੧੨. ਦ੍ਵਾਦਸਕਨਿਪਾਤੋ

[੪੬੪] ੧. ਚੂਲ਼ਕੁਣਾਲਜਾਤਕਵਣ੍ਣਨਾ

੧-੧੨. ਲੁਦ੍ਧਾਨਂ ਲਹੁਚਿਤ੍ਤਾਨਨ੍ਤਿ ਇਦਂ ਜਾਤਕਂ ਕੁਣਾਲਜਾਤਕੇ (ਜਾ. ੨.੨੧.ਕੁਣਾਲਜਾਤਕ) ਆਵਿ ਭਵਿਸ੍ਸਤਿ;

ਚੂਲ਼ਕੁਣਾਲਜਾਤਕਵਣ੍ਣਨਾ ਪਠਮਾ.

[੪੬੫] ੨. ਭਦ੍ਦਸਾਲਜਾਤਕਵਣ੍ਣਨਾ

ਕਾ ਤ੍ਵਂ ਸੁਦ੍ਧੇਹਿ ਵਤ੍ਥੇਹੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਞਾਤਤ੍ਥਚਰਿਯਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਞ੍ਹਿ ਅਨਾਥਪਿਣ੍ਡਿਕਸ੍ਸ ਨਿਵੇਸਨੇ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਨਿਬਦ੍ਧਭੋਜਨਂ ਪਵਤ੍ਤਤਿ, ਤਥਾ ਵਿਸਾਖਾਯ ਚ ਕੋਸਲਰਞ੍ਞੋ ਚ. ਤਤ੍ਥ ਪਨ ਕਿਞ੍ਚਾਪਿ ਨਾਨਗ੍ਗਰਸਭੋਜਨਂ ਦੀਯਤਿ, ਭਿਕ੍ਖੂਨਂ ਪਨੇਤ੍ਥ ਕੋਚਿ ਵਿਸ੍ਸਾਸਿਕੋ ਨਤ੍ਥਿ, ਤਸ੍ਮਾ ਭਿਕ੍ਖੂ ਰਾਜਨਿਵੇਸਨੇ ਨ ਭੁਞ੍ਜਨ੍ਤਿ, ਭਤ੍ਤਂ ਗਹੇਤ੍ਵਾ ਅਨਾਥਪਿਣ੍ਡਿਕਸ੍ਸ ਵਾ ਵਿਸਾਖਾਯ ਵਾ ਅਞ੍ਞੇਸਂ ਵਾ ਵਿਸ੍ਸਾਸਿਕਾਨਂ ਘਰਂ ਗਨ੍ਤ੍ਵਾ ਭੁਞ੍ਜਨ੍ਤਿ. ਰਾਜਾ ਏਕਦਿਵਸਂ ਪਣ੍ਣਾਕਾਰਂ ਆਹਟਂ ‘‘ਭਿਕ੍ਖੂਨਂ ਦੇਥਾ’’ਤਿ ਭਤ੍ਤਗ੍ਗਂ ਪੇਸੇਤ੍ਵਾ ‘‘ਭਤ੍ਤਗ੍ਗੇ ਭਿਕ੍ਖੂ ਨਤ੍ਥੀ’’ਤਿ ਵੁਤ੍ਤੇ ‘‘ਕਹਂ ਗਤਾ’’ਤਿ ਪੁਚ੍ਛਿਤ੍ਵਾ ‘‘ਅਤ੍ਤਨੋ ਵਿਸ੍ਸਾਸਿਕਗੇਹੇਸੁ ਨਿਸੀਦਿਤ੍ਵਾ ਭੁਞ੍ਜਨ੍ਤੀ’’ਤਿ ਸੁਤ੍ਵਾ ਭੁਤ੍ਤਪਾਤਰਾਸੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ‘‘ਭਨ੍ਤੇ, ਭੋਜਨਂ ਨਾਮ ਕਿਂ ਪਰਮ’’ਨ੍ਤਿ ਪੁਚ੍ਛਿ. ਵਿਸ੍ਸਾਸਪਰਮਂ ਮਹਾਰਾਜ, ਕਞ੍ਜਿਕਮਤ੍ਤਕਮ੍ਪਿ ਵਿਸ੍ਸਾਸਿਕੇਨ ਦਿਨ੍ਨਂ ਮਧੁਰਂ ਹੋਤੀਤਿ. ਭਨ੍ਤੇ, ਕੇਨ ਪਨ ਸਦ੍ਧਿਂ ਭਿਕ੍ਖੂਨਂ ਵਿਸ੍ਸਾਸੋ ਹੋਤੀਤਿ? ‘‘ਞਾਤੀਹਿ ਵਾ ਸੇਕ੍ਖਕੁਲੇਹਿ ਵਾ, ਮਹਾਰਾਜਾ’’ਤਿ. ਤਤੋ ਰਾਜਾ ਚਿਨ੍ਤੇਸਿ ‘‘ਏਕਂ ਸਕ੍ਯਧੀਤਰਂ ਆਨੇਤ੍ਵਾ ਅਗ੍ਗਮਹੇਸਿਂ ਕਰਿਸ੍ਸਾਮਿ, ਏਵਂ ਮਯਾ ਸਦ੍ਧਿਂ ਭਿਕ੍ਖੂਨਂ ਞਾਤਕੇ ਵਿਯ ਵਿਸ੍ਸਾਸੋ ਭਵਿਸ੍ਸਤੀ’’ਤਿ. ਸੋ ਉਟ੍ਠਾਯਾਸਨਾ ਅਤ੍ਤਨੋ ਨਿਵੇਸਨਂ ਗਨ੍ਤ੍ਵਾ ਕਪਿਲਵਤ੍ਥੁਂ ਦੂਤਂ ਪੇਸੇਸਿ ‘‘ਧੀਤਰਂ ਮੇ ਦੇਥ, ਅਹਂ ਤੁਮ੍ਹੇਹਿ ਸਦ੍ਧਿਂ ਞਾਤਿਭਾਵਂ ਇਚ੍ਛਾਮੀ’’ਤਿ.

ਸਾਕਿਯਾ ਦੂਤਵਚਨਂ ਸੁਤ੍ਵਾ ਸਨ੍ਨਿਪਤਿਤ੍ਵਾ ਮਨ੍ਤਯਿਂਸੁ ‘‘ਮਯਂ ਕੋਸਲਰਞ੍ਞੋ ਆਣਾਪਵਤ੍ਤਿਟ੍ਠਾਨੇ ਵਸਾਮ, ਸਚੇ ਦਾਰਿਕਂ ਨ ਦਸ੍ਸਾਮ, ਮਹਨ੍ਤਂ ਵੇਰਂ ਭਵਿਸ੍ਸਤਿ, ਸਚੇ ਦਸ੍ਸਾਮ, ਕੁਲਵਂਸੋ ਨੋ ਭਿਜ੍ਜਿਸ੍ਸਤਿ, ਕਿਂ ਨੁ ਖੋ ਕਾਤਬ੍ਬ’’ਨ੍ਤਿ. ਅਥ ਨੇ ਮਹਾਨਾਮੋ ਆਹ – ‘‘ਮਾ ਚਿਨ੍ਤਯਿਤ੍ਥ, ਮਮ ਧੀਤਾ ਵਾਸਭਖਤ੍ਤਿਯਾ ਨਾਮ ਨਾਗਮੁਣ੍ਡਾਯ ਨਾਮ ਦਾਸਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿ. ਸਾ ਸੋਲ਼ਸਵਸ੍ਸੁਦ੍ਦੇਸਿਕਾ ਉਤ੍ਤਮਰੂਪਧਰਾ ਸੋਭਗ੍ਗਪ੍ਪਤ੍ਤਾ ਪਿਤੁ ਵਂਸੇਨ ਖਤ੍ਤਿਯਜਾਤਿਕਾ, ਤਮਸ੍ਸ ‘ਖਤ੍ਤਿਯਕਞ੍ਞਾ’ਤਿ ਪੇਸੇਸ੍ਸਾਮਾ’’ਤਿ. ਸਾਕਿਯਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਦੂਤੇ ਪਕ੍ਕੋਸਾਪੇਤ੍ਵਾ ‘‘ਸਾਧੁ, ਦਾਰਿਕਂ ਦਸ੍ਸਾਮ, ਇਦਾਨੇਵ ਨਂ ਗਹੇਤ੍ਵਾ ਗਚ੍ਛਥਾ’’ਤਿ ਆਹਂਸੁ. ਦੂਤਾ ਚਿਨ੍ਤੇਸੁਂ ‘‘ਇਮੇ ਸਾਕਿਯਾ ਨਾਮ ਜਾਤਿਂ ਨਿਸ੍ਸਾਯ ਅਤਿਮਾਨਿਨੋ, ‘ਸਦਿਸੀ ਨੋ’ਤਿ ਵਤ੍ਵਾ ਅਸਦਿਸਿਮ੍ਪਿ ਦਦੇਯ੍ਯੁਂ, ਏਤੇਹਿ ਸਦ੍ਧਿਂ ਏਕਤੋ ਭੁਞ੍ਜਮਾਨਮੇਵ ਗਣ੍ਹਿਸ੍ਸਾਮਾ’’ਤਿ. ਤੇ ਏਵਮਾਹਂਸੁ ‘‘ਮਯਂ ਗਹੇਤ੍ਵਾ ਗਚ੍ਛਨ੍ਤਾ ਯਾ ਤੁਮ੍ਹੇਹਿ ਸਦ੍ਧਿਂ ਏਕਤੋ ਭੁਞ੍ਜਤਿ, ਤਂ ਗਹੇਤ੍ਵਾ ਗਮਿਸ੍ਸਾਮਾ’’ਤਿ. ਸਾਕਿਯਾ ਤੇਸਂ ਨਿਵਾਸਟ੍ਠਾਨਂ ਦਾਪੇਤ੍ਵਾ ‘‘ਕਿਂ ਕਰਿਸ੍ਸਾਮਾ’’ਤਿ ਚਿਨ੍ਤਯਿਂਸੁ. ਮਹਾਨਾਮੋ ਆਹ – ‘‘ਤੁਮ੍ਹੇ ਮਾ ਚਿਨ੍ਤਯਿਤ੍ਥ, ਅਹਂ ਉਪਾਯਂ ਕਰਿਸ੍ਸਾਮਿ, ਤੁਮ੍ਹੇ ਮਮ ਭੋਜਨਕਾਲੇ ਵਾਸਭਖਤ੍ਤਿਯਂ ਅਲਙ੍ਕਰਿਤ੍ਵਾ ਆਨੇਤ੍ਵਾ ਮਯਾ ਏਕਸ੍ਮਿਂ ਕਬਲ਼ੇ ਗਹਿਤਮਤ੍ਤੇ ‘ਦੇਵ, ਅਸੁਕਰਾਜਾ ਪਣ੍ਣਂ ਪਹਿਣਿ, ਇਮਂ ਤਾਵ ਸਾਸਨਂ ਸੁਣਾਥਾ’ਤਿ ਪਣ੍ਣਂ ਦਸ੍ਸੇਯ੍ਯਾਥਾ’’ਤਿ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਸ੍ਮਿਂ ਭੁਞ੍ਜਮਾਨੇ ਕੁਮਾਰਿਕਂ ਅਲਙ੍ਕਰਿਂਸੁ.

ਮਹਾਨਾਮੋ ‘‘ਧੀਤਰਂ ਮੇ ਆਨੇਥ, ਮਯਾ ਸਦ੍ਧਿਂ ਭੁਞ੍ਜਤੂ’’ਤਿ ਆਹ. ਅਥ ਨਂ ਅਲਙ੍ਕਰਿਤ੍ਵਾ ਤਾਵਦੇਵ ਥੋਕਂ ਪਪਞ੍ਚਂ ਕਤ੍ਵਾ ਆਨਯਿਂਸੁ. ਸਾ ‘‘ਪਿਤਰਾ ਸਦ੍ਧਿਂ ਭੁਞ੍ਜਿਸ੍ਸਾਮੀ’’ਤਿ ਏਕਪਾਤਿਯਂ ਹਤ੍ਥਂ ਓਤਾਰੇਸਿ. ਮਹਾਨਾਮੋਪਿ ਤਾਯ ਸਦ੍ਧਿਂ ਏਕਪਿਣ੍ਡਂ ਗਹੇਤ੍ਵਾ ਮੁਖੇ ਠਪੇਸਿ. ਦੁਤਿਯਪਿਣ੍ਡਾਯ ਹਤ੍ਥੇ ਪਸਾਰਿਤੇ ‘‘ਦੇਵ, ਅਸੁਕਰਞ੍ਞਾ ਪਣ੍ਣਂ ਪਹਿਤਂ, ਇਮਂ ਤਾਵ ਸਾਸਨਂ ਸੁਣਾਥਾ’’ਤਿ ਪਣ੍ਣਂ ਉਪਨਾਮੇਸੁਂ. ਮਹਾਨਾਮੋ ‘‘ਅਮ੍ਮ, ਤ੍ਵਂ ਭੁਞ੍ਜਾਹੀ’’ਤਿ ਦਕ੍ਖਿਣਹਤ੍ਥਂ ਪਾਤਿਯਾਯੇਵ ਕਤ੍ਵਾ ਵਾਮਹਤ੍ਥੇਨ ਗਹੇਤ੍ਵਾ ਪਣ੍ਣਂ ਓਲੋਕੇਸਿ. ਤਸ੍ਸ ਤਂ ਸਾਸਨਂ ਉਪਧਾਰੇਨ੍ਤਸ੍ਸੇਵ ਇਤਰਾ ਭੁਞ੍ਜਿ. ਸੋ ਤਸ੍ਸਾ ਭੁਤ੍ਤਕਾਲੇ ਹਤ੍ਥਂ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਸਿ. ਤਂ ਦਿਸ੍ਵਾ ਦੂਤਾ ‘‘ਨਿਚ੍ਛਯੇਨੇਸਾ ਏਤਸ੍ਸ ਧੀਤਾ’’ਤਿ ਨਿਟ੍ਠਮਕਂਸੁ, ਨ ਤਂ ਅਨ੍ਤਰਂ ਜਾਨਿਤੁਂ ਸਕ੍ਖਿਂਸੁ. ਮਹਾਨਾਮੋ ਮਹਨ੍ਤੇਨ ਪਰਿਵਾਰੇਨ ਧੀਤਰਂ ਪੇਸੇਸਿ. ਦੂਤਾਪਿ ਨਂ ਸਾਵਤ੍ਥਿਂ ਨੇਤ੍ਵਾ ‘‘ਅਯਂ ਕੁਮਾਰਿਕਾ ਜਾਤਿਸਮ੍ਪਨ੍ਨਾ ਮਹਾਨਾਮਸ੍ਸ ਧੀਤਾ’’ਤਿ ਵਦਿਂਸੁ. ਰਾਜਾ ਤੁਸ੍ਸਿਤ੍ਵਾ ਸਕਲਨਗਰਂ ਅਲਙ੍ਕਾਰਾਪੇਤ੍ਵਾ ਤਂ ਰਤਨਰਾਸਿਮ੍ਹਿ ਠਪੇਤ੍ਵਾ ਅਗ੍ਗਮਹੇਸਿਟ੍ਠਾਨੇ ਅਭਿਸਿਞ੍ਚਾਪੇਸਿ. ਸਾ ਰਞ੍ਞੋ ਪਿਯਾ ਅਹੋਸਿ ਮਨਾਪਾ.

ਅਥਸ੍ਸਾ ਨ ਚਿਰਸ੍ਸੇਵ ਗਬ੍ਭੋ ਪਤਿਟ੍ਠਹਿ. ਰਾਜਾ ਗਬ੍ਭਪਰਿਹਾਰਮਦਾਸਿ. ਸਾ ਦਸਮਾਸਚ੍ਚਯੇਨ ਸੁਵਣ੍ਣਵਣ੍ਣਂ ਪੁਤ੍ਤਂ ਵਿਜਾਯਿ. ਅਥਸ੍ਸ ਨਾਮਗ੍ਗਹਣਦਿਵਸੇ ਰਾਜਾ ਅਤ੍ਤਨੋ ਅਯ੍ਯਕਸ੍ਸ ਸਨ੍ਤਿਕਂ ਪੇਸੇਸਿ ‘‘ਸਕ੍ਯਰਾਜਧੀਤਾ ਵਾਸਭਖਤ੍ਤਿਯਾ ਪੁਤ੍ਤਂ ਵਿਜਾਯਿ, ਕਿਮਸ੍ਸ ਨਾਮਂ ਕਰੋਮਾ’’ਤਿ. ਤਂ ਪਨ ਸਾਸਨਂ ਗਹੇਤ੍ਵਾ ਗਤੋ ਅਮਚ੍ਚੋ ਥੋਕਂ ਬਧਿਰਧਾਤੁਕੋ, ਸੋ ਗਨ੍ਤ੍ਵਾ ਰਞ੍ਞੋ ਅਯ੍ਯਕਸ੍ਸਾਰੋਚੇਸਿ. ਸੋ ਤਂ ਸੁਤ੍ਵਾ ‘‘ਵਾਸਭਖਤ੍ਤਿਯਾ ਪੁਤ੍ਤਂ ਅਵਿਜਾਯਿਤ੍ਵਾਪਿ ਸਬ੍ਬਂ ਜਨਂ ਅਭਿਭਵਤਿ, ਇਦਾਨਿ ਪਨ ਅਤਿਵਿਯ ਰਞ੍ਞੋ ਵਲ੍ਲਭਾ ਭਵਿਸ੍ਸਤੀ’’ਤਿ ਆਹ. ਸੋ ਬਧਿਰਅਮਚ੍ਚੋ ‘‘ਵਲ੍ਲਭਾ’’ਤਿ ਵਚਨਂ ਦੁਸ੍ਸੁਤਂ ਸੁਤ੍ਵਾ ‘‘ਵਿਟਟੂਭੋ’’ਤਿ ਸਲ੍ਲਕ੍ਖੇਤ੍ਵਾ ਰਾਜਾਨਂ ਉਪਗਨ੍ਤ੍ਵਾ ‘‘ਦੇਵ, ਕੁਮਾਰਸ੍ਸ ਕਿਰ ‘ਵਿਟਟੂਭੋ’ਤਿ ਨਾਮਂ ਕਰੋਥਾ’’ਤਿ ਆਹ. ਰਾਜਾ ‘‘ਪੋਰਾਣਕਂ ਨੋ ਕੁਲਦਤ੍ਤਿਕਂ ਨਾਮਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ‘‘ਵਿਟਟੂਭੋ’’ਤਿ ਨਾਮਂ ਅਕਾਸਿ. ਤਤੋ ਪਟ੍ਠਾਯ ਕੁਮਾਰੋ ਕੁਮਾਰਪਰਿਹਾਰੇਨ ਵਡ੍ਢਨ੍ਤੋ ਸਤ੍ਤਵਸ੍ਸਿਕਕਾਲੇ ਅਞ੍ਞੇਸਂ ਕੁਮਾਰਾਨਂ ਮਾਤਾਮਹਕੁਲਤੋ ਹਤ੍ਥਿਰੂਪਕਅਸ੍ਸਰੂਪਕਾਦੀਨਿ ਆਹਰਿਯਮਾਨਾਨਿ ਦਿਸ੍ਵਾ ਮਾਤਰਂ ਪੁਚ੍ਛਿ ‘‘ਅਮ੍ਮ, ਅਞ੍ਞੇਸਂ ਮਾਤਾਮਹਕੁਲਤੋ ਪਣ੍ਣਾਕਾਰੋ ਆਹਰਿਯਤਿ, ਮਯ੍ਹਂ ਕੋਚਿ ਕਿਞ੍ਚਿ ਨ ਪੇਸੇਸਿ, ਕਿਂ ਤ੍ਵਂ ਨਿਮ੍ਮਾਤਾ ਨਿਪ੍ਪਿਤਾਸੀ’’ਤਿ? ਅਥ ਨਂ ਸਾ ‘‘ਤਾਤ, ਸਕ੍ਯਰਾਜਾਨੋ ਮਾਤਾਮਹਾ ਦੂਰੇ ਪਨ ਵਸਨ੍ਤਿ, ਤੇਨ ਤੇ ਕਿਞ੍ਚਿ ਨ ਪੇਸੇਨ੍ਤੀ’’ਤਿ ਵਤ੍ਵਾ ਵਞ੍ਚੇਸਿ.

ਪੁਨ ਸੋਲ਼ਸਵਸ੍ਸਿਕਕਾਲੇ ‘‘ਅਮ੍ਮ, ਮਾਤਾਮਹਕੁਲਂ ਪਸ੍ਸਿਤੁਕਾਮੋਮ੍ਹੀ’’ਤਿ ਵਤ੍ਵਾ ‘‘ਅਲਂ ਤਾਤ, ਕਿਂ ਤਤ੍ਥ ਗਨ੍ਤ੍ਵਾ ਕਰਿਸ੍ਸਸੀ’’ਤਿ ਵਾਰਿਯਮਾਨੋਪਿ ਪੁਨਪ੍ਪੁਨਂ ਯਾਚਿ. ਅਥਸ੍ਸ ਮਾਤਾ ‘‘ਤੇਨ ਹਿ ਗਚ੍ਛਾਹੀ’’ਤਿ ਸਮ੍ਪਟਿਚ੍ਛਿ. ਸੋ ਪਿਤੁ ਆਰੋਚੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿ. ਵਾਸਭਖਤ੍ਤਿਯਾ ਪੁਰੇਤਰਂ ਪਣ੍ਣਂ ਪੇਸੇਸਿ ‘‘ਅਹਂ ਇਧ ਸੁਖਂ ਵਸਾਮਿ, ਸਾਮਿਨੋ ਕਿਞ੍ਚਿ ਅਨ੍ਤਰਂ ਮਾ ਦਸ੍ਸਯਿਂਸੂ’’ਤਿ. ਸਾਕਿਯਾ ਵਿਟਟੂਭਸ੍ਸ ਆਗਮਨਂ ਞਤ੍ਵਾ ‘‘ਵਨ੍ਦਿਤੁਂ ਨ ਸਕ੍ਕਾ’’ਤਿ ਤਸ੍ਸ ਦਹਰਦਹਰੇ ਕੁਮਾਰਕੇ ਜਨਪਦਂ ਪਹਿਣਿਂਸੁ. ਕੁਮਾਰੇ ਕਪਿਲਵਤ੍ਥੁਂ ਸਮ੍ਪਤ੍ਤੇ ਸਾਕਿਯਾ ਸਨ੍ਥਾਗਾਰੇ ਸਨ੍ਨਿਪਤਿਂਸੁ. ਕੁਮਾਰੋ ਸਨ੍ਥਾਗਾਰਂ ਗਨ੍ਤ੍ਵਾ ਅਟ੍ਠਾਸਿ. ਅਥ ਨਂ ‘‘ਅਯਂ ਤੇ, ਤਾਤ, ਮਾਤਾਮਹੋ, ਅਯਂ ਮਾਤੁਲੋ’’ਤਿ ਵਦਿਂਸੁ ਸੋ ਸਬ੍ਬੇ ਵਨ੍ਦਮਾਨੋ ਵਿਚਰਿ. ਸੋ ਯਾਵਪਿਟ੍ਠਿਯਾ ਰੁਜਨਪ੍ਪਮਾਣਾ ਵਨ੍ਦਿਤ੍ਵਾ ਏਕਮ੍ਪਿ ਅਤ੍ਤਾਨਂ ਵਨ੍ਦਮਾਨਂ ਅਦਿਸ੍ਵਾ ‘‘ਕਿਂ ਨੁ ਖੋ ਮਂ ਵਨ੍ਦਨ੍ਤਾ ਨਤ੍ਥੀ’’ਤਿ ਪੁਚ੍ਛਿ. ਸਾਕਿਯਾ ‘‘ਤਾਤ, ਤਵ ਕਨਿਟ੍ਠਕੁਮਾਰਾ ਜਨਪਦਂ ਗਤਾ’’ਤਿ ਵਤ੍ਵਾ ਤਸ੍ਸ ਮਹਨ੍ਤਂ ਸਕ੍ਕਾਰਂ ਕਰਿਂਸੁ. ਸੋ ਕਤਿਪਾਹਂ ਵਸਿਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿ. ਅਥੇਕਾ ਦਾਸੀ ਸਨ੍ਥਾਗਾਰੇ ਤੇਨ ਨਿਸਿਨ੍ਨਫਲਕਂ ‘‘ਇਦਂ ਵਾਸਭਖਤ੍ਤਿਯਾਯ ਦਾਸਿਯਾ ਪੁਤ੍ਤਸ੍ਸ ਨਿਸਿਨ੍ਨਫਲਕ’’ਨ੍ਤਿ ਅਕ੍ਕੋਸਿਤ੍ਵਾ ਪਰਿਭਾਸਿਤ੍ਵਾ ਖੀਰੋਦਕੇਨ ਧੋਵਿ. ਏਕੋ ਪੁਰਿਸੋ ਅਤ੍ਤਨੋ ਆਵੁਧਂ ਪਮੁਸ੍ਸਿਤ੍ਵਾ ਨਿਵਤ੍ਤੋ ਤਂ ਗਣ੍ਹਨ੍ਤੋ ਵਿਟਟੂਭਕੁਮਾਰਸ੍ਸ ਅਕ੍ਕੋਸਨਸਦ੍ਦਂ ਸੁਤ੍ਵਾ ਤਂ ਅਨ੍ਤਰਂ ਪੁਚ੍ਛਿਤ੍ਵਾ ‘‘ਵਾਸਭਖਤ੍ਤਿਯਾ ਦਾਸਿਯਾ ਕੁਚ੍ਛਿਸ੍ਮਿਂ ਮਹਾਨਾਮਸਕ੍ਕਸ੍ਸ ਜਾਤਾ’’ਤਿ ਞਤ੍ਵਾ ਗਨ੍ਤ੍ਵਾ ਬਲਕਾਯਸ੍ਸ ਕਥੇਸਿ. ‘‘ਵਾਸਭਖਤ੍ਤਿਯਾ ਕਿਰ ਦਾਸਿਯਾ ਧੀਤਾ’’ਤਿ ਮਹਾਕੋਲਾਹਲਂ ਅਹੋਸਿ.

