੧੫. ਵੀਸਤਿਨਿਪਾਤੋ

[੪੯੭] ੧. ਮਾਤਙ੍ਗਜਾਤਕਵਣ੍ਣਨਾ

ਕੁਤੋ ਨੁ ਆਗਚ੍ਛਸਿ ਦੁਮ੍ਮਵਾਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਦੇਨਂ ਨਾਮ ਵਂਸਰਾਜਾਨਂ ਆਰਬ੍ਭ ਕਥੇਸਿ. ਤਸ੍ਮਿਞ੍ਹਿ ਕਾਲੇ ਆਯਸ੍ਮਾ ਪਿਣ੍ਡੋਲਭਾਰਦ੍ਵਾਜੋ ਜੇਤਵਨਤੋ ਆਕਾਸੇਨ ਗਨ੍ਤ੍ਵਾ ਯੇਭੁਯ੍ਯੇਨ ਕੋਸਮ੍ਬਿਯਂ ਉਦੇਨਸ੍ਸ ਰਞ੍ਞੋ ਉਯ੍ਯਾਨਂ ਦਿਵਾਵਿਹਾਰਾਯ ਗਚ੍ਛਤਿ. ਥੇਰੋ ਕਿਰ ਪੁਰਿਮਭਵੇ ਰਜ੍ਜਂ ਕਾਰੇਨ੍ਤੋ ਦੀਘਮਦ੍ਧਾਨਂ ਤਸ੍ਮਿਂ ਉਯ੍ਯਾਨੇ ਮਹਾਪਰਿਵਾਰੋ ਸਮ੍ਪਤ੍ਤਿਂ ਅਨੁਭਵਿ. ਸੋ ਤੇਨ ਪੁਬ੍ਬਾਚਿਣ੍ਣੇਨ ਯੇਭੁਯ੍ਯੇਨ ਤਤ੍ਥੇਵ ਦਿਵਾਵਿਹਾਰਂ ਨਿਸੀਦਿਤ੍ਵਾ ਫਲਸਮਾਪਤ੍ਤਿਸੁਖੇਨ ਵੀਤਿਨਾਮੇਤਿ. ਤਸ੍ਮਿਂ ਏਕਦਿਵਸਂ ਤਤ੍ਥ ਗਨ੍ਤ੍ਵਾ ਸੁਪੁਪ੍ਫਿਤਸਾਲਮੂਲੇ ਨਿਸਿਨ੍ਨੇ ਉਦੇਨੋ ਸਤ੍ਤਾਹਂ ਮਹਾਪਾਨਂ ਪਿਵਿਤ੍ਵਾ ‘‘ਉਯ੍ਯਾਨਕੀਲ਼ਂ ਕੀਲ਼ਿਸ੍ਸਾਮੀ’’ਤਿ ਮਹਨ੍ਤੇਨ ਪਰਿਵਾਰੇਨ ਉਯ੍ਯਾਨਂ ਗਨ੍ਤ੍ਵਾ ਮਙ੍ਗਲਸਿਲਾਪਟ੍ਟੇ ਅਞ੍ਞਤਰਾਯ ਇਤ੍ਥਿਯਾ ਅਙ੍ਕੇ ਨਿਪਨ੍ਨੋ ਸੁਰਾਮਦਮਤ੍ਤਤਾਯ ਨਿਦ੍ਦਂ ਓਕ੍ਕਮਿ. ਗਾਯਨ੍ਤਾ ਨਿਸਿਨ੍ਨਿਤ੍ਥਿਯੋ ਤੂਰਿਯਾਨਿ ਛਡ੍ਡੇਤ੍ਵਾ ਉਯ੍ਯਾਨਂ ਪਵਿਸਿਤ੍ਵਾ ਪੁਪ੍ਫਫਲਾਦੀਨਿ ਵਿਚਿਨਨ੍ਤਿਯੋ ਥੇਰਂ ਦਿਸ੍ਵਾ ਗਨ੍ਤ੍ਵਾ ਵਨ੍ਦਿਤ੍ਵਾ ਨਿਸੀਦਿਂਸੁ. ਥੇਰੋ ਤਾਸਂ ਧਮ੍ਮਕਥਂ ਕਥੇਨ੍ਤੋ ਨਿਸੀਦਿ. ਇਤਰਾਪਿ ਇਤ੍ਥੀ ਅਙ੍ਕਂ ਚਾਲੇਤ੍ਵਾ ਰਾਜਾਨਂ ਪਬੋਧੇਤ੍ਵਾ ‘‘ਕੁਹਿਂ ਤਾ ਵਸਲਿਯੋ ਗਤਾ’’ਤਿ ਵੁਤ੍ਤੇ ‘‘ਏਕਂ ਸਮਣਂ ਪਰਿਵਾਰੇਤ੍ਵਾ ਨਿਸਿਨ੍ਨਾ’’ਤਿ ਆਹ. ਸੋ ਕੁਦ੍ਧੋ ਗਨ੍ਤ੍ਵਾ ਥੇਰਂ ਅਕ੍ਕੋਸਿਤ੍ਵਾ ਪਰਿਭਾਸਿਤ੍ਵਾ ‘‘ਹਨ੍ਦਾਹਂ, ਤਂ ਸਮਣਂ ਤਮ੍ਬਕਿਪਿਲ੍ਲਕੇਹਿ ਖਾਦਾਪੇਸ੍ਸਾਮੀ’’ਤਿ ਕੋਧਵਸੇਨ ਥੇਰਸ੍ਸ ਸਰੀਰੇ ਤਮ੍ਬਕਿਪਿਲ੍ਲਕਪੁਟਂ ਭਿਨ੍ਦਾਪੇਸਿ. ਥੇਰੋ ਆਕਾਸੇ ਠਤ੍ਵਾ ਤਸ੍ਸੋਵਾਦਂ ਦਤ੍ਵਾ ਜੇਤਵਨੇ ਗਨ੍ਧਕੁਟਿਦ੍ਵਾਰੇਯੇਵ ਓਤਰਿਤ੍ਵਾ ਤਥਾਗਤੇਨ ‘‘ਕੁਤੋ ਆਗਤੋਸੀ’’ਤਿ ਪੁਟ੍ਠੋ ਥੇਰੋ ਤਮਤ੍ਥਂ ਆਰੋਚੇਸਿ. ਸਤ੍ਥਾ ‘‘ਨ ਖੋ, ਭਾਰਦ੍ਵਾਜ, ਉਦੇਨੋ ਇਦਾਨੇਵ ਪਬ੍ਬਜਿਤੇ ਵਿਹੇਠੇਤਿ, ਪੁਬ੍ਬੇਪਿ ਵਿਹੇਠੇਸਿਯੇਵਾ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਤਦਾ ਮਹਾਸਤ੍ਤੋ ਬਹਿਨਗਰੇ ਚਣ੍ਡਾਲਯੋਨਿਯਂ ਨਿਬ੍ਬਤ੍ਤਿ, ‘‘ਮਾਤਙ੍ਗੋ’’ਤਿਸ੍ਸ ਨਾਮਂ ਕਰਿਂਸੁ. ਅਪਰਭਾਗੇ ਵਿਞ੍ਞੁਤਂ ਪਤ੍ਤੋ ‘‘ਮਾਤਙ੍ਗਪਣ੍ਡਿਤੋ’’ਤਿ ਪਾਕਟੋ ਅਹੋਸਿ. ਤਦਾ ਬਾਰਾਣਸਿਸੇਟ੍ਠਿਨੋ ਧੀਤਾ ਦਿਟ੍ਠਮਙ੍ਗਲਿਕਾ ਨਾਮ ਏਕਮਾਸਦ੍ਵੇਮਾਸਵਾਰੇਨ ਮਹਾਪਰਿਵਾਰਾ ਉਯ੍ਯਾਨਂ ਕੀਲ਼ਿਤੁਂ ਗਚ੍ਛਤਿ. ਅਥੇਕਦਿਵਸਂ ਮਹਾਸਤ੍ਤੋ ਕੇਨਚਿ ਕਮ੍ਮੇਨ ਨਗਰਂ ਪਵਿਸਨ੍ਤੋ ਅਨ੍ਤਰਦ੍ਵਾਰੇ ਦਿਟ੍ਠਮਙ੍ਗਲਿਕਂ ਦਿਸ੍ਵਾ ਏਕਮਨ੍ਤਂ ਅਪਗਨ੍ਤ੍ਵਾ ਅਲ੍ਲੀਯਿਤ੍ਵਾ ਅਟ੍ਠਾਸਿ. ਦਿਟ੍ਠਮਙ੍ਗਲਿਕਾ ਸਾਣਿਯਾ ਅਨ੍ਤਰੇਨ ਓਲੋਕੇਨ੍ਤੀ ਤਂ ਦਿਸ੍ਵਾ ‘‘ਕੋ ਏਸੋ’’ਤਿ ਪੁਚ੍ਛਿਤ੍ਵਾ ‘‘ਚਣ੍ਡਾਲੋ ਅਯ੍ਯੇ’’ਤਿ ਵੁਤ੍ਤੇ ‘‘ਅਦਿਟ੍ਠਪੁਬ੍ਬਯੁਤ੍ਤਕਂ ਵਤ ਪਸ੍ਸਾਮੀ’’ਤਿ ਗਨ੍ਧੋਦਕੇਨ ਅਕ੍ਖੀਨਿ ਧੋਵਿਤ੍ਵਾ ਤਤੋ ਨਿਵਤ੍ਤਿ. ਤਾਯ ਸਦ੍ਧਿਂ ਨਿਕ੍ਖਨ੍ਤਜਨੋ ‘‘ਅਰੇ, ਦੁਟ੍ਠ ਚਣ੍ਡਾਲ, ਅਜ੍ਜ ਤਂ ਨਿਸ੍ਸਾਯ ਅਮ੍ਹਾਕਂ ਅਮੂਲਕਂ ਸੁਰਾਭਤ੍ਤਂ ਨਟ੍ਠ’’ਨ੍ਤਿ ਕੋਧਾਭਿਭੂਤੋ ਮਾਤਙ੍ਗਪਣ੍ਡਿਤਂ ਹਤ੍ਥੇਹਿ ਚ ਪਾਦੇਹਿ ਚ ਪੋਥੇਤ੍ਵਾ ਵਿਸਞ੍ਞਿਂ ਕਤ੍ਵਾ ਪਕ੍ਕਾਮਿ. ਸੋ ਮੁਹੁਤ੍ਤਂ ਵੀਤਿਨਾਮੇਤ੍ਵਾ ਪਟਿਲਦ੍ਧਸਞ੍ਞੋ ਚਿਨ੍ਤੇਸਿ ‘‘ਦਿਟ੍ਠਮਙ੍ਗਲਿਕਾਯ ਪਰਿਜਨੋ ਮਂ ਨਿਦ੍ਦੋਸਂ ਅਕਾਰਣੇਨ ਪੋਥੇਸਿ, ਦਿਟ੍ਠਮਙ੍ਗਲਿਕਂ ਲਭਿਤ੍ਵਾਵ ਉਟ੍ਠਹਿਸ੍ਸਾਮਿ, ਨੋ ਅਲਭਿਤ੍ਵਾ’’ਤਿ ਅਧਿਟ੍ਠਾਯ ਗਨ੍ਤ੍ਵਾ ਤਸ੍ਸਾ ਪਿਤੁ ਨਿਵੇਸਨਦ੍ਵਾਰੇ ਨਿਪਜ੍ਜਿ. ਸੋ ‘‘ਕੇਨ ਕਾਰਣੇਨ ਨਿਪਨ੍ਨੋਸੀ’’ਤਿ ਵੁਤ੍ਤੇ ‘‘ਅਞ੍ਞਂ ਕਾਰਣਂ ਨਤ੍ਥਿ, ਦਿਟ੍ਠਮਙ੍ਗਲਿਕਾਯ ਮੇ ਅਤ੍ਥੋ’’ਤਿ ਆਹ. ਏਕੋ ਦਿਵਸੋ ਅਤੀਤੋ, ਤਥਾ ਦੁਤਿਯੋ, ਤਤਿਯੋ, ਚਤੁਤ੍ਥੋ, ਪਞ੍ਚਮੋ, ਛਟ੍ਠੋ ਚ. ਬੋਧਿਸਤ੍ਤਾਨਂ ਅਧਿਟ੍ਠਾਨਂ ਨਾਮ ਸਮਿਜ੍ਝਤਿ, ਤਸ੍ਮਾ ਸਤ੍ਤਮੇ ਦਿਵਸੇ ਦਿਟ੍ਠਮਙ੍ਗਲਿਕਂ ਨੀਹਰਿਤ੍ਵਾ ਤਸ੍ਸ ਅਦਂਸੁ.

ਅਥ ਨਂ ਸਾ ‘‘ਉਟ੍ਠੇਹਿ, ਸਾਮਿ, ਤੁਮ੍ਹਾਕਂ ਗੇਹਂ ਗਚ੍ਛਾਮਾ’’ਤਿ ਆਹ. ਭਦ੍ਦੇ, ਤਵ ਪਰਿਜਨੇਨਮ੍ਹਿ ਸੁਪੋਥਿਤੋ ਦੁਬ੍ਬਲੋ, ਮਂ ਉਕ੍ਖਿਪਿਤ੍ਵਾ ਪਿਟ੍ਠਿਂ ਆਰੋਪੇਤ੍ਵਾ ਆਦਾਯ ਗਚ੍ਛਾਹੀਤਿ. ਸਾ ਤਥਾ ਕਤ੍ਵਾ ਨਗਰਵਾਸੀਨਂ ਪਸ੍ਸਨ੍ਤਾਨਞ੍ਞੇਵ ਨਗਰਾ ਨਿਕ੍ਖਮਿਤ੍ਵਾ ਚਣ੍ਡਾਲਗਾਮਕਂ ਗਤਾ. ਅਥ ਨਂ ਮਹਾਸਤ੍ਤੋ ਜਾਤਿਸਮ੍ਭੇਦਵੀਤਿਕ੍ਕਮਂ ਅਕਤ੍ਵਾਵ ਕਤਿਪਾਹਂ ਗੇਹੇ ਵਸਾਪੇਤ੍ਵਾ ਚਿਨ੍ਤੇਸਿ ‘‘ਅਹਮੇਤਂ ਲਾਭਗ੍ਗਯਸਗ੍ਗਪ੍ਪਤ੍ਤਂ ਕਰੋਨ੍ਤੋ ਪਬ੍ਬਜਿਤ੍ਵਾਵ ਕਾਤੁਂ ਸਕ੍ਖਿਸ੍ਸਾਮਿ, ਨ ਇਤਰਥਾ’’ਤਿ. ਅਥ ਨਂ ਆਮਨ੍ਤੇਤ੍ਵਾ ‘ਭਦ੍ਦੇ, ਮਯਿ ਅਰਞ੍ਞਤੋ ਕਿਞ੍ਚਿ ਅਨਾਹਰਨ੍ਤੇ ਅਮ੍ਹਾਕਂ ਜੀਵਿਕਾ ਨਪ੍ਪਵਤ੍ਤਤਿ, ਯਾਵ ਮਮਾਗਮਨਾ ਮਾ ਉਕ੍ਕਣ੍ਠਿ, ਅਹਂ ਅਰਞ੍ਞਂ ਗਮਿਸ੍ਸਾਮੀ’’ਤਿ ਵਤ੍ਵਾ ਗੇਹਵਾਸਿਨੋਪਿ ‘‘ਇਮਂ ਮਾ ਪਮਜ੍ਜਿਤ੍ਥਾ’’ਤਿ ਓਵਦਿਤ੍ਵਾ ਅਰਞ੍ਞਂ ਗਨ੍ਤ੍ਵਾ ਸਮਣਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਪ੍ਪਮਤ੍ਤੋ ਸਤ੍ਤਮੇ ਦਿਵਸੇ ਅਟ੍ਠ ਸਮਾਪਤ੍ਤਿਯੋ ਚ ਪਞ੍ਚ ਅਭਿਞ੍ਞਾਯੋ ਚ ਉਪ੍ਪਾਦੇਤ੍ਵਾ ‘‘ਇਦਾਨਿ ਦਿਟ੍ਠਮਙ੍ਗਲਿਕਾਯ ਅਵਸ੍ਸਯੋ ਭਵਿਤੁਂ ਸਕ੍ਖਿਸ੍ਸਾਮੀ’’ਤਿ ਇਦ੍ਧਿਯਾ ਗਨ੍ਤ੍ਵਾ ਚਣ੍ਡਾਲਗਾਮਦ੍ਵਾਰੇ ਓਤਰਿਤ੍ਵਾ ਦਿਟ੍ਠਮਙ੍ਗਲਿਕਾਯ ਗੇਹਦ੍ਵਾਰਂ ਅਗਮਾਸਿ. ਸਾ ਤਸ੍ਸਾਗਮਨਂ ਸੁਤ੍ਵਾ ਗੇਹਤੋ ਨਿਕ੍ਖਮਿਤ੍ਵਾ ‘‘ਸਾਮਿ, ਕਸ੍ਮਾ ਮਂ ਅਨਾਥਂ ਕਤ੍ਵਾ ਪਬ੍ਬਜਿਤੋਸੀ’’ਤਿ ਪਰਿਦੇਵਿ. ਅਥ ਨਂ ‘‘ਭਦ੍ਦੇ, ਮਾ ਚਿਨ੍ਤਯਿ, ਤਵ ਪੋਰਾਣਕਯਸਤੋ ਇਦਾਨਿ ਮਹਨ੍ਤਤਰਂ ਯਸਂ ਕਰਿਸ੍ਸਾਮਿ, ਅਪਿਚ ਖੋ ਪਨ ‘ਨ ਮਯ੍ਹਂ ਮਾਤਙ੍ਗਪਣ੍ਡਿਤੋ ਸਾਮਿਕੋ, ਮਹਾਬ੍ਰਹ੍ਮਾ ਮੇ ਸਾਮਿਕੋ’ਤਿ ਏਤ੍ਤਕਂ ਪਰਿਸਮਜ੍ਝੇ ਵਤ੍ਤੁਂ ਸਕ੍ਖਿਸ੍ਸਸੀ’ਤਿ ਆਹ. ‘‘ਆਮ, ਸਾਮਿ, ਸਕ੍ਖਿਸ੍ਸਾਮੀ’’ਤਿ. ‘‘ਤੇਨ ਹਿ ‘‘ਇਦਾਨਿ ਤੇ ਸਾਮਿਕੋ ਕੁਹਿਨ੍ਤਿ ਪੁਟ੍ਠਾ ‘ਬ੍ਰਹ੍ਮਲੋਕਂ ਗਤੋ’ਤਿ ਵਤ੍ਵਾ ‘ਕਦਾ ਆਗਮਿਸ੍ਸਤੀ’ਤਿ ਵੁਤ੍ਤੇ ‘ਇਤੋ ਸਤ੍ਤਮੇ ਦਿਵਸੇ ਪੁਣ੍ਣਮਾਯਂ ਚਨ੍ਦਂ ਭਿਨ੍ਦਿਤ੍ਵਾ ਆਗਮਿਸ੍ਸਤੀ’ਤਿ ਵਦੇਯ੍ਯਾਸੀ’’ਤਿ ਨਂ ਵਤ੍ਵਾ ਮਹਾਸਤ੍ਤੋ ਹਿਮਵਨ੍ਤਮੇਵ ਗਤੋ.

