੩. ਕੁਰੁਙ੍ਗਵਗ੍ਗੋ

[੨੧] ੧. ਕੁਰੁਙ੍ਗਮਿਗਜਾਤਕਵਣ੍ਣਨਾ

ਞਾਤਮੇਤਂ ਕੁਰੁਙ੍ਗਸ੍ਸਾਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਏਕਸ੍ਮਿਞ੍ਹਿ ਸਮਯੇ ਧਮ੍ਮਸਭਾਯਂ ਸਨ੍ਨਿਪਤਿਤਾ ਭਿਕ੍ਖੂ ‘‘ਆਵੁਸੋ ਦੇਵਦਤ੍ਤੋ ਤਥਾਗਤਸ੍ਸ ਘਾਤਨਤ੍ਥਾਯ ਧਨੁਗ੍ਗਹੇ ਪਯੋਜੇਸਿ, ਸਿਲਂ ਪਵਿਜ੍ਝਿ, ਧਨਪਾਲਂ ਵਿਸ੍ਸਜ੍ਜੇਸਿ, ਸਬ੍ਬਥਾਪਿ ਦਸਬਲਸ੍ਸ ਵਧਾਯ ਪਰਿਸਕ੍ਕਤੀ’’ਤਿ ਦੇਵਦਤ੍ਤਸ੍ਸ ਅਵਣ੍ਣਂ ਕਥੇਨ੍ਤਾ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸਿਨ੍ਨੋ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿ. ਭਨ੍ਤੇ, ਦੇਵਦਤ੍ਤੋ ਤੁਮ੍ਹਾਕਂ ਵਧਾਯ ਪਰਿਸਕ੍ਕਤੀਤਿ ਤਸ੍ਸ ਅਗੁਣਕਥਾਯ ਸਨ੍ਨਿਸਿਨ੍ਨਾਮ੍ਹਾਤਿ. ਸਤ੍ਥਾ ‘‘ਨ, ਭਿਕ੍ਖਵੇ, ਦੇਵਦਤ੍ਤੋ ਇਦਾਨੇਵ ਮਮ ਵਧਾਯ ਪਰਿਸਕ੍ਕਤਿ, ਪੁਬ੍ਬੇਪਿ ਮਮ ਵਧਾਯ ਪਰਿਸਕ੍ਕਿਯੇਵ, ਨ ਚ ਪਨ ਮਂ ਵਧਿਤੁਂ ਅਸਕ੍ਖੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕੁਰੁਙ੍ਗਮਿਗੋ ਹੁਤ੍ਵਾ ਏਕਸ੍ਮਿਂ ਅਰਞ੍ਞਾਯਤਨੇ ਫਲਾਨਿ ਖਾਦਨ੍ਤੋ ਵਸਤਿ. ਸੋ ਏਕਸ੍ਮਿਂ ਕਾਲੇ ਫਲਸਮ੍ਪਨ੍ਨੇ ਸੇਪਣ੍ਣਿਰੁਕ੍ਖੇ ਸੇਪਣ੍ਣਿਫਲਾਨਿ ਖਾਦਤਿ. ਅਥੇਕੋ ਗਾਮਵਾਸੀ ਅਟ੍ਟਕਲੁਦ੍ਦਕੋ ਫਲਰੁਕ੍ਖਮੂਲੇਸੁ ਮਿਗਾਨਂ ਪਦਾਨਿ ਉਪਧਾਰੇਤ੍ਵਾ ਉਪਰਿਰੁਕ੍ਖੇ ਅਟ੍ਟਕਂ ਬਨ੍ਧਿਤ੍ਵਾ ਤਤ੍ਥ ਨਿਸੀਦਿਤ੍ਵਾ ਫਲਾਨਿ ਖਾਦਿਤੁਂ ਆਗਤਾਗਤੇ ਮਿਗੇ ਸਤ੍ਤਿਯਾ ਵਿਜ੍ਝਿਤ੍ਵਾ ਤੇਸਂ ਮਂਸਂ ਵਿਕ੍ਕਿਣਨ੍ਤੋ ਜੀਵਿਕਂ ਕਪ੍ਪੇਤਿ. ਸੋ ਏਕਦਿਵਸਂ ਤਸ੍ਮਿਂ ਰੁਕ੍ਖਮੂਲੇ ਬੋਧਿਸਤ੍ਤਸ੍ਸ ਪਦਵਲ਼ਞ੍ਜਂ ਦਿਸ੍ਵਾ ਤਸ੍ਮਿਂ ਸੇਪਣ੍ਣਿਰੁਕ੍ਖੇ ਅਟ੍ਟਕਂ ਬਨ੍ਧਿਤ੍ਵਾ ਪਾਤੋਵ ਭੁਞ੍ਜਿਤ੍ਵਾ ਸਤ੍ਤਿਂ ਆਦਾਯ ਵਨਂ ਪਵਿਸਿਤ੍ਵਾ ਤਂ ਰੁਕ੍ਖਂ ਆਰੁਹਿਤ੍ਵਾ ਅਟ੍ਟਕੇ ਨਿਸੀਦਿ. ਬੋਧਿਸਤ੍ਤੋਪਿ ਪਾਤੋਵ ਵਸਨਟ੍ਠਾਨਾ ਨਿਕ੍ਖਮਿਤ੍ਵਾ ‘‘ਸੇਪਣ੍ਣਿਫਲਾਨਿ ਖਾਦਿਸ੍ਸਾਮੀ’’ਤਿ ਆਗਮ੍ਮ ਤਂ ਰੁਕ੍ਖਮੂਲਂ ਸਹਸਾਵ ਅਪਵਿਸਿਤ੍ਵਾ ‘‘ਕਦਾਚਿ ਅਟ੍ਟਕਲੁਦ੍ਦਕਾ ਰੁਕ੍ਖੇਸੁ ਅਟ੍ਟਕਂ ਬਨ੍ਧਨ੍ਤਿ, ਅਤ੍ਥਿ ਨੁ ਖੋ ਏਵਰੂਪੋ ਉਪਦ੍ਦਵੋ’’ਤਿ ਪਰਿਗ੍ਗਣ੍ਹਨ੍ਤੋ ਬਾਹਿਰਤੋਵ ਅਟ੍ਠਾਸਿ.

ਲੁਦ੍ਦਕੋਪਿ ਬੋਧਿਸਤ੍ਤਸ੍ਸ ਅਨਾਗਮਨਭਾਵਂ ਞਤ੍ਵਾ ਅਟ੍ਟਕੇ ਨਿਸਿਨ੍ਨੋਵ ਸੇਪਣ੍ਣਿਫਲਾਨਿ ਖਿਪਿਤ੍ਵਾ ਖਿਪਿਤ੍ਵਾ ਤਸ੍ਸ ਪੁਰਤੋ ਪਾਤੇਸਿ. ਬੋਧਿਸਤ੍ਤੋ ‘‘ਇਮਾਨਿ ਫਲਾਨਿ ਆਗਨ੍ਤ੍ਵਾ ਮਯ੍ਹਂ ਪੁਰਤੋ ਪਤਨ੍ਤਿ, ਅਤ੍ਥਿ ਨੁ ਖੋ ਉਪਰਿ ਲੁਦ੍ਦਕੋ’’ਤਿ ਪੁਨਪ੍ਪੁਨਂ ਉਲ੍ਲੋਕੇਨ੍ਤੋ ਲੁਦ੍ਦਕਂ ਦਿਸ੍ਵਾ ਅਪਸ੍ਸਨ੍ਤੋ ਵਿਯ ਹੁਤ੍ਵਾ ‘‘ਅਮ੍ਭੋ, ਰੁਕ੍ਖ-ਪੁਬ੍ਬੇ ਤ੍ਵਂ ਓਲਮ੍ਬਕਂ ਚਾਰੇਨ੍ਤੋ ਵਿਯ ਉਜੁਕਮੇਵ ਫਲਾਨਿ ਪਾਤੇਸਿ, ਅਜ੍ਜ ਪਨ ਤੇ ਰੁਕ੍ਖਧਮ੍ਮੋ ਪਰਿਚ੍ਚਤ੍ਤੋ, ਏਵਂ ਤਯਾ ਰੁਕ੍ਖਧਮ੍ਮੇ ਪਰਿਚ੍ਚਤ੍ਤੇ ਅਹਮ੍ਪਿ ਅਞ੍ਞਂ ਰੁਕ੍ਖਮੂਲਂ ਉਪਸਙ੍ਕਮਿਤ੍ਵਾ ਮਯ੍ਹਂ ਆਹਾਰਂ ਪਰਿਯੇਸਿਸ੍ਸਾਮੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੧. ‘‘ਞਾਤਮੇਤਂ ਕੁਰੁਙ੍ਗਸ੍ਸ, ਯਂ ਤ੍ਵਂ ਸੇਪਣ੍ਣਿ ਸੇਯ੍ਯਸਿ;

ਅਞ੍ਞਂ ਸੇਪਣ੍ਣਿ ਗਚ੍ਛਾਮਿ, ਨ ਮੇ ਤੇ ਰੁਚ੍ਚਤੇ ਫਲ’’ਨ੍ਤਿ.

ਤਤ੍ਥ ਞਾਤਨ੍ਤਿ ਪਾਕਟਂ ਜਾਤਂ. ਏਤਨ੍ਤਿ ਇਦਂ. ਕੁਰੁਙ੍ਗਸ੍ਸਾਤਿ ਕੁਰੁਙ੍ਗਮਿਗਸ੍ਸ. ਯਂ ਤ੍ਵਂ ਸੇਪਣ੍ਣਿ ਸੇਯ੍ਯਸੀਤਿ ਯਂ ਤ੍ਵਂ ਅਮ੍ਭੋ ਸੇਪਣ੍ਣਿਰੁਕ੍ਖ ਪੁਰਤੋ ਫਲਾਨਿ ਪਾਤਯਮਾਨੋ ਸੇਯ੍ਯਸਿ ਵਿਸੇਯ੍ਯਸਿ ਵਿਸਿਣ੍ਣਫਲੋ ਹੋਸਿ, ਤਂ ਸਬ੍ਬਂ ਕੁਰੁਙ੍ਗਮਿਗਸ੍ਸ ਪਾਕਟਂ ਜਾਤਂ. ਨ ਮੇ ਤੇ ਰੁਚ੍ਚਤੇ ਫਲਨ੍ਤਿ ਏਵਂ ਫਲਂ ਦਦਮਾਨਾਯ ਨ ਮੇ ਤਵ ਫਲਂ ਰੁਚ੍ਚਤਿ, ਤਿਟ੍ਠ ਤ੍ਵਂ, ਅਹਂ ਅਞ੍ਞਤ੍ਥ ਗਚ੍ਛਿਸ੍ਸਾਮੀਤਿ ਅਗਮਾਸਿ.

ਅਥਸ੍ਸ ਲੁਦ੍ਦਕੋ ਅਟ੍ਟਕੇ ਨਿਸਿਨ੍ਨੋਵ ਸਤ੍ਤਿਂ ਖਿਪਿਤ੍ਵਾ ‘‘ਗਚ੍ਛ, ਵਿਰਦ੍ਧੋ ਦਾਨਿਮ੍ਹਿ ਤ’’ਨ੍ਤਿ ਆਹ. ਬੋਧਿਸਤ੍ਤੋ ਨਿਵਤ੍ਤਿਤ੍ਵਾ ਠਿਤੋ ਆਹ ‘‘ਅਮ੍ਭੋ ਪੁਰਿਸ, ਇਦਾਨੀਸਿ ਕਿਞ੍ਚਾਪਿ ਮਂ ਵਿਰਦ੍ਧੋ, ਅਟ੍ਠ ਪਨ ਮਹਾਨਿਰਯੇ ਸੋਲ਼ਸਉਸ੍ਸਦਨਿਰਯੇ ਪਞ੍ਚਵਿਧਬਨ੍ਧਨਾਦੀਨਿ ਚ ਕਮ੍ਮਕਾਰਣਾਨਿ ਅਵਿਰਦ੍ਧੋਯੇਵਾਸੀ’’ਤਿ. ਏਵਞ੍ਚ ਪਨ ਵਤ੍ਵਾ ਪਲਾਯਿਤ੍ਵਾ ਯਥਾਰੁਚਿਂ ਗਤੋ, ਲੁਦ੍ਦੋਪਿ ਓਤਰਿਤ੍ਵਾ ਯਥਾਰੁਚਿਂ ਗਤੋ.

ਸਤ੍ਥਾਪਿ ‘‘ਨ, ਭਿਕ੍ਖਵੇ, ਦੇਵਦਤ੍ਤੋ ਇਦਾਨੇਵ ਮਮ ਵਧਾਯ ਪਰਿਸਕ੍ਕਤਿ, ਪੁਬ੍ਬੇਪਿ ਪਰਿਸਕ੍ਕਿਯੇਵ, ਨ ਚ ਪਨ ਮਂ ਵਧਿਤੁਂ ਅਸਕ੍ਖੀ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਅਟ੍ਟਕਲੁਦ੍ਦਕੋ ਦੇਵਦਤ੍ਤੋ ਅਹੋਸਿ, ਕੁਰੁਙ੍ਗਮਿਗੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕੁਰੁਙ੍ਗਮਿਗਜਾਤਕਵਣ੍ਣਨਾ ਪਠਮਾ.

[੨੨] ੨. ਕੁਕ੍ਕੁਰਜਾਤਕਵਣ੍ਣਨਾ

ਯੇ ਕੁਕ੍ਕੁਰਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਞਾਤਤ੍ਥਚਰਿਯਂ ਆਰਬ੍ਭ ਕਥੇਸਿ. ਸਾ ਦ੍ਵਾਦਸਕਨਿਪਾਤੇ ਭਦ੍ਦਸਾਲਜਾਤਕੇ ਆਵਿਭਵਿਸ੍ਸਤਿ. ਇਦਂ ਪਨ ਵਤ੍ਥੁਂ ਪਤਿਟ੍ਠਪੇਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਥਾਰੂਪਂ ਕਮ੍ਮਂ ਪਟਿਚ੍ਚ ਕੁਕ੍ਕੁਰਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਨੇਕਸਤਕੁਕ੍ਕੁਰਪਰਿਵੁਤੋ ਮਹਾਸੁਸਾਨੇ ਵਸਤਿ. ਅਥੇਕਦਿਵਸਂ ਰਾਜਾ ਸੇਤਸਿਨ੍ਧਵਯੁਤ੍ਤਂ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਰਥਂ ਆਰੁਯ੍ਹ ਉਯ੍ਯਾਨਂ ਗਨ੍ਤ੍ਵਾ ਤਤ੍ਥ ਦਿਵਸਭਾਗਂ ਕੀਲ਼ਿਤ੍ਵਾ ਅਤ੍ਥਙ੍ਗਤੇ ਸੂਰਿਯੇ ਨਗਰਂ ਪਾਵਿਸਿ. ਤਸ੍ਸ ਤਂ ਰਥਵਰਤ੍ਤਂ ਯਥਾਨਦ੍ਧਮੇਵ ਰਾਜਙ੍ਗਣੇ ਠਪਯਿਂਸੁ, ਸੋ ਰਤ੍ਤਿਭਾਗੇ ਦੇਵੇ ਵਸ੍ਸਨ੍ਤੇ ਤਿਨ੍ਤੋ. ਉਪਰਿਪਾਸਾਦਤੋ ਕੋਲੇਯ੍ਯਕਸੁਨਖਾ ਓਤਰਿਤ੍ਵਾ ਤਸ੍ਸ ਚਮ੍ਮਞ੍ਚ ਨਦ੍ਧਿਞ੍ਚ ਖਾਦਿਂਸੁ. ਪੁਨਦਿਵਸੇ ਰਞ੍ਞੋ ਆਰੋਚੇਸੁਂ ‘‘ਦੇਵ, ਨਿਦ੍ਧਮਨਮੁਖੇਨ ਸੁਨਖਾ ਪਵਿਸਿਤ੍ਵਾ ਰਥਸ੍ਸ ਚਮ੍ਮਞ੍ਚ ਨਦ੍ਧਿਞ੍ਚ ਖਾਦਿਂਸੂ’’ਤਿ. ਰਾਜਾ ਸੁਨਖਾਨਂ ਕੁਜ੍ਝਿਤ੍ਵਾ ‘‘ਦਿਟ੍ਠਦਿਟ੍ਠਟ੍ਠਾਨੇ ਸੁਨਖੇ ਘਾਤੇਥਾ’’ਤਿ ਆਹ. ਤਤੋ ਪਟ੍ਠਾਯ ਸੁਨਖਾਨਂ ਮਹਾਬ੍ਯਸਨਂ ਉਦਪਾਦਿ. ਤੇ ਦਿਟ੍ਠਿਦਿਟ੍ਠਟ੍ਠਾਨੇ ਘਾਤਿਯਮਾਨਾ ਪਲਾਯਿਤ੍ਵਾ ਸੁਸਾਨਂ ਗਨ੍ਤ੍ਵਾ ਬੋਧਿਸਤ੍ਤਸ੍ਸ ਸਨ੍ਤਿਕਂ ਅਗਮਂਸੁ.

ਬੋਧਿਸਤ੍ਤੋ ‘ਤੁਮ੍ਹੇ ਬਹੂ ਸਨ੍ਨਿਪਤਿਤਾ, ਕਿਂ ਨੁ ਖੋ ਕਾਰਣ’’ਨ੍ਤਿ ਪੁਚ੍ਛਿ. ਤੇ ‘‘ਅਨ੍ਤੇਪੁਰੇ ਕਿਰ ਰਥਸ੍ਸ ਚਮ੍ਮਞ੍ਚ ਨਦ੍ਧਿ ਚ ਸੁਨਖੇਹਿ ਖਾਦਿਤਾ’ਤਿ ਕੁਦ੍ਧੋ ਰਾਜਾ ਸੁਨਖਵਧਂ ਆਣਾਪੇਸਿ, ਬਹੂ ਸੁਨਖਾ ਵਿਨਸ੍ਸਨ੍ਤਿ, ਮਹਾਭਯਂ ਉਪ੍ਪਨ੍ਨ’’ਨ੍ਤਿ ਆਹਂਸੁ. ਬੋਧਿਸਤ੍ਤੋ ਚਿਨ੍ਤੇਸਿ ‘‘ਆਰਕ੍ਖਟ੍ਠਾਨੇ ਬਹਿ ਸੁਨਖਾਨਂ ਓਕਾਸੋ ਨਤ੍ਥਿ, ਅਨ੍ਤੋਰਾਜਨਿਵੇਸਨੇ ਕੋਲੇਯ੍ਯਕਸੁਨਖਾਨਮੇਵ ਤਂ ਕਮ੍ਮਂ ਭਵਿਸ੍ਸਤਿ. ਇਦਾਨਿ ਪਨ ਚੋਰਾਨਂ ਕਿਞ੍ਚਿ ਭਯਂ ਨਤ੍ਥਿ, ਅਚੋਰਾ ਮਰਣਂ ਲਭਨ੍ਤਿ, ਯਂਨੂਨਾਹਂ ਚੋਰੇ ਰਞ੍ਞੋ ਦਸ੍ਸੇਤ੍ਵਾ ਞਾਤਿਸਙ੍ਘਸ੍ਸ ਜੀਵਿਤਦਾਨਂ ਦਦੇਯ੍ਯ’’ਨ੍ਤਿ. ਸੋ ਞਾਤਕੇ ਸਮਸ੍ਸਾਸੇਤ੍ਵਾ ‘‘ਤੁਮ੍ਹੇ ਮਾ ਭਾਯਿਤ੍ਥ, ਅਹਂ ਵੋ ਅਭਯਂ ਆਹਰਿਸ੍ਸਾਮਿ, ਯਾਵ ਰਾਜਾਨਂ ਪਸ੍ਸਾਮਿ, ਤਾਵ ਇਧੇਵ ਹੋਥਾ’’ਤਿ ਪਾਰਮਿਯੋ ਆਵਜ੍ਜੇਤ੍ਵਾ ਮੇਤ੍ਤਾਭਾਵਨਂ ਪੁਰੇਚਾਰਿਕਂ ਕਤ੍ਵਾ ‘‘ਮਯ੍ਹਂ ਉਪਰਿ ਲੇਡ੍ਡੁਂ ਵਾ ਮੁਗ੍ਗਰਂ ਵਾ ਮਾ ਕੋਚਿ ਖਿਪਿਤੁਂ ਉਸ੍ਸਹੀ’’ਤਿ ਅਧਿਟ੍ਠਾਯ ਏਕਕੋਵ ਅਨ੍ਤੋਨਗਰਂ ਪਾਵਿਸਿ. ਅਥ ਨਂ ਦਿਸ੍ਵਾ ਏਕਸਤ੍ਤੋਪਿ ਕੁਜ੍ਝਿਤ੍ਵਾ ਓਲੋਕੇਨ੍ਤੋ ਨਾਮ ਨਾਹੋਸਿ. ਰਾਜਾਪਿ ਸੁਨਖਵਧਂ ਆਣਾਪੇਤ੍ਵਾ ਸਯਂ ਵਿਨਿਚ੍ਛਯੇ ਨਿਸਿਨ੍ਨੋ ਹੋਤਿ. ਬੋਧਿਸਤ੍ਤੋ ਤਤ੍ਥੇਵ ਗਨ੍ਤ੍ਵਾ ਪਕ੍ਖਨ੍ਦਿਤ੍ਵਾ ਰਞ੍ਞੋ ਆਸਨਸ੍ਸ ਹੇਟ੍ਠਾ ਪਾਵਿਸਿ. ਅਥ ਨਂ ਰਾਜਪੁਰਿਸਾ ਨੀਹਰਿਤੁਂ ਆਰਦ੍ਧਾ, ਰਾਜਾ ਪਨ ਵਾਰੇਸਿ.

