੧੩. ਤੇਰਸਕਨਿਪਾਤੋ

[੪੭੪] ੧. ਅਮ੍ਬਜਾਤਕਵਣ੍ਣਨਾ

ਅਹਾਸਿ ਮੇ ਅਮ੍ਬਫਲਾਨਿ ਪੁਬ੍ਬੇਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਦੇਵਦਤ੍ਤੋ ਹਿ ‘‘ਅਹਂ ਬੁਦ੍ਧੋ ਭਵਿਸ੍ਸਾਮਿ, ਮਯ੍ਹਂ ਸਮਣੋ ਗੋਤਮੋ ਨੇਵ ਆਚਰਿਯੋ ਨ ਉਪਜ੍ਝਾਯੋ’’ਤਿ ਆਚਰਿਯਂ ਪਚ੍ਚਕ੍ਖਾਯ ਝਾਨਪਰਿਹੀਨੋ ਸਙ੍ਘਂ ਭਿਨ੍ਦਿਤ੍ਵਾ ਅਨੁਪੁਬ੍ਬੇਨ ਸਾਵਤ੍ਥਿਂ ਆਗਚ੍ਛਨ੍ਤੋ ਬਹਿਜੇਤਵਨੇ ਪਥਵਿਯਾ ਵਿਵਰੇ ਦਿਨ੍ਨੇ ਅਵੀਚਿਂ ਪਾਵਿਸਿ. ਤਦਾ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਦੇਵਦਤ੍ਤੋ ਆਚਰਿਯਂ ਪਚ੍ਚਕ੍ਖਾਯ ਮਹਾਵਿਨਾਸਂ ਪਤ੍ਤੋ, ਅਵੀਚਿਮਹਾਨਿਰਯੇ ਨਿਬ੍ਬਤ੍ਤੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਆਚਰਿਯਂ ਪਚ੍ਚਕ੍ਖਾਯ ਮਹਾਵਿਨਾਸਂ ਪਤ੍ਤੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਤਸ੍ਸ ਪੁਰੋਹਿਤਕੁਲਂ ਅਹਿਵਾਤਰੋਗੇਨ ਵਿਨਸ੍ਸਿ. ਏਕੋਵ ਪੁਤ੍ਤੋ ਭਿਤ੍ਤਿਂ ਭਿਨ੍ਦਿਤ੍ਵਾ ਪਲਾਤੋ. ਸੋ ਤਕ੍ਕਸਿਲਂ ਗਨ੍ਤ੍ਵਾ ਦਿਸਾਪਾਮੋਕ੍ਖਸ੍ਸਾਚਰਿਯਸ੍ਸ ਸਨ੍ਤਿਕੇ ਤਯੋ ਵੇਦੇ ਚ ਅਵਸੇਸਸਿਪ੍ਪਾਨਿ ਚ ਉਗ੍ਗਹੇਤ੍ਵਾ ਆਚਰਿਯਂ ਵਨ੍ਦਿਤ੍ਵਾ ਨਿਕ੍ਖਨ੍ਤੋ ‘‘ਦੇਸਚਾਰਿਤ੍ਤਂ ਜਾਨਿਸ੍ਸਾਮੀ’’ਤਿ ਚਰਨ੍ਤੋ ਏਕਂ ਪਚ੍ਚਨ੍ਤਨਗਰਂ ਪਾਪੁਣਿ. ਤਂ ਨਿਸ੍ਸਾਯ ਮਹਾਚਣ੍ਡਾਲਗਾਮਕੋ ਅਹੋਸਿ. ਤਦਾ ਬੋਧਿਸਤ੍ਤੋ ਤਸ੍ਮਿਂ ਗਾਮੇ ਪਟਿਵਸਤਿ, ਪਣ੍ਡਿਤੋ ਬ੍ਯਤ੍ਤੋ ਅਕਾਲੇ ਫਲਂ ਗਣ੍ਹਾਪਨਮਨ੍ਤਂ ਜਾਨਾਤਿ. ਸੋ ਪਾਤੋਵ ਵੁਟ੍ਠਾਯ ਕਾਜਂ ਆਦਾਯ ਤਤੋ ਗਾਮਾ ਨਿਕ੍ਖਿਮਿਤ੍ਵਾ ਅਰਞ੍ਞੇ ਏਕਂ ਅਮ੍ਬਰੁਕ੍ਖਂ ਉਪਸਙ੍ਕਮਿਤ੍ਵਾ ਸਤ੍ਤਪਦਮਤ੍ਥਕੇ ਠਿਤੋ ਤਂ ਮਨ੍ਤਂ ਪਰਿਵਤ੍ਤੇਤ੍ਵਾ ਅਮ੍ਬਰੁਕ੍ਖਂ ਏਕੇਨ ਉਦਕਪਸਤੇਨ ਪਹਰਤਿ. ਰੁਕ੍ਖਤੋ ਤਙ੍ਖਣਞ੍ਞੇਵ ਪੁਰਾਣਪਣ੍ਣਾਨਿ ਪਤਨ੍ਤਿ, ਨਵਾਨਿ ਉਟ੍ਠਹਨ੍ਤਿ, ਪੁਪ੍ਫਾਨਿ ਪੁਪ੍ਫਿਤ੍ਵਾ ਪਤਨ੍ਤਿ, ਅਮ੍ਬਫਲਾਨਿ ਉਟ੍ਠਾਯ ਮੁਹੁਤ੍ਤੇਨੇਵ ਪਚ੍ਚਿਤ੍ਵਾ ਮਧੁਰਾਨਿ ਓਜਵਨ੍ਤਾਨਿ ਦਿਬ੍ਬਰਸਸਦਿਸਾਨਿ ਹੁਤ੍ਵਾ ਰੁਕ੍ਖਤੋ ਪਤਨ੍ਤਿ. ਮਹਾਸਤ੍ਤੋ ਤਾਨਿ ਉਚ੍ਚਿਨਿਤ੍ਵਾ ਯਾਵਦਤ੍ਥਂ ਖਾਦਿਤ੍ਵਾ ਕਾਜਂ ਪੂਰਾਪੇਤ੍ਵਾ ਗੇਹਂ ਗਨ੍ਤ੍ਵਾ ਤਾਨਿ ਵਿਕ੍ਕਿਣਿਤ੍ਵਾ ਪੁਤ੍ਤਦਾਰਂ ਪੋਸੇਸਿ.

ਸੋ ਬ੍ਰਾਹ੍ਮਣਕੁਮਾਰੋ ਮਹਾਸਤ੍ਤਂ ਅਕਾਲੇ ਅਮ੍ਬਪਕ੍ਕਾਨਿ ਆਹਰਿਤ੍ਵਾ ਵਿਕ੍ਕਿਣਨ੍ਤਂ ਦਿਸ੍ਵਾ ‘‘ਨਿਸ੍ਸਂਸਯੇਨ ਤੇਹਿ ਮਨ੍ਤਬਲੇਨ ਉਪ੍ਪਨ੍ਨੇਹਿ ਭਵਿਤਬ੍ਬਂ, ਇਮਂ ਪੁਰਿਸਂ ਨਿਸ੍ਸਾਯ ਇਦਂ ਅਨਗ੍ਘਮਨ੍ਤਂ ਲਭਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਮਹਾਸਤ੍ਤਸ੍ਸ ਅਮ੍ਬਾਨਿ ਆਹਰਣਨਿਯਾਮਂ ਪਰਿਗ੍ਗਣ੍ਹਨ੍ਤੋ ਤਥਤੋ ਞਤ੍ਵਾ ਤਸ੍ਮਿਂ ਅਰਞ੍ਞਤੋ ਅਨਾਗਤੇਯੇਵ ਤਸ੍ਸ ਗੇਹਂ ਗਨ੍ਤ੍ਵਾ ਅਜਾਨਨ੍ਤੋ ਵਿਯ ਹੁਤ੍ਵਾ ਤਸ੍ਸ ਭਰਿਯਂ ‘‘ਕੁਹਿਂ ਅਯ੍ਯੋ, ਆਚਰਿਯੋ’’ਤਿ ਪੁਚ੍ਛਿਤ੍ਵਾ ‘‘ਅਰਞ੍ਞਂ ਗਤੋ’’ਤਿ ਵੁਤ੍ਤੇ ਤਂ ਆਗਤਂ ਆਗਮਯਮਾਨੋਵ ਠਤ੍ਵਾ ਆਗਚ੍ਛਨ੍ਤਂ ਦਿਸ੍ਵਾ ਹਤ੍ਥਤੋ ਪਚ੍ਛਿਂ ਗਹੇਤ੍ਵਾ ਆਹਰਿਤ੍ਵਾ ਗੇਹੇ ਠਪੇਸਿ. ਮਹਾਸਤ੍ਤੋ ਤਂ ਓਲੋਕੇਤ੍ਵਾ ਭਰਿਯਂ ਆਹ – ‘‘ਭਦ੍ਦੇ, ਅਯਂ ਮਾਣਵੋ ਮਨ੍ਤਤ੍ਥਾਯ ਆਗਤੋ, ਤਸ੍ਸ ਹਤ੍ਥੇ ਮਨ੍ਤੋ ਨਸ੍ਸਤਿ, ਅਸਪ੍ਪੁਰਿਸੋ ਏਸੋ’’ਤਿ. ਮਾਣਵੋਪਿ ‘‘ਅਹਂ ਇਮਂ ਮਨ੍ਤਂ ਆਚਰਿਯਸ੍ਸ ਉਪਕਾਰਕੋ ਹੁਤ੍ਵਾ ਲਭਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਤੋ ਪਟ੍ਠਾਯ ਤਸ੍ਸ ਗੇਹੇ ਸਬ੍ਬਕਿਚ੍ਚਾਨਿ ਕਰੋਤਿ. ਦਾਰੂਨਿ ਆਹਰਤਿ, ਵੀਹਿਂ ਕੋਟ੍ਟੇਤਿ, ਭਤ੍ਤਂ ਪਚਤਿ, ਦਨ੍ਤਕਟ੍ਠਮੁਖਧੋਵਨਾਦੀਨਿ ਦੇਤਿ, ਪਾਦਂ ਧੋਵਤਿ.

ਏਕਦਿਵਸਂ ਮਹਾਸਤ੍ਤੇਨ ‘‘ਤਾਤ ਮਾਣਵ, ਮਞ੍ਚਪਾਦਾਨਂ ਮੇ ਉਪਧਾਨਂ ਦੇਹੀ’’ਤਿ ਵੁਤ੍ਤੇ ਅਞ੍ਞਂ ਅਪਸ੍ਸਿਤ੍ਵਾ ਸਬ੍ਬਰਤ੍ਤਿਂ ਊਰੁਮ੍ਹਿ ਠਪੇਤ੍ਵਾ ਨਿਸੀਦਿ. ਅਪਰਭਾਗੇ ਮਹਾਸਤ੍ਤਸ੍ਸ ਭਰਿਯਾ ਪੁਤ੍ਤਂ ਵਿਜਾਯਿ. ਤਸ੍ਸਾ ਪਸੂਤਿਕਾਲੇ ਪਰਿਕਮ੍ਮਂ ਸਬ੍ਬਮਕਾਸਿ. ਸਾ ਏਕਦਿਵਸਂ ਮਹਾਸਤ੍ਤਂ ਆਹ ‘‘ਸਾਮਿ, ਅਯਂ ਮਾਣਵੋ ਜਾਤਿਸਮ੍ਪਨ੍ਨੋ ਹੁਤ੍ਵਾ ਮਨ੍ਤਤ੍ਥਾਯ ਅਮ੍ਹਾਕਂ ਵੇਯ੍ਯਾਵਚ੍ਚਂ ਕਰੋਤਿ, ਏਤਸ੍ਸ ਹਤ੍ਥੇ ਮਨ੍ਤੋ ਤਿਟ੍ਠਤੁ ਵਾ ਮਾ ਵਾ, ਦੇਥ ਤਸ੍ਸ ਮਨ੍ਤ’’ਨ੍ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਸ੍ਸ ਮਨ੍ਤਂ ਦਤ੍ਵਾ ਏਵਮਾਹ – ‘‘ਤਾਤ, ਅਨਗ੍ਘੋਯਂ ਮਨ੍ਤੋ, ਤਵ ਇਮਂ ਨਿਸ੍ਸਾਯ ਮਹਾਲਾਭਸਕ੍ਕਾਰੋ ਭਵਿਸ੍ਸਤਿ, ਰਞ੍ਞਾ ਵਾ ਰਾਜਮਹਾਮਤ੍ਤੇਨ ਵਾ ‘ਕੋ ਤੇ ਆਚਰਿਯੋ’ਤਿ ਪੁਟ੍ਠਕਾਲੇ ਮਾ ਮਂ ਨਿਗੂਹਿਤ੍ਥੋ, ਸਚੇ ਹਿ ‘ਚਣ੍ਡਾਲਸ੍ਸ ਮੇ ਸਨ੍ਤਿਕਾ ਮਨ੍ਤੋ ਗਹਿਤੋ’ਤਿ ਲਜ੍ਜਨ੍ਤੋ ‘ਬ੍ਰਾਹ੍ਮਣਮਹਾਸਾਲੋ ਮੇ ਆਚਰਿਯੋ’ਤਿ ਕਥੇਸ੍ਸਸਿ, ਇਮਸ੍ਸ ਮਨ੍ਤਸ੍ਸ ਫਲਂ ਨ ਲਭਿਸ੍ਸਸੀ’’ਤਿ. ਸੋ ‘‘ਕਿਂ ਕਾਰਣਾ ਤਂ ਨਿਗੂਹਿਸ੍ਸਾਮਿ, ਕੇਨਚਿ ਪੁਟ੍ਠਕਾਲੇ ਤੁਮ੍ਹੇਯੇਵ ਕਥੇਸ੍ਸਾਮੀ’’ਤਿ ਵਤ੍ਵਾ ਤਂ ਵਨ੍ਦਿਤ੍ਵਾ ਚਣ੍ਡਾਲਗਾਮਤੋ ਨਿਕ੍ਖਮਿਤ੍ਵਾ ਮਨ੍ਤਂ ਵੀਮਂਸਿਤ੍ਵਾ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਅਮ੍ਬਾਨਿ ਵਿਕ੍ਕਿਣਿਤ੍ਵਾ ਬਹੁਂ ਧਨਂ ਲਭਿ.

ਅਥੇਕਦਿਵਸਂ ਉਯ੍ਯਾਨਪਾਲੋ ਤਸ੍ਸ ਹਤ੍ਥਤੋ ਅਮ੍ਬਂ ਕਿਣਿਤ੍ਵਾ ਰਞ੍ਞੋ ਅਦਾਸਿ. ਰਾਜਾ ਤਂ ਪਰਿਭੁਞ੍ਜਿਤ੍ਵਾ ‘‘ਕੁਤੋ ਸਮ੍ਮ, ਤਯਾ ਏਵਰੂਪਂ ਅਮ੍ਬਂ ਲਦ੍ਧ’’ਨ੍ਤਿ ਪੁਚ੍ਛਿ. ਦੇਵ, ਏਕੋ ਮਾਣਵੋ ਅਕਾਲਅਮ੍ਬਫਲਾਨਿ ਆਨੇਤ੍ਵਾ ਵਿਕ੍ਕਿਣਾਤਿ, ਤਤੋ ਮੇ ਗਹਿਤਨ੍ਤਿ. ਤੇਨ ਹਿ ‘‘ਇਤੋ ਪਟ੍ਠਾਯ ਇਧੇਵ ਅਮ੍ਬਾਨਿ ਆਹਰਤੂ’’ਤਿ ਨਂ ਵਦੇਹੀਤਿ. ਸੋ ਤਥਾ ਅਕਾਸਿ. ਮਾਣਵੋਪਿ ਤਤੋ ਪਟ੍ਠਾਯ ਅਮ੍ਬਾਨਿ ਰਾਜਕੁਲਂ ਹਰਤਿ. ਅਥ ਰਞ੍ਞਾ ‘‘ਉਪਟ੍ਠਹ ਮ’’ਨ੍ਤਿ ਵੁਤ੍ਤੇ ਰਾਜਾਨਂ ਉਪਟ੍ਠਹਨ੍ਤੋ ਬਹੁਂ ਧਨਂ ਲਭਿਤ੍ਵਾ ਅਨੁਕ੍ਕਮੇਨ ਵਿਸ੍ਸਾਸਿਕੋ ਜਾਤੋ. ਅਥ ਨਂ ਏਕਦਿਵਸਂ ਰਾਜਾ ਪੁਚ੍ਛਿ ‘‘ਮਾਣਵ, ਕੁਤੋ ਅਕਾਲੇ ਏਵਂ ਵਣ੍ਣਗਨ੍ਧਰਸਸਮ੍ਪਨ੍ਨਾਨਿ ਅਮ੍ਬਾਨਿ ਲਭਸਿ, ਕਿਂ ਤੇ ਨਾਗੋ ਵਾ ਸੁਪਣ੍ਣੋ ਵਾ ਦੇਵੋ ਵਾ ਕੋਚਿ ਦੇਤਿ, ਉਦਾਹੁ ਮਨ੍ਤਬਲਂ ਏਤ’’ਨ੍ਤਿ? ‘‘ਨ ਮੇ ਮਹਾਰਾਜ, ਕੋਚਿ ਦੇਤਿ, ਅਨਗ੍ਘੋ ਪਨ ਮੇ ਮਨ੍ਤੋ ਅਤ੍ਥਿ, ਤਸ੍ਸੇਵ ਬਲ’’ਨ੍ਤਿ. ‘‘ਤੇਨ ਹਿ ਮਯਮ੍ਪਿ ਤੇ ਏਕਦਿਵਸਂ ਮਨ੍ਤਬਲਂ ਦਟ੍ਠੁਕਾਮਾ’’ਤਿ. ‘‘ਸਾਧੁ, ਦੇਵ, ਦਸ੍ਸੇਸ੍ਸਾਮੀ’’ਤਿ. ਰਾਜਾ ਪੁਨਦਿਵਸੇ ਤੇਨ ਸਦ੍ਧਿਂ ਉਯ੍ਯਾਨਂ ਗਨ੍ਤ੍ਵਾ ‘‘ਦਸ੍ਸੇਹੀ’’ਤਿ ਆਹ. ਸੋ ‘‘ਸਾਧੂ’’ਤਿ ਅਮ੍ਬਰੁਕ੍ਖਂ ਉਪਗਨ੍ਤ੍ਵਾ ਸਤ੍ਤਪਦਮਤ੍ਥਕੇ ਠਿਤੋ ਮਨ੍ਤਂ ਪਰਿਵਤ੍ਤੇਤ੍ਵਾ ਰੁਕ੍ਖਂ ਉਦਕੇਨ ਪਹਰਿ. ਤਙ੍ਖਣਞ੍ਞੇਵ ਅਮ੍ਬਰੁਕ੍ਖੋ ਹੇਟ੍ਠਾ ਵੁਤ੍ਤਨਿਯਾਮੇਨੇਵ ਫਲਂ ਗਹੇਤ੍ਵਾ ਮਹਾਮੇਘੋ ਵਿਯ ਅਮ੍ਬਵਸ੍ਸਂ ਵਸ੍ਸਿ. ਮਹਾਜਨੋ ਸਾਧੁਕਾਰਂ ਅਦਾਸਿ, ਚੇਲੁਕ੍ਖੇਪਾ ਪਵਤ੍ਤਿਂਸੁ.

