੧. ਅਪਣ੍ਣਕਵਗ੍ਗੋ

੧. ਅਪਣ੍ਣਕਜਾਤਕਵਣ੍ਣਨਾ

ਇਮਂ ਤਾਵ ਅਪਣ੍ਣਕਧਮ੍ਮਦੇਸਨਂ ਭਗਵਾ ਸਾਵਤ੍ਥਿਂ ਉਪਨਿਸ੍ਸਾਯ ਜੇਤਵਨਮਹਾਵਿਹਾਰੇ ਵਿਹਰਨ੍ਤੋ ਕਥੇਸਿ. ਕਂ ਪਨ ਆਰਬ੍ਭ ਅਯਂ ਕਥਾ ਸਮੁਟ੍ਠਿਤਾਤਿ? ਸੇਟ੍ਠਿਸ੍ਸ ਸਹਾਯਕੇ ਪਞ੍ਚਸਤੇ ਤਿਤ੍ਥਿਯਸਾਵਕੇ. ਏਕਸ੍ਮਿਞ੍ਹਿ ਦਿਵਸੇ ਅਨਾਥਪਿਣ੍ਡਿਕੋ ਸੇਟ੍ਠਿ ਅਤ੍ਤਨੋ ਸਹਾਯਕੇ ਪਞ੍ਚਸਤੇ ਅਞ੍ਞਤਿਤ੍ਥਿਯਸਾਵਕੇ ਆਦਾਯ ਬਹੁਂ ਮਾਲਾਗਨ੍ਧਵਿਲੇਪਨਞ੍ਚੇਵ ਸਪ੍ਪਿਤੇਲਮਧੁਫਾਣਿਤਵਤ੍ਥਚ੍ਛਾਦਨਾਨਿ ਚ ਗਾਹਾਪੇਤ੍ਵਾ ਜੇਤਵਨਂ ਗਨ੍ਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਭੇਸਜ੍ਜਾਨਿ ਚੇਵ ਵਤ੍ਥਾਨਿ ਚ ਭਿਕ੍ਖੁਸਙ੍ਘਸ੍ਸ ਵਿਸ੍ਸਜ੍ਜੇਤ੍ਵਾ ਛ ਨਿਸਜ੍ਜਾਦੋਸੇ ਵਜ੍ਜੇਤ੍ਵਾ ਏਕਮਨ੍ਤਂ ਨਿਸੀਦਿ. ਤੇਪਿ ਅਞ੍ਞਤਿਤ੍ਥਿਯਸਾਵਕਾ ਤਥਾਗਤਂ ਵਨ੍ਦਿਤ੍ਵਾ ਸਤ੍ਥੁ ਪੁਣ੍ਣਚਨ੍ਦਸਸ੍ਸਿਰਿਕਂ ਮੁਖਂ, ਲਕ੍ਖਣਾਨੁਬ੍ਯਞ੍ਜਨਪਟਿਮਣ੍ਡਿਤਂ ਬ੍ਯਾਮਪ੍ਪਭਾਪਰਿਕ੍ਖਿਤ੍ਤਂ ਬ੍ਰਹ੍ਮਕਾਯਂ, ਆਵੇਲ਼ਾਵੇਲ਼ਾ ਯਮਕਯਮਕਾ ਹੁਤ੍ਵਾ ਨਿਚ੍ਛਰਨ੍ਤਿਯੋ ਘਨਬੁਦ੍ਧਰਸ੍ਮਿਯੋ ਚ ਓਲੋਕਯਮਾਨਾ ਅਨਾਥਪਿਣ੍ਡਿਕਸ੍ਸ ਸਮੀਪੇਯੇਵ ਨਿਸੀਦਿਂਸੁ.

ਅਥ ਨੇਸਂ ਸਤ੍ਥਾ ਮਨੋਸਿਲਾਤਲੇ ਸੀਹਨਾਦਂ ਨਦਨ੍ਤੋ ਤਰੁਣਸੀਹੋ ਵਿਯ ਗਜ੍ਜਨ੍ਤੋ ਪਾਵੁਸ੍ਸਕਮੇਘੋ ਵਿਯ ਚ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਚ ਰਤਨਦਾਮਂ ਗਨ੍ਥੇਨ੍ਤੋ ਵਿਯ ਚ ਅਟ੍ਠਙ੍ਗਸਮਨ੍ਨਾਗਤੇਨ ਸਵਨੀਯੇਨ ਕਮਨੀਯੇਨ ਬ੍ਰਹ੍ਮਸ੍ਸਰੇਨ ਨਾਨਾਨਯਵਿਚਿਤ੍ਤਂ ਮਧੁਰਧਮ੍ਮਕਥਂ ਕਥੇਸਿ. ਤੇ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਚਿਤ੍ਤਾ ਉਟ੍ਠਾਯ ਦਸਬਲਂ ਵਨ੍ਦਿਤ੍ਵਾ ਅਞ੍ਞਤਿਤ੍ਥਿਯਸਰਣਂ ਭਿਨ੍ਦਿਤ੍ਵਾ ਬੁਦ੍ਧਂ ਸਰਣਂ ਅਗਮਂਸੁ. ਤੇ ਤਤੋ ਪਟ੍ਠਾਯ ਨਿਚ੍ਚਕਾਲਂ ਅਨਾਥਪਿਣ੍ਡਿਕੇਨ ਸਦ੍ਧਿਂ ਗਨ੍ਧਮਾਲਾਦਿਹਤ੍ਥਾ ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤਿ, ਦਾਨਂ ਦੇਨ੍ਤਿ, ਸੀਲਂ ਰਕ੍ਖਨ੍ਤਿ, ਉਪੋਸਥਕਮ੍ਮਂ ਕਰੋਨ੍ਤਿ.

ਅਥ ਭਗਵਾ ਸਾਵਤ੍ਥਿਤੋ ਪੁਨਦੇਵ ਰਾਜਗਹਂ ਅਗਮਾਸਿ. ਤੇ ਤਥਾਗਤਸ੍ਸ ਗਤਕਾਲੇ ਤਂ ਸਰਣਂ ਭਿਨ੍ਦਿਤ੍ਵਾ ਪੁਨ ਅਞ੍ਞਤਿਤ੍ਥਿਯਸਰਣਂ ਗਨ੍ਤ੍ਵਾ ਅਤ੍ਤਨੋ ਮੂਲਟ੍ਠਾਨੇਯੇਵ ਪਤਿਟ੍ਠਿਤਾ. ਭਗਵਾਪਿ ਸਤ੍ਤਟ੍ਠ ਮਾਸੇ ਵੀਤਿਨਾਮੇਤ੍ਵਾ ਪੁਨ ਜੇਤਵਨਮੇਵ ਅਗਮਾਸਿ. ਅਨਾਥਪਿਣ੍ਡਿਕੋ ਪੁਨਪਿ ਤੇ ਆਦਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਤ੍ਥਾਰਂ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਤੇਪਿ ਭਗਵਨ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਅਥ ਨੇਸਂ ਤਥਾਗਤੇ ਚਾਰਿਕਂ ਪਕ੍ਕਨ੍ਤੇ ਗਹਿਤਸਰਣਂ ਭਿਨ੍ਦਿਤ੍ਵਾ ਪੁਨ ਅਞ੍ਞਤਿਤ੍ਥਿਯਸਰਣਮੇਵ ਗਹੇਤ੍ਵਾ ਮੂਲੇ ਪਤਿਟ੍ਠਿਤਭਾਵਂ ਭਗਵਤੋ ਆਰੋਚੇਸਿ.

ਭਗਵਾ ਅਪਰਿਮਿਤਕਪ੍ਪਕੋਟਿਯੋ ਨਿਰਨ੍ਤਰਂ ਪਵਤ੍ਤਿਤਵਚੀਸੁਚਰਿਤਾਨੁਭਾਵੇਨ ਦਿਬ੍ਬਗਨ੍ਧਗਨ੍ਧਿਤਂ ਨਾਨਾਗਨ੍ਧਪੂਰਿਤਂ ਰਤਨਕਰਣ੍ਡਕਂ ਵਿਵਰਨ੍ਤੋ ਵਿਯ ਮੁਖਪਦੁਮਂ ਵਿਵਰਿਤ੍ਵਾ ਮਧੁਰਸ੍ਸਰਂ ਨਿਚ੍ਛਾਰੇਨ੍ਤੋ ‘‘ਸਚ੍ਚਂ ਕਿਰ ਤੁਮ੍ਹੇ ਉਪਾਸਕਾ ਤੀਣਿ ਸਰਣਾਨਿ ਭਿਨ੍ਦਿਤ੍ਵਾ ਅਞ੍ਞਤਿਤ੍ਥਿਯਸਰਣਂ ਗਤਾ’’ਤਿ ਪੁਚ੍ਛਿ. ਅਥ ਤੇਹਿ ਪਟਿਚ੍ਛਾਦੇਤੁਂ ਅਸਕ੍ਕੋਨ੍ਤੇਹਿ ‘‘ਸਚ੍ਚਂ ਭਗਵਾ’’ਤਿ ਵੁਤ੍ਤੇ ਸਤ੍ਥਾ ‘‘ਉਪਾਸਕਾ ਹੇਟ੍ਠਾ ਅਵੀਚਿਂ ਉਪਰਿ ਭਵਗ੍ਗਂ ਪਰਿਚ੍ਛੇਦਂ ਕਤ੍ਵਾ ਤਿਰਿਯਂ ਅਪਰਿਮਾਣਾਸੁ ਲੋਕਧਾਤੂਸੁ ਸੀਲਾਦੀਹਿ ਗੁਣੇਹਿ ਬੁਦ੍ਧੇਨ ਸਦਿਸੋ ਨਾਮ ਨਤ੍ਥਿ, ਕੁਤੋ ਅਧਿਕਤਰੋ’’ਤਿ. ‘‘ਯਾਵਤਾ, ਭਿਕ੍ਖਵੇ, ਸਤ੍ਤਾ ਅਪਦਾ ਵਾ ਦ੍ਵਿਪਦਾ ਵਾ ਚਤੁਪ੍ਪਦਾ ਵਾ ਬਹੁਪ੍ਪਦਾ ਵਾ, ਤਥਾਗਤੋ ਤੇਸਂ ਅਗ੍ਗਮਕ੍ਖਾਯਤਿ (ਸਂ. ਨਿ. ੫.੧੩੯; ਅ. ਨਿ. ੪.੩੪), ਯਂ ਕਿਞ੍ਚਿ ਵਿਤ੍ਤਂ ਇਧ ਵਾ ਹੁਰਂ ਵਾ…ਪੇ… (ਖੁ. ਪਾ. ੬.੩; ਸੁ. ਨਿ. ੨੨੬) ਅਗ੍ਗਤੋ ਵੇ ਪਸਨ੍ਨਾਨ’’ਨ੍ਤਿਆਦੀਹਿ (ਅ. ਨਿ. ੪.੩੪; ਇਤਿਵੁ. ੯੦) ਸੁਤ੍ਤੇਹਿ ਪਕਾਸਿਤੇ ਰਤਨਤ੍ਤਯਗੁਣੇ ਪਕਾਸੇਤ੍ਵਾ ‘‘ਏਵਂ ਉਤ੍ਤਮਗੁਣੇਹਿ ਸਮਨ੍ਨਾਗਤਂ ਰਤਨਤ੍ਤਯਂ ਸਰਣਂ ਗਤਾ ਉਪਾਸਕਾ ਵਾ ਉਪਾਸਿਕਾ ਵਾ ਨਿਰਯਾਦੀਸੁ ਨਿਬ੍ਬਤ੍ਤਕਾ ਨਾਮ ਨਤ੍ਥਿ, ਅਪਾਯਨਿਬ੍ਬਤ੍ਤਿਤੋ ਪਨ ਮੁਚ੍ਚਿਤ੍ਵਾ ਦੇਵਲੋਕੇ ਉਪ੍ਪਜ੍ਜਿਤ੍ਵਾ ਮਹਾਸਮ੍ਪਤ੍ਤਿਂ ਅਨੁਭੋਨ੍ਤਿ, ਤਸ੍ਮਾ ਤੁਮ੍ਹੇਹਿ ਏਵਰੂਪਂ ਸਰਣਂ ਭਿਨ੍ਦਿਤ੍ਵਾ ਅਞ੍ਞਤਿਤ੍ਥਿਯਸਰਣਂ ਗਚ੍ਛਨ੍ਤੇਹਿ ਅਯੁਤ੍ਤਂ ਕਤ’’ਨ੍ਤਿ ਆਹ.

ਏਤ੍ਥ ਚ ਤੀਣਿ ਰਤਨਾਨਿ ਮੋਕ੍ਖਵਸੇਨ ਉਤ੍ਤਮਵਸੇਨ ਸਰਣਗਤਾਨਂ ਅਪਾਯੇਸੁ ਨਿਬ੍ਬਤ੍ਤਿਯਾ ਅਭਾਵਦੀਪਨਤ੍ਥਂ ਇਮਾਨਿ ਸੁਤ੍ਤਾਨਿ ਦਸ੍ਸੇਤਬ੍ਬਾਨਿ –

‘‘ਯੇ ਕੇਚਿ ਬੁਦ੍ਧਂ ਸਰਣਂ ਗਤਾਸੇ, ਨ ਤੇ ਗਮਿਸ੍ਸਨ੍ਤਿ ਅਪਾਯਭੂਮਿਂ;

ਪਹਾਯ ਮਾਨੁਸਂ ਦੇਹਂ, ਦੇਵਕਾਯਂ ਪਰਿਪੂਰੇਸ੍ਸਨ੍ਤਿ. (ਦੀ. ਨਿ. ੨.੩੩੨; ਸਂ. ਨਿ. ੧.੩੭);

‘‘ਯੇ ਕੇਚਿ ਧਮ੍ਮਂ ਸਰਣਂ ਗਤਾਸੇ, ਨ ਤੇ ਗਮਿਸ੍ਸਨ੍ਤਿ ਅਪਾਯਭੂਮਿਂ;

ਪਹਾਯ ਮਾਨੁਸਂ ਦੇਹਂ, ਦੇਵਕਾਯਂ ਪਰਿਪੂਰੇਸ੍ਸਨ੍ਤਿ.

‘‘ਯੇ ਕੇਚਿ ਸਙ੍ਘਂ ਸਰਣਂ ਗਤਾਸੇ, ਨ ਤੇ ਗਮਿਸ੍ਸਨ੍ਤਿ ਅਪਾਯਭੂਮਿਂ;

ਪਹਾਯ ਮਾਨੁਸਂ ਦੇਹਂ, ਦੇਵਕਾਯਂ ਪਰਿਪੂਰੇਸ੍ਸਨ੍ਤਿ.

‘‘ਬਹੁਂ ਵੇ ਸਰਣਂ ਯਨ੍ਤਿ, ਪਬ੍ਬਤਾਨਿ ਵਨਾਨਿ ਚ;

ਆਰਾਮਰੁਕ੍ਖਚੇਤ੍ਯਾਨਿ, ਮਨੁਸ੍ਸਾ ਭਯਤਜ੍ਜਿਤਾ.

‘‘ਨੇਤਂ ਖੋ ਸਰਣਂ ਖੇਮਂ, ਨੇਤਂ ਸਰਣਮੁਤ੍ਤਮਂ;

ਨੇਤਂ ਸਰਣਮਾਗਮ੍ਮ, ਸਬ੍ਬਦੁਕ੍ਖਾ ਪਮੁਚ੍ਚਤਿ.

‘‘ਯੋ ਚ ਬੁਦ੍ਧਞ੍ਚ ਧਮ੍ਮਞ੍ਚ, ਸਙ੍ਘਞ੍ਚ ਸਰਣਂ ਗਤੋ;

ਚਤ੍ਤਾਰਿ ਅਰਿਯਸਚ੍ਚਾਨਿ, ਸਮ੍ਮਪ੍ਪਞ੍ਞਾਯ ਪਸ੍ਸਤਿ.

‘‘ਦੁਕ੍ਖਂ ਦੁਕ੍ਖਸਮੁਪ੍ਪਾਦਂ, ਦੁਕ੍ਖਸ੍ਸ ਚ ਅਤਿਕ੍ਕਮਂ;

ਅਰਿਯਞ੍ਚਟ੍ਠਙ੍ਗਿਕਂ ਮਗ੍ਗਂ, ਦੁਕ੍ਖੂਪਸਮਗਾਮਿਨਂ.

‘‘ਏਤਂ ਖੋ ਸਰਣਂ ਖੇਮਂ, ਏਤਂ ਸਰਣਮੁਤ੍ਤਮਂ;

ਏਤਂ ਸਰਣਮਾਗਮ੍ਮ, ਸਬ੍ਬਦੁਕ੍ਖਾ ਪਮੁਚ੍ਚਤੀ’’ਤਿ. (ਧ. ਪ. ੧੮੮-੧੯੨);

ਨ ਕੇਵਲਞ੍ਚ ਨੇਸਂ ਸਤ੍ਥਾ ਏਤ੍ਤਕਂਯੇਵ ਧਮ੍ਮਂ ਦੇਸੇਸਿ, ਅਪਿਚ ਖੋ ‘‘ਉਪਾਸਕਾ ਬੁਦ੍ਧਾਨੁਸ੍ਸਤਿਕਮ੍ਮਟ੍ਠਾਨਂ ਨਾਮ, ਧਮ੍ਮਾਨੁਸ੍ਸਤਿਕਮ੍ਮਟ੍ਠਾਨਂ ਨਾਮ, ਸਙ੍ਘਾਨੁਸ੍ਸਤਿਕਮ੍ਮਟ੍ਠਾਨਂ ਨਾਮ ਸੋਤਾਪਤ੍ਤਿਮਗ੍ਗਂ ਦੇਤਿ, ਸੋਤਾਪਤ੍ਤਿਫਲਂ ਦੇਤਿ, ਸਕਦਾਗਾਮਿਮਗ੍ਗਂ ਦੇਤਿ, ਸਕਦਾਗਾਮਿਫਲਂ ਦੇਤਿ, ਅਨਾਗਾਮਿਮਗ੍ਗਂ ਦੇਤਿ, ਅਨਾਗਾਮਿਫਲਂ ਦੇਤਿ, ਅਰਹਤ੍ਤਮਗ੍ਗਂ ਦੇਤਿ, ਅਰਹਤ੍ਤਫਲਂ ਦੇਤੀ’’ਤਿਏਵਮਾਦੀਹਿਪਿ ਨਯੇਹਿ ਧਮ੍ਮਂ ਦੇਸੇਤ੍ਵਾ ‘‘ਏਵਰੂਪਂ ਨਾਮ ਸਰਣਂ ਭਿਨ੍ਦਨ੍ਤੇਹਿ ਅਯੁਤ੍ਤਂ ਤੁਮ੍ਹੇਹਿ ਕਤ’’ਨ੍ਤਿ ਆਹ. ਏਤ੍ਥ ਚ ਬੁਦ੍ਧਾਨੁਸ੍ਸਤਿਕਮ੍ਮਟ੍ਠਾਨਾਦੀਨਂ ਸੋਤਾਪਤ੍ਤਿਮਗ੍ਗਾਦਿਪ੍ਪਦਾਨਂ ‘‘ਏਕਧਮ੍ਮੋ, ਭਿਕ੍ਖਵੇ, ਭਾਵਿਤੋ ਬਹੁਲੀਕਤੋ ਏਕਨ੍ਤਨਿਬ੍ਬਿਦਾਯ ਵਿਰਾਗਾਯ ਨਿਰੋਧਾਯ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ. ਕਤਮੋ ਏਕਧਮ੍ਮੋ? ਬੁਦ੍ਧਾਨੁਸ੍ਸਤੀ’’ਤਿਏਵਮਾਦੀਹਿ (ਅ. ਨਿ. ੧.੨੯੬) ਸੁਤ੍ਤੇਹਿ ਦੀਪੇਤਬ੍ਬਂ.

ਏਵਂ ਭਗਵਾ ਨਾਨਪ੍ਪਕਾਰੇਹਿ ਉਪਾਸਕੇ ਓਵਦਿਤ੍ਵਾ ‘‘ਉਪਾਸਕਾ ਪੁਬ੍ਬੇਪਿ ਮਨੁਸ੍ਸਾ ਅਸਰਣਂ ‘ਸਰਣ’ਨ੍ਤਿ ਤਕ੍ਕਗ੍ਗਾਹੇਨ ਵਿਰਦ੍ਧਗ੍ਗਾਹੇਨ ਗਹੇਤ੍ਵਾ ਅਮਨੁਸ੍ਸਪਰਿਗ੍ਗਹਿਤੇ ਕਨ੍ਤਾਰੇ ਯਕ੍ਖਭਕ੍ਖਾ ਹੁਤ੍ਵਾ ਮਹਾਵਿਨਾਸਂ ਪਤ੍ਤਾ, ਅਪਣ੍ਣਕਗ੍ਗਾਹਂ ਪਨ ਏਕਂਸਿਕਗ੍ਗਾਹਂ ਅਵਿਰਦ੍ਧਗ੍ਗਾਹਂ ਗਹਿਤਮਨੁਸ੍ਸਾ ਤਸ੍ਮਿਂਯੇਵ ਕਨ੍ਤਾਰੇ ਸੋਤ੍ਥਿਭਾਵਂ ਪਤ੍ਤਾ’’ਤਿ ਵਤ੍ਵਾ ਤੁਣ੍ਹੀ ਅਹੋਸਿ. ਅਥ ਖੋ ਅਨਾਥਪਿਣ੍ਡਿਕੋ ਗਹਪਤਿ ਉਟ੍ਠਾਯਾਸਨਾ ਭਗਵਨ੍ਤਂ ਵਨ੍ਦਿਤ੍ਵਾ ਅਭਿਤ੍ਥਵਿਤ੍ਵਾ ਸਿਰਸ੍ਮਿਂ ਅਞ੍ਜਲਿਂ ਪਤਿਟ੍ਠਾਪੇਤ੍ਵਾ ਏਵਮਾਹ ‘‘ਭਨ੍ਤੇ, ਇਦਾਨਿ ਤਾਵ ਇਮੇਸਂ ਉਪਾਸਕਾਨਂ ਉਤ੍ਤਮਸਰਣਂ ਭਿਨ੍ਦਿਤ੍ਵਾ ਤਕ੍ਕਗ੍ਗਹਣਂ ਅਮ੍ਹਾਕਂ ਪਾਕਟਂ, ਪੁਬ੍ਬੇ ਪਨ ਅਮਨੁਸ੍ਸਪਰਿਗ੍ਗਹਿਤੇ ਕਨ੍ਤਾਰੇ ਤਕ੍ਕਿਕਾਨਂ ਵਿਨਾਸੋ, ਅਪਣ੍ਣਕਗ੍ਗਾਹਂ ਗਹਿਤਮਨੁਸ੍ਸਾਨਞ੍ਚ ਸੋਤ੍ਥਿਭਾਵੋ ਅਮ੍ਹਾਕਂ ਪਟਿਚ੍ਛਨ੍ਨੋ, ਤੁਮ੍ਹਾਕਮੇਵ ਪਾਕਟੋ, ਸਾਧੁ ਵਤ ਨੋ ਭਗਵਾ ਆਕਾਸੇ ਪੁਣ੍ਣਚਨ੍ਦਂ ਉਟ੍ਠਾਪੇਨ੍ਤੋ ਵਿਯ ਇਮਂ ਕਾਰਣਂ ਪਾਕਟਂ ਕਰੋਤੂ’’ਤਿ. ਅਥ ਭਗਵਾ ‘‘ਮਯਾ ਖੋ, ਗਹਪਤਿ, ਅਪਰਿਮਿਤਕਾਲਂ ਦਸ ਪਾਰਮਿਯੋ ਪੂਰੇਤ੍ਵਾ ਲੋਕਸ੍ਸ ਕਙ੍ਖਚ੍ਛੇਦਨਤ੍ਥਮੇਵ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਦ੍ਧਂ, ਸੀਹਵਸਾਯ ਸੁਵਣ੍ਣਨਾਲ਼ਿਂ ਪੂਰੇਨ੍ਤੋ ਵਿਯ ਸਕ੍ਕਚ੍ਚਂ ਸੋਤਂ ਓਦਹਿਤ੍ਵਾ ਸੁਣੋਹੀ’’ਤਿ ਸੇਟ੍ਠਿਨੋ ਸਤੁਪ੍ਪਾਦਂ ਜਨੇਤ੍ਵਾ ਹਿਮਗਬ੍ਭਂ ਪਦਾਲੇਤ੍ਵਾ ਪੁਣ੍ਣਚਨ੍ਦਂ ਨੀਹਰਨ੍ਤੋ ਵਿਯ ਭਵਨ੍ਤਰੇਨ ਪਟਿਚ੍ਛਨ੍ਨਕਾਰਣਂ ਪਾਕਟਂ ਅਕਾਸਿ.

ਅਤੀਤੇ ਕਾਸਿਰਟ੍ਠੇ ਬਾਰਾਣਸਿਨਗਰੇ ਬ੍ਰਹ੍ਮਦਤ੍ਤੋ ਨਾਮ ਰਾਜਾ ਅਹੋਸਿ. ਤਦਾ ਬੋਧਿਸਤ੍ਤੋ ਸਤ੍ਥਵਾਹਕੁਲੇ ਪਟਿਸਨ੍ਧਿਂ ਗਹੇਤ੍ਵਾ ਦਸਮਾਸਚ੍ਚਯੇਨ ਮਾਤੁਕੁਚ੍ਛਿਤੋ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਵਯਪ੍ਪਤ੍ਤੋ ਪਞ੍ਚਹਿ ਸਕਟਸਤੇਹਿ ਵਣਿਜ੍ਜਂ ਕਰੋਨ੍ਤੋ ਵਿਚਰਤਿ. ਸੋ ਕਦਾਚਿ ਪੁਬ੍ਬਨ੍ਤਤੋ ਅਪਰਨ੍ਤਂ ਗਚ੍ਛਤਿ, ਕਦਾਚਿ ਅਪਰਨ੍ਤਤੋ ਪੁਬ੍ਬਨ੍ਤਂ. ਬਾਰਾਣਸਿਯਂਯੇਵ ਅਞ੍ਞੋਪਿ ਸਤ੍ਥਵਾਹਪੁਤ੍ਤੋ ਅਤ੍ਥਿ ਬਾਲੋ ਅਬ੍ਯਤ੍ਤੋ ਅਨੁਪਾਯਕੁਸਲੋ. ਤਦਾ ਬੋਧਿਸਤ੍ਤੋ ਬਾਰਾਣਸਿਤੋ ਮਹਗ੍ਘਂ ਭਣ੍ਡਂ ਗਹੇਤ੍ਵਾ ਪਞ੍ਚ ਸਕਟਸਤਾਨਿ ਪੂਰੇਤ੍ਵਾ ਗਮਨਸਜ੍ਜਾਨਿ ਕਤ੍ਵਾ ਠਪੇਸਿ. ਸੋਪਿ ਬਾਲਸਤ੍ਥਵਾਹਪੁਤ੍ਤੋ ਤਥੇਵ ਪਞ੍ਚ ਸਕਟਸਤਾਨਿ ਪੂਰੇਤ੍ਵਾ ਗਮਨਸਜ੍ਜਾਨਿ ਕਤ੍ਵਾ ਠਪੇਸਿ.

ਤਦਾ ਬੋਧਿਸਤ੍ਤੋ ਚਿਨ੍ਤੇਸਿ ‘‘ਸਚੇ ਅਯਂ ਬਾਲਸਤ੍ਥਵਾਹਪੁਤ੍ਤੋ ਮਯਾ ਸਦ੍ਧਿਂਯੇਵ ਗਮਿਸ੍ਸਤਿ, ਸਕਟਸਹਸ੍ਸੇ ਏਕਤੋ ਮਗ੍ਗਂ ਗਚ੍ਛਨ੍ਤੇ ਮਗ੍ਗੋਪਿ ਨਪ੍ਪਹੋਸ੍ਸਤਿ, ਮਨੁਸ੍ਸਾਨਂ ਦਾਰੁਦਕਾਦੀਨਿਪਿ, ਬਲਿਬਦ੍ਦਾਨਂ ਤਿਣਾਨਿਪਿ ਦੁਲ੍ਲਭਾਨਿ ਭਵਿਸ੍ਸਨ੍ਤਿ, ਏਤੇਨ ਵਾ ਮਯਾ ਵਾ ਪੁਰਤੋ ਗਨ੍ਤੁਂ ਵਟ੍ਟਤੀ’’ਤਿ. ਸੋ ਤਂ ਪਕ੍ਕੋਸਾਪੇਤ੍ਵਾ ਏਤਮਤ੍ਥਂ ਆਰੋਚੇਤ੍ਵਾ ‘‘ਦ੍ਵੀਹਿਪਿ ਅਮ੍ਹੇਹਿ ਏਕਤੋ ਗਨ੍ਤੁਂ ਨ ਸਕ੍ਕਾ, ਕਿਂ ਤ੍ਵਂ ਪੁਰਤੋ ਗਮਿਸ੍ਸਸਿ, ਉਦਾਹੁ ਪਚ੍ਛਤੋ’’ਤਿ ਆਹ. ਸੋ ਚਿਨ੍ਤੇਸਿ ‘‘ਮਯਿ ਪੁਰਤੋ ਗਚ੍ਛਨ੍ਤੇ ਬਹੂ ਆਨਿਸਂਸਾ, ਮਗ੍ਗੇਨ ਅਭਿਨ੍ਨੇਨੇਵ ਗਮਿਸ੍ਸਾਮਿ, ਗੋਣਾ ਅਨਾਮਟ੍ਠਤਿਣਂ ਖਾਦਿਸ੍ਸਨ੍ਤਿ, ਮਨੁਸ੍ਸਾਨਂ ਅਨਾਮਟ੍ਠਂ ਸੂਪੇਯ੍ਯਪਣ੍ਣਂ ਭਵਿਸ੍ਸਤਿ, ਪਸਨ੍ਨਂ ਉਦਕਂ ਭਵਿਸ੍ਸਤਿ, ਯਥਾਰੁਚਿਂ ਅਗ੍ਘਂ ਠਪੇਤ੍ਵਾ ਭਣ੍ਡਂ ਵਿਕ੍ਕਿਣਿਸ੍ਸਾਮੀ’’ਤਿ. ਸੋ ‘‘ਅਹਂ, ਸਮ੍ਮ, ਪੁਰਤੋ ਗਮਿਸ੍ਸਾਮੀ’’ਤਿ ਆਹ. ਬੋਧਿਸਤ੍ਤੋਪਿ ਪਚ੍ਛਤੋ ਗਮਨੇ ਬਹੂ ਆਨਿਸਂਸੇ ਅਦ੍ਦਸ. ਏਵਂ ਹਿਸ੍ਸ ਅਹੋਸਿ – ‘‘ਪੁਰਤੋ ਗਚ੍ਛਨ੍ਤਾ ਮਗ੍ਗੇ ਵਿਸਮਟ੍ਠਾਨਂ ਸਮਂ ਕਰਿਸ੍ਸਨ੍ਤਿ, ਅਹਂ ਤੇਹਿ ਗਤਮਗ੍ਗੇਨ ਗਮਿਸ੍ਸਾਮਿ, ਪੁਰਤੋ ਗਤੇਹਿ ਬਲਿਬਦ੍ਦੇਹਿ ਪਰਿਣਤਥਦ੍ਧਤਿਣੇ ਖਾਦਿਤੇ ਮਮ ਗੋਣਾ ਪੁਨ ਉਟ੍ਠਿਤਾਨਿ ਮਧੁਰਤਿਣਾਨਿ ਖਾਦਿਸ੍ਸਨ੍ਤਿ, ਗਹਿਤਪਣ੍ਣਟ੍ਠਾਨਤੋ ਉਟ੍ਠਿਤਂ ਮਨੁਸ੍ਸਾਨਂ ਸੂਪੇਯ੍ਯਪਣ੍ਣਂ ਮਧੁਰਂ ਭਵਿਸ੍ਸਤਿ, ਅਨੁਦਕੇ ਠਾਨੇ ਆਵਾਟਂ ਖਨਿਤ੍ਵਾ ਏਤੇ ਉਦਕਂ ਉਪ੍ਪਾਦੇਸ੍ਸਨ੍ਤਿ, ਤੇਹਿ ਕਤੇਸੁ ਆਵਾਟੇਸੁ ਮਯਂ ਉਦਕਂ ਪਿਵਿਸ੍ਸਾਮ, ਅਗ੍ਘਟ੍ਠਪਨਂ ਨਾਮ ਮਨੁਸ੍ਸਾਨਂ ਜੀਵਿਤਾ ਵੋਰੋਪਨਸਦਿਸਂ, ਅਹਂ ਪਚ੍ਛਤੋ ਗਨ੍ਤ੍ਵਾ ਏਤੇਹਿ ਠਪਿਤਗ੍ਘੇਨ ਭਣ੍ਡਂ ਵਿਕ੍ਕਿਣਿਸ੍ਸਾਮੀ’’ਤਿ. ਅਥ ਸੋ ਏਤ੍ਤਕੇ ਆਨਿਸਂਸੇ ਦਿਸ੍ਵਾ ‘‘ਸਮ੍ਮ, ਤ੍ਵਂ ਪੁਰਤੋ ਗਚ੍ਛਾਹੀ’’ਤਿ ਆਹ. ‘‘ਸਾਧੁ, ਸਮ੍ਮਾ’’ਤਿ ਬਾਲਸਤ੍ਥਵਾਹੋ ਸਕਟਾਨਿ ਯੋਜੇਤ੍ਵਾ ਨਿਕ੍ਖਨ੍ਤੋ ਅਨੁਪੁਬ੍ਬੇਨ ਮਨੁਸ੍ਸਾਵਾਸਂ ਅਤਿਕ੍ਕਮਿਤ੍ਵਾ ਕਨ੍ਤਾਰਮੁਖਂ ਪਾਪੁਣਿ.

ਕਨ੍ਤਾਰਂ ਨਾਮ – ਚੋਰਕਨ੍ਤਾਰਂ, ਵਾਲ਼ਕਨ੍ਤਾਰਂ, ਨਿਰੁਦਕਕਨ੍ਤਾਰਂ, ਅਮਨੁਸ੍ਸਕਨ੍ਤਾਰਂ, ਅਪ੍ਪਭਕ੍ਖਕਨ੍ਤਾਰਨ੍ਤਿ ਪਞ੍ਚਵਿਧਂ. ਤਤ੍ਥ ਚੋਰੇਹਿ ਅਧਿਟ੍ਠਿਤਮਗ੍ਗੋ ਚੋਰਕਨ੍ਤਾਰਂ ਨਾਮ. ਸੀਹਾਦੀਹਿ ਅਧਿਟ੍ਠਿਤਮਗ੍ਗੋ ਵਾਲ਼ਕਨ੍ਤਾਰਂ ਨਾਮ. ਯਤ੍ਥ ਨ੍ਹਾਯਿਤੁਂ ਵਾ ਪਾਤੁਂ ਵਾ ਉਦਕਂ ਨਤ੍ਥਿ, ਇਦਂ ਨਿਰੁਦਕਕਨ੍ਤਾਰਂ ਨਾਮ. ਅਮਨੁਸ੍ਸਾਧਿਟ੍ਠਿਤਂ ਅਮਨੁਸ੍ਸਕਨ੍ਤਾਰਂ ਨਾਮ. ਮੂਲਖਾਦਨੀਯਾਦਿਵਿਰਹਿਤਂ ਅਪ੍ਪਭਕ੍ਖਕਨ੍ਤਾਰਂ ਨਾਮ. ਇਮਸ੍ਮਿਂ ਪਞ੍ਚਵਿਧੇ ਕਨ੍ਤਾਰੇ ਤਂ ਕਨ੍ਤਾਰਂ ਨਿਰੁਦਕਕਨ੍ਤਾਰਞ੍ਚੇਵ ਅਮਨੁਸ੍ਸਕਨ੍ਤਾਰਞ੍ਚ. ਤਸ੍ਮਾ ਸੋ ਬਾਲਸਤ੍ਥਵਾਹਪੁਤ੍ਤੋ ਸਕਟੇਸੁ ਮਹਨ੍ਤਮਹਨ੍ਤਾ ਚਾਟਿਯੋ ਠਪੇਤ੍ਵਾ ਉਦਕਸ੍ਸ ਪੂਰਾਪੇਤ੍ਵਾ ਸਟ੍ਠਿਯੋਜਨਿਕਂ ਕਨ੍ਤਾਰਂ ਪਟਿਪਜ੍ਜਿ.