ਕੁਮਾਰੋ ਤਂ ਸੁਤ੍ਵਾ ‘‘ਏਤੇ ਤਾਵ ਮਮ ਨਿਸਿਨ੍ਨਫਲਕਂ ਖੀਰੋਦਕੇਨ ਧੋਵਨ੍ਤੁ, ਅਹਂ ਪਨ ਰਜ੍ਜੇ ਪਤਿਟ੍ਠਿਤਕਾਲੇ ਏਤੇਸਂ ਗਲਲੋਹਿਤਂ ਗਹੇਤ੍ਵਾ ਮਮ ਨਿਸਿਨ੍ਨਫਲਕਂ ਧੋਵਿਸ੍ਸਾਮੀ’’ਤਿ ਚਿਤ੍ਤਂ ਪਟ੍ਠਪੇਸਿ. ਤਸ੍ਮਿਂ ਸਾਵਤ੍ਥਿਂ ਗਤੇ ਅਮਚ੍ਚਾ ਸਬ੍ਬਂ ਪਵਤ੍ਤਿਂ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਸਬ੍ਬੇ ਮਯ੍ਹਂ ਦਾਸਿਧੀਤਰਂ ਅਦਂਸੂ’’ਤਿ ਸਾਕਿਯਾਨਂ ਕੁਜ੍ਝਿਤ੍ਵਾ ਵਾਸਭਖਤ੍ਤਿਯਾਯ ਚ ਪੁਤ੍ਤਸ੍ਸ ਚ ਦਿਨ੍ਨਪਰਿਹਾਰਂ ਅਚ੍ਛਿਨ੍ਦਿਤ੍ਵਾ ਦਾਸਦਾਸੀਹਿ ਲਦ੍ਧਬ੍ਬਪਰਿਹਾਰਮਤ੍ਤਮੇਵ ਦਾਪੇਸਿ. ਤਤੋ ਕਤਿਪਾਹਚ੍ਚਯੇਨ ਸਤ੍ਥਾ ਰਾਜਨਿਵੇਸਨਂ ਆਗਨ੍ਤ੍ਵਾ ਨਿਸੀਦਿ. ਰਾਜਾ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਭਨ੍ਤੇ, ਤੁਮ੍ਹਾਕਂ ਕਿਰ ਞਾਤਕੇਹਿ ਦਾਸਿਧੀਤਾ ਮਯ੍ਹਂ ਦਿਨ੍ਨਾ, ਤੇਨਸ੍ਸਾ ਅਹਂ ਸਪੁਤ੍ਤਾਯ ਪਰਿਹਾਰਂ ਅਚ੍ਛਿਨ੍ਦਿਤ੍ਵਾ ਦਾਸਦਾਸੀਹਿ ਲਦ੍ਧਬ੍ਬਪਰਿਹਾਰਮਤ੍ਤਮੇਵ ਦਾਪੇਸਿ’’ਨ੍ਤਿ ਆਹ. ਸਤ੍ਥਾ ‘‘ਅਯੁਤ੍ਤਂ, ਮਹਾਰਾਜ, ਸਾਕਿਯੇਹਿ ਕਤਂ, ਦਦਨ੍ਤੇਹਿ ਨਾਮ ਸਮਾਨਜਾਤਿਕਾ ਦਾਤਬ੍ਬਾ ਅਸ੍ਸ. ਤਂ ਪਨ ਮਹਾਰਾਜ, ਵਦਾਮਿ ਵਾਸਭਖਤ੍ਤਿਯਾ ਖਤ੍ਤਿਯਰਾਜਧੀਤਾ ਖਤ੍ਤਿਯਸ੍ਸ ਰਞ੍ਞੋ ਗੇਹੇ ਅਭਿਸੇਕਂ ਲਭਿ, ਵਿਟਟੂਭੋਪਿ ਖਤ੍ਤਿਯਰਾਜਾਨਮੇਵ ਪਟਿਚ੍ਚ ਜਾਤੋ, ਮਾਤੁਗੋਤ੍ਤਂ ਨਾਮ ਕਿਂ ਕਰਿਸ੍ਸਤਿ, ਪਿਤੁਗੋਤ੍ਤਮੇਵ ਪਮਾਣਨ੍ਤਿ ਪੋਰਾਣਕਪਣ੍ਡਿਤਾ ਦਲਿਦ੍ਦਿਤ੍ਥਿਯਾ ਕਟ੍ਠਹਾਰਿਕਾਯਪਿ ਅਗ੍ਗਮਹੇਸਿਟ੍ਠਾਨਂ ਅਦਂਸੁ, ਤਸ੍ਸਾ ਚ ਕੁਚ੍ਛਿਮ੍ਹਿ ਜਾਤਕੁਮਾਰੋ ਦ੍ਵਾਦਸਯੋਜਨਿਕਾਯ ਬਾਰਾਣਸਿਯਾ ਰਜ੍ਜਂ ਕਤ੍ਵਾ ਕਟ੍ਠਵਾਹਨਰਾਜਾ ਨਾਮ ਜਾਤੋ’’ਤਿ ਕਟ੍ਠਵਾਹਨਜਾਤਕਂ (ਜਾ. ੧.੧.੭) ਕਥੇਸਿ. ਰਾਜਾ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ‘‘ਪਿਤੁਗੋਤ੍ਤਮੇਵ ਕਿਰ ਪਮਾਣ’’ਨ੍ਤਿ ਸੁਤ੍ਵਾ ਤੁਸ੍ਸਿਤ੍ਵਾ ਮਾਤਾਪੁਤ੍ਤਾਨਂ ਪਕਤਿਪਰਿਹਾਰਮੇਵ ਦਾਪੇਸਿ.

ਰਞ੍ਞੋ ਪਨ ਬਨ੍ਧੁਲੋ ਨਾਮ ਸੇਨਾਪਤਿ ਮਲ੍ਲਿਕਂ ਨਾਮ ਅਤ੍ਤਨੋ ਭਰਿਯਂ ਵਞ੍ਝਂ ‘‘ਤਵ ਕੁਲਘਰਮੇਵ ਗਚ੍ਛਾਹੀ’’ਤਿ ਕੁਸਿਨਾਰਮੇਵ ਪੇਸੇਸਿ. ਸਾ ‘‘ਸਤ੍ਥਾਰਂ ਦਿਸ੍ਵਾਵ ਗਮਿਸ੍ਸਾਮੀ’’ਤਿ ਜੇਤਵਨਂ ਪਵਿਸਿਤ੍ਵਾ ਤਥਾਗਤਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤਾ ‘‘ਕਹਂ ਗਚ੍ਛਸੀ’’ਤਿ ਚ ਪੁਟ੍ਠਾ ‘‘ਸਾਮਿਕੋ ਮੇ, ਭਨ੍ਤੇ, ਕੁਲਘਰਂ ਪੇਸੇਸੀ’’ਤਿ ਵਤ੍ਵਾ ‘‘ਕਸ੍ਮਾ’’ਤਿ ਵੁਤ੍ਤਾ ‘‘ਵਞ੍ਝਾ ਅਪੁਤ੍ਤਿਕਾ, ਭਨ੍ਤੇ’’ਤਿ ਵਤ੍ਵਾ ਸਤ੍ਥਾਰਾ ‘‘ਯਦਿ ਏਵਂ ਗਮਨਕਿਚ੍ਚਂ ਨਤ੍ਥਿ, ਨਿਵਤ੍ਤਾਹੀ’’ਤਿ ਵੁਤ੍ਤਾ ਤੁਟ੍ਠਾ ਸਤ੍ਥਾਰਂ ਵਨ੍ਦਿਤ੍ਵਾ ਨਿਵੇਸਨਮੇਵ ਪੁਨ ਅਗਮਾਸਿ. ‘‘ਕਸ੍ਮਾ ਨਿਵਤ੍ਤਸੀ’’ਤਿ ਪੁਟ੍ਠਾ ‘‘ਦਸਬਲੇਨ ਨਿਵਤ੍ਤਿਤਾਮ੍ਹੀ’’ਤਿ ਆਹ. ਸੇਨਾਪਤਿ ‘‘ਦਿਟ੍ਠਂ ਭਵਿਸ੍ਸਤਿ ਤਥਾਗਤੇਨ ਕਾਰਣ’’ਨ੍ਤਿ ਆਹ. ਸਾ ਨ ਚਿਰਸ੍ਸੇਵ ਗਬ੍ਭਂ ਪਟਿਲਭਿਤ੍ਵਾ ਉਪ੍ਪਨ੍ਨਦੋਹਲ਼ਾ ‘‘ਦੋਹਲ਼ੋ ਮੇ ਉਪ੍ਪਨ੍ਨੋ’’ਤਿ ਆਰੋਚੇਸਿ. ‘‘ਕਿਂ ਦੋਹਲ਼ੋ’’ਤਿ? ‘‘ਵੇਸਾਲਿਯਾ ਨਗਰੇ ਲਿਚ੍ਛਵਿਰਾਜਾਨਂ ਅਭਿਸੇਕਮਙ੍ਗਲਪੋਕ੍ਖਰਣਿਂ ਓਤਰਿਤ੍ਵਾ ਨ੍ਹਤ੍ਵਾ ਪਾਨੀਯਂ ਪਿਵਿਤੁਕਾਮਾਮ੍ਹਿ, ਸਾਮੀ’’ਤਿ. ਸੇਨਾਪਤਿ ‘‘ਸਾਧੂ’’ਤਿ ਵਤ੍ਵਾ ਸਹਸ੍ਸਥਾਮਧਨੁਂ ਗਹੇਤ੍ਵਾ ਤਂ ਰਥਂ ਆਰੋਪੇਤ੍ਵਾ ਸਾਵਤ੍ਥਿਤੋ ਨਿਕ੍ਖਮਿਤ੍ਵਾ ਰਥਂ ਪਾਜੇਨ੍ਤੋ ਵੇਸਾਲਿਂ ਪਾਵਿਸਿ.

ਤਸ੍ਮਿਞ੍ਚ ਕਾਲੇ ਕੋਸਲਰਞ੍ਞੋ ਬਨ੍ਧੁਲਸੇਨਾਪਤਿਨਾ ਸਦ੍ਧਿਂ ਏਕਾਚਰਿਯਕੁਲੇ ਉਗ੍ਗਹਿਤਸਿਪ੍ਪੋ ਮਹਾਲਿ ਨਾਮ ਲਿਚ੍ਛਵੀ ਅਨ੍ਧੋ ਲਿਚ੍ਛਵੀਨਂ ਅਤ੍ਥਞ੍ਚ ਧਮ੍ਮਞ੍ਚ ਅਨੁਸਾਸਨ੍ਤੋ ਦ੍ਵਾਰਸਮੀਪੇ ਵਸਤਿ. ਸੋ ਰਥਸ੍ਸ ਉਮ੍ਮਾਰੇ ਪਟਿਘਟ੍ਟਨਸਦ੍ਦਂ ਸੁਤ੍ਵਾ ‘‘ਬਨ੍ਧੁਲਮਲ੍ਲਸ੍ਸ ਰਥਪਤਨਸਦ੍ਦੋ ਏਸੋ, ਅਜ੍ਜ ਲਿਚ੍ਛਵੀਨਂ ਭਯਂ ਉਪ੍ਪਜ੍ਜਿਸ੍ਸਤੀ’’ਤਿ ਆਹ. ਪੋਕ੍ਖਰਣਿਯਾ ਅਨ੍ਤੋ ਚ ਬਹਿ ਚ ਆਰਕ੍ਖਾ ਬਲਵਾ, ਉਪਰਿ ਲੋਹਜਾਲਂ ਪਤ੍ਥਟਂ, ਸਕੁਣਾਨਮ੍ਪਿ ਓਕਾਸੋ ਨਤ੍ਥਿ. ਸੇਨਾਪਤਿ ਪਨ ਰਥਾ ਓਤਰਿਤ੍ਵਾ ਆਰਕ੍ਖਕੇ ਖਗ੍ਗੇਨ ਪਹਰਨ੍ਤੋ ਪਲਾਪੇਤ੍ਵਾ ਲੋਹਜਾਲਂ ਛਿਨ੍ਦਿਤ੍ਵਾ ਅਨ੍ਤੋਪੋਕ੍ਖਰਣਿਯਂ ਭਰਿਯਂ ਓਤਾਰੇਤ੍ਵਾ ਨ੍ਹਾਪੇਤ੍ਵਾ ਪਾਯੇਤ੍ਵਾ ਸਯਮ੍ਪਿ ਨ੍ਹਤ੍ਵਾ ਮਲ੍ਲਿਕਂ ਰਥਂ ਆਰੋਪੇਤ੍ਵਾ ਨਗਰਾ ਨਿਕ੍ਖਮਿਤ੍ਵਾ ਆਗਤਮਗ੍ਗੇਨੇਵ ਪਾਯਾਸਿ. ਆਰਕ੍ਖਕਾ ਗਨ੍ਤ੍ਵਾ ਲਿਚ੍ਛਵੀਨਂ ਆਰੋਚੇਸੁਂ. ਲਿਚ੍ਛਵਿਰਾਜਾਨੋ ਕੁਜ੍ਝਿਤ੍ਵਾ ਪਞ੍ਚ ਰਥਸਤਾਨਿ ਆਰੁਯ੍ਹ ‘‘ਬਨ੍ਧੁਲਮਲ੍ਲਂ ਗਣ੍ਹਿਸ੍ਸਾਮਾ’’ਤਿ ਨਿਕ੍ਖਮਿਂਸੁ. ਤਂ ਪਵਤ੍ਤਿਂ ਮਹਾਲਿਸ੍ਸ ਆਰੋਚੇਸੁਂ. ਮਹਾਲਿ ‘‘ਮਾ ਗਮਿਤ੍ਥ, ਸੋ ਹਿ ਵੋ ਸਬ੍ਬੇ ਘਾਤਯਿਸ੍ਸਤੀ’’ਤਿ ਆਹ. ਤੇਪਿ ‘‘ਮਯਂ ਗਮਿਸ੍ਸਾਮਯੇਵਾ’’ਤਿ ਵਦਿਂਸੁ. ਤੇਨ ਹਿ ਚਕ੍ਕਸ੍ਸ ਯਾਵ ਨਾਭਿਤੋ ਪਥਵਿਂ ਪਵਿਟ੍ਠਟ੍ਠਾਨਂ ਦਿਸ੍ਵਾ ਨਿਵਤ੍ਤੇਯ੍ਯਾਥ, ਤਤੋ ਅਨਿਵਤ੍ਤਨ੍ਤਾ ਪੁਰਤੋ ਅਸਨਿਸਦ੍ਦਂ ਵਿਯ ਸੁਣਿਸ੍ਸਥ, ਤਮ੍ਹਾ ਠਾਨਾ ਨਿਵਤ੍ਤੇਯ੍ਯਾਥ, ਤਤੋ ਅਨਿਵਤ੍ਤਨ੍ਤਾ ਤੁਮ੍ਹਾਕਂ ਰਥਧੁਰੇਸੁ ਛਿਦ੍ਦਂ ਪਸ੍ਸਿਸ੍ਸਥ, ਤਮ੍ਹਾ ਠਾਨਾ ਨਿਵਤ੍ਤੇਯ੍ਯਾਥ, ਪੁਰਤੋ ਮਾਗਮਿਤ੍ਥਾਤਿ. ਤੇ ਤਸ੍ਸ ਵਚਨੇਨ ਅਨਿਵਤ੍ਤਿਤ੍ਵਾ ਤਂ ਅਨੁਬਨ੍ਧਿਂਸੁਯੇਵ.

ਮਲ੍ਲਿਕਾ ਦਿਸ੍ਵਾ ‘‘ਰਥਾ, ਸਾਮਿ, ਪਞ੍ਞਾਯਨ੍ਤੀ’’ਤਿ ਆਹ. ਤੇਨ ਹਿ ਏਕਸ੍ਸ ਰਥਸ੍ਸ ਵਿਯ ਪਞ੍ਞਾਯਨਕਾਲੇ ਮਮ ਆਰੋਚੇਯ੍ਯਾਸੀਤਿ. ਸਾ ਯਦਾ ਸਬ੍ਬੇ ਏਕੋ ਵਿਯ ਹੁਤ੍ਵਾ ਪਞ੍ਞਾਯਿਂਸੁ, ਤਦਾ ‘‘ਏਕਮੇਵ ਸਾਮਿ ਰਥਸੀਸਂ ਪਞ੍ਞਾਯਤੀ’’ਤਿ ਆਹ. ਬਨ੍ਧੁਲੋ ‘‘ਤੇਨ ਹਿ ਇਮਾ ਰਸ੍ਮਿਯੋ ਗਣ੍ਹਾਹੀ’’ਤਿ ਤਸ੍ਸਾ ਰਸ੍ਮਿਯੋ ਦਤ੍ਵਾ ਰਥੇ ਠਿਤੋਵ ਧਨੁਂ ਆਰੋਪੇਤਿ, ਰਥਚਕ੍ਕਂ ਯਾਵ ਨਾਭਿਤੋ ਪਥਵਿਂ ਪਾਵਿਸਿ, ਲਿਚ੍ਛਵਿਨੋ ਤਂ ਠਾਨਂ ਦਿਸ੍ਵਾਪਿ ਨ ਨਿਵਤ੍ਤਿਂਸੁ. ਇਤਰੋ ਥੋਕਂ ਗਨ੍ਤ੍ਵਾ ਜਿਯਂ ਪੋਥੇਸਿ, ਅਸਨਿਸਦ੍ਦੋ ਵਿਯ ਅਹੋਸਿ. ਤੇ ਤਤੋਪਿ ਨ ਨਿਵਤ੍ਤਿਂਸੁ, ਅਨੁਬਨ੍ਧਨ੍ਤਾ ਗਚ੍ਛਨ੍ਤੇਵ. ਬਨ੍ਧੁਲੋ ਰਥੇ ਠਿਤਕੋਵ ਏਕਂ ਸਰਂ ਖਿਪਿ. ਸੋ ਪਞ੍ਚਨ੍ਨਂ ਰਥਸਤਾਨਂ ਰਥਸੀਸਂ ਛਿਦ੍ਦਂ ਕਤ੍ਵਾ ਪਞ੍ਚ ਰਾਜਸਤਾਨਿ ਪਰਿਕਰਬਨ੍ਧਨਟ੍ਠਾਨੇ ਵਿਜ੍ਝਿਤ੍ਵਾ ਪਥਵਿਂ ਪਾਵਿਸਿ. ਤੇ ਅਤ੍ਤਨੋ ਵਿਦ੍ਧਭਾਵਂ ਅਜਾਨਿਤ੍ਵਾ ‘‘ਤਿਟ੍ਠ ਰੇ, ਤਿਟ੍ਠ ਰੇ’’ਤਿ ਵਦਨ੍ਤਾ ਅਨੁਬਨ੍ਧਿਂਸੁਯੇਵ. ਬਨ੍ਧੁਲੋ ਰਥਂ ਠਪੇਤ੍ਵਾ ‘‘ਤੁਮ੍ਹੇ ਮਤਕਾ, ਮਤਕੇਹਿ ਸਦ੍ਧਿਂ ਮਯ੍ਹਂ ਯੁਦ੍ਧਂ ਨਾਮ ਨਤ੍ਥੀ’’ਤਿ ਆਹ. ਤੇ ‘‘ਮਤਕਾ ਨਾਮ ਅਮ੍ਹਾਦਿਸਾ ਨੇਵ ਹੋਨ੍ਤੀ’’ਤਿ ਵਦਿਂਸੁ. ‘‘ਤੇਨ ਹਿ ਸਬ੍ਬਪਚ੍ਛਿਮਸ੍ਸ ਪਰਿਕਰਂ ਮੋਚੇਥਾ’’ਤਿ. ਤੇ ਮੋਚਯਿਂਸੁ. ਸੋ ਮੁਤ੍ਤਮਤ੍ਤੇਯੇਵ ਮਰਿਤ੍ਵਾ ਪਤਿਤੋ. ਅਥ ਨੇ ‘‘ਸਬ੍ਬੇਪਿ ਤੁਮ੍ਹੇ ਏਵਰੂਪਾ, ਅਤ੍ਤਨੋ ਘਰਾਨਿ ਗਨ੍ਤ੍ਵਾ ਸਂਵਿਧਾਤਬ੍ਬਂ ਸਂਵਿਦਹਿਤ੍ਵਾ ਪੁਤ੍ਤਦਾਰੇ ਅਨੁਸਾਸਿਤ੍ਵਾ ਸਨ੍ਨਾਹਂ ਮੋਚੇਥਾ’’ਤਿ ਆਹ. ਤੇ ਤਥਾ ਕਤ੍ਵਾ ਸਬ੍ਬੇ ਜੀਵਿਤਕ੍ਖਯਂ ਪਤ੍ਤਾ.

ਬਨ੍ਧੁਲੋਪਿ ਮਲ੍ਲਿਕਂ ਸਾਵਤ੍ਥਿਂ ਆਨੇਸਿ. ਸਾ ਸੋਲ਼ਸਕ੍ਖਤ੍ਤੁਂ ਯਮਕੇ ਪੁਤ੍ਤੇ ਵਿਜਾਯਿ, ਸਬ੍ਬੇਪਿ ਸੂਰਾ ਥਾਮਸਮ੍ਪਨ੍ਨਾ ਅਹੇਸੁਂ, ਸਬ੍ਬਸਿਪ੍ਪੇ ਨਿਪ੍ਫਤ੍ਤਿਂ ਪਾਪੁਣਿਂਸੁ. ਏਕੇਕਸ੍ਸਪਿ ਪੁਰਿਸਸਹਸ੍ਸਪਰਿਵਾਰੋ ਅਹੋਸਿ. ਪਿਤਰਾ ਸਦ੍ਧਿਂ ਰਾਜਨਿਵੇਸਨਂ ਗਚ੍ਛਨ੍ਤੇਹਿ ਤੇਹੇਵ ਰਾਜਙ੍ਗਣਂ ਪਰਿਪੂਰਿ. ਅਥੇਕਦਿਵਸਂ ਵਿਨਿਚ੍ਛਯੇ ਕੂਟਡ੍ਡਪਰਾਜਿਤਾ ਮਨੁਸ੍ਸਾ ਬਨ੍ਧੁਲਂ ਆਗਚ੍ਛਨ੍ਤਂ ਦਿਸ੍ਵਾ ਮਹਾਰਵਂ ਵਿਰਵਨ੍ਤਾ ਵਿਨਿਚ੍ਛਯਅਮਚ੍ਚਾਨਂ ਕੂਟਡ੍ਡਕਾਰਣਂ ਤਸ੍ਸ ਆਰੋਚੇਸੁਂ. ਸੋਪਿ ਵਿਨਿਚ੍ਛਯਂ ਗਨ੍ਤ੍ਵਾ ਤਂ ਅਡ੍ਡਂ ਤੀਰੇਤ੍ਵਾ ਸਾਮਿਕਮੇਵ ਸਾਮਿਕਂ, ਅਸ੍ਸਾਮਿਕਮੇਵ ਅਸ੍ਸਾਮਿਕਂ ਅਕਾਸਿ. ਮਹਾਜਨੋ ਮਹਾਸਦ੍ਦੇਨ ਸਾਧੁਕਾਰਂ ਪਵਤ੍ਤੇਸਿ. ਰਾਜਾ ‘‘ਕਿਮਿਦ’’ਨ੍ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ਤੁਸ੍ਸਿਤ੍ਵਾ ਸਬ੍ਬੇਪਿ ਤੇ ਅਮਚ੍ਚੇ ਹਾਰੇਤ੍ਵਾ ਬਨ੍ਧੁਲਸ੍ਸੇਵ ਵਿਨਿਚ੍ਛਯਂ ਨਿਯ੍ਯਾਦੇਸਿ. ਸੋ ਤਤੋ ਪਟ੍ਠਾਯ ਸਮ੍ਮਾ ਵਿਨਿਚ੍ਛਿਨਿ. ਤਤੋ ਪੋਰਾਣਕਵਿਨਿਚ੍ਛਯਿਕਾ ਲਞ੍ਜਂ ਅਲਭਨ੍ਤਾ ਅਪ੍ਪਲਾਭਾ ਹੁਤ੍ਵਾ ‘‘ਬਨ੍ਧੁਲੋ ਰਜ੍ਜਂ ਪਤ੍ਥੇਤੀ’’ਤਿ ਰਾਜਕੁਲੇ ਪਰਿਭਿਨ੍ਦਿਂਸੁ. ਰਾਜਾ ਤਂ ਕਥਂ ਗਹੇਤ੍ਵਾ ਚਿਤ੍ਤਂ ਨਿਗ੍ਗਹੇਤੁਂ ਨਾਸਕ੍ਖਿ, ‘‘ਇਮਸ੍ਮਿਂ ਇਧੇਵ ਘਾਤਿਯਮਾਨੇ ਗਰਹਾ ਮੇ ਉਪ੍ਪਜ੍ਜਿਸ੍ਸਤੀ’’ਤਿ ਪੁਨ ਚਿਨ੍ਤੇਤ੍ਵਾ ‘‘ਪਯੁਤ੍ਤਪੁਰਿਸੇਹਿ ਪਚ੍ਚਨ੍ਤਂ ਪਹਰਾਪੇਤ੍ਵਾ ਤੇ ਪਲਾਪੇਤ੍ਵਾ ਨਿਵਤ੍ਤਕਾਲੇ ਅਨ੍ਤਰਾਮਗ੍ਗੇ ਪੁਤ੍ਤੇਹਿ ਸਦ੍ਧਿਂ ਮਾਰੇਤੁਂ ਵਟ੍ਟਤੀ’’ਤਿ ਬਨ੍ਧੁਲਂ ਪਕ੍ਕੋਸਾਪੇਤ੍ਵਾ ‘‘ਪਚ੍ਚਨ੍ਤੋ ਕਿਰ ਕੁਪਿਤੋ, ਤਵ ਪੁਤ੍ਤੇਹਿ ਸਦ੍ਧਿਂ ਗਨ੍ਤ੍ਵਾ ਚੋਰੇ ਗਣ੍ਹਾਹੀ’’ਤਿ ਪਹਿਣਿਤ੍ਵਾ ‘‘ਏਤ੍ਥੇਵਸ੍ਸ ਦ੍ਵਤ੍ਤਿਂਸਾਯ ਪੁਤ੍ਤੇਹਿ ਸਦ੍ਧਿਂ ਸੀਸਂ ਛਿਨ੍ਦਿਤ੍ਵਾ ਆਹਰਥਾ’’ਤਿ ਤੇਹਿ ਸਦ੍ਧਿਂ ਅਞ੍ਞੇਪਿ ਸਮਤ੍ਥੇ ਮਹਾਯੋਧੇ ਪੇਸੇਸਿ. ਤਸ੍ਮਿਂ ਪਚ੍ਚਨ੍ਤਂ ਗਚ੍ਛਨ੍ਤੇਯੇਵ ‘‘ਸੇਨਾਪਤਿ ਕਿਰ ਆਗਚ੍ਛਤੀ’’ਤਿ ਸੁਤ੍ਵਾਵ ਪਯੁਤ੍ਤਕਚੋਰਾ ਪਲਾਯਿਂਸੁ. ਸੋ ਤਂ ਪਦੇਸਂ ਆਵਾਸਾਪੇਤ੍ਵਾ ਜਨਪਦਂ ਸਣ੍ਠਪੇਤ੍ਵਾ ਨਿਵਤ੍ਤਿ.

