੪. ਕੁਲਾਵਕਵਗ੍ਗੋ

[੩੧] ੧. ਕੁਲਾਵਕਜਾਤਕਵਣ੍ਣਨਾ

ਕੁਲਾਵਕਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਪਰਿਸ੍ਸਾਵੇਤ੍ਵਾ ਪਾਨੀਯਂ ਪੀਤਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਸਾਵਤ੍ਥਿਤੋ ਕਿਰ ਦ੍ਵੇ ਸਹਾਯਕਾ ਦਹਰਭਿਕ੍ਖੂ ਜਨਪਦਂ ਗਨ੍ਤ੍ਵਾ ਏਕਸ੍ਮਿਂ ਫਾਸੁਕਟ੍ਠਾਨੇ ਯਥਾਜ੍ਝਾਸਯਂ ਵਸਿਤ੍ਵਾ ‘‘ਸਮ੍ਮਾਸਮ੍ਬੁਦ੍ਧਂ ਪਸ੍ਸਿਸ੍ਸਾਮਾ’’ਤਿ ਪੁਨ ਤਤੋ ਨਿਕ੍ਖਮਿਤ੍ਵਾ ਜੇਤਵਨਾਭਿਮੁਖਾ ਪਾਯਿਂਸੁ. ਏਕਸ੍ਸ ਹਤ੍ਥੇ ਪਰਿਸ੍ਸਾਵਨਂ ਅਤ੍ਥਿ, ਏਕਸ੍ਸ ਨਤ੍ਥਿ. ਦ੍ਵੇਪਿ ਏਕਤੋ ਪਾਨੀਯਂ ਪਰਿਸ੍ਸਾਵੇਤ੍ਵਾ ਪਿਵਨ੍ਤਿ. ਤੇ ਏਕਦਿਵਸਂ ਵਿਵਾਦਂ ਅਕਂਸੁ. ਪਰਿਸ੍ਸਾਵਨਸਾਮਿਕੋ ਇਤਰਸ੍ਸ ਪਰਿਸ੍ਸਾਵਨਂ ਅਦਤ੍ਵਾ ਸਯਮੇਵ ਪਾਨੀਯਂ ਪਰਿਸ੍ਸਾਵੇਤ੍ਵਾ ਪਿਵਿ, ਇਤਰੋ ਪਨ ਪਰਿਸ੍ਸਾਵਨਂ ਅਲਭਿਤ੍ਵਾ ਪਿਪਾਸਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ ਅਪਰਿਸ੍ਸਾਵੇਤ੍ਵਾ ਪਾਨੀਯਂ ਪਿਵਿ. ਤੇ ਉਭੋਪਿ ਅਨੁਪੁਬ੍ਬੇਨ ਜੇਤਵਨਂ ਪਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਨਿਸੀਦਿਂਸੁ. ਸਤ੍ਥਾ ਸਮ੍ਮੋਦਨੀਯਂ ਕਥਂ ਕਥੇਤ੍ਵਾ ‘‘ਕੁਤੋ ਆਗਤਤ੍ਥਾ’’ਤਿ ਪੁਚ੍ਛਿ. ‘‘ਭਨ੍ਤੇ, ਮਯਂ ਕੋਸਲਜਨਪਦੇ ਏਕਸ੍ਮਿਂ ਗਾਮਕੇ ਵਸਿਤ੍ਵਾ ਤਤੋ ਨਿਕ੍ਖਮਿਤ੍ਵਾ ਤੁਮ੍ਹਾਕਂ ਦਸ੍ਸਨਤ੍ਥਾਯ ਆਗਤਾ’’ਤਿ. ‘‘ਕਚ੍ਚਿ ਪਨ ਵੋ ਸਮਗ੍ਗਾ ਆਗਤਤ੍ਥਾ’’ਤਿ? ਅਪਰਿਸ੍ਸਾਵਨਕੋ ਆਹ ‘‘ਅਯਂ, ਭਨ੍ਤੇ, ਅਨ੍ਤਰਾਮਗ੍ਗੇ ਮਯਾ ਸਦ੍ਧਿਂ ਵਿਵਾਦਂ ਕਤ੍ਵਾ ਪਰਿਸ੍ਸਾਵਨਂ ਨਾਦਾਸੀ’’ਤਿ. ਇਤਰੋਪਿ ਆਹ ‘‘ਅਯਂ, ਭਨ੍ਤੇ, ਅਪਰਿਸ੍ਸਾਵੇਤ੍ਵਾਵ ਜਾਨਂ ਸਪਾਣਕਂ ਉਦਕਂ ਪਿਵੀ’’ਤਿ. ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਜਾਨਂ ਸਪਾਣਕਂ ਉਦਕਂ ਪਿਵੀ’’ਤਿ? ‘‘ਆਮ, ਭਨ੍ਤੇ, ਅਪਰਿਸ੍ਸਾਵਿਤਂ ਉਦਕਂ ਪਿਵਿਨ੍ਤਿ. ਸਤ੍ਥਾ ‘‘ਭਿਕ੍ਖੁ ਪੁਬ੍ਬੇ ਪਣ੍ਡਿਤਾ ਦੇਵਨਗਰੇ ਰਜ੍ਜਂ ਕਾਰੇਨ੍ਤਾ ਯੁਦ੍ਧਪਰਾਜਿਤਾ ਸਮੁਦ੍ਦਪਿਟ੍ਠੇਨ ਪਲਾਯਨ੍ਤਾ ‘ਇਸ੍ਸਰਿਯਂ ਨਿਸ੍ਸਾਯ ਪਾਣਵਧਂ ਨ ਕਰਿਸ੍ਸਾਮਾ’ਤਿ ਤਾਵ ਮਹਨ੍ਤਂ ਯਸਂ ਪਰਿਚ੍ਚਜਿਤ੍ਵਾ ਸੁਪਣ੍ਣਪੋਤਕਾਨਂ ਜੀਵਿਤਂ ਦਤ੍ਵਾ ਰਥਂ ਨਿਵਤ੍ਤਯਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਮਗਧਰਟ੍ਠੇ ਰਾਜਗਹੇ ਏਕੋ ਮਾਗਧਰਾਜਾ ਰਜ੍ਜਂ ਕਾਰੇਸਿ. ਤਦਾ ਬੋਧਿਸਤ੍ਤੋ ਯਥਾ ਏਤਰਹਿ ਸਕ੍ਕੋ ਪੁਰਿਮਤ੍ਤਭਾਵੇ ਮਗਧਰਟ੍ਠੇ ਮਚਲਗਾਮਕੇ ਨਿਬ੍ਬਤ੍ਤਿ, ਏਵਂ ਤਸ੍ਮਿਂਯੇਵ ਮਚਲਗਾਮਕੇ ਮਹਾਕੁਲਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਨਾਮਗ੍ਗਹਣਦਿਵਸੇ ਚਸ੍ਸ ‘‘ਮਘਕੁਮਾਰੋ’’ਤ੍ਵੇਵ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ‘‘ਮਘਮਾਣਵੋ’’ਤਿ ਪਞ੍ਞਾਯਿਤ੍ਥ. ਅਥਸ੍ਸ ਮਾਤਾਪਿਤਰੋ ਸਮਾਨਜਾਤਿਕਕੁਲਤੋ ਦਾਰਿਕਂ ਆਨਯਿਂਸੁ. ਸੋ ਪੁਤ੍ਤਧੀਤਾਹਿ ਵਡ੍ਢਮਾਨੋ ਦਾਨਪਤਿ ਅਹੋਸਿ, ਪਞ੍ਚ ਸੀਲਾਨਿ ਰਕ੍ਖਤਿ. ਤਸ੍ਮਿਞ੍ਚ ਗਾਮੇ ਤੇਤ੍ਤਿਂਸੇਵ ਕੁਲਾਨਿ ਹੋਨ੍ਤਿ, ਤੇਪਿ ਤੇਤ੍ਤਿਂਸ ਕੁਲਾ ਮਨੁਸ੍ਸਾ ਏਕਦਿਵਸਂ ਗਾਮਮਜ੍ਝੇ ਠਤ੍ਵਾ ਗਾਮਕਮ੍ਮਂ ਕਰੋਨ੍ਤਿ. ਬੋਧਿਸਤ੍ਤੋ ਠਿਤਟ੍ਠਾਨੇ ਪਾਦੇਹਿ ਪਂਸੁਂ ਵਿਯੂਹਿਤ੍ਵਾ ਤਂ ਪਦੇਸਂ ਰਮਣੀਯਂ ਕਤ੍ਵਾ ਅਟ੍ਠਾਸਿ, ਅਥਞ੍ਞੋ ਏਕੋ ਆਗਨ੍ਤ੍ਵਾ ਤਸ੍ਮਿਂ ਠਾਨੇ ਠਿਤੋ. ਬੋਧਿਸਤ੍ਤੋ ਅਪਰਂ ਠਾਨਂ ਰਮਣੀਯਂ ਕਤ੍ਵਾ ਅਟ੍ਠਾਸਿ, ਤਤ੍ਰਾਪਿ ਅਞ੍ਞੋ ਠਿਤੋ. ਬੋਧਿਸਤ੍ਤੋ ਅਪਰਮ੍ਪਿ ਅਪਰਮ੍ਪੀਤਿ ਸਬ੍ਬੇਸਮ੍ਪਿ ਠਿਤਟ੍ਠਾਨਂ ਰਮਣੀਯਂ ਕਤ੍ਵਾ ਅਪਰੇਨ ਸਮਯੇਨ ਤਸ੍ਮਿਂ ਠਾਨੇ ਮਣ੍ਡਪਂ ਕਾਰੇਸਿ, ਮਣ੍ਡਪਮ੍ਪਿ ਅਪਨੇਤ੍ਵਾ ਸਾਲਂ ਕਾਰੇਸਿ, ਤਤ੍ਥ ਫਲਕਾਸਨਾਨਿ ਸਨ੍ਥਰਿਤ੍ਵਾ ਪਾਨੀਯਚਾਟਿਂ ਠਪੇਸਿ.

ਅਪਰੇਨ ਸਮਯੇਨ ਤੇਪਿ ਤੇਤ੍ਤਿਂਸਜਨਾ ਬੋਧਿਸਤ੍ਤੇਨ ਸਮਾਨਚ੍ਛਨ੍ਦਾ ਅਹੇਸੁਂ. ਤੇ ਬੋਧਿਸਤ੍ਤੋ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਤਤੋ ਪਟ੍ਠਾਯ ਤੇਹਿ ਸਦ੍ਧਿਂ ਪੁਞ੍ਞਾਨਿ ਕਰੋਨ੍ਤੋ ਵਿਚਰਤਿ. ਤੇਪਿ ਤੇਨੇਵ ਸਦ੍ਧਿਂ ਪੁਞ੍ਞਾਨਿ ਕਰੋਨ੍ਤਾ ਕਾਲਸ੍ਸੇਵ ਵੁਟ੍ਠਾਯ ਵਾਸਿਫਰਸੁਮੁਸਲਹਤ੍ਥਾ ਚਤੁਮਹਾਪਥਾਦੀਸੁ ਮੁਸਲੇਨ ਪਾਸਾਣੇ ਉਬ੍ਬਤ੍ਤੇਤ੍ਵਾ ਪਵਟ੍ਟੇਨ੍ਤਿ, ਯਾਨਾਨਂ ਅਕ੍ਖਪਟਿਘਾਤਰੁਕ੍ਖੇ ਹਰਨ੍ਤਿ, ਵਿਸਮਂ ਸਮਂ ਕਰੋਨ੍ਤਿ, ਸੇਤੁਂ ਅਤ੍ਥਰਨ੍ਤਿ, ਪੋਕ੍ਖਰਣਿਯੋ ਖਣਨ੍ਤਿ, ਸਾਲਂ ਕਰੋਨ੍ਤਿ, ਦਾਨਾਨਿ ਦੇਨ੍ਤਿ, ਸੀਲਾਨਿ ਰਕ੍ਖਨ੍ਤਿ. ਏਵਂ ਯੇਭੁਯ੍ਯੇਨ ਸਕਲਗਾਮਵਾਸਿਨੋ ਬੋਧਿਸਤ੍ਤਸ੍ਸ ਓਵਾਦੇ ਠਤ੍ਵਾ ਸੀਲਾਨਿ ਰਕ੍ਖਿਂਸੁ.

ਅਥ ਨੇਸਂ ਗਾਮਭੋਜਕੋ ਚਿਨ੍ਤੇਸਿ ‘‘ਅਹਂ ਪੁਬ੍ਬੇ ਏਤੇਸੁ ਸੁਰਂ ਪਿਵਨ੍ਤੇਸੁ ਪਾਣਾਤਿਪਾਤਾਦੀਨਿ ਕਰੋਨ੍ਤੇਸੁ ਚਾਟਿਕਹਾਪਣਾਦਿਵਸੇਨ ਚੇਵ ਦਣ੍ਡਬਲਿਵਸੇਨ ਚ ਧਨਂ ਲਭਾਮਿ, ਇਦਾਨਿ ਪਨ ਮਘੋ ਮਾਣਵੋ ਸੀਲਂ ਰਕ੍ਖਾਪੇਤਿ, ਤੇਸਂ ਪਾਣਾਤਿਪਾਤਾਦੀਨਿ ਕਾਤੁਂ ਨ ਦੇਤਿ, ਇਦਾਨਿ ਪਨ ਤੇ ਪਞ੍ਚ ਸੀਲਾਨਿ ਨ ਰਕ੍ਖਾਪੇਸ੍ਸਾਮੀ’’ਤਿ ਕੁਦ੍ਧੋ ਰਾਜਾਨਂ ਉਪਸਙ੍ਕਮਿਤ੍ਵਾ ‘‘ਦੇਵ, ਬਹੂ ਚੋਰਾ ਗਾਮਘਾਤਾਦੀਨਿ ਕਰੋਨ੍ਤਾ ਵਿਚਰਨ੍ਤੀ’’ਤਿ ਆਹ. ਰਾਜਾ ਤਸ੍ਸ ਵਚਨਂ ਸੁਤ੍ਵਾ ‘‘ਗਚ੍ਛ, ਤੇ ਆਨੇਹੀ’’ਤਿ ਆਹ. ਸੋ ਗਨ੍ਤ੍ਵਾ ਸਬ੍ਬੇਪਿ ਤੇ ਬਨ੍ਧਿਤ੍ਵਾ ਆਨੇਤ੍ਵਾ ‘‘ਆਨੀਤਾ, ਦੇਵ, ਚੋਰਾ’’ਤਿ ਰਞ੍ਞੋ ਆਰੋਚੇਸਿ. ਰਾਜਾ ਤੇਸਂ ਕਮ੍ਮਂ ਅਸੋਧੇਤ੍ਵਾਵ ‘‘ਹਤ੍ਥਿਨਾ ਨੇ ਮਦ੍ਦਾਪੇਥਾ’’ਤਿ ਆਹ. ਤਤੋ ਸਬ੍ਬੇਪਿ ਤੇ ਰਾਜਙ੍ਗਣੇ ਨਿਪਜ੍ਜਾਪੇਤ੍ਵਾ ਹਤ੍ਥਿਂ ਆਨਯਿਂਸੁ. ਬੋਧਿਸਤ੍ਤੋ ਤੇਸਂ ਓਵਾਦਂ ਅਦਾਸਿ ‘‘ਤੁਮ੍ਹੇ ਸੀਲਾਨਿ ਆਵਜ੍ਜੇਥ, ਪੇਸੁਞ੍ਞਕਾਰਕੇ ਚ ਰਞ੍ਞੇ ਚ ਹਤ੍ਥਿਮ੍ਹਿ ਚ ਅਤ੍ਤਨੋ ਸਰੀਰੇ ਚ ਏਕਸਦਿਸਮੇਵ ਮੇਤ੍ਤਂ ਭਾਵੇਥਾ’’ਤਿ. ਤੇ ਤਥਾ ਅਕਂਸੁ. ਅਥ ਨੇਸਂ ਮਦ੍ਦਨਤ੍ਥਾਯ ਹਤ੍ਥਿਂ ਉਪਨੇਸੁਂ. ਸੋ ਉਪਨੀਯਮਾਨੋਪਿ ਨ ਉਪਗਚ੍ਛਤਿ, ਮਹਾਵਿਰਵਂ ਵਿਰਵਿਤ੍ਵਾ ਪਲਾਯਤਿ. ਅਞ੍ਞਂ ਅਞ੍ਞਂ ਹਤ੍ਥਿਂ ਆਨਯਿਂਸੁ, ਤੇਪਿ ਤਥੇਵ ਪਲਾਯਿਂਸੁ.

ਰਾਜਾ ‘‘ਏਤੇਸਂ ਹਤ੍ਥੇ ਕਿਞ੍ਚਿ ਓਸਧਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ‘‘ਵਿਚਿਨਥਾ’’ਤਿ ਆਹ. ਵਿਚਿਨਨ੍ਤਾ ਅਦਿਸ੍ਵਾ ‘‘ਨਤ੍ਥਿ, ਦੇਵਾ’’ਤਿ ਆਹਂਸੁ. ਤੇਨ ਹਿ ਕਿਞ੍ਚਿ ਮਨ੍ਤਂ ਪਰਿਵਤ੍ਤੇਸ੍ਸਨ੍ਤਿ, ਪੁਚ੍ਛਥ ਨੇ ‘‘ਅਤ੍ਥਿ ਵੋ ਪਰਿਵਤ੍ਤਨਮਨ੍ਤੋ’’ਤਿ? ਰਾਜਪੁਰਿਸਾ ਪੁਚ੍ਛਿਂਸੁ, ਬੋਧਿਸਤ੍ਤੋ ‘‘ਅਤ੍ਥੀ’’ਤਿ ਆਹ. ਰਾਜਪੁਰਿਸਾ ‘‘ਅਤ੍ਥਿ ਕਿਰ, ਦੇਵਾ’’ਤਿ ਆਰੋਚਯਿਂਸੁ, ਰਾਜਾ ਸਬ੍ਬੇਪਿ ਤੇ ਪਕ੍ਕੋਸਾਪੇਤ੍ਵਾ ‘‘ਤੁਮ੍ਹਾਕਂ ਜਾਨਨਮਨ੍ਤਂ ਕਥੇਥਾ’’ਤਿ ਆਹ. ਬੋਧਿਸਤ੍ਤੋ ਅਵੋਚ ‘‘ਦੇਵ, ਅਞ੍ਞੋ ਅਮ੍ਹਾਕਂ ਮਨ੍ਤੋ ਨਾਮ ਨਤ੍ਥਿ, ਅਮ੍ਹੇ ਪਨ ਤੇਤ੍ਤਿਂਸਮਤ੍ਤਾ ਜਨਾ ਪਾਣਂ ਨ ਹਨਾਮ, ਅਦਿਨ੍ਨਂ ਨਾਦਿਯਾਮ, ਮਿਚ੍ਛਾਚਾਰਂ ਨ ਚਰਾਮ, ਮੁਸਾਵਾਦਂ ਨ ਭਣਾਮ, ਮਜ੍ਜਂ ਨ ਪਿਵਾਮ, ਮੇਤ੍ਤਂ ਭਾਵੇਮ, ਦਾਨਂ ਦੇਮ, ਮਗ੍ਗਂ ਸਮਂ ਕਰੋਮ, ਪੋਕ੍ਖਰਣਿਯੋ ਖਣਾਮ, ਸਾਲਂ ਕਰੋਮ, ਅਯਂ ਅਮ੍ਹਾਕਂ ਮਨ੍ਤੋ ਚ ਪਰਿਤ੍ਤਞ੍ਚ ਵੁਡ੍ਢਿ ਚਾ’’ਤਿ. ਰਾਜਾ ਤੇਸਂ ਪਸਨ੍ਨੋ ਪੇਸੁਞ੍ਞਕਾਰਕਸ੍ਸ ਸਬ੍ਬਂ ਗੇਹਵਿਭਵਂ ਤਞ੍ਚ ਤੇਸਂਯੇਵ ਦਾਸਂ ਕਤ੍ਵਾ ਅਦਾਸਿ, ਤਂ ਹਤ੍ਥਿਞ੍ਚ ਗਾਮਞ੍ਚ ਤੇਸਂਯੇਵ ਅਦਾਸਿ.

ਤੇ ਤਤੋ ਪਟ੍ਠਾਯ ਯਥਾਰੁਚਿਯਾ ਪੁਞ੍ਞਾਨਿ ਕਰੋਨ੍ਤਾ ‘‘ਚਤੁਮਹਾਪਥੇ ਮਹਨ੍ਤਂ ਸਾਲਂ ਕਾਰੇਸ੍ਸਾਮਾ’’ਤਿ ਵਡ੍ਢਕਿਂ ਪਕ੍ਕੋਸਾਪੇਤ੍ਵਾ ਸਾਲਂ ਪਟ੍ਠਪੇਸੁਂ. ਮਾਤੁਗਾਮੇਸੁ ਪਨ ਵਿਗਤਚ੍ਛਨ੍ਦਤਾਯ ਤਸ੍ਸਾ ਸਾਲਾਯ ਮਾਤੁਗਾਮਾਨਂ ਪਤ੍ਤਿਂ ਨਾਦਂਸੁ. ਤੇਨ ਚ ਸਮਯੇਨ ਬੋਧਿਸਤ੍ਤਸ੍ਸ ਗੇਹੇ ਸੁਧਮ੍ਮਾ, ਚਿਤ੍ਤਾ, ਨਨ੍ਦਾ, ਸੁਜਾਤਿ ਚਤਸ੍ਸੋ ਇਤ੍ਥਿਯੋ ਹੋਨ੍ਤਿ. ਤਾਸੁ ਸੁਧਮ੍ਮਾ ਵਡ੍ਢਕਿਨਾ ਸਦ੍ਧਿਂ ਏਕਤੋ ਹੁਤ੍ਵਾ ‘‘ਭਾਤਿਕ, ਇਮਿਸ੍ਸਾ ਸਾਲਾਯ ਮਂ ਜੇਟ੍ਠਿਕਂ ਕਰੋਹੀ’’ਤਿ ਵਤ੍ਵਾ ਲਞ੍ਜਂ ਅਦਾਸਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪਠਮਮੇਵ ਕਣ੍ਣਿਕਾਰੁਕ੍ਖਂ ਸੁਕ੍ਖਾਪੇਤ੍ਵਾ ਤਚ੍ਛੇਤ੍ਵਾ ਵਿਜ੍ਝਿਤ੍ਵਾ ਕਣ੍ਣਿਕਂ ਨਿਟ੍ਠਾਪੇਤ੍ਵਾ ਵਤ੍ਥੇਨ ਪਲਿਵੇਠੇਤ੍ਵਾ ਠਪੇਸਿ. ਅਥ ਸਾਲਂ ਨਿਟ੍ਠਾਪੇਤ੍ਵਾ ਕਣ੍ਣਿਕਾਰੋਪਨਕਾਲੇ ‘‘ਅਹੋ, ਅਯ੍ਯਾ, ਏਕਂ ਨ ਸਰਿਮ੍ਹਾ’’ਤਿ ਆਹ. ‘‘ਕਿਂ ਨਾਮ, ਭੋ’’ਤਿ. ‘‘ਕਣ੍ਣਿਕਾ ਲਦ੍ਧੁਂ ਵਟ੍ਟਤੀ’’ਤਿ. ‘‘ਹੋਤੁ ਆਹਰਿਸ੍ਸਾਮਾ’’ਤਿ? ‘‘ਇਦਾਨਿ ਛਿਨ੍ਨਰੁਕ੍ਖੇਨ ਕਾਤੁਂ ਨ ਸਕ੍ਕਾ, ਪੁਬ੍ਬੇਯੇਵ ਛਿਨ੍ਦਿਤ੍ਵਾ ਤਚ੍ਛੇਤ੍ਵਾ ਵਿਜ੍ਝਿਤ੍ਵਾ ਠਪਿਤਕਣ੍ਣਿਕਾ ਲਦ੍ਧੁਂ ਵਟ੍ਟਤੀ’’ਤਿ. ‘‘ਇਦਾਨਿ ਕਿਂ ਕਾਤਬ੍ਬ’’ਨ੍ਤਿ? ‘‘ਸਚੇ ਕਸ੍ਸਚਿ ਗੇਹੇ ਨਿਟ੍ਠਾਪੇਤ੍ਵਾ ਠਪਿਤਾ ਵਿਕ੍ਕਾਯਿਕਕਣ੍ਣਿਕਾ ਅਤ੍ਥਿ, ਸਾ ਪਰਿਯੇਸਿਤਬ੍ਬਾ’’ਤਿ. ਤੇ ਪਰਿਯੇਸਨ੍ਤਾ ਸੁਧਮ੍ਮਾਯ ਗੇਹੇ ਦਿਸ੍ਵਾ ਮੂਲੇਨ ਨ ਲਭਿਂਸੁ. ‘‘ਸਚੇ ਮਂ ਸਾਲਾਯ ਪਤ੍ਤਿਕਂ ਕਰੋਥ, ਦਸ੍ਸਾਮੀ’’ਤਿ ਵੁਤ੍ਤੇ ‘‘ਨ ਮਯਂ ਮਾਤੁਗਾਮਾਨਂ ਪਤ੍ਤਿਂ ਦਮ੍ਹਾ’’ਤਿ ਆਹਂਸੁ.

ਅਥ ਨੇ ਵਡ੍ਢਕੀ ਆਹ ‘‘ਅਯ੍ਯਾ, ਤੁਮ੍ਹੇ ਕਿਂ ਕਥੇਥ, ਠਪੇਤ੍ਵਾ ਬ੍ਰਹ੍ਮਲੋਕਂ ਅਞ੍ਞਂ ਮਾਤੁਗਾਮਰਹਿਤਟ੍ਠਾਨਂ ਨਾਮ ਨਤ੍ਥਿ, ਗਣ੍ਹਥ ਕਣ੍ਣਿਕਂ, ਏਵਂ ਸਨ੍ਤੇ ਅਮ੍ਹਾਕਂ ਕਮ੍ਮਂ ਨਿਟ੍ਠਂ ਗਮਿਸ੍ਸਤੀ’’ਤਿ. ਤੇ ‘‘ਸਾਧੂ’’ਤਿ ਕਣ੍ਣਿਕਂ ਗਹੇਤ੍ਵਾ ਸਾਲਂ ਨਿਟ੍ਠਾਪੇਤ੍ਵਾ ਆਸਨਫਲਕਾਨਿ ਸਨ੍ਥਰਿਤ੍ਵਾ ਪਾਨੀਯਚਾਟਿਯੋ ਠਪੇਤ੍ਵਾ ਯਾਗੁਭਤ੍ਤਂ ਨਿਬਨ੍ਧਿਂਸੁ. ਸਾਲਂ ਪਾਕਾਰੇਨ ਪਰਿਕ੍ਖਿਪਿਤ੍ਵਾ ਦ੍ਵਾਰਂ ਯੋਜੇਤ੍ਵਾ ਅਨ੍ਤੋਪਾਕਾਰੇ ਵਾਲੁਕਂ ਆਕਿਰਿਤ੍ਵਾ ਬਹਿਪਾਕਾਰੇ ਤਾਲਪਨ੍ਤਿਯੋ ਰੋਪੇਸੁਂ. ਚਿਤ੍ਤਾਪਿ ਤਸ੍ਮਿਂ ਠਾਨੇ ਉਯ੍ਯਾਨਂ ਕਾਰੇਸਿ, ‘‘ਪੁਪ੍ਫੂਪਗਫਲੂਪਗਰੁਕ੍ਖੋ ਅਸੁਕੋ ਨਾਮ ਤਸ੍ਮਿਂ ਨਤ੍ਥੀ’’ਤਿ ਨਾਹੋਸਿ. ਨਨ੍ਦਾਪਿ ਤਸ੍ਮਿਂਯੇਵ ਠਾਨੇ ਪੋਕ੍ਖਰਣਿਂ ਕਾਰੇਸਿ ਪਞ੍ਚਵਣ੍ਣੇਹਿ ਪਦੁਮੇਹਿ ਸਞ੍ਛਨ੍ਨਂ ਰਮਣੀਯਂ. ਸੁਜਾ ਨ ਕਿਞ੍ਚਿ ਅਕਾਸਿ.

ਬੋਧਿਸਤ੍ਤੋ ਮਾਤੁ ਉਪਟ੍ਠਾਨਂ ਪਿਤੁ ਉਪਟ੍ਠਾਨਂ ਕੁਲੇ ਜੇਟ੍ਠਾਪਚਾਯਿਕਕਮ੍ਮਂ ਸਚ੍ਚਵਾਚਂ ਅਫਰੁਸਵਾਚਂ ਅਪਿਸੁਣਵਾਚਂ ਮਚ੍ਛੇਰਵਿਨਯਨ੍ਤਿ ਇਮਾਨਿ ਸਤ੍ਤ ਵਤਪਦਾਨਿ ਪੂਰੇਤ੍ਵਾ –

‘‘ਮਾਤਾਪੇਤ੍ਤਿਭਰਂ ਜਨ੍ਤੁਂ, ਕੁਲੇ ਜੇਟ੍ਠਾਪਚਾਯਿਨਂ;

ਸਣ੍ਹਂ ਸਖਿਲਸਮ੍ਭਾਸਂ, ਪੇਸੁਣੇਯ੍ਯਪ੍ਪਹਾਯਿਨਂ.

‘‘ਮਚ੍ਛੇਰਵਿਨਯੇ ਯੁਤ੍ਤਂ, ਸਚ੍ਚਂ ਕੋਧਾਭਿਭੁਂ ਨਰਂ;

ਤਂ ਵੇ ਦੇਵਾ ਤਾਵਤਿਂਸਾ, ਆਹੁ ਸਪ੍ਪੁਰਿਸੋ ਇਤੀ’’ਤਿ. (ਸਂ. ਨਿ. ੧.੨੫੭) –

ਏਵਂ ਪਸਂਸਿਯਭਾਵਂ ਆਪਜ੍ਜਿਤ੍ਵਾ ਜੀਵਿਤਪਰਿਯੋਸਾਨੇ ਤਾਵਤਿਂਸਭਵਨੇ ਸਕ੍ਕੋ ਦੇਵਰਾਜਾ ਹੁਤ੍ਵਾ ਨਿਬ੍ਬਤ੍ਤਿ, ਤੇਪਿਸ੍ਸ ਸਹਾਯਾ ਤਤ੍ਥੇਵ ਨਿਬ੍ਬਤ੍ਤਿਂਸੁ. ਤਸ੍ਮਿਂ ਕਾਲੇ ਤਾਵਤਿਂਸਭਵਨੇ ਅਸੁਰਾ ਪਟਿਵਸਨ੍ਤਿ. ਸਕ੍ਕੋ ਦੇਵਰਾਜਾ ‘‘ਕਿਂ ਨੋ ਸਾਧਾਰਣੇਨ ਰਜ੍ਜੇਨਾ’’ਤਿ ਅਸੁਰੇ ਦਿਬ੍ਬਪਾਨਂ ਪਾਯੇਤ੍ਵਾ ਮਤ੍ਤੇ ਸਮਾਨੇ ਪਾਦੇਸੁ ਗਾਹਾਪੇਤ੍ਵਾ ਸਿਨੇਰੁਪਬ੍ਬਤਪਾਦੇ ਖਿਪਾਪੇਸਿ. ਤੇ ਅਸੁਰਭਵਨਮੇਵ ਸਮ੍ਪਾਪੁਣਿਂਸੁ.

ਅਸੁਰਭਵਨਂ ਨਾਮ ਸਿਨੇਰੁਸ੍ਸ ਹੇਟ੍ਠਿਮਤਲੇ ਤਾਵਤਿਂਸਦੇਵਲੋਕਪ੍ਪਮਾਣਮੇਵ, ਤਤ੍ਥ ਦੇਵਾਨਂ ਪਾਰਿਚ੍ਛਤ੍ਤਕੋ ਵਿਯ ਚਿਤ੍ਤਪਾਟਲਿ ਨਾਮ ਕਪ੍ਪਟ੍ਠਿਯਰੁਕ੍ਖੋ ਹੋਤਿ. ਤੇ ਚਿਤ੍ਤਪਾਟਲਿਯਾ ਪੁਪ੍ਫਿਤਾਯ ਜਾਨਨ੍ਤਿ ‘‘ਨਾਯਂ ਅਮ੍ਹਾਕਂ ਦੇਵਲੋਕੋ, ਦੇਵਲੋਕਸ੍ਮਿਞ੍ਹਿ ਪਾਰਿਚ੍ਛਤ੍ਤਕੋ ਪੁਪ੍ਫਤੀ’’ਤਿ. ਅਥ ਤੇ ‘‘ਜਰਸਕ੍ਕੋ ਅਮ੍ਹੇ ਮਤ੍ਤੇ ਕਤ੍ਵਾ ਮਹਾਸਮੁਦ੍ਦਪਿਟ੍ਠੇ ਖਿਪਿਤ੍ਵਾ ਅਮ੍ਹਾਕਂ ਦੇਵਨਗਰਂ ਗਣ੍ਹਿ, ਤੇ ਮਯਂ ਤੇਨ ਸਦ੍ਧਿਂ ਯੁਜ੍ਝਿਤ੍ਵਾ ਅਮ੍ਹਾਕਂ ਦੇਵਨਗਰਮੇਵ ਗਣ੍ਹਿਸ੍ਸਾਮਾ’’ਤਿ ਕਿਪਿਲ੍ਲਿਕਾ ਵਿਯ ਥਮ੍ਭਂ ਸਿਨੇਰੁਂ ਅਨੁਸਞ੍ਚਰਮਾਨਾ ਉਟ੍ਠਹਿਂਸੁ. ਸਕ੍ਕੋ ‘‘ਅਸੁਰਾ ਕਿਰ ਉਟ੍ਠਿਤਾ’’ਤਿ ਸੁਤ੍ਵਾ ਸਮੁਦ੍ਦਪਿਟ੍ਠੇਯੇਵ ਅਬ੍ਭੁਗ੍ਗਨ੍ਤ੍ਵਾ ਯੁਜ੍ਝਮਾਨੋ ਤੇਹਿ ਪਰਾਜਿਤੋ ਦਿਯਡ੍ਢਯੋਜਨਸਤਿਕੇਨ ਵੇਜਯਨ੍ਤਰਥੇਨ ਦਕ੍ਖਿਣਸਮੁਦ੍ਦਸ੍ਸ ਮਤ੍ਥਕੇਨ ਪਲਾਯਿਤੁਂ ਆਰਦ੍ਧੋ. ਅਥਸ੍ਸ ਰਥੋ ਸਮੁਦ੍ਦਪਿਟ੍ਠੇਨ ਵੇਗੇਨ ਗਚ੍ਛਨ੍ਤੋ ਸਿਮ੍ਬਲਿਵਨਂ ਪਕ੍ਖਨ੍ਤੋ, ਤਸ੍ਸ ਗਮਨਮਗ੍ਗੇ ਸਿਮ੍ਬਲਿਵਨਂ ਨਲ਼ਵਨਂ ਵਿਯ ਛਿਜ੍ਜਿਤ੍ਵਾ ਛਿਜ੍ਜਿਤ੍ਵਾ ਸਮੁਦ੍ਦਪਿਟ੍ਠੇ ਪਤਤਿ. ਸੁਪਣ੍ਣਪੋਤਕਾ ਸਮੁਦ੍ਦਪਿਟ੍ਠੇ ਪਰਿਪਤਨ੍ਤਾ ਮਹਾਵਿਰਵਂ ਰਵਿਂਸੁ. ਸਕ੍ਕੋ ਮਾਤਲਿਂ ਪੁਚ੍ਛਿ ‘‘ਸਮ੍ਮ ਮਾਤਲਿ, ਕਿਂ ਸਦ੍ਦੋ ਨਾਮੇਸ, ਅਤਿਕਾਰੁਞ੍ਞਰਵੋ ਵਤ੍ਤਤੀ’’ਤਿ? ‘‘ਦੇਵ, ਤੁਮ੍ਹਾਕਂ ਰਥਵੇਗੇਨ ਵਿਚੁਣ੍ਣਿਤੇ ਸਿਮ੍ਬਲਿਵਨੇ ਪਤਨ੍ਤੇ ਸੁਪਣ੍ਣਪੋਤਕਾ ਮਰਣਭਯਤਜ੍ਜਿਤਾ ਏਕਵਿਰਵਂ ਵਿਰਵਨ੍ਤੀ’’ਤਿ.