ਰਾਜਾ ਅਮ੍ਬਫਲਾਨਿ ਖਾਦਿਤ੍ਵਾ ਤਸ੍ਸ ਬਹੁਂ ਧਨਂ ਦਤ੍ਵਾ ‘‘ਮਾਣਵਕ, ਏਵਰੂਪੋ ਤੇ ਅਚ੍ਛਰਿਯਮਨ੍ਤੋ ਕਸ੍ਸ ਸਨ੍ਤਿਕੇ ਗਹਿਤੋ’’ਤਿ ਪੁਚ੍ਛਿ. ਮਾਣਵੋ ‘‘ਸਚਾਹਂ ‘ਚਣ੍ਡਾਲਸ੍ਸ ਸਨ੍ਤਿਕੇ’ਤਿ ਵਕ੍ਖਾਮਿ, ਲਜ੍ਜਿਤਬ੍ਬਕਂ ਭਵਿਸ੍ਸਤਿ, ਮਞ੍ਚ ਗਰਹਿਸ੍ਸਨ੍ਤਿ, ਮਨ੍ਤੋ ਖੋ ਪਨ ਮੇ ਪਗੁਣੋ, ਇਦਾਨਿ ਨ ਨਸ੍ਸਿਸ੍ਸਤਿ, ਦਿਸਾਪਾਮੋਕ੍ਖਂ ਆਚਰਿਯਂ ਅਪਦਿਸਾਮੀ’’ਤਿ ਚਿਨ੍ਤੇਤ੍ਵਾ ਮੁਸਾਵਾਦਂ ਕਤ੍ਵਾ ‘‘ਤਕ੍ਕਸਿਲਾਯਂ ਦਿਸਾਪਾਮੋਕ੍ਖਾਚਰਿਯਸ੍ਸ ਸਨ੍ਤਿਕੇ ਗਹਿਤੋ ਮੇ’’ਤਿ ਵਦਨ੍ਤੋ ਆਚਰਿਯਂ ਪਚ੍ਚਕ੍ਖਾਸਿ. ਤਙ੍ਖਣਞ੍ਞੇਵ ਮਨ੍ਤੋ ਅਨ੍ਤਰਧਾਯਿ. ਰਾਜਾ ਸੋਮਨਸ੍ਸਜਾਤੋ ਤਂ ਆਦਾਯ ਨਗਰਂ ਪਵਿਸਿਤ੍ਵਾ ਪੁਨਦਿਵਸੇ ‘‘ਅਮ੍ਬਾਨਿ ਖਾਦਿਸ੍ਸਾਮੀ’’ਤਿ ਉਯ੍ਯਾਨਂ ਗਨ੍ਤ੍ਵਾ ਮਙ੍ਗਲਸਿਲਾਪਟ੍ਟੇ ਨਿਸੀਦਿਤ੍ਵਾ ਮਾਣਵ, ਅਮ੍ਬਾਨਿ ਆਹਰਾਤਿ ਆਹ. ਸੋ ‘‘ਸਾਧੂ’’ਤਿ ਅਮ੍ਬਂ ਉਪਗਨ੍ਤ੍ਵਾ ਸਤ੍ਤਪਦਮਤ੍ਥਕੇ ਠਿਤੋ ‘‘ਮਨ੍ਤਂ ਪਰਿਵਤ੍ਤੇਸ੍ਸਾਮੀ’’ਤਿ ਮਨ੍ਤੇ ਅਨੁਪਟ੍ਠਹਨ੍ਤੇ ਅਨ੍ਤਰਹਿਤਭਾਵਂ ਞਤ੍ਵਾ ਲਜ੍ਜਿਤੋ ਅਟ੍ਠਾਸਿ. ਰਾਜਾ ‘‘ਅਯਂ ਪੁਬ੍ਬੇ ਪਰਿਸਮਜ੍ਝੇਯੇਵ ਅਮ੍ਬਾਨਿ ਆਹਰਿਤ੍ਵਾ ਅਮ੍ਹਾਕਂ ਦੇਤਿ, ਘਨਮੇਘਵਸ੍ਸਂ ਵਿਯ ਅਮ੍ਬਵਸ੍ਸਂ ਵਸ੍ਸਾਪੇਤਿ, ਇਦਾਨਿ ਥਦ੍ਧੋ ਵਿਯ ਠਿਤੋ, ਕਿਂ ਨੁ ਖੋ ਕਾਰਣ’’ਨ੍ਤਿ ਚਿਨ੍ਤੇਤ੍ਵਾ ਤਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੧. ‘‘ਅਹਾਸਿ ਮੇ ਅਮ੍ਬਫਲਾਨਿ ਪੁਬ੍ਬੇ, ਅਣੂਨਿ ਥੂਲਾਨਿ ਚ ਬ੍ਰਹ੍ਮਚਾਰਿ;

ਤੇਹੇਵ ਮਨ੍ਤੇਹਿ ਨ ਦਾਨਿ ਤੁਯ੍ਹਂ, ਦੁਮਪ੍ਫਲਾ ਪਾਤੁਭਵਨ੍ਤਿ ਬ੍ਰਹ੍ਮੇ’’ਤਿ.

ਤਤ੍ਥ ਅਹਾਸੀਤਿ ਆਹਰਿ. ਦੁਮਪ੍ਫਲਾਤਿ ਰੁਕ੍ਖਫਲਾਨਿ.

ਤਂ ਸੁਤ੍ਵਾ ਮਾਣਵੋ ‘‘ਸਚੇ ‘ਅਜ੍ਜ ਅਮ੍ਬਫਲਂ ਨ ਗਣ੍ਹਾਮੀ’ਤਿ ਵਕ੍ਖਾਮਿ, ਰਾਜਾ ਮੇ ਕੁਜ੍ਝਿਸ੍ਸਤਿ, ਮੁਸਾਵਾਦੇਨ ਨਂ ਵਞ੍ਚੇਸ੍ਸਾਮੀ’’ਤਿ ਦੁਤਿਯਂ ਗਾਥਮਾਹ –

੨. ‘‘ਨਕ੍ਖਤ੍ਤਯੋਗਂ ਪਟਿਮਾਨਯਾਮਿ, ਖਣਂ ਮੁਹੁਤ੍ਤਞ੍ਚ ਮਨ੍ਤੇ ਨ ਪਸ੍ਸਂ;

ਨਕ੍ਖਤ੍ਤਯੋਗਞ੍ਚ ਖਣਞ੍ਚ ਲਦ੍ਧਾ, ਅਦ੍ਧਾ ਹਰਿਸ੍ਸਮ੍ਬਫਲਂ ਪਹੂਤ’’ਨ੍ਤਿ.

ਤਤ੍ਥ ਅਦ੍ਧਾਹਰਿਸ੍ਸਮ੍ਬਫਲਨ੍ਤਿ ਅਦ੍ਧਾ ਅਮ੍ਬਫਲਂ ਆਹਰਿਸ੍ਸਾਮਿ.

ਰਾਜਾ ‘‘ਅਯਂ ਅਞ੍ਞਦਾ ਨਕ੍ਖਤ੍ਤਯੋਗਂ ਨ ਵਦਤਿ, ਕਿਂ ਨੁ ਖੋ ਏਤ’’ਨ੍ਤਿ ਪੁਚ੍ਛਨ੍ਤੋ ਦ੍ਵੇ ਗਾਥਾ ਅਭਾਸਿ –

੩. ‘‘ਨਕ੍ਖਤ੍ਤਯੋਗਂ ਨ ਪੁਰੇ ਅਭਾਣਿ, ਖਣਂ ਮੁਹੁਤ੍ਤਂ ਨ ਪੁਰੇ ਅਸਂਸਿ;

ਸਯਂ ਹਰੀ ਅਮ੍ਬਫਲਂ ਪਹੂਤਂ, ਵਣ੍ਣੇਨ ਗਨ੍ਧੇਨ ਰਸੇਨੁਪੇਤਂ.

੪. ‘‘ਮਨ੍ਤਾਭਿਜਪ੍ਪੇਨ ਪੁਰੇ ਹਿ ਤੁਯ੍ਹਂ, ਦੁਮਪ੍ਫਲਾ ਪਾਤੁਭਵਨ੍ਤਿ ਬ੍ਰਹ੍ਮੇ;

ਸ੍ਵਾਜ੍ਜ ਨ ਪਾਰੇਸਿ ਜਪ੍ਪਮ੍ਪਿ ਮਨ੍ਤਂ, ਅਯਂ ਸੋ ਕੋ ਨਾਮ ਤਵਜ੍ਜ ਧਮ੍ਮੋ’’ਤਿ.

ਤਤ੍ਥ ਨ ਪਾਰੇਸੀਤਿ ਨ ਸਕ੍ਕੋਸਿ. ਜਪ੍ਪਮ੍ਪੀਤਿ ਜਪ੍ਪਨ੍ਤੋਪਿ ਪਰਿਵਤ੍ਤੇਨ੍ਤੋਪਿ. ਅਯਂ ਸੋਤਿ ਅਯਮੇਵ ਸੋ ਤਵ ਸਭਾਵੋ ਅਜ੍ਜ ਕੋ ਨਾਮ ਜਾਤੋਤਿ.

ਤਂ ਸੁਤ੍ਵਾ ਮਾਣਵੋ ‘‘ਨ ਸਕ੍ਕਾ ਰਾਜਾਨਂ ਮੁਸਾਵਾਦੇਨ ਵਞ੍ਚੇਤੁਂ, ਸਚੇਪਿ ਮੇ ਸਭਾਵੇ ਕਥਿਤੇ ਆਣਂ ਕਰੇਯ੍ਯ, ਕਰੋਤੁ, ਸਭਾਵਮੇਵ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦ੍ਵੇ ਗਾਥਾ ਅਭਾਸਿ –

੫. ‘‘ਚਣ੍ਡਾਲਪੁਤ੍ਤੋ ਮਮ ਸਮ੍ਪਦਾਸਿ, ਧਮ੍ਮੇਨ ਮਨ੍ਤੇ ਪਕਤਿਞ੍ਚ ਸਂਸਿ;

ਮਾ ਚਸ੍ਸੁ ਮੇ ਪੁਚ੍ਛਿਤੋ ਨਾਮਗੋਤ੍ਤਂ, ਗੁਯ੍ਹਿਤ੍ਥੋ ਅਤ੍ਥਂ ਵਿਜਹੇਯ੍ਯ ਮਨ੍ਤੋ.

੬. ‘‘ਸੋਹਂ ਜਨਿਨ੍ਦੇਨ ਜਨਮ੍ਹਿ ਪੁਟ੍ਠੋ, ਮਕ੍ਖਾਭਿਭੂਤੋ ਅਲਿਕਂ ਅਭਾਣਿਂ;

‘ਮਨ੍ਤਾ ਇਮੇ ਬ੍ਰਾਹ੍ਮਣਸ੍ਸਾ’ਤਿ ਮਿਚ੍ਛਾ, ਪਹੀਨਮਨ੍ਤੋ ਕਪਣੋ ਰੁਦਾਮੀ’’ਤਿ.

ਤਤ੍ਥ ਧਮ੍ਮੇਨਾਤਿ ਸਮੇਨ ਕਾਰਣੇਨ ਅਪ੍ਪਟਿਚ੍ਛਾਦੇਤ੍ਵਾਵ ਅਦਾਸਿ. ਪਕਤਿਞ੍ਚ ਸਂਸੀਤਿ ‘‘ਮਾ ਮੇ ਪੁਚ੍ਛਿਤੋ ਨਾਮਗੋਤ੍ਤਂ ਗੁਯ੍ਹਿਤ੍ਥੋ, ਸਚੇ ਗੂਹਸਿ, ਮਨ੍ਤਾ ਤੇ ਨਸ੍ਸਿਸ੍ਸਨ੍ਤੀ’’ਤਿ ਤੇਸਂ ਨਸ੍ਸਨਪਕਤਿਞ੍ਚ ਮਯ੍ਹਂ ਸਂਸਿ. ਬ੍ਰਾਹ੍ਮਣਸ੍ਸਾਤਿ ਮਿਚ੍ਛਾਤਿ ‘‘ਬ੍ਰਾਹ੍ਮਣਸ੍ਸ ਸਨ੍ਤਿਕੇ ਮਯਾ ਇਮੇ ਮਨ੍ਤਾ ਗਹਿਤਾ’’ਤਿ ਮਿਚ੍ਛਾਯ ਅਭਣਿਂ, ਤੇਨ ਮੇ ਤੇ ਮਨ੍ਤਾ ਨਟ੍ਠਾ, ਸ੍ਵਾਹਂ ਪਹੀਨਮਨ੍ਤੋ ਇਦਾਨਿ ਕਪਣੋ ਰੁਦਾਮੀਤਿ.

ਤਂ ਸੁਤ੍ਵਾ ਰਾਜਾ ‘‘ਅਯਂ ਪਾਪਧਮ੍ਮੋ ਏਵਰੂਪਂ ਰਤਨਮਨ੍ਤਂ ਨ ਓਲੋਕੇਸਿ, ਏਵਰੂਪਸ੍ਮਿਞ੍ਹਿ ਉਤ੍ਤਮਰਤਨਮਨ੍ਤੇ ਲਦ੍ਧੇ ਜਾਤਿ ਕਿਂ ਕਰਿਸ੍ਸਤੀ’’ਤਿ ਕੁਜ੍ਝਿਤ੍ਵਾ ਤਸ੍ਸ ਗਰਹਨ੍ਤੋ –

੭. ‘‘ਏਰਣ੍ਡਾ ਪੁਚਿਮਨ੍ਦਾ ਵਾ, ਅਥ ਵਾ ਪਾਲਿਭਦ੍ਦਕਾ;

ਮਧੁਂ ਮਧੁਤ੍ਥਿਕੋ ਵਿਨ੍ਦੇ, ਸੋ ਹਿ ਤਸ੍ਸ ਦੁਮੁਤ੍ਤਮੋ.

੮. ‘‘ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਯਮ੍ਹਾ ਧਮ੍ਮਂ ਵਿਜਾਨੇਯ੍ਯ, ਸੋ ਹਿ ਤਸ੍ਸ ਨਰੁਤ੍ਤਮੋ.

੯. ‘‘ਇਮਸ੍ਸ ਦਣ੍ਡਞ੍ਚ ਵਧਞ੍ਚ ਦਤ੍ਵਾ, ਗਲੇ ਗਹੇਤ੍ਵਾ ਖਲਯਾਥ ਜਮ੍ਮਂ;

ਯੋ ਉਤ੍ਤਮਤ੍ਥਂ ਕਸਿਰੇਨ ਲਦ੍ਧਂ, ਮਾਨਾਤਿਮਾਨੇਨ ਵਿਨਾਸਯਿਤ੍ਥਾ’’ਤਿ. –

ਇਮਾ ਗਾਥਾ ਆਹ.

ਤਤ੍ਥ ਮਧੁਤ੍ਥਿਕੋਤਿ ਮਧੁਅਤ੍ਥਿਕੋ ਪੁਰਿਸੋ ਅਰਞ੍ਞੇ ਮਧੁਂ ਓਲੋਕੇਨ੍ਤੋ ਏਤੇਸਂ ਰੁਕ੍ਖਾਨਂ ਯਤੋ ਮਧੁਂ ਲਭਤਿ, ਸੋਵ ਦੁਮੋ ਤਸ੍ਸ ਦੁਮੁਤ੍ਤਮੋ ਨਾਮ. ਤਥੇਵ ਖਤ੍ਤਿਯਾਦੀਸੁ ਯਮ੍ਹਾ ਪੁਰਿਸਾ ਧਮ੍ਮਂ ਕਾਰਣਂ ਯੁਤ੍ਤਂ ਅਤ੍ਥਂ ਵਿਜਾਨੇਯ੍ਯ, ਸੋਵ ਤਸ੍ਸ ਉਤ੍ਤਮੋ ਨਰੋ ਨਾਮ. ਇਮਸ੍ਸ ਦਣ੍ਡਞ੍ਚਾਤਿ ਇਮਸ੍ਸ ਪਾਪਧਮ੍ਮਸ੍ਸ ਸਬ੍ਬਸ੍ਸਹਰਣਦਣ੍ਡਞ੍ਚ ਵੇਲ਼ੁਪੇਸਿਕਾਦੀਹਿ ਪਿਟ੍ਠਿਚਮ੍ਮਂ ਉਪ੍ਪਾਟੇਤ੍ਵਾ ਵਧਞ੍ਚ ਦਤ੍ਵਾ ਇਮਂ ਜਮ੍ਮਂ ਗਲੇ ਗਹੇਤ੍ਵਾ ਖਲਯਾਥ, ਖਲਿਕਾਰਤ੍ਤਂ ਪਾਪੇਤ੍ਵਾ ਨਿਦ੍ਧਮਥ ਨਿਕ੍ਕਡ੍ਢਥ, ਕਿਂ ਇਮਿਨਾ ਇਧ ਵਸਨ੍ਤੇਨਾਤਿ.