ਅਥਸ੍ਸ ਕਨ੍ਤਾਰਮਜ੍ਝਂ ਗਤਕਾਲੇ ਕਨ੍ਤਾਰੇ ਅਧਿਵਤ੍ਥਯਕ੍ਖੋ ‘‘ਇਮੇਹਿ ਮਨੁਸ੍ਸੇਹਿ ਗਹਿਤਂ ਉਦਕਂ ਛਡ੍ਡਾਪੇਤ੍ਵਾ ਦੁਬ੍ਬਲੇ ਕਤ੍ਵਾ ਸਬ੍ਬੇਵ ਨੇ ਖਾਦਿਸ੍ਸਾਮੀ’’ਤਿ ਸਬ੍ਬਸੇਤਤਰੁਣਬਲਿਬਦ੍ਦਯੁਤ੍ਤਂ ਮਨੋਰਮਂ ਯਾਨਕਂ ਮਾਪੇਤ੍ਵਾ ਧਨੁਕਲਾਪਫਲਕਾਵੁਧਹਤ੍ਥੇਹਿ ਦਸਹਿ ਦ੍ਵਾਦਸਹਿ ਅਮਨੁਸ੍ਸੇਹਿ ਪਰਿਵੁਤੋ ਉਪ੍ਪਲਕੁਮੁਦਾਨਿ ਪਿਲ਼ਨ੍ਧਿਤ੍ਵਾ ਅਲ੍ਲਕੋਸੋ ਅਲ੍ਲਵਤ੍ਥੋ ਇਸ੍ਸਰਪੁਰਿਸੋ ਵਿਯ ਤਸ੍ਮਿਂ ਯਾਨਕੇ ਨਿਸੀਦਿਤ੍ਵਾ ਕਦ੍ਦਮਮਕ੍ਖਿਤੇਹਿ ਚਕ੍ਕੇਹਿ ਪਟਿਪਥਂ ਅਗਮਾਸਿ. ਪਰਿਵਾਰਅਮਨੁਸ੍ਸਾਪਿਸ੍ਸ ਪੁਰਤੋ ਚ ਪਚ੍ਛਤੋ ਚ ਗਚ੍ਛਨ੍ਤਾ ਅਲ੍ਲਕੇਸਾ ਅਲ੍ਲਵਤ੍ਥਾ ਉਪ੍ਪਲਕੁਮੁਦਮਾਲਾ ਪਿਲ਼ਨ੍ਧਿਤ੍ਵਾ ਪਦੁਮਪੁਣ੍ਡਰੀਕਕਲਾਪੇ ਗਹੇਤ੍ਵਾ ਭਿਸਮੁਲ਼ਾਲਾਨਿ ਖਾਦਨ੍ਤਾ ਉਦਕਬਿਨ੍ਦੂਹਿ ਚੇਵ ਕਲਲੇਹਿ ਚ ਪਗ੍ਘਰਨ੍ਤੇਹਿ ਅਗਮਂਸੁ. ਸਤ੍ਥਵਾਹਾ ਚ ਨਾਮ ਯਦਾ ਧੁਰਵਾਤੋ ਵਾਯਤਿ, ਤਦਾ ਯਾਨਕੇ ਨਿਸੀਦਿਤ੍ਵਾ ਉਪਟ੍ਠਾਕਪਰਿਵੁਤਾ ਰਜਂ ਪਰਿਹਰਨ੍ਤਾ ਪੁਰਤੋ ਗਚ੍ਛਨ੍ਤਿ. ਯਦਾ ਪਚ੍ਛਤੋ ਵਾਤੋ ਵਾਯਤਿ, ਤਦਾ ਤੇਨੇਵ ਨਯੇਨ ਪਚ੍ਛਤੋ ਗਚ੍ਛਨ੍ਤਿ. ਤਦਾ ਪਨ ਧੁਰਵਾਤੋ ਅਹੋਸਿ, ਤਸ੍ਮਾ ਸੋ ਸਤ੍ਥਵਾਹਪੁਤ੍ਤੋ ਪੁਰਤੋ ਅਗਮਾਸਿ.

ਯਕ੍ਖੋ ਤਂ ਆਗਚ੍ਛਨ੍ਤਂ ਦਿਸ੍ਵਾ ਅਤ੍ਤਨੋ ਯਾਨਕਂ ਮਗ੍ਗਾ ਓਕ੍ਕਮਾਪੇਤ੍ਵਾ ‘‘ਕਹਂ ਗਚ੍ਛਥਾ’’ਤਿ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਅਕਾਸਿ. ਸਤ੍ਥਵਾਹੋਪਿ ਅਤ੍ਤਨੋ ਯਾਨਕਂ ਮਗ੍ਗਾ ਓਕ੍ਕਮਾਪੇਤ੍ਵਾ ਸਕਟਾਨਂ ਗਮਨੋਕਾਸਂ ਦਤ੍ਵਾ ਏਕਮਨ੍ਤੇ ਠਿਤੋ ਤਂ ਯਕ੍ਖਂ ਅਵੋਚ ‘‘ਭੋ, ਅਮ੍ਹੇ ਤਾਵ ਬਾਰਾਣਸਿਤੋ ਆਗਚ੍ਛਾਮ. ਤੁਮ੍ਹੇ ਪਨ ਉਪ੍ਪਲਕੁਮੁਦਾਨਿ ਪਿਲ਼ਨ੍ਧਿਤ੍ਵਾ ਪਦੁਮਪੁਣ੍ਡਰੀਕਹਤ੍ਥਾ ਭਿਸਮੁਲ਼ਾਲਾਨਿ ਖਾਦਨ੍ਤਾ ਕਦ੍ਦਮਮਕ੍ਖਿਤਾ ਉਦਕਬਿਨ੍ਦੂਹਿ ਪਗ੍ਘਰਨ੍ਤੇਹਿ ਆਗਚ੍ਛਥ. ਕਿਂ ਨੁ ਖੋ ਤੁਮ੍ਹੇਹਿ ਆਗਤਮਗ੍ਗੇ ਦੇਵੋ ਵਸ੍ਸਤਿ, ਉਪ੍ਪਲਾਦਿਸਞ੍ਛਨ੍ਨਾਨਿ ਵਾ ਸਰਾਨਿ ਅਤ੍ਥੀ’’ਤਿ ਪੁਚ੍ਛਿ. ਯਕ੍ਖੋ ਤਸ੍ਸ ਕਥਂ ਸੁਤ੍ਵਾ ‘‘ਸਮ੍ਮ, ਕਿਂ ਨਾਮੇਤਂ ਕਥੇਸਿ. ਏਸਾ ਨੀਲਵਨਰਾਜਿ ਪਞ੍ਞਾਯਤਿ. ਤਤੋ ਪਟ੍ਠਾਯ ਸਕਲਂ ਅਰਞ੍ਞਂ ਏਕੋਦਕਂ, ਨਿਬਦ੍ਧਂ ਦੇਵੋ ਵਸ੍ਸਤਿ, ਕਨ੍ਦਰਾ ਪੂਰਾ, ਤਸ੍ਮਿਂ ਤਸ੍ਮਿਂ ਠਾਨੇ ਪਦੁਮਾਦਿਸਞ੍ਛਨ੍ਨਾਨਿ ਸਰਾਨਿ ਅਤ੍ਥੀ’’ਤਿ ਵਤ੍ਵਾ ਪਟਿਪਾਟਿਯਾ ਗਚ੍ਛਨ੍ਤੇਸੁ ਸਕਟੇਸੁ ‘‘ਇਮਾਨਿ ਸਕਟਾਨਿ ਆਦਾਯ ਕਹਂ ਗਚ੍ਛਥਾ’’ਤਿ ਪੁਚ੍ਛਿ. ‘‘ਅਸੁਕਜਨਪਦਂ ਨਾਮਾ’’ਤਿ. ‘‘ਇਮਸ੍ਮਿਂ ਚਿਮਸ੍ਮਿਞ੍ਚ ਸਕਟੇ ਕਿਂ ਨਾਮ ਭਣ੍ਡ’’ਨ੍ਤਿ? ‘‘ਅਸੁਕਞ੍ਚ ਅਸੁਕਞ੍ਚਾ’’ਤਿ. ‘‘ਪਚ੍ਛਤੋ ਆਗਚ੍ਛਨ੍ਤਂ ਸਕਟਂ ਅਤਿਵਿਯ ਗਰੁਕਂ ਹੁਤ੍ਵਾ ਆਗਚ੍ਛਤਿ, ਏਤਸ੍ਮਿਂ ਕਿਂ ਭਣ੍ਡ’’ਨ੍ਤਿ? ‘‘ਉਦਕਂ ਏਤ੍ਥਾ’’ਤਿ. ‘‘ਪਰਤੋ ਤਾਵ ਉਦਕਂ ਆਨੇਨ੍ਤੇਹਿ ਵੋ ਮਨਾਪਂ ਕਤਂ, ਇਤੋ ਪਟ੍ਠਾਯ ਪਨ ਉਦਕੇਨ ਕਿਚ੍ਚਂ ਨਤ੍ਥਿ, ਪੁਰਤੋ ਬਹੁ ਉਦਕਂ, ਚਾਟਿਯੋ ਭਿਨ੍ਦਿਤ੍ਵਾ ਉਦਕਂ ਛਡ੍ਡੇਤ੍ਵਾ ਸੁਖੇਨ ਗਚ੍ਛਥਾ’’ਤਿ ਆਹ. ਏਵਞ੍ਚ ਪਨ ਵਤ੍ਵਾ ‘‘ਤੁਮ੍ਹੇ ਗਚ੍ਛਥ, ਅਮ੍ਹਾਕਂ ਪਪਞ੍ਚੋ ਹੋਤੀ’’ਤਿ ਥੋਕਂ ਗਨ੍ਤ੍ਵਾ ਤੇਸਂ ਅਦਸ੍ਸਨਂ ਪਤ੍ਵਾ ਅਤ੍ਤਨੋ ਯਕ੍ਖਨਗਰਮੇਵ ਅਗਮਾਸਿ.

ਸੋਪਿ ਬਾਲਸਤ੍ਥਵਾਹੋ ਅਤ੍ਤਨੋ ਬਾਲਤਾਯ ਯਕ੍ਖਸ੍ਸ ਵਚਨਂ ਗਹੇਤ੍ਵਾ ਚਾਟਿਯੋ ਭਿਨ੍ਦਾਪੇਤ੍ਵਾ ਪਸਤਮਤ੍ਤਮ੍ਪਿ ਉਦਕਂ ਅਨਵਸੇਸੇਤ੍ਵਾ ਸਬ੍ਬਂ ਛਡ੍ਡਾਪੇਤ੍ਵਾ ਸਕਟਾਨਿ ਪਾਜਾਪੇਸਿ, ਪੁਰਤੋ ਅਪ੍ਪਮਤ੍ਤਕਮ੍ਪਿ ਉਦਕਂ ਨਾਹੋਸਿ, ਮਨੁਸ੍ਸਾ ਪਾਨੀਯਂ ਅਲਭਨ੍ਤਾ ਕਿਲਮਿਂਸੁ. ਤੇ ਯਾਵ ਸੂਰਿਯਤ੍ਥਙ੍ਗਮਨਾ ਗਨ੍ਤ੍ਵਾ ਸਕਟਾਨਿ ਮੋਚੇਤ੍ਵਾ ਪਰਿਵਟ੍ਟਕੇਨ ਠਪੇਤ੍ਵਾ ਗੋਣੇ ਚਕ੍ਕੇਸੁ ਬਨ੍ਧਿਂਸੁ. ਨੇਵ ਗੋਣਾਨਂ ਉਦਕਂ ਅਹੋਸਿ, ਨ ਮਨੁਸ੍ਸਾਨਂ ਯਾਗੁਭਤ੍ਤਂ ਵਾ. ਦੁਬ੍ਬਲਮਨੁਸ੍ਸਾ ਤਤ੍ਥ ਤਤ੍ਥ ਨਿਪਜ੍ਜਿਤ੍ਵਾ ਸਯਿਂਸੁ. ਰਤ੍ਤਿਭਾਗਸਮਨਨ੍ਤਰੇ ਯਕ੍ਖਾ ਯਕ੍ਖਨਗਰਤੋ ਆਗਨ੍ਤ੍ਵਾ ਸਬ੍ਬੇਪਿ ਗੋਣੇ ਚ ਮਨੁਸ੍ਸੇ ਚ ਜੀਵਿਤਕ੍ਖਯਂ ਪਾਪੇਤ੍ਵਾ ਮਂਸਂ ਖਾਦਿਤ੍ਵਾ ਅਟ੍ਠੀਨਿ ਅਵਸੇਸੇਤ੍ਵਾ ਅਗਮਂਸੁ. ਏਵਮੇਕਂ ਬਾਲਸਤ੍ਥਵਾਹਪੁਤ੍ਤਂ ਨਿਸ੍ਸਾਯ ਸਬ੍ਬੇਪਿ ਤੇ ਵਿਨਾਸਂ ਪਾਪੁਣਿਂਸੁ, ਹਤ੍ਥਟ੍ਠਿਕਾਦੀਨਿ ਦਿਸਾਵਿਦਿਸਾਸੁ ਵਿਪ੍ਪਕਿਣ੍ਣਾਨਿ ਅਹੇਸੁਂ. ਪਞ੍ਚ ਸਕਟਸਤਾਨਿ ਯਥਾਪੂਰਿਤਾਨੇਵ ਅਟ੍ਠਂਸੁ.

ਬੋਧਿਸਤ੍ਤੋਪਿ ਖੋ ਬਾਲਸਤ੍ਥਵਾਹਪੁਤ੍ਤਸ੍ਸ ਨਿਕ੍ਖਨ੍ਤਦਿਵਸਤੋ ਮਾਸਡ੍ਢਮਾਸਂ ਵੀਤਿਨਾਮੇਤ੍ਵਾ ਪਞ੍ਚਹਿ ਸਕਟਸਤੇਹਿ ਨਗਰਾ ਨਿਕ੍ਖਮ੍ਮ ਅਨੁਪੁਬ੍ਬੇਨ ਕਨ੍ਤਾਰਮੁਖਂ ਪਾਪੁਣਿ. ਸੋ ਤਤ੍ਥ ਉਦਕਚਾਟਿਯੋ ਪੂਰੇਤ੍ਵਾ ਬਹੁਂ ਉਦਕਂ ਆਦਾਯ ਖਨ੍ਧਾਵਾਰੇ ਭੇਰਿਂ ਚਰਾਪੇਤ੍ਵਾ ਮਨੁਸ੍ਸੇ ਸਨ੍ਨਿਪਾਤੇਤ੍ਵਾ ਏਵਮਾਹ ‘‘ਤੁਮ੍ਹੇ ਮਂ ਅਨਾਪੁਚ੍ਛਿਤ੍ਵਾ ਪਸਤਮਤ੍ਤਮ੍ਪਿ ਉਦਕਂ ਮਾ ਵਲ਼ਞ੍ਜਯਿਤ੍ਥ, ਕਨ੍ਤਾਰੇ ਵਿਸਰੁਕ੍ਖਾ ਨਾਮ ਹੋਨ੍ਤਿ, ਪਤ੍ਤਂ ਵਾ ਪੁਪ੍ਫਂ ਵਾ ਫਲਂ ਵਾ ਤੁਮ੍ਹੇਹਿ ਪੁਰੇ ਅਖਾਦਿਤਪੁਬ੍ਬਂ ਮਂ ਅਨਾਪੁਚ੍ਛਿਤ੍ਵਾ ਮਾ ਖਾਦਿਤ੍ਥਾ’’ਤਿ. ਏਵਂ ਮਨੁਸ੍ਸਾਨਂ ਓਵਾਦਂ ਦਤ੍ਵਾ ਪਞ੍ਚਹਿ ਸਕਟਸਤੇਹਿ ਕਨ੍ਤਾਰਂ ਪਟਿਪਜ੍ਜਿ. ਤਸ੍ਮਿਂ ਕਨ੍ਤਾਰਮਜ੍ਝਂ ਸਮ੍ਪਤ੍ਤੇ ਸੋ ਯਕ੍ਖੋ ਪੁਰਿਮਨਯੇਨੇਵ ਬੋਧਿਸਤ੍ਤਸ੍ਸ ਪਟਿਪਥੇ ਅਤ੍ਤਾਨਂ ਦਸ੍ਸੇਸਿ. ਬੋਧਿਸਤ੍ਤੋ ਤਂ ਦਿਸ੍ਵਾਵ ਅਞ੍ਞਾਸਿ ‘‘ਇਮਸ੍ਮਿਂ ਕਨ੍ਤਾਰੇ ਉਦਕਂ ਨਤ੍ਥਿ, ਨਿਰੁਦਕਕਨ੍ਤਾਰੋ ਨਾਮੇਸ, ਅਯਞ੍ਚ ਨਿਬ੍ਭਯੋ ਰਤ੍ਤਨੇਤ੍ਤੋ, ਛਾਯਾਪਿਸ੍ਸ ਨ ਪਞ੍ਞਾਯਤਿ, ਨਿਸ੍ਸਂਸਯਂ ਇਮਿਨਾ ਪੁਰਤੋ ਗਤੋ ਬਾਲਸਤ੍ਥਵਾਹਪੁਤ੍ਤੋ ਸਬ੍ਬਂ ਉਦਕਂ ਛਡ੍ਡਾਪੇਤ੍ਵਾ ਕਿਲਮੇਤ੍ਵਾ ਸਪਰਿਸੋ ਖਾਦਿਤੋ ਭਵਿਸ੍ਸਤਿ, ਮਯ੍ਹਂ ਪਨ ਪਣ੍ਡਿਤਭਾਵਂ ਉਪਾਯਕੋਸਲ੍ਲਂ ਨ ਜਾਨਾਤਿ ਮਞ੍ਞੇ’’ਤਿ. ਤਤੋ ਨਂ ਆਹ ‘‘ਗਚ੍ਛਥ ਤੁਮ੍ਹੇ, ਮਯਂ ਵਾਣਿਜਾ ਨਾਮ ਅਞ੍ਞਂ ਉਦਕਂ ਅਦਿਸ੍ਵਾ ਗਹਿਤਉਦਕਂ ਨ ਛਡ੍ਡੇਮ, ਦਿਟ੍ਠਟ੍ਠਾਨੇ ਪਨ ਛਡ੍ਡੇਤ੍ਵਾ ਸਕਟਾਨਿ ਸਲ੍ਲਹੁਕਾਨਿ ਕਤ੍ਵਾ ਗਮਿਸ੍ਸਾਮਾ’’ਤਿ ਯਕ੍ਖੋ ਥੋਕਂ ਗਨ੍ਤ੍ਵਾ ਅਦਸ੍ਸਨਂ ਉਪਗਮ੍ਮ ਅਤ੍ਤਨੋ ਯਕ੍ਖਨਗਰਮੇਵ ਗਤੋ.

ਯਕ੍ਖੇ ਪਨ ਗਤੇ ਮਨੁਸ੍ਸਾ ਬੋਧਿਸਤ੍ਤਂ ਆਹਂਸੁ ‘‘ਅਯ੍ਯ, ਏਤੇ ਮਨੁਸ੍ਸਾ ‘ਏਸਾ ਨੀਲਵਨਰਾਜਿ ਪਞ੍ਞਾਯਤਿ, ਤਤੋ ਪਟ੍ਠਾਯ ਨਿਬਦ੍ਧਂ ਦੇਵੋ ਵਸ੍ਸਤੀ’ਤਿ ਵਤ੍ਵਾ ਉਪ੍ਪਲਕੁਮੁਦਮਾਲਾਧਾਰਿਨੋ ਪਦੁਮਪੁਣ੍ਡਰੀਕਕਲਾਪੇ ਆਦਾਯ ਭਿਸਮੁਲ਼ਾਲਾਨਿ ਖਾਦਨ੍ਤਾ ਅਲ੍ਲਵਤ੍ਥਾ ਅਲ੍ਲਕੇਸਾ ਉਦਕਬਿਨ੍ਦੂਹਿ ਪਗ੍ਘਰਨ੍ਤੇਹਿ ਆਗਤਾ, ਉਦਕਂ ਛਡ੍ਡੇਤ੍ਵਾ ਸਲ੍ਲਹੁਕੇਹਿ ਸਕਟੇਹਿ ਖਿਪ੍ਪਂ ਗਚ੍ਛਾਮਾ’’ਤਿ. ਬੋਧਿਸਤ੍ਤੋ ਤੇਸਂ ਕਥਂ ਸੁਤ੍ਵਾ ਸਕਟਾਨਿ ਠਪਾਪੇਤ੍ਵਾ ਸਬ੍ਬੇ ਮਨੁਸ੍ਸੇ ਸਨ੍ਨਿਪਾਤਾਪੇਤ੍ਵਾ ‘‘ਤੁਮ੍ਹੇਹਿ ‘ਇਮਸ੍ਮਿਂ ਕਨ੍ਤਾਰੇ ਸਰੋ ਵਾ ਪੋਕ੍ਖਰਣੀ ਵਾ ਅਤ੍ਥੀ’ਤਿ ਕਸ੍ਸਚਿ ਸੁਤਪੁਬ੍ਬ’’ਨ੍ਤਿ ਪੁਚ੍ਛਿ. ‘‘ਨ, ਅਯ੍ਯ, ਸੁਤਪੁਬ੍ਬ’’ਨ੍ਤਿ. ਨਿਰੁਦਕਕਨ੍ਤਾਰੋ ਨਾਮ ਏਸੋ, ਇਦਾਨਿ ਏਕਚ੍ਚੇ ਮਨੁਸ੍ਸਾ ‘‘ਏਤਾਯ ਨੀਲਵਨਰਾਜਿਯਾ ਪੁਰਤੋ ਦੇਵੋ ਵਸ੍ਸਤੀ’’ਤਿ ਵਦਨ੍ਤਿ, ‘‘ਵੁਟ੍ਠਿਵਾਤੋ ਨਾਮ ਕਿਤ੍ਤਕਂ ਠਾਨਂ ਵਾਯਤੀ’’ਤਿ? ‘‘ਯੋਜਨਮਤ੍ਤਂ, ਅਯ੍ਯਾ’’ਤਿ. ‘‘ਕਚ੍ਚਿ ਪਨ ਵੋ ਏਕਸ੍ਸਾਪਿ ਸਰੀਰਂ ਵੁਟ੍ਠਿਵਾਤੋ ਪਹਰਤੀ’’ਤਿ? ‘‘ਨਤ੍ਥਿ ਅਯ੍ਯਾ’’ਤਿ. ‘‘ਮੇਘਸੀਸਂ ਨਾਮ ਕਿਤ੍ਤਕੇ ਠਾਨੇ ਪਞ੍ਞਾਯਤੀ’’ਤਿ? ‘‘ਤਿਯੋਜਨਮਤ੍ਤੇ ਅਯ੍ਯਾ’’ਤਿ. ‘‘ਅਤ੍ਥਿ ਪਨ ਵੋ ਕੇਨਚਿ ਏਕਮ੍ਪਿ ਮੇਘਸੀਸਂ ਦਿਟ੍ਠ’’ਨ੍ਤਿ? ‘‘ਨਤ੍ਥਿ, ਅਯ੍ਯਾ’’ਤਿ. ‘‘ਵਿਜ੍ਜੁਲਤਾ ਨਾਮ ਕਿਤ੍ਤਕੇ ਠਾਨੇ ਪਞ੍ਞਾਯਤੀ’’ਤਿ? ‘‘ਚਤੁਪ੍ਪਞ੍ਚਯੋਜਨਮਤ੍ਤੇ, ਅਯ੍ਯਾ’’ਤਿ. ‘‘ਅਤ੍ਥਿ ਪਨ ਵੋ ਕੇਨਚਿ ਵਿਜ੍ਜੁਲਤੋਭਾਸੋ ਦਿਟ੍ਠੋ’’ਤਿ? ‘‘ਨਤ੍ਥਿ, ਅਯ੍ਯਾ’’ਤਿ. ‘‘ਮੇਘਸਦ੍ਦੋ ਨਾਮ ਕਿਤ੍ਤਕੇ ਠਾਨੇ ਸੁਯ੍ਯਤੀ’’ਤਿ? ‘‘ਏਕਦ੍ਵਿਯੋਜਨਮਤ੍ਤੇ, ਅਯ੍ਯਾ’’ਤਿ. ‘‘ਅਤ੍ਥਿ ਪਨ ਵੋ ਕੇਨਚਿ ਮੇਘਸਦ੍ਦੋ ਸੁਤੋ’’ਤਿ? ‘‘ਨਤ੍ਥਿ, ਅਯ੍ਯਾ’’ਤਿ. ‘‘ਨ ਏਤੇ ਮਨੁਸ੍ਸਾ, ਯਕ੍ਖਾ ਏਤੇ, ਅਮ੍ਹੇ ਉਦਕਂ ਛਡ੍ਡਾਪੇਤ੍ਵਾ ਦੁਬ੍ਬਲੇ ਕਤ੍ਵਾ ਖਾਦਿਤੁਕਾਮਾ ਆਗਤਾ ਭਵਿਸ੍ਸਨ੍ਤਿ. ਪੁਰਤੋ ਗਤੋ ਬਾਲਸਤ੍ਥਵਾਹਪੁਤ੍ਤੋ ਨ ਉਪਾਯਕੁਸਲੋ. ਅਦ੍ਧਾ ਸੋ ਏਤੇਹਿ ਉਦਕਂ ਛਡ੍ਡਾਪੇਤ੍ਵਾ ਕਿਲਮੇਤ੍ਵਾ ਖਾਦਿਤੋ ਭਵਿਸ੍ਸਤਿ, ਪਞ੍ਚ ਸਕਟਸਤਾਨਿ ਯਥਾਪੂਰਿਤਾਨੇਵ ਠਿਤਾਨਿ ਭਵਿਸ੍ਸਨ੍ਤਿ. ਅਜ੍ਜ ਮਯਂ ਤਾਨਿ ਪਸ੍ਸਿਸ੍ਸਾਮ, ਪਸਤਮਤ੍ਤਮ੍ਪਿ ਉਦਕਂ ਅਛਡ੍ਡੇਤ੍ਵਾ ਸੀਘਸੀਘਂ ਪਾਜੇਥਾ’’ਤਿ ਪਾਜਾਪੇਸਿ.

ਸੋ ਗਚ੍ਛਨ੍ਤੋ ਯਥਾਪੂਰਿਤਾਨੇਵ ਪਞ੍ਚ ਸਕਟਸਤਾਨਿ ਗੋਣਮਨੁਸ੍ਸਾਨਞ੍ਚ ਹਤ੍ਥਟ੍ਠਿਕਾਦੀਨਿ ਦਿਸਾਵਿਦਿਸਾਸੁ ਵਿਪ੍ਪਕਿਣ੍ਣਾਨਿ ਦਿਸ੍ਵਾ ਸਕਟਾਨਿ ਮੋਚਾਪੇਤ੍ਵਾ ਸਕਟਪਰਿਵਟ੍ਟਕੇਨ ਖਨ੍ਧਾਵਾਰਂ ਬਨ੍ਧਾਪੇਤ੍ਵਾ ਕਾਲਸ੍ਸੇਵ ਮਨੁਸ੍ਸੇ ਚ ਗੋਣੇ ਚ ਸਾਯਮਾਸਭਤ੍ਤਂ ਭੋਜਾਪੇਤ੍ਵਾ ਮਨੁਸ੍ਸਾਨਂ ਮਜ੍ਝੇ ਗੋਣੇ ਨਿਪਜ੍ਜਾਪੇਤ੍ਵਾ ਸਯਂ ਬਲਨਾਯਕੋ ਹੁਤ੍ਵਾ ਖਗ੍ਗਹਤ੍ਥੋ ਤਿਯਾਮਰਤ੍ਤਿਂ ਆਰਕ੍ਖਂ ਗਹੇਤ੍ਵਾ ਠਿਤਕੋਵ ਅਰੁਣਂ ਉਟ੍ਠਾਪੇਸਿ. ਪੁਨਦਿਵਸੇ ਪਨ ਪਾਤੋਵ ਸਬ੍ਬਕਿਚ੍ਚਾਨਿ ਨਿਟ੍ਠਾਪੇਤ੍ਵਾ ਗੋਣੇ ਭੋਜੇਤ੍ਵਾ ਦੁਬ੍ਬਲਸਕਟਾਨਿ ਛਡ੍ਡਾਪੇਤ੍ਵਾ ਥਿਰਾਨਿ ਗਾਹਾਪੇਤ੍ਵਾ ਅਪ੍ਪਗ੍ਘਂ ਭਣ੍ਡਂ ਛਡ੍ਡਾਪੇਤ੍ਵਾ ਮਹਗ੍ਘਂ ਭਣ੍ਡਂ ਆਰੋਪਾਪੇਤ੍ਵਾ ਯਥਾਧਿਪ੍ਪੇਤਂ ਠਾਨਂ ਗਨ੍ਤ੍ਵਾ ਦਿਗੁਣਤਿਗੁਣੇਨ ਮੂਲੇਨ ਭਣ੍ਡਂ ਵਿਕ੍ਕਿਣਿਤ੍ਵਾ ਸਬ੍ਬਂ ਪਰਿਸਂ ਆਦਾਯ ਪੁਨ ਅਤ੍ਤਨੋ ਨਗਰਮੇਵ ਅਗਮਾਸਿ.

ਸਤ੍ਥਾ ਇਮਂ ਧਮ੍ਮਕਥਂ ਕਥੇਤ੍ਵਾ ‘‘ਏਵਂ, ਗਹਪਤਿ, ਪੁਬ੍ਬੇ ਤਕ੍ਕਗ੍ਗਾਹਗਾਹਿਨੋ ਮਹਾਵਿਨਾਸਂ ਪਤ੍ਤਾ, ਅਪਣ੍ਣਕਗ੍ਗਾਹਗਾਹਿਨੋ ਪਨ ਅਮਨੁਸ੍ਸਾਨਂ ਹਤ੍ਥਤੋ ਮੁਚ੍ਚਿਤ੍ਵਾ ਸੋਤ੍ਥਿਨਾ ਇਚ੍ਛਿਤਟ੍ਠਾਨਂ ਗਨ੍ਤ੍ਵਾ ਪੁਨ ਸਕਟ੍ਠਾਨਮੇਵ ਪਚ੍ਚਾਗਮਿਂਸੂ’’ਤਿ ਵਤ੍ਵਾ ਦ੍ਵੇਪਿ ਵਤ੍ਥੂਨਿ ਘਟੇਤ੍ਵਾ ਇਮਿਸ੍ਸਾ ਅਪਣ੍ਣਕਧਮ੍ਮਦੇਸਨਾਯ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਂ ਗਾਥਮਾਹ –

੧. ‘‘ਅਪਣ੍ਣਕਂ ਠਾਨਮੇਕੇ, ਦੁਤਿਯਂ ਆਹੁ ਤਕ੍ਕਿਕਾ;

ਏਤਦਞ੍ਞਾਯ ਮੇਧਾਵੀ, ਤਂ ਗਣ੍ਹੇ ਯਦਪਣ੍ਣਕ’’ਨ੍ਤਿ.

ਤਤ੍ਥ ਅਪਣ੍ਣਕਨ੍ਤਿ ਏਕਂਸਿਕਂ ਅਵਿਰਦ੍ਧਂ ਨਿਯ੍ਯਾਨਿਕਂ. ਠਾਨਨ੍ਤਿ ਕਾਰਣਂ. ਕਾਰਣਞ੍ਹਿ ਯਸ੍ਮਾ ਤਦਾਯਤ੍ਤਵੁਤ੍ਤਿਤਾਯ ਫਲਂ ਤਿਟ੍ਠਤਿ ਨਾਮ, ਤਸ੍ਮਾ ‘‘ਠਾਨ’’ਨ੍ਤਿ ਵੁਚ੍ਚਤਿ, ‘‘ਠਾਨਞ੍ਚ ਠਾਨਤੋ ਅਟ੍ਠਾਨਞ੍ਚ ਅਟ੍ਠਾਨਤੋ’’ਤਿਆਦੀਸੁ (ਵਿਭ. ੮੦੯) ਚਸ੍ਸ ਪਯੋਗੋ ਵੇਦਿਤਬ੍ਬੋ. ਇਤਿ ‘‘ਅਪਣ੍ਣਕਂ ਠਾਨ’’ਨ੍ਤਿ ਪਦਦ੍ਵਯੇਨਾਪਿ ‘‘ਯਂ ਏਕਨ੍ਤਹਿਤਸੁਖਾਵਹਤ੍ਤਾ ਪਣ੍ਡਿਤੇਹਿ ਪਟਿਪਨ੍ਨਂ ਏਕਂਸਿਕਕਾਰਣਂ ਅਵਿਰਦ੍ਧਕਾਰਣਂ ਨਿਯ੍ਯਾਨਿਕਕਾਰਣਂ, ਤਂ ਇਦ’’ਨ੍ਤਿ ਦੀਪੇਤਿ. ਅਯਮੇਤ੍ਥ ਸਙ੍ਖੇਪੋ, ਪਭੇਦਤੋ ਪਨ ਤੀਣਿ ਸਰਣਗਮਨਾਨਿ, ਪਞ੍ਚ ਸੀਲਾਨਿ, ਦਸ ਸੀਲਾਨਿ, ਪਾਤਿਮੋਕ੍ਖਸਂਵਰੋ, ਇਨ੍ਦ੍ਰਿਯਸਂਵਰੋ, ਆਜੀਵਪਾਰਿਸੁਦ੍ਧਿ, ਪਚ੍ਚਯਪਟਿਸੇਵਨਂ, ਸਬ੍ਬਮ੍ਪਿ ਚਤੁਪਾਰਿਸੁਦ੍ਧਿਸੀਲਂ; ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਾ, ਭੋਜਨੇ ਮਤ੍ਤਞ੍ਞੁਤਾ, ਜਾਗਰਿਯਾਨੁਯੋਗੋ, ਝਾਨਂ, ਵਿਪਸ੍ਸਨਾ, ਅਭਿਞ੍ਞਾ, ਸਮਾਪਤ੍ਤਿ, ਅਰਿਯਮਗ੍ਗੋ, ਅਰਿਯਫਲਂ, ਸਬ੍ਬਮ੍ਪੇਤਂ ਅਪਣ੍ਣਕਟ੍ਠਾਨਂ ਅਪਣ੍ਣਕਪਟਿਪਦਾ, ਨਿਯ੍ਯਾਨਿਕਪਟਿਪਦਾਤਿ ਅਤ੍ਥੋ.