ਮਹਾਸਤ੍ਤੋ ‘‘ਸਮ੍ਮ ਮਾਤਲਿ, ਮਾ ਅਮ੍ਹੇ ਨਿਸ੍ਸਾਯ ਏਤੇ ਕਿਲਮਨ੍ਤੁ, ਨ ਮਯਂ ਇਸ੍ਸਰਿਯਂ ਨਿਸ੍ਸਾਯ ਪਾਣਵਧਕਮ੍ਮਂ ਕਰੋਮ, ਏਤੇਸਂ ਪਨ ਅਤ੍ਥਾਯ ਮਯਂ ਜੀਵਿਤਂ ਪਰਿਚ੍ਚਜਿਤ੍ਵਾ ਅਸੁਰਾਨਂ ਦਸ੍ਸਾਮ, ਨਿਵਤ੍ਤਯੇਤਂ ਰਥ’’ਨ੍ਤਿ ਵਤ੍ਵਾ ਇਮਂ ਗਾਥਮਾਹ –

੩੧. ‘‘ਕੁਲਾਵਕਾ ਮਾਤਲਿ ਸਿਮ੍ਬਲਿਸ੍ਮਿਂ, ਈਸਾਮੁਖੇਨ ਪਰਿਵਜ੍ਜਯਸ੍ਸੁ;

ਕਾਮਂ ਚਜਾਮ ਅਸੁਰੇਸੁ ਪਾਣਂ, ਮਾਮੇ ਦਿਜਾ ਵਿਕੁਲਾਵਾ ਅਹੇਸੁ’’ਨ੍ਤਿ.

ਤਤ੍ਥ ਕੁਲਾਵਕਾਤਿ ਸੁਪਣ੍ਣਪੋਤਕਾ. ਮਾਤਲੀਤਿ ਸਾਰਥਿਂ ਆਮਨ੍ਤੇਸਿ. ਸਿਮ੍ਬਲਿਸ੍ਮਿਨ੍ਤਿ ਪਸ੍ਸ ਏਤੇ ਸਿਮ੍ਬਲਿਰੁਕ੍ਖੇ ਓਲਮ੍ਬਨ੍ਤਾ ਠਿਤਾਤਿ ਦਸ੍ਸੇਤਿ. ਈਸਾਮੁਖੇਨ ਪਰਿਵਜ੍ਜਯਸ੍ਸੂਤਿ ਏਤੇ ਏਤਸ੍ਸ ਰਥਸ੍ਸ ਈਸਾਮੁਖੇਨ ਯਥਾ ਨ ਹਞ੍ਞਨ੍ਤਿ, ਏਵਂ ਤੇ ਪਰਿਵਜ੍ਜਯਸ੍ਸੁ. ਕਾਮਂ ਚਜਾਮ ਅਸੁਰੇਸੁ ਪਾਣਨ੍ਤਿ ਯਦਿ ਅਮ੍ਹੇਸੁ ਅਸੁਰਾਨਂ ਪਾਣਂ ਚਜਨ੍ਤੇਸੁ ਏਤੇਸਂ ਸੋਤ੍ਥਿ ਹੋਤਿ, ਕਾਮਂ ਚਜਾਮ ਏਕਂਸੇਨੇਵ ਮਯਂ ਅਸੁਰੇਸੁ ਅਮ੍ਹਾਕਂ ਪਾਣਂ ਚਜਾਮ. ਮਾਮੇ ਦਿਜਾ ਵਿਕੁਲਾਵਾ ਅਹੇਸੁਨ੍ਤਿ ਇਮੇ ਪਨ ਦਿਜਾ ਇਮੇ ਗਰੁਲ਼ਪੋਤਕਾ ਵਿਦ੍ਧਸ੍ਤਵਿਚੁਣ੍ਣਿਤਕੁਲਾਵਕਤਾਯ ਵਿਕੁਲਾਵਾ ਮਾ ਅਹੇਸੁਂ, ਮਾ ਅਮ੍ਹਾਕਂ ਦੁਕ੍ਖਂ ਏਤੇਸਂ ਉਪਰਿ ਖਿਪ, ਨਿਵਤ੍ਤਯ ਨਿਵਤ੍ਤਯ ਰਥਨ੍ਤਿ. ਮਾਤਲਿਸਙ੍ਗਾਹਕੋ ਤਸ੍ਸ ਵਚਨਂ ਸੁਤ੍ਵਾ ਰਥਂ ਨਿਵਤ੍ਤੇਤ੍ਵਾ ਅਞ੍ਞੇਨ ਮਗ੍ਗੇਨ ਦੇਵਲੋਕਾਭਿਮੁਖਂ ਅਕਾਸਿ. ਅਸੁਰਾ ਪਨ ਤਂ ਨਿਵਤ੍ਤਯਮਾਨਮੇਵ ਦਿਸ੍ਵਾ ‘‘ਅਦ੍ਧਾ ਅਞ੍ਞੇਹਿਪਿ ਚਕ੍ਕਵਾਲ਼ੇਹਿ ਸਕ੍ਕਾ ਆਗਚ੍ਛਨ੍ਤਿ, ਬਲਂ ਲਭਿਤ੍ਵਾ ਰਥੋ ਨਿਵਤ੍ਤੋ ਭਵਿਸ੍ਸਤੀ’’ਤਿ ਮਰਣਭਯਭੀਤਾ ਪਲਾਯਿਤ੍ਵਾ ਅਸੁਰਭਵਨਮੇਵ ਪਵਿਸਿਂਸੁ.

ਸਕ੍ਕੋਪਿ ਦੇਵਨਗਰਂ ਪਵਿਸਿਤ੍ਵਾ ਦ੍ਵੀਸੁ ਦੇਵਲੋਕੇਸੁ ਦੇਵਗਣੇਨ ਪਰਿਵੁਤੋ ਨਗਰਮਜ੍ਝੇ ਅਟ੍ਠਾਸਿ. ਤਸ੍ਮਿਂ ਖਣੇ ਪਥਵਿਂ ਭਿਨ੍ਦਿਤ੍ਵਾ ਯੋਜਨਸਹਸ੍ਸੁਬ੍ਬੇਧੋ ਵੇਜਯਨ੍ਤਪਾਸਾਦੋ ਉਟ੍ਠਹਿ. ਵਿਜਯਨ੍ਤੇ ਉਟ੍ਠਿਤਤ੍ਤਾ ‘‘ਵੇਜਯਨ੍ਤੋ’’ ਤ੍ਵੇਵ ਨਾਮਂ ਅਕਂਸੁ. ਅਥ ਸਕ੍ਕੋ ਪੁਨ ਅਸੁਰਾਨਂ ਅਨਾਗਮਨਤ੍ਥਾਯ ਪਞ੍ਚਸੁ ਠਾਨੇਸੁ ਆਰਕ੍ਖਂ ਠਪੇਸਿ. ਯਂ ਸਨ੍ਧਾਯ ਵੁਤ੍ਤਂ –

‘‘ਅਨ੍ਤਰਾ ਦ੍ਵਿਨ੍ਨਂ ਅਯੁਜ੍ਝਪੁਰਾਨਂ, ਪਞ੍ਚਵਿਧਾ ਠਪਿਤਾ ਅਭਿਰਕ੍ਖਾ;

ਉਰਗਕਰੋਟਿਪਯਸ੍ਸ ਚ ਹਾਰੀ, ਮਦਨਯੁਤਾ ਚਤੁਰੋ ਚ ਮਹਨ੍ਤਾ’’ਤਿ. (ਸਂ. ਨਿ. ਅਟ੍ਠ. ੧.੧.੨੪੭);

ਦ੍ਵੇ ਨਗਰਾਨਿਪਿ ਯੁਦ੍ਧੇਨ ਗਹੇਤੁਂ ਅਸਕ੍ਕੁਣੇਯ੍ਯਤਾਯ ਅਯੁਜ੍ਝਪੁਰਾਨਿ ਨਾਮ ਜਾਤਾਨਿ ਦੇਵਨਗਰਞ੍ਚ ਅਸੁਰਨਗਰਞ੍ਚ. ਯਦਾ ਹਿ ਅਸੁਰਾ ਬਲਵਨ੍ਤਾ ਹੋਨ੍ਤਿ, ਅਥ ਦੇਵੇਹਿ ਪਲਾਯਿਤ੍ਵਾ ਦੇਵਨਗਰਂ ਪਵਿਸਿਤ੍ਵਾ ਦ੍ਵਾਰੇ ਪਿਹਿਤੇ ਅਸੁਰਾਨਂ ਸਤਸਹਸ੍ਸਮ੍ਪਿ ਕਿਞ੍ਚਿ ਕਾਤੁਂ ਨ ਸਕ੍ਕੋਤਿ. ਯਦਾ ਦੇਵਾ ਬਲਵਨ੍ਤਾ ਹੋਨ੍ਤਿ, ਅਥ ਅਸੁਰੇਹਿ ਪਲਾਯਿਤ੍ਵਾ ਅਸੁਰਨਗਰਂ ਪਵਿਸਿਤ੍ਵਾ ਦ੍ਵਾਰੇ ਪਿਹਿਤੇ ਸਕ੍ਕਾਨਂ ਸਤਸਹਸ੍ਸਮ੍ਪਿ ਕਿਞ੍ਚਿ ਕਾਤੁਂ ਨ ਸਕ੍ਕੋਤਿ. ਇਤਿ ਇਮਾਨਿ ਦ੍ਵੇ ਨਗਰਾਨਿ ਅਯੁਜ੍ਝਪੁਰਾਨਿ ਨਾਮ. ਤੇਸਂ ਅਨ੍ਤਰਾ ਏਤੇਸੁ ਉਰਗਾਦੀਸੁ ਪਞ੍ਚਸੁ ਠਾਨੇਸੁ ਸਕ੍ਕੇਨ ਆਰਕ੍ਖਾ ਠਪਿਤਾ. ਤਤ੍ਥ ਉਰਗ-ਸਦ੍ਦੇਨ ਨਾਗਾ ਗਹਿਤਾ. ਤੇ ਉਦਕੇ ਬਲਵਨ੍ਤਾ ਹੋਨ੍ਤਿ, ਤਸ੍ਮਾ ਸਿਨੇਰੁਸ੍ਸ ਪਠਮਾਲਿਨ੍ਦੇ ਤੇਸਂ ਆਰਕ੍ਖਾ. ਕਰੋਟਿ-ਸਦ੍ਦੇਨ ਸੁਪਣ੍ਣਾ ਗਹਿਤਾ. ਤੇਸਂ ਕਿਰ ਕਰੋਟਿ ਨਾਮ ਪਾਨਭੋਜਨਂ, ਤੇਨ ਤਂ ਨਾਮਂ ਲਭਿਂਸੁ, ਦੁਤਿਯਾਲਿਨ੍ਦੇ ਤੇਸਂ ਆਰਕ੍ਖਾ. ਪਯਸ੍ਸਹਾਰਿ-ਸਦ੍ਦੇਨ ਕੁਮ੍ਭਣ੍ਡਾ ਗਹਿਤਾ. ਦਾਨਵਰਕ੍ਖਸਾ ਕਿਰੇਤੇ, ਤਤਿਯਾਲਿਨ੍ਦੇ ਤੇਸਂ ਆਰਕ੍ਖਾ. ਮਦਨਯੁਤ-ਸਦ੍ਦੇਨ ਯਕ੍ਖਾ ਗਹਿਤਾ. ਵਿਸਮਚਾਰਿਨੋ ਕਿਰ ਤੇ ਯੁਦ੍ਧਸੋਣ੍ਡਾ, ਚਤੁਤ੍ਥਾਲਿਨ੍ਦੇ ਤੇਸਂ ਆਰਕ੍ਖਾ. ਚਤੁਰੋ ਚ ਮਹਨ੍ਤਾਤਿ ਚਤ੍ਤਾਰੋ ਮਹਾਰਾਜਾਨੋ ਵੁਤ੍ਤਾ, ਪਞ੍ਚਮਾਲਿਨ੍ਦੇ ਤੇਸਂ ਆਰਕ੍ਖਾ. ਤਸ੍ਮਾ ਯਦਿ ਅਸੁਰਾ ਕੁਪਿਤਾ ਆਵਿਲਚਿਤ੍ਤਾ ਦੇਵਪੁਰਂ ਉਪਯਨ੍ਤਿ, ਪਞ੍ਚਵਿਧੇਸੁ ਯਂ ਗਿਰਿਨੋ ਪਠਮਂ ਪਰਿਭਣ੍ਡਂ, ਤਂ ਉਰਗਾ ਪਰਿਬਾਹਿਯ ਤਿਟ੍ਠਨ੍ਤਿ. ਏਵਂ ਸੇਸੇਸੁ ਸੇਸਾ.

ਇਮੇਸੁ ਪਨ ਪਞ੍ਚਸੁ ਠਾਨੇਸੁ ਆਰਕ੍ਖਂ ਠਪੇਤ੍ਵਾ ਸਕ੍ਕੇ ਦੇਵਾਨਮਿਨ੍ਦੇ ਦਿਬ੍ਬਸਮ੍ਪਤ੍ਤਿਂ ਅਨੁਭਵਮਾਨੇ ਸੁਧਮ੍ਮਾ ਚਵਿਤ੍ਵਾ ਤਸ੍ਸੇਵ ਪਾਦਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ, ਕਣ੍ਣਿਕਾਯ ਦਿਨ੍ਨਨਿਸ੍ਸਨ੍ਦੇਨ ਚਸ੍ਸਾ ਪਞ੍ਚਯੋਜਨਸਤਿਕਾ ਸੁਧਮ੍ਮਾ ਨਾਮ ਦੇਵਸਭਾ ਉਦਪਾਦਿ, ਯਤ੍ਥ ਦਿਬ੍ਬਸੇਤਚ੍ਛਤ੍ਤਸ੍ਸ ਹੇਟ੍ਠਾ ਯੋਜਨਪ੍ਪਮਾਣੇ ਕਞ੍ਚਨਪਲ੍ਲਙ੍ਕੇ ਨਿਸਿਨ੍ਨੋ ਸਕ੍ਕੋ ਦੇਵਾਨਮਿਨ੍ਦੋ ਦੇਵਮਨੁਸ੍ਸਾਨਂ ਕਤ੍ਤਬ੍ਬਕਿਚ੍ਚਾਨਿ ਕਰੋਤਿ. ਚਿਤ੍ਤਾਪਿ ਚਵਿਤ੍ਵਾ ਤਸ੍ਸੇਵ ਪਾਦਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ, ਉਯ੍ਯਾਨਸ੍ਸ ਕਰਣਨਿਸ੍ਸਨ੍ਦੇਨ ਚਸ੍ਸਾ ਚਿਤ੍ਤਲਤਾਵਨਂ ਨਾਮ ਉਯ੍ਯਾਨਂ ਉਦਪਾਦਿ. ਨਨ੍ਦਾਪਿ ਚਵਿਤ੍ਵਾ ਤਸ੍ਸੇਵ ਪਾਦਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ, ਪੋਕ੍ਖਰਣਿਯਾ ਨਿਸ੍ਸਨ੍ਦੇਨ ਚਸ੍ਸਾ ਨਨ੍ਦਾ ਨਾਮ ਪੋਕ੍ਖਰਣੀ ਉਦਪਾਦਿ.

ਸੁਜਾ ਪਨ ਕੁਸਲਕਮ੍ਮਸ੍ਸ ਅਕਤਤ੍ਤਾ ਏਕਸ੍ਮਿਂ ਅਰਞ੍ਞੇ ਕਨ੍ਦਰਾਯ ਬਕਸਕੁਣਿਕਾ ਹੁਤ੍ਵਾ ਨਿਬ੍ਬਤ੍ਤਾ. ਸਕ੍ਕੋ ‘‘ਸੁਜਾ ਨ ਪਞ੍ਞਾਯਤਿ, ਕਤ੍ਥ ਨੁ ਖੋ ਨਿਬ੍ਬਤ੍ਤਾ’’ਤਿ ਆਵਜ੍ਜੇਨ੍ਤੋ ਤਂ ਦਿਸ੍ਵਾ ਤਤ੍ਥ ਗਨ੍ਤ੍ਵਾ ਤਂ ਆਦਾਯ ਦੇਵਲੋਕਂ ਆਗਨ੍ਤ੍ਵਾ ਤਸ੍ਸਾ ਰਮਣੀਯਂ ਦੇਵਨਗਰਂ ਸੁਧਮ੍ਮਂ ਦੇਵਸਭਂ ਚਿਤ੍ਤਲਤਾਵਨਂ ਨਨ੍ਦਾਪੋਕ੍ਖਰਣਿਞ੍ਚ ਦਸ੍ਸੇਤ੍ਵਾ ‘‘ਏਤਾ ਕੁਸਲਂ ਕਤ੍ਵਾ ਮਯ੍ਹਂ ਪਾਦਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਾ, ਤ੍ਵਂ ਪਨ ਕੁਸਲਂ ਅਕਤ੍ਵਾ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਾ, ਇਤੋ ਪਟ੍ਠਾਯ ਸੀਲਂ ਰਕ੍ਖਾਹੀ’’ਤਿ ਤਂ ਓਵਦਿਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਤਤ੍ਥੇਵ ਨੇਤ੍ਵਾ ਵਿਸ੍ਸਜ੍ਜੇਸਿ. ਸਾਪਿ ਤਤੋ ਪਟ੍ਠਾਯ ਸੀਲਂ ਰਕ੍ਖਤਿ. ਸਕ੍ਕੋ ਕਤਿਪਾਹਚ੍ਚਯੇਨ ‘‘ਸਕ੍ਕਾ ਨੁ ਖੋ ਸੀਲਂ ਰਕ੍ਖਿਤੁ’’ਨ੍ਤਿ ਗਨ੍ਤ੍ਵਾ ਮਚ੍ਛਰੂਪੇਨ ਉਤ੍ਤਾਨੋ ਹੁਤ੍ਵਾ ਪੁਰਤੋ ਨਿਪਜ੍ਜਿ, ਸਾ ‘‘ਮਤਮਚ੍ਛਕੋ’’ਤਿ ਸਞ੍ਞਾਯ ਸੀਸੇ ਅਗ੍ਗਹੇਸਿ, ਮਚ੍ਛੋ ਨਙ੍ਗੁਟ੍ਠਂ ਚਾਲੇਸਿ, ਅਥ ਨਂ ‘‘ਜੀਵਤਿ ਮਞ੍ਞੇ’’ਤਿ ਵਿਸ੍ਸਜ੍ਜੇਸਿ. ਸਕ੍ਕੋ ‘‘ਸਾਧੁ ਸਾਧੁ, ਸਕ੍ਖਿਸ੍ਸਸਿ ਸੀਲਂ ਰਕ੍ਖਿਤੁ’’ਨ੍ਤਿ ਅਗਮਾਸਿ. ਸਾ ਤਤੋ ਚੁਤਾ ਬਾਰਾਣਸਿਯਂ ਕੁਮ੍ਭਕਾਰਗੇਹੇ ਨਿਬ੍ਬਤ੍ਤਿ.

ਸਕ੍ਕੋ ‘‘ਕਹਂ ਨੁ ਖੋ ਨਿਬ੍ਬਤ੍ਤਾ’’ਤਿ ਤਤ੍ਥ ਨਿਬ੍ਬਤ੍ਤਭਾਵਂ ਞਤ੍ਵਾ ਸੁਵਣ੍ਣਏਲ਼ਾਲੁਕਾਨਂ ਯਾਨਕਂ ਪੂਰੇਤ੍ਵਾ ਮਜ੍ਝੇ ਗਾਮਸ੍ਸ ਮਹਲ੍ਲਕਵੇਸੇਨ ਨਿਸੀਦਿਤ੍ਵਾ ‘‘ਏਲ਼ਾਲੁਕਾਨਿ ਗਣ੍ਹਥ, ਏਲ਼ਾਲੁਕਾਨਿ ਗਣ੍ਹਥਾ’’ਤਿ ਉਗ੍ਘੋਸੇਸਿ. ਮਨੁਸ੍ਸਾ ਆਗਨ੍ਤ੍ਵਾ ‘‘ਦੇਹਿ, ਤਾਤਾ’’ਤਿ ਆਹਂਸੁ. ‘‘ਅਹਂ ਸੀਲਰਕ੍ਖਕਾਨਂ ਦਮ੍ਮਿ, ਤੁਮ੍ਹੇ ਸੀਲਂ ਰਕ੍ਖਥਾ’’ਤਿ? ‘‘ਮਯਂ ਸੀਲਂ ਨਾਮ ਨ ਜਾਨਾਮ, ਮੂਲੇਨ ਦੇਹੀ’’ਤਿ. ‘‘ਨ ਮਯ੍ਹਂ ਮੂਲੇਨ ਅਤ੍ਥੋ, ਸੀਲਰਕ੍ਖਕਾਨਞ੍ਞੇਵਾਹਂ ਦਮ੍ਮੀ’’ਤਿ. ਮਨੁਸ੍ਸਾ ‘‘ਕੋ ਚਾਯਂ ਏਲ਼ਾਲੁਕੋ’’ਤਿ ਪਕ੍ਕਮਿਂਸੁ. ਸੁਜਾ ਤਂ ਪਵਤ੍ਤਿਂ ਸੁਤ੍ਵਾ ‘‘ਮਯ੍ਹਂ ਆਨੀਤਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਗਨ੍ਤ੍ਵਾ ਤਂ ‘‘ਦੇਹਿ, ਤਾਤਾ’’ਤਿ ਆਹ. ‘‘ਸੀਲਂ ਰਕ੍ਖਸਿ, ਅਮ੍ਮਾ’’ਤਿ? ‘‘ਆਮ, ਰਕ੍ਖਾਮੀ’’ਤਿ. ‘‘ਇਦਂ ਮਯਾ ਤੁਯ੍ਹਮੇਵ ਅਤ੍ਥਾਯ ਆਭਤ’’ਨ੍ਤਿ ਸਦ੍ਧਿਂ ਯਾਨਕੇਨ ਗੇਹਦ੍ਵਾਰੇ ਠਪੇਤ੍ਵਾ ਪਕ੍ਕਾਮਿ.

ਸਾਪਿ ਯਾਵਜੀਵਂ ਸੀਲਂ ਰਕ੍ਖਿਤ੍ਵਾ ਤਤੋ ਚੁਤਾ ਵੇਪਚਿਤ੍ਤਿਸ੍ਸ ਅਸੁਰਿਨ੍ਦਸ੍ਸ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ, ਸੀਲਾਨਿਸਂਸੇਨ ਅਭਿਰੂਪਾ ਅਹੋਸਿ. ਸੋ ਤਸ੍ਸਾ ਵਯਪ੍ਪਤ੍ਤਕਾਲੇ ‘‘ਮਯ੍ਹਂ ਧੀਤਾ ਅਤ੍ਤਨੋ ਚਿਤ੍ਤਰੁਚਿਤਂ ਸਾਮਿਕਂ ਗਣ੍ਹਤੂ’’ਤਿ ਅਸੁਰੇ ਸਨ੍ਨਿਪਾਤੇਸਿ. ਸਕ੍ਕੋ ‘‘ਕਹਂ ਨੁ ਖੋ ਸਾ ਨਿਬ੍ਬਤ੍ਤਾ’’ਤਿ ਓਲੋਕੇਨ੍ਤੋ ਤਤ੍ਥ ਨਿਬ੍ਬਤ੍ਤਭਾਵਂ ਞਤ੍ਵਾ ‘‘ਸੁਜਾ ਚਿਤ੍ਤਰੁਚਿਤਂ ਸਾਮਿਕਂ ਗਣ੍ਹਨ੍ਤੀ ਮਂ ਗਣ੍ਹਿਸ੍ਸਤੀ’’ਤਿ ਅਸੁਰਵਣ੍ਣਂ ਮਾਪੇਤ੍ਵਾ ਤਤ੍ਥ ਅਗਮਾਸਿ. ਸੁਜਂ ਅਲਙ੍ਕਰਿਤ੍ਵਾ ਸਨ੍ਨਿਪਾਤਟ੍ਠਾਨਂ ਆਨੇਤ੍ਵਾ ‘‘ਚਿਤ੍ਤਰੁਚਿਤਂ ਸਾਮਿਕਂ ਗਣ੍ਹਾ’’ਤਿ ਆਹਂਸੁ. ਸਾ ਓਲੋਕੇਨ੍ਤੀ ਸਕ੍ਕਂ ਦਿਸ੍ਵਾ ਪੁਬ੍ਬੇਪਿ ਸਿਨੇਹਵਸੇਨ ਉਪ੍ਪਨ੍ਨਪੇਮੇਨ ਮਹੋਘੇਨ ਵਿਯ ਅਜ੍ਝੋਤ੍ਥਟਹਦਯਾ ਹੁਤ੍ਵਾ ‘‘ਅਯਂ ਮੇ ਸਾਮਿਕੋ’’ਤਿ ਵਤ੍ਵਾ ਤਸ੍ਸ ਉਪਰਿ ਪੁਪ੍ਫਦਾਮਂ ਖਿਪਿਤ੍ਵਾ ਅਗ੍ਗਹੇਸਿ. ਅਸੁਰਾ ‘‘ਅਮ੍ਹਾਕਂ ਰਾਜਾ ਏਤ੍ਤਕਂ ਕਾਲਂ ਧੀਤੁ ਅਨੁਚ੍ਛਵਿਕਂ ਅਲਭਿਤ੍ਵਾ ਇਦਾਨਿ ਲਭਤਿ, ਅਯਮੇਵਸ੍ਸਾ ਧੀਤੁ ਪਿਤਾਮਹਤੋ ਮਹਲ੍ਲਕੋ ਅਨੁਚ੍ਛਵਿਕੋ’’ਤਿ ਲਜ੍ਜਮਾਨਾ ਪਕ੍ਕਮਿਂਸੁ. ਸੋ ਤਂ ਦੇਵਨਗਰਂ ਆਨੇਤ੍ਵਾ ਅਡ੍ਢਤੇਯ੍ਯਾਨਂ ਨਾਟਿਕਾਕੋਟੀਨਂ ਜੇਟ੍ਠਿਕਂ ਕਤ੍ਵਾ ਯਾਵਤਾਯੁਕਂ ਠਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਭਿਕ੍ਖੁ ਪੁਬ੍ਬੇ ਪਣ੍ਡਿਤਾ ਦੇਵਨਗਰੇ ਰਜ੍ਜਂ ਕਾਰਯਮਾਨਾ ਅਤ੍ਤਨੋ ਜੀਵਿਤਂ ਪਰਿਚ੍ਚਜਨ੍ਤਾਪਿ ਪਾਣਾਤਿਪਾਤਂ ਨ ਕਰਿਂਸੁ, ਤ੍ਵਂ ਨਾਮ ਏਵਰੂਪੇ ਨਿਯ੍ਯਾਨਿਕੇ ਸਾਸਨੇ ਪਬ੍ਬਜਿਤ੍ਵਾ ਅਪਰਿਸ੍ਸਾਵਿਤਂ ਸਪਾਣਕਂ ਉਦਕਂ ਪਿਵਿਸ੍ਸਸੀ’’ਤਿ ਤਂ ਭਿਕ੍ਖੁਂ ਗਰਹਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਾਤਲਿਸਙ੍ਗਾਹਕੋ ਆਨਨ੍ਦੋ ਅਹੋਸਿ, ਸਕ੍ਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕੁਲਾਵਕਜਾਤਕਵਣ੍ਣਨਾ ਪਠਮਾ.

[੩੨] ੨. ਨਚ੍ਚਜਾਤਕਵਣ੍ਣਨਾ

ਰੁਦਂ ਮਨੁਞ੍ਞਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਬਹੁਭਣ੍ਡਿਕਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਹੇਟ੍ਠਾ ਦੇਵਧਮ੍ਮਜਾਤਕੇ (ਜਾ. ੧.੧.੬) ਵੁਤ੍ਤਸਦਿਸਮੇਵ. ਸਤ੍ਥਾ ਤਂ ਭਿਕ੍ਖੁਂ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਬਹੁਭਣ੍ਡੋ’’ਤਿ ਪੁਚ੍ਛਿ. ‘‘ਆਮ, ਭਨ੍ਤੇ’’ਤਿ. ‘‘ਕਿਂਕਾਰਣਾ ਤ੍ਵਂ ਭਿਕ੍ਖੁ ਬਹੁਭਣ੍ਡੋ ਜਾਤੋਸੀ’’ਤਿ? ਸੋ ਏਤ੍ਤਕਂ ਸੁਤ੍ਵਾਵ ਕੁਦ੍ਧੋ ਨਿਵਾਸਨਪਾਰੁਪਨਂ ਛਡ੍ਡੇਤ੍ਵਾ ‘‘ਇਮਿਨਾ ਦਾਨਿ ਨੀਹਾਰੇਨ ਵਿਚਰਾਮੀ’’ਤਿ ਸਤ੍ਥੁ ਪੁਰਤੋ ਨਗ੍ਗੋ ਅਟ੍ਠਾਸਿ. ਮਨੁਸ੍ਸਾ ‘‘ਧੀ ਧੀ’’ਤਿ ਆਹਂਸੁ. ਸੋ ਤਤੋ ਪਲਾਯਿਤ੍ਵਾ ਹੀਨਾਯਾਵਤ੍ਤੋ. ਭਿਕ੍ਖੂ ਧਮ੍ਮਸਭਾਯਂ ਸਨ੍ਨਿਸਿਨ੍ਨਾ ‘‘ਸਤ੍ਥੁ ਨਾਮ ਪੁਰਤੋ ਏਵਰੂਪਂ ਕਰਿਸ੍ਸਤੀ’’ਤਿ ਤਸ੍ਸ ਅਗੁਣਕਥਂ ਕਥੇਸੁਂ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਭਿਕ੍ਖੂ ਪੁਚ੍ਛਿ. ਭਨ੍ਤੇ, ‘‘ਸੋ ਹਿ ਨਾਮ ਭਿਕ੍ਖੁ ਤੁਮ੍ਹਾਕਂ ਪੁਰਤੋ ਚਤੁਪਰਿਸਮਜ੍ਝੇ ਹਿਰੋਤ੍ਤਪ੍ਪਂ ਪਹਾਯ ਗਾਮਦਾਰਕੋ ਵਿਯ ਨਗ੍ਗੋ ਠਤ੍ਵਾ ਮਨੁਸ੍ਸੇਹਿ ਜਿਗੁਚ੍ਛਿਯਮਾਨੋ ਹੀਨਾਯਾਵਤ੍ਤਿਤ੍ਵਾ ਸਾਸਨਾ ਪਰਿਹੀਨੋ’’ਤਿ ਤਸ੍ਸ ਅਗੁਣਕਥਾਯ ਨਿਸਿਨ੍ਨਾਮ੍ਹਾਤਿ. ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ ਸੋ ਭਿਕ੍ਖੁ ਹਿਰੋਤ੍ਤਪ੍ਪਾਭਾਵੇਨ ਰਤਨਸਾਸਨਾ ਪਰਿਹੀਨੋ, ਪੁਬ੍ਬੇ ਇਤ੍ਥਿਰਤਨਪਟਿਲਾਭਤੋਪਿ ਪਰਿਹੀਨੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਪਠਮਕਪ੍ਪੇ ਚਤੁਪ੍ਪਦਾ ਸੀਹਂ ਰਾਜਾਨਂ ਅਕਂਸੁ, ਮਚ੍ਛਾ ਆਨਨ੍ਦਮਚ੍ਛਂ, ਸਕੁਣਾ ਸੁਵਣ੍ਣਹਂਸਂ. ਤਸ੍ਸ ਪਨ ਸੁਵਣ੍ਣਹਂਸਰਾਜਸ੍ਸ ਧੀਤਾ ਹਂਸਪੋਤਿਕਾ ਅਭਿਰੂਪਾ ਅਹੋਸਿ. ਸੋ ਤਸ੍ਸਾ ਵਰਂ ਅਦਾਸਿ, ਸਾ ਅਤ੍ਤਨੋ ਚਿਤ੍ਤਰੁਚਿਤਂ ਸਾਮਿਕਂ ਵਾਰੇਸਿ. ਹਂਸਰਾਜਾ ਤਸ੍ਸਾ ਵਰਂ ਦਤ੍ਵਾ ਹਿਮਵਨ੍ਤੇ ਸਬ੍ਬੇ ਸਕੁਣੇ ਸਨ੍ਨਿਪਾਤਾਪੇਸਿ, ਨਾਨਪ੍ਪਕਾਰਾ ਹਂਸਮੋਰਾਦਯੋ ਸਕੁਣਗਣਾ ਸਮਾਗਨ੍ਤ੍ਵਾ ਏਕਸ੍ਮਿਂ ਮਹਨ੍ਤੇ ਪਾਸਾਣਤਲੇ ਸਨ੍ਨਿਪਤਿਂਸੁ. ਹਂਸਰਾਜਾ ‘‘ਅਤ੍ਤਨੋ ਚਿਤ੍ਤਰੁਚਿਤਂ ਸਾਮਿਕਂ ਆਗਨ੍ਤ੍ਵਾ ਗਣ੍ਹਾਤੂ’’ਤਿ ਧੀਤਰਂ ਪਕ੍ਕੋਸਾਪੇਸਿ. ਸਾ ਸਕੁਣਸਙ੍ਘਂ ਓਲੋਕੇਨ੍ਤੀ ਮਣਿਵਣ੍ਣਗੀਵਂ ਚਿਤ੍ਰਪੇਖੁਣਂ ਮੋਰਂ ਦਿਸ੍ਵਾ ‘‘ਅਯਂ ਮੇ ਸਾਮਿਕੋ ਹੋਤੂ’’ਤਿ ਆਰੋਚੇਸਿ. ਸਕੁਣਸਙ੍ਘਾ ਮੋਰਂ ਉਪਸਙ੍ਕਮਿਤ੍ਵਾ ਆਹਂਸੁ ‘‘ਸਮ੍ਮ ਮੋਰ, ਅਯਂ ਰਾਜਧੀਤਾ ਏਤ੍ਤਕਾਨਂ ਸਕੁਣਾਨਂ ਮਜ੍ਝੇ ਸਾਮਿਕਂ ਰੋਚੇਨ੍ਤੀ ਤਯਿ ਰੁਚਿਂ ਉਪ੍ਪਾਦੇਸੀ’’ਤਿ. ਮੋਰੋ ‘‘ਅਜ੍ਜਾਪਿ ਤਾਵ ਮੇ ਬਲਂ ਨ ਪਸ੍ਸਤੀ’’ਤਿ ਅਤਿਤੁਟ੍ਠਿਯਾ ਹਿਰੋਤ੍ਤਪ੍ਪਂ ਭਿਨ੍ਦਿਤ੍ਵਾ ਤਾਵ ਮਹਤੋ ਸਕੁਣਸਙ੍ਘਸ੍ਸ ਮਜ੍ਝੇ ਪਕ੍ਖੇ ਪਸਾਰੇਤ੍ਵਾ ਨਚ੍ਚਿਤੁਂ ਆਰਭਿ, ਨਚ੍ਚਨ੍ਤੋ ਅਪ੍ਪਟਿਚ੍ਛਨ੍ਨੋ ਅਹੋਸਿ.