ਰਾਜਪੁਰਿਸਾ ਤਥਾ ਕਤ੍ਵਾ ‘‘ਤਵਾਚਰਿਯਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਆਰਾਧੇਤ੍ਵਾਵ ਸਚੇ ਪੁਨ ਮਨ੍ਤੇ ਲਭਿਸ੍ਸਸਿ, ਇਧ ਆਗਚ੍ਛੇਯ੍ਯਾਸਿ, ਨੋ ਚੇ, ਇਮਂ ਦਿਸਂ ਮਾ ਓਲੋਕੇਯ੍ਯਾਸੀ’’ਤਿ ਤਂ ਨਿਬ੍ਬਿਸਯਮਕਂਸੁ. ਸੋ ਅਨਾਥੋ ਹੁਤ੍ਵਾ ‘‘ਠਪੇਤ੍ਵਾ ਆਚਰਿਯਂ ਨ ਮੇ ਅਞ੍ਞਂ ਪਟਿਸਰਣਂ ਅਤ੍ਥਿ, ਤਸ੍ਸੇਵ ਸਨ੍ਤਿਕਂ ਗਨ੍ਤ੍ਵਾ ਤਂ ਆਰਾਧੇਤ੍ਵਾ ਪੁਨ ਮਨ੍ਤਂ ਯਾਚਿਸ੍ਸਾਮੀ’’ਤਿ ਰੋਦਨ੍ਤੋ ਤਂ ਗਾਮਂ ਅਗਮਾਸਿ. ਅਥ ਨਂ ਆਗਚ੍ਛਨ੍ਤਂ ਦਿਸ੍ਵਾ ਮਹਾਸਤ੍ਤੋ ਭਰਿਯਂ ਆਮਨ੍ਤੇਤ੍ਵਾ ‘‘ਭਦ੍ਦੇ, ਪਸ੍ਸ ਤਂ ਪਾਪਧਮ੍ਮਂ ਪਰਿਹੀਨਮਨ੍ਤਂ ਪੁਨ ਆਗਚ੍ਛਨ੍ਤ’’ਨ੍ਤਿ ਆਹ. ਸੋ ਮਹਾਸਤ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ‘‘ਕਿਂਕਾਰਣਾ ਆਗਤੋਸੀ’’ਤਿ ਪੁਟ੍ਠੋ ‘‘ਆਚਰਿਯ, ਮੁਸਾਵਾਦਂ ਕਤ੍ਵਾ ਆਚਰਿਯਂ ਪਚ੍ਚਕ੍ਖਿਤ੍ਵਾ ਮਹਾਵਿਨਾਸਂ ਪਤ੍ਤੋਮ੍ਹੀ’’ਤਿ ਵਤ੍ਵਾ ਅਚ੍ਚਯਂ ਦਸ੍ਸੇਤ੍ਵਾ ਪੁਨ ਮਨ੍ਤੇ ਯਾਚਨ੍ਤੋ –

੧੦. ‘‘ਯਥਾ ਸਮਂ ਮਞ੍ਞਮਾਨੋ ਪਤੇਯ੍ਯ, ਸੋਬ੍ਭਂ ਗੁਹਂ ਨਰਕਂ ਪੂਤਿਪਾਦਂ;

ਰਜ੍ਜੂਤਿ ਵਾ ਅਕ੍ਕਮੇ ਕਣ੍ਹਸਪ੍ਪਂ, ਅਨ੍ਧੋ ਯਥਾ ਜੋਤਿਮਧਿਟ੍ਠਹੇਯ੍ਯ;

ਏਵਮ੍ਪਿ ਮਂ ਤਂ ਖਲਿਤਂ ਸਪਞ੍ਞ, ਪਹੀਨਮਨ੍ਤਸ੍ਸ ਪੁਨਪ੍ਪਦਾਹੀ’’ਤਿ. – ਗਾਥਮਾਹ;

ਤਤ੍ਥ ਯਥਾ ਸਮਨ੍ਤਿ ਯਥਾ ਪੁਰਿਸੋ ਇਦਂ ਸਮਂ ਠਾਨਨ੍ਤਿ ਮਞ੍ਞਮਾਨੋ ਸੋਬ੍ਭਂ ਵਾ ਗੁਹਂ ਵਾ ਭੂਮਿਯਾ ਫਲਿਤਟ੍ਠਾਨਸਙ੍ਖਾਤਂ ਨਰਕਂ ਵਾ ਪੂਤਿਪਾਦਂ ਵਾ ਪਤੇਯ੍ਯ. ਪੂਤਿਪਾਦੋਤਿ ਹਿਮਵਨ੍ਤਪਦੇਸੇ ਮਹਾਰੁਕ੍ਖੇ ਸੁਸ੍ਸਿਤ੍ਵਾ ਮਤੇ ਤਸ੍ਸ ਮੂਲੇਸੁ ਪੂਤਿਕੇਸੁ ਜਾਤੇਸੁ ਤਸ੍ਮਿਂ ਠਾਨੇ ਮਹਾਆਵਾਟੋ ਹੋਤਿ, ਤਸ੍ਸ ਨਾਮਂ. ਜੋਤਿਮਧਿਟ੍ਠਹੇਯ੍ਯਾਤਿ ਅਗ੍ਗਿਂ ਅਕ੍ਕਮੇਯ੍ਯ. ਏਵਮ੍ਪੀਤਿ ਏਵਂ ਅਹਮ੍ਪਿ ਪਞ੍ਞਾਚਕ੍ਖੁਨੋ ਅਭਾਵਾ ਅਨ੍ਧੋ ਤੁਮ੍ਹਾਕਂ ਵਿਸੇਸਂ ਅਜਾਨਨ੍ਤੋ ਤੁਮ੍ਹੇਸੁ ਖਲਿਤੋ, ਤਂ ਮਂ ਖਲਿਤਂ ਵਿਦਿਤ੍ਵਾ ਸਪਞ੍ਞ ਞਾਣਸਮ੍ਪਨ੍ਨ ਪਹੀਨਮਨ੍ਤਸ੍ਸ ਮਮ ਪੁਨਪਿ ਦੇਥਾਤਿ.

ਅਥ ਨਂ ਆਚਰਿਯੋ ‘‘ਤਾਤ, ਕਿਂ ਕਥੇਸਿ, ਅਨ੍ਧੋ ਹਿ ਸਞ੍ਞਾਯ ਦਿਨ੍ਨਾਯ ਸੋਬ੍ਭਾਦੀਨਿ ਪਰਿਹਰਤਿ, ਮਯਾ ਪਠਮਮੇਵ ਤਵ ਕਥਿਤਂ, ਇਦਾਨਿ ਕਿਮਤ੍ਥਂ ਮਮ ਸਨ੍ਤਿਕਂ ਆਗਤੋਸੀ’’ਤਿ ਵਤ੍ਵਾ –

੧੧. ‘‘ਧਮ੍ਮੇਨ ਮਨ੍ਤਂ ਤਵ ਸਮ੍ਪਦਾਸਿਂ, ਤੁਵਮ੍ਪਿ ਧਮ੍ਮੇਨ ਪਟਿਗ੍ਗਹੇਸਿ;

ਪਕਤਿਮ੍ਪਿ ਤੇ ਅਤ੍ਤਮਨੋ ਅਸਂਸਿਂ, ਧਮ੍ਮੇ ਠਿਤਂ ਤਂ ਨ ਜਹੇਯ੍ਯ ਮਨ੍ਤੋ.

੧੨. ‘‘ਯੋ ਬਾਲ-ਮਨ੍ਤਂ ਕਸਿਰੇਨ ਲਦ੍ਧਂ, ਯਂ ਦੁਲ੍ਲਭਂ ਅਜ੍ਜ ਮਨੁਸ੍ਸਲੋਕੇ;

ਕਿਞ੍ਚਾਪਿ ਲਦ੍ਧਾ ਜੀਵਿਤੁਂ ਅਪ੍ਪਪਞ੍ਞੋ, ਵਿਨਾਸਯੀ ਅਲਿਕਂ ਭਾਸਮਾਨੋ.

੧੩. ‘‘ਬਾਲਸ੍ਸ ਮੂਲ਼੍ਹਸ੍ਸ ਅਕਤਞ੍ਞੁਨੋ ਚ, ਮੁਸਾ ਭਣਨ੍ਤਸ੍ਸ ਅਸਞ੍ਞਤਸ੍ਸ;

ਮਨ੍ਤੇ ਮਯਂ ਤਾਦਿਸਕੇ ਨ ਦੇਮ, ਕੁਤੋ ਮਨ੍ਤਾ ਗਚ੍ਛ ਨ ਮਯ੍ਹਂ ਰੁਚ੍ਚਸੀ’’ਤਿ. –

ਇਮਾ ਗਾਥਾ ਆਹ.

ਤਤ੍ਥ ਧਮ੍ਮੇਨਾਤਿ ਅਹਮ੍ਪਿ ਤਵ ਆਚਰਿਯਭਾਗਂ ਹਿਰਞ੍ਞਂ ਵਾ ਸੁਵਣ੍ਣਂ ਵਾ ਅਗ੍ਗਹੇਤ੍ਵਾ ਧਮ੍ਮੇਨੇਵ ਮਨ੍ਤਂ ਸਮ੍ਪਦਾਸਿਂ, ਤ੍ਵਮ੍ਪਿ ਕਿਞ੍ਚਿ ਅਦਤ੍ਵਾ ਧਮ੍ਮੇਨ ਸਮੇਨੇਵ ਪਟਿਗ੍ਗਹੇਸਿ. ਧਮ੍ਮੇ ਠਿਤਨ੍ਤਿ ਆਚਰਿਯਪੂਜਕਧਮ੍ਮੇ ਠਿਤਂ. ਤਾਦਿਸਕੇਤਿ ਤਥਾਰੂਪੇ ਅਕਾਲਫਲਗਣ੍ਹਾਪਕੇ ਮਨ੍ਤੇ ਨ ਦੇਮ, ਗਚ੍ਛ ਨ ਮੇ ਰੁਚ੍ਚਸੀਤਿ.

ਸੋ ਏਵਂ ਆਚਰਿਯੇਨ ਉਯ੍ਯੋਜਿਤੋ ‘‘ਕਿਂ ਮਯ੍ਹਂ ਜੀਵਿਤੇਨਾ’’ਤਿ ਅਰਞ੍ਞਂ ਪਵਿਸਿਤ੍ਵਾ ਅਨਾਥਮਰਣਂ ਮਰਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਆਚਰਿਯਂ ਪਚ੍ਚਕ੍ਖਾਯ ਮਹਾਵਿਨਾਸਂ ਪਤ੍ਤੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਅਕਤਞ੍ਞੂ ਮਾਣਵੋ ਦੇਵਦਤ੍ਤੋ ਅਹੋਸਿ, ਰਾਜਾ ਆਨਨ੍ਦੋ, ਚਣ੍ਡਾਲਪੁਤ੍ਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਮ੍ਬਜਾਤਕਵਣ੍ਣਨਾ ਪਠਮਾ.

[੪੭੫] ੨. ਫਨ੍ਦਨਜਾਤਕਵਣ੍ਣਨਾ

ਕੁਠਾਰਿਹਤ੍ਥੋ ਪੁਰਿਸੋਤਿ ਇਦਂ ਸਤ੍ਥਾ ਰੋਹਿਣੀਨਦੀਤੀਰੇ ਵਿਹਰਨ੍ਤੋ ਞਾਤਕਾਨਂ ਕਲਹਂ ਆਰਬ੍ਭ ਕਥੇਸਿ. ਵਤ੍ਥੁ ਪਨ ਕੁਣਾਲਜਾਤਕੇ (ਜਾ. ੨.੨੧.ਕੁਣਾਲਜਾਤਕ) ਆਵਿ ਭਵਿਸ੍ਸਤਿ. ਤਦਾ ਪਨ ਸਤ੍ਥਾ ਞਾਤਕੇ ਆਮਨ੍ਤੇਤ੍ਵਾ – ਮਹਾਰਾਜਾ, ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਹਿਨਗਰੇ ਵਡ੍ਢਕਿਗਾਮੋ ਅਹੋਸਿ. ਤਤ੍ਰੇਕੋ ਬ੍ਰਾਹ੍ਮਣਵਡ੍ਢਕੀ ਅਰਞ੍ਞਤੋ ਦਾਰੂਨਿ ਆਹਰਿਤ੍ਵਾ ਰਥਂ ਕਤ੍ਵਾ ਜੀਵਿਕਂ ਕਪ੍ਪੇਸਿ. ਤਦਾ ਹਿਮਵਨ੍ਤਪਦੇਸੇ ਮਹਾਫਨ੍ਦਨਰੁਕ੍ਖੋ ਅਹੋਸਿ. ਏਕੋ ਕਾਲ਼ਸੀਹੋ ਗੋਚਰਂ ਪਰਿਯੇਸਿਤ੍ਵਾ ਆਗਨ੍ਤ੍ਵਾ ਤਸ੍ਸ ਮੂਲੇ ਨਿਪਜ੍ਜਿ. ਅਥਸ੍ਸ ਏਕਦਿਵਸਂ ਵਾਤੇ ਪਹਰਨ੍ਤੇ ਏਕੋ ਸੁਕ੍ਖਦਣ੍ਡਕੋ ਪਤਿਤ੍ਵਾ ਖਨ੍ਧੇ ਅਵਤ੍ਥਾਸਿ. ਸੋ ਥੋਕਂ ਖਨ੍ਧੇਨ ਰੁਜਨ੍ਤੇਨ ਭੀਤਤਸਿਤੋ ਉਟ੍ਠਾਯ ਪਕ੍ਖਨ੍ਦਿਤ੍ਵਾ ਪੁਨ ਨਿਵਤ੍ਤੋ ਆਗਤਮਗ੍ਗਂ ਓਲੋਕੇਨ੍ਤੋ ਕਿਞ੍ਚਿ ਅਦਿਸ੍ਵਾ ‘‘ਅਞ੍ਞੋ ਮਂ ਸੀਹੋ ਵਾ ਬ੍ਯਗ੍ਘੋ ਵਾ ਅਨੁਬਨ੍ਧਨ੍ਤੋ ਨਤ੍ਥਿ, ਇਮਸ੍ਮਿਂ ਪਨ ਰੁਕ੍ਖੇ ਨਿਬ੍ਬਤ੍ਤਦੇਵਤਾ ਮਂ ਏਤ੍ਥ ਨਿਪਜ੍ਜਨ੍ਤਂ ਨ ਸਹਤਿ ਮਞ੍ਞੇ, ਹੋਤੁ ਜਾਨਿਸ੍ਸਾਮੀ’’ਤਿ ਅਟ੍ਠਾਨੇ ਕੋਪਂ ਬਨ੍ਧਿਤ੍ਵਾ ਰੁਕ੍ਖਂ ਪਹਰਿਤ੍ਵਾ ‘‘ਨੇਵ ਤਵ ਰੁਕ੍ਖਸ੍ਸ ਪਤ੍ਤਂ ਖਾਦਾਮਿ, ਨ ਸਾਖਂ ਭਞ੍ਜਾਮਿ, ਇਧ ਅਞ੍ਞੇ ਮਿਗੇ ਵਸਨ੍ਤੇ ਸਹਸਿ, ਮਂ ਨ ਸਹਸਿ, ਕੋ ਮਯ੍ਹਂ ਦੋਸੋ ਅਤ੍ਥਿ, ਕਤਿਪਾਹਂ ਆਗਮੇਹਿ, ਸਮੂਲਂ ਤੇ ਰੁਕ੍ਖਂ ਉਪ੍ਪਾਟੇਤ੍ਵਾ ਖਣ੍ਡਾਖਣ੍ਡਿਕਂ ਛੇਦਾਪੇਸ੍ਸਾਮੀ’’ਤਿ ਰੁਕ੍ਖਦੇਵਤਂ ਤਜ੍ਜੇਤ੍ਵਾ ਏਕਂ ਪੁਰਿਸਂ ਉਪਧਾਰੇਨ੍ਤੋ ਵਿਚਰਿ. ਤਦਾ ਸੋ ਬ੍ਰਾਹ੍ਮਣਵਡ੍ਢਕੀ ਦ੍ਵੇ ਤਯੋ ਮਨੁਸ੍ਸੇ ਆਦਾਯ ਰਥਦਾਰੂਨਂ ਅਤ੍ਥਾਯ ਯਾਨਕੇਨ ਤਂ ਪਦੇਸਂ ਗਨ੍ਤ੍ਵਾ ਏਕਸ੍ਮਿਂ ਠਾਨੇ ਯਾਨਕਂ ਠਪੇਤ੍ਵਾ ਵਾਸਿਫਰਸੁਹਤ੍ਥੋ ਰੁਕ੍ਖੇ ਉਪਧਾਰੇਨ੍ਤੋ ਫਨ੍ਦਨਸਮੀਪਂ ਅਗਮਾਸਿ. ਕਾਲ਼ਸੀਹੋ ਤਂ ਦਿਸ੍ਵਾ ‘‘ਅਜ੍ਜ, ਮਯਾ ਪਚ੍ਚਾਮਿਤ੍ਤਸ੍ਸ ਪਿਟ੍ਠਿਂ ਦਟ੍ਠੁਂ ਵਟ੍ਟਤੀ’’ਤਿ ਗਨ੍ਤ੍ਵਾ ਰੁਕ੍ਖਮੂਲੇ ਅਟ੍ਠਾਸਿ. ਵਡ੍ਢਕੀ ਚ ਇਤੋ ਚਿਤੋ ਓਲੋਕੇਤ੍ਵਾ ਫਨ੍ਦਨਸਮੀਪੇਨ ਪਾਯਾਸਿ. ਸੋ ‘‘ਯਾਵ ਏਸੋ ਨਾਤਿਕ੍ਕਮਤਿ, ਤਾਵਦੇਵਸ੍ਸ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਪਠਮਂ ਗਾਥਮਾਹ –

੧੪. ‘‘ਕੁਠਾਰਿਹਤ੍ਥੋ ਪੁਰਿਸੋ, ਵਨਮੋਗਯ੍ਹ ਤਿਟ੍ਠਸਿ;

ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕਿਂ ਦਾਰੁਂ ਛੇਤੁਮਿਚ੍ਛਸੀ’’ਤਿ.