ਯਸ੍ਮਾ ਚ ਪਨ ਨਿਯ੍ਯਾਨਿਕਪਟਿਪਦਾਯ ਏਤਂ ਨਾਮਂ, ਤਸ੍ਮਾਯੇਵ ਭਗਵਾ ਅਪਣ੍ਣਕਪਟਿਪਦਂ ਦਸ੍ਸੇਨ੍ਤੋ ਇਮਂ ਸੁਤ੍ਤਮਾਹ –

‘‘ਤੀਹਿ, ਭਿਕ੍ਖਵੇ, ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਅਪਣ੍ਣਕਪਟਿਪਦਂ ਪਟਿਪਨ੍ਨੋ ਹੋਤਿ, ਯੋਨਿ ਚਸ੍ਸ ਆਰਦ੍ਧਾ ਹੋਤਿ ਆਸਵਾਨਂ ਖਯਾਯ. ਕਤਮੇਹਿ ਤੀਹਿ? ਇਧ, ਭਿਕ੍ਖਵੇ, ਭਿਕ੍ਖੁ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਹੋਤਿ, ਭੋਜਨੇ ਮਤ੍ਤਞ੍ਞੂ ਹੋਤਿ, ਜਾਗਰਿਯਂ ਅਨੁਯੁਤ੍ਤੋ ਹੋਤਿ. ਕਥਞ੍ਚ, ਭਿਕ੍ਖਵੇ, ਭਿਕ੍ਖੁ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਹੋਤਿ? ਇਧ, ਭਿਕ੍ਖਵੇ, ਭਿਕ੍ਖੁ ਚਕ੍ਖੁਨਾ ਰੂਪਂ ਦਿਸ੍ਵਾ ਨ ਨਿਮਿਤ੍ਤਗ੍ਗਾਹੀ ਹੋਤਿ…ਪੇ… ਏਵਂ ਖੋ, ਭਿਕ੍ਖਵੇ, ਭਿਕ੍ਖੁ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਭਿਕ੍ਖੁ ਭੋਜਨੇ ਮਤ੍ਤਞ੍ਞੂ ਹੋਤਿ? ਇਧ, ਭਿਕ੍ਖਵੇ, ਭਿਕ੍ਖੁ ਪਟਿਸਙ੍ਖਾ ਯੋਨਿਸੋ ਆਹਾਰਂ ਆਹਾਰੇਤਿ ਨੇਵ ਦਵਾਯ ਨ ਮਦਾਯ…ਪੇ… ਏਵਂ ਖੋ, ਭਿਕ੍ਖਵੇ, ਭਿਕ੍ਖੁ ਭੋਜਨੇ ਮਤ੍ਤਞ੍ਞੂ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਭਿਕ੍ਖੁ ਜਾਗਰਿਯਂ ਅਨੁਯੁਤ੍ਤੋ ਹੋਤਿ. ਇਧ, ਭਿਕ੍ਖਵੇ, ਭਿਕ੍ਖੁ ਦਿਵਸਂ ਚਙ੍ਕਮੇਨ ਨਿਸਜ੍ਜਾਯ…ਪੇ… ਏਵਂ ਖੋ, ਭਿਕ੍ਖਵੇ, ਭਿਕ੍ਖੁ ਜਾਗਰਿਯਂ ਅਨੁਯੁਤ੍ਤੋ ਹੋਤੀ’’ਤਿ (ਅ. ਨਿ. ੩.੧੬).

ਇਮਸ੍ਮਿਞ੍ਚਾਪਿ ਸੁਤ੍ਤੇ ਤਯੋਵ ਧਮ੍ਮਾ ਵੁਤ੍ਤਾ. ਅਯਂ ਪਨ ਅਪਣ੍ਣਕਪਟਿਪਦਾ ਯਾਵ ਅਰਹਤ੍ਤਫਲਂ ਲਬ੍ਭਤੇਵ. ਤਤ੍ਥ ਅਰਹਤ੍ਤਫਲਮ੍ਪਿ, ਫਲਸਮਾਪਤ੍ਤਿਵਿਹਾਰਸ੍ਸ ਚੇਵ, ਅਨੁਪਾਦਾਪਰਿਨਿਬ੍ਬਾਨਸ੍ਸ ਚ, ਪਟਿਪਦਾਯੇਵ ਨਾਮ ਹੋਤਿ.

ਏਕੇਤਿ ਏਕਚ੍ਚੇ ਪਣ੍ਡਿਤਮਨੁਸ੍ਸਾ. ਤਤ੍ਥ ਕਿਞ੍ਚਾਪਿ ‘‘ਅਸੁਕਾ ਨਾਮਾ’’ਤਿ ਨਿਯਮੋ ਨਤ੍ਥਿ, ਇਦਂ ਪਨ ਸਪਰਿਸਂ ਬੋਧਿਸਤ੍ਤਂਯੇਵ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਦੁਤਿਯਂ ਆਹੁ ਤਕ੍ਕਿਕਾਤਿ ਦੁਤਿਯਨ੍ਤਿ ਪਠਮਤੋ ਅਪਣ੍ਣਕਟ੍ਠਾਨਤੋ ਨਿਯ੍ਯਾਨਿਕਕਾਰਣਤੋ ਦੁਤਿਯਂ ਤਕ੍ਕਗ੍ਗਾਹਕਾਰਣਂ ਅਨਿਯ੍ਯਾਨਿਕਕਾਰਣਂ. ਆਹੁ ਤਕ੍ਕਿਕਾਤਿ ਏਤ੍ਥ ਪਨ ਸਦ੍ਧਿਂ ਪੁਰਿਮਪਦੇਨ ਅਯਂ ਯੋਜਨਾ – ਅਪਣ੍ਣਕਟ੍ਠਾਨਂ ਏਕਂਸਿਕਕਾਰਣਂ ਅਵਿਰਦ੍ਧਕਾਰਣਂ ਨਿਯ੍ਯਾਨਿਕਕਾਰਣਂ ਏਕੇ ਬੋਧਿਸਤ੍ਤਪ੍ਪਮੁਖਾ ਪਣ੍ਡਿਤਮਨੁਸ੍ਸਾ ਗਣ੍ਹਿਂਸੁ. ਯੇ ਪਨ ਬਾਲਸਤ੍ਥਵਾਹਪੁਤ੍ਤਪ੍ਪਮੁਖਾ ਤਕ੍ਕਿਕਾ ਆਹੁ, ਤੇ ਦੁਤਿਯਂ ਸਾਪਰਾਧਂ ਅਨੇਕਂਸਿਕਟ੍ਠਾਨਂ ਵਿਰਦ੍ਧਕਾਰਣਂ ਅਨਿਯ੍ਯਾਨਿਕਕਾਰਣਂ ਅਗ੍ਗਹੇਸੁਂ. ਤੇਸੁ ਯੇ ਅਪਣ੍ਣਕਟ੍ਠਾਨਂ ਅਗ੍ਗਹੇਸੁਂ, ਤੇ ਸੁਕ੍ਕਪਟਿਪਦਂ ਪਟਿਪਨ੍ਨਾ. ਯੇ ਦੁਤਿਯਂ ‘‘ਪੁਰਤੋ ਭਵਿਤਬ੍ਬਂ ਉਦਕੇਨਾ’’ਤਿ ਤਕ੍ਕਗ੍ਗਾਹਸਙ੍ਖਾਤਂ ਅਨਿਯ੍ਯਾਨਿਕਕਾਰਣਂ ਅਗ੍ਗਹੇਸੁਂ. ਤੇ ਕਣ੍ਹਪਟਿਪਦਂ ਪਟਿਪਨ੍ਨਾ.

ਤਤ੍ਥ ਸੁਕ੍ਕਪਟਿਪਦਾ ਅਪਰਿਹਾਨਿਪਟਿਪਦਾ, ਕਣ੍ਹਪਟਿਪਦਾ ਪਰਿਹਾਨਿਪਟਿਪਦਾ. ਤਸ੍ਮਾ ਯੇ ਸੁਕ੍ਕਪਟਿਪਦਂ ਪਟਿਪਨ੍ਨਾ, ਤੇ ਅਪਰਿਹੀਨਾ ਸੋਤ੍ਥਿਭਾਵਂ ਪਤ੍ਤਾ. ਯੇ ਪਨ ਕਣ੍ਹਪਟਿਪਦਂ ਪਟਿਪਨ੍ਨਾ, ਤੇ ਪਰਿਹੀਨਾ ਅਨਯਬ੍ਯਸਨਂ ਆਪਨ੍ਨਾਤਿ ਇਮਮਤ੍ਥਂ ਭਗਵਾ ਅਨਾਥਪਿਣ੍ਡਿਕਸ੍ਸ ਗਹਪਤਿਨੋ ਵਤ੍ਵਾ ਉਤ੍ਤਰਿ ਇਦਮਾਹ ‘‘ਏਤਦਞ੍ਞਾਯ ਮੇਧਾਵੀ, ਤਂ ਗਣ੍ਹੇ ਯਦਪਣ੍ਣਕ’’ਨ੍ਤਿ.

ਤਤ੍ਥ ਏਤਦਞ੍ਞਾਯ ਮੇਧਾਵੀਤਿ ‘‘ਮੇਧਾ’’ਤਿ ਲਦ੍ਧਨਾਮਾਯ ਵਿਪੁਲਾਯ ਵਿਸੁਦ੍ਧਾਯ ਉਤ੍ਤਮਾਯ ਪਞ੍ਞਾਯ ਸਮਨ੍ਨਾਗਤੋ ਕੁਲਪੁਤ੍ਤੋ ਏਤਂ ਅਪਣ੍ਣਕੇ ਚੇਵ ਸਪਣ੍ਣਕੇ ਚਾਤਿ ਦ੍ਵੀਸੁ ਅਤਕ੍ਕਗ੍ਗਾਹਤਕ੍ਕਗ੍ਗਾਹਸਙ੍ਖਾਤੇਸੁ ਠਾਨੇਸੁ ਗੁਣਦੋਸਂ ਵੁਦ੍ਧਿਹਾਨਿਂ ਅਤ੍ਥਾਨਤ੍ਥਂ ਞਤ੍ਵਾਤਿ ਅਤ੍ਥੋ. ਤਂ ਗਣ੍ਹੇ ਯਦਪਣ੍ਣਕਨ੍ਤਿ ਯਂ ਅਪਣ੍ਣਕਂ ਏਕਂਸਿਕਂ ਸੁਕ੍ਕਪਟਿਪਦਾਅਪਰਿਹਾਨਿਯਪਟਿਪਦਾਸਙ੍ਖਾਤਂ ਨਿਯ੍ਯਾਨਿਕਕਾਰਣਂ, ਤਦੇਵ ਗਣ੍ਹੇਯ੍ਯ. ਕਸ੍ਮਾ? ਏਕਂਸਿਕਾਦਿਭਾਵਤੋਯੇਵ. ਇਤਰਂ ਪਨ ਨ ਗਣ੍ਹੇਯ੍ਯ. ਕਸ੍ਮਾ? ਅਨੇਕਂਸਿਕਾਦਿਭਾਵਤੋਯੇਵ. ਅਯਞ੍ਹਿ ਅਪਣ੍ਣਕਪਟਿਪਦਾ ਨਾਮ ਸਬ੍ਬੇਸਂ ਬੁਦ੍ਧਪਚ੍ਚੇਕਬੁਦ੍ਧਬੁਦ੍ਧਪੁਤ੍ਤਾਨਂ ਪਟਿਪਦਾ. ਸਬ੍ਬਬੁਦ੍ਧਾ ਹਿ ਅਪਣ੍ਣਕਪਟਿਪਦਾਯਮੇਵ ਠਤ੍ਵਾ ਦਲ਼੍ਹੇਨ ਵੀਰਿਯੇਨ ਪਾਰਮਿਯੋ ਪੂਰੇਤ੍ਵਾ ਬੋਧਿਮੂਲੇ ਬੁਦ੍ਧਾ ਨਾਮ ਹੋਨ੍ਤਿ, ਪਚ੍ਚੇਕਬੁਦ੍ਧਾ ਪਚ੍ਚੇਕਬੋਧਿਂ ਉਪ੍ਪਾਦੇਨ੍ਤਿ, ਬੁਦ੍ਧਪੁਤ੍ਤਾ ਸਾਵਕਪਾਰਮਿਞਾਣਂ ਪਟਿਵਿਜ੍ਝਨ੍ਤਿ.

ਇਤਿ ਭਗਵਾ ਤੇਸਂ ਉਪਾਸਕਾਨਂ ਤਿਸ੍ਸੋ ਕੁਲਸਮ੍ਪਤ੍ਤਿਯੋ ਚ ਛ ਕਾਮਸਗ੍ਗੇ ਬ੍ਰਹ੍ਮਲੋਕਸਮ੍ਪਤ੍ਤਿਯੋ ਚ ਦਤ੍ਵਾਪਿ ਪਰਿਯੋਸਾਨੇ ਅਰਹਤ੍ਤਮਗ੍ਗਫਲਦਾਯਿਕਾ ਅਪਣ੍ਣਕਪਟਿਪਦਾ ਨਾਮ, ਚਤੂਸੁ ਅਪਾਯੇਸੁ ਪਞ੍ਚਸੁ ਚ ਨੀਚਕੁਲੇਸੁ ਨਿਬ੍ਬਤ੍ਤਿਦਾਯਿਕਾ ਸਪਣ੍ਣਕਪਟਿਪਦਾ ਨਾਮਾਤਿ ਇਮਂ ਅਪਣ੍ਣਕਧਮ੍ਮਦੇਸਨਂ ਦਸ੍ਸੇਤ੍ਵਾ ਉਤ੍ਤਰਿ ਚਤ੍ਤਾਰਿ ਸਚ੍ਚਾਨਿ ਸੋਲ਼ਸਹਿ ਆਕਾਰੇਹਿ ਪਕਾਸੇਸਿ. ਚਤੁਸਚ੍ਚਪਰਿਯੋਸਾਨੇ ਸਬ੍ਬੇਪਿ ਤੇ ਪਞ੍ਚਸਤਾ ਉਪਾਸਕਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਦਸ੍ਸੇਤ੍ਵਾ ਦ੍ਵੇ ਵਤ੍ਥੂਨਿ ਕਥੇਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਤ੍ਵਾ ਦਸ੍ਸੇਸਿ – ‘‘ਤਸ੍ਮਿਂ ਸਮਯੇ ਬਾਲਸਤ੍ਥਵਾਹਪੁਤ੍ਤੋ ਦੇਵਦਤ੍ਤੋ ਅਹੋਸਿ, ਤਸ੍ਸ ਪਰਿਸਾ ਦੇਵਦਤ੍ਤਪਰਿਸਾਵ, ਪਣ੍ਡਿਤਸਤ੍ਥਵਾਹਪੁਤ੍ਤਪਰਿਸਾ ਬੁਦ੍ਧਪਰਿਸਾ, ਪਣ੍ਡਿਤਸਤ੍ਥਵਾਹਪੁਤ੍ਤੋ ਪਨ ਅਹਮੇਵ ਅਹੋਸਿ’’ਨ੍ਤਿ ਦੇਸਨਂ ਨਿਟ੍ਠਾਪੇਸਿ.

ਅਪਣ੍ਣਕਜਾਤਕਵਣ੍ਣਨਾ ਪਠਮਾ.

੨. ਵਣ੍ਣੁਪਥਜਾਤਕਵਣ੍ਣਨਾ

ਅਕਿਲਾਸੁਨੋਤਿ ਇਮਂ ਧਮ੍ਮਦੇਸਨਂ ਭਗਵਾ ਸਾਵਤ੍ਥਿਯਂ ਵਿਹਰਨ੍ਤੋ ਕਥੇਸਿ. ਕਂ ਪਨ ਆਰਬ੍ਭਾਤਿ? ਏਕਂ ਓਸ੍ਸਟ੍ਠਵੀਰਿਯਂ ਭਿਕ੍ਖੁਂ. ਤਥਾਗਤੇ ਕਿਰ ਸਾਵਤ੍ਥਿਯਂ ਵਿਹਰਨ੍ਤੇ ਏਕੋ ਸਾਵਤ੍ਥਿਵਾਸੀ ਕੁਲਪੁਤ੍ਤੋ ਜੇਤਵਨਂ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਚਿਤ੍ਤੋ ਕਾਮੇਸੁ ਆਦੀਨਵਂ ਦਿਸ੍ਵਾ ਪਬ੍ਬਜਿਤ੍ਵਾ ਉਪਸਮ੍ਪਦਾਯ ਪਞ੍ਚਵਸ੍ਸਿਕੋ ਹੁਤ੍ਵਾ ਦ੍ਵੇ ਮਾਤਿਕਾ ਉਗ੍ਗਣ੍ਹਿਤ੍ਵਾ ਵਿਪਸ੍ਸਨਾਚਾਰਂ ਸਿਕ੍ਖਿਤ੍ਵਾ ਸਤ੍ਥੁ ਸਨ੍ਤਿਕੇ ਅਤ੍ਤਨੋ ਚਿਤ੍ਤਰੁਚਿਯਂ ਕਮ੍ਮਟ੍ਠਾਨਂ ਗਹੇਤ੍ਵਾ ਏਕਂ ਅਰਞ੍ਞਂ ਪਵਿਸਿਤ੍ਵਾ ਵਸ੍ਸਂ ਉਪਗਨ੍ਤ੍ਵਾ ਤੇਮਾਸਂ ਵਾਯਮਨ੍ਤੋਪਿ ਓਭਾਸਮਤ੍ਤਂ ਵਾ ਨਿਮਿਤ੍ਤਮਤ੍ਤਂ ਵਾ ਉਪ੍ਪਾਦੇਤੁਂ ਨਾਸਕ੍ਖਿ.

ਅਥਸ੍ਸ ਏਤਦਹੋਸਿ ‘‘ਸਤ੍ਥਾਰਾ ਚਤ੍ਤਾਰੋ ਪੁਗ੍ਗਲਾ ਕਥਿਤਾ, ਤੇਸੁ ਮਯਾ ਪਦਪਰਮੇਨ ਭਵਿਤਬ੍ਬਂ, ਨਤ੍ਥਿ ਮਞ੍ਞੇ ਮਯ੍ਹਂ ਇਮਸ੍ਮਿਂ ਅਤ੍ਤਭਾਵੇ ਮਗ੍ਗੋ ਵਾ ਫਲਂ ਵਾ, ਕਿਂ ਕਰਿਸ੍ਸਾਮਿ ਅਰਞ੍ਞਵਾਸੇਨ, ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਰੂਪਸੋਭਗ੍ਗਪ੍ਪਤ੍ਤਂ ਬੁਦ੍ਧਸਰੀਰਂ ਓਲੋਕੇਨ੍ਤੋ ਮਧੁਰਂ ਧਮ੍ਮਦੇਸਨਂ ਸੁਣਨ੍ਤੋ ਵਿਹਰਿਸ੍ਸਾਮੀ’’ਤਿ ਪੁਨ ਜੇਤਵਨਮੇਵ ਪਚ੍ਚਾਗਮਾਸਿ. ਅਥ ਨਂ ਸਨ੍ਦਿਟ੍ਠਸਮ੍ਭਤ੍ਤਾ ਆਹਂਸੁ – ‘‘ਆਵੁਸੋ, ਤ੍ਵਂ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ‘ਸਮਣਧਮ੍ਮਂ ਕਰਿਸ੍ਸਾਮੀ’ਤਿ ਗਤੋ, ਇਦਾਨਿ ਪਨ ਆਗਨ੍ਤ੍ਵਾ ਸਙ੍ਗਣਿਕਾਯ ਅਭਿਰਮਮਾਨੋ ਚਰਸਿ, ਕਿਂ ਨੁ ਖੋ ਤੇ ਪਬ੍ਬਜਿਤਕਿਚ੍ਚਂ ਮਤ੍ਥਕਂ ਪਤ੍ਤਂ, ਅਪ੍ਪਟਿਸਨ੍ਧਿਕੋ ਜਾਤੋਸੀ’’ਤਿ? ਆਵੁਸੋ, ਅਹਂ ਮਗ੍ਗਂ ਵਾ ਫਲਂ ਵਾ ਅਲਭਿਤ੍ਵਾ ‘‘ਅਭਬ੍ਬਪੁਗ੍ਗਲੇਨ ਮਯਾ ਭਵਿਤਬ੍ਬ’’ਨ੍ਤਿ ਵੀਰਿਯਂ ਓਸ੍ਸਜਿਤ੍ਵਾ ਆਗਤੋਮ੍ਹੀਤਿ. ‘‘ਅਕਾਰਣਂ ਤੇ, ਆਵੁਸੋ, ਕਤਂ ਦਲ਼੍ਹਵੀਰਿਯਸ੍ਸ ਸਤ੍ਥੁ ਸਾਸਨੇ ਪਬ੍ਬਜਿਤ੍ਵਾ ਵੀਰਿਯਂ ਓਸ੍ਸਜਨ੍ਤੇਨ, ਅਯੁਤ੍ਤਂ ਤੇ ਕਤਂ, ਏਹਿ ਤਥਾਗਤਸ੍ਸ ਦਸ੍ਸੇਮਾ’’ਤਿ ਤਂ ਆਦਾਯ ਸਤ੍ਥੁ ਸਨ੍ਤਿਕਂ ਅਗਮਂਸੁ.

ਸਤ੍ਥਾ ਤਂ ਦਿਸ੍ਵਾ ਏਵਮਾਹ ‘‘ਭਿਕ੍ਖਵੇ, ਤੁਮ੍ਹੇ ਏਤਂ ਭਿਕ੍ਖੁਂ ਅਨਿਚ੍ਛਮਾਨਂ ਆਦਾਯ ਆਗਤਾ, ਕਿਂ ਕਤਂ ਇਮਿਨਾ’’ਤਿ? ‘‘ਭਨ੍ਤੇ, ਅਯਂ ਭਿਕ੍ਖੁ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰੋਨ੍ਤੋ ਵੀਰਿਯਂ ਓਸ੍ਸਜਿਤ੍ਵਾ ਆਗਤੋ’’ਤਿ ਆਹਂਸੁ. ਅਥ ਨਂ ਸਤ੍ਥਾ ਆਹ ‘‘ਸਚ੍ਚਂ ਕਿਰ ਤਯਾ ਭਿਕ੍ਖੁ ਵੀਰਿਯਂ ਓਸ੍ਸਟ੍ਠ’’ਨ੍ਤਿ? ‘‘ਸਚ੍ਚਂ, ਭਗਵਾ’’ਤਿ. ‘‘ਕਿਂ ਪਨ ਤ੍ਵਂ ਭਿਕ੍ਖੁ ਏਵਰੂਪੇ ਮਮ ਸਾਸਨੇ ਪਬ੍ਬਜਿਤ੍ਵਾ ‘ਅਪ੍ਪਿਚ੍ਛੋ’ਤਿ ਵਾ ‘ਸਨ੍ਤੁਟ੍ਠੋ’ਤਿ ਵਾ ‘ਪਵਿਵਿਤ੍ਤੋ’ਤਿ ਵਾ ‘ਆਰਦ੍ਧਵੀਰਿਯੋ’ਤਿ ਵਾ ਏਵਂ ਅਤ੍ਤਾਨਂ ਅਜਾਨਾਪੇਤ੍ਵਾ ‘ਓਸ੍ਸਟ੍ਠਵੀਰਿਯੋ ਭਿਕ੍ਖੂ’ਤਿ ਜਾਨਾਪੇਸਿ. ਨਨੁ ਤ੍ਵਂ ਪੁਬ੍ਬੇ ਵੀਰਿਯਵਾ ਅਹੋਸਿ, ਤਯਾ ਏਕੇਨ ਕਤਂ ਵੀਰਿਯਂ ਨਿਸ੍ਸਾਯ ਮਰੁਕਨ੍ਤਾਰੇ ਪਞ੍ਚਸੁ ਸਕਟਸਤੇਸੁ ਮਨੁਸ੍ਸਾ ਚ ਗੋਣਾ ਚ ਪਾਨੀਯਂ ਲਭਿਤ੍ਵਾ ਸੁਖਿਤਾ ਜਾਤਾ, ਇਦਾਨਿ ਕਸ੍ਮਾ ਵੀਰਿਯਂ ਓਸ੍ਸਜਸੀ’’ਤਿ. ਸੋ ਭਿਕ੍ਖੁ ਏਤ੍ਤਕੇਨ ਵਚਨੇਨ ਉਪਤ੍ਥਮ੍ਭਿਤੋ ਅਹੋਸਿ.

ਤਂ ਪਨ ਕਥਂ ਸੁਤ੍ਵਾ ਭਿਕ੍ਖੂ ਭਗਵਨ੍ਤਂ ਯਾਚਿਂਸੁ – ‘‘ਭਨ੍ਤੇ, ਇਦਾਨਿ ਇਮਿਨਾ ਭਿਕ੍ਖੁਨਾ ਵੀਰਿਯਸ੍ਸ ਓਸ੍ਸਟ੍ਠਭਾਵੋ ਅਮ੍ਹਾਕਂ ਪਾਕਟੋ, ਪੁਬ੍ਬੇ ਪਨਸ੍ਸ ਏਕਸ੍ਸ ਵੀਰਿਯਂ ਨਿਸ੍ਸਾਯ ਮਰੁਕਨ੍ਤਾਰੇ ਗੋਣਮਨੁਸ੍ਸਾਨਂ ਪਾਨੀਯਂ ਲਭਿਤ੍ਵਾ ਸੁਖਿਤਭਾਵੋ ਪਟਿਚ੍ਛਨ੍ਨੋ, ਤੁਮ੍ਹਾਕਂ ਸਬ੍ਬਞ੍ਞੁਤਞ੍ਞਾਣਸ੍ਸੇਵ ਪਾਕਟੋ, ਅਮ੍ਹਾਕਮ੍ਪੇਤਂ ਕਾਰਣਂ ਕਥੇਥਾ’’ਤਿ. ‘‘ਤੇਨ ਹਿ, ਭਿਕ੍ਖਵੇ, ਸੁਣਾਥਾ’’ਤਿ ਭਗਵਾ ਤੇਸਂ ਭਿਕ੍ਖੂਨਂ ਸਤੁਪ੍ਪਾਦਂ ਜਨੇਤ੍ਵਾ ਭਵਨ੍ਤਰੇਨ ਪਟਿਚ੍ਛਨ੍ਨਕਾਰਣਂ ਪਾਕਟਮਕਾਸਿ.

ਅਤੀਤੇ ਕਾਸਿਰਟ੍ਠੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸਤ੍ਥਵਾਹਕੁਲੇ ਪਟਿਸਨ੍ਧਿਂ ਗਹੇਤ੍ਵਾ ਵਯਪ੍ਪਤ੍ਤੋ ਪਞ੍ਚਹਿ ਸਕਟਸਤੇਹਿ ਵਣਿਜ੍ਜਂ ਕਰੋਨ੍ਤੋ ਵਿਚਰਤਿ. ਸੋ ਏਕਦਾ ਸਟ੍ਠਿਯੋਜਨਿਕਂ ਮਰੁਕਨ੍ਤਾਰਂ ਪਟਿਪਜ੍ਜਿ. ਤਸ੍ਮਿਂ ਕਨ੍ਤਾਰੇ ਸੁਖੁਮਵਾਲੁਕਾ ਮੁਟ੍ਠਿਨਾ ਗਹਿਤਾ ਹਤ੍ਥੇ ਨ ਤਿਟ੍ਠਤਿ, ਸੂਰਿਯੁਗ੍ਗਮਨਤੋ ਪਟ੍ਠਾਯ ਅਙ੍ਗਾਰਰਾਸਿ ਵਿਯ ਉਣ੍ਹਾ ਹੋਤਿ, ਨ ਸਕ੍ਕਾ ਅਕ੍ਕਮਿਤੁਂ. ਤਸ੍ਮਾ ਤਂ ਪਟਿਪਜ੍ਜਨ੍ਤਾ ਦਾਰੁਦਕਤਿਲਤਣ੍ਡੁਲਾਦੀਨਿ ਸਕਟੇਹਿ ਆਦਾਯ ਰਤ੍ਤਿਮੇਵ ਗਨ੍ਤ੍ਵਾ ਅਰੁਣੁਗ੍ਗਮਨੇ ਸਕਟਾਨਿ ਪਰਿਵਟ੍ਟਂ ਕਤ੍ਵਾ ਮਤ੍ਥਕੇ ਮਣ੍ਡਪਂ ਕਾਰੇਤ੍ਵਾ ਕਾਲਸ੍ਸੇਵ ਆਹਾਰਕਿਚ੍ਚਂ ਨਿਟ੍ਠਾਪੇਤ੍ਵਾ ਛਾਯਾਯ ਨਿਸਿਨ੍ਨਾ ਦਿਵਸਂ ਖੇਪੇਤ੍ਵਾ ਅਤ੍ਥਙ੍ਗਤੇ ਸੂਰਿਯੇ ਸਾਯਮਾਸਂ ਭੁਞ੍ਜਿਤ੍ਵਾ ਭੂਮਿਯਾ ਸੀਤਲਾਯ ਜਾਤਾਯ ਸਕਟਾਨਿ ਯੋਜੇਤ੍ਵਾ ਗਚ੍ਛਨ੍ਤਿ, ਸਮੁਦ੍ਦਗਮਨਸਦਿਸਮੇਵ ਗਮਨਂ ਹੋਤਿ. ਥਲਨਿਯਾਮਕੋ ਨਾਮ ਲਦ੍ਧੁਂ ਵਟ੍ਟਤਿ, ਸੋ ਤਾਰਕਸਞ੍ਞਾ ਸਤ੍ਥਂ ਤਾਰੇਤਿ.

ਸੋਪਿ ਸਤ੍ਥਵਾਹੋ ਤਸ੍ਮਿਂ ਕਾਲੇ ਇਮਿਨਾਵ ਨਿਯਾਮੇਨ ਤਂ ਕਨ੍ਤਾਰਂ ਗਚ੍ਛਨ੍ਤੋ ਏਕੂਨਸਟ੍ਠਿ ਯੋਜਨਾਨਿ ਗਨ੍ਤ੍ਵਾ ‘‘ਇਦਾਨਿ ਏਕਰਤ੍ਤੇਨੇਵ ਮਰੁਕਨ੍ਤਾਰਾ ਨਿਕ੍ਖਮਨਂ ਭਵਿਸ੍ਸਤੀ’’ਤਿ ਸਾਯਮਾਸਂ ਭੁਞ੍ਜਿਤ੍ਵਾ ਸਬ੍ਬਂ ਦਾਰੁਦਕਂ ਖੇਪੇਤ੍ਵਾ ਸਕਟਾਨਿ ਯੋਜੇਤ੍ਵਾ ਪਾਯਾਸਿ. ਨਿਯਾਮਕੋ ਪਨ ਪੁਰਿਮਸਕਟੇ ਆਸਨਂ ਪਤ੍ਥਰਾਪੇਤ੍ਵਾ ਆਕਾਸੇ ਤਾਰਕਂ ਓਲੋਕੇਨ੍ਤੋ ‘‘ਇਤੋ ਪਾਜੇਥ, ਇਤੋ ਪਾਜੇਥਾ’’ਤਿ ਵਦਮਾਨੋ ਨਿਪਜ੍ਜਿ. ਸੋ ਦੀਘਮਦ੍ਧਾਨਂ ਅਨਿਦ੍ਦਾਯਨਭਾਵੇਨ ਕਿਲਨ੍ਤੋ ਨਿਦ੍ਦਂ ਓਕ੍ਕਮਿ, ਗੋਣੇ ਨਿਵਤ੍ਤਿਤ੍ਵਾ ਆਗਤਮਗ੍ਗਮੇਵ ਗਣ੍ਹਨ੍ਤੇ ਨ ਅਞ੍ਞਾਸਿ. ਗੋਣਾ ਸਬ੍ਬਰਤ੍ਤਿਂ ਅਗਮਂਸੁ. ਨਿਯਾਮਕੋ ਅਰੁਣੁਗ੍ਗਮਨਵੇਲਾਯ ਪਬੁਦ੍ਧੋ ਨਕ੍ਖਤ੍ਤਂ ਓਲੋਕੇਤ੍ਵਾ ‘‘ਸਕਟਾਨਿ ਨਿਵਤ੍ਤੇਥ ਨਿਵਤ੍ਤੇਥਾ’’ਤਿ ਆਹ. ਸਕਟਾਨਿ ਨਿਵਤ੍ਤੇਤ੍ਵਾ ਪਟਿਪਾਟਿਂ ਕਰੋਨ੍ਤਾਨਞ੍ਞੇਵ ਅਰੁਣੋ ਉਗ੍ਗਤੋ. ਮਨੁਸ੍ਸਾ ‘‘ਹਿਯ੍ਯੋ ਅਮ੍ਹਾਕਂ ਨਿਵਿਟ੍ਠਖਨ੍ਧਾਵਾਰਟ੍ਠਾਨਮੇਵੇਤਂ, ਦਾਰੁਦਕਮ੍ਪਿ ਨੋ ਖੀਣਂ, ਇਦਾਨਿ ਨਟ੍ਠਮ੍ਹਾ’’ਤਿ ਸਕਟਾਨਿ ਮੋਚੇਤ੍ਵਾ ਪਰਿਵਟ੍ਟਕੇਨ ਠਪੇਤ੍ਵਾ ਮਤ੍ਥਕੇ ਮਣ੍ਡਪਂ ਕਤ੍ਵਾ ਅਤ੍ਤਨੋ ਅਤ੍ਤਨੋ ਸਕਟਸ੍ਸ ਹੇਟ੍ਠਾ ਅਨੁਸੋਚਨ੍ਤਾ ਨਿਪਜ੍ਜਿਂਸੁ.