ਸੋ ਥੋਕਂ ਵਿਸ੍ਸਮਿਤ੍ਵਾ ਹੇਟ੍ਠਾਸਨਾ ਨਿਕ੍ਖਮਿਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ‘‘ਦੇਵ, ਤੁਮ੍ਹੇ ਕੁਕ੍ਕੁਰੇ ਮਾਰਾਪੇਥਾ’’ਤਿ ਪੁਚ੍ਛਿ. ‘‘ਆਮ, ਮਾਰਾਪੇਮਹ’’ਨ੍ਤਿ. ‘‘ਕੋ ਨੇਸਂ ਅਪਰਾਧੋ ਨਰਿਨ੍ਦਾ’’ਤਿ? ‘‘ਰਥਸ੍ਸ ਮੇ ਪਰਿਵਾਰਚਮ੍ਮਞ੍ਚ ਨਦ੍ਧਿਞ੍ਚ ਖਾਦਿਂਸੂ’’ਤਿ. ‘‘ਯੇ ਖਾਦਿਂਸੁ, ਤੇ ਜਾਨਾਥਾ’’ਤਿ? ‘‘ਨ ਜਾਨਾਮਾ’’ਤਿ. ‘‘‘ਇਮੇ ਨਾਮ ਚਮ੍ਮਖਾਦਕਚੋਰਾ’ਤਿ ਤਥਤੋ ਅਜਾਨਿਤ੍ਵਾ ਦਿਟ੍ਠਦਿਟ੍ਠਟ੍ਠਾਨੇਯੇਵ ਮਾਰਾਪਨਂ ਨ ਯੁਤ੍ਤਂ, ਦੇਵਾ’’ਤਿ. ‘‘ਰਥਚਮ੍ਮਸ੍ਸ ਕੁਕ੍ਕੁਰੇਹਿ ਖਾਦਿਤਤ੍ਤਾ ‘ਦਿਟ੍ਠਦਿਟ੍ਠੇ ਸਬ੍ਬੇਵ ਮਾਰੇਥਾ’ਤਿ ਸੁਨਖਵਧਂ ਆਣਾਪੇਸਿ’’ਨ੍ਤਿ. ‘‘ਕਿਂ ਪਨ ਵੋ ਮਨੁਸ੍ਸਾ ਸਬ੍ਬੇਵ ਕੁਕ੍ਕੁਰੇ ਮਾਰੇਨ੍ਤਿ, ਉਦਾਹੁ ਮਰਣਂ ਅਲਭਨ੍ਤਾਪਿ ਅਤ੍ਥੀ’’ਤਿ? ‘‘ਅਤ੍ਥਿ, ਅਮ੍ਹਾਕਂ ਘਰੇ ਕੋਲੇਯ੍ਯਕਾ ਮਰਣਂ ਨ ਲਭਨ੍ਤੀ’’ਤਿ. ਮਹਾਰਾਜ ਇਦਾਨੇਵ ਤੁਮ੍ਹੇ ‘‘ਰਥਚਮ੍ਮਸ੍ਸ ਕੁਕ੍ਕੁਰੇਹਿ ਖਾਦਿਤਤ੍ਤਾ ‘ਦਿਟ੍ਠਦਿਟ੍ਠੇ ਸਬ੍ਬੇਵ ਮਾਰੇਥਾ’ਤਿ ਸੁਨਖਵਧਂ ਆਣਾਪੇਸਿ’’ਨ੍ਤਿ ਅਵੋਚੁਤ੍ਥ, ਇਦਾਨਿ ਪਨ ‘‘ਅਮ੍ਹਾਕਂ ਘਰੇ ਕੋਲੇਯ੍ਯਕਾ ਮਰਣਂ ਨ ਲਭਨ੍ਤੀ’’ਤਿ ਵਦੇਥ. ‘‘ਨਨੁ ਏਵਂ ਸਨ੍ਤੇ ਤੁਮ੍ਹੇ ਛਨ੍ਦਾਦਿਵਸੇਨ ਅਗਤਿਗਮਨਂ ਗਚ੍ਛਥ, ਅਗਤਿਗਮਨਞ੍ਚ ਨਾਮ ਨ ਯੁਤ੍ਤਂ, ਨ ਚ ਰਾਜਧਮ੍ਮੋ, ਰਞ੍ਞਾ ਨਾਮ ਕਾਰਣਗਵੇਸਕੇਨ ਤੁਲਾਸਦਿਸੇਨ ਭਵਿਤੁਂ ਵਟ੍ਟਤਿ, ਇਦਾਨਿ ਚ ਕੋਲੇਯ੍ਯਕਾ ਮਰਣਂ ਨ ਲਭਨ੍ਤਿ, ਦੁਬ੍ਬਲਸੁਨਖਾਵ ਲਭਨ੍ਤਿ, ਏਵਂ ਸਨ੍ਤੇ ਨਾਯਂ ਸਬ੍ਬਸੁਨਖਘਚ੍ਚਾ, ਦੁਬ੍ਬਲਘਾਤਿਕਾ ਨਾਮੇਸਾ’’ਤਿ. ਏਵਞ੍ਚ ਪਨ ਵਤ੍ਵਾ ਮਹਾਸਤ੍ਤੋ ਮਧੁਰਸ੍ਸਰਂ ਨਿਚ੍ਛਾਰੇਤ੍ਵਾ ‘‘ਮਹਾਰਾਜ, ਯਂ ਤੁਮ੍ਹੇ ਕਰੋਥ, ਨਾਯਂ ਧਮ੍ਮੋ’’ਤਿ ਰਞ੍ਞੋ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੨੨. ‘‘ਯੇ ਕੁਕ੍ਕੁਰਾ ਰਾਜਕੁਲਮ੍ਹਿ ਵਦ੍ਧਾ, ਕੋਲੇਯ੍ਯਕਾ ਵਣ੍ਣਬਲੂਪਪਨ੍ਨਾ;

ਤੇਮੇ ਨ ਵਜ੍ਝਾ ਮਯਮਸ੍ਮ ਵਜ੍ਝਾ, ਨਾਯਂ ਸਘਚ੍ਚਾ ਦੁਬ੍ਬਲਘਾਤਿਕਾਯ’’ਨ੍ਤਿ.

ਤਤ੍ਥ ਯੇ ਕੁਕ੍ਕੁਰਾਤਿ ਯੇ ਸੁਨਖਾ. ਯਥਾ ਹਿ ਧਾਰੁਣ੍ਹੋਪਿ ਪਸ੍ਸਾਵੋ ‘‘ਪੂਤਿਮੁਤ੍ਤ’’ਨ੍ਤਿ, ਤਦਹੁਜਾਤੋਪਿ ਸਿਙ੍ਗਾਲੋ ‘‘ਜਰਸਿਙ੍ਗਾਲੋ’’ਤਿ, ਕੋਮਲਾਪਿ ਗਲੋਚਿਲਤਾ ‘‘ਪੂਤਿਲਤਾ’’ਤਿ, ਸੁਵਣ੍ਣਵਣ੍ਣੋਪਿ ਕਾਯੋ ‘‘ਪੂਤਿਕਾਯੋ’’ਤਿ ਵੁਚ੍ਚਤਿ, ਏਵਮੇਵਂ ਵਸ੍ਸਸਤਿਕੋਪਿ ਸੁਨਖੋ ‘‘ਕੁਕ੍ਕੁਰੋ’’ਤਿ ਵੁਚ੍ਚਤਿ. ਤਸ੍ਮਾ ਮਹਲ੍ਲਕਾ ਕਾਯਬਲੂਪਪਨ੍ਨਾਪਿ ਤੇ ‘‘ਕੁਕ੍ਕੁਰਾ’’ਤ੍ਵੇਵ ਵੁਤ੍ਤਾ. ਵਦ੍ਧਾਤਿ ਵਡ੍ਢਿਤਾ. ਕੋਲੇਯ੍ਯਕਾਤਿ ਰਾਜਕੁਲੇ ਜਾਤਾ ਸਮ੍ਭੂਤਾ ਸਂਵਡ੍ਢਾ. ਵਣ੍ਣਬਲੂਪਪਨ੍ਨਾਤਿ ਸਰੀਰਵਣ੍ਣੇਨ ਚੇਵ ਕਾਯਬਲੇਨ ਚ ਸਮ੍ਪਨ੍ਨਾ. ਤੇਮੇ ਨ ਵਜ੍ਝਾਤਿ ਤੇ ਇਮੇ ਸਸ੍ਸਾਮਿਕਾ ਸਾਰਕ੍ਖਾ ਨ ਵਜ੍ਝਾ. ਮਯਮਸ੍ਮ ਵਜ੍ਝਾਤਿ ਅਸ੍ਸਾਮਿਕਾ ਅਨਾਰਕ੍ਖਾ ਮਯਂ ਵਜ੍ਝਾ ਨਾਮ ਜਾਤਾ. ਨਾਯਂ ਸਘਚ੍ਚਾਤਿ ਏਵਂ ਸਨ੍ਤੇ ਅਯਂ ਅਵਿਸੇਸੇਨ ਸਘਚ੍ਚਾ ਨਾਮ ਨ ਹੋਤਿ. ਦੁਬ੍ਬਲਘਾਤਿਕਾਯਨ੍ਤਿ ਅਯਂ ਪਨ ਦੁਬ੍ਬਲਾਨਂਯੇਵ ਘਾਤਨਤੋ ਦੁਬ੍ਬਲਘਾਤਿਕਾ ਨਾਮ ਹੋਤਿ. ਰਾਜੂਹਿ ਨਾਮ ਚੋਰਾ ਨਿਗ੍ਗਣ੍ਹਿਤਬ੍ਬਾ, ਨੋ ਅਚੋਰਾ. ਇਧ ਪਨ ਚੋਰਾਨਂ ਕਿਞ੍ਚਿ ਭਯਂ ਨਤ੍ਥਿ, ਅਚੋਰਾ ਮਰਣਂ ਲਭਨ੍ਤਿ. ਅਹੋ ਇਮਸ੍ਮਿਂ ਲੋਕੇ ਅਯੁਤ੍ਤਂ ਵਤ੍ਤਤਿ, ਅਹੋ ਅਧਮ੍ਮੋ ਵਤ੍ਤਤੀਤਿ.

ਰਾਜਾ ਬੋਧਿਸਤ੍ਤਸ੍ਸ ਵਚਰਂ ਸੁਤ੍ਵਾ ਆਹ – ‘‘ਜਾਨਾਸਿ ਤ੍ਵਂ, ਪਣ੍ਡਿਤ, ਅਸੁਕੇਹਿ ਨਾਮ ਰਥਚਮ੍ਮਂ ਖਾਦਿਤ’’ਨ੍ਤਿ? ‘‘ਆਮ, ਜਾਨਾਮੀ’’ਤਿ. ‘‘ਕੇਹਿ ਖਾਦਿਤ’’ਨ੍ਤਿ? ‘‘ਤੁਮ੍ਹਾਕਂ ਗੇਹੇ ਵਸਨਕੇਹਿ ਕੋਲੇਯ੍ਯਕਸੁਨਖੇਹੀ’’ਤਿ. ‘‘ਕਥਂ ਤੇਹਿ ਖਾਦਿਤਭਾਵੋ ਜਾਨਿਤਬ੍ਬੋ’’ਤਿ? ‘‘ਅਹਂ ਤੇਹਿ ਖਾਦਿਤਭਾਵਂ ਦਸ੍ਸੇਸਾਮੀ’’ਤਿ. ‘‘ਦਸ੍ਸੇਹਿ ਪਣ੍ਡਿਤਾ’’ਤਿ. ‘‘ਤੁਮ੍ਹਾਕਂ ਘਰੇ ਕੋਲੇਯ੍ਯਕਸੁਨਖੇ ਆਹਰਾਪੇਤ੍ਵਾ ਥੋਕਂ ਤਕ੍ਕਞ੍ਚ ਦਬ੍ਬਤਿਣਾਨਿ ਚ ਆਹਰਾਪੇਥਾ’’ਤਿ. ਰਾਜਾ ਤਥਾ ਅਕਾਸਿ. ਅਥ ਨਂ ਮਹਾਸਤ੍ਤੋ ‘‘ਇਮਾਨਿ ਤਿਣਾਨਿ ਤਕ੍ਕੇਨ ਮਦ੍ਦਾਪੇਤ੍ਵਾ ਏਤੇ ਸੁਨਖੇ ਪਾਯੇਥਾ’’ਤਿ ਆਹ. ਰਾਜਾ ਤਥਾ ਕਤ੍ਵਾ ਪਾਯਾਪੇਸਿ, ਪੀਤਾ ਪੀਤਾ ਸੁਨਖਾ ਸਦ੍ਧਿਂ ਚਮ੍ਮੇਹਿ ਵਮਿਂਸੁ. ਰਾਜਾ ‘‘ਸਬ੍ਬਞ੍ਞੁਬੁਦ੍ਧਸ੍ਸ ਬ੍ਯਾਕਰਣਂ ਵਿਯਾ’’ਤਿ ਤੁਟ੍ਠੋ ਬੋਧਿਸਤ੍ਤਸ੍ਸ ਸੇਤਚ੍ਛਤ੍ਤੇਨ ਪੂਜਂ ਅਕਾਸਿ. ਬੋਧਿਸਤ੍ਤੋ ‘‘ਧਮ੍ਮਂ ਚਰ, ਮਹਾਰਾਜ, ਮਾਤਾਪਿਤੂਸੁ ਖਤ੍ਤਿਯਾ’’ਤਿਆਦੀਹਿ (ਜਾ. ੨.੧੭.੩੯) ਤੇਸਕੁਣਜਾਤਕੇ ਆਗਤਾਹਿ ਦਸਹਿ ਧਮ੍ਮਚਰਿਯਗਾਥਾਹਿ ਰਞ੍ਞੋ ਧਮ੍ਮਂ ਦੇਸੇਤ੍ਵਾ ‘‘ਮਹਾਰਾਜ, ਇਤੋ ਪਟ੍ਠਾਯ ਅਪ੍ਪਮਤ੍ਤੋ ਹੋਹੀ’’ਤਿ ਰਾਜਾਨਂ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਸੇਤਚ੍ਛਤ੍ਤਂ ਰਞ੍ਞੋਵ ਪਟਿਅਦਾਸਿ.

ਰਾਜਾ ਮਹਾਸਤ੍ਤਸ੍ਸ ਧਮ੍ਮਕਥਂ ਸੁਤ੍ਵਾ ਸਬ੍ਬਸਤ੍ਤਾਨਂ ਅਭਯਂ ਦਤ੍ਵਾ ਬੋਧਿਸਤ੍ਤਂ ਆਦਿਂ ਕਤ੍ਵਾ ਸਬ੍ਬਸੁਨਖਾਨਂ ਅਤ੍ਤਨੋ ਭੋਜਨਸਦਿਸਮੇਵ ਨਿਚ੍ਚਭਤ੍ਤਂ ਪਟ੍ਠਪੇਤ੍ਵਾ ਬੋਧਿਸਤ੍ਤਸ੍ਸ ਓਵਾਦੇ ਠਿਤੋ ਯਾਵਤਾਯੁਕਂ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਕਾਲਂ ਕਤ੍ਵਾ ਦੇਵਲੋਕੇ ਉਪ੍ਪਜ੍ਜਿ. ਕੁਕ੍ਕੁਰੋਵਾਦੋ ਦਸ ਵਸ੍ਸਸਹਸ੍ਸਾਨਿ ਪਵਤ੍ਤਿ. ਬੋਧਿਸਤ੍ਤੋਪਿ ਯਾਵਤਾਯੁਕਂ ਠਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ‘‘ਨ, ਭਿਕ੍ਖਵੇ, ਤਥਾਗਤੋ ਇਦਾਨੇਵ ਞਾਤਕਾਨਂ ਅਤ੍ਥਂ ਚਰਤਿ, ਪੁਬ੍ਬੇਪਿ ਚਰਿਯੇਵਾ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਅਵਸੇਸਾ ਪਰਿਸਾ ਬੁਦ੍ਧਪਰਿਸਾ, ਕੁਕ੍ਕੁਰਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕੁਕ੍ਕੁਰਜਾਤਕਵਣ੍ਣਨਾ ਦੁਤਿਯਾ.

[੨੩] ੩. ਭੋਜਾਜਾਨੀਯਜਾਤਕਵਣ੍ਣਨਾ

ਅਪਿ ਪਸ੍ਸੇਨ ਸੇਮਾਨੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਓਸ੍ਸਟ੍ਠਵੀਰਿਯਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਤਸ੍ਮਿਞ੍ਹਿ ਸਮਯੇ ਸਤ੍ਥਾ ਤਂ ਭਿਕ੍ਖੁਂ ਆਮਨ੍ਤੇਤ੍ਵਾ ‘‘ਭਿਕ੍ਖੁ, ਪੁਬ੍ਬੇ ਪਣ੍ਡਿਤਾ ਅਨਾਯਤਨੇਪਿ ਵੀਰਿਯਂ ਅਕਂਸੁ, ਪਹਾਰਂ ਲਦ੍ਧਾਪਿ ਨੇਵ ਓਸ੍ਸਜਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਭੋਜਾਜਾਨੀਯਸਿਨ੍ਧਵਕੁਲੇ ਨਿਬ੍ਬਤ੍ਤੋ ਸਬ੍ਬਾਲਙ੍ਕਾਰਸਮ੍ਪਨ੍ਨੋ ਬਾਰਾਣਸਿਰਞ੍ਞੋ ਮਙ੍ਗਲਸ੍ਸੋ ਅਹੋਸਿ. ਸੋ ਸਤਸਹਸ੍ਸਗ੍ਘਨਿਕਾਯ ਸੁਵਣ੍ਣਪਾਤਿਯਂਯੇਵ ਨਾਨਗ੍ਗਰਸਸਮ੍ਪਨ੍ਨਂ ਤਿਵਸ੍ਸਿਕਗਨ੍ਧਸਾਲਿਭੋਜਨਂ ਭੁਞ੍ਜਤਿ, ਚਾਤੁਜ੍ਜਾਤਿਕਗਨ੍ਧੂਪਲਿਤ੍ਤਾਯਮੇਵ ਭੂਮਿਯਂ ਤਿਟ੍ਠਤਿ, ਤਂ ਠਾਨਂ ਰਤ੍ਤਕਮ੍ਬਲਸਾਣਿਪਰਿਕ੍ਖਿਤ੍ਤਂ ਉਪਰਿ ਸੁਵਣ੍ਣਤਾਰਕਖਚਿਤਚੇਲਵਿਤਾਨਂ ਸਮੋਸਰਿਤਗਨ੍ਧਦਾਮਮਾਲਾਦਾਮਂ ਅਵਿਜਹਿਤਗਨ੍ਧਤੇਲਪਦੀਪਂ ਹੋਤਿ. ਬਾਰਾਣਸਿਰਜ੍ਜਂ ਪਨ ਅਪਤ੍ਥੇਨ੍ਤਾ ਰਾਜਾਨੋ ਨਾਮ ਨਤ੍ਥਿ. ਏਕਂ ਸਮਯਂ ਸਤ੍ਤ ਰਾਜਾਨੋ ਬਾਰਾਣਸਿਂ ਪਰਿਕ੍ਖਿਪਿਤ੍ਵਾ ‘‘ਅਮ੍ਹਾਕਂ ਰਜ੍ਜਂ ਵਾ ਦੇਤੁ, ਯੁਦ੍ਧਂ ਵਾ’’ਤਿ ਬਾਰਾਣਸਿਰਞ੍ਞੋ ਪਣ੍ਣਂ ਪੇਸੇਸੁਂ. ਰਾਜਾ ਅਮਚ੍ਚੇ ਸਨ੍ਨਿਪਾਤੇਤ੍ਵਾ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ ‘‘ਇਦਾਨਿ ਕਿਂ ਕਰੋਮ, ਤਾਤਾ’’ਤਿ ਪੁਚ੍ਛਿ. ‘‘ਦੇਵ, ਤੁਮ੍ਹੇਹਿ ਤਾਵ ਆਦਿਤੋਵ ਯੁਦ੍ਧਾਯ ਨ ਗਨ੍ਤਬ੍ਬਂ, ਅਸੁਕਂ ਨਾਮ ਅਸ੍ਸਾਰੋਹਂ ਪੇਸੇਤ੍ਵਾ ਯੁਦ੍ਧਂ ਕਾਰੇਥ, ਤਸ੍ਮਿਂ ਅਸਕ੍ਕੋਨ੍ਤੇ ਪਚ੍ਛਾ ਜਾਨਿਸ੍ਸਾਮਾ’’ਤਿ. ਰਾਜਾ ਤਂ ਪਕ੍ਕੋਸਾਪੇਤ੍ਵਾ ‘‘ਸਕ੍ਖਿਸ੍ਸਸਿ, ਤਾਤ, ਸਤ੍ਤਹਿ ਰਾਜੂਹਿ ਸਦ੍ਧਿਂ ਯੁਦ੍ਧਂ ਕਾਤੁ’’ਨ੍ਤਿ ਆਹ. ‘‘ਦੇਵ, ਸਚੇ ਭੋਜਾਜਾਨੀਯਸਿਨ੍ਧਵਂ ਲਭਾਮਿ, ਤਿਟ੍ਠਨ੍ਤੁ ਸਤ੍ਤ ਰਾਜਾਨੋ, ਸਕਲਜਮ੍ਬੁਦੀਪੇ ਰਾਜੂਹਿਪਿ ਸਦ੍ਧਿਂ ਯੁਜ੍ਝਿਤੁਂ ਸਕ੍ਖਿਸ੍ਸਾਮੀ’’ਤਿ. ‘‘ਤਾਤ, ਭੋਜਾਜਾਨੀਯਸਿਨ੍ਧਵੋ ਵਾ ਹੋਤੁ ਅਞ੍ਞੋ ਵਾ, ਯਂ ਇਚ੍ਛਸਿ, ਤਂ ਗਹੇਤ੍ਵਾ ਯੁਦ੍ਧਂ ਕਰੋਹੀ’’ਤਿ.

