੮. ਅਟ੍ਠਕਨਿਪਾਤੋ

[੪੧੭] ੧. ਕਚ੍ਚਾਨਿਜਾਤਕਵਣ੍ਣਨਾ

ਓਦਾਤਵਤ੍ਥਾ ਸੁਚਿ ਅਲ੍ਲਕੇਸਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਮਾਤੁਪੋਸਕਂ ਉਪਾਸਕਂ ਆਰਬ੍ਭ ਕਥੇਸਿ. ਸੋ ਕਿਰ ਸਾਵਤ੍ਥਿਯਂ ਕੁਲਦਾਰਕੋ ਆਚਾਰਸਮ੍ਪਨ੍ਨੋ ਪਿਤਰਿ ਕਾਲਕਤੇ ਮਾਤੁਦੇਵਤੋ ਹੁਤ੍ਵਾ ਮੁਖਧੋਵਨਦਨ੍ਤਕਟ੍ਠਦਾਨਨ੍ਹਾਪਨਪਾਦਧੋਵਨਾਦਿਵੇਯ੍ਯਾਵਚ੍ਚਕਮ੍ਮੇਨ ਚੇਵ ਯਾਗੁਭਤ੍ਤਾਦੀਹਿ ਚ ਮਾਤਰਂ ਪਟਿਜਗ੍ਗਿ. ਅਥ ਨਂ ਮਾਤਾ ‘‘ਤਾਤ, ਤਵ ਅਞ੍ਞਾਨਿਪਿ ਘਰਾਵਾਸਕਿਚ੍ਚਾਨਿ ਅਤ੍ਥਿ, ਏਕਂ ਸਮਜਾਤਿਕਂ ਕੁਲਕੁਮਾਰਿਕਂ ਗਣ੍ਹਾਹਿ, ਸਾ ਮਂ ਪੋਸੇਸ੍ਸਤਿ, ਤ੍ਵਮ੍ਪਿ ਅਤ੍ਤਨੋ ਕਮ੍ਮਂ ਕਰਿਸ੍ਸਸੀ’’ਤਿ ਆਹ. ‘‘ਅਮ੍ਮ, ਅਹਂ ਅਤ੍ਤਨੋ ਹਿਤਸੁਖਂ ਅਪਚ੍ਚਾਸੀਸਮਾਨੋ ਤੁਮ੍ਹੇ ਉਪਟ੍ਠਹਾਮਿ, ਕੋ ਅਞ੍ਞੋ ਏਵਂ ਉਪਟ੍ਠਹਿਸ੍ਸਤੀ’’ਤਿ? ‘‘ਕੁਲਵਡ੍ਢਨਕਮ੍ਮਂ ਨਾਮ ਤਾਤ, ਕਾਤੁਂ ਵਟ੍ਟਤੀ’’ਤਿ. ‘‘ਨ ਮਯ੍ਹਂ ਘਰਾਵਾਸੇਨ ਅਤ੍ਥੋ, ਅਹਂ ਤੁਮ੍ਹੇ ਉਪਟ੍ਠਹਿਤ੍ਵਾ ਤੁਮ੍ਹਾਕਂ ਧੂਮਕਾਲੇ ਪਬ੍ਬਜਿਸ੍ਸਾਮੀ’’ਤਿ. ਅਥਸ੍ਸ ਮਾਤਾ ਪੁਨਪ੍ਪੁਨਂ ਯਾਚਿਤ੍ਵਾਪਿ ਮਨਂ ਅਲਭਮਾਨਾ ਤਸ੍ਸ ਛਨ੍ਦਂ ਅਗ੍ਗਹੇਤ੍ਵਾ ਸਮਜਾਤਿਕਂ ਕੁਲਕੁਮਾਰਿਕਂ ਆਨੇਸਿ. ਸੋ ਮਾਤਰਂ ਅਪ੍ਪਟਿਕ੍ਖਿਪਿਤ੍ਵਾ ਤਾਯ ਸਦ੍ਧਿਂ ਸਂਵਾਸਂ ਕਪ੍ਪੇਸਿ. ਸਾਪਿ ‘‘ਮਯ੍ਹਂ ਸਾਮਿਕੋ ਮਹਨ੍ਤੇਨ ਉਸ੍ਸਾਹੇਨ ਮਾਤਰਂ ਉਪਟ੍ਠਹਤਿ, ਅਹਮ੍ਪਿ ਨਂ ਉਪਟ੍ਠਹਿਸ੍ਸਾਮਿ, ਏਵਮਸ੍ਸ ਪਿਯਾ ਭਵਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਂ ਸਕ੍ਕਚ੍ਚਂ ਉਪਟ੍ਠਹਿ. ਸੋ ‘‘ਅਯਂ ਮੇ ਮਾਤਰਂ ਸਕ੍ਕਚ੍ਚਂ ਉਪਟ੍ਠਹੀ’’ਤਿ ਤਤੋ ਪਟ੍ਠਾਯ ਲਦ੍ਧਲਦ੍ਧਾਨਿ ਮਧੁਰਖਾਦਨੀਯਾਦੀਨਿ ਤਸ੍ਸਾਯੇਵ ਦੇਤਿ. ਸਾ ਅਪਰਭਾਗੇ ਚਿਨ੍ਤੇਸਿ ‘‘ਅਯਂ ਲਦ੍ਧਲਦ੍ਧਾਨਿ ਮਧੁਰਖਾਦਨੀਯਾਦੀਨਿ ਮਯ੍ਹਞ੍ਞੇਵ ਦੇਤਿ, ਅਦ੍ਧਾ ਮਾਤਰਂ ਨੀਹਰਿਤੁਕਾਮੋ ਭਵਿਸ੍ਸਤਿ, ਨੀਹਰਣੂਪਾਯਮਸ੍ਸਾ ਕਰਿਸ੍ਸਾਮੀ’’ਤਿ ਏਵਂ ਅਯੋਨਿਸੋ ਉਮ੍ਮੁਜ੍ਜਿਤ੍ਵਾ ਏਕਂ ਦਿਵਸਂ ਆਹ – ‘‘ਸਾਮਿ, ਤਯਿ ਬਹਿ ਨਿਕ੍ਖਮਨ੍ਤੇ ਤਵ ਮਾਤਾ ਮਂ ਅਕ੍ਕੋਸਤੀ’’ਤਿ. ਸੋ ਤੁਣ੍ਹੀ ਅਹੋਸਿ.

ਸਾ ਚਿਨ੍ਤੇਸਿ – ‘‘ਇਮਂ ਮਹਲ੍ਲਿਕਂ ਉਜ੍ਝਾਪੇਤ੍ਵਾ ਪੁਤ੍ਤਸ੍ਸ ਪਟਿਕੂਲਂ ਕਾਰੇਸ੍ਸਾਮੀ’’ਤਿ. ਤਤੋ ਪਟ੍ਠਾਯ ਯਾਗੁਂ ਦਦਮਾਨਾ ਅਚ੍ਚੁਣ੍ਹਂ ਵਾ ਅਤਿਸੀਤਲਂ ਵਾ ਅਤਿਲੋਣਂ ਵਾ ਅਲੋਣਂ ਵਾ ਦੇਤਿ. ‘‘ਅਮ੍ਮ, ਅਚ੍ਚੁਣ੍ਹਾ’’ਤਿ ਵਾ ‘‘ਅਤਿਲੋਣਾ’’ਤਿ ਵਾ ਵੁਤ੍ਤੇ ਪੂਰੇਤ੍ਵਾ ਸੀਤੋਦਕਂ ਪਕ੍ਖਿਪਤਿ. ਪੁਨ ‘‘ਅਤਿਸੀਤਲਾ, ਅਲੋਣਾਯੇਵਾ’’ਤਿ ਵੁਤ੍ਤੇ ‘‘ਇਦਾਨੇਵ ‘ਅਚ੍ਚੁਣ੍ਹਾ, ਅਤਿਲੋਣਾ’ਤਿ ਵਤ੍ਵਾ ਪੁਨ ‘ਅਤਿਸੀਤਲਾ, ਅਲੋਣਾ’ਤਿ ਵਦਸਿ, ਕਾ ਤਂ ਤੋਸੇਤੁਂ ਸਕ੍ਖਿਸ੍ਸਤੀ’’ਤਿ ਮਹਾਸਦ੍ਦਂ ਕਰੋਤਿ. ਨ੍ਹਾਨੋਦਕਮ੍ਪਿ ਅਚ੍ਚੁਣ੍ਹਂ ਕਤ੍ਵਾ ਪਿਟ੍ਠਿਯਂ ਆਸਿਞ੍ਚਤਿ. ‘‘ਅਮ੍ਮ, ਪਿਟ੍ਠਿ ਮੇ ਦਹਤੀ’’ਤਿ ਚ ਵੁਤ੍ਤੇ ਪੁਨ ਪੂਰੇਤ੍ਵਾ ਸੀਤੋਦਕਂ ਪਕ੍ਖਿਪਤਿ. ‘‘ਅਤਿਸੀਤਂ, ਅਮ੍ਮਾ’’ਤਿ ਵੁਤ੍ਤੇ ‘‘ਇਦਾਨੇਵ ‘ਅਚ੍ਚੁਣ੍ਹ’ਨ੍ਤਿ ਵਤ੍ਵਾ ਪੁਨ ‘ਅਤਿਸੀਤ’ਨ੍ਤਿ ਵਦਤਿ, ਕਾ ਏਤਿਸ੍ਸਾ ਅਵਮਾਨਂ ਸਹਿਤੁਂ ਸਕ੍ਖਿਸ੍ਸਤੀ’’ਤਿ ਪਟਿਵਿਸ੍ਸਕਾਨਂ ਕਥੇਸਿ. ‘‘ਅਮ੍ਮ, ਮਞ੍ਚਕੇ ਮੇ ਬਹੂ ਮਙ੍ਗੁਲਾ’’ਤਿ ਚ ਵੁਤ੍ਤਾ ਮਞ੍ਚਕਂ ਨੀਹਰਿਤ੍ਵਾ ਤਸ੍ਸ ਉਪਰਿ ਅਤ੍ਤਨੋ ਮਞ੍ਚਕਂ ਪੋਥੇਤ੍ਵਾ ‘‘ਪੋਥਿਤੋ ਮੇ’’ਤਿ ਅਤਿਹਰਿਤ੍ਵਾ ਪਞ੍ਞਪੇਤਿ. ਮਹਾਉਪਾਸਿਕਾ ਦਿਗੁਣੇਹਿ ਮਙ੍ਗੁਲੇਹਿ ਖਜ੍ਜਮਾਨਾ ਸਬ੍ਬਰਤ੍ਤਿਂ ਨਿਸਿਨ੍ਨਾਵ ਵੀਤਿਨਾਮੇਤ੍ਵਾ ‘‘ਅਮ੍ਮ, ਸਬ੍ਬਰਤ੍ਤਿਂ ਮਙ੍ਗੁਲੇਹਿ ਖਾਦਿਤਾਮ੍ਹੀ’’ਤਿ ਵਦਤਿ. ਇਤਰਾ ‘‘ਹਿਯ੍ਯੋ ਤੇ ਮਞ੍ਚਕੋ ਪੋਥਿਤੋ, ਕਾ ਇਮਿਸ੍ਸਾ ਕਿਚ੍ਚਂ ਨਿਤ੍ਥਰਿਤੁਂ ਸਕ੍ਕੋਤੀ’’ਤਿ ਪਟਿਵਤ੍ਵਾ ‘‘ਇਦਾਨਿ ਨਂ ਪੁਤ੍ਤੇਨ ਉਜ੍ਝਾਪੇਸ੍ਸਾਮੀ’’ਤਿ ਤਤ੍ਥ ਤਤ੍ਥ ਖੇਲ਼ਸਿਙ੍ਘਾਣਿਕਾਦੀਨਿ ਵਿਪ੍ਪਕਿਰਿਤ੍ਵਾ ‘‘ਕਾ ਇਮਂ ਸਕਲਗੇਹਂ ਅਸੁਚਿਂ ਕਰੋਤੀ’’ਤਿ ਵੁਤ੍ਤੇ ‘‘ਮਾਤਾ ਤੇ ਏਵਰੂਪਂ ਕਰੋਤਿ, ‘ਮਾ ਕਰੀ’ਤਿ ਵੁਚ੍ਚਮਾਨਾ ਕਲਹਂ ਕਰੋਤਿ, ਅਹਂ ਏਵਰੂਪਾਯ ਕਾਲ਼ਕਣ੍ਣਿਯਾ ਸਦ੍ਧਿਂ ਏਕਗੇਹੇ ਵਸਿਤੁਂ ਨ ਸਕ੍ਕੋਮਿ, ਏਤਂ ਵਾ ਘਰੇ ਵਸਾਪੇਹਿ, ਮਂ ਵਾ’’ਤਿ ਆਹ.

ਸੋ ਤਸ੍ਸਾ ਵਚਨਂ ਸੁਤ੍ਵਾ ‘‘ਭਦ੍ਦੇ, ਤ੍ਵਂ ਤਰੁਣਾ ਯਤ੍ਥ ਕਤ੍ਥਚਿ ਗਨ੍ਤ੍ਵਾ ਜੀਵਿਤੁਂ ਸਕ੍ਕਾ, ਮਾਤਾ ਪਨ ਮੇ ਜਰਾਦੁਬ੍ਬਲਾ, ਅਹਮੇਵਸ੍ਸਾ ਪਟਿਸਰਣਂ, ਤ੍ਵਂ ਨਿਕ੍ਖਮਿਤ੍ਵਾ ਅਤ੍ਤਨੋ ਕੁਲਗੇਹਂ ਗਚ੍ਛਾਹੀ’’ਤਿ ਆਹ. ਸਾ ਤਸ੍ਸ ਵਚਨਂ ਸੁਤ੍ਵਾ ਭੀਤਾ ਚਿਨ੍ਤੇਸਿ ‘‘ਨ ਸਕ੍ਕਾ ਇਮਂ ਮਾਤੁ ਅਨ੍ਤਰੇ ਭਿਨ੍ਦਿਤੁਂ, ਏਕਂਸੇਨਸ੍ਸ ਮਾਤਾ ਪਿਯਾ, ਸਚੇ ਪਨਾਹਂ ਕੁਲਘਰਂ ਗਮਿਸ੍ਸਂ, ਵਿਧਵਵਾਸਂ ਵਸਨ੍ਤੀ ਦੁਕ੍ਖਿਤਾ ਭਵਿਸ੍ਸਾਮਿ, ਪੁਰਿਮਨਯੇਨੇਵ ਸਸ੍ਸੁਂ ਆਰਾਧੇਤ੍ਵਾ ਪਟਿਜਗ੍ਗਿਸ੍ਸਾਮੀ’’ਤਿ. ਸਾ ਤਤੋ ਪਟ੍ਠਾਯ ਪੁਰਿਮਸਦਿਸਮੇਵ ਤਂ ਪਟਿਜਗ੍ਗਿ. ਅਥੇਕਦਿਵਸਂ ਸੋ ਉਪੋਸਕੋ ਧਮ੍ਮਸ੍ਸਵਨਤ੍ਥਾਯ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ‘‘ਕਿਂ, ਉਪਾਸਕ, ਤ੍ਵਂ ਪੁਞ੍ਞਕਮ੍ਮੇਸੁ ਨ ਪਮਜ੍ਜਸਿ, ਮਾਤੁਉਪਟ੍ਠਾਨਕਮ੍ਮਂ ਪੂਰੇਸੀ’’ਤਿ ਚ ਵੁਤ੍ਤੋ ‘‘ਆਮ, ਭਨ੍ਤੇ, ਸਾ ਪਨ ਮਮ ਮਾਤਾ ਮਯ੍ਹਂ ਅਰੁਚਿਯਾਯੇਵ ਏਕਂ ਕੁਲਦਾਰਿਕਂ ਆਨੇਸਿ, ਸਾ ਇਦਞ੍ਚਿਦਞ੍ਚ ਅਨਾਚਾਰਕਮ੍ਮਂ ਅਕਾਸੀ’’ਤਿ ਸਬ੍ਬਂ ਸਤ੍ਥੁ ਆਚਿਕ੍ਖਿਤ੍ਵਾ ‘‘ਇਤਿ ਭਗਵਾ ਸਾ ਇਤ੍ਥੀ ਨੇਵ ਮਂ ਮਾਤੁ ਅਨ੍ਤਰੇ ਭਿਨ੍ਦਿਤੁਂ ਸਕ੍ਖਿ, ਇਦਾਨਿ ਨਂ ਸਕ੍ਕਚ੍ਚਂ ਉਪਟ੍ਠਹਤੀ’’ਤਿ ਆਹ. ਸਤ੍ਥਾ ਤਸ੍ਸ ਕਥਂ ਸੁਤ੍ਵਾ ‘‘ਇਦਾਨਿ ਤਾਵ ਤ੍ਵਂ ਉਪਾਸਕ, ਤਸ੍ਸਾ ਵਚਨਂ ਨ ਅਕਾਸਿ, ਪੁਬ੍ਬੇ ਪਨੇਤਿਸ੍ਸਾ ਵਚਨੇਨ ਤਵ ਮਾਤਰਂ ਨਿਕ੍ਕਡ੍ਢਿਤ੍ਵਾ ਮਂ ਨਿਸ੍ਸਾਯ ਪੁਨ ਗੇਹਂ ਆਨੇਤ੍ਵਾ ਪਟਿਜਗ੍ਗੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਅਞ੍ਞਤਰਸ੍ਸ ਕੁਲਸ੍ਸ ਪੁਤ੍ਤੋ ਪਿਤਰਿ ਕਾਲਕਤੇ ਮਾਤੁਦੇਵਤੋ ਹੁਤ੍ਵਾ ਵੁਤ੍ਤਨਿਯਾਮੇਨੇਵ ਮਾਤਰਂ ਪਟਿਜਗ੍ਗੀਤਿ ਸਬ੍ਬਂ ਹੇਟ੍ਠਾ ਕਥਿਤਨਯੇਨੇਵ ਵਿਤ੍ਥਾਰੇਤਬ੍ਬਂ. ‘‘ਅਹਂ ਏਵਰੂਪਾਯ ਕਾਲ਼ਕਣ੍ਣਿਯਾ ਸਦ੍ਧਿਂ ਵਸਿਤੁਂ ਨ ਸਕ੍ਕੋਮਿ, ਏਤਂ ਵਾ ਘਰੇ ਵਸਾਪੇਹਿ, ਮਂ ਵਾ’’ਤਿ ਵੁਤ੍ਤੇ ਤਸ੍ਸਾ ਕਥਂ ਗਹੇਤ੍ਵਾ ‘‘ਮਾਤੁਯੇਵ ਮੇ ਦੋਸੋ’’ਤਿ ਮਾਤਰਂ ਆਹ ‘‘ਅਮ੍ਮ, ਤ੍ਵਂ ਨਿਚ੍ਚਂ ਇਮਸ੍ਮਿਂ ਘਰੇ ਕਲਹਂ ਕਰੋਸਿ, ਇਤੋ ਨਿਕ੍ਖਮਿਤ੍ਵਾ ਅਞ੍ਞਸ੍ਮਿਂ ਯਥਾਰੁਚਿਤੇ ਠਾਨੇ ਵਸਾਹੀ’’ਤਿ. ਸਾ ‘‘ਸਾਧੂ’’ਤਿ ਰੋਦਮਾਨਾ ਨਿਕ੍ਖਮਿਤ੍ਵਾ ਏਕਂ ਸਮਿਦ੍ਧਕੁਲਂ ਨਿਸ੍ਸਾਯ ਭਤਿਂ ਕਤ੍ਵਾ ਦੁਕ੍ਖੇਨ ਜੀਵਿਕਂ ਕਪ੍ਪੇਸਿ. ਸਸ੍ਸੁਯਾ ਘਰਾ ਨਿਕ੍ਖਨ੍ਤਕਾਲੇ ਸੁਣਿਸਾਯ ਗਬ੍ਭੋ ਪਤਿਟ੍ਠਹਿ. ਸਾ ‘‘ਤਾਯ ਕਾਲ਼ਕਣ੍ਣਿਯਾ ਗੇਹੇ ਵਸਮਾਨਾਯ ਗਬ੍ਭਮ੍ਪਿ ਨ ਪਟਿਲਭਿਂ, ਇਦਾਨਿ ਮੇ ਗਬ੍ਭੋ ਲਦ੍ਧੋ’’ਤਿ ਪਤਿਨੋ ਚ ਪਟਿਵਿਸ੍ਸਕਾਨਞ੍ਚ ਕਥੇਨ੍ਤੀ ਵਿਚਰਤਿ.