ਤਤ੍ਥ ਪੁਰਿਸੋਤਿ ਤ੍ਵਂ ਕੁਠਾਰਿਹਤ੍ਥੋ ਏਕੋ ਪੁਰਿਸੋ ਇਮਂ ਵਨਂ ਓਗਯ੍ਹ ਤਿਟ੍ਠਸੀਤਿ.

ਸੋ ਤਸ੍ਸ ਵਚਨਂ ਸੁਤ੍ਵਾ ‘‘ਅਚ੍ਛਰਿਯਂ ਵਤ ਭੋ, ਨ ਵਤ ਮੇ ਇਤੋ ਪੁਬ੍ਬੇ ਮਿਗੋ ਮਨੁਸ੍ਸਵਾਚਂ ਭਾਸਨ੍ਤੋ ਦਿਟ੍ਠਪੁਬ੍ਬੋ, ਏਸ ਰਥਾਨੁਚ੍ਛਵਿਕਂ ਦਾਰੁਂ ਜਾਨਿਸ੍ਸਤਿ, ਪੁਚ੍ਛਿਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਦੁਤਿਯਂ ਗਾਥਮਾਹ –

੧੫. ‘‘ਇਸ੍ਸੋ ਵਨਾਨਿ ਚਰਸਿ, ਸਮਾਨਿ ਵਿਸਮਾਨਿ ਚ;

ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕਿਂ ਦਾਰੁਂ ਨੇਮਿਯਾ ਦਲ਼੍ਹ’’ਨ੍ਤਿ.

ਤਤ੍ਥ ਇਸ੍ਸੋਤਿ ਤ੍ਵਮ੍ਪਿ ਏਕੋ ਕਾਲ਼ਸੀਹੋ ਵਨਾਨਿ ਚਰਸਿ, ਤ੍ਵਂ ਰਥਾਨੁਚ੍ਛਵਿਕਂ ਦਾਰੁਂ ਜਾਨਿਸ੍ਸਸੀਤਿ.

ਤਂ ਸੁਤ੍ਵਾ ਕਾਲ਼ਸੀਹੋ ‘‘ਇਦਾਨਿ ਮੇ ਮਨੋਰਥੋ ਮਤ੍ਥਕਂ ਪਾਪੁਣਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਤਤਿਯਂ ਗਾਥਮਾਹ –

੧੬. ‘‘ਨੇਵ ਸਾਲੋ ਨ ਖਦਿਰੋ, ਨਾਸ੍ਸਕਣ੍ਣੋ ਕੁਤੋ ਧਵੋ;

ਰੁਕ੍ਖੋ ਚ ਫਨ੍ਦਨੋ ਨਾਮ, ਤਂ ਦਾਰੁਂ ਨੇਮਿਯਾ ਦਲ਼੍ਹ’’ਨ੍ਤਿ.

ਸੋ ਤਂ ਸੁਤ੍ਵਾ ਸੋਮਨਸ੍ਸਜਾਤੋ ‘‘ਸੁਦਿਵਸੇਨ ਵਤਮ੍ਹਿ ਅਜ੍ਜ ਅਰਞ੍ਞਂ ਪਵਿਟ੍ਠੋ, ਤਿਰਚ੍ਛਾਨਗਤੋ ਮੇ ਰਥਾਨੁਚ੍ਛਵਿਕਂ ਦਾਰੁਂ ਆਚਿਕ੍ਖਤਿ, ਅਹੋ ਸਾਧੂ’’ਤਿ ਪੁਚ੍ਛਨ੍ਤੋ ਚਤੁਤ੍ਥਂ ਗਾਥਮਾਹ –

੧੭. ‘‘ਕੀਦਿਸਾਨਿਸ੍ਸ ਪਤ੍ਤਾਨਿ, ਖਨ੍ਧੋ ਵਾ ਪਨ ਕੀਦਿਸੋ;

ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਯਥਾ ਜਾਨੇਮੁ ਫਨ੍ਦਨ’’ਨ੍ਤਿ.

ਅਥਸ੍ਸ ਸੋ ਆਚਿਕ੍ਖਨ੍ਤੋ ਦ੍ਵੇ ਗਾਥਾ ਅਭਾਸਿ –

੧੮. ‘‘ਯਸ੍ਸ ਸਾਖਾ ਪਲਮ੍ਬਨ੍ਤਿ, ਨਮਨ੍ਤਿ ਨ ਚ ਭਞ੍ਜਰੇ;

ਸੋ ਰੁਕ੍ਖੋ ਫਨ੍ਦਨੋ ਨਾਮ, ਯਸ੍ਸ ਮੂਲੇ ਅਹਂ ਠਿਤੋ.

੧੯. ‘‘ਅਰਾਨਂ ਚਕ੍ਕਨਾਭੀਨਂ, ਈਸਾਨੇਮਿਰਥਸ੍ਸ ਚ;

ਸਬ੍ਬਸ੍ਸ ਤੇ ਕਮ੍ਮਨਿਯੋ, ਅਯਂ ਹੇਸ੍ਸਤਿ ਫਨ੍ਦਨੋ’’ਤਿ.

ਤਤ੍ਥ ‘‘ਅਰਾਨ’’ਨ੍ਤਿ ਇਦਂ ਸੋ ‘‘ਕਦਾਚੇਸ ਇਮਂ ਰੁਕ੍ਖਂ ਨ ਗਣ੍ਹੇਯ੍ਯ, ਗੁਣਮ੍ਪਿਸ੍ਸ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਵਮਾਹ. ਤਤ੍ਥ ਈਸਾਨੇਮਿਰਥਸ੍ਸ ਚਾਤਿ ਈਸਾਯ ਚ ਨੇਮਿਯਾ ਚ ਸੇਸਸ੍ਸ ਚ ਰਥਸ੍ਸ ਸਬ੍ਬਸ੍ਸ ਤੇ ਏਸ ਕਮ੍ਮਨਿਯੋ ਕਮ੍ਮਕ੍ਖਮੋ ਭਵਿਸ੍ਸਤੀਤਿ.

ਸੋ ਏਵਂ ਆਚਿਕ੍ਖਿਤ੍ਵਾ ਤੁਟ੍ਠਮਾਨਸੋ ਏਕਮਨ੍ਤੇ ਵਿਚਰਿ, ਵਡ੍ਢਕੀਪਿ ਰੁਕ੍ਖਂ ਛਿਨ੍ਦਿਤੁਂ ਆਰਭਿ. ਰੁਕ੍ਖਦੇਵਤਾ ਚਿਨ੍ਤੇਸਿ ‘‘ਮਯਾ ਏਤਸ੍ਸ ਉਪਰਿ ਨ ਕਿਞ੍ਚਿ ਪਾਤਿਤਂ, ਅਯਂ ਅਟ੍ਠਾਨੇ ਆਘਾਤਂ ਬਨ੍ਧਿਤ੍ਵਾ ਮਮ ਵਿਮਾਨਂ ਨਾਸੇਤਿ, ਅਹਞ੍ਚ ਵਿਨਸ੍ਸਿਸ੍ਸਾਮਿ, ਏਕੇਨੁਪਾਯੇਨ ਇਮਞ੍ਚ ਇਸ੍ਸਂ ਵਿਨਾਸੇਸ੍ਸਾਮੀ’’ਤਿ. ਸਾ ਵਨਕਮ੍ਮਿਕਪੁਰਿਸੋ ਵਿਯ ਹੁਤ੍ਵਾ ਤਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਪੁਚ੍ਛਿ ‘‘ਭੋ ਪੁਰਿਸ ਮਨਾਪੋ ਤੇ ਰੁਕ੍ਖੋ ਲਦ੍ਧੋ, ਇਮਂ ਛਿਨ੍ਦਿਤ੍ਵਾ ਕਿਂ ਕਰਿਸ੍ਸਸੀ’’ਤਿ? ‘‘ਰਥਨੇਮਿਂ ਕਰਿਸ੍ਸਾਮੀ’’ਤਿ. ‘‘ਇਮਿਨਾ ਰੁਕ੍ਖੇਨ ਰਥੋ ਭਵਿਸ੍ਸਤੀ’’ਤਿ ਕੇਨ ਤੇ ਅਕ੍ਖਾਤਨ੍ਤਿ. ‘‘ਏਕੇਨ ਕਾਲ਼ਸੀਹੇਨਾ’’ਤਿ. ‘‘ਸਾਧੁ ਸੁਟ੍ਠੁ ਤੇਨ ਅਕ੍ਖਾਤਂ, ਇਮਿਨਾ ਰੁਕ੍ਖੇਨ ਰਥੋ ਸੁਨ੍ਦਰੋ ਭਵਿਸ੍ਸਤਿ, ਕਾਲ਼ਸੀਹਸ੍ਸ ਗਲਚਮ੍ਮਂ ਉਪ੍ਪਾਟੇਤ੍ਵਾ ਚਤੁਰਙ੍ਗੁਲਮਤ੍ਤੇ ਠਾਨੇ ਅਯਪਟ੍ਟੇਨ ਵਿਯ ਨੇਮਿਮਣ੍ਡਲੇ ਪਰਿਕ੍ਖਿਤ੍ਤੇ ਨੇਮਿ ਚ ਥਿਰਾ ਭਵਿਸ੍ਸਤਿ, ਬਹੁਞ੍ਚ ਧਨਂ ਲਭਿਸ੍ਸਸੀ’’ਤਿ. ‘‘ਕਾਲ਼ਸੀਹਚਮ੍ਮਂ ਕੁਤੋ ਲਚ੍ਛਾਮੀ’’ਤਿ? ‘‘ਤ੍ਵਂ ਬਾਲਕੋਸਿ, ਅਯਂ ਤਵ ਰੁਕ੍ਖੋ ਵਨੇ ਠਿਤੋ ਨ ਪਲਾਯਤਿ, ਤ੍ਵਂ ਯੇਨ ਤੇ ਰੁਕ੍ਖੋ ਅਕ੍ਖਾਤੋ, ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘ਸਾਮਿ ਤਯਾ ਦਸ੍ਸਿਤਰੁਕ੍ਖਂ ਕਤਰਟ੍ਠਾਨੇ ਛਿਨ੍ਦਾਮੀ’ਤਿ ਵਞ੍ਚੇਤ੍ਵਾ ਆਨੇਹਿ, ਅਥ ਨਂ ਨਿਰਾਸਙ੍ਕਂ ‘ਇਧ ਚ ਏਤ੍ਥ ਚ ਛਿਨ੍ਦਾ’ਤਿ ਮੁਖਤੁਣ੍ਡਂ ਪਸਾਰੇਤ੍ਵਾ ਆਚਿਕ੍ਖਨ੍ਤਂ ਤਿਖਿਣੇਨ ਮਹਾਫਰਸੁਨਾ ਕੋਟ੍ਟੇਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਚਮ੍ਮਂ ਆਦਾਯ ਵਰਮਂਸਂ ਖਾਦਿਤ੍ਵਾ ਰੁਕ੍ਖਂ ਛਿਨ੍ਦਾ’’ਤਿ ਵੇਰਂ ਅਪ੍ਪੇਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਇਮਾ ਗਾਥਾ ਆਹ –

੨੦. ‘‘ਇਤਿ ਫਨ੍ਦਨਰੁਕ੍ਖੋਪਿ, ਤਾਵਦੇ ਅਜ੍ਝਭਾਸਥ;

ਮਯ੍ਹਮ੍ਪਿ ਵਚਨਂ ਅਤ੍ਥਿ, ਭਾਰਦ੍ਵਾਜ ਸੁਣੋਹਿ ਮੇ.

੨੧. ‘‘ਇਸ੍ਸਸ੍ਸ ਉਪਕ੍ਖਨ੍ਧਮ੍ਹਾ, ਉਕ੍ਕਚ੍ਚ ਚਤੁਰਙ੍ਗੁਲਂ;

ਤੇਨ ਨੇਮਿਂ ਪਸਾਰੇਸਿ, ਏਵਂ ਦਲ਼੍ਹਤਰਂ ਸਿਯਾ.

੨੨. ‘‘ਇਤਿ ਫਨ੍ਦਨਰੁਕ੍ਖੋਪਿ, ਵੇਰਂ ਅਪ੍ਪੇਸਿ ਤਾਵਦੇ;

ਜਾਤਾਨਞ੍ਚ ਅਜਾਤਾਨਂ, ਇਸ੍ਸਾਨਂ ਦੁਕ੍ਖਮਾਵਹੀ’’ਤਿ.

ਤਤ੍ਥ ਭਾਰਦ੍ਵਾਜਾਤਿ ਤਂ ਗੋਤ੍ਤੇਨ ਆਲਪਤਿ. ਉਪਕ੍ਖਨ੍ਧਮ੍ਹਾਤਿ ਖਨ੍ਧਤੋ. ਉਕ੍ਕਚ੍ਚਾਤਿ ਉਕ੍ਕਨ੍ਤਿਤ੍ਵਾ.

ਵਡ੍ਢਕੀ ਰੁਕ੍ਖਦੇਵਤਾਯ ਵਚਨਂ ਸੁਤ੍ਵਾ ‘‘ਅਹੋ ਅਜ੍ਜ ਮਯ੍ਹਂ ਮਙ੍ਗਲਦਿਵਸੋ’’ਤਿ ਕਾਲ਼ਸੀਹਂ ਘਾਤੇਤ੍ਵਾ ਰੁਕ੍ਖਂ ਛੇਤ੍ਵਾ ਪਕ੍ਕਾਮਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੨੩. ‘‘ਇਚ੍ਚੇਵਂ ਫਨ੍ਦਨੋ ਇਸ੍ਸਂ, ਇਸ੍ਸੋ ਚ ਪਨ ਫਨ੍ਦਨਂ;

ਅਞ੍ਞਮਞ੍ਞਂ ਵਿਵਾਦੇਨ, ਅਞ੍ਞਮਞ੍ਞਮਘਾਤਯੁਂ.

੨੪. ‘‘ਏਵਮੇਵ ਮਨੁਸ੍ਸਾਨਂ, ਵਿਵਾਦੋ ਯਤ੍ਥ ਜਾਯਤਿ;

ਮਯੂਰਨਚ੍ਚਂ ਨਚ੍ਚਨ੍ਤਿ, ਯਥਾ ਤੇ ਇਸ੍ਸਫਨ੍ਦਨਾ.

੨੫. ‘‘ਤਂ ਵੋ ਵਦਾਮਿ ਭਦ੍ਦਂ ਵੋ, ਯਾਵਨ੍ਤੇਤ੍ਥ ਸਮਾਗਤਾ;

ਸਮ੍ਮੋਦਥ ਮਾ ਵਿਵਦਥ, ਮਾ ਹੋਥ ਇਸ੍ਸਫਨ੍ਦਨਾ.

੨੬. ‘‘ਸਾਮਗ੍ਗਿਮੇਵ ਸਿਕ੍ਖੇਥ, ਬੁਦ੍ਧੇਹੇਤਂ ਪਸਂਸਿਤਂ;

ਸਾਮਗ੍ਗਿਰਤੋ ਧਮ੍ਮਟ੍ਠੋ, ਯੋਗਕ੍ਖੇਮਾ ਨ ਧਂਸਤੀ’’ਤਿ.

ਤਤ੍ਥ ਅਘਾਤਯੁਨ੍ਤਿ ਘਾਤਾਪੇਸੁਂ. ਮਯੂਰਨਚ੍ਚਂ ਨਚ੍ਚਨ੍ਤੀਤਿ ਮਹਾਰਾਜਾ ਯਤ੍ਥ ਹਿ ਮਨੁਸ੍ਸਾਨਂ ਵਿਵਾਦੋ ਹੋਤਿ, ਤਤ੍ਥ ਯਥਾ ਨਾਮ ਮਯੂਰਾ ਨਚ੍ਚਨ੍ਤਾ ਪਟਿਚ੍ਛਾਦੇਤਬ੍ਬਂ ਰਹਸ੍ਸਙ੍ਗਂ ਪਾਕਟਂ ਕਰੋਨ੍ਤਿ, ਏਵਂ ਮਨੁਸ੍ਸਾ ਅਞ੍ਞਮਞ੍ਞਸ੍ਸ ਰਨ੍ਧਂ ਪਕਾਸੇਨ੍ਤਾ ਮਯੂਰਨਚ੍ਚਂ ਨਚ੍ਚਨ੍ਤਿ ਨਾਮ. ਯਥਾ ਤੇ ਇਸ੍ਸਫਨ੍ਦਨਾ ਅਞ੍ਞਮਞ੍ਞਸ੍ਸ ਰਨ੍ਧਂ ਪਕਾਸੇਨ੍ਤਾ ਨਚ੍ਚਿਂਸੁ ਨਾਮ. ਤਂ ਵੋਤਿ ਤੇਨ ਕਾਰਣੇਨ ਤੁਮ੍ਹੇ ਵਦਾਮਿ. ਭਦ੍ਦਂ ਵੋਤਿ ਭਦ੍ਦਂ ਤੁਮ੍ਹਾਕਂ ਹੋਤੁ. ਯਾਵਨ੍ਤੇਤ੍ਥਾਤਿ ਯਾਵਨ੍ਤੋ ਏਤ੍ਥ ਇਸ੍ਸਫਨ੍ਦਨਸਦਿਸਾ ਮਾ ਅਹੁਵਤ੍ਥ. ਸਾਮਗ੍ਗਿਮੇਵ ਸਿਕ੍ਖੇਥਾਤਿ ਸਮਗ੍ਗਭਾਵਮੇਵ ਤੁਮ੍ਹੇ ਸਿਕ੍ਖਥ, ਇਦਂ ਪਞ੍ਞਾਵੁਦ੍ਧੇਹਿ ਪਣ੍ਡਿਤੇਹਿ ਪਸਂਸਿਤਂ. ਧਮ੍ਮਟ੍ਠੋਤਿ ਸੁਚਰਿਤਧਮ੍ਮੇ ਠਿਤੋ. ਯੋਗਕ੍ਖੇਮਾ ਨ ਧਂਸਤੀਤਿ ਯੋਗੇਹਿ ਖੇਮਾ ਨਿਬ੍ਬਾਨਾ ਨ ਪਰਿਹਾਯਤੀਤਿ ਨਿਬ੍ਬਾਨੇਨ ਦੇਸਨਾਕੂਟਂ ਗਣ੍ਹਿ. ਸਕ੍ਯਰਾਜਾਨੋ ਧਮ੍ਮਕਥਂ ਸੁਤ੍ਵਾ ਸਮਗ੍ਗਾ ਜਾਤਾ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਤਂ ਕਾਰਣਂ ਵਿਦਿਤ੍ਵਾ ਤਸ੍ਮਿਂ ਵਨਸਣ੍ਡੇ ਨਿਵੁਤ੍ਥਦੇਵਤਾ ਅਹਮੇਵ ਅਹੋਸਿ’’ਨ੍ਤਿ.