ਸੋ ‘‘ਸਾਧੁ, ਦੇਵਾ’’ਤਿ ਰਾਜਾਨਂ ਵਨ੍ਦਿਤ੍ਵਾ ਪਾਸਾਦਾ ਓਰੁਯ੍ਹ ਭੋਜਾਜਾਨੀਯਸਿਨ੍ਧਵਂ ਆਹਰਾਪੇਤ੍ਵਾ ਸੁਵਮ੍ਮਿਤਂ ਕਤ੍ਵਾ ਅਤ੍ਤਨਾਪਿ ਸਬ੍ਬਸਨ੍ਨਾਹਸਨ੍ਨਦ੍ਧੋ ਖਗ੍ਗਂ ਬਨ੍ਧਿਤ੍ਵਾ ਸਿਨ੍ਧਵਪਿਟ੍ਠਿਵਰਗਤੋ ਨਗਰਾ ਨਿਕ੍ਖਮ੍ਮ ਵਿਜ੍ਜੁਲਤਾ ਵਿਯ ਚਰਮਾਨੋ ਪਠਮਂ ਬਲਕੋਟ੍ਠਕਂ ਭਿਨ੍ਦਿਤ੍ਵਾ ਏਕਂ ਰਾਜਾਨਂ ਜੀਵਗ੍ਗਾਹਮੇਵ ਗਹੇਤ੍ਵਾ ਆਗਨ੍ਤ੍ਵਾ ਨਗਰੇ ਬਲਸ੍ਸ ਨਿਯ੍ਯਾਦੇਤ੍ਵਾ ਪੁਨ ਗਨ੍ਤ੍ਵਾ ਦੁਤਿਯਂ ਬਲਕੋਟ੍ਠਕਂ ਭਿਨ੍ਦਿਤ੍ਵਾ ਤਥਾ ਤਤਿਯਨ੍ਤਿ ਏਵਂ ਪਞ੍ਚ ਰਾਜਾਨੋ ਜੀਵਗ੍ਗਾਹਂ ਗਹੇਤ੍ਵਾ ਛਟ੍ਠਂ ਬਲਕੋਟ੍ਠਕਂ ਭਿਨ੍ਦਿਤ੍ਵਾ ਛਟ੍ਠਸ੍ਸ ਰਞ੍ਞੋ ਗਹਿਤਕਾਲੇ ਭੋਜਾਜਾਨੀਯੋ ਪਹਾਰਂ ਲਭਤਿ, ਲੋਹਿਤਂ ਪਗ੍ਘਰਤਿ, ਵੇਦਨਾ ਬਲਵਤਿਯੋ ਵਤ੍ਤਨ੍ਤਿ. ਅਸ੍ਸਾਰੋਹੋ ਤਸ੍ਸ ਪਹਟਭਾਵਂ ਞਤ੍ਵਾ ਭੋਜਾਜਾਨੀਯਸਿਨ੍ਧਵਂ ਰਾਜਦ੍ਵਾਰੇ ਨਿਪਜ੍ਜਾਪੇਤ੍ਵਾ ਸਨ੍ਨਾਹਂ ਸਿਥਿਲਂ ਕਤ੍ਵਾ ਅਞ੍ਞਂ ਅਸ੍ਸਂ ਸਨ੍ਨਯ੍ਹਿਤੁਂ ਆਰਦ੍ਧੋ. ਬੋਧਿਸਤ੍ਤੋ ਮਹਾਫਾਸੁਕਪਸ੍ਸੇਨ ਨਿਪਨ੍ਨੋਵ ਅਕ੍ਖੀਨਿ ਉਮ੍ਮਿਲੇਤ੍ਵਾ ਅਸ੍ਸਾਰੋਹਂ ਦਿਸ੍ਵਾ ‘‘ਅਯਂ ਅਞ੍ਞਂ ਅਸ੍ਸਂ ਸਨ੍ਨਯ੍ਹਤਿ, ਅਯਞ੍ਚ ਅਸ੍ਸੋ ਸਤ੍ਤਮਂ ਬਲਕੋਟ੍ਠਕਂ ਭਿਨ੍ਦਿਤ੍ਵਾ ਸਤ੍ਤਮਂ ਰਾਜਾਨਂ ਗਣ੍ਹਿਤੁਂ ਨ ਸਕ੍ਖਿਸ੍ਸਤਿ, ਮਯਾ ਕਤਕਮ੍ਮਞ੍ਚ ਨਸ੍ਸਿਸ੍ਸਤਿ, ਅਪ੍ਪਟਿਸਮੋ ਅਸ੍ਸਾਰੋਹੋਪਿ ਨਸ੍ਸਿਸ੍ਸਤਿ, ਰਾਜਾਪਿ ਪਰਹਤ੍ਥਂ ਗਮਿਸ੍ਸਤਿ, ਠਪੇਤ੍ਵਾ ਮਂ ਅਞ੍ਞੋ ਅਸ੍ਸੋ ਸਤ੍ਤਮਂ ਬਲਕੋਟ੍ਠਕਂ ਭਿਨ੍ਦਿਤ੍ਵਾ ਸਤ੍ਤਮਂ ਰਾਜਾਨਂ ਗਹੇਤੁਂ ਸਮਤ੍ਥੋ ਨਾਮ ਨਤ੍ਥੀ’’ਤਿ ਨਿਪਨ੍ਨਕੋਵ ਅਸ੍ਸਾਰੋਹਂ ਪਕ੍ਕੋਸਾਪੇਤ੍ਵਾ ‘‘ਸਮ੍ਮ ਅਸ੍ਸਾਰੋਹ, ਸਤ੍ਤਮਂ ਬਲਕੋਟ੍ਠਕਂ ਭਿਨ੍ਦਿਤ੍ਵਾ ਸਤ੍ਤਮਂ ਰਾਜਾਨਂ ਗਹੇਤੁਂ ਸਮਤ੍ਥੋ ਠਪੇਤ੍ਵਾ ਮਂ ਅਞ੍ਞੋ ਅਸ੍ਸੋ ਨਾਮ ਨਤ੍ਥਿ, ਨਾਹਂ ਮਯਾ ਕਤਕਮ੍ਮਂ ਨਾਸੇਸ੍ਸਾਮਿ, ਮਮਞ੍ਞੇਵ ਉਟ੍ਠਾਪੇਤ੍ਵਾ ਸਨ੍ਨਯ੍ਹਾਹੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੩. ‘‘ਅਪਿ ਪਸ੍ਸੇਨ ਸੇਮਾਨੋ, ਸਲ੍ਲੇਭਿ ਸਲ੍ਲਲੀਕਤੋ;

ਸੇਯ੍ਯੋਵ ਵਲ਼ਵਾ ਭੋਜ੍ਝੋ, ਯੁਞ੍ਜ ਮਞ੍ਞੇਵ ਸਾਰਥੀ’’ਤਿ.

ਤਤ੍ਥ ਅਪਿ ਪਸ੍ਸੇਨ ਸੇਮਾਨੋਤਿ ਏਕੇਨ ਪਸ੍ਸੇਨ ਸਯਮਾਨਕੋਪਿ. ਸਲ੍ਲੇਭਿ ਸਲ੍ਲਲੀਕਤੋਤਿ ਸਲ੍ਲੇਹਿ ਵਿਦ੍ਧੋਪਿ ਸਮਾਨੋ. ਸੇਯ੍ਯੋਵ ਵਲ਼ਵਾ ਭੋਜ੍ਝੋਤਿ ਵਲ਼ਵਾਤਿ ਸਿਨ੍ਧਵਕੁਲੇਸੁ ਅਜਾਤੋ ਖਲੁਙ੍ਕਸ੍ਸੋ. ਭੋਜ੍ਝੋਤਿ ਭੋਜਾਜਾਨੀਯਸਿਨ੍ਧਵੋ. ਇਤਿ ਏਤਸ੍ਮਾ ਵਲ਼ਵਾ ਸਲ੍ਲੇਹਿ ਵਿਦ੍ਧੋਪਿ ਭੋਜਾਜਾਨੀਯਸਿਨ੍ਧਵੋਵ ਸੇਯ੍ਯੋ ਵਰੋ ਉਤ੍ਤਮੋ. ਯੁਞ੍ਜ ਮਞ੍ਞੇਵ ਸਾਰਥੀਤਿ ਯਸ੍ਮਾ ਏਵ ਗਤੋਪਿ ਅਹਮੇਵ ਸੇਯ੍ਯੋ, ਤਸ੍ਮਾ ਮਮਞ੍ਞੇਵ ਯੋਜੇਹਿ, ਮਂ ਵਮ੍ਮੇਹੀਤਿ ਵਦਤਿ.

ਅਸ੍ਸਾਰੋਹੋ ਬੋਧਿਸਤ੍ਤਂ ਉਟ੍ਠਾਪੇਤ੍ਵਾ ਵਣਂ ਬਨ੍ਧਿਤ੍ਵਾ ਸੁਸਨ੍ਨਦ੍ਧਂ ਸਨ੍ਨਯ੍ਹਿਤ੍ਵਾ ਤਸ੍ਸ ਪਿਟ੍ਠਿਯਂ ਨਿਸੀਦਿਤ੍ਵਾ ਸਤ੍ਤਮਂ ਬਲਕੋਟ੍ਠਕਂ ਭਿਨ੍ਦਿਤ੍ਵਾ ਸਤ੍ਤਮਂ ਰਾਜਾਨਂ ਜੀਵਗ੍ਗਾਹਂ ਗਹੇਤ੍ਵਾ ਰਾਜਬਲਸ੍ਸ ਨਿਯ੍ਯਾਦੇਸਿ, ਬੋਧਿਸਤ੍ਤਮ੍ਪਿ ਰਾਜਦ੍ਵਾਰਂ ਆਨਯਿਂਸੁ. ਰਾਜਾ ਤਸ੍ਸ ਦਸ੍ਸਨਤ੍ਥਾਯ ਨਿਕ੍ਖਮਿ. ਮਹਾਸਤ੍ਤੋ ਰਾਜਾਨਂ ਆਹ – ‘‘ਮਹਾਰਾਜ, ਸਤ੍ਤ ਰਾਜਾਨੋ ਮਾ ਘਾਤਯਿਤ੍ਥ, ਸਪਥਂ ਕਾਰੇਤ੍ਵਾ ਵਿਸ੍ਸਜ੍ਜੇਥ, ਮਯ੍ਹਞ੍ਚ ਅਸ੍ਸਾਰੋਹਸ੍ਸ ਚ ਦਾਤਬ੍ਬਂ ਯਸਂ ਅਸ੍ਸਾਰੋਹਸ੍ਸੇਵ ਦੇਥ, ਸਤ੍ਤ ਰਾਜਾਨੋ ਗਹੇਤ੍ਵਾ ਦਿਨ੍ਨਯੋਧਂ ਨਾਮ ਨਾਸੇਤੁਂ ਨ ਵਟ੍ਟਤਿ. ਤੁਮ੍ਹੇਪਿ ਦਾਨਂ ਦੇਥ, ਸੀਲਂ ਰਕ੍ਖਥ, ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਥਾ’’ਤਿ. ਏਵਂ ਬੋਧਿਸਤ੍ਤੇਨ ਰਞ੍ਞੋ ਓਵਾਦੇ ਦਿਨ੍ਨੇ ਬੋਧਿਸਤ੍ਤਸ੍ਸ ਸਨ੍ਨਾਹਂ ਮੋਚਯਿਂਸੁ, ਸੋ ਸਨ੍ਨਾਹੇ ਮੁਤ੍ਤਮਤ੍ਤੇਯੇਵ ਨਿਰੁਜ੍ਝਿ. ਰਾਜਾ ਤਸ੍ਸ ਸਰੀਰਕਿਚ੍ਚਂ ਕਾਰੇਤ੍ਵਾ ਅਸ੍ਸਾਰੋਹਸ੍ਸ ਮਹਨ੍ਤਂ ਯਸਂ ਦਤ੍ਵਾ ਸਤ੍ਤ ਰਾਜਾਨੋ ਪੁਨ ਅਤ੍ਤਨ੍ਨੋ ਅਦੁਬ੍ਭਾਯ ਸਪਥਂ ਕਾਰੇਤ੍ਵਾ ਸਕਸਕਟ੍ਠਾਨਾਨਿ ਪੇਸੇਤ੍ਵਾ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਤ੍ਵਾ ਜੀਵਿਤਪਰਿਯੋਸਾਨੇ ਯਥਾਕਮ੍ਮਂ ਗਤੋ.

ਸਤ੍ਥਾ ‘‘ਏਵਂ ਭਿਕ੍ਖੁ ਪੁਬ੍ਬੇ ਪਣ੍ਡਿਤਾ ਅਨਾਯਤਨੇਪਿ ਵੀਰਿਯਂ ਅਕਂਸੁ, ਏਵਰੂਪਂ ਪਹਾਰਂ ਲਦ੍ਧਾਪਿ ਨ ਓਸ੍ਸਜਿਂਸੁ, ਤ੍ਵਂ ਪਨ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਕਸ੍ਮਾ ਵੀਰਿਯਂ ਓਸ੍ਸਜਸੀ’’ਤਿ ਵਤ੍ਵਾ ਚਤ੍ਤਾਰਿ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਓਸ੍ਸਟ੍ਠਵੀਰਿਯੋ ਭਿਕ੍ਖੁ ਅਰਹਤ੍ਤਫਲੇ ਪਤਿਟ੍ਠਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਅਸ੍ਸਾਰੋਹੋ ਸਾਰਿਪੁਤ੍ਤੋ, ਭੋਜਾਜਾਨੀਯਸਿਨ੍ਧਵੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਭੋਜਾਜਾਨੀਯਜਾਤਕਵਣ੍ਣਨਾ ਤਤਿਯਾ.

[੨੪] ੪. ਆਜਞ੍ਞਜਾਤਕਵਣ੍ਣਨਾ

ਯਦਾ ਯਦਾਤਿ ਇਦਮ੍ਪਿ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਓਸ੍ਸਟ੍ਠਵੀਰਿਯਮੇਵ ਭਿਕ੍ਖੁਂ ਆਰਬ੍ਭ ਕਥੇਸਿ. ਤਂ ਪਨ ਭਿਕ੍ਖੁਂ ਸਤ੍ਥਾ ਆਮਨ੍ਤੇਤ੍ਵਾ ‘‘ਭਿਕ੍ਖੁ ਪੁਬ੍ਬੇ ਪਣ੍ਡਿਤਾ ਅਨਾਯਤਨੇਪਿ ਲਦ੍ਧਪ੍ਪਹਾਰਾਪਿ ਹੁਤ੍ਵਾ ਵੀਰਿਯਂ ਅਕਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਪੁਰਿਮਨਯੇਨੇਵ ਸਤ੍ਤ ਰਾਜਾਨੋ ਨਗਰਂ ਪਰਿਵਾਰਯਿਂਸੁ. ਅਥੇਕੋ ਰਥਿਕਯੋਧੋ ਦ੍ਵੇ ਭਾਤਿਕਸਿਨ੍ਧਵੇ ਰਥੇ ਯੋਜੇਤ੍ਵਾ ਨਗਰਾ ਨਿਕ੍ਖਮ੍ਮ ਛ ਬਲਕੋਟ੍ਠਕੇ ਭਿਨ੍ਦਿਤ੍ਵਾ ਛ ਰਾਜਾਨੋ ਅਗ੍ਗਹੇਸਿ. ਤਸ੍ਮਿਂ ਖਣੇ ਜੇਟ੍ਠਕਅਸ੍ਸੋ ਪਹਾਰਂ ਲਭਿ. ਰਥਿਕੋ ਰਥਂ ਪੇਸੇਨ੍ਤੋ ਰਾਜਦ੍ਵਾਰਂ ਆਗਨ੍ਤ੍ਵਾ ਜੇਟ੍ਠਭਾਤਿਕਂ ਰਥਾ ਮੋਚੇਤ੍ਵਾ ਸਨ੍ਨਾਹਂ ਸਿਥਿਲਂ ਕਤ੍ਵਾ ਏਕੇਨੇਵ ਪਸ੍ਸੇਨ ਨਿਪਜ੍ਜਾਪੇਤ੍ਵਾ ਅਞ੍ਞਂ ਅਸ੍ਸਂ ਸਨ੍ਨਯ੍ਹਿਤੁਂ ਆਰਦ੍ਧੋ. ਬੋਧਿਸਤ੍ਤੋ ਤਂ ਦਿਸ੍ਵਾ ਪੁਰਿਮਨਯੇਨੇਵ ਚਿਨ੍ਤੇਤ੍ਵਾ ਰਥਿਕਂ ਪਕ੍ਕੋਸਾਪੇਤ੍ਵਾ ਨਿਪਨ੍ਨਕੋਵ ਇਮਂ ਗਾਥਮਾਹ –

੨੪. ‘‘ਯਦਾ ਯਦਾ ਯਤ੍ਥ ਯਦਾ, ਯਤ੍ਥ ਯਤ੍ਥ ਯਦਾ ਯਦਾ;

ਆਜਞ੍ਞੋ ਕੁਰੁਤੇ ਵੇਗਂ, ਹਾਯਨ੍ਤਿ ਤਤ੍ਥ ਵਾਲ਼ਵਾ’’ਤਿ.

ਤਤ੍ਥ ਯਦਾ ਯਦਾਤਿ ਪੁਬ੍ਬਣ੍ਹਾਦੀਸੁ ਯਸ੍ਮਿਂ ਯਸ੍ਮਿਂ ਕਾਲੇ. ਯਤ੍ਥਾਤਿ ਯਸ੍ਮਿਂ ਠਾਨੇ ਮਗ੍ਗੇ ਵਾ ਸਙ੍ਗਾਮਸੀਸੇ ਵਾ. ਯਦਾਤਿ ਯਸ੍ਮਿਂ ਖਣੇ. ਯਤ੍ਥ ਯਤ੍ਥਾਤਿ ਸਤ੍ਤਨ੍ਨਂ ਬਲਕੋਟ੍ਠਕਾਨਂ ਵਸੇਨ ਬਹੂਸੁ ਯੁਦ੍ਧਮਣ੍ਡਲੇਸੁ. ਯਦਾ ਯਦਾਤਿ ਯਸ੍ਮਿਂ ਯਸ੍ਮਿਂ ਕਾਲੇ ਪਹਾਰਂ ਲਦ੍ਧਕਾਲੇ ਵਾ ਅਲਦ੍ਧਕਾਲੇ ਵਾ. ਆਜਞ੍ਞੋ ਕੁਰੁਤੇ ਵੇਗਨ੍ਤਿ ਸਾਰਥਿਸ੍ਸ ਚਿਤ੍ਤਰੁਚਿਤਂ ਕਾਰਣਂ ਆਜਾਨਨਸਭਾਵੋ ਆਜਞ੍ਞੋ ਵਰਸਿਨ੍ਧਵੋ ਵੇਗਂ ਕਰੋਤਿ ਵਾਯਮਤਿ ਵੀਰਿਯਂ ਆਰਭਤਿ. ਹਾਯਨ੍ਤਿ ਤਤ੍ਥ ਵਾਲ਼ਵਾਤਿ ਤਸ੍ਮਿਂ ਵੇਗੇ ਕਰਿਯਮਾਨੇ ਇਤਰੇ ਵਲ਼ਵਸਙ੍ਖਾਤਾ ਖਲ਼ੁਙ੍ਕਸ੍ਸਾ ਹਾਯਨ੍ਤਿ ਪਰਿਹਾਯਨ੍ਤਿ, ਤਸ੍ਮਾ ਇਮਸ੍ਮਿਂ ਰਥੇ ਮਂਯੇਵ ਯੋਜੇਹੀਤਿ ਆਹ.

ਸਾਰਥਿ ਬੋਧਿਸਤ੍ਤਂ ਉਟ੍ਠਾਪੇਤ੍ਵਾ ਰਥੇ ਯੋਜੇਤ੍ਵਾ ਸਤ੍ਤਮਂ ਬਲਕੋਟ੍ਠਕਂ ਭਿਨ੍ਦਿਤ੍ਵਾ ਸਤ੍ਤਮਂ ਰਾਜਾਨਂ ਆਦਾਯ ਰਥਂ ਪੇਸੇਨ੍ਤੋ ਰਾਜਦ੍ਵਾਰਂ ਆਗਨ੍ਤ੍ਵਾ ਸਿਨ੍ਧਵਂ ਮੋਚੇਸਿ. ਬੋਧਿਸਤ੍ਤੋ ਏਕੇਨ ਪਸ੍ਸੇਨ ਨਿਪਨ੍ਨੋ ਪੁਰਿਮਨਯੇਨੇਵ ਰਞ੍ਞੋ ਓਵਾਦਂ ਦਤ੍ਵਾ ਨਿਰੁਜ੍ਝਿ. ਰਾਜਾ ਤਸ੍ਸ ਸਰੀਰਕਿਚ੍ਚਂ ਕਾਰੇਤ੍ਵਾ ਸਾਰਥਿਸ੍ਸ ਸਮ੍ਮਾਨਂ ਕਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਸੋ ਭਿਕ੍ਖੁ ਅਰਹਤ੍ਤੇ ਪਤਿਟ੍ਠਾਸਿ. ਸਤ੍ਥਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਰਾਜਾ ਆਨਨ੍ਦਤ੍ਥੇਰੋ ਅਹੋਸਿ, ਅਸ੍ਸੋ ਸਮ੍ਮਾਸਮ੍ਬੁਦ੍ਧੋ’’ਤਿ.

ਆਜਞ੍ਞਜਾਤਕਵਣ੍ਣਨਾ ਚਤੁਤ੍ਥਾ.

[੨੫] ੫. ਤਿਤ੍ਥਜਾਤਕਵਣ੍ਣਨਾ

ਅਞ੍ਞਮਞ੍ਞੇਹਿ ਤਿਤ੍ਥੇਹੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਧਮ੍ਮਸੇਨਾਪਤਿਸ੍ਸ ਸਦ੍ਧਿਵਿਹਾਰਿਕਂ ਏਕਂ ਸੁਵਣ੍ਣਕਾਰਪੁਬ੍ਬਕਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਆਸਯਾਨੁਸਯਞਾਣਞ੍ਹਿ ਬੁਦ੍ਧਾਨਂਯੇਵ ਹੋਤਿ, ਨ ਅਞ੍ਞੇਸਂ. ਤਸ੍ਮਾ ਧਮ੍ਮਸੇਨਾਪਤਿ ਅਤ੍ਤਨੋ ਆਸਯਾਨੁਸਯਞਾਣਸ੍ਸ ਨਤ੍ਥਿਤਾਯ ਸਦ੍ਧਿਵਿਹਾਰਿਕਸ੍ਸ ਆਸਯਾਨੁਸਯਂ ਅਜਾਨਨ੍ਤੋ ਅਸੁਭਕਮ੍ਮਟ੍ਠਾਨਮੇਵ ਕਥੇਸਿ, ਤਸ੍ਸ ਤਂ ਨ ਸਪ੍ਪਾਯਮਹੋਸਿ. ਕਸ੍ਮਾ? ਸੋ ਕਿਰ ਪਟਿਪਾਟਿਯਾ ਪਞ੍ਚ ਜਾਤਿਸਤਾਨਿ ਸੁਵਣ੍ਣਕਾਰਗੇਹੇਯੇਵ ਪਟਿਸਨ੍ਧਿਂ ਗਣ੍ਹਿ, ਅਥਸ੍ਸ ਦੀਘਰਤ੍ਤਂ ਪਰਿਸੁਦ੍ਧਸੁਵਣ੍ਣਦਸ੍ਸਨਵਸੇਨ ਪਰਿਚਿਤਤ੍ਤਾ ਅਸੁਭਂ ਨ ਸਪ੍ਪਾਯਮਹੋਸਿ. ਸੋ ਤਤ੍ਥ ਨਿਮਿਤ੍ਤਮਤ੍ਤਮ੍ਪਿ ਉਪ੍ਪਾਦੇਤੁਂ ਅਸਕ੍ਕੋਨ੍ਤੋ ਚਤ੍ਤਾਰੋ ਮਾਸੇ ਖੇਪੇਸਿ.

