੯. ਨਵਕਨਿਪਾਤੋ
[੪੨੭] ੧. ਗਿਜ੍ਝਜਾਤਕਵਣ੍ਣਨਾ
ਪਰਿਸਙ੍ਕੁਪਥੋ ਨਾਮਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਦੁਬ੍ਬਚਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਕਿਰ ਏਕੋ ਕੁਲਪੁਤ੍ਤੋ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾਪਿ ਅਤ੍ਥਕਾਮੇਹਿ ਆਚਰਿਯੁਪਜ੍ਝਾਯੇਹਿ ਚੇਵ ਸਬ੍ਰਹ੍ਮਚਾਰੀਹਿ ਚ ‘‘ਏਵਂ ਤੇ ਅਭਿਕ੍ਕਮਿਤਬ੍ਬਂ, ਏਵਂ ਪਟਿਕ੍ਕਮਿਤਬ੍ਬਂ, ਏਵਂ ਆਲੋਕਿਤਬ੍ਬਂ, ਏਵਂ ਵਿਲੋਕਿਤਬ੍ਬਂ, ਏਵਂ ਸਮਿਞ੍ਜਿਤਬ੍ਬਂ, ਏਵਂ ਪਸਾਰਿਤਬ੍ਬਂ, ਏਵਂ ਨਿਵਾਸੇਤਬ੍ਬਂ, ਏਵਂ ਪਾਰੁਪਿਤਬ੍ਬਂ, ਏਵਂ ਪਤ੍ਤੋ ਗਹੇਤਬ੍ਬੋ, ਯਾਪਨਮਤ੍ਤਂ ਭਤ੍ਤਂ ਗਹੇਤ੍ਵਾ ਪਚ੍ਚਵੇਕ੍ਖਿਤ੍ਵਾਵ ਪਰਿਭੁਞ੍ਜਿਤਬ੍ਬਂ, ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੇਨ ਭੋਜਨੇ ਮਤ੍ਤਞ੍ਞੁਨਾ ਜਾਗਰਿਯਮਨੁਯੁਤ੍ਤੇਨ ਭਵਿਤਬ੍ਬਂ, ਇਦਂ ਆਗਨ੍ਤੁਕਵਤ੍ਤਂ ਨਾਮ ਜਾਨਿਤਬ੍ਬਂ, ਇਦਂ ਗਮਿਕਵਤ੍ਤਂ ਨਾਮ, ਇਮਾਨਿ ਚੁਦ੍ਦਸ ਖਨ੍ਧਕਵਤ੍ਤਾਨਿ, ਅਸੀਤਿ ਮਹਾਵਤ੍ਤਾਨਿ. ਤਤ੍ਥ ਤੇ ਸਮ੍ਮਾ ਵਤ੍ਤਿਤਬ੍ਬਂ, ਇਮੇ ਤੇਰਸ ਧੁਤਙ੍ਗਗੁਣਾ ਨਾਮ, ਏਤੇ ਸਮਾਦਾਯ ਵਤ੍ਤਿਤਬ੍ਬ’’ਨ੍ਤਿ ਓਵਦਿਯਮਾਨੋ ਦੁਬ੍ਬਚੋ ਅਹੋਸਿ ਅਕ੍ਖਮੋ ਅਪ੍ਪਦਕ੍ਖਿਣਗ੍ਗਾਹੀ ਅਨੁਸਾਸਨਿਂ. ‘‘ਅਹਂ ਤੁਮ੍ਹੇ ਨ ਵਦਾਮਿ, ਤੁਮ੍ਹੇ ਪਨ ਮਂ ਕਸ੍ਮਾ ਵਦਥ, ਅਹਮੇਵ ਅਤ੍ਤਨੋ ਅਤ੍ਥਂ ਵਾ ਅਨਤ੍ਥਂ ਵਾ ਜਾਨਿਸ੍ਸਾਮੀ’’ਤਿ ਅਤ੍ਤਾਨਂ ਅਵਚਨੀਯਂ ਅਕਾਸਿ. ਅਥਸ੍ਸ ਦੁਬ੍ਬਚਭਾਵਂ ਞਤ੍ਵਾ ਭਿਕ੍ਖੂ ਧਮ੍ਮਸਭਾਯਂ ਅਗੁਣਕਥਂ ਕਥੇਨ੍ਤਾ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ਤਂ ਭਿਕ੍ਖੁਂ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਦੁਬ੍ਬਚੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚ’’ਨ੍ਤਿ ਵੁਤ੍ਤੇ ‘‘ਕਸ੍ਮਾ ਭਿਕ੍ਖੁ ਏਵਰੂਪੇ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਅਤ੍ਥਕਾਮਾਨਂ ਵਚਨਂ ਨ ਕਰੋਸਿ, ਪੁਬ੍ਬੇਪਿ ਤ੍ਵਂ ਪਣ੍ਡਿਤਾਨਂ ਵਚਨਂ ਅਕਤ੍ਵਾ ਵੇਰਮ੍ਭਵਾਤਮੁਖੇ ਚੁਣ੍ਣਵਿਚੁਣ੍ਣੋ ਜਾਤੋ’’ਤਿ ਵਤ੍ਵਾ ਅਤੀਤਂ ਆਹਰਿ.
ਅਤੀਤੇ ਗਿਜ੍ਝਕੂਟੇ ਪਬ੍ਬਤੇ ਬੋਧਿਸਤ੍ਤੋ ਗਿਜ੍ਝਯੋਨਿਯਂ ਨਿਬ੍ਬਤ੍ਤਿ. ਪੁਤ੍ਤੋ ਪਨਸ੍ਸ ਸੁਪਤ੍ਤੋ ਨਾਮ ਗਿਜ੍ਝਰਾਜਾ ਅਨੇਕਸਹਸ੍ਸਗਿਜ੍ਝਪਰਿਵਾਰੋ ਥਾਮਸਮ੍ਪਨ੍ਨੋ ਅਹੋਸਿ. ਸੋ ਮਾਤਾਪਿਤਰੋ ਪੋਸੇਸਿ, ਥਾਮਸਮ੍ਪਨ੍ਨਤ੍ਤਾ ਪਨ ਅਤਿਦੂਰਂ ਉਪ੍ਪਤਤਿ. ਅਥ ਨਂ ਪਿਤਾ ‘‘ਤਾਤ, ਏਤ੍ਤਕਂ ਨਾਮ ਠਾਨਂ ਅਤਿਕ੍ਕਮਿਤ੍ਵਾ ਨ ਗਨ੍ਤਬ੍ਬ’’ਨ੍ਤਿ ਓਵਦਿ. ਸੋ ‘‘ਸਾਧੂ’’ਤਿ ਵਤ੍ਵਾਪਿ ਏਕਦਿਵਸਂ ਪਨ ਵੁਟ੍ਠੇ ਦੇਵੇ ਗਿਜ੍ਝੇਹਿ ਸਦ੍ਧਿਂ ਉਪ੍ਪਤਿਤ੍ਵਾ ਸੇਸੇ ਓਹਾਯ ਅਤਿਭੂਮਿਂ ਗਨ੍ਤ੍ਵਾ ਵੇਰਮ੍ਭਵਾਤਮੁਖਂ ਪਤ੍ਵਾ ਚੁਣ੍ਣਵਿਚੁਣ੍ਣਭਾਵਂ ਪਾਪੁਣਿ. ਸਤ੍ਥਾ ਤਮਤ੍ਥਂ ਦਸ੍ਸੇਨ੍ਤੋ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਾ ਗਾਥਾ ਅਭਾਸਿ –
੧. ‘‘ਪਰਿਸਙ੍ਕੁਪਥੋ ਨਾਮ, ਗਿਜ੍ਝਪਨ੍ਥੋ ਸਨਨ੍ਤਨੋ;
ਤਤ੍ਰਾਸਿ ਮਾਤਾਪਿਤਰੋ, ਗਿਜ੍ਝੋ ਪੋਸੇਸਿ ਜਿਣ੍ਣਕੇ;
ਤੇਸਂ ਅਜਗਰਮੇਦਂ, ਅਚ੍ਚਹਾਸਿ ਬਹੁਤ੍ਤਸੋ.
੨. ‘‘ਪਿਤਾ ਚ ਪੁਤ੍ਤਂ ਅਵਚ, ਜਾਨਂ ਉਚ੍ਚਂ ਪਪਾਤਿਨਂ;
ਸੁਪਤ੍ਤਂ ਥਾਮਸਮ੍ਪਨ੍ਨਂ, ਤੇਜਸ੍ਸਿਂ ਦੂਰਗਾਮਿਨਂ.
੩. ‘‘ਪਰਿਪ੍ਲਵਨ੍ਤਂ ਪਥਵਿਂ, ਯਦਾ ਤਾਤ ਵਿਜਾਨਹਿ;
ਸਾਗਰੇਨ ਪਰਿਕ੍ਖਿਤ੍ਤਂ, ਚਕ੍ਕਂਵ ਪਰਿਮਣ੍ਡਲਂ;
ਤਤੋ ਤਾਤ ਨਿਵਤ੍ਤਸ੍ਸੁ, ਮਾਸ੍ਸੁ ਏਤ੍ਤੋ ਪਰਂ ਗਮਿ.
੪. ‘‘ਉਦਪਤ੍ਤੋਸਿ ਵੇਗੇਨ, ਬਲੀ ਪਕ੍ਖੀ ਦਿਜੁਤ੍ਤਮੋ;
ਓਲੋਕਯਨ੍ਤੋ ਵਕ੍ਕਙ੍ਗੋ, ਪਬ੍ਬਤਾਨਿ ਵਨਾਨਿ ਚ.
੫. ‘‘ਅਦ੍ਦਸ੍ਸ ਪਥਵਿਂ ਗਿਜ੍ਝੋ, ਯਥਾਸਾਸਿ ਪਿਤੁਸ੍ਸੁਤਂ;
ਸਾਗਰੇਨ ਪਰਿਕ੍ਖਿਤ੍ਤਂ, ਚਕ੍ਕਂਵ ਪਰਿਮਣ੍ਡਲਂ.
੬. ‘‘ਤਞ੍ਚ ਸੋ ਸਮਤਿਕ੍ਕਮ੍ਮ, ਪਰਮੇਵਚ੍ਚਵਤ੍ਤਥ;
ਤਞ੍ਚ ਵਾਤਸਿਖਾ ਤਿਕ੍ਖਾ, ਅਚ੍ਚਹਾਸਿ ਬਲਿਂ ਦਿਜਂ.
੭. ‘‘ਨਾਸਕ੍ਖਾਤਿਗਤੋ ਪੋਸੋ, ਪੁਨਦੇਵ ਨਿਵਤ੍ਤਿਤੁਂ;
ਦਿਜੋ ਬ੍ਯਸਨਮਾਪਾਦਿ, ਵੇਰਮ੍ਭਾਨਂ ਵਸਂ ਗਤੋ.
੮. ‘‘ਤਸ੍ਸ ਪੁਤ੍ਤਾ ਚ ਦਾਰਾ ਚ, ਯੇ ਚਞ੍ਞੇ ਅਨੁਜੀਵਿਨੋ;
ਸਬ੍ਬੇ ਬ੍ਯਸਨਮਾਪਾਦੁਂ, ਅਨੋਵਾਦਕਰੇ ਦਿਜੇ.
੯. ‘‘ਏਵਮ੍ਪਿ ਇਧ ਵੁਡ੍ਢਾਨਂ, ਯੋ ਵਾਕ੍ਯਂ ਨਾਵਬੁਜ੍ਝਤਿ;
ਅਤਿਸੀਮਚਰੋ ਦਿਤ੍ਤੋ, ਗਿਜ੍ਝੋਵਾਤੀਤਸਾਸਨੋ;
ਸ ਵੇ ਬ੍ਯਸਨਂ ਪਪ੍ਪੋਤਿ, ਅਕਤ੍ਵਾ ਵੁਡ੍ਢਸਾਸਨ’’ਨ੍ਤਿ.
ਤਤ੍ਥ ਪਰਿਸਙ੍ਕੁਪਥੋਤਿ ਸਙ੍ਕੁਪਥੋ. ਮਨੁਸ੍ਸਾ ਹਿਰਞ੍ਞਸੁਵਣ੍ਣਤ੍ਥਾਯ ਗਚ੍ਛਨ੍ਤਾ ਤਸ੍ਮਿਂ ਪਦੇਸੇ ਖਾਣੁਕੇ ਕੋਟ੍ਟੇਤ੍ਵਾ ਤੇਸੁ ਰਜ੍ਜੁਯੋ ਬਨ੍ਧਿਤ੍ਵਾ ਗਚ੍ਛਨ੍ਤਿ, ਤੇਨ ਸੋ ਗਿਜ੍ਝਪਬ੍ਬਤੇ ਜਙ੍ਘਮਗ੍ਗੋ ‘‘ਸਙ੍ਕੁਪਥੋ’’ਤਿ ਵੁਚ੍ਚਤਿ. ਗਿਜ੍ਝਪਨ੍ਥੋਤਿ ਗਿਜ੍ਝਪਬ੍ਬਤਮਤ੍ਥਕੇ ਮਹਾਮਗ੍ਗੋ. ਸਨਨ੍ਤਨੋਤਿ ਪੋਰਾਣੋ. ਤਤ੍ਰਾਸੀਤਿ ਤਸ੍ਮਿਂ ਗਿਜ੍ਝਪਬ੍ਬਤਮਤ੍ਥਕੇ ਸਙ੍ਕੁਪਥੇ ਏਕੋ ਗਿਜ੍ਝੋ ਆਸਿ, ਸੋ ਜਿਣ੍ਣਕੇ ਮਾਤਾਪਿਤਰੋ ਪੋਸੇਸਿ. ਅਜਗਰਮੇਦਨ੍ਤਿ ਅਜਗਰਾਨਂ ਮੇਦਂ. ਅਚ੍ਚਹਾਸੀਤਿ ਅਤਿਵਿਯ ਆਹਰਿ. ਬਹੁਤ੍ਤਸੋਤਿ ਬਹੁਸੋ. ਜਾਨਂ ਉਚ੍ਚਂ ਪਪਾਤਿਨਨ੍ਤਿ ‘‘ਪੁਤ੍ਤੋ ਤੇ ਅਤਿਉਚ੍ਚਂ ਠਾਨਂ ਲਙ੍ਘਤੀ’’ਤਿ ਸੁਤ੍ਵਾ ‘‘ਉਚ੍ਚੇ ਪਪਾਤੀ ਅਯ’’ਨ੍ਤਿ ਜਾਨਨ੍ਤੋ. ਤੇਜਸ੍ਸਿਨ੍ਤਿ ਪੁਰਿਸਤੇਜਸਮ੍ਪਨ੍ਨਂ. ਦੂਰਗਾਮਿਨਨ੍ਤਿ ਤੇਨੇਵ ਤੇਜੇਨ ਦੂਰਗਾਮਿਂ. ਪਰਿਪ੍ਲਵਨ੍ਤਨ੍ਤਿ ਉਪ੍ਪਲਪਤ੍ਤਂ ਵਿਯ ਉਦਕੇ ਉਪ੍ਲਵਮਾਨਂ. ਵਿਜਾਨਹੀਤਿ ਵਿਜਾਨਾਸਿ. ਚਕ੍ਕਂਵ ਪਰਿਮਣ੍ਡਲਨ੍ਤਿ ਯਸ੍ਮਿਂ ਤੇ ਪਦੇਸੇ ਠਿਤਸ੍ਸ ਸਮੁਦ੍ਦੇਨ ਪਰਿਚ੍ਛਿਨ੍ਨੋ ਜਮ੍ਬੁਦੀਪੋ ਚਕ੍ਕਮਣ੍ਡਲਂਵ ਪਞ੍ਞਾਯਤਿ, ਤਤੋ ਤਾਤ ਨਿਵਤ੍ਤਾਹੀਤਿ ਓਵਦਨ੍ਤੋ ਏਵਮਾਹ.