ਫਨ੍ਦਨਜਾਤਕਵਣ੍ਣਨਾ ਦੁਤਿਯਾ.

[੪੭੬] ੩. ਜਵਨਹਂਸਜਾਤਕਵਣ੍ਣਨਾ

ਇਧੇਵ ਹਂਸ ਨਿਪਤਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦਲ਼੍ਹਧਮ੍ਮਧਨੁਗ੍ਗਹਸੁਤ੍ਤਨ੍ਤਦੇਸਨਂ (ਸਂ. ਨਿ. ੨.੨੨੮) ਆਰਬ੍ਭ ਕਥੇਸਿ. ਭਗਵਤਾ ਹਿ –

‘‘ਸੇਯ੍ਯਥਾਪਿ, ਭਿਕ੍ਖਵੇ, ਚਤ੍ਤਾਰੋ ਦਲ਼੍ਹਧਮ੍ਮਾ ਧਨੁਗ੍ਗਹਾ ਸੁਸਿਕ੍ਖਿਤਾ ਕਤਹਤ੍ਥਾ ਕਤੂਪਾਸਨਾ ਚਤੁਦ੍ਦਿਸਾ ਠਿਤਾ ਅਸ੍ਸੁ, ਅਥ ਪੁਰਿਸੋ ਆਗਚ੍ਛੇਯ੍ਯ ‘ਅਹਂ ਇਮੇਸਂ ਚਤੁਨ੍ਨਂ ਦਲ਼੍ਹਧਮ੍ਮਾਨਂ ਧਨੁਗ੍ਗਹਾਨਂ ਸੁਸਿਕ੍ਖਿਤਾਨਂ ਕਤਹਤ੍ਥਾਨਂ ਕਤੂਪਾਸਨਾਨਂ ਚਤੁਦ੍ਦਿਸਾ ਕਣ੍ਡੇ ਖਿਤ੍ਤੇ ਅਪਤਿਟ੍ਠਿਤੇ ਪਥਵਿਯਂ ਗਹੇਤ੍ਵਾ ਆਹਰਿਸ੍ਸਾਮੀ’ਤਿ. ‘‘ਤਂ ਕਿਂ ਮਞ੍ਞਥ, ਭਿਕ੍ਖਵੇ, ‘ਜਵਨੋ ਪੁਰਿਸੋ ਪਰਮੇਨ ਜਵੇਨ ਸਮਨ੍ਨਾਗਤੋ’ਤਿ ਅਲਂ ਵਚਨਾਯਾ’’ਤਿ? ‘‘ਏਵਂ ਭਨ੍ਤੇ’’ਤਿ. ਯਥਾ ਚ, ਭਿਕ੍ਖਵੇ, ਤਸ੍ਸ ਪੁਰਿਸਸ੍ਸ ਜਵੋ, ਯਥਾ ਚ ਚਨ੍ਦਿਮਸੂਰਿਯਾਨਂ ਜਵੋ, ਤਤੋ ਸੀਘਤਰੋ. ਯਥਾ ਚ, ਭਿਕ੍ਖਵੇ, ਤਸ੍ਸ ਪੁਰਿਸਸ੍ਸ ਜਵੋ, ਯਥਾ ਚ ਚਨ੍ਦਿਮਸੂਰਿਯਾਨਂ ਜਵੋ, ਯਥਾ ਚ ਯਾ ਦੇਵਤਾ ਚਨ੍ਦਿਮਸੂਰਿਯਾਨਂ ਪੁਰਤੋ ਧਾਵਨ੍ਤਿ, ਤਾਸਂ ਦੇਵਤਾਨਂ ਜਵੋ, ਤਤੋ ਸੀਘਤਰਂ ਆਯੁਸਙ੍ਖਾਰਾ ਖੀਯਨ੍ਤਿ, ਤਸ੍ਮਾਤਿਹ, ਭਿਕ੍ਖਵੇ, ਏਵਂ ਸਿਕ੍ਖਿਤਬ੍ਬਂ ‘ਅਪ੍ਪਮਤ੍ਤਾ ਵਿਹਰਿਸ੍ਸਾਮਾ’ਤਿ. ਏਵਞ੍ਹਿ ਵੋ, ਭਿਕ੍ਖਵੇ, ਸਿਕ੍ਖਿਤਬ੍ਬ’’ਨ੍ਤਿ –

ਇਮਸ੍ਸ ਸੁਤ੍ਤਸ੍ਸ ਕਥਿਤਦਿਵਸਤੋ ਦੁਤਿਯਦਿਵਸੇ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਸਤ੍ਥਾ ਅਤ੍ਤਨੋ ਬੁਦ੍ਧਵਿਸਯੇ ਠਤ੍ਵਾ ਇਮੇਸਂ ਸਤ੍ਤਾਨਂ ਆਯੁਸਙ੍ਖਾਰੇ ਇਤ੍ਤਰੇ ਦੁਬ੍ਬਲੇ ਕਤ੍ਵਾ ਪਰਿਦੀਪੇਨ੍ਤੋ ਪੁਥੁਜ੍ਜਨਭਿਕ੍ਖੂ ਅਤਿਵਿਯ ਸਨ੍ਤਾਸਂ ਪਾਪੇਸਿ, ਅਹੋ ਬੁਦ੍ਧਬਲਂ ਨਾਮਾ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਸ੍ਵਾਹਂ ਇਦਾਨਿ ਸਬ੍ਬਞ੍ਞੁਤਂ ਪਤ੍ਤੋ ਆਯੁਸਙ੍ਖਾਰਾਨਂ ਇਤ੍ਤਰਭਾਵਂ ਦਸ੍ਸੇਤ੍ਵਾ ਭਿਕ੍ਖੂ ਸਂਵੇਜੇਤ੍ਵਾ ਧਮ੍ਮਂ ਦੇਸੇਮਿ, ਮਯਾ ਹਿ ਪੁਬ੍ਬੇ ਅਹੇਤੁਕਹਂਸਯੋਨਿਯਂ ਨਿਬ੍ਬਤ੍ਤੇਨਪਿ ਆਯੁਸਙ੍ਖਾਰਾਨਂ ਇਤ੍ਤਰਭਾਵਂ ਦਸ੍ਸੇਤ੍ਵਾ ਬਾਰਾਣਸਿਰਾਜਾਨਂ ਆਦਿਂ ਕਤ੍ਵਾ ਸਕਲਰਾਜਪਰਿਸਂ ਸਂਵੇਜੇਤ੍ਵਾ ਧਮ੍ਮੋ ਦੇਸਿਤੋ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਜਵਨਹਂਸਯੋਨਿਯਂ ਨਿਬ੍ਬਤ੍ਤਿਤ੍ਵਾ ਨਵੁਤਿਹਂਸਸਹਸ੍ਸਪਰਿਵੁਤੋ ਚਿਤ੍ਤਕੂਟੇ ਪਟਿਵਸਤਿ. ਸੋ ਏਕਦਿਵਸਂ ਜਮ੍ਬੁਦੀਪਤਲੇ ਏਕਸ੍ਮਿਂ ਸਰੇ ਸਪਰਿਵਾਰੋ ਸਯਂਜਾਤਸਾਲਿਂ ਖਾਦਿਤ੍ਵਾ ਆਕਾਸੇ ਸੁਵਣ੍ਣਕਿਲਞ੍ਜਂ ਪਤ੍ਥਰਨ੍ਤੋ ਵਿਯ ਮਹਨ੍ਤੇਨ ਪਰਿਵਾਰੇਨ ਬਾਰਾਣਸਿਨਗਰਸ੍ਸ ਮਤ੍ਥਕੇਨ ਮਨ੍ਦਮਨ੍ਦਾਯ ਵਿਲਾਸਗਤਿਯਾ ਚਿਤ੍ਤਕੂਟਂ ਗਚ੍ਛਤਿ. ਅਥ ਨਂ ਬਾਰਾਣਸਿਰਾਜਾ ਦਿਸ੍ਵਾ ‘‘ਇਮਿਨਾਪਿ ਮਾਦਿਸੇਨ ਰਞ੍ਞਾ ਭਵਿਤਬ੍ਬ’’ਨ੍ਤਿ ਅਮਚ੍ਚਾਨਂ ਵਤ੍ਵਾ ਤਸ੍ਮਿਂ ਸਿਨੇਹਂ ਉਪ੍ਪਾਦੇਤ੍ਵਾ ਮਾਲਾਗਨ੍ਧਵਿਲੇਪਨਂ ਗਹੇਤ੍ਵਾ ਮਹਾਸਤ੍ਤਂ ਓਲੋਕੇਤ੍ਵਾ ਸਬ੍ਬਤੂਰਿਯਾਨਿ ਪਗ੍ਗਣ੍ਹਾਪੇਸਿ. ਮਹਾਸਤ੍ਤੋ ਅਤ੍ਤਨੋ ਸਕ੍ਕਾਰਂ ਕਰੋਨ੍ਤਂ ਦਿਸ੍ਵਾ ਹਂਸੇ ਪੁਚ੍ਛਿ ‘‘ਰਾਜਾ, ਮਮ ਏਵਰੂਪਂ ਸਕ੍ਕਾਰਂ ਕਰੋਨ੍ਤੋ ਕਿਂ ਪਚ੍ਚਾਸੀਸਤੀ’’ਤਿ? ‘‘ਤੁਮ੍ਹੇਹਿ ਸਦ੍ਧਿਂ ਮਿਤ੍ਤਭਾਵਂ ਦੇਵਾ’’ਤਿ. ‘‘ਤੇਨ ਹਿ ਰਞ੍ਞੋ ਅਮ੍ਹੇਹਿ ਸਦ੍ਧਿਂ ਮਿਤ੍ਤਭਾਵੋ ਹੋਤੂ’’ਤਿ ਰਞ੍ਞਾ ਸਦ੍ਧਿਂ ਮਿਤ੍ਤਭਾਵਂ ਕਤ੍ਵਾ ਪਕ੍ਕਾਮਿ. ਅਥੇਕਦਿਵਸਂ ਰਞ੍ਞੋ ਉਯ੍ਯਾਨਂ ਗਤਕਾਲੇ ਅਨੋਤਤ੍ਤਦਹਂ ਗਨ੍ਤ੍ਵਾ ਏਕੇਨ ਪਕ੍ਖੇਨ ਉਦਕਂ, ਏਕੇਨ ਚਨ੍ਦਨਚੁਣ੍ਣਂ ਆਦਾਯ ਆਗਨ੍ਤ੍ਵਾ ਰਾਜਾਨਂ ਤੇਨ ਉਦਕੇਨ ਨ੍ਹਾਪੇਤ੍ਵਾ ਚਨ੍ਦਨਚੁਣ੍ਣੇਨ ਓਕਿਰਿਤ੍ਵਾ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ਸਪਰਿਵਾਰੋ ਚਿਤ੍ਤਕੂਟਂ ਅਗਮਾਸਿ. ਤਤੋ ਪਟ੍ਠਾਯ ਰਾਜਾ ਮਹਾਸਤ੍ਤਂ ਦਟ੍ਠੁਕਾਮੋ ਹੁਤ੍ਵਾ ‘‘ਸਹਾਯੋ ਮੇ ਅਜ੍ਜ ਆਗਮਿਸ੍ਸਤਿ, ਸਹਾਯੋ ਮੇ ਅਜ੍ਜ ਆਗਮਿਸ੍ਸਤੀ’’ਤਿ ਆਗਮਨਮਗ੍ਗਂ ਓਲੋਕੇਨ੍ਤੋ ਅਚ੍ਛਤਿ.

ਤਦਾ ਮਹਾਸਤ੍ਤਸ੍ਸ ਕਨਿਟ੍ਠਾ ਦ੍ਵੇ ਹਂਸਪੋਤਕਾ ‘‘ਸੂਰਿਯੇਨ ਸਦ੍ਧਿਂ ਜਵਿਸ੍ਸਾਮਾ’’ਤਿ ਮਨ੍ਤੇਤ੍ਵਾ ਮਹਾਸਤ੍ਤਸ੍ਸ ਆਰੋਚੇਸੁਂ ‘‘ਮਯਂ ਸੂਰਿਯੇਨ ਸਦ੍ਧਿਂ ਜਵਿਸ੍ਸਾਮਾ’’ਤਿ. ‘‘ਤਾਤਾ, ਸੂਰਿਯਜਵੋ ਨਾਮ ਸੀਘੋ, ਸੂਰਿਯੇਨ ਸਦ੍ਧਿਂ ਜਵਿਤੁਂ ਨ ਸਕ੍ਖਿਸ੍ਸਥ, ਅਨ੍ਤਰਾਵ ਵਿਨਸ੍ਸਿਸ੍ਸਥ, ਮਾ ਗਮਿਤ੍ਥਾ’’ਤਿ. ਤੇ ਦੁਤਿਯਮ੍ਪਿ ਤਤਿਯਮ੍ਪਿ ਯਾਚਿਂਸੁ, ਬੋਧਿਸਤ੍ਤੋਪਿ ਤੇ ਯਾਵਤਤਿਯਂ ਵਾਰੇਸਿਯੇਵ. ਤੇ ਮਾਨਥਦ੍ਧਾ ਅਤ੍ਤਨੋ ਬਲਂ ਅਜਾਨਨ੍ਤਾ ਮਹਾਸਤ੍ਤਸ੍ਸ ਅਨਾਚਿਕ੍ਖਿਤ੍ਵਾਵ ‘‘ਸੂਰਿਯੇਨ ਸਦ੍ਧਿਂ ਜਵਿਸ੍ਸਾਮਾ’’ਤਿ ਸੂਰਿਯੇ ਅਨੁਗ੍ਗਤੇਯੇਵ ਗਨ੍ਤ੍ਵਾ ਯੁਗਨ੍ਧਰਮਤ੍ਥਕੇ ਨਿਸੀਦਿਂਸੁ. ਮਹਾਸਤ੍ਤੋ ਤੇ ਅਦਿਸ੍ਵਾ ‘‘ਕਹਂ ਨੁ ਖੋ ਗਤਾ’’ਤਿ ਪੁਚ੍ਛਿਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ ਚਿਨ੍ਤੇਸਿ ‘‘ਤੇ ਸੂਰਿਯੇਨ ਸਦ੍ਧਿਂ ਜਵਿਤੁਂ ਨ ਸਕ੍ਖਿਸ੍ਸਨ੍ਤਿ, ਅਨ੍ਤਰਾਵ ਵਿਨਸ੍ਸਿਸ੍ਸਨ੍ਤਿ, ਜੀਵਿਤਂ ਤੇਸਂ ਦਸ੍ਸਾਮੀ’’ਤਿ. ਸੋਪਿ ਗਨ੍ਤ੍ਵਾ ਯੁਗਨ੍ਧਰਮਤ੍ਥਕੇਯੇਵ ਨਿਸੀਦਿ. ਅਥ ਉਗ੍ਗਤੇ ਸੂਰਿਯਮਣ੍ਡਲੇ ਹਂਸਪੋਤਕਾ ਉਪ੍ਪਤਿਤ੍ਵਾ ਸੂਰਿਯੇਨ ਸਦ੍ਧਿਂ ਪਕ੍ਖਨ੍ਦਿਂਸੁ, ਮਹਾਸਤ੍ਤੋਪਿ ਤੇਹਿ ਸਦ੍ਧਿਂ ਪਕ੍ਖਨ੍ਦਿ. ਕਨਿਟ੍ਠਭਾਤਿਕੋ ਯਾਵ ਪੁਬ੍ਬਣ੍ਹਸਮਯਾ ਜਵਿਤ੍ਵਾ ਕਿਲਮਿ, ਪਕ੍ਖਸਨ੍ਧੀਸੁ ਅਗ੍ਗਿਉਟ੍ਠਾਨਕਾਲੋ ਵਿਯ ਅਹੋਸਿ. ਸੋ ਬੋਧਿਸਤ੍ਤਸ੍ਸ ਸਞ੍ਞਂ ਅਦਾਸਿ ‘‘ਭਾਤਿਕ, ਨ ਸਕ੍ਕੋਮੀ’’ਤਿ. ਅਥ ਨਂ ਮਹਾਸਤ੍ਤੋ ‘‘ਮਾ ਭਾਯਿ, ਜੀਵਿਤਂ ਤੇ ਦਸ੍ਸਾਮੀ’’ਤਿ ਪਕ੍ਖਪਞ੍ਜਰੇਨ ਪਰਿਕ੍ਖਿਪਿਤ੍ਵਾ ਅਸ੍ਸਾਸੇਤ੍ਵਾ ਚਿਤ੍ਤਕੂਟਪਬ੍ਬਤਂ ਨੇਤ੍ਵਾ ਹਂਸਾਨਂ ਮਜ੍ਝੇ ਠਪੇਤ੍ਵਾ ਪੁਨ ਪਕ੍ਖਨ੍ਦਿਤ੍ਵਾ ਸੂਰਿਯਂ ਪਤ੍ਵਾ ਇਤਰੇਨ ਸਦ੍ਧਿਂ ਪਾਯਾਸਿ. ਸੋਪਿ ਯਾਵ ਉਪਕਟ੍ਠਮਜ੍ਝਨ੍ਹਿਕਾ ਸੂਰਿਯੇਨ ਸਦ੍ਧਿਂ ਜਵਿਤ੍ਵਾ ਕਿਲਮਿ, ਪਕ੍ਖਸਨ੍ਧੀਸੁ ਅਗ੍ਗਿਉਟ੍ਠਾਨਕਾਲੋ ਵਿਯ ਅਹੋਸਿ. ਤਦਾ ਬੋਧਿਸਤ੍ਤਸ੍ਸ ਸਞ੍ਞਂ ਅਦਾਸਿ ‘‘ਭਾਤਿਕ, ਨ ਸਕ੍ਕੋਮੀ’’ਤਿ. ਤਮ੍ਪਿ ਮਹਾਸਤ੍ਤੋ ਤਥੇਵ ਸਮਸ੍ਸਾਸੇਤ੍ਵਾ ਪਕ੍ਖਪਞ੍ਜਰੇਨਾਦਾਯ ਚਿਤ੍ਤਕੂਟਮੇਵ ਅਗਮਾਸਿ. ਤਸ੍ਮਿਂ ਖਣੇ ਸੂਰਿਯੋ ਨਭਮਜ੍ਝਂ ਪਾਪੁਣਿ.