ਧਮ੍ਮਸੇਨਾਪਤਿ ਅਤ੍ਤਨੋ ਸਦ੍ਧਿਵਿਹਾਰਿਕਸ੍ਸ ਅਰਹਤ੍ਤਂ ਦਾਤੁਂ ਅਸਕ੍ਕੋਨ੍ਤੋ ‘‘ਅਦ੍ਧਾ ਅਯਂ ਬੁਦ੍ਧਵੇਨੇਯ੍ਯੋ ਭਵਿਸ੍ਸਤਿ, ਤਥਾਗਤਸ੍ਸ ਸਨ੍ਤਿਕਂ ਨੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਪਾਤੋਵ ਤਂ ਆਦਾਯ ਸਤ੍ਥੁ ਸਨ੍ਤਿਕਂ ਅਗਮਾਸਿ. ਸਤ੍ਥਾ ‘‘ਕਿਂ ਨੁ ਖੋ, ਸਾਰਿਪੁਤ੍ਤ, ਏਕਂ ਭਿਕ੍ਖੁਂ ਆਦਾਯ ਆਗਤੋਸੀ’’ਤਿ ਪੁਚ੍ਛਿ. ‘‘ਅਹਂ, ਭਨ੍ਤੇ, ਇਮਸ੍ਸ ਕਮ੍ਮਟ੍ਠਾਨਂ ਅਦਾਸਿਂ, ਅਯਂ ਪਨ ਚਤੂਹਿ ਮਾਸੇਹਿ ਨਿਮਿਤ੍ਤਮਤ੍ਤਮ੍ਪਿ ਨ ਉਪ੍ਪਾਦੇਸਿ, ਸ੍ਵਾਹਂ ‘ਬੁਦ੍ਧਵੇਨੇਯ੍ਯੋ ਏਸੋ ਭਵਿਸ੍ਸਤੀ’ਤਿ ਚਿਨ੍ਤੇਤ੍ਵਾ ਤੁਮ੍ਹਾਕਂ ਸਨ੍ਤਿਕਂ ਆਦਾਯ ਆਗਤੋ’’ਤਿ. ‘‘ਸਾਰਿਪੁਤ੍ਤ, ਕਤਰਂ ਪਨ ਤੇ ਕਮ੍ਮਟ੍ਠਾਨਂ ਸਦ੍ਧਿਵਿਹਾਰਿਕਸ੍ਸ ਦਿਨ੍ਨ’’ਨ੍ਤਿ? ‘‘ਅਸੁਭਕਮ੍ਮਟ੍ਠਾਨਂ ਭਗਵਾ’’ਤਿ. ‘‘ਸਾਰਿਪੁਤ੍ਤ, ਨਤ੍ਥਿ ਤਵ ਸਨ੍ਤਾਨੇ ਆਸਯਾਨੁਸਯਞਾਣਂ, ਗਚ੍ਛ, ਤ੍ਵਂ ਸਾਯਨ੍ਹਸਮਯੇ ਆਗਨ੍ਤ੍ਵਾ ਤਵ ਸਦ੍ਧਿਵਿਹਾਰਿਕਂ ਆਦਾਯ ਗਚ੍ਛੇਯ੍ਯਾਸੀ’’ਤਿ. ਏਵਂ ਸਤ੍ਥਾ ਥੇਰਂ ਉਯ੍ਯੋਜੇਤ੍ਵਾ ਤਸ੍ਸ ਭਿਕ੍ਖੁਸ੍ਸ ਮਨਾਪਂ ਚੀਵਰਞ੍ਚ ਨਿਵਾਸਨਞ੍ਚ ਦਾਪੇਤ੍ਵਾ ਤਂ ਆਦਾਯ ਗਾਮਂ ਪਿਣ੍ਡਾਯ ਪਵਿਸਿਤ੍ਵਾ ਪਣੀਤਂ ਖਾਦਨੀਯਭੋਜਨੀਯਂ ਦਾਪੇਤ੍ਵਾ ਮਹਾਭਿਕ੍ਖੁਸਙ੍ਘਪਰਿਵਾਰੋ ਪੁਨ ਵਿਹਾਰਂ ਆਗਨ੍ਤ੍ਵਾ ਗਨ੍ਧਕੁਟਿਯਂ ਦਿਵਸਭਾਗਂ ਖੇਪੇਤ੍ਵਾ ਸਾਯਨ੍ਹਸਮਯੇ ਤਂ ਭਿਕ੍ਖੁਂ ਗਹੇਤ੍ਵਾ ਵਿਹਾਰਚਾਰਿਕਂ ਚਰਮਾਨੋ ਅਮ੍ਬਵਨੇ ਏਕਂ ਪੋਕ੍ਖਰਣਿਂ ਮਾਪੇਤ੍ਵਾ ਤਤ੍ਥ ਮਹਨ੍ਤਂ ਪਦੁਮਿਨਿਗਚ੍ਛਂ, ਤਤ੍ਰਾਪਿ ਚ ਮਹਨ੍ਤਂ ਏਕਂ ਪਦੁਮਪੁਪ੍ਫਂ ਮਾਪੇਤ੍ਵਾ ‘‘ਭਿਕ੍ਖੁ ਇਮਂ ਪੁਪ੍ਫਂ ਓਲੋਕੇਨ੍ਤੋ ਨਿਸੀਦਾ’’ਤਿ ਨਿਸੀਦਾਪੇਤ੍ਵਾ ਗਨ੍ਧਕੁਟਿਂ ਪਾਵਿਸਿ.

ਸੋ ਭਿਕ੍ਖੁ ਤਂ ਪੁਪ੍ਫਂ ਪੁਨਪ੍ਪੁਨਂ ਓਲੋਕੇਤਿ. ਭਗਵਾ ਤਂ ਪੁਪ੍ਫਂ ਜਰਂ ਪਾਪੇਸਿ, ਤਂ ਤਸ੍ਸ ਪਸ੍ਸਨ੍ਤਸ੍ਸੇਵ ਜਰਂ ਪਤ੍ਵਾ ਵਿਵਣ੍ਣਂ ਅਹੋਸਿ. ਅਥਸ੍ਸ ਪਰਿਯਨ੍ਤਤੋ ਪਟ੍ਠਾਯ ਪਤ੍ਤਾਨਿ ਪਤਨ੍ਤਾਨਿ ਮੁਹੁਤ੍ਤੇਨ ਸਬ੍ਬਾਨਿ ਪਤਿਂਸੁ. ਤਤੋ ਕਿਞ੍ਜਕ੍ਖਂ ਪਤਿ, ਕਣ੍ਣਿਕਾਵ ਅਵਸਿਸ੍ਸਿ. ਸੋ ਭਿਕ੍ਖੁ ਤਂ ਪਸ੍ਸਨ੍ਤੋ ਚਿਨ੍ਤੇਸਿ ‘‘ਇਦਂ ਪਦੁਮਪੁਪ੍ਫਂ ਇਦਾਨੇਵ ਅਭਿਰੂਪਂ ਅਹੋਸਿ ਦਸ੍ਸਨੀਯਂ, ਅਥਸ੍ਸ ਵਣ੍ਣੋ ਪਰਿਣਤੋ, ਪਤ੍ਤਾਨਿ ਚ ਕਿਞ੍ਚਕ੍ਖਞ੍ਚ ਪਤਿਤਂ, ਕਣ੍ਣਿਕਾਮਤ੍ਤਮੇਵ ਅਵਸਿਟ੍ਠਂ, ਏਵਰੂਪਸ੍ਸ ਨਾਮ ਪਦੁਮਸ੍ਸ ਜਰਾ ਪਤ੍ਤਾ, ਮਯ੍ਹਂ ਸਰੀਰਸ੍ਸ ਕਿਂ ਨ ਪਾਪੁਣਿਸ੍ਸਤਿ, ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ’’ਤਿ ਵਿਪਸ੍ਸਨਂ ਪਟ੍ਠਪੇਸਿ. ਸਤ੍ਥਾ ‘‘ਤਸ੍ਸ ਚਿਤ੍ਤਂ ਵਿਪਸ੍ਸਨਂ ਆਰੁਲ਼੍ਹ’’ਨ੍ਤਿ ਞਤ੍ਵਾ ਗਨ੍ਧਕੁਟਿਯਂ ਨਿਸਿਨ੍ਨੋਵ ਓਭਾਸਂ ਫਰਿਤ੍ਵਾ ਇਮਂ ਗਾਥਮਾਹ –

‘‘ਉਚ੍ਛਿਨ੍ਦ ਸਿਨੇਹਮਤ੍ਤਨੋ, ਕੁਮੁਦਂ ਸਾਰਦਿਕਂਵ ਪਾਣਿਨਾ;

ਸਨ੍ਤਿਮਗ੍ਗਮੇਵ ਬ੍ਰੂਹਯ, ਨਿਬ੍ਬਾਨਂ ਸੁਗਤੇਨ ਦੇਸਿਤ’’ਨ੍ਤਿ. (ਧ. ਪ. ੨੮੫);

ਸੋ ਭਿਕ੍ਖੁ ਗਾਥਾਪਰਿਯੋਸਾਨੇ ਅਰਹਤ੍ਤਂ ਪਤ੍ਵਾ ‘‘ਮੁਤ੍ਤੋ ਵਤਮ੍ਹਿ ਸਬ੍ਬਭਵੇਹੀ’’ਤਿ ਚਿਨ੍ਤੇਤ੍ਵਾ –

‘‘ਸੋ ਵੁਤ੍ਥਵਾਸੋ ਪਰਿਪੁਣ੍ਣਮਾਨਸੋ, ਖੀਣਾਸਵੋ ਅਨ੍ਤਿਮਦੇਹਧਾਰੀ;

ਵਿਸੁਦ੍ਧਸੀਲੋ ਸੁਸਮਾਹਿਤਿਨ੍ਦ੍ਰਿਯੋ, ਚਨ੍ਦੋ ਯਥਾ ਰਾਹੁਮੁਖਾ ਪਮੁਤ੍ਤੋ.

‘‘ਸਮੋਤਤਂ ਮੋਹਮਹਨ੍ਧਕਾਰਂ, ਵਿਨੋਦਯਿਂ ਸਬ੍ਬਮਲਂ ਅਸੇਸਂ;

ਆਲੋਕਪਜ੍ਜੋਤਕਰੋ ਪਭਙ੍ਕਰੋ, ਸਹਸ੍ਸਰਂਸੀ ਵਿਯ ਭਾਣੁਮਾ ਨਭੇ’’ਤਿ. –

ਆਦੀਹਿ ਗਾਥਾਹਿ ਉਦਾਨਂ ਉਦਾਨੇਸਿ. ਉਦਾਨੇਤ੍ਵਾ ਚ ਪਨ ਗਨ੍ਤ੍ਵਾ ਭਗਵਨ੍ਤਂ ਵਨ੍ਦਿ. ਥੇਰੋਪਿ ਆਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਅਤ੍ਤਨੋ ਸਦ੍ਧਿਵਿਹਾਰਿਕਂ ਗਹੇਤ੍ਵਾ ਅਗਮਾਸਿ. ਅਯਂ ਪਵਤ੍ਤਿ ਭਿਕ੍ਖੂਨਂ ਅਨ੍ਤਰੇ ਪਾਕਟਾ ਜਾਤਾ. ਭਿਕ੍ਖੂ ਧਮ੍ਮਸਭਾਯਂ ਦਸਬਲਸ੍ਸ ਗੁਣੇ ਵਣ੍ਣਯਮਾਨਾ ਨਿਸੀਦਿਂਸੁ – ‘‘ਆਵੁਸੋ, ਸਾਰਿਪੁਤ੍ਤਤ੍ਥੇਰੋ ਆਸਯਾਨੁਸਯਞਾਣਸ੍ਸ ਅਭਾਵੇਨ ਅਤ੍ਤਨੋ ਸਦ੍ਧਿਵਿਹਾਰਿਕਸ੍ਸ ਆਸਯਂ ਨ ਜਾਨਾਤਿ, ਸਤ੍ਥਾ ਪਨ ਞਤ੍ਵਾ ਏਕਦਿਵਸੇਨੇਵ ਤਸ੍ਸ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਅਦਾਸਿ, ਅਹੋ ਬੁਦ੍ਧਾ ਨਾਮ ਮਹਾਨੁਭਾਵਾ’’ਤਿ.

ਸਤ੍ਥਾ ਆਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿ. ‘‘ਨ ਭਗਵਾ ਅਞ੍ਞਾਯ ਕਥਾਯ, ਤੁਮ੍ਹਾਕਞ੍ਞੇਵ ਪਨ ਧਮ੍ਮਸੇਨਾਪਤਿਨੋ ਸਦ੍ਧਿਵਿਹਾਰਿਕਸ੍ਸ ਆਸਯਾਨੁਸਯਞਾਣਕਥਾਯਾ’’ਤਿ. ਸਤ੍ਥਾ ‘‘ਨ, ਭਿਕ੍ਖਵੇ, ਏਤਂ ਅਚ੍ਛਰਿਯਂ, ਸ੍ਵਾਹਂ ਏਤਰਹਿ ਬੁਦ੍ਧੋ ਹੁਤ੍ਵਾ ਤਸ੍ਸ ਆਸਯਂ ਜਾਨਾਮਿ, ਪੁਬ੍ਬੇਪਾਹਂ ਤਸ੍ਸ ਆਸਯਂ ਜਾਨਾਮਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਰਜ੍ਜਂ ਕਾਰੇਸਿ. ਤਦਾ ਬੋਧਿਸਤ੍ਤੋ ਤਂ ਰਾਜਾਨਂ ਅਤ੍ਥੇ ਚ ਧਮ੍ਮੇ ਚ ਅਨੁਸਾਸਤਿ. ਤਦਾ ਰਞ੍ਞੋ ਮਙ੍ਗਲਅਸ੍ਸਨ੍ਹਾਨਤਿਤ੍ਥੇ ਅਞ੍ਞਤਰਂ ਵਲ਼ਵਂ ਖਲ਼ੁਙ੍ਕਸ੍ਸਂ ਨ੍ਹਾਪੇਸੁਂ. ਮਙ੍ਗਲਸ੍ਸੋ ਵਲ਼ਵੇਨ ਨ੍ਹਾਨਤਿਤ੍ਥਂ ਓਤਾਰਿਯਮਾਨੋ ਜਿਗੁਚ੍ਛਿਤ੍ਵਾ ਓਤਰਿਤੁਂ ਨ ਇਚ੍ਛਿ. ਅਸ੍ਸਗੋਪਕੋ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ ‘‘ਦੇਵ, ਮਙ੍ਗਲਸ੍ਸੋ ਤਿਤ੍ਥਂ ਓਤਰਿਤੁਂ ਨ ਇਚ੍ਛਤੀ’’ਤਿ. ਰਾਜਾ ਬੋਧਿਸਤ੍ਤਂ ਪੇਸੇਸਿ – ‘‘ਗਚ੍ਛ, ਪਣ੍ਡਿਤ, ਜਾਨਾਹਿ ਕੇਨ ਕਾਰਣੇਨ ਅਸ੍ਸੋ ਤਿਤ੍ਥਂ ਓਤਾਰਿਯਮਾਨੋ ਨ ਓਤਰਤੀ’’ਤਿ. ਬੋਧਿਸਤ੍ਤੋ ‘‘ਸਾਧੁ, ਦੇਵਾ’’ਤਿ ਨਦੀਤੀਰਂ ਗਨ੍ਤ੍ਵਾ ਅਸ੍ਸਂ ਓਲੋਕੇਤ੍ਵਾ ਨਿਰੋਗਭਾਵਮਸ੍ਸ ਞਤ੍ਵਾ ‘‘ਕੇਨ ਨੁ ਖੋ ਕਾਰਣੇਨ ਅਯਂ ਇਮਂ ਤਿਤ੍ਥਂ ਨ ਓਤਰਤੀ’’ਤਿ ਉਪਧਾਰੇਨ੍ਤੋ ‘‘ਪਠਮਤਰਂ ਏਤ੍ਥ ਅਞ੍ਞੋ ਨ੍ਹਾਪਿਤੋ ਭਵਿਸ੍ਸਤਿ, ਤੇਨੇਸ ਜਿਗੁਚ੍ਛਮਾਨੋ ਤਿਤ੍ਥਂ ਨ ਓਤਰਤਿ ਮਞ੍ਞੇ’’ਤਿ ਚਿਨ੍ਤੇਤ੍ਵਾ ਅਸ੍ਸਗੋਪਕੇ ਪੁਚ੍ਛਿ ‘‘ਅਮ੍ਭੋ, ਇਮਸ੍ਮਿਂ ਤਿਤ੍ਥੇ ਕਂ ਪਠਮਂ ਨ੍ਹਾਪਯਿਤ੍ਥਾ’’ਤਿ? ‘‘ਅਞ੍ਞਤਰਂ ਵਲ਼ਵਸ੍ਸਂ, ਸਾਮੀ’’ਤਿ.

ਬੋਧਿਸਤ੍ਤੋ ‘‘ਏਸ ਅਤ੍ਤਨੋ ਸਿਨ੍ਧਵਤਾਯ ਜਿਗੁਚ੍ਛਨ੍ਤੋ ਏਤ੍ਥ ਨ੍ਹਾਯਿਤੁਂ ਨ ਇਚ੍ਛਤਿ, ਇਮਂ ਅਞ੍ਞਤਿਤ੍ਥੇ ਨ੍ਹਾਪੇਤੁਂ ਵਟ੍ਟਤੀ’’ਤਿ ਤਸ੍ਸ ਆਸਯਂ ਞਤ੍ਵਾ ‘‘ਭੋ ਅਸ੍ਸਗੋਪਕ, ਸਪ੍ਪਿਮਧੁਫਾਣਿਤਾਦਿਭਿਸਙ੍ਖਤਪਾਯਾਸਮ੍ਪਿ ਤਾਵ ਪੁਨਪ੍ਪੁਨਂ ਭੁਞ੍ਜਨ੍ਤਸ੍ਸ ਤਿਤ੍ਤਿ ਹੋਤਿ. ਅਯਂ ਅਸ੍ਸੋ ਬਹੂ ਵਾਰੇ ਇਧ ਤਿਤ੍ਥੇ ਨ੍ਹਾਤੋ, ਅਞ੍ਞਮ੍ਪਿ ਤਾਵ ਨਂ ਤਿਤ੍ਥਂ ਓਤਾਰੇਤ੍ਵਾ ਨ੍ਹਾਪੇਥ ਚ ਪਾਯੇਥ ਚਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੫. ‘‘ਅਞ੍ਞਮਞ੍ਞੇਹਿ ਤਿਤ੍ਥੇਹਿ, ਅਸ੍ਸਂ ਪਾਯੇਹਿ ਸਾਰਥਿ;

ਅਚ੍ਚਾਸਨਸ੍ਸ ਪੁਰਿਸੋ, ਪਾਯਾਸਸ੍ਸਪਿ ਤਪ੍ਪਤੀ’’ਤਿ.

ਤਤ੍ਥ ਅਞ੍ਞਮਞ੍ਞੇਹੀਤਿ ਅਞ੍ਞੇਹਿ ਅਞ੍ਞੇਹਿ. ਪਾਯੇਹੀਤਿ ਦੇਸਨਾਸੀਸਮੇਤਂ, ਨ੍ਹਾਪੇਹਿ ਚ ਪਾਯੇਹਿ ਚਾਤਿ ਅਤ੍ਥੋ. ਅਚ੍ਚਾਸਨਸ੍ਸਾਤਿ ਕਰਣਤ੍ਥੇ ਸਾਮਿਵਚਨਂ, ਅਤਿਅਸਨੇਨ ਅਤਿਭੁਤ੍ਤੇਨਾਤਿ ਅਤ੍ਥੋ. ਪਾਯਾਸਸ੍ਸਪਿ ਤਪ੍ਪਤੀਤਿ ਸਪ੍ਪਿਆਦੀਹਿ ਅਭਿਸਙ੍ਖਤੇਨ ਮਧੁਰਪਾਯਾਸੇਨ ਤਪ੍ਪਤਿ ਤਿਤ੍ਤੋ ਹੋਤਿ, ਧਾਤੋ ਸੁਹਿਤੋ ਨ ਪੁਨ ਭੁਞ੍ਜਿਤੁਕਾਮਤਂ ਆਪਜ੍ਜਤਿ. ਤਸ੍ਮਾ ਅਯਮ੍ਪਿ ਅਸ੍ਸੋ ਇਮਸ੍ਮਿਂ ਤਿਤ੍ਥੇ ਨਿਬਦ੍ਧਂ ਨ੍ਹਾਨੇਨ ਪਰਿਯਤ੍ਤਿਂ ਆਪਨ੍ਨੋ ਭਵਿਸ੍ਸਤਿ, ਅਞ੍ਞਤ੍ਥ ਨਂ ਨ੍ਹਾਪੇਥਾਤਿ.

ਤੇ ਤਸ੍ਸ ਵਚਨਂ ਸੁਤ੍ਵਾ ਅਸ੍ਸਂ ਅਞ੍ਞਤਿਤ੍ਥਂ ਓਤਾਰੇਤ੍ਵਾ ਪਾਯਿਂਸੁ ਚੇਵ ਨ੍ਹਾਪਯਿਂਸੁ ਚ. ਬੋਧਿਸਤ੍ਤੋ ਅਸ੍ਸਸ੍ਸ ਪਾਨੀਯਂ ਪਿਵਿਤ੍ਵਾ ਨ੍ਹਾਨਕਾਲੇ ਰਞ੍ਞੋ ਸਨ੍ਤਿਕਂ ਅਗਮਾਸਿ. ਰਾਜਾ ‘‘ਕਿਂ, ਤਾਤ, ਅਸ੍ਸੋ ਨ੍ਹਾਤੋ ਚ ਪੀਤੋ ਚਾ’’ਤਿ ਪੁਚ੍ਛਿ. ‘‘ਆਮ, ਦੇਵਾ’’ਤਿ. ‘‘ਪਠਮਂ ਕਿਂ ਕਾਰਣਾ ਨ ਇਚ੍ਛਤੀ’’ਤਿ? ‘‘ਇਮਿਨਾ ਨਾਮ ਕਾਰਣੇਨਾ’’ਤਿ ਸਬ੍ਬਂ ਆਚਿਕ੍ਖਿ. ਰਾਜਾ ‘‘ਏਵਰੂਪਸ੍ਸ ਤਿਰਚ੍ਛਾਨਸ੍ਸਾਪਿ ਨਾਮ ਆਸਯਂ ਜਾਨਾਤਿ, ਅਹੋ ਪਣ੍ਡਿਤੋ’’ਤਿ ਬੋਧਿਸਤ੍ਤਸ੍ਸ ਮਹਨ੍ਤਂ ਯਸਂ ਦਤ੍ਵਾ ਜੀਵਿਤਪਰਿਯੋਸਾਨੇ ਯਥਾਕਮ੍ਮਂ ਗਤੋ. ਬੋਧਿਸਤ੍ਤੋਪਿ ਯਥਾਕਮ੍ਮਮੇਵ ਗਤੋ.

ਸਤ੍ਥਾ ‘‘ਨ, ਭਿਕ੍ਖਵੇ, ਅਹਂ ਏਤਸ੍ਸ ਇਦਾਨੇਵ ਆਸਯਂ ਜਾਨਾਮਿ, ਪੁਬ੍ਬੇਪਿ ਜਾਨਾਮਿਯੇਵਾ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਙ੍ਗਲਅਸ੍ਸੋ ਅਯਂ ਭਿਕ੍ਖੁ ਅਹੋਸਿ, ਰਾਜਾ ਆਨਨ੍ਦੋ, ਪਣ੍ਡਿਤਾਮਚ੍ਚੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਤਿਤ੍ਥਜਾਤਕਵਣ੍ਣਨਾ ਪਞ੍ਚਮਾ.