ਦਿਟ੍ਠਮਙ੍ਗਲਿਕਾਪਿ ਬਾਰਾਣਸਿਯਂ ਮਹਾਜਨਸ੍ਸ ਮਜ੍ਝੇ ਤੇਸੁ ਤੇਸੁ ਠਾਨੇਸੁ ਤਥਾ ਕਥੇਸਿ. ਮਹਾਜਨੋ ‘‘ਅਹੋ ਮਹਾਬ੍ਰਹ੍ਮਾ ਸਮਾਨੋ ਦਿਟ੍ਠਮਙ੍ਗਲਿਕਂ ਨ ਗਚ੍ਛਤਿ, ਏਵਮੇਤਂ ਭਵਿਸ੍ਸਤੀ’’ਤਿ ਸਦ੍ਦਹਿ. ਬੋਧਿਸਤ੍ਤੋਪਿ ਪੁਣ੍ਣਮਦਿਵਸੇ ਚਨ੍ਦਸ੍ਸ ਗਗਨਮਜ੍ਝੇ ਠਿਤਕਾਲੇ ਬ੍ਰਹ੍ਮਤ੍ਤਭਾਵਂ ਮਾਪੇਤ੍ਵਾ ਸਕਲਂ ਕਾਸਿਰਟ੍ਠਂ ਦ੍ਵਾਦਸਯੋਜਨਿਕਂ ਬਾਰਾਣਸਿਨਗਰਞ੍ਚ ਏਕੋਭਾਸਂ ਕਤ੍ਵਾ ਚਨ੍ਦਮਣ੍ਡਲਂ ਭਿਨ੍ਦਿਤ੍ਵਾ ਓਤਰਿਤ੍ਵਾ ਬਾਰਾਣਸਿਯਾ ਉਪਰੂਪਰਿ ਤਿਕ੍ਖਤ੍ਤੁਂ ਪਰਿਬ੍ਭਮਿਤ੍ਵਾ ਮਹਾਜਨੇਨ ਗਨ੍ਧਮਾਲਾਦੀਹਿ ਪੂਜਿਯਮਾਨੋ ਚਣ੍ਡਾਲਗਾਮਕਾਭਿਮੁਖੋ ਅਹੋਸਿ. ਬ੍ਰਹ੍ਮਭਤ੍ਤਾ ਸਨ੍ਨਿਪਤਿਤ੍ਵਾ ਚਣ੍ਡਾਲਗਾਮਕਂ ਗਨ੍ਤ੍ਵਾ ਦਿਟ੍ਠਮਙ੍ਗਲਿਕਾਯ ਗੇਹਂ ਸੁਦ੍ਧਵਤ੍ਥੇਹਿ ਛਾਦੇਤ੍ਵਾ ਭੂਮਿਂ ਚਤੁਜ੍ਜਾਤਿਯਗਨ੍ਧੇਹਿ ਓਪੁਞ੍ਛਿਤ੍ਵਾ ਪੁਪ੍ਫਾਨਿ ਵਿਕਿਰਿਤ੍ਵਾ ਧੂਮਂ ਦਤ੍ਵਾ ਚੇਲਵਿਤਾਨਂ ਪਸਾਰੇਤ੍ਵਾ ਮਹਾਸਯਨਂ ਪਞ੍ਞਪੇਤ੍ਵਾ ਗਨ੍ਧਤੇਲੇਹਿ ਦੀਪਂ ਜਾਲੇਤ੍ਵਾ ਦ੍ਵਾਰੇ ਰਜਤਪਟ੍ਟਵਣ੍ਣਵਾਲੁਕਂ ਓਕਿਰਿਤ੍ਵਾ ਪੁਪ੍ਫਾਨਿ ਵਿਕਿਰਿਤ੍ਵਾ ਧਜੇ ਬਨ੍ਧਿਂਸੁ. ਏਵਂ ਅਲਙ੍ਕਤੇ ਗੇਹੇ ਮਹਾਸਤ੍ਤੋ ਓਤਰਿਤ੍ਵਾ ਅਨ੍ਤੋ ਪਵਿਸਿਤ੍ਵਾ ਥੋਕਂ ਸਯਨਪਿਟ੍ਠੇ ਨਿਸੀਦਿ.

ਤਦਾ ਦਿਟ੍ਠਮਙ੍ਗਲਿਕਾ ਉਤੁਨੀ ਹੋਤਿ. ਅਥਸ੍ਸਾ ਅਙ੍ਗੁਟ੍ਠਕੇਨ ਨਾਭਿਂ ਪਰਾਮਸਿ, ਕੁਚ੍ਛਿਯਂ ਗਬ੍ਭੋ ਪਤਿਟ੍ਠਾਸਿ. ਅਥ ਨਂ ਮਹਾਸਤ੍ਤੋ ਆਮਨ੍ਤੇਤ੍ਵਾ ‘‘ਭਦ੍ਦੇ, ਗਬ੍ਭੋ ਤੇ ਪਤਿਟ੍ਠਿਤੋ, ਤ੍ਵਂ ਪੁਤ੍ਤਂ ਵਿਜਾਯਿਸ੍ਸਸਿ, ਤ੍ਵਮ੍ਪਿ ਪੁਤ੍ਤੋਪਿ ਤੇ ਲਾਭਗ੍ਗਯਸਗ੍ਗਪ੍ਪਤ੍ਤਾ ਭਵਿਸ੍ਸਥ, ਤਵ ਪਾਦਧੋਵਨਉਦਕਂ ਸਕਲਜਮ੍ਬੁਦੀਪੇ ਰਾਜੂਨਂ ਅਭਿਸੇਕੋਦਕਂ ਭਵਿਸ੍ਸਤਿ, ਨਹਾਨੋਦਕਂ ਪਨ ਤੇ ਅਮਤੋਸਧਂ ਭਵਿਸ੍ਸਤਿ, ਯੇ ਤਂ ਸੀਸੇ ਆਸਿਞ੍ਚਿਸ੍ਸਨ੍ਤਿ, ਤੇ ਸਬ੍ਬਰੋਗੇਹਿ ਮੁਚ੍ਚਿਸ੍ਸਨ੍ਤਿ, ਕਾਲ਼ਕਣ੍ਣਿਂ ਪਰਿਵਜ੍ਜੇਸ੍ਸਨ੍ਤਿ, ਤਵ ਪਾਦਪਿਟ੍ਠੇ ਸੀਸਂ ਠਪੇਤ੍ਵਾ ਵਨ੍ਦਨ੍ਤਾ ਸਹਸ੍ਸਂ ਦਸ੍ਸਨ੍ਤਿ, ਸੋਤਪਥੇ ਠਤ੍ਵਾ ਵਨ੍ਦਨ੍ਤਾ ਸਤਂ ਦਸ੍ਸਨ੍ਤਿ, ਚਕ੍ਖੁਪਥੇ ਠਤ੍ਵਾ ਵਨ੍ਦਨ੍ਤਾ ਏਕਂ ਕਹਾਪਣਂ ਦਤ੍ਵਾ ਵਨ੍ਦਿਸ੍ਸਨ੍ਤਿ, ਅਪ੍ਪਮਤ੍ਤਾ ਹੋਹੀ’’ਤਿ ਨਂ ਓਵਦਿਤ੍ਵਾ ਗੇਹਾ ਨਿਕ੍ਖਮਿਤ੍ਵਾ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ਉਪ੍ਪਤਿਤ੍ਵਾ ਚਨ੍ਦਮਣ੍ਡਲਂ ਪਾਵਿਸਿ. ਬ੍ਰਹ੍ਮਭਤ੍ਤਾ ਸਨ੍ਨਿਪਤਿਤ੍ਵਾ ਠਿਤਕਾਵ ਰਤ੍ਤਿਂ ਵੀਤਿਨਾਮੇਤ੍ਵਾ ਪਾਤੋਵ ਦਿਟ੍ਠਮਙ੍ਗਲਿਕਂ ਸੁਵਣ੍ਣਸਿਵਿਕਂ ਆਰੋਪੇਤ੍ਵਾ ਸੀਸੇਨ ਉਕ੍ਖਿਪਿਤ੍ਵਾ ਨਗਰਂ ਪਵਿਸਿਂਸੁ. ‘‘ਮਹਾਬ੍ਰਹ੍ਮਭਰਿਯਾ’’ਤਿ ਤਂ ਉਪਸਙ੍ਕਮਿਤ੍ਵਾ ਮਹਾਜਨੋ ਗਨ੍ਧਮਾਲਾਦੀਹਿ ਪੂਜੇਸਿ. ਪਾਦਪਿਟ੍ਠੇ ਸੀਸਂ ਠਪੇਤ੍ਵਾ ਵਨ੍ਦਿਤੁਂ ਲਭਨ੍ਤਾ ਸਹਸ੍ਸਤ੍ਥਵਿਕਂ ਦੇਨ੍ਤਿ, ਸੋਤਪਥੇ ਠਤ੍ਵਾ ਵਨ੍ਦਿਤੁਂ ਲਭਨ੍ਤਾ ਸਤਂ ਦੇਨ੍ਤਿ, ਚਕ੍ਖੁਪਥੇ ਠਤ੍ਵਾ ਵਨ੍ਦਿਤੁਂ ਲਭਨ੍ਤਾ ਏਕਂ ਕਹਾਪਣਂ ਦੇਨ੍ਤਿ. ਏਵਂ ਦ੍ਵਾਦਸਯੋਜਨਿਕਂ ਬਾਰਾਣਸਿਂ ਤਂ ਗਹੇਤ੍ਵਾ ਵਿਚਰਨ੍ਤਾ ਅਟ੍ਠਾਰਸਕੋਟਿਧਨਂ ਲਭਿਂਸੁ.

ਅਥ ਨਂ ਨਗਰਂ ਪਰਿਹਰਿਤ੍ਵਾ ਆਨੇਤ੍ਵਾ ਨਗਰਮਜ੍ਝੇ ਮਹਾਮਣ੍ਡਪਂ ਕਾਰੇਤ੍ਵਾ ਸਾਣਿਂ ਪਰਿਕ੍ਖਿਪਿਤ੍ਵਾ ਮਹਾਸਯਨਂ ਪਞ੍ਞਪੇਤ੍ਵਾ ਮਹਨ੍ਤੇਨ ਸਿਰਿਸੋਭਗ੍ਗੇਨ ਤਤ੍ਥ ਵਸਾਪੇਸੁਂ. ਮਣ੍ਡਪਸਨ੍ਤਿਕੇਯੇਵ ਸਤ੍ਤਦ੍ਵਾਰਕੋਟ੍ਠਂ ਸਤ੍ਤਭੂਮਿਕਂ ਪਾਸਾਦਂ ਕਾਤੁਂ ਆਰਭਿਂਸੁ, ਮਹਨ੍ਤਂ ਨਵਕਮ੍ਮਂ ਅਹੋਸਿ. ਦਿਟ੍ਠਮਙ੍ਗਲਿਕਾ ਮਣ੍ਡਪੇਯੇਵ ਪੁਤ੍ਤਂ ਵਿਜਾਯਿ. ਅਥਸ੍ਸ ਨਾਮਗ੍ਗਹਣਦਿਵਸੇ ਬ੍ਰਾਹ੍ਮਣਾ ਸਨ੍ਨਿਪਤਿਤ੍ਵਾ ਮਣ੍ਡਪੇ ਜਾਤਤ੍ਤਾ ‘‘ਮਣ੍ਡਬ੍ਯਕੁਮਾਰੋ’’ਤਿ ਨਾਮਂ ਕਰਿਂਸੁ. ਪਾਸਾਦੋ ਪਨ ਦਸਹਿ ਮਾਸੇਹਿ ਨਿਟ੍ਠਿਤੋ. ਤਤੋ ਪਟ੍ਠਾਯ ਸਾ ਮਹਨ੍ਤੇਨ ਯਸੇਨ ਤਸ੍ਮਿਂ ਵਸਤਿ, ਮਣ੍ਡਬ੍ਯਕੁਮਾਰੋਪਿ ਮਹਨ੍ਤੇਨ ਪਰਿਵਾਰੇਨ ਵਡ੍ਢਤਿ. ਤਸ੍ਸ ਸਤ੍ਤਟ੍ਠਵਸ੍ਸਕਾਲੇਯੇਵ ਜਮ੍ਬੁਦੀਪਤਲੇ ਉਤ੍ਤਮਾਚਰਿਯਾ ਸਨ੍ਨਿਪਤਿਂਸੁ. ਤੇ ਤਂ ਤਯੋ ਵੇਦੇ ਉਗ੍ਗਣ੍ਹਾਪੇਸੁਂ. ਸੋ ਸੋਲ਼ਸਵਸ੍ਸਕਾਲਤੋ ਪਟ੍ਠਾਯ ਬ੍ਰਾਹ੍ਮਣਾਨਂ ਭਤ੍ਤਂ ਪਟ੍ਠਪੇਸਿ, ਨਿਬਦ੍ਧਂ ਸੋਲ਼ਸ ਬ੍ਰਾਹ੍ਮਣਸਹਸ੍ਸਾਨਿ ਭੁਞ੍ਜਨ੍ਤਿ. ਚਤੁਤ੍ਥੇ ਦ੍ਵਾਰਕੋਟ੍ਠਕੇ ਬ੍ਰਾਹ੍ਮਣਾਨਂ ਦਾਨਂ ਦੇਤਿ.

ਅਥੇਕਸ੍ਮਿਂ ਮਹਾਮਹਦਿਵਸੇ ਗੇਹੇ ਬਹੁਂ ਪਾਯਾਸਂ ਪਟਿਯਾਦੇਸੁਂ. ਸੋਲ਼ਸ ਬ੍ਰਾਹ੍ਮਣਸਹਸ੍ਸਾਨਿ ਚਤੁਤ੍ਥੇ ਦ੍ਵਾਰਕੋਟ੍ਠਕੇ ਨਿਸੀਦਿਤ੍ਵਾ ਸੁਵਣ੍ਣਰਸਵਣ੍ਣੇਨ ਨਵਸਪ੍ਪਿਨਾ ਪਕ੍ਕਮਧੁਖਣ੍ਡਸਕ੍ਖਰਾਹਿ ਚ ਅਭਿਸਙ੍ਖਤਂ ਪਾਯਾਸਂ ਪਰਿਭੁਞ੍ਜਨ੍ਤਿ. ਕੁਮਾਰੋਪਿ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਸੁਵਣ੍ਣਪਾਦੁਕਾ ਆਰੁਯ੍ਹ ਹਤ੍ਥੇਨ ਕਞ੍ਚਨਦਣ੍ਡਂ ਗਹੇਤ੍ਵਾ ‘‘ਇਧ ਸਪ੍ਪਿਂ ਦੇਥ, ਇਧ ਮਧੁ’’ਨ੍ਤਿ ਵਿਚਾਰੇਨ੍ਤੋ ਚਰਤਿ. ਤਸ੍ਮਿਂ ਖਣੇ ਮਾਤਙ੍ਗਪਣ੍ਡਿਤੋ ਹਿਮਵਨ੍ਤੇ ਅਸ੍ਸਮਪਦੇ ਨਿਸਿਨ੍ਨੋ ‘‘ਕਾ ਨੁ ਖੋ ਦਿਟ੍ਠਮਙ੍ਗਲਿਕਾਯ ਪੁਤ੍ਤਸ੍ਸ ਪਵਤ੍ਤੀ’’ਤਿ ਓਲੋਕੇਨ੍ਤੋ ਤਸ੍ਸ ਅਤਿਤ੍ਥੇ ਪਕ੍ਖਨ੍ਦਭਾਵਂ ਦਿਸ੍ਵਾ ‘‘ਅਜ੍ਜੇਵ ਗਨ੍ਤ੍ਵਾ ਮਾਣਵਂ ਦਮੇਤ੍ਵਾ ਯਤ੍ਥ ਦਿਨ੍ਨਂ ਮਹਪ੍ਫਲਂ ਹੋਤਿ, ਤਤ੍ਥ ਦਾਨਂ ਦਾਪੇਤ੍ਵਾ ਆਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਆਕਾਸੇਨ ਅਨੋਤਤ੍ਤਦਹਂ ਗਨ੍ਤ੍ਵਾ ਮੁਖਧੋਵਨਾਦੀਨਿ ਕਤ੍ਵਾ ਮਨੋਸਿਲਾਤਲੇ ਠਿਤੋ ਰਤ੍ਤਦੁਪਟ੍ਟਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਪਂਸੁਕੂਲਸਙ੍ਘਾਟਿਂ ਪਾਰੁਪਿਤ੍ਵਾ ਮਤ੍ਤਿਕਾਪਤ੍ਤਂ ਆਦਾਯ ਆਕਾਸੇਨਾਗਨ੍ਤ੍ਵਾ ਚਤੁਤ੍ਥੇ ਦ੍ਵਾਰਕੋਟ੍ਠਕੇ ਦਾਨਗ੍ਗੇਯੇਵ ਓਤਰਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਮਣ੍ਡਬ੍ਯੋ ਕੁਮਾਰੋ ਇਤੋ ਚਿਤੋ ਚ ਓਲੋਕੇਨ੍ਤੋ ਤਂ ਦਿਸ੍ਵਾ ‘‘ਏਵਂਵਿਰੂਪੋ ਸਙ੍ਕਾਰਯਕ੍ਖਸਦਿਸੋ ਅਯਂ ਪਬ੍ਬਜਿਤੋ ਇਮਂ ਠਾਨਂ ਆਗਚ੍ਛਨ੍ਤੋ ਕੁਤੋ ਨੁ ਖੋ ਆਗਚ੍ਛਤੀ’’ਤਿ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਪਠਮਂ ਗਾਥਮਾਹ –

੧. ‘‘ਕੁਤੋ ਨੁ ਆਗਚ੍ਛਸਿ ਦੁਮ੍ਮਵਾਸੀ, ਓਤਲ੍ਲਕੋ ਪਂਸੁਪਿਸਾਚਕੋਵ;

ਸਙ੍ਕਾਰਚੋਲ਼ਂ ਪਟਿਮੁਞ੍ਚ ਕਣ੍ਠੇ, ਕੋ ਰੇ ਤੁਵਂ ਹੋਸਿ ਅਦਕ੍ਖਿਣੇਯ੍ਯੋ’’ਤਿ.