ਅਥ ਮਹਾਸਤ੍ਤੋ ‘‘ਮਮ ਅਜ੍ਜ ਸਰੀਰਬਲਂ ਵੀਮਂਸਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਕਵੇਗੇਨ ਪਕ੍ਖਨ੍ਦਿਤ੍ਵਾ ਯੁਗਨ੍ਧਰਮਤ੍ਥਕੇ ਨਿਸੀਦਿਤ੍ਵਾ ਤਤੋ ਉਪ੍ਪਤਿਤ੍ਵਾ ਏਕਵੇਗੇਨ ਸੂਰਿਯਂ ਪਾਪੁਣਿਤ੍ਵਾ ਕਾਲੇਨ ਪੁਰਤੋ, ਕਾਲੇਨ ਪਚ੍ਛਤੋ ਜਵਿਤ੍ਵਾ ਚਿਨ੍ਤੇਸਿ ‘‘ਮਯ੍ਹਂ ਸੂਰਿਯੇਨ ਸਦ੍ਧਿਂ ਜਵਨਂ ਨਾਮ ਨਿਰਤ੍ਥਕਂ ਅਯੋਨਿਸੋਮਨਸਿਕਾਰਸਮ੍ਭੂਤਂ, ਕਿਂ ਮੇ ਇਮਿਨਾ, ਬਾਰਾਣਸਿਂ ਗਨ੍ਤ੍ਵਾ ਮਮ ਸਹਾਯਕਸ੍ਸ ਰਞ੍ਞੋ ਅਤ੍ਥਯੁਤ੍ਤਂ ਧਮ੍ਮਯੁਤ੍ਤਂ ਕਥਂ ਕਥੇਸ੍ਸਾਮੀ’’ਤਿ. ਸੋ ਨਿਵਤ੍ਤਿਤ੍ਵਾ ਸੂਰਿਯੇ ਨਭਮਜ੍ਝਂ ਅਨਤਿਕ੍ਕਨ੍ਤੇਯੇਵ ਸਕਲਚਕ੍ਕਵਾਲ਼ਗਬ੍ਭਂ ਅਨ੍ਤਨ੍ਤੇਨ ਅਨੁਸਂਯਾਯਿਤ੍ਵਾ ਵੇਗਂ ਪਰਿਹਾਪੇਨ੍ਤੋ ਸਕਲਜਮ੍ਬੁਦੀਪਂ ਅਨ੍ਤਨ੍ਤੇਨ ਅਨੁਸਂਯਾਯਿਤ੍ਵਾ ਬਾਰਾਣਸਿਂ ਪਾਪੁਣਿ. ਦ੍ਵਾਦਸਯੋਜਨਿਕਂ ਸਕਲਨਗਰਂ ਹਂਸਚ੍ਛਨ੍ਨਂ ਵਿਯ ਅਹੋਸਿ, ਛਿਦ੍ਦਂ ਨਾਮ ਨ ਪਞ੍ਞਾਯਿ, ਅਨੁਕ੍ਕਮੇਨ ਵੇਗੇ ਪਰਿਹਾਯਨ੍ਤੇ ਆਕਾਸੇ ਛਿਦ੍ਦਾਨਿ ਪਞ੍ਞਾਯਿਂਸੁ. ਮਹਾਸਤ੍ਤੋ ਵੇਗਂ ਪਰਿਹਾਪੇਤ੍ਵਾ ਆਕਾਸਤੋ ਓਤਰਿਤ੍ਵਾ ਸੀਹਪਞ੍ਜਰਸ੍ਸ ਅਭਿਮੁਖਟ੍ਠਾਨੇ ਅਟ੍ਠਾਸਿ. ਰਾਜਾ ‘‘ਆਗਤੋ ਮੇ ਸਹਾਯੋ’’ਤਿ ਸੋਮਨਸ੍ਸਪ੍ਪਤ੍ਤੋ ਤਸ੍ਸ ਨਿਸੀਦਨਤ੍ਥਾਯ ਕਞ੍ਚਨਪੀਠਂ ਪਞ੍ਞਪੇਤ੍ਵਾ ‘‘ਸਮ੍ਮ, ਪਵਿਸ, ਇਧ ਨਿਸੀਦਾ’’ਤਿ ਵਤ੍ਵਾ ਪਠਮਂ ਗਾਥਮਾਹ –

੨੭. ‘‘ਇਧੇਵ ਹਂਸ ਨਿਪਤ, ਪਿਯਂ ਮੇ ਤਵ ਦਸ੍ਸਨਂ;

ਇਸ੍ਸਰੋਸਿ ਅਨੁਪ੍ਪਤ੍ਤੋ, ਯਮਿਧਤ੍ਥਿ ਪਵੇਦਯਾ’’ਤਿ.

ਤਤ੍ਥ ‘‘ਇਧਾ’’ਤਿ ਕਞ੍ਚਨਪੀਠਂ ਸਨ੍ਧਾਯਾਹ. ਨਿਪਤਾਤਿ ਨਿਸੀਦ. ਇਸ੍ਸਰੋਸੀਤਿ ਤ੍ਵਂ ਇਮਸ੍ਸ ਠਾਨਸ੍ਸ ਇਸ੍ਸਰੋ ਸਾਮਿ ਹੁਤ੍ਵਾ ਆਗਤੋਸੀਤਿ ਵਦਤਿ. ਯਮਿਧਤ੍ਥਿ ਪਵੇਦਯਾਤਿ ਯਂ ਇਮਸ੍ਮਿਂ ਨਿਵੇਸਨੇ ਅਤ੍ਥਿ, ਤਂ ਅਪਰਿਸਙ੍ਕਨ੍ਤੋ ਅਮ੍ਹਾਕਂ ਕਥੇਹੀਤਿ.

ਮਹਾਸਤ੍ਤੋ ਕਞ੍ਚਨਪੀਠੇ ਨਿਸੀਦਿ. ਰਾਜਾ ਸਤਪਾਕਸਹਸ੍ਸਪਾਕੇਹਿ ਤੇਲੇਹਿ ਤਸ੍ਸ ਪਕ੍ਖਨ੍ਤਰਾਨਿ ਮਕ੍ਖੇਤ੍ਵਾ ਕਞ੍ਚਨਤਟ੍ਟਕੇ ਮਧੁਲਾਜੇ ਚ ਮਧੁਰੋਦਕਞ੍ਚ ਸਕ੍ਖਰੋਦਕਞ੍ਚ ਦਾਪੇਤ੍ਵਾ ਮਧੁਰਪਟਿਸਨ੍ਥਾਰਂ ਕਤ੍ਵਾ ‘‘ਸਮ੍ਮ, ਤ੍ਵਂ ਏਕਕੋਵ ਆਗਤੋਸਿ, ਕੁਹਿਂ ਅਗਮਿਤ੍ਥਾ’’ਤਿ ਪੁਚ੍ਛਿ. ਸੋ ਤਂ ਪਵਤ੍ਤਿਂ ਵਿਤ੍ਥਾਰੇਨ ਕਥੇਸਿ. ਅਥ ਨਂ ਰਾਜਾ ਆਹ ‘‘ਸਮ੍ਮ, ਮਮਪਿ ਸੂਰਿਯੇਨ ਸਦ੍ਧਿਂ ਜਵਿਤਵੇਗਂ ਦਸ੍ਸੇਹੀ’’ਤਿ. ਮਹਾਰਾਜ, ਨ ਸਕ੍ਕਾ ਸੋ ਵੇਗੋ ਦਸ੍ਸੇਤੁਨ੍ਤਿ. ਤੇਨ ਹਿ ਮੇ ਸਰਿਕ੍ਖਕਮਤ੍ਤਂ ਦਸ੍ਸੇਹੀਤਿ. ਸਾਧੁ, ਮਹਾਰਾਜ, ਸਰਿਕ੍ਖਕਮਤ੍ਤਂ ਦਸ੍ਸੇਸ੍ਸਾਮਿ, ਅਕ੍ਖਣਵੇਧੀ ਧਨੁਗ੍ਗਹੇ ਸਨ੍ਨਿਪਾਤੇਹੀਤਿ. ਰਾਜਾ ਸਨ੍ਨਿਪਾਤੇਸਿ. ਮਹਾਸਤ੍ਤੋ ਚਤ੍ਤਾਰੋ ਧਨੁਗ੍ਗਹੇ ਗਹੇਤ੍ਵਾ ਨਿਵੇਸਨਾ ਓਰੁਯ੍ਹ ਰਾਜਙ੍ਗਣੇ ਸਿਲਾਥਮ੍ਭਂ ਨਿਖਣਾਪੇਤ੍ਵਾ ਅਤ੍ਤਨੋ ਗੀਵਾਯਂ ਘਣ੍ਟਂ ਬਨ੍ਧਾਪੇਤ੍ਵਾ ਸਿਲਾਥਮ੍ਭਮਤ੍ਥਕੇ ਨਿਸੀਦਿਤ੍ਵਾ ਚਤ੍ਤਾਰੋ ਧਨੁਗ੍ਗਹੇ ਥਮ੍ਭਂ ਨਿਸ੍ਸਾਯ ਚਤੁਦ੍ਦਿਸਾਭਿਮੁਖੇ ਠਪੇਤ੍ਵਾ ‘‘ਮਹਾਰਾਜ, ਇਮੇ ਚਤ੍ਤਾਰੋ ਜਨਾ ਏਕਪ੍ਪਹਾਰੇਨੇਵ ਚਤੁਦ੍ਦਿਸਾਭਿਮੁਖਾ ਚਤ੍ਤਾਰਿ ਕਣ੍ਡਾਨਿ ਖਿਪਨ੍ਤੁ, ਤਾਨਿ ਅਹਂ ਪਥਵਿਂ ਅਪ੍ਪਤ੍ਤਾਨੇਵ ਆਹਰਿਤ੍ਵਾ ਏਤੇਸਂ ਪਾਦਮੂਲੇ ਪਾਤੇਸ੍ਸਾਮਿ. ਮਮ ਕਣ੍ਡਗਹਣਤ੍ਥਾਯ ਗਤਭਾਵਂ ਘਣ੍ਟਸਦ੍ਦਸਞ੍ਞਾਯ ਜਾਨੇਯ੍ਯਾਸਿ, ਮਂ ਪਨ ਨ ਪਸ੍ਸਿਸ੍ਸਸੀ’’ਤਿ ਵਤ੍ਵਾ ਤੇਹਿ ਏਕਪ੍ਪਹਾਰੇਨੇਵ ਖਿਤ੍ਤਕਣ੍ਡਾਨਿ ਆਹਰਿਤ੍ਵਾ ਤੇਸਂ ਪਾਦਮੂਲੇ ਪਾਤੇਤ੍ਵਾ ਸਿਲਾਥਮ੍ਭਮਤ੍ਥਕੇ ਨਿਸਿਨ੍ਨਮੇਵ ਅਤ੍ਤਾਨਂ ਦਸ੍ਸੇਤ੍ਵਾ ‘‘ਦਿਟ੍ਠੋ ਤੇ, ਮਹਾਰਾਜ, ਮਯ੍ਹਂ ਵੇਗੋ’’ਤਿ ਵਤ੍ਵਾ ‘‘ਮਹਾਰਾਜ, ਅਯਂ ਵੇਗੋ ਮਯ੍ਹਂ ਨੇਵ ਉਤ੍ਤਮੋ, ਮਜ੍ਝਿਮੋ, ਪਰਿਤ੍ਤੋ ਲਾਮਕਵੇਗੋ ਏਸ, ਏਵਂ ਸੀਘੋ, ਮਹਾਰਾਜ, ਅਮ੍ਹਾਕਂ ਵੇਗੋ’’ਤਿ ਆਹ.

ਅਥ ਨਂ ਰਾਜਾ ਪੁਚ੍ਛਿ ‘‘ਸਮ੍ਮ, ਅਤ੍ਥਿ ਪਨ ਤੁਮ੍ਹਾਕਂ ਵੇਗਤੋ ਅਞ੍ਞੋ ਸੀਘਤਰੋ ਵੇਗੋ’’ਤਿ? ‘‘ਆਮ, ਮਹਾਰਾਜ, ਅਮ੍ਹਾਕਂ ਉਤ੍ਤਮਵੇਗਤੋਪਿ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਇਮੇਸਂ ਸਤ੍ਤਾਨਂ ਆਯੁਸਙ੍ਖਾਰਾ ਸੀਘਤਰਂ ਖੀਯਨ੍ਤਿ ਭਿਜ੍ਜਨ੍ਤਿ, ਖਯਂ ਗਚ੍ਛਨ੍ਤੀ’’ਤਿ ਖਣਿਕਨਿਰੋਧਵਸੇਨ ਰੂਪਧਮ੍ਮਾਨਂ ਨਿਰੋਧਂ ਦਸ੍ਸੇਤਿ, ਤਤੋ ਨਾਮਧਮ੍ਮਾਨਂ. ਰਾਜਾ ਮਹਾਸਤ੍ਤਸ੍ਸ ਕਥਂ ਸੁਤ੍ਵਾ ਮਰਣਭਯਭੀਤੋ ਸਤਿਂ ਪਚ੍ਚੁਪਟ੍ਠਾਪੇਤੁਂ ਅਸਕ੍ਕੋਨ੍ਤੋ ਭੂਮਿਯਂ ਪਤਿ, ਮਹਾਜਨੋ ਉਤ੍ਰਾਸਂ ਪਤ੍ਤੋ ਅਹੋਸਿ. ਰਞ੍ਞੋ ਮੁਖਂ ਉਦਕੇਨ ਸਿਞ੍ਚਿਤ੍ਵਾ ਸਤਿਂ ਲਭਾਪੇਸਿ. ਅਥ ਨਂ ਮਹਾਸਤ੍ਤੋ ‘‘ਮਹਾਰਾਜ, ਮਾ ਭਾਯਿ, ਮਰਣਸ੍ਸਤਿਂ ਭਾਵੇਹਿ, ਧਮ੍ਮਂ ਚਰਾਹਿ, ਦਾਨਾਦੀਨਿ ਪੁਞ੍ਞਾਨਿ ਕਰੋਹਿ, ਅਪ੍ਪਮਤ੍ਤੋ ਹੋਹਿ, ਦੇਵਾ’’ਤਿ ਓਵਦਿ. ਅਥ ਰਾਜਾ ‘‘ਸਾਮਿ, ਮਯਂ ਤੁਮ੍ਹਾਦਿਸੇਨ ਞਾਣਬਲਸਮ੍ਪਨ੍ਨੇਨ ਆਚਰਿਯੇਨ ਵਿਨਾ ਵਸਿਤੁਂ ਨ ਸਕ੍ਖਿਸ੍ਸਾਮ, ਚਿਤ੍ਤਕੂਟਂ ਅਗਨ੍ਤ੍ਵਾ ਮਯ੍ਹਂ ਧਮ੍ਮਂ ਦੇਸੇਨ੍ਤੋ ਮਯ੍ਹਂ ਓਵਾਦਾਚਰਿਯੋ ਹੁਤ੍ਵਾ ਇਧੇਵ ਵਸਾਹੀ’’ਤਿ ਯਾਚਨ੍ਤੋ ਦ੍ਵੇ ਗਾਥਾ ਅਭਾਸਿ –

੨੮. ‘‘ਸਵਨੇਨ ਏਕਸ੍ਸ ਪਿਯਾ ਭਵਨ੍ਤਿ, ਦਿਸ੍ਵਾ ਪਨੇਕਸ੍ਸ ਵਿਯੇਤਿ ਛਨ੍ਦੋ;

ਦਿਸ੍ਵਾ ਚ ਸੁਤ੍ਵਾ ਚ ਪਿਯਾ ਭਵਨ੍ਤਿ, ਕਚ੍ਚਿਨ੍ਨੁ ਮੇ ਪੀਯਸਿ ਦਸ੍ਸਨੇਨ.

੨੯. ‘‘ਸਵਨੇਨ ਪਿਯੋ ਮੇਸਿ, ਭਿਯ੍ਯੋ ਚਾਗਮ੍ਮ ਦਸ੍ਸਨਂ;

ਏਵਂ ਪਿਯਦਸ੍ਸਨੋ ਮੇ, ਵਸ ਹਂਸ ਮਮਨ੍ਤਿਕੇ’’ਤਿ.