[੨੬] ੬. ਮਹਿਲ਼ਾਮੁਖਜਾਤਕਵਣ੍ਣਨਾ

ਪੁਰਾਣਚੋਰਾਨ ਵਚੋ ਨਿਸਮ੍ਮਾਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਦੇਵਦਤ੍ਤੋ ਅਜਾਤਸਤ੍ਤੁਕੁਮਾਰਂ ਪਸਾਦੇਤ੍ਵਾ ਲਾਭਸਕ੍ਕਾਰਂ ਨਿਪ੍ਫਾਦੇਸਿ. ਅਜਾਤਸਤ੍ਤੁਕੁਮਾਰੋ ਦੇਵਦਤ੍ਤਸ੍ਸ ਗਯਾਸੀਸੇ ਵਿਹਾਰਂ ਕਾਰੇਤ੍ਵਾ ਨਾਨਗ੍ਗਰਸੇਹਿ ਤਿਵਸ੍ਸਿਕਗਨ੍ਧਸਾਲਿਭੋਜਨਸ੍ਸ ਦਿਵਸੇ ਦਿਵਸੇ ਪਞ੍ਚ ਥਾਲਿਪਾਕਸਤਾਨਿ ਅਭਿਹਰਿ. ਲਾਭਸਕ੍ਕਾਰਂ ਨਿਸ੍ਸਾਯ ਦੇਵਦਤ੍ਤਸ੍ਸ ਪਰਿਵਾਰੋ ਮਹਨ੍ਤੋ ਜਾਤੋ, ਦੇਵਦਤ੍ਤੋ ਪਰਿਵਾਰੇਨ ਸਦ੍ਧਿਂ ਵਿਹਾਰੇਯੇਵ ਹੋਤਿ. ਤੇਨ ਸਮਯੇਨ ਰਾਜਗਹਵਾਸਿਕਾ ਦ੍ਵੇ ਸਹਾਯਾ. ਤੇਸੁ ਏਕੋ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤੋ, ਏਕੋ ਦੇਵਦਤ੍ਤਸ੍ਸ. ਤੇ ਅਞ੍ਞਮਞ੍ਞਂ ਤਸ੍ਮਿਂ ਤਸ੍ਮਿਂ ਠਾਨੇਪਿ ਪਸ੍ਸਨ੍ਤਿ, ਵਿਹਾਰਂ ਗਨ੍ਤ੍ਵਾਪਿ ਪਸ੍ਸਨ੍ਤਿਯੇਵ.

ਅਥੇਕਦਿਵਸਂ ਦੇਵਦਤ੍ਤਸ੍ਸ ਨਿਸ੍ਸਿਤਕੋ ਇਤਰਂ ਆਹ – ‘‘ਆਵੁਸੋ, ਕਿਂ ਤ੍ਵਂ ਦੇਵਸਿਕਂ ਸੇਦੇਹਿ ਮੁਚ੍ਚਮਾਨੇਹਿ ਪਿਣ੍ਡਾਯ ਚਰਸਿ, ਦੇਵਦਤ੍ਤੋ ਗਯਾਸੀਸਵਿਹਾਰੇ ਨਿਸੀਦਿਤ੍ਵਾਵ ਨਾਨਗ੍ਗਰਸੇਹਿ ਸੁਭੋਜਨਂ ਭੁਞ੍ਜਤਿ, ਏਵਰੂਪੋ ਉਪਾਯੋ ਨਤ੍ਥਿ, ਕਿਂ ਤ੍ਵਂ ਦੁਕ੍ਖਂ ਅਨੁਭੋਸਿ, ਕਿਂ ਤੇ ਪਾਤੋਵ ਗਯਾਸੀਸਂ ਆਗਨ੍ਤ੍ਵਾ ਸਉਤ੍ਤਰਿਭਙ੍ਗਂ ਯਾਗੁਂ ਪਿਵਿਤ੍ਵਾ ਅਟ੍ਠਾਰਸਵਿਧਂ ਖਜ੍ਜਕਂ ਖਾਦਿਤ੍ਵਾ ਨਾਨਗ੍ਗਰਸੇਹਿ ਸੁਭੋਜਨਂ ਭੁਞ੍ਜਿਤੁਂ ਨ ਵਟ੍ਟਤੀ’’ਤਿ? ਸੋ ਪੁਨਪ੍ਪੁਨਂ ਵੁਚ੍ਚਮਾਨੋ ਗਨ੍ਤੁਕਾਮੋ ਹੁਤ੍ਵਾ ਤਤੋ ਪਟ੍ਠਾਯ ਗਯਾਸੀਸਂ ਗਨ੍ਤ੍ਵਾ ਭੁਞ੍ਜਿਤ੍ਵਾ ਕਾਲਸ੍ਸੇਵ ਵੇਲ਼ੁਵਨਂ ਆਗਚ੍ਛਤਿ. ਸੋ ਸਬ੍ਬਕਾਲਂ ਪਟਿਚ੍ਛਾਦੇਤੁਂ ਨਾਸਕ੍ਖਿ, ‘‘ਗਯਾਸੀਸਂ ਗਨ੍ਤ੍ਵਾ ਦੇਵਦਤ੍ਤਸ੍ਸ ਪਟ੍ਠਪਿਤਂ ਭਤ੍ਤਂ ਭੁਞ੍ਜਤੀ’’ਤਿ ਨ ਚਿਰਸ੍ਸੇਵ ਪਾਕਟੋ ਜਾਤੋ. ਅਥ ਨਂ ਸਹਾਯਾ ਪੁਚ੍ਛਿਂਸੁ ‘‘ਸਚ੍ਚਂ ਕਿਰ, ਤ੍ਵਂ ਆਵੁਸੋ, ਦੇਵਦਤ੍ਤਸ੍ਸ ਪਟ੍ਠਪਿਤਂ ਭਤ੍ਤਂ ਭੁਞ੍ਜਸੀ’’ਤਿ. ‘‘ਕੋ ਏਵਮਾਹਾ’’ਤਿ? ‘‘ਅਸੁਕੋ ਚ ਅਸੁਕੋ ਚਾ’’ਤਿ. ‘‘ਸਚ੍ਚਂ ਅਹਂ ਆਵੁਸੋ ਗਯਾਸੀਸਂ ਗਨ੍ਤ੍ਵਾ ਭੁਞ੍ਜਾਮਿ, ਨ ਪਨ ਮੇ ਦੇਵਦਤ੍ਤੋ ਭਤ੍ਤਂ ਦੇਤਿ, ਅਞ੍ਞੇ ਮਨੁਸ੍ਸਾ ਦੇਨ੍ਤੀ’’ਤਿ. ‘‘ਆਵੁਸੋ, ਦੇਵਦਤ੍ਤੋ ਬੁਦ੍ਧਾਨਂ ਪਟਿਕਣ੍ਟਕੋ ਦੁਸ੍ਸੀਲੋ ਅਜਾਤਸਤ੍ਤੁਂ ਪਸਾਦੇਤ੍ਵਾ ਅਧਮ੍ਮੇਨ ਅਤ੍ਤਨੋ ਲਾਭਸਕ੍ਕਾਰਂ ਉਪ੍ਪਾਦੇਸਿ, ਤ੍ਵਂ ਏਵਰੂਪੇ ਨਿਯ੍ਯਾਨਿਕੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾ ਦੇਵਦਤ੍ਤਸ੍ਸ ਅਧਮ੍ਮੇਨ ਉਪ੍ਪਨ੍ਨਂ ਭੋਜਨਂ ਭੁਞ੍ਜਸਿ, ਏਹਿ ਤਂ ਸਤ੍ਥੁ ਸਨ੍ਤਿਕਂ ਨੇਸ੍ਸਾਮਾ’’ਤਿ ਤਂ ਭਿਕ੍ਖੁਂ ਆਦਾਯ ਧਮ੍ਮਸਭਂ ਆਗਮਿਂਸੁ.

ਸਤ੍ਥਾ ਦਿਸ੍ਵਾਵ ‘‘ਕਿਂ, ਭਿਕ੍ਖਵੇ, ਏਤਂ ਭਿਕ੍ਖੁਂ ਅਨਿਚ੍ਛਨ੍ਤਞ੍ਞੇਵ ਆਦਾਯ ਆਗਤਤ੍ਥਾ’’ਤਿ? ‘‘ਆਮ ਭਨ੍ਤੇ, ਅਯਂ ਭਿਕ੍ਖੁ ਤੁਮ੍ਹਾਕਂ ਸਨ੍ਤਿਕੇ ਪਬ੍ਬਜਿਤ੍ਵਾ ਦੇਵਦਤ੍ਤਸ੍ਸ ਅਧਮ੍ਮੇਨ ਉਪ੍ਪਨ੍ਨਂ ਭੋਜਨਂ ਭੁਞ੍ਜਤੀ’’ਤਿ. ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਦੇਵਦਤ੍ਤਸ੍ਸ ਅਧਮ੍ਮੇਨ ਉਪ੍ਪਨ੍ਨਂ ਭੋਜਨਂ ਭੁਞ੍ਜਸੀ’’ਤਿ? ‘‘ਨ ਭਨ੍ਤੇ, ਦੇਵਦਤ੍ਤੋ ਮਯ੍ਹਂ ਦੇਤਿ, ਅਞ੍ਞੇ ਮਨੁਸ੍ਸਾ ਦੇਨ੍ਤਿ, ਤਮਹਂ ਭੁਞ੍ਜਾਮੀ’’ਤਿ. ਸਤ੍ਥਾ ‘‘ਮਾ ਭਿਕ੍ਖੁ ਏਤ੍ਥ ਪਰਿਹਾਰਂ ਕਰਿ, ਦੇਵਦਤ੍ਤੋ ਅਨਾਚਾਰੋ ਦੁਸ੍ਸੀਲੋ, ਕਥਞ੍ਹਿ ਨਾਮ ਤ੍ਵਂ ਇਧ ਪਬ੍ਬਜਿਤ੍ਵਾ ਮਮ ਸਾਸਨਂ ਭਜਨ੍ਤੋਯੇਵ ਦੇਵਦਤ੍ਤਸ੍ਸ ਭਤ੍ਤਂ ਭੁਞ੍ਜਸਿ, ਨਿਚ੍ਚਕਾਲਮ੍ਪਿ ਭਜਨਸੀਲਕੋਵ ਤ੍ਵਂ ਦਿਟ੍ਠਦਿਟ੍ਠੇਯੇਵ ਭਜਸੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਮਚ੍ਚੋ ਅਹੋਸਿ. ਤਦਾ ਰਞ੍ਞੋ ਮਹਿਲ਼ਾਮੁਖੋ ਨਾਮ ਮਙ੍ਗਲਹਤ੍ਥੀ ਅਹੋਸਿ ਸੀਲਵਾ ਆਚਾਰਸਮ੍ਪਨ੍ਨੋ, ਨ ਕਞ੍ਚਿ ਵਿਹੇਠੇਤਿ. ਅਥੇਕਦਿਵਸਂ ਤਸ੍ਸ ਸਾਲਾਯ ਸਮੀਪੇ ਰਤ੍ਤਿਭਾਗਸਮਨਨ੍ਤਰੇ ਚੋਰਾ ਆਗਨ੍ਤ੍ਵਾ ਤਸ੍ਸ ਅਵਿਦੂਰੇ ਨਿਸਿਨ੍ਨਾ ਚੋਰਮਨ੍ਤਂ ਮਨ੍ਤਯਿਂਸੁ ‘‘ਏਵਂ ਉਮ੍ਮਙ੍ਗੋ ਭਿਨ੍ਦਿਤਬ੍ਬੋ, ਏਵਂ ਸਨ੍ਧਿਚ੍ਛੇਦਕਮ੍ਮਂ ਕਤ੍ਤਬ੍ਬਂ, ਉਮ੍ਮਙ੍ਗਞ੍ਚ ਸਨ੍ਧਿਚ੍ਛੇਦਞ੍ਚ ਮਗ੍ਗਸਦਿਸਂ ਤਿਤ੍ਥਸਦਿਸਂ ਨਿਜ੍ਜਟਂ ਨਿਗ੍ਗੁਮ੍ਬਂ ਕਤ੍ਵਾ ਭਣ੍ਡਂ ਹਰਿਤੁਂ ਵਟ੍ਟਤਿ, ਹਰਨ੍ਤੇਨ ਮਾਰੇਤ੍ਵਾਵ ਹਰਿਤਬ੍ਬਂ, ਏਵਂ ਉਟ੍ਠਾਤੁਂ ਸਮਤ੍ਥੋ ਨਾਮ ਨ ਭਵਿਸ੍ਸਤਿ, ਚੋਰੇਨ ਚ ਨਾਮ ਸੀਲਾਚਾਰਯੁਤ੍ਤੇਨ ਨ ਭਵਿਤਬ੍ਬਂ, ਕਕ੍ਖਲ਼ੇਨ ਫਰੁਸੇਨ ਸਾਹਸਿਕੇਨ ਭਵਿਤਬ੍ਬ’’ਨ੍ਤਿ. ਏਵਂ ਮਨ੍ਤੇਤ੍ਵਾ ਅਞ੍ਞਮਞ੍ਞਂ ਉਗ੍ਗਣ੍ਹਾਪੇਤ੍ਵਾ ਅਗਮਂਸੁ. ਏਤੇਨੇਵ ਉਪਾਯੇਨ ਪੁਨਦਿਵਸੇਪਿ ਪੁਨਦਿਵਸੇਪੀਤਿ ਬਹੂ ਦਿਵਸੇ ਤਤ੍ਥ ਆਗਨ੍ਤ੍ਵਾ ਮਨ੍ਤਯਿਂਸੁ. ਸੋ ਤੇਸਂ ਵਚਨਂ ਸੁਤ੍ਵਾ ‘‘ਤੇ ਮਂ ਸਿਕ੍ਖਾਪੇਨ੍ਤੀ’’ਤਿ ਸਞ੍ਞਾਯ ‘‘ਇਦਾਨਿ ਮਯਾ ਕਕ੍ਖਲ਼ੇਨ ਫਰੁਸੇਨ ਸਾਹਸਿਕੇਨ ਭਵਿਤਬ੍ਬ’’ਨ੍ਤਿ ਤਥਾਰੂਪੋਵ ਅਹੋਸਿ. ਪਾਤੋਵ ਆਗਤਂ ਹਤ੍ਥਿਗੋਪਕਂ ਸੋਣ੍ਡਾਯ ਗਹੇਤ੍ਵਾ ਭੂਮਿਯਂ ਪੋਥੇਤ੍ਵਾ ਮਾਰੇਸਿ. ਅਪਰਮ੍ਪਿ ਤਥਾ ਅਪਰਮ੍ਪਿ ਤਥਾਤਿ ਆਗਤਾਗਤਂ ਮਾਰੇਤਿਯੇਵ.

‘‘ਮਹਿਲ਼ਾਮੁਖੋ ਉਮ੍ਮਤ੍ਤਕੋ ਜਾਤੋ ਦਿਟ੍ਠਦਿਟ੍ਠੇ ਮਾਰੇਤੀ’’ਤਿ ਰਞ੍ਞੋ ਆਰੋਚਯਿਂਸੁ. ਰਾਜਾ ਬੋਧਿਸਤ੍ਤਂ ਪਹਿਣਿ ‘‘ਗਚ੍ਛ ਪਣ੍ਡਿਤ, ਜਾਨਾਹਿ ਕੇਨ ਕਾਰਣੇਨ ਸੋ ਦੁਟ੍ਠੋ ਜਾਤੋ’’ਤਿ. ਬੋਧਿਸਤ੍ਤੋ ਗਨ੍ਤ੍ਵਾ ਤਸ੍ਸ ਸਰੀਰੇ ਅਰੋਗਭਾਵਂ ਞਤ੍ਵਾ ‘‘ਕੇਨ ਨੁ ਖੋ ਕਾਰਣੇਨ ਏਸ ਦੁਟ੍ਠੋ ਜਾਤੋ’’ਤਿ ਉਪਧਾਰੇਨ੍ਤੋ ‘‘ਅਦ੍ਧਾ ਅਵਿਦੂਰੇ ਕੇਸਞ੍ਚਿ ਵਚਨਂ ਸੁਤ੍ਵਾ ‘ਮਂ ਏਤੇ ਸਿਕ੍ਖਾਪੇਨ੍ਤੀ’ਤਿ ਸਞ੍ਞਾਯ ਦੁਟ੍ਠੋ ਜਾਤੋ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਹਤ੍ਥਿਗੋਪਕੇ ਪੁਚ੍ਛਿ ‘‘ਅਤ੍ਥਿ ਨੁ ਖੋ ਹਤ੍ਥਿਸਾਲਾਯ ਸਮੀਪੇ ਰਤ੍ਤਿਭਾਗੇ ਕੇਹਿਚਿ ਕਿਞ੍ਚਿ ਕਥਿਤਪੁਬ੍ਬ’’ਨ੍ਤਿ? ‘‘ਆਮ, ਸਾਮਿ, ਚੋਰਾ ਆਗਨ੍ਤ੍ਵਾ ਕਥਯਿਂਸੂ’’ਤਿ. ਬੋਧਿਸਤ੍ਤੋ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ ‘‘ਦੇਵ, ਅਞ੍ਞੋ ਹਤ੍ਥਿਸ੍ਸ ਸਰੀਰੇ ਵਿਕਾਰੋ ਨਤ੍ਥਿ, ਚੋਰਾਨਂ ਕਥਂ ਸੁਤ੍ਵਾ ਦੁਟ੍ਠੋ ਜਾਤੋ’’ਤਿ. ‘‘ਇਦਾਨਿ ਕਿਂ ਕਾਤੁਂ ਵਟ੍ਟਤੀ’’ਤਿ? ‘‘ਸੀਲਵਨ੍ਤੇ ਸਮਣਬ੍ਰਾਹ੍ਮਣੇ ਹਤ੍ਥਿਸਾਲਾਯਂ ਨਿਸੀਦਾਪੇਤ੍ਵਾ ਸੀਲਾਚਾਰਕਥਂ ਕਥਾਪੇਤੁਂ ਵਟ੍ਟਤੀ’’ਤਿ. ‘‘ਏਵਂ ਕਾਰੇਹਿ, ਤਾਤਾ’’ਤਿ.

ਬੋਧਿਸਤ੍ਤੋ ਗਨ੍ਤ੍ਵਾ ਸੀਲਵਨ੍ਤੇ ਸਮਣਬ੍ਰਾਹ੍ਮਣੇ ਹਤ੍ਥਿਸਾਲਾਯਂ ਨਿਸੀਦਾਪੇਤ੍ਵਾ ‘‘ਸੀਲਕਥਂ ਕਥੇਥ, ਭਨ੍ਤੇ’’ਤਿ ਆਹ. ਤੇ ਹਤ੍ਥਿਸ੍ਸ ਅਵਿਦੂਰੇ ਨਿਸਿਨ੍ਨਾ ‘‘ਨ ਕੋਚਿ ਪਰਾਮਸਿਤਬ੍ਬੋ ਨ ਮਾਰੇਤਬ੍ਬੋ, ਸੀਲਾਚਾਰਸਮ੍ਪਨ੍ਨੇਨ ਖਨ੍ਤਿਮੇਤ੍ਤਾਨੁਦ੍ਦਯਯੁਤ੍ਤੇਨ ਭਵਿਤੁਂ ਵਟ੍ਟਤੀ’’ਤਿ ਸੀਲਕਥਂ ਕਥਯਿਂਸੁ. ਸੋ ਤਂ ਸੁਤ੍ਵਾ ‘‘ਮਂ ਇਮੇ ਸਿਕ੍ਖਾਪੇਨ੍ਤਿ, ਇਤੋ ਦਾਨਿ ਪਟ੍ਠਾਯ ਸੀਲਵਨ੍ਤੇਨ ਭਵਿਤਬ੍ਬ’’ਨ੍ਤਿ ਸੀਲਵਾ ਅਹੋਸਿ. ਰਾਜਾ ਬੋਧਿਸਤ੍ਤਂ ਪੁਚ੍ਛਿ ‘‘ਕਿਂ, ਤਾਤ, ਸੀਲਵਾ ਜਾਤੋ’’ਤਿ? ਬੋਧਿਸਤ੍ਤੋ ‘‘ਆਮ, ਦੇਵਾ’’ਤਿ. ‘‘ਏਵਰੂਪੋ ਦੁਟ੍ਠਹਤ੍ਥੀ ਪਣ੍ਡਿਤੇ ਨਿਸ੍ਸਾਯ ਪੋਰਾਣਕਧਮ੍ਮੇਯੇਵ ਪਤਿਟ੍ਠਿਤੋ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੬. ‘‘ਪੁਰਾਣਚੋਰਾਨ ਵਚੋ ਨਿਸਮ੍ਮ, ਮਹਿਲ਼ਾਮੁਖੋ ਪੋਥਯਮਨ੍ਵਚਾਰੀ;

ਸੁਸਞ੍ਞਤਾਨਞ੍ਹਿ ਵਚੋ ਨਿਸਮ੍ਮ, ਗਜੁਤ੍ਤਮੋ ਸਬ੍ਬਗੁਣੇਸੁ ਅਟ੍ਠਾ’’ਤਿ.

ਤਤ੍ਥ ਪੁਰਾਣਚੋਰਾਨਨ੍ਤਿ ਪੋਰਾਣਚੋਰਾਨਂ. ਨਿਸਮ੍ਮਾਤਿ ਸੁਤ੍ਵਾ, ਪਠਮਂ ਚੋਰਾਨਂ ਵਚਨਂ ਸੁਤ੍ਵਾਤਿ ਅਤ੍ਥੋ. ਮਹਿਲ਼ਾਮੁਖੋਤਿ ਹਤ੍ਥਿਨਿਮੁਖੇਨ ਸਦਿਸਮੁਖੋ. ਯਥਾ ਮਹਿਲ਼ਾ ਪੁਰਤੋ ਓਲੋਕਿਯਮਾਨਾ ਸੋਭਤਿ, ਨ ਪਚ੍ਛਤੋ, ਤਥਾ ਸੋਪਿ ਪੁਰਤੋ ਓਲੋਕਿਯਮਾਨੋ ਸੋਭਤਿ. ਤਸ੍ਮਾ ‘‘ਮਹਿਲ਼ਾਮੁਖੋ’’ਤਿਸ੍ਸ ਨਾਮਂ ਅਕਂਸੁ. ਪੋਥਯਮਨ੍ਵਚਾਰੀਤਿ ਪੋਥਯਨ੍ਤੋ ਮਾਰੇਨ੍ਤੋ ਅਨੁਚਾਰੀ. ਅਯਮੇਵ ਵਾ ਪਾਠੋ. ਸੁਸਞ੍ਞਤਾਨਨ੍ਤਿ ਸੁਟ੍ਠੁ ਸਞ੍ਞਤਾਨਂ ਸੀਲਵਨ੍ਤਾਨਂ. ਗਜੁਤ੍ਤਮੋਤਿ ਉਤ੍ਤਮਗਜੋ ਮਙ੍ਗਲਹਤ੍ਥੀ. ਸਬ੍ਬਗੁਣੇਸੁ ਅਟ੍ਠਾਤਿ ਸਬ੍ਬੇਸੁ ਪੋਰਾਣਗੁਣੇਸੁ ਪਤਿਟ੍ਠਿਤੋ. ਰਾਜਾ ‘‘ਤਿਰਚ੍ਛਾਨਗਤਸ੍ਸਾਪਿ ਆਸਯਂ ਜਾਨਾਤੀ’’ਤਿ ਬੋਧਿਸਤ੍ਤਸ੍ਸ ਮਹਨ੍ਤਂ ਯਸਂ ਅਦਾਸਿ. ਸੋ ਯਾਵਤਾਯੁਕਂ ਠਤ੍ਵਾ ਸਦ੍ਧਿਂ ਬੋਧਿਸਤ੍ਤੇਨ ਯਥਾਕਮ੍ਮਂ ਗਤੋ.