ਤਤ੍ਥ ਦੁਮ੍ਮਵਾਸੀਤਿ ਅਨਞ੍ਜਿਤਅਮਣ੍ਡਿਤਘਟਿਤਸਙ੍ਘਾਟਿਕਪਿਲੋਤਿਕਵਸਨੋ. ਓਤਲ੍ਲਕੋਤਿ ਲਾਮਕੋ ਓਲਮ੍ਬਵਿਲਮ੍ਬਨਨ੍ਤਕਧਰੋ ਵਾ. ਪਂਸੁਪਿਸਾਚਕੋਵਾਤਿ ਸਙ੍ਕਾਰਟ੍ਠਾਨੇ ਪਿਸਾਚਕੋ ਵਿਯ. ਸਙ੍ਕਾਰਚੋਲ਼ਨ੍ਤਿ ਸਙ੍ਕਾਰਟ੍ਠਾਨੇ ਲਦ੍ਧਪਿਲੋਤਿਕਂ. ਪਟਿਮੁਞ੍ਚਾਤਿ ਪਟਿਮੁਞ੍ਚਿਤ੍ਵਾ. ਅਦਕ੍ਖਿਣੇਯ੍ਯੋਤਿ ਤ੍ਵਂ ਅਦਕ੍ਖਿਣੇਯ੍ਯੋ ਇਮੇਸਂ ਪਰਮਦਕ੍ਖਿਣੇਯ੍ਯਾਨਂ ਨਿਸਿਨ੍ਨਟ੍ਠਾਨਂ ਏਕੋ ਹੁਤ੍ਵਾ ਕੁਤੋ ਆਗਤੋ.

ਤਂ ਸੁਤ੍ਵਾ ਮਹਾਸਤ੍ਤੋ ਮੁਦੁਚਿਤ੍ਤੇਨੇਵ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਦੁਤਿਯਂ ਗਾਥਮਾਹ –

੨. ‘‘ਅਨ੍ਨਂ ਤਵੇਦਂ ਪਕਤਂ ਯਸਸ੍ਸਿ, ਤਂ ਖਜ੍ਜਰੇ ਭੁਞ੍ਜਰੇ ਪਿਯ੍ਯਰੇ ਚ;

ਜਾਨਾਸਿ ਮਂ ਤ੍ਵਂ ਪਰਦਤ੍ਤੂਪਜੀਵਿਂ, ਉਤ੍ਤਿਟ੍ਠਪਿਣ੍ਡਂ ਲਭਤਂ ਸਪਾਕੋ’’ਤਿ.

ਤਤ੍ਥ ਪਕਤਨ੍ਤਿ ਪਟਿਯਤ੍ਤਂ. ਯਸਸ੍ਸੀਤਿ ਪਰਿਵਾਰਸਮ੍ਪਨ੍ਨ. ਤਂ ਖਜ੍ਜਰੇਤਿ ਤਂ ਖਜ੍ਜਨ੍ਤਿ ਚ ਭੁਞ੍ਜਨ੍ਤਿ ਚ ਪਿਵਨ੍ਤਿ ਚ. ਕਿਂਕਾਰਣਾ ਮਯ੍ਹਂ ਕੁਜ੍ਝਸਿ? ਉਤ੍ਤਿਟ੍ਠਪਿਣ੍ਡਨ੍ਤਿ ਉਪਤਿਟ੍ਠਿਤ੍ਵਾ ਲਭਿਤਬ੍ਬਪਿਣ੍ਡਂ, ਉਟ੍ਠਾਯ ਠਿਤੇਹਿ ਵਾ ਦੀਯਮਾਨਂ ਹੇਟ੍ਠਾ ਠਤ੍ਵਾ ਲਭਿਤਬ੍ਬਪਿਣ੍ਡਂ. ਲਭਤਂ ਸਪਾਕੋਤਿ ਸਪਾਕੋ ਚਣ੍ਡਾਲੋਪਿ ਲਭਤੁ. ਜਾਤਿਸਮ੍ਪਨ੍ਨਾ ਹਿ ਯਤ੍ਥ ਕਤ੍ਥਚਿ ਲਭਨ੍ਤਿ, ਸਪਾਕਚਣ੍ਡਾਲਸ੍ਸ ਪਨ ਕੋ ਦੇਤਿ, ਦੁਲ੍ਲਭਪਿਣ੍ਡੋ ਅਹਂ, ਤਸ੍ਮਾ ਮੇ ਜੀਵਿਤਪਵਤ੍ਤਨਤ੍ਥਂ ਭੋਜਨਂ ਦਾਪੇਹਿ, ਕੁਮਾਰਾਤਿ.

ਤਤੋ ਮਣ੍ਡਬ੍ਯੋ ਗਾਥਮਾਹ –

੩. ‘‘ਅਨ੍ਨਂ ਮਮੇਦਂ ਪਕਤਂ ਬ੍ਰਾਹ੍ਮਣਾਨਂ, ਅਤ੍ਤਤ੍ਥਾਯ ਸਦ੍ਦਹਤੋ ਮਮੇਦਂ;

ਅਪੇਹਿ ਏਤ੍ਤੋ ਕਿਮਿਧਟ੍ਠਿਤੋਸਿ, ਨ ਮਾਦਿਸਾ ਤੁਮ੍ਹਂ ਦਦਨ੍ਤਿ ਜਮ੍ਮਾ’’ਤਿ.

ਤਤ੍ਥ ਅਤ੍ਤਤ੍ਥਾਯਾਤਿ ਅਤ੍ਤਨੋ ਵਡ੍ਢਿਅਤ੍ਥਾਯ. ਅਪੇਹਿ ਏਤ੍ਤੋਤਿ ਇਮਮ੍ਹਾ ਠਾਨਾ ਅਪਗਚ੍ਛ. ਨ ਮਾਦਿਸਾਤਿ ਮਾਦਿਸਾ ਜਾਤਿਸਮ੍ਪਨ੍ਨਾਨਂ ਉਦਿਚ੍ਚਬ੍ਰਾਹ੍ਮਣਾਨਂ ਦਾਨਂ ਦੇਨ੍ਤਿ, ਨ ਤੁਯ੍ਹਂ ਚਣ੍ਡਾਲਸ੍ਸ, ਗਚ੍ਛ, ਜਮ੍ਮਾਤਿ.

ਤਤੋ ਮਹਾਸਤ੍ਤੋ ਗਾਥਮਾਹ –

੪. ‘‘ਥਲੇ ਚ ਨਿਨ੍ਨੇ ਚ ਵਪਨ੍ਤਿ ਬੀਜਂ, ਅਨੂਪਖੇਤ੍ਤੇ ਫਲਮਾਸਮਾਨਾ;

ਏਤਾਯ ਸਦ੍ਧਾਯ ਦਦਾਹਿ ਦਾਨਂ, ਅਪ੍ਪੇਵ ਆਰਾਧਯੇ ਦਕ੍ਖਿਣੇਯ੍ਯੇ’’ਤਿ.

ਤਸ੍ਸਤ੍ਥੋ – ਕੁਮਾਰ, ਸਸ੍ਸਫਲਂ ਆਸੀਸਮਾਨਾ ਤੀਸੁਪਿ ਖੇਤ੍ਤੇਸੁ ਬੀਜਂ ਵਪਨ੍ਤਿ. ਤਤ੍ਥ ਅਤਿਵੁਟ੍ਠਿਕਾਲੇ ਥਲੇ ਸਸ੍ਸਂ ਸਮ੍ਪਜ੍ਜਤਿ, ਨਿਨ੍ਨੇ ਪੂਤਿਕਂ ਹੋਤਿ, ਅਨੂਪਖੇਤ੍ਤੇ ਨਦਿਞ੍ਚ ਤਲ਼ਾਕਞ੍ਚ ਨਿਸ੍ਸਾਯ ਕਤਂ ਓਘੇਨ ਵੁਯ੍ਹਤਿ. ਮਨ੍ਦਵੁਟ੍ਠਿਕਾਲੇ ਥਲੇ ਖੇਤ੍ਤੇ ਵਿਪਜ੍ਜਤਿ, ਨਿਨ੍ਨੇ ਥੋਕਂ ਸਮ੍ਪਜ੍ਜਤਿ, ਅਨੂਪਖੇਤ੍ਤੇ ਸਮ੍ਪਜ੍ਜਤੇਵ. ਸਮਵੁਟ੍ਠਿਕਾਲੇ ਥਲੇ ਖੇਤ੍ਤੇ ਥੋਕਂ ਸਮ੍ਪਜ੍ਜਤਿ, ਇਤਰੇਸੁ ਸਮ੍ਪਜ੍ਜਤੇਵ. ਤਸ੍ਮਾ ਯਥਾ ਫਲਮਾਸੀਸਮਾਨਾ ਤੀਸੁਪਿ ਖੇਤ੍ਤੇਸੁ ਵਪਨ੍ਤਿ, ਤਥਾ ਤ੍ਵਮ੍ਪਿ ਏਤਾਯ ਫਲਸਦ੍ਧਾਯ ਆਗਤਾਗਤਾਨਂ ਸਬ੍ਬੇਸਂਯੇਵ ਦਾਨਂ ਦੇਹਿ, ਅਪ੍ਪੇਵ ਨਾਮ ਏਵਂ ਦਦਨ੍ਤੋ ਦਕ੍ਖਿਣੇਯ੍ਯੇ ਆਰਾਧੇਯ੍ਯਾਸਿ ਲਭੇਯ੍ਯਾਸੀਤਿ.

ਤਤੋ ਮਣ੍ਡਬ੍ਯੋ ਗਾਥਮਾਹ –

੫. ‘‘ਖੇਤ੍ਤਾਨਿ ਮਯ੍ਹਂ ਵਿਦਿਤਾਨਿ ਲੋਕੇ, ਯੇਸਾਹਂ ਬੀਜਾਨਿ ਪਤਿਟ੍ਠਪੇਮਿ;

ਯੇ ਬ੍ਰਾਹ੍ਮਣਾ ਜਾਤਿਮਨ੍ਤੂਪਪਨ੍ਨਾ, ਤਾਨੀਧ ਖੇਤ੍ਤਾਨਿ ਸੁਪੇਸਲਾਨੀ’’ਤਿ.

ਤਤ੍ਥ ਯੇਸਾਹਨ੍ਤਿ ਯੇਸੁ ਅਹਂ. ਜਾਤਿਮਨ੍ਤੂਪਪਨ੍ਨਾਤਿ ਜਾਤਿਯਾ ਚ ਮਨ੍ਤੇਹਿ ਚ ਉਪਪਨ੍ਨਾ.

ਤਤੋ ਮਹਾਸਤ੍ਤੋ ਦ੍ਵੇ ਗਾਥਾ ਅਭਾਸਿ –

੬. ‘‘ਜਾਤਿਮਦੋ ਚ ਅਤਿਮਾਨਿਤਾ ਚ, ਲੋਭੋ ਚ ਦੋਸੋ ਚ ਮਦੋ ਚ ਮੋਹੋ;

ਏਤੇ ਅਗੁਣਾ ਯੇਸੁ ਚ ਸਨ੍ਤਿ ਸਬ੍ਬੇ, ਤਾਨੀਧ ਖੇਤ੍ਤਾਨਿ ਅਪੇਸਲਾਨਿ.

੭. ‘‘ਜਾਤਿਮਦੋ ਚ ਅਤਿਮਾਨਿਤਾ ਚ, ਲੋਭੋ ਚ ਦੋਸੋ ਚ ਮਦੋ ਚ ਮੋਹੋ;

ਏਤੇ ਅਗੁਣਾ ਯੇਸੁ ਨ ਸਨ੍ਤਿ ਸਬ੍ਬੇ, ਤਾਨੀਧ ਖੇਤ੍ਤਾਨਿ ਸੁਪੇਸਲਾਨੀ’’ਤਿ.

ਤਤ੍ਥ ਜਾਤਿਮਦੋਤਿ ‘‘ਅਹਮਸ੍ਮਿ ਜਾਤਿਸਮ੍ਪਨ੍ਨੋ’’ਤਿ ਏਵਂ ਉਪ੍ਪਨ੍ਨਮਾਨੋ. ਅਤਿਮਾਨਿਤਾ ਚਾਤਿ ‘‘ਅਞ੍ਞੋ ਮਯਾ ਸਦ੍ਧਿਂ ਜਾਤਿਆਦੀਹਿ ਸਦਿਸੋ ਨਤ੍ਥੀ’’ਤਿ ਅਤਿਕ੍ਕਮ੍ਮ ਪਵਤ੍ਤਮਾਨੋ. ਲੋਭਾਦਯੋ ਲੁਬ੍ਭਨਦੁਸ੍ਸਨਮਜ੍ਜਨਮੁਯ੍ਹਨਮਤ੍ਤਾਵ. ਅਪੇਸਲਾਨੀਤਿ ਏਵਰੂਪਾ ਪੁਗ੍ਗਲਾ ਆਸੀਵਿਸਭਰਿਤਾ ਵਿਯ ਵਮ੍ਮਿਕਾ ਅਪ੍ਪਿਯਸੀਲਾ ਹੋਨ੍ਤਿ. ਏਵਰੂਪਾਨਂ ਦਿਨ੍ਨਂ ਨ ਮਹਪ੍ਫਲਂ ਹੋਤਿ, ਤਸ੍ਮਾ ਮਾ ਏਤੇਸਂ ਸੁਪੇਸਲਖੇਤ੍ਤਭਾਵਂ ਮਞ੍ਞਿਤ੍ਥ. ਨ ਹਿ ਜਾਤਿਮਨ੍ਤਾ ਸਗ੍ਗਦਾਯਕਾ. ਯੇ ਪਨ ਜਾਤਿਮਾਨਾਦਿਰਹਿਤਾ ਅਰਿਯਾ, ਤਾਨਿ ਖੇਤ੍ਤਾਨਿ ਸੁਪੇਸਲਾਨਿ, ਤੇਸੁ ਦਿਨ੍ਨਂ ਮਹਪ੍ਫਲਂ, ਤੇ ਸਗ੍ਗਦਾਯਕਾ ਹੋਨ੍ਤੀਤਿ.

ਇਤਿ ਸੋ ਮਹਾਸਤ੍ਤੇ ਪੁਨਪ੍ਪੁਨਂ ਕਥੇਨ੍ਤੇ ਕੁਜ੍ਝਿਤ੍ਵਾ ‘‘ਅਯਂ ਅਤਿਵਿਯ ਬਹੁਂ ਵਿਪ੍ਪਲਪਤਿ, ਕੁਹਿਂ ਗਤਾ ਇਮੇ ਦੋਵਾਰਿਕਾ, ਨਯਿਮਂ ਚਣ੍ਡਾਲਂ ਨੀਹਰਨ੍ਤੀ’’ਤਿ ਗਾਥਮਾਹ –

੮. ‘‘ਕ੍ਵੇਤ੍ਥ ਗਤਾ ਉਪਜੋਤਿਯੋ ਚ, ਉਪਜ੍ਝਾਯੋ ਅਥ ਵਾ ਗਣ੍ਡਕੁਚ੍ਛਿ;

ਇਮਸ੍ਸ ਦਣ੍ਡਞ੍ਚ ਵਧਞ੍ਚ ਦਤ੍ਵਾ, ਗਲੇ ਗਹੇਤ੍ਵਾ ਖਲਯਾਥ ਜਮ੍ਮ’’ਨ੍ਤਿ.

ਤਤ੍ਥ ਕ੍ਵੇਤ੍ਥ ਗਤਾਤਿ ਇਮੇਸੁ ਤੀਸੁ ਦ੍ਵਾਰੇਸੁ ਠਪਿਤਾ ਉਪਜੋਤਿਯੋ ਚ ਉਪਜ੍ਝਾਯੋ ਚ ਗਣ੍ਡਕੁਚ੍ਛਿ ਚਾਤਿ ਤਯੋ ਦੋਵਾਰਿਕਾ ਕੁਹਿਂ ਗਤਾਤਿ ਅਤ੍ਥੋ.

ਤੇਪਿ ਤਸ੍ਸ ਵਚਨਂ ਸੁਤ੍ਵਾ ਵੇਗੇਨਾਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਕਿਂ ਕਰੋਮ ਦੇਵਾ’’ਤਿ ਆਹਂਸੁ. ‘‘ਅਯਂ ਵੋ ਜਮ੍ਮੋ ਚਣ੍ਡਾਲੋ ਦਿਟ੍ਠੋ’’ਤਿ? ‘‘ਨ ਪਸ੍ਸਾਮ ਦੇਵ, ਕੁਤੋਚਿ ਆਗਤਭਾਵਂ ਨ ਜਾਨਾਮਾ’’ਤਿ. ‘‘ਕੋ ਚੇਸ ਮਾਯਾਕਾਰੋ ਵਾ ਵਿਜ੍ਜਾਧਰੋ ਵਾ ਭਵਿਸ੍ਸਤਿ, ਇਦਾਨਿ ਕਿਂ ਤਿਟ੍ਠਥਾ’’ਤਿ. ‘‘ਕਿਂ ਕਰੋਮ ਦੇਵਾ’’ਤਿ? ‘‘ਇਮਸ੍ਸ ਮੁਖਮੇਵ ਪੋਥੇਤ੍ਵਾ ਭਿਨ੍ਦਨ੍ਤਾ ਦਣ੍ਡਵੇਲ਼ੁਪੇਸਿਕਾਹਿ ਪਿਟ੍ਠਿਚਮ੍ਮਂ ਉਪ੍ਪਾਟੇਨ੍ਤਾ ਵਧਞ੍ਚ ਦਤ੍ਵਾ ਗਲੇ ਗਹੇਤ੍ਵਾ ਏਤਂ ਜਮ੍ਮਂ ਖਲਯਾਥ, ਇਤੋ ਨੀਹਰਥਾ’’ਤਿ.

ਮਹਾਸਤ੍ਤੋ ਤੇਸੁ ਅਤ੍ਤਨੋ ਸਨ੍ਤਿਕਂ ਅਨਾਗਤੇਸ੍ਵੇਵ ਉਪ੍ਪਤਿਤ੍ਵਾ ਆਕਾਸੇ ਠਿਤੋ ਗਾਥਮਾਹ –

੯. ‘‘ਗਿਰਿਂ ਨਖੇਨ ਖਣਸਿ, ਅਯੋ ਦਨ੍ਤੇਹਿ ਖਾਦਸਿ;

ਜਾਤਵੇਦਂ ਪਦਹਸਿ, ਯੋ ਇਸਿਂ ਪਰਿਭਾਸਸੀ’’ਤਿ.

ਤਤ੍ਥ ਜਾਤਵੇਦਂ ਪਦਹਸੀਤਿ ਅਗ੍ਗਿਂ ਗਿਲਿਤੁਂ ਵਾਯਮਸਿ.