ਅਪਰਭਾਗੇ ਪੁਤ੍ਤਂ ਵਿਜਾਯਿਤ੍ਵਾ ਸਾਮਿਕਂ ਆਹ ‘‘ਤਵ ਮਾਤਰਿ ਗੇਹੇ ਵਸਮਾਨਾਯ ਪੁਤ੍ਤਂ ਨ ਲਭਿਂ, ਇਦਾਨਿ ਮੇ ਲਦ੍ਧੋ, ਇਮਿਨਾਪਿ ਕਾਰਣੇਨ ਤਸ੍ਸਾ ਕਾਲ਼ਕਣ੍ਣਿਭਾਵਂ ਜਾਨਾਹੀ’’ਤਿ. ਇਤਰਾ ‘‘ਮਮ ਕਿਰ ਨਿਕ੍ਕਡ੍ਢਿਤਕਾਲੇ ਪੁਤ੍ਤਂ ਲਭੀ’’ਤਿ ਸੁਤ੍ਵਾ ਚਿਨ੍ਤੇਸਿ ‘‘ਅਦ੍ਧਾ ਇਮਸ੍ਮਿਂ ਲੋਕੇ ਧਮ੍ਮੋ ਮਤੋ ਭਵਿਸ੍ਸਤਿ, ਸਚੇ ਹਿ ਧਮ੍ਮੋ ਮਤੋ ਨ ਭਵੇਯ੍ਯ, ਮਾਤਰਂ ਪੋਥੇਤ੍ਵਾ ਨਿਕ੍ਕਡ੍ਢਨ੍ਤਾ ਪੁਤ੍ਤਂ ਨ ਲਭੇਯ੍ਯੁਂ, ਸੁਖਂ ਨ ਜੀਵੇਯ੍ਯੁਂ, ਧਮ੍ਮਸ੍ਸ ਮਤਕਭਤ੍ਤਂ ਦਸ੍ਸਾਮੀ’’ਤਿ. ਸਾ ਏਕਦਿਵਸਂ ਤਿਲਪਿਟ੍ਠਞ੍ਚ ਤਣ੍ਡੁਲਞ੍ਚ ਪਚਨਥਾਲਿਞ੍ਚ ਦਬ੍ਬਿਞ੍ਚ ਆਦਾਯ ਆਮਕਸੁਸਾਨਂ ਗਨ੍ਤ੍ਵਾ ਤੀਹਿ ਮਨੁਸ੍ਸਸੀਸੇਹਿ ਉਦ੍ਧਨਂ ਕਤ੍ਵਾ ਅਗ੍ਗਿਂ ਜਾਲੇਤ੍ਵਾ ਉਦਕਂ ਓਰੁਯ੍ਹ ਸਸੀਸਂ ਨ੍ਹਤ੍ਵਾ ਸਾਟਕਂ ਨਿਵਾਸੇਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਉਦ੍ਧਨਟ੍ਠਾਨਂ ਗਨ੍ਤ੍ਵਾ ਕੇਸੇ ਮੋਚੇਤ੍ਵਾ ਤਣ੍ਡੁਲੇ ਧੋਵਿਤੁਂ ਆਰਭਿ. ਤਦਾ ਬੋਧਿਸਤ੍ਤੋ ਸਕ੍ਕੋ ਦੇਵਰਾਜਾ ਅਹੋਸਿ. ਬੋਧਿਸਤ੍ਤਾ ਚ ਨਾਮ ਅਪ੍ਪਮਤ੍ਤਾ ਹੋਨ੍ਤਿ, ਸੋ ਤਸ੍ਮਿਂ ਖਣੇ ਲੋਕਂ ਓਲੋਕੇਨ੍ਤੋ ਤਂ ਦੁਕ੍ਖਪ੍ਪਤ੍ਤਂ ‘‘ਧਮ੍ਮੋ ਮਤੋ’’ਤਿ ਸਞ੍ਞਾਯ ਧਮ੍ਮਸ੍ਸ ਮਤਕਭਤ੍ਤਂ ਦਾਤੁਕਾਮਂ ਦਿਸ੍ਵਾ ‘‘ਅਜ੍ਜ ਮਯ੍ਹਂ ਬਲਂ ਦਸ੍ਸੇਸ੍ਸਾਮੀ’’ਤਿ ਬ੍ਰਾਹ੍ਮਣਵੇਸੇਨ ਮਹਾਮਗ੍ਗਂ ਪਟਿਪਨ੍ਨੋ ਵਿਯ ਹੁਤ੍ਵਾ ਤਂ ਦਿਸ੍ਵਾ ਮਗ੍ਗਾ ਓਕ੍ਕਮ੍ਮ ਤਸ੍ਸਾ ਸਨ੍ਤਿਕੇ ਠਤ੍ਵਾ ‘‘ਅਮ੍ਮ, ਸੁਸਾਨੇ ਆਹਾਰਂ ਪਚਨ੍ਤਾ ਨਾਮ ਨਤ੍ਥਿ, ਤ੍ਵਂ ਇਮਿਨਾ ਇਧ ਪਕ੍ਕੇਨ ਤਿਲੋਦਨੇਨ ਕਿਂ ਕਰਿਸ੍ਸਸੀ’’ਤਿ ਕਥਂ ਸਮੁਟ੍ਠਾਪੇਨ੍ਤੋ ਪਠਮਂ ਗਾਥਮਾਹ –

੧. ‘‘ਓਦਾਤਵਤ੍ਥਾ ਸੁਚਿ ਅਲ੍ਲਕੇਸਾ, ਕਚ੍ਚਾਨਿ ਕਿਂ ਕੁਮ੍ਭਿਮਧਿਸ੍ਸਯਿਤ੍ਵਾ;

ਪਿਟ੍ਠਾ ਤਿਲਾ ਧੋਵਸਿ ਤਣ੍ਡੁਲਾਨਿ, ਤਿਲੋਦਨੋ ਹੇਹਿਤਿ ਕਿਸ੍ਸਹੇਤੂ’’ਤਿ.

ਤਤ੍ਥ ਕਚ੍ਚਾਨੀਤਿ ਤਂ ਗੋਤ੍ਤੇਨ ਆਲਪਤਿ. ਕੁਮ੍ਭਿਮਧਿਸ੍ਸਯਿਤ੍ਵਾਤਿ ਪਚਨਥਾਲਿਕਂ ਮਨੁਸ੍ਸਸੀਸੁਦ੍ਧਨਂ ਆਰੋਪੇਤ੍ਵਾ. ਹੇਹਿਤੀਤਿ ਅਯਂ ਤਿਲੋਦਨੋ ਕਿਸ੍ਸ ਹੇਤੁ ਭਵਿਸ੍ਸਤਿ, ਕਿਂ ਅਤ੍ਤਨਾ ਭੁਞ੍ਜਿਸ੍ਸਸਿ, ਉਦਾਹੁ ਅਞ੍ਞਂ ਕਾਰਣਮਤ੍ਥੀਤਿ.

ਅਥਸ੍ਸ ਸਾ ਆਚਿਕ੍ਖਨ੍ਤੀ ਦੁਤਿਯਂ ਗਾਥਮਾਹ –

੨. ‘‘ਨ ਖੋ ਅਯਂ ਬ੍ਰਾਹ੍ਮਣ ਭੋਜਨਤ੍ਥਾ, ਤਿਲੋਦਨੋ ਹੇਹਿਤਿ ਸਾਧੁਪਕ੍ਕੋ;

ਧਮ੍ਮੋ ਮਤੋ ਤਸ੍ਸ ਪਹੁਤ੍ਤਮਜ੍ਜ, ਅਹਂ ਕਰਿਸ੍ਸਾਮਿ ਸੁਸਾਨਮਜ੍ਝੇ’’ਤਿ.

ਤਤ੍ਥ ਧਮ੍ਮੋਤਿ ਜੇਟ੍ਠਾਪਚਾਯਨਧਮ੍ਮੋ ਚੇਵ ਤਿਵਿਧਸੁਚਰਿਤਧਮ੍ਮੋ ਚ. ਤਸ੍ਸ ਪਹੁਤ੍ਤਮਜ੍ਜਾਤਿ ਤਸ੍ਸਾਹਂ ਧਮ੍ਮਸ੍ਸ ਇਦਂ ਮਤਕਭਤ੍ਤਂ ਕਰਿਸ੍ਸਾਮੀਤਿ ਅਤ੍ਥੋ.

ਤਤੋ ਸਕ੍ਕੋ ਤਤਿਯਂ ਗਾਥਮਾਹ –

੩. ‘‘ਅਨੁਵਿਚ੍ਚ ਕਚ੍ਚਾਨਿ ਕਰੋਹਿ ਕਿਚ੍ਚਂ, ਧਮ੍ਮੋ ਮਤੋ ਕੋ ਨੁ ਤਵੇਵ ਸਂਸਿ;

ਸਹਸ੍ਸਨੇਤ੍ਤੋ ਅਤੁਲਾਨੁਭਾਵੋ, ਨ ਮਿਯ੍ਯਤੀ ਧਮ੍ਮਵਰੋ ਕਦਾਚੀ’’ਤਿ.

ਤਤ੍ਥ ਅਨੁਵਿਚ੍ਚਾਤਿ ਉਪਪਰਿਕ੍ਖਿਤ੍ਵਾ ਜਾਨਿਤ੍ਵਾ. ਕੋ ਨੁ ਤਵੇਵ ਸਂਸੀਤਿ ਕੋ ਨੁ ਤਵ ਏਵਂ ਆਚਿਕ੍ਖਿ. ਸਹਸ੍ਸਨੇਤ੍ਤੋਤਿ ਅਤ੍ਤਾਨਂ ਧਮ੍ਮਵਰਂ ਉਤ੍ਤਮਧਮ੍ਮਂ ਕਤ੍ਵਾ ਦਸ੍ਸੇਨ੍ਤੋ ਏਵਮਾਹ.

ਤਂ ਵਚਨਂ ਸੁਤ੍ਵਾ ਇਤਰਾ ਦ੍ਵੇ ਗਾਥਾ ਅਭਾਸਿ –

੪. ‘‘ਦਲ਼੍ਹਪ੍ਪਮਾਣਂ ਮਮ ਏਤ੍ਥ ਬ੍ਰਹ੍ਮੇ, ਧਮ੍ਮੋ ਮਤੋ ਨਤ੍ਥਿ ਮਮੇਤ੍ਥ ਕਙ੍ਖਾ;

ਯੇ ਯੇਵ ਦਾਨਿ ਪਾਪਾ ਭਵਨ੍ਤਿ, ਤੇ ਤੇਵ ਦਾਨਿ ਸੁਖਿਤਾ ਭਵਨ੍ਤਿ.

੫. ‘‘ਸੁਣਿਸਾ ਹਿ ਮਯ੍ਹਂ ਵਞ੍ਝਾ ਅਹੋਸਿ, ਸਾ ਮਂ ਵਧਿਤ੍ਵਾਨ ਵਿਜਾਯਿ ਪੁਤ੍ਤਂ;

ਸਾ ਦਾਨਿ ਸਬ੍ਬਸ੍ਸ ਕੁਲਸ੍ਸ ਇਸ੍ਸਰਾ, ਅਹਂ ਪਨਮ੍ਹਿ ਅਪਵਿਦ੍ਧਾ ਏਕਿਕਾ’’ਤਿ.

ਤਤ੍ਥ ਦਲ਼੍ਹਪ੍ਪਮਾਣਨ੍ਤਿ ਦਲ਼੍ਹਂ ਥਿਰਂ ਨਿਸ੍ਸਂਸਯਂ ਬ੍ਰਾਹ੍ਮਣ ਏਤ੍ਥ ਮਮ ਪਮਾਣਨ੍ਤਿ ਵਦਤਿ. ਯੇ ਯੇਤਿ ਤਸ੍ਸ ਮਤਭਾਵੇ ਕਾਰਣਂ ਦਸ੍ਸੇਨ੍ਤੀ ਏਵਮਾਹ. ਵਧਿਤ੍ਵਾਨਾਤਿ ਪੋਥੇਤ੍ਵਾ ਨਿਕ੍ਕਡ੍ਢਿਤ੍ਵਾ. ਅਪਵਿਦ੍ਧਾਤਿ ਛਡ੍ਡਿਤਾ ਅਨਾਥਾ ਹੁਤ੍ਵਾ ਏਕਿਕਾ ਵਸਾਮਿ.

ਤਤੋ ਸਕ੍ਕੋ ਛਟ੍ਠਂ ਗਾਥਮਾਹ –

੬. ‘‘ਜੀਵਾਮਿ ਵੋਹਂ ਨ ਮਤੋਹਮਸ੍ਮਿ, ਤਵੇਵ ਅਤ੍ਥਾਯ ਇਧਾਗਤੋਸ੍ਮਿ;

ਯਾ ਤਂ ਵਧਿਤ੍ਵਾਨ ਵਿਜਾਯਿ ਪੁਤ੍ਤਂ, ਸਹਾਵ ਪੁਤ੍ਤੇਨ ਕਰੋਮਿ ਭਸ੍ਮ’’ਨ੍ਤਿ.

ਤਤ੍ਥ ਵੋਤਿ ਨਿਪਾਤਮਤ੍ਤਂ.

ਇਤਰਾ ਤਂ ਸੁਤ੍ਵਾ ‘‘ਧੀ ਅਹਂ ਕਿਂ ਕਥੇਸਿਂ, ਮਮ ਨਤ੍ਤੁ ਅਮਰਣਕਾਰਣਂ ਕਰਿਸ੍ਸਾਮੀ’’ਤਿ ਸਤ੍ਤਮਂ ਗਾਥਮਾਹ –

੭. ‘‘ਏਵਞ੍ਚ ਤੇ ਰੁਚ੍ਚਤਿ ਦੇਵਰਾਜ, ਮਮੇਵ ਅਤ੍ਥਾਯ ਇਧਾਗਤੋਸਿ;

ਅਹਞ੍ਚ ਪੁਤ੍ਤੋ ਸੁਣਿਸਾ ਚ ਨਤ੍ਤਾ, ਸਮ੍ਮੋਦਮਾਨਾ ਘਰਮਾਵਸੇਮਾ’’ਤਿ.

ਅਥਸ੍ਸਾ ਸਕ੍ਕੋ ਅਟ੍ਠਮਂ ਗਾਥਮਾਹ –

੮. ‘‘ਏਵਞ੍ਚ ਤੇ ਰੁਚ੍ਚਤਿ ਕਾਤਿਯਾਨਿ, ਹਤਾਪਿ ਸਨ੍ਤਾ ਨ ਜਹਾਸਿ ਧਮ੍ਮਂ;

ਤੁਵਞ੍ਚ ਪੁਤ੍ਤੋ ਸੁਣਿਸਾ ਚ ਨਤ੍ਤਾ, ਸਮ੍ਮੋਦਮਾਨਾ ਘਰਮਾਵਸੇਥਾ’’ਤਿ.

ਤਤ੍ਥ ਹਤਾਪਿ ਸਨ੍ਤਾਤਿ ਯਦਿ ਤ੍ਵਂ ਪੋਥਿਤਾਪਿ ਨਿਕ੍ਕਡ੍ਢਿਤਾਪਿ ਸਮਾਨਾ ਤਵ ਦਾਰਕੇਸੁ ਮੇਤ੍ਤਧਮ੍ਮਂ ਨ ਜਹਾਸਿ, ਏਵਂ ਸਨ੍ਤੇ ਯਥਾ ਤ੍ਵਂ ਇਚ੍ਛਸਿ, ਤਥਾ ਹੋਤੁ, ਅਹਂ ਤੇ ਇਮਸ੍ਮਿਂ ਗੁਣੇ ਪਸਨ੍ਨੋਤਿ.

ਏਵਞ੍ਚ ਪਨ ਵਤ੍ਵਾ ਅਲਙ੍ਕਤਪਟਿਯਤ੍ਤੋ ਸਕ੍ਕੋ ਅਤ੍ਤਨੋ ਆਨੁਭਾਵੇਨ ਆਕਾਸੇ ਠਤ੍ਵਾ ‘‘ਕਚ੍ਚਾਨਿ ਤ੍ਵਂ ਮਾ ਭਾਯਿ, ਪੁਤ੍ਤੋ ਚ ਤੇ ਸੁਣਿਸਾ ਚ ਮਮਾਨੁਭਾਵੇਨ ਆਗਨ੍ਤ੍ਵਾ ਅਨ੍ਤਰਾਮਗ੍ਗੇ ਤਂ ਖਮਾਪੇਤ੍ਵਾ ਆਦਾਯ ਗਮਿਸ੍ਸਨ੍ਤਿ, ਅਪ੍ਪਮਤ੍ਤਾ ਹੋਹੀ’’ਤਿ ਵਤ੍ਵਾ ਅਤ੍ਤਨੋ ਠਾਨਮੇਵ ਗਤੋ. ਤੇਪਿ ਸਕ੍ਕਾਨੁਭਾਵੇਨ ਤਸ੍ਸਾ ਗੁਣਂ ਅਨੁਸ੍ਸਰਿਤ੍ਵਾ ‘‘ਕਹਂ ਨੋ ਮਾਤਾ’’ਤਿ ਅਨ੍ਤੋਗਾਮੇ ਮਨੁਸ੍ਸੇ ਪੁਚ੍ਛਿਤ੍ਵਾ ‘‘ਸੁਸਾਨਾਭਿਮੁਖਂ ਗਤਾ’’ਤਿ ਸੁਤ੍ਵਾ ‘‘ਅਮ੍ਮ, ਅਮ੍ਮਾ’’ਤਿ ਸੁਸਾਨਮਗ੍ਗਂ ਪਟਿਪਜ੍ਜਿਤ੍ਵਾ ਤਂ ਦਿਸ੍ਵਾਵ ਪਾਦੇਸੁ ਪਤਿਤ੍ਵਾ ‘‘ਅਮ੍ਮ, ਅਮ੍ਹਾਕਂ ਦੋਸਂ ਖਮਾਹੀ’’ਤਿ ਤਂ ਖਮਾਪੇਸੁਂ. ਸਾਪਿ ਨਤ੍ਤਾਰਂ ਗਣ੍ਹਿ. ਇਤਿ ਤੇ ਸਮ੍ਮੋਦਮਾਨਾ ਗੇਹਂ ਗਨ੍ਤ੍ਵਾ ਤਤੋ ਪਟ੍ਠਾਯ ਸਮਗ੍ਗਵਾਸਂ ਵਸਿਂਸੁ.

੯. ‘‘ਸਾ ਕਾਤਿਯਾਨੀ ਸੁਣਿਸਾਯ ਸਦ੍ਧਿਂ, ਸਮ੍ਮੋਦਮਾਨਾ ਘਰਮਾਵਸਿਤ੍ਥ;

ਪੁਤ੍ਤੋ ਚ ਨਤ੍ਤਾ ਚ ਉਪਟ੍ਠਹਿਂਸੁ, ਦੇਵਾਨਮਿਨ੍ਦੇਨ ਅਧਿਗ੍ਗਹੀਤਾ’’ਤਿ. –

ਅਯਂ ਅਭਿਸਮ੍ਬੁਦ੍ਧਗਾਥਾ.

ਤਤ੍ਥ ਸਾ ਕਾਤਿਯਾਨੀਤਿ ਭਿਕ੍ਖਵੇ, ਸਾ ਕਚ੍ਚਾਨਗੋਤ੍ਤਾ. ਦੇਵਾਨਮਿਨ੍ਦੇਨ ਅਧਿਗ੍ਗਹੀਤਾਤਿ ਦੇਵਿਨ੍ਦੇਨ ਸਕ੍ਕੇਨ ਅਨੁਗ੍ਗਹਿਤਾ ਹੁਤ੍ਵਾ ਤਸ੍ਸਾਨੁਭਾਵੇਨ ਸਮਗ੍ਗਵਾਸਂ ਵਸਿਂਸੂਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਸੋ ਉਪਾਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਮਾਤੁਪੋਸਕੋ ਏਤਰਹਿ ਮਾਤੁਪੋਸਕੋ ਅਹੋਸਿ, ਭਰਿਯਾਪਿਸ੍ਸ ਤਦਾ ਭਰਿਯਾਯੇਵ, ਸਕ੍ਕੋ ਪਨ ਅਹਮੇਵ ਅਹੋਸਿਨ੍ਤਿ.

ਕਚ੍ਚਾਨਿਜਾਤਕਵਣ੍ਣਨਾ ਪਠਮਾ.