ਸਤ੍ਥਾ ‘‘ਪੁਬ੍ਬੇਪਿ ਤ੍ਵਂ ਭਿਕ੍ਖੁ ਦਿਟ੍ਠਦਿਟ੍ਠੇਯੇਵ ਭਜਿ, ਚੋਰਾਨਂ ਵਚਨਂ ਸੁਤ੍ਵਾ ਚੋਰੇ ਭਜਿ, ਧਮ੍ਮਿਕਾਨਂ ਵਚਨਂ ਸੁਤ੍ਵਾ ਧਮ੍ਮਿਕੇ ਭਜੀ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਹਿਲ਼ਾਮੁਖੋ ਵਿਪਕ੍ਖਸੇਵਕਭਿਕ੍ਖੁ ਅਹੋਸਿ, ਰਾਜਾ ਆਨਨ੍ਦੋ, ਅਮਚ੍ਚੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਹਿਲ਼ਾਮੁਖਜਾਤਕਵਣ੍ਣਨਾ ਛਟ੍ਠਾ.

[੨੭] ੭. ਅਭਿਣ੍ਹਜਾਤਕਵਣ੍ਣਨਾ

ਨਾਲਂ ਕਬਲ਼ਂ ਪਦਾਤਵੇਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਉਪਾਸਕਞ੍ਚ ਮਹਲ੍ਲਕਤ੍ਥੇਰਞ੍ਚ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਦ੍ਵੇ ਸਹਾਯਕਾ. ਤੇਸੁ ਏਕੋ ਪਬ੍ਬਜਿਤ੍ਵਾ ਦੇਵਸਿਕਂ ਇਤਰਸ੍ਸ ਘਰਂ ਗਚ੍ਛਤਿ. ਸੋ ਤਸ੍ਸ ਭਿਕ੍ਖਂ ਦਤ੍ਵਾ ਸਯਮ੍ਪਿ ਭੁਞ੍ਜਿਤ੍ਵਾ ਤੇਨੇਵ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਯਾਵ ਸੂਰਿਯਤ੍ਥਙ੍ਗਮਨਾ ਆਲਾਪਸਲ੍ਲਾਪੇਨ ਨਿਸੀਦਿਤ੍ਵਾ ਨਗਰਂ ਪਵਿਸਤਿ, ਇਤਰੋਪਿ ਨਂ ਯਾਵ ਨਗਰਦ੍ਵਾਰਾ ਅਨੁਗਨ੍ਤ੍ਵਾ ਨਿਵਤ੍ਤਤਿ. ਸੋ ਤੇਸਂ ਵਿਸ੍ਸਾਸੋ ਭਿਕ੍ਖੂਨਂ ਅਨ੍ਤਰੇ ਪਾਕਟੋ ਜਾਤੋ. ਅਥੇਕਦਿਵਸਂ ਭਿਕ੍ਖੂ ਤੇਸਂ ਵਿਸ੍ਸਾਸਕਥਂ ਕਥੇਨ੍ਤਾ ਧਮ੍ਮਸਭਾਯਂ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿ, ਤੇ ‘‘ਇਮਾਯ ਨਾਮ, ਭਨ੍ਤੇ’’ਤਿ ਕਥਯਿਂਸੁ. ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ ਇਮੇ ਵਿਸ੍ਸਾਸਿਕਾ, ਪੁਬ੍ਬੇਪਿ ਵਿਸ੍ਸਾਸਿਕਾਯੇਵ ਅਹੇਸੁ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਮਚ੍ਚੋ ਅਹੋਸਿ. ਤਦਾ ਏਕੋ ਕੁਕ੍ਕੁਰੋ ਮਙ੍ਗਲਹਤ੍ਥਿਸਾਲਂ ਗਨ੍ਤ੍ਵਾ ਮਙ੍ਗਲਹਤ੍ਥਿਸ੍ਸ ਭੁਞ੍ਜਨਟ੍ਠਾਨੇ ਪਤਿਤਾਨਿ ਭਤ੍ਤਸਿਤ੍ਥਾਨਿ ਖਾਦਤਿ. ਸੋ ਤੇਨੇਵ ਭੋਜਨੇਨ ਸਂਵਦ੍ਧਮਾਨੋ ਮਙ੍ਗਲਹਤ੍ਥਿਸ੍ਸ ਵਿਸ੍ਸਾਸਿਕੋ ਜਾਤੋ ਹਤ੍ਥਿਸ੍ਸੇਵ ਸਨ੍ਤਿਕੇ ਭੁਞ੍ਜਤਿ, ਉਭੋਪਿ ਵਿਨਾ ਵਤ੍ਤਿਤੁਂ ਨ ਸਕ੍ਕੋਨ੍ਤਿ. ਸੋ ਹਤ੍ਥੀ ਨਂ ਸੋਣ੍ਡਾਯ ਗਹੇਤ੍ਵਾ ਅਪਰਾਪਰਂ ਕਰੋਨ੍ਤੋ ਕੀਲ਼ਤਿ, ਉਕ੍ਖਿਪਿਤ੍ਵਾ ਕੁਮ੍ਭੇ ਪਤਿਟ੍ਠਾਪੇਤਿ. ਅਥੇਕਦਿਵਸਂ ਏਕੋ ਗਾਮਿਕਮਨੁਸ੍ਸੋ ਹਤ੍ਥਿਗੋਪਕਸ੍ਸ ਮੂਲਂ ਦਤ੍ਵਾ ਤਂ ਕੁਕ੍ਕੁਰਂ ਆਦਾਯ ਅਤ੍ਤਨੋ ਗਾਮਂ ਅਗਮਾਸਿ. ਤਤੋ ਪਟ੍ਠਾਯ ਸੋ ਹਤ੍ਥੀ ਕੁਕ੍ਕੁਰਂ ਅਪਸ੍ਸਨ੍ਤੋ ਨੇਵ ਖਾਦਤਿ ਨ ਪਿਵਤਿ ਨ ਨ੍ਹਾਯਤਿ. ਤਮਤ੍ਥਂ ਰਞ੍ਞੋ ਆਰੋਚੇਸੁਂ. ਰਾਜਾ ਬੋਧਿਸਤ੍ਤਂ ਪਹਿਣਿ ‘‘ਗਚ੍ਛ ਪਣ੍ਡਿਤ, ਜਾਨਾਹਿ ਕਿਂਕਾਰਣਾ ਹਤ੍ਥੀ ਏਵਂ ਕਰੋਤੀ’’ਤਿ.

ਬੋਧਿਸਤ੍ਤੋ ਹਤ੍ਥਿਸਾਲਂ ਗਨ੍ਤ੍ਵਾ ਹਤ੍ਥਿਸ੍ਸ ਦੁਮ੍ਮਨਭਾਵਂ ਞਤ੍ਵਾ ‘‘ਇਮਸ੍ਸ ਸਰੀਰੇ ਰੋਗੋ ਨ ਪਞ੍ਞਾਯਤਿ, ਕੇਨਚਿ ਪਨਸ੍ਸ ਸਦ੍ਧਿਂ ਮਿਤ੍ਤਸਨ੍ਥਵੇਨ ਭਵਿਤਬ੍ਬਂ, ਤਂ ਅਪਸ੍ਸਨ੍ਤੋ ਏਸ ਮਞ੍ਞੇ ਸੋਕਾਭਿਭੂਤੋ’’ਤਿ ਹਤ੍ਥਿਗੋਪਕੇ ਪੁਚ੍ਛਿ ‘‘ਅਤ੍ਥਿ ਨੁ ਖੋ ਇਮਸ੍ਸ ਕੇਨਚਿ ਸਦ੍ਧਿਂ ਵਿਸ੍ਸਾਸੋ’’ਤਿ? ‘‘ਆਮ, ਅਤ੍ਥਿ ਸਾਮਿ ਏਕੇਨ ਸੁਨਖੇਨ ਸਦ੍ਧਿਂ ਬਲਵਾ ਮੇਤ੍ਤੀ’’ਤਿ. ‘‘ਕਹਂ ਸੋ ਏਤਰਹੀ’’ਤਿ? ‘‘ਏਕੇਨ ਮਨੁਸ੍ਸੇਨ ਨੀਤੋ’’ਤਿ. ‘‘ਜਾਨਾਥ ਪਨਸ੍ਸ ਨਿਵਾਸਨਟ੍ਠਾਨ’’ਨ੍ਤਿ? ‘‘ਨ ਜਾਨਾਮ, ਸਾਮੀ’’ਤਿ. ਬੋਧਿਸਤ੍ਤੋ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ‘‘ਨਤ੍ਥਿ, ਦੇਵ, ਹਤ੍ਥਿਸ੍ਸ ਕੋਚਿ ਆਬਾਧੋ, ਏਕੇਨ ਪਨਸ੍ਸ ਸੁਨਖੇਨ ਸਦ੍ਧਿਂ ਬਲਵਵਿਸ੍ਸਾਸੋ, ਤਂ ਅਪਸ੍ਸਨ੍ਤੋ ਨ ਭੁਞ੍ਜਤਿ ਮਞ੍ਞੇ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੭. ‘‘ਨਾਲਂ ਕਬਲ਼ਂ ਪਦਾਤਵੇ, ਨ ਚ ਪਿਣ੍ਡਂ ਨ ਕੁਸੇ ਨ ਘਂਸਿਤੁਂ;

ਮਞ੍ਞਾਮਿ ਅਭਿਣ੍ਹਦਸ੍ਸਨਾ, ਨਾਗੋ ਸ੍ਨੇਹਮਕਾਸਿ ਕੁਕ੍ਕੁਰੇ’’ਤਿ.

ਤਤ੍ਥ ਨਾਲਨ੍ਤਿ ਨ ਸਮਤ੍ਥੋ. ਕਬਲ਼ਨ੍ਤਿ ਭੋਜਨਕਾਲੇ ਪਠਮਮੇਵ ਦਿਨ੍ਨਂ ਕਟੁਕਕਬਲ਼ਂ. ਪਦਾਤਵੇਤਿ ਪਆਦਾਤਵੇ, ਸਨ੍ਧਿਵਸੇਨ ਆਕਾਰਲੋਪੋ ਵੇਦਿਤਬ੍ਬੋ, ਗਹੇਤੁਨ੍ਤਿ ਅਤ੍ਥੋ. ਨ ਚ ਪਿਣ੍ਡਨ੍ਤਿ ਵਡ੍ਢੇਤ੍ਵਾ ਦੀਯਮਾਨਂ ਭਤ੍ਤਪਿਣ੍ਡਮ੍ਪਿ ਨਾਲਂ ਗਹੇਤੁਂ. ਨ ਕੁਸੇਤਿ ਖਾਦਨਤ੍ਥਾਯ ਦਿਨ੍ਨਾਨਿ ਤਿਣਾਨਿਪਿ ਨਾਲਂ ਗਹੇਤੁਂ. ਨ ਘਂਸਿਤੁਨ੍ਤਿ ਨ੍ਹਾਪਿਯਮਾਨੋ ਸਰੀਰਮ੍ਪਿ ਘਂਸਿਤੁਂ ਨਾਲਂ. ਏਵਂ ਯਂ ਯਂ ਸੋ ਹਤ੍ਥੀ ਕਾਤੁਂ ਨ ਸਮਤ੍ਥੋ, ਤਂ ਤਂ ਸਬ੍ਬਂ ਰਞ੍ਞੋ ਆਰੋਚੇਤ੍ਵਾ ਤਸ੍ਸ ਅਸਮਤ੍ਥਭਾਵੇ ਅਤ੍ਤਨਾ ਸਲ੍ਲਕ੍ਖਿਤਕਾਰਣਂ ਆਰੋਚੇਨ੍ਤੋ ‘‘ਮਞ੍ਞਾਮੀ’’ਤਿਆਦਿਮਾਹ.

ਰਾਜਾ ਤਸ੍ਸ ਵਚਨਂ ਸੁਤ੍ਵਾ ‘‘ਇਦਾਨਿ ਕਿਂ ਕਾਤਬ੍ਬਂ ਪਣ੍ਡਿਤਾ’’ਤਿ ਪੁਚ੍ਛਿ. ‘‘‘ਅਮ੍ਹਾਕਂ ਕਿਰ ਮਙ੍ਗਲਹਤ੍ਥਿਸ੍ਸ ਸਹਾਯਂ ਸੁਨਖਂ ਏਕੋ ਮਨੁਸ੍ਸੋ ਗਹੇਤ੍ਵਾ ਗਤੋ, ਯਸ੍ਸ ਘਰੇ ਤਂ ਸੁਨਖਂ ਪਸ੍ਸਨ੍ਤਿ, ਤਸ੍ਸ ਅਯਂ ਨਾਮ ਦਣ੍ਡੋ’ਤਿ ਭੇਰਿਂ ਚਰਾਪੇਥ ਦੇਵਾ’’ਤਿ. ਰਾਜਾ ਤਥਾ ਕਾਰੇਸਿ. ਤਂ ਪਵਤ੍ਤਿਂ ਸੁਤ੍ਵਾ ਸੋ ਪੁਰਿਸੋ ਸੁਨਖਂ ਵਿਸ੍ਸਜ੍ਜੇਸਿ, ਸੁਨਖੋ ਵੇਗੇਨਾਗਨ੍ਤ੍ਵਾ ਹਤ੍ਥਿਸ੍ਸ ਸਨ੍ਤਿਕਮੇਵ ਅਗਮਾਸਿ. ਹਤ੍ਥੀ ਤਂ ਸੋਣ੍ਡਾਯ ਗਹੇਤ੍ਵਾ ਕੁਮ੍ਭੇ ਠਪੇਤ੍ਵਾ ਰੋਦਿਤ੍ਵਾ ਪਰਿਦੇਵਿਤ੍ਵਾ ਕੁਮ੍ਭਾ ਓਤਾਰੇਤ੍ਵਾ ਤੇਨ ਭੁਤ੍ਤੇ ਪਚ੍ਛਾ ਅਤ੍ਤਨਾਪਿ ਭੁਞ੍ਜਿ. ‘‘ਤਿਰਚ੍ਛਾਨਗਤਸ੍ਸ ਆਸਯਂ ਜਾਨਾਤੀ’’ਤਿ ਰਾਜਾ ਬੋਧਿਸਤ੍ਤਸ੍ਸ ਮਹਨ੍ਤਂ ਯਸਂ ਅਦਾਸਿ.

ਸਤ੍ਥਾ ‘‘ਨ, ਭਿਕ੍ਖਵੇ, ਇਮੇ ਇਦਾਨੇਵ ਵਿਸ੍ਸਾਸਿਕਾ, ਪੁਬ੍ਬੇਪਿ ਵਿਸ੍ਸਾਸਿਕਾਯੇਵਾ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਚਤੁਸਚ੍ਚਕਥਾਯ ਵਿਨਿਵਟ੍ਟੇਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ. ਇਦਂ ਚਤੁਸਚ੍ਚਕਥਾਯ ਵਿਨਿਵਟ੍ਟਨਂ ਨਾਮ ਸਬ੍ਬਜਾਤਕੇਸੁਪਿ ਅਤ੍ਥਿਯੇਵ. ਮਯਂ ਪਨ ਯਤ੍ਥਸ੍ਸ ਆਨਿਸਂਸੋ ਪਞ੍ਞਾਯਤਿ, ਤਤ੍ਥੇਵ ਦਸ੍ਸਯਿਸ੍ਸਾਮ.

ਤਦਾ ਸੁਨਖੋ ਉਪਾਸਕੋ ਅਹੋਸਿ, ਹਤ੍ਥੀ ਮਹਲ੍ਲਕਤ੍ਥੇਰੋ, ਰਾਜਾ ਆਨਨ੍ਦੋ, ਅਮਚ੍ਚਪਣ੍ਡਿਤੋ ਪਨ ਅਹਮੇਵ ਅਹੋਸਿਨ੍ਤਿ.

ਅਭਿਣ੍ਹਜਾਤਕਵਣ੍ਣਨਾ ਸਤ੍ਤਮਾ.

[੨੮] ੮. ਨਨ੍ਦਿਵਿਸਾਲਜਾਤਕਵਣ੍ਣਨਾ

ਮਨੁਞ੍ਞਮੇਵ ਭਾਸੇਯ੍ਯਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਛਬ੍ਬਗ੍ਗਿਯਾਨਂ ਭਿਕ੍ਖੂਨਂ ਓਮਸਵਾਦਂ ਆਰਬ੍ਭ ਕਥੇਸਿ. ਤਸ੍ਮਿਞ੍ਹਿ ਸਮਯੇ ਛਬ੍ਬਗ੍ਗਿਯਾ ਕਲਹਂ ਕਰੋਨ੍ਤਾ ਪੇਸਲੇ ਭਿਕ੍ਖੂ ਖੁਂਸੇਨ੍ਤਿ ਵਮ੍ਭੇਨ੍ਤਿ ਓਵਿਜ੍ਝਨ੍ਤਿ, ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਨ੍ਤਿ. ਭਿਕ੍ਖੂ ਭਗਵਤੋ ਆਰੋਚੇਸੁਂ. ਭਗਵਾ ਛਬ੍ਬਗ੍ਗਿਯੇ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਭਿਕ੍ਖਵੋ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚ’’ਨ੍ਤਿ ਵੁਤ੍ਤੇ ਵਿਗਰਹਿਤ੍ਵਾ ‘‘ਭਿਕ੍ਖਵੇ, ਫਰੁਸਵਾਚਾ ਨਾਮ ਤਿਰਚ੍ਛਾਨਗਤਾਨਮ੍ਪਿ ਅਮਨਾਪਾ, ਪੁਬ੍ਬੇਪਿ ਏਕੋ ਤਿਰਚ੍ਛਾਨਗਤੋ ਅਤ੍ਤਾਨਂ ਫਰੁਸੇਨ ਸਮੁਦਾਚਰਨ੍ਤਂ ਸਹਸ੍ਸਂ ਪਰਾਜੇਸੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਗਨ੍ਧਾਰਰਟ੍ਠੇ ਤਕ੍ਕਸਿਲਾਯਂ ਗਨ੍ਧਾਰਰਾਜਾ ਰਜ੍ਜਂ ਕਾਰੇਸਿ. ਤਦਾ ਬੋਧਿਸਤ੍ਤੋ ਗੋਯੋਨਿਯਂ ਨਿਬ੍ਬਤ੍ਤਿ. ਅਥ ਨਂ ਤਰੁਣਵਚ੍ਛਕਕਾਲੇਯੇਵ ਏਕੋ ਬ੍ਰਾਹ੍ਮਣੋ ਗੋਦਕ੍ਖਿਣਾਦਾਯਕਾਨਂ ਸਨ੍ਤਿਕਾ ਲਭਿਤ੍ਵਾ ‘‘ਨਨ੍ਦਿਵਿਸਾਲੋ’’ਤਿ ਨਾਮਂ ਕਤ੍ਵਾ ਪੁਤ੍ਤਟ੍ਠਾਨੇ ਠਪੇਤ੍ਵਾ ਸਮ੍ਪਿਯਾਯਮਾਨੋ ਯਾਗੁਭਤ੍ਤਾਦੀਨਿ ਦਤ੍ਵਾ ਪੋਸੇਸਿ. ਬੋਧਿਸਤ੍ਤੋ ਵਯਪ੍ਪਤ੍ਤੋ ਚਿਨ੍ਤੇਸਿ ‘‘ਅਹਂ ਇਮਿਨਾ ਬ੍ਰਾਹ੍ਮਣੇਨ ਕਿਚ੍ਛੇਨ ਪਟਿਜਗ੍ਗਿਤੋ, ਮਯਾ ਚ ਸਦ੍ਧਿਂ ਸਕਲਜਮ੍ਬੁਦੀਪੇ ਅਞ੍ਞੋ ਸਮਧੁਰੋ ਗੋਣੋ ਨਾਮ ਨਤ੍ਥਿ, ਯਂਨੂਨਾਹਂ ਅਤ੍ਤਨੋ ਬਲਂ ਦਸ੍ਸੇਤ੍ਵਾ ਬ੍ਰਾਹ੍ਮਣਸ੍ਸ ਪੋਸਾਵਨਿਯਂ ਦਦੇਯ੍ਯ’’ਨ੍ਤਿ ਸੋ ਏਕਦਿਵਸਂ ਬ੍ਰਾਹ੍ਮਣਂ ਆਹ ‘‘ਗਚ੍ਛ, ਬ੍ਰਾਹ੍ਮਣ, ਏਕਂ ਗੋਵਿਤ੍ਤਕਸੇਟ੍ਠਿਂ ਉਪਸਙ੍ਕਮਿਤ੍ਵਾ ‘ਮਯ੍ਹਂ ਬਲਿਬਦ੍ਦੋ ਅਤਿਬਦ੍ਧਂ ਸਕਟਸਤਂ ਪਵਟ੍ਟੇਤੀ’ਤਿ ਵਤ੍ਵਾ ਸਹਸ੍ਸੇਨ ਅਬ੍ਭੁਤਂ ਕਰੋਹੀ’’ਤਿ. ਸੋ ਬ੍ਰਾਹ੍ਮਣੋ ਸੇਟ੍ਠਿਸ੍ਸ ਸਨ੍ਤਿਕਂ ਗਨ੍ਤ੍ਵਾ ਕਥਂ ਸਮੁਟ੍ਠਾਪੇਸਿ ‘‘ਇਮਸ੍ਮਿਂ ਨਗਰੇ ਕਸ੍ਸ ਗੋਣੋ ਥਾਮਸਮ੍ਪਨ੍ਨੋ’’ਤਿ. ਅਥ ਨਂ ਸੇਟ੍ਠਿ ‘‘ਅਸੁਕਸ੍ਸ ਚ ਅਸੁਕਸ੍ਸ ਚਾ’’ਤਿ ਵਤ੍ਵਾ ‘‘ਸਕਲਨਗਰੇ ਪਨ ਅਮ੍ਹਾਕਂ ਗੋਣੇਹਿ ਸਦਿਸੋ ਨਾਮ ਨਤ੍ਥੀ’’ਤਿ ਆਹ. ਬ੍ਰਾਹ੍ਮਣੋ ‘‘ਮਯ੍ਹਂ ਏਕੋ ਗੋਣੋ ਅਤਿਬਦ੍ਧਂ ਸਕਟਸਤਂ ਪਵਟ੍ਟੇਤੁਂ ਸਮਤ੍ਥੋ ਅਤ੍ਥੀ’’ਤਿ ਆਹ. ਸੇਟ੍ਠਿ ਗਹਪਤਿ ‘‘ਕੁਤੋ ਏਵਰੂਪੋ ਗੋਣੋ’’ਤਿ ਆਹ. ਬ੍ਰਾਹ੍ਮਣੋ ‘‘ਮਯ੍ਹਂ ਗੇਹੇ ਅਤ੍ਥੀ’’ਤਿ. ‘‘ਤੇਨ ਹਿ ਅਬ੍ਭੁਤਂ ਕਰੋਹੀ’’ਤਿ. ‘‘ਸਾਧੁ ਕਰੋਮੀ’’ਤਿ ਸਹਸ੍ਸੇਨ ਅਬ੍ਭੁਤਂ ਅਕਾਸਿ.