ਉਦਪਤ੍ਤੋਸੀਤਿ ਪਿਤੁ ਓਵਾਦਂ ਅਕਤ੍ਵਾ ਏਕਦਿਵਸਂ ਗਿਜ੍ਝੇਹਿ ਸਦ੍ਧਿਂ ਉਪ੍ਪਤਿਤੋ ਤੇ ਓਹਾਯ ਪਿਤਰਾ ਕਥਿਤਟ੍ਠਾਨਂ ਅਗਮਾਸਿ. ਓਲੋਕਯਨ੍ਤੋਤਿ ਤਂ ਠਾਨਂ ਪਤ੍ਵਾ ਹੇਟ੍ਠਾ ਓਲੋਕੇਨ੍ਤੋ. ਵਕ੍ਕਙ੍ਗੋਤਿ ਵਙ੍ਕਗੀਵੋ. ਯਥਾਸਾਸਿ ਪਿਤੁਸ੍ਸੁਤਨ੍ਤਿ ਯਥਾਸ੍ਸ ਪਿਤੁ ਸਨ੍ਤਿਕਾ ਸੁਤਂ ਆਸਿ, ਤਥੇਵ ਅਦ੍ਦਸ, ‘‘ਯਥਾਸ੍ਸਾਸੀ’’ਤਿਪਿ ਪਾਠੋ. ਪਰਮੇਵਚ੍ਚਵਤ੍ਤਥਾਤਿ ਪਿਤਰਾ ਅਕ੍ਖਾਤਟ੍ਠਾਨਤੋ ਪਰਂ ਅਤਿਵਤ੍ਤੋਵ. ਤਞ੍ਚ ਵਾਤਸਿਖਾ ਤਿਕ੍ਖਾਤਿ ਤਂ ਅਨੋਵਾਦਕਂ ਬਲਿਮ੍ਪਿ ਸਮਾਨਂ ਦਿਜਂ ਤਿਖਿਣਵੇਰਮ੍ਭਵਾਤਸਿਖਾ ਅਚ੍ਚਹਾਸਿ ਅਤਿਹਰਿ, ਚੁਣ੍ਣਵਿਚੁਣ੍ਣਂ ਅਕਾਸਿ. ਨਾਸਕ੍ਖਾਤਿਗਤੋਤਿ ਨਾਸਕ੍ਖਿ ਅਤਿਗਤੋ. ਪੋਸੋਤਿ ਸਤ੍ਤੋ. ਅਨੋਵਾਦਕਰੇਤਿ ਤਸ੍ਮਿਂ ਦਿਜੇ ਪਣ੍ਡਿਤਾਨਂ ਓਵਾਦਂ ਅਕਰੋਨ੍ਤੇ ਸਬ੍ਬੇਪਿ ਤੇ ਮਹਾਦੁਕ੍ਖਂ ਪਾਪੁਣਿਂਸੁ. ਅਕਤ੍ਵਾ ਵੁਡ੍ਢਸਾਸਨਨ੍ਤਿ ਵੁਡ੍ਢਾਨਂ ਹਿਤਕਾਮਾਨਂ ਵਚਨਂ ਅਕਤ੍ਵਾ ਏਵਮੇਵ ਬ੍ਯਸਨਂ ਮਹਾਦੁਕ੍ਖਂ ਪਾਪੁਣਾਤਿ. ਤਸ੍ਮਾ ਤ੍ਵਂ ਭਿਕ੍ਖੁ ਮਾ ਗਿਜ੍ਝਸਦਿਸੋ ਭਵ, ਅਤ੍ਥਕਾਮਾਨਂ ਵਚਨਂ ਕਰੋਹੀਤਿ. ਸੋ ਸਤ੍ਥਾਰਾ ਏਵਂ ਓਵਦਿਤੋ ਤਤੋ ਪਟ੍ਠਾਯ ਸੁਵਚੋ ਅਹੋਸਿ.
ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਦੁਬ੍ਬਚਗਿਜ੍ਝੋ ਏਤਰਹਿ ਦੁਬ੍ਬਚਭਿਕ੍ਖੁ ਅਹੋਸਿ, ਗਿਜ੍ਝਪਿਤਾ ਪਨ ਅਹਮੇਵ ਅਹੋਸਿ’’ਨ੍ਤਿ.
ਗਿਜ੍ਝਜਾਤਕਵਣ੍ਣਨਾ ਪਠਮਾ.
[੪੨੮] ੨. ਕੋਸਮ੍ਬਿਯਜਾਤਕਵਣ੍ਣਨਾ
ਪੁਥੁਸਦ੍ਦੋਤਿ ਇਦਂ ਸਤ੍ਥਾ ਕੋਸਮ੍ਬਿਂ ਨਿਸ੍ਸਾਯ ਘੋਸਿਤਾਰਾਮੇ ਵਿਹਰਨ੍ਤੋ ਕੋਸਮ੍ਬਿਯਂ ਭਣ੍ਡਨਕਾਰਕੇ ਭਿਕ੍ਖੂ ਆਰਬ੍ਭ ਕਥੇਸਿ. ਵਤ੍ਥੁ ਕੋਸਮ੍ਬਕਕ੍ਖਨ੍ਧਕੇ (ਮਹਾਵ. ੪੫੧ ਆਦਯੋ) ਆਗਤਮੇਵ, ਅਯਂ ਪਨੇਤ੍ਥ ਸਙ੍ਖੇਪੋ. ਤਦਾ ਕਿਰ ਦ੍ਵੇ ਭਿਕ੍ਖੂ ਏਕਸ੍ਮਿਂ ਆਵਾਸੇ ਵਸਿਂਸੁ ਵਿਨਯਧਰੋ ਚ ਸੁਤ੍ਤਨ੍ਤਿਕੋ ਚ. ਤੇਸੁ ਸੁਤ੍ਤਨ੍ਤਿਕੋ ਏਕਦਿਵਸਂ ਸਰੀਰਵਲਞ੍ਜਂ ਕਤ੍ਵਾ ਉਦਕਕੋਟ੍ਠਕੇ ਆਚਮਨਉਦਕਾਵਸੇਸਂ ਭਾਜਨੇ ਠਪੇਤ੍ਵਾ ਨਿਕ੍ਖਮਿ. ਪਚ੍ਛਾ ਵਿਨਯਧਰੋ ਤਤ੍ਥ ਪਵਿਟ੍ਠੋ ਤਂ ਉਦਕਂ ਦਿਸ੍ਵਾ ਨਿਕ੍ਖਮਿਤ੍ਵਾ ਇਤਰਂ ਪੁਚ੍ਛਿ ‘‘ਆਵੁਸੋ, ਤਯਾ ਉਦਕਂ ਠਪਿਤ’’ਨ੍ਤਿ. ‘‘ਆਮਾਵੁਸੋ’’ਤਿ. ‘‘ਕਿਂ ਪਨੇਤ੍ਥ ਆਪਤ੍ਤਿਭਾਵਂ ਨ ਜਾਨਾਸੀ’’ਤਿ? ‘‘ਆਮਾਵੁਸੋ ਨ ਜਾਨਾਮੀ’’ਤਿ. ‘‘ਹੋਤਿ, ਆਵੁਸੋ, ਏਤ੍ਥ ਆਪਤ੍ਤੀ’’ਤਿ? ‘‘ਤੇਨ ਹਿ ਪਟਿਕਰਿਸ੍ਸਾਮਿ ਨ’’ਨ੍ਤਿ. ‘‘ਸਚੇ ਪਨ ਤੇ, ਆਵੁਸੋ, ਅਸਞ੍ਚਿਚ੍ਚ ਅਸਤਿਯਾ ਕਤਂ, ਨਤ੍ਥਿ ਆਪਤ੍ਤੀ’’ਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਅਹੋਸਿ. ਵਿਨਯਧਰੋਪਿ ਅਤ੍ਤਨੋ ਨਿਸ੍ਸਿਤਕਾਨਂ ‘‘ਅਯਂ ਸੁਤ੍ਤਨ੍ਤਿਕੋ ਆਪਤ੍ਤਿਂ ਆਪਜ੍ਜਮਾਨੋਪਿ ਨ ਜਾਨਾਤੀ’’ਤਿ ਆਰੋਚੇਸਿ. ਤੇ ਤਸ੍ਸ ਨਿਸ੍ਸਿਤਕੇ ਦਿਸ੍ਵਾ ‘‘ਤੁਮ੍ਹਾਕਂ ਉਪਜ੍ਝਾਯੋ ਆਪਤ੍ਤਿਂ ਆਪਜ੍ਜਿਤ੍ਵਾਪਿ ਆਪਤ੍ਤਿਭਾਵਂ ਨ ਜਾਨਾਤੀ’’ਤਿ ਆਹਂਸੁ. ਤੇ ਗਨ੍ਤ੍ਵਾ ਅਤ੍ਤਨੋ ਉਪਜ੍ਝਾਯਸ੍ਸ ਆਰੋਚੇਸੁਂ. ਸੋ ਏਵਮਾਹ – ‘‘ਅਯਂ ਵਿਨਯਧਰੋ ਪੁਬ੍ਬੇ ‘ਅਨਾਪਤ੍ਤੀ’ਤਿ ਵਤ੍ਵਾ ਇਦਾਨਿ ‘ਆਪਤ੍ਤੀ’ਤਿ ਵਦਤਿ, ਮੁਸਾਵਾਦੀ ਏਸੋ’’ਤਿ. ਤੇ ਗਨ੍ਤ੍ਵਾ ‘‘ਤੁਮ੍ਹਾਕਂ ਉਪਜ੍ਝਾਯੋ ਮੁਸਾਵਾਦੀ’’ਤਿ ਏਵਂ ਅਞ੍ਞਮਞ੍ਞਂ ਕਲਹਂ ਵਡ੍ਢਯਿਂਸੁ. ਤਤੋ ਵਿਨਯਧਰੋ ਓਕਾਸਂ ਲਭਿਤ੍ਵਾ ਤਸ੍ਸ ਆਪਤ੍ਤਿਯਾ ਅਦਸ੍ਸਨੇਨ ਉਕ੍ਖੇਪਨੀਯਕਮ੍ਮਂ ਅਕਾਸਿ. ਤਤੋ ਪਟ੍ਠਾਯ ਤੇਸਂ ਪਚ੍ਚਯਦਾਯਕਾ ਉਪਾਸਕਾਪਿ ਦ੍ਵੇ ਕੋਟ੍ਠਾਸਾ ਅਹੇਸੁਂ. ਓਵਾਦਪਟਿਗ੍ਗਾਹਿਕਾ ਭਿਕ੍ਖੁਨਿਯੋਪਿ ਆਰਕ੍ਖਦੇਵਤਾਪਿ ਦ੍ਵੇ ਕੋਟ੍ਠਾਸਾ ਅਹੇਸੁਂ. ਤਾਸਂ ਸਨ੍ਦਿਟ੍ਠਸਮ੍ਭਤ੍ਤਾ ਆਕਾਸਟ੍ਠਦੇਵਤਾਪਿ ਯਾਵ ਬ੍ਰਹ੍ਮਲੋਕਾ ਸਬ੍ਬੇ ਪੁਥੁਜ੍ਜਨਾ ਦ੍ਵੇ ਪਕ੍ਖਾ ਅਹੇਸੁਂ. ਯਾਵ ਅਕਨਿਟ੍ਠਭਵਨਾ ਪਨ ਇਦਂ ਕੋਲਾਹਲਂ ਅਗਮਾਸਿ.