ਅਥਸ੍ਸ ਨਗਰਤੋ ਅਵਿਦੂਰੇ ਠਾਨੇ ਤੇ ਯੋਧਾ ਪੁਤ੍ਤੇਹਿ ਸਦ੍ਧਿਂ ਸੀਸਂ ਛਿਨ੍ਦਿਂਸੁ. ਤਂ ਦਿਵਸਂ ਮਲ੍ਲਿਕਾਯ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਦ੍ਵੇ ਅਗ੍ਗਸਾਵਕਾ ਨਿਮਨ੍ਤਿਤਾ ਹੋਨ੍ਤਿ. ਅਥਸ੍ਸਾ ਪੁਬ੍ਬਣ੍ਹਸਮਯੇ ‘‘ਸਾਮਿਕਸ੍ਸ ਤੇ ਸਦ੍ਧਿਂ ਪੁਤ੍ਤੇਹਿ ਸੀਸਂ ਛਿਨ੍ਦਿਂਸੂ’’ਤਿ ਪਣ੍ਣਂ ਆਹਰਿਤ੍ਵਾ ਅਦਂਸੁ. ਸਾ ਤਂ ਪਵਤ੍ਤਿਂ ਞਤ੍ਵਾ ਕਸ੍ਸਚਿ ਕਿਞ੍ਚਿ ਅਵਤ੍ਵਾ ਪਣ੍ਣਂ ਉਚ੍ਛਙ੍ਗੇ ਕਤ੍ਵਾ ਭਿਕ੍ਖੁਸਙ੍ਘਮੇਵ ਪਰਿਵਿਸਿ. ਅਥਸ੍ਸਾ ਪਰਿਚਾਰਿਕਾ ਭਿਕ੍ਖੂਨਂ ਭਤ੍ਤਂ ਦਤ੍ਵਾ ਸਪ੍ਪਿਚਾਟਿਂ ਆਹਰਨ੍ਤਿਯੋ ਥੇਰਾਨਂ ਪੁਰਤੋ ਚਾਟਿਂ ਭਿਨ੍ਦਿਂਸੁ. ਧਮ੍ਮਸੇਨਾਪਤਿ ‘‘ਉਪਾਸਿਕੇ, ਭੇਦਨਧਮ੍ਮਂ ਭਿਨ੍ਨਂ, ਨ ਚਿਨ੍ਤੇਤਬ੍ਬ’’ਨ੍ਤਿ ਆਹ. ਸਾ ਉਚ੍ਛਙ੍ਗਤੋ ਪਣ੍ਣਂ ਨੀਹਰਿਤ੍ਵਾ ‘‘ਦ੍ਵਤ੍ਤਿਂਸਪੁਤ੍ਤੇਹਿ ਸਦ੍ਧਿਂ ਪਿਤੁ ਸੀਸਂ ਛਿਨ੍ਨਨ੍ਤਿ ਮੇ ਇਮਂ ਪਣ੍ਣਂ ਆਹਰਿਂਸੁ, ਅਹਂ ਇਦਂ ਸੁਤ੍ਵਾਪਿ ਨ ਚਿਨ੍ਤੇਮਿ, ਸਪ੍ਪਿਚਾਟਿਯਾ ਭਿਨ੍ਨਾਯ ਕਿਂ ਚਿਨ੍ਤੇਮਿ, ਭਨ੍ਤੇ’’ਤਿ ਆਹ. ਧਮ੍ਮਸੇਨਾਪਤਿ ‘‘ਅਨਿਮਿਤ੍ਤਮਨਞ੍ਞਾਤ’’ਨ੍ਤਿਆਦੀਨਿ (ਸੁ. ਨਿ. ੫੭੯) ਵਤ੍ਵਾ ਧਮ੍ਮਂ ਦੇਸੇਤ੍ਵਾ ਉਟ੍ਠਾਯਾਸਨਾ ਵਿਹਾਰਂ ਅਗਮਾਸਿ. ਸਾਪਿ ਦ੍ਵਤ੍ਤਿਂਸ ਸੁਣਿਸਾਯੋ ਪਕ੍ਕੋਸਾਪੇਤ੍ਵਾ ‘‘ਤੁਮ੍ਹਾਕਂ ਸਾਮਿਕਾ ਅਤ੍ਤਨੋ ਪੁਰਿਮਕਮ੍ਮਫਲਂ ਲਭਿਂਸੁ, ਤੁਮ੍ਹੇ ਮਾ ਸੋਚਿਤ੍ਥ ਮਾ ਪਰਿਦੇਵਿਤ੍ਥ, ਰਞ੍ਞੋ ਉਪਰਿ ਮਨੋਪਦੋਸਂ ਮਾ ਕਰਿਤ੍ਥਾ’’ਤਿ ਓਵਦਿ.

ਰਞ੍ਞੋ ਚਰਪੁਰਿਸਾ ਤਂ ਕਥਂ ਸੁਤ੍ਵਾ ਤੇਸਂ ਨਿਦ੍ਦੋਸਭਾਵਂ ਰਞ੍ਞੋ ਕਥਯਿਂਸੁ. ਰਾਜਾ ਸਂਵੇਗਪ੍ਪਤ੍ਤੋ ਤਸ੍ਸਾ ਨਿਵੇਸਨਂ ਗਨ੍ਤ੍ਵਾ ਮਲ੍ਲਿਕਞ੍ਚ ਸੁਣਿਸਾਯੋ ਚਸ੍ਸਾ ਖਮਾਪੇਤ੍ਵਾ ਮਲ੍ਲਿਕਾਯ ਵਰਂ ਅਦਾਸਿ. ਸਾ ‘‘ਗਹਿਤੋ ਮੇ ਹੋਤੂ’’ਤਿ ਵਤ੍ਵਾ ਤਸ੍ਮਿਂ ਗਤੇ ਮਤਕਭਤ੍ਤਂ ਦਤ੍ਵਾ ਨ੍ਹਤ੍ਵਾ ਰਾਜਾਨਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਦੇਵ, ਤੁਮ੍ਹੇਹਿ ਮੇ ਵਰੋ ਦਿਨ੍ਨੋ, ਮਯ੍ਹਞ੍ਚ ਅਞ੍ਞੇਨ ਅਤ੍ਥੋ ਨਤ੍ਥਿ, ਦ੍ਵਤ੍ਤਿਂਸਾਯ ਮੇ ਸੁਣਿਸਾਨਂ ਮਮ ਚ ਕੁਲਘਰਗਮਨਂ ਅਨੁਜਾਨਾਥਾ’’ਤਿ ਆਹ. ਰਾਜਾ ਸਮ੍ਪਟਿਚ੍ਛਿ. ਸਾ ਦ੍ਵਤ੍ਤਿਂਸਾਯ ਸੁਣਿਸਾਨਂ ਸਕਕੁਲਂ ਪੇਸੇਤ੍ਵਾ ਸਯਂ ਕੁਸਿਨਾਰਨਗਰੇ ਅਤ੍ਤਨੋ ਕੁਲਘਰਂ ਅਗਮਾਸਿ. ਰਾਜਾ ਬਨ੍ਧੁਲਸੇਨਾਪਤਿਨੋ ਭਾਗਿਨੇਯ੍ਯਸ੍ਸ ਦੀਘਕਾਰਾਯਨਸ੍ਸ ਨਾਮ ਸੇਨਾਪਤਿਟ੍ਠਾਨਂ ਅਦਾਸਿ. ਸੋ ਪਨ ‘‘ਮਾਤੁਲੋ ਮੇ ਇਮਿਨਾ ਮਾਰਿਤੋ’’ਤਿ ਰਞ੍ਞੋ ਓਤਾਰਂ ਗਵੇਸਨ੍ਤੋ ਵਿਚਰਤਿ. ਰਾਜਾਪਿ ਨਿਪ੍ਪਰਾਧਸ੍ਸ ਬਨ੍ਧੁਲਸ੍ਸ ਮਾਰਿਤਕਾਲਤੋ ਪਟ੍ਠਾਯ ਵਿਪ੍ਪਟਿਸਾਰੀ ਚਿਤ੍ਤਸ੍ਸਾਦਂ ਨ ਲਭਤਿ, ਰਜ੍ਜਸੁਖਂ ਨਾਨੁਭੋਤਿ.

ਤਦਾ ਸਤ੍ਥਾ ਸਾਕਿਯਾਨਂ ਵੇਲ਼ੁਂ ਨਾਮ ਨਿਗਮਂ ਉਪਨਿਸ੍ਸਾਯ ਵਿਹਰਤਿ. ਰਾਜਾ ਤਤ੍ਥ ਗਨ੍ਤ੍ਵਾ ਆਰਾਮਤੋ ਅਵਿਦੂਰੇ ਖਨ੍ਧਾਵਾਰਂ ਨਿਵਾਸੇਤ੍ਵਾ ‘‘ਮਹਨ੍ਤੇਨ ਪਰਿਵਾਰੇਨ ਸਤ੍ਥਾਰਂ ਵਨ੍ਦਿਸ੍ਸਾਮਾ’’ਤਿ ਵਿਹਾਰਂ ਗਨ੍ਤ੍ਵਾ ਪਞ੍ਚ ਰਾਜਕਕੁਧਭਣ੍ਡਾਨਿ ਦੀਘਕਾਰਾਯਨਸ੍ਸ ਦਤ੍ਵਾ ਏਕਕੋਵ ਗਨ੍ਧਕੁਟਿਂ ਪਾਵਿਸਿ. ਸਬ੍ਬਂ ਧਮ੍ਮਚੇਤਿਯਸੁਤ੍ਤਨਿਯਾਮੇਨੇਵ (ਮ. ਨਿ. ੨.੩੬੪ ਆਦਯੋ) ਵੇਦਿਤਬ੍ਬਂ. ਤਸ੍ਮਿਂ ਗਨ੍ਧਕੁਟਿਂ ਪਵਿਟ੍ਠੇ ਦੀਘਕਾਰਾਯਨੋ ਤਾਨਿ ਪਞ੍ਚ ਰਾਜਕਕੁਧਭਣ੍ਡਾਨਿ ਗਹੇਤ੍ਵਾ ਵਿਟਟੂਭਂ ਰਾਜਾਨਂ ਕਤ੍ਵਾ ਰਞ੍ਞੋ ਏਕਂ ਅਸ੍ਸਂ ਏਕਞ੍ਚ ਉਪਟ੍ਠਾਨਕਾਰਿਕਂ ਮਾਤੁਗਾਮਂ ਨਿਵਤ੍ਤੇਤ੍ਵਾ ਸਾਵਤ੍ਥਿਂ ਅਗਮਾਸਿ. ਰਾਜਾ ਸਤ੍ਥਾਰਾ ਸਦ੍ਧਿਂ ਪਿਯਕਥਂ ਕਥੇਤ੍ਵਾ ਨਿਕ੍ਖਨ੍ਤੋ ਸੇਨਂ ਅਦਿਸ੍ਵਾ ਤਂ ਮਾਤੁਗਾਮਂ ਪੁਚ੍ਛਿਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ ‘‘ਅਹਂ ਭਾਗਿਨੇਯ੍ਯਂ ਅਜਾਤਸਤ੍ਤੁਂ ਆਦਾਯ ਆਗਨ੍ਤ੍ਵਾ ਵਿਟਟੂਭਂ ਗਹੇਸ੍ਸਾਮੀ’’ਤਿ ਰਾਜਗਹਨਗਰਂ ਗਚ੍ਛਨ੍ਤੋ ਵਿਕਾਲੇ ਦ੍ਵਾਰੇਸੁ ਪਿਹਿਤੇਸੁ ਨਗਰਂ ਪਵਿਸਿਤੁਮਸਕ੍ਕੋਨ੍ਤੋ ਏਕਿਸ੍ਸਾਯ ਸਾਲਾਯ ਨਿਪਜ੍ਜਿਤ੍ਵਾ ਵਾਤਾਤਪੇਨ ਕਿਲਨ੍ਤੋ ਰਤ੍ਤਿਭਾਗੇ ਤਤ੍ਥੇਵ ਕਾਲਮਕਾਸਿ. ਵਿਭਾਤਾਯ ਰਤ੍ਤਿਯਾ ‘‘ਦੇਵ ਕੋਸਲਨਰਿਨ੍ਦ, ਇਦਾਨਿ ਅਨਾਥੋਸਿ ਜਾਤੋ’’ਤਿ ਵਿਲਪਨ੍ਤਿਯਾ ਤਸ੍ਸਾ ਇਤ੍ਥਿਯਾ ਸਦ੍ਦਂ ਸੁਤ੍ਵਾ ਰਞ੍ਞੋ ਆਰੋਚੇਸੁਂ. ਸੋ ਮਾਤੁਲਸ੍ਸ ਮਹਨ੍ਤੇਨ ਸਕ੍ਕਾਰੇਨ ਸਰੀਰਕਿਚ੍ਚਂ ਕਾਰੇਸਿ.

ਵਿਟਟੂਭੋਪਿ ਰਜ੍ਜਂ ਲਭਿਤ੍ਵਾ ਤਂ ਵੇਰਂ ਸਰਿਤ੍ਵਾ ‘‘ਸਬ੍ਬੇਪਿ ਸਾਕਿਯੇ ਮਾਰੇਸ੍ਸਾਮੀ’’ਤਿ ਮਹਤਿਯਾ ਸੇਨਾਯ ਨਿਕ੍ਖਮਿ. ਤਂ ਦਿਵਸਂ ਸਤ੍ਥਾ ਪਚ੍ਚੂਸਸਮਯੇ ਲੋਕਂ ਵੋਲੋਕੇਨ੍ਤੋ ਞਾਤਿਸਙ੍ਘਸ੍ਸ ਵਿਨਾਸਂ ਦਿਸ੍ਵਾ ‘‘ਞਾਤਿਸਙ੍ਗਹਂ ਕਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਬ੍ਬਣ੍ਹਸਮਯੇ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਗਨ੍ਧਕੁਟਿਯਂ ਸੀਹਸੇਯ੍ਯਂ ਕਪ੍ਪੇਤ੍ਵਾ ਸਾਯਨ੍ਹਸਮਯੇ ਆਕਾਸੇਨ ਗਨ੍ਤ੍ਵਾ ਕਪਿਲਵਤ੍ਥੁਸਾਮਨ੍ਤੇ ਏਕਸ੍ਮਿਂ ਕਬਰਚ੍ਛਾਯੇ ਰੁਕ੍ਖਮੂਲੇ ਨਿਸੀਦਿ. ਤਤੋ ਅਵਿਦੂਰੇ ਵਿਟਟੂਭਸ੍ਸ ਰਜ੍ਜਸੀਮਾਯ ਅਨ੍ਤੋ ਸਨ੍ਦਚ੍ਛਾਯੋ ਨਿਗ੍ਰੋਧਰੁਕ੍ਖੋ ਅਤ੍ਥਿ, ਵਿਟਟੂਭੋ ਸਤ੍ਥਾਰਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਭਨ੍ਤੇ, ਕਿਂਕਾਰਣਾ ਏਵਰੂਪਾਯ ਉਣ੍ਹਵੇਲਾਯ ਇਮਸ੍ਮਿਂ ਕਬਰਚ੍ਛਾਯੇ ਰੁਕ੍ਖਮੂਲੇ ਨਿਸੀਦਥ, ਏਤਸ੍ਮਿਂ ਸਨ੍ਦਚ੍ਛਾਯੇ ਨਿਗ੍ਰੋਧਰੁਕ੍ਖਮੂਲੇ ਨਿਸੀਦਥ, ਭਨ੍ਤੇ’’ਤਿ ਵਤ੍ਵਾ ‘‘ਹੋਤੁ, ਮਹਾਰਾਜ, ਞਾਤਕਾਨਂ ਛਾਯਾ ਨਾਮ ਸੀਤਲਾ’’ਤਿ ਵੁਤ੍ਤੇ ‘‘ਞਾਤਕਾਨਂ ਰਕ੍ਖਣਤ੍ਥਾਯ ਸਤ੍ਥਾ ਆਗਤੋ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਸਾਵਤ੍ਥਿਮੇਵ ਪਚ੍ਚਾਗਮਿ. ਸਤ੍ਥਾਪਿ ਉਪ੍ਪਤਿਤ੍ਵਾ ਜੇਤਵਨਮੇਵ ਗਤੋ.

ਰਾਜਾ ਸਾਕਿਯਾਨਂ ਦੋਸਂ ਸਰਿਤ੍ਵਾ ਦੁਤਿਯਂ ਨਿਕ੍ਖਮਿਤ੍ਵਾ ਤਥੇਵ ਸਤ੍ਥਾਰਂ ਪਸ੍ਸਿਤ੍ਵਾ ਪੁਨ ਨਿਵਤ੍ਤਿਤ੍ਵਾ ਤਤਿਯਵਾਰੇ ਨਿਕ੍ਖਮਿਤ੍ਵਾ ਤਤ੍ਥੇਵ ਸਤ੍ਥਾਰਂ ਪਸ੍ਸਿਤ੍ਵਾ ਨਿਵਤ੍ਤਿ. ਚਤੁਤ੍ਥਵਾਰੇ ਪਨ ਤਸ੍ਮਿਂ ਨਿਕ੍ਖਨ੍ਤੇ ਸਤ੍ਥਾ ਸਾਕਿਯਾਨਂ ਪੁਬ੍ਬਕਮ੍ਮਂ ਓਲੋਕੇਤ੍ਵਾ ਤੇਸਂ ਨਦਿਯਂ ਵਿਸਪਕ੍ਖਿਪਨਪਾਪਕਮ੍ਮਸ੍ਸ ਅਪ੍ਪਟਿਬਾਹਿਰਭਾਵਂ ਞਤ੍ਵਾ ਚਤੁਤ੍ਥਵਾਰੇ ਨ ਅਗਮਾਸਿ. ਵਿਟਟੂਭਰਾਜਾ ਖੀਰਪਾਯਕੇ ਦਾਰਕੇ ਆਦਿਂ ਕਤ੍ਵਾ ਸਬ੍ਬੇ ਸਾਕਿਯੇ ਘਾਤੇਤ੍ਵਾ ਗਲਲੋਹਿਤੇਨ ਨਿਸਿਨ੍ਨਫਲਕਂ ਧੋਵਿਤ੍ਵਾ ਪਚ੍ਚਾਗਮਿ. ਸਤ੍ਥਰਿ ਤਤਿਯਵਾਰੇ ਗਮਨਤੋ ਪਚ੍ਚਾਗਨ੍ਤ੍ਵਾ ਪੁਨਦਿਵਸੇ ਪਿਣ੍ਡਾਯ ਚਰਿਤ੍ਵਾ ਨਿਟ੍ਠਾਪਿਤਭਤ੍ਤਕਿਚ੍ਚੇ ਗਨ੍ਧਕੁਟਿਯਂ ਪਵਿਸਨ੍ਤੇ ਦਿਸਾਹਿ ਸਨ੍ਨਿਪਤਿਤਾ ਭਿਕ੍ਖੂ ਧਮ੍ਮਸਭਾਯਂ ਨਿਸੀਦਿਤ੍ਵਾ ‘‘ਆਵੁਸੋ, ਸਤ੍ਥਾ ਅਤ੍ਤਾਨਂ ਦਸ੍ਸੇਤ੍ਵਾ ਰਾਜਾਨਂ ਨਿਵਤ੍ਤਾਪੇਤ੍ਵਾ ਞਾਤਕੇ ਮਰਣਭਯਾ ਮੋਚੇਸਿ, ਏਵਂ ਞਾਤਕਾਨਂ ਅਤ੍ਥਚਰੋ ਸਤ੍ਥਾ’’ਤਿ ਭਗਵਤੋ ਗੁਣਕਥਂ ਕਥਯਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ ਤਥਾਗਤੋ ਞਾਤਕਾਨਂ ਅਤ੍ਥਂ ਚਰਤਿ, ਪੁਬ੍ਬੇਪਿ ਚਰਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਨਾਮ ਰਾਜਾ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਏਕਦਿਵਸਂ ਚਿਨ੍ਤੇਸਿ ‘‘ਜਮ੍ਬੁਦੀਪਤਲੇ ਰਾਜਾਨੋ ਬਹੁਥਮ੍ਭੇਸੁ ਪਾਸਾਦੇਸੁ ਵਸਨ੍ਤਿ, ਤਸ੍ਮਾ ਬਹੂਹਿ ਥਮ੍ਭੇਹਿ ਪਾਸਾਦਕਰਣਂ ਨਾਮ ਅਨਚ੍ਛਰਿਯਂ, ਯਂਨੂਨਾਹਂ ਏਕਥਮ੍ਭਕਂ ਪਾਸਾਦਂ ਕਾਰੇਯ੍ਯਂ, ਏਵਂ ਸਬ੍ਬਰਾਜੂਨਂ ਅਗ੍ਗਰਾਜਾ ਭਵਿਸ੍ਸਾਮੀ’’ਤਿ. ਸੋ ਵਡ੍ਢਕੀ ਪਕ੍ਕੋਸਾਪੇਤ੍ਵਾ ‘‘ਮਯ੍ਹਂ ਸੋਭਗ੍ਗਪ੍ਪਤ੍ਤਂ ਏਕਥਮ੍ਭਕਂ ਪਾਸਾਦਂ ਕਰੋਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਉਜੂ ਮਹਨ੍ਤੇ ਏਕਥਮ੍ਭਕਪਾਸਾਦਾਰਹੇ ਬਹੂ ਰੁਕ੍ਖੇ ਦਿਸ੍ਵਾ ‘‘ਇਮੇ ਰੁਕ੍ਖਾ ਸਨ੍ਤਿ, ਮਗ੍ਗੋ ਪਨ ਵਿਸਮੋ, ਨ ਸਕ੍ਕਾ ਓਤਾਰੇਤੁਂ, ਰਞ੍ਞੋ ਆਚਿਕ੍ਖਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਤਥਾ ਅਕਂਸੁ. ਰਾਜਾ ‘‘ਕੇਨਚਿ ਉਪਾਯੇਨ ਸਣਿਕਂ ਓਤਾਰੇਥਾ’’ਤਿ ਵਤ੍ਵਾ ‘‘ਦੇਵ, ਯੇਨ ਕੇਨਚਿ ਉਪਾਯੇਨ ਨ ਸਕ੍ਕਾ’’ਤਿ ਵੁਤ੍ਤੇ ‘‘ਤੇਨ ਹਿ ਮਮ ਉਯ੍ਯਾਨੇ ਏਕਂ ਰੁਕ੍ਖਂ ਉਪਧਾਰੇਥਾ’’ਤਿ ਆਹ. ਵਡ੍ਢਕੀ ਉਯ੍ਯਾਨਂ ਗਨ੍ਤ੍ਵਾ ਏਕਂ ਸੁਜਾਤਂ ਉਜੁਕਂ ਗਾਮਨਿਗਮਪੂਜਿਤਂ ਰਾਜਕੁਲਤੋਪਿ ਲਦ੍ਧਬਲਿਕਮ੍ਮਂ ਮਙ੍ਗਲਸਾਲਰੁਕ੍ਖਂ ਦਿਸ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸੁਂ. ਰਾਜਾ ‘‘ਉਯ੍ਯਾਨੇ ਰੁਕ੍ਖੋ ਨਾਮ ਮਮ ਪਟਿਬਦ੍ਧੋ, ਗਚ੍ਛਥ ਭੋ ਤਂ ਛਿਨ੍ਦਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਗਨ੍ਧਮਾਲਾਦਿਹਤ੍ਥਾ ਉਯ੍ਯਾਨਂ ਗਨ੍ਤ੍ਵਾ ਰੁਕ੍ਖੇ ਗਨ੍ਧਪਞ੍ਚਙ੍ਗੁਲਿਕਂ ਦਤ੍ਵਾ ਸੁਤ੍ਤੇਨ ਪਰਿਕ੍ਖਿਪਿਤ੍ਵਾ ਪੁਪ੍ਫਕਣ੍ਣਿਕਂ ਬਨ੍ਧਿਤ੍ਵਾ ਦੀਪਂ ਜਾਲੇਤ੍ਵਾ ਬਲਿਕਮ੍ਮਂ ਕਤ੍ਵਾ ‘‘ਇਤੋ ਸਤ੍ਤਮੇ ਦਿਵਸੇ ਆਗਨ੍ਤ੍ਵਾ ਰੁਕ੍ਖਂ ਛਿਨ੍ਦਿਸ੍ਸਾਮ, ਰਾਜਾ ਛਿਨ੍ਦਾਪੇਤਿ, ਇਮਸ੍ਮਿਂ ਰੁਕ੍ਖੇ ਨਿਬ੍ਬਤ੍ਤਦੇਵਤਾ ਅਞ੍ਞਤ੍ਥ ਗਚ੍ਛਤੁ, ਅਮ੍ਹਾਕਂ ਦੋਸੋ ਨਤ੍ਥੀ’’ਤਿ ਸਾਵੇਸੁਂ.

ਅਥ ਤਸ੍ਮਿਂ ਨਿਬ੍ਬਤ੍ਤੋ ਦੇਵਪੁਤ੍ਤੋ ਤਂ ਵਚਨਂ ਸੁਤ੍ਵਾ ‘‘ਨਿਸ੍ਸਂਸਯਂ ਇਮੇ ਵਡ੍ਢਕੀ ਇਮਂ ਰੁਕ੍ਖਂ ਛਿਨ੍ਦਿਸ੍ਸਨ੍ਤਿ, ਵਿਮਾਨਂ ਮੇ ਨਸ੍ਸਿਸ੍ਸਤਿ, ਵਿਮਾਨਪਰਿਯਨ੍ਤਿਕਮੇਵ ਖੋ ਪਨ ਮਯ੍ਹਂ ਜੀਵਿਤਂ, ਇਮਞ੍ਚ ਰਕ੍ਖਂ ਪਰਿਵਾਰੇਤ੍ਵਾ ਠਿਤੇਸੁ ਤਰੁਣਸਾਲਰੁਕ੍ਖੇਸੁ ਨਿਬ੍ਬਤ੍ਤਾਨਂ ਮਮ ਞਾਤਿਦੇਵਤਾਨਮ੍ਪਿ ਬਹੂਨਿ ਵਿਮਾਨਾਨਿ ਨਸ੍ਸਿਸ੍ਸਨ੍ਤਿ. ਵਿਮਾਨਪਰਿਯਨ੍ਤਿਕਮੇਵ ਮਮ ਞਾਤੀਨਂ ਦੇਵਤਾਨਮ੍ਪਿ ਜੀਵਿਤਂ, ਨ ਖੋ ਪਨ ਮਂ ਤਥਾ ਅਤ੍ਤਨੋ ਵਿਨਾਸੋ ਬਾਧਤਿ, ਯਥਾ ਞਾਤੀਨਂ, ਤਸ੍ਮਾ ਨੇਸਂ ਮਯਾ ਜੀਵਿਤਂ ਦਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਅਡ੍ਢਰਤ੍ਤਸਮਯੇ ਦਿਬ੍ਬਾਲਙ੍ਕਾਰਪਟਿਮਣ੍ਡਿਤੋ ਰਞ੍ਞੋ ਸਿਰਿਗਬ੍ਭਂ ਪਵਿਸਿਤ੍ਵਾ ਸਕਲਗਬ੍ਭਂ ਏਕੋਭਾਸਂ ਕਤ੍ਵਾ ਉਸ੍ਸਿਸਕਪਸ੍ਸੇ ਰੋਦਮਾਨੋ ਅਟ੍ਠਾਸਿ. ਰਾਜਾ ਤਂ ਦਿਸ੍ਵਾ ਭੀਤਤਸਿਤੋ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਪਠਮਂ ਗਾਥਮਾਹ –

੧੩. ‘‘ਕਾ ਤ੍ਵਂ ਸੁਦ੍ਧੇਹਿ ਵਤ੍ਥੇਹਿ, ਅਘੇ ਵੇਹਾਯਸਂ ਠਿਤਾ;

ਕੇਨ ਤ੍ਯਾਸ੍ਸੂਨਿ ਵਤ੍ਤਨ੍ਤਿ, ਕੁਤੋ ਤਂ ਭਯਮਾਗਤ’’ਨ੍ਤਿ.