ਸੁਵਣ੍ਣਹਂਸਰਾਜਾ ਲਜ੍ਜਿਤੋ ‘‘ਇਮਸ੍ਸ ਨੇਵ ਅਜ੍ਝਤ੍ਤਸਮੁਟ੍ਠਾਨਾ ਹਿਰੀ ਅਤ੍ਥਿ, ਨ ਬਹਿਦ੍ਧਾਸਮੁਟ੍ਠਾਨਂ ਓਤ੍ਤਪ੍ਪਂ, ਨਾਸ੍ਸ ਭਿਨ੍ਨਹਿਰੋਤ੍ਤਪ੍ਪਸ੍ਸ ਮਮ ਧੀਤਰਂ ਦਸ੍ਸਾਮੀ’’ਤਿ ਸਕੁਣਸਙ੍ਘਮਜ੍ਝੇ ਇਮਂ ਗਾਥਮਾਹ –

੩੨. ‘‘ਰੁਦਂ ਮਨੁਞ੍ਞਂ ਰੁਚਿਰਾ ਚ ਪਿਟ੍ਠਿ, ਵੇਲ਼ੁਰਿਯਵਣ੍ਣੂਪਨਿਭਾ ਚ ਗੀਵਾ;

ਬ੍ਯਾਮਮਤ੍ਤਾਨਿ ਚ ਪੇਖੁਣਾਨਿ, ਨਚ੍ਚੇਨ ਤੇ ਧੀਤਰਂ ਨੋ ਦਦਾਮੀ’’ਤਿ.

ਤਤ੍ਥ ਰੁਦਂ ਮਨੁਞ੍ਞਨ੍ਤਿ ਤ-ਕਾਰਸ੍ਸ ਦ-ਕਾਰੋ ਕਤੋ, ਰੁਤਂ ਮਨਾਪਂ, ਵਸ੍ਸਿਤਸਦ੍ਦੋ ਮਧੁਰੋਤਿ ਅਤ੍ਥੋ. ਰੁਚਿਰਾ ਚ ਪਿਟ੍ਠੀਤਿ ਪਿਟ੍ਠਿਪਿ ਤੇ ਚਿਤ੍ਰਾ ਚੇਵ ਸੋਭਨਾ ਚ. ਵੇਲ਼ੁਰਿਯਵਣ੍ਣੂਪਨਿਭਾਤਿ ਵੇਲ਼ੁਰਿਯਮਣਿਵਣ੍ਣਸਦਿਸਾ. ਬ੍ਯਾਮਮਤ੍ਤਾਨੀਤਿ ਏਕਬ੍ਯਾਮਪ੍ਪਮਾਣਾਨਿ. ਪੇਖੁਣਾਨੀਤਿ ਪਿਞ੍ਛਾਨਿ. ਨਚ੍ਚੇਨ ਤੇ ਧੀਤਰਂ ਨੋ ਦਦਾਮੀਤਿ ਹਿਰੋਤ੍ਤਪ੍ਪਂ ਭਿਨ੍ਦਿਤ੍ਵਾ ਨਚ੍ਚਿਤਭਾਵੇਨੇਵ ਤੇ ਏਵਰੂਪਸ੍ਸ ਨਿਲ੍ਲਜ੍ਜਸ੍ਸ ਧੀਤਰਂ ਨੋ ਦਦਾਮੀਤਿ ਵਤ੍ਵਾ ਹਂਸਰਾਜਾ ਤਸ੍ਮਿਂਯੇਵ ਪਰਿਸਮਜ੍ਝੇ ਅਤ੍ਤਨੋ ਭਾਗਿਨੇਯ੍ਯਸ੍ਸ ਹਂਸਪੋਤਕਸ੍ਸ ਧੀਤਰਂ ਅਦਾਸਿ. ਮੋਰੋ ਹਂਸਪੋਤਿਕਂ ਅਲਭਿਤ੍ਵਾ ਲਜ੍ਜਿਤ੍ਵਾ ਤਤੋਵ ਉਪ੍ਪਤਿਤ੍ਵਾ ਪਲਾਯਿ. ਹਂਸਰਾਜਾਪਿ ਅਤ੍ਤਨੋ ਵਸਨਟ੍ਠਾਨਮੇਵ ਗਤੋ.

ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ ਏਸ ਹਿਰੋਤ੍ਤਪ੍ਪਂ ਭਿਨ੍ਦਿਤ੍ਵਾ ਰਤਨਸਾਸਨਾ ਪਰਿਹੀਨੋ, ਪੁਬ੍ਬੇਪਿ ਇਤ੍ਥਿਰਤਨਪਟਿਲਾਭਤੋ ਪਰਿਹੀਨੋਯੇਵਾ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮੋਰੋ ਬਹੁਭਣ੍ਡਿਕੋ ਅਹੋਸਿ, ਹਂਸਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਨਚ੍ਚਜਾਤਕਵਣ੍ਣਨਾ ਦੁਤਿਯਾ.

[੩੩] ੩. ਸਮ੍ਮੋਦਮਾਨਜਾਤਕਵਣ੍ਣਨਾ

ਸਮ੍ਮੋਦਮਾਨਾਤਿ ਇਦਂ ਸਤ੍ਥਾ ਕਪਿਲਵਤ੍ਥੁਂ ਉਪਨਿਸ੍ਸਾਯ ਨਿਗ੍ਰੋਧਾਰਾਮੇ ਵਿਹਰਨ੍ਤੋ ਚੁਮ੍ਬਟਕਕਲਹਂ ਆਰਬ੍ਭ ਕਥੇਸਿ. ਸੋ ਕੁਣਾਲਜਾਤਕੇ (ਜਾ. ੨.੨੧.ਕੁਣਾਲਜਾਤਕ) ਆਵਿ ਭਵਿਸ੍ਸਤਿ. ਤਦਾ ਪਨ ਸਤ੍ਥਾ ਞਾਤਕੇ ਆਮਨ੍ਤੇਤ੍ਵਾ ‘‘ਮਹਾਰਾਜਾ ਞਾਤਕਾਨਂ ਅਞ੍ਞਮਞ੍ਞਂ ਵਿਗ੍ਗਹੋ ਨਾਮ ਨ ਯੁਤ੍ਤੋ, ਤਿਰਚ੍ਛਾਨਗਤਾਪਿ ਹਿ ਪੁਬ੍ਬੇ ਸਮਗ੍ਗਕਾਲੇ ਪਚ੍ਚਾਮਿਤ੍ਤੇ ਅਭਿਭਵਿਤ੍ਵਾ ਸੋਤ੍ਥਿਂ ਪਤ੍ਤਾ ਯਦਾ ਵਿਵਾਦਮਾਪਨ੍ਨਾ, ਤਦਾ ਮਹਾਵਿਨਾਸਂ ਪਤ੍ਤਾ’’ਤਿ ਵਤ੍ਵਾ ਞਾਤਿਰਾਜਕੁਲੇਹਿ ਆਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਵਟ੍ਟਕਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਨੇਕਵਟ੍ਟਕਸਹਸ੍ਸਪਰਿਵਾਰੋ ਅਰਞ੍ਞੇ ਪਟਿਵਸਤਿ. ਤਦਾ ਏਕੋ ਵਟ੍ਟਕਲੁਦ੍ਦਕੋ ਤੇਸਂ ਵਸਨਟ੍ਠਾਨਂ ਗਨ੍ਤ੍ਵਾ ਵਟ੍ਟਕਵਸ੍ਸਿਤਂ ਕਤ੍ਵਾ ਤੇਸਂ ਸਨ੍ਨਿਪਤਿਤਭਾਵਂ ਞਤ੍ਵਾ ਤੇਸਂ ਉਪਰਿ ਜਾਲਂ ਖਿਪਿਤ੍ਵਾ ਪਰਿਯਨ੍ਤੇਸੁ ਮਦ੍ਦਨ੍ਤੋ ਸਬ੍ਬੇ ਏਕਤੋ ਕਤ੍ਵਾ ਪਚ੍ਛਿਂ ਪੂਰੇਤ੍ਵਾ ਘਰਂ ਗਨ੍ਤ੍ਵਾ ਤੇ ਵਿਕ੍ਕਿਣਿਤ੍ਵਾ ਤੇਨ ਮੂਲੇਨ ਜੀਵਿਕਂ ਕਪ੍ਪੇਤਿ. ਅਥੇਕਦਿਵਸਂ ਬੋਧਿਸਤ੍ਤੋ ਤੇ ਵਟ੍ਟਕੇ ਆਹ – ‘‘ਅਯਂ ਸਾਕੁਣਿਕੋ ਅਮ੍ਹਾਕਂ ਞਾਤਕੇ ਵਿਨਾਸਂ ਪਾਪੇਤਿ, ਅਹਂ ਏਕਂ ਉਪਾਯਂ ਜਾਨਾਮਿ, ਏਨੇਸ ਅਮ੍ਹੇ ਗਣ੍ਹਿਤੁਂ ਨ ਸਕ੍ਖਿਸ੍ਸਤਿ, ਇਤੋ ਦਾਨਿ ਪਟ੍ਠਾਯ ਏਤੇਨ ਤੁਮ੍ਹਾਕਂ ਉਪਰਿ ਜਾਲੇ ਖਿਤ੍ਤਮਤ੍ਤੇ ਏਕੇਕੋ ਏਕੇਕਸ੍ਮਿਂ ਜਾਲਕ੍ਖਿਕੇ ਸੀਸਂ ਠਪੇਤ੍ਵਾ ਜਾਲਂ ਉਕ੍ਖਿਪਿਤ੍ਵਾ ਇਚ੍ਛਿਤਟ੍ਠਾਨਂ ਹਰਿਤ੍ਵਾ ਏਕਸ੍ਮਿਂ ਕਣ੍ਟਕਗੁਮ੍ਬੇ ਪਕ੍ਖਿਪਥ, ਏਵਂ ਸਨ੍ਤੇ ਹੇਟ੍ਠਾ ਤੇਨ ਤੇਨ ਠਾਨੇਨ ਪਲਾਯਿਸ੍ਸਾਮਾ’’ਤਿ. ਤੇ ਸਬ੍ਬੇ ‘‘ਸਾਧੂ’’ਤਿ ਪਟਿਸ੍ਸੁਣਿਂਸੁ. ਦੁਤਿਯਦਿਵਸੇ ਉਪਰਿ ਜਾਲੇ ਖਿਤ੍ਤੇ ਤੇ ਬੋਧਿਸਤ੍ਤੇਨ ਵੁਤ੍ਤਨਯੇਨੇਵ ਜਾਲਂ ਉਕ੍ਖਿਪਿਤ੍ਵਾ ਏਕਸ੍ਮਿਂ ਕਣ੍ਟਕਗੁਮ੍ਬੇ ਖਿਪਿਤ੍ਵਾ ਸਯਂ ਹੇਟ੍ਠਾਭਾਗੇਨ ਤਤੋ ਤਤੋ ਪਲਾਯਿਂਸੁ. ਸਾਕੁਣਿਕਸ੍ਸ ਗੁਮ੍ਬਤੋ ਜਾਲਂ ਮੋਚੇਨ੍ਤਸ੍ਸੇਵ ਵਿਕਾਲੋ ਜਾਤੋ, ਸੋ ਤੁਚ੍ਛਹਤ੍ਥੋਵ ਅਗਮਾਸਿ.

ਪੁਨਦਿਵਸਤੋ ਪਟ੍ਠਾਯਪਿ ਵਟ੍ਟਕਾ ਤਥੇਵ ਕਰੋਨ੍ਤਿ. ਸੋਪਿ ਯਾਵ ਸੂਰਿਯਤ੍ਥਙ੍ਗਮਨਾ ਜਾਲਮੇਵ ਮੋਚੇਨ੍ਤੋ ਕਿਞ੍ਚਿ ਅਲਭਿਤ੍ਵਾ ਤੁਚ੍ਛਹਤ੍ਥੋਵ ਗੇਹਂ ਗਚ੍ਛਤਿ. ਅਥਸ੍ਸ ਭਰਿਯਾ ਕੁਜ੍ਝਿਤ੍ਵਾ ‘‘ਤ੍ਵਂ ਦਿਵਸੇ ਦਿਵਸੇ ਤੁਚ੍ਛਹਤ੍ਥੋ ਆਗਚ੍ਛਸਿ, ਅਞ੍ਞਮ੍ਪਿ ਤੇ ਬਹਿ ਪੋਸਿਤਬ੍ਬਟ੍ਠਾਨਂ ਅਤ੍ਥਿ ਮਞ੍ਞੇ’’ਤਿ ਆਹ. ਸਾਕੁਣਿਕੋ ‘‘ਭਦ੍ਦੇ, ਮਮ ਅਞ੍ਞਂ ਪੋਸਿਤਬ੍ਬਟ੍ਠਾਨਂ ਨਤ੍ਥਿ, ਅਪਿਚ ਖੋ ਪਨ ਤੇ ਵਟ੍ਟਕਾ ਸਮਗ੍ਗਾ ਹੁਤ੍ਵਾ ਚਰਨ੍ਤਿ, ਮਯਾ ਖਿਤ੍ਤਮਤ੍ਤੇ ਜਾਲਂ ਆਦਾਯ ਕਣ੍ਟਕਗੁਮ੍ਬੇ ਖਿਪਿਤ੍ਵਾ ਗਚ੍ਛਨ੍ਤਿ, ਨ ਖੋ ਪਨੇਤੇ ਸਬ੍ਬਕਾਲਮੇਵ ਸਮ੍ਮੋਦਮਾਨਾ ਵਿਹਰਿਸ੍ਸਨ੍ਤਿ, ਤ੍ਵਂ ਮਾ ਚਿਨ੍ਤਯਿ, ਯਦਾ ਤੇ ਵਿਵਾਦਮਾਪਜ੍ਜਿਸ੍ਸਨ੍ਤਿ, ਤਦਾ ਤੇ ਸਬ੍ਬੇਵ ਆਦਾਯ ਤਵ ਮੁਖਂ ਹਾਸਯਮਾਨੋ ਆਗਚ੍ਛਿਸ੍ਸਾਮੀ’’ਤਿ ਵਤ੍ਵਾ ਭਰਿਯਾਯ ਇਮਂ ਗਾਥਮਾਹ –

੩੩. ‘‘ਸਮ੍ਮੋਦਮਾਨਾ ਗਚ੍ਛਨ੍ਤਿ, ਜਾਲਮਾਦਾਯ ਪਕ੍ਖਿਨੋ;

ਯਦਾ ਤੇ ਵਿਵਦਿਸ੍ਸਨ੍ਤਿ, ਤਦਾ ਏਹਿਨ੍ਤਿ ਮੇ ਵਸ’’ਨ੍ਤਿ.

ਤਤ੍ਥ ਯਦਾ ਤੇ ਵਿਵਦਿਸ੍ਸਨ੍ਤੀਤਿ ਯਸ੍ਮਿਂ ਕਾਲੇ ਤੇ ਵਟ੍ਟਕਾ ਨਾਨਾਲਦ੍ਧਿਕਾ ਨਾਨਾਗਾਹਾ ਹੁਤ੍ਵਾ ਵਿਵਦਿਸ੍ਸਨ੍ਤਿ, ਕਲਹਂ ਕਰਿਸ੍ਸਨ੍ਤੀਤਿ ਅਤ੍ਥੋ. ਤਦਾ ਏਹਿਨ੍ਤਿ ਮੇ ਵਸਨ੍ਤਿ ਤਸ੍ਮਿਂ ਕਾਲੇ ਸਬ੍ਬੇਪਿ ਤੇ ਮਮ ਵਸਂ ਆਗਚ੍ਛਿਸ੍ਸਨ੍ਤਿ. ਅਥਾਹਂ ਤੇ ਗਹੇਤ੍ਵਾ ਤਵ ਮੁਖਂ ਹਾਸੇਨ੍ਤੋ ਆਗਚ੍ਛਿਸ੍ਸਾਮੀਤਿ ਭਰਿਯਂ ਸਮਸ੍ਸਾਸੇਸਿ.

ਕਤਿਪਾਹਸ੍ਸੇਵ ਪਨ ਅਚ੍ਚਯੇਨ ਏਕੋ ਵਟ੍ਟਕੋ ਗੋਚਰਭੂਮਿਂ ਓਤਰਨ੍ਤੋ ਅਸਲ੍ਲਕ੍ਖੇਤ੍ਵਾ ਅਞ੍ਞਸ੍ਸ ਸੀਸਂ ਅਕ੍ਕਮਿ, ਇਤਰੋ ‘‘ਕੋ ਮਂ ਸੀਸੇ ਅਕ੍ਕਮੀ’’ਤਿ ਕੁਜ੍ਝਿਂ. ‘‘ਅਹਂ ਅਸਲ੍ਲਕ੍ਖੇਤ੍ਵਾ ਅਕ੍ਕਮਿਂ, ਮਾ ਕੁਜ੍ਝੀ’’ਤਿ ਵੁਤ੍ਤੇਪਿ ਕੁਜ੍ਝਿਯੇਵ. ਤੇ ਪੁਨਪ੍ਪੁਨਂ ਕਥੇਨ੍ਤਾ ‘‘ਤ੍ਵਮੇਵ ਮਞ੍ਞੇ ਜਾਲਂ ਉਕ੍ਖਿਪਸੀ’’ਤਿ ਅਞ੍ਞਮਞ੍ਞਂ ਵਿਵਾਦਂ ਕਰਿਂਸੁ. ਤੇਸੁ ਵਿਵਦਨ੍ਤੇਸੁ ਬੋਧਿਸਤ੍ਤੋ ਚਿਨ੍ਤੇਸਿ ‘‘ਵਿਵਾਦਕੇ ਸੋਤ੍ਥਿਭਾਵੋ ਨਾਮ ਨਤ੍ਥਿ, ਇਦਾਨੇਵ ਤੇ ਜਾਲਂ ਨ ਉਕ੍ਖਿਪਿਸ੍ਸਨ੍ਤਿ, ਤਤੋ ਮਹਨ੍ਤਂ ਵਿਨਾਸਂ ਪਾਪੁਣਿਸ੍ਸਨ੍ਤਿ, ਸਾਕੁਣਿਕੋ ਓਕਾਸਂ ਲਭਿਸ੍ਸਤਿ, ਮਯਾ ਇਮਸ੍ਮਿਂ ਠਾਨੇ ਨ ਸਕ੍ਕਾ ਵਸਿਤੁ’’ਨ੍ਤਿ. ਸੋ ਅਤ੍ਤਨੋ ਪਰਿਸਂ ਆਦਾਯ ਅਞ੍ਞਤ੍ਥ ਗਤੋ. ਸਾਕੁਣਿਕੋਪਿ ਖੋ ਕਤਿਪਾਹਚ੍ਚਯੇਨ ਆਗਨ੍ਤ੍ਵਾ ਵਟ੍ਟਕਵਸ੍ਸਿਤਂ ਵਸ੍ਸਿਤ੍ਵਾ ਤੇਸਂ ਸਨ੍ਨਿਪਤਿਤਾਨਂ ਉਪਰਿ ਜਾਲਂ ਖਿਪਿ. ਅਥੇਕੋ ਵਟ੍ਟਕੋ ‘‘ਤੁਯ੍ਹਂ ਕਿਰ ਜਾਲਂ ਉਕ੍ਖਿਪਨ੍ਤਸ੍ਸੇਵ ਮਤ੍ਥਕੇ ਲੋਮਾਨਿ ਪਤਿਤਾਨਿ, ਇਦਾਨਿ ਉਕ੍ਖਿਪਾ’’ਤਿ ਆਹ. ਅਪਰੋ ‘‘ਤੁਯ੍ਹਂ ਕਿਰ ਜਾਲਂ ਉਕ੍ਖਿਪਨ੍ਤਸ੍ਸੇਵ ਦ੍ਵੀਸੁ ਪਕ੍ਖੇਸੁ ਪਤ੍ਤਾਨਿ ਪਤਿਤਾਨਿ, ਇਦਾਨਿ ਉਕ੍ਖਿਪਾ’’ਤਿ ਆਹ. ਇਤਿ ਤੇਸਂ ‘‘ਤ੍ਵਂ ਉਕ੍ਖਿਪ, ਤ੍ਵਂ ਉਕ੍ਖਿਪਾ’’ਤਿ ਵਦਨ੍ਤਾਨਞ੍ਞੇਵ ਸਾਕੁਣਿਕੋ ਜਾਲਂ ਉਕ੍ਖਿਪਿਤ੍ਵਾ ਸਬ੍ਬੇਵ ਤੇ ਏਕਤੋ ਕਤ੍ਵਾ ਪਚ੍ਛਿਂ ਪੂਰੇਤ੍ਵਾ ਭਰਿਯਂ ਹਾਸਯਮਾਨੋ ਗੇਹਂ ਅਗਮਾਸਿ.

ਸਤ੍ਥਾ ‘‘ਏਵਂ ਮਹਾਰਾਜਾ ਞਾਤਕਾਨਂ ਕਲਹੋ ਨਾਮ ਨ ਯੁਤ੍ਤੋ, ਕਲਹੋ ਵਿਨਾਸਮੂਲਮੇਵ ਹੋਤੀ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਅਪਣ੍ਡਿਤਵਟ੍ਟਕੋ ਦੇਵਦਤ੍ਤੋ ਅਹੋਸਿ, ਪਣ੍ਡਿਤਵਟ੍ਟਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਮ੍ਮੋਦਮਾਨਜਾਤਕਵਣ੍ਣਨਾ ਤਤਿਯਾ.

[੩੪] ੪. ਮਚ੍ਛਜਾਤਕਵਣ੍ਣਨਾ

ਨ ਮਂ ਸੀਤਂ ਨ ਮਂ ਉਣ੍ਹਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪੁਰਾਣਦੁਤਿਯਿਕਾਪਲੋਭਨਂ ਆਰਬ੍ਭ ਕਥੇਸਿ. ਤਦਾ ਹਿ ਸਤ੍ਥਾ ਤਂ ਭਿਕ੍ਖੁਂ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿ. ‘‘ਸਚ੍ਚਂ, ਭਗਵਾ’’ਤਿ. ‘‘ਕੇਨਾਸਿ ਉਕ੍ਕਣ੍ਠਾਪਿਤੋ’’ਤਿ? ‘‘ਪੁਰਾਣਦੁਤਿਯਿਕਾ ਮੇ, ਭਨ੍ਤੇ ਮਧੁਰਹਤ੍ਥਰਸਾ, ਤਂ ਜਹਿਤੁਂ ਨ ਸਕ੍ਕੋਮੀ’’ਤਿ. ਅਥ ਨਂ ਸਤ੍ਥਾ ‘‘ਭਿਕ੍ਖੁ ਏਸਾ ਇਤ੍ਥੀ ਤਵ ਅਨਤ੍ਥਕਾਰਿਕਾ, ਪੁਬ੍ਬੇਪਿ ਤ੍ਵਂ ਏਤਂ ਨਿਸ੍ਸਾਯ ਮਰਣਂ ਪਾਪੁਣਨ੍ਤੋ ਮਂ ਆਗਮ੍ਮ ਮਰਣਾ ਮੁਤ੍ਤੋ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਪੁਰੋਹਿਤੋ ਅਹੋਸਿ. ਤਦਾ ਕੇਵਟ੍ਟਾ ਨਦਿਯਂ ਜਾਲਂ ਖਿਪਿਂਸੁ. ਅਥੇਕੋ ਮਹਾਮਚ੍ਛੋ ਰਤਿਵਸੇਨ ਅਤ੍ਤਨੋ ਮਚ੍ਛਿਯਾ ਸਦ੍ਧਿਂ ਕੀਲ਼ਮਾਨੋ ਆਗਚ੍ਛਤਿ. ਤਸ੍ਸ ਸਾ ਮਚ੍ਛੀ ਪੁਰਤੋ ਗਚ੍ਛਮਾਨਾ ਜਾਲਗਨ੍ਧਂ ਘਾਯਿਤ੍ਵਾ ਜਾਲਂ ਪਰਿਹਰਮਾਨਾ ਗਤਾ. ਸੋ ਪਨ ਕਾਮਗਿਦ੍ਧੋ ਲੋਲਮਚ੍ਛੋ ਜਾਲਕੁਚ੍ਛਿਮੇਵ ਪਵਿਟ੍ਠੋ. ਕੇਵਟ੍ਟਾ ਤਸ੍ਸ ਜਾਲਂ ਪਵਿਟ੍ਠਭਾਵਂ ਞਤ੍ਵਾ ਜਾਲਂ ਉਕ੍ਖਿਪਿਤ੍ਵਾ ਮਚ੍ਛਂ ਗਹੇਤ੍ਵਾ ਅਮਾਰੇਤ੍ਵਾਵ ਵਾਲਿਕਾਪਿਟ੍ਠੇ ਖਿਪਿਤ੍ਵਾ ‘‘ਇਮਂ ਅਙ੍ਗਾਰੇਸੁ ਪਚਿਤ੍ਵਾ ਖਾਦਿਸ੍ਸਾਮਾ’’ਤਿ ਅਙ੍ਗਾਰੇ ਕਰੋਨ੍ਤਿ, ਸੂਲਂ ਤਚ੍ਛੇਨ੍ਤਿ. ਮਚ੍ਛੋ ‘‘ਏਤਂ ਅਙ੍ਗਾਰਤਾਪਨਂ ਵਾ ਸੂਲਵਿਜ੍ਝਨਂ ਵਾ ਅਞ੍ਞਂ ਵਾ ਪਨ ਦੁਕ੍ਖਂ ਨ ਮਂ ਕਿਲਮੇਤਿ, ਯਂ ਪਨੇਸਾ ਮਚ੍ਛੀ ‘ਅਞ੍ਞਂ ਸੋ ਨੂਨ ਰਤਿਯਾ ਗਤੋ’ਤਿ ਮਯਿ ਦੋਮਨਸ੍ਸਂ ਆਪਜ੍ਜਤਿ, ਤਮੇਵ ਮਂ ਬਾਧਤੀ’’ਤਿ ਪਰਿਦੇਵਮਾਨੋ ਇਮਂ ਗਾਥਮਾਹ –

੩੪. ‘‘ਨ ਮਂ ਸੀਤਂ ਨ ਮਂ ਉਣ੍ਹਂ, ਨ ਮਂ ਜਾਲਸ੍ਮਿ ਬਾਧਨਂ;

ਯਞ੍ਚ ਮਂ ਮਞ੍ਞਤੇ ਮਚ੍ਛੀ, ਅਞ੍ਞਂ ਸੋ ਰਤਿਯਾ ਗਤੋ’’ਤਿ.

ਤਤ੍ਥ ਨ ਮਂ ਸੀਤਂ ਨ ਮਂ ਉਣ੍ਹਨ੍ਤਿ ਮਚ੍ਛਾਨਂ ਉਦਕਾ ਨੀਹਟਕਾਲੇ ਸੀਤਂ ਹੋਤਿ, ਤਸ੍ਮਿਂ ਵਿਗਤੇ ਉਣ੍ਹਂ ਹੋਤਿ, ਤਦੁਭਯਮ੍ਪਿ ਸਨ੍ਧਾਯ ‘‘ਨ ਮਂ ਸੀਤਂ ਨ ਮਂ ਉਣ੍ਹਂ ਬਾਧਤੀ’’ਤਿ ਪਰਿਦੇਵਤਿ. ਯਮ੍ਪਿ ਅਙ੍ਗਾਰੇਸੁ ਪਚ੍ਚਨਮੂਲਕਂ ਦੁਕ੍ਖਂ ਭਵਿਸ੍ਸਤਿ, ਤਮ੍ਪਿ ਸਨ੍ਧਾਯ ‘‘ਨ ਮਂ ਉਣ੍ਹ’’ਨ੍ਤਿ ਪਰਿਦੇਵਤੇਵ. ਨ ਮਂ ਜਾਲਸ੍ਮਿ ਬਾਧਨਨ੍ਤਿ ਯਮ੍ਪਿ ਮੇ ਜਾਲਸ੍ਮਿਂ ਬਾਧਨਂ ਅਹੋਸਿ, ਤਮ੍ਪਿ ਮਂ ਨ ਬਾਧੇਤੀਤਿ ਪਰਿਦੇਵਤਿ. ‘‘ਯਞ੍ਚ ਮ’’ਨ੍ਤਿਆਦੀਸੁ ਅਯਂ ਪਿਣ੍ਡਤ੍ਥੋ – ਸਾ ਮਚ੍ਛੀ ਮਮ ਜਾਲੇ ਪਤਿਤਸ੍ਸ ਇਮੇਹਿ ਕੇਵਟ੍ਟੇਹਿ ਗਹਿਤਭਾਵਂ ਅਜਾਨਨ੍ਤੀ ਮਂ ਅਪਸ੍ਸਮਾਨਾ ‘‘ਸੋ ਮਚ੍ਛੋ ਇਦਾਨਿ ਅਞ੍ਞਂ ਮਚ੍ਛਿਂ ਕਾਮਰਤਿਯਾ ਗਤੋ ਭਵਿਸ੍ਸਤੀ’’ਤਿ ਚਿਨ੍ਤੇਤਿ, ਤਂ ਤਸ੍ਸਾ ਦੋਮਨਸ੍ਸਪ੍ਪਤ੍ਤਾਯ ਚਿਨ੍ਤਨਂ ਮਂ ਬਾਧਤੀਤਿ ਵਾਲਿਕਾਪਿਟ੍ਠੇ ਨਿਪਨ੍ਨੋ ਪਰਿਦੇਵਤਿ.

ਤਸ੍ਮਿਂ ਸਮਯੇ ਪੁਰੋਹਿਤੋ ਦਾਸਪਰਿਵੁਤੋ ਨ੍ਹਾਨਤ੍ਥਾਯ ਨਦੀਤੀਰਂ ਆਗਤੋ. ਸੋ ਪਨ ਸਬ੍ਬਰੁਤਞ੍ਞੂ ਹੋਤਿ. ਤੇਨਸ੍ਸ ਮਚ੍ਛਪਰਿਦੇਵਨਂ ਸੁਤ੍ਵਾ ਏਤਦਹੋਸਿ ‘‘ਅਯਂ ਮਚ੍ਛੋ ਕਿਲੇਸਵਸੇਨ ਪਰਿਦੇਵਤਿ, ਏਵਂ ਆਤੁਰਚਿਤ੍ਤੋ ਖੋ ਪਨੇਸ ਮੀਯਮਾਨੋ ਨਿਰਯੇਯੇਵ ਨਿਬ੍ਬਤ੍ਤਿਸ੍ਸਤਿ, ਅਹਮਸ੍ਸ ਅਵਸ੍ਸਯੋ ਭਵਿਸ੍ਸਾਮੀ’’ਤਿ ਕੇਵਟ੍ਟਾਨਂ ਸਨ੍ਤਿਕਂ ਗਨ੍ਤ੍ਵਾ ‘‘ਅਮ੍ਭੋ ਤੁਮ੍ਹੇ ਅਮ੍ਹਾਕਂ ਏਕਦਿਵਸਮ੍ਪਿ ਬ੍ਯਞ੍ਜਨਤ੍ਥਾਯ ਮਚ੍ਛਂ ਨ ਦੇਥਾ’’ਤਿ ਆਹ. ਕੇਵਟ੍ਟਾ ‘‘ਕਿਂ ਵਦੇਥ, ਸਾਮਿ, ਤੁਮ੍ਹਾਕਂ ਰੁਚ੍ਚਨਕਮਚ੍ਛਂ ਗਣ੍ਹਿਤ੍ਵਾ ਗਚ੍ਛਥਾ’’ਤਿ ਆਹਂਸੁ. ‘‘ਅਮ੍ਹਾਕਂ ਅਞ੍ਞੇਨ ਕਮ੍ਮਂ ਨਤ੍ਥਿ, ਇਮਞ੍ਞੇਵ ਦੇਥਾ’’ਤਿ. ‘‘ਗਣ੍ਹਥ ਸਾਮੀ’’ਤਿ. ਬੋਧਿਸਤ੍ਤੋ ਤਂ ਉਭੋਹਿ ਹਤ੍ਥੇਹਿ ਗਹੇਤ੍ਵਾ ਨਦੀਤੀਰੇ ਨਿਸੀਦਿਤ੍ਵਾ ‘‘ਅਮ੍ਭੋ ਮਚ੍ਛ, ਸਚੇ ਤਾਹਂ ਅਜ੍ਜ ਨ ਪਸ੍ਸੇਯ੍ਯਂ, ਜੀਵਿਤਕ੍ਖਯਂ ਪਾਪੁਣੇਯ੍ਯਾਸਿ, ਇਦਾਨਿ ਇਤੋ ਪਟ੍ਠਾਯ ਮਾ ਕਿਲੇਸਵਸਿਕੋ ਅਹੋਸੀ’’ਤਿ ਓਵਦਿਤ੍ਵਾ ਉਦਕੇ ਵਿਸ੍ਸਜ੍ਜੇਤ੍ਵਾ ਨ੍ਹਤ੍ਵਾ ਨਗਰਂ ਪਾਵਿਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਸਤ੍ਥਾਪਿ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਚ੍ਛੀ ਪੁਰਾਣਦੁਤਿਯਿਕਾ ਅਹੋਸਿ, ਮਚ੍ਛੋ ਉਕ੍ਕਣ੍ਠਿਤਭਿਕ੍ਖੁ ਪੁਰੋਹਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਚ੍ਛਜਾਤਕਵਣ੍ਣਨਾ ਚਤੁਤ੍ਥਾ.