ਤਾਸਂ ਅਤ੍ਥੋ – ਸਮ੍ਮ ਹਂਸਰਾਜ ਸਵਨੇਨ ਏਕਸ੍ਸ ਏਕਚ੍ਚੇ ਪਿਯਾ ਹੋਨ੍ਤਿ, ‘‘ਏਵਂ ਗੁਣੋ ਨਾਮਾ’’ਤਿ ਸੁਤ੍ਵਾ ਸਵਨੇਨ ਪਿਯਾਯਤਿ, ਏਕਸ੍ਸ ਪਨ ਏਕਚ੍ਚੇ ਦਿਸ੍ਵਾਵ ਛਨ੍ਦੋ ਵਿਗਚ੍ਛਤਿ, ਪੇਮਂ ਅਨ੍ਤਰਧਾਯਤਿ, ਖਾਦਿਤੁਂ ਆਗਤਾ ਯਕ੍ਖਾ ਵਿਯ ਉਪਟ੍ਠਹਨ੍ਤਿ, ਏਕਸ੍ਸ ਏਕਚ੍ਚੇ ਦਿਸ੍ਵਾ ਚ ਸੁਤ੍ਵਾ ਚਾਤਿ ਉਭਯਥਾਪਿ ਪਿਯਾ ਹੋਨ੍ਤਿ, ਤੇਨ ਤਂ ਪੁਚ੍ਛਾਮਿ. ਕਚ੍ਚਿਨ੍ਨੁ ਮੇ ਪੀਯਸਿ ਦਸ੍ਸਨੇਨਾਤਿ ਕਚ੍ਚਿ ਨੁ ਤ੍ਵਂ ਮਂ ਪਿਯਾਯਸਿ, ਮਯ੍ਹਂ ਪਨ ਤ੍ਵਂ ਸਵਨੇਨ ਪਿਯੋਵ, ਦਸ੍ਸਨਂ ਪਨਾਗਮ੍ਮ ਅਤਿਪਿਯੋਵ. ਏਵਂ ਮਮ ਪਿਯਦਸ੍ਸਨੋ ਸਮਾਨੋ ਚਿਤ੍ਤਕੂਟਂ ਅਗਨ੍ਤ੍ਵਾ ਇਧ ਮਮ ਸਨ੍ਤਿਕੇ ਵਸਾਤਿ.

ਬੋਧਿਸਤ੍ਤੋ ਆਹ –

੩੦. ‘‘ਵਸੇਯ੍ਯਾਮ ਤਵਾਗਾਰੇ, ਨਿਚ੍ਚਂ ਸਕ੍ਕਤਪੂਜਿਤਾ;

ਮਤ੍ਤੋ ਚ ਏਕਦਾ ਵਜ੍ਜੇ, ਹਂਸਰਾਜਂ ਪਚਨ੍ਤੁ ਮੇ’’ਤਿ.

ਤਤ੍ਥ ਮਤ੍ਤੋ ਚ ਏਕਦਾਤਿ ਮਹਾਰਾਜ, ਮਯਂ ਤਵ ਘਰੇ ਨਿਚ੍ਚਂ ਪੂਜਿਤਾ ਵਸੇਯ੍ਯਾਮ, ਤ੍ਵਂ ਪਨ ਕਦਾਚਿ ਸੁਰਾਮਦਮਤ੍ਤੋ ਮਂਸਖਾਦਨਤ੍ਥਂ ‘‘ਹਂਸਰਾਜਂ ਪਚਨ੍ਤੁ ਮੇ’’ਤਿ ਵਦੇਯ੍ਯਾਸਿ, ਅਥ ਏਵਂ ਤਵ ਅਨੁਜੀਵਿਨੋ ਮਂ ਮਾਰੇਤ੍ਵਾ ਪਚੇਯ੍ਯੁਂ, ਤਦਾਹਂ ਕਿਂ ਕਰਿਸ੍ਸਾਮੀਤਿ.

ਅਥਸ੍ਸ ਰਾਜਾ ‘‘ਤੇਨ ਹਿ ਮਜ੍ਜਮੇਵ ਨ ਪਿਵਿਸ੍ਸਾਮੀ’’ਤਿ ਪਟਿਞ੍ਞਂ ਦਾਤੁਂ ਇਮਂ ਗਾਥਮਾਹ –

੩੧. ‘‘ਧਿਰਤ੍ਥੁ ਤਂ ਮਜ੍ਜਪਾਨਂ, ਯਂ ਮੇ ਪਿਯਤਰਂ ਤਯਾ;

ਨ ਚਾਪਿ ਮਜ੍ਜਂ ਪਿਸ੍ਸਾਮਿ, ਯਾਵ ਮੇ ਵਚ੍ਛਸੀ ਘਰੇ’’ਤਿ.

ਤਤੋ ਪਰਂ ਬੋਧਿਸਤ੍ਤੋ ਛ ਗਾਥਾ ਆਹ –

੩੨. ‘‘ਸੁਵਿਜਾਨਂ ਸਿਙ੍ਗਾਲਾਨਂ, ਸਕੁਣਾਨਞ੍ਚ ਵਸ੍ਸਿਤਂ;

ਮਨੁਸ੍ਸਵਸ੍ਸਿਤਂ ਰਾਜ, ਦੁਬ੍ਬਿਜਾਨਤਰਂ ਤਤੋ.

੩੩. ‘‘ਅਪਿ ਚੇ ਮਞ੍ਞਤੀ ਪੋਸੋ, ਞਾਤਿ ਮਿਤ੍ਤੋ ਸਖਾਤਿ ਵਾ;

ਯੋ ਪੁਬ੍ਬੇ ਸੁਮਨੋ ਹੁਤ੍ਵਾ, ਪਚ੍ਛਾ ਸਮ੍ਪਜ੍ਜਤੇ ਦਿਸੋ.

੩੪. ‘‘ਯਸ੍ਮਿਂ ਮਨੋ ਨਿਵਿਸਤਿ, ਅਵਿਦੂਰੇ ਸਹਾਪਿ ਸੋ;

ਸਨ੍ਤਿਕੇਪਿ ਹਿ ਸੋ ਦੂਰੇ, ਯਸ੍ਮਿਂ ਨਾਵਿਸਤੇ ਮਨੋ.

੩੫. ‘‘ਅਨ੍ਤੋਪਿ ਸੋ ਹੋਤਿ ਪਸਨ੍ਨਚਿਤ੍ਤੋ, ਪਾਰਂ ਸਮੁਦ੍ਦਸ੍ਸ ਪਸਨ੍ਨਚਿਤ੍ਤੋ;

ਅਨ੍ਤੋਪਿ ਸੋ ਹੋਤਿ ਪਦੁਟ੍ਠਚਿਤ੍ਤੋ, ਪਾਰਂ ਸਮੁਦ੍ਦਸ੍ਸ ਪਦੁਟ੍ਠਚਿਤ੍ਤੋ.

੩੬. ‘‘ਸਂਵਸਨ੍ਤਾ ਵਿਵਸਨ੍ਤਿ, ਯੇ ਦਿਸਾ ਤੇ ਰਥੇਸਭ;

ਆਰਾ ਸਨ੍ਤੋ ਸਂਵਸਨ੍ਤਿ, ਮਨਸਾ ਰਟ੍ਠਵਡ੍ਢਨ.

੩੭. ‘‘ਅਤਿਚਿਰਂ ਨਿਵਾਸੇਨ, ਪਿਯੋ ਭਵਤਿ ਅਪ੍ਪਿਯੋ;

ਆਮਨ੍ਤ ਖੋ ਤਂ ਗਚ੍ਛਾਮ, ਪੁਰਾ ਤੇ ਹੋਮ ਅਪ੍ਪਿਯਾ’’ਤਿ.

ਤਤ੍ਥ ਵਸ੍ਸਿਤਨ੍ਤਿ ਮਹਾਰਾਜ, ਤਿਰਚ੍ਛਾਨਗਤਾ ਉਜੁਹਦਯਾ, ਤੇਨ ਤੇਸਂ ਵਸ੍ਸਿਤਂ ਸੁਵਿਜਾਨਂ, ਮਨੁਸ੍ਸਾ ਪਨ ਕਕ੍ਖਲ਼ਾ, ਤਸ੍ਮਾ ਤੇਸਂ ਵਚਨਂ ਦੁਬ੍ਬਿਜਾਨਤਰਨ੍ਤਿ ਅਤ੍ਥੋ. ਯੋ ਪੁਬ੍ਬੇਤਿ ਯੋ ਪੁਗ੍ਗਲੋ ਪਠਮਮੇਵ ਅਤ੍ਤਮਨੋ ਹੁਤ੍ਵਾ ‘‘ਤ੍ਵਂ ਮਯ੍ਹਂ ਞਾਤਕੋ ਮਿਤ੍ਤੋ ਪਾਣਸਮੋ ਸਖਾ’’ਤਿ ਅਪਿ ਏਵਂ ਮਞ੍ਞਤਿ, ਸ੍ਵੇਵ ਪਚ੍ਛਾ ਦਿਸੋ ਵੇਰੀ ਸਮ੍ਪਜ੍ਜਤਿ, ਏਵਂ ਦੁਬ੍ਬਿਜਾਨਂ ਨਾਮ ਮਨੁਸ੍ਸਹਦਯਨ੍ਤਿ. ਨਿਵਿਸਤੀਤਿ ਮਹਾਰਾਜ, ਯਸ੍ਮਿਂ ਪੁਗ੍ਗਲੇ ਪੇਮਵਸੇਨ ਮਨੋ ਨਿਵਿਸਤਿ, ਸੋ ਦੂਰੇ ਵਸਨ੍ਤੋਪਿ ਅਵਿਦੂਰੇ ਸਹਾਪਿ ਵਸਤਿਯੇਵ ਨਾਮ. ਯਸ੍ਮਿਂ ਪਨ ਪੁਗ੍ਗਲੇ ਮਨੋ ਨ ਨਿਵਿਸਤਿ ਅਪੇਤਿ, ਸੋ ਸਨ੍ਤਿਕੇ ਵਸਨ੍ਤੋਪਿ ਦੂਰੇਯੇਵ.

ਅਨ੍ਤੋਪਿ ਸੋ ਹੋਤੀਤਿ ਮਹਾਰਾਜ, ਯੋ ਸਹਾਯੋ ਪਸਨ੍ਨਚਿਤ੍ਤੋ, ਸੋ ਚਿਤ੍ਤੇਨ ਅਲ੍ਲੀਨਤ੍ਤਾ ਪਾਰਂ ਸਮੁਦ੍ਦਸ੍ਸ ਵਸਨ੍ਤੋਪਿ ਅਨ੍ਤੋਯੇਵ ਹੋਤਿ. ਯੋ ਪਨ ਪਦੁਟ੍ਠਚਿਤ੍ਤੋ, ਸੋ ਚਿਤ੍ਤੇਨ ਅਨਲ੍ਲੀਨਤ੍ਤਾ ਅਨ੍ਤੋ ਵਸਨ੍ਤੋਪਿ ਪਾਰਂ ਸਮੁਦ੍ਦਸ੍ਸ ਨਾਮ. ਯੇ ਦਿਸਾ ਤੇਤਿ ਯੇ ਵੇਰਿਨੋ ਪਚ੍ਚਤ੍ਥਿਕਾ, ਤੇ ਏਕਤੋ ਵਸਨ੍ਤਾਪਿ ਦੂਰੇ ਵਸਨ੍ਤਿਯੇਵ ਨਾਮ. ਸਨ੍ਤੋ ਪਨ ਪਣ੍ਡਿਤਾ ਆਰਾ ਠਿਤਾਪਿ ਮੇਤ੍ਤਾਭਾਵਿਤੇਨ ਮਨਸਾ ਆਵਜ੍ਜੇਨ੍ਤਾ ਸਂਵਸਨ੍ਤਿਯੇਵ. ਪੁਰਾ ਤੇ ਹੋਮਾਤਿ ਯਾਵ ਤਵ ਅਪ੍ਪਿਯਾ ਨ ਹੋਮ, ਤਾਵਦੇਵ ਤਂ ਆਮਨ੍ਤੇਤ੍ਵਾ ਗਚ੍ਛਾਮਾਤਿ ਵਦਤਿ.

ਅਥ ਨਂ ਰਾਜਾ ਆਹ –

੩੮. ‘‘ਏਵਂ ਚੇ ਯਾਚਮਾਨਾਨਂ, ਅਞ੍ਜਲਿਂ ਨਾਵਬੁਜ੍ਝਸਿ;

ਪਰਿਚਾਰਕਾਨਂ ਸਤਂ, ਵਚਨਂ ਨ ਕਰੋਸਿ ਨੋ;

ਏਵਂ ਤਂ ਅਭਿਯਾਚਾਮ, ਪੁਨ ਕਯਿਰਾਸਿ ਪਰਿਯਾਯ’’ਨ੍ਤਿ.

ਤਤ੍ਥ ਏਵਂ ਚੇਤਿ ਸਚੇ ਹਂਸਰਾਜ, ਏਵਂ ਅਞ੍ਜਲਿਂ ਪਗ੍ਗਯ੍ਹ ਯਾਚਮਾਨਾਨਂ ਅਮ੍ਹਾਕਂ ਇਮਂ ਅਞ੍ਜਲਿਂ ਨਾਵਬੁਜ੍ਝਸਿ, ਤਵ ਪਰਿਚਾਰਕਾਨਂ ਸਮਾਨਾਨਂ ਵਚਨਂ ਨ ਕਰੋਸਿ, ਅਥ ਨਂ ਏਵਂ ਯਾਚਾਮ. ਪੁਨ ਕਯਿਰਾਸਿ ਪਰਿਯਾਯਨ੍ਤਿ ਕਾਲੇਨ ਕਾਲਂ ਇਧ ਆਗਮਨਾਯ ਵਾਰਂ ਕਰੇਯ੍ਯਾਸੀਤਿ ਅਤ੍ਥੋ.

ਤਤੋ ਬੋਧਿਸਤ੍ਤੋ ਆਹ –

੩੯. ‘‘ਏਵਂ ਚੇ ਨੋ ਵਿਹਰਤਂ, ਅਨ੍ਤਰਾਯੋ ਨ ਹੇਸ੍ਸਤਿ;

ਤੁਯ੍ਹਂ ਚਾਪਿ ਮਹਾਰਾਜ, ਮਯ੍ਹਞ੍ਚ ਰਟ੍ਠਵਡ੍ਢਨ;

ਅਪ੍ਪੇਵ ਨਾਮ ਪਸ੍ਸੇਮੁ, ਅਹੋਰਤ੍ਤਾਨਮਚ੍ਚਯੇ’’ਤਿ.

ਤਤ੍ਥ ਏਵਂ ਚੇ ਨੋਤਿ ਮਹਾਰਾਜ, ਮਾ ਚਿਨ੍ਤਯਿਤ੍ਥ, ਸਚੇ ਅਮ੍ਹਾਕਮ੍ਪਿ ਏਵਂ ਵਿਹਰਨ੍ਤਾਨਂ ਜੀਵਿਤਨ੍ਤਰਾਯੋ ਨ ਭਵਿਸ੍ਸਤਿ, ਅਪ੍ਪੇਵ ਨਾਮ ਉਭੋ ਅਞ੍ਞਮਞ੍ਞਂ ਪਸ੍ਸਿਸ੍ਸਾਮ, ਅਪਿਚ ਤ੍ਵਂ ਮਯਾ ਦਿਨ੍ਨਂ ਓਵਾਦਮੇਵ ਮਮ ਠਾਨੇ ਠਪੇਤ੍ਵਾ ਏਵਂ ਇਤ੍ਤਰਜੀਵਿਤੇ ਲੋਕਸਨ੍ਨਿਵਾਸੇ ਅਪ੍ਪਮਤ੍ਤੋ ਹੁਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਰੋਨ੍ਤੋ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਹਿ, ਏਵਞ੍ਹਿ ਮੇ ਓਵਾਦਂ ਕਰੋਨ੍ਤੋ ਮਂ ਪਸ੍ਸਿਸ੍ਸਤਿਯੇਵਾਤਿ. ਏਵਂ ਮਹਾਸਤ੍ਤੋ ਰਾਜਾਨਂ ਓਵਦਿਤ੍ਵਾ ਚਿਤ੍ਤਕੂਟਪਬ੍ਬਤਮੇਵ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਭਿਕ੍ਖਵੇ, ਪੁਬ੍ਬੇ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤੇਨਪਿ ਮਯਾ ਆਯੁਸਙ੍ਖਾਰਾਨਂ ਦੁਬ੍ਬਲਭਾਵਂ ਦਸ੍ਸੇਤ੍ਵਾ ਧਮ੍ਮੋ ਦੇਸਿਤੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਕਨਿਟ੍ਠੋ ਮੋਗ੍ਗਲ੍ਲਾਨੋ, ਮਜ੍ਝਿਮੋ ਸਾਰਿਪੁਤ੍ਤੋ, ਸੇਸਹਂਸਗਣਾ ਬੁਦ੍ਧਪਰਿਸਾ, ਜਵਨਹਂਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਜਵਨਹਂਸਜਾਤਕਵਣ੍ਣਨਾ ਤਤਿਯਾ.