ਇਮਞ੍ਚ ਪਨ ਗਾਥਂ ਵਤ੍ਵਾ ਮਹਾਸਤ੍ਤੋ ਪਸ੍ਸਨ੍ਤਸ੍ਸੇਵ ਮਾਣਵਸ੍ਸ ਚ ਬ੍ਰਾਹ੍ਮਣਾਨਞ੍ਚ ਆਕਾਸੇ ਪਕ੍ਖਨ੍ਦਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੧੦. ‘‘ਇਦਂ ਵਤ੍ਵਾਨ ਮਾਤਙ੍ਗੋ, ਇਸਿ ਸਚ੍ਚਪਰਕ੍ਕਮੋ;

ਅਨ੍ਤਲਿਕ੍ਖਸ੍ਮਿਂ ਪਕ੍ਕਾਮਿ, ਬ੍ਰਾਹ੍ਮਣਾਨਂ ਉਦਿਕ੍ਖਤ’’ਨ੍ਤਿ.

ਤਤ੍ਥ ਸਚ੍ਚਪਰਕ੍ਕਮੋਤਿ ਸਭਾਵਪਰਕ੍ਕਮੋ.

ਸੋ ਪਾਚੀਨਦਿਸਾਭਿਮੁਖੋ ਗਨ੍ਤ੍ਵਾ ਏਕਾਯ ਵੀਥਿਯਾ ਓਤਰਿਤ੍ਵਾ ‘‘ਪਦਵਲ਼ਞ੍ਜਂ ਪਞ੍ਞਾਯਤੂ’’ਤਿ ਅਧਿਟ੍ਠਾਯ ਪਾਚੀਨਦ੍ਵਾਰਸਮੀਪੇ ਪਿਣ੍ਡਾਯ ਚਰਨ੍ਤੋ ਮਿਸ੍ਸਕਭਤ੍ਤਂ ਸਂਕਡ੍ਢਿਤ੍ਵਾ ਏਕਿਸ੍ਸਂ ਸਾਲਾਯਂ ਨਿਸੀਦਿਤ੍ਵਾ ਮਿਸ੍ਸਕਭਤ੍ਤਂ ਪਰਿਭੁਞ੍ਜਿ. ਨਗਰਦੇਵਤਾ ‘‘ਅਯਂ ਅਮ੍ਹਾਕਂ ਅਯ੍ਯਂ ਵਿਹੇਠੇਤ੍ਵਾ ਕਥੇਤੀ’’ਤਿ ਅਸਹਮਾਨਾ ਆਗਮਿਂਸੁ. ਅਥਸ੍ਸ ਜੇਟ੍ਠਕਯਕ੍ਖੋ ਮਣ੍ਡਬ੍ਯਸ੍ਸ ਗੀਵਂ ਗਹੇਤ੍ਵਾ ਪਰਿਵਤ੍ਤੇਸਿ, ਸੇਸਦੇਵਤਾ ਸੇਸਬ੍ਰਾਹ੍ਮਣਾਨਂ ਗੀਵਂ ਗਣ੍ਹਿਤ੍ਵਾ ਪਰਿਵਤ੍ਤੇਸੁਂ. ਬੋਧਿਸਤ੍ਤੇ ਮੁਦੁਚਿਤ੍ਤਤਾਯ ਪਨ ‘‘ਤਸ੍ਸ ਪੁਤ੍ਤੋ’’ਤਿ ਨਂ ਨ ਮਾਰੇਨ੍ਤਿ, ਕੇਵਲਂ ਕਿਲਮੇਨ੍ਤਿਯੇਵ. ਮਣ੍ਡਬ੍ਯਸ੍ਸ ਸੀਸਂ ਪਰਿਵਤ੍ਤਿਤ੍ਵਾ ਪਿਟ੍ਠਿਪਸ੍ਸਾਭਿਮੁਖਂ ਜਾਤਂ, ਹਤ੍ਥਪਾਦਾ ਉਜੁਕਾ ਥਦ੍ਧਾਵ ਅਟ੍ਠਂਸੁ, ਅਕ੍ਖੀਨਿ ਕਾਲਕਤਸ੍ਸੇਵ ਪਰਿਵਤ੍ਤਿਂਸੁ. ਸੋ ਥਦ੍ਧਸਰੀਰੋਵ ਨਿਪਜ੍ਜਿ, ਸੇਸਬ੍ਰਾਹ੍ਮਣਾ ਮੁਖੇਨ ਖੇਲ਼ਂ ਵਮਨ੍ਤਾ ਅਪਰਾਪਰਂ ਪਰਿਵਤ੍ਤਨ੍ਤਿ. ਮਾਣਵਾ ‘‘ਅਯ੍ਯੇ, ਪੁਤ੍ਤਸ੍ਸ ਤੇ ਕਿਂ ਜਾਤ’’ਨ੍ਤਿ ਦਿਟ੍ਠਮਙ੍ਗਲਿਕਾਯ ਆਰੋਚਯਿਂਸੁ. ਸਾ ਵੇਗੇਨ ਗਨ੍ਤ੍ਵਾ ਪੁਤ੍ਤਂ ਦਿਸ੍ਵਾ ‘‘ਕਿਮੇਤ’’ਨ੍ਤਿ ਵਤ੍ਵਾ ਗਾਥਮਾਹ –

੧੧. ‘‘ਆਵੇਲ੍ਲਿਤਂ ਪਿਟ੍ਠਿਤੋ ਉਤ੍ਤਮਙ੍ਗਂ, ਬਾਹੁਂ ਪਸਾਰੇਤਿ ਅਕਮ੍ਮਨੇਯ੍ਯਂ;

ਸੇਤਾਨਿ ਅਕ੍ਖੀਨਿ ਯਥਾ ਮਤਸ੍ਸ, ਕੋ ਮੇ ਇਮਂ ਪੁਤ੍ਤਮਕਾਸਿ ਏਵ’’ਨ੍ਤਿ.

ਤਤ੍ਥ ਆਵੇਲ੍ਲਿਤਨ੍ਤਿ ਪਰਿਵਤ੍ਤਿਤਂ.

ਅਥਸ੍ਸਾ ਤਸ੍ਮਿਂ ਠਾਨੇ ਠਿਤਜਨੋ ਆਰੋਚੇਤੁਂ ਗਾਥਮਾਹ –

੧੨. ‘‘ਇਧਾਗਮਾ ਸਮਣੋ ਦੁਮ੍ਮਵਾਸੀ, ਓਤਲ੍ਲਕੋ ਪਂਸੁਪਿਸਾਚਕੋਵ;

ਸਙ੍ਕਾਰਚੋਲ਼ਂ ਪਟਿਮੁਞ੍ਚ ਕਣ੍ਠੇ, ਸੋ ਤੇ ਇਮਂ ਪੁਤ੍ਤਮਕਾਸਿ ਏਵ’’ਨ੍ਤਿ.

ਸਾ ਤਂ ਸੁਤ੍ਵਾਵ ਚਿਨ੍ਤੇਸਿ ‘‘ਅਞ੍ਞਸ੍ਸੇਤਂ ਬਲਂ ਨਤ੍ਥਿ, ਨਿਸ੍ਸਂਸਯਂ ਮਾਤਙ੍ਗਪਣ੍ਡਿਤੋ ਭਵਿਸ੍ਸਤਿ, ਸਮ੍ਪਨ੍ਨਮੇਤ੍ਤਾਭਾਵਨੋ ਖੋ ਪਨ ਧੀਰੋ ਨ ਏਤ੍ਤਕਂ ਜਨਂ ਕਿਲਮੇਤ੍ਵਾ ਗਮਿਸ੍ਸਤਿ, ਕਤਰਂ ਨੁ ਖੋ ਦਿਸਂ ਗਤੋ ਭਵਿਸ੍ਸਤੀ’’ਤਿ. ਤਤੋ ਪੁਚ੍ਛਨ੍ਤੀ ਗਾਥਮਾਹ –

੧੩. ‘‘ਕਤਮਂ ਦਿਸਂ ਅਗਮਾ ਭੂਰਿਪਞ੍ਞੋ, ਅਕ੍ਖਾਥ ਮੇ ਮਾਣਵਾ ਏਤਮਤ੍ਥਂ;

ਗਨ੍ਤ੍ਵਾਨ ਤਂ ਪਟਿਕਰੇਮੁ ਅਚ੍ਚਯਂ, ਅਪ੍ਪੇਵ ਨਂ ਪੁਤ੍ਤ ਲਭੇਮੁ ਜੀਵਿਤ’’ਨ੍ਤਿ.

ਤਤ੍ਥ ਗਨ੍ਤ੍ਵਾਨਾਤਿ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ. ਤਂ ਪਟਿਕਰੇਮੁ ਅਚ੍ਚਯਨ੍ਤਿ ਤਂ ਅਚ੍ਚਯਂ ਪਟਿਕਰਿਸ੍ਸਾਮ ਦੇਸੇਸ੍ਸਾਮ, ਖਮਾਪੇਸ੍ਸਾਮ ਨਨ੍ਤਿ. ਪੁਤ੍ਤ ਲਭੇਮੁ ਜੀਵਿਤਨ੍ਤਿ ਅਪ੍ਪੇਵ ਨਾਮ ਪੁਤ੍ਤਸ੍ਸ ਜੀਵਿਤਂ ਲਭੇਯ੍ਯਾਮ.

ਅਥਸ੍ਸਾ ਤਤ੍ਥ ਠਿਤਾ ਮਾਣਵਾ ਕਥੇਨ੍ਤਾ ਗਾਥਮਾਹਂਸੁ –

੧੪. ‘‘ਵੇਹਾਯਸਂ ਅਗਮਾ ਭੂਰਿਪਞ੍ਞੋ, ਪਥਦ੍ਧੁਨੋ ਪਨ੍ਨਰਸੇਵ ਚਨ੍ਦੋ;

ਅਪਿ ਚਾਪਿ ਸੋ ਪੁਰਿਮਦਿਸਂ ਅਗਚ੍ਛਿ, ਸਚ੍ਚਪ੍ਪਟਿਞ੍ਞੋ ਇਸਿ ਸਾਧੁਰੂਪੋ’’ਤਿ.

ਤਤ੍ਥ ਪਥਦ੍ਧੁਨੋਤਿ ਆਕਾਸਪਥਸਙ੍ਖਾਤਸ੍ਸ ਅਦ੍ਧੁਨੋ ਮਜ੍ਝੇ ਠਿਤੋ ਪਨ੍ਨਰਸੇ ਚਨ੍ਦੋ ਵਿਯ. ਅਪਿ ਚਾਪਿ ਸੋਤਿ ਅਪਿਚ ਖੋ ਪਨ ਸੋ ਪੁਰਤ੍ਥਿਮਂ ਦਿਸਂ ਗਤੋ.

ਸਾ ਤੇਸਂ ਵਚਨਂ ਸੁਤ੍ਵਾ ‘‘ਮਮ ਸਾਮਿਕਂ ਉਪਧਾਰੇਸ੍ਸਾਮੀ’’ਤਿ ਸੁਵਣ੍ਣਕਲਸਸੁਵਣ੍ਣਸਰਕਾਨਿ ਗਾਹਾਪੇਤ੍ਵਾ ਦਾਸਿਗਣਪਰਿਵੁਤਾ ਤੇਨ ਪਦਵਲ਼ਞ੍ਜਸ੍ਸ ਅਧਿਟ੍ਠਿਤਟ੍ਠਾਨਂ ਪਤ੍ਵਾ ਤੇਨਾਨੁਸਾਰੇਨ ਗਚ੍ਛਨ੍ਤੀ ਤਸ੍ਮਿਂ ਪੀਠਿਕਾਯ ਨਿਸੀਦਿਤ੍ਵਾ ਭੁਞ੍ਜਮਾਨੇ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਸੋ ਤਂ ਦਿਸ੍ਵਾ ਥੋਕਂ ਓਦਨਂ ਪਤ੍ਤੇ ਠਪੇਸਿ. ਦਿਟ੍ਠਮਙ੍ਗਲਿਕਾ ਸੁਵਣ੍ਣਕਲਸੇਨ ਤਸ੍ਸ ਉਦਕਂ ਅਦਾਸਿ. ਸੋ ਤਤ੍ਥੇਵ ਹਤ੍ਥਂ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਸਿ. ਅਥ ਨਂ ਸਾ ‘‘ਕੇਨ ਮੇ ਪੁਤ੍ਤਸ੍ਸ ਸੋ ਵਿਪ੍ਪਕਾਰੋ ਕਤੋ’’ਤਿ ਪੁਚ੍ਛਨ੍ਤੀ ਗਾਥਮਾਹ –

੧੫. ‘‘ਆਵੇਲ੍ਲਿਤਂ ਪਿਟ੍ਠਿਤੋ ਉਤ੍ਤਮਙ੍ਗਂ, ਬਾਹੁਂ ਪਸਾਰੇਤਿ ਅਕਮ੍ਮਨੇਯ੍ਯਂ;

ਸੇਤਾਨਿ ਅਕ੍ਖੀਨਿ ਯਥਾ ਮਤਸ੍ਸ, ਕੋ ਮੇ ਇਮਂ ਪੁਤ੍ਤਮਕਾਸਿ ਏਵ’’ਨ੍ਤਿ.

ਤਤੋ ਪਰਾ ਤੇਸਂ ਵਚਨਪਟਿਵਚਨਗਾਥਾ ਹੋਨ੍ਤਿ –

੧੬. ‘‘ਯਕ੍ਖਾ ਹਵੇ ਸਨ੍ਤਿ ਮਹਾਨੁਭਾਵਾ, ਅਨ੍ਵਾਗਤਾ ਇਸਯੋ ਸਾਧੁਰੂਪਾ;

ਤੇ ਦੁਟ੍ਠਚਿਤ੍ਤਂ ਕੁਪਿਤਂ ਵਿਦਿਤ੍ਵਾ, ਯਕ੍ਖਾ ਹਿ ਤੇ ਪੁਤ੍ਤਮਕਂਸੁ ਏਵਂ.

੧੭. ‘‘ਯਕ੍ਖਾ ਚ ਮੇ ਪੁਤ੍ਤਮਕਂਸੁ ਏਵਂ, ਤ੍ਵਞ੍ਞੇਵ ਮੇ ਮਾ ਕੁਦ੍ਧੋ ਬ੍ਰਹ੍ਮਚਾਰਿ;

ਤੁਮ੍ਹੇਵ ਪਾਦੇ ਸਰਣਂ ਗਤਾਸ੍ਮਿ, ਅਨ੍ਵਾਗਤਾ ਪੁਤ੍ਤਸੋਕੇਨ ਭਿਕ੍ਖੁ.

੧੮. ‘‘ਤਦੇਵ ਹਿ ਏਤਰਹਿ ਚ ਮਯ੍ਹਂ, ਮਨੋਪਦੋਸੋ ਨ ਮਮਤ੍ਥਿ ਕੋਚਿ;

ਪੁਤ੍ਤੋ ਚ ਤੇ ਵੇਦਮਦੇਨ ਮਤ੍ਤੋ, ਅਤ੍ਥਂ ਨ ਜਾਨਾਤਿ ਅਧਿਚ੍ਚ ਵੇਦੇ.

੧੯. ‘‘ਅਦ੍ਧਾ ਹਵੇ ਭਿਕ੍ਖੁ ਮੁਹੁਤ੍ਤਕੇਨ, ਸਮ੍ਮੁਯ੍ਹਤੇਵ ਪੁਰਿਸਸ੍ਸ ਸਞ੍ਞਾ;

ਏਕਾਪਰਾਧਂ ਖਮ ਭੂਰਿਪਞ੍ਞ, ਨ ਪਣ੍ਡਿਤਾ ਕੋਧਬਲਾ ਭਵਨ੍ਤੀ’’ਤਿ.

ਤਤ੍ਥ ਯਕ੍ਖਾਤਿ ਨਗਰਪਰਿਗ੍ਗਾਹਕਯਕ੍ਖਾ. ਅਨ੍ਵਾਗਤਾਤਿ ਅਨੁ ਆਗਤਾ, ਇਸਯੋ ਸਾਧੁਰੂਪਾ ਗੁਣਸਮ੍ਪਨ੍ਨਾਤਿ ਏਵਂ ਜਾਨਮਾਨਾਤਿ ਅਤ੍ਥੋ. ਤੇਤਿ ਤੇ ਇਸੀਨਂ ਗੁਣਂ ਞਤ੍ਵਾ ਤਵ ਪੁਤ੍ਤਂ ਦੁਟ੍ਠਚਿਤ੍ਤਂ ਕੁਪਿਤਚਿਤ੍ਤਂ ਵਿਦਿਤ੍ਵਾ. ਤ੍ਵਞ੍ਞੇਵ ਮੇਤਿ ਸਚੇ ਯਕ੍ਖਾ ਕੁਪਿਤਾ ਏਵਮਕਂਸੁ, ਕਰੋਨ੍ਤੁ, ਦੇਵਤਾ ਨਾਮ ਪਾਨੀਯਉਲ਼ੁਙ੍ਕਮਤ੍ਤੇਨ ਸਨ੍ਤਪ੍ਪੇਤੁਂ ਸਕ੍ਕਾ, ਤਸ੍ਮਾਹਂ ਤੇਸਂ ਨ ਭਾਯਾਮਿ, ਕੇਵਲਂ ਤ੍ਵਞ੍ਞੇਵ ਮੇ ਪੁਤ੍ਤਸ੍ਸ ਮਾ ਕੁਜ੍ਝਿ. ਅਨ੍ਵਾਗਤਾਤਿ ਆਗਤਾਸ੍ਮਿ. ਭਿਕ੍ਖੂਤਿ ਮਹਾਸਤ੍ਤਂ ਆਲਪਨ੍ਤੀ ਪੁਤ੍ਤਸ੍ਸ ਜੀਵਿਤਦਾਨਂ ਯਾਚਤਿ. ਤਦੇਵ ਹੀਤਿ ਦਿਟ੍ਠਮਙ੍ਗਲਿਕੇ ਤਦਾ ਤਵ ਪੁਤ੍ਤਸ੍ਸ ਮਂ ਅਕ੍ਕੋਸਨਕਾਲੇ ਚ ਮਯ੍ਹਂ ਮਨੋਪਦੋਸੋ ਨਤ੍ਥਿ, ਏਤਰਹਿ ਚ ਤਯਿ ਯਾਚਮਾਨਾਯਪਿ ਮਮ ਤਸ੍ਮਿਂ ਮਨੋਪਦੋਸੋ ਨਤ੍ਥਿਯੇਵ. ਵੇਦਮਦੇਨਾਤਿ ‘‘ਤਯੋ ਵੇਦਾ ਮੇ ਉਗ੍ਗਹਿਤਾ’’ਤਿ ਮਦੇਨ. ਅਧਿਚ੍ਚਾਤਿ ਵੇਦੇ ਉਗ੍ਗਹੇਤ੍ਵਾਪਿ ਅਤ੍ਥਾਨਤ੍ਥਂ ਨ ਜਾਨਾਤਿ. ਮੁਹੁਤ੍ਤਕੇਨਾਤਿ ਯਂ ਕਿਞ੍ਚਿ ਉਗ੍ਗਹੇਤ੍ਵਾ ਮੁਹੁਤ੍ਤਕੇਨੇਵ.