[੪੧੮] ੨. ਅਟ੍ਠਸਦ੍ਦਜਾਤਕਵਣ੍ਣਨਾ

ਇਦਂ ਪੁਰੇ ਨਿਨ੍ਨਮਾਹੂਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਸਲਰਞ੍ਞੋ ਅਡ੍ਢਰਤ੍ਤਸਮਯੇ ਸੁਤਂ ਭਿਂਸਨਕਂ ਅਵਿਨਿਬ੍ਭੋਗਸਦ੍ਦਂ ਆਰਬ੍ਭ ਕਥੇਸਿ. ਵਤ੍ਥੁ ਹੇਟ੍ਠਾ ਲੋਹਕੁਮ੍ਭਿਜਾਤਕੇ (ਜਾ. ੧.੪.੫੩ ਆਦਯੋ) ਕਥਿਤਸਦਿਸਮੇਵ. ਇਧ ਪਨ ਸਤ੍ਥਾ ‘‘ਮਯ੍ਹਂ, ਭਨ੍ਤੇ, ਇਮੇਸਂ ਸਦ੍ਦਾਨਂ ਸੁਤਤ੍ਤਾ ਕਿਨ੍ਤਿ ਭਵਿਸ੍ਸਤੀ’’ਤਿ ਵੁਤ੍ਤੇ ‘‘ਮਾ ਭਾਯਿ, ਮਹਾਰਾਜ, ਨ ਤੇ ਏਤੇਸਂ ਸੁਤਪਚ੍ਚਯਾ ਕੋਚਿ ਅਨ੍ਤਰਾਯੋ ਭਵਿਸ੍ਸਤਿ, ਨ ਹਿ, ਮਹਾਰਾਜ, ਏਵਰੂਪਂ ਭਯਾਨਕਂ ਅਵਿਨਿਬ੍ਭੋਗਸਦ੍ਦਂ ਤ੍ਵਮੇਵੇਕੋ ਸੁਣਿ, ਪੁਬ੍ਬੇਪਿ ਰਾਜਾਨੋ ਏਵਰੂਪਂ ਸਦ੍ਦਂ ਸੁਤ੍ਵਾ ਬ੍ਰਾਹ੍ਮਣਾਨਂ ਕਥਂ ਗਹੇਤ੍ਵਾ ਸਬ੍ਬਚਤੁਕ੍ਕਯਞ੍ਞਂ ਯਜਿਤੁਕਾਮਾ ਪਣ੍ਡਿਤਾਨਂ ਵਚਨਂ ਸੁਤ੍ਵਾ ਯਞ੍ਞਹਰਣਤ੍ਥਾਯ ਗਹਿਤਸਤ੍ਤੇ ਵਿਸ੍ਸਜ੍ਜੇਤ੍ਵਾ ਨਗਰੇ ਮਾਘਾਤਭੇਰਿਂ ਚਰਾਪੇਸੁ’’ਨ੍ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਸੀਤਿਕੋਟਿਵਿਭਵੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਉਗ੍ਗਹਿਤਸਿਪ੍ਪੋ ਮਾਤਾਪਿਤੂਨਂ ਅਚ੍ਚਯੇਨ ਰਤਨਵਿਲੋਕਨਂ ਕਤ੍ਵਾ ਸਬ੍ਬਂ ਵਿਭਵਜਾਤਂ ਦਾਨਮੁਖੇ ਵਿਸ੍ਸਜ੍ਜੇਤ੍ਵਾ ਕਾਮੇ ਪਹਾਯ ਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਅਪਰਭਾਗੇ ਲੋਣਮ੍ਬਿਲਸੇਵਨਤ੍ਥਾਯ ਮਨੁਸ੍ਸਪਥਂ ਚਰਨ੍ਤੋ ਬਾਰਾਣਸਿਂ ਪਤ੍ਵਾ ਰਾਜੁਯ੍ਯਾਨੇ ਵਸਿ. ਤਦਾ ਬਾਰਾਣਸਿਰਾਜਾ ਸਿਰਿਸਯਨੇ ਨਿਸਿਨ੍ਨੋ ਅਡ੍ਢਰਤ੍ਤਸਮਯੇ ਅਟ੍ਠ ਸਦ੍ਦੇ ਅਸ੍ਸੋਸਿ – ਪਠਮਂ ਰਾਜਨਿਵੇਸਨਸਾਮਨ੍ਤਾ ਉਯ੍ਯਾਨੇ ਏਕੋ ਬਕੋ ਸਦ੍ਦਮਕਾਸਿ, ਦੁਤਿਯਂ ਤਸ੍ਮਿਂ ਸਦ੍ਦੇ ਅਨੁਪਚ੍ਛਿਨ੍ਨੇਯੇਵ ਹਤ੍ਥਿਸਾਲਾਯ ਤੋਰਣਨਿਵਾਸਿਨੀ ਕਾਕੀ ਸਦ੍ਦਮਕਾਸਿ, ਤਤਿਯਂ ਰਾਜਗੇਹੇ ਕਣ੍ਣਿਕਾਯਂ ਨਿਵੁਤ੍ਥਘੁਣਪਾਣਕੋ ਸਦ੍ਦਮਕਾਸਿ, ਚਤੁਤ੍ਥਂ ਰਾਜਗੇਹੇ ਪੋਸਾਵਨਿਯਕੋਕਿਲੋ ਸਦ੍ਦਮਕਾਸਿ, ਪਞ੍ਚਮਂ ਤਤ੍ਥੇਵ ਪੋਸਾਵਨਿਯਮਿਗੋ ਸਦ੍ਦਮਕਾਸਿ, ਛਟ੍ਠਂ ਤਤ੍ਥੇਵ ਪੋਸਾਵਨਿਯਵਾਨਰੋ ਸਦ੍ਦਮਕਾਸਿ, ਸਤ੍ਤਮਂ ਤਤ੍ਥੇਵ ਪੋਸਾਵਨਿਯਕਿਨ੍ਨਰੋ ਸਦ੍ਦਮਕਾਸਿ, ਅਟ੍ਠਮਂ ਤਸ੍ਮਿਂ ਸਦ੍ਦੇ ਅਨੁਪਚ੍ਛਿਨ੍ਨੇਯੇਵ ਰਾਜਨਿਵੇਸਨਮਤ੍ਥਕੇਨ ਉਯ੍ਯਾਨਂ ਗਚ੍ਛਨ੍ਤੋ ਪਚ੍ਚੇਕਬੁਦ੍ਧੋ ਏਕਂ ਉਦਾਨਂ ਉਦਾਨੇਨ੍ਤੋ ਸਦ੍ਦਮਕਾਸਿ.

ਬਾਰਾਣਸਿਰਾਜਾ ਇਮੇ ਅਟ੍ਠ ਸਦ੍ਦੇ ਸੁਤ੍ਵਾ ਭੀਤਤਸਿਤੋ ਪੁਨਦਿਵਸੇ ਬ੍ਰਾਹ੍ਮਣੇ ਪੁਚ੍ਛਿ. ਬ੍ਰਾਹ੍ਮਣਾ ‘‘ਅਨ੍ਤਰਾਯੋ ਤੇ, ਮਹਾਰਾਜ, ਭਵਿਸ੍ਸਤਿ, ਸਬ੍ਬਚਤੁਕ੍ਕਯਞ੍ਞਂ ਯਜਿਸ੍ਸਾਮਾ’’ਤਿ ਵਤ੍ਵਾ ਰਞ੍ਞਾ ‘‘ਯਥਾਰੁਚਿਤਂ ਕਰੋਥਾ’’ਤਿ ਅਨੁਞ੍ਞਾਤਾ ਹਟ੍ਠਪਹਟ੍ਠਾ ਰਾਜਕੁਲਤੋ ਨਿਕ੍ਖਮਿਤ੍ਵਾ ਯਞ੍ਞਕਮ੍ਮਂ ਆਰਭਿਂਸੁ. ਅਥ ਨੇਸਂ ਜੇਟ੍ਠਕਸ੍ਸ ਯਞ੍ਞਕਾਰਬ੍ਰਾਹ੍ਮਣਸ੍ਸ ਅਨ੍ਤੇਵਾਸੀ ਮਾਣਵੋ ਪਣ੍ਡਿਤੋ ਬ੍ਯਤ੍ਤੋ ਆਚਰਿਯਂ ਆਹ – ‘‘ਆਚਰਿਯ, ਏਵਰੂਪਂ ਕਕ੍ਖਲ਼ਂ ਫਰੁਸਂ ਅਸਾਤਂ ਬਹੂਨਂ ਸਤ੍ਤਾਨਂ ਵਿਨਾਸਕਮ੍ਮਂ ਮਾ ਕਰੀ’’ਤਿ. ‘‘ਤਾਤ, ਤ੍ਵਂ ਕਿਂ ਜਾਨਾਸਿ, ਸਚੇਪਿ ਅਞ੍ਞਂ ਕਿਞ੍ਚਿ ਨ ਭਵਿਸ੍ਸਤਿ, ਮਚ੍ਛਮਂਸਂ ਤਾਵ ਬਹੁਂ ਖਾਦਿਤੁਂ ਲਭਿਸ੍ਸਾਮਾ’’ਤਿ. ‘‘ਆਚਰਿਯ, ਕੁਚ੍ਛਿਂ ਨਿਸ੍ਸਾਯ ਨਿਰਯੇ ਨਿਬ੍ਬਤ੍ਤਨਕਮ੍ਮਂ ਮਾ ਕਰੋਥਾ’’ਤਿ. ਤਂ ਸੁਤ੍ਵਾ ਸੇਸਬ੍ਰਾਹ੍ਮਣਾ ‘‘ਅਯਂ ਅਮ੍ਹਾਕਂ ਲਾਭਨ੍ਤਰਾਯਂ ਕਰੋਤੀ’’ਤਿ ਤਸ੍ਸ ਕੁਜ੍ਝਿਂਸੁ. ਮਾਣਵੋ ਤੇਸਂ ਭਯੇਨ ‘‘ਤੇਨ ਹਿ ਤੁਮ੍ਹੇਵ ਮਚ੍ਛਮਂਸਖਾਦਨੂਪਾਯਂ ਕਰੋਥਾ’’ਤਿ ਵਤ੍ਵਾ ਨਿਕ੍ਖਮਿਤ੍ਵਾ ਬਹਿਨਗਰੇ ਰਾਜਾਨਂ ਨਿਵਾਰੇਤੁਂ ਸਮਤ੍ਥਂ ਧਮ੍ਮਿਕਸਮਣਬ੍ਰਾਹ੍ਮਣਂ ਉਪਧਾਰੇਨ੍ਤੋ ਰਾਜੁਯ੍ਯਾਨਂ ਗਨ੍ਤ੍ਵਾ ਬੋਧਿਸਤ੍ਤਂ ਦਿਸ੍ਵਾ ਵਨ੍ਦਿਤ੍ਵਾ ‘‘ਭਨ੍ਤੇ, ਕਿਂ ਤੁਮ੍ਹਾਕਂ ਸਤ੍ਤੇਸੁ ਅਨੁਕਮ੍ਪਾ ਨਤ੍ਥਿ, ਰਾਜਾ ਬਹੂ ਸਤ੍ਤੇ ਮਾਰੇਤ੍ਵਾ ਯਞ੍ਞਂ ਯਜਾਪੇਤਿ, ਕਿਂ ਵੋ ਮਹਾਜਨਸ੍ਸ ਬਨ੍ਧਨਮੋਕ੍ਖਂ ਕਾਤੁਂ ਨ ਵਟ੍ਟਤੀ’’ਤਿ ਆਹ. ‘‘ਮਾਣਵ, ਏਤ੍ਥ ਨੇਵ ਰਾਜਾ ਅਮ੍ਹੇ ਜਾਨਾਤਿ, ਨ ਮਯਂ ਰਾਜਾਨਂ ਜਾਨਾਮਾ’’ਤਿ. ‘‘ਜਾਨਾਥ ਪਨ, ਭਨ੍ਤੇ, ਰਞ੍ਞਾ ਸੁਤਸਦ੍ਦਾਨਂ ਨਿਪ੍ਫਤ੍ਤਿ’’ਨ੍ਤਿ? ‘‘ਆਮ, ਜਾਨਾਮੀ’’ਤਿ. ‘‘ਜਾਨਨ੍ਤਾ ਰਞ੍ਞੋ ਕਸ੍ਮਾ ਨ ਕਥੇਥਾ’’ਤਿ? ‘‘ਮਾਣਵ ਕਿਂ ਸਕ੍ਕਾ ‘ਅਹਂ ਜਾਨਾਮੀ’ਤਿ ਨਲਾਟੇ ਸਿਙ੍ਗਂ ਬਨ੍ਧਿਤ੍ਵਾ ਚਰਿਤੁਂ, ਸਚੇ ਇਧਾਗਨ੍ਤ੍ਵਾ ਪੁਚ੍ਛਿਸ੍ਸਤਿ, ਕਥੇਸ੍ਸਾਮੀ’’ਤਿ.

ਮਾਣਵੋ ਵੇਗੇਨ ਰਾਜਕੁਲਂ ਗਨ੍ਤ੍ਵਾ ‘‘ਕਿਂ, ਤਾਤਾ’’ਤਿ ਵੁਤ੍ਤੇ ‘‘ਮਹਾਰਾਜ, ਤੁਮ੍ਹੇਹਿ ਸੁਤਸਦ੍ਦਾਨਂ ਨਿਪ੍ਫਤ੍ਤਿਂ ਜਾਨਨਕੋ ਏਕੋ ਤਾਪਸੋ ਤੁਮ੍ਹਾਕਂ ਉਯ੍ਯਾਨੇ ਮਙ੍ਗਲਸਿਲਾਯਂ ਨਿਸਿਨ੍ਨੋ ‘ਸਚੇ ਮਂ ਪੁਚ੍ਛਿਸ੍ਸਤਿ, ਕਥੇਸ੍ਸਾਮੀ’ਤਿ ਵਦਤਿ, ਗਨ੍ਤ੍ਵਾ ਤਂ ਪੁਚ੍ਛਿਤੁਂ ਵਟ੍ਟਤੀ’’ਤਿ ਆਹ. ਰਾਜਾ ਵੇਗੇਨ ਤਤ੍ਥ ਗਨ੍ਤ੍ਵਾ ਤਾਪਸਂ ਵਨ੍ਦਿਤ੍ਵਾ ਕਤਪਟਿਸਨ੍ਥਾਰੋ ਨਿਸੀਦਿਤ੍ਵਾ ‘‘ਸਚ੍ਚਂ ਕਿਰ, ਭਨ੍ਤੇ, ਤੁਮ੍ਹੇ ਮਯਾ ਸੁਤਸਦ੍ਦਾਨਂ ਨਿਪ੍ਫਤ੍ਤਿਂ ਜਾਨਾਥਾ’’ਤਿ ਪੁਚ੍ਛਿ. ‘‘ਆਮ, ਮਹਾਰਾਜਾ’’ਤਿ. ‘‘ਤੇਨ ਹਿ ਕਥੇਥ ਤਂ ਮੇ’’ਤਿ. ‘‘ਮਹਾਰਾਜ, ਤੇਸਂ ਸੁਤਪਚ੍ਚਯਾ ਤਵ ਕੋਚਿ ਅਨ੍ਤਰਾਯੋ ਨਤ੍ਥਿ, ਪੋਰਾਣੁਯ੍ਯਾਨੇ ਪਨ ਤੇ ਏਕੋ ਬਕੋ ਅਤ੍ਥਿ, ਸੋ ਗੋਚਰਂ ਅਲਭਨ੍ਤੋ ਜਿਘਚ੍ਛਾਯ ਪਰੇਤੋ ਪਠਮਂ ਸਦ੍ਦਮਕਾਸੀ’’ਤਿ ਤਸ੍ਸ ਕਿਰਿਯਂ ਅਤ੍ਤਨੋ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਪਠਮਂ ਗਾਥਮਾਹ –

੧੦. ‘‘ਇਦਂ ਪੁਰੇ ਨਿਨ੍ਨਮਾਹੁ, ਬਹੁਮਚ੍ਛਂ ਮਹੋਦਕਂ;

ਆਵਾਸੋ ਬਕਰਾਜਸ੍ਸ, ਪੇਤ੍ਤਿਕਂ ਭਵਨਂ ਮਮ;

ਤ੍ਯਜ੍ਜ ਭੇਕੇਨ ਯਾਪੇਮ, ਓਕਂ ਨ ਵਿਜਹਾਮਸੇ’’ਤਿ.

ਤਤ੍ਥ ਇਦਨ੍ਤਿ ਮਙ੍ਗਲਪੋਕ੍ਖਰਣਿਂ ਸਨ੍ਧਾਯ ਵਦਤਿ. ਸਾ ਹਿ ਪੁਬ੍ਬੇ ਉਦਕਤੁਮ੍ਬੇਨ ਉਦਕੇ ਪਵਿਸਨ੍ਤੇ ਮਹੋਦਕਾ ਬਹੁਮਚ੍ਛਾ, ਇਦਾਨਿ ਪਨ ਉਦਕਸ੍ਸ ਪਚ੍ਛਿਨ੍ਨਤ੍ਤਾ ਨ ਮਹੋਦਕਾ ਜਾਤਾ. ਤ੍ਯਜ੍ਜ ਭੇਕੇਨਾਤਿ ਤੇ ਮਯਂ ਅਜ੍ਜ ਮਚ੍ਛੇ ਅਲਭਨ੍ਤਾ ਮਣ੍ਡੂਕਮਤ੍ਤੇਨ ਯਾਪੇਮ. ਓਕਨ੍ਤਿ ਏਵਂ ਜਿਘਚ੍ਛਾਯ ਪੀਲ਼ਿਤਾਪਿ ਵਸਨਟ੍ਠਾਨਂ ਨ ਵਿਜਹਾਮ.

ਇਤਿ, ਮਹਾਰਾਜ, ਸੋ ਬਕੋ ਜਿਘਚ੍ਛਾਪੀਲ਼ਿਤੋ ਸਦ੍ਦਮਕਾਸਿ. ਸਚੇਪਿ ਤਂ ਜਿਘਚ੍ਛਾਤੋ ਮੋਚੇਤੁਕਾਮੋ, ਤਂ ਉਯ੍ਯਾਨਂ ਸੋਧਾਪੇਤ੍ਵਾ ਪੋਕ੍ਖਰਣਿਂ ਉਦਕਸ੍ਸ ਪੂਰੇਹੀਤਿ. ਰਾਜਾ ਤਥਾ ਕਾਰੇਤੁਂ ਏਕਂ ਅਮਚ੍ਚਂ ਆਣਾਪੇਸਿ.

‘‘ਹਤ੍ਥਿਸਾਲਤੋਰਣੇ ਪਨ ਤੇ, ਮਹਾਰਾਜ, ਏਕਾ ਕਾਕੀ ਵਸਮਾਨਾ ਅਤ੍ਤਨੋ ਪੁਤ੍ਤਸੋਕੇਨ ਦੁਤਿਯਂ ਸਦ੍ਦਮਕਾਸਿ, ਤਤੋਪਿ ਤੇ ਭਯਂ ਨਤ੍ਥੀ’’ਤਿ ਵਤ੍ਵਾ ਦੁਤਿਯਂ ਗਾਥਮਾਹ –

੧੧. ‘‘ਕੋ ਦੁਤਿਯਂ ਅਸੀਲਿਸ੍ਸ, ਬਨ੍ਧਰਸ੍ਸਕ੍ਖਿ ਭੇਚ੍ਛਤਿ;

ਕੋ ਮੇ ਪੁਤ੍ਤੇ ਕੁਲਾਵਕਂ, ਮਞ੍ਚ ਸੋਤ੍ਥਿਂ ਕਰਿਸ੍ਸਤੀ’’ਤਿ.