ਅਥੇਕੋ ਭਿਕ੍ਖੁ ਤਥਾਗਤਂ ਉਪਸਙ੍ਕਮਿਤ੍ਵਾ ਉਕ੍ਖੇਪਕਾਨਂ ‘‘ਧਮ੍ਮਿਕੇਨੇਵ ਕਮ੍ਮੇਨ ਅਯਂ ਉਕ੍ਖਿਤ੍ਤੋ, ਉਕ੍ਖਿਤ੍ਤਾਨੁਵਤ੍ਤਕਾਨਂ ਅਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ’’ਤਿ ਲਦ੍ਧਿਂ, ਉਕ੍ਖੇਪਕੇਹਿ ਵਾਰਿਯਮਾਨਾਨਮ੍ਪਿ ਤੇਸਂ ਤਂ ਅਨੁਪਰਿਵਾਰੇਤ੍ਵਾ ਚਰਣਭਾਵਞ੍ਚ ਸਤ੍ਥੁ ਆਰੋਚੇਸਿ. ਭਗਵਾ ‘‘ਸਮਗ੍ਗਾ ਕਿਰ ਹੋਨ੍ਤੂ’’ਤਿ ਦ੍ਵੇ ਵਾਰੇ ਪੇਸੇਤ੍ਵਾ ‘‘ਨ ਇਚ੍ਛਨ੍ਤਿ ਭਨ੍ਤੇ ਸਮਗ੍ਗਾ ਭਵਿਤੁ’’ਨ੍ਤਿ ਸੁਤ੍ਵਾ ਤਤਿਯਵਾਰੇ ‘‘ਭਿਨ੍ਨੋ ਭਿਕ੍ਖੁਸਙ੍ਘੋ’’ਤਿ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਉਕ੍ਖੇਪਕਾਨਂ ਉਕ੍ਖੇਪਨੇ, ਇਤਰੇਸਞ੍ਚ ਅਸਞ੍ਚਿਚ੍ਚ ਆਪਤ੍ਤਿਯਾ ਅਦਸ੍ਸਨੇ ਆਦੀਨਵਂ ਵਤ੍ਵਾ ਪਕ੍ਕਾਮਿ. ਪੁਨ ਤੇਸਂ ਤਤ੍ਥੇਵ ਏਕਸੀਮਾਯਂ ਉਪੋਸਥਾਦੀਨਿ ਕਾਰੇਤ੍ਵਾ ਭਤ੍ਤਗ੍ਗਾਦੀਸੁ ਭਣ੍ਡਨਜਾਤਾਨਂ ‘‘ਆਸਨਨ੍ਤਰਿਕਾਯ ਨਿਸੀਦਿਤਬ੍ਬ’’ਨ੍ਤਿ ਭਤ੍ਤਗ੍ਗੇ ਵਤ੍ਤਂ ਪਞ੍ਞਾਪੇਤ੍ਵਾ ‘‘ਇਦਾਨਿਪਿ ਭਣ੍ਡਨਜਾਤਾ ਵਿਹਰਨ੍ਤੀ’’ਤਿ ਸੁਤ੍ਵਾ ਤਤ੍ਥ ਗਨ੍ਤ੍ਵਾ ‘‘ਅਲਂ, ਭਿਕ੍ਖਵੇ, ਮਾ ਭਣ੍ਡਨ’’ਨ੍ਤਿਆਦੀਨਿ ਵਤ੍ਵਾ ਅਞ੍ਞਤਰੇਨ ਭਿਕ੍ਖੁਨਾ ਧਮ੍ਮਵਾਦਿਨਾ ਭਗਵਤੋ ਵਿਹੇਸਂ ਅਨਿਚ੍ਛਨ੍ਤੇਨ ‘‘ਆਗਮੇਤੁ, ਭਨ੍ਤੇ, ਭਗਵਾ ਧਮ੍ਮਸਾਮਿ, ਅਪ੍ਪੋਸ੍ਸੁਕ੍ਕੋ ਭਨ੍ਤੇ, ਭਗਵਾ ਦਿਟ੍ਠਧਮ੍ਮਸੁਖਵਿਹਾਰਂ ਅਨੁਯੁਤ੍ਤੋ ਵਿਹਰਤੁ, ਮਯਂ ਤੇਨ ਭਣ੍ਡਨੇਨ ਕਲਹੇਨ ਵਿਗ੍ਗਹੇਨ ਵਿਵਾਦੇਨ ਪਞ੍ਞਾਯਿਸ੍ਸਾਮਾ’’ਤਿ ਵੁਤ੍ਤੇ –
ਭੂਤਪੁਬ੍ਬਂ, ਭਿਕ੍ਖਵੇ, ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ ਨਾਮ ਕਾਸਿਰਾਜਾ ਅਹੋਸੀਤਿ ਬ੍ਰਹ੍ਮਦਤ੍ਤੇਨ ਦੀਘੀਤਿਸ੍ਸ ਕੋਸਲਰਞ੍ਞੋ ਰਜ੍ਜਂ ਅਚ੍ਛਨ੍ਦਿਤ੍ਵਾ ਅਞ੍ਞਾਤਕਵੇਸੇਨ ਵਸਨ੍ਤਸ੍ਸ ਮਾਰਿਤਭਾਵਞ੍ਚੇਵ ਦੀਘਾਵੁਕੁਮਾਰੇਨ ਅਤ੍ਤਨੋ ਜੀਵਿਤੇ ਦਿਨ੍ਨੇ ਤਤੋ ਪਟ੍ਠਾਯ ਤੇਸਂ ਸਮਗ੍ਗਭਾਵਞ੍ਚ ਕਥੇਤ੍ਵਾ ‘‘ਤੇਸਞ੍ਹਿ ਨਾਮ, ਭਿਕ੍ਖਵੇ, ਰਾਜੂਨਂ ਆਦਿਨ੍ਨਦਣ੍ਡਾਨਂ ਆਦਿਨ੍ਨਸਤ੍ਥਾਨਂ ਏਵਰੂਪਂ ਖਨ੍ਤਿਸੋਰਚ੍ਚਂ ਭਵਿਸ੍ਸਤਿ. ਇਧ ਖੋ ਤਂ, ਭਿਕ੍ਖਵੇ, ਸੋਭੇਥ, ਯਂ ਤੁਮ੍ਹੇ ਏਵਂ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਪਬ੍ਬਜਿਤਾ ਸਮਾਨਾ ਖਮਾ ਚ ਭਵੇਯ੍ਯਾਥ ਸੋਰਤਾ ਚਾ’’ਤਿ ਓਵਦਿਤ੍ਵਾ ਦੁਤਿਯਮ੍ਪਿ ਤਤਿਯਮ੍ਪਿ ‘‘ਅਲਂ, ਭਿਕ੍ਖਵੇ, ਮਾ ਭਣ੍ਡਨ’’ਨ੍ਤਿ ਵਾਰੇਤ੍ਵਾ ਅਨੋਰਮਨ੍ਤੇ ਦਿਸ੍ਵਾ ‘‘ਪਰਿਯਾਦਿਣ੍ਣਰੂਪਾ ਖੋ ਇਮੇ ਮੋਘਪੁਰਿਸਾ, ਨ ਯਿਮੇ ਸੁਕਰਾ ਸਞ੍ਞਾਪੇਤੁ’’ਨ੍ਤਿ ਪਕ੍ਕਮਿਤ੍ਵਾ ਪੁਨਦਿਵਸੇ ਪਿਣ੍ਡਪਾਤਪਟਿਕ੍ਕਨ੍ਤੋ ਗਨ੍ਧਕੁਟਿਯਾ ਥੋਕਂ ਵਿਸ੍ਸਮਿਤ੍ਵਾ ਸੇਨਾਸਨਂ ਸਂਸਾਮੇਤ੍ਵਾ ਅਤ੍ਤਨੋ ਪਤ੍ਤਚੀਵਰਮਾਦਾਯ ਸਙ੍ਘਮਜ੍ਝੇ ਆਕਾਸੇ ਠਤ੍ਵਾ ਇਮਾ ਗਾਥਾ ਅਭਾਸਿ –
੧੦. ‘‘ਪੁਥੁਸਦ੍ਦੋ ਸਮਜਨੋ, ਨ ਬਾਲੋ ਕੋਚਿ ਮਞ੍ਞਥ;
ਸਙ੍ਘਸ੍ਮਿਂ ਭਿਜ੍ਜਮਾਨਸ੍ਮਿਂ, ਨਾਞ੍ਞਂ ਭਿਯ੍ਯੋ ਅਮਞ੍ਞਰੁਂ.
੧੧. ‘‘ਪਰਿਮੁਟ੍ਠਾ ਪਣ੍ਡਿਤਾਭਾਸਾ, ਵਾਚਾਗੋਚਰਭਾਣਿਨੋ;
ਯਾਵਿਚ੍ਛਨ੍ਤਿ ਮੁਖਾਯਾਮਂ, ਯੇਨ ਨੀਤਾ ਨ ਤਂ ਵਿਦੂ.
੧੨. ‘‘ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;
ਯੇ ਚ ਤਂ ਉਪਨਯ੍ਹਨ੍ਤਿ, ਵੇਰਂ ਤੇਸਂ ਨ ਸਮ੍ਮਤਿ.
੧੩. ‘‘ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;
ਯੇ ਚ ਤਂ ਨੁਪਨਯ੍ਹਨ੍ਤਿ, ਵੇਰਂ ਤੇਸੂਪਸਮ੍ਮਤਿ.
੧੪. ‘‘ਨ ਹਿ ਵੇਰੇਨ ਵੇਰਾਨਿ, ਸਮ੍ਮਨ੍ਤੀਧ ਕੁਦਾਚਨਂ;
ਅਵੇਰੇਨ ਚ ਸਮ੍ਮਨ੍ਤਿ, ਏਸ ਧਮ੍ਮੋ ਸਨਨ੍ਤਨੋ.
੧੫. ‘‘ਪਰੇ ਚ ਨ ਵਿਜਾਨਨ੍ਤਿ, ਮਯਮੇਤ੍ਥ ਯਮਾਮਸੇ;
ਯੇ ਚ ਤਤ੍ਥ ਵਿਜਾਨਨ੍ਤਿ, ਤਤੋ ਸਮ੍ਮਨ੍ਤਿ ਮੇਧਗਾ.
੧੬. ‘‘ਅਟ੍ਠਿਚ੍ਛਿਨ੍ਨਾ ਪਾਣਹਰਾ, ਗਵਾਸ੍ਸਧਨਹਾਰਿਨੋ;
ਰਟ੍ਠਂ ਵਿਲੁਮ੍ਪਮਾਨਾਨਂ, ਤੇਸਮ੍ਪਿ ਹੋਤਿ ਸਙ੍ਗਤਿ;
ਕਸ੍ਮਾ ਤੁਮ੍ਹਾਕ ਨੋ ਸਿਯਾ.
੧੭. ‘‘ਸਚੇ ਲਭੇਥ ਨਿਪਕਂ ਸਹਾਯਂ, ਸਦ੍ਧਿਂਚਰਂ ਸਾਧੁਵਿਹਾਰਿਧੀਰਂ;
ਅਭਿਭੁਯ੍ਯ ਸਬ੍ਬਾਨਿ ਪਰਿਸ੍ਸਯਾਨਿ, ਚਰੇਯ੍ਯ ਤੇਨਤ੍ਤਮਨੋ ਸਤੀਮਾ.
੧੮. ‘‘ਨੋ ਚੇ ਲਭੇਥ ਨਿਪਕਂ ਸਹਾਯਂ, ਸਦ੍ਧਿਂਚਰਂ ਸਾਧੁਵਿਹਾਰਿਧੀਰਂ;
ਰਾਜਾਵ ਰਟ੍ਠਂ ਵਿਜਿਤਂ ਪਹਾਯ, ਏਕੋ ਚਰੇ ਮਾਤਙ੍ਗਰਞ੍ਞੇਵ ਨਾਗੋ.
੧੯. ‘‘ਏਕਸ੍ਸ ਚਰਿਤਂ ਸੇਯ੍ਯੋ, ਨਤ੍ਥਿ ਬਾਲੇ ਸਹਾਯਤਾ;
ਏਕੋ ਚਰੇ ਨ ਪਾਪਾਨਿ ਕਯਿਰਾ, ਅਪ੍ਪੋਸ੍ਸੁਕ੍ਕੋ ਮਾਤਙ੍ਗਰਞ੍ਞੇਵ ਨਾਗੋ’’ਤਿ.
ਤਤ੍ਥ ਪੁਥੁ ਮਹਾਸਦ੍ਦੋ ਅਸ੍ਸਾਤਿ ਪੁਥੁਸਦ੍ਦੋ. ਸਮਜਨੋਤਿ ਸਮਾਨੋ ਏਕਸਦਿਸੋ ਜਨੋ, ਸਬ੍ਬੋਵਾਯਂ ਭਣ੍ਡਨਕਾਰਕਜਨੋ ਸਮਨ੍ਤਤੋ ਸਦ੍ਦਨਿਚ੍ਛਾਰਣੇਨ ਪੁਥੁਸਦ੍ਦੋ ਚੇਵ ਸਦਿਸੋ ਚਾਤਿ ਵੁਤ੍ਤਂ ਹੋਤਿ. ਨ ਬਾਲੋ ਕੋਚਿ ਮਞ੍ਞਥਾਤਿ ਤਤ੍ਥ ਕੋਚਿ ਏਕੋਪਿ ‘‘ਅਹਂ ਬਾਲੋ’’ਤਿ ਨ ਮਞ੍ਞਿਤ੍ਥ, ਸਬ੍ਬੇ ਪਣ੍ਡਿਤਮਾਨਿਨੋ, ਸਬ੍ਬੋਵਾਯਂ ਭਣ੍ਡਨਕਾਰਕੋ ਜਨੋਯੇਵ. ਨਾਞ੍ਞਂ ਭਿਯ੍ਯੋ ਅਮਞ੍ਞਰੁਨ੍ਤਿ ਕੋਚਿ ਏਕੋਪਿ ‘‘ਅਹਂ ਬਾਲੋ’’ਤਿ ਨ ਮਞ੍ਞਿਤ੍ਥ, ਭਿਯ੍ਯੋ ਚ ਸਙ੍ਘਸ੍ਮਿਂ ਭਿਜ੍ਜਮਾਨੇ ਅਞ੍ਞਮ੍ਪਿ ਏਕਂ ‘‘ਮਯ੍ਹਂ ਕਾਰਣਾ ਸਙ੍ਘੋ ਭਿਜ੍ਜਤੀ’’ਤਿ ਇਦਂ ਕਾਰਣਂ ਨ ਮਞ੍ਞਿਤ੍ਥਾਤਿ ਅਤ੍ਥੋ.
ਪਰਿਮੁਟ੍ਠਾਤਿ ਮੁਟ੍ਠਸ੍ਸਤਿਨੋ. ਪਣ੍ਡਿਤਾਭਾਸਾਤਿ ਅਤ੍ਤਨੋ ਪਣ੍ਡਿਤਮਾਨੇਨ ਪਣ੍ਡਿਤਸਦਿਸਾ. ਵਾਚਾਗੋਚਰਭਾਣਿਨੋਤਿ ਰਾ-ਕਾਰਸ੍ਸ ਰਸ੍ਸਾਦੇਸੋ ਕਤੋ, ਵਾਚਾਗੋਚਰਾ ਚ ਨ ਸਤਿਪਟ੍ਠਾਨਾਦਿਅਰਿਯਧਮ੍ਮਗੋਚਰਾ, ਭਾਣਿਨੋ ਚ. ਕਥਂ ਭਾਣਿਨੋ? ਯਾਵਿਚ੍ਛਨ੍ਤਿ ਮੁਖਾਯਾਮਨ੍ਤਿ, ਯਾਵ ਮੁਖਂ ਪਸਾਰੇਤੁਂ ਇਚ੍ਛਨ੍ਤਿ, ਤਾਵ ਪਸਾਰੇਤ੍ਵਾ ਅਗ੍ਗਪਾਦੇਹਿ ਠਤ੍ਵਾ ਭਾਣਿਨੋ, ਏਕੋਪਿ ਸਙ੍ਘਗਾਰਵੇਨ ਮੁਖਸਙ੍ਕੋਚਨਂ ਨ ਕਰੋਤੀਤਿ ਅਤ੍ਥੋ. ਯੇਨ ਨੀਤਾਤਿ ਯੇਨ ਭਣ੍ਡਨੇਨ ਇਮਂ ਨਿਲ੍ਲਜ੍ਜਭਾਵਂ ਨੀਤਾ. ਨ ਤਂ ਵਿਦੂਤਿ ਏਵਂ ‘‘ਆਦੀਨਵਂ ਇਦ’’ਨ੍ਤਿ ਤਂ ਨ ਜਾਨਨ੍ਤਿ.