ਸੋ ਸਕਟਸਤਂ ਵਾਲੁਕਾਸਕ੍ਖਰਪਾਸਾਣਾਨਂਯੇਵ ਪੂਰੇਤ੍ਵਾ ਪਟਿਪਾਟਿਯਾ ਠਪੇਤ੍ਵਾ ਸਬ੍ਬਾਨਿ ਅਕ੍ਖਬਨ੍ਧਨਯੋਤ੍ਤੇਨ ਏਕਤੋ ਬਨ੍ਧਿਤ੍ਵਾ ਨਨ੍ਦਿਵਿਸਾਲਂ ਨ੍ਹਾਪੇਤ੍ਵਾ ਗਨ੍ਧਪਞ੍ਚਙ੍ਗੁਲਿਕਂ ਕਤ੍ਵਾ ਕਣ੍ਠੇ ਮਾਲਂ ਪਿਲ਼ਨ੍ਧਿਤ੍ਵਾ ਪੁਰਿਮਸਕਟਧੁਰੇ ਏਕਕਮੇਵ ਯੋਜੇਤ੍ਵਾ ਸਯਂ ਧੁਰੇ ਨਿਸੀਦਿਤ੍ਵਾ ਪਤੋਦਂ ਉਕ੍ਖਿਪਿਤ੍ਵਾ ‘‘ਗਚ੍ਛ ਕੂਟ, ਵਹਸ੍ਸੁ ਕੂਟਾ’’ਤਿ ਆਹ. ਬੋਧਿਸਤ੍ਤੋ ‘‘ਅਯਂ ਮਂ ਅਕੂਟਂ ਕੂਟਵਾਦੇਨ ਸਮੁਦਾਚਰਤੀ’’ਤਿ ਚਤ੍ਤਾਰੋ ਪਾਦੇ ਥਮ੍ਭੇ ਵਿਯ ਨਿਚ੍ਚਲੇ ਕਤ੍ਵਾ ਅਟ੍ਠਾਸਿ. ਸੇਟ੍ਠਿ ਤਙ੍ਖਣਞ੍ਞੇਵ ਬ੍ਰਾਹ੍ਮਣਂ ਸਹਸ੍ਸਂ ਆਹਰਾਪੇਸਿ. ਬ੍ਰਾਹ੍ਮਣੋ ਸਹਸ੍ਸਪਰਾਜਿਤੋ ਗੋਣਂ ਮੁਞ੍ਚਿਤ੍ਵਾ ਘਰਂ ਗਨ੍ਤ੍ਵਾ ਸੋਕਾਭਿਭੂਤੋ ਨਿਪਜ੍ਜਿ. ਨਨ੍ਦਿਵਿਸਾਲੋ ਚਰਿਤ੍ਵਾ ਆਗਤੋ ਬ੍ਰਾਹ੍ਮਣਂ ਸੋਕਾਭਿਭੂਤਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ‘‘ਕਿਂ, ਬ੍ਰਾਹ੍ਮਣ, ਨਿਦ੍ਦਾਯਸੀ’’ਤਿ ਆਹ. ‘‘ਕੁਤੋ ਮੇ, ਨਿਦ੍ਦਾ, ਸਹਸ੍ਸਪਰਾਜਿਤਸ੍ਸਾਤਿ, ਬ੍ਰਾਹ੍ਮਣ, ਮਯਾ ਏਤ੍ਤਕਂ ਕਾਲਂ ਤਵ ਗੇਹੇ ਵਸਨ੍ਤੇਨ ਅਤ੍ਥਿ ਕਿਞ੍ਚਿ ਭਾਜਨਂ ਵਾ ਭਿਨ੍ਦਿਤਪੁਬ੍ਬਂ, ਕੋਚਿ ਵਾ ਮਦ੍ਦਿਤਪੁਬ੍ਬੋ, ਅਟ੍ਠਾਨੇ ਵਾ ਪਨ ਉਚ੍ਚਾਰਪਸ੍ਸਾਵੋ ਕਤਪੁਬ੍ਬੋ’’ਤਿ? ‘‘ਨਤ੍ਥਿ ਤਾਤਾ’’ਤਿ. ਅਥ ਤ੍ਵਂ ਮਂ ਕਸ੍ਮਾ ਕੂਟਵਾਦੇਨ ਸਮੁਦਾਚਰਸਿ, ਤਵੇਵੇਸੋ ਦੋਸੋ, ਮਯ੍ਹਂ ਦੋਸੋ ਨਤ੍ਥਿ, ਗਚ੍ਛ, ਤੇਨ ਸਦ੍ਧਿਂ ਦ੍ਵੀਹਿ ਸਹਸ੍ਸੇਹਿ ਅਬ੍ਭੁਤਂ ਕਰੋਹਿ, ਕੇਵਲਂ ਮਂ ਅਕੂਟਂ ਕੂਟਵਾਦੇਨ ਮਾ ਸਮੁਦਾਚਰਸੀਤਿ.

ਬ੍ਰਾਹ੍ਮਣੋ ਤਸ੍ਸ ਵਚਨਂ ਸੁਤ੍ਵਾ ਗਨ੍ਤ੍ਵਾ ਦ੍ਵੀਹਿ ਸਹਸ੍ਸੇਹਿ ਅਬ੍ਭੁਤਂ ਕਤ੍ਵਾ ਪੁਰਿਮਨਯੇਨੇਵ ਸਕਟਸਤਂ ਅਤਿਬਨ੍ਧਿਤ੍ਵਾ ਨਨ੍ਦਿਵਿਸਾਲਂ ਮਣ੍ਡੇਤ੍ਵਾ ਪੁਰਿਮਸਕਟਧੁਰੇ ਯੋਜੇਸਿ. ਕਥਂ ਯੋਜੇਸੀਤਿ? ਯੁਗਂ ਧੁਰੇ ਨਿਚ੍ਚਲਂ ਬਨ੍ਧਿਤ੍ਵਾ ਏਕਾਯ ਕੋਟਿਯਾ ਨਨ੍ਦਿਵਿਸਾਲਂ ਯੋਜੇਤ੍ਵਾ ਏਕਂ ਕੋਟਿਂ ਧੁਰਯੋਤ੍ਤੇਨ ਪਲਿਵੇਠੇਤ੍ਵਾ ਯੁਗਕੋਟਿਞ੍ਚ ਅਕ੍ਖਪਾਦਞ੍ਚ ਨਿਸ੍ਸਾਯ ਮੁਣ੍ਡਰੁਕ੍ਖਦਣ੍ਡਕਂ ਦਤ੍ਵਾ ਤੇਨ ਯੋਤ੍ਤੇਨ ਨਿਚ੍ਚਲਂ ਬਨ੍ਧਿਤ੍ਵਾ ਠਪੇਸਿ. ਏਵਞ੍ਹਿ ਕਤੇ ਯੁਗਂ ਏਤ੍ਤੋ ਵਾ ਇਤੋ ਵਾ ਨ ਗਚ੍ਛਤਿ, ਸਕ੍ਕਾ ਹੋਤਿ ਏਕੇਨੇਵ ਗੋਣੇਨ ਆਕਡ੍ਢਿਤੁਂ. ਅਥਸ੍ਸ ਬ੍ਰਾਹ੍ਮਣੋ ਧੁਰੇ ਨਿਸੀਦਿਤ੍ਵਾ ਨਨ੍ਦਿਵਿਸਾਲਸ੍ਸ ਪਿਟ੍ਠਿਂ ਪਰਿਮਜ੍ਜਿਤ੍ਵਾ ‘‘ਗਚ੍ਛ ਭਦ੍ਰ, ਵਹਸ੍ਸੁ, ਭਨ੍ਦ੍ਰਾ’’ਤਿ ਆਹ. ਬੋਧਿਸਤ੍ਤੋ ਅਤਿਬਦ੍ਧਂ ਸਕਟਸਤਂ ਏਕਵੇਗੇਨੇਵ ਆਕਡ੍ਢਿਤ੍ਵਾ ਪਚ੍ਛਾ ਠਿਤਂ ਸਕਟਂ ਪੁਰਤੋ ਠਿਤਸ੍ਸ ਸਕਟਸ੍ਸ ਠਾਨੇ ਠਪੇਸਿ. ਗੋਵਿਤ੍ਤਕਸੇਟ੍ਠਿ ਪਰਾਜਿਤੋ ਬ੍ਰਾਹ੍ਮਣਸ੍ਸ ਦ੍ਵੇ ਸਹਸ੍ਸਾਨਿ ਅਦਾਸਿ. ਅਞ੍ਞੇਪਿ ਮਨੁਸ੍ਸਾ ਬੋਧਿਸਤ੍ਤਸ੍ਸ ਬਹੁਂ ਧਨਂ ਅਦਂਸੁ, ਸਬ੍ਬਂ ਬ੍ਰਾਹ੍ਮਣਸ੍ਸੇਵ ਅਹੋਸਿ. ਏਵਂ ਸੋ ਬੋਧਿਸਤ੍ਤਂ ਨਿਸ੍ਸਾਯ ਬਹੁਂ ਧਨਂ ਲਭਿ.

ਸਤ੍ਥਾ ‘‘ਨ, ਭਿਕ੍ਖਵੇ, ਫਰੁਸਵਚਨਂ ਨਾਮ ਕਸ੍ਸਚਿ ਮਨਾਪ’’ਨ੍ਤਿ ਛਬ੍ਬਗ੍ਗਿਯੇ ਭਿਕ੍ਖੂ ਗਰਹਿਤ੍ਵਾ ਸਿਕ੍ਖਾਪਦਂ ਪਞ੍ਞਪੇਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਂ ਗਾਥਮਾਹ –

੨੮. ‘‘ਮਨੁਞ੍ਞਮੇਵ ਭਾਸੇਯ੍ਯ, ਨਾਮਨੁਞ੍ਞਂ ਕੁਦਾਚਨਂ;

ਮਨੁਞ੍ਞਂ ਭਾਸਮਾਨਸ੍ਸ, ਗਰੁਂ ਭਾਰਂ ਉਦਦ੍ਧਰਿ;

ਧਨਞ੍ਚ ਨਂ ਅਲਾਭੇਸਿ, ਤੇਨ ਚਤ੍ਤਮਨੋ ਅਹੂ’’ਤਿ.

ਤਤ੍ਥ ਮਨੁਞ੍ਞਮੇਵ ਭਾਸੇਯ੍ਯਾਤਿ ਪਰੇਨ ਸਦ੍ਧਿਂ ਭਾਸਮਾਨੋ ਚਤੁਦੋਸਵਿਰਹਿਤਂ ਮਧੁਰਂ ਮਨਾਪਂ ਸਣ੍ਹਂ ਮੁਦੁਕਂ ਪਿਯਵਚਨਮੇਵ ਭਾਸੇਯ੍ਯ. ਗਰੁਂ ਭਾਰਂ ਉਦਦ੍ਧਰੀਤਿ ਨਨ੍ਦਿਵਿਸਾਲੋ ਬਲਿਬਦ੍ਦੋ ਅਮਨਾਪਂ ਭਾਸਮਾਨਸ੍ਸ ਭਾਰਂ ਅਨੁਦ੍ਧਰਿਤ੍ਵਾ ਪਚ੍ਛਾ ਮਨਾਪਂ ਪਿਯਵਚਨਂ ਭਾਸਮਾਨਸ੍ਸ ਬ੍ਰਾਹ੍ਮਣਸ੍ਸ ਗਰੁਂ ਭਾਰਂ ਉਦ੍ਧਰਿ, ਉਦ੍ਧਰਿਤ੍ਵਾ ਕਡ੍ਢਿਤ੍ਵਾ ਪਵਟ੍ਟੇਸੀਤਿ ਅਤ੍ਥੋ, ਦ-ਕਾਰੋ ਪਨੇਤ੍ਥ ਬ੍ਯਞ੍ਜਨਸਨ੍ਧਿਵਸੇਨ ਪਦਸਨ੍ਧਿਕਰੋ.

ਇਤਿ ਸਤ੍ਥਾ ‘‘ਮਨੁਞ੍ਞਮੇਵ ਭਾਸੇਯ੍ਯਾ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਬ੍ਰਾਹ੍ਮਣੋ ਆਨਨ੍ਦੋ ਅਹੋਸਿ, ਨਨ੍ਦਿਵਿਸਾਲੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਨਨ੍ਦਿਵਿਸਾਲਜਾਤਕਵਣ੍ਣਨਾ ਅਟ੍ਠਮਾ.

[੨੯] ੯. ਕਣ੍ਹਜਾਤਕਵਣ੍ਣਨਾ

ਯਤੋ ਯਤੋ ਗਰੁ ਧੁਰਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਯਮਕਪਾਟਿਹਾਰਿਯਂ ਆਰਬ੍ਭ ਕਥੇਸਿ. ਤਂ ਸਦ੍ਧਿਂ ਦੇਵੋਰੋਹਣੇਨ ਤੇਰਸਕਨਿਪਾਤੇ ਸਰਭਮਿਗਜਾਤਕੇ (ਜਾ. ੧.੧੩.੧੩੪ ਆਦਯੋ) ਆਵਿ ਭਵਿਸ੍ਸਤਿ. ਸਮ੍ਮਾਸਮ੍ਬੁਦ੍ਧੇ ਪਨ ਯਮਕਪਾਟਿਹਾਰਿਯਂ ਕਤ੍ਵਾ ਦੇਵਲੋਕੇ ਤੇਮਾਸਂ ਵਸਿਤ੍ਵਾ ਮਹਾਪਵਾਰਣਾਯ ਸਙ੍ਕਸ੍ਸਨਗਰਦ੍ਵਾਰੇ ਓਰੁਯ੍ਹ ਮਹਨ੍ਤੇਨ ਪਰਿਵਾਰੇਨ ਜੇਤਵਨਂ ਪਵਿਟ੍ਠੇ ਭਿਕ੍ਖੂ ਧਮ੍ਮਸਭਾਯਂ ਸਨ੍ਨਿਪਤਿਤ੍ਵਾ ‘‘ਆਵੁਸੋ, ਤਥਾਗਤੋ ਨਾਮ ਅਸਮਧੁਰੋ, ਤਥਾਗਤੇਨ ਵੁਲ਼੍ਹਧੁਰਂ ਅਞ੍ਞੋ ਵਹਿਤੁਂ ਸਮਤ੍ਥੋ ਨਾਮ ਨਤ੍ਥਿ, ਛ ਸਤ੍ਥਾਰੋ ‘ਮਯਮੇਵ ਪਾਟਿਹਾਰਿਯਂ ਕਰਿਸ੍ਸਾਮ, ਮਯਮੇਵ ਪਾਟਿਹਾਰਿਯਂ ਕਰਿਸ੍ਸਾਮਾ’ਤਿ ਵਤ੍ਵਾ ਏਕਮ੍ਪਿ ਪਾਟਿਹਾਰਿਯਂ ਨ ਅਕਂਸੁ, ਅਹੋ ਸਤ੍ਥਾ ਅਸਮਧੁਰੋ’’ਤਿ ਸਤ੍ਥੁ ਗੁਣਕਥਂ ਕਥੇਨ੍ਤਾ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿ. ‘‘ਮਯਂ, ਭਨ੍ਤੇ, ਨ ਅਞ੍ਞਾਯ ਕਥਾਯ, ਏਵਰੂਪਾਯ ਨਾਮ ਤੁਮ੍ਹਾਕਮੇਵ ਗੁਣਕਥਾਯਾ’’ਤਿ. ਸਤ੍ਥਾ ‘‘ਭਿਕ੍ਖਵੇ, ਇਦਾਨਿ ਮਯਾ ਵੁਲ਼੍ਹਧੁਰਂ ਕੋ ਵਹਿਸ੍ਸਤਿ, ਪੁਬ੍ਬੇ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤੋਪਿ ਅਹਂ ਅਤ੍ਤਨਾ ਸਮਧੁਰਂ ਕਞ੍ਚਿ ਨਾਲਤ੍ਥ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਗੋਯੋਨਿਯਂ ਪਟਿਸਨ੍ਧਿਂ ਗਣ੍ਹਿ. ਅਥ ਨਂ ਸਾਮਿਕਾ ਤਰੁਣਵਚ੍ਛਕਕਾਲੇਯੇਵ ਏਕਿਸ੍ਸਾ ਮਹਲ੍ਲਿਕਾਯ ਘਰੇ ਵਸਿਤ੍ਵਾ ਤਸ੍ਸਾ ਨਿਵਾਸਵੇਤਨਤੋ ਪਰਿਚ੍ਛਿਨ੍ਦਿਤ੍ਵਾ ਅਦਂਸੁ. ਸਾ ਤਂ ਯਾਗੁਭਤ੍ਤਾਦੀਹਿ ਪਟਿਜਗ੍ਗਮਾਨਾ ਪੁਤ੍ਤਟ੍ਠਾਨੇ ਠਪੇਤ੍ਵਾ ਵਡ੍ਢੇਸਿ. ਸੋ ‘‘ਅਯ੍ਯਿਕਾਕਾਲ਼ਕੋ’’ ਤ੍ਵੇਵ ਨਾਮਂ ਪਞ੍ਞਾਯਿਤ੍ਥ. ਵਯਪ੍ਪਤ੍ਤੋ ਚ ਅਞ੍ਜਨਵਣ੍ਣੋ ਹੁਤ੍ਵਾ ਗਾਮਗੋਣੇਹਿ ਸਦ੍ਧਿਂ ਚਰਤਿ, ਸੀਲਾਚਾਰਸਮ੍ਪਨ੍ਨੋ ਅਹੋਸਿ. ਗਾਮਦਾਰਕਾ ਸਿਙ੍ਗੇਸੁਪਿ ਕਣ੍ਣੇਸੁਪਿ ਗਲੇਪਿ ਗਹੇਤ੍ਵਾ ਓਲਮ੍ਬਨ੍ਤਿ, ਨਙ੍ਗੁਟ੍ਠੇਪਿ ਗਹੇਤ੍ਵਾ ਕੀਲ਼ਨ੍ਤਿ, ਪਿਟ੍ਠਿਯਮ੍ਪਿ ਨਿਸੀਦਨ੍ਤਿ. ਸੋ ਏਕਦਿਵਸਂ ਚਿਨ੍ਤੇਸਿ ‘‘ਮਯ੍ਹਂ ਮਾਤਾ ਦੁਗ੍ਗਤਾ, ਮਂ ਪੁਤ੍ਤਟ੍ਠਾਨੇ ਠਪੇਤ੍ਵਾ ਦੁਕ੍ਖੇਨ ਪੋਸੇਸਿ, ਯਂਨੂਨਾਹਂ ਭਤਿਂ ਕਤ੍ਵਾ ਇਮਂ ਦੁਗ੍ਗਤਭਾਵਤੋ ਮੋਚੇਯ੍ਯ’’ਨ੍ਤਿ. ਸੋ ਤਤੋ ਪਟ੍ਠਾਯ ਭਤਿਂ ਉਪਧਾਰੇਨ੍ਤੋ ਚਰਤਿ.

ਅਥੇਕਦਿਵਸਂ ਏਕੋ ਸਤ੍ਥਵਾਹਪੁਤ੍ਤੋ ਪਞ੍ਚਹਿ ਸਕਟਸਤੇਹਿ ਵਿਸਮਤਿਤ੍ਥਂ ਸਮ੍ਪਤ੍ਤੋ, ਤਸ੍ਸ ਗੋਣਾ ਸਕਟਾਨਿ ਉਤ੍ਤਾਰੇਤੁਂ ਨ ਸਕ੍ਕੋਨ੍ਤਿ, ਪਞ੍ਚਸੁ ਸਕਟਸਤੇਸੁ ਗੋਣਾ ਯੁਗਪਰਮ੍ਪਰਾਯ ਯੋਜਿਤਾ ਏਕਮ੍ਪਿ ਸਕਟਂ ਉਤ੍ਤਾਰੇਤੁਂ ਨਾਸਕ੍ਖਿਂਸੁ. ਬੋਧਿਸਤ੍ਤੋਪਿ ਗਾਮਗੋਣੇਹਿ ਸਦ੍ਧਿਂ ਤਤ੍ਥ ਸਮੀਪੇ ਚਰਤਿ. ਸਤ੍ਥਵਾਹਪੁਤ੍ਤੋਪਿ ਗੋਸੁਤ੍ਤਵਿਤ੍ਤਕੋ, ਸੋ ‘‘ਅਤ੍ਥਿ ਨੁ ਖੋ ਏਤੇਸਂ ਗੁਨ੍ਨਂ ਅਨ੍ਤਰੇ ਇਮਾਨਿ ਸਕਟਾਨਿ ਉਤ੍ਤਾਰੇਤੁਂ ਸਮਤ੍ਥੋ ਉਸਭਾਜਾਨੀਯੋ’’ਤਿ ਉਪਧਾਰਯਮਾਨੋ ਬੋਧਿਸਤ੍ਤਂ ਦਿਸ੍ਵਾ ‘‘ਅਯਂ ਆਜਾਨੀਯੋ ਸਕ੍ਖਿਸ੍ਸਤਿ ਮਯ੍ਹਂ ਸਕਟਾਨਿ ਉਤ੍ਤਾਰੇਤੁਂ, ਕੋ ਨੁ ਖੋ ਅਸ੍ਸ ਸਾਮਿਕੋ’’ਤਿ ਗੋਪਾਲਕੇ ਪੁਚ੍ਛਿ ‘‘ਕੋ ਨੁ ਖੋ ਭੋ ਇਮਸ੍ਸ ਸਾਮਿਕੋ, ਅਹਂ ਇਮਂ ਸਕਟੇ ਯੋਜੇਤ੍ਵਾ ਸਕਟੇਸੁ ਉਤ੍ਤਾਰਿਤੇਸੁ ਵੇਤਨਂ ਦਸ੍ਸਾਮੀ’’ਤਿ. ਤੇ ਆਹਂਸੁ ‘‘ਗਹੇਤ੍ਵਾ ਨਂ ਯੋਜੇਥ, ਨਤ੍ਥਿ ਇਮਸ੍ਸ ਇਮਸ੍ਮਿਂ ਠਾਨੇ ਸਾਮਿਕੋ’’ਤਿ. ਸੋ ਨਂ ਨਾਸਾਯ ਰਜ੍ਜੁਕੇਨ ਬਨ੍ਧਿਤ੍ਵਾ ਆਕਡ੍ਢੇਨ੍ਤੋ ਚਾਲੇਤੁਮ੍ਪਿ ਨਾਸਕ੍ਖਿ. ਬੋਧਿਸਤ੍ਤੋ ਕਿਰ ‘‘ਭਤਿਯਾ ਕਥਿਤਾਯ ਗਮਿਸ੍ਸਾਮੀ’’ਤਿ ਨ ਅਗਮਾਸਿ. ਸਤ੍ਥਵਾਹਪੁਤ੍ਤੋ ਤਸ੍ਸਾਧਿਪ੍ਪਾਯਂ ਞਤ੍ਵਾ ‘‘ਸਾਮਿ, ਤਯਾ ਪਞ੍ਚਸੁ ਸਕਟਸਤੇਸੁ ਉਤ੍ਤਾਰਿਤੇਸੁ ਏਕੇਕਸ੍ਸ ਸਕਟਸ੍ਸ ਦ੍ਵੇ ਦ੍ਵੇ ਕਹਾਪਣੇ ਭਤਿਂ ਕਤ੍ਵਾ ਸਹਸ੍ਸਂ ਦਸ੍ਸਾਮੀ’’ਤਿ ਆਹ. ਤਦਾ ਬੋਧਿਸਤ੍ਤੋ ਸਯਮੇਵ ਅਗਮਾਸਿ. ਅਥ ਨਂ ਪੁਰਿਸਾ ਪੁਰਿਮਸਕਟੇਸੁ ਯੋਜੇਸੁਂ. ਅਥ ਨਂ ਏਕਵੇਗੇਨੇਵ ਉਕ੍ਖਿਪਿਤ੍ਵਾ ਥਲੇ ਪਤਿਟ੍ਠਾਪੇਸਿ. ਏਤੇਨੁਪਾਯੇਨ ਸਬ੍ਬਸਕਟਾਨਿ ਉਤ੍ਤਾਰੇਸਿ.