ਬੋਧਿਸਤ੍ਤੋ ‘‘ਮਯਿ ਵੀਰਿਯਂ ਓਸ੍ਸਜਨ੍ਤੇ ਸਬ੍ਬੇ ਵਿਨਸ੍ਸਿਸ੍ਸਨ੍ਤੀ’’ਤਿ ਪਾਤੋ ਸੀਤਲਵੇਲਾਯਮੇਵ ਆਹਿਣ੍ਡਨ੍ਤੋ ਏਕਂ ਦਬ੍ਬਤਿਣਗਚ੍ਛਂ ਦਿਸ੍ਵਾ ‘‘ਇਮਾਨਿ ਤਿਣਾਨਿ ਹੇਟ੍ਠਾ ਉਦਕਸਿਨੇਹੇਨ ਉਟ੍ਠਿਤਾਨਿ ਭਵਿਸ੍ਸਨ੍ਤੀ’’ਤਿ ਚਿਨ੍ਤੇਤ੍ਵਾ ਕੁਦ੍ਦਾਲਂ ਗਾਹਾਪੇਤ੍ਵਾ ਤਂ ਪਦੇਸਂ ਖਣਾਪੇਸਿ, ਤੇ ਸਟ੍ਠਿਹਤ੍ਥਟ੍ਠਾਨਂ ਖਣਿਂਸੁ. ਏਤ੍ਤਕਂ ਠਾਨਂ ਖਣਿਤ੍ਵਾ ਪਹਰਨ੍ਤਾਨਂ ਕੁਦ੍ਦਾਲੋ ਹੇਟ੍ਠਾਪਾਸਾਣੇ ਪਟਿਹਞ੍ਞਿ, ਪਹਟਮਤ੍ਤੇ ਸਬ੍ਬੇ ਵੀਰਿਯਂ ਓਸ੍ਸਜਿਂਸੁ. ਬੋਧਿਸਤ੍ਤੋ ਪਨ ‘‘ਇਮਸ੍ਸ ਪਾਸਾਣਸ੍ਸ ਹੇਟ੍ਠਾ ਉਦਕੇਨ ਭਵਿਤਬ੍ਬ’’ਨ੍ਤਿ ਓਤਰਿਤ੍ਵਾ ਪਾਸਾਣੇ ਠਿਤੋ ਓਣਮਿਤ੍ਵਾ ਸੋਤਂ ਓਦਹਿਤ੍ਵਾ ਸਦ੍ਦਂ ਆਵਜ੍ਜੇਨ੍ਤੋ ਹੇਟ੍ਠਾ ਉਦਕਸ੍ਸ ਪਵਤ੍ਤਨਸਦ੍ਦਂ ਸੁਤ੍ਵਾ ਉਤ੍ਤਰਿਤ੍ਵਾ ਚੂਲ਼ੁਪਟ੍ਠਾਕਂ ਆਹ – ‘‘ਤਾਤ, ਤਯਾ ਵੀਰਿਯੇ ਓਸ੍ਸਟ੍ਠੇ ਸਬ੍ਬੇ ਵਿਨਸ੍ਸਿਸ੍ਸਾਮ, ਤ੍ਵਂ ਵੀਰਿਯਂ ਅਨੋਸ੍ਸਜਨ੍ਤੋ ਇਮਂ ਅਯਕੂਟਂ ਗਹੇਤ੍ਵਾ ਆਵਾਟਂ ਓਤਰਿਤ੍ਵਾ ਏਤਸ੍ਮਿਂ ਪਾਸਾਣੇ ਪਹਾਰਂ ਦੇਹੀ’’ਤਿ. ਸੋ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਸਬ੍ਬੇਸੁ ਵੀਰਿਯਂ ਓਸ੍ਸਜਿਤ੍ਵਾ ਠਿਤੇਸੁਪਿ ਵੀਰਿਯਂ ਅਨੋਸ੍ਸਜਨ੍ਤੋ ਓਤਰਿਤ੍ਵਾ ਪਾਸਾਣੇ ਪਹਾਰਂ ਅਦਾਸਿ. ਪਾਸਾਣੋ ਮਜ੍ਝੇ ਭਿਜ੍ਜਿਤ੍ਵਾ ਹੇਟ੍ਠਾ ਪਤਿਤ੍ਵਾ ਸੋਤਂ ਸਨ੍ਨਿਰੁਮ੍ਭਿਤ੍ਵਾ ਅਟ੍ਠਾਸਿ, ਤਾਲਕ੍ਖਨ੍ਧਪ੍ਪਮਾਣਾ ਉਦਕਵਟ੍ਟਿ ਉਗ੍ਗਞ੍ਛਿ. ਸਬ੍ਬੇ ਪਾਨੀਯਂ ਪਿਵਿਤ੍ਵਾ ਨ੍ਹਾਯਿਂਸੁ, ਅਤਿਰੇਕਾਨਿ ਅਕ੍ਖਯੁਗਾਦੀਨਿ ਫਾਲੇਤ੍ਵਾ ਯਾਗੁਭਤ੍ਤਂ ਪਚਿਤ੍ਵਾ ਭੁਞ੍ਜਿਤ੍ਵਾ ਗੋਣੇ ਚ ਭੋਜੇਤ੍ਵਾ ਸੂਰਿਯੇ ਅਤ੍ਥਙ੍ਗਤੇ ਉਦਕਾਵਾਟਸਮੀਪੇ ਧਜਂ ਬਨ੍ਧਿਤ੍ਵਾ ਇਚ੍ਛਿਤਟ੍ਠਾਨਂ ਅਗਮਂਸੁ. ਤੇ ਤਤ੍ਥ ਭਣ੍ਡਂ ਵਿਕ੍ਕਿਣਿਤ੍ਵਾ ਦਿਗੁਣਂ ਤਿਗੁਣਂ ਚਤੁਗ੍ਗੁਣਂ ਲਾਭਂ ਲਭਿਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਅਗਮਂਸੁ. ਤੇ ਤਤ੍ਥ ਯਾਵਤਾਯੁਕਂ ਠਤ੍ਵਾ ਯਥਾਕਮ੍ਮਂ ਗਤਾ, ਬੋਧਿਸਤ੍ਤੋਪਿ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਮੇਵ ਗਤੋ.

ਸਮ੍ਮਾਸਮ੍ਬੁਦ੍ਧੋ ਇਮਂ ਧਮ੍ਮਦੇਸਨਂ ਕਥੇਤ੍ਵਾ ਅਭਿਸਮ੍ਬੁਦ੍ਧੋਵ ਇਮਂ ਗਾਥਂ ਕਥੇਸਿ –

੨. ‘‘ਅਕਿਲਾਸੁਨੋ ਵਣ੍ਣੁਪਥੇ ਖਣਨ੍ਤਾ, ਉਦਙ੍ਗਣੇ ਤਤ੍ਥ ਪਪਂ ਅਵਿਨ੍ਦੁਂ;

ਏਵਂ ਮੁਨੀ ਵੀਰਿਯਬਲੂਪਪਨ੍ਨੋ, ਅਕਿਲਾਸੁ ਵਿਨ੍ਦੇ ਹਦਯਸ੍ਸ ਸਨ੍ਤਿ’’ਨ੍ਤਿ.

ਤਤ੍ਥ ਅਕਿਲਾਸੁਨੋਤਿ ਨਿਕ੍ਕੋਸਜ੍ਜਾ ਆਰਦ੍ਧਵੀਰਿਯਾ. ਵਣ੍ਣੁਪਥੇਤਿ ਵਣ੍ਣੁ ਵੁਚ੍ਚਤਿ ਵਾਲੁਕਾ, ਵਾਲੁਕਾਮਗ੍ਗੇਤਿ ਅਤ੍ਥੋ. ਖਣਨ੍ਤਾਤਿ ਭੂਮਿਂ ਖਣਮਾਨਾ. ਉਦਙ੍ਗਣੇਤਿ ਏਤ੍ਥ ਉਦਾਤਿ ਨਿਪਾਤੋ, ਅਙ੍ਗਣੇਤਿ ਮਨੁਸ੍ਸਾਨਂ ਸਞ੍ਚਰਣਟ੍ਠਾਨੇ, ਅਨਾਵਾਟੇ ਭੂਮਿਭਾਗੇਤਿ ਅਤ੍ਥੋ. ਤਤ੍ਥਾਤਿ ਤਸ੍ਮਿਂ ਵਣ੍ਣੁਪਥੇ. ਪਪਂ ਅਵਿਨ੍ਦੁਨ੍ਤਿ ਉਦਕਂ ਪਟਿਲਭਿਂਸੁ. ਉਦਕਞ੍ਹਿ ਪਪੀਯਨਭਾਵੇਨ ‘‘ਪਪਾ’’ਤਿ ਵੁਚ੍ਚਤਿ. ਪਵਦ੍ਧਂ ਵਾ ਆਪਂ ਪਪਂ, ਮਹੋਦਕਨ੍ਤਿ ਅਤ੍ਥੋ.

ਏਵਨ੍ਤਿ ਓਪਮ੍ਮਪਟਿਪਾਦਨਂ. ਮੁਨੀਤਿ ਮੋਨਂ ਵੁਚ੍ਚਤਿ ਞਾਣਂ, ਕਾਯਮੋਨੇਯ੍ਯਾਦੀਸੁ ਵਾ ਅਞ੍ਞਤਰਂ, ਤੇਨ ਸਮਨ੍ਨਾਗਤਤ੍ਤਾ ਪੁਗ੍ਗਲੋ ‘‘ਮੁਨੀ’’ਤਿ ਵੁਚ੍ਚਤਿ. ਸੋ ਪਨੇਸ ਅਗਾਰਿਯਮੁਨਿ, ਅਨਗਾਰਿਯਮੁਨਿ, ਸੇਕ੍ਖਮੁਨਿ, ਅਸੇਕ੍ਖਮੁਨਿ, ਪਚ੍ਚੇਕਬੁਦ੍ਧਮੁਨਿ, ਮੁਨਿਮੁਨੀਤਿ ਅਨੇਕਵਿਧੋ. ਤਤ੍ਥ ਅਗਾਰਿਯਮੁਨੀਤਿ ਗਿਹੀ ਆਗਤਫਲੋ ਵਿਞ੍ਞਾਤਸਾਸਨੋ. ਅਨਗਾਰਿਯਮੁਨੀਤਿ ਤਥਾਰੂਪੋਵ ਪਬ੍ਬਜਿਤੋ. ਸੇਕ੍ਖਮੁਨੀਤਿ ਸਤ੍ਤ ਸੇਕ੍ਖਾ. ਅਸੇਕ੍ਖਮੁਨੀਤਿ ਖੀਣਾਸਵੋ. ਪਚ੍ਚੇਕਬੁਦ੍ਧਮੁਨੀਤਿ ਪਚ੍ਚੇਕਸਮ੍ਬੁਦ੍ਧੋ. ਮੁਨਿਮੁਨੀਤਿ ਸਮ੍ਮਾਸਮ੍ਬੁਦ੍ਧੋ. ਇਮਸ੍ਮਿਂ ਪਨਤ੍ਥੇ ਸਬ੍ਬਸਙ੍ਗਾਹਕਵਸੇਨ ਮੋਨੇਯ੍ਯਸਙ੍ਖਾਤਾਯ ਪਞ੍ਞਾਯ ਸਮਨ੍ਨਾਗਤੋ ‘‘ਮੁਨੀ’’ਤਿ ਵੇਦਿਤਬ੍ਬੋ. ਵੀਰਿਯਬਲੂਪਪਨ੍ਨੋਤਿ ਵੀਰਿਯੇਨ ਚੇਵ ਕਾਯਬਲਞਾਣਬਲੇਨ ਚ ਸਮਨ੍ਨਾਗਤੋ. ਅਕਿਲਾਸੂਤਿ ਨਿਕ੍ਕੋਸਜ੍ਜੋ –

‘‘ਕਾਮਂ ਤਚੋ ਚ ਨ੍ਹਾਰੁ ਚ, ਅਟ੍ਠਿ ਚ ਅਵਸਿਸ੍ਸਤੁ;

ਉਪਸੁਸ੍ਸਤੁ ਨਿਸ੍ਸੇਸਂ, ਸਰੀਰੇ ਮਂਸਲੋਹਿਤ’’ਨ੍ਤਿ. –

ਏਵਂ ਵੁਤ੍ਤੇਨ ਚਤੁਰਙ੍ਗਸਮਨ੍ਨਾਗਤੇਨ ਵੀਰਿਯੇਨ ਸਮਨ੍ਨਾਗਤਤ੍ਤਾ ਅਨਲਸੋ. ਵਿਨ੍ਦੇ ਹਦਯਸ੍ਸ ਸਨ੍ਤਿਨ੍ਤਿ ਚਿਤ੍ਤਸ੍ਸਪਿ ਹਦਯਰੂਪਸ੍ਸਪਿ ਸੀਤਲਭਾਵਕਰਣੇਨ ‘‘ਸਨ੍ਤਿ’’ਨ੍ਤਿ ਸਙ੍ਖਂ ਗਤਂ ਝਾਨਵਿਪਸ੍ਸਨਾਭਿਞ੍ਞਾਅਰਹਤ੍ਤਮਗ੍ਗਞਾਣਸਙ੍ਖਾਤਂ ਅਰਿਯਧਮ੍ਮਂ ਵਿਨ੍ਦਤਿ ਪਟਿਲਭਤੀਤਿ ਅਤ੍ਥੋ. ਭਗਵਤਾ ਹਿ –

‘‘ਦੁਕ੍ਖਂ, ਭਿਕ੍ਖਵੇ, ਕੁਸੀਤੋ ਵਿਹਰਤਿ ਵੋਕਿਣ੍ਣੋ ਪਾਪਕੇਹਿ ਅਕੁਸਲੇਹਿ ਧਮ੍ਮੇਹਿ, ਮਹਨ੍ਤਞ੍ਚ ਸਦਤ੍ਥਂ ਪਰਿਹਾਪੇਤਿ. ਆਰਦ੍ਧਵੀਰਿਯੋ ਚ ਖੋ, ਭਿਕ੍ਖਵੇ, ਸੁਖਂ ਵਿਹਰਤਿ ਪਵਿਵਿਤ੍ਤੋ ਪਾਪਕੇਹਿ ਅਕੁਸਲੇਹਿ ਧਮ੍ਮੇਹਿ, ਮਹਨ੍ਤਞ੍ਚ ਸਦਤ੍ਥਂ ਪਰਿਪੂਰੇਤਿ, ਨ, ਭਿਕ੍ਖਵੇ, ਹੀਨੇਨ ਅਗ੍ਗਸ੍ਸ ਪਤ੍ਤਿ ਹੋਤੀ’’ਤਿ (ਸਂ. ਨਿ. ੨.੨੨) –

ਏਵਂ ਅਨੇਕੇਹਿ ਸੁਤ੍ਤੇਹਿ ਕੁਸੀਤਸ੍ਸ ਦੁਕ੍ਖਵਿਹਾਰੋ, ਆਰਦ੍ਧਵੀਰਿਯਸ੍ਸ ਚ ਸੁਖਵਿਹਾਰੋ ਸਂਵਣ੍ਣਿਤੋ. ਇਧਾਪਿ ਆਰਦ੍ਧਵੀਰਿਯਸ੍ਸ ਅਕਤਾਭਿਨਿਵੇਸਸ੍ਸ ਵਿਪਸ੍ਸਕਸ੍ਸ ਵੀਰਿਯਬਲੇਨ ਅਧਿਗਨ੍ਤਬ੍ਬਂ ਤਮੇਵ ਸੁਖਵਿਹਾਰਂ ਦਸ੍ਸੇਨ੍ਤੋ ‘‘ਏਵਂ ਮੁਨੀ ਵੀਰਿਯਬਲੂਪਪਨ੍ਨੋ, ਅਕਿਲਾਸੁ ਵਿਨ੍ਦੇ ਹਦਯਸ੍ਸ ਸਨ੍ਤਿ’’ਨ੍ਤਿ ਆਹ. ਇਦਂ ਵੁਤ੍ਤਂ ਹੋਤਿ – ਯਥਾ ਤੇ ਵਾਣਿਜਾ ਅਕਿਲਾਸੁਨੋ ਵਣ੍ਣੁਪਥੇ ਖਣਨ੍ਤਾ ਉਦਕਂ ਲਭਿਂਸੁ, ਏਵਂ ਇਮਸ੍ਮਿਮ੍ਪਿ ਸਾਸਨੇ ਅਕਿਲਾਸੁ ਹੁਤ੍ਵਾ ਵਾਯਮਮਾਨੋ ਪਣ੍ਡਿਤੋ ਭਿਕ੍ਖੁ ਇਮਂ ਝਾਨਾਦਿਭੇਦਂ ਹਦਯਸ੍ਸ ਸਨ੍ਤਿਂ ਲਭਤਿ. ਸੋ ਤ੍ਵਂ ਭਿਕ੍ਖੁ ਪੁਬ੍ਬੇ ਉਦਕਮਤ੍ਤਸ੍ਸ ਅਤ੍ਥਾਯ ਵੀਰਿਯਂ ਕਤ੍ਵਾ ਇਦਾਨਿ ਏਵਰੂਪੇ ਮਗ੍ਗਫਲਦਾਯਕੇ ਨਿਯ੍ਯਾਨਿਕਸਾਸਨੇ ਕਸ੍ਮਾ ਵੀਰਿਯਂ ਓਸ੍ਸਜਸੀਤਿ ਏਵਂ ਇਮਂ ਧਮ੍ਮਦੇਸਨਂ ਦਸ੍ਸੇਤ੍ਵਾ ਚਤ੍ਤਾਰਿ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਓਸ੍ਸਟ੍ਠਵੀਰਿਯੋ ਭਿਕ੍ਖੁ ਅਗ੍ਗਫਲੇ ਅਰਹਤ੍ਤੇ ਪਤਿਟ੍ਠਾਸਿ.

ਸਤ੍ਥਾਪਿ ਦ੍ਵੇ ਵਤ੍ਥੂਨਿ ਕਥੇਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਤ੍ਵਾ ਦਸ੍ਸੇਸਿ ‘‘ਤਸ੍ਮਿਂ ਸਮਯੇ ਵੀਰਿਯਂ ਅਨੋਸ੍ਸਜਿਤ੍ਵਾ ਪਾਸਾਣਂ ਭਿਨ੍ਦਿਤ੍ਵਾ ਮਹਾਜਨਸ੍ਸ ਉਦਕਦਾਯਕੋ ਚੂਲ਼ੁਪਟ੍ਠਾਕੋ ਅਯਂ ਓਸ੍ਸਟ੍ਠਵੀਰਿਯੋ ਭਿਕ੍ਖੁ ਅਹੋਸਿ, ਅਵਸੇਸਪਰਿਸਾ ਇਦਾਨਿ ਬੁਦ੍ਧਪਰਿਸਾ ਜਾਤਾ, ਸਤ੍ਥਵਾਹਜੇਟ੍ਠਕੋ ਪਨ ਅਹਮੇਵ ਅਹੋਸਿ’’ਨ੍ਤਿ ਦੇਸਨਂ ਨਿਟ੍ਠਾਪੇਸਿ.

ਵਣ੍ਣੁਪਥਜਾਤਕਵਣ੍ਣਨਾ ਦੁਤਿਯਾ.

੩. ਸੇਰਿਵਵਾਣਿਜਜਾਤਕਵਣ੍ਣਨਾ

ਇਧ ਚੇ ਨਂ ਵਿਰਾਧੇਸੀਤਿ ਇਮਮ੍ਪਿ ਧਮ੍ਮਦੇਸਨਂ ਭਗਵਾ ਸਾਵਤ੍ਥਿਯਂ ਵਿਹਰਨ੍ਤੋ ਏਕਂ ਓਸ੍ਸਟ੍ਠਵੀਰਿਯਮੇਵ ਭਿਕ੍ਖੁਂ ਆਰਬ੍ਭ ਕਥੇਸਿ. ਤਞ੍ਹਿ ਪੁਰਿਮਨਯੇਨੇਵ ਭਿਕ੍ਖੂਹਿ ਆਨੀਤਂ ਦਿਸ੍ਵਾ ਸਤ੍ਥਾ ਆਹ – ‘‘ਤ੍ਵਂ ਭਿਕ੍ਖੁ, ਏਵਰੂਪੇ ਮਗ੍ਗਫਲਦਾਯਕੇ ਸਾਸਨੇ ਪਬ੍ਬਜਿਤ੍ਵਾ ਵੀਰਿਯਂ ਓਸ੍ਸਜਨ੍ਤੋ ਸਤਸਹਸ੍ਸਗ੍ਘਨਿਕਾਯ ਕਞ੍ਚਨਪਾਤਿਯਾ ਪਰਿਹੀਨੋ ਸੇਰਿਵਵਾਣਿਜੋ ਵਿਯ ਚਿਰਂ ਸੋਚਿਸ੍ਸਸੀ’’ਤਿ. ਭਿਕ੍ਖੂ ਤਸ੍ਸਤ੍ਥਸ੍ਸ ਆਵਿਭਾਵਤ੍ਥਂ ਭਗਵਨ੍ਤਂ ਯਾਚਿਂਸੁ, ਭਗਵਾ ਭਵਨ੍ਤਰੇਨ ਪਟਿਚ੍ਛਨ੍ਨਕਾਰਣਂ ਪਾਕਟਮਕਾਸਿ.

ਅਤੀਤੇ ਇਤੋ ਪਞ੍ਚਮੇ ਕਪ੍ਪੇ ਬੋਧਿਸਤ੍ਤੋ ਸੇਰਿਵਰਟ੍ਠੇ ਕਚ੍ਛਪੁਟਵਾਣਿਜੋ ਅਹੋਸਿ. ਸੋ ਸੇਰਿਵਨਾਮਕੇਨ ਏਕੇਨ ਲੋਲਕਚ੍ਛਪੁਟਵਾਣਿਜੇਨ ਸਦ੍ਧਿਂ ਵੋਹਾਰਤ੍ਥਾਯ ਗਚ੍ਛਨ੍ਤੋ ਨੀਲਵਾਹਂ ਨਾਮ ਨਦਿਂ ਉਤ੍ਤਰਿਤ੍ਵਾ ਅਰਿਟ੍ਠਪੁਰਂ ਨਾਮ ਨਗਰਂ ਪਵਿਸਨ੍ਤੋ ਨਗਰਵੀਥਿਯੋ ਭਾਜੇਤ੍ਵਾ ਅਤ੍ਤਨੋ ਪਤ੍ਤਵੀਥਿਯਾ ਭਣ੍ਡਂ ਵਿਕ੍ਕਿਣਨ੍ਤੋ ਵਿਚਰਿ. ਇਤਰੋਪਿ ਅਤ੍ਤਨੋ ਪਤ੍ਤਵੀਥਿਂ ਗਣ੍ਹਿ. ਤਸ੍ਮਿਞ੍ਚ ਨਗਰੇ ਏਕਂ ਸੇਟ੍ਠਿਕੁਲਂ ਪਰਿਜਿਣ੍ਣਂ ਅਹੋਸਿ, ਸਬ੍ਬੇ ਪੁਤ੍ਤਭਾਤਿਕਾ ਚ ਧਨਞ੍ਚ ਪਰਿਕ੍ਖਯਂ ਅਗਮਂਸੁ, ਏਕਾ ਦਾਰਿਕਾ ਅਯ੍ਯਿਕਾਯ ਸਦ੍ਧਿਂ ਅਵਸੇਸਾ ਅਹੋਸਿ, ਤਾ ਦ੍ਵੇਪਿ ਪਰੇਸਂ ਭਤਿਂ ਕਤ੍ਵਾ ਜੀਵਨ੍ਤਿ. ਗੇਹੇ ਪਨ ਤਾਸਂ ਮਹਾਸੇਟ੍ਠਿਨਾ ਪਰਿਭੁਤ੍ਤਪੁਬ੍ਬਾ ਸੁਵਣ੍ਣਪਾਤਿ ਭਾਜਨਨ੍ਤਰੇ ਨਿਕ੍ਖਿਤ੍ਤਾ ਦੀਘਰਤ੍ਤਂ ਅਵਲਞ੍ਜਿਯਮਾਨਾ ਮਲਗ੍ਗਹਿਤਾ ਅਹੋਸਿ, ਤਾ ਤਸ੍ਸਾ ਸੁਵਣ੍ਣਪਾਤਿਭਾਵਮ੍ਪਿ ਨ ਜਾਨਨ੍ਤਿ. ਸੋ ਲੋਲਵਾਣਿਜੋ ਤਸ੍ਮਿਂ ਸਮਯੇ ‘‘ਮਣਿਕੇ ਗਣ੍ਹਥ, ਮਣਿਕੇ ਗਣ੍ਹਥਾ’’ਤਿ ਵਿਚਰਨ੍ਤੋ ਤਂ ਘਰਦ੍ਵਾਰਂ ਪਾਪੁਣਿ. ਸਾ ਕੁਮਾਰਿਕਾ ਤਂ ਦਿਸ੍ਵਾ ਅਯ੍ਯਿਕਂ ਆਹ ‘‘ਅਮ੍ਮ ਮਯ੍ਹਂ ਏਕਂ ਪਿਲ਼ਨ੍ਧਨਂ ਗਣ੍ਹਾ’’ਤਿ. ਅਮ੍ਮ ਮਯਂ ਦੁਗ੍ਗਤਾ, ਕਿਂ ਦਤ੍ਵਾ ਗਣ੍ਹਿਸ੍ਸਾਮਾਤਿ. ਅਯਂ ਨੋ ਪਾਤਿ ਅਤ੍ਥਿ, ਨੋ ਚ ਅਮ੍ਹਾਕਂ ਉਪਕਾਰਾ, ਇਮਂ ਦਤ੍ਵਾ ਗਣ੍ਹਾਤਿ. ਸਾ ਵਾਣਿਜਂ ਪਕ੍ਕੋਸਾਪੇਤ੍ਵਾ ਆਸਨੇ ਨਿਸੀਦਾਪੇਤ੍ਵਾ ਤਂ ਪਾਤਿਂ ਦਤ੍ਵਾ ‘‘ਅਯ੍ਯ, ਇਮਂ ਗਹੇਤ੍ਵਾ ਤਵ ਭਗਿਨਿਯਾ ਕਿਞ੍ਚਿਦੇਵ ਦੇਹੀ’’ਤਿ ਆਹ. ਵਾਣਿਜੋ ਪਾਤਿਂ ਹਤ੍ਥੇਨ ਗਹੇਤ੍ਵਾਵ ‘‘ਸੁਵਣ੍ਣਪਾਤਿ ਭਵਿਸ੍ਸਤੀ’’ਤਿ ਪਰਿਵਤ੍ਤੇਤ੍ਵਾ ਪਾਤਿਪਿਟ੍ਠਿਯਂ ਸੂਚਿਯਾ ਲੇਖਂ ਕਡ੍ਢਿਤ੍ਵਾ ਸੁਵਣ੍ਣਭਾਵਂ ਞਤ੍ਵਾ ‘‘ਇਮਾਸਂ ਕਿਞ੍ਚਿ ਅਦਤ੍ਵਾਵ ਇਮਂ ਪਾਤਿਂ ਹਰਿਸ੍ਸਾਮੀ’’ਤਿ ‘‘ਅਯਂ ਕਿਂ ਅਗ੍ਘਤਿ, ਅਡ੍ਢਮਾਸਕੋਪਿਸ੍ਸਾ ਮੂਲਂ ਨ ਹੋਤੀ’’ਤਿ ਭੂਮਿਯਂ ਖਿਪਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਏਕੇਨ ਪਵਿਸਿਤ੍ਵਾ ਨਿਕ੍ਖਨ੍ਤਵੀਥਿਂ ਇਤਰੋ ਪਵਿਸਿਤੁਂ ਲਭਤੀਤਿ ਬੋਧਿਸਤ੍ਤੋ ਤਂ ਵੀਥਿਂ ਪਵਿਸਿਤ੍ਵਾ ‘‘ਮਣਿਕੇ ਗਣ੍ਹਥ, ਮਣਿਕੇ ਗਣ੍ਹਥਾ’’ਤਿ ਵਿਚਰਨ੍ਤੋ ਤਮੇਵ ਘਰਦ੍ਵਾਰਂ ਪਾਪੁਣਿ.

ਪੁਨ ਸਾ ਕੁਮਾਰਿਕਾ ਤਥੇਵ ਅਯ੍ਯਿਕਂ ਆਹ. ਅਥ ਨਂ ਅਯ੍ਯਿਕਾ ‘‘ਅਮ੍ਮ, ਪਠਮਂ ਆਗਤਵਾਣਿਜੋ ਪਾਤਿਂ ਭੂਮਿਯਂ ਖਿਪਿਤ੍ਵਾ ਗਤੋ, ਇਦਾਨਿ ਕਿਂ ਦਤ੍ਵਾ ਗਣ੍ਹਿਸ੍ਸਾਮਾ’’ਤਿ ਆਹ. ਅਮ੍ਮ, ਸੋ ਵਾਣਿਜੋ ਫਰੁਸਵਾਚੋ, ਅਯਂ ਪਨ ਪਿਯਦਸ੍ਸਨੋ ਮੁਦੁਸਲ੍ਲਾਪੋ, ਅਪ੍ਪੇਵ ਨਾਮ ਨਂ ਗਣ੍ਹੇਯ੍ਯਾਤਿ. ਅਮ੍ਮ, ਤੇਨ ਹਿ ਪਕ੍ਕੋਸਾਹੀਤਿ. ਸਾ ਤਂ ਪਕ੍ਕੋਸਿ. ਅਥਸ੍ਸ ਗੇਹਂ ਪਵਿਸਿਤ੍ਵਾ ਨਿਸਿਨ੍ਨਸ੍ਸ ਤਂ ਪਾਤਿਂ ਅਦਂਸੁ. ਸੋ ਤਸ੍ਸਾ ਸੁਵਣ੍ਣਪਾਤਿਭਾਵਂ ਞਤ੍ਵਾ ‘‘ਅਮ੍ਮ, ਅਯਂ ਪਾਤਿ ਸਤਸਹਸ੍ਸਂ ਅਗ੍ਘਤਿ, ਸਤਸਹਸ੍ਸਗ੍ਘਨਕਭਣ੍ਡਂ ਮਯ੍ਹਂ ਹਤ੍ਥੇ ਨਤ੍ਥੀ’’ਤਿ ਆਹ. ਅਯ੍ਯ, ਪਠਮਂ ਆਗਤਵਾਣਿਜੋ ‘‘ਅਯਂ ਅਡ੍ਢਮਾਸਕਮ੍ਪਿ ਨ ਅਗ੍ਘਤੀ’’ਤਿ ਵਤ੍ਵਾ ਭੂਮਿਯਂ ਖਿਪਿਤ੍ਵਾ ਗਤੋ, ਅਯਂ ਪਨ ਤਵ ਪੁਞ੍ਞੇਨ ਸੁਵਣ੍ਣਪਾਤਿ ਜਾਤਾ ਭਵਿਸ੍ਸਤਿ, ਮਯਂ ਇਮਂ ਤੁਯ੍ਹਂ ਦੇਮ, ਕਿਞ੍ਚਿਦੇਵ ਨੋ ਦਤ੍ਵਾ ਇਮਂ ਗਹੇਤ੍ਵਾ ਯਾਹੀਤਿ. ਬੋਧਿਸਤ੍ਤੋ ਤਸ੍ਮਿਂ ਖਣੇ ਹਤ੍ਥਗਤਾਨਿ ਪਞ੍ਚ ਕਹਾਪਣਸਤਾਨਿ ਪਞ੍ਚਸਤਗ੍ਘਨਕਞ੍ਚ ਭਣ੍ਡਂ ਸਬ੍ਬਂ ਦਤ੍ਵਾ ‘‘ਮਯ੍ਹਂ ਇਮਂ ਤੁਲਞ੍ਚ ਪਸਿਬ੍ਬਕਞ੍ਚ ਅਟ੍ਠ ਚ ਕਹਾਪਣੇ ਦੇਥਾ’’ਤਿ ਏਤ੍ਤਕਂ ਯਾਚਿਤ੍ਵਾ ਆਦਾਯ ਪਕ੍ਕਾਮਿ. ਸੋ ਸੀਘਮੇਵ ਨਦੀਤੀਰਂ ਗਨ੍ਤ੍ਵਾ ਨਾਵਿਕਸ੍ਸ ਅਟ੍ਠ ਕਹਾਪਣੇ ਦਤ੍ਵਾ ਨਾਵਂ ਅਭਿਰੁਹਿ.

ਤਤੋ ਲੋਲਵਾਣਿਜੋਪਿ ਪੁਨ ਤਂ ਗੇਹਂ ਗਨ੍ਤ੍ਵਾ ‘‘ਆਹਰਥ ਤਂ ਪਾਤਿਂ, ਤੁਮ੍ਹਾਕਂ ਕਿਞ੍ਚਿਦੇਵ ਦਸ੍ਸਾਮੀ’’ਤਿ ਆਹ. ਸਾ ਤਂ ਪਰਿਭਾਸਿਤ੍ਵਾ ‘‘ਤ੍ਵਂ ਅਮ੍ਹਾਕਂ ਸਤਸਹਸ੍ਸਗ੍ਘਨਿਕਂ ਸੁਵਣ੍ਣਪਾਤਿਂ ਅਡ੍ਢਮਾਸਗ੍ਘਨਿਕਮ੍ਪਿ ਨ ਅਕਾਸਿ, ਤੁਯ੍ਹਂ ਪਨ ਸਾਮਿਕਸਦਿਸੋ ਏਕੋ ਧਮ੍ਮਿਕੋ ਵਾਣਿਜੋ ਅਮ੍ਹਾਕਂ ਸਹਸ੍ਸਂ ਦਤ੍ਵਾ ਤਂ ਆਦਾਯ ਗਤੋ’’ਤਿ ਆਹ. ਤਂ ਸੁਤ੍ਵਾਵ ‘‘ਸਤਸਹਸ੍ਸਗ੍ਘਨਿਕਾਯ ਸੁਵਣ੍ਣਪਾਤਿਯਾ ਪਰਿਹੀਨੋਮ੍ਹਿ, ਮਹਾਜਾਨਿਕਰੋ ਵਤ ਮੇ ਅਯ’’ਨ੍ਤਿ ਸਞ੍ਜਾਤਬਲਵਸੋਕੋ ਸਤਿਂ ਪਚ੍ਚੁਪਟ੍ਠਾਪੇਤੁਂ ਅਸਕ੍ਕੋਨ੍ਤੋ ਵਿਸਞ੍ਞੀ ਹੁਤ੍ਵਾ ਅਤ੍ਤਨੋ ਹਤ੍ਥਗਤੇ ਕਹਾਪਣੇ ਚੇਵ ਭਣ੍ਡਿਕਞ੍ਚ ਘਰਦ੍ਵਾਰੇਯੇਵ ਵਿਕਿਰਿਤ੍ਵਾ ਨਿਵਾਸਨਪਾਰੁਪਨਂ ਪਹਾਯ ਤੁਲਾਦਣ੍ਡਂ ਮੁਗ੍ਗਰਂ ਕਤ੍ਵਾ ਆਦਾਯ ਬੋਧਿਸਤ੍ਤਸ੍ਸ ਅਨੁਪਦਂ ਪਕ੍ਕਨ੍ਤੋ ਨਦੀਤੀਰਂ ਗਨ੍ਤ੍ਵਾ ਬੋਧਿਸਤ੍ਤਂ ਗਚ੍ਛਨ੍ਤਂ ਦਿਸ੍ਵਾ ‘‘ਅਮ੍ਭੋ, ਨਾਵਿਕ, ਨਾਵਂ ਨਿਵਤ੍ਤੇਹੀ’’ਤਿ ਆਹ. ਬੋਧਿਸਤ੍ਤੋ ਪਨ ‘‘ਤਾਤ, ਮਾ ਨਿਵਤ੍ਤਯੀ’’ਤਿ ਪਟਿਸੇਧੇਸਿ. ਇਤਰਸ੍ਸਪਿ ਬੋਧਿਸਤ੍ਤਂ ਗਚ੍ਛਨ੍ਤਂ ਪਸ੍ਸਨ੍ਤਸ੍ਸੇਵ ਬਲਵਸੋਕੋ ਉਦਪਾਦਿ, ਹਦਯਂ ਉਣ੍ਹਂ ਅਹੋਸਿ, ਮੁਖਤੋ ਲੋਹਿਤਂ ਉਗ੍ਗਞ੍ਛਿ, ਵਾਪਿਕਦ੍ਦਮੋ ਵਿਯ ਹਦਯਂ ਫਲਿ. ਸੋ ਬੋਧਿਸਤ੍ਤੇ ਆਘਾਤਂ ਬਨ੍ਧਿਤ੍ਵਾ ਤਤ੍ਥੇਵ ਜੀਵਿਤਕ੍ਖਯਂ ਪਾਪੁਣਿ. ਇਦਂ ਪਠਮਂ ਦੇਵਦਤ੍ਤਸ੍ਸ ਬੋਧਿਸਤ੍ਤੇ ਆਘਾਤਬਨ੍ਧਨਂ. ਬੋਧਿਸਤ੍ਤੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਮ੍ਮਾਸਮ੍ਬੁਦ੍ਧੋ ਇਮਂ ਧਮ੍ਮਦੇਸਨਂ ਕਥੇਤ੍ਵਾ ਅਭਿਸਮ੍ਬੁਦ੍ਧੋਵ ਇਮਂ ਗਾਥਂ ਕਥੇਸਿ –

੩. ‘‘ਇਧ ਚੇ ਨਂ ਵਿਰਾਧੇਸਿ, ਸਦ੍ਧਮ੍ਮਸ੍ਸ ਨਿਯਾਮਤਂ;

ਚਿਰਂ ਤ੍ਵਂ ਅਨੁਤਪ੍ਪੇਸਿ, ਸੇਰਿਵਾਯਂਵ ਵਾਣਿਜੋ’’ਤਿ.