ਏਵਂ ਤਾਯ ਖਮਾਪਿਯਮਾਨੋ ਮਹਾਸਤ੍ਤੋ ‘‘ਤੇਨ ਹਿ ਏਤੇਸਂ ਯਕ੍ਖਾਨਂ ਪਲਾਯਨਤ੍ਥਾਯ ਅਮਤੋਸਧਂ ਦਸ੍ਸਾਮੀ’’ਤਿ ਵਤ੍ਵਾ ਗਾਥਮਾਹ –

੨੦. ‘‘ਇਦਞ੍ਚ ਮਯ੍ਹਂ ਉਤ੍ਤਿਟ੍ਠਪਿਣ੍ਡਂ, ਤਵ ਮਣ੍ਡਬ੍ਯੋ ਭੁਞ੍ਜਤੁ ਅਪ੍ਪਪਞ੍ਞੋ;

ਯਕ੍ਖਾ ਚ ਤੇ ਨਂ ਨ ਵਿਹੇਠਯੇਯ੍ਯੁਂ, ਪੁਤ੍ਤੋ ਚ ਤੇ ਹੇਸ੍ਸਤਿ ਸੋ ਅਰੋਗੋ’’ਤਿ.

ਤਤ੍ਥ ਉਤ੍ਤਿਟ੍ਠਪਿਣ੍ਡਨ੍ਤਿ ਉਚ੍ਛਿਟ੍ਠਕਪਿਣ੍ਡਂ, ‘‘ਉਚ੍ਛਿਟ੍ਠਪਿਣ੍ਡ’’ਨ੍ਤਿਪਿ ਪਾਠੋ.

ਸਾ ਮਹਾਸਤ੍ਤਸ੍ਸ ਵਚਨਂ ਸੁਤ੍ਵਾ ‘‘ਦੇਥ, ਸਾਮਿ, ਅਮਤੋਸਧ’’ਨ੍ਤਿ ਸੁਵਣ੍ਣਸਰਕਂ ਉਪਨਾਮੇਸਿ. ਮਹਾਸਤ੍ਤੋ ਉਚ੍ਛਿਟ੍ਠਕਕਞ੍ਜਿਕਂ ਤਤ੍ਥ ਆਸਿਞ੍ਚਿਤ੍ਵਾ ‘‘ਪਠਮਞ੍ਞੇਵ ਇਤੋ ਉਪਡ੍ਢਂ ਤਵ ਪੁਤ੍ਤਸ੍ਸ ਮੁਖੇ ਓਸਿਞ੍ਚਿਤ੍ਵਾ ਸੇਸਂ ਚਾਟਿਯਂ ਉਦਕੇਨ ਮਿਸ੍ਸੇਤ੍ਵਾ ਸੇਸਬ੍ਰਾਹ੍ਮਣਾਨਂ ਮੁਖੇ ਓਸਿਞ੍ਚੇਹਿ, ਸਬ੍ਬੇਪਿ ਨਿਰੋਗਾ ਭਵਿਸ੍ਸਨ੍ਤੀ’’ਤਿ ਵਤ੍ਵਾ ਉਪ੍ਪਤਿਤ੍ਵਾ ਹਿਮਵਨ੍ਤਮੇਵ ਗਤੋ. ਸਾਪਿ ਤਂ ਸਰਕਂ ਸੀਸੇਨਾਦਾਯ ‘‘ਅਮਤੋਸਧਂ ਮੇ ਲਦ੍ਧ’’ਨ੍ਤਿ ਵਦਨ੍ਤੀ ਨਿਵੇਸਨਂ ਗਨ੍ਤ੍ਵਾ ਪਠਮਂ ਪੁਤ੍ਤਸ੍ਸ ਮੁਖੇ ਕਞ੍ਜਿਕਂ ਓਸਿਞ੍ਚਿ, ਯਕ੍ਖੋ ਪਲਾਯਿ. ਇਤਰੋ ਪਂਸੁਂ ਪੁਞ੍ਛਨ੍ਤੋ ਉਟ੍ਠਾਯ ‘‘ਅਮ੍ਮ ਕਿਮੇਤ’’ਨ੍ਤਿ ਆਹ. ਤਯਾ ਕਤਂ ਤ੍ਵਮੇਵ ਜਾਨਿਸ੍ਸਸਿ. ਏਹਿ, ਤਾਤ, ਤਵ ਦਕ੍ਖਿਣੇਯ੍ਯਾਨਂ ਤੇਸਂ ਵਿਪ੍ਪਕਾਰਂ ਪਸ੍ਸਾਤਿ. ਸੋ ਤੇ ਦਿਸ੍ਵਾ ਵਿਪ੍ਪਟਿਸਾਰੀ ਅਹੋਸਿ. ਅਥ ਨਂ ਮਾਤਾ ‘‘ਤਾਤ ਮਣ੍ਡਬ੍ਯ, ਤ੍ਵਂ ਬਾਲੋ ਦਾਨਸ੍ਸ ਮਹਪ੍ਫਲਟ੍ਠਾਨਂ ਨ ਜਾਨਾਸਿ, ਦਕ੍ਖਿਣੇਯ੍ਯਾ ਨਾਮ ਏਵਰੂਪਾ ਨ ਹੋਨ੍ਤਿ, ਮਾਤਙ੍ਗਪਣ੍ਡਿਤਸਦਿਸਾਵ ਹੋਨ੍ਤਿ, ਇਤੋ ਪਟ੍ਠਾਯ ਮਾ ਏਤੇਸਂ ਦੁਸ੍ਸੀਲਾਨਂ ਦਾਨਮਦਾਸਿ, ਸੀਲਵਨ੍ਤਾਨਂ ਦੇਹੀ’’ਤਿ ਵਤ੍ਵਾ ਆਹ –

੨੧. ‘‘ਮਣ੍ਡਬ੍ਯ ਬਾਲੋਸਿ ਪਰਿਤ੍ਤਪਞ੍ਞੋ, ਯੋ ਪੁਞ੍ਞਕ੍ਖੇਤ੍ਤਾਨਮਕੋਵਿਦੋਸਿ;

ਮਹਕ੍ਕਸਾਵੇਸੁ ਦਦਾਸਿ ਦਾਨਂ, ਕਿਲਿਟ੍ਠਕਮ੍ਮੇਸੁ ਅਸਞ੍ਞਤੇਸੁ.

੨੨. ‘‘ਜਟਾ ਚ ਕੇਸਾ ਅਜਿਨਾ ਨਿਵਤ੍ਥਾ, ਜਰੂਦਪਾਨਂਵ ਮੁਖਂ ਪਰੂਲ਼੍ਹਂ;

ਪਜਂ ਇਮਂ ਪਸ੍ਸਥ ਦੁਮ੍ਮਰੂਪਂ, ਨ ਜਟਾਜਿਨਂ ਤਾਯਤਿ ਅਪ੍ਪਪਞ੍ਞਂ.

੨੩. ‘‘ਯੇਸਂ ਰਾਗੋ ਚ ਦੋਸੋ ਚ, ਅਵਿਜ੍ਜਾ ਚ ਵਿਰਾਜਿਤਾ;

ਖੀਣਾਸਵਾ ਅਰਹਨ੍ਤੋ, ਤੇਸੁ ਦਿਨ੍ਨਂ ਮਹਪ੍ਫਲ’’ਨ੍ਤਿ.

ਤਤ੍ਥ ਮਹਕ੍ਕਸਾਵੇਸੂਤਿ ਮਹਾਕਸਾਵੇਸੁ ਮਹਨ੍ਤੇਹਿ ਰਾਗਕਸਾਵਾਦੀਹਿ ਸਮਨ੍ਨਾਗਤੇਸੁ. ਜਟਾ ਚ ਕੇਸਾਤਿ ਤਾਤ ਮਣ੍ਡਬ੍ਯ, ਤਵ ਦਕ੍ਖਿਣੇਯ੍ਯੇਸੁ ਏਕਚ੍ਚਾਨਂ ਕੇਸਾ ਜਟਾ ਕਤ੍ਵਾ ਬਦ੍ਧਾ. ਅਜਿਨਾ ਨਿਵਤ੍ਥਾਤਿ ਸਖੁਰਾਨਿ ਅਜਿਨਚਮ੍ਮਾਨਿ ਨਿਵਤ੍ਥਾ. ਜਰੂਦਪਾਨਂ ਵਾਤਿ ਤਿਣਗਹਨੇਨ ਜਿਣ੍ਣਕੂਪੋ ਵਿਯ ਮੁਖਂ ਦੀਘਮਸ੍ਸੁਤਾਯ ਪਰੂਲ਼੍ਹਂ. ਪਜਂ ਇਮਨ੍ਤਿ ਇਮਂ ਏਵਰੂਪਂ ਅਨਞ੍ਜਿਤਾਮਣ੍ਡਿਤਲੂਖਵੇਸਂ ਪਜਂ ਪਸ੍ਸਥ. ਨ ਜਟਾਜਿਨਨ੍ਤਿ ਏਤਂ ਜਟਾਜਿਨਂ ਇਮਂ ਅਪ੍ਪਪਞ੍ਞਂ ਪਜਂ ਤਾਯਿਤੁਂ ਨ ਸਕ੍ਕੋਤਿ, ਸੀਲਪਞ੍ਞਾਣਤਪੋਕਮ੍ਮਾਨੇਵ ਇਮੇਸਂ ਸਤ੍ਤਾਨਂ ਪਤਿਟ੍ਠਾ ਹੋਨ੍ਤਿ. ਯੇਸਨ੍ਤਿ ਯਸ੍ਮਾ ਯੇਸਂ ਏਤੇ ਰਜ੍ਜਨਦੁਸ੍ਸਨਮੁਯ੍ਹਨਸਭਾਵਾ ਰਾਗਾਦਯੋ ਅਟ੍ਠਵਤ੍ਥੁਕਾ ਚ ਅਵਿਜ੍ਜਾ ਵਿਰਾਜਿਤਾ ਵਿਗਤਾ, ਵਿਗਤਤ੍ਤਾਯੇਵ ਚ ਏਤੇਸਂ ਕਿਲੇਸਾਨਂ ਯੇ ਖੀਣਾਸਵਾ ਅਰਹਨ੍ਤੋ, ਤੇਸੁ ਦਿਨ੍ਨਂ ਮਹਪ੍ਫਲਂ, ਤਸ੍ਮਾ ਤ੍ਵਂ, ਤਾਤ, ਇਤੋ ਪਟ੍ਠਾਯ ਏਵਰੂਪਾਨਂ ਦੁਸ੍ਸੀਲਾਨਂ ਅਦਤ੍ਵਾ ਯੇ ਲੋਕੇ ਅਟ੍ਠਸਮਾਪਤ੍ਤਿਲਾਭਿਨੋ ਪਞ੍ਚਾਭਿਞ੍ਞਾ ਧਮ੍ਮਿਕਸਮਣਬ੍ਰਾਹ੍ਮਣਾ ਚ ਪਚ੍ਚੇਕਬੁਦ੍ਧਾ ਚ ਸਨ੍ਤਿ, ਤੇਸਂ ਦਾਨਂ ਦੇਹਿ. ਏਹਿ, ਤਾਤ, ਤਵ ਕੁਲੂਪਕੇ ਅਮਤੋਸਧਂ ਪਾਯੇਤ੍ਵਾ ਅਰੋਗੇ ਕਰਿਸ੍ਸਾਮਾਤਿ ਵਤ੍ਵਾ ਉਚ੍ਛਿਟ੍ਠਕਞ੍ਜਿਕਂ ਗਾਹਾਪੇਤ੍ਵਾ ਉਦਕਚਾਟਿਯਂ ਪਕ੍ਖਿਪਿਤ੍ਵਾ ਸੋਲ਼ਸਨ੍ਨਂ ਬ੍ਰਾਹ੍ਮਣਸਹਸ੍ਸਾਨਂ ਮੁਖੇਸੁ ਆਸਿਞ੍ਚਾਪੇਸਿ.

ਏਕੇਕੋ ਪਂਸੁਂ ਪੁਞ੍ਛਨ੍ਤੋਵ ਉਟ੍ਠਹਿ. ਅਥ ਨੇ ਬ੍ਰਾਹ੍ਮਣਾ ‘‘ਇਮੇਹਿ ਚਣ੍ਡਾਲੁਚ੍ਛਿਟ੍ਠਕਂ ਪੀਤ’’ਨ੍ਤਿ ਅਬ੍ਰਾਹ੍ਮਣੇ ਕਰਿਂਸੁ. ਤੇ ਲਜ੍ਜਿਤਾ ਬਾਰਾਣਸਿਤੋ ਨਿਕ੍ਖਮਿਤ੍ਵਾ ਮਜ੍ਝਰਟ੍ਠਂ ਗਨ੍ਤ੍ਵਾ ਮਜ੍ਝਰਞ੍ਞੋ ਸਨ੍ਤਿਕੇ ਵਸਿਂਸੁ, ਮਣ੍ਡਬ੍ਯੋ ਪਨ ਤਤ੍ਥੇਵ ਵਸਿ. ਤਦਾ ਵੇਤ੍ਤਵਤੀਨਗਰਂ ਉਪਨਿਸ੍ਸਾਯ ਵੇਤ੍ਤਵਤੀਨਦੀਤੀਰੇ ਜਾਤਿਮਨ੍ਤੋ ਨਾਮੇਕੋ ਬ੍ਰਾਹ੍ਮਣੋ ਪਬ੍ਬਜਿਤੋ ਜਾਤਿਂ ਨਿਸ੍ਸਾਯ ਮਹਨ੍ਤਂ ਮਾਨਮਕਾਸਿ. ਮਹਾਸਤ੍ਤੋ ‘‘ਏਤਸ੍ਸ ਮਾਨਂ ਭਿਨ੍ਦਿਸ੍ਸਾਮੀ’’ਤਿ ਤਂ ਠਾਨਂ ਗਨ੍ਤ੍ਵਾ ਤਸ੍ਸ ਸਨ੍ਤਿਕੇ ਉਪਰਿਸੋਤੇ ਵਾਸਂ ਕਪ੍ਪੇਸਿ. ਸੋ ਏਕਦਿਵਸਂ ਦਨ੍ਤਕਟ੍ਠਂ ਖਾਦਿਤ੍ਵਾ ‘‘ਇਮਂ ਦਨ੍ਤਕਟ੍ਠਂ ਜਾਤਿਮਨ੍ਤਸ੍ਸ ਜਟਾਸੁ ਲਗ੍ਗਤੂ’’ਤਿ ਅਧਿਟ੍ਠਾਯ ਨਦਿਯਂ ਪਾਤੇਸਿ. ਤਂ ਤਸ੍ਸ ਉਦਕਂ ਆਚਮਨ੍ਤਸ੍ਸ ਜਟਾਸੁ ਲਗ੍ਗਿ. ਸੋ ਤਂ ਦਿਸ੍ਵਾਵ ‘‘ਨਸ੍ਸ ਵਸਲਾ’’ਤਿ ਵਤ੍ਵਾ ‘‘ਕੁਤੋ ਅਯਂ ਕਾਲ਼ਕਣ੍ਣੀ ਆਗਤੋ, ਉਪਧਾਰੇਸ੍ਸਾਮਿ ਨ’’ਨ੍ਤਿ ਉਦ੍ਧਂਸੋਤਂ ਗਚ੍ਛਨ੍ਤੋ ਮਹਾਸਤ੍ਤਂ ਦਿਸ੍ਵਾ ‘‘ਕਿਂਜਾਤਿਕੋਸੀ’’ਤਿ ਪੁਚ੍ਛਿ. ‘‘ਚਣ੍ਡਾਲੋਸ੍ਮੀ’’ਤਿ. ‘‘ਤਯਾ ਨਦਿਯਾ ਦਨ੍ਤਕਟ੍ਠਂ ਪਾਤਿਤ’’ਨ੍ਤਿ? ‘‘ਆਮ, ਮਯਾ’’ਤਿ. ‘‘ਨਸ੍ਸ, ਵਸਲ, ਚਣ੍ਡਾਲ ਕਾਲ਼ਕਣ੍ਣਿ ਮਾ ਇਧ ਵਸਿ, ਹੇਟ੍ਠਾਸੋਤੇ ਵਸਾਹੀ’’ਤਿ ਵਤ੍ਵਾ ਹੇਟ੍ਠਾਸੋਤੇ ਵਸਨ੍ਤੇਨਪਿ ਤੇਨ ਪਾਤਿਤੇ ਦਨ੍ਤਕਟ੍ਠੇ ਪਟਿਸੋਤਂ ਆਗਨ੍ਤ੍ਵਾ ਜਟਾਸੁ ਲਗ੍ਗਨ੍ਤੇ ਸੋ ‘‘ਨਸ੍ਸ ਵਸਲ, ਸਚੇ ਇਧ ਵਸਿਸ੍ਸਸਿ, ਸਤ੍ਤਮੇ ਦਿਵਸੇ ਸਤ੍ਤਧਾ ਮੁਦ੍ਧਾ ਫਲਿਸ੍ਸਤੀ’’ਤਿ ਆਹ.