ਯੇ ਚ ਤਂ ਉਪਨਯ੍ਹਨ੍ਤੀਤਿ ਤਂ ‘‘ਅਕ੍ਕੋਚ੍ਛਿ ਮ’’ਨ੍ਤਿਆਦਿਕਂ ਆਕਾਰਂ ਯੇ ਉਪਨਯ੍ਹਨ੍ਤਿ. ਸਨਨ੍ਤਨੋਤਿ ਪੋਰਾਣੋ. ਪਰੇਤਿ ਪਣ੍ਡਿਤੇ ਠਪੇਤ੍ਵਾ ਤਤੋ ਅਞ੍ਞੇ ਭਣ੍ਡਨਕਾਰਕਾ ਪਰੇ ਨਾਮ. ਤੇ ਏਤ੍ਥ ਸਙ੍ਘਮਜ੍ਝੇ ਕੋਲਾਹਲਂ ਕਰੋਨ੍ਤਾ ‘‘ਮਯਂ ਯਮਾਮਸੇ ਉਪਯਮਾਮ ਨਸ੍ਸਾਮ, ਸਤਤਂ ਸਮਿਤਂ ਮਚ੍ਚੁਸਨ੍ਤਿਕਂ ਗਚ੍ਛਾਮਾ’’ਤਿ ਨ ਜਾਨਨ੍ਤਿ. ਯੇ ਚ ਤਤ੍ਥ ਵਿਜਾਨਨ੍ਤੀਤਿ ਯੇ ਤਤ੍ਥ ਪਣ੍ਡਿਤਾ ‘‘ਮਯਂ ਮਚ੍ਚੁਸਮੀਪਂ ਗਚ੍ਛਾਮਾ’’ਤਿ ਵਿਜਾਨਨ੍ਤਿ. ਤਤੋ ਸਮ੍ਮਨ੍ਤਿ ਮੇਧਗਾਤਿ ਭਿਕ੍ਖਵੇ, ਏਵਞ੍ਹਿ ਤੇ ਜਾਨਨ੍ਤਾ ਯੋਨਿਸੋਮਨਸਿਕਾਰਂ ਉਪ੍ਪਾਦੇਤ੍ਵਾ ਮੇਧਗਾਨਂ ਕਲਹਾਨਂ ਵੂਪਸਮਾਯ ਪਟਿਪਜ੍ਜਨ੍ਤਿ.
ਅਟ੍ਠਿਚ੍ਛਿਨ੍ਨਾਤਿ ਅਯਂ ਗਾਥਾ ਬ੍ਰਹ੍ਮਦਤ੍ਤਞ੍ਚ ਦੀਘਾਵੁਕੁਮਾਰਞ੍ਚ ਸਨ੍ਧਾਯ ਵੁਤ੍ਤਾ. ਤੇਸਮ੍ਪਿ ਹੋਤਿ ਸਙ੍ਗਤਿ. ਕਸ੍ਮਾ ਤੁਮ੍ਹਾਕਂ ਨ ਹੋਤਿ? ਯੇਸਂ ਵੋ ਨੇਵ ਮਾਤਾਪਿਤੂਨਂ ਅਟ੍ਠੀਨਿ ਛਿਨ੍ਨਾਨਿ, ਨ ਪਾਣਾ ਹਟਾ, ਨ ਗਵਾਸ੍ਸਧਨਾਨਿ ਹਟਾਨਿ. ਇਦਂ ਵੁਤ੍ਤਂ ਹੋਤਿ – ਭਿਕ੍ਖਵੇ, ਤੇਸਞ੍ਹਿ ਨਾਮ ਆਦਿਨ੍ਨਦਣ੍ਡਾਨਂ ਆਦਿਨ੍ਨਸਤ੍ਥਾਨਂ ਰਾਜੂਨਂ ਏਵਰੂਪਾ ਸਙ੍ਗਤਿ ਸਮਾਗਮੋ ਆਵਾਹਵਿਵਾਹਸਮ੍ਬਨ੍ਧਂ ਕਤ੍ਵਾ ਏਕਤੋ ਪਾਨਭੋਜਨਂ ਹੋਤਿ, ਤੁਮ੍ਹੇ ਏਵਰੂਪੇ ਸਾਸਨੇ ਪਬ੍ਬਜਿਤ੍ਵਾ ਅਤ੍ਤਨੋ ਵੇਰਮਤ੍ਤਮ੍ਪਿ ਜਹਿਤੁਂ ਨ ਸਕ੍ਕੋਥ, ਕੋ ਤੁਮ੍ਹਾਕਂ ਭਿਕ੍ਖੁਭਾਵੋਤਿ.
ਸਚੇ ਲਭੇਥਾਤਿਆਦਿਗਾਥਾਯੋ ਪਣ੍ਡਿਤਸਹਾਯਸ੍ਸ ਚ ਬਾਲਸਹਾਯਸ੍ਸ ਚ ਵਣ੍ਣਾਵਣ੍ਣਦੀਪਨਤ੍ਥਂ ਵੁਤ੍ਤਾ. ਅਭਿਭੁਯ੍ਯ ਸਬ੍ਬਾਨਿ ਪਰਿਸ੍ਸਯਾਨੀਤਿ ਸਬ੍ਬੇ ਪਾਕਟਪਰਿਸ੍ਸਯੇ ਚ ਪਟਿਚ੍ਛਨ੍ਨਪਰਿਸ੍ਸਯੇ ਚ ਅਭਿਭਵਿਤ੍ਵਾ ਤੇਨ ਸਦ੍ਧਿਂ ਅਤ੍ਤਮਨੋ ਸਤਿਮਾ ਚਰੇਯ੍ਯ. ਰਾਜਾਵ ਰਟ੍ਠਂ ਵਿਜਿਤਂ ਪਹਾਯਾਤਿ ਯਥਾ ਅਤ੍ਤਨੋ ਵਿਜਿਤਂ ਰਟ੍ਠਂ ਮਹਾਜਨਕਰਾਜਾ ਚ ਅਰਿਨ੍ਦਮਰਾਜਾ ਚ ਪਹਾਯ ਏਕਕੋਵ ਚਰਿਂਸੁ, ਏਵਂ ਚਰੇਯ੍ਯਾਤਿ ਅਤ੍ਥੋ. ਮਾਤਙ੍ਗਰਞ੍ਞੇਵ ਨਾਗੋਤਿ ਮਾਤਙ੍ਗੋ ਅਰਞ੍ਞੇ ਨਾਗੋਵ. ਮਾਤਙ੍ਗੋਤਿ ਹਤ੍ਥੀ ਵੁਚ੍ਚਤਿ, ਨਾਗੋਤਿ ਮਹਨ੍ਤਾਧਿਵਚਨਮੇਤਂ. ਯਥਾ ਹਿ ਮਾਤੁਪੋਸਕੋ ਮਾਤਙ੍ਗਨਾਗੋ ਅਰਞ੍ਞੇ ਏਕਕੋ ਚਰਿ, ਨ ਚ ਪਾਪਾਨਿ ਅਕਾਸਿ, ਯਥਾ ਚ ਸੀਲਵਹਤ੍ਥਿਨਾਗੋ. ਯਥਾ ਚ ਪਾਲਿਲੇਯ੍ਯਕੋ, ਏਵਂ ਏਕੋ ਚਰੇ, ਨ ਚ ਪਾਪਾਨਿ ਕਯਿਰਾਤਿ ਵੁਤ੍ਤਂ ਹੋਤਿ.
ਸਤ੍ਥਾ ਏਵਂ ਕਥੇਤ੍ਵਾਪਿ ਤੇ ਭਿਕ੍ਖੂ ਸਮਗ੍ਗੇ ਕਾਤੁਂ ਅਸਕ੍ਕੋਨ੍ਤੋ ਬਾਲਕਲੋਣਕਗਾਮਂ ਗਨ੍ਤ੍ਵਾ ਭਗੁਤ੍ਥੇਰਸ੍ਸ ਏਕੀਭਾਵੇ ਆਨਿਸਂਸਂ ਕਥੇਤ੍ਵਾ ਤਤੋ ਤਿਣ੍ਣਂ ਕੁਲਪੁਤ੍ਤਾਨਂ ਵਸਨਟ੍ਠਾਨਂ ਗਨ੍ਤ੍ਵਾ ਤੇਸਂ ਸਾਮਗ੍ਗਿਵਾਸੇ ਆਨਿਸਂਸਂ ਕਥੇਤ੍ਵਾ ਤਤੋ ਪਾਲਿਲੇਯ੍ਯਕਵਨਸਣ੍ਡਂ ਗਨ੍ਤ੍ਵਾ ਤਤ੍ਥ ਤੇਮਾਸਂ ਵਸਿਤ੍ਵਾ ਪੁਨ ਕੋਸਮ੍ਬਿਂ ਅਗਨ੍ਤ੍ਵਾ ਸਾਵਤ੍ਥਿਮੇਵ ਅਗਮਾਸਿ. ਕੋਸਮ੍ਬਿਵਾਸਿਨੋਪਿ ਉਪਾਸਕਾ ‘‘ਇਮੇ ਖੋ ਅਯ੍ਯਾ, ਕੋਸਮ੍ਬਕਾ ਭਿਕ੍ਖੂ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕਾ, ਇਮੇਹਿ ਉਬ੍ਬਾਲ਼੍ਹੋ ਭਗਵਾ ਪਕ੍ਕਨ੍ਤੋ, ਇਮੇਸਂ ਨੇਵ ਅਭਿਵਾਦਨਾਦੀਨਿ ਕਰਿਸ੍ਸਾਮ, ਨ ਉਪਗਤਾਨਂ ਪਿਣ੍ਡਪਾਤਂ ਦਸ੍ਸਾਮ, ਏਵਂ ਇਮੇ ਪਕ੍ਕਮਿਸ੍ਸਨ੍ਤਿ ਵਾ ਵੇਰਂ ਵਿਰਮਿਸ੍ਸਨ੍ਤਿ ਵਾ ਭਗਵਨ੍ਤਂ ਵਾ ਪਸਾਦੇਸ੍ਸਨ੍ਤੀ’’ਤਿ ਸਮ੍ਮਨ੍ਤਯਿਤ੍ਵਾ ਤਥੇਵ ਅਕਂਸੁ. ਤੇ ਤੇਨ ਦਣ੍ਡਕਮ੍ਮੇਨ ਪੀਲ਼ਿਤਾ ਸਾਵਤ੍ਥਿਂ ਗਨ੍ਤ੍ਵਾ ਭਗਵਨ੍ਤਂ ਖਮਾਪੇਸੁਂ.
ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਪਿਤਾ ਸੁਦ੍ਧੋਦਨਮਹਾਰਾਜਾ ਅਹੋਸਿ, ਮਾਤਾ ਮਹਾਮਾਯਾ, ਦੀਘਾਵੁਕੁਮਾਰੋ ਪਨ ਅਹਮੇਵ ਅਹੋਸਿ’’ਨ੍ਤਿ.
ਕੋਸਮ੍ਬਿਯਜਾਤਕਵਣ੍ਣਨਾ ਦੁਤਿਯਾ.
[੪੨੯] ੩. ਮਹਾਸੁਵਜਾਤਕਵਣ੍ਣਨਾ
ਦੁਮੋ ਯਦਾ ਹੋਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਕਿਰ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਕੋਸਲਜਨਪਦੇ ਅਞ੍ਞਤਰਂ ਪਚ੍ਚਨ੍ਤਗਾਮਂ ਉਪਨਿਸ੍ਸਾਯ ਅਰਞ੍ਞੇ ਵਿਹਾਸਿ. ਮਨੁਸ੍ਸਾ ਤਸ੍ਸ ਰਤ੍ਤਿਟ੍ਠਾਨਦਿਵਾਟ੍ਠਾਨਾਨਿ ਸਮ੍ਪਾਦੇਤ੍ਵਾ ਗਮਨਾਗਮਨਸਮ੍ਪਨ੍ਨੇ ਠਾਨੇ ਸੇਨਾਸਨਂ ਕਤ੍ਵਾ ਸਕ੍ਕਚ੍ਚਂ ਉਪਟ੍ਠਹਿਂਸੁ. ਤਸ੍ਸ ਵਸ੍ਸੂਪਗਤਸ੍ਸ ਪਠਮਮਾਸੇਯੇਵ ਸੋ ਗਾਮੋ ਝਾਯਿ, ਮਨੁਸ੍ਸਾਨਂ ਬੀਜਮਤ੍ਤਮ੍ਪਿ ਅਵਸਿਟ੍ਠਂ ਨਾਹੋਸਿ. ਤੇ ਤਸ੍ਸ ਪਣੀਤਂ ਪਿਣ੍ਡਪਾਤਂ ਦਾਤੁਂ ਨਾਸਕ੍ਖਿਂਸੁ. ਸੋ ਸਪ੍ਪਾਯਸੇਨਾਸਨੇਪਿ ਪਿਣ੍ਡਪਾਤੇਨ ਕਿਲਮਨ੍ਤੋ ਮਗ੍ਗਂ ਵਾ ਫਲਂ ਵਾ ਨਿਬ੍ਬਤ੍ਤੇਤੁਂ ਨਾਸਕ੍ਖਿ. ਅਥ ਨਂ ਤੇਮਾਸਚ੍ਚਯੇਨ ਸਤ੍ਥਾਰਂ ਵਨ੍ਦਿਤੁਂ ਆਗਤਂ ਸਤ੍ਥਾ ਪਟਿਸਨ੍ਥਾਰਂ ਕਤ੍ਵਾ ‘‘ਕਚ੍ਚਿ ਭਿਕ੍ਖੁ ਪਿਣ੍ਡਪਾਤੇਨ ਨ ਕਿਲਮਨ੍ਤੋਸਿ, ਸੇਨਾਸਨਸਪ੍ਪਾਯਞ੍ਚ ਅਹੋਸੀ’’ਤਿ ਪੁਚ੍ਛਿ. ਸੋ ਤਮਤ੍ਥਂ ਆਰੋਚੇਸਿ. ਸਤ੍ਥਾ ‘‘ਤਸ੍ਸ ਸੇਨਾਸਨਂ ਸਪ੍ਪਾਯ’’ਨ੍ਤਿ ਞਤ੍ਵਾ ‘‘ਭਿਕ੍ਖੁ ਸਮਣੇਨ ਨਾਮ ਸੇਨਾਸਨਸਪ੍ਪਾਯੇ ਸਤਿ ਲੋਲੁਪ੍ਪਚਾਰਂ ਪਹਾਯ ਕਿਞ੍ਚਿਦੇਵ ਯਥਾਲਦ੍ਧਂ ਪਰਿਭੁਞ੍ਜਿਤ੍ਵਾ ਸਨ੍ਤੁਟ੍ਠੇਨ ਸਮਣਧਮ੍ਮਂ ਕਾਤੁਂ ਵਟ੍ਟਤਿ. ਪੋਰਾਣਕਪਣ੍ਡਿਤਾ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਤ੍ਤਨੋ ਨਿਵਾਸਸੁਕ੍ਖਰੁਕ੍ਖੇ ਚੁਣ੍ਣਂ ਖਾਦਨ੍ਤਾਪਿ ਲੋਲੁਪ੍ਪਚਾਰਂ ਪਹਾਯ ਸਨ੍ਤੁਟ੍ਠਾ ਮਿਤ੍ਤਧਮ੍ਮਂ ਅਭਿਨ੍ਦਿਤ੍ਵਾ ਅਞ੍ਞਤ੍ਥ ਨ ਗਮਿਂਸੁ, ਤ੍ਵਂ ਪਨ ਕਸ੍ਮਾ ‘ਪਿਣ੍ਡਪਾਤੋ ਪਰਿਤ੍ਤੋ ਲੂਖੋ’ਤਿ ਸਪ੍ਪਾਯਸੇਨਾਸਨਂ ਪਰਿਚ੍ਚਜੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.