ਤਤ੍ਥ ਕਾ ਤ੍ਵਨ੍ਤਿ ਨਾਗਯਕ੍ਖਸੁਪਣ੍ਣਸਕ੍ਕਾਦੀਸੁ ਕਾ ਨਾਮ ਤ੍ਵਨ੍ਤਿ ਪੁਚ੍ਛਤਿ. ਵਤ੍ਥੇਹੀਤਿ ਵਚਨਮਤ੍ਤਮੇਵੇਤਂ, ਸਬ੍ਬੇਪਿ ਪਨ ਦਿਬ੍ਬਾਲਙ੍ਕਾਰੇ ਸਨ੍ਧਾਯੇਵਮਾਹ. ਅਘੇਤਿ ਅਪ੍ਪਟਿਘੇ ਆਕਾਸੇ. ਵੇਹਾਯਸਨ੍ਤਿ ਤਸ੍ਸੇਵ ਵੇਵਚਨਂ. ਕੇਨ ਤ੍ਯਾਸ੍ਸੂਨਿ ਵਤ੍ਤਨ੍ਤੀਤਿ ਕੇਨ ਕਾਰਣੇਨ ਤਵ ਅਸ੍ਸੂਨਿ ਵਤ੍ਤਨ੍ਤਿ. ਕੁਤੋਤਿ ਞਾਤਿਵਿਯੋਗਧਨਵਿਨਾਸਾਦੀਨਂ ਕਿਂ ਨਿਸ੍ਸਾਯ ਤਂ ਭਯਮਾਗਤਨ੍ਤਿ ਪੁਚ੍ਛਤਿ.

ਤਤੋ ਦੇਵਰਾਜਾ ਦ੍ਵੇ ਗਾਥਾ ਅਭਾਸਿ –

੧੪. ‘‘ਤਵੇਵ ਦੇਵ ਵਿਜਿਤੇ, ਭਦ੍ਦਸਾਲੋਤਿ ਮਂ ਵਿਦੂ;

ਸਟ੍ਠਿ ਵਸ੍ਸਸਹਸ੍ਸਾਨਿ, ਤਿਟ੍ਠਤੋ ਪੂਜਿਤਸ੍ਸ ਮੇ.

੧੫. ‘‘ਕਾਰਯਨ੍ਤਾ ਨਗਰਾਨਿ, ਅਗਾਰੇ ਚ ਦਿਸਮ੍ਪਤਿ;

ਵਿਵਿਧੇ ਚਾਪਿ ਪਾਸਾਦੇ, ਨ ਮਂ ਤੇ ਅਚ੍ਚਮਞ੍ਞਿਸੁਂ;

ਯਥੇਵ ਮਂ ਤੇ ਪੂਜੇਸੁਂ, ਤਥੇਵ ਤ੍ਵਮ੍ਪਿ ਪੂਜਯਾ’’ਤਿ.

ਤਤ੍ਥ ਤਿਟ੍ਠਤੋਤਿ ਸਕਲਬਾਰਾਣਸਿਨਗਰੇਹਿ ਚੇਵ ਗਾਮਨਿਗਮੇਹਿ ਚ ਤਯਾ ਚ ਪੂਜਿਤਸ੍ਸ ਨਿਚ੍ਚਂ ਬਲਿਕਮ੍ਮਞ੍ਚ ਸਕ੍ਕਾਰਞ੍ਚ ਲਭਨ੍ਤਸ੍ਸ ਮਯ੍ਹਂ ਇਮਸ੍ਮਿਂ ਉਯ੍ਯਾਨੇ ਤਿਟ੍ਠਨ੍ਤਸ੍ਸ ਏਤ੍ਤਕੋ ਕਾਲੋ ਗਤੋਤਿ ਦਸ੍ਸੇਤਿ. ਨਗਰਾਨੀਤਿ ਨਗਰਪਟਿਸਙ੍ਖਰਣਕਮ੍ਮਾਨਿ. ਅਗਾਰੇਚਾਤਿ ਭੂਮਿਗੇਹਾਨਿ. ਦਿਸਮ੍ਪਤੀਤਿ ਦਿਸਾਨਂ ਪਤਿ, ਮਹਾਰਾਜ. ਨ ਮਂ ਤੇਤਿ ਤੇ ਨਗਰਪਟਿਸਙ੍ਖਰਣਾਦੀਨਿ ਕਰੋਨ੍ਤਾ ਇਮਸ੍ਮਿਂ ਨਗਰੇ ਪੋਰਾਣਕਰਾਜਾਨੋ ਮਂ ਨਾਤਿਮਞ੍ਞਿਸੁਂ ਨਾਤਿਕ੍ਕਮਿਂਸੁ ਨ ਵਿਹੇਠਯਿਂਸੁ, ਮਮ ਨਿਵਾਸਰੁਕ੍ਖਂ ਛਿਨ੍ਦਿਤ੍ਵਾ ਅਤ੍ਤਨੋ ਕਮ੍ਮਂ ਨ ਕਰਿਂਸੁ, ਮਯ੍ਹਂ ਪਨ ਸਕ੍ਕਾਰਮੇਵ ਕਰਿਂਸੂਤਿ ਅਵਚ. ਯਥੇਵਾਤਿ ਤਸ੍ਮਾ ਯਥੇਵ ਤੇ ਪੋਰਾਣਕਰਾਜਾਨੋ ਮਂ ਪੂਜਯਿਂਸੁ, ਏਕੋਪਿ ਇਮਂ ਰੁਕ੍ਖਂ ਨ ਛਿਨ੍ਦਾਪੇਸਿ, ਤ੍ਵਞ੍ਚਾਪਿ ਮਂ ਤਥੇਵ ਪੂਜਯ, ਮਾ ਮੇ ਰੁਕ੍ਖਂ ਛੇਦਯੀਤਿ.

ਤਤੋ ਰਾਜਾ ਦ੍ਵੇ ਗਾਥਾ ਅਭਾਸਿ –

੧੬. ‘‘ਤਂ ਇਵਾਹਂ ਨ ਪਸ੍ਸਾਮਿ, ਥੂਲਂ ਕਾਯੇਨ ਤੇ ਦੁਮਂ;

ਆਰੋਹਪਰਿਣਾਹੇਨ, ਅਭਿਰੂਪੋਸਿ ਜਾਤਿਯਾ.

੧੭. ‘‘ਪਾਸਾਦਂ ਕਾਰਯਿਸ੍ਸਾਮਿ, ਏਕਤ੍ਥਮ੍ਭਂ ਮਨੋਰਮਂ;

ਤਤ੍ਥ ਤਂ ਉਪਨੇਸ੍ਸਾਮਿ, ਚਿਰਂ ਤੇ ਯਕ੍ਖ ਜੀਵਿਤ’’ਨ੍ਤਿ.

ਤਤ੍ਥ ਕਾਯੇਨਾਤਿ ਪਮਾਣੇਨ. ਇਦਂ ਵੁਤ੍ਤਂ ਹੋਤਿ – ਤਵ ਪਮਾਣੇਨ ਤਂ ਵਿਯ ਥੂਲਂ ਮਹਨ੍ਤਂ ਅਞ੍ਞਂ ਦੁਮਂ ਨ ਪਸ੍ਸਾਮਿ, ਤ੍ਵਞ੍ਞੇਵ ਪਨ ਆਰੋਹਪਰਿਣਾਹੇਨ ਸੁਜਾਤਸਙ੍ਖਾਤਾਯ ਸਮਸਣ੍ਠਾਨਉਜੁਭਾਵਪ੍ਪਕਾਰਾਯ ਜਾਤਿਯਾ ਚ ਅਭਿਰੂਪੋ ਸੋਭਗ੍ਗਪ੍ਪਤ੍ਤੋ ਏਕਥਮ੍ਭਪਾਸਾਦਾਰਹੋਤਿ. ਪਾਸਾਦਨ੍ਤਿ ਤਸ੍ਮਾ ਤਂ ਛੇਦਾਪੇਤ੍ਵਾ ਅਹਂ ਪਾਸਾਦਂ ਕਾਰਾਪੇਸ੍ਸਾਮੇਵ. ਤਤ੍ਥ ਤਨ੍ਤਿ ਤਂ ਪਨਾਹਂ ਸਮ੍ਮ ਦੇਵਰਾਜ, ਤਤ੍ਥ ਪਾਸਾਦੇ ਉਪਨੇਸ੍ਸਾਮਿ, ਸੋ ਤ੍ਵਂ ਮਯਾ ਸਦ੍ਧਿਂ ਏਕਤੋ ਵਸਨ੍ਤੋ ਅਗ੍ਗਗਨ੍ਧਮਾਲਾਦੀਨਿ ਲਭਨ੍ਤੋ ਸਕ੍ਕਾਰਪ੍ਪਤ੍ਤੋ ਸੁਖਂ ਜੀਵਿਸ੍ਸਸਿ, ਨਿਵਾਸਟ੍ਠਾਨਾਭਾਵੇਨ ਮੇ ਵਿਨਾਸੋ ਭਵਿਸ੍ਸਤੀਤਿ ਮਾ ਚਿਨ੍ਤਯਿ, ਚਿਰਂ ਤੇ ਯਕ੍ਖ ਜੀਵਿਤਂ ਭਵਿਸ੍ਸਤੀਤਿ.

ਤਂ ਸੁਤ੍ਵਾ ਦੇਵਰਾਜਾ ਦ੍ਵੇ ਗਾਥਾ ਅਭਾਸਿ –

੧੮. ‘‘ਏਵਂ ਚਿਤ੍ਤਂ ਉਦਪਾਦਿ, ਸਰੀਰੇਨ ਵਿਨਾਭਾਵੋ;

ਪੁਥੁਸੋ ਮਂ ਵਿਕਨ੍ਤਿਤ੍ਵਾ, ਖਣ੍ਡਸੋ ਅਵਕਨ੍ਤਥ.

੧੯. ‘‘ਅਗ੍ਗੇ ਚ ਛੇਤ੍ਵਾ ਮਜ੍ਝੇ ਚ, ਪਚ੍ਛਾ ਮੂਲਮ੍ਹਿ ਛਿਨ੍ਦਥ;

ਏਵਂ ਮੇ ਛਿਜ੍ਜਮਾਨਸ੍ਸ, ਨ ਦੁਕ੍ਖਂ ਮਰਣਂ ਸਿਯਾ’’ਤਿ.

ਤਤ੍ਥ ਏਵਂ ਚਿਤ੍ਤਂ ਉਦਪਾਦੀਤਿ ਯਦਿ ਏਵਂ ਚਿਤ੍ਤਂ ਤਵ ਉਪ੍ਪਨ੍ਨਂ. ਸਰੀਰੇਨ ਵਿਨਾਭਾਵੋਤਿ ਯਦਿ ਤੇ ਮਮ ਸਰੀਰੇਨ ਭਦ੍ਦਸਾਲਰੁਕ੍ਖੇਨ ਸਦ੍ਧਿਂ ਮਮ ਵਿਨਾਭਾਵੋ ਪਤ੍ਥਿਤੋ. ਪੁਥੁਸੋਤਿ ਬਹੁਧਾ. ਵਿਕਨ੍ਤਿਤ੍ਵਾਤਿ ਛਿਨ੍ਦਿਤ੍ਵਾ. ਖਣ੍ਡਸੋਤਿ ਖਣ੍ਡਾਖਣ੍ਡਂ ਕਤ੍ਵਾ ਅਵਕਨ੍ਤਥ. ਅਗ੍ਗੇ ਚਾਤਿ ਅਵਕਨ੍ਤਨ੍ਤਾ ਪਨ ਪਠਮਂ ਅਗ੍ਗੇ, ਤਤੋ ਮਜ੍ਝੇ ਛੇਤ੍ਵਾ ਸਬ੍ਬਪਚ੍ਛਾ ਮੂਲੇ ਛਿਨ੍ਦਥ. ਏਵਞ੍ਹਿ ਮੇ ਛਿਜ੍ਜਮਾਨਸ੍ਸ ਨ ਦੁਕ੍ਖਂ ਮਰਣਂ ਸਿਯਾ, ਸੁਖਂ ਨੁ ਖਣ੍ਡਸੋ ਭਵੇਯ੍ਯਾਤਿ ਯਾਚਤਿ.

ਤਤੋ ਰਾਜਾ ਦ੍ਵੇ ਗਾਥਾ ਅਭਾਸਿ –

੨੦. ‘‘ਹਤ੍ਥਪਾਦਂ ਯਥਾ ਛਿਨ੍ਦੇ, ਕਣ੍ਣਨਾਸਞ੍ਚ ਜੀਵਤੋ;

ਤਤੋ ਪਚ੍ਛਾ ਸਿਰੋ ਛਿਨ੍ਦੇ, ਤਂ ਦੁਕ੍ਖਂ ਮਰਣਂ ਸਿਯਾ.

੨੧. ‘‘ਸੁਖਂ ਨੁ ਖਣ੍ਡਸੋ ਛਿਨ੍ਨਂ, ਭਦ੍ਦਸਾਲ ਵਨਪ੍ਪਤਿ;

ਕਿਂਹੇਤੁ ਕਿਂ ਉਪਾਦਾਯ, ਖਣ੍ਡਸੋ ਛਿਨ੍ਨਮਿਚ੍ਛਸੀ’’ਤਿ.

ਤਤ੍ਥ ਹਤ੍ਥਪਾਦਨ੍ਤਿ ਹਤ੍ਥੇ ਚ ਪਾਦੇ ਚ. ਤਂ ਦੁਕ੍ਖਨ੍ਤਿ ਏਵਂ ਪਟਿਪਾਟਿਯਾ ਛਿਜ੍ਜਨ੍ਤਸ੍ਸ ਚੋਰਸ੍ਸ ਤਂ ਮਰਣਂ ਦੁਕ੍ਖਂ ਸਿਯਾ. ਸੁਖਂ ਨੂਤਿ ਸਮ੍ਮ ਭਦ੍ਦਸਾਲ, ਵਜ੍ਝਪ੍ਪਤ੍ਤਾ ਚੋਰਾ ਸੁਖੇਨ ਮਰਿਤੁਕਾਮਾ ਸੀਸਚ੍ਛੇਦਂ ਯਾਚਨ੍ਤਿ, ਨ ਖਣ੍ਡਸੋ ਛੇਦਨਂ, ਤ੍ਵਂ ਪਨ ਏਵਂ ਯਾਚਸਿ, ਤੇਨ ਤਂ ਪੁਚ੍ਛਾਮਿ ‘‘ਸੁਖਂ ਨੁ ਖਣ੍ਡਸੋ ਛਿਨ੍ਨ’’ਨ੍ਤਿ. ਕਿਂਹੇਤੂਤਿ ਖਣ੍ਡਸੋ ਛਿਨ੍ਨਂ ਨਾਮ ਨ ਸੁਖਂ, ਕਾਰਣੇਨ ਪਨੇਤ੍ਥ ਭਵਿਤਬ੍ਬਨ੍ਤਿ ਤਂ ਪੁਚ੍ਛਨ੍ਤੋ ਏਵਮਾਹ.

ਅਥਸ੍ਸ ਆਚਿਕ੍ਖਨ੍ਤੋ ਭਦ੍ਦਸਾਲੋ ਦ੍ਵੇ ਗਾਥਾ ਅਭਾਸਿ –

੨੨. ‘‘ਯਞ੍ਚ ਹੇਤੁਮੁਪਾਦਾਯ, ਹੇਤੁਂ ਧਮ੍ਮੂਪਸਂਹਿਤਂ;

ਖਣ੍ਡਸੋ ਛਿਨ੍ਨਮਿਚ੍ਛਾਮਿ, ਮਹਾਰਾਜ ਸੁਣੋਹਿ ਮੇ.

੨੩. ‘‘ਞਾਤੀ ਮੇ ਸੁਖਸਂਵਦ੍ਧਾ, ਮਮ ਪਸ੍ਸੇ ਨਿਵਾਤਜਾ;

ਤੇਪਿਹਂ ਉਪਹਿਂਸੇਯ੍ਯ, ਪਰੇਸਂ ਅਸੁਖੋਚਿਤ’’ਨ੍ਤਿ.

ਤਤ੍ਥ ਹੇਤੁਂ ਧਮ੍ਮੂਪਸਂਹਿਤਨ੍ਤਿ ਮਹਾਰਾਜ, ਯਂ ਹੇਤੁਸਭਾਵਯੁਤ੍ਤਮੇਵ, ਨ ਹੇਤੁਪਤਿਰੂਪਕਂ, ਹੇਤੁਂ ਉਪਾਦਾਯ ਆਰਬ੍ਭ ਸਨ੍ਧਾਯਾਹਂ ਖਣ੍ਡਸੋ ਛਿਨ੍ਨਮਿਚ੍ਛਾਮਿ, ਤਂ ਓਹਿਤਸੋਤੋ ਸੁਣੋਹੀਤਿ ਅਤ੍ਥੋ. ਞਾਤੀ ਮੇਤਿ ਮਮ ਭਦ੍ਦਸਾਲਰੁਕ੍ਖਸ੍ਸ ਛਾਯਾਯ ਸੁਖਸਂਵਦ੍ਧਾ ਮਮ ਪਸ੍ਸੇ ਤਰੁਣਸਾਲਰੁਕ੍ਖੇਸੁ ਨਿਬ੍ਬਤ੍ਤਾ ਮਯਾ ਕਤਵਾਤਪਰਿਤ੍ਤਾਣਤ੍ਤਾ ਨਿਵਾਤਜਾ ਮਮ ਞਾਤਕਾ ਦੇਵਸਙ੍ਘਾ ਅਤ੍ਥਿ, ਤੇ ਅਹਂ ਵਿਸਾਲਸਾਖਵਿਟਪੋ ਮੂਲੇ ਛਿਨ੍ਦਿਤ੍ਵਾ ਪਤਨ੍ਤੋ ਉਪਹਿਂਸੇਯ੍ਯਂ, ਸਂਭਗ੍ਗਵਿਮਾਨੇ ਕਰੋਨ੍ਤੋ ਵਿਨਾਸੇਯ੍ਯਨ੍ਤਿ ਅਤ੍ਥੋ. ਪਰੇਸਂ ਅਸੁਖੋਚਿਤਨ੍ਤਿ ਏਵਂ ਸਨ੍ਤੇ ਮਯਾ ਤੇਸਂ ਪਰੇਸਂ ਞਾਤਿਦੇਵਸਙ੍ਘਾਨਂ ਅਸੁਖਂ ਦੁਕ੍ਖਂ ਓਚਿਤਂ ਵਡ੍ਢਿਤਂ, ਨ ਚਾਹਂ ਤੇਸਂ ਦੁਕ੍ਖਕਾਮੋ, ਤਸ੍ਮਾ ਭਦ੍ਦਸਾਲਂ ਖਣ੍ਡਸੋ ਖਣ੍ਡਸੋ ਛਿਨ੍ਦਾਪੇਮੀਤਿ ਅਯਮੇਤ੍ਥਾਧਿਪ੍ਪਾਯੋ.

ਤਂ ਸੁਤ੍ਵਾ ਰਾਜਾ ‘‘ਧਮ੍ਮਿਕੋ ਵਤਾਯਂ, ਦੇਵਪੁਤ੍ਤੋ, ਅਤ੍ਤਨੋ ਵਿਮਾਨਵਿਨਾਸਤੋਪਿ ਞਾਤੀਨਂ ਵਿਮਾਨਵਿਨਾਸਂ ਨ ਇਚ੍ਛਤਿ, ਞਾਤੀਨਂ ਅਤ੍ਥਚਰਿਯਂ ਚਰਤਿ, ਅਭਯਮਸ੍ਸ ਦਸ੍ਸਾਮੀ’’ਤਿ ਤੁਸ੍ਸਿਤ੍ਵਾ ਓਸਾਨਗਾਥਮਾਹ –

੨੪. ‘‘ਚੇਤੇਯ੍ਯਰੂਪਂ ਚੇਤੇਸਿ, ਭਦ੍ਦਸਾਲ ਵਨਪ੍ਪਤਿ;

ਹਿਤਕਾਮੋਸਿ ਞਾਤੀਨਂ, ਅਭਯਂ ਸਮ੍ਮ ਦਮ੍ਮਿ ਤੇ’’ਤਿ.

ਤਤ੍ਥ ਚੇਤੇਯ੍ਯਰੂਪਂ ਚੇਤੇਸੀਤਿ ਞਾਤੀਸੁ ਮੁਦੁਚਿਤ੍ਤਤਾਯ ਚਿਨ੍ਤੇਨ੍ਤੋ ਚਿਨ੍ਤੇਤਬ੍ਬਯੁਤ੍ਤਕਮੇਵ ਚਿਨ੍ਤੇਸਿ. ਛੇਦੇਯ੍ਯਰੂਪਂ ਛੇਦੇਸੀਤਿਪਿ ਪਾਠੋ. ਤਸ੍ਸਤ੍ਥੋ – ਖਣ੍ਡਸੋ ਛਿਨ੍ਨਮਿਚ੍ਛਨ੍ਤੋ ਛੇਦੇਤਬ੍ਬਯੁਤ੍ਤਕਮੇਵ ਛੇਦੇਸੀਤਿ. ਅਭਯਨ੍ਤਿ ਏਤਸ੍ਮਿਂ ਤੇ ਸਮ੍ਮ, ਗੁਣੇ ਪਸੀਦਿਤ੍ਵਾ ਅਭਯਂ ਦਦਾਮਿ, ਨ ਮੇ ਪਾਸਾਦੇਨਤ੍ਥੋ, ਨਾਹਂ ਤਂ ਛੇਦਾਪੇਸ੍ਸਾਮਿ, ਗਚ੍ਛ ਞਾਤਿਸਙ੍ਘਪਰਿਵੁਤੋ ਸਕ੍ਕਤਗਰੁਕਤੋ ਸੁਖਂ ਜੀਵਾਤਿ ਆਹ.

ਦੇਵਰਾਜਾ ਰਞ੍ਞੋ ਧਮ੍ਮਂ ਦੇਸੇਤ੍ਵਾ ਅਗਮਾਸਿ. ਰਾਜਾ ਤਸ੍ਸੋਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਗ੍ਗਪੁਰਂ ਪੂਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇਪਿ ਤਥਾਗਤੋ ਞਾਤਤ੍ਥਚਰਿਯਂ ਅਚਰਿਯੇਵਾ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਤਰੁਣਸਾਲੇਸੁ ਨਿਬ੍ਬਤ੍ਤਦੇਵਤਾ ਬੁਦ੍ਧਪਰਿਸਾ, ਭਦ੍ਦਸਾਲਦੇਵਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਭਦ੍ਦਸਾਲਜਾਤਕਵਣ੍ਣਨਾ ਦੁਤਿਯਾ.

[੪੬੬] ੩. ਸਮੁਦ੍ਦਵਾਣਿਜਜਾਤਕਵਣ੍ਣਨਾ

ਕਸਨ੍ਤਿ ਵਪਨ੍ਤਿ ਤੇ ਜਨਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦੇਵਦਤ੍ਤਸ੍ਸ ਪਞ੍ਚ ਕੁਲਸਤਾਨਿ ਗਹੇਤ੍ਵਾ ਨਿਰਯੇ ਪਤਿਤਭਾਵਂ ਆਰਬ੍ਭ ਕਥੇਸਿ. ਸੋ ਹਿ ਅਗ੍ਗਸਾਵਕੇਸੁ ਪਰਿਸਂ ਗਹੇਤ੍ਵਾ ਪਕ੍ਕਨ੍ਤੇਸੁ ਸੋਕਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ ਉਣ੍ਹਲੋਹਿਤੇ ਮੁਖਤੋ ਨਿਕ੍ਖਨ੍ਤੇ ਬਲਵਵੇਦਨਾਪੀਲ਼ਿਤੋ ਤਥਾਗਤਸ੍ਸ ਗੁਣਂ ਅਨੁਸ੍ਸਰਿਤ੍ਵਾ ‘‘ਅਹਮੇਵ ਨਵ ਮਾਸੇ ਤਥਾਗਤਸ੍ਸ ਅਨਤ੍ਥਂ ਚਿਨ੍ਤੇਸਿਂ, ਸਤ੍ਥੁ ਪਨ ਮਯਿ ਪਾਪਚਿਤ੍ਤਂ ਨਾਮ ਨਤ੍ਥਿ, ਅਸੀਤਿਮਹਾਥੇਰਾਨਮ੍ਪਿ ਮਯਿ ਆਘਾਤੋ ਨਾਮ ਨਤ੍ਥਿ, ਮਯਾ ਕਤਕਮ੍ਮੇਨ ਅਹਮੇਵ ਇਦਾਨਿ ਅਨਾਥੋ ਜਾਤੋ, ਸਤ੍ਥਾਰਾਪਿਮ੍ਹਿ ਵਿਸ੍ਸਟ੍ਠੋ ਮਹਾਥੇਰੇਹਿਪਿ ਞਾਤਿਸੇਟ੍ਠੇਨ ਰਾਹੁਲਤ੍ਥੇਰੇਨਪਿ ਸਕ੍ਯਰਾਜਕੁਲੇਹਿਪਿ, ਗਨ੍ਤ੍ਵਾ ਸਤ੍ਥਾਰਂ ਖਮਾਪੇਸ੍ਸਾਮੀ’’ਤਿ ਪਰਿਸਾਯ ਸਞ੍ਞਂ ਦਤ੍ਵਾ ਅਤ੍ਤਾਨਂ ਪਞ੍ਚਕੇਨ ਗਾਹਾਪੇਤ੍ਵਾ ਰਤ੍ਤਿਂ ਰਤ੍ਤਿਂ ਗਚ੍ਛਨ੍ਤੋ ਕੋਸਲਰਟ੍ਠਂ ਸਮ੍ਪਾਪੁਣਿ. ਆਨਨ੍ਦਤ੍ਥੇਰੋ ਸਤ੍ਥੁ ਆਰੋਚੇਸਿ ‘‘ਦੇਵਦਤ੍ਤੋ ਕਿਰ, ਭਨ੍ਤੇ, ਤੁਮ੍ਹਾਕਂ ਖਮਾਪੇਤੁਂ ਆਗਚ੍ਛਤੀ’’ਤਿ. ‘‘ਆਨਨ੍ਦ, ਦੇਵਦਤ੍ਤੋ ਮਮ ਦਸ੍ਸਨਂ ਨ ਲਭਿਸ੍ਸਤੀ’’ਤਿ.

