ਜਾਤਕ-ਅਟ੍ਠਕਥਾ
(ਪਞ੍ਚਮੋ ਭਾਗੋ)
੧੬. ਤਿਂਸਨਿਪਾਤੋ
[੫੧੧] ੧. ਕਿਂਛਨ੍ਦਜਾਤਕਵਣ੍ਣਨਾ
ਕਿਂਛਨ੍ਦੋ ਕਿਮਧਿਪ੍ਪਾਯੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਪੋਸਥਕਮ੍ਮਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਸਤ੍ਥਾ ਬਹੂ ਉਪਾਸਕੇ ਚ ਉਪਾਸਿਕਾਯੋ ਚ ਉਪੋਸਥਿਕੇ ਧਮ੍ਮਸ੍ਸਵਨਤ੍ਥਾਯ ਆਗਨ੍ਤ੍ਵਾ ਧਮ੍ਮਸਭਾਯਂ ਨਿਸਿਨ੍ਨੇ ‘‘ਉਪੋਸਥਿਕਾਤ੍ਥ ਉਪਾਸਕਾ’’ਤਿ ਪੁਚ੍ਛਿਤ੍ਵਾ ‘‘ਆਮ, ਭਨ੍ਤੇ’’ਤਿ ਵੁਤ੍ਤੇ ‘‘ਸਾਧੁ ਵੋ ਕਤਂ ਉਪੋਸਥਂ ਕਰੋਨ੍ਤੇਹਿ, ਪੋਰਾਣਕਾ ਉਪਡ੍ਢੂਪੋਸਥਕਮ੍ਮਸ੍ਸ ਨਿਸ੍ਸਨ੍ਦੇਨ ਮਹਨ੍ਤਂ ਯਸਂ ਪਟਿਲਭਿਂਸੂ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.
ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਸਦ੍ਧੋ ਅਹੋਸਿ ਦਾਨਸੀਲਉਪੋਸਥਕਮ੍ਮੇਸੁ ਅਪ੍ਪਮਤ੍ਤੋ. ਸੋ ਸੇਸੇਪਿ ਅਮਚ੍ਚਾਦਯੋ ਦਾਨਾਦੀਸੁ ਸਮਾਦਪੇਸਿ. ਪੁਰੋਹਿਤੋ ਪਨਸ੍ਸ ਪਰਪਿਟ੍ਠਿਮਂਸਿਕੋ ਲਞ੍ਜਖਾਦਕੋ ਕੂਟਵਿਨਿਚ੍ਛਯਿਕੋ ਅਹੋਸਿ. ਰਾਜਾ ਉਪੋਸਥਦਿਵਸੇ ਅਮਚ੍ਚਾਦਯੋ ਪਕ੍ਕੋਸਾਪੇਤ੍ਵਾ ‘‘ਉਪੋਸਥਿਕਾ ਹੋਥਾ’’ਤਿ ਆਹ. ਪੁਰੋਹਿਤੋ ਉਪੋਸਥਂ ਨ ਸਮਾਦਿਯਿ. ਅਥ ਨਂ ਦਿਵਾ ਲਞ੍ਜਂ ਗਹੇਤ੍ਵਾ ਕੂਟਡ੍ਡਂ ਕਤ੍ਵਾ ਉਪਟ੍ਠਾਨਂ ਆਗਤਂ ਰਾਜਾ ‘‘ਤੁਮ੍ਹੇ ਉਪੋਸਥਿਕਾ’’ਤਿ ਅਮਚ੍ਚੇ ਪੁਚ੍ਛਨ੍ਤੋ ‘‘ਤ੍ਵਮ੍ਪਿ ਆਚਰਿਯ ਉਪੋਸਥਿਕੋ’’ਤਿ ਪੁਚ੍ਛਿ. ਸੋ ‘‘ਆਮਾ’’ਤਿ ਮੁਸਾਵਾਦਂ ਕਤ੍ਵਾ ਪਾਸਾਦਾ ਓਤਰਿ. ਅਥ ਨਂ ਏਕੋ ਅਮਚ੍ਚੋ ‘‘ਨਨੁ ਤੁਮ੍ਹੇ ਨ ਉਪੋਸਥਿਕਾ’’ਤਿ ਚੋਦੇਸਿ. ਸੋ ਆਹ – ‘‘ਅਹਂ ਵੇਲਾਯਮੇਵ ਭੁਞ੍ਜਿਂ, ਗੇਹਂ ਪਨ ਗਨ੍ਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਉਪੋਸਥਂ ਅਧਿਟ੍ਠਾਯ ਸਾਯਂ ਨ ਭੁਞ੍ਜਿਸ੍ਸਾਮਿ, ਰਤ੍ਤਿਂ ਸੀਲਂ ਰਕ੍ਖਿਸ੍ਸਾਮਿ, ਏਵਂ ਮੇ ਉਪਡ੍ਢੂਪੋਸਥਕਮ੍ਮਂ ਭਵਿਸ੍ਸਤੀ’’ਤਿ? ‘‘ਸਾਧੁ, ਆਚਰਿਯਾ’’ਤਿ. ਸੋ ਗੇਹਂ ਗਨ੍ਤ੍ਵਾ ਤਥਾ ਅਕਾਸਿ. ਪੁਨੇਕਦਿਵਸਂ ਤਸ੍ਮਿਂ ਵਿਨਿਚ੍ਛਯੇ ਨਿਸਿਨ੍ਨੇ ਅਞ੍ਞਤਰਾ ਸੀਲਵਤੀ ਇਤ੍ਥੀ ਅਡ੍ਡਂ ਕਰੋਨ੍ਤੀ ਘਰਂ ਗਨ੍ਤੁਂ ਅਲਭਮਾਨਾ ‘‘ਉਪੋਸਥਕਮ੍ਮਂ ਨਾਤਿਕ੍ਕਮਿਸ੍ਸਾਮੀ’’ਤਿ ਉਪਕਟ੍ਠੇ ਕਾਲੇ ਮੁਖਂ ਵਿਕ੍ਖਾਲੇਤੁਂ ਆਰਭਿ. ਤਸ੍ਮਿਂ ਖਣੇ ਬ੍ਰਾਹ੍ਮਣਸ੍ਸ ਸੁਪਕ੍ਕਾਨਂ ਅਮ੍ਬਫਲਾਨਂ ਅਮ੍ਬਪਿਣ੍ਡਿ ਆਹਰਿਯਿਤ੍ਥ. ਸੋ ਤਸ੍ਸਾ ਉਪੋਸਥਿਕਭਾਵਂ ਞਤ੍ਵਾ ‘‘ਇਮਾਨਿ ਖਾਦਿਤ੍ਵਾ ਉਪੋਸਥਿਕਾ ਹੋਹੀ’’ਤਿ ਅਦਾਸਿ. ਸਾ ਤਥਾ ਅਕਾਸਿ. ਏਤ੍ਤਕਂ ਬ੍ਰਾਹ੍ਮਣਸ੍ਸ ਕਮ੍ਮਂ.
ਸੋ ਅਪਰਭਾਗੇ ਕਾਲਂ ਕਤ੍ਵਾ ਹਿਮਵਨ੍ਤਪਦੇਸੇ ਕੋਸਿਕਿਗਙ੍ਗਾਯ ਤੀਰੇ ਤਿਯੋਜਨਿਕੇ ਅਮ੍ਬਵਨੇ ਰਮਣੀਯੇ ਭੂਮਿਭਾਗੇ ਸੋਭਗ੍ਗਪ੍ਪਤ੍ਤੇ ਕਨਕਵਿਮਾਨੇ ਅਲਙ੍ਕਤਸਿਰਿਸਯਨੇ ਸੁਤ੍ਤਪ੍ਪਬੁਦ੍ਧੋ ਵਿਯ ਨਿਬ੍ਬਤ੍ਤਿ ਅਲਙ੍ਕਤਪਟਿਯਤ੍ਤੋ ਉਤ੍ਤਮਰੂਪਧਰੋ ਸੋਲ਼ਸਸਹਸ੍ਸਦੇਵਕਞ੍ਞਾਪਰਿਵਾਰੋ. ਸੋ ਰਤ੍ਤਿਞ੍ਞੇਵ ਤਂ ਸਿਰਿਸਮ੍ਪਤ੍ਤਿਂ ਅਨੁਭੋਤਿ. ਵੇਮਾਨਿਕਪੇਤਭਾਵੇਨ ਹਿਸ੍ਸ ਕਮ੍ਮਸਰਿਕ੍ਖਕੋ ਵਿਪਾਕੋ ਅਹੋਸਿ, ਤਸ੍ਮਾ ਅਰੁਣੇ ਉਗ੍ਗਚ੍ਛਨ੍ਤੇ ਅਮ੍ਬਵਨਂ ਪਵਿਸਤਿ, ਪਵਿਟ੍ਠਕ੍ਖਣੇਯੇਵਸ੍ਸ ਦਿਬ੍ਬਤ੍ਤਭਾਵੋ ਅਨ੍ਤਰਧਾਯਤਿ, ਅਸੀਤਿਹਤ੍ਥਤਾਲਕ੍ਖਨ੍ਧਪ੍ਪਮਾਣੋ ਅਤ੍ਤਭਾਵੋ ਨਿਬ੍ਬਤ੍ਤਤਿ, ਸਕਲਸਰੀਰਂ ਝਾਯਤਿ, ਸੁਪੁਪ੍ਫਿਤਕਿਂਸੁਕੋ ਵਿਯ ਹੋਤਿ. ਦ੍ਵੀਸੁ ਹਤ੍ਥੇਸੁ ਏਕੇਕਾਵ ਅਙ੍ਗੁਲਿ, ਤਤ੍ਥ ਮਹਾਕੁਦ੍ਦਾਲਪ੍ਪਮਾਣਾ ਨਖਾ ਹੋਨ੍ਤਿ. ਤੇਹਿ ਨਖੇਹਿ ਅਤ੍ਤਨੋ ਪਿਟ੍ਠਿਮਂਸਂ ਫਾਲੇਤ੍ਵਾ ਉਪ੍ਪਾਟੇਤ੍ਵਾ ਖਾਦਨ੍ਤੋ ਵੇਦਨਾਪ੍ਪਤ੍ਤੋ ਮਹਾਰਵਂ ਰਵਨ੍ਤੋ ਦੁਕ੍ਖਂ ਅਨੁਭੋਤਿ. ਸੂਰਿਯੇ ਅਤ੍ਥਙ੍ਗਤੇ ਤਂ ਸਰੀਰਂ ਅਨ੍ਤਰਧਾਯਤਿ, ਦਿਬ੍ਬਸਰੀਰਂ ਨਿਬ੍ਬਤ੍ਤਤਿ, ਅਲਙ੍ਕਤਪਟਿਯਤ੍ਤਾ ਦਿਬ੍ਬਨਾਟਕਿਤ੍ਥਿਯੋ ਨਾਨਾਤੂਰਿਯਾਨਿ ਗਹੇਤ੍ਵਾ ਪਰਿਵਾਰੇਨ੍ਤਿ. ਸੋ ਮਹਾਸਮ੍ਪਤ੍ਤਿਂ ਅਨੁਭਵਨ੍ਤੋ ਰਮਣੀਯੇ ਅਮ੍ਬਵਨੇ ਦਿਬ੍ਬਪਾਸਾਦਂ ਅਭਿਰੁਹਤਿ. ਇਤਿ ਸੋ ਉਪੋਸਥਿਕਾਯ ਇਤ੍ਥਿਯਾ ਅਮ੍ਬਫਲਦਾਨਸ੍ਸ ਨਿਸ੍ਸਨ੍ਦੇਨ ਤਿਯੋਜਨਿਕਂ ਅਮ੍ਬਵਨਂ ਪਟਿਲਭਤਿ, ਲਞ੍ਜਂ ਗਹੇਤ੍ਵਾ ਕੂਟਡ੍ਡਕਰਣਨਿਸ੍ਸਨ੍ਦੇਨ ਪਨ ਪਿਟ੍ਠਿਮਂਸਂ ਉਪ੍ਪਾਟੇਤ੍ਵਾ ਖਾਦਤਿ, ਉਪਡ੍ਢੂਪੋਸਥਸ੍ਸ ਨਿਸ੍ਸਨ੍ਦੇਨ ਰਤ੍ਤਿਂ ਸਮ੍ਪਤ੍ਤਿਂ ਅਨੁਭੋਤਿ, ਸੋਲ਼ਸਸਹਸ੍ਸਨਾਟਕਿਤ੍ਥੀਹਿ ਪਰਿਵੁਤੋ ਪਰਿਚਾਰੇਸਿ.