ਅਤੀਤੇ ਹਿਮਵਨ੍ਤੇ ਗਙ੍ਗਾਤੀਰੇ ਏਕਸ੍ਮਿਂ ਉਦੁਮ੍ਬਰਵਨੇ ਅਨੇਕਸਤਸਹਸ੍ਸਾ ਸੁਕਾ ਵਸਿਂਸੁ. ਤਤ੍ਰ ਏਕੋ ਸੁਵਰਾਜਾ ਅਤ੍ਤਨੋ ਨਿਵਾਸਰੁਕ੍ਖਸ੍ਸ ਫਲੇਸੁ ਖੀਣੇਸੁ ਯਦੇਵ ਅਵਸਿਟ੍ਠਂ ਹੋਤਿ ਅਙ੍ਕੁਰੋ ਵਾ ਪਤ੍ਤਂ ਵਾ ਤਚੋ ਵਾ ਪਪਟਿਕਾ ਵਾ, ਤਂ ਖਾਦਿਤ੍ਵਾ ਗਙ੍ਗਾਯ ਪਾਨੀਯਂ ਪਿਵਿਤ੍ਵਾ ਪਰਮਪ੍ਪਿਚ੍ਛਸਨ੍ਤੁਟ੍ਠੋ ਹੁਤ੍ਵਾ ਅਞ੍ਞਤ੍ਥ ਨ ਗਚ੍ਛਤਿ. ਤਸ੍ਸ ਅਪ੍ਪਿਚ੍ਛਸਨ੍ਤੁਟ੍ਠਭਾਵਗੁਣੇਨ ਸਕ੍ਕਸ੍ਸ ਭਵਨਂ ਕਮ੍ਪਿ. ਸਕ੍ਕੋ ਆਵਜ੍ਜਮਾਨੋ ਤਂ ਦਿਸ੍ਵਾ ਤਸ੍ਸ ਵੀਮਂਸਨਤ੍ਥਂ ਅਤ੍ਤਨੋ ਆਨੁਭਾਵੇਨ ਤਂ ਰੁਕ੍ਖਂ ਸੁਕ੍ਖਾਪੇਸਿ. ਰੁਕ੍ਖੋ ਖਾਣੁਕਮਤ੍ਤੋ ਹੁਤ੍ਵਾ ਛਿਦ੍ਦਾਵਛਿਦ੍ਦੋ ਵਾਤੇ ਪਹਰਨ੍ਤੇ ਆਕੋਟਿਯਮਾਨੋ ਵਿਯ ਅਟ੍ਠਾਸਿ. ਤਸ੍ਸ ਛਿਦ੍ਦੇਹਿ ਚੁਣ੍ਣਾਨਿ ਨਿਕ੍ਖਮਨ੍ਤਿ. ਸੁਵਰਾਜਾ ਤਾਨਿ ਚੁਣ੍ਣਾਨਿ ਖਾਦਿਤ੍ਵਾ ਗਙ੍ਗਾਯ ਪਾਨੀਯਂ ਪਿਵਿਤ੍ਵਾ ਅਞ੍ਞਤ੍ਥ ਅਗਨ੍ਤ੍ਵਾ ਵਾਤਾਤਪਂ ਅਗਣੇਤ੍ਵਾ ਉਦੁਮ੍ਬਰਖਾਣੁਕੇ ਨਿਸੀਦਿ. ਸਕ੍ਕੋ ਤਸ੍ਸ ਪਰਮਪ੍ਪਿਚ੍ਛਭਾਵਂ ਞਤ੍ਵਾ ‘‘ਮਿਤ੍ਤਧਮ੍ਮਗੁਣਂ ਕਥਾਪੇਤ੍ਵਾ ਵਰਮਸ੍ਸ ਦਤ੍ਵਾ ਉਦੁਮ੍ਬਰਂ ਅਮਤਫਲਂ ਕਰਿਤ੍ਵਾ ਆਗਮਿਸ੍ਸਾਮੀ’’ਤਿ ਏਕੋ ਹਂਸਰਾਜਾ ਹੁਤ੍ਵਾ ਸੁਜਂ ਅਸੁਰਕਞ੍ਞਂ ਪੁਰਤੋ ਕਤ੍ਵਾ ਤਂ ਉਦੁਮ੍ਬਰਵਨਂ ਗਨ੍ਤ੍ਵਾ ਅਵਿਦੂਰੇ ਏਕਰੁਕ੍ਖਸ੍ਸ ਸਾਖਾਯ ਨਿਸੀਦਿਤ੍ਵਾ ਤੇਨ ਸਦ੍ਧਿਂ ਕਥਂ ਸਮੁਟ੍ਠਾਪੇਨ੍ਤੋ ਪਠਮਂ ਗਾਥਮਾਹ –
੨੦. ‘‘ਦੁਮੋ ਯਦਾ ਹੋਤਿ ਫਲੂਪਪਨ੍ਨੋ, ਭੁਞ੍ਜਨ੍ਤਿ ਨਂ ਵਿਹਙ੍ਗਮਾ ਸਮ੍ਪਤਨ੍ਤਾ;
ਖੀਣਨ੍ਤਿ ਞਤ੍ਵਾਨ ਦੁਮਂ ਫਲਚ੍ਚਯੇ, ਦਿਸੋਦਿਸਂ ਯਨ੍ਤਿ ਤਤੋ ਵਿਹਙ੍ਗਮਾ’’ਤਿ.
ਤਸ੍ਸਤ੍ਥੋ – ਸੁਵਰਾਜ, ਰੁਕ੍ਖੋ ਨਾਮ ਯਦਾ ਫਲਸਮ੍ਪਨ੍ਨੋ ਹੋਤਿ, ਤਦਾ ਤਂ ਸਾਖਤੋ ਸਾਖਂ ਸਮ੍ਪਤਨ੍ਤਾਵ ਵਿਹਙ੍ਗਮਾ ਭੁਞ੍ਜਨ੍ਤਿ, ਤਂ ਪਨ ਖੀਣਂ ਞਤ੍ਵਾ ਫਲਾਨਂ ਅਚ੍ਚਯੇਨ ਤਤੋ ਰੁਕ੍ਖਤੋ ਦਿਸੋਦਿਸਂ ਵਿਹਙ੍ਗਮਾ ਗਚ੍ਛਨ੍ਤੀਤਿ.
ਏਵਞ੍ਚ ਪਨ ਵਤ੍ਵਾ ਤਤੋ ਨਂ ਉਯ੍ਯੋਜੇਤੁਂ ਦੁਤਿਯਂ ਗਾਥਮਾਹ –
੨੧. ‘‘ਚਰ ਚਾਰਿਕਂ ਲੋਹਿਤਤੁਣ੍ਡ ਮਾ ਮਰਿ, ਕਿਂ ਤ੍ਵਂ ਸੁਵ ਸੁਕ੍ਖਦੁਮਮ੍ਹਿ ਝਾਯਸਿ;
ਤਦਿਙ੍ਘ ਮਂ ਬ੍ਰੂਹਿ ਵਸਨ੍ਤਸਨ੍ਨਿਭ, ਕਸ੍ਮਾ ਸੁਵ ਸੁਕ੍ਖਦੁਮਂ ਨ ਰਿਞ੍ਚਸੀ’’ਤਿ.
ਤਤ੍ਥ ਝਾਯਸੀਤਿ ਕਿਂਕਾਰਣਾ ਸੁਕ੍ਖਖਾਣੁਮਤ੍ਥਕੇ ਝਾਯਨ੍ਤੋ ਪਜ੍ਝਾਯਨ੍ਤੋ ਤਿਟ੍ਠਸਿ. ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ. ਵਸਨ੍ਤਸਨ੍ਨਿਭਾਤਿ ਵਸਨ੍ਤਕਾਲੇ ਵਨਸਣ੍ਡੋ ਸੁਵਗਣਸਮੋਕਿਣ੍ਣੋ ਵਿਯ ਨੀਲੋਭਾਸੋ ਹੋਤਿ, ਤੇਨ ਤਂ ‘‘ਵਸਨ੍ਤਸਨ੍ਨਿਭਾ’’ਤਿ ਆਲਪਤਿ. ਨ ਰਿਞ੍ਚਸੀਤਿ ਨ ਛਡ੍ਡੇਸਿ.
ਅਥ ਨਂ ਸੁਵਰਾਜਾ ‘‘ਅਹਂ ਹਂਸ ਅਤ੍ਤਨੋ ਕਤਞ੍ਞੁਕਤਵੇਦਿਤਾਯ ਇਮਂ ਰੁਕ੍ਖਂ ਨ ਜਹਾਮੀ’’ਤਿ ਵਤ੍ਵਾ ਦ੍ਵੇ ਗਾਥਾ ਅਭਾਸਿ –
੨੨. ‘‘ਯੇ ਵੇ ਸਖੀਨਂ ਸਖਾਰੋ ਭਵਨ੍ਤਿ, ਪਾਣਚ੍ਚਯੇ ਦੁਕ੍ਖਸੁਖੇਸੁ ਹਂਸ;
ਖੀਣਂ ਅਖੀਣਮ੍ਪਿ ਨ ਤਂ ਜਹਨ੍ਤਿ, ਸਨ੍ਤੋ ਸਤਂ ਧਮ੍ਮਮਨੁਸ੍ਸਰਨ੍ਤਾ.
੨੩. ‘‘ਸੋਹਂ ਸਤਂ ਅਞ੍ਞਤਰੋਸ੍ਮਿ ਹਂਸ, ਞਾਤੀ ਚ ਮੇ ਹੋਤਿ ਸਖਾ ਚ ਰੁਕ੍ਖੋ;
ਤਂ ਨੁਸ੍ਸਹੇ ਜੀਵਿਕਤ੍ਥੋ ਪਹਾਤੁਂ, ਖੀਣਨ੍ਤਿ ਞਤ੍ਵਾਨ ਨ ਹੇਸ ਧਮ੍ਮੋ’’ਤਿ.
ਤਤ੍ਥ ਯੇ ਵੇ ਸਖੀਨਂ ਸਖਾਰੋ ਭਵਨ੍ਤੀਤਿ ਯੇ ਸਹਾਯਾਨਂ ਸਹਾਯਾ ਹੋਨ੍ਤਿ. ਖੀਣਂ ਅਖੀਣਮ੍ਪੀਤਿ ਪਣ੍ਡਿਤਾ ਨਾਮ ਅਤ੍ਤਨੋ ਸਹਾਯਂ ਭੋਗਪਰਿਕ੍ਖਯੇਨ ਖੀਣਮ੍ਪਿ ਅਖੀਣਮ੍ਪਿ ਨ ਜਹਨ੍ਤਿ. ਸਤਂ ਧਮ੍ਮਮਨੁਸ੍ਸਰਨ੍ਤਾਤਿ ਪਣ੍ਡਿਤਾਨਂ ਪਵੇਣਿਂ ਅਨੁਸ੍ਸਰਮਾਨਾ. ਞਾਤੀ ਚ ਮੇਤਿ ਹਂਸਰਾਜ, ਅਯਂ ਰੁਕ੍ਖੋ ਸਮ੍ਪਿਯਾਯਨਤ੍ਥੇਨ ਮਯ੍ਹਂ ਞਾਤਿ ਚ ਸਮਾਚਿਣ੍ਣਚਰਣਤਾਯ ਸਖਾ ਚ. ਜੀਵਿਕਤ੍ਥੋਤਿ ਤਮਹਂ ਜੀਵਿਕਾਯ ਅਤ੍ਥਿਕੋ ਹੁਤ੍ਵਾ ਪਹਾਤੁਂ ਨ ਸਕ੍ਕੋਮਿ.
ਸਕ੍ਕੋ ਤਸ੍ਸ ਵਚਨਂ ਸੁਤ੍ਵਾ ਤੁਟ੍ਠੋ ਪਸਂਸਿਤ੍ਵਾ ਵਰਂ ਦਾਤੁਕਾਮੋ ਦ੍ਵੇ ਗਾਥਾ ਅਭਾਸਿ –
੨੪. ‘‘ਸਾਧੁ ਸਕ੍ਖਿ ਕਤਂ ਹੋਤਿ, ਮੇਤ੍ਤਿ ਸਂਸਤਿ ਸਨ੍ਥਵੋ;
ਸਚੇਤਂ ਧਮ੍ਮਂ ਰੋਚੇਸਿ, ਪਾਸਂਸੋਸਿ ਵਿਜਾਨਤਂ.
੨੫. ‘‘ਸੋ ਤੇ ਸੁਵ ਵਰਂ ਦਮ੍ਮਿ, ਪਤ੍ਤਯਾਨ ਵਿਹਙ੍ਗਮ;
ਵਰਂ ਵਰਸ੍ਸੁ ਵਕ੍ਕਙ੍ਗ, ਯਂ ਕਿਞ੍ਚਿ ਮਨਸਿਚ੍ਛਸੀ’’ਤਿ.