ਅਥ ਤਸ੍ਮਿਂ ਸਾਵਤ੍ਥਿਨਗਰਦ੍ਵਾਰਂ ਸਮ੍ਪਤ੍ਤੇ ਪੁਨ ਥੇਰੋ ਆਰੋਚੇਸਿ, ਭਗਵਾਪਿ ਤਥੇਵ ਅਵਚ. ਤਸ੍ਸ ਜੇਤਵਨੇ ਪੋਕ੍ਖਰਣਿਯਾ ਸਮੀਪਂ ਆਗਤਸ੍ਸ ਪਾਪਂ ਮਤ੍ਥਕਂ ਪਾਪੁਣਿ, ਸਰੀਰੇ ਡਾਹੋ ਉਪ੍ਪਜ੍ਜਿ, ਨ੍ਹਤ੍ਵਾ ਪਾਨੀਯਂ ਪਿਵਿਤੁਕਾਮੋ ਹੁਤ੍ਵਾ ‘‘ਮਞ੍ਚਕਤੋ ਮਂ ਆਵੁਸੋ ਓਤਾਰੇਥ, ਪਾਨੀਯਂ ਪਿਵਿਸ੍ਸਾਮੀ’’ਤਿ ਆਹ. ਤਸ੍ਸ ਓਤਾਰੇਤ੍ਵਾ ਭੂਮਿਯਂ ਠਪਿਤਮਤ੍ਤਸ੍ਸ ਚਿਤ੍ਤਸ੍ਸਾਦੇ ਅਲਦ੍ਧੇਯੇਵ ਮਹਾਪਥਵੀ ਵਿਵਰਮਦਾਸਿ. ਤਾਵਦੇਵ ਤਂ ਅਵੀਚਿਤੋ ਅਗ੍ਗਿਜਾਲਾ ਉਟ੍ਠਾਯ ਪਰਿਕ੍ਖਿਪਿਤ੍ਵਾ ਗਣ੍ਹਿ. ਸੋ ‘‘ਪਾਪਕਮ੍ਮਂ ਮੇ ਮਤ੍ਥਕਂ ਪਤ੍ਤ’’ਨ੍ਤਿ ਤਥਾਗਤਸ੍ਸ ਗੁਣੇ ਅਨੁਸ੍ਸਰਿਤ੍ਵਾ –

‘‘ਇਮੇਹਿ ਅਟ੍ਠੀਹਿ ਤਮਗ੍ਗਪੁਗ੍ਗਲਂ, ਦੇਵਾਤਿਦੇਵਂ ਨਰਦਮ੍ਮਸਾਰਥਿਂ;

ਸਮਨ੍ਤਚਕ੍ਖੁਂ ਸਤਪੁਞ੍ਞਲਕ੍ਖਣਂ, ਪਾਣੇਹਿ ਬੁਦ੍ਧਂ ਸਰਣਂ ਉਪੇਮੀ’’ਤਿ. (ਮਿ. ਪ. ੪.੧.੩) –

ਇਮਾਯ ਗਾਥਾਯ ਸਰਣੇ ਪਤਿਟ੍ਠਹਨ੍ਤੋ ਅਵੀਚਿਪਰਾਯਣੋ ਅਹੋਸਿ. ਤਸ੍ਸ ਪਨ ਪਞ੍ਚ ਉਪਟ੍ਠਾਕਕੁਲਸਤਾਨਿ ਅਹੇਸੁਂ. ਤਾਨਿਪਿ ਤਪ੍ਪਕ੍ਖਿਕਾਨਿ ਹੁਤ੍ਵਾ ਦਸਬਲਂ ਅਕ੍ਕੋਸਿਤ੍ਵਾ ਅਵੀਚਿਮ੍ਹਿਯੇਵ ਨਿਬ੍ਬਤ੍ਤਿਂਸੁ. ਏਵਂ ਸੋ ਤਾਨਿ ਪਞ੍ਚ ਕੁਲਸਤਾਨਿ ਗਣ੍ਹਿਤ੍ਵਾ ਅਵੀਚਿਮ੍ਹਿ ਪਤਿਟ੍ਠਿਤੋ.

ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਦੇਵਦਤ੍ਤੋ ਪਾਪੋ ਲਾਭਸਕ੍ਕਾਰਗਿਦ੍ਧਤਾਯ ਸਮ੍ਮਾਸਮ੍ਬੁਦ੍ਧੇ ਅਟ੍ਠਾਨੇ ਕੋਪਂ ਬਨ੍ਧਿਤ੍ਵਾ ਅਨਾਗਤਭਯਮਨੋਲੋਕੇਤ੍ਵਾ ਪਞ੍ਚਹਿ ਕੁਲਸਤੇਹਿ ਸਦ੍ਧਿਂ ਅਵੀਚਿਪਰਾਯਣੋ ਜਾਤੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ ਭਿਕ੍ਖਵੇ, ਇਦਾਨੇਵ ਦੇਵਦਤ੍ਤੋ ਲਾਭਸਕ੍ਕਾਰਗਿਦ੍ਧੋ ਹੁਤ੍ਵਾ ਅਨਾਗਤਭਯਂ ਨ ਓਲੋਕੇਸਿ, ਪੁਬ੍ਬੇਪਿ ਅਨਾਗਤਭਯਂ ਅਨੋਲੋਕੇਤ੍ਵਾ ਪਚ੍ਚੁਪ੍ਪਨ੍ਨਸੁਖਗਿਦ੍ਧੇਨ ਸਦ੍ਧਿਂ ਪਰਿਸਾਯ ਮਹਾਵਿਨਾਸਂ ਪਤ੍ਤੋ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਾਰਾਣਸਿਤੋ ਅਵਿਦੂਰੇ ਕੁਲਸਹਸ੍ਸਨਿਵਾਸੋ ਮਹਾਵਡ੍ਢਕੀਗਾਮੋ ਅਹੋਸਿ. ਤਤ੍ਥ ਵਡ੍ਢਕੀ ‘‘ਤੁਮ੍ਹਾਕਂ ਮਞ੍ਚਂ ਕਰਿਸ੍ਸਾਮ, ਪੀਠਂ ਕਰਿਸ੍ਸਾਮ, ਗੇਹਂ ਕਰਿਸ੍ਸਾਮਾ’’ਤਿ ਵਤ੍ਵਾ ਮਨੁਸ੍ਸਾਨਂ ਹਤ੍ਥਤੋ ਬਹੁਂ ਇਣਂ ਗਹੇਤ੍ਵਾ ਕਿਞ੍ਚਿ ਕਾਤੁਂ ਨ ਸਕ੍ਖਿਂਸੁ. ਮਨੁਸ੍ਸਾ ਦਿਟ੍ਠਦਿਟ੍ਠੇ ਵਡ੍ਢਕੀ ਚੋਦੇਨ੍ਤਿ ਪਲਿਬੁਦ੍ਧਨ੍ਤਿ. ਤੇ ਇਣਾਯਿਕੇਹਿ ਉਪਦ੍ਦੁਤਾ ਸੁਖਂ ਵਸਿਤੁਂ ਅਸਕ੍ਕੋਨ੍ਤਾ ‘‘ਵਿਦੇਸਂ ਗਨ੍ਤ੍ਵਾ ਯਤ੍ਥ ਕਤ੍ਥਚਿ ਵਸਿਸ੍ਸਾਮਾ’’ਤਿ ਅਰਞ੍ਞਂ ਪਵਿਸਿਤ੍ਵਾ ਰੁਕ੍ਖੇ ਛਿਨ੍ਦਿਤ੍ਵਾ ਮਹਤਿਂ ਨਾਵਂ ਬਨ੍ਧਿਤ੍ਵਾ ਨਦਿਂ ਓਤਾਰੇਤ੍ਵਾ ਆਹਰਿਤ੍ਵਾ ਗਾਮਤੋ ਗਾਵੁਤਡ੍ਢਯੋਜਨਮਤ੍ਤੇ ਠਾਨੇ ਠਪੇਤ੍ਵਾ ਅਡ੍ਢਰਤ੍ਤਸਮਯੇ ਗਾਮਂ ਆਗਨ੍ਤ੍ਵਾ ਪੁਤ੍ਤਦਾਰਮਾਦਾਯ ਨਾਵਟ੍ਠਾਨਂ ਗਨ੍ਤ੍ਵਾ ਨਾਵਂ ਆਰੁਯ੍ਹ ਅਨੁਕ੍ਕਮੇਨ ਮਹਾਸਮੁਦ੍ਦਂ ਪਵਿਸਿਤ੍ਵਾ ਵਾਤਵੇਗੇਨ ਵਿਚਰਨ੍ਤਾ ਸਮੁਦ੍ਦਮਜ੍ਝੇ ਏਕਂ ਦੀਪਕਂ ਪਾਪੁਣਿਂਸੁ. ਤਸ੍ਮਿਂ ਪਨ ਦੀਪਕੇ ਸਯਂਜਾਤਸਾਲਿਉਚ੍ਛੁਕਦਲਿਅਮ੍ਬਜਮ੍ਬੁਪਨਸਤਾਲਨਾਲ਼ਿਕੇਰਾਦੀਨਿ ਵਿਵਿਧਫਲਾਨਿ ਅਤ੍ਥਿ, ਅਞ੍ਞਤਰੋ ਪਭਿਨ੍ਨਨਾਵੋ ਪੁਰਿਸੋ ਪਠਮਤਰਂ ਤਂ ਦੀਪਕਂ ਪਤ੍ਵਾ ਸਾਲਿਭਤ੍ਤਂ ਭੁਞ੍ਜਮਾਨੋ ਉਚ੍ਛੁਆਦੀਨਿ ਖਾਦਮਾਨੋ ਥੂਲਸਰੀਰੋ ਨਗ੍ਗੋ ਪਰੂਲ਼੍ਹਕੇਸਮਸ੍ਸੁ ਤਸ੍ਮਿਂ ਦੀਪਕੇ ਪਟਿਵਸਤਿ.

ਵਡ੍ਢਕੀ ਚਿਨ੍ਤਯਿਂਸੁ ‘‘ਸਚੇ ਅਯਂ ਦੀਪਕੋ ਰਕ੍ਖਸਪਰਿਗ੍ਗਹਿਤੋ ਭਵਿਸ੍ਸਤਿ, ਸਬ੍ਬੇਪਿ ਅਮ੍ਹੇ ਵਿਨਾਸਂ ਪਾਪੁਣਿਸ੍ਸਾਮ, ਪਰਿਗ੍ਗਣ੍ਹਿਸ੍ਸਾਮ ਤਾਵ ਨ’’ਨ੍ਤਿ. ਅਥ ਸਤ੍ਤਟ੍ਠ ਪੁਰਿਸਾ ਸੂਰਾ ਬਲਵਨ੍ਤੋ ਸਨ੍ਨਦ੍ਧਪਞ੍ਚਾਵੁਧਾ ਹੁਤ੍ਵਾ ਓਤਰਿਤ੍ਵਾ ਦੀਪਕਂ ਪਰਿਗ੍ਗਣ੍ਹਿਂਸੁ. ਤਸ੍ਮਿਂ ਖਣੇ ਸੋ ਪੁਰਿਸੋ ਭੁਤ੍ਤਪਾਤਰਾਸੋ ਉਚ੍ਛੁਰਸਂ ਪਿਵਿਤ੍ਵਾ ਸੁਖਪ੍ਪਤ੍ਤੋ ਰਮਣੀਯੇ ਪਦੇਸੇ ਰਜਤਪਟ੍ਟਸਦਿਸੇ ਵਾਲੁਕਤਲੇ ਸੀਤਚ੍ਛਾਯਾਯ ਉਤ੍ਤਾਨਕੋ ਨਿਪਜ੍ਜਿਤ੍ਵਾ ‘‘ਜਮ੍ਬੁਦੀਪਵਾਸਿਨੋ ਕਸਨ੍ਤਾ ਵਪਨ੍ਤਾ ਏਵਰੂਪਂ ਸੁਖਂ ਨ ਲਭਨ੍ਤਿ, ਜਮ੍ਬੁਦੀਪਤੋ ਮਯ੍ਹਂ ਅਯਮੇਵ ਦੀਪਕੋ ਵਰ’’ਨ੍ਤਿ ਗਾਯਮਾਨੋ ਉਦਾਨਂ ਉਦਾਨੇਸਿ. ਅਥ ਸਤ੍ਥਾ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਸੋ ਭਿਕ੍ਖਵੇ ਪੁਰਿਸੋ ਇਮਂ ਉਦਾਨਂ ਉਦਾਨੇਸੀ’’ਤਿ ਦਸ੍ਸੇਨ੍ਤੋ ਪਠਮਂ ਗਾਥਮਾਹ –

੨੫. ‘‘ਕਸਨ੍ਤਿ ਵਪਨ੍ਤਿ ਤੇ ਜਨਾ, ਮਨੁਜਾ ਕਮ੍ਮਫਲੂਪਜੀਵਿਨੋ;

ਨਯਿਮਸ੍ਸ ਦੀਪਕਸ੍ਸ ਭਾਗਿਨੋ, ਜਮ੍ਬੁਦੀਪਾ ਇਦਮੇਵ ਨੋ ਵਰ’’ਨ੍ਤਿ.

ਤਤ੍ਥ ਤੇ ਜਨਾਤਿ ਤੇ ਜਮ੍ਬੁਦੀਪਵਾਸਿਨੋ ਜਨਾ. ਕਮ੍ਮਫਲੂਪਜੀਵਿਨੋਤਿ ਨਾਨਾਕਮ੍ਮਾਨਂ ਫਲੂਪਜੀਵਿਨੋ ਸਤ੍ਤਾ.

ਅਥ ਤੇ ਦੀਪਕਂ ਪਰਿਗ੍ਗਣ੍ਹਨ੍ਤਾ ਪੁਰਿਸਾ ਤਸ੍ਸ ਗੀਤਸਦ੍ਦਂ ਸੁਤ੍ਵਾ ‘‘ਮਨੁਸ੍ਸਸਦ੍ਦੋ ਵਿਯ ਸੁਯ੍ਯਤਿ, ਜਾਨਿਸ੍ਸਾਮ ਨ’’ਨ੍ਤਿ ਸਦ੍ਦਾਨੁਸਾਰੇਨ ਗਨ੍ਤ੍ਵਾ ਤਂ ਪੁਰਿਸਂ ਦਿਸ੍ਵਾ ‘‘ਯਕ੍ਖੋ ਭਵਿਸ੍ਸਤੀ’’ਤਿ ਭੀਤਤਸਿਤਾ ਸਰੇ ਸਨ੍ਨਹਿਂਸੁ. ਸੋਪਿ ਤੇ ਦਿਸ੍ਵਾ ਅਤ੍ਤਨੋ ਵਧਭਯੇਨ ‘‘ਨਾਹਂ, ਸਾਮਿ, ਯਕ੍ਖੋ, ਪੁਰਿਸੋਮ੍ਹਿ, ਜੀਵਿਤਂ ਮੇ ਦੇਥਾ’’ਤਿ ਯਾਚਨ੍ਤੋ ‘‘ਪੁਰਿਸਾ ਨਾਮ ਤੁਮ੍ਹਾਦਿਸਾ ਨਗ੍ਗਾ ਨ ਹੋਨ੍ਤੀ’’ਤਿ ਵੁਤ੍ਤੇ ਪੁਨਪ੍ਪੁਨਂ ਯਾਚਿਤ੍ਵਾ ਮਨੁਸ੍ਸਭਾਵਂ ਵਿਞ੍ਞਾਪੇਸਿ. ਤੇ ਤਂ ਪੁਰਿਸਂ ਉਪਸਙ੍ਕਮਿਤ੍ਵਾ ਸਮ੍ਮੋਦਨੀਯਂ ਕਥਂ ਸੁਤ੍ਵਾ ਤਸ੍ਸ ਤਤ੍ਥ ਆਗਤਨਿਯਾਮਂ ਪੁਚ੍ਛਿਂਸੁ. ਸੋਪਿ ਸਬ੍ਬਂ ਤੇਸਂ ਕਥੇਤ੍ਵਾ ‘‘ਤੁਮ੍ਹੇ ਅਤ੍ਤਨੋ ਪੁਞ੍ਞਸਮ੍ਪਤ੍ਤਿਯਾ ਇਧਾਗਤਾ, ਅਯਂ ਉਤ੍ਤਮਦੀਪੋ, ਨ ਏਤ੍ਥ ਸਹਤ੍ਥੇਨ ਕਮ੍ਮਂ ਕਤ੍ਵਾ ਜੀਵਨ੍ਤਿ, ਸਯਂਜਾਤਸਾਲੀਨਞ੍ਚੇਵ ਉਚ੍ਛੁਆਦੀਨਞ੍ਚੇਤ੍ਥ ਅਨ੍ਤੋ ਨਤ੍ਥੀਤਿ ਅਨੁਕ੍ਕਣ੍ਠਨ੍ਤਾ ਵਸਥਾ’’ਤਿ ਆਹ. ਇਧ ਪਨ ਵਸਨ੍ਤਾਨਂ ਅਮ੍ਹਾਕਂ ਅਞ੍ਞੋ ਪਰਿਪਨ੍ਥੋ ਨਤ੍ਥਿ, ਅਞ੍ਞਂ ਭਯਂ ਏਤ੍ਥ ਨਤ੍ਥਿ, ਅਯਂ ਪਨ ਅਮਨੁਸ੍ਸਪਰਿਗ੍ਗਹਿਤੋ, ਅਮਨੁਸ੍ਸਾ ਤੁਮ੍ਹਾਕਂ ਉਚ੍ਚਾਰਪਸ੍ਸਾਵਂ ਦਿਸ੍ਵਾ ਕੁਜ੍ਝੇਯ੍ਯੁਂ, ਤਸ੍ਮਾ ਤਂ ਕਰੋਨ੍ਤਾ ਵਾਲੁਕਂ ਵਿਯੂਹਿਤ੍ਵਾ ਵਾਲੁਕਾਯ ਪਟਿਚ੍ਛਾਦੇਯ੍ਯਾਥ, ਏਤ੍ਤਕਂ ਇਧ ਭਯਂ, ਅਞ੍ਞਂ ਨਤ੍ਥਿ, ਨਿਚ੍ਚਂ ਅਪ੍ਪਮਤ੍ਤਾ ਭਵੇਯ੍ਯਾਥਾਤਿ. ਤੇ ਤਤ੍ਥ ਵਾਸਂ ਉਪਗਚ੍ਛਿਂਸੁ. ਤਸ੍ਮਿਂ ਪਨ ਕੁਲਸਹਸ੍ਸੇ ਪਞ੍ਚਨ੍ਨਂ ਪਞ੍ਚਨ੍ਨਂ ਕੁਲਸਤਾਨਂ ਜੇਟ੍ਠਕਾ ਦ੍ਵੇ ਵਡ੍ਢਕੀ ਅਹੇਸੁਂ. ਤੇਸੁ ਏਕੋ ਬਾਲੋ ਅਹੋਸਿ ਰਸਗਿਦ੍ਧੋ, ਏਕੋ ਪਣ੍ਡਿਤੋ ਰਸੇਸੁ ਅਨਲ੍ਲੀਨੋ.

ਅਪਰਭਾਗੇ ਸਬ੍ਬੇਪਿ ਤੇ ਤਤ੍ਥ ਸੁਖਂ ਵਸਨ੍ਤਾ ਥੂਲਸਰੀਰਾ ਹੁਤ੍ਵਾ ਚਿਨ੍ਤਯਿਂਸੁ ‘‘ਚਿਰਂ ਪੀਤਾ ਨੋ ਸੁਰਾ, ਉਚ੍ਛੁਰਸੇਨ ਮੇਰਯਂ ਕਤ੍ਵਾ ਪਿਵਿਸ੍ਸਾਮਾ’’ਤਿ. ਤੇ ਮੇਰਯਂ ਕਾਰੇਤ੍ਵਾ ਪਿਵਿਤ੍ਵਾ ਮਦਵਸੇਨ ਗਾਯਨ੍ਤਾ ਨਚ੍ਚਨ੍ਤਾ ਕੀਲ਼ਨ੍ਤਾ ਪਮਤ੍ਤਾ ਤਤ੍ਥ ਤਤ੍ਥ ਉਚ੍ਚਾਰਪਸ੍ਸਾਵਂ ਕਤ੍ਵਾ ਅਪ੍ਪਟਿਚ੍ਛਾਦੇਤ੍ਵਾ ਦੀਪਕਂ ਜੇਗੁਚ੍ਛਂ ਪਟਿਕੂਲਂ ਕਰਿਂਸੁ. ਦੇਵਤਾ ‘‘ਇਮੇ ਅਮ੍ਹਾਕਂ ਕੀਲ਼ਾਮਣ੍ਡਲਂ ਪਟਿਕੂਲਂ ਕਰੋਨ੍ਤੀ’’ਤਿ ਕੁਜ੍ਝਿਤ੍ਵਾ ‘‘ਮਹਾਸਮੁਦ੍ਦਂ ਉਤ੍ਤਰਾਪੇਤ੍ਵਾ ਦੀਪਕਧੋਵਨਂ ਕਰਿਸ੍ਸਾਮਾ’’ਤਿ ਮਨ੍ਤੇਤ੍ਵਾ ‘‘ਅਯਂ ਕਾਲ਼ਪਕ੍ਖੋ, ਅਜ੍ਜ ਅਮ੍ਹਾਕਂ ਸਮਾਗਮੋ ਚ ਭਿਨ੍ਨੋ, ਇਤੋ ਦਾਨਿ ਪਨ੍ਨਰਸਮੇ ਦਿਵਸੇ ਪੁਣ੍ਣਮੀਉਪੋਸਥਦਿਵਸੇ ਚਨ੍ਦਸ੍ਸੁਗ੍ਗਮਨਵੇਲਾਯ ਸਮੁਦ੍ਦਂ ਉਬ੍ਬਤ੍ਤੇਤ੍ਵਾ ਸਬ੍ਬੇਪਿਮੇ ਘਾਤੇਸ੍ਸਾਮਾ’’ਤਿ ਦਿਵਸਂ ਠਪਯਿਂਸੁ. ਅਥ ਨੇਸਂ ਅਨ੍ਤਰੇ ਏਕੋ ਧਮ੍ਮਿਕੋ ਦੇਵਪੁਤ੍ਤੋ ‘‘ਮਾ ਇਮੇ ਮਮ ਪਸ੍ਸਨ੍ਤਸ੍ਸ ਨਸ੍ਸਿਂਸੂ’’ਤਿ ਅਨੁਕਮ੍ਪਾਯ ਤੇਸੁ ਸਾਯਮਾਸਂ ਭੁਞ੍ਜਿਤ੍ਵਾ ਘਰਦ੍ਵਾਰੇ ਸੁਖਕਥਾਯ ਨਿਸਿਨ੍ਨੇਸੁ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਸਕਲਦੀਪਂ ਏਕੋਭਾਸਂ ਕਤ੍ਵਾ ਉਤ੍ਤਰਾਯ ਦਿਸਾਯ ਆਕਾਸੇ ਠਤ੍ਵਾ ‘‘ਅਮ੍ਭੋ ਵਡ੍ਢਕੀ, ਦੇਵਤਾ ਤੁਮ੍ਹਾਕਂ ਕੁਦ੍ਧਾ. ਇਮਸ੍ਮਿਂ ਠਾਨੇ ਮਾ ਵਸਿਤ੍ਥ, ਇਤੋ ਅਡ੍ਢਮਾਸਚ੍ਚਯੇਨ ਹਿ ਦੇਵਤਾ ਸਮੁਦ੍ਦਂ ਉਬ੍ਬਤ੍ਤੇਤ੍ਵਾ ਸਬ੍ਬੇਵ ਤੁਮ੍ਹੇ ਘਾਤੇਸ੍ਸਨ੍ਤਿ, ਇਤੋ ਨਿਕ੍ਖਮਿਤ੍ਵਾ ਪਲਾਯਥਾ’’ਤਿ ਵਤ੍ਵਾ ਦੁਤਿਯਂ ਗਾਥਮਾਹ –

੨੬. ‘‘ਤਿਪਞ੍ਚਰਤ੍ਤੂਪਗਤਮ੍ਹਿ ਚਨ੍ਦੇ, ਵੇਗੋ ਮਹਾ ਹੇਹਿਤਿ ਸਾਗਰਸ੍ਸ;

ਉਪ੍ਲਵਿਸ੍ਸਂ ਦੀਪਮਿਮਂ ਉਲ਼ਾਰਂ, ਮਾ ਵੋ ਵਧੀ ਗਚ੍ਛਥ ਲੇਣਮਞ੍ਞ’’ਨ੍ਤਿ.

ਤਤ੍ਥ ਉਪ੍ਲਵਿਸ੍ਸਨ੍ਤਿ ਇਮਂ ਦੀਪਕਂ ਉਪ੍ਲਵਨ੍ਤੋ ਅਜ੍ਝੋਤ੍ਥਰਨ੍ਤੋ ਅਭਿਭਵਿਸ੍ਸਤਿ. ਮਾ ਵੋ ਵਧੀਤਿ ਸੋ ਸਾਗਰਵੇਗੋ ਤੁਮ੍ਹੇ ਮਾ ਵਧਿ.

ਇਤਿ ਸੋ ਤੇਸਂ ਓਵਾਦਂ ਦਤ੍ਵਾ ਅਤ੍ਤਨੋ ਠਾਨਮੇਵ ਗਤੋ. ਤਸ੍ਮਿਂ ਗਤੇ ਅਪਰੋ ਸਾਹਸਿਕੋ ਕਕ੍ਖਲ਼ੋ ਦੇਵਪੁਤ੍ਤੋ ‘‘ਇਮੇ ਇਮਸ੍ਸ ਵਚਨਂ ਗਹੇਤ੍ਵਾ ਪਲਾਯੇਯ੍ਯੁਂ, ਅਹਂ ਨੇਸਂ ਗਮਨਂ ਨਿਵਾਰੇਤ੍ਵਾ ਸਬ੍ਬੇਪਿਮੇ ਮਹਾਵਿਨਾਸਂ ਪਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦਿਬ੍ਬਾਲਙ੍ਕਾਰਪਟਿਮਣ੍ਡਿਤੋ ਸਕਲਦੀਪਂ ਏਕੋਭਾਸਂ ਕਰੋਨ੍ਤੋ ਆਗਨ੍ਤ੍ਵਾ ਦਕ੍ਖਿਣਾਯ ਦਿਸਾਯ ਆਕਾਸੇ ਠਤ੍ਵਾ ‘‘ਏਕੋ ਦੇਵਪੁਤ੍ਤੋ ਇਧਾਗਤੋ, ਨੋ’’ਤਿ ਪੁਚ੍ਛਿਤ੍ਵਾ ‘‘ਆਗਤੋ’’ਤਿ ਵੁਤ੍ਤੇ ‘‘ਸੋ ਵੋ ਕਿਂ ਕਥੇਸੀ’’ਤਿ ਵਤ੍ਵਾ ‘‘ਇਮਂ ਨਾਮ, ਸਾਮੀ’’ਤਿ ਵੁਤ੍ਤੇ ‘‘ਸੋ ਤੁਮ੍ਹਾਕਂ ਇਧ ਨਿਵਾਸਂ ਨ ਇਚ੍ਛਤਿ, ਦੋਸੇਨ ਕਥੇਤਿ, ਤੁਮ੍ਹੇ ਅਞ੍ਞਤ੍ਥ ਅਗਨ੍ਤ੍ਵਾ ਇਧੇਵ ਵਸਥਾ’’ਤਿ ਵਤ੍ਵਾ ਦ੍ਵੇ ਗਾਥਾ ਅਭਾਸਿ –

੨੭. ‘‘ਨ ਜਾਤੁਯਂ ਸਾਗਰਵਾਰਿਵੇਗੋ, ਉਪ੍ਲਵਿਸ੍ਸਂ ਦੀਪਮਿਮਂ ਉਲ਼ਾਰਂ;

ਤਂ ਮੇ ਨਿਮਿਤ੍ਤੇਹਿ ਬਹੂਹਿ ਦਿਟ੍ਠਂ, ਮਾ ਭੇਥ ਕਿਂ ਸੋਚਥ ਮੋਦਥਵ੍ਹੋ.

੨੮. ‘‘ਪਹੂਤਭਕ੍ਖਂ ਬਹੁਅਨ੍ਨਪਾਨਂ, ਪਤ੍ਤਤ੍ਥ ਆਵਾਸਮਿਮਂ ਉਲ਼ਾਰਂ;

ਨ ਵੋ ਭਯਂ ਪਟਿਪਸ੍ਸਾਮਿ ਕਿਞ੍ਚਿ, ਆਪੁਤ੍ਤਪੁਤ੍ਤੇਹਿ ਪਮੋਦਥਵ੍ਹੋ’’ਤਿ.

ਤਤ੍ਥ ਨ ਜਾਤੁਯਨ੍ਤਿ ਨ ਜਾਤੁ ਅਯਂ. ਮਾ ਭੇਥਾਤਿ ਮਾ ਭਾਯਿਤ੍ਥ. ਮੋਦਥਵ੍ਹੋਤਿ ਪਮੋਦਿਤਾ ਪੀਤਿਸੋਮਨਸ੍ਸਜਾਤਾ ਹੋਥ. ਆਪੁਤ੍ਤਪੁਤ੍ਤੇਹੀਤਿ ਯਾਵ ਪੁਤ੍ਤਾਨਮ੍ਪਿ ਪੁਤ੍ਤੇਹਿ ਪਮੋਦਥ, ਨਤ੍ਥਿ ਵੋ ਇਮਸ੍ਮਿਂ ਠਾਨੇ ਭਯਨ੍ਤਿ.