ਮਹਾਸਤ੍ਤੋ ‘‘ਸਚਾਹਂ ਏਤਸ੍ਸ ਕੁਜ੍ਝਿਸ੍ਸਾਮਿ, ਸੀਲਂ ਮੇ ਅਰਕ੍ਖਿਤਂ ਭਵਿਸ੍ਸਤਿ, ਉਪਾਯੇਨੇਵਸ੍ਸ ਮਾਨਂ ਭਿਨ੍ਦਿਸ੍ਸਾਮੀ’’ਤਿ ਸਤ੍ਤਮੇ ਦਿਵਸੇ ਸੂਰਿਯੁਗ੍ਗਮਨਂ ਨਿਵਾਰੇਸਿ. ਮਨੁਸ੍ਸਾ ਉਬ੍ਬਾਲ਼੍ਹਾ ਜਾਤਿਮਨ੍ਤਂ ਤਾਪਸਂ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਤੁਮ੍ਹੇ ਸੂਰਿਯੁਗ੍ਗਮਨਂ ਨ ਦੇਥਾ’’ਤਿ ਪੁਚ੍ਛਿਂਸੁ. ਸੋ ਆਹ – ‘‘ਨ ਮੇ ਤਂ ਕਮ੍ਮਂ, ਨਦੀਤੀਰੇ ਪਨੇਕੋ ਚਣ੍ਡਾਲੋ ਵਸਤਿ, ਤਸ੍ਸੇਤਂ ਕਮ੍ਮਂ ਭਵਿਸ੍ਸਤੀ’’ਤਿ. ਮਨੁਸ੍ਸਾ ਮਹਾਸਤ੍ਤਂ ਉਪਸਙ੍ਕਮਿਤ੍ਵਾ ‘‘ਤੁਮ੍ਹੇ, ਭਨ੍ਤੇ, ਸੂਰਿਯੁਗ੍ਗਮਨਂ ਨ ਦੇਥਾ’’ਤਿ ਪੁਚ੍ਛਿਂਸੁ. ‘‘ਆਮਾਵੁਸੋ’’ਤਿ. ‘‘ਕਿਂਕਾਰਣਾ’’ਤਿ. ‘‘ਤੁਮ੍ਹਾਕਂ ਕੁਲੂਪਕੋ ਤਾਪਸੋ ਮਂ ਨਿਰਪਰਾਧਂ ਅਭਿਸਪਿ, ਤਸ੍ਮਿਂ ਆਗਨ੍ਤ੍ਵਾ ਖਮਾਪਨਤ੍ਥਾਯ ਮਮ ਪਾਦੇਸੁ ਪਤਿਤੇ ਸੂਰਿਯਂ ਵਿਸ੍ਸਜ੍ਜੇਸ੍ਸਾਮੀ’’ਤਿ. ਤੇ ਗਨ੍ਤ੍ਵਾ ਤਂ ਕਡ੍ਢਨ੍ਤਾ ਆਨੇਤ੍ਵਾ ਮਹਾਸਤ੍ਤਸ੍ਸ ਪਾਦਮੂਲੇ ਨਿਪਜ੍ਜਾਪੇਤ੍ਵਾ ਖਮਾਪੇਤ੍ਵਾ ਆਹਂਸੁ ‘‘ਸੂਰਿਯਂ ਵਿਸ੍ਸਜ੍ਜੇਥ ਭਨ੍ਤੇ’’ਤਿ. ‘‘ਨ ਸਕ੍ਕਾ ਵਿਸ੍ਸਜ੍ਜੇਤੁਂ, ਸਚਾਹਂ ਵਿਸ੍ਸਜ੍ਜੇਸ੍ਸਾਮਿ, ਇਮਸ੍ਸ ਸਤ੍ਤਧਾ ਮੁਦ੍ਧਾ ਫਲਿਸ੍ਸਤੀ’’ਤਿ. ‘‘ਅਥ, ਭਨ੍ਤੇ, ਕਿਂ ਕਰੋਮਾ’’ਤਿ? ਸੋ ‘‘ਮਤ੍ਤਿਕਾਪਿਣ੍ਡਂ ਆਹਰਥਾ’’ਤਿ ਆਹਰਾਪੇਤ੍ਵਾ ‘‘ਇਮਂ ਤਾਪਸਸ੍ਸ ਸੀਸੇ ਠਪੇਤ੍ਵਾ ਤਾਪਸਂ ਓਤਾਰੇਤ੍ਵਾ ਉਦਕੇ ਠਪੇਥਾ’’ਤਿ ਠਪਾਪੇਤ੍ਵਾ ਸੂਰਿਯਂ ਵਿਸ੍ਸਜ੍ਜੇਸਿ. ਸੂਰਿਯਰਸ੍ਮੀਹਿ ਪਹਟਮਤ੍ਤੇ ਮਤ੍ਤਿਕਾਪਿਣ੍ਡੋ ਸਤ੍ਤਧਾ ਭਿਜ੍ਜਿ, ਤਾਪਸੋ ਉਦਕੇ ਨਿਮੁਜ੍ਜਿ.

ਮਹਾਸਤ੍ਤੋ ਤਂ ਦਮੇਤ੍ਵਾ ‘‘ਕਹਂ ਨੁ ਖੋ ਦਾਨਿ ਸੋਲ਼ਸ ਬ੍ਰਾਹ੍ਮਣਸਹਸ੍ਸਾਨਿ ਵਸਨ੍ਤੀ’’ਤਿ ਉਪਧਾਰੇਨ੍ਤੋ ‘‘ਮਜ੍ਝਰਞ੍ਞੋ ਸਨ੍ਤਿਕੇ’’ਤਿ ਞਤ੍ਵਾ ‘‘ਤੇ ਦਮੇਸ੍ਸਾਮੀ’’ਤਿ ਇਦ੍ਧਿਯਾ ਗਨ੍ਤ੍ਵਾ ਨਗਰਸਾਮਨ੍ਤੇ ਓਤਰਿਤ੍ਵਾ ਪਤ੍ਤਂ ਆਦਾਯ ਨਗਰੇ ਪਿਣ੍ਡਾਯ ਚਰਿ. ਬ੍ਰਾਹ੍ਮਣਾ ਤਂ ਦਿਸ੍ਵਾ ‘‘ਅਯਂ ਇਧ ਏਕਂ ਦ੍ਵੇ ਦਿਵਸੇ ਵਸਨ੍ਤੋਪਿ ਅਮ੍ਹੇ ਅਪ੍ਪਤਿਟ੍ਠੇ ਕਰਿਸ੍ਸਤੀ’’ਤਿ ਵੇਗੇਨ ਗਨ੍ਤ੍ਵਾ ‘‘ਮਹਾਰਾਜ, ਮਾਯਾਕਾਰੋ ਏਕੋ ਵਿਜ੍ਜਾਧਰੋ ਚੋਰੋ ਆਗਤੋ, ਗਣ੍ਹਾਪੇਥ ਨ’’ਨ੍ਤਿ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਮਹਾਸਤ੍ਤੋਪਿ ਮਿਸ੍ਸਕਭਤ੍ਤਂ ਆਦਾਯ ਅਞ੍ਞਤਰਂ ਕੁਟ੍ਟਂ ਨਿਸ੍ਸਾਯ ਪੀਠਿਕਾਯ ਨਿਸਿਨ੍ਨੋ ਭੁਞ੍ਜਤਿ. ਅਥ ਨਂ ਅਞ੍ਞਵਿਹਿਤਕਂ ਆਹਾਰਂ ਪਰਿਭੁਞ੍ਜਮਾਨਮੇਵ ਰਞ੍ਞਾ ਪਹਿਤਪੁਰਿਸਾ ਅਸਿਨਾ ਗੀਵਂ ਪਹਰਿਤ੍ਵਾ ਜੀਵਿਤਕ੍ਖਯਂ ਪਾਪੇਸੁਂ. ਸੋ ਕਾਲਂ ਕਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ. ਇਮਸ੍ਮਿਂ ਕਿਰ ਜਾਤਕੇ ਬੋਧਿਸਤ੍ਤੋ ਕੋਣ੍ਡਦਮਕੋ ਅਹੋਸਿ. ਸੋ ਤੇਨੇਵ ਪਰਤਨ੍ਤਿਯੁਤ੍ਤਭਾਵੇਨ ਜੀਵਿਤਕ੍ਖਯਂ ਪਾਪੁਣਿ. ਦੇਵਤਾ ਕੁਜ੍ਝਿਤ੍ਵਾ ਸਕਲਮੇਵ ਮਜ੍ਝਰਟ੍ਠਂ ਉਣ੍ਹਂ ਕੁਕ੍ਕੁਲ਼ਵਸ੍ਸਂ ਵਸ੍ਸਾਪੇਤ੍ਵਾ ਰਟ੍ਠਂ ਅਰਟ੍ਠਮਕਂਸੁ. ਤੇਨ ਵੁਤ੍ਤਂ –

‘‘ਉਪਹਚ੍ਚ ਮਨਂ ਮਜ੍ਝੋ, ਮਾਤਙ੍ਗਸ੍ਮਿਂ ਯਸਸ੍ਸਿਨੇ;

ਸਪਾਰਿਸਜ੍ਜੋ ਉਚ੍ਛਿਨ੍ਨੋ, ਮਜ੍ਝਾਰਞ੍ਞਂ ਤਦਾ ਅਹੂ’’ਤਿ. (ਜਾ. ੨.੧੯.੯੬);

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ ਇਦਾਨੇਵ, ਪੁਬ੍ਬੇਪਿ ਉਦੇਨੋ ਪਬ੍ਬਜਿਤੇ ਵਿਹੇਠੇਸਿਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਣ੍ਡਬ੍ਯੋ ਉਦੇਨੋ ਅਹੋਸਿ, ਮਾਤਙ੍ਗਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਾਤਙ੍ਗਜਾਤਕਵਣ੍ਣਨਾ ਪਠਮਾ.

[੪੯੮] ੨. ਚਿਤ੍ਤਸਮ੍ਭੂਤਜਾਤਕਵਣ੍ਣਨਾ

ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਆਯਸ੍ਮਤੋ ਮਹਾਕਸ੍ਸਪਸ੍ਸ ਪਿਯਸਂਵਾਸੇ ਦ੍ਵੇ ਸਦ੍ਧਿਵਿਹਾਰਿਕੇ ਭਿਕ੍ਖੂ ਆਰਬ੍ਭ ਕਥੇਸਿ. ਤੇ ਕਿਰ ਅਞ੍ਞਮਞ੍ਞਂ ਅਪ੍ਪਟਿਵਿਭਤ੍ਤਭੋਗਾ ਪਰਮਵਿਸ੍ਸਾਸਿਕਾ ਅਹੇਸੁਂ, ਪਿਣ੍ਡਾਯ ਚਰਨ੍ਤਾਪਿ ਏਕਤੋਵ ਗਚ੍ਛਨ੍ਤਿ, ਏਕਤੋਵ ਆਗਚ੍ਛਨ੍ਤਿ, ਵਿਨਾ ਭਵਿਤੁਂ ਨ ਸਕ੍ਕੋਨ੍ਤਿ. ਧਮ੍ਮਸਭਾਯਂ ਭਿਕ੍ਖੂ ਤੇਸਂਯੇਵ ਵਿਸ੍ਸਾਸਂ ਵਣ੍ਣਯਮਾਨਾ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਇਮੇਸਂ ਏਕਸ੍ਮਿਂ ਅਤ੍ਤਭਾਵੇ ਵਿਸ੍ਸਾਸਿਕਤ੍ਤਂ, ਪੋਰਾਣਕਪਣ੍ਡਿਤਾ ਤੀਣਿ ਚਤ੍ਤਾਰਿ ਭਵਨ੍ਤਰਾਨਿ ਗਚ੍ਛਨ੍ਤਾਪਿ ਮਿਤ੍ਤਭਾਵਂ ਨ ਵਿਜਹਿਂਸੁਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਅਵਨ੍ਤਿਰਟ੍ਠੇ ਉਜ੍ਜੇਨਿਯਂ ਅਵਨ੍ਤਿਮਹਾਰਾਜਾ ਨਾਮ ਰਜ੍ਜਂ ਕਾਰੇਸਿ. ਤਦਾ ਉਜ੍ਜੇਨਿਯਾ ਬਹਿ ਚਣ੍ਡਾਲਗਾਮਕੋ ਅਹੋਸਿ. ਮਹਾਸਤ੍ਤੋ ਤਤ੍ਥ ਨਿਬ੍ਬਤ੍ਤਿ, ਅਪਰੋਪਿ ਸਤ੍ਤੋ ਤਸ੍ਸੇਵ ਮਾਤੁਚ੍ਛਾਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤੇਸੁ ਏਕੋ ਚਿਤ੍ਤੋ ਨਾਮ ਅਹੋਸਿ, ਏਕੋ ਸਮ੍ਭੂਤੋ ਨਾਮ. ਤੇ ਉਭੋਪਿ ਵਯਪ੍ਪਤ੍ਤਾ ਚਣ੍ਡਾਲਵਂਸਧੋਵਨਂ ਨਾਮ ਸਿਪ੍ਪਂ ਉਗ੍ਗਣ੍ਹਿਤ੍ਵਾ ਏਕਦਿਵਸਂ ‘‘ਉਜ੍ਜੇਨੀਨਗਰਦ੍ਵਾਰੇ ਸਿਪ੍ਪਂ ਦਸ੍ਸੇਸ੍ਸਾਮਾ’’ਤਿ ਏਕੋ ਉਤ੍ਤਰਦ੍ਵਾਰੇ ਸਿਪ੍ਪਂ ਦਸ੍ਸੇਸਿ, ਏਕੋ ਪਾਚੀਨਦ੍ਵਾਰੇ. ਤਸ੍ਮਿਞ੍ਚ ਨਗਰੇ ਦ੍ਵੇ ਦਿਟ੍ਠਮਙ੍ਗਲਿਕਾਯੋ ਅਹੇਸੁਂ, ਏਕਾ ਸੇਟ੍ਠਿਧੀਤਾ, ਏਕਾ ਪੁਰੋਹਿਤਧੀਤਾ. ਤਾ ਬਹੁਖਾਦਨੀਯਭੋਜਨੀਯਮਾਲਾਗਨ੍ਧਾਦੀਨਿ ਗਾਹਾਪੇਤ੍ਵਾ ‘‘ਉਯ੍ਯਾਨਕੀਲ਼ਂ ਕੀਲ਼ਿਸ੍ਸਾਮਾ’’ਤਿ ਏਕਾ ਉਤ੍ਤਰਦ੍ਵਾਰੇਨ ਨਿਕ੍ਖਮਿ, ਏਕਾ ਪਾਚੀਨਦ੍ਵਾਰੇਨ. ਤਾ ਤੇ ਚਣ੍ਡਾਲਪੁਤ੍ਤੇ ਸਿਪ੍ਪਂ ਦਸ੍ਸੇਨ੍ਤੇ ਦਿਸ੍ਵਾ ‘‘ਕੇ ਏਤੇ’’ਤਿ ਪੁਚ੍ਛਿਤ੍ਵਾ ‘‘ਚਣ੍ਡਾਲਪੁਤ੍ਤਾ’’ਤਿ ਸੁਤ੍ਵਾ ‘‘ਅਪਸ੍ਸਿਤਬ੍ਬਯੁਤ੍ਤਕਂ ਵਤ ਪਸ੍ਸਿਮ੍ਹਾ’’ਤਿ ਗਨ੍ਧੋਦਕੇਨ ਅਕ੍ਖੀਨਿ ਧੋਵਿਤ੍ਵਾ ਨਿਵਤ੍ਤਿਂਸੁ. ਮਹਾਜਨੋ ‘‘ਅਰੇ ਦੁਟ੍ਠਚਣ੍ਡਾਲ, ਤੁਮ੍ਹੇ ਨਿਸ੍ਸਾਯ ਮਯਂ ਅਮੂਲਕਾਨਿ ਸੁਰਾਭਤ੍ਤਾਦੀਨਿ ਨ ਲਭਿਮ੍ਹਾ’’ਤਿ ਤੇ ਉਭੋਪਿ ਭਾਤਿਕੇ ਪੋਥੇਤ੍ਵਾ ਅਨਯਬ੍ਯਸਨਂ ਪਾਪੇਸਿ.

ਤੇ ਪਟਿਲਦ੍ਧਸਞ੍ਞਾ ਉਟ੍ਠਾਯ ਅਞ੍ਞਮਞ੍ਞਸ੍ਸ ਸਨ੍ਤਿਕਂ ਗਚ੍ਛਨ੍ਤਾ ਏਕਸ੍ਮਿਂ ਠਾਨੇ ਸਮਾਗਨ੍ਤ੍ਵਾ ਅਞ੍ਞਮਞ੍ਞਸ੍ਸ ਤਂ ਦੁਕ੍ਖੁਪ੍ਪਤ੍ਤਿਂ ਆਰੋਚੇਤ੍ਵਾ ਰੋਦਿਤ੍ਵਾ ਪਰਿਦੇਵਿਤ੍ਵਾ ‘‘ਕਿਨ੍ਤਿ ਕਰਿਸ੍ਸਾਮਾ’’ਤਿ ਮਨ੍ਤੇਤ੍ਵਾ ‘‘ਇਮਂ ਅਮ੍ਹਾਕਂ ਜਾਤਿਂ ਨਿਸ੍ਸਾਯ ਦੁਕ੍ਖਂ ਉਪ੍ਪਨ੍ਨਂ, ਚਣ੍ਡਾਲਕਮ੍ਮਂ ਕਾਤੁਂ ਨ ਸਕ੍ਖਿਸ੍ਸਾਮ, ਜਾਤਿਂ ਪਟਿਚ੍ਛਾਦੇਤ੍ਵਾ ਬ੍ਰਾਹ੍ਮਣਮਾਣਵਵਣ੍ਣੇਨ ਤਕ੍ਕਸਿਲਂ ਗਨ੍ਤ੍ਵਾ ਸਿਪ੍ਪਂ ਉਗ੍ਗਣ੍ਹਿਸ੍ਸਾਮਾ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਤਤ੍ਥ ਗਨ੍ਤ੍ਵਾ ਧਮ੍ਮਨ੍ਤੇਵਾਸਿਕਾ ਹੁਤ੍ਵਾ ਦਿਸਾਪਾਮੋਕ੍ਖਾਚਰਿਯਸ੍ਸ ਸਨ੍ਤਿਕੇ ਸਿਪ੍ਪਂ ਪਟ੍ਠਪੇਸੁਂ. ਜਮ੍ਬੁਦੀਪਤਲੇ ‘‘ਦ੍ਵੇ ਕਿਰ ਚਣ੍ਡਾਲਾ ਜਾਤਿਂ ਪਟਿਚ੍ਛਾਦੇਤ੍ਵਾ ਸਿਪ੍ਪਂ ਉਗ੍ਗਣ੍ਹਨ੍ਤੀ’’ਤਿ ਸੂਯਿਤ੍ਥ. ਤੇਸੁ ਚਿਤ੍ਤਪਣ੍ਡਿਤਸ੍ਸ ਸਿਪ੍ਪਂ ਨਿਟ੍ਠਿਤਂ, ਸਮ੍ਭੂਤਸ੍ਸ ਨ ਤਾਵ ਨਿਟ੍ਠਾਤਿ.