ਤਤ੍ਥ ਸਾਧੂਤਿ ਸਮ੍ਪਹਂਸਨਂ. ਸਕ੍ਖਿ ਕਤਂ ਹੋਤਿ, ਮੇਤ੍ਤਿ ਸਂਸਤਿ ਸਨ੍ਥਵੋਤਿ ਸਖਿਭਾਵੋ ਚ ਮੇਤ੍ਤਿ ਚ ਪਰਿਸਮਜ੍ਝੇ ਸਨ੍ਥਵੋ ਚਾਤਿ ਤਯਾ ਮਿਤ੍ਤਂ ਕਤਂ ਸਾਧੁ ਹੋਤਿ ਲਦ੍ਧਕਂ ਭਦ੍ਦਕਮੇਵ. ਸਚੇਤਂ ਧਮ੍ਮਨ੍ਤਿ ਸਚੇ ਏਤਂ ਮਿਤ੍ਤਧਮ੍ਮਂ. ਵਿਜਾਨਤਨ੍ਤਿ ਏਵਂ ਸਨ੍ਤੇ ਵਿਞ੍ਞੂਨਂ ਪਸਂਸਿਤਬ੍ਬਯੁਤ੍ਤਕੋਸੀਤਿ ਅਤ੍ਥੋ. ਸੋ ਤੇਤਿ ਸੋ ਅਹਂ ਤੁਯ੍ਹਂ. ਵਰਸ੍ਸੂਤਿ ਇਚ੍ਛਸ੍ਸੁ. ਯਂ ਕਿਞ੍ਚਿ ਮਨਸਿਚ੍ਛਸੀਤਿ ਯਂ ਕਿਞ੍ਚਿ ਮਨਸਾ ਇਚ੍ਛਸਿ, ਸਬ੍ਬਂ ਤਂ ਵਰਂ ਦਦਾਮਿ ਤੇਤਿ.
ਤਂ ਸੁਤ੍ਵਾ ਸੁਵਰਾਜਾ ਵਰਂ ਗਣ੍ਹਨ੍ਤੋ ਸਤ੍ਤਮਂ ਗਾਥਮਾਹ –
੨੬. ‘‘ਵਰਞ੍ਚ ਮੇ ਹਂਸ ਭਵਂ ਦਦੇਯ੍ਯ, ਅਯਞ੍ਚ ਰੁਕ੍ਖੋ ਪੁਨਰਾਯੁਂ ਲਭੇਥ;
ਸੋ ਸਾਖਵਾ ਫਲਿਮਾ ਸਂਵਿਰੂਲ਼੍ਹੋ, ਮਧੁਤ੍ਥਿਕੋ ਤਿਟ੍ਠਤੁ ਸੋਭਮਾਨੋ’’ਤਿ.
ਤਤ੍ਥ ਸਾਖਵਾਤਿ ਸਾਖਸਮ੍ਪਨ੍ਨੋ. ਫਲਿਮਾਤਿ ਫਲੇਨ ਉਪੇਤੋ. ਸਂਵਿਰੂਲ਼੍ਹੋਤਿ ਸਮਨ੍ਤਤੋ ਵਿਰੂਲ਼੍ਹਪਤ੍ਤੋ ਤਰੁਣਪਤ੍ਤਸਮ੍ਪਨ੍ਨੋ ਹੁਤ੍ਵਾ. ਮਧੁਤ੍ਥਿਕੋਤਿ ਸਂਵਿਜ੍ਜਮਾਨਮਧੁਰਫਲੇਸੁ ਪਕ੍ਖਿਤ੍ਤਮਧੁ ਵਿਯ ਮਧੁਰਫਲੋ ਹੁਤ੍ਵਾਤਿ ਅਤ੍ਥੋ.
ਅਥਸ੍ਸ ਸਕ੍ਕੋ ਵਰਂ ਦਦਮਾਨੋ ਅਟ੍ਠਮਂ ਗਾਥਮਾਹ –
੨੭. ‘‘ਤਂ ਪਸ੍ਸ ਸਮ੍ਮ ਫਲਿਮਂ ਉਲ਼ਾਰਂ, ਸਹਾਵ ਤੇ ਹੋਤੁ ਉਦੁਮ੍ਬਰੇਨ;
ਸੋ ਸਾਖਵਾ ਫਲਿਮਾ ਸਂਵਿਰੂਲ਼੍ਹੋ, ਮਧੁਤ੍ਥਿਕੋ ਤਿਟ੍ਠਤੁ ਸੋਭਮਾਨੋ’’ਤਿ.
ਤਤ੍ਥ ਸਹਾਵ ਤੇ ਹੋਤੁ ਉਦੁਮ੍ਬਰੇਨਾਤਿ ਤਵ ਉਦੁਮ੍ਬਰੇਨ ਸਦ੍ਧਿਂ ਸਹ ਏਕਤੋਵ ਵਾਸੋ ਹੋਤੁ.
ਏਵਞ੍ਚ ਪਨ ਵਤ੍ਵਾ ਸਕ੍ਕੋ ਤਂ ਅਤ੍ਤਭਾਵਂ ਵਿਜਹਿਤ੍ਵਾ ਅਤ੍ਤਨੋ ਚ ਸੁਜਾਯ ਚ ਆਨੁਭਾਵਂ ਦਸ੍ਸੇਤ੍ਵਾ ਗਙ੍ਗਾਤੋ ਹਤ੍ਥੇਨ ਉਦਕਂ ਗਹੇਤ੍ਵਾ ਉਦੁਮ੍ਬਰਖਾਣੁਕਂ ਪਹਰਿ. ਤਾਵਦੇਵ ਸਾਖਾਵਿਟਪਸਚ੍ਛਨ੍ਨੋ ਮਧੁਰਫਲੋ ਰੁਕ੍ਖੋ ਉਟ੍ਠਹਿਤ੍ਵਾ ਮੁਣ੍ਡਮਣਿਪਬ੍ਬਤੋ ਵਿਯ ਵਿਲਾਸਸਮ੍ਪਨ੍ਨੋ ਅਟ੍ਠਾਸਿ. ਸੁਵਰਾਜਾ ਤਂ ਦਿਸ੍ਵਾ ਸੋਮਨਸ੍ਸਪ੍ਪਤ੍ਤੋ ਸਕ੍ਕਸ੍ਸ ਥੁਤਿਂ ਕਰੋਨ੍ਤੋ ਨਵਮਂ ਗਾਥਮਾਹ –
੨੮. ‘‘ਏਵਂ ਸਕ੍ਕ ਸੁਖੀ ਹੋਹਿ, ਸਹ ਸਬ੍ਬੇਹਿ ਞਾਤਿਭਿ;
ਯਥਾਹਮਜ੍ਜ ਸੁਖਿਤੋ, ਦਿਸ੍ਵਾਨ ਸਫਲਂ ਦੁਮ’’ਨ੍ਤਿ.
ਸਕ੍ਕੋਪਿ ਤਸ੍ਸ ਵਰਂ ਦਤ੍ਵਾ ਉਦੁਮ੍ਬਰਂ ਅਮਤਫਲਂ ਕਤ੍ਵਾ ਸਦ੍ਧਿਂ ਸੁਜਾਯ ਅਤ੍ਤਨੋ ਠਾਨਮੇਵ ਗਤੋ. ਤਮਤ੍ਥਂ ਦੀਪਯਮਾਨਾ ਓਸਾਨੇ ਅਭਿਸਮ੍ਬੁਦ੍ਧਗਾਥਾ ਠਪਿਤਾ –
੨੯. ‘‘ਸੁਵਸ੍ਸ ਚ ਵਰਂ ਦਤ੍ਵਾ, ਕਤ੍ਵਾਨ ਸਫਲਂ ਦੁਮਂ;
ਪਕ੍ਕਾਮਿ ਸਹ ਭਰਿਯਾਯ, ਦੇਵਾਨਂ ਨਨ੍ਦਨਂ ਵਨ’’ਨ੍ਤਿ.
ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ ਭਿਕ੍ਖੁ ਪੋਰਾਣਕਪਣ੍ਡਿਤਾ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਾਪਿ ਅਲੋਲੁਪ੍ਪਚਾਰਾ ਅਹੇਸੁਂ. ਤ੍ਵਂ ਪਨ ਕਸ੍ਮਾ ਏਵਰੂਪੇ ਸਾਸਨੇ ਪਬ੍ਬਜਿਤ੍ਵਾ ਲੋਲੁਪ੍ਪਚਾਰਂ ਚਰਸਿ, ਗਚ੍ਛ ਤਤ੍ਥੇਵ ਵਸਾਹੀ’’ਤਿ ਕਮ੍ਮਟ੍ਠਾਨਮਸ੍ਸ ਕਥੇਤ੍ਵਾ ਜਾਤਕਂ ਸਮੋਧਾਨੇਸਿ. ਸੋ ਭਿਕ੍ਖੁ ਤਤ੍ਥ ਗਨ੍ਤ੍ਵਾ ਵਿਪਸ੍ਸਨਂ ਵਡ੍ਢੇਨ੍ਤੋ ਅਰਹਤ੍ਤਂ ਪਾਪੁਣਿ. ਤਦਾ ਸਕ੍ਕੋ ਅਨੁਰੁਦ੍ਧੋ ਅਹੋਸਿ, ਸੁਵਰਾਜਾ ਪਨ ਅਹਮੇਵ ਅਹੋਸਿਨ੍ਤਿ.
ਮਹਾਸੁਵਜਾਤਕਵਣ੍ਣਨਾ ਤਤਿਯਾ.
[੪੩੦] ੪. ਚੂਲ਼ਸੁਵਜਾਤਕਵਣ੍ਣਨਾ
ਸਨ੍ਤਿ ਰੁਕ੍ਖਾਤਿ ਇਦਂ ਸਤ੍ਥਾ ਸਾਵਤ੍ਥਿਯਂ ਜੇਤਵਨੇ ਵਿਹਰਨ੍ਤੋ ਵੇਰਞ੍ਜਕਣ੍ਡਂ ਆਰਬ੍ਭ ਕਥੇਸਿ. ਸਤ੍ਥਰਿ ਵੇਰਞ੍ਜਾਯਂ ਵਸ੍ਸਂ ਵਸਿਤ੍ਵਾ ਅਨੁਪੁਬ੍ਬੇਨ ਸਾਵਤ੍ਥਿਂ ਅਨੁਪ੍ਪਤ੍ਤੇ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਤਥਾਗਤੋ ਖਤ੍ਤਿਯਸੁਖੁਮਾਲੋ ਬੁਦ੍ਧਸੁਖੁਮਾਲੋ ਮਹਨ੍ਤੇਨ ਇਦ੍ਧਾਨੁਭਾਵੇਨ ਸਮਨ੍ਨਾਗਤੋਪਿ ਵੇਰਞ੍ਜਬ੍ਰਾਹ੍ਮਣੇਨ ਨਿਮਨ੍ਤਿਤੋ ਤੇਮਾਸਂ ਵਸਨ੍ਤੋ ਮਾਰਾਵਟ੍ਟਨਵਸੇਨ ਤਸ੍ਸ ਸਨ੍ਤਿਕਾ ਏਕਦਿਵਸਮ੍ਪਿ ਭਿਕ੍ਖਂ ਅਲਭਿਤ੍ਵਾ ਲੋਲੁਪ੍ਪਚਾਰਂ ਪਹਾਯ ਤੇਮਾਸਂ ਪਤ੍ਥਪੁਲਕਪਿਟ੍ਠੋਦਕੇਨ ਯਾਪੇਨ੍ਤੋ ਅਞ੍ਞਤ੍ਥ ਨ ਅਗਮਾਸਿ, ਅਹੋ ਤਥਾਗਤਾਨਂ ਅਪ੍ਪਿਚ੍ਛਸਨ੍ਤੁਟ੍ਠਭਾਵੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਅਨਚ੍ਛਰਿਯਂ, ਭਿਕ੍ਖਵੇ, ਤਥਾਗਤਸ੍ਸ ਇਦਾਨਿ ਲੋਲੁਪ੍ਪਚਾਰਪ੍ਪਹਾਨਂ, ਪੁਬ੍ਬੇਪਿ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤੋਪਿ ਲੋਲੁਪ੍ਪਚਾਰਂ ਪਹਾਸਿ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ. ਸਬ੍ਬਮ੍ਪਿ ਵਤ੍ਥੁ ਪੁਰਿਮਨਯੇਨੇਵ ਵਿਤ੍ਥਾਰੇਤਬ੍ਬਂ.
੩੦. ‘‘ਸਨ੍ਤਿ ਰੁਕ੍ਖਾ ਹਰਿਪਤ੍ਤਾ, ਦੁਮਾ ਨੇਕਫਲਾ ਬਹੂ;
ਕਸ੍ਮਾ ਨੁ ਸੁਕ੍ਖੇ ਕੋਲ਼ਾਪੇ, ਸੁਵਸ੍ਸ ਨਿਰਤੋ ਮਨੋ.
੩੧. ‘‘ਫਲਸ੍ਸ ਉਪਭੁਞ੍ਜਿਮ੍ਹਾ, ਨੇਕਵਸ੍ਸਗਣੇ ਬਹੂ;
ਅਫਲਮ੍ਪਿ ਵਿਦਿਤ੍ਵਾਨ, ਸਾਵ ਮੇਤ੍ਤਿ ਯਥਾ ਪੁਰੇ.
੩੨. ‘‘ਸੁਕ੍ਖਞ੍ਚ ਰੁਕ੍ਖਂ ਕੋਲ਼ਾਪਂ, ਓਪਤ੍ਤਮਫਲਂ ਦੁਮਂ;
ਓਹਾਯ ਸਕੁਣਾ ਯਨ੍ਤਿ, ਕਿਂ ਦੋਸਂ ਪਸ੍ਸਸੇ ਦਿਜ.
੩੩. ‘‘ਯੇ ਫਲਤ੍ਥਾ ਸਮ੍ਭਜਨ੍ਤਿ, ਅਫਲੋਤਿ ਜਹਨ੍ਤਿ ਨਂ;
ਅਤ੍ਤਤ੍ਥਪਞ੍ਞਾ ਦੁਮ੍ਮੇਧਾ, ਤੇ ਹੋਨ੍ਤਿ ਪਕ੍ਖਪਾਤਿਨੋ.
੩੪. ‘‘ਸਾਧੁ ਸਕ੍ਖਿ ਕਤਂ ਹੋਤਿ, ਮੇਤ੍ਤਿ ਸਂਸਤਿ ਸਨ੍ਥਵੋ;
ਸਚੇਤਂ ਧਮ੍ਮਂ ਰੋਚੇਸਿ, ਪਾਸਂਸੋਸਿ ਵਿਜਾਨਤਂ.
੩੫. ‘‘ਸੋ ਤੇ ਸੁਵ ਵਰਂ ਦਮ੍ਮਿ, ਪਤ੍ਤਯਾਨ ਵਿਹਙ੍ਗਮ;
ਵਰਂ ਵਰਸ੍ਸੁ ਵਕ੍ਕਙ੍ਗ, ਯਂ ਕਿਞ੍ਚਿ ਮਨਸਿਚ੍ਛਸਿ.
੩੬. ‘‘ਅਪਿ ਨਾਮ ਨਂ ਪਸ੍ਸੇਯ੍ਯਂ, ਸਪਤ੍ਤਂ ਸਫਲਂ ਦੁਮਂ;
ਦਲਿਦ੍ਦੋਵ ਨਿਧਿਂ ਲਦ੍ਧਾ, ਨਨ੍ਦੇਯ੍ਯਾਹਂ ਪੁਨਪ੍ਪੁਨਂ.
