅਜਾਨਿਤ੍ਵਾ ਤਂ ਗਹੇਤ੍ਵਾ ਅਤ੍ਤਨੋ ਭਰਿਯਂ ਅਕਾਸਿ, ਸਾ ਯਕ੍ਖੇ ਪਕ੍ਕੋਸਿਤ੍ਵਾ ਸਬ੍ਬਂ ਜਨਂ ਖਾਦਿਤ੍ਵਾ ਗਤਾ ਭਵਿਸ੍ਸਤੀ’’ਤਿ ਆਹਂਸੁ. ਬੋਧਿਸਤ੍ਤੋਪਿ ਤਂ ਦਿਵਸਂ ਤਸ੍ਸਾਯੇਵ ਸਾਲਾਯਂ ਪਰਿਤ੍ਤਵਾਲੁਕਂ ਸੀਸੇ ਕਤ੍ਵਾ ਪਰਿਤ੍ਤਸੁਤ੍ਤਞ੍ਚ ਪਰਿਕ੍ਖਿਪਿਤ੍ਵਾ ਖਗ੍ਗਂ ਗਹੇਤ੍ਵਾ ਠਿਤਕੋਵ ਅਰੁਣਂ ਉਟ੍ਠਾਪੇਸਿ. ਮਨੁਸ੍ਸਾ ਸਕਲਰਾਜਨਿਵੇਸਨਂ ਸੋਧੇਤ੍ਵਾ ਹਰਿਤੂਪਲਿਤ੍ਤਂ ਕਤ੍ਵਾ ਉਪਰਿ ਗਨ੍ਧੇਹਿ ਵਿਲਿਮ੍ਪਿਤ੍ਵਾ ਪੁਪ੍ਫਾਨਿ ਵਿਕਿਰਿਤ੍ਵਾ ਪੁਪ੍ਫਦਾਮਾਨਿ ਓਸਾਰੇਤ੍ਵਾ ਧੂਮਂ ਦਤ੍ਵਾ ਨਵਮਾਲਾ ਬਨ੍ਧਿਤ੍ਵਾ ਸਮ੍ਮਨ੍ਤਯਿਂਸੁ ‘‘ਅਮ੍ਭੋ, ਯੋ ਪੁਰਿਸੋ ਦਿਬ੍ਬਰੂਪਂ ਮਾਪੇਤ੍ਵਾ ਪਚ੍ਛਤੋ ਆਗਚ੍ਛਨ੍ਤਿਂ ਯਕ੍ਖਿਨਿਂ ਇਨ੍ਦ੍ਰਿਯਾਨਿ ਭਿਨ੍ਦਿਤ੍ਵਾ ਓਲੋਕਨਮਤ੍ਤਮ੍ਪਿ ਨ ਅਕਾਸਿ, ਸੋ ਅਤਿਵਿਯ ਉਲ਼ਾਰਸਤ੍ਤੋ ਧਿਤਿਮਾ ਞਾਣਸਮ੍ਪਨ੍ਨੋ, ਤਾਦਿਸੇ ਪੁਰਿਸੇ ਰਜ੍ਜਂ ਅਨੁਸਾਸਨ੍ਤੇ ਸਬ੍ਬਰਟ੍ਠਂ ਸੁਖਿਤਂ ਭਵਿਸ੍ਸਤਿ, ਤਂ ਰਾਜਾਨਂ ਕਰੋਮਾ’’ਤਿ. ਅਥ ਸਬ੍ਬੇ ਅਮਚ੍ਚਾ ਚ ਨਾਗਰਾ ਚ ਏਕਚ੍ਛਨ੍ਦਾ ਹੁਤ੍ਵਾ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ‘‘ਦੇਵ, ਤੁਮ੍ਹੇ ਇਮਂ ਰਜ੍ਜਂ ਕਾਰੇਥਾ’’ਤਿ ਨਗਰਂ ਪਵੇਸੇਤ੍ਵਾ ਰਤਨਰਾਸਿਮ੍ਹਿ ਠਪੇਤ੍ਵਾ ਅਭਿਸਿਞ੍ਚਿਤ੍ਵਾ ਤਕ੍ਕਸਿਲਰਾਜਾਨਂ ਅਕਂਸੁ. ਸੋ ਚਤ੍ਤਾਰਿ ਅਗਤਿਗਮਨਾਨਿ ਵਜ੍ਜੇਤ੍ਵਾ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਅਤੀਤਂ ਆਹਰਿਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਂ ਗਾਥਮਾਹ –

੯੬. ‘‘ਸਮਤਿਤ੍ਤਿਕਂ ਅਨਵਸੇਸਕਂ, ਤੇਲਪਤ੍ਤਂ ਯਥਾ ਪਰਿਹਰੇਯ੍ਯ;

ਏਵਂ ਸਚਿਤ੍ਤਮਨੁਰਕ੍ਖੇ, ਪਤ੍ਥਯਾਨੋ ਦਿਸਂ ਅਗਤਪੁਬ੍ਬ’’ਨ੍ਤਿ.

ਤਤ੍ਥ ਸਮਤਿਤ੍ਤਿਕਨ੍ਤਿ ਅਨ੍ਤੋਮੁਖਵਟ੍ਟਿਲੇਖਂ ਪਾਪੇਤ੍ਵਾ ਸਮਭਰਿਤਂ. ਅਨਵਸੇਸਕਨ੍ਤਿ ਅਨਵਸਿਞ੍ਚਨਕਂ ਅਪਰਿਸ੍ਸਾਵਨਕਂ ਕਤ੍ਵਾ. ਤੇਲਪਤ੍ਤਨ੍ਤਿ ਪਕ੍ਖਿਤ੍ਤਤਿਲਤੇਲਪਤ੍ਤਂ. ਪਰਿਹਰੇਯ੍ਯਾਤਿ ਹਰੇਯ੍ਯ, ਆਦਾਯ ਗਚ੍ਛੇਯ੍ਯ. ਏਵਂ ਸਚਿਤ੍ਤਮਨੁਰਕ੍ਖੇਤਿ ਤਂ ਤੇਲਭਰਿਤਂ ਪਤ੍ਤਂ ਵਿਯ ਅਤ੍ਤਨੋ ਚਿਤ੍ਤਂ ਕਾਯਗਤਾਸਤਿਯਾ ਗੋਚਰੇ ਚੇਵ ਸਮ੍ਪਯੁਤ੍ਤਸਤਿਯਾ ਚਾਤਿ ਉਭਿਨ੍ਨਂ ਅਨ੍ਤਰੇ ਪਕ੍ਖਿਪਿਤ੍ਵਾ ਯਥਾ ਮੁਹੁਤ੍ਤਮ੍ਪਿ ਬਹਿਦ੍ਧਾ ਗੋਚਰੇ ਨ ਵਿਕ੍ਖਿਪਤਿ, ਤਥਾ ਪਣ੍ਡਿਤੋ ਯੋਗਾਵਚਰੋ ਰਕ੍ਖੇਯ੍ਯ ਗੋਪੇਯ੍ਯ. ਕਿਂਕਾਰਣਾ? ਏਤਸ੍ਸ ਹਿ –

‘‘ਦੁਨ੍ਨਿਗ੍ਗਹਸ੍ਸ ਲਹੁਨੋ, ਯਤ੍ਥਕਾਮਨਿਪਾਤਿਨੋ;

ਚਿਤ੍ਤਸ੍ਸ ਦਮਥੋ ਸਾਧੁ, ਚਿਤ੍ਤਂ ਦਨ੍ਤਂ ਸੁਖਾਵਹ’’ਨ੍ਤਿ. (ਧ. ਪ. ੩੫);

ਤਸ੍ਮਾ –

‘‘ਸੁਦੁਦ੍ਦਸਂ ਸੁਨਿਪੁਣਂ, ਯਤ੍ਥਕਾਮਨਿਪਾਤਿਨਂ;

ਚਿਤ੍ਤਂ ਰਕ੍ਖੇਥ ਮੇਧਾਵੀ, ਚਿਤ੍ਤਂ ਗੁਤ੍ਤਂ ਸੁਖਾਵਹਂ’’. (ਧ. ਪ. ੩੬);

ਇਦਞ੍ਹਿ –

‘‘ਦੂਰਙ੍ਗਮਂ ਏਕਚਰਂ, ਅਸਰੀਰਂ ਗੁਹਾਸਯਂ;

ਯੇ ਚਿਤ੍ਤਂ ਸਂਯਮੇਸ੍ਸਨ੍ਤਿ, ਮੋਕ੍ਖਨ੍ਤਿ ਮਾਰਬਨ੍ਧਨਾ’’. (ਧ. ਪ. ੩੭);

ਇਤਰਸ੍ਸ ਪਨ –

‘‘ਅਨਵਟ੍ਠਿਤਚਿਤ੍ਤਸ੍ਸ, ਸਦ੍ਧਮ੍ਮਂ ਅਵਿਜਾਨਤੋ;

ਪਰਿਪ੍ਲਵਪਸਾਦਸ੍ਸ, ਪਞ੍ਞਾ ਨ ਪਰਿਪੂਰਤਿ’’. (ਧ. ਪ. ੩੮);

ਥਿਰਕਮ੍ਮਟ੍ਠਾਨਸਹਾਯਸ੍ਸ ਪਨ –

‘‘ਅਨਵਸ੍ਸੁਤਚਿਤ੍ਤਸ੍ਸ, ਅਨਨ੍ਵਾਹਤਚੇਤਸੋ;

ਪੁਞ੍ਞਪਾਪਪਹੀਨਸ੍ਸ, ਨਤ੍ਥਿ ਜਾਗਰਤੋ ਭਯਂ’’. (ਧ. ਪ. ੩੯);

ਤਸ੍ਮਾ ਏਤਂ –

‘‘ਫਨ੍ਦਨਂ ਚਪਲਂ ਚਿਤ੍ਤਂ, ਦੂਰਕ੍ਖਂ ਦੁਨ੍ਨਿਵਾਰਯਂ;

ਉਜੁਂ ਕਰੋਤਿ ਮੇਧਾਵੀ, ਉਸੁਕਾਰੋਵ ਤੇਜਨਂ’’. (ਧ. ਪ. ੩੩);

ਏਵਂ ਉਜੁਂ ਕਰੋਨ੍ਤੋ ਸਚਿਤ੍ਤਮਨੁਰਕ੍ਖੇ.