ਵਤ੍ਵਾ ਚ ਪਨ ‘‘ਕੋ ਨਾਮ ਤੇ, ਮਹਾਰਾਜ, ਹਤ੍ਥਿਸਾਲਾਯ ਹਤ੍ਥਿਮੇਣ੍ਡੋ’’ਤਿ ਪੁਚ੍ਛਿ. ‘‘ਬਨ੍ਧਰੋ ਨਾਮ, ਭਨ੍ਤੇ’’ਤਿ. ‘‘ਏਕਕ੍ਖਿਕਾਣੋ ਸੋ, ਮਹਾਰਾਜਾ’’ਤਿ? ‘‘ਆਮ, ਭਨ੍ਤੇ’’ਤਿ. ਮਹਾਰਾਜ, ਹਤ੍ਥਿਸਾਲਾਯ ਤੇ ਦ੍ਵਾਰਤੋਰਣੇ ਏਕਾ ਕਾਕੀ ਕੁਲਾਵਕਂ ਕਤ੍ਵਾ ਅਣ੍ਡਕਾਨਿ ਨਿਕ੍ਖਿਪਿ. ਤਾਨਿ ਪਰਿਣਤਾਨਿ ਕਾਕਪੋਤਕਾ ਨਿਕ੍ਖਨ੍ਤਾ, ਹਤ੍ਥਿਮੇਣ੍ਡੋ ਹਤ੍ਥਿਂ ਆਰੁਯ੍ਹ ਸਾਲਤੋ ਨਿਕ੍ਖਮਨ੍ਤੋ ਚ ਪਵਿਸਨ੍ਤੋ ਚ ਅਙ੍ਕੁਸਕੇਨ ਕਾਕਿਮ੍ਪਿ ਪੁਤ੍ਤਕੇਪਿਸ੍ਸਾ ਪਹਰਤਿ, ਕੁਲਾਵਕਮ੍ਪਿ ਵਿਦ੍ਧਂਸੇਤਿ. ਸਾ ਤੇਨ ਦੁਕ੍ਖੇਨ ਪੀਲ਼ਿਤਾ ਤਸ੍ਸ ਅਕ੍ਖਿਭੇਦਨਂ ਆਯਾਚਨ੍ਤੀ ਏਵਮਾਹ, ਸਚੇ ਤੇ ਕਾਕਿਯਾ ਮੇਤ੍ਤਚਿਤ੍ਤਂ ਅਤ੍ਥਿ, ਏਤਂ ਬਨ੍ਧਰਂ ਪਕ੍ਕੋਸਾਪੇਤ੍ਵਾ ਕੁਲਾਵਕਵਿਦ੍ਧਂਸਨਤੋ ਵਾਰੇਹੀਤਿ. ਰਾਜਾ ਤਂ ਪਕ੍ਕੋਸਾਪੇਤ੍ਵਾ ਪਰਿਭਾਸਿਤ੍ਵਾ ਹਾਰੇਤ੍ਵਾ ਅਞ੍ਞਸ੍ਸ ਤਂ ਹਤ੍ਥਿਂ ਅਦਾਸਿ.

‘‘ਪਾਸਾਦਕਣ੍ਣਿਕਾਯ ਪਨ ਤੇ, ਮਹਾਰਾਜ, ਏਕੋ ਘੁਣਪਾਣਕੋ ਵਸਤਿ. ਸੋ ਤਤ੍ਥ ਫੇਗ੍ਗੁਂ ਖਾਦਿਤ੍ਵਾ ਤਸ੍ਮਿਂ ਖੀਣੇ ਸਾਰਂ ਖਾਦਿਤੁਂ ਨਾਸਕ੍ਖਿ, ਸੋ ਭਕ੍ਖਂ ਅਲਭਿਤ੍ਵਾ ਨਿਕ੍ਖਮਿਤੁਮ੍ਪਿ ਅਸਕ੍ਕੋਨ੍ਤੋ ਪਰਿਦੇਵਮਾਨੋ ਤਤਿਯਂ ਸਦ੍ਦਮਕਾਸਿ, ਤਤੋਪਿ ਤੇ ਭਯਂ ਨਤ੍ਥੀ’’ਤਿ ਵਤ੍ਵਾ ਤਸ੍ਸ ਕਿਰਿਯਂ ਅਤ੍ਤਨੋ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਤਤਿਯਂ ਗਾਥਮਾਹ –

੧੨. ‘‘ਸਬ੍ਬਾ ਪਰਿਕ੍ਖਤਾ ਫੇਗ੍ਗੁ, ਯਾਵ ਤਸ੍ਸਾ ਗਤੀ ਅਹੁ;

ਖੀਣਭਕ੍ਖੋ ਮਹਾਰਾਜ, ਸਾਰੇ ਨ ਰਮਤੀ ਘੁਣੋ’’ਤਿ.

ਤਤ੍ਥ ਯਾਵ ਤਸ੍ਸਾ ਗਤੀ ਅਹੂਤਿ ਯਾਵ ਤਸ੍ਸਾ ਫੇਗ੍ਗੁਯਾ ਨਿਪ੍ਫਤ੍ਤਿ ਅਹੋਸਿ, ਸਾ ਸਬ੍ਬਾ ਖਾਦਿਤਾ. ਨ ਰਮਤੀਤਿ ‘‘ਮਹਾਰਾਜ, ਸੋ ਪਾਣਕੋ ਤਤੋ ਨਿਕ੍ਖਮਿਤ੍ਵਾ ਗਮਨਟ੍ਠਾਨਮ੍ਪਿ ਅਪਸ੍ਸਨ੍ਤੋ ਪਰਿਦੇਵਤਿ, ਨੀਹਰਾਪੇਹਿ ਨ’’ਨ੍ਤਿ ਆਹ. ਰਾਜਾ ਏਕਂ ਪੁਰਿਸਂ ਆਣਾਪੇਤ੍ਵਾ ਉਪਾਯੇਨ ਨਂ ਨੀਹਰਾਪੇਸਿ.

‘‘ਨਿਵੇਸਨੇ ਪਨ ਤੇ, ਮਹਾਰਾਜ, ਏਕਾ ਪੋਸਾਵਨਿਯਾ ਕੋਕਿਲਾ ਅਤ੍ਥੀ’’ਤਿ? ‘‘ਅਤ੍ਥਿ, ਭਨ੍ਤੇ’’ਤਿ. ‘‘ਮਹਾਰਾਜ, ਸਾ ਅਤ੍ਤਨਾ ਨਿਵੁਤ੍ਥਪੁਬ੍ਬਂ ਵਨਸਣ੍ਡਂ ਸਰਿਤ੍ਵਾ ਉਕ੍ਕਣ੍ਠਿਤ੍ਵਾ ‘ਕਦਾ ਨੁ ਖੋ ਇਮਮ੍ਹਾ ਪਞ੍ਜਰਾ ਮੁਚ੍ਚਿਤ੍ਵਾ ਰਮਣੀਯਂ ਵਨਸਣ੍ਡਂ ਗਚ੍ਛਿਸ੍ਸਾਮੀ’ਤਿ ਚਤੁਤ੍ਥਂ ਸਦ੍ਦਮਕਾਸਿ, ਤਤੋਪਿ ਤੇ ਭਯਂ ਨਤ੍ਥੀ’’ਤਿ ਵਤ੍ਵਾ ਚਤੁਤ੍ਥਂ ਗਾਥਮਾਹ –

੧੩. ‘‘ਸਾ ਨੂਨਾਹਂ ਇਤੋ ਗਨ੍ਤ੍ਵਾ, ਰਞ੍ਞੋ ਮੁਤ੍ਤਾ ਨਿਵੇਸਨਾ;

ਅਤ੍ਤਾਨਂ ਰਮਯਿਸ੍ਸਾਮਿ, ਦੁਮਸਾਖਨਿਕੇਤਿਨੀ’’ਤਿ.

ਤਤ੍ਥ ਦੁਮਸਾਖਨਿਕੇਤਿਨੀਤਿ ਸੁਪੁਪ੍ਫਿਤਾਸੁ ਰੁਕ੍ਖਸਾਖਾਸੁ ਸਕਨਿਕੇਤਾ ਹੁਤ੍ਵਾ. ਏਵਞ੍ਚ ਪਨ ਵਤ੍ਵਾ ‘‘ਉਕ੍ਕਣ੍ਠਿਤਾ, ਮਹਾਰਾਜ, ਸਾ ਕੋਕਿਲਾ, ਵਿਸ੍ਸਜ੍ਜੇਹਿ ਨ’’ਨ੍ਤਿ ਆਹ. ਰਾਜਾ ਤਥਾ ਕਾਰੇਸਿ.

‘‘ਨਿਵੇਸਨੇ ਪਨ ਤੇ, ਮਹਾਰਾਜ, ਏਕੋ ਪੋਸਾਵਨਿਯੋ ਮਿਗੋ ਅਤ੍ਥੀ’’ਤਿ? ‘‘ਅਤ੍ਥਿ, ਭਨ੍ਤੇ’’ਤਿ. ‘‘ਮਹਾਰਾਜ, ਸੋ ਏਕੋ ਯੂਥਪਤਿ ਅਤ੍ਤਨੋ ਮਿਗਿਂ ਅਨੁਸ੍ਸਰਿਤ੍ਵਾ ਕਿਲੇਸਵਸੇਨ ਉਕ੍ਕਣ੍ਠਿਤੋ ਪਞ੍ਚਮਂ ਸਦ੍ਦਮਕਾਸਿ, ਤਤੋਪਿ ਤੇ ਭਯਂ ਨਤ੍ਥੀ’’ਤਿ ਵਤ੍ਵਾ ਪਞ੍ਚਮਂ ਗਾਥਮਾਹ –

੧੪. ‘‘ਸੋ ਨੂਨਾਹਂ ਇਤੋ ਗਨ੍ਤ੍ਵਾ, ਰਞ੍ਞੋ ਮੁਤ੍ਤੋ ਨਿਵੇਸਨਾ;

ਅਗ੍ਗੋਦਕਾਨਿ ਪਿਸ੍ਸਾਮਿ, ਯੂਥਸ੍ਸ ਪੁਰਤੋ ਵਜ’’ਨ੍ਤਿ.

ਤਤ੍ਥ ਅਗ੍ਗੋਦਕਾਨੀਤਿ ਅਗ੍ਗਉਦਕਾਨਿ, ਅਞ੍ਞੇਹਿ ਮਿਗੇਹਿ ਪਠਮਤਰਂ ਅਪੀਤਾਨਿ ਅਨੁਚ੍ਛਿਟ੍ਠੋਦਕਾਨਿ ਯੂਥਸ੍ਸ ਪੁਰਤੋ ਗਚ੍ਛਨ੍ਤੋ ਕਦਾ ਨੁ ਖੋ ਪਿਵਿਸ੍ਸਾਮੀਤਿ.

ਮਹਾਸਤ੍ਤੋ ਤਮ੍ਪਿ ਮਿਗਂ ਵਿਸ੍ਸਜ੍ਜਾਪੇਤ੍ਵਾ ‘‘ਨਿਵੇਸਨੇ ਪਨ ਤੇ, ਮਹਾਰਾਜ, ਪੋਸਾਵਨਿਯੋ ਮਕ੍ਕਟੋ ਅਤ੍ਥੀ’’ਤਿ ਪੁਚ੍ਛਿ. ‘‘ਅਤ੍ਥਿ, ਭਨ੍ਤੇ’’ਤਿ ਵੁਤ੍ਤੇ ‘‘ਸੋਪਿ, ਮਹਾਰਾਜ, ਹਿਮਵਨ੍ਤਪਦੇਸੇ ਯੂਥਪਤਿ ਮਕ੍ਕਟੀਹਿ ਸਦ੍ਧਿਂ ਕਾਮਗਿਦ੍ਧੋ ਹੁਤ੍ਵਾ ਵਿਚਰਨ੍ਤੋ ਭਰਤੇਨ ਨਾਮ ਲੁਦ੍ਦੇਨ ਇਧ ਆਨੀਤੋ, ਇਦਾਨਿ ਉਕ੍ਕਣ੍ਠਿਤ੍ਵਾ ਤਤ੍ਥੇਵ ਗਨ੍ਤੁਕਾਮੋ ਛਟ੍ਠਂ ਸਦ੍ਦਮਕਾਸਿ, ਤਤੋਪਿ ਤੇ ਭਯਂ ਨਤ੍ਥੀ’’ਤਿ ਵਤ੍ਵਾ ਛਟ੍ਠਂ ਗਾਥਮਾਹ –

੧੫. ‘‘ਤਂ ਮਂ ਕਾਮੇਹਿ ਸਮ੍ਮਤ੍ਤਂ, ਰਤ੍ਤਂ ਕਾਮੇਸੁ ਮੁਚ੍ਛਿਤਂ;

ਆਨਯੀ ਭਰਤੋ ਲੁਦ੍ਦੋ, ਬਾਹਿਕੋ ਭਦ੍ਦਮਤ੍ਥੁ ਤੇ’’ਤਿ.

ਤਤ੍ਥ ਬਾਹਿਕੋਤਿ ਬਾਹਿਕਰਟ੍ਠਵਾਸੀ. ਭਦ੍ਦਮਤ੍ਥੁ ਤੇਤਿ ਇਮਮਤ੍ਥਂ ਸੋ ਵਾਨਰੋ ਆਹ, ਤੁਯ੍ਹਂ ਪਨ ਭਦ੍ਦਮਤ੍ਥੁ, ਵਿਸ੍ਸਜ੍ਜੇਹਿ ਨਨ੍ਤਿ.

ਮਹਾਸਤ੍ਤੋ ਤਂ ਵਾਨਰਂ ਵਿਸ੍ਸਜ੍ਜਾਪੇਤ੍ਵਾ ‘‘ਨਿਵੇਸਨੇ ਪਨ ਤੇ, ਮਹਾਰਾਜ, ਪੋਸਾਵਨਿਯੋ ਕਿਨ੍ਨਰੋ ਅਤ੍ਥੀ’’ਤਿ ਪੁਚ੍ਛਿਤ੍ਵਾ ‘‘ਅਤ੍ਥੀ’’ਤਿ ਵੁਤ੍ਤੇ ‘‘ਸੋ, ਮਹਾਰਾਜ, ਅਤ੍ਤਨੋ ਕਿਨ੍ਨਰਿਯਾ ਕਤਗੁਣਂ ਅਨੁਸ੍ਸਰਿਤ੍ਵਾ ਕਿਲੇਸਾਤੁਰੋ ਸਦ੍ਦਮਕਾਸਿ. ਸੋ ਹਿ ਤਾਯ ਸਦ੍ਧਿਂ ਏਕਦਿਵਸਂ ਤੁਙ੍ਗਪਬ੍ਬਤਸਿਖਰਂ ਆਰੁਹਿ. ਤੇ ਤਤ੍ਥ ਵਣ੍ਣਗਨ੍ਧਰਸਸਮ੍ਪਨ੍ਨਾਨਿ ਨਾਨਾਪੁਪ੍ਫਾਨਿ ਓਚਿਨਨ੍ਤਾ ਪਿਲ਼ਨ੍ਧਨ੍ਤਾ ਸੂਰਿਯਂ ਅਤ੍ਥਙ੍ਗਤਂ ਨ ਸਲ੍ਲਕ੍ਖੇਸੁਂ, ਅਤ੍ਥਙ੍ਗਤੇ ਸੂਰਿਯੇ ਓਤਰਨ੍ਤਾਨਂ ਅਨ੍ਧਕਾਰੋ ਅਹੋਸਿ. ਤਤ੍ਰ ਨਂ ਕਿਨ੍ਨਰੀ ‘ਸਾਮਿ, ਅਨ੍ਧਕਾਰੋ ਵਤ੍ਤਤਿ, ਅਪਕ੍ਖਲਨ੍ਤੋ ਅਪ੍ਪਮਾਦੇਨ ਓਤਰਾਹੀ’ਤਿ ਵਤ੍ਵਾ ਹਤ੍ਥੇ ਗਹੇਤ੍ਵਾ ਓਤਾਰੇਸਿ, ਸੋ ਤਾਯ ਤਂ ਵਚਨਂ ਅਨੁਸ੍ਸਰਿਤ੍ਵਾ ਸਦ੍ਦਮਕਾਸਿ, ਤਤੋਪਿ ਤੇ ਭਯਂ ਨਤ੍ਥੀ’’ਤਿ ਤਂ ਕਾਰਣਂ ਅਤ੍ਤਨੋ ਞਾਣਬਲੇਨ ਪਰਿਚ੍ਛਿਨ੍ਦਿਤ੍ਵਾ ਪਾਕਟਂ ਕਰੋਨ੍ਤੋ ਸਤ੍ਤਮਂ ਗਾਥਮਾਹ –

੧੬. ‘‘ਅਨ੍ਧਕਾਰਤਿਮਿਸਾਯਂ, ਤੁਙ੍ਗੇ ਉਪਰਿਪਬ੍ਬਤੇ;

ਸਾ ਮਂ ਸਣ੍ਹੇਨ ਮੁਦੁਨਾ, ਮਾ ਪਾਦਂ ਖਲਿ ਯਸ੍ਮਨੀ’’ਤਿ.

ਤਤ੍ਥ ਅਨ੍ਧਕਾਰਤਿਮਿਸਾਯਨ੍ਤਿ ਅਨ੍ਧਭਾਵਕਾਰਕੇ ਤਮੇ. ਤੁਙ੍ਗੇਤਿ ਤਿਖਿਣੇ. ਸਣ੍ਹੇਨ ਮੁਦੁਨਾਤਿ ਮਟ੍ਠੇਨ ਮੁਦੁਕੇਨ ਵਚਨੇਨ. ਮਾ ਪਾਦਂ ਖਲਿ ਯਸ੍ਮਨੀਤਿ ਯ-ਕਾਰੋ ਬ੍ਯਞ੍ਜਨਸਨ੍ਧਿਵਸੇਨ ਗਹਿਤੋ. ਇਦਂ ਵੁਤ੍ਤਂ ਹੋਤਿ – ਸਾ ਮਂ ਕਿਨ੍ਨਰੀ ਸਣ੍ਹੇਨ ਮੁਦਕੇਨ ਵਚਨੇਨ ‘‘ਸਾਮਿ, ਅਪ੍ਪਮਤ੍ਤੋ ਹੋਹਿ, ਮਾ ਪਾਦਂ ਖਲਿ ਅਸ੍ਮਨਿ, ਯਥਾ ਤੇ ਉਪਕ੍ਖਲਿਤ੍ਵਾ ਪਾਦੋ ਪਾਸਾਣਸ੍ਮਿਂ ਨ ਖਲਤਿ, ਤਥਾ ਓਤਰਾ’’ਤਿ ਵਤ੍ਵਾ ਹਤ੍ਥੇਨ ਗਹੇਤ੍ਵਾ ਓਤਾਰੇਸੀਤਿ.

ਇਤਿ ਮਹਾਸਤ੍ਤੋ ਕਿਨ੍ਨਰੇਨ ਕਤਸਦ੍ਦਕਾਰਣਂ ਕਥੇਤ੍ਵਾ ਤਂ ਵਿਸ੍ਸਜ੍ਜਾਪੇਤ੍ਵਾ ‘‘ਮਹਾਰਾਜ, ਅਟ੍ਠਮੋ ਉਦਾਨਸਦ੍ਦੋ ਅਹੋਸਿ. ਨਨ੍ਦਮੂਲਕਪਬ੍ਭਾਰਸ੍ਮਿਂ ਕਿਰ ਏਕੋ ਪਚ੍ਚੇਕਬੁਦ੍ਧੋ ਅਤ੍ਤਨੋ ਆਯੁਸਙ੍ਖਾਰਪਰਿਕ੍ਖਯਂ ਞਤ੍ਵਾ ‘ਮਨੁਸ੍ਸਪਥਂ ਗਨ੍ਤ੍ਵਾ ਬਾਰਾਣਸਿਰਞ੍ਞੋ ਉਯ੍ਯਾਨੇ ਪਰਿਨਿਬ੍ਬਾਯਿਸ੍ਸਾਮਿ, ਤਸ੍ਸ ਮੇ ਮਨੁਸ੍ਸਾ ਸਰੀਰਨਿਕ੍ਖੇਪਂ ਕਾਰੇਤ੍ਵਾ ਸਾਧੁਕੀਲ਼ਂ ਕੀਲ਼ਿਤ੍ਵਾ ਧਾਤੁਪੂਜਂ ਕਤ੍ਵਾ ਸਗ੍ਗਪਥਂ ਪੂਰੇਸ੍ਸਨ੍ਤੀ’ਤਿ ਇਦ੍ਧਾਨੁਭਾਵੇਨ ਆਗਚ੍ਛਨ੍ਤੋ ਤਵ ਪਾਸਾਦਸ੍ਸ ਮਤ੍ਥਕਂ ਪਤ੍ਤਕਾਲੇ ਖਨ੍ਧਭਾਰਂ ਓਤਾਰੇਤ੍ਵਾ ਨਿਬ੍ਬਾਨਪੁਰਪਵੇਸਨਦੀਪਨਂ ਉਦਾਨਂ ਉਦਾਨੇਸੀ’’ਤਿ ਪਚ੍ਚੇਕਬੁਦ੍ਧੇਨ ਵੁਤ੍ਤਂ ਗਾਥਮਾਹ –

੧੭. ‘‘ਅਸਂਸਯਂ ਜਾਤਿਖਯਨ੍ਤਦਸ੍ਸੀ, ਨ ਗਬ੍ਭਸੇਯ੍ਯਂ ਪੁਨਰਾਵਜਿਸ੍ਸਂ;

ਅਯਮਨ੍ਤਿਮਾ ਪਚ੍ਛਿਮਾ ਗਬ੍ਭਸੇਯ੍ਯਾ, ਖੀਣੋ ਮੇ ਸਂਸਾਰੋ ਪੁਨਬ੍ਭਵਾਯਾ’’ਤਿ.

ਤਸ੍ਸਤ੍ਥੋ – ਜਾਤਿਯਾ ਖਯਨ੍ਤਸਙ੍ਖਾਤਸ੍ਸ ਨਿਬ੍ਬਾਨਸ੍ਸ ਦਿਟ੍ਠਤ੍ਤਾ ਜਾਤਿਖਯਨ੍ਤਦਸ੍ਸੀ ਅਹਂ ਅਸਂਸਯਂ ਪੁਨ ਗਬ੍ਭਸੇਯ੍ਯਂ ਨ ਆਵਜਿਸ੍ਸਂ, ਅਯਂ ਮੇ ਅਨ੍ਤਿਮਾ ਜਾਤਿ, ਪਚ੍ਛਿਮਾ ਗਬ੍ਭਸੇਯ੍ਯਾ, ਖੀਣੋ ਮੇ ਪੁਨਬ੍ਭਵਾਯ ਖਨ੍ਧਪਟਿਪਾਟਿਸਙ੍ਖਾਤੋ ਸਂਸਾਰੋਤਿ.

‘‘ਇਦਞ੍ਚ ਪਨ ਸੋ ਉਦਾਨਂ ਵਤ੍ਵਾ ਇਮਂ ਉਯ੍ਯਾਨਵਨਂ ਆਗਮ੍ਮ ਏਕਸ੍ਸ ਸੁਪੁਪ੍ਫਿਤਸ੍ਸ ਸਾਲਸ੍ਸ ਮੂਲੇ ਪਰਿਨਿਬ੍ਬੁਤੋ, ਏਹਿ, ਮਹਾਰਾਜ, ਸਰੀਰਕਿਚ੍ਚਮਸ੍ਸ ਕਰਿਸ੍ਸਾਮਾ’’ਤਿ ਮਹਾਸਤ੍ਤੋ ਰਾਜਾਨਂ ਗਹੇਤ੍ਵਾ ਪਚ੍ਚੇਕਬੁਦ੍ਧਸ੍ਸ ਪਰਿਨਿਬ੍ਬੁਤਟ੍ਠਾਨਂ ਗਨ੍ਤ੍ਵਾ ਸਰੀਰਂ ਦਸ੍ਸੇਸਿ. ਰਾਜਾ ਤਸ੍ਸ ਸਰੀਰਂ ਦਿਸ੍ਵਾ ਸਦ੍ਧਿਂ ਬਲਕਾਯੇਨ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਬੋਧਿਸਤ੍ਤਸ੍ਸ ਵਚਨਂ ਨਿਸ੍ਸਾਯ ਯਞ੍ਞਂ ਹਾਰੇਤ੍ਵਾ ਸਬ੍ਬਸਤ੍ਤਾਨਂ ਜੀਵਿਤਦਾਨਂ ਦਤ੍ਵਾ ਨਗਰੇ ਮਾਘਾਤਭੇਰਿਂ ਚਰਾਪੇਤ੍ਵਾ ਸਤ੍ਤਾਹਂ ਸਾਧੁਕੀਲ਼ਂ ਕੀਲ਼ਿਤ੍ਵਾ ਸਬ੍ਬਗਨ੍ਧਚਿਤਕੇ ਮਹਨ੍ਤੇਨ ਸਕ੍ਕਾਰੇਨ ਪਚ੍ਚੇਕਬੁਦ੍ਧਸ੍ਸ ਸਰੀਰਂ ਝਾਪੇਤ੍ਵਾ ਧਾਤੁਯੋ ਚਤੁਮਹਾਪਥੇ ਥੂਪਂ ਕਾਰੇਸਿ. ਬੋਧਿਸਤ੍ਤੋਪਿ ਰਞ੍ਞੋ ਧਮ੍ਮਂ ਦੇਸੇਤ੍ਵਾ ‘‘ਅਪ੍ਪਮਤ੍ਤੋ ਹੋਹੀ’’ਤਿ ਓਵਦਿਤ੍ਵਾ ਹਿਮਵਨ੍ਤਮੇਵ ਪਵਿਸਿਤ੍ਵਾ ਬ੍ਰਹ੍ਮਵਿਹਾਰੇਸੁ ਪਰਿਕਮ੍ਮਂ ਕਤ੍ਵਾ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਮਹਾਰਾਜ, ਤਸ੍ਸ ਸਦ੍ਦਸ੍ਸ ਸੁਤਕਾਰਣਾ ਤਵ ਕੋਚਿ ਅਨ੍ਤਰਾਯੋ ਨਤ੍ਥੀ’’ਤਿ ਯਞ੍ਞਂ ਹਰਾਪੇਤ੍ਵਾ ‘‘ਮਹਾਜਨਸ੍ਸ ਜੀਵਿਤਂ ਦੇਹੀ’’ਤਿ ਜੀਵਿਤਦਾਨਂ ਦਾਪੇਤ੍ਵਾ ਨਗਰੇ ਧਮ੍ਮਭੇਰਿਂ ਚਰਾਪੇਤ੍ਵਾ ਧਮ੍ਮਂ ਦੇਸੇਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਮਾਣਵੋ ਸਾਰਿਪੁਤ੍ਤੋ, ਤਾਪਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਟ੍ਠਸਦ੍ਦਜਾਤਕਵਣ੍ਣਨਾ ਦੁਤਿਯਾ.

[੪੧੯] ੩. ਸੁਲਸਾਜਾਤਕਵਣ੍ਣਨਾ

ਇਦਂ ਸੁਵਣ੍ਣਕਾਯੂਰਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਅਨਾਥਪਿਣ੍ਡਿਕਸ੍ਸ ਦਾਸਿਂ ਆਰਬ੍ਭ ਕਥੇਸਿ. ਸਾ ਕਿਰ ਏਕਸ੍ਮਿਂ ਉਸ੍ਸਵਦਿਵਸੇ ਦਾਸਿਗਣੇਨ ਸਦ੍ਧਿਂ ਉਯ੍ਯਾਨਂ ਗਚ੍ਛਨ੍ਤੀ ਅਤ੍ਤਨੋ ਸਾਮਿਨਿਂ ਪੁਞ੍ਞਲਕ੍ਖਣਦੇਵਿਂ ਆਭਰਣਂ ਯਾਚਿ. ਸਾ ਤਸ੍ਸਾ ਸਤਸਹਸ੍ਸਮੂਲਂ ਅਤ੍ਤਨੋ ਆਭਰਣਂ ਅਦਾਸਿ. ਸਾ ਤਂ ਪਿਲ਼ਨ੍ਧਿਤ੍ਵਾ ਦਾਸਿਗਣੇਨ ਸਦ੍ਧਿਂ ਉਯ੍ਯਾਨਂ ਪਾਵਿਸਿ. ਅਥੇਕੋ ਚੋਰੋ ਤਸ੍ਸਾ ਆਭਰਣੇ ਲੋਭਂ ਉਪ੍ਪਾਦੇਤ੍ਵਾ ‘‘ਇਮਂ ਮਾਰੇਤ੍ਵਾ ਆਭਰਣਂ ਹਰਿਸ੍ਸਾਮੀ’’ਤਿ ਤਾਯ ਸਦ੍ਧਿਂ ਸਲ੍ਲਪਨ੍ਤੋ ਉਯ੍ਯਾਨਂ ਗਨ੍ਤ੍ਵਾ ਤਸ੍ਸਾ ਮਚ੍ਛਮਂਸਸੁਰਾਦੀਨਿ ਅਦਾਸਿ. ਸਾ ‘‘ਕਿਲੇਸਵਸੇਨ ਦੇਤਿ ਮਞ੍ਞੇ’’ਤਿ ਗਹੇਤ੍ਵਾ ਉਯ੍ਯਾਨਕੀਲ਼ਂ ਕੀਲ਼ਿਤ੍ਵਾ ਵੀਮਂਸਨਤ੍ਥਾਯ ਸਾਯਨ੍ਹਸਮਯੇ ਨਿਪਨ੍ਨੇ ਦਾਸਿਗਣੇ ਉਟ੍ਠਾਯ ਤਸ੍ਸ ਸਨ੍ਤਿਕਂ ਅਗਮਾਸਿ. ਸੋ ‘‘ਭਦ੍ਦੇ, ਇਮਂ ਠਾਨਂ ਅਪ੍ਪਟਿਚ੍ਛਨ੍ਨਂ, ਥੋਕਂ ਪੁਰਤੋ ਗਚ੍ਛਾਮਾ’’ਤਿ ਆਹ. ਤਂ ਸੁਤ੍ਵਾ ਇਤਰਾ ‘‘ਇਮਸ੍ਮਿਂ ਠਾਨੇ ਸਕ੍ਕਾ ਰਹਸ੍ਸਕਮ੍ਮਂ ਕਾਤੁਂ, ਅਯਂ ਪਨ ਨਿਸ੍ਸਂਸਯਂ ਮਂ ਮਾਰੇਤ੍ਵਾ ਪਿਲ਼ਨ੍ਧਨਭਣ੍ਡਂ ਹਰਿਤੁਕਾਮੋ ਭਵਿਸ੍ਸਤਿ, ਹੋਤੁ, ਸਿਕ੍ਖਾਪੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ‘‘ਸਾਮਿ, ਸੁਰਾਮਦੇਨ ਮੇ ਸੁਕ੍ਖਂ ਸਰੀਰਂ, ਪਾਨੀਯਂ ਤਾਵ ਮਂ ਪਾਯੇਹੀ’’ਤਿ ਏਕਂ ਕੂਪਂ ਨੇਤ੍ਵਾ ‘‘ਇਤੋ ਮੇ ਪਾਨੀਯਂ ਓਸਿਞ੍ਚਾ’’ਤਿ ਰਜ੍ਜੁਞ੍ਚ ਘਟਞ੍ਚ ਦਸ੍ਸੇਸਿ. ਚੋਰੋ ਰਜ੍ਜੁਂ ਕੂਪੇ ਓਤਾਰੇਸਿ, ਅਥ ਨਂ ਓਨਮਿਤ੍ਵਾ ਉਦਕਂ ਓਸਿਞ੍ਚਨ੍ਤਂ ਮਹਬ੍ਬਲਦਾਸੀ ਉਭੋਹਿ ਹਤ੍ਥੇਹਿ ਆਣਿਸਦਂ ਪਹਰਿਤ੍ਵਾ ਕੂਪੇ ਖਿਪਿਤ੍ਵਾ ‘‘ਨ ਤ੍ਵਂ ਏਤ੍ਤਕੇਨ ਮਰਿਸ੍ਸਸੀ’’ਤਿ ਏਕਂ ਮਹਨ੍ਤਂ ਇਟ੍ਠਕਂ ਮਤ੍ਥਕੇ ਆਸੁਮ੍ਭਿ. ਸੋ ਤਤ੍ਥੇਵ ਜੀਵਿਤਕ੍ਖਯਂ ਪਤ੍ਤੋ. ਸਾਪਿ ਨਗਰਂ ਪਵਿਸਿਤ੍ਵਾ ਸਾਮਿਨਿਯਾ ਆਭਰਣਂ ਦਦਮਾਨਾ ‘‘ਮਨਮ੍ਹਿ ਅਜ੍ਜ ਇਮਂ ਆਭਰਣਂ ਨਿਸ੍ਸਾਯ ਮਤਾ’’ਤਿ ਸਬ੍ਬਂ ਤਂ ਪਵਤ੍ਤਿਂ ਆਰੋਚੇਸਿ, ਸਾਪਿ ਅਨਾਥਪਿਣ੍ਡਿਕਸ੍ਸ ਆਰੋਚੇਸਿ, ਅਨਾਥਪਿਣ੍ਡਿਕੋ ਤਥਾਗਤਸ੍ਸ ਆਰੋਚੇਸਿ. ਸਤ੍ਥਾ ‘‘ਨ ਖੋ, ਗਹਪਤਿ, ਇਦਾਨੇਵ ਸਾ ਦਾਸੀ ਠਾਨੁਪ੍ਪਤ੍ਤਿਕਾਯ ਪਞ੍ਞਾਯ ਸਮਨ੍ਨਾਗਤਾ, ਪੁਬ੍ਬੇਪਿ ਸਮਨ੍ਨਾਗਤਾਵ, ਨ ਚ ਇਦਾਨੇਵ ਤਾਯ ਸੋ ਮਾਰਿਤੋ, ਪੁਬ੍ਬੇਪਿ ਨਂ ਮਾਰੇਸਿਯੇਵਾ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਸੁਲਸਾ ਨਾਮ ਨਗਰਸੋਭਿਨੀ ਪਞ੍ਚਸਤਵਣ੍ਣਦਾਸਿਪਰਿਵਾਰਾ ਅਹੋਸਿ, ਸਹਸ੍ਸੇਨ ਰਤ੍ਤਿਂ ਗਚ੍ਛਤਿ. ਤਸ੍ਮਿਂਯੇਵ ਨਗਰੇ ਸਤ੍ਤੁਕੋ ਨਾਮ ਚੋਰੋ ਅਹੋਸਿ ਨਾਗਬਲੋ, ਰਤ੍ਤਿਭਾਗੇ ਇਸ੍ਸਰਘਰਾਨਿ ਪਵਿਸਿਤ੍ਵਾ ਯਥਾਰੁਚਿਂ ਵਿਲੁਮ੍ਪਤਿ. ਨਾਗਰਾ ਸਨ੍ਨਿਪਤਿਤ੍ਵਾ ਰਞ੍ਞੋ ਉਪਕ੍ਕੋਸਿਂਸੁ. ਰਾਜਾ ਨਗਰਗੁਤ੍ਤਿਕਂ ਆਣਾਪੇਤ੍ਵਾ ਤਤ੍ਥ ਤਤ੍ਥ ਗੁਮ੍ਬਂ ਠਪਾਪੇਤ੍ਵਾ ਚੋਰਂ ਗਣ੍ਹਾਪੇਤ੍ਵਾ ‘‘ਸੀਸਮਸ੍ਸ ਛਿਨ੍ਦਥਾ’’ਤਿ ਆਹ. ਤਂ ਪਚ੍ਛਾਬਾਹਂ ਬਨ੍ਧਿਤ੍ਵਾ ਚਤੁਕ੍ਕੇ ਚਤੁਕ੍ਕੇ ਕਸਾਹਿ ਤਾਲ਼ੇਤ੍ਵਾ ਆਘਾਤਨਂ ਨੇਨ੍ਤਿ. ‘‘ਚੋਰੋ ਕਿਰ ਗਹਿਤੋ’’ਤਿ ਸਕਲਨਗਰਂ ਸਙ੍ਖੁਭਿ. ਤਦਾ ਸੁਲਸਾ ਵਾਤਪਾਨੇ ਠਤ੍ਵਾ ਅਨ੍ਤਰਵੀਥਿਂ ਓਲੋਕੇਨ੍ਤੀ ਤਂ ਦਿਸ੍ਵਾ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ‘‘ਸਚੇ ਇਮਂ ਚੋਰੋਤਿ ਗਹਿਤਪੁਰਿਸਂ ਮੋਚੇਤੁਂ ਸਕ੍ਖਿਸ੍ਸਾਮਿ, ਇਦਂ ਕਿਲਿਟ੍ਠਕਮ੍ਮਂ ਅਕਤ੍ਵਾ ਇਮਿਨਾਵ ਸਦ੍ਧਿਂ ਸਮਗ੍ਗਵਾਸਂ ਕਪ੍ਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਹੇਟ੍ਠਾ ਕਣਵੇਰਜਾਤਕੇ (ਜਾ. ੧.੪.੬੯ ਆਦਯੋ) ਵੁਤ੍ਤਨਯੇਨੇਵ ਨਗਰਗੁਤ੍ਤਿਕਸ੍ਸ ਸਹਸ੍ਸਂ ਪੇਸੇਤ੍ਵਾ ਤਂ ਮੋਚੇਤ੍ਵਾ ਤੇਨ ਸਦ੍ਧਿਂ ਸਮ੍ਮੋਦਮਾਨਾ ਸਮਗ੍ਗਵਾਸਂ ਵਸਿ. ਚੋਰੋ ਤਿਣ੍ਣਂ ਚਤੁਨ੍ਨਂ ਮਾਸਾਨਂ ਅਚ੍ਚਯੇਨ ਚਿਨ੍ਤੇਸਿ ‘‘ਅਹਂ ਇਮਸ੍ਮਿਂਯੇਵ ਠਾਨੇ ਵਸਿਤੁਂ ਨ ਸਕ੍ਖਿਸ੍ਸਾਮਿ, ਤੁਚ੍ਛਹਤ੍ਥੇਨ ਪਲਾਯਿਤੁਮ੍ਪਿ ਨ ਸਕ੍ਕਾ, ਸੁਲਸਾਯ ਪਿਲ਼ਨ੍ਧਨਭਣ੍ਡਂ ਸਤਸਹਸ੍ਸਂ ਅਗ੍ਘਤਿ, ਸੁਲਸਂ ਮਾਰੇਤ੍ਵਾ ਇਦਂ ਗਣ੍ਹਿਸ੍ਸਾਮੀ’’ਤਿ. ਅਥ ਨਂ ਏਕਦਿਵਸਂ ਆਹ – ‘‘ਭਦ੍ਦੇ, ਅਹਂ ਤਦਾ ਰਾਜਪੁਰਿਸੇਹਿ ਨੀਯਮਾਨੋ ਅਸੁਕਪਬ੍ਬਤਮਤ੍ਥਕੇ ਰੁਕ੍ਖਦੇਵਤਾਯ ਬਲਿਕਮ੍ਮਂ ਪਟਿਸ੍ਸੁਣਿਂ, ਸਾ ਮਂ ਬਲਿਕਮ੍ਮਂ ਅਲਭਮਾਨਾ ਭਾਯਾਪੇਤਿ, ਬਲਿਕਮ੍ਮਮਸ੍ਸਾ ਕਰੋਮਾ’’ਤਿ. ‘‘ਸਾਧੁ, ਸਾਮਿ, ਸਜ੍ਜੇਤ੍ਵਾ ਪੇਸੇਹੀ’’ਤਿ. ‘‘ਭਦ੍ਦੇ, ਪੇਸੇਤੁਂ ਨ ਵਟ੍ਟਤਿ, ਮਯਂ ਉਭੋਪਿ ਸਬ੍ਬਾਭਰਣਪਟਿਮਣ੍ਡਿਤਾ ਮਹਨ੍ਤੇਨ ਪਰਿਵਾਰੇਨ ਗਨ੍ਤ੍ਵਾ ਦਸ੍ਸਾਮਾ’’ਤਿ. ‘‘ਸਾਧੁ, ਸਾਮਿ, ਤਥਾ ਕਰੋਮਾ’’ਤਿ.

ਅਥ ਨਂ ਤਥਾ ਕਾਰੇਤ੍ਵਾ ਪਬ੍ਬਤਪਾਦਂ ਗਤਕਾਲੇ ਆਹ – ‘‘ਭਦ੍ਦੇ, ਮਹਾਜਨਂ ਦਿਸ੍ਵਾ ਦੇਵਤਾ ਬਲਿਕਮ੍ਮਂ ਨ ਸਮ੍ਪਟਿਚ੍ਛਿਸ੍ਸਤਿ, ਮਯਂ ਉਭੋਵ ਅਭਿਰੁਹਿਤ੍ਵਾ ਦੇਮਾ’’ਤਿ. ਸੋ ਤਾਯ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤੋ ਤਂ ਬਲਿਪਾਤਿਂ ਉਕ੍ਖਿਪਾਪੇਤ੍ਵਾ ਸਯਂ ਸਨ੍ਨਦ੍ਧਪਞ੍ਚਾਵੁਧੋ ਹੁਤ੍ਵਾ ਪਬ੍ਬਤਮਤ੍ਥਕਂ ਅਭਿਰੁਹਿਤ੍ਵਾ ਏਕਂ ਸਤਪੋਰਿਸਪਪਾਤਂ ਨਿਸ੍ਸਾਯ ਜਾਤਰੁਕ੍ਖਮੂਲੇ ਬਲਿਭਾਜਨਂ ਠਪਾਪੇਤ੍ਵਾ ‘‘ਭਦ੍ਦੇ, ਨਾਹਂ ਬਲਿਕਮ੍ਮਤ੍ਥਾਯ ਆਗਤੋ, ਤਂ ਪਨ ਮਾਰੇਤ੍ਵਾ ਪਿਲ਼ਨ੍ਧਨਂ ਤੇ ਗਹੇਤ੍ਵਾ ਗਮਿਸ੍ਸਾਮੀਤਿ ਆਗਤੋਮ੍ਹਿ, ਤਵ ਪਿਲ਼ਨ੍ਧਨਂ ਓਮੁਞ੍ਚਿਤ੍ਵਾ ਉਤ੍ਤਰਸਾਟਕੇਨ ਭਣ੍ਡਿਕਂ ਕਰੋਹੀ’’ਤਿ ਆਹ. ‘‘ਸਾਮਿ, ਮਂ ਕਸ੍ਮਾ ਮਾਰੇਸੀ’’ਤਿ? ‘‘ਧਨਕਾਰਣਾ’’ਤਿ. ‘‘ਸਾਮਿ, ਮਯਾ ਕਤਗੁਣਂ ਅਨੁਸ੍ਸਰ, ਅਹਂ ਤਂ ਬਨ੍ਧਿਤ੍ਵਾ ਨੀਯਮਾਨਂ ਸੇਟ੍ਠਿਪੁਤ੍ਤੇਨ ਪਰਿਵਤ੍ਤੇਤ੍ਵਾ ਬਹੁਂ ਧਨਂ ਦਤ੍ਵਾ ਜੀਵਿਤਂ ਲਭਾਪੇਸਿਂ, ਦੇਵਸਿਕਂ ਸਹਸ੍ਸਂ ਲਭਮਾਨਾਪਿ ਅਞ੍ਞਂ ਪੁਰਿਸਂ ਨ ਓਲੋਕੇਮਿ, ਏਵਞ੍ਹਿ ਤਵ ਉਪਕਾਰਿਕਂ ਮਾ ਮਂ ਮਾਰੇਹਿ, ਬਹੁਞ੍ਚ ਤੇ ਧਨਂ ਦਸ੍ਸਾਮਿ, ਤਵ ਦਾਸੀ ਚ ਭਵਿਸ੍ਸਾਮੀ’’ਤਿ ਯਾਚਨ੍ਤੀ ਪਠਮਂ ਗਾਥਮਾਹ –

੧੮. ‘‘ਇਦਂ ਸੁਵਣ੍ਣਕਾਯੂਰਂ, ਮੁਤ੍ਤਾ ਵੇਲ਼ੁਰਿਯਾ ਬਹੂ;

ਸਬ੍ਬਂ ਹਰਸ੍ਸੁ ਭਦ੍ਦਨ੍ਤੇ, ਮਞ੍ਚ ਦਾਸੀਤਿ ਸਾਵਯਾ’’ਤਿ.

ਤਤ੍ਥ ਕਾਯੂਰਨ੍ਤਿ ਗੀਵਾਯਂ ਪਿਲ਼ਨ੍ਧਨਪਸਾਧਨਂ ਕਾਯੂਰਂ. ਸਾਵਯਾਤਿ ਮਹਾਜਨਮਜ੍ਝੇ ਸਾਵੇਤ੍ਵਾ ਦਾਸਿਂ ਕਤ੍ਵਾ ਗਣ੍ਹਾਤਿ.

ਤਤੋ ਸਤ੍ਤੁਕੇਨ –

੧੯. ‘‘ਓਰੋਪਯਸ੍ਸੁ ਕਲ੍ਯਾਣਿ, ਮਾ ਬਾਲ਼੍ਹਂ ਪਰਿਦੇਵਸਿ;

ਨ ਚਾਹਂ ਅਭਿਜਾਨਾਮਿ, ਅਹਨ੍ਤ੍ਵਾ ਧਨਮਾਭਤ’’ਨ੍ਤਿ. –

ਅਤ੍ਤਨੋ ਅਜ੍ਝਾਸਯਾਨੁਰੂਪਂ ਦੁਤਿਯਗਾਥਾਯ ਵੁਤ੍ਤਾਯ ਸੁਲਸਾ ਠਾਨੁਪ੍ਪਤ੍ਤਿਕਾਰਣਂ ਪਟਿਲਭਿਤ੍ਵਾ ‘‘ਅਯਂ ਚੋਰੋ ਮਯ੍ਹਂ ਜੀਵਿਤਂ ਨ ਦਸ੍ਸਤਿ, ਉਪਾਯੇਨ ਨਂ ਪਠਮਤਰਂ ਪਪਾਤੇ ਪਾਤੇਤ੍ਵਾ ਜੀਵਿਤਕ੍ਖਯਂ ਪਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਾਥਾਦ੍ਵਯਮਾਹ –

੨੦. ‘‘ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤਾਸ੍ਮਿ ਵਿਞ੍ਞੁਤਂ;

ਨ ਚਾਹਂ ਅਭਿਜਾਨਾਮਿ, ਅਞ੍ਞਂ ਪਿਯਤਰਂ ਤਯਾ.

੨੧. ‘‘ਏਹਿ ਤਂ ਉਪਗੂਹਿਸ੍ਸਂ, ਕਰਿਸ੍ਸਞ੍ਚ ਪਦਕ੍ਖਿਣਂ;

ਨ ਹਿ ਦਾਨਿ ਪੁਨ ਅਤ੍ਥਿ, ਮਮ ਤੁਯ੍ਹਞ੍ਚ ਸਙ੍ਗਮੋ’’ਤਿ.

ਸਤ੍ਤੁਕੋ ਤਸ੍ਸਾਧਿਪ੍ਪਾਯਂ ਅਜਾਨਨ੍ਤੋ ‘‘ਸਾਧੁ, ਭਦ੍ਦੇ, ਏਹਿ ਉਪਗੂਹਸ੍ਸੁ ਮ’’ਨ੍ਤਿ ਆਹ. ਸੁਲਸਾ ਤਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਉਪਗੂਹਿਤ੍ਵਾ ‘‘ਇਦਾਨਿ ਤਂ, ਸਾਮਿ, ਚਤੂਸੁ ਪਸ੍ਸੇਸੁ ਵਨ੍ਦਿਸ੍ਸਾਮੀ’’ਤਿ ਵਤ੍ਵਾ ਪਾਦਪਿਟ੍ਠਿਯਂ ਸੀਸਂ ਠਪੇਤ੍ਵਾ ਬਾਹੁਪਸ੍ਸੇ ਵਨ੍ਦਿਤ੍ਵਾ ਪਚ੍ਛਿਮਪਸ੍ਸਂ ਗਨ੍ਤ੍ਵਾ ਵਨ੍ਦਮਾਨਾ ਵਿਯ ਹੁਤ੍ਵਾ ਨਾਗਬਲਾ ਗਣਿਕਾ ਚੋਰਂ ਦ੍ਵੀਸੁ ਪਚ੍ਛਾਪਾਦੇਸੁ ਗਹੇਤ੍ਵਾ ਹੇਟ੍ਠਾ ਸੀਸਂ ਕਤ੍ਵਾ ਸਤਪੋਰਿਸੇ ਨਰਕੇ ਖਿਪਿ. ਸੋ ਤਤ੍ਥੇਵ ਚੁਣ੍ਣਵਿਚੁਣ੍ਣਂ ਪਤ੍ਵਾ ਮਰਿ. ਤਂ ਕਿਰਿਯਂ ਦਿਸ੍ਵਾ ਪਬ੍ਬਤਮਤ੍ਥਕੇ ਨਿਬ੍ਬਤ੍ਤਦੇਵਤਾ ਇਮਾ ਗਾਥਾ ਅਭਾਸਿ –

੨੨. ‘‘ਨ ਹਿ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਤਤ੍ਥ ਤਤ੍ਥ ਵਿਚਕ੍ਖਣਾ.

੨੩. ‘‘ਨ ਹਿ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਲਹੁਂ ਅਤ੍ਥਂ ਵਿਚਿਨ੍ਤਿਕਾ.

੨੪. ‘‘ਲਹੁਞ੍ਚ ਵਤ ਖਿਪ੍ਪਞ੍ਚ, ਨਿਕਟ੍ਠੇ ਸਮਚੇਤਯਿ;

ਮਿਗਂ ਪੁਣ੍ਣਾਯਤੇਨੇਵ, ਸੁਲਸਾ ਸਤ੍ਤੁਕਂ ਵਧਿ.

੨੫. ‘‘ਯੋਧ ਉਪ੍ਪਤਿਤਂ ਅਤ੍ਥਂ, ਨ ਖਿਪ੍ਪਮਨੁਬੁਜ੍ਝਤਿ;

ਸੋ ਹਞ੍ਞਤਿ ਮਨ੍ਦਮਤਿ, ਚੋਰੋਵ ਗਿਰਿਗਬ੍ਭਰੇ.

੨੬. ‘‘ਯੋ ਚ ਉਪ੍ਪਤਿਤਂ ਅਤ੍ਥਂ, ਖਿਪ੍ਪਮੇਵ ਨਿਬੋਧਤਿ;

ਮੁਚ੍ਚਤੇ ਸਤ੍ਤੁਸਮ੍ਬਾਧਾ, ਸੁਲਸਾ ਸਤ੍ਤੁਕਾਮਿਵਾ’’ਤਿ.

ਤਤ੍ਥ ਪਣ੍ਡਿਤਾ ਹੋਤੀਤਿ ਇਤ੍ਥੀਪਿ ਪਣ੍ਡਿਤਾ ਤਤ੍ਥ ਤਤ੍ਥ ਵਿਚਕ੍ਖਣਾ ਹੋਤਿ, ਅਥ ਵਾ ਇਤ੍ਥੀ ਪਣ੍ਡਿਤਾ ਚੇਵ ਤਤ੍ਥ ਤਤ੍ਥ ਵਿਚਕ੍ਖਣਾ ਚ ਹੋਤਿ. ਲਹੁਂ ਅਤ੍ਥਂ ਵਿਚਿਨ੍ਤਿਕਾਤਿ ਲਹੁਂ ਖਿਪ੍ਪਂ ਅਤ੍ਥਂ ਵਿਚਿਨ੍ਤਿਕਾ. ਲਹੁਞ੍ਚ ਵਤਾਤਿ ਅਦਨ੍ਧਞ੍ਚ ਵਤ. ਖਿਪ੍ਪਞ੍ਚਾਤਿ ਅਚਿਰੇਨੇਵ. ਨਿਕਟ੍ਠੇ ਸਮਚੇਤਯੀਤਿ ਸਨ੍ਤਿਕੇ ਠਿਤਾਵ ਤਸ੍ਸ ਮਰਣੂਪਾਯਂ ਚਿਨ੍ਤੇਸਿ. ਪੁਣ੍ਣਾਯਤੇਨੇਵਾਤਿ ਪੂਰਿਤਧਨੁਸ੍ਮਿਂ. ਇਦਂ ਵੁਤ੍ਤਂ ਹੋਤਿ – ਯਥਾ ਛੇਕੋ ਮਿਗਲੁਦ੍ਦਕੋ ਸਕਣ੍ਡਪੁਣ੍ਣਧਨੁਸ੍ਮਿਂ ਖਿਪ੍ਪਂ ਮਿਗਂ ਵਧਤਿ, ਏਵਂ ਸੁਲਸਾ ਸਤ੍ਤੁਕਂ ਵਧੀਤਿ. ਯੋਧਾਤਿ ਯੋ ਇਮਸ੍ਮਿਂ ਸਤ੍ਤਲੋਕੇ. ਨਿਬੋਧਤੀਤਿ ਜਾਨਾਤਿ. ਸਤ੍ਤੁਕਾਮਿਵਾਤਿ ਸਤ੍ਤੁਕਾ ਇਵ, ਯਥਾ ਸੁਲਸਾ ਮੁਤ੍ਤਾ, ਏਵਂ ਮੁਚ੍ਚਤੀਤਿ ਅਤ੍ਥੋ.

ਇਤਿ ਸੁਲਸਾ ਚੋਰਂ ਵਧਿਤ੍ਵਾ ਪਬ੍ਬਤਾ ਓਰੁਯ੍ਹ ਅਤ੍ਤਨੋ ਪਰਿਜਨਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਅਯ੍ਯਪੁਤ੍ਤੋ ਕਹ’’ਨ੍ਤਿ ਪੁਟ੍ਠਾ ‘‘ਮਾ ਤਂ ਪੁਚ੍ਛਥਾ’’ਤਿ ਵਤ੍ਵਾ ਰਥਂ ਅਭਿਰੁਹਿਤ੍ਵਾ ਨਗਰਮੇਵ ਪਾਵਿਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਤੇ ਉਭੋਪਿ ਇਮੇਯੇਵ ਅਹੇਸੁਂ, ਦੇਵਤਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੁਲਸਾਜਾਤਕਵਣ੍ਣਨਾ ਤਤਿਯਾ.

[੪੨੦] ੪. ਸੁਮਙ੍ਗਲਜਾਤਕਵਣ੍ਣਨਾ

ਭੁਸਮ੍ਹਿ ਕੁਦ੍ਧੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਰਾਜੋਵਾਦਸੁਤ੍ਤਂ ਆਰਬ੍ਭ ਕਥੇਸਿ. ਤਦਾ ਪਨ ਸਤ੍ਥਾ ਰਞ੍ਞਾ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋ ਵਯਪ੍ਪਤ੍ਤੋ ਪਿਤੁ ਅਚ੍ਚਯੇਨ ਰਜ੍ਜਂ ਕਾਰੇਸਿ, ਮਹਾਦਾਨਂ ਪਵਤ੍ਤੇਸਿ. ਤਸ੍ਸ ਸੁਮਙ੍ਗਲੋ ਨਾਮ ਉਯ੍ਯਾਨਪਾਲੋ ਅਹੋਸਿ. ਅਥੇਕੋ ਪਚ੍ਚੇਕਬੁਦ੍ਧੋ ਨਨ੍ਦਮੂਲਕਪਬ੍ਭਾਰਾ ਨਿਕ੍ਖਮਿਤ੍ਵਾ ਚਾਰਿਕਂ ਚਰਮਾਨੋ ਬਾਰਾਣਸਿਂ ਪਤ੍ਵਾ ਉਯ੍ਯਾਨੇ ਵਸਿਤ੍ਵਾ ਪੁਨਦਿਵਸੇ ਨਗਰਂ ਪਿਣ੍ਡਾਯ ਪਾਵਿਸਿ. ਤਮੇਨਂ ਰਾਜਾ ਦਿਸ੍ਵਾ ਪਸਨ੍ਨਚਿਤ੍ਤੋ ਵਨ੍ਦਿਤ੍ਵਾ ਪਾਸਾਦਂ ਆਰੋਪੇਤ੍ਵਾ ਰਾਜਾਸਨੇ ਨਿਸੀਦਾਪੇਤ੍ਵਾ ਨਾਨਗ੍ਗਰਸੇਹਿ ਖਾਦਨੀਯਭੋਜਨੀਯੇਹਿ ਪਰਿਵਿਸਿਤ੍ਵਾ ਅਨੁਮੋਦਨਂ ਸੁਤ੍ਵਾ ਪਸਨ੍ਨੋ ਅਤ੍ਤਨੋ ਉਯ੍ਯਾਨੇ ਵਸਨਤ੍ਥਾਯ ਪਟਿਞ੍ਞਂ ਗਾਹਾਪੇਤ੍ਵਾ ਉਯ੍ਯਾਨਂ ਪਵੇਸੇਤ੍ਵਾ ਸਯਮ੍ਪਿ ਭੁਤ੍ਤਪਾਤਰਾਸੋ ਤਤ੍ਥ ਗਨ੍ਤ੍ਵਾ ਰਤ੍ਤਿਟ੍ਠਾਨਦਿਵਾਟ੍ਠਾਨਾਦੀਨਿ ਸਂਵਿਦਹਿਤ੍ਵਾ ਸੁਮਙ੍ਗਲਂ ਨਾਮ ਉਯ੍ਯਾਨਪਾਲਂ ਵੇਯ੍ਯਾਵਚ੍ਚਕਰਂ ਕਤ੍ਵਾ ਨਗਰਂ ਪਾਵਿਸਿ. ਪਚ੍ਚੇਕਬੁਦ੍ਧੋ ਤਤੋ ਪਟ੍ਠਾਯ ਨਿਬਦ੍ਧਂ ਰਾਜਗੇਹੇ ਭੁਞ੍ਜਨ੍ਤੋ ਤਤ੍ਥ ਚਿਰਂ ਵਸਿ, ਸੁਮਙ੍ਗਲੋਪਿ ਨਂ ਸਕ੍ਕਚ੍ਚਂ ਉਪਟ੍ਠਹਿ.

ਅਥੇਕਦਿਵਸਂ ਪਚ੍ਚੇਕਬੁਦ੍ਧੋ ਸੁਮਙ੍ਗਲਂ ਆਮਨ੍ਤੇਤ੍ਵਾ ‘‘ਅਹਂ ਕਤਿਪਾਹਂ ਅਸੁਕਗਾਮਂ ਨਿਸ੍ਸਾਯ ਵਸਿਤ੍ਵਾ ਆਗਚ੍ਛਿਸ੍ਸਾਮਿ, ਰਞ੍ਞੋ ਆਰੋਚੇਹੀ’’ਤਿ ਵਤ੍ਵਾ ਪਕ੍ਕਾਮਿ. ਸੁਮਙ੍ਗਲੋਪਿ ਰਞ੍ਞੋ ਆਰੋਚੇਸਿ. ਪਚ੍ਚੇਕਬੁਦ੍ਧੋ ਕਤਿਪਾਹਂ ਤਤ੍ਥ ਵਸਿਤ੍ਵਾ ਸਾਯਂ ਸੂਰਿਯੇ ਅਤ੍ਥਙ੍ਗਤੇ ਤਂ ਉਯ੍ਯਾਨਂ ਪਚ੍ਚਾਗਮਿ. ਸੁਮਙ੍ਗਲੋ ਤਸ੍ਸ ਆਗਤਭਾਵਂ ਅਜਾਨਨ੍ਤੋ ਅਤ੍ਤਨੋ ਗੇਹਂ ਅਗਮਾਸਿ. ਪਚ੍ਚੇਕਬੁਦ੍ਧੋਪਿ ਪਤ੍ਤਚੀਵਰਂ ਪਟਿਸਾਮੇਤ੍ਵਾ ਥੋਕਂ ਚਙ੍ਕਮਿਤ੍ਵਾ ਪਾਸਾਣਫਲਕੇ ਨਿਸੀਦਿ. ਤਂ ਦਿਵਸਂ ਪਨ ਉਯ੍ਯਾਨਪਾਲਸ੍ਸ ਘਰਂ ਪਾਹੁਨਕਾ ਆਗਮਿਂਸੁ. ਸੋ ਤੇਸਂ ਸੂਪਬ੍ਯਞ੍ਜਨਤ੍ਥਾਯ ‘‘ਉਯ੍ਯਾਨੇ ਅਭਯਲਦ੍ਧਂ ਮਿਗਂ ਮਾਰੇਸ੍ਸਾਮੀ’’ਤਿ ਧਨੁਂ ਆਦਾਯ ਉਯ੍ਯਾਨਂ ਗਨ੍ਤ੍ਵਾ ਮਿਗਂ ਉਪਧਾਰੇਨ੍ਤੋ ਪਚ੍ਚੇਕਬੁਦ੍ਧਂ ਦਿਸ੍ਵਾ ‘‘ਮਹਾਮਿਗੋ ਭਵਿਸ੍ਸਤੀ’’ਤਿ ਸਞ੍ਞਾਯ ਸਰਂ ਸਨ੍ਨਯ੍ਹਿਤ੍ਵਾ ਵਿਜ੍ਝਿ. ਪਚ੍ਚੇਕਬੁਦ੍ਧੋ ਸੀਸਂ ਵਿਵਰਿਤ੍ਵਾ ‘‘ਸੁਮਙ੍ਗਲਾ’’ਤਿ ਆਹ. ਸੋ ਸਂਵੇਗਪ੍ਪਤ੍ਤੋ ਵਨ੍ਦਿਤ੍ਵਾ ‘‘ਭਨ੍ਤੇ, ਅਹਂ ਤੁਮ੍ਹਾਕਂ ਆਗਤਭਾਵਂ ਅਜਾਨਨ੍ਤੋ ‘ਮਿਗੋ’ਤਿ ਸਞ੍ਞਾਯ ਵਿਜ੍ਝਿਂ, ਖਮਥ ਮੇ’’ਤਿ ਵਤ੍ਵਾ ‘‘ਹੋਤੁ ਦਾਨਿ ਕਿਂ ਕਰਿਸ੍ਸਸਿ, ਏਹਿ ਸਰਂ ਲੁਞ੍ਚਿਤ੍ਵਾ ਗਣ੍ਹਾਹੀ’’ਤਿ ਵੁਤ੍ਤੇ ਵਨ੍ਦਿਤ੍ਵਾ ਸਰਂ ਲੁਞ੍ਚਿ, ਮਹਤੀ ਵੇਦਨਾ ਉਪ੍ਪਜ੍ਜਿ. ਪਚ੍ਚੇਕਬੁਦ੍ਧੋ ਤਤ੍ਥੇਵ ਪਰਿਨਿਬ੍ਬਾਯਿ. ਉਯ੍ਯਾਨਪਾਲੋ ‘‘ਸਚੇ ਰਾਜਾ ਜਾਨਿਸ੍ਸਤਿ, ਨਾਸੇਸ੍ਸਤੀ’’ਤਿ ਪੁਤ੍ਤਦਾਰਂ ਗਹੇਤ੍ਵਾ ਤਤੋਵ ਪਲਾਯਿ. ਤਾਵਦੇਵ ‘‘ਪਚ੍ਚੇਕਬੁਦ੍ਧੋ ਪਰਿਨਿਬ੍ਬੁਤੋ’’ਤਿ ਦੇਵਤਾਨੁਭਾਵੇਨ ਸਕਲਨਗਰਂ ਏਕਕੋਲਾਹਲਂ ਜਾਤਂ.

ਪੁਨਦਿਵਸੇ ਮਨੁਸ੍ਸਾ ਉਯ੍ਯਾਨਂ ਗਨ੍ਤ੍ਵਾ ਪਚ੍ਚੇਕਬੁਦ੍ਧਂ ਦਿਸ੍ਵਾ ‘‘ਉਯ੍ਯਾਨਪਾਲੋ ਪਚ੍ਚੇਕਬੁਦ੍ਧਂ ਮਾਰੇਤ੍ਵਾ ਪਲਾਤੋ’’ਤਿ ਰਞ੍ਞੋ ਕਥਯਿਂਸੁ. ਰਾਜਾ ਮਹਨ੍ਤੇਨ ਪਰਿਵਾਰੇਨ ਉਯ੍ਯਾਨਂ ਗਨ੍ਤ੍ਵਾ ਸਤ੍ਤਾਹਂ ਸਰੀਰਪੂਜਂ ਕਤ੍ਵਾ ਮਹਨ੍ਤੇਨ ਸਕ੍ਕਾਰੇਨ ਝਾਪੇਤ੍ਵਾ ਧਾਤੁਯੋ ਆਦਾਯ ਚੇਤਿਯਂ ਕਤ੍ਵਾ ਤਂ ਪੂਜੇਨ੍ਤੋ ਧਮ੍ਮੇਨ ਰਜ੍ਜਂ ਕਾਰੇਸਿ. ਸੁਮਙ੍ਗਲੋਪਿ ਏਕਸਂਵਚ੍ਛਰਂ ਵੀਤਿਨਾਮੇਤ੍ਵਾ ‘‘ਰਞ੍ਞੋ ਚਿਤ੍ਤਂ ਜਾਨਿਸ੍ਸਾਮੀ’’ਤਿ ਆਗਨ੍ਤ੍ਵਾ ਏਕਂ ਅਮਚ੍ਚਂ ਪਸ੍ਸਿਤ੍ਵਾ ‘‘ਮਯਿ ਰਞ੍ਞੋ ਚਿਤ੍ਤਂ ਜਾਨਾਹੀ’’ਤਿ ਆਹ. ਅਮਚ੍ਚੋਪਿ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸ ਗੁਣਂ ਕਥੇਸਿ. ਰਾਜਾ ਅਸੁਣਨ੍ਤੋ ਵਿਯ ਅਹੋਸਿ. ਪੁਨ ਕਿਞ੍ਚਿ ਅਵਤ੍ਵਾ ਰਞ੍ਞੋ ਅਨਤ੍ਤਮਨਭਾਵਂ ਸੁਮਙ੍ਗਲਸ੍ਸ ਕਥੇਸਿ. ਸੋ ਦੁਤਿਯਸਂਵਚ੍ਛਰੇਪਿ ਆਗਨ੍ਤ੍ਵਾ ਤਥੇਵ ਰਾਜਾ ਤੁਣ੍ਹੀ ਅਹੋਸਿ. ਤਤਿਯਸਂਵਚ੍ਛਰੇ ਆਗਨ੍ਤ੍ਵਾ ਪੁਤ੍ਤਦਾਰਂ ਗਹੇਤ੍ਵਾਵ ਆਗਮਿ. ਅਮਚ੍ਚੋ ਰਞ੍ਞੋ ਚਿਤ੍ਤਮੁਦੁਭਾਵਂ ਞਤ੍ਵਾ ਤਂ ਰਾਜਦ੍ਵਾਰੇ ਠਪੇਤ੍ਵਾ ਤਸ੍ਸਾਗਤਭਾਵਂ ਰਞ੍ਞੋ ਕਥੇਸਿ. ਰਾਜਾ ਤਂ ਪਕ੍ਕੋਸਾਪੇਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ‘‘ਸੁਮਙ੍ਗਲ, ਕਸ੍ਮਾ ਤਯਾ ਮਮ ਪੁਞ੍ਞਕ੍ਖੇਤ੍ਤਂ ਪਚ੍ਚੇਕਬੁਦ੍ਧੋ ਮਾਰਿਤੋ’’ਤਿ ਪੁਚ੍ਛਿ. ਸੋ ‘‘ਨਾਹਂ, ਦੇਵ, ‘ਪਚ੍ਚੇਕਬੁਦ੍ਧਂ ਮਾਰੇਮੀ’ਤਿ ਮਾਰੇਸਿਂ, ਅਪਿਚ ਖੋ ਇਮਿਨਾ ਨਾਮ ਕਾਰਣੇਨ ਇਦਂ ਨਾਮ ਅਕਾਸਿ’’ਨ੍ਤਿ ਤਂ ਪਵਤ੍ਤਿਂ ਆਚਿਕ੍ਖਿ. ਅਥ ਨਂ ਰਾਜਾ ‘‘ਤੇਨ ਹਿ ਮਾ ਭਾਯੀ’’ਤਿ ਸਮਸ੍ਸਾਸੇਤ੍ਵਾ ਪੁਨ ਉਯ੍ਯਾਨਪਾਲਮੇਵ ਅਕਾਸਿ.

ਅਥ ਨਂ ਸੋ ਅਮਚ੍ਚੋ ਪੁਚ੍ਛਿ ‘‘ਦੇਵ, ਕਸ੍ਮਾ ਤੁਮ੍ਹੇ ਦ੍ਵੇ ਵਾਰੇ ਸੁਮਙ੍ਗਲਸ੍ਸ ਗੁਣਂ ਸੁਤ੍ਵਾਪਿ ਕਿਞ੍ਚਿ ਨ ਕਥਯਿਤ੍ਥ, ਕਸ੍ਮਾ ਪਨ ਤਤਿਯਵਾਰੇ ਸੁਤ੍ਵਾ ਤਂ ਪਕ੍ਕੋਸਿਤ੍ਵਾ ਅਨੁਕਮ੍ਪਿਤ੍ਥਾ’’ਤਿ? ਰਾਜਾ ‘‘ਤਾਤ, ਰਞ੍ਞਾ ਨਾਮ ਕੁਦ੍ਧੇਨ ਸਹਸਾ ਕਿਞ੍ਚਿ ਕਾਤੁਂ ਨ ਵਟ੍ਟਤਿ, ਤੇਨਾਹਂ ਪੁਬ੍ਬੇ ਤੁਣ੍ਹੀ ਹੁਤ੍ਵਾ ਤਤਿਯਵਾਰੇ ਸੁਮਙ੍ਗਲੇ ਮਮ ਚਿਤ੍ਤਸ੍ਸ ਮੁਦੁਭਾਵਂ ਞਤ੍ਵਾ ਤਂ ਪਕ੍ਕੋਸਾਪੇਸਿ’’ਨ੍ਤਿ ਰਾਜਵਤ੍ਤਂ ਕਥੇਨ੍ਤੋ ਇਮਾ ਗਾਥਾ ਆਹ –

੨੭. ‘‘ਭੁਸਮ੍ਹਿ ਕੁਦ੍ਧੋਤਿ ਅਵੇਕ੍ਖਿਯਾਨ, ਨ ਤਾਵ ਦਣ੍ਡਂ ਪਣਯੇਯ੍ਯ ਇਸ੍ਸਰੋ;

ਅਟ੍ਠਾਨਸੋ ਅਪ੍ਪਤਿਰੂਪਮਤ੍ਤਨੋ, ਪਰਸ੍ਸ ਦੁਕ੍ਖਾਨਿ ਭੁਸਂ ਉਦੀਰਯੇ.

੨੮. ‘‘ਯਤੋ ਚ ਜਾਨੇਯ੍ਯ ਪਸਾਦਮਤ੍ਤਨੋ, ਅਤ੍ਥਂ ਨਿਯੁਞ੍ਜੇਯ੍ਯ ਪਰਸ੍ਸ ਦੁਕ੍ਕਟਂ;

ਤਦਾਯਮਤ੍ਥੋਤਿ ਸਯਂ ਅਵੇਕ੍ਖਿਯ, ਅਥਸ੍ਸ ਦਣ੍ਡਂ ਸਦਿਸਂ ਨਿਵੇਸਯੇ.

੨੯. ‘‘ਨ ਚਾਪਿ ਝਾਪੇਤਿ ਪਰਂ ਨ ਅਤ੍ਤਨਂ, ਅਮੁਚ੍ਛਿਤੋ ਯੋ ਨਯਤੇ ਨਯਾਨਯਂ;

ਯੋ ਦਣ੍ਡਧਾਰੋ ਭਵਤੀਧ ਇਸ੍ਸਰੋ, ਸ ਵਣ੍ਣਗੁਤ੍ਤੋ ਸਿਰਿਯਾ ਨ ਧਂਸਤਿ.

੩੦. ‘‘ਯੇ ਖਤ੍ਤਿਯਾ ਸੇ ਅਨਿਸਮ੍ਮਕਾਰਿਨੋ, ਪਣੇਨ੍ਤਿ ਦਣ੍ਡਂ ਸਹਸਾ ਪਮੁਚ੍ਛਿਤਾ;

ਅਵਣ੍ਣਸਂਯੁਤਾ ਜਹਨ੍ਤਿ ਜੀਵਿਤਂ, ਇਤੋ ਵਿਮੁਤ੍ਤਾਪਿ ਚ ਯਨ੍ਤਿ ਦੁਗ੍ਗਤਿਂ.

੩੧. ‘‘ਧਮ੍ਮੇ ਚ ਯੇ ਅਰਿਯਪ੍ਪਵੇਦਿਤੇ ਰਤਾ, ਅਨੁਤ੍ਤਰਾ ਤੇ ਵਚਸਾ ਮਨਸਾ ਕਮ੍ਮੁਨਾ ਚ;

ਤੇ ਸਨ੍ਤਿਸੋਰਚ੍ਚਸਮਾਧਿਸਣ੍ਠਿਤਾ, ਵਜਨ੍ਤਿ ਲੋਕਂ ਦੁਭਯਂ ਤਥਾਵਿਧਾ.

੩੨. ‘‘ਰਾਜਾਹਮਸ੍ਮਿ ਨਰਪਮਦਾਨਮਿਸ੍ਸਰੋ, ਸਚੇਪਿ ਕੁਜ੍ਝਾਮਿ ਠਪੇਮਿ ਅਤ੍ਤਨਂ;

ਨਿਸੇਧਯਨ੍ਤੋ ਜਨਤਂ ਤਥਾਵਿਧਂ, ਪਣੇਮਿ ਦਣ੍ਡਂ ਅਨੁਕਮ੍ਪ ਯੋਨਿਸੋ’’ਤਿ.

ਤਤ੍ਥ ਅਵੇਕ੍ਖਿਯਾਨਾਤਿ ਅਵੇਕ੍ਖਿਤ੍ਵਾ ਜਾਨਿਤ੍ਵਾ. ਇਦਂ ਵੁਤ੍ਤਂ ਹੋਤਿ – ਤਾਤ, ਪਥਵਿਸ੍ਸਰੋ ਰਾਜਾ ਨਾਮ ‘‘ਅਹਂ ਭੁਸਂ ਕੁਦ੍ਧੋ ਬਲਵਕੋਧਾਭਿਭੂਤੋ’’ਤਿ ਞਤ੍ਵਾ ਅਟ੍ਠਵਤ੍ਥੁਕਾਦਿਭੇਦਂ ਦਣ੍ਡਂ ਪਰਸ੍ਸ ਨ ਪਣਯੇਯ੍ਯ ਨ ਵਤ੍ਤੇਯ੍ਯ. ਕਿਂਕਾਰਣਾ? ਕੁਦ੍ਧੋ ਹਿ ਅਟ੍ਠਵਤ੍ਥੁਕਂ ਸੋਲ਼ਸਵਤ੍ਥੁਕਂ ਕਤ੍ਵਾ ਅਟ੍ਠਾਨੇਨ ਅਕਾਰਣੇਨ ਅਤ੍ਤਨੋ ਰਾਜਭਾਵਸ੍ਸ ਅਨਨੁਰੂਪਂ ‘‘ਇਮਂ ਏਤ੍ਤਕਂ ਨਾਮ ਆਹਰਥ, ਇਦਞ੍ਚ ਤਸ੍ਸ ਕਰੋਥਾ’’ਤਿ ਪਰਸ੍ਸ ਭੁਸਂ ਦੁਕ੍ਖਾਨਿ ਬਲਵਦੁਕ੍ਖਾਨਿ ਉਦੀਰਯੇ.

ਯਤੋਤਿ ਯਦਾ. ਇਦਂ ਵੁਤ੍ਤਂ ਹੋਤਿ – ਯਦਾ ਪਨ ਰਾਜਾ ਪਰਸ੍ਮਿਂ ਉਪ੍ਪਨ੍ਨਂ ਅਤ੍ਤਨੋ ਪਸਾਦਂ ਜਾਨੇਯ੍ਯ, ਅਥ ਪਰਸ੍ਸ ਦੁਕ੍ਕਟਂ ਅਤ੍ਥਂ ਨਿਯੁਞ੍ਜੇਯ੍ਯ ਉਪਪਰਿਕ੍ਖੇਯ੍ਯ, ਤਦਾ ਏਵਂ ਨਿਯੁਞ੍ਜਨ੍ਤੋ ‘‘ਅਯਂ ਨਾਮੇਤ੍ਥ ਅਤ੍ਥੋ, ਅਯਂ ਏਤਸ੍ਸ ਦੋਸੋ’’ਤਿ ਸਯਂ ਅਤ੍ਤਪਚ੍ਚਕ੍ਖਂ ਕਤ੍ਵਾ ਅਥਸ੍ਸ ਅਪਰਾਧਕਾਰਕਸ੍ਸ ਅਟ੍ਠਵਤ੍ਥੁਕਹੇਤੁ ਅਟ੍ਠੇਵ, ਸੋਲ਼ਸਵਤ੍ਥੁਕਹੇਤੁ ਸੋਲ਼ਸੇਵ ਕਹਾਪਣੇ ਗਣ੍ਹਮਾਨੋ ਦਣ੍ਡਂ ਸਦਿਸਂ ਕਤਦੋਸਾਨੁਰੂਪਂ ਨਿਵੇਸਯੇ ਠਪੇਯ੍ਯ ਪਵਤ੍ਤੇਯ੍ਯਾਤਿ.

ਅਮੁਚ੍ਛਿਤੋਤਿ ਛਨ੍ਦਾਦੀਹਿ ਅਗਤਿਕਿਲੇਸੇਹਿ ਅਮੁਚ੍ਛਿਤੋ ਅਨਭਿਭੂਤੋ ਹੁਤ੍ਵਾ ਯੋ ਨਯਾਨਯਂ ਨਯਤੇ ਉਪਪਰਿਕ੍ਖਤਿ, ਸੋ ਨੇਵ ਪਰਂ ਝਾਪੇਤਿ, ਨ ਅਤ੍ਤਾਨਂ. ਛਨ੍ਦਾਦਿਵਸੇਨ ਹਿ ਅਹੇਤੁਕਂ ਦਣ੍ਡਂ ਪਵਤ੍ਤੇਨ੍ਤੋ ਪਰਮ੍ਪਿ ਤੇਨ ਦਣ੍ਡੇਨ ਝਾਪੇਤਿ ਦਹਤਿ ਪੀਲ਼ੇਤਿ, ਅਤ੍ਤਾਨਮ੍ਪਿ ਤਤੋਨਿਦਾਨੇਨ ਪਾਪੇਨ. ਅਯਂ ਪਨ ਨ ਪਰਂ ਝਾਪੇਤਿ, ਨ ਅਤ੍ਤਾਨਂ. ਯੋ ਦਣ੍ਡਧਾਰੋ ਭਵਤੀਧ ਇਸ੍ਸਰੋਤਿ ਯੋ ਇਧ ਪਥਵਿਸ੍ਸਰੋ ਰਾਜਾ ਇਧ ਸਤ੍ਤਲੋਕੇ ਦੋਸਾਨੁਚ੍ਛਵਿਕਂ ਦਣ੍ਡਂ ਪਵਤ੍ਤੇਨ੍ਤੋ ਦਣ੍ਡਧਾਰੋ ਹੋਤਿ. ਸ ਵਣ੍ਣਗੁਤ੍ਤੋਤਿ ਗੁਣਵਣ੍ਣੇਨ ਚੇਵ ਯਸਵਣ੍ਣੇਨ ਚ ਗੁਤ੍ਤੋ ਰਕ੍ਖਿਤੋ ਸਿਰਿਯਾ ਨ ਧਂਸਤਿ ਨ ਪਰਿਹਾਯਤਿ. ਅਵਣ੍ਣਸਂਯੁਤਾ ਜਹਨ੍ਤੀਤਿ ਅਧਮ੍ਮਿਕਾ ਲੋਲਰਾਜਾਨੋ ਅਵਣ੍ਣੇਨ ਯੁਤ੍ਤਾ ਹੁਤ੍ਵਾ ਜੀਵਿਤਂ ਜਹਨ੍ਤਿ.

ਧਮ੍ਮੇ ਚ ਯੇ ਅਰਿਯਪ੍ਪਵੇਦਿਤੇਤਿ ਯੇ ਰਾਜਾਨੋ ਆਚਾਰਅਰਿਯੇਹਿ ਧਮ੍ਮਿਕਰਾਜੂਹਿ ਪਵੇਦਿਤੇ ਦਸਵਿਧੇ ਰਾਜਧਮ੍ਮੇ ਰਤਾ. ਅਨੁਤ੍ਤਰਾ ਤੇਤਿ ਤੇ ਵਚਸਾ ਮਨਸਾ ਕਮ੍ਮੁਨਾ ਚ ਤੀਹਿਪਿ ਏਤੇਹਿ ਅਨੁਤ੍ਤਰਾ ਜੇਟ੍ਠਕਾ. ਤੇ ਸਨ੍ਤਿਸੋਰਚ੍ਚਸਮਾਧਿਸਣ੍ਠਿਤਾਤਿ ਤੇ ਅਗਤਿਪਹਾਨੇਨ ਕਿਲੇਸਸਨ੍ਤਿਯਞ੍ਚ ਸੁਸੀਲ੍ਯਸਙ੍ਖਾਤੇ ਸੋਰਚ੍ਚੇ ਚ ਏਕਗ੍ਗਤਾਸਮਾਧਿਮ੍ਹਿ ਚ ਸਣ੍ਠਿਤਾ ਪਤਿਟ੍ਠਿਤਾ ਧਮ੍ਮਿਕਰਾਜਾਨੋ. ਵਜਨ੍ਤਿ ਲੋਕਂ ਦੁਭਯਨ੍ਤਿ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਮਨੁਸ੍ਸਲੋਕਤੋ ਦੇਵਲੋਕਂ, ਦੇਵਲੋਕਤੋ ਮਨੁਸ੍ਸਲੋਕਨ੍ਤਿ ਉਭਯਲੋਕਮੇਵ ਵਜਨ੍ਤਿ, ਨਿਰਯਾਦੀਸੁ ਨ ਨਿਬ੍ਬਤ੍ਤਨ੍ਤਿ. ਨਰਪਮਦਾਨਨ੍ਤਿ ਨਰਾਨਞ੍ਚ ਨਾਰੀਨਞ੍ਚ. ਠਪੇਮਿ ਅਤ੍ਤਨਨ੍ਤਿ ਕੁਦ੍ਧੋਪਿ ਕੋਧਵਸੇਨ ਅਗਨ੍ਤ੍ਵਾ ਅਤ੍ਤਾਨਂ ਪੋਰਾਣਕਰਾਜੂਹਿ ਠਪਿਤਨਯਸ੍ਮਿਂਯੇਵ ਧਮ੍ਮੇ ਠਪੇਮਿ, ਵਿਨਿਚ੍ਛਯਧਮ੍ਮਂ ਨ ਭਿਨ੍ਦਾਮੀਤਿ.