[੩੫] ੫. ਵਟ੍ਟਕਜਾਤਕਵਣ੍ਣਨਾ

ਸਨ੍ਤਿ ਪਕ੍ਖਾ ਅਪਤਨਾਤਿ ਇਦਂ ਸਤ੍ਥਾ ਮਗਧੇਸੁ ਚਾਰਿਕਂ ਚਰਮਾਨੋ ਦਾਵਗ੍ਗਿਨਿਬ੍ਬਾਨਂ ਆਰਬ੍ਭ ਕਥੇਸਿ. ਏਕਸ੍ਮਿਞ੍ਹਿ ਸਮਯੇ ਸਤ੍ਥਾ ਮਗਧੇਸੁ ਚਾਰਿਕਂ ਚਰਮਾਨੋ ਅਞ੍ਞਤਰਸ੍ਮਿਂ ਮਗਧਗਾਮਕੇ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਭਿਕ੍ਖੁਗਣਪਰਿਵੁਤੋ ਮਗ੍ਗਂ ਪਟਿਪਜ੍ਜਿ. ਤਸ੍ਮਿਂ ਸਮਯੇ ਮਹਾਡਾਹੋ ਉਟ੍ਠਹਿ, ਪੁਰਤੋ ਚ ਪਚ੍ਛਤੋ ਚ ਬਹੂ ਭਿਕ੍ਖੂ ਦਿਸ੍ਸਨ੍ਤਿ, ਸੋਪਿ ਖੋ ਅਗ੍ਗਿ ਏਕਧੂਮੋ ਏਕਜਾਲੋ ਹੁਤ੍ਵਾ ਅਵਤ੍ਥਰਮਾਨੋ ਆਗਚ੍ਛਤੇਵ. ਤਤ੍ਥੇਕੇ ਪੁਥੁਜ੍ਜਨਭਿਕ੍ਖੂ ਮਰਣਭਯਭੀਤਾ ‘‘ਪਟਗ੍ਗਿਂ ਦਸ੍ਸਾਮ, ਤੇਨ ਦਡ੍ਢਟ੍ਠਾਨਂ ਇਤਰੋ ਅਗ੍ਗਿ ਨ ਓਤ੍ਥਰਿਸ੍ਸਤੀ’’ਤਿ ਅਰਣਿਸਹਿਤਂ ਨੀਹਰਿਤ੍ਵਾ ਅਗ੍ਗਿਂ ਕਰੋਨ੍ਤਿ. ਅਪਰੇ ਆਹਂਸੁ ‘‘ਆਵੁਸੋ, ਤੁਮ੍ਹੇ ਕਿਂ ਨਾਮ ਕਰੋਥ, ਗਗਨਮਜ੍ਝੇ ਠਿਤਂ ਚਨ੍ਦਮਣ੍ਡਲਂ, ਪਾਚੀਨਲੋਕਧਾਤੁਤੋ ਉਗ੍ਗਚ੍ਛਨ੍ਤਂ ਸਹਸ੍ਸਰਂਸਿਪਟਿਮਣ੍ਡਿਤਂ ਸੂਰਿਯਮਣ੍ਡਲਂ, ਵੇਲਾਯ ਤੀਰੇ ਠਿਤਾ ਸਮੁਦ੍ਦਂ, ਸਿਨੇਰੁਂ ਨਿਸ੍ਸਾਯ ਠਿਤਾ ਸਿਨੇਰੁਂ ਅਪਸ੍ਸਨ੍ਤਾ ਵਿਯ ਸਦੇਵਕੇ ਲੋਕੇ ਅਗ੍ਗਪੁਗ੍ਗਲਂ ਅਤ੍ਤਨਾ ਸਦ੍ਧਿਂ ਗਚ੍ਛਨ੍ਤਮੇਵ ਸਮ੍ਮਾਸਮ੍ਬੁਦ੍ਧਂ ਅਨੋਲੋਕੇਤ੍ਵਾ ‘ਪਟਗ੍ਗਿਂ ਦੇਮਾ’ਤਿ ਵਦਥ, ਬੁਦ੍ਧਬਲਂ ਨਾਮ ਨ ਜਾਨਾਥ, ਏਥ ਸਤ੍ਥੁ ਸਨ੍ਤਿਕਂ ਗਮਿਸ੍ਸਾਮਾ’’ਤਿ. ਤੇ ਪੁਰਤੋ ਚ ਪਚ੍ਛਤੋ ਚ ਗਚ੍ਛਨ੍ਤਾ ਸਬ੍ਬੇਪਿ ਏਕਤੋ ਹੁਤ੍ਵਾ ਦਸਬਲਸ੍ਸ ਸਨ੍ਤਿਕਂ ਅਗਮਂਸੁ. ਸਤ੍ਥਾ ਮਹਾਭਿਕ੍ਖੁਸਙ੍ਘਪਰਿਵਾਰੋ ਅਞ੍ਞਤਰਸ੍ਮਿਂ ਪਦੇਸੇ ਅਟ੍ਠਾਸਿ. ਦਾਵਗ੍ਗਿ ਅਭਿਭਵਨ੍ਤੋ ਵਿਯ ਵਿਰਵਨ੍ਤੋ ਆਗਚ੍ਛਤਿ. ਆਗਨ੍ਤ੍ਵਾ ਤਥਾਗਤਸ੍ਸ ਠਿਤਟ੍ਠਾਨਂ ਪਤ੍ਵਾ ਤਸ੍ਸ ਪਦੇਸਸ੍ਸ ਸਮਨ੍ਤਾ ਸੋਲ਼ਸਕਰੀਸਮਤ੍ਤਟ੍ਠਾਨਂ ਪਤ੍ਤੋ ਉਦਕੇ ਓਪਿਲਾਪਿਤਤਿਣੁਕ੍ਕਾ ਵਿਯ ਨਿਬ੍ਬਾਯਿ, ਵਿਨਿਬ੍ਬੇਧਤੋ ਦ੍ਵਤ੍ਤਿਂਸਕਰੀਸਮਤ੍ਤਟ੍ਠਾਨਂ ਅਵਤ੍ਥਰਿਤੁਂ ਨਾਸਕ੍ਖਿ.

ਭਿਕ੍ਖੂ ਸਤ੍ਥੁ ਗੁਣਕਥਂ ਆਰਭਿਂਸੁ – ‘‘ਅਹੋ ਬੁਦ੍ਧਾਨਂ ਗੁਣਾ ਨਾਮ, ਅਯਞ੍ਹਿ ਨਾਮ ਅਚੇਤਨੋ ਅਗ੍ਗਿ ਬੁਦ੍ਧਾਨਂ ਠਿਤਟ੍ਠਾਨਂ ਅਵਤ੍ਥਰਿਤੁਂ ਨ ਸਕ੍ਕੋਤਿ, ਉਦਕੇ ਤਿਣੁਕ੍ਕਾ ਵਿਯ ਨਿਬ੍ਬਾਯਤਿ, ਅਹੋ ਬੁਦ੍ਧਾਨਂ ਆਨੁਭਾਵੋ ਨਾਮਾ’’ਤਿ. ਸਤ੍ਥਾ ਤੇਸਂ ਕਥਂ ਸੁਤ੍ਵਾ ‘‘ਨ, ਭਿਕ੍ਖਵੇ, ਏਤਂ ਏਤਰਹਿ ਮਯ੍ਹਂ ਬਲਂ, ਯਂ ਇਮਂ ਭੂਮਿਪ੍ਪਦੇਸਂ ਪਤ੍ਵਾ ਏਸ ਅਗ੍ਗਿ ਨਿਬ੍ਬਾਯਤਿ. ਇਦਂ ਪਨ ਮਯ੍ਹਂ ਪੋਰਾਣਕਸਚ੍ਚਬਲਂ. ਇਮਸ੍ਮਿਞ੍ਹਿ ਪਦੇਸੇ ਸਕਲਮ੍ਪਿ ਇਮਂ ਕਪ੍ਪਂ ਅਗ੍ਗਿ ਨ ਜਲਿਸ੍ਸਤਿ, ਕਪ੍ਪਟ੍ਠਿਯਪਾਟਿਹਾਰਿਯਂ ਨਾਮੇਤ’’ਨ੍ਤਿ ਆਹ. ਅਥਾਯਸ੍ਮਾ ਆਨਨ੍ਦੋ ਸਤ੍ਥੁ ਨਿਸੀਦਨਤ੍ਥਾਯ ਚਤੁਗ੍ਗੁਣਂ ਸਙ੍ਘਾਟਿਂ ਪਞ੍ਞਪੇਸਿ, ਨਿਸੀਦਿ ਸਤ੍ਥਾ ਪਲ੍ਲਙ੍ਕਂ ਆਭੁਜਿਤ੍ਵਾ. ਭਿਕ੍ਖੁਸਙ੍ਘੋਪਿ ਤਥਾਗਤਂ ਵਨ੍ਦਿਤ੍ਵਾ ਪਰਿਵਾਰੇਤ੍ਵਾ ਨਿਸੀਦਿ. ਅਥ ਸਤ੍ਥਾ ‘‘ਇਦਂ ਤਾਵ, ਭਨ੍ਤੇ, ਅਮ੍ਹਾਕਂ ਪਾਕਟਂ, ਅਤੀਤਂ ਪਟਿਚ੍ਛਨ੍ਨਂ, ਤਂ ਨੋ ਪਾਕਟਂ ਕਰੋਥਾ’’ਤਿ ਭਿਕ੍ਖੂਹਿ ਆਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਮਗਧਰਟ੍ਠੇ ਤਸ੍ਮਿਂਯੇਵ ਪਦੇਸੇ ਬੋਧਿਸਤ੍ਤੋ ਵਟ੍ਟਕਯੋਨਿਯਂ ਪਟਿਸਨ੍ਧਿਂ ਗਹੇਤ੍ਵਾ ਮਾਤੁਕੁਚ੍ਛਿਤੋ ਜਾਤੋ ਅਣ੍ਡਕੋਸਂ ਪਦਾਲੇਤ੍ਵਾ ਨਿਕ੍ਖਨ੍ਤਕਾਲੇ ਮਹਾਗੇਣ੍ਡੁਕਪ੍ਪਮਾਣੋ ਵਟ੍ਟਕਪੋਤਕੋ ਅਹੋਸਿ. ਅਥ ਨਂ ਮਾਤਾਪਿਤਰੋ ਕੁਲਾਵਕੇ ਨਿਪਜ੍ਜਾਪੇਤ੍ਵਾ ਮੁਖਤੁਣ੍ਡਕੇਨ ਗੋਚਰਂ ਆਹਰਿਤ੍ਵਾ ਪੋਸੇਨ੍ਤਿ. ਤਸ੍ਸ ਪਕ੍ਖੇ ਪਸਾਰੇਤ੍ਵਾ ਆਕਾਸੇ ਗਮਨਬਲਂ ਵਾ ਪਾਦੇ ਉਕ੍ਖਿਪਿਤ੍ਵਾ ਥਲੇ ਗਮਨਬਲਂ ਵਾ ਨਤ੍ਥਿ. ਤਞ੍ਚ ਪਦੇਸਂ ਸਂਵਚ੍ਛਰੇ ਸਂਵਚ੍ਛਰੇ ਦਾਵਗ੍ਗਿ ਗਣ੍ਹਾਤਿ, ਸੋ ਤਸ੍ਮਿਮ੍ਪਿ ਸਮਯੇ ਮਹਾਰਵਂ ਰਵਨ੍ਤੋ ਤਂ ਪਦੇਸਂ ਗਣ੍ਹਿ, ਸਕੁਣਸਙ੍ਘਾ ਅਤ੍ਤਨੋ ਅਤ੍ਤਨੋ ਕੁਲਾਵਕੇਹਿ ਨਿਕ੍ਖਮਿਤ੍ਵਾ ਮਰਣਭਯਭੀਤਾ ਵਿਰਵਨ੍ਤਾ ਪਲਾਯਨ੍ਤਿ, ਬੋਧਿਸਤ੍ਤਸ੍ਸਪਿ ਮਾਤਾਪਿਤਰੋ ਮਰਣਭਯਭੀਤਾ ਬੋਧਿਸਤ੍ਤਂ ਛਡ੍ਡੇਤ੍ਵਾ ਪਲਾਯਿਂਸੁ. ਬੋਧਿਸਤ੍ਤੋ ਕੁਲਾਵਕੇ ਨਿਪਨ੍ਨਕੋਵ ਗੀਵਂ ਉਕ੍ਖਿਪਿਤ੍ਵਾ ਅਵਤ੍ਥਰਿਤ੍ਵਾ ਆਗਚ੍ਛਨ੍ਤਂ ਅਗ੍ਗਿਂ ਦਿਸ੍ਵਾ ਚਿਨ੍ਤੇਸਿ ‘‘ਸਚੇ ਮਯ੍ਹਂ ਪਕ੍ਖੇ ਪਸਾਰੇਤ੍ਵਾ ਆਕਾਸੇਨ ਗਮਨਬਲਂ ਭਵੇਯ੍ਯ, ਉਪ੍ਪਤਿਤ੍ਵਾ ਅਞ੍ਞਤ੍ਥ ਗਚ੍ਛੇਯ੍ਯਂ. ਸਚੇ ਪਾਦੇ ਉਕ੍ਖਿਪਿਤ੍ਵਾ ਗਮਨਬਲਂ ਭਵੇਯ੍ਯ, ਪਦਵਾਰੇਨ ਅਞ੍ਞਤ੍ਥ ਗਚ੍ਛੇਯ੍ਯਂ. ਮਾਤਾਪਿਤਰੋਪਿ ਖੋ ਮੇ ਮਰਣਭਯਭੀਤਾ ਮਂ ਏਕਕਂ ਪਹਾਯ ਅਤ੍ਤਾਨਂ ਪਰਿਤ੍ਤਾਯਨ੍ਤਾ ਪਲਾਤਾ. ਇਦਾਨਿ ਮੇ ਅਞ੍ਞਂ ਪਟਿਸਰਣਂ ਨਤ੍ਥਿ, ਅਤਾਣੋਮ੍ਹਿ ਅਸਰਣੋ, ਕਿਂ ਨੁ ਖੋ ਅਜ੍ਜ ਮਯਾ ਕਾਤੁਂ ਵਟ੍ਟਤੀ’’ਤਿ.

ਅਥਸ੍ਸ ਏਤਦਹੋਸਿ ‘‘ਇਮਸ੍ਮਿਂ ਲੋਕੇ ਸੀਲਗੁਣੋ ਨਾਮ ਅਤ੍ਥਿ, ਸਚ੍ਚਗੁਣੋ ਨਾਮ ਅਤ੍ਥਿ, ਅਤੀਤੇ ਪਾਰਮਿਯੋ ਪੂਰੇਤ੍ਵਾ ਬੋਧਿਮੂਲੇ ਨਿਸੀਦਿਤ੍ਵਾ ਅਭਿਸਮ੍ਬੁਦ੍ਧਾ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਸਮ੍ਪਨ੍ਨਾ ਸਚ੍ਚਾਨੁਦ੍ਦਯਕਾਰੁਞ੍ਞਖਨ੍ਤਿਸਮਨ੍ਨਾਗਤਾ ਸਬ੍ਬਸਤ੍ਤੇਸੁ ਸਮਪ੍ਪਵਤ੍ਤਮੇਤ੍ਤਾਭਾਵਨਾ ਸਬ੍ਬਞ੍ਞੁਬੁਦ੍ਧਾ ਨਾਮ ਅਤ੍ਥਿ, ਤੇਹਿ ਚ ਪਟਿਵਿਦ੍ਧਾ ਧਮ੍ਮਗੁਣਾ ਨਾਮ ਅਤ੍ਥਿ, ਮਯਿ ਚਾਪਿ ਏਕਂ ਸਚ੍ਚਂ ਅਤ੍ਥਿ, ਸਂਵਿਜ੍ਜਮਾਨੋ ਏਕੋ ਸਭਾਵਧਮ੍ਮੋ ਪਞ੍ਞਾਯਤਿ, ਤਸ੍ਮਾ ਅਤੀਤੇ ਬੁਦ੍ਧੇ ਚੇਵ ਤੇਹਿ ਪਟਿਵਿਦ੍ਧਗੁਣੇ ਚ ਆਵਜ੍ਜੇਤ੍ਵਾ ਮਯਿ ਵਿਜ੍ਜਮਾਨਂ ਸਚ੍ਚਸਭਾਵਧਮ੍ਮਂ ਗਹੇਤ੍ਵਾ ਸਚ੍ਚਕਿਰਿਯਂ ਕਤ੍ਵਾ ਅਗ੍ਗਿਂ ਪਟਿਕ੍ਕਮਾਪੇਤ੍ਵਾ ਅਜ੍ਜ ਮਯਾ ਅਤ੍ਤਨੋ ਚੇਵ ਸੇਸਸਕੁਣਾਨਞ੍ਚ ਸੋਤ੍ਥਿਭਾਵਂ ਕਾਤੁਂ ਵਟ੍ਟਤੀ’’ਤਿ. ਤੇਨ ਵੁਤ੍ਤਂ –

‘‘ਅਤ੍ਥਿ ਲੋਕੇ ਸੀਲਗੁਣੋ, ਸਚ੍ਚਂ ਸੋਚੇਯ੍ਯਨੁਦ੍ਦਯਾ;

ਤੇਨ ਸਚ੍ਚੇਨ ਕਾਹਾਮਿ, ਸਚ੍ਚਕਿਰਿਯਮਨੁਤ੍ਤਰਂ.

‘‘ਆਵਜ੍ਜੇਤ੍ਵਾ ਧਮ੍ਮਬਲਂ, ਸਰਿਤ੍ਵਾ ਪੁਬ੍ਬਕੇ ਜਿਨੇ;

ਸਚ੍ਚਬਲਮਵਸ੍ਸਾਯ, ਸਚ੍ਚਕਿਰਿਯਮਕਾਸਹ’’ਨ੍ਤਿ. (ਚਰਿਯਾ. ੩.੭੯-੮੦);

ਅਥ ਬੋਧਿਸਤ੍ਤੋ ਅਤੀਤੇ ਪਰਿਨਿਬ੍ਬੁਤਾਨਂ ਬੁਦ੍ਧਾਨਂ ਗੁਣੇ ਆਵਜ੍ਜੇਤ੍ਵਾ ਅਤ੍ਤਨਿ ਵਿਜ੍ਜਮਾਨਂ ਸਚ੍ਚਸਭਾਵਂ ਆਰਬ੍ਭ ਸਚ੍ਚਕਿਰਿਯਂ ਕਰੋਨ੍ਤੋ ਇਮਂ ਗਾਥਮਾਹ –

੩੫. ‘‘ਸਨ੍ਤਿ ਪਕ੍ਖਾ ਅਪਤਨਾ, ਸਨ੍ਤਿ ਪਾਦਾ ਅਵਞ੍ਚਨਾ;

ਮਾਤਾਪਿਤਾ ਚ ਨਿਕ੍ਖਨ੍ਤਾ, ਜਾਤਵੇਦ ਪਟਿਕ੍ਕਮਾ’’ਤਿ.

ਤਤ੍ਥ ਸਨ੍ਤਿ ਪਕ੍ਖਾ ਅਪਤਨਾਤਿ ਮਯ੍ਹਂ ਪਕ੍ਖਾ ਨਾਮ ਅਤ੍ਥਿ ਉਪਲਬ੍ਭਨ੍ਤਿ, ਨੋ ਚ ਖੋ ਸਕ੍ਕਾ ਏਤੇਹਿ ਉਪ੍ਪਤਿਤੁਂ ਆਕਾਸੇਨ ਗਨ੍ਤੁਨ੍ਤਿ ਅਪਤਨਾ. ਸਨ੍ਤਿ ਪਾਦਾ ਅਵਞ੍ਚਨਾਤਿ ਪਾਦਾਪਿ ਮੇ ਅਤ੍ਥਿ, ਤੇਹਿ ਪਨ ਵਞ੍ਚਿਤੁਂ ਪਦਵਾਰਗਮਨੇਨ ਗਨ੍ਤੁਂ ਨ ਸਕ੍ਕਾਤਿ ਅਵਞ੍ਚਨਾ. ਮਾਤਾਪਿਤਾ ਚ ਨਿਕ੍ਖਨ੍ਤਾਤਿ ਯੇ ਚ ਮਂ ਅਞ੍ਞਤ੍ਥ ਨੇਯ੍ਯੁਂ, ਤੇਪਿ ਮਰਣਭਯੇਨ ਮਾਤਾਪਿਤਰੋ ਨਿਕ੍ਖਨ੍ਤਾ. ਜਾਤਵੇਦਾਤਿ ਅਗ੍ਗਿਂ ਆਲਪਤਿ. ਸੋ ਹਿ ਜਾਤੋਵ ਵੇਦਯਤਿ ਪਞ੍ਞਾਯਤਿ, ਤਸ੍ਮਾ ‘‘ਜਾਤਵੇਦੋ’’ਤਿ ਵੁਚ੍ਚਤਿ. ਪਟਿਕ੍ਕਮਾਤਿ ਪਟਿਗਚ੍ਛ ਨਿਵਤ੍ਤਾਤਿ ਜਾਤਵੇਦਂ ਆਣਾਪੇਤਿ.

ਇਤਿ ਮਹਾਸਤ੍ਤੋ ‘‘ਸਚੇ ਮਯ੍ਹਂ ਪਕ੍ਖਾਨਂ ਅਤ੍ਥਿਭਾਵੋ, ਤੇ ਚ ਪਸਾਰੇਤ੍ਵਾ ਆਕਾਸੇ ਅਪਤਨਭਾਵੋ, ਪਾਦਾਨਂ ਅਤ੍ਥਿਭਾਵੋ, ਤੇ ਚ ਉਕ੍ਖਿਪਿਤ੍ਵਾ ਅਵਞ੍ਚਨਭਾਵੋ, ਮਾਤਾਪਿਤੂਨਂ ਮਂ ਕੁਲਾਵਕੇਯੇਵ ਛਡ੍ਡੇਤ੍ਵਾ ਪਲਾਤਭਾਵੋ ਚ ਸਚ੍ਚੋ ਸਭਾਵਭੂਤੋਯੇਵ, ਜਾਤਵੇਦ, ਏਤੇਨ ਸਚ੍ਚੇਨ ਤ੍ਵਂ ਇਤੋ ਪਟਿਕ੍ਕਮਾ’’ਤਿ ਕੁਲਾਵਕੇ ਨਿਪਨ੍ਨਕੋਵ ਸਚ੍ਚਕਿਰਿਯਂ ਅਕਾਸਿ. ਤਸ੍ਸ ਸਹ ਸਚ੍ਚਕਿਰਿਯਾਯ ਸੋਲ਼ਸਕਰੀਸਮਤ੍ਤੇ ਠਾਨੇ ਜਾਤਵੇਦੋ ਪਟਿਕ੍ਕਮਿ. ਪਟਿਕ੍ਕਮਨ੍ਤੋ ਚ ਨ ਝਾਯਮਾਨੋਵ ਅਞ੍ਞਂ ਗਤੋ, ਉਦਕੇ ਪਨ ਓਪਿਲਾਪਿਤਾ ਉਕ੍ਕਾ ਵਿਯ ਤਤ੍ਥੇਵ ਨਿਬ੍ਬਾਯਿ. ਤੇਨ ਵੁਤ੍ਤਂ –

‘‘ਸਹ ਸਚ੍ਚੇ ਕਤੇ ਮਯ੍ਹਂ, ਮਹਾਪਜ੍ਜਲਿਤੋ ਸਿਖੀ;

ਵਜ੍ਜੇਸਿ ਸੋਲ਼ਸ ਕਰੀਸਾਨਿ, ਉਦਕਂ ਪਤ੍ਵਾ ਯਥਾ ਸਿਖੀ’’ਤਿ. (ਚਰਿਯਾ. ੩.੮੨);

ਤਂ ਪਨ ਠਾਨਂ ਸਕਲੇਪਿ ਇਮਸ੍ਮਿਂ ਕਪ੍ਪੇ ਅਗ੍ਗਿਨਾ ਅਨਭਿਭਵਨੀਯਤ੍ਤਾ ਕਪ੍ਪਟ੍ਠਿਯਪਾਟਿਹਾਰਿਯਂ ਨਾਮ ਜਾਤਂ. ਏਵਂ ਬੋਧਿਸਤ੍ਤੋ ਸਚ੍ਚਕਿਰਿਯਂ ਕਤ੍ਵਾ ਜੀਵਿਤਪਰਿਯੋਸਾਨੇ ਯਥਾਕਮ੍ਮਂ ਗਤੋ.

ਸਤ੍ਥਾ ‘‘ਨ, ਭਿਕ੍ਖਵੇ, ਇਮਸ੍ਸ ਵਨਸ੍ਸ ਅਗ੍ਗਿਨਾ ਅਨਜ੍ਝੋਤ੍ਥਰਣਂ ਏਤਰਹਿ ਮਯ੍ਹਂ ਬਲਂ, ਪੋਰਾਣਂ ਪਨੇਤਂ ਵਟ੍ਟਪੋਤਕਕਾਲੇ ਮਯ੍ਹਮੇਵ ਸਚ੍ਚਬਲ’’ਨ੍ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਸਿ. ਸਚ੍ਚਪਰਿਯੋਸਾਨੇ ਕੇਚਿ ਸੋਤਾਪਨ੍ਨਾ ਅਹੇਸੁਂ, ਕੇਚਿ ਸਕਦਾਗਾਮਿਨੋ, ਕੇਚਿ ਅਨਾਗਾਮਿਨੋ, ਕੇਚਿ ਅਰਹਤ੍ਤਂ ਪਤ੍ਤਾਤਿ. ਸਤ੍ਥਾਪਿ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਾਤਾਪਿਤਰੋ ਏਤਰਹਿ ਮਾਤਾਪਿਤਰੋਵ ਅਹੇਸੁਂ, ਵਟ੍ਟਕਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਵਟ੍ਟਕਜਾਤਕਵਣ੍ਣਨਾ ਪਞ੍ਚਮਾ.

[੩੬] ੬. ਸਕੁਣਜਾਤਕਵਣ੍ਣਨਾ

ਯਂ ਨਿਸ੍ਸਿਤਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦਡ੍ਢਪਣ੍ਣਸਾਲਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਏਕੋ ਕਿਰ ਭਿਕ੍ਖੁ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਜੇਤਵਨਤੋ ਨਿਕ੍ਖਮ੍ਮ ਕੋਸਲੇਸੁ ਏਕਂ ਪਚ੍ਚਨ੍ਤਗਾਮਂ ਨਿਸ੍ਸਾਯ ਏਕਸ੍ਮਿਂ ਅਰਞ੍ਞਸੇਨਾਸਨੇ ਵਸਤਿ. ਅਥਸ੍ਸ ਪਠਮਮਾਸੇਯੇਵ ਪਣ੍ਣਸਾਲਾ ਡਯ੍ਹਿਤ੍ਥ. ਸੋ ‘‘ਪਣ੍ਣਸਾਲਾ ਮੇ ਦਡ੍ਢਾ, ਦੁਕ੍ਖਂ ਵਸਾਮੀ’’ਤਿ ਮਨੁਸ੍ਸਾਨਂ ਆਚਿਕ੍ਖਿ. ਮਨੁਸ੍ਸਾ ‘‘ਇਦਾਨਿ ਨੋ ਖੇਤ੍ਤਂ ਪਰਿਸੁਕ੍ਖਂ, ਕੇਦਾਰੇ ਪਾਯੇਤ੍ਵਾ ਕਰਿਸ੍ਸਾਮ’’, ਤਸ੍ਮਿਂ ਪਾਯਿਤੇ ‘‘ਬੀਜਂ ਵਪਿਤ੍ਵਾ’’, ਬੀਜੇ ਵੁਤ੍ਤੇ ‘‘ਵਤਿਂ ਕਤ੍ਵਾ’’, ਵਤਿਯਾ ਕਤਾਯ ‘‘ਨਿਦ੍ਦਾਯਿਤ੍ਵਾ, ਲਾਯਿਤ੍ਵਾ, ਮਦ੍ਦਿਤ੍ਵਾ’’ਤਿ ਏਵਂ ਤਂ ਤਂ ਕਮ੍ਮਂ ਅਪਦਿਸਨ੍ਤਾਯੇਵ ਤੇਮਾਸਂ ਵੀਤਿਨਾਮੇਸੁਂ. ਸੋ ਭਿਕ੍ਖੁ ਤੇਮਾਸਂ ਅਜ੍ਝੋਕਾਸੇ ਦੁਕ੍ਖਂ ਵਸਨ੍ਤੋ ਕਮ੍ਮਟ੍ਠਾਨਂ ਵਡ੍ਢੇਤ੍ਵਾ ਵਿਸੇਸਂ ਨਿਬ੍ਬਤ੍ਤੇਤੁਂ ਨਾਸਕ੍ਖਿ. ਪਵਾਰੇਤ੍ਵਾ ਪਨ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ‘‘ਕਿਂ ਭਿਕ੍ਖੁ ਸੁਖੇਨ ਵਸ੍ਸਂਵੁਤ੍ਥੋਸਿ, ਕਮ੍ਮਟ੍ਠਾਨਂ ਤੇ ਮਤ੍ਥਕਂ ਪਤ੍ਤ’’ਨ੍ਤਿ ਪੁਚ੍ਛਿ. ਸੋ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ ‘‘ਸੇਨਾਸਨਸਪ੍ਪਾਯਸ੍ਸ ਮੇ ਅਭਾਵੇਨ ਕਮ੍ਮਟ੍ਠਾਨਂ ਮਤ੍ਥਕਂ ਨ ਪਤ੍ਤ’’ਨ੍ਤਿ ਆਹ. ਸਤ੍ਥਾ ‘‘ਪੁਬ੍ਬੇ ਭਿਕ੍ਖੁ ਤਿਰਚ੍ਛਾਨਗਤਾਪਿ ਅਤ੍ਤਨੋ ਸਪ੍ਪਾਯਾਸਪ੍ਪਾਯਂ ਜਾਨਿਂਸੁ, ਤ੍ਵਂ ਕਸ੍ਮਾ ਨ ਅਞ੍ਞਾਸੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸਕੁਣਯੋਨਿਯਂ ਨਿਬ੍ਬਤ੍ਤਿਤ੍ਵਾ ਸਕੁਣਸਙ੍ਘਪਰਿਵੁਤੋ ਅਰਞ੍ਞਾਯਤਨੇ ਸਾਖਾਵਿਟਪਸਮ੍ਪਨ੍ਨਂ ਮਹਾਰੁਕ੍ਖਂ ਨਿਸ੍ਸਾਯ ਵਸਤਿ. ਅਥੇਕਦਿਵਸਂ ਤਸ੍ਸ ਰੁਕ੍ਖਸ੍ਸ ਸਾਖਾਸੁ ਅਞ੍ਞਮਞ੍ਞਂ ਘਂਸਨ੍ਤੀਸੁ ਚੁਣ੍ਣਂ ਪਤਤਿ, ਧੂਮੋ ਉਟ੍ਠਾਤਿ. ਤਂ ਦਿਸ੍ਵਾ ਬੋਧਿਸਤ੍ਤੋ ਚਿਨ੍ਤੇਸਿ ‘‘ਇਮਾ ਦ੍ਵੇ ਸਾਖਾ ਏਵਂ ਘਂਸਮਾਨਾ ਅਗ੍ਗਿਂ ਵਿਸ੍ਸਜ੍ਜੇਸ੍ਸਨ੍ਤਿ, ਸੋ ਪਤਿਤ੍ਵਾ ਪੁਰਾਣਪਣ੍ਣਾਨਿ ਗਣ੍ਹਿਸ੍ਸਤਿ, ਤਤੋ ਪਟ੍ਠਾਯ ਇਮਮ੍ਪਿ ਰੁਕ੍ਖਂ ਝਾਪੇਸ੍ਸਤਿ, ਨ ਸਕ੍ਕਾ ਇਧ ਅਮ੍ਹੇਹਿ ਵਸਿਤੁਂ, ਇਤੋ ਪਲਾਯਿਤ੍ਵਾ ਅਞ੍ਞਤ੍ਥ ਗਨ੍ਤੁਂ ਵਟ੍ਟਤੀ’’ਤਿ. ਸੋ ਸਕੁਣਸਙ੍ਘਸ੍ਸ ਇਮਂ ਗਾਥਮਾਹ –

੩੬. ‘‘ਯਂ ਨਿਸ੍ਸਿਤਾ ਜਗਤਿਰੁਹਂ ਵਿਹਙ੍ਗਮਾ, ਸ੍ਵਾਯਂ ਅਗ੍ਗਿਂ ਪਮੁਞ੍ਚਤਿ;

ਦਿਸਾ ਭਜਥ ਵਕ੍ਕਙ੍ਗਾ, ਜਾਤਂ ਸਰਣਤੋ ਭਯ’’ਨ੍ਤਿ.

ਤਤ੍ਥ ਜਗਤਿਰੁਹਨ੍ਤਿ ਜਗਤਿ ਵੁਚ੍ਚਤਿ ਪਥਵੀ, ਤਤ੍ਥ ਜਾਤਤ੍ਤਾ ਰੁਕ੍ਖੋ ‘‘ਜਗਤਿਰੁਹੋ’’ਤਿ ਵੁਚ੍ਚਤਿ. ਵਿਹਙ੍ਗਮਾਤਿ ਵਿਹਂ ਵੁਚ੍ਚਤਿ ਆਕਾਸਂ, ਤਤ੍ਥ ਗਮਨਤੋ ਪਕ੍ਖੀ ‘‘ਵਿਹਙ੍ਗਮਾ’’ਤਿ ਵੁਚ੍ਚਨ੍ਤਿ. ਦਿਸਾ ਭਜਥਾਤਿ ਇਮਂ ਰੁਕ੍ਖਂ ਮੁਞ੍ਚਿਤ੍ਵਾ ਇਤੋ ਪਲਾਯਨ੍ਤਾ ਚਤਸ੍ਸੋ ਦਿਸਾ ਭਜਥ. ਵਕ੍ਕਙ੍ਗਾਤਿ ਸਕੁਣੇ ਆਲਪਤਿ. ਤੇ ਹਿ ਉਤ੍ਤਮਙ੍ਗਂ ਗਲਂ ਕਦਾਚਿ ਕਦਾਚਿ ਵਙ੍ਕਂ ਕਰੋਨ੍ਤਿ, ਤਸ੍ਮਾ ‘‘ਵਕ੍ਕਙ੍ਗਾ’’ਤਿ ਵੁਚ੍ਚਨ੍ਤਿ. ਵਙ੍ਕਾ ਵਾ ਤੇਸਂ ਉਭੋਸੁ ਪਸ੍ਸੇਸੁ ਪਕ੍ਖਾ ਜਾਤਾਤਿ ਵਕ੍ਕਙ੍ਗਾ. ਜਾਤਂ ਸਰਣਤੋ ਭਯਨ੍ਤਿ ਅਮ੍ਹਾਕਂ ਅਵਸ੍ਸਯਰੁਕ੍ਖਤੋਯੇਵ ਭਯਂ ਨਿਬ੍ਬਤ੍ਤਂ, ਏਥ ਅਞ੍ਞਤ੍ਥ ਗਚ੍ਛਾਮਾਤਿ.

ਬੋਧਿਸਤ੍ਤਸ੍ਸ ਵਚਨਕਰਾ ਪਣ੍ਡਿਤਸਕੁਣਾ ਤੇਨ ਸਦ੍ਧਿਂ ਏਕਪ੍ਪਹਾਰੇਨੇਵ ਉਪ੍ਪਤਿਤ੍ਵਾ ਅਞ੍ਞਤ੍ਥ ਗਤਾ. ਯੇ ਪਨ ਅਪਣ੍ਡਿਤਾ, ਤੇ ‘‘ਏਵਮੇਵ ਏਸ ਬਿਨ੍ਦੁਮਤ੍ਤੇ ਉਦਕੇ ਕੁਮ੍ਭੀਲੇ ਪਸ੍ਸਤੀ’’ਤਿ ਤਸ੍ਸ ਵਚਨਂ ਅਗ੍ਗਹੇਤ੍ਵਾ ਤਤ੍ਥੇਵ ਵਸਿਂਸੁ. ਤਤੋ ਨ ਚਿਰਸ੍ਸੇਵ ਬੋਧਿਸਤ੍ਤੇਨ ਚਿਨ੍ਤਿਤਾਕਾਰੇਨੇਵ ਅਗ੍ਗਿ ਨਿਬ੍ਬਤ੍ਤਿਤ੍ਵਾ ਤਂ ਰੁਕ੍ਖਂ ਅਗ੍ਗਹੇਸਿ. ਧੂਮੇਸੁ ਚ ਜਾਲਾਸੁ ਚ ਉਟ੍ਠਿਤਾਸੁ ਧੂਮਨ੍ਧਾ ਸਕੁਣਾ ਅਞ੍ਞਤ੍ਥ ਗਨ੍ਤੁਂ ਨਾਸਕ੍ਖਿਂਸੁ, ਅਗ੍ਗਿਮ੍ਹਿ ਪਤਿਤ੍ਵਾ ਪਤਿਤ੍ਵਾ ਵਿਨਾਸਂ ਪਾਪੁਣਿਂਸੁ.

ਸਤ੍ਥਾ ‘‘ਏਵਂ ਭਿਕ੍ਖੁ ਪੁਬ੍ਬੇ ਤਿਰਚ੍ਛਾਨਗਤਾਪਿ ਰੁਕ੍ਖਗ੍ਗੇ ਵਸਨ੍ਤਾ ਅਤ੍ਤਨੋ ਸਪ੍ਪਾਯਾਸਪ੍ਪਾਯਂ ਜਾਨਨ੍ਤਿ, ਤ੍ਵਂ ਕਸ੍ਮਾ ਨ ਅਞ੍ਞਾਸੀ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਸਿ. ਸਚ੍ਚਪਰਿਯੋਸਾਨੇ ਸੋ ਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਿਤੋ. ਸਤ੍ਥਾਪਿ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਬੋਧਿਸਤ੍ਤਸ੍ਸ ਵਚਨਕਰਾ ਸਕੁਣਾ ਬੁਦ੍ਧਪਰਿਸਾ ਅਹੇਸੁਂ, ਪਣ੍ਡਿਤਸਕੁਣੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਕੁਣਜਾਤਕਵਣ੍ਣਨਾ ਛਟ੍ਠਾ.