ਪਤ੍ਥਯਾਨੋ ਦਿਸਂ ਅਗਤਪੁਬ੍ਬਨ੍ਤਿ ਇਮਸ੍ਮਿਂ ਕਾਯਗਤਾਸਤਿਕਮ੍ਮਟ੍ਠਾਨੇ ਕਮ੍ਮਂ ਆਰਭਿਤ੍ਵਾ ਅਨਮਤਗ੍ਗੇ ਸਂਸਾਰੇ ਅਗਤਪੁਬ੍ਬਂ ਦਿਸਂ ਪਤ੍ਥੇਨ੍ਤੋ ਪਿਹੇਨ੍ਤੋ ਵੁਤ੍ਤਨਯੇਨ ਸਕਂ ਚਿਤ੍ਤਂ ਰਕ੍ਖੇਯ੍ਯਾਤਿ ਅਤ੍ਥੋ. ਕਾ ਪਨੇਸਾ ਦਿਸਾ ਨਾਮ? –

‘‘ਮਾਤਾਪਿਤਾ ਦਿਸਾ ਪੁਬ੍ਬਾ, ਆਚਰਿਯਾ ਦਕ੍ਖਿਣਾ ਦਿਸਾ;

ਪੁਤ੍ਤਦਾਰਾ ਦਿਸਾ ਪਚ੍ਛਾ, ਮਿਤ੍ਤਾਮਚ੍ਚਾ ਚ ਉਤ੍ਤਰਾ.

‘‘ਦਾਸਕਮ੍ਮਕਰਾ ਹੇਟ੍ਠਾ, ਉਦ੍ਧਂ ਸਮਣਬ੍ਰਾਹ੍ਮਣਾ;

ਏਤਾ ਦਿਸਾ ਨਮਸ੍ਸੇਯ੍ਯ, ਅਲਮਤ੍ਤੋ ਕੁਲੇ ਗਿਹੀ’’ਤਿ. (ਦੀ. ਨਿ. ੩.੨੭੩) –

ਏਤ੍ਥ ਤਾਵ ਪੁਤ੍ਤਦਾਰਾਦਯੋ ‘‘ਦਿਸਾ’’ਤਿ ਵੁਤ੍ਤਾ.

‘‘ਦਿਸਾ ਚਤਸ੍ਸੋ ਵਿਦਿਸਾ ਚਤਸ੍ਸੋ, ਉਦ੍ਧਂ ਅਧੋ ਦਸ ਦਿਸਾ ਇਮਾਯੋ;

ਕਤਮਂ ਦਿਸਂ ਤਿਟ੍ਠਤਿ ਨਾਗਰਾਜਾ, ਯਮਦ੍ਦਸਾ ਸੁਪਿਨੇ ਛਬ੍ਬਿਸਾਣ’’ਨ੍ਤਿ. (ਜਾ. ੧.੧੬.੧੦੪) –

ਏਤ੍ਥ ਪੁਰਤ੍ਥਿਮਾਦਿਭੇਦਾ ਦਿਸਾਵ ‘‘ਦਿਸਾ’’ਤਿ ਵੁਤ੍ਤਾ.

‘‘ਅਗਾਰਿਨੋ ਅਨ੍ਨਦਪਾਨਵਤ੍ਥਦਾ, ਅਵ੍ਹਾਯਿਕਾ ਤਮ੍ਪਿ ਦਿਸਂ ਵਦਨ੍ਤਿ;

ਏਸਾ ਦਿਸਾ ਪਰਮਾ ਸੇਤਕੇਤੁ, ਯਂ ਪਤ੍ਵਾ ਦੁਕ੍ਖੀ ਸੁਖਿਨੋ ਭਵਨ੍ਤੀ’’ਤਿ. (ਜਾ. ੧.੬.੯) –

ਏਤ੍ਥ ਪਨ ਨਿਬ੍ਬਾਨਂ ‘‘ਦਿਸਾ’’ਤਿ ਵੁਤ੍ਤਂ. ਇਧਾਪਿ ਤਦੇਵ ਅਧਿਪ੍ਪੇਤਂ. ਤਞ੍ਹਿ ‘‘ਖਯਂ ਵਿਰਾਗ’’ਨ੍ਤਿਆਦੀਹਿ ਦਿਸ੍ਸਤਿ ਅਪਦਿਸ੍ਸਤਿ, ਤਸ੍ਮਾ ‘‘ਦਿਸਾ’’ਤਿ ਵੁਚ੍ਚਤਿ. ਅਨਮਤਗ੍ਗੇ ਪਨ ਸਂਸਾਰੇ ਕੇਨਚਿ ਬਾਲਪੁਥੁਜ੍ਜਨੇਨ ਸੁਪਿਨੇਨਪਿ ਅਗਤਪੁਬ੍ਬਤਾਯ ਅਗਤਪੁਬ੍ਬਾ ਦਿਸਾ ਨਾਮਾਤਿ ਵੁਤ੍ਤਂ. ਤਂ ਪਤ੍ਥਯਨ੍ਤੇਨ ਕਾਯਗਤਾਸਤਿਯਾ ਯੋਗੋ ਕਰਣੀਯੋਤਿ.

ਏਵਂ ਸਤ੍ਥਾ ਨਿਬ੍ਬਾਨੇਨ ਦੇਸਨਾਯ ਕੂਟਂ ਗਹੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਪਰਿਸਾ ਬੁਦ੍ਧਪਰਿਸਾ ਅਹੋਸਿ, ਰਜ੍ਜਪ੍ਪਤ੍ਤਕੁਮਾਰੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਤੇਲਪਤ੍ਤਜਾਤਕਵਣ੍ਣਨਾ ਛਟ੍ਠਾ.