ਤਸ੍ਮਿਂ ਕਾਲੇ ਬਾਰਾਣਸਿਰਾਜਾ ਕਾਮੇਸੁ ਦੋਸਂ ਦਿਸ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਧੋਗਙ੍ਗਾਯ ਰਮਣੀਯੇ ਭੂਮਿਪਦੇਸੇ ਪਣ੍ਣਸਾਲਂ ਕਾਰੇਤ੍ਵਾ ਉਞ੍ਛਾਚਰਿਯਾਯ ਯਾਪੇਨ੍ਤੋ ਵਿਹਾਸਿ. ਅਥੇਕਦਿਵਸਂ ਤਮ੍ਹਾ ਅਮ੍ਬਵਨਾ ਮਹਾਘਟਪ੍ਪਮਾਣਂ ਅਮ੍ਬਪਕ੍ਕਂ ਗਙ੍ਗਾਯ ਪਤਿਤ੍ਵਾ ਸੋਤੇਨ ਵੁਯ੍ਹਮਾਨਂ ਤਸ੍ਸ ਤਾਪਸਸ੍ਸ ਪਰਿਭੋਗਤਿਤ੍ਥਾਭਿਮੁਖਂ ਅਗਮਾਸਿ. ਸੋ ਮੁਖਂ ਧੋਵਨ੍ਤੋ ਤਂ ਮਜ੍ਝੇ ਨਦਿਯਾ ਆਗਚ੍ਛਨ੍ਤਂ ਦਿਸ੍ਵਾ ਉਦਕਂ ਤਰਨ੍ਤੋ ਗਨ੍ਤ੍ਵਾ ਆਦਾਯ ਅਸ੍ਸਮਪਦਂ ਆਹਰਿਤ੍ਵਾ ਅਗ੍ਯਾਗਾਰੇ ਠਪੇਤ੍ਵਾ ਸਤ੍ਥਕੇਨ ਫਾਲੇਤ੍ਵਾ ਯਾਪਨਮਤ੍ਤਂ ਖਾਦਿਤ੍ਵਾ ਸੇਸਂ ਕਦਲਿਪਣ੍ਣੇਹਿ ਪਟਿਚ੍ਛਾਦੇਤ੍ਵਾ ਪੁਨਪ੍ਪੁਨਂ ਦਿਵਸੇ ਦਿਵਸੇ ਯਾਵ ਪਰਿਕ੍ਖਯਾ ਖਾਦਿ. ਤਸ੍ਮਿਂ ਪਨ ਖੀਣੇ ਅਞ੍ਞਂ ਫਲਾਫਲਂ ਖਾਦਿਤੁਂ ਨਾਸਕ੍ਖਿ, ਰਸਤਣ੍ਹਾਯ ਬਜ੍ਝਿਤ੍ਵਾ ‘‘ਤਮੇਵ ਅਮ੍ਬਪਕ੍ਕਂ ਖਾਦਿਸ੍ਸਾਮੀ’’ਤਿ ਨਦੀਤੀਰਂ ਗਨ੍ਤ੍ਵਾ ਨਦਿਂ ਓਲੋਕੇਨ੍ਤੋ ‘‘ਅਮ੍ਬਂ ਅਲਭਿਤ੍ਵਾ ਨ ਉਟ੍ਠਹਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਨਿਸੀਦਿ. ਸੋ ਤਤ੍ਥ ਨਿਰਾਹਾਰੋ ਏਕਮ੍ਪਿ ਦਿਵਸਂ, ਦ੍ਵੇਪਿ, ਤੀਣਿ, ਚਤੁ, ਪਞ੍ਚ, ਛ ਦਿਵਸਾਨਿ ਵਾਤਾਤਪੇਨ ਪਰਿਸੁਸ੍ਸਨ੍ਤੋ ਅਮ੍ਬਂ ਓਲੋਕੇਨ੍ਤੋ ਨਿਸੀਦਿ. ਅਥ ਸਤ੍ਤਮੇ ਦਿਵਸੇ ਨਦੀਦੇਵਤਾ ਆਵਜ੍ਜਮਾਨਾ ਤਂ ਕਾਰਣਂ ਞਤ੍ਵਾ ‘‘ਅਯਂ ਤਾਪਸੋ ਤਣ੍ਹਾਵਸਿਕੋ ਹੁਤ੍ਵਾ ਸਤ੍ਤਾਹਂ ਨਿਰਾਹਾਰੋ ਗਙ੍ਗਂ ਓਲੋਕੇਨ੍ਤੋ ਨਿਸੀਦਿ, ਇਮਸ੍ਸ ਅਮ੍ਬਪਕ੍ਕਂ ਅਦਾਤੁਂ ਨ ਯੁਤ੍ਤਂ, ਅਲਭਨ੍ਤੋ ਮਰਿਸ੍ਸਤਿ, ਦਸ੍ਸਾਮਿ ਤਸ੍ਸਾ’’ਤਿ ਆਗਨ੍ਤ੍ਵਾ ਗਙ੍ਗਾਯ ਉਪਰਿ ਆਕਾਸੇ ਠਤ੍ਵਾ ਤੇਨ ਸਦ੍ਧਿਂ ਸਲ੍ਲਪਨ੍ਤੀ ਪਠਮਂ ਗਾਥਮਾਹ –
੧. ‘‘ਕਿਂਛਨ੍ਦੋ ਕਿਮਧਿਪ੍ਪਾਯੋ, ਏਕੋ ਸਮ੍ਮਸਿ ਘਮ੍ਮਨਿ;
ਕਿਂਪਤ੍ਥਯਾਨੋ ਕਿਂ ਏਸਂ, ਕੇਨ ਅਤ੍ਥੇਨ ਬ੍ਰਾਹ੍ਮਣਾ’’ਤਿ.
ਤਤ੍ਥ ਛਨ੍ਦੋਤਿ ਅਜ੍ਝਾਸਯੋ. ਅਧਿਪ੍ਪਾਯੋਤਿ ਚਿਤ੍ਤਂ. ਸਮ੍ਮਸੀਤਿ ਅਚ੍ਛਸਿ. ਘਮ੍ਮਨੀਤਿ ਗਿਮ੍ਹੇ. ਏਸਨ੍ਤਿ ਏਸਨ੍ਤੋ. ਬ੍ਰਾਹ੍ਮਣਾਤਿ ਪਬ੍ਬਜਿਤਤ੍ਤਾ ਤਾਪਸਂ ਆਲਪਤਿ. ਇਦਂ ਵੁਤ੍ਤਂ ਹੋਤਿ – ਬ੍ਰਾਹ੍ਮਣ, ਤ੍ਵਂ ਕਿਂ ਅਧਿਪ੍ਪਾਯੋ ਕਿਂ ਚਿਨ੍ਤੇਨ੍ਤੋ ਕਿਂ ਪਤ੍ਥੇਨ੍ਤੋ ਕਿਂ ਗਵੇਸਨ੍ਤੋ ਕੇਨਤ੍ਥੇਨ ਇਮਸ੍ਮਿਂ ਗਙ੍ਗਾਤੀਰੇ ਗਙ੍ਗਂ ਓਲੋਕੇਨ੍ਤੋ ਨਿਸਿਨ੍ਨੋਤਿ.
ਤਂ ਸੁਤ੍ਵਾ ਤਾਪਸੋ ਨਵ ਗਾਥਾ ਅਭਾਸਿ –
੨. ‘‘ਯਥਾ ਮਹਾ ਵਾਰਿਧਰੋ, ਕੁਮ੍ਭੋ ਸੁਪਰਿਣਾਹਵਾ;
ਤਥੂਪਮਂ ਅਮ੍ਬਪਕ੍ਕਂ, ਵਣ੍ਣਗਨ੍ਧਰਸੁਤ੍ਤਮਂ.
੩. ‘‘ਤਂ ਵੁਯ੍ਹਮਾਨਂ ਸੋਤੇਨ, ਦਿਸ੍ਵਾਨਾਮਲਮਜ੍ਝਿਮੇ;
ਪਾਣੀਭਿ ਨਂ ਗਹੇਤ੍ਵਾਨ, ਅਗ੍ਯਾਯਤਨਮਾਹਰਿਂ.
੪. ‘‘ਤਤੋ ਕਦਲਿਪਤ੍ਤੇਸੁ, ਨਿਕ੍ਖਿਪਿਤ੍ਵਾ ਸਯਂ ਅਹਂ;
ਸਤ੍ਥੇਨ ਨਂ ਵਿਕਪ੍ਪੇਤ੍ਵਾ, ਖੁਪ੍ਪਿਪਾਸਂ ਅਹਾਸਿ ਮੇ.
੫. ‘‘ਸੋਹਂ ਅਪੇਤਦਰਥੋ, ਬ੍ਯਨ੍ਤੀਭੂਤੋ ਦੁਖਕ੍ਖਮੋ;
ਅਸ੍ਸਾਦਂ ਨਾਧਿਗਚ੍ਛਾਮਿ, ਫਲੇਸ੍ਵਞ੍ਞੇਸੁ ਕੇਸੁਚਿ.
੬. ‘‘ਸੋਸੇਤ੍ਵਾ ਨੂਨ ਮਰਣਂ, ਤਂ ਮਮਂ ਆਵਹਿਸ੍ਸਤਿ;
ਅਮ੍ਬਂ ਯਸ੍ਸ ਫਲਂ ਸਾਦੁ, ਮਧੁਰਗ੍ਗਂ ਮਨੋਰਮਂ;
ਯਮੁਦ੍ਧਰਿਂ ਵੁਯ੍ਹਮਾਨਂ, ਉਦਧਿਸ੍ਮਾ ਮਹਣ੍ਣਵੇ.
੭. ‘‘ਅਕ੍ਖਾਤਂ ਤੇ ਮਯਾ ਸਬ੍ਬਂ, ਯਸ੍ਮਾ ਉਪਵਸਾਮਹਂ;
ਰਮ੍ਮਂ ਪਤਿ ਨਿਸਿਨ੍ਨੋਸ੍ਮਿ, ਪੁਥੁਲੋਮਾਯੁਤਾ ਪੁਥੁ.
੮. ‘‘ਤ੍ਵਞ੍ਚ ਖੋ ਮੇਵ ਅਕ੍ਖਾਹਿ, ਅਤ੍ਤਾਨਮਪਲਾਯਿਨਿ;
ਕਾ ਵਾ ਤ੍ਵਮਸਿ ਕਲ੍ਯਾਣਿ, ਕਿਸ੍ਸ ਵਾ ਤ੍ਵਂ ਸੁਮਜ੍ਝਿਮੇ.
੯. ‘‘ਰੁਪ੍ਪਪਟ੍ਟਪਲਿਮਟ੍ਠੀਵ, ਬ੍ਯਗ੍ਘੀਵ ਗਿਰਿਸਾਨੁਜਾ;
ਯਾ ਸਨ੍ਤਿ ਨਾਰਿਯੋ ਦੇਵੇਸੁ, ਦੇਵਾਨਂ ਪਰਿਚਾਰਿਕਾ.
੧੦. ‘‘ਯਾ ਚ ਮਨੁਸ੍ਸਲੋਕਸ੍ਮਿਂ, ਰੂਪੇਨਾਨ੍ਵਾਗਤਿਤ੍ਥਿਯੋ;
ਰੂਪੇਨ ਤੇ ਸਦਿਸੀ ਨਤ੍ਥਿ, ਦੇਵੇਸੁ ਗਨ੍ਧਬ੍ਬਮਨੁਸ੍ਸਲੋਕੇ;
ਪੁਟ੍ਠਾਸਿ ਮੇ ਚਾਰੁਪੁਬ੍ਬਙ੍ਗਿ, ਬ੍ਰੂਹਿ ਨਾਮਞ੍ਚ ਬਨ੍ਧਵੇ’’ਤਿ.
ਤਤ੍ਥ ਵਾਰਿਧਰੋ ਕੁਮ੍ਭੋਤਿ ਉਦਕਘਟੋ. ਸੁਪਰਿਣਾਹਵਾਤਿ ਸੁਸਣ੍ਠਾਨੋ. ਵਣ੍ਣਗਨ੍ਧਰਸੁਤ੍ਤਮਨ੍ਤਿ ਵਣ੍ਣਗਨ੍ਧਰਸੇਹਿ ਉਤ੍ਤਮਂ. ਦਿਸ੍ਵਾਨਾਤਿ ਦਿਸ੍ਵਾ. ਅਮਲਮਜ੍ਝਿਮੇਤਿ ਨਿਮ੍ਮਲਮਜ੍ਝੇ. ਦੇਵਤਂ ਆਲਪਨ੍ਤੋ ਏਵਮਾਹ. ਪਾਣੀਭੀਤਿ ਹਤ੍ਥੇਹਿ. ਅਗ੍ਯਾਯਤਨਮਾਹਰਿਨ੍ਤਿ ਅਤ੍ਤਨੋ ਅਗ੍ਗਿਹੁਤਸਾਲਂ ਆਹਰਿਂ. ਵਿਕਪ੍ਪੇਤ੍ਵਾਤਿ ਵਿਚ੍ਛਿਨ੍ਦਿਤ੍ਵਾ. ‘‘ਵਿਕਨ੍ਤੇਤ੍ਵਾ’’ਤਿਪਿ ਪਾਠੋ. ‘‘ਖਾਦਿ’’ਨ੍ਤਿ ਪਾਠਸੇਸੋ. ਅਹਾਸਿ ਮੇਤਿ ਤਂ ਜਿਵ੍ਹਗ੍ਗੇ ਠਪਿਤਮਤ੍ਤਮੇਵ ਸਤ੍ਤ ਰਸਹਰਣਿਸਹਸ੍ਸਾਨਿ ਫਰਿਤ੍ਵਾ ਮਮ ਖੁਦਞ੍ਚ ਪਿਪਾਸਞ੍ਚ ਹਰਿ. ਅਪੇਤਦਰਥੋਤਿ ਵਿਗਤਕਾਯਚਿਤ੍ਤਦਰਥੋ. ਸੁਧਾਭੋਜਨਂ ਭੁਤ੍ਤਸ੍ਸ ਵਿਯ ਹਿ ਤਸ੍ਸ ਸਬ੍ਬਦਰਥਂ ਅਪਹਰਿ. ਬ੍ਯਨ੍ਤੀਭੂਤੋਤਿ ਤਸ੍ਸ ਅਮ੍ਬਪਕ੍ਕਸ੍ਸ ਵਿਗਤਨ੍ਤੋ ਜਾਤੋ, ਪਰਿਕ੍ਖੀਣਅਮ੍ਬਪਕ੍ਕੋ ਹੁਤ੍ਵਾਤਿ ਅਤ੍ਥੋ. ਦੁਖਕ੍ਖਮੋਤਿ ਦੁਕ੍ਖੇਨ ਅਸਾਤੇਨ ਕਾਯਕ੍ਖਮੇਨ ਚੇਵ ਚਿਤ੍ਤਕ੍ਖਮੇਨ ਚ ਸਮਨ੍ਨਾਗਤੋ. ਅਞ੍ਞੇਸੁ ਪਨ ਕਦਲਿਪਨਸਾਦੀਸੁ ਫਲੇਸੁ ਪਰਿਤ੍ਤਕਮ੍ਪਿ ਅਸ੍ਸਾਦਂ ਨਾਧਿਗਚ੍ਛਾਮਿ, ਸਬ੍ਬਾਨਿ ਮੇ ਜਿਵ੍ਹਾਯ ਠਪਿਤਮਤ੍ਤਾਨਿ ਤਿਤ੍ਤਕਾਨੇਵ ਸਮ੍ਪਜ੍ਜਨ੍ਤੀਤਿ ਦੀਪੇਤਿ.