[੪੭੭] ੪. ਚੂਲ਼ਨਾਰਦਜਾਤਕਵਣ੍ਣਨਾ

ਨ ਤੇ ਕਟ੍ਠਾਨਿ ਭਿਨ੍ਨਾਨੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਥੁਲ੍ਲਕੁਮਾਰਿਕਾਪਲੋਭਨਂ ਆਰਬ੍ਭ ਕਥੇਸਿ. ਸਾਵਤ੍ਥਿਵਾਸਿਨੋ ਕਿਰੇਕਸ੍ਸ ਕੁਲਸ੍ਸ ਪਨ੍ਨਰਸਸੋਲ਼ਸਵਸ੍ਸੁਦ੍ਦੇਸਿਕਾ ਧੀਤਾ ਅਹੋਸਿ ਸੋਭਗ੍ਗਪ੍ਪਤ੍ਤਾ, ਨ ਚ ਨਂ ਕੋਚਿ ਵਾਰੇਸਿ. ਅਥਸ੍ਸਾ ਮਾਤਾ ਚਿਨ੍ਤੇਸਿ ‘‘ਮਮ ਧੀਤਾ ਵਯਪ੍ਪਤ੍ਤਾ, ਨ ਚ ਨਂ ਕੋਚਿ ਵਾਰੇਤਿ, ਆਮਿਸੇਨ ਮਚ੍ਛਂ ਵਿਯ ਏਤਾਯ ਏਕਂ ਸਾਕਿਯਭਿਕ੍ਖੁਂ ਪਲੋਭੇਤ੍ਵਾ ਉਪ੍ਪਬ੍ਬਾਜੇਤ੍ਵਾ ਤਂ ਨਿਸ੍ਸਾਯ ਜੀਵਿਸ੍ਸਾਮੀ’’ਤਿ. ਤਦਾ ਚ ਸਾਵਤ੍ਥਿਵਾਸੀ ਏਕੋ ਕੁਲਪੁਤ੍ਤੋ ਸਾਸਨੇ ਉਰਂ ਦਤ੍ਵਾ ਪਬ੍ਬਜਿਤ੍ਵਾ ਉਪਸਮ੍ਪਨ੍ਨਕਾਲਤੋ ਪਟ੍ਠਾਯ ਸਿਕ੍ਖਾਕਾਮਤਂ ਪਹਾਯ ਆਲਸਿਯੋ ਸਰੀਰਮਣ੍ਡਨਮਨੁਯੁਤ੍ਤੋ ਵਿਹਾਸਿ. ਮਹਾਉਪਾਸਿਕਾ ਗੇਹੇ ਯਾਗੁਖਾਦਨੀਯਭੋਜਨੀਯਾਨਿ ਸਮ੍ਪਾਦੇਤ੍ਵਾ ਦ੍ਵਾਰੇ ਠਤ੍ਵਾ ਅਨ੍ਤਰਵੀਥਿਯਾ ਗਚ੍ਛਨ੍ਤੇਸੁ ਭਿਕ੍ਖੂਸੁ ਏਕਂ ਭਿਕ੍ਖੁਂ ਰਸਤਣ੍ਹਾਯ ਬਨ੍ਧਿਤ੍ਵਾ ਗਹੇਤੁਂ ਸਕ੍ਕੁਣੇਯ੍ਯਰੂਪਂ ਉਪਧਾਰੇਨ੍ਤੀ ਤੇਪਿਟਕਆਭਿਧਮ੍ਮਿਕਵਿਨਯਧਰਾਨਂ ਮਹਨ੍ਤੇਨ ਪਰਿਵਾਰੇਨ ਗਚ੍ਛਨ੍ਤਾਨਂ ਅਨ੍ਤਰੇ ਕਞ੍ਚਿ ਗਯ੍ਹੁਪਗਂ ਅਦਿਸ੍ਵਾ ਤੇਸਂ ਪਚ੍ਛਤੋ ਗਚ੍ਛਨ੍ਤਾਨਂ ਮਧੁਰਧਮ੍ਮਕਥਿਕਾਨਂ ਅਚ੍ਛਿਨ੍ਨਵਲਾਹਕਸਦਿਸਾਨਂ ਪਿਣ੍ਡਪਾਤਿਕਾਨਮ੍ਪਿ ਅਨ੍ਤਰੇ ਕਞ੍ਚਿ ਅਦਿਸ੍ਵਾਵ ਏਕਂ ਯਾਵ ਬਹਿ ਅਪਙ੍ਗਾ ਅਕ੍ਖੀਨਿ ਅਞ੍ਜੇਤ੍ਵਾ ਕੇਸੇ ਓਸਣ੍ਹੇਤ੍ਵਾ ਦੁਕੂਲਨ੍ਤਰਵਾਸਕਂ ਨਿਵਾਸੇਤ੍ਵਾ ਘਟਿਤਮਟ੍ਠਂ ਚੀਵਰਂ ਪਾਰੁਪਿਤ੍ਵਾ ਮਣਿਵਣ੍ਣਪਤ੍ਤਂ ਆਦਾਯ ਮਨੋਰਮਂ ਛਤ੍ਤਂ ਧਾਰਯਮਾਨਂ ਵਿਸ੍ਸਟ੍ਠਿਨ੍ਦ੍ਰਿਯਂ ਕਾਯਦਲ਼੍ਹਿਬਹੁਲਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਇਮਂ ਸਕ੍ਕਾ ਗਣ੍ਹਿਤੁ’’ਨ੍ਤਿ ਗਨ੍ਤ੍ਵਾ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ‘‘ਏਥ, ਭਨ੍ਤੇ’’ਤਿ ਘਰਂ ਆਨੇਤ੍ਵਾ ਨਿਸੀਦਾਪੇਤ੍ਵਾ ਯਾਗੁਆਦੀਹਿ ਪਰਿਵਿਸਿਤ੍ਵਾ ਕਤਭਤ੍ਤਕਿਚ੍ਚਂ ਤਂ ਭਿਕ੍ਖੁਂ ‘‘ਭਨ੍ਤੇ, ਇਤੋ ਪਟ੍ਠਾਯ ਇਧੇਵਾਗਚ੍ਛੇਯ੍ਯਾਥਾ’’ਤਿ ਆਹ. ਸੋਪਿ ਤਤੋ ਪਟ੍ਠਾਯ ਤਤ੍ਥੇਵ ਗਨ੍ਤ੍ਵਾ ਅਪਰਭਾਗੇ ਵਿਸ੍ਸਾਸਿਕੋ ਅਹੋਸਿ.

ਅਥੇਕਦਿਵਸਂ ਮਹਾਉਪਾਸਿਕਾ ਤਸ੍ਸ ਸਵਨਪਥੇ ਠਤ੍ਵਾ ‘‘ਇਮਸ੍ਮਿਂ ਗੇਹੇ ਉਪਭੋਗਪਰਿਭੋਗਮਤ੍ਤਾ ਅਤ੍ਥਿ, ਤਥਾਰੂਪੋ ਪਨ ਮੇ ਪੁਤ੍ਤੋ ਵਾ ਜਾਮਾਤਾ ਵਾ ਗੇਹਂ ਵਿਚਾਰਿਤੁਂ ਸਮਤ੍ਥੋ ਨਤ੍ਥੀ’’ਤਿ ਆਹ. ਸੋ ਤਸ੍ਸਾ ਵਚਨਂ ਸੁਤ੍ਵਾ ‘‘ਕਿਮਤ੍ਥਂ ਨੁ ਖੋ ਕਥੇਤੀ’’ਤਿ ਥੋਕਂ ਹਦਯੇ ਵਿਦ੍ਧੋ ਵਿਯ ਅਹੋਸਿ. ਸਾ ਧੀਤਰਂ ਆਹ ‘‘ਇਮਂ ਪਲੋਭੇਤ੍ਵਾ ਤਵ ਵਸੇ ਵਤ੍ਤਾਪੇਹੀ’’ਤਿ. ਸਾ ਤਤੋ ਪਟ੍ਠਾਯ ਮਣ੍ਡਿਤਪਸਾਧਿਤਾ ਇਤ੍ਥਿਕੁਤ੍ਤਵਿਲਾਸੇਹਿ ਤਂ ਪਲੋਭੇਸਿ. ਥੁਲ੍ਲਕੁਮਾਰਿਕਾਤਿ ਨ ਚ ਥੂਲਸਰੀਰਾ ਦਟ੍ਠਬ੍ਬਾ, ਥੂਲਾ ਵਾ ਹੋਤੁ ਕਿਸਾ ਵਾ, ਪਞ੍ਚਕਾਮਗੁਣਿਕਰਾਗੇਨ ਪਨ ਥੂਲਤਾਯ ‘‘ਥੁਲ੍ਲਕੁਮਾਰਿਕਾ’’ਤਿ ਵੁਚ੍ਚਤਿ. ਸੋ ਦਹਰੋ ਕਿਲੇਸਵਸਿਕੋ ਹੁਤ੍ਵਾ ‘‘ਨ ਦਾਨਾਹਂ ਬੁਦ੍ਧਸਾਸਨੇ ਪਤਿਟ੍ਠਾਤੁਂ ਸਕ੍ਖਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਵਿਹਾਰਂ ਗਨ੍ਤ੍ਵਾ ਪਤ੍ਤਚੀਵਰਂ ਨਿਯ੍ਯਾਦੇਤ੍ਵਾ ਅਸੁਕਟ੍ਠਾਨਂ ਨਾਮ ਗਮਿਸ੍ਸਾਮਿ, ਤਤ੍ਰ ਮੇ ਵਤ੍ਥਾਨਿ ਪੇਸੇਥਾ’’ਤਿ ਵਤ੍ਵਾ ਵਿਹਾਰਂ ਗਨ੍ਤ੍ਵਾ ਪਤ੍ਤਚੀਵਰਂ ਨਿਯ੍ਯਾਦੇਤ੍ਵਾ ‘‘ਉਕ੍ਕਣ੍ਠਿਤੋਸ੍ਮੀ’’ਤਿ ਆਚਰਿਯੁਪਜ੍ਝਾਯੇ ਆਹ. ਤੇ ਤਂ ਆਦਾਯ ਸਤ੍ਥੁ ਸਨ੍ਤਿਕਂ ਨੇਤ੍ਵਾ ‘‘ਅਯਂ ਭਿਕ੍ਖੁ ਉਕ੍ਕਣ੍ਠਿਤੋ’’ਤਿ ਆਰੋਚੇਸੁਂ. ਸਤ੍ਥਾ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਕੇਨ ਉਕ੍ਕਣ੍ਠਾਪਿਤੋਸੀ’’ਤਿ ਵਤ੍ਵਾ ‘‘ਥੁਲ੍ਲਕੁਮਾਰਿਕਾਯ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਪੁਬ੍ਬੇਪੇਸਾ ਤਵ ਅਰਞ੍ਞੇ ਵਸਨ੍ਤਸ੍ਸ ਬ੍ਰਹ੍ਮਚਰਿਯਨ੍ਤਰਾਯਂ ਕਤ੍ਵਾ ਮਹਨ੍ਤਂ ਅਨਤ੍ਥਮਕਾਸਿ, ਪੁਨ ਤ੍ਵਂ ਏਤਮੇਵ ਨਿਸ੍ਸਾਯ ਕਸ੍ਮਾ ਉਕ੍ਕਣ੍ਠਿਤੋਸੀ’’ਤਿ ਵਤ੍ਵਾ ਭਿਕ੍ਖੂਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਸਿਰਟ੍ਠੇ ਮਹਾਭੋਗੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਉਗ੍ਗਹਿਤਸਿਪ੍ਪੋ ਕੁਟੁਮ੍ਬਂ ਸਣ੍ਠਪੇਸਿ, ਅਥਸ੍ਸ ਭਰਿਯਾ ਏਕਂ ਪੁਤ੍ਤਂ ਵਿਜਾਯਿਤ੍ਵਾ ਕਾਲਮਕਾਸਿ. ਸੋ ‘‘ਯਥੇਵ ਮੇ ਪਿਯਭਰਿਯਾਯ, ਏਵਂ ਮਯਿਪਿ ਮਰਣਂ ਆਗਮਿਸ੍ਸਤਿ, ਕਿਂ ਮੇ ਘਰਾਵਾਸੇਨ, ਪਬ੍ਬਜਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਕਾਮੇ ਪਹਾਯ ਪੁਤ੍ਤਂ ਆਦਾਯ ਹਿਮਵਨ੍ਤਂ ਪਵਿਸਿਤ੍ਵਾ ਤੇਨ ਸਦ੍ਧਿਂ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਾ ਨਿਬ੍ਬਤ੍ਤੇਤ੍ਵਾ ਵਨਮੂਲਫਲਾਹਾਰੋ ਅਰਞ੍ਞੇ ਵਿਹਾਸਿ. ਤਦਾ ਪਚ੍ਚਨ੍ਤਵਾਸਿਨੋ ਚੋਰਾ ਜਨਪਦਂ ਪਵਿਸਿਤ੍ਵਾ ਗਾਮਂ ਪਹਰਿਤ੍ਵਾ ਕਰਮਰੇ ਗਹੇਤ੍ਵਾ ਭਣ੍ਡਿਕਂ ਉਕ੍ਖਿਪਾਪੇਤ੍ਵਾ ਪੁਨ ਪਚ੍ਚਨ੍ਤਂ ਪਾਪਯਿਂਸੁ. ਤੇਸਂ ਅਨ੍ਤਰੇ ਏਕਾ ਅਭਿਰੂਪਾ ਕੁਮਾਰਿਕਾ ਕੇਰਾਟਿਕਪਞ੍ਞਾਯ ਸਮਨ੍ਨਾਗਤਾ ਚਿਨ੍ਤੇਸਿ ‘‘ਇਮੇ ਅਮ੍ਹੇ ਗਹੇਤ੍ਵਾ ਦਾਸਿਭੋਗੇਨ ਪਰਿਭੁਞ੍ਜਿਸ੍ਸਨ੍ਤਿ, ਏਕੇਨ ਉਪਾਯੇਨ ਪਲਾਯਿਤੁਂ ਵਟ੍ਟਤੀ’’ਤਿ. ਸਾ ‘‘ਸਾਮਿ, ਸਰੀਰਕਿਚ੍ਚਂ ਕਾਤੁਕਾਮਾਮ੍ਹਿ, ਥੋਕਂ ਪਟਿਕ੍ਕਮਿਤ੍ਵਾ ਤਿਟ੍ਠਥਾ’’ਤਿ ਵਤ੍ਵਾ ਚੋਰੇ ਵਞ੍ਚੇਤ੍ਵਾ ਪਲਾਯਿਤ੍ਵਾ ਅਰਞ੍ਞਂ ਪਵਿਸਨ੍ਤੀ ਬੋਧਿਸਤ੍ਤਸ੍ਸ ਪੁਤ੍ਤਂ ਅਸ੍ਸਮੇ ਠਪੇਤ੍ਵਾ ਫਲਾਫਲਤ੍ਥਾਯ ਗਤਕਾਲੇ ਪੁਬ੍ਬਣ੍ਹਸਮਯੇ ਤਂ ਅਸ੍ਸਮਂ ਪਾਪੁਣਿਤ੍ਵਾ ਤਂ ਤਾਪਸਕੁਮਾਰਂ ਕਾਮਰਤਿਯਾ ਪਲੋਭੇਤ੍ਵਾ ਸੀਲਮਸ੍ਸ ਭਿਨ੍ਦਿਤ੍ਵਾ ਅਤ੍ਤਨੋ ਵਸੇ ਵਤ੍ਤੇਤ੍ਵਾ ‘‘ਕਿਂ ਤੇ ਅਰਞ੍ਞਵਾਸੇਨ, ਏਹਿ ਗਾਮਂ ਗਨ੍ਤ੍ਵਾ ਵਸਿਸ੍ਸਾਮ, ਤਤ੍ਰ ਹਿ ਰੂਪਾਦਯੋ ਕਾਮਗੁਣਾ ਸੁਲਭਾ’’ਤਿ ਆਹ. ਸੋਪਿ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਪਿਤਾ ਤਾਵ ਮੇ ਅਰਞ੍ਞਤੋ ਫਲਾਫਲਂ ਆਹਰਿਤੁਂ ਗਤੋ, ਤਂ ਦਿਸ੍ਵਾ ਉਭੋਪਿ ਏਕਤੋਵ ਗਮਿਸ੍ਸਾਮਾ’’ਤਿ ਆਹ.

ਸਾ ਚਿਨ੍ਤੇਸਿ – ‘‘ਅਯਂ ਤਰੁਣਦਾਰਕੋ ਨ ਕਿਞ੍ਚਿ ਜਾਨਾਤਿ, ਪਿਤਰਾ ਪਨਸ੍ਸ ਮਹਲ੍ਲਕਕਾਲੇ ਪਬ੍ਬਜਿਤੇਨ ਭਵਿਤਬ੍ਬਂ, ਸੋ ਆਗਨ੍ਤ੍ਵਾ ‘ਇਧ ਕਿਂ ਕਰੋਸੀ’ਤਿ ਮਂ ਪੋਥੇਤ੍ਵਾ ਪਾਦੇ ਗਹੇਤ੍ਵਾ ਕਡ੍ਢੇਤ੍ਵਾ ਅਰਞ੍ਞੇ ਖਿਪਿਸ੍ਸਤਿ, ਤਸ੍ਮਿਂ ਅਨਾਗਤੇਯੇਵ ਪਲਾਯਿਸ੍ਸਾਮੀ’’ਤਿ. ਅਥ ਨਂ ‘‘ਅਹਂ ਪੁਰਤੋ ਗਚ੍ਛਾਮਿ, ਤ੍ਵਂ ਪਚ੍ਛਾ ਆਗਚ੍ਛੇਯ੍ਯਾਸੀ’’ਤਿ ਵਤ੍ਵਾ ਮਗ੍ਗਸਞ੍ਞਂ ਆਚਿਕ੍ਖਿਤ੍ਵਾ ਪਕ੍ਕਾਮਿ. ਸੋ ਤਸ੍ਸਾ ਗਤਕਾਲਤੋ ਪਟ੍ਠਾਯ ਉਪ੍ਪਨ੍ਨਦੋਮਨਸ੍ਸੋ ਯਥਾ ਪੁਰੇ ਕਿਞ੍ਚਿ ਵਤ੍ਤਂ ਅਕਤ੍ਵਾ ਸਸੀਸਂ ਪਾਰੁਪਿਤ੍ਵਾ ਅਨ੍ਤੋਪਣ੍ਣਸਾਲਾਯ ਪਜ੍ਝਾਯਨ੍ਤੋ ਨਿਪਜ੍ਜਿ. ਮਹਾਸਤ੍ਤੋ ਫਲਾਫਲਂ ਆਦਾਯ ਆਗਨ੍ਤ੍ਵਾ ਤਸ੍ਸਾ ਪਦਵਲਞ੍ਜਂ ਦਿਸ੍ਵਾ ‘‘ਅਯਂ ਮਾਤੁਗਾਮਸ੍ਸ ਪਦਵਲਞ੍ਜੋ, ‘‘ਪੁਤ੍ਤਸ੍ਸ ਮਮ ਸੀਲਂ ਭਿਨ੍ਨਂ ਭਵਿਸ੍ਸਤੀ’’ਤਿ ਚਿਨ੍ਤੇਨ੍ਤੋ ਪਣ੍ਣਸਾਲਂ ਪਵਿਸਿਤ੍ਵਾ ਫਲਾਫਲਂ ਓਤਾਰੇਤ੍ਵਾ ਪੁਤ੍ਤਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –