੧੪. ਅਸਮ੍ਪਦਾਨਵਗ੍ਗੋ

[੧੩੧] ੧. ਅਸਮ੍ਪਦਾਨਜਾਤਕਵਣ੍ਣਨਾ

ਅਸਮ੍ਪਦਾਨੇਨਿਤਰੀਤਰਸ੍ਸਾਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਤਸ੍ਮਿਞ੍ਹਿ ਕਾਲੇ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ ਦੇਵਦਤ੍ਤੋ, ਅਕਤਞ੍ਞੂ ਤਥਾਗਤਸ੍ਸ ਗੁਣਂ ਨ ਜਾਨਾਤੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ ਦੇਵਦਤ੍ਤੋ ਅਕਤਞ੍ਞੂ, ਪੁਬ੍ਬੇਪਿ ਅਕਤਞ੍ਞੂਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਮਗਧਰਟ੍ਠੇ ਰਾਜਗਹੇ ਏਕਸ੍ਮਿਂ ਮਗਧਰਞ੍ਞੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸੇਵ ਸੇਟ੍ਠਿ ਅਹੋਸਿ ਅਸੀਤਿਕੋਟਿਵਿਭਵੋ ਸਙ੍ਖਸੇਟ੍ਠੀਤਿ ਨਾਮੇਨ. ਬਾਰਾਣਸਿਯਂ ਪੀਲ਼ਿਯਸੇਟ੍ਠਿ ਨਾਮ ਅਸੀਤਿਕੋਟਿਵਿਭਵੋਵ ਅਹੋਸਿ. ਤੇ ਅਞ੍ਞਮਞ੍ਞਂ ਸਹਾਯਕਾ ਅਹੇਸੁਂ. ਤੇਸੁ ਬਾਰਾਣਸਿਯਂ ਪੀਲ਼ਿਯਸੇਟ੍ਠਿਸ੍ਸ ਕੇਨਚਿਦੇਵ ਕਾਰਣੇਨ ਮਹਨ੍ਤਂ ਭਯਂ ਉਪ੍ਪਜ੍ਜਿ, ਸਬ੍ਬਂ ਸਾਪਤੇਯ੍ਯਂ ਪਰਿਹਾਯਿ. ਸੋ ਦਲਿਦ੍ਦੋ ਅਪ੍ਪਟਿਸਰਣੋ ਹੁਤ੍ਵਾ ਭਰਿਯਂ ਆਦਾਯ ਸਙ੍ਖਸੇਟ੍ਠਿਂ ਪਚ੍ਚਯਂ ਕਤ੍ਵਾ ਬਾਰਾਣਸਿਤੋ ਨਿਕ੍ਖਮਿਤ੍ਵਾ ਪਦਸਾਵ ਰਾਜਗਹਂ ਪਤ੍ਵਾ ਸਙ੍ਖਸੇਟ੍ਠਿਸ੍ਸ ਨਿਵੇਸਨਂ ਅਗਮਾਸਿ. ਸੋ ਤਂ ਦਿਸ੍ਵਾਵ ‘‘ਸਹਾਯੋ ਮੇ ਆਗਤੋ’’ਤਿ ਪਰਿਸ੍ਸਜਿਤ੍ਵਾ ਸਕ੍ਕਾਰਸਮ੍ਮਾਨਂ ਕਤ੍ਵਾ ਕਤਿਪਾਹਂ ਵੀਤਿਨਾਮੇਤ੍ਵਾ ਏਕਦਿਵਸਂ ‘‘ਸਮ੍ਮ, ਕੇਨਟ੍ਠੇਨ ਆਗਤੋਸੀ’’ਤਿ ਪੁਚ੍ਛਿ. ‘‘ਭਯਂ ਮੇ, ਸਮ੍ਮ, ਉਪ੍ਪਨ੍ਨਂ, ਸਬ੍ਬਂ ਧਨਂ ਪਰਿਕ੍ਖੀਣਂ, ਉਪਤ੍ਥਮ੍ਭੋ ਮੇ ਹੋਹੀ’’ਤਿ. ‘‘ਸਾਧੁ ਸਮ੍ਮ, ਮਾ ਭਾਯੀ’’ਤਿ ਭਣ੍ਡਾਗਾਰਂ ਵਿਵਰਾਪੇਤ੍ਵਾ ਚਤ੍ਤਾਲੀਸ ਹਿਰਞ੍ਞਕੋਟਿਯੋ ਦਾਪੇਤ੍ਵਾ ਸੇਸਮ੍ਪਿ ਪਰਿਚ੍ਛਦਪਰਿਵਾਰਂ ਸਬ੍ਬਂ ਅਤ੍ਤਨੋ ਸਨ੍ਤਕਂ ਸਵਿਞ੍ਞਾਣਕਂ ਅਵਿਞ੍ਞਾਣਕਂ ਮਜ੍ਝੇ ਭਿਨ੍ਦਿਤ੍ਵਾ ਉਪਡ੍ਢਮੇਵ ਅਦਾਸਿ. ਸੋ ਤਂ ਵਿਭਵਂ ਆਦਾਯ ਪੁਨ ਬਾਰਾਣਸਿਂ ਗਨ੍ਤ੍ਵਾ ਨਿਵਾਸਂ ਕਪ੍ਪੇਸਿ.

ਅਪਰਭਾਗੇ ਸਙ੍ਖਸੇਟ੍ਠਿਸ੍ਸਪਿ ਤਾਦਿਸਮੇਵ ਭਯਂ ਉਪ੍ਪਜ੍ਜਿ. ਸੋ ਅਤ੍ਤਨੋ ਪਟਿਸਰਣਂ ਉਪਧਾਰੇਨ੍ਤੋ ‘‘ਸਹਾਯਸ੍ਸ ਮੇ ਮਹਾਉਪਕਾਰੋ ਕਤੋ, ਉਪਡ੍ਢਵਿਭਵੋ ਦਿਨ੍ਨੋ. ਨ ਸੋ ਮਂ ਦਿਸ੍ਵਾ ਪਰਿਚ੍ਚਜਿਸ੍ਸਤਿ, ਤਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਭਰਿਯਂ ਆਦਾਯ ਪਦਸਾਵ ਬਾਰਾਣਸਿਂ ਗਨ੍ਤ੍ਵਾ ਭਰਿਯਂ ਆਹ ‘‘ਭਦ੍ਦੇ, ਤਵ ਮਯਾ ਸਦ੍ਧਿਂ ਅਨ੍ਤਰਵੀਥਿਯਾ ਗਮਨਂ ਨਾਮ ਨ ਯੁਤ੍ਤਂ, ਮਯਾ ਪੇਸਿਤਯਾਨਮਾਰੁਯ੍ਹ ਮਹਨ੍ਤੇਨ ਪਰਿਵਾਰੇਨ ਪਚ੍ਛਾ ਆਗਮਿਸ੍ਸਸਿ. ਯਾਵ ਯਾਨਂ ਪੇਸੇਮਿ, ਤਾਵ ਇਧੇਵ ਹੋਹੀ’’ਤਿ ਵਤ੍ਵਾ ਤਂ ਸਾਲਾਯ ਠਪੇਤ੍ਵਾ ਸਯਂ ਨਗਰਂ ਪਵਿਸਿਤ੍ਵਾ ਸੇਟ੍ਠਿਸ੍ਸ ਘਰਂ ਗਨ੍ਤ੍ਵਾ ‘‘ਰਾਜਗਹਨਗਰਤੋ ਤੁਮ੍ਹਾਕਂ ਸਹਾਯੋ ਸਙ੍ਖਸੇਟ੍ਠਿ ਨਾਮ ਆਗਤੋ’’ਤਿ ਆਰੋਚਾਪੇਸਿ. ਸੋ ‘‘ਆਗਚ੍ਛਤੂ’’ਤਿ ਪਕ੍ਕੋਸਾਪੇਤ੍ਵਾ ਤਂ ਦਿਸ੍ਵਾ ਨੇਵ ਆਸਨਾ ਵੁਟ੍ਠਾਸਿ, ਨ ਪਟਿਸਨ੍ਥਾਰਂ ਅਕਾਸਿ, ਕੇਵਲਂ ‘‘ਕਿਮਤ੍ਥਂ ਆਗਤੋਸੀ’’ਤਿ ਪੁਚ੍ਛਿ. ‘‘ਤੁਮ੍ਹਾਕਂ ਦਸ੍ਸਨਤ੍ਥਂ ਆਗਤੋਮ੍ਹੀ’’ਤਿ. ‘‘ਨਿਵਾਸੋ ਤੇ ਕਹਂ ਗਹਿਤੋ’’ਤਿ? ‘‘ਨ ਤਾਵ ਨਿਵਾਸਟ੍ਠਾਨਂ ਅਤ੍ਥਿ, ਸੇਟ੍ਠਿਘਰਣਿਮ੍ਪਿ ਸਾਲਾਯ ਠਪੇਤ੍ਵਾਵ ਆਗਤੋਮ੍ਹੀ’’ਤਿ. ‘‘ਤੁਮ੍ਹਾਕਂ ਇਧ ਨਿਵਾਸਟ੍ਠਾਨਂ ਨਤ੍ਥਿ, ਨਿਵਾਪਂ ਗਹੇਤ੍ਵਾ ਏਕਸ੍ਮਿਂ ਠਾਨੇ ਪਚਾਪੇਤ੍ਵਾ ਭੁਞ੍ਜਿਤ੍ਵਾ ਗਚ੍ਛਥ, ਪੁਨ ਅਮ੍ਹਾਕਂ ਘਰਂ ਮਾ ਪਵਿਸਥਾ’’ਤਿ ਵਤ੍ਵਾ ‘‘ਮਯ੍ਹਂ ਸਹਾਯਸ੍ਸ ਦੁਸ੍ਸਨ੍ਤੇ ਬਨ੍ਧਿਤ੍ਵਾ ਏਕਂ ਬਹਲਪਲਾਪਤੁਮ੍ਬਂ ਦੇਹੀ’’ਤਿ ਦਾਸਂ ਆਣਾਪੇਸਿ. ਤਂ ਦਿਵਸਂ ਕਿਰ ਸੋ ਰਤ੍ਤਸਾਲੀਨਂ ਸਕਟਸਹਸ੍ਸਮਤ੍ਤਂ ਓਫੁਨਾਪੇਤ੍ਵਾ ਕੋਟ੍ਠਾਗਾਰਂ ਪੂਰਾਪੇਸਿ, ਚਤ੍ਤਾਲੀਸਕੋਟਿਧਨਂ ਗਹੇਤ੍ਵਾ ਆਗਤੋ ਅਕਤਞ੍ਞੂ ਮਹਾਚੋਰੋ ਸਹਾਯਕਸ੍ਸ ਤੁਮ੍ਬਮਤ੍ਤੇ ਪਲਾਪੇ ਦਾਪੇਸਿ. ਦਾਸੋ ਪਚ੍ਛਿਯਂ ਏਕਂ ਪਲਾਪਤੁਮ੍ਬਂ ਪਕ੍ਖਿਪਿਤ੍ਵਾ ਬੋਧਿਸਤ੍ਤਸ੍ਸ ਸਨ੍ਤਿਕਂ ਅਗਮਾਸਿ.

ਬੋਧਿਸਤ੍ਤੋ ਚਿਨ੍ਤੇਸਿ – ‘‘ਅਯਂ ਅਸਪ੍ਪੁਰਿਸੋ ਮਮ ਸਨ੍ਤਿਕਾ ਚਤ੍ਤਾਲੀਸਕੋਟਿਧਨਂ ਲਭਿਤ੍ਵਾ ਇਦਾਨਿ ਪਲਾਪਤੁਮ੍ਬਂ ਦਾਪੇਸਿ, ਗਣ੍ਹਾਮਿ ਨੁ ਖੋ, ਨ ਗਣ੍ਹਾਮੀ’’ਤਿ? ਅਥਸ੍ਸ ਏਤਦਹੋਸਿ ‘‘ਅਯਂ ਤਾਵ ਅਕਤਞ੍ਞੂ ਮਿਤ੍ਤਦੁਬ੍ਭੀ ਕਤਵਿਨਾਸਕਭਾਵੇਨ ਮਯਾ ਸਦ੍ਧਿਂ ਮਿਤ੍ਤਭਾਵਂ ਭਿਨ੍ਦਿ. ਸਚਾਹਂ ਏਤੇਨ ਦਿਨ੍ਨਂ ਪਲਾਪਤੁਮ੍ਬਂ ਲਾਮਕਤ੍ਤਾ ਨ ਗਣ੍ਹਿਸ੍ਸਾਮਿ, ਅਹਮ੍ਪਿ ਮਿਤ੍ਤਭਾਵਂ ਭਿਨ੍ਦਿਸ੍ਸਾਮਿ. ਅਨ੍ਧਬਾਲਾ ਪਰਿਤ੍ਤਕਂ ਲਦ੍ਧਂ ਅਗ੍ਗਣ੍ਹਨ੍ਤਾ ਮਿਤ੍ਤਭਾਵਂ ਵਿਨਾਸੇਨ੍ਤਿ, ਅਹਂ ਪਨ ਏਤੇਨ ਦਿਨ੍ਨਂ ਪਲਾਪਤੁਮ੍ਬਂ ਗਹੇਤ੍ਵਾ ਮਮ ਵਸੇਨ ਮਿਤ੍ਤਭਾਵਂ ਪਤਿਟ੍ਠਾਪੇਸ੍ਸਾਮੀ’’ਤਿ. ਸੋ ਪਲਾਪਤੁਮ੍ਬਂ ਦੁਸ੍ਸਨ੍ਤੇ ਬਨ੍ਧਿਤ੍ਵਾ ਪਾਸਾਦਾ ਓਰੁਯ੍ਹ ਸਾਲਂ ਅਗਮਾਸਿ. ਅਥ ਨਂ ਭਰਿਯਾ ‘‘ਕਿਂ ਤੇ, ਅਯ੍ਯ, ਲਦ੍ਧ’’ਨ੍ਤਿ ਪੁਚ੍ਛਿ. ‘‘ਭਦ੍ਦੇ ਅਮ੍ਹਾਕਂ ਸਹਾਯੋ ਪੀਲ਼ਿਯਸੇਟ੍ਠਿ ਪਲਾਪਤੁਮ੍ਬਂ ਦਤ੍ਵਾ ਅਮ੍ਹੇ ਅਜ੍ਜੇਵ ਵਿਸ੍ਸਜ੍ਜੇਸੀ’’ਤਿ. ਸਾ ‘‘ਅਯ੍ਯ, ਕਿਮਤ੍ਥਂ ਅਗ੍ਗਹੇਸਿ, ਕਿਂ ਏਤਂ ਚਤ੍ਤਾਲੀਸਕੋਟਿਧਨਸ੍ਸ ਅਨੁਚ੍ਛਵਿਕ’’ਨ੍ਤਿ ਰੋਦਿਤੁਂ ਆਰਭਿ. ਬੋਧਿਸਤ੍ਤੋਪਿ ‘‘ਭਦ੍ਦੇ, ਮਾ ਰੋਦਿ, ਅਹਂ ਤੇਨ ਸਦ੍ਧਿਂ ਮਿਤ੍ਤਭਾਵਭੇਦਨਭਯੇਨ ਮਮ ਵਸੇਨ ਮਿਤ੍ਤਭਾਵਂ ਪਤਿਟ੍ਠਾਪੇਤੁਂ ਗਣ੍ਹਿਂ, ਤ੍ਵਂ ਕਿਂਕਾਰਣਾ ਰੋਦਸੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੧੩੧. ‘‘ਅਸਮ੍ਪਦਾਨੇਨਿਤਰੀਤਰਸ੍ਸ, ਬਾਲਸ੍ਸ ਮਿਤ੍ਤਾਨਿ ਕਲੀਭਵਨ੍ਤਿ;

ਤਸ੍ਮਾ ਹਰਾਮਿ ਭੁਸਂ ਅਡ੍ਢਮਾਨਂ, ਮਾ ਮੇ ਮਿਤ੍ਤਿ ਜੀਯਿਤ੍ਥ ਸਸ੍ਸਤਾਯ’’ਨ੍ਤਿ.

ਤਤ੍ਥ ਅਸਮ੍ਪਦਾਨੇਨਾਤਿ ਅਸਮ੍ਪਾਦਾਨੇਨ. ਅਕਾਰਲੋਪੇ ਸਨ੍ਧਿ, ਅਗ੍ਗਹਣੇਨਾਤਿ ਅਤ੍ਥੋ. ਇਤਰੀਤਰਸ੍ਸਾਤਿ ਯਸ੍ਸ ਕਸ੍ਸਚਿ ਲਾਮਕਾਲਾਮਕਸ੍ਸ. ਬਾਲਸ੍ਸ ਮਿਤ੍ਤਾਨਿ ਕਲੀਭਵਨ੍ਤੀਤਿ ਦਨ੍ਧਸ੍ਸ ਅਪਞ੍ਞਸ੍ਸ ਮਿਤ੍ਤਾਨਿ ਕਲੀਨਿ ਕਾਲ਼ਕਣ੍ਣਿਸਦਿਸਾਨਿ ਹੋਨ੍ਤਿ, ਭਿਜ੍ਜਨ੍ਤੀਤਿ ਅਤ੍ਥੋ. ਤਸ੍ਮਾ ਹਰਾਮਿ ਭੁਸਂ ਅਡ੍ਢਮਾਨਨ੍ਤਿ ਤੇਨ ਕਾਰਣੇਨ ਅਹਂ ਸਹਾਯੇਨ ਦਿਨ੍ਨਂ ਏਕਪਲਾਪਤੁਮ੍ਬਂ ਹਰਾਮਿ ਗਣ੍ਹਾਮੀਤਿ ਦਸ੍ਸੇਤਿ. ‘‘ਮਾਨ’’ਨ੍ਤਿ ਹਿ ਅਟ੍ਠਨ੍ਨਂ ਨਾਲ਼ੀਨਂ ਨਾਮਂ, ਚਤੁਨ੍ਨਂ ਅਡ੍ਢਮਾਨਂ, ਚਤਸ੍ਸੋ ਚ ਨਾਲ਼ਿਯੋ ਤੁਮ੍ਬੋ ਨਾਮ. ਤੇਨ ਵੁਤ੍ਤਂ ‘‘ਪਲਾਪਤੁਮ੍ਬ’’ਨ੍ਤਿ. ਮਾ ਮੇ ਮਿਤ੍ਤਿ ਜੀਯਿਤ੍ਥ ਸਸ੍ਸਤਾਯਨ੍ਤਿ ਮਮ ਸਹਾਯੇਨ ਸਦ੍ਧਿਂ ਮਿਤ੍ਤਿ ਮਾ ਭਿਜ੍ਜਿਤ੍ਥ, ਸਸ੍ਸਤਾਵ ਅਯਂ ਹੋਤੂਤਿ ਅਤ੍ਥੋ.

ਏਵਂ ਵੁਤ੍ਤੇਪਿ ਸੇਟ੍ਠਿਭਰਿਯਾ ਰੋਦਤੇਵ. ਤਸ੍ਮਿਂ ਖਣੇ ਸਙ੍ਖਸੇਟ੍ਠਿਨਾ ਪੀਲ਼ਿਯਸੇਟ੍ਠਿਸ੍ਸ ਦਿਨ੍ਨੋ ਕਮ੍ਮਨ੍ਤਦਾਸੋ ਸਾਲਾਦ੍ਵਾਰੇਨ ਆਗਚ੍ਛਨ੍ਤੋ ਸੇਟ੍ਠਿਭਰਿਯਾਯ ਰੋਦਨਸਦ੍ਦਂ ਸੁਤ੍ਵਾ ਸਾਲਂ ਪਵਿਸਿਤ੍ਵਾ ਅਤ੍ਤਨੋ ਸਾਮਿਕੇ ਦਿਸ੍ਵਾ ਪਾਦੇਸੁ ਨਿਪਤਿਤ੍ਵਾ ਰੋਦਿਤ੍ਵਾ ਕਨ੍ਦਿਤ੍ਵਾ ‘‘ਕਿਮਤ੍ਥਂ ਇਧਾਗਤਤ੍ਥ, ਸਾਮੀ’’ਤਿ ਪੁਚ੍ਛਿ. ਸੇਟ੍ਠਿ ਸਬ੍ਬਂ ਆਰੋਚੇਸਿ. ਕਮ੍ਮਨ੍ਤਦਾਸੋ ‘‘ਹੋਤੁ, ਸਾਮਿ, ਮਾ ਚਿਨ੍ਤਯਿਤ੍ਥਾ’’ਤਿ ਉਭੋਪਿ ਅਸ੍ਸਾਸੇਤ੍ਵਾ ਅਤ੍ਤਨੋ ਗੇਹਂ ਨੇਤ੍ਵਾ ਗਨ੍ਧੋਦਕੇਨ ਨ੍ਹਾਪੇਤ੍ਵਾ ਭੋਜੇਤ੍ਵਾ ‘‘ਸਾਮਿਕਾ, ਵੋ ਆਗਤਾ’’ਤਿ ਸੇਸਦਾਸੇ ਸਨ੍ਨਿਪਾਤੇਤ੍ਵਾ ਦਸ੍ਸੇਤ੍ਵਾ ਕਤਿਪਾਹਂ ਵੀਤਿਨਾਮੇਤ੍ਵਾ ਸਬ੍ਬੇ ਦਾਸੇ ਗਹੇਤ੍ਵਾ ਰਾਜਙ੍ਗਣਂ ਗਨ੍ਤ੍ਵਾ ਉਪਰਵਂ ਅਕਾਸਿ. ਰਾਜਾ ਪਕ੍ਕੋਸਾਪੇਤ੍ਵਾ ‘‘ਕਿਂ ਏਤ’’ਨ੍ਤਿ ਪੁਚ੍ਛਿ, ਤੇ ਸਬ੍ਬਂ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸੁਂ.

ਰਾਜਾ ਤੇਸਂ ਵਚਨਂ ਸੁਤ੍ਵਾ ਉਭੋਪਿ ਸੇਟ੍ਠੀ ਪਕ੍ਕੋਸਾਪੇਤ੍ਵਾ ਸਙ੍ਖਸੇਟ੍ਠਿਂ ਪੁਚ੍ਛਿ ‘‘ਸਚ੍ਚਂ ਕਿਰ ਤਯਾ ਮਹਾਸੇਟ੍ਠਿ ਪੀਲ਼ਿਯਸੇਟ੍ਠਿਸ੍ਸ ਚਤ੍ਤਾਲੀਸਕੋਟਿਧਨਂ ਦਿਨ੍ਨ’’ਨ੍ਤਿ? ‘‘ਆਮ, ਮਹਾਰਾਜ, ਮਮ ਸਹਾਯਸ੍ਸ ਮਂ ਤਕ੍ਕੇਤ੍ਵਾ ਰਾਜਗਹਂ ਆਗਤਸ੍ਸ ਨ ਕੇਵਲਂ ਧਨਂ, ਸਬ੍ਬਂ ਵਿਭਵਜਾਤਂ ਸਵਿਞ੍ਞਾਣਕਂ ਅਵਿਞ੍ਞਾਣਕਂ ਦ੍ਵੇ ਕੋਟ੍ਠਾਸੇ ਕਤ੍ਵਾ ਸਮਭਾਗੇ ਅਦਾਸਿਨ੍ਤਿ. ਰਾਜਾ ‘‘ਸਚ੍ਚਮੇਤ’’ਨ੍ਤਿ ਪੀਲ਼ਿਯਸੇਟ੍ਠਿਂ ਪੁਚ੍ਛਿ. ‘‘ਆਮ, ਦੇਵਾ’’ਤਿ. ‘‘ਤਯਾ ਪਨਸ੍ਸ ਤਞ੍ਞੇਵ ਤਕ੍ਕੇਤ੍ਵਾ ਆਗਤਸ੍ਸ ਅਤ੍ਥਿ ਕੋਚਿ ਸਕ੍ਕਾਰੋ ਵਾ ਸਮ੍ਮਾਨੋ ਵਾ ਕਤੋ’’ਤਿ. ਸੋ ਤੁਣ੍ਹੀ ਅਹੋਸਿ. ਅਪਿ ਪਨ ਤੇ ਏਤਸ੍ਸ ਪਲਾਪਤੁਮ੍ਬਮਤ੍ਤਂ ਦੁਸ੍ਸਨ੍ਤੇ ਪਕ੍ਖਿਪਾਪੇਤ੍ਵਾ ਦਾਪਿਤਂ ਅਤ੍ਥੀਤਿ. ਤਮ੍ਪਿ ਸੁਤ੍ਵਾ ਤੁਣ੍ਹੀਯੇਵ ਅਹੋਸਿ. ਰਾਜਾ ‘‘ਕਿਂ ਕਾਤਬ੍ਬ’’ਨ੍ਤਿ ਅਮਚ੍ਚੇਹਿ ਸਦ੍ਧਿਂ ਮਨ੍ਤੇਤ੍ਵਾ ਤਂ ਪਰਿਭਾਸਿਤ੍ਵਾ ‘‘ਗਚ੍ਛਥ, ਪੀਲ਼ਿਯਸੇਟ੍ਠਿਸ੍ਸ ਘਰੇ ਸਬ੍ਬਂ ਵਿਭਵਂ ਸਙ੍ਖਸੇਟ੍ਠਿਸ੍ਸ ਦੇਥਾ’’ਤਿ ਆਹ. ਬੋਧਿਸਤ੍ਤੋ ‘‘ਮਹਾਰਾਜ, ਮਯ੍ਹਂ ਪਰਸਨ੍ਤਕੇਨ ਅਤ੍ਥੋ ਨਤ੍ਥਿ, ਮਯਾ ਦਿਨ੍ਨਮਤ੍ਤਮੇਵ ਪਨ ਦਾਪੇਥਾ’’ਤਿ ਆਹ. ਰਾਜਾ ਬੋਧਿਸਤ੍ਤਸ੍ਸ ਸਨ੍ਤਕਂ ਦਾਪੇਸਿ. ਬੋਧਿਸਤ੍ਤੋ ਸਬ੍ਬਂ ਅਤ੍ਤਨੋ ਦਿਨ੍ਨਵਿਭਵਂ ਪਟਿਲਭਿਤ੍ਵਾ ਦਾਸਪਰਿਵੁਤੋ ਰਾਜਗਹਮੇਵ ਗਨ੍ਤ੍ਵਾ ਕੁਟੁਮ੍ਬਂ ਸਣ੍ਠਪੇਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪੀਲ਼ਿਯਸੇਟ੍ਠਿ ਦੇਵਦਤ੍ਤੋ ਅਹੋਸਿ, ਸਙ੍ਖਸੇਟ੍ਠਿ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਸਮ੍ਪਦਾਨਜਾਤਕਵਣ੍ਣਨਾ ਪਠਮਾ.

[੧੩੨] ੨. ਭੀਰੁਕਜਾਤਕਵਣ੍ਣਨਾ

ਕੁਸਲੂਪਦੇਸੇ ਧਿਤਿਯਾ ਦਲ਼੍ਹਾਯ ਚਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਜਪਾਲਨਿਗ੍ਰੋਧੇ ਮਾਰਧੀਤਾਨਂ ਪਲੋਭਨਸੁਤ੍ਤਨ੍ਤਂ ਆਰਬ੍ਭ ਕਥੇਸਿ. ਭਗਵਤਾ ਹਿ ਆਦਿਤੋ ਪਟ੍ਠਾਯ ਵੁਤ੍ਤਂ –

‘‘ਦਦ੍ਦਲ੍ਲਮਾਨਾ ਆਗਞ੍ਛੁਂ, ਤਣ੍ਹਾ ਚ ਅਰਤੀ ਰਗਾ;

ਤਾ ਤਤ੍ਥ ਪਨੁਦੀ ਸਤ੍ਥਾ, ਤੂਲਂ ਭਟ੍ਠਂਵ ਮਾਲੁਤੋ’’ਤਿ. (ਸਂ. ਨਿ. ੧.੧੬੧);

ਏਵਂ ਯਾਵ ਪਰਿਯੋਸਾਨਾ ਤਸ੍ਸ ਸੁਤ੍ਤਨ੍ਤਸ੍ਸ ਕਥਿਤਕਾਲੇ ਧਮ੍ਮਸਭਾਯਂ ਸਨ੍ਨਿਪਤਿਤਾ ਭਿਕ੍ਖੂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਸਮ੍ਮਾਸਮ੍ਬੁਦ੍ਧੋ ਮਾਰਧੀਤਰੋ ਅਨੇਕਸਤਾਨਿਪਿ ਦਿਬ੍ਬਰੂਪਾਨਿ ਮਾਪੇਤ੍ਵਾ ਪਲੋਭਨਤ੍ਥਾਯ ਉਪਸਙ੍ਕਮਨ੍ਤਿਯੋ ਅਕ੍ਖੀਨਿਪਿ ਉਮ੍ਮੀਲੇਤ੍ਵਾ ਨ ਓਲੋਕੇਸਿ, ਅਹੋ ਬੁਦ੍ਧਬਲਂ ਨਾਮ ਅਚ੍ਛਰਿਯ’’ਨ੍ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ ਮਯ੍ਹਂ ਸਬ੍ਬਾਸਵੇ ਖੇਪੇਤ੍ਵਾ ਸਬ੍ਬਞ੍ਞੁਤਂ ਸਮ੍ਪਤ੍ਤਸ੍ਸ ਮਾਰਧੀਤਾਨਂ ਅਨੋਲੋਕਨਂ ਨਾਮ ਅਚ੍ਛਰਿਯਂ, ਅਹਞ੍ਹਿ ਪੁਬ੍ਬੇ ਬੋਧਿਞਾਣਂ ਪਰਿਯੇਸਮਾਨੋ ਸਕਿਲੇਸਕਾਲੇਪਿ ਅਭਿਸਙ੍ਖਤਂ ਦਿਬ੍ਬਰੂਪਂ ਇਨ੍ਦ੍ਰਿਯਾਨਿ ਭਿਨ੍ਦਿਤ੍ਵਾ ਕਿਲੇਸਵਸੇਨ ਅਨੋਲੋਕੇਤ੍ਵਾਵ ਗਨ੍ਤ੍ਵਾ ਮਹਾਰਜ੍ਜਂ ਪਾਪੁਣਿ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਭਾਤਿਕਸਤਸ੍ਸ ਕਨਿਟ੍ਠੋ ਅਹੋਸੀਤਿ ਸਬ੍ਬਂ ਹੇਟ੍ਠਾ ਤਕ੍ਕਸਿਲਾਜਾਤਕੇ ਵੁਤ੍ਤਨਯੇਨੇਵ ਵਿਤ੍ਥਾਰੇਤਬ੍ਬਂ. ਤਦਾ ਪਨ ਤਕ੍ਕਸਿਲਾਨਗਰਵਾਸੀਹਿ ਬਹਿਨਗਰੇ ਸਾਲਾਯਂ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ਯਾਚਿਤ੍ਵਾ ਰਜ੍ਜਂ ਪਟਿਚ੍ਛਾਪੇਤ੍ਵਾ ਅਭਿਸੇਕੇ ਕਤੇ ਤਕ੍ਕਸਿਲਾਨਗਰਵਾਸਿਨੋ ਨਗਰਂ ਦੇਵਨਗਰਂ ਵਿਯ, ਰਾਜਭਵਨਞ੍ਚ ਇਨ੍ਦਭਵਨਂ ਵਿਯ ਅਲਙ੍ਕਰਿਂਸੁ. ਤਦਾ ਬੋਧਿਸਤ੍ਤੋ ਨਗਰਂ ਪਵਿਸਿਤ੍ਵਾ ਰਾਜਭਵਨੇ ਪਾਸਾਦੇ ਮਹਾਤਲੇ ਸਮੁਸ੍ਸਿਤਸੇਤਚ੍ਛਤ੍ਤਂ ਰਤਨਵਰਪਲ੍ਲਙ੍ਕਂ ਅਭਿਰੁਯ੍ਹ ਦੇਵਰਾਜਲੀਲਾਯ ਨਿਸੀਦਿ, ਅਮਚ੍ਚਾ ਚ ਬ੍ਰਾਹ੍ਮਣਗਹਪਤਿਕਾਦਯੋ ਚ ਖਤ੍ਤਿਯਕੁਮਾਰਾ ਚ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਪਰਿਵਾਰੇਤ੍ਵਾ ਅਟ੍ਠਂਸੁ, ਦੇਵਚ੍ਛਰਾਪਟਿਭਾਗਾ ਸੋਲ਼ਸਸਹਸ੍ਸਨਾਟਕਿਤ੍ਥਿਯੋ ਨਚ੍ਚਗੀਤਵਾਦਿਤਕੁਸਲਾ ਉਤ੍ਤਮਵਿਲਾਸਸਮ੍ਪਨ੍ਨਾ ਨਚ੍ਚਗੀਤਵਾਦਿਤਾਨਿ ਪਯੋਜੇਸੁਂ. ਗੀਤਵਾਦਿਤਸਦ੍ਦੇਨ ਰਾਜਭਵਨਂ ਮੇਘਤ੍ਥਨਿਤਪੂਰਿਤਾ ਮਹਾਸਮੁਦ੍ਦਕੁਚ੍ਛਿ ਵਿਯ ਏਕਨਿਨ੍ਨਾਦਂ ਅਹੋਸਿ. ਬੋਧਿਸਤ੍ਤੋ ਤਂ ਅਤ੍ਤਨੋ ਸਿਰਿਸੋਭਗ੍ਗਂ ਓਲੋਕਯਮਾਨੋਵ ਚਿਨ੍ਤੇਸਿ ‘‘ਸਚਾਹਂ ਤਾਸਂ ਯਕ੍ਖਿਨੀਨਂ ਅਭਿਸਙ੍ਖਤਂ ਦਿਬ੍ਬਰੂਪਂ ਓਲੋਕੇਸ੍ਸਂ, ਜੀਵਿਤਕ੍ਖਯਂ ਪਤ੍ਤੋ ਅਭਵਿਸ੍ਸਂ, ਇਮਂ ਸਿਰਿਸੋਭਗ੍ਗਂ ਨ ਓਲੋਕੇਸ੍ਸਂ. ਪਚ੍ਚੇਕਬੁਦ੍ਧਾਨਂ ਪਨ ਓਵਾਦੇ ਠਿਤਭਾਵੇਨ ਇਦਂ ਮਯਾ ਸਮ੍ਪਤ੍ਤ’’ਨ੍ਤਿ. ਏਵਞ੍ਚ ਪਨ ਚਿਨ੍ਤੇਤ੍ਵਾ ਉਦਾਨਂ ਉਦਾਨੇਨ੍ਤੋ ਇਮਂ ਗਾਥਮਾਹ –

੧੩੨. ‘‘ਕੁਸਲੂਪਦੇਸੇ ਧਿਤਿਯਾ ਦਲ਼੍ਹਾਯ ਚ, ਅਨਿਵਤ੍ਤਿਤਤ੍ਤਾ ਭਯਭੀਰੁਤਾਯ ਚ;

ਨ ਰਕ੍ਖਸੀਨਂ ਵਸਮਾਗਮਿਮ੍ਹਸੇ, ਸ ਸੋਤ੍ਥਿਭਾਵੋ ਮਹਤਾ ਭਯੇਨ ਮੇ’’ਤਿ.

ਤਤ੍ਥ ਕੁਸਲੂਪਦੇਸੇਤਿ ਕੁਸਲਾਨਂ ਉਪਦੇਸੇ, ਪਚ੍ਚੇਕਬੁਦ੍ਧਾਨਂ ਓਵਾਦੇਤਿ ਅਤ੍ਥੋ. ਧਿਤਿਯਾ ਦਲ਼੍ਹਾਯ ਚਾਤਿ ਦਲ਼੍ਹਾਯ ਧਿਤਿਯਾ ਚ, ਥਿਰੇਨ ਅਬ੍ਬੋਚ੍ਛਿਨ੍ਨਨਿਰਨ੍ਤਰਵੀਰਿਯੇਨ ਚਾਤਿ ਅਤ੍ਥੋ. ਅਨਿਵਤ੍ਤਿਤਤ੍ਤਾ ਭਯਭੀਰੁਤਾਯ ਚਾਤਿ ਭਯਭੀਰੁਤਾਯ ਅਨਿਵਤ੍ਤਿਤਤਾਯ ਚ. ਤਤ੍ਥ ਭਯਨ੍ਤਿ ਚਿਤ੍ਤੁਤ੍ਰਾਸਮਤ੍ਤਂ ਪਰਿਤ੍ਤਭਯਂ. ਭੀਰੁਤਾਤਿ ਸਰੀਰਕਮ੍ਪਨਪ੍ਪਤ੍ਤਂ ਮਹਾਭਯਂ. ਇਦਂ ਉਭਯਮ੍ਪਿ ਮਹਾਸਤ੍ਤਸ੍ਸ ‘‘ਯਕ੍ਖਿਨਿਯੋ ਨਾਮੇਤਾ ਮਨੁਸ੍ਸਖਾਦਿਕਾ’’ਤਿ ਭੇਰਵਾਰਮ੍ਮਣਂ ਦਿਸ੍ਵਾਪਿ ਨਾਹੋਸਿ. ਤੇਨਾਹ ‘‘ਅਨਿਵਤ੍ਤਿਤਤ੍ਤਾ ਭਯਭੀਰੁਤਾਯ ਚਾ’’ਤਿ. ਭਯਭੀਰੁਤਾਯ ਅਭਾਵੇਨੇਵ ਭੇਰਵਾਰਮ੍ਮਣਂ ਦਿਸ੍ਵਾਪਿ ਅਨਿਵਤ੍ਤਨਭਾਵੇਨਾਤਿ ਅਤ੍ਥੋ. ਨ ਰਕ੍ਖਸੀਨਂ ਵਸਮਾਗਮਿਮ੍ਹਸੇਤਿ ਯਕ੍ਖਕਨ੍ਤਾਰੇ ਤਾਸਂ ਰਕ੍ਖਸੀਨਂ ਵਸਂ ਨ ਅਗਮਿਮ੍ਹ. ਯਸ੍ਮਾ ਅਮ੍ਹਾਕਂ ਕੁਸਲੂਪਦੇਸੇ ਧਿਤਿ ਚ ਦਲ਼੍ਹਾ ਅਹੋਸਿ, ਭਯਭੀਰੁਤਾਭਾਵੇਨ ਚ ਅਨਿਵਤ੍ਤਨਸਭਾਵਾ ਅਹੁਮ੍ਹਾ, ਤਸ੍ਮਾ ਰਕ੍ਖਸੀਨਂ ਵਸਂ ਨ ਅਗਮਿਮ੍ਹਾਤਿ ਵੁਤ੍ਤਂ ਹੋਤਿ. ਸ ਸੋਤ੍ਥਿਭਾਵੋ ਮਹਤਾ ਭਯੇਨ ਮੇਤਿ ਸੋ ਮਯ੍ਹਂ ਅਯਂ ਅਜ੍ਜ ਮਹਤਾ ਭਯੇਨ ਰਕ੍ਖਸੀਨਂ ਸਨ੍ਤਿਕਾ ਪਤ੍ਤਬ੍ਬੇਨ ਦੁਕ੍ਖਦੋਮਨਸ੍ਸੇਨ ਸੋਤ੍ਥਿਭਾਵੋ ਖੇਮਭਾਵੋ ਪੀਤਿਸੋਮਨਸ੍ਸਭਾਵੋਯੇਵ ਜਾਤੋਤਿ.

ਏਵਂ ਮਹਾਸਤ੍ਤੋ ਇਮਾਯ ਗਾਥਾਯ ਧਮ੍ਮਂ ਦੇਸੇਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਅਹਂ ਤੇਨ ਸਮਯੇਨ ਤਕ੍ਕਸਿਲਂ ਗਨ੍ਤ੍ਵਾ ਰਜ੍ਜਪ੍ਪਤ੍ਤਕੁਮਾਰੋ ਅਹੋਸਿ’’ਨ੍ਤਿ.

ਭੀਰੁਕਜਾਤਕਵਣ੍ਣਨਾ ਦੁਤਿਯਾ.

[੧੩੩] ੩. ਘਤਾਸਨਜਾਤਕਵਣ੍ਣਨਾ

ਖੇਮਂ ਯਹਿਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਹਿ ਭਿਕ੍ਖੁ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਪਚ੍ਚਨ੍ਤਂ ਗਨ੍ਤ੍ਵਾ ਏਕਂ ਗਾਮਕਂ ਉਪਨਿਸ੍ਸਾਯ ਅਰਞ੍ਞਸੇਨਾਸਨੇ ਵਸ੍ਸਂ ਉਪਗਞ੍ਛਿ. ਤਸ੍ਸ ਪਠਮਮਾਸੇਯੇਵ ਪਿਣ੍ਡਾਯ ਪਵਿਟ੍ਠਸ੍ਸ ਪਣ੍ਣਸਾਲਾ ਝਾਯਿਤ੍ਥ. ਸੋ ਵਸਨਟ੍ਠਾਨਾਭਾਵੇਨ ਕਿਲਮਨ੍ਤੋ ਉਪਟ੍ਠਾਕਾਨਂ ਆਚਿਕ੍ਖਿ. ਤੇ ‘‘ਹੋਤੁ, ਭਨ੍ਤੇ, ਪਣ੍ਣਸਾਲਂ ਕਰਿਸ੍ਸਾਮ, ਕਸਾਮ ਤਾਵ, ਵਪਾਮ ਤਾਵਾ’’ਤਿਆਦੀਨਿ ਵਦਨ੍ਤਾ ਤੇਮਾਸਂ ਵੀਤਿਨਾਮੇਸੁਂ. ਸੋ ਸੇਨਾਸਨਸਪ੍ਪਾਯਾਭਾਵੇਨ ਕਮ੍ਮਟ੍ਠਾਨਂ ਮਤ੍ਥਕਂ ਪਾਪੇਤੁਂ ਨਾਸਕ੍ਖਿ. ਸੋ ਨਿਮਿਤ੍ਤਮਤ੍ਤਮ੍ਪਿ ਅਨੁਪ੍ਪਾਦੇਤ੍ਵਾ ਵੁਤ੍ਥਵਸ੍ਸੋ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ‘‘ਕਿਂ ਨੁ ਖੋ ਤੇ, ਭਿਕ੍ਖੁ, ਕਮ੍ਮਟ੍ਠਾਨਂ ਸਪ੍ਪਾਯਂ ਜਾਤ’’ਨ੍ਤਿ ਪੁਚ੍ਛਿ. ਸੋ ਆਦਿਤੋ ਪਟ੍ਠਾਯ ਅਸਪ੍ਪਾਯਭਾਵਂ ਕਥੇਸਿ. ਸਤ੍ਥਾ ‘‘ਪੁਬ੍ਬੇ ਖੋ, ਭਿਕ੍ਖੁ, ਤਿਰਚ੍ਛਾਨਾਪਿ ਅਤ੍ਤਨੋ ਸਪ੍ਪਾਯਾਸਪ੍ਪਾਯਂ ਞਤ੍ਵਾ ਸਪ੍ਪਾਯਕਾਲੇ ਵਸਿਤ੍ਵਾ ਅਸਪ੍ਪਾਯਕਾਲੇ ਵਸਨਟ੍ਠਾਨਂ ਪਹਾਯ ਅਞ੍ਞਤ੍ਥ ਅਗਮਂਸੁ, ਤ੍ਵਂ ਕਸ੍ਮਾ ਅਤ੍ਤਨੋ ਸਪ੍ਪਾਯਾਸਪ੍ਪਾਯਂ ਨ ਅਞ੍ਞਾਸੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸਕੁਣਯੋਨਿਯਂ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਸੋਭਗ੍ਗਪ੍ਪਤ੍ਤੋ ਸਕੁਣਰਾਜਾ ਹੁਤ੍ਵਾ ਏਕਸ੍ਮਿਂ ਅਰਞ੍ਞਾਯਤਨੇ ਜਾਤਸ੍ਸਰਤੀਰੇ ਸਾਖਾਵਿਟਪਸਮ੍ਪਨ੍ਨਂ ਬਹਲਪਤ੍ਤਪਲਾਸਂ ਮਹਾਰੁਕ੍ਖਂ ਉਪਨਿਸ੍ਸਾਯ ਸਪਰਿਵਾਰੋ ਵਾਸਂ ਕਪ੍ਪੇਸਿ. ਬਹੂ ਸਕੁਣਾ ਤਸ੍ਸ ਰੁਕ੍ਖਸ੍ਸ ਉਦਕਮਤ੍ਥਕੇ ਪਤ੍ਥਟਸਾਖਾਸੁ ਵਸਨ੍ਤਾ ਸਰੀਰਵਲ਼ਞ੍ਜਂ ਉਦਕੇ ਪਾਤੇਨ੍ਤਿ. ਤਸ੍ਮਿਞ੍ਚ ਜਾਤਸ੍ਸਰੇ ਚਣ੍ਡੋ ਨਾਗਰਾਜਾ ਵਸਤਿ. ਤਸ੍ਸ ਏਤਦਹੋਸਿ ‘‘ਇਮੇ ਸਕੁਣਾ ਮਯ੍ਹਂ ਨਿਵਾਸੇ ਜਾਤਸ੍ਸਰੇ ਸਰੀਰਵਲ਼ਞ੍ਜਂ ਪਾਤੇਨ੍ਤਿ, ਯਂਨੂਨਾਹਂ ਉਦਕਤੋ ਅਗ੍ਗਿਂ ਉਟ੍ਠਾਪੇਤ੍ਵਾ ਰੁਕ੍ਖਂ ਝਾਪੇਤ੍ਵਾ ਏਤੇ ਪਲਾਪੇਯ੍ਯ’’ਨ੍ਤਿ. ਸੋ ਕੁਦ੍ਧਮਾਨਸੋ ਰਤ੍ਤਿਭਾਗੇ ਸਬ੍ਬੇਸਂ ਸਕੁਣਾਨਂ ਸਨ੍ਨਿਪਤਿਤ੍ਵਾ ਰੁਕ੍ਖਸਾਖਾਸੁ ਨਿਪਨ੍ਨਕਾਲੇ ਪਠਮਂ ਤਾਵ ਉਦ੍ਧਨਾਰੋਪਿਤਂ ਵਿਯ ਉਦਕਂ ਪਕ੍ਕੁਧਾਪੇਤ੍ਵਾ ਦੁਤਿਯਵਾਰੇ ਧੂਮਂ ਉਟ੍ਠਾਪੇਤ੍ਵਾ ਤਤਿਯਵਾਰੇ ਤਾਲਕ੍ਖਨ੍ਧਪ੍ਪਮਾਣਂ ਜਾਲਂ ਉਟ੍ਠਾਪੇਸਿ. ਬੋਧਿਸਤ੍ਤੋ ਉਦਕਤੋ ਜਾਲਂ ਉਟ੍ਠਹਮਾਨਂ ਦਿਸ੍ਵਾ ‘‘ਭੋ, ਸਕੁਣਾ, ਅਗ੍ਗਿਨਾ ਆਦਿਤ੍ਤਂ ਨਾਮ ਉਦਕੇਨ ਨਿਬ੍ਬਾਪੇਨ੍ਤਿ, ਇਦਾਨਿ ਪਨ ਉਦਕਮੇਵ ਆਦਿਤ੍ਤਂ. ਨ ਸਕ੍ਕਾ ਅਮ੍ਹੇਹਿ ਇਧ ਵਸਿਤੁਂ, ਅਞ੍ਞਤ੍ਥ ਗਮਿਸ੍ਸਾਮਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੧੩੩. ‘‘ਖੇਮਂ ਯਹਿਂ ਤਤ੍ਥ ਅਰੀ ਉਦੀਰਿਤੋ, ਦਕਸ੍ਸ ਮਜ੍ਝੇ ਜਲਤੇ ਘਤਾਸਨੋ;

ਨ ਅਜ੍ਜ ਵਾਸੋ ਮਹਿਯਾ ਮਹੀਰੁਹੇ, ਦਿਸਾ ਭਜਵ੍ਹੋ ਸਰਣਾਜ੍ਜ ਨੋਭਯ’’ਨ੍ਤਿ.

ਤਤ੍ਥ ਖੇਮਂ ਯਹਿਂ ਤਤ੍ਥ ਅਰੀ ਉਦੀਰਿਤੋਤਿ ਯਸ੍ਮਿਂ ਉਦਕਪਿਟ੍ਠੇ ਖੇਮਭਾਵੋ ਨਿਬ੍ਭਯਭਾਵੋ, ਤਸ੍ਮਿਂ ਅਤ੍ਤਪਚ੍ਚਤ੍ਥਿਕੋ ਸਪਤ੍ਤੋ ਉਟ੍ਠਿਤੋ. ਦਕਸ੍ਸਾਤਿ ਉਦਕਸ੍ਸ. ਘਤਾਸਨੋਤਿ ਅਗ੍ਗਿ. ਸੋ ਹਿ ਘਤਂ ਅਸ੍ਨਾਤਿ, ਤਸ੍ਮਾ ‘‘ਘਤਾਸਨੋ’’ਤਿ ਵੁਚ੍ਚਤਿ. ਨ ਅਜ੍ਜ ਵਾਸੋਤਿ ਅਜ੍ਜ ਨੋ ਵਾਸੋ ਨਤ੍ਥਿ. ਮਹਿਯਾ ਮਹੀਰੁਹੇਤਿ ਮਹਿਰੁਹੋ ਵੁਚ੍ਚਤਿ ਰੁਕ੍ਖੋ, ਤਸ੍ਮਿਂ ਇਮਿਸ੍ਸਾ ਮਹਿਯਾ ਜਾਤੇ ਰੁਕ੍ਖੇਤਿ ਅਤ੍ਥੋ. ਦਿਸਾ ਭਜਵ੍ਹੋਤਿ ਦਿਸਾ ਭਜਥ ਗਚ੍ਛਥ. ਸਰਣਾਜ੍ਜ ਨੋ ਭਯਨ੍ਤਿ ਅਜ੍ਜ ਅਮ੍ਹਾਕਂ ਸਰਣਤੋ ਭਯਂ ਜਾਤਂ, ਪਟਿਸਰਣਟ੍ਠਾਨਤੋ ਭਯਂ ਉਪ੍ਪਨ੍ਨਨ੍ਤਿ ਅਤ੍ਥੋ.

ਏਵਂ ਵਤ੍ਵਾ ਬੋਧਿਸਤ੍ਤੋ ਅਤ੍ਤਨੋ ਵਚਨਕਰੇ ਸਕੁਣੇ ਆਦਾਯ ਉਪ੍ਪਤਿਤ੍ਵਾ ਅਞ੍ਞਤ੍ਥ ਗਤੋ. ਬੋਧਿਸਤ੍ਤਸ੍ਸ ਵਚਨਂ ਅਗ੍ਗਹੇਤ੍ਵਾ ਠਿਤਸਕੁਣਾ ਜੀਵਿਤਕ੍ਖਯਂ ਪਤ੍ਤਾ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਸੋ ਭਿਕ੍ਖੁ ਅਰਹਤ੍ਤੇ ਪਤਿਟ੍ਠਾਸਿ.

ਤਦਾ ਬੋਧਿਸਤ੍ਤਸ੍ਸ ਵਚਨਕਰਾ ਸਕੁਣਾ ਬੁਦ੍ਧਪਰਿਸਾ ਅਹੇਸੁਂ, ਸਕੁਣਰਾਜਾ ਪਨ ਅਹਮੇਵ ਅਹੋਸਿਨ੍ਤਿ.

ਘਤਾਸਨਜਾਤਕਵਣ੍ਣਨਾ ਤਤਿਯਾ.

[੧੩੪] ੪. ਝਾਨਸੋਧਨਜਾਤਕਵਣ੍ਣਨਾ

ਯੇ ਸਞ੍ਞਿਨੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਙ੍ਕਸ੍ਸਨਗਰਦ੍ਵਾਰੇ ਅਤ੍ਤਨਾ ਸਂਖਿਤ੍ਤੇਨ ਪੁਚ੍ਛਿਤਪਞ੍ਹਸ੍ਸ ਧਮ੍ਮਸੇਨਾਪਤਿਨੋ ਵਿਤ੍ਥਾਰਬ੍ਯਾਕਰਣਂ ਆਰਬ੍ਭ ਕਥੇਸਿ. ਤਤ੍ਰਿਦਂ ਅਤੀਤਵਤ੍ਥੁ – ਅਤੀਤੇ ਕਿਰ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਰਞ੍ਞਾਯਤਨੇ ਕਾਲਂ ਕਰੋਨ੍ਤੋ ਅਨ੍ਤੇਵਾਸਿਕੇਹਿ ਪੁਚ੍ਛਿਤੋ ‘‘ਨੇਵਸਞ੍ਞੀਨਾਸਞ੍ਞੀ’’ਤਿ ਆਹ…ਪੇ… ਤਾਪਸਾ ਜੇਟ੍ਠਨ੍ਤੇਵਾਸਿਕਸ੍ਸ ਕਥਂ ਨ ਗਣ੍ਹਿਂਸੁ. ਬੋਧਿਸਤ੍ਤੋ ਆਭਸ੍ਸਰਤੋ ਆਗਨ੍ਤ੍ਵਾ ਆਕਾਸੇ ਠਤ੍ਵਾ ਇਮਂ ਗਾਥਮਾਹ –

੧੩੪. ‘‘ਯੇ ਸਞ੍ਞਿਨੋ ਤੇਪਿ ਦੁਗ੍ਗਤਾ, ਯੇਪਿ ਅਸਞ੍ਞਿਨੋ ਤੇਪਿ ਦੁਗ੍ਗਤਾ;

ਏਤਂ ਉਭਯਂ ਵਿਵਜ੍ਜਯ, ਤਂ ਸਮਾਪਤ੍ਤਿਸੁਖਂ ਅਨਙ੍ਗਣ’’ਨ੍ਤਿ.

ਤਤ੍ਥ ਯੇ ਸਞ੍ਞਿਨੋਤਿ ਠਪੇਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨਲਾਭਿਨੋ ਅਵਸੇਸੇ ਸਚਿਤ੍ਤਕਸਤ੍ਤੇ ਦਸ੍ਸੇਤਿ. ਤੇਪਿ ਦੁਗ੍ਗਤਾਤਿ ਤਸ੍ਸਾ ਸਮਾਪਤ੍ਤਿਯਾ ਅਲਾਭਤੋ ਤੇਪਿ ਦੁਗ੍ਗਤਾ ਨਾਮ. ਯੇਪਿ ਅਸਞ੍ਞਿਨੋਤਿ ਅਸਞ੍ਞਭਵੇ ਨਿਬ੍ਬਤ੍ਤੇ ਅਚਿਤ੍ਤਕਸਤ੍ਤੇ ਦਸ੍ਸੇਤਿ. ਤੇਪਿ ਦੁਗ੍ਗਤਾਤਿ ਤੇਪਿ ਇਮਿਸ੍ਸਾਯੇਵ ਸਮਾਪਤ੍ਤਿਯਾ ਅਲਾਭਤੋ ਦੁਗ੍ਗਤਾਯੇਵ ਨਾਮ. ਏਤਂ ਉਭਯਂ ਵਿਵਜ੍ਜਯਾਤਿ ਏਤਂ ਉਭਯਮ੍ਪਿ ਸਞ੍ਞਿਭਵਞ੍ਚ ਅਸਞ੍ਞਿਭਵਞ੍ਚ ਵਿਵਜ੍ਜਯ ਪਜਹਾਤਿ ਅਨ੍ਤੇਵਾਸਿਕਂ ਓਵਦਤਿ. ਤਂ ਸਮਾਪਤ੍ਤਿਸੁਖਂ ਅਨਙ੍ਗਣਨ੍ਤਿ ਤਂ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਲਾਭਿਨੋ ਸਨ੍ਤਟ੍ਠੇਨ ‘‘ਸੁਖ’’ਨ੍ਤਿ ਸਙ੍ਖਂ ਗਤਂ ਝਾਨਸੁਖਂ ਅਨਙ੍ਗਣਂ ਨਿਦ੍ਦੋਸਂ ਬਲਵਚਿਤ੍ਤੇਕਗ੍ਗਤਾਸਭਾਵੇਨਪਿ ਤਂ ਅਨਙ੍ਗਣਂ ਨਾਮ ਜਾਤਂ.

ਏਵਂ ਬੋਧਿਸਤ੍ਤੋ ਧਮ੍ਮਂ ਦੇਸੇਤ੍ਵਾ ਅਨ੍ਤੇਵਾਸਿਕਸ੍ਸ ਗੁਣਂ ਕਥੇਤ੍ਵਾ ਬ੍ਰਹ੍ਮਲੋਕਮੇਵ ਅਗਮਾਸਿ. ਤਦਾ ਸੇਸਤਾਪਸਾ ਜੇਟ੍ਠਨ੍ਤੇਵਾਸਿਕਸ੍ਸ ਸਦ੍ਦਹਿਂਸੁ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਜੇਟ੍ਠਨ੍ਤੇਵਾਸਿਕੋ ਸਾਰਿਪੁਤ੍ਤੋ, ਮਹਾਬ੍ਰਹ੍ਮਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਝਾਨਸੋਧਨਜਾਤਕਵਣ੍ਣਨਾ ਚਤੁਤ੍ਥਾ.

[੧੩੫] ੫. ਚਨ੍ਦਾਭਜਾਤਕਵਣ੍ਣਨਾ

ਚਨ੍ਦਾਭਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਙ੍ਕਸ੍ਸਨਗਰਦ੍ਵਾਰੇ ਥੇਰਸ੍ਸੇਵ ਪਞ੍ਹਬ੍ਯਾਕਰਣਂ ਆਰਬ੍ਭ ਕਥੇਸਿ. ਅਤੀਤੇ ਕਿਰ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਰਞ੍ਞਾਯਤਨੇ ਕਾਲਂ ਕਰੋਨ੍ਤੋ ਅਨ੍ਤੇਵਾਸਿਕੇਹਿ ਪੁਚ੍ਛਿਤੋ ‘‘ਚਨ੍ਦਾਭਂ ਸੂਰਿਯਾਭ’’ਨ੍ਤਿ ਵਤ੍ਵਾ ਆਭਸ੍ਸਰੇ ਨਿਬ੍ਬਤ੍ਤੋ. ਤਾਪਸਾ ਜੇਟ੍ਠਨ੍ਤੇਵਾਸਿਕਸ੍ਸ ਨ ਸਦ੍ਦਹਿਂਸੁ. ਬੋਧਿਸਤ੍ਤੋ ਆਭਸ੍ਸਰਤੋ ਆਗਨ੍ਤ੍ਵਾ ਆਕਾਸੇ ਠਿਤੋ ਇਮਂ ਗਾਥਮਾਹ –

੧੩੫. ‘‘ਚਨ੍ਦਾਭਂ ਸੂਰਿਯਾਭਞ੍ਚ, ਯੋਧ ਪਞ੍ਞਾਯ ਗਾਧਤਿ;

ਅਵਿਤਕ੍ਕੇਨ ਝਾਨੇਨ, ਹੋਤਿ ਆਭਸ੍ਸਰੂਪਗੋ’’ਤਿ.

ਤਤ੍ਥ ਚਨ੍ਦਾਭਨ੍ਤਿ ਓਦਾਤਕਸਿਣਂ ਦਸ੍ਸੇਤਿ. ਸੂਰਿਯਾਭਨ੍ਤਿ ਪੀਤਕਸਿਣਂ. ਯੋਧ ਪਞ੍ਞਾਯ ਗਾਧਤੀਤਿ ਯੋ ਪੁਗ੍ਗਲੋ ਇਧ ਸਤ੍ਤਲੋਕੇ ਇਦਂ ਕਸਿਣਦ੍ਵਯਂ ਪਞ੍ਞਾਯ ਗਾਧਤਿ, ਆਰਮ੍ਮਣਂ ਕਤ੍ਵਾ ਅਨੁਪਵਿਸਤਿ, ਤਤ੍ਥੇਵ ਪਤਿਟ੍ਠਹਤਿ. ਅਥ ਵਾ ਚਨ੍ਦਾਭਂ ਸੂਰਿਯਾਭਞ੍ਚ, ਯੋਧ ਪਞ੍ਞਾਯ ਗਾਧਤੀਤਿ ਯਤ੍ਤਕਂ ਠਾਨਂ ਚਨ੍ਦਾਭਾ ਚ ਸੂਰਿਯਾਭਾ ਚ ਪਤ੍ਥਟਾ, ਤਤ੍ਥਕੇ ਠਾਨੇ ਪਟਿਭਾਗਕਸਿਣਂ ਵਡ੍ਢੇਤ੍ਵਾ ਤਂ ਆਰਮ੍ਮਣਂ ਕਤ੍ਵਾ ਝਾਨਂ ਨਿਬ੍ਬਤ੍ਤੇਨ੍ਤੋ ਉਭਯਮ੍ਪੇਤਂ ਆਭਂ ਪਞ੍ਞਾਯ ਗਾਧਤਿ ਨਾਮ. ਤਸ੍ਮਾ ਅਯਮ੍ਪੇਤ੍ਥ ਅਤ੍ਥੋਯੇਵ. ਅਵਿਤਕ੍ਕੇਨ ਝਾਨੇਨ, ਹੋਤਿ ਆਭਸ੍ਸਰੂਪਗੋਤਿ ਸੋ ਪੁਗ੍ਗਲੋ ਤਥਾ ਕਤ੍ਵਾ ਪਟਿਲਦ੍ਧੇਨ ਦੁਤਿਯੇਨ ਝਾਨੇਨ ਆਭਸ੍ਸਰਬ੍ਰਹ੍ਮਲੋਕੂਪਗੋ ਹੋਤੀਤਿ.

ਏਵਂ ਬੋਧਿਸਤ੍ਤੋ ਤਾਪਸੇ ਬੋਧੇਤ੍ਵਾ ਜੇਟ੍ਠਨ੍ਤੇਵਾਸਿਕਸ੍ਸ ਗੁਣਂ ਕਥੇਤ੍ਵਾ ਬ੍ਰਹ੍ਮਲੋਕਮੇਵ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਜੇਟ੍ਠਨ੍ਤੇਵਾਸਿਕੋ ਸਾਰਿਪੁਤ੍ਤੋ, ਮਹਾਬ੍ਰਹ੍ਮਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚਨ੍ਦਾਭਜਾਤਕਵਣ੍ਣਨਾ ਪਞ੍ਚਮਾ.

[੧੩੬] ੬. ਸੁਵਣ੍ਣਹਂਸਜਾਤਕਵਣ੍ਣਨਾ

ਯਂ ਲਦ੍ਧਂ ਤੇਨ ਤੁਟ੍ਠਬ੍ਬਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਥੁਲ੍ਲਨਨ੍ਦਂ ਭਿਕ੍ਖੁਨਿਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਞ੍ਹਿ ਅਞ੍ਞਤਰੋ ਉਪਾਸਕੋ ਭਿਕ੍ਖੁਨਿਸਙ੍ਘਂ ਲਸੁਣੇਨ ਪਵਾਰੇਤ੍ਵਾ ਖੇਤ੍ਤਪਾਲਂ ਆਣਾਪੇਸਿ ‘‘ਸਚੇ ਭਿਕ੍ਖੁਨਿਯੋ ਆਗਚ੍ਛਨ੍ਤਿ, ਏਕੇਕਾਯ ਭਿਕ੍ਖੁਨਿਯਾ ਦ੍ਵੇ ਤਯੋ ਭਣ੍ਡਿਕੇ ਦੇਹੀ’’ਤਿ. ਤਤੋ ਪਟ੍ਠਾਯ ਭਿਕ੍ਖੁਨਿਯੋ ਤਸ੍ਸ ਗੇਹਮ੍ਪਿ ਖੇਤ੍ਤਮ੍ਪਿ ਲਸੁਣਤ੍ਥਾਯ ਗਚ੍ਛਨ੍ਤਿ. ਅਥੇਕਸ੍ਮਿਂ ਉਸ੍ਸਵਦਿਵਸੇ ਤਸ੍ਸ ਗੇਹੇ ਲਸੁਣਂ ਪਰਿਕ੍ਖਯਂ ਅਗਮਾਸਿ. ਥੁਲ੍ਲਨਨ੍ਦਾ ਭਿਕ੍ਖੁਨੀ ਸਪਰਿਵਾਰਾ ਗੇਹਂ ਗਨ੍ਤ੍ਵਾ ‘‘ਲਸੁਣੇਨਾਵੁਸੋ ਅਤ੍ਥੋ’’ਤਿ ਵਤ੍ਵਾ ‘‘ਨਤ੍ਥਯ੍ਯੇ, ਯਥਾਭਤਂ ਲਸੁਣਂ ਪਰਿਕ੍ਖੀਣਂ, ਖੇਤ੍ਤਂ ਗਚ੍ਛਥਾ’’ਤਿ ਵੁਤ੍ਤਾ ਖੇਤ੍ਤਂ ਗਨ੍ਤ੍ਵਾ ਨ ਮਤ੍ਤਂ ਜਾਨਿਤ੍ਵਾ ਲਸੁਣਂ ਆਹਰਾਪੇਸਿ. ਖੇਤ੍ਤਪਾਲੋ ਉਜ੍ਝਾਯਿ ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਨ ਮਤ੍ਤਂ ਜਾਨਿਤ੍ਵਾ ਲਸੁਣਂ ਹਰਾਪੇਸ੍ਸਨ੍ਤੀ’’ਤਿ? ਤਸ੍ਸ ਕਥਂ ਸੁਤ੍ਵਾ ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ, ਤਾਪਿ, ਤਾਸਂ ਸੁਤ੍ਵਾ ਭਿਕ੍ਖੂਪਿ, ਉਜ੍ਝਾਯਿਂਸੁ. ਉਜ੍ਝਾਯਿਤ੍ਵਾ ਚ ਪਨ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਭਗਵਾ ਥੁਲ੍ਲਨਨ੍ਦਂ ਭਿਕ੍ਖਨਿਂ ਗਰਹਿਤ੍ਵਾ ‘‘ਭਿਕ੍ਖਵੇ, ਮਹਿਚ੍ਛੋ ਪੁਗ੍ਗਲੋ ਨਾਮ ਵਿਜਾਤਮਾਤੁਯਾਪਿ ਅਪ੍ਪਿਯੋ ਹੋਤਿ ਅਮਨਾਪੋ, ਅਪ੍ਪਸਨ੍ਨੇ ਪਸਾਦੇਤੁਂ, ਪਸਨ੍ਨਾਨਂ ਵਾ ਭਿਯ੍ਯੋਸੋਮਤ੍ਤਾਯ ਪਸਾਦਂ ਜਨੇਤੁਂ, ਅਨੁਪ੍ਪਨ੍ਨਂ ਵਾ ਲਾਭਂ ਉਪ੍ਪਾਦੇਤੁਂ, ਉਪ੍ਪਨ੍ਨਂ ਵਾ ਪਨ ਲਾਭਂ ਥਿਰਂ ਕਾਤੁਂ ਨ ਸਕ੍ਕੋਤਿ. ਅਪ੍ਪਿਚ੍ਛੋ ਪਨ ਪੁਗ੍ਗਲੋ ਅਪ੍ਪਸਨ੍ਨੇ ਪਸਾਦੇਤੁਂ, ਪਸਨ੍ਨਾਨਂ ਵਾ ਭਿਯ੍ਯੋਸੋਮਤ੍ਤਾਯ ਪਸਾਦਂ ਜਨੇਤੁਂ, ਅਨੁਪ੍ਪਨ੍ਨਂ ਵਾ ਲਾਭਂ ਉਪ੍ਪਾਦੇਤੁਂ, ਉਪ੍ਪਨ੍ਨਂ ਵਾ ਪਨ ਲਾਭਂ ਥਿਰਂ ਕਾਤੁਂ ਸਕ੍ਕੋਤੀ’’ਤਿਆਦਿਨਾ ਨਯੇਨ ਭਿਕ੍ਖੂਨਂ ਤਦਨੁਚ੍ਛਵਿਕਂ ਧਮ੍ਮਂ ਕਥੇਤ੍ਵਾ ‘‘ਨ, ਭਿਕ੍ਖਵੇ, ਥੁਲ੍ਲਨਨ੍ਦਾ ਇਦਾਨੇਵ ਮਹਿਚ੍ਛਾ, ਪੁਬ੍ਬੇਪਿ ਮਹਿਚ੍ਛਾਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਞ੍ਞਤਰਸ੍ਮਿਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਤਸ੍ਸ ਵਯਪ੍ਪਤ੍ਤਸ੍ਸ ਸਮਾਨਜਾਤਿਕਾ ਕੁਲਾ ਪਜਾਪਤਿਂ ਆਹਰਿਂਸੁ. ਤਸ੍ਸਾ ਨਨ੍ਦਾ ਨਨ੍ਦਾਵਤੀ ਸੁਨ੍ਦਰੀਨਨ੍ਦਾਤਿ ਤਿਸ੍ਸੋ ਧੀਤਰੋ ਅਹੇਸੁਂ. ਤਾਸੁ ਪਤਿਕੁਲਂ ਅਗਤਾਸੁਯੇਵ ਬੋਧਿਸਤ੍ਤੋ ਕਾਲਂ ਕਤ੍ਵਾ ਸੁਵਣ੍ਣਹਂਸਯੋਨਿਯਂ ਨਿਬ੍ਬਤ੍ਤਿ, ਜਾਤਿਸ੍ਸਰਞਾਣਞ੍ਚਸ੍ਸ ਉਪ੍ਪਜ੍ਜਿ. ਸੋ ਵਯਪ੍ਪਤ੍ਤੋ ਸੁਵਣ੍ਣਸਞ੍ਛਨ੍ਨਂ ਸੋਭਗ੍ਗਪ੍ਪਤ੍ਤਂ ਮਹਨ੍ਤਂ ਅਤ੍ਤਭਾਵਂ ਦਿਸ੍ਵਾ ‘‘ਕੁਤੋ ਨੁ ਖੋ ਚਵਿਤ੍ਵਾ ਅਹਂ ਇਧੂਪਪਨ੍ਨੋ’’ਤਿ ਆਵਜ੍ਜੇਨ੍ਤੋ ‘‘ਮਨੁਸ੍ਸਲੋਕਤੋ’’ਤਿ ਞਤ੍ਵਾ ਪੁਨ ‘‘ਕਥਂ ਨੁ ਖੋ ਮੇ ਬ੍ਰਾਹ੍ਮਣੀ ਚ ਧੀਤਰੋ ਚ ਜੀਵਨ੍ਤੀ’’ਤਿ ਉਪਧਾਰੇਨ੍ਤੋ ‘‘ਪਰੇਸਂ ਭਤਿਂ ਕਤ੍ਵਾ ਕਿਚ੍ਛੇਨ ਜੀਵਨ੍ਤੀ’’ਤਿ ਞਤ੍ਵਾ ਚਿਨ੍ਤੇਸਿ ‘‘ਮਯ੍ਹਂ ਸਰੀਰੇ ਸੋਵਣ੍ਣਮਯਾਨਿ ਪਤ੍ਤਾਨਿ ਕੋਟ੍ਟਨਘਟ੍ਟਨਖਮਾਨਿ, ਇਤੋ ਤਾਸਂ ਏਕੇਕਂ ਪਤ੍ਤਂ ਦਸ੍ਸਾਮਿ, ਤੇਨ ਮੇ ਪਜਾਪਤਿ ਚ ਧੀਤਰੋ ਚ ਸੁਖਂ ਜੀਵਿਸ੍ਸਨ੍ਤੀ’’ਤਿ. ਸੋ ਤਤ੍ਥ ਗਨ੍ਤ੍ਵਾ ਪਿਟ੍ਠਿਵਂਸਕੋਟਿਯਂ ਨਿਲੀਯਿ, ਬ੍ਰਾਹ੍ਮਣੀ ਚ ਧੀਤਰੋ ਚ ਬੋਧਿਸਤ੍ਤਂ ਦਿਸ੍ਵਾ ‘‘ਕੁਤੋ ਆਗਤੋਸਿ, ਸਾਮੀ’’ਤਿ ਪੁਚ੍ਛਿਂਸੁ. ‘‘ਅਹਂ ਤੁਮ੍ਹਾਕਂ ਪਿਤਾ ਕਾਲਂ ਕਤ੍ਵਾ ਸੁਵਣ੍ਣਹਂਸਯੋਨਿਯਂ ਨਿਬ੍ਬਤ੍ਤੋ ਤੁਮ੍ਹੇ ਦਟ੍ਠੁਂ ਆਗਤੋ. ਇਤੋ ਪਟ੍ਠਾਯ ਤੁਮ੍ਹਾਕਂ ਪਰੇਸਂ ਭਤਿਂ ਕਤ੍ਵਾ ਦੁਕ੍ਖਜੀਵਿਕਾਯ ਜੀਵਨਕਿਚ੍ਚਂ ਨਤ੍ਥਿ, ਅਹਂ ਵੋ ਏਕੇਕਂ ਪਤ੍ਤਂ ਦਸ੍ਸਾਮਿ, ਤਂ ਵਿਕ੍ਕਿਣਿਤ੍ਵਾ ਸੁਖੇਨ ਜੀਵਥਾ’’ਤਿ ਏਕਂ ਪਤ੍ਤਂ ਦਤ੍ਵਾ ਅਗਮਾਸਿ. ਸੋ ਏਤੇਨੇਵ ਨਿਯਾਮੇਨ ਅਨ੍ਤਰਨ੍ਤਰਾ ਆਗਨ੍ਤ੍ਵਾ ਏਕੇਕਂ ਪਤ੍ਤਂ ਦੇਤਿ, ਬ੍ਰਾਹ੍ਮਣੀ ਚ ਧੀਤਰੋ ਚ ਅਡ੍ਢਾ ਸੁਖਿਤਾ ਅਹੇਸੁਂ.

ਅਥੇਕਦਿਵਸਂ ਸਾ ਬ੍ਰਾਹ੍ਮਣੀ ਧੀਤਰੋ ਆਮਨ੍ਤੇਸਿ ‘‘ਅਮ੍ਮਾ, ਤਿਰਚ੍ਛਾਨਾਨਂ ਨਾਮ ਚਿਤ੍ਤਂ ਦੁਜ੍ਜਾਨਂ. ਕਦਾਚਿ ਵੋ ਪਿਤਾ ਇਧ ਨਾਗਚ੍ਛੇਯ੍ਯ, ਇਦਾਨਿਸ੍ਸ ਆਗਤਕਾਲੇ ਸਬ੍ਬਾਨਿ ਪਤ੍ਤਾਨਿਪਿ ਲੁਞ੍ਚਿਤ੍ਵਾ ਗਣ੍ਹਾਮਾ’’ਤਿ. ਤਾ ‘‘ਏਵਂ ਨੋ ਪਿਤਾ ਕਿਲਮਿਸ੍ਸਤੀ’’ਤਿ ਨ ਸਮ੍ਪਟਿਚ੍ਛਿਂਸੁ. ਬ੍ਰਾਹ੍ਮਣੀ ਪਨ ਮਹਿਚ੍ਛਤਾਯ ਪੁਨ ਏਕਦਿਵਸਂ ਸੁਵਣ੍ਣਹਂਸਰਾਜਸ੍ਸ ਆਗਤਕਾਲੇ ‘‘ਏਹਿ ਤਾਵ, ਸਾਮੀ’’ਤਿ ਵਤ੍ਵਾ ਤਂ ਅਤ੍ਤਨੋ ਸਨ੍ਤਿਕਂ ਉਪਗਤਂ ਉਭੋਹਿ ਹਤ੍ਥੇਹਿ ਗਹੇਤ੍ਵਾ ਸਬ੍ਬਪਤ੍ਤਾਨਿ ਲੁਞ੍ਚਿ. ਤਾਨਿ ਪਨ ਬੋਧਿਸਤ੍ਤਸ੍ਸ ਰੁਚਿਂ ਵਿਨਾ ਬਲਕ੍ਕਾਰੇਨ ਗਹਿਤਤ੍ਤਾ ਸਬ੍ਬਾਨਿ ਬਕਪਤ੍ਤਸਦਿਸਾਨਿ ਅਹੇਸੁਂ. ਬੋਧਿਸਤ੍ਤੋ ਪਕ੍ਖੇ ਪਸਾਰੇਤ੍ਵਾ ਗਨ੍ਤੁਂ ਨਾਸਕ੍ਖਿ. ਅਥ ਨਂ ਸਾ ਮਹਾਚਾਟਿਯਂ ਪਕ੍ਖਿਪਿਤ੍ਵਾ ਪੋਸੇਸਿ. ਤਸ੍ਸ ਪੁਨ ਉਟ੍ਠਹਨ੍ਤਾਨਿ ਪਤ੍ਤਾਨਿ ਸੇਤਾਨਿ ਸਮ੍ਪਜ੍ਜਿਂਸੁ. ਸੋ ਸਞ੍ਜਾਤਪਤ੍ਤੋ ਉਪ੍ਪਤਿਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਗਨ੍ਤ੍ਵਾ ਨ ਪੁਨ ਆਗਮਾਸਿ.

ਸਤ੍ਥਾ ਇਮਂ ਅਤੀਤਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਥੁਲ੍ਲਨਨ੍ਦਾ ਇਦਾਨੇਵ ਮਹਿਚ੍ਛਾ, ਪੁਬ੍ਬੇਪਿ ਮਹਿਚ੍ਛਾਯੇਵ, ਮਹਿਚ੍ਛਤਾਯ ਚ ਪਨ ਸੁਵਣ੍ਣਮ੍ਹਾ ਪਰਿਹੀਨਾ. ਇਦਾਨਿ ਪਨ ਅਤ੍ਤਨੋ ਮਹਿਚ੍ਛਤਾਯ ਏਵ ਲਸੁਣਮ੍ਹਾਪਿ ਪਰਿਹਾਯਿਸ੍ਸਤਿ, ਤਸ੍ਮਾ ਇਤੋ ਪਟ੍ਠਾਯ ਲਸੁਣਂ ਖਾਦਿਤੁਂ ਨ ਲਭਿਸ੍ਸਤਿ. ਯਥਾ ਚ ਥੁਲ੍ਲਨਨ੍ਦਾ, ਏਵਂ ਤਂ ਨਿਸ੍ਸਾਯ ਸੇਸਭਿਕ੍ਖੁਨਿਯੋਪਿ. ਤਸ੍ਮਾ ਬਹੁਂ ਲਭਿਤ੍ਵਾਪਿ ਪਮਾਣਮੇਵ ਜਾਨਿਤਬ੍ਬਂ, ਅਪ੍ਪਂ ਲਭਿਤ੍ਵਾ ਪਨ ਯਥਾਲਦ੍ਧੇਨੇਵ ਸਨ੍ਤੋਸੋ ਕਾਤਬ੍ਬੋ, ਉਤ੍ਤਰਿ ਨ ਪਤ੍ਥੇਤਬ੍ਬ’’ਨ੍ਤਿ ਵਤ੍ਵਾ ਇਮਂ ਗਾਥਮਾਹ –

੧੩੬. ‘‘ਯਂ ਲਦ੍ਧਂ ਤੇਨ ਤੁਟ੍ਠਬ੍ਬਂ, ਅਤਿਲੋਭੋ ਹਿ ਪਾਪਕੋ;

ਹਂਸਰਾਜਂ ਗਹੇਤ੍ਵਾਨ, ਸੁਵਣ੍ਣਾ ਪਰਿਹਾਯਥਾ’’ਤਿ.

ਤਤ੍ਥ ਤੁਟ੍ਠਬ੍ਬਨ੍ਤਿ ਤੁਸ੍ਸਿਤਬ੍ਬਂ.

ਇਦਂ ਪਨ ਵਤ੍ਵਾ ਸਤ੍ਥਾ ਅਨੇਕਪਰਿਯਾਯੇਨ ਗਰਹਿਤ੍ਵਾ ‘‘ਯਾ ਪਨ ਭਿਕ੍ਖੁਨੀ ਲਸੁਣਂ ਖਾਦੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੭੯੪) ਸਿਕ੍ਖਾਪਦਂ ਪਞ੍ਞਾਪੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਬ੍ਰਾਹ੍ਮਣੀ ਅਯਂ ਥੁਲ੍ਲਨਨ੍ਦਾ ਅਹੋਸਿ, ਤਿਸ੍ਸੋ ਧੀਤਰੋ ਇਦਾਨਿ ਤਿਸ੍ਸੋਯੇਵ ਭਗਿਨਿਯੋ, ਸੁਵਣ੍ਣਹਂਸਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੁਵਣ੍ਣਹਂਸਜਾਤਕਵਣ੍ਣਨਾ ਛਟ੍ਠਾ.

[੧੩੭] ੭. ਬਬ੍ਬੁਜਾਤਕਵਣ੍ਣਨਾ

ਯਤ੍ਥੇਕੋ ਲਭਤੇ ਬਬ੍ਬੂਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕਾਣਮਾਤੁਸਿਕ੍ਖਾਪਦਂ (ਪਾਚਿ. ੨੩੦ ਆਦਯੋ) ਆਰਬ੍ਭ ਕਥੇਸਿ. ਸਾਵਤ੍ਥਿਯਞ੍ਹਿ ਕਾਣਮਾਤਾ ਨਾਮ ਧੀਤੁਵਸੇਨ ਪਾਕਟਨਾਮਾ ਉਪਾਸਿਕਾ ਅਹੋਸਿ ਸੋਤਾਪਨ੍ਨਾ ਅਰਿਯਸਾਵਿਕਾ. ਸਾ ਧੀਤਰਂ ਕਾਣਂ ਅਞ੍ਞਤਰਸ੍ਮਿਂ ਗਾਮਕੇ ਸਮਾਨਜਾਤਿਕਸ੍ਸ ਪੁਰਿਸਸ੍ਸ ਅਦਾਸਿ. ਕਾਣਾ ਕੇਨਚਿਦੇਵ ਕਰਣੀਯੇਨ ਮਾਤੁ ਘਰਂ ਅਗਮਾਸਿ. ਅਥਸ੍ਸਾ ਸਾਮਿਕੋ ਕਤਿਪਾਹਚ੍ਚਯੇਨ ਦੂਤਂ ਪਾਹੇਸਿ ‘‘ਆਗਚ੍ਛਤੁ ਕਾਣਾ, ਇਚ੍ਛਾਮਿ ਕਾਣਾਯ ਆਗਮਨ’’ਨ੍ਤਿ. ਕਾਣਾ ਦੂਤਸ੍ਸ ਵਚਨਂ ਸੁਤ੍ਵਾ ‘‘ਅਮ੍ਮ, ਗਮਿਸ੍ਸਾਮੀ’’ਤਿ ਮਾਤਰਂ ਆਪੁਚ੍ਛਿ. ਕਾਣਮਾਤਾ ‘‘ਏਤ੍ਤਕਂ ਕਾਲਂ ਵਸਿਤ੍ਵਾ ਕਥਂ ਤੁਚ੍ਛਹਤ੍ਥਾਵ ਗਮਿਸ੍ਸਸੀ’’ਤਿ ਪੂਵਂ ਪਚਿ. ਤਸ੍ਮਿਂਯੇਵ ਖਣੇ ਏਕੋ ਪਿਣ੍ਡਚਾਰਿਕੋ ਭਿਕ੍ਖੁ ਤਸ੍ਸਾ ਨਿਵੇਸਨਂ ਅਗਮਾਸਿ, ਉਪਾਸਿਕਾ ਤਂ ਨਿਸੀਦਾਪੇਤ੍ਵਾ ਪਤ੍ਤਪੂਰਂ ਪੂਵਂ ਦਾਪੇਸਿ. ਸੋ ਭਿਕ੍ਖੁ ਨਿਕ੍ਖਮਿਤ੍ਵਾ ਅਞ੍ਞਸ੍ਸ ਆਚਿਕ੍ਖਿ, ਤਸ੍ਸਪਿ ਤਥੇਵ ਦਾਪੇਸਿ. ਸੋਪਿ ਨਿਕ੍ਖਮਿਤ੍ਵਾ ਅਞ੍ਞਸ੍ਸ ਆਚਿਕ੍ਖਿ, ਤਸ੍ਸਪਿ ਤਥੇਵਾਤਿ ਏਵਂ ਚਤੁਨ੍ਨਂ ਜਨਾਨਂ ਦਾਪੇਸਿ. ਯਥਾਪਟਿਯਤ੍ਤਂ ਪੂਵਂ ਪਰਿਕ੍ਖਯਂ ਅਗਮਾਸਿ, ਕਾਣਾਯ ਗਮਨਂ ਨ ਸਮ੍ਪਜ੍ਜਿ. ਅਥਸ੍ਸਾ ਸਾਮਿਕੋ ਦੁਤਿਯਮ੍ਪਿ, ਤਤਿਯਮ੍ਪਿ ਦੂਤਂ ਪਾਹੇਸਿ. ਤਤਿਯਂ ਪਾਹੇਨ੍ਤੋ ਚ ‘‘ਸਚੇ ਕਾਣਾ ਨਾਗਚ੍ਛਿਸ੍ਸਤਿ, ਅਹਂ ਅਞ੍ਞਂ ਪਜਾਪਤਿਂ ਆਨੇਸ੍ਸਾਮੀ’’ਤਿ ਪਾਹੇਸਿ. ਤਯੋਪਿ ਵਾਰੇ ਤੇਨੇਵ ਉਪਾਯੇਨ ਗਮਨਂ ਨ ਸਮ੍ਪਜ੍ਜਿ, ਕਾਣਾਯ ਸਾਮਿਕੋ ਅਞ੍ਞਂ ਪਜਾਪਤਿਂ ਆਨੇਸਿ. ਕਾਣਾ ਤਂ ਪਵਤ੍ਤਿਂ ਸੁਤ੍ਵਾ ਰੋਦਮਾਨਾ ਅਟ੍ਠਾਸਿ.

ਸਤ੍ਥਾ ਤਂ ਕਾਰਣਂ ਞਤ੍ਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਕਾਣਮਾਤਾਯ ਨਿਵੇਸਨਂ ਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ਕਾਣਮਾਤਰਂ ਪੁਚ੍ਛਿ ‘‘ਕਿਸ੍ਸਾਯਂ ਕਾਣਾ ਰੋਦਤੀ’’ਤਿ? ‘‘ਇਮਿਨਾ ਨਾਮ ਕਾਰਣੇਨਾ’’ਤਿ ਚ ਸੁਤ੍ਵਾ ਕਾਣਮਾਤਰਂ ਸਮਸ੍ਸਾਸੇਤ੍ਵਾ ਧਮ੍ਮਿਂ ਕਥਂ ਕਥੇਤ੍ਵਾ ਉਟ੍ਠਾਯਾਸਨਾ ਵਿਹਾਰਂ ਅਗਮਾਸਿ. ਅਥ ਤੇਸਂ ਚਤੁਨ੍ਨਂ ਭਿਕ੍ਖੂਨਂ ਤਯੋ ਵਾਰੇ ਯਥਾਪਟਿਯਤ੍ਤਪੂਵਂ ਗਹੇਤ੍ਵਾ ਕਾਣਾਯ ਗਮਨਸ੍ਸ ਉਪਚ੍ਛਿਨ੍ਨਭਾਵੋ ਭਿਕ੍ਖੁਸਙ੍ਘੇ ਪਾਕਟੋ ਜਾਤੋ. ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਚਤੂਹਿ ਨਾਮ ਭਿਕ੍ਖੂਹਿ ਤਯੋ ਵਾਰੇ ਕਾਣਮਾਤਾਯ ਪਕ੍ਕਪੂਵਂ ਖਾਦਿਤ੍ਵਾ ਕਾਣਾਯ ਗਮਨਨ੍ਤਰਾਯਂ ਕਤ੍ਵਾ ਸਾਮਿਕੇਨ ਪਰਿਚ੍ਚਤ੍ਤਂ ਧੀਤਰਂ ਨਿਸ੍ਸਾਯ ਮਹਾਉਪਾਸਿਕਾਯ ਦੋਮਨਸ੍ਸਂ ਉਪ੍ਪਾਦਿਤ’’ਨ੍ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ ਤੇ ਚਤ੍ਤਾਰੋ ਭਿਕ੍ਖੂ ਕਾਣਮਾਤਾਯ ਸਨ੍ਤਕਂ ਖਾਦਿਤ੍ਵਾ ਤਸ੍ਸਾ ਦੋਮਨਸ੍ਸਂ ਉਪ੍ਪਾਦੇਸੁਂ, ਪੁਬ੍ਬੇਪਿ ਉਪ੍ਪਾਦੇਸੁਂਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਪਾਸਾਣਕੋਟ੍ਟਕਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਪਰਿਯੋਦਾਤਸਿਪ੍ਪੋ ਅਹੋਸਿ. ਕਾਸਿਰਟ੍ਠੇ ਏਕਸ੍ਮਿਂ ਨਿਗਮੇ ਏਕੋ ਮਹਾਵਿਭਵੋ ਸੇਟ੍ਠਿ ਅਹੋਸਿ, ਤਸ੍ਸ ਨਿਧਾਨਗਤਾਯੇਵ ਚਤ੍ਤਾਲੀਸ ਹਿਰਞ੍ਞਕੋਟਿਯੋ ਅਹੇਸੁਂ. ਅਥਸ੍ਸ ਭਰਿਯਾ ਕਾਲਂ ਕਤ੍ਵਾ ਧਨਸਿਨੇਹੇਨ ਗਨ੍ਤ੍ਵਾ ਧਨਪਿਟ੍ਠਿਯਂ ਮੂਸਿਕਾ ਹੁਤ੍ਵਾ ਨਿਬ੍ਬਤ੍ਤਿ. ਏਵਂ ਅਨੁਕ੍ਕਮੇਨ ਸਬ੍ਬਮ੍ਪਿ ਤਂ ਕੁਲਂ ਅਬ੍ਭਤ੍ਥਂ ਅਗਮਾਸਿ, ਵਂਸੋ ਉਪਚ੍ਛਿਜ੍ਜਿ. ਸੋ ਗਾਮੋਪਿ ਛਡ੍ਡਿਤੋ ਅਪਣ੍ਣਤ੍ਤਿਕਭਾਵਂ ਅਗਮਾਸਿ. ਤਦਾ ਬੋਧਿਸਤ੍ਤੋ ਤਸ੍ਮਿਂ ਪੁਰਾਣਗਾਮਟ੍ਠਾਨੇ ਪਾਸਾਣੇ ਉਪ੍ਪਾਟੇਤ੍ਵਾ ਕੋਟ੍ਟੇਤਿ. ਅਥ ਸਾ ਮੂਸਿਕਾ ਗੋਚਰਾਯ ਚਰਮਾਨਾ ਬੋਧਿਸਤ੍ਤਂ ਪੁਨਪ੍ਪੁਨਂ ਪਸ੍ਸਨ੍ਤੀ ਉਪ੍ਪਨ੍ਨਸਿਨੇਹਾ ਹੁਤ੍ਵਾ ਚਿਨ੍ਤੇਸਿ ‘‘ਮਯ੍ਹਂ ਧਨਂ ਬਹੁ ਨਿਕ੍ਕਾਰਣੇਨ ਨਸ੍ਸਿਸ੍ਸਤਿ, ਇਮਿਨਾ ਸਦ੍ਧਿਂ ਏਕਤੋ ਹੁਤ੍ਵਾ ਇਦਂ ਧਨਂ ਦਤ੍ਵਾ ਮਂਸਂ ਵਿਕ੍ਕਿਣਾਪੇਤ੍ਵਾ ਖਾਦਿਸ੍ਸਾਮੀ’’ਤਿ. ਸਾ ਏਕਦਿਵਸਂ ਏਕਂ ਕਹਾਪਣਂ ਮੁਖੇਨ ਡਂਸਿਤ੍ਵਾ ਬੋਧਿਸਤ੍ਤਸ੍ਸ ਸਨ੍ਤਿਕਂ ਅਗਮਾਸਿ. ਸੋ ਤਂ ਦਿਸ੍ਵਾ ਪਿਯਵਾਚਾਯ ਸਮਾਲਪਨ੍ਤੋ ‘‘ਕਿਂ ਨੁ ਖੋ, ਅਮ੍ਮ, ਕਹਾਪਣਂ ਗਹੇਤ੍ਵਾ ਆਗਤਾਸੀ’’ਤਿ ਆਹ. ਤਾਤ, ਇਮਂ ਗਹੇਤ੍ਵਾ ਅਤ੍ਤਨਾਪਿ ਪਰਿਭੁਞ੍ਜ, ਮਯ੍ਹਮ੍ਪਿ ਮਂਸਂ ਆਹਰਾਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਕਹਾਪਣਂ ਆਦਾਯ ਘਰਂ ਗਨ੍ਤ੍ਵਾ ਏਕੇਨ ਮਾਸਕੇਨ ਮਂਸਂ ਕਿਣਿਤ੍ਵਾ ਆਹਰਿਤ੍ਵਾ ਤਸ੍ਸਾ ਅਦਾਸਿ. ਸਾ ਤਂ ਗਹੇਤ੍ਵਾ ਅਤ੍ਤਨੋ ਨਿਵਾਸਟ੍ਠਾਨਂ ਗਨ੍ਤ੍ਵਾ ਯਥਾਰੁਚਿਯਾ ਖਾਦਿ. ਤਤੋ ਪਟ੍ਠਾਯ ਇਮਿਨਾਵ ਨਿਯਾਮੇਨ ਦਿਵਸੇ ਦਿਵਸੇ ਬੋਧਿਸਤ੍ਤਸ੍ਸ ਕਹਾਪਣਂ ਦੇਤਿ, ਸੋਪਿਸ੍ਸਾ ਮਂਸਂ ਆਹਰਤਿ.

ਅਥੇਕਦਿਵਸਂ ਤਂ ਮੂਸਿਕਂ ਬਿਲ਼ਾਰੋ ਅਗ੍ਗਹੇਸਿ. ਅਥ ਨਂ ਸਾ ਏਵਮਾਹ ‘‘ਮਾ, ਸਮ੍ਮ, ਮਂ ਮਾਰੇਸੀ’’ਤਿ. ਕਿਂਕਾਰਣਾ ਨ ਮਾਰੇਸ੍ਸਾਮਿ? ਅਹਞ੍ਹਿ ਛਾਤੋ ਮਂਸਂ ਖਾਦਿਤੁਕਾਮੋ, ਨ ਸਕ੍ਕਾ ਮਯਾ ਨ ਮਾਰੇਤੁਨ੍ਤਿ. ਕਿਂ ਪਨ ਏਕਦਿਵਸਮੇਵ ਮਂਸਂ ਖਾਦਿਤੁਕਾਮੋਸਿ, ਉਦਾਹੁ ਨਿਚ੍ਚਕਾਲਨ੍ਤਿ? ‘‘ਲਭਮਾਨੋ ਨਿਚ੍ਚਕਾਲਮ੍ਪਿ ਖਾਦਿਤੁਕਾਮੋਮ੍ਹੀ’’ਤਿ. ‘‘ਯਦਿ ਏਵਂ ਅਹਂ ਤੇ ਨਿਚ੍ਚਕਾਲਂ ਮਂਸਂ ਦਸ੍ਸਾਮਿ, ਵਿਸ੍ਸਜ੍ਜੇਹਿ ਮ’’ਨ੍ਤਿ. ਅਥ ਨਂ ਬਿਲ਼ਾਰੋ ‘‘ਤੇਨ ਹਿ ਅਪ੍ਪਮਤ੍ਤਾ ਹੋਹੀ’’ਤਿ ਵਿਸ੍ਸਜ੍ਜੇਸਿ. ਤਤੋ ਪਟ੍ਠਾਯ ਸਾ ਅਤ੍ਤਨੋ ਆਭਤਂ ਮਂਸਂ ਦ੍ਵੇ ਕੋਟ੍ਠਾਸੇ ਕਤ੍ਵਾ ਏਕਂ ਬਿਲ਼ਾਰਸ੍ਸ ਦੇਤਿ, ਏਕਂ ਸਯਂ ਖਾਦਤਿ. ਅਥ ਨਂ ਏਕਦਿਵਸਂ ਅਞ੍ਞੋਪਿ ਬਿਲ਼ਾਰੋ ਅਗ੍ਗਹੇਸਿ, ਤਮ੍ਪਿ ਤਥੇਵ ਸਞ੍ਞਾਪੇਤ੍ਵਾ ਅਤ੍ਤਾਨਂ ਵਿਸ੍ਸਜ੍ਜਾਪੇਸਿ. ਤਤੋ ਪਟ੍ਠਾਯ ਤਯੋ ਕੋਟ੍ਠਾਸੇ ਕਤ੍ਵਾ ਖਾਦਨ੍ਤਿ. ਪੁਨ ਅਞ੍ਞੋ ਅਗ੍ਗਹੇਸਿ, ਤਮ੍ਪਿ ਤਥੇਵ ਸਞ੍ਞਾਪੇਤ੍ਵਾ ਅਤ੍ਤਾਨਂ ਮੋਚਾਪੇਸਿ. ਤਤੋ ਪਟ੍ਠਾਯ ਚਤ੍ਤਾਰੋ ਕੋਟ੍ਠਾਸੇ ਕਤ੍ਵਾ ਖਾਦਨ੍ਤਿ. ਪੁਨ ਅਞ੍ਞੋ ਅਗ੍ਗਹੇਸਿ, ਤਮ੍ਪਿ ਤਥੇਵ ਸਞ੍ਞਾਪੇਤ੍ਵਾ ਅਤ੍ਤਾਨਂ ਮੋਚਾਪੇਸਿ. ਤਤੋ ਪਟ੍ਠਾਯ ਪਞ੍ਚ ਕੋਟ੍ਠਾਸੇ ਕਤ੍ਵਾ ਖਾਦਨ੍ਤਿ. ਸਾ ਪਞ੍ਚਮਂ ਕੋਟ੍ਠਾਸਂ ਖਾਦਮਾਨਾ ਅਪ੍ਪਾਹਾਰਤਾਯ ਕਿਲਨ੍ਤਾ ਕਿਸਾ ਅਹੋਸਿ ਅਪ੍ਪਮਂਸਲੋਹਿਤਾ

ਬੋਧਿਸਤ੍ਤੋ ਤਂ ਦਿਸ੍ਵਾ ‘‘ਅਮ੍ਮ, ਕਸ੍ਮਾ ਮਿਲਾਤਾਸੀ’’ਤਿ ਵਤ੍ਵਾ ‘‘ਇਮਿਨਾ ਨਾਮ ਕਾਰਣੇਨਾ’’ਤਿ ਵੁਤ੍ਤੇ ‘‘ਤ੍ਵਂ ਏਤ੍ਤਕਂ ਕਾਲਂ ਕਸ੍ਮਾ ਮਯ੍ਹਂ ਨਾਚਿਕ੍ਖਿ, ਅਹਮੇਤ੍ਥ ਕਾਤਬ੍ਬਂ ਜਾਨਿਸ੍ਸਾਮੀ’’ਤਿ ਤਂ ਸਮਸ੍ਸਾਸੇਤ੍ਵਾ ਸੁਦ੍ਧਫਲਿਕਪਾਸਾਣੇਨ ਗੁਹਂ ਕਤ੍ਵਾ ਆਹਰਿਤ੍ਵਾ ‘‘ਅਮ੍ਮ, ਤ੍ਵਂ ਇਮਂ ਗੁਹਂ ਪਵਿਸਿਤ੍ਵਾ ਨਿਪਜ੍ਜਿਤ੍ਵਾ ਆਗਤਾਗਤਾਨਂ ਫਰੁਸਾਹਿ ਵਾਚਾਹਿ ਸਨ੍ਤਜ੍ਜੇਯ੍ਯਾਸੀ’’ਤਿ ਆਹ. ਸਾ ਗੁਹਂ ਪਵਿਸਿਤ੍ਵਾ ਨਿਪਜ੍ਜਿ. ਅਥੇਕੋ ਬਿਲ਼ਾਰੋ ਆਗਨ੍ਤ੍ਵਾ ‘‘ਦੇਹਿ, ਅਜ੍ਜ ਮੇ ਮਂਸ’’ਨ੍ਤਿ ਆਹ. ਅਥ ਨਂ ਮੂਸਿਕਾ ‘‘ਅਰੇ, ਦੁਟ੍ਠਬਿਲ਼ਾਰ, ਕਿਂ ਤੇ ਅਹਂ ਮਂਸਹਾਰਿਕਾ, ਅਤ੍ਤਨੋ ਪੁਤ੍ਤਾਨਂ ਮਂਸਂ ਖਾਦਾ’’ਤਿ ਤਜ੍ਜੇਸਿ. ਬਿਲ਼ਾਰੋ ਫਲਿਕਗੁਹਾਯ ਨਿਪਨ੍ਨਭਾਵਂ ਅਜਾਨਨ੍ਤੋ ਕੋਧਵਸੇਨ ਮੂਸਿਕਂ ਗਣ੍ਹਿਸ੍ਸਾਮੀ’’ਤਿ ਸਹਸਾਵ ਪਕ੍ਖਨ੍ਦਿਤ੍ਵਾ ਹਦਯੇਨ ਫਲਿਕਗੁਹਾਯਂ ਪਹਰਿ. ਤਾਵਦੇਵਸ੍ਸ ਹਦਯਂ ਭਿਜ੍ਜਿ, ਅਕ੍ਖੀਨਿ ਨਿਕ੍ਖਮਨਾਕਾਰਪ੍ਪਤ੍ਤਾਨਿ ਜਾਤਾਨਿ. ਸੋ ਤਤ੍ਥੇਵ ਜੀਵਿਤਕ੍ਖਯਂ ਪਤ੍ਵਾ ਏਕਮਨ੍ਤਂ ਪਟਿਚ੍ਛਨ੍ਨਟ੍ਠਾਨੇ ਪਤਿ. ਏਤੇਨੂਪਾਯੇਨ ਅਪਰੋਪਿ ਅਪਰੋਪੀਤਿ ਚਤ੍ਤਾਰੋਪਿ ਜਨਾ ਜੀਵਿਤਕ੍ਖਯਂ ਪਾਪੁਣਿਂਸੁ. ਤਤੋ ਪਟ੍ਠਾਯ ਮੂਸਿਕਾ ਨਿਬ੍ਭਯਾ ਹੁਤ੍ਵਾ ਬੋਧਿਸਤ੍ਤਸ੍ਸ ਦੇਵਸਿਕਂ ਦ੍ਵੇ ਤਯੋ ਕਹਾਪਣੇ ਦੇਤਿ. ਏਵਂ ਅਨੁਕ੍ਕਮੇਨ ਸਬ੍ਬਮ੍ਪਿ ਧਨਂ ਬੋਧਿਸਤ੍ਤਸ੍ਸੇਵ ਅਦਾਸਿ. ਤੇ ਉਭੋਪਿ ਯਾਵਜੀਵਂ ਮੇਤ੍ਤਿਂ ਅਭਿਨ੍ਦਿਤ੍ਵਾ ਯਥਾਕਮ੍ਮਂ ਗਤਾ.

ਸਤ੍ਥਾ ਇਮਂ ਅਤੀਤਂ ਆਹਰਿਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਂ ਗਾਥਮਾਹ –

੧੩੭. ‘‘ਯਤ੍ਥੇਕੋ ਲਭਤੇ ਬਬ੍ਬੁ, ਦੁਤਿਯੋ ਤਤ੍ਥ ਜਾਯਤਿ;

ਤਤਿਯੋ ਚ ਚਤੁਤ੍ਥੋ ਚ, ਇਦਂ ਤੇ ਬਬ੍ਬੁਕਾ ਬਿਲ’’ਨ੍ਤਿ.

ਤਤ੍ਥ ਯਤ੍ਥਾਤਿ ਯਸ੍ਮਿਂ ਠਾਨੇ. ਬਬ੍ਬੂਤਿ ਬਿਲ਼ਾਰੋ. ਦੁਤਿਯੋ ਤਤ੍ਥ ਜਾਯਤੀਤਿ ਯਤ੍ਥ ਏਕੋ ਮੂਸਿਕਂ ਵਾ ਮਂਸਂ ਵਾ ਲਭਤਿ, ਦੁਤਿਯੋਪਿ ਤਤ੍ਥ ਬਿਲ਼ਾਰੋ ਜਾਯਤਿ ਉਪ੍ਪਜ੍ਜਤਿ, ਤਥਾ ਤਤਿਯੋ ਚ ਚਤੁਤ੍ਥੋ ਚ. ਏਵਂ ਤੇ ਤਦਾ ਚਤ੍ਤਾਰੋ ਬਿਲ਼ਾਰਾ ਅਹੇਸੁਂ. ਹੁਤ੍ਵਾ ਚ ਪਨ ਦਿਵਸੇ ਦਿਵਸੇ ਮਂਸਂ ਖਾਦਨ੍ਤਾ ਤੇ ਬਬ੍ਬੁਕਾ ਇਦਂ ਫਲਿਕਮਯਂ ਬਿਲਂ ਉਰੇਨ ਪਹਰਿਤ੍ਵਾ ਸਬ੍ਬੇਪਿ ਜੀਵਿਤਕ੍ਖਯਂ ਪਤ੍ਤਾਤਿ.

ਏਵਂ ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਚਤ੍ਤਾਰੋ ਬਿਲ਼ਾਰਾ ਚਤ੍ਤਾਰੋ ਭਿਕ੍ਖੂ ਅਹੇਸੁਂ, ਮੂਸਿਕਾ ਕਾਣਮਾਤਾ, ਪਾਸਾਣਕੋਟ੍ਟਕਮਣਿਕਾਰੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਬਬ੍ਬੁਜਾਤਕਵਣ੍ਣਨਾ ਸਤ੍ਤਮਾ.

[੧੩੮] ੮. ਗੋਧਾਜਾਤਕਵਣ੍ਣਨਾ

ਕਿਂ ਤੇ ਜਟਾਹਿ ਦੁਮ੍ਮੇਧਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਕੁਹਕਭਿਕ੍ਖੁਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਹੇਟ੍ਠਾ ਕਥਿਤਸਦਿਸਮੇਵ.

ਅਤੀਤੇ ਪਨ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਗੋਧਾਯੋਨਿਯਂ ਪਟਿਸਨ੍ਧਿਂ ਗਣ੍ਹਿ. ਤਦਾ ਏਕੋ ਪਞ੍ਚਾਭਿਞ੍ਞੋ ਉਗ੍ਗਤਪੋ ਤਾਪਸੋ ਏਕਂ ਪਚ੍ਚਨ੍ਤਗਾਮਂ ਨਿਸ੍ਸਾਯ ਅਰਞ੍ਞਾਯਤਨੇ ਪਣ੍ਣਸਾਲਾਯਂ ਵਸਤਿ, ਗਾਮਵਾਸਿਨੋ ਤਾਪਸਂ ਸਕ੍ਕਚ੍ਚਂ ਉਪਟ੍ਠਹਨ੍ਤਿ. ਬੋਧਿਸਤ੍ਤੋ ਤਸ੍ਸ ਚਙ੍ਕਮਨਕੋਟਿਯਂ ਏਕਸ੍ਮਿਂ ਵਮ੍ਮਿਕੇ ਵਸਤਿ, ਵਸਨ੍ਤੋ ਚ ਪਨ ਦਿਵਸੇ ਦਿਵਸੇ ਦ੍ਵੇ ਤਯੋ ਵਾਰੇ ਤਾਪਸਂ ਉਪਸਙ੍ਕਮਿਤ੍ਵਾ ਧਮ੍ਮੂਪਸਂਹਿਤਂ ਅਤ੍ਥੂਪਸਂਹਿਤਞ੍ਚ ਵਚਨਂ ਸੁਤ੍ਵਾ ਤਾਪਸਂ ਵਨ੍ਦਿਤ੍ਵਾ ਵਸਨਟ੍ਠਾਨਮੇਵ ਗਚ੍ਛਤਿ. ਅਪਰਭਾਗੇ ਤਾਪਸੋ ਗਾਮਵਾਸਿਨੋ ਆਪੁਚ੍ਛਿਤ੍ਵਾ ਪਕ੍ਕਾਮਿ. ਪਕ੍ਕਮਨ੍ਤੇ ਚ ਪਨ ਤਸ੍ਮਿਂ ਸੀਲਵਤਸਮ੍ਪਨ੍ਨੇ ਤਾਪਸੇ ਅਞ੍ਞੋ ਕੂਟਤਾਪਸੋ ਆਗਨ੍ਤ੍ਵਾ ਤਸ੍ਮਿਂ ਅਸ੍ਸਮਪਦੇ ਵਾਸਂ ਕਪ੍ਪੇਸਿ. ਬੋਧਿਸਤ੍ਤੋ ‘‘ਅਯਮ੍ਪਿ ਸੀਲਵਾ’’ਤਿ ਸਲ੍ਲਕ੍ਖੇਤ੍ਵਾ ਪੁਰਿਮਨਯੇਨੇਵ ਤਸ੍ਸ ਸਨ੍ਤਿਕਂ ਅਗਮਾਸਿ.

ਅਥੇਕਦਿਵਸਂ ਨਿਦਾਘਸਮਯੇ ਅਕਾਲਮੇਘੇ ਵੁਟ੍ਠੇ ਵਮ੍ਮਿਕੇਹਿ ਮਕ੍ਖਿਕਾ ਨਿਕ੍ਖਮਿਂਸੁ, ਤਾਸਂ ਖਾਦਨਤ੍ਥਂ ਗੋਧਾ ਆਹਿਣ੍ਡਿਂਸੁ. ਗਾਮਵਾਸਿਨੋ ਨਿਕ੍ਖਮਿਤ੍ਵਾ ਮਕ੍ਖਿਕਾਖਾਦਕਾ ਗੋਧਾ ਗਹੇਤ੍ਵਾ ਸਿਨਿਦ੍ਧਸਮ੍ਭਾਰਸਂਯੁਤ੍ਤਂ ਅਮ੍ਬਿਲਾਨਮ੍ਬਿਲਂ ਗੋਧਾਮਂਸਂ ਸਮ੍ਪਾਦੇਤ੍ਵਾ ਤਾਪਸਸ੍ਸ ਅਦਂਸੁ. ਤਾਪਸੋ ਗੋਧਾਮਂਸਂ ਖਾਦਿਤ੍ਵਾ ਰਸਤਣ੍ਹਾਯ ਬਦ੍ਧੋ ‘‘ਇਦਂ ਮਂਸਂ ਅਤਿਮਧੁਰਂ, ਕਿਸ੍ਸ ਮਂਸਂ ਨਾਮੇਤ’’ਨ੍ਤਿ ਪੁਚ੍ਛਿਤ੍ਵਾ ‘‘ਗੋਧਾਮਂਸ’’ਨ੍ਤਿ ਸੁਤ੍ਵਾ ‘‘ਮਮ ਸਨ੍ਤਿਕਂ ਮਹਾਗੋਧਾ ਆਗਚ੍ਛਤਿ, ਤਂ ਮਾਰੇਤ੍ਵਾ ਮਂਸਂ ਖਾਦਿਸ੍ਸਾਮੀ’’ਤਿ ਚਿਨ੍ਤੇਸਿ. ਚਿਨ੍ਤੇਤ੍ਵਾ ਚ ਪਨ ਭਾਜਨਞ੍ਚ ਸਪ੍ਪਿਲੋਣਾਦੀਨਿ ਚ ਆਹਰਾਪੇਤ੍ਵਾ ਏਕਮਨ੍ਤੇ ਠਪੇਤ੍ਵਾ ਮੁਗ੍ਗਰਮਾਦਾਯ ਕਾਸਾਵੇਨ ਪਟਿਚ੍ਛਾਦੇਤ੍ਵਾ ਪਣ੍ਣਸਾਲਾਦ੍ਵਾਰੇ ਬੋਧਿਸਤ੍ਤਸ੍ਸ ਆਗਮਨਂ ਓਲੋਕਯਮਾਨੋ ਉਪਸਨ੍ਤੂਪਸਨ੍ਤੋ ਵਿਯ ਹੁਤ੍ਵਾ ਨਿਸੀਦਿ ਬੋਧਿਸਤ੍ਤੋ ਸਾਯਨ੍ਹਸਮਯੇ ‘‘ਤਾਪਸਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਨਿਕ੍ਖਮਿਤ੍ਵਾ ਉਪਸਙ੍ਕਮਨ੍ਤੋਵ ਤਸ੍ਸ ਇਨ੍ਦ੍ਰਿਯਵਿਪ੍ਪਕਾਰਂ ਦਿਸ੍ਵਾ ਚਿਨ੍ਤੇਸਿ ‘‘ਨਾਯਂ ਤਾਪਸੋ ਅਞ੍ਞੇਸੁ ਦਿਵਸੇਸੁ ਨਿਸੀਦਨਾਕਾਰੇਨ ਨਿਸਿਨ੍ਨੋ, ਅਜ੍ਜੇਸ ਮਂ ਓਲੋਕੇਨ੍ਤੋਪਿ ਦੁਟ੍ਠਿਨ੍ਦ੍ਰਿਯੋ ਹੁਤ੍ਵਾ ਓਲੋਕੇਤਿ, ਪਰਿਗ੍ਗਣ੍ਹਿਸ੍ਸਾਮਿ ਨ’’ਨ੍ਤਿ. ਸੋ ਤਾਪਸਸ੍ਸ ਹੇਟ੍ਠਾਵਾਤੇ ਠਤ੍ਵਾ ਗੋਧਾਮਂਸਗਨ੍ਧਂ ਘਾਯਿਤ੍ਵਾ ‘‘ਇਮਿਨਾ ਕੂਟਤਾਪਸੇਨ ਅਜ੍ਜ ਗੋਧਾਮਂਸਂ ਖਾਦਿਤਂ ਭਵਿਸ੍ਸਤਿ, ਤੇਨੇਸ ਰਸਤਣ੍ਹਾਯ ਬਦ੍ਧੋ ਅਜ੍ਜ ਮਂ ਅਤ੍ਤਨੋ ਸਨ੍ਤਿਕਂ ਉਪਸਙ੍ਕਮਨ੍ਤਂ ਮੁਗ੍ਗਰੇਨ ਪਹਰਿਤ੍ਵਾ ਮਂਸਂ ਪਚਿਤ੍ਵਾ ਖਾਦਿਤੁਕਾਮੋ ਭਵਿਸ੍ਸਤੀ’’ਤਿ ਤਸ੍ਸ ਸਨ੍ਤਿਕਂ ਅਨੁਪਗਨ੍ਤ੍ਵਾਵ ਪਟਿਕ੍ਕਮਿਤ੍ਵਾ ਵਿਚਰਤਿ.

ਤਾਪਸੋ ਬੋਧਿਸਤ੍ਤਸ੍ਸ ਅਨਾਗਮਨਭਾਵਂ ਞਤ੍ਵਾ ‘‘ਇਮਿਨਾ ‘ਅਯਂ ਮਂ ਪਹਰਿਤੁਕਾਮੋ’ਤਿ ਞਾਤਂ ਭਵਿਸ੍ਸਤਿ, ਤੇਨ ਕਾਰਣੇਨ ਨਾਗਚ੍ਛਤਿ, ਅਨਾਗਚ੍ਛਨ੍ਤਸ੍ਸਾਪਿਸ੍ਸ ਕੁਤੋ ਮੁਤ੍ਤੀ’’ਤਿ ਮੁਗ੍ਗਰਂ ਨੀਹਰਿਤ੍ਵਾ ਖਿਪਿ. ਸੋ ਤਸ੍ਸ ਅਗ੍ਗਨਙ੍ਗੁਟ੍ਠਮੇਵ ਆਸਾਦੇਸਿ. ਬੋਧਿਸਤ੍ਤੋ ਵੇਗੇਨ ਵਮ੍ਮਿਕਂ ਪਵਿਸਿਤ੍ਵਾ ਅਞ੍ਞੇਨ ਛਿਦ੍ਦੇਨ ਸੀਸਂ ਉਕ੍ਖਿਪਿਤ੍ਵਾ ‘‘ਅਮ੍ਭੋ ਕੂਟਜਟਿਲ, ਅਹਂ ਤਵ ਸਨ੍ਤਿਕਂ ਉਪਸਙ੍ਕਮਨ੍ਤੋ ‘ਸੀਲਵਾ’ਤਿ ਸਞ੍ਞਾਯ ਉਪਸਙ੍ਕਮਿਂ, ਇਦਾਨਿ ਪਨ ਤੇ ਮਯਾ ਕੂਟਭਾਵੋ ਞਾਤੋ, ਤਾਦਿਸਸ੍ਸ ਮਹਾਚੋਰਸ੍ਸ ਕਿਂ ਇਮਿਨਾ ਪਬ੍ਬਜ੍ਜਾਲਿਙ੍ਗੇਨਾ’’ਤਿ ਵਤ੍ਵਾ ਤਂ ਗਰਹਨ੍ਤੋ ਇਮਂ ਗਾਥਮਾਹ –

੧੩੮. ‘‘ਕਿਂ ਤੇ ਜਟਾਹਿ ਦੁਮ੍ਮੇਧ, ਕਿਂ ਤੇ ਅਜਿਨਸਾਟਿਯਾ;

ਅਬ੍ਭਨ੍ਤਰਂ ਤੇ ਗਹਨਂ, ਬਾਹਿਰਂ ਪਰਿਮਜ੍ਜਸੀ’’ਤਿ.

ਤਤ੍ਥ ਕਿਂ ਤੇ ਜਟਾਹਿ ਦੁਮ੍ਮੇਧਾਤਿ ਅਮ੍ਭੋ ਦੁਮ੍ਮੇਧ, ਨਿਪ੍ਪਞ੍ਞ ਏਤਾ ਪਬ੍ਬਜਿਤੇਨ ਧਾਰੇਤਬ੍ਬਾ ਜਟਾ, ਪਬ੍ਬਜ੍ਜਾਗੁਣਰਹਿਤਸ੍ਸ ਕਿਂ ਤੇ ਤਾਹਿ ਜਟਾਹੀਤਿ ਅਤ੍ਥੋ. ਕਿਂ ਤੇ ਅਜਿਨਸਾਟਿਯਾਤਿ ਅਜਿਨਸਾਟਿਯਾ ਅਨੁਚ੍ਛਵਿਕਸ੍ਸ ਸਂਵਰਸ੍ਸ ਅਭਾਵਕਾਲਤੋ ਪਟ੍ਠਾਯ ਕਿਂ ਤੇ ਅਜਿਨਸਾਟਿਯਾ. ਅਬ੍ਭਨ੍ਤਰਂ ਤੇ ਗਹਨਨ੍ਤਿ ਤਵ ਅਬ੍ਭਨ੍ਤਰਂ ਹਦਯਂ ਰਾਗਦੋਸਮੋਹਗਹਨੇਨ ਗਹਨਂ ਪਟਿਚ੍ਛਨ੍ਨਂ. ਬਾਹਿਰਂ ਪਰਿਮਜ੍ਜਸੀਤਿ ਸੋ ਤ੍ਵਂ ਅਬ੍ਭਨ੍ਤਰੇ ਗਹਨੇ ਨ੍ਹਾਨਾਦੀਹਿ ਚੇਵ ਲਿਙ੍ਗਗਹਨੇਨ ਚ ਬਾਹਿਰਂ ਪਰਿਮਜ੍ਜਸਿ, ਤਂ ਪਰਿਮਜ੍ਜਨ੍ਤੋ ਕਞ੍ਜਿਕਪੂਰਿਤਲਾਬੁ ਵਿਯ ਵਿਸਪੂਰਿਤਚਾਟਿ ਵਿਯ ਆਸੀਵਿਸਪੂਰਿਤਵਮ੍ਮਿਕੋ ਵਿਯ ਗੂਥਪੂਰਿਤਚਿਤ੍ਤਘਟੋ ਵਿਯ ਚ ਬਹਿਮਟ੍ਠੋਵ ਹੋਸਿ, ਕਿਂ ਤਯਾ ਚੋਰੇਨ ਇਧ ਵਸਨ੍ਤੇਨ, ਸੀਘਂ ਇਤੋ ਪਲਾਯਾਹਿ, ਨੋ ਚੇ ਪਲਾਯਸਿ, ਗਾਮਵਾਸੀਨਂ ਤੇ ਆਚਿਕ੍ਖਿਤ੍ਵਾ ਨਿਗ੍ਗਹਂ ਕਾਰਾਪੇਸ੍ਸਾਮੀਤਿ.

ਏਵਂ ਬੋਧਿਸਤ੍ਤੋ ਕੂਟਤਾਪਸਂ ਤਜ੍ਜੇਤ੍ਵਾ ਵਮ੍ਮਿਕਮੇਵ ਪਾਵਿਸਿ, ਕੂਟਤਾਪਸੋਪਿ ਤਤੋ ਪਕ੍ਕਾਮਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕੂਟਤਾਪਸੋ ਅਯਂ ਕੁਹਕੋ ਅਹੋਸਿ, ਪੁਰਿਮੋ ਸੀਲਵਨ੍ਤਤਾਪਸੋ ਸਾਰਿਪੁਤ੍ਤੋ, ਗੋਧਾਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਗੋਧਾਜਾਤਕਵਣ੍ਣਨਾ ਅਟ੍ਠਮਾ.

[੧੩੯] ੯. ਉਭਤੋਭਟ੍ਠਜਾਤਕਵਣ੍ਣਨਾ

ਅਕ੍ਖੀ ਭਿਨ੍ਨਾ ਪਟੋ ਨਟ੍ਠੋਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਤਦਾ ਕਿਰ ਧਮ੍ਮਸਭਾਯਂ ਭਿਕ੍ਖੂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਸੇਯ੍ਯਥਾਪਿ ਨਾਮ ਛਵਾਲਾਤਂ ਉਭਤੋਪਦਿਤ੍ਤਂ ਮਜ੍ਝੇ ਗੂਥਗਤਂ ਨੇਵਾਰਞ੍ਞੇ ਕਟ੍ਠਤ੍ਥਂ ਫਰਤਿ, ਨ ਗਾਮੇ ਕਟ੍ਠਤ੍ਥਂ ਫਰਤਿ, ਏਵਮੇਵ ਦੇਵਦਤ੍ਤੋ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਉਭਤੋ ਭਟ੍ਠੋ ਉਭਤੋ ਪਰਿਬਾਹਿਰੋ ਜਾਤੋ, ਗਿਹਿਪਰਿਭੋਗਾ ਚ ਪਰਿਹੀਨੋ, ਸਾਮਞ੍ਞਤ੍ਥਞ੍ਚ ਨ ਪਰਿਪੂਰੇਤੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਦੇਵਦਤ੍ਤੋ ਇਦਾਨੇਵ ਉਭਤੋ ਭਟ੍ਠੋ ਹੋਤਿ, ਅਤੀਤੇਪਿ ਉਭਤੋ ਭਟ੍ਠੋ ਅਹੋਸਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਰੁਕ੍ਖਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਦਾ ਏਕਸ੍ਮਿਂ ਗਾਮਕੇ ਬਾਲ਼ਿਸਿਕਾ ਵਸਨ੍ਤਿ. ਅਥੇਕੋ ਬਾਲ਼ਿਸਿਕੋ ਬਲ਼ਿਸਂ ਆਦਾਯ ਦਹਰੇਨ ਪੁਤ੍ਤੇਨ ਸਦ੍ਧਿਂ ਯਸ੍ਮਿਂ ਸੋਬ੍ਭੇ ਪਕਤਿਯਾਪਿ ਬਾਲ਼ਿਸਿਕਾ ਮਚ੍ਛੇ ਗਣ੍ਹਨ੍ਤਿ, ਤਤ੍ਥ ਗਨ੍ਤ੍ਵਾ ਬਲ਼ਿਸਂ ਖਿਪਿ. ਬਲ਼ਿਸੋ ਉਦਕਪਟਿਚ੍ਛਨ੍ਨੇ ਏਕਸ੍ਮਿਂ ਖਾਣੁਕੇ ਲਗ੍ਗਿ. ਬਾਲ਼ਿਸਿਕੋ ਤਂ ਆਕਡ੍ਢਿਤੁਂ ਅਸਕ੍ਕੋਨ੍ਤੋ ਚਿਨ੍ਤੇਸਿ ‘‘ਅਯਂ ਬਲ਼ਿਸੋ ਮਹਾਮਚ੍ਛੇ ਲਗ੍ਗੋ ਭਵਿਸ੍ਸਤਿ, ਪੁਤ੍ਤਕਂ ਮਾਤੁ ਸਨ੍ਤਿਕਂ ਪੇਸੇਤ੍ਵਾ ਪਟਿਵਿਸ੍ਸਕੇਹਿ ਸਦ੍ਧਿਂ ਕਲਹਂ ਕਾਰਾਪੇਮਿ, ਏਵਂ ਇਤੋ ਨ ਕੋਚਿ ਕੋਟ੍ਠਾਸਂ ਪਚ੍ਚਾਸੀਸਿਸ੍ਸਤੀ’’ਤਿ. ਸੋ ਪੁਤ੍ਤਂ ਆਹ ‘‘ਗਚ੍ਛ, ਤਾਤ, ਅਮ੍ਹੇਹਿ ਮਹਾਮਚ੍ਛਸ੍ਸ ਲਦ੍ਧਭਾਵਂ ਮਾਤੁ ਆਚਿਕ੍ਖਾਹਿ, ‘ਪਟਿਵਿਸ੍ਸਕੇਹਿ ਕਿਰ ਸਦ੍ਧਿਂ ਕਲਹਂ ਕਰੋਹੀ’ਤਿ ਵਦੇਹੀ’’ਤਿ. ਸੋ ਪੁਤ੍ਤਂ ਪੇਸੇਤ੍ਵਾ ਬਲ਼ਿਸਂ ਆਕਡ੍ਢਿਤੁਂ ਅਸਕ੍ਕੋਨ੍ਤੋ ਰਜ੍ਜੁਚ੍ਛੇਦਨਭਯੇਨ ਉਤ੍ਤਰਿਸਾਟਕਂ ਥਲੇ ਠਪੇਤ੍ਵਾ ਉਦਕਂ ਓਤਰਿਤ੍ਵਾ ਮਚ੍ਛਲੋਭੇਨ ਮਚ੍ਛਂ ਉਪਧਾਰੇਨ੍ਤੋ ਖਾਣੁਕੇਹਿ ਪਹਰਿਤ੍ਵਾ ਦ੍ਵੇਪਿ ਅਕ੍ਖੀਨਿ ਭਿਨ੍ਦਿ. ਥਲੇ ਠਪਿਤਸਾਟਕਂਪਿਸ੍ਸ ਚੋਰੋ ਹਰਿ. ਸੋ ਵੇਦਨਾਪ੍ਪਤ੍ਤੋ ਹੁਤ੍ਵਾ ਹਤ੍ਥੇਨ ਅਕ੍ਖੀਨਿ ਉਪ੍ਪੀਲ਼ਯਮਾਨੋ ਗਹੇਤ੍ਵਾ ਉਦਕਾ ਉਤ੍ਤਰਿਤ੍ਵਾ ਕਮ੍ਪਮਾਨੋ ਸਾਟਕਂ ਪਰਿਯੇਸਤਿ.

ਸਾਪਿਸ੍ਸ ਭਰਿਯਾ ‘‘ਕਲਹਂ ਕਤ੍ਵਾ ਕਸ੍ਸਚਿ ਅਪਚ੍ਚਾਸੀਸਨਭਾਵਂ ਕਰਿਸ੍ਸਾਮੀ’’ਤਿ ਏਕਸ੍ਮਿਂਯੇਵ ਕਣ੍ਣੇ ਤਾਲਪਣ੍ਣਂ ਪਿਲ਼ਨ੍ਧਿਤ੍ਵਾ ਏਕਂ ਅਕ੍ਖਿਂ ਉਕ੍ਖਲਿਮਸਿਯਾ ਅਞ੍ਜੇਤ੍ਵਾ ਕੁਕ੍ਕੁਰਂ ਅਙ੍ਕੇਨਾਦਾਯ ਪਟਿਵਿਸ੍ਸਕਘਰਂ ਅਗਮਾਸਿ. ਅਥ ਨਂ ਏਕਾ ਸਹਾਯਿਕਾ ਏਵਮਾਹ ‘‘ਏਕਸ੍ਮਿਂਯੇਵ ਤੇ ਕਣ੍ਣੇ ਤਾਲਪਣ੍ਣਂ ਪਿਲ਼ਨ੍ਧਿਤਂ, ਏਕਂ ਅਕ੍ਖਿ ਅਞ੍ਜਿਤਂ, ਪਿਯਪੁਤ੍ਤਂ ਵਿਯ ਕੁਕ੍ਕੁਰਂ ਅਙ੍ਕੇਨਾਦਾਯ ਘਰਤੋ ਘਰਂ ਗਚ੍ਛਸਿ, ਕਿਂ ਉਮ੍ਮਤ੍ਤਿਕਾਸਿ ਜਾਤਾ’’ਤਿ. ‘‘ਨਾਹਂ ਉਮ੍ਮਤ੍ਤਿਕਾ, ਤ੍ਵਂ ਪਨ ਮਂ ਅਕਾਰਣੇਨ ਅਕ੍ਕੋਸਸਿ ਪਰਿਭਾਸਸਿ, ਇਦਾਨਿ ਤਂ ਗਾਮਭੋਜਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਟ੍ਠ ਕਹਾਪਣੇ ਦਣ੍ਡਾਪੇਸ੍ਸਾਮੀ’’ਤਿ ਏਵਂ ਕਲਹਂ ਕਤ੍ਵਾ ਉਭੋਪਿ ਗਾਮਭੋਜਕਸ੍ਸ ਸਨ੍ਤਿਕਂ ਅਗਮਂਸੁ. ਕਲਹੇ ਵਿਸੋਧਿਯਮਾਨੇ ਤਸ੍ਸਾਯੇਵ ਮਤ੍ਥਕੇ ਦਣ੍ਡੋ ਪਤਿ. ਅਥ ਨਂ ਬਨ੍ਧਿਤ੍ਵਾ ‘‘ਦਣ੍ਡਂ ਦੇਹੀ’’ਤਿ ਪੋਥੇਤੁਂ ਆਰਭਿਂਸੁ.

ਰੁਕ੍ਖਦੇਵਤਾ ਗਾਮੇ ਤਸ੍ਸਾ ਇਮਂ ਪਵਤ੍ਤਿਂ, ਅਰਞ੍ਞੇ ਚਸ੍ਸਾ ਪਤਿਨੋ ਤਂ ਬ੍ਯਸਨਂ ਦਿਸ੍ਵਾ ਖਨ੍ਧਨ੍ਤਰੇ ਠਿਤਾ ‘‘ਭੋ ਪੁਰਿਸ, ਤੁਯ੍ਹਂ ਉਦਕੇਪਿ ਕਮ੍ਮਨ੍ਤੋ ਪਦੁਟ੍ਠੋ ਥਲੇਪਿ, ਉਭਤੋਭਟ੍ਠੋ ਜਾਤੋ’’ਤਿ ਵਤ੍ਵਾ ਇਮਂ ਗਾਥਮਾਹ –

੧੩੯. ‘‘ਅਕ੍ਖੀ ਭਿਨ੍ਨਾ ਪਟੋ ਨਟ੍ਠੋ, ਸਖਿਗੇਹੇ ਚ ਭਣ੍ਡਨਂ;

ਉਭਤੋ ਪਦੁਟ੍ਠਾ ਕਮ੍ਮਨ੍ਤਾ, ਉਦਕਮ੍ਹਿ ਥਲਮ੍ਹਿ ਚਾ’’ਤਿ.

ਤਤ੍ਥ ਸਖਿਗੇਹੇ ਚ ਭਣ੍ਡਨਨ੍ਤਿ ਸਖੀ ਨਾਮ ਸਹਾਯਿਕਾ, ਤਸ੍ਸਾ ਚ ਗੇਹੇ ਤਵ ਭਰਿਯਾਯ ਭਣ੍ਡਨਂ ਕਤਂ, ਭਣ੍ਡਨਂ ਕਤ੍ਵਾ ਬਨ੍ਧਿਤ੍ਵਾ ਪੋਥੇਤ੍ਵਾ ਦਣ੍ਡਂ ਦਾਪਿਯਤਿ. ਉਭਤੋ ਪਦੁਟ੍ਠਾ ਕਮ੍ਮਨ੍ਤਾਤਿ ਏਵਂ ਤਵ ਦ੍ਵੀਸੁਪਿ ਠਾਨੇਸੁ ਕਮ੍ਮਨ੍ਤਾ ਪਦੁਟ੍ਠਾਯੇਵ ਭਿਨ੍ਨਾਯੇਵ. ਕਤਰੇਸੁ ਦ੍ਵੀਸੁ? ਉਦਕਮ੍ਹਿ ਥਲਮ੍ਹਿ ਚਾਤਿ, ਅਕ੍ਖਿਭੇਦੇਨ ਪਟਨਾਸੇਨ ਚ ਉਦਕੇ ਕਮ੍ਮਨ੍ਤਾ ਪਦੁਟ੍ਠਾ, ਸਖਿਗੇਹੇ ਭਣ੍ਡਨੇਨ ਥਲੇ ਕਮ੍ਮਨ੍ਤਾ ਪਦੁਟ੍ਠਾਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਬਾਲ਼ਿਸਿਕੋ ਦੇਵਦਤ੍ਤੋ ਅਹੋਸਿ, ਰੁਕ੍ਖਦੇਵਤਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਉਭਤੋਭਟ੍ਠਜਾਤਕਵਣ੍ਣਨਾ ਨਵਮਾ.