ਏਵਂ ਸੋ ਇਮਾਹਿ ਦ੍ਵੀਹਿ ਗਾਥਾਹਿ ਤੇ ਅਸ੍ਸਾਸੇਤ੍ਵਾ ਪਕ੍ਕਾਮਿ. ਤਸ੍ਸ ਪਕ੍ਕਨ੍ਤਕਾਲੇ ਧਮ੍ਮਿਕਦੇਵਪੁਤ੍ਤਸ੍ਸ ਵਚਨਂ ਅਨਾਦਿਯਨ੍ਤੋ ਬਾਲਵਡ੍ਢਕੀ ‘‘ਸੁਣਨ੍ਤੁ ਮੇ, ਭੋਨ੍ਤੋ, ਵਚਨ’’ਨ੍ਤਿ ਸੇਸਵਡ੍ਢਕੀ ਆਮਨ੍ਤੇਤ੍ਵਾ ਪਞ੍ਚਮਂ ਗਾਥਮਾਹ –

੨੯. ‘‘ਯੋ ਦੇਵੋਯਂ ਦਕ੍ਖਿਣਾਯਂ ਦਿਸਾਯਂ, ਖੇਮਨ੍ਤਿ ਪਕ੍ਕੋਸਤਿ ਤਸ੍ਸ ਸਚ੍ਚਂ;

ਨ ਉਤ੍ਤਰੋ ਵੇਦਿ ਭਯਾਭਯਸ੍ਸ, ਮਾ ਭੇਥ ਕਿਂ ਸੋਚਥ ਮੋਦਥਵ੍ਹੋ’’ਤਿ.

ਤਤ੍ਥ ਦਕ੍ਖਿਣਾਯਨ੍ਤਿ ਦਕ੍ਖਿਣਾਯ, ਅਯਮੇਵ ਵਾ ਪਾਠੋ.

ਤਂ ਸੁਤ੍ਵਾ ਰਸਗਿਦ੍ਧਾ ਪਞ੍ਚਸਤਾ ਵਡ੍ਢਕੀ ਤਸ੍ਸ ਬਾਲਸ੍ਸ ਵਚਨਂ ਆਦਿਯਿਂਸੁ. ਇਤਰੋ ਪਨ ਪਣ੍ਡਿਤਵਡ੍ਢਕੀ ਤਸ੍ਸ ਵਚਨਂ ਅਨਾਦਿਯਨ੍ਤੋ ਤੇ ਵਡ੍ਢਕੀ ਆਮਨ੍ਤੇਤ੍ਵਾ ਚਤਸ੍ਸੋ ਗਾਥਾ ਅਭਾਸਿ –

੩੦. ‘‘ਯਥਾ ਇਮੇ ਵਿਪ੍ਪਵਦਨ੍ਤਿ ਯਕ੍ਖਾ, ਏਕੋ ਭਯਂ ਸਂਸਤਿ ਖੇਮਮੇਕੋ;

ਤਦਿਙ੍ਘ ਮਯ੍ਹਂ ਵਚਨਂ ਸੁਣਾਥ, ਖਿਪ੍ਪਂ ਲਹੁਂ ਮਾ ਵਿਨਸ੍ਸਿਮ੍ਹ ਸਬ੍ਬੇ.

੩੧. ‘‘ਸਬ੍ਬੇ ਸਮਾਗਮ੍ਮ ਕਰੋਮ ਨਾਵਂ, ਦੋਣਿਂ ਦਲ਼੍ਹਂ ਸਬ੍ਬਯਨ੍ਤੂਪਪਨ੍ਨਂ;

ਸਚੇ ਅਯਂ ਦਕ੍ਖਿਣੋ ਸਚ੍ਚਮਾਹ, ਮੋਘਂ ਪਟਿਕ੍ਕੋਸਤਿ ਉਤ੍ਤਰੋਯਂ;

ਸਾ ਚੇਵ ਨੋ ਹੇਹਿਤਿ ਆਪਦਤ੍ਥਾ, ਇਮਞ੍ਚ ਦੀਪਂ ਨ ਪਰਿਚ੍ਚਜੇਮ.

੩੨. ‘‘ਸਚੇ ਚ ਖੋ ਉਤ੍ਤਰੋ ਸਚ੍ਚਮਾਹ, ਮੋਘਂ ਪਟਿਕ੍ਕੋਸਤਿ ਦਕ੍ਖਿਣੋਯਂ;

ਤਮੇਵ ਨਾਵਂ ਅਭਿਰੁਯ੍ਹ ਸਬ੍ਬੇ, ਏਵਂ ਮਯਂ ਸੋਤ੍ਥਿ ਤਰੇਮੁ ਪਾਰਂ.

੩੩. ‘‘ਨ ਵੇ ਸੁਗਣ੍ਹਂ ਪਠਮੇਨ ਸੇਟ੍ਠਂ, ਕਨਿਟ੍ਠਮਾਪਾਥਗਤਂ ਗਹੇਤ੍ਵਾ;

ਯੋ ਚੀਧ ਤਚ੍ਛਂ ਪਵਿਚੇਯ੍ਯ ਗਣ੍ਹਤਿ, ਸ ਵੇ ਨਰੋ ਸੇਟ੍ਠਮੁਪੇਤਿ ਠਾਨ’’ਨ੍ਤਿ.

ਤਤ੍ਥ ਵਿਪ੍ਪਵਦਨ੍ਤੀਤਿ ਅਞ੍ਞਮਞ੍ਞਂ ਵਿਰੁਦ੍ਧਂ ਵਦਨ੍ਤਿ. ਲਹੁਨ੍ਤਿ ਪੁਰਿਮਸ੍ਸ ਅਤ੍ਥਦੀਪਨਂ. ਦੋਣਿਨ੍ਤਿ ਗਮ੍ਭੀਰਂ ਮਹਾਨਾਵਂ. ਸਬ੍ਬਯਨ੍ਤੂਪਪਨ੍ਨਨ੍ਤਿ ਸਬ੍ਬੇਹਿ ਫਿਯਾਰਿਤ੍ਤਾਦੀਹਿ ਯਨ੍ਤੇਹਿ ਉਪਪਨ੍ਨਂ. ਸਾ ਚੇਵ ਨੋ ਹੇਹਿਤਿ ਆਪਦਤ੍ਥਾਤਿ ਸਾ ਚ ਨੋ ਨਾਵਾ ਪਚ੍ਛਾਪਿ ਉਪ੍ਪਨ੍ਨਾਯ ਆਪਦਾਯ ਅਤ੍ਥਾ ਭਵਿਸ੍ਸਤਿ, ਇਮਞ੍ਚ ਦੀਪਂ ਨ ਪਰਿਚ੍ਚਜਿਸ੍ਸਾਮ. ਤਰੇਮੂਤਿ ਤਰਿਸ੍ਸਾਮ. ਨ ਵੇ ਸੁਗਣ੍ਹਨ੍ਤਿ ਨ ਵੇ ਸੁਖੇਨ ਗਣ੍ਹਿਤਬ੍ਬਂ. ਸੇਟ੍ਠਨ੍ਤਿ ਉਤ੍ਤਮਂ ਤਥਂ ਸਚ੍ਚਂ. ਕਨਿਟ੍ਠਨ੍ਤਿ ਪਠਮਵਚਨਂ ਉਪਾਦਾਯ ਪਚ੍ਛਿਮਵਚਨਂ ਕਨਿਟ੍ਠਂ ਨਾਮ. ਇਧਾਪਿ ‘‘ਨ ਵੇ ਸੁਗਣ੍ਹ’’ਨ੍ਤਿ ਅਨੁਵਤ੍ਤਤੇਵ. ਇਦਂ ਵੁਤ੍ਤਂ ਹੋਤਿ – ਅਮ੍ਭੋ ਵਡ੍ਢਕੀ, ਯੇਨ ਕੇਨਚਿ ਪਠਮੇਨ ਵੁਤ੍ਤਵਚਨਂ ‘‘ਇਦਮੇਵ ਸੇਟ੍ਠਂ ਤਥਂ ਸਚ੍ਚ’’ਨ੍ਤਿ ਸੁਖਂ ਨ ਗਣ੍ਹਿਤਬ੍ਬਮੇਵ, ਯਥਾ ਚ ਤਂ, ਏਵਂ ਕਨਿਟ੍ਠਂ ਗਚ੍ਛਾ ਵੁਤ੍ਤਵਚਨਮ੍ਪਿ ‘‘ਇਦਮੇਵ ਤਥਂ ਸਚ੍ਚ’’ਨ੍ਤਿ ਨ ਗਣ੍ਹਿਤਬ੍ਬਂ. ਯਂ ਪਨ ਸੋਤਵਿਸਯਂ ਆਪਾਥਗਤਂ ਹੋਤਿ, ਤਂ ਆਪਾਥਗਤਂ ਗਹੇਤ੍ਵਾ ਯੋ ਇਧ ਪਣ੍ਡਿਤਪੁਰਿਸੋ ਪੁਰਿਮਵਚਨਞ੍ਚ ਪਚ੍ਛਿਮਵਚਨਞ੍ਚ ਪਵਿਚੇਯ੍ਯ ਵਿਚਿਨਿਤ੍ਵਾ ਤੀਰੇਤ੍ਵਾ ਉਪਪਰਿਕ੍ਖਿਤ੍ਵਾ ਤਚ੍ਛਂ ਗਣ੍ਹਾਤਿ, ਯਂ ਤਥਂ ਸਚ੍ਚਂ ਸਭਾਵਭੂਤਂ, ਤਦੇਵ ਪਚ੍ਚਕ੍ਖਂ ਕਤ੍ਵਾ ਗਣ੍ਹਾਤਿ. ਸ ਵੇ ਨਰੋ ਸੇਟ੍ਠਮੁਪੇਤਿ ਠਾਨਨ੍ਤਿ ਸੋ ਉਤ੍ਤਮਂ ਠਾਨਂ ਉਪੇਤਿ ਅਧਿਗਚ੍ਛਤਿ ਵਿਨ੍ਦਤਿ ਲਭਤੀਤਿ.

ਸੋ ਏਵਞ੍ਚ ਪਨ ਵਤ੍ਵਾ ਆਹ – ‘‘ਅਮ੍ਭੋ, ਮਯਂ ਦ੍ਵਿਨ੍ਨਮ੍ਪਿ ਦੇਵਤਾਨਂ ਵਚਨਂ ਕਰਿਸ੍ਸਾਮ, ਨਾਵਂ ਤਾਵ ਸਜ੍ਜੇਯ੍ਯਾਮ. ਸਚੇ ਪਠਮਸ੍ਸ ਵਚਨਂ ਸਚ੍ਚਂ ਭਵਿਸ੍ਸਤਿ, ਤਂ ਨਾਵਂ ਅਭਿਰੁਹਿਤ੍ਵਾ ਪਲਾਯਿਸ੍ਸਾਮ, ਅਥ ਇਤਰਸ੍ਸ ਵਚਨਂ ਸਚ੍ਚਂ ਭਵਿਸ੍ਸਤਿ, ਨਾਵਂ ਏਕਮਨ੍ਤੇ ਠਪੇਤ੍ਵਾ ਇਧੇਵ ਵਸਿਸ੍ਸਾਮਾ’’ਤਿ. ਏਵਂ ਵੁਤ੍ਤੇ ਬਾਲਵਡ੍ਢਕੀ ‘‘ਅਮ੍ਭੋ, ਤ੍ਵਂ ਉਦਕਪਾਤਿਯਂ ਸੁਸੁਮਾਰਂ ਪਸ੍ਸਸਿ, ਅਤੀਵ ਦੀਘਂ ਪਸ੍ਸਸਿ, ਪਠਮਦੇਵਪੁਤ੍ਤੋ ਅਮ੍ਹੇਸੁ ਦੋਸਵਸੇਨ ਕਥੇਸਿ, ਪਚ੍ਛਿਮੋ ਸਿਨੇਹੇਨੇਵ, ਇਮਂ ਏਵਰੂਪਂ ਵਰਦੀਪਂ ਪਹਾਯ ਕੁਹਿਂ ਗਮਿਸ੍ਸਾਮ, ਸਚੇ ਪਨ ਤ੍ਵਂ ਗਨ੍ਤੁਕਾਮੋ, ਤਵ ਪਰਿਸਂ ਗਣ੍ਹਿਤ੍ਵਾ ਨਾਵਂ ਕਰੋਹਿ, ਅਮ੍ਹਾਕਂ ਨਾਵਾਯ ਕਿਚ੍ਚਂ ਨਤ੍ਥੀ’’ਤਿ ਆਹ. ਪਣ੍ਡਿਤੋ ਅਤ੍ਤਨੋ ਪਰਿਸਂ ਗਹੇਤ੍ਵਾ ਨਾਵਂ ਸਜ੍ਜੇਤ੍ਵਾ ਨਾਵਾਯ ਸਬ੍ਬੂਪਕਰਣਾਨਿ ਆਰੋਪੇਤ੍ਵਾ ਸਪਰਿਸੋ ਨਾਵਾਯ ਅਟ੍ਠਾਸਿ.

ਤਤੋ ਪੁਣ੍ਣਮਦਿਵਸੇ ਚਨ੍ਦਸ੍ਸ ਉਗ੍ਗਮਨਵੇਲਾਯ ਸਮੁਦ੍ਦਤੋ ਊਮਿ ਉਤ੍ਤਰਿਤ੍ਵਾ ਜਾਣੁਕਪਮਾਣਾ ਹੁਤ੍ਵਾ ਦੀਪਕਂ ਧੋਵਿਤ੍ਵਾ ਗਤਾ. ਪਣ੍ਡਿਤੋ ਸਮੁਦ੍ਦਸ੍ਸ ਉਤ੍ਤਰਣਭਾਵਂ ਞਤ੍ਵਾ ਨਾਵਂ ਵਿਸ੍ਸਜ੍ਜੇਸਿ. ਬਾਲਵਡ੍ਢਕਿਪਕ੍ਖਿਕਾਨਿ ਪਞ੍ਚ ਕੁਲਸਤਾਨਿ ‘‘ਸਮੁਦ੍ਦਤੋ ਊਮਿ ਦੀਪਧੋਵਨਤ੍ਥਾਯ ਆਗਤਾ, ਏਤ੍ਤਕਮੇਵ ਏਤ’’ਨ੍ਤਿ ਕਥੇਨ੍ਤਾ ਨਿਸੀਦਿਂਸੁ. ਤਤੋ ਪਟਿਪਾਟਿਯਾ ਕਟਿਪ੍ਪਮਾਣਾ ਪੁਰਿਸਪ੍ਪਮਾਣਾ ਤਾਲਪ੍ਪਮਾਣਾ ਸਤ੍ਤਤਾਲਪ੍ਪਮਾਣਾ ਸਾਗਰਊਮਿ ਦੀਪਕਮ੍ਪਿ ਵੁਯ੍ਹਮਾਨਾ ਆਗਞ੍ਛਿ. ਪਣ੍ਡਿਤੋ ਉਪਾਯਕੁਸਲਤਾਯ ਰਸੇ ਅਲਗ੍ਗੋ ਸੋਤ੍ਥਿਨਾ ਗਤੋ, ਬਾਲਵਡ੍ਢਕੀ ਰਸਗਿਦ੍ਧੇਨ ਅਨਾਗਤਭਯਂ ਅਨੋਲੋਕੇਨ੍ਤੋ ਪਞ੍ਚਹਿ ਕੁਲਸਤੇਹਿ ਸਦ੍ਧਿਂ ਵਿਨਾਸਂ ਪਤ੍ਤੋ.

ਇਤੋ ਪਰਾ ਸਾਨੁਸਾਸਨੀ ਤਮਤ੍ਥਂ ਦੀਪਯਮਾਨਾ ਤਿਸ੍ਸੋ ਅਭਿਸਮ੍ਬੁਦ੍ਧਗਾਥਾ ਹੋਨ੍ਤਿ –

੩੪. ‘‘ਯਥਾਪਿ ਤੇ ਸਾਗਰਵਾਰਿਮਜ੍ਝੇ, ਸਕਮ੍ਮੁਨਾ ਸੋਤ੍ਥਿ ਵਹਿਂਸੁ ਵਾਣਿਜਾ;

ਅਨਾਗਤਤ੍ਥਂ ਪਟਿਵਿਜ੍ਝਿਯਾਨ, ਅਪ੍ਪਮ੍ਪਿ ਨਾਚ੍ਚੇਤਿ ਸ ਭੂਰਿਪਞ੍ਞੋ.

੩੫. ‘‘ਬਾਲਾ ਚ ਮੋਹੇਨ ਰਸਾਨੁਗਿਦ੍ਧਾ, ਅਨਾਗਤਂ ਅਪ੍ਪਟਿਵਿਜ੍ਝਿਯਤ੍ਥਂ;

ਪਚ੍ਚੁਪ੍ਪਨ੍ਨੇ ਸੀਦਨ੍ਤਿ ਅਤ੍ਥਜਾਤੇ, ਸਮੁਦ੍ਦਮਜ੍ਝੇ ਯਥਾ ਤੇ ਮਨੁਸ੍ਸਾ.

੩੬. ‘‘ਅਨਾਗਤਂ ਪਟਿਕਯਿਰਾਥ ਕਿਚ੍ਚਂ, ‘ਮਾ ਮਂ ਕਿਚ੍ਚਂ ਕਿਚ੍ਚਕਾਲੇ ਬ੍ਯਧੇਸਿ’;

ਤਂ ਤਾਦਿਸਂ ਪਟਿਕਤਕਿਚ੍ਚਕਾਰਿਂ, ਨ ਤਂ ਕਿਚ੍ਚਂ ਕਿਚ੍ਚਕਾਲੇ ਬ੍ਯਧੇਤੀ’’ਤਿ.

ਤਤ੍ਥ ਸਕਮ੍ਮੁਨਾਤਿ ਅਨਾਗਤਭਯਂ ਦਿਸ੍ਵਾ ਪੁਰੇਤਰਂ ਕਤੇਨ ਅਤ੍ਤਨੋ ਕਮ੍ਮੇਨ. ਸੋਤ੍ਥਿ ਵਹਿਂਸੂਤਿ ਖੇਮੇਨ ਗਮਿਂਸੁ. ਵਾਣਿਜਾਤਿ ਸਮੁਦ੍ਦੇ ਵਿਚਰਣਭਾਵੇਨ ਵਡ੍ਢਕੀ ਵੁਤ੍ਤਾ. ਪਟਿਵਿਜ੍ਝਿਯਾਨਾਤਿ ਏਵਂ, ਭਿਕ੍ਖਵੇ, ਪਠਮਤਰਂ ਕਤ੍ਤਬ੍ਬਂ ਅਨਾਗਤਂ ਅਤ੍ਥਂ ਪਟਿਵਿਜ੍ਝਿਤ੍ਵਾ ਇਧਲੋਕੇ ਭੂਰਿਪਞ੍ਞੋ ਕੁਲਪੁਤ੍ਤੋ ਅਪ੍ਪਮਤ੍ਤਕਮ੍ਪਿ ਅਤ੍ਤਨੋ ਅਤ੍ਥਂ ਨ ਅਚ੍ਚੇਤਿ ਨਾਤਿਵਤ੍ਤਤਿ, ਨ ਹਾਪੇਤੀਤਿ ਅਤ੍ਥੋ. ਅਪ੍ਪਟਿਵਿਜ੍ਝਿਯਤ੍ਥਨ੍ਤਿ ਅਪ੍ਪਟਿਵਿਜ੍ਝਿਤ੍ਵਾ ਅਤ੍ਥਂ, ਪਠਮਮੇਵ ਕਤ੍ਤਬ੍ਬਂ ਅਕਤ੍ਵਾਤਿ ਅਤ੍ਥੋ. ਪਚ੍ਚੁਪ੍ਪਨ੍ਨੇਤਿ ਯਦਾ ਤਂ ਅਨਾਗਤਂ ਅਤ੍ਥਜਾਤਂ ਉਪ੍ਪਜ੍ਜਤਿ, ਤਦਾ ਤਸ੍ਮਿਂ ਪਚ੍ਚੁਪ੍ਪਨ੍ਨੇ ਸੀਦਨ੍ਤਿ, ਅਤ੍ਥੇ ਜਾਤੇ ਅਤ੍ਤਨੋ ਪਤਿਟ੍ਠਂ ਨ ਲਭਨ੍ਤਿ, ਸਮੁਦ੍ਦੇ ਤੇ ਬਾਲਵਡ੍ਢਕੀ ਮਨੁਸ੍ਸਾ ਵਿਯ ਵਿਨਾਸਂ ਪਾਪੁਣਨ੍ਤਿ.

ਅਨਾਗਤਨ੍ਤਿ ਭਿਕ੍ਖਵੇ, ਪਣ੍ਡਿਤਪੁਰਿਸੋ ਅਨਾਗਤਂ ਪਠਮਤਰਂ ਕਤ੍ਤਬ੍ਬਕਿਚ੍ਚਂ ਸਮ੍ਪਰਾਯਿਕਂ ਵਾ ਦਿਟ੍ਠਧਮ੍ਮਿਕਂ ਵਾ ਪਟਿਕਯਿਰਾਥ, ਪੁਰੇਤਰਮੇਵ ਕਰੇਯ੍ਯ. ਕਿਂਕਾਰਣਾ? ਮਾ ਮਂ ਕਿਚ੍ਚਂ ਕਿਚ੍ਚਕਾਲੇ ਬ੍ਯਧੇਸਿ, ਪੁਰੇ ਕਤ੍ਤਬ੍ਬਞ੍ਹਿ ਪੁਰੇ ਅਕਯਿਰਮਾਨਂ ਪਚ੍ਛਾ ਪਚ੍ਚੁਪ੍ਪਨ੍ਨਭਾਵਪ੍ਪਤ੍ਤਂ ਅਤ੍ਤਨੋ ਕਿਚ੍ਚਕਾਲੇ ਕਾਯਚਿਤ੍ਤਾਬਾਧੇਨ ਬ੍ਯਧੇਤਿ, ਤਂ ਮਂ ਮਾ ਬ੍ਯਧੇਸੀਤਿ ਪਠਮਮੇਵ ਨਂ ਪਣ੍ਡਿਤੋ ਕਰੇਯ੍ਯ. ਤਂ ਤਾਦਿਸਨ੍ਤਿ ਯਥਾ ਪਣ੍ਡਿਤਂ ਪੁਰਿਸਂ. ਪਟਿਕਤਕਿਚ੍ਚਕਾਰਿਨ੍ਤਿ ਪਟਿਕਚ੍ਚੇਵ ਕਤ੍ਤਬ੍ਬਕਿਚ੍ਚਕਾਰਿਨਂ. ਤਂ ਕਿਚ੍ਚਂ ਕਿਚ੍ਚਕਾਲੇਤਿ ਅਨਾਗਤਂ ਕਿਚ੍ਚਂ ਕਯਿਰਮਾਨਂ ਪਚ੍ਛਾ ਪਚ੍ਚੁਪ੍ਪਨ੍ਨਭਾਵਪ੍ਪਤ੍ਤਂ ਅਤ੍ਤਨੋ ਕਿਚ੍ਚਕਾਲੇ ਕਾਯਚਿਤ੍ਤਾਬਾਧਕਾਲੇ ਤਾਦਿਸਂ ਪੁਰਿਮਂ ਨ ਬ੍ਯਧੇਤਿ ਨ ਬਾਧਤਿ. ਕਸ੍ਮਾ? ਪੁਰੇਯੇਵ ਕਤਤ੍ਤਾਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਪਚ੍ਚੁਪ੍ਪਨ੍ਨਸੁਖੇ ਲਗ੍ਗੋ ਅਨਾਗਤਭਯਂ ਅਨੋਲੋਕੇਤ੍ਵਾ ਸਪਰਿਸੋ ਵਿਨਾਸਂ ਪਤ੍ਤੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਬਾਲਵਡ੍ਢਕੀ ਦੇਵਦਤ੍ਤੋ ਅਹੋਸਿ, ਦਕ੍ਖਿਣਦਿਸਾਯ ਠਿਤੋ ਅਧਮ੍ਮਿਕਦੇਵਪੁਤ੍ਤੋ ਕੋਕਾਲਿਕੋ, ਉਤ੍ਤਰਦਿਸਾਯ ਠਿਤੋ ਧਮ੍ਮਿਕਦੇਵਪੁਤ੍ਤੋ ਸਾਰਿਪੁਤ੍ਤੋ, ਪਣ੍ਡਿਤਵਡ੍ਢਕੀ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਮੁਦ੍ਦਵਾਣਿਜਜਾਤਕਵਣ੍ਣਨਾ ਤਤਿਯਾ.

[੪੬੭] ੪. ਕਾਮਜਾਤਕਵਣ੍ਣਨਾ

ਕਾਮਂ ਕਾਮਯਮਾਨਸ੍ਸਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਬ੍ਰਾਹ੍ਮਣਂ ਆਰਬ੍ਭ ਕਥੇਸਿ. ਏਕੋ ਕਿਰ ਸਾਵਤ੍ਥਿਵਾਸੀ ਬ੍ਰਾਹ੍ਮਣੋ ਅਚਿਰਵਤੀਤੀਰੇ ਖੇਤ੍ਤਕਰਣਤ੍ਥਾਯ ਅਰਞ੍ਞਂ ਕੋਟੇਸਿ. ਸਤ੍ਥਾ ਤਸ੍ਸ ਉਪਨਿਸ੍ਸਯਂ ਦਿਸ੍ਵਾ ਸਾਵਤ੍ਥਿਂ ਪਿਣ੍ਡਾਯ ਪਵਿਸਨ੍ਤੋ ਮਗ੍ਗਾ ਓਕ੍ਕਮ੍ਮ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ‘‘ਕਿਂ ਕਰੋਸਿ ਬ੍ਰਾਹ੍ਮਣਾ’’ਤਿ ਵਤ੍ਵਾ ‘‘ਖੇਤ੍ਤਟ੍ਠਾਨਂ ਕੋਟਾਪੇਮਿ ਭੋ, ਗੋਤਮਾ’’ਤਿ ਵੁਤ੍ਤੇ ‘‘ਸਾਧੁ, ਬ੍ਰਾਹ੍ਮਣ, ਕਮ੍ਮਂ ਕਰੋਹੀ’’ਤਿ ਵਤ੍ਵਾ ਅਗਮਾਸਿ. ਏਤੇਨੇਵ ਉਪਾਯੇਨ ਛਿਨ੍ਨਰੁਕ੍ਖੇ ਹਾਰੇਤ੍ਵਾ ਖੇਤ੍ਤਸ੍ਸ ਸੋਧਨਕਾਲੇ ਕਸਨਕਾਲੇ ਕੇਦਾਰਬਨ੍ਧਨਕਾਲੇ ਵਪਨਕਾਲੇਤਿ ਪੁਨਪ੍ਪੁਨਂ ਗਨ੍ਤ੍ਵਾ ਤੇਨ ਸਦ੍ਧਿਂ ਪਟਿਸਨ੍ਥਾਰਮਕਾਸਿ. ਵਪਨਦਿਵਸੇ ਪਨ ਸੋ ਬ੍ਰਾਹ੍ਮਣੋ ‘‘ਅਜ੍ਜ, ਭੋ ਗੋਤਮ, ਮਯ੍ਹਂ ਵਪ੍ਪਮਙ੍ਗਲਂ, ਅਹਂ ਇਮਸ੍ਮਿਂ ਸਸ੍ਸੇ ਨਿਪ੍ਫਨ੍ਨੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਸ੍ਸਾਮੀ’’ਤਿ ਆਹ. ਸਤ੍ਥਾ ਤੁਣ੍ਹੀਭਾਵੇਨ ਅਧਿਵਾਸੇਤ੍ਵਾ ਪਕ੍ਕਾਮਿ. ਪੁਨੇਕਦਿਵਸਂ ਬ੍ਰਾਹ੍ਮਣੋ ਸਸ੍ਸਂ ਓਲੋਕੇਨ੍ਤੋ ਅਟ੍ਠਾਸਿ. ਸਤ੍ਥਾਪਿ ਤਤ੍ਥ ਗਨ੍ਤ੍ਵਾ ‘‘ਕਿਂ ਕਰੋਸਿ ਬ੍ਰਾਹ੍ਮਣਾ’’ਤਿ ਪੁਚ੍ਛਿਤ੍ਵਾ ‘‘ਸਸ੍ਸਂ ਓਲੋਕੇਮਿ ਭੋ ਗੋਤਮਾ’’ਤਿ ਵੁਤ੍ਤੇ ‘‘ਸਾਧੁ ਬ੍ਰਾਹ੍ਮਣਾ’’ਤਿ ਵਤ੍ਵਾ ਪਕ੍ਕਾਮਿ. ਤਦਾ ਬ੍ਰਾਹ੍ਮਣੋ ਚਿਨ੍ਤੇਸਿ ‘‘ਸਮਣੋ ਗੋਤਮੋ ਅਭਿਣ੍ਹਂ ਆਗਚ੍ਛਤਿ, ਨਿਸ੍ਸਂਸਯਂ ਭਤ੍ਤੇਨ ਅਤ੍ਥਿਕੋ, ਦਸ੍ਸਾਮਹਂ ਤਸ੍ਸ ਭਤ੍ਤ’’ਨ੍ਤਿ. ਤਸ੍ਸੇਵਂ ਚਿਨ੍ਤੇਤ੍ਵਾ ਗੇਹਂ ਗਤਦਿਵਸੇ ਸਤ੍ਥਾਪਿ ਤਤ੍ਥ ਅਗਮਾਸਿ. ਅਥ ਬ੍ਰਾਹ੍ਮਣਸ੍ਸ ਅਤਿਵਿਯ ਵਿਸ੍ਸਾਸੋ ਅਹੋਸਿ. ਅਪਰਭਾਗੇ ਪਰਿਣਤੇ ਸਸ੍ਸੇ ‘‘ਸ੍ਵੇ ਖੇਤ੍ਤਂ ਲਾਯਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਨਿਪਨ੍ਨੇ ਬ੍ਰਾਹ੍ਮਣੇ ਅਚਿਰਵਤਿਯਾ ਉਪਰਿ ਸਬ੍ਬਰਤ੍ਤਿਂ ਕਰਕਵਸ੍ਸਂ ਵਸ੍ਸਿ. ਮਹੋਘੋ ਆਗਨ੍ਤ੍ਵਾ ਏਕਨਾਲ਼ਿਮਤ੍ਤਮ੍ਪਿ ਅਨਵਸੇਸਂ ਕਤ੍ਵਾ ਸਬ੍ਬਂ ਸਸ੍ਸਂ ਸਮੁਦ੍ਦਂ ਪਵੇਸੇਸਿ. ਬ੍ਰਾਹ੍ਮਣੋ ਓਘਮ੍ਹਿ ਪਤਿਤੇ ਸਸ੍ਸਵਿਨਾਸਂ ਓਲੋਕੇਤ੍ਵਾ ਸਕਭਾਵੇਨ ਸਣ੍ਠਾਤੁਂ ਨਾਹੋਸਿ, ਬਲਵਸੋਕਾਭਿਭੂਤੋ ਹਤ੍ਥੇਨ ਉਰਂ ਪਹਰਿਤ੍ਵਾ ਪਰਿਦੇਵਮਾਨੋ ਰੋਦਨ੍ਤੋ ਨਿਪਜ੍ਜਿ.

ਸਤ੍ਥਾ ਪਚ੍ਚੂਸਸਮਯੇ ਸੋਕਾਭਿਭੂਤਂ ਬ੍ਰਾਹ੍ਮਣਂ ਦਿਸ੍ਵਾ ‘‘ਬ੍ਰਾਹ੍ਮਣਸ੍ਸਾਵਸ੍ਸਯੋ ਭਵਿਸ੍ਸਾਮੀ’’ਤਿ ਪੁਨਦਿਵਸੇ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਭਿਕ੍ਖੂ ਵਿਹਾਰਂ ਪੇਸੇਤ੍ਵਾ ਪਚ੍ਛਾਸਮਣੇਨ ਸਦ੍ਧਿਂ ਤਸ੍ਸ ਗੇਹਦ੍ਵਾਰਂ ਅਗਮਾਸਿ. ਬ੍ਰਾਹ੍ਮਣੋ ਸਤ੍ਥੁ ਆਗਤਭਾਵਂ ਸੁਤ੍ਵਾ ‘‘ਪਟਿਸਨ੍ਥਾਰਤ੍ਥਾਯ ਮੇ ਸਹਾਯੋ ਆਗਤੋ ਭਵਿਸ੍ਸਤੀ’’ਤਿ ਪਟਿਲਦ੍ਧਸ੍ਸਾਸੋ ਆਸਨਂ ਪਞ੍ਞਪੇਸਿ. ਸਤ੍ਥਾ ਪਵਿਸਿਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ‘‘ਬ੍ਰਾਹ੍ਮਣ, ਕਸ੍ਮਾ ਤ੍ਵਂ ਦੁਮ੍ਮਨੋਸਿ, ਕਿਂ ਤੇ ਅਫਾਸੁਕ’’ਨ੍ਤਿ ਪੁਚ੍ਛਿ. ਭੋ ਗੋਤਮ, ਅਚਿਰਵਤੀਤੀਰੇ ਮਯਾ ਰੁਕ੍ਖਚ੍ਛੇਦਨਤੋ ਪਟ੍ਠਾਯ ਕਤਂ ਕਮ੍ਮਂ ਤੁਮ੍ਹੇ ਜਾਨਾਥ, ਅਹਂ ‘‘ਇਮਸ੍ਮਿਂ ਸਸ੍ਸੇ ਨਿਪ੍ਫਨ੍ਨੇ ਤੁਮ੍ਹਾਕਂ ਦਾਨਂ ਦਸ੍ਸਾਮੀ’’ਤਿ ਵਿਚਰਾਮਿ, ਇਦਾਨਿ ਮੇ ਸਬ੍ਬਂ ਤਂ ਸਸ੍ਸਂ ਮਹੋਘੋ ਸਮੁਦ੍ਦਮੇਵ ਪਵੇਸੇਸਿ, ਕਿਞ੍ਚਿ ਅਵਸਿਟ੍ਠਂ ਨਤ੍ਥਿ, ਸਕਟਸਤਮਤ੍ਤਂ ਧਞ੍ਞਂ ਵਿਨਟ੍ਠਂ, ਤੇਨ ਮੇ ਮਹਾਸੋਕੋ ਉਪ੍ਪਨ੍ਨੋਤਿ. ‘‘ਕਿਂ ਪਨ, ਬ੍ਰਾਹ੍ਮਣ, ਸੋਚਨ੍ਤਸ੍ਸ ਨਟ੍ਠਂ ਪੁਨਾਗਚ੍ਛਤੀ’’ਤਿ. ‘‘ਨੋ ਹੇਤਂ ਭੋ ਗੋਤਮਾ’’ਤਿ. ‘‘ਏਵਂ ਸਨ੍ਤੇ ਕਸ੍ਮਾ ਸੋਚਸਿ, ਇਮੇਸਂ ਸਤ੍ਤਾਨਂ ਧਨਧਞ੍ਞਂ ਨਾਮ ਉਪ੍ਪਜ੍ਜਨਕਾਲੇ ਉਪ੍ਪਜ੍ਜਤਿ, ਨਸ੍ਸਨਕਾਲੇ ਨਸ੍ਸਤਿ, ਕਿਞ੍ਚਿ ਸਙ੍ਖਾਰਗਤਂ ਅਨਸ੍ਸਨਧਮ੍ਮਂ ਨਾਮ ਨਤ੍ਥਿ, ਮਾ ਚਿਨ੍ਤਯੀ’’ਤਿ. ਇਤਿ ਨਂ ਸਤ੍ਥਾ ਸਮਸ੍ਸਾਸੇਤ੍ਵਾ ਤਸ੍ਸ ਸਪ੍ਪਾਯਧਮ੍ਮਂ ਦੇਸੇਨ੍ਤੋ ਕਾਮਸੁਤ੍ਤਂ (ਸੁ. ਨਿ. ੭੭੨ ਆਦਯੋ) ਕਥੇਸਿ. ਸੁਤ੍ਤਪਰਿਯੋਸਾਨੇ ਸੋਚਨ੍ਤੋ ਬ੍ਰਾਹ੍ਮਣੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਤ੍ਥਾ ਤਂ ਨਿਸ੍ਸੋਕਂ ਕਤ੍ਵਾ ਉਟ੍ਠਾਯਾਸਨਾ ਵਿਹਾਰਂ ਅਗਮਾਸਿ. ‘‘ਸਤ੍ਥਾ ਅਸੁਕਂ ਨਾਮ ਬ੍ਰਾਹ੍ਮਣਂ ਸੋਕਸਲ੍ਲਸਮਪ੍ਪਿਤਂ ਨਿਸ੍ਸੋਕਂ ਕਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸੀ’’ਤਿ ਸਕਲਨਗਰਂ ਅਞ੍ਞਾਸਿ. ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਦਸਬਲੋ ਬ੍ਰਾਹ੍ਮਣੇਨ ਸਦ੍ਧਿਂ ਮਿਤ੍ਤਂ ਕਤ੍ਵਾ ਵਿਸ੍ਸਾਸਿਕੋ ਹੁਤ੍ਵਾ ਉਪਾਯੇਨੇਵ ਤਸ੍ਸ ਸੋਕਸਲ੍ਲਸਮਪ੍ਪਿਤਸ੍ਸ ਧਮ੍ਮਂ ਦੇਸੇਤ੍ਵਾ ਤਂ ਨਿਸ੍ਸੋਕਂ ਕਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਾਹਂ ਏਤਂ ਨਿਸ੍ਸੋਕਮਕਾਸਿ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤਸ੍ਸ ਰਞ੍ਞੋ ਦ੍ਵੇ ਪੁਤ੍ਤਾ ਅਹੇਸੁਂ. ਸੋ ਜੇਟ੍ਠਕਸ੍ਸ ਉਪਰਜ੍ਜਂ ਅਦਾਸਿ, ਕਨਿਟ੍ਠਸ੍ਸ ਸੇਨਾਪਤਿਟ੍ਠਾਨਂ. ਅਪਰਭਾਗੇ ਬ੍ਰਹ੍ਮਦਤ੍ਤੇ ਕਾਲਕਤੇ ਅਮਚ੍ਚਾ ਜੇਟ੍ਠਕਸ੍ਸ ਅਭਿਸੇਕਂ ਪਟ੍ਠਪੇਸੁਂ. ਸੋ ‘‘ਨ ਮਯ੍ਹਂ ਰਜ੍ਜੇਨਤ੍ਥੋ, ਕਨਿਟ੍ਠਸ੍ਸ ਮੇ ਦੇਥਾ’’ਤਿ ਵਤ੍ਵਾ ਪੁਨਪ੍ਪੁਨਂ ਯਾਚਿਯਮਾਨੋਪਿ ਪਟਿਕ੍ਖਿਪਿਤ੍ਵਾ ਕਨਿਟ੍ਠਸ੍ਸ ਅਭਿਸੇਕੇ ਕਤੇ ‘‘ਨ ਮੇ ਇਸ੍ਸਰਿਯੇਨਤ੍ਥੋ’’ਤਿ ਉਪਰਜ੍ਜਾਦੀਨਿਪਿ ਨ ਇਚ੍ਛਿ. ‘‘ਤੇਨ ਹਿ ਸਾਦੂਨਿ ਭੋਜਨਾਨਿ ਭੁਞ੍ਜਨ੍ਤੋ ਇਧੇਵ ਵਸਾਹੀ’’ਤਿ ਵੁਤ੍ਤੇਪਿ ‘‘ਨ ਮੇ ਇਮਸ੍ਮਿਂ ਨਗਰੇ ਕਿਚ੍ਚਂ ਅਤ੍ਥੀ’’ਤਿ ਬਾਰਾਣਸਿਤੋ ਨਿਕ੍ਖਮਿਤ੍ਵਾ ਪਚ੍ਚਨ੍ਤਂ ਗਨ੍ਤ੍ਵਾ ਏਕਂ ਸੇਟ੍ਠਿਕੁਲਂ ਨਿਸ੍ਸਾਯ ਸਹਤ੍ਥੇਨ ਕਮ੍ਮਂ ਕਰੋਨ੍ਤੋ ਵਸਿ. ਤੇ ਅਪਰਭਾਗੇ ਤਸ੍ਸ ਰਾਜਕੁਮਾਰਭਾਵਂ ਞਤ੍ਵਾ ਕਮ੍ਮਂ ਕਾਤੁਂ ਨਾਦਂਸੁ, ਕੁਮਾਰਪਰਿਹਾਰੇਨੇਵ ਤਂ ਪਰਿਹਰਿਂਸੁ. ਅਪਰਭਾਗੇ ਰਾਜਕਮ੍ਮਿਕਾ ਖੇਤ੍ਤਪ੍ਪਮਾਣਗ੍ਗਹਣਤ੍ਥਾਯ ਤਂ ਗਾਮਂ ਅਗਮਂਸੁ. ਸੇਟ੍ਠਿ ਰਾਜਕੁਮਾਰਂ ਉਪਸਙ੍ਕਮਿਤ੍ਵਾ ‘‘ਸਾਮਿ, ਮਯਂ ਤੁਮ੍ਹੇ ਪੋਸੇਮ, ਕਨਿਟ੍ਠਭਾਤਿਕਸ੍ਸ ਪਣ੍ਣਂ ਪੇਸੇਤ੍ਵਾ ਅਮ੍ਹਾਕਂ ਬਲਿਂ ਹਾਰੇਥਾ’’ਤਿ ਆਹ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਅਹਂ ਅਸੁਕਸੇਟ੍ਠਿਕੁਲਂ ਨਾਮ ਉਪਨਿਸ੍ਸਾਯ ਵਸਾਮਿ, ਮਂ ਨਿਸ੍ਸਾਯ ਏਤੇਸਂ ਬਲਿਂ ਵਿਸ੍ਸਜ੍ਜੇਹੀ’’ਤਿ ਪਣ੍ਣਂ ਪੇਸੇਸਿ. ਰਾਜਾ ‘‘ਸਾਧੂ’’ਤਿ ਵਤ੍ਵਾ ਤਥਾ ਕਾਰੇਸਿ.

ਅਥ ਨਂ ਸਕਲਗਾਮਵਾਸਿਨੋਪਿ ਜਨਪਦਵਾਸਿਨੋਪਿ ਉਪਸਙ੍ਕਮਿਤ੍ਵਾ ‘‘ਮਯਂ ਤੁਮ੍ਹਾਕਞ੍ਞੇਵ ਬਲਿਂ ਦਸ੍ਸਾਮ, ਅਮ੍ਹਾਕਮ੍ਪਿ ਸੁਙ੍ਕਂ ਵਿਸ੍ਸਜ੍ਜਾਪੇਹੀ’’ਤਿ ਆਹਂਸੁ. ਸੋ ਤੇਸਮ੍ਪਿ ਅਤ੍ਥਾਯ ਪਣ੍ਣਂ ਪੇਸੇਤ੍ਵਾ ਵਿਸ੍ਸਜ੍ਜਾਪੇਸਿ. ਤਤੋ ਪਟ੍ਠਾਯ ਤੇ ਤਸ੍ਸੇਵ ਬਲਿਂ ਅਦਂਸੁ. ਅਥਸ੍ਸ ਮਹਾਲਾਭਸਕ੍ਕਾਰੋ ਅਹੋਸਿ, ਤੇਨ ਸਦ੍ਧਿਞ੍ਞੇਵਸ੍ਸ ਤਣ੍ਹਾਪਿ ਮਹਤੀ ਜਾਤਾ. ਸੋ ਅਪਰਭਾਗੇਪਿ ਸਬ੍ਬਂ ਜਨਪਦਂ ਯਾਚਿ, ਉਪਡ੍ਢਰਜ੍ਜਂ ਯਾਚਿ, ਕਨਿਟ੍ਠੋਪਿ ਤਸ੍ਸ ਅਦਾਸਿਯੇਵ. ਸੋ ਤਣ੍ਹਾਯ ਵਡ੍ਢਮਾਨਾਯ ਉਪਡ੍ਢਰਜ੍ਜੇਨਪਿ ਅਸਨ੍ਤੁਟ੍ਠੋ ‘‘ਰਜ੍ਜਂ ਗਣ੍ਹਿਸ੍ਸਾਮੀ’’ਤਿ ਜਨਪਦਪਰਿਵੁਤੋ ਤਂ ਨਗਰਂ ਗਨ੍ਤ੍ਵਾ ਬਹਿਨਗਰੇ ਠਤ੍ਵਾ ‘‘ਰਜ੍ਜਂ ਵਾ ਮੇ ਦੇਤੁ ਯੁਦ੍ਧਂ ਵਾ’’ਤਿ ਕਨਿਟ੍ਠਸ੍ਸ ਪਣ੍ਣਂ ਪਹਿਣਿ. ਕਨਿਟ੍ਠੋ ਚਿਨ੍ਤੇਸਿ ‘‘ਅਯਂ ਬਾਲੋ ਪੁਬ੍ਬੇ ਰਜ੍ਜਮ੍ਪਿ ਉਪਰਜ੍ਜਾਦੀਨਿਪਿ ਪਟਿਕ੍ਖਿਪਿਤ੍ਵਾ ਇਦਾਨਿ ‘ਯੁਦ੍ਧੇਨ ਗਣ੍ਹਾਮੀ’ਤਿ ਵਦਤਿ, ਸਚੇ ਖੋ ਪਨਾਹਂ ਇਮਂ ਯੁਦ੍ਧੇਨ ਮਾਰੇਸ੍ਸਾਮਿ, ਗਰਹਾ ਮੇ ਭਵਿਸ੍ਸਤਿ, ਕਿਂ ਮੇ ਰਜ੍ਜੇਨਾ’’ਤਿ. ਅਥਸ੍ਸ ‘‘ਅਲਂ ਯੁਦ੍ਧੇਨ, ਰਜ੍ਜਂ ਗਣ੍ਹਤੂ’’ਤਿ ਪੇਸੇਸਿ. ਸੋ ਰਜ੍ਜਂ ਗਣ੍ਹਿਤ੍ਵਾ ਕਨਿਟ੍ਠਸ੍ਸ ਉਪਰਜ੍ਜਂ ਦਤ੍ਵਾ ਤਤੋ ਪਟ੍ਠਾਯ ਰਜ੍ਜਂ ਕਾਰੇਨ੍ਤੋ ਤਣ੍ਹਾਵਸਿਕੋ ਹੁਤ੍ਵਾ ਏਕੇਨ ਰਜ੍ਜੇਨ ਅਸਨ੍ਤੁਟ੍ਠੋ ਦ੍ਵੇ ਤੀਣਿ ਰਜ੍ਜਾਨਿ ਪਤ੍ਥੇਤ੍ਵਾ ਤਣ੍ਹਾਯ ਕੋਟਿਂ ਨਾਦ੍ਦਸ.

ਤਦਾ ਸਕ੍ਕੋ ਦੇਵਰਾਜਾ ‘‘ਕੇ ਨੁ ਖੋ ਲੋਕੇ ਮਾਤਾਪਿਤਰੋ ਉਪਟ੍ਠਹਨ੍ਤਿ, ਕੇ ਦਾਨਾਦੀਨਿ ਪੁਞ੍ਞਾਨਿ ਕਰੋਨ੍ਤਿ, ਕੇ ਤਣ੍ਹਾਵਸਿਕਾ’’ਤਿ ਓਲੋਕੇਨ੍ਤੋ ਤਸ੍ਸ ਤਣ੍ਹਾਵਸਿਕਭਾਵਂ ਞਤ੍ਵਾ ‘‘ਅਯਂ ਬਾਲੋ ਬਾਰਾਣਸਿਰਜ੍ਜੇਨਪਿ ਨ ਤੁਸ੍ਸਤਿ, ਅਹਂ ਸਿਕ੍ਖਾਪੇਸ੍ਸਾਮਿ ਨ’’ਨ੍ਤਿ ਮਾਣਵਕਵੇਸੇਨ ਰਾਜਦ੍ਵਾਰੇ ਠਤ੍ਵਾ ‘‘ਏਕੋ ਉਪਾਯਕੁਸਲੋ ਮਾਣਵੋ ਦ੍ਵਾਰੇ ਠਿਤੋ’’ਤਿ ਆਰੋਚਾਪੇਤ੍ਵਾ ‘‘ਪਵਿਸਤੂ’’ਤਿ ਵੁਤ੍ਤੇ ਪਵਿਸਿਤ੍ਵਾ ਰਾਜਾਨਂ ਜਯਾਪੇਤ੍ਵਾ ‘‘ਕਿਂਕਾਰਣਾ ਆਗਤੋਸੀ’’ਤਿ ਵੁਤ੍ਤੇ ‘‘ਮਹਾਰਾਜ ਤੁਮ੍ਹਾਕਂ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥਿ, ਰਹੋ ਪਚ੍ਚਾਸੀਸਾਮੀ’’ਤਿ ਆਹ. ਸਕ੍ਕਾਨੁਭਾਵੇਨ ਤਾਵਦੇਵ ਮਨੁਸ੍ਸਾ ਪਟਿਕ੍ਕਮਿਂਸੁ. ਅਥ ਨਂ ਮਾਣਵੋ ‘‘ਅਹਂ, ਮਹਾਰਾਜ, ਫੀਤਾਨਿ ਆਕਿਣ੍ਣਮਨੁਸ੍ਸਾਨਿ ਸਮ੍ਪਨ੍ਨਬਲਵਾਹਨਾਨਿ ਤੀਣਿ ਨਗਰਾਨਿ ਪਸ੍ਸਾਮਿ, ਅਹਂ ਤੇ ਅਤ੍ਤਨੋ ਆਨੁਭਾਵੇਨ ਤੇਸੁ ਰਜ੍ਜਂ ਗਹੇਤ੍ਵਾ ਦਸ੍ਸਾਮਿ, ਪਪਞ੍ਚਂ ਅਕਤ੍ਵਾ ਸੀਘਂ ਗਨ੍ਤੁਂ ਵਟ੍ਟਤੀ’’ਤਿ ਆਹ. ਸੋ ਤਣ੍ਹਾਵਸਿਕੋ ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਸਕ੍ਕਾਨੁਭਾਵੇਨ ‘‘ਕੋ ਵਾ ਤ੍ਵਂ, ਕੁਤੋ ਵਾ ਆਗਤੋ, ਕਿਂ ਵਾ ਤੇ ਲਦ੍ਧੁਂ ਵਟ੍ਟਤੀ’’ਤਿ ਨ ਪੁਚ੍ਛਿ. ਸੋਪਿ ਏਤ੍ਤਕਂ ਵਤ੍ਵਾ ਤਾਵਤਿਂਸਭਵਨਮੇਵ ਅਗਮਾਸਿ.

ਰਾਜਾ ਅਮਚ੍ਚੇ ਪਕ੍ਕੋਸਾਪੇਤ੍ਵਾ ‘‘ਏਕੋ ਮਾਣਵੋ ‘ਅਮ੍ਹਾਕਂ ਤੀਣਿ ਰਜ੍ਜਾਨਿ ਗਹੇਤ੍ਵਾ ਦਸ੍ਸਾਮੀ’ਤਿ ਆਹ, ਤਂ ਪਕ੍ਕੋਸਥ, ਨਗਰੇ ਭੇਰਿਂ ਚਰਾਪੇਤ੍ਵਾ ਬਲਕਾਯਂ ਸਨ੍ਨਿਪਾਤਾਪੇਥ, ਪਪਞ੍ਚਂ ਅਕਤ੍ਵਾ ਤੀਣਿ ਰਜ੍ਜਾਨਿ ਗਣ੍ਹਿਸ੍ਸਾਮੀ’’ਤਿ ਵਤ੍ਵਾ ‘‘ਕਿਂ ਪਨ ਤੇ, ਮਹਾਰਾਜ, ਤਸ੍ਸ ਮਾਣਵਸ੍ਸ ਸਕ੍ਕਾਰੋ ਵਾ ਕਤੋ, ਨਿਵਾਸਟ੍ਠਾਨਂ ਵਾ ਪੁਚ੍ਛਿਤ’’ਨ੍ਤਿ ਵੁਤ੍ਤੇ ‘‘ਨੇਵ ਸਕ੍ਕਾਰਂ ਅਕਾਸਿਂ, ਨ ਨਿਵਾਸਟ੍ਠਾਨਂ ਪੁਚ੍ਛਿਂ, ਗਚ੍ਛਥ ਨਂ ਉਪਧਾਰੇਥਾ’’ਤਿ ਆਹ. ਉਪਧਾਰੇਨ੍ਤਾ ਨਂ ਅਦਿਸ੍ਵਾ ‘‘ਮਹਾਰਾਜ, ਸਕਲਨਗਰੇ ਮਾਣਵਂ ਨ ਪਸ੍ਸਾਮਾ’’ਤਿ ਆਰੋਚੇਸੁਂ. ਤਂ ਸੁਤ੍ਵਾ ਰਾਜਾ ਦੋਮਨਸ੍ਸਜਾਤੋ ‘‘ਤੀਸੁ ਨਗਰੇਸੁ ਰਜ੍ਜਂ ਨਟ੍ਠਂ, ਮਹਨ੍ਤੇਨਮ੍ਹਿ ਯਸੇਨ ਪਰਿਹੀਨੋ, ‘ਨੇਵ ਮੇ ਪਰਿਬ੍ਬਯਂ ਅਦਾਸਿ, ਨ ਚ ਪੁਚ੍ਛਿ ਨਿਵਾਸਟ੍ਠਾਨ’ਨ੍ਤਿ ਮਯ੍ਹਂ ਕੁਜ੍ਝਿਤ੍ਵਾ ਮਾਣਵੋ ਅਨਾਗਤੋ ਭਵਿਸ੍ਸਤੀ’’ਤਿ ਪੁਨਪ੍ਪੁਨਂ ਚਿਨ੍ਤੇਸਿ. ਅਥਸ੍ਸ ਤਣ੍ਹਾਵਸਿਕਸ੍ਸ ਸਰੀਰੇ ਡਾਹੋ ਉਪ੍ਪਜ੍ਜਿ, ਸਰੀਰੇ ਪਰਿਡਯ੍ਹਨ੍ਤੇ ਉਦਰਂ ਖੋਭੇਤ੍ਵਾ ਲੋਹਿਤਪਕ੍ਖਨ੍ਦਿਕਾ ਉਦਪਾਦਿ. ਏਕਂ ਭਾਜਨਂ ਪਵਿਸਤਿ, ਏਕਂ ਨਿਕ੍ਖਮਤਿ, ਵੇਜ੍ਜਾ ਤਿਕਿਚ੍ਛਿਤੁਂ ਨ ਸਕ੍ਕੋਨ੍ਤਿ, ਰਾਜਾ ਕਿਲਮਤਿ. ਅਥਸ੍ਸ ਬ੍ਯਾਧਿਤਭਾਵੋ ਸਕਲਨਗਰੇ ਪਾਕਟੋ ਅਹੋਸਿ.