੩੭. ‘‘ਤਤੋ ਅਮਤਮਾਦਾਯ, ਅਭਿਸਿਞ੍ਚਿ ਮਹੀਰੁਹਂ;
ਤਸ੍ਸ ਸਾਖਾ ਵਿਰੂਹਿਂਸੁ, ਸੀਤਚ੍ਛਾਯਾ ਮਨੋਰਮਾ.
੩੮. ‘‘ਏਵਂ ਸਕ੍ਕ ਸੁਖੀ ਹੋਹਿ, ਸਹ ਸਬ੍ਬੇਹਿ ਞਾਤਿਭਿ;
ਯਥਾਹਮਜ੍ਜ ਸੁਖਿਤੋ, ਦਿਸ੍ਵਾਨ ਸਫਲਂ ਦੁਮਂ.
੩੯. ‘‘ਸੁਵਸ੍ਸ ਚ ਵਰਂ ਦਤ੍ਵਾ, ਕਤ੍ਵਾਨ ਸਫਲਂ ਦੁਮਂ;
ਪਕ੍ਕਾਮਿ ਸਹ ਭਰਿਯਾਯ, ਦੇਵਾਨਂ ਨਨ੍ਦਨਂ ਵਨ’’ਨ੍ਤਿ. –
ਪਞ੍ਹਪਟਿਪਞ੍ਹਾਪਿ ਅਤ੍ਥੋਪਿ ਪੁਰਿਮਨਯੇਨੇਵ ਵੇਦਿਤਬ੍ਬਾ, ਅਨੁਤ੍ਤਾਨਪਦਮੇਵ ਪਨ ਵਣ੍ਣਯਿਸ੍ਸਾਮ.
ਹਰਿਪਤ੍ਤਾਤਿ ਨੀਲਪਤ੍ਤਸਚ੍ਛਨ੍ਨਾ. ਕੋਲ਼ਾਪੇਤਿ ਵਾਤੇ ਪਹਰਨ੍ਤੇ ਆਕੋਟਿਤਸਦ੍ਦਂ ਵਿਯ ਮੁਞ੍ਚਮਾਨੇ ਨਿਸ੍ਸਾਰੇ. ਸੁਵਸ੍ਸਾਤਿ ਆਯਸ੍ਮਤੋ ਸੁਵਰਾਜਸ੍ਸ ਕਸ੍ਮਾ ਏਵਰੂਪੇ ਰੁਕ੍ਖੇ ਮਨੋ ਨਿਰਤੋ. ਫਲਸ੍ਸਾਤਿ ਫਲਂ ਅਸ੍ਸ ਰੁਕ੍ਖਸ੍ਸ. ਨੇਕਵਸ੍ਸਗਣੇਤਿ ਅਨੇਕਵਸ੍ਸਗਣੇ. ਬਹੂਤਿ ਸਮਾਨੇਪਿ ਅਨੇਕਸਤੇ ਨ ਦ੍ਵੇ ਤਯੋ, ਅਥ ਖੋ ਬਹੂਵ. ਵਿਦਿਤ੍ਵਾਨਾਤਿ ਹਂਸਰਾਜ ਇਦਾਨਿ ਅਮ੍ਹਾਕਂ ਇਮਂ ਰੁਕ੍ਖਂ ਅਫਲਂ ਵਿਦਿਤ੍ਵਾਪਿ ਯਥਾ ਪੁਰੇ ਏਤੇਨ ਸਦ੍ਧਿਂ ਮੇਤ੍ਤਿ, ਸਾਵ ਮੇਤ੍ਤਿ, ਤਞ੍ਹਿ ਮਯਂ ਨ ਭਿਨ੍ਦਾਮ, ਮੇਤ੍ਤਿਂ ਭਿਨ੍ਦਨ੍ਤਾ ਹਿ ਅਨਰਿਯਾ ਅਸਪ੍ਪੁਰਿਸਾ ਨਾਮ ਹੋਨ੍ਤੀਤਿ ਪਕਾਸੇਨ੍ਤੋ ਏਵਮਾਹ.
ਓਪਤ੍ਤਨ੍ਤਿ ਅਵਪਤ੍ਤਂ ਨਿਪ੍ਪਤ੍ਤਂ ਪਤਿਤਪਤ੍ਤਂ. ਕਿਂ ਦੋਸਂ ਪਸ੍ਸਸੇਤਿ ਅਞ੍ਞੇ ਸਕੁਣਾ ਏਤਂ ਓਹਾਯ ਅਞ੍ਞਤ੍ਥ ਗਚ੍ਛਨ੍ਤਿ, ਤ੍ਵਂ ਏਵਂ ਗਮਨੇ ਕਿਂ ਨਾਮ ਦੋਸਂ ਪਸ੍ਸਸਿ. ਯੇ ਫਲਤ੍ਥਾਤਿ ਯੇ ਪਕ੍ਖਿਨੋ ਫਲਤ੍ਥਾਯ ਫਲਕਾਰਣਾ ਸਮ੍ਭਜਨ੍ਤਿ ਉਪਗਚ੍ਛਨ੍ਤਿ, ਅਫਲੋਤਿ ਞਤ੍ਵਾ ਏਤਂ ਜਹਨ੍ਤਿ. ਅਤ੍ਤਤ੍ਥਪਞ੍ਞਾਤਿ ਅਤ੍ਤਨੋ ਅਤ੍ਥਾਯ ਪਞ੍ਞਾ, ਪਰਂ ਅਨੋਲੋਕੇਤ੍ਵਾ ਅਤ੍ਤਨਿਯੇਵ ਵਾ ਠਿਤਾ ਏਤੇਸਂ ਪਞ੍ਞਾਤਿ ਅਤ੍ਤਤ੍ਥਪਞ੍ਞਾ. ਪਕ੍ਖਪਾਤਿਨੋਤਿ ਤੇ ਅਤ੍ਤਨੋਯੇਵ ਵੁਡ੍ਢਿਂ ਪਚ੍ਚਾਸੀਸਮਾਨਾ ਮਿਤ੍ਤਪਕ੍ਖਂ ਪਾਤੇਨ੍ਤਿ ਨਾਸੇਨ੍ਤੀਤਿ ਪਕ੍ਖਪਾਤਿਨੋ ਨਾਮ ਹੋਨ੍ਤਿ. ਅਤ੍ਤਪਕ੍ਖੇਯੇਵ ਵਾ ਪਤਨ੍ਤੀਤਿ ਪਕ੍ਖਪਾਤਿਨੋ.
ਅਪਿ ਨਾਮ ਨਨ੍ਤਿ ਹਂਸਰਾਜ, ਸਚੇ ਮੇ ਮਨੋਰਥੋ ਨਿਪ੍ਫਜ੍ਜੇਯ੍ਯ, ਤਯਾ ਦਿਨ੍ਨੋ ਵਰੋ ਸਮ੍ਪਜ੍ਜੇਯ੍ਯ, ਅਪਿ ਨਾਮ ਅਹਂ ਇਮਂ ਰੁਕ੍ਖਂ ਸਪਤ੍ਤਂ ਸਫਲਂ ਪੁਨ ਪਸ੍ਸੇਯ੍ਯਂ, ਤਤੋ ਦਲਿਦ੍ਦੋ ਨਿਧਿਂ ਲਭਿਤ੍ਵਾਵ ਪੁਨਪ੍ਪੁਨਂ ਏਤਂ ਅਭਿਨਨ੍ਦੇਯ੍ਯਂ, ਤਂ ਦਿਸ੍ਵਾਵ ਪਮੋਦੇਯ੍ਯਂ. ਅਮਤਮਾਦਾਯਾਤਿ ਅਤ੍ਤਨੋ ਆਨੁਭਾਵੇਨ ਠਿਤੋ ਗਙ੍ਗੋਦਕਂ ਗਹੇਤ੍ਵਾ ਅਭਿਸਿਞ੍ਚਯੀਤਿ ਅਤ੍ਥੋ. ਇਮਸ੍ਮਿਂ ਜਾਤਕੇ ਇਮਾਯ ਸਦ੍ਧਿਂ ਦ੍ਵੇ ਅਭਿਸਮ੍ਬੁਦ੍ਧਗਾਥਾ ਹੋਨ੍ਤਿ.
ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਕ੍ਕੋ ਅਨੁਰੁਦ੍ਧੋ ਅਹੋਸਿ, ਸੁਵਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.
ਚੂਲ਼ਸੁਵਜਾਤਕਵਣ੍ਣਨਾ ਚਤੁਤ੍ਥਾ.
[੪੩੧] ੫. ਹਰਿਤਚਜਾਤਕਵਣ੍ਣਨਾ
ਸੁਤਂ ਮੇਤਂ ਮਹਾਬ੍ਰਹ੍ਮੇਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਤਞ੍ਹਿ ਭਿਕ੍ਖੁਂ ਏਕਂ ਅਲਙ੍ਕਤਮਾਤੁਗਾਮਂ ਦਿਸ੍ਵਾ ਉਕ੍ਕਣ੍ਠਿਤਂ ਦੀਘਕੇਸਨਖਲੋਮਂ ਵਿਬ੍ਭਮਿਤੁਕਾਮਂ ਆਚਰਿਯੁਪਜ੍ਝਾਯੇਹਿ ਅਰੁਚਿਯਾ ਆਨੀਤਂ. ਸਤ੍ਥਾ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਉਕ੍ਕਣ੍ਠਿਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਕਿਂਕਾਰਣਾ’’ਤਿ ਵਤ੍ਵਾ ‘‘ਅਲਙ੍ਕਤਮਾਤੁਗਾਮਂ ਦਿਸ੍ਵਾ ਕਿਲੇਸਵਸੇਨ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਕਿਲੇਸੋ ਨਾਮ ਗੁਣਵਿਦ੍ਧਂਸਕੋ ਅਪ੍ਪਸ੍ਸਾਦੋ ਨਿਰਯੇ ਨਿਬ੍ਬਤ੍ਤਾਪੇਤਿ, ਏਸ ਪਨ ਕਿਲੇਸੋ ਕਿਂਕਾਰਣਾ ਤਂ ਨ ਕਿਲਮੇਸ੍ਸਤਿ? ਨ ਹਿ ਸਿਨੇਰੁਂ ਪਹਰਿਤ੍ਵਾ ਪਹਰਣਵਾਤੋ ਪੁਰਾਣਪਣ੍ਣਸ੍ਸ ਲਜ੍ਜਤਿ, ਇਮਞ੍ਹਿ ਕਿਲੇਸਂ ਨਿਸ੍ਸਾਯ ਬੋਧਿਞਾਣਸ੍ਸ ਅਨੁਪਦਂ ਚਰਮਾਨਾ ਪਞ੍ਚਅਭਿਞ੍ਞਅਟ੍ਠਸਮਾਪਤ੍ਤਿਲਾਭਿਨੋ ਵਿਸੁਦ੍ਧਮਹਾਪੁਰਿਸਾਪਿ ਸਤਿਂ ਉਪਟ੍ਠਪੇਤੁਂ ਅਸਕ੍ਕੋਨ੍ਤਾ ਝਾਨਂ ਅਨ੍ਤਰਧਾਪੇਸੁ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.
ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਏਕਸ੍ਮਿਂ ਨਿਗਮੇ ਅਸੀਤਿਕੋਟਿਵਿਭਵੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ, ਕਞ੍ਚਨਛਵਿਤਾਯ ਪਨਸ੍ਸ ‘‘ਹਰਿਤਚਕੁਮਾਰੋ’’ਤਿ ਨਾਮਂ ਕਰਿਂਸੁ. ਸੋ ਵਯਪ੍ਪਤ੍ਤੋ ਤਕ੍ਕਸਿਲਂ ਗਨ੍ਤ੍ਵਾ ਉਗ੍ਗਹਿਤਸਿਪ੍ਪੋ ਕੁਟੁਮ੍ਬਂ ਸਣ੍ਠਪੇਤ੍ਵਾ ਮਾਤਾਪਿਤੂਨਂ ਅਚ੍ਚਯੇਨ ਧਨਵਿਲੋਕਨਂ ਕਤ੍ਵਾ ‘‘ਧਨਮੇਵ ਪਞ੍ਞਾਯਤਿ, ਧਨਸ੍ਸ ਉਪ੍ਪਾਦਕਾ ਨ ਪਞ੍ਞਾਯਨ੍ਤਿ, ਮਯਾਪਿ ਮਰਣਮੁਖੇ ਚੁਣ੍ਣਵਿਚੁਣ੍ਣੇਨ ਭਵਿਤਬ੍ਬ’’ਨ੍ਤਿ ਮਰਣਭਯਭੀਤੋ ਮਹਾਦਾਨਂ ਦਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਸਤ੍ਤਮੇ ਦਿਵਸੇ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਤਤ੍ਥ ਚਿਰਂ ਵਨਮੂਲਫਲਾਹਾਰੋ ਯਾਪੇਤ੍ਵਾ ਲੋਣਮ੍ਬਿਲਸੇਵਨਤ੍ਥਾਯ ਪਬ੍ਬਤਾ ਓਤਰਿਤ੍ਵਾ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਰਾਜੁਯ੍ਯਾਨੇ ਵਸਿਤ੍ਵਾ ਪੁਨਦਿਵਸੇ ਬਾਰਾਣਸਿਯਂ ਭਿਕ੍ਖਾਯ ਚਰਨ੍ਤੋ ਰਾਜਦ੍ਵਾਰਂ ਸਮ੍ਪਾਪੁਣਿ. ਰਾਜਾ ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ਪਕ੍ਕੋਸਾਪੇਤ੍ਵਾ ਸਮੁਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਨਾਨਗ੍ਗਰਸਭੋਜਨਂ ਭੋਜੇਤ੍ਵਾ ਅਨੁਮੋਦਨਾਵਸਾਨੇ ਅਤਿਰੇਕਤਰਂ ਪਸੀਦਿਤ੍ਵਾ ‘‘ਕਹਂ, ਭਨ੍ਤੇ, ਗਚ੍ਛਥਾ’’ਤਿ ਵਤ੍ਵਾ ‘‘ਵਸ੍ਸਾਵਾਸਟ੍ਠਾਨਂ ਉਪਧਾਰੇਮ, ਮਹਾਰਾਜਾ’’ਤਿ ਵੁਤ੍ਤੇ ‘‘ਸਾਧੁ, ਭਨ੍ਤੇ’’ਤਿ ਭੁਤ੍ਤਪਾਤਰਾਸੋ ਤਂ ਆਦਾਯ ਉਯ੍ਯਾਨਂ ਗਨ੍ਤ੍ਵਾ ਤਤ੍ਥ ਰਤ੍ਤਿਟ੍ਠਾਨਦਿਵਾਟ੍ਠਾਨਾਦੀਨਿ ਕਾਰਾਪੇਤ੍ਵਾ ਉਯ੍ਯਾਨਪਾਲਂ ਪਰਿਚਾਰਕਂ ਕਤ੍ਵਾ ਦਤ੍ਵਾ ਵਨ੍ਦਿਤ੍ਵਾ ਨਿਕ੍ਖਮਿ. ਮਹਾਸਤ੍ਤੋ ਤਤੋ ਪਟ੍ਠਾਯ ਨਿਬਦ੍ਧਂ ਰਞ੍ਞੋ ਗੇਹੇ ਭੁਞ੍ਜਨ੍ਤੋ ਦ੍ਵਾਦਸ ਵਸ੍ਸਾਨਿ ਤਤ੍ਥ ਵਸਿ.