[੯੭] ੭. ਨਾਮਸਿਦ੍ਧਿਜਾਤਕਵਣ੍ਣਨਾ

ਜੀਵਕਞ੍ਚ ਮਤਂ ਦਿਸ੍ਵਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਨਾਮਸਿਦ੍ਧਿਕਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਏਕੋ ਕਿਰ ਕੁਲਪੁਤ੍ਤੋ ਨਾਮੇਨ ਪਾਪਕੋ ਨਾਮ. ਸੋ ਸਾਸਨੇ ਉਰਂ ਦਤ੍ਵਾ ਪਬ੍ਬਜਿਤੋ ਭਿਕ੍ਖੂਹਿ ‘‘ਏਹਾਵੁਸੋ, ਪਾਪਕ, ਤਿਟ੍ਠਾਵੁਸੋ, ਪਾਪਕਾ’’ਤਿ ਵੁਚ੍ਚਮਾਨੋ ਚਿਨ੍ਤੇਸਿ ‘‘ਲੋਕੇ ਪਾਪਕਂ ਨਾਮ ਲਾਮਕਂ ਕਾਲ਼ਕਣ੍ਣਿਭੂਤਂ ਵੁਚ੍ਚਤਿ, ਅਞ੍ਞਂ ਮਙ੍ਗਲਪਟਿਸਂਯੁਤ੍ਤਂ ਨਾਮਂ ਆਹਰਾਪੇਸ੍ਸਾਮੀ’’ਤਿ. ਸੋ ਆਚਰਿਯੁਪਜ੍ਝਾਯੇ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਮਯ੍ਹਂ ਨਾਮਂ ਅਵਮਙ੍ਗਲਂ, ਅਞ੍ਞਂ ਮੇ ਨਾਮਂ ਕਰੋਥਾ’’ਤਿ ਆਹ. ਅਥ ਨਂ ਤੇ ਏਵਮਾਹਂਸੁ – ‘‘ਆਵੁਸੋ, ਨਾਮਂ ਨਾਮ ਪਣ੍ਣਤ੍ਤਿਮਤ੍ਤਂ, ਨਾਮੇਨ ਕਾਚਿ ਅਤ੍ਥਸਿਦ੍ਧਿ ਨਾਮ ਨਤ੍ਥਿ, ਅਤ੍ਤਨੋ ਨਾਮੇਨੇਵ ਸਨ੍ਤੁਟ੍ਠੋ ਹੋਹੀ’’ਤਿ. ਸੋ ਪੁਨਪ੍ਪੁਨਂ ਯਾਚਿਯੇਵ. ਤਸ੍ਸਾਯਂ ਨਾਮਸਿਦ੍ਧਿਕਭਾਵੋ ਭਿਕ੍ਖੁਸਙ੍ਘੇ ਪਾਕਟੋ ਜਾਤੋ. ਅਥੇਕਦਿਵਸਂ ਧਮ੍ਮਸਭਾਯਂ ਸਨ੍ਨਿਸਿਨ੍ਨਾ ਭਿਕ੍ਖੂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਅਸੁਕੋ ਕਿਰ ਭਿਕ੍ਖੁ ਨਾਮਸਿਦ੍ਧਿਕੋ ਮਙ੍ਗਲਂ ਨਾਮਂ ਆਹਰਾਪੇਤੀ’’ਤਿ. ਅਥ ਸਤ੍ਥਾ ਧਮ੍ਮਸਭਂ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਸੋ ਇਦਾਨੇਵ, ਪੁਬ੍ਬੇਪਿ ਨਾਮਸਿਦ੍ਧਿਕੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਤਕ੍ਕਸਿਲਾਯਂ ਬੋਧਿਸਤ੍ਤੋ ਦਿਸਾਪਾਮੋਕ੍ਖੋ ਆਚਰਿਯੋ ਹੁਤ੍ਵਾ ਪਞ੍ਚ ਮਾਣਵਕਸਤਾਨਿ ਮਨ੍ਤੇ ਵਾਚੇਸਿ. ਤਸ੍ਸੇਕੋ ਮਾਣਵੋ ਪਾਪਕੋ ਨਾਮ ਨਾਮੇਨ. ਸੋ ‘‘ਏਹਿ, ਪਾਪਕ, ਯਾਹਿ, ਪਾਪਕਾ’’ਤਿ ਵੁਚ੍ਚਮਾਨੋ ਚਿਨ੍ਤੇਸਿ ‘‘ਮਯ੍ਹਂ ਨਾਮਂ ਅਵਮਙ੍ਗਲਂ, ਅਞ੍ਞਂ ਨਾਮਂ ਆਹਰਾਪੇਸ੍ਸਾਮੀ’’ਤਿ. ਸੋ ਆਚਰਿਯਂ ਉਪਸਙ੍ਕਮਿਤ੍ਵਾ ‘‘ਆਚਰਿਯ, ਮਯ੍ਹਂ ਨਾਮਂ ਅਵਮਙ੍ਗਲਂ, ਅਞ੍ਞਂ ਮੇ ਨਾਮਂ ਕਰੋਥਾ’’ਤਿ ਆਹ. ਅਥ ਨਂ ਆਚਰਿਯੋ ਅਵੋਚ ‘‘ਗਚ੍ਛ, ਤਾਤ, ਜਨਪਦਚਾਰਿਕਂ ਚਰਿਤ੍ਵਾ ਅਤ੍ਤਨੋ ਅਭਿਰੁਚਿਤਂ ਏਕਂ ਮਙ੍ਗਲਨਾਮਂ ਗਹੇਤ੍ਵਾ ਏਹਿ, ਆਗਤਸ੍ਸ ਤੇ ਨਾਮਂ ਪਰਿਵਤ੍ਤੇਤ੍ਵਾ ਅਞ੍ਞਂ ਨਾਮਂ ਕਰਿਸ੍ਸਾਮੀ’’ਤਿ. ਸੋ ‘‘ਸਾਧੂ’’ਤਿ ਪਾਥੇਯ੍ਯਂ ਗਹੇਤ੍ਵਾ ਨਿਕ੍ਖਨ੍ਤੋ ਗਾਮੇਨ ਗਾਮਂ ਚਰਨ੍ਤੋ ਏਕਂ ਨਗਰਂ ਪਾਪੁਣਿ. ਤਤ੍ਥ ਚੇਕੋ ਪੁਰਿਸੋ ਕਾਲਕਤੋ ਜੀਵਕੋ ਨਾਮ ਨਾਮੇਨ. ਸੋ ਤਂ ਞਾਤਿਜਨੇਨ ਆਲ਼ਾਹਨਂ ਨੀਯਮਾਨਂ ਦਿਸ੍ਵਾ ‘‘ਕਿਂ ਨਾਮਕੋ ਏਸ ਪੁਰਿਸੋ’’ਤਿ ਪੁਚ੍ਛਿ. ‘‘ਜੀਵਕੋ ਨਾਮੇਸੋ’’ਤਿ. ‘‘ਜੀਵਕੋਪਿ ਮਰਤੀ’’ਤਿ? ‘‘ਜੀਵਕੋਪਿ ਮਰਤਿ, ਅਜੀਵਕੋਪਿ ਮਰਤਿ, ਨਾਮਂ ਨਾਮ ਪਣ੍ਣਤ੍ਤਿਮਤ੍ਤਂ, ਤ੍ਵਂ ਬਾਲੋ ਮਞ੍ਞੇ’’ਤਿ. ਸੋ ਤਂ ਕਥਂ ਸੁਤ੍ਵਾ ਨਾਮੇ ਮਜ੍ਝਤ੍ਤੋ ਹੁਤ੍ਵਾ ਅਨ੍ਤੋਨਗਰਂ ਪਾਵਿਸਿ.

ਅਥੇਕਂ ਦਾਸਿਂ ਭਤਿਂ ਅਦਦਮਾਨਂ ਸਾਮਿਕਾ ਦ੍ਵਾਰੇ ਨਿਸੀਦਾਪੇਤ੍ਵਾ ਰਜ੍ਜੁਯਾ ਪਹਰਨ੍ਤਿ, ਤਸ੍ਸਾ ਚ ‘‘ਧਨਪਾਲੀ’’ਤਿ ਨਾਮਂ ਹੋਤਿ. ਸੋ ਅਨ੍ਤਰਵੀਥਿਯਾ ਗਚ੍ਛਨ੍ਤੋ ਤਂ ਪੋਥਿਯਮਾਨਂ ਦਿਸ੍ਵਾ ‘‘ਕਸ੍ਮਾ ਇਮਂ ਪੋਥੇਥਾ’’ਤਿ ਪੁਚ੍ਛਿ. ‘‘ਭਤਿਂ ਦਾਤੁਂ ਨ ਸਕ੍ਕੋਤੀ’’ਤਿ. ‘‘ਕਿਂ ਪਨਸ੍ਸਾ ਨਾਮ’’ਨ੍ਤਿ? ‘‘ਧਨਪਾਲੀ ਨਾਮਾ’’ਤਿ. ਨਾਮੇਨ ਧਨਪਾਲੀ ਸਮਾਨਾਪਿ ਭਤਿਮਤ੍ਤਂ ਦਾਤੁਂ ਨ ਸਕ੍ਕੋਤੀਤਿ ਧਨਪਾਲਿਯੋਪਿ ਅਧਨਪਾਲਿਯੋਪਿ ਦੁਗ੍ਗਤਾ ਹੋਨ੍ਤਿ, ਨਾਮਂ ਨਾਮ ਪਣ੍ਣਤ੍ਤਿਮਤ੍ਤਂ, ਤ੍ਵਂ ਬਾਲੋ ਮਞ੍ਞੇਤਿ. ਸੋ ਨਾਮੇ ਮਜ੍ਝਤ੍ਤਤਰੋ ਹੁਤ੍ਵਾ ਨਗਰਾ ਨਿਕ੍ਖਮ੍ਮ ਮਗ੍ਗਂ ਪਟਿਪਨ੍ਨੋ ਅਨ੍ਤਰਾਮਗ੍ਗੇ ਮਗ੍ਗਮੂਲ਼੍ਹਪੁਰਿਸਂ ਦਿਸ੍ਵਾ ‘‘ਅਮ੍ਭੋ ਕਿਂ ਕਰੋਨ੍ਤੋ ਵਿਚਰਸੀ’’ਤਿ ਪੁਚ੍ਛਿ. ‘‘ਮਗ੍ਗਮੂਲ਼੍ਹੋਮ੍ਹਿ, ਸਾਮੀ’’ਤਿ. ‘‘ਕਿਂ ਪਨ ਤੇ ਨਾਮ’’ਨ੍ਤਿ? ‘‘ਪਨ੍ਥਕੋ ਨਾਮਾ’’ਤਿ. ‘‘ਪਨ੍ਥਕੋਪਿ ਮਗ੍ਗਮੂਲ਼੍ਹੋ ਹੋਤੀ’’ਤਿ? ‘‘ਪਨ੍ਥਕੋਪਿ ਅਪਨ੍ਥਕੋਪਿ ਮਗ੍ਗਮੂਲ਼੍ਹੋ ਹੋਤਿ, ਨਾਮਂ ਨਾਮ ਪਣ੍ਣਤ੍ਤਿਮਤ੍ਤਂ ਤ੍ਵਂ ਪਨ ਬਾਲੋ ਮਞ੍ਞੇਤਿ’’. ਸੋ ਨਾਮੇ ਅਤਿਮਜ੍ਝਤ੍ਤੋ ਹੁਤ੍ਵਾ ਬੋਧਿਸਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਕਿਂ, ਤਾਤ, ਨਾਮਂ ਰੋਚੇਤ੍ਵਾ ਆਗਤੋਸੀ’’ਤਿ ਵੁਤ੍ਤੇ ‘‘ਆਚਰਿਯ, ਜੀਵਕਾਪਿ ਨਾਮ ਮਰਨ੍ਤਿ ਅਜੀਵਕਾਪਿ, ਧਨਪਾਲਿਯੋਪਿ ਦੁਗ੍ਗਤਾ ਹੋਨ੍ਤਿ ਅਧਨਪਾਲਿਯੋਪਿ, ਪਨ੍ਥਕਾਪਿ ਮਗ੍ਗਮੂਲ਼੍ਹਾ ਹੋਨ੍ਤਿ ਅਪਨ੍ਥਕਾਪਿ, ਨਾਮਂ ਨਾਮ ਪਣ੍ਣਤ੍ਤਿਮਤ੍ਤਂ, ਨਾਮੇਨ ਸਿਦ੍ਧਿ ਨਤ੍ਥਿ, ਕਮ੍ਮੇਨੇਵ ਸਿਦ੍ਧਿ. ਅਲਂ ਮਯ੍ਹਂ ਅਞ੍ਞੇਨ ਨਾਮੇਨ, ਤਦੇਵ ਮੇ ਨਾਮਂ ਹੋਤੂ’’ਤਿ ਆਹ. ਬੋਧਿਸਤ੍ਤੋ ਤੇਨ ਦਿਟ੍ਠਞ੍ਚ ਕਤਞ੍ਚ ਸਂਸਨ੍ਦੇਤ੍ਵਾ ਇਮਂ ਗਾਥਮਾਹ –

੯੭. ‘‘ਜੀਵਕਞ੍ਚ ਮਤਂ ਦਿਸ੍ਵਾ, ਧਨਪਾਲਿਞ੍ਚ ਦੁਗ੍ਗਤਂ;

ਪਨ੍ਥਕਞ੍ਚ ਵਨੇ ਮੂਲ਼੍ਹਂ, ਪਾਪਕੋ ਪੁਨਰਾਗਤੋ’’ਤਿ.

ਤਤ੍ਥ ਪੁਨਰਾਗਤੋਤਿ ਇਮਾਨਿ ਤੀਣਿ ਕਾਰਣਾਨਿ ਦਿਸ੍ਵਾ ਪੁਨ ਆਗਤੋ, ਰ-ਕਾਰੋ ਸਨ੍ਧਿਵਸੇਨ ਵੁਤ੍ਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਸ ਨਾਮਸਿਦ੍ਧਿਕੋਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਨਾਮਸਿਦ੍ਧਿਕੋ ਇਦਾਨਿਪਿ ਨਾਮਸਿਦ੍ਧਿਕੋਯੇਵ, ਆਚਰਿਯਪਰਿਸਾ ਬੁਦ੍ਧਪਰਿਸਾ, ਆਚਰਿਯੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਨਾਮਸਿਦ੍ਧਿਜਾਤਕਵਣ੍ਣਨਾ ਸਤ੍ਤਮਾ.

[੯੮] ੮. ਕੂਟਵਾਣਿਜਜਾਤਕਵਣ੍ਣਨਾ

ਸਾਧੁ ਖੋ ਪਣ੍ਡਿਤੋ ਨਾਮਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਕੂਟਵਾਣਿਜਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਞ੍ਹਿ ਦ੍ਵੇ ਜਨਾ ਏਕਤੋ ਵਣਿਜ੍ਜਂ ਕਰੋਨ੍ਤਾ ਭਣ੍ਡਂ ਸਕਟੇਨਾਦਾਯ ਜਨਪਦਂ ਗਨ੍ਤ੍ਵਾ ਲਦ੍ਧਲਾਭਾ ਪਚ੍ਚਾਗਮਿਂਸੁ. ਤੇਸੁ ਕੂਟਵਾਣਿਜੋ ਚਿਨ੍ਤੇਸਿ ‘‘ਅਯਂ ਬਹੂ ਦਿਵਸੇ ਦੁਬ੍ਭੋਜਨੇਨ ਦੁਕ੍ਖਸੇਯ੍ਯਾਯ ਕਿਲਨ੍ਤੋ, ਇਦਾਨਿ ਅਤ੍ਤਨੋ ਘਰੇ ਨਾਨਗ੍ਗਰਸੇਹਿ ਯਾਵਦਤ੍ਥਂ ਸੁਭੋਜਨਂ ਭੁਞ੍ਜਿਤ੍ਵਾ ਅਜੀਰਕੇਨ ਮਰਿਸ੍ਸਤਿ. ਅਥਾਹਂ ਇਮਂ ਭਣ੍ਡਂ ਤਯੋ ਕੋਟ੍ਠਾਸੇ ਕਤ੍ਵਾ ਏਕਂ ਤਸ੍ਸ ਦਾਰਕਾਨਂ ਦਸ੍ਸਾਮਿ, ਦ੍ਵੇ ਕੋਟ੍ਠਾਸੇ ਅਤ੍ਤਨਾ ਗਹੇਸ੍ਸਾਮੀ’’ਤਿ. ਸੋ ‘‘ਅਜ੍ਜ ਭਾਜੇਸ੍ਸਾਮ, ਸ੍ਵੇ ਭਾਜੇਸ੍ਸਾਮਾ’’ਤਿ ਭਣ੍ਡਂ ਭਾਜੇਤੁਂ ਨ ਇਚ੍ਛਿ. ਅਥ ਨਂ ਪਣ੍ਡਿਤਵਾਣਿਜੋ ਅਕਾਮਕਂ ਨਿਪ੍ਪੀਲ਼ੇਤ੍ਵਾ ਭਾਜਾਪੇਤ੍ਵਾ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਕਤਪਟਿਸਨ੍ਥਾਰੋ ‘‘ਅਤਿਪਪਞ੍ਚੋ ਤੇ ਕਤੋ, ਇਧਾਗਨ੍ਤ੍ਵਾਪਿ ਚਿਰੇਨ ਬੁਦ੍ਧੁਪਟ੍ਠਾਨਂ ਆਗਤੋਸੀ’’ਤਿ ਵੁਤ੍ਤੇ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਸਤ੍ਥਾ ‘‘ਨ ਖੋ ਸੋ, ਉਪਾਸਕ, ਇਦਾਨੇਵ ਕੂਟਵਾਣਿਜੋ, ਪੁਬ੍ਬੇਪਿ ਕੂਟਵਾਣਿਜੋਯੇਵ. ਇਦਾਨਿ ਪਨ ਤਂ ਵਞ੍ਚੇਤੁਕਾਮੋ ਜਾਤੋ, ਪੁਬ੍ਬੇ ਪਣ੍ਡਿਤੇਪਿ ਵਞ੍ਚੇਤੁਂ ਉਸ੍ਸਹੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਬਾਰਾਣਸਿਯਂ ਵਾਣਿਜਕੁਲੇ ਨਿਬ੍ਬਤ੍ਤਿ, ਨਾਮਗ੍ਗਹਣਦਿਵਸੇ ਚਸ੍ਸ ‘‘ਪਣ੍ਡਿਤੋ’’ਤਿ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਅਞ੍ਞੇਨ ਵਾਣਿਜੇਨ ਸਦ੍ਧਿਂ ਏਕਤੋ ਹੁਤ੍ਵਾ ਵਣਿਜ੍ਜਂ ਕਰੋਤਿ, ਤਸ੍ਸ ‘‘ਅਤਿਪਣ੍ਡਿਤੋ’’ਤਿ ਨਾਮਂ ਅਹੋਸਿ. ਤੇ ਬਾਰਾਣਸਿਤੋ ਪਞ੍ਚਹਿ ਸਕਟਸਤੇਹਿ ਭਣ੍ਡਂ ਆਦਾਯ ਜਨਪਦਂ ਗਨ੍ਤ੍ਵਾ ਵਣਿਜ੍ਜਂ ਕਤ੍ਵਾ ਲਦ੍ਧਲਾਭਾ ਪੁਨ ਬਾਰਾਣਸਿਂ ਆਗਮਿਂਸੁ. ਅਥ ਨੇਸਂ ਭਣ੍ਡਭਾਜਨਕਾਲੇ ਅਤਿਪਣ੍ਡਿਤੋ ਆਹ ‘‘ਮਯਾ ਦ੍ਵੇ ਕੋਟ੍ਠਾਸਾ ਲਦ੍ਧਬ੍ਬਾ’’ਤਿ. ‘‘ਕਿਂਕਾਰਣਾ’’ਤਿ? ‘‘ਤ੍ਵਂ ਪਣ੍ਡਿਤੋ, ਅਹਂ ਅਤਿਪਣ੍ਡਿਤੋ. ਪਣ੍ਡਿਤੋ ਏਕਂ ਲਦ੍ਧੁਂ ਅਰਹਤਿ, ਅਤਿਪਣ੍ਡਿਤੋ ਦ੍ਵੇ’’ਤਿ. ‘‘ਨਨੁ ਅਮ੍ਹਾਕਂ ਦ੍ਵਿਨ੍ਨਂ ਭਣ੍ਡਮੂਲਕਮ੍ਪਿ ਗੋਣਾਦਯੋਪਿ ਸਮਸਮਾਯੇਵ, ਤ੍ਵਂ ਕਸ੍ਮਾ ਦ੍ਵੇ ਕੋਟ੍ਠਾਸੇ ਲਦ੍ਧੁਂ ਅਰਹਸੀ’’ਤਿ. ‘‘ਅਤਿਪਣ੍ਡਿਤਭਾਵੇਨਾ’’ਤਿ. ਏਵਂ ਤੇ ਕਥਂ ਵਡ੍ਢੇਤ੍ਵਾ ਕਲਹਂ ਅਕਂਸੁ.

ਤਤੋ ਅਤਿਪਣ੍ਡਿਤੋ ‘‘ਅਤ੍ਥੇਕੋ ਉਪਾਯੋ’’ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਪਿਤਰਂ ਏਕਸ੍ਮਿਂ ਸੁਸਿਰਰੁਕ੍ਖੇ ਪਵੇਸੇਤ੍ਵਾ ‘‘ਤ੍ਵਂ ਅਮ੍ਹੇਸੁ ਆਗਤੇਸੁ ‘ਅਤਿਪਣ੍ਡਿਤੋ ਦ੍ਵੇ ਕੋਟ੍ਠਾਸੇ ਲਦ੍ਧੁਂ ਅਰਹਤੀ’ਤਿ ਵਦੇਯ੍ਯਾਸੀ’’ਤਿ ਵਤ੍ਵਾ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ‘‘ਸਮ੍ਮ, ਮਯ੍ਹਂ ਦ੍ਵਿਨ੍ਨਂ ਕੋਟ੍ਠਾਸਾਨਂ ਯੁਤ੍ਤਭਾਵਂ ਵਾ ਅਯੁਤ੍ਤਭਾਵਂ ਵਾ ਏਸਾ ਰੁਕ੍ਖਦੇਵਤਾ ਜਾਨਾਤਿ, ਏਹਿ, ਤਂ ਪੁਚ੍ਛਿਸ੍ਸਾਮਾ’’ਤਿ ਤਂ ਤਤ੍ਥ ਨੇਤ੍ਵਾ ‘‘ਅਯ੍ਯੇ ਰੁਕ੍ਖਦੇਵਤੇ, ਅਮ੍ਹਾਕਂ ਅਟ੍ਟਂ ਪਚ੍ਛਿਨ੍ਦਾ’’ਤਿ ਆਹ. ਅਥਸ੍ਸ ਪਿਤਾ ਸਰਂ ਪਰਿਵਤ੍ਤੇਤ੍ਵਾ ‘‘ਤੇਨ ਹਿ ਕਥੇਥਾ’’ਤਿ ਆਹ. ‘‘ਅਯ੍ਯੇ, ਅਯਂ ਪਣ੍ਡਿਤੋ, ਅਹਂ ਅਤਿਪਣ੍ਡਿਤੋ. ਅਮ੍ਹੇਹਿ ਏਕਤੋ ਵੋਹਾਰੋ ਕਤੋ, ਤਤ੍ਥ ਕੇਨ ਕਿਂ ਲਦ੍ਧਬ੍ਬਨ੍ਤਿ. ਪਣ੍ਡਿਤੇਨ ਏਕੋ ਕੋਟ੍ਠਾਸੋ, ਅਤਿਪਣ੍ਡਿਤੇਨ ਪਨ ਦ੍ਵੇ ਕੋਟ੍ਠਾਸਾ ਲਦ੍ਧਬ੍ਬਾ’’ਤਿ. ਬੋਧਿਸਤ੍ਤੋ ਏਵਂ ਵਿਨਿਚ੍ਛਿਤਂ ਅਟ੍ਟਂ ਸੁਤ੍ਵਾ ‘‘ਇਦਾਨਿ ਦੇਵਤਾਭਾਵਂ ਵਾ ਅਦੇਵਤਾਭਾਵਂ ਵਾ ਜਾਨਿਸ੍ਸਾਮੀ’’ਤਿ ਪਲਾਲਂ ਆਹਰਿਤ੍ਵਾ ਸੁਸਿਰਂ ਪੂਰੇਤ੍ਵਾ ਅਗ੍ਗਿਂ ਅਦਾਸਿ, ਅਤਿਪਣ੍ਡਿਤਸ੍ਸ ਪਿਤਾ ਜਾਲਾਯ ਫੁਟ੍ਠਕਾਲੇ ਅਡ੍ਢਜ੍ਝਾਮੇਨ ਸਰੀਰੇਨ ਉਪਰਿ ਆਰੁਯ੍ਹ ਸਾਖਂ ਗਹੇਤ੍ਵਾ ਓਲਮ੍ਬਨ੍ਤੋ ਭੂਮਿਯਂ ਪਤਿਤ੍ਵਾ ਇਮਂ ਗਾਥਮਾਹ –

੯੮. ‘‘ਸਾਧੁ ਖੋ ਪਣ੍ਡਿਤੋ ਨਾਮ, ਨ ਤ੍ਵੇਵ ਅਤਿਪਣ੍ਡਿਤੋ;

ਅਤਿਪਣ੍ਡਿਤੇਨ ਪੁਤ੍ਤੇਨ, ਮਨਮ੍ਹਿ ਉਪਕੂਲ਼ਿਤੋ’’ਤਿ.

ਤਤ੍ਥ ਸਾਧੁ ਖੋ ਪਣ੍ਡਿਤੋ ਨਾਮਾਤਿ ਇਮਸ੍ਮਿਂ ਲੋਕੇ ਪਣ੍ਡਿਚ੍ਚੇਨ ਸਮਨ੍ਨਾਗਤੋ ਕਾਰਣਾਕਾਰਣਞ੍ਞੂ ਪੁਗ੍ਗਲੋ ਸਾਧੁ ਸੋਭਨੋ. ਅਤਿਪਣ੍ਡਿਤੋਤਿ ਨਾਮਮਤ੍ਤੇਨ ਅਤਿਪਣ੍ਡਿਤੋ ਕੂਟਪੁਰਿਸੋ ਨ ਤ੍ਵੇਵ ਵਰਂ. ਮਨਮ੍ਹਿ ਉਪਕੂਲ਼ਿਤੋਤਿ ਥੋਕੇਨਮ੍ਹਿ ਝਾਮੋ, ਅਡ੍ਢਜ੍ਝਾਮਕੋਵ ਮੁਤ੍ਤੋਤਿ ਅਤ੍ਥੋ. ਤੇ ਉਭੋਪਿ ਮਜ੍ਝੇ ਭਿਨ੍ਦਿਤ੍ਵਾ ਸਮਞ੍ਞੇਵ ਕੋਟ੍ਠਾਸਂ ਗਣ੍ਹਿਤ੍ਵਾ ਯਥਾਕਮ੍ਮਂ ਗਤਾ.

ਸਤ੍ਥਾ ‘‘ਪੁਬ੍ਬੇਪਿ ਏਸ ਕੂਟਵਾਣਿਜੋਯੇਵਾ’’ਤਿ ਇਮਂ ਅਤੀਤਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕੂਟਵਾਣਿਜੋ ਪਚ੍ਚੁਪ੍ਪਨ੍ਨੇਪਿ ਕੂਟਵਾਣਿਜੋਯੇਵ, ਪਣ੍ਡਿਤਵਾਣਿਜੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕੂਟਵਾਣਿਜਜਾਤਕਵਣ੍ਣਨਾ ਅਟ੍ਠਮਾ.

[੯੯] ੯. ਪਰੋਸਹਸ੍ਸਜਾਤਕਵਣ੍ਣਨਾ

ਪਰੋਸਹਸ੍ਸਮ੍ਪਿ ਸਮਾਗਤਾਨਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪੁਥੁਜ੍ਜਨਪੁਚ੍ਛਾਪਞ੍ਚਕਂ ਆਰਬ੍ਭ ਕਥੇਸਿ. ਵਤ੍ਥੁ ਸਰਭਜਾਤਕੇ (ਜਾ. ੧.੧੩.੧੩੪ ਆਦਯੋ) ਆਵਿ ਭਵਿਸ੍ਸਤਿ. ਏਕਸ੍ਮਿਂ ਪਨ ਸਮਯੇ ਭਿਕ੍ਖੂ ਧਮ੍ਮਸਭਾਯਂ ਸਨ੍ਨਿਪਤਿਤ੍ਵਾ ‘‘ਆਵੁਸੋ, ਦਸਬਲੇਨ ਸਂਖਿਤ੍ਤੇਨ ਕਥਿਤਂ ਧਮ੍ਮਸੇਨਾਪਤਿ ਸਾਰਿਪੁਤ੍ਤੋ ਵਿਤ੍ਥਾਰੇਨ ਬ੍ਯਾਕਾਸੀ’’ਤਿ ਥੇਰਸ੍ਸ ਗੁਣਂ ਕਥਯਮਾਨਾ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਸਾਰਿਪੁਤ੍ਤੋ ਇਦਾਨੇਵ ਮਯਾ ਸਂਖਿਤ੍ਤੇਨ ਭਾਸਿਤਂ ਵਿਤ੍ਥਾਰੇਨ ਬ੍ਯਾਕਰੋਤਿ, ਪੁਬ੍ਬੇਪਿ ਬ੍ਯਾਕਾਸਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਉਦਿਚ੍ਚਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਤਕ੍ਕਸਿਲਾਯਂ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਕਾਮੇ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਪਞ੍ਚਾਭਿਞ੍ਞਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਹਿਮਵਨ੍ਤੇ ਵਿਹਾਸਿ. ਪਰਿਵਾਰੋਪਿਸ੍ਸ ਪਞ੍ਚ ਤਾਪਸਸਤਾਨਿ ਅਹੇਸੁਂ. ਅਥਸ੍ਸ ਜੇਟ੍ਠਨ੍ਤੇਵਾਸਿਕੋ ਵਸ੍ਸਾਰਤ੍ਤਸਮਯੇ ਉਪਡ੍ਢਂ ਇਸਿਗਣਂ ਆਦਾਯ ਲੋਣਮ੍ਬਿਲਸੇਵਨਤ੍ਥਾਯ ਮਨੁਸ੍ਸਪਥਂ ਅਗਮਾਸਿ. ਤਦਾ ਬੋਧਿਸਤ੍ਤਸ੍ਸ ਕਾਲਕਿਰਿਯਾਸਮਯੋ ਜਾਤੋ. ਅਥ ਨਂ ਅਨ੍ਤੇਵਾਸਿਕਾ ‘‘ਆਚਰਿਯ, ਕਤਰੋ ਵੋ ਗੁਣੋ ਲਦ੍ਧੋ’’ਤਿ ਅਧਿਗਮਂ ਪੁਚ੍ਛਿਂਸੁ. ਸੋ ‘‘ਨਤ੍ਥਿ ਕਿਞ੍ਚੀ’’ਤਿ ਵਤ੍ਵਾ ਆਭਸ੍ਸਰਬ੍ਰਹ੍ਮਲੋਕੇ ਨਿਬ੍ਬਤ੍ਤਿ. ਬੋਧਿਸਤ੍ਤਾ ਹਿ ਅਰੂਪਸਮਾਪਤ੍ਤਿਲਾਭਿਨੋ ਹੁਤ੍ਵਾਪਿ ਅਭਬ੍ਬਟ੍ਠਾਨਤ੍ਤਾ ਆਰੁਪ੍ਪੇ ਨ ਨਿਬ੍ਬਤ੍ਤਨ੍ਤਿ. ਅਨ੍ਤੇਵਾਸਿਕਾ ‘‘ਆਚਰਿਯਸ੍ਸ ਅਧਿਗਮੋ ਨਤ੍ਥੀ’’ਤਿ ਆਲ਼ਾਹਨੇ ਸਕ੍ਕਾਰਂ ਨ ਕਰਿਂਸੁ.

ਜੇਟ੍ਠਨ੍ਤੇਵਾਸਿਕੋ ਆਗਨ੍ਤ੍ਵਾ ‘‘ਕਹਂ ਆਚਰਿਯੋ’’ਤਿ ਪੁਚ੍ਛਿਤ੍ਵਾ ‘‘ਕਾਲਕਤੋ’’ਤਿ ਸੁਤ੍ਵਾ ‘‘ਅਪਿ ਆਚਰਿਯਂ ਅਧਿਗਮਂ ਪੁਚ੍ਛਿਤ੍ਥਾ’’ਤਿ ਆਹ. ‘‘ਆਮ, ਪੁਚ੍ਛਿਮ੍ਹਾ’’ਤਿ. ‘‘ਕਿਂ ਕਥੇਸੀ’’ਤਿ? ‘‘ਨਤ੍ਥਿ ਕਿਞ੍ਚੀਤਿ ਤੇਨ ਵੁਤ੍ਤਂ, ਅਥਸ੍ਸ ਅਮ੍ਹੇਹਿ ਸਕ੍ਕਾਰੋ ਨ ਕਤੋ’’ਤਿ ਆਹਂਸੁ. ਜੇਟ੍ਠਨ੍ਤੇਵਾਸਿਕੋ ‘‘ਤੁਮ੍ਹੇ ਆਚਰਿਯਸ੍ਸ ਵਚਨਤ੍ਥਂ ਨ ਜਾਨਾਥ, ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਲਾਭੀ ਆਚਰਿਯੋ’’ਤਿ ਆਹ. ਤੇ ਤਸ੍ਮਿਂ ਪੁਨਪ੍ਪੁਨਂ ਕਥੇਨ੍ਤੇਪਿ ਨ ਸਦ੍ਦਹਿਂਸੁ. ਬੋਧਿਸਤ੍ਤੋ ਤਂ ਕਾਰਣਂ ਞਤ੍ਵਾ ‘‘ਅਨ੍ਧਬਾਲਾ ਮਮ ਜੇਟ੍ਠਨ੍ਤੇਵਾਸਿਕਸ੍ਸ ਵਚਨਂ ਨ ਸਦ੍ਦਹਨ੍ਤਿ. ਇਮਂ ਤੇਸਂ ਕਾਰਣਂ ਪਾਕਟਂ ਕਰਿਸ੍ਸਾਮੀ’’ਤਿ ਬ੍ਰਹ੍ਮਲੋਕਾ ਆਗਨ੍ਤ੍ਵਾ ਅਸ੍ਸਮਪਦਮਤ੍ਥਕੇ ਮਹਨ੍ਤੇਨਾਨੁਭਾਵੇਨ ਆਕਾਸੇ ਠਤ੍ਵਾ ਜੇਟ੍ਠਨ੍ਤੇਵਾਸਿਕਸ੍ਸ ਪਞ੍ਞਾਨੁਭਾਵਂ ਵਣ੍ਣੇਨ੍ਤੋ ਇਮਂ ਗਾਥਮਾਹ –

੯੯. ‘‘ਪਰੋਸਹਸ੍ਸਮ੍ਪਿ ਸਮਾਗਤਾਨਂ, ਕਨ੍ਦੇਯ੍ਯੁਂ ਤੇ ਵਸ੍ਸਸਤਂ ਅਪਞ੍ਞਾ;

ਏਕੋਵ ਸੇਯ੍ਯੋ ਪੁਰਿਸੋ ਸਪਞ੍ਞੋ, ਯੋ ਭਾਸਿਤਸ੍ਸ ਵਿਜਾਨਾਤਿ ਅਤ੍ਥ’’ਨ੍ਤਿ.

ਤਤ੍ਥ ਪਰੋਸਹਸ੍ਸਮ੍ਪੀਤਿ ਅਤਿਰੇਕਸਹਸ੍ਸਮ੍ਪਿ. ਸਮਾਗਤਾਨਨ੍ਤਿ ਸਨ੍ਨਿਪਤਿਤਾਨਂ ਭਾਸਿਤਸ੍ਸ ਅਤ੍ਥਂ ਜਾਨਿਤੁਂ ਅਸਕ੍ਕੋਨ੍ਤਾਨਂ ਬਾਲਾਨਂ. ਕਨ੍ਦੇਯ੍ਯੁਂ ਤੇ ਵਸ੍ਸਸਤਂ ਅਪਞ੍ਞਾਤਿ ਤੇ ਏਵਂ ਸਮਾਗਤਾ ਅਪਞ੍ਞਾ ਇਮੇ ਬਾਲਤਾਪਸਾ ਵਿਯ ਵਸ੍ਸਸਤਮ੍ਪਿ ਵਸ੍ਸਸਹਸ੍ਸਮ੍ਪਿ ਰੋਦੇਯ੍ਯੁਂ ਪਰਿਦੇਵੇਯ੍ਯੁਂ, ਰੋਦਮਾਨਾਪਿ ਪਨ ਅਤ੍ਥਂ ਵਾ ਕਾਰਣਂ ਵਾ ਨੇਵ ਜਾਨੇਯ੍ਯੁਨ੍ਤਿ ਦੀਪੇਤਿ. ਏਕੋਵ ਸੇਯ੍ਯੋ ਪੁਰਿਸੋ ਸਪਞ੍ਞੋਤਿ ਏਵਰੂਪਾਨਂ ਬਾਲਾਨਂ ਪਰੋਸਹਸ੍ਸਤੋਪਿ ਏਕੋ ਪਣ੍ਡਿਤਪੁਰਿਸੋਵ ਸੇਯ੍ਯੋ ਵਰਤਰੋਤਿ ਅਤ੍ਥੋ. ਕੀਦਿਸੋ ਸਪਞ੍ਞੋਤਿ? ਯੋ ਭਾਸਿਤਸ੍ਸ ਵਿਜਾਨਾਤਿ ਅਤ੍ਥਂ ਅਯਂ ਜੇਟ੍ਠਨ੍ਤੇਵਾਸਿਕੋ ਵਿਯਾਤਿ.

ਏਵਂ ਮਹਾਸਤ੍ਤੋ ਆਕਾਸੇ ਠਿਤੋਵ ਧਮ੍ਮਂ ਦੇਸੇਤ੍ਵਾ ਤਾਪਸਗਣਂ ਬੁਜ੍ਝਾਪੇਤ੍ਵਾ ਬ੍ਰਹ੍ਮਲੋਕਮੇਵ ਗਤੋ. ਤੇਪਿ ਤਾਪਸਾ ਜੀਵਿਤਪਰਿਯੋਸਾਨੇ ਬ੍ਰਹ੍ਮਲੋਕਪਰਾਯਣਾ ਅਹੇਸੁਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਜੇਟ੍ਠਨ੍ਤੇਵਾਸਿਕੋ ਸਾਰਿਪੁਤ੍ਤੋ ਅਹੋਸਿ, ਮਹਾਬ੍ਰਹ੍ਮਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਪਰੋਸਹਸ੍ਸਜਾਤਕਵਣ੍ਣਨਾ ਨਵਮਾ.

[੧੦੦] ੧੦. ਅਸਾਤਰੂਪਜਾਤਕਵਣ੍ਣਨਾ

ਅਸਾਤਂ ਸਾਤਰੂਪੇਨਾਤਿ ਇਦਂ ਸਤ੍ਥਾ ਕੁਣ੍ਡਿਯਨਗਰਂ ਉਪਨਿਸ੍ਸਾਯ ਕੁਣ੍ਡਧਾਨਵਨੇ ਵਿਹਰਨ੍ਤੋ ਕੋਲਿਯਰਾਜਧੀਤਰਂ ਸੁਪ੍ਪਵਾਸਂ ਉਪਾਸਿਕਂ ਆਰਬ੍ਭ ਕਥੇਸਿ. ਸਾ ਹਿ ਤਸ੍ਮਿਂ ਸਮਯੇ ਸਤ੍ਤ ਵਸ੍ਸਾਨਿ ਕੁਚ੍ਛਿਨਾ ਗਬ੍ਭਂ ਪਰਿਹਰਿਤ੍ਵਾ ਸਤ੍ਤਾਹਂ ਮੂਲ਼੍ਹਗਬ੍ਭਾ ਅਹੋਸਿ, ਅਧਿਮਤ੍ਤਾ ਵੇਦਨਾ ਪਵਤ੍ਤਿਂਸੁ. ਸਾ ਏਵਂ ਅਧਿਮਤ੍ਤਵੇਦਨਾਭਿਭੂਤਾਪਿ ‘‘ਸਮ੍ਮਾਸਮ੍ਬੁਦ੍ਧੋ ਵਤ ਸੋ ਭਗਵਾ, ਯੋ ਏਵਰੂਪਸ੍ਸ ਦੁਕ੍ਖਸ੍ਸ ਪਹਾਨਾਯ ਧਮ੍ਮਂ ਦੇਸੇਤਿ. ਸੁਪ੍ਪਟਿਪਨ੍ਨੋ ਵਤ ਤਸ੍ਸ ਭਗਵਤੋ ਸਾਵਕਸਙ੍ਘੋ, ਯੋ ਏਵਰੂਪਸ੍ਸ ਦੁਕ੍ਖਸ੍ਸ ਪਹਾਨਾਯ ਪਟਿਪਨ੍ਨੋ. ਸੁਸੁਖਂ ਵਤ ਨਿਬ੍ਬਾਨਂ, ਯਤ੍ਥੇਵ ਰੂਪਂ ਦੁਕ੍ਖਂ ਨਤ੍ਥੀ’’ਤਿ (ਉਦਾ. ੧੮) ਇਮੇਹਿ ਤੀਹਿ ਵਿਤਕ੍ਕੇਹਿ ਅਧਿਵਾਸੇਸਿ. ਸਾ ਸਾਮਿਕਂ ਪਕ੍ਕੋਸੇਤ੍ਵਾ ਤਞ੍ਚ ਅਤ੍ਤਨੋ ਪਵਤ੍ਤਿਂ ਵਨ੍ਦਨਸਾਸਨਞ੍ਚ ਆਰੋਚੇਤੁਂ ਸਤ੍ਥੁ ਸਨ੍ਤਿਕਂ ਪੇਸੇਸਿ. ਸਤ੍ਥਾ ਵਨ੍ਦਨਸਾਸਨਂ ਸੁਤ੍ਵਾਵ ‘‘ਸੁਖਿਨੀ ਹੋਤੁ ਸੁਪ੍ਪਵਾਸਾ ਕੋਲਿਯਧੀਤਾ, ਸੁਖਿਨੀ ਅਰੋਗਾ ਅਰੋਗਂ ਪੁਤ੍ਤਂ ਵਿਜਾਯਤੂ’’ਤਿ ਆਹ. ਸਹ ਵਚਨੇਨੇਵ ਪਨ ਭਗਵਤੋ ਸੁਪ੍ਪਵਾਸਾ ਕੋਲਿਯਧੀਤਾ ਸੁਖਿਨੀ ਅਰੋਗਾ ਅਰੋਗਂ ਪੁਤ੍ਤਂ ਵਿਜਾਯਿ. ਅਥਸ੍ਸਾ ਸਾਮਿਕੋ ਗੇਹਂ ਗਨ੍ਤ੍ਵਾ ਤਂ ਵਿਜਾਤਂ ਦਿਸ੍ਵਾ ‘‘ਅਚ੍ਛਰਿਯਂ ਵਤ, ਭੋ’’ਤਿ ਅਤਿਵਿਯ ਤਥਾਗਤਸ੍ਸ ਆਨੁਭਾਵੇਨ ਅਚ੍ਛਰਿਯਬ੍ਭੁਤਚਿਤ੍ਤਜਾਤੋ ਅਹੋਸਿ.