ਅਥੇਕਦਿਵਸਂ ਏਕੋ ਗਾਮਵਾਸੀ ‘‘ਬ੍ਰਾਹ੍ਮਣਵਾਚਨਕਂ ਕਰਿਸ੍ਸਾਮੀ’’ਤਿ ਆਚਰਿਯਂ ਨਿਮਨ੍ਤੇਸਿ. ਤਮੇਵ ਰਤ੍ਤਿਂ ਦੇਵੋ ਵਸ੍ਸਿਤ੍ਵਾ ਮਗ੍ਗੇ ਕਨ੍ਦਰਾਦੀਨਿ ਪੂਰੇਸਿ. ਆਚਰਿਯੋ ਪਾਤੋਵ ਚਿਤ੍ਤਪਣ੍ਡਿਤਂ ਪਕ੍ਕੋਸਾਪੇਤ੍ਵਾ ‘‘ਤਾਤ, ਅਹਂ ਗਨ੍ਤੁਂ ਨ ਸਕ੍ਖਿਸ੍ਸਾਮਿ, ਤ੍ਵਂ ਮਾਣਵੇਹਿ ਸਦ੍ਧਿਂ ਗਨ੍ਤਾ ਮਙ੍ਗਲਂ ਵਤ੍ਵਾ ਤੁਮ੍ਹੇਹਿ ਲਦ੍ਧਂ ਭੁਞ੍ਜਿਤ੍ਵਾ ਅਮ੍ਹੇਹਿ ਲਦ੍ਧਂ ਆਹਰਾ’’ਤਿ ਪੇਸੇਸਿ. ਸੋ ‘‘ਸਾਧੂ’’ਤਿ ਮਾਣਵਕੇ ਗਹੇਤ੍ਵਾ ਗਤੋ. ਯਾਵ ਮਾਣਵਾ ਨ੍ਹਾਯਨ੍ਤਿ ਚੇਵ ਮੁਖਾਨਿ ਚ ਧੋਵਨ੍ਤਿ, ਤਾਵ ਮਨੁਸ੍ਸਾ ਪਾਯਾਸਂ ਵਡ੍ਢੇਤ੍ਵਾ ਨਿਬ੍ਬਾਤੂਤਿ ਠਪੇਸੁਂ. ਮਾਣਵਾ ਤਸ੍ਮਿਂ ਅਨਿਬ੍ਬੁਤੇਯੇਵ ਆਗਨ੍ਤ੍ਵਾ ਨਿਸੀਦਿਂਸੁ. ਮਨੁਸ੍ਸਾ ਦਕ੍ਖਿਣੋਦਕਂ ਦਤ੍ਵਾ ਤੇਸਂ ਪੁਰਤੋ ਪਾਤਿਯੋ ਠਪੇਸੁਂ. ਸਮ੍ਭੂਤੋ ਲੁਦ੍ਧਧਾਤੁਕੋ ਵਿਯ ਹੁਤ੍ਵਾ ‘‘ਸੀਤਲੋ’’ਤਿ ਸਞ੍ਞਾਯ ਪਾਯਾਸਪਿਣ੍ਡਂ ਉਕ੍ਖਿਪਿਤ੍ਵਾ ਮੁਖੇ ਠਪੇਸਿ, ਸੋ ਤਸ੍ਸ ਆਦਿਤ੍ਤਅਯੋਗੁਲ਼ੋ ਵਿਯ ਮੁਖਂ ਦਹਿ. ਸੋ ਕਮ੍ਪਮਾਨੋ ਸਤਿਂ ਅਨੁਪਟ੍ਠਾਪੇਤ੍ਵਾ ਚਿਤ੍ਤਪਣ੍ਡਿਤਂ ਓਲੋਕੇਤ੍ਵਾ ਚਣ੍ਡਾਲਭਾਸਾਯ ਏਵ ‘‘ਖਲ਼ੁ ਖਲ਼ੂ’’ਤਿ ਆਹ. ਸੋਪਿ ਤਥੇਵ ਸਤਿਂ ਅਨੁਪਟ੍ਠਾਪੇਤ੍ਵਾ ਚਣ੍ਡਾਲਭਾਸਾਯ ਏਵ ‘‘ਨਿਗ੍ਗਲ ਨਿਗ੍ਗਲਾ’’ਤਿ ਆਹ. ਮਾਣਵਾ ਅਞ੍ਞਮਞ੍ਞਂ ਓਲੋਕੇਤ੍ਵਾ ‘‘ਕਿਂ ਭਾਸਾ ਨਾਮੇਸਾ’’ਤਿ ਵਦਿਂਸੁ. ਚਿਤ੍ਤਪਣ੍ਡਿਤੋ ਮਙ੍ਗਲਂ ਅਭਾਸਿ. ਮਾਣਵਾ ਬਹਿ ਨਿਕ੍ਖਮਿਤ੍ਵਾ ਵਗ੍ਗਵਗ੍ਗਾ ਹੁਤ੍ਵਾ ਤਤ੍ਥ ਤਤ੍ਥ ਨਿਸੀਦਿਤ੍ਵਾ ਭਾਸਂ ਸੋਧੇਨ੍ਤਾ ‘‘ਚਣ੍ਡਾਲਭਾਸਾ’’ਤਿ ਞਤ੍ਵਾ ‘‘ਅਰੇ ਦੁਟ੍ਠਚਣ੍ਡਾਲਾ, ਏਤ੍ਤਕਂ ਕਾਲਂ ‘ਬ੍ਰਾਹ੍ਮਣਾਮ੍ਹਾ’ਤਿ ਵਤ੍ਵਾ ਵਞ੍ਚਯਿਤ੍ਥਾ’’ਤਿ ਉਭੋਪਿ ਤੇ ਪੋਥਯਿਂਸੁ. ਅਥੇਕੋ ਸਪ੍ਪੁਰਿਸੋ ‘‘ਅਪੇਥਾ’’ਤਿ ਵਾਰੇਤ੍ਵਾ ‘‘ਅਯਂ ਤੁਮ੍ਹਾਕਂ ਜਾਤਿਯਾ ਦੋਸੋ, ਗਚ੍ਛਥ ਕਤ੍ਥਚਿ ਦੇਸੇਵ ਪਬ੍ਬਜਿਤ੍ਵਾ ਜੀਵਥਾ’’ਤਿ ਤੇ ਉਭੋ ਉਯ੍ਯੋਜੇਸਿ. ਮਾਣਵਾ ਤੇਸਂ ਚਣ੍ਡਾਲਭਾਵਂ ਆਚਰਿਯਸ੍ਸ ਆਰੋਚੇਸੁਂ.

ਤੇਪਿ ਅਰਞ੍ਞਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਨ ਚਿਰਸ੍ਸੇਵ ਤਤੋ ਚਵਿਤ੍ਵਾ ਨੇਰਞ੍ਜਰਾਯ ਤੀਰੇ ਮਿਗਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿਂਸੁ. ਤੇ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਕਾਲਤੋ ਪਟ੍ਠਾਯ ਏਕਤੋਵ ਵਿਚਰਨ੍ਤਿ, ਵਿਨਾ ਭਵਿਤੁਂ ਨ ਸਕ੍ਕੋਨ੍ਤਿ. ਤੇ ਏਕਦਿਵਸਂ ਗੋਚਰਂ ਗਹੇਤ੍ਵਾ ਏਕਸ੍ਮਿਂ ਰੁਕ੍ਖਮੂਲੇ ਸੀਸੇਨ ਸੀਸਂ, ਸਿਙ੍ਗੇਨ ਸਿਙ੍ਗਂ, ਤੁਣ੍ਡੇਨ ਤੁਣ੍ਡਂ ਅਲ੍ਲੀਯਾਪੇਤ੍ਵਾ ਰੋਮਨ੍ਥਯਮਾਨੇ ਠਿਤੇ ਦਿਸ੍ਵਾ ਏਕੋ ਲੁਦ੍ਦਕੋ ਸਤ੍ਤਿਂ ਖਿਪਿਤ੍ਵਾ ਏਕਪ੍ਪਹਾਰੇਨੇਵ ਜੀਵਿਤਾ ਵੋਰੋਪੇਸਿ. ਤਤੋ ਚਵਿਤ੍ਵਾ ਨਮ੍ਮਦਾਨਦੀਤੀਰੇ ਉਕ੍ਕੁਸਯੋਨਿਯਂ ਨਿਬ੍ਬਤ੍ਤਿਂਸੁ. ਤਤ੍ਰਾਪਿ ਵੁਦ੍ਧਿਪ੍ਪਤ੍ਤੇ ਗੋਚਰਂ ਗਹੇਤ੍ਵਾ ਸੀਸੇਨ ਸੀਸਂ, ਤੁਣ੍ਡੇਨ ਤੁਣ੍ਡਂ ਅਲ੍ਲੀਯਾਪੇਤ੍ਵਾ ਠਿਤੇ ਦਿਸ੍ਵਾ ਏਕੋ ਯਟ੍ਠਿਲੁਦ੍ਦਕੋ ਏਕਪ੍ਪਹਾਰੇਨੇਵ ਬਨ੍ਧਿਤ੍ਵਾ ਵਧਿ. ਤਤੋ ਪਨ ਚਵਿਤ੍ਵਾ ਚਿਤ੍ਤਪਣ੍ਡਿਤੋ ਕੋਸਮ੍ਬਿਯਂ ਪੁਰੋਹਿਤਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਸਮ੍ਭੂਤਪਣ੍ਡਿਤੋ ਉਤ੍ਤਰਪਞ੍ਚਾਲਰਞ੍ਞੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤੇ ਨਾਮਗ੍ਗਹਣਦਿਵਸਤੋ ਪਟ੍ਠਾਯ ਅਤ੍ਤਨੋ ਜਾਤਿਂ ਅਨੁਸ੍ਸਰਿਂਸੁ. ਤੇਸੁ ਸਮ੍ਭੂਤਪਣ੍ਡਿਤੋ ਨਿਰਨ੍ਤਰਂ ਸਰਿਤੁਂ ਅਸਕ੍ਕੋਨ੍ਤੋ ਚਤੁਤ੍ਥਂ ਚਣ੍ਡਾਲਜਾਤਿਮੇਵ ਅਨੁਸ੍ਸਰਤਿ, ਚਿਤ੍ਤਪਣ੍ਡਿਤੋ ਪਟਿਪਾਟਿਯਾ ਚਤਸ੍ਸੋਪਿ ਜਾਤਿਯੋ. ਸੋ ਸੋਲ਼ਸਵਸ੍ਸਕਾਲੇ ਨਿਕ੍ਖਮਿਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਂ ਨਿਬ੍ਬਤ੍ਤੇਤ੍ਵਾ ਝਾਨਸੁਖੇਨ ਵੀਤਿਨਾਮੇਨ੍ਤੋ ਵਸਿ. ਸਮ੍ਭੂਤਪਣ੍ਡਿਤੋਪਿ ਪਿਤੁ ਅਚ੍ਚਯੇਨ ਛਤ੍ਤਂ ਉਸ੍ਸਾਪੇਤ੍ਵਾ ਛਤ੍ਤਮਙ੍ਗਲਦਿਵਸੇਯੇਵ ਮਹਾਜਨਮਜ੍ਝੇ ਮਙ੍ਗਲਗੀਤਂ ਕਤ੍ਵਾ ਉਦਾਨਵਸੇਨ ਦ੍ਵੇ ਗਾਥਾ ਅਭਾਸਿ. ਤਂ ਸੁਤ੍ਵਾ ‘‘ਅਮ੍ਹਾਕਂ ਰਞ੍ਞੋ ਮਙ੍ਗਲਗੀਤ’’ਨ੍ਤਿ ਓਰੋਧਾਪਿ ਗਨ੍ਧਬ੍ਬਾਪਿ ਤਮੇਵ ਗੀਤਂ ਗਾਯਨ੍ਤਿ. ਅਨੁਕ੍ਕਮੇਨੇਵ ‘‘ਰਞ੍ਞੋ ਪਿਯਗੀਤ’’ਨ੍ਤਿ ਸਬ੍ਬੇਪਿ ਨਗਰਵਾਸਿਨੋ ਮਨੁਸ੍ਸਾ ਤਮੇਵ ਗਾਯਨ੍ਤਿ.

ਚਿਤ੍ਤਪਣ੍ਡਿਤੋਪਿ ਹਿਮਵਨ੍ਤਪਦੇਸੇ ਵਸਨ੍ਤੋਯੇਵ ‘‘ਕਿਂ ਨੁ ਖੋ ਮਮ ਭਾਤਿਕੇਨ ਸਮ੍ਭੂਤੇਨ ਛਤ੍ਤਂ ਲਦ੍ਧਂ, ਉਦਾਹੁ ਨ ਵਾ’’ਤਿ ਉਪਧਾਰੇਨ੍ਤੋ ਲਦ੍ਧਭਾਵਂ ਞਤ੍ਵਾ ‘‘ਨਵਰਜ੍ਜਂ ਤਾਵ ਇਦਾਨਿ ਗਨ੍ਤ੍ਵਾਪਿ ਬੋਧੇਤੁਂ ਨ ਸਕ੍ਖਿਸ੍ਸਾਮਿ, ਮਹਲ੍ਲਕਕਾਲੇ ਨਂ ਉਪਸਙ੍ਕਮਿਤ੍ਵਾ ਧਮ੍ਮਂ ਕਥੇਤ੍ਵਾ ਪਬ੍ਬਾਜੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਪਣ੍ਣਾਸ ਵਸ੍ਸਾਨਿ ਅਗਨ੍ਤ੍ਵਾ ਰਞ੍ਞੋ ਪੁਤ੍ਤਧੀਤਾਹਿ ਵਡ੍ਢਿਤਕਾਲੇ ਇਦ੍ਧਿਯਾ ਗਨ੍ਤ੍ਵਾ ਉਯ੍ਯਾਨੇ ਓਤਰਿਤ੍ਵਾ ਮਙ੍ਗਲਸਿਲਾਪਟ੍ਟੇ ਸੁਵਣ੍ਣਪਟਿਮਾ ਵਿਯ ਨਿਸੀਦਿ. ਤਸ੍ਮਿਂ ਖਣੇ ਏਕੋ ਦਾਰਕੋ ਤਂ ਗੀਤਂ ਗਾਯਨ੍ਤੋ ਦਾਰੂਨਿ ਉਦ੍ਧਰਤਿ. ਚਿਤ੍ਤਪਣ੍ਡਿਤੋ ਤਂ ਪਕ੍ਕੋਸਿ. ਸੋ ਆਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਅਥ ਨਂ ਆਹ – ‘‘ਤ੍ਵਂ ਪਾਤੋਵ ਪਟ੍ਠਾਯ ਇਮਮੇਵ ਗੀਤਂ ਗਾਯਸਿ, ਕਿਂ ਅਞ੍ਞਂ ਨ ਜਾਨਾਸੀ’’ਤਿ. ‘‘ਭਨ੍ਤੇ, ਅਞ੍ਞਾਨਿਪਿ ਬਹੂਨਿ ਜਾਨਾਮਿ, ਇਮਾਨਿ ਪਨ ਦ੍ਵੇ ਰਞ੍ਞੋ ਪਿਯਗੀਤਾਨਿ, ਤਸ੍ਮਾ ਇਮਾਨੇਵ ਗਾਯਾਮੀ’’ਤਿ. ‘‘ਅਤ੍ਥਿ ਪਨ ਰਞ੍ਞੋ ਗੀਤਸ੍ਸ ਪਟਿਗੀਤਂ ਗਾਯਨ੍ਤੋ’’ਤਿ? ‘‘ਨਤ੍ਥਿ ਭਨ੍ਤੇ’’ਤਿ. ‘‘ਸਕ੍ਖਿਸ੍ਸਸਿ ਪਨ ਤ੍ਵਂ ਪਟਿਗੀਤਂ ਗਾਯਿਤੁ’’ਨ੍ਤਿ? ‘‘ਜਾਨਨ੍ਤੋ ਸਕ੍ਖਿਸ੍ਸਾਮੀ’’ਤਿ. ‘‘ਤੇਨ ਹਿ ਤ੍ਵਂ ਰਞ੍ਞਾ ਦ੍ਵੀਸੁ ਗੀਤੇਸੁ ਗਾਯਿਤੇਸੁ ਇਦਂ ਤਤਿਯਂ ਕਤ੍ਵਾ ਗਾਯਸ੍ਸੂ’’ਤਿ ਗੀਤਂਦਤ੍ਵਾ ‘‘ਗਨ੍ਤ੍ਵਾ ਰਞ੍ਞੋ ਸਨ੍ਤਿਕੇ ਗਾਯਿਸ੍ਸਸਿ, ਰਾਜਾ ਤੇ ਪਸੀਦਿਤ੍ਵਾ ਮਹਨ੍ਤਂ ਇਸ੍ਸਰਿਯਂ ਦਸ੍ਸਤੀ’’ਤਿ ਉਯ੍ਯੋਜੇਸਿ.

ਸੋ ਸੀਘਂ ਮਾਤੁ ਸਨ੍ਤਿਕਂ ਗਨ੍ਤ੍ਵਾ ਅਤ੍ਤਾਨਂ ਅਲਙ੍ਕਾਰਾਪੇਤ੍ਵਾ ਰਾਜਦ੍ਵਾਰਂ ਗਨ੍ਤ੍ਵਾ ‘‘ਏਕੋ ਕਿਰ ਦਾਰਕੋ ਤੁਮ੍ਹੇਹਿ ਸਦ੍ਧਿਂ ਪਟਿਗੀਤਂ ਗਾਯਿਸ੍ਸਤੀ’’ਤਿ ਰਞ੍ਞੋ ਆਰੋਚਾਪੇਤ੍ਵਾ ‘‘ਆਗਚ੍ਛਤੂ’’ਤਿ ਵੁਤ੍ਤੇ ਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਤ੍ਵਂ ਕਿਰ, ਤਾਤ, ਪਟਿਗੀਤਂ ਗਾਯਿਸ੍ਸਸੀ’’ਤਿ ਪੁਟ੍ਠੋ ‘‘ਆਮ, ਦੇਵ, ਸਬ੍ਬਂ ਰਾਜਪਰਿਸਂ ਸਨ੍ਨਿਪਾਤੇਥਾ’’ਤਿ ਸਨ੍ਨਿਪਤਿਤਾਯ ਪਰਿਸਾਯ ਰਾਜਾਨਂ ਆਹ ‘‘ਤੁਮ੍ਹੇ ਤਾਵ, ਦੇਵ, ਤੁਮ੍ਹਾਕਂ ਗੀਤਂ ਗਾਯਥ, ਅਥਾਹਂ ਪਟਿਗੀਤਂ ਗਾਯਿਸ੍ਸਾਮੀ’’ਤਿ. ਰਾਜਾ ਗਾਥਾਦ੍ਵਯਮਾਹ –

੨੪. ‘‘ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਂ, ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥਿ;

ਪਸ੍ਸਾਮਿ ਸਮ੍ਭੂਤਂ ਮਹਾਨੁਭਾਵਂ, ਸਕਮ੍ਮੁਨਾ ਪੁਞ੍ਞਫਲੂਪਪਨ੍ਨਂ.

੨੫. ‘‘ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਂ, ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥਿ;

ਕਚ੍ਚਿਨ੍ਨੁ ਚਿਤ੍ਤਸ੍ਸਪਿ ਏਵਮੇਵਂ, ਇਦ੍ਧੋ ਮਨੋ ਤਸ੍ਸ ਯਥਾਪਿ ਮਯ੍ਹ’’ਨ੍ਤਿ.