ਅਥੇਕਦਿਵਸਂ ਰਾਜਾ ਪਚ੍ਚਨ੍ਤਂ ਕੁਪਿਤਂ ਵੂਪਸਮੇਤੁਂ ਗਚ੍ਛਨ੍ਤੋ ‘‘ਅਮ੍ਹਾਕਂ ਪੁਞ੍ਞਕ੍ਖੇਤ੍ਤਂ ਮਾ ਪਮਜ੍ਜੀ’’ਤਿ ਮਹਾਸਤ੍ਤਂ ਦੇਵਿਯਾ ਨਿਯ੍ਯਾਦੇਤ੍ਵਾ ਅਗਮਾਸਿ. ਤਤੋ ਪਟ੍ਠਾਯ ਸਾ ਮਹਾਸਤ੍ਤਂ ਸਹਤ੍ਥਾ ਪਰਿਵਿਸਤਿ. ਅਥੇਕਦਿਵਸਂ ਸਾ ਭੋਜਨਂ ਸਮ੍ਪਾਦੇਤ੍ਵਾ ਤਸ੍ਮਿਂ ਚਿਰਾਯਮਾਨੇ ਗਨ੍ਧੋਦਕੇਨ ਨ੍ਹਤ੍ਵਾ ਸਣ੍ਹਂ ਮਟ੍ਠਸਾਟਕਂ ਨਿਵਾਸੇਤ੍ਵਾ ਸੀਹਪਞ੍ਜਰਂ ਵਿਵਰਾਪੇਤ੍ਵਾ ਸਰੀਰੇ ਵਾਤਂ ਪਹਰਾਪੇਨ੍ਤੀ ਖੁਦ੍ਦਕਮਞ੍ਚਕੇ ਨਿਪਜ੍ਜਿ. ਮਹਾਸਤ੍ਤੋਪਿ ਦਿਵਾਤਰਂ ਸੁਨਿਵਤ੍ਥੋ ਸੁਪਾਰੁਤੋ ਭਿਕ੍ਖਾਭਾਜਨਂ ਆਦਾਯ ਆਕਾਸੇਨਾਗਨ੍ਤ੍ਵਾ ਸੀਹਪਞ੍ਜਰਂ ਪਾਪੁਣਿ. ਦੇਵਿਯਾ ਤਸ੍ਸ ਵਾਕਚਿਰਸਦ੍ਦਂ ਸੁਤ੍ਵਾ ਵੇਗੇਨ ਉਟ੍ਠਹਨ੍ਤਿਯਾ ਮਟ੍ਠਸਾਟਕੋ ਭਸ੍ਸਿ, ਮਹਾਸਤ੍ਤਸ੍ਸ ਵਿਸਭਾਗਾਰਮ੍ਮਣਂ ਚਕ੍ਖੁਂ ਪਟਿਹਞ੍ਞਿ. ਅਥਸ੍ਸ ਅਨੇਕਵਸ੍ਸਕੋਟਿਸਤਸਹਸ੍ਸਕਾਲੇ ਅਬ੍ਭਨ੍ਤਰੇ ਨਿਵੁਤ੍ਥਕਿਲੇਸੋ ਕਰਣ੍ਡਕੇ ਸਯਿਤਆਸੀਵਿਸੋ ਵਿਯ ਉਟ੍ਠਹਿਤ੍ਵਾ ਝਾਨਂ ਅਨ੍ਤਰਧਾਪੇਸਿ. ਸੋ ਸਤਿਂ ਉਪਟ੍ਠਾਪੇਤੁਂ ਅਸਕ੍ਕੋਨ੍ਤੋ ਗਨ੍ਤ੍ਵਾ ਦੇਵਿਂ ਹਤ੍ਥੇ ਗਣ੍ਹਿ, ਤਾਵਦੇਵ ਸਾਣਿਂ ਪਰਿਕ੍ਖਿਪਿਂਸੁ. ਸੋ ਤਾਯ ਸਦ੍ਧਿਂ ਲੋਕਧਮ੍ਮਂ ਸੇਵਿਤ੍ਵਾ ਭੁਞ੍ਜਿਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਤਤੋ ਪਟ੍ਠਾਯ ਦੇਵਸਿਕਂ ਤਥੇਵ ਅਕਾਸਿ. ਤਸ੍ਸ ਤਾਯ ਸਦ੍ਧਿਂ ਲੋਕਧਮ੍ਮਪਟਿਸੇਵਨਂ ਸਕਲਨਗਰੇ ਪਾਕਟਂ ਜਾਤਂ. ਅਮਚ੍ਚਾ ‘‘ਹਰਿਤਚਤਾਪਸੋ ਏਵਮਕਾਸੀ’’ਤਿ ਰਞ੍ਞੋ ਪਣ੍ਣਂ ਪਹਿਣਿਂਸੁ. ਰਾਜਾ ‘‘ਮਂ ਭਿਨ੍ਦਿਤੁਕਾਮਾ ਏਵਂ ਵਦਨ੍ਤੀ’’ਤਿ ਅਸਦ੍ਦਹਿਤ੍ਵਾ ਪਚ੍ਚਨ੍ਤਂ ਵੂਪਸਮੇਤ੍ਵਾ ਬਾਰਾਣਸਿਂ ਪਚ੍ਚਾਗਨ੍ਤ੍ਵਾ ਨਗਰਂ ਪਦਕ੍ਖਿਣਂ ਕਤ੍ਵਾ ਦੇਵਿਯਾ ਸਨ੍ਤਿਕਂ ਗਨ੍ਤ੍ਵਾ ‘‘ਸਚ੍ਚਂ, ਕਿਰ ਮਮ ਅਯ੍ਯੋ ਹਰਿਤਚਤਾਪਸੋ ਤਯਾ ਸਦ੍ਧਿਂ ਲੋਕਧਮ੍ਮਂ ਪਟਿਸੇਵਤੀ’’ਤਿ ਪੁਚ੍ਛਿ. ‘‘ਸਚ੍ਚਂ, ਦੇਵਾ’’ਤਿ. ਸੋ ਤਸ੍ਸਾਪਿ ਅਸਦ੍ਦਹਿਤ੍ਵਾ ‘‘ਤਮੇਵ ਪਟਿਪੁਚ੍ਛਿਸ੍ਸਾਮੀ’’ਤਿ ਉਯ੍ਯਾਨਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ ਤਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –
੪੦. ‘‘ਸੁਤਂ ਮੇਤਂ ਮਹਾਬ੍ਰਹ੍ਮੇ, ਕਾਮੇ ਭੁਞ੍ਜਤਿ ਹਾਰਿਤੋ;
ਕਚ੍ਚੇਤਂ ਵਚਨਂ ਤੁਚ੍ਛਂ, ਕਚ੍ਚਿ ਸੁਦ੍ਧੋ ਇਰਿਯ੍ਯਸੀ’’ਤਿ.
ਤਤ੍ਥ ਕਚ੍ਚੇਤਨ੍ਤਿ ਕਚ੍ਚਿ ਏਤਂ ‘‘ਹਾਰਿਤੋ ਕਾਮੇ ਪਰਿਭੁਞ੍ਜਤੀ’’ਤਿ ਅਮ੍ਹੇਹਿ ਸੁਤਂ ਵਚਨਂ ਤੁਚ੍ਛਂ ਅਭੂਤਂ, ਕਚ੍ਚਿ ਤ੍ਵਂ ਸੁਦ੍ਧੋ ਇਰਿਯ੍ਯਸਿ ਵਿਹਰਸੀਤਿ.
ਸੋ ਚਿਨ੍ਤੇਸਿ – ‘‘ਅਯਂ ਰਾਜਾ ‘ਨਾਹਂ ਪਰਿਭੁਞ੍ਜਾਮੀ’ਤਿ ਵੁਤ੍ਤੇਪਿ ਮਮ ਸਦ੍ਦਹਿਸ੍ਸਤੇਵ, ਇਮਸ੍ਮਿਂ ਲੋਕੇ ਸਚ੍ਚਸਦਿਸੀ ਪਤਿਟ੍ਠਾ ਨਾਮ ਨਤ੍ਥਿ. ਉਜ੍ਝਿਤਸਚ੍ਚਾ ਹਿ ਬੋਧਿਮੂਲੇ ਨਿਸੀਦਿਤ੍ਵਾ ਬੋਧਿਂ ਪਾਪੁਣਿਤੁਂ ਨ ਸਕ੍ਕੋਨ੍ਤਿ, ਮਯਾ ਸਚ੍ਚਮੇਵ ਕਥੇਤੁਂ ਵਟ੍ਟਤੀ’’ਤਿ. ਬੋਧਿਸਤ੍ਤਸ੍ਸ ਹਿ ਏਕਚ੍ਚੇਸੁ ਠਾਨੇਸੁ ਪਾਣਾਤਿਪਾਤੋਪਿ ਅਦਿਨ੍ਨਾਦਾਨਮ੍ਪਿ ਕਾਮੇਸੁਮਿਚ੍ਛਾਚਾਰੋਪਿ ਸੁਰਾਮੇਰਯਮਜ੍ਜਪਾਨਮ੍ਪਿ ਹੋਤਿਯੇਵ, ਅਤ੍ਥਭੇਦਕਵਿਸਂਵਾਦਨਂ ਪੁਰਕ੍ਖਤ੍ਵਾ ਮੁਸਾਵਾਦੋ ਨਾਮ ਨ ਹੋਤਿ, ਤਸ੍ਮਾ ਸੋ ਸਚ੍ਚਮੇਵ ਕਥੇਨ੍ਤੋ ਦੁਤਿਯਂ ਗਾਥਮਾਹ –
੪੧. ‘‘ਏਵਮੇਤਂ ਮਹਾਰਾਜ, ਯਥਾ ਤੇ ਵਚਨਂ ਸੁਤਂ;
ਕੁਮ੍ਮਗ੍ਗਂ ਪਟਿਪਨ੍ਨੋਸ੍ਮਿ, ਮੋਹਨੇਯ੍ਯੇਸੁ ਮੁਚ੍ਛਿਤੋ’’ਤਿ.
ਤਤ੍ਥ ਮੋਹਨੇਯ੍ਯੇਸੂਤਿ ਕਾਮਗੁਣੇਸੁ. ਕਾਮਗੁਣੇਸੁ ਹਿ ਲੋਕੋ ਮੁਯ੍ਹਤਿ, ਤੇ ਚ ਲੋਕਂ ਮੋਹਯਨ੍ਤਿ, ਤਸ੍ਮਾ ਤੇ ‘‘ਮੋਹਨੇਯ੍ਯਾ’’ਤਿ ਵੁਚ੍ਚਨ੍ਤੀਤਿ.
ਤਂ ਸੁਤ੍ਵਾ ਰਾਜਾ ਤਤਿਯਂ ਗਾਥਮਾਹ –
੪੨. ‘‘ਅਦੁ ਪਞ੍ਞਾ ਕਿਮਤ੍ਥਿਯਾ, ਨਿਪੁਣਾ ਸਾਧੁਚਿਨ੍ਤਿਨੀ;
ਯਾਯ ਉਪ੍ਪਤਿਤਂ ਰਾਗਂ, ਕਿਂ ਮਨੋ ਨ ਵਿਨੋਦਯੇ’’ਤਿ.
ਤਤ੍ਥ ਅਦੂਤਿ ਨਿਪਾਤੋ. ਇਦਂ ਵੁਤ੍ਤਂ ਹੋਤਿ – ਭਨ੍ਤੇ, ਗਿਲਾਨਸ੍ਸ ਨਾਮ ਭੇਸਜ੍ਜਂ, ਪਿਪਾਸਿਤਸ੍ਸ ਪਾਨੀਯਂ ਪਟਿਸਰਣਂ, ਤੁਮ੍ਹਾਕਂ ਪਨੇਸਾ ਨਿਪੁਣਾ ਸਾਧੂਨਂ ਅਤ੍ਥਾਨਂ ਚਿਨ੍ਤਿਨੀ ਪਞ੍ਞਾ ਕਿਮਤ੍ਥਿਯਾ, ਯਾਯ ਪੁਨ ਉਪ੍ਪਤਿਤਂ ਰਾਗਂ ਕਿਂ ਮਨੋ ਨ ਵਿਨੋਦਯੇ, ਕਿਂ ਚਿਤ੍ਤਂ ਵਿਨੋਦੇਤੁਂ ਨਾਸਕ੍ਖੀਤਿ.
ਅਥਸ੍ਸ ਕਿਲੇਸਬਲਂ ਦਸ੍ਸੇਨ੍ਤੋ ਹਾਰਿਤੋ ਚਤੁਤ੍ਥਂ ਗਾਥਮਾਹ –
੪੩. ‘‘ਚਤ੍ਤਾਰੋਮੇ ਮਹਾਰਾਜ, ਲੋਕੇ ਅਤਿਬਲਾ ਭੁਸਾ;
ਰਾਗੋ ਦੋਸੋ ਮਦੋ ਮੋਹੋ, ਯਤ੍ਥ ਪਞ੍ਞਾ ਨ ਗਾਧਤੀ’’ਤਿ.
ਤਤ੍ਥ ਯਤ੍ਥਾਤਿ ਯੇਸੁ ਪਰਿਯੁਟ੍ਠਾਨਂ ਪਤ੍ਤੇਸੁ ਮਹੋਘੇ ਪਤਿਤਾ ਵਿਯ ਪਞ੍ਞਾ ਗਾਧਂ ਪਤਿਟ੍ਠਂ ਨ ਲਭਤਿ.
ਤਂ ਸੁਤ੍ਵਾ ਰਾਜਾ ਪਞ੍ਚਮਂ ਗਾਥਮਾਹ –
੪੪. ‘‘ਅਰਹਾ ਸੀਲਸਮ੍ਪਨ੍ਨੋ, ਸੁਦ੍ਧੋ ਚਰਤਿ ਹਾਰਿਤੋ;
ਮੇਧਾਵੀ ਪਣ੍ਡਿਤੋ ਚੇਵ, ਇਤਿ ਨੋ ਸਮ੍ਮਤੋ ਭਵ’’ਨ੍ਤਿ.