ਤਤ੍ਥ ਇਧ ਚੇ ਨਂ ਵਿਰਾਧੇਸਿ, ਸਦ੍ਧਮ੍ਮਸ੍ਸ ਨਿਯਾਮਤਨ੍ਤਿ ਇਮਸ੍ਮਿਂ ਸਾਸਨੇ ਏਤਂ ਸਦ੍ਧਮ੍ਮਸ੍ਸ ਨਿਯਾਮਤਾਸਙ੍ਖਾਤਂ ਸੋਤਾਪਤ੍ਤਿਮਗ੍ਗਂ ਵਿਰਾਧੇਸਿ. ਯਦਿ ਵਿਰਾਧੇਸਿ, ਵੀਰਿਯਂ ਓਸ੍ਸਜਨ੍ਤੋ ਨਾਧਿਗਚ੍ਛਸਿ ਨ ਪਟਿਲਭਸੀਤਿ ਅਤ੍ਥੋ. ਚਿਰਂ ਤ੍ਵਂ ਅਨੁਤਪ੍ਪੇਸੀਤਿ ਏਵਂ ਸਨ੍ਤੇ ਤ੍ਵਂ ਦੀਘਮਦ੍ਧਾਨਂ ਸੋਚਨ੍ਤੋ ਪਰਿਦੇਵਨ੍ਤੋ ਅਨੁਤਪੇਸ੍ਸਸਿ, ਅਥ ਵਾ ਓਸ੍ਸਟ੍ਠਵੀਰਿਯਤਾਯ ਅਰਿਯਮਗ੍ਗਸ੍ਸ ਵਿਰਾਧਿਤਤ੍ਤਾ ਦੀਘਰਤ੍ਤਂ ਨਿਰਯਾਦੀਸੁ ਉਪ੍ਪਨ੍ਨੋ ਨਾਨਪ੍ਪਕਾਰਾਨਿ ਦੁਕ੍ਖਾਨਿ ਅਨੁਭਵਨ੍ਤੋ ਅਨੁਤਪ੍ਪਿਸ੍ਸਸਿ ਕਿਲਮਿਸ੍ਸਸੀਤਿ ਅਯਮੇਤ੍ਥ ਅਤ੍ਥੋ. ਕਥਂ? ਸੇਰਿਵਾਯਂਵ ਵਾਣਿਜੋਤਿ ‘‘ਸੇਰਿਵਾ’’ਤਿ ਏਵਂਨਾਮਕੋ ਅਯਂ ਵਾਣਿਜੋ ਯਥਾ. ਇਦਂ ਵੁਤ੍ਤਂ ਹੋਤਿ – ਯਥਾ ਪੁਬ੍ਬੇ ਸੇਰਿਵਨਾਮਕੋ ਵਾਣਿਜੋ ਸਤਸਹਸ੍ਸਗ੍ਘਨਿਕਂ ਸੁਵਣ੍ਣਪਾਤਿਂ ਲਭਿਤ੍ਵਾ ਤਸ੍ਸਾ ਗਹਣਤ੍ਥਾਯ ਵੀਰਿਯਂ ਅਕਤ੍ਵਾ ਤਤੋ ਪਰਿਹੀਨੋ ਅਨੁਤਪ੍ਪਿ, ਏਵਮੇਵ ਤ੍ਵਮ੍ਪਿ ਇਮਸ੍ਮਿਂ ਸਾਸਨੇ ਪਟਿਯਤ੍ਤਸੁਵਣ੍ਣਪਾਤਿਸਦਿਸਂ ਅਰਿਯਮਗ੍ਗਂ ਓਸ੍ਸਟ੍ਠਵੀਰਿਯਤਾਯ ਅਨਧਿਗਚ੍ਛਨ੍ਤੋ ਤਤੋ ਪਰਿਹੀਨੋ ਦੀਘਰਤ੍ਤਂ ਅਨੁਤਪ੍ਪਿਸ੍ਸਸਿ. ਸਚੇ ਪਨ ਵੀਰਿਯਂ ਨ ਓਸ੍ਸਜਿਸ੍ਸਸਿ, ਪਣ੍ਡਿਤਵਾਣਿਜੋ ਸੁਵਣ੍ਣਪਾਤਿਂ ਵਿਯ ਮਮ ਸਾਸਨੇ ਨਵਵਿਧਮ੍ਪਿ ਲੋਕੁਤ੍ਤਰਧਮ੍ਮਂ ਪਟਿਲਭਿਸ੍ਸਸੀਤਿ.

ਏਵਮਸ੍ਸ ਸਤ੍ਥਾ ਅਰਹਤ੍ਤੇਨ ਕੂਟਂ ਗਣ੍ਹਨ੍ਤੋ ਇਮਂ ਧਮ੍ਮਦੇਸਨਂ ਦਸ੍ਸੇਤ੍ਵਾ ਚਤ੍ਤਾਰਿ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਓਸ੍ਸਟ੍ਠਵੀਰਿਯੋ ਭਿਕ੍ਖੁ ਅਗ੍ਗਫਲੇ ਅਰਹਤ੍ਤੇ ਪਤਿਟ੍ਠਾਸਿ.

ਸਤ੍ਥਾਪਿ ਦ੍ਵੇ ਵਤ੍ਥੂਨਿ ਕਥੇਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਤ੍ਵਾ ਦਸ੍ਸੇਸਿ – ‘‘ਤਦਾ ਬਾਲਵਾਣਿਜੋ ਦੇਵਦਤ੍ਤੋ ਅਹੋਸਿ, ਪਣ੍ਡਿਤਵਾਣਿਜੋ ਪਨ ਅਹਮੇਵ ਅਹੋਸਿ’’ਨ੍ਤਿ ਦੇਸਨਂ ਨਿਟ੍ਠਾਪੇਸਿ.

ਸੇਰਿਵਵਾਣਿਜਜਾਤਕਵਣ੍ਣਨਾ ਤਤਿਯਾ.

੪. ਚੂਲ਼ਸੇਟ੍ਠਿਜਾਤਕਵਣ੍ਣਨਾ

ਅਪ੍ਪਕੇਨਪਿ ਮੇਧਾਵੀਤਿ ਇਮਂ ਧਮ੍ਮਦੇਸਨਂ ਭਗਵਾ ਰਾਜਗਹਂ ਉਪਨਿਸ੍ਸਾਯ ਜੀਵਕਮ੍ਬਵਨੇ ਵਿਹਰਨ੍ਤੋ ਚੂਲ਼ਪਨ੍ਥਕਤ੍ਥੇਰਂ ਆਰਬ੍ਭ ਕਥੇਸਿ.

ਤਤ੍ਥ ਚੂਲ਼ਪਨ੍ਥਕਸ੍ਸ ਤਾਵ ਨਿਬ੍ਬਤ੍ਤਿ ਕਥੇਤਬ੍ਬਾ. ਰਾਜਗਹੇ ਕਿਰ ਧਨਸੇਟ੍ਠਿਕੁਲਸ੍ਸ ਧੀਤਾ ਅਤ੍ਤਨੋ ਦਾਸੇਨੇਵ ਸਦ੍ਧਿਂ ਸਨ੍ਥਵਂ ਕਤ੍ਵਾ ‘‘ਅਞ੍ਞੇਪਿ ਮੇ ਇਮਂ ਕਮ੍ਮਂ ਜਾਨੇਯ੍ਯੁ’’ਨ੍ਤਿ ਭੀਤਾ ਏਵਮਾਹ ‘‘ਅਮ੍ਹੇਹਿ ਇਮਸ੍ਮਿਂ ਠਾਨੇ ਵਸਿਤੁਂ ਨ ਸਕ੍ਕਾ, ਸਚੇ ਮੇ ਮਾਤਾਪਿਤਰੋ ਇਮਂ ਦੋਸਂ ਜਾਨਿਸ੍ਸਨ੍ਤਿ, ਖਣ੍ਡਾਖਣ੍ਡਂ ਕਰਿਸ੍ਸਨ੍ਤਿ, ਵਿਦੇਸਂ ਗਨ੍ਤ੍ਵਾ ਵਸਿਸ੍ਸਾਮਾ’’ਤਿ ਹਤ੍ਥਸਾਰਂ ਗਹੇਤ੍ਵਾ ਅਗ੍ਗਦ੍ਵਾਰੇਨ ਨਿਕ੍ਖਮਿਤ੍ਵਾ ‘‘ਯਤ੍ਥ ਵਾ ਤਤ੍ਥ ਵਾ ਅਞ੍ਞੇਹਿ ਅਜਾਨਨਟ੍ਠਾਨਂ ਗਨ੍ਤ੍ਵਾ ਵਸਿਸ੍ਸਾਮਾ’’ਤਿ ਉਭੋਪਿ ਅਗਮਂਸੁ.

ਤੇਸਂ ਏਕਸ੍ਮਿਂ ਠਾਨੇ ਵਸਨ੍ਤਾਨਂ ਸਂਵਾਸਮਨ੍ਵਾਯ ਤਸ੍ਸਾ ਕੁਚ੍ਛਿਯਂ ਗਬ੍ਭੋ ਪਤਿਟ੍ਠਾਸਿ. ਸਾ ਗਬ੍ਭਪਰਿਪਾਕਂ ਆਗਮ੍ਮ ਸਾਮਿਕੇਨ ਸਦ੍ਧਿਂ ਮਨ੍ਤੇਸਿ ‘‘ਗਬ੍ਭੋ ਮੇ ਪਰਿਪਾਕਂ ਗਤੋ, ਞਾਤਿਬਨ੍ਧੁਵਿਰਹਿਤੇ ਠਾਨੇ ਗਬ੍ਭਵੁਟ੍ਠਾਨਂ ਨਾਮ ਉਭਿਨ੍ਨਮ੍ਪਿ ਅਮ੍ਹਾਕਂ ਦੁਕ੍ਖਮੇਵ, ਕੁਲਗੇਹਮੇਵ ਗਚ੍ਛਾਮਾ’’ਤਿ. ਸੋ ‘‘ਸਚਾਹਂ ਗਮਿਸ੍ਸਾਮਿ, ਜੀਵਿਤਂ ਮੇ ਨਤ੍ਥੀ’’ਤਿ ਚਿਨ੍ਤੇਤ੍ਵਾ ‘‘ਅਜ੍ਜ ਗਚ੍ਛਾਮ, ਸ੍ਵੇ ਗਚ੍ਛਾਮਾ’’ਤਿ ਦਿਵਸੇ ਅਤਿਕ੍ਕਾਮੇਸਿ. ਸਾ ਚਿਨ੍ਤੇਸਿ ‘‘ਅਯਂ ਬਾਲੋ ਅਤ੍ਤਨੋ ਦੋਸਮਹਨ੍ਤਤਾਯ ਗਨ੍ਤੁਂ ਨ ਉਸ੍ਸਹਤਿ, ਮਾਤਾਪਿਤਰੋ ਨਾਮ ਏਕਨ੍ਤਹਿਤਾ, ਅਯਂ ਗਚ੍ਛਤੁ ਵਾ ਮਾ ਵਾ, ਮਯਾ ਗਨ੍ਤੁਂ ਵਟ੍ਟਤੀ’’ਤਿ. ਸਾ ਤਸ੍ਮਿਂ ਗੇਹਾ ਨਿਕ੍ਖਨ੍ਤੇ ਗੇਹਪਰਿਕ੍ਖਾਰਂ ਪਟਿਸਾਮੇਤ੍ਵਾ ਅਤ੍ਤਨੋ ਕੁਲਘਰਂ ਗਤਭਾਵਂ ਅਨਨ੍ਤਰਗੇਹਵਾਸੀਨਂ ਆਰੋਚੇਤ੍ਵਾ ਮਗ੍ਗਂ ਪਟਿਪਜ੍ਜਿ.

ਅਥ ਸੋ ਪੁਰਿਸੋ ਘਰਂ ਆਗਤੋ ਤਂ ਅਦਿਸ੍ਵਾ ਪਟਿਵਿਸ੍ਸਕੇ ਪੁਚ੍ਛਿਤ੍ਵਾ ‘‘ਕੁਲਘਰਂ ਗਤਾ’’ਤਿ ਸੁਤ੍ਵਾ ਵੇਗੇਨ ਅਨੁਬਨ੍ਧਿਤ੍ਵਾ ਅਨ੍ਤਰਾਮਗ੍ਗੇ ਸਮ੍ਪਾਪੁਣਿ. ਤਸ੍ਸਾਪਿ ਤਤ੍ਥੇਵ ਗਬ੍ਭਵੁਟ੍ਠਾਨਂ ਅਹੋਸਿ. ਸੋ ‘‘ਕਿਂ ਇਦਂ ਭਦ੍ਦੇ’’ਤਿ ਪੁਚ੍ਛਿ. ‘‘ਸਾਮਿ, ਏਕੋ ਪੁਤ੍ਤੋ ਜਾਤੋ’’ਤਿ. ‘‘ਇਦਾਨਿ ਕਿਂ ਕਰਿਸ੍ਸਾਮਾ’’ਤਿ? ‘‘ਯਸ੍ਸਤ੍ਥਾਯ ਮਯਂ ਕੁਲਘਰਂ ਗਚ੍ਛੇਯ੍ਯਾਮ, ਤਂ ਕਮ੍ਮਂ ਅਨ੍ਤਰਾਵ ਨਿਪ੍ਫਨ੍ਨਂ, ਤਤ੍ਥ ਗਨ੍ਤ੍ਵਾ ਕਿਂ ਕਰਿਸ੍ਸਾਮ, ਨਿਵਤ੍ਤਾਮਾ’’ਤਿ ਦ੍ਵੇਪਿ ਏਕਚਿਤ੍ਤਾ ਹੁਤ੍ਵਾ ਨਿਵਤ੍ਤਿਂਸੁ. ਤਸ੍ਸ ਚ ਦਾਰਕਸ੍ਸ ਪਨ੍ਥੇ ਜਾਤਤ੍ਤਾ ‘‘ਪਨ੍ਥਕੋ’’ਤਿ ਨਾਮਂ ਅਕਂਸੁ. ਤਸ੍ਸਾ ਨ ਚਿਰਸ੍ਸੇਵ ਅਪਰੋਪਿ ਗਬ੍ਭੋ ਪਤਿਟ੍ਠਹਿ. ਸਬ੍ਬਂ ਪੁਰਿਮਨਯੇਨੇਵ ਵਿਤ੍ਥਾਰੇਤਬ੍ਬਂ. ਤਸ੍ਸਾਪਿ ਦਾਰਕਸ੍ਸ ਪਨ੍ਥੇ ਜਾਤਤ੍ਤਾ ਪਠਮਜਾਤਸ੍ਸ ‘‘ਮਹਾਪਨ੍ਥਕੋ’’ਤਿ ਨਾਮਂ ਕਤ੍ਵਾ ਇਤਰਸ੍ਸ ‘‘ਚੂਲ਼ਪਨ੍ਥਕੋ’’ਤਿ ਨਾਮਂ ਅਕਂਸੁ. ਤੇ ਦ੍ਵੇਪਿ ਦਾਰਕੇ ਗਹੇਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਆਗਤਾ.

ਤੇਸਂ ਤਤ੍ਥ ਵਸਨ੍ਤਾਨਂ ਅਯਂ ਮਹਾਪਨ੍ਥਕਦਾਰਕੋ ਅਞ੍ਞੇ ਦਾਰਕੇ ‘‘ਚੂਲ਼ਪਿਤਾ ਮਹਾਪਿਤਾ’’ਤਿ, ‘‘ਅਯ੍ਯਕੋ ਅਯ੍ਯਿਕਾ’’ਤਿ ਚ ਵਦਨ੍ਤੇ ਸੁਤ੍ਵਾ ਮਾਤਰਂ ਪੁਚ੍ਛਿ ‘‘ਅਮ੍ਮ, ਅਞ੍ਞੇ ਦਾਰਕਾ ‘ਚੂਲ਼ਪਿਤਾ ਮਹਾਪਿਤਾ’ਤਿਪਿ ਵਦਨ੍ਤਿ, ‘ਅਯ੍ਯਕੋ ਅਯ੍ਯਿਕਾ’ਤਿਪਿ ਵਦਨ੍ਤਿ, ਅਮ੍ਹਾਕਂ ਞਾਤਕਾ ਨਤ੍ਥੀ’’ਤਿ. ‘‘ਆਮ, ਤਾਤ, ਤੁਮ੍ਹਾਕਂ ਏਤ੍ਥ ਞਾਤਕਾ ਨਤ੍ਥਿ, ਰਾਜਗਹਨਗਰੇ ਪਨ ਵੋ ਧਨਸੇਟ੍ਠਿ ਨਾਮ ਅਯ੍ਯਕੋ, ਤਤ੍ਥ ਤੁਮ੍ਹਾਕਂ ਬਹੂ ਞਾਤਕਾ’’ਤਿ. ‘‘ਕਸ੍ਮਾ ਤਤ੍ਥ ਨ ਗਚ੍ਛਥ, ਅਮ੍ਮਾ’’ਤਿ? ਸਾ ਅਤ੍ਤਨੋ ਅਗਮਨਕਾਰਣਂ ਪੁਤ੍ਤਸ੍ਸ ਅਕਥੇਤ੍ਵਾ ਪੁਤ੍ਤੇਸੁ ਪੁਨਪ੍ਪੁਨਂ ਕਥੇਨ੍ਤੇਸੁ ਸਾਮਿਕਂ ਆਹ – ‘‘ਇਮੇ ਦਾਰਕਾ ਮਂ ਅਤਿਵਿਯ ਕਿਲਮੇਨ੍ਤਿ, ਕਿਂ ਨੋ ਮਾਤਾਪਿਤਰੋ ਦਿਸ੍ਵਾ ਮਂਸਂ ਖਾਦਿਸ੍ਸਨ੍ਤਿ, ਏਹਿ ਦਾਰਕਾਨਂ ਅਯ੍ਯਕਕੁਲਂ ਦਸ੍ਸੇਸ੍ਸਾਮਾ’’ਤਿ. ‘‘ਅਹਂ ਸਮ੍ਮੁਖਾ ਭਵਿਤੁਂ ਨ ਸਕ੍ਖਿਸ੍ਸਾਮਿ, ਤਂ ਪਨ ਤਤ੍ਥ ਨਯਿਸ੍ਸਾਮੀ’’ਤਿ. ‘‘ਸਾਧੁ, ਅਯ੍ਯ, ਯੇਨ ਕੇਨਚਿ ਉਪਾਯੇਨ ਦਾਰਕਾਨਂ ਅਯ੍ਯਕਕੁਲਮੇਵ ਦਟ੍ਠੁਂ ਵਟ੍ਟਤੀ’’ਤਿ ਦ੍ਵੇਪਿ ਜਨਾ ਦਾਰਕੇ ਆਦਾਯ ਅਨੁਪੁਬ੍ਬੇਨ ਰਾਜਗਹਂ ਪਤ੍ਵਾ ਨਗਰਦ੍ਵਾਰੇ ਏਕਿਸ੍ਸਾ ਸਾਲਾਯ ਨਿਵਾਸਂ ਕਤ੍ਵਾ ਦਾਰਕਮਾਤਾ ਦ੍ਵੇ ਦਾਰਕੇ ਗਹੇਤ੍ਵਾ ਆਗਤਭਾਵਂ ਮਾਤਾਪਿਤੂਨਂ ਆਰੋਚਾਪੇਸਿ.

ਤੇ ਤਂ ਸਾਸਨਂ ਸੁਤ੍ਵਾ ‘‘ਸਂਸਾਰੇ ਵਿਚਰਨ੍ਤਾਨਂ ਨ ਪੁਤ੍ਤੋ ਨ ਧੀਤਾ ਨਾਮ ਨਤ੍ਥਿ, ਤੇ ਅਮ੍ਹਾਕਂ ਮਹਾਪਰਾਧਿਕਾ, ਨ ਸਕ੍ਕਾ ਤੇਹਿ ਅਮ੍ਹਾਕਂ ਚਕ੍ਖੁਪਥੇ ਠਾਤੁਂ, ਏਤ੍ਤਕਂ ਪਨ ਧਨਂ ਗਹੇਤ੍ਵਾ ਦ੍ਵੇਪਿ ਜਨਾ ਫਾਸੁਕਟ੍ਠਾਨਂ ਗਨ੍ਤ੍ਵਾ ਜੀਵਨ੍ਤੁ, ਦਾਰਕੇ ਪਨ ਇਧ ਪੇਸੇਨ੍ਤੂ’’ਤਿ. ਸੇਟ੍ਠਿਧੀਤਾ ਮਾਤਾਪਿਤੂਹਿ ਪੇਸਿਤਂ ਧਨਂ ਗਹੇਤ੍ਵਾ ਦਾਰਕੇ ਆਗਤਦੂਤਾਨਂਯੇਵ ਹਤ੍ਥੇ ਦਤ੍ਵਾ ਪੇਸੇਸਿ, ਦਾਰਕਾ ਅਯ੍ਯਕਕੁਲੇ ਵਡ੍ਢਨ੍ਤਿ. ਤੇਸੁ ਚੂਲ਼ਪਨ੍ਥਕੋ ਅਤਿਦਹਰੋ, ਮਹਾਪਨ੍ਥਕੋ ਪਨ ਅਯ੍ਯਕੇਨ ਸਦ੍ਧਿਂ ਦਸਬਲਸ੍ਸ ਧਮ੍ਮਕਥਂ ਸੋਤੁਂ ਗਚ੍ਛਤਿ. ਤਸ੍ਸ ਨਿਚ੍ਚਂ ਸਤ੍ਥੁ ਸਮ੍ਮੁਖਾ ਧਮ੍ਮਂ ਸੁਣਨ੍ਤਸ੍ਸ ਪਬ੍ਬਜ੍ਜਾਯ ਚਿਤ੍ਤਂ ਨਮਿ. ਸੋ ਅਯ੍ਯਕਂ ਆਹ ‘‘ਸਚੇ ਤੁਮ੍ਹੇ ਸਮ੍ਪਟਿਚ੍ਛਥ, ਅਹਂ ਪਬ੍ਬਜੇਯ੍ਯ’’ਨ੍ਤਿ. ‘‘ਕਿਂ ਵਦੇਸਿ, ਤਾਤ, ਮਯ੍ਹਂ ਸਕਲਲੋਕਸ੍ਸਪਿ ਪਬ੍ਬਜ੍ਜਾਤੋ ਤਵੇਵ ਪਬ੍ਬਜ੍ਜਾ ਭਦ੍ਦਿਕਾ, ਸਚੇ ਸਕ੍ਕੋਸਿ, ਪਬ੍ਬਜ ਤਾਤਾ’’ਤਿ ਸਮ੍ਪਟਿਚ੍ਛਿਤ੍ਵਾ ਸਤ੍ਥੁ ਸਨ੍ਤਿਕਂ ਗਤੋ. ਸਤ੍ਥਾ ‘‘ਕਿਂ ਮਹਾਸੇਟ੍ਠਿ ਦਾਰਕੋ ਤੇ ਲਦ੍ਧੋ’’ਤਿ. ‘‘ਆਮ, ਭਨ੍ਤੇ ਅਯਂ ਦਾਰਕੋ ਮਯ੍ਹਂ ਨਤ੍ਤਾ, ਤੁਮ੍ਹਾਕਂ ਸਨ੍ਤਿਕੇ ਪਬ੍ਬਜਾਮੀਤਿ ਵਦਤੀ’’ਤਿ ਆਹ. ਸਤ੍ਥਾ ਅਞ੍ਞਤਰਂ ਪਿਣ੍ਡਚਾਰਿਕਂ ਭਿਕ੍ਖੁਂ ‘‘ਇਮਂ ਦਾਰਕਂ ਪਬ੍ਬਾਜੇਹੀ’’ਤਿ ਆਣਾਪੇਸਿ. ਥੇਰੋ ਤਸ੍ਸ ਤਚਪਞ੍ਚਕਕਮ੍ਮਟ੍ਠਾਨਂ ਆਚਿਕ੍ਖਿਤ੍ਵਾ ਪਬ੍ਬਾਜੇਸਿ. ਸੋ ਬਹੁਂ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਪਰਿਪੁਣ੍ਣਵਸ੍ਸੋ ਉਪਸਮ੍ਪਦਂ ਲਭਿ. ਉਪਸਮ੍ਪਨ੍ਨੋ ਹੁਤ੍ਵਾ ਯੋਨਿਸੋ ਮਨਸਿਕਾਰੇ ਕਮ੍ਮਂ ਕਰੋਨ੍ਤੋ ਅਰਹਤ੍ਤਂ ਪਾਪੁਣਿ.

ਸੋ ਝਾਨਸੁਖੇਨ, ਮਗ੍ਗਸੁਖੇਨ, ਫਲਸੁਖੇਨ ਵੀਤਿਨਾਮੇਨ੍ਤੋ ਚਿਨ੍ਤੇਸਿ ‘‘ਸਕ੍ਕਾ ਨੁ ਖੋ ਇਮਂ ਸੁਖਂ ਚੂਲ਼ਪਨ੍ਥਕਸ੍ਸ ਦਾਤੁ’’ਨ੍ਤਿ. ਤਤੋ ਅਯ੍ਯਕਸੇਟ੍ਠਿਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਮਹਾਸੇਟ੍ਠਿ ਸਚੇ ਤੁਮ੍ਹੇ ਸਮ੍ਪਟਿਚ੍ਛਥ, ਅਹਂ ਚੂਲ਼ਪਨ੍ਥਕਂ ਪਬ੍ਬਾਜੇਯ੍ਯ’’ਨ੍ਤਿ ਆਹ. ‘‘ਪਬ੍ਬਾਜੇਥ, ਭਨ੍ਤੇ’’ਤਿ. ਥੇਰੋ ਚੂਲ਼ਪਨ੍ਥਕਦਾਰਕਂ ਪਬ੍ਬਾਜੇਤ੍ਵਾ ਦਸਸੁ ਸੀਲੇਸੁ ਪਤਿਟ੍ਠਾਪੇਸਿ. ਚੂਲ਼ਪਨ੍ਥਕਸਾਮਣੇਰੋ ਪਬ੍ਬਜਿਤ੍ਵਾਵ ਦਨ੍ਧੋ ਅਹੋਸਿ.

‘‘ਪਦੁਮਂ ਯਥਾ ਕੋਕਨਦਂ ਸੁਗਨ੍ਧਂ, ਪਾਤੋ ਸਿਯਾ ਫੁਲ੍ਲਮਵੀਤਗਨ੍ਧਂ;

ਅਙ੍ਗੀਰਸਂ ਪਸ੍ਸ ਵਿਰੋਚਮਾਨਂ, ਤਪਨ੍ਤਮਾਦਿਚ੍ਚਮਿਵਨ੍ਤਲਿਕ੍ਖੇ’’ਤਿ. (ਸਂ. ਨਿ. ੧.੧੨੩; ਅ. ਨਿ. ੫.੧੯੫) –

ਇਮਂ ਏਕਗਾਥਂ ਚਤੂਹਿ ਮਾਸੇਹਿ ਗਣ੍ਹਿਤੁਂ ਨਾਸਕ੍ਖਿ. ਸੋ ਕਿਰ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਪਬ੍ਬਜਿਤ੍ਵਾ ਪਞ੍ਞਵਾ ਹੁਤ੍ਵਾ ਅਞ੍ਞਤਰਸ੍ਸ ਦਨ੍ਧਭਿਕ੍ਖੁਨੋ ਉਦ੍ਦੇਸਗ੍ਗਹਣਕਾਲੇ ਪਰਿਹਾਸਕੇਲ਼ਿਂ ਅਕਾਸਿ. ਸੋ ਭਿਕ੍ਖੁ ਤੇਨ ਪਰਿਹਾਸੇਨ ਲਜ੍ਜਿਤੋ ਨੇਵ ਉਦ੍ਦੇਸਂ ਗਣ੍ਹਿ, ਨ ਸਜ੍ਝਾਯਮਕਾਸਿ. ਤੇਨ ਕਮ੍ਮੇਨ ਅਯਂ ਪਬ੍ਬਜਿਤ੍ਵਾਵ ਦਨ੍ਧੋ ਜਾਤੋ, ਗਹਿਤਗਹਿਤਂ ਪਦਂ ਉਪਰੂਪਰਿ ਪਦਂ ਗਣ੍ਹਨ੍ਤਸ੍ਸ ਨਸ੍ਸਤਿ. ਤਸ੍ਸ ਇਮਮੇਵ ਗਾਥਂ ਗਹੇਤੁਂ ਵਾਯਮਨ੍ਤਸ੍ਸ ਚਤ੍ਤਾਰੋ ਮਾਸਾ ਅਤਿਕ੍ਕਨ੍ਤਾ.

ਅਥ ਨਂ ਮਹਾਪਨ੍ਥਕੋ ਆਹ ‘‘ਚੂਲ਼ਪਨ੍ਥਕ, ਤ੍ਵਂ ਇਮਸ੍ਮਿਂ ਸਾਸਨੇ ਅਭਬ੍ਬੋ, ਚਤੂਹਿ ਮਾਸੇਹਿ ਏਕਮ੍ਪਿ ਗਾਥਂ ਗਹੇਤੁਂ ਨ ਸਕ੍ਕੋਸਿ, ਪਬ੍ਬਜਿਤਕਿਚ੍ਚਂ ਪਨ ਤ੍ਵਂ ਕਥਂ ਮਤ੍ਥਕਂ ਪਾਪੇਸ੍ਸਸਿ, ਨਿਕ੍ਖਮ ਇਤੋ’’ਤਿ ਵਿਹਾਰਾ ਨਿਕ੍ਕਡ੍ਢਿ. ਚੂਲ਼ਪਨ੍ਥਕੋ ਬੁਦ੍ਧਸਾਸਨੇ ਸਿਨੇਹੇਨ ਗਿਹਿਭਾਵਂ ਨ ਪਤ੍ਥੇਤਿ. ਤਸ੍ਮਿਞ੍ਚ ਕਾਲੇ ਮਹਾਪਨ੍ਥਕੋ ਭਤ੍ਤੁਦ੍ਦੇਸਕੋ ਹੋਤਿ. ਜੀਵਕੋ ਕੋਮਾਰਭਚ੍ਚੋ ਬਹੁਂ ਗਨ੍ਧਮਾਲਂ ਆਦਾਯ ਅਤ੍ਤਨੋ ਅਮ੍ਬਵਨਂ ਗਨ੍ਤ੍ਵਾ ਸਤ੍ਥਾਰਂ ਪੂਜੇਤ੍ਵਾ ਧਮ੍ਮਂ ਸੁਤ੍ਵਾ ਉਟ੍ਠਾਯਾਸਨਾ ਦਸਬਲਂ ਵਨ੍ਦਿਤ੍ਵਾ ਮਹਾਪਨ੍ਥਕਂ ਉਪਸਙ੍ਕਮਿਤ੍ਵਾ ‘‘ਕਿਤ੍ਤਕਾ, ਭਨ੍ਤੇ, ਸਤ੍ਥੁ ਸਨ੍ਤਿਕੇ ਭਿਕ੍ਖੂ’’ਤਿ ਪੁਚ੍ਛਿ. ‘‘ਪਞ੍ਚਮਤ੍ਤਾਨਿ ਭਿਕ੍ਖੁਸਤਾਨੀ’’ਤਿ. ‘‘ਸ੍ਵੇ, ਭਨ੍ਤੇ, ਬੁਦ੍ਧਪ੍ਪਮੁਖਾਨਿ ਪਞ੍ਚ ਭਿਕ੍ਖੁਸਤਾਨਿ ਆਦਾਯ ਅਮ੍ਹਾਕਂ ਨਿਵੇਸਨੇ ਭਿਕ੍ਖਂ ਗਣ੍ਹਥਾ’’ਤਿ. ‘‘ਉਪਾਸਕ, ਚੂਲ਼ਪਨ੍ਥਕੋ ਨਾਮ ਭਿਕ੍ਖੁ ਦਨ੍ਧੋ ਅਵਿਰੁਲ਼੍ਹਿਧਮ੍ਮੋ, ਤਂ ਠਪੇਤ੍ਵਾ ਸੇਸਾਨਂ ਨਿਮਨ੍ਤਨਂ ਸਮ੍ਪਟਿਚ੍ਛਾਮੀ’’ਤਿ ਥੇਰੋ ਆਹ. ਤਂ ਸੁਤ੍ਵਾ ਚੂਲ਼ਪਨ੍ਥਕੋ ਚਿਨ੍ਤੇਸਿ ‘‘ਥੇਰੋ ਏਤ੍ਤਕਾਨਂ ਭਿਕ੍ਖੂਨਂ ਨਿਮਨ੍ਤਨਂ ਸਮ੍ਪਟਿਚ੍ਛਨ੍ਤੋ ਮਂ ਬਾਹਿਰਂ ਕਤ੍ਵਾ ਸਮ੍ਪਟਿਚ੍ਛਤਿ, ਨਿਸ੍ਸਂਸਯਂ ਮਯ੍ਹਂ ਭਾਤਿਕਸ੍ਸ ਮਯਿ ਚਿਤ੍ਤਂ ਭਿਨ੍ਨਂ ਭਵਿਸ੍ਸਤਿ, ਕਿਂ ਇਦਾਨਿ ਮਯ੍ਹਂ ਇਮਿਨਾ ਸਾਸਨੇਨ, ਗਿਹੀ ਹੁਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਰੋਨ੍ਤੋ ਜੀਵਿਸ੍ਸਾਮੀ’’ਤਿ.

ਸੋ ਪੁਨਦਿਵਸੇ ਪਾਤੋਵ ‘‘ਗਿਹੀ ਭਵਿਸ੍ਸਾਮੀ’’ਤਿ ਪਾਯਾਸਿ. ਸਤ੍ਥਾ ਪਚ੍ਚੂਸਕਾਲੇਯੇਵ ਲੋਕਂ ਓਲੋਕੇਨ੍ਤੋ ਇਮਂ ਕਾਰਣਂ ਦਿਸ੍ਵਾ ਪਠਮਤਰਂ ਗਨ੍ਤ੍ਵਾ ਚੂਲ਼ਪਨ੍ਥਕਸ੍ਸ ਗਮਨਮਗ੍ਗੇ ਦ੍ਵਾਰਕੋਟ੍ਠਕੇ ਚਙ੍ਕਮਨ੍ਤੋ ਅਟ੍ਠਾਸਿ. ਚੂਲ਼ਪਨ੍ਥਕੋ ਘਰਂ ਗਚ੍ਛਨ੍ਤੋ ਸਤ੍ਥਾਰਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿ. ਅਥ ਨਂ ਸਤ੍ਥਾ ‘‘ਕਹਂ ਪਨ, ਤ੍ਵਂ ਚੂਲ਼ਪਨ੍ਥਕ, ਇਮਾਯ ਵੇਲਾਯ ਗਚ੍ਛਸੀ’’ਤਿ ਆਹ. ਭਾਤਾ ਮਂ, ਭਨ੍ਤੇ, ਨਿਕ੍ਕਡ੍ਢਤਿ, ਤੇਨਾਹਂ ਵਿਬ੍ਭਮਿਤੁਂ ਗਚ੍ਛਾਮੀਤਿ. ਚੂਲ਼ਪਨ੍ਥਕ, ਤਵ ਪਬ੍ਬਜ੍ਜਾ ਨਾਮ ਮਮ ਸਨ੍ਤਕਾ, ਭਾਤਰਾ ਨਿਕ੍ਕਡ੍ਢਿਤੋ ਕਸ੍ਮਾ ਮਮ ਸਨ੍ਤਿਕਂ ਨਾਗਞ੍ਛਿ? ਏਹਿ ਕਿਂ ਤੇ ਗਿਹਿਭਾਵੇਨ, ਮਮ ਸਨ੍ਤਿਕੇ ਭਵਿਸ੍ਸਸੀ’’ਤਿ ਭਗਵਾ ਚੂਲ਼ਪਨ੍ਥਕਂ ਆਦਾਯ ਗਨ੍ਤ੍ਵਾ ਗਨ੍ਧਕੁਟਿਪ੍ਪਮੁਖੇ ਨਿਸੀਦਾਪੇਤ੍ਵਾ ‘‘ਚੂਲ਼ਪਨ੍ਥਕ, ਤ੍ਵਂ ਪੁਰਤ੍ਥਾਭਿਮੁਖੋ ਹੁਤ੍ਵਾ ਇਮਂ ਪਿਲੋਤਿਕਂ ‘ਰਜੋਹਰਣਂ ਰਜੋਹਰਣ’ਨ੍ਤਿ ਪਰਿਮਜ੍ਜਨ੍ਤੋ ਇਧੇਵ ਹੋਹੀ’’ਤਿ ਇਦ੍ਧਿਯਾ ਅਭਿਸਙ੍ਖਤਂ ਪਰਿਸੁਦ੍ਧਂ ਪਿਲੋਤਿਕਾਖਣ੍ਡਂ ਦਤ੍ਵਾ ਕਾਲੇ ਆਰੋਚਿਤੇ ਭਿਕ੍ਖੁਸਙ੍ਘਪਰਿਵੁਤੋ ਜੀਵਕਸ੍ਸ ਗੇਹਂ ਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿ.

ਚੂਲ਼ਪਨ੍ਥਕੋਪਿ ਸੂਰਿਯਂ ਓਲੋਕੇਨ੍ਤੋ ਤਂ ਪਿਲੋਤਿਕਾਖਣ੍ਡਂ ‘‘ਰਜੋਹਰਣਂ ਰਜੋਹਰਣ’’ਨ੍ਤਿ ਪਰਿਮਜ੍ਜਨ੍ਤੋ ਨਿਸੀਦਿ, ਤਸ੍ਸ ਤਂ ਪਿਲੋਤਿਕਾਖਣ੍ਡਂ ਪਰਿਮਜ੍ਜਨ੍ਤਸ੍ਸ ਪਰਿਮਜ੍ਜਨ੍ਤਸ੍ਸ ਕਿਲਿਟ੍ਠਂ ਅਹੋਸਿ. ਤਤੋ ਚਿਨ੍ਤੇਸਿ ‘‘ਇਦਂ ਪਿਲੋਤਿਕਾਖਣ੍ਡਂ ਅਤਿਵਿਯ ਪਰਿਸੁਦ੍ਧਂ, ਇਮਂ ਪਨ ਅਤ੍ਤਭਾਵਂ ਨਿਸ੍ਸਾਯ ਪੁਰਿਮਪਕਤਿਂ ਵਿਜਹਿਤ੍ਵਾ ਏਵਂ ਕਿਲਿਟ੍ਠਂ ਜਾਤਂ, ਅਨਿਚ੍ਚਾ ਵਤ ਸਙ੍ਖਾਰਾ’’ਤਿ ਖਯਵਯਂ ਪਟ੍ਠਪੇਨ੍ਤੋ ਵਿਪਸ੍ਸਨਂ ਵਡ੍ਢੇਸਿ. ਸਤ੍ਥਾ ‘‘ਚੂਲ਼ਪਨ੍ਥਕਸ੍ਸ ਚਿਤ੍ਤਂ ਵਿਪਸ੍ਸਨਂ ਆਰੁਲ਼੍ਹ’’ਨ੍ਤਿ ਞਤ੍ਵਾ ‘‘ਚੂਲ਼ਪਨ੍ਥਕ, ਤ੍ਵਂ ਏਤਂ ਪਿਲੋਤਿਕਾਖਣ੍ਡਮੇਵ ਸਂਕਿਲਿਟ੍ਠਂ ਰਜੋਰਞ੍ਜਿਤਂ ਜਾਤਨ੍ਤਿ ਮਾ ਸਞ੍ਞਂ ਕਰਿ, ਅਬ੍ਭਨ੍ਤਰੇ ਪਨ ਤੇ ਰਾਗਰਜਾਦਯੋ ਅਤ੍ਥਿ, ਤੇ ਹਰਾਹੀ’’ਤਿ ਵਤ੍ਵਾ ਓਭਾਸਂ ਵਿਸ੍ਸਜ੍ਜੇਤ੍ਵਾ ਪੁਰਤੋ ਨਿਸਿਨ੍ਨੋ ਵਿਯ ਪਞ੍ਞਾਯਮਾਨਰੂਪੋ ਹੁਤ੍ਵਾ ਇਮਾ ਗਾਥਾ ਅਭਾਸਿ –

‘‘ਰਾਗੋ ਰਜੋ ਨ ਚ ਪਨ ਰੇਣੁ ਵੁਚ੍ਚਤਿ, ਰਾਗਸ੍ਸੇਤਂ ਅਧਿਵਚਨਂ ਰਜੋਤਿ;

ਏਤਂ ਰਜਂ ਵਿਪ੍ਪਜਹਿਤ੍ਵ ਭਿਕ੍ਖਵੋ, ਵਿਹਰਨ੍ਤਿ ਤੇ ਵਿਗਤਰਜਸ੍ਸ ਸਾਸਨੇ.

‘‘ਦੋਸੋ ਰਜੋ ਨ ਚ ਪਨ ਰੇਣੁ ਵੁਚ੍ਚਤਿ, ਦੋਸਸ੍ਸੇਤਂ ਅਧਿਵਚਨਂ ਰਜੋਤਿ;

ਏਤਂ ਰਜਂ ਵਿਪ੍ਪਜਹਿਤ੍ਵ ਭਿਕ੍ਖਵੋ, ਵਿਹਰਨ੍ਤਿ ਤੇ ਵਿਗਤਰਜਸ੍ਸ ਸਾਸਨੇ.

‘‘ਮੋਹੋ ਰਜੋ ਨ ਚ ਪਨ ਰੇਣੁ ਵੁਚ੍ਚਤਿ, ਮੋਹਸ੍ਸੇਤਂ ਅਧਿਵਚਨਂ ਰਜੋਤਿ;

ਏਤਂ ਰਜਂ ਵਿਪ੍ਪਜਹਿਤ੍ਵ ਭਿਕ੍ਖਵੋ, ਵਿਹਰਨ੍ਤਿ ਤੇ ਵਿਗਤਰਜਸ੍ਸ ਸਾਸਨੇ’’ਤਿ. (ਮਹਾਨਿ. ੨੦੯; ਚੂਲ਼ਨਿ. ਉਦਯਮਾਣਵਪੁਚ੍ਛਾਨਿਦ੍ਦੇਸ ੭੪);

ਗਾਥਾਪਰਿਯੋਸਾਨੇ ਚੂਲ਼ਪਨ੍ਥਕੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ, ਪਟਿਸਮ੍ਭਿਦਾਹਿਯੇਵਸ੍ਸ ਤੀਣਿ ਪਿਟਕਾਨਿ ਆਗਮਂਸੁ. ਸੋ ਕਿਰ ਪੁਬ੍ਬੇ ਰਾਜਾ ਹੁਤ੍ਵਾ ਨਗਰਂ ਪਦਕ੍ਖਿਣਂ ਕਰੋਨ੍ਤੋ ਨਲਾਟਤੋ ਸੇਦੇ ਮੁਚ੍ਚਨ੍ਤੇ ਪਰਿਸੁਦ੍ਧੇਨ ਸਾਟਕੇਨ ਨਲਾਟਨ੍ਤਂ ਪੁਞ੍ਛਿ, ਸਾਟਕੋ ਕਿਲਿਟ੍ਠੋ ਅਹੋਸਿ. ਸੋ ‘‘ਇਮਂ ਸਰੀਰਂ ਨਿਸ੍ਸਾਯ ਏਵਰੂਪੋ ਪਰਿਸੁਦ੍ਧੋ ਸਾਟਕੋ ਪਕਤਿਂ ਜਹਿਤ੍ਵਾ ਕਿਲਿਟ੍ਠੋ ਜਾਤੋ, ਅਨਿਚ੍ਚਾ ਵਤ ਸਙ੍ਖਾਰਾ’’ਤਿ ਅਨਿਚ੍ਚਸਞ੍ਞਂ ਪਟਿਲਭਿ. ਤੇਨ ਕਾਰਣੇਨਸ੍ਸ ਰਜੋਹਰਣਮੇਵ ਪਚ੍ਚਯੋ ਜਾਤੋ.

ਜੀਵਕੋਪਿ ਖੋ ਕੋਮਾਰਭਚ੍ਚੋ ਦਸਬਲਸ੍ਸ ਦਕ੍ਖਿਣੋਦਕਂ ਉਪਨਾਮੇਸਿ. ਸਤ੍ਥਾ ‘‘ਨਨੁ, ਜੀਵਕ, ਵਿਹਾਰੇ ਭਿਕ੍ਖੂ ਅਤ੍ਥੀ’’ਤਿ ਹਤ੍ਥੇਨ ਪਤ੍ਤਂ ਪਿਦਹਿ. ਮਹਾਪਨ੍ਥਕੋ ‘‘ਭਨ੍ਤੇ, ਵਿਹਾਰੇ ਨਤ੍ਥਿ ਭਿਕ੍ਖੂ’’ਤਿ ਆਹ. ਸਤ੍ਥਾ ‘‘ਅਤ੍ਥਿ ਜੀਵਕਾ’’ਤਿ ਆਹ. ਜੀਵਕੋ ‘‘ਤੇਨ ਹਿ, ਭਣੇ, ਗਚ੍ਛ, ਵਿਹਾਰੇ ਭਿਕ੍ਖੂਨਂ ਅਤ੍ਥਿਭਾਵਂ ਵਾ ਨਤ੍ਥਿਭਾਵਂ ਵਾ ਜਾਨਾਹੀ’’ਤਿ ਪੁਰਿਸਂ ਪੇਸੇਸਿ. ਤਸ੍ਮਿਂ ਖਣੇ ਚੂਲ਼ਪਨ੍ਥਕੋ ‘‘ਮਯ੍ਹਂ ਭਾਤਿਕੋ ‘ਵਿਹਾਰੇ ਭਿਕ੍ਖੂ ਨਤ੍ਥੀ’ਤਿ ਭਣਤਿ, ਵਿਹਾਰੇ ਭਿਕ੍ਖੂਨਂ ਅਤ੍ਥਿਭਾਵਮਸ੍ਸ ਪਕਾਸੇਸ੍ਸਾਮੀ’’ਤਿ ਸਕਲਂ ਅਮ੍ਬਵਨਂ ਭਿਕ੍ਖੂਨਂਯੇਵ ਪੂਰੇਸਿ. ਏਕਚ੍ਚੇ ਭਿਕ੍ਖੂ ਚੀਵਰਕਮ੍ਮਂ ਕਰੋਨ੍ਤਿ, ਏਕਚ੍ਚੇ ਰਜਨਕਮ੍ਮਂ, ਏਕਚ੍ਚੇ ਸਜ੍ਝਾਯਂ ਕਰੋਨ੍ਤੀਤਿ ਏਵਂ ਅਞ੍ਞਮਞ੍ਞਂ ਅਸਦਿਸਂ ਭਿਕ੍ਖੁਸਹਸ੍ਸਂ ਮਾਪੇਸਿ. ਸੋ ਪੁਰਿਸੋ ਵਿਹਾਰੇ ਬਹੂ ਭਿਕ੍ਖੂ ਦਿਸ੍ਵਾ ਨਿਵਤ੍ਤਿਤ੍ਵਾ ‘‘ਅਯ੍ਯ, ਸਕਲਂ ਅਮ੍ਬਵਨਂ ਭਿਕ੍ਖੂਹਿ ਪਰਿਪੁਣ੍ਣ’’ਨ੍ਤਿ ਜੀਵਕਸ੍ਸ ਆਰੋਚੇਸਿ. ਥੇਰੋਪਿ ਖੋ ਤਤ੍ਥੇਵ –

‘‘ਸਹਸ੍ਸਕ੍ਖਤ੍ਤੁਮਤ੍ਤਾਨਂ, ਨਿਮ੍ਮਿਨਿਤ੍ਵਾਨ ਪਨ੍ਥਕੋ;

ਨਿਸੀਦਮ੍ਬਵਨੇ ਰਮ੍ਮੇ, ਯਾਵ ਕਾਲਪ੍ਪਵੇਦਨਾ’’ਤਿ. (ਥੇਰਗਾ. ੫੬੩);

ਅਥ ਸਤ੍ਥਾ ਤਂ ਪੁਰਿਸਂ ਆਹ – ‘‘ਵਿਹਾਰਂ ਗਨ੍ਤ੍ਵਾ ‘ਸਤ੍ਥਾ ਚੂਲ਼ਪਨ੍ਥਕਂ ਨਾਮ ਪਕ੍ਕੋਸਤੀ’ਤਿ ਵਦੇਹੀ’’ਤਿ. ਤੇਨ ਗਨ੍ਤ੍ਵਾ ਤਥਾਵੁਤ੍ਤੇ ‘‘ਅਹਂ ਚੂਲ਼ਪਨ੍ਥਕੋ, ਅਹਂ ਚੂਲ਼ਪਨ੍ਥਕੋ’’ਤਿ ਮੁਖਸਹਸ੍ਸਂ ਉਟ੍ਠਹਿ. ਪੁਰਿਸੋ ਗਨ੍ਤ੍ਵਾ ‘‘ਸਬ੍ਬੇਪਿ ਕਿਰ ਤੇ, ਭਨ੍ਤੇ, ਚੂਲ਼ਪਨ੍ਥਕਾਯੇਵ ਨਾਮਾ’’ਤਿ ਆਹ. ਤੇਨ ਹਿ ਤ੍ਵਂ ਗਨ੍ਤ੍ਵਾ ਯੋ ਪਠਮਂ ‘‘ਅਹਂ ਚੂਲ਼ਪਨ੍ਥਕੋ’’ਤਿ ਵਦਤਿ, ਤਂ ਹਤ੍ਥੇ ਗਣ੍ਹ, ਅਵਸੇਸਾ ਅਨ੍ਤਰਧਾਯਿਸ੍ਸਨ੍ਤੀਤਿ. ਸੋ ਤਥਾ ਅਕਾਸਿ, ਤਾਵਦੇਵ ਸਹਸ੍ਸਮਤ੍ਤਾ ਭਿਕ੍ਖੂ ਅਨ੍ਤਰਧਾਯਿਂਸੁ. ਥੇਰੋ ਤੇਨ ਪੁਰਿਸੇਨ ਸਦ੍ਧਿਂ ਅਗਮਾਸਿ. ਸਤ੍ਥਾ ਭਤ੍ਤਕਿਚ੍ਚਪਰਿਯੋਸਾਨੇ ਜੀਵਕਂ ਆਮਨ੍ਤੇਸਿ ‘‘ਜੀਵਕ, ਚੂਲ਼ਪਨ੍ਥਕਸ੍ਸ ਪਤ੍ਤਂ ਗਣ੍ਹ, ਅਯਂ ਤੇ ਅਨੁਮੋਦਨਂ ਕਰਿਸ੍ਸਤੀ’’ਤਿ. ਜੀਵਕੋ ਤਥਾ ਅਕਾਸਿ. ਥੇਰੋ ਸੀਹਨਾਦਂ ਨਦਨ੍ਤੋ ਤਰੁਣਸੀਹੋ ਵਿਯ ਤੀਣਿ ਪਿਟਕਾਨਿ ਸਂਖੋਭੇਤ੍ਵਾ ਅਨੁਮੋਦਨਂ ਅਕਾਸਿ.

ਸਤ੍ਥਾ ਉਟ੍ਠਾਯਾਸਨਾ ਭਿਕ੍ਖੁਸਙ੍ਘਪਰਿਵਾਰੋ ਵਿਹਾਰਂ ਗਨ੍ਤ੍ਵਾ ਭਿਕ੍ਖੂਹਿ ਵਤ੍ਤੇ ਦਸ੍ਸਿਤੇ ਉਟ੍ਠਾਯਾਸਨਾ ਗਨ੍ਧਕੁਟਿਪ੍ਪਮੁਖੇ ਠਤ੍ਵਾ ਭਿਕ੍ਖੁਸਙ੍ਘਸ੍ਸ ਸੁਗਤੋਵਾਦਂ ਦਤ੍ਵਾ ਕਮ੍ਮਟ੍ਠਾਨਂ ਕਥੇਤ੍ਵਾ ਭਿਕ੍ਖੁਸਙ੍ਘਂ ਉਯ੍ਯੋਜੇਤ੍ਵਾ ਸੁਰਭਿਗਨ੍ਧਵਾਸਿਤਂ ਗਨ੍ਧਕੁਟਿਂ ਪਵਿਸਿਤ੍ਵਾ ਦਕ੍ਖਿਣੇਨ ਪਸ੍ਸੇਨ ਸੀਹਸੇਯ੍ਯਂ ਉਪਗਤੋ. ਅਥ ਸਾਯਨ੍ਹਸਮਯੇ ਧਮ੍ਮਸਭਾਯਂ ਭਿਕ੍ਖੂ ਇਤੋ ਚਿਤੋ ਚ ਸਮੋਸਰਿਤ੍ਵਾ ਰਤ੍ਤਕਮ੍ਬਲਸਾਣਿਂ ਪਰਿਕ੍ਖਿਪਨ੍ਤਾ ਵਿਯ ਨਿਸੀਦਿਤ੍ਵਾ ਸਤ੍ਥੁ ਗੁਣਕਥਂ ਆਰਭਿਂਸੁ ‘‘ਆਵੁਸੋ, ਮਹਾਪਨ੍ਥਕੋ ਚੂਲ਼ਪਨ੍ਥਕਸ੍ਸ ਅਜ੍ਝਾਸਯਂ ਅਜਾਨਨ੍ਤੋ ‘ਚਤੂਹਿ ਮਾਸੇਹਿ ਏਕਗਾਥਂ ਗਣ੍ਹਿਤੁਂ ਨ ਸਕ੍ਕੋਤਿ, ਦਨ੍ਧੋ ਅਯ’ਨ੍ਤਿ ਵਿਹਾਰਾ ਨਿਕ੍ਕਡ੍ਢਿ, ਸਮ੍ਮਾਸਮ੍ਬੁਦ੍ਧੋ ਪਨ ਅਤ੍ਤਨੋ ਅਨੁਤ੍ਤਰਧਮ੍ਮਰਾਜਤਾਯ ਏਕਸ੍ਮਿਂਯੇਵਸ੍ਸ ਅਨ੍ਤਰਭਤ੍ਤੇ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਅਦਾਸਿ, ਤੀਣਿ ਪਿਟਕਾਨਿ ਪਟਿਸਮ੍ਭਿਦਾਹਿਯੇਵ ਆਗਤਾਨਿ, ਅਹੋ ਬੁਦ੍ਧਾਨਂ ਬਲਂ ਨਾਮ ਮਹਨ੍ਤ’’ਨ੍ਤਿ.

ਅਥ ਭਗਵਾ ਧਮ੍ਮਸਭਾਯਂ ਇਮਂ ਕਥਾਪਵਤ੍ਤਿਂ ਞਤ੍ਵਾ ‘‘ਅਜ੍ਜ ਮਯਾ ਗਨ੍ਤੁਂ ਵਟ੍ਟਤੀ’’ਤਿ ਬੁਦ੍ਧਸੇਯ੍ਯਾਯ ਉਟ੍ਠਾਯ ਸੁਰਤ੍ਤਦੁਪਟ੍ਟਂ ਨਿਵਾਸੇਤ੍ਵਾ ਵਿਜ੍ਜੁਲਤਂ ਵਿਯ ਕਾਯਬਨ੍ਧਨਂ ਬਨ੍ਧਿਤ੍ਵਾ ਰਤ੍ਤਕਮ੍ਬਲਸਦਿਸਂ ਸੁਗਤਮਹਾਚੀਵਰਂ ਪਾਰੁਪਿਤ੍ਵਾ ਸੁਰਭਿਗਨ੍ਧਕੁਟਿਤੋ ਨਿਕ੍ਖਮ੍ਮ ਮਤ੍ਤਵਾਰਣੋ ਵਿਯ ਸੀਹਵਿਕ੍ਕਨ੍ਤਵਿਲਾਸੇਨ ਵਿਜਮ੍ਭਮਾਨੋ ਸੀਹੋ ਵਿਯ ਅਨਨ੍ਤਾਯ ਬੁਦ੍ਧਲੀਲਾਯ ਧਮ੍ਮਸਭਂ ਗਨ੍ਤ੍ਵਾ ਅਲਙ੍ਕਤਮਣ੍ਡਪਮਜ੍ਝੇ ਸੁਪਞ੍ਞਤ੍ਤਵਰਬੁਦ੍ਧਾਸਨਂ ਅਭਿਰੁਯ੍ਹ ਛਬ੍ਬਣ੍ਣਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਨ੍ਤੋ ਅਣ੍ਣਵਕੁਚ੍ਛਿਂ ਓਭਾਸਯਮਾਨੋ ਯੁਗਨ੍ਧਰਮਤ੍ਥਕੇ ਬਾਲਸੂਰਿਯੋ ਵਿਯ ਆਸਨਮਜ੍ਝੇ ਨਿਸੀਦਿ. ਸਮ੍ਮਾਸਮ੍ਬੁਦ੍ਧੇ ਪਨ ਆਗਤਮਤ੍ਤੇ ਭਿਕ੍ਖੁਸਙ੍ਘੋ ਕਥਂ ਪਚ੍ਛਿਨ੍ਦਿਤ੍ਵਾ ਤੁਣ੍ਹੀ ਅਹੋਸਿ.

ਸਤ੍ਥਾ ਮੁਦੁਕੇਨ ਮੇਤ੍ਤਚਿਤ੍ਤੇਨ ਪਰਿਸਂ ਓਲੋਕੇਤ੍ਵਾ ‘‘ਅਯਂ ਪਰਿਸਾ ਅਤਿਵਿਯ ਸੋਭਤਿ, ਏਕਸ੍ਸਪਿ ਹਤ੍ਥਕੁਕ੍ਕੁਚ੍ਚਂ ਵਾ ਪਾਦਕੁਕ੍ਕੁਚ੍ਚਂ ਵਾ ਉਕ੍ਕਾਸਿਤਸਦ੍ਦੋ ਵਾ ਖਿਪਿਤਸਦ੍ਦੋ ਵਾ ਨਤ੍ਥਿ, ਸਬ੍ਬੇਪਿਮੇ ਬੁਦ੍ਧਗਾਰਵੇਨ ਸਗਾਰਵਾ ਬੁਦ੍ਧਤੇਜੇਨ ਤਜ੍ਜਿਤਾ ਮਯਿ ਆਯੁਕਪ੍ਪਮ੍ਪਿ ਅਕਥੇਤ੍ਵਾ ਨਿਸਿਨ੍ਨੇ ਪਠਮਂ ਕਥਂ ਸਮੁਟ੍ਠਾਪੇਤ੍ਵਾ ਨ ਕਥੇਸ੍ਸਨ੍ਤਿ, ਕਥਾਸਮੁਟ੍ਠਾਪਨਵਤ੍ਤਂ ਨਾਮ ਮਯਾਵ ਜਾਨਿਤਬ੍ਬਂ, ਅਹਮੇਵ ਪਠਮਂ ਕਥੇਸ੍ਸਾਮੀ’’ਤਿ ਮਧੁਰੇਨ ਬ੍ਰਹ੍ਮਸ੍ਸਰੇਨ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ, ਕਾ ਚ ਪਨ ਵੋ ਅਨ੍ਤਰਾਕਥਾ ਵਿਪ੍ਪਕਤਾ’’ਤਿ ਆਹ. ਭਨ੍ਤੇ, ਨ ਮਯਂ ਇਮਸ੍ਮਿਂ ਠਾਨੇ ਨਿਸਿਨ੍ਨਾ ਅਞ੍ਞਂ ਤਿਰਚ੍ਛਾਨਕਥਂ ਕਥੇਮ, ਤੁਮ੍ਹਾਕਂਯੇਵ ਪਨ ਗੁਣੇ ਵਣ੍ਣਯਮਾਨਾ ਨਿਸਿਨ੍ਨਾਮ੍ਹ ‘‘ਆਵੁਸੋ ਮਹਾਪਨ੍ਥਕੋ ਚੂਲ਼ਪਨ੍ਥਕਸ੍ਸ ਅਜ੍ਝਾਸਯਂ ਅਜਾਨਨ੍ਤੋ ‘ਚਤੂਹਿ ਮਾਸੇਹਿ ਏਕਂ ਗਾਥਂ ਗਣ੍ਹਿਤੁਂ ਨ ਸਕ੍ਕੋਤਿ, ਦਨ੍ਧੋ ਅਯ’ਨ੍ਤਿ ਵਿਹਾਰਾ ਨਿਕ੍ਕਡ੍ਢਿ, ਸਮ੍ਮਾਸਮ੍ਬੁਦ੍ਧੋ ਪਨ ਅਨੁਤ੍ਤਰਧਮ੍ਮਰਾਜਤਾਯ ਏਕਸ੍ਮਿਂਯੇਵਸ੍ਸ ਅਨ੍ਤਰਭਤ੍ਤੇ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਅਦਾਸਿ, ਅਹੋ ਬੁਦ੍ਧਾਨਂ ਬਲਂ ਨਾਮ ਮਹਨ੍ਤ’’ਨ੍ਤਿ. ਸਤ੍ਥਾ ਭਿਕ੍ਖੂਨਂ ਕਥਂ ਸੁਤ੍ਵਾ ‘‘ਭਿਕ੍ਖਵੇ, ਚੂਲ਼ਪਨ੍ਥਕੋ ਮਂ ਨਿਸ੍ਸਾਯ ਇਦਾਨਿ ਤਾਵ ਧਮ੍ਮੇਸੁ ਧਮ੍ਮਮਹਨ੍ਤਤਂ ਪਤ੍ਤੋ, ਪੁਬ੍ਬੇ ਪਨ ਮਂ ਨਿਸ੍ਸਾਯ ਭੋਗੇਸੁਪਿ ਭੋਗਮਹਨ੍ਤਤਂ ਪਾਪੁਣੀ’’ਤਿ ਆਹ. ਭਿਕ੍ਖੂ ਤਸ੍ਸਤ੍ਥਸ੍ਸ ਆਵਿਭਾਵਤ੍ਥਂ ਭਗਵਨ੍ਤਂ ਯਾਚਿਂਸੁ. ਭਗਵਾ ਭਵਨ੍ਤਰੇਨ ਪਟਿਚ੍ਛਨ੍ਨਂ ਕਾਰਣਂ ਪਾਕਟਂ ਅਕਾਸਿ.

ਅਤੀਤੇ ਕਾਸਿਰਟ੍ਠੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸੇਟ੍ਠਿਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਸੇਟ੍ਠਿਟ੍ਠਾਨਂ ਲਭਿਤ੍ਵਾ ਚੂਲ਼ਸੇਟ੍ਠਿ ਨਾਮ ਅਹੋਸਿ, ਸੋ ਪਣ੍ਡਿਤੋ ਬ੍ਯਤ੍ਤੋ ਸਬ੍ਬਨਿਮਿਤ੍ਤਾਨਿ ਜਾਨਾਤਿ. ਸੋ ਏਕਦਿਵਸਂ ਰਾਜੁਪਟ੍ਠਾਨਂ ਗਚ੍ਛਨ੍ਤੋ ਅਨ੍ਤਰਵੀਥਿਯਂ ਮਤਮੂਸਿਕਂ ਦਿਸ੍ਵਾ ਤਙ੍ਖਣਞ੍ਞੇਵ ਨਕ੍ਖਤ੍ਤਂ ਸਮਾਨੇਤ੍ਵਾ ਇਦਮਾਹ ‘‘ਸਕ੍ਕਾ ਚਕ੍ਖੁਮਤਾ ਕੁਲਪੁਤ੍ਤੇਨ ਇਮਂ ਉਨ੍ਦੂਰਂ ਗਹੇਤ੍ਵਾ ਪੁਤ੍ਤਦਾਰਭਰਣਞ੍ਚ ਕਾਤੁਂ ਕਮ੍ਮਨ੍ਤੇ ਚ ਪਯੋਜੇਤੁ’’ਨ੍ਤਿ? ਅਞ੍ਞਤਰੋ ਦੁਗ੍ਗਤਕੁਲਪੁਤ੍ਤੋ ਤਂ ਸੇਟ੍ਠਿਸ੍ਸ ਵਚਨਂ ਸੁਤ੍ਵਾ ‘‘ਨਾਯਂ ਅਜਾਨਿਤ੍ਵਾ ਕਥੇਸ੍ਸਤੀ’’ਤਿ ਤਂ ਮੂਸਿਕਂ ਗਹੇਤ੍ਵਾ ਏਕਸ੍ਮਿਂ ਆਪਣੇ ਬਿਲ਼ਾਲਸ੍ਸਤ੍ਥਾਯ ਵਿਕ੍ਕਿਣਿਤ੍ਵਾ ਕਾਕਣਿਕਂ ਲਭਿਤ੍ਵਾ ਤਾਯ ਕਾਕਣਿਕਾਯ ਫਾਣਿਤਂ ਗਹੇਤ੍ਵਾ ਏਕੇਨ ਘਟੇਨ ਪਾਨੀਯਂ ਗਣ੍ਹਿ. ਸੋ ਅਰਞ੍ਞਤੋ ਆਗਚ੍ਛਨ੍ਤੇ ਮਾਲਾਕਾਰੇ ਦਿਸ੍ਵਾ ਥੋਕਂ ਥੋਕਂ ਫਾਣਿਤਖਣ੍ਡਂ ਦਤ੍ਵਾ ਉਲ਼ੁਙ੍ਕੇਨ ਪਾਨੀਯਂ ਅਦਾਸਿ, ਤੇ ਚਸ੍ਸ ਏਕੇਕਂ ਪੁਪ੍ਫਮੁਟ੍ਠਿਂ ਅਦਂਸੁ. ਸੋ ਤੇਨ ਪੁਪ੍ਫਮੂਲੇਨ ਪੁਨਦਿਵਸੇਪਿ ਫਾਣਿਤਞ੍ਚ ਪਾਨੀਯਘਟਞ੍ਚ ਗਹੇਤ੍ਵਾ ਪੁਪ੍ਫਾਰਾਮਮੇਵ ਗਤੋ. ਤਸ੍ਸ ਤਂ ਦਿਵਸਂ ਮਾਲਾਕਾਰਾ ਅਡ੍ਢੋਚਿਤਕੇ ਪੁਪ੍ਫਗਚ੍ਛੇ ਦਤ੍ਵਾ ਅਗਮਂਸੁ. ਸੋ ਨ ਚਿਰਸ੍ਸੇਵ ਇਮਿਨਾ ਉਪਾਯੇਨ ਅਟ੍ਠ ਕਹਾਪਣੇ ਲਭਿ.

ਪੁਨ ਏਕਸ੍ਮਿਂ ਵਾਤਵੁਟ੍ਠਿਦਿਵਸੇ ਰਾਜੁਯ੍ਯਾਨੇ ਬਹੂ ਸੁਕ੍ਖਦਣ੍ਡਕਾ ਚ ਸਾਖਾ ਚ ਪਲਾਸਞ੍ਚ ਵਾਤੇਨ ਪਾਤਿਤਂ ਹੋਤਿ, ਉਯ੍ਯਾਨਪਾਲੋ ਛਡ੍ਡੇਤੁਂ ਉਪਾਯਂ ਨ ਪਸ੍ਸਤਿ. ਸੋ ਤਤ੍ਥ ਗਨ੍ਤ੍ਵਾ ‘‘ਸਚੇ ਇਮਾਨਿ ਦਾਰੁਪਣ੍ਣਾਨਿ ਮਯ੍ਹਂ ਦਸ੍ਸਸਿ, ਅਹਂ ਤੇ ਇਮਾਨਿ ਸਬ੍ਬਾਨਿ ਨੀਹਰਿਸ੍ਸਾਮੀ’’ਤਿ ਉਯ੍ਯਾਨਪਾਲਂ ਆਹ, ਸੋ ‘‘ਗਣ੍ਹ ਅਯ੍ਯਾ’’ਤਿ ਸਮ੍ਪਟਿਚ੍ਛਿ. ਚੂਲ਼ਨ੍ਤੇਵਾਸਿਕੋ ਦਾਰਕਾਨਂ ਕੀਲ਼ਨਮਣ੍ਡਲਂ ਗਨ੍ਤ੍ਵਾ ਫਾਣਿਤਂ ਦਤ੍ਵਾ ਮੁਹੁਤ੍ਤੇਨ ਸਬ੍ਬਾਨਿ ਦਾਰੁਪਣ੍ਣਾਨਿ ਨੀਹਰਾਪੇਤ੍ਵਾ ਉਯ੍ਯਾਨਦ੍ਵਾਰੇ ਰਾਸਿਂ ਕਾਰੇਸਿ. ਤਦਾ ਰਾਜਕੁਮ੍ਭਕਾਰੋ ਰਾਜਕੁਲੇ ਭਾਜਨਾਨਂ ਪਚਨਤ੍ਥਾਯ ਦਾਰੂਨਿ ਪਰਿਯੇਸਮਾਨੋ ਉਯ੍ਯਾਨਦ੍ਵਾਰੇ ਤਾਨਿ ਦਿਸ੍ਵਾ ਤਸ੍ਸ ਹਤ੍ਥਤੋ ਕਿਣਿਤ੍ਵਾ ਗਣ੍ਹਿ. ਤਂ ਦਿਵਸਂ ਚੂਲ਼ਨ੍ਤੇਵਾਸਿਕੋ ਦਾਰੁਵਿਕ੍ਕਯੇਨ ਸੋਲ਼ਸ ਕਹਾਪਣੇ ਚਾਟਿਆਦੀਨਿ ਚ ਪਞ੍ਚ ਭਾਜਨਾਨਿ ਲਭਿ.

ਸੋ ਚਤੁਵੀਸਤਿਯਾ ਕਹਾਪਣੇਸੁ ਜਾਤੇਸੁ ‘‘ਅਤ੍ਥਿ ਅਯਂ ਉਪਾਯੋ ਮਯ੍ਹ’’ਨ੍ਤਿ ਨਗਰਦ੍ਵਾਰਤੋ ਅਵਿਦੂਰੇ ਠਾਨੇ ਏਕਂ ਪਾਨੀਯਚਾਟਿਂ ਠਪੇਤ੍ਵਾ ਪਞ੍ਚਸਤੇ ਤਿਣਹਾਰਕੇ ਪਾਨੀਯੇਨ ਉਪਟ੍ਠਹਿ. ਤੇ ਆਹਂਸੁ ‘‘ਸਮ੍ਮ, ਤ੍ਵਂ ਅਮ੍ਹਾਕਂ ਬਹੂਪਕਾਰੋ, ਕਿਂ ਤੇ ਕਰੋਮਾ’’ਤਿ? ਸੋ ‘‘ਮਯ੍ਹਂ ਕਿਚ੍ਚੇ ਉਪ੍ਪਨ੍ਨੇ ਕਰਿਸ੍ਸਥਾ’’ਤਿ ਵਤ੍ਵਾ ਇਤੋ ਚਿਤੋ ਚ ਵਿਚਰਨ੍ਤੋ ਥਲਪਥਕਮ੍ਮਿਕੇਨ ਚ ਜਲਪਥਕਮ੍ਮਿਕੇਨ ਚ ਸਦ੍ਧਿਂ ਮਿਤ੍ਤਸਨ੍ਥਵਂ ਅਕਾਸਿ. ਤਸ੍ਸ ਥਲਪਥਕਮ੍ਮਿਕੋ ‘‘ਸ੍ਵੇ ਇਮਂ ਨਗਰਂ ਅਸ੍ਸਵਾਣਿਜਕੋ ਪਞ੍ਚ ਅਸ੍ਸਸਤਾਨਿ ਗਹੇਤ੍ਵਾ ਆਗਮਿਸ੍ਸਤੀ’’ਤਿ ਆਚਿਕ੍ਖਿ. ਸੋ ਤਸ੍ਸ ਵਚਨਂ ਸੁਤ੍ਵਾ ਤਿਣਹਾਰਕੇ ਆਹ ‘‘ਅਜ੍ਜ ਮਯ੍ਹਂ ਏਕੇਕਂ ਤਿਣਕਲਾਪਂ ਦੇਥ, ਮਯਾ ਚ ਤਿਣੇ ਅਵਿਕ੍ਕਿਣਿਤੇ ਅਤ੍ਤਨੋ ਤਿਣਂ ਮਾ ਵਿਕ੍ਕਿਣਥਾ’’ਤਿ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪਞ੍ਚ ਤਿਣਕਲਾਪਸਤਾਨਿ ਆਹਰਿਤ੍ਵਾ ਤਸ੍ਸ ਘਰੇ ਪਾਪਯਿਂਸੁ. ਅਸ੍ਸਵਾਣਿਜੋ ਸਕਲਨਗਰੇ ਅਸ੍ਸਾਨਂ ਗੋਚਰਂ ਅਲਭਿਤ੍ਵਾ ਤਸ੍ਸ ਸਹਸ੍ਸਂ ਦਤ੍ਵਾ ਤਂ ਤਿਣਂ ਗਣ੍ਹਿ.

ਤਤੋ ਕਤਿਪਾਹਚ੍ਚਯੇਨਸ੍ਸ ਜਲਪਥਕਮ੍ਮਿਕੋ ਸਹਾਯਕੋ ਆਰੋਚੇਸਿ ‘‘ਪਟ੍ਟਨਮ੍ਹਿ ਮਹਾਨਾਵਾ ਆਗਤਾ’’ਤਿ. ਸੋ ‘‘ਅਤ੍ਥਿ ਅਯਂ ਉਪਾਯੋ’’ਤਿ ਅਟ੍ਠਹਿ ਕਹਾਪਣੇਹਿ ਸਬ੍ਬਪਰਿਵਾਰਸਮ੍ਪਨ੍ਨਂ ਤਾਵਕਾਲਿਕਂ ਰਥਂ ਗਹੇਤ੍ਵਾ ਮਹਨ੍ਤੇਨ ਯਸੇਨ ਨਾਵਾਪਟ੍ਟਨਂ ਗਨ੍ਤ੍ਵਾ ਏਕਂ ਅਙ੍ਗੁਲਿਮੁਦ੍ਦਿਕਂ ਨਾਵਿਕਸ੍ਸ ਸਚ੍ਚਕਾਰਂ ਦਤ੍ਵਾ ਅਵਿਦੂਰੇ ਠਾਨੇ ਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਨਿਸਿਨ੍ਨੋ ਪੁਰਿਸੇ ਆਣਾਪੇਸਿ ‘‘ਬਾਹਿਰਤੋ ਵਾਣਿਜੇਸੁ ਆਗਤੇਸੁ ਤਤਿਯੇਨ ਪਟਿਹਾਰੇਨ ਮਂ ਆਰੋਚੇਥਾ’’ਤਿ. ‘‘ਨਾਵਾ ਆਗਤਾ’’ਤਿ ਸੁਤ੍ਵਾ ਬਾਰਾਣਸਿਤੋ ਸਤਮਤ੍ਤਾ ਵਾਣਿਜਾ ‘‘ਭਣ੍ਡਂ ਗਣ੍ਹਾਮਾ’’ਤਿ ਆਗਮਿਂਸੁ. ਭਣ੍ਡਂ ਤੁਮ੍ਹੇ ਨ ਲਭਿਸ੍ਸਥ, ਅਸੁਕਟ੍ਠਾਨੇ ਨਾਮ ਮਹਾਵਾਣਿਜੇਨ ਸਚ੍ਚਕਾਰੋ ਦਿਨ੍ਨੋਤਿ. ਤੇ ਤਂ ਸੁਤ੍ਵਾ ਤਸ੍ਸ ਸਨ੍ਤਿਕਂ ਆਗਤਾ. ਪਾਦਮੂਲਿਕਪੁਰਿਸਾ ਪੁਰਿਮਸਞ੍ਞਾਵਸੇਨ ਤਤਿਯੇਨ ਪਟਿਹਾਰੇਨ ਤੇਸਂ ਆਗਤਭਾਵਂ ਆਰੋਚੇਸੁਂ. ਤੇ ਸਤਮਤ੍ਤਾ ਵਾਣਿਜਾ ਏਕੇਕਂ ਸਹਸ੍ਸਂ ਦਤ੍ਵਾ ਤੇਨ ਸਦ੍ਧਿਂ ਨਾਵਾਯ ਪਤ੍ਤਿਕਾ ਹੁਤ੍ਵਾ ਪੁਨ ਏਕੇਕਂ ਸਹਸ੍ਸਂ ਦਤ੍ਵਾ ਪਤ੍ਤਿਂ ਵਿਸ੍ਸਜ੍ਜਾਪੇਤ੍ਵਾ ਭਣ੍ਡਂ ਅਤ੍ਤਨੋ ਸਨ੍ਤਕਮਕਂਸੁ.

ਚੂਲ਼ਨ੍ਤੇਵਾਸਿਕੋ ਦ੍ਵੇ ਸਤਸਹਸ੍ਸਾਨਿ ਗਣ੍ਹਿਤ੍ਵਾ ਬਾਰਾਣਸਿਂ ਆਗਨ੍ਤ੍ਵਾ ‘‘ਕਤਞ੍ਞੁਨਾ ਮੇ ਭਵਿਤੁਂ ਵਟ੍ਟਤੀ’’ਤਿ ਏਕਂ ਸਤਸਹਸ੍ਸਂ ਗਾਹਾਪੇਤ੍ਵਾ ਚੂਲ਼ਸੇਟ੍ਠਿਸ੍ਸ ਸਮੀਪਂ ਗਤੋ. ਅਥ ਨਂ ਸੇਟ੍ਠਿ ‘‘ਕਿਂ ਤੇ, ਤਾਤ, ਕਤ੍ਵਾ ਇਦਂ ਧਨਂ ਲਦ੍ਧ’’ਨ੍ਤਿ ਪੁਚ੍ਛਿ. ਸੋ ‘‘ਤੁਮ੍ਹੇਹਿ ਕਥਿਤਉਪਾਯੇ ਠਤ੍ਵਾ ਚਤੁਮਾਸਮ੍ਭਨ੍ਤਰੇਯੇਵ ਲਦ੍ਧ’’ਨ੍ਤਿ ਮਤਮੂਸਿਕਂ ਆਦਿਂ ਕਤ੍ਵਾ ਸਬ੍ਬਂ ਵਤ੍ਥੁਂ ਕਥੇਸਿ. ਚੂਲ਼ਸੇਟ੍ਠਿ ਤਸ੍ਸ ਵਚਨਂ ਸੁਤ੍ਵਾ ‘‘ਇਦਾਨਿ ਏਵਰੂਪਂ ਦਾਰਕਂ ਮਮ ਸਨ੍ਤਕਂ ਕਾਤੁਂ ਵਟ੍ਟਤੀ’’ਤਿ ਵਯਪ੍ਪਤ੍ਤਂ ਅਤ੍ਤਨੋ ਧੀਤਰਂ ਦਤ੍ਵਾ ਸਕਲਕੁਟੁਮ੍ਬਸ੍ਸ ਸਾਮਿਕਂ ਅਕਾਸਿ. ਸੋ ਸੇਟ੍ਠਿਨੋ ਅਚ੍ਚਯੇਨ ਤਸ੍ਮਿਂ ਨਗਰੇ ਸੇਟ੍ਠਿਟ੍ਠਾਨਂ ਲਭਿ. ਬੋਧਿਸਤ੍ਤੋਪਿ ਯਥਾਕਮ੍ਮਂ ਅਗਮਾਸਿ.

ਸਮ੍ਮਾਸਮ੍ਬੁਦ੍ਧੋਪਿ ਇਮਂ ਧਮ੍ਮਦੇਸਨਂ ਕਥੇਤ੍ਵਾ ਅਭਿਸਮ੍ਬੁਦ੍ਧੋਵ ਇਮਂ ਗਾਥਂ ਕਥੇਸਿ –

੪. ‘‘ਅਪ੍ਪਕੇਨਪਿ ਮੇਧਾਵੀ, ਪਾਭਤੇਨ ਵਿਚਕ੍ਖਣੋ;

ਸਮੁਟ੍ਠਾਪੇਤਿ ਅਤ੍ਤਾਨਂ, ਅਣੁਂ ਅਗ੍ਗਿਂਵ ਸਨ੍ਧਮ’’ਨ੍ਤਿ.

ਤਤ੍ਥ ਅਪ੍ਪਕੇਨਪੀਤਿ ਥੋਕੇਨਪਿ ਪਰਿਤ੍ਤਕੇਨਪਿ. ਮੇਧਾਵੀਤਿ ਪਞ੍ਞਵਾ. ਪਾਭਤੇਨਾਤਿ ਭਣ੍ਡਮੂਲੇਨ. ਵਿਚਕ੍ਖਣੋਤਿ ਵੋਹਾਰਕੁਸਲੋ. ਸਮੁਟ੍ਠਾਪੇਤਿ ਅਤ੍ਤਾਨਨ੍ਤਿ ਮਹਨ੍ਤਂ ਧਨਞ੍ਚ ਯਸਞ੍ਚ ਉਪ੍ਪਾਦੇਤ੍ਵਾ ਤਤ੍ਥ ਅਤ੍ਤਾਨਂ ਸਣ੍ਠਾਪੇਤਿ ਪਤਿਟ੍ਠਾਪੇਤਿ. ਯਥਾ ਕਿਂ? ਅਣੁਂ ਅਗ੍ਗਿਂਵ ਸਨ੍ਧਮਂ, ਯਥਾ ਪਣ੍ਡਿਤਪੁਰਿਸੋ ਪਰਿਤ੍ਤਂ ਅਗ੍ਗਿਂ ਅਨੁਕ੍ਕਮੇਨ ਗੋਮਯਚੁਣ੍ਣਾਦੀਨਿ ਪਕ੍ਖਿਪਿਤ੍ਵਾ ਮੁਖਵਾਤੇਨ ਧਮਨ੍ਤੋ ਸਮੁਟ੍ਠਾਪੇਤਿ ਵਡ੍ਢੇਤਿ ਮਹਨ੍ਤਂ ਅਗ੍ਗਿਕ੍ਖਨ੍ਧਂ ਕਰੋਤਿ, ਏਵਮੇਵ ਪਣ੍ਡਿਤੋ ਥੋਕਮ੍ਪਿ ਪਾਭਤਂ ਲਭਿਤ੍ਵਾ ਨਾਨਾਉਪਾਯੇਹਿ ਪਯੋਜੇਤ੍ਵਾ ਧਨਞ੍ਚ ਯਸਞ੍ਚ ਵਡ੍ਢੇਤਿ, ਵਡ੍ਢੇਤ੍ਵਾ ਚ ਪਨ ਤਤ੍ਥ ਅਤ੍ਤਾਨਂ ਪਤਿਟ੍ਠਾਪੇਤਿ, ਤਾਯ ਏਵ ਵਾ ਪਨ ਧਨਯਸਮਹਨ੍ਤਤਾਯ ਅਤ੍ਤਾਨਂ ਸਮੁਟ੍ਠਾਪੇਤਿ, ਅਭਿਞ੍ਞਾਤਂ ਪਾਕਟਂ ਕਰੋਤੀਤਿ ਅਤ੍ਥੋ.

ਇਤਿ ਭਗਵਾ ‘‘ਭਿਕ੍ਖਵੇ, ਚੂਲ਼ਪਨ੍ਥਕੋ ਮਂ ਨਿਸ੍ਸਾਯ ਇਦਾਨਿ ਧਮ੍ਮੇਸੁ ਧਮ੍ਮਮਹਨ੍ਤਤਂ ਪਤ੍ਤੋ, ਪੁਬ੍ਬੇ ਪਨ ਭੋਗੇਸੁਪਿ ਭੋਗਮਹਨ੍ਤਤਂ ਪਾਪੁਣੀ’’ਤਿ ਏਵਂ ਇਮਂ ਧਮ੍ਮਦੇਸਨਂ ਦਸ੍ਸੇਤ੍ਵਾ ਦ੍ਵੇ ਵਤ੍ਥੂਨਿ ਕਥੇਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਚੂਲ਼ਨ੍ਤੇਵਾਸਿਕੋ ਚੂਲ਼ਪਨ੍ਥਕੋ ਅਹੋਸਿ, ਚੂਲ਼ਕਸੇਟ੍ਠਿ ਪਨ ਅਹਮੇਵ ਅਹੋਸਿ’’ਨ੍ਤਿ ਦੇਸਨਂ ਨਿਟ੍ਠਾਪੇਸਿ.

ਚੂਲ਼ਸੇਟ੍ਠਿਜਾਤਕਵਣ੍ਣਨਾ ਚਤੁਤ੍ਥਾ.

੫. ਤਣ੍ਡੁਲਨਾਲ਼ਿਜਾਤਕਵਣ੍ਣਨਾ

ਕਿਮਗ੍ਘਤਿ ਤਣ੍ਡੁਲਨਾਲ਼ਿਕਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਲਾਲੁਦਾਯਿਤ੍ਥੇਰਂ ਆਰਬ੍ਭ ਕਥੇਸਿ. ਤਸ੍ਮਿਂ ਸਮਯੇ ਆਯਸ੍ਮਾ ਦਬ੍ਬੋ ਮਲ੍ਲਪੁਤ੍ਤੋ ਸਙ੍ਘਸ੍ਸ ਭਤ੍ਤੁਦ੍ਦੇਸਕੋ ਹੋਤਿ. ਤਸ੍ਮਿਂ ਪਾਤੋਵ ਸਲਾਕਭਤ੍ਤਾਨਿ ਉਦ੍ਦਿਸਮਾਨੇ ਲਾਲੁਦਾਯਿਤ੍ਥੇਰਸ੍ਸ ਕਦਾਚਿ ਵਰਭਤ੍ਤਂ ਪਾਪੁਣਾਤਿ, ਕਦਾਚਿ ਲਾਮਕਭਤ੍ਤਂ. ਸੋ ਲਾਮਕਭਤ੍ਤਸ੍ਸ ਪਤ੍ਤਦਿਵਸੇ ਸਲਾਕਗ੍ਗਂ ਆਕੁਲਂ ਕਰੋਤਿ, ‘‘ਕਿਂ ਦਬ੍ਬੋਵ ਸਲਾਕਂ ਦਾਤੁਂ ਜਾਨਾਤਿ, ਅਮ੍ਹੇ ਨ ਜਾਨਾਮਾ’’ਤਿ ਵਦਤਿ. ਤਸ੍ਮਿਂ ਸਲਾਕਗ੍ਗਂ ਆਕੁਲਂ ਕਰੋਨ੍ਤੇ ‘‘ਹਨ੍ਦ ਦਾਨਿ ਤ੍ਵਮੇਵ ਸਲਾਕਂ ਦੇਹੀ’’ਤਿ ਸਲਾਕਪਚ੍ਛਿਂ ਅਦਂਸੁ. ਤਤੋ ਪਟ੍ਠਾਯ ਸੋ ਸਙ੍ਘਸ੍ਸ ਸਲਾਕਂ ਅਦਾਸਿ. ਦੇਨ੍ਤੋ ਚ ਪਨ ‘‘ਇਦਂ ਵਰਭਤ੍ਤ’’ਨ੍ਤਿ ਵਾ ‘‘ਲਾਮਕਭਤ੍ਤ’’ਨ੍ਤਿ ਵਾ ‘‘ਅਸੁਕਵਸ੍ਸਗ੍ਗੇ ਵਰਭਤ੍ਤ’’ਨ੍ਤਿ ਵਾ ‘‘ਅਸੁਕਵਸ੍ਸਗ੍ਗੇ ਲਾਮਕਭਤ੍ਤ’’ਨ੍ਤਿ ਵਾ ਨ ਜਾਨਾਤਿ, ਠਿਤਿਕਂ ਕਰੋਨ੍ਤੋਪਿ ‘‘ਅਸੁਕਵਸ੍ਸਗ੍ਗੇ ਠਿਤਿਕਾ’’ਤਿ ਨ ਸਲ੍ਲਕ੍ਖੇਤਿ. ਭਿਕ੍ਖੂਨਂ ਠਿਤਵੇਲਾਯ ‘‘ਇਮਸ੍ਮਿਂ ਠਾਨੇ ਅਯਂ ਠਿਤਿਕਾ ਠਿਤਾ, ਇਮਸ੍ਮਿਂ ਠਾਨੇ ਅਯ’’ਨ੍ਤਿ ਭੂਮਿਯਂ ਵਾ ਭਿਤ੍ਤਿਯਂ ਵਾ ਲੇਖਂ ਕਡ੍ਢਤਿ. ਪੁਨਦਿਵਸੇ ਸਲਾਕਗ੍ਗੇ ਭਿਕ੍ਖੂ ਮਨ੍ਦਤਰਾ ਵਾ ਹੋਨ੍ਤਿ ਬਹੁਤਰਾ ਵਾ, ਤੇਸੁ ਮਨ੍ਦਤਰੇਸੁ ਲੇਖਾ ਹੇਟ੍ਠਾ ਹੋਤਿ, ਬਹੁਤਰੇਸੁ ਉਪਰਿ. ਸੋ ਠਿਤਿਕਂ ਅਜਾਨਨ੍ਤੋ ਲੇਖਾਸਞ੍ਞਾਯ ਸਲਾਕਂ ਦੇਤਿ.

ਅਥ ਨਂ ਭਿਕ੍ਖੂ ‘‘ਆਵੁਸੋ, ਉਦਾਯਿ, ਲੇਖਾ ਨਾਮ ਹੇਟ੍ਠਾ ਵਾ ਹੋਤਿ ਉਪਰਿ ਵਾ, ਵਰਭਤ੍ਤਂ ਪਨ ਅਸੁਕਵਸ੍ਸਗ੍ਗੇ ਠਿਤਂ, ਲਾਮਕਭਤ੍ਤਂ ਅਸੁਕਵਸ੍ਸਗ੍ਗੇ’’ਤਿ ਆਹਂਸੁ. ਸੋ ਭਿਕ੍ਖੂ ਪਟਿਪ੍ਫਰਨ੍ਤੋ ‘‘ਯਦਿ ਏਵਂ ਅਯਂ ਲੇਖਾ ਕਸ੍ਮਾ ਏਵਂ ਠਿਤਾ, ਕਿਂ ਅਹਂ ਤੁਮ੍ਹਾਕਂ ਸਦ੍ਦਹਾਮਿ, ਇਮਿਸ੍ਸਾ ਲੇਖਾਯ ਸਦ੍ਦਹਾਮੀ’’ਤਿ ਵਦਤਿ. ਅਥ ਨਂ ਦਹਰਾ ਚ ਸਾਮਣੇਰਾ ਚ ‘‘ਆਵੁਸੋ ਲਾਲੁਦਾਯਿ ਤਯਿ ਸਲਾਕਂ ਦੇਨ੍ਤੇ ਭਿਕ੍ਖੂ ਲਾਭੇਨ ਪਰਿਹਾਯਨ੍ਤਿ, ਨ ਤ੍ਵਂ ਦਾਤੁਂ ਅਨੁਚ੍ਛਵਿਕੋ, ਗਚ੍ਛ ਇਤੋ’’ਤਿ ਸਲਾਕਗ੍ਗਤੋ ਨਿਕ੍ਕਡ੍ਢਿਂਸੁ. ਤਸ੍ਮਿਂ ਖਣੇ ਸਲਾਕਗ੍ਗੇ ਮਹਨ੍ਤਂ ਕੋਲਾਹਲਂ ਅਹੋਸਿ. ਤਂ ਸੁਤ੍ਵਾ ਸਤ੍ਥਾ ਆਨਨ੍ਦਤ੍ਥੇਰਂ ਪੁਚ੍ਛਿ ‘‘ਆਨਨ੍ਦ, ਸਲਾਕਗ੍ਗੇ ਮਹਨ੍ਤਂ ਕੋਲਾਹਲਂ, ਕਿਂ ਸਦ੍ਦੋ ਨਾਮੇਸੋ’’ਤਿ. ਥੇਰੋ ਤਥਾਗਤਸ੍ਸ ਤਮਤ੍ਥਂ ਆਰੋਚੇਸਿ. ‘‘ਆਨਨ੍ਦ, ਨ ਇਦਾਨੇਵ ਲਾਲੁਦਾਯਿ ਅਤ੍ਤਨੋ ਬਾਲਤਾਯ ਪਰੇਸਂ ਲਾਭਹਾਨਿਂ ਕਰੋਤਿ, ਪੁਬ੍ਬੇਪਿ ਅਕਾਸਿਯੇਵਾ’’ਤਿ ਆਹ. ਥੇਰੋ ਤਸ੍ਸਤ੍ਥਸ੍ਸ ਆਵਿਭਾਵਤ੍ਥਂ ਭਗਵਨ੍ਤਂ ਯਾਚਿ. ਭਗਵਾ ਭਵਨ੍ਤਰੇਨ ਪਟਿਚ੍ਛਨ੍ਨਂ ਕਾਰਣਂ ਪਾਕਟਂ ਅਕਾਸਿ.

ਅਤੀਤੇ ਕਾਸਿਰਟ੍ਠੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਰਾਜਾ ਅਹੋਸਿ. ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਤਸ੍ਸ ਅਗ੍ਘਾਪਨਿਕੋ ਅਹੋਸਿ. ਹਤ੍ਥਿਅਸ੍ਸਾਦੀਨਿ ਚੇਵ ਮਣਿਸੁਵਣ੍ਣਾਦੀਨਿ ਚ ਅਗ੍ਘਾਪੇਸਿ, ਅਗ੍ਘਾਪੇਤ੍ਵਾ ਭਣ੍ਡਸਾਮਿਕਾਨਂ ਭਣ੍ਡਾਨੁਰੂਪਮੇਵ ਮੂਲਂ ਦਾਪੇਸਿ. ਰਾਜਾ ਪਨ ਲੁਦ੍ਧੋ ਹੋਤਿ, ਸੋ ਲੋਭਪਕਤਿਤਾਯ ਏਵਂ ਚਿਨ੍ਤੇਸਿ ‘‘ਅਯਂ ਅਗ੍ਘਾਪਨਿਕੋ ਏਵਂ ਅਗ੍ਘਾਪੇਨ੍ਤੋ ਨ ਚਿਰਸ੍ਸੇਵ ਮਮ ਗੇਹੇ ਧਨਂ ਪਰਿਕ੍ਖਯਂ ਗਮੇਸ੍ਸਤਿ, ਅਞ੍ਞਂ ਅਗ੍ਘਾਪਨਿਕਂ ਕਰਿਸ੍ਸਾਮੀ’’ਤਿ. ਸੋ ਸੀਹਪਞ੍ਜਰਂ ਉਗ੍ਘਾਟੇਤ੍ਵਾ ਰਾਜਙ੍ਗਣਂ ਓਲੋਕੇਨ੍ਤੋ ਏਕਂ ਗਾਮਿਕਮਨੁਸ੍ਸਂ ਲੋਲਬਾਲਂ ਰਾਜਙ੍ਗਣੇਨ ਗਚ੍ਛਨ੍ਤਂ ਦਿਸ੍ਵਾ ‘‘ਏਸ ਮਯ੍ਹਂ ਅਗ੍ਘਾਪਨਿਕਕਮ੍ਮਂ ਕਾਤੁਂ ਸਕ੍ਖਿਸ੍ਸਤੀ’’ਤਿ ਤਂ ਪਕ੍ਕੋਸਾਪੇਤ੍ਵਾ ‘‘ਸਕ੍ਖਿਸ੍ਸਸਿ, ਭਣੇ, ਅਮ੍ਹਾਕਂ ਅਗ੍ਘਾਪਨਿਕਕਮ੍ਮਂ ਕਾਤੁ’’ਨ੍ਤਿ ਆਹ. ਸਕ੍ਖਿਸ੍ਸਾਮਿ, ਦੇਵਾਤਿ. ਰਾਜਾ ਅਤ੍ਤਨੋ ਧਨਰਕ੍ਖਣਤ੍ਥਾਯ ਤਂ ਬਾਲਂ ਅਗ੍ਘਾਪਨਿਕਕਮ੍ਮੇ ਠਪੇਸਿ. ਤਤੋ ਪਟ੍ਠਾਯ ਸੋ ਬਾਲੋ ਹਤ੍ਥਿਅਸ੍ਸਾਦੀਨਿ ਅਗ੍ਘਾਪੇਨ੍ਤੋ ਅਗ੍ਘਂ ਹਾਪੇਤ੍ਵਾ ਯਥਾਰੁਚਿਯਾ ਕਥੇਤਿ. ਤਸ੍ਸ ਠਾਨਨ੍ਤਰੇ ਠਿਤਤ੍ਤਾ ਯਂ ਸੋ ਕਥੇਤਿ, ਤਮੇਵ ਮੂਲਂ ਹੋਤਿ.

ਤਸ੍ਮਿਂ ਕਾਲੇ ਉਤ੍ਤਰਾਪਥਤੋ ਏਕੋ ਅਸ੍ਸਵਾਣਿਜੋ ਪਞ੍ਚ ਅਸ੍ਸਸਤਾਨਿ ਆਨੇਸਿ. ਰਾਜਾ ਤਂ ਪੁਰਿਸਂ ਪਕ੍ਕੋਸਾਪੇਤ੍ਵਾ ਅਸ੍ਸੇ ਅਗ੍ਘਾਪੇਸਿ. ਸੋ ਪਞ੍ਚਨ੍ਨਂ ਅਸ੍ਸਸਤਾਨਂ ਏਕਂ ਤਣ੍ਡੁਲਨਾਲ਼ਿਕਂ ਅਗ੍ਘਮਕਾਸਿ. ਕਤ੍ਵਾ ਚ ਪਨ ‘‘ਅਸ੍ਸਵਾਣਿਜਸ੍ਸ ਏਕਂ ਤਣ੍ਡੁਲਨਾਲ਼ਿਕਂ ਦੇਥਾ’’ਤਿ ਵਤ੍ਵਾ ਅਸ੍ਸੇ ਅਸ੍ਸਸਾਲਾਯਂ ਸਣ੍ਠਾਪੇਸਿ. ਅਸ੍ਸਵਾਣਿਜੋ ਪੋਰਾਣਅਗ੍ਘਾਪਨਿਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਪਵਤ੍ਤਿਂ ਆਰੋਚੇਤ੍ਵਾ ‘‘ਇਦਾਨਿ ਕਿਂ ਕਤ੍ਤਬ੍ਬ’’ਨ੍ਤਿ ਪੁਚ੍ਛਿ. ਸੋ ਆਹ ‘‘ਤਸ੍ਸ ਪੁਰਿਸਸ੍ਸ ਲਞ੍ਜਂ ਦਤ੍ਵਾ ਏਵਂ ਪੁਚ੍ਛਥ ‘ਅਮ੍ਹਾਕਂ ਤਾਵ ਅਸ੍ਸਾ ਏਕਂ ਤਣ੍ਡੁਲਨਾਲ਼ਿਕਂ ਅਗ੍ਘਨ੍ਤੀਤਿ ਞਾਤਮੇਤਂ, ਤੁਮ੍ਹੇ ਪਨ ਨਿਸ੍ਸਾਯ ਤਣ੍ਡੁਲਨਾਲ਼ਿਯਾ ਅਗ੍ਘਂ ਜਾਨਿਤੁਕਾਮਮ੍ਹਾ, ਸਕ੍ਖਿਸ੍ਸਥ ਨੋ ਰਞ੍ਞੋ ਸਨ੍ਤਿਕੇ ਠਤ੍ਵਾ ਸਾ ਤਣ੍ਡੁਲਨਾਲ਼ਿਕਾ ਇਦਂ ਨਾਮ ਅਗ੍ਘਤੀਤਿ ਵਤ੍ਤੁ’ਨ੍ਤਿ, ਸਚੇ ਸਕ੍ਕੋਮੀਤਿ ਵਦਤਿ, ਤਂ ਗਹੇਤ੍ਵਾ ਰਞ੍ਞੋ ਸਨ੍ਤਿਕਂ ਗਚ੍ਛਥ, ਅਹਮ੍ਪਿ ਤਤ੍ਥ ਆਗਮਿਸ੍ਸਾਮੀ’’ਤਿ.

ਅਸ੍ਸਵਾਣਿਜੋ ‘‘ਸਾਧੂ’’ਤਿ ਬੋਧਿਸਤ੍ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਗ੍ਘਾਪਨਿਕਸ੍ਸ ਲਞ੍ਜਂ ਦਤ੍ਵਾ ਤਮਤ੍ਥਂ ਆਰੋਚੇਸਿ. ਸੋ ਲਞ੍ਜਂ ਲਭਿਤ੍ਵਾਵ ‘‘ਸਕ੍ਖਿਸ੍ਸਾਮਿ ਤਣ੍ਡੁਲਨਾਲ਼ਿਂ ਅਗ੍ਘਾਪੇਤੁ’’ਨ੍ਤਿ. ‘‘ਤੇਨ ਹਿ ਗਚ੍ਛਾਮ ਰਾਜਕੁਲ’’ਨ੍ਤਿ ਤਂ ਆਦਾਯ ਰਞ੍ਞੋ ਸਨ੍ਤਿਕਂ ਅਗਮਾਸਿ. ਬੋਧਿਸਤ੍ਤੋਪਿ ਅਞ੍ਞੇਪਿ ਬਹੂ ਅਮਚ੍ਚਾ ਅਗਮਿਂਸੁ. ਅਸ੍ਸਵਾਣਿਜੋ ਰਾਜਾਨਂ ਵਨ੍ਦਿਤ੍ਵਾ ਆਹ – ‘‘ਦੇਵ, ਪਞ੍ਚਨ੍ਨਂ ਅਸ੍ਸਸਤਾਨਂ ਏਕਂ ਤਣ੍ਡੁਲਨਾਲ਼ਿਂ ਅਗ੍ਘਨਕਭਾਵਂ ਜਾਨਾਮ, ਸਾ ਪਨ ਤਣ੍ਡੁਲਨਾਲ਼ਿ ਕਿਂ ਅਗ੍ਘਤੀਤਿ ਅਗ੍ਘਾਪਨਿਕਂ ਪੁਚ੍ਛਥ ਦੇਵਾ’’ਤਿ. ਰਾਜਾ ਤਂ ਪਵਤ੍ਤਿਂ ਅਜਾਨਨ੍ਤੋ ‘‘ਅਮ੍ਭੋ ਅਗ੍ਘਾਪਨਿਕ, ਪਞ੍ਚ ਅਸ੍ਸਸਤਾਨਿ ਕਿਂ ਅਗ੍ਘਨ੍ਤੀ’’ਤਿ ਪੁਚ੍ਛਿ. ਤਣ੍ਡੁਲਨਾਲ਼ਿਂ, ਦੇਵਾਤਿ. ‘‘ਹੋਤੁ, ਭਣੇ, ਅਸ੍ਸਾ ਤਾਵ ਤਣ੍ਡੁਲਨਾਲ਼ਿਂ ਅਗ੍ਘਨ੍ਤੁ. ਸਾ ਪਨ ਕਿਂ ਅਗ੍ਘਤਿ ਤਣ੍ਡੁਲਨਾਲ਼ਿਕਾ’’ਤਿ ਪੁਚ੍ਛਿ. ਸੋ ਬਾਲਪੁਰਿਸੋ ‘‘ਬਾਰਾਣਸਿਂ ਸਨ੍ਤਰਬਾਹਿਰਂ ਅਗ੍ਘਤਿ ਤਣ੍ਡੁਲਨਾਲ਼ਿਕਾ’’ਤਿ ਆਹ. ਸੋ ਕਿਰ ਪੁਬ੍ਬੇ ਰਾਜਾਨਂ ਅਨੁਵਤ੍ਤਨ੍ਤੋ ਏਕਂ ਤਣ੍ਡੁਲਨਾਲ਼ਿਂ ਅਸ੍ਸਾਨਂ ਅਗ੍ਘਮਕਾਸਿ. ਪੁਨ ਵਾਣਿਜਸ੍ਸ ਹਤ੍ਥਤੋ ਲਞ੍ਜਂ ਲਭਿਤ੍ਵਾ ਤਸ੍ਸਾ ਤਣ੍ਡੁਲਨਾਲ਼ਿਕਾਯ ਬਾਰਾਣਸਿਂ ਸਨ੍ਤਰਬਾਹਿਰਂ ਅਗ੍ਘਮਕਾਸਿ. ਤਦਾ ਪਨ ਬਾਰਾਣਸਿਯਾ ਪਾਕਾਰਪਰਿਕ੍ਖੇਪੋ ਦ੍ਵਾਦਸਯੋਜਨਿਕੋ ਹੋਤਿ. ਇਦਮਸ੍ਸ ਅਨ੍ਤਰਂ, ਬਾਹਿਰਂ ਪਨ ਤਿਯੋਜਨਸਤਿਕਂ ਰਟ੍ਠਂ. ਇਤਿ ਸੋ ਬਾਲੋ ਏਵਂ ਮਹਨ੍ਤਂ ਬਾਰਾਣਸਿਂ ਸਨ੍ਤਰਬਾਹਿਰਂ ਤਣ੍ਡੁਲਨਾਲ਼ਿਕਾਯ ਅਗ੍ਘਮਕਾਸਿ.

ਤਂ ਸੁਤ੍ਵਾ ਅਮਚ੍ਚਾ ਪਾਣਿਂ ਪਹਰਿਤ੍ਵਾ ਹਸਮਾਨਾ ‘‘ਮਯਂ ਪੁਬ੍ਬੇ ਪਥਵਿਞ੍ਚ ਰਜ੍ਜਞ੍ਚ ਅਨਗ੍ਘਨ੍ਤਿ ਸਞ੍ਞਿਨੋ ਅਹੁਮ੍ਹ, ਏਵਂ ਮਹਨ੍ਤਂ ਕਿਰ ਸਰਾਜਕਂ ਬਾਰਾਣਸਿਰਜ੍ਜਂ ਤਣ੍ਡੁਲਨਾਲ਼ਿਮਤ੍ਤਂ ਅਗ੍ਘਤਿ, ਅਹੋ ਅਗ੍ਘਾਪਨਿਕਸ੍ਸ ਞਾਣਸਮ੍ਪਦਾ. ਕਹਂ ਏਤ੍ਤਕਂ ਕਾਲਂ ਅਯਂ ਅਗ੍ਘਾਪਨਿਕੋ ਵਿਹਾਸਿ, ਅਮ੍ਹਾਕਂ ਰਞ੍ਞੋ ਏਵ ਅਨੁਚ੍ਛਵਿਕੋ’’ਤਿ ਪਰਿਹਾਸਂ ਅਕਂਸੁ –

੫. ‘‘ਕਿਮਗ੍ਘਤਿ ਤਣ੍ਡੁਲਨਾਲ਼ਿਕਾਯਂ, ਅਸ੍ਸਾਨ ਮੂਲਾਯ ਵਦੇਹਿ ਰਾਜ;

ਬਾਰਾਣਸਿਂ ਸਨ੍ਤਰਬਾਹਿਰਂ, ਅਯਮਗ੍ਘਤਿ ਤਣ੍ਡੁਲਨਾਲ਼ਿਕਾ’’ਤਿ.

ਤਸ੍ਮਿਂ ਕਾਲੇ ਰਾਜਾ ਲਜ੍ਜਿਤੋ ਤਂ ਬਾਲਂ ਨਿਕ੍ਕਡ੍ਢਾਪੇਤ੍ਵਾ ਬੋਧਿਸਤ੍ਤਸ੍ਸੇਵ ਅਗ੍ਘਾਪਨਿਕਟ੍ਠਾਨਂ ਅਦਾਸਿ. ਬੋਧਿਸਤ੍ਤੋਪਿ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਦ੍ਵੇ ਵਤ੍ਥੂਨਿ ਕਥੇਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਗਾਮਿਕਬਾਲਅਗ੍ਘਾਪਨਿਕੋ ਲਾਲੁਦਾਯੀ ਅਹੋਸਿ, ਪਣ੍ਡਿਤਅਗ੍ਘਾਪਨਿਕੋ ਪਨ ਅਹਮੇਵ ਅਹੋਸਿ’’ਨ੍ਤਿ ਦੇਸਨਂ ਨਿਟ੍ਠਾਪੇਸਿ.

ਤਣ੍ਡੁਲਨਾਲ਼ਿਜਾਤਕਵਣ੍ਣਨਾ ਪਞ੍ਚਮਾ.