[੩੭] ੭. ਤਿਤ੍ਤਿਰਜਾਤਕਵਣ੍ਣਨਾ

ਯੇ ਵੁਡ੍ਢਮਪਚਾਯਨ੍ਤੀਤਿ ਇਦਂ ਸਤ੍ਥਾ ਸਾਵਤ੍ਥਿਂ ਗਚ੍ਛਨ੍ਤੋ ਸਾਰਿਪੁਤ੍ਤਤ੍ਥੇਰਸ੍ਸ ਸੇਨਾਸਨਪਟਿਬਾਹਨਂ ਆਰਬ੍ਭ ਕਥੇਸਿ. ਅਨਾਥਪਿਣ੍ਡਿਕੇਨ ਹਿ ਵਿਹਾਰਂ ਕਾਰੇਤ੍ਵਾ ਦੂਤੇ ਪੇਸਿਤੇ ਸਤ੍ਥਾ ਰਾਜਗਹਾ ਨਿਕ੍ਖਮ੍ਮ ਵੇਸਾਲਿਂ ਪਤ੍ਵਾ ਤਤ੍ਥ ਯਥਾਭਿਰਨ੍ਤਂ ਵਿਹਰਿਤ੍ਵਾ ‘‘ਸਾਵਤ੍ਥਿਂ ਗਮਿਸ੍ਸਾਮੀ’’ਤਿ ਮਗ੍ਗਂ ਪਟਿਪਜ੍ਜਿ. ਤੇਨ ਚ ਸਮਯੇਨ ਛਬ੍ਬਗ੍ਗਿਯਾਨਂ ਅਨ੍ਤੇਵਾਸਿਕਾ ਪੁਰਤੋ ਪੁਰਤੋ ਗਨ੍ਤ੍ਵਾ ਥੇਰਾਨਂ ਸੇਨਾਸਨੇਸੁ ਅਗ੍ਗਹਿਤੇਸ੍ਵੇਵ ‘‘ਇਦਂ ਸੇਨਾਸਨਂ ਅਮ੍ਹਾਕਂ ਉਪਜ੍ਝਾਯਸ੍ਸ, ਇਦਂ ਆਚਰਿਯਸ੍ਸ, ਇਦਂ ਅਮ੍ਹਾਕਮੇਵ ਭਵਿਸ੍ਸਤੀ’’ਤਿ ਸੇਨਾਸਨਾਨਿ ਪਲਿਬੁਨ੍ਧੇਨ੍ਤਿ. ਪਚ੍ਛਾ ਆਗਤਾ ਥੇਰਾ ਸੇਨਾਸਨਾਨਿ ਨ ਲਭਨ੍ਤਿ. ਸਾਰਿਪੁਤ੍ਤਤ੍ਥੇਰਸ੍ਸਾਪਿ ਅਨ੍ਤੇਵਾਸਿਕਾ ਥੇਰਸ੍ਸ ਸੇਨਾਸਨਂ ਪਰਿਯੇਸਨ੍ਤਾ ਨ ਲਭਿਂਸੁ. ਥੇਰੋ ਸੇਨਾਸਨਂ ਅਲਭਨ੍ਤੋ ਸਤ੍ਥੁ ਸੇਨਾਸਨਸ੍ਸ ਅਵਿਦੂਰੇ ਏਕਸ੍ਮਿਂ ਰੁਕ੍ਖਮੂਲੇ ਨਿਸਜ੍ਜਾਯ ਚ ਚਙ੍ਕਮੇਨ ਚ ਰਤ੍ਤਿਂ ਵੀਤਿਨਾਮੇਸਿ. ਸਤ੍ਥਾ ਪਚ੍ਚੂਸਸਮਯੇ ਨਿਕ੍ਖਮਿਤ੍ਵਾ ਉਕ੍ਕਾਸਿ, ਥੇਰੋਪਿ ਉਕ੍ਕਾਸਿ. ‘‘ਕੋ ਏਸੋ’’ਤਿ? ‘‘ਅਹਂ, ਭਨ੍ਤੇ, ਸਾਰਿਪੁਤ੍ਤੋ’’ਤਿ. ‘‘ਸਾਰਿਪੁਤ੍ਤ, ਇਮਾਯ ਵੇਲਾਯ ਇਧ ਕਿਂ ਕਰੋਸੀ’’ਤਿ? ‘‘ਸੋ ਤਂ ਪਵਤ੍ਤਿਂ ਆਰੋਚੇਸਿ’’. ਸਤ੍ਥਾ ਥੇਰਸ੍ਸ ਵਚਨਂ ਸੁਤ੍ਵਾ ‘‘ਇਦਾਨਿ ਤਾਵ ਮਯਿ ਜੀਵਨ੍ਤੇਯੇਵ ਭਿਕ੍ਖੂ ਅਞ੍ਞਮਞ੍ਞਂ ਅਗਾਰਵਾ ਅਪਤਿਸ੍ਸਾ ਵਿਹਰਨ੍ਤਿ, ਪਰਿਨਿਬ੍ਬੁਤੇ ਕਿਂ ਨੁ ਖੋ ਕਰਿਸ੍ਸਨ੍ਤੀ’’ਤਿ ਆਵਜ੍ਜੇਨ੍ਤਸ੍ਸ ਧਮ੍ਮਸਂਵੇਗੋ ਉਦਪਾਦਿ.

ਸੋ ਪਭਾਤਾਯ ਰਤ੍ਤਿਯਾ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪੁਚ੍ਛਿ ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਪੁਰਤੋ ਪੁਰਤੋ ਗਨ੍ਤ੍ਵਾ ਥੇਰਾਨਂ ਭਿਕ੍ਖੂਨਂ ਸੇਨਾਸਨਂ ਪਟਿਬਾਹਨ੍ਤੀ’’ਤਿ. ‘‘ਸਚ੍ਚਂ, ਭਗਵਾ’’ਤਿ? ਤਤੋ ਛਬ੍ਬਗ੍ਗਿਯੇ ਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ ‘‘ਕੋ ਨੁ ਖੋ, ਭਿਕ੍ਖਵੇ, ਅਗ੍ਗਾਸਨਂ ਅਗ੍ਗੋਦਕਂ ਅਗ੍ਗਪਿਣ੍ਡਂ ਅਰਹਤੀ’’ਤਿ? ਏਕਚ੍ਚੇ ‘‘ਖਤ੍ਤਿਯਕੁਲਾ ਪਬ੍ਬਜਿਤੋ’’ਤਿ ਆਹਂਸੁ, ਏਕਚ੍ਚੇ ‘‘ਬ੍ਰਾਹ੍ਮਣਕੁਲਾ, ਗਹਪਤਿਕੁਲਾ ਪਬ੍ਬਜਿਤੋ’’ਤਿ, ਅਪਰੇ ‘‘ਵਿਨਯਧਰੋ, ਧਮ੍ਮਕਥਿਕੋ, ਪਠਮਸ੍ਸ ਝਾਨਸ੍ਸ ਲਾਭੀ, ਦੁਤਿਯਸ੍ਸ, ਤਤਿਯਸ੍ਸ, ਚਤੁਤ੍ਥਸ੍ਸ ਝਾਨਸ੍ਸ ਲਾਭੀ’’ਤਿ. ਅਪਰੇ ‘‘ਸੋਤਾਪਨ੍ਨੋ, ਸਕਦਾਗਾਮੀ, ਅਨਾਗਾਮੀ, ਅਰਹਾ, ਤੇਵਿਜ੍ਜੋ, ਛਲ਼ਭਿਞ੍ਞੋ’’ਤਿ ਆਹਂਸੁ. ਏਵਂ ਤੇਹਿ ਭਿਕ੍ਖੂਹਿ ਅਤ੍ਤਨੋ ਅਤ੍ਤਨੋ ਰੁਚਿਵਸੇਨ ਅਗ੍ਗਾਸਨਾਦਿਰਹਾਨਂ ਕਥਿਤਕਾਲੇ ਸਤ੍ਥਾ ਆਹ – ‘‘ਨ, ਭਿਕ੍ਖਵੇ, ਮਯ੍ਹਂ ਸਾਸਨੇ ਅਗ੍ਗਾਸਨਾਦੀਨਿ ਪਤ੍ਵਾ ਖਤ੍ਤਿਯਕੁਲਾ ਪਬ੍ਬਜਿਤੋ ਪਮਾਣਂ, ਨ ਬ੍ਰਾਹ੍ਮਣਕੁਲਾ ਪਬ੍ਬਜਿਤੋ, ਨ ਗਹਪਤਿਕੁਲਾ ਪਬ੍ਬਜਿਤੋ, ਨ ਵਿਨਯਧਰੋ, ਨ ਸੁਤ੍ਤਨ੍ਤਿਕੋ, ਨ ਆਭਿਧਮ੍ਮਿਕੋ, ਨ ਪਠਮਜ੍ਝਾਨਾਦਿਲਾਭਿਨੋ, ਨ ਸੋਤਾਪਨ੍ਨਾਦਯੋ ਪਮਾਣਂ, ਅਥ ਖੋ, ਭਿਕ੍ਖਵੇ, ਇਮਸ੍ਮਿਂ ਸਾਸਨੇ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਾਤਬ੍ਬਂ, ਅਗ੍ਗਾਸਨਂ ਅਗ੍ਗੋਦਕਂ ਅਗ੍ਗਪਿਣ੍ਡੋ ਲਦ੍ਧਬ੍ਬੋ. ਇਦਮੇਤ੍ਥ ਪਮਾਣਂ. ਤਸ੍ਮਾ ਵੁਡ੍ਢਤਰੋ ਭਿਕ੍ਖੁ ਏਤੇਸਂ ਅਨੁਚ੍ਛਵਿਕੋ. ਇਦਾਨਿ ਖੋ ਪਨ, ਭਿਕ੍ਖਵੇ, ਸਾਰਿਪੁਤ੍ਤੋ ਮਯ੍ਹਂ ਅਗ੍ਗਸਾਵਕੋ ਅਨੁਧਮ੍ਮਚਕ੍ਕਪ੍ਪਵਤ੍ਤਕੋ ਮਮਾਨਨ੍ਤਰਂ ਸੇਨਾਸਨਂ ਲਦ੍ਧੁਂ ਅਰਹਤਿ, ਸੋ ਇਮਂ ਰਤ੍ਤਿਂ ਸੇਨਾਸਨਂ ਅਲਭਨ੍ਤੋ ਰੁਕ੍ਖਮੂਲੇ ਵੀਤਿਨਾਮੇਸਿ, ਤੁਮ੍ਹੇ ਇਦਾਨੇਵ ਏਵਂ ਅਗਾਰਵਾ ਅਪਤਿਸ੍ਸਾ, ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਕਿਨ੍ਤਿ ਕਤ੍ਵਾ ਵਿਹਰਿਸ੍ਸਥਾ’’ਤਿ. ਅਥ ਨੇਸਂ ਓਵਾਦਦਾਨਤ੍ਥਾਯ ‘‘ਪੁਬ੍ਬੇ, ਭਿਕ੍ਖਵੇ, ਤਿਰਚ੍ਛਾਨਗਤਾਪਿ ‘ਨ ਖੋ ਪਨੇਤਂ ਅਮ੍ਹਾਕਂ ਪਤਿਰੂਪਂ, ਯਂ ਮਯਂ ਅਞ੍ਞਮਞ੍ਞਂ ਅਗਾਰਵਾ ਅਪਤਿਸ੍ਸਾ ਅਸਭਾਗਵੁਤ੍ਤਿਨੋ ਵਿਹਰੇਯ੍ਯਾਮ, ਅਮ੍ਹੇਸੁ ਮਹਲ੍ਲਕਤਰਂ ਜਾਨਿਤ੍ਵਾ ਤਸ੍ਸ ਅਭਿਵਾਦਨਾਦੀਨਿ ਕਰਿਸ੍ਸਾਮਾ’ਤਿ ਸਾਧੁਕਂ ਵੀਮਂਸਿਤ੍ਵਾ ‘ਅਯਂ ਨੋ ਮਹਲ੍ਲਕੋ’ਤਿ ਞਤ੍ਵਾ ਤਸ੍ਸ ਅਭਿਵਾਦਨਾਦੀਨਿ ਕਤ੍ਵਾ ਦੇਵਪਥਂ ਪੂਰਯਮਾਨਾ ਗਤਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਹਿਮਵਨ੍ਤਪ੍ਪਦੇਸੇ ਏਕਂ ਮਹਾਨਿਗ੍ਰੋਧਂ ਉਪਨਿਸ੍ਸਾਯ ਤਯੋ ਸਹਾਯਾ ਵਿਹਰਿਂਸੁ – ਤਿਤ੍ਤਿਰੋ, ਮਕ੍ਕਟੋ, ਹਤ੍ਥੀਤਿ. ਤੇ ਅਞ੍ਞਮਞ੍ਞਂ ਅਗਾਰਵਾ ਅਪਤਿਸ੍ਸਾ ਅਸਭਾਗਵੁਤ੍ਤਿਨੋ ਅਹੇਸੁਂ. ਅਥ ਨੇਸਂ ਏਤਦਹੋਸਿ ‘‘ਨ ਯੁਤ੍ਤਂ ਅਮ੍ਹਾਕਂ ਏਵਂ ਵਿਹਰਿਤੁਂ, ਯਂਨੂਨ ਮਯਂ ਯੋ ਨੋ ਮਹਲ੍ਲਕਤਰੋ, ਤਸ੍ਸ ਅਭਿਵਾਦਨਾਦੀਨਿ ਕਰੋਨ੍ਤਾ ਵਿਹਰੇਯ੍ਯਾਮਾ’’ਤਿ. ‘‘ਕੋ ਪਨ ਨੋ ਮਹਲ੍ਲਕਤਰੋ’’ਤਿ ਚਿਨ੍ਤੇਨ੍ਤਾ ਏਕਦਿਵਸਂ ‘‘ਅਤ੍ਥੇਸੋ ਉਪਾਯੋ’’ਤਿ ਤਯੋਪਿ ਜਨਾ ਨਿਗ੍ਰੋਧਮੂਲੇ ਨਿਸੀਦਿਤ੍ਵਾ ਤਿਤ੍ਤਿਰੋ ਚ ਮਕ੍ਕਟੋ ਚ ਹਤ੍ਥਿਂ ਪੁਚ੍ਛਿਂਸੁ ‘‘ਸਮ੍ਮ ਹਤ੍ਥਿ, ਤ੍ਵਂ ਇਮਂ ਨਿਗ੍ਰੋਧਰੁਕ੍ਖਂ ਕੀਵਪ੍ਪਮਾਣਕਾਲਤੋ ਪਟ੍ਠਾਯ ਜਾਨਾਸੀ’’ਤਿ? ਸੋ ਆਹ ‘‘ਸਮ੍ਮਾ, ਅਹਂ ਤਰੁਣਪੋਤਕਕਾਲੇ ਇਮਂ ਨਿਗ੍ਰੋਧਗਚ੍ਛਂ ਅਨ੍ਤਰਸਤ੍ਥੀਸੁ ਕਤ੍ਵਾ ਗਚ੍ਛਾਮਿ, ਅਵਤ੍ਥਰਿਤ੍ਵਾ ਠਿਤਕਾਲੇ ਚ ਪਨ ਮੇ ਏਤਸ੍ਸ ਅਗ੍ਗਸਾਖਾ ਨਾਭਿਂ ਘਟ੍ਟੇਤਿ, ਏਵਾਹਂ ਇਮਂ ਗਚ੍ਛਕਾਲਤੋ ਪਟ੍ਠਾਯ ਜਾਨਾਮੀ’’ਤਿ ਪੁਨ ਉਭੋਪਿ ਜਨਾ ਪੁਰਿਮਨਯੇਨੇਵ ਮਕ੍ਕਟਂ ਪੁਚ੍ਛਿਂਸੁ. ਸੋ ਆਹ ‘‘ਅਹਂ ਸਮ੍ਮਾ ਮਕ੍ਕਟਚ੍ਛਾਪਕੋ ਸਮਾਨੋ ਭੂਮਿਯਂ ਨਿਸੀਦਿਤ੍ਵਾ ਗੀਵਂ ਅਨੁਕ੍ਖਿਪਿਤ੍ਵਾਵ ਇਮਸ੍ਸ ਨਿਗ੍ਰੋਧਪੋਤਕਸ੍ਸ ਅਗ੍ਗਙ੍ਕੁਰੇ ਖਾਦਾਮਿ, ਏਵਾਹਂ ਇਮਂ ਖੁਦ੍ਦਕਕਾਲਤੋ ਪਟ੍ਠਾਯ ਜਾਨਾਮੀ’’ਤਿ. ਅਥ ਇਤਰੇ ਉਭੋਪਿ ਪੁਰਿਮਨਯੇਨੇਵ ਤਿਤ੍ਤਿਰਂ ਪੁਚ੍ਛਿਂਸੁ. ਸੋ ਆਹ ‘‘ਸਮ੍ਮਾ, ਪੁਬ੍ਬੇ ਅਸੁਕਸ੍ਮਿਂ ਨਾਮ ਠਾਨੇ ਮਹਾਨਿਗ੍ਰੋਧਰੁਕ੍ਖੋ ਅਹੋਸਿ, ਅਹਂ ਤਸ੍ਸ ਫਲਾਨਿ ਖਾਦਿਤ੍ਵਾ ਇਮਸ੍ਮਿਂ ਠਾਨੇ ਵਚ੍ਚਂ ਪਾਤੇਸਿਂ, ਤਤੋ ਏਸ ਰੁਕ੍ਖੋ ਜਾਤੋ, ਏਵਾਹਂ ਇਮਂ ਅਜਾਤਕਾਲਤੋ ਪਟ੍ਠਾਯ ਜਾਨਾਮਿ, ਤਸ੍ਮਾ ਅਹਂ ਤੁਮ੍ਹੇਹਿ ਜਾਤਿਯਾ ਮਹਲ੍ਲਕਤਰੋ’’ਤਿ.

ਏਵਂ ਵੁਤ੍ਤੇ ਮਕ੍ਕਟੋ ਚ ਹਤ੍ਥੀ ਚ ਤਿਤ੍ਤਿਰਪਣ੍ਡਿਤਂ ਆਹਂਸੁ ‘‘ਸਮ੍ਮ, ਤ੍ਵਂ ਅਮ੍ਹੇਹਿ ਮਹਲ੍ਲਕਤਰੋ, ਇਤੋ ਪਟ੍ਠਾਯ ਮਯਂ ਤਵ ਸਕ੍ਕਾਰਗਰੁਕਾਰਮਾਨਨਵਨ੍ਦਨਪੂਜਨਾਨਿ ਚੇਵ ਅਭਿਵਾਦਨਪਚ੍ਚੁਟ੍ਠਾਨਅਞ੍ਜਲਿਕਮ੍ਮਸਾਮੀਚਿਕਮ੍ਮਾਨਿ ਚ ਕਰਿਸ੍ਸਾਮ, ਓਵਾਦੇ ਚ ਤੇ ਠਸ੍ਸਾਮ, ਤ੍ਵਂ ਪਨ ਇਤੋ ਪਟ੍ਠਾਯ ਅਮ੍ਹਾਕਂ ਓਵਾਦਾਨੁਸਾਸਨਿਂ ਦਦੇਯ੍ਯਾਸੀ’’ਤਿ. ਤਤੋ ਪਟ੍ਠਾਯ ਤਿਤ੍ਤਿਰੋ ਤੇਸਂ ਓਵਾਦਂ ਅਦਾਸਿ, ਸੀਲੇਸੁ ਪਤਿਟ੍ਠਾਪੇਸਿ, ਸਯਮ੍ਪਿ ਸੀਲਾਨਿ ਸਮਾਦਿਯਿ. ਤੇ ਤਯੋਪਿ ਜਨਾ ਪਞ੍ਚਸੁ ਸੀਲੇਸੁ ਪਤਿਟ੍ਠਾਯ ਅਞ੍ਞਮਞ੍ਞਂ ਸਗਾਰਵਾ ਸਪ੍ਪਤਿਸ੍ਸਾ ਸਭਾਗਵੁਤ੍ਤਿਨੋ ਹੁਤ੍ਵਾ ਜੀਵਿਤਪਰਿਯੋਸਾਨੇ ਦੇਵਲੋਕਪਰਾਯਣਾ ਅਹੇਸੁਂ. ਤੇਸਂ ਤਿਣ੍ਣਂ ਸਮਾਦਾਨਂ ਤਿਤ੍ਤਿਰਿਯਂ ਬ੍ਰਹ੍ਮਚਰਿਯਂ ਨਾਮ ਅਹੋਸਿ.

ਤੇ ਹਿ ਨਾਮ, ਭਿਕ੍ਖਵੇ, ਤਿਰਚ੍ਛਾਨਗਤਾ ਅਞ੍ਞਮਞ੍ਞਂ ਸਗਾਰਵਾ ਸਪ੍ਪਤਿਸ੍ਸਾ ਵਿਹਰਿਂਸੁ, ਤੁਮ੍ਹੇ ਏਵਂ ਸ੍ਵਾਖਾਤੇ ਧਮ੍ਮਵਿਨਯੇ ਪਬ੍ਬਜਿਤ੍ਵਾ ਕਸ੍ਮਾ ਅਞ੍ਞਮਞ੍ਞਂ ਅਗਾਰਵਾ ਅਪਤਿਸ੍ਸਾ ਵਿਹਰਥ. ਅਨੁਜਾਨਾਮਿ, ਭਿਕ੍ਖਵੇ, ਇਤੋ ਪਟ੍ਠਾਯ ਤੁਮ੍ਹਾਕਂ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ, ਯਥਾਵੁਡ੍ਢਂ ਅਗ੍ਗਾਸਨਂ ਅਗ੍ਗੋਦਕਂ ਅਗ੍ਗਪਿਣ੍ਡਂ, ਨ ਇਤੋ ਪਟ੍ਠਾਯ ਚ ਨਵਕਤਰੇਨ ਵੁਡ੍ਢਤਰੋ ਸੇਨਾਸਨੇਨ ਪਟਿਬਾਹਿਤਬ੍ਬੋ, ਯੋ ਪਟਿਬਾਹੇਯ੍ਯ, ਆਪਤ੍ਤਿਦੁਕ੍ਕਟਸ੍ਸਾਤਿ ਏਵਂ ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਂ ਗਾਥਮਾਹ –

੩੭. ‘‘ਯੇ ਵੁਡ੍ਢਮਪਚਾਯਨ੍ਤਿ, ਨਰਾ ਧਮ੍ਮਸ੍ਸ ਕੋਵਿਦਾ;

ਦਿਟ੍ਠੇਵ ਧਮ੍ਮੇ ਪਾਸਂਸਾ, ਸਮ੍ਪਰਾਯੇ ਚ ਸੁਗ੍ਗਤੀ’’ਤਿ.

ਤਤ੍ਥ ਯੇ ਵੁਡ੍ਢਮਪਚਾਯਨ੍ਤੀਤਿ ਜਾਤਿਵੁਡ੍ਢੋ, ਵਯੋਵੁਡ੍ਢੋ, ਗੁਣਵੁਡ੍ਢੋਤਿ ਤਯੋ ਵੁਡ੍ਢਾ. ਤੇਸੁ ਜਾਤਿਸਮ੍ਪਨ੍ਨੋ ਜਾਤਿਵੁਡ੍ਢੋ ਨਾਮ, ਵਯੇ ਠਿਤੋ ਵਯੋਵੁਡ੍ਢੋ ਨਾਮ, ਗੁਣਸਮ੍ਪਨ੍ਨੋ ਗੁਣਵੁਡ੍ਢੋ ਨਾਮ. ਤੇਸੁ ਗੁਣਸਮ੍ਪਨ੍ਨੋ ਵਯੋਵੁਡ੍ਢੋ ਇਮਸ੍ਮਿਂ ਠਾਨੇ ‘‘ਵੁਡ੍ਢੋ’’ਤਿ ਅਧਿਪ੍ਪੇਤੋ. ਅਪਚਾਯਨ੍ਤੀਤਿ ਜੇਟ੍ਠਾਪਚਾਯਿਕਕਮ੍ਮੇਨ ਪੂਜੇਨ੍ਤਿ. ਧਮ੍ਮਸ੍ਸ ਕੋਵਿਦਾਤਿ ਜੇਟ੍ਠਾਪਚਾਯਨਧਮ੍ਮਸ੍ਸ ਕੋਵਿਦਾ ਕੁਸਲਾ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ. ਪਾਸਂਸਾਤਿ ਪਸਂਸਾਰਹਾ. ਸਮ੍ਪਰਾਯੇ ਚ ਸੁਗ੍ਗਤੀਤਿ ਸਮ੍ਪਰੇਤਬ੍ਬੇ ਇਮਂ ਲੋਕਂ ਹਿਤ੍ਵਾ ਗਨ੍ਤਬ੍ਬੇ ਪਰਲੋਕੇਪਿ ਤੇਸਂ ਸੁਗਤਿਯੇਵ ਹੋਤੀਤਿ. ਅਯਂ ਪਨੇਤ੍ਥ ਪਿਣ੍ਡਤ੍ਥੋ – ਭਿਕ੍ਖਵੇ, ਖਤ੍ਤਿਯਾ ਵਾ ਹੋਨ੍ਤੁ ਬ੍ਰਾਹ੍ਮਣਾ ਵਾ ਵੇਸ੍ਸਾ ਵਾ ਸੁਦ੍ਦਾ ਵਾ ਗਹਟ੍ਠਾ ਵਾ ਪਬ੍ਬਜਿਤਾ ਵਾ ਤਿਰਚ੍ਛਾਨਗਤਾ ਵਾ, ਯੇ ਕੇਚਿ ਸਤ੍ਤਾ ਜੇਟ੍ਠਾਪਚਿਤਿਕਮ੍ਮੇ ਛੇਕਾ ਕੁਸਲਾ ਗੁਣਸਮ੍ਪਨ੍ਨਾਨਂ ਵਯੋਵੁਡ੍ਢਾਨਂ ਅਪਚਿਤਿਂ ਕਰੋਨ੍ਤਿ, ਤੇ ਇਮਸ੍ਮਿਞ੍ਚ ਅਤ੍ਤਭਾਵੇ ਜੇਟ੍ਠਾਪਚਿਤਿਕਾਰਕਾਤਿ ਪਸਂਸਂ ਵਣ੍ਣਨਂ ਥੋਮਨਂ ਲਭਨ੍ਤਿ, ਕਾਯਸ੍ਸ ਚ ਭੇਦਾ ਸਗ੍ਗੇ ਨਿਬ੍ਬਤ੍ਤਨ੍ਤੀਤਿ.

ਏਵਂ ਸਤ੍ਥਾ ਜੇਟ੍ਠਾਪਚਿਤਿਕਮ੍ਮਸ੍ਸ ਗੁਣਂ ਕਥੇਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਹਤ੍ਥਿਨਾਗੋ ਮੋਗ੍ਗਲ੍ਲਾਨੋ ਅਹੋਸਿ, ਮਕ੍ਕਟੋ ਸਾਰਿਪੁਤ੍ਤੋ, ਤਿਤ੍ਤਿਰਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਤਿਤ੍ਤਿਰਜਾਤਕਵਣ੍ਣਨਾ ਸਤ੍ਤਮਾ.

[੩੮] ੮. ਬਕਜਾਤਕਵਣ੍ਣਨਾ

ਨਾਚ੍ਚਨ੍ਤਂ ਨਿਕਤਿਪ੍ਪਞ੍ਞੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਚੀਵਰਵਡ੍ਢਕਂ ਭਿਕ੍ਖੁ ਆਰਬ੍ਭ ਕਥੇਸਿ. ਏਕੋ ਕਿਰ ਜੇਤਵਨਵਾਸਿਕੋ ਭਿਕ੍ਖੁ ਯਂਕਿਞ੍ਚਿ ਚੀਵਰੇ ਕਤ੍ਤਬ੍ਬਂ ਛੇਦਨਘਟ੍ਟਨਵਿਚਾਰਣਸਿਬ੍ਬਨਾਦਿਕਂ ਕਮ੍ਮਂ, ਤਤ੍ਥ ਸੁਕੁਸਲੋ. ਸੋ ਤਾਯ ਕੁਸਲਤਾਯ ਚੀਵਰਂ ਵਡ੍ਢੇਤਿ, ਤਸ੍ਮਾ ‘‘ਚੀਵਰਵਡ੍ਢਕੋ’’ ਤ੍ਵੇਵ ਪਞ੍ਞਾਯਿਤ੍ਥ. ਕਿਂ ਪਨੇਸ ਕਰੋਤੀਤਿ? ਜਿਣ੍ਣਪਿਲੋਤਿਕਾਸੁ ਹਤ੍ਥਕਮ੍ਮਂ ਦਸ੍ਸੇਤ੍ਵਾ ਸੁਫਸ੍ਸਿਕਂ ਮਨਾਪਂ ਚੀਵਰਂ ਕਤ੍ਵਾ ਰਜਨਪਰਿਯੋਸਾਨੇ ਪਿਟ੍ਠੋਦਕੇਨ ਰਜਿਤ੍ਵਾ ਸਙ੍ਖੇਨ ਘਂਸਿਤ੍ਵਾ ਉਜ੍ਜਲਂ ਮਨੁਞ੍ਞਂ ਕਤ੍ਵਾ ਨਿਕ੍ਖਿਪਤਿ. ਚੀਵਰਕਮ੍ਮਂ ਕਾਤੁਂ ਅਜਾਨਨ੍ਤਾ ਭਿਕ੍ਖੂ ਅਹਤੇ ਸਾਟਕੇ ਗਹੇਤ੍ਵਾ ਤਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ‘‘ਮਯਂ ਚੀਵਰਂ ਕਾਤੁਂ ਨ ਜਾਨਾਮ, ਚੀਵਰਂ ਨੋ ਕਤ੍ਵਾ ਦੇਥਾ’’ਤਿ ਵਦਨ੍ਤਿ. ਸੋ ‘‘ਚੀਵਰਂ ਆਵੁਸੋ ਕਰਿਯਮਾਨਂ ਚਿਰੇਨ ਨਿਟ੍ਠਾਤਿ, ਮਯਾ ਕਤਚੀਵਰਮੇਵ ਅਤ੍ਥਿ, ਇਮੇ ਸਾਟਕੇ ਠਪੇਤ੍ਵਾ ਤਂ ਗਣ੍ਹਿਤ੍ਵਾ ਗਚ੍ਛਥਾ’’ਤਿ ਨੀਹਰਿਤ੍ਵਾ ਦਸ੍ਸੇਤਿ. ਤੇ ਤਸ੍ਸ ਵਣ੍ਣਸਮ੍ਪਤ੍ਤਿਮੇਵ ਦਿਸ੍ਵਾ ਅਨ੍ਤਰਂ ਅਜਾਨਨ੍ਤਾ ‘‘ਥਿਰ’’ਨ੍ਤਿ ਸਞ੍ਞਾਯ ਅਹਤਸਾਟਕੇ ਚੀਵਰਵਡ੍ਢਕਸ੍ਸ ਦਤ੍ਵਾ ਤਂ ਗਣ੍ਹਿਤ੍ਵਾ ਗਚ੍ਛਨ੍ਤਿ. ਤਂ ਤੇਹਿ ਥੋਕਂ ਕਿਲਿਟ੍ਠਕਾਲੇ ਉਣ੍ਹੋਦਕੇਨ ਧੋਵਿਯਮਾਨਂ ਅਤ੍ਤਨੋ ਪਕਤਿਂ ਦਸ੍ਸੇਤਿ, ਤਤ੍ਥ ਤਤ੍ਥ ਜਿਣ੍ਣਟ੍ਠਾਨਂ ਪਞ੍ਞਾਯਤਿ, ਤੇ ਵਿਪ੍ਪਟਿਸਾਰਿਨੋ ਹੋਨ੍ਤਿ. ਏਵਂ ਆਗਤਾਗਤੇ ਪਿਲੋਤਿਕਾਹਿ ਵਞ੍ਚੇਨ੍ਤੋ ਸੋ ਭਿਕ੍ਖੁ ਸਬ੍ਬਤ੍ਥ ਪਾਕਟੋ ਜਾਤੋ.

ਯਥਾ ਚੇਸ ਜੇਤਵਨੇ, ਤਥਾ ਅਞ੍ਞਤਰਸ੍ਮਿਂ ਗਾਮਕੇਪਿ ਏਕੋ ਚੀਵਰਵਡ੍ਢਕੋ ਲੋਕਂ ਵਞ੍ਚੇਤਿ. ਤਸ੍ਸ ਸਮ੍ਭਤ੍ਤਾ ਭਿਕ੍ਖੂ ‘‘ਭਨ੍ਤੇ, ਜੇਤਵਨੇ ਕਿਰ ਏਕੋ ਚੀਵਰਵਡ੍ਢਕੋ ਏਵਂ ਲੋਕਂ ਵਞ੍ਚੇਤੀ’’ਤਿ ਆਰੋਚੇਸੁਂ. ਅਥਸ੍ਸ ਏਤਦਹੋਸਿ ‘‘ਹਨ੍ਦਾਹਂ, ਤਂ ਨਗਰਵਾਸਿਕਂ ਵਞ੍ਚੇਮੀ’’ਤਿ ਪਿਲੋਤਿਕਚੀਵਰਂ ਅਤਿਮਨਾਪਂ ਕਤ੍ਵਾ ਸੁਰਤ੍ਤਂ ਰਜਿਤ੍ਵਾ ਤਂ ਪਾਰੁਪਿਤ੍ਵਾ ਜੇਤਵਨਂ ਅਗਮਾਸਿ. ਇਤਰੋ ਤਂ ਦਿਸ੍ਵਾਵ ਲੋਭਂ ਉਪ੍ਪਾਦੇਤ੍ਵਾ ‘‘ਭਨ੍ਤੇ, ਇਮਂ ਚੀਵਰਂ ਤੁਮ੍ਹੇਹਿ ਕਤ’’ਨ੍ਤਿ ਪੁਚ੍ਛਿ. ‘‘ਆਮਾਵੁਸੋ’’ਤਿ. ‘‘ਭਨ੍ਤੇ, ਇਮਂ ਚੀਵਰਂ ਮਯ੍ਹਂ ਦੇਥ, ਤੁਮ੍ਹੇ ਅਞ੍ਞਂ ਲਭਿਸ੍ਸਥਾ’’ਤਿ? ‘‘ਆਵੁਸੋ, ਮਯਂ ਗਾਮਵਾਸਿਕਾ ਦੁਲ੍ਲਭਪਚ੍ਚਯਾ, ਇਮਾਹਂ ਤੁਯ੍ਹਂ ਦਤ੍ਵਾ ਅਤ੍ਤਨਾ ਕਿਂ ਪਾਰੁਪਿਸ੍ਸਾਮੀ’’ਤਿ? ‘‘ਭਨ੍ਤੇ, ਮਮ ਸਨ੍ਤਿਕੇ ਅਹਤਸਾਟਕਾ ਅਤ੍ਥਿ, ਤੇ ਗਹੇਤ੍ਵਾ ਤੁਮ੍ਹਾਕਂ ਚੀਵਰਂ ਕਰੋਥਾ’’ਤਿ. ‘‘ਆਵੁਸੋ, ਮਯਾ ਏਤ੍ਥ ਹਤ੍ਥਕਮ੍ਮਂ ਦਸ੍ਸਿਤਂ, ਤਯਿ ਪਨ ਏਵਂ ਵਦਨ੍ਤੇ ਕਿਂ ਸਕ੍ਕਾ ਕਾਤੁਂ, ਗਣ੍ਹਾਹਿ ਨ’’ਨ੍ਤਿ ਤਸ੍ਸ ਪਿਲੋਤਿਕਚੀਵਰਂ ਦਤ੍ਵਾ ਅਹਤਸਾਟਕੇ ਆਦਾਯ ਤਂ ਵਞ੍ਚੇਤ੍ਵਾ ਪਕ੍ਕਾਮਿ. ਜੇਤਵਨਵਾਸਿਕੋਪਿ ਤਂ ਚੀਵਰਂ ਪਾਰੁਪਿਤ੍ਵਾ ਕਤਿਪਾਹਚ੍ਚਯੇਨ ਉਣ੍ਹੋਦਕੇਨ ਧੋਵਨ੍ਤੋ ਜਿਣ੍ਣਪਿਲੋਤਿਕਭਾਵਂ ਦਿਸ੍ਵਾ ਲਜ੍ਜਿਤੋ ‘‘ਗਾਮਵਾਸਿਚੀਵਰਵਡ੍ਢਕੇਨ ਕਿਰ ਜੇਤਵਨਵਾਸਿਕੋ ਵਞ੍ਚਿਤੋ’’ਤਿ ਤਸ੍ਸ ਵਞ੍ਚਿਤਭਾਵੋ ਸਙ੍ਘਮਜ੍ਝੇ ਪਾਕਟੋ ਜਾਤੋ.

ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਤਂ ਕਥਂ ਕਥੇਨ੍ਤਾ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿ. ਤੇ ਤਮਤ੍ਥਂ ਆਰੋਚੇਸੁਂ. ਸਤ੍ਥਾ ‘‘ਨ, ਭਿਕ੍ਖਵੇ, ਜੇਤਵਨਵਾਸੀ ਚੀਵਰਵਡ੍ਢਕੋ ਇਦਾਨੇਵ ਅਞ੍ਞੇ ਵਞ੍ਚੇਤਿ, ਪੁਬ੍ਬੇਪਿ ਵਞ੍ਚੇਸਿਯੇਵ. ਨ ਗਾਮਵਾਸਿਕੇਨਾਪਿ ਇਦਾਨੇਵ ਏਸ ਜੇਤਵਨਵਾਸੀ ਚੀਵਰਵਡ੍ਢਕੋ ਵਞ੍ਚਿਤੋ, ਪੁਬ੍ਬੇਪਿ ਵਞ੍ਚਿਤੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਏਕਸ੍ਮਿਂ ਅਰਞ੍ਞਾਯਤਨੇ ਬੋਧਿਸਤ੍ਤੋ ਅਞ੍ਞਤਰਂ ਪਦੁਮਸਰਂ ਨਿਸ੍ਸਾਯ ਠਿਤੇ ਵਰਣਰੁਕ੍ਖੇ ਰੁਕ੍ਖਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਦਾ ਅਞ੍ਞਤਰਸ੍ਮਿਂ ਨਾਤਿਮਹਨ੍ਤੇ ਸਰੇ ਨਿਦਾਘਸਮਯੇ ਉਦਕਂ ਮਨ੍ਦਂ ਅਹੋਸਿ, ਬਹੂ ਚੇਤ੍ਥ ਮਚ੍ਛਾ ਹੋਨ੍ਤਿ. ਅਥੇਕੋ ਬਕੋ ਤੇ ਮਚ੍ਛੇ ਦਿਸ੍ਵਾ ‘‘ਏਕੇਨ ਉਪਾਯੇਨ ਇਮੇ ਮਚ੍ਛੇ ਵਞ੍ਚੇਤ੍ਵਾ ਖਾਦਿਸ੍ਸਾਮੀ’’ਤਿ ਗਨ੍ਤ੍ਵਾ ਉਦਕਪਰਿਯਨ੍ਤੇ ਚਿਨ੍ਤੇਨ੍ਤੋ ਨਿਸੀਦਿ. ਅਥ ਨਂ ਮਚ੍ਛਾ ਦਿਸ੍ਵਾ ‘‘ਕਿਂ, ਅਯ੍ਯ, ਚਿਨ੍ਤੇਨ੍ਤੋ ਨਿਸਿਨ੍ਨੋਸੀ’’ਤਿ ਪੁਚ੍ਛਿਂਸੁ. ‘‘ਤੁਮ੍ਹਾਕਂ ਚਿਨ੍ਤੇਨ੍ਤੋ ਨਿਸਿਨ੍ਨੋਮ੍ਹੀ’’ਤਿ. ‘‘ਕਿਂ ਅਮ੍ਹਾਕਂ ਚਿਨ੍ਤੇਸਿ, ਅਯ੍ਯਾ’’ਤਿ? ‘‘‘ਇਮਸ੍ਮਿਂ ਸਰੇ ਉਦਕਂ ਪਰਿਤ੍ਤਂ, ਗੋਚਰੋ ਮਨ੍ਦੋ, ਨਿਦਾਘੋ ਚ ਮਹਨ੍ਤੋ, ਇਦਾਨਿਮੇ ਮਚ੍ਛਾ ਕਿਂ ਨਾਮ ਕਰਿਸ੍ਸਨ੍ਤੀ’ਤਿ ਤੁਮ੍ਹਾਕਂ ਚਿਨ੍ਤੇਨ੍ਤੋ ਨਿਸਿਨ੍ਨੋਮ੍ਹੀ’’ਤਿ. ‘‘ਅਥ ਕਿਂ ਕਰੋਮ, ਅਯ੍ਯਾ’’ਤਿ? ‘‘ਤੁਮ੍ਹੇ ਸਚੇ ਮਯ੍ਹਂ ਵਚਨਂ ਕਰੇਯ੍ਯਾਥ, ਅਹਂ ਵੋ ਏਕੇਕਂ ਮੁਖਤੁਣ੍ਡਕੇਨ ਗਹੇਤ੍ਵਾ ਏਕਂ ਪਞ੍ਚਵਣ੍ਣਪਦੁਮਸਞ੍ਛਨ੍ਨਂ ਮਹਾਸਰਂ ਨੇਤ੍ਵਾ ਵਿਸ੍ਸਜ੍ਜੇਯ੍ਯ’’ਨ੍ਤਿ. ‘‘ਅਯ੍ਯ, ਪਠਮਕਪ੍ਪਿਕਤੋ ਪਟ੍ਠਾਯ ਮਚ੍ਛਾਨਂ ਚਿਨ੍ਤਨਕਬਕੋ ਨਾਮ ਨਤ੍ਥਿ, ਤ੍ਵਂ ਅਮ੍ਹੇਸੁ ਏਕੇਕਂ ਖਾਦਿਤੁਕਾਮੋਸੀ’’ਤਿ. ‘‘ਨਾਹਂ ਤੁਮ੍ਹੇ ਮਯ੍ਹਂ ਸਦ੍ਦਹਨ੍ਤੇ ਖਾਦਿਸ੍ਸਾਮਿ’’. ‘‘ਸਚੇ ਪਨ ਸਰਸ੍ਸ ਅਤ੍ਥਿਭਾਵਂ ਮਯ੍ਹਂ ਨ ਸਦ੍ਦਹਥ, ਏਕਂ ਮਚ੍ਛਂ ਮਯਾ ਸਦ੍ਧਿਂ ਸਰਂ ਪਸ੍ਸਿਤੁਂ ਪੇਸੇਥਾ’’ਤਿ. ਮਚ੍ਛਾ ਤਸ੍ਸ ਸਦ੍ਦਹਿਤ੍ਵਾ ‘‘ਅਯਂ ਜਲੇਪਿ ਥਲੇਪਿ ਸਮਤ੍ਥੋ’’ਤਿ ਏਕਂ ਕਾਲ਼ਮਹਾਮਚ੍ਛਂ ਅਦਂਸੁ ‘‘ਇਮਂ ਗਹੇਤ੍ਵਾ ਗਚ੍ਛਥਾ’’ਤਿ. ਸੋ ਤਂ ਗਹੇਤ੍ਵਾ ਨੇਤ੍ਵਾ ਸਰੇ ਵਿਸ੍ਸਜ੍ਜੇਤ੍ਵਾ ਸਬ੍ਬਂ ਸਰਂ ਦਸ੍ਸੇਤ੍ਵਾ ਪੁਨ ਆਨੇਤ੍ਵਾ ਤੇਸਂ ਮਚ੍ਛਾਨਂ ਸਨ੍ਤਿਕੇ ਵਿਸ੍ਸਜ੍ਜੇਸਿ. ਸੋ ਤੇਸਂ ਮਚ੍ਛਾਨਂ ਸਰਸ੍ਸ ਸਮ੍ਪਤ੍ਤਿਂ ਵਣ੍ਣੇਸਿ. ਤੇ ਤਸ੍ਸ ਕਥਂ ਸੁਤ੍ਵਾ ਗਨ੍ਤੁਕਾਮਾ ਹੁਤ੍ਵਾ ‘‘ਸਾਧੁ, ਅਯ੍ਯ, ਅਮ੍ਹੇ ਗਣ੍ਹਿਤ੍ਵਾ ਗਚ੍ਛਾਹੀ’’ਤਿ ਆਹਂਸੁ.

ਬਕੋ ਪਠਮਂ ਤਂ ਕਾਲ਼ਮਹਾਮਚ੍ਛਮੇਵ ਗਹੇਤ੍ਵਾ ਸਰਤੀਰਂ ਨੇਤ੍ਵਾ ਸਰਂ ਦਸ੍ਸੇਤ੍ਵਾ ਸਰਤੀਰੇ ਜਾਤੇ ਵਰਣਰੁਕ੍ਖੇ ਨਿਲੀਯਿਤ੍ਵਾ ਤਂ ਵਿਟਪਨ੍ਤਰੇ ਪਕ੍ਖਿਪਿਤ੍ਵਾ ਤੁਣ੍ਡੇਨ ਵਿਜ੍ਝਨ੍ਤੋ ਜੀਵਿਤਕ੍ਖਯਂ ਪਾਪੇਤ੍ਵਾ ਮਂਸਂ ਖਾਦਿਤ੍ਵਾ ਕਣ੍ਟਕੇ ਰੁਕ੍ਖਮੂਲੇ ਪਾਤੇਤ੍ਵਾ ਪੁਨ ਗਨ੍ਤ੍ਵਾ ‘‘ਵਿਸ੍ਸਟ੍ਠੋ, ਮੇ ਸੋ ਮਚ੍ਛੋ, ਅਞ੍ਞੋ ਆਗਚ੍ਛਤੂ’’ਤਿ ਏਤੇਨੁਪਾਯੇਨ ਏਕੇਕਂ ਗਹੇਤ੍ਵਾ ਸਬ੍ਬੇ ਮਚ੍ਛੇ ਖਾਦਿਤ੍ਵਾ ਪੁਨ ਆਗਤੋ ਏਕਂ ਮਚ੍ਛਮ੍ਪਿ ਨਾਦ੍ਦਸ. ਏਕੋ ਪਨੇਤ੍ਥ ਕਕ੍ਕਟਕੋ ਅਵਸਿਟ੍ਠੋ. ਬਕੋ ਤਮ੍ਪਿ ਖਾਦਿਤੁਕਾਮੋ ਹੁਤ੍ਵਾ ‘‘ਭੋ, ਕਕ੍ਕਟਕ, ਮਯਾ ਸਬ੍ਬੇਤੇ ਮਚ੍ਛਾ ਨੇਤ੍ਵਾ ਪਦੁਮਸਞ੍ਛਨ੍ਨੇ ਮਹਾਸਰੇ ਵਿਸ੍ਸਜ੍ਜਿਤਾ, ਏਹਿ ਤਮ੍ਪਿ ਨੇਸ੍ਸਾਮੀ’’ਤਿ. ‘‘ਮਂ ਗਹੇਤ੍ਵਾ ਗਚ੍ਛਨ੍ਤੋ ਕਥਂ ਗਣ੍ਹਿਸ੍ਸਸੀ’’ਤਿ? ‘‘ਡਂਸਿਤ੍ਵਾ ਗਣ੍ਹਿਸ੍ਸਾਮੀ’’ਤਿ. ‘‘ਤ੍ਵਂ ਏਵਂ ਗਹੇਤ੍ਵਾ ਗਚ੍ਛਨ੍ਤੋ ਮਂ ਪਾਤੇਸ੍ਸਸਿ, ਨਾਹਂ ਤਯਾ ਸਦ੍ਧਿਂ ਗਮਿਸ੍ਸਾਮੀ’’ਤਿ. ‘‘ਮਾ ਭਾਯਿ, ਅਹਂ ਤਂ ਸੁਗ੍ਗਹਿਤਂ ਗਹੇਤ੍ਵਾ ਗਮਿਸ੍ਸਾਮੀ’’ਤਿ. ਕਕ੍ਕਟਕੋ ਚਿਨ੍ਤੇਸਿ ‘‘ਇਮਸ੍ਸ ਮਚ੍ਛੇ ਨੇਤ੍ਵਾ ਸਰੇ ਵਿਸ੍ਸਜ੍ਜਨਂ ਨਾਮ ਨਤ੍ਥਿ. ਸਚੇ ਪਨ ਮਂ ਸਰੇ ਵਿਸ੍ਸਜ੍ਜੇਸ੍ਸਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਵਿਸ੍ਸਜ੍ਜੇਸ੍ਸਤਿ, ਗੀਵਮਸ੍ਸ ਛਿਨ੍ਦਿਤ੍ਵਾ ਜੀਵਿਤਂ ਹਰਿਸ੍ਸਾਮੀ’’ਤਿ.

ਅਥ ਨਂ ਏਵਮਾਹ ‘‘ਸਮ੍ਮ ਬਕ, ਨ ਖੋ ਤ੍ਵਂ ਸੁਗ੍ਗਹਿਤਂ ਗਹੇਤੁਂ ਸਕ੍ਖਿਸ੍ਸਸਿ, ਅਮ੍ਹਾਕਂ ਪਨ ਗਹਣਂ ਸੁਗ੍ਗਹਣਂ, ਸਚਾਹਂ ਅਲ਼ੇਹਿ ਤਵ ਗੀਵਂ ਗਹੇਤੁਂ ਲਭਿਸ੍ਸਾਮਿ, ਤਵ ਗੀਵਂ ਸੁਗ੍ਗਹਿਤਂ ਕਤ੍ਵਾ ਤਯਾ ਸਦ੍ਧਿਂ ਗਮਿਸ੍ਸਾਮੀ’’ਤਿ. ਸੋ ਤਂ ‘‘ਵਞ੍ਚੇਤੁਕਾਮੋ ਏਸ ਮ’’ਨ੍ਤਿ ਅਜਾਨਨ੍ਤੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਕਕ੍ਕਟਕੋ ਅਤ੍ਤਨੋ ਅਲ਼ੇਹਿ ਕਮ੍ਮਾਰਸਣ੍ਡਾਸੇਨ ਵਿਯ ਤਸ੍ਸ ਗੀਵਂ ਸੁਗ੍ਗਹਿਤਂ ਕਤ੍ਵਾ ‘‘ਇਦਾਨਿ ਗਚ੍ਛਾ’’ਤਿ ਆਹ. ਸੋ ਤਂ ਨੇਤ੍ਵਾ ਸਰਂ ਦਸ੍ਸੇਤ੍ਵਾ ਵਰਣਰੁਕ੍ਖਾਭਿਮੁਖੋ ਪਾਯਾਸਿ. ਕਕ੍ਕਟਕੋ ਆਹ ‘‘ਮਾਤੁਲ, ਅਯਂ ਸਰੋ ਏਤ੍ਤੋ, ਤ੍ਵਂ ਪਨ ਇਤੋ ਕਿਂ ਨੇਸੀ’’ਤਿ? ਬਕੋ ‘‘ਨ ਤੇ ਮਾਤੁਲੋ ਅਹਂ, ਨ ਭਗਿਨਿਪੁਤ੍ਤੋਸਿ ਵਤ ਮੇ ਤ੍ਵ’’ਨ੍ਤਿ ਵਤ੍ਵਾ ‘‘ਤ੍ਵਂ ‘ਏਸ ਮਂ ਉਕ੍ਖਿਪਿਤ੍ਵਾ ਵਿਚਰਨ੍ਤੋ ਮਯ੍ਹਂ ਦਾਸੋ’ਤਿ ਸਞ੍ਞਂ ਕਰੋਸਿ ਮਞ੍ਞੇ, ਪਸ੍ਸੇਤਂ ਵਰਣਰੁਕ੍ਖਸ੍ਸ ਮੂਲੇ ਕਣ੍ਟਕਰਾਸਿਂ, ਯਥਾ ਮੇ ਤੇ ਸਬ੍ਬੇ ਮਚ੍ਛਾ ਖਾਦਿਤਾ, ਤਮ੍ਪਿ ਤਥੇਵ ਖਾਦਿਸ੍ਸਾਮੀ’’ਤਿ ਆਹ. ਕਕ੍ਕਟਕੋ ‘‘ਏਤੇ ਮਚ੍ਛਾ ਅਤ੍ਤਨੋ ਬਾਲਤਾਯ ਤਯਾ ਖਾਦਿਤਾ, ਅਹਂ ਪਨ ਤੇ ਮਂ ਖਾਦਿਤੁਂ ਨ ਦਸ੍ਸਾਮਿ, ਤਞ੍ਞੇਵ ਪਨ ਵਿਨਾਸਂ ਪਾਪੇਸ੍ਸਾਮਿ. ਤ੍ਵਞ੍ਹਿ ਬਾਲਤਾਯ ਮਯਾ ਵਞ੍ਚਿਤਭਾਵਂ ਨ ਜਾਨਾਸਿ, ਮਰਨ੍ਤਾ ਉਭੋਪਿ ਮਰਿਸ੍ਸਾਮ, ਅਹਂ ਤੇ ਸੀਸਂ ਛਿਨ੍ਦਿਤ੍ਵਾ ਭੂਮਿਯਂ ਖਿਪਿਸ੍ਸਾਮੀ’’ਤਿ ਵਤ੍ਵਾ ਕਮ੍ਮਾਰਸਣ੍ਡਾਸੇਨ ਵਿਯ ਅਲ਼ੇਹਿ ਤਸ੍ਸ ਗੀਵਂ ਨਿਪ੍ਪੀਲ਼ੇਸਿ. ਸੋ ਵਿਵਟੇਨ ਮੁਖੇਨ ਅਕ੍ਖੀਹਿ ਅਸ੍ਸੁਨਾ ਪਗ੍ਘਰਨ੍ਤੇਨ ਮਰਣਭਯਤਜ੍ਜਿਤੋ ‘‘ਸਾਮਿ, ਅਹਂ ਤਂ ਨ ਖਾਦਿਸ੍ਸਾਮਿ, ਜੀਵਿਤਂ ਮੇ ਦੇਹੀ’’ਤਿ ਆਹ. ‘‘ਯਦਿ ਏਵਂ ਓਤਰਿਤ੍ਵਾ ਮਂ ਸਰਸ੍ਮਿਂ ਵਿਸ੍ਸਜ੍ਜੇਹੀ’’ਤਿ. ਸੋ ਨਿਵਤ੍ਤਿਤ੍ਵਾ ਸਰਮੇਵ ਓਤਰਿਤ੍ਵਾ ਕਕ੍ਕਟਕਂ ਸਰਪਰਿਯਨ੍ਤੇ ਪਙ੍ਕਪਿਟ੍ਠੇ ਠਪੇਸਿ, ਕਕ੍ਕਟਕੋ ਕਤ੍ਤਰਿਕਾਯ ਕੁਮੁਦਨਾਲ਼ਂ ਕਪ੍ਪੇਨ੍ਤੋ ਵਿਯ ਤਸ੍ਸ ਗੀਵਂ ਕਪ੍ਪੇਤ੍ਵਾ ਉਦਕਂ ਪਾਵਿਸਿ.

ਤਂ ਅਚ੍ਛਰਿਯਂ ਦਿਸ੍ਵਾ ਵਰਣਰੁਕ੍ਖੇ ਅਧਿਵਤ੍ਥਾ ਦੇਵਤਾ ਸਾਧੁਕਾਰਂ ਦਦਮਾਨਾ ਵਨਂ ਉਨ੍ਨਾਦਯਮਾਨਾ ਮਧੁਰਸ੍ਸਰੇਨ ਇਮਂ ਗਾਥਮਾਹ –

੩੮. ‘‘ਨਾਚ੍ਚਨ੍ਤਂ ਨਿਕਤਿਪ੍ਪਞ੍ਞੋ, ਨਿਕਤ੍ਯਾ ਸੁਖਮੇਧਤਿ;

ਆਰਾਧੇਤਿ ਨਿਕਤਿਪ੍ਪਞ੍ਞੋ, ਬਕੋ ਕਕ੍ਕਟਕਾਮਿਵਾ’’ਤਿ.

ਤਤ੍ਥ ਨਾਚ੍ਚਨ੍ਤਂ ਨਿਕਤਿਪ੍ਪਞ੍ਞੋ, ਨਿਕਤ੍ਯਾ ਸੁਖਮੇਧਤੀਤਿ ਨਿਕਤਿ ਵੁਚ੍ਚਤਿ ਵਞ੍ਚਨਾ, ਨਿਕਤਿਪ੍ਪਞ੍ਞੋ ਵਞ੍ਚਨਪਞ੍ਞੋ ਪੁਗ੍ਗਲੋ ਤਾਯ ਨਿਕਤ੍ਯਾ ਨਿਕਤਿਯਾ ਵਞ੍ਚਨਾਯ ਨ ਅਚ੍ਚਨ੍ਤਂ ਸੁਖਮੇਧਤਿ, ਨਿਚ੍ਚਕਾਲੇ ਸੁਖਸ੍ਮਿਂਯੇਵ ਪਤਿਟ੍ਠਾਤੁਂ ਨ ਸਕ੍ਕੋਤਿ, ਏਕਂਸੇਨ ਪਨ ਵਿਨਾਸਂ ਪਾਪੁਣਾਤਿਯੇਵਾਤਿ ਅਤ੍ਥੋ. ਆਰਾਧੇਤੀਤਿ ਪਟਿਲਭਤਿ. ਨਿਕਤਿਪ੍ਪਞ੍ਞੋਤਿ ਕੇਰਾਟਿਕਭਾਵਂ ਸਿਕ੍ਖਿਤਪਞ੍ਞੋ ਪਾਪਪੁਗ੍ਗਲੋ ਅਤ੍ਤਨਾ ਕਤਸ੍ਸ ਪਾਪਸ੍ਸ ਫਲਂ ਆਰਾਧੇਤਿ ਪਟਿਲਭਤਿ ਵਿਨ੍ਦਤੀਤਿ ਅਤ੍ਥੋ. ਕਥਂ? ਬਕੋ ਕਕ੍ਕਟਕਾਮਿਵ, ਯਥਾ ਬਕੋ ਕਕ੍ਕਟਕਾ ਗੀਵਚ੍ਛੇਦਂ ਪਾਪੁਣਾਤਿ, ਏਵਂ ਪਾਪਪੁਗ੍ਗਲੋ ਅਤ੍ਤਨਾ ਕਤਪਾਪਤੋ ਦਿਟ੍ਠਧਮ੍ਮੇ ਵਾ ਸਮ੍ਪਰਾਯੇ ਵਾ ਭਯਂ ਆਰਾਧੇਤਿ ਪਟਿਲਭਤੀਤਿ ਇਮਮਤ੍ਥਂ ਪਕਾਸੇਨ੍ਤੋ ਮਹਾਸਤ੍ਤੋ ਵਨਂ ਉਨ੍ਨਾਦੇਨ੍ਤੋ ਧਮ੍ਮਂ ਦੇਸੇਸਿ.

ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ ਗਾਮਵਾਸਿਚੀਵਰਵਡ੍ਢਕੇਨੇਸ ਵਞ੍ਚਿਤੋ, ਅਤੀਤੇਪਿ ਵਞ੍ਚਿਤੋਯੇਵਾ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸੋ ਬਕੋ ਜੇਤਵਨਵਾਸੀ ਚੀਵਰਵਡ੍ਢਕੋ ਅਹੋਸਿ, ਕਕ੍ਕਟਕੋ ਗਾਮਵਾਸੀ ਚੀਵਰਵਡ੍ਢਕੋ, ਰੁਕ੍ਖਦੇਵਤਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਬਕਜਾਤਕਵਣ੍ਣਨਾ ਅਟ੍ਠਮਾ.

[੩੯] ੯. ਨਨ੍ਦਜਾਤਕਵਣ੍ਣਨਾ

ਮਞ੍ਞੇ ਸੋਵਣ੍ਣਯੋ ਰਾਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਾਰਿਪੁਤ੍ਤਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ ਆਰਬ੍ਭ ਕਥੇਸਿ. ਸੋ ਕਿਰ ਭਿਕ੍ਖੁ ਸੁਬ੍ਬਚੋ ਅਹੋਸਿ ਵਚਨਕ੍ਖਮੋ, ਥੇਰਸ੍ਸ ਮਹਨ੍ਤੇਨੁਸ੍ਸਾਹੇਨ ਉਪਕਾਰਂ ਕਰੋਤਿ. ਅਥੇਕਂ ਸਮਯਂ ਥੇਰੋ ਸਤ੍ਥਾਰਂ ਆਪੁਚ੍ਛਿਤ੍ਵਾ ਚਾਰਿਕਂ ਚਰਨ੍ਤੋ ਦਕ੍ਖਿਣਾਗਿਰਿਜਨਪਦਂ ਅਗਮਾਸਿ. ਸੋ ਭਿਕ੍ਖੁ ਤਤ੍ਥ ਗਤਕਾਲੇ ਮਾਨਤ੍ਥਦ੍ਧੋ ਹੁਤ੍ਵਾ ਥੇਰਸ੍ਸ ਵਚਨਂ ਨ ਕਰੋਤਿ ‘‘ਆਵੁਸੋ, ਇਦਂ ਨਾਮ ਕਰੋਹੀ’’ਤਿ ਵੁਤ੍ਤੇ ਪਨ ਥੇਰਸ੍ਸ ਪਟਿਪਕ੍ਖੋ ਹੋਤਿ. ਥੇਰੋ ਤਸ੍ਸ ਆਸਯਂ ਨ ਜਾਨਾਤਿ. ਸੋ ਤਤ੍ਥ ਚਾਰਿਕਂ ਚਰਿਤ੍ਵਾ ਪੁਨ ਜੇਤਵਨਂ ਆਗਤੋ. ਸੋ ਭਿਕ੍ਖੁ ਥੇਰਸ੍ਸ ਜੇਤਵਨਵਿਹਾਰਂ ਆਗਤਕਾਲਤੋ ਪਟ੍ਠਾਯ ਪੁਨ ਤਾਦਿਸੋਵ ਜਾਤੋ. ਥੇਰੋ ਤਥਾਗਤਸ੍ਸ ਆਰੋਚੇਸਿ ‘‘ਭਨ੍ਤੇ, ਮਯ੍ਹਂ ਏਕੋ ਸਦ੍ਧਿਵਿਹਾਰਿਕੋ ਏਕਸ੍ਮਿਂ ਠਾਨੇ ਸਤੇਨ ਕੀਤਦਾਸੋ ਵਿਯ ਹੋਤਿ, ਏਕਸ੍ਮਿਂ ਠਾਨੇ ਮਾਨਤ੍ਥਦ੍ਧੋ ਹੁਤ੍ਵਾ ‘ਇਦਂ ਨਾਮ ਕਰੋਹੀ’ਤਿ ਵੁਤ੍ਤੇ ਪਟਿਪਕ੍ਖੋ ਹੋਤੀ’’ਤਿ. ਸਤ੍ਥਾ ‘‘ਨਾਯਂ, ਸਾਰਿਪੁਤ੍ਤ, ਭਿਕ੍ਖੁ ਇਦਾਨੇਵ ਏਵਂਸੀਲੋ, ਪੁਬ੍ਬੇਪੇਸ ਏਕਂ ਠਾਨਂ ਗਤੋ ਸਤੇਨ ਕੀਤਦਾਸੋ ਵਿਯ ਹੋਤਿ. ਏਕਂ ਠਾਨਂ ਗਤੋ ਪਟਿਪਕ੍ਖੋ ਪਟਿਸਤ੍ਤੁ ਹੋਤੀ’’ਤਿ ਵਤ੍ਵਾ ਥੇਰੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਏਕਸ੍ਮਿਂ ਕੁਟੁਮ੍ਬਿਯਕੁਲੇ ਪਟਿਸਨ੍ਧਿਂ ਗਣ੍ਹਿ. ਤਸ੍ਸੇਕੋ ਸਹਾਯਕੋ ਕੁਟੁਮ੍ਬਿਕੋ ਸਯਂ ਮਹਲ੍ਲਕੋ, ਭਰਿਯਾ ਪਨਸ੍ਸ ਤਰੁਣੀ. ਸਾ ਤਂ ਨਿਸ੍ਸਾਯ ਪੁਤ੍ਤਂ ਪਟਿਲਭਿ. ਸੋ ਚਿਨ੍ਤੇਸਿ ‘‘ਅਯਂ ਇਤ੍ਥੀ ਤਰੁਣਤ੍ਤਾ ਮਮਚ੍ਚਯੇਨ ਕਞ੍ਚਿਦੇਵ ਪੁਰਿਸਂ ਗਹੇਤ੍ਵਾ ਇਮਂ ਧਨਂ ਵਿਨਾਸੇਯ੍ਯ, ਪੁਤ੍ਤਸ੍ਸ ਮੇ ਨ ਦਦੇਯ੍ਯ, ਯਂਨੂਨਾਹਂ ਇਮਂ ਧਨਂ ਪਥਵਿਗਤਂ ਕਰੇਯ੍ਯ’’ਨ੍ਤਿ ਘਰੇ ਨਨ੍ਦਂ ਨਾਮ ਦਾਸਂ ਗਹੇਤ੍ਵਾ ਅਰਞ੍ਞਂ ਗਨ੍ਤ੍ਵਾ ਏਕਸ੍ਮਿਂ ਠਾਨੇ ਤਂ ਧਨਂ ਨਿਦਹਿਤ੍ਵਾ ਤਸ੍ਸ ਆਚਿਕ੍ਖਿਤ੍ਵਾ ‘‘ਤਾਤ, ਨਨ੍ਦ, ਇਮਂ ਧਨਂ ਮਮਚ੍ਚਯੇਨ ਮਯ੍ਹਂ ਪੁਤ੍ਤਸ੍ਸ ਆਚਿਕ੍ਖੇਯ੍ਯਾਸਿ, ਮਾ ਚ ਨਂ ਪਰਿਚ੍ਚਜਸੀ’’ਤਿ ਓਵਦਿਤ੍ਵਾ ਕਾਲਮਕਾਸਿ.

ਪੁਤ੍ਤੋਪਿਸ੍ਸ ਅਨੁਕ੍ਕਮੇਨ ਵਯਪ੍ਪਤ੍ਤੋ ਜਾਤੋ. ਅਥ ਨਂ ਮਾਤਾ ਆਹ – ‘‘ਤਾਤ, ਤਵ ਪਿਤਾ ਨਨ੍ਦਂ ਦਾਸਂ ਗਹੇਤ੍ਵਾ ਧਨਂ ਨਿਧੇਸਿ, ਤਂ ਆਹਰਾਪੇਤ੍ਵਾ ਕੁਟੁਮ੍ਬਂ ਸਣ੍ਠਪੇਹੀ’’ਤਿ. ਸੋ ਏਕਦਿਵਸਂ ਨਨ੍ਦਂ ਆਹ – ‘‘ਮਾਤੁਲ, ਅਤ੍ਥਿ ਕਿਞ੍ਚਿ ਮਯ੍ਹਂ ਪਿਤਰਾ ਧਨਂ ਨਿਦਹਿਤ’’ਨ੍ਤਿ. ‘‘ਆਮ, ਸਾਮੀ’’ਤਿ. ‘‘ਕੁਹਿਂ ਤਂ ਨਿਦਹਿਤ’’ਨ੍ਤਿ. ‘‘ਅਰਞ੍ਞੇ, ਸਾਮੀ’’ਤਿ. ‘‘ਤੇਨ ਹਿ ਗਚ੍ਛਾਮਾ’’ਤਿ ਕੁਦ੍ਦਾਲਪਿਟਕਂ ਆਦਾਯ ਨਿਧਿਟ੍ਠਾਨਂ ਗਨ੍ਤ੍ਵਾ ‘‘ਕਹਂ ਮਾਤੁਲ, ਧਨ’’ਨ੍ਤਿ ਆਹ. ਨਨ੍ਦੋ ਆਰੁਯ੍ਹ ਧਨਮਤ੍ਥਕੇ ਠਤ੍ਵਾ ਧਨਂ ਨਿਸ੍ਸਾਯ ਮਾਨਂ ਉਪ੍ਪਾਦੇਤ੍ਵਾ ‘‘ਅਰੇ ਦਾਸਿਪੁਤ੍ਤ ਚੇਟਕ, ਕੁਤੋ ਤੇ ਇਮਸ੍ਮਿਂ ਠਾਨੇ ਧਨ’’ਨ੍ਤਿ ਕੁਮਾਰਂ ਅਕ੍ਕੋਸਤਿ. ਕੁਮਾਰੋ ਤਸ੍ਸ ਫਰੁਸਵਚਨਂ ਸੁਤ੍ਵਾ ਅਸੁਣਨ੍ਤੋ ਵਿਯ ‘‘ਤੇਨ ਹਿ ਗਚ੍ਛਾਮਾ’’ਤਿ ਤਂ ਗਹੇਤ੍ਵਾ ਪਟਿਨਿਵਤ੍ਤਿਤ੍ਵਾ ਪੁਨ ਦ੍ਵੇ ਤਯੋ ਦਿਵਸੇ ਅਤਿਕ੍ਕਮਿਤ੍ਵਾ ਅਗਮਾਸਿ, ਨਨ੍ਦੋ ਤਥੇਵ ਅਕ੍ਕੋਸਤਿ. ਕੁਮਾਰੋ ਤੇਨ ਸਦ੍ਧਿਂ ਫਰੁਸਵਚਨਂ ਅਵਤ੍ਵਾਵ ਨਿਵਤ੍ਤਿਤ੍ਵਾ ‘‘ਅਯਂ ਦਾਸੋ ਇਤੋ ਪਟ੍ਠਾਯ ‘ਧਨਂ ਆਚਿਕ੍ਖਿਸ੍ਸਾਮੀ’ਤਿ ਗਚ੍ਛਤਿ, ਗਨ੍ਤ੍ਵਾ ਪਨ ਮਂ ਅਕ੍ਕੋਸਤਿ, ਤਤ੍ਥ ਕਾਰਣਂ ਨ ਜਾਨਾਮਿ, ਅਤ੍ਥਿ ਖੋ ਪਨ ਮੇ ਪਿਤੁ ਸਹਾਯੋ ਕੁਟੁਮ੍ਬਿਕੋ, ਤਂ ਪਟਿਪੁਚ੍ਛਿਤ੍ਵਾ ਜਾਨਿਸ੍ਸਾਮੀ’’ਤਿ ਬੋਧਿਸਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਸਬ੍ਬਂ ਤਂ ਪਵਤ੍ਤਿਂ ਆਰੋਚੇਤ੍ਵਾ ‘‘ਕਿਂ ਨੁ ਖੋ, ਤਾਤ, ਕਾਰਣ’’ਨ੍ਤਿ ਪੁਚ੍ਛਿ.

ਬੋਧਿਸਤ੍ਤੋ ‘‘ਯਸ੍ਮਿਂ ਤੇ, ਤਾਤ, ਠਾਨੇ ਠਿਤੋ ਨਨ੍ਦੋ ਅਕ੍ਕੋਸਤਿ, ਤਤ੍ਥੇਵ ਤੇ ਪਿਤੁ ਸਨ੍ਤਕਂ ਧਨਂ, ਤਸ੍ਮਾ ਯਦਾ ਤੇ ਨਨ੍ਦੋ ਅਕ੍ਕੋਸਤਿ, ਤਦਾ ਨਂ ‘ਏਹਿ ਰੇ ਦਾਸ, ਕਿਂ ਅਕ੍ਕੋਸਸੀ’ਤਿ ਆਕਡ੍ਢਿਤ੍ਵਾ ਤਂ ਠਾਨਂ ਭਿਨ੍ਦਿਤ੍ਵਾ ਕੁਲਸਨ੍ਤਕਂ ਧਨਂ ਨੀਹਰਿਤ੍ਵਾ ਦਾਸਂ ਉਕ੍ਖਿਪਾਪੇਤ੍ਵਾ ਧਨਂ ਆਹਰਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੩੯. ‘‘ਮਞ੍ਞੇ ਸੋਵਣ੍ਣਯੋ ਰਾਸਿ, ਸੋਵਣ੍ਣਮਾਲਾ ਚ ਨਨ੍ਦਕੋ;

ਯਤ੍ਥ ਦਾਸੋ ਆਮਜਾਤੋ, ਠਿਤੋ ਥੁਲ੍ਲਾਨਿ ਗਜ੍ਜਤੀ’’ਤਿ.

ਤਤ੍ਥ ਮਞ੍ਞੇਤਿ ਏਵਂ ਅਹਂ ਜਾਨਾਮਿ. ਸੋਵਣ੍ਣਯੋਤਿ ਸੁਨ੍ਦਰੋ ਵਣ੍ਣੋ ਏਤੇਸਨ੍ਤਿ ਸੋਵਣ੍ਣਾਨਿ. ਕਾਨਿ ਤਾਨਿ? ਰਜਤਮਣਿਕਞ੍ਚਨਪਵਾਲ਼ਾਦੀਨਿ ਰਤਨਾਨਿ. ਇਮਸ੍ਮਿਞ੍ਹਿ ਠਾਨੇ ਸਬ੍ਬਾਨੇਤਾਨਿ ‘‘ਸੁਵਣ੍ਣਾਨੀ’’ਤਿ ਅਧਿਪ੍ਪੇਤਾਨਿ, ਤੇਸਂ ਰਾਸਿ ਸੋਵਣ੍ਣਯੋ ਰਾਸਿ. ਸੋਵਣ੍ਣਮਾਲਾ ਚਾਤਿ ਤੁਯ੍ਹਂ ਪਿਤੁਸਨ੍ਤਕਾ ਸੁਵਣ੍ਣਮਾਲਾ ਚ ਏਤ੍ਥੇਵਾਤਿ ਮਞ੍ਞਾਮਿ. ਨਨ੍ਦਕੋ ਯਤ੍ਥ ਦਾਸੋਤਿ ਯਸ੍ਮਿਂ ਠਾਨੇ ਠਿਤੋ ਨਨ੍ਦਕੋ ਦਾਸੋ. ਆਮਜਾਤੋਤਿ ‘‘ਆਮ, ਅਹਂ ਵੋ ਦਾਸੀ’’ਤਿ ਏਵਂ ਦਾਸਬ੍ਯਂ ਉਪਗਤਾਯ ਆਮਦਾਸਿਸਙ੍ਖਾਤਾਯ ਦਾਸਿਯਾ ਪੁਤ੍ਤੋ. ਠਿਤੋ ਥੁਲ੍ਲਾਨਿ ਗਜ੍ਜਤੀਤਿ ‘‘ਸੋ ਯਸ੍ਮਿਂ ਠਾਨੇ ਠਿਤੋ ਥੁਲ੍ਲਾਨਿ ਫਰੁਸਵਚਨਾਨਿ ਵਦਤਿ, ਤਤ੍ਥੇਵ ਤੇ ਕੁਲਸਨ੍ਤਕਂ ਧਨਂ, ਏਵਂ ਅਹਂ ਤਂ ਮਞ੍ਞਾਮੀ’’ਤਿ ਬੋਧਿਸਤ੍ਤੋ ਕੁਮਾਰਸ੍ਸ ਧਨਗ੍ਗਹਣੂਪਾਯਂ ਆਚਿਕ੍ਖਿ.

ਕੁਮਾਰੋ ਬੋਧਿਸਤ੍ਤਂ ਵਨ੍ਦਿਤ੍ਵਾ ਘਰਂ ਗਨ੍ਤ੍ਵਾ ਨਨ੍ਦਂ ਆਦਾਯ ਨਿਧਿਟ੍ਠਾਨਂ ਗਨ੍ਤ੍ਵਾ ਯਥਾਨੁਸਿਟ੍ਠਂ ਪਟਿਪਜ੍ਜਿਤ੍ਵਾ ਤਂ ਧਨਂ ਆਹਰਿਤ੍ਵਾ ਕੁਟੁਮ੍ਬਂ ਸਣ੍ਠਪੇਤ੍ਵਾ ਬੋਧਿਸਤ੍ਤਸ੍ਸ ਓਵਾਦੇ ਠਿਤੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਜੀਵਿਤਪਰਿਯੋਸਾਨੇ ਯਥਾਕਮ੍ਮਂ ਗਤੋ.

ਸਤ੍ਥਾ ‘‘ਪੁਬ੍ਬੇਪੇਸ ਏਵਂਸੀਲੋਯੇਵਾ’’ਤਿ ਵਤ੍ਵਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਨਨ੍ਦੋ ਸਾਰਿਪੁਤ੍ਤਸ੍ਸ ਸਦ੍ਧਿਵਿਹਾਰਿਕੋ ਅਹੋਸਿ, ਪਣ੍ਡਿਤਕੁਟੁਮ੍ਬਿਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਨਨ੍ਦਜਾਤਕਵਣ੍ਣਨਾ ਨਵਮਾ.

[੪੦] ੧੦. ਖਦਿਰਙ੍ਗਾਰਜਾਤਕਵਣ੍ਣਨਾ

ਕਾਮਂ ਪਤਾਮਿ ਨਿਰਯਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਨਾਥਪਿਣ੍ਡਿਕਂ ਆਰਬ੍ਭ ਕਥੇਸਿ. ਅਨਾਥਪਿਣ੍ਡਿਕੋ ਹਿ ਵਿਹਾਰਮੇਵ ਆਰਬ੍ਭ ਚਤੁਪਞ੍ਞਾਸਕੋਟਿਧਨਂ ਬੁਦ੍ਧਸਾਸਨੇ ਪਰਿਚ੍ਚਜਿਤ੍ਵਾ ਵਿਕਿਰਿਤ੍ਵਾ ਠਪੇਤ੍ਵਾ ਤੀਣਿ ਰਤਨਾਨਿ ਅਞ੍ਞਤ੍ਥ ਰਤਨਸਞ੍ਞਮੇਵ ਅਨੁਪ੍ਪਾਦੇਤ੍ਵਾ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਦੇਵਸਿਕਂ ਤੀਣਿ ਮਹਾਉਪਟ੍ਠਾਨਾਨਿ ਗਚ੍ਛਤਿ. ਪਾਤੋਵ ਏਕਵਾਰਂ ਗਚ੍ਛਤਿ, ਕਤਪਾਤਰਾਸੋ ਏਕਵਾਰਂ, ਸਾਯਨ੍ਹੇ ਏਕਵਾਰਂ. ਅਞ੍ਞਾਨਿਪਿ ਅਨ੍ਤਰਨ੍ਤਰੁਪਟ੍ਠਾਨਾਨਿ ਹੋਨ੍ਤਿਯੇਵ. ਗਚ੍ਛਨ੍ਤੋ ਚ ‘‘ਕਿਂ ਨੁ ਖੋ ਆਦਾਯ ਆਗਤੋਤਿ ਸਾਮਣੇਰਾ ਵਾ ਦਹਰਾ ਵਾ ਹਤ੍ਥਮ੍ਪਿ ਮੇ ਓਲੋਕੇਯ੍ਯੁ’’ਨ੍ਤਿ ਤੁਚ੍ਛਹਤ੍ਥੋ ਨਾਮ ਨ ਗਤਪੁਬ੍ਬੋ. ਪਾਤੋਵ ਗਚ੍ਛਨ੍ਤੋ ਯਾਗੁਂ ਗਾਹਾਪੇਤ੍ਵਾ ਗਚ੍ਛਤਿ, ਕਤਪਾਤਰਾਸੋ ਸਪ੍ਪਿਨਵਨੀਤਮਧੁਫਾਣਿਤਾਦੀਨਿਪਿ, ਸਾਯਨ੍ਹਸਮਯੇ ਗਨ੍ਧਮਾਲਾਵਤ੍ਥਾਦਿਹਤ੍ਥੋਤਿ. ਏਵਂ ਦਿਵਸੇ ਦਿਵਸੇ ਪਰਿਚ੍ਚਜਨ੍ਤਸ੍ਸ ਪਨਸ੍ਸ ਪਰਿਚ੍ਚਾਗੇ ਪਮਾਣਂ ਨਤ੍ਥਿ.

ਬਹੂ ਵੋਹਾਰੂਪਜੀਵਿਨੋਪਿਸ੍ਸ ਹਤ੍ਥਤੋ ਪਣ੍ਣੇ ਆਰੋਪੇਤ੍ਵਾ ਅਟ੍ਠਾਰਸਕੋਟਿਸਙ੍ਖ੍ਯਂ ਧਨਂ ਇਣਂ ਗਣ੍ਹਿਂਸੁ, ਤੇ ਮਹਾਸੇਟ੍ਠਿ ਨ ਆਹਰਾਪੇਤਿ. ਅਞ੍ਞਾ ਪਨਸ੍ਸ ਕੁਲਸਨ੍ਤਕਾ ਅਟ੍ਠਾਰਸ ਕੋਟਿਯੋ ਨਦੀਤੀਰੇ ਨਿਦਹਿਤ੍ਵਾ ਠਪਿਤਾ ਅਚਿਰਵਤੋਦਕੇਨ ਨਦੀਕੂਲੇ ਭਿਨ੍ਨੇ ਮਹਾਸਮੁਦ੍ਦਂ ਪਵਿਟ੍ਠਾ, ਤਾ ਯਥਾਪਿਹਿਤਲਞ੍ਛਿ ਤਾਵ ਲੋਹਚਾਟਿਯੋ ਅਣ੍ਡਵਕੁਚ੍ਛਿਯਂ ਪਵਟ੍ਟਨ੍ਤਾ ਵਿਚਰਨ੍ਤਿ. ਗੇਹੇ ਪਨਸ੍ਸ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਨਿਚ੍ਚਭਤ੍ਤਂ ਨਿਬਦ੍ਧਮੇਵ ਹੋਤਿ. ਸੇਟ੍ਠਿਨੋ ਹਿ ਗੇਹਂ ਭਿਕ੍ਖੁਸਙ੍ਘਸ੍ਸ ਚਤੁਮਹਾਪਥੇ ਖਤਪੋਕ੍ਖਰਣਿਸਦਿਸਂ, ਸਬ੍ਬਭਿਕ੍ਖੂਨਂ ਮਾਤਾਪਿਤੁਟ੍ਠਾਨੇ ਠਿਤਂ. ਤੇਨਸ੍ਸ ਘਰਂ ਸਮ੍ਮਾਸਮ੍ਬੁਦ੍ਧੋਪਿ ਗਚ੍ਛਤਿ, ਅਸੀਤਿਮਹਾਥੇਰਾਪਿ ਗਚ੍ਛਨ੍ਤਿਯੇਵ. ਸੇਸਭਿਕ੍ਖੂਨਂ ਪਨ ਗਚ੍ਛਨ੍ਤਾਨਞ੍ਚ ਆਗਚ੍ਛਨ੍ਤਾਨਞ੍ਚ ਪਮਾਣਂ ਨਤ੍ਥਿ. ਤਂ ਪਨ ਘਰਂ ਸਤ੍ਤਭੂਮਕਂ ਸਤ੍ਤਦ੍ਵਾਰਕੋਟ੍ਠਕਪਟਿਮਣ੍ਡਿਤਂ, ਤਸ੍ਸ ਚਤੁਤ੍ਥੇ ਦ੍ਵਾਰਕੋਟ੍ਠਕੇ ਏਕਾ ਮਿਚ੍ਛਾਦਿਟ੍ਠਿਕਾ ਦੇਵਤਾ ਵਸਤਿ, ਸਾ ਸਮ੍ਮਾਸਮ੍ਬੁਦ੍ਧੇ ਗੇਹਂ ਪਵਿਸਨ੍ਤੇ ਅਤ੍ਤਨੋ ਵਿਮਾਨੇ ਠਾਤੁਂ ਨ ਸਕ੍ਕੋਤਿ, ਦਾਰਕੇ ਗਹੇਤ੍ਵਾ ਓਤਰਿਤ੍ਵਾ ਭੂਮਿਯਂ ਤਿਟ੍ਠਤਿ. ਅਸੀਤਿਮਹਾਥੇਰੇਸੁਪਿ ਅਵਸੇਸਤ੍ਥੇਰੇਸੁਪਿ ਪਵਿਸਨ੍ਤੇਸੁ ਚ ਨਿਕ੍ਖਮਨ੍ਤੇਸੁ ਚ ਤਥੇਵ ਕਰੋਤਿ. ਸਾ ਚਿਨ੍ਤੇਸਿ ‘‘ਸਮਣੇ ਗੋਤਮੇ ਚ ਸਾਵਕੇਸੁ ਚਸ੍ਸ ਇਮਂ ਗੇਹਂ ਪਵਿਸਨ੍ਤੇਸੁ ਮਯ੍ਹਂ ਸੁਖਂ ਨਾਮ ਨਤ੍ਥਿ, ਨਿਚ੍ਚਕਾਲਂ ਓਤਰਿਤ੍ਵਾ ਓਤਰਿਤ੍ਵਾ ਭੂਮਿਯਂ ਠਾਤੁਂ ਨ ਸਕ੍ਖਿਸ੍ਸਾਮਿ. ਯਥਾ ਇਮੇ ਏਤਂ ਘਰਂ ਨ ਪਵਿਸਨ੍ਤਿ, ਤਥਾ ਮਯਾ ਕਾਤੁਂ ਵਟ੍ਟਤੀ’’ਤਿ. ਅਥੇਕਦਿਵਸਂ ਸਯਨੂਪਗਤਸ੍ਸੇਵ ਮਹਾਕਮ੍ਮਨ੍ਤਿਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਓਭਾਸਂ ਫਰਿਤ੍ਵਾ ਅਟ੍ਠਾਸਿ. ‘‘ਕੋ ਏਤ੍ਥਾ’’ਤਿ ਚ ਵੁਤ੍ਤੇ ‘‘ਅਹਂ ਚਤੁਤ੍ਥਦ੍ਵਾਰਕੋਟ੍ਠਕੇ ਨਿਬ੍ਬਤ੍ਤਦੇਵਤਾ’’ਤਿ ਆਹ. ‘‘ਕਸ੍ਮਾ ਆਗਤਾਸੀ’’ਤਿ? ‘‘ਕਿਂ ਤੁਮ੍ਹੇ ਸੇਟ੍ਠਿਸ੍ਸ ਕਿਰਿਯਂ ਨ ਪਸ੍ਸਥ, ਅਤ੍ਤਨੋ ਪਚ੍ਛਿਮਕਾਲਂ ਅਨੋਲੋਕੇਤ੍ਵਾ ਧਨਂ ਨੀਹਰਿਤ੍ਵਾ ਸਮਣਂ ਗੋਤਮਂਯੇਵ ਪੂਜੇਤਿ, ਨੇਵ ਵਣਿਜ੍ਜਂ ਪਯੋਜੇਤਿ, ਨ ਕਮ੍ਮਨ੍ਤੇ ਪਟ੍ਠਪੇਤਿ, ਤੁਮ੍ਹੇ ਸੇਟ੍ਠਿਂ ਤਥਾ ਓਵਦਥ, ਯਥਾ ਅਤ੍ਤਨੋ ਕਮ੍ਮਨ੍ਤਂ ਕਰੋਤਿ. ਯਥਾ ਚ ਸਮਣੋ ਗੋਤਮੋ ਸਸਾਵਕੋ ਇਮਂ ਘਰਂ ਨ ਪਵਿਸਤਿ, ਤਥਾ ਕਰੋਥਾ’’ਤਿ. ਅਥ ਨਂ ਸੋ ਆਹ ‘‘ਬਾਲਦੇਵਤੇ, ਸੇਟ੍ਠਿ ਧਨਂ ਵਿਸ੍ਸਜ੍ਜੇਨ੍ਤੋ ਨਿਯ੍ਯਾਨਿਕੇ ਬੁਦ੍ਧਸਾਸਨੇ ਵਿਸ੍ਸਜ੍ਜੇਤਿ, ਸੋ ਸਚੇ ਮਂ ਚੂਲ਼ਾਯਂ ਗਹੇਤ੍ਵਾ ਵਿਕ੍ਕਿਣਿਸ੍ਸਤਿ, ਨੇਵਾਹਂ ਕਿਞ੍ਚਿ ਕਥੇਸ੍ਸਾਮਿ, ਗਚ੍ਛ ਤ੍ਵਂ’’ਨ੍ਤਿ. ਸਾ ਪੁਨੇਕਦਿਵਸਂ ਸੇਟ੍ਠਿਨੋ ਜੇਟ੍ਠਪੁਤ੍ਤਂ ਉਪਸਙ੍ਕਮਿਤ੍ਵਾ ਤਥੇਵ ਓਵਦਿ, ਸੋਪਿ ਤਂ ਪੁਰਿਮਨਯੇਨੇਵ ਤਜ੍ਜੇਸਿ. ਸੇਟ੍ਠਿਨਾ ਪਨ ਸਦ੍ਧਿਂ ਕਥੇਤੁਂਯੇਵ ਨ ਸਕ੍ਕੋਤਿ.

ਸੇਟ੍ਠਿਨੋਪਿ ਨਿਰਨ੍ਤਰਂ ਦਾਨਂ ਦੇਨ੍ਤਸ੍ਸ ਵੋਹਾਰੇ ਅਕਰੋਨ੍ਤਸ੍ਸ ਆਯੇ ਮਨ੍ਦੀਭੂਤੇ ਧਨਂ ਪਰਿਕ੍ਖਯਂ ਅਗਮਾਸਿ. ਅਥਸ੍ਸ ਅਨੁਕ੍ਕਮੇਨ ਦਾਲਿਦ੍ਦਿਯਪ੍ਪਤ੍ਤਸ੍ਸ ਪਰਿਭੋਗਸਾਟਕਸਯਨਭੋਜਨਾਨਿਪਿ ਪੁਰਾਣਸਦਿਸਾਨਿ ਨ ਭਵਿਂਸੁ. ਏਵਂਭੂਤੋਪਿ ਭਿਕ੍ਖੁਸਙ੍ਘਸ੍ਸ ਦਾਨਂ ਦੇਤਿ, ਪਣੀਤਂ ਪਨ ਕਤ੍ਵਾ ਦਾਤੁਂ ਨ ਸਕ੍ਕੋਤਿ. ਅਥ ਨਂ ਏਕਦਿਵਸਂ ਵਨ੍ਦਿਤ੍ਵਾ ਨਿਸਿਨ੍ਨਂ ਸਤ੍ਥਾ ‘‘ਦੀਯਤਿ ਪਨ ਤੇ, ਗਹਪਤਿ, ਕੁਲੇ ਦਾਨ’’ਨ੍ਤਿ ਪੁਚ੍ਛਿ. ਸੋ ‘‘ਦੀਯਤਿ, ਭਨ੍ਤੇ, ਤਞ੍ਚ ਖੋ ਕਣਾਜਕਂ ਬਿਲਙ੍ਗਦੁਤਿਯ’’ਨ੍ਤਿ ਆਹ. ਅਥ ਨਂ ਸਤ੍ਥਾ ‘‘ਗਹਪਤਿ, ‘ਲੂਖਂ ਦਾਨਂ ਦੇਮੀ’ਤਿ ਮਾ ਚਿਤ੍ਤਂ ਸਙ੍ਕੋਚਯਿਤ੍ਥ. ਚਿਤ੍ਤਸ੍ਮਿਞ੍ਹਿ ਪਣੀਤੇ ਬੁਦ੍ਧਪਚ੍ਚੇਕਬੁਦ੍ਧਬੁਦ੍ਧਸਾਵਕਾਨਂ ਦਿਨ੍ਨਦਾਨਂ ਲੂਖਂ ਨਾਮ ਨ ਹੋਤਿ. ਕਸ੍ਮਾ? ਵਿਪਾਕਮਹਨ੍ਤਤ੍ਤਾ’’ਤਿ ਆਹ. ਚਿਤ੍ਤਞ੍ਹਿ ਪਣੀਤਂ ਕਾਤੁਂ ਸਕ੍ਕੋਨ੍ਤਸ੍ਸ ਦਾਨਂ ਲੂਖਂ ਨਾਮ ਨਤ੍ਥੀਤਿ ਚੇਤਂ ਏਵਂ ਵੇਦਿਤਬ੍ਬਂ –

‘‘ਨਤ੍ਥਿ ਚਿਤ੍ਤੇ ਪਸਨ੍ਨਮ੍ਹਿ, ਅਪ੍ਪਕਾ ਨਾਮ ਦਕ੍ਖਿਣਾ;

ਤਥਾਗਤੇ ਵਾ ਸਮ੍ਬੁਦ੍ਧੇ, ਅਥ ਵਾ ਤਸ੍ਸ ਸਾਵਕੇ. (ਵਿ. ਵ. ੮੦੪);

‘‘ਨ ਕਿਰਤ੍ਥਿ ਅਨੋਮਦਸ੍ਸਿਸੁ, ਪਾਰਿਚਰਿਯਾ ਬੁਦ੍ਧੇਸੁ ਅਪ੍ਪਕਾ;

ਸੁਕ੍ਖਾਯ ਅਲੋਣਿਕਾਯ ਚ, ਪਸ੍ਸ ਫਲਂ ਕੁਮ੍ਮਾਸਪਿਣ੍ਡਿਯਾ’’ਤਿ.

ਅਪਰਮ੍ਪਿ ਨਂ ਆਹ ‘‘ਗਹਪਤਿ, ਤ੍ਵਂ ਤਾਵ ਲੂਖਂ ਦਾਨਂ ਦਦਮਾਨੋ ਅਟ੍ਠਨ੍ਨਂ ਅਰਿਯਪੁਗ੍ਗਲਾਨਂ ਦੇਸਿ, ਅਹਂ ਵੇਲਾਮਕਾਲੇ ਸਕਲਜਮ੍ਬੁਦੀਪਂ ਉਨ੍ਨਙ੍ਗਲਂ ਕਤ੍ਵਾ ਸਤ੍ਤ ਰਤਨਾਨਿ ਦਦਮਾਨੋ ਪਞ੍ਚ ਮਹਾਨਦਿਯੋ ਏਕੋਘਪੁਣ੍ਣਂ ਕਤ੍ਵਾ ਵਿਯ ਚ ਮਹਾਦਾਨਂ ਪਵਤ੍ਤਯਮਾਨੋ ਤਿਸਰਣਗਤਂ ਵਾ ਪਞ੍ਚਸੀਲਰਕ੍ਖਨਕਂ ਵਾ ਕਞ੍ਚਿ ਨਾਲਤ੍ਥਂ, ਦਕ੍ਖਿਣੇਯ੍ਯਪੁਗ੍ਗਲਾ ਨਾਮ ਏਵਂ ਦੁਲ੍ਲਭਾ. ਤਸ੍ਮਾ ‘ਲੂਖਂ ਮੇ ਦਾਨ’ਨ੍ਤਿ ਮਾ ਚਿਤ੍ਤਂ ਸਙ੍ਕੋਚਯਿਤ੍ਥਾ’’ਤਿ ਏਵਞ੍ਚ ਪਨ ਵਤ੍ਵਾ ਵੇਲਾਮਸੁਤ੍ਤਂ (ਅ. ਨਿ. ੯.੨੦) ਕਥੇਸਿ.

ਅਥ ਖੋ ਸਾ ਦੇਵਤਾ ਇਸ੍ਸਰਕਾਲੇ ਸੇਟ੍ਠਿਨਾ ਸਦ੍ਧਿਂ ਕਥੇਤੁਮ੍ਪਿ ਅਸਕ੍ਕੋਨ੍ਤੀ ‘‘ਇਦਾਨਾਯਂ ਦੁਗ੍ਗਤਤ੍ਤਾ ਮਮ ਵਚਨਂ ਗਣ੍ਹਿਸ੍ਸਤੀ’’ਤਿ ਮਞ੍ਞਮਾਨਾ ਅਡ੍ਢਰਤ੍ਤਸਮਯੇ ਸਿਰਿਗਬ੍ਭਂ ਪਵਿਸਿਤ੍ਵਾ ਓਭਾਸਂ ਫਰਿਤ੍ਵਾ ਆਕਾਸੇ ਅਟ੍ਠਾਸਿ. ਸੇਟ੍ਠਿ ਤਂ ਦਿਸ੍ਵਾ ‘‘ਕੋ ਏਸੋ’’ਤਿ ਆਹ. ‘‘ਅਹਂ ਮਹਾਸੇਟ੍ਠਿ ਚਤੁਤ੍ਥਦ੍ਵਾਰਕੋਟ੍ਠਕੇ ਅਧਿਵਤ੍ਥਾ, ਦੇਵਤਾ’’ਤਿ. ‘‘ਕਿਮਤ੍ਥਮਾਗਤਾਸੀ’’ਤਿ? ‘‘ਤੁਯ੍ਹਂ ਓਵਾਦਂ ਕਥੇਤੁਕਾਮਾ ਹੁਤ੍ਵਾ ਆਗਚ੍ਛਾਮੀ’’ਤਿ. ‘‘ਤੇਨ ਹਿ ਕਥੇਹੀ’’ਤਿ. ਮਹਾਸੇਟ੍ਠਿ ਤ੍ਵਂ ਪਚ੍ਛਿਮਕਾਲਂ ਨ ਚਿਨ੍ਤੇਸਿ, ਪੁਤ੍ਤਧੀਤਰੋ ਨ ਓਲੋਕੇਸਿ, ਸਮਣਸ੍ਸ ਤੇ ਗੋਤਮਸ੍ਸ ਸਾਸਨੇ ਬਹੁਂ ਧਨਂ ਵਿਪ੍ਪਕਿਣ੍ਣਂ, ਸੋ ਤ੍ਵਂ ਅਤਿਵੇਲਂ ਧਨਵਿਸ੍ਸਜ੍ਜਨੇਨ ਵਾ ਵਣਿਜ੍ਜਾਦਿਕਮ੍ਮਾਨਂ ਅਕਰਣੇਨ ਵਾ ਸਮਣਂ ਗੋਤਮਂ ਨਿਸ੍ਸਾਯ ਦੁਗ੍ਗਤੋ ਜਾਤੋ, ਏਵਂਭੂਤੋਪਿ ਸਮਣਂ ਗੋਤਮਂ ਨ ਮੁਞ੍ਚਸਿ, ਅਜ੍ਜਪਿ ਤੇ ਸਮਣਾ ਘਰਂ ਪਵਿਸਨ੍ਤਿਯੇਵ. ਯਂ ਤਾਵ ਤੇਹਿ ਨੀਤਂ, ਤਂ ਨ ਸਕ੍ਕਾ ਪਚ੍ਚਾਹਰਾਪੇਤੁਂ, ਗਹਿਤਂ ਗਹਿਤਮੇਵ ਹੋਤੁ, ਇਤੋ ਪਟ੍ਠਾਯ ਪਨ ਸਯਞ੍ਚ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ ਮਾ ਗਮਿਤ੍ਥ, ਸਾਵਕਾਨਞ੍ਚਸ੍ਸ ਇਮਂ ਘਰਂ ਪਵਿਸਿਤੁਂ ਮਾ ਅਦਾਸਿ, ਸਮਣਂ ਗੋਤਮਂ ਨਿਵਤ੍ਤਿਤ੍ਵਾਪਿ ਅਨੋਲੋਕੇਨ੍ਤੋ ਅਤ੍ਤਨੋ ਵੋਹਾਰੇ ਚ ਵਣਿਜ੍ਜਞ੍ਚ ਕਤ੍ਵਾ ਕੁਟੁਮ੍ਬਂ ਸਣ੍ਠਪੇਹੀ’’ਤਿ. ਅਥ ਨਂ ਸੋ ਏਵਮਾਹ ‘‘ਅਯਂ ਤਯਾ ਮਯ੍ਹਂ ਦਾਤਬ੍ਬਓਵਾਦੋ’’ਤਿ. ‘‘ਆਮ, ਅਯ੍ਯਾ’’ਤਿ. ਤਾਦਿਸਾਨਂ ਦੇਵਤਾਨਂ ਸਤੇਨਪਿ ਸਹਸ੍ਸੇਨਪਿ ਸਤਸਹਸ੍ਸੇਨਪਿ ਅਕਮ੍ਪਨੀਯੋ ਅਹਂ ਦਸਬਲੇਨ ਕਤੋ. ਮਮ ਹਿ ਸਦ੍ਧਾ ਸਿਨੇਰੁ ਵਿਯ ਅਚਲਾ ਸੁਪ੍ਪਤਿਟ੍ਠਿਤਾ, ਮਯਾ ਨਿਯ੍ਯਾਨਿਕੇ ਰਤਨਸਾਸਨੇ ਧਨਂ ਵਿਸ੍ਸਜ੍ਜਿਤਂ, ਅਯੁਤ੍ਤਂ ਤੇ ਕਥਿਤਂ, ਬੁਦ੍ਧਸਾਸਨੇ ਪਹਾਰੋ ਦਿਨ੍ਨੋ, ਏਵਰੂਪਾਯ ਅਨਾਚਾਰਾਯ ਦੁਸ੍ਸੀਲਾਯ ਕਾਲ਼ਕਣ੍ਣਿਯਾ ਸਦ੍ਧਿਂ ਤਯਾ ਮਮ ਏਕਗੇਹੇ ਵਸਨਕਿਚ੍ਚਂ ਨਤ੍ਥਿ, ਸੀਘਂ ਮਮ ਗੇਹਾ ਨਿਕ੍ਖਮਿਤ੍ਵਾ ਅਞ੍ਞਤ੍ਥ ਗਚ੍ਛਾਤਿ.

ਸਾ ਸੋਤਾਪਨ੍ਨਸ੍ਸ ਅਰਿਯਸਾਵਕਸ੍ਸ ਵਚਨਂ ਸੁਤ੍ਵਾ ਠਾਤੁਂ ਅਸਕ੍ਕੋਨ੍ਤੀ ਅਤ੍ਤਨੋ ਵਸਨਟ੍ਠਾਨਂ ਗਨ੍ਤ੍ਵਾ ਦਾਰਕੇ ਹਤ੍ਥੇਨ ਗਹੇਤ੍ਵਾ ਨਿਕ੍ਖਮਿ. ਨਿਕ੍ਖਮਿਤ੍ਵਾ ਚ ਪਨ ਅਞ੍ਞਤ੍ਥ ਵਸਨਟ੍ਠਾਨਂ ਅਲਭਮਾਨਾ ‘‘ਸੇਟ੍ਠਿਂ ਖਮਾਪੇਤ੍ਵਾ ਤਤ੍ਥੇਵ ਵਸਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਗਰਪਰਿਗ੍ਗਾਹਕਦੇਵਪੁਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਵਨ੍ਦਿਤ੍ਵਾ ਅਟ੍ਠਾਸਿ. ‘‘ਕੇਨਟ੍ਠੇਨ ਆਗਤਾਸੀ’’ਤਿ ਚ ਵੁਤ੍ਤੇ ‘‘ਅਹਂ ਸਾਮਿ, ਅਤ੍ਤਨੋ ਬਾਲਤਾਯ ਅਨੁਪਧਾਰੇਤ੍ਵਾ ਅਨਾਥਪਿਣ੍ਡਿਕੇਨ ਸੇਟ੍ਠਿਨਾ ਸਦ੍ਧਿਂ ਕਥੇਸਿਂ, ਸੋ ਮਂ ਕੁਜ੍ਝਿਤ੍ਵਾ ਵਸਨਟ੍ਠਾਨਾ ਨਿਕ੍ਕਡ੍ਢਿ, ਮਂ ਸੇਟ੍ਠਿਸ੍ਸ ਸਨ੍ਤਿਕਂ ਨੇਤ੍ਵਾ ਖਮਾਪੇਤ੍ਵਾ ਵਸਨਟ੍ਠਾਨਂ ਮੇ ਦੇਥਾ’’ਤਿ. ‘‘ਕਿਂ ਪਨ ਤਯਾ ਸੇਟ੍ਠਿ ਵੁਤ੍ਤੋ’’ਤਿ ‘‘ਇਤੋ ਪਟ੍ਠਾਯ ਬੁਦ੍ਧੁਪਟ੍ਠਾਨਂ ਸਙ੍ਘੁਪਟ੍ਠਾਨਂ ਮਾ ਕਰਿ, ਸਮਣਸ੍ਸ ਗੋਤਮਸ੍ਸ ਘਰਪ੍ਪਵੇਸਨਂ ਮਾ ਅਦਾਸੀ’’ਤਿ ‘‘ਏਵਂ ਮੇ ਵੁਤ੍ਤੋ, ਸਾਮੀ’’ਤਿ. ਅਯੁਤ੍ਤਂ ਤਯਾ ਵੁਤ੍ਤਂ, ਸਾਸਨੇ ਪਹਾਰੋ ਦਿਨ੍ਨੋ, ‘‘ਅਹਂ ਤਂ ਆਦਾਯ ਸੇਟ੍ਠਿਨੋ ਸਨ੍ਤਿਕਂ ਗਨ੍ਤੁਂ ਨ ਉਸ੍ਸਹਾਮੀ’’ਤਿ. ਸਾ ਤਸ੍ਸ ਸਨ੍ਤਿਕਾ ਸਙ੍ਗਹਂ ਅਲਭਿਤ੍ਵਾ ਚਤੁਨ੍ਨਂ ਮਹਾਰਾਜਾਨਂ ਸਨ੍ਤਿਕਂ ਅਗਮਾਸਿ.