ਸੋਸੇਤ੍ਵਾਤਿ ਨਿਰਾਹਾਰਤਾਯ ਸੋਸੇਤ੍ਵਾ ਸੁਕ੍ਖਾਪੇਤ੍ਵਾ. ਤਂ ਮਮਨ੍ਤਿ ਤਂ ਮਮ. ਯਸ੍ਸਾਤਿ ਯਂ ਅਸ੍ਸ, ਅਹੋਸੀਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਯਂ ਫਲਂ ਮਮ ਸਾਦੁ ਅਹੋਸਿ, ਯਮਹਂ ਗਮ੍ਭੀਰੇ ਪੁਥੁਲਉਦਕਕ੍ਖਨ੍ਧਸਙ੍ਖਾਤੇ ਮਹਣ੍ਣਵੇ ਵੁਯ੍ਹਮਾਨਂ ਤਤੋ ਉਦਧਿਸ੍ਮਾ ਉਦ੍ਧਰਿਂ, ਤਂ ਅਮ੍ਬਂ ਮਮ ਮਰਣਂ ਆਵਹਿਸ੍ਸਤੀਤਿ ਮਞ੍ਞਾਮਿ, ਮਯ੍ਹਂ ਤਂ ਅਲਭਨ੍ਤਸ੍ਸ ਜੀਵਿਤਂ ਨਪ੍ਪਵਤ੍ਤਿਸ੍ਸਤੀਤਿ. ਉਪਵਸਾਮੀਤਿ ਖੁਪ੍ਪਿਪਾਸਾਹਿ ਉਪਗਤੋ ਵਸਾਮਿ. ਰਮ੍ਮਂ ਪਤਿ ਨਿਸਿਨ੍ਨੋਸ੍ਮੀਤਿ ਰਮਣੀਯਂ ਨਦਿਂ ਪਤਿ ਅਹਂ ਨਿਸਿਨ੍ਨੋ. ਪੁਥੁਲੋਮਾਯੁਤਾ ਪੁਥੂਤਿ ਅਯਂ ਨਦੀ ਪੁਥੁਲੋਮੇਹਿ ਮਚ੍ਛੇਹਿ ਆਯੁਤਾ ਪੁਥੁ ਵਿਪੁਲਾ, ਅਪਿ ਨਾਮ ਮੇ ਇਤੋ ਸੋਤ੍ਥਿ ਭਵੇਯ੍ਯਾਤਿ ਅਧਿਪ੍ਪਾਯੋ. ਅਪਲਾਯਿਨੀਤਿ ਅਪਲਾਯਿਤ੍ਵਾ ਮਮ ਸਮ੍ਮੁਖੇ ਠਿਤੇਤਿ ਤਂ ਦੇਵਤਂ ਆਲਪਤਿ. ‘‘ਅਪਲਾਸਿਨੀ’’ਤਿਪਿ ਪਾਠੋ, ਪਲਾਸਰਹਿਤੇ ਅਨਵਜ੍ਜਸਰੀਰੇਤਿ ਅਤ੍ਥੋ. ਕਿਸ੍ਸ ਵਾਤਿ ਕਿਸ੍ਸ ਵਾ ਕਾਰਣਾ ਇਧਾਗਤਾਸੀਤਿ ਪੁਚ੍ਛਤਿ.
ਰੂਪਪਟ੍ਟਪਲਿਮਟ੍ਠੀਵਾਤਿ ਸੁਟ੍ਠੁ ਪਰਿਮਜ੍ਜਿਤਕਞ੍ਚਨਪਟ੍ਟਸਦਿਸੀ. ਬ੍ਯਗ੍ਘੀਵਾਤਿ ਲੀਲਾਵਿਲਾਸੇਨ ਤਰੁਣਬ੍ਯਗ੍ਘਪੋਤਿਕਾ ਵਿਯ. ਦੇਵਾਨਨ੍ਤਿ ਛਨ੍ਨਂ ਕਾਮਾਵਚਰਦੇਵਾਨਂ. ਯਾ ਚ ਮਨੁਸ੍ਸਲੋਕਸ੍ਮਿਨ੍ਤਿ ਯਾ ਚ ਮਨੁਸ੍ਸਲੋਕੇ. ਰੂਪੇਨਾਨ੍ਵਾਗਤਿਤ੍ਥਿਯੋਤਿ ਰੂਪੇਨ ਅਨ੍ਵਾਗਤਾ ਇਤ੍ਥਿਯੋ ਨਤ੍ਥੀਤਿ ਅਤ੍ਤਨੋ ਸਮ੍ਭਾਵਨਾਯ ਏਵਮਾਹ. ਤਵ ਰੂਪਸਦਿਸਾਯ ਨਾਮ ਨ ਭਵਿਤਬ੍ਬਨ੍ਤਿ ਹਿਸ੍ਸ ਅਧਿਪ੍ਪਾਯੋ. ਗਨ੍ਧਬ੍ਬਮਨੁਸ੍ਸਲੋਕੇਤਿ ਮੂਲਗਨ੍ਧਾਦਿਨਿਸ੍ਸਿਤੇਸੁ ਗਨ੍ਧਬ੍ਬੇਸੁ ਚ ਮਨੁਸ੍ਸਲੋਕੇ ਚ. ਚਾਰੁਪੁਬ੍ਬਙ੍ਗੀਤਿ ਚਾਰੁਨਾ ਪੁਬ੍ਬਙ੍ਗੇਨ ਊਰੁਲਕ੍ਖਣੇਨ ਸਮਨ੍ਨਾਗਤੇ. ਨਾਮਞ੍ਚ ਬਨ੍ਧਵੇਤਿ ਅਤ੍ਤਨੋ ਨਾਮਗੋਤ੍ਤਞ੍ਚ ਬਨ੍ਧਵੇ ਚ ਮਯ੍ਹਂ ਅਕ੍ਖਾਹੀਤਿ ਵਦਤਿ.
ਤਤੋ ਦੇਵਧੀਤਾ ਅਟ੍ਠ ਗਾਥਾ ਅਭਾਸਿ –
੧੧. ‘‘ਯਂ ਤ੍ਵਂ ਪਤਿ ਨਿਸਿਨ੍ਨੋਸਿ, ਰਮ੍ਮਂ ਬ੍ਰਾਹ੍ਮਣ ਕੋਸਿਕਿਂ;
ਸਾਹਂ ਭੁਸਾਲਯਾਵੁਤ੍ਥਾ, ਵਰਵਾਰਿਵਹੋਘਸਾ.
੧੨. ‘‘ਨਾਨਾਦੁਮਗਣਾਕਿਣ੍ਣਾ, ਬਹੁਕਾ ਗਿਰਿਕਨ੍ਦਰਾ;
ਮਮੇਵ ਪਮੁਖਾ ਹੋਨ੍ਤਿ, ਅਭਿਸਨ੍ਦਨ੍ਤਿ ਪਾਵੁਸੇ.
੧੩. ‘‘ਅਥੋ ਬਹੂ ਵਨਤੋਦਾ, ਨੀਲਵਾਰਿਵਹਿਨ੍ਧਰਾ;
ਬਹੁਕਾ ਨਾਗਵਿਤ੍ਤੋਦਾ, ਅਭਿਸਨ੍ਦਨ੍ਤਿ ਵਾਰਿਨਾ.
੧੪. ‘‘ਤਾ ਅਮ੍ਬਜਮ੍ਬੁਲਬੁਜਾ, ਨੀਪਾ ਤਾਲਾ ਚੁਦੁਮ੍ਬਰਾ;
ਬਹੂਨਿ ਫਲਜਾਤਾਨਿ, ਆਵਹਨ੍ਤਿ ਅਭਿਣ੍ਹਸੋ.
੧੫. ‘‘ਯਂ ਕਿਞ੍ਚਿ ਉਭਤੋ ਤੀਰੇ, ਫਲਂ ਪਤਤਿ ਅਮ੍ਬੁਨਿ;
ਅਸਂਸਯਂ ਤਂ ਸੋਤਸ੍ਸ, ਫਲਂ ਹੋਤਿ ਵਸਾਨੁਗਂ.
੧੬. ‘‘ਏਤਦਞ੍ਞਾਯ ਮੇਧਾਵਿ, ਪੁਥੁਪਞ੍ਞ ਸੁਣੋਹਿ ਮੇ;
ਮਾ ਰੋਚਯ ਮਭਿਸਙ੍ਗਂ, ਪਟਿਸੇਧ ਜਨਾਧਿਪ.
੧੭. ‘‘ਨ ਵਾਹਂ ਵਡ੍ਢਵਂ ਮਞ੍ਞੇ, ਯਂ ਤ੍ਵਂ ਰਟ੍ਠਾਭਿਵਡ੍ਢਨ;
ਆਚੇਯ੍ਯਮਾਨੋ ਰਾਜਿਸਿ, ਮਰਣਂ ਅਭਿਕਙ੍ਖਸਿ.
੧੮. ‘‘ਤਸ੍ਸ ਜਾਨਨ੍ਤਿ ਪਿਤਰੋ, ਗਨ੍ਧਬ੍ਬਾ ਚ ਸਦੇਵਕਾ;
ਯੇ ਚਾਪਿ ਇਸਯੋ ਲੋਕੇ, ਸਞ੍ਞਤਤ੍ਤਾ ਤਪਸ੍ਸਿਨੋ;
ਅਸਂਸਯਂ ਤੇਪਿ ਜਾਨਨ੍ਤਿ, ਪਟ੍ਠਭੂਤਾ ਯਸਸ੍ਸਿਨੋ’’ਤਿ.
ਤਤ੍ਥ ਕੋਸਿਕਿਨ੍ਤਿ ਯਂ ਤ੍ਵਂ, ਬ੍ਰਾਹ੍ਮਣ, ਰਮ੍ਮਂ ਕੋਸਿਕਿਂ ਗਙ੍ਗਂ ਪਤਿ ਨਿਸਿਨ੍ਨੋ. ਭੁਸਾਲਯਾਵੁਤ੍ਥਾਤਿ ਭੁਸੇ ਚਣ੍ਡਸੋਤੇ ਆਲਯੋ ਯਸ੍ਸ ਵਿਮਾਨਸ੍ਸ, ਤਸ੍ਮਿਂ ਅਧਿਵਤ੍ਥਾ, ਗਙ੍ਗਟ੍ਠਕਵਿਮਾਨਵਾਸਿਨੀਤਿ ਅਤ੍ਥੋ. ਵਰਵਾਰਿਵਹੋਘਸਾਤਿ ਵਰਵਾਰਿਵਹੇਨ ਓਘੇਨ ਸਮਨ੍ਨਾਗਤਾ. ਪਮੁਖਾਤਿ ਤਾ ਵੁਤ੍ਤਪ੍ਪਕਾਰਾ ਗਿਰਿਕਨ੍ਦਰਾ ਮਂ ਪਮੁਖਂ ਕਰੋਨ੍ਤਿ, ਅਹਂ ਤਾਸਂ ਪਾਮੋਕ੍ਖਾ ਹੋਮੀਤਿ ਦਸ੍ਸੇਤਿ. ਅਭਿਸਨ੍ਦਨ੍ਤੀਤਿ ਸਨ੍ਦਨ੍ਤਿ ਪਵਤ੍ਤਨ੍ਤਿ, ਤਤੋ ਤਤੋ ਆਗਨ੍ਤ੍ਵਾ ਮਂ ਕੋਸਿਕਿਗਙ੍ਗਂ ਪਵਿਸਨ੍ਤੀਤਿ ਅਤ੍ਥੋ. ਵਨਤੋਦਾਤਿ ਨ ਕੇਵਲਂ ਕਨ੍ਦਰਾਵ, ਅਥ ਖੋ ਬਹੂ ਵਨਤੋਦਾ ਤਮ੍ਹਾ ਤਮ੍ਹਾ ਵਨਮ੍ਹਾ ਉਦਕਾਨਿਪਿ ਮਂ ਬਹੂਨਿ ਪਵਿਸਨ੍ਤਿ. ਨੀਲਵਾਰਿਵਹਿਨ੍ਧਰਾਤਿ ਮਣਿਵਣ੍ਣੇਨ ਨੀਲਵਾਰਿਨਾ ਯੁਤ੍ਤੇ ਉਦਕਕ੍ਖਨ੍ਧਸਙ੍ਖਾਤੇ ਵਹੇ ਧਾਰਯਨ੍ਤਿਯੋ. ਨਾਗਵਿਤ੍ਤੋਦਾਤਿ ਨਾਗਾਨਂ ਵਿਤ੍ਤਿਕਾਰੇਨ ਧਨਸਙ੍ਖਾਤੇਨ ਵਾ ਉਦਕੇਨ ਸਮਨ੍ਨਾਗਤਾ. ਵਾਰਿਨਾਤਿ ਏਵਰੂਪਾ ਹਿ ਬਹੂ ਨਦਿਯੋ ਮਂ ਵਾਰਿਨਾਵ ਅਭਿਸਨ੍ਦਨ੍ਤਿ ਪੂਰੇਨ੍ਤੀਤਿ ਦਸ੍ਸੇਤਿ.
ਤਾਤਿ ਤਾ ਨਦਿਯੋ. ਆਵਹਨ੍ਤੀਤਿ ਏਤਾਨਿ ਅਮ੍ਬਾਦੀਨਿ ਆਕਡ੍ਢਨ੍ਤਿ. ਸਬ੍ਬਾਨਿ ਹਿ ਏਤਾਨਿ ਉਪਯੋਗਤ੍ਥੇ ਪਚ੍ਚਤ੍ਤਵਚਨਾਨਿ. ਅਥ ਵਾ ਤਾਤਿ ਉਪਯੋਗਬਹੁਵਚਨਂ. ਆਵਹਨ੍ਤੀਤਿ ਇਮਾਨਿ ਅਮ੍ਬਾਦੀਨਿ ਤਾ ਨਦਿਯੋ ਆਗਚ੍ਛਨ੍ਤਿ, ਉਪਗਚ੍ਛਨ੍ਤੀਤਿ ਅਤ੍ਥੋ, ਏਵਂ ਉਪਗਤਾਨਿ ਪਨ ਮਮ ਸੋਤਂ ਪਵਿਸਨ੍ਤੀਤਿ ਅਧਿਪ੍ਪਾਯੋ. ਸੋਤਸ੍ਸਾਤਿ ਯਂ ਉਭਤੋ ਤੀਰੇ ਜਾਤਰੁਕ੍ਖੇਹਿ ਫਲਂ ਮਮ ਅਮ੍ਬੁਨਿ ਪਤਤਿ, ਸਬ੍ਬਂ ਤਂ ਮਮ ਸੋਤਸ੍ਸੇਵ ਵਸਾਨੁਗਂ ਹੋਤਿ. ਨਤ੍ਥੇਤ੍ਥ ਸਂਸਯੋਤਿ ਏਵਂ ਅਮ੍ਬਪਕ੍ਕਸ੍ਸ ਨਦੀਸੋਤੇਨ ਆਗਮਨਕਾਰਣਂ ਕਥੇਸਿ.