੬. ਦੇਵਧਮ੍ਮਜਾਤਕਵਣ੍ਣਨਾ

ਹਿਰਿਓਤ੍ਤਪ੍ਪਸਮ੍ਪਨ੍ਨਾਤਿ ਇਦਂ ਭਗਵਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਬਹੁਭਣ੍ਡਿਕਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਸਾਵਤ੍ਥਿਵਾਸੀ ਕਿਰੇਕੋ ਕੁਟੁਮ੍ਬਿਕੋ ਭਰਿਯਾਯ ਕਾਲਕਤਾਯ ਪਬ੍ਬਜਿ. ਸੋ ਪਬ੍ਬਜਨ੍ਤੋ ਅਤ੍ਤਨੋ ਪਰਿਵੇਣਞ੍ਚ ਅਗ੍ਗਿਸਾਲਞ੍ਚ ਭਣ੍ਡਗਬ੍ਭਞ੍ਚ ਕਾਰੇਤ੍ਵਾ ਭਣ੍ਡਗਬ੍ਭਂ ਸਪ੍ਪਿਤਣ੍ਡੁਲਾਦੀਹਿ ਪੂਰੇਤ੍ਵਾ ਪਬ੍ਬਜਿ. ਪਬ੍ਬਜਿਤ੍ਵਾ ਚ ਪਨ ਅਤ੍ਤਨੋ ਦਾਸੇ ਪਕ੍ਕੋਸਾਪੇਤ੍ਵਾ ਯਥਾਰੁਚਿਤਂ ਆਹਾਰਂ ਪਚਾਪੇਤ੍ਵਾ ਭੁਞ੍ਜਤਿ, ਬਹੁਪਰਿਕ੍ਖਾਰੋ ਚ ਅਹੋਸਿ, ਰਤ੍ਤਿਂ ਅਞ੍ਞਂ ਨਿਵਾਸਨਪਾਰੁਪਨਂ ਹੋਤਿ, ਦਿਵਾ ਅਞ੍ਞਂ. ਵਿਹਾਰਪਚ੍ਚਨ੍ਤੇ ਵਸਤਿ. ਤਸ੍ਸੇਕਦਿਵਸਂ ਚੀਵਰਪਚ੍ਚਤ੍ਥਰਣਾਦੀਨਿ ਨੀਹਰਿਤ੍ਵਾ ਪਰਿਵੇਣੇ ਪਤ੍ਥਰਿਤ੍ਵਾ ਸੁਕ੍ਖਾਪੇਨ੍ਤਸ੍ਸ ਸਮ੍ਬਹੁਲਾ ਜਾਨਪਦਾ ਭਿਕ੍ਖੂ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤਾ ਪਰਿਵੇਣਂ ਗਨ੍ਤ੍ਵਾ ਚੀਵਰਾਦੀਨਿ ਦਿਸ੍ਵਾ ‘‘ਕਸ੍ਸਿਮਾਨੀ’’ਤਿ ਪੁਚ੍ਛਿਂਸੁ. ਸੋ ‘‘ਮਯ੍ਹਂ, ਆਵੁਸੋ’’ਤਿ ਆਹ. ‘‘ਆਵੁਸੋ, ਇਦਮ੍ਪਿ ਚੀਵਰਂ, ਇਦਮ੍ਪਿ ਨਿਵਾਸਨਂ, ਇਦਮ੍ਪਿ ਪਚ੍ਚਤ੍ਥਰਣਂ, ਸਬ੍ਬਂ ਤੁਯ੍ਹਮੇਵਾ’’ਤਿ? ‘‘ਆਮ ਮਯ੍ਹਮੇਵਾ’’ਤਿ. ‘‘ਆਵੁਸੋ ਭਗਵਤਾ ਤੀਣਿ ਚੀਵਰਾਨਿ ਅਨੁਞ੍ਞਾਤਾਨਿ, ਤ੍ਵਂ ਏਵਂ ਅਪ੍ਪਿਚ੍ਛਸ੍ਸ ਬੁਦ੍ਧਸ੍ਸ ਸਾਸਨੇ ਪਬ੍ਬਜਿਤ੍ਵਾ ਏਵਂ ਬਹੁਪਰਿਕ੍ਖਾਰੋ ਜਾਤੋ, ਏਹਿ ਤਂ ਦਸਬਲਸ੍ਸ ਸਨ੍ਤਿਕਂ ਨੇਸ੍ਸਾਮਾ’’ਤਿ ਤਂ ਆਦਾਯ ਸਤ੍ਥੁ ਸਨ੍ਤਿਕਂ ਅਗਮਂਸੁ.

ਸਤ੍ਥਾ ਦਿਸ੍ਵਾਵ ‘‘ਕਿਂ ਨੁ ਖੋ, ਭਿਕ੍ਖਵੇ, ਅਨਿਚ੍ਛਮਾਨਕਂਯੇਵ ਭਿਕ੍ਖੁਂ ਗਣ੍ਹਿਤ੍ਵਾ ਆਗਤਤ੍ਥਾ’’ਤਿ ਆਹ. ‘‘ਭਨ੍ਤੇ, ਅਯਂ ਭਿਕ੍ਖੁ ਬਹੁਭਣ੍ਡੋ ਬਹੁਪਰਿਕ੍ਖਾਰੋ’’ਤਿ. ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਬਹੁਭਣ੍ਡੋ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ‘‘ਕਸ੍ਮਾ ਪਨ ਤ੍ਵਂ ਭਿਕ੍ਖੁ ਬਹੁਭਣ੍ਡੋ ਜਾਤੋ’’? ‘‘ਨਨੁ ਅਹਂ ਅਪ੍ਪਿਚ੍ਛਤਾਯ ਸਨ੍ਤੁਟ੍ਠਿਤਾਯ ਪਵਿਵੇਕਸ੍ਸ ਵੀਰਿਯਾਰਮ੍ਭਸ੍ਸ ਵਣ੍ਣਂ ਵਦਾਮੀ’’ਤਿ. ਸੋ ਸਤ੍ਥੁ ਵਚਨਂ ਸੁਤ੍ਵਾ ਕੁਪਿਤੋ ‘‘ਇਮਿਨਾ ਦਾਨਿ ਨੀਹਾਰੇਨ ਚਰਿਸ੍ਸਾਮੀ’’ਤਿ ਪਾਰੁਪਨਂ ਛਡ੍ਡੇਤ੍ਵਾ ਪਰਿਸਮਜ੍ਝੇ ਏਕਚੀਵਰੋ ਅਟ੍ਠਾਸਿ.

ਅਥ ਨਂ ਸਤ੍ਥਾ ਉਪਤ੍ਥਮ੍ਭਯਮਾਨੋ ‘‘ਨਨੁ ਤ੍ਵਂ ਭਿਕ੍ਖੁ ਪੁਬ੍ਬੇ ਹਿਰੋਤ੍ਤਪ੍ਪਗਵੇਸਕੋ ਦਕਰਕ੍ਖਸਕਾਲੇਪਿ ਹਿਰੋਤ੍ਤਪ੍ਪਂ ਗਵੇਸਮਾਨੋ ਦ੍ਵਾਦਸ ਸਂਵਚ੍ਛਰਾਨਿ ਵਿਹਾਸਿ, ਅਥ ਕਸ੍ਮਾ ਇਦਾਨਿ ਏਵਂ ਗਰੁਕੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾ ਚਤੁਪਰਿਸਮਜ੍ਝੇ ਪਾਰੁਪਨਂ ਛਡ੍ਡੇਤ੍ਵਾ ਹਿਰੋਤ੍ਤਪ੍ਪਂ ਪਹਾਯ ਠਿਤੋਸੀ’’ਤਿ? ਸੋ ਸਤ੍ਥੁ ਵਚਨਂ ਸੁਤ੍ਵਾ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਾਪੇਤ੍ਵਾ ਤਂ ਚੀਵਰਂ ਪਾਰੁਪਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਭਿਕ੍ਖੂ ਤਸ੍ਸਤ੍ਥਸ੍ਸ ਆਵਿਭਾਵਤ੍ਥਂ ਭਗਵਨ੍ਤਂ ਯਾਚਿਂਸੁ, ਭਗਵਾ ਭਵਨ੍ਤਰੇਨ ਪਟਿਚ੍ਛਨ੍ਨਂ ਕਾਰਣਂ ਪਾਕਟਂ ਅਕਾਸਿ.

ਅਤੀਤੇ ਕਾਸਿਰਟ੍ਠੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਨਾਮ ਰਾਜਾ ਅਹੋਸਿ. ਤਦਾ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਤਸ੍ਸ ਨਾਮਗ੍ਗਹਣਦਿਵਸੇ ‘‘ਮਹਿਸਾਸਕੁਮਾਰੋ’’ਤਿ ਨਾਮਂ ਅਕਂਸੁ. ਤਸ੍ਸ ਆਧਾਵਿਤ੍ਵਾ ਪਰਿਧਾਵਿਤ੍ਵਾ ਵਿਚਰਣਕਾਲੇ ਰਞ੍ਞੋ ਅਞ੍ਞੋਪਿ ਪੁਤ੍ਤੋ ਜਾਤੋ, ਤਸ੍ਸ ‘‘ਚਨ੍ਦਕੁਮਾਰੋ’’ਤਿ ਨਾਮਂ ਅਕਂਸੁ. ਤਸ੍ਸ ਪਨ ਆਧਾਵਿਤ੍ਵਾ ਪਰਿਧਾਵਿਤ੍ਵਾ ਵਿਚਰਣਕਾਲੇ ਬੋਧਿਸਤ੍ਤਸ੍ਸ ਮਾਤਾ ਕਾਲਮਕਾਸਿ, ਰਾਜਾ ਅਞ੍ਞਂ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਸਾ ਰਞ੍ਞੋ ਪਿਯਾ ਅਹੋਸਿ ਮਨਾਪਾ, ਸਾਪਿ ਸਂਵਾਸਮਨ੍ਵਾਯ ਏਕਂ ਪੁਤ੍ਤਂ ਵਿਜਾਯਿ, ‘‘ਸੂਰਿਯਕੁਮਾਰੋ’’ਤਿਸ੍ਸ ਨਾਮਂ ਅਕਂਸੁ. ਰਾਜਾ ਪੁਤ੍ਤਂ ਦਿਸ੍ਵਾ ਤੁਟ੍ਠਚਿਤ੍ਤੋ ‘‘ਭਦ੍ਦੇ, ਪੁਤ੍ਤਸ੍ਸ ਤੇ ਵਰਂ ਦਮ੍ਮੀ’’ਤਿ ਆਹ. ਦੇਵੀ, ਵਰਂ ਇਚ੍ਛਿਤਕਾਲੇ ਗਹੇਤਬ੍ਬਂ ਕਤ੍ਵਾ ਠਪੇਸਿ. ਸਾ ਪੁਤ੍ਤੇ ਵਯਪ੍ਪਤ੍ਤੇ ਰਾਜਾਨਂ ਆਹ – ‘‘ਦੇਵੇਨ ਮਯ੍ਹਂ ਪੁਤ੍ਤਸ੍ਸ ਜਾਤਕਾਲੇ ਵਰੋ ਦਿਨ੍ਨੋ, ਪੁਤ੍ਤਸ੍ਸ ਮੇ ਰਜ੍ਜਂ ਦੇਹੀ’’ਤਿ. ਰਾਜਾ ‘‘ਮਯ੍ਹਂ ਦ੍ਵੇ ਪੁਤ੍ਤਾ ਅਗ੍ਗਿਕ੍ਖਨ੍ਧਾ ਵਿਯ ਜਲਮਾਨਾ ਵਿਚਰਨ੍ਤਿ, ਨ ਸਕ੍ਕਾ ਤਵ ਪੁਤ੍ਤਸ੍ਸ ਰਜ੍ਜਂ ਦਾਤੁ’’ਨ੍ਤਿ ਪਟਿਕ੍ਖਿਪਿਤ੍ਵਾਪਿ ਤਂ ਪੁਨਪ੍ਪੁਨਂ ਯਾਚਮਾਨਮੇਵ ਦਿਸ੍ਵਾ ‘‘ਅਯਂ ਮਯ੍ਹਂ ਪੁਤ੍ਤਾਨਂ ਪਾਪਕਮ੍ਪਿ ਚਿਨ੍ਤੇਯ੍ਯਾ’’ਤਿ ਪੁਤ੍ਤੇ ਪਕ੍ਕੋਸਾਪੇਤ੍ਵਾ ਆਹ – ‘‘ਤਾਤਾ, ਅਹਂ ਸੂਰਿਯਕੁਮਾਰਸ੍ਸ ਜਾਤਕਾਲੇ ਵਰਂ ਅਦਾਸਿਂ. ਇਦਾਨਿਸ੍ਸ ਮਾਤਾ ਰਜ੍ਜਂ ਯਾਚਤਿ, ਅਹਂ ਤਸ੍ਸ ਨ ਦਾਤੁਕਾਮੋ, ਮਾਤੁਗਾਮੋ ਨਾਮ ਪਾਪੋ, ਤੁਮ੍ਹਾਕਂ ਪਾਪਕਮ੍ਪਿ ਚਿਨ੍ਤੇਯ੍ਯ, ਤੁਮ੍ਹੇ ਅਰਞ੍ਞਂ ਪਵਿਸਿਤ੍ਵਾ ਮਮ ਅਚ੍ਚਯੇਨ ਕੁਲਸਨ੍ਤਕੇ ਨਗਰੇ ਰਜ੍ਜਂ ਕਰੇਯ੍ਯਾਥਾ’’ਤਿ ਰੋਦਿਤ੍ਵਾ ਕਨ੍ਦਿਤ੍ਵਾ ਸੀਸੇ ਚੁਮ੍ਬਿਤ੍ਵਾ ਉਯ੍ਯੋਜੇਸਿ. ਤੇ ਪਿਤਰਂ ਵਨ੍ਦਿਤ੍ਵਾ ਪਾਸਾਦਾ ਓਤਰਨ੍ਤੇ ਰਾਜਙ੍ਗਣੇ ਕੀਲ਼ਮਾਨੋ ਸੂਰਿਯਕੁਮਾਰੋ ਦਿਸ੍ਵਾ ਤਂ ਕਾਰਣਂ ਞਤ੍ਵਾ ‘‘ਅਹਮ੍ਪਿ ਭਾਤਿਕੇਹਿ ਸਦ੍ਧਿਂ ਗਮਿਸ੍ਸਾਮੀ’’ਤਿ ਤੇਹਿ ਸਦ੍ਧਿਂਯੇਵ ਨਿਕ੍ਖਮਿ. ਤੇ ਹਿਮਵਨ੍ਤਂ ਪਵਿਸਿਂਸੁ.

ਬੋਧਿਸਤ੍ਤੋ ਮਗ੍ਗਾ ਓਕ੍ਕਮ੍ਮ ਰੁਕ੍ਖਮੂਲੇ ਨਿਸੀਦਿਤ੍ਵਾ ਸੂਰਿਯਕੁਮਾਰਂ ਆਮਨ੍ਤੇਸਿ ‘‘ਤਾਤ ਸੂਰਿਯਕੁਮਾਰ, ਏਤਂ ਸਰਂ ਗਨ੍ਤ੍ਵਾ ਨ੍ਹਤ੍ਵਾ ਚ ਪਿਵਿਤ੍ਵਾ ਚ ਪਦੁਮਿਨਿਪਣ੍ਣੇਹਿ ਅਮ੍ਹਾਕਮ੍ਪਿ ਪਾਨੀਯਂ ਆਨੇਹੀ’’ਤਿ. ਤਂ ਪਨ ਸਰਂ ਵੇਸ੍ਸਵਣਸ੍ਸ ਸਨ੍ਤਿਕਾ ਏਕੇਨ ਦਕਰਕ੍ਖਸੇਨ ਲਦ੍ਧਂ ਹੋਤਿ, ਵੇਸ੍ਸਵਣੋ ਚ ਤਂ ਆਹ – ‘‘ਠਪੇਤ੍ਵਾ ਦੇਵਧਮ੍ਮਜਾਨਨਕੇ ਯੇ ਅਞ੍ਞੇ ਇਮਂ ਸਰਂ ਓਤਰਨ੍ਤਿ, ਤੇ ਖਾਦਿਤੁਂ ਲਭਸਿ. ਅਨੋਤਿਣ੍ਣੇ ਨ ਲਭਸੀ’’ਤਿ. ਤਤੋ ਪਟ੍ਠਾਯ ਸੋ ਰਕ੍ਖਸੋ ਯੇ ਤਂ ਸਰਂ ਓਤਰਨ੍ਤਿ, ਤੇ ਦੇਵਧਮ੍ਮੇ ਪੁਚ੍ਛਿਤ੍ਵਾ ਯੇ ਨ ਜਾਨਨ੍ਤਿ, ਤੇ ਖਾਦਤਿ. ਅਥ ਖੋ ਸੂਰਿਯਕੁਮਾਰੋ ਤਂ ਸਰਂ ਗਨ੍ਤ੍ਵਾ ਅਵੀਮਂਸਿਤ੍ਵਾਵ ਓਤਰਿ. ਅਥ ਨਂ ਸੋ ਰਕ੍ਖਸੋ ਗਹੇਤ੍ਵਾ ‘‘ਦੇਵਧਮ੍ਮੇ ਜਾਨਾਸੀ’’ਤਿ ਪੁਚ੍ਛਿ. ਸੋ ‘‘ਦੇਵਧਮ੍ਮਾ ਨਾਮ ਚਨ੍ਦਿਮਸੂਰਿਯਾ’’ਤਿ ਆਹ. ਅਥ ਨਂ ‘‘ਤ੍ਵਂ ਦੇਵਧਮ੍ਮੇ ਨ ਜਾਨਾਸੀ’’ਤਿ ਵਤ੍ਵਾ ਉਦਕਂ ਪਵੇਸੇਤ੍ਵਾ ਅਤ੍ਤਨੋ ਵਸਨਟ੍ਠਾਨੇ ਠਪੇਸਿ. ਬੋਧਿਸਤ੍ਤੋਪਿ ਤਂ ਅਤਿਚਿਰਾਯਨ੍ਤਂ ਦਿਸ੍ਵਾ ਚਨ੍ਦਕੁਮਾਰਂ ਪੇਸੇਸਿ. ਰਕ੍ਖਸੋ ਤਮ੍ਪਿ ਗਹੇਤ੍ਵਾ ‘‘ਦੇਵਧਮ੍ਮੇ ਜਾਨਾਸੀ’’ਤਿ ਪੁਚ੍ਛਿ. ‘‘ਆਮ ਜਾਨਾਮਿ, ਦੇਵਧਮ੍ਮਾ ਨਾਮ ਚਤਸ੍ਸੋ ਦਿਸਾ’’ਤਿ. ਰਕ੍ਖਸੋ ‘‘ਨ ਤ੍ਵਂ ਦੇਵਧਮ੍ਮੇ ਜਾਨਾਸੀ’’ਤਿ ਤਮ੍ਪਿ ਗਹੇਤ੍ਵਾ ਤਤ੍ਥੇਵ ਠਪੇਸਿ.

ਬੋਧਿਸਤ੍ਤੋ ਤਸ੍ਮਿਮ੍ਪਿ ਚਿਰਾਯਨ੍ਤੇ ‘‘ਏਕੇਨ ਅਨ੍ਤਰਾਯੇਨ ਭਵਿਤਬ੍ਬ’’ਨ੍ਤਿ ਸਯਂ ਤਤ੍ਥ ਗਨ੍ਤ੍ਵਾ ਦ੍ਵਿਨ੍ਨਮ੍ਪਿ ਓਤਰਣਪਦਵਲ਼ਞ੍ਜਂ ਦਿਸ੍ਵਾ ‘‘ਰਕ੍ਖਸਪਰਿਗ੍ਗਹਿਤੇਨ ਇਮਿਨਾ ਸਰੇਨ ਭਵਿਤਬ੍ਬ’’ਨ੍ਤਿ ਖਗ੍ਗਂ ਸਨ੍ਨਯ੍ਹਿਤ੍ਵਾ ਧਨੁਂ ਗਹੇਤ੍ਵਾ ਅਟ੍ਠਾਸਿ. ਦਕਰਕ੍ਖਸੋ ਬੋਧਿਸਤ੍ਤਂ ਉਦਕਂ ਅਨੋਤਰਨ੍ਤਂ ਦਿਸ੍ਵਾ ਵਨਕਮ੍ਮਿਕਪੁਰਿਸੋ ਵਿਯ ਹੁਤ੍ਵਾ ਬੋਧਿਸਤ੍ਤਂ ਆਹ – ‘‘ਭੋ, ਪੁਰਿਸ, ਤ੍ਵਂ ਮਗ੍ਗਕਿਲਨ੍ਤੋ ਕਸ੍ਮਾ ਇਮਂ ਸਰਂ ਓਤਰਿਤ੍ਵਾ ਨ੍ਹਤ੍ਵਾ ਪਿਵਿਤ੍ਵਾ ਭਿਸਮੁਲ਼ਾਲਂ ਖਾਦਿਤ੍ਵਾ ਪੁਪ੍ਫਾਨਿ ਪਿਲ਼ਨ੍ਧਿਤ੍ਵਾ ਯਥਾਸੁਖਂ ਨ ਗਚ੍ਛਸੀ’’ਤਿ? ਬੋਧਿਸਤ੍ਤੋ ਤਂ ਦਿਸ੍ਵਾ ‘‘ਏਸੋ ਯਕ੍ਖੋ ਭਵਿਸ੍ਸਤੀ’’ਤਿ ਞਤ੍ਵਾ ‘‘ਤਯਾ ਮੇ ਭਾਤਿਕਾ ਗਹਿਤਾ’’ਤਿ ਆਹ. ‘‘ਆਮ, ਗਹਿਤਾ’’ਤਿ. ‘‘ਕਿਂ ਕਾਰਣਾ’’ਤਿ? ‘‘ਅਹਂ ਇਮਂ ਸਰਂ ਓਤਿਣ੍ਣਕੇ ਲਭਾਮੀ’’ਤਿ. ‘‘ਕਿਂ ਪਨ ਸਬ੍ਬੇਵ ਲਭਸੀ’’ਤਿ? ‘‘ਯੇ ਦੇਵਧਮ੍ਮੇ ਜਾਨਨ੍ਤਿ, ਤੇ ਠਪੇਤ੍ਵਾ ਅਵਸੇਸੇ ਲਭਾਮੀ’’ਤਿ. ‘‘ਅਤ੍ਥਿ ਪਨ ਤੇ ਦੇਵਧਮ੍ਮੇਹਿ ਅਤ੍ਥੋ’’ਤਿ? ‘‘ਆਮ, ਅਤ੍ਥੀ’’ਤਿ. ‘‘ਯਦਿ ਏਵਂ ਅਹਂ ਤੇ ਦੇਵਧਮ੍ਮੇ ਕਥੇਸ੍ਸਾਮੀ’’ਤਿ. ‘‘ਤੇਨ ਹਿ ਕਥੇਹਿ, ਅਹਂ ਦੇਵਧਮ੍ਮੇ ਸੁਣਿਸ੍ਸਾਮੀ’’ਤਿ. ਬੋਧਿਸਤ੍ਤੋ ਆਹ ‘‘ਅਹਂ ਦੇਵਧਮ੍ਮੇ ਕਥੇਯ੍ਯਂ, ਕਿਲਿਟ੍ਠਗਤ੍ਤੋ ਪਨਮ੍ਹੀ’’ਤਿ. ਯਕ੍ਖੋ ਬੋਧਿਸਤ੍ਤਂ ਨ੍ਹਾਪੇਤ੍ਵਾ ਭੋਜਨਂ ਭੋਜੇਤ੍ਵਾ ਪਾਨੀਯਂ ਪਾਯੇਤ੍ਵਾ ਪੁਪ੍ਫਾਨਿ ਪਿਲ਼ਨ੍ਧਾਪੇਤ੍ਵਾ ਗਨ੍ਧੇਹਿ ਵਿਲਿਮ੍ਪਾਪੇਤ੍ਵਾ ਅਲਙ੍ਕਤਮਣ੍ਡਪਮਜ੍ਝੇ ਪਲ੍ਲਙ੍ਕਂ ਅਤ੍ਥਰਿਤ੍ਵਾ ਅਦਾਸਿ.

ਬੋਧਿਸਤ੍ਤੋ ਆਸਨੇ ਨਿਸੀਦਿਤ੍ਵਾ ਯਕ੍ਖਂ ਪਾਦਮੂਲੇ ਨਿਸੀਦਾਪੇਤ੍ਵਾ ‘‘ਤੇਨ ਹਿ ਓਹਿਤਸੋਤੋ ਸਕ੍ਕਚ੍ਚਂ ਦੇਵਧਮ੍ਮੇ ਸੁਣਾਹੀ’’ਤਿ ਇਮਂ ਗਾਥਮਾਹ –

੬. ‘‘ਹਿਰਿਓਤ੍ਤਪ੍ਪਸਮ੍ਪਨ੍ਨਾ, ਸੁਕ੍ਕਧਮ੍ਮਸਮਾਹਿਤਾ;

ਸਨ੍ਤੋ ਸਪ੍ਪੁਰਿਸਾ ਲੋਕੇ, ਦੇਵਧਮ੍ਮਾਤਿ ਵੁਚ੍ਚਰੇ’’ਤਿ.

ਤਤ੍ਥ ਹਿਰਿਓਤ੍ਤਪ੍ਪਸਮ੍ਪਨ੍ਨਾਤਿ ਹਿਰਿਯਾ ਚ ਓਤ੍ਤਪ੍ਪੇਨ ਚ ਸਮਨ੍ਨਾਗਤਾ. ਤੇਸੁ ਕਾਯਦੁਚ੍ਚਰਿਤਾਦੀਹਿ ਹਿਰਿਯਤੀਤਿ ਹਿਰੀ, ਲਜ੍ਜਾਯੇਤਂ ਅਧਿਵਚਨਂ. ਤੇਹਿਯੇਵ ਓਤ੍ਤਪ੍ਪਤੀਤਿ ਓਤ੍ਤਪ੍ਪਂ, ਪਾਪਤੋ ਉਬ੍ਬੇਗਸ੍ਸੇਤਂ ਅਧਿਵਚਨਂ. ਤਤ੍ਥ ਅਜ੍ਝਤ੍ਤਸਮੁਟ੍ਠਾਨਾ ਹਿਰੀ, ਬਹਿਦ੍ਧਾਸਮੁਟ੍ਠਾਨਂ ਓਤ੍ਤਪ੍ਪਂ. ਅਤ੍ਤਾਧਿਪਤੇਯ੍ਯਾ ਹਿਰੀ, ਲੋਕਾਧਿਪਤੇਯ੍ਯਂ ਓਤ੍ਤਪ੍ਪਂ. ਲਜ੍ਜਾਸਭਾਵਸਣ੍ਠਿਤਾ ਹਿਰੀ, ਭਯਸਭਾਵਸਣ੍ਠਿਤਂ ਓਤ੍ਤਪ੍ਪਂ. ਸਪ੍ਪਤਿਸ੍ਸਵਲਕ੍ਖਣਾ ਹਿਰੀ, ਵਜ੍ਜਭੀਰੁਕਭਯਦਸ੍ਸਾਵਿਲਕ੍ਖਣਂ ਓਤ੍ਤਪ੍ਪਂ.

ਤਤ੍ਥ ਅਜ੍ਝਤ੍ਤਸਮੁਟ੍ਠਾਨਂ ਹਿਰਿਂ ਚਤੂਹਿ ਕਾਰਣੇਹਿ ਸਮੁਟ੍ਠਾਪੇਤਿ – ਜਾਤਿਂ ਪਚ੍ਚਵੇਕ੍ਖਿਤ੍ਵਾ ਵਯਂ ਪਚ੍ਚਵੇਕ੍ਖਿਤ੍ਵਾ ਸੂਰਭਾਵਂ ਪਚ੍ਚਵੇਕ੍ਖਿਤ੍ਵਾ ਬਾਹੁਸਚ੍ਚਂ ਪਚ੍ਚਵੇਕ੍ਖਿਤ੍ਵਾ. ਕਥਂ? ‘‘ਪਾਪਕਰਣਂ ਨਾਮੇਤਂ ਨ ਜਾਤਿਸਮ੍ਪਨ੍ਨਾਨਂ ਕਮ੍ਮਂ, ਹੀਨਜਚ੍ਚਾਨਂ ਕੇਵਟ੍ਟਾਦੀਨਂ ਕਮ੍ਮਂ, ਮਾਦਿਸਸ੍ਸ ਜਾਤਿਸਮ੍ਪਨ੍ਨਸ੍ਸ ਇਦਂ ਕਮ੍ਮਂ ਕਾਤੁਂ ਨ ਯੁਤ੍ਤ’’ਨ੍ਤਿ ਏਵਂ ਤਾਵ ਜਾਤਿਂ ਪਚ੍ਚਵੇਕ੍ਖਿਤ੍ਵਾ ਪਾਣਾਤਿਪਾਤਾਦਿਪਾਪਂ ਅਕਰੋਨ੍ਤੋ ਹਿਰਿਂ ਸਮੁਟ੍ਠਾਪੇਤਿ. ਤਥਾ ‘‘ਪਾਪਕਰਣਂ ਨਾਮੇਤਂ ਦਹਰੇਹਿ ਕਤ੍ਤਬ੍ਬਂ ਕਮ੍ਮਂ, ਮਾਦਿਸਸ੍ਸ ਵਯੇ ਠਿਤਸ੍ਸ ਇਦਂ ਕਮ੍ਮਂ ਕਾਤੁਂ ਨ ਯੁਤ੍ਤ’’ਨ੍ਤਿ ਏਵਂ ਵਯਂ ਪਚ੍ਚਵੇਕ੍ਖਿਤ੍ਵਾ ਪਾਣਾਤਿਪਾਤਾਦਿਪਾਪਂ ਅਕਰੋਨ੍ਤੋ ਹਿਰਿਂ ਸਮੁਟ੍ਠਾਪੇਤਿ. ਤਥਾ ‘‘ਪਾਪਕਮ੍ਮਂ ਨਾਮੇਤਂ ਦੁਬ੍ਬਲਜਾਤਿਕਾਨਂ ਕਮ੍ਮਂ, ਮਾਦਿਸਸ੍ਸ ਸੂਰਭਾਵਸਮ੍ਪਨ੍ਨਸ੍ਸ ਇਦਂ ਕਮ੍ਮਂ ਕਾਤੁਂ ਨ ਯੁਤ੍ਤ’’ਨ੍ਤਿ ਏਵਂ ਸੂਰਭਾਵਂ ਪਚ੍ਚਵੇਕ੍ਖਿਤ੍ਵਾ ਪਾਣਾਤਿਪਾਤਾਦਿਪਾਪਂ ਅਕਰੋਨ੍ਤੋ ਹਿਰਿਂ ਸਮੁਟ੍ਠਾਪੇਤਿ. ਤਥਾ ‘‘ਪਾਪਕਮ੍ਮਂ ਨਾਮੇਤਂ ਅਨ੍ਧਬਾਲਾਨਂ ਕਮ੍ਮਂ, ਨ ਪਣ੍ਡਿਤਾਨਂ, ਮਾਦਿਸਸ੍ਸ ਪਣ੍ਡਿਤਸ੍ਸ ਬਹੁਸ੍ਸੁਤਸ੍ਸ ਇਦਂ ਕਮ੍ਮਂ ਕਾਤੁਂ ਨ ਯੁਤ੍ਤ’’ਨ੍ਤਿ ਏਵਂ ਬਾਹੁਸਚ੍ਚਂ ਪਚ੍ਚਵੇਕ੍ਖਿਤ੍ਵਾ ਪਾਣਾਤਿਪਾਤਾਦਿਪਾਪਂ ਅਕਰੋਨ੍ਤੋ ਹਿਰਿਂ ਸਮੁਟ੍ਠਾਪੇਤਿ. ਏਵਂ ਅਜ੍ਝਤ੍ਤਸਮੁਟ੍ਠਾਨਂ ਹਿਰਿਂ ਚਤੂਹਿ ਕਾਰਣੇਹਿ ਸਮੁਟ੍ਠਾਪੇਤਿ. ਸਮੁਟ੍ਠਾਪੇਤ੍ਵਾ ਚ ਪਨ ਅਤ੍ਤਨੋ ਚਿਤ੍ਤੇ ਹਿਰਿਂ ਪਵੇਸੇਤ੍ਵਾ ਪਾਪਕਮ੍ਮਂ ਨ ਕਰੋਤਿ. ਏਵਂ ਹਿਰੀ ਅਜ੍ਝਤ੍ਤਸਮੁਟ੍ਠਾਨਾ ਨਾਮ ਹੋਤਿ.

ਕਥਂ ਓਤ੍ਤਪ੍ਪਂ ਬਹਿਦ੍ਧਾਸਮੁਟ੍ਠਾਨਂ ਨਾਮ? ‘‘ਸਚੇ ਤ੍ਵਂ ਪਾਪਕਮ੍ਮਂ ਕਰਿਸ੍ਸਸਿ, ਚਤੂਸੁ ਪਰਿਸਾਸੁ ਗਰਹਪ੍ਪਤ੍ਤੋ ਭਵਿਸ੍ਸਸਿ.

‘‘ਗਰਹਿਸ੍ਸਨ੍ਤਿ ਤਂ ਵਿਞ੍ਞੂ, ਅਸੁਚਿਂ ਨਾਗਰਿਕੋ ਯਥਾ;

ਵਜ੍ਜਿਤੋ ਸੀਲਵਨ੍ਤੇਹਿ, ਕਥਂ ਭਿਕ੍ਖੁ ਕਰਿਸ੍ਸਸੀ’’ਤਿ. (ਧ. ਸ. ਅਟ੍ਠ. ੧ ਬਲਰਾਸਿਵਣ੍ਣਨਾ) –

ਏਵਂ ਪਚ੍ਚਵੇਕ੍ਖਨ੍ਤੋ ਹਿ ਬਹਿਦ੍ਧਾਸਮੁਟ੍ਠਿਤੇਨ ਓਤ੍ਤਪ੍ਪੇਨ ਪਾਪਕਮ੍ਮਂ ਨ ਕਰੋਤਿ. ਏਵਂ ਓਤ੍ਤਪ੍ਪਂ ਬਹਿਦ੍ਧਾਸਮੁਟ੍ਠਾਨਂ ਨਾਮ ਹੋਤਿ.

ਕਥਂ ਹਿਰੀ ਅਤ੍ਤਾਧਿਪਤੇਯ੍ਯਾ ਨਾਮ? ਇਧੇਕਚ੍ਚੋ ਕੁਲਪੁਤ੍ਤੋ ਅਤ੍ਤਾਨਂ ਅਧਿਪਤਿਂ ਜੇਟ੍ਠਕਂ ਕਤ੍ਵਾ ‘‘ਮਾਦਿਸਸ੍ਸ ਸਦ੍ਧਾਪਬ੍ਬਜਿਤਸ੍ਸ ਬਹੁਸ੍ਸੁਤਸ੍ਸ ਧੁਤਙ੍ਗਧਰਸ੍ਸ ਨ ਯੁਤ੍ਤਂ ਪਾਪਕਮ੍ਮਂ ਕਾਤੁ’’ਨ੍ਤਿ ਪਾਪਂ ਨ ਕਰੋਤਿ. ਏਵਂ ਹਿਰੀ ਅਤ੍ਤਾਧਿਪਤੇਯ੍ਯਾ ਨਾਮ ਹੋਤਿ. ਤੇਨਾਹ ਭਗਵਾ –

‘‘ਸੋ ਅਤ੍ਤਾਨਂਯੇਵ ਅਧਿਪਤਿਂ ਕਤ੍ਵਾ ਅਕੁਸਲਂ ਪਜਹਤਿ, ਕੁਸਲਂ ਭਾਵੇਤਿ. ਸਾਵਜ੍ਜਂ ਪਜਹਤਿ, ਅਨਵਜ੍ਜਂ ਭਾਵੇਤਿ. ਸੁਦ੍ਧਮਤ੍ਤਾਨਂ ਪਰਿਹਰਤੀ’’ਤਿ (ਅ. ਨਿ. ੩.੪੦).