ਸਤ੍ਥਵਾਹਪੁਤ੍ਤੋ ਏਕੇਕਸ੍ਸ ਸਕਟਸ੍ਸ ਏਕੇਕਂ ਕਤ੍ਵਾ ਪਞ੍ਚਸਤਾਨਿ ਭਣ੍ਡਿਕਂ ਕਤ੍ਵਾ ਤਸ੍ਸ ਗਲੇ ਬਨ੍ਧਿ. ਸੋ ‘‘ਅਯਂ ਮਯ੍ਹਂ ਯਥਾਪਰਿਚ੍ਛਿਨ੍ਨਂ ਭਤਿਂ ਨ ਦੇਤਿ, ਨ ਦਾਨਿਸ੍ਸ ਗਨ੍ਤੁਂ ਦਸ੍ਸਾਮੀ’’ਤਿ ਗਨ੍ਤ੍ਵਾ ਸਬ੍ਬਪੁਰਿਮਸਕਟਸ੍ਸ ਪੁਰਤੋ ਮਗ੍ਗਂ ਨਿਵਾਰੇਤ੍ਵਾ ਅਟ੍ਠਾਸਿ. ਅਪਨੇਤੁਂ ਵਾਯਮਨ੍ਤਾਪਿ ਨਂ ਅਪਨੇਤੁਂ ਨਾਸਕ੍ਖਿਂਸੁ. ਸਤ੍ਥਵਾਹਪੁਤ੍ਤੋ ‘‘ਜਾਨਾਤਿ ਮਞ੍ਞੇ ਏਸ ਅਤ੍ਤਨੋ ਭਤਿਯਾ ਊਨਭਾਵ’’ਨ੍ਤਿ ਏਕੇਕਸ੍ਮਿਂ ਸਕਟੇ ਦ੍ਵੇ ਦ੍ਵੇ ਕਤ੍ਵਾ ਸਹਸ੍ਸਭਣ੍ਡਿਕਂ ਬਨ੍ਧਿਤ੍ਵਾ ‘‘ਅਯਂ ਤੇ ਸਕਟੁਤ੍ਤਰਣਭਤੀ’’ਤਿ ਗੀਵਾਯਂ ਲਗ੍ਗੇਸਿ. ਸੋ ਸਹਸ੍ਸਭਣ੍ਡਿਕਂ ਆਦਾਯ ਮਾਤੁ ਸਨ੍ਤਿਕਂ ਅਗਮਾਸਿ. ਗਾਮਦਾਰਕਾ ‘‘ਕਿਂ ਨਾਮੇਤਂ ਅਯ੍ਯਿਕਾਕਾਲ਼ਕਸ੍ਸ ਗਲੇ’’ਤਿ ਬੋਧਿਸਤ੍ਤਸ੍ਸ ਸਨ੍ਤਿਕਂ ਆਗਚ੍ਛਨ੍ਤਿ. ਸੋ ਤੇ ਅਨੁਬਨ੍ਧਿਤ੍ਵਾ ਦੂਰਤੋਵ ਪਲਾਪੇਨ੍ਤੋ ਮਾਤੁ ਸਨ੍ਤਿਕਂ ਗਤੋ. ਪਞ੍ਚਨ੍ਨਂ ਪਨ ਸਕਟਸਤਾਨਂ ਉਤ੍ਤਾਰਿਤਤ੍ਤਾ ਰਤ੍ਤੇਹਿ ਅਕ੍ਖੀਹਿ ਕਿਲਨ੍ਤਰੂਪੋ ਪਞ੍ਞਾਯਿਤ੍ਥ. ਅਯ੍ਯਿਕਾ ਤਸ੍ਸ ਗੀਵਾਯ ਸਹਸ੍ਸਤ੍ਥਵਿਕਂ ਦਿਸ੍ਵਾ ‘‘ਤਾਤ, ਅਯਂ ਤੇ ਕਹਂ ਲਦ੍ਧਾ’’ਤਿ ਗੋਪਾਲਕਦਾਰਕੇ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਤਾਤ, ਕਿਂ ਅਹਂ ਤਯਾ ਲਦ੍ਧਭਤਿਯਾ ਜੀਵਿਤੁਕਾਮਾ, ਕਿਂਕਾਰਣਾ ਏਵਰੂਪਂ ਦੁਕ੍ਖਂ ਅਨੁਭੋਸੀ’’ਤਿ ਵਤ੍ਵਾ ਬੋਧਿਸਤ੍ਤਂ ਉਣ੍ਹੋਦਕੇਨ ਨ੍ਹਾਪੇਤ੍ਵਾ ਸਕਲਸਰੀਰਂ ਤੇਲੇਨ ਮਕ੍ਖੇਤ੍ਵਾ ਪਾਨੀਯਂ ਪਾਯੇਤ੍ਵਾ ਸਪ੍ਪਾਯਂ ਭੋਜਨਂ ਭੋਜੇਤ੍ਵਾ ਜੀਵਿਤਪਰਿਯੋਸਾਨੇ ਸਦ੍ਧਿਂ ਬੋਧਿਸਤ੍ਤੇਨ ਯਥਾਕਮ੍ਮਂ ਗਤਾ.

ਸਤ੍ਥਾ ‘‘ਨ, ਭਿਕ੍ਖਵੇ, ਤਥਾਗਤੋ ਇਦਾਨੇਵ ਅਸਮਧੁਰੋ, ਪੁਬ੍ਬੇਪਿ ਅਸਮਧੁਰੋਯੇਵਾ’’ਤਿ ਵਤ੍ਵਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਂ ਗਾਥਮਾਹ –

੨੯. ‘‘ਯਤੋ ਯਤੋ ਗਰੁ ਧੁਰਂ, ਯਤੋ ਗਮ੍ਭੀਰਵਤ੍ਤਨੀ;

ਤਦਾਸ੍ਸੁ ਕਣ੍ਹਂ ਯੁਞ੍ਜਨ੍ਤਿ, ਸ੍ਵਾਸ੍ਸੁ ਤਂ ਵਹਤੇ ਧੁਰ’’ਨ੍ਤਿ.

ਤਤ੍ਥ ਯਤੋ ਯਤੋ ਗਰੁ ਧੁਰਨ੍ਤਿ ਯਸ੍ਮਿਂ ਯਸ੍ਮਿਂ ਠਾਨੇ ਧੁਰਂ ਗਰੁ ਭਾਰਿਯਂ ਹੋਤਿ, ਅਞ੍ਞੇ ਬਲਿਬਦ੍ਦਾ ਉਕ੍ਖਿਪਿਤੁਂ ਨ ਸਕ੍ਕੋਨ੍ਤਿ. ਯਤੋ ਗਮ੍ਭੀਰਵਤ੍ਤਨੀਤਿ ਵਤ੍ਤਨ੍ਤਿ ਏਤ੍ਥਾਤਿ ਵਤ੍ਤਨੀ, ਮਗ੍ਗਸ੍ਸੇਤਂ ਨਾਮਂ, ਯਸ੍ਮਿਂ ਠਾਨੇ ਉਦਕਚਿਕ੍ਖਲ੍ਲਮਹਨ੍ਤਤਾਯ ਵਾ ਵਿਸਮਚ੍ਛਿਨ੍ਨਤਟਭਾਵੇਨ ਵਾ ਮਗ੍ਗੋ ਗਮ੍ਭੀਰੋ ਹੋਤੀਤਿ ਅਤ੍ਥੋ. ਤਦਾਸ੍ਸੁ ਕਣ੍ਹਂ ਯੁਞ੍ਜਨ੍ਤੀਤਿ ਏਤ੍ਥ ਅਸ੍ਸੂਤਿ ਨਿਪਾਤਮਤ੍ਤਂ, ਤਦਾ ਕਣ੍ਹਂ ਯੁਞ੍ਜਨ੍ਤੀਤਿ ਅਤ੍ਥੋ. ਯਦਾ ਧੁਰਞ੍ਚ ਗਰੁ ਹੋਤਿ ਮਗ੍ਗੋ ਚ ਗਮ੍ਭੀਰੋ, ਤਦਾ ਅਞ੍ਞੇ ਬਲਿਬਦ੍ਦੇ ਅਪਨੇਤ੍ਵਾ ਕਣ੍ਹਮੇਵ ਯੋਜੇਨ੍ਤੀਤਿ ਵੁਤ੍ਤਂ ਹੋਤਿ. ਸ੍ਵਾਸ੍ਸੁ ਤਂ ਵਹਤੇ ਧੁਰਨ੍ਤਿ ਏਤ੍ਥਾਪਿ ਅਸ੍ਸੂਤਿ ਨਿਪਾਤਮਤ੍ਤਮੇਵ, ਸੋ ਤਂ ਧੁਰਂ ਵਹਤੀਤਿ ਅਤ੍ਥੋ.

ਏਵਂ ਭਗਵਾ ‘‘ਤਦਾ, ਭਿਕ੍ਖਵੇ, ਕਣ੍ਹੋਵ ਤਂ ਧੁਰਂ ਵਹਤੀ’’ਤਿ ਦਸ੍ਸੇਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਹਲ੍ਲਿਕਾ ਉਪ੍ਪਲਵਣ੍ਣਾ ਅਹੋਸਿ, ਅਯ੍ਯਿਕਾਕਾਲ਼ਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕਣ੍ਹਜਾਤਕਵਣ੍ਣਨਾ ਨਵਮਾ.

[੩੦] ੧੦. ਮੁਨਿਕਜਾਤਕਵਣ੍ਣਨਾ

ਮਾ ਮੁਨਿਕਸ੍ਸ ਪਿਹਯੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਥੁਲ੍ਲਕੁਮਾਰਿਕਾਪਲੋਭਨਂ ਆਰਬ੍ਭ ਕਥੇਸਿ. ਤਂ ਤੇਰਸਕਨਿਪਾਤੇ ਚੂਲ਼ਨਾਰਦਕਸ੍ਸਪਜਾਤਕੇ (ਜਾ. ੧.੧੩.੪੦ ਆਦਯੋ) ਆਵਿ ਭਵਿਸ੍ਸਤਿ. ਸਤ੍ਥਾ ਪਨ ਤਂ ਭਿਕ੍ਖੁਂ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿ. ‘‘ਆਮ, ਭਨ੍ਤੇ’’ਤਿ. ‘‘ਕਿਂ ਨਿਸ੍ਸਾਯਾ’’ਤਿ? ‘‘ਥੁਲ੍ਲਕੁਮਾਰਿਕਾਪਲੋਭਨਂ ਭਨ੍ਤੇ’’ਤਿ. ਸਤ੍ਥਾ ‘‘ਭਿਕ੍ਖੁ ਏਸਾ ਤਵ ਅਨਤ੍ਥਕਾਰਿਕਾ, ਪੁਬ੍ਬੇਪਿ ਤ੍ਵਂ ਇਮਿਸ੍ਸਾ ਵਿਵਾਹਦਿਵਸੇ ਜੀਵਿਤਕ੍ਖਯਂ ਪਤ੍ਵਾ ਮਹਾਜਨਸ੍ਸ ਉਤ੍ਤਰਿਭਙ੍ਗਭਾਵਂ ਪਤ੍ਤੋ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਏਕਸ੍ਮਿਂ ਗਾਮਕੇ ਏਕਸ੍ਸ ਕੁਟੁਮ੍ਬਿਕਸ੍ਸ ਗੇਹੇ ਗੋਯੋਨਿਯਂ ਨਿਬ੍ਬਤ੍ਤਿ ‘‘ਮਹਾਲੋਹਿਤੋ’’ਤਿ ਨਾਮੇਨ, ਕਨਿਟ੍ਠਭਾਤਾਪਿਸ੍ਸ ਚੂਲ਼ਲੋਹਿਤੋ ਨਾਮ ਅਹੋਸਿ. ਤੇਯੇਵ ਦ੍ਵੇ ਭਾਤਿਕੇ ਨਿਸ੍ਸਾਯ ਤਸ੍ਮਿਂ ਕੁਲੇ ਕਮ੍ਮਧੁਰਂ ਵਤ੍ਤਤਿ. ਤਸ੍ਮਿਂ ਪਨ ਕੁਲੇ ਏਕਾ ਕੁਮਾਰਿਕਾ ਅਤ੍ਥਿ, ਤਂ ਏਕੋ ਨਗਰਵਾਸੀ ਕੁਲਪੁਤ੍ਤੋ ਅਤ੍ਤਨੋ ਪੁਤ੍ਤਸ੍ਸ ਵਾਰੇਸਿ. ਤਸ੍ਸਾ ਮਾਤਾਪਿਤਰੋ ‘‘ਕੁਮਾਰਿਕਾਯ ਵਿਵਾਹਕਾਲੇ ਆਗਤਾਨਂ ਪਾਹੁਨਕਾਨਂ ਉਤ੍ਤਰਿਭਙ੍ਗੋ ਭਵਿਸ੍ਸਤੀ’’ਤਿ ਯਾਗੁਭਤ੍ਤਂ ਦਤ੍ਵਾ ਮੁਨਿਕਂ ਨਾਮ ਸੂਕਰਂ ਪੋਸੇਸੁਂ. ਤਂ ਦਿਸ੍ਵਾ ਚੂਲ਼ਲੋਹਿਤੋ ਭਾਤਰਂ ਪੁਚ੍ਛਿ ‘‘ਇਮਸ੍ਮਿਂ ਕੁਲੇ ਕਮ੍ਮਧੁਰਂ ਵਤ੍ਤਮਾਨਂ ਅਮ੍ਹੇ ਦ੍ਵੇ ਭਾਤਿਕੇ ਨਿਸ੍ਸਾਯ ਵਤ੍ਤਤਿ, ਇਮੇ ਪਨ ਅਮ੍ਹਾਕਂ ਤਿਣਪਲਾਲਾਦੀਨੇਵ ਦੇਨ੍ਤਿ, ਸੂਕਰਂ ਯਾਗੁਭਤ੍ਤੇਨ ਪੋਸੇਨ੍ਤਿ, ਕੇਨ ਨੁ ਖੋ ਕਾਰਣੇਨ ਏਸ ਏਤਂ ਲਭਤੀ’’ਤਿ. ਅਥਸ੍ਸ ਭਾਤਾ ‘‘ਤਾਤ ਚੂਲ਼ਲੋਹਿਤ, ਮਾ ਤ੍ਵਂ ਏਤਸ੍ਸ ਭੋਜਨਂ ਪਿਹਯਿ, ਅਯਂ ਸੂਕਰੋ ਮਰਣਭਤ੍ਤਂ ਭੁਞ੍ਜਤਿ. ਏਤਿਸ੍ਸਾ ਹਿ ਕੁਮਾਰਿਕਾਯ ਵਿਵਾਹਕਾਲੇ ਆਗਤਾਨਂ ਪਾਹੁਨਕਾਨਂ ਉਤ੍ਤਰਿਭਙ੍ਗੋ ਭਵਿਸ੍ਸਤੀਤਿ ਇਮੇ ਏਤਂ ਸੂਕਰਂ ਪੋਸੇਨ੍ਤਿ, ਇਤੋ ਕਤਿਪਾਹਚ੍ਚਯੇਨ ਤੇ ਮਨੁਸ੍ਸਾ ਆਗਮਿਸ੍ਸਨ੍ਤਿ, ਅਥ ਨਂ ਸੂਕਰਂ ਪਾਦੇਸੁ ਗਹੇਤ੍ਵਾ ਕਡ੍ਢੇਨ੍ਤਾ ਹੇਟ੍ਠਾਮਞ੍ਚਤੋ ਨੀਹਰਿਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਪਾਹੁਨਕਾਨਂ ਸੂਪਬ੍ਯਞ੍ਜਨਂ ਕਰਿਯਮਾਨਂ ਪਸ੍ਸਿਸ੍ਸਸੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੩੦. ‘‘ਮਾ ਮੁਨਿਕਸ੍ਸ ਪਿਹਯਿ, ਆਤੁਰਨ੍ਨਾਨਿ ਭੁਞ੍ਜਤਿ;

ਅਪ੍ਪੋਸ੍ਸੁਕ੍ਕੋ ਭੁਸਂ ਖਾਦ, ਏਤਂ ਦੀਘਾਯੁਲਕ੍ਖਣ’’ਨ੍ਤਿ.

ਤਤ੍ਥ ਮਾ ਮੁਨਿਕਸ੍ਸ ਪਿਹਯੀਤਿ ਮੁਨਿਕਸ੍ਸ ਭੋਜਨੇ ਪਿਹਂ ਮਾ ਉਪ੍ਪਾਦਯਿ, ‘‘ਏਸ ਮੁਨਿਕੋ ਸੁਭੋਜਨਂ ਭੁਞ੍ਜਤੀ’’ਤਿ ਮਾ ਮੁਨਿਕਸ੍ਸ ਪਿਹਯਿ, ‘‘ਕਦਾ ਨੁ ਖੋ ਅਹਮ੍ਪਿ ਏਵਂ ਸੁਖਿਤੋ ਭਵੇਯ੍ਯ’’ਨ੍ਤਿ ਮਾ ਮੁਨਿਕਭਾਵਂ ਪਤ੍ਥਯਿ. ਅਯਞ੍ਹਿ ਆਤੁਰਨ੍ਨਾਨਿ ਭੁਞ੍ਜਤਿ. ਆਤੁਰਨ੍ਨਾਨੀਤਿ ਮਰਣਭੋਜਨਾਨਿ. ਅਪ੍ਪੋਸ੍ਸੁਕ੍ਕੋ ਭੁਸਂ ਖਾਦਾਤਿ ਤਸ੍ਸ ਭੋਜਨੇ ਨਿਰੁਸ੍ਸੁਕ੍ਕੋ ਹੁਤ੍ਵਾ ਅਤ੍ਤਨਾ ਲਦ੍ਧਂ ਭੁਸਂ ਖਾਦ. ਏਤਂ ਦੀਘਾਯੁਲਕ੍ਖਣਨ੍ਤਿ ਏਤਂ ਦੀਘਾਯੁਭਾਵਸ੍ਸ ਕਾਰਣਂ. ਤਤੋ ਨ ਚਿਰਸ੍ਸੇਵ ਤੇ ਮਨੁਸ੍ਸਾ ਆਗਮਿਂਸੁ, ਮੁਨਿਕਂ ਘਾਤੇਤ੍ਵਾ ਨਾਨਪ੍ਪਕਾਰੇਹਿ ਪਚਿਂਸੁ. ਬੋਧਿਸਤ੍ਤੋ ਚੂਲ਼ਲੋਹਿਤਂ ਆਹ ‘‘ਦਿਟ੍ਠੋ ਤੇ, ਤਾਤ, ਮੁਨਿਕੋ’’ਤਿ. ਦਿਟ੍ਠਂ ਮੇ, ਭਾਤਿਕ, ਮੁਨਿਕਸ੍ਸ ਭੋਜਨਫਲਂ, ਏਤਸ੍ਸ ਭੋਜਨਤੋ ਸਤਗੁਣੇਨ ਸਹਸ੍ਸਗੁਣੇਨ ਅਮ੍ਹਾਕਂ ਤਿਣਪਲਾਲਭੁਸਮਤ੍ਤਮੇਵ ਉਤ੍ਤਮਞ੍ਚ ਅਨਵਜ੍ਜਞ੍ਚ ਦੀਘਾਯੁਲਕ੍ਖਣਞ੍ਚਾਤਿ.

ਸਤ੍ਥਾ ‘‘ਏਵਂ ਖੋ ਤ੍ਵਂ ਭਿਕ੍ਖੁ ਪੁਬ੍ਬੇਪਿ ਇਮਂ ਕੁਮਾਰਿਕਂ ਨਿਸ੍ਸਾਯ ਜੀਵਿਤਕ੍ਖਯਂ ਪਤ੍ਵਾ ਮਹਾਜਨਸ੍ਸ ਉਤ੍ਤਰਿਭਙ੍ਗਭਾਵਂ ਗਤੋ’’ਤਿ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤੋ ਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਸਤ੍ਥਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮੁਨਿਕਸੂਕਰੋ ਉਕ੍ਕਣ੍ਠਿਤਭਿਕ੍ਖੁ ਅਹੋਸਿ, ਥੁਲ੍ਲਕੁਮਾਰਿਕਾ ਏਸਾ ਏਵ, ਚੂਲ਼ਲੋਹਿਤੋ ਆਨਨ੍ਦੋ, ਮਹਾਲੋਹਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮੁਨਿਕਜਾਤਕਵਣ੍ਣਨਾ ਦਸਮਾ.

ਕੁਰੁਙ੍ਗਵਗ੍ਗੋ ਤਤਿਯੋ.

ਤਸ੍ਸੁਦ੍ਦਾਨਂ –

ਕੁਰੁਙ੍ਗਂ ਕੁਕ੍ਕੁਰਞ੍ਚੇਵ, ਭੋਜਾਜਾਨੀਯਞ੍ਚ ਆਜਞ੍ਞਂ;

ਤਿਤ੍ਥਂ ਮਹਿਲ਼ਾਮੁਖਾਭਿਣ੍ਹਂ, ਨਨ੍ਦਿਕਣ੍ਹਞ੍ਚ ਮੁਨਿਕਨ੍ਤਿ.