ਮੇਧਾਵਿ ਪੁਥੁਪਞ੍ਞਾਤਿ ਉਭਯਂ ਆਲਪਨਮੇਵ. ਮਾ ਰੋਚਯਾਤਿ ਏਵਂ ਤਣ੍ਹਾਭਿਸਙ੍ਗਂ ਮਾ ਰੋਚਯ. ਪਟਿਸੇਧਾਤਿ ਪਟਿਸੇਧੇਹਿ ਨਨ੍ਤਿ ਰਾਜਾਨਂ ਓਵਦਤਿ. ਵਡ੍ਢਵਨ੍ਤਿ ਪਞ੍ਞਾਵਡ੍ਢਭਾਵਂ ਪਣ੍ਡਿਤਭਾਵਂ. ਰਟ੍ਠਾਭਿਵਡ੍ਢਨਾਤਿ ਰਟ੍ਠਸ੍ਸ ਅਭਿਵਡ੍ਢਨ. ਆਚੇਯ੍ਯਮਾਨੋਤਿ ਮਂਸਲੋਹਿਤੇਹਿ ਆਚਿਯਨ੍ਤੋ ਵਡ੍ਢਨ੍ਤੋ, ਤਰੁਣੋਵ ਹੁਤ੍ਵਾਤਿ ਅਤ੍ਥੋ. ਰਾਜਿਸੀਤਿ ਤਂ ਆਲਪਤਿ. ਇਦਂ ਵੁਤ੍ਤਂ ਹੋਤਿ – ਯਂ ਤ੍ਵਂ ਨਿਰਾਹਾਰਤਾਯ ਸੁਸ੍ਸਮਾਨੋ ਤਰੁਣੋਵ ਸਮਾਨੋ ਅਮ੍ਬਲੋਭੇਨ ਮਰਣਂ ਅਭਿਕਙ੍ਖਸਿ, ਨ ਵੇ ਅਹਂ ਤਵ ਇਮਂ ਪਣ੍ਡਿਤਭਾਵਂ ਮਞ੍ਞਾਮੀਤਿ.
ਤਸ੍ਸਾਤਿ ਯੋ ਪੁਗ੍ਗਲੋ ਤਣ੍ਹਾਵਸਿਕੋ ਹੋਤਿ, ਤਸ੍ਸ ਤਣ੍ਹਾਵਸਿਕਭਾਵਂ ‘‘ਪਿਤਰੋ’’ਤਿ ਸਙ੍ਖਂ ਗਤਾ ਬ੍ਰਹ੍ਮਾਨੋ ਚ ਸਦ੍ਧਿਂ ਕਾਮਾਵਚਰਦੇਵੇਹਿ ਗਨ੍ਧਬ੍ਬਾ ਚ ਵੁਤ੍ਤਪ੍ਪਕਾਰਾ ਦਿਬ੍ਬਚਕ੍ਖੁਕਾ ਇਸਯੋ ਚ ਅਸਂਸਯਂ ਜਾਨਨ੍ਤਿ. ਅਨਚ੍ਛਰਿਯਞ੍ਚੇਤਂ, ਯਂ ਤੇ ਇਦ੍ਧਿਮਨ੍ਤੋ ਜਾਨੇਯ੍ਯੁਂ, ‘‘ਅਸੁਕੋ ਹਿ ਨਾਮ ਤਣ੍ਹਾਵਸਿਕੋ ਹੋਤੀ’’ਤਿ. ਪੁਨ ਤੇਸਂ ਭਾਸਮਾਨਾਨਂ ਵਚਨਂ ਸੁਤ੍ਵਾ ਯੇਪਿ ਤੇਸਂ ਪਟ੍ਠਭੂਤਾ ਯਸਸ੍ਸਿਨੋ ਪਰਿਚਾਰਕਾ, ਤੇਪਿ ਜਾਨਨ੍ਤਿ. ਪਾਪਕਮ੍ਮਂ ਕਰੋਨ੍ਤਸ੍ਸ ਹਿ ਰਹੋ ਨਾਮ ਨਤ੍ਥੀਤਿ ਤਾਪਸਸ੍ਸ ਸਂਵੇਗਂ ਉਪ੍ਪਾਦੇਨ੍ਤੀ ਏਵਮਾਹ.
ਤਤੋ ਤਾਪਸੋ ਚਤਸ੍ਸੋ ਗਾਥਾ ਅਭਾਸਿ –
੧੯. ‘‘ਏਵਂ ਵਿਦਿਤ੍ਵਾ ਵਿਦੂ ਸਬ੍ਬਧਮ੍ਮਂ, ਵਿਦ੍ਧਂਸਨਂ ਚਵਨਂ ਜੀਵਿਤਸ੍ਸ;
ਨ ਚੀਯਤੀ ਤਸ੍ਸ ਨਰਸ੍ਸ ਪਾਪਂ, ਸਚੇ ਨ ਚੇਤੇਤਿ ਵਧਾਯ ਤਸ੍ਸ.
੨੦. ‘‘ਇਸਿਪੂਗਸਮਞ੍ਞਾਤੇ, ਏਵਂ ਲੋਕ੍ਯਾ ਵਿਦਿਤਾ ਸਤਿ;
ਅਨਰਿਯਪਰਿਸਮ੍ਭਾਸੇ, ਪਾਪਕਮ੍ਮਂ ਜਿਗੀਸਸਿ.
੨੧. ‘‘ਸਚੇ ਅਹਂ ਮਰਿਸ੍ਸਾਮਿ, ਤੀਰੇ ਤੇ ਪੁਥੁਸੁਸ੍ਸੋਣਿ;
ਅਸਂਸਯਂ ਤਂ ਅਸਿਲੋਕੋ, ਮਯਿ ਪੇਤੇ ਆਗਮਿਸ੍ਸਤਿ.
੨੨. ‘‘ਤਸ੍ਮਾ ਹਿ ਪਾਪਕਂ ਕਮ੍ਮਂ, ਰਕ੍ਖਸ੍ਸੇਵ ਸੁਮਜ੍ਝਿਮੇ;
ਮਾ ਤਂ ਸਬ੍ਬੋ ਜਨੋ ਪਚ੍ਛਾ, ਪਕੁਟ੍ਠਾਯਿ ਮਯਿ ਮਤੇ’’ਤਿ.
ਤਤ੍ਥ ਏਵਂ ਵਿਦਿਤ੍ਵਾਤਿ ਯਥਾ ਅਹਂ ਸੀਲਞ੍ਚ ਅਨਿਚ੍ਚਤਞ੍ਚ ਜਾਨਾਮਿ, ਏਵਂ ਜਾਨਿਤ੍ਵਾ ਠਿਤਸ੍ਸ. ਵਿਦੂਤਿ ਵਿਦੁਨੋ. ਸਬ੍ਬਧਮ੍ਮਨ੍ਤਿ ਸਬ੍ਬਂ ਸੁਚਰਿਤਧਮ੍ਮਂ. ਤਿਵਿਧਞ੍ਹਿ ਸੁਚਰਿਤਂ ਇਧ ਸਬ੍ਬਧਮ੍ਮੋਤਿ ਅਧਿਪ੍ਪੇਤਂ. ਵਿਦ੍ਧਂਸਨਨ੍ਤਿ ਭਙ੍ਗਂ. ਚਵਨਨ੍ਤਿ ਚੁਤਿਂ. ਜੀਵਿਤਸ੍ਸਾਤਿ ਆਯੁਨੋ. ਇਦਂ ਵੁਤ੍ਤਂ ਹੋਤਿ – ਏਵਂ ਵਿਦਿਤ੍ਵਾ ਠਿਤਸ੍ਸ ਪਣ੍ਡਿਤਸ੍ਸ ਸਬ੍ਬਂ ਸੁਚਰਿਤਧਮ੍ਮਂ ਜੀਵਿਤਸ੍ਸ ਚ ਅਨਿਚ੍ਚਤਂ ਜਾਨਨ੍ਤਸ੍ਸ ਏਵਰੂਪਸ੍ਸ ਨਰਸ੍ਸ ਪਾਪਂ ਨ ਚੀਯਤਿ ਨ ਵਡ੍ਢਤਿ. ਸਚੇ ਨ ਚੇਤੇਤਿ ਵਧਾਯ ਤਸ੍ਸਾਤਿ ਤਸ੍ਸ ਸਙ੍ਖਂ ਗਤਸ੍ਸ ਪਰਪੁਗ੍ਗਲਸ੍ਸ ਵਧਾਯ ਨ ਚੇਤੇਤਿ ਨ ਪਕਪ੍ਪੇਤਿ, ਨੇਵ ਪਰਪੁਗ੍ਗਲਂ ਵਧਾਯ ਚੇਤੇਤਿ, ਨਾਪਿ ਪਰਸਨ੍ਤਕਂ ਵਿਨਾਸੇਤਿ, ਅਹਞ੍ਚ ਕਸ੍ਸਚਿ ਵਧਾਯ ਅਚੇਤੇਤ੍ਵਾ ਕੇਵਲਂ ਅਮ੍ਬਪਕ੍ਕੇ ਆਸਙ੍ਗਂ ਕਤ੍ਵਾ ਗਙ੍ਗਂ ਓਲੋਕੇਨ੍ਤੋ ਨਿਸਿਨ੍ਨੋ, ਤ੍ਵਂ ਮਯ੍ਹਂ ਕਿਂ ਨਾਮ ਅਕੁਸਲਂ ਪਸ੍ਸਸੀਤਿ.
ਇਸਿਪੂਗਸਮਞ੍ਞਾਤੇਤਿ ਇਸਿਗਣੇਨ ਸੁਟ੍ਠੁ ਅਞ੍ਞਾਤੇ ਇਸੀਨਂ ਸਮ੍ਮਤੇ. ਏਵਂ ਲੋਕ੍ਯਾਤਿ ਤ੍ਵਂ ਨਾਮ ਪਾਪਪਵਾਹਨੇਨ ਲੋਕਸ੍ਸ ਹਿਤਾਤਿ ਏਵਂ ਵਿਦਿਤਾ. ਸਤੀਤਿ ਸਤਿ ਸੋਭਨੇ ਉਤ੍ਤਮੇਤਿ ਆਲਪਨਮੇਤਂ. ਅਨਰਿਯਪਰਿਸਮ੍ਭਾਸੇਤਿ ‘‘ਤਸ੍ਸ ਜਾਨਨ੍ਤਿ ਪਿਤਰੋ’’ਤਿਆਦਿਕਾਯ ਅਸੁਨ੍ਦਰਾਯ ਪਰਿਭਾਸਾਯ ਸਮਨ੍ਨਾਗਤੇ. ਜਿਗੀਸਸੀਤਿ ਮਯਿ ਪਾਪੇ ਅਸਂਵਿਜ੍ਜਨ੍ਤੇਪਿ ਮਂ ਏਵਂ ਪਰਿਭਾਸਨ੍ਤੀ ਚ ਪਰਮਰਣਂ ਅਜ੍ਝੁਪੇਕ੍ਖਨ੍ਤੀ ਚ ਅਤ੍ਤਨੋ ਪਾਪਕਮ੍ਮਂ ਗਵੇਸਸਿ ਉਪ੍ਪਾਦੇਸਿ. ਤੀਰੇ ਤੇਤਿ ਤਵ ਗਙ੍ਗਾਤੀਰੇ. ਪੁਥੁਸੁਸ੍ਸੋਣੀਤਿ ਪੁਥੁਲਾਯ ਸੁਨ੍ਦਰਾਯ ਸੋਣਿਯਾ ਸਮਨ੍ਨਾਗਤੇ. ਪੇਤੇਤਿ ਅਮ੍ਬਪਕ੍ਕਂ ਅਲਭਿਤ੍ਵਾ ਪਰਲੋਕਂ ਗਤੇ, ਮਤੇਤਿ ਅਤ੍ਥੋ. ਪਕੁਟ੍ਠਾਯੀਤਿ ਅਕ੍ਕੋਸਿ ਗਰਹਿ ਨਿਨ੍ਦਿ. ‘‘ਪਕ੍ਵਤ੍ਥਾਸੀ’’ਤਿਪਿ ਪਾਠੋ.
ਤਂ ਸੁਤ੍ਵਾ ਦੇਵਧੀਤਾ ਪਞ੍ਚ ਗਾਥਾ ਅਭਾਸਿ –
੨੩. ‘‘ਅਞ੍ਞਾਤਮੇਤਂ ਅਵਿਸਯ੍ਹਸਾਹਿ, ਅਤ੍ਤਾਨਮਮ੍ਬਞ੍ਚ ਦਦਾਮਿ ਤੇ ਤਂ;
ਯੋ ਦੁਬ੍ਬਜੇ ਕਾਮਗੁਣੇ ਪਹਾਯ, ਸਨ੍ਤਿਞ੍ਚ ਧਮ੍ਮਞ੍ਚ ਅਧਿਟ੍ਠਿਤੋਸਿ.
੨੪. ‘‘ਯੋ ਹਿਤ੍ਵਾ ਪੁਬ੍ਬਸਞ੍ਞੋਗਂ, ਪਚ੍ਛਾਸਂਯੋਜਨੇ ਠਿਤੋ;
ਅਧਮ੍ਮਞ੍ਚੇਵ ਚਰਤਿ, ਪਾਪਞ੍ਚਸ੍ਸ ਪਵਡ੍ਢਤਿ.
੨੫. ‘‘ਏਹਿ ਤਂ ਪਾਪਯਿਸ੍ਸਾਮਿ, ਕਾਮਂ ਅਪ੍ਪੋਸ੍ਸੁਕੋ ਭਵ;
ਉਪਨਯਾਮਿ ਸੀਤਸ੍ਮਿਂ, ਵਿਹਰਾਹਿ ਅਨੁਸ੍ਸੁਕੋ.
੨੬. ‘‘ਤਂ ਪੁਪ੍ਫਰਸਮਤ੍ਤੇਭਿ, ਵਕ੍ਕਙ੍ਗੇਹਿ ਅਰਿਨ੍ਦਮ;
ਕੋਞ੍ਚਾ ਮਯੂਰਾ ਦਿਵਿਯਾ, ਕੋਲਟ੍ਠਿਮਧੁਸਾਲ਼ਿਕਾ;
ਕੂਜਿਤਾ ਹਂਸਪੂਗੇਹਿ, ਕੋਕਿਲੇਤ੍ਥ ਪਬੋਧਰੇ.
੨੭. ‘‘ਅਮ੍ਬੇਤ੍ਥ ਵਿਪ੍ਪਸਾਖਗ੍ਗਾ, ਪਲਾਲਖਲਸਨ੍ਨਿਭਾ;
ਕੋਸਮ੍ਬਸਲਲ਼ਾ ਨੀਪਾ, ਪਕ੍ਕਤਾਲਵਿਲਮ੍ਬਿਨੋ’’ਤਿ.