ਏਵਂ ਛਹਿ ਗਾਥਾਹਿ ਰਞ੍ਞਾ ਅਤ੍ਤਨੋ ਗੁਣੇ ਕਥਿਤੇ ਸਬ੍ਬਾਪਿ ਰਾਜਪਰਿਸਾ ਤੁਟ੍ਠਾ ‘‘ਅਯਂ ਸੀਲਾਚਾਰਗੁਣਸਮ੍ਪਤ੍ਤਿ ਤੁਮ੍ਹਾਕਞ੍ਞੇਵ ਅਨੁਰੂਪਾ’’ਤਿ ਰਞ੍ਞੋ ਗੁਣੇ ਕਥੇਸੁਂ. ਸੁਮਙ੍ਗਲੋ ਪਨ ਪਰਿਸਾਯ ਕਥਿਤਾਵਸਾਨੇ ਉਟ੍ਠਾਯ ਰਾਜਾਨਂ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਰਞ੍ਞੋ ਥੁਤਿਂ ਕਰੋਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੩੩. ‘‘ਸਿਰੀ ਚ ਲਕ੍ਖੀ ਚ ਤਵੇਵ ਖਤ੍ਤਿਯ, ਜਨਾਧਿਪ ਮਾ ਵਿਜਹਿ ਕੁਦਾਚਨਂ;

ਅਕ੍ਕੋਧਨੋ ਨਿਚ੍ਚਪਸਨ੍ਨਚਿਤ੍ਤੋ, ਅਨੀਘੋ ਤੁਵਂ ਵਸ੍ਸਸਤਾਨਿ ਪਾਲਯ.

੩੪. ‘‘ਗੁਣੇਹਿ ਏਤੇਹਿ ਉਪੇਤ ਖਤ੍ਤਿਯ, ਠਿਤਮਰਿਯਵਤ੍ਤੀ ਸੁਵਚੋ ਅਕੋਧਨੋ;

ਸੁਖੀ ਅਨੁਪ੍ਪੀਲ਼ ਪਸਾਸ ਮੇਦਿਨਿਂ, ਇਤੋ ਵਿਮੁਤ੍ਤੋਪਿ ਚ ਯਾਹਿ ਸੁਗ੍ਗਤਿਂ.

੩੫. ‘‘ਏਵਂ ਸੁਨੀਤੇਨ ਸੁਭਾਸਿਤੇਨ, ਧਮ੍ਮੇਨ ਞਾਯੇਨ ਉਪਾਯਸੋ ਨਯਂ;

ਨਿਬ੍ਬਾਪਯੇ ਸਙ੍ਖੁਭਿਤਂ ਮਹਾਜਨਂ, ਮਹਾਵ ਮੇਘੋ ਸਲਿਲੇਨ ਮੇਦਿਨਿ’’ਨ੍ਤਿ.

ਤਤ੍ਥ ਸਿਰੀ ਚ ਲਕ੍ਖੀ ਚਾਤਿ ਪਰਿਵਾਰਸਮ੍ਪਤ੍ਤਿ ਚ ਪਞ੍ਞਾ ਚ. ਅਨੀਘੋਤਿ ਨਿਦ੍ਦੁਕ੍ਖੋ ਹੁਤ੍ਵਾ. ਉਪੇਤ ਖਤ੍ਤਿਯਾਤਿ ਉਪੇਤੋ ਖਤ੍ਤਿਯ, ਅਯਮੇਵ ਵਾ ਪਾਠੋ. ਠਿਤਮਰਿਯਵਤ੍ਤੀਤਿ ਠਿਤਅਰਿਯਵਤ੍ਤਿ, ਅਰਿਯਵਤ੍ਤਿ ਨਾਮ ਦਸਰਾਜਧਮ੍ਮਸਙ੍ਖਾਤਂ ਪੋਰਾਣਰਾਜਵਤ੍ਤਂ, ਤਤ੍ਥ ਪਤਿਟ੍ਠਿਤਤ੍ਤਾ ਠਿਤਰਾਜਧਮ੍ਮੋ ਹੁਤ੍ਵਾਤਿ ਅਤ੍ਥੋ. ਅਨੁਪ੍ਪੀਲ਼ ਪਸਾਸ ਮੇਦਿਨਿਨ੍ਤਿ ਅਨੁਪ੍ਪੀਲ਼ਂ ਪਸਾਸ ਮੇਦਿਨਿਞ੍ਚ, ਅਯਮੇਵ ਵਾ ਪਾਠੋ. ਸੁਨੀਤੇਨਾਤਿ ਸੁਨਯੇਨ ਸੁਟ੍ਠੁ ਕਾਰਣੇਨ. ਧਮ੍ਮੇਨਾਤਿ ਦਸਕੁਸਲਕਮ੍ਮਪਥਧਮ੍ਮੇਨ. ਞਾਯੇਨਾਤਿ ਪੁਰਿਮਪਦਸ੍ਸੇਵ ਵੇਵਚਨਂ. ਉਪਾਯਸੋਤਿ ਉਪਾਯਕੋਸਲ੍ਲੇਨ. ਨਯਨ੍ਤਿ ਨਯਨ੍ਤੋ ਰਜ੍ਜਂ ਅਨੁਸਾਸਨ੍ਤੋ ਧਮ੍ਮਿਕਰਾਜਾ. ਨਿਬ੍ਬਾਪਯੇਤਿ ਇਮਾਯ ਪਟਿਪਤ੍ਤਿਯਾ ਕਾਯਿਕਚੇਤਸਿਕਦੁਕ੍ਖਂ ਦਰਥਂ ਅਪਨੇਨ੍ਤੋ ਕਾਯਿਕਚੇਤਸਿਕਦੁਕ੍ਖਸਙ੍ਖੁਭਿਤਮ੍ਪਿ ਮਹਾਜਨਂ ਮਹਾਮੇਘੋ ਸਲਿਲੇਨ ਮੇਦਿਨਿਂ ਵਿਯ ਨਿਬ੍ਬਾਪੇਯ੍ਯ, ਤ੍ਵਮ੍ਪਿ ਤਥੇਵ ਨਿਬ੍ਬਾਪੇਹੀਤਿ ਦਸ੍ਸੇਨ੍ਤੋ ਏਵਮਾਹ.

ਸਤ੍ਥਾ ਕੋਸਲਰਞ੍ਞੋ ਓਵਾਦਵਸੇਨ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪਚ੍ਚੇਕਬੁਦ੍ਧੋ ਪਰਿਨਿਬ੍ਬੁਤੋ, ਸੁਮਙ੍ਗਲੋ ਆਨਨ੍ਦੋ ਅਹੋਸਿ, ਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੁਮਙ੍ਗਲਜਾਤਕਵਣ੍ਣਨਾ ਚਤੁਤ੍ਥਾ.

[੪੨੧] ੫. ਗਙ੍ਗਮਾਲਜਾਤਕਵਣ੍ਣਨਾ

ਅਙ੍ਗਾਰਜਾਤਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਪੋਸਥਕਮ੍ਮਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਸਤ੍ਥਾ ਉਪੋਸਥਿਕੇ ਉਪਾਸਕੇ ਆਮਨ੍ਤੇਤ੍ਵਾ ‘‘ਉਪਾਸਕਾ ਸਾਧੁਰੂਪਂ ਵੋ ਕਤਂ ਉਪੋਸਥਂ ਉਪਵਸਨ੍ਤੇਹਿ, ਦਾਨਂ ਦਾਤਬ੍ਬਂ, ਸੀਲਂ ਰਕ੍ਖਿਤਬ੍ਬਂ, ਕੋਧੋ ਨ ਕਾਤਬ੍ਬੋ, ਮੇਤ੍ਤਾ ਭਾਵੇਤਬ੍ਬਾ, ਉਪੋਸਥਵਾਸੋ ਵਸਿਤਬ੍ਬੋ, ਪੋਰਾਣਕਪਣ੍ਡਿਤਾ ਹਿ ਏਕਂ ਉਪਡ੍ਢੁਪੋਸਥਕਮ੍ਮਂ ਨਿਸ੍ਸਾਯ ਮਹਾਯਸਂ ਲਭਿਂਸੂ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਤਸ੍ਮਿਂ ਨਗਰੇ ਸੁਚਿਪਰਿਵਾਰੋ ਨਾਮ ਸੇਟ੍ਠਿ ਅਹੋਸਿ ਅਸੀਤਿਕੋਟਿਧਨਵਿਭਵੋ ਦਾਨਾਦਿਪੁਞ੍ਞਾਭਿਰਤੋ. ਤਸ੍ਸ ਪੁਤ੍ਤਦਾਰਾਪਿ ਪਰਿਜਨੋਪਿ ਅਨ੍ਤਮਸੋ ਤਸ੍ਮਿਂ ਘਰੇ ਵਚ੍ਛਪਾਲਕਾਪਿ ਸਬ੍ਬੇ ਮਾਸਸ੍ਸ ਛ ਦਿਵਸੇ ਉਪੋਸਥਂ ਉਪਵਸਨ੍ਤਿ. ਤਦਾ ਬੋਧਿਸਤ੍ਤੋ ਏਕਸ੍ਮਿਂ ਦਲਿਦ੍ਦਕੁਲੇ ਨਿਬ੍ਬਤ੍ਤਿਤ੍ਵਾ ਭਤਿਂ ਕਤ੍ਵਾ ਕਿਚ੍ਛੇਨ ਜੀਵਤਿ. ਸੋ ‘‘ਭਤਿਂ ਕਰਿਸ੍ਸਾਮੀ’’ਤਿ ਤਸ੍ਸ ਗੇਹਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ‘‘ਕਿਂ ਆਗਤੋਸੀ’’ਤਿ ਵੁਤ੍ਤੇ ‘‘ਤੁਮ੍ਹਾਕਂ ਗੇਹੇ ਭਤਿਯਾ ਕਮ੍ਮਕਰਣਤ੍ਥ’’ਨ੍ਤਿ ਆਹ. ਸੇਟ੍ਠਿ ਅਞ੍ਞੇਸਂ ਭਤਿਕਾਨਂ ਆਗਤਦਿਵਸੇਯੇਵ ‘‘ਇਮਸ੍ਮਿਂ ਗੇਹੇ ਕਮ੍ਮਂ ਕਰੋਨ੍ਤਾ ਸੀਲਂ ਰਕ੍ਖਨ੍ਤਿ, ਸੀਲਂ ਰਕ੍ਖਿਤੁਂ ਸਕ੍ਕੋਨ੍ਤਾ ਕਮ੍ਮਂ ਕਰੋਥਾ’’ਤਿ ਵਦਤਿ, ਬੋਧਿਸਤ੍ਤਸ੍ਸ ਪਨ ਸੀਲਰਕ੍ਖਣਆਚਿਕ੍ਖਣੇ ਸਞ੍ਞਂ ਅਕਤ੍ਵਾ ‘‘ਸਾਧੁ, ਤਾਤ, ਅਤ੍ਤਨੋ ਭਤਿਂ ਜਾਨਿਤ੍ਵਾ ਕਮ੍ਮਂ ਕਰੋਹੀ’’ਤਿ ਆਹ. ਸੋ ਤਤੋ ਪਟ੍ਠਾਯ ਸੁਵਚੋ ਹੁਤ੍ਵਾ ਉਰਂ ਦਤ੍ਵਾ ਅਤ੍ਤਨੋ ਕਿਲਮਥਂ ਅਗਣੇਤ੍ਵਾ ਤਸ੍ਸ ਸਬ੍ਬਕਿਚ੍ਚਾਨਿ ਕਰੋਤਿ, ਪਾਤੋਵ ਕਮ੍ਮਨ੍ਤਂ ਗਨ੍ਤ੍ਵਾ ਸਾਯਂ ਆਗਚ੍ਛਤਿ.

ਅਥੇਕਦਿਵਸਂ ਨਗਰੇ ਛਣਂ ਘੋਸੇਸੁਂ. ਮਹਾਸੇਟ੍ਠਿ ਦਾਸਿਂ ਆਮਨ੍ਤੇਤ੍ਵਾ ‘‘ਅਜ੍ਜੁਪੋਸਥਦਿਵਸੋ, ਗੇਹੇ ਕਮ੍ਮਕਰਾਨਂ ਪਾਤੋਵ ਭਤ੍ਤਂ ਪਚਿਤ੍ਵਾ ਦੇਹਿ, ਕਾਲਸ੍ਸੇਵ ਭੁਞ੍ਜਿਤ੍ਵਾ ਉਪੋਸਥਿਕਾ ਭਵਿਸ੍ਸਨ੍ਤੀ’’ਤਿ ਆਹ. ਬੋਧਿਸਤ੍ਤੋ ਕਾਲਸ੍ਸੇਵ ਉਟ੍ਠਾਯ ਕਮ੍ਮਨ੍ਤਂ ਅਗਮਾਸਿ, ‘‘ਅਜ੍ਜੁਪੋਸਥਿਕੋ ਭਵੇਯ੍ਯਾਸੀ’’ਤਿ ਤਸ੍ਸ ਕੋਚਿ ਨਾਰੋਚੇਸਿ. ਸੇਸਕਮ੍ਮਕਰਾ ਪਾਤੋਵ ਭੁਞ੍ਜਿਤ੍ਵਾ ਉਪੋਸਥਿਕਾਵ ਅਹੇਸੁਂ. ਸੇਟ੍ਠਿਪਿ ਸਪੁਤ੍ਤਦਾਰੋ ਸਪਰਿਜਨੋ ਉਪੋਸਥਂ ਅਧਿਟ੍ਠਹਿ, ਸਬ੍ਬੇਪਿ ਉਪੋਸਥਿਕਾ ਅਤ੍ਤਨੋ ਅਤ੍ਤਨੋ ਵਸਨਟ੍ਠਾਨਂ ਗਨ੍ਤ੍ਵਾ ਸੀਲਂ ਆਵਜ੍ਜੇਨ੍ਤਾ ਨਿਸੀਦਿਂਸੁ. ਬੋਧਿਸਤ੍ਤੋ ਸਕਲਦਿਵਸਂ ਕਮ੍ਮਂ ਕਤ੍ਵਾ ਸੂਰਿਯਤ੍ਥਙ੍ਗਮਨਵੇਲਾਯ ਆਗਤੋ. ਅਥਸ੍ਸ ਭਤ੍ਤਕਾਰਿਕਾ ਹਤ੍ਥਧੋਵਨਂ ਦਤ੍ਵਾ ਪਾਤਿਯਂ ਭਤ੍ਤਂ ਵਡ੍ਢੇਤ੍ਵਾ ਉਪਨਾਮੇਸਿ. ਬੋਧਿਸਤ੍ਤੋ ‘‘ਅਞ੍ਞੇਸੁ ਦਿਵਸੇਸੁ ਇਮਾਯ ਵੇਲਾਯ ਮਹਾਸਦ੍ਦੋ ਹੋਤਿ, ਅਜ੍ਜ ਕਹਂ ਗਤਾ’’ਤਿ ਪੁਚ੍ਛਿ. ‘‘ਸਬ੍ਬੇ ਉਪੋਸਥਂ ਸਮਾਦਿਯਿਤ੍ਵਾ ਅਤ੍ਤਨੋ ਅਤ੍ਤਨੋ ਵਸਨਟ੍ਠਾਨਾਨਿ ਗਤਾ’’ਤਿ. ਤਂ ਸੁਤ੍ਵਾ ਬੋਧਿਸਤ੍ਤੋ ਚਿਨ੍ਤੇਸਿ ‘‘ਏਤ੍ਤਕਾਨਂ ਸੀਲਵਨ੍ਤਾਨਂ ਅਨ੍ਤਰੇ ਅਹਂ ਏਕੋ ਦੁਸ੍ਸੀਲੋ ਹੁਤ੍ਵਾ ਨ ਵਸਿਸ੍ਸਾਮਿ, ਇਦਾਨਿ ਉਪੋਸਥਙ੍ਗੇਸੁ ਅਧਿਟ੍ਠਿਤੇਸੁ ਹੋਤਿ ਨੁ ਖੋ ਉਪੋਸਥਕਮ੍ਮਂ, ਨੋ’’ਤਿ. ਸੋ ਗਨ੍ਤ੍ਵਾ ਸੇਟ੍ਠਿਂ ਪੁਚ੍ਛਿ. ਅਥ ਨਂ ਸੇਟ੍ਠਿ ‘‘ਤਾਤ ਪਾਤੋਵ ਅਨਧਿਟ੍ਠਿਤਤ੍ਤਾ ਸਕਲਂ ਉਪੋਸਥਕਮ੍ਮਂ ਨ ਹੋਤਿ, ਉਪਡ੍ਢੁਪੋਸਥਕਮ੍ਮਂ ਪਨ ਹੋਤੀ’’ਤਿ ਆਹ.

ਸੋ ‘‘ਏਤ੍ਤਕਮ੍ਪਿ ਹੋਤੂ’’ਤਿ ਸੇਟ੍ਠਿਸ੍ਸ ਸਨ੍ਤਿਕੇ ਸਮਾਦਿਨ੍ਨਸੀਲੋ ਹੁਤ੍ਵਾ ਉਪੋਸਥਕਮ੍ਮਂ ਅਧਿਟ੍ਠਾਯ ਅਤ੍ਤਨੋ ਵਸਨੋਕਾਸਂ ਪਵਿਸਿਤ੍ਵਾ ਸੀਲਂ ਆਵਜ੍ਜੇਨ੍ਤੋ ਨਿਪਜ੍ਜਿ. ਅਥਸ੍ਸ ਸਕਲਦਿਵਸਂ ਨਿਰਾਹਾਰਤਾਯ ਪਚ੍ਛਿਮਯਾਮਸਮਨਨ੍ਤਰੇ ਸਤ੍ਥਕਵਾਤਾ ਸਮੁਟ੍ਠਹਿਂਸੁ. ਸੇਟ੍ਠਿਨਾ ਨਾਨਾਵਿਧਾਨਿ ਭੇਸਜ੍ਜਾਨਿ ਆਹਰਿਤ੍ਵਾ ‘‘ਭੁਞ੍ਜਾ’’ਤਿ ਵੁਚ੍ਚਮਾਨੋਪਿ ‘‘ਉਪੋਸਥਂ ਨ ਭਿਨ੍ਦਿਸ੍ਸਾਮਿ, ਜੀਵਿਤਪਰਿਯਨ੍ਤਿਕਂ ਕਤ੍ਵਾ ਸਮਾਦਿਯਿ’’ਨ੍ਤਿ ਆਹ. ਬਲਵਵੇਦਨਾ ਉਪ੍ਪਜ੍ਜਿ, ਅਰੁਣੁਗ੍ਗਮਨਵੇਲਾਯ ਸਤਿਂ ਪਚ੍ਚੁਪਟ੍ਠਾਪੇਤੁਂ ਨਾਸਕ੍ਖਿ. ਅਥ ਨਂ ‘‘ਇਦਾਨਿ ਮਰਿਸ੍ਸਤੀ’’ਤਿ ਨੀਹਰਿਤ੍ਵਾ ‘‘ਓਸਾਰਕੇ ਨਿਪਜ੍ਜਾਪੇਸੁਂ. ਤਸ੍ਮਿਂ ਖਣੇ ਬਾਰਾਣਸਿਰਾਜਾ ਰਥਵਰਗਤੋ ਮਹਨ੍ਤੇਨ ਪਰਿਵਾਰੇਨ ਨਗਰਂ ਪਦਕ੍ਖਿਣਂ ਕਰੋਨ੍ਤੋ ਤਂ ਠਾਨਂ ਸਮ੍ਪਾਪੁਣਿ. ਬੋਧਿਸਤ੍ਤੋ ਤਸ੍ਸ ਸਿਰਿਂ ਓਲੋਕੇਤ੍ਵਾ ਤਸ੍ਮਿਂ ਲੋਭਂ ਉਪ੍ਪਾਦੇਤ੍ਵਾ ਰਜ੍ਜਂ ਪਤ੍ਥੇਸਿ. ਸੋ ਚਵਿਤ੍ਵਾ ਉਪਡ੍ਢੁਪੋਸਥਕਮ੍ਮਨਿਸ੍ਸਨ੍ਦੇਨ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਸਾ ਲਦ੍ਧਗਬ੍ਭਪਰਿਹਾਰਾ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿ, ‘‘ਉਦਯਕੁਮਾਰੋ’’ਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਾਪੁਣਿ, ਜਾਤਿਸ੍ਸਰਞਾਣੇਨ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ‘‘ਅਪ੍ਪਕਸ੍ਸ ਕਮ੍ਮਸ੍ਸ ਫਲਂ ਮਮ ਇਦ’’ਨ੍ਤਿ ਅਭਿਕ੍ਖਣਂ ਉਦਾਨਂ ਉਦਾਨੇਸਿ. ਸੋ ਪਿਤੁ ਅਚ੍ਚਯੇਨ ਰਜ੍ਜਂ ਪਤ੍ਵਾਪਿ ਅਤ੍ਤਨੋ ਮਹਨ੍ਤਂ ਸਿਰਿਵਿਭਵਂ ਓਲੋਕੇਤ੍ਵਾ ਤਦੇਵ ਉਦਾਨਂ ਉਦਾਨੇਸਿ.