ਤਦਾ ਬੋਧਿਸਤ੍ਤੋ ਤਕ੍ਕਸਿਲਤੋ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਬਾਰਾਣਸਿਨਗਰੇ ਮਾਤਾਪਿਤੂਨਂ ਸਨ੍ਤਿਕਂ ਆਗਤੋ ਤਂ ਰਞ੍ਞੋ ਪਵਤ੍ਤਿਂ ਸੁਤ੍ਵਾ ‘‘ਅਹਂ ਤਿਕਿਚ੍ਛਿਸ੍ਸਾਮੀ’’ਤਿ ਰਾਜਦ੍ਵਾਰਂ ਗਨ੍ਤ੍ਵਾ ‘‘ਏਕੋ ਕਿਰ ਤਰੁਣਮਾਣਵੋ ਤੁਮ੍ਹੇ ਤਿਕਿਚ੍ਛਿਤੁਂ ਆਗਤੋ’’ਤਿ ਆਰੋਚਾਪੇਸਿ. ਰਾਜਾ ‘‘ਮਹਨ੍ਤਮਹਨ੍ਤਾ ਦਿਸਾਪਾਮੋਕ੍ਖਵੇਜ੍ਜਾਪਿ ਮਂ ਤਿਕਿਚ੍ਛਿਤੁਂ ਨ ਸਕ੍ਕੋਨ੍ਤਿ, ਕਿਂ ਤਰੁਣਮਾਣਵੋ ਸਕ੍ਖਿਸ੍ਸਤਿ, ਪਰਿਬ੍ਬਯਂ ਦਤ੍ਵਾ ਵਿਸ੍ਸਜ੍ਜੇਥ ਨ’’ਨ੍ਤਿ ਆਹ. ਤਂ ਸੁਤ੍ਵਾ ਮਾਣਵੋ ‘‘ਮਯ੍ਹਂ ਵੇਜ੍ਜਕਮ੍ਮੇਨ ਵੇਤਨਂ ਨਤ੍ਥਿ, ਅਹਂ ਤਿਕਿਚ੍ਛਾਮਿ, ਕੇਵਲਂ ਭੇਸਜ੍ਜਮੂਲਮਤ੍ਤਂ ਦੇਤੂ’’ਤਿ ਆਹ. ਤਂ ਸੁਤ੍ਵਾ ਰਾਜਾ ‘‘ਸਾਧੂ’’ਤਿ ਪਕ੍ਕੋਸਾਪੇਸਿ. ਮਾਣਵੋ ਰਾਜਾਨਂ ਵਨ੍ਦਿਤ੍ਵਾ ‘‘ਮਾ ਭਾਯਿ, ਮਹਾਰਾਜ, ਅਹਂ ਤੇ ਤਿਕਿਚ੍ਛਾਮਿ, ਅਪਿਚ ਖੋ ਪਨ ਮੇ ਰੋਗਸ੍ਸ ਸਮੁਟ੍ਠਾਨਂ ਆਚਿਕ੍ਖਾਹੀ’’ਤਿ ਆਹ. ਰਾਜਾ ਹਰਾਯਮਾਨੋ ‘‘ਕਿਂ ਤੇ ਸਮੁਟ੍ਠਾਨੇਨ, ਭੇਸਜ੍ਜਂ ਏਵ ਕਰੋਹੀ’’ਤਿ ਆਹ. ਮਹਾਰਾਜ, ਵੇਜ੍ਜਾ ਨਾਮ ‘‘ਅਯਂ ਬ੍ਯਾਧਿ ਇਮਂ ਨਿਸ੍ਸਾਯ ਸਮੁਟ੍ਠਿਤੋ’’ਤਿ ਞਤ੍ਵਾ ਅਨੁਚ੍ਛਵਿਕਂ ਭੇਸਜ੍ਜਂ ਕਰੋਨ੍ਤੀਤਿ. ਰਾਜਾ ‘‘ਸਾਧੁ ਤਾਤਾ’’ਤਿ ਸਮੁਟ੍ਠਾਨਂ ਕਥੇਨ੍ਤੋ ‘‘ਏਕੇਨ ਮਾਣਵੇਨ ਆਗਨ੍ਤ੍ਵਾ ਤੀਸੁ ਨਗਰੇਸੁ ਰਜ੍ਜਂ ਗਹੇਤ੍ਵਾ ਦਸ੍ਸਾਮੀ’’ਤਿਆਦਿਂ ਕਤ੍ਵਾ ਸਬ੍ਬਂ ਕਥੇਤ੍ਵਾ ‘‘ਇਤਿ ਮੇ ਤਾਤ, ਤਣ੍ਹਂ ਨਿਸ੍ਸਾਯ ਬ੍ਯਾਧਿ ਉਪ੍ਪਨ੍ਨੋ, ਸਚੇ ਤਿਕਿਚ੍ਛਿਤੁਂ ਸਕ੍ਕੋਸਿ, ਤਿਕਿਚ੍ਛਾਹੀ’’ਤਿ ਆਹ. ਕਿਂ ਪਨ ਮਹਾਰਾਜ, ਸੋਚਨਾਯ ਤਾਨਿ ਨਗਰਾਨਿ ਸਕ੍ਕਾ ਲਦ੍ਧੁਨ੍ਤਿ? ‘‘ਨ ਸਕ੍ਕਾ ਤਾਤਾ’’ਤਿ. ‘‘ਏਵਂ ਸਨ੍ਤੇ ਕਸ੍ਮਾ ਸੋਚਸਿ, ਮਹਾਰਾਜ, ਸਬ੍ਬਮੇਵ ਹਿ ਸਵਿਞ੍ਞਾਣਕਾਵਿਞ੍ਞਾਣਕਵਤ੍ਥੁਂ ਅਤ੍ਤਨੋ ਕਾਯਂ ਆਦਿਂ ਕਤ੍ਵਾ ਪਹਾਯ ਗਮਨੀਯਂ, ਚਤੂਸੁ ਨਗਰੇਸੁ ਰਜ੍ਜਂ ਗਹੇਤ੍ਵਾਪਿ ਤ੍ਵਂ ਏਕਪ੍ਪਹਾਰੇਨੇਵ ਨ ਚਤਸ੍ਸੋ ਭਤ੍ਤਪਾਤਿਯੋ ਭੁਞ੍ਜਿਸ੍ਸਸਿ, ਨ ਚਤੂਸੁ ਸਯਨੇਸੁ ਸਯਿਸ੍ਸਸਿ, ਨ ਚਤ੍ਤਾਰਿ ਵਤ੍ਥਯੁਗਾਨਿ ਅਚ੍ਛਾਦੇਸ੍ਸਸਿ, ਤਣ੍ਹਾਵਸਿਕੇਨ ਨਾਮ ਭਵਿਤੁਂ ਨ ਵਟ੍ਟਤਿ, ਅਯਞ੍ਹਿ ਤਣ੍ਹਾ ਨਾਮ ਵਡ੍ਢਮਾਨਾ ਚਤੂਹਿ ਅਪਾਯੇਹਿ ਮੁਚ੍ਚਿਤੁਂ ਨ ਦੇਤੀਤਿ.

ਇਤਿ ਨਂ ਮਹਾਸਤ੍ਤੋ ਓਵਦਿਤ੍ਵਾ ਅਥਸ੍ਸ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੩੭. ‘‘ਕਾਮਂ ਕਾਮਯਮਾਨਸ੍ਸ, ਤਸ੍ਸ ਚੇ ਤਂ ਸਮਿਜ੍ਝਤਿ;

ਅਦ੍ਧਾ ਪੀਤਿਮਨੋ ਹੋਤਿ, ਲਦ੍ਧਾ ਮਚ੍ਚੋ ਯਦਿਚ੍ਛਤਿ.

੩੮. ‘‘ਕਾਮਂ ਕਾਮਯਮਾਨਸ੍ਸ, ਤਸ੍ਸ ਚੇ ਤਂ ਸਮਿਜ੍ਝਤਿ;

ਤਤੋ ਨਂ ਅਪਰਂ ਕਾਮੇ, ਘਮ੍ਮੇ ਤਣ੍ਹਂਵ ਵਿਨ੍ਦਤਿ.

੩੯. ‘‘ਗਵਂਵ ਸਿਙ੍ਗਿਨੋ ਸਿਙ੍ਗਂ, ਵਡ੍ਢਮਾਨਸ੍ਸ ਵਡ੍ਢਤਿ;

ਏਵਂ ਮਨ੍ਦਸ੍ਸ ਪੋਸਸ੍ਸ, ਬਾਲਸ੍ਸ ਅਵਿਜਾਨਤੋ;

ਭਿਯ੍ਯੋ ਤਣ੍ਹਾ ਪਿਪਾਸਾ ਚ, ਵਡ੍ਢਮਾਨਸ੍ਸ ਵਡ੍ਢਤਿ.

੪੦. ‘‘ਪਥਬ੍ਯਾ ਸਾਲਿਯਵਕਂ, ਗਵਾਸ੍ਸਂ ਦਾਸਪੋਰਿਸਂ;

ਦਤ੍ਵਾ ਚ ਨਾਲਮੇਕਸ੍ਸ, ਇਤਿ ਵਿਦ੍ਵਾ ਸਮਂ ਚਰੇ.

੪੧. ‘‘ਰਾਜਾ ਪਸਯ੍ਹ ਪਥਵਿਂ ਵਿਜਿਤ੍ਵਾ, ਸਸਾਗਰਨ੍ਤਂ ਮਹਿਮਾਵਸਨ੍ਤੋ;

ਓਰਂ ਸਮੁਦ੍ਦਸ੍ਸ ਅਤਿਤ੍ਤਰੂਪੋ, ਪਾਰਂ ਸਮੁਦ੍ਦਸ੍ਸਪਿ ਪਤ੍ਥਯੇਥ.

੪੨. ‘‘ਯਾਵ ਅਨੁਸ੍ਸਰਂ ਕਾਮੇ, ਮਨਸਾ ਤਿਤ੍ਤਿ ਨਾਜ੍ਝਗਾ;

ਤਤੋ ਨਿਵਤ੍ਤਾ ਪਟਿਕ੍ਕਮ੍ਮ ਦਿਸ੍ਵਾ, ਤੇ ਵੇ ਸੁਤਿਤ੍ਤਾ ਯੇ ਪਞ੍ਞਾਯ ਤਿਤ੍ਤਾ.

੪੩. ‘‘ਪਞ੍ਞਾਯ ਤਿਤ੍ਤਿਨਂ ਸੇਟ੍ਠਂ, ਨ ਸੋ ਕਾਮੇਹਿ ਤਪ੍ਪਤਿ;

ਪਞ੍ਞਾਯ ਤਿਤ੍ਤਂ ਪੁਰਿਸਂ, ਤਣ੍ਹਾ ਨ ਕੁਰੁਤੇ ਵਸਂ.

੪੪. ‘‘ਅਪਚਿਨੇਥੇਵ ਕਾਮਾਨਂ, ਅਪ੍ਪਿਚ੍ਛਸ੍ਸ ਅਲੋਲੁਪੋ;

ਸਮੁਦ੍ਦਮਤ੍ਤੋ ਪੁਰਿਸੋ, ਨ ਸੋ ਕਾਮੇਹਿ ਤਪ੍ਪਤਿ.

੪੫. ‘‘ਰਥਕਾਰੋਵ ਚਮ੍ਮਸ੍ਸ, ਪਰਿਕਨ੍ਤਂ ਉਪਾਹਨਂ;

ਯਂ ਯਂ ਚਜਤਿ ਕਾਮਾਨਂ, ਤਂ ਤਂ ਸਮ੍ਪਜ੍ਜਤੇ ਸੁਖਂ;

ਸਬ੍ਬਞ੍ਚੇ ਸੁਖਮਿਚ੍ਛੇਯ੍ਯ, ਸਬ੍ਬੇ ਕਾਮੇ ਪਰਿਚ੍ਚਜੇ’’ਤਿ.

ਤਤ੍ਥ ਕਾਮਨ੍ਤਿ ਵਤ੍ਥੁਕਾਮਮ੍ਪਿ ਕਿਲੇਸਕਾਮਮ੍ਪਿ. ਕਾਮਯਮਾਨਸ੍ਸਾਤਿ ਪਤ੍ਥਯਮਾਨਸ੍ਸ. ਤਸ੍ਸ ਚੇ ਤਂ ਸਮਿਜ੍ਝਤੀਤਿ ਤਸ੍ਸ ਪੁਗ੍ਗਲਸ੍ਸ ਤਂ ਕਾਮਿਤਵਤ੍ਥੁ ਸਮਿਜ੍ਝਤਿ ਚੇ, ਨਿਪ੍ਫਜ੍ਜਤਿ ਚੇਤਿ ਅਤ੍ਥੋ. ਤਤੋ ਨਂ ਅਪਰਂ ਕਾਮੇਤਿ ਏਤ੍ਥ ਨਨ੍ਤਿ ਨਿਪਾਤਮਤ੍ਤਂ. ਅਪਰਨ੍ਤਿ ਪਰਭਾਗਦੀਪਨਂ. ਕਾਮੇਤਿ ਉਪਯੋਗਬਹੁਵਚਨਂ. ਇਦਂ ਵੁਤ੍ਤਂ ਹੋਤਿ – ਸਚੇ ਕਾਮਂ ਕਾਮਯਮਾਨਸ੍ਸ ਤਂ ਕਾਮਿਤਵਤ੍ਥੁ ਸਮਿਜ੍ਝਤਿ, ਤਸ੍ਮਿਂ ਸਮਿਦ੍ਧੇ ਤਤੋ ਪਰਂ ਸੋ ਪੁਗ੍ਗਲੋ ਕਾਮਯਮਾਨੋ ਯਥਾ ਨਾਮ ਘਮ੍ਮੇ ਗਿਮ੍ਹਕਾਲੇ ਵਾਤਾਤਪੇਨ ਕਿਲਨ੍ਤੋ ਤਣ੍ਹਂ ਵਿਨ੍ਦਤਿ, ਪਾਨੀਯਪਿਪਾਸਂ ਪਟਿਲਭਤਿ, ਏਵਂ ਭਿਯ੍ਯੋ ਕਾਮਤਣ੍ਹਾਸਙ੍ਖਾਤੇ ਕਾਮੇ ਵਿਨ੍ਦਤਿ ਪਟਿਲਭਤਿ, ਰੂਪਤਣ੍ਹਾਦਿਕਾ ਤਣ੍ਹਾ ਚਸ੍ਸ ਵਡ੍ਢਤਿਯੇਵਾਤਿ. ਗਵਂਵਾਤਿ ਗੋਰੂਪਸ੍ਸ ਵਿਯ. ਸਿਙ੍ਗਿਨੋਤਿ ਮਤ੍ਥਕਂ ਪਦਾਲੇਤ੍ਵਾ ਉਟ੍ਠਿਤਸਿਙ੍ਗਸ੍ਸ. ਮਨ੍ਦਸ੍ਸਾਤਿ ਮਨ੍ਦਪਞ੍ਞਸ੍ਸ. ਬਾਲਸ੍ਸਾਤਿ ਬਾਲਧਮ੍ਮੇ ਯੁਤ੍ਤਸ੍ਸ. ਇਦਂ ਵੁਤ੍ਤਂ ਹੋਤਿ – ਯਥਾ ਵਚ੍ਛਕਸ੍ਸ ਵਡ੍ਢਨ੍ਤਸ੍ਸ ਸਰੀਰੇਨੇਵ ਸਦ੍ਧਿਂ ਸਿਙ੍ਗਂ ਵਡ੍ਢਤਿ, ਏਵਂ ਅਨ੍ਧਬਾਲਸ੍ਸਪਿ ਅਪ੍ਪਤ੍ਤਕਾਮਤਣ੍ਹਾ ਚ ਪਤ੍ਤਕਾਮਪਿਪਾਸਾ ਚ ਅਪਰਾਪਰਂ ਵਡ੍ਢਤੀਤਿ.

ਸਾਲਿਯਵਕਨ੍ਤਿ ਸਾਲਿਖੇਤ੍ਤਯਵਖੇਤ੍ਤਂ. ਏਤੇਨ ਸਾਲਿਯਵਾਦਿਕਂ ਸਬ੍ਬਂ ਧਞ੍ਞਂ ਦਸ੍ਸੇਤਿ, ਦੁਤਿਯਪਦੇਨ ਸਬ੍ਬਂ ਦ੍ਵਿਪਦਚਤੁਪ੍ਪਦਂ ਦਸ੍ਸੇਤਿ. ਪਠਮਪਦੇਨ ਵਾ ਸਬ੍ਬਂ ਅਵਿਞ੍ਞਾਣਕਂ, ਇਤਰੇਨ ਸਵਿਞ੍ਞਾਣਕਂ. ਦਤ੍ਵਾ ਚਾਤਿ ਦਤ੍ਵਾਪਿ. ਇਦਂ ਵੁਤ੍ਤਂ ਹੋਤਿ – ਤਿਟ੍ਠਨ੍ਤੁ ਤੀਣਿ ਰਜ੍ਜਾਨਿ, ਸਚੇ ਸੋ ਮਾਣਵੋ ਅਞ੍ਞਂ ਵਾ ਸਕਲਮ੍ਪਿ ਪਥਵਿਂ ਸਵਿਞ੍ਞਾਣਕਾਵਿਞ੍ਞਾਣਕਰਤਨਪੂਰਂ ਕਸ੍ਸਚਿ ਦਤ੍ਵਾ ਗਚ੍ਛੇਯ੍ਯ, ਇਦਮ੍ਪਿ ਏਤ੍ਤਕਂ ਵਤ੍ਥੁ ਏਕਸ੍ਸੇਵ ਅਪਰਿਯਨ੍ਤਂ, ਏਵਂ ਦੁਪ੍ਪੂਰਾ ਏਸਾ ਤਣ੍ਹਾ ਨਾਮ. ਇਤਿ ਵਿਦ੍ਵਾ ਸਮਂ ਚਰੇਤਿ ਏਵਂ ਜਾਨਨ੍ਤੋ ਪੁਰਿਸੋ ਤਣ੍ਹਾਵਸਿਕੋ ਅਹੁਤ੍ਵਾ ਕਾਯਸਮਾਚਾਰਾਦੀਨਿ ਪੂਰੇਨ੍ਤੋ ਚਰੇਯ੍ਯ.

ਓਰਨ੍ਤਿ ਓਰਿਮਕੋਟ੍ਠਾਸਂ ਪਤ੍ਵਾ ਤੇਨ ਅਤਿਤ੍ਤਰੂਪੋ ਪੁਨ ਸਮੁਦ੍ਦਪਾਰਮ੍ਪਿ ਪਤ੍ਥਯੇਥ. ਏਵਂ ਤਣ੍ਹਾਵਸਿਕਸਤ੍ਤਾ ਨਾਮ ਦੁਪ੍ਪੂਰਾਤਿ ਦਸ੍ਸੇਤਿ. ਯਾਵਾਤਿ ਅਨਿਯਾਮਿਤਪਰਿਚ੍ਛੇਦੋ. ਅਨੁਸ੍ਸਰਨ੍ਤਿ ਅਨੁਸ੍ਸਰਨ੍ਤੋ. ਨਾਜ੍ਝਗਾਤਿ ਨ ਵਿਨ੍ਦਤਿ. ਇਦਂ ਵੁਤ੍ਤਂ ਹੋਤਿ – ਮਹਾਰਾਜ, ਪੁਰਿਸੋ ਅਪਰਿਯਨ੍ਤੇਪਿ ਕਾਮੇ ਮਨਸਾ ਅਨੁਸ੍ਸਰਨ੍ਤੋ ਤਿਤ੍ਤਿਂ ਨ ਵਿਨ੍ਦਤਿ, ਪਤ੍ਤੁਕਾਮੋਵ ਹੋਤਿ, ਏਵਂ ਕਾਮੇਸੁ ਸਤ੍ਤਾਨਂ ਤਣ੍ਹਾ ਵਡ੍ਢਤੇਵ. ਤਤੋ ਨਿਵਤ੍ਤਾਤਿ ਤਤੋ ਪਨ ਵਤ੍ਥੁਕਾਮਕਿਲੇਸਕਾਮਤੋ ਚਿਤ੍ਤੇਨ ਨਿਵਤ੍ਤਿਤ੍ਵਾ ਕਾਯੇਨ ਪਟਿਕ੍ਕਮ੍ਮ ਞਾਣੇਨ ਆਦੀਨਵਂ ਦਿਸ੍ਵਾ ਯੇ ਪਞ੍ਞਾਯ ਤਿਤ੍ਤਾ ਪਰਿਪੁਣ੍ਣਾ, ਤੇ ਤਿਤ੍ਤਾ ਨਾਮ.

ਪਞ੍ਞਾਯ ਤਿਤ੍ਤਿਨਂ ਸੇਟ੍ਠਨ੍ਤਿ ਪਞ੍ਞਾਯ ਤਿਤ੍ਤੀਨਂ ਅਯਂ ਪਰਿਪੁਣ੍ਣਸੇਟ੍ਠੋ, ਅਯਮੇਵ ਵਾ ਪਾਠੋ. ਨ ਸੋ ਕਾਮੇਹਿ ਤਪ੍ਪਤੀਤਿ ‘‘ਨ ਹੀ’’ਤਿਪਿ ਪਾਠੋ. ਯਸ੍ਮਾ ਪਞ੍ਞਾਯ ਤਿਤ੍ਤੋ ਪੁਰਿਸੋ ਕਾਮੇਹਿ ਨ ਪਰਿਡਯ੍ਹਤੀਤਿ ਅਤ੍ਥੋ. ਨ ਕੁਰੁਤੇ ਵਸਨ੍ਤਿ ਤਾਦਿਸਞ੍ਹਿ ਪੁਰਿਸਂ ਤਣ੍ਹਾ ਵਸੇ ਵਤ੍ਤੇਤੁਂ ਨ ਸਕ੍ਕੋਤਿ, ਸ੍ਵੇਵ ਪਨ ਤਣ੍ਹਾਯ ਆਦੀਨਵਂ ਦਿਸ੍ਵਾ ਸਰਭਙ੍ਗਮਾਣਵੋ ਵਿਯ ਚ ਅਡ੍ਢਮਾਸਕਰਾਜਾ ਵਿਯ ਚ ਤਣ੍ਹਾਵਸੇ ਨ ਪਵਤ੍ਤਤੀਤਿ ਅਤ੍ਥੋ. ਅਪਚਿਨੇਥੇਵਾਤਿ ਵਿਦ੍ਧਂਸੇਥੇਵ. ਸਮੁਦ੍ਦਮਤ੍ਤੋਤਿ ਮਹਤਿਯਾ ਪਞ੍ਞਾਯ ਸਮਨ੍ਨਾਗਤਤ੍ਤਾ ਸਮੁਦ੍ਦਪ੍ਪਮਾਣੋ. ਸੋ ਮਹਨ੍ਤੇਨ ਅਗ੍ਗਿਨਾਪਿ ਸਮੁਦ੍ਦੋ ਵਿਯ ਕਿਲੇਸਕਾਮੇਹਿ ਨ ਤਪ੍ਪਤਿ ਨ ਡਯ੍ਹਤਿ.

ਰਥਕਾਰੋਤਿ ਚਮ੍ਮਕਾਰੋ. ਪਰਿਕਨ੍ਤਨ੍ਤਿ ਪਰਿਕਨ੍ਤਨ੍ਤੋ. ਇਦਂ ਵੁਤ੍ਤਂ ਹੋਤਿ – ਯਥਾ ਚਮ੍ਮਕਾਰੋ ਉਪਾਹਨਂ ਪਰਿਕਨ੍ਤਨ੍ਤੋ ਯਂ ਯਂ ਚਮ੍ਮਸ੍ਸ ਅਗਯ੍ਹੂਪਗਟ੍ਠਾਨਂ ਹੋਤਿ, ਤਂ ਤਂ ਚਜਿਤ੍ਵਾ ਉਪਾਹਨਂ ਕਤ੍ਵਾ ਉਪਾਹਨਮੂਲਂ ਲਭਿਤ੍ਵਾ ਸੁਖਿਤੋ ਹੋਤਿ, ਏਵਮੇਵ ਪਣ੍ਡਿਤੋ ਚਮ੍ਮਕਾਰਸਤ੍ਥਸਦਿਸਾਯ ਪਞ੍ਞਾਯ ਕਨ੍ਤਨ੍ਤੋ ਯਂ ਯਂ ਓਧਿਂ ਕਾਮਾਨਂ ਚਜਤਿ, ਤੇਨ ਤੇਨਸ੍ਸ ਕਾਮੋਧਿਨਾ ਰਹਿਤਂ ਤਂ ਤਂ ਕਾਯਕਮ੍ਮਂ ਵਚੀਕਮ੍ਮਂ ਮਨੋਕਮ੍ਮਞ੍ਚ ਸੁਖਂ ਸਮ੍ਪਜ੍ਜਤਿ ਵਿਗਤਦਰਥਂ, ਸਚੇ ਪਨ ਸਬ੍ਬਮ੍ਪਿ ਕਾਯਕਮ੍ਮਾਦਿਸੁਖਂ ਵਿਗਤਪਰਿਲ਼ਾਹਮੇਵ ਇਚ੍ਛੇਯ੍ਯ, ਕਸਿਣਂ ਭਾਵੇਤ੍ਵਾ ਝਾਨਂ ਨਿਬ੍ਬਤ੍ਤੇਤ੍ਵਾ ਸਬ੍ਬੇ ਕਾਮੇ ਪਰਿਚ੍ਚਜੇਤਿ.

ਬੋਧਿਸਤ੍ਤਸ੍ਸ ਪਨ ਇਮਂ ਗਾਥਂ ਕਥੇਨ੍ਤਸ੍ਸ ਰਞ੍ਞੋ ਸੇਤਚ੍ਛਤ੍ਤਂ ਆਰਮ੍ਮਣਂ ਕਤ੍ਵਾ ਓਦਾਤਕਸਿਣਜ੍ਝਾਨਂ ਉਦਪਾਦਿ, ਰਾਜਾਪਿ ਅਰੋਗੋ ਅਹੋਸਿ. ਸੋ ਤੁਟ੍ਠੋ ਸਯਨਾ ਵੁਟ੍ਠਹਿਤ੍ਵਾ ‘‘ਏਤ੍ਤਕਾ ਵੇਜ੍ਜਾ ਮਂ ਤਿਕਿਚ੍ਛਿਤੁਂ ਨਾਸਕ੍ਖਿਂਸੁ, ਪਣ੍ਡਿਤਮਾਣਵੋ ਪਨ ਅਤ੍ਤਨੋ ਞਾਣੋਸਧੇਨ ਮਂ ਨਿਰੋਗਂ ਅਕਾਸੀ’’ਤਿ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਦਸਮਂ ਗਾਥਮਾਹ –

੪੬. ‘‘ਅਟ੍ਠ ਤੇ ਭਾਸਿਤਾ ਗਾਥਾ, ਸਬ੍ਬਾ ਹੋਨ੍ਤਿ ਸਹਸ੍ਸਿਯਾ;