ਤੇਹਿਪਿ ਤਥੇਵ ਪਟਿਕ੍ਖਿਤ੍ਤਾ ਸਕ੍ਕਂ ਦੇਵਰਾਜਂ ਉਪਸਙ੍ਕਮਿਤ੍ਵਾ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ ‘‘ਅਹਂ, ਦੇਵ, ਵਸਨਟ੍ਠਾਨਂ ਅਲਭਮਾਨਾ ਦਾਰਕੇ ਹਤ੍ਥੇਨ ਗਹੇਤ੍ਵਾ ਅਨਾਥਾ ਵਿਚਰਾਮਿ, ਤੁਮ੍ਹਾਕਂ ਸਿਰਿਯਾ ਮਯ੍ਹਂ ਵਸਨਟ੍ਠਾਨਂ ਦਾਪੇਥਾ’’ਤਿ ਸੁਟ੍ਠੁਤਰਂ ਯਾਚਿ. ਸੋਪਿ ਨਂ ਆਹ ‘‘ਤਯਾ ਅਯੁਤ੍ਤਂ ਕਤਂ, ਜਿਨਸਾਸਨੇ ਪਹਾਰੋ ਦਿਨ੍ਨੋ, ਅਹਮ੍ਪਿ ਤਂ ਨਿਸ੍ਸਾਯ ਸੇਟ੍ਠਿਨਾ ਸਦ੍ਧਿਂ ਕਥੇਤੁਂ ਨ ਸਕ੍ਕੋਮਿ, ਏਕਂ ਪਨ ਤੇ ਸੇਟ੍ਠਿਸ੍ਸ ਖਮਨੂਪਾਯਂ ਕਥੇਸ੍ਸਾਮੀ’’ਤਿ. ‘‘ਸਾਧੁ, ਦੇਵ, ਕਥੇਹੀ’’ਤਿ. ਮਹਾਸੇਟ੍ਠਿਸ੍ਸ ਹਤ੍ਥਤੋ ਮਨੁਸ੍ਸੇਹਿ ਪਣ੍ਣੇ ਆਰੋਪੇਤ੍ਵਾ ਅਟ੍ਠਾਰਸਕੋਟਿਸਙ੍ਖ੍ਯਂ ਧਨਂ ਗਹਿਤਂ ਅਤ੍ਥਿ, ਤ੍ਵਂ ਤਸ੍ਸ ਆਯੁਤ੍ਤਕਵੇਸਂ ਗਹੇਤ੍ਵਾ ਕਞ੍ਚਿ ਅਜਾਨਾਪੇਤ੍ਵਾ ਤਾਨਿ ਪਣ੍ਣਾਨਿ ਆਦਾਯ ਕਤਿਪਯੇਹਿ ਯਕ੍ਖਤਰੁਣੇਹਿ ਪਰਿਵਾਰਿਤਾ ਏਕੇਨ ਹਤ੍ਥੇਨ ਪਣ੍ਣਂ, ਏਕੇਨ ਲੇਖਨਿਂ ਗਹੇਤ੍ਵਾ ਤੇਸਂ ਗੇਹਂ ਗਨ੍ਤ੍ਵਾ ਗੇਹਮਜ੍ਝੇ ਠਿਤਾ ਅਤ੍ਤਨੋ ਯਕ੍ਖਾਨੁਭਾਵੇਨ ਤੇ ਉਤ੍ਤਾਸੇਤ੍ਵਾ ‘‘ਇਦਂ ਤੁਮ੍ਹਾਕਂ ਇਣਪਣ੍ਣਂ, ਅਮ੍ਹਾਕਂ ਸੇਟ੍ਠਿ ਅਤ੍ਤਨੋ ਇਸ੍ਸਰਕਾਲੇ ਤੁਮ੍ਹੇ ਨ ਕਿਞ੍ਚਿ ਆਹ, ਇਦਾਨਿ ਦੁਗ੍ਗਤੋ ਜਾਤੋ, ਤੁਮ੍ਹੇਹਿ ਗਹਿਤਕਹਾਪਣਾਨਿ ਦੇਥਾ’’ਤਿ ਅਤ੍ਤਨੋ ਯਕ੍ਖਾਨੁਭਾਵਂ ਦਸ੍ਸੇਤ੍ਵਾ ਸਬ੍ਬਾਪਿ ਤਾ ਅਟ੍ਠਾਰਸ ਹਿਰਞ੍ਞਕੋਟਿਯੋ ਸਾਧੇਤ੍ਵਾ ਸੇਟ੍ਠਿਸ੍ਸ ਤੁਚ੍ਛਕੋਟ੍ਠਕੇ ਪੂਰੇਤ੍ਵਾ ਅਞ੍ਞਂ ਅਚਿਰਵਤਿਨਦੀਤੀਰੇ ਨਿਦਹਿਤਂ ਧਨਂ ਨਦੀਕੂਲੇ ਭਿਨ੍ਨੇ ਸਮੁਦ੍ਦਂ ਪਵਿਟ੍ਠਂ ਅਤ੍ਥਿ, ਤਮ੍ਪਿ ਅਤ੍ਤਨੋ ਆਨੁਭਾਵੇਨ ਆਹਰਿਤ੍ਵਾ ਤੁਚ੍ਛਕੋਟ੍ਠਕੇ ਪੂਰੇਤ੍ਵਾ, ਅਞ੍ਞਮ੍ਪਿ ਅਸੁਕਟ੍ਠਾਨੇ ਨਾਮ ਅਸ੍ਸਾਮਿਕਂ ਅਟ੍ਠਾਰਸਕੋਟਿਮਤ੍ਤਮੇਵ ਧਨਂ ਅਤ੍ਥਿ, ਤਮ੍ਪਿ ਆਹਰਿਤ੍ਵਾ ਤੁਚ੍ਛਕੋਟ੍ਠਕੇ ਪੂਰੇਹਿ, ਇਮਾਹਿ ਚਤੁਪਞ੍ਞਾਸਕੋਟੀਹਿ ਇਮਂ ਤੁਚ੍ਛਕੋਟ੍ਠਕਪੂਰਕਂ ਦਣ੍ਡਕਮ੍ਮਂ ਕਤ੍ਵਾ ਮਹਾਸੇਟ੍ਠਿਂ ਖਮਾਪੇਹੀਤਿ.

ਸਾ ‘‘ਸਾਧੁ, ਦੇਵਾ’’ਤਿ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਵੁਤ੍ਤਨਯੇਨੇਵ ਸਬ੍ਬਂ ਧਨਂ ਆਹਰਿਤ੍ਵਾ ਕੋਟ੍ਠਕੇ ਪੂਰੇਤ੍ਵਾ ਅਡ੍ਢਰਤ੍ਤਸਮਯੇ ਸੇਟ੍ਠਿਸ੍ਸ ਸਿਰਿਗਬ੍ਭਂ ਪਵਿਸਿਤ੍ਵਾ ਓਭਾਸਂ ਫਰਿਤ੍ਵਾ ਆਕਾਸੇ ਅਟ੍ਠਾਸਿ. ‘‘ਕੋ ਏਸੋ’’ਤਿ ਵੁਤ੍ਤੇ ‘‘ਅਹਂ ਤੇ ਮਹਾਸੇਟ੍ਠਿ ਚਤੁਤ੍ਥਦ੍ਵਾਰਕੋਟ੍ਠਕੇ ਅਧਿਵਤ੍ਥਾ ਅਨ੍ਧਬਾਲਦੇਵਤਾ, ਮਯਾ ਮਹਾਮੋਹਮੂਲ਼੍ਹਾਯ ਬੁਦ੍ਧਗੁਣੇ ਅਜਾਨਿਤ੍ਵਾ ਪੁਰਿਮੇਸੁ ਦਿਵਸੇਸੁ ਤੁਮ੍ਹੇਹਿ ਸਦ੍ਧਿਂ ਕਿਞ੍ਚਿ ਕਥਿਤਂ ਅਤ੍ਥਿ, ਤਂ ਮੇ ਦੋਸਂ ਖਮਥ. ਸਕ੍ਕਸ੍ਸ ਹਿ ਮੇ ਦੇਵਰਾਜਸ੍ਸ ਵਚਨੇਨ ਤੁਮ੍ਹਾਕਂ ਇਣਂ ਸੋਧੇਤ੍ਵਾ ਅਟ੍ਠਾਰਸ ਕੋਟਿਯੋ, ਸਮੁਦ੍ਦਂ ਗਤਾ ਅਟ੍ਠਾਰਸ ਕੋਟਿਯੋ, ਤਸ੍ਮਿਂ ਤਸ੍ਮਿਂ ਠਾਨੇ ਅਸ੍ਸਾਮਿਕਧਨਸ੍ਸ ਅਟ੍ਠਾਰਸ ਕੋਟਿਯੋਤਿ ਚਤੁਪਣ੍ਣਾਸ ਕੋਟਿਯੋ ਆਹਰਿਤ੍ਵਾ ਤੁਚ੍ਛਕੋਟ੍ਠਕਪੂਰਣੇਨ ਦਣ੍ਡਕਮ੍ਮਂ ਕਤਂ, ਜੇਤਵਨਵਿਹਾਰਂ ਆਰਬ੍ਭ ਪਰਿਕ੍ਖਯਂ ਗਤਧਨਂ ਸਬ੍ਬਂ ਸਮ੍ਪਿਣ੍ਡਿਤਂ, ਵਸਨਟ੍ਠਾਨਂ ਅਲਭਮਾਨਾ ਕਿਲਮਾਮਿ, ਮਯਾ ਅਞ੍ਞਾਣਤਾਯ ਕਥਿਤਂ ਮਨਸਿ ਅਕਤ੍ਵਾ ਖਮਥ ਮਹਾਸੇਟ੍ਠੀ’’ਤਿ ਆਹ.

ਅਨਾਥਪਿਣ੍ਡਿਕੋ ਤਸ੍ਸਾ ਵਚਨਂ ਸੁਤ੍ਵਾ ਚਿਨ੍ਤੇਸਿ ‘‘ਅਯਂ ਦੇਵਤਾ ‘ਦਣ੍ਡਕਮ੍ਮਞ੍ਚ ਮੇ ਕਤ’ਨ੍ਤਿ ਵਦਤਿ, ਅਤ੍ਤਨੋ ਚ ਦੋਸਂ ਪਟਿਜਾਨਾਤਿ, ਸਤ੍ਥਾ ਇਮਂ ਵਿਨੇਤ੍ਵਾ ਅਤ੍ਤਨੋ ਗੁਣੇ ਜਾਨਾਪੇਸ੍ਸਤਿ, ਸਮ੍ਮਾਸਮ੍ਬੁਦ੍ਧਸ੍ਸ ਨਂ ਦਸ੍ਸੇਸ੍ਸਾਮੀ’’ਤਿ. ਅਥ ਨਂ ਆਹ ‘‘ਅਮ੍ਮ, ਦੇਵਤੇ, ਸਚੇਸਿ ਮਂ ਖਮਾਪੇਤੁਕਾਮਾ, ਸਤ੍ਥੁ ਸਨ੍ਤਿਕੇ ਮਂ ਖਮਾਪੇਹੀ’’ਤਿ. ਸਾਧੁ ਏਵਂ ਕਰਿਸ੍ਸਾਮਿ, ‘‘ਸਤ੍ਥੁ ਪਨ ਮਂ ਸਨ੍ਤਿਕਂ ਗਹੇਤ੍ਵਾ ਗਚ੍ਛਾਹੀ’’ਤਿ. ਸੋ ‘‘ਸਾਧੂ’’ਤਿ ਵਤ੍ਵਾ ਵਿਭਾਤਾਯ ਰਤ੍ਤਿਯਾ ਪਾਤੋਵ ਤਂ ਗਹੇਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਤਾਯ ਕਤਕਮ੍ਮਂ ਸਬ੍ਬਂ ਤਥਾਗਤਸ੍ਸ ਆਰੋਚੇਸਿ. ਸਤ੍ਥਾ ਤਸ੍ਸ ਵਚਨਂ ਸੁਤ੍ਵਾ ‘‘ਇਧ, ਗਹਪਤਿ, ਪਾਪਪੁਗ੍ਗਲੋਪਿ ਯਾਵ ਪਾਪਂ ਨ ਪਚ੍ਚਤਿ, ਤਾਵ ਭਦ੍ਰਾਨਿ ਪਸ੍ਸਤਿ. ਯਦਾ ਪਨਸ੍ਸ ਪਾਪਂ ਪਚ੍ਚਤਿ, ਤਦਾ ਪਾਪਮੇਵ ਪਸ੍ਸਤਿ. ਭਦ੍ਰਪੁਗ੍ਗਲੋਪਿ ਯਾਵ ਭਦ੍ਰਂ ਨ ਪਚ੍ਚਤਿ, ਤਾਵ ਪਾਪਾਨਿ ਪਸ੍ਸਤਿ. ਯਦਾ ਪਨਸ੍ਸ ਭਦ੍ਰਂ ਪਚ੍ਚਤਿ, ਤਦਾ ਭਦ੍ਰਮੇਵ ਪਸ੍ਸਤੀ’’ਤਿ ਵਤ੍ਵਾ ਇਮਾ ਧਮ੍ਮਪਦੇ ਦ੍ਵੇ ਗਾਥਾ ਅਭਾਸਿ –

‘‘ਪਾਪੋਪਿ ਪਸ੍ਸਤੀ ਭਦ੍ਰਂ, ਯਾਵ ਪਾਪਂ ਨ ਪਚ੍ਚਤਿ;

ਯਦਾ ਚ ਪਚ੍ਚਤੀ ਪਾਪਂ, ਅਥ ਪਾਪੋ ਪਾਪਾਨਿ ਪਸ੍ਸਤਿ.

‘‘ਭਦ੍ਰੋਪਿ ਪਸ੍ਸਤੀ ਪਾਪਂ, ਯਾਵ ਭਦ੍ਰਂ ਨ ਪਚ੍ਚਤਿ;

ਯਦਾ ਚ ਪਚ੍ਚਤੀ ਭਦ੍ਰਂ, ਅਥ ਭਦ੍ਰੋ ਭਦ੍ਰਾਨਿ ਪਸ੍ਸਤੀ’’ਤਿ. (ਧ. ਪ. ੧੧੯-੧੨੦);

ਇਮਾਸਞ੍ਚ ਪਨ ਗਾਥਾਨਂ ਪਰਿਯੋਸਾਨੇ ਸਾ ਦੇਵਤਾ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਸਾ ਚਕ੍ਕਙ੍ਕਿਤੇਸੁ ਸਤ੍ਥੁ ਪਾਦੇਸੁ ਨਿਪਤਿਤ੍ਵਾ ‘‘ਮਯਾ, ਭਨ੍ਤੇ, ਰਾਗਰਤ੍ਤਾਯ ਦੋਸਪਦੁਟ੍ਠਾਯ ਮੋਹਮੂਲ਼੍ਹਾਯ ਅਵਿਜ੍ਜਨ੍ਧਾਯ ਤੁਮ੍ਹਾਕਂ ਗੁਣੇ ਅਜਾਨਨ੍ਤਿਯਾ ਪਾਪਕਂ ਵਚਨਂ ਵੁਤ੍ਤਂ, ਤਂ ਮੇ ਖਮਥਾ’’ਤਿ ਸਤ੍ਥਾਰਂ ਖਮਾਪੇਤ੍ਵਾ ਮਹਾਸੇਟ੍ਠਿਮ੍ਪਿ ਖਮਾਪੇਸਿ.

ਤਸ੍ਮਿਂ ਸਮਯੇ ਅਨਾਥਪਿਣ੍ਡਿਕੋ ਸਤ੍ਥੁ ਪੁਰਤੋ ਅਤ੍ਤਨੋ ਗੁਣਂ ਕਥੇਸਿ ‘‘ਭਨ੍ਤੇ, ਅਯਂ ਦੇਵਤਾ ‘ਬੁਦ੍ਧੁਪਟ੍ਠਾਨਾਦੀਨਿ ਮਾ ਕਰੋਹੀ’ਤਿ ਵਾਰਯਮਾਨਾਪਿ ਮਂ ਵਾਰੇਤੁਂ ਨਾਸਕ੍ਖਿ, ‘ਦਾਨਂ ਨ ਦਾਤਬ੍ਬ’ਨ੍ਤਿ ਇਮਾਯ ਵਾਰਿਯਮਾਨੋਪਹਂ ਦਾਨਂ ਅਦਾਸਿਮੇਵ, ਨੂਨ ਏਸ, ਭਨ੍ਤੇ, ਮਯ੍ਹਂ ਗੁਣੋ’’ਤਿ. ਸਤ੍ਥਾ ‘‘ਤ੍ਵਂ ਖੋਸਿ ਗਹਪਤਿ ਸੋਤਾਪਨ੍ਨੋ ਅਰਿਯਸਾਵਕੋ ਅਚਲਸਦ੍ਧੋ ਵਿਸੁਦ੍ਧਦਸ੍ਸਨੋ, ਤੁਯ੍ਹਂ ਇਮਾਯ ਅਪ੍ਪੇਸਕ੍ਖਦੇਵਤਾਯ ਵਾਰੇਨ੍ਤਿਯਾ ਅਵਾਰਿਤਭਾਵੋ ਨ ਅਚ੍ਛਰਿਯੋ. ਯਂ ਪਨ ਪੁਬ੍ਬੇ ਪਣ੍ਡਿਤਾ ਅਨੁਪ੍ਪਨ੍ਨੇ ਬੁਦ੍ਧੇ ਅਪਰਿਪਕ੍ਕਞਾਣੇ ਠਿਤਾ ਕਾਮਾਵਚਰਿਸ੍ਸਰੇਨ ਮਾਰੇਨ ਆਕਾਸੇ ਠਤ੍ਵਾ ‘ਸਚੇ ਦਾਨਂ ਦਸ੍ਸਸਿ, ਇਮਸ੍ਮਿਂ ਨਿਰਯੇ ਪਚ੍ਚਿਸ੍ਸਸੀ’ਤਿ ਅਸੀਤਿਹਤ੍ਥਗਮ੍ਭੀਰਂ ਅਙ੍ਗਾਰਕਾਸੁਂ ਦਸ੍ਸੇਤ੍ਵਾ ‘ਮਾ ਦਾਨਂ ਅਦਾਸੀ’ਤਿ ਵਾਰਿਤਾਪਿ ਪਦੁਮਕਣ੍ਣਿਕਾਮਜ੍ਝੇ ਠਤ੍ਵਾ ਦਾਨਂ ਅਦਂਸੁ, ਇਦਂ ਅਚ੍ਛਰਿਯ’’ਨ੍ਤਿ ਵਤ੍ਵਾ ਅਨਾਥਪਿਣ੍ਡਿਕੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਬਾਰਾਣਸਿਸੇਟ੍ਠਿਸ੍ਸ ਕੁਲੇ ਨਿਬ੍ਬਤ੍ਤਿਤ੍ਵਾ ਨਾਨਪ੍ਪਕਾਰੇਹਿ ਸੁਖੂਪਕਰਣੇਹਿ ਦੇਵਕੁਮਾਰੋ ਵਿਯ ਸਂਵਡ੍ਢਿਯਮਾਨੋ ਅਨੁਕ੍ਕਮੇਨ ਵਿਞ੍ਞੁਤਂ ਪਤ੍ਵਾ ਸੋਲ਼ਸਵਸ੍ਸਕਾਲੇਯੇਵ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਤੋ. ਸੋ ਪਿਤੁ ਅਚ੍ਚਯੇਨ ਸੇਟ੍ਠਿਟ੍ਠਾਨੇ ਠਤ੍ਵਾ ਚਤੂਸੁ ਨਗਰਦ੍ਵਾਰੇਸੁ ਚਤਸ੍ਸੋ ਦਾਨਸਾਲਾਯੋ, ਮਜ੍ਝੇ ਨਗਰਸ੍ਸ ਏਕਂ, ਅਤ੍ਤਨੋ ਨਿਵੇਸਨਦ੍ਵਾਰੇ ਏਕਨ੍ਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਮਹਾਦਾਨਂ ਦੇਤਿ, ਸੀਲਂ ਰਕ੍ਖਤਿ, ਉਪੋਸਥਕਮ੍ਮਂ ਕਰੋਤਿ.

ਅਥੇਕਦਿਵਸਂ ਪਾਤਰਾਸਵੇਲਾਯ ਬੋਧਿਸਤ੍ਤਸ੍ਸ ਨਾਨਗ੍ਗਰਸੇ ਮਨੁਞ੍ਞਭੋਜਨੇ ਉਪਨੀਯਮਾਨੇ ਏਕੋ ਪਚ੍ਚੇਕਬੁਦ੍ਧੋ ਸਤ੍ਤਾਹਚ੍ਚਯੇਨ ਨਿਰੋਧਾ ਵੁਟ੍ਠਾਯ ਭਿਕ੍ਖਾਚਾਰਵੇਲਂ ਸਲ੍ਲਕ੍ਖੇਤ੍ਵਾ ‘‘ਅਜ੍ਜ ਮਯਾ ਬਾਰਾਣਸਿਸੇਟ੍ਠਿਸ੍ਸ ਗੇਹਦ੍ਵਾਰਂ ਗਨ੍ਤੁਂ ਵਟ੍ਟਤੀ’’ਤਿ ਨਾਗਲਤਾਦਨ੍ਤਕਟ੍ਠਂ ਖਾਦਿਤ੍ਵਾ ਅਨੋਤਤ੍ਤਦਹੇ ਮੁਖਧੋਵਨਂ ਕਤ੍ਵਾ ਮਨੋਸਿਲਾਤਲੇ ਠਿਤੋ ਨਿਵਾਸੇਤ੍ਵਾ ਵਿਜ੍ਜੁਲਤਾਸਦਿਸਂ ਕਾਯਬਨ੍ਧਨਂ ਬਨ੍ਧਿਤ੍ਵਾ ਚੀਵਰਂ ਪਾਰੁਪਿਤ੍ਵਾ ਇਦ੍ਧਿਮਯਮਤ੍ਤਿਕਾਪਤ੍ਤਂ ਆਦਾਯ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਸ੍ਸ ਭਤ੍ਤੇ ਉਪਨੀਤਮਤ੍ਤੇ ਗੇਹਦ੍ਵਾਰੇ ਅਟ੍ਠਾਸਿ. ਬੋਧਿਸਤ੍ਤੋ ਤਂ ਦਿਸ੍ਵਾਵ ਆਸਨਾ ਵੁਟ੍ਠਾਯ ਨਿਪਚ੍ਚਕਾਰਂ ਦਸ੍ਸੇਤ੍ਵਾ ਪਰਿਕਮ੍ਮਕਾਰਕਂ ਓਲੋਕੇਸਿ. ‘‘ਕਿਂ ਕਰੋਮਿ, ਸਾਮੀ’’ਤਿ ਚ ਵੁਤ੍ਤੇ ‘‘ਅਯ੍ਯਸ੍ਸ ਪਤ੍ਤਂ ਆਹਰਥਾ’’ਤਿ ਆਹ. ਤਙ੍ਖਣਞ੍ਞੇਵ ਮਾਰੋ ਪਾਪਿਮਾ ਵਿਕਮ੍ਪਮਾਨੋ ਉਟ੍ਠਾਯ ‘‘ਅਯਂ ਪਚ੍ਚੇਕਬੁਦ੍ਧੋ ਇਤੋ ਸਤ੍ਤਮੇ ਦਿਵਸੇ ਆਹਾਰਂ ਲਭਿ, ਅਜ੍ਜ ਅਲਭਮਾਨੋ ਵਿਨਸ੍ਸਿਸ੍ਸਤਿ, ਇਮਞ੍ਚ ਵਿਨਾਸੇਸ੍ਸਾਮਿ, ਸੇਟ੍ਠਿਨੋ ਚ ਦਾਨਨ੍ਤਰਾਯਂ ਕਰਿਸ੍ਸਾਮੀ’’ਤਿ ਤਙ੍ਖਣਞ੍ਞੇਵ ਆਗਨ੍ਤ੍ਵਾ ਅਨ੍ਤਰਵਤ੍ਥੁਮ੍ਹਿ ਅਸੀਤਿਹਤ੍ਥਮਤ੍ਤਂ ਅਙ੍ਗਾਰਕਾਸੁਂ ਨਿਮ੍ਮਿਨਿ. ਸਾ ਖਦਿਰਙ੍ਗਾਰਪੁਣ੍ਣਾ ਸਮ੍ਪਜ੍ਜਲਿਤਾ ਸਜੋਤਿਭੂਤਾ ਅਵੀਚਿਮਹਾਨਿਰਯੋ ਵਿਯ ਖਾਯਿਤ੍ਥ. ਤਂ ਪਨ ਮਾਪੇਤ੍ਵਾ ਸਯਂ ਆਕਾਸੇ ਅਟ੍ਠਾਸਿ. ਪਤ੍ਤਾਹਰਣਤ੍ਥਾਯ ਗਚ੍ਛਮਾਨੋ ਪੁਰਿਸੋ ਤਂ ਦਿਸ੍ਵਾ ਮਹਾਭਯਪ੍ਪਤ੍ਤੋ ਨਿਵਤ੍ਤਿ. ਬੋਧਿਸਤ੍ਤੋ ‘‘ਕਿਂ, ਤਾਤ, ਨਿਵਤ੍ਤੋਸੀ’’ਤਿ ਪੁਚ੍ਛਿ. ਅਯਂ ਸਾਮਿ ਅਨ੍ਤਰਵਤ੍ਥੁਮ੍ਹਿ ਮਹਤੀ ਅਙ੍ਗਾਰਕਾਸੁ ਸਮ੍ਪਜ੍ਜਲਿਤਾ ਸਜੋਤਿਭੂਤਾਤਿ. ਅਥਞ੍ਞੋ ਅਥਞ੍ਞੋਤਿ ਏਵਂ ਆਗਤਾਗਤਾ ਸਬ੍ਬੇਪਿ ਭਯਪ੍ਪਤ੍ਤਾ ਵੇਗੇਨ ਪਲਾਯਿਂਸੁ.

ਬੋਧਿਸਤ੍ਤੋ ਚਿਨ੍ਤੇਸਿ ‘‘ਅਜ੍ਜ ਮਯ੍ਹਂ ਦਾਨਨ੍ਤਰਾਯਂ ਕਾਤੁਕਾਮੋ ਵਸਵਤ੍ਤੀ ਮਾਰੋ ਉਯ੍ਯੁਤ੍ਤੋ ਭਵਿਸ੍ਸਤਿ, ਨ ਖੋ ਪਨ ਜਾਨਾਤਿ ਮਾਰਸਤੇਨ ਮਾਰਸਹਸ੍ਸੇਨਪਿ ਮਯ੍ਹਂ ਅਕਮ੍ਪਿਯਭਾਵਂ, ਅਜ੍ਜ ਦਾਨਿ ਮਯ੍ਹਂ ਵਾ ਮਾਰਸ੍ਸ ਵਾ ਬਲਮਹਨ੍ਤਤਂ, ਆਨੁਭਾਵਮਹਨ੍ਤਤਂ ਜਾਨਿਸ੍ਸਾਮੀ’’ਤਿ ਤਂ ਯਥਾਸਜ੍ਜਿਤਮੇਵ ਭਤ੍ਤਪਾਤਿਂ ਸਯਂ ਆਦਾਯ ਗੇਹਾ ਨਿਕ੍ਖਮ੍ਮ ਅਙ੍ਗਾਰਕਾਸੁਤਟੇ ਠਤ੍ਵਾ ਆਕਾਸਂ ਉਲ੍ਲੋਕੇਤ੍ਵਾ ਮਾਰਂ ਦਿਸ੍ਵਾ ‘‘ਕੋਸਿ ਤ੍ਵ’’ਨ੍ਤਿ ਆਹ. ‘‘ਅਹਂ, ਮਾਰੋ’’ਤਿ. ‘‘ਅਯਂ ਅਙ੍ਗਾਰਕਾਸੁ ਤਯਾ ਨਿਮ੍ਮਿਤਾ’’ਤਿ? ‘‘ਆਮ, ਮਯਾ’’ਤਿ. ‘‘ਕਿਮਤ੍ਥਾਯਾ’’ਤਿ. ‘‘ਤਵ ਦਾਨਸ੍ਸ ਅਨ੍ਤਰਾਯਕਰਣਤ੍ਥਾਯ ਚ ਪਚ੍ਚੇਕਬੁਦ੍ਧਸ੍ਸ ਚ ਜੀਵਿਤਨਾਸਨਤ੍ਥਾਯਾ’’ਤਿ. ਬੋਧਿਸਤ੍ਤੋ ‘‘ਨੇਵ ਤੇ ਅਹਂ ਅਤ੍ਤਨੋ ਦਾਨਸ੍ਸ ਅਨ੍ਤਰਾਯਂ, ਨ ਪਚ੍ਚੇਕਬੁਦ੍ਧਸ੍ਸ ਜੀਵਿਤਨ੍ਤਰਾਯਂ ਕਾਤੁਂ ਦਸ੍ਸਾਮਿ, ਅਜ੍ਜ ਦਾਨਿ ਮਯ੍ਹਂ ਵਾ ਤੁਯ੍ਹਂ ਵਾ ਬਲਮਹਨ੍ਤਤਂ, ਆਨੁਭਾਵਮਹਨ੍ਤਤਂ ਜਾਨਿਸ੍ਸਾਮੀ’’ਤਿ ਅਙ੍ਗਾਰਕਾਸੁਤਟੇ ਠਤ੍ਵਾ ‘‘ਭਨ੍ਤੇ, ਪਚ੍ਚੇਕਬੁਦ੍ਧ ਅਹਂ ਇਮਿਸ੍ਸਾ ਅਙ੍ਗਾਰਕਾਸੁਯਾ ਅਧੋਸੀਸੋ ਪਤਮਾਨੋਪਿ ਨ ਨਿਵਤ੍ਤਿਸ੍ਸਾਮਿ, ਕੇਵਲਂ ਤੁਮ੍ਹੇ ਮਯਾ ਦਿਨ੍ਨਂ ਭੋਜਨਂ ਪਟਿਗ੍ਗਣ੍ਹਥਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੪੦. ‘‘ਕਾਮਂ ਪਤਾਮਿ ਨਿਰਯਂ, ਉਦ੍ਧਂਪਾਦੋ ਅਵਂਸਿਰੋ;

ਨਾਨਰਿਯਂ ਕਰਿਸ੍ਸਾਮਿ, ਹਨ੍ਦ ਪਿਣ੍ਡਂ ਪਟਿਗ੍ਗਹਾ’’ਤਿ.

ਤਤ੍ਥਾਯਂ ਪਿਣ੍ਡਤ੍ਥੋ – ਭਨ੍ਤੇ, ਪਚ੍ਚੇਕਵਰਬੁਦ੍ਧ ਸਚੇਪਹਂ ਤੁਮ੍ਹਾਕਂ ਪਿਣ੍ਡਪਾਤਂ ਦੇਨ੍ਤੋ ਏਕਂਸੇਨੇਵ ਇਮਂ ਨਿਰਯਂ ਉਦ੍ਧਂਪਾਦੋ ਅਵਂਸਿਰੋ ਹੁਤ੍ਵਾ ਪਤਾਮਿ, ਤਥਾਪਿ ਯਦਿਦਂ ਅਦਾਨਞ੍ਚ ਅਸੀਲਞ੍ਚ ਅਰਿਯੇਹਿ ਅਕਤ੍ਤਬ੍ਬਤ੍ਤਾ ਅਨਰਿਯੇਹਿ ਚ ਕਤ੍ਤਬ੍ਬਤ੍ਤਾ ‘‘ਅਨਰਿਯ’’ਨ੍ਤਿ ਵੁਚ੍ਚਤਿ, ‘‘ਨ ਤਂ ਅਨਰਿਯਂ ਕਰਿਸ੍ਸਾਮਿ, ਹਨ੍ਦ ਇਮਂ ਮਯਾ ਦੀਯਮਾਨਂ ਪਿਣ੍ਡਂ ਪਟਿਗ੍ਗਹ ਪਟਿਗ੍ਗਣ੍ਹਾਹੀ’’ਤਿ. ਏਤ੍ਥ ਚ ਹਨ੍ਦਾਤਿ ਵੋਸ੍ਸਗ੍ਗਤ੍ਥੇ ਨਿਪਾਤੋ.

ਏਵਂ ਵਤ੍ਵਾ ਬੋਧਿਸਤ੍ਤੋ ਦਲ਼੍ਹਸਮਾਦਾਨੇਨ ਭਤ੍ਤਪਾਤਿਂ ਗਹੇਤ੍ਵਾ ਅਙ੍ਗਾਰਕਾਸੁਮਤ੍ਥਕੇਨ ਪਕ੍ਖਨ੍ਤੋ, ਤਾਵਦੇਵ ਅਸੀਤਿਹਤ੍ਥਗਮ੍ਭੀਰਾਯ ਅਙ੍ਗਾਰਕਾਸੁਯਾ ਤਲਤੋ ਉਪਰੂਪਰਿਜਾਤਂ ਸਤਪਤ੍ਤਪੁਪ੍ਫਿਤਂ ਏਕਂ ਮਹਾਪਦੁਮਂ ਉਗ੍ਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਾਦੇ ਸਮ੍ਪਟਿਚ੍ਛਿ. ਤਤੋ ਮਹਾਤੁਮ੍ਬਮਤ੍ਤਾ ਰੇਣੁ ਉਗ੍ਗਨ੍ਤ੍ਵਾ ਮਹਾਸਤ੍ਤਸ੍ਸ ਮੁਦ੍ਧਨਿ ਠਤ੍ਵਾ ਸਕਲਸਰੀਰਂ ਸੁਵਣ੍ਣਚੁਣ੍ਣਸਮੋਕਿਣ੍ਣਮਿਵ ਅਕਾਸਿ. ਸੋ ਪਦੁਮਕਣ੍ਣਿਕਾਯ ਠਤ੍ਵਾ ਨਾਨਗ੍ਗਰਸਭੋਜਨਂ ਪਚ੍ਚੇਕਬੁਦ੍ਧਸ੍ਸ ਪਤ੍ਤੇ ਪਤਿਟ੍ਠਾਪੇਸਿ. ਸੋ ਤਂ ਪਟਿਗ੍ਗਹੇਤ੍ਵਾ ਅਨੁਮੋਦਨਂ ਕਤ੍ਵਾ ਪਤ੍ਤਂ ਆਕਾਸੇ ਖਿਪਿਤ੍ਵਾ ਪਸ੍ਸਨ੍ਤਸ੍ਸੇਵ ਮਹਾਜਨਸ੍ਸ ਸਯਮ੍ਪਿ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਨਾਨਪ੍ਪਕਾਰਂ ਵਲਾਹਕਪਨ੍ਤਿਂ ਮਦ੍ਦਮਾਨੋ ਵਿਯ ਹਿਮਵਨ੍ਤਮੇਵ ਗਤੋ. ਮਾਰੋਪਿ ਪਰਾਜਿਤੋ ਦੋਮਨਸ੍ਸਂ ਪਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਗਤੋ. ਬੋਧਿਸਤ੍ਤੋ ਪਨ ਪਦੁਮਕਣ੍ਣਿਕਾਯ ਠਿਤਕੋਵ ਮਹਾਜਨਸ੍ਸ ਦਾਨਸੀਲਸਂਵਣ੍ਣਨੇਨ ਧਮ੍ਮਂ ਦੇਸੇਤ੍ਵਾ ਮਹਾਜਨੇਨ ਪਰਿਵੁਤੋ ਅਤ੍ਤਨੋ ਨਿਵੇਸਨਮੇਵ ਪਵਿਸਿਤ੍ਵਾ ਯਾਵਜੀਵਂ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ‘‘ਨਯਿਦਂ, ਗਹਪਤਿ, ਅਚ੍ਛਰਿਯਂ, ਯਂ ਤ੍ਵਂ ਏਵਂ ਦਸ੍ਸਨਸਮ੍ਪਨ੍ਨੋ ਏਤਰਹਿ ਦੇਵਤਾਯ ਨ ਕਮ੍ਪਿਤੋ, ਪੁਬ੍ਬੇ ਪਣ੍ਡਿਤੇਹਿ ਕਤਮੇਵ ਅਚ੍ਛਰਿਯ’’ਨ੍ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਪਚ੍ਚੇਕਬੁਦ੍ਧੋ ਤਤ੍ਥੇਵ ਪਰਿਨਿਬ੍ਬਾਯਿ, ਮਾਰਂ ਪਰਾਜੇਤ੍ਵਾ ਪਦੁਮਕਣ੍ਣਿਕਾਯ ਠਤ੍ਵਾ ਪਚ੍ਚੇਕਬੁਦ੍ਧਸ੍ਸ ਪਿਣ੍ਡਪਾਤਦਾਯਕੋ ਬਾਰਾਣਸਿਸੇਟ੍ਠਿ ਪਨ ਅਹਮੇਵ ਅਹੋਸਿ’’ਨ੍ਤਿ.

ਖਦਿਰਙ੍ਗਾਰਜਾਤਕਵਣ੍ਣਨਾ ਦਸਮਾ.