ਸੁਪ੍ਪਵਾਸਾਪਿ ਪੁਤ੍ਤਂ ਵਿਜਾਯਿਤ੍ਵਾ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਦਾਨਂ ਦਾਤੁਕਾਮਾ ਪੁਨ ਨਿਮਨ੍ਤਨਤ੍ਥਾਯ ਤਂ ਪੇਸੇਸਿ. ਤੇਨ ਖੋ ਪਨ ਸਮਯੇਨ ਮਹਾਮੋਗ੍ਗਲ੍ਲਾਨਸ੍ਸ ਉਪਟ੍ਠਾਕੇਨ ਬੁਦ੍ਧਪ੍ਪਮੁਖੋ ਸਙ੍ਘੋ ਨਿਮਨ੍ਤਿਤੋ ਹੋਤਿ. ਸਤ੍ਥਾ ਸੁਪ੍ਪਵਾਸਾਯ ਦਾਨਸ੍ਸ ਓਕਾਸਦਾਨਤ੍ਥਾਯ ਥੇਰਂ ਤਸ੍ਸ ਸਨ੍ਤਿਕਂ ਪੇਸੇਤ੍ਵਾ ਤਂ ਸਞ੍ਞਾਪੇਤ੍ਵਾ ਸਤ੍ਤਾਹਂ ਤਸ੍ਸਾ ਦਾਨਂ ਪਟਿਗ੍ਗਹੇਸਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਸਤ੍ਤਮੇ ਪਨ ਦਿਵਸੇ ਸੁਪ੍ਪਵਾਸਾ ਪੁਤ੍ਤਂ ਸੀਵਲਿਕੁਮਾਰਂ ਮਣ੍ਡੇਤ੍ਵਾ ਸਤ੍ਥਾਰਞ੍ਚੇਵ ਭਿਕ੍ਖੁਸਙ੍ਘਞ੍ਚ ਵਨ੍ਦਾਪੇਸਿ. ਤਸ੍ਮਿਂ ਪਟਿਪਾਟਿਯਾ ਸਾਰਿਪੁਤ੍ਤਤ੍ਥੇਰਸ੍ਸ ਸਨ੍ਤਿਕਂ ਨੀਤੇ ਥੇਰੋ ਤੇਨ ਸਦ੍ਧਿਂ ‘‘ਕਚ੍ਚਿ ਤੇ, ਸੀਵਲਿ, ਖਮਨੀਯ’’ਨ੍ਤਿ ਪਟਿਸਨ੍ਥਾਰਮਕਾਸਿ. ਸੋ ‘‘ਕੁਤੋ ਮੇ, ਭਨ੍ਤੇ, ਸੁਖਂ, ਸ੍ਵਾਹਂ ਸਤ੍ਤ ਵਸ੍ਸਾਨਿ ਲੋਹਿਤਕੁਮ੍ਭਿਯਂ ਵਸਿ’’ਨ੍ਤਿ ਥੇਰੇਨ ਸਦ੍ਧਿਂ ਏਵਰੂਪਂ ਕਥਂ ਕਥੇਸਿ. ਸੁਪ੍ਪਾਵਾਸਾ ਤਸ੍ਸ ਵਚਨਂ ਸੁਤ੍ਵਾ ‘‘ਸਤ੍ਤਾਹਜਾਤੋ ਮੇ ਪੁਤ੍ਤੋ ਅਨੁਬੁਦ੍ਧੇਨ ਧਮ੍ਮਸੇਨਾਪਤਿਨਾ ਸਦ੍ਧਿਂ ਮਨ੍ਤੇਤੀ’’ਤਿ ਸੋਮਨਸ੍ਸਪ੍ਪਤ੍ਤਾ ਅਹੋਸਿ. ਸਤ੍ਥਾ ‘‘ਅਪਿ ਨੁ ਸੁਪ੍ਪਵਾਸੇ ਅਞ੍ਞੇਪਿ ਏਵਰੂਪੇ ਪੁਤ੍ਤੇ ਇਚ੍ਛਸੀ’’ਤਿ ਆਹ. ‘‘ਸਚੇ, ਭਨ੍ਤੇ, ਏਵਰੂਪੇ ਅਞ੍ਞੇ ਸਤ੍ਤ ਪੁਤ੍ਤੇ ਲਭੇਯ੍ਯਂ, ਇਚ੍ਛੇਯ੍ਯਮੇਵਾਹ’’ਨ੍ਤਿ. ਸਤ੍ਥਾ ਉਦਾਨਂ ਉਦਾਨੇਤ੍ਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸੀਵਲਿਕੁਮਾਰੋਪਿ ਖੋ ਸਤ੍ਤਵਸ੍ਸਿਕਕਾਲੇਯੇਵ ਸਾਸਨੇ ਉਰਂ ਦਤ੍ਵਾ ਪਬ੍ਬਜਿਤ੍ਵਾ ਪਰਿਪੁਣ੍ਣਵਸ੍ਸੋ ਉਪਸਮ੍ਪਦਂ ਲਭਿਤ੍ਵਾ ਪੁਞ੍ਞਵਾ ਲਾਭਗ੍ਗਪ੍ਪਤ੍ਤੋ ਹੁਤ੍ਵਾ ਪਥਵਿਂ ਉਨ੍ਨਾਦੇਤ੍ਵਾ ਅਰਹਤ੍ਤਂ ਪਤ੍ਵਾ ਪੁਞ੍ਞਵਨ੍ਤਾਨਂ ਅਨ੍ਤਰੇ ਏਤਦਗ੍ਗਟ੍ਠਾਨਂ ਪਾਪੁਣਿ.

ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਸਨ੍ਨਿਪਤਿਤ੍ਵਾ ‘‘ਆਵੁਸੋ, ਸੀਵਲਿਤ੍ਥੇਰੋ ਨਾਮ ਏਵਰੂਪੋ ਮਹਾਪੁਞ੍ਞੋ ਪਤ੍ਥਿਤਪਤ੍ਥਨੋ ਪਚ੍ਛਿਮਭਵਿਕਸਤ੍ਤੋ ਸਤ੍ਤ ਵਸ੍ਸਾਨਿ ਲੋਹਿਤਕੁਮ੍ਭਿਯਂ ਵਸਿਤ੍ਵਾ ਸਤ੍ਤਾਹਂ ਮੂਲ਼੍ਹਗਬ੍ਭਭਾਵਂ ਆਪਜ੍ਜਿ, ਅਹੋ ਮਾਤਾਪੁਤ੍ਤਾ ਮਹਨ੍ਤਂ ਦੁਕ੍ਖਂ ਅਨੁਭਵਿਂਸੁ, ਕਿਂ ਨੁ ਖੋ ਕਮ੍ਮਂ ਅਕਂਸੂ’’ਤਿ ਕਥਂ ਸਮੁਟ੍ਠਾਪੇਸੁਂ. ਸਤ੍ਥਾ ਤਤ੍ਥਾਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਭਿਕ੍ਖਵੇ, ਸੀਵਲਿਨੋ ਮਹਾਪੁਞ੍ਞਤੋਵ ਸਤ੍ਤ ਵਸ੍ਸਾਨਿ ਲੋਹਿਤਕੁਮ੍ਭਿਯਂ ਨਿਵਾਸੋ ਚ ਸਤ੍ਤਾਹਂ ਮੂਲ਼੍ਹਗਬ੍ਭਭਾਵਪ੍ਪਤ੍ਤਿ ਚ ਅਤ੍ਤਨਾ ਕਤਕਮ੍ਮਮੂਲਕਾਵ, ਸੁਪ੍ਪਵਾਸਾਯਪਿ ਸਤ੍ਤ ਵਸ੍ਸਾਨਿ ਕੁਚ੍ਛਿਨਾ ਗਬ੍ਭਪਰਿਹਰਣਦੁਕ੍ਖਞ੍ਚ ਸਤ੍ਤਾਹਂ ਮੂਲ਼੍ਹਗਬ੍ਭਦੁਕ੍ਖਞ੍ਚ ਅਤ੍ਤਨਾ ਕਤਕਮ੍ਮਮੂਲਕਮੇਵਾ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿਤ੍ਵਾ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਪਿਤੁ ਅਚ੍ਚਯੇਨ ਰਜ੍ਜਂ ਪਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਸਿ. ਤਸ੍ਮਿਂ ਸਮਯੇ ਕੋਸਲਮਹਾਰਾਜਾ ਮਹਨ੍ਤੇਨ ਬਲੇਨਾਗਨ੍ਤ੍ਵਾ ਬਾਰਾਣਸਿਂ ਗਹੇਤ੍ਵਾ ਰਾਜਾਨਂ ਮਾਰੇਤ੍ਵਾ ਤਸ੍ਸੇਵ ਅਗ੍ਗਮਹੇਸਿਂ ਅਤ੍ਤਨੋ ਅਗ੍ਗਮਹੇਸਿਂ ਅਕਾਸਿ. ਬਾਰਾਣਸਿਰਞ੍ਞੋ ਪਨ ਪੁਤ੍ਤੋ ਪਿਤੁ ਮਰਣਕਾਲੇ ਨਿਦ੍ਧਮਨਦ੍ਵਾਰੇਨ ਪਲਾਯਿਤ੍ਵਾ ਬਲਂ ਸਂਹਰਿਤ੍ਵਾ ਬਾਰਾਣਸਿਂ ਆਗਨ੍ਤ੍ਵਾ ਅਵਿਦੂਰੇ ਨਿਸੀਦਿਤ੍ਵਾ ਤਸ੍ਸ ਰਞ੍ਞੋ ਪਣ੍ਣਂ ਪੇਸੇਸਿ ‘‘ਰਜ੍ਜਂ ਵਾ ਦੇਤੁ ਯੁਦ੍ਧਂ ਵਾ’’ਤਿ. ਸੋ ‘‘ਯੁਦ੍ਧਂ ਦੇਮੀ’’ਤਿ ਪਟਿਪਣ੍ਣਂ ਪੇਸੇਸਿ. ਰਾਜਕੁਮਾਰਸ੍ਸ ਪਨ ਮਾਤਾ ਤਂ ਸਾਸਨਂ ਸੁਤ੍ਵਾ ‘‘ਯੁਦ੍ਧੇਨ ਕਮ੍ਮਂ ਨਤ੍ਥਿ, ਸਬ੍ਬਦਿਸਾਸੁ ਸਞ੍ਚਾਰਂ ਪਚ੍ਛਿਨ੍ਦਿਤ੍ਵਾ ਬਾਰਾਣਸਿਨਗਰਂ ਪਰਿਵਾਰੇਤੁ, ਤਤੋ ਦਾਰੂਦਕਭਤ੍ਤਪਰਿਕ੍ਖਯੇਨ ਕਿਲਨ੍ਤਮਨੁਸ੍ਸਂ ਨਗਰਂ ਵਿਨਾਵ ਯੁਦ੍ਧੇਨ ਗਣ੍ਹਿਸ੍ਸਸੀ’’ਤਿ ਪਣ੍ਣਂ ਪੇਸੇਸਿ. ਸੋ ਮਾਤੁ ਸਾਸਨਂ ਸੁਤ੍ਵਾ ਸਤ੍ਤ ਦਿਵਸਾਨਿ ਸਞ੍ਚਾਰਂ ਪਚ੍ਛਿਨ੍ਦਿਤ੍ਵਾ ਨਗਰਂ ਰੁਨ੍ਧਿ, ਨਾਗਰਾ ਸਞ੍ਚਾਰਂ ਅਲਭਮਾਨਾ ਸਤ੍ਤਮੇ ਦਿਵਸੇ ਤਸ੍ਸ ਰਞ੍ਞੋ ਸੀਸਂ ਗਹੇਤ੍ਵਾ ਕੁਮਾਰਸ੍ਸ ਅਦਂਸੁ. ਕੁਮਾਰੋ ਪਨ ਨਗਰਂ ਪਵਿਸਿਤ੍ਵਾ ਰਜ੍ਜਂ ਗਹੇਤ੍ਵਾ ਜੀਵਿਤਪਰਿਯੋਸਾਨੇ ਯਥਾਕਮ੍ਮਂ ਗਤੋ.

ਸੋ ਏਤਰਹਿ ਸਤ੍ਤ ਦਿਵਸਾਨਿ ਸਞ੍ਚਾਰਂ ਪਚ੍ਛਿਨ੍ਦਿਤ੍ਵਾ ਨਗਰਂ ਰੁਨ੍ਧਿਤ੍ਵਾ ਗਹਿਤਕਮ੍ਮਨਿਸ੍ਸਨ੍ਦੇਨ ਸਤ੍ਤ ਵਸ੍ਸਾਨਿ ਲੋਹਿਤਕੁਮ੍ਭਿਯਂ ਵਸਿਤ੍ਵਾ ਸਤ੍ਤਾਹਂ ਮੂਲ਼੍ਹਗਬ੍ਭਭਾਵਂ ਆਪਜ੍ਜਿ. ਯਂ ਪਨ ਸੋ ਪਦੁਮੁਤ੍ਤਰਸ੍ਸ ਭਗਵਤੋ ਪਾਦਮੂਲੇ ‘‘ਲਾਭੀਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਮਹਾਦਾਨਂ ਦਤ੍ਵਾ ਪਤ੍ਥਨਂ ਅਕਾਸਿ, ਯਞ੍ਚ ਵਿਪਸ੍ਸਿਬੁਦ੍ਧਕਾਲੇ ਨਾਗਰੇਹਿ ਸਦ੍ਧਿਂ ਸਹਸ੍ਸਗ੍ਘਨਕਂ ਗੁਲ਼ਦਧਿਂ ਦਤ੍ਵਾ ਪਤ੍ਥਨਮਕਾਸਿ, ਤਸ੍ਸਾਨੁਭਾਵੇਨ ਲਾਭੀਨਂ ਅਗ੍ਗੋ ਜਾਤੋ. ਸੁਪ੍ਪਵਾਸਾਪਿ ‘‘ਨਗਰਂ ਰੁਨ੍ਧਿਤ੍ਵਾ ਗਣ੍ਹ, ਤਾਤਾ’’ਤਿ ਪੇਸਿਤਭਾਵੇਨ ਸਤ੍ਤ ਵਸ੍ਸਾਨਿ ਕੁਚ੍ਛਿਨਾ ਗਬ੍ਭਂ ਪਰਿਹਰਿਤ੍ਵਾ ਸਤ੍ਤਾਹਂ ਮੂਲ਼੍ਹਗਬ੍ਭਾ ਜਾਤਾ.

ਸਤ੍ਥਾ ਇਮਂ ਅਤੀਤਂ ਆਹਰਿਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਂ ਗਾਥਮਾਹ –

੧੦੦. ‘‘ਅਸਾਤਂ ਸਾਤਰੂਪੇਨ, ਪਿਯਰੂਪੇਨ ਅਪ੍ਪਿਯਂ;

ਦੁਕ੍ਖਂ ਸੁਖਸ੍ਸ ਰੂਪੇਨ, ਪਮਤ੍ਤਮਤਿਵਤ੍ਤਤੀ’’ਤਿ.

ਤਤ੍ਥ ਅਸਾਤਂ ਸਾਤਰੂਪੇਨਾਤਿ ਅਮਧੁਰਮੇਵ ਮਧੁਰਪਤਿਰੂਪਕੇਨ. ਪਮਤ੍ਤਮਤਿਵਤ੍ਤਤੀਤਿ ਅਸਾਤਂ ਅਪ੍ਪਿਯਂ ਦੁਕ੍ਖਨ੍ਤਿ ਏਤਂ ਤਿਵਿਧਮ੍ਪਿ ਏਤੇਨ ਸਾਤਰੂਪਾਦਿਨਾ ਆਕਾਰੇਨ ਸਤਿਵਿਪ੍ਪਵਾਸਵਸੇਨ ਪਮਤ੍ਤਂ ਪੁਗ੍ਗਲਂ ਅਤਿਵਤ੍ਤਤਿ ਅਭਿਭਵਤਿ ਅਜ੍ਝੋਤ੍ਥਰਤੀਤਿ ਅਤ੍ਥੋ. ਇਦਂ ਭਗਵਤਾ ਯਞ੍ਚ ਤੇ ਮਾਤਾਪੁਤ੍ਤਾ ਇਮਿਨਾ ਗਬ੍ਭਪਰਿਹਰਣਗਬ੍ਭਵਾਸਸਙ੍ਖਾਤੇਨ ਅਸਾਤਾਦਿਨਾ ਪੁਬ੍ਬੇ ਨਗਰਰੁਨ੍ਧਨਸਾਤਾਦਿਪਤਿਰੂਪਕੇਨ ਅਜ੍ਝੋਤ੍ਥਟਾ, ਯਞ੍ਚ ਇਦਾਨਿ ਸਾ ਉਪਾਸਿਕਾ ਪੁਨਪਿ ਸਤ੍ਤਕ੍ਖਤ੍ਤੁਂ ਏਵਰੂਪਂ ਅਸਾਤਂ ਅਪ੍ਪਿਯਂ ਦੁਕ੍ਖਂ ਪੇਮਵਤ੍ਥੁਭੂਤੇਨ ਪੁਤ੍ਤਸਙ੍ਖਾਤੇਨ ਸਾਤਾਦਿਪਤਿਰੂਪਕੇਨ ਅਜ੍ਝੋਤ੍ਥਟਾ ਹੁਤ੍ਵਾ ਤਥਾ ਅਵਚ, ਤਂ ਸਬ੍ਬਮ੍ਪਿ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਨਗਰਂ ਰੁਨ੍ਧਿਤ੍ਵਾ ਰਜ੍ਜਪ੍ਪਤ੍ਤਕੁਮਾਰੋ ਸੀਵਲਿ ਅਹੋਸਿ, ਮਾਤਾ ਸੁਪ੍ਪਵਾਸਾ, ਪਿਤਾ ਪਨ ਬਾਰਾਣਸਿਰਾਜਾ ਅਹਮੇਵ ਅਹੋਸਿ’’ਨ੍ਤਿ.