[੧੪੦] ੧੦. ਕਾਕਜਾਤਕਵਣ੍ਣਨਾ

ਨਿਚ੍ਚਂ ਉਬ੍ਬਿਗ੍ਗਹਦਯਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਞਾਤਤ੍ਥਚਰਿਯਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਦ੍ਵਾਦਸਕਨਿਪਾਤੇ ਭਦ੍ਦਸਾਲਜਾਤਕੇ (ਜਾ. ੧.੧੨.੧੩ ਆਦਯੋ) ਆਵਿ ਭਵਿਸ੍ਸਤਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਕਯੋਨਿਯਂ ਨਿਬ੍ਬਤ੍ਤਿ. ਅਥੇਕਦਿਵਸਂ ਰਞ੍ਞੋ ਪੁਰੋਹਿਤੋ ਬਹਿਨਗਰੇ ਨਦਿਯਂ ਨ੍ਹਾਯਿਤ੍ਵਾ ਗਨ੍ਧੇ ਵਿਲਿਮ੍ਪਿਤ੍ਵਾ ਮਾਲਂ ਪਿਲ਼ਨ੍ਧਿਤ੍ਵਾ ਵਰਵਤ੍ਥਨਿਵਤ੍ਥੋ ਨਗਰਂ ਪਾਵਿਸਿ. ਨਗਰਦ੍ਵਾਰਤੋਰਣੇ ਦ੍ਵੇ ਕਾਕਾ ਨਿਸਿਨ੍ਨਾ ਹੋਨ੍ਤਿ. ਤੇਸੁ ਏਕੋ ਏਕਂ ਆਹ – ‘‘ਸਮ੍ਮ, ਅਹਂ ਇਮਸ੍ਸ ਬ੍ਰਾਹ੍ਮਣਸ੍ਸ ਮਤ੍ਥਕੇ ਸਰੀਰਵਲ਼ਞ੍ਜਂ ਪਾਤੇਸ੍ਸਾਮੀ’’ਤਿ. ਇਤਰੋ ‘‘ਮਾ ਤੇ ਏਤਂ ਰੁਚ੍ਚਿ, ਅਯਂ ਬ੍ਰਾਹ੍ਮਣੋ ਇਸ੍ਸਰੋ, ਇਸ੍ਸਰਜਨੇਨ ਚ ਸਦ੍ਧਿਂ ਵੇਰਂ ਨਾਮ ਪਾਪਕਂ. ਅਯਞ੍ਹਿ ਕੁਦ੍ਧੋ ਸਬ੍ਬੇਪਿ ਕਾਕੇ ਵਿਨਾਸੇਯ੍ਯਾ’’ਤਿ. ‘‘ਨ ਸਕ੍ਕਾ ਮਯਾ ਨ ਕਾਤੁ’’ਨ੍ਤਿ. ‘‘ਤੇਨ ਹਿ ਪਞ੍ਞਾਯਿਸ੍ਸਸੀ’’ਤਿ ਵਤ੍ਵਾ ਇਤਰੋ ਕਾਕੋ ਪਲਾਯਿ. ਸੋ ਤੋਰਣਸ੍ਸ ਹੇਟ੍ਠਾਭਾਗਂ ਸਮ੍ਪਤ੍ਤੇ ਬ੍ਰਾਹ੍ਮਣੇ ਓਲਮ੍ਬਕਂ ਚਾਲੇਨ੍ਤੋ ਵਿਯ ਤਸ੍ਸ ਮਤ੍ਥਕੇ ਵਚ੍ਚਂ ਪਾਤੇਸਿ. ਬ੍ਰਾਹ੍ਮਣੋ ਕੁਜ੍ਝਿਤ੍ਵਾ ਕਾਕੇਸੁ ਵੇਰਂ ਬਨ੍ਧਿ.

ਤਸ੍ਮਿਂ ਕਾਲੇ ਏਕਾ ਭਤਿਯਾ ਵੀਹਿਕੋਟ੍ਟਿਕਦਾਸੀ ਵੀਹਿਂ ਗੇਹਦ੍ਵਾਰੇ ਆਤਪੇ ਪਤ੍ਥਰਿਤ੍ਵਾ ਰਕ੍ਖਨ੍ਤੀ ਨਿਸਿਨ੍ਨਾਵ ਨਿਦ੍ਦਂ ਓਕ੍ਕਮਿ. ਤਸ੍ਸਾ ਪਮਾਦਂ ਞਤ੍ਵਾ ਏਕੋ ਦੀਘਲੋਮਕੋ ਏਲ਼ਕੋ ਆਗਨ੍ਤ੍ਵਾ ਵੀਹਿਂ ਖਾਦਿ, ਸਾ ਪਬੁਜ੍ਝਿਤ੍ਵਾ ਤਂ ਦਿਸ੍ਵਾ ਪਲਾਪੇਸਿ. ਏਲ਼ਕੋ ਦੁਤਿਯਮ੍ਪਿ, ਤਤਿਯਮ੍ਪਿ ਤਸ੍ਸਾ ਤਥੇਵ ਨਿਦ੍ਦਾਯਨਕਾਲੇ ਆਗਨ੍ਤ੍ਵਾ ਵੀਹਿਂ ਖਾਦਿ. ਸਾਪਿ ਤਂ ਤਿਕ੍ਖਤ੍ਤੁਂ ਪਲਾਪੇਤ੍ਵਾ ਚਿਨ੍ਤੇਸਿ ‘‘ਅਯਂ ਪੁਨਪ੍ਪੁਨਂ ਖਾਦਨ੍ਤੋ ਉਪਡ੍ਢਵੀਹਿਂ ਖਾਦਿਸ੍ਸਤਿ, ਬਹੁ ਮੇ ਛੇਦੋ ਭਵਿਸ੍ਸਤਿ, ਇਦਾਨਿਸ੍ਸ ਪੁਨ ਅਨਾਗਮਨਕਾਰਣਂ ਕਰਿਸ੍ਸਾਮੀ’’ਤਿ. ਸਾ ਅਲਾਤਂ ਗਹੇਤ੍ਵਾ ਨਿਦ੍ਦਾਯਮਾਨਾ ਵਿਯ ਨਿਸੀਦਿਤ੍ਵਾ ਵੀਹਿਖਾਦਨਤ੍ਥਾਯ ਏਲ਼ਕੇ ਸਮ੍ਪਤ੍ਤੇ ਉਟ੍ਠਾਯ ਅਲਾਤੇਨ ਏਲ਼ਕਂ ਪਹਰਿ, ਲੋਮਾਨਿ ਅਗ੍ਗਿਂ ਗਣ੍ਹਿਂਸੁ. ਸੋ ਸਰੀਰੇ ਝਾਯਨ੍ਤੇ ‘‘ਅਗ੍ਗਿਂ ਨਿਬ੍ਬਾਪੇਸ੍ਸਾਮੀ’’ਤਿ ਵੇਗੇਨ ਗਨ੍ਤ੍ਵਾ ਹਤ੍ਥਿਸਾਲਾਯ ਸਮੀਪੇ ਏਕਿਸ੍ਸਾ ਤਿਣਕੁਟਿਯਾ ਸਰੀਰਂ ਘਂਸਿ, ਸਾ ਪਜ੍ਜਲਿ. ਤਤੋ ਉਟ੍ਠਿਤਾ ਜਾਲਾ ਹਤ੍ਥਿਸਾਲਂ ਗਣ੍ਹਿ. ਹਤ੍ਥਿਸਾਲਾਸੁ ਝਾਯਨ੍ਤੀਸੁ ਹਤ੍ਥਿਪਿਟ੍ਠਾਨਿ ਝਾਯਿਂਸੁ, ਬਹੂ ਹਤ੍ਥੀ ਵਣਿਤਸਰੀਰਾ ਅਹੇਸੁਂ. ਵੇਜ੍ਜਾ ਹਤ੍ਥੀ ਅਰੋਗੇ ਕਾਤੁਂ ਅਸਕ੍ਕੋਨ੍ਤਾ ਰਞ੍ਞੋ ਆਰੋਚੇਸੁਂ. ਰਾਜਾ ਪੁਰੋਹਿਤਂ ਆਹ ‘‘ਆਚਰਿਯ, ਹਤ੍ਥਿਵੇਜ੍ਜਾ ਹਤ੍ਥੀ ਤਿਕਿਚ੍ਛਿਤੁਂ ਨ ਸਕ੍ਕੋਨ੍ਤਿ, ਅਪਿ ਕਿਞ੍ਚਿ ਭੇਸਜ੍ਜਂ ਜਾਨਾਸੀ’’ਤਿ. ‘‘ਜਾਨਾਮਿ, ਮਹਾਰਾਜਾ’’ਤਿ. ‘‘ਕਿਂ ਲਦ੍ਧੁਂ ਵਟ੍ਟਤੀ’’ਤਿ? ‘‘ਕਾਕਵਸਾ, ਮਹਾਰਾਜਾ’’ਤਿ. ਰਾਜਾ ‘‘ਤੇਨ ਹਿ ਕਾਕੇ ਮਾਰੇਤ੍ਵਾ ਵਸਂ ਆਹਰਥਾ’’ਤਿ ਆਹ. ਤਤੋ ਪਟ੍ਠਾਯ ਕਾਕੇ ਮਾਰੇਤ੍ਵਾ ਵਸਂ ਅਲਭਿਤ੍ਵਾ ਤਤ੍ਥ ਤਤ੍ਥੇਵ ਰਾਸਿਂ ਕਰੋਨ੍ਤਿ, ਕਾਕਾਨਂ ਮਹਾਭਯਂ ਉਪ੍ਪਜ੍ਜਿ.

ਤਦਾ ਬੋਧਿਸਤ੍ਤੋ ਅਸੀਤਿਕਾਕਸਹਸ੍ਸਪਰਿਵਾਰੋ ਮਹਾਸੁਸਾਨੇ ਵਸਤਿ. ਅਥੇਕੋ ਕਾਕੋ ਗਨ੍ਤ੍ਵਾ ਕਾਕਾਨਂ ਉਪ੍ਪਨ੍ਨਭਯਂ ਬੋਧਿਸਤ੍ਤਸ੍ਸ ਆਰੋਚੇਸਿ. ਸੋ ਚਿਨ੍ਤੇਸਿ ‘‘ਠਪੇਤ੍ਵਾ ਮਂ ਅਞ੍ਞੋ ਮਯ੍ਹਂ ਞਾਤਕਾਨਂ ਉਪ੍ਪਨ੍ਨਭਯਂ ਹਰਿਤੁਂ ਸਮਤ੍ਥੋ ਨਾਮ ਨਤ੍ਥਿ, ਹਰਿਸ੍ਸਾਮਿ ਨ’’ਨ੍ਤਿ ਦਸ ਪਾਰਮਿਯੋ ਆਵਜ੍ਜੇਤ੍ਵਾ ਮੇਤ੍ਤਾਪਾਰਮਿਂ ਪੁਰੇਚਾਰਿਕਂ ਕਤ੍ਵਾ ਏਕਵੇਗੇਨ ਪਕ੍ਖਨ੍ਦਿਤ੍ਵਾ ਵਿਵਟਮਹਾਵਾਤਪਾਨੇਨ ਪਵਿਸਿਤ੍ਵਾ ਰਞ੍ਞੋ ਆਸਨਸ੍ਸ ਹੇਟ੍ਠਾ ਪਾਵਿਸਿ. ਅਥ ਨਂ ਏਕੋ ਮਨੁਸ੍ਸੋ ਗਹਿਤੁਕਾਮੋ ਅਹੋਸਿ. ਰਾਜਾ ‘‘ਸਰਣਂ ਪਵਿਟ੍ਠੋ, ਮਾ ਗਣ੍ਹੀ’’ਤਿ ਵਾਰੇਸਿ. ਮਹਾਸਤ੍ਤੋ ਥੋਕਂ ਵਿਸ੍ਸਮਿਤ੍ਵਾ ਮੇਤ੍ਤਾਪਾਰਮਿਂ ਆਵਜ੍ਜੇਤ੍ਵਾ ਹੇਟ੍ਠਾਸਨਾ ਨਿਕ੍ਖਮਿਤ੍ਵਾ ਰਾਜਾਨਂ ਆਹ – ‘‘ਮਹਾਰਾਜ, ਰਞ੍ਞਾ ਨਾਮ ਛਨ੍ਦਾਦਿਵਸੇਨ ਅਗਨ੍ਤ੍ਵਾ ਰਜ੍ਜਂ ਕਾਰੇਤੁਂ ਵਟ੍ਟਤਿ. ਯਂ ਯਂ ਕਮ੍ਮਂ ਕਤ੍ਤਬ੍ਬਂ ਹੋਤਿ, ਸਬ੍ਬਂ ਨਿਸਮ੍ਮ ਉਪਧਾਰੇਤ੍ਵਾ ਕਾਤੁਂ ਵਟ੍ਟਤਿ. ਯਞ੍ਚ ਕਯਿਰਮਾਨਂ ਨਿਪ੍ਫਜ੍ਜਤਿ, ਤਦੇਵ ਕਾਤੁਂ ਵਟ੍ਟਤਿ, ਨ ਇਤਰਂ. ਸਚੇ ਹਿ ਰਾਜਾਨੋ ਯਂ ਕਯਿਰਮਾਨਂ ਨ ਨਿਪ੍ਫਜ੍ਜਤਿ, ਤਂ ਕਰੋਨ੍ਤਿ, ਮਹਾਜਨਸ੍ਸ ਮਰਣਭਯਪਰਿਯੋਸਾਨਂ ਮਹਾਭਯਂ ਉਪ੍ਪਜ੍ਜਤਿ. ਪੁਰੋਹਿਤੋ ਵੇਰਵਸਿਕੋ ਹੁਤ੍ਵਾ ਮੁਸਾਵਾਦਂ ਅਭਾਸਿ, ਕਾਕਾਨਂ ਵਸਾ ਨਾਮ ਨਤ੍ਥੀ’’ਤਿ. ਤਂ ਸੁਤ੍ਵਾ ਰਾਜਾ ਪਸਨ੍ਨਚਿਤ੍ਤੋ ਬੋਧਿਸਤ੍ਤਸ੍ਸ ਕਞ੍ਚਨਭਦ੍ਦਪੀਠਂ ਦਾਪੇਤ੍ਵਾ ਤਤ੍ਥ ਨਿਸਿਨ੍ਨਸ੍ਸ ਪਕ੍ਖਨ੍ਤਰਾਨਿ ਸਤਪਾਕਸਹਸ੍ਸਪਾਕਤੇਲੇਹਿ ਮਕ੍ਖਾਪੇਤ੍ਵਾ ਕਞ੍ਚਨਤਟ੍ਟਕੇ ਰਾਜਾਰਹਂ ਸੁਭੋਜਨਂ ਭੋਜਾਪੇਤ੍ਵਾ ਪਾਨੀਯਂ ਪਾਯੇਤ੍ਵਾ ਸੁਹਿਤਂ ਵਿਗਤਦਰਥਂ ਮਹਾਸਤ੍ਤਂ ਏਤਦਵੋਚ ‘‘ਪਣ੍ਡਿਤ, ਤ੍ਵਂ ‘ਕਾਕਾਨਂ ਵਸਾ ਨਾਮ ਨਤ੍ਥੀ’ਤਿ ਵਦੇਸਿ, ਕੇਨ ਕਾਰਣੇਨ ਨੇਸਂ ਵਸਾ ਨ ਹੋਤੀ’’ਤਿ ਬੋਧਿਸਤ੍ਤੋ ‘‘ਇਮਿਨਾ ਚ ਇਮਿਨਾ ਚ ਕਾਰਣੇਨਾ’’ਤਿ ਸਕਲਨਿਵੇਸਨਂ ਏਕਰਵਂ ਕਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੧੪੦. ‘‘ਨਿਚ੍ਚਂ ਉਬ੍ਬਿਗ੍ਗਹਦਯਾ, ਸਬ੍ਬਲੋਕਵਿਹੇਸਕਾ;

ਤਸ੍ਮਾ ਨੇਸਂ ਵਸਾ ਨਤ੍ਥਿ, ਕਾਕਾਨਮ੍ਹਾਕ ਞਾਤਿਨ’’ਨ੍ਤਿ.

ਤਤ੍ਰਾਯਂ ਸਙ੍ਖੇਪਤ੍ਥੋ – ਮਹਾਰਾਜ, ਕਾਕਾ ਨਾਮ ਨਿਚ੍ਚਂ ਉਬ੍ਬਿਗ੍ਗਮਾਨਸਾ ਭਯਪ੍ਪਤ੍ਤਾਵ ਵਿਹਰਨ੍ਤਿ, ਸਬ੍ਬਲੋਕਸ੍ਸ ਚ ਵਿਹੇਸਕਾ, ਖਤ੍ਤਿਯਾਦਯੋ ਮਨੁਸ੍ਸੇਪਿ ਇਤ੍ਥਿਪੁਰਿਸੇਪਿ ਕੁਮਾਰਕੁਮਾਰਿਕਾਦਯੋਪਿ ਵਿਹੇਠੇਨ੍ਤਾ ਕਿਲਮੇਨ੍ਤਾਵ ਵਿਚਰਨ੍ਤਿ, ਤਸ੍ਮਾ ਇਮੇਹਿ ਦ੍ਵੀਹਿ ਕਾਰਣੇਹਿ ਨੇਸਂ ਅਮ੍ਹਾਕਂ ਞਾਤੀਨਂ ਕਾਕਾਨਂ ਵਸਾ ਨਾਮ ਨਤ੍ਥਿ. ਅਤੀਤੇਪਿ ਨ ਭੂਤਪੁਬ੍ਬਾ, ਅਨਾਗਤੇਪਿ ਨ ਭਵਿਸ੍ਸਤੀਤਿ.

ਏਵਂ ਮਹਾਸਤ੍ਤੋ ਇਮਂ ਕਾਰਣਂ ਉਤ੍ਤਾਨਂ ਕਤ੍ਵਾ ‘‘ਮਹਾਰਾਜ, ਰਞ੍ਞਾ ਨਾਮ ਅਨਿਸਮ੍ਮ ਅਨੁਪਧਾਰੇਤ੍ਵਾ ਕਮ੍ਮਂ ਨ ਕਤ੍ਤਬ੍ਬ’’ਨ੍ਤਿ ਰਾਜਾਨਂ ਬੋਧੇਸਿ. ਰਾਜਾ ਤੁਸ੍ਸਿਤ੍ਵਾ ਬੋਧਿਸਤ੍ਤਂ ਰਜ੍ਜੇਨ ਪੂਜੇਸਿ. ਬੋਧਿਸਤ੍ਤੋ ਰਜ੍ਜਂ ਰਞ੍ਞੋਯੇਵ ਪਟਿਦਤ੍ਵਾ ਰਾਜਾਨਂ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਸਬ੍ਬਸਤ੍ਤਾਨਂ ਅਭਯਂ ਯਾਚਿ. ਰਾਜਾ ਤਸ੍ਸ ਧਮ੍ਮਦੇਸਨਂ ਸੁਤ੍ਵਾ ਸਬ੍ਬਸਤ੍ਤਾਨਂ ਅਭਯਂ ਦਤ੍ਵਾ ਕਾਕਾਨਂ ਨਿਬਦ੍ਧਦਾਨਂ ਪਟ੍ਠਪੇਸਿ. ਦਿਵਸੇ ਦਿਵਸੇ ਤਣ੍ਡੁਲਮ੍ਬਣਸ੍ਸ ਭਤ੍ਤਂ ਪਚਿਤ੍ਵਾ ਨਾਨਗ੍ਗਰਸੇਹਿ ਓਮਦ੍ਦਿਤ੍ਵਾ ਕਾਕਾਨਂ ਦੀਯਤਿ, ਮਹਾਸਤ੍ਤਸ੍ਸ ਪਨ ਰਾਜਭੋਜਨਮੇਵ ਦੀਯਿਤ੍ਥ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਬਾਰਾਣਸਿਰਾਜਾ ਆਨਨ੍ਦੋ ਅਹੋਸਿ, ਕਾਕਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕਾਕਜਾਤਕਵਣ੍ਣਨਾ ਦਸਮਾ.

ਅਸਮ੍ਪਦਾਨਵਗ੍ਗੋ ਚੁਦ੍ਦਸਮੋ.

ਤਸ੍ਸੁਦ੍ਦਾਨਂ –

ਅਸਮ੍ਪਦਾਨਭੀਰੁਕਂ, ਘਤਾਸਨਝਾਨਸੋਧਂ;

ਚਨ੍ਦਾਭਂ ਸੁਵਣ੍ਣਹਂਸਂ, ਬਬ੍ਬੁਗੋਧੁਭਤੋਭਟ੍ਠਂ;

ਕਾਕਰਾਜਾਤਿ ਤੇ ਦਸਾਤਿ.