ਤਤ੍ਥ ਅਞ੍ਞਾਤਮੇਤਨ੍ਤਿ ‘‘ਗਰਹਾ ਤੇ ਭਵਿਸ੍ਸਤੀਤਿ ਵਦਨ੍ਤੋ ਅਮ੍ਬਪਕ੍ਕਤ੍ਥਾਯ ਵਦਸੀ’’ਤਿ ਏਤਂ ਕਾਰਣਂ ਮਯਾ ਅਞ੍ਞਾਤਂ. ਅਵਿਸਯ੍ਹਸਾਹੀਤਿ ਰਾਜਾਨੋ ਨਾਮ ਦੁਸ੍ਸਹਂ ਸਹਨ੍ਤਿ, ਤੇਨ ਨਂ ਆਲਪਨ੍ਤੀ ਏਵਮਾਹ. ਅਤ੍ਤਾਨਨ੍ਤਿ ਤਂ ਆਲਿਙ੍ਗਿਤ੍ਵਾ ਅਮ੍ਬਵਨਂ ਨਯਨ੍ਤੀ ਅਤ੍ਤਾਨਞ੍ਚ ਤੇ ਦਦਾਮਿ ਤਞ੍ਚ ਅਮ੍ਬਂ. ਕਾਮਗੁਣੇਤਿ ਕਞ੍ਚਨਮਾਲਾਸੇਤਚ੍ਛਤ੍ਤਪਟਿਮਣ੍ਡਿਤੇ ਵਤ੍ਥੁਕਾਮੇ. ਸਨ੍ਤਿਞ੍ਚ ਧਮ੍ਮਞ੍ਚਾਤਿ ਦੁਸ੍ਸੀਲ੍ਯਵੂਪਸਮੇਨ ਸਨ੍ਤਿਸਙ੍ਖਾਤਂ ਸੀਲਞ੍ਚੇਵ ਸੁਚਰਿਤਧਮ੍ਮਞ੍ਚ. ਅਧਿਟ੍ਠਿਤੋਸੀਤਿ ਯੋ ਤ੍ਵਂ ਇਮੇ ਗੁਣੇ ਉਪਗਤੋ, ਏਤੇਸੁ ਵਾ ਪਤਿਟ੍ਠਿਤੋਤਿ ਅਤ੍ਥੋ.
ਪੁਬ੍ਬਸਞ੍ਞੋਗਨ੍ਤਿ ਪੁਰਿਮਬਨ੍ਧਨਂ. ਪਚ੍ਛਾਸਂਯੋਜਨੇਤਿ ਪਚ੍ਛਿਮਬਨ੍ਧਨੇ. ਇਦਂ ਵੁਤ੍ਤਂ ਹੋਤਿ – ਅਮ੍ਭੋ ਤਾਪਸ ਯੋ ਮਹਨ੍ਤਂ ਰਜ੍ਜਸਿਰਿਵਿਭਵਂ ਪਹਾਯ ਅਮ੍ਬਪਕ੍ਕਮਤ੍ਤੇ ਰਸਤਣ੍ਹਾਯ ਬਜ੍ਝਿਤ੍ਵਾ ਵਾਤਾਤਪਂ ਅਗਣੇਤ੍ਵਾ ਨਦੀਤੀਰੇ ਸੁਸ੍ਸਮਾਨੋ ਨਿਸੀਦਤਿ, ਸੋ ਮਹਾਸਮੁਦ੍ਦਂ ਤਰਿਤ੍ਵਾ ਵੇਲਨ੍ਤੇ ਸਂਸੀਦਨਪੁਗ੍ਗਲਸਦਿਸੋ. ਯੋ ਪੁਗ੍ਗਲੋ ਰਸਤਣ੍ਹਾਵਸਿਕੋ ਅਧਮ੍ਮਞ੍ਚੇਵ ਚਰਤਿ, ਰਸਤਣ੍ਹਾਵਸੇਨ ਕਰਿਯਮਾਨਂ ਪਾਪਞ੍ਚਸ੍ਸ ਪਵਡ੍ਢਤੀਤਿ. ਇਤਿ ਸਾ ਤਾਪਸਂ ਗਰਹਨ੍ਤੀ ਏਵਮਾਹ.
ਕਾਮਂ ਅਪ੍ਪੋਸ੍ਸੁਕੋ ਭਵਾਤਿ ਏਕਂਸੇਨੇਵ ਅਮ੍ਬਪਕ੍ਕੇ ਨਿਰਾਲਯੋ ਹੋਹਿ. ਸੀਤਸ੍ਮਿਨ੍ਤਿ ਸੀਤਲੇ ਅਮ੍ਬਵਨੇ. ਤਨ੍ਤਿ ਏਵਂ ਵਦਮਾਨਾਵ ਦੇਵਤਾ ਤਾਪਸਂ ਆਲਿਙ੍ਗਿਤ੍ਵਾ ਉਰੇ ਨਿਪਜ੍ਜਾਪੇਤ੍ਵਾ ਆਕਾਸੇ ਪਕ੍ਖਨ੍ਤਾ ਤਿਯੋਜਨਿਕਂ ਦਿਬ੍ਬਅਮ੍ਬਵਨਂ ਦਿਸ੍ਵਾ ਸਕੁਣਸਦ੍ਦਞ੍ਚ ਸੁਤ੍ਵਾ ਤਾਪਸਸ੍ਸ ਆਚਿਕ੍ਖਨ੍ਤੀ ‘‘ਤ’’ਨ੍ਤਿ ਏਵਮਾਹ. ਪੁਪ੍ਫਰਸਮਤ੍ਤੇਭੀਤਿ ਪੁਪ੍ਫਰਸੇਨ ਮਤ੍ਤੇਹਿ. ਵਕ੍ਕਙ੍ਗੇਹੀਤਿ ਵਙ੍ਕਗੀਵੇਹਿ ਸਕੁਣੇਹਿ ਅਭਿਨਾਦਿਤਨ੍ਤਿ ਅਤ੍ਥੋ. ਇਦਾਨਿ ਤੇ ਸਕੁਣੇ ਆਚਿਕ੍ਖਨ੍ਤੀ ‘‘ਕੋਞ੍ਚਾ’’ਤਿਆਦਿਮਾਹ. ਤਤ੍ਥ ਦਿਵਿਯਾਤਿ ਦਿਬ੍ਯਾ. ਕੋਲਟ੍ਠਿਮਧੁਸਾਲ਼ਿਕਾਤਿ ਕੋਲਟ੍ਠਿਸਕੁਣਾ ਚ ਨਾਮ ਸੁਵਣ੍ਣਸਾਲ਼ਿਕਾ ਸਕੁਣਾ ਚ. ਏਤੇ ਦਿਬ੍ਬਸਕੁਣਾ ਏਤ੍ਥ ਵਸਨ੍ਤੀਤਿ ਦਸ੍ਸੇਤਿ. ਕੂਜਿਤਾ ਹਂਸਪੂਗੇਹੀਤਿ ਹਂਸਗਣੇਹਿ ਉਪਕੂਜਿਤਾ ਵਿਰਵਸਙ੍ਘਟ੍ਟਿਤਾ. ਕੋਕਿਲੇਤ੍ਥ ਪਬੋਧਰੇਤਿ ਏਤ੍ਥ ਅਮ੍ਬਵਨੇ ਕੋਕਿਲਾ ਵਸ੍ਸਨ੍ਤਿਯੋ ਅਤ੍ਤਾਨਂ ਪਬੋਧੇਨ੍ਤਿ ਞਾਪੇਨ੍ਤਿ. ਅਮ੍ਬੇਤ੍ਥਾਤਿ ਅਮ੍ਬਾ ਏਤ੍ਥ. ਵਿਪ੍ਪਸਾਖਗ੍ਗਾਤਿ ਫਲਭਾਰੇਨ ਓਨਮਿਤਸਾਖਗ੍ਗਾ. ਪਲਾਲਖਲਸਨ੍ਨਿਭਾਤਿ ਪੁਪ੍ਫਸਨ੍ਨਿਚਯੇਨ ਸਾਲਿਪਲਾਲਖਲਸਦਿਸਾ. ਪਕ੍ਕਤਾਲਵਿਲਮ੍ਬਿਨੋਤਿ ਪਕ੍ਕਤਾਲਫਲਵਿਲਮ੍ਬਿਨੋ. ਏਵਰੂਪਾ ਰੁਕ੍ਖਾ ਚ ਏਤ੍ਥ ਅਤ੍ਥੀਤਿ ਅਮ੍ਬਵਨਂ ਵਣ੍ਣੇਤਿ.
ਵਣ੍ਣਯਿਤ੍ਵਾ ਚ ਪਨ ਤਾਪਸਂ ਤਤ੍ਥ ਓਤਾਰੇਤ੍ਵਾ ‘‘ਇਮਸ੍ਮਿਂ ਅਮ੍ਬਵਨੇ ਅਮ੍ਬਾਨਿ ਖਾਦਨ੍ਤੋ ਅਤ੍ਤਨੋ ਤਣ੍ਹਂ ਪੂਰੇਹੀ’’ਤਿ ਵਤ੍ਵਾ ਪਕ੍ਕਾਮਿ. ਤਾਪਸੋ ਅਮ੍ਬਾਨਿ ਖਾਦਿਤ੍ਵਾ ਤਣ੍ਹਂ ਪੂਰੇਤ੍ਵਾ ਵਿਸ੍ਸਮਿਤ੍ਵਾ ਅਮ੍ਬਵਨੇ ਵਿਚਰਨ੍ਤੋ ਤਂ ਪੇਤਂ ਦੁਕ੍ਖਂ ਅਨੁਭਵਨ੍ਤਂ ਦਿਸ੍ਵਾ ਕਿਞ੍ਚਿ ਵਤ੍ਤੁਂ ਨਾਸਕ੍ਖਿ. ਸੂਰਿਯੇ ਪਨ ਅਤ੍ਥਙ੍ਗਤੇ ਤਂ ਨਾਟਕਿਤ੍ਥਿਪਰਿਵਾਰਿਤਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਮਾਨਂ ਦਿਸ੍ਵਾ ਤਿਸ੍ਸੋ ਗਾਥਾ ਅਭਾਸਿ –
੨੮. ‘‘ਮਾਲੀ ਕਿਰਿਟੀ ਕਾਯੂਰੀ, ਅਙ੍ਗਦੀ ਚਨ੍ਦਨੁਸ੍ਸਦੋ;
ਰਤ੍ਤਿਂ ਤ੍ਵਂ ਪਰਿਚਾਰੇਸਿ, ਦਿਵਾ ਵੇਦੇਸਿ ਵੇਦਨਂ.
੨੯. ‘‘ਸੋਲ਼ਸਿਤ੍ਥਿਸਹਸ੍ਸਾਨਿ, ਯਾ ਤੇਮਾ ਪਰਿਚਾਰਿਕਾ;
ਏਵਂ ਮਹਾਨੁਭਾਵੋਸਿ, ਅਬ੍ਭੁਤੋ ਲੋਮਹਂਸਨੋ.
੩੦. ‘‘ਕਿਂ ਕਮ੍ਮਮਕਰੀ ਪੁਬ੍ਬੇ, ਪਾਪਂ ਅਤ੍ਤਦੁਖਾਵਹਂ;
ਯਂ ਕਰਿਤ੍ਵਾ ਮਨੁਸ੍ਸੇਸੁ, ਪਿਟ੍ਠਿਮਂਸਾਨਿ ਖਾਦਸੀ’’ਤਿ.
ਤਤ੍ਥ ਮਾਲੀਤਿ ਦਿਬ੍ਬਮਾਲਾਧਰੋ. ਕਿਰਿਟੀਤਿ ਦਿਬ੍ਬਵੇਠਨਧਰੋ. ਕਾਯੂਰੀਤਿ ਦਿਬ੍ਬਾਭਰਣਪਟਿਮਣ੍ਡਿਤੋ. ਅਙ੍ਗਦੀਤਿ ਦਿਬ੍ਬਙ੍ਗਦਸਮਨ੍ਨਾਗਤੋ. ਚਨ੍ਦਨੁਸ੍ਸਦੋਤਿ ਦਿਬ੍ਬਚਨ੍ਦਨਵਿਲਿਤ੍ਤੋ. ਪਰਿਚਾਰੇਸੀਤਿ ਇਨ੍ਦ੍ਰਿਯਾਨਿ ਦਿਬ੍ਬਵਿਸਯੇਸੁ ਚਾਰੇਸਿ. ਦਿਵਾਤਿ ਦਿਵਾ ਪਨ ਮਹਾਦੁਕ੍ਖਂ ਅਨੁਭੋਸਿ. ਯਾ ਤੇਮਾਤਿ ਯਾ ਤੇ ਇਮਾ. ਅਬ੍ਭੁਤੋਤਿ ਮਨੁਸ੍ਸਲੋਕੇ ਅਭੂਤਪੁਬ੍ਬੋ. ਲੋਮਹਂਸਨੋਤਿ ਯੇ ਤਂ ਪਸ੍ਸਨ੍ਤਿ, ਤੇਸਂ ਲੋਮਾਨਿ ਹਂਸਨ੍ਤਿ. ਪੁਬ੍ਬੇਤਿ ਪੁਰਿਮਭਵੇ. ਅਤ੍ਤਦੁਖਾਵਹਨ੍ਤਿ ਅਤ੍ਤਨੋ ਦੁਕ੍ਖਾਵਹਂ. ਮਨੁਸ੍ਸੇਸੂਤਿ ਯਂ ਮਨੁਸ੍ਸਲੋਕੇ ਕਤ੍ਵਾ ਇਦਾਨਿ ਅਤ੍ਤਨੋ ਪਿਟ੍ਠਿਮਂਸਾਨਿ ਖਾਦਸੀਤਿ ਪੁਚ੍ਛਤਿ.
ਪੇਤੋ ਤਂ ਸਞ੍ਜਾਨਿਤ੍ਵਾ ‘‘ਤੁਮ੍ਹੇ ਮਂ ਨ ਸਞ੍ਜਾਨਾਥ, ਅਹਂ ਤੁਮ੍ਹਾਕਂ ਪੁਰੋਹਿਤੋ ਅਹੋਸਿਂ, ਇਦਂ ਮੇ ਰਤ੍ਤਿਂ ਸੁਖਾਨੁਭਵਨਂ ਤੁਮ੍ਹੇ ਨਿਸ੍ਸਾਯ ਕਤਸ੍ਸ ਉਪਡ੍ਢੂਪੋਸਥਸ੍ਸ ਨਿਸ੍ਸਨ੍ਦੇਨ ਲਦ੍ਧਂ, ਦਿਵਾ ਦੁਕ੍ਖਾਨੁਭਵਨਂ ਪਨ ਮਯਾ ਪਕਤਸ੍ਸ ਪਾਪਸ੍ਸੇਵ ਨਿਸ੍ਸਨ੍ਦੇਨ. ਅਹਞ੍ਹਿ ਤੁਮ੍ਹੇਹਿ ਵਿਨਿਚ੍ਛਯੇ ਠਪਿਤੋ ਕੂਟਡ੍ਡਂ ਕਰਿਤ੍ਵਾ ਲਞ੍ਜਂ ਗਹੇਤ੍ਵਾ ਪਰਪਿਟ੍ਠਿਮਂਸਿਕੋ ਹੁਤ੍ਵਾ ਤਸ੍ਸ ਦਿਵਾ ਕਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਇਦਂ ਦੁਕ੍ਖਂ ਅਨੁਭਵਾਮੀ’’ਤਿ ਵਤ੍ਵਾ ਗਾਥਾਦ੍ਵਯਮਾਹ –
੩੧. ‘‘ਅਜ੍ਝੇਨਾਨਿ ਪਟਿਗ੍ਗਯ੍ਹ, ਕਾਮੇਸੁ ਗਧਿਤੋ ਅਹਂ;
ਅਚਰਿਂ ਦੀਘਮਦ੍ਧਾਨਂ, ਪਰੇਸਂ ਅਹਿਤਾਯਹਂ.
੩੨. ‘‘ਯੋ ਪਿਟ੍ਠਿਮਂਸਿਕੋ ਹੋਤਿ, ਏਵਂ ਉਕ੍ਕਚ੍ਚ ਖਾਦਤਿ;
ਯਥਾਹਂ ਅਜ੍ਜ ਖਾਦਾਮਿ, ਪਿਟ੍ਠਿਮਂਸਾਨਿ ਅਤ੍ਤਨੋ’’ਤਿ.
ਤਤ੍ਥ ਅਜ੍ਝੇਨਾਨੀਤਿ ਵੇਦੇ. ਪਟਿਗ੍ਗਯ੍ਹਾਤਿ ਪਟਿਗ੍ਗਹੇਤ੍ਵਾ ਅਧੀਯਿਤ੍ਵਾ. ਅਚਰਿਨ੍ਤਿ ਪਟਿਪਜ੍ਜਿਂ. ਅਹਿਤਾਯਹਨ੍ਤਿ ਅਹਿਤਾਯ ਅਤ੍ਥਨਾਸਨਾਯ ਅਹਂ. ਯੋ ਪਿਟ੍ਠਿਮਂਸਿਕੋਤਿ ਯੋ ਪੁਗ੍ਗਲੋ ਪਰੇਸਂ ਪਿਟ੍ਠਿਮਂਸਖਾਦਕੋ ਪਿਸੁਣੋ ਹੋਤਿ. ਉਕ੍ਕਚ੍ਚਾਤਿ ਉਕ੍ਕਨ੍ਤਿਤ੍ਵਾ.
ਇਦਞ੍ਚ ਪਨ ਵਤ੍ਵਾ ਤਾਪਸਂ ਪੁਚ੍ਛਿ – ‘‘ਤੁਮ੍ਹੇ ਕਥਂ ਇਧਾਗਤਾ’’ਤਿ. ਤਾਪਸੋ ਸਬ੍ਬਂ ਵਿਤ੍ਥਾਰੇਨ ਕਥੇਸਿ. ‘‘ਇਦਾਨਿ ਪਨ, ਭਨ੍ਤੇ, ਇਧੇਵ ਵਸਿਸ੍ਸਥ, ਗਮਿਸ੍ਸਥਾ’’ਤਿ. ‘‘ਨ ਵਸਿਸ੍ਸਾਮਿ, ਅਸ੍ਸਮਪਦਂਯੇਵ ਗਮਿਸ੍ਸਾਮੀ’’ਤਿ. ਪੇਤੋ ‘‘ਸਾਧੁ, ਭਨ੍ਤੇ, ਅਹਂ ਵੋ ਨਿਬਦ੍ਧਂ ਅਮ੍ਬਪਕ੍ਕੇਨ ਉਪਟ੍ਠਹਿਸ੍ਸਾਮੀ’’ਤਿ ਵਤ੍ਵਾ ਅਤ੍ਤਨੋ ਆਨੁਭਾਵੇਨ ਅਸ੍ਸਮਪਦੇਯੇਵ ਓਤਾਰੇਤ੍ਵਾ ‘‘ਅਨੁਕ੍ਕਣ੍ਠਾ ਇਧੇਵ ਵਸਥਾ’’ਤਿ ਪਟਿਞ੍ਞਂ ਗਹੇਤ੍ਵਾ ਗਤੋ. ਤਤੋ ਪਟ੍ਠਾਯ ਨਿਬਦ੍ਧਂ ਅਮ੍ਬਪਕ੍ਕੇਨ ਉਪਟ੍ਠਹਿ. ਤਾਪਸੋ ਤਂ ਪਰਿਭੁਞ੍ਜਨ੍ਤੋ ਕਸਿਣਪਰਿਕਮ੍ਮਂ ਕਤ੍ਵਾ ਝਾਨਾਭਿਞ੍ਞਾ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.
ਸਤ੍ਥਾ ਉਪਾਸਕਾਨਂ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਕੇਚਿ ਸੋਤਾਪਨ੍ਨਾ ਅਹੇਸੁਂ, ਕੇਚਿ ਸਕਦਾਗਾਮਿਨੋ, ਕੇਚਿ ਅਨਾਗਾਮਿਨੋ. ਤਦਾ ਦੇਵਧੀਤਾ ਉਪ੍ਪਲਵਣ੍ਣਾ ਅਹੋਸਿ, ਤਾਪਸੋ ਪਨ ਅਹਮੇਵ ਅਹੋਸਿਨ੍ਤਿ.
ਕਿਂਛਨ੍ਦਜਾਤਕਵਣ੍ਣਨਾ ਪਠਮਾ.
[੫੧੨] ੨. ਕੁਮ੍ਭਜਾਤਕਵਣ੍ਣਨਾ
ਕੋ ਪਾਤੁਰਾਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਵਿਸਾਖਾਯ ਸਹਾਯਿਕਾ ਸੁਰਾਪੀਤਾ ਪਞ੍ਚਸਤਾ ਇਤ੍ਥਿਯੋ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਸੁਰਾਛਣੇ ਸਙ੍ਘੁਟ੍ਠੇ ਤਾ ਪਞ੍ਚਸਤਾ ਇਤ੍ਥਿਯੋ ਸਾਮਿਕਾਨਂ ਛਣੇ ਕੀਲ਼ਮਾਨਾਨਂ ਤਿਕ੍ਖਸੁਰਂ ਪਟਿਯਾਦੇਤ੍ਵਾ ‘‘ਛਣਂ ਕੀਲ਼ਿਸ੍ਸਾਮਾ’’ਤਿ ਸਬ੍ਬਾਪਿ ਵਿਸਾਖਾਯ ਸਨ੍ਤਿਕਂ ਗਨ੍ਤ੍ਵਾ ‘‘ਸਹਾਯਿਕੇ ਛਣਂ ਕੀਲ਼ਿਸ੍ਸਾਮਾ’’ਤਿ ਵਤ੍ਵਾ ‘‘ਅਯਂ ਸੁਰਾਛਣੋ, ਨ ਅਹਂ ਸੁਰਂ ਪਿਵਿਸ੍ਸਾਮੀ’’ਤਿ ਵੁਤ੍ਤੇ – ‘‘ਤੁਮ੍ਹੇ ਸਮ੍ਮਾਸਮ੍ਬੁਦ੍ਧਸ੍ਸ ਦਾਨਂ ਦੇਥ, ਮਯਂ ਛਣਂ ਕਰਿਸ੍ਸਾਮਾ’’ਤਿ ਆਹਂਸੁ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਾ ਉਯ੍ਯੋਜੇਤ੍ਵਾ ਸਤ੍ਥਾਰਂ ਨਿਮਨ੍ਤਾਪੇਤ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਬਹੁਂ ਗਨ੍ਧਮਾਲਂ ਆਦਾਯ ਸਾਯਨ੍ਹਸਮਯੇ ਧਮ੍ਮਕਥਂ ਸੋਤੁਂ ਤਾਹਿ ਪਰਿਵੁਤਾ ਜੇਤਵਨਂ ਅਗਮਾਸਿ. ਤਾ ਪਨਿਤ੍ਥਿਯੋ ਸੁਰਂ ਪਿਵਮਾਨਾਵ ਤਾਯ ਸਦ੍ਧਿਂ ਗਨ੍ਤ੍ਵਾ ਦ੍ਵਾਰਕੋਟ੍ਠਕੇ ਠਤ੍ਵਾ ਸੁਰਂ ਪਿਵਿਤ੍ਵਾਵ ਤਾਯ ਸਦ੍ਧਿਂ ਸਤ੍ਥੁ ਸਨ੍ਤਿਕਂ ਅਗਮਂਸੁ. ਵਿਸਾਖਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ, ਇਤਰਾਸੁ ਏਕਚ੍ਚਾ ਸਤ੍ਥੁ ਸਨ੍ਤਿਕੇਯੇਵ ਨਚ੍ਚਿਂਸੁ, ਏਕਚ੍ਚਾ ਗਾਯਿਂਸੁ, ਏਕਚ੍ਚਾ ਹਤ੍ਥਕੁਕ੍ਕੁਚ੍ਚਪਾਦਕੁਕ੍ਕੁਚ੍ਚਾਨਿ, ਏਕਚ੍ਚਾ ਕਲਹਂ ਅਕਂਸੁ.
ਸਤ੍ਥਾ ਤਾਸਂ ਸਂਵੇਗਜਨਨਤ੍ਥਾਯ ਭਮੁਕਲੋਮਤੋ ਰਂਸੀ ਵਿਸ੍ਸਜ੍ਜੇਸਿ, ਅਨ੍ਧਕਾਰਤਿਮਿਸਾ ਅਹੋਸਿ. ਤਾ ਭੀਤਾ ਅਹੇਸੁਂ ਮਰਣਭਯਤਜ੍ਜਿਤਾ, ਤੇਨ ਤਾਸਂ ਸੁਰਾ ਜੀਰਿ. ਸਤ੍ਥਾ ਨਿਸਿਨ੍ਨਪਲ੍ਲਙ੍ਕੇ ਅਨ੍ਤਰਹਿਤੋ ਸਿਨੇਰੁਮੁਦ੍ਧਨਿ ਠਤ੍ਵਾ ਉਣ੍ਣਲੋਮਤੋ ਰਂਸੀ ਵਿਸ੍ਸਜ੍ਜੇਸਿ, ਚਨ੍ਦਸੂਰਿਯਸਹਸ੍ਸੁਗ੍ਗਮਨਂ ਵਿਯ ਅਹੋਸਿ. ਸਤ੍ਥਾ ਤਤ੍ਥ ਠਿਤੋਵ ਤਾਸਂ ਸਂਵੇਗਜਨਨਤ੍ਥਾਯ –
‘‘ਕੋ ਨੁ ਹਾਸੋ ਕਿਮਾਨਨ੍ਦੋ, ਨਿਚ੍ਚਂ ਪਜ੍ਜਲਿਤੇ ਸਤਿ;
ਅਨ੍ਧਕਾਰੇਨ ਓਨਦ੍ਧਾ, ਪਦੀਪਂ ਨ ਗਵੇਸਥਾ’’ਤਿ. (ਧ. ਪ. ੧੪੬) –
ਇਮਂ ਗਾਥਮਾਹ. ਗਾਥਾਪਰਿਯੋਸਾਨੇ ਤਾ ਪਞ੍ਚਸਤਾਪਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ. ਸਤ੍ਥਾ ਆਗਨ੍ਤ੍ਵਾ ਗਨ੍ਧਕੁਟਿਛਾਯਾਯ ਬੁਦ੍ਧਾਸਨੇ ਨਿਸੀਦਿ. ਅਥ ਨਂ ਵਿਸਾਖਾ ਵਨ੍ਦਿਤ੍ਵਾ, ‘‘ਭਨ੍ਤੇ, ਇਦਂ ਹਿਰੋਤ੍ਤਪ੍ਪਭੇਦਕਂ ਸੁਰਾਪਾਨਂ ਨਾਮ ਕਦਾ ਉਪ੍ਪਨ੍ਨ’’ਨ੍ਤਿ ਪੁਚ੍ਛਿ. ਸੋ ਤਸ੍ਸਾ ਆਚਿਕ੍ਖਨ੍ਤੋ ਅਤੀਤਂ ਆਹਰਿ.
ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਏਕੋ ਕਾਸਿਰਟ੍ਠਵਾਸੀ ਸੁਰੋ ਨਾਮ ਵਨਚਰਕੋ ਭਣ੍ਡਪਰਿਯੇਸਨਤ੍ਥਾਯ ਹਿਮਵਨ੍ਤਂ ਅਗਮਾਸਿ. ਤਤ੍ਥੇਕੋ ਰੁਕ੍ਖੋ ਉਗ੍ਗਨ੍ਤ੍ਵਾ ਪੋਰਿਸਮਤ੍ਤੇ ਠਾਨੇ ਤਿਧਾਕਪ੍ਪੋ ਅਹੋਸਿ. ਤਸ੍ਸ ਤਿਣ੍ਣਂ ਕਪ੍ਪਾਨਂ ਅਨ੍ਤਰੇ ਚਾਟਿਪ੍ਪਮਾਣੋ ਆਵਾਟੋ ਅਹੋਸਿ. ਸੋ ਦੇਵੇ ਵਸ੍ਸਨ੍ਤੇ ਉਦਕੇਨ ਪੂਰਿਤੋ, ਤਂ ਪਰਿਵਾਰੇਤ੍ਵਾ ਹਰੀਤਕੀ ਆਮਲਕੀ ਮਰਿਚਗਚ੍ਛੋ ਚ ਅਹੋਸਿ, ਤੇਸਂ ਪਕ੍ਕਾਨਿ ਫਲਾਨਿ ਛਿਜ੍ਜਿਤ੍ਵਾ ਤਤ੍ਥ ਪਤਨ੍ਤਿ. ਤਸ੍ਸਾਵਿਦੂਰੇ ਸਯਂਜਾਤਸਾਲਿ ਜਾਤੋ, ਤਤੋ ਸੁਵਕਾ ਸਾਲਿਸੀਸਾਨਿ ਆਹਰਿਤ੍ਵਾ ਤਸ੍ਮਿਂ ਰੁਕ੍ਖੇ ਨਿਸੀਦਿਤ੍ਵਾ ਖਾਦਨ੍ਤਿ. ਤੇਸਂ ਖਾਦਮਾਨਾਨਂ ਸਾਲੀਪਿ ਤਣ੍ਡੁਲਾਪਿ ਤਤ੍ਥ ਪਤਨ੍ਤਿ. ਇਤਿ ਤਂ ਉਦਕਂ ਸੂਰਿਯਸਨ੍ਤਾਪੇਨ ਪਚ੍ਚਮਾਨਂ ਰਸਂ ਲੋਹਿਤਵਣ੍ਣਂ ਅਹੋਸਿ. ਨਿਦਾਘਸਮਯੇ ਪਿਪਾਸਿਤਾ ਸਕੁਣਗਣਾ ਆਗਨ੍ਤ੍ਵਾ ਤਂ ਪਿਵਿਤ੍ਵਾ ਮਤ੍ਤਾ ਪਰਿਵਤ੍ਤਿਤ੍ਵਾ ਰੁਕ੍ਖਮੂਲੇ ਪਤਿਂਸੁ, ਤਸ੍ਮਿਂ ਥੋਕਂ ਨਿਦ੍ਦਾਯਿਤ੍ਵਾ ਵਿਕੂਜਮਾਨਾ ਪਕ੍ਕਮਨ੍ਤਿ. ਰੁਕ੍ਖਸੁਨਖਮਕ੍ਕਟਾਦੀਸੁਪਿ ਏਸੇਵ ਨਯੋ. ਵਨਚਰਕੋ ਤਂ ਦਿਸ੍ਵਾ ‘‘ਸਚੇ ਇਦਂ ਵਿਸਂ ਭਵੇਯ੍ਯ, ਇਮੇ ਮਰੇਯ੍ਯੁਂ, ਇਮੇ ਪਨ ਥੋਕਂ ਨਿਦ੍ਦਾਯਿਤ੍ਵਾ ਯਥਾਸੁਖਂ ਗਚ੍ਛਨ੍ਤਿ, ਨਯਿਦਂ ਵਿਸ’’ਨ੍ਤਿ ਸਯਂ ਪਿਵਿਤ੍ਵਾ ਮਤ੍ਤੋ ਹੁਤ੍ਵਾ ਮਂਸਂ ਖਾਦਿਤੁਕਾਮੋ ਅਹੋਸਿ. ਤਤੋ ਅਗ੍ਗਿਂ ਕਤ੍ਵਾ ਰੁਕ੍ਖਮੂਲੇ ਪਤਿਤੇ ਤਿਤ੍ਤਿਰਕੁਕ੍ਕੁਟਾਦਯੋ ਮਾਰੇਤ੍ਵਾ ਮਂਸਂ ਅਙ੍ਗਾਰੇ ਪਚਿਤ੍ਵਾ ਏਕੇਨ ਹਤ੍ਥੇਨ ਨਚ੍ਚਨ੍ਤੋ ਏਕੇਨ ਮਂਸਂ ਖਾਦਨ੍ਤੋ ਏਕਾਹਦ੍ਵੀਹਂ ਤਤ੍ਥੇਵ ਅਹੋਸਿ.
ਤਤੋ ਪਨ ਅਵਿਦੂਰੇ ਏਕੋ ਵਰੁਣੋ ਨਾਮ ਤਾਪਸੋ ਵਸਤਿ. ਵਨਚਰਕੋ ਅਞ੍ਞਦਾਪਿ ਤਸ੍ਸ ਸਨ੍ਤਿਕਂ ਗਚ੍ਛਤਿ. ਅਥਸ੍ਸ ਏਤਦਹੋਸਿ – ‘‘ਇਦਂ ਪਾਨਂ ਤਾਪਸੇਨ ਸਦ੍ਧਿਂ ਪਿਵਿਸ੍ਸਾਮੀ’’ਤਿ. ਸੋ ਏਕਂ ਵੇਲ਼ੁਨਾਲ਼ਿਕਂ ਪੂਰੇਤ੍ਵਾ ਪਕ੍ਕਮਂਸੇਨ ਸਦ੍ਧਿਂ ਆਹਰਿਤ੍ਵਾ ਪਣ੍ਣਸਾਲਂ ਗਨ੍ਤ੍ਵਾ, ‘‘ਭਨ੍ਤੇ, ਇਮਂ ਪਿਵਥਾ’’ਤਿ ਵਤ੍ਵਾ ਉਭੋਪਿ ਮਂਸਂ ਖਾਦਨ੍ਤਾ ਪਿਵਿਂਸੁ. ਇਤਿ ਸੁਰੇਨ ਚ ਵਰੁਣੇਨ ਚ ਦਿਟ੍ਠਤ੍ਤਾ ਤਸ੍ਸ ਪਾਨਸ੍ਸ ‘‘ਸੁਰਾ’’ਤਿ ਚ ‘‘ਵਰੁਣਾ’’ਤਿ ਚ ਨਾਮਂ ਜਾਤਂ. ਤੇ ਉਭੋਪਿ ‘‘ਅਤ੍ਥੇਸੋ ਉਪਾਯੋ’’ਤਿ ਵੇਲ਼ੁਨਾਲ਼ਿਯੋ ਪੂਰੇਤ੍ਵਾ ਕਾਜੇਨਾਦਾਯ ਪਚ੍ਚਨ੍ਤਨਗਰਂ ਗਨ੍ਤ੍ਵਾ ‘‘ਪਾਨਕਾਰਕਾ ਨਾਮ ਆਗਤਾ’’ਤਿ ਰਞ੍ਞੋ ਆਰੋਚਾਪੇਸੁਂ. ਰਾਜਾ ਨੇ ਪਕ੍ਕੋਸਾਪੇਸਿ, ਤੇ ਤਸ੍ਸ ਪਾਨਂ ਉਪਨੇਸੁਂ. ਰਾਜਾ ਦ੍ਵੇ ਤਯੋ ਵਾਰੇ ਪਿਵਿਤ੍ਵਾ ਮਜ੍ਜਿ, ਤਸ੍ਸ ਤਂ ਏਕਾਹਦ੍ਵੀਹਮਤ੍ਤਮੇਵ ਅਹੋਸਿ. ਅਥ ਨੇ ‘‘ਅਞ੍ਞਮ੍ਪਿ ਅਤ੍ਥੀ’’ਤਿ ਪੁਚ੍ਛਿ. ‘‘ਅਤ੍ਥਿ, ਦੇਵਾ’’ਤਿ. ‘‘ਕੁਹਿ’’ਨ੍ਤਿ? ‘‘ਹਿਮਵਨ੍ਤੇ ਦੇਵਾ’’ਤਿ. ‘‘ਤੇਨ ਹਿ ਆਨੇਥਾ’’ਤਿ. ਤੇ ਗਨ੍ਤ੍ਵਾ ਏਕਦ੍ਵੇ ਵਾਰੇ ਆਨੇਤ੍ਵਾ ‘‘ਨਿਬਦ੍ਧਂ ਗਨ੍ਤੁਂ ਨ ਸਕ੍ਖਿਸ੍ਸਾਮਾ’’ਤਿ ਸਮ੍ਭਾਰੇ ਸਲ੍ਲਕ੍ਖੇਤ੍ਵਾ ਤਸ੍ਸ ਰੁਕ੍ਖਸ੍ਸ ਤਚਂ ਆਦਿਂ ਕਤ੍ਵਾ ਸਬ੍ਬਸਮ੍ਭਾਰੇ ਪਕ੍ਖਿਪਿਤ੍ਵਾ ਨਗਰੇ ਸੁਰਂ ਕਰਿਂਸੁ. ਨਾਗਰਾ ਸੁਰਂ ਪਿਵਿਤ੍ਵਾ ਪਮਾਦਂ ਆਪਨ੍ਨਾ ਦੁਗ੍ਗਤਾ ਅਹੇਸੁਂ, ਨਗਰਂ ਸੁਞ੍ਞਂ ਵਿਯ ਅਹੋਸਿ, ਤੇਨ ਪਾਨਕਾਰਕਾ ਤਤੋ ਪਲਾਯਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ‘‘ਪਾਨਕਾਰਕਾ ਆਗਤਾ’’ਤਿ ਰਞ੍ਞੋ ਆਰੋਚਾਪੇਸੁਂ. ਰਾਜਾ ਨੇ ਪਕ੍ਕੋਸਾਪੇਤ੍ਵਾ ਪਰਿਬ੍ਬਯਂ ਅਦਾਸਿ. ਤੇ ਤਤ੍ਥਾਪਿ ਸੁਰਂ ਅਕਂਸੁ, ਤਮ੍ਪਿ ਨਗਰਂ ਤਥੇਵ ਵਿਨਸ੍ਸਿ, ਤਤੋ ਪਲਾਯਿਤ੍ਵਾ ਸਾਕੇਤਂ, ਸਾਕੇਤਤੋ ਸਾਵਤ੍ਥਿਂ ਅਗਮਂਸੁ.
ਤਦਾ ਸਾਵਤ੍ਥਿਯਂ ਸਬ੍ਬਮਿਤ੍ਤੋ ਨਾਮ ਰਾਜਾ ਅਹੋਸਿ. ਸੋ ਤੇਸਂ ਸਙ੍ਗਹਂ ਕਤ੍ਵਾ ‘‘ਕੇਨ ਵੋ ਅਤ੍ਥੋ’’ਤਿ ਪੁਚ੍ਛਿਤ੍ਵਾ ‘‘ਸਮ੍ਭਾਰਮੂਲੇਨ ਚੇਵ ਸਾਲਿਪਿਟ੍ਠੇਨ ਚ ਪਞ੍ਚਹਿ ਚਾਟਿਸਤੇਹਿ ਚਾ’’ਤਿ ਵੁਤ੍ਤੇ ਸਬ੍ਬਂ ਦਾਪੇਸਿ. ਤੇ ਪਞ੍ਚਸੁ ਚਾਟਿਸਤੇਸੁ ਸੁਰਂ ਸਣ੍ਠਾਪੇਤ੍ਵਾ ਮੂਸਿਕਭਯੇਨ ਚਾਟਿਰਕ੍ਖਣਤ੍ਥਾਯ ਏਕੇਕਾਯ ਚਾਟਿਯਾ ਸਨ੍ਤਿਕੇ ਏਕੇਕਂ ਬਿਲ਼ਾਰਂ ਬਨ੍ਧਿਂਸੁ. ਤੇ ਪਚ੍ਚਿਤ੍ਵਾ ਉਤ੍ਤਰਣਕਾਲੇ ਚਾਟਿਕੁਚ੍ਛੀਸੁ ਪਗ੍ਘਰਨ੍ਤਂ ਸੁਰਂ ਪਿਵਿਤ੍ਵਾ ਮਤ੍ਤਾ ਨਿਦ੍ਦਾਯਿਂਸੁ. ਮੂਸਿਕਾ ਆਗਨ੍ਤ੍ਵਾ ਤੇਸਂ ਕਣ੍ਣਨਾਸਿਕਦਾਠਿਕਨਙ੍ਗੁਟ੍ਠੇ ਖਾਦਿਤ੍ਵਾ ਅਗਮਂਸੁ. ‘‘ਬਿਲ਼ਾਰਾ ਸੁਰਂ ਪਿਵਿਤ੍ਵਾ ਮਤਾ’’ਤਿ ਆਯੁਤ੍ਤਕਪੁਰਿਸਾ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਵਿਸਕਾਰਕਾ ਏਤੇ ਭਵਿਸ੍ਸਨ੍ਤੀ’’ਤਿ ਤੇਸਂ ਦ੍ਵਿਨ੍ਨਮ੍ਪਿ ਜਨਾਨਂ ਸੀਸਾਨਿ ਛਿਨ੍ਦਾਪੇਸਿ. ਤੇ ‘‘ਸੁਰਂ ਦੇਵ, ਮਧੁਰਂ ਦੇਵਾ’’ਤਿ ਵਿਰਵਨ੍ਤਾਵ ਮਰਿਂਸੁ. ਰਾਜਾ ਤੇ ਮਾਰਾਪੇਤ੍ਵਾ ‘‘ਚਾਟਿਯੋ ਭਿਨ੍ਦਥਾ’’ਤਿ ਆਣਾਪੇਸਿ. ਬਿਲ਼ਾਰਾਪਿ ਸੁਰਾਯ ਜਿਣ੍ਣਾਯ ਉਟ੍ਠਹਿਤ੍ਵਾ ਕੀਲ਼ਨ੍ਤਾ ਵਿਚਰਿਂਸੁ, ਤੇ ਦਿਸ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਸਚੇ ਵਿਸਂ ਅਸ੍ਸ, ਏਤੇ ਮਰੇਯ੍ਯੁਂ, ਮਧੁਰੇਨੇਵ ਭਵਿਤਬ੍ਬਂ, ਪਿਵਿਸ੍ਸਾਮਿ ਨ’’ਨ੍ਤਿ ਨਗਰਂ ਅਲਙ੍ਕਾਰਾਪੇਤ੍ਵਾ ਰਾਜਙ੍ਗਣੇ ਮਣ੍ਡਪਂ ਕਾਰਾਪੇਤ੍ਵਾ ਅਲਙ੍ਕਤਮਣ੍ਡਪੇ ਸਮੁਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲਙ੍ਕੇ ਨਿਸੀਦਿਤ੍ਵਾ ਅਮਚ੍ਚਗਣਪਰਿਵੁਤੋ ਸੁਰਂ ਪਾਤੁਂ ਆਰਭਿ.