ਤਤ੍ਥ ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥੀਤਿ ਸੁਕਤਦੁਕ੍ਕਟੇਸੁ ਕਮ੍ਮੇਸੁ ਕਿਞ੍ਚਨ ਏਕਕਮ੍ਮਮ੍ਪਿ ਮੋਘਂ ਨਾਮ ਨਤ੍ਥਿ, ਨਿਪ੍ਫਲਂ ਨ ਹੋਤਿ, ਵਿਪਾਕਂ ਦਤ੍ਵਾਵ ਨਸ੍ਸਤੀਤਿ ਅਪਰਾਪਰਿਯਵੇਦਨੀਯਕਮ੍ਮਂ ਸਨ੍ਧਾਯਾਹ. ਸਮ੍ਭੂਤਨ੍ਤਿ ਅਤ੍ਤਾਨਂ ਵਦਤਿ, ਪਸ੍ਸਾਮਹਂ ਆਯਸ੍ਮਨ੍ਤਂ ਸਮ੍ਭੂਤਂ ਸਕੇਨ ਕਮ੍ਮੇਨ ਪੁਞ੍ਞਫਲੂਪਪਨ੍ਨਂ, ਸਕਮ੍ਮਂ ਨਿਸ੍ਸਾਯ ਪੁਞ੍ਞਫਲੇਨ ਉਪਪਨ੍ਨਂ ਤਂ ਪਸ੍ਸਾਮੀਤਿ ਅਤ੍ਥੋ. ਕਚ੍ਚਿਨ੍ਨੁ ਚਿਤ੍ਤਸ੍ਸਪੀਤਿ ਮਯਞ੍ਹਿ ਦ੍ਵੇਪਿ ਜਨਾ ਏਕਤੋ ਹੁਤ੍ਵਾ ਨ ਚਿਰਂ ਸੀਲਂ ਰਕ੍ਖਿਮ੍ਹ, ਅਹਂ ਤਾਵ ਤਸ੍ਸ ਫਲੇਨ ਮਹਨ੍ਤਂ ਯਸਂ ਪਤ੍ਤੋ, ਕਚ੍ਚਿ ਨੁ ਖੋ ਮੇ ਭਾਤਿਕਸ੍ਸ ਚਿਤ੍ਤਸ੍ਸਪਿ ਏਵਮੇਵ ਮਨੋ ਇਦ੍ਧੋ ਸਮਿਦ੍ਧੋਤਿ.

ਤਸ੍ਸ ਗੀਤਾਵਸਾਨੇ ਦਾਰਕੋ ਗਾਯਨ੍ਤੋ ਤਤਿਯਂ ਗਾਥਮਾਹ –

੨੬. ‘‘ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਂ, ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥਿ;

ਚਿਤ੍ਤਮ੍ਪਿ ਜਾਨਾਹਿ ਤਥੇਵ ਦੇਵ, ਇਦ੍ਧੋ ਮਨੋ ਤਸ੍ਸ ਯਥਾਪਿ ਤੁਯ੍ਹ’’ਨ੍ਤਿ.

ਤਂ ਸੁਤ੍ਵਾ ਰਾਜਾ ਚਤੁਤ੍ਥਂ ਗਾਥਮਾਹ –

੨੭. ‘‘ਭਵਂ ਨੁ ਚਿਤ੍ਤੋ ਸੁਤਮਞ੍ਞਤੋ ਤੇ, ਉਦਾਹੁ ਤੇ ਕੋਚਿ ਨਂ ਏਤਦਕ੍ਖਾ;

ਗਾਥਾ ਸੁਗੀਤਾ ਨ ਮਮਤ੍ਥਿ ਕਙ੍ਖਾ, ਦਦਾਮਿ ਤੇ ਗਾਮਵਰਂ ਸਤਞ੍ਚਾ’’ਤਿ.

ਤਤ੍ਥ ਸੁਤਮਞ੍ਞਤੋ ਤੇਤਿ ਅਹਂ ਸਮ੍ਭੂਤਸ੍ਸ ਭਾਤਾ ਚਿਤ੍ਤੋ ਨਾਮਾਤਿ ਵਦਨ੍ਤਸ੍ਸ ਚਿਤ੍ਤਸ੍ਸੇਵ ਨੁ ਤੇ ਸਨ੍ਤਿਕਾ ਸੁਤਨ੍ਤਿ ਅਤ੍ਥੋ. ਕੋਚਿ ਨਨ੍ਤਿ ਉਦਾਹੁ ਮਯਾ ਸਮ੍ਭੂਤਸ੍ਸ ਰਞ੍ਞੋ ਭਾਤਾ ਚਿਤ੍ਤੋ ਦਿਟ੍ਠੋਤਿ ਕੋਚਿ ਤੇ ਏਤਮਤ੍ਥਂ ਆਚਿਕ੍ਖਿ. ਸੁਗੀਤਾਤਿ ਸਬ੍ਬਥਾਪਿ ਅਯਂ ਗਾਥਾ ਸੁਗੀਤਾ, ਨਤ੍ਥੇਤ੍ਥ ਮਮ ਕਙ੍ਖਾ. ਗਾਮਵਰਂ ਸਤਞ੍ਚਾਤਿ ਗਾਮਵਰਾਨਂ ਤੇ ਸਤਂ ਦਦਾਮੀਤਿ ਵਦਤਿ.

ਤਤੋ ਦਾਰਕੋ ਪਞ੍ਚਮਂ ਗਾਥਮਾਹ –

੨੮. ‘‘ਨ ਚਾਹਂ ਚਿਤ੍ਤੋ ਸੁਤਮਞ੍ਞਤੋ ਮੇ, ਇਸੀ ਚ ਮੇ ਏਤਮਤ੍ਥਂ ਅਸਂਸਿ;

ਗਨ੍ਤ੍ਵਾਨ ਰਞ੍ਞੋ ਪਟਿਗਾਹਿ ਗਾਥਂ, ਅਪਿ ਤੇ ਵਰਂ ਅਤ੍ਤਮਨੋ ਦਦੇਯ੍ਯਾ’’ਤਿ.

ਤਤ੍ਥ ਏਤਮਤ੍ਥਨ੍ਤਿ ਤੁਮ੍ਹਾਕਂ ਉਯ੍ਯਾਨੇ ਨਿਸਿਨ੍ਨੋ ਏਕੋ ਇਸਿ ਮਯ੍ਹਂ ਏਤਮਤ੍ਥਂ ਆਚਿਕ੍ਖਿ.

ਤਂ ਸੁਤ੍ਵਾ ਰਾਜਾ ‘‘ਸੋ ਮਮ ਭਾਤਾ ਚਿਤ੍ਤੋ ਭਵਿਸ੍ਸਤਿ, ਇਦਾਨੇਵ ਨਂ ਗਨ੍ਤ੍ਵਾ ਪਸ੍ਸਿਸ੍ਸਾਮੀ’’ਤਿ ਪੁਰਿਸੇ ਆਣਾਪੇਨ੍ਤੋ ਗਾਥਾਦ੍ਵਯਮਾਹ –

੨੯. ‘‘ਯੋਜੇਨ੍ਤੁ ਵੇ ਰਾਜਰਥੇ, ਸੁਕਤੇ ਚਿਤ੍ਤਸਿਬ੍ਬਨੇ;

ਕਚ੍ਛਂ ਨਾਗਾਨਂ ਬਨ੍ਧਥ, ਗੀਵੇਯ੍ਯਂ ਪਟਿਮੁਞ੍ਚਥ.

੩੦. ‘‘ਆਹਞ੍ਞਨ੍ਤੁ ਭੇਰਿਮੁਦਿਙ੍ਗਸਙ੍ਖੇ, ਸੀਘਾਨਿ ਯਾਨਾਨਿ ਚ ਯੋਜਯਨ੍ਤੁ;

ਅਜ੍ਜੇਵਹਂ ਅਸ੍ਸਮਂ ਤਂ ਗਮਿਸ੍ਸਂ, ਯਤ੍ਥੇਵ ਦਕ੍ਖਿਸ੍ਸਮਿਸਿਂ ਨਿਸਿਨ੍ਨ’’ਨ੍ਤਿ.

ਤਤ੍ਥ ਆਹਞ੍ਞਨ੍ਤੂਤਿ ਆਹਨਨ੍ਤੁ. ਅਸ੍ਸਮਂ ਤਨ੍ਤਿ ਤਂ ਅਸ੍ਸਮਂ.

ਸੋ ਏਵਂ ਵਤ੍ਵਾ ਰਥਂ ਅਭਿਰੁਯ੍ਹ ਸੀਘਂ ਗਨ੍ਤ੍ਵਾ ਉਯ੍ਯਾਨਦ੍ਵਾਰੇ ਰਥਂ ਠਪੇਤ੍ਵਾ ਚਿਤ੍ਤਪਣ੍ਡਿਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਤੁਟ੍ਠਮਾਨਸੋ ਅਟ੍ਠਮਂ ਗਾਥਮਾਹ –

੩੧. ‘‘ਸੁਲਦ੍ਧਲਾਭੋ ਵਤ ਮੇ ਅਹੋਸਿ, ਗਾਥਾ ਸੁਗੀਤਾ ਪਰਿਸਾਯ ਮਜ੍ਝੇ;

ਸ੍ਵਾਹਂ ਇਸਿਂ ਸੀਲਵਤੂਪਪਨ੍ਨਂ, ਦਿਸ੍ਵਾ ਪਤੀਤੋ ਸੁਮਨੋਹਮਸ੍ਮੀ’’ਤਿ.

ਤਸ੍ਸਤ੍ਥੋ – ਸੁਲਦ੍ਧਲਾਭੋ ਵਤ ਮਯ੍ਹਂ ਛਤ੍ਤਮਙ੍ਗਲਦਿਵਸੇ ਪਰਿਸਾਯ ਮਜ੍ਝੇ ਗੀਤਗਾਥਾ ਸੁਗੀਤਾਵ ਅਹੋਸਿ, ਸ੍ਵਾਹਂ ਅਜ੍ਜ ਸੀਲਵਤਸਮ੍ਪਨ੍ਨਂ ਇਸਿਂ ਦਿਸ੍ਵਾ ਪੀਤਿਸੋਮਨਸ੍ਸਪ੍ਪਤ੍ਤੋ ਜਾਤੋਤਿ.

ਸੋ ਚਿਤ੍ਤਪਣ੍ਡਿਤਸ੍ਸ ਦਿਟ੍ਠਕਾਲਤੋ ਪਟ੍ਠਾਯ ਸੋਮਨਸ੍ਸਪ੍ਪਤ੍ਤੋ ‘‘ਭਾਤਿਕਸ੍ਸ ਮੇ ਪਲ੍ਲਙ੍ਕਂ ਅਤ੍ਥਰਥਾ’’ਤਿਆਦੀਨਿ ਆਣਾਪੇਨ੍ਤੋ ਨਵਮਂ ਗਾਥਮਾਹ –

੩੨. ‘‘ਆਸਨਂ ਉਦਕਂ ਪਜ੍ਜਂ, ਪਟਿਗ੍ਗਣ੍ਹਾਤੁ ਨੋ ਭਵਂ;

ਅਗ੍ਘੇ ਭਵਨ੍ਤਂ ਪੁਚ੍ਛਾਮ, ਅਗ੍ਘਂ ਕੁਰੁਤੁ ਨੋ ਭਵ’’ਨ੍ਤਿ.

ਤਤ੍ਥ ਅਗ੍ਘੇਤਿ ਅਤਿਥਿਨੋ ਦਾਤਬ੍ਬਯੁਤ੍ਤਕਸ੍ਮਿਂ ਅਗ੍ਘੇ ਭਵਨ੍ਤਂ ਆਪੁਚ੍ਛਾਮ. ਕੁਰੁਤੁ ਨੋਤਿ ਇਮਂ ਨੋ ਅਗ੍ਘਂ ਭਵਂ ਪਟਿਗ੍ਗਣ੍ਹਾਤੁ.

ਏਵਂ ਮਧੁਰਪਟਿਸਨ੍ਥਾਰਂ ਕਤ੍ਵਾ ਰਜ੍ਜਂ ਮਜ੍ਝੇ ਭਿਨ੍ਦਿਤ੍ਵਾ ਦੇਨ੍ਤੋ ਇਤਰਂ ਗਾਥਮਾਹ –

੩੩. ‘‘ਰਮ੍ਮਞ੍ਚ ਤੇ ਆਵਸਥਂ ਕਰੋਨ੍ਤੁ, ਨਾਰੀਗਣੇਹਿ ਪਰਿਚਾਰਯਸ੍ਸੁ;

ਕਰੋਹਿ ਓਕਾਸਮਨੁਗ੍ਗਹਾਯ, ਉਭੋਪਿਮਂ ਇਸ੍ਸਰਿਯਂ ਕਰੋਮਾ’’ਤਿ.

ਤਤ੍ਥ ਇਮਂ ਇਸ੍ਸਰਿਯਨ੍ਤਿ ਕਪਿਲਰਟ੍ਠੇ ਉਤ੍ਤਰਪਞ੍ਚਾਲਨਗਰੇ ਰਜ੍ਜਂ ਮਜ੍ਝੇ ਭਿਨ੍ਦਿਤ੍ਵਾ ਦ੍ਵੇਪਿ ਜਨਾ ਕਰੋਮ ਅਨੁਭਵਾਮ.

ਤਸ੍ਸ ਤਂ ਵਚਨਂ ਸੁਤ੍ਵਾ ਚਿਤ੍ਤਪਣ੍ਡਿਤੋ ਧਮ੍ਮਂ ਦੇਸੇਨ੍ਤੋ ਛ ਗਾਥਾ ਅਭਾਸਿ –

੩੪. ‘‘ਦਿਸ੍ਵਾ ਫਲਂ ਦੁਚ੍ਚਰਿਤਸ੍ਸ ਰਾਜ, ਅਤ੍ਥੋ ਸੁਚਿਣ੍ਣਸ੍ਸ ਮਹਾਵਿਪਾਕਂ;

ਅਤ੍ਤਾਨਮੇਵ ਪਟਿਸਂਯਮਿਸ੍ਸਂ, ਨ ਪਤ੍ਥਯੇ ਪੁਤ੍ਤ ਪਸੁਂ ਧਨਂ ਵਾ.

੩੫. ‘‘ਦਸੇਵਿਮਾ ਵਸ੍ਸਦਸਾ, ਮਚ੍ਚਾਨਂ ਇਧ ਜੀਵਿਤਂ;

ਅਪਤ੍ਤਞ੍ਞੇਵ ਤਂ ਓਧਿਂ, ਨਲ਼ੋ ਛਿਨ੍ਨੋਵ ਸੁਸ੍ਸਤਿ.

੩੬. ‘‘ਤਤ੍ਥ ਕਾ ਨਨ੍ਦਿ ਕਾ ਖਿਡ੍ਡਾ, ਕਾ ਰਤੀ ਕਾ ਧਨੇਸਨਾ;

ਕਿਂ ਮੇ ਪੁਤ੍ਤੇਹਿ ਦਾਰੇਹਿ, ਰਾਜ ਮੁਤ੍ਤੋਸ੍ਮਿ ਬਨ੍ਧਨਾ.

੩੭. ‘‘ਸੋਹਂ ਏਵਂ ਪਜਾਨਾਮਿ, ਮਚ੍ਚੁ ਮੇ ਨਪ੍ਪਮਜ੍ਜਤਿ;

ਅਨ੍ਤਕੇਨਾਧਿਪਨ੍ਨਸ੍ਸ, ਕਾ ਰਤੀ ਕਾ ਧਨੇਸਨਾ.

੩੮. ‘‘ਜਾਤਿ ਨਰਾਨਂ ਅਧਮਾ ਜਨਿਨ੍ਦ, ਚਣ੍ਡਾਲਯੋਨਿ ਦ੍ਵਿਪਦਾਕਨਿਟ੍ਠਾ;

ਸਕੇਹਿ ਕਮ੍ਮੇਹਿ ਸੁਪਾਪਕੇਹਿ, ਚਣ੍ਡਾਲਗਬ੍ਭੇ ਅਵਸਿਮ੍ਹ ਪੁਬ੍ਬੇ.

੩੯. ‘‘ਚਣ੍ਡਾਲਾਹੁਮ੍ਹ ਅਵਨ੍ਤੀਸੁ, ਮਿਗਾ ਨੇਰਞ੍ਜਰਂ ਪਤਿ;

ਉਕ੍ਕੁਸਾ ਨਮ੍ਮਦਾਤੀਰੇ, ਤ੍ਯਜ੍ਜ ਬ੍ਰਾਹ੍ਮਣਖਤ੍ਤਿਯਾ’’ਤਿ.

ਤਤ੍ਥ ਦੁਚ੍ਚਰਿਤਸ੍ਸਾਤਿ ਮਹਾਰਾਜ, ਤ੍ਵਂ ਸੁਚਰਿਤਸ੍ਸੇਵ ਫਲਂ ਜਾਨਾਸਿ, ਅਹਂ ਪਨ ਦੁਚ੍ਚਰਿਤਸ੍ਸਪਿ ਫਲਂ ਪਸ੍ਸਾਮਿਯੇਵ. ਮਯਞ੍ਹਿ ਉਭੋ ਦੁਚ੍ਚਰਿਤਸ੍ਸ ਫਲੇਨ ਇਤੋ ਚਤੁਤ੍ਥੇ ਅਤ੍ਤਭਾਵੇ ਚਣ੍ਡਾਲਯੋਨਿਯਂ ਨਿਬ੍ਬਤ੍ਤਾ. ਤਤ੍ਥ ਨ ਚਿਰਂ ਸੀਲਂ ਰਕ੍ਖਿਤ੍ਵਾ ਤਸ੍ਸ ਫਲੇਨ ਤ੍ਵਂ ਖਤ੍ਤਿਯਕੁਲੇ ਨਿਬ੍ਬਤ੍ਤੋ, ਅਹਂ ਬ੍ਰਾਹ੍ਮਣਕੁਲੇ, ਏਵਾਹਂ ਦੁਚ੍ਚਰਿਤਸ੍ਸ ਚ ਫਲਂ ਸੁਚਿਣ੍ਣਸ੍ਸ ਚ ਮਹਾਵਿਪਾਕਂ ਦਿਸ੍ਵਾ ਅਤ੍ਤਾਨਮੇਵ ਸੀਲਸਂਯਮੇਨ ਪਟਿਸਂਯਮਿਸ੍ਸਂ, ਪੁਤ੍ਤਂ ਵਾ ਪਸੁਂ ਵਾ ਧਨਂ ਵਾ ਨ ਪਤ੍ਥੇਮਿ.