ਤਦਾ ਸਕ੍ਕੋ ਦੇਵਰਾਜਾ ‘‘ਕੇ ਨੁ ਖੋ ਮਾਤੁਪਟ੍ਠਾਨਾਦੀਸੁ ਅਪ੍ਪਮਤ੍ਤਾ ਤੀਣਿ ਸੁਚਰਿਤਾਨਿ ਪੂਰੇਨ੍ਤੀ’’ਤਿ ਲੋਕਂ ਵੋਲੋਕੇਨ੍ਤੋ ਤਂ ਰਾਜਾਨਂ ਸੁਰਂ ਪਾਤੁਂ ਨਿਸਿਨ੍ਨਂ ਦਿਸ੍ਵਾ ‘‘ਸਚਾਯਂ ਸੁਰਂ ਪਿਵਿਸ੍ਸਤਿ, ਸਕਲਜਮ੍ਬੁਦੀਪੋ ਨਸ੍ਸਿਸ੍ਸਤਿ. ਯਥਾ ਨ ਪਿਵਿਸ੍ਸਤਿ, ਤਥਾ ਨਂ ਕਰਿਸ੍ਸਾਮੀ’’ਤਿ ਏਕਂ ਸੁਰਾਪੁਣ੍ਣਂ ਕੁਮ੍ਭਂ ਹਤ੍ਥਤਲੇ ਠਪੇਤ੍ਵਾ ਬ੍ਰਾਹ੍ਮਣਵੇਸੇਨਾਗਨ੍ਤ੍ਵਾ ਰਞ੍ਞੋ ਸਮ੍ਮੁਖਟ੍ਠਾਨੇ ਆਕਾਸੇ ਠਤ੍ਵਾ ‘‘ਇਮਂ ਕੁਮ੍ਭਂ ਕਿਣਾਥ, ਇਮਂ ਕੁਮ੍ਭਂ ਕਿਣਾਥਾ’’ਤਿ ਆਹ. ਸਬ੍ਬਮਿਤ੍ਤਰਾਜਾ ਤਂ ਤਥਾ ਵਦਨ੍ਤਂ ਆਕਾਸੇ ਠਿਤਂ ਦਿਸ੍ਵਾ ‘‘ਕੁਤੋ ਨੁ ਖੋ ਬ੍ਰਾਹ੍ਮਣੋ ਆਗਚ੍ਛਤੀ’’ਤਿ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –
੩੩. ‘‘ਕੋ ਪਾਤੁਰਾਸੀ ਤਿਦਿਵਾ ਨਭਮ੍ਹਿ, ਓਭਾਸਯਂ ਸਂਵਰਿਂ ਚਨ੍ਦਿਮਾਵ;
ਗਤ੍ਤੇਹਿ ਤੇ ਰਸ੍ਮਿਯੋ ਨਿਚ੍ਛਰਨ੍ਤਿ, ਸਤੇਰਤਾ ਵਿਜ੍ਜੁਰਿਵਨ੍ਤਲਿਕ੍ਖੇ.
੩੪. ‘‘ਸੋ ਛਿਨ੍ਨਵਾਤਂ ਕਮਸੀ ਅਘਮ੍ਹਿ, ਵੇਹਾਯਸਂ ਗਚ੍ਛਸਿ ਤਿਟ੍ਠਸੀ ਚ;
ਇਦ੍ਧੀ ਨੁ ਤੇ ਵਤ੍ਥੁਕਤਾ ਸੁਭਾਵਿਤਾ, ਅਨਦ੍ਧਗੂਨਂ ਅਪਿ ਦੇਵਤਾਨਂ.
੩੫. ‘‘ਵੇਹਾਯਸਂ ਗਮ੍ਮਮਾਗਮ੍ਮ ਤਿਟ੍ਠਸਿ, ਕੁਮ੍ਭਂ ਕਿਣਾਥਾਤਿ ਯਮੇਤਮਤ੍ਥਂ;
ਕੋ ਵਾ ਤੁਵਂ ਕਿਸ੍ਸ ਵਾ ਤਾਯ ਕੁਮ੍ਭੋ, ਅਕ੍ਖਾਹਿ ਮੇ ਬ੍ਰਾਹ੍ਮਣ ਏਤਮਤ੍ਥ’’ਨ੍ਤਿ.
ਤਤ੍ਥ ਕੋ ਪਾਤੁਰਾਸੀਤਿ ਕੁਤੋ ਪਾਤੁਭੂਤੋਸਿ, ਕੁਤੋ ਆਗਤੋਸੀਤਿ ਅਤ੍ਥੋ. ਤਿਦਿਵਾ ਨਭਮ੍ਹੀਤਿ ਕਿਂ ਤਾਵਤਿਂਸਭਵਨਾ ਆਗਨ੍ਤ੍ਵਾ ਇਧ ਨਭਮ੍ਹਿ ਆਕਾਸੇ ਪਾਕਟੋ ਜਾਤੋਸੀਤਿ ਪੁਚ੍ਛਤਿ. ਸਂਵਰਿਨ੍ਤਿ ਰਤ੍ਤਿਂ. ਸਤੇਰਤਾਤਿ ਏਵਂਨਾਮਿਕਾ. ਸੋਤਿ ਸੋ ਤ੍ਵਂ. ਛਿਨ੍ਨਵਾਤਨ੍ਤਿ ਵਲਾਹਕੋਪਿ ਤਾਵ ਵਾਤੇਨ ਕਮਤਿ, ਤਸ੍ਸ ਪਨ ਸੋਪਿ ਵਾਤੋ ਨਤ੍ਥਿ, ਤੇਨੇਵਮਾਹ. ਕਮਸੀਤਿ ਪਵਤ੍ਤੇਸਿ. ਅਘਮ੍ਹੀਤਿ ਅਪ੍ਪਟਿਘੇ ਆਕਾਸੇ. ਵਤ੍ਥੁਕਤਾਤਿ ਵਤ੍ਥੁ ਵਿਯ ਪਤਿਟ੍ਠਾ ਵਿਯ ਕਤਾ. ਅਨਦ੍ਧਗੂਨਂ ਅਪਿ ਦੇਵਤਾਨਨ੍ਤਿ ਯਾ ਪਦਸਾ ਅਦ੍ਧਾਨਂ ਅਗਮਨੇਨ ਅਨਦ੍ਧਗੂਨਂ ਦੇਵਤਾਨਂ ਇਦ੍ਧਿ, ਸਾ ਅਪਿ ਤਵ ਸੁਭਾਵਿਤਾਤਿ ਪੁਚ੍ਛਤਿ. ਵੇਹਾਯਸਂ ਗਮ੍ਮਮਾਗਮ੍ਮਾਤਿ ਆਕਾਸੇ ਪਵਤ੍ਤਂ ਪਦਵੀਤਿਹਾਰਂ ਪਟਿਚ੍ਚ ਨਿਸ੍ਸਾਯ. ‘‘ਤਿਟ੍ਠਸੀ’’ਤਿ ਇਮਸ੍ਸ ‘‘ਕੋ ਵਾ ਤੁਵ’’ਨ੍ਤਿ ਇਮਿਨਾ ਸਮ੍ਬਨ੍ਧੋ, ਏਵਂ ਤਿਟ੍ਠਮਾਨੋ ਕੋ ਵਾ ਤ੍ਵਨ੍ਤਿ ਅਤ੍ਥੋ. ਯਮੇਤਮਤ੍ਥਨ੍ਤਿ ਯਂ ਏਤਂ ਵਦਸਿ. ਇਮਸ੍ਸ ‘‘ਕਿਸ੍ਸ ਵਾ ਤਾਯ’’ਨ੍ਤਿ ਇਮਿਨਾ ਸਮ੍ਬਨ੍ਧੋ, ਯਂ ਏਤਂ ਕੁਮ੍ਭਂ ਕਿਣਾਥਾਤਿ ਵਦਸਿ, ਕਿਸ੍ਸ ਵਾ ਤੇ ਅਯਂ ਕੁਮ੍ਭੋਤਿ ਅਤ੍ਥੋ.
ਤਤੋ ਸਕ੍ਕੋ ‘‘ਤੇਨ ਹਿ ਸੁਣਾਹੀ’’ਤਿ ਵਤ੍ਵਾ ਸੁਰਾਯ ਦੋਸੇ ਦਸ੍ਸੇਨ੍ਤੋ ਆਹ –
੩੬. ‘‘ਨ ਸਪ੍ਪਿਕੁਮ੍ਭੋ ਨਪਿ ਤੇਲਕੁਮ੍ਭੋ, ਨ ਫਾਣਿਤਸ੍ਸ ਨ ਮਧੁਸ੍ਸ ਕੁਮ੍ਭੋ;
ਕੁਮ੍ਭਸ੍ਸ ਵਜ੍ਜਾਨਿ ਅਨਪ੍ਪਕਾਨਿ, ਦੋਸੇ ਬਹੂ ਕੁਮ੍ਭਗਤੇ ਸੁਣਾਥ.
੩੭. ‘‘ਗਲ਼ੇਯ੍ਯ ਯਂ ਪਿਤ੍ਵਾ ਪਤੇ ਪਪਾਤਂ, ਸੋਬ੍ਭਂ ਗੁਹਂ ਚਨ੍ਦਨਿਯੋਲ਼ਿਗਲ੍ਲਂ;
ਬਹੁਮ੍ਪਿ ਭੁਞ੍ਜੇਯ੍ਯ ਅਭੋਜਨੇਯ੍ਯਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੩੮. ‘‘ਯਂ ਪਿਤ੍ਵਾ ਚਿਤ੍ਤਸ੍ਮਿਂ ਅਨੇਸਮਾਨੋ, ਆਹਿਣ੍ਡਤੀ ਗੋਰਿਵ ਭਕ੍ਖਸਾਦੀ;
ਅਨਾਥਮਾਨੋ ਉਪਗਾਯਤਿ ਨਚ੍ਚਤਿ ਚ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੩੯. ‘‘ਯਂ ਵੇ ਪਿਵਿਤ੍ਵਾ ਅਚੇਲੋਵ ਨਗ੍ਗੋ, ਚਰੇਯ੍ਯ ਗਾਮੇ ਵਿਸਿਖਨ੍ਤਰਾਨਿ;
ਸਮ੍ਮੂਲ਼੍ਹਚਿਤ੍ਤੋ ਅਤਿਵੇਲਸਾਯੀ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੪੦. ‘‘ਯਂ ਪਿਤ੍ਵਾ ਉਟ੍ਠਾਯ ਪਵੇਧਮਾਨੋ, ਸੀਸਞ੍ਚ ਬਾਹੁਞ੍ਚ ਪਚਾਲਯਨ੍ਤੋ;
ਸੋ ਨਚ੍ਚਤੀ ਦਾਰੁਕਟਲ੍ਲਕੋਵ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੪੧. ‘‘ਯਂ ਵੇ ਪਿਵਿਤ੍ਵਾ ਅਗ੍ਗਿਦਡ੍ਢਾ ਸਯਨ੍ਤਿ, ਅਥੋ ਸਿਗਾਲੇਹਿਪਿ ਖਾਦਿਤਾਸੇ;
ਬਨ੍ਧਂ ਵਧਂ ਭੋਗਜਾਨਿਞ੍ਚੁਪੇਨ੍ਤਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੪੨. ‘‘ਯਂ ਪਿਤ੍ਵਾ ਭਾਸੇਯ੍ਯ ਅਭਾਸਨੇਯ੍ਯਂ, ਸਭਾਯਮਾਸੀਨੋ ਅਪੇਤਵਤ੍ਥੋ;
ਸਮ੍ਮਕ੍ਖਿਤੋ ਵਨ੍ਤਗਤੋ ਬ੍ਯਸਨ੍ਨੋ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੪੩. ‘‘ਯਂ ਵੇ ਪਿਵਿਤ੍ਵਾ ਉਕ੍ਕਟ੍ਠੋ ਆਵਿਲਕ੍ਖੋ, ਮਮੇਵ ਸਬ੍ਬਪਥਵੀਤਿ ਮਞ੍ਞੇ;
ਨ ਮੇ ਸਮੋ ਚਾਤੁਰਨ੍ਤੋਪਿ ਰਾਜਾ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੪੪. ‘‘ਮਾਨਾਤਿਮਾਨਾ ਕਲਹਾਨਿ ਪੇਸੁਣੀ, ਦੁਬ੍ਬਣ੍ਣਿਨੀ ਨਗ੍ਗਯਿਨੀ ਪਲਾਯਿਨੀ;
ਚੋਰਾਨ ਧੁਤ੍ਤਾਨ ਗਤੀ ਨਿਕੇਤੋ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੪੫. ‘‘ਇਦ੍ਧਾਨਿ ਫੀਤਾਨਿ ਕੁਲਾਨਿ ਅਸ੍ਸੁ, ਅਨੇਕਸਾਹਸ੍ਸਧਨਾਨਿ ਲੋਕੇ;
ਉਚ੍ਛਿਨ੍ਨਦਾਯਜ੍ਜਕਤਾਨਿਮਾਯ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੪੬. ‘‘ਧਞ੍ਞਂ ਧਨਂ ਰਜਤਂ ਜਾਤਰੂਪਂ, ਖੇਤ੍ਤਂ ਗਵਂ ਯਤ੍ਥ ਵਿਨਾਸਯਨ੍ਤਿ;
ਉਚ੍ਛੇਦਨੀ ਵਿਤ੍ਤਗਤਂ ਕੁਲਾਨਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੪੭. ‘‘ਯਂ ਵੇ ਪਿਤ੍ਵਾ ਦਿਤ੍ਤਰੂਪੋਵ ਪੋਸੋ, ਅਕ੍ਕੋਸਤਿ ਮਾਤਰਂ ਪਿਤਰਞ੍ਚ;
ਸਸ੍ਸੁਮ੍ਪਿ ਗਣ੍ਹੇਯ੍ਯ ਅਥੋਪਿ ਸੁਣ੍ਹਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੪੮. ‘‘ਯਂ ਵੇ ਪਿਤ੍ਵਾ ਦਿਤ੍ਤਰੂਪਾਵ ਨਾਰੀ, ਅਕ੍ਕੋਸਤੀ ਸਸ੍ਸੁਰਂ ਸਾਮਿਕਞ੍ਚ;
ਦਾਸਮ੍ਪਿ ਗਣ੍ਹੇ ਪਰਿਚਾਰਿਕਮ੍ਪਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੪੯. ‘‘ਯਂ ਵੇ ਪਿਵਿਤ੍ਵਾਨ ਹਨੇਯ੍ਯ ਪੋਸੋ, ਧਮ੍ਮੇ ਠਿਤਂ ਸਮਣਂ ਬ੍ਰਾਹ੍ਮਣਂ ਵਾ;
ਗਚ੍ਛੇ ਅਪਾਯਮ੍ਪਿ ਤਤੋਨਿਦਾਨਂ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੫੦. ‘‘ਯਂ ਵੇ ਪਿਵਿਤ੍ਵਾ ਦੁਚ੍ਚਰਿਤਂ ਚਰਨ੍ਤਿ, ਕਾਯੇਨ ਵਾਚਾਯ ਚ ਚੇਤਸਾ ਚ;
ਨਿਰਯਂ ਵਜਨ੍ਤਿ ਦੁਚ੍ਚਰਿਤਂ ਚਰਿਤ੍ਵਾ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.
੫੧. ‘‘ਯਂ ਯਾਚਮਾਨਾ ਨ ਲਭਨ੍ਤਿ ਪੁਬ੍ਬੇ, ਬਹੁਂ ਹਿਰਞ੍ਞਮ੍ਪਿ ਪਰਿਚ੍ਚਜਨ੍ਤਾ;
ਸੋ ਤਂ ਪਿਵਿਤ੍ਵਾ ਅਲਿਕਂ ਭਣਾਤਿ, ਤਸ੍ਸਾ ਪੁਣ੍ਣਂ ਕੁਮ੍ਭਮਿਮਂ ਕਿਣਾਥ.